PETERAE
äbaeni üng tärü saite cae
Angcü üng älo
Peterae äbaeni cae tärü te lä A.D. 64-70 khösäning säla-a daila awng ai. Hini äbaeni üng cae dang saite Khristen na lä angcü üng tärü te cae dang saite na by kae vi. Hini cae üng äly kälengky phüng lä käjüng sa te särae na üng mätu saite na hai honi mätu saite phüng-a käsi sa saite na tea mäkhang pa hethang vi. Peterae lä yng saite na ma kaesyng y mätu saite na tea makä sakha mäthang haile pa ai mei näte phüng mätu pa te vi. Äni lä Säthaw lo mitang hai buisaw na üng lo cungrü saite na aely kälengky khai kha tärü pa te vi.
Äphüng äkädawiky
Angcü üng älo 1:1-2
Khristen na bung re saite 1:3-21
Särae käjüng sa saite na 2:1-22
Kangkhüng üng Areng ly haile saite 3:1-18
11Hini cae lä Isu Khrista üng mawsawng hai angtawtha lawng saite, kai, Simon Peterae, te üng vi. Kai lä Säthaw hai mä-ai üng Aeqangkung Isu Khrista üng cüng saite hai-a kai ce kätyng yng te ävang käting dang saite na tea cae tärü te vi.
2Säthaw lä äma tea hai mä-ai üng Areng Isu Khrista bung nang ce üng mäny saite hai-a tähang kähawi hai awngneng saite lä nang ce tea cungrü-a py sy.
Säthaw üng re saite
3Mä-ai lä Säthaw üng aely kängai-a hing haw hethang äma üng haidae hai angxynlyng na mä-ai tea py vi dy. Äni üng phung-ang hai hawi saite hai-a mä-ai bung re saite Säthaw tea mäny te hai-a honi angxynlyng na mä-ai lä dang ö te vi dy. 4Äni üng phung-ang hai hawi saite hai-a äma lä mä-ai tea lengphi saite hai ävang käting älo aedo saite na py te vi dy. Tukätephüng-a äni üng älo aedo saite na hai-a nang ce lä hini älawngpre üng ngaiphi tüng y saite hai-a täphra saite üng aelawi kha Säthaw üng käcüng aeme aeqa saite kätyng nang ce üng käcüng-a aeme aeqa saite thung-a la awng haw ö vi ai. 5Tukätephüng-a nang ma ce üng yng saite tea hing saite täbawi hethang aethawsa ö he kae. Nang ce üng hini aeme aeqa saite käcai lä Säthaw bung mäny rae saite tea täbawi hethang aethawsa ö te vi. 6Säthaw bung mäny rae saite tea aeküng saite hai täbawi ö. Aeküng saite tea lä khung saite hai täbawi ö. Khung saite tea lä Säthaw üng aely kängai kätyng hing saite tea täbawi ö. 7Säthaw üng aely kängai-a hing saite tea lä nang ce üng yng saite kangby jä-ai na tea bälung aevaw saite hai-a täbawi ö te vi. Yng saite kangby jä-ai na bung bälung aevaw saite khimi angxynlyng na tea bälung aevaw saite hai täbawi ö. 8Nang ce lä hini aeme aeqa saite käcai-a awng rae awng rae dylä, mä-ai üng Areng Isu Khrista bung mäny saite lä nang ce tähang aetütü-a lawng ö y vi ai. Tukha nang ce lä khimi ce tea kähawi-a säbawng haw ö vi ai. 9Tungaila khimi lawngtä lä hini aeme aeqa saite käcai awng y vi dylä, äni lä ämi kangjö lawngtä kätyng vi. Äni lä jangni-a äma üng hunghö sa saite na Säthaw ma bälawi vi dy näte tea sa tämang te vi dy.
10Tukätephüng-a, yng saite kangby jä-ai na ä, nang ce lä Säthaw üng ka saite hai re saite na cakhi hethang aethawsa rae sa rae ö. Nang ce hini kätyng sa dylä, nang ce lä yng saite tea manila khaisö ö y vi ai. 11Säthaw lä nang ce tea mä-ai üng Aeqangkung Areng Isu Khrista üng dungtäsa pre thung-a kähawi-a lady vi ai.
