HEBÄRAI
khimi ce tea tärü saite cae
Angcü üng älo
Caekäcai kaw saite na ma hini cae tärü saite kung lä Banabas, y dylä Apolo, y dylä Pawlae ce thung üng lawng lawngtä daila awng ai. Hini cae lä Jerusalem märü pra y te kälang A.D. 70 khösäning-a tärü te vi. Cae tärü te kung ma Judae Khristen na tähang mawlang kaedawng-a khaiky kha tärü pa te vi. Äni ce lä honi kätü-a tengxyng y sakälö khü saite na aeting te phüng-a, cae tärü saite kung lä yng saite na ma äma ce üng Khrista tea yng saite na khaisö kha Judae na üng ubädi hai reitae na tea ae-y lae ai te phüng-a, bälung mawng phi ö te vi. Hini cae üng aely lengky saite phüng lä Isu Khrista lä lengky saite phung-ang hai haidae awng kha äte angxynlyng na qawng-a lengky vi näkha thui te vi. Hini cae thung-a nung leilae saite älo lä “qawng-a lengky” näsaite vi. Käri lo-a lä “hawiky” näsaite lo tawng te vi.
Äphüng äkädawiky
Khrista lä Säthaw üng cungrü-a aetüng hai saite lawng te 1:1-3
Khrista lä Känipre angtawtha na qawng-a lengky saite 1:4-2:18
Khrista lä Mosi hai Joshu qawng-a lengky pa saite 3:1-4:13
Khrista lä mäthykung na qawng-a lengky pa saite 4:14-7:28
Khrista üng älo aedo saite lä lengky saite 8:1-9:22
Khrista üng löci lä kälang löci mawi qawng-a lengky saite 9:23-10:39
Yng saite lä aely kälengky lawng te phüng 11:1-12:29
Säthaw tea kawng hai saite 13:1-19
Kangkhüng üng aetang saite13:20-21
Kangkhüng üng thui saite lo 13:22-25
1Säthaw lä khimi ce tea Äcäpaw te mang hai-a thui te
1Jangni üng hai Säthaw lä mä-ai üng kangsi kangjaw na tea älang cawngkhang na hai kätü awng mang-a buisaw na te mang hai-a älo aepe vi dy. 2Tungaila vaihi kangkhüng käni-a lä Äcäpaw te mang hai-a mä-ai tea älo thui te vi dy. Säthaw lä Äcäpaw hai-a käni hai älawng sa kha äte angxynlyng na tea pyng hai hethang re vi dy. 3Äcäpaw lä Säthaw üng phung-ang matangtä cangxei hethang hawi mei näte tea mätü kha äma khekhe lä Säthaw üng aeme aeqa saite hai aetawng khaw te vi. Hini älawng hai käni äte angxynlyng na tea lä äma üng haidae awng saite lo hai äma ce üng mityng-a awng jawjaw hethang sa te vi. Äni lä khimi ce üng hunghö na tea mäcai pyng ea Känipre-a awng saite phung-ang kälengky Säthaw üng bangtang mang-a aety vi dy.
Äcäpaw lä Känipre üng angtawtha na qawng-a lengky
4Säthaw üng Cäpaw lä Känipre üng angtawtha na qawng-a tengxyng y lengky te kätyng Säthaw ma mäthi saite ämüng lä Känipre üng angtawtha na üng ämüng na qawng-a lengky vi. 5Säthaw lä ämi Känipre üng angtawtha tea,
“Nang lä kai üng Cäpaw vi.
Vaini kai lä nang üng Pä-ai-a aelawng vi dy” näkha thui vai y lyng.
Y dylä Säthaw ma Känipre üng angtawtha lawngtä phüng tea,
“Kai lä äni üng Pä-ai-a lawng kha
äni lä Kai üng Cäpaw-a lawng ai” näkha thui tyng y lyng.
6Säthaw lä äma üng Cäpaw äcälö bung hini älawngpre-a mätaw te kätü-a,
“Säthaw üng Känipre üng angtawtha angxynlyng na lä äni tea cäphaw ö hethang kae” näkha äni ma näpa vi dy.
7Tungaila Säthaw lä Känipre üng angtawtha na üng phüng tea,
“Säthaw lä äma üng Känipre üng angtawtha na tea aeli kätyng lawng hai kha,
äni ce lä äma üng mawsawng na tea maikädo na kätyng lawng hai vi” näkha näpa.
8Tungaila Äcäpaw phüng äni ma thui te lä,
“Säthaw ä, nang üng pyng saite pre lä dungtäsa awng jawjaw vi ai.
Nang lä nang ma üng khimi na tea cüng saite hai pyng te vi.
9Nang lä mitang khaw saite tea bälung aevaw kha sa tämang saite tea lä esäre te vi.
Tukätephüng-a kai, nang üng Säthaw, lä nang bung re ea nang üng kangby jä-ai na qawng-a,
mäsang kha tengxyng y anghawtho saite na nang tea py te vi dy” näkha nä vi.
10Säthaw ma la,
“Areng ä, Nang lä, angcüky älawng tea sa kha,
käni khösang na tea lä nang üng äkö na hai sa te vi.
11Honi angxynlyng na pra ö king ngaila nang lä dungtäsa awng jawjaw ai.
Äni ce angxynlyng lä kä-o kätyng mawng ö vi ai.
12Nang lä kä-o tea bäle te kätyng äni ce tea bäle kha käde phae vi ai.
Äni ce lä kä-o kämawng na kätyng awng ö ngaila nang lä lang te awng y lyng.
Nang lä manila dü y lyng” näkha nätyng te vi.
13Säthaw lä,
“Nang üng täre na bung nang üng äkho täkui-a khai te khytä,
kai üng bangtang mang-a aety ba” näkha,
Känipre üng ämi angtawtha tea la thui vai y lyng.
14Känipre üng angtawtha na lä mawsawng na xyng lawng te kae vi. Äni ce lä Säthaw üng aeqang saite na tea säbawng hai hethang mätaw saite na kae.
2Säthaw üng aeqang saite
1Tukätephüng-a mä-ai lä thai saite lo mitang tea kähawi-a tängai ö khü hethang kae. Tukä y dylä mä-ai üng yng saite lä laja vi ai. 2Säthaw lä mä-ai üng kangsi kangjaw na tea Känipre üng angtawtha na hai-a thui saite angthang lä mitang khaw te vi. Honi angthang tea hui y, tängai y saite khimi na tea lä Säthaw ma äni ce hai aeteng khaw saite deng py ö vi ai. 3Hokä aeqang saite käleng tea mä-ai dawngcang y vi dylä, Areng ma mä-ai tea deng py ai näte lä tätang khaw vi. Areng äma khekhe lä hini aeqang saite angthang angcü-a ma thui te vi dy. Äni üng angthang thai saite khimi na ma mä-ai tea lä honi angthang tüngkhaw vi saite mätü vi dy. 4Äni üng khimi na ma mitang khaw te angthang mätü hethang Säthaw lä cangxei saite na hai kamarae cawngkhang na sa te vi. Äni lä äma üng aely kängai kätyng Muilaw Käcai üng sakaw saite na hai-a äma üng khimi na tea py pa te vi dy.
Mä-ai bung aeqang saite mang-a bähawi te Kung
5Mä-ai lä vaimaw mang-a tyng hethang älawngpre kangthae phüng thui te vi. Säthaw lä Känipre üng angtawtha na tähang honi pre tea pyng hethang aenae py pa y. 6Caekäcai thung-a khimi lawngtä ma thui te lä,
“Säthaw ä, ätephüng-a nang lä bälung thung-a,
khimi ce bung aedawng te vi mei.
Nang tähang khimi ce üng caw nade na bung rui hethang ätephüng-a aely lengky te vi mei.
7Nang lä äni ce bung Känipre üng angtawtha na qawng-a cäditä aeneng hai pa vi dy.
Nang lä khimi ce tea cangxei-a sa kha phung-ang py pa vi dy.
8Nang lä äte angxynlyng na pyng hai hethang äni ce tea aenae py pa vi dy” näkha nä vi.
Säthaw ma, “Äte angxynlyng na äni ce tea pyng hai te vi” näte lä khimi üng pyng y saite lä äte haetä la awng y näte vi. Tungaila vaihi khimi ce lä äte angxynlyng na tea pyng te mä-ai lä nung ö y vi rawng. 9Tungaila mä-ai lä Isu bung nung ö te vi. Säthaw lä Isu bung Känipre üng angtawtha na qawng-a tänaetä äje cäcaw kaeneng-a khai pa vi. Hini kätyng Isu lä Säthaw üng tähang kähawi hai-a khimi angxynlyng na tähang dü pa hethang kae te vi. Äni lä mä-ai tähang mätang bälaica-a dü pa te phüng-a Säthaw ma vaihi lä äni tea cangxei-a sa kha phung-ang py pa te mä-ai lä mäny ö te vi. 10Säthaw lä äni hai-a äni tähang äte angxynlyng na tea sa kha pyng hai pa te vi. Äni lä Isu bung mätang bälaica aeting te hai-a cungrü hai pa te vi. Tukätephüng-a caw nade awng mang te na bung lä äma üng phung-ang thung-a qa hai hethang nähai pa vi dy. Tukha Isu lä äni ce bung aeqang saite Areng vi.
11Isu lä khimi ce bung äma ce üng hunghö na tea mäcai pa te vi. Äni hai äni ma mäcai saite angxynlyng na üng Äpä-ai lä lawngtä kae. Tukätephüng-a Isu lä äni ce tea äma üng kangby hai ticaw na näkha ka hethang aejae y. 12Isu lä Säthaw tea,
“Kai lä nang üng sa saite na kai ma üng kangby hai ticaw na tea thui ai.
Kai lä nang tea mangtä cäphaw he aecö saite na üng maw-a bälawi saite ae-awi na thui ai” näpa.
13Äni ma thui tynglyng be te lä, “Kai lä Säthaw tea ae-y vi ai” näkha nä vi. Äni lä, “Kai tea Säthaw ma py saite caw nade na hai kai lä hi-a mangtä awng te vi” näpa.
14Honi caw nade na lä äthi hai ängang awng saite khimi na vi te phüng-a, Isu lä honi na kätyng äthi ängang awng saite khimi-a aelawng khe te by vi dy. Äni üng dü saite hai-a Setan angra üng haidae tea täphra haw te vi dy. Honi Setan angra tea lä khimi ce bung bädü hai hethang haidae awng vi. 15Isu lä hini kätyng sa te phüng-a, khimi angxynlyng na tea mawsawng na kätyng awng saite thung üng aelawi hai pa vi dy. Khimi ce lä dü hethang ri te phüng-a, äni ce lä hing saite jungtä mawsawng na kätyng awng ö vi dy. 16Äni lä Känipre üng angtawtha na tea säbawng te y lyng näte mä-ai lä mäny ö te vi. Äni lä Abraham üng kaesui kaebeng na tea säbawng te vi. 17Tukätephüng-a äni lä älang qütä-a äma üng khimi na kätyng aetawng hethang kae te vi. Hini kätyng äni lä mä-ai tea bäheng kha Säthaw üng ae-y khü saite Mäthykung Kälengky-a lawng haw te vi. Tukätephüng-a Säthaw lä khimi ce üng hunghö na tea bälawi haw te vi. 18Setan lä Isu tea hunghö sa hethang the te hai mätang bälai saite tea äni lä aeting khe te vi dy. Tukätephüng-a Isu lä hunghö sa hethang Setan ma the saite khimi na tea säbawng haw te vi dy.
