EPHESI
kangkawng tea Pawlae tärü saite cae
Angcü üng älo
Hini cae lä angtawtha Pawlae ma äma Rom märü-a awng te thüng A.D. 60-64 khösäning säla-a tärü te daila awng ai. Ephesi lä honi kätü-a Asia pre cäpi (vaini üng Turki pre) thung-a ämüng aethang saite märü vi. Honi märü-a lä kaepai sa hethang lolang pui na aeting bawi saite mityng vi. Atemi näsaite mimi anglaw tea cäphaw hethang ingkäleng pui la honi märü-a awng te vi. Pawlae lä Ephesi märü-a säning thungtä awng kha Angthang Kähawi thui te vi. Hini cae thung-a Pawlae lä käjüng sa te särae na üng mätu saite hai Ephesi kangkawng üng sa tämang saite phüng na tärü te y vi. Hini cae üng mawlang kaedawng lä känetä awng vi. Haetä lä Pawlae ma Ephesi kangkawng üng khimi na tea Säthaw hai äni üng tähang kähawi lä matangtä leng kha aesang mei näte mäny hethang ngai hai te vi. Äbaeni üng lä kangkawng thung-a bälung mangtä aedü hethang ngai hai te vi. Pawlae lä kangkawng phüng caiping-a tärü te vi. Äni ma Kangkawng tea lä khimi üng ätabung üng mätae kha ing, la sa te hai la mätae ea tärü te vi.
Äphüng äkädawiky
Angcü üng älo 1:1-2
Khrista hai kangkawng 1:3-3:21
Khrista hai-a dang saite hing saite kangthae 4:1-6:20
Kangkhüng üng cibai sa te lo 6:21-24
1Angcü üng kawng saite lo
1Kai, Pawlae, ma Ephesi märü-a awng saite Säthaw üng khimi na tea cae tärü te dy.
Isu Khrista üng angtawtha lawngtä-a khai hethang lä Säthaw üng aely kängai vi. Nang ce lä Isu Khrista hai bungtä awng kha äni tea yng ö jawjaw saite na vi.
2Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.
Khrista hai-a dang saite tähang kähawi na
3Mä-ai üng Areng Isu Khrista üng Pä-ai Säthaw tea bälaw ö si. Äni lä Khrista hai-a mä-ai tähang Känipre-a Muilaw Käcai aesui saite üng tähang kähawi angxynlyng na py vi.
4-5Hini khölawng pre sa y te kälang üng hai ma mä-ai bung lä Khrista phüng-a re pyng te vi dy. Mä-ai bung lä äni üng maw-a caiping kha cy haw y hethang re te vi dy. Säthaw lä mä-ai tea bälung aevaw kha Isu Khrista ma sa pa saite hai-a äma üng caw nade na kätyng bälawng hai hethang aedawng rüng te vi dy. Säthaw ma hikä sa te lä äma kawng hethang äma üng aely kängai vi. 6Säthaw üng leng bärai saite tähang kähawi phüng-a mä-ai lä äni tea bälaw hethang kae te vi. Äma üng bälung aevawky saite Cäpaw üng sa te phüng-a, äni lä mä-ai tea hini tähang kähawi mäsai y käla py pyng te vi dy. 7-8Isu Khrista üng dü saite hai äthi phüng-a Säthaw lä mä-ai üng hunghö na bälawi kha mä-ai bung lawi hai te vi dy.
Säthaw üng tähang kähawi lä tengxyng y leng bärai vi. Äni lä tähang kähawi hai-a mä-ai tea bälung kähae py kha äte angxynlyng na tea mäny hai king te vi dy. 9Säthaw lä äma üng ho saite aely kängai mä-ai tea täphawng pa te vi dy. Äni lä honi ho saite mawlang kaedawng tea Khrista hai-a sa king hethang aedawng rüng te vi dy. 10Khai rüng saite kätü tyng khaw tea äni ma Känipre-a hai älawngpre-a awng saite angxynlyng na tea lä Khrista üng aenae täkui-a mangtä khai ö ai näsaite lä äni üng mawlang kaedawng vi.
11Säthaw lä mä-ai bung Khrista hai bungtä awng hethang re te by vi. Jangni-a ma honi tea sa hethang äni lä aedawng rüng te phüng-a, mä-ai bung re te vi dy. Äte angxynlyng na tea lä äma üng mawlang kaedawng kätyng sa te vi. 12Khrista tea yng angcü saite na lä mä-ai Judae khimi na vi. Tukätephüng-a mä-ai lä Säthaw üng phung-ang käleng phüng-a äni tea bälaw ö vi ai.
13Vaihi nang ce la aeqang saite Angthang Kähawi, lo mitang tea lä thai ö pyng te by vi dy. Nang ce lä Khrista tea yng kha äni hai bungtä awng ö te vi dy. Äni hai bungtä te phüng-a Säthaw lä älo aedo saite kätyng Muilaw Käcai bung nang ce tea py vi dy. Hini Muilaw Käcai lä nang ce tea Säthaw üng khimi vi näkha mätü saite äsäny vi dy. 14Mä-ai lä Muilaw Käcai bung dang te phüng-a, Säthaw lä äma älo aedo saite kähawi na py ai näte mä-ai lä mäny haw khaw ai. Säthaw lä äma üng khimi lawng saite mä-ai bung aeqang king hethang kätü-a, äni lä mä-ai tea tähang kähawi na py king vi ai. Säthaw lä leng bärai te phüng-a äni tea mä-ai lä bälaw ö si.
