TIMOTHE
tea angcü üng Pawlae tärü saite cae
Angcü üng älo
Pawlae lä Timothe bung äcäpaw kätyng Khrista hai-a mäthi te vi. Timothe änä-awi lä Judae khimi kha äpä-ai lä Käri khimi vi. Timothe lä Pawlae üng äpy lawng kha aesäbawng saite lawngtä la vi. Hini cae tea Pawlae ma A.D. 64 khösäning kätü-a tärü te daila awng ai näkha Caekäcai kaw saite särae na lä aethang khai ö vi. Pawlae lä Rom märü üng thawng thung üng tänaetä aelawi kha Angthang Kähawi thui hethang khölawng tho te thüng-a, Timothe bung lä Ephesi kangkawng tea säbawng hethang khai pa te vi. Pawlae lä Makedonia khö khölawng mäsa te thüng-a, Timothe tähang hini cae tärü te daila awng ai. Hini cae üng aely lengky saite mawlang kaedawng lä Timothe ma Ephesi kangkawng tea makä sakha rui ai mei, kangkawng üng mätawngky na makä sa kha khai ai mei, kangkawng üng khimi na la makä sa kha hing ö mei, käjüng sa saite särae na ma kaesyng y mätu saite lo na tea makä sa kha mäkhang haw ai mei näte na vi.
Äphüng äkädawiky
Angcü üng älo 1:1-2
Kangkawng hai kangkawng üng mätawngky na phüng täru saite na 1:3-3:16
Timothe üng kälu phüng täru saite na 4:1-6:21
11Mä-ai aethang khai saite Isu Khrista hai Aeqangkung Säthaw üng särilo hai-a, Isu Khrista üng angtawtha kai, Pawlae, ma hini cae tärü te vi.
2Yng saite phüng-a nang lä kai üng cäpaw tätang kätyng awng te, Timothe ä, nang tea hini cae kai lä tärü te vi.
Mä-ai üng Pä-ai Säthaw hai Areng Isu Khrista ma tähang kähawi, bäheng saite hai awngneng saite nang tea py jo sy.
Kätüng y mätu saite särae na tea sädi py pa
3Makedonia khö-a kai ly he aetawng te kätü-a, nang lä Ephesi märü-a awng hethang mäci te vi. Ätephüng-a mei nädylä nang lä kaesyng y-a mätu saite särae na tea mäkhang hethang särilo thui haw ai. 4Kangsi kangjaw na cäkae kangrüng thung-a tenglei y thui saite na hai ceng kaesui kaebeng na phüng, kätü bärawng kha thui y hethang äni ce tea nang lä särilo hai mäkhang ba. Hini na phüng-a khimi ce lä aejaw aemang ö te vi. Hini na lä äni ce ma yng te hai-a Säthaw üng kälu sa hethang säbawng haw te y. 5Hini särilo üng mawkung lä yng saite na üng lawng lawngtä tea bälung aevaw saite vi. Hini bälung aevaw te na cai saite bälung hai, käsi sa y näkha mäny saite hai kätüng yng saite bälung awng saite khimi na lä dang haw ai. 6Tungaila kätüng y mätu saite särae na lä hini Säthaw üng ngai saite na tea khaisö ö te vi. Hini jüng-a, äni ce lä älo aetütü na phüng thui ö xyng te kae. 7Äni ce lä Mosi üng Ubädi mätu saite särae na-a aelawng hethang ngai ö vi. Tungaila äni ce lä äma ce thui saite phüng na tea mäny ö y. Äni ce lä ae-y nae hawi vi näkha thui te älo tea äma ce mäteng ma mäny ö te vi.
