LUKA
tärü saite Angthang Kähawi
Angcü üng älo
Hini cae-u tärü saite lä Luka vi näte Caekäcai mänykaw saite na lä bälung aedü ö te vi. Luka lä ceng kälang-a na thung-a aepeng kha Käri khimi reitae kätyng cae aetu ea latang lawng te vi. Äni lä Pawlae hai he aede kha Pawlae üng khölawng tho te phütä-a qa te by vi. Hini cae-u tea lä A.D. 59-63 khösäning säla-a tärü te vi. Hini Angthang Kähawi lä Theophilu näsaite tea tärü te vi. Luka lä hini cae-u tärü saite üng mawlang kaedawng tea ämi hai nung khe saite na ma thui saite phüng, hai Isu Khrista üng hing saite phüng cülä-ü-a tärü hethang ngai te vi. Hini Angthang Kähawi phai te kätü-a Luka bälunghae saite khimi vi näte nung haw vi. Äni ma cae tärü te lä ceng kälang khimi ce tähang aely kälengky-a khai te vi. Hini Angthang Kähawi hai-a Säthaw ma khimi angxynlyng na tea tähang kähawi py te phüng mätü te vi. Luka ma Isu üng phüng thui tea “Khimi üng Cäpaw” näte lo te tea tawng leilae vi. Hini Angthang Kähawi-a lä aetang saite phüng aely käleng-a thui khü pa te vi. Angthang Käkawi kälang-a qa y saite aethang saite phüng mätae te lo lä qa te vi. Khrista äma aetang khe saite na la cungrü-a tärü te vi. Luka üng Angthang Kähawi thung-a anghawtho saite aely käleng näkha nung haw te vi. Angthang Kähawi kälang na qawng-a Khrista üng hing saite phüng cungrüky-a tärü pa te vi. Hini cae-u thung üng kaehütä lä Angthang Kähawi kälang thung-a qa te y vi.
Äphüng äkädawiky
Angcü üng älo 1:1-4
Baptismae Johan ni Isu aepeng te hai änini üng nade kätü na 1:5-2:52
Baptismae Johan üng kälu sa saite 3:1-20
Isu Khrista baptismae la saite hai äni tea Setan angra ma bärawi bäleng saite 3:21-4:13
Kalile khö-a Isu Khrista üng mipui thung-a kälu käsawng sa saite 4:14-9:50
Kalile khö üng hai Jerusalem märü-a Isu üng ly saite 9:51-19:27
Jerusalem märü hai äteng äpa-a Isu Khrista üng kangkhüng käni säritä 19:28-23:56
Areng Isu kädü thung üng aetha haile saite hai ämaw aetüng kha Känipre-a paw saite 24:1-53
1Angcü üng älo
1Mätawngky Theophilu ä,
Kai ce säla-a tyng saite na phüng tärü hethang khimi ce lä awng mang pyng vi dy. 2Khimi ce ma kai ce tea thui saite kätyng äni ce lä tärü ö te vi. Honi khimi ce lä angcü-a äma ce ämi hai hini na nung ö khe te vi. Äni ce lä Säthaw tähang mawsawng sa kha Säthaw üng angthang khimi ce tea thui pa saite na vi. 3Tukätephüng-a kai ma la Areng Isu phüng angcü üng hai kähawi-a aedüng aethui pyng kha nang tähang älang kätüng-a tärü hethang hawi ai müng näkha dawng te vi. 4Tu üng mätawngky Theophilu ä, nang tea khimi ce mätu saite phüng tätang mäny hai hethang ngai te phüng-a hikä tärü te vi dy.
Baptismae Johan aepeng ai näte phüng thui rüng pa
5Judae khö üng sanphrang Herodae thüng-a Säthaw üng mäthykung Zakhari näsaite lawngtä lä awng. Äma lä Abija näsaite mäthykung amäjy thung üng vi. Äni üng nawngpui Elizabe lä Säthaw üng mäthykung Aron ceng kaesui thung üng by vi. 6Änini lawng netä lä Säthaw maw-a käcüngky-a awng hawi te vi. Areng üng täru saite älo na la tängai hawi bärai te vi. 7Tungaila Elizabe lä kätung kämai kha änini lä äcaw nade dang hawi y. Änini lä mätawng hawi phi vi dy.
8Känitä-a Zakhari üng äpy lä Säthaw tähang kälu sa te kätü-a, Zakhari lä Säthaw üng Ingkäcai thung-a kälu sa by. 9Äni lä Säthaw üng mäthykung na üng reitae kätyng phui hai aere kha Säthaw üng Ingkäcai-a ly ea rimuidi tea maisawi hethang kae pa te vi. 10Äni ma rimuidi tea maisawi te kätü-a aecö saite khimipui na lä Säthaw üng Ingkäcai ärang mang-a aetang pa ö dy.
11Honi kätü-a Säthaw üng angtawtha lawngtä lä äni tea aetüng kha rimuidi maisawi nae bangtang mang-a aedaw pa. 12Zakhari lä äni bung nung te kätü-a, aethüng kha ri vi dy. 13Tukha Säthaw üng angtawtha ma “Zakhari ä, ri y hang. Nang üng aetang te tüng lä Säthaw ma thai kha mäthang te kae ecy. Nang nawngpui Elizabe lä cäpaw lawngtä aepeng ai mang. Tukha nang lä äni tea ‘Johan’ näkha ämüng mäthi ba. 14Äni phüng-a nang ni lä kawng anghawtho bärai ai mang. Äni aepeng te phüng-a khimi ce lä anghawtho mang by vi ai. 15Areng maw-a äni lä aely lengky saite khimi aelawng vi ai. Äni lä Cäpje tui hai ra na nei he kae y ai. Äni tea lä aepeng te üng hai Säthaw ma Muilaw Käcai kawi hai jawjaw pa vi ai. 16Johan lä Isrelae khimi awng mang na bung äma ce üng Areng Säthaw tea bähawi haile pa vi ai. 17Tukha äni lä Areng üng langmaw-a ly kha Buisaw Elijae kätyng Muilaw Käcai hai aethaw awng bärai vi ai. Äcäpaw hai äpä-ai na tea aede haile pa vi ai. Säthaw üng älo kätüng tängai y saite na tea khimi cüng saite na kätyng sakaw by hethang kätüng mätü vi ai. Areng üng lo tängai hethang khimi ce tea aerü hai rüng pa vi ai” näpa.
18Zakhari ma Säthaw üng angtawtha tea “Makä sa kha hini tea kai lä mäny tätang haw ai mei. Kai hai kai nawngpui lä mätawng phi te vi dy be” näpa.
19Säthaw üng angtawtha ma “Kai üng ämüng lä Kabrela vi. Säthaw maw-a aedaw saite lawngtä vi. Kai lä nang tea hini Angthang Kähawi thui hethang Säthaw ma kai bung mätaw te vi. 20Vaihi ma nang lä älo aepe haw y ai dy. Nang üng cäpaw aepeng te khytä nang lä sitäri-a awng ai. Ätephüng-a mei nädylä nang lä kai üng lo na yng y te phüng-a vi. Kai ma thui saite lo lä äma kätü-a cungrü khaw vi ai” näpa.
21Honi kätü-a Zakhari bung khimipui na lä ärang mang-a aering ö pa. Äni lä Säthaw üng Ingkäcai thung-a qae bärai te phüng-a khimipui na lä cangxei ö vi dy. 22Zakhari ärang-a tho te kätü-a lä äni lä khimi ce tea älo aepe haw pa y. Äni lä Säthaw üng Ingkäcai thung-a äsämai haetä nung dy näte khimipui na lä mäny ö praw pa dy. Äma lä khimipui na tea älo aepe haw y kha äkö hai ni mätü pa kae vi.
23Zakhari lä äma üng kälu kätü byng pyng ea lä ing-a vawi haile by dy. 24Tupyng dylä änawngpui Elizabe lä äjo awng kha law bangawtä ärang-a tho y käla ing-a awng kae dy. 25Elizabe ma “Hini lä Areng ma kai üng aetang saite mäthang te vi dy. Vaihi Säthaw ma kai tea säbawng kha khimi ce maw-a kai üng kaejae sai la hai pa te vi dy” näpa.
Isu aepeng ai näte phüng thui rüng pa
26Elizabe üng äjo awng te law tärutä kätü-a lä Kalile khö Nazare märü-a Säthaw lä angtawtha Kabrela bung mätaw pa. 27Äni lä anglaw Maeri tea ly pa dy. Maeri lä Sanphrang Davidae ceng kaesui thung üng Josefae ämüng awng saite hai aepawng he aedo te vi. 28Säthaw üng angtawtha ma Maeri tea “Nang tea awngneng saite awng sy. Säthaw ma nang tea bälung aevaw kha tähang kähawi py vi ai” näpa.
29Maeri lä äni lo phüng-a bälung kikaehü-a awng pa dy. Angtawtha üng thui saite lo lä makä näte vi nang mei näkha äni lä aedawng dy. 30Säthaw üng angtawtha ma Maeri tea “Maeri ä, ri y hang. Säthaw ma nang tea tähang kähawi py te dy ecy. 31Nang lä äjo awng kha cäpaw lawngtä aepeng ai. Nang lä äni tea ‘Isu’ näkha ämüng mäthi he kae. 32Säthaw ma äni tea aenae kälengky py pa vi ai. Khimi ce ma äni tea Aesangky Säthaw üng Cäpaw näkha ka ö vi ai. Areng Säthaw ma äni bung kangsi sanphrang Davidae kätyng sanphrang kälengky-a aelawng hai pa vi ai. 33Äni lä Isrelae khimi na üng sanphrang sa kha äma üng pre-a pyng jawjaw vi ai” näkha näpa.
34Maeri ma Säthaw üng angtawtha tea “Kai lä anglaw kae ea makä sa kha äby aepeng haw vi ai mei” näkha düng pa.
35Säthaw üng angtawtha ma Maeri tea “Muilaw Käcai ma nang üng qawng-a tyng kha Aesangky te Säthaw üng phung-ang lä nang qawng-a khu vi ai. Tukätephüng-a khimi ce ma lä nang cäpaw tea Säthaw üng Cäpaw Käcai näkha ka ö vi ai. 36Nang üng amäjy Elizabe mäteng ma mätawng käni-a äjo awng by dy. Khimi ce ma kätung kämai näsaite nawngmädi lä äjopawng te law tärutä awng pa vi dy. 37Säthaw sa haw y te lä haetä la awng y vi” näkha thui pa.
38Maeri ma la “Kai lä Säthaw üng mawsawng kae vi. Nang ma thui saite kätyng kai tea tyng kae sy” näkha näpa. Tupyng-a Säthaw üng angtawtha lä äni te üngta ly ja pa vi dy.
Maeri ma Elizabe tea dawnghang ly pa
39Honi pyng dylä qae y tea ma Maeri lä aerü kha Judae khö me anghung angmang mang-a awng saite märü-a Elizabe hai aeting hethang ly praw dy. 40Tupyng-a Maeri lä Zakhari ni ing-a tyng kha Elizabe tea kawng bärai aesa pa. 41Maeri thui te tüng Elizabe ma thai te kätü-a lä äma äjo thung üng äby lä aetae pa vi. Tukha Elizabe lä Muilaw Käcai hai kawi pa vi dy. 42Äni lä ätüng käleng hai Maeri tea “Nang tea nawngmädi angxynlyng na qawng-a Säthaw ma tähang kähawi py te dy. Nang üng äjo thung-a awng saite äby tea la Säthaw ma tähang kähawi py te vi dy. 43Säthaw lä kai tea tätang khü bälung aevaw kha kai üng Areng nä-awi bung kai tea dawnghang ly hai te vi. 44Nang ma kai tea kawng bärai sa te tüng thai praw te kätü-a kai jo thung üng äby la aetae by vi. 45Nang lä Säthaw üng aedo te losai tyng tätang ai näkha yng te phüng-a Säthaw lä nang tea tähang kähawi py vi ai” näkha thui pa.
Maeri ma Säthaw tea bälaw pa
46Tukha Maeri lä,
“Kai lä Säthaw tea bälaw dy.
47Kai bung Aeqangkung
Säthaw phüng-a kai lä kawngphi vi dy.
48Äni üng mawsawng nawngmädi kaeneng tea äni ma aedawng hai pa vi.
Vai üng hai dung angxynlyng üng khimi ce ma kai tea,
Säthaw üng tähang kähawi dang saite nawngmädi näkha thui ö vi ai.
49Ätephüng-a mei nädylä, phung-ang lengky saite Säthaw ma kai tähang cangxei te na sa pa te phüng-a vi.
Äni lä caiping saite Kung vi.
50Säthaw tea tämö khai saite dung angxynlyng na üng khimi ce tea äni lä bäheng vi ai.
51Äma üng haidae hai aethaw awng saite na sa pa vi dy.
Äma lä bälung aesang saite khimi tea aehui xhixae hai pa dy.
52Säthaw ma sanphrang na üng aenae bung laja pa.
Tungaila khimi ce maw-a aemäneng saite na tea lä äni ma mäsang hai pa vi.
53Äma lä äjo kaelang na tea bö ang kähawi na hai mäcaw kha,
tawngnang saite na tea lä büngqaitä ma bälawi sö pa vi.
54Säthaw lä äma tea mawsawng sa saite Isrelae khimi na tea säbawng pa.
Äma lä äni ce tea bäheng hethang tämang pa te y vi.
55Säthaw lä mä-ai üng kangsi na tea aedo saite älo kätyng Abraham hai,
äni üng kaesui kaebeng na bung bäheng jawjaw vi” näkha Maeri ma äma ae-awi hai thui pa dy.
56Tukha Maeri lä Elizabe tea law thungtä rytä awng kha äma üng ing-a vawi haile vi dy.
Baptismae Johan bung aepeng pa
57Elizabe üng äby aepeng hethang tyng te kätü-a lä äma lä äcäpaw aepeng pa by dy. 58Äni tea Säthaw ma cangxei-a bäheng kha sa saite äma üng amäjy na hai särawng dawngpa khimi ce thai ea lä äni hai mangtä kawng hai pa ö by dy.
59Käni täjaetä kätü-a äni ce amäjy na hai Judae mätawngky na lä Judae reitae kätyng äcäpaw üng lengkhüng täke hethang ly ö. Äni ce üng amäjy na ma lä honi cäpaw tea “Zakhari” näkha äpä-ai üng ämüng mäthi he ngai ö vi. 60Tukä ea la äby üng nä-awi ma lä “Tukä y. Johan müng mäthi ö kae” näkha thui pa.
61Äni ce ma äby nä-awi tea “Nang ni üng äceng thung-a hini ämüng lä mäthi te awng vai y be” näkha näpa. 62Tupyng-a äni ce lä äby üng pä-ai tea äkö hai mätü kha düng pa ö dy. Äby müng äpä-ai üng kängai-a mäthi hai hethang mäny he ngai ö te phüng-a vi.
63Zakhari ma lä äni ce tea kopeng haetä mäkai kha honi kopeng phei qawng-a “Äby üng ämüng lä Johan vi” näkha tärü pa dy. Honi kä tärü te nung ea äni ce lä cangxei ö dy. 64Honi üng hai ma Zakhari lä älo aepe haile praw haw raw pa vi dy. Äni lä älo aepe angcü haile te hai Säthaw tea kawng te lo thui vi dy. 65Särawng dawngpa üng khimi ce ma lä cangxei ö phi dy. Judae khö üng me anghung angmang mang-a awng saite khimi na ma lä hini angxynlyng na phüng aethui ö pa by vi dy. 66Hini phüng thai saite khimi qütä na lä tämang ö haw y vi. Tukha äni ce ma “Hini nade lä makäti khimi lawng ai mei hi” näkha aedüng aethui ö vi. Tukätephüng-a Säthaw üng haidae lä äni hai mangtä awng pa dy.
Zakhari ma Säthaw tea bälaw pa
67Äby üng pä-ai Zakhari lä Muilaw Käcai kawi kha buisaw lo thui dy.
68“Isrelae khimi ce üng Areng Säthaw tea bälaw ö si.
Ätephüng-a mei nädylä äni lä äma üng khimi ce bung aeqang hethang ly pa te phüng-a vi.
69Säthaw lä mä-ai tea aethaw awng saite Aeqangkung bung mätaw pa vi.
Äni lä Säthaw üng mawsawng Davidae sanphrang ceng thung mang tho saite vi.
70Hini phüng Säthaw ma lä buisaw käcai na hai-a,
cangkhawng üng hai ma thui rüng pa te vi.
71Hini Aeqangkung lä mä-ai üng täre na hai esäre saite khimi na aenae thung üngta mä-ai bung kätho pa vi ai.
72Säthaw lä äma üng käcai-a aedo kha mä-ai kangsi na tea thui saite lä tämang te y vi.
Tukha äni lä mä-ai tea bäheng jawjaw te vi.
73Hini phüng-a äni lä mä-ai üng kangsi Abraham tea cakhi te älo aedo kha thui pa te vi dy.
74-75Säthaw lä mä-ai üng täre na kö thung üng mä-ai bung kätho haile vi ai näkha aedo vi.
Tukha mä-ai lä hing te rytä täre na tea ri y käla äni üng mawsawng sa haw ai.
Tudylä mä-ai lä äni üng maw-a käcüng hai käcai-a awng haw ai.
76Kai cäpaw ä, nang tea khimi ce ma Kaesangky Säthaw üng buisaw näkha ka ö vi ai.
Tukätephüng-a nang lä Areng üng maw-a ly kha äma tähang lolang aerü vi ai.
77Säthaw ma khimi ce üng hunghö na bung bälawi kha,
aeqang saite phüng nang lä Säthaw üng khimi ce tea mätu pa vi ai.
78Säthaw lä khimi ce tea bäheng tätang te phüng-a,
Mesia lä känise te kätyng mä-ai tea tyng vi ai.
79Mesia lä hunghö käving thung-a awng saite khimi na hai,
dü he ri saite khimi na tea kaevang py kha Säthaw üng Angthang kätüng thui pa ai.
Äni lä mä-ai tea awngneng saite lolang thung-a ly hethang bähawi pa vi ai” näkha Zakhari lä thui pa.
80Tukha nade Johan lä ryng kha äma lä Säthaw tea yng te hai aethaw awng rae pa vi dy. Isrelae khimi na maw-a Säthaw üng älo thui te kätü khytä daithung kärang mang-a awng pa vi dy.
2Isu bung aepeng te phüng
1Hani kätü-a Sica sanphrang Awkutu lä Rom pre angxynlyng-a awng te khimi angxynlyng na üng ämüng lä cärei na üng cae-u thung-a mäkung he kae näkha aenae hai thui pa vi. 2Hikä ämüng mäkung hai te lä angcü üng sa saite vi. Honi kätü-a Kuinia näsaite kälengky lä Siria pre tea pyng te vi. 3Tukha khimi qütä lä äma ce ceng kaesui na awng te mityng mang-a ly kha cärei na üng cae-u thung-a ämüng mäkung he kae ö te vi.
4Tukätephüng-a Josefae lä Kalile khö Nazare märü üng hai tho kha Judae khö Davidae üng märü Bethlehem-a ly te by vi. Äni lä sanphrang Davidae ceng kaesui te phüng-a vi. 5Josefae lä äma hai aepawng hethang aedo saite Maeri hai mangtä Bethlehem märü-a cärei na üng cae-u thung-a ämüng mäkung hethang ly hawi by dy. Maeri lä äjo awng pa vi dy. 6Änini lä Bethlehem märü-a awng hawi te thüng-a äby aepeng he kätü lä tyng pa vi dy. 7Maeri lä äcäpaw cälö lawngtä aepeng pa dy. Äma lä äni bung libyng käsa hai säbang kha raebawi raca mäcaw te okö haetä thung-a khai pa dy. Angvüng aehae nae thung-a änini tähang mityng awng pa y te phüng-a Maeri lä hini kä sa te vi.
Beram rui saite hai Säthaw üng angtawtha na
8Honi kärung-a beram rui te kung na lä Bethlehem märü teng üng aeca rawng-a beram na hai mangtä awng ö te vi. 9Säthaw üng angtawtha lawngtä lä äni ce tea aetüng pa vi. Tukha Areng üng phung-ang lä äni ce äteng äpa-a aevang pheng kha äni ce lä ri ö phi vi dy. 10Tu-ea lä Säthaw üng angtawtha ma äni ce tea “Ri ö hang. Kai lä nang ce hai khimi angxynlyng na ma tengxyng y kawng hai he Angthang Kähawi thui hethang ly te kae ecy. 11Vaidüng ma hini sanphrang Davidae üng märü-a Aeqangkung lä nang ce tähang aepeng pa dy. Äni lä Khrista vi. Areng la vi. 12Kai ma thui saite phüng kätüng-a nang ce makä sa kha mäny ai mei nädylä: Libyng käsa hai säbang kha raebawi raca mäcaw te okö thung-a bäsawng saite äby bung nang ce lä nung ö ai mang” näkha näpa.
13Qengtäma Säthaw üng angtawtha rangpui na lä aetüng praw kha Säthaw tea bälaw pa ö vi dy.
14“Aesangky saite Säthaw tea bälaw ö si.
Älawng qawng üng Säthaw ma bälung aevaw saite khimi na tea lä awngneng te awng jo sy” näkha thui pa ö dy.
15Tupyng-a Säthaw üng angtawtha na ly ö pang pyng te kätü-a lä beram rui te khimi ce ma äma ce tingtawi aethui ö te lä “Co, Bethlehem märü-a ly ea Areng ma thui saite na kheng ö jo si” näkha nä ö dy.
16Hini phüng-a äni ce lä ly ö dawde kha Maeri ni Josefae hai raebawi raca mäcaw te okö thung-a bäsawng saite äby bung lä nung pa ö vi. 17Äni ce ma äby bung nung pyng ea lä Säthaw üng angtawtha ma äby phüng thui pa saite lo na khimi qütä tea thui haile pa ö dy. 18Tukha beram rui te khimi ce ma thui saite angthang thai saite khimi angxynlyng na lä cangxei ö dy. 19Maeri ma lä hini älo angxynlyng na phüng bälung thung-a sämai khi kha aedawng mäsüng pa te vi. 20Tupyng-a beram rui te kung na lä äma ce mityng-a vawi haile ea Säthaw tea tämö khai kha bälaw ö dy. Tukätephüng-a Säthaw üng angtawtha ma thui te kätyng äni ce thai kha nung khaw pa ö vi dy.
Nade Isu bung Säthaw Ingkäcai-a nähai pa
21Käni täjaetä kätü-a Judae reitae kätyng mätawngky na ma nade bung lengkhüng täke pyng ea lä “Isu” näkha ämüng mäthi ö pa dy. Hini ämüng lä änä-awi äjopawng y kälang-a Säthaw üng angtawtha ma thui pa saite ämüng vi.
Isu bung Ingkäcai-a a pa
22Äby lawngtä aepeng pyng-a Maeri hai Josefae ni la Mosi üng Ubädi kätyng sa hethang kätü lä tyng pa vi dy. Tukha Maeri hai Josefae ni lä Isu bung Jerusalem märü-a nähai kha Säthaw üng Ingkäcai thung mang Säthaw tea nade bung a hawi dy. 23“Ätephüng-a mei nädylä Caekäcai thung-a cäpaw äcälö qütä na lä Säthaw üng kae vi” näkha mäkung pa te phüng-a vi. 24Tukha änini lä Areng üng Caekäcai thung-a täru te kätyng bähö caw me netä hai nähai hawi kha Säthaw tea löci aesa hawi pa by te vi.
25Honi kätü-a Simon näsaite khimi lawngtä lä Jerusalem märü-a awng pa vi. Äni lä khimi cüng saite lawngtä kha Säthaw üng lo tängai jawjaw saite khimi vi. Äni lä Isrelae na bung aeqang saite Säthaw üng Mesia tea aering te vi. Muilaw Käcai lä äni hai mangtä awng te vi. 26Muilaw Käcai ma Simon tea “Nang dü y kälang-a Areng üng Mesia bung nung vi ai” näkha thui rüng pa te vi dy. 27Honi kätü-a Muilaw Käcai ma Simon bung Säthaw üng Ingkäcai mang-a ly hai pa dy. Äni lä Ingkäcai-a awng te thüng-a Maeri hai Josefae lä äby Isu bung nähai hawi kha Mosi üng Ubädi kätyng sa hawi te by vi. 28Simon ma äby bung nung te kätü-a lä äkö hai süng kha täpawi pa ea Säthaw tea kawng te lo thui dy. 29Äni lä phung-ang kälengky
“Areng ä, Nang ma kai tea aedo saite älo kätyng vaihi lä tyng te vi dy.
Vai lä nang üng mawsawng kai lä awngneng-a dü lawi mai sy.
30Khimi ce tea aeqang hai he mätaw te hini nade bung kai ma üng ämi hai vaihi ma nung khe te vi dy.
31Nang ma khimi angxynlyng na maw-a Aeqangkung bung re dy.
32Äni lä ceng kälang khimi ce tea lolang mätü saite kaevang-a lawng pa vi ai.
Isrelae khimi na lä äni üng phüng hai-a phung-ang dang ö vi ai” näkha thui pa dy.
33Änä-awi hai äpä-ai ni lä Isu phüng Simon ma thui saite phüng-a cangxei hawi vi dy. 34Tupyng-a Simon ma äni ce tea tähang kähawi py pa kha Isu üng nä-awi Maeri tea “Säthaw ma hini nade bung re kha äni phüng-a Isrelae khimi awng mang te na lä pra ai. Awng mang te na lä aeqang te dang ö ai. Äni lä Säthaw üng kamarae-a aelawng vi ai. Tungaila khimi ce lä äni tea e pa ö vi ai. 35Äni phüng-a Säthaw lä khimi ce üng kaedawng kätüng mätü pa vi ai. Tukha nang üng bälung tea lä aeteng hai thung te kätyng naw hai pa vi ai” näpa.
36Hini mityng-a Ana näsaite buisaw nawngmädi lawngtä lä awng by vi. Äni üng pä-ai lä Asa ceng thung üng Fanuel näsaite khimi vi. Ana lä mätawng phi pa vi dy. Äni lä änawngpaw hai aepawng kha säning säritä awng te kae vi. 37Tupyng-a änawngpaw lä dü pa vi dy. Tukha äma lä lömai nä-awi-a säning rui täjae bälitä khytä awng vi dy. Äma lä Säthaw üng Ingkäcai thung-a awng kha kädüng kädang Säthaw tea cäphaw ea böjae te hai ma aetang vävawi te vi. 38Hini kätü-a buisaw lömai nawngmädi lä Josefae hai Maeri ni teng-a ly kha äby Isu phüng Säthaw tea bälaw pa dy. Äni lä Säthaw ma Mesia bung Jerusalem märü aeqang hethang mätaw ai näte aering saite khimi angxynlyng na tea Isu phüng thui pa vi dy.
Nazare märü-a vawi haile pa
39Josefae hai Maeri ni lä Säthaw üng Ubädi kätyng sa khüng bawi te kätü-a lä Isu hai äma ce awng saite Kalile khö üng Nazare märü-a vawi ö vi dy. 40Tukha nade Isu lä ryng kha aethaw awng pa vi dy. Tupyng-a äni lä bälunghae bärai pa te vi. Säthaw ma äni tea bälung aevaw kha tähang kähawi py pa vi dy.
Säthaw Ingkäcai-a nade Isu
41Isu üng nä-awi hai pä-ai ni lä Cäqengja te pawi tähang Jerusalem märü-a säning qütä ly vävawi hawi te by vi. 42Isu säning hawlai netä pyng-a lä, änä-awi hai äpä-ai ni lä ly vävawi te honi pawi-a ly hawi kha Isu bung la nähai te by vi. 43Pawi khüng te kätü-a lä, Isu üng nä-awi hai pä-ai lä äma ce üng märü mang-a vawi hawi vi dy. Tukä ea la nade Isu lä Jerusalem märü-a awng pa te vi rawng. Änä-awi ni äpä-ai lä mäny hawi pa y vi. 44Isu lä äma ce rawijae na hai mangtä ly by müng näkha aedawng hawi te hai änini lä känini rui ly hawi te vi dy. Tukha änini lä Isu bung äma ce üng amäjy na hai rawijae na säla-a ha hawi pa dy. 45Isu bung nung hawi y te kätü-a lä änini ma Jerusalem märü-a aekö haile phi kha ha hawi dy. 46Käni thungtä pyng-a ni änini lä Isu bung Säthaw üng Ingkäcai thung-a nung hawi pa vi. Äni lä Judae särae na hai mangtä aety kha äni ce te üng älo tängai te hai äni ce tea älo na düng pa vi. 47Isu lä bälungkähae hai älo aepe te thai saite khimi angxynlyng na lä cangxei ö pa dy. 48Änä-awi hai äpä-ai ni ma äni hai aeting te kätü-a lä cangxei hawi by vi. Änä-awi ma äni tea, “Cäpaw ä, Nang lä ätemakä kai ni tea tukä sa te vi mei. Nang pä-ai hai kai ni lä bälung mawng phi te hai nang bung ha hawi te dy be hi” näkha thui pa.
49Isu ma änini tea “Ätephüng-a kai tea ha hawi te mei. Kai lä Üngai Ing-a awng hethang kae vi” näte mäny hawi y vi nang mei näpa. 50Tungaila änä-awi ni äpä-ai lä Isu ma thui saite lo tea bälungva hawi pa y vi.
51Tupyng-a lä Isu lä änini hai mangtä Nazare märü-a vawi pa by dy. Tukha Isu lä änini üng älo na kähawi-a tängai pa te vi. Änä-awi lä hini angxynlyng na phüng äma üng bälung thung-a sämai khi pa vi dy. 52Tudylä Isu lä ryng kha bälunghae te hai awng rae pa vi dy. Säthaw hai khimi ce maw-a la mimai dang pa vi dy.
3Johan üng Säthaw lo thui saite
Mat 3:1-12; Mar 1:1-8; Joh 1:19-28
1Honi kätü-a Taiberia näsaite Sica sanphrang Rom pre angxynlyng na tea pyng te lä säning hawlai bangawtä awng vi dy. Mätawngky Pontia Pilata lä Judae khö-a pyng kha sanphrang Herodae lä Kalile khö tea pyng te by vi. Herodae üng kangby Philip lä Iturea khö hai Trakoniti khö känetä tea pyng te by vi. Mätawngky Lasania lä Abilene khö tea pyng te by. 2Honi kätü-a Ana hai Kaiafa ni lä mäthykung kälengky na vi. Honi thüng-a Säthaw lä Zakhari üng cäpaw Baptismae Johan tea älo aepe pa vi dy. Äni lä daithung kärang mang-a awng te kätü-a vi. 3Tukha Johan lä Jordan tävaw teng üng vang, märü angxynlyng na mang-a ly kha Säthaw üng angthang thui pa te lä, “Nang ma ce üng hunghö na ae-ui ö. Kai ma nang ce tea baptismae py ai dy. Tudylä Säthaw ma nang ce üng hunghö na bälawi vi ai” näkha näpa. 4Jangni-a buisaw Isaia ma Johan phüng thui kha tärü rüng pa te vi dy. Buisaw Isaia lä
“Daithung kärang-a khimi lawngtä ma a kha thui ai.
Areng ly nae lolang mäcai rüng lawi.
Äni tähang lolang mätaw pa lawi.
5Khimi ce ma angdung qütä-a mäkawi kha me anghung angmang qütä tea mängi pa ö sy.
Lolang kaeke na tea mätaw kha aengi aetang y saite lolang na tea kähawi-a bädü pa ö sy.
6Tukha khimi angxynlyng na ma Säthaw lä khimi ce bung aeqang saite nung ö vi ai” näkha näpa.
7Khimipui na lä Johan üng baptismae la he ly ö dy. Äni ma “Nang ce lä bärui käsi hai aetawng vi. Nang ce lä Säthaw ma dengpy saite aelawi haw y lyng. 8Nang ce lä tüng saite kälu sa te hai-a ae-ui tätang te mätü mang re. Tukha ‘Kai ce lä Abraham hai kaesui na kae vi’ näkha nang ma ce tingtawi aethui ö mang hang re. Säthaw lä hini kälung na tea mäteng Abraham kaesui na-a bälawng haw te vi. 9Säthaw lä aetu süng kha äthai kung bälu hethang awng rüng te khimi hai lawngtä kätyng vi. Äni ma äthai aethai y saite äkung angxynlyng na tea bälu pang ea mai hai sawi vi ai” näpa.
10Khimipui thung üng khimi ce ma Johan tea “Kai ce lä makä sa ai mei” näkha düng pa dy.
11Johan ma äni ce tea “Kä-o känetä awng saite khimi lä awng y saite khimi tea py pa. Ca nei he awng saite khimi lä ca nei he awng y saite khimi tea bäri pa mai he kae vi” näkha thui pa.
12Angko cawng te kung na lä Johan tea baptismae la hethang ly ö by vi. Äni ce lä “Särae, kai ce lä makä sa ai mei” näkha düng pa ö dy.
13Johan ma äni ce tea “Nang ce lä pre käpyng na ma ko hai te qawng-a kanglai angko cawng ö hang” näkha mäthang pa dy.