Pawlae üng aetang pa saite
15Areng Isu tea nang ce üng yng saite hai Säthaw üng khimi angxynlyng na tea nang ce ma bälung aevaw saite phüng na kai ce lä thai vi dy. 16Tukätephüng-a nang ce tähang kai lä Säthaw tea kawng te lo thui kha aetang jawjaw te vi. 17Kai lä mä-ai üng Areng Isu Khrista üng Säthaw, phung-ang aesang saite Pä-ai, tea aetang te vi. Nang ce tea Muilaw Käcai üng bälunghae saite hai täphawng saite py hethang äni tea kai lä aetang te vi. Nang ce lä äni tea mäny ö rae ai mang. 18Äni lä lo mitang tea nang ce mänykaw hethang säbawng ai näte kai lä aetang te by vi. Tudylä nang ce bung ka te kätü-a, aedo kha aethang khai saite tea nang ce lä mäny ö ai. Äma üng khimi na tea py hethang älo aedo saite tähang kähawi käleng na nang ce mäny ö by hethang kai lä aetang te vi. 19Äte angxynlyng na qawng-a awng saite äni üng haidae nang ce mäny hethang kai lä aetang te by vi. Hini haidae lä yng saite mä-ai üng bälung tea mäqa te vi. 20Hini haidae käleng hai-a Säthaw lä Khrista bung kädü thung üng mäning haile kha Känipre äma üng bangtang mang-a aety hai pa vi dy. 21Haidae leng saite angra na hai Säthaw üng angtawtha angxynlyng na qawng-a lä aesangky saite Khrista ma pyng te vi dy. Äni üng ämüng lä haidae awng te sanphrang hai mätawngky angxynlyng na üng ämüng na qawng-a lengky vi. Vaihi pyng te mätawngky na tea qaitä cang y, vaimaw mang üng mätawngky na qawng-a la äni üng aenae lä lengky vi. 22Säthaw lä äte angxynlyng na tea Khrista üng äkho täkui-a khai pa vi dy. Yng saite kangkawng angxynlyng na qawng-a älö kätyng äni bung khai pa vi dy. 23Yng saite kangkawng lä Khrista üng ätabung kätyng vi. Kangkawng lä Khrista üng hing saite hai kawi te vi. Khrista lä mityng qütä-a awng te angxynlyng na tea kähing py saite Kung vi.
2Säthaw lä mä-ai tea hing saite kangthae py pa
1Jangni-a nang ce lä Säthaw üng lo tängai ö y kha hunghö sa te phüng-a, khimi kädü na kätyng vi dy. 2Nang ce lä hini älawngpre üng khimi na kätyng hunghö sa ö te vi dy. Khösang-a awng kha haidae awng te angra na bung pyng saite Setan angra tea hui ö vi dy. Hini Setan angra lä Säthaw lo tängai y saite khimi na bung hawi y saite mang-a bähawi jawjaw vi. 3Jangni-a Khrista tea yng y te kälang-a, mä-ai angxynlyng na lä hini kätyng awng ö te by vi. Mä-ai üng ngaiphi tüng y saite hai hawi y kaedawng saite na tea mä-ai lä hui ö vi dy. Mä-ai la hunghö sakaw saite khimi-a aepeng te phüng-a khimi kälang na kätyng Säthaw üng dengpy hethang aeteng khaw te na by vi.
4Tungaila Säthaw lä mä-ai bung bälung aevaw phi kha mä-ai tea lä bäheng bärai te vi. 5Tudylä mä-ai lä Säthaw üng lo tängai y te phüng-a dü saite khimi na kätyng awng te kätü-a, äni ma mä-ai bung lä Khrista hai mangtä hing hai te vi dy. Säthaw lä tähang kähawi hai-a nang ce bung aeqang te vi dy. 6Säthaw lä mä-ai bung Isu Khrista hai mangtä kädü thung üng mätha ea Känipre-a Khrista hai mangtä aety kha pyng hai te vi. Mä-ai lä Khrista hai bungtä te phüng-a Säthaw lä hikä sa te vi dy. 7Ätephüng-a mei nädylä äni lä vaimaw mang üng khimi na tea Säthaw üng tähang kähawi leng bärai saite mäteng ma mätü haw hethang tähang vi. Säthaw üng tähang kähawi lä äte kälang angxynlyng na qawng-a lengky te vi. Äni lä mä-ai hai Isu Khrista tea bungtä bälawng te hai-a äma üng tähang kähawi leng bärai saite mä-ai tea mätü te vi dy. 8Khrista tea yng te phüng-a äma üng bäheng saite hai-a, Säthaw ma nang ce bung aeqang vi dy. Nang ce üng aethawsa saite phüng-a, äni lä nang ce bung aeqang te y. Äni lä nang ce bung äjawng-a aeqang te vi. 9Nang ce ma kähawi sa phüng-a, Säthaw lä nang ce bung aeqang te y lyng. Tukätephüng-a ämi la aethaw haw y lyng. 10Säthaw lä mä-ai bung khimi kangthae kätyng-a sa te vi dy. Mä-ai lä hawi saite kälu na sa hethang Isu Khrista hai bungtä-a lawng hai te vi. Honi hawi saite kälu na lä jangni-a Säthaw üng mawlang kaedawng kätyng sa te vi dy.
