KOLOSAE
kangkawng tea Pawlae tärü saite cae
Angcü üng älo
Hini cae lä Pawlae ma Rom märü mang A.D. 60-64 khösäning säla-a tärü te daila awng ai. Pawlae lä säning thungtä Ephesi märü-a awng ea Angthang Kähawi thui te kätü-a, Epaphra näsaite khimi lawngtä lä ae-ui kha Isu Khrista tea yng vi dy. Äni ma Kolosae märü-a ly kha Angthang Kähawi thui pa te phüng-a, Khristen kangkawng lawng te vi. Hini kangkawng kangthae thung-a käjüng aesa saite särae na lä kung ea Khrista Angthang Kähawi hai aesui y saite reitae hai ubädi na mätu pa ö te vi. Tukätephüng-a Epaphra lä Rom märü-a awng saite Pawlae tea ly kha äni hai aedüng aethui hawi te vi. Honi pyng-a Pawlae lä Kolosae märü-a awng saite kangkawng tea hini cae tärü te vi. Hini cae üng mawlang kaedawng lä yng saite na tea aethaw py hethang hai kaesyng y mätu saite phüng tea thui mäcai pa hethang hai Isu Khrista üng phung-ang leng saite phüng mätü pa hethang vi.
Äphüng äkädawiky
Angcü üng älo 1:1-8
Khrista üng py te aeqang saite 1:9-2:19
Khrista hai-a kangthae hing saite 2:20-4:6
Kangkhüng üng cibai sa te lo 4:7-18
1Pawlae üng kangkawng na tea kawng saite lo
1Hini lä kai, Pawlae, ma tärü saite cae vi. Säthaw ma re te phüng-a, kai lä Isu Khrista üng angtawtha lawngtä vi. Kai lä mä-ai üng kangby Timothe hai mangtä hi-a awng hawi te vi. Kai ni ma nang ce tea kawng te lo thui hawi te dy ba.
2Kolosae märü-a awng saite Säthaw üng khimi na hai, Khrista hai mangtä aebälung kha awng saite mä-ai üng äpy na tea kai lä hini cae tärü dy.
Mä-ai üng Pä-ai Säthaw ma nang ce tea tähang kähawi hai awngneng saite py sy.
Säthaw tea kawng te lo thui kha aetang pa
3Nang ce tähang aetang saite kätü qütä, mä-ai üng Areng Isu Khrista üng Pä-ai Säthaw tea kai ni lä kawng te lo thui jawjaw hawi te vi. 4Ätephüng-a mei nädylä Isu Khrista tea nang ce üng yng saite hai-a Säthaw üng khimi angxynlyng na tea nang ce ma bälung aevaw saite na kai ni lä thai hawi te phüng-a vi. 5Lo mitang khaw te Angthang Kähawi lä nang ce tea kangmang-a tyng te phüng-a, honi Angthang Kähawi üng py te aethang khai saite phüng tea nang ce lä thai ö te phüng-a, kai ni lä anghawtho hawi dy. Tukätephüng-a khösang mang-a nang ce tähang khai saite aethang khai te tea nang ma ce üng yng saite hai, bälung aevaw saite lä tyng te vi dy. 6Nang ce tea tyng saite Angthang Kähawi lä älawngpre-a awng te mityng qütä, aethang hai dü vi dy. Nang ce lä honi Angthang Kähawi thai angcü kha Säthaw üng tähang kähawi tea mäny te üng hai ma dang te kätyng, mityng qütä awng saite khimi na la dang ö tyng by vi dy. 7Nang ce lä Säthaw üng tähang kähawi tea mäny hai hethang Epaphra ma mätu te vi. Äni lä kai ni hai nang ce tea bälung aevaw saite Khrista üng mawsawng lawngtä vi. Äni lä kai ni üng jüng-a, nang ce thung-a Khrista tähang kälu khüsälü-a sa saite khimi vi. 8Muilaw Käcai te mang üng dang saite nang ce üng bälung aevaw saite phüng tea äni ma kai ni tea thui te vi.