3Isu lä Mosi qawng-a lengky
1Säthaw ma re saite yng te kangby jä-ai na ä, Areng Isu üng äphüng aedawng ö lawi. Äni bung lä mä-ai üng thui te yng saite üng Mäthykung Kälengky lawng hethang Säthaw ma mätaw te vi dy. 2Mosi lä Säthaw üng ingthung lawng saite khimi na tähang ae-y khü kha sa te kätyng Isu la äma bung re saite Säthaw tähang ae-y khü kha sa te by vi. 3Ing sa saite khimi tea lä ing qawng-a cang y khimi na ma tämö khai ky vi. Hini kätyng-a Mosi qawng-a cang y khimi na lä Isu tea tämö khai hethang aetengky te vi. 4Ing qütä tea lä lawng lawngtä ma sa te vi. Äte angxynlyng na tea sa saite lä Säthaw vi. 5Mosi lä Säthaw üng ing lawng saite khimi angxynlyng na tähang ae-y khü kha sa saite mawsawng vi. Äni lä vaimaw mang-a Säthaw ma thui saite lo na tea täphawng pa te vi dy. 6Tungaila Khrista lä Säthaw üng Cäpaw kätyng ae-y khü saite hai äma üng ing angxynlyng na tea pyng te vi. Mä-ai lä ri y te bälung awng kha mä-ai ma üng aethang khai saite Khrista tea ae-y khü dylä, mä-ai lä Säthaw üng ing hai äma üng khimi na vi.
Säthaw üng khimi na aehae nae
7Tukätephüng-a Muilaw Käcai ma thui te kätyng,
“Vaini Säthaw üng ätüng nang ce thai dylä, bälung tangkö ö hang.
8Nang ce üng kangsi kangjaw na lä daithung kärang-a bälung tangkö te hai Säthaw tea elekhei sa ö te vi dy.
Honi kätü-a daithung kärang-a bälung tangkö te hai äni ce lä Säthaw tea käny ö te vi.
9Säthaw ma, ‘Nang ce üng kangsi kangjaw na lä Kai üng cangxei sa saite na säning ruibälitä tütü nung ö ngaila,
Kai tea käny leilae ö te vi dy’ näpa.
10Tukätephüng-a Kai lä honi dung üng khimi na tea kädawtho kha thui te lä,
‘Äni ce lä Kai üng lo hui hethang ngai y kha käde phae ö te vi.
Äni ce lä kai üng sa saite na tea mäny ö te y vi’ näpa.
11Kai lä kädawtho te phüng-a, kai ma,
‘Äni ce tea lä manila kai üng aehae saite mityng-a kung hethang py y lyng’ näkha täking te vi” näpa.
12Yng saite kangby jä-ai na ä, nang ce thung üng ämi la hawi y saite bälung hai yng y saite khimi awng y hethang sädi khai ö. Honi khimi lä Säthaw kanghing tea hui y käla äni bung khaisö vi ai. 13Honi jüng-a nang ce thung üng ämi la hunghö üng kaeling kaemae-a qa kha bälung tangkö y hethang käni qütä lawng lawngtä tea aesäbawng ö. Isu Khrista ly haile te kätü khytä hini kätyng sa ö ba. 14Mä-ai lä angcü üng yng te kätyng kangteng khytä Säthaw tea bälung ae-y khü kha awng dylä, Säthaw ma Khrista tea py hethang awng saite thung-a mä-ai lä qa ö te by vi.
15Caekäcai thung-a,
“Nang ce lä vaini Säthaw üng ätüng thai dylä, bälung tangkö ö hang.
Nang ce üng kangsi kangjaw na lä Säthaw tea elekhei sa ö te vi.
Honi kätyng nang ce lä bälung awng ö hang” näkha thui vi.
16Säthaw üng lo thai kha äni tea elekhei sa saite khimi na lä ämi mei. Honi na lä Aikuta pre üng hai Mosi ma mäthoja kha nähai saite khimi angxynlyng na vi. 17Säthaw lä äni ce tea säning ruibälitä tütü kädawtho pa te vi dy. Honi khimi ce lä hunghö sa kha daithung kärang-a dü ö king vi dy. 18Säthaw ma, “Äni ce lä makäte kätü-a la kai üng aehae saite mityng-a kung haw y lyng” näkha täking khü saite lo lä ämi ce tähang mei. Honi lä Säthaw üng lo tängai y saite khimi na tea thui te vi. 19Tudylä äni ce lä yng y te phüng-a, Säthaw üng aehae saite mityng-a kung haw y te tea mä-ai lä mäny ö vi.
41Säthaw lä mä-ai tea Äma aehae saite mityng-a kung haw hethang älo aedo te awng vi. Tukätephüng-a nang ce thung üng ämi la Äni üng aehae nae tea mäqaw y hethang sädi khai ö. 2Jangni-a Aikuta pre üng tho ea ly saite Isrelae khimi na kätyng mä-ai lä Säthaw üng Angthang Kähawi thai ö te by vi dy. Tungaila honi angthang lä äni ce tähang ävang ting te y lyng. Ätephüng-a mei nädylä äni ce lä angthang thai te kätü-a, yng te hai lady ö y te phüng-a vi. 3Yng saite mä-ai lä Säthaw üng lo aedo te aehae saite mityng-a kung haw ö te vi. Caekäcai thung-a Säthaw ma,
“Kai lä kädawtho kha,
‘Äni ce lä manila kai üng aehae saite mityng-a kung haw ö y lyng’ näkha täking pa vi dy” nä vi.
Säthaw lä hini älawngpre sa angcü te kätü üng hai ma äma üng hini kälu na sa khüng ngaila, hini lo lä thui jawjaw te vi rawng. 4Caekäcai na thung-a äsäritä kätü-a, älo thui te lä, “Äsäritä Käni-a, Säthaw lä äma üng kälu sa saite angxynlyng na üng aehae te vi dy” näkha nä vi. 5Säthaw ma Caekäcai thung-a thui be te lä, “Äni ce lä manila Kai üng aehae saite mityng-a kung haw ö y lyng” näpa. 6Angthang Kähawi tea thai angcü saite khimi na lä yng y te phüng-a, aehae saite mityng-a kung haw ö te y vi dy. Tukätephüng-a khimi kälang na tea Säthaw lä honi aehae saite mityng-a kung hai pa te vi. 7Tukätephüng-a Säthaw lä “vaini” mäthi saite käni haetä tea khai pa te vi. Caekäcai thung-a awng te kätyng säning qae bärai te kätü pyng-a, Davidae sanphrang hai-a honi käni üng phüng thui ea,
“Vaini Säthaw lo nang ce thai dylä,
bälung tangkö ö hang” näkha awng vi.
8Joshu lä Säthaw ma älo aedo te kätyng Isrelae khimi na bung aehae saite mityng-a nähai vi dylä, Säthaw lä qae te kätü pyng-a käni kälang phüng lä thui y lyng. 9Tungaila äsäri käni-a Säthaw lä aehae te kätyng äma üng khimi na aehae hethang mityng lä awng te vi rawng. 10Säthaw lä hini älawngpre sa pyng-a aehae te kätyng Säthaw üng aehae saite mityng-a kung haw saite khimi angxynlyng na lä äma ce üng kälu na aehae ö vi ai. 11Tukätephüng-a honi aehae saite mityng-a kung haw hethang mä-ai lä aethawsa ö hethang kae. Isrelae khimi na ma Säthaw üng lo tängai y te phüng-a, äni ce üng yng saite lä la ö vi dy. Ämi la honi kätyng lä awng hang sy.
12Säthaw üng lo lä hing kha haidae awng vi. Äbaw känetä awng saite aekei sawngseng qawng-a cöky vi. Säthaw üng lo lä khimi ce üng bälung hai Säthaw ma py saite kähing tea täphü haw te vi. Ähu äxingxü hai angxing na tea täphü haw te vi. Bälung kaedawng hai khimi üng aely kängai saite na tea la cei haw te vi. 13Säthaw üng maw-a lä äte haetä la ho hethang dang y lyng. Säthaw üng sa saite angxynlyng na lä äma üng maw-a aephawng king te vi. Mä-ai ma üng sa te angxynlyng phüng na Säthaw üng maw-a thui mäcai king hethang kae.
Mäthykung kälengky Isu
14Mä-ai tea Säthaw üng Cäpaw Isu näsaite Mäthykung Kälengky lawngtä awng vi. Äni lä Käni na mang cäqeng kha Säthaw üng maw-a tyng te vi. Tukätephüng-a mä-ai lä täbawng hai aepho kha yng saite tea lä cakhi-a aekhaw ö si. 15Mä-ai üng Mäthykung Kälengky lä mä-ai üng aethaw awng saite tea mäny kha bäheng te vi. Setan lä mä-ai tea hunghö sa hai hethang the te kätyng äni tea la älang qütä the te by vi. Tungaila äni lä hunghö awng te y. 16Tukätephüng-a mä-ai lä tähang kähawi awng saite Säthaw üng Areng aety nae maw-a bälung ae-y khü te hai ma ly ö si. Mä-ai üng aely ngai saite kätyng-a, mä-ai tea säbawng hethang Säthaw üng tähang kähawi hai bäheng saite na tea mä-ai lä aeting ö vi ai.
51Säthaw lä mäthykung kälengky qütä bung äma üng khimi na thung üng re te vi. Äni bung lä khimi ce üng jüng-a Säthaw tea mawsawng sa hethang khai pa te vi dy. Äni lä khimi ce üng hunghö na tähang Säthaw tea löci na sa kha lasawng na py pa hethang vi. 2Mäthykung kälengky äma khekhe lä aethawdi saite khimi vi. Tukätephüng-a sa tämang saite na tea lä mäny y te phüng-a, hunghö sa saite khimi na tea äni lä bäheng haw te vi. 3Äni lä äma ma khekhe la aethawdi te phüng-a khimi ce üng hunghö na tähang cang y äma üng hunghö na tähang la löci sa hethang kae te by vi. 4Ämi la äma tea mäthykung kälengky lawng hethang aemäsang haw y lyng. Säthaw lä Aron bung mäthykung kälengky lawng hethang re te kätyng Säthaw ma ka saite khimi xyng ni mäthykung kälengky lawng haw te kae vi.