12Tukätephüng-a nang ce lä hini na tea mäny kha lo mitang yng khü ngaila, kai lä nang ce tea tämang y hethang thui haile jawjaw ai. 13Kai ma hini älawngpre-a hing te jungtä, nang ce tea hini na phüng aedawng haile tyng ö hethang lä kai üng kälu vi näte kai lä mäny te vi. 14Tukha kai lä qae y tea ma dü ai näte mä-ai üng Areng Isu Khrista ma täphawng te phüng-a mäny te vi dy. 15Tudylä kai dü pyng-a, nang ce lä hini na tea tätang aedawng haile ö jawjaw hethang kai lä aethawsa vi ai.
Kai ce lä ämi hai Khrista üng phung-ang tea nung ö khe saite
16Mä-ai üng Areng Isu Khrista lä haidae hai äma üng ly haile ai näte nang ce tea kai ce ma thui te kätü-a, khimi ce ma thui saite cäkae na tea thui te y lyng. Tungaila kai ce lä kai ma ce üng ämi hai Khrista üng phung-ang käleng tea nung khe ö te vi dy. 17Mä-ai üng Pä-ai Säthaw lä Isu tea tämö khai saite hai phung-ang py te vi. Äte angxynlyng na qawng-a lengky saite Säthaw ma Känipre mang üng ätüng hai-a, “Hini lä Kai ma bälung aevaw saite Kai üng Cäpaw vi. Äni lä kai tea anghawtho hai te vi” näkha thui te kätü-a kai ce lä awng ö te vi dy. 18Kai ma ce khekhe lä cai saite me anghung qawng-a, Khrista hai mangtä awng te kätü-a, Käni khösang mang üng tho saite ätüng thai ö te vi dy.
19Tukha kai ce lä buisaw na ma thui pyng saite lo tea ae-y ö rae te vi. Nang ce lä buisaw na üng lo na tea tängai hethang aeteng khaw ö te vi. Ätephüng-a mei nädylä, buisaw na ma thui saite lo na lä käving thung-a maibung kätyng aevang te phüng-a vi. Honi kaevang lä khö aevang kha Khrista lä kädang Tengpaw kaevang kätyng nang ce üng bälung thung-a säde te khytä aevang vi ai. 20Aely lengky te lä, Caekäcai thung-a awng saite buisaw na üng lo lä ämi lawngtä ma la äma üng kaedawng hai thui mäcai haw y lyng näte nang ce lä mäny ö hethang kae. 21Ämi buisaw la äma üng aely kängai kätyng thui te y. Honi jüng-a Muilaw Käcai ma äni ce tea pyng kha Säthaw üng thui hai hethang ngai saite lo na tea äni ce lä thui ö te vi dy.
2Käjüng sa saite särae na
1Jangni-a buisaw käjüng aesa kha thui saite na lä Säthaw üng khimi na thung-a awng ö by vi. Honi kätyng nang ce thung-a käjüng sa kha mätu saite särae na awng ö vi ai. Äni ce lä khimi ce üng yng saite na tea täphra hethang kangru-a sa tämang saite na mätu ö vi ai. Hini särae na lä äma ce bung hunghö üng aelawi hai saite Areng tea mäteng ma aephae ö vi ai. Äni ce tea la Säthaw ma täphra phraw pa ö vi ai 2Säthaw üng khimi awng mang saite na lä äma ce üng saerae hethang hawi saite lang-a hui ö ai. Tukha yng y saite khimi kälang na lä älang kätüng phüng tea käsi na thui ö vi ai. 3Hini särae na lä ae-aw te bälung awng ö vi ai. Äni ce lä äma ce sa saite cäkae na thui te hai-a nang ce te üng tangkae dang hethang aethawsa ö ai. Jangni-a ma Säthaw lä äni ce tea tärae cei hethang sa rüng pa te vi dy. Säthaw lä äni ce tea täphra hethang aering vi ai.