9Tukätephüng-a, nang ce üng angthang thai te phüng-a, nang ce tähang aehae y käla ma kai ni lä aetang jawjaw ö te vi. Säthaw lä nang ce tea mani kätyng awng hai hethang ngai mei näte mäny hethang kai ni lä aetang pa te vi. Säthaw lä nang ce tea Muilaw Käcai tähang hai, thaikaw te bälungkähae py hethang tähang kai ni lä Säthaw tea aetang hawi pa te vi dy. 10Tupyng dylä Areng üng ngai te kätyng awng hethang, Areng ma kawng hai hethang nang ce lä sa haw jawjaw ö ai. Nang ce lä hawi saite kälu angxynlyng na sa ö ai. Tukha nang ce lä Säthaw tea mäny te qawng-a mäny rae ö ai. 11Nang ce lä cüng saite hai änawngsa te awng mang haw hethang Säthaw lä äma üng awng saite haidae angxynlyng na hai nang ce tea aethaw py hethang kai ni lä aetang hawi jawjaw mang. Tukätephüng-a nang ce lä anghawtho ö ai. 12Nang ce lä mä-ai üng Pä-ai Säthaw tea kawng te lo thui haw jawjaw ö ai. Säthaw lä äma üng khimi na tähang kaevang pre thung-a sa rüng ea khai saite tähang kähawi na tea nang ce la kaeteng khaw-a dang hethang nang ce üng bälung mäcai te vi dy. 13Säthaw lä mä-ai bung käving ma pyng saite thung üng aeqang te vi dy. Äni lä mä-ai bung äma üng bälung aevaw saite Äcäpaw üng pre thung-a nähai ö vi dy. 14Äma üng Cäpaw tähang hai-a mä-ai üng hunghö na bälawi kha Setan üng haidae thung üng mä-ai bung Säthaw ma kätho te vi dy.
Khrista üng aesangky saite phung-ang
15Säthaw bung lä ämi la nung haw y ngaila, Khrista lä khimi ce tea Säthaw üng ämaw äcae mätü pa te vi dy. Khrista lä Säthaw üng Cäpaw cälö lawng kha Säthaw ma sa saite angxynlyng na qawng-a aenae awngky te vi. 16Khrista hai-a Säthaw lä äte angxynlyng na sa vi dy. Käni hai älawng, nung haw saite hai nung haw y saite angxynlyng na, phung-ang leng saite änang na hai Känipre üng angtawtha angxynlyng na tea Khrista tähang sa pa te vi dy. 17Äte angxynlyng na awng y te kälang-a ma Khrista lä awng pyng te vi dy. Khrista üng phung-ang hai äte angxynlyng na lä äma ce üng mityng-a cülä-ü-a awng jawjaw pyng ö te vi dy. 18Khrista lä kangkawng üng älö vi. Kangkawng la äni üng ätabung by vi. Äni lä kangkawng tea kähing py saite Kung vi. Äni bung Säthaw ma kädü thung üng angcüky-a mätha kha dungtäsa hing hai pa vi dy. Tukäte hai-a Khrista lä älawng hai käni khösang na üng aely kälengky saite lawngtä vi. 19Tukätephüng-a Säthaw lä äma üng kängai angxynlyng na Äcäpaw tea cungrü hai saite lä äma üng aely ngai phi saite vi dy. 20Säthaw lä äma üng Cäpaw tähang hai Känipre-a awng saite angxynlyng na hai älawngpre-a awng saite angxynlyng na äma tea tyng hai hethang aely ngai te vi. Äma üng Cäpaw lä thinglang qawng-a äthi lawng hai te, hai äte angxynlyng na tea Säthaw lä äma hai aede hethang älang sa pa te vi dy.
21Jangni-a nang ce üng hawi y saite bälung mäke phüng-a, Säthaw hai hanglaw saite mityng-a awng ea lä äni üng täre na lawng ö vi dy. 22Tungaila vaihi Säthaw üng Cäpaw lä khimi-a aelawng kha dü te hai-a nang ce lä Säthaw hai aede haile tyng vi dy. Ätephüng-a Säthaw ma hikä sa te mei nädylä nang ce bung äma maw-a ka te thüng-a, nang ce lä caiping ea hunghö awng y, sa tämang y saite thung-a awng haw hethang tähang vi. 23Nang ce lä Angthang Kähawi tea yng jawjaw kha khimi käcüng-a lawng ö hethang kae. Angthang Kähawi thai ea dang saite aethang khai te üng nang ce lä aemäqaja hethang kae ö te y. Nang ce thai pyng saite hini Angthang Kähawi lä älawngpre mityng qütä awng saite khimi na tea thui pa ö. Kai, Pawlae, lä honi Angthang Kähawi üng mawsawng lawng te vi dy.