Khrista hai-a bungtä lawng saite
11Nang ce lä Judae ceng thung üng aepeng saite na y. Nang ce makä awng mei näte aedawng haile ö ba. Judae khimi na lä lengkhüng täke ö te vi. Nang ce tea lä lengkhüng täke y saite khimi na näkha nä ö te vi. Lengkhüng täke te lä khimi ce üng äkö hai sa saite ätabung ärang mang üng äsäny kae. 12Jangni-a nang ce lä Khrista hai aesui ö te y. Nang ce ceng kälang na lä Isrelae khimi thung-a qa ö te y vi. Säthaw ma Isrelae khimi na hai mangtä älo aenai saite na thung-a nang ce lä qa ö y vi. Tukätephüng-a nang ce lä Säthaw tea mäny y te hai aethang khai te awng y käla ma hini älawngpre-a awng ö te vi. 13Jangni-a nang ce lä Säthaw hai hanglaw ngaila vaihi lä Isu Khrista hai bungtä awng ö te vi dy. Säthaw lä Isu Khrista üng äthi hai-a äma teng-a nang ce bung nähai te vi dy. 14Khrista äma khekhe lä Judae na hai ceng kälang na säla-a aede nae sa pa vi dy. Jangni-a Judae khimi na hai ceng kälang na lä aekäsi ö tingtawi te vi. Hini lä äni ce säla-a baesung kätyng awng te vi. Khrista ma honi baesung bung täphra kha ceng känetä tea lä ceng haetä-a bälawng pa vi dy. 15Khrista ma Judae na üng reitae hai ubädi na tea äma üng dü saite hai-a aenae awng y rung khytä sa pa vi dy. Äni üng mawlang kaedawng lä Judae khimi na hai ceng kälang na tea äma hai bungtä lawng hai kha ceng kangthae haetä-a bälawng pa vi dy. Hini kätyng sa te hai-a ceng känetä tea lä aede hai pa vi dy. 16Khrista lä thinglang qawng-a dü te hai-a, Judae na hai ceng kälang na tea aede haile tyng hai pa vi dy. Änini tea ätabung haetä-a bälawng kha Säthaw üng äpy-a aelawng hai pa vi dy. Vaihi änini lä äma ni tingtawi aekäsi hawi te y vi dy. 17Khrista ly kha jangni-a Säthaw hai hanglaw-a awng saite nang ce ceng kälang na hai kaenai-a awng saite kai ce Judae na tea lä awngneng saite Angthang Kähawi thui te vi dy. 18Khrista phüng-a nang ce hai kai ce lä haetä saite Muilaw Käcai hai-a mä-ai üng Pä-ai Säthaw tea ly haw te vi.
19Tukätephüng-a ceng kälang nang ce lä pre kälang üng khimi na kätyng y vi dy. Angvüng angvaw kätyng la y. Nang ce lä Säthaw üng khimi na hai mangtä, märü haetä üng khimi na kätyng aelawng ö by dy. Säthaw üng engthung khaw üng khimi na by vi dy. 20Nang ce la angtawtha na hai buisaw na üng aenyng nae qawng-a sa saite ing haetä kätyng vi. Isu Khrista äma lä ing tähang aely lengky saite ing aeling kätyng vi. 21Khrista hai-a ing angxynlyng na lä mangtä aesätawng bawi te vi. Äni phüng-a ing lä sang hai rae te vi. Tukätephüng-a honi Ing lä Areng tähang ingkäcai-a aelawng te vi. 22Nang ce la Khrista hai bungtä lawng te phüng-a, äni lä nang ce hai aesätawng te by vi dy. Tukätephüng-a nang ce lä Säthaw üng Muilaw Käcai hai-a äni üng aeta nae-a aelawng ö vi dy.
3Pawlae ma ceng kälang na tea Angthang Kähawi thui pa
1Tukätephüng-a ceng kälang na tea Isu Khrista üng Angthang Kähawi thui te phüng-a thawng thung-a pä-ung saite kai, Pawlae, lä nang ce tähang aetang pa dy. 2Kai lä nang ce ceng kälang na tea Angthang Kähawi thui hethang Säthaw ma kai tea äma üng tähang kähawi hai-a py saite kälu lä nang ce thai tätang ö pyng te vi dy. 3Säthaw lä äma üng ho saite kaedawng kai tea täphawng te vi dy. Kai lä hini phüng äje cäcaw nang ce tea tärü pyng te vi dy. 4Hini tea phai te kätü-a Khrista üng ho saite angthang kai thaikaw saite tea nang ce la mäny ö ai mang. 5Jangni üng dung-a Säthaw lä hini ho saite mawlang kaedawng khimi ce tea täphawng pa te y. Tungaila vaihi Säthaw lä äma üng angtawtha käcai na hai buisaw käcai na tea Muilaw Käcai hai-a hini mawlang kaedawng tea täphawng pa te vi dy. 6Säthaw üng ho saite mawlang kaedawng lä hini vi. Angthang Kähawi phüng-a, ceng kälang na lä Judae khimi na hai mangtä Säthaw py saite tähang kähawi angxynlyng na lä dang ö by ai. Ceng kälang na hai Judae khimi na lä ätabung haetä kätyng lawng ö te vi. Nang ce ceng kälang na lä Isu Khrista hai-a Säthaw ma Judae khimi na tea aedo saite älo dang ö te by vi.