5Tukätephüng-a Khrista la äma tea äma mäthykung kälengky lawng hethang aemäsang te y lyng. Säthaw lä äni tea,
“Nang lä kai üng Cäpaw vi.
Vaini kai lä nang üng Pä-ai-a aelawng vi dy” näkha näpa.
6Äni ma Caekäcai phütä thung-a thui tynglyng be te lä,
“Nang lä cangkhawng üng mäthykung Melkhizede kätyng dungtäsa mäthykung lawng ai” näkha nä vi.
7Isu lä älawngpre äma üng hing te thüng-a Säthaw tea aetang vi. Dü saite üng äni bung aeqang haw saite Säthaw tea minaw tui na hai raw kha ätüng käleng na hai aesi aebai te vi. Äni lä bälung aemäneng kha älo tängai pa te phüng-a, Säthaw lä äni üng aetang saite tea tängai pa vi dy. 8Äni lä Säthaw üng Cäpaw lawng ngaila äma üng mätang bälaica te na hai-a älo tängai hethang aetu te vi dy. 9Säthaw lä äni bung cungrü hai pyng-a, äma üng lo tängai saite khimi angxynlyng na tähang dungtäsa aeqang saite äkung-a äni lä aelawng vi dy. 10Säthaw lä äni bung Melkhizede kätyng mäthykung kälengky-a lawng hai hethang khai pa te vi dy.
Khrista tea yng saite lä käde phae ö hang
11Hini na phüng thui hethang ngai saite älo na kai ce lä awng mang vi. Tungaila nang ce tea thui mäcai hethang lä rae bärai. Ätephüng-a mei nädylä, nang ce lä nai-ui saite na kae vi. 12Nang ce lä vaihi kätü-a khimi kälang na tea mätu hethang hawi khaw te vi. Tungaila nang ce tea khimi lawng lawngtä ma Säthaw üng angthang angcü üng lo tea mätu hethang lä aely ngai te vi rawng. Nang ce lä äby na kätyng vi. Bö ang na tea ca haw y lyng. Känö tui na nei te kae vi rawng. 13Känö tui qaitä nei saite khimi lä äby kae vi rawng. Käsi hai kähawi näsaite tea lä täphü hethang kaw te y vi rawng. 14Tungaila bö ang na lä ryng saite khimi na tähang kae. Äni ce lä käsi hai kähawi tea täphü kaw hethang aetu ö pyng te vi dy.
61Tukätephüng-a angcü üng Khrista phüng mätu saite na tea khaisö kha yng te ryng hai hethang mätu saite na tea mä-ai lä ly ö si. Mä-ai üng yng saite aenyng nae tea lä mätu haile tyng hethang aely ngai te y lyng. 2Hini na lä: Hawi y saite kälu na üng ae-ui kha Säthaw tea yng saite, Baptismae la saite, yng saite khimi na tea äkö thyng saite, dü saite üng aetha haile saite, dungtäsa tärae cei saite na vi. 3Mä-ai lä ryng saite Khristen-a aelawng ö si. Säthaw ma aely ngai dylä, mä-ai lä honi kätyng sa ö ai.
4Mä-ai ma üng yng saite na khaisö te khimi na tea lä ae-ui hai hethang nähai haw y lyng. Äni ce lä Säthaw üng kaevang-a awng vai kha Säthaw üng pyng saite hing te kangthae tea mäteng pyng ö te vi dy. Äni ce hai yng saite khimi kälang na tea lä Säthaw ma Muilaw Käcai mangtä py ö te vi dy. 5Säthaw üng älo tea hawi vi näkha äni ce lä mäny ö khe vi. Säthaw ma pre pyng saite kätü üng haidae tea äni ce lä mäny ö pyng te vi dy. 6Honi pyng-a äni ce lä Khrista tea yng saite na käde phae ö te vi. Honi khimi na tea lä ae-ui haile tyng hai hethang säbawng haw y lyng. Ätephüng-a mei nädylä äni ce lä Säthaw üng Cäpaw bung thinglang qawng-a täheng tynglyng kha khimi ce maw-a Khrista tea kaejae pa ö te phüng-a vi.
7Älawng lä äma qawng-a khöne saite khö tui tea nei kha äkung e saite khimi na ma tawng haw hethang äkung na aepra ea leng hai pa te vi. Säthaw lä honi älawng tea tähang kähawi py pa te vi. 8Tungaila älawng lä angling kung na hai aeca kung na tea aepra dylä, äte la ävang ting te y. Säthaw lä honi älawng tea täking vi ai. Kangkhüng-a lä honi khimi na ma älawng tea mai hai sawi ö vi ai.
9Kai üng bälung aevaw saite kangby jä-ai na ä, kai ce lä hini kätyng thui ngaila, nang ce tea kai ce lä bälung ae-y khü ö te vi. Säthaw ma nang ce bung aeqang saite hai tähang kähawiky na nang ce tea py te vi dy näte kai ce lä mäny ö te vi. 10Säthaw lä cüng jawjaw te vi. Äma üng khimi na tea nang ce ma säbawng pyng saite na hai säbawng jawjaw saite na tea lä Säthaw ma aedawng haile tyng te vi. Nang ce lä Säthaw tea bälung aevaw ö kha äni tähang kälu sa saite tea äni lä tämang te y. 11Nang ce angxynlyng tea Khrista tyng haile te khytä honi kätyng bälung kähawi awng kha aethaw rae jawjaw hethang lä mä-ai üng ngaiky ö saite vi. Hokä dylä nang ce üng aethang khai saite na lä cungrü khaw ö vi ai. 12Kai ce lä nang ce tea aethawli hai hethang ngai te y lyng. Khrista tea yng kha khung saite khimi na kätyng awng hai hethang hai Säthaw üng aedo saite lo na tea dang hai ö hethang ngai te vi.
Säthaw üng aedo saite älo käcakhi
13Säthaw lä Abraham tea älo aedo te kätü-a, äni lä äma üng aedo te kätyng sa hethang älo aenai khü te vi. Äni qawng-a leng saite ämi la awng y te phüng-a, äni lä äma üng ämüng hai älo aenai te vi dy. 14Äni ma, “Kai lä nang tea tähang kähawi py khaw ai. Nang üng kaesui kaebeng na awng mang hai vi ai” näkha näpa. 15Abraham lä änawngsa kha Säthaw üng älo aedo te kätyng dang khaw vi dy. 16Khimi ce lä äma ce qawng-a leng saite na üng ämüng tea ka kha älo aedo ö te vi dy. Honi cakhi-a aedo saite lo hai älo ae-e saite angxynlyng na tea lä bädü ö te vi dy. 17Säthaw lä äma üng aedo saite lo dang te khimi na tea äma üng mawlang kaedawng lä manila lang vai y näte mäny haisy hethang ngai hai te vi. Tukätephüng-a Säthaw lä äni üng cakhi-a aedo saite lo hai aedo pa te vi dy. 18Säthaw lä äma üng älo aedo saite kätü-a täking saite lo la thui pa te vi dy. Honi känetä lä mäqa haw y saite na vi. Säthaw lä kaeling kaemae sa haw y te phüng-a, mä-ai lä Säthaw tea bälung ae-y khü ö te vi. Säthaw ma mä-ai bung aedung hai hethang äni tea aehui ö te vi. Säthaw ma py te aethang khai saite tea mä-ai lä kähawi-a süng khü hethang aethaw dang ö te vi. 19Mä-ai üng hing saite tähang tui sangphaw aeca hai nae süng käleng kätyng hini aethang khai saite lä mä-ai tähang awng te vi. Honi lä mä-ai üng bälung tea cakhi hai saite vi. Honi cakhi hai saite lä Känipre Ingkäcai käleng thung-a jaeky saite känih käsa te mang hai mityng käcaiky-a nähai haw te vi. Hini aethang khai saite lä Isu Khrista vi dy. 20Isu lä mä-ai tea säbawng hethang mä-ai y kälang-a Mityng Käcaiky thung-a kung rüng te vi dy. Äni lä mäthykung kälengky Melkhizede kätyng-a mä-ai üng dungtäsa Mäthykung kälengky-a aelawng vi dy.
7Mäthykung Melkhizede
1Hini Melkhizede lä Salem märü üng sanphrang vi. Äni lä Aesangky saite Säthaw üng mäthykung vi. Abraham lä täre aety kha sanphrang lawng bälitä tea bäja saite üng vawi haile te kätü-a, Melkhizede lä äni hai aeting kha äni tea tähang kähawi py pa vi. 2Abraham lä täre aety kha dang saite angxynlyng na üng phü hawtä thung üng phütä lä Melkhizede tea py pa vi dy. Melkhizede näte ämüng üng älawngsai lä, “Cüng saite sanphrang vi.” Salem märü üng pyng saite phüng-a, äni la “Awngneng saite sanphrang” näkha ämüng awng te vi.7:2 Salem näte lä, “Awneng saite Sanphrang” näte vi.3Caekäcai thung-a Melkhizede üng änä-awi, äpä-ai hai kangsi kangjaw na üng phüng lä tärü kha khai y lyng. Äni bung aepeng saite, dü saite angthang na la tärü te awng y. Äni lä Säthaw üng Cäpaw khekhe kätyng dungtäsa mäthykung-a lawng te vi.
4Melkhizede lä matangtä leng mei näte aedawng ö. Mä-ai üng kangsi Abraham mäteng ma täre aety te üng dang saite angxynlyng na thung üng hawtä-a haetä äni tea py pa te vi. 5Mäthykung na lawng saite Levi üng kaepreng lä äma ce üng kangby jä-ai, Isrelae khimi na te üng hawtä haetä tea cawng hethang kae. Hini lä Mosi üng Ubädi ma thui saite kätyng vi. Isrelae khimi angxynlyng na lä Abraham üng kaepreng lawng ngaila, hini kätyng mäthykung na lä sa hethang kae ö te vi. 6Melkhizede lä Levi ceng thung üng tho te y ngaila, äni lä Abraham te üng hawtä-a haetä tea cawng te vi. Melkhizede lä Säthaw üng älo aedo te na dang saite Abraham tea tähang kähawi py pa vi dy. 7Tähang kähawi py saite Kung lä tähang kähawi dang saite kung qawng-a aesangky vi näte angxynlyng na ma mäny o te vi. 8Levi kaesui kaebeng üng mäthykung na lä hawtä haetä cawng te dang ngaila, kangkhüng mang-a lä dü ö ai te khimi na kae. Tungaila hawtä-a haetä cawng saite Melkhizede lä Caekäcai thung-a thui te kätyng dü y saite mäthykung vi. 9Mä-ai üng thui haw te lä Abraham lä Melkhizede tea hawtä-a haetä py te kätü-a, Levi ceng kaesui kaebeng na la Melkhizede tea py te by vi. Ätephüng-a mei nädylä, Levi lä Abraham üng kaesui kaebeng te phüng-a vi. 10Melkhizede lä Abraham hai aeting te kätü-a, Levi lä aepeng te y vi rawng. Tungaila äni lä äkangsi pä-ai Abraham üng ätabung thung-a awng te vi rawng näkha hini kätyng thui haw te vi.