4Tukätephüng-a jangni-a Känipre üng angtawtha phütä na ma hunghö sa te kätü-a, Säthaw lä äni ce tea dengpy te vi. Säthaw lä äni ce bung ving saite angqaw khaw käthu-a kädephae kha pä-ung pa ö vi dy. Äni lä äni ma tärae cei te käni tyng te khytä äni ce bung honi thawng käving thung-a pä-ung ö vi ai. 5Jangni-a Säthaw lä äma üng lo tängai y saite khimi na üng älawngpre tea täphra pa te vi dy. Säthaw ma äni ce tea lä tui cäqing hai täphra king pa te vi dy. Äni lä Novae hai äma engthung üng khimi lawng säritä xyngtä na tea aeqang pa kae vi dy. Novae lä khimi ce tea cüng saite phüng thui pa te vi. 6Säthaw lä Sodom hai Komorae märü tea dengpy kha honi märü känetä tea baiphö-a lawng te khytä maikang hai king pa te vi dy. Äni lä hikä sa te hai-a, äma tea mäthi y saite khimi na tea lä makä sa kha dengpy ai mei näte mätü te vi dy. 7Säthaw lä khimi käcüng Lawtae bung aeqang pa vi dy. Lawtae lä honi khimi ce ma Säthaw üng Ubädi tängai y kha lawng lawngtä täkübäjang sa te phüng-a, tengxyng y bälung hawi pa y vi dy. 8Honi khimi käcüng lä khimi käsi na thung-a awng kha äni ce üng pawprae saite lo na, hunghö sa saite na käni qütä thai kha nung te phüng-a bälung mätang phi pa vi dy. 9Säthaw lä äma üng lo tängai saite na üng bälung mätang bälai te thung üng aeqang hethang mäny jawjaw te vi. Äni lä älo tängai y saite khimi na bung kangkhüng üng tärae cei saite käni tyng te khytä dengpy jawjaw pa vi ai. 10Äma ce üng ngaiphi tüng y saite mang-a hui saite na hai Säthaw üng aenae tea mäthi y saite na tea Äni lä tengxyng y dengpy khaw vi ai.
Käjüng sa saite särae na lä ri y käla aethaw ö te vi. Äni ce lä Känipre üng phung-ang awng saite na tea mäteng ma mäthi y käla käsi thui vawng ö te vi. 11Känipre üng angtawtha na lä hini käjüng sa saite särae na qawng-a aethaw hai haidae awngky ö te vi. Tungaila äni ce mäteng ma, Känipre üng phung-ang awng saite na phüng Areng üng maw-a käsi thui hethang ri ö te vi. 12Tungaila hini khimi na lä äma ce mänykaw y saite na tea käsi thui ö te vi. Äni ce lä aedawng kaw y kha ngaiphi tüng y saite bälung xyngtä awng saite tawngbawi kärai na kätyng vi. Äni ce aepeng te lä khimi ce ma ne kha bädü ö hethang xyng kae. Hini särae na bung lä tawngbawi na kätyng Säthaw ma bädü ö by vi ai. 13Äni ce lä khimi kälang na tea mätang bälai hai te phüng-a, Säthaw ma äni ce tea mätang bälai hai haile tyng ö vi ai. Hini käjüng sa saite särae na lä käni-a mäteng ma äma ce üng ngaiphi tüng y saite lang mang-a hui kha anghawtho ö te vi. Äni ce lä nang ce hai mangtä nei ca te thüng-a, käjüng sa kha äma ce üng käsi lang mang-a hui ö te vi. Äni ce lä nang ce tea saerae hai kha pawprae hai ö te by vi. 14Äni ce lä nawngmädi na hai täkübäjang sa hethang xyng aedawng jawjaw ö te vi. Äni ce lä hunghö sa te tea manila mängae vai ö te y vi. Äni ce lä Khrista tea yng khi y saite khimi na tea hunghö mang-a bähawi pa ö te vi. Äni ce lä tengxyng y ae-aw tätang saite na lawng ö vi dy. Säthaw lä hini khimi ce tea täking te vi dy. 15Äni ce la kätüng sa saite lang mang-a hui ö y vi dy. Äni ce lä lolang tämang ö te kätyng vi. Äni ce lä Beor üng cäpaw Balam üng lolang mang-a hui ö te vi. Balam lä tangkae ngaiphi te phüng-a tämang saite sa te vi. 16Tungaila cäphö lä käsi sa saite Balam tea pring pa vi dy. Älo aepe haw y saite cäphö känawkhing käsa mäteng ma, khimi kätyng älo aepe kha bawlae kätyng sa saite buisaw tea mäkhang pa te vi dy.
