Johan

JOHAN

tärü saite Angthang Kähawi

Angcü üng älo

Hini Angthang Käkawi lä Isu üng bälung aevaw phi saite angtawtha Johan ma tärü te vi. Hini Angthang Kähawi tea lä A.D. 100 Khösäning y kälang-a tärü te vi. Johan lä Judae khimi na üng awng saite tea mäny khe kha äma ce üng reitae tea tärü leilae te vi. Äni lä Caekäcai Kangrüng tea kähawi-a mäny khü kha äma üng Angthang Kähawi lä Caekäcai Kangrüng üng bäkung kädawng na awng mang-a qa te vi. Johan üng Angthang Kähawi angcü hai Caekäcai Kangrüng angcü üng lo la aetawng khaw te vi. Hini Angthang Kähawi üng mawlang kaedawng lä khimi ce ma Isu Khrista lä Säthaw üng Cäpaw tätang lawng te vi näte yng khü ö hethang vi. Hini cae-u thung-a Khrista äma ma ämi mei näte Angthang Kähawi kälang na qawng-a cungrüky-a aetüng te vi. Hini cae-u üng cangxei he hawi saite lä kaehütä cang y lä Isu Khrista kangkhüng kätü käni-a hing saite üng aeting saite na phüng thui te vi.

Äphüng äkädawiky

Angcü üng älo 1:1-18

Baptismae särae Johan hai Isu üng angcü üng äkähui na 1:19-51

Isu Khrista üng mipui thung-a kälu käsawng sa saite 2:1-12:50

Jerusalem märü hai äteng äpa-a Isu Khrista üng käni säritä na 13:1-19:42

Isu Khrista üng dü saite thung üng aetha haile saite hai ämaw aetüng saite 20:1-31

Honi pyng-a qengtä Kalile khö-a ämaw aetüng haile saite 21:1-25

Hing saite älo

¹Angcü-a ma älo awng. Honi älo lä Säthaw hai mangtä awng te vi. Honi älo la Säthaw äma vi dy. ²Älo lä angcü-a Säthaw hai mangtä awng vi. ³Pä-ai lä älo hai-a äte angxynlyng na bung sa. Pä-ai lä äni hai y käla äte haetä lä sa te awng y. ⁴Sa saite angxynlyng na lä älo hai-a hing te dang. Honi hing saite lä khimi ce tähang kaevang vi. ⁵Honi kaevang lä käving thung-a aevang ea käving ma lä honi kaevang bung manila bädü haw y vi.

⁶Säthaw lä Baptismae Johan näsaite bung mätaw pa dy. ⁷Äni lä khimi ce tea kaevang phüng ätete lo thui hethang ly te vi. Khimi angxynlyng na thai kha yng hethang tähang ly te vi. ⁸Johan lä kaevang y. Kaevang phüng ätete lo thui hethang ly te kae. ⁹Kaevang tätang lä älawngpre-a ly kha khimi angxynlyng na qawng-a aevang dy.

¹⁰Äni lä älawng-a awng kha Pä-ai lä älawng bung äni hai-a sa te vi. Tungaila älawng khimi na lä äni bung mäny y. ¹¹Äni lä äma üng khö-a ly ea la äma khö üng khimi na ma lä mäkung pa y. ¹²Tungaila khimi phütä na lä äni bung mäkung kha äni tea yng ö dy. Äni ce bung Säthaw üng caw nade na-a aelawng hai pa dy. ¹³Honi nade na lä äthi ängang üng kängai-a aepeng te y. Khimi nawngmäcaw üng aely kängai kätyng aepeng te na y. Tukha Säthaw üng kängai-a aepeng te na vi.

¹⁴Älo lä khimi-a aelawng kha kai ce tea bälung aevaw te hai Säthaw üng bälung kähawi mitang khü-a mätü ea mä-ai hai mangtä awng. Kai ce lä äni üng phung-ang nung ö dy. Hini phung-ang lä Pä-ai Säthaw ma Cäpaw lawngtä xyng tea py saite phung-ang vi.

¹⁵Baptismae Johan ma äni üng phüng thui te la “Äni lä kai aepeng y te kälang-a awng pyng te phüng-a kai qawng-a lengky vi näkha thui rüng pa saite lä äni dy” näkha ätüng käleng hai-a a pa te vi dy.

¹⁶Äni mä-ai angxynlyng na tea bälung aevaw kha tähang kähawi py jawjaw vi dy. ¹⁷Säthaw lä Mosi te mang hai-a Ubädi lo py kha Säthaw üng bälung kähawi hai mitang khü lä Isu Khrista hai-a tyng dy. ¹⁸Ämi la Säthaw bung nung vai te y. Tungaila Pä-ai üng äteng-a awng saite Äcäpaw lawngtä xyng ma Säthaw bung khimi ce tea mäny hai pa te vi.

Baptismae Johan ma thui saite Isu üng phüng

Mat 3:1-12; Mar 1:1-8; Luk 3:1-18

¹⁹Jerusalem märü-a awng saite Judae mätawngky na ma lä mäthykung hai Levi na bung Baptismae Johan tea mätaw kha “Nang lä ämi mei” näkha düng hai pa.1:19 Levi na lä Isrelae khi thung üng levi ceng haetä vi. Äni ce lä Säthaw Ingkäcai kälu säbawng saite na vi.

²⁰Tukha Johan ma “Kai lä Mesia y lyng” näkha cüngpra-a thui pa.

²¹Äni ce ma “Nang lä ämi mei. Elijae mei” näkha düng pa be dy.

Tukha Johan ma “Kai lä Elijae y lyng” näkha näpa.

Äni ce ma tudylä “Nang lä buisaw mei” näkha düng pa ea,

“Kai lä buisaw la y lyng” näkha mäthang pa dy.

²²Tukha äni ce ma “Nang lä ämi mei.” Kai ce bung mätaw saite tea thui haile hethang ngai vi. Nang ma üng phüng ätemakä thui te mei näkha düng pa.

²³Johan ma lä buisaw Isaia thui te kätyng mäthang pa.

Kai lä daithung kärang-a a saite lawngtä üng ätüng vi.

“Areng üng lolang mäcai pa ö” näkha thui te kung lä kai dy.

²⁴Johan tea mätaw saite phütä Pharisai na ma lä, ²⁵“Nang lä Mesia la y vi, Elijae la y vi, buisaw la y vi nädylä ätephüng-a baptismae py te mei” näkha düng pa.

²⁶Baptismae Johan ma “Kai lä tui hai baptismae py dy. Nang ce thung-a nang ma ce mäny y saite lawngtä awng vi. ²⁷Honi lawngtä lä kai üng leithung-a tyng kha kai lä äni üng kho painai rui sö hethang mäteng ma aeteng y” näpa.

²⁸Baptismae Johan ma baptismae py saite Jordan tävaw käni käse mang-a awng saite Bethani vang-a hini kätyng pharisai na Johan tea düng pa te vi.

Säthaw üng beram caw

²⁹Khawngdang mang üng käni-a Isu lä äni te mang-a ly te nung kha Johan ma “Älawng khimi ce üng hunghö la pa saite Säthaw üng beram caw tea kheng ö e. ³⁰‘Kai aepeng y te kälang-a ma awng pyng te phüng-a kai qawng-a lengky saite lä kai üng leithung-a tyng vi ai rawng’ näkha jangni-a thui rüng pa saite lä äni dy” näpa. ³¹Kai äni bung mae y. Tungaila Isrelae khimi na äni bung mäny hethang tähang-a kai lä khimi ce tea tui hai baptismae py pa hethang ly te vi näpa.

³²Tupyng-a Baptismae Johan ma “Känipre mang üng Muilaw Käcai lä bähö kätyng aeja käthu ea äni qawng-a cu te kai lä nung vi dy. ³³Kai la äni bung mae y. Tungaila tui hai baptismae py he mätaw saite Säthaw lä kai tea Muilaw Käcai aeja käthu kha khimi lawngtä üng qawng-a cu te lä nung ai mang. Äni lä Muilaw Käcai hai baptismae py ai” näkha thui pa. ³⁴Hokä thui te kätyng kai lä nung te vi. Äni lä Säthaw üng Cäpaw vi näte kai lä thui te vi.

Angcü üng Isu üng äkähui na

³⁵Khawngdang mang üng käni-a Baptismae Johan lä äkähui lawng netä hai mangtä honi mityng-a aedaw kha awng dy. ³⁶Tukha Isu aeke te nung ea “Kheng kae-e, Säthaw üng beram caw ho” näkha näpa.

³⁷Äkähui lawng netä la honi lo thai ea Isu leithung hui pa hawi dy.

³⁸Tukha Isu lä aehawi kha änini hui hawi te nung ea “Nang ni lä äte ngai hawi te mei” näkha düng pa. Änini ma “Rabi ä, nang lä äte ma-a awng te vi mei” näkha düng hawi pa dy. Rabi näsaite älo lä särae näte vi.

³⁹Isu ma “Ly kha kheng hawi e” näpa. Honi kätü lä kädüng naeri bälitä-a vi. Änini lä hui kha Isu awng saite mityng nung ea äni hai mangtä khöving te khytä awng hawi dy.

⁴⁰Baptismae Johan üng älo thai ea Isu leithung hui saite lawng netä thung-a lawngtä lä Simon Peterae üng kangby Andru vi.

⁴¹Äni la äjä-ai Simon bung mäqang mang kha “Mesia hai kai ni aeting vi dy” näkha näpa. (Mesia näsaite älo lä “Khrista” näte vi.) ⁴²Tupyng-a äni lä Simon bung Isu tea nähai pa.

Isu lä Simon tea kheng ea “Nang ämüng lä Johan üng cäpaw Simon. Tungaila ‘Kepha’ näkha ämüng mäthi vi ai” näpa. (Kepha lä Peterae näte dy.)1:42 Kepha lä “Peterae” näte vi. Peterae näsaite älo lä kälung käleng näte vi.

Isu Philip ni Nathanela bung kähyng pa

⁴³Kädang mang üng känitä-a lä Isu lä Kalile khö-a ly hethang bälung aedawng te vi. Philip hai aeting ea “Kai leithung hui” näpa. ⁴⁴Philip la Andru ni Peterae kätyng Besaida märü üng khimi by vi. ⁴⁵Philip la Nathanela hai aeting ea “Mosi üng Ubädi cae-u thung-a hai buisaw na ma la tärü kha thui rüng saite lawngtä bung kai ce lä aeting vi dy. Äni lä Nazare märü üng ly saite Josefae üng cäpaw Isu vi” näpa.

⁴⁶Nathanela ma “Nazare märü üng ätete kähawi tho haw ai ae” näkha düng pa. Philip ma “Ly kha kheng by” näpa.

⁴⁷Isu lä Nathanela ly te nung ea “Kaeling sa vai y saite Isrelae khimi mitang vi” näpa.

⁴⁸Nathanela ma “Makä sa kha nang lä kai bung mäny te vi mei” näkha düng pa.

Isu ma “Philip nang bung ka y te kälang-a thaidö kung täkui-a awng ea ma kai lä nang bung nung te vi dy” näpa.

⁴⁹Nathanela ma “Rabi ä, nang lä Säthaw üng Cäpaw, Isrelae na üng Sanphrang vi” näkha näpa.

⁵⁰Isu ma “Thaidö kung täkui-a awng ea nang bung kai nung vi näte thui te phüng-a nang lä yng te mei. Hini qawng-a cang y cangxei saite na nang lä nung vi ai rawng” näpa. ⁵¹Isu ma äni ce tea “Tängai ba. Känipre aepä-awng kha Kai, Khimi üng Cäpaw qawng-a Säthaw üng angtawtha ma aerung paw te nung ö vi ai” näpa.

Kana märü üng aepawng te pawi

¹Käni thungtä-a Kalile khö Kana märü-a aepawng pawi awng. Ho-a Isu üng änä-awi Maeri la awng by. ²Honi aepawng pawi-a Isu hai äkähui na tea ly hethang ka pa by. ³Cäpje thai tui byng ea Isu üng änä-awi ma “Äni ce lä Cäpje tui byng vi dy” näkha Isu tea thui pa.

⁴Isu ma “Änang ä, ätephüng-a kai tea hini phüng thui te mei. Kai kälu sa saite kätü lä tyng y rawng” näpa.

⁵Änä-awi ma mawsawng na tea “Isu ma thui te kätyng sa pa ö” näkha näpa dy.

⁶Honi mityng-a kälung hai sa saite bärawi thai tärutä awng. Kälung bärawi thaitä thung-a lä tuibung kuisy, ruithungtä aevai vi. Judae na üng reitae kätyng caiping hai hethang mäsung te vi. ⁷Isu ma mawsawng na tea “Hini bärawi thung-a tui kawipy-a mäkawi ö” näkha näpa. Tukha äni ce ma bärawi tärai kawi te khytä tui mäkawi py pa ö dy. ⁸Tupyng-a Isu ma “Hini bärawi thung üng tui büde kha pawi kung tea nähai pa” näpa. Tukha mawsawng na lä thui te kätyng sa pa ö dy. ⁹Pawi kung ma honi Cäpje tui-a aelawng te tui tea mäteng dy. Mawsawng na lä Cäpje tui mani üng dang te mei näte mäny ngaila pawi kung lä mäny y. Tukha pawi kung ma nawngpui käla kung tea kähyng pa dy. ¹⁰Äni ma “Khimi angxynlyng la Cäpje tui kähawiky ni angvüng tea angcü-a nei hai mang te vi. Khimi ce nei te mängae pyng-a kangkhüng-a ni Cäpje tui kähawi y ni nei hai te vi. Nang lä Cäpje tui kähawiky vaihi ni mätho lae dai vi lä” näpa.

¹¹Isu lä angcü-a cangxei te kamarae lä Kalile khö Kana märü-a sa te vi. Äma üng phung-ang mätü pa dy. Äkähui na la Isu tea yng ö dy.

¹²Tupyng-a Isu lä änä-awi kangby, äkähui na hai mangtä Kapernawm märü-a ly ö dy. Ho-a äni ce käni rui käqae-a awng ö y.

Säthaw üng Ingkäcai tea mäcai ping pa

Mat 21:12-13; Mar 11:15-17; Luk 19:45-46

¹³Judae na üng Cäqengja te Pawi aenai ea Isu lä Jerusalem märü-a ly dy. ¹⁴Isu lä Säthaw üng Ingkäcai baesung thung-a raebawi, beram, bähö jaw te hai tangkae aeleng saite tawlae na kung teng-a aety kha awng te nung dy. ¹⁵Ruinawng hai ry nae sa kha beram hai raebawi na angxynlyng Säthaw üng Ingkäcai baesung thung üng mätho pa dy. Tangkae aeleng saite khung bung nui pa kha phawisae na la cawngpe xhixae pa vi dy. ¹⁶Isu ma bähö jaw saite na tea “Hini mätho ö king la. Kai Pä-ai üng Ingkäcai-a vyngjaw nae mityng sa ö hang” näkha näpa. ¹⁷Äkähui na lä Caekäcai ping thung-a tärü saite aedawng va ö dy. “Säthaw üng Ingkäcai tea bälung aevaw te lä kai üng bälung tea maikang te kätyng kae dy” näpa.

¹⁸Judae mätawngky na ma “Säthaw ma nang tea hini na sa he aenae py te kai ce mäny hethang kamarae mätü” näkha näpa.

¹⁹Isu ma “Hini Säthaw üng Ingkäcai bung aephei ö. Kai ma käni thungtä-a sa haile pa ai mang” näpa.

²⁰Judae na ma “Hini Säthaw üng Ingkäcai sa te lä säning rui bäli tärutä qae te vi. Nang lä käni thungtä hai ma cyng raw haw vi ai mei” näkha düng pa.

²¹Isu ma Säthaw üng Ingkäcai phüng thui te la äma üng ätabung tea thui te vi. ²²Säthaw lä Isu bung kädü thung üng mätha pyng ea äkähui na lä Isu lo sämai haile ö vi. Tukha äni ce lä Caekäcai ping hai Isu üng älo tea yng ö dy.

Khimi ce üng phüng Isu lä mäny pa

²³Cäqengja te pawi kätü-a Isu lä Jerusalem märü-a awng. Äni ma sa te kamarae na khimipui na la nung te phüng-a, Isu tea yng ö vi dy. ²⁴Tungaila Isu lä khimi ce üng bälung mäny king te phüng-a äni ce tea ae-y pa te y vi. ²⁵Isu lä khimi ce üng phüng mäny king te phüng-a ämi lawngtä lä khimi phüng thui hethang aely ngai te y.

Isu hai Nikodimae

¹Pharisai na thung-a Nikodimae näsaite Judae khimi mätawngky lawngtä awng. ²Äni la düngtä-a Isu tea ly kha “Särae ä, nang lä Säthaw ma mätaw saite särae lawngtä vi näte kai ce lä mäny dy. Säthaw lä khimi lawngtä hai mangtä awng y dylä, nang kätyng-a ämi la cangxei saite sa haw y lyng” näkha näpa.

³Isu ma “Tängai ba, äbaeni aepeng haile y saite khimi lä Säthaw ma Sanphrang sa saite nung haw y lyng” näpa.

⁴Nikodimae ma “Säning leng saite lä ätemakä sa kha aepeng haile haw ai mei. Änä-awi jo thung-a kung haile ea äbaeni aepeng haw y dy” näkha näpa.

⁵Tukha Isu ma “Tängai khü ba. Khimi lawngtä lä tui hai Muilaw Käcai hai-a aepeng y dylä, Säthaw üng pre thung-a qa haw y lyng. ⁶Khimi üng änä-awi pä-ai hai-a khimi ätabung dang. Säthaw üng Muilaw Käcai hai-a muilaw hing saite dang. ⁷Äbaeni aepeng haile hethang kae näkha kai thui te tea lä cangxei y hang. ⁸Aeli lä äma ngai saite mang-a tho te vi. Aeli tho te tüng thai ngaila mani mityng üng tho te mei näte thui haw y. Muilaw Käcai hai-a hing saite dang te na lä hini kätyng kae vi” näpa.

⁹Nikodima ma “Hini lä ätemakä sa kha awng haw ai mei” näkha düng pa.

¹⁰Tukha Isu ma “Nang lä Isrelae khimi na üng särae lawngtä be. Hini phüng thaikaw y rae vi mei. ¹¹Tängai khü ba. Mä-ai lä mä-ai ma mäny khe saite phüng thui vävawi te vi. Nung saite phüng thui te kae. Tungaila kai ce üng thui saite nang ce lä tängai he ngai ö y vi. ¹²Hini älawng üng phüng kai thui ea nang ce lä yng ö y. Känipre üng phüng kai ma thui dylä nang ce lä yng ö y lyng. ¹³Ämi lawngtä lä Känipre-a paw vai te y. Känipre üng cäqa saite Khimi üng Cäpaw lawngtä ni Känipre-a paw vai te kae.

¹⁴“Mosi ma daithung kärang-a süng hai sa saite thing qawng-a bärui mäkhing kha bädaw pa. Hini kätyng Khimi üng Cäpaw bung lä bädaw by ai. ¹⁵Tukätephüng-a Khimi üng Cäpaw tea yng saite khimi angxynlyng la dungtäsa hing te dang vi. ¹⁶Säthaw lä älawng khimi ce tea bälung aevaw te phüng-a Äcäpaw lawngtä xyng bung py vi. Äcäpaw tea yng saite khimi angxynlyng na lä muilaw dü y käla dungtäsa hing te dang vi. ¹⁷Säthaw lä khimi ce tea dengpy hethang Äcäpaw bung älawng qawng-a mätaw te y. Älawng üng khimi na bung Äcäpaw hai aeqang hethang tähang-a mätaw te kae vi.

¹⁸“Säthaw üng Cäpaw tea yng saite khimi na tea lä Säthaw ma dengpy te awng y. Äcäpaw tea yng y saite khimi na tea lä vaihi ma Säthaw lä dengpy te vi dy. Ätephüng-a mei nädylä Säthaw üng Cäpaw lawngtä xyng tea yng pa y te phüng-a vi. ¹⁹Säthaw üng dengpy te lä hini dy. Kaevang lä älawngpre-a tyng ngaila khimi ce lä hunghö sa te phüng-a kaevang qawng käving tea bälung aevaw ö ky te vi. ²⁰Hunghö sa saite khimi angxynlyng na lä kaevang tea esäre ö te vi. Äma ce üng hawi y sa te na aetüng y hethang äni ce lä kaevang teng-a ly he ngai y. ²¹Tungaila mitang khü-a sa saite khimi na lä äma ce üng sa saite na Säthaw hai aesui kha mätü hethang kaevang teng-a ly ö dy.”

Isu ni Johan

²²Tupyng-a Isu lä äkähui na hai mangtä Judae khö mang-a ly ö dy. Honi mityng-a äkähui na hai mangtä awng kha khimi ce tea baptismae py dy. ²³Baptismae Johan lä Salim märü teng-a tui awng mang saite Aenon mityng-a baptismae py pa dy. Khimi ce lä awng mang-a ly ö jawjaw kha baptismae la ö dy. ²⁴(Honi kätü-a Baptismae Johan lä thawng thung-a awng y rawng.)

²⁵Johan üng äkähui phütä na lä reitae kätyng caiping saite phüng Judae khimi lawngtä hai ae-e ö dy. ²⁶Baptismae Johan üng äkähui na lä äni tea ly kha “Särae ä, Jordan tävaw rei-a nang hai mangtä awng saite khimi ma nang ma thui saite lawngtä tea äni lä vaihi baptismae py dy. Äni tea khimi angxynlyng na lä ly dy” näkha thui pa.

²⁷Baptismae Johan ma “Säthaw ma sa te y dylä, khimi ce tea äte la aecyng y lyng. ²⁸Kai lä Mesia y vi. Äni üng maw-a mätaw saite lawngtä kae. Kai ma thui te nang ce thai kha thui haw te kae. ²⁹Nawngmädi anglaw bung dang saite lä nawngpaw vi dy. Nawngpaw üng rawijae lä äni äteng-a awng kha äni üng ätüng tängai ea anghawtho te vi. Hini kätyng kai üng kawng te lä kawi dy. ³⁰Äni lä aely lengky kha kai lä leithung mang-a aenaw vi ai.

Känipre üng cäqa saite Isu

³¹“Känipre mang üng cäqa saite Kung lä khimi angxynlyng qawng-a lengky. Älawng qawng-a aepeng saite lä älawng üng khimi kha älawng üng phüng thui te vi. Tungaila Känipre üng cäqa saite Khimi lä äte angxynlyng qawng-a aesangky. ³²Äni lä äma nung te hai thai saite phüng thui ngaila äni üng angthang tea ämi la yng pa ö y. ³³Tungaila äni üng angthang yng saite khimi na ma lä ‘Säthaw lä mitang khü vi’ näkha thui te vi. ³⁴Säthaw ma mätaw saite lawngtä lä Säthaw üng älo angthang thui vi. Säthaw ma äni tea Muilaw Käcai käkawi-a py pa te vi. ³⁵Pä-ai lä Äcäpaw tea bälung aevaw kha äte angxynlyng na äni kö thung-a py pa dy. ³⁶Äcäpaw tea yng te na la dungtäsa hing te dang ö dy. Äcäpaw tea yng y saite na lä dungtä hing te dang ö y lyng. Äni ce tea Säthaw ma dengpy jawjaw ö vi ai.”

Isu ni Samari nawngmädi

^1-3Isu lä Baptismae Johan qawng-a khimipui na bung äkähui-a bälawng kha baptismae py te phüng Pharisai na ma thai ö dy. Tungaila Isu lä khimi ce tea baptismae py tätang te y. Äkähui na ma ni baptismae py te kae. Khimi ce ma aeqa te lo Isu lä thai ea Judae khö üng tho kha Kalile khö-a vawi haile tyng vi dy. ⁴Isu lä Kalile khö-a ly hethang tähang-a Samari khö cäqeng kha ly he kae te vi.

