Kalatia

KALATIA

khö üng kangkawng tea Pawlae tärü saite cae

Angcü üng älo

Pawlae lä hini cae tea A.D. 50-60 khösäning säla-a tärü te daila awng ai. Äni lä Kalatia khö-a Angthang Kähawi thui pyng-a, ceng kälang khimi na lä Khristen lawng ö te vi. Tungaila Judae Khristen phütä na lä Mosi üng Ubädi tea süng khü hethang ngai ö te vi. Tukätephüng-a Kalatia Kangkawng-a Khristen kangthae na lä lengkhüng täke y dylä, aeqang saite dang haw y näkha mätu ö te vi. Judae reitae kälang na hui hethang la mätu pa ö te vi. Tukha Kalatia kangkawng lä bälung xhuxa ö vi dy. Pawlae lä hini cae thung-a khimi lawngtä lä Khrista tea yng saite qaitä hai-a ni Säthaw ma khimi käcüng-a mäthi te phüng thui pa te vi. Säthaw ma py te cüng saite tea älang kälang hai dang haw y näte phüng la mätü pa te by vi. Khimi lawngtä lä Isu tea yng te phüng-a Säthaw ma äni üng hunghö tea mäcai kha äni tea Muilaw Käcai py pa te vi. Hini lä khimi ce sa saite kälu phüng-a y. Säthaw ma sa saite kälu phüng-a kae näkha Pawlae lä tärü pa te vi.

Äphüng äkädawiky

Angcü üng älo 1:1-10

Angtawtha kätyng Pawlae tea awng saite aenae 1:11-2:21

Säthaw üng tähang kähawi phüng thui saite Angthang Kähawi 3:1-4:31

Khristen üng aelawi saite hai kälu käsawng 5:1-6:10

Kangkhüng üng cibai sa saite lo 6:11-18

Kalatia khö-a awng te kangkawng na tea kawng te lo thui pa

¹Hini lä kai, Pawlae, ma tärü te cae vi. Kai lä angtawtha lawngtä vi. Kai bung lä khimi ce üng aenae hai khimi ce ma angtawtha hethang mätaw te y. Isu Khrista hai kädü thung üng äma bung mätha haile pa saite mä-ai üng Pä-ai Säthaw ma kai bung lä mätaw te kae vi. ²Kai hai hi-a awng saite yng te khimi angxynlyng na ma Kalatia khö üng kangkawng na tea kawng te lo thui ö te vi.

³Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.

⁴Mä-ai üng Pä-ai Säthaw aely kängai-a mä-ai üng hunghö sa te phüng-a, Isu Khrista lä dü pa te vi dy. Hini hai-a käsi kaedawng saite hai kähawi y sa saite khimi na kätyng awng y hethang äni lä mä-ai bung aeqang te vi. ⁵Mä-ai lä Säthaw tea dungtäsa bälaw ö si. Amen.

Kätüng y mätu saite lo tea lä tängai ö hang

⁶Khrista üng tähang kähawi hai-a ka te Säthaw tea nang ce lä dawde-a khaisö ö te phüng-a, kai lä tengxyng y cangxei vi. Nang ce lä khimi ce ma kälang mätu saite mang-a hui ö lae te vi. ⁷Honi mätu saite lä Angthang Kähawi y vi. Khimi phütä na lä nang ce tea xhuxa hai kha Khrista üng Angthang Kähawi tea mäqa hethang ngai ö te vi. ⁸Nang ce tea kai ce lä Angthang Kähawi thui ö pyng te vi dy. Angthang Kähawi y käla mätu saite kälang älang tea kai ce ma thui te läsy, Känipre mang üng angtawtha te lawngtä mäteng ma thui te läsy, Säthaw ma hokä thui saite na tea lä dungtäsa angsawi aelawi saite py raw sy. ⁹Nang ce tea kai ma thui pyng saite na, kai lä vaihi ma thui haile tyng be ai rawng. Lawng lawngtä ma nang ce tea kai ce ma thui pyng saite Angthang Kähawi y käla thui mai dylä, äni tea dungtäsa angsawi lawi saite py raw sy.

¹⁰Vaihi kai lä khimi ce üng kängai-a sa te mei. Y lyng. Säthaw üng bälung aely kängai-a sa te kae. Kai lä khimi ce üng kängai-a sa te kae vi nädylä Khrista üng mawsawng lawng haw y dy lyng.

Säthaw ma Pawlae bung ka pa

¹¹Yng saite kangby jä-ai na ä, kai thui te Angthang Kähawi lä khimi ce üng kaedawng qawng-a aenyng te y vi näte nang ce tea mäny hai hethang kai lä ngai te vi. ¹²Khimi te üng hini angthang kai lä dang te y. Ämi ma la kai tea mätu te y. Isu Khrista ma kai tea aetüng hai te kae.

¹³Jangni-a Judae khimi na üng reitae tea kai hui te lä nang ce thai ö pyng te vi dy. Säthaw üng kangkawng tea kai lä mätangca-a sakälö khü kha täphra hethang ngai näte nang ce lä mäny ö pyng te vi dy. ¹⁴Mä-ai kangsi kangjaw na üng reitae hai Ubädi tea hui hethang kai lä tengxyng y aethawsa te vi. Kai hai mangtä ryng saite Judae khimi kä-awng mang na qawng-a kai lä Ubädi tea mänyky te vi.

