TIMOTHE
tea äbaeni üng Pawlae tärü saite cae
Angcü üng älo
Pawlae lä Rom märü thawng thung üng tänaetä aelawi kha Nero sica sanphrang ma äni bung lä thawng thung-a pä-ung hailae tyng pa vi dy. Pawlae lä hini cae tea A.D. 66-67 khösäning säla-a thawng thung mang tärü te daila awng ai. Hini lä Pawlae üng kangkhüng tärü saite cae vi. Honi kätü-a Pawlae lä ätabung aethawdi phi kha äma üng kälu hai hing saite lä byng aetawng dy näte mäny te vi dy. Hini cae thung üng mawlang kaedawng lä äthungtä awng vi. Angcü üng lä honi Nero Sica sanphrang ma Khristen kangkawng na tea sakälö khü kha Khristen na yng te cakhi hethang Timothe lä makä sa kha säbawng haw ai mei näte tähang Pawlae ma mäci pa te vi. Äbaeni üng lä Pawlae bung äma üng äpy na ma khai sö pa te phüng-a, Timothe bung äma tea ly dawde hethang ngai hai te vi. Ämäthung üng lä Timothe hai-a Ephesi märü üng kangkawng tähang cae tha hethang ngai hai te vi.
Äphüng äkädawiky
Angcü üng älo 1:1-2
Säthaw tea bälaw saite hai Timothe tea aethaw py saite 1:3-2:13
Täru saite hai sädi py saite 2:14-4:5
Pawlae äma khekhe ma aeting saite na4:6-18
Kangkhüng üng cibai sa te lo 4:19-22
1Pawlae ma angcü üng aethaw py saite lo
1Hini cae lä kai, Pawlae, te üng vi. Säthaw lä äma ma üng kängai-a Isu Khrista üng angtawtha-a lawng hai hethang kai bung re te vi dy. Isu Khrista tea yng saite khimi na tea lä dungtäsa hing saite py hethang Säthaw ma älo aedo saite phüng thui hethang kai bung mätaw te vi dy.
2Hini cae lä kai üng cäpaw khekhe kätyng bälung aevaw saite Timothe, nang, tea tärü te vi.
Mä-ai üng Pä-ai Säthaw hai Areng Isu Khrista ma nang ce tea tähang kähawi, bäheng saite hai awngneng saite py sy.
Aethaw py saite lo
3Kai lä kai üng kangsi kangjaw na kätyng käsi kähawi mäny saite bälung käcai hai Säthaw tea cäphaw kha nang tähang kawng hai te vi. Kärung käni nang tea ämaw aedawng te hai kai lä nang tähang aetang jawjaw te vi. 4Mä-ai ni aeprei hawi te thüng-a, nang üng minaw tui aeqa saite na tea aedawng haile kha kai lä nang hai aeting tyng hethang ngaiphi te vi. Tukä dylä kai lä tengxyng y anghawtho haw ai. 5Nang üng yng tätang saite tea kai lä aedawng haile te vi. Nang üng kangsi nä-awi Lo-i, hai nang nä-awi Euni ni lä Isu Khrista tea yng te cakhi hawi te vi. Nang la vaihi änini kätyng yng te cakhi by vi näte kai lä ae-y khü te vi. 6Hikäte phüng-a kai üng äkö na nang qawng-a thyng kha aetang te kätü-a, Säthaw ma py te sakaw saite tea tawng haile king hethang nang tea kai lä sädi py te vi. 7Säthaw lä mä-ai tea ri saite bälung py te y vi. Honi jüng-a haidae awng te bälung, bälung aevaw saite hai mä-ai ma tea aeküng saite bälung py te vi.
