PETERAE
angcü üng tärü saite cae
Angcü üng älo
Hini cae tärü saite kung ma lä äma tea Isu Khrista üng angtawtha Peterae näkha tui te vi. Peterae lä hini kätü-a säning käsa-a mätang bälai pa te phüng-a, äma üng yng saite lä cakhi te vi. Hini cae lä A.D. 64 khösäning-a tärü te daila awng ai. Honi kätü-a Peterae lä mätawng phi te daila awng ai dy. Caekäcai käkaw phütä na ma honi cae tärü te kätü-a, Peterae lä Rom märü-a awng te thüng-a daila awng ai näkha dawng ö te vi. Peterae lä hini cae Asia pre cäpi-a awng saite Judae Khristen na hai ceng kälang na tähang tärü te pa te vi. Honi mityng-a awng saite Khristen kangkawng na lä Pawlae hai-a lawng saite na vi. Hini cae üng mawlang kaedawng lä mä-ai ma üng yng saite phüng-a, mätang bälai saite hai sakälö khü saite Khristen na tea aethaw py pa hethang vi. Peterae ma hini cae thung-a lä mätang bälai saite lo tärü leilae te vi. Peterae üng äbaeni mawlang kaedawng lä Säthaw üng beram kanghö na tea mäcaw pa hethang phüng vi.
Äphüng äkädawiky
Angcü üng älo 1:1-2
Säthaw üng aeqang saite phüng aedawng haile tyng hai saite 1:3-12
Käcai-a hing hethang mäci pa saite 1:13-2:10
Mätang bälai saite kätü-a Khristen na tea awng saite kälu käsawng na 2:11-4:19
Khristen na üng aemäneng saite hai kälu käsawng sa saite 5:1-11
Kangkhüng üng cibai sa te lo 5:12-14
1Peterae üng kawng saite lo
1Hini cae lä, Isu Khrista üng angtawtha, kai, Peterae te üng vi. Ponta khö, Kalatia khö, Kapadokia khö, Asia pre cäpi hai Bethunia khö-a angvüng angvaw na kätyng aehi sangxang saite Säthaw üng khimi na tea kai lä cae tärü te vi. 2Jangni üng hai ma Pä-ai Säthaw lä nang ce bung mäny kha re ea Äma üng Muilaw Käcai ma nang ce tea cai hai te vi dy. Tukätephüng-a nang ce lä Isu Khrista üng lo tängai kha äma üng äthi hai-a nang ce lä cai ö te vi dy. Säthaw ma nang ce tea lä tähang kähawi hai awngneng saite cungrü-a py sy.
Dungtäsa hing te tähang aethang khai saite
3Mä-ai üng Areng Isu Khrista üng Pä-ai Säthaw tea kawng te lo thui ö si. Äni lä mä-ai tea tengxyng y bäheng te phüng-a, Isu Khrista bung kädü thung üng mäning haile te hai-a mä-ai tea aepeng saite kangthae py vi dy. Tukätephüng-a mä-ai lä aethang khai saite kanghing awng ö te vi. 4Säthaw ma mä-ai tähang lä Känipre ingthawng khai pa te vi dy. Honi lä pra haw y, täphra haw y, la ja haw y. 5Kangkhüng üng käni-a, Säthaw lä äma üng aeqang saite täphawng te kätü khytä, nang ce üng yng saite phüng-a äma üng haidae hai-a nang ce bung aedung pa vi dy.
