THESALONIKA
kangkawng tea äbaeni üng Pawlae tärü saite cae
Angcü üng älo
Hini Thesalonika märü üng kangkawng tähang äbaeni tärü saite cae lä angcü üng tärü saite hai aetawng vi. Pawlae lä Korin märü awng te thüng A.D. 51-52 khösäning säla-a hini cae tärü te daila awng ai. Äni lä angcü üng Thesalonika märü üng kangkawng tähang cae tärü tea Khristen phütä na lä thaikaw y kha Areng Isu Khrista ly haile praw ai näte tea aedawng ö te vi. Tukätephüng-a äni ce lä bälung xhuxa kha kälu na sa y käla Areng Isu ly haile ai näte tea aering ö kae vi. Vaihi Pawlae lä Isu Khrista ly haile ai näte phüng äni ce kätüng-a thaikaw haw hethang hini äbaeni cae tea tärü be pa te vi.
Äphüng äkädawiky
Angcü üng älo 1:1-2
Thesalonika kangkawng phüng-a, Säthaw tea bälaw saite hai kangkawng phüng kähawi thui saite 1:3-12
Khrista ly haile hethang phüng mätu saite 2:1-17
Khristen na üng aeme aeqa saite phüng mäci saite 3:1-16
Kangkhüng üng cibai sa te lo 3:17-18
1Pawlae ma Thesalonika märü üng yng saite na tea lady te cae
1Hini cae lä kai, Pawlae, ma Thesalonika märü üng Areng Isu Khrista hai mä-ai üng Pä-ai Säthaw tea yng saite khimi na tea tärü te vi. Kai hai mangtä awng saite Saila hai Timothe ni la nang ce tea aedawng te lo thui hawi by dy.
2Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.
Kawng te lo thui kha aetang pa
3Yng saite kangby jä-ai na ä, kai ce lä nang ce tähang kätü qütä Säthaw tea kawng te lo thui jawjaw hethang kae ö te vi. Kai ce lä hikä sa hethang hawi khaw ö vi. Ätephüng-a mei nädylä, nang ce üng yng saite ryng rae, ryng rae kha lawng lawngtä tea bälung aevaw qi saite lä äkung na kätyng aepa phung jawjaw ö te phüng-a vi. 4Tukätephüng-a kai ce ma nang ce üng phüng lä Säthaw üng kangkawng na tea aethaw ö te vi. Khimi ce ma nang ce tea mätang bälaica-a sakälö khü jawjaw te kätü-a, nang ce üng yng saite hai änawngsa haw saite phüng na kai ce lä thui ö te vi.
5Nang ce lä vaihi mätang bälai ö te vi. Tungaila hini lä Säthaw pre üng aeteng khaw te khimi-a lawng ö hethang tähang vi. Hini angxynlyng na lä Säthaw üng tärae cei te tüng vi näte tea mätü te vi dy. 6Säthaw lä kätüng khaw-a tärae cei te vi. Nang ce tea mätang bälai-a sa saite khimi na tea lä Säthaw ma tärawitha haile tyng ai. 7Tukha nang ce hai kai ce mangtä vaihi mätang bälai saite khimi na tea lä Säthaw ma säbawng ai. Hini na lä Areng Isu Khrista Känipre mang üng ly haile be te kätü-a, tyng khaw vi ai. Äni üng haidae awng saite angtawtha na lä Äma hai mangtä maibälai hai tho ö ai. 8Säthaw lä Äma tea elekhei sa saite na hai mä-ai üng Areng Isu üng Angthang Kähawi tängai y saite na tea lä dengpy ai. 9Areng Isu lä äni ce tea dungtäsa täphra saite hai deng py vi ai. Äni ce bung lä Säthaw ma äma te üng täprei kha Äni üng leng saite haidae lä äma üng hai äni ce tea hanglaw hai vi ai. 10Areng Isu ly haile be te kätü-a, Äni tea yng saite khimi angxynlyng na lä tämö khai ea cangxei kha bälaw ö ai. Kai ce ma thui saite Äni üng angthang tea nang ce lä yng te phüng-a, hini khimi ce thung-a nang ce la qa ö by vi ai.
11Tukätephüng-a kai ce lä nang ce tähang aetang jawjaw ö te vi. Säthaw lä nang ce tea ka saite hai kaeteng khaw-a awng haw hethang säbawng he kai ce lä aetang pa ö te vi. Nang ce üng yng te hai ngai saite kälu kähawi na sa haw hethang haidae na äni ma nang ce tea py sy. 12Nang ce phüng-a, khimi ce lä mä-ai üng Areng Isu ämüng tea bälaw haw hethang kai ce lä aetang ö te vi. Tudylä Isu ma la nang ce tea bälaw by ai. Mä-ai üng Säthaw hai Areng Isu Khrista lä äma üng tähang kähawi hai-a hini aetang saite na tea lä mäthang vi ai.