⁵Isu lä Samari khö üng Sukha märü-a tyng dy. Hini märü lä kangsi Jaeko ma cäpaw Josefae tähang py saite älawng mityng teng-a awng te vi. ⁶Honi mityng-a Jaeko üng tuikang awng. Isu lä khölawng tho te üng mäsae phi kha tuikang teng-a aety kha awng. Honi kätü lä käni anghung te kätü tingtang-a vi.

⁷Samari nawngmädi lä tuidu hethang tuikang-a ly. Isu ma nawngmädi tea “Kai tähang tui py jo e” näkha mäkai pa. ⁸Äkähui na lä käcakänei na rang hethang märü thung-a ly pa ö vi.

⁹Samari nawngmädi ma “Kai lä Samari nawngmädi kae vi. Nang lä Judae khimi be. Nang lä äte makäte phüng-a kai te üng tui nei hethang mäkai te mei” näkha düng pa. (Judae na lä Samari khimi na hai aede hethang dang y.)

¹⁰Isu ma “Säthaw ma py saite lasawng bung nang mäny y. Nang tea tui nei hethang mäkai te kai lä ämi mei näte nang mäny y. Hini na mäny dylä kai tea mäkai by vi ai. Kai ma nang tähang hing saite tui py ai” näpa.

¹¹Nawngmädi ma “Särae ä, tuikang la thu phi. Nang tea tuidu hethang tuibung la awng te y. Äte ma üng nang lä hing saite tui dang ai mei. ¹²Nang lä kai ce üng kangsi Jaeko qawng-a lengky vi nang mei. Jaeko ma hini tuikang tea kai ce tähang py te vi. Äma hai äma üng cäpaw cänung na hai beram raebawi na la hini tuikang üng tui nei ö te by” näpa.

¹³Isu ma “Hini tui nei saite hengtä lä tui aehe haile ö vi ai. ¹⁴Tungaila kai ma py saite tui nei te hengtä lä manila tui aehe he y dy. Hini tui lä äni üng äthung-a tui cäpring-a aelawng kha dungtäsa hing saite dang hai ai” näpa.

¹⁵Nawngmädi ma Isu tea “Särae ä, kai tähang honi tui py jo. Tukä dylä kai lä manila tui aehe y ai dy. Hini mityng-a tuidu hethang lä ly haile he ngai y ai dy” näpa.

¹⁶Isu ma “Nang nawngpaw bung kähyng kha hini mityng-a ly haile” näpa.

¹⁷Nawngmädi ma “Kai la nawngpaw awng y” näpa.

Isu ma “Nawngpaw awng y näte la tätang khaw-a thui te vi. ¹⁸Nang lä nawngpaw lawng bangtä awng vai dy. Vaihi nang hai mangtä awng saite nawngmäcaw lä nang üng nawngpaw y. Nang lä kai tea mitang khü-a thui te vi” näpa.

¹⁹Nawngmädi ma “Särae ä, nang lä buisaw näte kai lä mäny dy. ²⁰Kai ce üng kangsi na lä hini me anghung-a Säthaw tea cäphaw ö vävawi te vi. Tungaila nang ce Judae khimi na lä Jerusalem märü-a Säthaw tea cäphaw hethang kae nä ö te vi be” näkha thui pa.

²¹Isu ma “Änang nawngmädi ä, kai üng thui te lo yng ba. Khimi ce lä hini anghung hai Jerusalem märü-a ly y käla ma mä-ai üng Pä-ai Säthaw tea cäphaw saite kätü lä tyng ai dy. ²²Nang ce Samari khimi na lä nang ma ce cäphaw saite Säthaw bung mäny ö y. Kai ce Judae khimi na lä kai ma ce aesi saite Säthaw bung mäny ö te vi. Ätephüng-a mei nädylä aeqang saite lä Judae khimi na te mang hai ly te vi. ²³Tungaila mä-ai üng Pä-ai Säthaw tea tätang khaw-a cäphaw saite khimi na lä mitang khü te hai, Muilaw Käcai hai cäphaw hethang kätü lä tyng vi ai rawng. Honi kätü lä vaihi tyng te vi dy. Hini kätyng äni tea cäphaw hethang Pä-ai üng kängai vi. ²⁴Säthaw lä Muilaw vi. Säthaw tea cäphaw saite na lä Muilaw Käcai hai mitang khü te hai cäphaw hethang kae” näkha thui vi.

²⁵Nawngmädi ma “Mesia ly ai näte kai mäny by. Hini Mesia ly te kätü-a, mä-ai tea äte angxynlyng na phüng thui mäcai pa vi ai” näpa.

²⁶Tukha Isu ma “Vaihi nang hai älo aepe saite Kai lä Khrista dy” näpa.

²⁷Honi kätü-a Isu äkähui na lä märü üng tyng haile ö dy. Äni ce lä Isu ma nawngmädi hai älo aepe te nung ea cangxei ö vi. Tungaila äni tea “Äte ngai te mei. Y dylä ätephüng-a hini nawngmädi hai älo aepe te mei” näte ämi ma la düng vawng pa y.

²⁸Tukha nawngmädi lä awikaw khaisö ea märü thung-a vawi haile dy. ²⁹Äni ma “ly ö kai üng sa saite phüng angxynlyng na thui saite khimi lawngtä tea kheng ö e. Äni lä Mesia vi nang müng” näkha khimi ce tea thui pa. ³⁰Tukha khimi ce lä märü thung üng tho kha Isu tea ly ö dy.

³¹Hini kätü-a äkähui na lä “Särae ä, käcakänei na ca jo re” näkha näpa.

³²Tungaila Isu ma “Nang ce mäny y saite käcakänei kai tea awng” näpa.

³³Tukha äkähui na lä “Äni tähang khimi lawngtä ma käcakänei tha pa vi dy mei” näkha äma ce tingtawi aedüng ö dy.

³⁴Isu ma “Kai bung mätaw saite Kung üng aely ngai te kätyng sa kha äni ma kai tea py saite kälu khüng rung khytä sa te lä kai üng käcakänei kae dy. ³⁵‘Vaihi üng hai law bälitä qae ea caw ae te kätü tyng ai dy’ näte nang ce lä thui ö. Nang ce tea kai thui te lä ämi bäli kha lai na tea kheng ö lawi. Lai-a caw ae hethang caw müng vi dy. ³⁶Caw ae saite na lä vaihi kälu vang dang kha dungtäsa hing saite tähang äthai na mätung ö dy. Tu saite hai ae saite khimi na lä mangtä anghawtho ö ai. ³⁷Tukha ‘lawngtä lä tu kha lawngtä lä ae ai’ näkha thui saite lä tätang khaw vi. ³⁸Nang ce ma tu y saite lai üng caw ae hethang kai lä mätaw dy. Äkälang khimi na lä lai kälu mäsae rung khytä sa ö. Nang ce la äni ce üng kälu thung-a sa te jungtä khung kha ae by dylä caw dang ö ai” näkha thui pa.

³⁹Samari nawngmädi ma “Äni lä kai sa saite phüng angxynlyng na thui haile tyng vi” näkha thui te phüng-a honi märü üng khimi kä-awng mang na lä Isu tea yng ö dy. ⁴⁰Tukha Samari khimi na lä Isu tea tyng ea äma ce hai mangtä awng hethang aesi aebai pa ö. Isu lä äni ce hai käni netä awng pa dy.

⁴¹Tukha Isu üng älo phüng-a yng saite na awng mang rae vi dy. ⁴²Äni ce ma Samari nawngmädi tea “Vaihi kai ce Isu tea yng te lä nang üng älo phüng-a la y. Isu üng älo kai ce ma thai khe te phüng-a kae. Hini lawngtä lä älawngpre üng Aeqangkung tätang näte kai ce lä mäny dy” näpa.

Mätawngky üng cäpaw naw saite tea hawi sa pa

⁴³Käni netä pyng-a Isu lä Samari khö üng tho kha Kalile khö-a ly dy. ⁴⁴Isu ma “Buisaw lä äma awng saite märü-a mimai dang y” näkha thui pa. ⁴⁵Isu lä Kalile khö-a tyng ea Kalile khimi na ma Isu tea lady pa ö dy. Ätephüng-a mei nädylä äni ce lä Cäqengja te pawi tähang Jerusalem märü-a ly kha Isu ma sa saite na nung ö te phüng-a vi.

⁴⁶Isu lä tui tea Cäpje tui-a aelawng hai kha Kalile khö Kana märü-a äbaeni ly be haile tyng dy. Honi märü-a mätawngky lawngtä lä awng. Äni üng cäpaw lä Kapernawm märü-a kawngang naw kha awng te vi. ⁴⁷Honi mätawngky lä Judae khö üng Kalile khö-a Isu tyng te angthang thai dylä dü aetawng saite äma üng cäpaw bung ly kha naw te hawi sa pa hethang äni lä Isu tea aesi aebai pa dy. ⁴⁸Isu ma “Nang ce lä cangxei te na nung y dylä yng ö y lyng” näpa.

⁴⁹Mätawngky ma “Särae ä, kai üng cäpaw lä dü y kü ea tyng rung khytä ly pa kü jo re” näpa.

⁵⁰Isu ma “Vawi lawi, nang üng cäpaw lä naw te hawi vi dy” näkha näpa.

Äni lä Isu üng thui te älo tea yng kha ing-a vawi haile dy. ⁵¹Äma lolang-a ly te kätü-a äma üng mawsawng na hai aeting pa dy. Äni tea “Nang üng cäpaw naw te lä hawi vi dy” näkha thui pa.

⁵²Äma lä “Kai cäpaw lä mata kätü-a naw hawi te mei” näkha düng ea lä mawsawng na ma “Jangdüng naeritä-a käbi qa vi” näkha näpa. ⁵³Tukha äpä-ai lä honi kätü-a Isu ma “Nang üng cäpaw naw hawi dy” näkha thui te kätü tea aedawng haile dy. Tukätephüng-a äni hai äni ce ingthung angxynlyng lä Isu tea yng ö vi dy.

⁵⁴Hini cangxei saite kamarae lä Isu ma Judae khö üng hai Kalile khö-a tyng pyng-a sa saite äbaeni kamarae na vi.

Isu ma tuikang teng-a khimi lawngtä bung naw te hawi sa pa

¹Tupyng-a Judae na üng pawi awng saite Jerusalem märü-a Isu lä ly by. ²Jerusalem märü üng Beram kätho teng-a tuikang haetä awng. Tuikang tea Hebärai lo hai-a Besaida näkha näpa. Honi tuikang teng-a bakhung bangawtä awng. ³Honi bakhung täkui-a lä naw saite na awng mang vi. Mikangjö, langly haw y saite na, kökho kädü na aesawng kha awng ö mang pa vi. ⁴Säthaw üng angtawtha lä tuikang-a qeng qangtä cäqa kha tui bung aehüng hai pa vi. Äni ce lä honi tui aehüng saite tea aering ö te vi. Hokä tui aehüng te thüng-a tuikang thung-a aerung mang te khimi lä naw te hawi pa te vi.5:4 Hini lä phütä Caekäcai thung-a awng y vi.⁵Honi mityng-a säning rui thung täjaetä naw mätang saite khimi lawngtä la tuikang teng-a awng. ⁶Äni aesawng te Isu ma nung dylä äni naw te qae bärai te mäny kha “Nang lä naw te hawi hethang ngai mei” näkha düng pa.

⁷Tukha äni ma “Särae ä, tui aehüng ea kai bung tuikang thung-a nähai pa hethang ämi la awng y. Tuikang thung-a kai ma aerung he sa ea kälang lawngtä ma kai üng maw-a aerung xei te vi” näkha näpa.

⁸Tukha Isu ma “Aetha, nang üng i nae la kha aeke lawi cü” näpa. ⁹Äni la qengtäma naw te hawi praw kha äma üng i nae la ea aeke pa dy.

Honi käni la Aehae te Käni vi. ¹⁰Tukha Judae mätawngky na ma naw saw hawi saite khimi tea “Vaini lä Aehae te Käni vi. Nang üng i nae bung nähai hethang lä Aehae te Käni üng Ubädi hai aebäla y” näkha näpa.

¹¹Tukha kai bung naw te hawi sa pa saite khimi ma “Nang üng i nae la ea aeke lawi” näkha nä vi.

¹²Äni ce ma “Nang tea i nae la kha aeke lawi näsaite lä ämi vi nang mei” näkha düng pa.

¹³Naw hawi saite khimi lä äma tea naw hawi sa saite Kung lä ämi mei näte mäny pa y. Ätephüng-a mei nädylä Isu lä khimipui säla mang kangru-a ly ja pa te vi.

¹⁴Tupyng-a Isu ma äni bung Säthaw üng Ingkäcai-a aeting ea “Nang lä vaihi naw te hawi vi dy. Hunghö sa haile vi hang lawi ba. Tukä y dylä nang tea lä hini qawng-a cang y mätang te tyng ai” näkha näpa.

¹⁵Naw hawi saite khimi ma Judae mätawngky na tea ly kha “Kai bung naw hawi sa pa te lä Isu vi” näkha thui pa. ¹⁶Tupyng-a Aehae te Käni-a khimi känaw na hawi sa te phüng-a Judae mätawngky ma Isu tea sakälö khü pa dy. ¹⁷Isu ma “Kai üng Pä-ai lä kälu sa jawjaw vi. Honi kätyng-a kai la kälu sa jawjaw hethang kae” näkha äni ce tea thui pa.

¹⁸Hini kätyng-a thui te hai Aehae te Käni tea täphra te cang y Säthaw tea la äma üng Pä-ai näkha kähyng be vi rawng. Tukä sa te hai-a äma tea la Säthaw hai mangtä khai te phüng-a Judae mätawngky na lä Isu bung bädü hethang aeceng ö vi dy.

Cäpaw üng särilo

¹⁹Isu ma Judae mätawngky na tea “Tängai ö. Kai Äcäpaw, lä kai ma üng kängai kätyng-a äte haetä la sa haw y. Pä-ai sa saite nung kha hini kätyng sa te kae. Pä-ai sa saite na ni kai, Äcäpaw, la sa te kae. ²⁰Pä-ai lä Äcäpaw tea bälung aevaw te phüng-a äma sa saite na Kai Äcäpaw tea mätü vi. Hini phüng-a lengky te na sa hethang Pä-ai lä Äcäpaw tea mätü be vi ai cä-üng nang ce lä cangxei ö ai mang. ²¹Pä-ai lä khimi kädü na bung mäning haile te kätyng-a Kai, Äcäpaw, la kai ma aely ngai saite na bung hing te py te by vi. ²²Pä-ai lä ämi tea la tärae cei te awng y. Tärae cei hethang aenae angxynlyng na lä Kai, Äcäpaw, tea py pa vi dy. ²³Khimi ce lä Pä-ai tea tämö khai te kätyng Äcäpaw tea la tämö khai hethang kae. Äcäpaw tea tämö khai y te na lä Äcäpaw bung mätaw saite Pä-ai tea tämö khai y saite na kae dy.

²⁴“Tängai ö, nang ce tea kai ma thui saite lo thai kha kai bung mätaw saite Kung tea yng te khimi ce lä dungtäsa hing te dang vi. Säthaw ma äni tea dengpy y käla ma kädü thung üng hing te mang-a aekae hai pa vi dy.

²⁵“Tängai ö, khimi kädü na lä Säthaw üng Cäpaw ätüng thai saite kätü lä tyng vi ai. Honi kätü lä vaihi ma tyng te vi dy. Kai, Äcäpaw, üng ätüng thai saite khimi na lä hing haile ö vi ai. ²⁶Pä-ai tea hing saite äkung awng te kätyng Kai, Äcäpaw, tea la honi hing saite äkung Pä-ai ma py te vi dy. ²⁷Kai lä Khimi üng Cäpaw te phüng-a Pä-ai lä kai tea tärae cei he aenae py vi dy. ²⁸Hini phüng na nang ce lä cangxei ö y ma. Khimi kädü angxynlyng na lä täprawng mang kai üng ätüng thai te kätü lä tyng vi ai rawng. ²⁹Kähawi-a awng saite na lä aetha kha hing haile ö vi ai. Kähawi-a awng y saite khimi na lä aetha ea Säthaw ma dengpy vi ai.

Isu üng phüng äte te lo na

³⁰“Kai lä kai ma üng aely kängai kätyng äte haetä la sa haw te y. Pä-ai üng älo kätyng-a ni khimi ce tea tärae cei te kae. Kai lä kai ma üng aely kängai kätyng-a bärawi te y vi. Kai bung mätaw saite Pä-ai üng aely ngai te kätyng bärawi te phüng-a kai tea tärae cei te lä aesyng mang.

³¹“Kai lä kai ma üng phüng ätete lo thui dylä kai üng ätete lo lä khimi ce yng he ngai y. ³²Tungaila kai üng phüng äte te lo thui saite lawngtä awng. Äni üng ätete lo lä tüngkhaw vi näte kai lä mäny te vi. ³³Nang ce lä Baptismae Johan tea äkähui na bung mätaw ö vi. Äni lä älo tüngkhaw-a ätete lo thui te vi. ³⁴Khimi ce üng ätete lo na lä kai tähang aely ngai y. Tungaila nang ce aeqang te dang hethang tähang-a hini älo kai thui te kae. ³⁵Baptismae Johan lä aevang saite maibung kätyng vi. Nang ce lä äni üng kaevang-a tänaetä kätü-a anghawtho hethang ngai ö te kae. ³⁶Baptismae Johan üng ätete lo thui te qawng-a lengky saite ätete lo lä kai tea awng. Honi na khüng hai hethang Pä-ai ma kai kö thung-a a saite kälu vi. Kai vaihi sa saite kälu lä kai bung Pä-ai ma mätaw kha mätü te vi dy. ^37-38Kai bung mätaw saite Pä-ai ma lä kai üng phüng thui te vi. Nang ce lä Pä-ai üng ätüng qengtä la thai vai te y vi. Ämaw äcae la nung ö vai te y. Nang ce üng bälung thung-a Säthaw üng älo awng y. Ätephüng-a mei nädylä nang ce üng Pä-ai ma mätaw saite tea yng y te phüng-a vi. ³⁹Caekäcai phai dylä dungtäsa hing te dang ai müng näkha aedawng te hai Caekäcai tea phai kha dawng mäsüng khü ö te vi. Honi Caekäcai lä Kai üng phüng tea thui saite lo kae vi. ⁴⁰Tungaila nang ce lä hing te dang hethang tähang-a kai tea ly he ngai ö y.

⁴¹“Khimi ce ma bälaw saite tea kai lä ngai te y. ⁴²Tungaila nang ce bung kai lä mäny king vi. Nang ce üng bälung thung-a lä Säthaw tea bälung aevaw te awng ö y. ⁴³Kai lä Pä-ai üng ämüng hai tyng ea la nang ce lä kai bung mäkung ö y vi. Khimi kälang ma äma üng ämüng hai ly dylä nang ce lä mäkung ö vi ai. ⁴⁴Nang ce lä lawngtä hai lawngtä tea aebälaw hethang ngai ö te kae vi. Tungaila lawngtä xyng awng te Säthaw üng bälaw te dang hethang lä aethaw aesa ö y. Tudylä nang ce lä ätemakä sa kha kai tea yng haw ö ai mei. ⁴⁵Tungaila nang ce lä Pä-ai üng maw-a käsi thui ai näte aedawng ö y ma hang. Nang ce tea hunghö phüng thui hethang lä nang ce ma ae-y saite Mosi vi. ⁴⁶Mosi lä kai üng phüng tärü te khimi vi. Mosi tea nang ce yng tätang dylä kai tea la yng tätang ö by vi ai. ⁴⁷Tungaila nang ce lä Mosi üng tärü saite lo tea yng ö y dylä ätemakä sa kha kai üng thui saite lo tea yng ö ai mei” näkha näpa.

Nawngmäcaw sang bangtä na bung mäcaw te

Mat 14:13-21; Mar 6:30-44; Luk 9:10-17

¹Isu lä Kalile näsaite Tiberi tuilipui ha mang rei-a aekae dy. ²Naw saite khimi na tea hawi sa te kamarae nung te phüng-a khimipui na lä äni leithung hui ö dy. ³Isu lä me anghung mang-a paw kha äkähui na hai mangtä aety kha awng. ⁴Judae na üng Cäqengja näsaite Pawi lä tyng hethang aenai dy. ⁵Isu ma kheng ea lä khimipui na äma tea ly te nung kha “Äni ce ca hethang käcakänei na mamang-a rang ai mei” näkha Philip tea düng pa. ⁶Hini kätyng düng te lä Philip tea käny he ngai te vi. Isu lä äma makä sa ai mei näte mäny rüng pa vi.

⁷Philip ma “Khimi lawngtä law täjaetä kälu sa te vang6:7 Phawisae pjaetä cungvai netä hai khimi angxynlyng na bung mäcaw hethang aelo he y” näpa.

⁸Äkähui lawngtä Simon Peterae üng kangby Andru ma lä, ⁹“Hi-a nade lawngtä awng. Äni tea täkaw phe bangawtä hai mawi me netä awng vi. Tungaila hikä tangtä awng mang saite khimipui na tähang hini lä aelo haw y lyng” näkha näpa.6:9 Hini täkaw lä kjung caw tangni hai sa saite tea thui te vi.

¹⁰Isu ma “Nawngmäcaw na tea aety hai” näkha näpa. Honi mityng lä paetae awng mang vi. Nawngmäcaw sang bangtä na lä honi paetae qawng-a aety ö dy.

¹¹Tupyng-a Isu lä täkaw la kha aetang pyng-a aety saite khimi na tea bäri hai pa. Mawi lä honi kätyng sa pyng-a khimi ce lä äjo kawi rung khytä ca ö bawi dy. ¹²Äni ce ca te mängae pyng ea Isu ma “Ca kaebang na mäküng haile ö ba. Täpang ö hang” näkha äkähui na tea thui pa. ¹³Tupyng-a äkähui na la mäküng ea lä täkaw phe bangtä hai mawi me netä üng kaebang lä tawng hawlai netä kawipy dang ö vi dy.

¹⁴Isu ma sa saite kamarae na nung te khimi ce la “Äni lä älawngpre-a ly ai näsaite buisaw tätang vi dy” näkha thui ö dy. ¹⁵Isu lä äma tea khimi ce ly kha äma bung aethaw paitae hai Sanphrang bälawng he kae dy näte mäny te phüng-a äma qaitä me anghung-a paw ja vi dy.

Isu tui qawng-a aeke pa

Mat 14:22-33; Mar 6:45-52

¹⁶Kädüng lang mang-a äkähui na lä Kalile tuilipui mang-a ly ö dy. ¹⁷Bälawng qawng-a aedang kha tuilipui ha mang rei Kapernawm märü-a aekae ö dy. Khöving ngaila Isu lä äni ce tea tyng pa te y vi rawng. ¹⁸Honi kätü-a aeli kangcai tho kha tui lä bungba pa vi dy. ¹⁹Äkähui na lä meng thung meng bälitä tyng ea Isu lä tui qawng-a aeke kha äni ce te mang-a ly te nung ö vi. Tukha äni ce lä ri pa ö dy. ²⁰Isu ma “Kai kae ecy. Ri ö hang,” näkha näpa. ²¹Tupyng-a äni ce lä anghawtho te hai ma Isu bung bälawng qawng-a kähyng ö dy. Tukha bälawng la tänaetäma ngai saite mityng-a tyng pa dy.