¹⁵Tungaila Säthaw lä kai aepeng y te kälang üng hai mäteng ma, äma üng tähang kähawi hai-a kai bung re te vi dy. Äni lä äma üng kälu sa hai hethang kai bung ka te vi. ¹⁶Kai lä khimi ceng kälang na tea Khrista üng Angthang Kähawi thui hethang Säthaw lä äma üng Cäpaw bung aetüng hai pa vi dy. Honi kätü-a, kai lä ämi hai la älo aedüng aethui te y lyng. ¹⁷Kai y kälang-a angtawtha lawng saite na hai aeting hethang kai lä Jerusalem märü-a ly te y vi. Tukä ea la kai lä Arabia pre-a ly mang te vi. Honi pyng-a lä Damasaka märü-a kai lä aekö haile te vi. ¹⁸Säning thungtä qae te kätü-a, kai lä Peterae1:18 Peterae tea Kepha näkha a pa vi hai aeting hethang Jerusalem märü-a ly te vi. Äni hai mangtä käni hawlai bangawtä kai lä awng te vi. ¹⁹Areng Isu üng kangby Jaeko hai la aeting vi. Angtawtha kälang na hai lä lawngtä la aeting te y vi.

²⁰Kai tärü saite na lä tüngkhaw te vi. Kai lä kaeling thui y näte Säthaw ma mäny vi.

²¹Honi pyng-a kai lä Siria pre, Kiliki khö-a ly te vi. ²²Judae khö-a awng te Khrista üng kangkawng na lä kai bung nung vai y lyng. ²³Äni ce thai pyng saite angthang lä, Jangni-a mä-ai tea sakälö khü saite khimi lä äma täphra hethang ngai saite angthang tea vaihi lä thui te vi dy näkha nä ö te vi. ²⁴Tukha kai phüng-a, äni ce lä Säthaw tea bälaw ö dy.

Pawlae hai angtawtha saite kälang na

¹Säning hawlai bälitä byng te kätü-a, kai lä Banaba hai mangtä Jerusalem märü-a ly be dy. Tita bung la ly hai te by vi. ²Säthaw ma Jerusalem märü-a ly hethang mätü te phüng-a, kai lä ly te vi. Ho-a awng te thüng-a, yng saite na ma kangkawng üng mätawngky-a khai saite na hai qaitä kai lä aeting vi. Ceng kälang na tea kai ma thui pa saite Angthang Kähawi tea kai lä thui mäcai te vi dy. Säthaw tähang kai ma sa saite kälu tea lä aetütü-a awng hai hethang ngai te y. ³Kangkawng mätawngky lä bälung aedü kha kai hai mangtä awng saite kai üng kangby jä-ai Tita lä Käri khimi ngaila äni bung lä lengkhüng täke hai pa te y. ⁴Tukä ea la yng te kätyng käjüng sa saite khimi phütä na lä Tita bung lengkhüng täke hai hethang ngai ö te vi. Honi khimi ce lä Isu Khrista hai-a, kai ce üng aelawi saite mäny hai hethang kangkawng thung-a kangru mang kung ö te vi. Äni ce lä mä-ai bung Judae khimi na üng reitae tea hui hai kha mawsawng kätyng lawng haile hethang ngai ö te vi. ⁵Nang ce lä Angthang Kähawi üng lo mitang tea yng jawjaw haw hethang äni ce üng lo tea kai ce lä tänaetä mäteng ma tängai ö y lyng.

⁶Kangkawng üng mätawngky na lä kai ma thui pa saite Angthang Kähawi tea äte haetä la kangthae mätu ö te y vi. Khimi ce lä honi mätawngky na tea aely kälengky-a khai ö ngaila, kai tähang lä khimi ce kätyng aely leng te y vi. Säthaw lä khimi ce üng mimai tea kheng te y lyng. ⁷Säthaw lä Judae na tea Angthang Kähawi thui hethang Peterae bung mätaw te kätyng-a, ceng kälang na tea Angthang Kähawi thui hethang la Säthaw ma kai bung mätaw te by vi näte äni ce lä nung ö te vi dy. ⁸Ätephüng-a mei nädylä Peterae bung Judae na tea angtawtha hethang aethaw py saite Säthaw lä kai bung la ceng kälang na tea angtawtha hethang aethaw py te by vi dy. ⁹Jaeko, Peterae hai Johan ce lä kangkawng üng mätawngky käleng na vi näkha khimi ce lä dawng ö te vi. Äni ce lä Säthaw ma kai ce tea py saite tähang kähawi phüng thai te kätü-a, kai ce lä äni ce üng kangby jä-ai na kae näte khimi qütä ma mäny hethang lä Banaba hai kai ni tea äni ce lä cibai sa ö vi dy. Kai ce lä ceng kälang na thung-a kälu sa hethang hai äni ce la Judae na thung-a kälu sa hethang näte phüng-a, kai ce hai äni ce lä bälung mangtä aedü ö vi dy. ¹⁰Äni ce mäkai te haetä lä, “Jerusalem märü üng yng saite khimi kangtang na tea säbawng pa” näkha nä ö te vi. Hini lä kai üng aely ngai saite kälu by vi dy.