8Tukätephüng-a mä-ai üng Areng Isu phüng khimi ce tea thui hethang aejae hang ba. Äni üng tähang thawng thung-a pä-ung saite kai tähang la aejae hang. Angthang Kähawi tähang mätang bälaica saite thung-a kai hai mangtä mätang hethang awng rüng ba. Säthaw lä nang tea haidae py ai mang. 9Säthaw lä mä-ai bung aeqang kha käcai-a hing hethang ka te vi dy. Äni lä mä-ai üng kähawi sa saite na phüng-a ka te y lyng. Äma ma üng mawlang kaedawng hai tähang kähawi phüng-a vi. Älawng sa y te kälang-a ma, Säthaw lä äma üng tähang kähawi mä-ai tea mätü hethang Isu Khrista bung mätaw te hai-a sa rüng te vi dy. 10Vaihi Säthaw lä hini tähang kähawi mä-ai tea caiping-a täphawng hai pyng te vi dy. Mä-ai üng Aeqangkung Isu Khrista lä hi älawngpre-a ly kha mä-ai bung aeqang te phüng tea mätü te vi. Äni lä kädü mi tea täphra kha dungtäsa hing hethang Angthang Kähawi hai-a mä-ai tea täphawng te vi dy.
11Säthaw lä hini Angthang Kähawi thui hai hethang kai bung angtawtha-a hai särae lawngtä-a re te vi dy. 12Tukätephüng-a kai lä thawng thung-a mätang bälai saite na aeting jawjaw vi. Tungaila kai lä aejae y lyng. Ätephüng-a mei nädylä kai ma yng saite Khrista bung kai lä mäny te phüng-a vi. Khrista lä äma ly haile te Käni khytä kai tea a saite Angthang Kähawi tea aedung hai haw ai näte kai lä ae-y khü te vi. 13Kai üng kätüng mätu saite tea nang lä thai pyng te vi dy. Hini tea lä nang üng aetu nae kätüng kätyng khai khü ba. Nang lä Isu Khrista hai bungtä te phüng-a, yng jawjaw kha khimi kälang na tea bälung aevaw jawjaw ba. 14Nang tea Säthaw ma a saite lo angthang kätüng tea aedung hai ba. Mä-ai thung-a awng saite Muilaw Käcai lä nang tea säbawng ai mang.
15Asia pre cäpi-a awng saite yng te khimi awng mang te na ma kai bung lä khaisö te nang lä mäny te vi dy. Honi thung-a Phukela hai Hemokena ni mäteng ma qa hawi te vi. 16Areng ma Onesiphora hai äni üng engthung na tea bäheng jo sy. Ätephüng-a mei nädylä äni lä kai tea aethaw py leilae kha kai bung thawng thung-a pä-ung saite kätü-a äni lä kai tea ly hethang aejae te y. 17Hokä cang y äni lä Rom märü-a tyng te kätü-a, aethawsi y käla ma kai hai aeting y rytä kai tea mäqang vi dy. 18Tärae cei saite Käni-a lä Areng ma Onesiphora tea lä bäheng sy. Ephesi märü-a äni lä kai tea makä tangtä säbawng mei näte nang lä kähawi-a mäny khe te vi.
2Isu Khrista üng reisae kähawi
1Timothe ä, nang, lä kai üng cäpaw kätyng vi. Isu Khrista ma nang tähang py saite tähang kähawi hai aethaw aela ba. 2Nang lä kai ma khimi awng mang saite na maw-a mätu saite Isu Khrista üng Angthang Kähawi tea thai pyng te vi dy. Nang lä khimi kälang na tea mätu hai hethang ae-y haw nae hawi saite khimi na tea hini angthang a ba.
3Nang lä Isu Khrista üng reisae kähawi lawngtä kätyng kai ce hai mangtä mätang bälai hai jo ba. 4Reisae lawngtä lä kälu kälang tea sa haw y lyng. Ätephüng-a mei nädylä äni lä äma üng reisae mätawngky tea kawng hai hethang ngai te phüng-a vi. 5Honi kätyng-a, khimi lawngtä lä aehui te pawi-a qa dylä, honi aehui saite pawi üng älang na tängai y dylä, äni lä bäja saite ävang käting dang haw y lyng. 6Aethaw rae ea lai sa te khimi lawngtä lä angcü-a cawbi cawthai na dang hethang kae te vi. 7Kai thui saite na phüng aedawng ba. Hini angxynlyng na tea mäny hai hethang Areng lä nang tea säbawng ai.
