Jaeko

JAEKO

tärü saite cae

Angcü üng älo

Hini cae lä Judae khimi lawngtä ma tärü te tea nungsy haw te vi. Jerusalem märü kangkawng üng mätawngky, Isu Khrista üng kangby, Jaeko ma tärü te vi näkha khimi awng mangky saite na ma lä dawng ö vi. Hini cae lä A.D. 48-50 khösäning säla-a tärü te daila awng ai. Jaeko lä älawngpre mityng qütä-a aehi sangxang saite Isrelae khimi na tea aethaw py hethang ngai te vi. Khristen na lä Säthaw üng kängai-a makä sa kha hing ai mei näkha la mätu pa ö te vi.

Äphüng äkädawiky

Angcü üng älo 1:1

Yng saite hai bälunghae saite 1:2-8

Mätang saite hai tawngnang saite 1:9-11

Käny saite hai the saite 1:12-18

Tängai saite hai kälu sa saite 1:19-27

Khimi üng mimai kheng y hethang sädi py saite 2:1-13

Yng saite hai kälu sa saite 2:14-26

Bälai tea pä-üng saite phüng 3:1-18

Khristen hai älawngpre üng khimi na 4:1-5:6

Täru saite 5:7-20

Angcü üng älo

¹Säthaw hai Areng Isu Khrista üng mawsawng kai, Jaeko, lä mityng qütä-a aehi sangxang saite Isrelae ceng hawlai netä na tea kawng te lo thui te vi.

Yng saite hai bälunghae saite

²Kai üng yng saite kangby jä-ai na ä, nang ce lä the saite cawngkhang na aeting te kätü-a, anghawtho saite kätyng honi phüng tea aedawng ö ba. ³Nang ce üng yng saite tea Säthaw ma käny te phüng-a, nang ce üng khung saite ryng haw vi näte nang ce lä mäny ö te vi. ⁴Nang ce üng khung saite lä ryng te qawng-a ryng rae kha hing saite angxynlyng na tähang awng hethang kae. Tukä dylä nang ce üng aeme aeqa saite lä ryng kha cungrü ö ai. Tukha nang ce lä aethawdi ö y vi ai. ⁵Nang ce thung üng bälung kähae ngai saite khimi lä Säthaw tea mäkai sy. Säthaw lä khimi qütä tea cy y käla mäsai y te hai py khaw ai. ⁶Tungaila khimi lawngtä mäkai dylä, yng khü kha yng vawng y saite bälung lä awng hethang kae y. Yng khü y saite khimi lä aeli kangcai hai-a bungba saite pangle tui leng kätyng vi. ⁷Honi kätyng awng saite khimi lä Säthaw te üng ätete dang y lyng näkha dawng he kae y. ⁸Yng vawng y saite khimi lä sa saite qütä cakhi-a awng te y vi.

Mätang saite hai tawngnang saite

⁹Yng saite khimi kangtang lä Säthaw ma äni bung lä mäsang ai te phüng-a anghawtho rae sy. ¹⁰Tungaila tawngnang saite lawngtä lä Säthaw ma äni bung mäneng ai te phüng-a anghawtho sy. Ätephüng-a mei nädylä, äni üng hing saite lä daithung üng äpa kätyng tänaetä ma la vi ai. ¹¹Käni lä se kha bi te kätü-a, äkung lä cei ea äpa lä aerui kha äcae kähawi lä pra te vi. Hini kätyng tawngnang saite khimi lä äma üng kälu sa te thüng-a pra vi ai.

Käny saite hai the saite

¹²Khimi lawngtä lä the saite hai käny saite aeting te kätü-a, äni üng yng saite cakhi dylä, äni lä anghawtho haw vi. Ätephüng-a mei nädylä Säthaw ma honi na tea bäja pyng saite khimi bung lä ävang käting dungtäsa hing saite py ai. Säthaw lä äma tea bälung aevaw saite khimi na tea lä ävang käting dungtäsa hing saite py hethang älo aedo te vi. ¹³The saite aeting te khimi ma, “Säthaw lä kai tea the te vi” näkha thui hethang kae y. Ätephüng-a mei nädylä Ämi lawngtä la Säthaw tea käsi sa hai hethang the haw te y. Äni la ämi tea la käsi sa hethang the te y by vi. ¹⁴Mä-ai üng ngaiphi tüng y saite bälung lä mä-ai tea the te vi. Äni ce lä mä-ai tea mäthang sa kha käsi mang-a nähai ö te vi. ¹⁵Tupyng-a mä-ai lä ngaiphi tüng y saite na thung-a hui kha hunghö sa ö te vi. Hunghö lä leng kha ryng khü te kätü-a, mä-ai bung dü hai te vi.