Antioh märü-a Pawlae ma Peterae tea pring pa

¹¹Peterae lä Antioh märü-a tyng te kätü-a, äni lä cüngpra-a sa tämang te phüng-a, kai lä äni tea yng saite khimipui na maw-a pring pa te vi. ¹²Peterae tyng angcü te kätü-a, äni lä ceng kälang yng saite na hai mangtä nei ca vävawi te vi. Tungaila Jaeko üng kangby jä-ai na Jerusalem märü üng tyng pyng te kätü-a, Peterae lä yng saite ceng kälang na hai aeprei kha ca nei pa vi. Ätephüng-a mei nädylä yng saite na lä lengkhüng täke hethang aely lengky vi näkha thui saite na ma äni tea käsi prawng ai näte ri te phüng-a vi. ¹³Yng saite Judae kälang na la Peterae hai mangtä sa tämang ö te by vi dy. Äni ce üng sa tämang saite thung-a, Banaba mäteng ma qa pö ma te by vi. ¹⁴Äni ce lä Angthang Kähawi üng lo mitang tea hui ö y te kai ma nung te kätü-a lä, yng saite khimi angxynlyng na üng maw-a Peterae tea kai ma pring pa te lä “Nang lä Judae khimi lawngtä ea Judae khimi kätyng awng te y vi. Ceng kälang na kätyng awng lae te vi tu la. Tudylä ceng kälang na üng yng te tea Judae na üng reitae mang-a hui hai hethang ätephüng-a nang lä sa aekhe kang te vi mei” näpa.

Judae na hai ceng kälang na üng yng te

¹⁵Kai ce lä nä-awi ma aepeng saite Judae khimi na vi be. Kai ce lä ceng kälang na kätyng hunghö sa kha Säthaw hai hanglaw te y lyng. ¹⁶Khimi lawngtä lä Ubädi hui te phüng-a, y käla, Isu Khrista tea yng te phüng-a, Säthaw lä äni tea cüng hai vi dy näte mä-ai lä mäny ö te vi. Mä-ai lä Isu Khrista tea yng ö te by vi. Hini hai-a Säthaw lä mä-ai bung Ubädi hui hai y käla Isu Khrista tea yng te hai-a khimi käcüng-a khai te vi. Ämi bung la Ubädi hui te phüng-a, Säthaw lä khimi käcüng-a khai pa y lyng. ¹⁷Judae na üng ubädi hui te y käla Säthaw ma mä-ai bung khimi käcüng-a khai hethang Isu Khrista tea yng te phüng-a, mä-ai lä hunghö sa ö te vi näkha Judae khimi phütä na lä dawng ö te vi. Tudylä Khrista lä mä-ai tea hunghö sa hai te vi näkha thui te vi mei. Tukä y lyng. ¹⁸Mä-ai lä ubädi üng älang tea khaisö kha kangthae kälang sa haile tyng he ngai vi dylä, mä-ai lä hunghö sa ö te vi dy. ¹⁹Kai lä Ubädi hui kha awng vai te vi. Ubädi thung üng Khrista ma kai bung bälawi te kätü-a lä, Säthaw tähang-a kai lä hing haw te vi dy. Ubädi lä kai tähang äte haetä la y vi dy. ²⁰Kai lä Khrista hai mangtä thinglang qawng-a dü pyng te kätyng vi. Kai lä leithung jungtä üng kätyng hing te y vi dy. Vaihi Khrista lä kai üng bälung thung-a hing te vi. Vaihi hing te lä Säthaw üng Cäpaw tea ae-y kha hing te kae. Cäpaw lä kai bung bälung aevaw kha kai tähang äma üng hing saite py vi dy. ²¹Säthaw üng tähang kähawi tea kai lä khaisö haw y lyng. Ubädi tea hui te phüng-a Säthaw ma kai tea khimi käcüng-a khai dylä, Khrista üng dü pa saite lä aetütü kae vi dy.

Yng saite hai Mosi üng Ubädi

¹Kalatia khö üng yng saite kangby jä-ai na ä, ätephüng-a nang ce lä kaerö na kätyng sa ö te vi mei. Nang ce tea ämi ma aedawi hai sa te mei. Kai lä nang ce tea Isu Khrista üng Angthang thui te thüng-a, äni ma thinglang qawng-a dü pa saite lä nang ce üng ämi hai nung ö khe te kätyng vi dy. ²Nang ce tea kai lä älo haetä düng hethang ngai vi. Säthaw lä nang ce tea Muilaw Käcai bung makäte phüng-a py te mei. Mosi üng Ubädi tea hui ö te phüng-a mei. Y dylä Khrista üng Angthang Kähawi thai kha yng ö te phüng mei. ³Nang ce lä tukä tangtä aerö ö te vi mei. Nang ce Khristen na üng hing saite te lä Muilaw Käcai hai aetawng te vi. Vaihi nang ce lä mä-ai ma üng aethaw hai-a cungrü hai hethang ngai ö te mei. ⁴Nang ce lä Angthang Kähawi yng te phüng-a mätang bälai saite awng mang ö te vi dy. Nang ce üng mätang bälai saite lä aetütü y te vi näte kai lä aethang khai te vi. ⁵Säthaw lä Muilaw Käcai bung nang ce tea py kha nang ce thung-a cangxei saite na sa pa te lä, Ubädi tea nang ce hui ö te phüng-a mei. Tukä y lyng. Äni üng Angthang Kähawi thai kha yng ö te phüng-a kae.