Kangkawng tähang Pawlae üng sa saite kälu
24Nang ce tähang mätang bälai saite phüng-a vaihi kai lä anghawtho te vi. Khrista lä kai bung mätang bälai hai he ngai te angxynlyng na tähang-a kai lä aerü rüng te vi dy. Khrista üng ätabung kätyng awng saite kangkawng tähang mätang saite tea äma üng aely kängai cungrü hai hethang kai lä mätang te vi. 25Säthaw lä kai bung äma üng lo cungrü hai hethang, nang ce tea äma üng Angthang Kähawi thui hai hethang mätaw te vi. Tukätephüng-a kai lä kangkawng üng mawsawng lawng te vi dy. 26Jangni-a Säthaw lä äma üng mawlang kaedawng khimi ce tea mäny hethang py y ngaila, äni üng khimi na tea vaihi lä täphawng pa vi dy. 27Säthaw lä ceng kälang na tähang äma sa saite na matangtä cangxei hethang hawi mei näte äma üng khimi na tea mäny hai pa ö vi dy. Hokä sa saite lä khimi kälang na näsaite nang ce thung-a, Khrista la awng dy näte vi. Tukätephüng-a Säthaw üng phung-ang aesang saite tea nang ce la dang haw ai näkha aethang khai haw te vi. 28Kai ce lä Khrista üng Angthang khimi qütä tea thui ö vi. Säthaw ma py saite bälung kähae hai kai ce lä khimi qütä tea mäcü ö te vi. Khrista hai mangtä aede hethang khimi qütä lä Säthaw maw-a tyng te kätü-a cungrü hai hethang kai ce lä honi kätyng sa ö te vi. 29Tukätephüng-a kai lä hini kätyng aethawsa kha kälu sa te vi. Khrista ma py saite phung-ang lä kai üng äthung-a awng kha sa te vi ba.
21Kai lä nang ce hai, Leodikia märü üng khimi na, kai bung nung vai y saite khimi kälang na tea säbawng hethang matangtä bälung mawng mei näte nang ce tea mäny hai hethang ngai te vi. 2Kai lä äte makäte phüng-a hini kätyng sa mei nädylä äni ce angxynlyng tea aethaw py hethang ngai te vi. Äma ce tingtawi bälung aevaw te hai aede ö näkha thui hethang kai lä ngai te vi. Säthaw üng älo käcai tea kätüng khaw-a thaikaw bawi te hai aethawng saite cangxei hethang hawi bärai te na äni ce tea dang hai bawi hethang kai lä ngai te vi. Honi kätyng Khrista näte Säthaw üng mätaw te tea äni ce lä mäny ö ai mang. 3Säthaw lä ho saite bälungkähae hai ävang käting angthang tea Khrista ma nang ce tea mänykaw hai te vi.
4Ämi ma la lo kätui hai nang ce tea kaeling kaemae sa ea bähawi haw y hethang, kai lä hini kätyng thui hethang ngai vi. 5Kai üng ätabung lä nang ce hai hanglaw ngaila, bälung kaedawng-a lä nang ce hai mangtä awng jawjaw te vi. Nang ce lä bälung mangtä awng ea Khrista tea yng te leng phi ö te vi näkha mäny te phüng-a kai lä anghawtho bärai vi.
Khrista hai mangtä hing saite
6Nang ce lä Khrista Isu tea “Areng” näkha nä hethang dang te phüng-a, äni hai bungtä awng jawjaw ö te vi. 7Äni tea nang ce üng angjüng lä ru kha awng ö ba. Äni üng lo tea tängai khü kha hing ö. Epaphra hai äni üng rawijae na ma nang ce tea mätu te kätyng, nang ce üng yng saite lä ca te qawng-a ca khi ö rae ba. Säthaw tea kawng te lo thui kha bälaw jawjaw ö ba.