6Tukätephüng-a nang ce lä tengxyng y anghawtho ö lawi ba. Nang ce lä vaihi älang cawngkhang na hai, mätang bälai saite hai säny saite aeting te phüng-a, tänaetä tähang bälungsi ö te vi. 7Hini käny saite na lä nang ce üng yng saite tätang vi näte tea mätü ai. Khimi ce lä pra haw saite sui tea mäteng ma mai hai säny kha mäcai ö te vi. Nang ce üng yng saite lä hini sui qawng-a ävang tingky te vi. Tukätephüng-a nang ce üng yng saite lä mätang bälai te hai-a käny dylä, nang ce üng yng saite lä cakhi ö vi ai. Nang ce lä hini kätyng yng dylä, Isu Khrista ly haile te kätü-a Säthaw ma nang ce tea bälaw vi ai. Tukha äni lä nang ce tea phung-ang hai tämö käleng khai saite na py vi ai. 8Nang ce lä Khrista bung nung vai y ngaila, äni tea bälung aevaw ö te vi. Vaihi nang ce lä äni bung nung y ngaila, äni tea yng ö te vi. Nang ce üng anghawtho saite lä phung-ang hai kawi kha nang ce lä thui lei haw king ö te y vi. 9Ätephüng-a mei nädylä, Säthaw lä nang ce bung aeqang te vi. Honi aeqang saite lä nang ce üng yng saite mawlang kaedawng vi dy.
10Buisaw na lä hini aeqang saite phüng mäny hethang ngai bärai kha khüsälü-a kheng ö te vi. Säthaw ma nang ce tea py hethang tähang kähawi phüng äni ce lä buisaw lo thui ö te vi dy. 11Äni ce lä yng saite na bung Säthaw aeqang ai näte kätü mäny hethang aethawsa kha aetu ö te vi dy. Äni ce thung-a awng saite Khrista üng Muilaw lä äma üng mätang bälai saite hai phung-ang phüng thui rüng pa te vi dy. Honi lä Muilaw Käcai ma äni ce tea thui saite kätü vi dy. 12Äni ce üng kälu lä äma ce tähang y käla, nang ce tähang vi näte Säthaw ma hini buisaw na tea täphawng pa te vi dy. Känipre üng mätaw saite Muilaw Käcai üng haidae hai-a, Angthang Kähawi thui saite angtawtha na te mang hai vaihi nang ce lä thai pyng saite phüng na, äni ce lä thui ö te vi dy. Hini phüng na tea lä Känipre üng angtawtha na mäteng ma mäny hethang ngai ö te by vi.
Käcai-a hing hethang re saite
13Tukätephüng-a nang ma ce tea aeküng kha kälu tähang nang ma ce üng bälung kaedawng na tea lä aerü rüng ö lawi. Isu Khrista ly haile te kätü-a, nang ce tea tähang kähawi py ai näte nang ce lä cungrü-a aethang khai jawjaw ö lawi. 14Nang ce lä älo tängai saite Säthaw üng caw nade na kätyng hing hethang kae. Vaihi nang ce lä nang ma ce üng ngaiphi tüng y saite bälung kätyng hui ö hang. Honi lä Säthaw bung nang ce mäny y te kätü-a, sa saite kae. 15Honi jüng-a nang ce bung re saite Säthaw lä cai te kätyng nang ce sa saite angxynlyng na la cai ö lawi. 16Tukätephüng-a Caekäcai thung-a, “Kai lä cai te phüng-a, nang ce la cai ö” näkha näte vi.
17Säthaw ma khimi ce tea tärae cei te kätü-a lä mimai kheng te y. Äni lä khimi qütä üng sa saite kätyng tärae cei vi ai. Nang ce aetang te kätü-a, hini Säthaw tea lä, “Mä-ai üng Pä-ai ä” näkha thui ö te vi. Tukätephüng-a nang ce lä hini älawngpre-a awng te thüng-a, Säthaw tea ri kha tämö khai ö. 18Nang ce lä nang ma ce üng kangsi kangjaw te üng dang saite ävang käting y hing saite älang üng lawi hai hethang Säthaw ma py saite tea mäny ö te vi. Äni ma py saite ävang lä pra haw saite sui hai tangkae kätyng y. 19Nang ce bung aelawi hai hethang, Säthaw lä Isu Khrista üng ävang ting saite äthi py te vi dy. Khrista lä angvawi awng y saite beram caw kätyng lawng te vi dy. 20Säthaw lä älawng sa y te kälang üng hai ma Khrista bung lä re pyng te vi dy. Hini kangkhüng kätü-a, äni lä Khrista bung nang ce tähang täphawng pa te vi dy. 21Nang ce lä Khrista hai-a Säthaw tea yng ö te vi. Säthaw ma Khrista bung lä kädü thung üng mätha haile tyng kha äni tea phung-ang py pa vi dy. Tukätephüng-a nang ce lä Säthaw tea yng kha aethang khai tätang ö te vi.