⁶Abraham phüng aedawng ö e. Caekäcai thung-a, “Äni üng yng saite phüng-a, Säthaw lä khimi käcüng-a äni tea khai te vi” näkha awng vi. ⁷Yng saite khimi na lä Abraham üng caw nade na tätang vi näkha mäny ö vi dy. ⁸Ceng kälang na bung lä yng te hai-a khimi käcüng kätyng Säthaw ma khai ai mang näte cangkhawng üng hai ma Caekäcai thung-a tärü pyng te vi dy. Säthaw ma, “Khimi ceng angxynlyng na lä nang hai-a tähang kähawi dang ö ai mang” näkha Abraham tea Angthang Kähawi thui rüng pa te vi dy. ⁹Tukätephüng-a Abraham kätyng yng saite khimi angxynlyng na tea lä Säthaw ma äni tea py te kätyng tähang kähawi py by vi dy.

¹⁰Säthaw ma khimi käcüng-a khai hethang Ubädi tea ae-y saite na lä, Säthaw üng angsawi tyng te vi dy. Caekäcai-a lä, “Ubädi thung-a tärü te angxynlyng na tea tängai y saite khimi na lä, Säthaw üng angsawi py tätang khaw te vi dy” näkha tärü te vi. ¹¹Ubädi tea tängai te phüng-a, Säthaw lä ämi tea la khimi käcüng-a khai te y vi näte lä aenysy vi dy. Caekäcai thung-a, “Säthaw ma khimi käcüng-a khai saite lä yng te hai-a dungtäsa hing vi ai” näkha tärü te awng vi. ¹²Yng saite hai ubädi lä aesui te y lyng. Caekäcai thung-a tärü te lä, “Ubädi thung-a awng saite angxynlyng na tea tängai te khimi lä hing ai,” näkha awng vi.

¹³Khrista lä mä-ai tähang angsawi lawi te hai-a, Ubädi üng angsawi lawi te üng mä-ai bung lä äni ma bälawi pa te vi dy. Hini phüng Caekäcai thung-a tärü te lä, “Thinglang qawng-a täheng kha mädü pa saite khimi qütä lä Säthaw üng angsawi lawi saite vi” näkha awng te vi. ¹⁴Isu Khrista ma mä-ai bung aeqang te kätü-a Säthaw lä Abraham tea tähang kähawi py te kätyng ceng kälang na tea la py te by vi. Tukätephüng-a yng saite hai-a mä-ai lä Säthaw ma aedo saite Muilaw Käcai bung dang haw ö ai mang.

Ubädi hai aedo saite lo

¹⁵Yng saite kangby jä-ai na ä, nang ce tea käni qütä mä-ai ma üng hing saite hai-a mätae kha lo mitang kai ma mätü si ba. Khimi lawng netä ma bälung mangtä aedü kha älo aedo hawi khü dylä, ämi ma la aedo saite lo tea täphra haw y lyng. Ämi la mäqa haw y lyng. Säthaw üng aedo saite lo lä honi kätyng by vi. ¹⁶Säthaw lä Abraham hai äni üng kaepreng tea aedo saite älo py te vi. Caekäcai thung-a “Kaepreng” näte lä khimi awng mang saite na phüng tea thui te y lyng. “Nang üng Kaepreng” näte lo lä khimi lawngtä xyng tea thui te kae. Honi lawngtä lä Khrista vi. ¹⁷Kai lä äte thui hethang ngai te mei nädylä, Säthaw lä Abraham tea älo aedo pyng saite khösäning cungvai bälitä hai ruithungtä awng te kätü-a lä, Mosi tea Ubädi py te by vi dy. Hini Ubädi lä Säthaw ma Abraham tähang aedo kha py saite lo tea lä täphra haw y lyng. ¹⁸Nang ce lä Ubädi tea hui ö te phüng-a, Säthaw lä nang ce tea tähang kähawi py y lyng. Äni üng aedo pyng saite lo phüng-a, nang ce tea tähang kähawi py ai. Hini kätyng Säthaw lä Abraham tea älo aedo te phüng-a, tähang kähawi py te by vi.

¹⁹Hokä dylä ätephüng-a, Säthaw lä Ubädi py te vi mei. Säthaw lä khimi tea hunghö sa vi näte mätü hethang Ubädi py be te vi. Älo aedo saite Abraham üng kaepreng tyng te khytä xyng Ubädi lä aenae awng te kae vi. Säthaw lä Känipre üng angtawtha na hai Mosi tea Ubädi py te vi. Mosi lä Säthaw hai khimi säla-a äsäla sa pa saite kung na vi. ²⁰Äsäla sa te kung näte lä kangkawng haetä xyng tähang kälu sa te y lyng. Äni lä kangkawng känetä tähang kälu sa te vi. Tungaila Abraham tea älo aedo saite Säthaw lä lawngtä xyng awng te kae.

Ubädi lo üng mawlang tähang

²¹Ubädi lä Säthaw üng aedo saite älo tea elekhei sa te vi mei. Hokä y lyng. Ubädi lä khimi ce tea dungtäsa hing saite py haw vi nädylä, mä-ai lä Ubädi tängai te phüng-a, Säthaw ma khimi käcüng kätyng khai haw vi ai. ²²Tungaila Caekäcai thung-a hunghö lä älawngpre-a awng saite khimi angxynlyng na tea pyng vi dy näte awng vi. Tukätephüng-a Isu Khrista tea yng saite khimi na bung lä dungtäsa hing saite dang hai hethang Säthaw lä aedo te älo py pa vi dy.