8Ämi ma la nang ce tea mäthang sa kha ne y hethang sädi khai ö. Särae kälang na lä khimi ce üng reitae, käni khösang tea pyng saite Setan angra te üng ly te kaedawng hai bälung kähae na, nang ce tea mätu ö te vi. Honi kaedawng hai bälung kähae na lä Khrista hai aesui te y lyng. 9Khrista lä khimi-a aelawng te kätü-a, äni lä Säthaw üng cungrü saite kätyng hing te vi. 10Nang ce lä Khrista hai mangtä awng te phüng-a, cungrü ö te vi dy. Äni lä haidae leng saite angra na hai angxynlyng na tea pyng pa te vi.
11Khrista hai bungtä awng te phüng-a, nang ce lä lengkhüng täke te dang ö pyng te vi dy. Honi lengkhüng täke te lä khimi ce ma täke te y. Hunghö sa he ngai saite tea kädephae haw hethang Khrista lä nang ce tea äma üng lengkhüng täke saite hai sa te vi. 12Nang ce lä baptismae la te kätü-a, nang ce üng hunghö sa he ngai saite tea Khrista hai mangtä ö pyng te kätyng awng haw vi dy. Äni bung kädü thung üng mätha kha hing hai pa saite Säthaw üng phung-ang tea nang ce lä yng te phüng-a, Khrista hai mangtä dü saite thung üng nang ce la hing haile ö te by vi dy. 13Jangni-a nang ce lä hunghö sa kha reitae-a hui y saite khimi kälang na te phüng-a, dü saite na kätyng vi dy. Tungaila Säthaw lä Khrista hai mangtä nang ce tea hing hai te vi dy. Mä-ai üng hunghö angxynlyng na tea Säthaw lä bälawi vi dy. 14Mä-ai üng sa tämang saite tärü te cae tea mäthuija kha khai vi dy. Honi cae tea Khrista üng thinglang qawng-a täheng ea täphra pa te vi dy. 15Säthaw lä phung-ang leng saite angra na tea Khrista üng thinglang hai-a bäja te tea Känipre üng angtawtha na hai khimi ce maw-a mätü pa vi dy.
16Tukätephüng-a, reitae thung-a tärü te kätyng ca te, nei te, reitae üng pawi sa te, law se te üng pawi sa te, Aehae te Käni-a, nang ce lä hui y te phüng-a, nang ce tea khimi ce ma cy ö hang sy. 17Honi jae saite na hai reitae na lä vaimaw mang-a tyng hethang awng saite kaekhui haetä kätyng vi. Khrista lawngtä xyng ni mitang khaw te kae. 18Särae kälang na lä sa tämang te hai aemäneng kha Känipre üng angtawtha na tea cäphaw hethang mätu pa te vi. Äni ce üng the saite mang-a hui ö hang ba. Honi kätyng hui dylä, nang ce üng aeqang saite vang lä laja ö ai. Honi särae na lä äsämai mang aetüng te phüng-a, Säthaw üng Angthang tea hawihai pailai thaikaw te vi näkha näte lä äni ce üng käjüng aesa ö saite na kae. Äni ce lä khimi ce üng kaedawng hai thui ea aethaw ö vi dy. Tungaila äni ce aethaw hai nae lä äte haetä la awng y lyng. 19Äni ce lä ätabung üng älö kätyng awng saite Khrista tea aenyng ö te y vi dy. Khrista üng rui saite phüng-a, ätabung-a awng saite äxingxü na hai aethaw rui na lä aesätawng ea ca hethang dang kha Säthaw üng aely kängai-a ätabung angxynlyng na lä ryng ö te vi dy.