Khimi ce ma Isu bung mäqang pa

²²Kädang mang-a lä tuilipui rei-a awng saite khimipui na lä honi mityng-a bälawng haetä xyng awng te mäny ö dy. Honi bälawng-a lä Isu aedang y käla äkähui na qaitä aedang te mäny ö dy. ²³Tukha Tiberi märü mang üng ly saite bälawng na lä Isu ma Säthaw tea bälaw kha khimi ce tea täkaw mäcaw saite mityng-a tyng ö dy. ²⁴Khimipui na lä honi mityng-a Isu hai äkähui na awng y te nung ea lä bälawng na aedang ö kha Isu bung mäqang hethang Kapernawm märü-a ly ö dy.

Isu lä kähing py te täkaw

²⁵Tuilipui rei mang-a Isu hai aeting ea khimipui na ma “Särae ä, nang lä mata kätü-a hini mityng-a tyng te mei” näkha düng pa dy.

²⁶Isu ma “Tängai ö. Nang ce ma kai bung mäqang ö te lä kai sa saite kamarae na nung kha mäqang ö te y. Äjo kawi rung khytä käcakänei na ca hethang dang te phüng-a kae vi. ²⁷Aekang y saite käcakänei na tähang aethawsa ö y ma. Dungtäsa kähing py saite käcakänei na tähang aethawsa ö. Kai, Khimi üng Cäpaw, ma nang ce tähang hini käcakänei na py ai mang. Ätephüng-a mei nädylä kai üng Pä-ai Säthaw lä kai tea bälung kähawi mätü king te vi dy” näkha näpa.

²⁸Khimi ce ma “Kai ce lä Säthaw üng aely ngai te kätyng sa hethang ätemakä sa ai mei” näkha düng pa.

²⁹Isu ma “Säthaw üng kängai saite kälu lä äma mätaw saite Kung tea yng hethang kae vi” näkha näpa.

³⁰Tukha äni ce ma “Nang tea kai ce yng hethang lä nang lä äte kamarae na mätü dy mei. Nang lä äte kälu na sa te vi nang mei. ³¹Caekäcai thung-a ‘Mosi ma äni ce ca nei hethang käni mang üng täkaw bäla pa vi dy’ näkha thui te kätyng kai ce üng kangsi na lä daithung kärang-a Mana täkaw na ca ö” näkha thui pa.

³²Isu ma äni ce tea “Tängai ö. Mosi lä nang ce tähang Känipre mang üng täkaw na py te y. Kai üng Pä-ai mani nang ce tähang käni mang üng täkaw tätang py te kae vi. ³³Honi Säthaw ma py te täkaw lä käni mang üng aeqa kha älawng üng khimi angxynlyng na tähang hing nae py te kae vi” näpa.

³⁴Tukha äni ce ma “Särae ä, honi täkaw na kai ce tähang käni qütä aevaw y py khü jo” näpa.

³⁵Isu ma äni ce tea “Kai lä Kähing py saite Täkaw vi. Kai tea ly saite na lä manila äjo aelang y ai dy. Kai tea yng saite na lä manila tui aehe y ai dy. ³⁶Nang ce lä kai bung nung näkha kai thui ngaila yng ö y vi rawng” näpa. ³⁷“Ä-ai ma kai tähang py saite khimi angxynlyng na lä kai tea ly ö vi ai. Kai tea ly saite khimi na bung lä kai ma mäkung jawjaw ai. ³⁸Ätephüng-a mei nädylä kai lä kai ma üng ngai te kätyng sa hethang Känipre mang üng cäqa te y. Kai bung mätaw saite Pä-ai üng aely ngai te kätyng sa hethang cäqa te kae. ³⁹Kai bung mätaw saite Kung üng kängai lä äni ma kai tea py saite khimi lawngtä bung la hai y vi ai. Kangkhüng käni-a kai ma hing haile tyng bawi vi ai. ⁴⁰Äcäpaw bung nung kha yng saite khimi angxynlyng na lä dungtäsa hing te dang hethang Pä-ai lä ngai te vi. Kai ma äni ce bung kangkhüng üng käni-a lä aetha ö hai tyng pa vi ai” näkha näpa.

⁴¹Isu ma “Kai lä Känipre üng aeqa saite Täkaw” näkha thui te phüng-a Judae khimi na lä äni phüng aeqa ö vi. ⁴²Äni ce ma “Hini lä Josefae üng cäpaw Isu y mei. Äni üng änä-awi ni äpä-ai bung lä mä-ai mäny saite y vi mei. Ätephüng-a ‘Kai lä Känipre üng cäqa te’ näkha thui vi mei” näkha thui pa ö dy.

⁴³Isu ma “Nang ma ce tingtawi aeqa ö hang baw. ⁴⁴Kai bung mätaw saite Pä-ai ma kähyng te y dylä ämi la kai tea tyng haw y lyng. Kai lä äni bung kangkhüng üng käni-a kädü thung üng aetha hai tyng pa vi ai. ⁴⁵Buisaw na ma thui te lo ‘Äni angxynlyng na tea Säthaw ma angtu thui pa vi ai.’ Pä-ai üng älo thai kha aetu saite na lä kai tea ly ö dy. ⁴⁶Pä-ai bung nung vai saite khimi lawngtä lä awng y vi. Säthaw te mang üng ly saite kai mäqaitä ni Pä-a bung nung vai te kae. ⁴⁷Tängai ö. Kai tea yng saite khimi na lä dungtäsa hing te dang vi. ⁴⁸Kai lä kähing py saite täkaw vi. ⁴⁹Nang ce üng kangsi na lä daithung kärang-a Mana täkaw ca ngaila dü ö te vi. ⁵⁰Tungaila Känipre üng aeqa saite Täkaw amäjy cawngkhang ca saite khimi na lä dü bi y ai dy. ⁵¹Kai lä Känipre üng cäqa saite hing te Täkaw vi. Hini Täkaw ca saite khimi na lä dungtäsa hing te dang vi ai. Hini Täkaw lä kai üng ängang vi. Älawng üng khimi na tea hing hai hethang tähang-a kai üng ängang py te vi.”

⁵²Tukha Judae na lä “Äni lä äma üng ängang mä-ai ca hethang makä sa kha py haw ai mei” näkha äma ce tingtawi ae-e ö dy.

⁵³Isu ma “Tängai ö, Kai, Khimi üng Cäpaw, üng ängang tea ca y, äthi tea nei y dylä nang ce tea hing saite lä awng y lyng. ⁵⁴Kai üng ängang ca kha äthi nei saite khimi na lä dungtäsa hing saite dang vi. Kai ma äni ce bung kangkhüng üng käni-a kädü thung üng mätha pa vi ai. ⁵⁵Kai üng ängang lä käcakänei tätang vi. Kai üng äthi la nei nae tätang vi. ⁵⁶Kai üng ängang ca kha äthi nei saite khimi na lä kai hai mangtä awng te na vi dy. Kai lä äni ce hai mangtä awng te by vi. ⁵⁷Hing saite Pä-ai ma Kai bung mätaw kha Kai lä Pä-ai phüng-a hing te kätyng Kai üng ängang ca saite khimi na lä Kai phüng-a hing ö vi ai. ⁵⁸Hini la Känipre mang üng aeqa saite Täkaw vi. Nang ce üng kangsi na lä Mana täkaw ca kha dü ö te vi. Tungaila hini Täkaw tea ca saite khimi na lä dungtä hing jaw ö vi ai” näpa.

⁵⁹Isu ma Kapernawm märü Judae na üng ingkäcai-a mätu ea hini phüng na thui pa te vi.

Dungtäsa hing te älo

⁶⁰Honi angthang la äkähui kä-awng mang na thai ö bawi ea äni ce ma “Hini mätu saite la älo ngang si phi. Ämi lä thaikaw haw y lyng” näkha näpa.

⁶¹Äkähui na äni phüng aeqa te Isu ma mäny phraw ea “Hini älo phüng-a nang ce lä yng ö y vi mei. ⁶²Kai, Khimi üng Cäpaw, lä awng vai saite mityng-a paw te nang ce nung dylä makä aedawng ö ai mei. ⁶³Säthaw üng Muilaw lä kähing py te vi. Khimi ce üng aethaw hai äte haetä la sa haw y. Kai thui te lo hai-a nang ce lä Säthaw üng Muilaw dang te vi. Honi Muilaw ma nang ce tea hing te py te vi. ⁶⁴Tungaila nang ce thung üng phütä na lä yng ö y” näpa. Isu lä angcü üng hai ämi la äma tea yng y kha äma bung täre kö thung-a a ai näte mäny rüng te vi. ⁶⁵Isu ma “Pä-ai ma üng aely kängai hai y dylä ämi lä kai tea tyng haw y” näkha kai thui vai te vi.

⁶⁶Honi käni üng hai äkähui kä-awng mang na lä aekö kha Isu leithung hui pa ö y vi dy. ⁶⁷Isu ma äkähui lawng hawlai netä na tea “Nang ce la kai bung khaisö he ngai ö te vi mei” näkha düng pa.

⁶⁸Simon Peterae ma “Areng ä, kai ce lä ämi tea ly ö ai mei. Dungtäsatä kähing py saite älo lä nang tea ni awng te kae be. ⁶⁹Nang lä Säthaw üng Caiping saite lawngtä näte kai ce mäny kha yng ö te dy be” näkha näpa.

⁷⁰Tukha Isu ma “Kai lä nang ce lawng hawlai netä na bung re te dy. Tungaila nang ce thung üng lawngtä tea lä Setan angra ma kung vi” näpa. ⁷¹Isu ma äni lä Simon Iskriota üng cäpaw Judae phüng thui te vi. Judae Iskriota lä äkähui lawng hawlai netä thung-a qa ngaila kangkhüng-a lä Isu bung täre na kö thung-a a pa vi ai.

Isu hai äkangby na

¹Tupyng-a Isu lä Kalile khö-a khölawng tho dy. Judae mätawngky na lä äni bung bädü hethang aeceng ö pa te phüng-a Judae khö-a khölawng tho hethang ngai pa y. ²Tukha Judae na üng Taipung pawi lä aenai dy.7:2 Taipung näte lä Säthaw ma khimi ce tea säningtä-a qengtä honi Taipung-a käni täjaetä awng hai vi. Honi Pawi lä Säthaw ma Ikuta pre üng Isrelae khimi na bung nähai kha daithung üng Taipung-a awng te sädi dang hethang pawi sa te vi.³Äkangby na ma Isu tea “Nang sa saite kamarae äkähui na nung hethang hini mityng üng tho kha Judae khö-a ly lawi. ⁴Khimi lawngtä ämüng aethang he ngai dylä kangru-a sa y. Nang lä hini cangxei saite sa dylä nang üng phüng älawngpre bawi ma mäny rung khytä sa by ä” näpa. ⁵Äkangby na mäteng ma Isu tea yng pa ö y.

⁶Isu ma “Kai ly hethang aesyng te kätü tyng te y rawng. Nang ce lä mani kätü-a la ly hethang dang jawjaw. ⁷Älawngpre üng khimi na lä nang ce tea esäre haw y. Kai tea esäre ö te vi. Honi kätyng esäre te lä kai ma äni ce sa saite kähawi y na phüng thui pa te phüng-a vi. ⁸Hini pawi-a nang ce lä ly ö. Kai ly hethang aesyng te kätü lä tyng y te phüng-a ly y rawng lyng” näkha näpa. ⁹Tukä thui pyng ea Isu lä Kalile khö-a awng.

Taipung pawi-a Isu ly te

¹⁰Honi pawi-a äkangby na ly pyng ea Isu la kangru-a ly by dy. ¹¹Judae mätawngky na lä honi pawi-a Isu bung mäqang kha “Äni lä ma-a awng mei” näkha düng pa ö dy.

¹²Khimipui na lä Isu phüng aemäcü ö dy. Khimi phütä na lä “Äni lä khimi kähawi kae” näkha näpa. Phütä na ma “Äni lä khimi ce bung lolang tämang hai te vi” näkha näpa. ¹³Tungaila Judae mätawngky na tea ri te phüng-a Isu üng phüng ämi la cüngpra-a thui pa ö vawng y.

¹⁴Pawi käni kaehütä tyng ea Isu lä Säthaw üng Ingkäcai-a ly kha älo angtu thui pa dy. ¹⁵Judae mätawngky na lä cangxei phi te hai “Hini khimi lä cae aetu vai y käla ma ätemakä sa kha hini kätyng kaw te mei” näkha thui pa ö dy.

¹⁶Isu ma “Kai üng mätu saite lä kai ma te üng y. Kai bung mätaw saite Säthaw te üng angtu lo kae. ¹⁷Khimi lawngtä ma Säthaw üng aely kängai sa he ngai dylä kai mätu te lä Säthaw te mang üng mei, kai ma üng mei näte äni mäny ai. ¹⁸Mä-ai ma üng aely kängai hai thui saite khimi lä mä-ai ma phung-ang dang he ngai te kae vi. Tungaila äma bung mätaw te Kung üng phung-ang tähang aethawsa saite khimi lä mitang khü vi. Äni lä älo kaeling thuikaw y lyng. ¹⁹Mosi ma nang ce tähang Ubädi py pyng te vi dy. Tungaila nang ce thung üng ämi lawngtä la honi Ubädi bäjui ö te y. Nang ce lä ätephüng-a kai bung bädü hethang aethawsa ö te vi mei” näkha näpa.

²⁰Khimipui na ma “Nang la angra kung te vi. Nang bung bädü hethang aethawsa te lä ämi mei” näpa.

²¹Isu ma “Kai kamarae haetä sa tea nang angxynlyng lä cangxei ö bawi te vi. ²²Mosi ma nang ce üng nawngmäcaw nade na bung lengkhüng täke hethang losai py. Tätang khü-a hini lengkhüng täke he reitae lä Mosi ma aetawng te y, nang ce üng kangsi na ma aetawng te kae vi. Nang ce la Aehae te Käni-a lengkhüng täke ö vi.7:22 Judae na üng reitae kätyng nawngmäcaw aepeng pyng te käni täjae tyng ea honi käni lä aehae te käni hai aepy ngaila lengkhüng täke ö vi.²³Mosi üng Ubädi täphra y hethang tähang-a Aehae saite Käni-a lengkhüng täke vi dylä Kai ma khimi lawngtä bung Aehae te Käni-a känaw käsaw hawi sa pa te phüng-a, nang ce lä makä sa kha kädawtho ö te vi mei. ²⁴Khimi üng mimai tea kheng kha tärae cei ö hang. Tätang khü-a tärae cei ö” näkha näpa.

Isu lä Mesia mei näkha aedüng ö

²⁵Jerusalem märü üng khimi phütä na ma “Isu bung Judae mätawngky na ma bädü hethang aethawsa te y mei. ²⁶Kheng e, äni lä khimipui tea älo angtu thui kha awng dy. Ämi lawngtä la äni tea mäkhang y vi mei. Äni lä Mesia vi näte mä-ai üng mätawngky na lä mäny ö by cämei. ²⁷Tungaila Äni lä mamang üng ly mei näte mä-ai lä mäny te vi. Mesia ly saite kätü-a lä Äni üng awng saite mityng ämi la mäny y lyng” näpa.

²⁸Isu lä Säthaw üng Ingkäcai-a älo angtu thui kha awng ea “Nang ce lä Kai bung mäny ö te vi. Kai mani mang üng ly te mei näte la nang ce mäny ö te vi. Tungaila Kai lä Kai ma üng aenae hai-a ly te y. Kai bung mätaw saite Kung lä mitang khü vi. Äni bung lä nang ce mäny ö y lyng. ²⁹Kai lä Äni te üng ly kha Äni ma Kai bung mätaw te phüng-a Äni bung mäny te vi” näkha ätüng käleng hai thui pa dy.

³⁰Honi kätü-a khimi ce lä Isu bung ne hethang aethawsa ngaila Äni bung ne hethang kätü lä tyng pa y te phüng-a, ämi ma la ne haw y. ³¹Tungaila khimipui na thung üng khimi kä-awng mang na lä Isu tea yng ö te vi. Äni ce ma “Mesia cäqa te kätü-a lä Isu ma sa saite kamarae qawng-a cang y sa ai mei” näkha näpa.

Isu bung ne hethang reisae na bung mätaw pa

³²Tukha Isu phüng-a khimi ce lä aemäcü te Pharisai na lä thai ö dy. Tukätephüng-a mäthykung käleng na lä Isu bung ne hethang reisae na bung mätaw pa ö dy. ³³Isu ma khimi ce tea “Kai lä nang ce hai tänaetä awng te kae. Tupyng-a kai ma bung mätaw saite Kung tea vawi haile vi ai. ³⁴Nang ce lä Kai bung mäqang ngaila aeting haw y lyng. Kai ly saite mityng-a nang ce lä ly haw y lyng” näkha näpa.

³⁵Judae mätawngky na ma “Mä-ai ce mäqang ea aeting y hethang mani mityng-a ämi la ly vi ai nang mei. Judae khimi na awng saite Käri märü-a ly kha äni ce tea älo angtu thui hethang vi nang mei. ³⁶Äni ma ‘Nang ce lä Kai bung mäqang ngaila aeting y lyng. Kai ly saite mityng-a nang ce ly haw y lyng. Hini kä äni thui te la ätemakä näte vi nang mei’ näkha äma ce tingtawi aedüng aethui ö dy.”

Isu ma kähing py te vawcawng phüng thui pa

³⁷Honi Pawi üng aely kälengky te kangkhüng üng käni-a Isu lä aedaw kha “Tui aehe saite khimi na lä Kai tea ly kha nei ö sy. ³⁸Kai tea yng saite khimi lä Caekäcai thung-a tärü te kätyng lawng vi ai. ‘Äni üng bälung thung-a lä kähing py te vawcawng tui lawng te vi dy’” näkha ätüng käleng hai thui pa dy. ³⁹Isu lä äma tea yng saite khimi na dang hethang Muilaw Käcai phüng thui pa dy. Honi kätü-a Säthaw lä Muilaw Käcai bung khimi ce tähang py pa te y vi rawng. Ätephüng-a mei nädylä Isu lä phung-ang dang te y vi rawng.

Khimi ce bälung aedü pa y

⁴⁰Khimi phütä na lä Isu üng älo thai kha “Äni lä buisaw tätang vi” näpa.

⁴¹Phütä na ma “Äni lä Mesia vi” näkha thui pa.

Phütä na ma lä “Mesia lä Kalile khö üng khimi vi nang mei. ⁴²Caekäcai thung-a lä Mesia lä Davidae ceng thung üng vi. Davidae awng saite Bethlehem märü-a aepeng ai näkha awng te vi” näpa ⁴³Tukha Isu phüng-a khimi ce lä bälung aedü ö y pa vi dy. ⁴⁴Khimi phütä na lä Isu bung ne hethang ngai ö dy. Tungaila ämi la ne vawng y vi.

Judae mätawngky na lä yng ö y

⁴⁵Kangkhüng-a lä Säthaw üng Ingkäcai tea rui saite reisae na lä ly haile ö dy. Mäthykung käleng hai Pharisai na ma “Ätephüng-a äni bung nähai y te mei” näkha düng pa ö dy.

⁴⁶Tukha reisae na ma “Hini Khimi thui te kätyng ämi la thui vai te y vi” näkha näpa.

⁴⁷Pharisai na ma “Nang ce la Äni üng the te thung-a qa ö te vi dy mei. ⁴⁸Mä-ai üng mätawngky hai Pharisai na thung-a ämi la Äni tea yng te awng y. ⁴⁹Khimipui na lä Mosi te mang py saite Ubädi mäny ö te y vi. Äni ce lä Säthaw üng tähang käsi dang ö te dy” näkha näpa.

⁵⁰Äni ce thung-a Nikodima lä qa te by vi. Äni lä jangni-a Isu tea ly vai te vi. ⁵¹Nikodima ma “Mä-ai lä äni äte sa tämang mei näte la düng vai te y. Äni tea älo düng te awng y käla ma dengpy te lä mä-ai üng Ubädi hai-a aebäla mang mei” näpa.

⁵²Äni ce ma “Nang lä Kalile khimi by vi nang mei. Caekäcai thung-a kheng kae-e. Kalile khö üng buisaw lawngtä la tho y näte nang mäny vai mei” näpa. ⁵³Tupyng-a khimi qütä lä äma ce ing-a vawi ö king dy.

Änawngpaw y saite nawngmäcaw hai i te nawngmädi

¹Isu lä Olive kung na awng saite me anghung-a ly dy. ²Kädang thawde-a Säthaw üng Ingkäcai-a ly ea khimipui na lä äni tea aekäcö pa ö vi. Isu lä aety kha äni ce tea älo mätu pa vi. ³Ubädi särae hai Pharisai na lä nawngmädi lawngtä bung äni tea nähai pa ö vi. Khimi ce ma äni lä änawngpaw y saite nawngmäcaw hai täkübäjang sa saite nung ea ne kha khimi ce maw-a aedaw hai pa dy. ⁴Äni ce ma “Särae ä, hini nawngmädi lä änawngpaw y saite nawngmäcaw hai täkübäjang sa te kai ce nung kha ne te vi. ⁵Mosi üng Ubädi thung-a hini nawngmädi bung lä kälung hai käde kha bädü he kae näkha awng. Vaihi nang lä ätemakä thui ai mei” näkha düng pa. ⁶Äni ce lä Isu tea käsi nung hethang ngai te phüng-a hini kätyng düng pa lükae te vi. Tukha Isu lä bü ea älawng qawng-a äköbäjung hai cae tärü kha awng pa dy.

⁷Äni ce lä Isu tea älo düng haile ö pa be dy. Tukha Isu lä thyngdyng ea kheng kha “Nang ce thung-a hunghö awng y saite khimi lä angcü-a ma äni tea kälung hai käde mang” näpa. ⁸Tupyng-a äni lä bü kha älawng qawng-a äköbäjung hai cae tärü haile kha awng pa tyng be dy. ⁹Äni ce lä Isu üng älo thui te thai ea khösäning kälengky üng hai aetawng kha cäpiky sengtä lawngtä pyng-a lawngtä tho ö king pa vi dy. Tukha Isu lä äma qaitä awng kha nawngmädi la äni üng maw-a aedaw kha awng. ¹⁰Isu lä thyngdyng kha kheng ea “Nawngmädi ä, äni ce lä ma-a dy mei. Nang tea dengpy hethang ämi la awng y vi dy mei” näkha düng pa.

¹¹Nawngmädi ma “Areng ä, ämi lawngtä la awng y vi dy” näkha näpa.

Isu ma “Kai la nang üng hunghö phüng-a dengpy y lyng. Ly lawi mai cü. Hunghö sa vi hang lawi ba” näkha näpa.

Isu lä älawng khimi ce tähang kaevang

¹²Tukha Isu ma khimipui na tea “Kai lä älawngpre khimi ce üng kaevang vi. Kai leithung hui saite na lä manila käving thung-a ly y dy lyng. Äni ce lä kähing py saite kaevang dang ö vi ai” näkha näpa.

¹³Pharisai na ma “Nang lä Nang ma üng phüng thui te vi. Tukha Nang üng thui saite lä ämi la yng he ngai y” näpa.

¹⁴Isu ma “Kai lä Kai ma üng phüng thui te vi. Tungaila Kai üng thui te lo yng hethang kae. Ätephüng-a mei nädylä Kai lä mani mityng üng ly te mei, mani mityng-a vawi ai mei näte mäny te vi. Tungaila nang ce lä Kai mani mityng üng ly te mei, mani mityng-a vawi ai mei näte mäny ö te y. ¹⁵Nang ce lä khimi ce üng kaedawng hai-a tärae cei ö te kae vi. Kai lä ämi tea la tärae cei vai te y. ¹⁶Tungaila Kai tärae cei si nädylä Kai üng sa te lä tüng khaw vi. Ätephüng-a mei nädylä kai lä kai ma qaitä y. Kai bung mätaw saite Pä-ai hai mangtä awng te phüng-a vi. ¹⁷Nang üng Ubädi thung-a tärü te lä ‘Ätete lo tho saite khimi lawng netä bälung aedü dylä äni lo lä tüng khaw vi’ näkha awng vi. ¹⁸Kai lä Kai ma üng phüng thui te lawngtä kha Kai bung mätaw saite Pä-ai lä Kai phüng thui saite äkälang lawngtä vi” näkha näpa.