¹⁶Kai üng bälung aevaw saite kangby jä-ai na ä, ämi ma la nang ce tea kaeling kaemae sa ö hang sy. ¹⁷Hawi saite hai cungrü saite lasawng qütä lä Känipre üng tho te vi. Känipre kaevang tea sa saite Säthaw lä mä-ai tea hini lasawng na py te vi. Äni lä aethui saite kaekhui kätyng aemäqa te y vi. ¹⁸Äni lä äma üng mawlang kaedawng kätyng lo mitang hai-a mä-ai tea hing saite kangthae py te vi dy. Ätephüng-a mei nädylä, äni lä mä-ai bung äma sa saite na thung-a, angcüky mityng-a py hethang ngai te vi.

Tängai saite hai sa saite

¹⁹Kai üng bälung aevaw saite kangby jä-ai na ä, hini na tea nang ce lä aedawng haile ö ba. Älo na tea lä tängai dawde ö. Älo aepe saite hai kädawtho saite na tea lä kangjai-a awng hethang kae. ²⁰Khimi lawngtä kädawtho te kätü-a, äni lä Säthaw üng ngai saite kälu käcüng-a sa haw y lyng. ²¹Tukätephüng-a nang ce üng pawprae saite kaedawng hai aepä-e saite angxynlyng na khaisö ö lawi. Säthaw ma nang ce üng bälung thung-a mäkung saite lo tea nang ce lä aemäneng te bälung hai täla ö. Hini lo lä nang ce bung aeqang haw te vi.

²²Nang ce lä Säthaw üng lo tea tängai te qaitä y käla sa hethang kae. Khimi lawngtä ma tängai kha sa y dylä, äni lä äma tea kaeling kaemae aethui raw te vi. ²³Khimi lawngtä lä Säthaw üng lo tea tängai kha äni üng lo kätyng sa y dylä, äni lä khawitälae thung-a äma üng mimai tea nung te kätyng vi. ²⁴Hini khimi lä äma ma tea aekheng kha äni lä mityng kälang-a ly ea äma üng ämaw äcae tea qengtä ma tämang ja te kätyng vi. ²⁵Tungaila khimi lawngtä lä Säthaw üng cungrü saite Ubädi tea khüsälü-a kheng kha tängai ea Ubädi thung-a awng saite na tämang y käla sa jawjaw dylä, Säthaw ma äni tea lä tähang kähawi na py vi ai. Ätephüng-a mei nädylä, Ubädi lä mä-ai tea bälawi saite phüng-a vi.

²⁶Khimi lawngtä lä Säthaw tea yng te kätyng sa saite tea dawng kha äma üng täbawng tea aeküng y dylä, äni lä äma tea kaeling kaemae sa te vi. Äni üng sa saite lä Säthaw üng maw-a ävang ting y. ²⁷Mä-ai üng Pä-ai Säthaw ngai saite kälu na lä mätang bälai saite ruicaw na hai nawngmädi lömai na tea säbawng hethang vi. Tukha hini älawngpre khimi na üng käsi sa saite hai-a, nang ce lä pawprae y hethang aethawsa ö.

Khimi üng mimai kheng y hethang sädi py saite

¹Kai üng kangby jä-ai na ä, nang ce lä phung-ang aesang saite mä-ai üng Areng Isu Khrista tea yng te phüng-a ämi üng mimai tea la kheng ö hang. ²Sui kösübü aecö kha kä-o ävang käting na hai aelawng saite khimi lawngtä lä nang ce üng aecö saite mityng-a kung vi nämai si. Mätang kha kä-o nitha kangrüng aena saite khimi lawngtä la kung te by vi. ³Nang ce ma kä-o ävang käting na aelawng saite khimi tea tämö khai te hai, “Hawi saite mityng hi-a aety lawi” näkha nang ce lä thui te vi nämai si. Tungaila nang ce ma khimi kangtang tea lä, “Nang lä honi mityng-a aedaw. Y dylä kai üng khokung-a aety” näkha thui nämai si. ⁴Hini kätyng nang ce sa dylä, khimi ce üng mimai tea kheng te y mei. Nang ce lä käsi na dawng saite tärae cei kung-a lawng ö te vi dy.