7Säthaw lä äma üng tähang kähawi hai haidae hai-a kai tea hini Angthang Kähawi thui hethang mawsawng-a bälawng te vi dy. 8Kai lä Säthaw üng khimi angxynlyng na thung-a aely leng y ky saite lawngtä vi. Tungaila Säthaw lä ceng kälang na tea Khrista üng tengxyng y tawngnang saite phüng thui hethang kai tea tähang kähawi py te vi dy. Hini Khrista üng tengxyng y tawngnang saite phüng lä khimi ce ma thaikaw saite qawng-a hawiky te vi. 9Äte angxynlyng na sa saite Säthaw lä hini äma üng mawlang kaedawng tea jangni üng dung jungtä-a lä ho king kha khai pa te vi dy. Äma üng ho saite mawlang kaedawng lä ätemakä sa ai mei näte khimi angxynlyng na tea thui mäcai hai hethang Säthaw ma kai bung re te vi dy. 10Hikä sa saite lä Säthaw üng cangxei te bälung kähae na tea vaihi lä yng saite kangkawng hai-a käni khösang-a haidae leng saite angra na hai angtawtha angxynlyng na tea mäny hai pa hethang vi dy. 11Säthaw lä älawng sa y te kälang üng hai ma hini kätyng-a mawlang kaedawng awng te vi dy. Äni lä honi tea mä-ai üng Areng Isu Khrista hai-a khüng rung khytä sa pa te vi dy. 12Mä-ai lä Khrista tea yng te hai äni hai bungtä awng te phüng-a, Säthaw üng maw-a ri y käla bälung ae-y khü kha ly haw ö te vi dy. 13Tukha nang ce tähang kai lä mätangbälai hai te phüng-a, aethawsi ö y hethang nang ce tea kai lä aesi aebai he ngai te vi. Nang ce lä hini phüng-a aethaw te bälung awng ö hethang kae.
Pawlae üng aetang saite
14Hini phüng-a kai lä mä-ai üng Pä-ai Säthaw üng maw-a khokhö didü kha aetang te vi. 15Äni lä Känipre üng awng saite angtawtha angxynlyng na hai kälang angxynlyng na, hai älawngpre-a awng saite ceng angxynlyng na tea sa saite Pä-ai vi. 16Säthaw lä äma üng leng bärai te phung-ang kätyng Muilaw Käcai üng haidae hai-a nang ce üng bälung thung-a aethaw py hethang kai lä aetang te vi dy. 17Tukäte hai-a nang ce üng yng te phüng-a, nang ce üng bälung thung-a Khrista lä awng ai. Thingkawng lä älawng thung-a angjüng ru kha ca khi te kätyng nang ce lä Säthaw üng bälung aevaw saite thung-a cakhi ö by hethang kai lä aetang te vi. 18Nang ce lä, Säthaw üng khimi angxynlyng na hai mangtä, Khrista üng bälung aevaw saite käthu käcawng, kaesang, käka hai kähanglaw na tea mäny te haidae awng haw ö hethang kai lä aetang te vi. 19Khrista üng bälung aevaw saite lä leng bärai te phüng-a, khimi ce lä thaikaw haw king ö y lyng. Tungaila nang ce lä äni üng bälung aevaw saite tea mänykaw ö hethang kai lä aetang te vi dy. Tudylä Säthaw äma üng aeme aeqa saite na lä nang ce üng bälung thung-a awng kha cungrü haw ö vi ai.
20Mä-ai mäkai saite hai aedawng haw saite qawng-a, Säthaw lä awng mang-a py rae haw vi ai. Ätephüng-a mei nädylä äni üng haidae lä mä-ai üng bälung thung-a kälu sa te vi dy. 21Khimi ce lä kangkawng thung-a, Isu Khrista hai-a Säthaw üng leng bärai saite phung-ang tea nung haw ö te vi. Tukätephüng-a mä-ai lä dungtäsa Säthaw tea bälaw ö si. Amen.
4Yng saite na lä Khrista hai bungtä awng
1Areng üng kälu sa te phüng-a kai bung lä thawng thung-a pä-ung te vi. Säthaw ma nang ce bung ka te hai kaeteng-a nang ce lä kähawi-a awng hethang kai lä aesi aebai te vi. 2Nang ce lä kätü qütä-a bälung aemäneng kha äkäneng-a awng ö. Änawngsa te hai lawng lawngtä tea bälung aevaw te hai khung kha awng ö jaw jaw ba. 3Muilaw Käcai hai-a nang ce lä bungtä-a lawng te vi dy. Tukätephüng-a nang ce lä aebälung te hai awng jawjaw hethang aethawsa ö. Nang ce lä awngneng te hai awng dylä, hini kätyng lawng ö ai. 4Mä-ai yng saite na lä khimi lawngtä üng ätabung kaesui kaebeng kätyng vi. Mä-ai üng bälung thung-a aeta saite Muilaw Käcai lä lawngtä kae. Hini kätyng Säthaw lä nang ce bung ka te kätü-a, aethang khai saite haetä py te kae. 5Mä-ai angxynlyng na lä Areng lawngtä, yng saite haetä awng kha baptismae haetä la ö te kae. 6Pä-ai Säthaw lawngtä xyng tea mä-ai angxynlyng na lä cäphaw ö te kae vi. Äni lä mä-ai angxynlyng na tea pyng te vi. Äni lä mä-ai angxynlyng na thung-a aeta kha mä-ai hai-a kälu sa te vi.
