Angtawtha
na üng sa saite kälu
Angcü üng älo
Hini cae lä latang lawng saite Luka ma tärü kha Angthang Kähawi Luka üng kaebäsa vi. Luka üng Angthang Kähawi kätyng Theophilu näte lawng ta tähang tärü te vi. Hini tea lä A.D. 63 Khösäning kätü-a tärü te daila awng ai. Hini cae-u üng aely lengky saite phüng lä kangkawng angcü üng aepreng saite hai leng saite na phüng qa te vi. Hini cae-u lä Angthang Kähawi na hai angtawtha na ma kangkawng na tähang tärü saite cae hai mäsa pa te cae vi. Honi thung üng aely lengky saite lä 1:8 tä vi. Hini bäkung thung-a Muilaw Käcai cäqa hethang älo aedo te awng vi. Tukätephüng-a hini cae-u lä Muilaw Käcai ma sa saite phüng thui haw te vi. Hini cae-u tea lä känetä täphü haw te vi. Angcü haetä lä Jerusalem märü hai Judae khö särawng dawngpa üng aeting saite phüng thui kha angtawtha Peterae lä aely lengky saite khimi vi. Äbaeni-a lä pre kälang na-a angtawtha na ly kha Angthang Kähawi thui ö te vi. Honi mityng kangthae na lä kangkawng kangthae na lawng ö te vi. Hini äbaeni thung-a aely lengky saite khimi lä Pawlae vi. Hini cae-u thung-a nung te xhuxa saite lä Judae khimi üng Khristen na hai ceng kälang Khristen na lä bälung aedü te awng ö y vi. Hini cae-u lä Angthang Kähawi thui he Jerusalem märü üng hai Rom märü khytä ly saite khölawng näkha thui haw te vi.
Äphüng äkädawiky
Isu üng Angthang Kähawi thui hethang aerü saite 1:1-26
A. Areng Isu kangkhüng üng py saite särilo hai aedo saite 1:1-14
B. Judae üng mityng tea la saite khimi 1:15-26
Jerusalem märü-a Areng Isu üng Angthang Kähawi thui saite 2:1-8:3
Judae khö hai Samari khö-a Angthang Kähawi thui saite 8:4-12:25
Pawlae üng kälu käsawng sa saite 13:1-28:31
A. Angcü üng khölawng tho saite 13:1-14:28
B. Jerusalem märü-a sa saite kangkawng na üng kawngci 15:1-35
C. Äbaeni üng khölawng tho saite 15:36-18:22
D. Ämäthung üng khölawng tho saite 18:23-21:16
E. Jerusalem märü, Ketäri märü hai Rom märü na-a Pawlae bung thawng thung-a khai saite 21:17-28:31
11-2Änang Theophilu ä, kai ma nang tähang jangni-a tärü saite cae-u-a lä, Isu lä Känipre-a paw y te kälang-a, äma üng sa saite hai mätu saite phüng angxynlyng na vi. Isu lä älawngpre-a, awng te kätü-a re pyng saite angtawtha na tea Muilaw Käcai hai angtu thui pa dy. 3Isu lä mätang kha dü pyng ea angtawtha na tea käni ruibälitä ämaw aetüng kha äma lä hing kha awng haile te mäny hethang äma bung mätü leilae pa. Isu lä angtawtha na tea Säthaw üng pre phüng thui pa. 4Känitä-a, Isu lä angtawtha na hai mangtä awng ea “Nang ce Jerusalem märü üng ly ö ja hang. Ä-ai ma mätaw he aedo saite Muilaw Käcai tea aering kha awng ö. Honi phüng na kai ma nang ce tea thui pyng te thai ö vi dy. 5Baptismae Johan lä tui hai baptismae py dy. Tungaila käni qae y tea Säthaw ma Muilaw Käcai hai baptismae py vi ai” näpa.
Isu lä Känipre-a paw te
6Tupyng-a angtawtha na lä aekäcö kha awng ea Isu tea “Areng ä, vaini üng kätü lä Isrelae khimi na tähang äma ce üng pre py haile he kätü dy mei” näkha düng pa.
7Isu ma angtawtha na tea “Ä-ai Säthaw lä aenae äma üng aely ngai te kätyng kätü käni na khai pa te nang ce lä mäny haw y lyng. 81:8 Mat 28:19; Mar 16:15-19; Luk 24:47-48Tungaila Muilaw Käcai nang ce tea tyng te kätü-a, nang ce lä haidae na dang kha Jerusalem märü, Judae khö angxynlyng hai Samari khö, khöteng täki khytä, khimi ce tea kai üng angthang thui ö ai” näpa. 9Älo thui pyng ea angtawtha na üng ämi känung-a Säthaw ma äni bung Känipre mang-a nähaija pa vi dy. Tämai ma khu kha angtawtha na lä äni bung nung ö y vi dy.
10Angtawtha na lä käni mang-a kheng kha awng ea, känih kanglung aekhu saite Känipre Säthaw üng angtawtha lawng netä lä äni ce tea aetüng pa vi. 11Äni ce ma “Kalile khimi ce ä, ätephüng-a aedaw kha käni mang-a kheng ö te vi mei. Känipre-a paw saite Isu bung nung te kätyng äni lä äbaeni cäqa haile vi ai” näkha thui pa.
Angtawtha na aetang pa
12Tupyng-a angtawtha na lä Olive kung na awng saite me anghung mang üng Jerusalem märü-a vawi haile ö dy. Olive kung na awng saite me anghung lä Jerusalem märü hai hanglaw bärai te y vi. 131:13 Mat 10:2-4; Mar 3:16-19; Luk 6:14-16Äni ce lä märü thung-a tyng ea äma ce awng saite ing üng äqawng-a paw ö dy. Honi mityng-a Peterae, Johan, Jaeko, Andru, Philip, Thawmae, Barthawleme, Mathai, Alphai üng cäpaw Jaeko, äma ce pre tea pyng hethang ngai hai ky saite Simon hai Jaeko üng cäpaw Judae ce awng ö vi. 14Angtawtha na angxynlyng lä aekäcö kha mangtä aetang leilae ö dy. Isu tea säbawng saite nawngmädi na hai äni üng nä-awi Maeri, äkangby na la awng ö by vi.
Peterae ma älo thui pa
15Kätü käni qae saite kätü-a, Isu tea Yng saite khimi lawng cungvai kuisytä na lä aekäcö ö kha awng ea Peterae lä aedaw kha älo thui pa dy. 16“By jä-ai na ä, Isu bung ne saite khimi na tea lang mätü saite lä Judae Iskriota vi. Caekäcai ping thung-a, Judae phüng thui rüng te kätyng cungrü hai te vi dy. Honi losai lä jangni-a Muilaw Käcai ma Davidae sanphrang tea thui hai pa te vi. 17Isu ma Judae la mä-ai hai mangtä kälu sa hethang re te vi kha mä-ai üng khimi by vi.
18(Judae lä hawi y saite kälu vang tangkae hai lai rang pa vi. Honi lai mityng-a kaibu kaerae kha äjo kawi ea täri na tho te hai ma dü pa vi. 19Honi angthang lä Jerusalem märü üng khimi angxynlyng na ma thai ö vi. Tukätephüng-a honi lai tea äma ce üng lo hai “Akedama” näkha näpa. Honi lä äthi tho saite lai näkha thui te vi.)
20“Davidae sanphrang ma Sam ae-awi cae-u thung-a.
‘Äni üng ing lä khimi deqang sy. Honi ing-a ämi la awng hang sy.
Äni üng mätawngky kälu la khimi kälang na lasy’ näkha tärü vi.
21-22“Tukätephüng-a Isu bung Säthaw ma aetha haile vi näte phüng na mä-ai hai mangtä thui hethang tähang-a khimi lawngtä bung re ö si. Honi khimi lä Baptismae Johan üng baptismae sa saite üng hai, Isu lä mä-ai hai mangtä khölawng tho saite kätü üng hai, äma Känipre-a paw te khytä, mä-ai hai mangtä awng saite khimi lawng he kae” näpa.
23Tukha äni ce lä khimi lawng netä bung re ö dy. Änini lä Basaba näsaite Josefae (Justus näkha la mäny ö te vi) hai Mathia ni vi. 24-25Tukha äni ce lä aetang ö ea “Areng ä, nang lä khimi ce bälung mäny saite kung vi. Judae Iskriota lä äma aeteng saite mityng-a ly te vi dy. Judae mityng-a angtawtha ämi bung re dy mei näte Areng ä, kai ce tea mätü e.” 26Tupyng-a phui aepy saite kätü-a, Mathia lä dang vi kha äni lä angtawtha lawng hawlai haetä thung üng khimi-a aelawng by vi dy.
2Pengtikos pawi käni
1Pengtikos pawi tyng te kätü-a, yng saite angxynlyng na lä mityng kähaetä-a mangtä aekäcö kha awng ö vi. 2Qengtäma käni mang üng aeli kangcai tho te kätyng ätüng lä tyng pa vi. Honi ätüng lä äni ce aety saite mityng qütä-a kawi pheng pa vi dy. 3Äni ce lä mai bälai kätyng aetüng te nung ö vi. Honi na lä aetäprei kha käyng na lawng lawngtä üng qawng-a tyng pa ö vi dy. 4Tukha Muilaw Käcai ma äni ce angxynlyng tea rui hai pa vi dy. Muilaw Käcai ma älo aepe hai te kätyng-a, äni ce lä älo amäjy cawngkhang na hai aepe ö vi dy.
5Honi kätü-a älawngpre kälang mityng mang üng awng saite Judae na lä ly kha Jerusalem märü-a awng ö te vi. Äni ce lä Säthaw tea cäphaw ö te vi. 6Äni ce hani tüng na thai te kätü-a lä, ly kha aekäcüng ö te vi. Khimi qütä lä yng saite na üng älo aepe te äma ce üng älo na hai, thai ö te phüng-a, äni ce lä cangxei ö vi dy. 7Äni ce lä cangxei ö phi te phüng-a “Älo thui saite hini khimi angxynlyng na lä Kalile khimi ce y vi nang mei. 8Makä sa kha mä-ai lä mä-ai ma ce üng älo na hai-a, thai haw ö te vi mei. 9-10Mä-ai lä Parthai pre, Medai pre, Elamitai pre, Mesopotamia pre, Judae khö, Kapadokia khö, Ponta khö, Asia pre cäpi, Phrukia khö, Pamphulia khö, Aikuta pre, Sarene märü teng üng Lebia khö hai, Rom märü na mang üng hai ly ö bawi te vi. 11Mä-ai thung-a Judae khimi na lä awng te by vi. Judae na üng Säthaw tea cäphaw saite ceng kälang na la awng by vi. Kreti näsaite angrai sälawng qawng üng khimi na hai Arabia pre üng awng saite khimi na la awng ö te vi. Tungaila Säthaw üng cangxei saite phüng äni ce thui saite lä mä-ai ma ce üng lo na hai thai ö te vi” näkha aethui ö dy. 12Tukha äni ce lä cangxei te hai thui haw y kha äma ce ma lawng lawngtä tea “Hini lä ätemakä näte vi nang mei” näkha aedüng ö vi dy.
13Tungaila phütä khimi ce ma aenui aepai hai-a “Äni ce lä jö, ra bärui ö te kae ecy” näkha näpa.
Peterae ma älo thui pa
14Tukha Peterae lä angtawtha lawng hawlai haetä na hai mangtä aedaw kha khimipui na tea “By jä-ai Judae na hai Jerusalem märü-a awng saite rawijae na ä, kai ma hikä awng saite phüng nang ce tea thui mäcai he ngai. Nang ce lä kähawi-a tängai ö. 15Hini khimi ce lä nang ce üng dawng te kätyng-a jö, ra na bärui ö te y lyng. Vaihi kädang thawde naeri täkawtä kae vi rawng. 16Hini lä buisaw Jola ma thui rüng saite kätyng kae vi.
17‘Säthaw ma kangkhüng üng käni-a lä, kai ma khimi angxynlyng na tea kai ma üng Muilaw Käcai py vi ai.
Nang üng cäpaw cänung na ma buisaw lo thui ö vi ai.
Nang üng särai na lä, äsämai na nung ö vi ai.
Nang üng mätawng nawngmäcaw na lä aemang na nung ö vi ai.
18Honi käni-a lä kai tea yng saite mawsawng tangnae,
nawngmädi nawngmäcaw na tea mäteng kai ma üng Muilaw Käcai mätaw vi ai.
Äni ce ma buisaw lo thui ö vi ai.
19Kai ma käni mang-a cangxei saite na sa pa ai.
Älawng qawng-a kamarae na sa ai.
Älawng qawng-a khimi ce lä äthi na hai maikhü na nung ö vi ai.
20Areng üng phung-ang käni käleng tyng y te kälang-a,
käni lä käving-a aelawng kha Law lä äthi kätyng thing vi ai.
21Areng tea ka saite khimi angxynlyng na bung,
Säthaw ma aeqang ö pa vi ai näkha ätüng käleng hai-a thui pa dy.’
22“Isrelae khimi ce ä, hini älo na tängai ö! Säthaw ma Nazare märü üng Isu tea cangxei saite na hai kamarae na sa hethang aenae py pa vi. Honi hai-a Säthaw lä Isu bung mätaw kha mätü te vi. Honi tea nang ma ce ma lä mäny ö te kae be. 23Säthaw lä äma üng aedawng te aely kängai saite te phüng-a, Isu bung nang ce tea a te vi dy. Tukha nang ce lä khimi kähawi y na hai äni bung thinglang qawng-a sengmu hai täheng kha bädü pa ö te vi. 24Tungaila Säthaw ma Isu bung kädü thung üng mätha haile tyng vi dy. Äni bung mätang te thung üng aelawi hai te vi. Kädü mi lä äni tea mäkhing haw y te phüng-a vi. 25Davidae ma Isu phüng thui te lä,
‘Kai, Mesia, lä Areng Säthaw bung kai üng äteng-a nung jawjaw te vi.
Äni lä kai üng bangtang mang-a awng te phüng-a, kai lä ri y vi ai.
26Tukätephüng-a kai lä anghawtho kha Säthaw tea bälaw te vi.
Kai üng ätabung tähang la aethang khai te awng vi.
27Ätephüng-a mei nädylä nang ma kai bung angqaw khaw-a khaisö y vi ai.
Kai lä Areng üng älo tängai te hai, tämö khai te phüng-a, kai üng ätabung täprawng-a rawng hai pa y vi ai.
28Nang lä kai tea hing te lolang mätü te vi.
Nang ma kai tea awng hai te phüng-a, kai lä tengxyng y kawngphi vi’ näkha näpa.
29“Rawijae na ä, nang ce tea tätang khü-a kai lä thui te vi. Mä-ai üng kangsi Davidae lä dü kha äni bung khimi ce ma ö pa te vi. Tukha äni üng täprawng lä vaini khytä hi-a awng rawng. 30Tungaila äni lä buisaw lawngtä vi kha Säthaw lä äni üng älo aedo te tea mäny vi. Säthaw lä Davidae üng kaesui lawngtä bung Davidae kätyng-a, sanphrang sa hai vi ai näte äma lä mäny te vi. 31Tukha Säthaw ma makä sa ai mei näte Davidae lä mäny vi te phüng-a,
‘Mesia lä aetha be ai näte thui pa vi.
Säthaw lä äni bung täprawng-a khaisö y vi ai. Äni üng ätabung lä täprawng-a rawng hai pa y vi ai’ näpa.
32“Honi Isu bung Säthaw ma aetha hai tyng pa vi dy näte kai ce lä nung khe kha khimi ce tea thui haw ö te vi. 33Säthaw ma Isu bung äma üng bangtang mang-a khai kha Äpä-ai ma aedo saite Muilaw Käcai tea äni lä dang vi dy. Nang ce vaihi nung kha thai saite lä Areng ma mä-ai tea py saite äni üng lasawng vi. 34-35Sanphrang Davidae lä Känipre mang-a paw te y. Tungaila äni thui te lä
‘Kai üng Areng tea Säthaw ma thui pa te lä,
“Nang üng täre na bung nang üng äkho täkui-a,
khai te khytä kai üng bangtang mang-a, aety nä be”’ näpa.
36“Tudylä Isrelae khimi na ä, nang ce ma thinglang qawng-a täheng saite Isu bung Säthaw ma Areng hai Mesia-a bälawng dy näte, nang ce angxynlyng tea mäny he ngai hai te vi” näkha ätüng käleng hai-a thui pa dy.
37Peterae thui saite na khimi ce ma thai te kätü-a lä, äni ce lä bälung hawi y phi ö pa vi dy. Peterae hai angtawtha kälang na tea “Rawijae na ä, kai ce lä makä sa ai dy mei” näpa.
38Peterae ma lä äni ce tea “Nang ce angxynlyng hunghö thung üng aedawng mäkhüng ö lawi. Isu Khrista üng ämüng hai-a, nang ce lä baptismae la ö. Tudylä nang ce üng hunghö na Säthaw ma bälawi ai mang. Tukha nang ce lä Muilaw Käcai dang ai. 39Säthaw ma hini aedo saite lo lä, nang ce hai nang ma ce üng nade na tähang py te vi. Hini aedo saite lo lä, kähanglaw-a awng saite nang ce angxynlyng na tähang vi. Mä-ai üng Säthaw ma ka saite khimi angxynlyng na tähang vi.”
40Peterae lä kälang älo na hai, äni ce tea kähawi-a, täru khi pa dy. Äni ma “Säthaw lä hawi y saite na tea dengpy ai. Nang ce lä äni ce kätyng awng ö hang” näkha näpa. 41Äni üng älo tängai saite Khimi ce lä baptismae la ö dy. Tukha honi käni-a khimi sang thungtä tingtang Isu tea yng kha äni ce üng äpy na-a lawng ö vi dy.
Yng saite na üng kähing sai
42Äni ce lä angtawtha na üng mätu te lo na tängai ö dy. Äni ce lä käni qütä-a aekäcö kha Areng bö ca te hai aetang ö vi dy.
43Tukha Jerusalem-a awng saite na angxynlyng lä cangxei ö vi dy. Ätephüng-a mei nädylä angtawtha na ma cangxei saite na hai kamarae na sa pa mang te phüng-a vi. 44Isu tea Yng saite khimi angxynlyng na lä mangtä aeting leilae kha äma ce üng vyngsai angxynlyng na lä rangpui-a mäsung ö vi dy. 45Äni ce lä äma ce üng älawng mityng hai vyngsai na jaw kha aely ngai saite-a tangkae mangtä aeri ö bawi vi dy. 46Äni ce lä käni qütä Säthaw üng Ingkäcai käleng thung-a mangtä aeting ö dy. Tukha äni ce lä bälung mangtä kawng anghawtho te hai ma, äma ce üng ing-a Areng bö mangtä ca ö vi dy. 47Äni ce lä Säthaw tea bälaw te hai, khimi angxynlyng na maw-a mimai dang ö vi. Tukha Areng Isu ma käni qütä khimi ce bung aeqang kha yng saite na lä aepu rae pa vi dy.
3Peterae lä aeke haw y saite khimi bung naw te hawi sa pa
1Nitä käni-a Peterae ni Johan lä Säthaw üng Ingkäcai-a aetang saite kätü kädüng lang naeri thungtä-a ly hawi dy. 2Äcae kähawi bei näkha thui saite Ingkäcai üng thokhae kung-a aepeng te üng hai aeke haw y saite khimi lawngtä lä aety kha awng pa vi. Äni bung khimi ce ma käni qütä aejawng kha Ingkäcai-a ly saite na tea phawisae mäkai hethang khai pa vi. 3Äni lä Peterae ni Johan bung kätho-a kung te nung ea “Phawisae py jo ä” näkha mäkai pa vi. 4Peterae ni Johan lä äni tea kheng hawi dy. Peterae ma “Kai ni tea kheng e” näkha näpa 5Tukha äni lä änini te üng phawisae dang ai müng näkha aepö te hai kheng te vi. 6Tungaila Peterae ma “Kai ni tea sui hai tangkae awng y. Kai ni tea awng saite ta nang tea py ai mang. Nazare märü üng Isu Khrista üng ämüng hai-a aetha kha aeke lawi” näpa. 7Tupyng-a äni üng äkö bangtang-a süng kha mätha pa dy. Qengtäma äni üng äkho hai äkho mi la aethaw awng pa vi dy. 8Äni la aebälü kha aeke te aetawng dy. Tupyng-a äni lä Peterae ni Johan hai ly ea Ingkäcai thung-a aebälü te hai aeke kha Säthaw tea bälaw pa vi dy. 9Khimipui angxynlyng ma äni lä aeke kha Säthaw tea bälaw te nung ö bawi pa vi. 10Khimipui na lä äni lä Ingkäcai üng äcae kähawi thokhae kung-a aety kha phawisae mäkai saite khimi näte mäny te vi kha cangxei ö phi vi dy.
Ingkäcai-a Peterae älo thui pa
11Naw hawi saite khimi lä Peterae ni Johan äteng-a awng khi pa ea khimi angxynlyng na lä cangxei te hai Peterae ce kä awng sai Solomon ämüng mäthi saite bakhung-a aehui kha aekäcö ö vi dy. 12Peterae lä khimi ce bung nung kha äni ce tea “Isrelae khimi ce ä, ätephüng-a nang ce lä cangxei kha kheng ö te vi mei. Kai ce üng haidae hai hawi saite phüng-a, äni üng naw hawi te näkha nang ce lä kai ce tea aepö ö te vi mei. 13Abraham üng Säthaw, Isaika üng Säthaw hai Jaeko üng Säthaw, mä-ai kangsi na üng Säthaw, lä äma üng mawsawng Isu bung mäsang pa te vi dy. Nang ce lä honi Isu bung bädü hethang Pilata mätawngky kö-a a ö te vi. Pilata mätawngky ma honi Isu bung aelawi hai hethang ngai ea la nang ce lä äni bung khaisö ö te vi. 14Nang ce lä caiping te hai cüng saite Isu bung ngai pa ö y. Khimi bädü saite honi bung lä lawi hethang mäkai ö vi. 15Nang ce ma hing hai saite kung bung lä bädü ö vi. Tungaila Säthaw ma Isu bung lä kädü thung üng mätha haile pa vi. Kai ni lä ämi hai nung khe hawi te vi kha hini kätyng nang ce tea thui haw te dy. 16Mä-ai lä Isu tea yng te phüng-a hini khimi lä naw hawi te vi dy. Nang ce lä äni bung nung te hai mäny ö vi. Tukha mä-ai lä Isu tea yng te phüng-a Isu ma lä hini khimi bung nang ce nung te kätyng äma üng ämüng haidae hai-a, naw te hawi hai ping pa te vi dy.
17“Rawijae na ä, nang ce lä nang ma ce üng mätawngky na ma, Isu lä Mesia vi näte mäny y te phüng-a, hini kätyng sa te kai lä mäny vi. 18Tungaila Säthaw lä buisaw na hai-a, thui hai rüng te kätyng-a, Mesia lä mätang bälaica vi ai. Hini kätyng Säthaw ma thui saite lo lä cungrü hai te vi dy. 19Tukha nang ce üng hunghö na cai hethang tähang-a, aedawng mäkhüng te hai ma Säthaw tea vawi ö haile lawi. 20Tudylä Säthaw ma nang ce tea Muilaw Käcai hai aethaw py ai. Nang ce tähang Isu bung äbaeni mätaw be ai. Isu lä Säthaw ma nang ce tähang khai rüng pa saite Mesia vi. 21Jangni-a Säthaw ma lä buisaw käcai na hai-a, älo aedo hai rüng te kätyng angxynlyng sa bälai bawi y te khytä Isu lä Känipre-a awng he kae vi. 22Mosi ma Mesia phüng thui te lä ‘Säthaw ma kai kätyng aetawng saite buisaw lawngtä bung mätaw pa ai. Äni lä nang ce ceng thung üng khimi lawng vi ai. Honi buisaw thui saite lo angxynlyng na nang ce lä tängai he kae. 23Äni üng älo tängai y saite khimi tea lä Säthaw ma täphra pa vi ai’ näpa. 24Buisaw Samawila üng hai aetawng kha buisaw angxynlyng na la vaihi kätü üng phüng na thui rüng pa te vi dy. 25Nang ce lä buisaw üng aedo te lo kätyng dang ö vi ai. Säthaw ma kangsi na tea aedo saite älo nang ce hai aesui bawi te vi. Säthaw ma Abraham tea ‘Nang üng äceng phüng-a älawngpre üng khimi angxynlyng na tähang kähawi dang ö bawi ai’ näkha thui pa dy. 26Säthaw lä äma üng mawsawng bung älawngpre-a mätaw ea nang ce tähang kähawi dang hethang angcü-a ma nang ce thung-a, tyng hai pa te vi. Nang ce hawi y saite lolang üng aekö haile hethang tähang kähawi py te vi.”
4Peterae ni Johan bung thawng thung-a khai pa
1Peterae ni Johan lä khimipui na tea älo thui saite kätü-a mäthykung na, Säthaw üng Ingkäcai ty saite na üng mätawngky hai Sadukai na lä tyng ö by vi. 2Angtawtha na lä khimi ce tea mätü kha Isu dü te üng aetha saite phüng na thui pa te phüng-a, mätawngky na lä kädawtho pa ö vi dy. 3Äni ce lä Peterae ni Johan bung ne kha vaihi lä kädüng te phüng-a, kädang khytä thawng thung-a khai pa vi dy. 4Tungaila angthang thai saite khimipui thung üng yng saite na lä awng mang pa vi. Tupyng-a Yng saite khimi nawngmäcaw na lä lawng sang bangtä tingtang awng pa vi.
5Nitä pyng-a lä Judae kälengky hai mätawngky na hai Mosi üng Ubädi särae na lä Jerusalem märü-a aeting ö dy. 6Äni ce lä mäthykung kälengky Ana hai aeting ö vi. Honi mityng-a Kaiafa, Johan Alesanda hai mäthykung mätawngky üng äkälang amäjy na la awng ö by vi. 7Äni ce lä Peterae ni Johan bung äma ce maw-a nähai hai ea änini tea “Nang ni tea ämi üng ämüng hai hini sa hethang haidae py te mei” näkha düng pa dy.
8Tukha Peterae lä Muilaw Käcai kawi te lolang mätü pa te hai äni ce tea “Judae na üng mätawngky na ä, ämi üng ämüng hai sa hawi te mei. 9Vaihi nang ce ma kai ce tea düng saite phüng lä aeke haw y saite khimi bung mä-ai lä säbawng kha äni üng känaw käsaw hawi hai te vi. Äni lä makä sa kha aekei haw te mei näte nang ce lä mäny he ngai ö te mei. 10Nang ce hai Isrelae khimi angxynlyng na te mäny hai he ngai te lä, nang ce ma thinglang qawng-a bädü saite Nazare märü üng Isu Khrista üng haidae hai-a hini aedaw saite khimi bung känaw käsaw hawi sa pa te vi. Nang ce ma bädü saite Isu bung lä Säthaw ma mätha haile tyng pa te vi dy. 11Caekäcai thung-a Isu phüng hini kätyng tärü vi.
‘Ing sa saite nang ce ma khaisö saite kälung lä
aely kälengky kälung-a aelawng vi dy’ näkha nä vi.
12Honi Isu ma qaitä ni khimi ce bung aeqang haw te kae. Älawng qawng-a awng saite khimi na tähang Säthaw lä Isu lawngtä xyng bung mätaw te vi” näkha Peterae ma thui pa.
13Peterae ni Johan lä ri te awng y käla sa te nung ea änini lä khimi rungrang kae kha cae la kaw phi saite khimi y, näte mätawngky na ma mäny ea lä, cangxei ö pa vi dy. Änini lä Isu hai mangtä awng saite khimi vi näte lä mäny ö vi dy. 14Naw hawi saite khimi bung lä Peterae ni Johan hai mangtä aedaw kha awng te nung te phüng-a, äni ce lä ätemakä la käsi thui haw ö pa y vi dy. 15Tupyng-a Judae mätawngky na lä Peterae ni Johan bung kawngci üng ärang mang-a mätho hai kha äma ce tingtawi älo aedüng ö dy. 16Äni ce lä “Hini khimi ni tea makä sa ö ai mei. Änini ma cangxei-a sa saite lä Jerusalem märü üng khimi angxynlyng ma mäny ö bawi vi dy. Mä-ai lä hini cangxei-a sa y näkha thui haw y lyng. 17Tungaila hini angthang khimi qütä mäny y hethang tähang-a, mä-ai lä sa he kae. Äni ce lä Isu üng ämüng ämi tea la thui y hethang kätei te lo thui ö kae si.”
18Tupyng-a Judae mätawngky na lä angtawtha lawng netä bung kähyng haile pa ea Isu phüng thui, mätu he kae y, näkha täru khi pa vi dy. 19Tukha Peterae ni Johan ma “Säthaw üng lo tängai te qawng-a nang ce üng lo tängai dylä, Säthaw maw-a hawi ai mang mei näte dawng kae-e. 20Kai ni lä nung saite hai thai saite phüng thui y käla awng haw y lyng” näkha äni ce tea thui hawi pa vi dy. 21Tupyng-a Judae mätawngky na lä angtawtha ni tea kätei kha bälawi hawi vi dy. Makä sa kha änini tea dengpy ai mei näte mäny ö pa y vi dy. Äte makäte phüng-a mei nädylä, khimi ce angxynlyng lä angtawtha ni sa saite kamarae phüng-a, Säthaw tea bälaw kha awng pa ö te vi. 22Peterae ni Johan ma kamarae hai naw hawi sa pa saite khimi lä khösäning ruibälitä cang y awng pa vi dy.
Käyng na üng aetang pa saite
23Peterae ni Johan lä thawng thung üng aelawi pyng ea, änini üng rawijae na thung-a ly kha mäthykung käleng na hai, Judae mätawngky na thui te älo na thui pa haile hawi vi dy. 24Käyng na ma honi lo thai ea äni ce lä “Areng ä, nang lä käni, älawng, pangle thung-a awng saite na bung sa pa saite Kung vi. 25Nang lä nang ma üng mawsawng kai ce üng Pä-ai Davidae sanphrang tea Muilaw Käcai hai älo aepe hai te vi.
‘Ätephüng-a ceng kälang üng khimi na lä kädawtho kha,
Isrelae khimi na la hawi y saite na dawng aetütü ö te vi mei.
26Älawng qawng üng sanphrang na hai mätawngky na lä,
Areng hai äma üng Mesia tea täre sa he aekäcö ö dy’ näpa.
27“Tätang khü-a Herodae sanphrang hai Rom mätawngky Pontia Pilata lä ceng kälang üng khimi na hai Isrelae khimi na lä hini märü-a aekäcö ö vi. Nang ma re rüng kha nang üng caiping saite mawsawng Isu bung äni ce lä bädü hethang aedüng ö vi dy. 28Nang lä phung-ang käleng vi. Nang ma jangni-a aedawng te kätyng hai aely ngai te kätyng äni ce lä sa ö te vi. 29Areng ä, äni ce üng kätei saite na sämai kü jo ba. Nang üng mawsawng na ri y käla ma nang üng älo thui vawng hethang säbawng kü ba. 30Nang üng äkö bäjae kha Cäpaw Käcai Isu üng haidae hai-a, cangxei saite na hai kamarae na sa kha khimi ce üng känaw käsaw na hawi sa pa kü ba” näkha ätüng käleng hai aetang ö dy.