8Sanphrang Davidae kaesui kaebeng lawng saite Isu Khrista bung kädü thung üng Säthaw ma mätha haile vi dy näte tea aedawng haile jawjaw ba. Hini lä khimi ce tea kai üng thui saite Angthang Kähawi vi. 9Hini Angthang Kähawi mätu te phüng-a, kai lä mätang bälai hai te vi. Käsi sa saite khimi lawngtä kätyng thawng thung-a singqy rui na hai mäteng ma kai tea khimi ce lä mäkhing te vi. Tungaila Säthaw üng lo tea lä ämi ma la mäkhing haw y lyng. 10Tukätephüng-a Säthaw ma re saite khimi na üng yng hethang tähang kai lä mätang bälai te angxynlyng na tea khung jawjaw te vi. Honi hai-a khimi ce lä Isu Khrista tea yng kha dungtäsa phung-ang hai aeqang saite dang haw ö ai. 11Hini lä ae-y nae hawi saite älo vi
“Khrista hai mangtä mä-ai dü vi dylä,
Äni hai mangtä mä-ai lä hing haile tyng ö by ai.
12Äni tähang mä-ai mätang te aeting jawjaw dylä Äni hai mangtä mä-ai la pre pyng ö by ai.
Mä-ai ma Äni bung aephae dylä äni la mä-ai bung aephae by vi ai.
13Khrista tea mä-ai ae-y khi y ngaila Äni lä mä-ai üng ae-y khü nae-a awng jawjaw ai.
Ätephüng-a mei nädylä Äni lä äma üng aedo saite lo tea täphra haw y te phüng-a vi.”
Säthaw kawng hai hethang kälu sa te khimi lawng he kae
14Hini mätu saite na yng te khimi na tea aedawng haile hethang thui pa. Älo älawngsai na phüng lawngtä hai lawngtä ae-e y hethang Säthaw üng maw-a äni ce tea sädi py pa ba. Honi ae-e saite lä aetütü kae. Tängai saite khimi na üng yng te tea täphra hai xyng te kae vi. 15Nang lä Säthaw üng maw-a aedaw ea äni üng kawng hai hethang aethawsa ba. Nang ma üng kälu tähang aejae y käla sa saite khimi-a lawng ba. Lo mitang tea kähawi-a mätu khü saite khimi-a lawng ba. 16Nang lä Säthaw tea tämö khai y saite lo, aetütü ävang ting y saite lo thui saite na tea aehi ba. Hokä thui saite khimi na lä Säthaw tea mäny y saite khimi na kätyng lawng rae ö vi ai. 17Äni ce üng älo na lä angvawi käsi haetä kätyng aepreng ö ai. Honi kätyng mätu te khimi na thung-a lä Humenai hai Phileta ni la qa hawi te by vi. 18Änini lä älo mitang hai hanglaw hawi te vi dy. Änini lä “Säthaw lä yng saite khimi na bung kädü thung üng mätha haile pyng te vi dy” näkha mätu hawi te vi. Honi hai-a khimi phütä na üng yng saite tea täphra hawi te vi. 19Tungaila Säthaw tea yng khü te khimi na üng yng saite lä ingkäleng haetä üng aenyng nae ca te kätyng cakhi te vi. Säthaw üng tärü saite na lä “Areng lä äma tea yng saite khimi na bung mäny vi” näte hai “Khimi lawngtä ma kai lä Areng leithung hui te vi näkha thui dylä, käsi sa saite tea khaisö hethang kae te vi” näte awng vi.