11Levi kaesui kaebeng üng mäthykung lawng saite tea mänyng kha Säthaw lä Isrelae khimi na tea Mosi üng Ubädi py te vi. Tungaila Levi ceng üng mäthykung na hai Isrelae khimi na lä cungrü-a sa haw y lyng. Tukäte phüng Säthaw lä Levi hai Aron ceng kaesui kaebeng thung üng y käla ma Melkhizede kätyng mäthykung kälang lawngtä bung mätaw hethang aely ngai te vi. 12Mäthykung sa saite amäjy na tea mäqa ja vi dylä, Ubädi la mäqa hethang kae te by vi. 13Hini na phüng thui saite mä-ai üng Areng lä amäjy kälang üng vi. Honi amäjy thung üng ämi lawngtä la mäthykung kälu sa vai y lyng. 14Mä-ai üng Areng lä Judae amäjy thung üng tho näte angxynlyng na ma mäny ö bawi te vi dy. Mosi üng Ubädi-a lä mäthykung na phüng thui te kätü-a, Judae amäjy na phüng äte haetä la thui vai te y vi.
Isu lä Melkhizede kätyng mäthykung lawng saite
15Kai ma thui saite na tea nang ce lä caiping-a mäny ö vi ai. Melkhizede kätyng mäthykung kälang lä tho vi. 16Säthaw üng mäthykung lawngtä lä khimi ce üng reitae-a awng te kätyng y lyng. Äte makäte phüng-a mei nädylä äni lä Levi amäjy thung üng y te phüng-a vi. Tungaila bynglei y hing saite üng haidae hai-a mäthykung-a lawng te vi. 17Caekäcai thung-a, “Nang lä Melkhizede kätyng dungtäsa mäthykung-a lawng vi” näkha awng vi. 18Ubädi kangrüng na lä aethaw awng y, ävang la ting y te phüng-a, Säthaw ma käde phae te vi dy. 19Mosi üng Ubädi lä khimi ce tea cungrü hai haw y lyng. Säthaw lä mä-ai tea vaihi aethang khai hethang hawiky saite tea py te vi dy. Honi aethang khai saite hai-a mä-ai lä Säthaw hai aenaidei haw te vi.
20Mä-ai lä hini aethang khai hethang hawiky saite awng te cang y, Säthaw üng älo aedo saite la awng te by vi. Aron üng hai tho saite khimi na lä mäthykung na-a lawng saite kätü-a Säthaw lä honi älo aedo te tea thui te y vi. 21Tungaila Isu lä mäthykung-a lawng kha Säthaw lä älo aedo te hai äni tea thui te kätü-a lä,
“Areng lä älo aedo vi dy kha äni üng bälung lä aemäqa y lyng:
‘Nang lä dungtäsa mäthykung-a lawng ai’” näkha thui vi.
22Säthaw ma hikä täking te phüng-a, Isu hai-a jangni üng qawng-a mä-ai lä hawiky saite älo aedo te dang kha bälung ae-y khü haw ö te vi dy.
23Vaihi Levi amäjy thung üng tho saite mäthykung na lä awng mang ö te vi. Ätephüng-a mei nädylä mäthykung qütä lä dü haw bawi vi te phüng-a, äni ce üng kälu tea lä sa jawjaw hethang dang haw ö y lyng. 24Tukätephüng-a Isu lä dungtäsa hing kha, äni lä dungtäsa mäthykung-a lawng te vi. 25Tukätephüng-a Isu hai-a Säthaw tea ly saite khimi na bung lä dungtäsa cungrü-a aeqang haw bawi ö te vi. Ätephüng-a mei nädylä äni lä khimi ce bung aeqang he Säthaw tea aetang haw jawjaw hethang dungtäsa hing te vi dy.
26Isu lä mä-ai üng aely ngai saite Mäthykung Kälengky vi. Äni lä caiping kha cy nae awng y. Sa tämang saite la awng y. Mä-ai hunghö sa saite khimi na hai äni lä aetawng te y vi. Säthaw lä äni bung Känipre üng aesangky saite mityng-a mäsang pa vi dy. 27Äni lä mäthykung kälengky kälang na kätyng y. Äni lä angcüky-a äma khekhe üng hunghö na tähang käni qütä löci aesa hethang aely ngai y dy. Mäthykung kälang na lä khimi kälang na üng hunghö na tähang löci aesa y te kälang-a, Säthaw tea äma khekhe löci aesa te vi. Isu lä Säthaw tea qengtäma dungtäsa tähang äma bung löci aesa te kätyng py te vi dy. 28Mosi üng Ubädi kätyng Säthaw lä cungrü y saite khimi na bung mäthykung kälengky-a khai te vi. Tungaila Mosi tea Ubädi py pyng te kätü-a, Säthaw lä älo aedo kha Äcäpaw bung re pa te vi dy. Honi Äcäpaw bung lä dungtäsa cungrü saite Mäthykung Kälengky-a khai te vi dy.
8Mä-ai üng mäthykung kälengky Isu
1Kai ce thui hethang ngai saite lä hini vi. Mä-ai tea lä Känipre Sanphrang Säthaw üng aety nae bangtang mang-a aety saite Mäthykung Kälengky awng vi. 2Äni lä Säthaw üng taipung thung üng caiky saite mityng-a mäthykung sa te vi. Honi taipung tätang khaw tea lä khimi ce ma sa te y. Areng ma sa khe te vi.
3Mäthykung kälengky qütä lä Säthaw tea lasawng hai tawngbawi na löci aesa hai he hethang khai te vi. Tukätephüng-a mä-ai üng Mäthykung kälengky lä Säthaw tea hae haetä hai löci aesa hethang kae. 4Hini älawngpre-a Khrista awng vi dylä, äni lä mäthykung-a lawng haw y lyng. Judae na üng Ubädi kätyng löci lasawng na aesa hethang mäthykung awng mang saite na lä awng rüng ö te vi dy. 5Hini älawngpre-a mäthykung na üng kälu sa saite lä Känipre-a mäthykung sa saite üng ämuilaw kätyng kae. Honi lä Mosi üng aeting saite täthei vi. Mosi lä Taipung Käcai sa hethang aerü te kätü-a, Säthaw ma äni tea, “Me anghung-a Kai ma nang tea mätü pyng saite mimi täthei kätyng khaw-a, angxynlyng na kähawi-a sa hethang kae” näkha nä vi dy. 6Tungaila vaihi Säthaw lä Isu bung mäthykung sa hai hethang re te vi dy. Isu üng kälu sa saite na lä hini älawngpre-a awng saite mäthykung na qawng-a aely lengky vi. Honi kätyng Säthaw hai äni üng khimi na säla-a Isu üng aenai saite lo lä aenai saite Kangrüng qawng-a hawiky vi. Ätephüng-a nädylä honi aenai saite lo Kangthae lä hawiky saite älo aedo saite na qawng-a aenyng te phüng-a vi.
7Angcüky üng aenai saite älo lä cungrü-a sa haw y te phüng-a, äbaeni üng aenai saite lo lä aely ngai te vi. 8Tungaila Säthaw lä äma üng khimi na tea cy kha äni ma,
“‘Judae khimi na hai, Isrelae khimi na hai kai lä aenai saite älo Kangthae sa hethang
kätü lä aenai vi dy.
9Aenai saite älo Kangthae lä Aikuta pre üng äni ce üng kangsi kangjaw na bung äkö na hai süng kha nähai saite kätü-a,
äni ce hai kai üng aenai saite älo hai lä aetawng te y lyng.
Äni ce lä honi aenai saite lo tea tängai ö khü y te phüng-a vi.
Tukätephüng-a kai lä äni ce bung khaisö te vi dy’ näkha Areng ma thui te vi.
10‘Tungaila kai lä khawngdüng-a Isrelae khimi na hai hini aenai saite älo Kangthae sa ai’ näkha Areng lä thui vi.
‘Kai lä äni ce üng kaedawng saite thung-a kai üng ubädi na tea mäkung vi ai.
Äni ce üng bälung thung-a honi na kai lä tärü ai.
Kai lä äni ce üng Säthaw-a lawng kha äni ce la kai üng khimi na-a lawng ö ai.
11Khimi lawngtä lä äma üng kangby jä-ai na hai äma üng äma üng särawng dawngpa na tea,
“Areng bung mäny ö lawi” näkha mätu hethang ngai y dy lyng.
Tukha äni ce angxynlyng lä aely cäpiky üng hai
kälengky saite khimi na khytä kai bung mäny ö bawi ai.
12Kai lä äni ce üng hunghö na tea bälawi ai.
Kai lä äni ce üng hunghö na tea bälawi ai. Kai lä äni ce üng sa tämang saite na tea aedawng jawjaw y dy lyng’ näkha näpa.”
13Säthaw lä honi älo aedo saite tea älo aedo saite kangthae näkha mäthi te vi dy. Honi kätyng-a äni lä angcüky üng aenai saite älo tea lä aenai saite älo Kangrüng näkha mäthi te vi. Kangrüng tea lä tawng hethang dang y te phüng-a, qae y tea ma la ja vi ai.
9Älawngpre-a hai Känipre-a Säthaw tea cäphaw saite
1Säthaw hai Isrelae khimi na säla-a angcüky üng aenai saite älo lä hini älawngpre-a Säthaw tea cäphaw hethang älang na hai cäphaw hethang mityng phüng thui te vi dy. 2Säthaw lä Isrelae khimi na ma äma tea cäphaw hethang taipung sa hai te vi. Honi taipung thung-a lä engthung khaw känetä awng. Angcüky üng ingthung khaw-a lä maibung kaesang haetä, khung haetä hai khung qawng-a lä täkaw käcai na awng vi. Honi ingthung khaw-a tea lä Mityng Käcai näkha mäthi vi dy. 3Äbaeni üng jaeky saite känih käsa üng leithung mang-a lä caiky saite Mityng näkha mäthi vi. 4Honi mityng-a lä rimui ädi maisawi hethang sui hai lawi saite maicang cäpi hai aenai hai saite älo üng sui hai lawi saite tengtae awng te vi. Honi tengtae thung-a lä mana täkaw khai saite sui kaephi kaesang hai Aron üng pawngpai awng vi. Honi pawngpai lä kädo sai vi dy. Aenai te üng ubädi na tärü saite kälung phei känetä la awng vi. 5Tengtae äqawng-a lä Säthaw awng näte mätü hethang Kherubin9:5 Kherubin na lä Känipre üng angtawtha na kätyng vi. mimi na la awng vi. Äni ce üng mäkhi na lä hunghö na bälawi saite mityng tea khu pa. Tungaila vaihi kai ce lä hini angxynlyng na thui mäcai hethang dang haw king ö te y.
