JOHAN
äbaeni üng tärü saite cae
Angcü üng älo
Angtawtha Johan üng äbaeni cae tärü te A.D. 90 khösäning lä angcü üng cae tärü te kätü hai matangtä aekhang te y. Hini cae lä “Khristen kangkawng üng mätawngky” te üng “Säthaw ma re saite nawngmädi käleng hai äma üng caw nade na” tea tärü saite cae vi. Hini lä kangkawng haetä hai äma qa kha yng saite na tea thui te daila awng ai. Hini cae kädawi lä lawng lawngtä tea bälung aevaw hethang mäci kha käjüng sa saite särae na hai äni ce üng mätu saite na tea sädi py pa te vi.
Äphüng äkädawiky
Angcü üng älo 1-3
Bälung aevaw saite lä aely lengky 4-6
Käjüng sa saite särae na tea sädi py saite 7-11
Kangkhüng üng cibai sa te lo 12-13
1Kawng te lo hai aetang saite
1-2Kai, Khristen Kangkawng üng mätawngky, lä Säthaw ma re saite nawngmädi käleng hai äma üng caw nade na, nang ce tea cae tärü te vi. Kai lä nang ce angxynlyng na tea bälung aevaw tätang te vi. Kai ma qaitä nang ce tea bälung aevaw te cang y, lo mitang tea mäny saite khimi angxynlyng na ma la nang ce tea lä bälung aevaw ö te by. Ätephüng-a mei nädylä lo mitang lä mä-ai thung-a awng kha mä-ai hai mangtä dungtäsa awng jawjaw ö ai te phüng-a vi.
3Mä-ai üng Pä-ai Säthaw hai Äcäpaw Isu Khrista lä mä-ai tea tähang kähawi hai, bäheng saite hai awngneng saite py sy. Tudylä mä-ai lä älo mitang khaw tea mäny kha lawng lawngtä bälung aevaw dylä honi na lä mä-ai hai mangtä awng jawjaw ai.
Älo mitang hai bälung aevaw saite
4Mä-ai üng Pä-ai Säthaw ma Ubädi py te kätyng nang üng caw nade phütä na lä lo mitang kätyng hing saite tea kai lä thai te phüng-a, tengxyng y anghawtho te vi. 5Tukätephüng-a bälung aevaw saite nawngmädi ä, mä-ai lä lawng lawngtä tea bälung aevaw hethang kai lä nang tea mäci te vi. Kai lä nang ce tea Ubädi kangthae tärü te y lyng. Hini lä angcü üng hai ma mä-ai tea awng pyng saite Ubädi kae. 6Bälung aevaw näsaite hini lä Säthaw üng Ubädi na tea mä-ai lä tängai ea hing hethang kae. Angcü üng hai nang ce thai ö pyng saite äni üng Ubädi kätyng: nang ce angxynlyng lä bälung aevaw saite thung-a hing ö hethang kae.
7Kaeling kaemae sa te awng mang saite na lä hini älawngpre mityng qütä-a tyng ö vi dy. Isu Khrista lä khimi-a aelawng kha hini älawngpre-a tyng saite tea äni ce lä aephae ö te vi. Honi kätyng thui saite khimi lä kaeling kaemae thui kha Khrista üng täre Kälengky-a aelawng te vi. 8Tukätephüng-a hini khimi ma nang ce tea älang tämang saite mang-a bähawi haw y rung khytä nang ce lä sädi khai ö. Hokä ea ni nang ce1:8 Cäekäcai täpyng saite phütä na-a lä “nang ce” jüng-a “mä-ai” näkha tawng ö te vi. üng aethawsa saite na lä aetütü-a lawng y käla Säthaw üng py saite cungrü te ävang nang ce lä dang ö ai.
9Khimi lawngtä Khrista üng mätu saite kätyng awng y käla, äma üng kaedawng na kätyng sa dylä, Säthaw hai bungtä awng haw te y vi. Khrista ma mätu saite tea yng khü dylä mä-ai üng Pä-ai Säthaw ni Äcäpaw hai bungtä awng te vi. 10Khimi lawngtä lä Khrista üng mätu saite kätyng y käla kälang mätu lae saite na hai nang ce tea tyng dylä honi khimi bung lä nang ce üng ing-a mäkung hang. Äni bung la yng saite äpy kätyng lady hang ba. 11Khimi lawngtä ma honi khimi bung lady dylä äni üng käsi sa saite thung-a ingkung la qa te by kae vi.
Kangkhüng üng älo
12Kai lä nang ce tea cae awng mang-a tärü hethang ngai ea la, hini caerang thung-a tärü saite caetui hai tärü hethang ngai te y. Honi jüng-a nang ce tea kai lä aeting khe kha lawng lawngtä bälung aevaw te hai aekheng ea aethaw py te lo na aethui haw ai näte lä kai üng aethang khai saite vi. Hokä dylä nang ce lä tengxyng y anghawtho ö vi ai.
13Säthaw ma re saite nang ticaw üng nade na ma la nang ce tea kawng bärai sa te lo thui ö te by vi.