Khrista hai mangtä dü kha hing saite
20Nang ce lä Khrista hai mangtä dü pyng vi dy te phüng-a, hini älawng üng pyng saite na tea nang ce lä tängai hethang ngai ö y dy lyng. Tukätephüng-a ätemakä älawng üng pyng saite na awng te kätyng, nang ce lä älawngpre üng reitae tea tängai ö te vi rawng mei. 21Äte makäte phüng-a, “Honi tea süng hang. Mäteng hang. Aela hang,” näsaite ubädi na tea nang ce lä hui ö vi ai rawng mei. 22Hini ubädi na tea tawng vai vi dylä, hini angxynlyng na lä äte la ävang ting ö te y vi. Hini na lä khimi ce ma mätu saite reitae na kae. 23Hini mätu saite na lä bälunghae te kätyng awng ö te vi. Honi mätu saite na tea Säthaw tähang aethaw aesa saite bälung hai mä-ai ma tea aemäneng saite lä mä-ai ma üng ätabung tea känaw py te hai aetawng vi. Tungaila honi mätu saite na lä hunghö sa y hethang säbawng haw y lyng.
3Säthaw üng aely kängai hai hing saite
1Nang ce lä Khrista hai mangtä kädü thung üng aetha tyng te phüng-a, Säthaw üng bangtang mang-a aety kha awng te Khrista üng mityng, Känipre hai aesui saite na tea ngai jawjaw ö ba. 2Nang ce lä älawngpre hai aesui saite na tea aedawng y käla ma Känipre hai aesui saite na tea phai aedawng ö lawi. 3Äte makäte phüng-a mei nädylä nang ce lä dü ö pyng te vi dy. Vaihi nang ce üng hing saite lä Säthaw tea Khrista hai mangtä ho ea khai te vi. 4Nang ce üng hing saite langdüng lä Khrista vi. Äni lä älawngpre-a ly haile te kätü-a, nang ce la äni üng phung-ang dang kha äni hai mangtä tho ö by ai.
Hing saite kangrüng hai kangthae
5Tudylä nang ce lä bädö saite bälung üng kängai-a hui ö hang ba. Täkübäjang sa saite na, cai y saite na, deirei saite na, ngaiphi tüng y sa hethang ngai saite na, ae-aw saite bälung na awng ö vi hang lawi. (Ae-aw saite bälung näte lä mimi tea cäphaw te kätyng by vi.) 6Khimi ce lä hini kätyng sa te phüng-a, Säthaw lä äni ce tea dengpy vi ai. Hini käsi na phüng-a, Säthaw üng dengpy saite lä äma üng älo tängai y saite na qawng-a tyng tätang khaw ai. 7Jangni-a nang ce lä honi hawi y saite lang mang-a hui kha awng vävawi ö te vi dy. Khrista tea yng y te kälang-a lä, honi käsi na thung-a nang ma ce ma awng vai ö te vi dy.
8Tungaila vaihi lä hini na tea nang ce sa hethang kae ö y dy ba. Hini na lä kädawtho saite na, rang saite na, esäre saite na, käsi prawng saite na hai täbawng mang lo käcai y tho saite na tea nang ce lä mäqaw ö la. 9Nang ce lä lawng lawngtä tea älo kaeling kaemae aethui ö vi hang. Nang ce lä nang ma ce üng hawi y sa te na tea khaisö ö lawi. 10Nang ce lä vaihi khimi kangthae-a aelawng ö te vi dy. Säthaw lä nang ce üng äthung-a kähawi aeme aeqa saite na mäkung kha äma üng ämaw äcae hai aetawng rung khytä sa te vi dy. Tukätephüng-a nang ce lä äni bung tätang khaw-a mäny ö ai. 11Hini phüng-a lä, Judae khimi läsy, ceng kälang khimi läsy, lengkhüng täke te läsy, täke y te läsy, khimi kärang läsy, kärang y läsy, mawsawng läsy, mawsawng y läsy, awng y dy lyng. Khrista lawngtä ni aely lengky te kae. Äni lä yng saite khimi qütä thung-a awng bawi te vi.