⁵Kai üng bälung aevaw saite kangby jä-ai na ä, tängai ö! Säthaw lä hini älawngpre-a khimi kangtang na bung re te vi. Äni ce lä Isu tea yng te phüng-a, tätang tawngnang saite na vi. Säthaw lä äma tea bälung aevaw saite khimi na tea lä äma üng pre py hethang älo aedo te kätyng khimi kangtang na tea äma üng pre dang te thung-a qa hai ö te vi. ⁶Tungaila nang ce lä khimi kangtang na tea mäthi ö te y vi. Nang ce bung sakälö khü kha tärae cei te mityng-a nähai prae saite na lä khimi tawngnang saite na ö y mei. ⁷Äni ce lä nang ce hai aesui saite Isu Khrista üng ämüng kähawi tea käsi thui ö te y mei.

⁸Caekäcai thung-a awng saite lengky saite Sanphrang Säthaw üng Ubädi-a, “Nang ma tea nang ma bälung aevaw te kätyng nang üng kangby jä-ai tea bälung aevaw hethang kae” näkha thui te vi. Honi Ubädi tea nang ce tängai tätang dylä hawiky ö te vi. ⁹Tungaila nang ce lä khimi ce üng mimai kheng dylä, hunghö sa ö te vi. Säthaw üng Ubädi lä nang ce tea hui y saite khimi na kätyng mäthi ö te vi. ¹⁰Khimi lawngtä lä Ubädi angxynlyng na tea tängai kha särilo haetä tea sa tämang dylä, äni lä Säthaw üng maw-a Ubädi angxynlyng na tea sa tämang te kätyng vi dy. ¹¹“Khimi lawngtä lä khimi kälang lawng lawngtä üng nawngpui tea y dylä nawngpaw tea täkübäjang sa hang” näkha thui te Areng lä, “Khimi bung bädü hang” näkha la thui te by vi. Tukätephüng-a nang ce lä khimi lawng lawngtä üng nawngpui y dylä nawngpaw hai täkübäjang sa y ngaila, khimi tea bädü dylä, nang ce lä Ubädi angxynlyng na tea sa tämang ö te vi dy. ¹²Khimi ce tea aelawi hai saite Ubädi kätyng nang ce lä Säthaw ma tärae cei saite khimi na kätyng älo aepe kha sa ö ba. ¹³Khimi lawngtä lä äma üng kangby jä-ai na tea bäheng y dylä, Säthaw ma tärae cei te kätü-a, äni tea la bäheng y by ai. Bäheng saite lä tärae cei saite qawng-a haidae awngky te vi.

Yng saite hai kälu sa saite

¹⁴Yng saite kangby jä-ai na ä, khimi lawngtä lä yng näkha thui ea hawi saite kälu na sa y dylä, honi lä äma tähang ävang ting te y vi. Hini kätyng yng saite lä äma tea aeqang haw y lyng. ¹⁵Nang ce kangby jä-ai na thung üng lawngtä lä käni qütä ca nei hethang hai aekhu aena hethang awng y näkha thui ö vi nämai si. ¹⁶Äni tea nang ce lä, “Kawng bärai te hai ma ly lawi. Bi üng-a awng kha äjo kawi hethang ca lawi” näkha thui ngaila, nang ce lä äni tähang aely ngai saite na tea py y dylä, äte la ävang ting te y vi. ¹⁷Honi kätyng Isu Khrista tea yng ngaila, hawi saite kälu na sa y dylä, yng saite lä kädü kae vi.