6Hini kätyng angxynlyng na tea aerü rüng kha mäthykung na lä taipung angcüky üng ingthung khaw-a kung ea käni qütä äma ce üng kälu sa ö vi dy. 7Tungaila mäthykung kälengky xyng ni taipung üng äbaeni ingthung khaw-a lä säningtä-a qengtä xyng kung te kae vi. Äni lä äma üng hunghö tähang hai khimi ce üng mäny y käla sa tämang saite hunghö na tähang-a löci sa pa hethang löci aesa saite tawngbawi üng äthi tea süng kha kung hethang kae. 8Angcüky üng taipung awng te kätü-a, Mityng Käcaiky thung-a ly saite lolang pä-awng y vi rawng te phüng-a, hini angxynlyng na hai Muilaw Käcai lä aenysy-a mätu te vi. 9Hini lä vaini kätü tähang mätae saite vi. Mäthykung na ma Säthaw tea löci sa saite lasawng na hai tawngbawi na lä cäphaw saite khimi na üng käsi kähawi mäny saite bälung kaedawng tea cai hai king haw y näkha thui hethang ngai te vi. 10Säthaw tea löci sa saite na lä käca känei hai reitae kätyng mäse saite cawngkhang na hai aesui te kae vi. Hini angxynlyng na lä bälung thung hai aesui y saite reitae na kae vi. Hini na lä Säthaw ma angxynlyng na tea kangthae sa te kätü khytä xyng ni awng ö te kae vi.
Khrista üng äthi
11Tungaila Khrista lä vaihi awng rüng saite kähawi na üng Mäthykung Kälengky kätyng tyng rüng te vi dy. Äni lä jangni üng awng pyng saite Taipung qawng-a tengxyng y lengky saite hai cungrüky saite taipung thung-a kung kha mawsawng sa te vi. Honi taipung lä khimi üng äkö na hai sa te y. Hini lä Säthaw ma sa saite älawngpre hai la aesui te y vi. 12Äni lä sobei na, raebawi na üng äthi na hai-a kung te y lyng. Tungaila äni lä Mityng Käcaiky-a äma üng äthi khekhe hai nähai kha mä-ai tea dungtäsa aeqang hethang qengtäma kung te vi dy. 13Sobei thi, raebawi thi, hai raebawi cäpi tea maisawi kha dang saite baiphö na tea reitae kätyng pawprae saite khimi na tea käthüng ö te vi. Honi lä äni ce ärang mang üng tea cai hai te kae. 14Tungaila Khrista üng äthi lä hini qawng-a cang y sa haw te vi. Äni lä dungtäsa Muilaw hai-a äma ma löci sa te vi dy. Äni lä Säthaw tähang cungrü-a löci aesa saite vi dy. Tukätephüng-a äni üng äthi lä tengxyng y haidae awng kha mä-ai üng käsi kähawi mänykaw saite bälung kaedawng na tea ävang ting y saite reitae thung üng cai hai te vi. Vaihi mä-ai lä Säthaw kähing tea mawsawng sa haw ö te vi dy.
15Tukätephüng-a Khrista lä Säthaw hai khimi ce säla-a kangthae aenai saite vi. Tudylä Säthaw ma ka saite khimi angxynlyng na lä Säthaw üng aedo saite dungtäsa tähang kähawi tea dang haw ö te vi. Khrista lä angcü üng aenai saite täkui-a hunghö sa saite khimi na bung bälawi hethang dü pa te vi dy te phüng-a, honi kätyng lawng te vi dy.
16Khimi lawngtä lä äni üng ingthawng na ämi ma dang ai mei näkha cae hai tärü ea khai he nädylä, honi khimi lä dü vi dy näte tea mätü khe hethang aely ngai te vi. 17Äni üng awng saite ingthawng na tea ämi ma dang hethang mei näkha tärü saite kung hing te vi rawng nädylä äma üng tärü saite cae lä tawng haw te y rawng. Honi khimi dü pyng te kätü-a ni äni üng cae tea lä tawng haw hethang kae. 18Tukäte phüng angcüky älo aenai saite mäteng ma tawngbawi üng äthi qa y dylä, tawng hethang dang haw y lyng. 19Angcüky-a, Mosi lä khimi angxynlyng na tea Ubädi angxynlyng na thung üng särilo na thui pa vi. Honi pyng-a äni lä raebawi thi, sobei thi na tea tui hai aeqo ea Ubädi cae-u hai khimi angxynlyng na tea käthüng pa te vi. Äni lä Hiso näsaite thingkawng kung üng cangpre hai beram mui kangthing hai mäkhing kha honi äthi käthüng hethang tawng vi dy. 20Mosi ma, “Hini äthi lä Säthaw ma nang ce tea tängai hai hethang täru saite aenai te äsäny vi” näkha näpa. 21Hini kätyng-a Mosi la Taipung Käcai hai cäphaw ea tawng saite angxynlyng na qawng-a, äthi hai käthüng pa by vi dy. 22Tätang khaw, Mosi üng Ubädi kätyng äte angxynlyng na lä äthi hai-a cai hethang dang ö vi. Äthi bälawng y dylä Säthaw lä hunghö tea bälawi y lyng.
Khrista dü te phüng-a hunghö na bälawi saite
23Hini na lä Känipre-a awng saite na üng täthei lawng te phüng-a, äthi hai cai hai hethang kae. Tungaila Känipre-a awng saite na tea cai hai hethang lä löci kähawiky sa hethang aely ngai vi. 24Khrista lä khimi ce üng äkö hai sa saite Mityng Käcai-a kung te y lyng. Älawngpre-a awng saite Mityng Käcai lä Känipre-a awng saite Mityng Käcai täthei vi dy. Äni lä mä-ai üng jüng-a Säthaw üng maw-a tyng hethang Känipre-a kung te vi dy. 25Judae na üng mäthykung kälengky lä säning qütä Mityng Käcaiky-a tawngbawi üng äthi hai kung te vi. Tungaila Khrista lä äma ma löci aesa leilae hethang ly te y. 26Tudylä älawngpre sa angcü te kätü üng hai Isu lä mätang bälaica jawjaw hethang kae. Tungaila vaihi lä hini älawngpre angxynlyng na byng hethang aenai te kätü-a, äni lä qengtä hai ma tho kha äma ma bung löci aesa ea khimi ce angxynlyng üng hunghö na tea mäcai ping pa vi dy. 27Khimi qütä lä qengtä dü hethang kae kha honi pyng-a Säthaw ma äni ce tea tärae cei vi ai. 28Honi kätyng täthei Khrista lä khimi awng mang te na üng hunghö na tea mäcai hethang äma tea äma löci mawi kätyng-a qengtä aesa pa vi dy. Äni lä äbaeni tyng haile tyng vi ai. Honi kätü-a äni lä khimi ce üng hunghö na hai aesui kha äte la sa pa y dy lyng. Tungaila äni tea aering saite na bung lä äni ma aeqang pa vi ai mang.
10Angxynlyng na tähang qengtä Khrista üng dü pa saite
1Judae na üng Ubädi lä tätang saite na üng mitang khaw te hai cungrü saite aetu nae y vi. Honi lä tyng hethang äkähawi na üng äkaekhui kae vi. Ubädi kätyng lä säningtä pyng-a säningtä löci na sa pyng saite täthei-a sa hethang kae. Tudylä Ubädi hai Säthaw tea ly saite khimi na lä löci na sa te hai-a makä sa kha la hini löci na hai-a cungrü haw y lyng. 2Säthaw tea cäphaw saite khimi na lä äma ce üng hunghö na üng tätang khaw-a cai haw vi dylä, äni ce lä hunghö awng näte dawng ö y dy lyng. Löci angxynlyng na tea sa haw ö y vi ai dy. 3Honi säningtä pyng-a säningtä löci aesa saite lä khimi ce tea äma ce üng hunghö na aedawng haile tyng hai ö te vi. 4Tukha raebawi thi hai sobei thi na lä khimi ce üng hunghö na tea cai hai haw te y lyng.
5Tukätephüng-a Khrista lä hini älawngpre-a ly te kätü-a, Äni ma Säthaw tea,
“Nang lä khimi ce üng lasawng hai tawngbawi löci sa saite na tea ngai y vi.
Tungaila nang lä Kai tähang ätabung sa rüng te vi dy.
6Nang lä maicang qawng-a maisawi saite tawngbawi na, y dylä,
hunghö mäcai hethang löci sa saite na tea ngai te y vi.
7Tukätephüng-a Kai ma, ‘Säthaw ä, Kai lä hi-a vi.
Caekäcai thung-a lä Kai üng phüng tärü te kätyng nang üng aely kängai sa hethang,
Kai lä tyng vi dy’ nä vi” näkha thui vi dy.
8Angcü-a Khrista ma, “Nang lä löci sa saite, lasawng na py saite, y dylä tawngbawi na tea maicang qawng-a maisawi saite, hai hunghö na tea mäcai ping hethang löci sa saite na tea ngai y” näkha thui vi. (Ubädi-a awng te kätyng honi löci na sa hai hethang awng ngaila, Äni lä honi tea thui te vi.) 9Tupyng-a Khrista ma, “Säthaw ä, Kai lä hi-a vi. Nang üng aely kängai sa hethang Kai lä tyng te vi dy” näkha thui vi. Tudylä Säthaw lä löci sa saite Kangrüng angxynlyng na tea käde phae kha honi na üng mityng-a Khrista üng löci sa saite tea khai pa te vi. 10Säthaw üng aely kängai kätyng Isu Khrista lä äma üng ätabung tea qengtä löci aesa saite hai-a mä-ai üng hunghö na mäcai te vi dy.
11Judae na üng mäthykung qütä na lä käni qütä äma ce üng kälu na sa kha honi kätyng täthei löci na sa pyng-a sa be saite kätü na lä awng mang ö te vi. Tungaila hini löci sa saite na lä manila hunghö na tea mäcai haw ö te y. 12Tungaila Khrista lä dungtäsa tähang löci mawi kätyng-a hunghö na tähang qengtä hai ma äma ma löci aesa te vi dy. Vaihi äni lä Säthaw üng äkö bangtang mang-a aety kha awng te vi. 13Säthaw lä äma üng täre na tea äkho täkui-a khai te khytä äma lä honi tea aering kha awng te vi. 14Tukätephüng-a Khrista üng qengtä löci sa saite hai-a cai hai saite khimi na tea lä dungtäsa kätü tähang cungrü hai te vi dy.
15Muilaw Käcai la honi phüng mä-ai tea thui te vi. 16Angcüky-a äni ma,
“ ‘Hini lä vaimaw mang tyng hethang awng saite käni-a,
kai la äni ce hai aenai saite sa vi ai,’ näte Areng lä thui vi.
‘Kai lä äni ce üng bälung thung-a Kai üng Ubädi na khai ai.
Äni ce üng bälung kaedawng saite qawng-a Kai üng Ubädi na tärü ai’” näkha nä vi.