22Nang ce üng lo mitang tängai saite hai-a, nang ce lä käcai na-a lawng ö te vi dy. Tukha nang ce lä nang ma ce üng yng saite äpy kälang na tea bälung aevaw khaw ö te vi. Lawng lawngtä tea bälung mäke hai bälung aevaw ö lawi. 23Nang ce lä hing kha dungtäsa Säthaw üng lo hai-a aepeng kangthae ö te vi. Hini aepeng kangthae saite lä tänaetä ma pra saite y. Nang ce lä dungtäsa hing saite Kung üng caw nade na lawng ö te vi. 24Tukätephüng-a Caekäcai thung-a,
“Khimi angxynlyng na lä aeca kung kätyng vi.
Äni ce angxynlyng üng ämaw äcae lä tänaetä ma rawng raw saite daithung üng äpa na kätyng vi.
Aeca kung lä cei kha äpa na lä qui te vi.
25Tungaila Säthaw üng lo lä dungtäsa awng te vi.”
Hini älo lä khimi ce ma nang ce tea thui saite Angthang Kähawi vi dy.
21Nang ma ce üng käsi sa saite angxynlyng na, kaeling kaemae sa saite, käjüng aesa saite, pä-e saite hai khimi ce phüng käsi prawng saite angxynlyng na tea lä khaisö ö lawi. 2Kangthae aepeng saite äby na lä känö tui aehe ö te vi. Hini kätyng Muilaw Käcai ma py saite känö tui tätang tea nang ce lä aehe ö jo. Honi känö tui tätang nei te hai-a Säthaw üng aeqang saite cungrü pyng te kätü-a, nang ce lä ryng haw ö te vi. 3Areng lä hawi vi näte vaihi nang ce lä kähawi mäny khe ö te vi dy.2:3 Sam 34:8
Hing saite lungphö hai re saite khimi na
4Nang ce lä Säthaw Ingkäcai üng hing saite lungphö Khrista tea ly ö te vi. Khimi ce lä äni bung khaisö ngaila, Säthaw ma äni bung lä re kha ävang käting-a mäthi te vi. 5Nang ce la hing saite lungphö na kätyng by vi. Säthaw lä äma üng Muilaw Käcai hai-a Ingkäcai sa hethang nang ce bung tawng sy. Hini Ingkäcai-a, nang ce la mäthykung käcai na kätyng kälu sa ö by vi ai. Nang ce lä Muilaw Käcai ma mäci saite kätyng löci na sa ö vi ai. Isu Khrista hai-a Säthaw lä nang ce üng löci na tea täla haw vi ai. 6Caekäcai thung-a thui te lä, “Kai lä ävang ting bärai saite lungphö tea re kha Zaion märü-a ing aenyng nae kätyng khai ai. Äni tea yng saite khimi na lä manila aethawsi ö y vi ai” näkha näte vi.
7Hini lungphö lä yng saite nang ce tähang ävang ting te vi. Tungaila yng y saite khimi na tähang Caekäcai thung-a tärü te lä, “Ing sa saite kung na ma hini lungphö tea khaisö ngaila, aely lengky saite lungphö-a bälawng vi dy” näkha awng te vi.
8Caekäcai thung-a, “Hini lungphö lä khimi ce tea äkho hai mäthui khy hai kha äni ce bung täbakhu hai ö vi ai” näkha tärü te la awng te vi. Äni ce lä Säthaw üng lo tängai y te phüng-a, äkho mäthui khy ö te vi. Honi lä äni ce tähang Säthaw üng aely kängai vi dy.