7Tungaila Khrista lä mä-ai lawng lawngtä tea äma üng aely kängai-a sakaw saite cawngkhang na py qi ö te vi. 8Hini lä Säthaw üng cae-u thung-a tärü te kätyng vi.
“Areng lä aesangky saite mityng-a paw te kätü-a,
äni ma bäja saite täre na tea lä ne kha äma hai mangtä nähai vi dy.
Äni lä khimi ce tea lasawng cawngkhang na py pa vi dy” näkha nä vi.
9“Aesangky saite mityng-a äni lä paw ja vi dy” näkha thui te kätü-a, hini lo lä Khrista lä hini älawngpre-a cäqa rüng pyng te vi dy näte tea thui te vi. 10Hini älawngpre-a cäqa saite lawngtä lä khösang qawng-a aesangky saite mityng mang-a paw ja saite lawngtä hai mangtä kae. Tukätephüng-a äni lä Käni hai älawng mityng qütä-a awng haw te vi. 11Hini Areng lä äma üng kangkawng na tea sakaw saite cawngkhang na py pa te vi. Äni lä khimi phütä na tea angtawtha na-a lawng hethang sakaw saite na py kha kälang phütä na tea lä buisaw na-a lawng hethang sakaw saite na py pa te by vi. Phütä na tea lä Angthang Kähawi thui hethang sakaw saite na py pa te vi. Kälang phütä na tea lä yng saite na bung rui kha mätu hethang sakaw saite na py pa vi dy. 12Khrista ma hini kätyng sakaw saite na py te lä Säthaw üng khimi na tea äma tähang kälu sa hethang aerü rüng hai te vi. Tudylä Khrista üng ätabung lawng saite Säthaw üng kangkawng angxynlyng na lä aethaw awng kha ryng ö rae vi ai. 13Tukätephüng-a Säthaw üng Cäpaw tea yng saite hai mäny saite hai-a mä-ai lä bungtä-a lawng ö vi ai. Mä-ai lä Khrista üng cungrü saite tea pha hethang ryng te khimi na-a aelawng ö ai. 14Tupyng-a mä-ai lä nade na kätyng y lyng. Kaesyng y-a mätu saite hai kaeling kaemae sa saite na lä mä-ai tea the haw ö y dy. Mä-ai lä aeli pui hai tuileng ma bäja rungrang saite bälawng haetä kätyng y vi dy. 15Hini jüng-a, mä-ai lä bälung aevaw te hai lo mitang tea thui te hai-a, mä-ai lä äte angxynlyng na-a Khrista kätyng aetawng rae kha ryng ö ai. Khrista lä kangkawng üng älö vi. 16Khrista lä äma üng ätabung kaesui kaepreng angxynlyng na tea kaebäla-a mangtä käcüng te vi. Ätabung aela xhixae y hethang mä-ai lä aesätawng saite ähu ähawng hai aethaw rui na kätyng vi. Ätabung angxynlyng na üng kaesui kaepreng angxynlyng na äma ce üng kälu sa qi dylä ätabung angxynlyng na lä ryng kha aethaw awng te hai ätabung kaepreng tingtawi bälung aevaw ö qi te vi.
Mä-ai üng hing saite kangthae
17Tukätephüng-a Khrista üng aenae hai-a nang ce tea kai lä mäci te vi. Nang ce lä Säthaw tea mäny y saite na kätyng awng ö vi hang lawi. Äni ce üng kaedawng saite na lä aetütü kae. 18Äni ce lä Säthaw lo mitang tea thaikaw king haw ö y vi. Äni ce lä Säthaw ma py te hing saite hai hanglaw bärai ö te vi. Ätephüng-a mei nädylä äni ce lä bälung tangkö kha Säthaw bung mäny haw ö y. 19Äni ce lä aejae te bälung awng y te phüng-a, äma ce tea aeküng y käla äma ce üng ngaiphi tüng y saite mang-a hui ö vi dy. Äni ce lä täkü bäjang sa saite angxynlyng na tea anghawtho te hai sa ö jawjaw te vi.
20Tungaila nang ce lä Khrista üng mätu saite hai-a hini kätyng hing hethang nang ce lä aetu ö te y lyng. 21Khrista üng phüng thai saite nang ce hai äni üng äkähui na ma nang ce tea mätu te na lä, Isu üng lo mitang kätyng vi näte kai lä bälung ae-y khaw te vi. 22Tukätephüng-a jangni Säthaw bung mäny y te kälang-a, nang ce üng aeme aeqa kha käsi sa jawjaw saite na tea lä khaisö ö lawi. Hini ngaiphi tüng y saite na lä nang ce tea kaeling kaemae sa hai kha täphra hethang ngai ö te vi. 23Säthaw ma nang ce üng bälung hai kaedawng saite na tea lä kangthae-a sa sy. 24Säthaw lä nang ce tea äma üng täthei-a aeme aeqa saite kangthae py te vi. Säthaw üng aeme aeqa saite lä cungrü kha cai te vi. Tukätephüng-a hini aeme aeqa saite kangthae kätyng-a nang ce lä awng kha sa ö lawi.