31Äni ce aetang pyng ea äni ce awng saite mityng aehüng pa vi. Äni ce angxynlyng Muilaw Käcai hai kawi kha Säthaw üng älo thui vawng ö phi vi dy.
Käyng na üng awng saite
32Käyng angxynlyng na lä bälung mangtä aedü kha awng ö vi. Ämi lawngtä la vyngsai angxynlyng na mäsai te awng y käla ma mangtä mäsung ö vi. 33Angtawtha na lä Säthaw ma Isu dü te üng mätha haile te phüng haidae käleng hai-a thui ö vi dy. Tukha äni ce tea Säthaw ma tähang kähawi awng mang-a py pa dy. 34-35Äni ce thung-a mätang saite ämi lä awng pa y vi. Ätephüng-a mei nädylä lai hai ing awng saite khimi na jaw kha tangkae na lä angtawtha na tea py pa ö te phüng-a vi. Tukha angtawtha na ma khimi qütä tähang aely ngai te kätyng bäri pa haile dy.
36-37Josefae näsaite khimi lawngtä la awng vi. Äni lä Levi ceng kaesui vi kha Saipära angrai sälawng üng ly te vi. Angtawtha na ma äni tea Banaba näkha ämüng kangthae mäthi pa dy. (Banaba näsaite ämüng üng phüng lä khimi ce tea aethaw py saite khimi näte vi.) Banaba lä äma üng lai jaw kha angtawtha na maw-a phawisae khai pa vi dy.
5Anania hai Sapiri
1Honi kätü-a Anania näsaite nawngmäcaw hai änawngpui Sapiri lä äma ni üng lai jaw hawi te vi. 2Tukha Anania lä jaw ea dang saite phawisae kaehütä äma ni tähang khai mai vi dy. Äni üng änawngpui la mäny by vi. Phawisae kaehütä lä angtawtha na tea py pa dy. 3Peterae ma Anania tea “Anania ä, nang lä lai jaw ea dang saite phawisae kaehütä nang ma tähang khai mai kha Muilaw Käcai tea kaeling sa vi dy. Ätephüng-a hini kätyng sa hethang nang üng bälung thung-a Setan angra tea mityng pyng hai te vi mei. 4Honi lai lä jaw y kälang-a lä nang ma üng y vi nang mei. Jaw pyng ea dang saite phawisae la nang ma üng vyng y mei. Ätephüng-a nang üng bälung thung-a hini kätyng dawng te mei. Nang lä khimi tea kaeling sa te kae y, Säthaw tea kaeling sa te vi dy.” 5Honi älo thai te hai Anania lä aetüng kha dü pa vi dy. Honi phüng thai saite khimi na lä ri ö phi pa vi dy. 6Tukha särai na ma Anania äro bung käni hai säve pyng ea ärang-a mätho kha aevui ö vi dy.
7Tupyng-a naeri thungtä qae saite kätü-a, Anania üng änawngpui lä tyng by vi dy. Tungaila hani phüng na äni lä mäny y vi rawng. 8Peterae ma “Nang lä lai ävang hijetä jaw te kae mei” näkha düng pa.
Tukha änawngpui ma lä “Tu jetä kae dy” näkha thui pa.
9Peterae ma “Ätephüng-a nang ni lä Säthaw üng Muilaw Käcai tea käny hethang bälung aedü hawi te vi mei. Kheng e, nang nawngpaw bung aevui saite na vaihi thokhae kung-a tyng ö dy. Nang bung la äni ce ma aevui ai mang” näpa. 10Qengtäma honi nawngmädi lä Peterae üng ämaw-a aetüng kha dü by vi dy. Särai na lä honi nawngmädi dü te nung ö vi dy. Tukha äro bung aejawng kha änawngpaw teng-a aevui pa by vi dy. 11Käyng na hai äkälang khimi angxynlyng lä honi phüng na thai ea tengxyng y ri ö phi vi dy.
Angtawtha na ma khimi känaw bung hawi sa pa
12Angtawtha na lä khimi ce tähang cangxei saite kamarae awng mawng-a sa pa ö dy. Käyng na angxynlyng lä Solomon üng bakhung-a aekäcö leilae ö dy. 13Tukha Isu tea yng y saite khimi na phüng äkälang na lä kähawi thui ngaila, ämi la äni ce hai mangtä awng ö vawng y vi dy. 14Tungaila Areng Isu tea yng saite nawngmädi nawngmäcaw na lä awng mang rae awng mang rae pa ö vi. 15Tukätephüng-a khimi ce lä känaw na bung nähai ö pa vi. Peterae lä lolang-a aeke te kätü-a, naw saite na khimi ce üng ätabung qawng-a Peterae üng kaekhui tyng hethang tähang-a aejawng nae na hai khimi känaw na bung lolang qawng-a khai ö vi dy. 16Tukha Jerusalem äteng äpa-a awng saite vang hai märü üng khimipui na lä naw saite na hai angra kung saite na bung nähai ö vi. Angtawtha na ma äni ce angxynlyng na bung hawi sa pa vi dy.
Angtawtha na tea sakälö khü pa
17Tukha mäthykung kälengky hai Sadukai thung-a awng saite äni üng rawijae na lä pä-e te bälung awng ö vi. Äni ce tea bäjeng hethang dawng khaw ö vi dy. 18Äni ce lä angtawtha na bung ne ea thawng thung-a bäla ö pa vi dy. 19Tukha kärung thung-a Säthaw üng angtawtha ma lä thawng ing kätho pä-awng ea angtawtha na bung ärang mang-a nähai pa ö vi. 20“Nang ce lä ly kha Säthaw üng Ingkäcai baesung thung-a dungtäsa hing saite phüng khimi ce tea thui pa ö lawi” näpa. 21Angtawtha na lä Säthaw üng angtawtha ma thui te kätyng khö aevang ea lä Ingkäcai baesung thung-a ly kha khimi ce tea Isu phüng mätu pa ö vi dy.
Mäthykung kälengky hai äma üng rawijae na tyng ea äni ce lä Sanhendrin kawngci-a awng saite Isrelae mätawngky angxynlyng na bung aekäcö hai pa vi dy. Tupyng-a angtawtha na bung nähai hethang Ingkäcai ty saite na bung thawng thung-a mätaw ö dy. 22Äni ce thawng thung-a tyng saite kätü-a lä, angtawtha na bung nung pa ö y vi. Tukha Sanhendrin kawngci-a vawi haile ö dy. 23Tukha “Thawng kätho lä äkähawi-a aekhae vi. Thawng-a ty saite na lä kätho teng-a awng te kai ce lä nung ö te vi. Tungaila kätho pä-awng kha kheng ea lä, äthung-a ämi lä awng y pa vi dy” näkha thui pa ö haile tyng dy. 24Honi angthang na thai saite kätü-a Ingkäcai ty saite na üng kälengky hai mäthykung käleng na lä cangxei te hai “Vaihi makäti na tyng ai rawng mei” näkha aedawng ö dy. 25Tukha khimi lawngtä lä tyng ea “Nang ce ma thawng thung-a khai saite khimi na lä Ingkäcai baesung thung-a aedaw kha khimipui na tea Isu phüng mätu kha awng vi dy” näkha thui pa dy. 26Tukha Ingkäcai ty saite üng äkälengky ma lä äma üng Ingkäcai ty saite na hai ly kha angtawtha na bung vähai pa ö vi. Tungaila äma ce tea khimipui na ma kälung hai käde kha bädü ai näte ri te phüng-a angtawtha na bung kähawi-a nähai pa ö vi dy.
27Tupyng-a angtawtha na bung Sanhendrin kawngci üng maw-a aedaw hai pa ö vi. Tukha mäthykung kälengky ma lä äni ce tea älo düng pa dy. 28Äni ma “Isu üng phüng nang ce lä mätu vawi hang” näkha mäkhang khi pa dy. “Tungaila vaihi nang ce lä Jerusalem märü-a awng saite khimi angxynlyng na tea äni üng phüng mätu ö pyng te vi dy. Kai ce phüng-a äni lä dü te vi näkha nang ce lä käsi thui ö te be tu” näkha näpa vi.
29Tukha Peterae hai angtawtha na ma “Kai ce lä khimi ce üng älo tängai te qawng-a lä Säthaw üng älo tängai he kae te vi. 30Nang ce ma thinglang qawng-a Isu bung täheng kha bädü te vi. Mä-ai kangsi na üng Säthaw ma lä äni bung kädü thung üng mätha haile tyng pa vi dy. 31Säthaw lä honi Isu bung äma üng bangtang mang-a khai kha Mätawngky hai Aeqangkung-a mäsang pa te vi. Isrelae khimi na aedawng mäkhüng haw hethang hai hunghö aelawi hai hethang tähang-a, Säthaw ma Isu bung hikä khai pa te vi dy. 32Kai ce lä hini phüng na nung khe kha thui haw saite na vi. Muilaw Käcai la khimi ce tea mätü vi. Säthaw lä äma üng älo tängai saite na tea äma üng Muilaw Käcai py te vi” näpa.
33Hini älo na thai ea lä Sanhendrin kawngci äkung na lä tengxyng y, kädawtho phi te phüng-a, angtawtha na bung bädü hethang aedüng ö vi. 34Tungaila Kamela näsaite Pharisai lawngtä la awng vi. Äni lä Mosi üng Ubädi mätu saite särae vi kha khimi angxynlyng na ma tämö khai te lawngtä vi. Honi Kamela lä Sanhendrin kawngci ämaw-a aetha kha angtawtha na bung tänaetä ärang-a mätho hai hethang thui pa vi. 35Tukha äni ma “Isrelae na ä, honi khimi ce tea makä sa ai mei näte nang ce kähawi-a aedawng ö. 36Jangni-a Thuda näsaite lä Rom aecörae tea täphra hethang täre mäsa hai kha äma lä ‘Kai lä khimi mätawngky dy’ näkha thui te vi. Äni lä khimi lawng cungvai bälitä na bung käcö te vi. Reisae na ma äni bung bädü pyng ea lä leithung hui saite khimi na lä awng ö xhixae kha äni üng sa saite na lä la king pa vi dy. 37Tupyng-a aecörae lä khimi üng ämüng cae-u thung-a tärü hai te kätü-a, Kalile khö üng Judae näsaite lä tho be kha äma leithung hui saite khimi na tea Rom aecörae bung täphra he täre sa hai dy. Äni bung la Rom reisae na ma bädü pyng be ea lä äni üng äkähui na la awng xhixae pa be vi dy. 38Tukätephüng-a kai ma nang ce tea thui he ngai te lä, äni ce sa he ngai saite tea mäkhang ö hang. Äni ce bung bälawi pa ö kae. 39Äni ce sa saite na khimi üng kaedawng saite kae dylä pra raw vi ai mang. Tungaila Säthaw üng aely kängai kätyng sa vi dylä nang ce täphra haw y te cang y, nang ce ma Säthaw tea täre sa te kätyng awng lae vi ai” näpa.
Tukha Sanhendrin kawngci üng khimi na lä Kamela üng thui saite na tängai ö dy. 40Angtawtha na bung nähai kha mäkhae pa ö vi. Tupyng-a äni ce tea Isu üng phüng älo thui haile y hethang mäkhang ceng kha bälawi pa ö vi dy. 41Tukha angtawtha na lä Isu tähang äni ce mätangbälai saite lä Säthaw üng lasawng näkha aedawng ö te phüng-a, bälung anghawtho te hai ma Sanhendrin kawngci mityng üng thoja pa ö vi dy. 42Tupyng-a käni qütä Säthaw üng Ingkäcai hai Yng saite khimi na üng ing-a, Isu lä Mesia vi näte phüng Angthang Kähawi na thui ö haile tyng vi dy.
6Angtawtha na tea säbawng he khimi lawng säritä re pa
1Honi kätü-a yng saite na lä khimi rui awng mang rae vi dy. Tukha Käri lo aepe saite Judae khimi na hai Hebärai lo aepe saite Judae khimi na lä aede ö y vi. Käri lo aepe saite Judae khimi na lä äma ce te üng lömai nä-awi na tea mangtä ca nei he bäri hai y näkha Hebärai lo aepe Judae khimi na tea käsi thui pa ö vi. 2Tukha angtawtha lawng hawlai netä na lä äkähui na bung kähyng ea “Kai ce lä Säthaw lo thui saite na khaisö kha ca nei hethang bäri saite lä aevaw y lyng. 3By jä-ai na ä, nang ce thung üng khimi lawng säritä bung re ö lawi. Äni ce lä Muilaw Käcai kawi te hai, bälung cüng te hai, khimi ce ma äni ce tea tämö khai saite na-a lawng hethang kae. Hini kälu sa hethang äni ce tea kai ce ma py pa ai mang. 4Kai ce tähang-a lä, aetang te hai Angthang Kähawi thui te hai, mätu kha kätü na byng hai vi ai” näpa.
5Angtawtha üng thui te lo lä Yng saite khimi angxynlyng na ma ngai ö bawi te vi. Tukha äni ce lä Stephen bung re ö vi dy. Stephen lä yng te aethaw leng bärai kha Muilaw Käcai hai kawi saite khimi vi. Tupyng-a Philip, Proko, Nikano, Timon, Pamena, Nikola ce bung re ö dy. Nikola lä Judae khimi y vi. Äni lä Antioh märü üng Judae khimi na üng yng te tea ngai saite khimi lawngtä vi. 6Hakä re saite na bung angtawtha na maw-a nähai pa ö vi dy. Tupyng-a angtawtha na ma äni ce üng älö-a, äkö thyng kha aetang pa ö dy.
7Tukha Säthaw üng älo Angthang Kähawi lä aehi haidü kha Jerusalem märü-a, Yng saite khimi na lä nyng rae pa vi dy. Mäthykung awng mang saite na la, honi Angthang Kähawi tea tängai kha yng ö vi dy.
Stephen bung ne pa
8Stephen lä Säthaw üng tähang kähawi tea käcung-a, dang te hai haidae dang te khimi vi. Tukha cangxei te hai kamarae na khimi ce maw-a, sa pa saite lawngtä vi. 9Tungaila khimi phütä na lä, älo e pa ö vi. Äni ce lä khimi mawsawng üng aelawi saite khimi na üng Ingkäcai näsaite aecö nae mityng üng ly ö te vi. Äni ce lä Sarene hai Alesanda märü üng Kiliki khö hai, Asia pre cäpi üng Judae khimi na vi. 10Tungaila Stephen lä Muilaw Käcai üng bälung cüng saite hai älo thui pa te phüng-a, äni ce lä älo ae-e te bäja haw pa ö y vi. 11Tupyng-a äni ce lä khimi phütä na tea Stephen üng phüng kätüng y-a, thui hethang mäcü ö vi. Honi khimi ce ma “Stephen lä Mosi hai Säthaw phüng käsi prawng saite na kai ce lä thai vi” näpa. 12Hini kätyng äni ce lä khimi ce hai mätawngky na hai, Mosi üng Ubädi särae na tea lä Stephen tea kädawtho rung khytä sa ö vi. Tukha äni ce lä Stephen bung ne kha Sanhendrin kawngci maw-a, nähai pa ö dy. 13Tupyng-a äni ce lä Stephen phüng kätüng y-a, thui saite khimi na bung nähai pa ö vi. Honi khimi ce ma “Hini khimi lä Säthaw üng Ingkäcai hai Mosi üng Ubädi phüng tea käsi prawng vävawi te vi. 14Nazare märü üng Isu lä Ingkäcai bung aephei kha Mosi üng Ubädi reitae na tea la kangthae-a, sa bälai ai näkha Stephen thui te lo mä-ai lä thai ö te vi” näpa. 15Sanhendrin kawngci-a aety saite angxynlyng na ma Stephen tea kheng khisäli ea äni üng mimai lä, Säthaw üng angtawtha üng mimai hai aetawng te nung ö pa vi dy.
7Stephen ma Sanhendrin kawngci-a älo thui pa
1Mäthykung kälengky ma Stephen tea “Hini lo lä tätang mei” näkha düng pa.
2Stephen ma “By jä-ai hai, Ä-ai ce ä, tängai ö. Mä-ai üng pä-ai Abraham lä Haran märü-a, awng y te kälang-a, Mesopotamia pre-a awng te thüng-a ma, phung-ang hai awng saite Säthaw lä äni maw-a aetüng te vi dy. 3Säthaw ma ‘Nang ma awng saite pre hai nang ma üng kangby jä-ai na bung khaisö kha kai mätü saite pre-a ly’ näkha näpa. 4Tukha Abraham lä Kalädai pre üng tho ea Haran märü-a awng pa vi dy. Äma üng pä-ai dü pyng-a, vaihi nang ce awng saite pre-a, Säthaw ma äni tea aepüng hai pa te vi. 5Honi kätü-a Säthaw ma Abraham tea äni tähang pyng nae mityng cäpi cäcaw haetä mäteng ma py pa y. Tungaila Säthaw ma hini pre tea äma tähang hai, äma üng kätökäteng na pyng hethang py ai näkha äni tea älo aedo pa. Honi älo aedo saite kätü-a, Abraham lä nade lawngtä lä awng pa y rawng. 6Säthaw ma Abraham tea ‘Nang üng kätökäteng na lä khimi kälang na pyng saite pre-a, angvüng kätyng awng ö ai. Khimi kälang na ma äni ce bung säning cungvai bälitä mätangbälai te hai mawsawng tangnae-a, khai pa ai. 7Tungaila äni ce bung mawsawng tangnae-a, bälawng hai saite khimi na tea lä kai ma bäjeng pa ai. Tupyng-a nang üng kätökäteng na lä honi pre üng tho kha hini mityng-a, äni ce ma kai tea cäphaw ö ai’ näpa. 8Tupyng-a Säthaw ma Abraham hai mangtä älo aedo kha sämai nae tähang-a, Abraham hai äma üng kätökäteng nawngmäcaw angxynlyng na bung lengkhüng täke pa dy. Tukha Abraham lä äcäpaw Isaika bung dang pyng ea, käni täjaetä-a lä, äni tea lengkhüng täke pa vi. Honi kätyng Isaika la äcäpaw Jaeko bung dang dy. Jaeko la cäpaw lawng hawlai netä bung dang. Jaeko üng cäpaw na lä mä-ai üng äceng hawlai netä na üng pä-ai na vi dy.
9“Jaeko üng cäpaw käleng na ma, Josefae tea pä-e pa ö vi. Tukätephüng-a, Josefae bung jaw kha äni lä Aikuta pre-a, mawsawng tangnae-a, aelawng vi dy. Tungaila Säthaw lä äni hai mangtä awng pa vi. 10Äni bung mätangbälai saite thung üng aelawi hai pa vi. Säthaw ma Josefae tea bälungkähae py pa kha Aikuta sanphrang Faraw maw-a, mimai dang hai pa vi dy. Tukha sanphrang ma, äni bung Aikuta pre üng khimi na tea hai sanphrang üng ing-a, awng saite ingthawng angxynlyng na tea pyng saite kung-a khai pa vi dy. 11Tukha Aikuta pre hai Kanan pre angxynlyng la bötäkang tho kha tengxyng y mätang saite lä tyng pa ö vi dy. Mä-ai üng kangsi na la ca nei hethang awng pa ö y vi. 12Aikuta pre-a cawbi cawthai, awng te angthang Jaeko ma thai te kätü-a lä, äma üng äcaw na mä-ai üng kangsi na bung mätaw pa vi. Hini lä angcü üng khölawng tho saite vi. 13Äbaeni Aikuta pre-a khölawng tho te kätü-a lä, Josefae ma äkangby jä-ai na tea äma üng phüng na thui pa vi dy. Tukha Faraw sanphrang lä, äni üng engthung na phüng mäny pa vi dy. 14Tupyng-a Josefae ma äpä-ai Jaeko hai mangtä äma üng engthung angxynlyng na bung Aikuta pre-a aepüng hai pa vi dy. Äni ce lä lawng rui säri bangawtä awng vi. 15Tupyng-a Jaeko lä Aikuta pre-a ly pö by dy. Honi pre-a äni hai äma üng äcaw na lä, dü ö vi dy. 16Äni ce üng kätökäteng äro na tea lä Sekhen märü-a nähai haile kha Abraham ma rang saite täprawng-a, aevui ö vi dy. Hani täprawng lä Hamorae cäpaw ce te üng Abraham ma ävang py kha rang saite mityng vi.
17“Säthaw ma Abraham tea aedo saite lo kä sa hethang kätü tyng ea lä, Aikuta pre-a Isrelae khimi na lä, tengxyng y aepu hai rae pa vi dy. 18Honi kätü-a lä, Aikuta pre-a Josefae bung mäny y saite sanphrang lawngtä ma pyng pa vi dy. 19Honi sanphrang lä mä-ai üng kangsi na tea kätüng y te hai, mätangca-a, sa pa te vi. Äni ce üng aepeng pei te nade na bung dü rung khytä ing ärang mang-a, kädesö kha khai hai pa ö te vi. 20Honi thüng-a lä, Mosi bung aepeng saite kätü vi. Mosi lä tengxyng y ämaw hawi phi saite nade vi. Äni bung äpä-ai üng ing-a law thungtä kangru-a, mäcaw pa vi dy. 21Mosi bung ing ärang-a, khaisö te kätü-a, Faraw sanphrang üng äcänung ma la ea äma üng cäpaw kätyng-a mäcaw pa vi dy. 22Mosi lä Aikuta pre khimi ce üng kaw saite bälung kähae angxynlyng na aetu kha äni lä haidae hai älo thui kha äte angxynlyng na sa vi dy.
23“Äni lä säning ruibälitä awng te kätü-a, äma üng kangby jä-ai Isrelae khimi na tea dyng hethang aedawng vi dy. 24Tukha Isrelae khimi lawngtä bung Aikuta khimi lawngtä ma, bo te nung vi. Äma lä Isrelae khimi tea aekung kha tärawitha ea Aikuta khimi bung bädü pa vi dy. 25Säthaw ma äni bung äma üng khimi na aelawi hai hethang tähang-a, mätaw te vi näte Isrelae khimi na mäny ai müng näkha äma lä aedawng te vi. Tungaila äni ce lä mäny ö pa y vi. 26Kädang mang-a äma ce Isrelae khimi lawng netä aemang hawi te tea Mosi lä nung pa vi. Äni ma ‘Nang ni lä kangby jä-ai kae be tu, aejaw aemang hawi hang lawi’ näkha aede haile hethang thui pa dy. 27Tungaila kätüng y sa saite khimi ma Mosi bung nuilaw kha ‘Kai ce tea pyng hethang hai tärae cei hethang aenae nang tea ämi ma py mei. 28Jangdüng aetawi Aikuta khimi bung bädü te kätyng-a, kai bung la bädü hethang ngai be te rawng mei’ näkha düng pa vi. 29Mosi ma hani lo thai te kätü-a lä, Aikuta pre üng pryng ja kha Midian pre-a awng pa vi dy. Hani pre-a äni lä äcäpaw lawng netä dang vi.
30“Säning ruibälitä qae tea lä, Sinai me anghung teng-a, awng saite daithung kärang mai aekhaw saite angprüng thung mang Säthaw üng angtawtha lawngtä lä, äni tea aetüng pa vi dy. 31Honi Mosi nung te kätü-a, äni lä cangxei phi te hai kheng hethang äteng-a ly ea lä Säthaw üng älo aepe te tüng thai pa vi. 32Tukha Säthaw ma ‘Kai lä nang kangsi na üng Säthaw vi. Abraham, Isaika hai Jaeko ce üng Säthaw vi’ näkha näpa. Mosi lä ri kha käsawtho te hai kheng vawng pa y dy. 33Tupyng-a Säthaw ma Mosi tea ‘Nang aedaw saite mityng lä, älawng käcai vi. Nang üng kho painai na aesö la.’ 34Aikuta pre-a awng saite kai üng khimi na mätangbälai te lä, kai ma tätang nung dy mang. Äni ce üng raw hang saite tüng na la, kai lä thai pyng dy. Tukha kai lä äni ce bung aelawi hai hethang cäqa te vi dy. Vaihi ma ly praw lawi. Kai ma nang bung Aikuta pre-a mätaw ai” näpa.
35“Honi Mosi bung lä Isrelae khimi na ma ngai pa y vi. Äni ce ma ‘Kai ce tea pyng hethang hai tärae cei hethang aenae nang tea ämi ma py mei’ näkha düng pa ö vi. Tungaila Mosi lä Isrelae khimi na tea pyng hethang hai, mawsawng thung üng aelawi hai hethang Säthaw ma äni bung mätaw te vi. Säthaw lä angprüng thung mang äni tea aetüng hai saite lä, äma üng angtawtha hai-a, aetüng hai kha hini kä sa hethang thui pa dy. 36Mosi lä Isrelae khimi na bung Aikuta pre üng hai mätho kha bälawi saite khimi vi. Äni lä Aikuta pre-a, pangle kangthing hai daithung kärang-a, säning ruibälitä cangxei saite na sa pa vi. 37Mosi ma ‘Säthaw lä kai kätyng aetawng saite buisaw lawngtä bung mätaw pa ai. Äni lä nang ce ceng thung üng khimi lawng vi ai’ näkha Isrelae khimi na tea thui pa dy. 38Daithung kärang-a, aekäcö saite Isrelae khimi na hai Mosi lä mangtä awng te vi. Sinai me anghung-a, Säthaw üng angtawtha ma, Mosi te mang hai-a, mä-ai üng kangsi na tea älo aepe te vi. Säthaw ma mä-ai tähang älo kanghing lä Mosi tea py pa.
39“Tungaila mä-ai üng kangsi na lä, äni üng älo tängai he ngai pa ö y vi. Aikuta pre-a vawi haile hethang bälung kaedawng awng ö te kae vi. 40Äni ce ma Mosi jä-ai Aron tea ‘Mä-ai üng maw mang ly hai saite mimi, kai ce tähang sa pa jo. Mä-ai bung Aikuta pre üng bähawi saite Mosi lä ätemakä awng mei näte kai ce lä mäny y’ näkha näpa. 41Honi kätü-a äni ce lä, mimi raebawi cäpi sa ö vi. Tupyng-a mimi tea mäthy te hai äma ce kö hai sa te mimi tähang, kawng anghawtho kha pawi sa ö vi dy. 42Tungaila Säthaw lä äni ce tea kädawtho kha käni, law, tengpaw na tea phai cäphaw hethang sa ö kae sy näkha kädesö pa vi dy. Buisaw na üng cae-u-a, tärü pa te lä,
‘Isrelae khimi na ä, nang ce lä daithung kärang-a,
säning ruibälitä tütü awng te thüng-a, tawngbawi na hai,
mäthy kha cäphaw ö te vi. Tungaila kai tähang sa ö te y.
43Nang ce phaw ö saite lä Molokae mimi üng tengtae vi.
Rephana näsaite mimi tengpaw la phaw ö te vi.
Honi mimi na lä nang ce cäphaw hethang sa ö te kae.
Tukätephüng-a, Kai lä nang ce bung mätho kha Babilon pre hai hanglaw saite mityng mang-a mätaw vi ai’ näpa.
44“Mä-ai kangsi na daithung kärang-a, awng tea Säthaw lä äni ce hai mangtä awng te sämai nae tähang-a, Säthaw üng aeta nae taipung lä awng vi. Mosi tea Säthaw ma mätü saite kätyng taipung sa ö te vi. 45Mä-ai üng kangsi na lä äma ce üng pä-ai na te mang üng hai Taipung dang ö te vi. Joshu lä Isrelae khimi na bung hini pre-a, nähai ea äni ce lä Taipung bung aejawng ö vi. Säthaw ma jangni-a hini pre-a awng saite na bung mätho kha Isrelae khimi na ma hini pre pyng te vi dy. Honi Taipung lä Davidae sanphrang üng dung khytä honi pre-a awng jaw te vi. 46Davidae sanphrang lä Säthaw maw-a mimai dang saite khimi vi. Tukha Säthaw aeta hethang hai, Jaeko üng kaesui na Säthaw tea cäphaw hethang tähang ing sa he mäkai pa vi. 47Tungaila Säthaw üng Ingkäcai sa saite kung lä Solomon sanphrang vi.
48“Tukä ea la Kaesangky Säthaw lä, khimi ma sa saite ing-a, awng te y vi. Buisaw ma thui te lä,
49‘Käni khösang lä Kai üng aety nae vi.
Älawng lä Kai üng äkho thyng nae vi.
Nang lä Kai tähang makäti Ingkäcai sa pa ai mei.
Kai aehae saite mityng lä, ma-a mei.
50Kai ma qaitä ni ätete angxynlyng na tea sa te y mei’ näkha näpa.
51“Nang ce lä tengxyng y, bälung tangkö ö phi vi. Nang ce lä Säthaw üng älo tängai hethang känawkhing pang ö te vi. Nang ce lä nang ma ce üng kangsi na kätyng Muilaw Käcai tea mäthi ö y te vi be tu. 52Nang ce üng kangsi na lä, buisaw angxynlyng na tea sakälö khü ö te vi. Äni ce lä Säthaw üng mawsawng käcüng ly ai näkha thui rüng saite buisaw na tea la bädü ö te vi dy. Vaihi nang ce lä, äni ce bung a kha bädü hai ö pa vi dy. 53Nang ce lä Säthaw üng angtawtha hai-a, Mosi üng Ubädi dang ö vi. Tungaila nang ce lä tängai ö y be tu” näpa.
Stephen tea kälung hai käde kha bädü pa
54Sanhendrin kawngci üng khimi na lä honi lo thai te kätü-a, kädawtho phi te hai äfaw aetä-ai kha awng pa ö vi dy. 55Tukä ea la Stephen lä Muilaw Käcai hai kawi kha käni mang-a kheng te kätü-a, Säthaw üng phung-ang hai, Säthaw üng bangtang mang-a, Isu aedaw te bung nung pa vi. 56Tupyng-a Stephen ma “Kheng e, Känipre aepä-awng kha Säthaw üng bangtang mang-a Khimi üng Cäpaw, Isu aedaw te tea kai lä nung vi” näpa.
57Judae kawngci na lä, honi älo thai ea äni ce lä ätüng käleng hai hang kha känawkhing aetämüng ea Stephen tea aehui ru ö dy. 58Äni bung märü üng ärang mang-a, re kha äni tea bädü hethang kälung hai käde ö dy. Stephen phüng hawi y thui saite na lä, Sawlae näsaite särai tea kä-o na khai pa ö vi dy. 59Tukha Äni ce ma kälung hai käde saite kätü-a, Stephen lä “Areng Isu ä, kai üng Muilaw bung la lawi ba” näkha aetang pa vi. 60Tupyng-a äni lä khokhö didü kha “Areng ä, äni ce üng kai bung bädü te hunghö na bälawi pa ba” näkha ätüng käleng hai hang pyng ea dü pa vi dy.
81Sawlae la Stephen bung bädü te lä bälung aedü te awng by vi.
Äni ce lä kangkawng na tea sakälö khü pa
Honi käni üng hai aetawng kha Jerusalem märü üng Yng saite khimi na lä mätangbälai te na tengxyng y aeting ö phi pa vi dy. Tukätephüng-a äni ce lä Judae khö hai Samari khö mityng qütä-a, pryng ö xhixae vi dy. Angtawtha na qaitä ni Jerusalem-a awng ö kae dy. 2Säthaw tea tämö khai saite khimi phütä na ma, Stephen bung aevui kha ätüng käleng hai-a, raw ö pa vi dy.