17Hini käjüng sa saite särae na lä kang saite tui cäpring hai aeli ma mäsaeja saite tämai na kätyng vi. Tukätephüng-a Säthaw lä äni ce tähang ving phi saite mityng khai pa te vi dy. 18Äni ce lä aethaw kha aetütü saite lo na aepe ö te vi. Äni ce lä mimi na bung khaisö kha tänaetä Khrista tea yng saite khimi na tea ngaiphi tüng y saite bälung hai-a hunghö sa hethang the pa ö te vi. 19Äni ce lä hini khimi na tea Säthaw üng Ubädi tängai jawjaw y käla ma aelawi haw te vi näkha älo aedo ö te vi. Tungaila käjüng sa saite särae äma ce khekhe lä äma ce tea täphra saite aeme aeqa te na üng mawsawng tangnae-a lawng ö te vi dy. Ätephüng-a mei nädylä, khimi lawngtä lä äma tea pyng saite üng mawsawng tangnae lawng te vi. 20Äni ce lä mä-ai üng Aeqangkung Areng Isu Khrista bung mäny te hai-a, hini älawngpre üng täphra saite käsi üng aelawi pyng-a, äni ce üng hini käsi dawng-a aemang kha pyng pa haile vi dylä, angcü üng Khrista tea yng y te kälang üng kätü qawng-a siky ö vi ai. 21Äni ce lä älang käcüng tea mäny y dylä, hawiky te vi. Säthaw üng älang mäny pyng-a, äma üng äkähui na ma mätu saite caiping te särilo käcai khaisö haile vi dylä, äni ce lä tähang siky ö te vi. 22Äni ce sa saite lä hini pelo känetä ma lä tüng tätang vi näkha mätü te vi. Hini lä, “Ui lä bälo kha äma üng anglo tea ly haile kha ca tyng te vi.” Honi kätyng, “Tui bähu ping saite o lä, angqo thung-a ly kha aelo haile tyng te vi” näkha näte vi.
3Areng ly haile hethang käni
1Kai üng bälung aevaw te yng saite kangby jä-ai na ä, kai lä nang ce tea cae haetä tärü pyng-a, vaihi la äbaeni üng cae tärü te vi. Cae känetä-a thung-a, kai ma tärü te lä hini na nang ce üng aedawng haile te hai-a, käcai-a dawng hethang aethawsa ö te vi dy. 2Kai lä jangni-a Säthaw üng buisaw käcai na ma thui pyng saite lo na hai-a nang ce üng angtawtha na hai mä-ai üng Aeqangkung Areng Isu Khrista ma nang ce tea py saite särilo tea aedawng haile tyng hethang ngai hai te vi. 3Aely lengky saite lä, nang ce lä hini kangkhüng üng dungpa-a mänui hai saite khimi na lä tho ai näte mäny ö hethang kae. Äni ce lä äma ce üng ngaiphi tüng y saite na tea hui kha nang ce tea mänui hai ö vi ai. 4Äni ce ma, “Khrista lä ly haile tyng hethang älo aedo te y vi mei. Äni lä ma-a mei. Tungaila mä-ai üng kangsi kangjaw na lä dü pyng saite kätü üng hai aetawng kha Säthaw ma älawng sa te kätü üng hai ätete angxynlyng na lä hini kätyng awng jawjaw te vi rawng” näkha thui ö vi ai. 5Äni ce lä cangkhawng-a Säthaw üng särilo hai-a Käni hai älawng sa saite tea khaisö ö te vi. Säthaw lä tui hai-a tui thung üng älawng tea sa pa vi dy. 6Säthaw lä tui cäqing hai-a cangkhawng üng älawng tea lä täphra pa vi dy. 7Hini kätyng-a Säthaw lä vaihi awng saite älawng hai käni tea lä äma üng särilo hai-a mai hai täphra hethang khai pa te vi. Äni ce bung lä Säthaw ma äma tea yng y saite na bung tärae cei kha täphra hethang kätü khytä khai pa te vi.