14Tupyng-a reisae phütä na ma lä Johan tea “Kai ce lä makä sa ö ai mei” näkha düng pa dy.
Johan ma äni ce tea “Khimi ce te üng tangkae dang hethang tähang-a äni ce tea mätang bälai-a sa pa ö hang. Tangkae dang hethang khimi ce tea aethaw paitae hai käsi thui kha teng pa ö hang. Nang ma ce üng kälu sa kha dang saite tangkae hai ma awng ö pü kae” näpa.
15Khimi ce lä Khrista ly ai näte dawng ö rüng dy. Tukha äni ce lä Baptismae Johan tea Mesia dy müng näkha käthi ö te vi. 16Baptismae Johan ma äni ce angxynlyng tea “Kai lä nang ce tea tui hai baptismae py dy. Kai qawng-a haidae lengky saite lawngtä lä ly ai. Kai lä äni üng kho painai rui sö hethang mäteng ma aeteng y vi. Äni ma lä nang ce tea Muilaw Käcai hai-a, mai hai baptismae py ai mang. 17Äma üng kö-a caw mäsi hethang bäraw süngrüng saite khimi hai aetawng vi. Äni lä cawpai thung-a caw kangta na bung mäkawi pa vi ai. Äma lä cawfi na bung dü y saite mai thung-a kädesö pa vi ai” näkha thui pa dy.
18Johan lä Angthang Kähawi khimi ce tängai hethang älang cawngkhang na hai thui pa mang vi dy. 19Tupyng-a Johan lä Herodae sanphrang tea “Nang kangby üng nawngpui Herodia bung la te phüng-a Säthaw üng Ubädi hai aebäla y vi” näkha thui pa dy. Herodae üng kälang hawi y sa saite na phüng la Johan lä thui pa te vi. 20Tukätephüng-a Herodae lä käsi kangthae haetä sa kha Baptismae Johan bung thawng thung-a bäla pa te vi.
Johan ma Isu tea baptismae py pa
21Johan ma khimi angxynlyng na tea baptismae py te kätü-a, Isu lä baptismae la by dy. Isu ma aetang te thüng-a käni lä aepä-awng pa te vi. 22Tukha Säthaw üng Muilaw Käcai lä bähö kätyng aeja käthu ea äni qawng-a cu pa vi. Tukä ea käni mang Säthaw üng ätüng lä Isu tea “Nang lä kai üng bälung aevawky saite Cäpaw vi. Nang lä kai tea kawng hai ky saite vi,” näkha näpa.
Isu üng ceng kaesui na phüng
23Isu lä säning ruithungtä tingtang awng te kätü-a, Säthaw ma mätaw saite kälu äni lä aetawng vi dy. Khimi ce ma Isu lä “Josefae üng cäpaw vi” näkha aethang khai ö vi. Josefae üng pä-ai lä Heli, 24Heli üng pä-ai lä Mathatha, Mathatha üng pä-ai lä Levi. Levi üng pä-ai lä Melakhi, Melakhi üng pä-ai lä Jannai, Jannai üng pä-ai lä Josefae vi. 25Josefae üng pä-ai lä Mathathia vi. Mathathia üng pä-ai lä Amos vi. Amos üng pä-ai lä Nahum vi. Nahum üng pä-ai lä Esli vi. Esli üng pä-ai lä Nakai vi. 26Nakai üng pä-ai lä Math vi. Math üng pä-ai lä Mathathia vi. Mathathia üng pä-ai lä Semen vi. Semen üng pä-ai lä Jose vi. Jose üng pä-ai lä Joda vi. 27Joda üng pä-ai lä Johanan vi. Johanan üng pä-ai lä Resa vi. Resa üng pä-ai lä Zerubabel vi. Zerubabel üng pä-ai lä Sete vi. Sete üng pä-ai lä Neri vi. 28Neri üng pä-ai lä Melkhi vi. Melkhi üng pä-ai lä Adi vi. Adi üng pä-ai lä Kosam vi. Kosam üng pä-ai lä Elmadam vi. Elmadam üng pä-ai lä Er vi. 29Er üng pä-ai lä Joshu vi. Joshu üng pä-ai lä Eliezer vi. Eliezer üng pä-ai lä Jorim vi. Jorim üng pä-ai lä Mathat vi. Mathat üng pä-ai lä Levi vi. 30Levi üng pä-ai lä Simon vi. Simon üng pä-ai lä Judae vi. Judae üng pä-ai lä Josefae vi. Josefae üng pä-ai lä Jonan vi. Jonan üng pä-ai lä Eliakim vi. 31Eliakim üng pä-ai lä Melea vi. Melea üng pä-ai lä Menna vi. Menna üng pä-ai lä Mathat vi. Mathat üng pä-ai lä Nathan vi, Nathan üng pä-ai lä Davidae vi, 32Davidae üng pä-ai lä Jese vi, Jese üng pä-ai lä Obe vi. Obe üng pä-ai lä Boaz vi, Boaz üng pä-ai lä Salmon vi. Salmon üng pä-ai lä Nashon vi. 33Nashon üng pä-ai lä Aminade vi. Aminade üng pä-ai lä Admin vi. Admin üng pä-ai lä Arni vi. Arni üng pä-ai lä Hezron vi. Hezron üng pä-ai lä Pere vi. Pere üng pä-ai lä Judae vi. 34Judae üng pä-ai lä Jaeko vi. Jaeko üng pä-ai lä Isaika vi. Isaika üng pä-ai lä Abraham vi. Abraham üng pä-ai lä Tera vi. Tera üng pä-ai lä Nahor vi. 35Nahor üng pä-ai lä Seru vi. Seru üng pä-ai lä Reu vi. Reu üng pä-ai lä Pele vi. Pele üng pä-ai lä Eber vi. Eber üng pä-ai lä Shela vi. 36Shela üng pä-ai lä Kinan vi. Kinan üng pä-ai lä Arphaxa vi. Arphaxa üng pä-ai lä Shem vi. Shem üng pä-ai lä Novae vi. Novae üng pä-ai lä Lame vi. 37Lame üng pä-ai lä Methusela vi. Methusela üng pä-ai lä Eno vi. Eno üng pä-ai lä Jare vi. Jare üng pä-ai lä Mahalale vi. Mahalale üng pä-ai lä Kenan vi. 38Kenan üng pä-ai lä Enosh vi. Enosh üng pä-ai lä Seth vi. Seth üng pä-ai lä Adam vi. Adam üng pä-ai lä Säthaw vi dy.
4Setan angra ma Isu tea the pa
1Isu lä Muilaw Käcai hai kawi kha Jordan tävaw üngta vawi haile ea Muilaw Käcai ma äni bung daithung kärang-a nähai pa vi. 2Isu lä ho-a käni ruibälitä awng ea Setan angra ma hunghö sa hethang the pa dy. Honi pyng-a Isu lä äte la ca y te phüng-a kätü käni na byng pyng ea lä äma lä äjo aelang phi pa vi dy.
3Setan angra ma äni tea “Nang lä Säthaw üng Cäpaw tätang dylä hini kälung na tea täkaw-a bälawng by ä,” näkha näpa.
4Tukha Isu ma Setan angra tea “Caekäcai thung-a tärü te lä ‘Khimi lä täkaw ma qaitä hai-a hing haw te y vi’” näkha mäthang pa dy.
5Tupyng-a Setan angra ma Isu bung me anghung kaesang haetä qawng-a nähai kha tänaetäma Isu tea älawng-a awng saite pre angxynlyng na bung mätü pa vi. 6Tupyng-a Setan angra ma Isu tea “Hini pre na üng phung-ang käleng hai aenae angxynlyng na bung nang tea kai py ai dy. Säthaw ma hini pre na kai tea a tephüng-a, kai lä hini ta kai ma ngai saite lawngtä tea py haw te vi. 7Tudylä nang ma kai tea cäphaw dylä, hini angxynlyng na nang lä dang haw ai mang” näkha thui pa dy.
8Tukha Isu ma Setan angra tea “Caekäcai thung-a tärü te lä, ‘Nang üng Areng Säthaw tea ni cäphaw kha äni ma qaitä tea ni mawsawng sa kae’” näkha mäthang pa.
9Tupyng-a äni bung Setan angra ma Jerusalem märü-a nähai kha Säthaw üng Ingkäcai üng kaesangky mityng qawng-a aedaw hai pa vi dy. Tukha Isu tea “Nang Säthaw üng Cäpaw dylä säly käthu by. 10-11Caekäcai thung-a tärü te lä ‘Säthaw ma nang tea äma üng angtawtha na hai kähawi-a rui hai vi ai. Äni üng angtawtha na ma nang tea äma ce üng kö hai pangky ö vi ai. Tukätephüng-a nang üng kho bung mäteng kälung na hai-a tämaw ca hai y ai mang’” näpa.
12Tungaila Isu ma äni tea “Säthaw üng Caekäcai ma lä, ‘Nang üng Areng Säthaw tea käny hang’” näpa vi.
13Tukha Setan angra ma Isu tea älang cawngkhang hai the pa dy. Tupyng-a äni lä älang kähawi tyng te khytä Isu teng üngta ly ja pa vi dy.
Isu lä kälu sa te aetawng dy
14Isu lä Muilaw Käcai üng haidae hai Kalile khö-a vawi haile vi dy. Tukha äni üng angthang anghe lä särawng dawngpa mityng qütä-a aethangdü pa vi. 15Isu ma Judae na üng ingkäcai na mang-a Säthaw lo mätu kha khimi qütä na lä äni tea bälaw ö bawi pa vi dy.
Nazare üng khimi ce ma Isu tea e pa dy
16Isu lä äma ryng saite Nazare märü-a ly vi dy. Tukha Aehae te Käni-a lä, äma lä Judae na üng ingkäcai thung-a ly vävawi vi. Tupyng-a Isu lä ha-a Caekäcai phai hethang aetha pa. 17Äni ce ma lä Isu tea buisaw Isaia tärü saite Caekäcai ang-yng bälang pa dy. Isu ma honi cae ang-yng lang kha phai pa dy.
18-19“Areng üng Muilaw Käcai lä kai hai mangtä awng dy.
Khimi kangtang na tea Angthang Kähawi thui hethang
Säthaw ma kai bung re te phüng-a vi.
Thawng thung üng khimi ce tea bälawi vi ai näte phüng thui hethang,
ämi kangjö na ämi nung haile hethang,
Säthaw ma kai bung mätaw te vi.
Sakälö khü pa saite khimi na aelawi hethang,
Areng ma äma üng khimi ce bung qae y tea ma, aeqang ai dy näte thui pa hethang,
Säthaw ma kai bung mätaw te vi dy” näkha phai pa.
20Tupyng-a Isu lä cae ang-yng bung täyng haile kha Judae na üng ingkäcai kälengky tea py pa haile ea aety pa vi dy. Ho-a awng saite khimi angxynlyng na ma äni tea kheng khisäli pa dy. 21Tukha Isu ma äni ce tea “Hini Caekäcai lä nang ce üng thai te kätyng vaihi ma cungrü te vi dy” näpa.
22Khimi angxynlyng na lä äni üng phüng-a bälaw ö vi dy. Äni ce lä Isu üng thui saite älo kähawi na phüng-a cangxei ö vi dy. Tukha äni ce lä “Äni lä Josefae üng cäpaw y vi nang mei” näkha aethui ö dy.
23Isu ma äni ce tea “Nang ce ma kai tea hini pelo kätyng thui ö vi ai. Latang, nang ma üng naw saite tea nang ma hawi sa raw kae ba ä, nang ma Kapernawm märü-a sa saite phüng kai ce lä thai by vi. Vaihi nang ma üng ryng saite mityng Nazare märü-a lä hini kätyng sa pa jo by” näkha näpa. 24Honi pyng-a Isu ma “Kai lo tängai ö. Khimi ce ma ämi buisaw lawngtä bung la äma üng vang kung-a lä tämö khai pa y vi.
25“Kai tätang thui te lä buisaw Elijae üng kätü-a, Isrelae pre-a lä nawngmädi lömai na awng mang vi. Honi kätü-a, säning thungtä hai kaehütä khöne pa y vi. Tukha Isrelae pre qütä-a khimi ce tea lä bötäkang tho pa vi dy. 26Tungaila Säthaw ma Elijae bung Isrelae pre üng lömai ämi tea la mätaw pa te y vi. Tukha Sidon khö Zarepha märü-a awng saite nawngmädi lömai lawngtä tea ni Elijae bung mätaw pa te kae. 27Buisaw Elise kätü-a, Isrelae pre-a ängang käsi mang saite khimi na awng mang pa dy. Tungaila Säthaw ma äni ce thung üng ämi tea la hawi sa pa te y vi. Siria pre üng Neman lawngtä xyng tea ni hawi sa pa te kae vi” näkha thui pa dy.
28Hini thui saite lo Judae na üng ingkäcai-a awng saite khimi na thai te kätü-a lä, kädawtho ö phi pa vi dy. 29Tukha äni ce lä aetha rü kha Isu bung märü ärang mang-a mätho ö pa vi dy. Khimi ce lä Isu bung Nazare märü sa saite me anghung kaesang mang-a nähai kha täkha thung-a nui praw hethang sa pa ö vi. 30Tungaila Isu lä khimipui säla mang ly ja pa vi dy.
Isu ma angra bung mätho pa
31Tupyng-a Isu lä Kalile khö üng Kapernawm märü-a ly ea, äma lä Aehae te Käni-a khimi ce tea Säthaw lo mätu pa dy. 32Äni lä aenae hai älo mätu pa te phüng-a thai saite khimi na lä cangxei ö pa vi dy. 33Judae na üng ingkäcai thung-a angra kung saite khimi lawngtä awng pa vi. Honi khimi lä ätüng käleng hai hang pa dy. 34Äni ma “Nazare märü üng Isu ä, nang lä kai ce tea ätemakä sa hethang ngai te mei. Kai ce tea täphra hethang ngai te mei. Nang lä Säthaw üng cai saite Cäpaw näte kai lä mäny vi” näkha thui pa dy.
35Isu ma äni tea “Sitäri-a awng. Hini khimi thung üng tho la” näkha särilo hai thui pa vi dy. Tupyng-a angra ma honi khimi bung khimipui na maw-a aetüng hai dung pa dy. Tukha tämaw py y käla ma äni thung üng thoja pa vi dy.
36Khimi angxynlyng na lä cangxei ö dy. Äma ce tingtawi aedüng aethui ö te lä, “Äni thui saite na lä cangxei he hawi na ly. Äni lä angra na tea aenae hai haidae lo na täru ea, angra lä Isu üng lo tängai kha khimi te üng thoja na ly” näkha aethui ö dy. 37Tukha Isu üng angthang lä särawng dawngpa üng vangpui vang cäpi angxynlyng na mang-a aethangdü pa vi dy.
Isu ma khimi känaw käsaw na hawi sa pa
38Tupyng-a Isu lä Judae na üng ingkäcai üng tho kha Simon üng ing-a ly pa vi. Simon üng pä-i lä kawngang naw kha äkähui na lä Isu tea säbawng hethang mäkai pa vi. 39Tukätephüng-a Isu lä nawngmädi üng i nae teng-a aedaw kha äni üng käbi tea haidae hai thui te phüng-a nawngmädi lä hawi pa vi dy. Tukha äni lä aetha praw ea äni ce tea käca känei mäcaw pa dy.
40Käni düng te kätü-a lä känaw mi cawngkhang awng saite na bung khimi ce ma Isu tea nähai pa vi dy. Tukha Isu ma äma üng äkö hai naw saite khimi qütä na tea thyng kha hawi sa pa vi dy. 41Isu ma angra kung saite khimi na thung üng angra na bung lä mätho pang pa vi. Angra na ma lä Isu tea “Nang lä Säthaw üng Cäpaw vi” näkha ätüng käleng hai thui pa vi.
Tungaila Isu lä äni ce tea älo haetä la aepe y hethang mäkhang pa vi. Ätephüng-a mei nädylä angra na ma Isu lä Mesia vi näkha mäny ö vi dy.
Judae na üng ingkäcai-a mätu pa
42Käni tho y kälang-a Isu lä khimi awng y saite mityng mang-a ly ja pa vi dy. Tungaila khimi ce lä Isu bung mäqang ö dy. Äni ce ma Isu bung nung te kätü-a, Isu tea kälang mang-a ly ja y hethang mäkhang he ngai ö dy. 43Tungaila Isu ma äni ce tea “Kai lä kälang märü mang-a awng saite khimi na tea ly kha Säthaw ma pre pyng te phüng Angthang Kähawi thui ngece hethang by vi. Hini phüng-a Säthaw lä kai bung mätaw te vi” näkha thui pa vi.
44Tupyng-a Isu lä Judae khö üng märü na mang-a ly kha Judae na üng ingkäcai na thung-a Angthang Kähawi thui jawjaw pa vi dy.
5Isu ma angcü üng äkähui na bung ka pa
1Känitä-a Isu lä Kenesare tuilipui pyng-a aedaw pa vi. Khimipui na lä Säthaw lo thui saite tängai hethang äni teng-a ly ö dy. 2Tukha tui teng-a mawi ne te khimi ce ma khai saite bälawng känetä tea Isu lä nung dy. Äni ce lä aerung ea mawipry na mäse kha awng ö vi dy. 3Isu lä Simon näsaite khimi üng bälawng qawng-a paw pa vi. Äni ma Simon tea “Bälawng bung tui teng üngta cäditä-a nui kü pa e” näpa. Tukha Isu lä bälawng qawng mang aety kha khimi ce tea Säthaw lo na mätu pa vi.
4Tukha äni ma Simon tea, “Vaihi bälawng bung tui käthu mang-a haw. Tu-a nang ce mawi ne hethang mawipry jae ö” näpa.
5Tukha Simon ma “Särae ä, kai ce lä kärung rungtaw mawi ne hethang aethaw aesa ngaila, äte haetä la dang y vi. Tungaila nang ma thui te phüng-a kai ce üng pry na jae haile ai mang” näpa. 6Äni ce ma pry jae haile kha pry aesä-ei aenai rung khytä mawi na lä awng mang-a dang pa ö dy. 7Tukätephüng-a äni ce lä kälang bälawng-a awng saite äpy na bung äma ce tea säbawng hethang ka ö dy. Tukha äni ce ma ly ea bälawng känetä ne aenai-a mawi na thyng ö vi dy. 8Hikä Simon Peterae ma nung te kätü-a lä, äni lä Isu üng maw-a khokhö didü kha Isu tea “Kai teng üngta ly ja la, Areng ä, kai lä hunghö awng mang saite khimi kae vi” näpa.
9Simon Peterae ma hikä thui pa te lä, äni hai äma äpy na mawi awng mang-a dang kha cangxei pa te phüng-a vi. 10Simon üng äpy Zebede üng cäpaw Jaeko hai Johan ni la cangxei hawi by vi. Tukha Isu ma Simon tea “Ri y hang. Hini lä vaini üng hai aetawng kha nang ni lä mawi ne te jüng-a kai tea yng hethang khimi ce bung nähai saite-a bälawng vi ai” näkha näpa.
11Tupyng-a Simon hai äma üng äpy na lä äma ce üng bälawng na tui teng-a nähai haile kha ätete angxynlyng na khaisö ea Isu leithung hui pa ö vi dy.
Ängang käsi lawngtä bung Isu ma hawi sa pa
12Känitä-a Isu lä märü haetä-a awng ea ängang käsi mang bung saite khimi lawngtä lä äteng-a ly pa vi. Äni ma Isu bung nung te kätü-a, Isu teng-a aebo kha mimai bü käthu te hai “Areng ä, nang ma aely ngai dylä kai bung hawi sa haw he kae” näkha näpa vi.
13Isu ma äma üng kö bäjang kha khimi känaw tea “Kai aely ngai cy. Hawi lawi sy” näpa. Tänaetäma äni üng ängang käsi lä hawi praw pa raw vi dy.
14Tupyng-a Isu ma äni tea “Ämi tea lä hini phüng thui hang ba. Tungaila ly kha nang ma bung mäthykung na tea mätü ba. Tukha Mosi üng Ubädi kätyng mäthykung tea löci sa ba. Hikä sa te lä nang üng vaihi naw te hawi dy näte khimi qütä ma mäny vi ai” näkha täru pa.
15Tungaila Isu üng angthang lä aethang rae pa vi dy. Tukätephüng-a khimipui käleng na lä Isu üng lo tängai hethang hai äma ce üng känaw käsaw na hawi hai hethang äni teng-a ly ö mang pa vi dy. 16Tungaila Isu lä khimi awng y te mityng mang-a ly ja kha aetang vävawi pa vi dy.
Isu ma kökho kädü lawngtä bung hawi sa pa
17Känitä-a Isu ma khimipui na tea Säthaw lo mätu te kätü-a, Pharisai na hai Mosi üng Ubädi mätu saite särae na lä ha-a aety ö pa by vi. Äni ce lä Kalile khö hai Judae khö qütä üng vang na mang üng hai Jerusalem märü mang üng ly ö saite na vi. Tukha Areng üng haidae lä Isu hai mangtä awng kha khimi känaw käsaw na tea hawi sa pa vi dy. 18Khimi phütä na ma kökho kädü lawngtä bung i nae hai aejawng kha tyng pa ö vi. Äni ce lä khimi känaw bung engthung üng Isu teng-a nähai he ngai ö te vi. 19Tungaila khimipui na awng phi pa te phüng-a äni ce lä ingthung-a kung haw ö pa y vi. Tukha äni ce lä engphö-a paw kha usai ngang hai aebu saite engphö tea khawng ea äkhaw sa ö dy. Tukha äni ce lä khimipui na säla üng Isu maw-a khimi känaw üng i nae tea ruinawng hai mäkhing kha äkhaw mang bäla pa ö dy. 20Isu hini khimi ce üng yng saite nung te kätü-a lä khimi känaw tea “Änang ä, nang üng hunghö bung kai ma bälawi vi dy” näpa.
21Pharisai na hai Ubädi särae na lä “Hini khimi lä ämi mei. Äma tea Säthaw kätyng aesa te lä. Säthaw lawngtä xyng ni hunghö bälawi haw te kae be” näkha aedawng ö dy.
22Isu lä äni ce üng kaedawng saite na mäny king kha äni ce tea “Ätephüng-a nang ce lä tukäti na dawng ö te vi mei. 23Hini kökho kädü tea thui he manita jaky mei. ‘Nang üng hunghö bälawi dy näkha thui te jaky mei’ y käla ‘Aetha kha aeke lawi’ näte jaky mei. 24Tungaila kai ma nang ce tea Kai, Khimi üng Cäpaw, älawng qawng-a hunghö na bälawi hethang aenae awng näte mätü vi ai” näpa. Tupyng-a Isu ma kökho kädü saite khimi tea “Nang tea kai thui ai. Aetha ea i nae tä-yng kha ing-a vawi lawi cü” näpa.
25Khimi känaw lä khimipui na maw mang aetha praw ea äma üng i nae tä-yng kha Säthaw tea bälaw te hai ma ing-a vawi pa vi dy. 26Khimi qütä na lä cangxei kha Säthaw tea bälaw ö by vi. Äni ce lä ri kha “Vaini mä-ai lä cangxei saite na nung dy” näkha thui ö vi dy.
Isu ma Levi bung ka pa
27Honi pyng-a Isu lä tho ea lä Levi näsaite angko cawng te kung lawngtä äma üng jung-a aety te bung nung pa vi. Isu ma äni tea “Kai leithung hui lawi” näpa dy. 28Levi lä aetha kha äma üng kälu angxynlyng na khaisö ea Isu leithung hui praw pa vi dy.
29Tupyng-a Levi lä äma üng ing-a Isu tähang bö mäcaw saite pawi käleng sa kha angko cawng saite khimipui na hai kälang angvüng na bung ka ea bö mangtä ca ö dy. 30Tukä ea la Pharisai na hai Ubädi särae na lä Isu üng äkähui na tea “Makäte phüng-a nang ce lä angko cawng saite khimi na hai, khimi hunghö na hai mangtä ca nei ö te vi mei” näkha käsi thui pa vi.
31Isu ma äni ce tea “Känaw käsaw awng y saite na lä latang bung ngai y lyng. Tungaila naw te khimi lä ngai vi. 32Kai lä khimi cüng saite na bung ka hethang ly te y. Khimi hunghö na ae-ui hethang tähang ly te kae” näkha mäthang pa dy.
Böjae saite phüng düng pa
33Äni ce ma Isu tea “Johan üng äkähui na lä böjae kha aetang vävawi ö te vi. Pharisai na üng äkähui na la hikä sa te by vi. Tukä eala nang leithung hui saite na lä böjae y käla nei ca kha awng vävawi ö vi” näpa.
34Isu ma äni ce tea “Nawngpui käla kung üng angvüng na lä äni hai mangtä awng te thüng-a böjae hai te awng vai y. 35Tungaila nawngpui la te kung bung täre na ma laja te kätü-a lä äni üng rawijae na böjae ai rawng mang” näpa.
36Isu ma hikä mätae te älo hai äni ce tea “Ämi la kä-o kangthae ngang tea täke kha kä-o kangrüng ngang tea bang vai y. Hakä sa dylä, kä-o kangthae ngang lä khaw ai be. Tukha kangrüng ngang hai kangthae ngang lä aebäla haw y vi ai. 37Ämi la mawiphö bung kangrüng thung-a Cäpje tui kangthae tea mäkawi te awng vai y. Hokä mäkawi dylä, Cäpje tui kangthae lä mawiphö bung kangrüng tea aepo hai kha Cäpje tui lä aebu ea äbung lä pra vi ai dy. 38Cäpje tui kangthae lä mawiphö bung kangthae-a ni mäkawi vävawi saite kae vi. 39Tukha Cäpje tui kangrüng nei pyng saite khimi lä ätui kangthae nei he ngai y vi dy. Cäpje tui kangrüng lä hawiky näkha aethang khai te vi.”5:39 Cäpje tui la qa dylä jö kätyng by vi.
6Isu lä aehae te käni üng Areng
1Aehae te Känitä-a Isu lä lai caw kae mang ly ea äkähui na lä caw vui sädy ö dy. Tukha äkö hai känawi ea caw me ca ö vi. 2Pharisai phütä na ma “Makäte phüng-a nang ce lä Aehae te Käni-a aesyng y te na sa ö lae vi mei” näpa.
3Isu ma äni ce tea “Nang ce lä Davidae hai äma üng äpy na böjo aelang te kätü-a sa saite na phüng phai vai y vi nang mei. 4Äni lä Säthaw üng Taipung-a kung ea Säthaw tähang khai saite täkaw la kha ca ea, äpy na tea la py pa by vi. Honi täkaw lä Judae reitae kätyng mäthykung na qaitä ca haw te kae” näpa.
5Tupyng-a Isu ma äni ce tea “Kai Khimi üng Cäpaw lä Aehae te Käni üng Areng la vi” näpa.
Äkö dü saite khimi bung Isu ma hawi sa pa
6Aehae te äkälang käni-a Isu lä Judae na üng ingkäcai thung-a kung kha mätu pa dy. Ho-a äkö bangtang mang dü saite khimi lawngtä lä awng. 7Pharisai na hai Ubädi särae na lä Isu tea käsi thui hethang älang ha pa ö dy. Äni ce lä Aehae te Käni-a naw saite khimi bung Isu ma hawi sa ai mei, sa y mei näte nung hethang kähawi-a kheng ö vi. 8Tungaila Isu lä äni ce üng aedawng saite mäny praw pa. Tukha äkö dü saite khimi tea “Aetha kha khimi ce maw-a aedaw lawi” näpa. Tukätephüng-a äni la aetha kha aedaw vi dy. 9Tupyng-a Isu ma äni ce tea “Aehae te Käni-a Judae na üng Ubädi kätyng kähawi sa he kae mei, käsi sa he kae mei. Khimi üng hing saite tea aeqang he kae mei, täphra he kae mei” näkha düng pa. 10Äni lä khimi angxynlyng na tea kheng aeki prei kha naw saite khimi tea “Nang üng äkö bäjang lawi” näpa. Khimi känaw lä älo tängai kha äni üng äkö la hawi ping pa vi dy.
11Tungaila Judae mätawngky na lä kädawtho phi kha Isu tea makä käsi sa haw ai mei näte phüng äma ce tingtawi aedüng ö dy.
Isu ma angtawtha lawng hawlai netä na bung re pa
12Känitä-a Isu lä me anghung haetä-a paw kha Säthaw tea kärung rungtaw aetang dy. 13Kädang khö aevang ea lä äkähui na tea ka pa. Tukha äni ce thung üng khimi lawng hawlai netä na bung re kha äni ce tea “Angtawtha na” näkha mäthi pa vi. 14Äni ce üng ämüng lä Peterae näsaite Simon, äni üng kangby Andru, Jaeko, Johan, Philip, Barthawleme, 15Mathai, Thawmae, Alphai üng cäpaw Jaeko, Isrelae pre tähang bälung nawphi saite Simon, 16Jaeko üng cäpaw Judae hai Isu bung täre na kö-a a saite khimi Judae Iskriota ce vi.
Isu ma Säthaw lo mätu kha känaw käsaw awng te na bung hawi sa pa
17Isu lä äni ce hai mangtä ly käthu kha angdawng haetä-a aedaw dy. Äma leithung hui saite khimipui na hai Jerusalem märü hai Judae khö mityng qütä üng khimi ce hai pangle pyng-a awng saite Taira märü hai Sidon märü mang üng ly saite khimi na la tyng by vi. 18Äni ce lä Isu üng älo tängai hethang hai äma ce üng känaw käsaw na hawi hethang ngai kha ly ö te by vi. Angra kung saite khimi na tea lä Isu ma hawi sa pa. 19Isu te üng haidae tho kha känaw käsaw na hawi pa te phüng-a, khimi angxynlyng na lä Isu tea aela hethang aethaw aesa ö dy.
Tähang kähawi hai tähang käsi
20Isu ma äkähui na tea kheng kha
“Mätang saite nang ce lä tähang hawi,
Säthaw üng pre lä nang ce tähang vi.
21Vaihi böjo aelang saite nang ce lä tähang hawi, nang ce lä äjo kawi te tyng vi ai.
Vaihi raw saite na lä tähang hawi, nang ce lä mänui te awng ai mang.
22“Kai, Khimi üng Cäpaw, phüng-a, khimi ce ma nang ce tea esäre te hai käsi thui kha ngai y te hai thui tämawng dylä nang ce lä tähang hawi. 23Nang ce hokä aeting dylä kawng te hai aebälü ö. Ätephüng-a mei nädylä Känipre-a lä nang ce üng ävang käting awng te phüng-a vi. Vaihi nang ce tea käsi sa saite khimi na üng kangsi na lä buisaw na tea mätangbälai sa pa ö te by vi.
24Tungaila khimi känang na ä, nang ce lä tähang si.
Nang ce lä älawng üng hawi saite na dang ö pyng te vi dy.
Tudylä nang ce lä dang bälai hethang awng y dy.
25Vaihi äjo kawi saite nang ce lä tähang si.
Nang ce lä äjo aelang te awng vi ai rawng.
Vaihi mänui saite nang ce lä tähang si.
Nang ce lä bälungsi kha rawpi te awng ö vi ai rawng.
26“Khimi angxynlyng ma nang ce tea bälaw dylä nang ce lä tähang si. Äni ce üng kangsi na lä buisaw kaeling na tea honi kätyng bälaw ö te by vi.
Täre na tea bälung aevaw ö
27“Kai lo thai saite khimi na ä, nang ce tea kai thui te lä, nang ma ce üng täre na tea bälung aevaw ö. Nang ce tea esäre saite na tea kähawi sa pa. 28Nang ce tea täking saite khimi na tea Säthaw ma tähang kähawi py hethang aetang pa. Nang ce tea mätang bälai-a sa saite khimi na tähang aetang pa ö. 29Nang üng tangbeng täbeng saite khimi tea, pheitä mang aetüng pa be re. Nang qawng üng kä-o la saite khimi tea äthung üng kä-o py pa be. 30Nang tea mäkai saite khimi qütä na tea py pa. Nang üng ingthawng la saite khimi tea lä aethaw paitae hai mäkai haile hang. 31Mä-ai ma tea kähawi sa hethang ngai hai te kätyng, khimi kälang na tea la sa pa ö.
32“Nang ce tea bälung aevaw saite khimi na tea ni bälung aevaw kae dylä, Säthaw ma nang ce tea kähawi thui he y lyng. Hunghö sa te khimi ce mäteng ma äma ce bälung aevaw saite khimi na tea bälung aevaw ö te vi. 33Nang ce tea kähawi sa saite khimi na tea ni kähawi sa kae dylä, Säthaw ma nang ce tea kähawi thui he y lyng. Hokä lä hunghö sa te khimi ce mäteng ma sa ö te vi. 34Nang ce lä py haile ai näkha aethang khai saite khimi na tea ni äkhi mäqaw kae dylä, Säthaw ma nang ce tea kähawi thui he y lyng. Hunghö sa te khimi ce mäteng ma hunghö sa saite khimi na tea kälai hung haw bawi ai näte kaedawng hai äkhi mäqaw ö te vi. 35Nang ce üng täre na tea bälung aevaw kha äni ce tea kähawi phai sa pa ö ba. Äni ce te üng ätete dang haile tyng hethang aedawng y käla ma aekhi ö. Tudylä nang ce lä ävang käleng dang kha Aesangky Säthaw üng caw na-a aelawng ö ai mang. Ätephüng-a mei nädylä, Säthaw lä äma üng säbawng te tea mänykaw y saite na hai käsi sa saite khimi na tea la bälung hawi khai te vi. 36Känipre üng Pä-ai Säthaw ma khimi ce tea bäheng te kätyng nang ce la khimi ce tea bäheng ö tyng jo.
