KORIN
kangkawng tea äbaeni üng Pawlae tärü saite cae
Angcü üng älo
Hini cae lä Pawlae ma Korin märü-a awng saite kangkawng tähang angcü üng cae tärü pyng te qae y tea ma tärü saite cae vi. Angcü tärü te cae lä A.D. 55 khösäning angcü-a tärü kha äbaeni cae tea lä honi khösäning byng aetawng-a tärü te daila awng ai. Pawlae lä kangkawng tähang angcü üng cae tärü tea kangkawng aetäphü te phüng hai käjüng sa saite särae na phüng tärü te vi. Honi xhuxa saite lä äbaeni cae tärü te kätü-a la, Korin kangkawng thung-a byng te y vi rawng. Käjüng sa saite särae na ma Pawlae lä angtawtha tätang lawng te y näkha kangkawng-a mätu pa ö te vi. Pawlae lä Isu ma re saite angtawtha lawng hawlai netä na thung-a qa te y ngaila, angtawtha tätang vi näte hini cae thung-a mätü te vi. Hini cae thung-a lä äma üng bälung kaedawng saite phüng tea tärüky te vi. Hini lä tärü saite cae kälang thung-a qa te y vi. Äni lä Angthang Kähawi thui te thung-a aeting saite äphüng tea tärü king te vi. Äni üng Säthaw kälu sa te mawlang kaedawng na hai kangkawng tea matangtä bälung aevaw mei näte phüng tärü te vi.
Äphüng äkädawiky
Angcü üng älo 1:1-11
Pawlae hai Korin märü-a awng saite kangkawng 1:12-7:16
Judae khö-a awng saite Khristen kangtang na tähang säbawng saite tangkae 8:1-9:15
Angtawtha tätang lawngtä kätyng-a äma tea älang kähawi awng te phüng Pawlae üng mäthang saite 10:1-13:10
Kangkhüng üng cibai sa saite lo 13:11-14
11Hini cae lä kai, Pawlae hai mä-ai üng kangby Timothe te üng tha te vi. Säthaw lä äma üng aely kängai hai-a, kai bung Khrista Isu üng angtawtha lawng hethang re vi dy.
Kai lä Korin märü-a awng saite Säthaw üng kangkawng hai Käri pre-a awng saite Säthaw üng khimi käcai angxynlyng na tea hini cae tärü te vi.
2Mä-ai üng pä-ai Säthaw hai Areng Isu Khrista ma tähang kähawi hai awneng saite lä nang ce tea py sy.
Säthaw tea Pawlae ma bälaw saite
3Mä-ai üng Areng Isu Khrista üng Pä-ai Säthaw tea mä-ai lä bälaw ö si. Äni lä khimi angxynlyng na tea bäheng saite Pä-ai vi. Äni lä khimi ce tea säbawng khaw saite Säthaw vi. 4Äni lä mä-ai üng mätang bälai saite angxynlyng na thung-a mä-ai tea säbawng te vi. Tukätephüng-a mä-ai la mätang bälai saite na khimi ce aeting te kätü-a, äni ce tea säbawng haw ö te vi. Säthaw lä mä-ai tea säbawng te kätyng mä-ai la äni ce tea säbawng haw ö te by vi. 5Mä-ai lä Khrista üng mätang bälai saite cawngkhang thung-a qa te kätyng Khrista hai-a Säthaw üng säbawng saite cawngkhang thung-a la qa ö by te vi. 6Mä-ai mätang bälai saite na aeting dylä, nang ce üng säbawng saite hai aeqang saite tähang vi. Säthaw ma mä-ai tea säbawng dylä, mä-ai lä äni hai-a nang ce tea la säbawng haw te by vi. Mätang bälai saite tea änawngsa te hai-a khung haw hethang Säthaw lä nang ce tea aethaw py te vi. Nang ce lä mä-ai khung haw te mätang bälai saite tea khung haw ö te vi. 7Nang ce tähang mä-ai üng aethang khai saite lä cakhi ö te vi. Ätephüng-a mei nädylä nang ce lä kai ce üng mätang bälai aeting te kätyng, Säthaw lä kai ce tea säbawng te kätyng, nang ce tea la säbawng te by vi näte mäny ö te vi.
8Kängby jä-ai na ä, Asia pre cäpi-a kai ce aeting saite, mätang bälai saite na phüng kai ce lä nang ce tea mäny hai hethang ngai ö te vi. Kai ce aeting saite müngkäli na lä kai ce üng bälung na tea tibutica hai te vi dy. Kai ce lä dü tätang khaw ai näkha dawng ö te vi dy. 9Tätang khaw, kai ce lä bädü khaw hethang dy näkha dawng ö te vi dy. Tungaila kai ce lä mä-ai ma tea ae-y ö y hethang hini lä tyng te vi dy. Dü saite na bung mäning haile tyng pa saite Säthaw tea xyng ae-y hethang ni awng te kae. 10Säthaw lä kai ce bung ri hethang hawi saite kädü thung üng käthoja te vi dy. Äni lä kai ce bung aeqang haile tyng ai näte mä-ai aethang khai ö te vi. Äni lä kai ce bung aeqang jawjaw tyng be vi ai. 11Nang ce lä kai ce tähang aetang te hai-a säbawng ö te vi. Tukätephüng-a Säthaw lä khimi awng mang te na üng aetang saite na tea thai kha kai ce tea tähang kähawi py ai. Tukha khimi awng mang saite na lä Säthaw tea kawng te lo thui ö ai.
Pawlae lä äma üng khölawng tea käsüja saite
12Kai ce lä hini phüng aethaw ö te vi. Hini älawngpre-a Säthaw ma py saite käcai hai tüng saite na kai ce lä awng näte kai ma ce üng käsi kähawi sa saite bälung ma thui te vi dy. Nang ce hai mangtä awng khaw te thüng-a ämi lawngtä ma la cy haw y hethang kai ce lä sädi khai ö te vi. Tungaila kai ce lä hini tea khimi ce üng bälunghae saite hai-a sa ö te y. Säthaw üng tähang kähawi hai-a sa ö te vi dy. 13-14Kai ce lä nang ce ma thaikaw kha phai haw saite qaitä nang ce tea tärü khaw te vi dy. Vaihi nang ce lä angxynlyng na tea thaikaw y ngaila, känitä-a lä kai ce üng angxynlyng na tea nang ce lä thaikaw ai näte kai ce lä aethang khai ö te vi. Tupyng-a mä-ai üng Areng Isu Khrista ly haile te kätü-a, nang ce phüng-a kai ce lä aethaw haw te kätyng kai ce phüng-a nang ce la aethaw ö haw ai.
15Kai lä hini phüng na tea ae-y khü te phüng-a, qengnetä nang ce tea ly hethang aedawng rüng te vi dy. Hini kätyng ly te phüng-a, Säthaw lä nang ce tea qengnetä tähang kähawi py rae vi ai. 16Kai lä Makedonia khö-a ly te thüng-a qengtä, nang ce tea kung hethang aedawng rüng te vi dy. Honi pyng-a Makedonia khö üng vawi haile te kätü-a, äbaeni qengtä kung kha nang ce lä kai ce bung Judae khö-a ly hethang säbawng haw ai näkha kai lä aedawng te vi dy. 17Kai lä hini kätyng sa hethang mawlang kaedawng awng te kätü-a, kai lä kähawi-a dawng y te vi mei. Kai lä älawngpre üng khimi na kätyng mawlang kaedawng awng kha qengtä ma “Älawng vi” “Älawng y vi” näkha kai thui vi näte nang ce lä dawng ö vi mei. 18Säthaw lä älo mitang aepe te kätyng kai lä nang ce tea älo aedo te kätü-a, “Älawng vi” “Älawng y vi” näkha qengtä kätü-a ma thui te y. 19Saila, Timothe hai kai ma khekhe lä nang ce tea Säthaw üng Cäpaw Isu Khrista üng Angthang thui te vi dy. Säthaw üng Cäpaw Isu Khrista lä, “Älawng vi” “Älawng y” näkha qengtä-a ma thui te y. Säthaw lä äni hai-a “Älawng vi” näkha thui jawjaw te vi. 20Säthaw ma mä-ai tea py te älo aedo saite angxynlyng na lä Khrista hai-a, “Älawng vi” näkha thui te vi dy. Tukätephüng-a mä-ai lä Säthaw üng phung-ang aesang hethang “Amen” näkha thui te kätü-a, mä-ai üng Areng Isu Khrista hai-a thui ö te vi. 21Säthaw äma khekhe lä kai ce hai nang ce tea Khrista-a bungtä lawng hai mei kha yng te cakhi hai hethang sa pa vi dy. Äni ma mä-ai bung lä re kha khai lyng pa te vi dy. 22Tukha mä-ai lä Säthaw hai aesui vi näte mätü hethang äni lä mä-ai üng bälung thung-a Muilaw Käcai py kha mä-ai tea äsäny sa pa vi dy. Hini aedo saite lo lä khawngdüng-a Säthaw ma mä-ai tea py khaw hethang awng saite tähang kähawi na vi.
23Kai üng lo mitang hai thui saite tea mäny kha Säthaw lä kai üng sasi vi dy. Kai lä nang ce tea bälung aethawsi hai hethang ngai y te phüng-a, Korin märü-a aekö haile y vi ai dy. 24Kai ce lä nang ce tea ätemakä yng hethang särilo hai thui hethang ngai te y. Kai ce lä nang ce anghawtho hethang nang ce hai mangtä kälu sa ö te vi. Ätephüng-a mei nädylä nang ce lä yng saite hai-a ca khi te vi näte kai ce lä mäny ö te vi.