¹⁸Tungaila khimi lawngtä ma, “Nang lä yng saite awng vi. Kai lä hawi saite kälu sa vi. Tudylä nang lä hawi saite kälu sa y käla nang üng yng saite kai tea mätü lawi. Kai lä kälu kähawi na sa te hai-a kai üng yng saite nang ce tea mätü ai” näkha thui he awng vi. ¹⁹Nang ce lä Säthaw lawngtä xyng awng näkha yng ö te vi. Hini lä hawi vi. Tungaila angra na mäteng ma yng kha ri te hai-a käsawtho ö te by vi. ²⁰Nang ce lä kangthö na vi. Khimi lawngtä lä Säthaw tea yng kha hawi saite kälu sa y dylä, ävang ting te y vi näte kai ma nang ce tea mätü ai mei. ²¹Mä-ai üng kangsi Abraham üng phüng tea aedawng ö lawi. Äni tea Säthaw lä khimi käcüng-a mäthi te lä äni üng kälu phüng-a vi. Abraham lä äma üng cäpaw Isaika bung maicang qawng-a thyng kha Säthaw tea löci kätyng sa rüng te vi dy. ²²Abraham lä Säthaw tea tengxyng y yng vi näte äni üng kälu hai mätü te vi näte tea nang ce lä nung haw ö te y mei. Äni üng yng saite lä äni üng sa saite hai-a cungrü hai te vi. ²³Caekäcai thung-a, “Abraham lä Säthaw tea yng te phüng-a, Säthaw lä äni tea khimi käcüng-a mäthi te vi” näkha thui rüng saite tea lä cungrü hai te vi. Tukha Säthaw lä äni bung kangby jä-ai-a mäthi te vi dy. ²⁴Säthaw ma khimi lawngtä bung äni üng yng saite xyngtä phüng-a khimi käcüng kätyng mäthi te y vi näkha nang ce lä mäny haw ö te vi. Säthaw lä äni üng sa saite kälu phüng-a, äni bung khimi käcüng-a mäthi te vi.

²⁵Nawngmädi kangdei Raha mäteng ma, hini kätyng sa te by vi. Äni lä Isrelae khimi na üng sämeng mätaw saite bung äma üng ing-a lady kha kangkhüng mang-a lä lolang kälang mang hai mätaw ja pa te vi dy. Hini kätyng sa te phüng-a, äni tea Säthaw lä khimi käcüng-a mäthi pa te vi dy.

²⁶Muilaw awng y saite ätabung lä kädü kätyng-a, kälu na sa y käla yng saite lä kädü kae vi.

Bälai tea pä-üng saite phüng

¹Kai üng yng saite kangby jä-ai na ä, nang ce thung üng khimi äje cäcaw xyngtä lä kangkawng thung-a särae na lawng hethang sa ö hang. Ätephüng-a mei nädylä, Säthaw lä mätu saite kai ce tea khimi kälang na qawng-a cang y, dengpyky vi ai näte nang ce lä mäny ö te vi. ²Mä-ai angxynlyng na lä tämang saite cawngkhang na sa ö te vi. Älo hai thui tämang y saite khimi dylä cungrü te vi. Äni lä äma üng ätabung angxynlyng na tea aeküng haw te vi. ³Mä-ai lä cäphö üng täbawng thung-a süng cäpi byng khai kha ruinawng hai sätawng ea mä-ai üng lo tea tängai hai kha ly hethang ngai saite mang-a ly hai haw ö te vi. ⁴Tui sangphaw käleng pui na lä aelipui na üng aethaw hai-a ly ö te vi. Sangphaw tea lä ta cäpi hai-a ly hethang ngai saite mang-a sangphaw bähawi saite kung ma mäqa te vi. ⁵Hini kätyng bälai lä mä-ai ätabung üng cäpi saite kaepreng haetä vi.

Tungaila äni lä äma tea tengxyng y aethaw haw te vi. Mai di cäpi lä aetö käleng pui tea kang haw vi näte aedawng haile ö. ⁶Khimi üng bälai lä mai kätyng vi. Mä-ai üng ätabung kaepreng thung-a bälai lä haidae käsi awng te vi. Honi bälai lä khimi angxynlyng na tea käsi na sa haw te vi. Honi lä maipui angrawng üng tho saite mai hai-a mä-ai üng hing saite angxynlyng na tea kang hai haw te vi. ⁷Mä-ai khimi lä tawngbawi amäjy cawngkhang na, tävaw na, kaw-va saite na hai tui thung üng mawi na tea änawng hawi rung te khytä sa haw jawjaw ö te vi. ⁸Tungaila bälai tea lä ämi lawngtä la änawng hawi rung khytä sa haw ö te y. Bälai lä äce kawi kha käsi sa jawjaw te vi. ⁹Mä-ai lä mä-ai üng Pä-ai hai Areng tea bälai hai bälaw kha Säthaw üng ämaw äcae kätyng sa saite khimi na tea lä täking ö te by vi. ¹⁰Täbawng haetä üng bälaw saite hai täking saite lo tho mei te vi. Kai üng yng saite kangby jä-ai na ä, hini kätyng mä-ai lä sa ö vi hang si. ¹¹Vawcawng haetä üng tui kätui hai tui kälung tho mei haw mei. ¹²Kai üng yng saite kangby jä-ai na ä, thaidö kung-a lä olive äthai aethai haw mei. Cäpje kung-a thaidö thai aethai haw mei. Honi kätyng tui kälung tho saite vawcawng hai tui kätui lä tho haw y lyng.