¹⁹Äni ce ma “Nang üng Pä-ai lä ma-a awng te vi nang mei” näkha düng pa.

Isu ma lä “Kai hai Kai üng Pä-ai bung nang ce lä mäny ö te y. Nang ce lä Kai bung mäny dylä Pä-ai bung la mäny ö vi ai” näpa.

²⁰Isu lä Säthaw üng Ingkäcai thung-a thawlawng bung awng saite teng-a mätu ea hini lo thui te vi. Tungaila äni bung ne hethang kätü tyng y rawng te phüng-a, ämi la Isu bung ne pa y rawng.

Kai ly saite mityng-a nang ce lä hui haw y lyng

²¹Tupyng-a Isu ma “Kai lä ly ja hethang kae te vi. Nang ce lä kai bung mäqang ö vi ai. Tungaila nang ce lä nang ma ce üng hunghö hai-a dü ö vi ai. Kai ly saite mityng-a nang ce lä ly haw ö y lyng” näkha thui pa haile vi.

²²Judae mätawngky na ma “‘Kai ly saite mityng-a nang ce lä ly haw y lyng’ nä vi to. Äni lä äma tea äma ma aebädü hethang thui te vi nang mei” näkha düng ö dy.

²³Isu ma “Nang ce lä hini älawngpre hai aesui saite khimi na vi. Kai lä äqawng mang üng ly te vi. Nang ce lä hini älawngpre üng khimi na vi. Kai lä hini älawngpre üng y vi. ²⁴Tukha nang ce lä nang ma ce üng hunghö hai-a dü ö vi ai näte Kai ma nang ce tea thui vai te vi dy. Kai lä Kai ma thui mäcai saite Kung lawngtä khekhe näte nang ce yng y dylä nang ma ce üng hunghö hai-a nang ce lä dü ö tätang vi ai” näpa.

²⁵Äni ce ma “Nang lä ämi vi nang mei” näkha düng pa.

Isu ma äni ce tea “Kai lä ämi mei näte angcü-a ma kai thui pyng te vi dy be. ²⁶Nang ce üng phüng kai lä thui hethang hai nang ce tea tärae cei hethang awng mang te vi. Kai bung mätaw saite Kung lä mitang khü vi. Äni te üng thai saite älo ni Kai lä älawng khimi ce tea thui te kae vi” näkha näpa.

²⁷Isu ma Pä-ai üng phüng thui te tea äni ce lä thaikaw pa ö te y vi. ²⁸Tukha Isu ma “Nang ce lä Kai, Khimi üng Cäpaw, bung thinglang qawng-a bang saite kätü-a, Kai lä ämi mei näte nang ce mäny ö ai. Kai ma üng aely ngai te kätyng äte haetä la sa te y kha Pä-ai ma mätu te kätyng älo thui te kae vi näte nang ce lä mäny ö ai mang. ²⁹Kai bung mätaw saite Kung lä Kai hai mangtä awng te vi. Äni üng aely kängai-a Kai lä sa jawjaw pa te phüng-a Äni lä Kai bung khaisö te y vi” näkha näpa.

³⁰Isu ma hini älo na thui te thai saite khimi kä-awng mang na lä Isu tea yng ö dy.

Abraham üng caw na

³¹Isu lä äma tea yng saite Judae khimi na tea “Nang ce lä kai thui te kätyng sa ö dylä kai üng äkähui tätang na vi dy. ³²Säthaw üng phüng tätang nang ce mäny ö te phüng-a honi ma nang ce bung aelawi hai pa vi ai mang” näkha näpa.

³³Äni ce ma “Kai ce lä Abraham üng kaesui na vi. Manila ämi üng mawsawng tangnae sa kha awng vai ö te y. Nang lä ätephüng-a ‘Kai ce tea aelawi ö vi ai mang’ näte vi mei” näkha düng pa ö dy.

³⁴Isu ma “Tängai ö, hunghö sa saite na lä hunghö üng mawsawng tangnae na vi dy. ³⁵Mawsawng lä engthung haetä-a awng jaw te y vi. Äcäpaw ni ingthung haetä-a awng jawjaw te kae vi. ³⁶Kai, Äcäpaw, ma nang ce bung bälawi dylä tätang khaw-a nang ce aelawi ö vi ai. ³⁷Nang ce lä Abraham üng kaesui na näte kai lä mäny. Tungaila nang ce lä Kai üng älo thui saite tea tängai y te phüng-a, Kai bung bädü he ngai ö te vi. ³⁸Kai lä Pä-ai te mang üng nung saite na phüng nang ce tea thui te kae. Nang ce lä nang ma ce üng pä-ai ma thui te kätyng sa ö te vi” näpa.

³⁹Äni ce ma “Kai ce üng pä-ai lä Abraham vi” näkha näpa.

Isu ma “Nang ce lä Abraham üng caw na tätang nädylä Abraham kätyng-a sa hethang kae” näpa. ⁴⁰“Säthaw te mang üng älo mitang kai lä nang ce tea thui dy. Tungaila kai bung bädü hethang nang ce lä aethawsa ö te vi. Abraham lä hini kätyng sa te y lyng. ⁴¹Nang ce lä nang ma ce üng pä-ai sa te kätyng-a sa ö te vi” näpa.

Äni ce ma “Kai ce lä täkü bäjang caw y. Kai ce üng Pä-ai lä Säthaw lawngtä ni awng te kae be” näpa.

⁴²Isu ma “Säthaw lä nang ce üng Pä-ai vi dylä nang ce lä Kai tea bälung aevaw ö vi ai. Kai lä Säthaw te mang üng ly kha vaihi hi-a awng te kae be. Kai ma üng aely ngai te kätyng-a ly te y lyng. Säthaw ma Kai bung mätaw te kae vi. ⁴³Ätephüng-a Kai thui saite lo nang ce lä thaikaw ö y te vi mei. Kai thui saite älo nang ce lä thai he ngai y te phüng-a vi. ⁴⁴Nang ce üng pä-ai lä Setan angra kae vi. Tukha nang ce pä-ai üng aely kängai kätyng nang ce lä sa hethang aethawsa ö te vi. Setan angra lä angcü üng hai ma khimi bädü te kae vi. Äni tea älo mitang lä awng te y vi kha älo kaeling thui te lä äma üng rawraw kae vi. Äni lä khimi älo kaeling na üng pä-ai kae vi. ⁴⁵Kai lä älo mitang khü thui te phüng-a, nang ce lä Kai tea yng ö y. ⁴⁶Kai lä hunghö sa te vi näte nang ce thung üng khimi lawngtä ma mätü haw ai mei. Kai älo mitang thui te dylä, nang ce lä ätephüng-a yng ö y te vi mei. ⁴⁷Säthaw te mang üng ly saite Kung lä Äni üng älo tea tängai te vi. Tungaila nang ce lä Säthaw te mang üng ly y te phüng-a, älo aetängai ö y te vi” näkha näpa.

Isu ni Abraham

⁴⁸Judae khimi na ma “Nang lä Samari khimi hai angra kung saite khimi vi näkha kai ce ma thui te lä tüngkhaw vi” näpa.

⁴⁹Isu ma “Kai lä angra kung saite khimi y lyng. Kai lä Pä-ai tea tämö khai saite Kung kae. Tungaila nang ce lä Kai tea tämö khai y saite khimi na kae vi. ⁵⁰Kai la Kai ma üng phung-ang leng hethang aethawsa te y. Kai üng phung-ang tähang sa saite Kung lawngtä awng vi. Äni lä tärae cei te Kung vi. ⁵¹Tängai ö, Kai üng lo tängai saite na lä manila dü y ai dy” näkha näpa.

⁵²Judae khimi na ma “Nang tea angra kung vi näte kai ce lä vaihi mäny khe dy. Abraham hai buisaw na lä dü king te vi dy be. Nang lä ‘Kai üng lo tängai saite na la manila dü be y ai dy’ näkha näte vi mei. ⁵³Nang lä kai ce üng kangsi Abraham qawng-a haidae lengky hethang aepö mei. Abraham hai buisaw na la dü king te vi dy. Nang lä nang ma tea makäti khimi käthi te vi mei” näkha düng pa.

⁵⁴Isu ma “Kai lä Kai ma tea tämö khai te kae dylä, Kai üng tämö khai saite lä aetütü kae dy. Kai üng Pä-ai lä Kai tea tämö khai te vi. Äni tea nang ce üng Säthaw näkha nä ö te vi. ⁵⁵Nang ce lä äni tea mäny ö y ngaila Kai lä mäny vi. Kai lä äni tea mäny y näkha thui dylä Kai lä nang ce kätyng kaeling lo thui saite by kae dy. Kai la Pä-ai bung mäny kha äni üng lo tängai saite kung vi. ⁵⁶Nang ce üng pä-ai Abraham lä Kai tyng te käni nung ai näte phüng aedawng kha kawngphi te vi. Kai tyng saite käni tea äni lä nung khe kha kawngphi te vi” näkha näpa.

⁵⁷Judae na ma “Nang lä säning rui bangtä la awng te y rawng be. Ätemakä sa kha Abraham bung nung te vi mei” näkha düng pa.

⁵⁸Isu ma “Tängai ö, Abraham aepeng y te kälang-a ma, Kai lä awng pyng te vi dy” näkha näpa.

⁵⁹Honi kätü-a äni ce lä Isu tea käthu hethang kälung na aekhü ö pa vi dy. Tungaila Isu lä kangru-a aeho kha Säthaw üng Ingkäcai thung üng thoja pa vi dy.

Mikangjö üng ämi aevang hai pa

¹Isu lä aeke kha awng tea aepeng te üng hai ma ämi bäjö saite khimi lawngtä bung nung pa vi. ²Äkähui na ma “Särae ä, hini khimi üng ämi bäjö te lä äma üng hunghö phüng-a mei. Änä-awi ni äpä-ai üng hunghö phüng-a mei” näkha düng pa.

³Isu ma “Äma üng hunghö phüng-a y. Änä-awi ni äpä-ai üng hunghö phüng-a la y lyng. Äni üng ämi bäjö te lä Säthaw üng phung-ang äni hai-a aetüng hai te kae ecy. ⁴Käni aevang saite kätü-a kai bung mätaw saite Säthaw üng kälu mä-ai ce lä sa hethang kae te vi. Ämi lawngtä lä kälu sa he dang y te käving lä tyng vi ai. ⁵Kai lä älawng qawng-a awng te thüng-a älawngpre khimi ce üng kaevang vi” näkha näpa.

⁶Älo thui pyng-a Isu lä älawng-a mäce mäthui kha älawng ngang hai angqo sa pa vi. Tukha mikangjö khimi üng ämi-a angqo hai kälo pa dy. ⁷Tukha Isu ma “Ly kha Silawm tuikang-a ämi aelae jaw cü” näpa. (Silawm näte lä mätaw te näte vi.) Tupyng-a honi khimi lä ly kha ämi aelae pang ea lä ämi lä aevang pa vi dy. Tukha äni lä ämi aevang kha ing-a tyng pa dy.

⁸Äni lä jangni-a phawisae mäkai kha ca nei saite khimi näte ingdawngpa na hai äni bung nung vai saite na lä mäny ö te phüng-a äni ce ma “Äni lä aety kha phawisae mäkai saite khimi y mei” näkha näpa.

⁹Khimi phütä na ma “Äni khaw be ä.” Phütä na ma lä “äni hai aetawng saite khimi kae müng” näpa.

Tukha äni ma “Kai lä nang ce thui saite khimi dy” näpa.

¹⁰Khimi ce ma “Nang lä makä sa kha ämi aevang te mei” näkha düng pa.

¹¹Äni ma “‘Isu’ näsaite khimi ma angqo sa kha kai üng ämi-a kälo te vi. Äni ma kai bung Silawm tuikang-a ämi aelae hai vi. Tukha kai ly kha ämi aelae pyng ea lä ämi aevang vi dy” näkha thui pa dy.

¹²Khimi ce ma “Honi khimi lä ma-a awng mei” näkha düng pa.

Tukha mikangjö vai saite ma “Kai lä mäny y” näkha näpa.

Pharisai na ma ämi aevang saite khimi tea düng pa

¹³Khimi ce lä ämi bäjö vai saite khimi bung Pharisai na tea nähai pa ö dy. ¹⁴Isu ma äni üng ämi-a angqo sa kha kälo ea ämi aevang te käni lä Aehae te Käni vi. ¹⁵Pharisai na lä äni tea makä sa kha ämi aevang te mei näte phüng düng pa dy. Tukha äni ma “Kai üng ämi-a angqo sa kha kälo pyng-a kai lä tui hai ämi aelae pyng-a ämi lä aevang dy” näpa.

¹⁶Pharisai phütä na ma “Hini kä sa te lä Aehae te Käni üng Ubädi tea bäjui te y. Tukätephüng-a äni la Säthaw te mang üng mätaw saite Khimi y” näpa.

Phütä na ma “Hunghö awng te khimi lä ätemakä hini cangxei te na sa haw ai mei” näkha näpa. Tukha äni ce lä lawngtä hai lawngtä bälung aedü ö pa y vi dy.

¹⁷Pharisai na lä ämi bäjö vai saite khimi tea “Nang tea ämi aevang hai saite khimi phüng makä aedawng mei” näkha düng haile pa.

Äni ma “Buisaw vi” näkha näpa dy.

¹⁸Judae mätawngky na lä hini khimi jangni-a ämi bäjö kha vaihi ämi aevang saite tea yng y te hai ma änä-awi ni äpä-ai tea kähyng pa dy. ¹⁹Äni ce ma “Hini lä nang ni üng cäpaw mei. Nang ce thui te kätyng äni lä aepeng te üng hai ma ämi bäjö te vi mei. Tudylä ätemakä sa kha vaihi äni ämi aevang te vi mei” näkha düng pa.

²⁰Änä-awi ni äpä-ai ma “Äni lä kai ni üng cäpaw tätang cäkae. Aepeng te hai ma äni lä ämi bäjö tätang te vi. ²¹Tungaila ätemakä sa kha vaihi ämi aevang te mei näte kai ni la mäny hawi y. Äni tea ämi ma ämi aevang hai mei näte la kai ni lä mäny y. Äni tea phai düng ö. Äni lä särai dy. Äni üng phüng lä äma ma thui ai mang” näkha näpa. ²²Hini kätyng-a änä-awi ni äpä-ai thui te lä Judae mätawngky na tea ri te phüng-a vi. Khimi lawngtä ma Isu lä Mesia vi näkha älo aepho vi dylä äni bung Judae na üng ingkäcai üng mätho hethang Judae mätawngky na lä aedüng ö pyng te vi dy. ²³Tukätephüng-a änä-awi ni äpä-ai ma “Äni lä särai dy. Äma tea düng ö ba” näkha näpa hawi te vi.

²⁴Judae mätawngky na la ämi bäjö vai saite khimi bung äbaeni kähyng ea “Säthaw maw-a mitang khü-a thui lawi. Nang mi aevang hai saite khimi lä hunghö sa vi näte kai ce lä mäny dy” näpa.

²⁵Äni ma “Kai lä äni hunghö sa mei näte mäny y. Tungaila kai haetä mäny te awng. Kai lä jangni-a ämi bäjö kha vaihi aevang te mäny kae” näpa.

²⁶Tukha äni ce ma “Äni lä nang tea ätemakä sa mei. Ätemakä sa kha ämi aevang hai te mei” näkha düng pa ö dy.

²⁷Äni ma “Kai ma nang ce tea thui pyng te vi dy. Nang ce lä tängai ö y. Ätephüng-a thai haile hethang ngai te vi mei. Nang ce la äni üng leithung hui hethang ngai ö te by mei” näkha düng pa.

²⁸Äni ce ma äni tea jaw kha “Nang lä äni leithung hui saite vi. Kai ce lä Mosi leithung hui saite na kae. ²⁹Kai ce lä Säthaw ma Mosi tea älo aepe te mäny vi. Tungaila hini khimi lä mani mityng üng ly te mei näte mäteng ma kai ce mäny y” näpa.

³⁰Ämi kangjö vai te khimi ma “Äni lä kai üng ämi aevang hai te vi. Tungaila nang ce lä äni mani mang üng ly mei näte mäny y. Hini lä cangxei hethang hawi bärai na ly. ³¹Säthaw lä hunghö khimi ce üng aetang te tängai y. Säthaw üng aely kängai sa saite khimi kähawi na üng aetang te ni tängai te kae. ³²Aepeng te üng hai ämi kangjö bung ämi aevang hai te lä jangni-a la thai vai y. ³³Äni lä Säthaw te mang üng ly te y dylä, äte haetä la sa haw y lyng” näkha näpa.

³⁴Äni ce ma “Nang lä aepeng te üng hai hunghö awng saite khimi kae. Kai ce tea ätemakä angtu thui vawng mei” näkha ämi bäjö vai saite bung lä Judae na üng ingkäcai thung üng mäthoja pa dy.

Muilaw mikangjö

³⁵Isu lä ämi bäjö vai saite bung mätho te angthang thai kha äni hai aeting ea “Nang lä Khimi üng Cäpaw tea yng mei” näkha düng pa.

³⁶Äni ma “Särae ä, Khimi üng Cäpaw, lä Ämi mei. Kai lä Äni tea yng hethang kai tea thui jo” näkha näpa.

³⁷Isu ma “Nang lä Äni bung nung dy. Äni lä vaihi nang hai älo aepe sälö kha awng dy” näkha näpa.

³⁸Ämi kangjö vai ma “Areng ä, kai yng dy cäkae” näkha cäphaw ea thui pa dy.

³⁹Tukha Isu ma “Kai lä älawng tea tärae cei hethang ly te dy. Ämi aevang saite na lä ämi bäjö kha ämi bäjö saite na lä ämi aevang vi ai” näkha näpa.

⁴⁰Pharisai phütä na ma äni lo thai ea “Kai ce tea lä ämi kangjö näkha thui he ngai te mei” näkha düng pa.

⁴¹Isu ma “Nang ce ämi bäjö dylä, hunghö awng y lyng. Vaihi nang ce lä ämi aevang näkha thui te phüng-a, nang ce lä hunghö awng ö te dy” näkha näpa.

Beram rui saite Kung üng mätae te

¹Isu ma “Tängai ö. Khimi lawngtä lä beram awng nae thung-a hawngkhae mang kung y käla mityng kälang mang kung dylä äni lä theru y dylä damarae kae. ²Hawngkhae mang kung saite khimi lä beram rui saite kung dy. ³Hawngkhae ty saite ma beram kärui kung na tähang hawngkhae pä-awng pa vi. Tukha beram na lä äni üng ätüng tängai ö vi. Äni lä äma üng beram na bung ämüng kähyng kha awng nae thung üng ärang-a mätho te vi. ⁴Ärang-a mätho pyng-a äma lä beram na ämaw-a mang ea beram na lä äni üng ätüng thai kha äni leithung hui ö te vi. ⁵Beram na lä khimi kälang leithung hui vai y. Ätephüng-a mei nädylä khimi kälang üng ätüng mäny y te phüng-a äni te üng aehui ö king vi ai” näpa.

⁶Isu ma hini mätae te hai äni ce tea thui ngaila äni ce lä thaikaw pa ö y.

Beram rui te Kung kähawiky Isu

⁷Tukha Isu ma “Tängai ö, Kai lä beram na kung saite hawngkhae vi. ⁸Kai üng ämaw-a tyng saite na lä theru hai damarae na kae vi. Beram na lä äni üng älo tängai y lyng. ⁹Kai lä hawngkhae vi. Honi hawngkhae mang kung saite na lä awng derui te dang ai. Äni ce lä kung hai tho hai ea, ca nei hethang käcakänei kähawi na dang ö vi ai” näpa. ¹⁰Theru lä bäru hethang bädü hethang hai täphra hethang ni ly te vi. Kai lä khimi ce hing hethang qaitä cang y, hing hai saite aequng bawi te dang hethang tähang ly te kae.

¹¹Kai lä beram rui saite Kung kähawi vi. Beram rui saite Kung kähawi lä beram na tähang dü hethang awng rüng te vi. ¹²Vanglang saite khimi lä beram rui saite Kung y. Äni lä beram na bung pyng te y. Tukätephüng-a äni lä käsui tyng te nung ea beram na bung khaisö kha aehuija vi ai. Tukha käsui ma beram bung kei kha beram na lä aehui xhixae vi ai. ¹³Vanglang saite khimi lä phawisae ngai kha sa te phüng-a, beram na bung dawngcang y käla aehuija te vi. ^14-15Kai lä beram rui saite Kung kähawi vi. Pä-ai lä Kai bung mäny kha Kai la Pä-ai bung mäny te kätyng Kai hai beram na la aemäny ö te vi. Kai lä beram na tähang dü hethang awng rüng te vi. ¹⁶Hini beram awng nae thung-a awng y saite beram na lä Kai pyng te vi rawng. Honi beram na lä Kai ma nähai vi ai. Äni ce la kai üng ätüng tängai ö vi ai. Tukha beram kanghö haetä hai rui te Kung lawngtä awng ai.

¹⁷“Kai lä hing saite dang haile hethang tähang-a kai lä dü hethang awng rüng te phüng-a Pä-ai lä Kai tea bälung aevaw vi. ¹⁸Kai ma üng aely hai y dylä ämi la Kai bung bädü haw y. Kai ma üng aely hai ea ni Kai bung bädü haw te kae. Kai lä Kai ma üng hing saite aepy he aenae awng te vi. Kai ma tea hing haile hethang aenae la awng. Hini kätyng sa hethang Pä-ai ma Kai tea py te vi dy” näkha näpa.

¹⁹Hini älo phüng-a Judae na lä bälung aedü ö y haile pa dy. ²⁰Khimi phütä na ma “Äni lä angra kung kha kangthö vi. Ätephüng-a äni lo tea tängai ö te mei” näkha näpa.

²¹Tungaila khimi äkälang na ma “Angra kung saite lä hini kätyng thui haw y lyng. Angra kung saite lä ämi kangjö bung ämi aevang hai vi ai mei” näkha näpa.

Judae na lä Isu tea yng ö pa y

²²Jerusalem märü-a Säthaw üng Ingkäcai ae-a te pawi lä tyng dy. Honi lä säding thüng-a vi. ²³Isu lä Säthaw üng Ingkäcai baesung thung-a awng saite Solomon bakhung-a aeke kha awng dy. ²⁴Tukha Judae khimi na lä Isu tea säveng ea “Nang lä kai ce tea kätüng khaw-a thui hethang majetä aering ai rawng mei. Nang lä Mesia dylä, kai ce tea cüngpra-a thui by ä,” näkha näpa.

²⁵Isu ma “Nang ce tea kai thui pyng te vi dy. Tungaila nang ce lä yng ö y. Pä-ai üng ämüng hai Kai ätete sa saite kamarae na lä Kai tähang sasi na vi dy. ²⁶Nang ce lä Kai üng beram na y te phüng-a Kai tea yng ö y. ²⁷Kai üng beram na lä Kai üng ätüng tängai vi. Kai lä äni ce bung mäny kha äni ce la Kai leithung hui ö te vi. ²⁸Kai ma äni ce tähang dungtäsa hing te py dy. Manila äni ce la dü y dy. Ämi la Kai kö thung üng äni ce bung lawng haw y lyng. ²⁹Äni ce bung Kai tea a saite Pä-ai lä äte angxynlyng na qawng-a lengky. Ämi ma la beram na bung Pä-ai kö thung üng lawng haw y lyng. ³⁰Pä-ai hai Kai lä bungtä kae vi” näkha näpa.