12Nang ce lä Säthaw ma re saite khimi na vi. Säthaw lä nang ce bung bälung aevaw kha khimi käcai-a bälawng te vi dy. Tukätephüng-a nang ce lä bäheng te, änawng hawi te, aemäneng te, bälung äkäneng awng saite hai änawngsa saite na hai-a awng ö. 13Nang ce lä nang ma ce tingtawi kädawtho ö hang. Lawngtä ma nang tea sa tämang dylä, äni üng sa tämang saite tea bälawi pa. Areng lä nang ce üng sa tämang saite tea bälawi te kätyng nang ce la äpy üng sa tämang saite tea bälawi pa ö jo. 14Aely lengky te lä nang ma ce tingtawi lawng lawngtä tea bälung aevaw ö. Honi kätyng lawng lawngtä tea nang ce lä bälung aevaw te phüng-a, nang ce rawijae aesa saite lä cungrü ö ai dy mang. 15Khrista üng awngneng saite lä nang ce üng bälung thung-a pyng sy. Nang ce angxynlyng lä ätabung haetä üng kaepreng na kae vi. Tukätephüng-a nang ce bung lä awngneng saite thung-a mangtä awng hai hethang Säthaw ma re te vi dy. Tudylä Säthaw tea nang ce lä kawng te lo thui ö lawi. 16Khrista üng lo angthang tea kätü qütä aedawng ö ba. Nang ce lä lawngtä tea lawngtä Khrista üng Angthang aemätu kha bälunghae saite angxynlyng na hai aemäcü ö. Nang ce üng bälung mäke angxynlyng na hai Säthaw tea Sam ae-awi na, Säthaw tea bälaw saite ae-awi na, Säthaw üng Angthang hai ae-awi na thui kha kawng ö lawi. 17Nang ce lä kälu sa te hai, älo thui saite angxynlyng na hai Areng Isu üng jüng-a sa pa ö. Areng Isu hai-a nang ce lä Säthaw tea kawng te lo thui jawjaw ö ba.
Pawlae üng angtu thui saite lo
18Nawngpui na ä, nang ma ce üng nawngpaw na ma pyng saite täkui-a awng kha thui saite lo tea tängai ö. Areng Isu üng äkähui na lä hini kätyng sa hethang kae.
19Nawngpaw na ä, nang ma ce üng nawngpui na tea bälung aevaw ö. Äni ce tea lä sakälö khü pa ö hang ba.
20Nade na ä, nang ma ce üng nä-awi, pä-ai lo angxynlyng na tängai jawjaw ö ba. Nang ce honi kätyng tängai ö dylä, Areng üng bälung tea kawng hai ai.
21Pä-ai na ä, nang ce üng caw nade na tea äte la sa y käla ma kädawtho hai ö hang. Hokä sa dylä, äni ce lä aethawsi ö ai.
22Mawsawng na ä, nang ma ce üng ingkung na lo tängai ö. Ingkung na lä nang ce tea bälaw hethang kheng te thüng-a, äni ce üng kängai xyngtä tähang lä sa ö hang. Säthaw tea tämö khai te phüng-a, nang ce lä bälung mitang khaw-a awng te hai kälu sa ö ba. 23Äte makäti kälu sa ngaila, nang ce lä khimi ce üng kängai-a sa ö hethang y lyng. Säthaw üng kängai-a sa te kätyng, bälung mäke angxynlyng na aepy te hai-a nang ce lä sa ö ba. 24Areng Isu lä nang ce üng kälu sa te tähang ävang py ai näsaite tea lä mäny ö. Areng lä äma üng khimi na tähang sa rüng saite ävang na nang ce tea py ai. Nang ce ma mawsawng sa tätang khaw saite Areng lä Khrista vi. 25Khimi lawngtä hunghö sa dylä hunghö sa te kätyng ävang tea lä Säthaw ma dengpy ai. Säthaw lä ämi üng mimai tea la kheng te y vi.
41Ingkung na ä, nang ma ce üng mawsawng na tähang kätüng hai kähawi-a kheng ö ba. Nang ce la Känipre-a awng saite Areng üng mawsawng na vi näte mäny ö ba.