25Tukätephüng-a nang ce lä ätete kaeling kaemae na jangni üng kätyng-a thui ö vi hang lawi. Mä-ai lä ätabung haetä üng kaepreng na kätyng vi te phüng-a, mä-ai angxynlyng na lä mä-ai ma üng yng saite rawijae na tea lo mitang xyng ni thui ö hethang kae. 26Nang ce kädawtho dylä, hunghö sa ö hang. Käni düng y te kälang-a ma kädawtho te aenawng ö lawi. 27Nang ce üng kädawtho jawjaw te hai Setan angra ma nang ce tea pyng hethang py ö hang. 28Jangni-a bäru saite khimi lä bäru jawjaw hethang kae y dy. Hini jung-a äni lä äma üng kö na hai aethaw rae kha kälu sa sy. Tudylä khimi kangtang na tea säbawng haw ai mang. 29Älo aetütü saite na hai khimi kälang na tea naw rung khytä aepe ö hang. Honi jüng-a, khimi kälang na aethaw dang saite lo na nang ce lä aepe ö. Thai saite na tähang aesäbawng saite lo na aepe ö ba. 30Säthaw üng Muilaw Käcai tea lä bälungsi hai ö hang. Säthaw lä Muilaw Käcai py te hai-a nang ce tea äsäny sa te vi. Hini äsäny hai kangkhüng üng käni-a nang ce bung Säthaw lä cungrü-a aeqang vi ai näte mätü te by vi. 31Nang ce lä bälung thung-a khai khü te käsi dawng saite na, kädaw rae saite angxynlyng na hai, kädawtho saite, aejaw aemang saite, khimi ce phüng aeqa saite na hai esäre saite angxynlyng na tea lä khaisö ö lawi. 32Nang ce lä nang ma ce tingtawi aebäheng kha bälung aevaw ö ba. Säthaw lä Isu Khrista üng phüng-a nang ce üng hunghö na bälawi te kätyng-a, hunghö na tea nang ma ce tingtawi la aebälawi ö.
5Kaevang-a hing saite
1Nang ce lä Säthaw ma bälung aevaw bärai saite äma üng caw nade na vi te phüng-a, äma kätyng täthei-a awng hethang aethawsa ö. 2Khrista lä mä-ai tea bälung aevaw kha mä-ai tähang dü pa te kätyng-a khimi kälang na tea la bälung aevaw ö lawi. Khrista lä äma üng hing saite lä löci aesa hethang Säthaw tea py pa te vi dy. Honi löci lä Säthaw tähang ämui hawi te vi.
3Nang ce thung-a täkü bäjang sa saite na, cai y saite na, ae-aw saite bälung na phüng cy nae awng y hethang kae. Hini na lä Säthaw üng khimi käcai na hai aeteng khaw te vi. 4Paesu paenai phüng na, rang saite lo na hai aenui aepai-a käcai y thui saite lo na la nang ce lä aepe ö hang. Hini na lä nang ce thui hethang hawi saite lo na y vi. Hini jüng-a Säthaw tea kawng saite älo na phai thui ö kae. 5Täkü bäjang sa saite khimi na, cai y saite na, ae-aw te bälung awng saite na lä Säthaw hai Khrista üng pre-a kung haw y lyng näte nang ce lä mäny hethang kae. Ae-aw te bälung awng saite na lä mimi tea cäphaw te kätyng by vi.
6Älo pawngpang na hai-a nang ce tea kaeling kaemae sa te na tea lä yng ö hang. Äqawng-a thui saite na kätyng hunghö na sa te phüng-a, Säthaw ma äma üng lo tängai y saite na tea lä qae y tea ma dengpy vi ai. 7Tukätephüng-a nang ce lä hini khimi ce üng hunghö sa saite na thung-a qa ö hang. 8Jangni-a nang ce lä käving thung-a awng ö vai saite na vi. Tungaila vaihi lä Säthaw üng khimi-a aelawng kha kaevang-a awng ö te na vi dy. Tukätephüng-a nang ce lä kaevang-a awng saite khimi na kätyng sa ö. 9Ätephüng-a mei nädylä, nang ce thung-a awng saite kaevang lä nang ce tea hawi saite na, cüng saite na hai mitang khaw saite na sa hai ö te vi. 10Säthaw üng kawng hai saite na äte mei näte tea lä aetu ö. 11Käving thung-a awng saite khimi na lä ävang käting y sa ö te vi. Nang ce lä äni ce üng sa saite na thung-a qa ö hang. Honi jüng-a hikä käsi sa saite na tea lä täphawng pa ö. 12Säthaw üng lo tängai y saite na lä kangru-a sa saite na phüng thui hethang mäteng ma saerae he hawi te vi. 13Kaevang tho te kätü-a, hawi y saite na tea khimi ce lä nung haw ö king vi ai. 14Ätephüng-a mei nädylä, kaevang lä äte angxynlyng na tea täphawng king pa te vi. Tukätephüng-a khimi ce ma ae-awi hai thui ö te lä,
“I saite ä, i aelaw lawi.
Dü saite ä, aetha lawi.
Khrista üng kaevang lä nang tea aevang vi ai” näkha nä vi.