³¹Tukha Judae khimi na ma Isu tea käde hethang kälung aekhü haile ö dy. ³²Isu ma “Pä-ai lä Kai tea kälu kähawi na awng mang-a sa hai te vi. Äte makäti na sa te phüng-a, nang ce lä Kai tea kälung hai käde hethang sa ö te mei” näkha düng pa.

³³Äni ce ma “Nang kälu kähawi na sa te phüng-a, kälung hai käde hethang sa te y. Nang lä khimi by kae ea ma Säthaw müng aemäthi vi. Säthaw üng ämüng aengang te phüng-a kälung hai käde hethang sa te kae” näkha mäthang pa.

³⁴Tukha Isu ma äni ce tea “Caekäcai thung-a ‘Säthaw ma thui te nang ce lä säthaw na vi’ näkha tärü te vi. ³⁵Caekäcai-a thui te phüng na, tätang vi näte kai ce lä mäny vi. Säthaw ma äma üng lo angthang thai saite na tea säthaw na” näkha thui te vi. ³⁶“Üngai ma Kai bung re kha älawngpre-a mätaw te vi. Tudylä kai lä Säthaw üng Cäpaw näkha thui te phüng-a, Kai lä Säthaw müng aengang te näkha nang ce lä ätephüng-a käsi prawng ö te mei. ³⁷Kai lä Pä-ai üng kälu sa te y dylä yng ö y ma. ³⁸Pä-ai üng kälu sa ö dylä Kai tea yng y ngaila Kai üng sa te kälu tea yng ö. Pä-ai lä Kai tea awng kha Kai la Pä-ai tea awng näte nang ce mäny ö ai mang” näkha mäthang pa.

³⁹Tukha äni ce lä Isu bung ne hethang aethaw aesa ö haile dy. Tungaila Isu lä äni ce thung üng kangru-a ly ja pa vi.

⁴⁰Tukha Isu lä angcü-a Baptismae Johan ma baptismae py saite Jordan tävaw rei mang-a ly kha honi mityng-a awng pa dy. ⁴¹Khimipui na Äni tea ly ö. Äni ce ma “Baptismae Johan lä äte cangxei te na sa vai te y. Tungaila hini Khimi üng phüng Johan ma thui saite angxynlyng lä tätang vi” näkha näpa. ⁴²Tukha honi mityng-a khimipui na lä Isu tea yng ö vi dy.

Lazarae dü te

¹Lazarae näsaite khimi lawngtä lä naw kha awng. Äni hai äticaw Maeri ni Matha lä Bethani vang-a awng. ²Maeri lä Areng üng äkho-a, rimui tui kälo kha äsang hai mai pa saite nawngmädi vi. Naw saite Lazarae lä äni üng kangpraw vi. ³Tukha äticaw ni ma Isu tea “Areng ä, nang bälung aevaw saite Lazarae lä naw kha awng vi” näkha angthang thui pa.

⁴Isu lä honi angthang thai pyng-a “Honi känaw lä dü saite hai teng hethang y rawng. Säthaw üng phung-ang aetüng hai hethang naw te kae. Hokä naw saite hai-a, Säthaw lä Äcäpaw üng phung-ang mätü vi ai” näkha näpa.

⁵Isu lä Matha, Maeri ni Lazarae ce tea bälung aevaw te vi. ⁶Tungaila Lazarae naw te phüng thai ea, Isu lä honi mityng-a, käni netä awng pa te vi rawng. ⁷Tupyng-a lä Isu ma äma üng äkähui na tea “Judae khö-a ly ö si” näkha näpa.

⁸Äkähui na ma “Särae ä, Judae khimi na lä nang tea kälung hai käde hethang sa ö te lä qae y vi rawng. Honi mityng-a nang ly haile be vi ai rawng mei” näkha düng pa.

⁹Isu ma “Känitä-a naeri hawlai netä awng. Käni üng kaevang awng tea aeke saite khimi na lä äkho mäthui pha te awng y. Ätephüng-a mei nädylä, äni ce lä älawng üng khimi na tea kaevang py saite tea nung ö vi. ¹⁰Kärung thung-a aeke saite khimi na lä kaevang awng y te phüng-a, äkho mäthui pha ö vi ai” näkha näpa. ¹¹Isu ma hini kätyng thui pyng ea “Mä-ai üng rawijae Lazarae lä i te vi. Äni bung i bälaw hethang, Kai ly ai rawng ba” näkha näpa.

¹²Äkähui na ma “Areng ä, äni lä i te kae dylä, naw te hawi haile vi ai mang” näpa.

¹³Isu ma Lazarae dü te phüng hini kätyng thui pa ea äkähui na lä Lazarae i tätang te phüng thui te käthi ö te vi. ¹⁴Tupyng-a Isu ma äni ce tea cüngpra-a “Lazarae lä dü vi dy. ¹⁵Tungaila honi mityng-a Kai awng y te lä nang ce tähang Kai lä anghawtho te vi. Ätephüng-a mei nädylä vaihi nang ce lä Kai tea yng tätang ö vi ai. Co, äni tea ly ö bawi si” näpa.

¹⁶Didamu näsaite Thawmae ma äkähui na tea “Mä-ai angxynlyng Särae hai mangtä ly ö si. Äni hai mangtä dü ö si” näkha näpa.

Isu lä Matha ni Maeri hai älo aepe

¹⁷Isu tyng saite kätü-a, Lazarae bung aevui khüng te lä käni bälitä awng pa vi dy. ¹⁸Bethani vang lä Jerusalem märü hai meng netä rytä hanglaw te vi. ¹⁹Judae khimi kä-awng mang na lä, Matha ni Maeri tea ly kha kangpraw dü te phüng-a bälung bädang pa ö dy.

²⁰Matha lä Isu ly te thai kha lady hethang tho pa dy. Maeri lä ing-a aety kha awng pa te vi. ²¹Matha ma Isu tea “Areng ä, hini mityng-a nang awng kha lä kai üng kangpraw lä dü he y. ²²Tungaila vaihi nang üng mäkai saite na lä Säthaw ma sa vi ai näte kai lä mäny vi” näpa.

²³Isu ma äni tea “Nang üng kangpraw lä hing haile tyng vi ai mang” näkha näpa.

²⁴Matha ma “Kangkhüng üng käni-a lä, khimi kädü na aetha tyng te kätü-a, äni la aetha haile tyng by ai näte kai mäny” näpa.

²⁵Isu ma “Kai lä khimi ce bung hing hai kha mätha haile tyng saite Kung vi. Kai tea yng saite khimi na lä dü ngaila, hing haile tyng vi ai. ²⁶Kai tea awng kha yng saite khimi na lä hing kha manila dü y ai dy. Kai üng lo nang lä yng cäkae mei” näkha düng pa.

²⁷Matha ma “Üng, Areng ä, nang lä älawngpre-a cäqa saite Säthaw üng Cäpaw Mesia näte kai lä yng” näkha thui pa.

Isu ma minaw tui qa hai pa

²⁸Matha lä hikä thui pyng-a, ing-a vawi kha äkangby Maeri bung kähyng ea “Särae ly dy. Nang bung la kähyng by” näkha thui pa. ²⁹Hini lo thai kha Maeri lä aetha ea Isu tea ly dawde pa dy. ³⁰Isu lä vang thung-a kung y käla ma, Matha hai aeting saite mityng-a, awng jaw pa vi rawng. ³¹Maeri tea bälung bädang pa hethang ing-a awng saite Judae khimi na ma, Maeri aetha dawde te nung ea lä, raw hethang täprawng-a ly te käthi ö vi. Tukha äni ce lä Maeri üng leithung hui ö dy.

³²Maeri lä Isu awng saite mityng-a tyng pa dy. Äni lä Isu bung nung ea khokung-a bü kha “Areng ä, nang hini mityng-a awng ea kha lä kai üng kangpraw lä dü hethang y” näkha näpa.

³³Isu lä Maeri hai mangtä ly saite Judae khimi na ma raw sung te nung ea lä bälung hawi pa y by vi dy. ³⁴Äni ma “Äni üng äro bung nang ce ma-a aevui ö mei” näkha düng pa. Äni ce ma “Areng ly kha kheng kae-e” näpa.

³⁵Isu lä minaw tui qa pa dy. ³⁶Tukha Judae na ma “Kheng e, Isu lä Lazarae tea matangtä bälung aevaw te vi mei” näkha näpa.

³⁷Tukha Judae khimi phütä na ma “Ämi kangjö khimi bung aevang hai pa saite hini Särae lä Lazarae tea äni dü y ea naw saite hawi rung khytä sa haw y vi mei” näpa ö.

Isu ma Lazarae bung mäning haile tyng pa

³⁸Isu lä bälung hawi y haile te hai täprawng-a ly dy. Honi täprawng täpu khaw tea kälung hai qengtang pa vi. ³⁹Isu ma “Kälung bung nui ö ja la” näpa.

Dü saite üng äticaw Matha ma “Areng ä, vaihi lä äro rawng te mui vi ai dy. Lazarae dü te lä käni bälitä awng te vi dy” näpa.

⁴⁰Tukha Isu ma “Nang yng dylä, Säthaw üng phung-ang bung nung ai näte kai thui pyng te y mei” näkha näpa. ⁴¹Tukha khimi ce lä täprawng üng kälung mäthuija ö pa dy. Tupyng-a Isu lä käni mang-a dy kha “Pä-ai ä, kai üng älo nang tängai te phüng-a kawng bärai ba. ⁴²Nang lä kai üng älo tängai jawjaw te kai mäny vi. Tungaila kai bung nang ma mätaw näte hini mityng-a, awng saite khimi na mäny hethang tähang-a, hini kätyng kai mäkai te vi” näpa. ⁴³Tupyng-a Isu ma Lazarae tho lawi näkha ätüng käleng hai thui pa dy. ⁴⁴Dü saite khimi lä äkö äkho-a, libyng aemeng bung te hai ämikhüng-a sipry aesäbang kha thopu pa dy. Isu ma khimi ce tea “Äni üng aemeng bung saite libyng na lang pa ö lawi, ing-a vawi lawi sy” näkha näpa.

Isu bung bädü hethang aeceng pa

Mat 26:1-5; Mar 14:1-2; Luk 22:1-2

⁴⁵Maeri tea ly saite Judae khimi kä-awng mang na lä Isu sa saite nung kha äni tea yng ö dy. ⁴⁶Tungaila Judae khimi phütä na ma, Pharisai na tea ly kha Isu sa saite phüng thui pa ö dy. ⁴⁷Tupyng-a mäthykung käleng hai Pharisai na lä Sanhendrin kawngci-a aekäcö kha aedüng aethui ö dy. Äni ce ma “Hini khimi lä hi-a, cangxei saite kamarae na sa mang vi. Mä-ai lä ätemakä sa ö ai dy mei. ⁴⁸Äni lä kamarae sa te mä-ai mäkhang y dylä khimi angxynlyng na lä, äni tea yng ö vi ai. Tupyng-a Rom aecörae mätawngky na ly kha Säthaw üng Ingkäcai hai, mä-ai ceng bung täphra vi ai to” näkha thui pa ö dy.

⁴⁹Honi säning-a mäthykung kälengky Kaiafa näsaite khimi lawngtä lä awng vi. Äni ma “Nang ce lä äte la mäny ö y. ⁵⁰Mä-ai ceng angxynlyng na dü te qawng-a lä, khimi ce tähang khimi lawngtä dü te lä hawiky näte nang ce lä mäny ö y mei” näkha näpa. ⁵¹Honi kätyng thui te lä äma üng kaw saite hai-a thui te y. Honi säning-a äni lä mäthykung kälengky vi. Tukha Isu lä Judae khimi na tähang-a dü pa ai mang näkha buisaw lo hai thui rüng pa te vi. ⁵²Isu lä Judae khimi na qaitä tähang dü te y. Äni lä älawngpre-a awng xhixae saite Säthaw üng caw na angxynlyng na tähang dü pa vi ai. Tukä sa te hai-a äni bung kangkawng haetä-a awng hai vi ai.

⁵³Honi käni üng hai aetawng kha äni ce lä Isu bung bädü hethang aeceng ö pa vi dy. ⁵⁴Tukätephüng-a Isu lä Judae khö-a cüngpra-a ly pa y vi dy. Daithung kärang teng üng Epharim näsaite vang-a ly ea äkähui na hai mangtä awng.

⁵⁵Judae khimi na üng Cäqengja saite pawi lä aenai pa dy. Tukätephüng-a vang-a awng saite khimi na lä reitae kätyng aemäcai ping hethang tähang pawi tyng y te kälang-a Jerusalem märü-a ly ö dy. ⁵⁶Äni ce lä Isu bung mäqang ö dy. Äni ce lä Säthaw üng Ingkäcai baesung thung-a aedaw kha “Äni lä hini pawi-a ly ai mei. Nang ce lä makä aedawng ö mei” näkha äma ce tingtawi aedüng aethui ö dy. ⁵⁷Mäthykung käleng na hai Pharisai na lä khimi lawng lawngtä ma Isu awng saite mityng mäny dylä äni bung ne haw hethang angthang aethai hai he kae näkha täru khi pa dy.

Bethani vang-a Isu kho-a rimui tui kädi pa saite

Mat 26:6-13; Mar 14:3-9

¹Cäqengja te Pawi tyng hethang käni tärutä ngai saite kätü-a, Isu lä Bethani vang-a tyng pa dy. Honi vang-a dü te üng Isu ma mäning haile tyng saite Lazarae lä awng by. ²Äni ce lä Isu tea kädüngbö mäcaw kha Matha ma bö ang aepaw pa dy. Isu hai bö ca te thung-a Lazarae la qa by. ³Tukha Maeri lä ävang ting phi saite rimui pilangtä süng kha ly pa. Honi rimui lä nadu näsaite üng sa te vi. Isu üng äkho-a honi rimui tui kälo kha äma üng äsang hai mai pa vi. Honi rimui tui üng ämui lä engthung khaw-a awng saite khimi angxynlyng na thai pa vi dy. ⁴Isu bung täre na kö-a a saite äkähui Judae Iskriota ma lä ngai pa y. ⁵Äni lä makäte phüng-a “Hini rimui lä phawisae cungvai thungtä-a, jaw kha dang saite phawisae lä mätang saite khimi na tähang py pa y te mei. Hini phawisae lä khimi lawngtä üng känitä sa kha dang saite ävang jetä vi” näkha näpa. ⁶Judae lä mätang saite khimi na tea bäheng kha thui te y. Äni lä theru te phüng-a, hini kätyng thui te kae. Äni lä tangkae cawngkö süng kha äma tähang kangru-a, mäsung te vi.

⁷Isu ma “Hini nawngmädi tea lä sakälö khü pa hang. Äni lä Kai bung aevui te kätü-a Kai tähang äni ma sa saite tea lä sädi dang ö sy. ⁸Mätang saite na lä nang ce hai mangtä awng jawjaw te kae. Kai lä nang ce hai mangtä awng jawjaw he y lyng” näpa.

Lazarae bung bädü hethang aeceng pa

⁹Bethani vang-a Isu tyng te thai kha Judae khimipui na lä, honi vang-a ly ö bawi dy. Äni ce lä Isu ma qaitä tea nung hethang ly ö te y. Isu ma mäning haile saite Lazarae bung la nung hethang ngai te phüng-a ly ö te kae vi. ¹⁰Tukätephüng-a mäthykung käleng na lä Lazarae bung la bädü hethang aeceng ö pa dy. ¹¹Lazarae phüng-a Judae khimi kä-awng mang te na lä, mäthykung käleng bung khaisö kha Isu tea yng pa ö te phüng-a vi.

Isu Jerusalem märü-a kung pa

Mat 21:1-11; Mar 11:1-11; Luk 19:28-40

¹²Kädang pyng üng känitä-a lä, Cäqengja Pawi-a ly saite khimipui na lä Jerusalem märü-a Isu ly ai näte angthang thai ö vi dy. ¹³Äni ce lä cangrang cangpre na süng kha “Hosana näkha Säthaw tea bälaw ö si. Areng üng ämüng hai ly saite lawngtä tea Säthaw ma tähang kähawi py sy. Isrelae khimi na üng sanphrang lä tähang hawi te awng sy” näkha a ea Isu bung lady pa ö dy.

¹⁴Isu lä cäphö känawkhing käsa cäpi bung nung kha honi qawng-a aedang pa dy. Caekäcai ping thung-a hini kätyng tärü te awng vi.

¹⁵“Jerusalem märü üng khimi na ä12:15 Zaion üng cänung ce ä, ri ö y ma.

Kheng kae-e, nang ce üng sanphrang lä

cäphö känawkhing käsa cäpi qawng-a aedang kha ly dy näkha awng.”

¹⁶Äkähui na lä honi kätü-a, hini phüng thaikaw ö pa y. Isu lä dü te üng aetha pyng-a phung-ang dang pyng ea lä, hini Caekäcai ping lä Isu phüng näte hai Isu tähang hini kätyng sa te mäny haile tyng ö dy.

¹⁷Tukha Isu ma Lazarae bung täprawng thung üng kähyng kha mätha haile tyng te kätü-a, awng saite khimipui na ma honi angthang lä aethang haidü vi dy. ¹⁸Honi cangxei saite kamarae sa te thai te phüng-a, khimipui na lä Isu tea lady hethang ly pa ö dy. ¹⁹Pharisai na ma “Kheng kae-e, mä-ai lä äte haetä la sakaw te y. Älawng üng khimi angxynlyng na lä äni leithung hui king ö vi dy” näkha äma ce tingtawi aethui ö dy.

Käri khimi ce ma Isu bung mäqang pa

²⁰Jerusalem märü-a pawi sa te kätü-a, Säthaw tea cäphaw hethang Käri khimi phütä na ly by. ²¹Äni ce ma Kalile khö Besaida märü üng Philip tea ly ea “Särae ä, kai ce lä Isu bung nung hethang ngai” näkha näpa.

²²Philip lä Andru tea ly kha hini phüng thui pa dy. Tupyng-a änini lä Isu tea ly hawi kha honi phüng na thui pa dy. ²³Isu ma “Kai, Khimi üng Cäpaw, üng phung-ang aetüng hethang kätü lä tyng dy. ²⁴Tängai ö. Caw mö lä älawng qawng-a aeqa ea aekaw y dylä mötä xyng awng he kae vi. Caw mö lä aekaw kha aepra dylä äthai awng mang-a aethai vi ai. ²⁵Khimi lawngtä lä, äma üng hing saite tea bälung aevaw dylä äni lä pra vi ai. Hini älawng qawng-a, mä-ai ma üng hing te tea mäsai y saite na lä, dungtäsa hing saite dang ai. ²⁶Kai üng mawsawng sa he ngai dylä kai leithung hui hethang kae. Kai awng te mityng-a lä kai üng mawsawng la awng by ai. Kai üng mawsawng na tea lä, Kai üng Pä-ai ma tämö mäsang vi ai.

Isu lä äma dü hethang phüng thui pa

²⁷“Vaihi kai lä bälung mätangca te hai awng te vi. Kai lä ätemakä thui ai mei. ‘Ä-ai ä, Kai lä hini mätangca saite na kai tea tyng hai hang’ näkha thui ai mei. Kai lä hini mätangca saite na aeting hethang ly te kae. ²⁸Pä-ai ä, nang üng ämüng lä phung-ang aetüng sy.”

Käni mang üng ätüng lä “Kai lä phung-ang aetüng te vi dy. Tupyng-a phung-ang lä aetüng be ai rawng” näkha thui pa.

²⁹Honi mityng-a aedaw saite khimipui na lä ätüng thai kha phütä na ma lä “Khö bärü te tüng” näpa. Phütä na ma “Isu tea Säthaw üng angtawtha ma älo aepe te kae” näpa.

³⁰Isu ma “Hini ätüng lä kai tähang y lyng. Nang ce tähang kae. ³¹Vaihi ma älawngpre üng khimi na tea tärae cei he kätü lä tyng te dy. Säthaw ma hini älawngpre tea pyng saite Setan angra bung lä mäthoja vi ai. ³²Äni ce lä kai bung thinglang qawng-a bang ö vi ai. Tupyng-a khimi angxynlyng na bung kai ma tea ka vi ai” näpa. ³³Hini kä thui te lä äma ätemakä dü ai mei näte phüng thui rüng pa te vi.

³⁴Khimipui na ma “Mesia lä dungtäsa hing jaw ai näkha Ubädi lo thung-a awng. Tudylä Kai, Khimi üng Cäpaw, bung thinglang qawng-a täheng vi ai näkha nang lä makäte phüng-a thui haw te mei. Kai, Khimi üng Cäpaw, näte lä ämi mei” näkha düng pa.

³⁵Isu ma “Äkaevang lä nang ce tea tänaetä awng ai. Nang ce tea käving ma bäja y hethang kaevang awng te thüng-a ly ö lawi. Käving-a ly saite nang lä nang ma mani mityng-a ly mei näte mäny y. ³⁶Kaevang awng te thüng-a honi kaevang tea yng ö lawi. Tukä ea ni nang ce lä kaevang üng caw-a aelawng ö ai” näkha thui pa. Tupyng-a Isu lä tho kha khimi ce äma bung nung haw y saite mityng mang-a ly ja pa vi dy.

Khimi ce ma yng pa y

³⁷Isu ma äni ce üng maw-a kamarae na awng mang-a sa pa vi dy. Tungaila äni ce lä Isu tea yng ö pa y vi rawng. ³⁸Hini na lä buisaw Isaia thui te kätyng tyng khaw te dy. Äni ma

“Areng ä, kai ce üng thui saite angthang tea ämi ma yng mei.

Areng ma äni üng haidae ämi tea mätu mei” näkha nä vi.

³⁹Khimi ce lä ätephüng-a yng haw y mei näte buisaw Isaia ma thui te vi.

⁴⁰Äni lä “Säthaw ma äni ce üng ämi bäjö hai pa te vi.

Äni ce üng bälung la tangkö hai pa vi.

Tukätephüng-a äni ce üng ämi na la nung haw ö y.

Bälung hai la mäny haw y.

Äni ce üng naw saite na hawi hethang kai tea aekö haile tyng ö y” näpa.

⁴¹Isaia lä Isu üng phung-ang nung te phüng-a, äni phüng hini kätyng thui rüng pa te vi.

⁴²Tungaila Judae mätawngky thung üng khimi awng mang saite na lä Isu tea yng ö dy. Äni ce lä Pharisai na ma, Judae na üng ingkäcai thung üng mätho ai näte ri te phüng-a, yng te phüng cüngpra-a thui ö vawng pa te y vi. ⁴³Äni ce lä Säthaw ma bälaw te qawng-a, khimi ce üng bälaw saite tea ngaiky ö te phüng-a vi.

Isu ma khimipui na tea Kangkhüng üng thui te lo

⁴⁴Tukha Isu ma “Kai tea yng te na lä kai ma qaitä tea yng te y. Kai bung mätaw saite Kung tea yng te by kae dy. ⁴⁵Kai bung nung te na lä kai bung mätaw saite Kung tea nung te by kae dy. ⁴⁶Kai tea yng saite angxynlyng na lä, käving thung-a awng y hethang kai lä kaevang-a aelawng kha älawng qawng-a cäqa te dy. ⁴⁷Kai thui saite älo thai ea tängai y te khimi ce tea kai lä tärae cei he y. Älawngpre üng khimi na tea tärae cei hethang kai ly te y. Älawngpre üng khimi na bung aeqang hethang kai ly te kae.

