JOHAN
angcü üng tärü saite cae
Angcü üng älo
Hini cae lä Zebede üng cäpaw Isu Khrista üng angtawtha Johan ma tärü te vi. Äni lä Johan üng Angthang Kähawi hai Aetüng hai saite Cae tärü te kung vi. Hini cae tea lä Johan Ephesi märü-a awng te thüng A.D. 90 khösäning-a tärü te daila awng ai näkha Caekäcai kaw saite phütä ma dawng ö te vi. Johan lä hini cae tea Khristen kangkawng cawngkhang na tähang tärü pa te vi. Tärü te üng mawlang kaedawng lä bälitä awng te vi. Äni lä angcü-a yng saite na tea kaesyng y mätu te särae na tähang sädi py pa ea äni ce üng kaesyng y mätu saite tea makä sa kha elekhei sa haw ai mei näkha älang mätü pa te vi. Äbaeni-a lä yng saite na hunghö sa haw y hethang älang kähawi mätü pa te vi. Ämäthung üng lä Khristen na lä Isu tea yng saite cakhi kha dungtäsa hing saite dang tätang vi dy näkha aethaw py pa te vi. Äbäli üng lä äni ce anghawtho saite awng hai rae hethang ngai te vi.
Äphüng äkädawiky
Angcü üng älo 1:1-4
Kaevang hai käving 1:5-2:29
Säthaw üng caw nade na hai Setan angra üng caw nade na 3:1-24
Kätüng hai aesyng y saite 4:1-6
Bälung aevaw hethang kae saite 4:7-21
Bäja saite hai yng saite 5:1-21
1Kähing py saite Angthang Kähawi
1Angcü üng hai awng kha kähing py saite älo phüng kai ce ma nang ce tähang tärü ö te vi. Honi tea kai ce lä thai kha ämi hai kheng ea nung haw kha äkö hai aela khe ö saite vi. 2Honi älo lä khimi-a aelawng kha khimi angxynlyng na ma äni tea nung haw ö te vi. Kai ce lä nung pyng kha nang ce tea thui ö te vi. Honi dungtäsa kähing py saite lawngtä lä angcü üng hai ma awng kha mä-ai üng Pä-ai Säthaw hai mangtä awng te vi. Vaihi Säthaw lä äni bung mä-ai tea mätü te vi dy. 3Kai ce nung kha thai saite na nang ce tea la thui te ö by vi. Hokä ea ni mä-ai lä mangtä rawijae aesa hethang dang ö ai. Mä-ai lä Pä-ai Säthaw hai Äcäpaw Isu Khrista hai rawijae aesa ö saite na vi. 4Mä-ai üng anghawtho bärai saite bälung kawi hai haw hethang hini tea kai ce lä nang ce tea tärü ö te vi.
Kaevang thung-a awng saite
5Hini lä Isu Khrista te üng kai ce ma thai saite Angthang nang ce tea thui te vi. Säthaw lä Kaevang vi. Äni tea lä käving haetä la awng y. 6Mä-ai lä äni hai mangtä rawijae sa ea awng näkha thui ngaila käving-a awng kha sa tämang saite awng te vi rawng nädylä, lo mitang hai-a hing y kha kaeling kaemae thui ö saite na kae vi. 7Tungaila Säthaw lä kaevang-a awng te kätyng mä-ai la kaevang-a awng nädylä, mä-ai lä lawng lawngtä tea rawijae sa ö te vi dy. Säthaw üng Cäpaw Isu üng äthi lä mä-ai üng hunghö angxynlyng na tea mäcai pang te vi dy.
8Mä-ai lä hunghö awng y näkha thui dylä, mä-ai ma tea kaeling kaemae sa ö te kae. Säthaw üng lo mitang lä mä-ai üng bälung thung-a awng y. 9Mä-ai üng hunghö na Säthaw tea täphawng dylä äni lä ae-y khü kha cüng saite phüng-a mä-ai üng hunghö na tea bälawi vi ai. Mä-ai üng kätüng y sa saite angxynlyng na tea la mäcai ai. 10Mä-ai lä hunghö sa y näkha thui dylä, Säthaw lä kaeling kaemae sa saite Kung vi näkha mä-ai lä thui ö te vi dy. Säthaw üng lo mitang lä mä-ai üng bälung thung-a awng y lyng.
2Mä-ai tea säbawng saite Isu Khrista
1Kai üng caw nade na ä, hunghö sa y hethang hini cae thung-a nang ce tea kai lä tärü te vi. Tungaila khimi lawngtä hunghö sa dylä, Pä-ai maw-a mä-ai üng jüng-a mäkai pa hethang lawngtä awng vi. Äni lä cüng saite Isu Khrista vi. 2Mä-ai üng hunghö na tea Säthaw ma bälawi hethang Khrista äma lä löci sa saite mawi-a aelawng vi dy. Äni lä mä-ai üng hunghö qaitä tähang kae y, hini älawngpre-a awng saite khimi angxynlyng na üng hunghö na tähang la löci aesa saite by vi.