8Säthaw üng Ubädi na kätüng-a mätu dylä, Ubädi lä hawi vi näte mä-ai lä mäny ö dy. 9-10Säthaw lä khimi cüng saite na tähang Ubädi lä py te y näte mä-ai la mäny ö te by. Säthaw üng Ubädi tängai y saite khimi na, Säthaw tea elekhei saite khimi na, Säthaw tea tämö khai y saite khimi na, hunghö sa jawjaw saite khimi na, Säthaw kängai-a awng y saite khimi na hai Säthaw tea mäny hethang ngai y saite khimi na tähang lä Ubädi py te vi dy. Hini Ubädi lä äma ce üng nä-awi pä-ai na hai khimi kälang na tea bädü saite na, täkübäjang sa saite na, nawngmädi tingtawi, nawngmäcaw tingtawi mangtä i saite na, khimi ce bung ne kha mawsawng tangnae sa hai he khimi kälang na tea jaw saite na, kaeling lo thui saite na, älo mitang thui hethang äni ce aedo pyng saite kätü-a mäteng ma kaeling sa saite na, Säthaw phüng kätüng mätu te tea elekhei sa saite na tähang Säthaw lä Ubädi py te vi. 11Hini mätu saite kätüng lä cangxei saite Säthaw üng phung-ang phüng Angthang Kähawi hai mangtä aebäla te vi. Hini lä Säthaw ma kai tea sa hai saite kälu vi dy.
Pawlae ma Isu Khrista tea kawng te lo thui pa
12Mä-ai üng Areng Isu Khrista tea kai lä kawng te lo thui dy. Äni lä kai tea aethaw py te vi. Äni üng kälu sa hethang re kha ae-y haw saite khimi lawngtä kätyng-a kai bung aedawng hai pa te phüng-a vi. 13Kai lä jangni-a Isu lä Khrista phüng käsi na thui kha yng saite na tea mätang bälai-a älang chawngkhang hai sa kha säkälö khü ngaila Khrista lä kai tea bäheng te vi. Ätephüng-a mei nädylä kai ma käsi sa saite tea mäny y te lä Khrista tea yng pa y te phüng-a vi. 14Mä-ai üng Areng lä kai tea tengxyng y tähang kähawi py te vi dy. Kai la äni tea yng kha khimi kälang na tea bälung aevaw haw hethang sa te by vi dy. Ätephüng-a mei nädylä kai lä Isu Khrista hai bungtä awng te vi dy. 15Hini thui saite lo lä ae-y nae hawi kha yng king hethang aeteng khaw te na vi. “Isu Khrista lä hunghö sa saite khimi na bung aeqang hethang älawng qawng-a ly te vi dy.” Honi hunghö sa saite khimi angxynlyng na qawng-a kai lä hunghö saky te vi. 16Tungaila Säthaw lä kai hunghö sa saite na thung üng käsiky tea bäheng phi te vi. Ätephüng-a mei nädylä Isu Khrista üng änawng saky saite phüng lä kai te mang hai-a khimi ce tea mätü hethang ngai hai te vi. Tukha äni tea yng saite khimi na lä äma ce tea hini kätyng änawngsa ai näte tea mäny hethang ngai hai te vi. Ätephüng-a mei nädylä Säthaw ma khimi ce tea lä dungtäsa hing saite dang hethang ngai hai te vi. 17Dungtäsa pyng saite Sanphrang, dungtäsa hing saite, ämi ma la nung haw y saite, lawngtä xyng awng saite, Säthaw tea dungtäsa tämö khai te hai bälaw jawjaw sy. Amen.
Pawlae ma Timothe tea aethaw py pa
18Kai üng cäpaw Timothe ä, buisaw phütä na ma nang sa hethang phüng thui rüng vai saite na kätyng kai lä nang tea hini särilo py te vi. Tukätephüng-a Angthang Kähawi tähang kähawi-a aety hethang buisaw na ma thui saite lo na lä nang tea säbawng hai vi ai. 19Nang lä käsi sa y näkha mäny te hai Khrista tea yng khi ba. Khimi phütä lä käsi kähawi mäny saite bälung tea khaisö ö te vi. Tukätephüng-a äni ce lä yng haw ö y vi dy. 20Äni ce thung-a Humenai hai Alesanda ni la qa hawi te vi. Kai lä änini bung Setan angra üng kö thung-a a te vi dy. Honi hai-a Säthaw phüng änini ma käsi thui haw y hethang aetu hawi sy.