²³Khrista tyng y te kälang-a mä-ai lä Ubädi üng thawngsae na vi. Säthaw ma yng saite lang mätü te khytä khimi ce lä hini kätyng awng hethang kae te vi. ²⁴Khrista tyng te khytä Ubädi ma mä-ai bung rui kha äni tea bähawi te vi. Honi pyng-a mä-ai lä Khrista tea yng te phüng-a Säthaw ma mä-ai bung lä khimi käcüng-a khai vi dy. ²⁵Vaihi mä-ai lä Khrista tea yng te phüng-a, bähawi te Ubädi bung lä ngai y vi dy.

Säthaw üng caw nade na

²⁶Nang ce angxynlyng lä Khrista Isu tea yng te hai-a, Säthaw üng caw nade na-a lawng ö vi dy. ²⁷Khrista hai bungtä awng hethang baptismae la ö te vi dy. Tudylä nang ce angxynlyng na lä kä-o kangthae aelawng te kätyng, Khrista üng hing saite tea aelawng ö te vi dy. ²⁸Isu Khrista hai bungtä lawng te phüng-a khimi angxynlyng na lä mangtä kae. Äni üng maw-a lä Judae khimi hai Käri khimi, mawsawng tangnae hai khimi kaelawi, nawngmäcaw hai nawngmädi lä mangtä bawi te kae vi. ²⁹Nang ce lä Khrista üng khimi na lawng ö te phüng-a, Abraham üng caw nade na vi dy. Säthaw lä Abraham tea aedo saite älo kätyng-a nang ce tea lä tähang kähawi py ai.

Mä-ai ce lä mawsawng na y dy

¹Kai thui hethang ngai saite lä, äpä-ai üng ingthawng aety hethang dang saite cäpaw lä, nade thüng-a äma lä mawsawng lawngtä kätyng by vi. Tungaila äma ryng te kätü-a lä, äpä-ai üng ingthawng angxynlyng na äni lä dang king vi ai. ²Äpä-ai üng khai pa saite kätü tyng te khytä, äcäpaw lä äma bung rui saite hai kheng saite khimi na üng älo tea tängai hethang kae te vi. ³Mä-ai la honi kätyng by vi. Khrista ly y te kälang-a, mä-ai lä nade na kätyng awng te by vi. Älawngpre üng reitae ma mä-ai tea lä pyng te by vi.

⁴Tungaila kätü tyng khaw ea lä, Säthaw lä äma üng Cäpaw bung älawngpre-a mätaw vi dy. Äni bung lä nawngmädi lawngtä üng cäpaw kätyng aepeng kha, Judae na üng Ubädi täkui-a awng hai pa vi dy. ⁵Äni lä Ubädi täkui-a awng saite mä-ai bung aelawi hai hethang Säthaw lä äni bung mätaw pa te vi. Tukha mä-ai lä Säthaw üng caw nade na-a lawng haw ö vi dy.

Vaihi mä-ai lä Säthaw üng caw na-a aelawng ö dy

⁶Nang ce lä Säthaw üng caw nade na lawng ö te phüng-a, äni lä mä-ai üng bälung thung-a äma Cäpaw üng Muilaw Käcai bung mätaw vi dy. Muilaw Käcai phüng-a, mä-ai lä, “Üngai, Ä-ai” näkha ka hethang dang vi. ⁷Vaihi nang ce lä mawsawng na y vi dy. Caw nade na vi dy. Caw nade na aelawng te phüng-a, Säthaw ma nang ce tähang khai saite angxynlyng na lä nang ce tea py vi ai.

Kalatia khö üng yng saite na tähang Pawlae ma bälung mawng hai pa

⁸Jangni-a nang ce lä Säthaw bung mäny y te kätü-a lä, Säthaw y saite nang ce tea säbawng haw saite mimi na tea cäphaw ö vi dy. ⁹Vaihi nang ce lä Säthaw bung mäny ö vi. Säthaw ma nang ce bung mäny vi dy näte kai lä thui hethang kae te vi. Tudylä Nang ce lä aethawdi saite, ävang ting y saite, säbawng haw y saite reitae na mang-a la makäte phüng-a aekö hethang ngai ö te mei. Makäte phüng-a, honi na üng mawsawng-a nang ce lä aelawng haile be tyng hethang ngai ö te mei. ¹⁰Nang ce lä käni rui, law, khösäning hai kätü na tea ävang käting-a khai kha pawi na sa ö te vi. ¹¹Kai lä nang ce tähang bälung mawng hai bärai vi. Kai ma nang ce thung-a sa pyng saite kälu angxynlyng na lä aetütü-a awng lae ai te phüng-a vi.

¹²Yng saite kangby jä-ai na ä, nang ce tea kai lä aesi aebai te lo thui hethang ngai vi dy. Kai kätyng ubädi thung üng aelawi ö jo. Ätephüng-a mei näte lä Kai la nang ce kätyng awng te by kae vi. Nang ce lä kai tea sa tämang ö te y vi. ¹³Kai lä angcü üng Angthang Kähawi nang ce tea thui saite kätü-a, kai üng ätabung aethawdi saite phüng nang ce lä aedawng haile ö te vi. ¹⁴Kai üng ätabung aethawdi saite lä, kai tea mäthi y hethang nang ce tea the saite lawng haw te vi. Tungaila nang ce lä kai tea mäthi y sa te la awng y. Ngai y saite bälung awng ö y vi. Hini jüng-a nang ce lä kai tea Känipre angtawtha kätyng-a, Isu Khrista khekhe kätyng-a, lady ö te vi. ¹⁵Honi kätü-a nang ce lä tengxyng y anghawtho ö te vi. Vaihi lä ätemakä awng ö te vi mei. Nang ma ce üng ämi na mäteng ma aethawpu kha kai tähang py he dang haw dylä, py ö vi ai näte kai lä thui khaw haw te vi. ¹⁶Vaihi kai lä nang ce tea lo mitang thui te phüng-a, nang ce üng täre-a aelawng te vi nang mei.