20Ingkäleng pui haetä-a lä sui, tangkae hai sa te pangkae na awng vi. Älawng ngang, thingkawng na hai sa saite pangkae hai kaephi na la awng te by vi. Sui, tangkae hai sa saite na tea lä pawi käleng-a ävang käting na khai hethang khimi ce ma tawng ö dy. Tungaila älawng ngang, thingkawng na hai sa saite pangkae hai kaephi na tea lä pawprae saite na thae kha khimi ce ma tawng ö te vi. 21Khimi lawngtä lä äma ma tea pawprae saite üng aemäcai pang dylä mangkri, äni lä pawi käleng-a ävang käting na khai saite kaephi hai aetawng vi dy. Äni lä käcai-a awng te phüng-a äni üng Areng lä äni tea kälu kähawi sa hethang tawng haw ai. 22Nang lä särai anglaw na sa hethang ngaiphi tüng y saite na tea aehi ba. Bälung käcai hai Areng tea cäphaw saite khimi na hai mangtä cüng saite, yng saite, bälung aevaw saite, awngneng saite awng hethang aethawsa ba. 23Ae-e aetütü saite lo hai älo kangthö na tea thung-a lä qa hang ba. Ätephüng-a mei nädylä honi lo na hai khimi ce lä aejaw aemang hai saite vi näte nang lä thaikaw te phüng-a vi. 24Säthaw üng mawsawng na lä aejaw aemang he kae y. Honi jüng-a äni lä khimi qütä tea bäheng kha Säthaw üng lo mitang kähawi-a mätu haw hethang kae. 25Hini kätyng-a elekhei thui saite khimi na tea lä änawngsa te hai, älo käneng hai kätüng thui pa hethang kae. Äni ce tea ae-ui haile he Säthaw ma py hethang aethang khai ba. Älo mitang mäny hethang äni ce tea säbawng pa. 26Tudylä äni ce lä tüng te, tüng y te na mäny kha Setan angra sa saite mäthang thung üng aelawi ö ai. Setan angra lä äni ce tea äma ngai te kätyng sa hethang mäthang-a aemang hai ö te vi dy.
3Kangkhüng Käni na
1Kai ma vaihi thui saite lo tea lä hawihai pailai tängai ö khü ba. Kangkhüng Käni na-a lä rae saite kätü na awng ai. 2Khimi ce lä äma ce tea xyng hai äma ce üng tangkae tea bälung aevaw ö ai. Äni ce lä aethaw te hai bälungleng kha khimi ce phüng käsi thui ö ai. Änä-awi äpä-ai üng lo tängai ö y ai. Säbawng saite khimi na tea kawng te lo thui y te hai, Säthaw tea tämö khai ö y ai. 3Äni ce lä khimi kälang na tea bälung aevaw ö y. Khimi ce üng sa tämang te tea bälawi y saite hai, khimi ce phüng kaeling thui ö ai. Mä-ai ma tea aeküng haw y saite hai kädaw rae saite hai kähawi saite tea ngai y te na awng ö ai. 4Äni ce lä äma ce rawijae na bung äma ce üng täre na tea a ö ai. Aedawng y käla sa rungrang te hai, khimi kälang na qawng-a hawiky näte aedawng ö ai. Säthaw tea bälung aevaw y käla äma ce üng ngaiphi tüng y saite tea bälung aevaw ö ky saite na vi. 5Äni ce lä Säthaw tea cäphaw te kätyng sa ngaila äni üng haidae tea e ö te vi. Honi kätyng awng saite khimi na hai aede ö hang. 6Honi khimi thung üng phütä lä khimi kälang na ma äni ce bung ingthung-a kung hai hethang kaeling sa ö vi. Honi ingthung-a awng saite aethawdi te nawngmädi na tea kaesyng y mätu saite mang-a hui hai hethang bärawi bäleng ö te vi. Honi nawngmädi na lä hunghö sa te phüng-a äma ce lä kähawi y sa te tea aedawng ö tütü te vi dy. Tukha äni ce lä ngaiphi tüng y saite angxynlyng na mang-a hui ö vi dy. 7Nawngmädi honi na lä aetu leilae ngaila älo mitang tea thaikaw haw ö te y vi. 8Jangni-a Janne hai Jambre ni ma Mosi tea elekhei sa hawi vi dy. Honi kätyng sa tämang saite khimi na lä älo mitang tea elekhei sa ö te by vi. Äni ce lä aedawng kaw y kha kätüng-a yng ö y vi dy. 9Äni ce lä khimi ce tea kaeling sa jawjaw haw ö y lyng. Ätephüng-a mei nädylä jangni-a Janne hai Jambre ni lä kaerö saite khimi kae näte Judae khimi na mäny te kätyng khimi qütä ma la änini phüng tea mänysy ö ai mang.