Khimi kälang na tea tärae cei ö hang
37“Khimi ce tärae cei ö hang. Tudylä nang ce tea Säthaw ma cei y ai mang. Khimi ce tea äpre py ö hang. Tudylä Säthaw ma nang ce tea la äpre py y ai mang. Khimi ce üng hunghö tea bälawi ö. Tudylä nang ce üng hunghö tea Säthaw ma bälawi ai. 38Khimi ce tea mäsai y te hai py pa ö. Tukä ea ni Säthaw ma nang ce tea mäsai y te hai py ai. Säthaw lä nang ce tea kähawi-a nä-e kha tähüng saite tawng käkawi pang-a nüng ea py ai mang. Nang ce lä khimi ce tea nüng kha py te kätyng Säthaw lä nüng kha nang ce tea py by ai” näpa.
39Tukha Isu ma hini mätae te lo hai äni ce tea thui pa. “Ämi kangjö ma äkälang ämi kangjö lawngtä tea bähawi haw sai mei. Änini lawng netä lä angrawng thung-a aeqa ai be. 40Aetu te khimi lä särae qawng-a lengky y lyng. Tungaila särae te üng kähawi-a aetu saite khimi qütä lä äma üng särae kätyng by vi ai.
41“Nang ce lä kangby jä-ai mi thung üng angnüng cäpi cäcaw tea kheng khü ö te vi mei. Tungaila nang ma ce üng ämi thung-a awng saite thingkawng byng tea lä aedawng ö y. 42Nang ce üng äpy äjae tea ‘Nang mi thung üng angnüng cäpi cäcaw tea la si’ näkha thui ö hang. Käjüng sa saite nang lä, nang ma üng ämi-a awng saite thingkawng byng tea angcü-a la mang re baw. Tukä ea ni nang lä caiping-a nung kha äpy äjae ämi angnüng tea la haw vi ai.
Äkung hai äthai
43“Äkung kähawi-a äthai kähawi y aethai vai te y vi. Äkung kähawi y-a lä äthai kähawi aethai haw y. 44Äthai tea kheng kha äthai kung phüng mäny haw te vi. Khimi ce ma thaidö thai tea angling kung üng jö haw te y. Cäpje thai bung lä angling kung üng jö haw y. 45Khimi kähawi lä kähawi-a aedawng te phüng-a khimi ce tea kähawi sa kha kähawi-a ni thui vi ai. Khimi käsi lä hawi y saite aedawng te phüng-a khimi ce tea hawi y sa kha hawi y saite lo ni thui vi ai. Ätephüng-a mei nädylä äma üng bälung thung-a kawi saite na ni äma üng täbawng mang tho te phüng-a vi.
Ing sa te khimi lawng netä
46“Nang ce lä kai thui saite lo tängai y käla ma ‘Areng ä, Areng ä,’ näkha kai tea makä sa kha ka ö te vi mei. 47Kai tea ly ea kai üng lo thai kha tängai saite khimi lä hini kä vi hei. 48Äni lä ing sa saite khimi lawngtä kätyng vi. Äni lä älawng käthu-a tai kha kälung qawng-a aenyng ea ing sa saite khimi lawngtä kätyng vi. Tuimaw lä aethaw awng phi te hai tho kha honi ing tea ty pa. Tungaila ing lä aecü pa y vi. Ätephüng-a mei nädylä ing aenyng nae hawi bärai pa te phüng-a vi. 49Tungaila kai üng lo thai ea tängai y saite khimi lä hini kä hei. Äni lä aenyng nae kähawi y-a ing sa saite khimi lawngtä kätyng vi. Äni üng ing lä tuimaw tho kha tänaetäma aene ea bäja praw pa vi dy” näpa.6:49 Hini kjung näsaite caw tea Judae khimi ce ma lä täkaw sa ö te vi.
7Reisae mätawngky üng yng te phüng
1Isu lä khimi ce tea älo angthang mätu pyng te kätü-a, Kapernawm märü-a kung dy. 2Ho-a Rom reisae cungvaitä bung pyng saite mätawngky üng mawsawng lawngtä awng. Reisae mätawngky lä hani mawsawng tea bälung aevaw bärai vi. Äni lä dü aenai kawngang naw pa dy. 3Reisae mätawngky ma Isu üng angthang thai dylä Judae mätawngky phütä na bung Isu tea mätaw pa. Äma üng mawsawng bung naw te hawi sa pa hethang Isu bung mäkai hai pa te vi. 4-5Isu teng-a tyng te kätü-a, “Hini reisae mätawngky lä nang üng säbawng saite dang hethang aeteng vi. Ätephüng-a mei nädylä äni lä mä-ai üng Isrelae ceng tea bälung aevaw kha Judae üng ingkäcai la sa pa vi” näkha äni ce lä aebai pa.
6Tukha Isu lä äni ce hai mangtä ly dy. Reisae mätawngky üng ing-a tyng hethang aenai dylä, Isu tea reisae mätawngky mätaw saite rawijae na lä aeting pa dy. Äni ce ma “Särae ä, nang ma tea mätang hai ca y ma hang. Nang bung lä kai üng ing-a ly hethang aeteng y lyng. 7Tukätephüng-a kai lä nang teng-a ly hethang aeteng y näkha kai aedawng. Tungaila Areng, nang üng lo bälangtä phai thui dylä kai üng mawsawng lä naw te hawi raw ai mang. 8Kai lä khimi üng aenae täkui-a awng saite khimi kae. Kai üng aenae täkui-a reisae na awng. Kai ma lawngtä tea ‘Ly lawi’ nädylä äni lä ly vi. Äkälang reisae na tea ‘Vawi lawi’ nädylä äni lä vawi vi. Kai üng mawsawng tea ‘Hini kä sa nädylä äni lä sa vi’” näkha näpa.
9Isu ma hini lo thai ea tengxyng y cangxei vi dy. Tukha äma leithung hui te khimipui na tea aehawi kha “Tängai ö, Isrelae khimi na thung-a mäteng ma hini kätangtä yng phi saite khimi bung kai aeting vai y” näpa.
10Tupyng-a Rom reisae mätawngky mätaw saite khimi na lä ing-a vawi haile tyng kha mawsawng üng naw hawi haile te nung ö dy.
Isu ma nawngmädi lömai üng cäpaw lawngtä bung mäning haile pa
11Tupyng-a Isu lä Nain näsaite märü haetä-a ly kha äkähui na hai khimipui na lä mangtä hui ö by. 12Märü üng baesung hawngkhae kung teng-a tyng te kätü-a, khimi ce lä äro bung aejawng kha märü ärang mang-a nähai ö vi. Dü saite khimi lä nawngmädi lömai üng cäpaw lawngtä xyng saite vi. Märü üng khimipui na lä hani lömai hai mangtä hui ö by. 13Areng ma nawngmädi lömai bung nung dylä bäheng phi pa kha äni tea “Raw vawi hang lawi” näpa. 14Tupyng-a Isu lä ly kha hani äro aejawng nae tea aela ea aejawng saite khimi na lä aedaw ö dy. Isu ma äni tea “Särai ä, kai thui dy, aetha lawi” näpa. 15Khimi kädü lä aety kha älo aepe te aetawng ea Isu ma äni bung änä-awi tea a pa dy.
16Khimi angxynlyng na lä cangxei kha Säthaw tea bälaw dy. Äni ce ma lä “Mä-ai thung-a buisaw leng bärai te tho dy. Säthaw lä äma üng khimi ce tea säbawng hethang ly te dy” näkha aethui ö dy.
17Hini Isu üng angthang lä Judae khö hai püngkhe dawngpa mityng qütä-a aethangdü pa vi dy.
Isu hai Baptismae Johan
18-19Baptismae Johan üng äkähui na lä hini angthang angxynlyng Johan tea thui pa. Baptismae Johan lä äni ce thung üng lawng netä bung ka kha Isu tea mätaw pa. Johan ma “Nang lä kai ce ma aering saite Mesia dy mei. Tukä y käla kai ce lä kälang lawngtä bung aering ai rawng mei” näkha düng hai pa.
20Isu tea äni ce tyng te kätü-a lä “Baptismae Johan ma ‘Tyng ai näte Kung lä nang dy mei. Kai ce lä khimi kälang lawngtä bung aering ai rawng mei’ näkha düng hethang kai ni bung nang tea mätaw te dy” näpa.
21Honi kätü khaw-a Isu lä känaw käsaw awng saite na hai, angra kung saite khimi na tea hawi sa pa te vi. Ämi kangjö na tea la nung hai pa dy. 22Tukätephüng-a Isu lä änini tea “Nang ni lä vawi hawi haile kha ätete nung saite hai thai saite amäjy na Baptismae Johan tea thui pa ba. ‘Ämi kangjö na ämi nung haw ö dy. Äkho kangbai na la aeke haw ö dy. Ängang käsi mang saite na tea hawi sa pa dy. Känaw pang saite na la thai haile tyng ö dy. Dü saite na lä aetha haile tyng ö dy. Mätang saite khimi na Angthang Kähawi thai ö by dy. 23Leithung mang-a aehawi y käla yng jawjaw saite khimi tea lä Säthaw ma tähang kähawi py ai’” näpa.
24Baptismae Johan üng äkähui na vawi pyng ea lä, Isu ma Johan phüng khimi ce tea thui pa dy. Äni ma “Nang ce lä äte bung nung hethang ngai kha daithung kärang mang-a ly ö te mei. Aeli tho kha aehüng saite säbö kung tea kheng ö he mei. 25Y dylä äte tea kheng hethang ly ö te mei. Kä-o ävang käting na aelawng saite khimi lawngtä bung nung he ngai ö te mei. Tukä y lyng. Ävang käting kä-o aelawng saite khimi na lä sanphrang üng ing na thung-a awng ö te kae be. 26Nang ce lä makäti khimi bung kheng hethang daithung kärang-a ly ö te mei. Buisaw lawngtä bung nung he ngai te mei. Tängai ö, nang ce lä buisaw lawngtä qawng-a lengky saite bung nung ö vi dy. 27Hikä Johan phüng Caekäcai thung-a tärü te vi. ‘Tängai ö, nang üng maw-a kai üng angtawtha saite bung kai ma mätaw ai. Äni lä nang üng ämaw-a lolang mäcai pa vi ai’ näpa. 28Tängai ö, nawngmädi na üng aepeng saite khimi na thung-a Baptismae Johan qawng-a lengky te ämi la awng y. Tungaila Säthaw üng pre pyng te thung-a, äcäpiky saite lawngtä lä Johan qawng-a lengky vi” näpa.
29Tukha khimi angxynlyng na hai angko cawng saite khimi na mäteng, Isu üng lo thai te kätü-a lä, Säthaw sa te tüng saite lä mäny ö dy. Tukätephüng-a äni ce lä Baptismae Johan üng baptismae la ö te vi. 30Tungaila Pharisai na hai Ubädi särae na lä Säthaw üng kaedawng saite na tea ngai y te phüng-a, Baptismae Johan te üng baptismae la ö y te vi.
31Isu ma lä “Vaihi dung üng khimi ce tea äte hai mätae ai mei. Äni ce lä äte hai aetawng mei. 32Äni ce lä vyngjaw te mityng-a aety kha äma ce tingtawi älo aepe saite nade kätyng äma ce cici aekähyng ö vi. Äni ce ma ‘Kai ce lä nang ce tähang kätang üng ngaila nang ce lä lang ö y. Kai ce lä äro kung-a bälungsi te hai ae-awi ngaila, nang ce lä raw ö y’ näkha näpa. 33Tudylä Baptismae Johan lä böjae kha Cäpje tui na nei y käla awng ea lä nang ce ma ‘Johan tea angra kung te vi’ näkha näpa ö dy. 34Kai, Khimi üng Cäpaw, lä ly tea ca nei kha awng vi. Tukha nang ce ma ‘Kheng e, äni lä bö ca te hahaw pä-ai, Cäpje tui neipro te khimi vi. Äni lä angko cawng saite na, khimi hunghö sa saite na hai rawijae aesa vi’ näpa ö be dy. 35Tungaila Säthaw üng bälunghae te tea tängai saite khimi angxynlyng na hai-a Säthaw üng bälungkähae lä tätang vi näkha mätü ö dy” näpa.
Isu tea hunghö sa saite nawngmädi lawngtä ma rimui tuisü pa
36Pharisai lawngtä lä Isu tea kädüngbö ca hethang ka pa. Tukätephüng-a äni lä Pharisai ing-a ly kha bö loka-a aw pa dy. 37Tudylä honi märü üng hunghö sa saite nawngmädi lawngtä lä Pharisai ing-a Isu bö ca hethang awng te mäny kha kälung kanglung rimui pilang süng ea kung pa vi. 38Äni lä Isu üng leithung-a aedaw kha raw ea Isu kho-a minaw tui bäla kha sui hai pa dy. Tudylä Isu üng kho tea äsang hai mai pa. Tupyng-a Isu kho tea mänang kha rimui tui hai kälo pa vi. 39Isu tea ka saite Pharisai ma hakä nung ea lä äma üng bälung thung-a “Hini khimi lä buisaw lawngtä dylä äma tea aela saite nawngmädi lä hunghö sa saite lawngtä näte mäny ai be” näkha äma ma aedawng dy.
40Isu ma äni tea “Simon ä, kai lä nang tea haetä thui hethang ngai” näpa.
Simon ma “Thui mai by Särae ä” näkha näpa.
41Isu ma lä “Khimi lawng netä lä tangkae mäseng saite kung lawngtä te üng tangkae khi hawi dy. Lawngtä lä tangkae cungvai bangtä, lawngtä lä rui bangtä khi hawi vi. 42Änini lä kälai jy hethang awng hawi pa y te phüng-a tangkae mäseng saite kung ma änini tea kälai aelawi hai bawng pa vi. Tukä dylä änini thung üng ämi ta lä äkung tea bälung aevawky ai mei” näpa.
43Simon ma “Hunghö awng mangky saite khimi lä, bälung aevawky ai näte kai lä aepö vi” näkha mäthang pa. Isu ma “Nang lä kätüng thui khaw te vi” näpa.
44Tupyng-a äma lä nawngmädi te mang-a aehawi kha Simon tea “Nang lä hini nawngmädi tea kheng. Kai lä nang ingthung-a kung ea la kai üng äkho mäse hethang äte tui la nang lä py y. Tungaila hini nawngmädi lä kai üng kho-a äma üng minaw tui na hai sui hai ea äma üng äsang hai mai ping pa te vi. 45Nang lä kai tea lady kha mänang y. Tu-ea la hini nawngmädi lä kung te kätü üng hai ma kai üng kho-a aehae y käla mänang vi. 46Nang lä kai üng lö-a situi hai kälo y. Tu-ea la hini nawngmädi lä kai üng kho na tea rimui hai kälo pyng te vi dy. 47Tukätephüng-a nang tea kai thui te lä, hini nawngmädi lä äma üng hunghö na kai ma bälawi mang pa te phüng-a äni lä kai tea bälung aevawky te vi. Tudylä kai ma hunghö äje cäcaw bälawi pa saite khimi lä kai tea äje cäcaw-a bälung aevaw he kae vi” näpa.
48Tukha Isu ma nawngmädi tea “Nang üng hunghö na bälawi pang vi dy” näpa.
49Angvüng kälang na ma äma ce tingtawi aethui ö te lä “Hunghö na tea mäteng bälawi haw saite hini khimi lä ämi vi nang mei vai” näkha aethui ö dy.
50Isu ma nawngmädi tea “Nang ma kai tea yng te phüng-a Säthaw ma nang bung aeqang te dy. Awneng te hai vawi lawi ba” näpa.
8Isu hai rawijae aesa saite nawngmädi na
1Hini pyng dylä Isu lä vang hai märü na mang-a ly kha Säthaw üng Angthang Kähawi thui pa. Äma üng äkähui lawng hawlai netä na la mangtä ly ö by. 2Tukha känaw käsaw hai angra ma kung te üng hawi sa pa saite nawngmädi phütä na la Isu hai mangtä hui ö te by. Äni ce thung-a Isu ma angra me säritä mätho saite Makadala märü üng Maeri la by vi. 3Herodae üng ingthawng rui saite mätawngky Kuza üng nawngpui Joana la qa by. Tukha Susana hai nawngmädi kälang na la hui ö by. Hini nawngmädi na lä äma ce üng vyngsai na hai-a Isu hai äkähui na tea säbawng pa ö dy.
Ämöti hi saite khimi hai mätae te
4Märü qütä mang üng khimipui na lä aekäcüng ö te thüng-a, Isu lä mätae te hai äni ce tea älo thui pa.
5“Lai sa te khimi lawngtä lä ämöti hi hethang lai-a ly. Hi te kätü-a ämöti phütä lä lolang qawng-a aeqa vi. Tupyng-a ämöti tea lä khimi ce ma thaw kha tävaw na ma ca king. 6Ämöti phütä na lä älung qawng-a aeqa vi. Äkung aepra ngaila tui dang y kha cei raw vi. 7Ämöti phütä na lä angling kung säla-a aeqa vi. Angling kung na lä äkung hai mangtä ryng kha äkung na tea bäjang pa vi. 8Tudylä ämöti phütä na lä älawng kähawi-a aeqa vi. Äkung lä aepra ea ryng kha äthai na aethai mang pa dy. Lai sa te kung üng ämöti hi saite lä phü cungvaitä dang rae pa vi” näpa.
Tupyng-a Isu lä “Känawkhing awng saite khimi na lä thaikaw ö sy” näkha näpa.
Ämöti hi te hai mätae saite phüng thui mäcai pa
Mat 13:10-17, 18-23; Mar 4:10-12, 13-20
9Äkähui na ma Isu tea “Hini mätae saite lo lä makä näte vi nang mei” näkha düng pa. 10Isu ma äni ce tea “Säthaw lä nang ce tea äni üng pre phüng ho saite na mäny hai te vi. Khimi kälang na tea mätae te lo hai kai lä thui te vi. Hini phüng Caekäcai-a tärü te lä ‘Äni ce lä kai sa saite kheng ngaila nung ö y. Kai ma thui saite thai ngaila bälungva ö y’ näte vi.
Isu ma ämöti hi saite khimi hai mätae te phüng thui mäcai pa
11“Hini mätae te phüng lä hikä hei. Ämöti lä Säthaw üng älo vi. 12Lolang qawng-a aeqa te ämöti lä Säthaw lo thai saite khimi na tea thui te vi. Tudylä Setan angra lä äni ce bälung thung üng Säthaw lo la pa ja vi. Tukha äni ce lä yng y kha Säthaw lä äni ce bung aeqang pa y. 13Älung qawng-a aeqa te ämöti na lä Säthaw lo thai kha kawng bärai te hai yng praw saite khimi na tea thui te vi. Tungaila Säthaw lo äni ce üng bälung thung-a cakhi y te phüng-a tänaetä yng ö te kae. Mätangca saite aeting te kätü-a lä yng jawjaw ö y vi dy. 14Angling thung-a aeqa saite ämöti lä Säthaw üng lo thai pyng saite khimi na tea thui te vi. Tungaila äni ce lä bälung mawng saite, tawngnang saite hai mä-ai ma üng kängai saite na phüng-a yng saite lä ryng haw y vi. 15Älawng kähawi-a aeqa saite ämöti lä Säthaw lo thai pyng-a bälung mitang hai mätung khi saite khimi tea thui te vi. Äni ce lä Säthaw üng lo tängai jawjaw kha äthai aethai hai vi ai” näpa.
Maibung hai mätae te
16“Ämi ma la maibung thawng ea tawng hai khu vai y. Honi maibung tea aety nae täkui-a khai vai y vi. Engthung-a kung saite khimi na kaevang nung hethang maibung khai nae qawng-a ni khai saite kae vi.
17“Ho saite Säthaw üng angthang lä Säthaw ma khimi ce tea täphawng vi ai. Täphung saite Säthaw üng pre phüng angxynlyng na lä Säthaw ma khimi ce tea mäny hai vi ai.
18“Tukätephüng-a nang ce mänykaw hethang tängai ö. Sakaw te awng saite khimi na tea lä Säthaw ma py rae vi ai. Tungaila Sakaw te awng y saite khimi na tea lä äma ce tea awng dy näkha aedawng saite tea mäteng ma Säthaw ma la king vi ai” näpa.
Isu üng nä-awi hai kangby na
19Isu üng nä-awi hai kangby na lä äni tea aeting hethang ly ö dy. Tungaila khimipui awng mang te phüng-a Isu teng-a tyng haw ö y. 20Khimi lawngtä ma Isu tea “Nang üng nä-awi hai kangby na lä nang hai aeting hethang ngai kha ärang mang-a aering ö dy” näpa.
21Isu ma äni ce tea “Säthaw üng lo thai kha tängai saite na lä kai üng nä-awi hai kangby na kae dy” näkha mäthang pa.
Isu ma aeli kangcai tea ding hai pa
22Känitä-a Isu lä äkähui na tea “Tuilipui rei mang-a aekae ö si” näpa. Äni ce lä bälawng qawng-a paw kha Tuilipui rei mang-a aekae ö dy. 23Äni ce aekae ö te thüng-a, Isu lä i pa te vi rawng. Honi kätü-a aeli kangcai tho kha äni ce üng bälawng lä tui kawi aenai kha ne hethang sa pa vi dy. 24Äkähui na lä ri ö phi kha Isu tea “Särae, Särae ä, mä-ai lä dü ai dy hei” näkha i bälaw pa. Isu lä i aelaw kha aedaw ea aeli hai tuileng na tea älo hai mäkhang kha aeli hai tuileng na lä ding pa dy.
25Isu ma äkähui na tea “Nang ce lä kai tea makäte phüng-a yng ö y te vi mei” näkha düng pa.
Äni ce lä ri te hai cangxei ea äma ce tingtawi aethui ö. “Hini khimi lä ämi vi nang mei. Aeli hai tuileng na mäteng ma äni üng lo tängai na ly” näkha aethui ö dy.
Angra kung te khimi lawngtä tea hawi sa pa
26Tukha äni ce lä Kerasene khö mang-a bälawng hai aekae ö dy. Honi khö lä Kalile tuilipui rei mang-a awng pa te vi. 27Isu lä tui teng-a aekhü te kätü-a, märü-a awng vai kha angra kung saite khimi lawngtä hai aeting. Honi khimi tea angra kung te lä qae bärai vi dy. Tudylä äni lä kä-o la aelawng y, ing-a la awng y, täprawng-a ni awng te kae vi. 28Äni ma Isu bung nung te kätü-a lä hangrang kha Isu üng maw-a aebo ea aethaw hai ma “Aesangky Säthaw üng Cäpaw Isu ä, Kai tea nang lä äte sa hethang ngai hai te mei. Kai tea mätangca-a sa hang jo ba ä” näkha aebai pa. 29Hokä thui te lä Isu ma äni thung üng angra bung mätho te lo thui pyng pa te phüng-a vi. Angra ma äni bung süng te kätü na lä awng mang pa vi dy. Äni üng kökho na tea singqy rui hai mäkhing tang kha rui saite na hai khai ngaila singqy rui na aethe bae ea angra ma khimi awng y saite mityng mang-a aehui hai te vi.
30Isu ma äni tea “Nang üng ämüng lä ämi mei”8:30 Käri lo üng “Legion” näkha düng pa.
Tukha äni ma “Kai üng ämüng lä angra kanghö vi” näpa. Ätephüng-a mei nädylä äni tea kung te angra lä awng mang pa te phüng-a vi. 31Angra na ma Isu tea “Kai ce bung ngärei thung mang-a mätaw hang jo ba” näkha aesi aebai ö pa.
32Honi kätü-a äteng äpa-a üng me anghung mang-a lä o kanghö na raca ca te awng mang pa vi. Angra na lä o na thung-a kung hethang Isu tea aebai ö dy. Tukha Isu lä äni ce üng mäkai saite kätyng sa pa dy. 33Angra na lä khimi te üng tho ea o na thung-a kung ö dy. O kanghö na lä täkha mang aehui käthu kha säly hai ea tuilipui-a aesänung kha dü ö king pa vi dy.
34O bung rui saite khimi na ma hokä awng te nung ea lä, äni ce lä aehui kha märü hai särawng dawngpa na mang-a honi phüng thui pa ö dy. 35Khimi ce lä ha-a makäte mei näte na kheng hethang ly ö dy. Isu üng maw-a tyng te kätü-a, angra kung vai saite khimi lä bälung cüng haile kha kä-o aelawng ea Isu maw-a aety te nung ö dy. Tukha äni ce lä ri ö phi dy. 36Nung khe saite khimi na ma lä angra kung kha hawi haile saite phüng khimi ce tea thui pa ö by dy. 37Tudylä Kerasene khö üng khimi angxynlyng na lä ri kha Isu tea äma ce khö üng thoja hethang mäkai pa ö vi. Tukätephüng-a Isu lä bälawng aedang ea honi mityng üng ly ja vi dy. 38Angra tho saite khimi lä Isu leithung hui hethang mäkai pa. Tungaila Isu ma py pa y vi.
39Isu ma äni tea “Ing-a phai vawi kha Säthaw ma nang tea makätangtä kähawi sa mei näte phüng thui pa ba” näpa.
Äni lä Isu te üng tho kha äma tea Isu ma matangtä kähawi sa mei näte phüng märü üng khimi angxynlyng na tea thui pa king dy.
Jairae cänung hai naw saite nawngmädi lawngtä phüng
40Isu lä tuilipui rei mang üng vawi haile te kätü-a khimipui na lä äni tea lady ö dy. Ätephüng-a mei nädylä äni ce lä Isu tea aering ö te phüng-a vi. 41Tudylä Judae na üng ingkäcai mätawngky Jairae lä Isu maw-a aebo ea äma ing-a ly hethang mäkai pa. 42Hikä mäkai te lä säning hawlai netä awng saite äcänung lawngtä xyng lä dü aenai naw pa te phüng-a vi.
Isu ma äni üng ing-a ly te kätü-a, khimipui na lä Isu teng-a lawng lawngtä aenui ö mingmawng te vi. 43Tudylä honi thung-a khösäning hawlai netä äthi märaw saite nawngmädi lawngtä awng by. Äni üng naw saite tea lä ämi ma la hawi sa pa haw y vi. 44Honi nawngmädi lä Isu teng-a leithung mang ly kha äni üng kä-o tawng-a aela ea lä äma üng äthi märaw saite lä aeküng raw pa vi.
45Isu ma khimi ce tea “Kai tea aela saite lä ämi mei” näpa. Äni ce angxynlyng lä aela y näpa.
Tupyng-a Peterae ma Isu tea “Särae ä, Khimi hijetä aenui mimawng te thung-a lä nang tea aela te khimi lä awng ai be ä” näpa. 46Isu ma äni ce tea “Khimi lawng lawngtä ma kai tea aela kha kai thung üng haidae tho te kai lä aeny te vi” näpa. 47Tudylä nawngmädi lä aeho haw y te mäny te kätü-a lä käsawtho te hai ma Isu üng maw-a aebo pa. Tupyng-a äni lä khimipui angxynlyng na maw-a Isu tea aela kha äma üng naw saite na hawi praw te phüng thui pa dy. 48Isu ma äni tea “Cänung ä, Kai tea yng te phüng-a Säthaw ma nang tea hawi hai te vi dy. Awneng te hai ly lawi mai ba” näpa.
49Isu ma thui te thüng-a Judae na üng ingkäcai mätawngky ing üng khimi lawngtä lä tyng pa. Äni ma Jairae tea “Nang üng cänung lä dü vi dy. Särae tea xhu hai vi hang lawi” näpa.
50Isu honi lo thai ea “Bälung mawng y ma. Yng jawjaw ba. Nang cänung lä hing haile ai rawng mang” näpa.
51Isu lä Jairae ing-a tyng te kätü-a, anglaw üng änä-awi ni äpä-ai hai, Peterae, Johan, hai Jaeko ce bung äma hai mangtä engthung-a kung hai kha khimi kälang na tea lä kung hai pa y. 52Äcänung lä dü te phüng-a khimi angxynlyng na lä bälungsi kha raw ö sung pa te vi. Tudylä Isu ma äni ce tea “Raw ö hang. Äni lä dü te y lyng. I te kae ecy” näpa.
53Jairae cänung dü te mäny saite khimi na ma lä Isu tea mänui hai pa vi. 54Tungaila Isu lä anglaw üng kö-a süng ea “Anglaw ä, aetha lawi” näpa. 55Tukha äcänung anglaw lä hing haile tyng kha aetha praw pa dy. Tupyng-a Isu ma nade üng nä-awi ni pä-ai tea “Anglaw tea käca känei mäcaw pa ba” näpa. 56Anglaw üng nä-awi hai pä-ai ni lä cangxei hawi dy. Tungaila Isu ma äni ce tea “Hikä sa saite phüng ämi tea la thui ö hang ba” näkha täru khi pa.
9Angtawtha hawlai netä na tea mätaw pa
1Isu lä äma üng äkähui lawng hawlai netä na bung ka kha naw saite khimi na tea hawi sa hethang hai angra na bung mätho hethang, haidae hai aenae py pa. 2Tupyng-a Isu ma äni ce tea Säthaw üng pre phüng thui hethang hai naw saite khimi na tea hawi sa hethang mätaw pa. 3Isu ma “Nang ce lä khölawng-a äte haetä la nähai ö y ma. Pawngpai, cawngkö, käca känei, tangkae phawisae na la nähai ö y ma. Kä-o kaeqai haetä la nähai ö y ma hang. 4Khimi lawngtä ma nang ce bung äma ing-a ka dylä honi märü üng tho te khytä äni ing-a ma aehae ö kae. 5Khimi ce ma nang ce tea äni ce märü-a lady y dylä honi märü üng tho saite kätü-a nang ma ce üng khodi na täkhy pang ö. Säthaw ma äni ce tea kädawtho te phüng mätü ö” näpa.
6Tupyng-a angtawtha na lä tho kha vang qütä aevi prei ea Angthang Kähawi thui te hai naw saite na tea hawi sa pa ö dy.
Isu lä ämi mei näte Herodae ma düng pa
7-8Kalile khö pyng saite kälengky Herodae lä Isu üng sa saite na phüng thai dy. Khimi phütä na ma lä “Baptismae Johan lä kädü thung üng aetha haile tyng te vi” näpa. Khimi kälang na ma lä “Elijae tho haile te vi” näpa. Phütä kälang na ma lä “Vaicaw üng buisaw lawng lawngtä hing haile tyng te vi dy müng” näkha näpa. Hini äphüng na Herodae lä thai ea dawng tämangtü pa dy. 9Herodae lä “Kai ma Baptismae Johan bung lä älö byng kha bädü hai pyng te vi dy. Kai thai saite hini lä ämi vi nang mei vai” näpa. Tudylä äni lä Isu tea aeting hethang ngai dy.
Khimi lawng sang bangawtä na tea täkaw mäcaw pa
Mat 14:13-21; Mar 6:30-44; Joh 6:1-14
10Isu üng angtawtha na lä khölawng üng vawi haile kha äma ce sa saite angxynlyng na phüng Isu tea thui pa. Tupyng-a Isu ma äni ce qaitä bung ka kha Besaida näsaite märü-a ly ö dy. 11Tungaila khimipui na lä honi angthang thai kha äni leithung hui ö dy. Isu lä äni ce tea lady kha Säthaw üng pre angthang thui pa. Naw te hawi hethang ngai saite khimi angxynlyng na tea la äni ma hawi sa pa.
12Käni düng te kätü-a lä äkähui lawng hawlai netä na ma Isu tea “Hini khimipui na tea mätaw kha särawng dawngpa üng vang na mang-a ca hethang hai aehae nae ha hai kae. Hini mityng lä khimi ce hai hanglaw bärai te vi” näpa.
13Isu ma äni ce tea “Nang ce lä äni ce tea käca känei na mäcaw pa ö” näpa.
Äni ce ma Isu tea “Kai ce tea lä mawi me netä hai täkaw phe bangawtä xyng awng kae vi. Hini khimipui angxynlyng na tähang ly kha ca nei hethang rang pa ai mei” näpa.
14(Ätephüng-a mei nädylä khimi nawngmäcaw qaitä ma lawng sang bangtä tingtang awng te phüng-a vi.)9:14 Hini mityng-a nawngmädi hai nade na la awng by vi
Tungaila Isu ma äkähui na tea “Khimi rui bangaw rytä äly äly-a awng hai kha aety hai ö” näpa.