3Tungaila Sawlae lä Yng saite khimi na bung täphra hethang aethaw aesa kha awng vi. Äni lä ing qütä-a kung kha Isu tea yng saite nawngmädi nawngmäcaw na bung ne kha thawng thung-a pä-ung pa ö vi dy.
Samari khö-a Angthang Kähawi thui pa
4Yng saite khimi aeprei xhixae saite na lä, mityng qütä-a ly kha Angthang Kähawi thui ö vi. 5Philip lä Samari khö üng märü kälengky-a, ly kha khimi ce tea Mesia üng Angthang Kähawi thui pa dy. 6Khimipui na lä Philip ma thui saite angthang thai kha äni ma sa saite kamarae na la nung ea lä, äni üng älo thui saite na kähawi-a, tängai ö pa vi. 7Philipi lä khimi kä-awng mang na te üng angra na bung mätho pa vi dy. Äni ce lä ätüng käleng hai hangrang kha thoja pa ö vi dy. Ängang kädü sö saite khimi na hai, kökho kangbai na tea la, Philipi ma naw hawi sa ö bawi pa vi dy. 8Tukätephüng-a hani märü üng khimi angxynlyng na lä tengxyng y kawng ö phi pa vi dy.
9Honi märü-a Simon näsaite khimi lawngtä awng vi. Äni lä angra buisaw käqae-a sa te vi. Tukha Samari khimi ce tea cangxei hai pa te vi. Äni lä khimi ce tea “Kai lä mätawngky dy” näkha näpa. 10Tukha kaeneng kaesang üng khimi angxynlyng na ma “Hini khimi lä Säthaw ma käleng-a, khai kha haidae käleng hai sa te vi” näkha Simon üng älo tea tängai ö pa vi dy. 11Simon lä angra buisaw älang hai sa saite lä, khimi ce tea cangxei hai te lä, qae bärai vi dy te phüng-a, khimi ce lä äni üng leithung-a, hui ö vi dy. 12Tungaila Säthaw üng pre Angthang Kähawi phüng hai Isu Khrista üng ämüng phüng Philip ma thui te kätü-a lä, äni ce lä yng pa kha nawngmädi nawngmäcaw na lä, äni te üng baptismae la ö vi dy. 13Simon äma mäteng ma yng kha Philip te üng baptismae la by vi dy. Tukha äni lä Philip leithung mityng qütä-a hui vi dy. Äni lä kamarae käleng na nung te phüng-a, cangxei phi pa te vi.
14Jerusalem märü-a awng saite angtawtha na lä, Samari khö üng khimi na Säthaw üng Angthang tea yng ö vi dy näte thai saite kätü-a lä, äni ce ma Peterae ni Johan bung honi Samari khimi ce tea mätaw pa vi dy. 15Peterae ni Johan tyng te kätü-a, Yng saite khimi na tea lä, Muilaw Käcai dang hethang tähang-a, änini ma aetang pa hawi vi dy. 16Ätephüng-a mei nädylä honi kätü khytä Muilaw Käcai lä äni ce thung üng ämi tea lä tyng pa y vi rawng te phüng-a vi. Yng saite khimi na lä, Areng Isu üng ämüng hai-a baptismae la ö te kae vi. 17Peterae ni Johan ma äni ce üng älö-a, äkö thyng saite kätü-a, äni ce lä Muilaw Käcai dang pa ö vi dy.
18-19Tukha angtawtha änini üng äkö thyng kha khimi ce Muilaw Käcai dang te Simon ma nung ea lä “Kai tea hini kätyng haidae py jo. Tudylä Kai ma äkö hai thyng saite khimi angxynlyng na la Muilaw Käcai dang haw vi ai” näkha angtawtha na tea tangkae py hethang ngai vi.
20Tungaila Peterae ma “Nang lä Säthaw üng lasawng bung tangkae hai rang he aedawng te phüng-a, nang ma üng tangkae hai mangtä nang lä pra sy. 21Säthaw maw-a nang lä tüng y saite bälung awng te phüng-a, kai ce üng kälu thung-a nang lä qa haw y dy. 22Tukätephüng-a, hini hawi y saite bälung kaedawng na tähang ae-ui lawi. Hikä bälung kaedawng kähawi y awng te hunghö bälawi hethang Areng tea aetang kha ae-ui lawi. Nang honi kätyng sa dylä Areng ma hunghö bälawi daila awng ai mang. 23Nang lä tengxyng y bälung pä-e te hai, hunghö üng mawsawng kätyng-a, awng näte kai mäny vi” näpa.
24Tupyng-a Simon ma “Nang ce thui saite ätete na tyng y hethang Areng tea kai tähang aetang pa kü jo” näkha mäthang pa.
25Tupyng-a änini lä Areng Isu üng phüng nung khe saite na hai, Säthaw üng Angthang phüng thui hawi pyng tea lä, Peterae ni Johan lä Jerusalem märü mang-a, vawi haile tyng hawi vi dy. Vawi saite lolang jungtä awng mang saite Samari vang na thung-a, Angthang Kähawi thui pa hawi dy.
Philipi hai Eithiopjae mätawngky
26Säthaw üng angtawtha lä Philip tea “Nang lä Jerusalem märü üng hai Kaza märü-a ly saite lolang kätyng ätüng mang-a ly ba. Honi lolang mang-a lä, khimi ce ly bärai ö y vi” näkha näpa. 27-28Tukätephüng-a Philip lä aetha kha ly vi dy. Tukha äni lä Eithiopia pre üng mätawngky khimi lawngtä hai, aeting pa vi dy. Äni lä Eithiopia pre üng Kangda näsaite sanphrang nä-awi üng kätui awicae angxynlyng na rui pa saite aely kälengky khimi lawngtä vi. Äni lä Jerusalem märü-a ly kha Säthaw tea cäphaw pyng ea äma üng ing mang-a vawi haile tyng te vi. Tukha äni lä äma üng kaeri qawng-a, aedang ea buisaw Isaia üng tärü saite cae-u tea ätüng tho te hai-a, phai pa vi. 29Muilaw Käcai ma Philip tea “Honi kaeri teng-a ly kha awng ba” näpa. 30Tukha Philip lä honi kaeri teng-a aehui vi dy. Honi mätawngky lä äteng-a tyng ea lä buisaw Isaia üng tärü saite cae-u tea äni phai te tüng thai pa ea lä “Nang phai saite cae üng älawngsai tea lä nang mäny vai mei” näkha düng pa dy.
31Äni ma “Kai tea thui mäcai saite khimi awng y hi lä, Kai lä mäny haw y vi” näpa. Tupyng-a Philip tea lä kaeri qawng-a paw kha äni hai mangtä aedang hethang ka pa dy. 32Honi mätawngky phai saite Caekäcai ping-a lä,
“Khimi ce ma äni bung beram kätyng ra hethang nähai ö vi.
Beram lä ämui ba saite khimi na üng maw-a,
sitäri-a awng te kätyng äni lä täbawng aepho y käla awng pa vi.
33Äni bung säri mäneng te kätü-a, kätüng-a thui pa hethang ämi lä awng y.
Äni üng ceng kaesui na phüng ämi la thui pa haw y.
Äni ce lä äni bung älawngpre-a, bädü te phüng-a vi” näpa.
34Honi mätawngky ma Philip tea “Buisaw lä ämi üng phüng thui te mei. Äma üng phüng mei. Khimi kälang lawng lawngtä üng phüng mei. Kai tea thui mäcai jo kae-e” näkha näpa. 35Philip ma honi Caekäcai ping älang thung üng hai aetawng kha Areng Isu üng Angthang Kähawi thui pa vi dy. 36Änini lä khölawng tho te kätü-a, tui awng saite mityng-a, tyng hawi dy. Honi kätü-a mätawngky ma “Hini mityng-a lä, tui awng dy. Kai lä baptismae la hethang dang y mei” näkha düng pa. 37Philip ma “Nang ma Areng Isu tea bälung mitang hai yng khü dylä, kai ma baptismae nang tea py ai mang” näpa. Mätawngky ma “Areng Isu lä Säthaw üng Cäpaw näte kai lä yng vi” näkha mäthang pa dy.
38Tukha mätawngky lä kaeri bung aenawng hai kha änini lä tui thung-a aerung hawi dy. Tupyng-a Philip ma mätawngky tea baptismae py pa vi dy. 39Änini tui thung üng paw hawi te kätü-a lä, Säthaw üng Muilaw Käcai ma Philip bung mityng kälang mang-a, bähawi kha mätawngky lä, äni bung nung haile tyng pa y vi dy. Tungaila äni lä lolang jungtä anghawtho bärai te hai ma, khölawng tho jawjaw vi dy. 40Tukha Philip lä Azotae märü-a tyng vi dy. Khölawng tho prei kha märü haetä pyng-a haetä-a kung ea Angthang Kähawi na thui prei pa vi dy. Kangkhüng-a lä Kesari märü-a tyng dy.
9Sawlae üng khimi kangthae aelawng te phüng
1Honi kätü-a Sawlae lä Areng Isu tea Yng saite khimi na bung bädü hethang kätei te lo thui tütü pa te vi rawng. Äni lä mäthykung kälengky tea ly kha, 2Damasaka märü-a awng te Judae na üng ingkäcai mätawngky na tea py hethang cae mäkai pa vi. Sawlae lä Damasaka-a, Areng Isu üng leithung hui saite nawngmädi nawngmäcaw na bung aeting ea äni ce bung ne kha aethaw paitae hai-a, Jerusalem märü-a nähai hethang aenae ngai te vi.
3Äni lä khölawng tho kha Damasaka märü teng-a tyng te kätü-a, käni mang üng kaevang haetä lä qengtäma äni üng äteng-a, aevang pheng praw pa vi dy. 4Äni lä älawng qawng-a, aetüng praw kha äni hai älo aepe te tüng thai pa vi. Ätüng lä “Sawlae, Sawlae, nang lä ätephüng-a, kai tea sakälö khü te vi mei” näkha düng pa.
5Sawlae ma “Areng ä, nang lä ämi mei” näkha düng pa.
Äni ma “Kai lä nang ma sakälö khü saite Isu dy. 6Tungaila nang lä aetha kha märü thung-a kung lawi. Nang makä sa ai mei näte khimi lawng lawngtä ma thui king pa ai mang” näpa.
7Sawlae hai mangtä khölawng tho saite khimi na lä ri phi te hai älo aepe y käla ma, aedaw kha awng ö vi dy. Äni ce lä ätüng ma qaitä thaisö kha ämi bung la nung pa ö y vi. 8Kangkhüng-a Sawlae lä älawng qawng üng aetha kha ämi bäli te kätü-a, äte haetä la nung pa y vi dy. Tukätephüng-a äni ce lä, Sawlae üng äkö-a süng kha Damasaka märü thung-a bähawi ö pa dy. 9Äni lä käni thungtä khytä ämi aevang pa y. Honi käni thungtä käcakänei na lä ca y dy.
10Damasaka märü-a lä, Anania näsaite Yng saite khimi lawngtä awng vi. Areng Isu ma äsämai mang hai-a “Anania ä” näkha äni tea ka pa vi.
Anania ma “Areng ä, kai lä hi-a awng mang” näkha näpa.
11Areng ma “Nang lä lolang kätaw näsaite mang-a ly lawi. Judae üng ing-a Tasu märü üng Sawlae ämüng awng saite khimi lawngtä bung düng ba. Äni lä aetang kha awng te vi. 12Sawlae lä äsämai mang hai-a, Anania näsaite khimi lawngtä lä kung kha äni üng ämi aevang hai hethang tähang-a, älö-a äkö thyng te nung vi” näkha näpa.
13Anania ma “Areng ä, äni lä Jerusalem märü üng käyng khimi na tea sakälö khü vi näte hai äni üng phüng khimi angxynlyng na ma, thui te lä kai thai vi. 14Tukha Areng tea Yng saite khimi angxynlyng na bung ne hethang mäthykung käleng na te üng aenae dang pyng saite khimi vi” näkha näpa.
15Tungaila Areng ma “Ly lawi. Äni bung lä kai üng mawsawng tähang-a, kai ma re te vi dy. Äni ma ceng kälang na hai äni ce sanphrang na hai, Isrelae khimi na tea Angthang Kähawi thui vi ai. 16Äni lä kai üng phüng khimi ce tea thui te phüng-a, äni lä tengxyng y mätangbälai saite awng mang-a, aeting ai näte kai ma äni tea mäny hai vi ai.”
17Tupyng-a Anania lä Sawlae awng saite ing-a ly kha Sawlae tea äkö thyng pa ea “Kangby ä, lolang-a nang tea aetüng pa saite Areng Isu ma kai bung nang tea mätaw te vi dy. Nang üng ämi aevang haile hethang tähang hai, Muilaw Käcai kawi hethang kai bung nang tea mätaw te vi dy” näkha näpa. 18Qengtäma Sawlae ämi thung üng mawili kätyng-a, ämi üng aeqa pa vi dy. Ämi la aevang haile tyng pa. Äni lä aetha kha baptismae la vi dy. 19Tupyng-a käcakänei na ca kha aethaw na awng haile tyng pa vi dy.
Damasaka märü-a Pawlae ma älo thui pa
Sawlae lä Damasaka märü-a Yng saite khimi na hai mangtä käni bäraw y-a awng pa vi. 20Judae na üng ingkäcai thung-a kung praw kha Isu lä Säthaw üng Cäpaw vi näte phüng thui pa vi dy.
21Äni üng älo thai saite khimi angxynlyng na lä cangxei ö phi vi dy. Äni ce ma “Hini khimi lä Jerusalem märü üng Isu tea Yng saite khimi na bung bädü saite khimi y mei. Hini mityng üng käyng na bung ne kha mäthykung käleng na tea nähai hethang äni lä ly te y vi mei.”
22Tungaila Sawlae lä aethaw awng te hai, Areng Isu lä Mesia tätang vi näte phüng khüsälü-a, thui pa te thai ea lä, Damasaka märü üng awng saite Judae khimi na lä cangxei ö vi dy.
23Tupyng-a käni bäraw y awng te kätü-a lä, Judae mätawngky khimi na lä Sawlae bung bädü hethang kangru-a aedüng ö vi dy. 24Tungaila äni ce ma kangru-a aedüng te lä, Sawlae ma mäny va pa vi. Äni ce lä Sawlae bung bädü hethang kärung käni märü üng hawngkhae na-a aemaw ö vi dy.9:24 2 Kor 11:32-3325Tungaila Sawlae üng äkähui na lä kärung thung-a, äni bung paeceng thung-a mäceng kha märü üng baesung äkhaw mang ruinawng hai bäla käthu pa ö vi dy.
Jerusalem märü-a Sawlae tyng haile pa
26Sawlae lä Jerusalem märü-a tyng te kätü-a, Yng saite khimi na hai mangtä awng hethang aethaw aesa vi. Tungaila äni lä Yng saite khimi lawngtä by vi dy näte äni ce angxynlyng lä yng pa y kha äni tea ri pa ö vi. 27Tukha Banaba lä Sawlae bung angtawtha na tea nähai pa dy. Damasaka lolang-a Areng Isu bung Sawlae nung pyng saite phüng läsy, Areng Isu ma äni tea älo thui saite phüng läsy, Damasaka märü-a, Isu üng ämüng hai angthang thui vawng saite phüng na läsy thui pa dy. 28Sawlae la angtawtha na hai mangtä Jerusalem märü-a awng kha Areng Isu üng phüng ri y käla, khimi ce tea thui pa vi dy. 29Äni lä Käri lo aepe saite Judae na hai älo ae-e te vi. Tukha äni ce lä äni bung bädü he aethaw aesa pa ö vi dy. 30Honi phüng yng saite na thai te kätü-a lä, äni bung Kesari märü-a nähai pa kha, tupyng-a Tasu märü-a tha pa ja vi dy.
31Honi kätü-a Judae khö, Kalile khö hai Samari khö mityng qütä-a kangkawng na lä awngneng pa vi dy. Kangkawng üng khimi na lä Areng Isu tea ri te bälung hai-a, awng kha Muilaw Käcai ma, äni ce tea säbawng kha aethaw py pa vi. Tukha yng saite na lä awng mang rae pa ö vi dy.
Luda märü hai Jopa märü-a Peterae tyng pa
32Peterae lä mityng qütä-a khölawng tho kha Luda märü üng Säthaw Yng saite khimi na tea tyng pa vi dy. 33Honi märü-a lä Ania näsaite khimi lawngtä lä ängang dü kha säning täjaetä tütü aesawng ea awng saite khimi lawngtä bung nung dy. 34Peterae ma äni tea “Ania ä, Isu Khrista lä nang tea naw saite hawi sa te vi dy. Aetha kha i nae tea nang ma ma tä-yng lawi” näkha näpa. Ania lä qengtäma aetha praw pa vi dy. 35Luda märü hai Saron khö-a awng saite khimipui na lä, Ania bung nung kha Areng Isu tea yng ö vi dy.
36Jopa märü-a lä Abitha näsaite Isu tea yng te nawngmädi lawngtä awng. Äni üng ämüng tätang lä Käri lo hai-a, Doka näpa vi. Äni lä kähawi sa te hai mätang saite na tea säbawng he ngaiphi saite khimi vi. 37Doka lä kawngang naw kha dü pa vi dy. Äni üng äro bung lä tui bähu kha ing üng äqawng aekheng-a khai pa ö vi. 38Luda märü lä Jopa märü hai aenaidei vi kha yng saite na lä Luda märü-a Peterae awng näte mäny ö te vi. Tupyng-a khimi lawng netä bung Peterae tea mätaw pa vi dy. Tukha änini ma “Kai ce tea kärang-a ly dawde ba” näkha näpa. 39Tukha Peterae lä änini hai mangtä hui pö jaw dy. Tyng te kätü-a, khimi ce lä äni bung ing üng äqawng aekheng mang-a ka pa. Nawngmädi lömai nä-awi na lä Peterae üng äteng-a sävenglü kha Doka hing te thüng-a sa saite kä-o, käni na mätü kha raw pa ö vi. 40Peterae lä äni ce bung ärang mang-a tho hai pang kha khokhö didü ea aetang pa vi. Tupyng-a äro te mang-a aehawi kha “Abitha, aetha lawi” näpa. Äni lä ämi bäli ea Peterae bung nung kha aetha ea aety pa dy. 41Peterae ma äkö-a süng kha mätha pa dy. Tupyng-a yng te khimi ce hai nawngmädi lömai na tea kähyng kha hing haile tyng saite Doka bung mätü pa vi dy. 42Honi angthang lä Jopa märü-a awng saite khimi na lä honi angthang thai ö vi dy. Tukha khimipui na lä Areng Isu tea yng ö vi dy. 43Tukha Peterae lä Jopa märü üng raebawi phö kälu sa saite Simon hai mangtä käni käqae jaw-a awng vi dy.
10Peterae ni Konelia
1Kesari märü-a Konelia näsaite khimi lawngtä awng vi. Äni lä Rom täre üng mätawngky vi kha Itali täre kangkawng lawng cungvaitä na bung pyng saite lawngtä vi. 2Äni lä Säthaw tea dawngrütü saite khimi vi. Äni hai äni üng engthung rütä na la Säthaw tea tämö khai ö bärai vi. Khimi kangtang na tea tangkae py kha säbawng leilae vi. Säthaw tea la aetang jawjaw kha awng te vi. 3Känitä üng käni aekai te naeri thungtä kätü-a lä, äsämai mang nung vi. Säthaw üng angtawtha lä äni tea ly pa kha “Konelia ä” näkha näpa.
4Äni lä ri te hai-a Säthaw üng angtawtha tea kheng kha “Areng ä, äte mei” näkha näpa.
Säthaw üng angtawtha ma “Nang üng aetang leilae te hai khimi kangtang na tea tangkae hai py vävawi saite na lä, Säthaw ma kawng hai vi dy. 5Vaihi ma Jopa märü-a, khimi mätaw kha Peterae näsaite Simon bung ka lawi. 6Äni lä raebawi phö kälu sa saite Simon üng ing-a aehae vi. Honi ing lä pangle pyng-a awng mang” näkha näpa. 7Honi Säthaw üng angtawtha vawi pyng ea lä, Konelia lä äma üng mawsawng lawng netä hai Säthaw tea bälung aepy saite reisae lawngtä bung kähyng kha, 8Hini aeting saite phüng angxynlyng na äni ce tea thui pa pyng ea lä, äni ce bung Jopa märü-a mätaw pa vi dy. Peterae lä äsämai nung pa dy.
9Äni ce khölawng tho pyng te üng kädang mang käni anghung-a lä, Jopa märü teng-a tyng ö dy. Käni anghung-a, Peterae lä aetang hethang ing üng äqawng-a paw pa vi dy. 10Äni lä äjo aelang phi kha ätete hae haetä ca hethang ngai pa vi. Äni tähang ca nae aerü sälö te kätü-a, äni lä äsämai mang nung pa vi. 11Känipre aepä-awng te na läsy, känih phei haetä kätyng ätäki bälitä tea süng kha Känipre üng hai älawng qawng-a lawngtä ma bäla käthu saite na nung vi. 12Honi na thung-a lä, äkho bälitä awng saite tawngbawi amäjy cawngkhang na, älawng qawng-a kaw-va saite na hai tävaw amäjy cawngkhang na la qa pa vi. 13Tupyng-a “Peterae ä, aetha lawi. Honi na ra kha ca lawi” näte ätüng lä thai pa vi dy.
14Tungaila Peterae ma “Areng ä, aesyng y lyng. Kai lä cai y saite ätete käcakänei lä manila ca vai te y” näkha näpa.
15Äbaeni üng ätüng lä “Säthaw ma caiping vi näsaite tea nang lä cai y näkha thui hang baw” näpa. 16Hokä qengthungtä ätüng na thai pyng ea lä, qengtäma känih phei lä Känipre mang-a lawngtä ma la haile king pa vi dy.
17Peterae lä äsämai mang üng älawngsai phüng mäny hethang aedawng kha awng vi dy. Honi kätü-a Konelia ma mätaw saite khimi na lä Simon üng ing tea düng kha ha ea thokhae kung-a äni lä aedaw kha awng pa vi dy. 18Äni ce ma “Simon näsaite Peterae lä hini ing-a awng mei” näkha hyng ea düng pa ö vi.
19Peterae lä äsämai mang üng phüng dawng mäsüng kha awng te thüng-a, Muilaw Käcai ma Simon tea “Khimi lawng thungtä na lä nang bung ha ö vi. 20Aetha kha aerung pa lawi. Kai ma äni ce bung mätaw te vi kha aedawng näpi y ma ätemakä läsy äni ce hai mangtä hui praw lawi” näkha näpa. 21Tukätephüng-a Peterae lä äni ce tea cäqa pa kha “Nang ce ha saite khimi lä kai dy. Ätemakä hethang nang ce lä, hi-a ly ö te mei” näkha düng pa.
22Äni ce ma “Konelia näsaite täre mätawngky ma, kai ce tea mätaw te vi. Konelia lä khimi mitang vi kha Säthaw tea tämö khai ea ri kha awng saite khimi vi. Judae khimi angxynlyng na üng tämö khai saite khimi la vi. Säthaw üng angtawtha käcai lawngtä lä Konelia tea nang bung kähyng hethang täru pa vi. Nang thui saite na äni tängai hethang tähang vi” näkha näpa. 23Tupyng-a Peterae ma äni ce bung ingthung-a ka kha honi düngtä i hai pa dy.
Kädang mang-a, Peterae lä äni ce hai mangtä hui pa te kätü-a lä, Jopa märü üng Yng saite khimi phütä na lä hui pa ö by vi.
Peterae Konelia ing-a awng te
24Honi pyng üng känitä-a lä, Peterae lä Kesari märü-a tyng vi dy. Konelia lä äma kähyng saite äpy na hai rawijae aesa saite na hai mangtä äni tea aering kha awng pa ö vi dy. 25Peterae engthung-a kung te kätü-a lä, Konelia lä äni üng khokung-a bü kha cäphaw hethang ngai pa vi dy. 26Tungaila Peterae ma “Aetha lawi. Kai lä nang kätyng khimi rungrang by kae baw” näkha Konelia tea aetha hai pa dy. 27Tupyng-a Konelia hai mangtä älo aepe kha äni ce ingthung-a kung te kätü-a, khimi awng mang-a aekäcö kha awng te tea nung pa ö vi dy. 28Tupyng-a Peterae ma äni ce tea “Judae khimi na lä ceng kälang na hai aede he kae y. Äni ce tea dawnghang ly he kae y. Mosi üng Ubädi ma mäkhang saite nang ce lä mäny ö khü te vi. Tungaila Säthaw ma ‘“Ämi tea la cai y” näkha aedawng he kae y,’ näte kai tea Säthaw ma thui mäcai vi dy. 29Tukätephüng-a nang ma kai bung ka te kätü-a, kai lä ae-e y käla ma hui praw te vi dy. Ätephüng-a kai tea kähyng te mei näte phüng kai tea thui ö jo” näkha näpa vi.
30Konelia ma “Jandüng aetawi käni bälitä käni anghung pyng üng naeri thungtä üng vaihi kätyng kätü-a, kai lä ing-a aetang kha awng te kae vi. Hokä ea aecang phrung saite kä-o aelawng saite khimi lawngtä lä kai üng maw-a aedaw praw vi dy. 31Äni ma ‘Konelia ä, nang üng aetang saite tüng lä Säthaw ma thai vi dy ecy. Nang ma kangtang na tea tangkae hai py leilae saite na lä Säthaw ma mäny te vi dy. 32Tukha Jopa märü-a khimi mätaw kha Peterae näsaite Simon bung ka lawi. Äni lä raebawi phö kälu sa saite Simon üng ing-a aehae vi. Honi ing lä pangle pyng-a awng mang’ näkha nä vi. 33Tukätephüng-a kai lä qengtäma nang tea khimi bung mätaw praw te vi. Nang ly pa te phüng-a tengxyng y kai lä kawngphi vi. Nang te mang hai Areng ma thui hai saite angthang tängai hethang tähang-a, kai ce lä Säthaw üng ämaw-a tyng te vi dy” näkha näpa.
Äceng kälang na tea Angthang Kähawi thai hai te
34Tupyng-a Peterae lä “Tätang khü-a ma, Säthaw lä khimi kaeneng kaesang tea kheng te y, näte kai lä vaihi mäny vi dy. 35Säthaw lä ceng angxynlyng na thung üng äni tea ri te hai tämö khai kha kätüng khaw-a sa saite khimi qütä bung ngai te vi. 36Säthaw lä Isrelae khimi na tea mäny hai te angthang phüng, nang ce lä thai ö vi dy. Äte angxynlyng na üng Areng-a bälawng saite Isu Khrista lä khimi angxynlyng na tähang sa saite hai-a, mä-ai lä Säthaw hai aede haw vi dy. Honi lä Angthang Kähawi vi dy. 37Baptismae Johan ma baptismae angthang thui pyng pa te kätü-a, Kalile khö üng hai aetawng kha Judae khö qütä-a Isu ma sa saite angxynlyng na phüng nang ce lä mäny ö vi dy. 38Nazare märü üng Isu lä Säthaw te mang üng Muilaw Käcai hai haidae dang te phüng nang ce lä mäny ö vi. Säthaw lä äni hai mangtä awng te phüng-a, äni lä mityng qütä-a ly kha kähawi sa ea khimi ce bung naw hawi hai te vi. Angra kung te khimi ce thung üng mätho kha Setan angra üng haidae thung mang üng äni ce bung bälawi pa vi dy. 39Jerusalem märü hai Judae khö üng mityng qütä-a la, Isu ma sa saite phüng na kai ce lä nung kha thai khe saite äkung na vi. Tupyng-a khimi ce lä Isu bung thinglang qawng-a täheng kha bädü ö pa vi dy. 40Tungaila käni thungtä käni-a lä, Säthaw ma Isu bung kädü thung üng mätha haile kha khimi ce tea lä, äni bung nung hai pa vi dy. 41Khimi qütä na ma lä, Isu bung nung ö bawi te y vi. Säthaw lä khimi ce tea thui hethang re rüng saite khimi na ni, äni bung nung te kae vi. Honi re saite na lä kai ce vi dy. Isu dü te üng hai, aetha pyng ea, äni hai mangtä ca nei saite na lä kai ce vi dy. 42Kai ce ma nung khe saite hini na khimi ce tea thui hethang mätaw te vi. Säthaw ma Isu bung hing saite hai, dü saite khimi na tea tärae cei kha Areng-a awng hai hethang re pa te phüng-a, mä-ai lä honi phüng thui hethang kae te vi. 43Buisaw na angxynlyng ma, äni üng phüng thui rüng te vi. Isu tea Yng saite khimi angxynlyng na üng hunghö na Säthaw ma bälawi ai näte buisaw na ma thui te vi dy.”
Muilaw Käcai tea ceng kälang na dang pa
44Hikä Peterae thui ea Muilaw Käcai lä angthang thai saite khimi na tea tyng pa vi dy. 45Khimi ceng kälang na la Muilaw Käcai üng lasawng na dang pa vi te phüng-a, Peterae hai mangtä ly saite käyng Judae khimi na ma lä, cangxei ö phi pa vi dy. 46Ätephüng-a mei nädylä khimi ceng kälang na lä Muilaw Käcai ma aepe hai saite älo cawngkhang hai Säthaw tea bälaw ö te phüng-a vi. Tukha Peterae ma äni ce lä 47“Kai ce kätyng Muilaw Käcai dang saite khimi na by vi. Tukätephüng-a ämi ma lä baptismae la hethang ämi la mäkhang haw y vi ai” näkha näpa. 48Tupyng-a Peterae lä äni ce tea Isu Khrista üng ämüng hai-a baptismae py hethang thui pa dy. Tukha Peterae tea äma ce hai käni käqae-a mangtä awng hethang äni ce lä mäkai pa dy.
11Jerusalem märü üng kangkawng tea Peterae älo thui pa
1Ceng kälang khimi na lä Säthaw üng Angthang Kähawi yng ö te vi näte phüng lä angtawtha na hai Judae khö üng Yng saite khimi na ma thai ö vi dy. 2Peterae lä Jerusalem märü-a tyng saite kätü-a, ceng kälang na tea lengkhüng täke hethang ngai hai saite Judae na ma äni sa te lä tämang vi dy näkha Peterae tea käsi thui pa ö vi. 3Äni ce ma “Nang lä ceng kälang khimi na tea dawnghang ly kha äni ce hai mangtä ca te vi be tu” näpa. 4Tukätephüng-a Peterae ma äni ce tea honi phüng angcü üng hai käteng khytä tätang khü-a thui mäcai pa vi dy.