Älang mätü pa
2Aetang te mäqaw ö hang. Aetang te kätü-a lä aethawli y käla ma Säthaw tea kawng te lo thui jawjaw ö ba. 3Nang ce lä kai ce tähang la aetang pa ö jo. Tudylä Säthaw lä äma üng angthang thui hethang kai ce tea kätho pä-awng vi ai. Tukätephüng-a kai ce lä jangni-a äni ce mäny vai y saite Khrista üng Angthang khimi ce tea thui haw ö ai. Hini Angthang thui te phüng-a kai bung lä vaihi thawng thung-a pä-ung te vi. 4Kai lä thui hethang kae saite honi Angthang tea caiping-a khimipui na tea thui haw jawjaw hethang nang ce ma aetang pa ö jo ba.
5Nang ce lä Areng Isu tea yng y saite khimi na bung bälung kähae hai sa te kätü tea kähawi-a tawng ö ba. Areng Isu tea yng y saite khimi na maw-a nang ce lä bälung haesy-a awng ö ba. Sa hethang dang saite älang angxynlyng na tea kähawi-a nang ce lä tawng ö. 6Nang ce la äni ce tea bälung aevaw kha äni ce ma bälung aevaw tyng rung khytä sa ö. Angthang Kähawi phüng tähang düng saite khimi qütä na tea hawihai pailai makä mäthang ai mei näte mäny ö ba.
Kangkhüng üng cibai sa te lo
7Tukhika ma kai üng angthang na nang ce tea thui king pa ai mang. Äni lä kai üng bälung aevaw saite Khristen kangby, mitang khü-a kai hai mangtä Areng üng kälu sa te vi. 8Kai ma äni bung nang ce tea mätaw te lä kai ce üng angthang thui king hethang hai nang ce tea aethaw py hethang tähang vi. 9Äni lä Onesimae hai mangtä tyng ai mang. Onesimae lä mä-ai üng bälung aevaw saite yng te khimi lawngtä vi. Äni lä nang ce awng saite märü üng khimi käyng na thung üng mitang khüsälü te khimi lawngtä vi. Änini ma hi üng angthang na nang ce tea thui king hawi ai.
10Kai hai mangtä thawng thung-a pä-ung saite Aristaku ma nang ce tea cibai sa te lo thui by mang ba. Banaba üng kangby lawng saite Marka la nang ce tea cibai sa te lo thui by. Äni üng angthang tärü te cae tea nang ce lä dang ö dy. Nang ce tea änini tyng dylä lady ö ba. 11Justus näkha mäthi saite Isu la nang ce tea cibai sa te lo thui by. Äni ce lawng thungtä lä Säthaw üng kälu tea kai hai mangtä sa saite Judae khimi na vi. Äni ce phüng-a kai lä aethaw dang bärai te vi.
12Nang ce üng lawngtä Khrista Isu üng mawsawng Epaphra, la nang ce tea cibai sa te lo thui by vi. Nang ce tähang äni lä aetang jawjaw pa te vi. Nang ce üng yng saite cakhi hethang Säthaw üng sa pa saite na tea nang ce mäny hethang äni ma aetang jawjaw pa te vi dy. 13Äni lä nang ce tähang hai Leodikia märü, Herapolis märü-a awng saite khimi na tähang aethaw rae kha kälu sa saite tea kai lä thui haw vi. 14Mä-ai üng bälung aevaw saite rawijae latang Luka hai Dema ni ma la nang ce tea cibai sa te lo thui hawi by.
15Leodikia märü-a awng saite yng te khimi na tea kai üng ämaw aedawng saite phüng thui pa ö jo. Numpha hai äma ing üng kangkawng na tea la cibai sa te lo angthang thui pa ö ba. 16Hini cae tea nang ce üng kangkawng khimi na ma phai pyng dylä, Laodikia kangkawng-a awng saite khimi na la phai ö jo sy ba. Leodikia märü-a awng saite kangkawng na tähang, kai ma tärü saite cae tea la nang ce phai ö jo ba. 17Nang ce ma Akhipa tea, “Areng ma ae-y kha sa hethang py saite kälu tea lä khüng king rung khytä sa he kae” näkha thui pa ö ba.
18Kai, Pawlae, üng hini cibai sa saite lo tea lä kai ma üng kö hai tärü khe te vi ba. Kai bung thawng thung-a pä-ung te tea nang ce lä aedawng haile tyng kha aetang pa ö jo ba.
Säthaw ma nang ce tea tähang kähawi py jo sy. Amen.