15Äkähui na lä äni thui te kätyng khimi angxynlyng na tea aety hai dy. 16Tukha Isu ma täkaw phe bangawtä hai mawi me netä la ea käni khösang mang-a kheng tähang kha Säthaw tea kawng te lo thui pa. Tupyng-a äni lä täkaw hai mawi tea täpe kha khimipui na tea bäri hethang äkähui na tea bälang hai pa dy. 17Khimi angxynlyng na la äjo käkawi-a ca ö bawi dy. Tukha äkähui na makä ca kaebang na mäküng ea lä tawng hawlai netä kawi tyng pa te vi rawng.
Isu lä Mesia näte Peterae ma thui pa
18Känitä-a Isu lä äma qaitä aetang te kätü-a äkähui na lä äni hai mangtä awng. Isu ma äni ce tea “Khimi ce ma kai tea ämi nä ö mei” näkha düng pa.
19Äni ce ma Isu tea “Khimi phütä na ma lä ‘Baptismae Johan’ näkha näpa. Khimi phütä na ma lä ‘Elijae’ nä vi. Tukha khimi kälang phütä na ma lä ‘Aetha haile tyng saite vaicaw üng buisaw lawngtä dy nä ö’” näpa.
20Tupyng-a Isu ma “Tudylä nang ce lä kai tea ämi näkha nä ö mei” näpa.
Tukha Peterae ma “Nang lä Säthaw mätaw saite Mesia vi” näpa.
Isu lä äma mätangca kha dü ai näte phüng thui rüng pa
21Isu ma äni ce tea hini phüng ämi tea la thui y hethang täru khi pa dy. 22Tukha Isu ma äni ce tea “Kai, Khimi üng Cäpaw, lä mätangca hethang kae. Judae na üng mätawngky na, mäthykung käleng na hai Ubädi särae na ma kai tea lä khaisö kha bädü vi ai. Tungaila ämäthung käni-a lä hing kha aetha haile tyng vi ai” näpa.
23Tupyng-a äni ce angxynlyng tea “Khimi lawngtä lä kai leithung hui hethang ngai dylä äma üng kängai sai na khaisö he kae. Äni lä kätü qütä dü hethang awng rüng kha äma üng thinglawng aepö kha kai leithung hui he kae. 24Khimi lawngtä lä äma üng hing saite tea aeqang he ngai dylä honi khimi lä dungtäsa hing te dang haw y lyng. Tungaila kai phüng-a dü hethang awng rüng saite lä dungtäsa hing te dang ai. 25Khimi lawngtä lä älawngpre angxynlyng na tea pyng ea mäteng ma dungtäsa hing te dang y dylä tähang si te kae dy. 26Khimi lawngtä lä kai hai kai üng älo phüng-a aejae dylä Kai, Khimi üng Cäpaw, lä kai ma üng phung-ang hai Üngai üng phung-ang hai Säthaw üng angtawtha käcai na hai ly te kätü-a hini khimi phüng-a aejae vi ai. 27Kai ma nang ce tea tätang khaw thui te lä hini mityng-a awng saite khimi phütä na lä Säthaw üng pre nung y kälang-a lä dü y rawng lyng” näkha näpa.
Isu lä äma üng phung-ang hai aetüng pa
28Hini lo thui pyng te käni täjae rytä kätü-a Isu lä Peterae, Johan hai Jaeko ce bung äma hai mangtä ka kha me anghung haetä-a aetang hethang paw ö dy. 29Isu aetang te thüng-a äni üng mimai lä lang kha kä-o lä kälung ping-a ang pa vi. 30Khimi lawng netä lä qengtäma aetüng pa. Änini lä Mosi hai Elijae vi. 31Änini lä phung-ang hai aetüng ea Isu hai älo aepe hawi dy. Isu dü ai te phüng äni ce lä aethui ö te vi. Isu lä qae y tea ma Jerusalem märü-a dü te hai-a Säthaw aely kängai sai tea cungrü hai vi ai. 32Peterae hai äma üng rawijae na lä i-sämu pa vi. Tungaila äni ce i aelaw te kätü-a Isu üng phung-ang hai, Isu hai mangtä aedaw pa saite khimi lawng netä tea nung ö dy. 33Honi khimi lawng netä Isu teng üngta ly ja te kätü-a lä Peterae ma Isu tea, “Särae ä, Hini mityng-a awng he hawi bärai vi. Areng, nang tähang taipung haetä, Mosi tähang haetä hai Elijae tähang haetä, taipung käthungtä kai ce ma sa pa ai dy” näpa. Peterae lä kähawi-a aedawng y käla thui te vi.
34Äni hikä thui te thüng-a khö angnüng ma äni ce tea khu pa vi. Hokä khu pa ea äni ce lä ri ö phi dy. 35Khö angnüng thung üng ätüng tho pa te lä “Hini lä kai ma re saite Kai üng Cäpaw vi. Äni üng lo tängai ö” näpa.
36Älo tho pyng te kätü-a, Isu lä äma qaitä awng te äni ce lä nung ö. Äkähui lawng thungtä na lä honi kätü-a äma ce nung saite phüng ämi tea la thui pa ö y.
Isu ma angra kung saite nade lawngtä tea hawi sa pa
37Känitä pyng-a Isu hai äkähui na lä me anghung üng haita aerung käthu te kätü-a, khimipui na lä äni tea aeting pa ö. 38Khimipui thung üng khimi lawngtä ma Isu tea “Särae ä, kai üng cäpaw lawngtä xyng tea hawi sa pa hethang kai lä mäkai te vi. 39Äni tea angra ma süng kha hang hai praw jawjaw te vi. Angra lä äni tea aesö hai kha äni üng täbawng mang mäcepolo na tho hai pa vi. Angra lä äni tea naw mätangca-a sakälö khü kha äni tea täphra pa vi ai dy. 40Kai lä nang üng äkähui na tea angra bung mätho hethang mäkai by. Tungaila äni ce lä angra bung mätho haw ö y vi” näpa.
41Isu ma äni ce tea “Vaidung üng khimi ce ä, nang ce lä Säthaw tea yng ö y kha sa tämang saite khimi na kae vi. Kai lä nang ce hai mangtä käni majetä awng ai rawng mei. Nang cäpaw bung hi-a nähai lawi” näpa.
42Nade lä ly te thüng-a angra ma äni bung älawng-a aetüng hai dung kha aesö hai pa te vi. Tungaila Isu ma lä angra bung mätho hethang thui kha nade tea hawi sa haile ea äpä-ai tea a pa tyng vi dy. 43Tukha khimi angxynlyng na Säthaw üng haidae nung te phüng-a cangxei ö vi dy.
Isu lä äma dü ai näte phüng thui haile pa
Khimi qütä na lä Isu sa saite na tea cangxei ea Isu ma äkähui na tea 44“Kähawi-a tängai ö. Lawng lawngtä ma Kai, Khimi üng Cäpaw, bung täre na tea a aetawng dy” näpa. 45Tungaila hikä thui saite äni ce lä bälungva ö y vi. Honi ho saite älo phüng lä thaikaw ö y vi. Äni ce lä Isu tea älo düng vawng ö y vi.
Ämi mei kälengky
46Äkähui na lä äma ce thung-a ämi ta lengky mei näkha lawngtä tea lawngtä ae-e ö dy. 47Isu lä äni ce ae-e te phüng mäny kha nade cäpi lawngtä bung ka ea äteng-a aedaw hai pa. 48Tupyng-a Isu ma äkähui na tea “Kai üng ämüng hai-a hini nade bung lady saite khimi lä kai bung lady te kae dy. Kai tea lady saite khimi lä kai bung mätaw saite Säthaw tea lady te by dy. Nang ce thung-a kaenengky saite na lä Säthaw ma kaesangky-a aedawng hai vi ai” näkha näpa.
Isu üng äkähui na tea e y saite na lä äni ce mang üng khimi ce kae
49Johan ma Isu tea “Särae ä, nang üng ämüng hai angra na tea mätho saite khimi lawngtä bung kai ce lä nung vi. Äni lä mä-ai äpy y te phüng-a äni tea kai ce lä mäkhang pa te vi” näpa.
50Isu ma “Äni tea mäkhang ö hang. Nang ce tea engleng sa y saite khimi lä nang ma ce te mang üng kae dy” näkha thui pa.
Samari vang üng khimi ce ma Isu bung mäkung he ngai pa y
51Känipre-a paw hethang kätü aenai ea Isu lä Jerusalem märü-a ly ngece hethang sa pa. 52Tukha angtawtha phütä na bung mätaw mang pa vi. Äni ce lä Samari vang haetä-a kung kha Isu aehae hethang na sa rüng pa dy. 53Tungaila honi vang üng khimi ce ma lä äni tea mäkung pa y. Ätephüng-a mei nädylä Isu lä Jerusalem märü mang-a ly hethang kae pa te phüng-a vi. 54Äma üng äkähui Johan hai Jaeko ni ma hikä nung te kätü-a lä Isu tea “Areng, kai ce lä Säthaw tea käni mang üng mai aeqa kha äni ce tea kang hethang mäkai he ngai hai te vi nang mei” näkha düng pa.
55Tukha Isu lä aehawi kha äni ce tea pring pa. 56Tupyng-a Isu hai äma üng äkähui na lä kälang vang haetä mang-a ly ö dy.
Isu üng äkähui aelawng he ngai saite na
57Äni ce khölawng ly te kätü-a, khimi lawngtä ma Isu tea “Nang ly saite qütä-a kai lä hui ai” näkha näpa.
58Isu ma “Kivae na lä äkhaw awng. Tävaw na lä täbö awng. Tungaila Kai, Khimi üng Cäpaw, lä älö qu nae mäteng awng te y vi” näkha näpa.
59Tupyng-a Isu ma khimi kälang lawngtä tea “Kai leithung hui” näpa.
Tungaila äni ma “Areng ä, kai pä-ai üng äro bärung he sa mang re si” näpa.
60Isu ma “Kädü na lä äma ce üng äro tea bärung ö raw kae sy. Tungaila nang ce lä ly kha Säthaw üng pre phüng phai thui ö” näpa.
61Kälang lawngtä ma “Areng ä, kai lä nang leithung hui ai mang. Tungaila kai üng engthung na tea vawi kha aeprei te pawi sa mang re si ba” näpa.
62Isu ma “Ämi la laithawng nae-a süng kha leithung mang-a aehawi saite khimi lä Säthaw üng pre-a kälu sa hethang aeteng y lyng” näpa.
10Isu ma khimi lawng rui säri netä na bung mätaw
1Hini pyng-a Areng ma äkähui kälang lawng rui säri netä na bung re kha lawng ne lawng netä täbawi ea äma ly hethang vang, märü na mang-a mätaw rüng pa. 2Isu ma äni ce tea “Ae he caw kangmüng lä awng mang vi. Tungaila caw ae te khimi ce lä di vi. Tukätephüng-a caw ae saite na bung mätaw mang hethang lai kung tea mäkai ö. 3Ly ö. Kai ma nang ce bung käsui säla-a beram caw na tea bälawi te kätyng mätaw te vi. 4Nang ce üng phawisae-i, cawngkö kho painai kanglai na nähai ö y ma. Lolang-a aedaw kha ämi tea la älo awng mang-a aepe ö hang. 5Nang ce ma khimi lawng lawngtä ing-a paw te kätü-a ‘Säthaw ma hini ing tea awngneng saite py sy’ näkha thui ö mang ba. 6Awngneng te ingkung ma nang ce bung lady dylä, Säthaw ma äni üng engthung tea awngneng saite py ai mang. Tungaila äni ce ma nang ce tea lady y dylä Säthaw üng awngneng saite lä nang ce tea tyng lae vi ai mang. 7Nang ce lä honi ing-a awng kha ingkung ma mäcaw mänei saite na ca ö. Ätephüng-a mei nädylä kälu sa te khimi lä äma üng sa saite vang dang hethang aeteng te phüng-a vi. Ing haetä pyng-a haetä aepüng ö hang. 8Nang ce lä märü haetä-a kung ea khimi ce ma lady kha mäcaw saite käca känei lä ca ö. 9Ho-a awng saite khimi känaw käsaw na tea hawi sa pa ö. Tukha khimi ce tea ‘Säthaw üng pre lä nang ce tähang vi’ näkha thui pa ö. 10Tungaila nang ce tea märü phütä üng khimi ce lä lady y vi ai. Tukä ea nang ce lä lolang qawng mang tho kha hikä thui pa. 11‘Kai ce lä nang ce märü üng kai ce kho-a aebi saite khodi tea mäteng täkhy dy. Ätephüng-a mei nädylä Säthaw ma nang ce tea kädawtho te vi. Nang ce tea mäny hai he ngai te lä Säthaw üng pre nang ce tähang vi. Tungaila nang ce lä ngai ö y’ näpa. 12Kai lo tängai ö. Säthaw lä khimi ce tea tärae cei saite käni-a honi märü lä Sodom märü qawng-a cang y dengpy vi ai rawng” näpa.
Yng y saite märü na
13Isu ma lä “Korazin märü üng khimi ce ä, nang ce lä tähang si. Besaida märü üng khimi ce ä, nang ce la tähang si vi. Nang ce märü-a sa te cangxei saite na Taira hai Sidon märü-a lä sa te y vi. Honi märü na üng khimi ce lä vaicaw üng hai ma hunghö ae-ui ö te vi. Äni ce lä kä-o kämawng na aelawng ea baiphö thung-a aety kha ae-ui te mätü ö pyng te vi dy. 14Säthaw ma khimi ce tea tärae cei te kätü-a lä Taira hai Sidon märü qawng-a cang y nang ce tea lä dengpy vi ai rawng. 15Kapernawm märü üng khimi ce ä, nang ce tea Säthaw ma tengxyng y mäsang te käthi mei. Tukä sa y lyng. Nang ce bung ngärei thung-a käde vi ai” näpa.
16Isu ma äkähui na tea “Nang ce üng lo tängai saite khimi lä kai lo tängai te dy. Nang ce tea lady y saite khimi lä kai tea lady y te vi. Kai tea lady y dylä, kai bung mätaw saite Säthaw tea lady y te by kae dy” näpa.
Äma üng äkähui lawng rui säri netä na tyng haile pa
17Äkähui rui säri netä saite na lä vawi haile kha tengxyng y kawng ö dy. Äni ce lä “Areng ä, kai ce lä nang üng ämüng hai-a angra na tea mäteng mätho te vi” näkha näpa.
18Isu ma äni ce tea “Kai lä Setan angra bung käni üng anglaw säde te kätyng aeqa te nung vi. 19Tängai ö, kai ma nang ce tea py saite aenae phüng-a nang ce lä bärui na, känitä-ai na qawng-a thaw ea la naw ö y lyng. Setan angra üng haidae angxynlyng na bäja hethang nang ce tea haidae py pyng te vi dy. Nang ce tea äte naw saite tyng hai y ai mang. 20Tungaila nang ce lä angra na bung bäja te phüng-a kawng ö hang. Säthaw lä nang ce üng ämüng na Känipre-a awng saite cae-u thung-a tärü te phüng phai kawng ö” näpa.
Isu anghawtho pa
21Honi kätü-a Isu lä Muilaw Käcai phüng-a kawng kha “Üngai ä, käni hai älawng üng Areng, nang tea bälaw mang. Ätephüng-a mei nädylä nang lä bälungkähae na tähang ho saite phüng na tea nade kätyng awng saite khimi na tea täphawng pa te phüng-a vi. Üngai ä, hini lä nang aely ngai saite vi.
22“Kai Pä-ai ma kai tea haidae hai bälungkähae py king vi dy. Säthaw üng Cäpaw näte ämi la mäny y. Pä-ai lawngtä xyng ni mäny te kae vi. Kai üng Pä-ai tea ämi la mäny y. Kai, äni üng Cäpaw ma qaitä mäny te kae. Kai, äni üng Cäpaw, ma mäny hai he ngai saite khimi phütä na lä Üngai tea mäny ö dy” näpa.
23Tupyng-a Isu lä äkähui na te mang-a aehawi kha “Vaihi nang ce kätyng nung saite khimi na tea Säthaw ma tähang kähawi py vi. 24Tängai ö. Nang ce nung saite na tea awng mang te buisaw na hai awng mang te sanphrang na lä nung hethang ngai ea la nung he dang ö y. Nang ce thai saite na tea thai he ngai ea la thai he dang ö y” näpa.
Samari khimi kähawi phüng cäkae
25Ubädi särae lawngtä lä Isu tea ly kha “Särae ä, dungtäsa hing te dang hethang kai lä makä sa he kae mei” näkha käny te hai düng pa.
26Isu ma äni tea “Hini phüng Caekäcai thung-a makä tärü mei. Nang lä makä mäny mei” näkha düng pa.
27Äni ma Isu tea “Caekäcai thung-a ‘Nang üng Areng Säthaw tea nang üng bälung mäke hai, aethaw awng saite hai, bälunghaesy te hai bälung aevaw he kae.’ Tukha ‘Nang ma tea nang ma bälung aevaw te kätyng nang üng äpy äjae tea bälung aevaw hethang kae’ näkha awng vi” näpa.
28Isu ma äni tea “Nang lä älang kätüng-a mäthang khaw te vi. Hini kätyng sa dylä, nang lä dungtäsa hing ai mang” näpa.
29Honi Ubädi käkaw lä äma tea khimi käcüng näte mäny hethang kängai-a Isu tea “Tudylä kai üng äpy äjae lä ämi mei” näkha düng pa be dy.
30Tukha Isu ma äni tea “Khimi lawngtä lä Jerusalem märü üng haita Jerikhaw märü mang-a ly käthu vi. Äni ly te thüng-a damarae na hai aeting kha äni üng kä-o na bäling ea dü aenai-a bo kha äni bung khaisö pa. Äni ce lä äni üng vyng na la king kha ly ö ja pa vi dy. 31Mäthykung lawngtä lä honi lolang mang ly. Äni ma honi khimi bung nung te kätü-a lä lolang teng mang eng kha ly ja pa vi. 32Honi kätyng Levi lawngtä lä hani lolang mang ly by. Äni la honi khimi bung nung by dy. Äni lä lolang teng mang eng kha ly ja pa be by vi. 33Tupyng-a Samari khimi lawngtä lä äma üng khölawng ly tea honi khimi awng saite-a tyng by te vi. Tukha Samari khimi lä honi khimi känaw bung nung te kätü-a äni tea bäheng phi pa dy. 34Tukätephüng-a äni teng-a ly kha äni üng tämaw na situi, Cäpje tui na hai mäse pa. Tukha tämaw na tea libyng sä-ei kha bang pa dy. Tupyng-a äni lä khimi känaw bung äma üng cäphö känawkhing käsa qawng-a dang kha aehae nae haetä-a nähai ea säbawng pa vi. 35Kädang mang-a lä Samari khimi lä aehae nae ingkung tea tangkae bungtä py pa. Tukha äni ma ingkung tea ‘Hini khimi bung kähawi-a rui pa jo ba. Kai vawi haile te kätü-a hini qawng-a khü saite angxynlyng na lä kai ma hung haile tyng ai mang’ näpa.”
36Isu ma “Hini khimi lawng thungtä thung-a damarae na ma bo kha naw saite khimi üng äpy äjae lä ämi mei” näpa.
37Ubädi särae ma lä “Äni tea bäheng saite khimi lawngtä ta vi” näkha mäthang pa.
Tupyng-a Isu ma äni tea “Nang lä ly kha äni kätyng sa jo ba” näpa.
Matha hai Maeri
38Isu hai äkähui na lä äma ce üng khölawng ly jawjaw kha vang haetä-a tyng ö dy. Ho-a lä Matha näsaite nawngmädi lawngtä ma Isu bung äma ce üng ing-a aehae hai pa. 39Matha tea lä Maeri näsaite kangby lawngtä awng vi. Maeri lä Isu teng-a aety kha äni üng älo thui saite na tängai pa. 40Tungaila Matha lä käca känei aerü hethang kälu nyng te phüng-a bälungbi phi pa dy. Tukha Matha lä Isu teng-a ly ea “Areng ä, kai kangby ma kai ma qaitä tea khimi angxynlyng na ca hethang aerü hai te vi. Kai tea säbawng hethang äni tea thui pa jo e” näkha näpa.
41Tukha Isu ma äni tea “Matha ä, nang lä äte awng mang-a bälungbi phi saite khimi vi. 42Tungaila aely leng saite lä haetä xyng awng kae. Maeri lä hini aely leng saite re pyng te vi dy. Tukätephüng-a kai lä äni te üng hini lä laja haw y lyng” näpa.
11Säthaw tea aetang te phüng Isu ma mätu pa
1Känitä-a Isu lä aetang kha awng. Äni aetang khüng te kätü-a lä äma üng äkähui lawngtä ma äni tea “Areng ä, Baptismae Johan ma äma üng äkähui na tea aetang te mätu te kätyng kai ce tea la mätu jo” näkha näpa.
2Isu ma äni ce tea “Nang ce aetang te kätü-a hikä thui ö.
Pä-ai, nang üng ämüng käcai tea khimi ce ma tämö khai sy.
Nang ma Sanphrang kätyng pyng sy.
3Kai ce üng käni qütä ca hethang py kü ba.
4Kai ce tea tämang saite khimi na üng hunghö na kai ce bälawi te kätyng,
kai ce üng hunghö bälawi kü ba.
Kai ce hunghö sa te khytä bärawi bäleng saite aeting hai jo hang ba” näpa.
5Tupyng-a Isu lä äma üng äkähui na tea “Nang ce thung üng lawng lawngtä ma angnihü-a rawijae lawngtä ing-a ly kha ‘Änang ä, täkaw angpa thungtä kai tea canglai jo re e. 6Ätephüng-a mei nädylä kai üng ing-a rawijae angvüng lawngtä tyng te phüng-a vi. Kai lä äni tea mäcaw nae äte haetä la awng y’ näkha näpa. 7Äni üng rawijae ma ‘Kai tea xhu hang. Ing kätho la aekhae pyng te vi dy. Kai üng caw na la i pang ö vi dy. Tukätephüng-a kai lä aetha kha nang tähang äte raca la py haw y dy’ näkha thui vi ai. 8Tängai ö. Äni lä aetha kha nang tea ca nae py ai. Tungaila nang lä äni üng rawijae te phüng-a nang tea ca nae py ngang y. Nang lä aehae y käla mäkai vawng te phüng-a nang ngai saite angxynlyng na py ai.
9“Tukätephüng-a tängai ö. Mäkai ö. Tudylä Säthaw ma nang ce tea py ai mang. Ha ö jawjaw. Tudylä Säthaw ma nang ce tea nung hai ai mang. Kätho tea täkhü ö jawjaw. Tudylä Säthaw ma nang ce tea kätho pä-awng pa ai mang. 10Säthaw lä mäkai saite khimi angxynlyng na tea py ai. Ha jawjaw saite khimi angxynlyng na lä nung ai. Kätho täkhü saite khimi angxynlyng na tea lä Säthaw ma kätho pä-awng pa ai. 11Nang ce thung-a pä-ai na lä äcäpaw ma mawi mäkai ea bärui py dang ai mei. 12Aedui mäkai dylä käni tä-ai py dang ai mei. 13Nang ce hunghö awng mang saite khimi mäteng ma caw nade na tea kähawi sai na py vävawi te vi. Tukätephüng-a Känipre-a awng saite nang ce üng Pä-ai lä mäkai saite khimi na tea Muilaw Käcai py khaw vi ai” näpa.
Isu hai Bezebul angra
14Isu lä khimi tea älo aepe haw y-a sa pa saite angra bung mätho pa. Angra tho pyng te kätü-a honi khimi lä älo aepe haw pa dy. Tukha khimipui na lä cangxei ö dy. 15Tungaila khimi phütä na ma lä “Äni lä Belzebul näsaite angra mangkhawng üng haidae hai-a angra na bung mätho te vi” näpa.
16Tukha khimi kälang phütä na ma lä äni tea käny hethang Känipre mang üng kamarae hai aenae na mäkai pa. 17Isu lä äni ce kaedawng saite mäny praw kha äni ce tea “Pre haetä-a khimi ce lä aetäphü kha täre aety raw dylä honi pre lä pra hethang awng kae dy. Engthung haetä-a la äma ce tingtawi aetäphü ö dylä pra hethang awng kae dy. 18Setan angra na lä äma ce tea äma ce aety raw dylä äni ce üng pre lä makä sa kha aedaw haw ai mei. Kai ma hikä thui te lä, kai lä Belzebul angra mangkhawng üng haidae hai angra na bung mätho te näkha nang ce ma kai tea thui ö te phüng-a vi. 19Tudylä kai lä Belzebul angra mangkhawng üng haidae hai angra na mätho te kae dylä, nang ce üng äkähui na lä ämi üng haidae hai-a angra bung mätho ö te mei. Tudylä nang ce tämang te phüng äkähui na ma mätü ai. 20Tungaila kai lä Säthaw üng haidae hai-a angra na bung mätho te dylä Säthaw lä äma üng pre tea vaihi ma pyng rüng te mätü te vi dy.
21“Aethaw awng saite khimi lä aetu aekei na hai äma ing tea kähawi-a rui te kätü-a lä äni üng ingthawng na tea ämi la bäru haw y lyng. 22Tungaila äma qawng-a aethaw awngky te khimi lawng lawngtä ma äni tea aety kha bäja pa te kätü-a lä äma üng ae-y nae aetu aekei na laja kha hani khimi üng ingthawng na tea aeri pro pa ö vi ai.
23“Kai te mang-a awng y saite khimi lä kai üng täre kae vi. Khimi lawngtä lä kai hai mangtä Säthaw üng pre tähang khimi cüng saite y dylä täprei saite kae vi.
Angra vawi haile te
24“Angra lä khimi thung üngta tho ea daithung kärang mang-a aevi kha awng nae ha räreng vi. Dang pa y ea lä ‘Kai ma üng mityng kangrüng-a kung haile khyry ai’ nä vi. 25Tukha angra lä vawi haile te kätü-a äma kung saite khimi lä mäcai ping kha cülä-ü saite ing hai aetawng te nung pa vi dy. 26Tukha äni lä äma qawng-a siky saite kälang angra me säritä na tea ka dy. Tukha äni ce angxynlyng na lä honi khimi tea kung kha awng pa vi. Tukätephüng-a honi angra kung saite khimi üng kangkhüng-a awng saite lä angcü üng qawng-a siky dy” näpa.
Tätang tähang kähawi dang saite na
27Isu älo thui te thüng-a, khimipui thung üng nawngmädi lawngtä ma “Nang bung aepeng kha känö tui nei hai saite änä-awi lä tähang hawi” näkha thui pa.
28Tukha Isu ma “Säthaw üng lo thai kha tängai saite khimi lä tähang hawiky” näkha thui haile pa.
Kamarae mäkai pa
29Khimipui na lä Isu teng-a aekäcö rae ea Isu ma “Vaidung üng khimi kaetha na lä si ö vi. Äni ce lä kamarae ha ö. Tungaila Säthaw ma Jonae tähang sa pa saite kamarae haetä xyng kätyng kai ma khimi ce tea mätü ai. 30Jonae lä Ninevi märü-a khimi ce tähang kamarae-a aelawng te kätyng lä Kai, Khimi üng Cäpaw, lä vaidung üng khimi ce tähang kamarae-a aelawng vi ai. 31Säthaw ma khimi ce tea tärae cei te kätü-a lä Seba pre üng sanphrang nä-awi lä aedaw kha vaidung üng khimi ce tea dengpy he aeteng näkha thui vi ai. Ätephüng-a mei nädylä, äni lä Solomon sanphrang üng bälunghae te lo tängai hethang ngai kha khöteng täki mang üng hai ly pa vi. Vaihi kätü-a lä Solomon qawng-a kälengky lawngtä lä hi-a awng dy. 32Säthaw ma khimi ce tea tärae cei te kätü-a lä Ninevi märü üng khimi ce lä aedaw kha vaidung üng khimi ce tea dengpy he aeteng näkha thui vi ai. Ätephüng-a mei nädylä Jonae ma thui te lo phüng-a äni ce lä hunghö üng ae-ui ö te vi. Tukha vaihi Jonae qawng-a lengky saite lawngtä lä hi-a awng vi dy.
Ätabung üng kaevang
33“Ämi la maibung thawng kha tawng täkui-a khai vai y. Maibung thawng kha la ho vai y. Engthung-a kung saite khimi na kaevang nung hethang maibung khai nae qawng-a ni khai saite kae vi. 34Nang üng ämi lä ätabung kaevang vi. Nang üng ämi na hawi dylä, ätabung angxynlyng na lä aevang bawi vi ai. Tungaila nang ämi hawi y dylä, nang lä kähawi-a nung haw y kha käving thung-a awng te kae dy. 35Tukätephüng-a nang ce tea awng saite kaevang lä käving-a aelawng y hethang sädi khai ö. 36Nang lä kaevang kawi kha ving te mityng-a awng y dylä nang üng hing saite angxynlyng na tea aevang bawi vi ai. Nang tea aevang bärai saite maibung kätyng aevang vi ai” näpa.
Pharisai hai Ubädi särae na tea pring pa
37Isu ma älo thui pyng te kätü-a lä Pharisai lawngtä ma äni tea kädüngbö ca he ka pa. Tukätephüng-a äni la bö loka-a aw pa dy. 38Isu lä Judae reitae kätyng äkö aese y käla bö aw te Pharisai ma nung ea lä cangxei pa dy. 39Tukha Isu ma äni tea “Pharisai, nang ce lä pangkae hai kaephi üng ärang mang mäse ö te kae vi. Tungaila nang ce üng bälung-a lä kanglai hai käsi kawi te vi. 40Khimi kaerö na ä, khimi üng ätabung tea sa saite Säthaw lä khimi üng bälung tea la sa te vi. 41Tungaila khimi kangtang na tea bäheng kha nang ce üng kaephi hai pangkae-a awng saite raca na py pa. Tudylä nang ce lä Säthaw maw-a cai ai mang.
42“Pharisai na ä, nang ce lä tähang si. Ätephüng-a mei nädylä nang ce lä sawngprang sawngkeng hai angti angjang na hawtä haetä py ngaila khimi ce tea kätüng-a sa y. Säthaw tea la bälung aevaw ö y. Nang ce lä hawtä-a haetä py hethang kae vi. Tungaila hini qawng-a aely käleng mätu saite na la bäjui hethang kae.
43“Pharisai, nang ce lä tähang si. Nang ce lä Judae na üng ingkäcai thung-a aety nae kaesangky mang awng he ngai ö te vi. Vyngjaw saite mityng-a khimi ce ma tämö khai te na ngai ö ky te phüng-a vi. 44Pharisai nang ce lä tähang si. Ätephüng-a mei nädylä nang ce lä aeny y saite täprawng kätyng kae. Khimi ce lä honi täprawng qawng mang ly ea äthung-a lä äro awng te mäny ö y vi” näpa.
45Judae Ubädi särae lawngtä ma Isu tea “Särae ä, nang ma hini thui saite na lä kai ce tea la jaw te kätyng by vi” näpa.
46Isu ma äni ce tea “Ubädi särae na ä, nang ce lä tähang si. Nang ce lä khimi ce tea sa hethang bäja y saite kälu sa hai ö te vi. Tungaila nang ma ce ma lä khimi ce tea säbawng hethang haetä la sa te y. 47Nang ce lä tähang si. Nang ce lä buisaw na tähang äcae hawi saite täprawng sa ö dy. Nang ce üng kangsi na ma honi buisaw na bung bädü ö khe te vi. 48Nang ce üng kangsi na sa te hawi näte aedawng te mätü ö dy. Äni ce ma buisaw na bung bädü kha nang ce ma buisaw na tähang äcae hawi saite täprawng na sa ö dy. 49Hini phüng-a Säthaw lä äma üng bälungkähae hai-a ‘Kai ma Isrelae khimi na tea buisaw na hai angtawtha na bung mätaw vi ai. Isrelae khimi na ma buisaw phütä na tea, mätangca-a sa pa. Buisaw kälang na tea la bädü pa vi ai’ näpa. 50Tukätephüng-a vaidung üng khimi ce tea Säthaw ma äma üng buisaw angxynlyng na tea bädü pa te phüng-a dengpy vi ai. 51Älawng aetawng angcü üng Abela äthi üng hai buisaw Zakhari üng äthi khytä buisaw na bung bädü te vi. Tukätephüng-a vaidung üng khimi ce tea Säthaw ma tärae cei vi ai. Kangkhüng-a bädü saite buisaw Zakhari bung lä äni ce ma maicang hai Ingkäcai säla-a bädü pa ö dy.
52“Ubädi särae na ä, nang ce lä tähang si vi. Khimi ce ma Säthaw tea mäny hethang lolang nang ce lä pä-üng ö pa te vi. Nang ma ce lä Säthaw tea mäny he ngai ö y. Tukha Säthaw tea mäny he ngai saite khimi na tea la mäkhang pa ö te vi” näpa.
53-54Tupyng-a Isu lä honi mityng üng tho te kätü-a, Pharisai na hai Ubädi särae na ma lä Isu tea älo e te aetawng ö dy. Älo tämang saite dang hethang äni ce lä Isu tea tengxyng y älo düng mang pa ö dy.