21Tukätephüng-a kai üng bälung thung-a lä nang ce tea ly haile tyng y hethang aedawng te vi. Tudylä kai lä nang ce tea bälungsi hai y vi ai. 2Kai ma nang ce tea bälungsi hai dylä, ämi ma kai tea anghawtho hai ai mei. Kai ma bälungsi hai saite khimi na lä kai tea anghawtho hai haw y lyng. 3Tukätephüng-a kai lä nang ce tea honi cae tärü te vi dy. Nang ce tea kai tyng te kätü-a, kai tea bälungsi hai hethang kai lä ngai te y. Nang ce lä kai tea anghawtho hai hethang kae. Kai anghawtho dylä, nang ce angxynlyng la anghawtho ö by ai näte kai lä bälung ae-y khü te vi. 4Jangni üng cae tärü te kätü-a, kai lä bälungbi, bälung mawng kha minaw tui na rui te vi dy. Kai üng mawlang kaedawng lä nang ce tea bälungsi hai hethang y. Tungaila kai lä nang ce tea makätangtä bälung aevaw mei näte tea mäny hai hethang ngai te vi.
Hunghö sa te khimi tea hunghö bälawi saite
5Hunghö sa saite khimi ma khimi ce tea bälungsi hai vi dylä, äni lä kai tea ma qaitä sa te y lyng. Äni lä nang ce angxynlyng tea kai qawng-a cang y bälungsi haiky-a sa te vi dy. Kai lä honi phüng tea awng mang-a thui hethang ngai te y. 6Nang ce thung üng khimi awng mang saite na lä hunghö sa saite lawngtä tea bäjeng rüng pyng te vi dy. Hini bäjeng saite lä äni tähang aeteng khaw te vi. 7Tungaila vaihi lä äni tea hunghö bälawi kha aethaw py hethang kätü vi. Nang ce ma hini kätyng sa ö y dylä, äni lä bälungsi xüng kha aethawsi ea äma üng yng saite tea khaisö vi ai. 8Tukätephüng-a nang ce lä äni tea bälung aevaw tätang vi näte phüng vaihi äni tea mätü hethang kai lä nang ce tea mäci te vi. 9Kai lä cae tärü te kätü-a, nang ce tea käny hethang ngai te vi dy. Kai üng täru saite lo na nang ce lä tängai king mei näte kai lä mäny hethang ngai te vi dy. 10Nang ce ma khimi ce üng hunghö na bälawi dylä, kai la äni ce tea bälawi te by vi. Hunghö bälawi hethang awng dylä, Khrista maw-a nang ce üng phüng-a kai lä hunghö bälawi pyng te vi dy. 11Setan angra ma mä-ai tea bäja haw y hethang kai ce lä hini kätyng sa hethang kae ö te vi. Mä-ai lä Setan angra üng käsi mawlang kaedawng tea mäny te vi.
Troas märü-a Pawlae üng bälung mawng saite na
12Kai lä Troa märü-a Khrista üng Angthang Kähawi thui hethang tyng te kätü-a, Areng lä ho-a kälu sa hethang älang sa rüng pa vi dy. 13Tungaila kai üng kängby jä-ai Tita bung aeting y te phüng-a, kai lä tengxyng y bälung mawng phi te vi dy. Tukätephüng-a kai lä honi Troas märü-a awng saite khimi na tea cibai sa te lo thui pyng-a lä Makedonia khö-a ly ja te vi dy.
Khrista hai-a bäja saite
14Mä-ai üng Säthaw tea mä-ai bälaw ö si. Säthaw lä mä-ai bung Khrista üng bäja saite pawi-a qa hai jawjaw hethang phüng-a vi. Mä-ai ly saite mityng qütä-a, Säthaw lä Khrista üng Angthang Kähawi thui hai jawjaw te vi. Honi lä ämui kähawi kätyng lawng hai hethang vi. 15Mä-ai lä Säthaw tähang Khrista üng löci mui kähawi kätyng vi. Mä-ai lä Säthaw ma aeqang saite khimi na hai dengpy saite khimi na thung-a aehö saite ämui kätyng vi. 16Tungaila Säthaw ma dengpy hethang awng saite khimi na tähang, mä-ai lä kädü üng tho saite ämui kärawng kätyng vi. Säthaw ma aeqang saite khimi na tähang, mä-ai lä hing saite üng ämui kähawi na vi. Tätang khaw-a thui hethang nädylä, ämi lawngtä la äma ma hai-a hini kälu tea lä sa haw y lyng. 17Khimi awng mang saite na lä ävang dang hai hethang Säthaw üng lo thui ö te vi. Mä-ai lä hini khimi ce kätyng y. Säthaw ma mä-ai bung mätaw te phüng-a, mä-ai lä Säthaw üng maw-a bälung mitang khaw hai Khrista üng Angthang thui ö te vi.
3Kähing py saite älo aenai te kangthae
1Nang ce üng maw-a kai ce lä aethaw ö te käthi vi mei. Hokä y dylä kai ce lä khimi phütä na kätyng, lady hai saite cae lä nang ce tähang aely ngai ö te vi mei. Hokä y dylä nang ce ma tärü saite cae tea kai ce lä aely ngai ö te vi mei. 2Nang ma ce khekhe lä mä-ai üng bälung thung-a tärü saite cae kätyng vi. Khimi qütä ma hini cae tea lä phai kha mäny haw te vi. 3Khrista khekhe ma hini cae tea tärü kha kai ce hai-a tha te vi. Hini cae lä caetui hai tärü te y. Hing saite Säthaw üng Muilaw Käcai hai tärü te vi. Honi lä kälung phei na qawng-a tärü te y. Khimi ce üng bälung thung-a tärü te vi.
4Kai ce lä Khrista hai-a Säthaw tea ae-y khü te phüng-a, hini lä thui ö te vi. 5Kai ce lä hini kälu tea kai ma ce ma sa haw vi näkha thui ö haw te y. Säthaw ma kai ce tea hini kälu sa hethang sakaw saite py vi dy. 6Säthaw äma khekhe lä kai ce tea älo aenai saite kangthae üng mawsawng lawng hethang sakaw saite py vi dy. Honi älo aenai saite lä tärü saite ubädi hai aetawng te y. Honi lä Muilaw Käcai üng aenai saite lo vi. Tärü saite Ubädi lä mä-ai bung dü saite mang-a tha kha Muilaw Käcai lä mä-ai tea kähing py te vi.
7Säthaw ma Mosi tea kälung phei qawng-a tärü saite Ubädi py te kätü-a, Säthaw üng phung-ang lä aetüng te vi dy. Mosi üng mimai qawng-a Säthaw üng phung-ang lä kangjai-a la ngaila, Isrelae khimi na lä Mosi üng mimai tea kheng haw ö te y vi dy. Mä-ai bung dü saite mang-a tha te Ubädi lä phung-ang käleng hai tyng te vi dy. 8Muilaw Käcai üng kälu lä Ubädi tyng te qawng-a cang y phung-ang aesangky tätang khaw ai. 9Ubädi hai-a Säthaw lä khimi ce tea dengpy te vi. Tungaila Ubädi lä phung-ang hai tyng te vi dy. Älo aenai saite kangthae hai-a Säthaw lä mä-ai bung khimi käcüng-a mäthi te vi. Älo aenai saite kangthae lä ubädi qawng-a tengxyng y phung-ang lengky te vi dy. 10Älo aenai saite kangthae üng phung-ang lä tengxyng y leng te phüng-a, älo aenai saite kangrüng üng phung-ang lä aemai vi dy. 11Tänaetä khai saite älo aenai te kangrüng lä phung-ang awng vi dylä, dungtäsa awng saite älo aenai te kangthae lä phung-ang tengxyng y aesangky vi dy.
12Mä-ai lä älo aenai saite kangthae lä awng jawjaw ai näkha aethang khai te phüng-a, thui vawng ö te vi. 13Mosi üng mimai-a phung-ang aemai saite Isrelae khimi na nung y hethang äni lä äma üng mimai tea känih hai täphung te vi dy. Mä-ai lä hini kätyng y. 14Säthaw lä Isrelae khimi na üng bälung na tea tangkö hai pa te vi dy. Tukätephüng-a, äni ce lä vaihi khytä, aenai saite älo kangrüng üng ubädi phai te kätü-a, khimi ce üng bälung lä känih haetä hai khu te kätyng awng vi. Khimi lawngtä Khrista tea yng dylä, Khrista ma honi känih tea mäthuija pa te vi. 15Vaihi khytä Isrelae khimi na lä Mosi üng ubädi phai te kätü-a, äni ce üng bälung na lä hini känih hai khu saite kätyng vi. 16Tungaila khimi lawngtä Areng tea yng te kätü-a, Areng lä hini känih tea mäthuija pa te vi. 17Areng lä Muilaw vi. Areng üng Muilaw Käcai awng saite mityng qütä-a, äni lä khimi ce bung bälawi pa te vi. 18Tukätephüng-a mimai tea täphung y saite mä-ai angxynlyng na lä Areng üng phung-ang tea nung kha khimi kälang na tea mätü ö te vi. Muilaw awng saite Areng üng phung-ang lä mä-ai bung mäqa ea Areng hai mangtä aetawng khaw hethang sa kha mä-ai üng phung-ang lä lengky rae lengky rae jawjaw te vi.