2Kangkawng thung-a mangtä aetang ö
1Tukha khimi angxynlyng na tähang awng mang-a nang ce aetang pa hethang kai lä angcü-a ma mäci te vi. Säthaw tea khimi angxynlyng na tähang aesi aebai pa hethang, äni ce üng kängai na mäkai pa hethang hai äni ce tähang kawng te lo thui pa. 2Sanphrang na hai aecörae mätawngky angxynlyng na tähang, kähawi-a aetang pa ö. Tudylä mä-ai lä awngneng te hai derui deso-a awng haw ö ai. Tukha mä-ai la Säthaw üng kängai hai käcai-a awng haw ö ai. 3Hini lä hawi kha mä-ai bung aeqang pa saite Säthaw tea kawng hai te vi. 4Säthaw lä khimi angxynlyng na bung aeqang kha älo mitang mäny hethang ngai hai bawi te by vi. 5Ätephüng-a mei nädylä Säthaw lä lawngtä xyng awng kae. Khimi ce hai Säthaw säla-a aede hethang sa haw pa saite Kung lä Khrista Isu lawngtä xyng kae vi. 6Äni lä khimi qütä aelawi hai hethang äma üng hing saite aepy kha dü pa te vi dy. Säthaw ma khai khaw te kätü-a, hini angthang lä khimi qütä tea thai hai te vi dy. 7Honi phüng-a Säthaw lä ceng kälang2:7 Judae y saite khimi na tea thui te vi. na tea yng saite hai älo mitang phüng-a angthang thui hethang angtawtha-a kai bung re te vi. Kai thui saite lä lo mitang vi. Kaeling y lyng.
8Kai lä Säthaw tea cäphaw hethang aeting saite mityng qütä üng nawngmäcaw na tea käcai-a awng kha aetang hethang äkö na täryng hai hethang ngai te vi. Äni ce lä kädawtho y käla lawng lawngtä aejaw aemang y hethang kae. 9Nawngmädi na tea la khimi ce üng ämi kaepi-a hai khimi qütä äni ce tea tämö khai he kaeteng-a aekhu aena hai hethang kai lä ngai te vi. Äni ce üng äsang na lä kanglai pro-a aesa ö hang. Äni ce lä sui na, khawisäling kälung na hai ävang ting bärai saite kä-o, nitha na la aemäthy hethang kae ö y. 10Säthaw üng kängai-a hing saite nawngmädi na lä khimi kälang na tea säbawng ö sy. Hikä sa te hai äma ce tea äcae kähawi aesa ö te vi dy. 11Nawngmädi qütä lä Säthaw üng phüng aetu ö sy. Hokä mätu saite särae na tea äni ce lä tämö khai ö sy. 12Nawngmädi na ma kangkawng thung-a nawngmäcaw na tea mätu kha äni ce tea pyng hai hethang kai lä ngai te y vi. Nawngmädi na lä sitäri-a awng hethang kae. 13Ätephüng-a mei nädylä Adam bung angcü-a Säthaw lä sa te vi dy. Tupyng-a ni Evi bung sa te kae. 14Setan lä Adam tea kaeling thui te y. Nawngmädi tea ni thui te kae. Tukha nawngmädi lä hunghö sa te kung-a aelawng te vi dy. 15Nawngmädi na lä caw na aepeng te hai-a aeqang te dang ö vi ai. Äni ce lä Isu Khrista tea yng saite, khimi ce tea bälung aevaw saite, cai saite hai khimi ce ämi kaepi-a Säthaw üng kängai-a hing jawjaw dylä Säthaw ma äni ce bung aeqang pa ö ai.
3Kangkawng üng mätawngky na
1Hini lä ae-y nae hawi saite lo na vi. Kangkawng üng mätawngky-a lawng hethang ngai saite khimi dylä, äni üng ngai saite lä tengxyng y hawi bärai vi. 2Tukätephüng-a äni lä khimi ce ma cy haw y hethang kae. Äni lä änawngpui lawngtä xyng ni awng he kae. Äni lä äma tea aeküng saite, bälunghae saite hai hing hethang kae. Khimi ce ma tämö khai saite khimi-a lawng te hai angvüng angvaw na tea lady kha mäcaw mänei hethang kae. Khimi ce tea la Säthaw üng angthang hawi hai pailai mätu kaw saite khimi lawng hethang kae. 3Äni lä Cäpje tui neipro hethang kae y. Aejaw aemang rungrang hethang y käla bälung kähawi awng te hai awng pü he kae. Tangkae tea ngai ngae he kae y. 4Äni lä äma üng ingthung takö tea kähawi-a bälung bäcai hethang kae. Äni üng caw nade angxynlyng na lä äma üng lo tängai kha tämö khai hethang mätu he kae. 5Khimi lawngtä lä äma üng engthung takö tea kähawi-a bälung bäcai hethang kaw y dylä, Säthaw üng khimi na tea bälung bäcai haw y lyng. 6Säthaw tea yng saite khimi kangthae lawng hethang kae y. Y dylä äni lä bälung leng lae ai. Hokä dylä Säthaw ma Setan angra tea deng py te kätyng-a äni tea la deng py by ai. 7Yng y saite khimi na ma kangkawng mätawngky lawngtä lä tämö khai saite khimi lawng hethang kae. Hokä dylä yng y te khimi na ma äni tea ämüng täphra haw y lyng. Äni lä Setan angra üng mäthang-a la aemang y lyng.