Säthaw üng bälunghae saite

¹³Nang ce thung-a bälunghae saite lä ämi mei. Mänykaw saite lä ämi mei. Nang ce lä hawi saite kähing hai mätü hethang kae. Nang ce lä aemäneng kha hawi saite kälu na hai bälunghae saite mätü ö. ¹⁴Tungaila nang ce üng bälung thung-a tengxyng y pä-e saite, ae-aw saite na awng kha “kai lä bälunghae te vi” näkha thui te hai nang ma ce tea aethaw ö hang. Nang ce lä kaeling kaemae thui kha lo mitang thui ö te vi. ¹⁵Hokä bälunghae saite lä Säthaw te üng tho te y. Säthaw üng Muilaw lä mä-ai tea hini kätyng bälunghae hai te y vi. Honi bälunghae hai saite lä älawngpre hai aesui kha Setan angra te üng tho te kae. ¹⁶Ätephüng-a mei nädylä, pä-e saite, ae-aw saite bälung na awng dylä xhuxa saite awng haw te vi. Khimi ce lä käsi cawngkhang na sa ö te vi. ¹⁷Tungaila Säthaw te üng tho saite bälung kähae lä angcüky-a cai te vi. Honi lä awngneng saite, bälung hawi saite, khimi kälang na tähang aedawng kaw pa saite, bäheng saite hai kälu kähawi sa saite na vi. Honi lä khimi ce üng mimai kheng te hai käjüng sa te awng y. ¹⁸Khimi kälang na aede hai hethang sa saite na lä awngneng saite üng ämöti hi te khimi na kätyng vi. Äni ce lä cüng saite üng äthai na tea ae ö vi ai.

Nang ma ce bung Säthaw tea ae-a ö

¹Ätephüng-a nang ma ce tingtawi aejaw aemang kha aety ö te mei. Honi lä nang ma ce üng bälung thung-a ngaiphi tüng y saite na lä aejaw aemang jawjaw ö te vi. ²Nang ce lä hae haetä tea ae-aw ngaila dang ö te y. Honi hai nang ce lä khimi ce bung bädü hethang awng rüng ö te vi. Nang ce lä bädö ngaila dang ö te y vi. Tukha nang ce lä aejaw aemang kha aety ö te vi. Nang ce lä Säthaw tea aetang y te phüng-a, nang ma ce ngai saite na dang ö te y. ³Nang ce aetang te kätü-a, mäteng ma dang y te lä nang ma ce üng tämang saite kaedawng hai Säthaw tea mäkai ö te phüng-a vi. Nang ce lä mäkai saite tea nang ma ce üng bälung kawng hai hethang tähang xyng tawng he ngai ö te vi. ⁴Nang ce lä täkübäjang sa ö saite kätyng vi. Nang ce lä honi älawngpre üng hawi y saite älang tea bälung aevaw dylä, Säthaw tea esäre te vi dy näte nang ce lä mäny ö y mei. Hini älawngpre üng rawijae aesa hethang ngai saite khimi lä Säthaw üng täre-a lawng te vi dy. ⁵Caekäcai thung-a thui saite lo, “Säthaw lä mä-ai üng bälung thung-a mäkung saite Muilaw ma mä-ai tea tengxyng y pä-e hai te vi” näkha näte tea nang ce lä aetütü käthi ö te vi mei. ⁶Tungaila Säthaw ma mä-ai tea tähang kähawi py rae te vi. Tukätephüng-a Caekäcai-a, “Säthaw lä aethaw saite khimi na tea elekhei sa te vi. Tungaila aemäneng saite khimi na tea lä tähang kähawi py te vi” näkha thui vi.