4Sätüng thung-a khai saite sui tangkae na
1Säthaw üng bäheng saite hai-a äni ma kai ce tea hini kälu sa hai hethang py vi dy te phüng-a, kai ce lä aethawdi ö te y vi. 2Kai ce lä saerae hethang hai ho hethang hawi khaw saite kälu angxynlyng na tea khaisö ö vi dy. Kai ce lä ämi tea la kaeling sa te y kha Säthaw üng älo lä aemäqa te y vi. Kai ce lä lo mitang tea thui phrang ö te vi. Hini kätyng Säthaw üng maw-a cüng vi näte khimi angxynlyng na üng bälung thung-a mäny haw ö te vi. 3Kai ce thui saite Angthang Kähawi tea ho dylä, Säthaw ma täphra saite na tähang ho te vi. 4Hini älawngpre tea pyng saite Setan lä yng y saite khimi na üng bälung kaedawng na tea ving hai pa te vi. Tukätephüng-a äni ce lä Khrista phüng Angthang Kähawi üng phung-ang aesang saite kaevang tea nung haw ö y. Khrista lä Säthaw hai aetawng khaw te vi. 5Kai ce lä kai ma ce üng phüng na tea thui ö te y. Kai ce lä “Isu Khrista lä khimi angxynlyng na üng Areng vi näte hai kai ce lä Isu hai-a nang ce üng mawsawng na lawng ö vi” näte thui ö te vi. 6Säthaw ma, “Käving thung-a kaevang awng sy” näkha thui vi dy. Hini Säthaw lä mä-ai üng bälung na thung-a la äni üng kaevang aevang hai te vi dy. Tukätephüng-a Isu Khrista üng mimai-a mä-ai lä Säthaw üng phung-ang tea nung kha mäny haw ö te vi.
7Kai ce lä sui tangkae awng saite sätüng na kätyng vi. Hini hai-a kai ce lä äte angxynlyng na qawng-a lengky saite haidae lä Säthaw hai aesui te vi näte mätü te vi. Hini lä kai ce hai aesui te y. 8Kai ce lä mätang bälai saite cawngkhang aeting ngaila, kai ce üng bälung lä tibutica ö y lyng. Kai ce lä sa hethang kae saite tea mäny y ngaila, aethawsi ö te y. 9Khimi ce ma kai ce tea sakälö khü ngaila, Säthaw lä kai ce bung khaisö ö y lyng. Khimi ce ma kai ce tea bo ngaila, kai ce lä dü ö te y vi rawng. 10Khimi ce ma Isu bung bädü te kätyng, kai ce la kätü qütä-a dü saite hai aenai ö te by vi. Hini kätyng khimi angxynlyng na lä kai ce hai-a Isu lä hing vi näte mäny haw ö te vi. 11Kai ce lä hing te thüng-a, Isu tähang dü saite tea aenai ö jawjaw te vi. Tukätephüng-a kai ce üng dü haw saite ätabung hai-a Khrista üng hing saite tea khimi ce lä nung haw ö te vi. 12Kai ce lä dü saite hai aeting ö jawjaw te vi. Tungaila nang ce lä dungtäsa kähing tea dang ö ai.
13Caekäcai thung-a, “Kai lä yng te phüng-a, thui te vi” näkha tärü te vi. Hini kätyng aetawng saite yng te hai kai ce lä Angthang Kähawi thui ö te vi. 14Areng Isu bung mäning haile tyng pa saite Säthaw ma Isu hai bungtä kai ce bung mäning haile tyng by ai näte kai ce lä mäny ö te vi. Äni lä nang ce hai kai ce bung äni üng maw-a ka vi ai. 15Hini angxynlyng na lä nang ce üng tähang vi. Säthaw üng tähang kähawi lä khimi awng mang rae, awng mang rae saite na tea tyng bawi te phüng-a, khimi ce lä Säthaw tea bälaw kha Säthaw üng phung-ang tea tengxyng y mäsang ö vi ai.
Yng te hai-a hing saite
16Tukätephüng-a mä-ai lä manila aethawdi vai ö y lyng. Mä-ai üng ätabung na lä dü hethang täretäre aenai rae ngaila, Muilaw Käcai ma mä-ai tea py te hing saite lä känitä pyng-a känitä lä aethaw awng hai rae ö te vi. 17Mä-ai lä tänaetä tähang aeting saite hini mätang bälai te lä jahaw vi. Hini kätyng aeting saite hai-a, Säthaw lä mä-ai tea lengky saite dungtäsa phung-ang py vi ai. 18Tukätephüng-a ämi hai nung haw saite na kheng y käla, mä-ai lä nung haw y saite na tea kheng khü ö te vi. Nung haw saite na lä tänaetä awng kha nung haw y saite na lä dungtäsa awng te vi.
5Mä-ai üng ätabung kangthae na
1Mä-ai ma üng hini ätabung lä tänaetä awng hethang taipung kätyng vi. Hini taipung aene te kätü-a, mä-ai lä khimi üng äkö hai sa y käla Säthaw ma mä-ai tähang sa pa saite Känipre dungtäsa ing-a awng haw vi ai näkha mäny ö te vi. 2Mä-ai lä hini taipung-a tänaetä awng te thüng-a, Känipre üng ing-a awng hethang aedawng kha anghawtho y te hai thui ö te vi. 3Säthaw ma mä-ai tea py saite ätabung dang te kätü-a, mä-ai lä ätabung qa y käla awng ö vi ai. 4Mä-ai lä mä-ai ma üng aene saite taipung kätyng ätabung awng ö te vi. Mä-ai lä mätang bälai aeting te phüng-a, hang ö sung te vi. Hini kätyng hang sung saite lä hini älawngpre hai aesui saite mä-ai üng ätabung tea khaisö hethang ngai ö te phüng-a y vi. Kai ce lä dü haw saite mä-ai üng ätabung tea Säthaw ma py te dü y saite ätabung kangthae hai aeleng hethang ngai ö te phüng-a vi. 5Hini kätyng mäqa hethang Säthaw lä mä-ai tea sa rüng te vi dy. Vaimaw mang-a mä-ai lä hawi saite na dang hethang Säthaw ma Muilaw Käcai bung py te hai-a aedo khü te vi dy.
6Tukätephüng-a mä-ai lä Säthaw tea bälung ae-y khü jawjaw haw ö te vi. Hini älawngpre hai aesui saite ätabung-a mä-ai lä hing te jungtä, Areng üng ing hai hanglaw vi näte mäny ö te vi. 7Kai ce lä nung saite na hai-a hing te y lyng. Kai ce lä yng saite hai-a hing ö te vi. 8Kai ce lä Areng tea bälung ae-y khü ö te vi. Mä-ai lä älawngpre hai aesui saite ätabung üng hai kähanglaw-a awng kha Areng hai mangtä awng hethang ngaiky te vi. 9Tungaila mä-ai lä hini älawngpre üng ätabung-a la awng haw te läsy, y dylä Areng üng ing-a la awng haw te läsy, aely lengky te lä Areng tea kawng hai hethang mä-ai lä ngaiky ö te vi. 10Mä-ai angxynlyng lä Khrista ma tärae cei hethang äni üng maw-a aedaw ö hethang kae. Hini älawngpre-a mä-ai lä awng te thüng-a, mä-ai sa saite aeteng khaw te ävang na, y dylä Säthaw lä mä-ai tea dengpy vi ai.
Kai ce lä Säthaw üng angtawtha na vi.
11Mä-ai lä Areng tea tämö khai kha ri hethang kae te mäny te phüng-a, Angthang Kähawi tea yng hethang khimi ce tea mäci ö te vi. Säthaw lä mä-ai tea mäny king te vi. Nang ce üng bälung thung-a kai üng phüng la mäny ö phi by näkha kai lä aethang khai te vi. 12Kai ce lä mä-ai ma üng hawi saite na phüng nang ce tea thui haile hethang aely ngai te y. Kai ce lä nang ce tea kai ma ce üng phüng aethaw hai haw hethang ngai ö te vi. Khimi kälang na lä khimi ce nung haw saite hai aethaw ngaila, äni ce lä Säthaw maw-a cüng saite phüng tea dawng ö te y vi. Nang ce ma kai ce üng phüng aethaw haw dylä, nang ce lä honi khimi ce tea mäthang haw ö ai. 13Kai ce lä kangthö lawng dylä, Säthaw tähang mäthö ö te vi. Hokä y käla, khimi kangthö y dylä, nang ce tähang kae vi. 14Khrista lä khimi qütä tähang dü pa te phüng-a, khimi angxynlyng na lä äni hai mangtä dü vi dy näte mä-ai lä mäny ö khü te vi dy. Tukätephüng-a mä-ai tea lä Khrista üng bälung aevaw saite ma pyng te vi. 15Khrista lä khimi angxynlyng na tähang dü pa te vi dy. Tukätephüng-a hing saite kangthae dang te khimi angxynlyng na lä äma ce üng tähang hing hethang kae te y vi dy. Äni ce tähang dü pa saite hai Säthaw ma mäning haile tyng saite Areng üng tähang, hing pa hethang lä aeteng khaw ö te vi.
16Tukätephüng-a mä-ai lä vaihi üng hai aetawng kha ämi lawngtä tea la älawngpre üng khimi na üng kaedawng kätyng dawng ö te y vi. Jangni-a kai ce lä Khrista üng phüng tea älawngpre khimi na üng kaedawng kätyng aedawng ngaila, vaihi lä hini kätyng dawng ö te y vi dy. 17Khrista hai bungtä awng saite khimi qütä lä, khimi kangthae-a lawng vi dy. Älang kangrüng kätyng hing saite na lä aemai king vi dy. Älang kälang kangthae-a hing saite lä tyng te vi dy. 18Hini angxynlyng na tea lä Säthaw ma sa te vi dy. Mä-ai lä Khrista hai-a Säthaw üng täre na lawng saite üng hai äni üng kängby jä-ai na-a lawng ö vi dy. Tudylä äni ma mä-ai tea lä khimi kälang na bung la Säthaw üng kängby jä-ai na lawng hai by hethang kälu py te vi dy. 19Khrista hai-a hini älawngpre üng khimi angxynlyng na tea äma üng täre na üng hai äma üng rawijae na-a lawng hethang Säthaw ma mäqa te phüng kai ce lä thui ö te vi. Säthaw lä khimi ce üng hunghö na tea dawng te y vi dy. Hini phüng tea mä-ai lä thui hethang kae.