Kangkawng üng bähawi kung na
8Hini kätyng-a kangkawng üng bähawi kung na la khimi ce ma tämö khai te khimi lawng ö hethang kae. Älo mitang thui saite khimi na lawng hethang kae. Cäpje tui neipro y saite na, tangkae tea ngai ngae y saite na lawng he kae. 9Säthaw lä äni ce tea täphawng saite lo mitang käthu tea äni ce lä yng khi ö hethang kae. Käsi kähawi mänykaw saite bälung hai sa tämang te awng y näkha aedawng saite khimi na-a lawng ö hethang kae. 10Yng saite khimi na ma bähawi kung lawng hethang ngai saite khimi ce tea lä käny mang hethang kae. Äni ce tea sa tämang saite nung y dylä, mätawngky kälu na sa ö mai sy. 11Honi kätyng-a mätawngky na üng änawngpui na lä khimi ce ma tämö khai saite nawngmädi na lawng ö hethang kae. Khimi ce phüng käsi thui rungrang hethang kae y. Äni ce lä äma ce tea aeküng hethang kae. Kätü qütä khimi ce üng ae-y nae hawi saite nawngmädi na lawng ö hethang kae. 12Mätawngky na lä nawngpui lawngtä xyng awng hethang kae. Nade na hai engthung takö na tea kähawi-a bälung bäcai kaw hethang kae. 13Bähawi kung üng kälu tea kähawi-a sakaw saite na tea lä khimi ce ma tämö khai ai mang. Äni ce lä ri te, aejae te awng y käla Isu Khrista tea yng saite Angthang khimi ce tea thui haw ö ai.
Ho saite phüng
14Kai lä nang awng tea Ephesi märü-a qae y te kätü-a tyng hethang aethang khai tätang ngaila, hini täru saite lo na nang tea tärü te vi. 15Ätephüng-a mei nädylä kai qae mai dylä, Säthaw üng engthung khaw lawng saite kangkawng-a, yng saite na makä sa kha awng ö ai mei näte nang tea mäny hai hethang kai lä ngai te vi. Ing aeling hai aenyng nae lä ing tea ca hai te vi. Honi kätyng kangkawng lä Säthaw üng älo mitang ma cakhi hai te vi dy. 16Ho ea khai saite na tea Säthaw ma mä-ai tea täphawng saite na lä cangxei hethang hawi bärai vi.
Honi tea ämi ma eja haw y lyng.
Khrista lä khimi cüngtang-a aelawng vi dy.
Muilaw Käcai hai-a mä-ai tea Isu lä Säthaw üng Cäpaw tätang vi näkha mätü vi dy.
Äni bung lä Känipre angtawtha na ma nung ö vi dy.
Äni üng angtawtha na lä äni üng phüng ceng qütä na tea thui ö te vi dy.
Hini älawngpre mityng qütä üng khimi na lä Äni tea yng ö dy.
Säthaw ma Äni bung lä Känipre-a nähaija vi dy.
4Kätüng y mätu saite särae na
1Muilaw Käcai ma aenysy-a thui saite lä kangkhüng üng käni-a, khimi phütä na lä kätüng khaw yng saite tea khaisö ö ai. Äni ce lä kaeling sa saite angra na üng lo tängai ea, angra na üng mätu saite na te mang-a hui ö vi ai. 2Honi khimi ce lä älo mitang mätu hethang käjüng aesa kha kaeling thui ö te kae. Khimi lawngtä lä süng käbi phi hai äma kö kang dylä sa pitui kha naw te aeny y vi dy. Honi kätyng äni ce la käsi kähawi mäny saite bälung awng ö y vi dy. 3Äni ce lä khimi ce tea ingthawng sa hethang kae y näte hai, käca känei phütä na tea ca hethang kae y näkha mätu ö te vi. Tungaila Säthaw lä käca känei angxynlyng na tea sa saite Kung vi. Yng ea lo mitang mäny saite khimi na lä Säthaw tea kawng te lo thui kha ca haw ö te vi. 4Säthaw ma sa saite angxynlyng na lä hawi vi. Tukätephüng-a mä-ai lä Äni tea kawng te lo thui ea ca dylä, käca känei phütä tea lä jae hethang ngai y lyng. 5Säthaw üng lo hai aetang te phüng-a, käca känei angxynlyng na lä cai vi dy.