17Tupyng-a äni ma, “Kai lä äni ce üng hunghö na hai sa tämang saite kälu na tea aedawng haile jawjaw ö y vi ai” näkha näpa. 18Vaihi Säthaw ma hunghö na tea bälawi pyng te kätü-a lä, löci na sa hethang lä äte la aely ngai y dy.
Säthaw hai kaenai-a ly ö si
19Tukätephüng-a kangby jä-ai na ä, Isu lä mä-ai tähang dü pa te phüng-a, Mityng Käcaiky-a kung hethang mä-ai lä ae-y khü saite bälung awng ö te phüng-a vi. 20Khrista lä mä-ai tähang kähing py saite älang kangthae pä-awng vi dy. Vaihi mä-ai lä känih ngang käsa10:20 Hini känih käsa jae saite lä Säthaw üng taipung hai Ingkäcai thung üng caipingky saite mityng-a khimi ce kung haw y hethang jae kha khai pa te vi. jae saite hai-a Säthaw tea kung haw ö dy. Honi känih käsa lä Khrista üng ätabung tea thui te vi. 21Mä-ai lä Säthaw üng Ingkäcai-a rui hethang Mäthykung käleng lawngtä awng vi. 22Tukätephüng-a mä-ai lä Säthaw üng äteng-a mitang khaw saite bälung, yng khü te hai ly ö si. Khrista üng äthi lä mä-ai üng käsi kähawi mäny saite bälung kaedawng na tea mäcai pa te phüng-a, mä-ai üng sa saite hunghö na tea lä aedawng ö vi hang lawi. Mä-ai üng ätabung na tea lä tui käcai hai mäse pang vi dy. 23Khimi ce maw-a mä-ai thui saite aethang khai te tea lä cakhi-a süng ö si. Ätephüng-a mei nädylä Säthaw ma älo aedo saite tea sa khü hethang mä-ai lä ae-y haw ö te phüng-a vi. 24Mä-ai lä lawng lawngtä tähang aedawng ö si. Bälung aevaw te hai kälu kähawi sa hethang mä-ai lä aesäbawng linglawng ö si dy. 25Khimi phütä na lä kangkawng üng khimi na aecöqu saite thung-a ly ö y vi dy. Tungaila mä-ai lä mangtä aecöqu jawjaw ö si. Areng tyng haile hethang käni lä aenai vi dy te phüng-a, mä-ai angxynlyng na lä aethaw aepy te qawng-a cang y aethaw aepy linglawng rae ö si.
26Mä-ai lä lo mitang khaw tea mäny pyng-a, mä-ai üng kängai-a sa tämang haile jawjaw dylä, hunghö na mäcai hethang tawngbawi hai löci aesa hethang lä awng ö y vi dy. 27Tungaila mä-ai lä honi kätyng sa vi dylä mä-ai üng hunghö na lä Säthaw üng deng py saite tea ri te hai ni aering hethang awng ö te kae vi dy. Säthaw üng täre na lä täphra saite tengxyng y mai käbi tea aering hethang ni awng te kae dy. 28Khimi lawngtä lä Mosi üng Ubädi tea tängai y kha hunghö sa dylä, khimi lawng ne lawng thungtä na ma äni üng hunghö sa saite tea nung kha thui dylä, mätawngky na lä bäheng y te hai ma äni tea bädü haw ö te vi. 29Säthaw üng Cäpaw tea mäthi y saite khimi na lä ätemakä aelawng ai mei näte nang ce lä aedawng ö mei. Hunghö üng cai hai pa saite Säthaw üng aenai te üng äthi tea ävang käting y kätyng mäthi saite khimi hai tähang kähawi üng Muilaw Käcai tea cy saite khimi tea lä Säthaw ma honi qawng-a siky saite deng py ai. 30Areng ma thui te lä, “Hunghö sa saite khimi tea lä kai ma rawithung tha ai. Kai ma rawithung tha pa vi ai” näkha nä vi. Äni ma honi kätyng, “Areng lä äma üng khimi na tea tärae cei ai” näkha näte vi. Hikä thui saite Areng bung mä-ai lä mäny ö te vi. 31Kähing Säthaw üng haidae täkui-a tyng saite na lä ri hethang hawi bärai vi.
32Angcüky käni Säthaw üng kaevang nang ce thung-a aevang saite tea lä aedawng ö ba. Nang ce lä kätü awng mang-a mätang bälaica te na aeting ngaila, nang ce yng saite tea lä käde phae ö y vi. 33Qeng qengtä nang ce tea khimi ce lä mipui na maw-a käsi thui kha sakälö khü ö vi dy. Qeng qengtä khimi kälang na lä nang ce kätyng mätang bälai aeting te thung-a, nang ce la äni üng kangby jä-ai sa hethang awng rüng ö te vi dy. 34Nang ce lä thawng thung-a pä-ung saite na tea bäheng ö te vi. Nang ce tea awng saite vyngsai angxynlyng na tea khimi ce ma la king ngaila anghawtho te hai khung ö te vi. Äte makäte phüng-a mei nädylä dungtäsa aekang kha hawiky saite vyngsai na nang ma ce tea awng näte nang ce lä mäny ö vi dy. 35Tukätephüng-a nang ce lä aethawsi ö hang. Tupyng dylä Säthaw ma nang ce tea ävang käleng py ai mang. 36Nang ce lä änawngsa jawjaw ö hethang aely ngai. Tukä dylä Säthaw üng aely kängai tea sa khüng te kätü-a, äma üng älo aedo saite na tea nang ce lä dang ö ai. 37Caekäcai thung-a,
“Qae y tea ma Areng lä ly ai.
Qae y dy lyng.
38Kai üng khimi käcüng na lä yng saite hai hing ö ai.
Tungaila yng saite üng hai leithung mang-a aekö haile tyng saite khimi na tea lä,
kai lä ngai y lyng” näkha näpa.
39Mä-ai lä aekö haile tyng kha Säthaw ma täphra saite khimi na y. Mä-ai lä yng kha Säthaw üng aeqang saite khimi na vi dy.
11Yng saite
1Mä-ai tea yng saite awng dylä, aethang khai saite tea mä-ai lä ae-y khü ea ämi hai nung haw y saite tea tätang näkha mäny ö saite vi. 2Jangni üng khimi na lä yng te phüng-a, Säthaw lä äni ce tea bälung aevaw ö te vi.
3Säthaw lä äma üng älo hai-a hini älawng hai käni tea sa vi dy näte tea mä-ai lä yng saite hai mäny haw ö vi. Äni lä nung haw y saite na hai nung haw saite na sa te tea la yng saite hai-a mäny haw te vi.
4Abela lä Säthaw tea yng te saite hai-a, Ka-i-na qawng-a hawiky saite löci sa vi dy. Abela üng yng te phüng-a, Säthaw lä äni tea khimi käcüng kätyng mäthi vi dy. Säthaw lä Abela üng löci tea hawi näkha thui vi dy. Äni lä dü ngaila Säthaw tea yng te phüng-a, mä-ai tea älo aepe jawjaw ö te vi rawng.
5Eno lä Säthaw tea yng te phüng-a dü y vi. Äni bung Säthaw lä kanghing tang-a ma khösang mang-a nähaija te phüng-a, äni hai ämi la aeting haile tyng haw y vi dy. Säthaw lä äni bung nähaija y te kätü-a, Eno lä Säthaw ma kawng hai saite vi dy näte Caekäcai thung-a thui te kätyng vi dy. 6Khimi lawngtä lä yng saite awng y dylä, Säthaw tea kawng hai haw y lyng. Ätephüng-a mei nädylä Säthaw tea ly saite khimi lä Säthaw awng vi näte yng kha äni bung ha saite khimi na tea lä ävang py ai näte tea yng hethang kae.
7Novae lä nung haw y saite ämaw mang-a tyng hethang na phüng Säthaw üng sädi py saite na tea yng te hai-a thai vi. Äni lä Säthaw tea yng te phüng-a, äni lä älo tängai ea tui sangphaw sa vi. Tukätephüng-a tui cäqing tho saite thung üng äma üng engthung khaw na tea aeqang haw te vi. Novae lä äma üng yng saite hai-a älawngpre üng khimi na tea lä sa tämang te mätü pa vi dy. Novae lä Säthaw tea yng te phüng-a, Säthaw lä äni tea khimi käcüng-a mäthi vi dy.
8Säthaw ma Abraham bung ka te kätü-a, äni lä yng saite hai-a älo tängai te vi. Äni lä Säthaw ma ämaw mang-a py hethang aedo saite pre-a ly vi dy. Äni lä äma üng awng saite pre tea khaisö kha äni nung vai y saite pre-a ly te vi. 9Abraham lä yng saite hai-a Säthaw üng aedo saite honi pre-a angvüng lawngtä kätyng awng vi dy. Abraham hai äma üng cäpaw Isaika hai äkätö Jako ce lä känih hai sa saite taipung-a awng ö vi dy. Säthaw lä Abraham üng cäpaw Isaika hai äkangtö Jaeko tea honi aedo saite älo täthei py pa vi dy. 10Ätephüng-a mei nädylä Abraham lä Säthaw ma aerü kha sa te dungtäsa aenyng nae cakhi saite märü-a awng hethang aering te vi.
11Abraham hai änawngpui Sara ni lä mätawng phi hawi vi dy. Sara lä nawngmädi kätung kämai kae vi. Tungaila Säthaw lä äma üng älo aedo te kätyng sa ai näkha Abraham lä yng khü te phüng-a, äcäpaw lawngtä bung dang vi dy. 12Tukätephüng-a äcaw na dang haw y saite Abraham lawngtä üng hai aepreng saite khimi na lä khösang-a awng saite tengpaw na kätyng awng mang vi dy. Honi khimi ce bung lä tävaw bälang-a awng saite täpung kälawngdi kätyng ämi la to lei y vi.
13Hini khimi angxynlyng na lä dü saite kätü khytä Säthaw tea yng ö jawjaw vi dy. Äni ce lä Säthaw üng aedo saite na dang y ngaila, kähanglaw mang xyng Säthaw üng aedo saite na tea nung kha anghawtho ö vi dy. Äni ce lä hini älawngpre-a angvüng na kätyng ing, la käla ly rungrang saite na kae vi näkha thui ö vi dy. 14Honi kätyng thui saite khimi na lä äma ce ma pyng jawjaw hethang pre haetä tea ha saite na vi dy näte tea mätü te vi. 15Äni ce lä äma ce khaisö saite pre tea bäsai hethang hawi näkha dawng dylä, aekö tyng haw mang. 16Tungaila äni ce lä hini qawng-a hawi saite pre tea aethang khai ö te vi. Honi pre lä Känipre-a qaitä awng te kae vi. Tukätephüng-a äni ce lä Säthaw tea äma ce üng Säthaw näkha ka ö te phüng-a Säthaw lä aejae te y. Säthaw lä äni ce tähang märü sa kha khai rüng te vi dy.