20Tukätephüng-a mä-ai lä Khrista üng angtawtha na lawng ö vi dy. Säthaw lä kai ce hai-a nang ce tea mäci te vi. Kai ce ma Khrista tähang-a nang ce lä Säthaw üng täre na üng hai äma üng rawijae na-a lawng ö hethang Säthaw ma kai ce hai-a mäci te kätyng aebai te hai mäci ö te vi. 21Khrista lä manila äte hunghö sa vai te y vi. Tungaila Säthaw lä mä-ai üng tähang-a äni tea lä hunghö awng te kätyng mäthi te vi dy. Tukätephüng-a mä-ai lä Khrista hai bungtä awng ö dylä, Säthaw ma mä-ai tea lä khimi käcüng-a mäthi vi ai.
6Säthaw üng mawsawng na mätang bälai saite
1Kai ce lä nang ce hai Säthaw üng kälu mangtä sa saite kängby jä-ai na lawng te phüng-a, nang ce tea mäci he ngai ö te vi. Säthaw ma nang ce angxynlyng tea tähang kähawi py vi dy. Tukätephüng-a Säthaw üng tähang kähawi tea aetütü-a lawng hai hethang lä sa ö hang. 2Jangni-a Säthaw ma thui te lä,
“Kai ma khai khü saite kätü tyng tea,
nang ce mäkai saite na tea kai lä thai te vi dy.
Kai lä nang ce bung aeqang hethang tyng te kätü-a,
nang ce tea säbawng pyng te vi dy” näkha nä vi.
Tängai ö. Säthaw ma khai khü saite kätü lä vaihi dy. Äni ma nang ce bung aeqang hethang kätü la vaihi dy.
3Kai ce lä khimi ce ma hunghö sa kha Angthang Kähawi tea tängai y hethang äte la sa ö te y. Ätephüng-a mei nädylä kai ce tea Säthaw ma py saite kälu phüng khimi ce ma käsi thui hai hethang ngai ö te y vi. 4Kai ce lä Säthaw üng mawsawng na lawng vi näte älang cawngkhang hai-a mätü ö te vi. Kai ce lä mätang bälai saite, rae saite na, xhuxa saite na hai aeting te kätü-a, änawngsa kha khung ö te vi. 5Khimi ce lä kai ce tea bo kha thawng thung-a pä-ung ö vi dy. Kai ce lä aepuilung saite na aeting kha mäsae qa saite kälu na sa ö vi dy. Kai ce lä i haw y käla, ca haw y käla awng ö te vi dy. 6Kai ce lä bälung cai saite, mänykaw saite, änawngsa saite hai khimi ce tea säbawng saite bälung hai-a Säthaw üng mawsawng na näte mätü ö te vi dy. Muilaw Käcai lä kai ce üng äthung-a aeta kha kai ce üng tätang bälung aevaw saite hai la vi. 7Kai ce lä lo mitang thui kha Säthaw üng haidae hai-a kälu sa ö te vi dy. Cüng saite lä kai ce üng maiphaw maicae vi. Kai ce lä hini maiphaw maicae hai täre na tea aety kha mä-ai ma tea aedung ö te vi. 8Khimi ce lä kai ce tea bälaw kha kai ce üng phüng käsi thui saite, cy saite hai hawi saite na thui ö te vi. Äni ce lä kai ce tea kaeling kaemae sa saite na vi näkha dawng ngaila, kai ce lä lo mitang tea qaitä thui ö te vi. 9Kai ce tea khimi ce ma mäny hethang ngai y ngaila, khimi qütä lä kai ce bung mäny ö king te vi. Kai ce lä dü saite hai aenai ngaila, hing jawjaw ö te vi. Khimi ce ma kai ce tea sakälö khü ngaila, äni ce lä kai ce bung bädü haw ö te y vi. 10Kai ce lä bälungsi ngaila, anghawtho haw ö jawjaw te vi. Kai ce lä tangkae awng y ngaila, khimi awng mang saite na tea Säthaw üng tähang kähawi tha haw ö te vi. Kai ce lä äte haetä la awng ö y ngaila, Säthaw lä kai ce tea äte angxynlyng na py te vi dy.
11Korin märü üng kängby jä-ai na ä, kai ce lä nang ce tea thui tätang khaw pyng te vi dy. Kai ce lä nang ce tea bälung mäke hai aevaw kha lady ö bawi te vi. 12Kai ce lä nang ce tea bälung aevaw ö tätang te vi. Tungaila nang ce üng bälung aevaw saite lä kai ce tähang deqang vi dy. 13Kai lä äpä-ai ma äma üng caw nade na tea älo aepe te kätyng nang ce tea thui hethang ngai te vi. Kai ce lä nang ce tea bälung aevaw kha lady ö khaw te vi. Tukätephüng-a nang ce la kai ce tea bälung mäke hai aevaw kha lady ö jo.
Khrista tea mäny y saite khimi na hai kängby jä-ai sa ö hang
14Khrista tea mäny y saite khimi na hai kängby jä-ai aesa ö hang. Khimi käcüng na hai Säthaw üng lo tängai y saite khimi na lä kängby jä-ai aesa haw y. Kaevang hai käving lä mangtä awng haw y lyng. 15Khrista hai Setan lä bälung mangtä aedü haw y. Khrista tea yng saite khimi hai Khrista tea yng y saite khimi lä bälung mangtä aedü haw y lyng. 16Säthaw üng Ingkäcai hai Säthaw bung mäny y saite khimi na üng cäphaw saite mimi na lä aesui te y vi. Mä-ai lä hing saite Säthaw üng Ingkäcai vi. Säthaw ma,
“Kai lä kai ma üng khimi na
thung-a aeke kha awng ai.
Kai la äni ce üng Säthaw-a lawng kha
äni ce la kai üng khimi na-a lawng ö ai” näkha näte vi.
17Areng ma,
“Kai tea yng y saite khimi na
thung üng tho ö la.
Nang ce lä äni ce hai
kängby jä-ai sa ö hethang kae y.
Säthaw bung mäny y saite khimi na üng
pawprae saite na tea lä aehi ö.
Hini kätyng sa dylä,
kai lä nang ce bung lady ai.
18Kai lä nang ce üng Äpä-ai-a lawng ai.
Nang ce la kai üng cäpaw cänung na lawng ö ai” näkha
äte angxynlyng na sa haw saite Areng ma thui te vi dy.
71Kangby jä-ai na ä, Säthaw üng hini aedo saite na lä mä-ai tähang vi te phüng-a, mä-ai ma tea ätabung hai bälung üng ngaiphi tüng y saite angxynlyng na tea lä aemäcai pang ö si. Mä-ai lä Säthaw tea ri kha tämö khai saite hai-a käcai ping-a awng ö si.
Pawlae üng anghawtho saite
2Kai ce tea nang ce üng bälung aevaw kha lady ö. Kai ce lä ämi tea la sa tämang ö te y. Yng saite tämang hai ö te y. Kaeling kaemae la sa ö te y vi. 3Kai lä nang ce tea dengpy hethang ngai te phüng-a hikä thui te y. Kai ce lä nang ce hai mangtä dü te läsy, hing te läsy nang ce tea bälung aevaw phi te vi näte angcü mang-a thui rüng ö pyng te vi dy. 4Kai lä nang ce tea bälung ae-y phi kha nang ce phüng tengxyng y aethaw te vi. Mätang bälai saite aeting te kätü-a, nang ce ma kai ce tea aethaw py kha tengxyng y anghawtho te vi.
5Kai ce lä Makedonia khö-a tyng te kätü-a, aehae haw ö te y vi. Älang cawngkhang-a, kai ce lä mätang bälai saite na aeting ö te vi dy. Khimi ce hai aejaw aemang kha kai ce üng bälung thung-a lä ri ö te vi dy. 6Tungaila Säthaw lä bälung aethawsi saite na tea aethaw py pa te vi. Äni ma Tita tyng te hai-a kai ce tea aethaw py te vi dy. 7Kai ce lä Tita tyng te phüng-a qaitä anghawtho te y. Nang ce ma äni tea säbawng te phüng-a la anghawtho ö te by vi. Nang ce ma kai ce hai aeting hethang ngai phi vi näte phüng, kai ce üng mätang bälai saite phüng, nang ce lä bälungsi te hai kai ce tea säbawng hethang ngai ö te phüng, Tita ma thui pa te phüng-a, kai la tengxyng y anghawtho bärai te vi dy.
8Kai üng cae ma nang ce tea bälungsi hai ngaila, kai lä honi cae tärü saite phüng-a, bälung hawi y te awng y lyng. Tungaila hini cae lä nang ce tea bälungsi hai te phüng-a, kai lä tänaetä bälung hawi y vi dy. 9Vaihi kai lä anghawtho te vi. Nang ce lä bälungsi hai ö te phüng-a y lyng. Tungaila nang ce üng bälungsi saite hai-a, nang ce lä ae-ui ö te phüng-a vi dy. Säthaw lä nang ce üng bälungsi saite tawng kha nang ce tea hawi saite na-a mäqa pa te phüng-a, kai ce lä nang ce tea naw hai te y vi. 10Säthaw lä nang ce tea bälungsi hai vi te phüng-a, nang ce lä ae-ui kha bälung aemäqa ea ni Säthaw ma nang ce bung aeqang haw vi ai. Tukätephüng-a ämi lawngtä la bälung hawi y hethang awng y. Tungaila älawngpre hai aesui saite bälungsi te kädü lang mang-a tha pa te vi. 11Säthaw ma bälungsi saite hai-a nang ce üng bälung thung-a äte sa mei näte aedawng ö. Nang ce lä Säthaw tähang aethaw rae ö phi te vi. Nang ce lä hunghö sa saite thung-a qa y näte mätü hethang aethawsa ö te vi dy. Nang ce lä hunghö sa saite khimi na tea kädawtho ö te vi. Nang ce lä Säthaw tea ri ö te vi. Nang ce lä kai tea aeting haile hethang ngai ö phi te vi. Nang ce lä kai tea awng mang-a säbawng hethang ngai ö te vi. Nang ce lä hunghö sa saite khimi tea bäjeng ö hethang ngai te vi dy.7:11 Hini phüng lä 2:6 tä thung-a tärü vai te vi dy. Nang ce lä honi hunghö sa saite na thung-a qa y näte mätü ö king te vi dy.