Isu Khrista üng mawsawng kähawi
6Nang lä hini kai üng täru te lo yng saite khimi na tea mätu dylä nang lä Isu Khrista üng mawsawng kähawi-a aelawng ai mang. Nang lä nang ma üng yng saite hai tängai kha mätu saite kähawi hai Säthaw ma nang tea aethaw py vi ai. 7Säthaw hai aesui y saite cäkae kangrüng na tea lä aehi tätang khü ba. Honi jüng-a Säthaw üng ngai te hai hing hethang nang lä aetu ba. 8Khimi lawngtä äma üng ätabung-a aethaw awng hethang aethaw aesa bärai te lä hawi vi. Tungaila Säthaw üng kängai-a awng ea hing hethang aethaw sa dylä hawiky vi. Honi kätyng aethaw sa te lä, hini älawngpre-a hing te hai, vaimaw mang tähang hing te lä ävang ting bärai vi. 9Vaihi kai ma thui saite lä lo mitang kha ae-y nae hawi ea yng king hethang aeteng khaw te lo na vi. 10Hini lo phüng-a, mä-ai lä hikä sa hethang aethaw sa ö te vi. Ätephüng-a mei nädylä mä-ai lä hing tätang saite Säthaw tea aethang khai te phüng-a vi. Äni lä khimi angxynlyng na üng Aeqangkung vi. Äni tea yng saite khimi na bung lä aeqang lyng pa te vi.
11Kai ma tärü pyng saite lo na yng saite khimi na tea mätu kha tängai hethang särilo hai thui pa. 12Nang lä khösäning na te phüng-a, ämi ma la mäthi y te awng hang sy ba. Nang lä älo aepe saite, hing saite, khimi kälang na tea bälung aevaw saite, yng saite, sa tämang y käla awng saite hai yng saite khimi na tähang aetu hai nae lawng sy ba. 13Kai tyng te khytä, Säthaw üng Caekäcai tea yng saite khimi na maw-a, phai pa, thui pa te hai mätu hethang kätü aela ba. 14Nang lä Muilaw Käcai ma py te sa kaw saite tea aedawng ba. Kangkawng üng mätawngky na ma nang qawng-a äkö thyng kha aetang ea Säthaw lä buisaw na üng lo hai-a, nang tea lä Muilaw Käcai üng sa kaw saite py pyng te vi dy. 15Hini kai tärü saite na aethaw aela kha sa ba. Honi na tea nang lä tängai khü ba. Tudylä khimi qütä ma nang üng ryng saite yng te tea nung haw ai. 16Nang üng hing saite hai mätu saite lo na tea lä sädi khai khü ba. Hini na tähang nang lä aethawsi y käla sa jawjaw ba. Hini kätyng nang sa dylä, nang hai nang üng lo tängai saite khimi na tea lä Säthaw ma aeqang vi ai.
5Yng saite na tea rui hethang kälu
1Nang qawng-a nawngmäcaw mätawngky lawngtä tea lä älo aethaw paitae hai pring pa hang. Äni tea lä nang üng äpä-ai kätyng tämö khai kha älo hai aepe pa. Nang qawng-a nade nawngmäcaw na tea lä äkangby na kätyng thui ba. 2Nawngmädi mätawngky na tea lä änä-awi na kätyng tämö khai kha nang ma qawng-a nade saite nawngmädi na tea lä ticaw na kätyng älo aepe ea bälung käcai hai thui ba.