8Tungaila kai üng bälung aevaw te yng saite kangby jä-ai na ä, nang ce lä hini haetä tea sa tämang ö hang. Säthaw lä känitä tea lä khösäning sangtä kätyng khösäning sangtä tea la känitä kätyng nung te vi. 9Areng lä äma üng älo aedo saite kätyng sa hethang kätü tea mänawng te vi näkha khimi phütä na lä dawng ö te vi. Honi jüng-a nang ce tea änawngsa kha ämi lawngtä bung la pra hai hethang ngai te y vi. Äni lä khimi qütä tea äma ce hunghö sa saite ae-ui hai hethang ngai te vi.
10Areng lä ämi lawngtä la aedawng y te kätü-a, theru kätyng ly haile vi ai. Honi käni-a khösang lä ätüng käleng hai laja kha khösang-a awng saite angxynlyng na tea lä maikang kha pra hai king vi ai. Älawng hai älawng qawng-a awng saite angxynlyng na lä la king ö vi ai. 11Hini kätyng ätete angxynlyng lä pra king vi ai te phüng-a, nang ce lä ätemakä sa kha awng hethang kae ö te mei. Nang ce üng hing saite angxynlyng lä cai kha Säthaw tea kawng hai hethang kae. 12Nang ce lä Khrista ly haile te käni tea aering kha honi käni tyng dawde hethang aethawsa ö. Honi käni-a Säthaw lä khösang tea mai hai täphra vi ai. Hini mai üng käbi hai-a khösang üng käni, law hai tengpaw na lä qawng ö vi ai. 13Tungaila Säthaw ma khimi käcüng na xyng awng hethang Känipre kangthae hai älawng kangthae sa ai näkha älo aedo saite tea mä-ai lä aering ö te vi.
14Tukätephüng-a, kai üng bälung aevaw te tea yng saite kangby jä-ai na ä, nang ce lä hini angxynlyng na tea aering ö te phüng-a, cy y hethang, cai hethang Säthaw hai awngneng hethang aethawsa ö. 15Mä-ai üng Areng üng änawngsa saite hai-a äni ma nang ce bung aeqang hethang älang kähawi py ai näte nang ce lä aedawng ö ba. Mä-ai üng bälung aevaw saite kangby jä-ai Pawlae lä Säthaw ma äni tea bälung kähae hai-a nang ce tea hini kätyng tärü pyng te by vi dy. 16Äni lä äma üng cae angxynlyng na thung-a hini na phüng tärü saite älawngsai lä mangtä kae. Tungaila äni üng cae na thung-a phütä lä mänykaw hethang rae bärai vi. Honi na mänykaw y kha yng te cakhi y saite na lä honi na tea kätüng y-a mätu ö te vi. Caekäcai thung üng phütä cae kälang äkädawng na tea lä hini kätyng sa ö te vi. Säthaw lä äni ce tea täphra ö vi ai.
17Tungaila kai üng bälung aevaw te yng saite kangby jä-ai na ä, nang ce lä hini phüng mäny pyng ö te vi dy. Aerü ö rüng lawi. Tudylä Säthaw üng Ubädi tängai y saite khimi na lä äni ce üng sa tämang te hai-a nang ce bung kätüng y saite mang-a the haw y lyng. Nang ce üng yng te cakhi saite na te üng nang ce bung lä aethuija hai haw ö y vi ai. 18Tudylä mä-ai üng Aeqangkung Areng Isu Khrista üng tähang kähawi tea mänykaw rae kha äni bung mäny rae hethang aethawsa ö. Areng tea phung-ang käleng lä vai üng hai dungtäsa awng jawjaw sy. Amen.