2Säthaw üng Ubädi tea elekhei sa saite Kung
1Yng saite kangby jä-ai na ä, mä-ai üng Areng Isu Khrista lä ly haile tyng be te kätü hai, Äma hai aeting hethang mä-ai bung lä Säthaw ma mangtä käcö ai te phüng kai ce lä nang ce tea mäny hai hethang ngai ö te vi. 2Khimi phütä na lä Areng üng Käni lä tyng rüng vi dy näkha thui ö vi. Khimi ce lä buisaw na üng lo, y käla, kai ce ma thui te lo na, y käla, cae tärü te phüng na thui ö vi ai. Hikä thui te thai dylä, nang ce lä jahaw-a bälung mawng kha aethüng y hethang nang ce tea aesi aebai kha kai ce lä thui hethang ngai ö te vi. 3Nang ce lä khimi ce ma kaeling kaemae sa saite tea yng ö hang ba. Ätephüng-a mei nädylä Areng Isu ly haile be y te kälang-a, khimi awng mang saite na ma Säthaw tea aety saite kätü lä tyng ai rawng. Honi kätyng awng te kätü-a, Säthaw üng Ubädi tea elekhei sa saite kung lä tho vi ai. Äni bung lä Säthaw ma täphra ai. 4Äni lä Säthaw tea elekhei sa kha khimi ce ma Säthaw näkha ka ea cäphaw saite angxynlyng tea mäsang vi ai. Tukätephüng-a äni lä Säthaw üng Ingkäcai thung-a mäteng ma aety kha äma tea Säthaw-a aemäthi ea khimi qütä tea thui pa vi ai.
5Kai lä nang ce hai mangtä awng te thüng-a, hini phüng na nang ce tea thui leilae pyng saite tea aedawng haile tyng ö khü ba. 6Ubädi tea elekhei sa saite Kung tho y hethang mäkhangky saite na tea nang ce lä mäny ö vi. Äni lä Säthaw üng khai saite kätü-a khaw tho vi ai. 7Tätang khaw, Säthaw üng Ubädi tea elekhei sa hethang Setan lä khimi ce bung kangru-a the hethang aetawng rüng te vi. Tungaila hini haidae tea mäkhang saite lawngtä lä vaihi khytä awng te vi rawng. Äni bung Säthaw ma nähaija te kätü tyng y rytä lä, äni lä hikä sa jawjaw vi ai. 8Honi pyng-a Ubädi tea elekhei sa saite Kung lä tho ai. Tungaila Areng Isu ly haile be te kätü-a lä, särilo haetä hai Ubädi tea elekhei sa saite Kung tea täphra vi ai. Tukha Isu lä phung-ang hai ly kha Ubädi tea elekhei sa saite Kung tea haidae awng y king hethang sa pa vi ai. 9Ubädi tea elekhei sa saite Kung lä Setan angra üng haidae hai ly kha khimi ce tea kaeling kaemae sa hethang cangxei saite na, kamarae na hai äsäny cawngkhang saite na sa vi ai. 10Tukha äni lä käsi cawngkhang na hai pra saite lang-a awng te khimi na tea kaeling kaemae sa vi ai. Hini khimi ce lä Isu Khrista üng tüng saite lo Angthang tea tängai hethang ngai y te phüng-a, Säthaw lä äni ce bung aeqang haw pa ö y. 11Äni ce lä Angthang Kähawi tängai y te phüng-a, Säthaw lä äni ce tea tüng y saite na tea yng hai pa vi dy. Tukätephüng-a äni ce lä kaeling kaemae na sa saite Kung tea yng ö vi ai. 12Tukätephüng-a tüng saite Angthang Kähawi tea yng y käla, käsi sa te tea bälungrui sui saite angxynlyng na tea lä Säthaw ma tärae cei kha dengpy ai.
Yng te cakhi ö
13Areng Isu ma bälung aevaw saite yng te kangby jä-ai na ä, nang ce tähang-a kai ce lä Säthaw tea kawng te lo thui jawjaw ö hethang kae te vi. Ätephüng-a mei nädylä äni lä älawng sa te kätü-a ma, aeqang hethang nang ce bung re te vi dy. Äni lä Muilaw Käcai hai-a khimi käcai-a bälawng kha lo mitang tea nang ce üng yng te hai-a nang ce bung aeqang te vi. 14Kai ce üng Angthang Kähawi thui saite hai-a Säthaw lä nang ce bung ka te vi. Mä-ai üng Areng Isu Khrista üng phung-ang tea nang ce lä qa haw hethang nang ce bung ka te vi. 15Tukätephüng-a yng saite kangby jä-ai na ä, nang ce üng yng saite lä ca ö khi ba. Kai ce lä nang ce tea älo hai läsy, cae hai läsy, mätu pyng saite na tea lä yng khü jawjaw ö ba.