Timothe tea Pawlae ma täru kha aethaw py saite lo na
10Tungaila khimi ce tea kai ma mätu saite na nang lä kähawi-a mäny te vi. Nang lä kai üng awng saite na, mawlang tähang kaedawng saite, yng saite, änawngsa saite, bälung aevaw saite hai mätang bälaica pyng saite angxynlyng na mäny te vi dy. 11Antioh märü, Aikonia märü hai Lutara märü-a, khimi ce ma känaw py kha mätang bälaica-a sa saite cawngkhang na tea nang lä mäny te vi. Tungaila Areng lä honi angxynlyng na thung üng kai bung aeqang te vi dy. 12Tätang khaw-a thui si nädylä, Isu Khrista hai bungtä awng te hai-a Säthaw üng bälung kängai-a sa saite khimi qütä lä sakälö khü saite aeting khaw ai. 13Käsi sa te hai kaeling sa te khimi na lä sa tämang ö rae ai mang. Äni ce lä khimi ce tea kaeling sa te kätyng khimi kälang na ma la äni ce tea kaeling sa ö by ai. 14Tungaila nang lä kai ma khimi ce tea mätu te kätyng älo mitang tea kähawi-a rui jawjaw hethang kae. Honi na lä lo mitang vi näkha nang lä mäny ba. Ätephüng-a mei nädylä nang tea mätu saite khimi na tea nang lä ae-y haw te vi. 15Nang lä nade te kätü üng hai ma Caekäcai ping tea mäny pyng te vi dy. Honi Caekäcai na lä Säthaw üng aeqang saite lä Isu Khrista tea yng te hai-a dang te vi näte nang mäny haw hethang säbawng saite cae vi. 16Caekäcai angxynlyng na lä Säthaw ma tärü saite na üng bälung kaedawng thung-a mäkung te vi. Honi lä khimi ce tea mätu hethang, pring hethang, sa tämang saite mätü hethang, cüng saite sa hethang, khimi ce tea mätu pa hethang, säbawng haw ai. 17Hini Caekäcai phüng-a Säthaw üng mawsawng lä hawi saite kälu angxynlyng sa haw hethang hai aerü rüng kha awng haw ai.
41Säthaw hai Isu Khrista üng maw-a, kai lä nang tea mäci te dy. Isu Khrista lä Sanphrang kätyng pre pyng hethang ly haile tyng te kätü-a lä, hing saite khimi na hai dü saite hai khimi na tea tärae cei ai. 2Angthang Kähawi thui ba. Kätü na hawi te läsy, hawi y te läsy, nang lä Säthaw üng lo thui hethang aerü rüng lawi ba. Khimi ce üng sa tämang te kätü-a, nang lä äni ce tea thui pa. Käsi sa te khimi na tea pring pa. Kätüng sa saite khimi na tea aethaw py pa. Honi kälu angxynlyng na tea nang lä änawngsa bärai te hai mätu te hai-a sa ba. 3Khimi ce lä kätüng mätu te na tea tängai hethang ngai y te kätü lä tyng ai rawng. Äni ce lä äma ce üng ngaiphi tüng y saite mang-a hui ö ai. Tukha äni ce lä thai hethang ngai saite lo mätu te särae rangpui na tea ha ö vi ai. 4Khimi ce lä älo mitang tea tängai hethang ngai ö y ai. Tukha äni ce lä tüng y saite cäkae kangrüng na tea tängai ö ai. 5Tungaila, Timothe ä, nang ma tea nang ma kätü qütä aeküng hethang kae. Mätang bälai te kätü-a, nang lä änawngsa ba. Angthang Kähawi thui ba. Säthaw ma py saite kälu angxynlyng na tea nang lä sa king ba.