⁷Tukätephüng-a Säthaw üng aely kängai-a hui ö. Setan angra te üng aedung ö. Hini kätyng sa dylä, Setan angra lä nang ce te üng aehuija vi ai. ⁸Nang ce lä Säthaw äteng-a ly dylä, äni la nang ce äteng-a ly by ai. Hunghö sa saite nang ce lä nang ma ce üng sa saite na cai hai ö lawi. Yng vawng y saite nang ce lä cai saite kaedawng awng ö lawi. ⁹Bälungsi kha minaw tui qa ö lawi. Nang ce üng mänui saite lä raw saite mang-a aelawng hai kha anghawtho saite na lä bälungsi saite mang-a lawng hai ö. ¹⁰Nang ce lä Areng üng maw-a aemäneng ö. Tudylä äni lä nang ce tea mäsang vi ai.

Kangby jä-ai na phüng aeqa ö hang

¹¹Yng saite kangby jä-ai na ä, lawng lawngtä üng phüng aeqa ö hang. Äma üng kangby jä-ai na phüng aeqa saite, y dylä tärae cei saite khimi lä Säthaw üng Ubädi phüng tea aeqa kha tärae cei saite khimi-a lawng te vi dy. Nang ce ma Ubädi tea tärae cei dylä, Ubädi tea tängai ö y te vi dy. Nang ce lä Ubädi tea tärae cei saite khimi na-a lawng ö te vi dy. ¹²Ubädi py saite hai tärae cei saite Kung lä Säthaw lawngtä xyng kae. Äni lawngtä xyng ni aeqang saite hai täphra haw saite vi. Nang ce lä nang ma ce üng kangby jä-ai na tea tärae cei te lä aeteng te y vi.

Aethaw saite khimi na tea sädi py saite

¹³Kai üng thui saite tea tängai ö! Nang ma ce tingtawi lä, “Vaini, y dylä khawngdang-a, kai ce lä hini märü-a ly kha säningtä tingtang vyng na kaepai sa kha tawngnang hai vi ai” näkha aethui ö te vi. ¹⁴Nang ce lä khawngdang mang-a ätemakä awng ai mei näte mäny ö y. Nang ce üng hing saite lä tänaetä xyng awng kha laja saite khö sämawng kätyng vi. ¹⁵Nang ce ma thui hethang kae saite lä, “Areng ma mä-ai tea hing hai hethang aely ngai vi dylä, kai ce lä hini kätyng sa ai” näkha nä ö te vi. ¹⁶Tungaila nang ce lä bälung aesang te hai aethaw ö te vi. Hini kä aethaw saite angxynlyng na lä sa tämang ö te vi dy.

¹⁷Tukätephüng-a kähawi sa hethang kae saite tea mäny kha sa y saite khimi lä hunghö sa te vi.

Tawnang saite na tea sädi py pa

¹Nang ce tawngnang saite na ä, kai üng thui saite lo tea tängai ö. Nang ce lä ätüng käleng hai raw ö. Ätephüng-a mei nädylä, Säthaw ma nang ce tea bälung mawng saite na hai mätang bälai saite na tyng hai ö ai te phüng-a vi. ²Nang ce üng tawngnang saite na lä pra king ö vi ai. Nang ce üng aekhu aena saite na la khawraw ma ca king ö vi ai. ³Nang ce üng sui hai tangkae na lä süngei ma ca ö vi ai. Hini süngei ma ca saite sui hai tangkae na lä nang ce tea cy kha nang ce lä khimi kangtang na tea säbawng y te mätü te vi. Honi eica saite na lä nang ce üng ätabung na tea la mai kätyng kang vi ai. Kangkhüng üng Käni tyng te tähang mäteng ma nang ce lä nang ma ce tähang mätung ö mang te vi dy. ⁴Nang ce lä nang ma ce üng la-a caw ae saite khimi na tähang ävang na py y käla awng ö te vi. Äni ce üng hang saite tüng tea tängai ö. Tukha äte angxynlyng na sa haw saite Säthaw lä caw ae saite khimi na üng hang te ätüng tea thai vi dy. ⁵Nang ce lä hini älawngpre-a tengxyng y anghawtho kha nang ma ce ngai te kätyng awng ö te vi dy. Säthaw ma khimi ce tea tärae cei ai te kätü-a, nang ce lä nang ma ce üng ngaiphi saite bälung na qaitä kätyng awng ö te vi. ⁶Nang ce lä khimi käcüng na tea tärae cei hai kha bädü ö te vi dy. Äni lä nang ce tea tärawitha te y vi.