⁴⁸“Kai bung mäkung y kha älo tängai y saite khimi na tea tärae cei hethang lawngtä awng. Kai thui saite älo ma kangkhüng käni-a, äni tea tärae cei vi ai. ⁴⁹Ätephüng-a mei nädylä kai lä kai ma üng aenae hai thui te y. Kai bung mätaw saite Pä-ai ma ätemakä angtu thui ai mei näte kai tea thui te vi. ⁵⁰Pä-ai üng hini älosai phüng-a, khimi ce lä dungtäsa hing saite dang vi. Tukha kai thui saite lo lä, Pä-ai ma thui hai te vi” näkha ätüng käleng hai thui pa dy.

Isu ma äkähui na üng äkho mäse pa

¹Cäqengja te pawi käni haetä tyng hethang kätü lä aenai dy. Isu lä älawngpre üng tho kha Pä-ai tea vawi haile hethang kätü tyng te mäny pa vi. Isu lä älawngpre-a awng saite äma üng äkähui na tea bälung aevaw jawjaw te vi. Äni ce tea käni kangteng khytä bälung aevaw jawjaw vi.

²Isu hai äkähui na lä kädüngbö mangtä ca kha awng ö dy. Setan angra lä Simon üng cäpaw Judae Iskriota tea Isu bung täre na üng kö thung-a, a hethang bärawi rüng pa vi dy. ³Pä-ai ma Isu tea äte angxynlyng na sa hethang aenae a pa dy. Isu lä hini na mäny king te vi. Äma lä Säthaw te mang üng ly te vi kha Säthaw tea vawi haile tyng ai näte mäny te vi. ⁴Tukha äni lä kädüngbö ca te loka üng aetha kha äma üng känih aeling pa dy. Sipry la ea angkeng-a aemäkhing dy. ⁵Tupyng-a kaephi käleng-a tui kädi ea äkähui na üng äkho mäse kha angkeng-a aemäkhing saite sipry hai mai pa dy.

⁶Simon Peterae tea tyng ea lä äni ma “Areng ä, kai üng äkho tea nang lä mäse by vi ai mei” näkha düng pa.

⁷Isu ma “Kai sa saite tea vaihi nang lä mäny y rawng. Khawngdüng-a nang lä mäny by ai mang” näkha näpa.

⁸Peterae ma “Areng ä, kai üng äkho tea manila mäse hang” näpa.

Isu ma “Nang üng äkho tea kai mäse y dylä, nang lä kai hai aesui te y dy” näkha näpa.

⁹Tukha Simon Peterae ma “Areng ä, kai üng äkho mäse te cang y äkö hai älö na la mäse king kae” näpa.

¹⁰Isu ma “Tui aehu pyng saite khimi üng ätabung lä caiping pyng te vi dy. Äkho ni mäse hethang ngai te kae. Nang ce angxynlyng caiping ö vi dy. Tungaila nang ce thung-a lawngtä lä caiping te y vi.” (¹¹Isu lä äma bung ämi ma täre na kö thung-a, a ai mei näte äni lä mäny te vi. Tukätephüng-a “lawngtä lä caiping y” näkha thui te vi.)

¹²Isu lä äkähui na üng äkho mäse pyng ea känih aekhu haile tyng kha cäpawikhung-a aety pa be dy. Äni ma “Nang ce tea kai sa saite na mäny ö dy mei” näkha düng pa. ¹³Nang ce lä kai tea “Särae, Areng” näkha kähyng ö. Honi kätyng nang ce kähyng te lä tüngkhaw te vi. Kai lä honi dy. ¹⁴Kai lä nang ce üng Särae hai Areng la vi. Tukha nang ce üng äkho tea kai ma mäse te kätyng nang ma ce tingtawi la äkho aemäse hethang kae näpa. ¹⁵Nang ce tea kai sa te kätyng nang ma ce tingtawi sa hethang kae. Kai ma sa te kätyng nang ce kai üng könüng la ö.

¹⁶“Tängai ö, mawsawng lä äma üng areng qawng-a lengky te y. Angtawtha la mätaw saite ingkung qawng-a lengky te y lyng. ¹⁷Vaihi hini phüng nang ce mäny kha honi kätyng sa dylä Säthaw ma nang ce tea tähang kähawi py ai.

¹⁸“Nang ce angxynlyng phüng tea kai lä thui te y. Re pyng saite khimi na bung kai lä mäny vi. Tungaila Caekäcai thung-a awng te lä ‘Kai hai bö mangtä ca saite khimi lä kai tea äkho hai mäthui a’ näkha tärü saite kätyng tyng khaw vi ai” näpa. ¹⁹“Honi kätyng tyng te kätü-a Kai lä kai vi näte nang ce yng hethang tähang-a honi na tyng y te kälang-a, vaihi ma nang ce tea thui rüng te dy ba. ²⁰Tängai ö. Kai ma mätaw saite bung mäkung saite khimi lä kai bung mäkung te by kae dy. Kai bung mäkung saite khimi na lä, kai bung mätaw saite Säthaw bung mäkung te by kae dy” näpa.

Isu bung a saite khimi

Mat 26:20-25; Mar 14:17-21; Luk 22:21-23

²¹Isu lä hini kätyng thui pyng ea bälung mätangca te tyng pa dy. Äni ma “Tängai ö. Nang ce thung üng lawngtä ma, kai bung täre na kö thung-a a vi ai” näkha cüngpra-a thui pa dy.

²²Äkähui na lä äma ce tingtawi aekheng ö rü dy. Isu lä ämi phüng thui te mei näte äni ce lä mäny ö y. ²³Isu ma bälung aevaw saite äkähui lawngtä lä äni üng äteng-a aety pa dy. ²⁴Simon Peterae ma lä Isu ma bälung aevaw saite äkähui tea “Ämi phüng thui te mei” näte düng hethang sädi py pa.

²⁵Tukha Honi äkähui lawngtä lä Isu tea aeneng kha “Areng ä, äni lä ämi mei” näkha düng pa.

²⁶Isu lä “Täkaw kaehütä angfang thung-a sänung kha py saite lä äni dy” näkha näpa. Tupyng-a Isu lä Simon üng cäpaw Judae Iskriota tähang täkaw kaehütä ang thung-a sänung kha py pa dy. ²⁷Honi täkaw tea Judae ma la pyng-a Setan angra lä äni tea kung praw pa vi dy. Isu ma “Judae ä, nang ma sa hethang ngai saite kärang-a sa lawi” näpa. ²⁸Isu ma ätephüng-a Judae tea hini kätyng thui te mei näte bö aw saite äkähui na lä ämi lawngtä la mäny pa ö y. ²⁹Judae Iskriota lä tangkae cawngkö süng saite khimi vi kha pawi tähang ngai saite na rang hethang, y dylä mätang saite khimi na tähang phawisae py hethang tähang-a, Isu ma älo py pa müng näkha äkähui na lä aedawng ö te vi.

³⁰Tukha Judae Iskriota lä täkaw kaehütä la pyng-a, ärang-a tho praw pa vi dy. Honi kätü lä kärung thung-a vi.

Isu lä äma dü ai te phüng thui haile tyng pa

³¹Judae thoja pyng ea Isu ma “Vaihi ma Säthaw lä Kai, Khimi üng Cäpaw, lä phung-ang aetüng ai dy. Äni hai-a Säthaw üng phung-ang aetüng te dy. ³²Säthaw lä Äcäpaw hai-a phung-ang aetüng te dylä, Säthaw ma khekhe Äcäpaw üng phung-ang kärang-a aetüng hai pa ai. ³³Kai caw nade na ä, Kai lä nang ce hai tänaetä awng he kae dy. Nang ce lä Kai bung mäqang ö vi ai. ‘Kai ly saite mityng-a, nang ce lä ly haw y lyng’ näkha Judae mätawngky na tea thui te kätyng, vaihi nang ce tea la Kai ma thui te dy ba. ³⁴Kai lä nang ce tea särilo kangthae py dy. Nang ma ce tingtawi bälung aevaw ö. Kai lä nang ce tea bälung aevaw te kätyng nang ma ce tingtawi lawng lawngtä tea bälung aevaw hethang kae. ³⁵Nang ma ce tingtawi bälung aevaw dylä, khimi angxynlyng na ma nang ce lä Kai üng äkähui tätang na vi näte mäny ö ai mang” näpa.

Peterae lä aephae ai näte phüng thui rüng pa

Mat 26:31-35; Mar 14:17-31; Luk 22:31-34

³⁶Simon Peterae ma “Areng ä, mani mityng-a ly ai mei” näkha düng pa.

Isu ma “Kai ly saite mityng-a nang lä vaihi hui haw y lyng. Khawngdüng-a lä, hui haw ai mang” näpa.

³⁷Peterae ma “Areng ä, ätephüng-a vaihi kai lä hui haw y te vi mei. Areng nang tähang kai dü hethang awng rüng te dy” näkha näpa.

³⁸Isu ma “Kai tähang nang lä dü hethang awng rüng dy mei. Tungaila aekhawng y te kälang-a, nang lä Kai bung qeng thungtä aephae vi ai” näkha näpa.

Isu lä Pä-ai tea ly saite lolang

¹Isu ma “Nang ce lä bälungbi ö hang. Säthaw tea phai yng ö. Kai tea la yng ö. ²Kai üng Pä-ai ing-a awng nae mityng awng mang. Awng nae mityng awng mang y kha lä Kai thui y vi ai dy. Nang ce tähang mityng sa rüng hethang Kai ly ai rawng. ³Kai ly kha nang ce tähang mityng sa rüng pyng-a, Kai ly haile tyng ai rawng mang. Kai awng saite mityng-a awng hethang nang ce bung la Kai ma ka haile ai rawng mang. ⁴Kai ly saite mityng-a ly hethang lolang nang ce lä mäny ö dy” näpa.

⁵Thawmae ma “Areng ä, nang ly saite mityng kai ce lä mäny y. Ätemakä sa kha honi lolang bung kai ce mäny haw ai mei” näkha düng pa.

⁶Isu ma “Kai lä lolang vi. Älo mitang hai Hing saite la vi. Pä-ai tea tyng rung khytä ly haw saite lolang lä Kai ma qaitä kae. ⁷Nang ce ma Kai bung mäny tätang dylä, Kai üng Pä-ai bung la mäny ö ai mang. Vaihi üng hai aetawng kha nang ce lä, Kai üng Pä-ai bung mäny kha nung ö dy” näkha näpa.

⁸Philip ma “Areng ä, Pä-ai bung kai ce tea mätü jo by ä. Honi kätyng mätü dylä kai ce üng ngai saite cungrü ai dy mang” näkha näpa.

⁹Isu ma “Philip ä, Kai lä nang ce hai mangtä awng te qae vi dy. Nang ce lä vaihi khytä, Kai bung mae te y vi rawng mei. Kai bung nung saite khimi lä Kai üng Pä-ai bung nung te by kae dy. Kai üng Pä-ai bung kai ce tea mätü näkha ätephüng-a nang lä thui te mei.” ¹⁰Kai lä Pä-ai tea awng kha Pä-ai la kai tea awng näte nang lä yng y mei. Nang ce tea kai thui te lä, kai ma üng lo y. Kai sa te na la kai tea awng saite Pä-ai lä äma üng kälu sa hai te vi. ¹¹Kai lä Pä-ai tea awng ea Pä-ai la kai tea awng näte yng ö lawi. Tukä y dylä kai sa saite kamarae tea kheng kha yng ö lawi. ¹²Tängai ö. Kai tea yng saite khimi na lä kai sa saite cangxei te kälu na sa haw ö vi ai. Honi qawng-a lengky saite cangxei saite kälu na la sa haw vi ai rawng. Ätephüng-a mei nädylä kai lä Pä-ai tea vawi ai dy. ¹³Kai üng ämüng hai-a nang ce mäkai te kätyng kai ma sa py ai. Tukha hini kätyng Cäpaw hai-a Pä-ai üng phung-ang lä aetüng vi ai. ¹⁴Nang ce lä Kai üng ämüng hai-a, ätete hae haetä mäkai saite na Kai ma sa py ai mang.

Muilaw Käcai bung mätaw he aedo pa

¹⁵“Nang ce ma kai tea bälung aevaw dylä kai üng särilo na nang ce tängai hethang kae. ¹⁶Kai lä Pä-ai tea mäkai kha nang ce hai mangtä awng jawjaw hethang säbawng saite Kung lawgtä bung mätaw ai mang. ¹⁷Äni lä Säthaw phüng mitang-a aetüng pa saite Muilaw Käcai vi. Älawng üng khimi na lä honi Muilaw Käcai bung bälung thung-a mäkung haw y. Nung y kha äni bung mäny ö y. Tungaila nang ce üng bälung thung-a hini Muilaw Käcai awng jawjaw te phüng-a, nang ce lä äni bung mäny te vi.

¹⁸“Kai lä nang ce bung ruicaw kätyng-a khaisö y lyng. Nang ce tea kai ly haile tyng ai rawng mang. ¹⁹Qae y te kätü-a älawng üng khimi na lä, kai bung nung ö haw y dy. Tungaila nang ce lä nung ö vi ai rawng. Kai lä hing te phüng-a nang ce la hing ö by vi ai. ²⁰Kai aetha haile te käni-a, kai Pä-ai tea awng ea nang ce lä kai tea awng te kätyng kai la nang ce tea awng näte nang ce mäny ö ai mang.

²¹“Kai üng särilo thai kha tängai saite khimi na lä, kai tea bälung aevaw ö te dy. Kai bung bälung aevaw saite khimi na tea lä, Pä-ai la bälung aevaw by vi ai. Kai la äni ce tea bälung aevaw kha kai ma khekhe äni ce tea aetüng hai pa vi ai” näkha näpa.

²²Judae Iskriota y saite äkälang Judae ma “Areng ä, älawng üng khimi na tea nang ma bung aetüng hai y käla kai ce tea ätemakä sa kha aetüng te vi mei” näkha düng pa.

²³Isu ma “Kai tea bälung aevaw saite khimi na lä, kai üng angtu lo tängai ö vi ai. Kai üng Pä-ai lä äni tea bälung aevaw vi ai. Pä-ai hai kai ni lä äni ce hai mangtä awng ai. ²⁴Kai tea bälung aevaw y saite khimi na lä, kai üng angtu lo tängai y lyng. Nang ce thai saite lä kai ma üng mätu saite lo y. Kai bung mätaw saite Pä-ai üng angtu lo kae.

²⁵“Nang ce hai mangtä awng te thüng-a ma, kai lä hini älo na thui pyng te vi dy. ²⁶Pä-ai lä kai üng ämüng hai-a, nang ce tähang mätaw saite säbawng te Kung, Muilaw Käcai lä, nang ce tea angxynlyng na mätu pa ai. Kai thui pyng te na sädi dang hai ai mang.

²⁷“Nang ce bälung awng derui saite Kai ma khai pa dy. Kai üng awngneng saite nang ce tea py dy. Älawng üng khimi na lä hini awngneng saite py haw y. Nang ce lä bälungbi ö hang. Ri ö hang. ²⁸Kai lä ly ja ngaila nang ce tea ly haile tyng ai näte Kai thui te nang ce thai pyng te dy. Nang ce ma Kai tea bälung aevaw dylä, Kai üng Pä-ai tea ly te phüng-a, nang ce lä kawng ö by ai. Ätephüng-a mei nädylä, Pä-ai lä Kai qawng-a lengky. ²⁹Hini na tyng te kätü-a, nang ce yng hethang tähang hini na tyng y kälang-a, vaihi Kai ma thui rüng te vi dy. ³⁰Älawngpre bung pyng saite Setan angra lä, ly sälö te phüng-a, Kai lä nang ce hai älo awng mang-a aepe haw y ai dy. Äni lä kai tea bäja haw y lyng. ³¹Kai lä Pä-ai tea bälung aevaw näte älawngpre üng khimi na ma mäny hethang aely ngai. Tukätephüng-a Pä-ai ma kai tea thui te kätyng, Kai lä angxynlyng na sa khaw te kae.

“Hini mityng üng aetha kha ly ö si dy” näkha näpa.

Cäpje kung hai mätae pa

¹“Kai lä Cäpje kung tätang dy. Kai üng Pä-ai lä angkhaw Kung vi. ²Äni ma kai tea äthai aethai y saite cangpre angxynlyng na bung tälei pa vi. Äthai aethai saite cangpre na bung lä, äthai aethai rae hethang cangpre na bung dawi rung khytä tälei pa vi. ³Nang ce lä kai thui saite älo phüng-a caiping ö pyng te vi dy. ⁴Kai lä nang ce hai aesui jawjaw. Kai lä nang ce hai aesui jawjaw ai mang. Cäpje cangpre lä äkung hai aesui y dylä äthai aethai haw y. Äkung hai aesui ea ni äthai aethai haw te kae. Nang ce la kai tea aesui y dylä äte la sa haw y lyng.

⁵“Kai lä Cäpje kung hai aetawng vi. Nang ce lä cangpre na hai aetawng vi. Khimi lawngtä lä kai hai aesui kha kai lä äni hai aesui ea ni, äthai aethai mang vi ai. Kai ma nang ce tea säbawng y dylä nang ce äte la sa haw y lyng. ⁶Khimi lawngtä lä kai hai aesui y dylä ärang-a käde saite cangpre käcei hai aetawng vi ai. Khimi ce lä honi cangpre na mäküng cu kha mai thung-a käde ö te vi. ⁷Nang ce lä kai hai aesui kha kai üng älo nang ce sädi dang dylä nang ce ngai saite ätete na mäkai ea Säthaw ma py ai mang. ⁸Nang ce lä äthai awng mang-a aethai te hai-a, Pä-ai üng phung-ang aetüng hai pa dy. Honi hai-a nang ce lä kai üng äkähui-a, aelawng ö te dy. ⁹Pä-ai ma kai tea bälung aevaw te kätyng kai lä nang ce tea bälung aevaw te by vi. Nang ce lä kai üng bälung aevaw te thung-a awng ö jawjaw ba. ¹⁰Kai lä Pä-ai üng särilo tängai kha Pä-ai lä Kai tea bälung aevaw jawjaw te kätyng nang ce lä Kai üng särilo tängai dylä, Kai lä nang ce tea bälung aevaw jawjaw vi ai.

¹¹“Nang ce lä Kai te üng anghawtho saite dang hethang hini phüng na Kai lä thui te vi. Nang ce anghawtho te cungrü hai hethang ngai te vi. ¹²Kai üng särilo lä hikä dy. Nang ce tea Kai bälung aevaw te kätyng nang ma ce tingtawi bälung aevaw ö. ¹³Mä-ai ma üng rawijae na tähang dü hethang aerü rüng saite khimi lawngtä üng bälung aevaw te qawng-a lengky saite bälung aevaw te lä ämi tea la awng y. ¹⁴Kai üng särilo kätyng nang ce sa ö dylä kai üng rawijae na kae dy. ¹⁵Kai lä nang ce tea mawsawng näkha kähyng y dy. Ätephüng-a mei nädylä mawsawng lä ingkung üng aedawng saite na mäny y. Tungaila vaihi kai lä nang ce tea ‘Rawijae’ näkha kähyng dy. Ätephüng-a mei nädylä, Pä-ai te üng thai saite älo angxynlyng nang ce tea kai lä thui pyng te vi dy. ¹⁶Nang ce ma kai bung re te y. Kai ma nang ce bung re te kae. Nang ce ly kha äthai aethai mang hethang kai lä mätaw te vi. Nang ce lä aekang jawjaw saite äthai na äthai he kae. Tupyng-a kai üng ämüng hai-a, nang ce mäkai saite angxynlyng na lä Pä-ai ma py ai mang. ¹⁷Hini lä kai üng särilo dy ba. Nang ma ce tingtawi bälung aevaw ö.

Älawng khimi ce ma äkähui na tea esäre pa

¹⁸“Älawng üng khimi na ma nang ce tea esäre dylä kai tea esäre mang te vi näte nang ce la sädi dang ö ba. ¹⁹Nang ce lä älawng hai aesui saite khimi na y. Nang ce lä älawng üng khimi na aesui dylä äni ce ma nang ce tea äma ce üng rawijae kätyng bälung aevaw ai mang. Kai lä nang ce bung älawng üng khimi na thung üng re te dy. Tukätephüng-a älawng üng khimi na ma nang ce tea esäre ö te kae. ²⁰Nang ce tea kai thui vai saite na aedawng hai ö. ‘Mawsawng lä areng qawng-a lengky y’ näkha näpa. Älawng üng khimi na ma kai tea sakälö khü dylä, nang ce tea la sakälö khü ö vi ai. Äni ce ma kai üng mätu saite lo tängai dylä, nang ce üng mätu saite lo la tängai ö vi ai. ²¹Khimi ce lä kai bung mätaw saite Säthaw bung mäny ö y. Tukätephüng-a nang ce lä kai üng äkähui na te phüng-a, nang ce tea sakälö khü ö vi ai. ²²Kai ly kha äni ce tea thui y dylä, äni ce üng hunghö lä äni ce tea awng jawjaw hethang y. Äni ce lä äma ce sa saite hawi y, näte mäny näkha thui haw y. ²³Kai tea esäre saite khimi lä Kai üng Pä-ai tea la esäre te by kae dy. ²⁴Kai lä ämi la sa vai y saite kamarae äni ce maw-a sa y kha lä äni ce üng hunghö lä äni ce tea awng jawjaw hethang y. Vaihi äni ce lä hini kai sa saite kamarae na nung ngaila Kai hai Kai Pä-ai tea esäre ö te vi. ²⁵Hini kätyng Caekäcai ping thung-a tärü te lä “Äni ce lä Kai tea esäre hethang äte phüng la awng y käla ma Kai tea esäre ö te vi” näkha näpa.

²⁶“Säbawng te Kung Muilaw Käcai bung nang ce tähang Kai ma mätaw ai. Hini Muilaw Käcai lä Säthaw phüng mitang khaw-a thui ai. Äni lä Pä-ai te üng ly kha Kai phüng thui pa ai mang. ²⁷Nang ce la Kai üng phüng na thui ö vi ai. Ätephüng-a mei na dylä, angcü üng hai Kai hai mangtä awng te phüng-a vi.”

¹Isu ma “Nang ce üng yng te pra y hethang hini lo kai thui te vi. ²Äni ce lä nang ce bung Judae na üng ingkäcai thung üng mätho ö vi ai. Nang ce bung bädü saite khimi lä Säthaw üng kälu sa te dy näkha äma aedawng te kätü lä tyng khaw vi ai rawng. ³Khimi ce lä Pä-ai hai Kai ni bung mäny ö y te phüng-a, hini kätyng nang ce tea sa ö vi ai. ⁴Hini phüng lä nang ce tea kai lä thui rüng te vi dy. Hini phüng na tyng dylä, Kai ma thui rüng te kätyng nang ce lä sädi khai ö vi ai. Angcü-a kai lä nang ce hai mangtä awng te phüng-a hini na thui y te vi” näpa.