15Tukätephüng-a nang ce üng sa saite na tea lä sädi khai ö. Khimi kaerö na kätyng y käla bälunghae saite na kätyng sa ö lawi. 16Vaini kätü-a khimi ce lä käsi sa phi te phüng-a, nang ce üng sa haw te kätü-a kähawi sa ö lawi. 17Tukätephüng-a nang ce lä khimi kangthö na-a lawng y käla, Säthaw üng aely kängai na mäny hethang aethawsa ö lawi.
18Nang ce üng aeme aeqa te tea pra hai saite jö na tea lä nei ngae ö hang. Honi jüng-a Muilaw Käcai üng haidae lä nang ce tea pyng jawjaw sy. 19Lawng lawngtä tea Sam ae-awi na, Säthaw tea bälaw saite ae-awi na hai Säthaw üng Angthang hai ae-awi na thui ö. Nang ce üng bälung mäke angxynlyng na hai ätüng ätang na hai Säthaw tea bälaw ö. 20Mä-ai üng Areng Isu Khrista ämüng hai-a äte angxynlyng na tähang mä-ai üng Pä-ai Säthaw tea kawng te lo thui ö jawjaw ba.
Nawngpui hai nawngpaw
21Nang ce lä Khrista tea tämö khai te phüng-a, nang ma ce tingtawi üng älo na aetängai ö.
22Nawngpui na ä, nang ce lä Areng üng pyng saite täkui-a awng te kätyng, änawngpaw na üng täkui-a awng ö. 23Isu Khrista lä kangkawng üng älö-a aelawng te kätyng nawngpaw lä änawngpui üng älö kätyng-a aelawng te vi. Khrista lä äma üng ätabung kätyng lawng saite kangkawng tea aeqang te vi. 24Nawngpui na ä, honi kangkawng lä Khrista üng pyng saite täkui-a awng te kätyng-a, äte angxynlyng na-a nang ce lä änawngpaw üng pyng saite täkui-a awng ö.
25Nawngpaw na ä, Khrista lä kangkawng tea bälung aevaw kha kangkawng tähang dü hai pa te kätyng, änawngpui tea bälung aevaw hethang kae te by vi. 26Mä-ai tea cai hai hethang Khrista lä hikä sa te vi dy. Tui hai-a mäse te kätyng-a Säthaw üng lo hai Khrista lä kangkawng tea mäcai te by vi dy. 27Areng lä äma üng kangkawng tähang dü pa te vi dy. Tukätephüng-a äni lä äma üng kangkawng angxynlyng na tea ämaw äcae hawi hai bawi kha äma üng maw-a nähai bawi haw te vi dy. Hikä sa te phüng-a äma üng kangkawng lä khimi üng mimai kätyng aeje te, pawprae te la awng y vi ai dy. Honi kangkawng lä caiping kha cungrü bawi vi ai. 28Hini kätyng-a nawngpaw lä äma üng ätabung tea bälung aevaw te kätyng-a änawngpui tea la bälung aevaw hethang kae. Änawngpui tea bälung aevaw saite lawngtä lä äma tea bälung aevaw te vi. 29Ämi la mä-ai ma üng ätabung tea lä esäre te y. Honi jüng-a Khrista lä kangkawng tea rui te kätyng-a äni lä äma üng ätabung tea rui kha mäcaw te by vi. 30Mä-ai angxynlyng na lä Khrista üng ätabung kaepreng na vi. 31Tukha Caekäcai thung-a “Nawngmäcaw lä nä-awi pä-ai ni bung khaisö kha nawngpui hai aepawng ea awng hawi te vi. Tudylä änini lawng netä lä bungtä-a lawng vi ai” näkha nä vi. 32Hini lä ho saite älo käleng vi. Tungaila kai lä Khrista hai kangkawng aesui saite phüng nang ce tea thui te vi. 33Tudylä nawngmäcaw qütä lä äma tea bälung aevaw te kätyng änawngpui tea la bälung aevaw hethang kae. Nawngpui qütä la änawngpaw tea tämö khai hethang kae.
6Änä-awi, äpä-ai hai cäpaw cänung na
1Caw nade na ä, nang ce lä Areng hai bungtä awng ö te vi. Tukätephüng-a nang ce lä nang ma ce üng nä-awi pä-ai älo na tängai ö hethang kae. Hini kä awng hethang nang ce lä aeteng khaw ö te vi. 2Caekäcai thung-a tärü te lä, “Nang nä-awi, ni nang pä-ai tea tämö khai ba” näkha nä vi. Mosi üng Ubädi thung üng hini Ubädi tea lä Säthaw ma angcü-a aedo saite lo vi. 3“Nang nä-awi ni nang pä-ai tea tämö khai dylä, nang lä tähang kähawi dang kha älawng qawng-a hing sa ai” näkha awng vi.
4Pä-ai na ä, nang ce üng caw nade na tea rang saite lo hai thui kha kädawtho hai ö hang. Honi jüng-a nang ce lä äni ce tea cülä-ü-a Säthaw üng lo mitang hai mätu pa ö.