5Peterae ma “Kai lä Jopa märü-a aetang te thüng-a, hini äsämai mang nung te vi. Känih phei haetä kätyng ätäki bälitä tea süng kha Känipre üng hai bäla käthu saite na kai lä nung vi. Tukha honi na lä kai awng saite teng-a tyng vi dy. 6Honi na thung-a kheng saite kätü-a lä, äkho bälitä awng saite ing üng tawngbawi na hai daithung üng tawngbawi na, älawng qawng-a kaw-va saite na hai tävaw amäjy cawngkhang na tea kai lä nung te vi. 7Tupyng-a ‘Peterae ä, aetha lawi. Honi na ra kha ca lawi’ näsaite ätüng kai lä thai te vi. 8Tungaila kai ma ‘Areng ä, aesyng y lyng. Kai lä cai y saite ätete käcakänei tea manila ca vai te y’ näkha näpa. 9Tupyng-a Känipre mang üng äbaeni ätüng lä ‘Säthaw ma caiping vi näsaite tea nang lä cai y näkha thui hang baw nä vi’ näpa. 10Hokä qeng thungtä tyng pyng ea lä, honi angxynlyng na bung Känipre mang-a lawngtä ma la haile king pa vi dy. 11Honi kätü khaw-a kai awng saite ing-a khimi lawng thungtä na lä, tyng vi dy. Äni ce lä Kesari märü üng hai, kai tea mätaw saite khimi na vi. 12Muilaw Käcai ma ‘Äni ce hai mangtä hui praw kha äte lä aedawng näpi y ma’ näkha nä vi. Jopa märü üng Yng saite khimi lawng tärutä lä kai hai mangtä hui ö te vi. Kai ce angxynlyng lä Konelia ing-a aehae ö bawi te vi dy. 13Konelia lä äni üng engthung-a Säthaw üng angtawtha bung aeting kha honi phüng kai ce tea thui vi dy. Säthaw üng angtawtha ma ‘Jopa märü-a khimi mätaw kha Peterae näsaite Simon bung ka lawi. 14Äni lä nang ma hai nang ma ce engthung rütä Säthaw ma aeqang hethang Angthang Kähawi thui vi ai’ näpa. 15Tupyng-a kai lä älo aepe te aetawng angcü-a, Muilaw Käcai lä kai ce tea tyng te kätyng äni ce qawng-a la tyng ö te by vi. 16Tukha Areng Isu üng älo kai lä aedawng haile tyng vi. Äni ma ‘Baptismae Johan lä tui hai baptismae py dy. Tungaila nang ce lä Muilaw Käcai hai-a baptismae dang ö ai mang’ näkha näpa. 17Säthaw ma Areng Isu Khrista tea yng saite mä-ai tähang py te lasawng kätyng ceng kälang khimi na tähang la py te by vi näte lä aenysy te vi dy. Tukätephüng-a kai lä Säthaw tea mäkhang haw y vi” näkha näpa.
18Honi älo thai ea, äni ce lä käsi thui ö y käla ma, Säthaw tea bälaw ö vi dy. “Säthaw lä ceng kälang khimi na tea hing te kangthae dang hethang äni ce tea ae-ui hai pa te vi” näkha näpa.
Antioh märü üng kangkawng
19Isu tea Yng saite khimi na lä Stephen tea sakälö khü kha bädü pa te phüng-a mityng qütä-a, pryng ö xhixae vi dy. Äni ce phütä na lä Phonecia khö, Saipära angrai sälawng hai Antioh märü khytä tyng ö vi dy. Äni ce lä Isu üng angthang Judae khimi na ma qaitä tea thui pa ö vi dy. 20Tukä ea la äni ce thung-a, Saipära angrai sälawng üng hai Sarene khö üng khimi phütä na la Antioh märü-a ly kha Käri lo aepe saite khimi na tea la Areng Isu üng Angthang Kähawi na thui ö pa vi dy. 21Äni ce lä Areng Isu üng haidae na dang te hai-a, khimi awng mang te na lä Areng Isu tea yng kha äni leithung hui ö vi dy.
22Hini angthang lä Jerusalem märü üng kangkawng na ma thai kha Banaba bung Antioh märü-a mätaw pa dy. 23Äni lä honi märü-a tyng ea Säthaw üng tähang kähawi nung te kätü-a lä, anghawtho vi dy. Äni lä Areng Isu tea bälung mitang hai yng jawjaw hethang mätu pa vi dy. 24Banaba lä khimi mitang pa vi kha Muilaw Käcai kawi te hai-a yng saite la cakhi te vi. Tukha khimi awng mang te na Areng Isu tea yng hethang tähang-a, äni lä säbawng bärai pa vi dy.
25Tupyng-a Banaba lä Sawlae bung ha hethang Tasu märü-a ly vi dy. 26Äni hai aeting tea lä Antioh märü-a, kähyng pa. Änini lä säning jungtä kangkawng üng khimi na hai aeting kha khimipui na tea mätu pa ö vi dy. Yng saite khimi na tea angcü-a Khristen näkha mäthi mang saite mityng lä, Antioh märü vi.
27Honi thüng-a buisaw phütä na lä, Jerusalem märü üng hai, Antioh märü-a ly ö dy. 28Honi na thung üng Akäbu näsaite khimi lawngtä lä, aetha kha Muilaw Käcai ma thui te kätyng “Älawngpre mityng qütä-a lä täkang tho ai näkha thui rüng” pa vi dy. Hini thui rüng saite phüng lä Rom Sica sanphrang Kalodia dung-a lä, tyng pa khaw vi dy. 29Yng saite khimi na lä äma ce bäja te rytä Judae khö-a awng saite kangby jä-ai na tea säbawng hethang aedüng aethui ö vi dy. 30Hikä bälung aedü kha thui saite lo kätyng lä säbawng hethang tangkae na tea Banaba ni Sawlae te mang hai-a, Jerusalem märü üng kangkawng mätawngky na tea py pa vi dy.
12Sakälö khü saite tyngrae pa
1Honi kätü-a Herodae sanphrang lä kangkawng üng phütä khimi ce bung ne kha sakälö khü hethang aetawng pa vi dy. 2Äni lä Johan üng kangby Jaeko bung aekei sawngseng hai-a bädü pa hai te vi. 3Hokä sa tea Judae khimi na ngai ö te, Herodae ma nung te kätü-a lä, Peterae bung la ha hai pa vi dy. (Honi kätü lä täkaw aepae saite aesi qa y käla täkaw ca saite pawi kätü vi.) 4Herodae lä Peterae bung ne kha thawng thung-a pä-ung pa vi dy. Reisae kangkawng bälitä tea lä äni bung ty hai pa vi dy. Cäqengja pawi käni pyng-a, Peterae bung Judae khimi na üng maw-a, mätho hai kha älo cei hethang aedawng te vi. 5Tukätephüng-a Peterae bung lä thawng thung-a pä-ung pa vi dy. Tungaila kangkawng üng khimi na ma la Peterae tähang bälung mitang hai-a, Säthaw ma äni tea säbawng pa hethang tähang aetang kha awng ö vi dy.
Peterae lä thawng thung üng aelawi pa
6Peterae bung Herodae ma khimi ce üng maw-a mätho kha älo cei saite käni tyng y te kälang üng kärung thung-a, Peterae lä reisae lawng netä säla-a i kha awng pa vi. Äni bung singqy rui känetä hai, mäkhing kha khai pa vi. Thawng thung üng thokhae kung-a la reisae na ty hai ö pa vi. 7Säthaw üng angtawtha lä Peterae üng äteng-a, qengtäma tyng kha thawng thung-a aevang hai pheng pa vi dy. Säthaw üng angtawtha ma Peterae üng mäna-a täkhaw kha “Aetha dawde lawi” näkha i bälaw pa vi. Tukha Peterae äkö caecei üng singqy rui na lä aela king pa vi dy. 8Säthaw üng angtawtha ma “Nang ma üng khabai aemäkhing kha kho painai aecö lawi” näpa. Peterae lä honi thui te kätyng sa pa vi dy. Tupyng-a Säthaw üng angtawtha ma “Känih aekhu kha kai leithung hui lawi” näkha näpa. 9Peterae lä thawng thung üng tho kha Säthaw üng angtawtha leithung hui pa vi dy. Äni lä Säthaw üng angtawtha ma sa saite tea tätang vi näte mäny pa y vi. Äsämai mang nung kha awng te vi näkha aedawng te kae vi. 10Änini lä thawng rui saite reisae na awng te mityng känetä tea cäqengja kha süng hai sa saite märü üng hawngkhae-a tyng hawi vi dy. Honi hawngkhae lä äma ma aepä-awng va pa vi. Tukha änini lä tho kha lolang äteng-a, bäjui hawi vi dy. Tupyng-a Säthaw üng angtawtha lä qengtäma la pa ja vi dy.
11Tupyng-a Peterae lä aemäny va haile saite kätü-a, “Areng Isu lä Säthaw üng angtawtha bung mätaw kha kai tea Herodae sanphrang kö thung üng hai Judae khimi na ma käsi tyng hai hethang ngai saite angxynlyng na thung üng aelawi hai pa dy näte kai lä vaihi mäny te vi dy” näkha näpa.
12Äni lä hini kätyng mäny te kätü-a, Johan Marka üng änä-awi Maeri üng ing-a ly ja vi dy. Honi ing-a lä Yng saite khimi pui na aekäcö ea aetang kha awng ö te vi. 13Peterae lä baesung üng kätho täkhü tea Roda näsaite mawsawng nawngmädi lä kätho teng-a ly pa dy. 14Äni lä Peterae üng ätüng mae kha anghawtho phi te hai ma kätho pä-awng y käla ingthung mang-a aehui ea kung haile kha äni ma khimi ce tea “Peterae lä kätho üng ärang-a awng dy” näkha näpa. 15Äni ce ma “Nang lä mäthö te vi dy” näpa. Tungaila mawsawng nawngmädi ma äma thui saite lä tätang vi näte phüng thui pa täto kha äni ce ma “Honi lä Peterae bung rui saite Säthaw üng angtawtha ngaw müng” näpa dy.
16Tungaila Peterae lä kätho tea täkhü täto kha awng pa be ea lä, äni ce ma kätho pä-awng pa vi dy. Tukha äni ce lä Peterae bung nung kha cangxei ö vi dy. 17Peterae ma äni ce sitäri-a awng hethang äkö hai mäkhang kha äma bung Säthaw ma thawng thung üng makä sa kha bälawi pa mei näte phüng na thui pa vi dy. Tupyng-a “Hini phüng na Jaeko hai kangby jä-ai kälang na tea thui pa jo ba ä” näkha täru khüng ea lä mityng kälang mang-a ly ja pa vi dy.
18Khö aevang ea lä “Peterae lä ma-a vi dy mei” näkha thawng rui saite reisae na lä aedüng kha bälungbi te hai ri ö phi vi dy. 19Herodae sanphrang lä Peterae bung mäqang hai ea aeting pa y vi kha rui saite reisae na tea älo düng lilöpro kha äni ce tea bädü hai pa vi dy.
Tupyng-a Herodae sanphrang lä Judae khö üng tho kha Kesari märü-a käni käqae-a awng pa vi dy.
Herodae sanphrang dü pa
20Herodae lä Taira märü üng khimi na hai Sidon märü üng khimi na tea tengxyng y kädawtho kha honi märü üng khimi na lä, aekäcö ea äni tea ly pa ö dy. Angcü-a Herodae üng ing-a pyng saite mätawngky Blastus üng säbawng saite na dang ö dy. Tupyng-a Herodae sanphrang tea kung kha aede haile hethang älo na thui pa ö dy. Ätephüng-a mei nädylä, äni ce üng pre lä Herodae sanphrang üng pre-a, vyngsai na rang kha ca nei te phüng-a vi.
21Herodae sanphrang ma aedo saite käni-a lä, sanphrang üng aekhu aena saite ävang käting na aekhu aena kha äma üng aety nae-a aety ea khimi ce tea älo na thui pa vi dy. 22Äni ce ma “Hini ätüng lä khimi üng ätüng y vi. Angra üng ätüng vi” näkha hang ea thui pa ö vi dy. 23Sanphrang lä äma tea khimi ce ma bälaw hethang mäkhang te y vi. Säthaw üng phung-ang khimi ce tea bälaw hai pa y te phüng-a, qengtäma Säthaw üng angtawtha ma äni tea kälung ca hai kha dü pa vi dy.
24Säthaw üng Älo angthang lä aethang hai dü kha Yng saite khimi na lä awng mang rae ea aepu rae pa vi dy.
25Banaba ni Sawlae lä äma ce sa he awng saite kälu na sa khüng pyng ea Johan Marka bung ka ea Jerusalem märü-a ly kha Antioh märü-a vawi ö vi dy.
13Banaba ni Sawlae bung kangkawng üng khimi na ma mätaw pa
1Antioh kangkawng thung-a lä buisaw na hai särae na awng vi. Äni ce lä Banaba, khimi kangnung näsaite Simon, Sarene khö üng Lucia, Herodae hai mangtä ryng saite Manen hai Sawlae ce vi. 2Äni ce lä Areng tea cäphaw kha böjae te hai awng ea, Muilaw Käcai ma “Sawlae hai Banaba bung kai üng kälu sa hethang tähang-a khai ö ba” näkha näpa.
3Tukätephüng-a äni ce lä böjae kha aetang khüng ea lä, Banaba ni Sawlae üng älö qawng-a äni ce üng äkö na thyng pa ö vi dy. Tupyng-a änini bung Muilaw Käcai üng aely kängai kätyng sa hethang mätaw pa vi dy.
Saipära angrai sälawng-a Angthang Kähawi thui pa
4Banaba ni Sawlae lä Muilaw Käcai ma mätaw te kätyng, Selucia märü-a tyng hawi kha honi märü üng hai Saipära angrai sälawng mang-a tui sangphaw aedang kha ly ö dy. 5Äni ce lä Salami märü-a tyng te thüng-a, Judae na üng ingkäcai na thung-a Säthaw üng Angthang thui pa vi dy. Johan Marka ma änini tea säbawng pa te vi.
6Äni ce lä honi angrai sälawng-a aeke kha Papho märü khytä ly pa vi dy. Honi märü-a lä Judae khimi angra buisaw lawngtä hai aeting pa dy. Äni üng ämüng lä Bar Isu vi kha kai lä Säthaw üng buisaw dy näkha thui pa vi. 7Äni lä Rom aecörae mätawngky Serki, Pawlu üng rawijae, vi. Honi mätawngky lä bälunghae saite khimi lawngtä vi. Äni lä Säthaw üng Angthang tängai hethang ngai kha Banaba ni Sawlae tea kähyng hai pa vi dy. 8Tungaila Käri lo hai-a Elima näsaite angra buisaw lä Banaba ni Sawlae hai älo ae-e tütü pa vi. Ätephüng-a mei nädylä mätawngky bung Isu tea yng hethang ngai pa y te vi. 9Tupyng-a Pawlae näsaite Sawlae lä Muilaw Käcai hai kawi kha angra buisaw Elima tea kheng khü pa vi. 10Äni ma “Nang lä Setan angra üng cäpaw, kätüng angxynlyng na üng täre. Nang lä Khimi ce tea kaeling sa jawjaw kha hawi y saite sa pa vi. Nang lä Säthaw üng kätüng sai phüng tea kaeling sa tütü vi. 11Vaihi ma Säthaw üng äkö lä nang qawng-a tyng kha, nang lä ämi bäjö vi ai dy. Nang lä käni bäraw y käni bung nung y vi ai” näkha näpa.
Qengtäma angra buisaw ämi bäjö king pa vi dy. Tukha äni lä äma tea äkö süng kha lolang bähawi hethang khimi bung mäqang kae vi dy. 12Mätawngky lä hokä sa pa saite na nung ea lä, Isu üng angthang tea yng by vi dy. Äni lä Areng Isu üng angthang phüng thai ea lä cangxei pa vi dy.
Pisidia khö Antioh märü-a Säthaw lo thui hawi pa
13Pawlae hai äma üng rawijae na lä Papho märü üng hai tui sangphaw aedang kha Pamphulia khö Peka märü-a tyng ö dy. Honi mityng üng hai Johan Marka lä äni ce hai aeprei kha Jerusalem märü-a vawi haile pa vi dy. 14Tupyng-a änini lä Peka märü üng tho kha Pisidia khö Antioh märü-a tyng hawi vi dy. Tukha änini lä Aehae te Käni-a Judae na üng ingkäcai-a kung kha aety hawi vi dy. 15Mosi üng Ubädi hai buisaw na tärü te cae na phai pyng ea lä, ingkäcai mätawngky na ma äni ce tea “By jä-ai na ä, khimi ce tea aethaw py hethang awng dylä, vaihi älo thui ö” näkha khimi bung mätaw kha äni ce tea thui hai pa dy. 16Pawlae lä aetha kha sitäri-a awng hethang äma üng äkö hai mäkhang pyng ea lä,
“Isrelae khimi na hai Säthaw tea cäphaw saite ceng kälang na ä, kai lo tängai ö e. 17Isrelae khimi na üng Säthaw lä, kai ce üng kangsi kangjaw na bung re te vi dy. Aikuta pre-a angvüng kätyng awng hai ea, äni ce bung awng mang hai rae pa vi dy. Äma üng haidae hai-a, honi pre üng äni ce bung bähawi pa te vi. 18Äni ce bung daithung kärang-a säning ruibälitä rytä änawngsa te hai-a rui pa te vi. 19Tupyng-a Säthaw ma Kanan pre-a awng saite khimi äceng säritä na tea täphra pang kha honi pre tea lä äma üng khimi na pyng hethang py pa vi dy. 20Kai ce üng kangsi kangjaw na Aikuta pre-a tyng pyng te säning cungvai bälitä hai rui bangawtä qae pyng ea lä Kanan pre tea pyng hai pa vi dy.
“Honi na pyng-a lä buisaw Samawila kätü khytä, älo cei saite mätawngky bung Isrelae khimi na tea Säthaw ma py pa vi dy. 21Tupyng-a Isrelae khimi na lä sanphrang lawngtä bung mäkai pa vi. Tukha Säthaw ma Benjamin äpy äjae thung üng, Kisa üng cäpaw Sawlae bung äni ce üng sanphrang mityng-a re pa vi dy. Äni lä säning ruibälitä sanphrang sa pa dy. 22Tupyng-a Säthaw ma Sawlae bung sanphrang mityng üng käsü pa ja kha Davidae bung Isrelae khimi na üng sanphrang-a khai pa vi dy. Säthaw ma ‘Jese üng cäpaw Davidae lä kai üng bälung hai aeting khaw saite khimi vi. Kai ngai saite angxynlyng na äni tea sa hai vi ai’ näkha Davidae phüng thui pa vi dy. 23Säthaw lä Davidae üng kaesui thung mang üng Isu bung Isrelae khimi na tähang Aeqangkung-a mätaw pa vi dy. Jangni-a Säthaw lä hini kätyng sa ai näte Davidae hai mä-ai üng kangsi na tea älo aedo pa vi dy. 24Isu tyng y te kälang-a, Baptismae Johan ma Isrelae khimi angxynlyng na tea ‘Aedawng mäkhüng kha baptismae la ö lawi’ näkha thui pa. 25Baptismae Johan ma äma üng kälu sa te khüng aetawng ea, äni ma ‘Kai tea ämi nä hethang aepö mei. Kai lä nang ce ma aering saite Mesia y vi. Äni lä kai üng leithung-a tyng vi ai. Kai lä Äni üng kho painai rui sö hethang mäteng ma aeteng y’ näkha näpa.
26“Isrelae kangby jä-ai na ä, Abraham üng kaesui hai Säthaw tea yng saite ceng kälang khimi na ä, Säthaw lä khimi bung makä sa kha aeqang mei näte angthang mä-ai tea mäny hai te vi dy. 27Jerusalem märü üng khimi na hai äni ce üng mätawngky na ma Isu lä Aeqangkung näte mäny ö pa y vi. Aehae te Käni qütä äma ce phai saite buisaw na üng cae, älo la mäny ö va y vi. Tungaila äni ce lä Isu bung bädü te hai-a buisaw na üng lo tüngkhaw te vi dy. 28Isu bung bädü hethang sa tämang te haetä mäteng ma awng y ngaila, äni ce lä bädü hethang Pilata mätawngky tea mäkai pa ö vi. 29Äni ce lä honi Isu phüng Caekäcai thung-a tärü pyng saite na kätyng Isu tea sa ö pyng tea lä, äma üng äkähui na ma äro bung thinglang qawng üng bärung kha täprawng-a aevui pa ö dy. 30Tungaila Säthaw ma Isu bung kädükhaw üng mätha haile tyng hai pa vi dy. 31Tukha Isu lä äma hai mangtä Kalile khö üng Jerusalem märü-a ly saite khimi na lä Isu bung käni käqae-a nung ö vi dy. Äni ce lä vaihi Isrelae khimi na tea Isu bung nung te angthang phüng thui pa ö vi dy. 32-33Kai ce lä nang ce tea Angthang Kähawi thui hethang hi-a tyng dy. Säthaw ma mä-ai üng kangsi na tea py saite älo aedo te kätyng äni lä mä-ai tähang vaihi ma cungrü hai vi dy. Säthaw lä Isu bung kädükhaw üng aetha hai ea älo aedo saite cungrü hai te vi dy. Äbaeni üng Sam cae-u thung-a tärü te lä,
‘Nang lä Kai üng Cäpaw vi.
Vaini Kai lä nang üng Pä-ai-a aelawng vi dy.’
34Säthaw ma äma üng Äcäpaw bung aetha haile tyng kha baeni dü haile tyng y vi dy. Tukätephüng-a Säthaw ma
‘Davidae tea tätang khü-a caiping te tähang kähawi na py hethang,
älo aedo te kätyng nang tea py ai mang’ näpa.
35Honi phüng äkälang Sam cae-u thung-a
‘Nang lä Nang ma üng älo tängai khü saite Mawsawng bung täprawng-a rawng hai pa y vi ai’ näkha näpa.
36Davidae lä äma hing te thüng-a, Säthaw ma äni tea sa hai he ngai saite kätyng sa pyng ea, dü kha kangsi kangjaw na üng täprawng-a äni üng äro bung ö pa te vi. Äni üng äro la rawng pa vi dy. 37Tungaila Säthaw ma dü te üng aetha haile pa hai saite Isu üng ätabung lä honi kätyng rawng pa te y vi. 38Kai üng kangby jä-ai na ä, tängai ö. Honi Isu sa te phüng-a, Säthaw ma nang ce üng hunghö bälawi haw saite phüng na, kai lä nang ce tea mäny hai hethang ngai te vi. 39Isu tea Yng saite khimi angxynlyng na tea Säthaw ma kätüng-a nung vi dy. Mosi üng Ubädi hai-a, nang ce tea Säthaw ma kätüng-a nung y lyng. 40Buisaw na üng Caekäcai thung-a tärü te kätyng, Säthaw ma nang tea sa y hethang sädi khai ba.
41‘Buisaw ma kai thui saite älo tea käsi prawng saite khimi na tängai ö. Nang ce lä cangxei te hai pra ö ai.
Kai ma ri hethang kähawi sa pa ai.
Khimi kälang na ma thui mäcai ngaila, nang ce lä yng ö y lyng’” näpa.
42Judae na üng ingkäcai thung üng Pawlae ni Banaba tho hawi te kätü-a lä, khimi ce ma änini tea ämaw mang üng Aehae te Käni-a, hini phüng na thui haile pa hethang mäkai ö vi. 43Judae na üng ingkäcai üng mätawngky na ma khimi ce bung vawi hai te kätü-a, Judae khimi na hai Judae na üng Säthaw tea cäphaw saite khimi na lä Pawlae ni Banaba leithung hui pa ö vi dy. Pawlae ni Banaba lä äni ce hai älo aepe kha Säthaw üng tähang kähawi phüng thui ea yng jawjaw hethang aethaw py pa hawi dy.
44Ämaw mang üng Aehae te Käni-a, Säthaw üng lo tängai hethang märü angxynlyng tingtang üng khimi na lä ly pa ö vi dy. 45Tukä ea Judae khimi na lä khimipui na bung nung te kätü-a, aepä-e te bälung awng ö phi vi. Pawlae thui saite älo tea ae-e kha äni tea käsi prawng pa ö vi. 46Tupyng-a Pawlae ni Banaba lä ri y te hai ma, thui vawng hawi te lä “Kai ni lä Säthaw üng lo Angthang nang ce tea thui mang hethang Säthaw ma kai tea täru te vi. Tungaila nang ce lä Säthaw üng Lo Angthang bung kädesö vi. Nang lä dungtäsa kanghing dang hethang aeteng näkha mätü vi. Tukha kai ni lä nang ce te üng tho kha ceng kälang khimi na tea ly vi ai dy. 47Säthaw ma kai ni tea hini kätyng täru vi.
‘Nang ni ceng kälang ce tea ly kha kaevang mätü hethang nang ni bung mätaw te vi.
Älawngpre angxynlyng-a awng saite khimi na tea äni ma aeqang te dang hai ai näte nang ce ma thui he kae’” näpa.
48Ceng kälang khimi na ma honi Älo angthang thai te kätü-a lä, anghawtho te hai ma Säthaw üng Angthang tea bälaw ö vi dy. Säthaw ma dungtäsa hing saite dang hethang re saite khimi na lä yng ö vi dy.
49Honi kätü-a Areng Isu üng Älo angthang lä honi pre mityng qütä-a aepreng dü pa vi dy. 50Tungaila Judae khimi na lä Säthaw tea cäphaw saite nawngmädi areng na hai märü üng mätawngky khimi na ma Pawlae ni Banaba tea kädawtho rung khytä sa ö pa vi. Äni ce lä Pawlae ni Banaba tea sakälö khü kha äma ce pre üng mäthoja ö pa vi dy. 51Pawlae ni Banaba la äma ni üng khodi na täkhy hawi pa vi dy. Honi kä sa te lä Säthaw ma äni ce bung khaisö te vi näte sämai nae sa te vi. Änini lä Aikonia märü-a ly hawi vi dy. 52Antioh märü üng Yng saite khimi na lä Muilaw Käcai kawi te hai anghawtho kha awng ö jawjaw vi dy.
14Aikonia märü-a Säthaw üng kälu sa pa
1Pawlae ni Banaba lä Aikonia märü-a äni ce üng reitae kätyng Judae na üng ingkäcai-a kung hawi kha Isu üng phüng haidae hai thui pa vi dy. Tukha Judae khimi na hai Käri khimi na lä awng mang-a yng pa ö vi dy. 2Tungaila yng he ngai y saite Judae khimi phütä na ma ceng kälang khimi na tea yng pa y hethang mäcü pa ö vi. Äceng kälang na lä käyng na tea kädawtho rung khytä thui kha bäleng pa ö vi. 3Pawlae hai Banaba ni la honi mityng-a käqae-a awng kha Areng üng phüng ri y te hai ma thui vawng hawi pa vi. Areng Isu ma änini tea cangxei saite na hai kamarae na sa haw hethang haidae py pa vi. Änini ma thui saite Säthaw üng tähang kähawi lä tüng vi näte mätü hethang hikä sa hai pa te vi. 4Märü thung-a awng saite khimi na Angthang Kähawi phüng-a aede ö pa y vi. Phütä na lä Judae khimi na te mang-a qa kha phütä na lä angtawtha na te mang-a awng pa ö vi dy.
5Tupyng-a Judae khimi hai ceng kälang khimi na lä äma ce üng mätawngky na hai Pawlae ni Banaba tea sakälö khü hethang kangru-a aedüng ö vi dy. Äni ce lä Pawlae ni Banaba bung kälung hai käthu kha bädü he aedawng ö vi dy. 6Honi phüng Pawlae hai Banaba ni ma thai hawi te kätü-a lä, Likonia khö üng Lutara hai Debe märü na hai äteng-a awng saite mityng mang-a pryng ja hawi vi dy. 7Honi mityng-a änini lä Areng Isu üng Angthang Kähawi thui jawjaw hawi pa vi dy.
Lutara hai Derbe märü-a Säthaw üng kälu sa pa
8Lutara märü-a aepeng te üng hai ängang dü kha aeke haw y saite khimi lawngtä aety pa vi. 9Äni lä Pawlae thui saite Lo Angthang tängai kha awng te vi. Pawlae lä khimi känaw tea kheng khü ea lä, Isu ma naw te hawi sa pa haw vi näte äni yng te tea nung pa vi. 10Pawlae ma “Aetha lawi” näkha naw saite khimi tea älo tüng käleng hai thui pa vi. Äni lä aetha praw kha aebälü ea aeke pa vi dy. 11Khimipui na lä Pawlae sa saite tea nung kha “Angra na lä khimi kä aecyng kha mä-ai tea ly te vi dy” näkha äni ce üng Likonia khimi ce üng älo tüng käleng hai-a thui ö vi dy. 12Äni ce lä Banaba tea Zeus angra käleng näkha kähyng pa ö vi dy. Pawlae tea lä angthang py saite angra Heme näkha kähyng pa vi. Ätephüng-a mei nädylä, äni lä älo khimi ce maw-a älo aepe pa te phüng-a vi. 13Zeus angra üng ingkäcai lä märü üng ärang teng-a awng vi. Honi Zeus angra üng mäthykung lä raebawi, na hai äpa aesi saite na märü üng hawngkhae mang-a nähai pa vi. Zeus angra üng mäthykung hai khimipui na lä mangtä angtawtha ni tea hani na hai mäthy hethang ngai pa ö vi.
14Hokä sa hethang phüng na angtawtha Banaba hai Pawlae ni mäny te kätü-a lä, bälung aengai y phi te hai äma ni üng kä-o na sä-ei ea khimi ce thung mang-a aehui kha ätüng käleng hai älo aepe pa vi. 15Änini ma “Khimi na ä, ätephüng-a nang ce lä hini kä sa ö te vi mei. Kai ni lä nang ce kätyng khimi by kae be. Kai ni lä nang ce tea Angthang Kähawi thui hethang tyng hawi te kae. Nang ce lä hini ävang ting y te na khaisö kha Säthaw kanghing te mang-a aekö tyng hethang kai ni lä thui te vi dy. Honi Säthaw lä käni älawng, pangle hai honi thung üng ätete angxynlyng na tea sa saite Kung vi. 16Jangni leithung mang-a, Säthaw lä ceng kälang khimi angxynlyng na tea äma ce kängai saite kätyng cäphaw hethang py pa te vi. 17Tungaila Säthaw lä kähawi sa te hai äma awng saite phüng, khimi angxynlyng na tea mätü pa te vi. Säthaw lä käni mang khöne hai kha äma ce üng kätü tyng ea lä, cawbi cawthai na aethai kha müng hai pa te vi. Nang ce tea raca na mäcaw mang kha anghawtho hai te vi” näpa. 18Hini na kätyng angtawtha ni thui ea mäteng ma, khimi ce lä änini tea mäthy hethang reitae hai-a mäkhang haw pa te kae vi.
19Tupyng-a Judae khimi phütä na lä Antioh hai Aikonia märü na mang üng tyng kha Lutara märü üng khimipui na tea äma ce te mang-a qa hai hethang Pawlae ni üng thui saite lä tüng y näkha bäleng pa ö te vi. Äni ce lä Pawlae tea kälung hai käthu kha märü ärang mang-a re kha khaisö pa vi dy. Pawlae lä dü dy näkha äni ce lä dawng ö te vi dy. 20Tungaila yng saite na lä Pawlae üng äteng-a venglükü kha aedaw pa ö vi dy. Tukha äni lä aetha kha märü thung-a kung tyng pa vi dy. Känitä pyng-a Pawlae ni Banaba lä tho kha Debe märü-a ly hawi pa vi dy.