9Tungaila nang ce lä Säthaw ma re saite khimi na, Sanphrang üng mäthykung na, cai saite khimi na hai, Säthaw hai aesui saite khimi na vi. Äni ma nang ce bung lä käving thung üng käthoja kha äma üng cangxei saite kaevang thung-a khai vi dy. Tukätephüng-a nang ce lä Säthaw üng cangxei saite kälu phüng tea thui haw ö te vi. 10Jangni-a nang ce lä Säthaw üng khimi na y ngaila, vaihi lä Äni üng khimi na vi. Jangni-a lä Säthaw üng bäheng saite mäny y ngaila, vaihi nang ce lä Äni üng bäheng saite tea mäny ö te vi dy.
Säthaw üng mawsawng na
11Bälung aevaw saite äpy na ä, hini älawngpre-a nang ce lä angvüng angvaw na kätyng awng kha ngaiphi tüng y saite na tea lä hui ö hang. Säthaw ma nang ce tea py te hing saite tea hini ngaiphi tüng y saite na lä aety jawjaw ö te vi. 12Säthaw tea mäny y saite khimi na thung-a nang ce lä cy y rung khytä hing ö. Tudylä äni ce lä nang ce tea sa tämang hethang cy ngaila, nang ce üng kälu kähawi na tea lä nung haw ö ai. Hini hai-a, äni ce lä Areng ly haile te käni-a Säthaw tea bälaw haw ö ai.
Aenae awng saite na tea tämö khai ö
13-14Areng üng tähang-a, aenae awng saite qütä na üng lo tea tängai ö ba. Pre pyng saite sanphrang na hai äni ma khai saite mätawngky na tea tämö khai ö. Sanphrang ma äni ce bung käsi sa saite na tea lä dengpy kha kähawi sa saite na tea lä bälaw hai hethang khai pa te vi. 15Kälu kähawi na sa saite lä Säthaw üng aely kängai vi. Hokä sa saite hai-a, nang ce lä äte la mänykaw y saite khimi na üng älo aetütü te na tea lä sitäri hai haw ö te vi. 16Nang ce lä khimi kaelawi na kätyng hing ö lawi. Tungaila nang ce üng kaelawi saite na tea lä hunghö täphung hethang tawng ö hang. Säthaw üng mawsawng na kätyng nang ce lä hing ö ba. 17Nang ce lä khimi qütä tea tämö khai ö. Yng saite äpy na tea bälung aevaw ö ba. Säthaw tea ri kha sanphrang tea tämö khai ö.
Khrista üng mätang bälai saite
18Mawswang tangnae na ä, nang ce lä nang ma ce üng ingkung na üng lo na tängai kha äni ce tea tämö khai ö. Nang ce lä bäheng kha hawi saite ingkung na üng älo tea tängai te qaitä y, rang saite ingkung na üng lo na tea la tängai hethang kae ö te by vi. 19Nang ce lä Säthaw üng aely kängai mäny te phüng-a, sa tämang y käla mätang bälai ö dylä, Säthaw lä nang ce tea tähang kähawi py vi ai. 20Nang ce lä sa tämang te phüng-a, nang ma ce üng ingkung ma bo dylä, ämi ma la nang ce tea bälaw y lyng. Tungaila nang ce lä kähawi sa te phüng-a, mätang bälai saite tea khung dylä, Säthaw lä kawng hai vi ai. 21Säthaw lä nang ce tea hini kätyng sa hai hethang re te vi dy. Khrista lä nang ce tähang mätang bälai hai pa te vi dy. Äni lä nang ce tähang aetu nae vi. Äni üng kho lawi na tea nang ce lä bäjui hethang kae. 22Äni lä hunghö sa vai te y. Äni lä kaeling kaemae lo thui vai te y vi. 23Khimi ce ma äni tea käsi prawng te kätü-a, äni lä äte lo käsi haetä la mäthang haile tyng te y vi. Äni lä mätang bälai te kätü-a, khimi ce ma aethüng hai hethang lo thui te y vi. Tungaila äni lä käcüng-a tärae cei saite Säthaw tea aethang khai te kae. 24Mä-ai üng hunghö na phüng-a, Khrista äma lä thinglang qawng-a mätang bälai pa te vi dy. Tukätephüng-a mä-ai lä khimi kädü kätyng hunghö sa hethang kae ö y dy. Mä-ai lä cüng saite tähang hing ö hethang kae. Äni üng tämaw na hai-a, nang ce üng tämaw na lä thae king ö te vi dy. 25Nang ce lä lolang tämang saite beram na kätyng vi. Tungaila vaihi nang ce lä Beram rui saite hai nang ce üng hing saite angxynlyng na tea aedung hai saite Kung tea aekö haile tyng ö te vi dy.