Ingkung na hai mawsawng na
5Mawsawng na ä, hini älawngpre-a nang ce lä nang ma ce üng ingkung na lo tängai ö. Nang ce lä Khrista üng lo tängai te kätyng-a, nang ma ce üng ingkung na älo tea bälung mäke angxynlyng na hai tängai kha tämö khai ö ba. 6Nang ce üng ingkung ma nang ce tea kheng te kätü-a mimai dang hethang qaitä y vi. Nang ce lä Säthaw üng aely kängai-a nang ma ce üng bälung mäke angxynlyng na hai Khrista üng mawsawng na kätyng sa ö. 7Khimi ce üng mawsawng kätyng sa te cang y, Areng tähang mawsawng sa te kätyng nang ce lä anghawtho kha kälu tea sa ö. 8Mawsawng te läsy, khimi kaelawi te läsy, hawi saite kälu sa dylä, Säthaw ma nang ce tea ävang käting py ai näte mäny ö ba.
9Ingkung na ä, nang ma ce üng mawsawng na tea kai thui te kätyng sa ö ba. Nang ma ce üng mawsawng na tea aethüng hethang hawi saite na sa pa ö hang. Nang ce hai nang ma ce üng mawsawng na üng Ingkung käleng lä Känipre-a awng vi näte aedawng haile ö. Äni lä khimi ce tea mimai kheng te y vi.
Säthaw üng täre aevyng na
10Kangkhüng üng lo nang ce tea kai thui te lä hikä vi. Areng üng haidae käleng hai-a nang ce lä aethaw aela ö. 11Nang ce lä Säthaw ma py saite täre aevyng angxynlyng na tea aelawng ö. Tudylä Setan angra üng hawi y saite kaedawng na tea nang ce lä aedung haw ö ai mang. 12Mä-ai lä khimi ce hai täre aety ö te y. Käni khösang üng haidae hai aenae awng saite angra na, hini älawng käving pre tea pyng saite angra käleng na, älawng qawng-a aenae awng saite na hai täre aety ö te vi. 13Tukätephüng-a nang ce lä Säthaw ma py saite täre aevyng angxynlyng na aelawng ö. Tudylä angra na tyng te kätü-a, nang ce lä aedung haw ö ai mang. Täre aety hethang aerü rüng pyng te kätü-a, nang ce lä cakhi-a aedaw haw ö ai.
14Tukätephüng-a nang ce lä aedung hethang aerü kha awng ö rüng. Säthaw üng lo mitang lä khabai hai aetawng vi. Honi hai angkeng tea kähawi-a aekheng ö ba. Säthaw üng cüng saite lä tatärang-a aedung hai saite süng kä-o kätyng vi. Honi tea nang ce lä aelawng ö. 15Awngneng hethang py saite Angthang Kähawi thui he nang ce lä aerü ö rüng. Tukha hini na lä nang ma ce üng kho painai na tea aecö rüng pa te kätyng vi. 16Hini na cang y, nang ce üng Säthaw tea yng saite lä cakhi-a süng ö. Hini lä reisae na üng khöpui kätyng vi. Hini khöpui hai-a Setan ma kae te maikang saite bälaw cung tea nang ce lä bädü haw ö ai. 17Säthaw üng aeqang saite lä reisae na üng süng lökhu kätyng vi. Honi tea lä aekhu ö ba. Säthaw üng losai lä Muilaw Käcai üng aekei sawngseng kätyng vi. Hini tea nang ce lä kähawi-a süng ö khü ba. 18Kätü qütä-a Muilaw Käcai üng bähawi te kätyng aetang ö ba. Nang ce tähang äte angxynlyng na säbawng hethang Säthaw tea aetang ö ba. Hini kätyng sa haw hethang nang ce lä canglailing-a awng ö. Säthaw üng khimi angxynlyng na tähang aethawsi y käla ma aetang ö jawjaw pa ba. 19Kai tähang la aetang pa jo ba. Säthaw üng ho saite Angthang Kähawi tea mäny hai hethang hai kai lä ri y käla ma thui te kätü qütä-a, Säthaw ma kai tea py te aebäla saite lo thui haw hethang aetang pa ö jo. 20Kai lä Angthang Kähawi thui hethang Isu Khrista ma re saite angtawtha lawngtä vi. Hini kätyng sa te phüng-a kai bung lä thawng thung-a pä-ung te vi. Angthang Kähawi tea ri y käla ma thui he kae te kätyng thui haw hethang kai tähang Säthaw tea aetang pa ö jo.
Kangkhüng üng cibai sa te lo
21Tukhika lä mä-ai üng bälung aevaw saite kangby vi. Äni lä Säthaw üng kälu mitang khü-a sa te vi. Äni ma kai üng phüng angxynlyng na nang ce tea thui pa ai mang ba. Tukätephüng-a nang ce lä kai üng sa saite na hai awng saite na phüng mäny ö ai. 22Tukätephüng-a kai lä äni bung nang ce tea mätaw te vi dy. Tudylä kai ce lä makä awng mei näte nang ce mäny haw hethang hai nang ce tea äni ma aethaw py haw hethang vi.
23Mä-ai üng Pä-ai Säthaw hai Areng Isu Khrista lä nang ce yng saite na tea awngneng saite, bälung aevaw saite hai yng saite na py sy. 24Manila bynglei y saite bälung aevaw te hai-a, mä-ai üng Areng Isu Khrista bung bälung aevaw saite, nang ce angxynlyng na qawng-a Säthaw üng tähang kähawi lä tyng sy.