Muilaw Käcai üng kälu

⁵“Vaihi lä kai bung mätaw saite Kung tea kai lä vawi ai dy. Tungaila nang ce lä ‘Mani mityng-a ly ai mei’ näkha ämi la düng ö y. ⁶Hini phüng vaihi Kai ma thui te phüng-a, nang ce lä bälungsi phi ö dy. ⁷Tängai ö, Kai vawi te lä nang ce tähang hawiky te vi. Kai vawi y dylä nang ce tea säbawng saite Kung lä tyng y lyng. Kai ly kha Muilaw Käcai bung nang ce tea mätaw ai mang. ⁸Honi Muilaw Käcai cäqa te kätü-a, älawng üng khimi na tea hunghö sa saite phüng täphawng pa ai. Khimi ce lä Säthaw üng cüng saite phüng dawng tämang te na tea täphawng ai. Säthaw ma tärae cei saite phüng na la täphawng pa ai mang. ⁹Äni ce lä kai tea yng y te phüng-a älawngpre üng khimi na lä hunghö awng vi. ¹⁰Kai lä Pä-ai tea vawi kha nang ce lä Kai bung nung he y ai dy, te phüng-a hini älawngpre üng khimi na lä Säthaw üng cüng saite phüng aedawng te tämang ö vi. ¹¹Säthaw lä älawngpre bung pyng saite Setan angra tea tärae cei pyng te phüng-a, äni ce lä tärae cei te phüng aedawng te tämang ö vi.

¹²“Nang ce tea Kai thui hethang lä awng mang te vi rawng. Tungaila nang ce lä vaihi thaikaw he y rawng lyng. ¹³Tungaila Säthaw üng älo mitang phüng mätu saite Muilaw Käcai tyng ea lä, nang ce tea älo mitang angxynlyng phüng na täphawng pa ai mang. Honi Muilaw Käcai lä äma ngai te kätyng-a thui he y. Äma thai saite phüng na ni nang ce tea thui hethang kae. Ämaw mang üng phüng na äni ma nang ce tea thui rüng vi ai. ¹⁴Äni lä Kai te mang üng dang saite älo na, nang ce tea thui pa te phüng-a, Kai üng phung-ang bung äni ma aetüng hai pa vi ai. ¹⁵Pä-ai ma pyng saite angxynlyng na lä, Kai hai aesui bawi te vi. Tukätephüng-a Kai ma ‘Honi Muilaw Käcai lä Kai te üng dang saite älo na nang ce tea thui pa ai’ näkha Kai lä thui te dy.

Bälungsi te üng anghawtho haile ai

¹⁶“Kätü tänaetä säla-a ma, nang ce lä Kai bung nung he y dy. Tupyng-a kätü tänaetä qae ea nang ce lä Kai bung nung be haile tyng vi ai” näkha näpa.

¹⁷Tukätephüng-a äkähui na ma “Hini lä ätemakä thui te mei. Äni ma mä-ai tea ‘Kätü tänaetä qae ea nang ce lä Kai bung nung ö he y dy. Tupyng-a kätü tänaetä qae ea lä kai bung nang ce nung ö haile tyng vi ai’ näkha thui vi. Honi kätyng cang y äni ma ‘Kai lä Pä-ai tea vawi ai rawng’ näkha nä vi. ¹⁸‘Kätü tänaetä qae ea näte lä’ ätemakä näte vi mei. Ätemakä thui te mei näte mä-ai lä thaikaw y” näkha äma ce tingtawi aethui ö dy.

¹⁹Isu lä äma tea äni ce düng hethang ngai te mäny kha “Kätü tänaetä qae ea nang ce lä Kai bung nung y lyng dy näte hai, kätü tänaetä qae ea Kai bung nang ce lä nung haile ai näsaite phüng Kai thui te ätemakä näte mei näte nang ma ce tingtawi aedüng ö vi” näpa. ²⁰“Tängai ö, nang ce lä rawpi te kätü-a älawng üng khimi na lä anghawtho ö vi ai. Nang ce lä bälungsi ngaila, honi bälungsi saite lä bälung anghawtho saite na-a lawng ö vi ai mang. ²¹Nawngmädi lawngtä lä äby aepeng te kätü tyng ea äni lä bälung mawng te awng vi. Ätephüng-a mei nädylä, äni lä naw mätang saite kätü tyng pa te phüng-a vi. Tungaila äby aepeng pyng ea lä, älawng qawng-a nade lawngtä bung aepeng pa te phüng-a, äma üng naw saite na tämang raw kha anghawtho vi dy. ²²Hini kätyng-a nang ce lä vaihi bälung mawng üngsüng ö te vi dy. Tungaila Kai lä nang ce hai aeting haile tyng te kätü-a, nang ce lä anghawtho ö vi ai. Nang ce üng anghawtho saite lä ämi khimi ma la, lawngja haw y lyng.

²³“Honi käni-a nang ce lä kai tea äte la mäkai ö y vi ai. Tängai ö. Kai üng ämüng hai-a nang ce mäkai saite angxynlyng na lä Pä-ai ma py ai mang. ²⁴Vaihi khytä nang ce lä Kai üng ämüng hai-a, äte haetä la mäkai ö y vi rawng. Mäkai ö. Nang ce dang ö ai mang. Tukha nang ce üng anghawtho te cungrü hai pa ai.

Älawngpre tea bäja pa

²⁵“Hini phüng na Kai lä mätae te lo hai-a nang ce tea thui pyng te vi dy. Hini kätyng mätae te lo hai thui y käla Pä-ai üng phüng nang ce tea cüngpra-a thui saite kätü lä tyng ai rawng. ²⁶Honi kätü-a nang ce lä Kai üng ämüng hai-a mäkai ö vi ai. Nang ce tähang Pä-ai tea Kai ma mäkai pa ai mang näkha kai lä thui te y vi. ²⁷Ätephüng-a mei nädylä, nang ce lä Kai tea bälung aevaw kha Kai lä Säthaw te mang üng ly näte, nang ce lä yng ö te phüng-a, Pä-ai lä nang ce tea bälung aevaw te vi. ²⁸Kai lä Pä-ai te üng tho kha älawngpre-a cäqa te kae. Vaihi älawngpre üng tho kha Pä-ai tea vawi haile tyng ai dy” näpa.

²⁹Äkähui na ma “Vaihi kätü-a mätae te lo hai thui y käla, cüngpra-a älo thui pa vi dy. ³⁰Nang lä äte cawngkhang na mäny king näte vaihi kai ce lä mäny vi dy. Isu tea ämi la älo düng hethang ngai pa y vi dy. Hini na phüng-a nang lä Säthaw te mang üng ly näte kai ce lä yng vi dy” näkha näpa.

³¹Isu ma “Nang ce lä vaihi yng ö tätang dy. ³²Nang ce angxynlyng lä aehui sangxang kha ing-a vawi hethang kätü lä tyng vi ai rawng. Honi kätü lä vaihi ma tyng te dy. Nang ce lä Kai bung khaisö ö vi ai. Tungaila Pä-ai lä Kai hai mangtä awng kha Kai lä Kai ma qaitä awng te y vi. ³³Nang ce lä Kai hai aesui kha awngneng hethang tähang hini phüng na Kai thui pyng te vi dy. Nang ce lä älawngpre-a mätangca saite na aeting ö vi ai. Tungaila aethaw aela kha awng ö. Kai lä älawngpre tea bäja te vi dy” näkha näpa.

Isu ma äkähui na tähang aetang pa

¹Isu lä hini kätyng thui pyng ea käni mang-a kheng kha “Pä-ai ä, kätü lä tyng te dy. Kai, Äcäpaw, lä Pä-ai üng phung-ang aetüng hai hethang Cäpaw üng phung-ang aetüng hai lawi ba. ²Pä-ai ma Kai, Äcäpaw, tea a saite khimi na tea dungtäsa hing te py hethang tähang-a, khimi angxynlyng na tea pyng saite aenae lä Kai tea py vi dy. ³Dungtäsa hing saite näte lä Säthaw tätang lawngtä xyng tea mäny te hai, Nang, Säthaw, ma mätaw saite Kai, Isu Khrista, bung mäny te tea näte vi. ⁴Hini älawng qawng-a Kai lä Pä-ai üng phung-ang mätü pa te vi dy. Nang ma sa hai saite kälu Kai lä khüng rung khytä sa pyng te vi dy. ⁵Pä-ai ä, vaihi nang ma üng maw-a Kai üng phung-ang aetüng hai lawi. Hini älawngpre awng y te kälang-a ma, Nang hai mangtä pyng saite phung-ang lä, Kai tähang py jo lawi ba.

⁶“Pä-ai ma hini älawng üng Kai tea py saite khimi na bung Pä-ai tea mäny hai te vi dy. Hini khimi ce lä Nang hai aesui kha Nang lä äni ce bung Kai tea a pyng te vi dy. Äni ce lä Nang üng älo tängai jawjaw ö dy. ⁷Pä-ai ma Kai tähang py saite angxynlyng na lä Nang te mang üng ly te vi näte vaihi äni ce mäny ö by dy. ⁸Kai tea Nang ma thui saite angthang Kai lä äni ce tea thui pa kha äni ce lä tängai ö dy. Kai lä Nang ma te üng ly te mäny khü kha Pä-ai, Nang, ma Kai bung mätaw näte äni ce lä yng ö dy.

⁹“Kai lä äni ce tähang aetang pa dy. Ätephüng-a mei nädylä Kai tea Nang ma py saite khimi na lä, Nang hai aesui vi dy. Älawngpre üng khimi na tähang lä aetang y. ¹⁰Kai pyng saite angxynlyng na lä Nang hai aesui bawi te vi. Nang ma pyng saite khimi angxynlyng na Kai la pyng te by vi. Honi hai-a kai üng phung-ang lä äni ce tähang aetüng hai te kae. ¹¹Kai lä Nang tea vaihi vawi haile tyng vi ai. Älawngpre-a awng y dy. Tungaila äni ce lä älawngpre-a awng vi ai rawng. Caiping saite Pä-ai, Nang, üng ämüng haidae hai äni ce bung aekung hai te vi. Nang hai Kai bungtä awng te kätyng, äma ce tingtawi bungtä awng hethang Nang ma Kai tea hini ämüng py vi dy. ¹²Kai lä äni ce hai mangtä awng te thüng-a, äni ce bung Nang üng ämüng haidae hai aekung hai pa te vi. Säthaw ma pra hai hethang khimi lawngtä y dylä, ämi lawngtä la pra y lyng. Caekäcai thung-a tärü te lä cungrü hai te dy. ¹³Vaihi Kai lä nang tea vawi te dy. Äni ce lä Kai üng anghawtho saite käcung-a, dang hethang tähang hini älawngpre qawng-a, Kai awng te thüng-a ma, hini älo na äni ce tea thui pa te vi. ¹⁴Nang üng älo äni ce tähang Kai py pa vi dy. Älawng üng khimi na ma äni ce tea esäre pa ö vi. Ätephüng-a mei nädylä, Kai älawngpre hai aesui y te kätyng, äni ce la älawngpre hai aesui ö y. ¹⁵Pä-ai lä äni ce bung älawngpre üng nähai hethang tähang-a, Kai mäkai te y lyng. Setan ma äni ce bung lolang tämang hai y hethang aekung hai pa kü. ¹⁶Kai lä älawngpre hai aesui y te kätyng, äni ce la älawngpre hai aesui ö te y. ¹⁷Äni ce bung älo mitang hai-a, caiping-a sa pa. Nang ma üng älo lä mitang khaw vi. ¹⁸Pä-ai, Nang, ma Kai bung älawngpre-a, mätaw te kätyng Kai ma äni ce bung la älawngpre-a mätaw te by dy. ¹⁹Äni ce lä Säthaw tähang mä-ai ma bung aepy hethang tähang-a, Kai lä äni ce tähang Kai ma bung aemäthy ping te vi dy.

²⁰“Kai lä äkähui na tähang ma qaitä aetang pa te y lyng. Äni ce ma ätete lo thui pa te phüng-a Kai tea yng saite na tähang la aetang te by vi. ²¹Äni ce angxynlyng lä bungtä awng hethang aetang te kae. Pä-ai ä, Nang, lä Kai hai aesui kha Kai la nang hai aesui te kätyng, äni ce bung mä-ai ma hai aesui hai jo ba. Tukä ea ni Pä-ai nang ma Kai bung mätaw te älawngpre üng khimi na ma yng hethang kae. ²²Nang ma Kai tea py saite phung-ang, Kai lä äni ce tähang py pa dy. Mä-ai ni lä bungtä awng te kätyng, äma ce tingtawi bungtä awng hethang Kai lä hini kä sa te vi. ²³Pä-ai, Nang, ma Kai hai aesui te kätyng Kai la äni ce hai aesui te by. Tukä ea ni äni ce lä käcung-a bungtä lawng ö vi ai. Tupyng-a Pä-ai, Nang, ma Kai bung mätaw kha Kai tea bälung aevaw te kätyng, äni ce tea la Pä-ai ma bälung aevaw saite älawngpre üng khimi angxynlyng na lä mäny haw ö bawi vi ai” näpa.

²⁴“Pä-ai ä, nang ma py saite hini khimi ce bung Kai awng saite mityng-a, mangtä awng hai hethang Kai lä ngai te vi. Älawngpre awng y te kälang üng hai, nang ma Kai tea bälung aevaw te phüng-a, Kai tea py saite phung-ang lä äkähui na tea nung hai hethang ngai te vi. ²⁵Käcüng saite Pä-ai ä, Nang bung älawngpre üng khimi na ma mäny ö y. Tungaila Kai lä Nang bung mäny vi. Hini äkähui na lä Kai bung Pä-ai, Nang, ma mätaw näte mäny ö by dy. ²⁶Pä-ai, Nang, bung Kai ma äni ce tea mäny hai pyng te vi dy. Hini qawng-a cang y mäny hai jawjaw vi ai rawng. Nang ma Kai tea bälung aevaw saite lä, äni ce tea awng by. Kai la äni ce hai aesui by ai” näkha näpa.

Isu bung ne pa

Mat 26:47-56; Mar 14:43-50; Luk 22:47-53

¹Isu lä aetang pyng ea äkähui na hai mangtä Kidron angdung mang aekae ö dy. Honi mityng-a angkhaw haetä awng. Tukha Isu hai äkähui na lä honi angkhaw thung-a kung ö dy. ²Honi mityng-a Isu hai äkähui na ly tütü te phüng-a, Isu bung a saite Judae Iskriota lä hini mityng tea mäny vi. ³Judae Iskriota lä honi mityng-a ly kha mäthykung käleng na hai Pharisai na ma mätaw saite Rom reisae phütä na hai, Säthaw üng Ingkäcai-a rui saite reisae na bung nähai pa ö dy. Äni ce lä maibung maito hai aetu aekei na süng kha ly ö dy. ⁴Isu lä äma aeting hethang angxynlyng phüng na mäny rüng pa te vi dy. Tukha äni ce tea ly ea “Nang ce lä ämi bung mäqang ö te mei” näkha düng pa.

⁵Äni ce ma “Nazare märü üng Isu bung mäqang te vi” näpa.

Isu ma “Kai lä Äni dy” näkha näpa.

Isu bung a saite Judae Iskriota lä äni ce hai mangtä aedaw kha awng pa by dy. ⁶Isu ma “Kai lä Äni dy” näkha thui ea äni ce lä leithung-a aenaw kha älawng qawng-a aetüng ö vi dy. ⁷Isu ma äni ce tea “Nang ce lä ämi bung mäqang ö te mei” näkha düng haile tyng pa be dy.

Äni ce ma “Nazare märü üng Isu bung mäqang ö te vi” näkha näpa.

⁸Isu ma “Äni lä Kai dy näkha nang ce tea Kai thui pyng te vi dy be. Nang ce lä Kai bung mäqang te dylä, hini äkähui na ly ö pang re sy” näkha näpa. ⁹Jangni-a Isu ma. “Pä-ai ä, Nang ma py saite khimi lawngtä lä laja y” näkha thui rüng te vi. Hini älo kätyng cungrü hai pa te vi dy.

¹⁰Tupyng-a Simon Peterae lä aekei aebäju kha mäthykung kälengky üng mawsawng tea sai kha äni üng känawkhing bangtang mang aelybae pa vi dy. Mawsawng üng ämüng lä Malkhu vi. ¹¹Isu ma Peterae tea “Aekei tea lä ä-ing thung-a mäceng la. Pä-ai ma aeting hai saite tui bynglyng tea kai lä aehi y dy” näkha näpa.

Ana mätawngky maw-a Isu bung nähai pa

Mat 26:57-58; Mar 14:53-54; Luk 22:54

¹²Tupyng-a Rom reisae na, äni ce üng mätawngky hai Judae na üng ingkäcai ty saite reisae na lä Isu bung ne kha mäkhing pa ö dy. ¹³Äni ce lä Isu bung Ana näsaite Judae mätawngky maw-a nähai ö mang pa vi dy. Ana lä Kaiafa üng pä-ui vi. Kaiafa lä honi säning üng mäthykung kälengky vi. ¹⁴Kaiafa ma “Khimi angxynlyng na tähang khimi lawngtä dü te lä hawiky te vi” näkha Judae mätawngky na tea aedawng hethang älo thui vai pa te vi.

Peterae angcü üng aephae pa

Mat 26:69-70; Mar 14:66-68; Luk 22:55-57

¹⁵Simon Peterae hai äkälang äkähui lawngtä lä Isu leithung hui pa hawi dy. Äkälang äkähui lawngtä lä mäthykung kälengky hai aemae te vi. Tukha Isu hai mangtä äni lä mäthykung kälengky üng baesung thung-a kung pa vi. ¹⁶Peterae lä baesung rang-a aedaw kha awng dy. Mäthykung hai aemae saite äkähui lawngtä lä ärang-a tho kha hawngkhae ty saite nawngmädi hai älo aepe ea Peterae bung äthung-a nähai pa dy. ¹⁷Hawngkhae ty saite nawngmädi ma “Nang lä hini Khimi üng äkähui by mei” näkha düng pa.

Tukha Peterae ma, “Kai lä y lyng” näkha näpa.

¹⁸Honi kädüng lä de phi te vi. Mäthykung üng reisae na hai mawsawng na lä mai ae-awng tea äni la ae-awng kha awng pa dy. Peterae la äni ce hai mangtä mai ae-awng kha awng dy.

Isu tea mäthykung kälengky ma düng pa

Mat 26:59-66; Mar 14:55-64; Luk 22:66-71

¹⁹Mäthykung kälengky ma Isu tea äkähui na üng phüng hai Isu üng mätu saite phüng na düng pa dy. ²⁰Isu ma “Kai lä khimi ce üng maw-a, cüngpra-a älo thui te vi. Judae khimi na aecö saite Judae na üng ingkäcai hai Säthaw üng Ingkäcai thung-a la, Kai lä Säthaw lo mätu tütü te vi. Manila Kai lä kangru-a thui vai te y. ²¹Ätephüng-a Kai tea nang ce lä düng ö te mei. Kai üng angtu lo thai saite na tea düng ö kae baw. Kai thui saite na äni ce lä mäny bawi mang” näpa.

²²Isu ma hini kä thui pyng-a, äni teng-a awng saite reisae lawngtä ma Isu üng tangbeng-a täbeng pa vi. “Nang lä mäthykung kälengky tea tukä thui vawng te vi mei” näkha näpa.

²³Isu ma “Kai üng thui saite tämang dylä, hi-a awng saite khimi na tea Kai üng tämang saite mani mei näte thui hai pa. Kai kätüng-a thui vi dylä, ätephüng-a Kai tea nang lä täbeng te mei” näkha näpa.

²⁴Tupyng-a Ana mätawngky ma Isu bung mäkhing kha mäthykung kälengky Kaiafa tea mätaw pa dy.

Peterae ma Isu bung aephae haile tyng pa

Mat 26:71-75; Mar 14:69-72; Luk 22:58-62

²⁵Simon Peterae lä aedaw kha mai ae-awng by. Phütä na ma “Nang lä Äni üng äkähui y mei” näkha düng pa.

Peterae ma “Kai y lyng” näkha aephae pa be dy.

²⁶Mäthykung kälengky üng mawsawng lawngtä ma “Kai lä nang bung Isu hai mangtä angkhaw thung-a nung vai te vi” näpa. Honi mawsawng lä Peterae ma känawkhing-a aekei hai saibawng saite khimi üng äpy äjae by vi.

²⁷Peterae lä aephae haile pa vi. Honi tänaetä-a ma ae lä khawng raw pa vi dy.

Pilata mätawngky maw-a Isu bung nähai pa

Mat 27:1-2, 11-14; Mar 15:1-5; Luk 23:1-5

²⁸Äni ce ma Isu bung Kaiafa te üng Rom aecörae mätawngky üng ing-a nähai pa ö dy. Honi kätü lä kädang thawde-a vi. Judae khimi na lä Cäqengja te pawi kädüngbö ca hethang äma ce üng reitae kätyng käcai ping-a awng hethang ngai y. Tukätephüng-a Pilata lä Rom khimi vi te phüng-a, äni üng ing-a kung he ngai ö y. ²⁹Tukha Pilata lä äni ce hai aeting hethang ärang-a tho kha “Hini khimi tea lä ätephüng-a käsi thui ö te mei” näkha düng pa.

³⁰Äni ce ma “Äni lä khimi kähawi ea kha lä nang üng maw-a kai ce ma äni bung nähai he y” näpa.

³¹Pilata ma äni ce tea “Nang ma ce ma äni bung nähai haile tyng ö kae. Nang ma ce üng Ubädi kätyng äni tea tärae cei ö” näkha näpa.

Judae khimi na ma “Kai ce lä ämi bung la dengpy kha bädü hethang aenae awng te y” näpa. ³²Isu lä makä dü ai mei näte thui rüng saite kätyng lä cungrü hai pa te vi dy.

³³Pilata lä äma üng ingkäleng thung-a kung haile tyng ea Isu bung kähyng kha “Nang lä Judae na üng Sanphrang vi nang mei” näkha düng pa.

³⁴Isu ma “Hini düng te lä nang ma üng kängai kätyng düng te mei. Y dylä kai üng phüng khimi ce ma nang tea thui pyng vi dy mei” näkha düng pa.

³⁵Pilata ma “Nang lä kai tea Judae khimi nä hethang aepö mei. Nang üng khimi na hai mäthykung käleng na ma, nang bung kai tea a te vi. Nang lä äte sa vi nang mei” näkha düng pa.

³⁶Isu ma “Kai üng pre lä hini älawngpre hai aesui te y lyng. Kai üng pre hini älawng hai aesui dylä Judae na ma Kai bung ne haw y rung khytä, Kai üng mawsawng na ma, aety ö vi ai. Tungaila vaihi Kai üng pre lä hini älawngpre hai aesui te y” näkha näpa.

³⁷Pilata ma “Tudylä Nang lä Sanphrang vi mei” näkha düng pa.

Isu ma “Nang ma thui te kätyng Kai lä Sanphrang vi. Kai lä Älo mitang phüng thui hethang tähang-a aepeng kha hi älawng qawng-a cäqa te dy. Älo mitang hai aesui saite khimi na lä Kai üng älo na tängai ö te vi” näkha näpa.

³⁸Pilata ma “Älo mitang näte lä äte mei” näkha düng pa.

Isu bung bädü pa

Mat 27:15-31; Mar 15:6-20; Luk 23:13-25

Tupyng-a Pilata lä tho kha Judae na tea “Hini Khimi lä sa tämang te kai aeting y. ³⁹Tungaila nang ce üng reitae kätyng-a kai lä Cäqengja te pawi kätü-a, thawng thung üng khimi lawngtä bung bälawi vävawi pa te vi. Hini Judae na üng Sanphrang bung nang ce tähang bälawi pa ai mei” näkha düng pa.

⁴⁰Äni ce ma “Äni bung bälawi hang. Kai ce tähang Baraba bung bälawi” näkha a pa ö dy. (Baraba lä xhuxa te thung-a qa jawjaw saite khimi vi.)

¹Tupyng-a Pilata lä Isu bung nähai hai kha ruinawng hai, aethawtä mäkhae hai pa vi. ²Reisae na lä angling cangpre täkui kha sanphrang lökhu kätyng Isu üng älö-a aekhu hai pa ö. Tupyng-a kä-o kangthing Äni tea bälawng pa vi. ³Reisae na ma Isu tea “Judae na üng Sanphrang lä khö sa hawi sy” näkha thui ea tangbeng-a täbeng täto pa ö vi.