6Mäthykung lä löci sa pyng te kätü-a, Cäpje tui hai bälawng te vi. Kai üng hing saite lä honi Cäpje tui bälawng te hai aetawng vi. Hini älawngpre üng kai tho hethang kätü lä aenai vi dy. 7Kai lä kähawi-a aety pyng te vi dy. Aehui saite pawi-a la kai lä kangteng khytä aehui te khüng pyng te vi dy. Kai lä yng saite tea aekhaw khü te vi dy. 8Kai lä kawng te hai äni üng lo tängai te phüng-a vaihi Säthaw ma kai tähang ävang käting khai rüng pa vi dy. Khimi angxynlyng na tea kätüng-a tärae cei saite Areng lä äma ly haile te honi Käni-a lä kai tea hini ävang käting py ai. Kai ma qaitä tea py hethang kae y. Äma ly haile te kätü tea aethang khai te hai aering saite khimi angxynlyng na tea la ävang käting py pa ö by ai.
Pawlae lä Timothe bung äma tea ly hai dawde hethang thui pa
9Nang lä kai tea ly dawde haw hethang aethawsa ba. 10Dema lä hini älawngpre-a awng saite cawngkhang na tea bälung aevaw te phüng-a, kai bung khaisö kha Thesalonika märü-a ly ja vi dy. Kriski lä Kalatia khö-a ly kha Tita lä Dalamatia khö-a ly vi dy. 11Luka ma qaitä ni kai hai mangtä awng te kae. Marka bung lä mäqang kha nang hai mangtä nähai ba. Ätephüng-a mei nädylä äni lä kai üng kälu tea säbawng haw ai te phüng-a vi. 12Kai lä Tukhika bung Ephesi märü-a mätaw vi dy. 13Nang ly kätü-a Troa märü üng Kaipa ing-a khai saite kai üng kä-o hai, cae-u na hai aely leng te cae tärü saite na tea nähai pa jo ba ä.
14Pething särae Alesanda lä kai üng kälu tea elekhei sa te awng mang vi dy. Äni sa saite käsi tähang Areng lä äni tea tärawitha ai. 15Nang la äni tea sädi khai ba. Mä-ai üng mätu saite lo angxynlyng na tea äni lä tengxyng y elekhei sa phüng-a vi.
16Kai tea tärae cei te kung ma angcü üng tärae cei te kätü lä, ämi lawngtä la kai tea säbawng hethang awng y. Khimi qütä ma kai bung khaisö te vi dy. Kai tea khaisö te phüng-a, äni ce üng sa tämang saite na Säthaw ma bälawi hethang kai lä aetang pa te vi. 17Tungaila Areng Isu lä kai äteng-a mangtä awng hai kha aethaw py te vi dy. Tukätephüng-a Khrista üng Angthang Kähawi tea honi mityng-a awng saite ceng kälang khimi angxynlyng na thai hethang kai lä thui king haw vi dy. Khrista ma kai bung lä kädü khaw üng aeqang pa te vi dy. 18Areng lä kai bung khimi ce üng käsi sa te angxynlyng na thung üng aelawi hai pa ai. Äni lä äma üng pyng saite Känipre-a kai bung kähawi-a nähai ai. Äni tea mä-ai lä cäphaw kha dungtäsa bälaw ö khü si. Amen.
Pawlae üng kangkhüng kawng bärai sa te älo na
19Precila ni Akuila tea hai Onesiphora üng engthung rü tea la kai üng kawng bärai sa te lo thui pa jo ba. 20Erastus lä Korin märü-a awng te vi dy. Trophima lä naw te phüng-a, kai lä Mile märü-a äni bung khaisö vi dy.
21Säding tho y te kälang-a nang lä hi-a tyng hethang aethawsa ba.
Ebula, Puden, Lina, Kaladia hai hi-a awng te yng saite angxynlyng na ma nang tea kawng bärai sa te lo thui ö by dy.
22Areng lä nang hai mangtä awng jaw sy.
Säthaw lä tähang kähawi lä nang ce angxynlyng tea py jo sy.