Honi khimi na lä nang ce tea kähawi sa ö y

¹⁷Kätüng y mätu saite khimi na lä nang ce bung äma ce te mang-a qa hai hethang ngai ö phi te vi. Tungaila nang ce tähang lä hawi te y lyng. Äni ce lä nang ce tea kai ce üng kangby jä-ai-a lawng y hethang sa he ngai hai ö te vi. Äni ce üng lo tea tängai hai hethang ngai ö phi te vi. ¹⁸Aethawsa he ngai saite bälung awng te lä hawi. Tungaila mawlang tähang kaedawng kähawi la awng hethang kae. Khimi ce lä kätü qütä honi kätyng sa ö hethang hawi vi. Kai awng te kätü-a läsy kai awng y te kätü-a läsy sa ö jawjaw ba. ¹⁹Kai üng ngai bärai saite caw nade na ä, nawngmädi lawngtä lä äby aepeng te kätü-a, naw mätang te kätyng nang ce tähang-a kai la naw mätang haile tyng te by vi. Nang ce lä Khrista tea yng te kähing sai ryng khü y rytä lä, kai lä honi naw mätang saite tea aeting vi ai rawng. ²⁰Vaihi nang ce hai mangtä awng kha nang ce üng bälung kaedawng na mäny ea kai lä nang ce hai älo aepe khe hethang ngai te vi. Ätephüng-a mei nädylä nang ce tähang kai lä bälung mawng hai phi te phüng-a vi.

Sara ni Hakara üng phüng

²¹Ubädi täkui-a awng hethang ngai saite na ä, nang ce lä Ubädi ma thui saite na tea mäny ö y mei. ²²Caekäcai thung-a tärü te lä, Abraham lä äcäpaw lawng netä awng. Lawngtä lä mawsawng nawngmädi üng vi. Vai lawngtä lä ingkung nawngmädi üng vi. ²³Nawngmädi mawsawng üng aepeng saite cäpaw lä khimi üng kaedawng hai-a aepeng saite kae; Tungaila nawngmädi ingkung üng aepeng saite cäpaw lä Säthaw üng aedo saite lo kätyng-a aepeng te vi. ²⁴Hini nawngmädi lawng netä lä mätae saite lo nä haw vi. Nawngmädi lawng netä lä Säthaw üng älo aedo saite känetä tea thui te vi. Säthaw ma Sinai me anghung qawng-a py kha aedo saite älo lä mawsawng nawngmädi Hakara kätyng vi. Sinai me anghung-a Säthaw lä khimi ce tea mawsawng lawng hai hethang Ubädi py pa te vi. ²⁵Hakara lä Arabia pre üng awng saite Sinai me anghung tea näte vi. Vaihi awng saite Jerusalem märü kätyng la vi. Hini märü üng khimi ce lä Ubädi üng mawsawng na vi. ²⁶Tungaila Känipre mang üng awng saite Jerusalem märü lä ingkung nawngmädi Sara kätyng vi. Sara lä aelawi saite nawngmädi vi. Äni lä mä-ai yng saite khimi angxynlyng na üng änä-awi vi. ²⁷Caekäcai thung-a tärü te lä:

“Caw nade na bung aepeng y saite nawngmädi ä, anghawtho ba.

Nade bung aepeng ea naw mätang aeting vai y saite nawngmädi lä, hang kha anghawtho ba.

Ätephüng-a mei nädylä, aekhaisö saite nawngmädi lä änawngpaw awng saite

nawngmädi qawng-a, nade na bung dangky ai rawng mang” näte awng vi.

²⁸Yng saite kangby jä-ai na ä, nang ce lä Isaika kätyng-a Säthaw üng lo aedo kha aepeng saite caw nade na vi. ²⁹Jangni-a khimi üng kaedawng hai aepeng saite cäpaw lä Muilaw Käcai üng haidae hai aepeng saite cäpaw tea mätang bälaica-a sakälö khü pa te vi. Vaihi mä-ai la honi kätyng aeting te by vi. ³⁰Tungaila Caekäcai thung-a makä thui mei nädylä, “Nawngmädi mawsawng hai äni üng cäpaw bung lä mäthoja te vi. Nawngmädi mawsawng üng cäpaw lä ingkung nawngmädi üng cäpaw hai mangtä ingthawng aety haw y lyng” näkha näte awng vi. ³¹Tukätephüng-a yng saite kangby jä-ai na ä, mä-ai lä nawngmädi mawsawng üng caw nade na y vi. Ingkung nawngmädi üng caw nade na kae.

Khrista hai-a aelawi saite

¹Mä-ai aelawi hethang Khrista ma aeqang pyng te vi dy. Tukätephüng-a nang ce lä mawsawng na-a aelawng haile tyng y hethang ca khü ö he kae.