Siria pre Antioh märü-a vawi haile pa
21Pawlae hai Banaba ni lä Derbe märü-a Angthang Kähawi thui kha khimipui na lä awng mang-a yng ö mang pa vi dy. Tupyng-a änini lä Lutara, Aikonia hai Antioh märü na mang-a vawi haile tyng hawi dy. 22Märü qütä änini lä Yng saite khimi na hai aeting ea Säthaw üng Angthang Kähawi thui kha Isu tea yng jawjaw hethang aethaw py pa hawi dy. Tukha änini ma “Mä-ai Isu tea yng saite na lä Säthaw üng pre-a kung y te kälang-a, mätangbälai saite na aeting ö vi ai” näkha Yng saite khimi na tea thui pa dy. 23Pawlae hai Banaba ni lä kangkawng qütä-a mätawngky na bung re kha khai pa dy. Tukha böjae kha aetang ea äni ce yng saite Areng ma rui hethang aetang pa.
24Tupyng-a Pawlae hai Banaba ni lä Pisidia khö üng Pamphulia khö-a tyng hawi vi dy. 25Änini lä Peka märü-a la Angthang Kähawi thui hawi te vi. Honi pyng-a Atalia märü-a tyng hawi dy. 26Honi märü-a änini lä tui sangphaw aedang ea Antioh märü mang-a ly hawi vi dy. Jangni-a Antioh märü üng kangkawng tea Pawlae ni Banaba bung honi mityng-a ly kha Säthaw üng tähang kähawi thui hai hethang mätaw te vi dy. Säthaw ma änini tea säbawng hethang aetang pa ö vi dy. Honi kälu sa te lä vaihi Pawlae ni Banaba lä khüng hawi te vi dy.
27Antioh märü-a änini tyng te kätü-a, änini lä Yng saite khimi na bung aekäcö hai kha äma ni hai-a Säthaw ma sa saite kälu na läsy, ceng kälang khimi na yng hethang Säthaw ma kätü kähawi py te phüng-a läsy, änini ma thui hawi pa haile king te vi dy. 28Tupyng-a änini lä Yng saite khimi na hai mangtä kätü käqae-a awng hawi vi dy.
15Jerusalem märü-a kangkawng üng kawngci
1Khimi phütä na lä Judae khö üng hai Antioh märü-a ly kha käyng na tea “Nang ce lä Mosi üng reitae kätyng lengkhüng täke te awng y dylä, aeqang te dang haw y” näkha mätu ö vi. 2Tukätephüng-a Pawlae hai Banaba ni lä honi khimi ce hai älo aedüng kha tengxyng y ae-e ö vi dy. Tupyng-a Pawlae ni Banaba hai Antioh märü üng Yng saite khimi phütä na bung mangtä hikä ae-e saite phüng, aedüng hai hethang Jerusalem märü üng kangkawng na ma mätawngky na hai angtawtha na tea mätaw ö vi dy.
3Kangkawng üng khimi na lä äni ce bung tha pa ö vi. Äni ce lä Phonecia khö hai Samari khö na tea cäqeng ea ceng kälang khimi na Säthaw tea yng kha khimi kangthae aelawng te phüng na thui pa ö dy. Hini angthang phüng-a, kangby jä-ai angxynlyng na lä anghawtho ö phi pa vi dy. 4Jerusalem märü-a äni ce tyng te kätü-a, kangkawng üng Yng saite khimi na hai mangtä angtawtha na, kangkawng üng mätawngky na ma äni ce bung lady pyng-a, äma ce tea Säthaw ma äni ce hai-a sa saite phüng angxynlyng na thui pa ö king vi dy. 5Tungaila Pharisai na thung üng Yng saite khimi phütä na lä aetha kha, “Ceng kälang Khimi na lä lengkhüng täke hethang kae. Mosi üng Ubädi tea bäjui hethang äni ce tea thui he kae” näkha näpa ö vi.
6Angtawtha na hai kangkawng thung üng mätawngky na lä hini phüng aedawng hethang aekäcö ö vi dy. 7Kätü käqae-a aedüng pyng ea lä, Peterae ma aetha kha “Kangby jä-ai na ä, Säthaw lä jangni üng hai ma ceng kälang khimi na yng haw hethang, Angthang Kähawi thui hai hethang kai bung nang ce thung üng re te vi näte nang ce lä mäny ö te vi dy. 8Khimi ce üng bälung mäny saite Säthaw lä Muilaw Käcai bung mä-ai tea py te kätyng, ceng kälang khimi na tea py pa te hai-a äni ce tea bälung aevaw te phüng mätü pa te vi dy. 9Säthaw lä äni ce bung mä-ai hai täphü kha khai te y. Äni ce lä Isu tea yng te phüng-a, äni ce üng bälung la caiping vi dy. 10Ätephüng-a nang ce lä Säthaw tea käny hethang ngai ö te vi mei. Mä-ai kangsi na läsy, mä-ai ma läsy, phaw haw y saite müngkäli tea ätephüng-a, ceng kälang üng Yng saite khimi na tea phaw hai ö te vi mei. 11Mä-ai lä yng kha Areng Isu üng tähang kähawi hai-a Säthaw lä mä-ai bung aeqang te vi dy. Ceng kälang na tea la honi kätyng aeqang te vi dy.”
12Banaba ni Pawlae lä äma ni mang hai-a ceng kälang khimi na säla-a awng tea Säthaw ma sa saite cangxei te na hai kamarae angxynlyng na phüng thui te thüng-a, aekäcö saite khimipui na lä sitäri-a tängai kha awng pa ö vi dy. 13Äni ce thui pyng te kätü-a lä, Jaeko ma “Kangby jä-ai na ä, kai üng älo tängai ö kae-e. 14Simon ma Säthaw lä angcü-a ceng kälang khimi na thung üng phütä khimi na bung äma üng khimi-a aelawng hai hethang re te hai-a, äni ce bung re vi näte phüng thui mäcai pyng te vi dy. 15Caekäcai thung-a buisaw na üng thui saite älo na lä hini phüng hai aetawng te by vi.
16Areng ma honi khüng pyng-a Kai ly haile kha
Davidae üng pra saite pre Kai ma sa haile vi ai.
Pra saite na kangthae sa bälai kha honi pre bung cakhi hai pa vi ai.
17Honi kä sa te hai-a älawngpre-a awng saite khimi angxynlyng na hai
Kai üng khimi-a aelawng hai hethang Kai ma kähyng saite ceng kälang na Kai tea ly ö vi ai.
18Hini lä Jangni-a Säthaw ma thui rüng saite älo vi” näkha näpa.
19Tukha Säthaw te mang-a aekö haile saite ceng kälang khimi na tea mätangbälai saite tyng hai hethang mä-ai sa hethang aevaw y lyng. 20Mä-ai lä äni ce tea cae tärü hethang aevaw vi. Mimi tea löci sa saite mawi ca hang. Aepawng y käla nawngpui nawngpaw kätyng awng vai y. Känawngjang tära kha ra saite üng ängang la ca hethang kae y. Äthi la nei hethang kae y. Hini phüng lä Judae na känyngky saite na vi. 21Ätephüng-a mei nädylä vaicaw üng hai ma aetawng kha Mosi üng Ubädi cae bung Aehae te Käni qütä Judae na üng ingkäcai na thung-a phai te hai Mosi üng älo phüng märü qütä-a thui ö vi dy.
Yng saite ceng kälang khimi na tea py pa saite cae
22Tupyng-a angtawtha na hai, kangkawng üng mätawngky na kangkawng üng khimi angxynlyng na lä äma ce thung üng khimi na phütä re kha Pawlae ni Banaba hai mangtä Antioh märü-a mätaw he aedawng ö vi. Äni ce lä Yng saite khimi na ma tämö khai saite Basaba näsaite Judae hai Saila ni bung re pa ö vi dy. 23Äni ce hai mangtä cae tha pa ö dy. Honi cae lä “Jerusalem märü-a awng saite angtawtha na hai kangkawng üng mätawngky na ma tärü te vi.
“Kai ce lä Khrista hai-a nang ce üng kangby jä-ai na vi. Kai ce lä Antioh märü, Siria pre, Kiliki khö üng ceng kälang käyng na tea cae tärü kha cibai sa dy. 24Kai ce thung üng khimi phütä na lä kai ce üng älo täru y ta ma nang ce tea ly kha mätangbälai py ea bälungbi saite lo na thui te phüng kai ce lä thai vi dy. 25Tukätephüng-a kai ce lä älo aedüng kha khimi phütä bung re ea nang ce tea mätaw hethang bälung aedü kha sa ö te vi dy. Honi na lä kai ce ma bälung aevaw saite Banaba, Pawlae hai mangtä ly ö ai mang. 26Pawlae ni Banaba lä mä-ai üng Areng Isu Khrista üng kälu sa te phüng-a dü khytä mätangbälai te thung-a tyng vi dy. 27Tukha kai ce lä änini hai mangtä Judae ni Saila bung nang ce tea mätaw te vi dy. Kai ce üng cae thung-a tärü saite phüng na la änini ma thui haile pa hawi ai mang. 28Ngai saite Ubädi qawng-a nang ce lä müngkäli phaw hai y hethang Muilaw Käcai hai kai ce lä bälung aedü ö vi dy. 29Mimi tea löci sa saite mawi ca hang. Äthi lä ca hang. Känawngjang tära kha ra saite üng ängang lä ca hethang kae y. Aepawng y käla nawngpui nawngpaw kätyng awng vai y. Hini na tea aehi dylä hawiky te vi dy. Nawsaw hawi ö sy” näkha awng te vi.
30Mätaw saite äni ce lä Antioh märü-a ly kha Yng saite khimi angxynlyng na bung aekäcö hai kha täru saite cae py pa ö vi dy. 31Honi cae tea phai pa saite kätü-a, käyng na aethaw py saite älo na phüng-a kawng ö phi pa vi dy. 32Buisaw Judae hai Saila ni lä äni ce tea kätü käsa-a aethaw py pa kha yng te cakhi hai rae vi dy. 33Änini lä honi mityng-a kätü käqae-a awng pyng ea lä, Yng saite khimi na ma änini bung tähang kähawi py kha Jerusalem märü-a mätaw haile pa vi dy. 34Tungaila Saila lä ha-a awng hethang aedawng pa vi.15:34 Hini lä Caekäcai phütä thung-a kädawng 34tä awng y vi.
35Pawlae hai Banaba ni lä Antioh märü-a awng ea Areng Isu üng Angthang Kähawi khimi awng mang saite na hai mangtä mätu kha thui ö vi dy.
Pawlae ni Banaba aeprei hawi dy
36Känitä-a lä Pawlae ma Banaba tea “Areng Isu üng Lo Angthang mä-ai thui pyng saite märü qütä awng te yng saite na tea ly haile kha äni ce üng sa saite na kheng hawi si” näkha näpa. 37Hokä ea Banaba lä Johan Marka bung änini hai mangtä nähai hethang ngai pa te vi. 38Tungaila Johan Marka, jangni-a, bung äma ni hai mangtä khölawng kätengpü-a hui y käla Pamphulia khö-a äma ni te üng ly ja pa te phüng-a, Pawlae lä äni bung nähai hethang aevaw y lyng näkha aedawng pa vi dy. 39Änini lä älo tengxyng y-a ae-e kha lolang aeprei hawi te vi dy. Banaba lä Johan Marka bung ka kha Saipära angrai sälawng mang-a tui sangphaw hai ly ja pa vi dy. 40Pawlae lä Saila bung re kha thoja te by vi dy. Yng saite khimi na lä Pawlae ni Saila tea Säthaw üng tähang kähawi dang kha änini hai mangtä awng hethang aetang kha mätaw pa dy. 41Pawlae lä honi mityng üng hai Siria pre hai Kiliki khö-a ly kha kangkawng üng khimi na tea yng te cakhi hai hethang aethaw py te lo thui pa vi dy.
16Pawlae ma Timothe bung kähyng pa
1Tupyng-a Pawlae lä Debe märü hai Lutara märü-a tyng vi dy. Lutara märü-a Timothe näsaite Yng saite khimi lawngtä awng vi. Äni üng änä-awi lä yng saite Judae nawngmädi vi. Tungaila äpä-ai lä Käri khimi lawngtä vi. 2Timothe lä Lutara hai Aikonia märü üng Yng saite khimi na ma kähawi thui pa te khimi lawngtä vi. 3Pawlae lä Timothe bung khölawng-a äma hai mangtä nähai hethang ngai hai te phüng-a äni tea lengkhüng täke pa vi dy. Hini kätyng sa pa te lä äni üng äpä-ai lä Käri khimi vi kha honi mityng-a awng saite Judae khimi na lä mäny ö bawi pa te phüng-a vi. 4Äni ce lä märü haetä pyng-a haetä cäqeng kha ly ö te kätü-a Jerusalem märü-a awng saite angtawtha na hai kangkawng üng mätawngky na ma Yng saite khimi na tängai hethang tähang Ubädi älo thui mäcai pa ö vi. 5Tukätephüng-a kangkawng khimi ce üng yng cakhi rae kha käni qütä yng te khimi ce lä awng mang pa vi dy.
Troa märü-a Pawlae nung saite äsämai
6Pawlae ni Saila lä Phrukia khö Kalatia khö na tea cäqeng ö vi. Muilaw Käcai lä äni ce tea Asia pre cäpi-a Angthang Kähawi thui hethang mäkhang pa vi. 7Äni ce lä Musi khö khöri-a tyng ea Bethunia khö-a ly he ngai ö vi. Tungaila Isu üng Muilaw Käcai ma äni ce tea ly hethang mäkhang pa vi. 8Tukätephüng-a äni ce lä Musi khö bung cäqeng kha Troa märü-a tyng ö vi dy. 9Pawlae lä honi kärung üng äsämai thung-a Makedonia khö üng khimi lawngtä lä aedaw kha äni hai älo aepe te kai lä nung vi. Makedonia khimi na ma “Makedonia khö-a aekae kha säbawng kü” näkha mäkai pa. 10Hini kä äsämai bung Pawlae nung pyng-a, qengtäma kai ce lä Makedonia khö-a ly hethang aerü ö vi dy. Ätephüng-a mei nädylä Makedonia khö üng khimi na tea Isu üng Angthang Kähawi thui hethang kai ce bung Säthaw ma mätaw te vi näkha kai ce lä aedawng ö te phüng-a vi.
Philipi märü üng Lidia yng te
11Tukha kai ce lä Troa märü üng hai Samothrae angrai sälawng mang-a tui sangphaw aedang kha khawngdang mang-a lä Neapoli märü-a tyng ö vi dy. 12Honi märü üng hai Philipi märü-a ly ö dy. Philipi märü lä Makedonia khö üng aely leng saite märü kaehaetä vi. Rom aecörae mätawngky na awng te mityng la vi. Honi märü-a kai ce lä käni bäraw y-a awng ö te vi. 13Aehae te Käni-a lä märü üng hawngkhae ärang mang-a tho kha tävaw teng mang-a awng ö vi. Tupyng-a aetang hethang mityng awng ai müng näkha aedawng ö vi dy. Honi mityng-a kai ce lä aety kha aekäcö saite nawngmädi phütä na älo aepe kha awng. 14Äni ce thung-a Lidia näsaite nawngmädi lawngtä awng vi. Äni lä Thetaria märü üng ly kha ävang ting saite äsae kangthing na rang kha jaw te nawngmädi lawngtä vi. Äni lä Säthaw tea cäphaw kha awng vi. Pawlae thui saite angthang na tängai khü hethang Areng Isu ma äni üng bälung tea mäny hai va pa vi dy. 15Äni hai äma üng engthung na lä baptismae la ö vi dy. Tupyng-a Lidia ma “Kai lä Areng Isu tea yng tätang dy näte nang ce aepö dy cä-üng, kai ing-a kung kha aehae ö jo ba” näkha kai ce tea kähawi-a bähawi vi dy.
Pawlae hai Saila ni bung lä Philipi märü-a thawng thung-a bäla pa
16Nitä-a lä, kai ce lä aetang saite mityng-a ly ö te kätü-a, angra ma kung kha ämaw mang tähang thuikaw saite nawngmädi mawsawng lawngtä hai aeting vi. Äni lä hikä ämaw mang tähang thui rüng pa te hai-a, äma üng ingkung tähang tangkae na dang hai mang pa te vi. 17Honi nawngmädi mawsawng lä Pawlae hai kai ce leithung hui vi. Äni ma “Hini khimi ce lä aesangky saite Säthaw üng mawsawng na vi kha nang ce tea aeqang saite angthang thui pa” näkha ätüng käleng hai thui pa vi. 18Honi nawngmädi tea lä käni bäraw y-a hani kä sa pa te phüng-a, Pawlae lä bälung hawi y vi dy. Kangkhüng-a lä aehawi kha angra tea “Nang lä hini nawngmädi thung üng tho la. Isu Khrista üng ämüng hai-a, kai ma thui te vi” näkha näpa. Tänaetäma angra lä tho pa vi dy.
19Äni üng ingkung na lä äma ce üng tangkae dang saite älang awng y te mäny ö ea lä, Pawlae ni Saila bung ne kha mätawngky na awng saite märü thung üng mityng mang re ea nähai pa vi dy. 20Rom mätawngky na maw-a nähai kha “Hini khimi ce lä Judae khimi na vi. Mä-ai üng märü thung-a aepuilung rungtä sa pa ö te vi. 21Kai ce üng reitae hai aetawng y saite änini lä mätu vi. Rom khimi na ma lä, honi raitae bäjui hethang ngai y vi” näkha näpa. 22Khimi angxynlyng na lä Pawlae hai Saila ni tea sakälö khü he sa pa ö vi.
Rom mätawngky na ma änini üng kä-o na sä-ei kha bo hai hethang täru pa ö dy. 23Reisae na ma Pawlae ni Saila tea bo täto kha thawng thung-a bäla pa ö dy. Märü üng mätawngky na ma la thawng üng äkälengky tea änini bung thawng thung-a kähawi-a rui hethang täru pa dy. 24Tukätephüng-a thawng üng äkälengky lä änini bung thawng thung üng äsäla-a mäkung kha äkho na tea lawngki hai khai pa vi dy.
25Kärung angnihü-a lä Pawlae hai Saila ni lä aetang te hai ae-awi na thui kha Säthaw tea bälaw hawi vi dy. Thawng thung-a awng saite khimi kälang na lä honi tüng na tängai ö pa vi dy. 26Qengtäma älawng-a lä tengxyng y pangtälü naw kha thawng üng aenyng nae lä aehüng pa by vi. Thawng kätho angxynlyng na la aepä-awng praw pa bawi vi. Thawng thung-a awng saite angxynlyng na üng äkö caecei üng singqy rui aela king pa vi dy. 27Thawng üng äkälengky lä aelaw kha thawng kätho na aepä-awng te nung ea lä thawng thung üng khimi na pryng king vi dy müng näkha aekei aemätho ea äma bung aebädü hethang sa pa vi dy. 28Tungaila Pawlae ma “Nang ma tea käsi aesa hang. Kai ce angxynlyng lä hini mityng-a awng bawi ö te vi rawng mang” näkha älo tüng käleng hai thui pa.
29Thawng üng äkälengky lä maito py hethang kähyng vi. Tukha äni ce lä thawng thung-a aehui ea kung pa ö king vi dy. Äni lä käsawtho kha Pawlae ni Saila üng maw-a kaibu kha awng pa vi. 30Tupyng-a äni ce bung ärang-a nähai kha “Särae na ä, kai lä aeqang saite dang hethang makä sa ai mei” näkha düng pa.
31Änini ma “Areng Isu tea yng dylä, nang hai nang ma üng engthung rütä na lä Säthaw üng aeqang saite dang ai mang” näkha näpa. 32Tupyng-a Pawlae hai Saila ni ma äma hai äma üng engthung rütä na tea Säthaw üng Angthang Kähawi lä thui pa hawi vi dy. 33Honi kärung-a raw ma thawng üng äkälengky lä Pawlae ni Saila üng tämaw na tea mäse pa vi dy. Tupyng-a qengtäma äni hai engthung rütä üng khimi na lä baptismae la ö vi dy. 34Äni ma Pawlae ni Saila bung äma ing-a nähai kha käcakänei na hai mäcaw pa vi. Äni hai äma üng engthung rütä na lä Säthaw tea yng te phüng-a, tengxyng y kawng anghawtho ö phi pa vi dy.
35Kädang khö aevang te kätü-a, märü üng mätawngky na lä änini bung thawng thung üng bälawi hethang reisae mätawngky na tea mätaw kha älo thui hai pa ö vi.
36Tukätephüng-a thawng üng mätawngky ma Pawlae tea “Märü üng mätawngky käleng na ma nang ni bung thawng thung üng bälawi hethang thui ö vi dy. Tukätephüng-a bälung derui te hai ma nang ni lä tho hawi lawi” näkha näpa.
37Tungaila Pawlae ma Reisae mätawngky na tea “Kai ni lä Rom khimi na vi. Tungaila äni ce ma kai ni tea älo cei y käla ma khimipui maw-a kai ni bung bo kha thawng thung-a pä-ung vi. Vaihi lä kai ni bung kangru-a mätho hethang ngai te mei. Honi lä aesyng te y lyng. Märü üng mätawngky na äma ce ly khe kha kai ni bung thawng thung üng mätho ö sy” näkha näpa.
38Reisae mätawngky na ma hini phüng bung märü üng mätawngky käleng na tea thui pa ö vi. Pawlae hai Saila ni lä Rom khimi na vi näte phüng äni ce thai ea lä, ri ö phi pa vi dy. 39Tukha äni ce lä ly ea, Pawlae ni Saila tea bäleng te lo na thui pa ö vi dy. Tupyng-a änini bung thawng üng mätho kha honi märü üng tho hethang aesi aebai kha thui pa ö vi dy. 40Tupyng-a, änini lä thawng thung üng tho kha Lidia üng ing-a ly hawi vi dy. Tukha Yng saite khimi na hai aeting kha äni ce tea aethaw py pa vi dy. Honi pyng dylä, honi märü üng änini lä tho hawi pa vi dy.
17Thesalonika märü-a Säthaw üng kälu sa pa
1Pawlae hai Saila ni lä khölawng tho ea Angphipoli hai Apolonia märü na bung cäqeng kha Thesalonika märü-a tyng pa ö vi dy. Honi märü-a lä, Judae na üng ingkäcai awng vi. 2Pawlae lä äma sa vävawi te kätyng honi Judae na üng ingkäcai-a ly dy. Aehae te Käni thungtä khytä Caekäcai phüng aedüng ö dy. 3Pawlae lä Caekäcai phüng thui mäcai kha Mesia mätangbälai ea dü te üng aetha te phüng mätu vi dy. Pawlae ma “Kai ma nang ce tea thui saite Isu lä Mesia vi” näkha näpa. 4Judae Khimi phütä na lä Pawlae thui saite älo tätang vi näkha yng ea äni ce lä Pawlae ni Saila te mang-a qa vi dy. Säthaw tea cäphaw saite Käri khimi awng mang te na hai märü thung-a ämüng aethang saite nawngmädi na la qa by vi.
5Tungaila Judae khimi na lä pä-e te bälung awng ö vi. Äni ce lä märü lolang üng khimi käpra na bung käcö kha aepuilung hai ö pa vi dy. Äni ce lä märü angxynlyng na tea aepuilung hai te vi. Jason näsaite üng ing-a, aethaw paitae hai äni ce lä kung ea Pawlae ni Saila bung mäqang ö vi dy. Änini bung khimi ce maw-a re hethang ngai ö vi. 6Änini bung mäqang kha dang y saite kätü-a lä, Jason hai Yng saite khimi phütä na bung märü üng mätawngky na maw-a re kha nähai ö vi. Äni ce ma “Hini khimi ce lä älawngpre mityng qütä-a aede y phi rung khytä sa ö vi. Äni ce lä vaihi kai ce üng märü-a lä tyng ö te vi dy. 7Jason lä äni ce bung äma üng ing-a aehae hai pa vi. Honi khimi ce lä Sica sanphrang üng Ubädi na tängai ö te y vi. Isu näsaite Sanphrang äkälang lawngtä awng vi” näkha ätüng käleng hai hang pa ö vi dy. 8Honi märü üng mätawngky na hai khimipui na thai ea lä, äni ce lä tengxyng y kädawtho kha aepuilung ö vi dy. 9Mätawngky na ma Jason hai äma üng äpy na tea tangkae na py hai pyng-a lä, äni ce bung bälawi pa vi dy.
Beri märü-a Säthaw üng kälu sa pa
10Honi kärung-a ma, Yng saite khimi na lä, Pawlae ni Saila bung Beri märü-a mätaw pa hawi vi dy. Honi märü-a tyng ea änini lä Judae na üng ingkäcai-a ly hawi dy. 11Beri märü üng khimi na lä, Thesalonika märü üng khimi na qawng-a, bälunghaeky ö vi. Tukha Beri märü üng khimi na lä Pawlae thui saite Angthang Kähawi tea kähawi-a tängai ö te vi. Äni ce lä Pawlae thui saite lo kätyng tüng mei, tüng y mei näte mäny haw hethang Caekäcai tea käni qütä phai ö vi. 12Judae khimi na lä yng ö mang vi dy. Ämüng aethang saite Käri nawngmädi, nawngmäcaw na la awng mang-a yng ö vi dy. 13Pawlae lä Beri märü-a, Säthaw üng Angthang Kähawi thui kha awng te phüng, Thesalonika märü üng Judae khimi na ma thai te kätü-a lä, Beri märü-a ly kha khimipui na tea täre sa hethang mäcü pa ö vi dy. 14Tukha qengtäma Yng saite khimi na ma Pawlae bung pangle pyng mang-a ly hai ja pa ö vi. Tungaila Saila hai Timothe ni lä Beri märü-a, awng hawi jawjaw vi dy. 15Äni ce lä Pawlae bung Athen märü-a nähai pa vi dy. Äni ce Beri märü-a vawi y kälang-a, Pawlae lä Saila ni Timothe bung kärang-a, äma tea ly hethang älo täru pa vi dy.
Athen märü-a Säthaw üng kälu sa pa
16Pawlae lä Athen märü-a, Saila hai Timothe ni bung aering kha awng te thüng-a, honi märü-a mimi na awng mang te nung ea lä, äni lä bälung hawi y vi dy. 17Äni lä Judae na üng ingkäcai-a ly kha Judae khimi na hai Judae na üng Säthaw tea cäphaw saite mityng-a cäphaw te ceng kälang khimi na hai aedüng ö vi dy. Käni qütä märü üng äsäla-ung-a aekäcö kha awng saite khimi na hai äni lä älo aethui vi dy. 18Epikura üng bälung käcüng aedawng saite hai Satu-i üng bälung käcüng aedawng saite Särae na hai la, Pawlae lä aedüng aethui vi dy.
Honi thung üng khimi phütä na ma “Hini lopu lä äte na thui hethang ngai te mei” näkha düng pa. Äkälang khimi na ma “Äni lä ceng kälang na üng angra na phüng thui te ngaw müng” näkha näpa. Ätemakä mei nädylä, Pawlae lä Areng Isu phüng hai äni dü te üng aetha te Angthang Kähawi thui te phüng-a vi. 19Tupyng-a äni ce lä Pawlae bung Aripaku me anghung mang-a, aekäcö saite kawngci mang-a nähai pa vi dy. Äni ce ma “Nang thui saite matu te kangthae phüng kai ce mäny hethang ngai ö by. 20Nang ce thui saite phüng phütä na lä, kai ce tähang äkangthae vi. Honi älo üng älawngsai na kai ce lä mäny he ngai vi” näkha näpa ö vi. (21Athen märü üng khimi angxynlyng na hai, honi märü-a awng saite angvüng na lä, angthang kangthae phüng thui kha tängai te hai-a, kätü na byng hai ö te vi dy.)
22Tupyng-a Pawlae lä Aripaku kawngci maw-a aedaw kha “Athen märü üng khimi na ä, nang ce lä tengxyng y Käri angra na tea tämö khai saite khimi na vi näte kai lä nung te hai-a mäny te vi. 23Kai lä nang ce üng märü-a aeke prei kha angra na tea cäphaw saite mityng na kheng te kätü-a, ‘Mäny y saite angra tähang’ näkha cae tärü saite maicang haetä tea nung te vi. Hikä nang ce mäny y käla, cäphaw saite phüng tea vaihi kai lä thui hethang ngai. 24Honi na lä älawng hai älawng qawng-a awng saite äte amäjy cawngkhang na tea sa pa saite Säthaw kae vi. Honi Säthaw lä älawng käni pyng saite Areng vi. Äni lä khimi üng kö hai sa saite ingkäcai na thung-a awng y lyng. 25Säthaw lä khimi hai tawngbawi na angxynlyng tea hing hethang aely ngai saite na py pa te vi. Tukätephüng-a khimi ce ma äni tähang lä äte haetä la sa hethang dang y lyng. 26Säthaw lä angcü-a khimi lawngtä bung sa kha honi khimi üng hai ceng angxynlyng na bung sa pa vi. Säthaw ma honi khimi na bung älawng mityng qütä-a awng hai pa te vi. Honi khimi ceng qütä na awng hethang mityng hai, kätü käni na tea Säthaw lä khai rüng pa te vi. 27Khimi ce ma Säthaw bung mäqang hai hethang äni lä hini kätyng angxynlyng na sa pa te vi dy. Säthaw lä khimi ce ma äma bung ha kha aeting hai hethang ngai te vi. Tätang khü-a, Säthaw lä mä-ai angxynlyng hai hanglaw-a awng te y vi. 28Khimi lawngtä ma thui te lä
‘Mä-ai lä äni hai-a, hing kha aetae ea kälu sa haw te kae vi.’
Nang ce üng cae tärü te särae phütä ma
‘Mä-ai lä Säthaw üng nade na vi’ näkha tärü vi.
29Tukätephüng-a mä-ai lä Säthaw üng nade na vi näte, Säthaw lä sui, tangkae, kälung hai-a saite mimi hai, aetawng vi näkha aedawng ö hethang kae te y. Khimi ce lä äma ce üng kaw te bälung käcüng hai mimi na sa ngaila, honi na lä hing ö te y vi. 30Jangni-a khimi ce ma Säthaw bung mäny y ngaila äni lä bälung käsa hai awng te vi. Vaihi lä mityng qütä-a khimi ce aedawng mäkhüng hethang hai, äni tea aekö haile tyng hai hethang äni lä losai py te vi. 31Ätephüng-a mei nädylä, Säthaw ma re saite Areng hai-a, älawngpre üng khimi angxynlyng na tea kätüng-a, tärae cei saite kätü lä khai pa pyng te vi dy. Honi kätyng sa hethang, Isu bung kädü thung üng mätha haile te hai-a, khimi angxynlyng na tea sasi mätü te vi dy” näkha näpa.
32Pawlae ma kädü üng aetha haile te phüng thui te thai ea lä khimi phütä na ma, mänui hai pa ö vi. Tungaila khimi phütä na ma “Nang thui saite phüng, kai ce thai haile tyng hethang ngai rae vi rawng” näkha näpa ö vi. 33Tupyng-a Pawlae lä Aripaku kawngci üng ly ja pa vi dy. 34Khimi phütä na lä Pawlae leithung hui kha Isu tea yng ö vi dy. Honi na thung-a Daionesi näsaite lä, Aripaku kawngci üng äpy lawngtä by vi. Damari näsaite nawngmädi lawngtä hai khimi kälang phütä na lä qa te by vi.