3Nawngpui na hai nawngpaw na phüng
1Hini kätyng nawngmädi na ä, nang ce lä nang ma ce nawngpaw na üng lo tea tängai hethang kae. Ätephüng-a mei nädylä, äni ce thung üng phütä Säthaw üng lo tea yng y dylä, nang ce üng hing saite hai-a äni ce lä yng haw ö vi ai. Nang ce lä äni ce tea yng hai hethang älo bälangtä hai la aepe he aely ngai y lyng. 2Äni ce lä nang ce üng hing saite käcai hai Säthaw tea tämö khai saite na nung ö ai.
3Nang ma ce üng ämaw äcae hawiky hethang äsang na lä kanglai pro-a aesa ö hang. Sui na hai ävang ting bärai saite kä-o nitha la aemäthy ö hang. 4Honi jüng-a, nang ce lä bälung kätüng, bälung äkäneng hai awngneng saite hai-a aemai y saite äcae kähawi-a awng ö vi ai. Hini lä Säthaw üng maw-a tengxyng y ävang ting bärai te vi. 5Jangni-a Säthaw tea aethang khai saite nawngmädi käcai na lä hini kätyng äma ce tea aemäthy ö te vi. Äni ce lä änawngpaw üng lo na tea tängai ö vi dy. 6Honi kätyng Sara lä Abraham üng lo tängai kha änawngpaw tea ingkung näkha thui vi dy. Nang ce lä ri y käla kälu kähawi sa dylä, Sara üng cänung na lawng ö te vi.
7Nawngpaw na ä, hini kätyng nang ma ce hai mangtä awng saite nawngpui na phüng mänykaw kha khüsälü-a dawng khü ö lawi. Nang ce kätyng aethaw awng y saite nawngpui na tea äpy na kätyng tämö khai ö. Ätephüng-a mei nädylä Säthaw lä nang ce hai nang ma ce üng nawngpui na tea hing saite kangthae mangtä py ö vi ai. Hini kätyng nang ce sa dylä, nang ce üng aetang saite na tea Säthaw lä mäthang vi ai.
Khristen na üng mätang bälai saite
8Kangkhüng-a, kai thui hethang ngai te lä, nang ce lä bälung kaedawng mangtä awng kha aebäheng tingtawi ö lawi. Lawng lawngtä tea Khristen äpy na kätyng bälung aevaw ö. Aebäheng kha aemäneng saite bälung na awng ö ba. 9Nang ce lä käsi sa saite khimi na tea rawithung tha ö hang. Nang ce tea täking saite na tea lä täking haile tyng ö hang. Hini jüng-a, nang ce lä äni ce tea tähang kähawi py pa ö. Ätephüng-a mei nädylä Säthaw lä nang ce bung hini kätyng sa hai hethang re te vi dy. Tudylä, Säthaw lä nang ce tea tähang kähawi py ai mang. 10Caekäcai thung-a,
“Nang ce lä hini älawngpre-a kähawi-a awng hethang ngai kha kawng hethang ngai ö dylä,
käsi thui kha kaeling kaemae na sa hethang kae y.
11Nang ce lä käsi sa jawjaw y käla kähawi sa ö hethang kae.
Nang ce lä lawng lawngtä awngneng hethang aethawsa he kae.
12Ätephüng-a mei nädylä, Areng lä khimi käcüng na tea rui kha
äni ce üng aetang saite na tea tängai pa te vi.
Tungaila käsi sa saite khimi na tea Areng lä elekhei sa pa te vi.”