²Tängai ö, kai, Pawlae, ma thui te dy. Nang ce ma lengkhüng täke saite tea ae-y dylä, nang ce tähang Khrista ma dü pa saite lä ävang ting y dy lyng. ³Kai ma thui tynglyng be te lä, lengkhüng täke saite tea ae-y te khimi qütä lä Mosi üng Ubädi angxynlyng na tea hui hethang kae. ⁴Ubädi hui te hai-a Säthaw maw-a khimi käcüng lawng hethang ngai dylä, Khrista hai aesui te y vi dy. Tudylä Säthaw üng tähang kähawi hai äni lä aesui te y vi dy. ⁵Khrista tea yng te hai-a, Säthaw lä cüng te vi näkha aedawng te lä mä-ai lä Muilaw Käcai phüng-a aethang khai ö te vi. ⁶Mä-ai lä Isu Khrista hai mangtä aesui te kätü-a, lengkhüng täke te hai, täke y te lä, aely leng te y lyng. Khrista tea yng kha mä-ai lä Säthaw hai khimi ce tea bälung aevaw saite lä aely lengky vi.

⁷Nang ce lä aepeng te kangthae dang kha Muilaw Käcai lang mang kähawi-a hui saite na vi. Lo mitang tea tängai y hethang nang ce tea ämi ma the te mei. ⁸Nang ce bung ka saite Säthaw lä hini kä the te y lyng. ⁹Säthaw üng lo thung-a lä, “Täkawdi aepae saite aesi äje cäcaw lä täkaw awng mang saite tea aepae hai haw te vi” näkha nä vi. ¹⁰Nang ce lä kaesyng y mätu saite lo na tea tängai y hethang Säthaw lä nang ce tea säbawng ai näkha kai lä ae-y te vi. Nang ce tea bälung xhuxa hethang thui saite khimi na tea lä Säthaw ma dengpy ai mang.

¹¹Yng saite kangby jä-ai na ä, khimi ce lä lengkhüng täke hethang kae näkha kai thui dylä, ätephüng-a kai tea vaihi khytä khimi ce lä sakälö khü ö te vi mei. Khrista lä thinglang qawng-a dü te hai-a aeqang saite dang te phüng thui te jüng-a, khimi ce lä lengkhüng täke hethang kae näkha kai thui vi dylä, Judae khimi na ma kai tea lä elekhei sa y dy lyng. ¹²Nang ce tea bälung xhuxa hethang sa saite khimi na tea lä äma ce üng lengkhüng täke te na cang y, angxynlyng na tea aeking hethang kai lä ngai te vi.

¹³Yng saite kangby jä-ai na ä, Säthaw lä nang ce üng ngaiphi tüng y saite tea hui hethang py te y vi. Honi jüng-a nang ce üng aelawi saite hai-a, lawng lawngtä tea bälung aevaw te hai aesäbawng ö hethang kae. ¹⁴Mosi üng Ubädi angxynlyng na tea älosai haetä hai kädawipy-a kai thui ai dy. “Nang ma üng kangby jä-ai na tea lä nang ma tea bälung aevaw te kätyng aevaw” näte vi. ¹⁵Nang ce lä ui käpryng na aekei te kätyng käsi aethui kha aemang dylä, nang ma ce tingtawi aetäphra ö ai. Hini na tea lä sädi khai ö.

Ngaiphi tüng y saite bälung hai Muilaw käcai awng saite bälung

¹⁶Kai thui hethang ngai te lä: nang ce lä Muilaw Käcai ma bähawi te kätyng hing ö ba. Honi kätyng awng dylä ngaiphi tüng y saite mang-a nang ce lä hui hethang ngai ö y ai dy mang. ¹⁷Mä-ai üng ngaiphi tüng y saite bälung lä Muilaw Käcai tea elekhei sa te kae. Muilaw Käcai la mä-ai üng ngaiphi tüng y saite bälung tea elekhei sa te by vi. Muilaw Käcai hai nang ce üng ngaiphi tüng y saite bälung lä aetawng y te phüng-a, nang ce lä ngai saite na sa haw y dy lyng. ¹⁸Tukätephüng-a Muilaw Käcai ma nang ce tea lang mätü dylä, Mosi üng Ubädi lä nang ce tea pyng y dy.

^19-21Ngaiphi tüng y saite bälung üng sa saite na lä: nawngpui nawngpaw kätyng mangtä i saite na, paesu paenai cawngkhang sa saite na, nawngmäcaw nawngmädi mangtä i hethang ngai te bälung awng saite na, mimi na tea cäphaw saite na, khimi ce tea ädawi hai käsi sa saite na, esäre saite na, aejaw aemang saite na, pä-e te bälung awng saite na, kädaw rae saite na, ae-aw saite na, aetäphü te bälung awng saite na, kangkawng sa lyky saite na, mä-ai ma tingtawi aepä-e saite na, jö nei ngae saite na, pawi qütä ly kha nei ca ngae saite na hai kälang hawi y sa saite na vi. Honi na kätyng sa saite khimi na lä Säthaw pre üng tähang kähawi dang haw y lyng. Kai lä jangni-a thui pyng te kätyng vaihi la sädi py te vi.