18Korin märü-a Säthaw üng kälu sa pa
1Tupyng-a Pawlae lä Athen märü üng tho kha Korin märü-a tyng vi. 2Honi märü-a Ponta khö üng Akuila näsaite Judae khimi lawngtä hai, äni üng nawngpui Precila ni hai aeting vi. Judae khimi qütä na lä Rom märü üng tho hethang Kalodia Sica sanphrang ma aenae lo thui pa te phüng-a, äni ce lä qae y te kätü-a ma, Itali pre üng tho saite khimi na vi. 3Äni ce lä Pawlae kätyng mawiphö hai taipung kälu sa saite khimi na vi. Tukätephüng-a Pawlae lä, äni ce tea ly kha äni ce hai mangtä kälu sa kha awng pa te vi dy. 4Aehae te Käni qütä Pawlae lä Judae na üng ingkäcai-a Judae khimi na hai Käri khimi na yng hethang äni ce hai Säthaw lo aedüng aethui ö dy.
5Saila hai Timothe ni lä Makedonia khö üng tyng te kätü-a, Pawlae lä Angthang Kähawi kätü qütä thui jawjaw kha Areng Isu lä Mesia vi näte phüng Judae khimi na tea kähawi-a thui mäcai pa ö vi dy. 6Tungaila Judae khimi na lä äni tea älo e pa kha käsi prawng te kätü-a lä, Pawlae lä äma üng kä-o qawng üng angmawngdi na täkhy kha äni lä “Säthaw ma nang ce tea dungtäsa dengpy dylä, honi lä nang ma ce üng sa tämang saite phüng-a kae. Kai üng sa tämang te y. Vai üng hai aetawng ea kai lä ceng kälang khimi na tea ly ai” näkha näpa. 7Tupyng-a Pawlae lä Judae na üng ingkäcai thung üng tho kha Säthaw tea cäphaw saite ceng kälang khimi Titu Justus üng ing-a Angthang Kähawi thui pa vi dy. Honi ing lä Judae na üng ingkäcai hai aenaidei pa vi. 8Judae na üng ingkäcai mätawngky sa saite Krispus hai, äma üng engthung rütä na lä Isu tea yng ö vi dy. Korin märü üng ceng kälang khimi na la, Angthang Kähawi thai ea yng pa kha baptismae la ö mang vi dy.
9Pawlae lä kärungtä-a äsämai haetä nung vi. Areng ma “Ri y hang. Kai üng phüng thui phai thui ba. Sitäri-a awng hang. 10Kai lä nang hai mangtä awng te phüng-a, ämi ma la, nang tea käsi sa haw y lyng. Hini märü-a, kai üng khimi na lä awng mang te vi” näpa. 11Tukätephüng-a Pawlae lä Korin märü-a säningtä hai law tärutä awng kha Säthaw üng älo äni ce tea mätu pa vi dy.
12Kalio lä Käri pre-a, Rom aecörae üng mätawngky kälengky-a re kha pyng te thüng-a, Judae khimi na lä aekäcö kha Pawlae bung ne ea älo cei saite mityng mang-a nähai pa vi dy. 13Äni ce ma “Hini khimi lä Judae na üng Ubädi tea elekhei sa kha Säthaw tea cäphaw hethang khimi ce bung bäleng te vi” näkha thui pa.
14Pawlae ma älo aepe hethang sa ea lä, Kalio ma “Judae khimi na ä, hini khimi ma Rom Ubädi tängai y käla kaeling-a hawi y saite sa te awng dylä, kai lä nang ce üng thui saite lo tea änawngsa te hai tängai pa ai mang. 15Tungaila hini aedüng aethui saite älo hai ämüng na lä nang ce üng reitae hai aesui te phüng-a, nang ma ce ma aethui ö raw te kae. Kai ma hini phüng tea lä tärae cei hethang ngai y lyng” näkha näpa. 16Tupyng-a Judae khimi na bung älo cei saite mityng üng äni ma mäthoja hai pa vi dy. 17Äni ce lä Judae na üng ingkäcai mätawngky Sothene bung ne kha älo cei saite mityng-a bo pa ö vi. Tungaila Kalio lä honi sa saite tea dawngcang y käla awng pa vi.
Antioh märü-a Pawlae tyng haile pa
18Pawlae lä Korin märü-a, käni rui bäraw y-a awng vi. Tupyng-a by jä-ai na te üng tho kha Precila, Akuila ce hai mangtä Siria pre-a tui sangphaw aedang kha ly ö dy. Kenkria märü üng tui sangphaw tho y kälang-a, äni lä Säthaw tea älo aedo te sämai nae tähang-a äma lä äsang aeba vi dy. 19Ephesi märü-a tyng saite kätü-a, Pawlae ma Prekila ni Akuila lä märü-a, awng hai pa vi dy. Pawlae lä Judae na üng ingkäcai-a kung kha Judae khimi na hai älo aedüng aethui vi dy. 20Khimi ce lä äma ce hai mangtä käni rui bäraw y-a, awng hethang mäkai ngaila Pawlae lä ngai pa y. 21Tungaila Pawlae lä “Säthaw ma aely ngai vi dylä, nang ce tea kai ly haile tyng ai mang” näkha tui sangphaw-a paw kha Ephesi märü üng tho ja pa vi dy.
22Äni lä Kesari märü-a tyng ea tui sangphaw qawng üng aerung pyng-a Jerusalem märü-a ly kha kangkawng üng Yng saite khimi na tea kawng bärai sa pa dy. Tupyng-a Antioh märü-a ly vi dy. 23Honi märü-a käni bäraw y, awng pyng-a khölawng tho kha Kalatia khö hai Phrukia khö-a tyng ea lä, Yng saite khimi angxynlyng na tea Säthaw üng älo angthang hai aethaw py pa vi dy.
Ephesi märü hai Korin märü-a Apolo älo thui pa
24Honi kätü-a Apolo näsaite Judae khimi lawngtä lä Ephesi märü-a tyng pa vi dy. Äni lä Alesanda märü üng vi kha bälung cüng bärai te hai Caekäcai tea lä mäny bärai saite khimi vi. 25Areng Isu üng phüng na aetu vai saite khimi la vi. Äni lä Isu üng phüng na bälung mitang hai-a, khimi ce tea mätu pa vi dy. Äni lä Isu üng phüng thui tätang khaw te vi. Tungaila äni lä Baptismae Johan üng baptismae ma qaitä mäny te kae vi. 26Äni lä Judae na üng ingkäcai-a, ri y te hai älo thui vawng vi dy. Precila hai Akuila ni äni üng thui saite älo thai ea lä, äni bung ing-a kähyng kha Säthaw lä khimi ce tea ätemakä aeqang mei näte phüng na kähawi-a, thui mäcai hai pa vi dy. 27Apolo lä Käri pre-a ly hethang ngai ea lä, Ephesi märü üng kangby jä-ai na ma äni tea aethaw py pa vi. Käri pre üng khimi na tea äni bung lady hethang cae tärü te hai-a säbawng pa dy. Äni lä ha-a tyng ea Säthaw üng tähang kähawi hai-a, yng saite na tea awng mang-a säbawng pa dy. 28Khimipui na maw-a aedüng aethui bärai ea Judae khimi na tämang vi näte mätü pa vi dy. Ätephüng-a mei nädylä, äni ma Isu lä Mesia vi näte Caekäcai na hai-a mätü pa te vi.18:28 Äsang aeba te.
19Ephesi märü-a Pawlae tyng pa
1Korin märü-a Apolo awng te thüng-a Pawlae lä khölawng tho kha Kalatia khö hai Prukia pre cäqeng kha aeke prei pyng-a, Ephesi märü-a tyng vi dy. Honi märü-a äni lä Yng saite khimi phütä na hai aeting vi. 2Äni ma “Nang ce lä Yng saite khimi-a aelawng ea Muilaw Käcai dang ö dy mei” näkha düng pa.
Äni ce ma “Muilaw Käcai awng saite phüng kai ce lä thai vai te y vi rawng” näkha mäthang pa.
3Tukha Pawlae ma “Tukä dylä nang ce lä äte makäti baptismae dang ö te mei” näkha düng pa.
Äni ce ma “Baptismae Johan üng baptismae dang te vi” näkha näpa.
4Pawlae ma “Baptismae Johan üng baptismae lä hunghö üng aedawng mäkhüng vi dy näte sämai nae vi. Johan lä äma üng leithung-a, tyng saite äni tea yng he kae näkha Isrelae khimi na tea thui pa te vi. Äni ma thui saite lä Areng Isu vi dy” näpa.
5Tukätephüng-a hani älo thai ea, äni ce lä Areng Isu üng ämüng hai-a, baptismae la ö vi dy. 6Pawlae ma äni ce üng älö-a äkö thyng pa ea lä, Muilaw Käcai lä äni ce tea tyng pa vi dy. Tukha äni ce lä Muilaw Käcai ma aepe hai saite älo cawngkhang na aepe ö vi dy. Säthaw üng Angthang Kähawi na la thui pa ö by vi dy. 7Äni ce lä khimi lawng hawlai netä tingtang awng pa te vi.
8Pawlae lä Judae na üng ingkäcai-a ly kha Säthaw üng pre phüng khimi ce tea ri y te hai aedüng ea äni ce yng rung khytä bäleng pa vi. Äni lä hini kätyng, law thungtä tütü sa vi. 9Tungaila khimi phütä na lä bälung tangkö kha yng he ngai ö pa y vi. Khimipui maw-a Areng üng mätu saite phüng na tea käsi thui pa ö vi. Tukätephüng-a Pawlae lä Judae na üng ingkäcai üng tho kha Yng saite khimi na bung nähai vi dy. Tairana näsaite khimi üng cae aetu nae mityng-a, käni qütä älo na aedüng aethui pa vi dy. 10Hini kä säning netä tütü sa kha Asia pre cäpi-a, awng saite Judae khimi na hai Käri khimi na angxynlyng lä, Säthaw üng älo angthang thai ö pa vi dy.
Seva üng caw na
11Säthaw lä Pawlae hai-a tengxyng y cangxei saite kamarae na sa hai pa vi. 12Khimi ce lä Pawlae ma tawng saite sipry hai aekhu aena nae na khimi känaw na hai angra kung saite khimi na tea nähai pa kha äni ce üng äqawng-a thyng kha khimi känaw na üng naw saite na hawi hai pa ea angra na bung la äma ce kung saite khimi te üng tho hai ja pa ö vi dy. 13Judae khimi phütä na lä, khölawng tho rungrang ea Areng Isu üng ämüng hai-a, angra na bung mätho hethang aethawsa ö vi. Äni ce lä “Pawlae ma thui saite Isu üng ämüng hai-a, nang bung kai mätho dy” näkha khimi üng äthung-a kung saite angra tea näpa ö vi. 14Seva näsaite Judae na üng mäthykung kälengky üng cäpaw lawng säritä na lä hini kätyng sa ö vi dy.
15Tungaila angra ma “Isu bung kai mäny vi. Pawlae bung la kai mäny vi. Tungaila nang ce lä ämi ce mei” näkha düng pa vi dy.
16Tupyng-a angra kung te khimi lä äni ce tea täba kha äni ce bung bäja ea bo täto pa vi. Äni ce lä kä-o na aesä-ei ea tengxyng y tämaw dang kha honi ing üng aehui ö pang vi dy. 17Hini phüng na Ephesi märü üng Judae khimi na hai Käri khimi na angxynlyng ma thai ea lä, äni ce lä ri ö phi pa vi dy. Tukha Areng Isu üng ämüng tea äni ce tämö khai ö phi pa vi dy. 18Areng Isu tea Yng saite khimi na lä ly mang kha äma ce üng hunghö na khimi ce maw-a täphawng pa ö vi dy. 19Angra haidae hai khimi ce tea hawi y sa saite khimi na lä äma ce üng cae ang-yng na käcüng kha nähai ea khimipui na maw-a maisawi ö vi dy. Honi cae-u na üng ävang na to ea lä, phawisae pjae täsawng bangtä tingtang awng pa te vi. 20Hini kätyng-a Areng Isu üng angthang lä aesadü kha khimi ce lä mäny ea yng ö mang pa vi dy.
Ephesi märü-a aepuilung te tyng pa
21Hini na pyng-a, Pawlae lä Makedonia khö hai Käri pre cäqeng kha Jerusalem märü-a ly hethang aedawng pyng pa te vi dy. Äni lä “Honi märü-a ly pyng-a Rom märü-a lä ly ngece by vi ai rawng” näkha thui pa vi. 22Äni lä äma hai mangtä kälu sa saite Timothe hai Erastus ni bung Makedonia khö-a mätaw vi dy. Äma lä Asia pre cäpi-a, käni käqae-a awng te vi.
23Honi kätü-a Ephesi märü-a, Areng Isu üng angthang mätu saite phüng-a, aepuilung hai pa vi dy. 24Demetrius näsaite pething the te khimi lawngtä lä tangkae hai mimi sa te vi. Hini mimi na lä Atemi angra anglaw üng ingkäcai hai aetawng vi. Demetrius lä äma üng äpy na tähang phawisae dang hai mang pa te vi. 25Demetrius lä äma üng äpy hai honi kälu sa saite khimi na bung aekäcüng hai kha “Rawijae na ä, hini kälu hai-a, mä-ai lä phawisae na dang mang te nang ce lä, mäny ö vi dy. 26Hini Pawlae näsaite khimi lä, Ephesi märü üng khimi na angxynlyng tea äni üng lo yng rung khytä bäleng vi näte nang ce lä mäny ö vi dy. Äni lä Asia pre cäpi angxynlyng na-a hini kätyng sa vi. Pawlae ma thui saite lo lä khimi üng äkö hai sa saite lä Säthaw na tätang y näkha thui jawjaw vi. 27Khimi ce lä äni üng lo tängai jawjaw dylä qae y kälang-a, mä-ai üng sa saite na ävang ting y näkha thui vi ai dy. Honi qawng-a cang y khimi ce lä, Atemi angra anglaw cäpaw hethang näkha ämi la äni üng ingkäcai-a ly y dy lyng. Asia pre cäpi hai älawngpre angxynlyng na-a khimi ce lä Atemi angra anglaw käleng tea cäphaw ö te vi.”
28Honi älo thai ea lä, khimipui na lä Pawlae tea kädawtho ö vi dy. “Äni ce lä Ephesi märü üng Atemi angra anglaw lä kälengky vi” näkha ätüng käleng hai-a, hang ö vi dy. 29Hini aepuilung saite lä Ephesi märü-a awng pa vi dy. Khimi ce lä Pawlae üng rawijae sa saite Makedonia khö üng khimi Kaju hai, Aristaku ni bung ne kha märü üng miting sa te mityng käleng-a nähai pa ö vi dy. 30Pawlae lä äma ma honi khimipui na maw-a ly kha älo thui he ngai te vi. Tungaila Yng saite khimi na ma honi kätyng sa y hethang mäkhang pa ö vi. 31Pawlae üng rawijae aecörae mätawngky phütä na ma äni tea khimi mätaw praw kha miting sa te mityng thung-a, kung y hethang aesi aebai pa ö vi dy. 32Hini kätü-a, aecö saite khimi na lä tengxyng y, xhuxa ö pa vi dy. Phütä na lä älo tho ea mangtä hang kha äkälang phütä na lä älo kälang tho ea mangtä hang ö te vi. Tyng saite khimi kä-awng mang na lä, ätephüng-a aecö ö te mei näte mäny ö y vi. 33Judae na lä Alesanda näsaite Judae khimi bung khimipui maw-a, nui pa vi. Khimipui thung üng khimi phütä na lä, Alesanda ätemakä sa ai mei näte ätüng käleng hai-a, hang ö vi dy. Alesanda lä khimipui na tea sitäri-a awng hethang äkö hai mätü pa vi. Äni ce tea älo thui hethang äni lä ngai te vi. 34Tungaila äni lä Judae khimi vi näte khimi ce ma mäny ea lä “Ephesi märü üng Atemi angra anglaw lä kälengky vi” näkha naeri netä khytä ätüng mangtä hai hang ö vi dy.
35Tupyng-a märü üng cärei kälengky ma, khimipui na tea sitäri-a, awng hai kha “Ephesi khimi na ä, Ephesi märü lä Atemi angra anglaw üng ingkäcai hai, Känipre üng aeqa saite äni üng mimi kähawi-a rui vi näte älawngpre khimi ce ma, mäny bawi te vi. 36Hini phüng na lä ämi ma la, e haw y lyng. Tukätephüng-a nang ce lä sitäri-a, awng he kae. Kähawi-a aedawng y käla, äte la, sa he aevaw y vi. 37Nang ce lä hini khimi ce bung hini mityng-a nähai ö vi. Äni ce lä mä-ai üng cäphaw saite ing na thung-a, kung kha theru sa te y vi. Mä-ai üng angra anglaw tea käsi prawng te la awng te y vi. 38Demetrius hai äpy pething sa saite khimi na lä, khimi lawng lawngtä tea käsi thui he ngai dylä älo aecei te mityng awng. Aenae pyng saite khimi na la awng. Jung-a la, nang ce teng hethang dang mang. 39Tungaila nang äkälang ätete phüng na awng dylä märü üng aekäcö nae mityng-a ly kha aedüng hai hethang dang mang. 40Vaini xhuxa saite phüng-a, aecörae mätawngky na ma, käsi thui he awng te vi. Hikä xhuxa hethang lä awng te y vi. Hikä xhuxa hai hethang phüng la mä-ai lä älang mätü haw y lyng” näkha näpa. 41Hini kätyng thui pyng ea märü üng cärei kälengky ma khimipui na tea honi mityng üng aeprei hai pa vi dy.
20Pawlae lä Makedonia khö hai Käri pre-a ly te
1Tukha xhuxa saite na byng ea, Pawlae lä Yng saite khimi na bung kähyng kha aethaw py te älo na thui pa dy. Tupyng-a äni ce tea kähawi-a, awng ö ba. Kai ly ai dy ba ä, näkha Makedonia khö-a ly ja pa vi dy. 2Äni lä honi khö-a ly prei kha Yng saite khimi na tea aethaw py te älo na thui pa mang pyng ea lä, Käri pre-a ly pa vi dy. 3Äni lä Käri pre-a law thungtä awng dy. Tupyng-a Siria pre-a tui sangphaw aedang he sa ea, äni bung bädü hethang Judae khimi phütä na ma, aemäcü saite angthang äma lä mäny pa vi. Tukätephüng-a äni lä Makedonia khö cäqeng kha vawi hethang bälung aedawng dy. 4Pawlae hai mangtä hui saite äpy na lä Beri märü Puru üng cäpaw Sopata, Thesalonika märü üng Aristaku hai Sekunda ni, Debe märü üng Kaju, Timothe Asia pre cäpi üng Tukhika hai Trophima ce angxynlyng na vi. 5Äni ce lä langmaw-a ly kha kai ce tea Troa märü-a aering ö te vi. 6Täkaw aepae saite aesi qa y käla täkaw ca saite pawi pyng-a, Philipi märü üng hai tui sangphaw aedang kha käni bangawtä pyng ea lä, äni ce awng saite Troa märü-a tyng dy. Hani märü-a, kai ce käni säritä awng ö vi.
Troa märü-a Pawlae üng Kangkhüng dawnghang ly te
7Kai ce lä ätäru käni üng kädüng-a mangtä Areng bö ca hethang aekäcüng ö dy. Pawlae lä kädang mang-a honi märü üng khölawng tho hethang aedawng te phüng-a, äma lä kärung angnihü khytä Yng saite khimi na tea Säthaw üng Angthang thui pa vi. 8Kai ce aekäcö saite äqawng üng engthung-a lä, maibung thawng saite na awng mang vi. 9Tudylä Eutakhu näsaite särai lawngtä lä kailae haetä qawng-a aety kha awng pa vi. Pawlae älo thui te thüng-a, äni lä i-sämu kha awng. Äni i khü te kätü-a lä, ing tang thungtä awng saite üng hai älawng-a aeqa pa vi. Khimi ce ma äni bung mätha ea lä äni lä dü pa vi dy. 10Tungaila Pawlae lä älawng-a aerung käthu kha äni tea kaibu kha täkawi ea “Bälung mawng ö y ma. Äni lä hing vi ai rawng” näkha thui pa. 11Tupyng-a Pawlae lä ing qawng-a paw haile ea äkähui khimi na hai mangtä Areng bö ca ö dy. Ca ö pyng ea lä, khö aevang te khytä äni ce hai mangtä awng kha älo na aepe ö vi dy. Tupyng-a honi märü üng tho vi dy. 12Yng saite khimi na lä hing saite särai bung äma ce üng ing-a, nähai kha bälung awngneng te dang ö vi dy.
Troa märü üng Mile märü-a ly te
13Kai ce lä tui sangphaw tea ly dawde kha aedang ea Aso märü mang-a ly ö dy. Honi märü-a tyng ea ni, Pawlae bung tui sangphaw qawng-a paw hai hethang vi. Ätephüng-a mei nädylä Pawlae lä honi märü khytä äkho hai ly hethang sa te vi. 14Kai ce lä Aso märü-a äni hai aeting ea, tui sangphaw qawng-a äni bung nähai kha Mitulen märü mang-a ly ö dy. 15Kädang mang-a lä honi mityng üng tho kha Kio näsaite angrai sälawng teng-a, kai ce lä tyng ö vi dy. Kädang mang üng känitä-a lä, Samo angrai sälawng-a tyng kha kädang mang-a lä, Mile märü-a tyng ö dy. 16Pawlae lä Asia pre cäpi-a kätü byng hethang ngai y te phüng-a, Ephesi märü tea cäqeng kha tui sangphaw aedang hethang dawng vi dy. Tyng haw dylä Pengtikos Pawi käni Jerusalem märü-a, kärang-a tyng hethang ngai pa te phüng-a vi.
Pawlae lä Ephesi kangkawng üng mätawngky na hai aeting pa
17Pawlae lä Ephesi märü üng kangkawng mätawngky na hai aeting hethang ngai te phüng-a, Mile märü üng Ephesi märü-a, khimi lawngtä bung mätaw pa vi. 18Kangkawng üng mätawngky na tyng ö te kätü-a, Pawlae ma “Kai lä Asia pre cäpi-a tyng angcü te käni üng hai aetawng kha nang ce hai mangtä awng saite kätü qütä-a, makä sa mei näte nang ce lä mäny ö te vi. 19Judae khimi na ma kai tea mätang bälai-a, sakälö khü kha kai bung bädü hethang aemäcü ö ngaila, kai lä bälung aemäneng ea minaw tui rui te hai, Areng üng kälu sa te vi. 20Khimipui na maw-a läsy, nang ce üng ing-a läsy, nang ce tähang aerawi saite lo na angxynlyng kai ma mätu king te nang ce lä mäny ö te vi dy. 21Aedawng mäkhüng ea Säthaw tea aekö haile hethang hai mä-ai üng Areng Isu tea yng hethang, kai lä Judae khimi na hai Käri khimi na tea la kähawi-a thui pa te vi. 22Vaihi kai lä Muilaw Käcai ma thui te lo tängai kha Jerusalem märü-a ly te vi dy. Honi märü-a makä awng ai mei näte kai lä mäny y. 23Tungaila Muilaw Käcai ma ‘Thawng thung-a pä-ung te hai mätangca saite na nang lä aeting vi ai’ näkha märü qütä-a thui rüng kha sädi py saite kai lä mäny vi. 24Kai lä dü ea la, hing ea la, kai tähang aely leng y lyng. Tungaila Areng Isu ma sa hai hethang kai tea py saite kälu khüng haw hethang sa saite lä aely lengky te vi. Honi kälu lä, Säthaw üng tähang kähawi phüng-a, Angthang Kähawi thui hethang vi.
25“Kai lä Säthaw pre phüng nang ce angxynlyng tea ly kha thui vi dy. Nang ce lä kai bung nung haile y vi ai dy näte kai lä vaihi mäny te vi dy. 26Tukätephüng-a khimi lawng lawngtä phra vi dylä, honi lä kai üng sa tämang te y näte vaini ma nang ce mäny hethang kai thui te dy. 27Ätephüng-a mei nädylä, kai lä Säthaw üng aely kängai angxynlyng na nang ce tea thui king te phüng-a vi. 28Tukätephüng-a nang ce lä mä-ai ma ce tea sädi hai awng ö. Muilaw Käcai ma nang ce tähang a saite kangkawng tea kähawi-a rui ö. Beram rui saite Kung ma beram rui te kätyng nang ce lä, Säthaw üng kangkawng tea kähawi-a, rui kha kheng ö. Ätephüng-a mei na dylä, Säthaw lä äma üng Cäpaw thi hai-a honi kangkawng bung rang te vi. 29Kai ly ja te kätü-a, kätüng y mätu saite khimi phütä na lä, nang ce thung-a kung vi ai. Äni ce lä käsui hai aetawng kha bäheng y te hai kangkawng tea täphra hethang aethawsa vi ai näte kai lä mäny vi. 30Nang ce thung üng mäteng ma phütä khimi ce lä kaeling thui kha Yng saite khimi na bung äma ce leithung hui hai hethang the te kätü lä tyng vi ai. 31Tukätephüng-a kähawi-a aering ö. Kai lä nang ce lawng lawngtä tea säning thungtä tütü kärung käni minaw tui rui kha thui saite Angthang Kähawi mätu saite tea aedawng ö haile ba.
32“Nang ce bung Säthaw üng äkö thung-a a te vi dy. Säthaw üng tähang kähawi ma nang ce tea säbawng vi ai. Säthaw üng tähang kähawi phüng-a, nang ce üng yng saite cakhi haw ö vi ai. Tukäte hai-a Säthaw üng khimi käcai qütä tähang khai rüng saite tähang kähawi lä nang ce dang ö vi dy. 33Kai lä khimi üng sui, tangkae, kä-o nitha na bädö te y vi. 34Kai hai kai rawijae na aely ngai saite kä-o nitha hai, käcakänei na dang hethang kai äkö hai kälu sa te tea nang ce lä mäny ö vi. 35Nang ce lä hini kätyng kälu sa kha mätang saite na tea säbawng hethang kätü qütä kai lä mätü te vi. Areng Isu ma ‘Khimi ce te üng dang te qawng-a, py saite lä tähang hawiky’ vi näkha thui saite lo tea aedawng haile ö ba” näpa.
36Tupyng-a Pawlae lä khokhö didü kha äni ce hai mangtä aetang pa vi dy. 37Äni ce angxynlyng lä Pawlae tea täkawi kha mänang te hai tengxyng y raw ö vi dy. 38Yng saite na lä Pawlae bung nung haile y vi ai dy näte äni ma thui te phüng-a, äni ce lä tengxyng y bälungsi ö phi vi dy. Tupyng-a Pawlae bung tui sangphaw mang-a tha pa ö vi dy.
21Jerusalem märü-a Pawlae tyng pa
1Kai ce lä äni ce hai aeprei pyng-a, tui sangphaw hai kätaw-a aedang kha Kos angrai sälawng-a tyng ö vi dy. Kädang mang-a lä Rodes angrai sälawng-a tyng be kha honi üng hai ly be ea lä Patarae märü-a ly ö dy. 2Phonecia khö-a ly saite tui sangphaw haetä hai, aeting kha honi tui sangphaw hai ly ö dy. 3Tupyng-a kai ce lä Saipära angrai sälawng bung nung ea lä, honi angrai sälawng üng käni kädüng mang-a cäqeng kha Siria pre mang-a ly ö vi dy. Taira märü-a tui sangphaw kälu sa saite na vyng täkhü hethang awng pa vi kha tui sangphaw lä honi märü-a aehae vi dy. 4Honi mityng-a Yng saite khimi phütä na hai aeting kha kai ce lä käni säritä äni ce hai mangtä awng kae dy. Honi Yng saite khimi na lä Muilaw Käcai hai-a Pawlae bung Jerusalem märü-a ly y hethang thui pa ö vi. 5Tungaila käni säritä pyng ea lä, kai ce lä Jerusalem märü mang-a khölawng tho haile ö be dy. Käyng khimi angxynlyng na lä äma ce üng nawngpui cäpi caw nade na hai mangtä märü ärang pangle pyng khytä kai ce bung tha ö dy. Kai ce angxynlyng lä pangle pyng-a khokhö didü kha aetang ö dy. 6Tupyng-a lawngtä hai lawngtä kawng bärai aesa ö kha kai ce lä tui sangphaw qawng-a paw ea äni ce lä äma ce üng ing-a vawi ö haile tyng vi dy.
7Taira märü üng khölawng tho haile ea kai ce lä, Tolami märü-a tyng ö dy. Hani märü-a käyng na tea nawsaw hawi ö cämei näpa kha äni ce tea känitä aehae ö vi. 8Kädang mang-a lä, khölawng tho kha Kesari märü-a tyng ea kai ce lä Angthang Kähawi thui pa saite Philip ing-a aehae ö vi. Jangni-a Jerusalem kangkawng thung-a, lömai na tea säbawng hethang khimi lawng täjaetä re ea Philip la qa by vi. 9Äni tea nawngpaw nang y saite cänung lawng bälitä awng vi. Honi äcänung na lä buisaw lo aepae haw saite na vi. 10Honi mityng-a kai ce lä käni käqae-a aehae kha Akäbu näsaite buisaw lawngtä lä Judae khö üng ly vi dy. 11Tukha äni lä kai ce tea ly ea Pawlae üng khabai la kha äma üng äkö hai äkho tea aemäkhing vi. Tupyng-a Akapu lä “Muilaw Käcai lä hini kätyng thui te vi. Jerusalem märü-a Judae khimi na ma hini khabai üng äkung bung hini kätyng mäkhing kha ceng kälang khimi na tea a vi ai” näkha näpa.
12Hini älo thai ea, kai ce hai ho-a awng saite khimi na lä Pawlae tea Jerusalem märü-a ly y hethang aesi aebai kha thui pa ö vi. 13Tungaila Pawlae ma “Nang ce lä ätephüng-a, hini kä raw kha kai tea bälungsi hai ö te vi mei. Kai lä Areng Isu tähang Jerusalem märü-a, aemäkhing hethang cang y, dü hethang mäteng ma, aerü rüng kha awng te vi” näkha mäthang pa.
14Pawlae tea aebai kha mäkhang te dang y ea lä, kai ce lä “Areng üng kängai kätyng kae sy” näkha aenawng ö sö kae dy.
15Hini pyng-a kai ce lä khölawng tho hethang aerü kha Jerusalem märü-a ly ö dy. 16Kesari märü üng Yng saite khimi phütä na lä, kai ce hai mangtä ly kha kai ce bung Mason näsaite ing-a nähai ö vi. Mason lä Saipära angrai sälawng üng ly kha yng angcü saite khimi vi.