3Säbawng kha mäcaw hethang amäjy awng y saite lömai nä-awi na tea lä tämö khai kha säbawng pa. 4Tungaila lömai nä-awi lawngtä tea caw nade na, y dylä kätö käteng awng dylä äni ce lä aely lengky te hai engthung khaw-a awng saite khimi na tea säbawng ea Säthaw üng kängai kätyng hing te mätü ö sy. Honi kätyng-a äni ce lä äma ce üng nä-awi pä-ai na hai kangsi kangjaw na tea säbawng te hai tärawitha haile tyng ö te vi dy. Äni ce hini kätyng sa ö te lä Säthaw tea kawng hai te vi. 5Nang ma säbawng hethang ngai saite lömai nä-awi lä äni tea säbawng hethang ämi la awng pa y. Honi kätyng nawngmädi lömai lä äma tea säbawng hethang tähang Säthaw tea kädüng kädang aetang jawjaw kha aethang khai te hai awng saite nawngmädi lawng he kae. 6Tungaila äma üng kängai xyng-a awng kha Säthaw hai aesui y-a awng saite nawngmädi lömai lä hing ngaila dü rüng te vi dy. 7Hini täru saite lo na yng saite khimi na tea la thui pa jo. Tudylä äni ce tea ämi lawngtä ma la sa tämang saite awng näkha cy haw y ai mang. 8Khimi lawngtä lä äma üng amäjy na tähang hai äma üng engthung khaw tea mäteng ma rui hethang ngai y dylä, äni lä Khrista tea yng y näkha mätü te vi. Honi khimi lä Khrista bung mäny y saite khimi qawng-a siky vi dy.
9Khösäning rui täru cang y saite nawngmädi lömai dylä, lömai na üng ämüng cae-u thung-a täbawi kha tärü sy. Äni lä äma üng nawngpaw lawngtä xyng hai cakhi-a awng hethang kae. 10Äni lä khimi ce tea säbawng saite khimi vi näte tea khimi kälang na ma lä mäny ö bawi vi. Honi lä caw nade na tea kähawi-a mäsang saite, angvüng angvaw na bung äma üng ing-a lady kha mäkung saite, yng saite na üng äkho na tea mäse saite, mätang saite na tea säbawng saite hai kälu kähawi angxynlyng na sa jawjaw hethang äni lä kae vi.
11Säning rui täru täkui üng lömai nä-awi na bung lä lömai na üng ämüng cae-u thung-a täbawi kha tärü pa ö hang. Äni ce lä nawngpaw nang haile tyng hethang bälung kaedawng awng dylä, äni ce lä Khrista üng kälu sa hethang tämang ö ai. 12Tukha äni ce lä angcü üng Khrista tea aedo saite älo täphra te phüng-a, Säthaw ma äni ce tea lä deng py vi ai. 13Hokä cang y, honi lömai nawngmädi käna na tea lä kangkawng ma mäcaw dylä, kälu sa ö y vi ai. Äni ce lä khimi ce ing qütä dawnghang ly tütü kha äma ce üng kätü tea bärawng ö te vi. Hokä äni ce lä aethaw käli na lawng te cang y, äni ce lä khimi ce phüng thui rungrang te hai khimi ce tea xhu hai saite älo na, hai äni ce thui he hawi y saite na phüng thui ö te vi. 14Tukätephüng-a lömai nä-awi säning käna na lä nawngpaw na nang haile ea caw nade na dang kha äma ce üng engthung na tea rui ö hethang kai lä mäci te vi. Tudylä mä-ai üng bälung kae-i na ma yng saite na tea cy hethang awng ö y ai. 15Lömai nawngmädi phütä na lä Säthaw te mang aekö haile te hai ma Setan angra tea hui ö te vi näte lä tüngkhaw vi dy. 16Yng saite nawngmädi na üng engthung-a nawngmädi lömai na awng dylä, äni ce lä honi na tea säbawng pa hethang kae. Kangkawng lä honi äma ce üng engthung na thung-a awng saite nawngmädi lömai na tea mäcaw hethang kae y. Tudylä kangkawng lä mitang khaw säbawng hethang ngai saite lömai na tea lä hawihai pailai säbawng haw ai mang.