^22-23Muilaw Käcai ma mä-ai tea pyng dylä, äni ma mä-ai tea sa hai saite na lä: bälung aevaw saite, anghawtho saite, awngneng saite, änawngsa saite, bäsai y saite, kähawi sa saite, ae-y nae hawi saite, älo käneng aepe saite, mä-ai ma tea aeküng haw saite na vi. Honi na tea lä Mosi üng Ubädi la elekhei sa y lyng. ²⁴Isu Khrista hai aesui saite na lä äma ce üng ngaiphi tüng y saite bälung na tea thinglang qawng-a täheng te by vi dy. Tukätephüng-a äni ce üng ngaiphi tüng y saite lä äni ce tea pyng haw y dy. ²⁵Muilaw Käcai lä mä-ai tea hing saite kangthae py te phüng-a, äni üng mätü saite lang mang-a mä-ai lä hui ö si. ²⁶Mä-ai lä bälung leng ö hang si. Khimi ce hai aejaw aemang ö hang si. Aepä-e te bälung la awng ö hang si ba.

Lawng lawngtä tea aesäbawng ö

¹Yng saite kangby jä-ai na ä, khimi lawngtä hunghö sa saite tea nang ce thung üng lawngtä ma nung dylä, Muilaw Käcai hai-a yng ca saite nang ce lä äni tea älang kätüng mang-a bähawi haile tyng pa ba. Äni tea lä älo käneng hai säbawng haile tyng hethang kae. Nang ce la nang ma ce ma hunghö sa y hethang sädi khai ö ba. ²Mätang bälai tyng te kätü-a lä, nang ma ce tingtawi aesäbawng ö ba. Nang ce hini kätyng sa dylä, Khrista üng älo na tea tängai ö te kae dy mang. ³Khimi lawngtä lä aely leng y ea ma, äma tea aely lengky-a aekhai dylä, äma tea kaeling aesa raw te kae vi. ⁴Khimi qütä lä mä-ai ma üng sa saite na tea aekheng haile tyng hethang kae. Tupyng-a mä-ai ma üng sa saite te kätüng tea lä aethaw haw mang. Khimi kälang na üng sa saite hai mä-ai ma üng sa saite tea lä mätae hang. ⁵Khimi qütä lä Säthaw ma py saite kälu tea kähawi-a sa hethang kae.

⁶Säthaw lo tea aetu saite khimi lä mätu saite khimi tea hawi saite angxynlyng na bäri pa hethang kae.

⁷Mä-ai ma tea kaeling sa raw ö hang. Säthaw üng dengpy saite tea lä mäthi y hethang kae y. Säthaw lä Khimi lawngtä tea äma üng hi saite ämöti kätyng-a äthai ae hai tyng vi ai. ⁸Äma üng ngaiphi tüng y saite bälung hai ämöti hi te khimi lä dungtäsa dü saite tea ae ai. Tungaila Muilaw Käcai üng kängai kätyng-a ämöti hi saite khimi lä Muilaw Käcai te üng dungtäsa hing saite tea ae vi ai. ⁹Mä-ai lä aethawsi y käla ma hawi saite tea sa ö si. Mä-ai lä leithung mang-a aenaw y dylä Säthaw üng khai khü saite kätü-a lä, äthai kähawi ae haw ai mang ba. ¹⁰Tukätephüng-a mä-ai lä sa haw saite kätü-a, khimi angxynlyng na tähang-a kähawi sa ö si. Mä-ai üng yng saite kangby jä-ai na tähang la kähawi sa pa hethang lä aely lengky te vi.

Kangkhüng üng cibai sa saite lo

¹¹Nang ce tea kai ma üng kö hai tärü te caelung käleng na tea kheng ö. ¹²Nang ce tea lengkhüng täke hethang aethaw paitae hai sa saite na lä, Judae khimi kälang na üng mimai dang hethang sa te kae. Säthaw lä Khrista ma thinglang qawng-a dü te hai-a khimi ce bung aeqang te vi näkha thui te phüng-a, äni ce lä sakälö khü saite aeting hethang ngai ö te y vi. ¹³Lengkhüng täke saite äma ce mäteng ma Mosi üng Ubädi tea tängai ö te y. Tungaila nang ce tea lengkhüng täke hai hethang äni ce lä ngai ö te vi. Nang ce lä äni ce üng leithung hui ö te vi näte aethaw haw hethang äni ce lä hikä sa ö te vi. ¹⁴Kai tähang aethaw nae lä mä-ai üng Areng Isu Khrista üng thinglang haetä xyng kae vi. Khrista üng thinglang hai-a hini älawngpre hai aesui saite na lä kai tähang äly leng te y. Kai la hini älawngpre üng khimi ce tähang äly leng te y. ¹⁵Khimi lawngtä lä lengkhüng täke te hai, täke y te lä aely leng te y lyng. Aepeng kangthae-a lawng te lä aely lengky vi. ¹⁶Hini lo na tängai saite khimi angxynlyng na tea Säthaw lä awngneng te hai bäheng saite py jaw sy. Äni ce lä Säthaw üng khimi käcüng tätang na vi.

¹⁷Vaihi üng hai aetawng kha kai tea ämi lawngtä la mätang bälaica-a sa vi hang. Kai üng ätabung qawng-a awng saite angvawi cäqang na lä, kai lä Isu Khrista üng mawsawng vi näte mätü te vi.

¹⁸Yng saite kangby jä-ai na ä, Areng Isu Khrista üng tähang kähawi lä nang ce hai mangtä awng jawjaw sy. Amen.