Pawlae lä Jaeko hai aeting pa
17Jerusalem märü-a kai ce tyng ea kangby jä-ai na lä kawng te hai lady ö dy. 18Kädang mang-a Pawlae lä kai ce hai mangtä Jaeko hai aeting hethang ly vi. Kangkawng üng mätawngky angxynlyng na lä honi mityng-a awng ö vi. 19Pawlae lä honi khimi ce tea kawng bärai sa dy. Tupyng-a ceng kälang na tea Säthaw lä Pawlae te mang hai-a, sa pa saite kälu na phüng äni ce tea thui king pa vi dy. 20Pawlae ma thui te thai ea lä, äni ce angxynlyng la Säthaw tea bälaw ö dy. Tukha Pawlae tea “Kangby ä, yng saite Judae khimi sangrui-a awng mang kha äni ce angxynlyng lä Mosi üng Ubädi tea matangtä bälungrui sui mei näte nang lä mäny dy. 21Ceng kälang na thung-a awng saite Judae khimi na tea Mosi üng Ubädi khaisö hethang nang ma mätu te äni ce lä thai ö vi. Nade na bung lengkhüng täke hai y hethang Judae na üng reitae hui y hethang nang ma mätu te äni ce lä thai ö vi dy. 22Kai ce lä makä sa ö ai mei. Nang tyng te angthang lä äni ce thai khe ö te vi dy. 23Tukätephüng-a kai ce thui te kätyng sa ba. Kai ce hai mangtä Säthaw tea älo aedo saite khimi lawng bälitä awng. 24Äni ce bung ka kha äni ce hai mangtä aemäcai ping te Judae reitae kätyng sa ö ba. Äni ce lä mäthy hethang kätü tyng ea nang ma honi byng saite ävang na py pa. Tukha äni ce äsang aeba hethang dang ö ai. Hini kätyng sa dylä nang üng phüng khimi ce ma thai saite lä tüng y vi näte hai, nang ma ma Mosi üng Ubädi lo tängai vi näte khimi qütä na ma mäny ö vi ai. 25Yng saite ceng kälang khimi na tähang cae tärü pyng vi dy. Honi cae thung-a hini kätyng thui vi. Mimi tea löci sa saite mawi ca hang. Äthi la nei hethang kae y. Känawngjang tära kha ra saite üng ängang la ca hethang kae y. Aepawng y käla nawngpui nawngpaw kätyng awng vai y,” näkha näpa.
26Pawlae lä kädang mang-a, honi khimi lawng bälitä na bung ka ea äni ce hai mangtä aemäcai ping te Judae reitae kätyng sa vi dy. Tupyng-a äni lä Säthaw üng Ingkäcai thung-a kung kha aemäcai ping-a sa saite mani käni-a khüng ai mei näte thui rüng vi dy. Tukha äni ce lä lawng lawngtä tähang mäthy hethang mani käni-a sa ai mei näte la thui rüng te vi.
Pawlae bung ne pa
27Judae na üng reitae kätyng aemäcai ping te käni säritä byng aetawng ea, Asia pre cäpi üng Judae khimi phütä na lä, Pawlae bung Säthaw üng Ingkäcai thung-a nung ö vi. Äni ce lä khimipui na tea bärawi bäleng kha Pawlae bung ne ö vi. 28Äni ce ma “Isrelae khimi ce ä, säbawng ö jo kae-e. Hini khimi lä mityng qütä-a ly kha Isrelae khimi na phüng läsy, Mosi üng Ubädi phüng läsy, Säthaw üng Ingkäcai phüng läsy, käsi thui kha khimi ce angxynlyng tea mätu pa vi. Honi cang y vaihi äni lä Käri khimi na bung Säthaw üng Ingkäcai baesung thung-a nähai ea hini Ingkäcai üng caiping te tea täphra vi dy.” (29Ätephüng-a mei nädylä äni ce lä Pawlae ni Ephesi märü üng Trophima näsaite Käri khimi hai mangtä märü thung-a aeting te nung te phüng-a vi. Tukätephüng-a Pawlae lä Trophima bung Säthaw üng ingkäcai-a nähai müng näte aepö te phüng-a vi.)
30Märü qütä aepuilung kha khimi ce lä mityng qütä üng aehui kha Pawlae bung ne ea Säthaw üng Ingkäcai ärang mang-a re ö vi. Tupyng-a qengtäma Ingkäcai kätho lä aekhae praw pa vi. 31Äni ce lä Pawlae bung bädü he sa ö te thüng-a, Rom reisae kälengky lä Jerusalem märü üng khimi angxynlyng na xhuxa te angthang thai pa vi. 32Tukha äni lä qengtäma reisae na hai reisae käleng phütä na bung ka kha khimipui awng saite mityng-a aehui ö vi dy. Khimi ce lä reisae kälengky hai reisae na bung nung dylä Pawlae tea bo te lä aenawng ö vi dy. 33Reisae kälengky lä ly kha Pawlae bung ne ea singqy rui känetä hai mäkhing hethang älo py pa. Tukha “Hini khimi lä ämi mei. Äte sa te mei” näkha düng pa. 34Khimipui na lä ätüng amäjy cawngkhang tho kha hang pa ö vi. Hikä hang te tüng na phüng-a reisae kälengky lä ätemakä mei näte mäny haw y kha Pawlae bung reisae na awng saite mityng-a, nähai hethang älo py pa vi. 35Äni lenglö-a tyng ea lä, khimipui na lä tengxyng y kädawtho phi te phüng-a, Pawlae bung reisae na ma aepö kha nähai pa vi dy. 36Khimipui na lä leithung-a hui kha “Äni bung bädü la” näkha hang ö vi dy.
Pawlae ma thui pa
37Pawlae bung reisae na awng saite mityng-a nähai he sa te kätü-a, Pawlae lä reisae kälengky tea “Kai nang tea älosaitä aepe haw ai mei” näpa.
Äni ma “Nang lä Käri lo aepekaw mei. 38Jangni nang lä khimi ce aecörae tea täre sa hethang bärawi bäleng saite Aikuta khimi y mei. Nang lä aecörae tea täre aety hethang khimi sang bälitä na bung daithung dairang-a nähai saite khimi y mei” näkha düng pa.
39Pawlae ma “Kai lä Judae khimi vi. Kiliki khö ämüng aethang saite Tasu märü üng khimi vi. Kai lä khimipui na tea älo aepe hethang säbawng kü” näpa.
40Tukha reisae kälengky ma älo aepe he py ea Pawlae lä lenglö qawng-a aedaw kha khimipui na tea sitäri-a awng hethang äkö hai mätü pa. Äni ce sitäri ea äma lä Hebärai lo hai thui pa dy.
221Pawlae ma “Kangby jä-ai na hai Ä-ai na ä, vaihi kai thui he ngai saite älo tea tängai ö re ba. Kai lä sa tämang te awng y näte thui mäcai he ngai vi” näpa. 2Hebärai lo hai thui te khimipui na thai ea lä, äni ce lä sitäri-a awng pa ö rae vi.
3Tupyng-a Pawlae ma “Kai lä Judae khimi vi. Kai lä Kiliki khö näsaite Tasu märü-a aepeng te vi. Tungaila hini Jerusalem märü-a ryng te vi. Kangsi sangrung na bäjui saite Judae Ubädi tea kai lä Kamela üng khokung mang kähawi-a aetu te vi. Vaihi nang ce lä Säthaw tähang bälung aepy te kätyng, kai la bälung aepy te by vi. 4Kai lä Areng Isu üng lolang bäjui saite khimi na bung bädü he khytä sakälö khü pa te vi. Nawngmädi nawngmäcaw na bung ne kha thawng thung-a pä-ung pa te vi dy. 5Kai thui saite lo tätang vi näte mäthykung kälengky na hai Sanhendrin kawngci üng Judae khimi mätawngky na lä mäny kha thui haw ö vi. Kai lä äni ce te üng Damasaka märü-a awng saite Judae khimi mätawngky na tea py hethang cae na dang te vi dy. Tukha Isu tea Yng saite khimi na tea bäjeng hethang tähang hai, ne kha Jerusalem märü-a nähai hethang honi cae ma, kai tea aenae py te vi.
Pawlae aepeng kangthae te phüng
6“Tukha kai khölawng tho kha Damasaka märü teng-a tyng te kätü-a, käni anghung-a käni mang üng kaevang haetä lä qengtäma kai tea säveng lükü kha aevang pheng praw vi dy. 7Kai lä älawng qawng-a aetüng praw kha ‘Sawlae, Sawlae, nang lä ätephüng-a kai tea sakälö khü te vi mei’ näsaite ätüng haetä thai vi. 8Tukha kai ma ‘Areng ä, nang lä ämi mei’ näkha düng dy. Äni ma ‘Kai lä nang ma sakälö khü saite Nazare märü üng Isu dy’ nä vi. 9Kai hai mangtä ly saite khimi na lä honi äkaevang nung ngaila, kai tea thui saite Areng üng älo tüng lä thai ö y lyng. 10Kai ma ‘Areng ä, kai lä makä sa ai mei’ näkha düng dy. Areng ma ‘Aetha kha Damasaka märü-a ly lawi. Nang sa hethang khai rüng saite kälu phüng nang tea kai ma thui king ai mang’ nä vi. 11Kai lä aevang pheng saite äkaevang phüng-a, kai üng ämi lä ving vi dy. Tukha kai ma hai mangtä ly saite khimi na ma kai üng äkö-a süng kha Damasaka märü thung-a bähawi ö vi dy.
12“Anania näsaite khimi lä kai tea ly dy. Äni lä Mosi üng Ubädi na tängai kha Säthaw tea bälung aepy saite khimi lawngtä vi. Äni lä Damasaka märü üng Judae khimi angxynlyng na ma tämö khai saite khimi vi. 13Äni lä kai üng äteng-a aedaw kha ‘Kangby Sawlae ä, nang üng ämi aevang lawi ba’ näkha näpa. Qengtäma kai lä äni bung nung haw vi dy. 14Tupyng-a Anania ma ‘Nang lä mä-ai kangsi sangrung na cäphaw saite Säthaw üng kängai mäny hethang äma lä nang bung re te vi. Nang lä Säthaw üng tüng saite mawsawng bung nung kha äni üng täbawng mang thui saite älo thai vi ai. 15Nang ma nung saite hai thai saite na khimi angxynlyng na tea thui hethang Areng üng älo thui saite kung-a aelawng vi ai. 16Tukätephüng-a äte tea aering kha awng te mei. Aetha kha baptismae la lawi. Nang üng hunghö na aelawi hethang Areng tea aetang lawi’ näkha näpa.
Pawlae bung ceng kälang khimi na tea älo thui he mätaw pa
17“Kai lä Jerusalem märü-a tyng haile kha Säthaw üng Ingkäcai-a aetang ea äsämai nung vi. 18Äsämai thung-a Areng bung nung ea ‘Jerusalem märü üng tho praw lawi. Hini märü üng khimi na lä kai üng phüng nang thui te na tängai ö y lyng’ näpa. 19Tungaila kai lä ‘Areng ä, kai lä Judae na üng ingkäcai qütä ly kha nang tea Yng saite khimi na bung thawng thung-a pä-ung hethang ne kha bo saite khimi lä kai dy näte äni ce mäny ö vi. 20Nang üng phüng angthang thui saite Stephen bung bädü ea kai lä äteng-a aedaw kha ngai hai te by vi. Äni bung bädü te khimi ce üng nitha, kä-o na tea rui pa te vi’ näkha näpa. 21Tupyng-a Areng ma ‘Ly lawi. Mityng kähanglaw-a awng saite ceng kälang khimi na tea nang bung kai mätaw ai’ näkha thui vi” näpa.
22Khimi ce lä Pawlae ma ceng kälang khimi na tea Angthang Kähawi thui te khytä tängai ö vi dy. Tupyng-a hini kätyng Pawlae thui te thai ea lä “Hini khimi bung älawng qawng üng mäthoja la. Äni lä hing hethang aeteng y vi dy” näkha ätüng käleng hai hang ö vi. 23Äni ce lä äma ce üng aekhu saite kä-o käsa na aeling kha hawi ea angmawngdi na khösang mang-a, hi kha hang ö vi dy. 24Tukha Rom reisae mätawngky lä Pawlae bung reisae na awng saite mityng-a nähai hethang thui pa. Ätephüng-a hikä khimi ce ma äni tea hang te mei, näte phüng mäny hethang Pawlae tea bo kha düng hethang älo thui pa ö vi dy. 25Tupyng-a äni ce lä Pawlae bung bo hethang mawiphö rui hai mäkhing rang pyng ea, Pawlae ma äteng-a aedaw saite Rom reisae käleng tea “Rom khimi lawngtä tea älo cei te awng y käla ma bo saite lä Rom Ubädi hai aebäla by cäkae mei” näkha düng pa.
26Honi älo thai ea lä reisae käleng ma reisae äkälengky tea ly kha “Nang lä makä sa ai dy mei. Äni lä Rom khimi vi” näkha thui pa.
27Tukha reisae kälengky lä Pawlae tea ly kha “Kai tea thui khü e. Nang lä Rom khimi mei” näkha düng pa.
Pawlae ma “Üng, Rom khimi cy” näkha näpa.
28Tukha Reisae kälengky ma “Kai lä tangkae awng mang-a py kha Rom khimi-a aelawng te kae vi” näpa.
Pawlae lä “Kai lä aepeng te üng hai ma, Rom khimi vi” näkha näpa.
29Äni tea düng saite khimi na lä qengtäma aenaw ö king pa vi dy. Pawlae lä Rom khimi vi näte hai äni bung kharui hai mäkhing myng te mäny ea reisae kälengky lä ri by vi dy.
Judae na üng kawngci maw-a Pawlae tyng pa
30Kädang mang-a lä, Pawlae tea Judae khimi na ma äte sa tämang te hai-a, käsi thui ö te mei näte reisae kälengky lä kähawi-a, mäny he ngai pa vi dy. Tukätephüng-a äni ma Pawlae tea mäkhing saite singqy rui na sö hai pa ea, mäthykung käleng na hai Sanhendrin kawngci üng mätawngky na tea aekäcüng ö hethang älo py pa by vi dy. Tupyng-a Pawlae bung nähai kha äni ce maw-a aedaw hai dy.
231Pawlae lä Sanhendrin kawngci na tea kheng bädiki ea “Kangby jä-ai na ä, kai lä vaini khytä Säthaw üng maw-a, caiping te bälung kaedawng hai-a awng kha kälu sa te vi” näpa. 2Mäthykung kälengky Anania lä hini lo thai kha äteng-a, aedaw saite khimi na tea Pawlae üng täbawng-a, täbeng hethang älo py pa vi. 3Tukha Pawlae ma “Thung kanglung hai kälo saite usai engpang ä, nang tea ni Säthaw ma täbeng tätang ai to. Nang lä Ubädi kätyng kai tea tärae cei hethang kawngci-a aety ngaila kai tea täbeng hai te lä, Ubädi hai aebäla y vi dy be tu” näpa.
4Äteng-a aedaw saite khimi na lä “Nang lä Säthaw üng mäthykung kälengky tea käsi thui vawng te vi mei” näpa.
5Pawlae ma “Kangby jä-ai na ä, äni lä Mäthykung Kälengky näte kai lä mäny y. Caekäcai thung-a lä ‘Nang üng äceng na bung pyng saite kung tea lä käsi thui hang’ näkha näte vi” näpa.
6Tupyng-a Pawlae lä Sanhendrin kawngci thung-a phütä lä Sadukai na hai kälang phütä lä Pharisai na näte mäny ea lä “Kangby jä-ai na ä, kai lä Pharisai vi. Pharisai üng cäpaw la vi. Dü saite na aetha haile tyng ai näte lä kai üng aethang khai saite vi. Tukätephüng-a vaihi kai lä älo cei hethang aeting saite khimi vi” näkha näpa.
7Tukha Pharisai hai Sadukai na lä älo ae-e kha Sanhendrin kawngci lä phü netä aeprei ö vi dy. (8Sadukai na lä dü te üng aetha haile tyng te lä awng y. Säthaw üng angtawtha na awng y. Angra na la awng y. Muilaw Käcai lä awng y näkha yng ö te vi. Tungaila Pharisai na lä honi angxynlyng na lä awng näkha yng ö te vi.) 9Äni ce ae-e saite lo lä ätüng aesa te qawng-a aesa rae pa vi dy. Pharisai kangkawng thung üng Mosi üng Ubädi särae na lä aetha kha “Hini khimi tea äte sa tämang te la, kai ce lä nung y. Muilaw, y dylä Säthaw üng angtawtha lawngtä ma äni tea thui te daila awng ai müng” näkha ae-e pa vi dy.
10Tukha ae-e te lä ty rae, ty rae pa te phüng-a, äni ce lä Pawlae tea tibu tica sa ai te phüng-a reisae kälengky lä ri hai te vi dy. Äni lä reisae na tea aerung hai kha Pawlae bung reisae na awng saite mityng-a nähai hethang äni ce thung üng käthoja hai pa vi dy.
11Honi kärung-a Areng lä Pawlae teng-a aedaw kha “Ri hang. Nang lä Jerusalem märü üng khimi na tea kai üng phüng thui pyng te kätyng, Rom märü üng khimi na tea la thui he kae te by vi” näkha näpa.
Pawlae bung bädü he kangru-a aeceng pa
12Kädang mang-a Judae khimi phütä na lä aeting kha “Pawlae bung bädü y rytä kai ce lä ca nei y käla awng he vi” näkha älo aedo ö dy. 13Honi kätyng kangru-a aedüng saite khimi na lä lawng ruibälitä cang y awng ö te vi. 14Äni ce lä mäthykung käleng na hai, Judae mätawngky na tea ly kha “Kai ce lä Pawlae bung bädü y rytä äte käcakänei la ca y lyng” näkha aedo ö te vi. 15“Tukätephüng-a nang ce hai, Sanhendrin kawngci na ma, Pawlae üng phüng tea kähawi-a düng hethang ngai te kätyng sa kha Rom reisae kälengky tea äni bung nang ce tea nähai hethang thui pa ö ba. Nang ce tea tyng y kälang-a, äni bung bädü hethang kai ce lä aering rüng ai mang” näkha näpa.
16Tungaila honi aeceng te phüng lä, Pawlae ticaw üng cäpaw lä mäny kha reisae na awng te mityng-a, kung ea Pawlae tea thui pa vi dy. 17Pawlae lä reisae käleng lawngtä bung kähyng kha “Hini nade bung reisae kälengky tea nähai ba. Äni tea thui hethang älo haetä awng” näkha näpa 18Tukha reisae käleng lä honi nade bung reisae kälengky tea nähai pyng ea, “Thawng thung-a pä-ung saite Pawlae ma kai tea kähyng kha hini nade bung nang tea tha hai te vi. Äni lä nang tea thui hethang älo haetä awng ti” näkha nä vi.
19Reisae kälengky lä honi nade bung äkö-a, süng kha khimi awng y saite mityng haetä-a nähai pa vi dy. Tupyng-a “Kai tea nang äte lo thui hethang ngai te mei” näkha düng pa.
20Nade ma “Judae na lä Pawlae üng phüng tea kähawi-a mäny he ngai te kätyng sa kha khawngdang lä nang tea Pawlae bung kawngci-a nähai hethang mäkai he aedüng ö te vi. 21Äni ce üng mäkai te kätyng tängai hang ba. Lolang-a khimi lawng ruibälitä cang y te na lä aw kha aemaw ö vi. Äni ce lä Pawlae bung bädü y rytä äte käcakänei la ca y näkha älo aedo ö te vi. Vaihi äni ce lä Pawlae bung bädü hethang aerü rüng kha nang ma Pawlae bung mätaw hethang thui saite lo tea aering ö te vi dy” näpa.
22Reisae kälengky ma “Nang lä hikä kai tea thui saite phüng ämi tea la, thui hang ba” näkha thui ea honi nade bung mätaw pa vi dy.
Pawlae bung aecörae mätawngky Feli tea tha pa
23Tupyng-a reisae kälengky lä reisae käleng lawng netä bung ka kha “Vaidüng naeri täkawtä-a, Kesari märü-a ly hethang reisae lawng cungvai netä cäphö aedang saite reisae lawng rui säritä hai, täri süng saite reisae lawng cungvai netä na khölawng tho hethang aerü ö hai rüng ba. 24Pawlae tähang cäphö la khai rüng pa. Äni bung aecörae mätawngky Feli tea kähawi-a rui kha tha pa ö” näkha älo py pa. 25Reisae kälengky lä cae haetä tärü ea py pa vi dy. 26Honi cae thung-a “Kai, Kalodia Lusia, ma aecörae mätawngky nang Feli tea tämö khai te hai cae tärü dy ba. 27Judae khimi na lä hini khimi bung ne kha bädü he sa ö vi. Äni lä Rom khimi vi näte kai lä mäny kha reisae na hai mangtä ly ea äni bung aeqang hai te vi dy. 28Kai lä äni tea Judae khimi na ma ätephüng-a käsi thui ö te mei näte mäny he ngai te phüng-a, äni ce üng Sanhendrin kawngci-a äni bung nähai te vi dy. 29Judae khimi na lä äni tea Mosi üng Ubädi na phüng hai-a, käsi thui ö te vi. Äni lä dü hethang hai thawng thung-a pä-ung hethang khytä sa tämang saite äte haetä la awng y te phüng kai lä mäny te vi. 30Judae khimi na lä äni tea bädü hethang kangru-a aedüng ö te phüng-a, kai lä angthang thai kha äni bung nang tea mätaw praw te vi. Tärae ngai saite khimi na tea la nang üng maw-a täphawng hethang kai ma älo täru pa te vi dy. Nang lä nawsaw hawi sy ba” näkha tärü te vi dy.
31Reisae na lä reisae kälengky üng älo thui te kätyng sa ö vi dy. Äni ce lä Pawlae bung ka kha honi kärung-a ma, Antipatri märü khytä tha pa ö dy. 32Kädang mang-a reisae na lä äma ce üng awng saite mityng-a vawi ö haile vi dy. Cäphö aedang saite reisae na lä Pawlae hai mangtä ly ö te vi. 33Äni ce lä Kesari märü-a tyng ea reisae kälengky üng cae aecörae mätawngky tea py kha Pawlae bung ämaw-a nähai pa vi dy. 34Aecörae mätawngky Feli lä honi cae phai pyng-a, “Nang lä äte khö üng khimi mei” näkha düng pa. Kiliki khö üng khimi näte Feli lä mäny vi dy. 35Tukha aecörae mätawngky Feli ma “Hini mityng-a nang tea tärae ngai saite khimi na tyng dylä, nang üng phüng kai ma düng ai” näpa. Tupyng-a Pawlae bung Herodae sanphrang ing-a kähawi-a rui kha khai hethang älo py pa vi dy.
24Pawlae phüng Judae khimi na ma käsi thui pa
1Käni bangawtä pyng-a Mäthykung Kälengky Anania lä Judae mätawngky phütä na hai Tathula näsaite Rom Ubädi mäny te kung hai mangtä Kesari märü-a tyng ö dy. Äni ce lä aecörae mätawngky Feli maw-a, Pawlae phüng käsi na thui pa ö vi. 2Aecörae mätawngky Feli lä Pawlae bung ämaw-a nähai ea Ubädi mäny te kung, Tathula ma,
“Aecörae mätawngky Feli ä, nang lä kai ce tea bälung käcüng hai pyng saite tähang kähawi phüng-a, kai ce lä kätü käsa-a awng hai neng ö te vi dy. Nang lä kai ce üng pre tähang kangthae saite na sa bälai pa te vi. 3Feli ä, Hikä sa saite na phüng-a, kai ce lä mityng qütä-a, kawng bärai te lo hai kähawi thui ö jawjaw te vi. 4Kai ce lä nang üng kätü na byng rung khytä sa he ngai y lyng. Tungaila kädawi byng-a kai ce thui saite na tängai kü ba. 5Hini khimi lä pre tea täre mäsa saite vi. Äni lä älawngpre qütä üng Judae khimi qütä na tea aepuilung hethang bäleng pa vi. Äni lä Nazare kangkawng khimi na üng mätawngky lawngtä vi näte kai ce lä mäny ö te vi. 6Säthaw üng Ingkäcai tea la känüng hai hethang aethawsa te phüng-a, äni bung kai ce lä ne ö te vi. (Äni tea kai ce lä Mosi üng Ubädi kätyng älo cei he ngai ö te vi. 7Tungaila reisae kälengky Lusia lä ly kha kai ce kö thung üng Pawlae bung aethaw paitae hai ma lawngprae kha nähai te vi. 8Äni tea käsi thui saite Judae khimi na bung la nang tea ly ö hethang kae te phüng älo py pa te vi dy.)24:8 Hini lä Caekäcai phütä-a awng te y vi. Nang ma äni tea tärae cei dylä, kai ce thui saite phüng angxynlyng na tätang vi näte mäny ai mang” näkha näpa. 9Judae khimi na ma, “Hini lo na lä tätang vi” näkha Pawlae phüng käsi na thui ö rü pa vi dy.
Pawlae lä aecörae mätawngky Feli maw-a awng
10Aecörae mätawngky lä äkö hai äsäny mätü kha Pawlae tea älo thui hethang py pa dy.
Tukha Pawlae ma “Aecörae mätawngky ä, nang lä Judae khimi na tea säning bäraw y-a tärae cei kha awng te phüng kai lä mäny vi. Tukätephüng-a, kai üng sa tämang y te phüng nang tea thui hethang dang te phüng-a, kai lä kawng bärai vi. 11Kai lä Jerusalem märü-a Säthaw tea cäphaw hethang tyng pyng te lä, käni hawlai netä ni awng te kae vi rawng. Hini phüng na nang ma düng dylä, mäny haw vi ai. 12Säthaw üng Ingkäcai-a läsy, Judae na üng ingkäcai hai märü thung-a la khimi ce xhuxa hai hethang kai mäcü te lä, Judae khimi na la nung ö te y vi. 13Vaihi kai tea käsi thui saite na, äni ce lä ätete lo hai mätü haw ö te y. 14Tungaila kai ce üng kangsi na üng Säthaw tea cäphaw kha Areng Isu üng mätu saite älang kai lä bäjui te vi. Äni ce lä honi tea tämang saite vi näkha aedawng ö te vi. Tungaila Mosi üng Ubädi hai buisaw na tärü kha thui saite angxynlyng na tea kai lä yng vi. 15Kai tea käsi thui saite na kätyng, kai la Säthaw tea aethang khai te by vi. Kai üng aethang khai saite äte mei nädylä, Säthaw lä khimi käsi kähawi re y käla, khimi ce angxynlyng bung kädü thung üng mätha haile vi ai. 16Tukätephüng-a kai lä Säthaw hai khimi ce maw-a, bälung käcai-a awng hethang käni qütä aethaw aesa kha awng te vi.
17“Kai lä Jerusalem märü üng tho kha khösäning qae bärai saite kätü pyng-a, kai ma üng khimi kangtang na tea lasawng py hethang hai aemäthy hethang Jerusalem märü-a ly haile tyng te vi. 18Äni ce lä kai bung Säthaw üng Ingkäcai thung-a nung ea kai lä caiping-a sa pyng te vi dy. Tukha khimipui na lä awng mang te y vi. Xhuxa te la awng te y. 19Tungaila honi mityng-a Asia pre cäpi üng ly saite Judae khimi phütä na lä awng ö vi. Kai tea käsi thui he awng dylä, äma ce ma hini mityng-a ly kha kai sa tämang saite na nang tea thui hethang kae te vi. 20Honi kätyng y dylä vaihi hi-a awng saite khimi na lä Sanhendrin kawngci maw-a kai awng te kätü-a kai üng sa tämang saite äte awng mei näte thui ö sy. 21Äni ce lä kai tea haetä phüng ni käsi thui haw te kae. Äni ce maw-a aedaw ea kai lä ‘Dü saite na aetha haile tyng vi ai näkha kai lä yng te phüng-a, vaini nang lä kai tea tärae cei te vi’” näkha näpa.
22Feli lä Areng Isu üng mätu saite älang phüng kähawi-a mäny te vi kha älo aecei saite lä honi kätü-a, aenawng hai pa vi dy. Äni ma “Reisae kälengky Lusia tyng ea lä, nang ce üng ämö tea kai ma bädü pa ai mang” näpa. 23Tupyng-a Pawlae bung rui saite reisae na hai khai pa. Äni üng rawijae na ly kha äni üng aely kängai säbawng saite na tea mäkhang pa y hethang reisae käleng tea älo py pa vi dy.
Pawlae lä aecörae mätawngky Feli hai Drusila maw-a awng
24Käni qae te kätü-a aecörae mätawngky Feli lä äma üng nawngpui Drusila hai mangtä tyng hawi vi. Änawngpui lä Judae khimi vi. Feli ma Pawlae bung kähyng hai kha Isu Khrista tea yng saite phüng Pawlae thui te lo tängai vi dy. 25Tungaila Pawlae lä Säthaw maw-a, käcüng saite phüng hai, bälung üng kängai saite aeküng hethang phüng hai, Säthaw ma tärae cei te kätü tyng hethang phüng na thui pa ea lä aecörae mätawngky Feli lä ri phi vi dy. Äni ma, “Vaihi nang lä ly haw dy. Kai ma aevaw saite käni-a nang bung ka haile ai mang ba” näpa. 26Feli lä Pawlae ma täbüng py ai müng näte aethang khai te hai äni tea kähyng leilae kha älo aepe pa vi dy.
27Säning netä pyng-a lä aecörae mätawngky Feli mityng-a, Porcius Festus näsaite Rom khimi hai aele dy. Aecörae mätawngky Feli lä Judae khimi na maw-a mimai dang hethang ngai te phüng-a, Pawlae bung thawng thung-a pä-ung pa jawjaw te vi rawng.
25Aecörae mätawngky Festus maw-a Pawlae awng te
1Aecörae mätawngky Festus lä honi khö-a tyng kha käni thungtä qae ea Kesari märü üng hai Jerusalem märü-a ly vi dy. 2Mäthykung kälengky na hai Judae mätawngky na ma Pawlae lä sa tämang te awng mang saite phüng Festus tea thui pa ö vi. 3Äni ce lä Pawlae bung lolang-a aemaw kha bädü hethang kangru-a aedüng ö vi dy. Festus lä äni ce maw-a mimai dang hethang Pawlae bung Jerusalem märü-a nähai hethang Festus tea mäkai dawde pa ö vi dy. 4Tungaila aecörae mätawngky Festus ma “Kesari märü-a Pawlae bung lä thawng thung-a pä-ung pa te vi. Honi märü-a lä qae y tea kai ma ly khe ai. 5Nang ce üng mätawngky na lä kai hai mangtä hui kha Pawlae sa tämang saite hae haetä awng dylä kai üng maw-a thui ö sy” näpa.
6Aecörae mätawngky Festus lä Jerusalem märü-a käni täjaetä awng pyng ea Kesari märü-a ly vi dy. Kädang mang-a lä älo cei saite mityng-a aety kha Pawlae bung nähai hethang älo py pa dy. 7Pawlae tyng saite kätü-a lä, Jerusalem märü üng ly saite Judae khimi na ma äni tea sävenglü kha käsi thui pa ö vi dy. Tungaila äni ce lä äte sasi lo na mätü haw pa ö y vi. 8Tupyng-a Pawlae ma “Kai lä Judae na üng Ubädi hai, Säthaw üng Ingkäcai hai, Rom sanphrang Sica tea äte haetä la käsi sa te awng y lyng” näkha thui haile pa.
9Tungaila aecörae mätawngky Festus lä Judae khimi na thung-a, ämüng kähawi dang hethang ngai kha Pawlae tea “Nang lä Jerusalem märü-a ly kha ho-a kai üng maw-a hini lo cei hethang ngai te mei” näkha düng pa.
10Tukha Pawlae ma “Kai lä vaihi Sica sanphrang üng älo cei saite mityng-a awng te vi. Hini mityng-a kai üng ämö cei hethang aeteng te vi. Aecörae mätawngky nang ma kähawi-a mäny te kätyng kai lä Judae khimi na tea hawi y sa saite äte haetä la awng te y lyng. 11Kai lä tätang khü-a dü he aeteng te khytä ätete kähawi y sa law vi dylä, dü hethang tea kai lä e y lyng mang. Tungaila Judae khimi na ma kai tea käsi thui saite na tätang khü y vi dylä, ämi ma la kai bung äni ce kö thung-a a haw y lyng. Sica sanphrang tea kai bung mätaw hethang kai lä mäkai te vi dy” näpa.