17Kangkawng tea kähawi-a rui saite mätawngky na tea yng saite na lä tämö khai ea bälung aepy bärai te hai tangkae phawisae na hai säbawng ö hethang kae. Äni ce lä Säthaw üng angthang mätu ea thui te phüng-a, äni ce tea lä tämö khai hethang aeteng te vi. 18Caekäcai-a thung-a, “Caw aeti saite raebawi üng täbawng tea lä tämüng pa hang” näkha awng vi. Vai kälang mang-a awng saite losai haetä lä, “Kälu sa saite khimi lä äma üng sa te ävang na dang hethang aeteng vi” näkha awng te vi. 19Khimi lawngtä lä kangkawng mätawngky tea hunghö sa näkha cy dylä, tängai ö hang. Khimi lawng ne, lawng thungtä ma äni tea hunghö sa näkha thui xang ea ni tängai ö kae ba. 20Hunghö sa saite mätawngky tea lä yng saite angxynlyng na üng maw-a pring pa. Honi kätyng sa dylä, mätawngky kälang na lä hunghö sa hethang ri ö ai mang.
21Säthaw üng maw-a, Isu Khrista hai re saite Känipre üng angtawtha na üng maw-a, hini täru saite lo na tea täphü te awng y hethang hai, mimai kheng y hethang kai lä nang tea särilo hai thui khü te vi. 22Mätawngky sa hethang khimi lawngtä üng äqawng-a, nang üng äkö na thyng dawde hang ba. Tukädylä äni üng sa saite hunghö thung-a nang la qa te kätyng by kae dy. Nang ma ma hunghö sa y hethang sädi khai ba.
23Nang lä tui ma qaitä xyng nei hang. Nang lä naw leilae te hai äjo känaw awng te phüng-a, Cäpje tui äje cäcaw nei jo.
24Khimi phütä na üng hunghö sa te na lä aeny lyng te vi. Honi hunghö na tähang-a Säthaw lä äni ce tea deng py ai näte mäny haw vi. Tungaila khimi phütä na lä kangru mang-a hunghö sa ö te vi. Khimi kälang na lä honi hunghö tea kangkhüng mang-a lä nung ö ai. 25Hini kätyng-a, khimi phütä na üng kälu kähawi tea mäny praw haw te vi. Khimi kälang na lä kangru-a kähawi sa ngaila, kangkhüng mang-a lä khimi qütä ma mäny ö ai mang.
61Mawsawng qütä lä äma ce üng ingkung na tea tämö khai hethang kae. Tukä dylä Säthaw üng ämüng hai mä-ai üng mätu saite tea ämi ma la thui rungrang hethang dang y lyng. 2Ingkung na lä yng saite na dylä, äni ce lä Khrista phüng-a kangby jä-ai na lawng by vi dy näkha tämö khai y käla awng ö hang. Äni ce lä äma ce üng ingkung na tähang mawsawng kälu sa rae hethang mäteng ma kae ö te vi. Äni ce üng kälu hai-a ävang dang te khimi na lä yng saite na hai Khrista hai-a bälung aevaw saite na lawng ö vi dy. Hini älo na nang ma äni ce tea mätu kha mäci pa ö ba.
Kätüng y mätu saite särae na
3Khimi phütä na lä tüng y saite älo na mätu ö vi. Honi na lä mä-ai üng Areng Isu Khrista ma mätu saite älo mitang na hai aebäla te y. Kätüng mätu saite na lä Säthaw üng kängai hing saite na tea säbawng ö te vi. 4Kätüng y mätu saite khimi na lä äte la mäny y käla bälung leng ö te vi. Äni ce lä ae-e hethang älo bälang na phüng aejaw aemang saite tea ngai ö xüng te vi. Honi älo na lä pä-e saite, ae-e saite, khimi ce phüng thui rungrang saite, khimi kälang na phüng käsi dawng saite, hai lawng lawngtä teng lei y te aekäsi saite na lawng ö te vi. 5Hini kätüng y mätu saite särae na lä äma ce tingtawi ae-e hethang ngai jawjaw kha tüng te, tüng y te tea mäny haw y saite khimi na vi dy. Äni ce lä Säthaw phüng mätu saite lä tangkae dang hethang älang haetä vi näkha aedawng ö te vi.