13Nang ce ma kähawi sa hethang ngai dylä, ämi la nang ce tea mätang bälai saite py y lyng. 14Tungaila nang ce lä kätüng sa saite phüng-a mätang bälai ea mäteng ma, Säthaw lä nang ce tea tähang kähawi py ai. Säthaw bung mäny y saite na tea lä ri ö hang. Bälung mawng ö hang. 15Nang ce lä bälung thung-a Khrista tea Areng kätyng cäphaw ö. Khimi ce ma nang ce tea aethang khai saite phüng na düng dylä, khimi qütä tea mäthang hethang awng rüng jawjaw ö ba. Tungaila tämö khai kha älo käneng hai mäthang ö ba. 16Käsi kähawi mäny saite nang ce üng bälung tea käcai-a khai ö. Tudylä, nang ce üng Khrista leithung hui te phüng-a aeme aeqa saite kähawi tea käsi thui saite khimi na lä saerae ö vi ai. 17Nang ce üng mätang bälai saite tea Säthaw üng aely kängai-a bälawng dylä, käsi sa te phüng-a nang ce üng mätang bälai aeting saite qawng-a kähawi sa kha mätang bälai aeting saite lä hawiky te vi. 18Mä-ai üng hunghö angxynlyng na tähang Khrista lä qengtä dü pa te vi dy. Äni lä nang ce bung Säthaw tea nähai hethang cüng saite lawngtä lä cüng y saite na tähang dü pa te vi dy. Khimi ce ma äni üng ätabung tea bädü ngaila, Säthaw lä äni bung Muilaw Käcai hai-a mäning haile tyng pa vi dy. 19Muilaw Käcai hai-a, äni lä ly kha angqaw khaw-a Säthaw ma thawng thung-a pä-ung saite na tea Angthang Kähawi thui pa vi dy. 20Honi lä cangkhawng-a Säthaw üng lo tängai y saite khimi na üng muilaw na vi. Honi thüng-a Novae üng tui sangphaw sa te kätü-a Säthaw lä änawngsa kha aering te vi. Tui sangphaw thung üng khimi äje cäcaw lawng täjaetä xyng bung lä Säthaw ma tui cäqing üng aeqang haw pa vi dy. 21Hini tui lä baptismae phüng tea thui te äsäny vi dy. Vaihi Säthaw ma nang ce tea lä baptismae hai-a aeqang te vi. Baptismae üng tui lä nang ce üng ätabung üng pawprae saite na tea mäse te y. Nang ce lä baptismae la te hai käsi kähawi mäny saite bälung käcai hai-a Säthaw tea älo aedo ö te vi. Honi baptismae phüng-a Isu Khrista üng aetha haile tyng saite hai-a Säthaw lä mä-ai bung aeqang te vi. 22Khrista lä Känipre-a paw kha Säthaw üng bangtang mang-a aety vi. Äni lä Känipre üng angtawtha na, Känipre-a awng saite haidae hai, aenae angxynlyng na tea pyng te vi dy.
4Säthaw tähang hing saite
1Khrista lä äma üng ätabung mätang bälai te phüng-a, mä-ai la äni üng bälung kaedawng kätyng awng hethang aerü rüng ö. Ätephüng-a mei nädylä, äma üng ätabung-a mätang bälai saite khimi lä hunghö hai aesui jawjaw te y vi dy. 2Vaihi üng hai älawngpre-a nang ce üng hing saite kätü-a, nang ma ce üng ngaiphi tüng y saite kätyng awng hethang kae y. Säthaw üng aely kängai tähang hing ö lawi. 3Jangni-a nang ce lä Säthaw bung mäny y saite khimi na kätyng awng te kätü tea awng mang-a bärawng ngae ö te vi dy. Nang ce lä täkübäjang sa saite na, ngaiphi tüng y-a hui saite na, bärui ngae saite na, pawi sa kha nei, ca ngae saite na, Säthaw ma känyng saite mimi tea cäphaw saite na kätyng awng ö te vi dy. 4Nang ce lä vaihi kähawi-a hing y kha Säthaw bung mäny y saite khimi na hai vaihi aesätawng y te phüng-a, äni ce lä cangxei ö te vi dy. Tukätephüng-a äni ce lä nang ce tea käsi prawng ö te vi. 5Tungaila äni ce lä dü saite hai hing saite khimi angxynlyng na tea tärae cei hethang awng rüng saite Säthaw tea äma ce üng hing saite phüng lä thui hethang kae ö vi ai. 6Tukätephüng-a vaihi dü pyng saite na tea äni ce lä Angthang Kähawi thui pyng ö te vi dy. Tukha Säthaw lä khimi angxynlyng na kätyng äni ce tea äma ce üng älawngpre-a awng te thüng-a, sa te kätyng tärae cei vi ai. Tungaila äni ce lä Muilaw Käcai hai-a, Säthaw hai mangtä dungtäsa hing haw ö ai.