12Aecörae e mätawngky Festus lä äma ce tärae cei te kung na hai aedüng pyng ea, “Nang lä Sica sanphrang tea ly hethang ngai dylä ly he kae vi” näpa.
Aecörae mätawngky Festus hai Akripa sanphrang älo aedüng te
13Käni qae y saite kätü-a lä, Akripa sanphrang hai äticaw käna Berni lä Kesari märü-a tyng hawi dy. Änini lä aecörae mätawngky Festus tea kawng bärai sa he ly hawi vi. 14Honi märü-a käni awng mang-a aehae ea aecörae mätawngky Festus lä Pawlae üng phüng, sanphrang tea thui pa vi dy. Festus ma “Hini mityng-a Feli ma thawng thung-a bäla kha khai saite khimi lawngtä awng. 15Kai lä Jerusalem märü-a tyng ea mäthykung käleng na hai Judae mätawngky na ma kai tea äni üng phüng käsi thui pyng ea äni tea bäjeng hethang mäkai ö vi. 16Tukha kai ma äni ce tea ‘Älo käcei kung na hai mangtä aeting hai kha tärae ngai saite ce üng käsi thui te lo tea mäthang haile hethang py pa y käla ma, bäjeng te lä Rom khimi na üng reitae y lyng’ näkha mäthang pa. 17Tukätephüng-a äni ce lä hini märü-a tyng ea, kai lä aenawng y te hai ma kädang mang-a älo cei saite mityng-a, aety kha honi khimi bung ka hai pa te vi dy. 18Tärae ngai saite kung na lä aetha kha äni tea käsi thui ngaila kai üng aethang khai te kätyng äni üng sa tämang saite na phüng äni ce thui ö te y vi. 19Äma ce üng reitae phüng älo ae-e ö vi. Äni ce lä Isu näsaite lawngtä dü te phüng thui ö te vi. Tungaila Pawlae lä Isu lä hing haile tyng vi näkha ae-e vi. 20Honi phüng kai lä dawng hethang mäny y vi dy. Tukätephüng-a kai ma Pawlae tea ‘Nang lä hini phüng Jerusalem märü-a ly ea älo aecei he ngai cäkae mei’ näkha düng pa. 21Tungaila Pawlae ma ‘Sica sanphrang ma cei saite ni kai lä ngai te kae vi’ näkha näpa. Tukätephüng-a äni bung Sica tea ly hai y rytä reisae na tea awng hethang kai lä älo khai pa vi” näpa.
22Tupyng-a Akripa sanphrang lä Festus tea “Honi khimi thui saite lo kai ma thai khe he ngai vi” näpa.
Tupyng-a Festus ma “Äni thui saite lo lä khawngdang, nang ma thai ai mang” näpa.
Akripa hai Berni ni maw-a Pawlae tyng pa
23Tukha kädang mang-a lä Akripa hai Berni lä aevyng ävang käting phi na hai ma, reisae kälengky na hai märü üng mätawngky khimi na hai mangtä aecö saite ingkäleng pui thung-a kung ö vi dy. Tupyng-a Festus ma thui te kätyng Pawlae bung nähai ö dy. 24Festus ma “Akripa sanphrang ä, Tyng saite khimi angxynlyng na ä, äni tea kheng ö. Jerusalem märü hai hini märü-a awng saite Judae khimipui na ma ‘Hini khimi bung lä kanghing-a khai he aeteng y’ näkha hang ea kai tea thui ö te vi. 25Tungaila äni lä dü he khytä sa tämang saite haetä la, awng te kai lä nung y vi. Tungaila äma lä Sica sanphrang tea ly he ngai vi näte phüng-a, äni bung Sica sanphrang tea mätaw he kai lä aedawng te vi. 26Äni üng phüng Sica sanphrang tea cae hai tärü hethang kai lä mäny te haetä la awng te y vi. Tukätephüng-a äni bung nang ce üng maw-a nähai te vi dy. Akripa sanphrang, nang ma äni tea älo düng ba. Tupyng-a ni kai lä cae hai hae haetä tärü te dang haw hethang vi. 27Thawng thung üng khimi lawngtä bung lä sa tämang te phüng haetä la thui y käla mätaw te lä aevaw y lyng näkha kai lä aedawng te vi” näpa.
26Akripa sanphrang maw-a Pawlae awng te
1Akripa sanphrang ma “Nang thui haw dy” näkha Pawlae tea näpa. Tukha Pawlae lä äkö bäjae kha,
2“Akripa sanphrang ä, kai tea Judae khimi na ma käsi thui saite na phüng vaihi nang üng ämaw-a kai thui he dang te kai lä kawngphi vi. 3Nang lä Judae khimi na üng reitae na hai älo ae-e saite phüng angxynlyng na kähawi-a mäny te vi. Tukätephüng-a kai thui saite lo tea änawng käsa hai tängai pa jo.
4“Kai lä nade käni üng hai ma kai üng pre-a hai, tupyng-a Jerusalem märü-a makä awng mei näte Judae khimi na lä mäny ö bawi te vi dy. 5Kai bung äni ce mäny te lä qae vi dy. Kai lä Judae na üng kangkawng thung-a Ubädi kähawi-a tängai khü saite Pharisai vi näte äni ce ma ngai dylä thui haw mang. 6Säthaw lä kai ce üng kangsi sangrung na tähang khai pa te älo aedo saite tea kai üng aethang khai te phüng-a, vaihi kai lä älo aecei hethang hi-a aedaw te vi dy. 7Kai ce Judae ceng hawlai netä na ma kärung käni Säthaw tea cäphaw kha aethang khai te hai aering ö pa saite aedo te älo vi. Akripa sanphrang ä, hini aethang khai te phüng-a, kai tea Judae khimi na ma käsi thui ö te vi. 8Kädü na bung Säthaw ma mätha haile tyng te hi-a awng saite nang ce lä ätephüng-a yng he ngai ö y te mei.
9“Kai ma la Nazare märü üng Isu ämüng tea e hethang aethawsa te lä aeteng vi näkha yng vai te vi. 10Hini kätyng Jerusalem märü-a kai lä sa te by vi dy. Mäthykung käleng üng aenae hai Yng saite khimi angxynlyng na bung kai ma thawng thung-a pä-ung pa te vi. Äni ce bung bädü saite kätü-a lä kai la bälung mangtä aedü te by vi. 11Kai lä Judae na üng ingkäcai-a ly kha äni ce tea bäjeng hai tütü te vi. Äni ce üng yng saite na khaisö hai hethang kai aethawsa te vi. Äni ce tea kai lä esäre phi te vi. Tukha kai lä pre kälang üng märü na mang-a ly kha äni ce tea sakälö khü pa te vi dy.
Pawlae lä äma yng saite phüng thui pa
12“Hini kätyng sa hethang kai lä mäthykung käleng üng aenae hai-a, äni ce te üng dang te cae süng kha, Damasaka märü-a ly te vi dy. 13Sanphrang ä, hokä ly te kätü, käni anghung-a, käni mang üng kaevang haetä lä kai hai mangtä ly saite äpy tea säveng lükü kha aevang pheng te kai lä nung vi dy. Honi kaevang lä käni qawng-a angky vi. 14Tukha kai ce angxynlyng lä älawng qawng-a aetüng praw ö vi. Tupyng-a Hebärai lo hai kai tea ‘Sawlae, Sawlae, nang lä ätephüng-a kai tea sakälö khü te vi mei. Nang lä kai aely ngai saite tea e dylä nang mani naw hethang kae vi’ näsaite ätüng kai lä thai vi. 15Tupyng-a kai ma ‘Areng ä, nang lä ämi mei’ näkha düng pa. Äni ma ‘Kai lä nang ma sakälö khü saite Nazare märü üng Isu dy. 16Tungaila vaihi aetha kha aedaw lawi. Nang bung kai üng mawsawng sa hai hethang nang tea kai ly te vi dy. Vaini nang nung pyng saite na hai, ämaw mang-a kai ma nang tea mätü hethang awng saite na phüng, khimi ce tea thui hethang kae. 17Kai lä nang bung Isrelae khimi na kö thung üng hai, ceng kälang khimi na kö thung üng la aelawi hai ai mang. 18Nang lä ceng kälang khimi na üng ämi tea aevang hai pa he kae. Äni ce bung käving thung üng hai kaevang mang-a aekö hai lawi. Tukha Setan angra üng haidae thung üng hai Säthaw te mang-a, tyng hai hethang kae. Äni ce lä kai tea yng te phüng-a, Säthaw ma äni ce üng hunghö na bälawi pa ai. Säthaw ma re saite khimi na thung-a, awng haw hethang mityng py ai. Hini kä aelawng hethang kai lä nang bung mätaw te vi.’
Pawlae äma üng sa saite phüng thui pa
19“Akripa Sanphrang ä, kai lä käni mang üng äsämai tea tängai khü te vi dy. 20Angcü-a Damasaka märü-a, tupyng-a Jerusalem märü üng khimi na hai, Judae khö üng khimi qütä tea hai, ceng kälang khimi na tea la Säthaw te mang-a aekö haile tyng te hai hunghö aedawng mäkhüng hethang kai lä äni ce tea thui pa te vi. Tätang khü-a aedawng mäkhüng dy näte mätü hethang äni ce lä hawi saite kälu sa hethang kae vi näkha kai thui te vi. 21Tukätephüng-a Judae khimi na lä Säthaw üng Ingkäcai thung-a kai bung ne kha bädü hethang aethawsa ö vi. 22-23Tungaila Säthaw lä kai tea säbawng te phüng-a, vaini khytä kai lä hing kha khimi cäpi käleng angxynlyng na tea Lo Angthang thui te vi. Mesia lä dü he kae näte hai kädü thung üng hai angcü-a aetha tyng ai näte phüng kai thui te vi dy. Tukätephüng-a Mesia lä Isrelae khimi hai, ceng kälang khimi na tähang äkaevang vi kha äni ce bung aeqang ö pa te vi. Mosi hai buisaw na ma thui te kätyng kai la thui te by vi” näkha näpa.
24Hini kätyng thui ea aecörae mätawngky Festus lä “Pawlae ä, Nang lä mäthö te vi dy. Mäny pro kha mäthö te vi dy be tu” näkha hang pa.
25Pawlae ma “Aecörae mätawngky Festus ä, kai lä mäthö te y vi. Nang tea mitang khü-a kai thui te kae vi. 26Hini phüng na lä Sanphrang nang ma mäny be ä. Tukätephüng-a kai lä äni üng maw-a thui vawng te vi. Hini phüng na lä khimi angxynlyng ma mäny ö te vi. Honi phüng angxynlyng na tea Sanphrang ma mäny king pyng vi dy näkha kai lä yng te vi. 27Akripa Sanphrang ä, nang lä buisaw na üng älo yng cäkae mei. Nang yng te phüng kai lä mäny te vi” näkha näpa.
28Akripa Sanphrang ma “Nang lä hikä kätü dawi tea kai bung Khristen aelawng hai hethang bäleng haw he aepö vi nang mei” näpa.
29Pawlae ma “Kätü dawi te, sa te lä aely leng y lyng. Sanphrang, nang hai vaini mangtä kai thui te lo tängai saite khimi angxynlyng na lä kai kätyng awng king by hethang Säthaw tea kai lä aetang te vi. Tungaila nang ce tea kai bung mäkhing te kätyng awng hai hethang lä ngai te y vi” näpa.
30Tudylä Sanphrang hai mangtä äma üng äticaw käna Berni hai aecörae mätawngky Festus hai, khimi angxynlyng na lä aetha kha ly ja ö vi dy. 31Äni ce lä honi mityng üng ly ja pyng ea lä “Äni lä dü hethang hai thawng thung-a pä-ung hethang khytä, sa tämang saite haetä lä awng te y” näkha äma ce tingtawi aethui ö vi dy. 32Akripa ma “Hini khimi lä Sica sanphrang tea tärae aecei hethang mäkai te awng y kha lä, äni bung bälawi haw vi dy” näkha aecörae mätawngky Festus tea thui pa vi dy.
27Rom märü mang-a Pawlae tui sangphaw aedang te
1Aecörae mätawngky Festus ma kai ce bung Itali pre-a tui sangphaw aedang hethang thui vi. Tupyng-a Pawlae hai thawng thung üng khimi phütä na bung Julia näsaite reisae cungvaitä na üng kälengky tea a pa vi. Reisae kälengky Julia lä, Sica sanphrang üng reisae kangkawng näsaite reisae kangkawng thung üng vi. 2Adramiti märü üng tyng saite tui sangphaw qawng-a paw kha tho ö vi dy. Kai ce lä Adramiti märü üng tyng saite tui sangphaw lä Asia pre cäpi tävaw pyng jungtä ly kha tui sangphaw aehaenae mityng na mang-a tyng he tähang vi. Makedonia khö Thesalonika märü üng Aristaku lä kai ce hai mangtä ly te by vi. 3Kädang mang-a kai ce lä Sidon märü-a tyng ö vi dy. Tukha Julia lä Pawlae tea bäheng kha äma aely ngai saite na säbawng haw hethang rawijae na hai aeting hai pa dy. 4Honi märü üng tho ea lä aelipui tho te hai aeting te phüng-a, Saipära angrai sälawng üng aeli aekhü saite mang-a ly ö dy. 5Kiliki khö hai Pamphulia khö mang üng pangle tea aekae pyng ea lä, Luki khö üng Mira märü-a tyng ö vi dy. 6Honi märü-a reisae kälengky ma Itali pre-a ly hethang Alesanda märü üng tyng saite tui sangphaw haetä tea nung vi dy. Tukha kai ce bung honi tui sangphaw qawng-a paw hai vi dy.
7Kai ce lä käni qae bärai te hai ma kangjai kangjai-a ly kha Kidos märü kaenai-a rae bärai te hai tyng ö vi dy. Aeli tho te nyng kha kai ce lä Salmoni äteng äpa-a mang hai Kreti angrai sälawng aeli aekhü te mang-a aedang ö vi dy. 8Kai ce lä rae bärai te hai ma Käri pre üng pangle pyng hai aenai saite mang-a ly kha Tui sangphaw Aehae nae Hawi näkha ämüng awng saite mityng-a tyng ö dy. Honi teng-a lä Lasia märü awng te vi.
9Kai ce lä kätü na byng mang kha hunghö bälawi saite käni tea cäqengja te vi dy. Tukätephüng-a tui sangphaw hai khölawng tho te lä ri hethang hawi vi. Pawlae lä äni ce tea hini kätyng älo na thui pa vi dy. 10Tukha Pawlae ma “Khimi na ä, vaihi kätü-a pangle thung-a khölawng tho he nädylä, ri he hawi phi. Tui sangphaw hai vyngsai na la te cang y mä-ai üng hing saite la, la haw ai te phüng, kai lä mäny vi” näkha thui pa. 11Tungaila reisae kälengky lä Pawlae üng thui te älo qawng-a, tui sangphaw kung hai tui sangphaw üng kälu sämae üng thui saite älo tea yngky pa te vi. 12Hini tui sangphaw aehae nae-a lä säding jungtä aehae hethang hawi y te phüng-a, khimi ce angxynlyng lä hini mityng üng tho ea Phoni märü-a tyng haw dylä tyng rung khytä ly kha säding-a aehae he ngai ö te vi. Phoni tui sangphaw aehaenae lä Kreti angrai sälawng-a awng kha käni kädüng, älüng hai käni kädüng ätüng mang-a, aehawi ea awng te vi.
Pangle-a aeli kangcai tho pa
13Tävaw ätüng mang üng aeli lä tho te aetawng ea tui sangphaw üng khimi na lä äma ce üng aedawng te kätyng mawcawng hethang aepö kha tui sangphaw aehae ea cakhi hai nae süng käleng aetho kha Kreti tui teng-a jungtä aenai rae rung khytä ly ö vi dy. 14Tungaila qae y tea ma käni käse hai älüng mang üng aeli kangcai aethaw awng phi saite lä mepui mang üng tho pa vi dy. 15Tui sangphaw lä aelipui hai aeting pa te phüng-a, ly hethang dang y vi dy. Tukha äni ce lä ly hethang ngai saite mityng-a ly haw y vi dy. Aeli tho saite mang-a aebaja kae vi dy. 16Koda näsaite angrai sälawng cäpi ätüng mang-a tyng ea lä aeli aekhü pa vi dy. Tukha honi mityng-a tui sangphaw leithung üng bälawng cäpi bung pra y rung khytä rae bärai te hai ma cakhi-a sa hai pa vi dy. 17Tui sangphaw üng kälu sämae na lä honi bälawng bung täryng ho ea mäkhing vi dy. Tui sangphaw tea ätäkui mang ruinawng hai mäkhing kha cakhi rung khytä sa ö vi dy. Äni ce lä Lebia pre üng bälang-a, tui sangphaw aetang rang he mawng te phüng-a, tui sangphaw üng jae saite libyng na bäla kha aeli tho saite mang-a aebaja hai ö vi dy. 18Tukha kädang khytä aeli kangcai lä tho jawjaw pa kha äni ce lä vyngsai na tea tui sangphaw qawng üng käde phae ö vi dy. 19Ämäthung käni-a lä tui sangphaw üng tawng saite vyngsai na äni ce lä pangle thung-a käde phae ö be vi dy. 20Kai ce lä käni bäraw y-a käni, law, tengpaw na tea nung haw y vi dy. Aeli la aethaw hawi te hai aenawng y käla ma, tho jawjaw te vi. Kangkhüng-a kai ce lä hing hethang mäteng ma aethang khai ö y te vi dy.
21Khimi ce lä käni bäraw y, ca nei y käla awng ö te vi. Tupyng-a Pawlae lä äni ce maw-a aedaw kha “Khimi na ä, nang ce lä kai üng lo tängai kha Kreti angrai sälawng üng tho y käla awng ea kha lä, hini kätyng mätang saite hai pra saite na aeting ö y vi ai. 22Tungaila vaihi lä aethawsi ö hang. Nang ce thung-a ämi la dü y lyng. Tui sangphaw ma qaitä ni pra he kae mang. 23Jangdüng kärung-a kai cäphaw saite Säthaw üng angtawtha lawngtä lä kai teng-a aedaw kha 24‘Pawlae ä, ri hang ba. Nang lä Sica sanphrang üng maw-a aedaw he kae. Säthaw üng tähang kähawi phüng-a, nang hai mangtä tui sangphaw aedang saite khimi angxynlyng na bung kädü thung üng aelawi hai vi ai’ näpa. 25Tukätephüng-a aethawsi ö hang. Kai lä Säthaw tea Yng saite khimi vi. Tukha kai tea Säthaw üng angtawtha ma thui te kätyng lä, tyng khaw vi ai näte kai lä yng vi. 26Tungaila mä-ai üng tui sangphaw lä angrai sälawng haetä qawng-a aetang kha awng vi ai” näpa.
27Käni hawlai bälitä tyng saite kädüng-a, kai ce üng tui sangphaw lä Adriatic pangle-a aeli tho saite mang-a, aebaja kha awng vi. Kärung angnihü rytä-a lä, tui sangphaw üng kälu sämae na lä tui teng hai aenai dy müng näte aedawng ö vi dy. 28Tukha äni ce lä tui thu mei näte mätae kha pe cungvai kuisytä awng te mäny ö vi dy. Tukha ämaw mang-a ly sosei kha mätae be ea lä, pe rui täkawtä awng te mäny ö vi dy. 29Äni ce lä kälung bärawng na hai aetei he ri te phüng-a, tui sangphaw äpai mang tui sangphaw aehae ea cakhi hai saite süng käleng bälitä tea käde kha khö aevang lawi sy näkha aetang ö vi dy. 30Tui sangphaw üng kälu sa saite na lä aehae ea cakhi hai saite süng käleng na bung bäla te käjüng sa kha bälawng cäpi tui thung-a bäla ea aedang kha aehuija he sa ö vi dy. 31Tukha Pawlae la reisae kälengky hai reisae na tea “Hini tui sangphaw üng kälu sämae ce tui sangphaw qawng-a awng jaw y dylä, nang ce lä aelaw haw y lyng” näpa. 32Tukätephüng-a reisae na lä bälawng cäpi üng ruinawng bung täleibae kha bälawng tea tho hai pa vi dy.
33Khö aevang aetawng-a, Pawlae lä khimi ce angxynlyng tea käcakänei na ca hethang bälang kha “Nang ce lä äte haetä la ca y käla ma awng te lä käni hawlai bälitä awng vi dy. Nang ce lä äte käcakänei la ca ö y vi. 34Nang ce hing he käcakänei ca hethang tähang-a, kai lä vaihi aebai kha thui te dy. Nang ce thung-a ämi üng äsangme haetä la, la y lyng mang” näpa. 35Tupyng-a Pawlae lä täkaw süng kha äni ce üng maw-a, Säthaw tea kawng te lo thui vi dy. Tukha täkaw täpe ea ca hai pa ö vi dy. 36Tukha äni ce angxynlyng lä aethaw dang haile kha käcakänei na ca ö tyng dy. 37Tui sangphaw qawng-a khimi angxynlyng na lä lawng cungvai netä hai rui säri tärutä awng vi dy. 38Khimi ce angxynlyng mängae rung khytä ca pyng ea tui sangphaw jang hai kü hethang kjung caw ni na pangle thung-a käde ö pang vi dy.
Tui sangphaw pra pa
39Khö aevang ea lä tui sangphaw üng kälu sämae na lä äma ce mani mityng-a, tyng dy mei näte mäny ö y vi dy. Tungaila tävaw pyng üng täpung bälang haetä nung te phüng-a, honi mityng-a, tui sangphaw tyng haw hethang aedawng ö vi dy. 40Äni ce lä aehae ea cakhi hai saite süng käleng ruinawng tälei bae kha pangle tui thung-a käde ö vi. Qengtäma tui sangphaw haw saite äpai mang üng ruinawng na lä sö kha tui sangphaw ämawng-a jae saite äsae na jae ea tui teng mang-a haw ö vi dy. 41Tungaila tui sangphaw lä bälang-a ky kha aetang rang pa vi dy. Tui sangphaw ämawng lä täpung älawng ngang-a, kungju kha cakhi-a awng te phüng-a aecü y pa vi dy. Tui sangphaw äpai mang-a lä tuileng ma bo te phüng-a aekhy he sa pa vi dy.
42Reisae na lä thawng thung üng khimi na tuija kha aehui pang ai näte bälungbi pa te phüng-a, äni ce bung bädü hethang aedüng ö dy. 43Tungaila reisae kälengky lä Pawlae bung hing hai hethang ngai te phüng-a, reisae na üng aedüng te kätyng sa y hethang mäkhang pa. Tukha tuija kaw saite khimi na bung lä angcü-a tui sangphaw qawng üng säly kha tui teng mang-a ja hai pa vi dy. 44Tupyng-a äkälang na bung pephei hai tui sangphaw pra saite üng vyng na qawng-a aedang hai kha aekae hethang älo thui pa dy. Hini kätyng-a kai ce angxynlyng lä kädü thung üng aelawi kha mepui-a kähawi-a tyng ö vi dy.
28Malta angrai sälawng-a tyng te
1Kai ce lä kähawi-a mepui qawng-a tyng pyng ea, hini lä Malta angrai sälawng näte mäny ö vi dy. 2Angrai sälawng üng khimi na angxynlyng lä kai ce tea bäheng kha säbawng ö vi. Khöne kha de phi pa te phüng-a, äni ce lä kai ce tähang maiti kha kai ce tea lady ö vi dy. 3Pawlae lä thing aecawng ea mai thung-a thing ti pa dy. Tukha thing aecawng saite üng bärui metä lä tho ea Pawlae üng äkö-a mätu kha aehawi loko pa vi dy. 4Äni üng äkö-a aehawi loko saite bärui tea angrai sälawng üng khimi na ma nung ea lä “Hini lä khimi bung bädü saite khimi ngaw müng. Pangle-a kädü thung üng aelawi ngaila tärawitha saite angra ma lä äni tea hing hethang py pa y lyng” näkha äma ce tingtawi aethui ö vi. 5Tungaila Pawlae lä bärui tea mai thung-a, käthüng kha kädepö pa vi dy. Äni lä äte haetä la naw te awng pa y vi. 6Äni ce ma Pawlae lä ba vi ai. Tukä y dylä qengtäma aetüng ea dü ai näkha aering kha kheng ö rü te vi. Hini kätyng käqae-a aering ngaila Pawlae lä ätemakä la, awng pa y vi te nung ea lä, äni ce lä bälung äkälang dawng kha “Hini lä angra vi ai” näkha thui ö vi dy.
7Honi mityng teng üng angrai sälawng-a, mätawngky Publiu üng älawng na lä awng vi. Äni lä kai ce bung ing-a lady kha käni thungtä tütü mäcaw mänei pa te vi. 8Publiu üng pä-ai lä kawngang naw te hai, äjosaw kha aesawng pa vi. Pawlae lä känaw awng saite mityng-a ly kha Säthaw tea aetang pa. Tupyng-a äni üng qawng-a, äkö thyng kha äni tea naw hawi hai pa vi dy. 9Tupyng-a honi angrai sälawng üng naw saite khimi angxynlyng na lä, Pawlae tea ly ö dy. Pawlae ma äni ce tea naw te na hawi hai bawi pa vi dy. 10Äni ce lä kai ce tea tämö khai phi ö vi dy. Kai ce ly hethang kätü tyng ea kai ce üng aely ngai saite angxynlyng na tui sangphaw qawng-a tha pa ö vi dy.
Rom märü-a Pawlae tyng te
11Law thungtä qae pyng ea lä, kai ce lä honi angrai sälawng-a säding-a aehae saite tui sangphaw hai aedang ö vi dy. Honi tui sangphaw lä Alesanda märü mang üng ly te vi. Angra kangby jä-ai Kaephe lawng netä näkha ämüng awng te vi. (Honi tui sangphaw üng ämaw-a Kasta hai Polu näsaite kangby jä-ai Kaephe üng mimi tea thui te vi dy.) 12Kai ce lä Siraku märü-a tyng ea tui sangphaw lä käni thungtä aehae vi dy. 13Honi märü üng tho kha Rikion märü-a tyng ö dy. Kädang mang-a lä ätüng mang üng aeli tho te phüng-a, käni netä qae te kätü-a lä Puteoli märü-a tyng ö vi dy. 14Honi märü-a lä Yng saite khimi phütä na hai aeting ö vi dy. Tukha äni ce lä äma ce hai käni säritä awng hethang mäkai pa dy. Tukha kai ce lä Rom märü-a äkho hai ly kha tyng ö dy. 15Rom märü üng Yng saite khimi na lä kai ce tyng te phüng mäny kha Apiu üng vyngjaw saite mityng hai, Cärai Käthungtä näsaite märü khytä ly kha lady ö vi. Pawlae lä äni ce bung nung ea Säthaw tea kawng te lo thui kha aethaw dang vi dy.
Rom märü-a Säthaw üng kälu sa pa
16Rom28:16 Angtawtha 25:11 märü-a tyng ea Pawlae lä rui saite reisae lawngtä hai mangtä awng he dang dy.
17Käni thungtä qae pyng ea Pawlae ma Judae mätawngky na bung kähyng vi dy. Äni ce lä aekäcö qu ea Pawlae ma “Kangby jä-ai na ä, kai lä mä-ai üng khimi na tea hai, kangsi na üng reitae tea äte haetä la sa tämang te awng y. Tungaila Judae khimi na lä Jerusalem märü-a kai bung ne kha Rom khimi na tea a ö te vi dy. 18Äni ce lä kai tea älo cei pyng ea bädü hethang sa ö te vi. Tungaila sa tämang te awng pa y te phüng-a, kai bung äni ce lä bälawi hethang ngai ö vi. 19Tungaila Judae khimi na lä älo ae-e te phüng-a, kai lä Sica Sanphrang tea tyng te khytä mäkai te vi. Tungaila mä-ai ma üng khimi na tea käsi thui hethang awng te y vi dy. 20Tukha nang ce hai aeting kha älo thui hethang kai lä mäkai te vi dy. Kai tea hini singqy rui hai mäkhing te lä, Isrelae khimi na aethang khai saite Mesia phüng-a vi” näpa.
21Äni ce ma “Kai ce lä nang üng phüng Judae khö üng cae lä dang te y vi. Isrelae pre üng ly saite kai ce üng yng te khimi ämi lawngtä la nang üng phüng hawi y saite na thui te y vi. 22Tungaila nang hai aesui saite hini kangkawng phüng ae-e kha mityng qütä-a thui saite na kai ce lä thai vi. Tukätephüng-a nang üng yng saite phüng na kai ce lä thai hethang ngai vi” näpa.
23Tudylä äni ce ma Pawlae tea aeting hethang käni rui aedo pa ö dy. Aedo saite käni-a Pawlae üng ing-a khimi ce ly ö mang pa dy. Pawlae lä kädang üng hai kädüng khytä Säthaw üng pre phüng kähawi-a thui mäcai pa dy. Mosi üng Ubädi hai buisaw na tärü saite cae tea kheng kha Isu üng phüng la äni ce bälungva hethang kähawi-a bäleng kha thui pa vi. 24Khimi phütä na lä Pawlae üng thui saite älo tängai ngaila phütä na lä yng ö y vi. 25Pawlae thui pyng te kätü-a Judae khimi na lä äma ce tingtawi ae-e kha vawi ö vi dy. Pawlae kangkhüng-a thui saite älo lä, “Buisaw Isaia hai nang ma ce üng kangsi na tea Muilaw Käcai ma thui te lä tätang khaw vi.
26‘Hini khimi na tea ly kha thui ö lawi.
“Nang ce lä känawkhing hai thai jawjaw ngaila thaikaw ö y vi ai.
Nang ce lä ämi hai nung jawjaw ngaila mäny ö y vi ai.”
27Ätephüng-a mei nädylä hini khimi na üng bälung lä tangkö te vi.
Äni ce lä känawkhing pang ö te vi.
Äni ce üng ämi lä bäjö ö te phüng-a vi.
Tukä y dylä äni ce lä känawkhing hai thai ö ai.
Äni ce üng ämi hai nung haw kha bälung hai la mäny va haw ö vi ai.
Äni ce lä hini kätyng awng kha kai tea aekö haile dylä, äni ce tea känaw käsaw hawi sa pa ö vi ai.’28:27 Isaia 6:9-10
28“Tukätephüng-a Säthaw ma khimi ce bung aeqang saite angthang lä ceng kälang tea tyng pyng vi dy. Äni ce lä tängai ai näte nang ce lä mäny ö lawi” näpa. 29(Hini kä Pawlae ma thui pyng ea, Judae khimi na lä äma ce tingtawi älo ae-e täto kha ly ö pang vi dy.)28:29 Hini kädawng 29tä lä Caekäcai phütä thung-a awng te y vi.
30Pawlae lä honi märü-a äma vanglang saite ing-a säning netä awng vi dy. Äma üng ing-a ly saite khimi angxynlyng na tea kähawi-a lady pa vi dy. 31Äni lä ri y te hai ma Säthaw üng pre phüng hai Areng Isu Khrista phüng khimi ce tea thui kha mätu pa vi dy. Ämi lawngtä la äni tea mäkhang pa y.