6Tungaila mä-ai lä Säthaw üng kängai sa kha Säthaw ma py saite hai bälung kawng ea awng hethang mä-ai tähang hawiky te vi. 7Hini älawngpre-a mä-ai lä aepeng te kätü-a, äte haetä la nähai ö te y. Dü te kätü-a lä mä-ai hai mangtä äte haetä la nähai haw ö te y. 8Mä-ai tea aely ngai saite käca känei hai aekhu aena nae awng dylä, bälung kawng hethang kae. 9Tawngnang hethang ngai saite khimi na tea Setan lä hunghö sa hethang the pa vi. Äni ce lä kangthö na üng kängai hai ae-aw saite bälung phüng-a, mä-ai ma tea mätang bälai te hai Säthaw lä äni ce tea deng py vi ai. 10Tangkae phawisae tea bälung aevaw te lä käsi angxynlyng na üng älangdüng vi. Khimi phütä na lä tangkae dang hethang ngai phi te phüng-a, äma ce yng saite na tea kädephae ö te vi. Äni ce lä mä-ai ma tea aeteng hai thung te kätyng nawphi rung khytä sa ö te vi.
Pawlae ma kangkhüng üng täru saite lo
11Säthaw tea yng saite Timothe ä, nang lä Säthaw hai aesui te vi. Tukätephüng-a nang lä honi angxynlyng na tea aehi ba. Tukha käcüng saite, Säthaw üng kängai-a awng saite, yng saite, bälung aevaw saite, änawngsa saite hai bälung kähawi awng hethang nang lä aethaw aesa ba. 12Täre aety jawjaw saite reisae kähawi kätyng, nang lä Khrista tea yng jawjaw ba. Säthaw ma nang tea dungtäsa hing saite dang hai hethang ka te vi. Tudylä dungtäsa hing saite tea nang lä cakhi-a süng khü ba. Nang lä khimi ce maw-a Khrista tea yng saite phüng thui pyng te vi dy. 13Hing hethang äte angxynlyng na py saite Säthaw hai Pontia Pilata mätawngky üng maw-a älo mitang tho saite Isu Khrista üng maw-a, nang tea kai lä särilo thui te vi. 14Sa tämang y käla Säthaw üng särilo tängai ba. Tudylä mä-ai üng Areng Isu Khrista ly haile tyng y rytä lä, ämi ma la nang tea cy haw y ai mang. 15Säthaw ma üng khai rüng saite käni-a, Khrista lä ly haile ai. Säthaw lä bälaw hethang aeteng khaw saite lawngtä xyng awng te Sanphrang vi. Äni lä sanphrang na üng Sanphrang hai areng na üng Areng vi. 16Dungtäsa hing saite lawngtä xyng lä Äni vi. Ämi lawngtä ma la äteng-a ly haw y kaevang pheng saite thung-a Äni lä awng te vi. Äni bung lä ämi lawngtä ma la nung vai y, nung la nung haw y. Khimi ce ma Äni tea tämö khai ö kha Äma üng haidae lä dungtäsa awng jawjaw ai. Amen.
17Vaini älawngpre-a tawngnang saite khimi na tea bälung leng y hethang särilo hai thui pa. Äni ce lä äma ce üng tangkae na qawng-a ae-y y hethang thui pa. Tangkae lä la dawde haw te phüng-a vi. Honi jüng-a äni ce lä Säthaw tea ae-y hethang kae. Äni lä mä-ai kawng hethang angxynlyng na mäsai y käla, awngmang-a py te vi. 18Khimi ce tea säbawng hethang thui pa. Äni ce lä hawi saite kälu na sa hethang kae. Khimi ce tea mäsai y käla py hethang hai äma ce üng vyngsai na khimi kälang na tea bäri hethang äma ce üng ngai te kätyng äni ce tea mätu pa. 19Hini kätyng äni ce lä äma ce üng mawlang tähang vyngsai na mätung ö ai. Hini na lä äma ce üng hing hai hethang cakhi saite langdüng vi. Tudylä äni ce lä hing saite tätang dang haw ö vi ai.
20Timothe ä, Säthaw ma nang tea ae-y kha sa hethang py saite kälu tea kähawi-a rui ba. Säthaw hai aesui y saite lo, aetütü saite lo, ävang ting y saite lo na tea aehi ba. Säthaw phüng tea elekhei sa kha kätüng y mätu saite bälunghae te na näkha näsaite na hai nang lä älo aepe kha kätü byng hai hang ba. 21Khimi phütä na lä hini mätu saite tea tängai ö vi dy. Hini hai-a, äni ce lä Khrista tea yng saite kädephae ö te vi.
Säthaw üng tähang kähawi lä nang ce angxynlyng tea py jo sy.