16-17Mä-ai üng Areng Isu Khrista hai Pä-ai Säthaw ma mä-ai tea bälung aevaw kha tähang kähawi hai-a, dungtäsa aethaw dang saite hai aethang khai saite py te vi. Mä-ai üng Pä-ai Säthaw lä nang ce üng bälung na tea aethaw py kha hawi saite angxynlyng na thui hethang hai, kälu sa khü jawjaw ö hethang säbawng sy.
3Kai ce tähang aetang pa ö
1Yng saite kangby jä-ai na ä, nang ce lä kai ce tähang aetang pa ö jo ba. Areng Isu üng Angthang Kähawi aepreng dawde kha nang ce ma Angthang Kähawi yng ea tängai te kätyng, thai saite khimi qütä la tängai haw hethang aetang pa ö jo. 2Säthaw ma käsi sa kha hawi y saite khimi na te üng kai ce bung bälawi hethang la aetang pa ö ba. Ätephüng-a mei nädylä Angthang Kähawi thai saite khimi qütä lä yng y te phüng-a vi.
3Tungaila Areng lä äma thui pyng saite tea lä sa vävawi te vi. Tukha äni lä nang ce tea aethaw py vi ai. Setan angra ma nang ce tea käsi sa haw y hethang nang ce bung Areng ma aedung pa vi ai. 4Nang ce lä kai ce thui saite särilo vaihi tängai te kätyng, vaimaw mang-a la tängai jawjaw vi ai näte, kai ce lä Areng hai-a bälung ae-y khü öte vi dy.
5Nang ce tea Säthaw lä matangtä bälung aevaw mei näte Areng Isu Khrista ma mätü sy. Areng tea khimi ce ma mätangca-a sa te kätü-a, äni üng änawngsa te phüng lä nang ce tea mäny hai sy.
Kälu sa hethang kae
6Yng saite kangby jä-ai na ä, aethawli saite na hai mätu pyng te lo na tängai y käla yng saite khimi angxynlyng na tea lä aehi ö. Hini täru te lo lä mä-ai üng Areng Isu Khrista üng py saite aenae hai-a, nang ce tea kai ce lä thui ö te vi dy. 7Nang ce lä kai ce üng sa te täthei sa jawjaw hethang kae näte nang ma ce khekhe ma mäny ö te vi dy. Kai ce lä nang ce hai mangtä awng te thüng-a, kai ce lä aethawli ö te y. 8Tukha ävang py y käla, kai ce lä äjawng-a khimi ce üng bö ca ö te y vi. Honi jüng-a, nang ce lä kai ce tea mäcaw mänei te bälungbi hai y hethang tähang kai ce lä aethawli y käla kärung käni aethaw rae kha kälu sa ö te vi. 9Tätang khaw, nang ce ma mäcaw mänei hethang nang ce tea kai ce lä mäkai hethang aenae awng te vi. Tungaila kai ce sa saite täthei nang ce tea sa hai hethang ngai te phüng-a, kai ce lä hini kätyng sa ö te vi. 10Kai ce lä nang ce hai mangtä awng te kätü-a mäteng ma, kai ce ma “Kälu sa hethang ngai y saite tea lä mäcaw mänei hang” näkha särilo hai thui leilae ö pyng te vi dy.
11Aethawli saite khimi phütä na lä nang ce thung-a awng näte kai ce lä thai pyng te phüng-a, kai ce lä hini angxynlyng na thui ö te vi. Äni ce lä kälu la sa ö te y. Hikäti khimi ce lä, khimi kälang na tea xu hai aetütü ö te kae vi. 12Hokäti khimi ce tea kai ce lä äma ce ca nei haw hethang tähang-a, kälu tea khüsälü-a sa haile tyng hethang Areng Isu Khrista ma py saite aenae hai-a thui kha mäci ö te dy.
13Yng saite kangby jä-ai na ä, nang ce lä hawi saite kälu sa hethang aethawsi ö hang ba. 14Nang ce thung-a kai ce ma hini cae hai tärü kha thui pyng saite lo tängai y te khimi awng dylä, äni lä ämi mei näte khimi qütä tea mäny hai khü kha äni hai lä rawijae aesa ö hang ba. Tudylä hikä sa te hai-a äni lä saerae ai mang. 15Tungaila äni tea täre lawngtä kätyng dawng y käla, yng saite kangby jä-ai lawngtä kätyng khai kha pring pa.
Pawlae üng kangkhüng cibai sa te lo äni ce tea thui pa
16Awngneng te kä py Kung, Areng Isu, ma nang ce tea aeting saite angxynlyng na thung-a awngneng saite py jawjaw sy. Areng lä nang ce angxynlyng hai mangtä awng sy.
17Kai, Pawlae, ma hini kangkhüng üng cibai sa te lo kai üng kö hai nang ce tea tärü te vi. Hini lä kai te üng tha khe saite cae angxynlyng na üng säny vi dy.
18Mä-ai üng Areng Isu Khrista te üng tähang kähawi käleng lä nang ce angxynlyng tea awng sy.