17Säthaw lä Abraham tea käny te kätü-a, äni lä yng te phüng-a äma üng cäpaw Isaika bung löci mawi kätyng löci aesa hai te vi. Äni lä Isaika bung Säthaw üng aedo saite kätyng dang ngaila, äma üng lawngtä xyng awng saite äcäpaw bung löci aesa saite mawi kätyng sa hethang aerü rüng pa te vi dy. 18Säthaw ma Abraham tea, “Isaika te mang hai-a kai aedo saite kaesui kaebeng na nang tea dang hai ai” näkha näpa. 19Säthaw lä dü saite üng Isaika bung mätha haile haw vi ai näkha Abraham lä aedawng vi dy. Tukätephüng-a Abraham lä äcäpaw Isaika bung dü saite üng dang haile tyng vi dy näkha thui haw vi dy.
20Isaika lä yng te phüng-a, vaimaw mang-a Säthaw lä Jaeko hai Esawka ni tea tähang kähawi py ai näkha älo aedo te vi.
21Jaeko lä äma dü y te kälang-a, yng saite hai-a Josefae üng äcäpaw lawng netä tea tähang kähawi py pa qi vi dy. Äni lä äma üng pawngpai hai aethaw aela kha aedaw ea Säthaw tea cäphaw pa vi dy.
22Josefae lä dü aetawng te kätü-a, yng khü te hai Aikuta pre üng hai Isrelae khimi na üng tho saite angthang thui vi dy. Josefae lä äni ce tho te kätü-a äma üng ähu na hai makä sa kha nähai ö ai mei näsaite na täru rüng pa vi dy.
23Mosi bung aepeng pyng-a änä-awi ni äpä-ai lä yng hawi te phüng-a, sanphrang üng särilo tea tängai y hethang ri hawi y te vi. Tukha Mosi bung lä law thungtä tütü kangru-a ho hawi vi dy. Äni lä nade kälang na qawng ämaw äcae hawi pa te tea änini lä nung hawi te vi.
24Mosi lä ryng te kätü-a, yng te phüng-a, khimi ce ma äni tea Faraw sanphrang cänung üng cäpaw näkha ka ö saite tea äni lä ngai te y vi. 25Äni lä tänaetä hunghö hai-a anghawtho te qawng-a, Säthaw üng khimi na hai mangtä mätang bälai hethang awng saite tea re vi dy. 26Mesia üng tähang mäthi y saite lä, Aikuta pre üng tawnang saite angxynlyng na qawng-a ävang tingky vi näkha äni lä aedawng vi dy. Äni lä ämaw mang-a äma üng dang hethang ävang käting tea nung rüng te phüng-a vi dy.
27Mosi lä yng te phüng-a sanphrang üng kädawtho saite tea ri y käla, Aikuta pre üng hai thoja vi dy. Äni lä nung haw y saite Säthaw tea nung te kätyng khung kha awng jawjaw te vi. 28Mosi lä yng te phüng-a, Säthaw üng täru te kätyng Cäqengja saite pawi lä Isrelae khimi na tea aetawng hai pa vi dy. Isrelae khimi na tea lä äma ce üng thokhae löpang hai äjaw angxynlyng na tea äthi kälo hai pa ö vi dy. Tukätephüng-a Säthaw lä täphra saite Känipre angtawtha bung mätaw pa dy. Honi angtawtha lä Isrelae khimi na üng cäpaw äcälö na tea bädü pa y hethang tähang vi.
29Isrelae khimi na lä yng te phüng-a, phuirae saite lolang-a aeke te kätyng pangle kangthing tea aekae ö vi dy. Tungaila Aikuta khimi na ma aekae te kätü-a, äni ce angxynlyng lä tui thung-a aesänung kha dü ö vi dy.
30Isrelae khimi na lä yng te phüng-a, Jerikhaw märü-a käni säritä aevi pyng ea lä märü tea aepang saite baesung na lä aene pa vi dy. 31Nawngmädi kangdei Raha lä yng te phüng-a, Säthaw üng lo tängai y saite khimi na hai mangtä dü y. Ätephüng-a mei nädylä Isrelae khimi na üng sämeng na tea kähawi-a lady pa te phüng-a vi.
32Kai lä hini qawng-a cang y älo aepe haw y vi dy. Kidon, Bare, Samsom, Jephata, Davidae, Samawila hai buisaw na üng angthang kai ma thui pa hethang kätü lä awng te y vi. 33Äni ce lä yng te hai-a pre na tea täre aety kha bäja haw ö vi dy. Äni ce lä tüng saite na sa kha Säthaw üng aedo saite na dang ö vi dy. Äni ce lä xangsi täkai täbawng tea pä-üng pa te vi dy. 34Äni ce lä maipui maileng ma kang saite tea la bädü pa vi dy. Äni ce tea lä aekei hai bädü hethang ngai saite khimi na kö thung üng lawi hai vi dy. Äni ce lä aethaw awng y saite khimi na ngaila, Säthaw lä aethaw awng saite khimi na-a bälawng pa ö vi dy. Äni ce lä täre aety kha pre kälang üng aethaw awng saite reisae na tea bäja ö vi dy. 35Nawngmädi na lä yng saite phüng-a, kädü thung üng hing haile tyng saite äma ce üng engthung dü saite na tea dang haile tyng ö vi dy.
Khimi phütä na lä sakälö khü kha bädü he ngai saite na äkö thung üng lawi hai hethang ngai ö y. Äni ce lä hini kähing qawng-a hawiky saite kähing tea dang hethang dü ö vi dy. 36Khimi phütä na tea lä khimi ce ma mänui hai kha ruinawng na hai bo pa ö te vi. Khimi phütä na tea singqy rui na hai mäkhing kha thawng thung-a pä-ung ö vi dy. 37Khimi ce ma phütä tea lä kälung aeke hai käde kae saite, phütä tea lä säja hai aepo bälo saite hai, phütä na tea lä aekei sawngseng hai bädü pa ö vi dy. Äni ce lä beram phö, sobei phö na aelawng kha ly rungrang ö vi dy. Mätang saite, mätang bälaica saite, sakälö khü saite na la aeting ö pa vi dy. 38Äni ce lä khimi kähawi na te phüng-a, hini älawngpre üng khimi na hai aesui ö te y. Äni ce lä ing, la käla na kätyng daithung dairang-a, me anghung na qawng-a ly rungrang ea, täpu khaw na hai älawng khaw na thung-a awng ö vi dy.
39Äni ce lä yng ö te phüng-a, Säthaw tea kawng hai kha Säthaw lä äni ce üng phüng Caekäcai thung-a tärü hai pa vi dy. Tungaila äni ce lä Säthaw üng älo aedo saite angxynlyng na älawngpre-a dang ö te y. 40Ätephüng-a mei nädylä Säthaw lä mä-ai tähang hawiky saite mawlang kaedawng awng te phüng-a vi dy. Äni üng ae-y saite hini khimi na tea lä mä-ai hai mangtä Säthaw ma khimi cungrü-a bälawng haw ö vi ai.
12Mä-ai üng pä-ai Säthaw
1Mä-ai üng yng saite tea nung khe saite khimipui na lä mä-ai tea sävenglü kha awng ö vi. Mä-ai lä aehui kha aepreng saite khimi na kätyng vi. Tukätephüng-a mä-ai tea aebiceng saite hunghö na tea lä khaisö ö si. Mä-ai ämaw üng lolang-a aethawsa kha aehui ö si dy. 2Mä-ai lä Isu tea kheng khü jawjaw ö si. Äni lä mä-ai üng yng saite tea aetawng angcü hai kha cungrü-a sa pa saite Kung la vi. Äni lä thinglang qawng-a täheng saite üng saerae dang te tea khung vi dy. Ätephüng-a mei nädylä hokä äni sa te lä ämaw mang-a anghawtho ai näte tea Äni lä mäny te phüng-a vi dy. Vaihi äni lä Säthaw üng aety nae bangtang mang-a aety te vi.
3Hunghö awng saite khimi na ma äni tea mäkä tangtä elekhei sa mei näte aedawng ö lawi. Hokäte phüng-a nang ce lä bälung bäsae xha kha aethawsi ö y ai mang. 4Vaihi khytä hunghö sa saite khimi na lä nang ce tea elekhei sa kha täre aety te kätü-a, nang ce lä dü saite hai aeting ö y vi ai. 5Säthaw lä äma üng nade na kätyng nang ce tea aethaw py saite lo na nang ce lä tämang ö king te vi mei. Äni ma,
“Kai üng nade ä, Areng ma nang üng sa tämang saite na mätü te kätü-a, tängai khü ba.
Nang tea pring te kätü-a lä aethawsi hang ba.
6Ätephüng-a mei nädylä Areng lä äma bälung aevaw saite khimi qütä tea lä pring te vi.
Caw nade na kätyng re saite khimi qütä tea lä deng py te vi” näkha näte vi.
7Nang ce mätang bälai aeting saite na lä Äpä-ai üng pring saite tea khung ö ba. Säthaw lä nang ce bung äma üng caw nade na kätyng re saite tea nang ce üng mätang bälai saite hai-a mätü te vi. Äpä-ai lä äcaw qütä tea pring y käla awng vai mei. 8Säthaw lä caw nade angxynlyng na tea pring te vi. Äni ma nang ce tea pring y nädylä, nang ce lä äni hai aesui saite caw nade na y. Nang ce lä bäjangcaw na kae vi. 9Mä-ai angxynlyng na lä hini älawngpre-a äpä-ai na awng ö te vi. Honi äpä-ai na ma mä-ai tea lä pring kha mä-ai lä mä-ai ma üng pä-ai na tea tämö khai ö te vi. Honi qawng-a cang y Känipre-a awng saite Pä-ai üng pring saite lo tea lä tängai hethang hawiky ö te vi. Honi kätyng sa dylä, mä-ai la dungtäsa hing ö ai. 10Hini älawngpre-a mä-ai üng pä-ai na lä tänaetä äma ce üng kähawiky-a aedawng te kätyng mä-ai tea pring ö te vi. Tungaila Säthaw lä mä-ai üng kähawiky saite tähang pring te kae. Mä-ai lä äni üng cai saite thung-a qa haw ö hethang vi. 11Mä-ai tea pring te kätü-a, mä-ai lä bälungsi hai ö te vi. Anghaw la tho haw ö y lyng. Tungaila ämaw mang üng pring te tea khung saite khimi na tea lä cüng saite hai awngneng saite dang ö te vi dy.
Sädi py saite na
12Tukätephüng-a nang ce üng äkö hai äkho aethaw awng y saite na tähang aethaw aela ö. 13Lolang kätaw-a ly jawjaw ö. Hokä ea ni äkho kangbai na lä aetüng y käla ma hawi ö ai mang.