7Hini älawngpre teng hethang kätü lä aenai vi dy. Tukätephüng-a nang ma ce tea aeküng kha canglailing te hai awng ö. Tudylä nang ce lä aetang haw ö ai. 8Äte angxynlyng na üng aely lengky te lä, lawng lawngtä tea bälung aevaw tätang saite vi. Ätephüng-a mei nädylä, nang ce üng bälung aevaw saite lä awng mang te hunghö na tea bälawi haw te vi. 9Jawsi saite lo thui y käla, nang ma ce tingtawi ingthung-a lady ö. 10Khimi qütä tea lä Säthaw ma py te sakaw saite cawngkhang na awng qi ö te vi. Nang ce üng sakaw saite na lä khimi kälang na tea säbawng hethang kähawi-a rui khü saite khimi na kätyng tawng ö qi hethang kae. 11Thuikaw saite khimi na lä Säthaw üng angthang thui hethang kae. Khimi kälang tea säbawng saite khimi na lä Säthaw üng aethaw hai-a säbawng hethang kae. Tudylä, nang ce sa saite angxynlyng na hai khimi ce lä Isu Khrista hai-a Säthaw tea bälaw haw ö ai. Äni üng haidae hai phung-ang lä dungtäsa awng jawjaw sy. Amen.
12Yng saite rawijae na ä, nang ce lä mätang bälai saite hai-a nawphi saite käny te phüng tea lä cangxei ö hang. Nang ce tea langsei-a tyng saite na tea lä dawng ö hang. 13Tungaila Khrista üng mätang bälai saite thung-a, nang ce lä qa te phüng-a, anghawtho ö ba. Tudylä Khrista üng phung-ang täphawng te kätü-a, nang ce lä anghawtho rae haw ö vi ai. 14Nang ce lä Khrista leithung hui saite na lawng te phüng-a, khimi ce ma käsi prawng dylä, anghawtho ö. Säthaw üng phung-ang awng saite Muilaw Käcai lä nang ce hai mangtä awng vi näte nang ce lä hini hai-a mäny haw ö te vi. 15Nang ce mätang bälai dylä, nang ce lä khimi bädü saite na, bäru saite na, khimi lawng lawngtä ma käsi sa saite na hai khimi kälang na tea xhu hai saite na phüng-a mätang bälai-a lawng hai ö hang. 16Tungaila nang ce lä Khristen lawng te phüng-a, mätang bälaica dylä, saerae ö hang. Nang ce lä Khrista üng ämüng awng te phüng-a, Säthaw tea bälaw ö.
17Säthaw üng ingthung-a tärae cei saite kätü aetawng hethang lä aenai vi dy. Mä-ai tea tärae cei saite aetawng dylä, Säthaw üng Angthang Kähawi yng y saite khimi na lä tähang si ö vi ai. 18Caekäcai thung-a, “Khimi käcüng tähang aeqang hethang rae dylä, Säthaw lo tängai y saite khimi na hai hunghö sa saite khimi na lä makä awng ai mei” näkha awng te vi.
19Tukätephüng-a, Säthaw üng aely kängai phüng-a, mätang bälai saite khimi na lä kähawi sa jawjaw ö hethang kae. Äni ce lä äma ce bung sa saite Säthaw tea cungrü-a ae-y ö hethang kae. Säthaw lä äma üng aedo saite lo kätyng sa te vi.