⁴Pilata lä ärang-a tho haile tyng kha Judae khimipui na tea “Kheng ö e. Kai lä nang ce tähang Äni bung nähai pa dy. Tungaila Äni bung bädü hethang sa tämang saite lä, awng y näte nang ce mäny hai hethang kai lä ngai te vi” näpa. ⁵Isu lä angling lökhu aekhu kha laikipa känih hai aekhu ea ärang mang-a mätho hai pa dy. Pilata ma Judae na tea “Kheng ö lawi. Hini Khimi lä hi-a dy” näkha näpa.

⁶Mäthykung käleng hai Säthaw üng Ingkäcai ty saite reisae na lä Isu bung nung ea “Äni bung lä thinglang qawng-a täheng kha bädü la. Äni bung lä thinglang qawng-a täheng kha bädü la” näkha a pa ö dy.

Tungaila Pilata ma “Nang ma ce ma Äni bung nähai kha thinglang qawng-a täheng kha bädü la. Äni tea sa tämang saite na äte haetä la kai lä nung y” näkha näpa.

⁷Judae mätawngky na ma “Äni lä Äma tea Säthaw üng Cäpaw näte phüng-a, kai ce üng Ubädi kätyng dü hethang aeteng khaw te vi dy.”

⁸Äni ce üng älo na thai ea Pilata lä ri te qawng-a ri rae pa vi dy. ⁹Pilata lä äma üng ingkäleng thung-a kung haile kha Isu tea “Nang lä mamang üng ly te mei” näkha düng pa.

Tungaila Isu lä älo bälangtä la mäthang pa y. ¹⁰Pilata ma “Nang lä kai hai älo aepe hethang ngai y te vi nang mei. Nang bung bälawi haw y dylä, thinglang qawng-a täheng haw te aenae kai tea awng näte Nang lä mäny y mei” näpa.

¹¹Isu ma “Säthaw ma nang tea hini aenae py kha Kai bung thinglang qawng-a täheng haw. Tukätephüng-a Kai bung nang üng kö thung-a, a saite khimi lä nang qawng-a hunghö lengky” näkha näpa.

¹²Tukha Pilata lä Isu bung bälawi hethang älang mäqang dy. Tungaila Judae mätawngky na ma “Äni bung bälawi dylä, nang lä Sica sanphrang üng rawijae y dy. Mä-ai ma tea sanphrang näsaite khimi lä Sica sanphrang tea täre sa te kae dy” näpa.

¹³Pilata lä hini älo thai ea Isu bung ärang-a nähai haile pa vi. Kälung phaeqae käleng na hai sa saite mityng-a, tärae cei te kung üng aety nae-a aety kha awng pa dy. (Honi mityng tea Hebärai lo hai “Kabatha” näkha näpa.) ¹⁴Honi kätü lä Cäqengja saite pawi tähang aerü rüng te käni üng käni anghung aetawng ea vi dy. Pilata ma Judae khimi na tea “Kheng ö e. Hini lä nang ce üng Sanphrang vi” näkha näpa.

¹⁵Judae khimi na ma “Äni bung bädü. Äni bung bädü. Thinglang qawng-a täheng kha bädü la” näkha a pa ö sung vi dy.

Pilata ma äni ce tea “Nang ce üng Sanphrang bung thinglang qawng-a täheng kha bädü hethang ngai ö bawi cäkae mei” näkha düng pa.

Mäthykung käleng na ma “Kai ce üng sanphrang lä Sica sanphrang vi” näpa.

¹⁶Kangkhüng-a Pilata ma Isu bung thinglang qawng-a täheng kha bädü hethang reisae na üng kö thung-a a pa dy.

Isu bung thinglang qawng-a bädü pa

Mat 27:32-44; Mar 15:21-32; Luk 23:26-43

Tukha reisae na lä Isu bung nähai ö dy. ¹⁷Isu lä Älökorö näsaite mityng-a ly kha äma üng thinglang hai aepö dy. Honi mityng tea Hebärai lo hai “Kolakota” näkha näpa. ¹⁸Honi mityng-a, Isu bung thinglang qawng-a täheng pa dy. Isu hai mangtä khimi kälang lawng netä bung la täheng hawi pa by. Isu bung lä äsäla-a khai pa.

¹⁹Pilata lä sämai nae cae tärü hai kha Isu üng thinglang qawng-a bang pa dy. Honi cae lä “JUDAE NA ÜNG SANPHRANG, NAZARE MÄRÜ ÜNG ISU VI” näkha tärü te vi. ²⁰Isu bung thinglang qawng-a täheng te mityng lä, märü hai aenai vi. Judae khimi kä-awng mang na lä honi cae tea phai ö bawi vi dy. Honi cae lä Arami lo hai, Latin lo hai, Käri lo na hai-a tärü pa te vi. ²¹Mäthykung käleng na ma Pilata tea “‘Judae na üng Sanphrang’ näkha tärü hang. Äni lä ‘Äma ma tea Judae na üng Sanphrang nä vi’ näkha tärü kae” näpa.

²²Pilata ma “Kai ma tärü te kätyng khai hethang kae” näkha näpa.

²³Reisae na lä Isu bung thinglang qawng-a täheng pyng ea, Isu üng nitha kä-o phü bälitä khai kha aeri ö dy. Äni ce ma Isu üng känih lä, la king ö pa vi dy. Tungaila honi känih lä hui saite ätawng awng pa y. ²⁴Reisae na ma “Hini känih tea sä-ei ö hang. Phui sa kha aeri ö si” näkha äma ce tingtawi aethui ö dy. Hini kätyng reisae na sa te lä Caekäcai thung-a

“Äni ce lä Kai üng nitha, kä-o na aeri ö vi.

Kai üng känih tea phui sa ö vi,”

näkha tärü saite lo lä cungrü hai te vi dy.

²⁵Isu üng nä-awi hai änä-awi üng kangby, Kolawpha üng nawngpui Maeri hai Makadala märü üng Maeri ce la thinglang teng-a aedaw kha awng pa ö dy. ²⁶Isu lä änä-awi üng äteng-a äma bälung aevaw saite äkähui lawngtä aedaw te nung pa. Tukha Isu ma “Ä-awi ä, hini lä nang üng cäpaw dy” näkha näpa.

²⁷Tupyng-a äkähui tea “Hini lä nang üng nä-awi dy” näkha näpa. Honi käni üng hai äkähui lä Maeri bung äma üng ing-a nähai kha awng hai pa dy.

Isu lä dü pa

Mat 27:45-56; Mar 15:33-41; Luk 23:44-49

²⁸Honi kätü-a äte angxynlyng na lä khüng dy näte Isu lä mäny dy. Tupyng-a Caekäcai thung-a tärü te kätyng “Kai tui aehe vi” näkha näpa.

²⁹Honi mityng-a Cäpje tui käthaw khai saite awikaw haetä awng pa. Äni ce lä libyng kämawng bung Cäpje tui thung-a, sänung kha thingkawng cangpre-a mäkhing ea Isu üng täbawng-a tui pa ö dy. ³⁰Isu lä honi Cäpje tui käthaw nei pyng ea “Äte angxynlyng na lä khüng vi dy” näkha thui pa.

Tupyng-a Isu lä älö heng kha dü pa vi dy.

Mäna-a täri hai thung pa

³¹Honi käni lä pawi tähang aerü te käni kha khawngdang lä Cäqengja näsaite pawi üng Aehae te Käni vi. Judae mätawngky na lä äro bung Aehae te Käni-a thinglang qawng-a khai hethang ngai ö te y vi. Tukätephüng-a Judae mätawngky na lä Pilata tea ly kha thinglang qawng-a täheng saite khimi na dü dawde hethang äni ce üng äkho khy hethang mäkai pa dy. ³²Tukha reisae na lä ly kha Isu hai mangtä thinglang qawng-a täheng saite angcü üng khimi äkho tea thingbyng hai mäkhaeqaw kha äbaeni khimi üng äkho la mäkhaeqaw pa be te vi rawng. ³³Tungaila reisae na lä Isu tea tyng ea Isu lä dü pyng pa te nung kha äkho-a thingbyng hai mäkhae pa y. ³⁴Tungaila reisae lawngtä ma Isu üng mäna-a täri hai thung kha qengtäma äthi hai tui lä tho pa vi dy. ³⁵Hini phüng nung khe saite khimi ma ätete lo thui pa dy. Äni üng thui saite lä tätang khaw vi. Äni lä nang ce yng ö hethang nung khe saite lo thui te vi. ³⁶Caekäcai cungrü hai hethang tähang-a, hini na tyng te vi dy. Caekäcai thung-a lä “Äni üng ähu haetä la aekhy hang sy” näkha tärü te vi. ³⁷Äkälang Caekäcai thung-a lä “Äni ce lä äma ce ma täri hai thung saite tea kheng ö vi ai” näkha awng pa te vi.

Isu bung aevui pa

Mat 27:57-61; Mar 15:42-47; Luk 23:50-56

³⁸Tupyng-a Arimathia märü üng Josefae lä Isu üng äro la hethang Pilata tea mäkai pa dy. Josefae lä Judae mätawngky na tea ri te phüng-a, Isu leithung kangru-a hui saite lawngtä vi. Pilata ma Isu ro la hethang py pa kha äni lä äro bung nähai pa. ³⁹Jangni kärung thung-a Isu tea ly saite Nikodima la Josefae hai mangtä hui pa dy. Nikodimae lä mura näsaite äkung hai älos näsaite äkung üng sa saite rimui tui xainai täbisae kuisy bangtä süng pa vi. ⁴⁰Änini lä Isu üng äro la kha Judae khimi na üng äro bärung saite reitae kätyng rimui tui xainai hai kälo kha Isu bung libyng kanglung hai säve pa dy. ⁴¹Isu bung thinglang qawng-a täheng saite äteng-a angkhaw haetä awng. Honi angkhaw thung-a ämi lawngtä bung la, aevui vai y saite täprawng täpu kangthae haetä awng pa vi. ⁴²Honi käni lä Judae khimi na üng aerü rüng saite käni vi. Tukätephüng-a Isu üng äro bung kaenai-a awng saite täprawng täpu-a aevui ö pa dy.

Isu lä aetha pa

Mat 28:1-8; Mar 16:1-8; Luk 24:1-12

¹Käni säritä üng angcü üng käni kädang thawde khö aevang y te kätü-a, Makadala märü üng Maeri lä Isu üng täprawng täpu-a ly dy. Äni lä täprawng khaw üng kälung käleng aethuija te nung pa vi. ²Tukha Maeri lä Simon Peterae hai Isu ma bälung aevaw saite äkälang äkähui na tea aehui kha “Khimi ce ma Areng üng äro bung täprawng üng la ö ja vi dy. Äte ma mang-a khai mei näte mäny ö y” näkha näpa.

³Tukha Peterae lä äkälang äkähui hai täprawng täpu mang-a ly hawi dy. ⁴Änini lawng netä lä mangtä aehui hawi ngaila, äkälang äkähui lawngtä lä Peterae qawng-a täprawng-a tyng mang pa vi. ⁵Äni lä bü kha kheng ea lä, täprawng täpu thung-a, libyng käsa na awng sö te nung pa kae vi. Tungaila äni lä täprawng täpu thung-a kung pa y vi. ⁶Tupyng-a Simon Peterae lä äni üng leithung-a tyng ea täprawng täpu thung-a kung pa dy. Äni lä honi mityng-a, libyng na aetä-yng kha awng te nung pa kae vi dy. ⁷Isu üng älö-a bang saite sipry lä bälemy kha kälang-a khai ea libyng na lä kälang-a awng te nung pa vi. ⁸Tukha täprawng-a tyng mang saite äkälang äkähui la täprawng täpu thung-a kung dy. Nung kha yng pa by vi dy. ⁹Isu lä dü te üng aetha he kae näte Caekäcai-a tärü saite tea äni ce lä mäny ö y vi rawng. ¹⁰Tukha äkähui lawng netä ni lä ing-a vawi hawi kae dy.

Makadala märü üng Maeri tea Isu ma aetüng pa

Mat 28:9-10; Mar 9:11

¹¹Maeri lä täprawng täpu ärang-a aedaw ea raw kha awng pa vi. Äni lä raw ea täprawng täpu thung-a kheng dy. ¹²Isu üng äro awng te mityng-a kanglung aekhu aena saite Säthaw üng angtawtha lawng netä bung nung pa vi. Lawngtä lä lötang-a aety kha äkälang lawngtä lä khotang mang-a aety kha awng. ¹³Känipre üng angtawtha lawng netä ma “Änang nawngmädi ä, ätephüng-a raw te vi mei” näkha düng pa hawi dy.

Tukha Maeri ma “Kai üng Areng äro bung lä khimi ce ma laja vi dy. Mani mityng-a khai ö mei näte kai lä mäny y vi” näpa.

¹⁴Hini kätyng thui pyng ea leithung-a aehawi ea lä Isu aedaw te tea Maeri lä nung ngaila, Isu bung mae pa y vi. ¹⁵Isu ma “Änang, nawngmädi ä, ätephüng-a raw te vi mei. Nang lä ämi bung mäqang te vi nang mei” näkha düng pa.

Tukha Maeri ma Isu tea angkhaw ty te kung käthi kha “Särae ä, Areng üng äro bung kälang mityng-a khai dylä, kai tea thui khü jo. Kai ma la ai mang” näpa.

¹⁶Isu lä “Maeri ä” näkha kähyng pa dy.

Tukha Maeri lä Isu te mang-a aehawi kha Hebärai lo hai “Raboni” näkha kähyng pa. (Raboni näte lä “Särae ä” näte by kae vi.)

¹⁷Isu ma “Kai tea aela hang. Kai lä Pä-ai tea tyng y te vi rawng. Kai üng äkähui na tea ly kha Kai üng ‘Pä-ai’ hai nang ce üng ‘Pä-ai’ kai üng ‘Säthaw’ hai nang ce üng ‘Säthaw’ tea kai lä ly ai näte phüng thui” näkha näpa dy.

¹⁸Makadala märü üng Maeri lä äkähui na tea ly kha äma Areng bung nung khe saite hai äni ma täru saite phüng na thui king pa vi dy.

Äkähui na tea Isu ma aetüng pa

Mat 28:16-20; Mar 16:14-18; Luk 24:36-49

¹⁹Äkähui na lä Judae mätawngky na tea ri te phüng-a Aehae te Käni kädang mang üng kädüng-a, engthung-a aekäcö kha kätho aekhaemy ea awng pa ö dy. Qengtäma Isu lä äni ce säla ung-a aedaw kha “Säthaw ma nang ce tea bälung awngneng saite py sy” näkha näpa. ²⁰Hokä thui pyng ea äma üng äkö tämaw hai mäna tämaw na äkähui na tea mätü pa dy. Äkähui na lä Isu bung nung kha tengxyng y anghawtho ö pa vi dy. ²¹Tupyng-a Isu ma thui pa haile te lä “Nang ce tea awngneng te awng sy. Pä-ai ma kai bung mätaw te kätyng-a, nang ce bung la kai mätaw te vi dy” näkha näpa. ²²Hokä thui pyng ea Isu lä äkähui na tea mö kha “Nang ce lä Muilaw Käcai bung bälung thung-a mäkung ö lawi. ²³Nang ce ma khimi ce üng hunghö na bung bälawi dylä, Säthaw ma la äni ce üng hunghö bälawi vi ai. Nang ce lä khimi ce üng hunghö na bälawi y dylä, Säthaw ma äni ce üng hunghö bälawi y vi ai” näkha näpa.

Isu ni Thawmae

²⁴Isu tyng te kätü-a, äkähui hawlai netä thung üng Didamu näsaite Thawmae lä äkähui na hai mangtä awng pa y vi. ²⁵Isu üng äkälang äkähui na ma “Kai ce lä Areng bung nung vi dy” näkha Thawmae tea thui pa.

Thawmae ma “Isu üng äkö-a sengmu hai täheng te tämaw nung y, äni üng tämaw-a kai üng äköbäjung hai aela khe y, mäna üng tämaw-a äkö hai mäthang khe y dylä, kai lä yng haw y lyng” näpa.

²⁶Tukha täbaitä qae ea äkähui na lä engthung-a aekäcö haile kha awng ö be dy. Honi kätü-a Thawmae la äni ce hai mangtä awng pa by dy. Kätho aekhaemy kha awng ö te vi. Tungaila Isu lä kung ea äni ce üng äsäla-a aedaw kha “Nang ce tea awngneng te tyng sy” näpa. ²⁷Tupyng-a Thawmae tea “Nang üng köbäjung hai hini mityng-a mäthang e. Kai üng kö tea kheng e, nang üng kö hai kai üng mäna-a mäthang. Yng y käla awng hang lawi ba. Yng lawi” näkha näpa.

²⁸Thawmae ma “Kai üng Areng, kai üng Säthaw” näkha näpa.

²⁹Isu ma “Nang lä kai bung nung te phüng-a yng te kae vi. Kai bung nung y käla ma yng saite khimi na lä tähang hawi” näkha näpa.

Hini cae tärü te phüng

³⁰Hini cae-u thung-a tärü y saite cangxei te kamarae äkälang na tea la, Isu lä äkähui na maw-a sa pa dy. ³¹Tungaila Isu ma Mesia lä Säthaw üng Cäpaw vi näte nang ce yng haw hethang hai hokä yng ea ni, Isu hai-a hing saite dang hethang tähang-a, hini na tea kai lä tärü te vi dy.

Isu lä äkähui lawng säritä tea aetüng pa

¹Tupyng-a Isu lä Tiberi tuilipui teng-a äkähui na tea aetüng pa be dy. Aetüng te lä hini kätyng vi. ²Simon Peterae Didamu näsaite Thawmae, Kalile khö Kana märü üng Nathanela, Zebede üng cäpaw lawng netä hai äkälang äkähui lawng netä lä mangtä awng. ³Simon Peterae ma äni ce tea “Kai lä mawi ne ai” näkha näpa.

Äni ce ma “Kai ce la hui by ai” näpa. Tukha äni ce lä bälawng hai mawi la te ly ö dy. Tungaila kärung rungtaw mawi ne te lä dang pa ö y vi. ⁴Kädang thawde-a Isu lä mepui-a aedaw kha awng pa. Tungaila äkähui na lä Isu näte mae pa ö y.

⁵Isu ma “Rawijae na ä, mawi dang ö mei” näkha düng pa.

Äni ce ma “Dang y vi” näpa.

⁶Isu ma “Nang ce lä bälawng üng bangtang mang-a bälo hai heng ö by ä, mawi dang ai mang” näpa. Thui te kätyng-a äni ce ma bälo heng ea lä, mawi awng mang pa te phüng-a bälo bung re haw ö pa y vi dy.

⁷Tukha Isu ma bälung aevaw saite äkähui lä “Mä-ai üng Areng vi” näkha Simon Peterae tea thui pa. Hini lo thai ea Peterae lä nitha aetäkei kha tuilipui thung-a säly jaw pa dy. ⁸Äkälang äkähui na lä mawi awng mang saite bälo bung re kha bälawng hai hui pa ö dy. Äni ce lä mepui hai hanglaw bärai y, lang rui bangawtä tingtang awng. ⁹Äni ce lä mepui-a tyng ea mai ae-e-a bädang saite mawi hai täkaw bung nung ö vi. ¹⁰Isu ma “Nang ce üng vaihi dang saite mawi phütä nähai ö e” näpa.

¹¹Simon Peterae lä bälawng qawng-a paw ea mawi käleng na kawipy saite bälo bung mepui qawng-a re pa dy. Mawi me cungvaitä hai rui bangaw thungtä aemang ngaila, bälo lä aesä-ei pa y vi rawng. ¹²Isu ma “Ly kha kädang bö ca ö lawi” näkha äni ce tea thui pa. Äkähui na lä ämi lawngtä la “Nang lä ämi mei” näkha düng vawng ö pa y. Äma ce lä Areng näte mäny ö vi. ¹³Isu lä ly kha täkaw hai mawi la ea äni ce tea py pa.

¹⁴Isu lä dü te üng aetha pyng ea, äkähui na tea aetüng pa te lä qeng ämäthung dy.

Isu ni Peterae

¹⁵Äkähui na ca pyng ea Isu ma “Johan üng cäpaw Simon ä, äni ce ma kai tea bälung aevaw te qawng-a nang lä bälung aevawky cäkae mei” näkha Simon Peterae tea düng pa.

Simon ma “Tüng cäkae Areng ä, nang tea kai bälung aevaw näte nang lä mäny dy” näpa.

Tupyng-a Isu ma Peterae tea “Kai üng beram caw na tea mäcaw ba” näkha näpa.

¹⁶Tupyng-a Isu ma “Johan üng cäpaw Simon ä, nang lä kai tea bälung aevaw cäkae mei” näkha düng haile pa dy.

Peterae ma “Tüng cäkae. Areng ä, nang tea bälung aevaw näte nang lä mäny dy be” näpa.

Tukha Isu ma “Kai üng beram na tea rui pa ba” näkha näpa. ¹⁷Isu lä “Johan üng cäpaw Simon ä, nang lä kai tea bälung aevaw mei” näkha ämäthung düng pa be dy.

Tukä qengthungtä düng pyng-a Peterae lä bälung naw kha “Areng ä, Nang lä äte cawngkhang na mäny bawi te kae be. Nang tea bälung aevaw näte nang ma mäny dy be” näpa.

Isu ma “Kai üng beram na bung mäcaw ba.

¹⁸“Tängai ba. Nang lä nade thüng-a khabai angkeng-a aemäkhing kha ngai saite mityng-a ly dy. Mätawng ea lä nang üng äkö pang netä bäjae kha khimi kälang na ma nang bung mäkhing pyng-a, nang ly hethang ngai y saite mityng-a nähai vi ai” näpa. ¹⁹(Isu ma hini kätyng thui pa te lä, Peterae lä Säthaw üng phung-ang aetüng hai hethang ätemakä sa kha dü ai mei näte phüng thui rüng pa te vi.) Tupyng-a Isu ma Peterae tea “Kai leithung hui lawi” näkha näpa.

Isu hai äkälang äkähui na

²⁰Peterae lä leithung mang-a aehawi te kätü-a, äni üng leithung-a Isu ma bälung aevaw saite äkähui bung nung dy. Äni lä kädüngbö ca ea Isu üng äteng-a aety saite äkähui lawngtä ma “Areng ä, nang bung ämi ma täre na kö thung-a, a hethang mei” näkha düng pa. ²¹Peterae lä honi äkähui na bung nung kha “Areng ä, hini lä makä awng ai mei” näkha düng pa.

²²Isu ma “Kai cäqa haile tyng te khytä, äni tea hing hethang kai ngai hai dylä, nang üng aely y lyng. Nang lä kai leithung-a hui lawi” näkha näpa.

²³Honi älo phüng-a, “Honi äkähui dü hethang y dy” näkha thui rungrang saite angthang lä äkähui na säla-a aethangdü pa vi dy. Tungaila Isu lä “Hini äkähui lä dü y dy” näkha thui te y “Kai cäqa haile te kätü khytä, äni tea hing hai hethang kai ngai dylä nang üng aely y lyng” näkha thui te kae.

²⁴Hini phüng na thui saite hai tärü saite kung lä hini äkähui vi. Äni üng thui saite hini lo lä tüngkhaw te kai ce lä mäny ö te vi.

Kangkhüng üng älo

²⁵Isu ma sa saite phüng äkälang na la awng mang te vi rawng. Honi angxynlyng na tärü king dylä, cae-u na khai hethang hini älawngpre-a mityng awng he y lyng näte kai lä aepö vi.