12Pharisai na kätyng awng ö hang
1Khimipui sangrui-a märaw y na lä aekäcö te kätü-a äni ce lä lawng lawngtä tea äma ce üng äkho na hai aethaw mimawng ö dy. Isu lä äkähui na tea thui mang te lo lä “Nang ce lä Pharisai na üng täkaw aepae saite aesi tea kähawi-a sädi khai ö. Äni ce lä käjüng aesa vävawi te vi. 2Khimi ce ma täphung saite na tea Säthaw ma lä täphawng vi ai. Äni ce ma ho saite na tea Säthaw ma nung hai bawi vi ai. 3Käving thung-a nang ce üng aethui saite na lä khimi ce ma lä kaevang-a thai ö vi ai. Engthung khaw-a nang ma ce tingtawi aemäcü saite lo lä khimi ce ma engphö qawng mang a hai ö vi ai” näpa.
Säthaw tea ma qaitä ri ö
4“Tängai ö. Rawijae na ä, ätabung tea bädü haw saite khimi na tea lä ri ö hang. Äni ce lä hani qawng-a käsiky sa haw y dy. 5Tungaila nang ce ri hethang aeteng saite lawngtä phüng kai thui ai. Ätabung bädü pyng ea nang ce bung ngärei-a käde haw saite Säthaw tea ri ö. Kai thui be thele ai. Äni tea ni ri hethang aeteng khaw te vi.
6“Khimi ce lä mawri tävaw cäpi me bangawtä tea phawisae pjae netä hai jaw ö te vi. Tungaila Säthaw lä mawri metä tea la tämang sö te y. 7Tätang, nang ce älö üng äsang na tea mäteng Säthaw lä to bawi haw te vi. Tukätephüng-a ri ö hang. Nang ce lä mawri na qawng-a ävang tingky.
Isu tea aephae te phüng
8“Tängai ö. Kai bung khimi ce maw-a aephae y saite ämi tea la, Säthaw üng angtawtha na maw-a Kai, Khimi üng Cäpaw, ma äni bung aephae y by ai. 9Tungaila kai bung khimi ce maw-a aephae saite khimi tea lä Säthaw üng angtawtha na maw-a Kai, Khimi üng Cäpaw, ma aephae haile tyng by ai.
10“Tukha Kai, Khimi üng Cäpaw, tea käsi prawng saite khimi bung lä Säthaw ma hunghö bälawi haw ngaila Muilaw Käcai tea käsi prawng saite khimi bung lä Säthaw ma bälawi haw y lyng.
11“Nang ce tea khimi ce ma Judae na üng ingkäcai-a, mätawngky na hai aenae awng saite khimi na maw-a nähai te kätü-a nang ce lä makä thui ai mei. Sa tämang y te phüng makä mätü ai mei näte phüng bälung mawng ö hang. 12Honi kätü-a nang ce üng thui hethang aeteng saite lo na lä Muilaw Käcai ma mätu ai mang” näpa.
Tawngnang saite khimi kaerö cäkae
13Khimipui thung üng khimi lawngtä ma Isu tea “Särae ä, kai üng kangby tea kai hai ingthawng aeri hethang thui päjo e” näpa.
14Isu ma “Nang ni tea tärae cei te hai ingthawng mäkhawi hethang lä kai üng kälu y” näpa. 15Tupyng-a Isu ma äni ce tea “Sädi khai ö. Ingthawng na tea bädö ö hang. Khimi lawng lawngtä lä ingthawng awng mang te phüng-a kawng anghawtho te hai hing sa y lyng” näpa.
16Tudylä Isu ma äni ce tea mätae te lo thui pa. “Tawngnang te Khimi lawngtä lä la paetu hawi kha tengxyng y caw awng mang-a dang pa dy. 17Äma lä makä sa ai mei hi ly. Kai lä kai ma üng caw khai nae awng y rawng be hi nä ea aedawng kha nä dy. 18Tukha äma ma tea ‘Kai lä hikä sa ai. Kai üng cawtai na aephei kha hini qawng-a kälengky-a sa ea caw hai pyng saite angxynlyng na mätung kha khai ai. 19Tukha kai ma tea kai ma “Nang lä khösäning awng mang-a tawng hethang tähang nang ma üng pyng saite na mäkhüng cu pyng dy. Aehae kha nei ca anghawtho te hai ma awng ba” näkha nä ai’ näpa. 20Tungaila Säthaw ma äni tea ‘Khimi kaerö ä, vaidüng lä nang dü ai dy. Tudylä nang üng mätung saite na lä ämi dang ai mei’ näpa.
21“Mä-ai ma tähang ingthawng mätung kha Säthaw maw-a aely leng saite na sa y dylä honi tawngnang te khimi kätyng awng vi ai” näpa.
Säthaw tea ae-y ö
22Tupyng-a Isu ma äkähui na tea “Tängai ö. Tukätephüng-a nang ce lä älawng qawng-a hing hethang bälungbi ö hang. Ätemakä ca ai mei, ätemakä aekhu aena ai mei näkha ätabung tähang bälungbi ö hang. 23Nang ce üng hing saite tähang lä käca känei ätabung hai aekhu aena nae qawng-a aely lengky saite awng vi rawng. 24Pä-a na phüng dawng mäsüng ö e. Äni ce lä caw la e y. Caw la ae y. Cawpai la awng y. Tungaila Säthaw ma äni ce tea mäcaw pa vi. Nang ce lä tävaw na qawng-a ävang tingky te y vi mei. 25Nang ce lä bälungbi te hai-a mä-ai ma üng hing saite säning tea äje cäcaw ryng hai sei haw mei. 26Bälungbi te hai-a hini cäcaw mäteng sa haw y dylä ätephüng-a kälang na phüng-a bälungbi ö te vi mei. 27Tängai ö. Daithung üng äcae hawi saite äpa na phüng aedawng ö kae-e. Äni ce lä ryng kha kälu la sa vai y. Kä-o lä aekhü vai y. Tungaila phung-ang leng saite Solomon sanphrang mäteng ma honi äpa na kätyng äcae hawi saite kä-o na aekhu aena haw y” näpa. 28Nang ce lä Säthaw tea yng te di bärai vi. Säthaw lä daithung üng aeca tea äcae kähawi-a sa te vi. Tudylä hini aeca vaihi hing kha khawngdang lä khimi ce ma mai thung-a käde te vi. Tukätephüng-a Säthaw lä nang ce tea ngai saite kä-o na py ai be.
29“Makä ca ai mei. Makä nei ai mei” näte phüng dawng kha bälungbi ö hang. 30Honi na bung Säthaw bung mäny y saite khimi na ma la dang hethang aethawsa ö by. Honi na nang ce aely ngai te phüng nang ce üng Pä-ai lä mäny te vi. 31Säthaw üng pre hai aesui saite amäjy na phüng angcü-a aedawng ö mang. Tukä dylä honi angxynlyng na äni ma nang ce tea py ai mang.
Känipre-a tawngnang saite
32“Khimi äphü cäpi na ä, ri ö hang. Nang ce üng Pä-ai lä nang ce tea äni ma pyng saite pre-a awng hai hethang ngai te vi. 33Nang ma ce üng pyng saite ingthawng na jaw ea khimi kangtang na tea tangkae py ö. Hini kätyng mö haw y saite phawisae-i na nang ma ce tähang sa ö dy. Theru bäru haw y, dengkeng ma ca haw y kha tenglei y saite ingthawng nang ce tähang Känipre-a awng ai. 34Tudylä nang ce üng kätui awicae awng saite mityng-a nang ce bälung lä awng vi.
Kätüng-a awng saite mawsawng
35“Säthaw üng kälu sa he kärung käni kä-o nitha hai maibung aerü rüng ö jawjaw. 36Aepawng pawi haetä üng vawi saite äni ce üng ingkung tea kätho pä-awng praw he aering rüng saite mawsawng na kätyng awng ö. 37Ingkung tyng haile te kätü-a äni üng mawsawng na lä i y käla aering te ingkung ma nung dylä honi mawsawng na lä tähang hawi ö dy. Tängai ö. Ingkung lä äma üng mawsawng lawngtä tea nitha na mäna hai kha äni üng mawsawng na tea bö aw hai ea bö mäcaw pa vi ai. 38Angni hü-a läsy, kädang thawde-a läsy ingkung vawi te kätü tea aering saite mawsawng na lä tähang hawi. 39Hini tea mäny ö ba. Ingkung lä mata kätü-a, theru ly ai mei näte mäny dylä, äma üng ing tea theru ma täkhüva y hethang aering vi ai. 40Nang ce la aerü ö rüng kha awng hethang kae by. Ätephüng-a mei nädylä Kai, Khimi üng Cäpaw, lä nang ce ma aethang khai y te kätü-a tyng vi ai” näpa.
Mawsawng lawng netä
41Tudylä Peterae ma “Areng ä, hini mätae te lo lä kai ce ma qaitä tea thui te mei. Y käla khimi angxynlyng na tähang-a thui te mei” näkha düng pa.
42Isu ma äni tea “Kätüng-a sa khü te hai bälunghae saite mawsawng kälengky lä ämi mei. Ingkung ma hini mawsawng kälengky tea kälang mawsawng na bung rui hethang hai kätü tyng ea äni ce tea bö ang na py pa hethang aenae py pa dy. 43Ingkung ma vawi haile te kätü-a äni ma thui te kätyng mawsawng kälengky üng sa khü te nung dylä mawsawng kälengky lä tähang hawi. 44Tängai ö. Ingkung lä äma üng pyng saite ingthawng angxynlyng na äni tea rui hai pa vi ai. 45Tungaila honi mawsawng lä ‘Kai üng ingkung vawi hethang qae ai rawng’ näkha äma ma aedawng te hai mawsawng kälang nawngmädi, nawngmäcaw na tea bo te hai ngai te kätyng nei ca kha bärui te hai awng näre maisi. 46Mawsawng kälengky ma aethang khai y te kätü-a ingkung lä vawi haile vi ai. Ingkung vawi haile hethang kätü mawsawng lä mäny y te phüng-a vi. Tukha ingkung lä hini mawsawng kälengky tea tengxyng y dengpy kha Säthaw üng lo yng y saite na hai mangtä khai vi ai.
47“Mawsawng lawngtä lä ingkung kängai mäny ngaila hani kätyng aerü rüng pa y dylä Ingkung ma äni tea tengxyng y dengpy ai. 48Tukä e la mawsawng lawngtä ma äni üng ingkung kängai mäny y kha sa tämang dylä Ingkung lä äni tea äje cäcaw dengpy ai. Säthaw lä khimi lawngtä tea tähang kähawi py mang dylä äni tea aely leng saite kälu sa hethang ngai hai vi ai. Säthaw lä khimi lawngtä tea aenae py mang dylä äni tea khimi kälang na qawng-a kälu kähawi-a sa hethang ngai hai ky vi ai.
Isu üng älo thui te phüng-a khimi ce aetäprei ö
49“Kai lä hi älawng qawng-a maikang hai hethang ly te vi. Kai lä vaihi mäteng maikang te aetawng he ngai te vi dy. 50Tungaila kai lä ri he hawi saite baptismae la ai rawng. Honi khüng te khytä kai lä bälung mätang phi vi dy. 51Hi älawng qawng-a awngneng hethang kai ly te käthi ö mei. Tukä y lyng. Khimi ce bälung aetäprei hai hethang kai ly te kae. 52Vai üng hai kaetawng khimi lawng bangawtä awng saite ingthawng-a äma ce tingtawi älo aebäri ö vi ai. Pheitä mang lawng netä hai pheitä mang lawng thungtä awng kha aetäprei ö vi ai. 53Äpä-ai hai äcäpaw, änä-awi hai äcänung, äkangni hai älingaw äma ce tingtawi älo aebäri ö vi ai” näpa.
Kangkhüng käni tea mäny ö
54Isu ma khimipui na tea “Käni kädüng mang-a khö angnüng tho te nung dylä, khöne ai näkha nang ce thui praw ö dy. Nang ce thui te kätyng awng khaw vi ai. 55Tukha ätüng mang-a aeli tho te kätü-a khöbi ai näkha thui ö. Nang ce thui te kä awng khaw vi ai. 56Khimi käjüng käsa na ä, nang ce lä älawngpre hai käni khösang-a kheng kha makä awng ai mei näte mäny dy. Säthaw tea mäny hethang käjüng sa ö vi. Tungaila vaihi Säthaw makä sa ai mei näte nang ce lä mäny ö y vi.
Täre na hai aebädü ö
57“Säthaw maw-a tüng saite mäny kha nang ce lä kätüng sa hethang kae. 58Nang ma tea tärae ly saite khimi lawngtä awng dylä nang ni lawng netä tärae jung-a tyng y kälang-a aebädü hethang aethaw aesa he kae. Hakä sa y dylä nang üng täre lä nang ce bung tärae cei saite kung maw-a nähai vi ai. Tärae käcei kung ma nang bung reisae tea a kha reisae ma nang bung thawng thung-a bäla vi ai. 59Tängai ö. Deng tangkae py bawi y rytä nang lä thawng thung üng tho he dang y lyng” näpa.
13Hunghö üng ae-ui ö
1Honi kätü-a khimi phütä na lä Isu tea ly kha Rom aecörae Pilata ma Kalile khimi ce bung bädü te phüng thui pa ö dy. Hini Kalile khimi ce lä Säthaw tea löci aebawng te thüng-a Pilata mätawngky üng reisae na ma äni ce bung bädü pa ö te vi. 2Isu ma “Hini Kalile khimi ce bung hini kätyng bädü pa te phüng lä Kalile khimi kälang angxynlyng na qawng-a hunghö saky näkha nang ce lä dawng ö dang te vi mei. 3Tängai ö. Tukä y lyng. Nang ce angxynlyng la hunghö ae-ui y dylä dawngcang y te kätü-a ma dü ö by vi ai. 4Silawm märü üng awng saite dyng nae ing kaesang aene ea khimi lawng hawlai täjae na bung tiphae kha dü saite khimi na lä Jerusalem märü-a awng saite khimi angxynlyng na qawng-a hunghö saky näkha nang ce lä dawng ö dang te vi mei. 5Tängai ö. Tukä y lyng. Nang ce angxynlyng na la hunghö ae-ui y dylä dawngcang y te kätü-a ma dü ö by vi ai” näpa.
Äthai aethai y saite thaidö kung phüng hai mätae pa
6Tupyng-a Isu ma äni ce tea hini mätae te lo kä thui pa. “Khimi lawngtä lä äma üng Cäpje angkhaw-a thaidö kung kungtä awng. Honi khimi lä thaidö kung-a ly kha äthai mäqang ea lä thaitä la nung pa y vi. 7Tukätephüng-a äni lä angkhaw rui saite khimi tea ‘Kai lä hini thaidö kung-a ly kha äthai mäqang te säning thungtä awng vi dy. Tungaila thaitä la nung y vi. Thaidö kung bung bälu khyry la. Angkhaw thung-a tälokhei-a awngky te kae to’ näpa.
8“Angkhaw rui saite kung ma ‘Ingkung ä, vaising säningtä lä awng re mai sy. Kai ma hini kung tea tai aekilü kha si-ei na hai bawng kae-e si. 9Taidy-a lä äthai aethai daila awng ai rawng mang. Aethai y ea ni bälu kae si’ näkha thui haile pa dy” näpa.
Isu ma nawngmädi kaeqa lawngtä bung Aehae saite Käni-a hawi sa pa
10Aehae te Känitä-a Isu lä Judae na üng ingkäcai haetä thung-a khimi ce tea Säthaw lo mätu pa dy. 11Honi mityng-a lä angra ma sa pa te phüng-a nawngmädi kaeqa lawngtä lä säning hawlai täjaetä awng pa te vi dy. Äni üng ängang lä aekhüng kha kätaw-a aedaw haw pa y vi. 12Isu ma äni bung nung dylä, ämaw-a ka kha “Änang ä, nang üng naw saite lä kai ma hawi sa te vi dy” näpa. 13Tupyng-a Isu lä äma üng kö lä nawngmädi tea thyng pa. Nawngmädi lä qengtäma kätaw-a aedaw kha Säthaw tea bälaw praw pa vi dy.
14Isu ma Aehae te Käni-a khimi lawngtä bung hawi sa pa te phüng-a Judae na üng ingkäcai mätawngky lä bälung aengai hai y phi pa vi dy. Tukätephüng-a äni ma khimi ce tea “Kälu sa hethang käni tärutä awng be. Nawsaw hawi sa hethang hini käni na säla-a ly hai ö. Aehae te Käni-a lä hini kätyng sa ö hang” näpa.
15Areng ma äni tea “Nang ce käjüng aesa saite khimi na ä, Aehae te Käni-a, nang ma ce üng raebawi, cäphö känawkhing käsa na bung tui nei hai hethang ärang mang-a mäqaw vai ö y khe mei. 16Abraham üng cänung hini nawngmädi lä säning hawlai täjaetä Setan angra ma mäkhing pa te to. Äni bung Aehae te Käni-a hikä mäqaw pa saite lä, tämang te y lyng” näkha mäthang pa.
17Isu ma hini lo thui te kätü-a, äma tea e saite angxynlyng na lä aejae ö dy. Tungaila khimipui na lä cangxei saite na Isu ma sa pa te phüng-a kawng ö phi vi dy.
Angmawi mö hai mätae pa
18Tupyng-a Isu ma “Säthaw üng pre lä äte hai aetawng mei. Äte hai mätae ai mei. 19Säthaw üng pre lä angmawi mö aepra te hai aetawng vi. Khimi lawngtä lä angmawi mö la kha äma üng angkhaw thung-a tu dy. Honi ämöti lä äkung aepra kha ryng ea khösang üng tävaw na lä cangpre na qawng-a cu kha täbö sa ö dy” näpa.
Täkaw aepae saite aesi hai mätae pa
20Tukha Isu ma “Säthaw üng pre lä äte hai kai mätae ai mei. 21Säthaw üng pre lä täkaw aepae saite aesi hai aetawng vi. Nawngmädi lawngtä lä täkaw aepae saite aesi äje cäcaw la kha kjung täkawdi na hai aeqo kha täkawdi awng mang-a aepae hai bawi te vi” näpa.13:21 Kjung täkawdi näte lä Judae khimi ce tawng saite täkawdi vi. Täkaw aepae saite aesi lä äni ce täkaw sa tea aepae hai pa te käti ta by vi. “Jö” sa tea täkaw aepae saite aesi tawng te kätyng Judae khimi ce üng täkaw na sa tea tawng saite käti ta vi.
Kätho khaw kaecei
22Tupyng-a Isu lä Jerusalem märü-a khölawng tho te thüng-a vang cäpi hai vang käleng na mang-a ly prei kha khimi ce tea Säthaw lo mätu pa.
23Khimi lawngtä ma Isu tea “Areng ä, Säthaw lä khimi äje cäcaw xyng tea aeqang hethang kae mei” näkha düng pa.
24Tukha Isu ma äni ce tea “Kätho kaecei mang kung hethang nang ce lä aethaw aesa ö. Tängai ö. Khimi märaw y na lä kätho kaecei mang hai Säthaw üng pre-a kung hethang aethaw aesa ö vi ai. Tungaila äni ce lä kung haw ö y lyng. 25Ingkung lä aetha kha kätho aekhae te kätü-a nang ce lä ärang mang aedaw ea kätho täkhü kha ‘Särae ä, kai ce tähang kätho pä-awng kü jo e’ näkha aebai ö ai. Tungaila äni ma ‘Nang ce mamang üng ly ö te mei näte kai lä mäny y’ näkha nä vi ai. 26Tukha nang ce ma ‘Kai ce lä nang hai mangtä nei ca saite na kae baw. Kai ce üng märü-a nang lä Säthaw üng älo na mätu te be ä,’ näkha nä ö vi ai. 27Tungaila äni ma lä ‘Nang ce mamang üng ly ö te mei kai lä mäny y. Käsi sa saite nang ce angxynlyng na, kai te üngta ly ö pang la’ näkha mäthang vi ai. 28Säthaw üng pre-a Abraham, Isaika, Jaeko hai buisaw angxynlyng na bung nang ce lä nung ngaila, Säthaw ma nang ce bung honi mityng üng mäthoja ö vi ai. Honi kätü-a nang ce lä rawsö ea aemäkütang kha awng ö vi ai. 29Nidüng, nise, älüng hai ätüng mang üng khimi ce lä ly kha Säthaw pre üng pawi-a mityng la ö vi ai. 30Tängai ö. Angcü-a kälengky saite khimi na lä kangkhüng-a lä cäpiky-a awng ö vi ai. Vaihi cäpiky-a awng saite khimi na lä kangkhüng-a lä kälengky-a awng ö lae vi ai” näpa.
Isu hai Herodae sanphrang
31Honi kätü-a ma Pharisai phütä na lä Isu tea ly ea “Nang lä hini mityng üng tho kha kälang mang-a ly la. Herodae lä nang bung bädü hethang dawng rüng dy to” näpa.
32Isu ma äni ce tea “Honi kivae kätyng bälung aeke saite Herodae tea ly kha thui pa ö. ‘Kai lä vaini hai khawngdang lä khimi ce te üng angra na mätho kha känaw käsaw na bung hawi sa pa vi ai. Ämäthung käni-a lä kai üng kälu khüng ai dy’ näpa. 33Makäte läsy kai lä vaini, khawngdang hai khawngdang ni aetawi-a lä Jerusalem märü mang-a khölawng tho he kae te vi. Ätephüng-a mei nädylä Isrelae khimi na ma Säthaw üng buisaw qütä na bung lä Jerusalem märü-a bädü ö pa te vi.
Isu lä Jerusalem märü tähang bälungsi
34“Jerusalem märü üng khimi ce ä, nang ce lä Säthaw mätaw saite buisaw na bung bädü kha Säthaw mätaw saite angtawtha na bung lä kälung hai käde kha bädü ö te vi. Ae nä-awi ma äma üng mäkhi täkui-a käcüng ea äcaw na bung aw hai te kätyng kai ma nang ce angxynlyng na tea kähawi-a aedung hai leilae hethang kai lä ngai bärai te vi. Tungaila nang ce lä kai tea ngai ö y vi. 35Tängai ö. Nang üng märü hai Säthaw üng Ingkäcai tea Säthaw ma khaisö dy. Kai näte lä ‘Areng üng ämüng hai ly saite lawngtä tea Säthaw ma tähang kähawi py sy’ näkha nang ce thui ö y rytä lä kai bung nung haile tyng y vi ai” näpa.
14Isu ma naw te khimi lawngtä bung hawi sa pa
1Aehae te Känitä-a, Isu lä aely lengky saite Pharisai mätawngky lawngtä üng ing-a kädüngbö ca hethang ly pa. Tukha äni ce lä Isu tea khüsälü-a kheng ö rü pa ö dy. 2Isu üng maw-a lä ängang ba saite khimi lawngtä awng pa vi. 3Isu ma Pharisai na hai Ubädi särae na tea “Aehae te Käni-a känaw käsaw awng saite khimi bung hawi sa pa te lä Mosi üng Ubädi hai aebäla mei, aebäla y mei” näkha düng pa.
4Tungaila äni ce lä äte la mäthang pa ö y. Isu lä khimi känaw tea äkö thyng kha hawi sa pa ea ing-a vawi hai pa vi dy. 5Tupyng-a Isu ma “Nang ce thung üng khimi lawng lawngtä lä äma üng äcäpaw läsy, raebawi läsy Aehae te Käni-a, tuikang thung-a aeqa dylä la praw y käla awng ai mei” näpa.
6Tukha äni ce lä ätemakä la mäthang kaw pa ö y vi dy.
Aemäneng saite khimi na tea Säthaw lä mäsang pa
7Thangka pang saite angvüng na lä äma ce tähang mityng kähawi na aela ö te Isu lä nung dy. Tukätephüng-a Isu ma äni ce tea hini mätae te lo hai thui pa dy. 8“Khimi lawngtä ma nang ce bung aepawng pawi-a thangka la te kätü-a lä, mityng kähawiky-a la ö hang. Hini pawi kung lä nang qawng-a tämö awngky saite khimi kälang bung thangka la daila awng vi ai. 9Hokä dylä, nang tea ka saite pawi üng ingkung ma ly kha ‘Nang üng mityng kähawi lä aehi pa’ nädylä nang lä hawi y saite mityng mang-a aekäsü hethang kae vi ai. Tukha nang lä kaejae dang vi ai. 10Tukätephüng-a nang bung ka dylä mityng kähawi y-a aety mang re. Tudylä ingkung ma nang tea ‘Änang ä, ly kha hi-a hawiky saite mityng-a aety ba’ nä vi ai. Tudylä nang lä thangka pang saite angvüng angxynlyng na maw-a tämö khai te dang vi ai. 11Mä-ai ma tea aemäsang saite khimi tea lä Säthaw ma mäneng pa vi ai. Tukha mä-ai ma tea aemäneng saite khimi tea lä Säthaw ma mäsang pa vi ai” näpa.
12Tupyng-a Isu lä äma bung kädüngbö ka saite ingkung tea “Nang ma khimi ce tea kädang bö läsy, kädüngbö läsy ka te kätü-a nang üng rawijae na, kangby jä-ai na, kaesui kaebeng na hai särawng dawngpa khimi känang na tea ka y hang. Nang ma honi khimi amäjy na bung ka dylä, äni ce lä nang tea ka haile te hai ma hung ö tyng vi ai. 13Nang ma pawi sa te kätü-a lä khimi kangtang na hai, kaeqa na hai, ämi kangjö na bung phai ka kae ba. 14Nang ma tukä sa dylä, Säthaw ma nang tea tähang kähawi py ai. Äni ce ma lä nang tea äte la hung haile haw y lyng. Tungaila khimi cüng saite na kädü thung üngta aetha be te kätü-a lä Säthaw ma nang tea ävang py haile tyng ai mang” näpa.
Pawi käleng hai mätae pa
15Isu hai mangtä nei ca te thung üng khimi lawngtä ma hini lo thai te kätü-a lä, äni ma Isu tea “Säthaw pre üng pawi-a nei ca saite khimi lä tähang hawi” näpa.
16Tukha Isu ma “Khimi lawngtä lä thangka angvüng awng mang-a la kha pawi käleng sa pa vi dy. 17Pawi kätü-a pawi kung lä, äma üng mawsawng bung mätaw kha ka he khimi ce tea ‘Ly ö lawi. Vaihi äte angxynlyng na sa rüng dy’ näkha ka hai pa dy. 18Tungaila äni ce angxynlyng lä aekhe te lo hai thui pa ö vi. Angcü üng khimi ma ‘Kai lä lai haetä rang kha kheng he kae te vi. Pawi-a ly haw y te phüng-a kai tea bäheng kü ba’ näpa. 19Khimi kälang lawngtä ma lä ‘Kai lä laithawng nae raebawi me hawtä rang te phüng-a hani na hawi mei, hawi y mei näte ly kha käny hethang awng vi. Kai tea bäheng kü’ näpa be dy. 20Tukha khimi kälang lawngtä ma ‘Vaihi ma nawngpui la xyng te kae vi rawng. Tukätephüng-a ly haw y lyng’ näkha näpa tynglyng be dy.
21“Tupyng-a mawsawng ma ingkung tea hini angthang na thui pa vi dy. Ingkung lä kädawtho kha äma üng mawsawng tea ‘Tho kha märü üng lolang cäpi käleng na säla mang-a ly ö dawde ea khimi kangtang, kaeqa, kökho kangbai, ämi naw kangjö na bung ka ö cü’ näpa. 22Tukha mawsawng ma ‘Ingkung ä, nang ma thui te kätyng kai lä sa pyng te vi dy. Tungaila mityng lä aekawng mang vi rawng’ näpa. 23Tukätephüng-a ingkung ma mawsawng tea ‘Märü ärang mang üng lolang cäpi, käleng na mang jung ly kha kai üng ing-a kawi hethang-a khimi ce bung ka cü. 24Kai ma ka pyng saite ämi khimi lawngtä la kai üng pawi-a ca ö hang’” näkha näpa.
Äkähui lawngtä aelawng hethang
25Khimipui na lä Isu hai mangtä khölawng-a ly ö dy. Isu lä äni ce te mang-a aehawi kha 26“Khimi lawngtä ma kai üng äkähui-a aelawng hethang ngai dylä änä-awi hai äpä-ai, änawngpui hai äcaw na, kangby jä-ai hai äticaw na qawng-a kai tea bälung aevawky hethang kae. Äni lä äma üng hing saite tea mäteng ma bälung aevaw te qawng-a kai tea bälung aevawky tätang hethang kae te vi. 27Khimi lawngtä ma kai leithung hui hethang ngai dylä äma üng kängai sai khaisö kha thinglawng aepö hethang kae te vi. Äni lä kätü qütä kai leithung hui hethang awng rüng he kae.
28“Nang ce thung üng lawngtä ma dyng nae ing kaesang sa he ngai näre mai. Äni lä kälu aetawng y kälang-a ma tangkae majetä khü ai mei näkha aedawng mang vi ai. Tupyng-a ing cyng hethang tangkae khy ai mei, khy y ai mei näkha to rüng vi ai. 29Äni lä ing aeling täling sö kha ing cyng haw y mäse lae dylä nung saite khimi na ma äni tea mänui hai pa ö ai be. 30Äni ce ma ‘Hini khimi lä ing aeling täling sö kha cyng haw y mäse na ly’ näkha näpa ö vi ai.
31“Sanphrang lawngtä lä kälang sanphrang lawngtä tea täre aety ngai vi näre mai. Äni lä ‘Kai tea sang hawtä xyng reisae na awng te kae vi. Sang kuisytä reisae na hai kai tea ly kha aety he sa saite täre na tea kai lä bäja haw y ai mei’ näkha kähawi-a aedawng mang vi ai. 32Äni bäja haw y ai te mäny dylä, äni üng täre sanphrang tea kähanglaw-a awng te thüng-a ma äni hai aede hethang khimi säla na bung äni lä mätaw vi ai. 33Honi kätyng nang ce thung üng khimi lawngtä ma kai üng äkähui-a aelawng he ngai dylä, äma üng awng saite angxynlyng na khaisö he kae.
Bälawi hai mätae pa
34“Bälawi lä hawi. Tungaila bälawidae dylä, lung haile tyng rung khytä sa haw y dy. 35Lai älawng tähang läsy, äkung hawi hai hethang läsy, hawi y vi dy. Tukätephüng-a honi bälawi lä khimi ce ma kädesö hethang awng te kae vi dy. Känawkhing awng saite khimi na lä thaikaw ö sy” näkha näpa vi.
15La saite beram hai mätae pa
1Qengtä-a lä angko cawng saite na hai hunghö sa saite khimi kälang awng mang te na lä Isu üng lo tängai hethang aekäcüng ö dy. 2Tudylä Pharisai na hai Ubädi särae na ma “Hini khimi lä khimi hunghö na hai aeso kha bö mäteng mangtä ca na ly” näkha jawsi pa ö dy. 3Tupyng-a Isu ma äni ce tea hini mätae te lo hai thui pa dy.
4Tukha äni ma “Nang ce thung-a khimi lawngtä lä beram cungvaitä awng kha honi thung üng metä la näre maisi. Äni lä makä sa ai mei. Äni lä beram rui täkawtä hai täkawtä na bung raca rawng-a khai kha la saite beram tea dang y rytä ha ngece vi ai. 5Honi beram bung nung te kätü-a lä äni lä kawng te hai ma aepö ho kha ing-a vawi haile dy. 6Tupyng-a äni lä äma üng rawijae na hai särawng dawngpa na bung ka kha äni ce tea ‘Kai hai mangtä kawng ö jo. Kai üng beram la saite lä nung haile tyng vi dy’ näpa. 7Tängai ö. Hunghö sa saite khimi lawngtä ae-ui dylä hini kätyng by vi ai. Säthaw hai äma üng angtawtha na lä honi khimi tea tengxyng y kawngphi pa ö vi ai. Ae-ui hethang ngai y saite khimi cüng saite lawng rui täkaw hai täkawtä na qawng-a äni ce lä honi khimi tea kawngky ö vi ai.
La saite phawisae hai mätae pa
8“Nawngmädi lawngtä lä sädokhai tangkae phawisae pjae hawtä awng saite thung üng haetä la näre maisi. Äni lä makä sa ai mei. Maibung thawng kha ing mäse ea nung haile y rytä äma lä kähawi-a ha ngece vi ai. 9Tukha äni lä honi phawisae bung nung haile tyng te kätü-a lä äma üng rawijae na hai särawng dawngpa na bung ka kha ‘Kai hai mangtä kawng ö jo. Kai üng la saite phawisae lä nung haile tyng vi dy’ näpa. 10Tängai ö. Honi kätyng khimi hunghö lawngtä ae-ui dylä Säthaw hai äma üng angtawtha na lä kawng ö phi te vi” näpa.