12Tukätephüng-a kai ma nang ce tea hini cae tärü ngaila hunghö sa saite khimi qaitä tähang y, naw hai saite khimi tähang la y. Kai lä Säthaw üng maw-a nang ce lä kai ce tea matangtä bälung aevaw ö mei näte nang ce tea mäny hai hethang ngai te phüng-a, hini cae tärü te vi dy. 13Hini phüng-a, kai ce lä aethaw dang ö khü te vi dy.
Kai ce lä aethaw dang te cang y vi. Tita tea nang ce ma säbawng vi näkha äni lä anghawtho te phüng-a, kai ce lä äni hai mangtä anghawtho ö te by vi dy. 14Kai lä nang ce üng phüng-a Tita tea aethaw jawjaw te vi dy. Hini aethaw te phüng-a, nang ce lä kai ce tea saerae hai ö te y. Kai ce lä nang ce tea kätü qütä lo mitang thui pyng ö te vi dy. Hini kätyng Tita tea kai ce lä aethaw kha thui pyng saite na la tätang khaw vi. 15Tukätephüng-a Tita lä nang ce tea tengxyng y bälung aevaw rae aevaw rae kha nang ce lä äni üng lo tea tängai ö vi näte aedawng haile te vi. Nang ce lä äni tea ri kha käsawtho te hai lady ö te vi dy. 16Kai lä nang ce tea tengxyng ae-y khü haw te phüng-a, anghawtho phi te vi.
8Bäsai y käla py ö
1Kangby jä-ai na ä, kai lä hini Makedonia khö üng kangkawng na tea Säthaw ma py saite tähang kähawi phüng nang ce tea mäny hai hethang ngai te vi. 2Äni ce lä tengxyng y mätang bälai saite na hai käny saite na aeting kha tengxyng y mätang ö te vi. Tungaila äni ce lä anghawtho phi kha Khristen kängby jä-ai na tea bäsai y käla py hethang ngai saite bälung awng ö te vi. 3-4Äni ce lä äma ce py haw te rytä py kha py haw te qawng-a cang y mäteng ma py ö te vi dy näte kai lä thui hethang ngai te vi. Äni ce lä äma ce üng kängai kätyng hikä sa te vi. Jerusalem märü-a awng saite Säthaw üng khimi na tea säbawng saite thung-a qa haw hethang kai ce tea mäkai ö leilae te vi dy. 5Äni ce lä kai ce üng aethang khai saite qawng-a cang y sa ö vi dy. Angcüky-a äni ce lä Areng tea äma ce bung ae-a pyng-a, Säthaw üng aely kätyng kai ce tea la äma ce ma ae-a ö te by vi dy. 6Tukätephüng-a hini kälu aetawng saite Tita tea nang ce thung-a hini bälung aevaw saite üng kälu tea sa khüng hethang kai lä mäci te vi dy. 7Nang ce lä tengxyng y äte angxynlyng na-a tawngnang ö vi. Nang ce üng yng saite, älo thuikaw saite, mänykaw saite, säbawng he ngai saite bälung hai kai ce tea bälung aevaw saite na awng ö vi dy. Tukätephüng-a nang ce lä hini bälung aevaw saite üng kälu tähang bäsai y käla py hai hethang kai ce lä ngai hai ö te vi.
8Kai lä nang ce tea särilo thui y ngaila, yng saite khimi kälang na üng säbawng hethang aethaw awng saite mätü te hai-a nang ce üng bälung aevaw saite lä tätang mei, tätang y mei, näte mäny hai hethang nang ce tea käny te vi. 9Nang ce lä mä-ai üng Areng Isu Khrista üng tähang kähawi tea mäny ö te vi. Äni lä tawngnang ngaila, nang ce tähang kangtang-a aelawng te vi dy. Äni üng kangtang saite hai-a, nang ce lä tawngnang ö te vi dy.
10Kai lä nang ce sa hethang kae saite tea thui he ngai te vi. Jangdüng üng khösäning-a nang ce lä angcü üng ae-a saite khimi na lawng te cang y, py hethang bälung awng ö tätang khaw saite na lawng ö vi dy. 11Tukätephüng-a nang ce ma aetawng kha tangkae käcö saite tea lä kaecyng-a sa ö. Nang ce lä hini tangkae käcö saite aetawng hethang bälung aethaw awng phi te kätyng, bälung aethaw awng phi te hai-a kaecyng-a sa ö. Nang ma ce tea awng te kätyng py ö. 12Nang ce lä säbawng he ngai saite bälung awng ö dylä, nang ce üng py haw saite tea lä Säthaw ma täla vi ai. Säthaw lä nang ce py haw y saite tea ngai te y.
13Kai ce lä nang ce tea mätang bälai hai hethang ngai ö te y. Yng saite kälang na säbawng te dang hethang rae saite aeting hai he ngai ö te y vi. Kai ce ngai hai saite lä py saite khimi na hai dang saite khimi angxynlyng na lä mangtä aequng bawi ö he kae te vi. 14Vaihi kätü-a nang ce lä nang ma ce üng tawngnang saite na hai äni ce üng aely ngai saite tea säbawng ö te vi. Kangkhüng-a lä äni ce üng tawngnang saite lä nang ce üng aely ngai saite na tea säbawng haw ö ai. Hini kätyng py saite na hai dang saite na lä mangtä aequng bawi ö vi ai. 15Caekäcai thung-a, “Awng mang-a mätung saite khimi na lä bälai te awng ö y. Äje cäcaw mätung saite khimi na lä aelo ö vi dy” näkha tärü te vi.
Tita hai äma üng kängby jä-ai na
16Kai ce lä nang ce tea säbawng hethang ngai te kätyng Tita lä nang ce tea la säbawng hai hethang Säthaw ma sa te phüng-a kai ce lä Säthaw tea kawng te lo thui ö te vi. 17Tita lä kai ce üng mäci saite lo tängai te qawng-a cang y sa te vi dy. Äni lä äma üng kängai kätyng nang ce tea säbawng hethang ngai saite bälung awng te hai ly te vi. 18Angthang Kähawi thui te phüng-a kangkawng angxynlyng na ma bälaw saite kängby jä-ai lawngtä bung la Tita hai mangtä kai ce lä mätaw te by vi. 19Hokä cang y rawng, kai ce lä Jerusalem märü-a awng saite yng saite khimi na tea säbawng hethang lasawng nähai te kätü-a, honi kängby jä-ai bung lä kai ce hai mangtä ly hai hethang kangkawng na ma äni bung re te vi dy. Hini phüng-a, Areng üng phung-ang lä aesang vi ai. Kai ce lä säbawng he ngai saite bälung awng vi näkha mätü ö te by vi.
20Kai ce lä Jerusalem märü üng yng saite khimi na tähang bäsai y käla py saite lasawng na kai ce ma makä süng ai mei näte tea khimi ce ma cy te awng y hethang ngai ö te vi. 21Kai ce lä Areng üng maw-a qaitä aeteng khaw saite sa hethang aethawsa ö te y. Kai ce lä khimi ce üng maw-a la aeteng khaw saite sa hethang aethawsa ö te by vi.
22Kai ce lä Tita hai mangtä kängby jä-ai kälang bung nang ce tea mätaw ö te vi. Kai ce lä äni tea kätü awng mang-a käny pyng te vi dy. Äni lä khimi ce tea säbawng hethang bälung awng phi te vi. Vaihi äni lä nang ce tea ae-y khü kha säbawng rae hethang mäteng ma ngai te vi. 23Tita lä kai üng kängby jä-ai kähawi vi. Äni lä nang ce tea säbawng hethang kai hai mangtä kälu sa te vi. Äni hai mangtä hui saite kängby jä-ai kälang lawng netä lä kangkawng na üng khimi na ma re kha mätaw hawi saite vi. Äni ce lä Khrista üng phung-ang tähang kälu sa ö te vi. 24Tukätephüng-a hini khimi ce tea nang ce üng bälung aevaw saite na mätü ö lawi. Hikä sa dylä, nang ce phüng kai ma aethaw saite kätüng tea kangkawng angxynlyng na ma nung ö ai.