5Kangkawng üng mätawngky na
1Kai ma khekhe lä kangkawng üng mätawngky vi kha nang ce thung üng kangkawng mätawngky na tea mäci te vi. Kai lä Khrista üng mätang bälai saite na tea nung khe kha thui te vi. Säthaw ma Khrista üng phung-ang täphawng te kätü-a, hini phung-ang thung-a kai lä qa vi ai. 2Beram rui saite na kätyng Säthaw ma nang ce tea py saite beram kanghö na lawng saite äma üng khimi na tea rui ö ba. Honi lä nang ce üng kälu lawng te phüng-a y, Säthaw üng aely kängai phüng-a kawng te bälung hai nang ce lä sa ö. Nang ce lä tangkae dang hethang tähang y ngaila äni ce tea säbawng hethang ngai tätang ö te phüng-a vi. 3Nang ce üng beram kanghö na tea pyng hethang aethawsa ö hang. Tungaila nang ce tea Säthaw ma a saite beram kanghö na üng aetu nae-a lawng ö ba. 4Beram rui te kung kälengky Khrista ly haile te kätü-a, nang ce lä phung-ang leng bärai saite ävang käting dang ö ai. Hini üng ang saite lä manila aemai y vi ai.
5Honi kätyng, nang ce anghyngli na ä, nang ma ce üng mätawngky na üng älo na tängai hethang kae. Nang ce lä bälung aemäneng kha awng ö. Caekäcai thung-a, “Säthaw lä aethaw saite khimi na tea elekhei sa te vi. Tungaila aemäneng saite khimi na tea lä tähang kähawi py te vi” näkha nä vi. 6Nang ce lä äte angxynlyng na sa haw saite Säthaw üng maw-a, bälung aemäneng ö. Tudylä äma üng khai saite kätü tyng tea lä nang ce bung mäsang vi ai. 7Nang ce üng bälung mawng saite angxynlyng na äni tea a ö. Ätephüng-a mei nädylä äni lä nang ce üng ngai saite na py hethang ngai te phüng-a vi.
8Nang ce lä aeküng kha canglailing te hai awng ö. Nang ce üng täre Setan angra lä lawng lawngtä tea täphra hethang ämaw ähawng sa saite xangsi täkai kätyng aevi kha mäqang te vi. 9Nang ce üng yng te cakhi kha äni tea aedung ö. Ätephüng-a mei nädylä hini älawngpre angxynlyng na üng yng saite äpy na lä nang ma ce kätyng mätang bälai saite na tea nang ce lä mäny ö te vi. 10Nang ce lä tänaetä mätang bälai pyng-a, tähang kähawi angxynlyng na üng Säthaw lä nang ce tea yng te cakhi hai kha aethaw awng hai ea cungrü hai ö vi ai. Äni lä Isu Khrista hai-a äma üng dungtäsa phung-ang thung-a qa hethang nang ce bung re te vi dy. 11Äni lä dungtäsa haidae awng jawjaw sy. Amen.
Peterae üng cibai sa te lo na
12Kai lä yng khü saite Khristen kangby jä-ai kätyng mäthi saite Saila ma säbawng te hai-a, hini cae kädawi nang ce tea tärü te vi dy. Kai lä nang ce tea aethaw py hethang tärü te vi. Hini lä Säthaw üng tähang kähawi tätang vi näkha kai lä thui he ngai te vi. Nang ce lä hini tähang kähawi tea yng khü ö ba.
13Babilon märü-a awng saite Säthaw ma re saite kangkawng lä nang ce üng ticaw kätyng vi. Äni lä nang ce tea cibai sa te lo na thui te vi. Kai üng cäpaw khe kätyng awng saite Marka ma la nang ce tea cibai sa te lo thui by vi. 14Bälung aevaw saite hai lawng lawngtä tea kawng te lo aethui ö.
Awngneng saite lä Khrista hai aesui saite nang ce angxynlyng na tea awng sy.