Änawngsa kha yng khi saite

⁷Yng saite kangby jä-ai na ä, tukätephüng-a Areng ly haile te khytä aering ö. Lai sa saite na lä älawng üng ävang ting saite äthai na dang te khytä, angcü hai kangkhüng üng khö tui na tea khung kha aering te phüng aedawng ö. ⁸Nang ce lä mä-ai üng Areng ly haile hethang kätü lä aenai te phüng-a cakhi-a änawngsa ö.

⁹Yng saite kangby jä-ai na ä, nang ma ce tingtawi khimi phüng aethui ö hang. Hokä y dylä, Areng lä nang ce tea tärae cei vi ai. Tärae cei saite kung lä thokhae teng-a aedaw te vi dy. ¹⁰Yng saite kangby jä-ai na ä, mä-ai üng Areng üng Angthang thui saite buisaw na aeme aeqa te na phüng tea dawng ö lawi. Äni ce lä mätang bälai kha khung ö te vi dy. Nang ce la äni ce täthei awng hethang kae ö te by vi. ¹¹Änawngsa kha khung saite khimi na tea Säthaw ma tähang kähawi py vi näkha thui te nang ce ma mäny ö te vi. Nang ce lä Joba üng änawngsa saite phüng thai ö pyng te vi dy. Areng ma kangkhüng-a äni tea säbawng saite phüng nang ce lä thai ö pyng te vi dy. Areng lä bälung äkäneng hai khimi ce tea bäheng te vi.

¹²Yng saite kangby jä-ai na ä, kai thui saite na tea tängai ö! Nang ce lä älo aely kälengky-a aedo te kätü-a, täking ö hang. Känipre hai, y dylä älawngpre hai, y dylä ätete hae haetä hai la täking ö hang. Nang ce ma “üng” näkha thui hethang ngai dylä, “üng” näkha thui ö. Nang ce ma “y” näkha thui hethang ngai dylä, “y” näkha thui ö. Y dylä, Säthaw ma nang ce tea tärae cei ai.

Yng saite hai aetang saite

¹³Nang ce thung-a khimi lawngtä lä mätang bälai te awng mei. Äni lä aetang sy. Anghawtho saite lawng lawngtä awng mei. Äni lä Säthaw tea ae-awi na hai bälaw sy. ¹⁴Nang ce thung-a lawng lawngtä lä känaw käsaw awng mei. Äni lä kangkawng üng mätawngky na bung ka kha känaw käsaw awng saite khimi tea Areng üng ämüng hai-a situi kälo ea äni ce ma aetang pa ö vi. ¹⁵Yng saite hai aetang te phüng-a, Areng lä Khimi känaw käsaw bung hawi sa pa vi ai. Tukha Areng ma äni bung mätha pa vi ai. Äni hunghö sa dylä, Areng lä äni üng hunghö na tea bälawi vi ai. ¹⁶Tukätephüng-a nang ma ce üng hunghö na lawng lawngtä tea aethui kha lawng lawngtä tähang aetang ö. Tudylä nang ce üng känaw käsaw lä hawi king ö vi ai. Khimi käcüng lawngtä üng aetang saite lä tengxyng y haidae awng kha mawcawng te vi. ¹⁷Elijae lä mä-ai kätyng khimi by kae. Äni ma khöne y hethang yng khü kha aetang pyng-a lä khö reng pa vi. Tukha hini älawng qawng-a khö reng te lä säning thungtä hai law tärutä awng pa te vi dy. ¹⁸Honi pyng-a äni lä mä-ai üng Areng tea khöne hethang aetang haile tyng pa be vi dy. Tukha Säthaw lä khöne hai kha cawbi cawthai na hai angti angjang na tho hai pa vi dy.

¹⁹Yng saite kangby jä-ai na ä, nang ce thung üng khimi lawngtä ma lo mitang tea tängai y dylä, khimi kälang lä äma üng kangby jä-ai tea ae-ui haile hai hethang äni tea säbawng vi dy näkha nä ö maisi. ²⁰Hunghö sa saite khimi tea äma sa tämang saite lang üng aekö haile tyng hai saite khimi lä hini hunghö sa saite khimi bung dü saite thung üng aeqang vi ai näte mäny ö. Tukha Säthaw lä honi khimi üng hunghö awng mang saite na tea bälawi pa vi ai.