9Jerusalem märü-a awng saite Khristen na tea säbawng saite
1Kai lä Jerusalem märü üng Säthaw üng khimi na tea säbawng saite phüng nang ce tea cae tärü hethang aely ngai te y. 2Nang ce lä säbawng hethang bälung awng ö vi näte kai lä mäny vi. Kai lä nang ce üng phüng hini Makedonia khö-a awng saite kangkawng na tea aethaw pyng te vi dy. Kai lä äni ce tea, “Jangni üng khösäning-a ma Käri pre üng Khristen na lä säbawng hethang aerü rüng ö pyng te vi dy” näkha näpa. Nang ce üng bälung aepy saite lä Makedonia khö üng Khristen na tea la bälung aethaw awng hai ö te by vi. 3Tungaila nang ce üng phüng kai üng aethaw saite lä tätang vi näte mätü hethang hini yng saite kängby jä-ai na bung nang ce tea kai lä mätaw te vi. Kai ma thui pyng saite kätyng nang ce lä tangkae khai aecö rüng hethang kai ce ma äni ce bung mätaw ö te vi. 4Kai hai mangtä Makedonia khö üng hai hui saite yng te khimi na ma nang ce üng aerü rüng y saite tea nung dylä, nang ce tea ae-y khü te phüng-a, kai ce la tengxyng y saerae ö by vi ai. Nang ma ce khekhe la saerae ö by ai. 5Tukätephüng-a hini kängby jä-ai na bung nang ce tea mätaw rüng hethang aely ngai te vi näkha kai lä aedawng vi dy. Tukäte hai-a nang ce lä bäsai y käla py hethang aedo saite lasawng mätung rüng hethang äni ce lä säbawng ö he kae. Kai ma nang ce tea py hai aekhe kang hethang särilo thui te y käla, nang ma ce üng bälung kängai kätyng py saite lasawng lawng hethang kae.
6Khimi lawngtä lä ämöti äje cäcaw xyng hi dylä, äni lä caw äje cäcaw xyng ae vi ai. Tungaila khimi lawngtä ämöti awng mang-a hi dylä, äni lä caw awng mang-a ae vi ai näte aedawng haile ö. 7Nang ce thung-a khimi qütä lä, äma ce üng bälung thung-a aedawng te kätyng py hethang kae. Nang ce lä bäsai te bälung hai py hethang kae te y. Nang ce lä khimi phütä ma särilo hai thui te phüng-a, py hethang kae ö te y. Säthaw lä anghawtho te bälung hai py saite khimi tea lä bälung aevaw te vi. 8Säthaw lä nang ce tea tähang kähawi cawngkhang na py haw te vi. Tupyng-a nang ce lä äly ngai saite angxynlyng na awng kha kälu kähawi cawngkhang na sa haw hethang awng mai vi ai rawng. 9Caekäcai thung-a,
“Khimi käcüng lä khimi kangtang tea
bäsai y käla py te vi.
Äni üng sa te kälu kähawi tea
Säthaw lä manila tämang y lyng” näkha awng te vi.
10Areng lä ämöti hi saite kung tea ämöti na py kha khimi ce tea käcakänei py hai te vi. Hini kätyng Areng lä nang ce tea vaihi awng saite qawng-a cang y py rae ai. Tukha nang ce lä khimi kälang na tea säbawng rae kha kälu kähawi na sa haw ö rae vi ai. 11Areng lä nang ce tea älang cawngkhang-a tawngnang hai ö ai. Tudylä nang ce lä kätü qütä-a bäsai y käla py haw ö te vi. Kai ce te mang hai-a nang ce üng py saite na khimi ce ma dang te kätü-a, äni ce lä Säthaw tea kawng te lo thui ö ai. 12Tukätephüng-a nang ce üng kälu kähawi sa te phüng-a, nang ce lä Säthaw üng khimi na üng aely ngai saite na tea sabawng ö te qaitä y. Khimi awng mang saite na la Säthaw tea kawng te lo thui ö by ai. 13Nang ce lä Khrista hai aesui vi näte nang ce üng kälu kähawi sa te hai-a mätü ö te vi. Honi hai-a khimi awng mang saite na ma Säthaw tea bälaw ö ai. Nang ce lä Khrista üng Angthang Kähawi thui te qaitä y, äni tea hui hethang ngai saite bälung la awng vi näte nang ce üng bäsai y käla khimi qütä tea py te hai-a mätü ö te vi. 14Säthaw ma nang ce tea py saite tähang kähawi käleng phüng-a, äni ce lä nang ce tea bälung aevaw phi kha nang ce tähang Säthaw tea aetang pa ö ai. 15Mä-ai lä thui kha manila bynglei haw y saite Säthaw üng lasawng phüng-a, äni tea bälaw ö si.
10Pawlae lä äma üng kälu phüng mäthang saite
1Kai, Pawlae, lä Khrista üng bälung aemäneng kha äkäneng awng saite hai-a nang ce tea thui hethang ngai te vi. Khimi phütä ma, kai lä nang ce hai aeting te kätü-a, äkäneng-a awng ngaila, hanglaw-a awng te kätü-a lä nang ce tea pring vawng vi näkha kai üng phüng thui ö te vi. 2Khimi phütä ma kai ce lä älawngpre üng älang kätyng awng te vi näkha kai ce phüng thui ö te vi. Kai ce tyng te kätü-a, hini khimi ce tea kai ce lä pring vawng ö vi ai. Hini kätyng nang ce tea kai ce lä pring he aely ngai y hethang näkha aesi aebai ö te vi. 3Kai ce lä hini älawngpre-a awng ngaila, älawngpre üng älang kätyng aety ö te y. 4Kai ce ma süng saite maiphaw maicae na lä, hini älawngpre üng tho saite na y vi. Säthaw ma kai ce tea hini haidae awng saite maiphaw maicae na py te vi. Setan te üng aethaw awng saite kaedawng na tea täphra haw hethang vi. Tüng y saite älo ae-e te na tea täphra hethang vi. 5Kai ce lä khimi ce ma Säthaw bung mäny y hethang Setan üng mäkhangky saite na tea täphra ö king te vi. Kai ce lä khimi ce üng dawng saite angxynlyng na tea ne king kha äni ce bung Khrista üng älo tea tängai hai ö pa te vi. 6Nang ce lä Khrista üng älo tea tängai king te kai ce ma nung ö te kätü-a, Khrista tea elekhei sa saite khimi angxynlyng na bung lä kai ce ma dengpy hethang awng rüng ö vi ai.
7Nang ce lä ärang mang kheng kha ämaw äcae haetä tea xyng nung ö te vi. Nang ce thung üng phütä lä äma ma tea Khrista üng äkähui vi näkha ae-y khü dylä, äni lä Khrista hai aesui te kätyng kai ce la Khrista hai aesui ö te vi näkha dawng te lä hawi khaw te vi. 8Kai lä Areng ma py saite aenae phüng qengtä cang y aethaw dylä, saerae te y vi. Säthaw lä nang ce üng yng saite cakhi hai hethang kai ce tea aenae py vi dy. Honi aenae lä nang ce üng yng saite aethawdi hai hethang y vi. 9Kai ma tärü saite cae na hai-a nang ce tea ri hai hethang ngai te vi näkha dawng ö hang. 10Khimi phütä ma, “Pawlae lä äma üng cae na hai aenae mätü kha tengxyng y haidae awng te vi. Tungaila äma khekhe lä kai ce üng maw-a tyng te kätü-a, äni lä aethawdi kha älo na thui lä aetütü kae vi” näkha thui ö te vi. 11Kai lä hanglaw-a awng kha cae na tärü te hai nang ce tea tyng kha sa saite lä aetawng khaw vi näte hini khimi ce ma mäny hethang kae.
12Kai ce lä mä-ai ma tea aely leng te vi näkha aedawng saite khimi na hai aetawng khaw te vi näkha thui hethang ngai ö te y. Honi khimi ce lä äma ce tea “Kai ce lä hawi te vi, kai ce lä tüng te vi” näkha dawng kha aethaw dylä, honi khimi ce lä äte haetä la mäny y näte mätü ö te kae. 13Kai ce lä Säthaw ma py saite aethaw hai aenae qawng-a cang y aethaw ö te y vi. Kai ce lä Säthaw ma py saite kälu phüng xyngtä ni aethaw ö vi ai. Kai ce üng kälu sa saite lä nang ce awng saite mityng khytä tyng vi dy. 14Kai ce lä Säthaw ma särilo thui y saite mityng-a, kälu sa ö te y vi. Kai ce lä nang ce tea tyng te kätü-a, Säthaw ma särilo thui saite mityng-a kälu sa ö te vi dy. Kai ce lä nang ce awng te khytä ly kha Khrista üng Angthang Kähawi nang ce tea thui ö te vi dy. 15Kai ce lä Säthaw ma py saite kälu phüng xyng aethaw ö te vi. Kai ce lä khimi kälang na üng kälu phüng tea aethaw ö te y lyng. Kai ce lä nang ce üng yng saite ryng jawjaw kha nang ce thung-a kai ce kälu sa hethang lä leng rae ai näkha aethang khai ö te vi. 16Honi pyng-a, kai ce lä nang ce awng saite mityng cang y mityng kälang kangthae na-a Angthang Kähawi thui haw ö vi ai. Kai ce lä khimi kälang na äma ce üng mityng-a sa saite kälu phüng tea aethaw hai hethang ngai ö te y lyng.
17Caekäcai thung-a, “Khimi lawngtä aethaw hethang ngai dylä, Areng üng sa saite phüng tea xyng ni aethaw hethang kae” näkha näte vi. 18Ätephüng-a mei nädylä, khimi lawngtä ma äma üng phüng aethaw saite tea Säthaw lä ngai te y. Areng lä äma khekhe tea bälaw saite khimi na xyngtä tea ni ngai te kae vi.