La saite cäpaw hai mätae pa
11Tupyng-a Isu ma äkälang mätae te lo thui bäsa pa be dy. Äni ma “Khimi lawngtä lä cäpaw lawng netä awng. 12Cäpaw käna ma äpä-ai tea ‘Üngai ä, kai tähang ingthawng bäri lawi’ näpa. Tukätephüng-a äpä-ai lä äma üng ingthawng äcäpaw ni tähang bäri pa vi dy. 13Tudylä qae y te kälang-a ma äcäpaw käna lä äma üng ingthawng angxynlyng na käcüng kha pre kähanglaw mang-a thoja pa vi dy. Ho-a äni tyng te thüng-a lä äma üng tangkae na hai äma ngai ngai nei ca te hai awng kha kähawi y mang-a aetütü-a täpang king vi dy. 14Äma üng tangkae angxynlyng na täpang king pyng-a, honi pre angxynlyng na-a lä täkang tho kha äni lä mätang phi pa vi dy. 15Tukätephüng-a äni lä honi pre üng khimi lawngtä tea mawsawng sa dy. Honi khimi ma äni tea lä o raca mäcaw nae kälu py pa dy. 16Äni lä äjo aelang phi pa kha o raca thung üng sawngrawi äthai na mäteng ma ca hethang bädö pa vi dy. Tungaila ämi ma la äni tea äte haetä la py pa y vi. 17Tukha äni aedawng mäkhüng te kätü-a lä, ‘Üngai tea kälu sa nae angxynlyng na lä bö ca lei y ea, kai lä hi-a böjo aelang te hai ma dü pawpae ai dy be hi ly. 18Kai lä hini mityng khaisö kha ä-ai tea vawi haile ai. Tukha “Üngai ä, kai lä Säthaw hai nang tea sa tämang te vi dy. Nang üng cäpaw näkha mäthi hethang kai lä aeteng y lyng dy. 19Nang üng kälu sa nae khimi lawngtä kä kai bung bälawng jo kae ba” näkha kai nähe kae dy’ näkha aedawng dy. 20Tukätephüng-a äni lä aetha kha äpä-ai tea vawi haile vi dy.
“Tungaila hanglaw mang üng hai ma äpä-ai lä äni bung mae praw kha bäheng te hai aehui ea äcäpaw tea täkawi ceng kha mänang pa vi dy. 21Tukha cäpaw ma lä ‘Üngai ä, kai lä Säthaw hai nang tea sa tämang te vi dy. Nang üng cäpaw mäthi hethang la kai lä aeteng y vi dy’ näpa. 22Tungaila äpä-ai ma lä äma üng mawsawng na tea ‘Kä-o kähawiky vähai dawde kha äni tea bälawng pa. Kösübü haetä la äni üng kö-a mäcö pa. Äni üng kho-a la kho painai mäcö pa. 23Sicaw ärung kähawiky-a mäcaw saite la qy pa. Pawi käleng sa ea kawng te hai mä-ai mangtä bö ca ö si ba. 24Hini kai üng cäpaw lä dü kha hing haile te kätyng vi dy. Äni lä la kha kai hai aeting haile tyng te vi dy hei’ näpa. Tukätephüng-a äni ce lä anghawtho te hai ma pawi sa ö dy.
25“Honi kätü-a cäpaw kälengky lä lai-a awng pa te vi. Äni vawi kha ing teng-a tyng te kätü-a lä aebi, aetawng, qala na hai lang te tüng na thai pa vi dy. 26Tukätephüng-a äni lä mawsawng lawngtä bung ka ea ‘Ing-a lä äte makäte vi nang mei’ näkha düng pa dy. 27Äni ma ‘Nang üng kangby vawi haile tyng dy. Nawsaw kähawi hai-a aeting tyng te phüng-a nang pä-ai ma sicaw ärung kähawiky-a mäcaw saite qy kha kawng te pawi sa te ka ecy’ näpa.
28“Tukha äjä-ai käleng lä kädawtho kha ingthung-a kung hethang ngai pa y vi dy. Tukätephüng-a äpä-ai ma lä tho kha äni tea bäleng pa dy. 29Tungaila äni ma äpä-ai tea ‘Kheng kae-e. Säning hijetä mawsawng kätyng nang üng kälu kai lä sa dy. Nang üng lo la kai lä tängai vävawi te kae. Tungaila kai üng rawijae na hai anghawtho hethang pawi sa he sobei cäcaw mäteng ma nang lä kai tea py vai y be. 30Tungaila hini nang üng cäpaw lä nawngmädi kähawi y na hai nang üng ingthawng aetütü-a täpang king kha vawi haile te kätü-a, äni tähang nang lä sicaw ärung kähawiky qy te vi ly’ näpa. 31Tukha äpä-ai ma ‘Cäpaw ä, nang lä kai hai awng jawjaw te kae be ä. Kai üng awng saite angxynlyng na lä nang üng kae baw. 32Tungaila kai ce lä kawng te hai pawi sa he kae te vi. Ätephüng-a mei nädylä hini nang üng kangby lä dü kha hing haile te kätyng vi dy. Äni lä la kha mä-ai hai aeting haile te phüng-a kawng he hawi te vi baw’” näkha thui pa.
16Aey nae hawi y saite mawsawng kälengky
1Isu ma äkähui na tea “Khimi känang lawngtä tea äma üng mawsawng kälengky lawngtä awng vi. Känitä-a lä khimi phütä na ma khimi känang tea ly kha äni üng mawsawng kälengky ma ingthawng na täpang king te phüng thui pa vi dy. 2Tukätephüng-a ingkung ma mawsawng kälengky bung ka kha ‘Nang üng angthang kai lä hikä thai vi. Nang ma kai üng ingthawng hai tangkae makä sa ai mei näte caerang hai tärü kha kai tea mätü lawi. Nang bung ingthawng rui saite kung-a kai lä khai haw jaw ngang y te phüng-a vi’ näpa. 3Mawsawng kälengky lä äma ma tea ‘Kai üng ingkung ma kai tea kälu sa hai y te vi dy. Kai lä vaihi makä sa ai dy mei. Kai lä la sa hethang la aethaw awng y. Kai lä khimi ce tea mäkai hethang la aejae ky. 4Kälu awng y te kätü-a khimi ce ma äma ce üng ing-a kai bung ka hethang tähang makä sa ai mei näte kai mäny dy’ näkha aedawng vi dy.
5“Tukätephüng-a äni lä ingkung üng kälai hung he awng saite khimi lawngtä pyng-a lawngtä bung ka dy. Angcüky khimi tea äni ma ‘Kai üng ingkung tähang nang py he kälai majetä awng mei’ näkha düng pa. 6Tukha kangmangky khimi ma ‘Olive situi bung käleng-a cungvaitä py hethang awng’ näpa. Tudylä mawsawng kälengky ma ‘Nang üng caekhu la ea situi bung käleng rui bangawtä näkha tärü haile dawde lawi’ näpa. 7Tupyng-a äni ma äbaeni khimi tea ‘Nang lä kälai majetä py he awng mei’ düng pa. Äni ma ‘Kai lä caw tawng sangtä äni tea py he awng’ näkha mäthang pa. Mawsawng kälengky ma ‘Nang üng caekhu la kha cungvai täjaetä näkha tärü ba’ näpa.
8“Kätüng khaw-a sa y saite mawsawng kälengky tea äni üng Ingkung ma kähawi thui pa vi dy. Ätephüng-a mei nädylä mawsawng kälengky lä bälunghae te hai sa pa te phüng-a vi. Hini älawngpre üng khimi ce lä Säthaw üng khimi ce qawng-a äma ce äpy na hai aepawng tea lä bälunghae ö ky te vi.
9“Tängai ö. Älawngpre üng ingthawng tangkae na hai nang ma ce üng rawijae na dang hethang sa ö ba. Tudylä honi ingthawng na byng te kätü-a lä nang ce bung dungtäsa ing-a Säthaw ma lady ai mang. 10Khimi lawngtä lä vyngsai äje cäcaw-a ae-y nae hawi dylä, nyng saite vyngsai-a la ae-y nae hawi vi. Tungaila khimi lawngtä lä vyngsai äje cäcaw-a ae-y nae hawi y dylä nyng saite vyngsai-a lä ae-y nae hawi y vi. 11Tukätephüng-a nang ce lä älawngpre üng ingthawng tawng tea ae-y nae hawi y vi dylä dungtä ävang ting saite vyngsai-a la Säthaw ma nang ce tea ae-y ngang y vi. 12Älawng-a nang lä ingthawng na älang kaesyng-a mäsung y vi dylä Säthaw ma nang ce tähang Känipre-a ingthawng na py he y vi.
13“Ämi mawsawng la ingkung lawng netä üng kälu sa mei haw y lyng. Lawngtä tea tämö khai kha lawngtä tea lä khengsing vi ai. Y dylä lawngtä tea esäre kha kälang lawngtä tea lä bälung aevaw ai. Nang ce lä qengtäma Säthaw hai älawngpre üng tangkae tähang mawsawng sa mei haw y lyng” näpa.
Säthaw üng lo tängai te lä tangkae qawng-a aely lengky
Mat 11:12-13; 5:31-32; Mar 10:11-12
14Tangkae ngaiphi saite Pharisai na lä hini lo angxynlyng na thai kha Isu tea mänui hai pa ö dy. 15Tukätephüng-a Isu ma äni ce tea “Nang ce lä khimi ce üng maw-a angrubu-a awng hethang ngai ö te kae vi. Tungaila Säthaw lä nang ce üng bälung tea mäny te vi. Khimi ce ma aely kälengky-a khai saite na tea Säthaw lä esäre kha känyng te vi.
16“Mosi üng Ubädi hai buisaw na üng lo lä Baptismae Johan tyng te kätü khytä aely lengky te vi. Honi kätü üng hai Säthaw üng pre Angthang Kähawi khimi ce lä thui ö vi dy. Awng mang te khimi ce lä Säthaw üng pre-a kung hethang aethaw aesa ö dy. 17Käni hai älawng lä la haw te vi. Tungaila Säthaw üng Ubädi sai bälangtä mäteng ma la haw y lyng.
18“Khimi lawngtä lä äma üng nawngpui bung aekhai ea kälang nawngmädi hai aepawng dylä täkübäjang sa te kae dy. Tukha khimi lawngtä lä änawngpaw ma khaisö saite nawngmädi bung la dylä täkübäjang sa te by kae dy.
Khimi känang hai Lazarae
19“Qengtä-a khimi känang saite lawngtä lä ävang ting phi saite kä-o käsa hai kähawi na aelawng kha käni qütä areng cyng ea kawng anghawtho te hai awng pa vi dy. 20Äni üng hawngkhae teng-a lä Lazarae näsaite khimi kangtang lawngtä bung äpy na ma tha pa dy. Tukha Lazarae lä phawisae hai käca känei na äni tea mäkai pa dy. Äni üng ätabung qawng-a lä angvawi na mang bung kha awng pa te vi. 21Äni lä khimi känang loka qawng üng bö kaebu na ca hethang ngaiphi kha awng pa vi dy Ui na mäteng ma ly kha äni üng angvawi na tea bälei pa vi dy.
22“Tukha khimi kangtang dü pyng te kätü-a lä Säthaw üng angtawtha na ma äni bung lä Abraham üng äteng-a nähai pa vi dy. Khimi känang la dü kha khimi ce ma ö pa by vi dy. 23Khimi känang lä ngärei-a tyng kha mätangbälai phi pa vi dy. Tukha äni kheng tähang te kätü-a lä kähanglaw üng Abraham hai äni üng äteng-a awng saite Lazarae ni bung nung pa vi dy. 24Tukha khimi känang lä ‘Üngai Abraham ä, kai tea bäheng kü jo ä, Lazarae bung äma üng köbäjung mawng hai tui-a sänung pe kha kai üng bälai tea bädang hai hethang mätaw kü jo ä. Makäte phüng-a mei nädylä kai lä hini mai thung-a tengxyng y mätangbälai phi na vi dy hei’ näpa.
25“Tungaila Abraham ma ‘Cäpaw ä, nang hing te kätü-a ätete kähawi dang saite na aedawng haile jo re. Honi thüng-a Lazarae lä mätang cili-a awng te lä aedawng pa jo re baw. Äni lä vaihi hi-a kähawi awngneng kha nang lä naw mätangbälai phi dai vi be tu ly. 26Tukä cang y mä-ai säla-a thu bärai saite älawng käkhaw haetä awng te vi. Tukätephüng-a hi üng ly hethang ngai saite ämi la nang ce tea ly haw y lyng. Nang ce te üng ämi la aekae kha kai ce tea ly haw y lyng’ näpa. 27Tupyng-a khimi känang ma Abraham tea ‘Tudylä Üngai Abraham ä, kai pä-ai üng ing-a Lazarae bung mätaw hethang kai aebai te dy hei. 28Kai üng kangby na lawng bangawtä awng vi rawng. Lazarae bung äni ce tea hini mätangbälai phi saite mityng-a tyng y by hethang kähawi-a thui hai khü pa jo e’ näpa.
29“Abraham ma ‘Nang üng kangby na tea canglailing kha awng hethang Mosi üng Ubädi hai buisaw na üng thui saite lo na awng pyng te vi dy. Honi lo na tängai ö kae sy’ näpa. 30Tungaila khimi känang ma ‘Tukä y lyng, Üngai Abraham ä, kädü thung üng lawng lawngtä ma ly haile kha äni ce tea thui dylä äni ce ae-ui ö ai mang’ näpa. 31Abraham ma äni tea ‘Mosi üng Ubädi hai buisaw na ma thui saite älo tea äni ce tängai y dylä kädü thung üng khimi lawng lawngtä aetha tyng kha thui ea la äni ce yng ö y lyng’” näpa näkha thui pa.
17Hunghö hai hunghö bälawi saite
1Isu ma äkähui na tea “Khimi ce tea hunghö sa hai hethang khimi kälang na lä awng tätang vi ai. Tungaila khimi lawngtä ma khimi kälang tea hunghö sa hai dylä tähang si. 2Honi khimi lä hini kai tea yng saite lawng lawngtä pra hai te qawng-a lä äni üng känawngjang-a kälung käleng ae-awi kha pangle tui thung-a khimi ce ma kädesö khyry te lä äni tähang hawiky vi ai rawng. 3Tukätephüng-a nang ma ce ma hawihai pailai-a aedawng ö.
“Nang üng kangby jä-ai ma nang tea sa tämang dylä äni tea pring ba. Äni ae-ui haile dylä sa tämang saite na bälawi pa ba. 4Känitä-a ma nang tea qengsäritä sa tämang ea qengsäritä ly kha ‘Kai ae-ui haile dy mang’ näkha thui dylä nang lä äni tea bälawi pa hethang kae ba” näpa.
Yng saite
5Angtawtha na ma Areng tea “Kai ce üng yng te ca hai pa kü jo” näpa.
6Tukha Isu ma äni ce tea “Nang ce üng yng saite lä angmawi mö kaesüng haetä jetä kätyng awng dylä, hini kälung raca kung tea, ‘Angjüng aephawi baw kha pangle tui thung-a ae-e ba’ nädylä honi äkung lä nang ce üng älo tängai vi ai.
Mawsawng üng kälu
7“Nang ce thung üng lawngtä tea laithawng saite mawsawng lawngtä, y käla beram rui saite mawsawng lawngtä awng näre maisi. Äni lai üng vawi te kätü-a ‘Dei, bö aw kha ca lawi’ näkha nang lä äni tea thui y vi ai. 8Hokä thui te jüng-a ‘Nang lä kä-o aeqai ea kai ca nei hethang kädüngbö sa kha mäcaw lawi. Kai nei ca pyng ea ni kädüngbö nang ca haw ai’ näkha nang lä thui vi ai mei. 9Nang üng mawsawng lä nang lo tängai te phüng-a nang lä äni tea kawng te lo thui y lyng. 10Honi kätyng Säthaw ma nang ce tea sa hethang thui saite na kätyng sa khüng bawi pyng te kätü-a lä, ‘Mä-ai lä aeteng y saite mawsawng na vi, Mä-ai tea sa hethang thui saite kälu xyngtä mä-ai lä sa ö te kae vi’ näkha thui ö” näpa.
Ängang käsi lawng hawtä na bung hawi sa pa
11Jerusalem märü mang-a khölawng ly ea Isu lä Samari hai Kalile khöri säla mang ly prei pa vi. 12Vang haetä-a kung te kätü-a ängang käsi awng saite khimi lawng hawtä na lä äni te mang-a ly pa ö dy. Äni ce lä hanglaw te mityng haetä mang aedaw pa ö. 13Tukha äni ce ma ätüng aesa bärai te hai “Isu, Särae ä, kai ce tea bäheng kü jo” näpa.
14Äni ce bung nung te kätü-a lä, Isu ma “Nang ce ly kha mäthykung na tea nang ma ce üng ätabung na aekheng hai ö” näpa. Äni ce lä ly ö sälö tea ma ängang käsi lä hawi kha caiping ö raw pa dy.
15Äni ce thung üng lawngtä lä äma hawi te aemäny dylä, aekö haile tyng kha ätüng aesa bärai te hai ma Säthaw tea bälaw pa vi. 16Tukha äni lä Isu maw-a aebo kha kawng te lo thui pa dy. Äni lä Samari khimi lawngtä vi. 17Isu ma “Khimi lawng hawtä na tea kai ma hawi sa pa te vi. Kälang lawngtäkawtä na lä ma-a vi mei. 18Khimi lawngtä xyng ma aekö haile tyng kha Säthaw tea bälaw te kae vi. Tukä ea la äni lä khimi ceng kälang lawngtä lä vi” näpa. 19Tupyng-a Isu ma äni tea “Aetha kha ly lawi ba. Nang üng yng te phüng-a, Säthaw ma nang tea hawi sa te vi dy” näpa.
Säthaw ma Sanphrang sa hethang kätü
20Känitä-a Pharisai na ma Isu tea “Säthaw lä mata kätü-a, Sanphrang sa te aetawng ai mei” näkha düng pa. Isu ma “Säthaw üng pre nang ce üng ämi hai nung haw y vi ai” näpa. 21Khimi ce ma ‘Kheng e, Säthaw üng pre lä “Hi-a hei” y käla “Ho-a ho”’ näkha thui haw y lyng. Ätephüng-a mei nädylä Säthaw üng pre lä nang ce üng bälung thung-a ni awng vi ai” näkha mäthang pa.
22Tupyng-a Isu ma äkähui na tea “Nang ce lä Kai, Khimi üng Cäpaw, bung tänaetä xyng nung hethang ngai te kätü qengtä lä tyng vi ai. Tungaila nang ce lä nung haw y lyng. 23Khimi ce ma nang ce tea ‘Äni lä ho-a awng.’ Y käla ‘Äni lä hi-a awng’ näkha thui ngaila äni ce leithung hui ö hang. 24Anglaw säde ea khöteng täki haetä mang üng haita kälang pheitä mang-a aevang hai te kätyng lä Kai, Khimi üng Cäpaw, ly haile te kätü-a lä honi kä awng by vi ai. 25Tungaila angcü y kälang-a ma kai lä mätangbälai te hai vaidung üng kaetha khimi ce ma la kai bung khaisö ö vi ai. 26Novae dung-a khimi ce sa te kätyng Kai, Khimi üng Cäpaw, ly haile te kätü-a la khimi ce lä honi kätyng sa ö by vi ai. 27Novae sangphaw käleng thung-a kung te käni khytä khimi ce lä nei ca kha aepawng ea pawi na sa ö te vi. Honi pyng-a khöpui khöre ne phi te hai tui cäqing tho ea khimi angxynlyng na lä tui aesänung kha dü ö pang pa vi dy. 28Lawtae thüng-a la hini kätyng by vi. Khimi ce lä nei ca, vyng rang, vyngjaw, äkung na e kha ing na sa te hai awng ö te by vi. 29Tungaila Sodom märü üng Lawtae tho te käni-a lä qengtäma käni mang üng mai hai keng na aeqa kha khimi angxynlyng na bung bädü king pa vi dy. 30Kai, Khimi üng Cäpaw, ly haile te kätü-a lä honi kätyng awng by vi ai.
31“Honi käni-a lä engphö qawng-a awng saite ämi la äma engthung üng awng saite vyngsai na la hethang aerung hang sy. Honi kätyng lai-a awng saite khimi la hae haetä la hethang ing-a vawi hang sy. 32Lawtae nawngpui phüng aedawng haile ö ba. 33Khimi lawngtä lä älawng qawng-a hing te tähang qaitä aethaw aesa te kae dylä dungtäsa hing te dang haw y lyng. Khimi lawngtä hini älawng-a hing te tähang qaitä aethaw aesa te jüng-a kai leithung hui dylä dungtäsa hing te dang vi ai. 34Tängai ö. Kai ly haile tyng te kärung-a lä i nae haetä-a i saite khimi lawng netä thung üng lawngtä bung laja kha lawngtä bung lä kai ma khaisö vi ai. 35Nawngmädi lawng netä caw mangtä deng te thung üng lawngtä bung lä kai ma laja kha lawngtä bung lä kai ma khaisö vi ai. 36Tudylä nawngmäcaw lawng netä la-a awng ai üng, lawngtä bung lä laja kha kälang lawngtä bung lä kai ma khaisö vi ai” näpa.
37Äni ce ma “Areng ä, nang lä mani mityng mang tho ai mei” näkha düng pa.
Isu ma äni ce tea “Äro awng te mityng-a lä khimi kädü ngang ca saite aemö säling na aekäcö ö vi ai” näpa.
18Nawngmädi lömai hai tärae cei saite kung
1Tupyng-a Isu lä äkähui na tea aethawsi y käla aetang jawjaw he kae näkha mätae te lo haetä hai mätu pa dy. 2Isu ma “Märü haetä-a tärae cei saite kung lawngtä awng. Äni lä Säthaw tea la ri te y. Khimi ce tähang la dawngpa te y vi. 3Honi märü-a la nawngmädi lömai lawngtä lä awng vi. Äni lä tärae cei saite kung tea ‘Kai üng bälungkae-i na ma kanglai ca y hethang kai tea säbawng kü jo’ näkha ly ea aebai pa vi. 4Kätü käno kha tärae cei saite kung lä äni üng aebai saite lo tea tängai pa te y vi. Tungaila kangkhüng-a äni lä äma üng bälung thung-a ‘Kai lä Säthaw tea ri te y khimi ce tähang la dawng hai te y. 5Tukä ea la hini nawngmädi lömai lä kai tea xhu hai ai te phüng-a äni lä kätüng saite dang hethang kai ma säbawng pa si ä. Tukä ea ni kangkhüng-a lä äni ma kai tea ly kha bäsae te py y ai dy’ näkha nä dy.”
6Tukha Isu ma “Kätüng y-a tärae cei saite kung ma thui te lo kähawi-a aedawng ö. 7Säthaw re saite khimi na ma mäkai jawjaw dylä Säthaw lä äni ce kätüng saite dang hethang säbawng pa te vi. Äni ce tea säbawng hethang Säthaw lä mänung te y. 8Tängai ö. Säthaw lä äni ce tähang kätüng-a tätang sa dawde pa vi ai. Tungaila Kai, Khimi üng Cäpaw, ly haile te kätü-a lä älawngpre-a awng saite khimi na lä kai tea yng ai mang mei” näpa.
Pharisai hai angko cawng saite khimi
9Äma ce tea lä khimi cüng saite näkha aedawng ea khimi qütä tea tämö khai y saite khimi phütä na tea, Isu ma hini mätae te lo hai thui pa. 10Äni ma “Khimi lawng netä lä Säthaw üng Ingkäcai thung-a aetang hethang ly hawi dy. Honi thung üng lawngtä lä Pharisai kha kälang lawngtä lä angko cawng saite khimi vi.
11“Pharisai lä aedaw ea äma phüng hai aetang pa te lä ‘Säthaw ä, kai lä khimi kälang na, kangru na, käsi sa saite na, täkübäjang sa saite na hai honi angko cawng saite khimi kätyng y te phüng-a nang tea kawng bärai ba. 12Kai lä käni säritä-a bö qengnetä jae kha kai üng dang saite angxynlyng na thung üng hawtä-a haetä la nang tea py te vi’ näpa.
13“Tungaila angko cawng saite khimi lä kähanglaw mang aedaw ea khösang mang-a mäteng thyngdyng vawng y te hai ma ‘Säthaw ä, Kai khimi hunghö tea bäheng kü jo ba’ näkha äma üng tatärang-a aekätung kha aetang pa dy. 14Tängai ö. Hini khimi vawi haile te kätü-a Säthaw lä äni tea khimi käcüng-a nung pa vi dy. Pharisai tea lä hokä nung pa y. Mä-ai ma tea aemäsang saite khimi tea lä Säthaw ma mäneng pa vi ai. Tukha mä-ai ma tea aemäneng saite khimi tea Säthaw lä mäsang pa vi ai” näpa.
Isu ma nade na tea tähang kähawi py pa
15Khimi ce lä äma ce üng äby na bung tähang kähawi py hai hethang Isu tea nähai ö pa by vi dy. Äkähui na ma äni ce bung nung te kätü-a lä äni ce tea mäkhang pa ö vi. 16Tungaila Isu ma nade na bung ka ea “Nade na bung kai tea ly hai ö mai sy. Mäkhang pa ö hang. Säthaw üng pre lä honi nade kätyng awng saite khimi na tähang vi. 17Tängai ö. Hini nade na la Säthaw tea sanphrang kätyng lady ö te vi. Hini nade na kätyng sa y saite khimi lawngtä lä Säthaw üng pre thung-a kung haw y lyng” näpa.
Mätawngky khimi känang
18Mätawngky lawngtä ma Isu tea “Särae kähawi ä, dungtäsa hing te dang hethang kai lä makä sa he kae mei” näkha düng pa.
19Isu ma äni tea “Nang lä ätephüng-a särae kähawi näkha kai tea thui te vi mei. Ämi lawngtä la hawi te y. Säthaw lawngtä xyng ni hawi te kae be. 20Säthaw üng särilo na nang mäny be. ‘Täkübäjang sa hang, khimi bung bädü hang, bäru hang, khimi ce phüng tüng y saite na jung kai-a tho hang, nang nä-awi ni nang pä-ai tea tämö khai’ näkha tärü te vi” näpa.
21Honi mätawngky ma lä “Hini Ubädi na kai lä nade üng hai ma tängai pyng te vi dy” näpa.
22Hikä Isu ma thai te kätü-a lä, äni tea “Nang lä haetä sa hethang awng te vi rawng. Nang üng awng saite angxynlyng na jaw king kha honi tangkae lä khimi kangtang na tea py pa. Tudylä Känipre ingthawng lä nang dang ai mang. Tupyng dylä ly kha kai leithung hui” näpa. 23Hini lo mätawngky ma thai te kätü-a lä, äni lä bälung hawi y phi pa vi dy. Ätephüng-a mei nädylä äni lä tawngnang phi pa te phüng-a vi.
24Isu ma äni tea kheng kha “Khimi känang na Säthaw üng pre thung-a kung hethang lä rae bärai vi. 25Tätang, khimi känang lawngtä Säthaw üng pre thung-a kung hethang qawng-a lä cäphrüng khaw-a säphö känawngjang käsa metä kung te lä jaky vi ai rawng” näpa.
26Hini lo thai saite khimi na ma lä Isu tea “Tudylä Säthaw lä ämi bung aeqang ai mei” näpa.
27Isu ma “Khimi ce sa haw y saite tea Säthaw lä sa haw te vi” näkha mäthang pa dy.
28Peterae ma Isu tea “Kai ce lä kai ma ce pyng saite angxynlyng na khaisö ea, nang leithung hui ö te vi dy” näpa.
29-30Isu ma äni ce tea “Tängai ö, khimi lawngtä lä Säthaw üng pre tähang-a äma üng ing, nawngpui, kangby jä-ai, änä-awi äpä-ai hai caw nade na bung kädesö dylä, äni lä vaihi hing te thüng-a khaisö saite na qawng-a cang y tähang kähawi na awng mang-a dang rae vi ai. Tukä cang y vaimaw mang-a la dungtäsa hing saite la dang be vi ai” näpa.
Isu lä äma dü ai näte phüng thui rüng pa
31Isu lä äkähui hawlai netä xyng na bung ka kha “Tängai ö. Mä-ai lä Jerusalem märü mang-a khölawng tho ö te vi. Kai, Khimi üng Cäpaw, phüng buisaw na ma tärü te lo angxynlyng na lä cungrü vi ai dy. 32Khimi ce ma kai bung lä ceng kälang na üng kö thung-a a ö vi ai. Äni ce ma kai bung mänui hai, kaejae py te hai, mäce mäthawi kha bo ea bädü ö vi ai. 33Tukha käni thungtä kätü-a lä kai lä kädü thung üng aetha haile tyng vi ai” näpa.
34Tungaila äkähui na lä hikä thui saite lo tea bälungva ö y vi. Säthaw lä honi älo älawngsai tea äni ce tähang ho pa te phüng-a vi. Tukha Isu thui saite phüng äni ce lä mäny ö pa y vi.
Isu ma ämi kangjö lawngtä bung hawi sa pa
35Isu lä Jerikhaw märü teng-a tyng ea, ämi kangjö lawngtä lä lolang teng mang-a aety kha tangkae mäkai pa dy. 36Khimipui na ly te tüng ämi kangjö khimi ma thai te kätü-a äni lä “Äte makäte vi nang mei” näkha düng pa dy.
37Khimi ce ma lä äni tea “Nazare märü üng Isu ly te ti ä” näkha thui pa.
38Tukätephüng-a äni lä “Isu ä, Sanphrang Davidae üng Cäpaw ä, kai tea bäheng kü jo” näkha aethaw hai hang pa dy.
39Ämaw-a ly mang saite na ma lä äni tea sitäri-a awng hethang mäkhang pa. Tungaila äni lä “Sanphrang Davidae üng Cäpaw ä, kai tea bäheng kü jo” näkha ätüng kälengky hai-a a rae pa vi dy.
40Tukha Isu lä aedaw ea “Honi khimi bung kai tea vähai” näpa. Isu teng-a äni tyng ea lä, 41“Nang tähang kai lä äte sa pa ai mei” näkha düng pa dy.
Tukha äni ma Isu tea “Areng ä, kai lä ämi aevang haile hethang ngai vi” näpa.
42Isu ma äni tea “Nang üng ämi aevang lawi sy. Nang yng te phüng-a Säthaw ma nang tea hawi sa te dy mang” näpa.
43Tukha ämi kangjö lä ämi aevang haw praw pa vi dy. Tudylä äni lä Säthaw tea bälaw kha Isu leithung hui pa vi dy. Khimi angxynlyng na ma hokä nung te kätü-a lä äni ce la Säthaw tea bälaw ö by vi dy.
19Angko cawng saite Jaekai
1Isu lä Jerikhaw märü-a kung kha ly praw vi dy. 2Jerikhaw märü-a lä Jaekai näsaite khimi lawngtä awng. Äni lä angko cawng saite na üng khimi kälengky lawngtä kha tawngnang te vi. 3Isu näsaite khimi bung äni lä nung hethang ngai vi. Tungaila äni lä äreng dawi kha khimi awng mang pa te phüng-a Isu bung nung haw pa y vi. 4Tukätephüng-a äni lä ämaw-a aehui kha Isu bung nung hethang thaidö kung käleng mawng-a paw pa vi dy. Isu lä hani lolang mang ly ai näte äni lä mäny te vi. 5Jaekai awng saite thaidö kung teng-a Isu tyng dylä äni tea dy kha “Jaekai ä, aerung dawde lawi. Vaidüng nang ing-a kai aehae he ngai hei” näpa.
6Tukätephüng-a Jaekai lä aerung dawde kha kawng te hai äma ing-a Isu bung ka pa dy.
7Hini kä nung saite khimi angxynlyng na ma “Isu lä hunghö sa saite khimi lawngtä ing-a aehae hethang kung dy ho” näkha jawsi pa ö dy.
8Tungaila Jaekai lä aedaw kha Isu tea “Areng ä, Tängai kae-e. Kai pyng saite ingthawng kaehütä khimi kangtang na tea py hethang vaihi ma kai aedo te vi dy. Tudylä khimi ce tea kätüng y hai sa kha kai dang saite na la phü bälitä-a kai ma hung haile tyng ai mang” näpa.
9Isu ma äni tea “Vaini lä Säthaw ma nang hai nang ma üng engthung na tea aeqang te vi dy. Nang lä Abraham ceng thung üng tho saite khimi te phüng-a vi. 10Kai, Khimi üng Cäpaw, lä la saite khimi na bung ha hethang hai, aeqang hethang ly te vi” näkha thui pa.
Sui tangkae pjae hawtä na hai mätae pa
11Hini lo äni ce tängai te thüng-a Isu ma mätae te lo haetä hai thui pa be dy. Ätephüng-a mei nädylä äni ce lä Jerusalem märü teng-a tyng kha Säthaw ma Sanphrang sa he lä aenaidei dy näkha khimi ce ma dawng ö pa te phüng-a vi. 12Isu ma “Tawngmang lawngtä lä khölawng kähanglaw-a ly hethang aerü vi dy. Äni tea lä sanphrang kälengky ma äma mityng üng sanphrang-a sa hai pa te vi. Tupyng-a äni lä äma üng mityng-a vawi haile hethang kae te vi. 13Tukätephüng-a äni lä äma üng mawsawng lawng hawtä na bung ka kha äni ce tea minas näsaite sädokhai tangkae haetä py qi pa vi dy. Tukha äni ce tea ‘Kai tyng haile te khytä hini tangkae hai nang ce mälaw ö’ näpa.19:13 Minas näsaite “sädokhai tangkae” lä law thungtä hai kaehütä üng kälu sa te vang hai aeba khaw te vi.14Tungaila äma pre üng khimi phütä na ma äni tea esäre pa vi dy. Tukätephüng-a äni ce lä äma ce üng mätawngky phütä na bung sanphrang kälengky tea mätaw kha thui pa te lä ‘Kai ce lä hini khimi bung kai ce üng sanphrang-a sa hai he ngai te y vi’ näpa.