14Khimi angxynlyng na hai mangtä awngneng saite hai-a awng hethang aethawsa ö ba. Caiping saite thung-a hing ö. Caiping y saite khimi ämi la Areng bung nung haw y lyng. 15Säthaw üng tähang kähawi thung üng thoja y hethang sädi khai ö. Angjüng khaw saite äkung kätyng la aelawng y hethang sädi khai ö. Khimi lawngtä honi kung kätyng awng dylä nang ce thung-a käsi na awng mang-a sa haw te vi. Honi hai-a yng saite khimi awng mang te na tea Säthaw üng maw-a pawprae hai haw ö te vi. 16Nang ce thung-a ämi la täkübäjang sa y hethang sädi khai ö. Esawka lä äcälöky üng tähang kähawi tea ang kaephi hai aeleng ja te vi. Hini kätyng Säthaw tea mäthi y sa hang. 17Nang ce mäny te kätyng, kangkhüng mang-a, Esawka lä äpä-ai üng py saite tähang kähawi tea ngai vi dy. Tungaila äni üng pä-ai lä äni tea eja pa vi dy. Äni lä minaw tui aeqa te hai-a ae-ui ngaila, äma üng sa saite tea mäqa haile tyng haw pa y vi dy.
18Isrelae khimi na kätyng Sinai me anghung-a nang ce lä ly ö te y. Honi me anghung lä maikang kha ving pung saite, käving mityng hai aeli khöpui tho saite mityng vi. 19Honi anghung-a lä baw üng saite ätüng käleng tho saite mityng vi. Isrelae khimi na lä honi ätüng thai te kätü-a, honi ätüng na tea äni ce ma äte haetä la thai hai pa y hethang Mosi tea aesi aebai ö vi dy. 20Ätephüng-a mei nädylä äni ce lä, “Tawngbawi metä mäteng ma hini me anghung tea aela dylä, kälung hai käde kae hethang kae” näkha thui saite särilo tea khung haw y te phüng-a vi. 21Mosi äma khekhe lä me anghung-a nung saite na tea tengxyng y ri vi dy. Äni lä “Kai lä ri kha käsawtho vi” näkha thui vi.
22Tungaila nang ce lä Zaion me anghung-a hing saite Säthaw üng märü, Känipre-a awng saite Jerusalem märü-a ly ö vi dy. Nang ce lä anghawtho te hai aecö saite Känipre üng angtawtha sangrui-a cang y te na üng mityng-a tyng ö vi dy. 23Nang ce lä Säthaw üng cäpaw äcälöky awng saite kangkawng-a tyng ö te vi dy. Honi kangkawng thung üng ämüng na lä Känipre üng cae-u thung-a tärü kha khai pa vi dy. Nang ce lä khimi angxynlyng na tea tärae cei saite Säthaw tea tyng ö vi dy. Honi lä cungrü-a sa saite khimi käcüng na üng awng saite mityng vi dy. 24Säthaw hai khimi ce üng säla-a aenai saite kangthae tea aerü rüng saite lä Isu tea tyng te vi dy. Nang ce lä Isu üng käthüng saite äthi tea tyng ö vi dy. Honi äthi lä Abela üng äthi qawng-a hawiky saite älo tea thui vi.
25Tukätephüng-a thui saite khimi lawngtä üng älo tea tängai y hethang sädi khai ö. Hini älawngpre-a Säthaw üng älo thui saite lawngtä üng lo tea tängai y saite khimi na tea lä Säthaw ma deng py vi. Mä-ai lä Känipre üng hai thui saite Areng üng älo tea khaisö vi dylä, Säthaw ma deng py saite thung üng ämi lä aelawi haw y lyng. 26Mosi üng kätü-a, Säthaw üng ätüng lä hini älawngpre tea aehüng hai pa vi dy. Tungaila vaihi äni lä, “Kai lä vaimaw mang-a qengtä hini älawngpre qaitä cang y Känipre tea la tähüng hai vi ai” näkha älo aedo pyng te vi dy. 27Vaihi, “Qengtä pyng-a” näte älo lä Säthaw ma sa kha khai saite angxynlyng na tea tähüng ea aethuija hai vi ai. Honi kätü-a aehüng haw y saite na ni cakhi-a awng ö ai.
28Ämi ma la tähüng haw y saite pre-a mä-ai lä dang te phüng-a, Säthaw tea kawng te lo thui ö si. Mä-ai lä Säthaw üng bälung kawng hai saite älang hai-a äni tea cäphaw ö si. Äni tea ri kha tämö khai ö si. 29Ätephüng-a mei nädylä, mä-ai üng Säthaw lä tätang kang hai saite mai kätyng vi.
13Säthaw üng kawng hai hethang sa saite
1Khristen kangby jä-ai na kätyng-a lawng lawngtä tea bälung aevaw jawjaw ö ba. 2Angvüng na bung nang ce üng ing-a lady hethang tämang ö hang. Honi kätyng sa saite khimi phütä na lä mäny y käla ma Känipre üng angtawtha na tea lady ö vai te vi dy. 3Nang ce lä thawng thung-a pä-ung saite khimi na hai mangtä awng te kätyng äni ce tea säbawng ö. Nang ma ce khekhe mätang bälai aeting te kätyng, mätang bälaica saite khimi na tea säbawng ö ba.
4Khimi angxynlyng na lä ingthawng sa te tea tämö khai ö hethang kae. Nawngpui ni nawngpaw lä lawng lawngtä tea bälung ae-y khü hethang kae. Säthaw lä khimi kälang na üng nawngpui nawngpaw na hai sa tämang kha täkübäjang sa saite na tea lä deng py vi ai.
5Nang ce lä tangkae na dang mang hethang bädö ö hang. Nang mä ce tea awng saite rytä hai bälung kawng te hai-a awng ö. Ätephüng-a mei nädylä Säthaw lä, “Kai lä nang bung makäte kätü-a la khaisö y lyng. Manila nang bung käde phae y lyng” näkha nä vi. 6Tukätephüng-a,
“Areng lä kai tea säbawng te phüng,
kai lä ri y lyng.
Khimi ce ma kai tea ätemakä sa haw ai mei” näkha,
mä-ai lä ae-y khü te bälung hai thui haw te vi.
7Nang ce tea angcüky-a Säthaw üng Angthang Kähawi thui saite nang ce üng mätawngky na tea kähawi-a aedawng haile ö ba. Äni ce üng hing saite älang kähawi hai dü te khytä yng khü saite tea aedawng ö ba. Äni ce üng yng saite täthei nang ce lä sa ö. 8Isu Khrista lä jangni üng hai, vaini la, dungtäsa la lang te awng y vi. 9Angthang Kähawi y käla äte cawngkhang kätüng y kangthae mätu saite na tea hui y hethang nang ce lä sädi khai ö. Säthaw üng tähang kähawi hai-a mä-ai üng bälung thung-a aethaw awng hai hethang lä hawi ö te vi. Judae khimi na üng reitae kätyng ca hethang lä ävang ting te y vi.
10Löci aesa saite maicang lä mä-ai tea awng te vi. Säthaw üng Taipung-a kälu sa saite mäthykung na lä mä-ai üng löci sa te thung-a äni ce lä löci mawi ca haw y lyng. 11Mäthykung kälengky lä tawngbawi na üng äthi tea Mityng Käcaiky thung-a hunghö na tähang löci aesa hethang nähai pa te vi. Tungaila tawngbawi äro na tea lä khimi ce awng saite mityng ärang mang-a mai hai sawi te vi dy. 12Hini phüng-a Isu lä äma üng äthi khekhe hai-a khimi ce üng hunghö tea mäcai hai hethang märü üng hawngkhae kätho ärang mang-a dü te by vi dy. 13Tukätephüng-a mä-ai lä märü ärang mang-a ly kha äma hai mangtä saerae saite thung-a qa ö si. 14Hini älawngpre-a mä-ai tähang dungtäsa awng hai hethang märü lä awng y lyng. Mä-ai lä vaimaw mang-a tyng hethang märü tea ha ö te vi. 15Tukätephüng-a mä-ai lä Isu hai-a Säthaw tea bälaw te hai löci sa jawjaw ö si. Honi löci lä, “Säthaw lä Areng vi” näkha mä-ai üng täbawng na hai thui saite lä Säthaw tea mä-ai üng löci sa te vi. 16Hawi saite kälu tea sa kha lawngtä tea lawngtä aesäbawng hethang lä tämang ö hang. Hini na lä Säthaw tea bälung kawng hai saite löci aesa te na phüng-a vi.
17Nang ma ce üng mätawngky na älo tea lä tängai ö ba. Äni ce thui saite na kätyng sa ö. Äni ce lä nang ce üng bälung na tea aehae y käla rui khü ö te vi. Ätephüng-a mei nädylä, äni ce lä äma ce üng kälu na phüng Säthaw tea thui hethang kae ö te vi. Nang ce lä äni ce üng älo tea tängai dylä, äni ce lä äma ce kälu tea anghawtho te hai sa ö ai. Tungaila nang ce ma tängai y dylä, äni ce lä bälungsi saite hai kälu sa ö ai. Honi lä nang ce üng tähang äte la ävang ting y lyng.
18Kai ce tähang aetang ö jawjaw ba. Kai ce lä kai ma ce üng käsi kähawi mäny saite bälung kaedawng tea mänysy ö te vi. Kai ce lä kätü angxynlyng na tea kätüng khaw-a sa hethang ngai ö te vi. 19Kai lä qae y tea ma nang ce tea ly haile tyng haw hethang kai tähang bälung mitang hai aetang ö näkha nang ce tea mäci khü te vi.
Kangkhüngky üng aetang saite
20Awngneng py saite Säthaw lä beram rui te Kung käleng lawng saite mä-ai üng Areng Isu tea dü te üng mäning haile tyng pa vi dy. Honi lä Isu Khrista üng äthi hai-a sa te vi. Honi äthi lä dungtäsa aenai saite äsäny vi. 21Säthaw üng aely kängai sa hethang äni lä nang ce tea kähawi angxynlyng na py hethang kai lä aetang pa te vi. Säthaw tea bälung kawng hai saite mä-ai üng bälung thung-a Isu Khrista hai-a äni ma sa haw sy. Isu Khrista tea lä dungtäsa phung-ang aesang te awng jawjaw sy. Amen.
Kangkhüngky üng täru saite älo
22Kangby jä-ai na ä, kai üng aethaw py saite angthang tea änawng käsa hai tängai hethang kai lä nang ce tea mäci te vi. Kai lä nang ce tea cae kädawi hai-a tärü vi dy. 23Mä-ai üng kangby Timothe lä thawng thung üng lawi vi dy näte kai lä nang ce tea mäny hai hethang ngai te vi. Qae y tea ma Timothe tyng dawde dylä kai lä äni hai mangtä nang ce hai aeting hethang ly ai.
24Kai ce lä nang ce üng mätawngky angxynlyng na hai Säthaw üng khimi angxynlyng na tea cibai sa te lo na thui ö te vi. Itali pre üng yng saite na ma la nang ce tea cibai sa te lo na thui ö te by vi.
25Säthaw üng tähang kähawi lä nang ce angxynlyng na hai mangtä awng jawjaw ö sy.