11Pawlae hai käjüng sa saite angtawtha na
1Kai lä kangthö lawngtä kätyng älo äje cäcaw aepe dylä, kai tea khung ö. Tätang khaw nang ce lä khung ö te vi. 2Säthaw lä nang ce tea dökhaw te kätyng kai la nang ce tea dökhaw te vi. Kai lä nang ce bung anglaw käcai ping kätyng nawngmäcaw lawng saite Khrista lawngtä xyng hai aepawng hethang älo aedo pa te vi. 3Tungaila Setan lawng saite bärui lä äma üng kaeling kaemae sa te hai Evi tea hunghö sa hai hethang the te kätyng khimi phütä ma nang ce tea älang tämang hai kha nang ce lä Khrista bung bälung aevaw saite tea kädephae ö ai näte kai lä bälung mawng te vi. 4Khimi lawngtä lä nang ce tea ly kha kai ce ma Isu phüng thui saite hai aetawng y saite phüng thui dylä, nang ce lä anghawtho kha tängai ö te vi. Y dylä Säthaw ma nang ce tea py saite Muilaw hai aetawng y saite phüng tea khimi lawngtä ma thui dylä, nang ce lä lady ö vi. Nang ce yng saite hai aetawng y saite Angthang Kähawi tea khimi lawngtä ma thui dylä, nang ce lä jahaw-a yng ö vi.
5Nang ce ma aesangky te kätyng mäthi saite angtawtha na lä kai qawng-a aesangky vi näkha kai lä aedawng te y vi. 6Kai lä älo thuikaw phi saite y ngaila, ätete na mäny haw hethang bälungkähae awng te vi. Hini lä kai ce ma älang cawngkhang na hai nang ce tea mäny hai rüng ö pyng te vi dy.
7Kai lä nang ce tea äte ävang la y käla Säthaw üng Angthang Kähawi thui te vi dy. Kai lä aemäneng te hai-a nang ce tea aely leng hai te vi. Hini kätyng kai üng sa saite lä tämang te vi mei. 8Kai lä nang ce tähang kälu sa haw hethang kangkawng kälang na üng tangkae la te vi dy. Nang ce tea säbawng hethang äni ce te üng bäru te vi näkha lawng lawngtä ma thui haw te vi. 9Kai lä nang ce hai mangtä awng te thüng-a, kai hae haetä aely ngai te kätü-a lä nang ce thung üng ämi tea la bälungbi hai te y lyng. Makedonia khö üng tyng saite yng te kängby jä-ai na ma kai aely ngai saite angxynlyng na säbawng ö te vi dy. Kai lä nang ce tea äte manila bälungbi hai hethang awng vai te y näte kai lä ae-y te vi. Vaimaw mang-a la hini kätyng awng by ai näte kai lä ae-y te vi. 10Kai üng bälung thung-a lä Khrista üng lo mitang awng te phüng-a, Käri pre angxynlyng-a ämi lawngtä la kai hini kätyng aethaw te tea mäkhang haw ö y ai. 11Kai lä nang ce tea bälung aevaw y te phüng-a, hini kätyng thui te mei. Kai lä nang ce tea bälung aevaw vi näte Säthaw lä mäny te vi.
12Kai lä vaihi sa saite kätyng sa jawjaw ai. Hini kätyng hai-a, käjüng sa saite angtawtha na ma äma ce üng sa saite kälu lä kai ce hai aetawng vi näkha aethaw jawjaw haw ö y vi ai dy. 13Hini khimi ce lä angtawtha na lawng hethang käjüng aesa ö te vi. Äni ce lä kaeling kaemae thui saite khimi na vi. Äni ce lä Khrista üng kälu sa saite angtawtha na lawng hethang käjüng aesa ö te vi. 14Äni ce sa saite na lä cangxei hethang awng te y. Setan angra äma lä Känipre kaevang üng angtawtha lawng hethang käjüng aesa te vi dy. 15Tukätephüng-a äni üng mawsawng na lä cüng saite üng mawsawng na lawng hethang käjüng sa saite lä cangxei hethang awng te y. Kangkhüng-a Säthaw lä äni ce tea äma ce sa te hai aeteng khaw saite deng py ai.
Pawlae üng mätang bälai saite na
16Kai thui tynglyng he ngai saite lä, ämi lawngtä la kai tea kangthö kätyng dawng hang. Tungaila nang ce ma kai tea kangthö kätyng dawng dylä, kangthö lawngtä kätyng kai bung lady ö. Tukä dylä kai lä äje cäcaw aethaw haw vi ai. 17Kai üng aethaw saite lä Säthaw üng älang kätyng y. Kai lä kangthö kätyng thui vi ai. 18Khimi awng mang saite na lä älawngpre üng älang kätyng aethaw ö te phüng-a, kai la aethaw by ai. 19Nang ce lä nang ma ce tea bälunghae phi te kätyng dawng te phüng-a, kangthö na tea anghawtho te hai tängai ö te vi. 20Hini qawng-a cang y, nang ce tea mawsawng na kätyng pyng saite khimi qütä tea nang ce lä änawngsa ö te vi. Nang ce tea kaeling kaemae sa kha bäru saite na, mäthi y saite na, nang ce üng mimai na tea täbeng saite na tea nang ce lä khung ö te vi.
21Kai ce lä nang ce tea hini kä sa hethang aethaw awng y kha saerae te hai thui hethang kae te vi. Tungaila khimi lawngtä lä hae haetä phüng tea aethaw vawng dylä, kai la aethaw vawng te by vi. Kai lä kangthö kätyng thui te vi. 22Hini angtawtha na lä Hebärai khimi na mei. Kai la by vi. Äni ce lä Isrelae khimi na mei. Kai la by vi. Äni ce lä Abraham üng kaesui kaebeng na mei. Kai la by vi. 23Äni ce lä Khrista üng mawsawng na mei. Kai lä hawiky saite mawsawng vi. Kai lä kangthö kätyng älo aepe te vi. Kai lä äni ce qawng-a cang y Khrista üng kälu mäsaexa te hai sa vi dy. Kai tea lä äni ce qawng-a cang y thawng thung-a pä-ung leilae te vi dy. Khimi ce ma kai tea lä äni ce qawng-a cang y boky te vi dy. Kai lä äni ce qawng-a cang y dü saite hai aeting leilae te vi. 24Judae khimi na ma kai tea ruinawng na hai qeng rui thung täkawtä bo te äbangawtä mäteng ma awng te vi dy. 25Rom khimi na ma kai tea pawngpai hai ry te lä ämäthung vi dy. Khimi ce lä kai bung bädü hethang älung aeke na hai käde vai ö te vi. Kai lä tui sangphaw käpra qeng thungtä aedang vai te vi. Kai lä pangle thung-a kärung rungtä hai käni nitä tui thung-a awng vai te vi dy. 26Kai lä khölawng tho leilae te vi. Hini kätyng ly te kätü-a, kai lä tävaw käleng thung üng käsi aeting saite, damärae na hai aeting saite, kai ma üng ceng khekhe Judae khimi na ma kai tea ri saite sa hethang ngai te hai khimi ceng kälang na ma ri saite sa hethang ngai ö te vi. Kai lä märü thung-a ri hethang aeting saite na, daithung kärang-a ri hethang aeting saite hai pangle thung-a ri hethang na aeting te vi. Kai üng kängby jä-ai na kätyng käjüng sa saite khimi na ma la kai tea ri saite sa hethang ngai ö by vi dy. 27Kai lä kälu sa te mäsaexa vi dy. Kai lä i haw y käla awng saite, bö aelang saite, tui aehe saite, ca nei hethang awng y saite, aekhu aena hethang awng y saite hai de phi saite na aeting leilae te vi dy. 28Honi qawng-a cang y kai lä käsi kälai kälang na aeting te vi rawng. Kai la kangkawng angxynlyng na tähang käni qütä bälungbi te by vi. 29Kai lä aethawdi saite khimi phütä hai aeting te kätü-a, aethawdi saite khimi kätyng lawng te by. Kai lä hunghö sa hai hethang the pyng saite khimi phütä na hai aeting te kätü-a, hunghö sa hai saite khimi na tea kädawtho te vi.
30Kai aethaw hethang kae te lä, kai üng aethaw awng y näte phüng na tea mätü hethang aethaw ai. 31Kai lä kaeling kaemae sa y näte Areng Isu üng Pä-ai Säthaw lä mäny te vi. Äni üng ämüng tea khimi ce lä bälaw ö jawjaw sy. 32Kai lä Damasaka märü-a awng te thüng-a, sanphrang Arita täkui-a awng saite Aecörae mätawngky lä kai bung ne hethang Damasaka märü üng reisae na tea rui hai ö te vi dy. 33Tungaila kai üng äkähui na lä kai bung paeceng thung-a mäceng kha märü üng baesung äkhaw mang ruinawng hai bäla te phüng-a kai lä honi sanphrang kö thung üng lawi haw te vi dy.
12Pawlae üng äsämai hai aetüng saite na
1Äte la ävang ting te y ngaila, kai lä aethaw haw te vi. Tudylä Areng ma kai ce tea mätü saite äsämai na hai aetüng saite phüng na nang ce tea kai thui ai. 2Leithung üng khösäning hawlai bälitä-a aesangky saite Känipre thung-a Säthaw ma nähaija pa saite Khrista üng äkähui lawngtä bung kai lä mäny vi. Säthaw ma äni üng ätabung tea aesangky saite Känipre-a nähaija te mei y dylä, äsämai mätü te mei näte kai lä mäny y ngaila Säthaw lä mäny te vi. 3-4Säthaw ma hini khimi bung paradai thung-a nähaija vi näte kai lä mäny vi. Säthaw ma äni üng ätabung tea Paradai-a nähaija mei y dylä äsämai mätü te mei kai lä mäny y ngaila Säthaw lä mäny te vi näkha kai lä thui haile tynglyng te vi. Äni lä khimi üng täbawng hai älo aepe haw y saite na, thui mäcai haw y saite lo na thai vi dy. 5Kai lä honi khimi phüng tea aethaw haw te vi. Tungaila kai ma üng phüng lä aethaw y lyng. Kai ma üng aethawdi saite phüng xyngtä aethaw vi ai. 6Kai lä aethaw hethang ngai dylä, kangthö kätyng älo aepe y lyng. Ätephüng-a mei nädylä, kai lä lo mitang na aepe te vi. Tungaila kai lä aethaw y lyng. Khimi ce ma kai üng sa saite nung kha thai saite na phüng-a cang y kai tea tämö khai hai hethang kai lä ngai te y vi.