15“Tungaila hini khimi känang lä sanphrang aelawng kha äma üng pre-a vawi haile tyng vi dy. Tupyng-a äni lä äma üng tangkae py qi saite mawsawng lawng hawtä na bung ka dy. Äni lä äni ce tangkae hai mälaw kha majetä mawcawng ö mei näte mäny hethang ngai te vi. 16Angcüky lawngtä lä ly kha äni tea ‘Särae ä, nang py saite tangkae hai kai mälaw te lä kaebärai hawtä dang rae dai vi’ näpa. 17Tukätephüng-a ingkung ma äni tea ‘Nang sa te lä hawi bärai te vi. Nang lä mawsawng kähawi vi. Tukätephüng-a nang lä äje cäcaw-a la ae-y nae hawi te phüng-a märü hawtä na üng khimi ce tea pyng saite mätawngky-a kai ma nang bung khai dy ba’ näpa. 18Tupyng-a äbaeni lawngtä ma ly kha äni tea ‘Särae ä, nang py saite tangkae hai kai mälaw te lä kaebärai bangawtä dang rae te vi’ näpa. 19Tukha Ingkung ma äni tea ‘Märü bangawtä na üng khimi ce tea pyng saite mätawngky-a kai ma nang bung khai dy ba’ näpa.
20“Tupyng-a mawsawng kälang lä ly kha äni tea ‘Särae ä, hini lä nang ma py saite tangkae dy. Kai lä honi tea libyng hai täpamy kha kähawi-a ho te vi. 21Nang lä bäheng te bälung awng y saite khimi lawngtä vi te phüng-a kai lä ri te vi. Nang lä khimi kälang ce ma aethaw rae kha sa saite üng ävang tea la te vi’ näpa.
22“Ingkung ma äni tea ‘Nang lä mawsawng käsi kae vi. Nang sa tämang saite tea nang ma üng älo na hai kai mätü ai. Kai lä bäheng te bälung awng y kha khimi kälang na ma aethaw rae kha sa saite vang la kha äkung e y käla ae vi näte nang lä mäny vi dy. 23Makäte phüng-a kai üng tangkae bung nang lä beng-a khai y te vi mei. Kai vawi te kätü-a lä, honi tangkae hai aepu rae saite na lä kai dang bawi haw hethang vi baw’ näpa.
24“Tupyng-a Ingkung lä äteng-a aedaw saite mawsawng na tea ‘Äni te üng tangkae la kha sädokhai tangkae haetä awng saite khimi tea py pa la’ näpa.
25“Äni ce ma ‘Särae ä, äni tea hawtä awng pyng vi dy ecy’ näkha thui pa.
26“Tukha Ingkung ma ‘Tängai ö. Sakaw te awng saite khimi tea lä kai ma py rae vi ai. Kai thui saite kätyng kälu tea kähawi-a sa y saite khimi tea lä py pyng saite kälu mäteng kai ma la king vi ai. 27Tukä ea la kai bung äni ce üng sanphrang sa hai he ngai y kha esäre saite bälungkae-i bung hi-a vähai kha kai maw-a bädü ö la’” näkha näpa.
Isu lä Jerusalem-a kung hethang aerü pa
Mat 21:1-11; Mar 11:1-11; Joh 12:12-19
28Isu lä mätae te lo thui pyng-a Jerusalem märü-a ly ngaisai pa vi dy. 29Olive kung na awng saite me anghung teng üng Bephake hai Bethani vang na kaenai-a Isu tyng ea lä äkähui lawng netä bung ka pa dy. 30Isu lä änini tea “Nang ni lä ämaw üng vang-a ly hawi ba. Ho-a nang ni kung dylä cäphö känawkhing käsa cäpi mäkhing te metä bung nung hawi ai mang. Honi cäphö lä ämi la aedang vai te y vi rawng. Honi cäphö üng ruinawng sö kha hi-a nähai hawi ba. 31Khimi lawng lawngtä ma ‘Ätephüng-a nang ni lä cäphö ruinawng sö hawi te mei’ näkha düng dylä, honi cäphö bung ‘Areng ma aely ngai te vi’ näkha thui pa hawi ba” näkha täru ea mätaw pa dy.
32Tukha änini la ly hawi kha Isu ma thui saite kätyng lä nung hawi khaw pa vi dy. 33Änini ma cäphö känawkhing käsa caw bung sö hawi sälö tea lä, honi ingkung na ma “Äte sa hethang cäphö känawkhing käsa bung sö hawi te vi mei” näkha düng pa.
34Änini ma “Areng aely ngai te vi” näkha näpa hawi dy. 35Änini lä honi cäphö känawkhing käsa bung Isu tea nähai hawi dy. Tukha äni ce lä cäphö qawng-a kä-o na khu hawi kha Isu aedang hethang säbawng pa ö dy. 36Isu lä cäphö känawkhing käsa caw tea aedang kha Jerusalem mang-a ly sälö ea khimi ce lä äma ce üng kä-o na lolang qawng-a mädai ö prei pa vi dy.
37Isu lä Olive kung na awng saite me anghung mang Jerusalem-a ly käthu te lolang mityng-a tyng te kätü-a lä, äkähui angxynlyng na lä kawng kha Säthaw tea ätüng käleng na hai bälaw ö pa vi. Isu sa saite cangxei te na äni ce lä nung ö vi dy. Tukätephüng-a äni ce lä 38“Areng üng ämüng hai ly saite sanphrang tea Säthaw ma tähang kähawi py sy. Känipre-a lä awngneng te awng sy. Aesangky saite Säthaw üng phung-ang la leng sy” näkha ätüng kaesa hai thui ö dy.
39Khimipui na thung üng Pharisai phütä na ma Isu tea “Särae ä, nang üng äkähui na tea pring la by” näpa.
40Tungaila Isu ma äni ce tea “Tängai ö. Äni ce ma sitäri-a awng dylä, kälung na ma bälaw ö vi ai” näkha mäthang pa.
Isu lä Jerusalem khimi ce tähang minaw tui aeqa hai pa
41Isu lä Jerusalem hai kaenai-a tyng kha märü bung nung haw te kätü-a, honi märü tähang bälungsi kha minaw tui aeqa pa dy. 42Tukha äni ma “Jerusalem khimi ce ä, nang ce hai Säthaw säla-a aede saite vaihi nang ce mäny ea kha lä hawi ai. Tungaila nang ce lä kai bung e te phüng-a Säthaw lä nang ce tea mäny hai y, nung hai ö y dy. 43Täre na ma nang ce üng märü tea täphra hethang säveng ö vi ai. Äni ce lä nang ce tho haw y rung khytä sävengmy ö vi ai. 44Äni ce lä nang ce märü hai nang ce angxynlyng na tea täphra ö vi ai. Kälung phei haetä qawng-a haetä aeqynlyng kha awng he y lyng. Ätephüng-a mei nädylä nang ce ma tea aeqang hethang Säthaw ly te kätü tea nang ce lä dawngcang ö y te phüng-a vi” näpa.
Säthaw üng Ingkäcai-a Isu kung pa
Mat 21:12-17; Mar 11:15-19; Joh 2:13-22
45Tupyng-a Isu lä Säthaw Ingkäcai thung-a kung kha vyngjaw saite khimi na tea mätho pa vi dy. 46Isu ma äni ce tea “Caekäcai-a tärü te lä, Kai üng ing lä aetang nae ing kae vi. Tungaila nang ce lä hini ing tea damarae ce üng täbö tärawng-a bälawng ö lae dai vi ly” näpa.
47Isu lä khimi ce tea käni qütä Säthaw Ingkäcai-a älo mätu pa vi dy. Tungaila mäthykung käleng na hai Ubädi särae na hai, khimipui thung üng mätawngky na ma lä Isu bung bädü hethang älang ha ö pa vi. 48Tungaila äni ce lä hokä sa hethang älang haetä la dang haw pa ö y vi. Ätephüng-a mei nädylä khimipui na lä, äni üng lo kähawi-a tängai ö pa te phüng-a vi.
20Isu üng aenae phüng düng pa
1Känitä-a Isu lä Säthaw üng Ingkäcai angkhaw thung-a khimi ce tea Angthang Kähawi mätu kha thui pa vi dy. Tukha mäthykung käleng na hai, Ubädi särae na hai mätawngky na lä Isu tea tyng pa ö dy. 2Äni ce ma Isu tea “Hini nang sa saite na lä äte ma üng aenae hai sa te mei. Hini aenae lä nang tea ämi ma py te mei näte kai ce tea thui” näkha näpa.
3Isu ma äni ce tea “Kai ma nang ce tea älo haetä düng by ai. Kai tea mäthang ö jo. 4Baptismae Johan üng baptismae py saite lä khimi ce üng aenae hai py te mei, y käla Säthaw üng aenae hai py te mei” näkha düng pa dy.
5Tudylä äni ce lä äma ce tingtawi aedüng aethui ö kha “Mä-ai ma ‘Säthaw lä Johan tea baptismae py hai te vi’ näkha thui dylä äni ma mä-ai tea ‘Nang ce lä äni üng lo makäte phüng-a yng ö y te mei’ nähe kae dy. 6Y käla ‘Khimi ce ma Baptismae Johan tea baptismae py hai te vi’ näkha nädylä khimi angxynlyng na ma mä-ai tea kälung hai käde he kae dy. Ätephüng-a mei nädylä khimi angxynlyng na ma Johan lä buisaw lawngtä vi näkha yng ö bawi te vi” näpa. 7Tukätephüng-a äni ce ma “Ämi ma Johan tea baptismae py hai te mei näte kai ce lä mäny y” näkha mäthang pa ö kae dy.
8Isu ma äni ce tea “Hikä sa saite na lä ämi üng aenae hai kai sa te mei näte nang ce tea kai lä thui y lyng” näpa.
Cäpje angkhaw tea vang saite kung na hai mätae pa
9Isu ma khimi ce tea hini mätae te lo hai thui pa te lä “Cäpje angkhaw sa saite khimi lawngtä lä äma üng angkhaw bung khimi ce tea vang hai kha äma lä khölawng kähanglaw-a thoja pa vi dy. 10Cäpje thai na müng te kätü-a äni lä äma üng mawsawng lawngtä bung Cäpje angkhaw vang saite khimi na tea mätaw pa dy. Angkhaw kung lä äma dang he Cäpje thai la hai hethang mawsawng bung mätaw pa te vi. Tungaila angkhaw vang saite na ma lä mawsawng tea bo kha büngqaitä mätaw haile tyng pa vi dy. 11Tupyng-a angkhaw kung mawsawng kälang lawngtä bung mätaw haile be dy. Tungaila äni ce lä honi mawsawng tea la bo kha kaejae py ea büngqaitä mätaw haile tyng pa be vi. 12Tukha angkhaw kung lä ämäthung mawsawng lawngtä bung mätaw tynglyng be elä äni tea la tämaw dangrung khytä bo praca kha angkhaw rang mang-a mätho sö pa be vi dy. 13Tukätephüng-a angkhaw kung lä ‘Kai makä sa ai mei hi ly. Kai bälung aevawky saite kai ma üng cäpaw bung mätaw kae si ä, äni tea lä tämö khai ö daila awng ai mang’ näkha aedawng vi dy. 14Tungaila angkhaw vang saite na ma angkhaw kung üng cäpaw bung nung dylä ‘Honi lä ingthawng kaety vi. Co, äni bung bädü ö kae si. Tudylä hini angkhaw lä mä-ai hang haw ai mang’ näkha äma ce tingtawi aeceng ö vi dy. 15Tukätephüng-a angkhaw vang saite na lä äni bung angkhaw ärang mang-a aethaw paitae hai mätho kha bädü pa vi dy.
“Tudylä angkhaw kung lä äni ce tea makä sa ai mei. 16Angkhaw kung lä ly kha angkhaw vang saite na bung bädü ea honi angkhaw lä khimi kälang na tea vang hai vi ai” näpa.
Hini kätyng Isu thui saite lo khimi ce ma thai te kätü-a lä “Hini kätyng lä mani la tyng hang sy” näkha thui pa ö vi dy.
17Isu ma kätaw-a kheng kha äni ce tea “Tudylä Caekäcai thung-a tärü saite phüng lä
‘Ing sa saite khimi na ma khaisö saite kälung lä,
aely kälengky kälung-a aelawng vi dy’ näte lä ätemakä näte mei” näkha düng pa.
18Khimi lawngtä lä honi kälung qawng-a aeqa dylä ängang aela xhixae vi ai. Honi kälung ma khimi lawngtä qawng-a aeqa dylä tibutica-a awng vi ai näpa.
19Honi kätü-a Ubädi särae na hai mäthykung käleng na ma Isu bung nerang hethang älang ha pa ö vi dy. Ätephüng-a mei nädylä hini mätae te lo lä äni ce tea bädeng kha thui te lo kae näte äni ce lä mäny ö te phüng-a vi. Tungaila äni ce lä khimipui na tea ri ö vi dy.
Sica Sanphrang kälengky tea angko py
20Ubädi kaw saite särae na hai mäthykung mätawngky na lä Isu bung kaenai mang aering ö vi dy. Khimi käjüng aesa saite na bung Isu teng-a ly hai pa ö dy. Isu lä älo tämang saite na thui ai müng näkha äni ce lä aepö ö te vi. Hokä dylä äni ce lä Isu bung ne kha aenae awng saite Rom mätawngky na üng kö thung-a a haw vi ai. 21Tukätephüng-a angrubu-a aesa saite khimi na ma Isu tea “Särae ä, nang lä kätüng khaw saite älo ni thui kha mätu te kai ce lä mäny ö te vi. Nang lä khimi ce üng mimai tea la kheng y käla ma Säthaw üng älang kätüng khaw-a mätu te vi. 22Kai ce lä Sica Sanphrang tea angko py sang mei, py sang y mei” näkha düng pa.
23Isu lä äni ce käjüng sa kha düng te phüng mäny pa vi. Tukha äni ce tea, 24“Phawisae pjaetä kai tea mätü e. Honi qawng-a awng saite ämüng hai äpung lä ämi üng mei” näpa.
Tukha äni ce ma “Sica sanphrang üng äpung hai ämüng vi” näkha mäthang pa ö dy.
25Isu ma äni ce tea “Sica sanphrang pyng saite lä äni tea py pa ö. Säthaw pyng saite lä Säthaw tea py pa ö” näpa.
26Äni ce lä khimipui na üng maw-a Isu üng älo tämang saite ne hethang the pa haw ö y vi. Tukha äni ce lä cangxei kha äte lo la aepe ö y vi dy.
Kädü thung üng aetha tyng te phüng
27Tudylä kädü thung üng aetha haile te awng y näkha na saite Sadukai na thung üng khimi phütä na lä Isu tea ly ö dy. 28Tukha äni ce ma Isu tea “Särae ä, Mosi üng Ubädi thung-a tärü te lä hikä vi. ‘Khimi lawngtä lä äcaw na dang y käla ma dü dylä äni üng nawngpui bung äkangby ma aekö hai he kae. Dü saite äjä-ai üng amäjy aepreng hai he kae’ näkha nä vi. 29Qengtä-a kangby jä-ai lawng säritä lä awng. Äjä-aiky lä ingthawng sa kha caw na dang y käla dü pa vi. 30Äbaeni lawngtä la äjä-ai lömai nawngmädi bung la kha dü pa be vi. 31Tupyng-a ämäthung kangby lä äjä-ai lömai bung aekö pa be vi dy. Tukha honi kätyng kangby jä-ai lawng säritä na lä lawngtä la caw na dang y te hai ma dü ö bawi pa vi dy. 32Kangkhüng-a lä honi nawngmädi la dü pa by vi dy. 33Tudylä kädü thung üng aetha be te kätü-a lä honi nawngmädi lä ämi üng nawngpui-a aelawng ai mei. Äni ce kangby jä-ai lawng säritä na hai äni lä aepawng bawi te vi” näkha düng pa.
34Tudylä Isu ma “Vaihi kätü-a älawng qawng-a awng saite khimi na lä aepawng kha ae-awng ö te vi. 35Tungaila vaimaw mang-a Säthaw lä kädü thung üng aetha hai kha älawng kangthae-a awng hethang Säthaw üng maw-a aeteng saite khimi na lä aepawng te awng y vi ai dy. 36Tukha äni ce lä Säthaw üng angtawtha na kätyng awng te phüng-a dü haw y vi ai dy. Äni ce lä Säthaw üng caw na-a aelawng vi ai dy. Äni ce lä Säthaw ma kädü thung üng aetha hai te caw na aelawng te phüng-a vi. 37Dü saite thung üng aetha haile te phüng Mosi ma mätu pyng te vi dy. Säthaw ma äni tea angprüng thung mang älo aepe te kätü-a Mosi ma Areng tea Abraham üng Säthaw, Isaika üng Säthaw hai Jaeko üng Säthaw näkha ka vi näkha tärü te vi. 38Säthaw lä dü saite khimi na üng Säthaw y. Hing saite khimi na üng Säthaw kae. Ätephüng-a mei nädylä Säthaw üng känung-a lä dü saite na la hing tyng te vi” näpa.
39Ubädi särae phütä na ma lä “Särae ä, nang üng mäthang saite lo lä tüngkhaw mang” näkha näpa ö dy. 40Tukha äni ce lä Isu tea älo kälang la düng haile vawng ö pa y vi dy.
Sanphrang Davidae üng cäpaw phüng
41Tupyng-a Isu ma äni ce tea “Mesia lä Sanphrang Davidae üng cäpaw vi” näte lä ätemakä sa kha thui haw te mei. 42-43Sam cae-u thung-a sanphrang Davidae lä äma ma “Kai üng Areng tea Säthaw ma thui pa te lä ‘Nang üng täre na bung nang üng äkho täkui-a khai te khytä kai üng bangtang mang-a aety’ nä be näpa. 44Davidae ma Mesia tea ‘Areng’ näpa lae dylä, Mesia lä makä sa kha Davidae üng cäpaw-a aelawng haw ai mei” näpa.
Ubädi kaw saite särae na tea aehi ö
45Khimi angxynlyng na älo tängai ö te thüng-a, Isu ma äkähui na tea 46“Ubädi särae na tea aehi ö. Äni ce lä kä-o ävang kätingky na aelawng kha seng mityng mang-a ly ea khimi ce ma tämö khai ea lady te ngai ö bärai vi. Judae na üng ingkäcai mityng kähawi-a aety hethang ngai ö bärai te vi. Pawi sa saite ing-a la hawiky saite mityng-a aety hethang ngai ö te kae vi. 47Äni ce lä nawngmädi lömai na üng ingthawng na tämo kha la ea käjüng sa kha sadui-a aetang ö te vi. Honi khimi ce tea Säthaw lä khimi kälang na qawng-a käsiky saite dengpy vi ai” näpa.
21Lömai nawngmädi üng thawlawng
1Khimi känang na lä Säthaw Ingkäcai thung üng thawlawng bung-a äma ce üng tangkae na py pa ö te Isu lä nung pa vi dy. 2Nawngmädi lömai kangtang ma phawisae pjae netä py te tea la Isu lä nung by vi dy. 3Tupyng-a Isu ma “Tängai ö. Hini nawngmädi lömai kangtang lä khimi kälang angxynlyng na qawng-a tangkae py ky te vi dy. 4Hini khimi angxynlyng na lä äma ce tea awng saite thung üng kanglai na py ö te kae vi. Tungaila lömai nawngmädi kangtang lä äma tea hing hai hethang aelo xyng-a awng saite angxynlyng na py king pa te vi dy” näpa.
Dung kangteng üng Kamarae na
5Isu üng äkähui phütä na ma lä Säthaw Ingkäcai bung kälung na hai äcae kähawi-a sa te na phüng aethui ö vi. Tukha khimi ce ma Säthaw üng Ingkäcai mäthy hethang py saite kälang äcae kähawi sai na tea äni ce lä kähawi thui pa ö vi dy. Tungaila Isu ma 6“Hi-a nang ce nung saite kälung na lä haetä qawng-a kälang haetä aeqynlyng y te kätü lä tyng vi ai rawng. Täre na ma hini kälung na tea mäne ö sangxang pa vi ai rawng” näpa.
Mätang bälaica saite na
7Tupyng-a äni ce ma Isu tea “Särae ä, hini na lä mata kätü-a tyng ai rawng mei. Honi kamarae na tyng hethang phüng lä ätemakä sa kha kai ce mäny ai mei” näkha düng pa.
8Tukha Isu ma äni ce tea “Nang ce tea khimi ce ma kaeling kaemae sa y hethang kähawi-a kheng ö rüng. Ätephüng-a mei nädylä khimi ce ma ‘Kai lä Mesia dy’ näkha thui ö vi ai. Y dylä ‘Mesia tyng hethang kätü lä aenai dy’ näkha äni ce thui ö be ai rawng. Tungaila äni ce tea nang ce lä yng ö hang. 9Pre na säla-a hai pre na thung-a täre aesa te na phüng nang ce thai te kätü-a lä ri ö y hang. Hini na lä tyng ngece vi ai. Tungaila kätü lä teng te y vi rawng” näpa.
10Tupyng-a Isu ma äni ce tea “Ceng haetä hai haetä, pre haetä hai haetä täre aety ö vi ai rawng. 11Mityng kälang kälang mang-a pangtälü käleng na naw ai, bötäkang tho ai, anghawi kaelae känaw käsaw na la tyng mang vi ai rawng. Käni mang üng ri hethang hawi bärai saite na hai kamarae käleng na tho vi ai rawng.
Säthaw lä äma üng khimi ce tea säbawng pa ai
12“Tungaila hini na tyng y kälang-a khimi ce ma nang ce bung ne kha mätang bälai-a sakälökhü ö ai. Äni ce lä nang ce bung Judae na üng ingkäcai-a aethaw paitae hai nähai kha thawng thung-a bäla ö vi ai. Tukha nang ce bung sanphrang na hai aecörae mätawngky na maw-a nähai ö vi ai. Nang ce lä kai üng äkähui na vi te phüng-a äni ce lä hini angxynlyng na nang ce tea sa ö vi ai. 13Hini lä nang ce ma äni ce tea kai phüng thui hethang älang-a aelawng vi ai. 14Tungaila nang ce lä makä älo qa ai mei näte phüng lä bälung mawng ö hang. 15Ätephüng-a mei nädylä nang ce tea nang ma ce üng bälungkae-i na ma e haw y hethang kai ma bälungkähae hai älo na py ai mang. 16Nang ce üng nä-awi pä-ai, kangby jä-ai amäjy na hai rawijae na mäteng ma la nang ce bung täre na tea a ö vi ai. Tukha nang ce thung üng phütä na bung lä äni ce ma bädü ö vi ai. 17Kai üng phüng-a khimi angxynlyng na lä nang ce tea esäre ö vi ai. 18Tungaila Säthaw ma nang ce üng äsangme haetä la y te khytä nang ce tea aedung vi ai. 19Nang ce ma Säthaw tea ae-y khi dylä hing saite dang ö vi ai” näpa.
Ceng kälang na ma Jerusalem märü tea täphra ö vi ai
20“Täre na ma Jerusalem märü tea aebärüng kha sävenglü te nang ce nung dylä, hini märü lä pra hethang aetawng te dy näte mäny ö ai. 21Honi kätü-a lä Judae khö-a awng saite khimi na lä me anghung na mang-a aehui ö pang sy. Jerusalem märü üng awng saite na lä tho ö pang he kae. Märü üng ärang mang-a awng saite na lä märü thung-a kung ö hang sy. 22Ätephüng-a mei nädylä honi käni lä Säthaw ma dengpy te käni vi ai. Buisaw na ma honi phüng Caekäcai thung-a tärü pyng saite na lä aekö bawi vi ai. 23Honi kätü-a lä äjopawng saite nawngmädi hai nökai kä-awng na lä tengxyng y rae saite tyng ö vi ai. Isrelae pre üng khimi ce lä mätang phi pa ö vi ai. Tukha Säthaw lä hini Isrelae khimi na tea kädawtho phi pa vi ai. 24Täre na ma tei kha Isrelae khimi na bung awng mang-a aekei hai qy kha bädü pa ö vi ai. Tukha Isrelae khimi phütä na bung lä ne kha pre rang kälang mityng qütä mang-a nähai ö pa vi ai. Säthaw ma ceng kälang na tea aenae py saite thüng-a Jerusalem märü tea lä mätangbälai sakälö khü kha äkho hai aecö toto pa vi ai.
Mesia ly haile ai te phüng
25“Käni, law, hai Tengpaw na tea lä kamarae na tho vi ai. Älawngpre angxynlyng na üng khimi ce lä pangle üng tuileng bungba te ätüng käleng na phüng-a ri kha bälung mawng ö vi ai. Tukha äni ce lä äte sa hethang la mäny ö y vi ai. 26Khimi ce lä älawng qawng-a tyng saite söpra te na tea ri phi te hai aemäny y käla awng jijü ö vi ai. Säthaw ma käni khösang üng na tea ca rung khytä sui saite haidae na lä tähüng pa vi ai. 27Honi kätü-a lä Kai, Khimi üng Cäpaw, lä haidae hai phung-ang hai khö angnüng thung mang ly te khimi ce ma nung ö vi ai. 28Hini na tyng hethang aetawng te kätü-a lä Säthaw ma nang ce bung aeqang hethang kätü lä aenai ai dy te phüng-a aethaw aela ea kheng ö rüng kha awng” näpa.
Thaidö kung
29Tupyng-a Isu ma äni ce tea mätae te lo hai thui pa te lä “Thaidö kung hai thingkawng kung angxynlyng na tea kheng ö. 30Äkung kädo kangthae saite nung dylä nisae aenai te nang ce lä mäny ö dy. 31Honi kätyng hini na tyng te nung ea lä, Säthaw lä khimi angxynlyng na üng aequngkyng saite Sanphrang-a lawng hethang aenai dy näte nang ce lä tätang mäny haw ö dy.
32“Tängai ö. Hini angxynlyng na tyng te cung bawi y rytä lä, vaidung üng kaetha na lä dü ö y vi ai rawng. 33Käni hai älawng lä pra ngaila Kai üng älo na lä manila pra y vi ai.
Isu üng äkähui na lä kähawi-a awng rüng he kae
34“Nang ce lä nei, ca pro te hai bärui si phi te phüng-a bälungli hai tang ö hang. Ätabung tähang bälungbi saite phüng-a la bälungli hai tang ö hang. Hakä awng dylä kai ly haile te kätü käni lä nang ce tea dawng aemang te kätyng aepö y tea ma tyngmu ai to. 35Kai üng ly haile te phüng-a älawngpre üng khimi angxynlyng na qawng-a tyng vi ai. 36Kähawi-a kheng ö rüng. Tyng he awng saite angxynlyng söpra te na thung üng aelaw haw hethang aetang ö. Tukha dylä nang ce lä Kai, Khimi üng Cäpaw, maw-a aedaw haw hethang aetang ö” näpa.
37Käni qütä Isu lä khimi ce tea Ingkäcai thung-a älo angtu thui pa vi dy. Tukha kärung qütä äni lä Olive kung na awng saite me anghung-a awng pa vi dy. 38Tukha khimi angxynlyng na lä kädang thawde qütä äni üng älo tängai hethang Ingkäcai-a ly ö pa vi dy.
22Isu bung a hethang Judae lä ngai
Mat 26:1-5; Mar 14:1-2; Joh 11:45-53
1Cäqengja te pawi näsaite aepae saite aesi qa y te täkaw pawi kätü lä aenai vi dy. 2Tukha mäthykung käleng na hai Ubädi särae na lä khimipui na tea ri te phüng-a Isu bung kangru-a bädü hethang älang ha ö dy.
Judae lä Isu bung a hethang bälung aedü pa
3Honi kätü-a äkähui lawng hawlai netä na thung üng Iskriota näsaite Judae tea lä Setan angra ma kung pa vi dy. 4Tukha Judae lä mäthykung käleng na hai ingkäcai rui saite mätawngky na tea ly kha Isu bung makä sa kha ne ai mei näte phüng äni ce hai aedüng ö dy. 5Äni ce lä kawngphi te hai Judae tea tangkae py hethang älo aedo ö vi dy. 6Äni lä bälung aedü te hai khimi cing sa te kätü-a Isu bung äni ce kö thung-a a hethang älang kähawi mäqang pa dy.
Isu hai äkähui na lä Cäqengja te Pawi tähang aerü ö
Mat 26:17-25; Mar 14:12-21; Joh 13:21-30
7Cäqengja te pawi näsaite täkaw aepae saite aesi qa y te pawi tähang beram caw hai löci aesa he käni lä tyng pa vi dy. 8Isu ma Peterae ni Johan tea “Nang ni ly hawi kha Cäqengja te pawi üng kädüngbö mä-ai ca hethang aerü rüng hawi lawi ba” näkha mätaw pa.
9Änini ma Isu tea “Nang lä kai ni bung ma-a aerü rüng hethang ngai hai te vi mei” näkha düng pa hawi dy.
10Isu ma “Nang ni märü thung-a kung hawi te kätü-a lä tui awikaw aepö saite khimi lawngtä hai aeting hawi ai mang. Äni leithung hui kha äni kung saite ing-a phai kung hawi jo ba. 11Tukha ingkung tea ‘Särae ma, “Kai üng äkähui na hai mangtä Cäqengja te pawi-a kädüngbö ca hethang mityng lä ma-a mei nä vi” näkha düng ba’ näpa. 12Äni lä äqawng üng böloka na hai awng rüng saite teithung käleng haetä nang ni tea mätü ai mang. Honi mityng-a mä-ai kädüngbö ca hethang aerü hawi rüng ba ä” näpa.
13Änini lä ly hawi kha äma ni tea Isu ma thui te kätyng nung hawi khaw vi dy. Tukha änini lä Cäqengja te pawi üng kädüngbö tähang aerü rüng hawi pa dy.
Areng üng Kädüngbö
Mat 26:26-30; Mar 14:22-26; 1 Kor 11:23-25
14Honi kätü tyng ea lä Isu hai äma üng angtawtha na lä bö aw ö dy. 15Tukha Isu ma äni ce tea “Mätang bälaica te kai aeting y kälang-a nang ce hai mangtä hini Cäqengja te Pawi üng kädüngbö ca hethang kai lä tengxyng y ngaiphi vi dy. 16Tängai ö. Hini Cäqengja te Pawi üng kädüngbö lä Säthaw üng pre-a cungrü te kätü-a ni kai lä ca haile tyng vi ai” näpa.
17Tudylä Isu lä bynglyng la ea Säthaw tea kawng te lo thui khüng te hai “Hini bynglyng la ea nang ce angxynlyng na nei ö. 18Tängai ö. Säthaw üng pre tyng pyng ea ni kai lä hini Cäpje tui nei haile tyng vi ai” näpa.
19Tupyng-a Isu lä täkaw la ea Säthaw tea kawng te lo thui khüng dylä täkaw bung täpe ba kha äni ce tea py pa dy. Hikä äni ma “Hini täkaw lä nang ce tähang py saite kai üng ätabung vi. Kai tea aedawng haile tyng hethang hini kätyng ca ö jawjaw ba” näpa. 20Hini kätyng kädüngbö ca pyng ea lä Isu ma bynglyng la kha äni ce tea “Hini bynglyng thung-a awng saite cäpje tui lä nang ce tähang bälawng saite kai üng äthi vi. Hini kai üng thi lä Säthaw hai khimi ce säla-a awng kha älo aenai saite kangthae üng kamarae vi.
21“Tungaila täre na üng kö thung-a kai bung a hethang khimi lä kai hai hini loka-a bö mangtä ca vi dy. 22Kai, Khimi üng Cäpaw, lä thui rüng te kätyng ly vi ai. Tungaila kai bung täre na kö thung-a a saite khimi lä tähang si” näpa.
23Äkähui na lä “Mä-ai thung üng ämi ta lä honi kä sa ai mei” näkha äma ce tingtawi aedüng ö vi dy.
Ämi mei äkälengky
24Tudylä äkähui na lä äma ce thung-a kälengky lä ämi ai mei näkha älo aebäri ö dy. 25Tukätephüng-a Isu lä äni ce tea “Hini ceng kälang na üng sanphrang na lä äma ce üng khimi ce tea aenae hai pyng ö te vi. Aenae awng saite khimi na lä ‘Khimi ce tea säbawng saite kung na vi’ näkha äma ce ma aenä ö te vi. 26Tungaila nang ce lä hokä awng he kae y. Nang ce thung-a äkälengky te khimi lä äcäpiky kätyng awng sy. Pyng saite mätawngky lä mawsawng-a awng kae. 27Loka-a aety saite khimi lengky mei. Y käla äni tea bö mäcaw saite khimi lengky mei. Loka-a aety saite khimi ni lengky te vi be. Tungaila kai lä nang ce thung-a mawsawng kätyng awng te kae vi.
28“Kai tea khimi ce ma kaexe ha te kätü-a nang ce lä kai hai mangtä awng hai jawjaw saite na vi. 29Üngai ma kai tea pre pyng hethang py te kätyng nang ce pre pyng hethang kai ma py ai. 30Tukätephüng-a nang ce lä kai üng pre-a kai hai mangtä loka-a ca nei haw ö ai. Tukha nang ce lä tärae cei te kung üng aety nae-a aety kha Isrelae ceng hawlai netä na tea pyng ö vi ai.
Peterae lä aephae ai näte phüng Isu ma thui rüng pa
Mat 26:31-35; Mar 14:27-31; Joh 13:36-38
31“Simon, Simon, caw aelai te kätyng nang ce tea käny hethang Setan angra lä Säthaw tea mäkai pyng te vi dy. 32Tungaila nang üng yng saite pra y hethang kai lä aetang pa dy. Kai tea nang ae-y haile te kätü-a lä nang ma ce üng kangby jä-ai na tea aethaw py haile tyng pa jo” näpa.
33Tungaila Peterae ma Isu tea “Areng ä, kai lä nang hai mangtä thawng thung-a läsy, dü tea läsy ly hethang awng rüng te vi dy” näpa.
34Isu ma “Peterae ä, tängai khü. Nang lä vaikhawng kädang aekhawng y te kälang-a ‘Hini khimi bung kai mäny y’ näkha qengthungtä kai tea aephae vi ai” näpa.
Ämaw mang-a tyng hethang rae saite na
35Tupyng-a Isu lä äkähui na tea “Phawisae-i, cawngkö hai kho painai na süng hai y käla kai ma nang ce bung mätaw te kätü-a lä nang ce tea aely ngai saite na awng king dy cäkae mei” näkha düng pa.
Tukha äni ce ma “Aely ngai saite na lä awng y vi” näkha mäthang pa.
36Isu ma äni ce tea “Vaihi nang ce tea phawisae-i awng dylä süng ö. Cawngkö la awng dylä süng ö. Nang ce tea aekei awng y dylä känih jaw ea rang ö. 37Nang ce tea kai thui te lä, Caekäcai thung-a kai phüng tärü te awng. ‘Honi khimi lä hunghö sa saite na thung-a qa te vi’ näkha näte lä cungrü hai hethang kae te vi. Kai üng phüng tärü saite lä kai ma tea cungrü te vi dy” näpa.
38Äkähui na ma “Areng ä, kheng e. Hi-a aekei thawnglang känetä awng” näpa.
Isu ma “Hawi dy,” näpa.
Isu lä Olive kung na awng saite me anghung-a aetang pa
39Isu lä äma üng reitae kätyng Olive kung na awng saite me anghung-a äkähui na hai ly ö dy. 40Honi mityng-a äni ce tyng te kätü-a lä Isu ma äni ce tea “Hunghö sa te khytä bärawi bäleng saite aeting y hethang aetang ö” näpa.
41Isu lä äni ce hai hanglaw bärai y te mityng mang-a tho ea khokhö didü kha Säthaw tea aetang pa vi dy. 42“Üngai ä, nang ma aely ngai dylä hini mätangbälai phi saite kai tea aeting y hethang säbawng kü ba. Tungaila kai ma üng ngai te kätyng y käla nang üng ngai saite kätyng kae sy” näpa 43Säthaw üng angtawtha ma Isu tea aetüng kha aethaw py pa dy. 44Isu lä bälungbi te hai mawng phi te phüng-a aethaw aela kha aetang rae pa vi dy. Äni üng ae-ui tui lä äthi kätyng älawng qawng-a aeqa pa vi dy.
45Isu aetang khüng kha äkähui na tea ly haile te kätü-a lä äni ce lä bälungsi te hai mäsaexa kha i ö qu te nung pa vi. 46Isu ma äni ce tea “Nang ce lä ätephüng-a i ö qu te vi mei” näkha düng pa. “Aetha kha aetang ö lawi baw. Tudylä nang ce lä hunghö sa te khytä bärawi bäleng saite aeting y ai mang” näkha näpa.
Isu bung ne pa
Mat 26:47-56; Mar 14:34-50; Joh 18:3-11
47Isu ma äkähui na tea älo thui te thüng-a, khimi kanghö lä tyng pa dy. Tukha äkähui lawng hawlai netä thung üng Judae Iskriota näsaite khimi lawngtä lä äni ce tea lolang mätü pa vi. Äni lä Isu teng-a ly kha mänang pa vi dy. 48Isu ma äni tea “Judae Iskriota ä, Kai, Khimi üng Cäpaw, tea mänang te hai ma nang lä täre na kö thung-a a te vi be tu kä-aw” näpa.
49Isu üng äkähui na ma Isu bung ne hethang aenai te mäny te kätü-a lä, äni ce ma Isu tea “Areng ä, kai ce ma aekei na hai qy pa ai mei” näpa. 50Tukha äni ce thung üng lawngtä ma mäthykung kälengky üng mawsawng üng känawkhing tea sai kha bangtang mang lä aelybae pa vi dy.
51Tungaila Isu ma äkähui tea “Tukä tangtä lä hawi dy” näpa kha äni üng känawkhing tea hawi sa haile tyng pa vi dy.
52Tupyng-a Isu ma äma tea tyng saite mäthykung käleng na hai, Ingkäcai üng kälengky reisae na hai, mätawngky na tea “Aetu aekei na hai, thingbyng na hai süng kha käsi sa saite khimi kätyng-a nang ce lä kai bung ne hethang ly ö te vi mei. 53Kai lä käni qütä Säthaw üng Ingkäcai baesung thung-a nang ce hai mangtä awng ea lä kai bung ne ö y be. Tungaila vaihi lä nang ce üng kätü kha Setan angra ma pyng saite kätü vi dy” näpa.
Peterae ma Isu bung aephae pa
Mat 26:57-58, 69-75; Mar 14:53-54, 66-72; Joh 18:12-18, 25-27
54Äni ce lä Isu bung ne ea mäthykung kälengky üng ing-a nähai kha mäkung pa vi dy. Tungaila Peterae lä kähanglaw mang hui pa te vi. 55Khimi ce lä leikung-a maiti kha aekäcö ea mangtä aety ö qu te kätü-a Peterae lä äni ce hai aety te by vi. 56Mawsawng anglaw lawngtä ma lä äni bung mai kaevang-a aety te nung pa vi dy. Anglaw ma äni tea kähawi-a kheng kha “Hini lä Isu hai mangtä awng saite khimi vi” näpa.
57Tungaila Peterae ma “Nawngmädi ä, kai lä äni bung mäny y lyng” näkha näpa.
58Tänaetä kätü-a khimi kälang lawngtä ma äni bung nung be kha “Nang lä äni ce thung üng lawngtä by vi be” näpa.
Tukha Peterae ma “Änang ä, kai lä äni ce thung üng y lyng” näpa.
59Tänaeritä rytä pyng-a lä kälang khimi lawngtä ma “Tätang khaw hini khimi lä Isu hai awng te vi. Ätephüng-a mei nädylä äni lä Kalile khimi tyng by vi” näkha nä aekhe kang pa dy.
60Tukha Peterae ma äni tea “Änang ä, nang üng lo thui saite aesyng y vi” näpa.
Äni lä älo thui te kätü-a ma ae lä khawng raw pa vi dy. 61Tupyng-a Isu lä aehawi kha Peterae tea kätaw-a kheng pa vi dy. Tudylä Peterae lä Areng ma äni tea thui saite lo na aedawng va te lä “Kädang aekhawng y kälang-a nang lä kai bung mäny y näkha qengthungtä aephae ai” näsaite lo vi. 62Peterae lä äma sa saite mäny va te kätü-a lä, äni lä tho kha bälung aekhy te hai ma rawsö kae vi dy.
Isu tea mänui hai pa
63Isu bung rui saite khimi na lä äni tea mänui hai kha bo pa ö vi dy. 64Äni ce ma Isu üng mimai tea libyng hai bang kha “Nang tea ämi ma bo te mei, buisaw lo hai thui by ä” näkha düng pa dy. 65Tukha reisae na ma älo amäjy cawngkhang na hai Isu tea käsi prawng pa ö vi dy.
Isu tea tärae cei pa
Mat 26:59-66; Mar 14:55-64; Joh 18:19-24
66Kädang khö aevang ea lä, khimipui thung üng mätawng na hai, mäthykung käleng na hai, Ubädi särae na lä mangtä Sanhendrin kawngci-a aeting ö qu dy. Tukha Isu bung äni ce maw-a nähai pa ö dy. 67Äni ce ma Isu tea “Nang Mesia tätang dylä kai ce tea thui” näpa.
Isu ma äni ce tea “Nang ce tea kai thui dylä, nang ce lä yng ö y ai.
68“Tukha kai ma nang ce tea düng dylä nang ce lä mäthang ö y ai. 69Tungaila vai üng hai kaetawng Kai, Khimi üng Cäpaw, lä aenae angxynlyng na awng saite Säthaw üng bangtang mang-a aety vi ai” näpa.
70Tupyng-a äni ce angxynlyng na ma Isu tea “Tudylä nang lä Säthaw üng Cäpaw mei” näkha düng pa.
Tukha Isu ma äni ce tea “Kai dy näte nang ce ma thui te vi dy” näpa.
71Tukha äni ce ma “Mä-ai lä äte älo kälang la ngai bälai be y dy. Äni üng täbawng mang aepho saite älo mä-ai thai pyng te dy tu la” näpa.
23Isu bung Mätawngky Pilata tea tha pa
Mat 27:1-2, 11-14; Mar 15:1-5; Joh 18:28-38
1Tupyng-a aekäcö saite khimi mätawngky angxynlyng na lä aetha ea Isu bung Rom Mätawngky Pilata tea nähai ö pa vi dy. 2Tudylä äni ce ma Isu tea kaekhe lawng thui pa te lä “Hini khimi lä kai ce Isrelae khimi na tea älang tämang hai te vi. Äni lä Sica sanphrang kälengky tähang angko py te na tea mäkhang te vi. Tukha äma tea Mesia näsaite sanphrang lawngtä vi näkha thui te vi” näpa.
3Tukätephüng-a Mätawngky Pilata ma Isu tea “Nang lä Judae na üng sanphrang vi nang mei” näkha düng pa.
Tukha Isu ma “Nang ma thui te kätyng kae dy” näkha mäthang pa dy.
4Tupyng-a Pilata ma mäthykung käleng na hai khimipui na tea “Hini khimi lä Rom Ubädi tea sa tämang te kai lä nung y vi” näkha näpa.
5Tungaila äni ce ma “Äni lä Kalile khö üng hai aetawng kha Judae khö üng khimi angxynlyng na tea äni üng mätu saite lo hai käsi sa te hai xhuxa hai te vi. Vaihi äni lä Jerusalem märü-a tyng te vi dy” näkha käsi thui pa ö vi dy.
Isu bung Herodae sanphrang tea tha pa
6Pilata ma hikä thai ea lä “Äni lä Kalile khö üng khimi vi nang mei” näkha düng pa. 7Isu lä Herodae kaepyng üng khimi näte Mätawngky Pilata ma mäny te kätü-a lä Isu bung Herodae sanphrang tea mätaw pa vi dy. Honi kätü-a Herodae lä Jerusalem märü-a awng te by vi. 8Herodae ma Isu bung nung te kätü-a lä äni lä tengxyng y kawng pa vi dy. Ätephüng-a mei nädylä äni lä Isu bung nung hethang aedawng phi pa te vi. Isu phüng äni lä thai pyng te vi dy kha Isu ma cangxei sa saite hae haetä nung he ngaiphi pa te vi.
9Äni ma älo düng mang ngaila Isu lä äni tea mäthang pa y vi. 10Mäthykung käleng na hai Ubädi särae na lä aedaw kha aethawtä hai ma Isu tea käsi prawng pa ö vi dy. 11Tupyng-a Herodae hai äma üng reisae na ma lä Isu tea kaekhe lawng thui te hai mänui hai pa ö dy. Sanphrang üng kä-o kangthing äni tea bälawng kha mätawngky Pilata tea mätaw haile pa be vi dy. 12Honi käni-a lä Herodae sanphrang hai mätawngky Pilata lä aede hawi vi dy. Hikä y kälang-a änini lä lawng lawngtä bälungkae-i lawng hawi te vi.
Isu bung bädü hethang tärae cei pa
Mat 27:15-26; Mar 15:6-15; Joh 18:39-19:16
13Pilata ma mäthykung käleng na hai mätawngky na hai khimi ce tea mangtä ka pa dy. 14Tukha äni ce tea “Hini khimi lä khimi ce tea xhuxa hai te vi näkha nä ea nang ce lä äni bung hi-a nähai ö te vi. Tukha kai lä nang ce üng maw-a äni tea älo cei ea lä nang ce ma käsi prawng te kätyng hini khimi lä sa tämang saite äte haetä la nung y vi be. 15Herodae sanphrang la Isu üng käsi sa te lä nung te y by vi. Äni ma Isu bung mä-ai tea mätaw haile tyng be te vi. Nang ce nung haw te kätyng Isu lä dü hethang aeteng te khytä äte haetä la sa tämang saite awng te y vi. 16Tukätephüng-a äni bung kai ma üng reisae na tea bo hai pyng ea bälawi hethang kai thui ai mang” näpa. 17Cäqengja te Pawi qütä-a lä mätawngky Pilata ma thawng qa saite lawngtä bung bälawi te reitae lä awng te vi.
18Tukha äni ce lä mangtä a kha “Hini khimi bung bädü la. Baraba bung bälawi pa” näkha hang pa ö dy. 19(Baraba lä Jerusalem märü tea xhuxa hethang aethawsa te phüng-a hai khimi bädü te phüng-a thawngkae te vi.)
20Pilata ma lä Isu bung bälawi hethang ngai hai te phüng-a äni ce tea älo thui haile pa be dy. 21Tungaila äni ce lä a kha “Äni bung lä thinglang qawng-a täheng kha bädü la. Äni bung lä thinglang qawng-a täheng kha bädü la” näkha näpa.
22Pilata ma ämäthung-a thui pa te lä “Ätephüng-a äni bung thinglang qawng-a täheng ai mei. Hini khimi lä äte sa tämang te awng vi nang mei. Dü hethang khytä äni sa tämang saite kai lä nung y vi be. Tukätephüng-a äni tea bo pyng-a bälawi hethang kai ma üng reisae na tea kai thui pa ai dy” näkha näpa.
23Tungaila äni ce lä aethaw paitae hai ma äni bung thinglang qawng-a täheng kha bädü la näsaite ätüng käleng hai thui pa ö dy. Kangkhüng-a lä mätawngky Pilata la äni ce üng kängai-a qa pö ma vi dy. 24Tukätephüng-a Pilata lä äni ce üng mäkai te kätyng py hethang kae pa vi dy. 25Khimi bädü kha Jerusalem märü tea xhuxa hethang aethawsa te phüng-a thawngkae saite Banaba bung lä äni ce mäkai te kätyng Pilata ma bälawi pa vi dy. Tukha mätawngky Pilata lä Isrelae khimi na üng kängai-a Isu bung a pa vi dy.
Reisae na ma Isu bung thinglang qawng-a täheng pa
Mat 27:32-44; Mar 15:21-32; Joh 19:17-27
26Reisae na ma Isu bung nähai ea märü ärang mang üng ly saite Sarene märü üng Simon bung äni ce ma aethaw paitae hai mätawng rang kha thinglang aepö hai ea Isu leithung hui hai pa vi dy.
27Khimipui na la Isu leithung mang hui pa ö dy. Äni tähang bälungsi kha rawpi saite nawngmädi na la qa te by vi. 28Isu lä äni ce tea aehawi kha “Jerusalem märü üng nawngmädi na ä, kai tähang raw ö hang. Nang ma ce tähang hai nang ma ce üng caw na tähang phai raw hai ö kae. 29Nang ce ma lä ‘Äcaw na dang y saite nawngmädi na hai äcaw aepeng y saite nawngmädi na hai äby känö nei hai vai y saite nawngmädi na lä tähang hawi’ näkha nang ce thui hethang kätü lä tyng vi ai rawng. 30Honi kätü-a khimi ce lä me kaesang na tea ‘Kai ce qawng-a aekai ma pa. Me anghung cäpi na ä, kai ce tea täphung la’ näkha nä ö vi ai. 31Ätephüng-a mei nädylä kai, thingkawng kung kanghing kätyng awng ea khimi ce ma hini na kätyng sa dylä Säthaw lä nang ce thingkawng kung käcei kätyng awng saite khimi tea lä makätangtä dengpy y käla awng vi ai mei” näpa.
32Tudylä Isu hai mangtä bädü hethang khimi kälang lawng netä bung la nähai pa te by vi. Änini lä käsi sa hawi saite khimi vi. 33Äni ce lä älökorö23:33 Latin älo-a Kalvari. näsaite mityng-a tyng te kätü-a lä Isu lä änini hai mangtä thinglang qawng-a täheng pa hawi by dy. Änini tea lä Isu üng bangtang mang-a lawngtä, bangrawi mang-a lawngtä khai pa te vi. 34Isu ma “Üngai ä, Äni ce üng sa tämang saite na bälawi pa kü ba. Ätephüng-a mei nädylä äni ce lä äma ce sa saite na mäny ö y te kae vi” näpa.
Tukha reisae na ma lä Isu üng kä-o na tea phui hai sa kha aeri ö xhixae pa vi dy. 35Khimipui na lä aedaw kha dyng ea lä Judae mätawngky na ma la Isu tea mänui hai pa ö vi. Äni ce ma “Äni lä khimi kälang na tea lä bälawi haw te be. Säthaw ma re saite Mesia tätang khaw dylä äma tea äma ma aebälawi kae sy baw” näkha näpa.
36Reisae na ma ly kha Isu tea mänui hai pa te by vi. Äni ce lä Isu tea ävang ting y saite Cäpje tui käthaw hai mätyng pa ö dy. 37Tukha äni ce ma Isu tea “Nang lä Judae na üng sanphrang dylä nang ma tea nang ma aebälawi raw kae baw” näpa.
38Isu üng lötang-a lä “Hini lä Judae na üng Sanphrang vi” näkha cae hai tärü saite pephei äni ce lä täheng pa vi dy.
39Äma teng-a täheng by saite khimi käsi lawngtä ma “Nang lä Mesia y vi nang mei. Nang ma tea aebälawi ea kai ni bung la bälawi jo baw” näkha äni ma mänui hai pa dy.
40Tungaila kälang lawngtä ma lä “Nang lä Säthaw tea ri y vi nang mei. Nang lä äni kätyng thinglang qawng-a dü ai dy be tu. 41Mä-ai ni lä mä-ai mani üng hawi y sa te lai-a hikä dü mätang hethang aeteng khaw te vi. Hini khimi lä äte haetä la sa tämang te y” näkha jawsi pa dy.
42Tupyng-a äni ma “Isu ä, Nang üng pre thung-a nang tyng te kätü-a lä, kai tea la bäheng kü jo ba” näpa.
43Isu ma äni tea “Tängai ba. Vaihi ma nang lä Kai hai mangtä Paradai pre-a awng ai mang” näpa.23:43 Paradai pre näte lä Känipre tea Käri lo hai thui te vi.
Isu dü te phüng
Mat 27:45-56; Mar 15:13-41; Joh 19:28-30
44-45Käni anghung kätü üng hai naeri thungtä tingtang Isrelae pre lä ving kha käni kaevang lä la pa vi dy. Tukha Ingkäcai üng jaeky saite känih käsa lä ä-ungtang-a aesä-ei phung pa vi dy. 46Tudylä Isu lä ätüng käleng hai hang rang kha “Üngai ä, Nang tea Kai üng Muilaw bung Kang a dy” näkha dü pa vi dy.
47Reisae cungvaitä na bung pyng saite mätawngky ma hini na nung te kätüng-a Säthaw tea cäphaw kha thui pa te lä “Äni lä khimi cüng saite lawngtä tätang khaw vi ly” näkha näpa vi dy.
48Hini na kheng hethang aekäcüng saite khimi angxynlyng na lä Isu üng dü mätang te nung te kätü-a lä, äma ce üng tatärang-a aekätung kha bälung hawi y phi te hai ma vawi ö haile tyng kae vi dy. 49Tungaila Isu bung mäny saite khimi angxynlyng na hai Kalile khö üng hai äma leithung hui saite nawngmädi na lä kähanglaw mang aedaw kha dy ö kae dy.
Isu bung ö pa
Mat 27:57-61; Mar 15:42-47; Joh 19:38-42
50-51Hokä ea Josefae ämüng awng saite khimi lawngtä awng. Äni lä Judae khö Arimathia märü üng khimi vi. Äni lä khimi hawi te hai cüng saite lawngtä kha Säthaw ma Sanphrang sa hethang kätü tea aering saite khimi by vi. Äni lä Judae na üng kawngci-a thung-a qa saite lawngtä by vi. Tungaila äni lä Isu bung bädü hethang älang mäkhawi tärae cei te kätü-a lä, äni ce hai mangtä bälung aedü te y vi. 52Äni lä mätawngky Pilata tea ly kha Isu üng äro mäkai pa dy. 53Tukha Josefae lä Isu ro bung thinglang qawng üng la pa vi dy. Tukha libyng kanglung hai Isu ro tea meng kha säbang ea ämi bung la ö vai y saite kälung täko te täprawng angrawng kangthae thung-a ö pa vi dy. 54Honi kätü lä äni ce üng Aehae te Käni tähang aerü rüng saite käni vi. Tukha Aehae te Käni la aetawng hethang aenai pa te vi dy.
55Kalile khö üng hai Isu leithung hui saite nawngmädi na la Josefae leithung hui kha Isu üng äro bung kälung täko saite täprawng angrawng kangthae-a ö te nung ö by vi dy. 56Tupyng-a äni ce lä äma ce Aehae te ing-a vawi kha situi ämui kähawi na hai rimui na aerü rüng pa ö dy.
Tungaila äni ce lä Mosi üng Ubädi kätyng Aehae te Käni-a lä aehae ö vi dy.
24Isu hing haile tyng pa
Mat 28:1-10; Mar 16:1-8; Joh 20:1-10
1Käni säritä üng angcü üng käni kädang thawde-a nawngmädi na lä äma ce aerü rüng saite rimui hai situi ämui kähawi na süng kha täprawng-a ly ö dy. 2-3Äni ce tyng te kätü-a lä täprawng khaw thokhae üng kälung käleng aethuija te nung ö vi dy. Tungaila äthung-a kung ea lä Areng Isu üng äro lä äni ce nung ö y mäse vi dy. 4Hini phüng äni ce dawng tämangtü te thüng-a lä kä-o angphung-a aelawng saite khimi lawng netä lä äni ce teng-a aedaw praw pa vi. 5Tukha nawngmädi na lä ri phi pa te phüng-a älawng-a bü ö kae dy. Tukä ea la änini ma ätephüng-a nang ce lä khimi kädü thung-a khimi kanghing bung ha ö te vi mei. 6Äni lä hini mityng-a awng y dy. Aetha haile tyng vi dy ecy. Äni ma nang ce hai mangtä Kalile khö-a awng te thüng-a thui saite lo na aedawng haile tyng ö baw. 7Äni lä “Äni ce ma Kai, Khimi üng Cäpaw, bung lä khimi hunghö na kö thung-a a kha thinglang qawng-a täheng pa vi ai. Tukha ämäthung käni-a lä aetha haile tyng vi ai” näkha näpa.
8Tupyng-a ni, äni ce lä Isu üng älo na aedawng haile tyng ö vi dy. 9-10Hini nawngmädi na lä Makadala märü üng Maeri, Jonae Jaeko üng nä-awi Maeri hai kälang nawngmädi na vi. Äni ce täprawng üng vawi haile te kätü-a lä angtawtha lawng hawlai haetä na hai kälang angtawtha angxynlyng na tea äni ce aeting saite phüng na thui pa ö vi dy. 11Tungaila äkähui na lä nawngmädi na ma thui saite älo tea yng pa ö y vi. Honi lo tea äkähui na lä kangthö lo kä khai ö te phüng-a vi. 12Tungaila Peterae lä aetha kha täprawng-a aehui pa dy. Peterae ma bü kha angrawng khaw-a kheng ea lä Isu ro bung säbang saite libyng käsa na ni nung sö pa kae vi dy. Tukha Peterae lä tho kha cangxei te hai ma ing-a vawi haile kae vi dy.
Angtawtha lawng netä lä Isu bung Emo lolang-a aeting
13Honi käni khaw-a ma äkähui na thung üng khimi lawng netä lä Emo näsaite vang-a khölawng ly hawi dy. Honi vang lä Jerusalem märü hai meng säritä tingtang hanglaw pa te vi. 14Änini lä leithung mang üng Jerusalem angthang phüng na aethui hawi prei dy. 15Hokä aedüng aethui hawi te thüng-a, Isu äma lä änini teng-a aesi kha mangtä ly hai pa by dy. 16Tungaila änini lä Isu näte mäny hawi pa y. 17Isu ma änini tea “Nang ni ly te tärawi aethui hawi te lä äte phüng na mei” näkha düng pa.
Tukha änini lä bälung hawi y te hai ma aedaw hawi caw dy. 18Änini thung üng Kleopa näsaite khimi ma lä Isu tea “Nang lä Jerusalem märü üng ly saite angvüng lawngtä by ea vaidüng vaikhawng üng Jerusalem angthang phüng mäny y vi nang mei” näkha düng pa.
19Isu ma änini tea “Äte phüng na mei” näkha düng pa.
Änini ma Isu tea “Nazare märü üng Isu phüng baw ä. Äni lä haidae hai-a älo thui kha cangxei te na sa saite buisaw lawngtä vi. Säthaw lä äni tea säbawng pa te vi. Khimi awng mang saite na ma lä äni tea tämö khai bawi pa te vi. 20Mäthykung käleng na hai kai ce üng mätawngky na ma äni bung bädü hethang Mätawngky Pilata tea a pa vi dy. Tukha äni bung thinglang qawng-a täheng ea bädü pa vi. 21Äni lä Isrelae khimi na tea bälawi pa hethang Säthaw ma mätaw saite khimi lawngtä vi näte kai ce lä aethang khai ö bawi te vi. Dawng hethang hawi y saite lä Isu dü te vaihi lä käni thungtä awng vi dy. 22-23Tukä cang y kai ce üng rawijae nawngmädi phütä na ma lä mä-ai tea cangxei hai ö te vi dy. Äni ce lä kädang thawde-a täprawng angrawng-a ly ö te vi. Tungaila Isu üng äro lä äni ce nung ö y. Äni ce ma vawi haile kha Säthaw üng angtawtha saite ni bung äsämai-a nung te phüng mä-ai tea thui ö te vi. Honi angtawtha saite ni ma lä Isu aetha haile kha hing te phüng äni ce tea thui pa te vi. 24Tupyng-a kai ce üng äpy phütä na lä nawngmädi na ma thui te kätyng täprawng-a ly kha awng y te Isu ro tea äni ce lä kheng ö dy. Tungaila Isu bung la nung ö pa y vi” näpa.
25Tupyng-a Isu ma änini tea “Nang ni lä äte la dawng kaw hawi y te vi. Säthaw üng buisaw na lo tea yng hethang nang ni lä rae bärai hawi te vi. 26Mesia lä hini kä mätangbälai hethang Säthaw üng aely kätyng kae vi. Tupyng-a ni Känipre-a Säthaw lä äni tähang phung-ang käleng py vi ai näte mäny hawi y vi nang mei” näpa. 27Tukha Isu lä Mosi hai buisaw angxynlyng na ma äma phüng Caekäcai-a thui saite lo na hai aetawng kha änini tea thui mäcai pa dy.
28Äni ce lawng thungtä vang hai kaenai-a tyng te kätü-a lä vang bung cäqeng hethang ngai te kätyng Isu lä sa pa vi dy. 29Tukha äkähui ni ma Isu tea “Kai ni hai aehae jo kae by. Kätü la mätü vi dy. Ving ai dy to” näkha mäkhang hawi pa. Tudylä Isu lä änini hai aehae hethang ly pa by dy. 30-31Isu lä änini hai mangtä bö aw te kätü-a lä täkaw la ea Säthaw tea kawng te lo thui kha täkaw täpe ea änini tähang py pa. Honi kätü-a Säthaw lä änini üng ämi tea aevang haisy kha Isu vi näte änini lä mae hawi raw pa vi dy. Tudylä Isu la änini teng üng laja pa vi dy. 32Tupyng-a änini lä “lolang säla-a äni ma mä-ai ni tea älo thui kha Caekäcai lo na thui mäcai te kätü-a mä-ai ni lä tengxyng y kawng te y mei” näkha aethui hawi dy.
33Tukha änini lä aetha ea Jerusalem märü-a vawi haile praw hawi dy. Isu üng äkähui lawng hawlai haetä na hai aekäcö saite äkähui kälang na hai änini lä aeting dy. 34Tudylä äni ce ma änini tea “Areng lä tätang hing haile tyng te vi dy. Simon tea la aetüng pyng pa te vi dy” näpa.
35Tupyng-a änini la lolang-a aeting saite phüng na hai täkaw täpe te kätü-a Isu bung mae hawi saite phüng äkähui äkälang na tea thui pa haile tyng hawi by dy.
Isu ma äkähui na tea aetüng pa
Mat 28:16-20; Mar 14:18; Joh 20:19-23; Angtawtha 1:6-8
36Änini ma hini phüng na thui te thüng-a Isu lä äni ce säla-a aedaw kha “Säthaw ma nang ce tea bälung awngneng saite py sy” näpa.
37Äni ce lä tengxyng y ri ö vi dy. Ätephüng-a mei nädylä äni ce lä Isu tea seisi angra käthi ö te phüng-a vi. 38Tudylä Isu ma äni ce tea “Ätephüng-a bälungbi ö te vi mei. Ätephüng-a nang ce lä yng haw ö y te vi mei. 39Kai üng kökho na tea kheng ö. Kai tätang khaw dy be hi. Kai tea aela kha kheng ö, seisi angra lä ätabung hai awng te y. Tungaila kai lä nang ce nung te kätyng-a ätabung hai awng te vi” näpa.
40Äni ma hikä thui pyng te kätü-a, Isu lä äni ce tea äma üng äkö tämaw hai äkho tämaw na mätü pa dy. 41Tukha äni ce lä cangxei te hai kawngphi te phüng-a yng haw ö y te vi rawng. Tukha Isu ma äni ce tea “Nang ce tea äte ca hethang awng mei” näkha düng pa. 42Äni ce ma mawi bädang saite äbyng haetä Isu tea py pa dy. 43Isu lä honi tea la kha äni ce üng maw-a ca pa vi dy.
44Tupyng-a Isu ma äni ce tea “Kai lä nang ce hai mangtä awng te thüng-a thui saite lä ‘Mosi üng Ubädi hai buisaw lo na mang hai Sam cae-u mang hai kai üng phüng tärü saite angxynlyng na lä cung hai bawi he kae’ näte hini lo na lä vaini ma cung bawi te vi dy” näpa.
45Tudylä Caekäcai lo na tea mäny haw hethang äni ce tea thui mäcai pa vi dy. 46Isu ma äni ce tea “Mosi üng Ubädi-a kai phüng thui saite lä hikä hei. Mesia lä mätang kha dü vi ai. Tupyng-a ämäthung käni-a lä kädü thung üngta hing haile tyng vi ai. 47Hini angthang lä Mesia üng aenae hai-a pre qütä awng saite khimi na tea thui ai. Ae-ui saite khimi na tea lä Säthaw ma hunghö bälawi pa vi ai. Äni ce lä hini angthang tea Jerusalem märü üng hai aetawng kha thui ö vi ai. 48Nang ce lä honi angxynlyng na phüng nung khe saite na vi. Tudylä hini phüng nang ce lä pre angxynlyng üng khimi ce tea thui hethang kae te vi. 49Üngai ma mätaw he aedo saite Muilaw Käcai bung nang ce tea kai mätaw ai mang. Tungaila Säthaw üng haidae nang ce dang y rytä lä hini Jerusalem märü-a aering ö re ba” näpa.
Isu bung Känipre-a Säthaw ma nähai pa
Mar 16:19-20; Angtawtha 1:9-11
50Isu lä äkähui na bung Bethani vang teng-a tyng khytä nähai pyng-a äma üng kö hai bäjae kha äni ce tea tähang kähawi py pa vi dy. 51Tukha Isu lä äni ce tea tähang kähawi py te thüng-a Säthaw ma äni bung Känipre mang-a nähaija pa vi dy. Tudylä äkähui na bung Isu ma khaisö pa vi dy. 52Tupyng-a äni ce lä khokhö didü ea äni tea cäphaw pa ö dy. Tukha äni ce lä kawng anghawtho phi te hai ma Jerusalem märü-a vawi haile ö tyng vi dy. 53Tudylä äni ce lä Säthaw üng Ingkäcai thung mang käni qütä awng kha Säthaw tea kawng te lo thui ö jawjaw vi dy.