7Tukha Säthaw ma kai tea mätü te cangxei phi saite aetüng te na phüng-a, kai lä bälung lengphi y hethang Säthaw ma kai üng ätabung thung-a nawphi saite bäthaw tea ru hai te vi. Säthaw ma Setan angra üng angtawtha bung kai tea bo hai hethang py pa vi dy. 8Areng ma hini mäthaw tea täkeja hethang qeng thungtä kai lä aetang pyng te vi dy. 9Tungaila Areng lä kai tea, “Kai üng tähang kähawi lä nang tähang aelo te vi. Nang lä aethawdi te kätü-a, kai üng haidae lä cungrü te vi” näkha mäthang vi dy. Tukätephüng-a kai üng aethawdi saite phüng anghawtho te hai kai lä aethaw vi ai. Tudylä Khrista üng haidae lä kai hai mangtä awng vi ai. 10Khrista üng tähang-a, aethawdi saite, mänui hai saite, mätang bälai saite, sakälö khü saite hai rae saite na kai aeting dylä, kai lä kawng te vi. Kai lä aethawdi te kätü-a, Khrista üng haidae lä kai tea awng te vi.
Korin märü üng yng saite na tähang Pawlae üng bälungbi saite
11Kai lä kangthö kätyng sa vi dy. Tungaila nang ce lä kai tea hini kätyng sa hai te vi dy. Nang ce lä kai tea bälaw hethang kae saite khimi na vi. Kai lä Säthaw üng maw-a aely leng y saite khimi lawng ngaila, nang ce ma aesangky-a mäthi saite angtawtha na kätyng aely leng te lawngtä by vi. 12Kai lä nang ce hai mangtä awng saite kätü-a, angtawtha lawngtä üng äsäny lä cangxei saite hai kamarae na tea änawngsa te hai sa pyng te vi dy. 13Kai lä nang ce tea kangkawng kälang na üng aely leng y te kätyng dawng te vi mei. Kai ma üng aely ngai saite na phüng-a, nang ce tea kai lä bälungbi hai y lyng. Hini xyngtä phüng-a nang ce lä kangkawng kälang na hai aetawng te y. Hini kätyng nang ce tea kai üng sa tämang saite tea lä bälawi ö ba.
14Vaihi kai lä nang ce tea ly hethang qeng thungtä aerü te vi dy. Kai aely ngai saite na hai-a nang ce tea kai lä bälungbi hai y lyng. Kai lä nang ce te üng tangkae na ngai te y. Kai lä nang ce bung ngai te kae. Caw nade na lä änä-awi äpä-ai ni tähang tangkae na mätung ö hethang kae te y vi. Änä-awi äpä-ai ni lä caw nade na tähang tangkae na mätung he kae. 15Kai tea awng saite angxynlyng na nang ce tea py hethang tähang-a kai lä anghawtho vi ai. Kai lä nang ce tea säbawng he kai üng hing saite mäteng ma py hethang awng rüng te vi. Kai lä nang ce tea bälung aevaw phi te phüng-a, nang ce lä kai tea äje cäcaw bälung aevaw ö te vi mei.
16Kai lä nang ce tähang müngkäli lawng hai te y näte nang ce lä mäny ö te vi. Tungaila khimi phütä ma kai lä nang ce te üng ävang dang hethang kaeling kaemae sa te vi dy näkha aedawng ö te vi. 17Makä sa kha kai lä nang ce tea kaeling kaemae sa vi mei. Nang ce tea mätaw saite khimi na thung üng lawngtä hai-a kai lä ävang dang te vi mei. 18Kai lä Tita bung nang ce tea ly hethang mäci kha mätaw te vi dy. Kai lä Khristen kängby jä-ai lawngtä bung la äni hai mangtä mätaw te by vi dy. Tita lä nang ce te üng äte amäjy na la te vi mei. Kai ni lä mangtä kälu sa hawi te vi.
19Ämi ma la kai ce tea cy haw y hethang älo thui saite na nang ce lä kätü qütä aedawng ö mei. Kai ce lä Khrista hai bungtä kha Säthaw üng maw-a älo thui ö te vi dy. Bälung aevaw saite kängby jä-ai na ä, kai ce sa saite angxynlyng na lä nang ce üng yng saite na ca rae hethang vi. 20Kai tyng te kätü-a, nang ce üng awng saite na tea kai lä bälung kawng te y näkha kai lä bälung mawng te vi. Nang ce la kai awng saite hai bälung kawng ö y by vi ai näte kai lä bälung mawng te vi. Kai lä nang ce säla-a aejaw aemang saite, pä-e saite, kädawtho saite, ae-aw saite, käsi prawng saite, khimi phüng aeqa saite, bälungleng saite hai xhuxa saite na tea aeting ai näte bälung mawng te vi. 21Nang ce tea tyng haile te kätü-a, nang ce üng maw-a kai üng Säthaw ma kai bung aemäneng hai ai näte kai lä bälung mawng te vi. Tudylä jangni üng hai ma hunghö sa kha ae-ui y käla vaihi khytä hunghö sa saite khimi awng mang te tähang bälung nawphi ai näkha kai lä bälung mawng te vi. Nang ce thung üng khimi awng mang saite na lä pawprae saite, täkübäjang sa saite, hai ngaiphi tüng y saite na awng kha ae-ui ö y te phüng-a kai lä bälungsi vi ai.
13Pawlae üng kangkhüng üng sädi py saite na
1Hini lä nang ce tea kai ly ai näte ämäthung üng vi ai. Caekäcai thung-a, “Khimi lawngtä lä khimi kälang lawngtä tea cy hethang ngai dylä, honi phüng mäny saite khimi lawng ne lawng thungtä awng dylä, äni ce üng lo tea tängai hethang hawi te vi” näkha näte vi. 2Kai lä äbaeni üng nang ce tea tyng te kätü-a, sädi py rüng pyng te vi dy. Vaihi kai lä kähanglaw mang thui haile be ai. Kai lä jangni-a üng hai sa tämang pyng saite khimi na hai hunghö sa saite khimi kälang angxynlyng na tea bäheng y käla dengpy ai. 3Nang ce lä kai te mang hai-a Khrista lä älo aepe vi näte mäny hethang kai tea mätü hai he mäkai ö te vi. Khrista lä nang ce üng kangkawng thung-a aethawdi te y vi. Äni lä äma üng haidae nang ce tea mätü ai. 4Khimi ce ma Areng bung thinglang qawng-a täheng te kätü-a, äni lä aethawdi te vi dy. Tungaila vaihi äni lä Säthaw üng haidae hai hing te vi. Kai ce la äni hai bungtä vi te phüng-a, aethawdi ö ngaila, Säthaw üng haidae hai-a Isu hai mangtä hing kha nang ce tähang kälu sa ö ai.
5Nang ce lä yng saite tüng mei, tüng y mei, näte mäny hethang nang ma ce tea aekäny ö. Hini kätyng aekäny te kätü-a, nang ma ce üng bälung thung-a, Isu Khrista awng näte nang ce lä mäny ö te y mei. Nang ce äthung-a Khrista awng näte mäny ö y dylä, nang ce üng yng saite lä tüng te y vi. 6Hini kätyng kai ce lä käny pyng ea Säthaw üng saite angtawtha na vi näte nang ce lä mäny vi ai näte aethang khai ö te vi. 7Nang ce äte haetä la sa tämang y hethang kai ce lä Säthaw tea aetang ö te vi. Kai ce lä Säthaw üng tüng saite angtawtha na vi näte khimi ce üng maw-a mätü hethang y. Tungaila nang ce kätüng sa saite lä aely leng te vi. Kai ce üng phüng khimi ce dawng saite lä aely leng te y. 8Kai ce lä lo mitang tea elekhei sa haw ö te y. Kai ce lä lo mitang tähang xyng kälu sa haw ö te vi. 9Kai ce aethawdi te kätü-a, nang ce aethaw awng dylä, kai ce lä kawng ö vi. Kai ce lä nang ce tea cungrü saite khimi na lawng hethang aetang ö te vi. 10Tukätephüng-a kai lä kähanglaw-a awng te thüng-a, hini phüng na cae tärü te vi. Tudylä kai tyng te kätü-a, kai lä Areng ma py saite aenae hai nang ce tea pring y lyng. Hini aenae lä nang ce üng yng saite lä aethaw awng hethang Areng ma kai tea py te vi. Nang ce tea aethawsi hai hethang y lyng.
Kangkhüng üng cibai sa saite lo
11Kai üng kängby jä-ai na ä, kangkhüng üng cibai sa saite lo lä nang ce lä nawsaw hawi kha anghawtho ö sy. Cungrü hethang aethawsa ö. Kai ma nang ce tea thui pyng saite tea tängai ea bälung haetä awng kha awngneng te hai-a ma awng ö. Hini kätyng nang ce sa dylä, bälung aevaw te hai awngneng te käpy Kung, Areng Säthaw, lä nang ce hai mangtä awng ai.
12Nang ce lä nang ma ce tingtawi bälung aevaw te hai lady ö.
13Säthaw üng khimi angxynlyng na ma nang ce tea cibai sa te lo thui ö vi.
14Areng Isu Khrista üng tähang kähawi, Säthaw üng bälung aevaw saite hai Muilaw Käcai üng aede saite lä nang ce angxynlyng na hai mangtä awng sy.