3Mä-ai ma Säthaw üng Ubädi na tängai dylä, mä-ai lä äni bung mäny vi näsaite tea ae-y khü ö te vi. 4Khimi lawngtä lä äni üng Ubädi tea tängai y käla ma kai lä “Säthaw tea mäny vi” nädylä kaeling kaemae thui te kae. Älo mitang lä äni tea awng y lyng. 5Tungaila mä-ai lä äni üng Ubädi tea tängai dylä, mä-ai lä Säthaw tea bälung aevaw te kawi ö vi dy. Mä-ai lä Säthaw hai bungtä awng saite tea hini kätyng mäny haw khü ö te vi. 6Mä-ai lä Säthaw hai bungtä awng dylä Isu Khrista kätyng awng hethang kae.
Ubädi kangthae
7Kai üng bälung aevaw saite rawijae na ä, kai lä nang ce tea Ubädi kangthae tea tärü te y lyng. Hini lä angcü üng hai awng pyng saite Ubädi kangrüng kae. Honi Ubädi lä nang ce ma thai pyng saite na kae. 8Tungaila kai lä nang ce tea Ubädi kangthae la tärü te vi. Honi Ubädi üng tüng saite lä Khrista üng hing saite hai nang ce üng hing saite hai-a khimi ce ma nung haw ö te vi. Ätephüng-a mei nädylä käving hai sa tämang saite lä di kha kaevang tätang lä aevang sälö rüng te vi.
9Khimi lawngtä lä Säthaw üng kaevang kätyng awng te dy näkha äma üng rawijae na tea esäre dylä, käving thung-a awng te kae vi rawng. 10Khimi lawngtä lä äma üng yng saite rawijae tea bälung aevaw dylä, kaevang-a hing te vi dy. Tukätephüng-a äni üng hing saite thung-a lä hunghö sa hai hethang awng te y lyng. 11Tungaila khimi lawngtä lä rawijae tea esäre dylä, käving thung-a awng te kae vi rawng. Äni lä käving thung-a aeke kha mamang-a ly te mei näte mäny y vi. Ätephüng-a mei nädylä käving lä äni tea ämi kangjö kätyng lawng hai pa te phüng-a vi.
12Kai üng bälung aevaw saite caw nade na ä, Säthaw ma nang ce üng hunghö na lä Khrista üng phüng-a bälawi vi dy näte phüng kai lä nang ce tea tärü te vi. 13Pä-ai na ä, angcü üng hai awng saite Areng bung nang ce lä mäny ö te phüng-a, nang ce tea kai lä cae tärü te vi. Anghyngli na ä, nang ce lä Setan angra tea bäja ö te phüng-a nang ce tea kai lä cae tärü te vi.
14Kai üng caw nade na ä, nang ce lä mä-ai üng Pä-ai Säthaw tea mäny ö te phüng-a, nang ce tea kai lä cae tärü te vi. Pä-ai na ä, angcü üng awng saite Areng bung mäny ö te phüng-a nang ce tea kai lä cae tärü te vi. Anghyngli na ä, nang ce lä aethaw awng kha Säthaw üng lo lä nang ce üng bälung thung-a awng ea Setan angra tea bäja ö te phüng-a kai lä cae tärü te vi.
Hini älawngpre tea lä bälung aevaw ö hang
15Hini älawngpre hai aesui saite na tea lä bälung aevaw ö hang. Khimi lawngtä lä hini älawngpre tea bälung aevaw dylä, mä-ai üng Pä-ai Säthaw tea bälung aevaw haw y lyng. 16Älawngpre hai aesui saite angxynlyng na lä ngaiphi tüng y saite na, ämi hai nung kha bädö saite na, mä-ai ma üng ingthawng lathawng na hai bälung aethaw saite na lä mä-ai üng Pä-ai Säthaw hai aesui ö te y lyng. Hini lä älawngpre hai aesui saite na kae. 17Älawngpre hai honi üng awng saite na tea ngaiphi saite na lä la ja saite na kae vi. Tungaila Säthaw üng aely kängai sa saite khimi lä dungtäsa hing vi ai.
Khrista üng täre kälengky
18Kai üng bälung aevaw saite caw nade na ä, kangkhüng üng kätü lä tyng vi ai dy. Khrista üng täre kälengky lä tyng ai näte tea nang ce lä thai ö pyng te vi dy. Vaihi la Khrista üng täre na lä awng mang-a tho rüng pyng te vi dy. Tukätephüng-a kangkhüngky üng kätü lä aenai vi näsaite tea mä-ai lä mäny ö te vi. 19Hini khimi na lä mä-ai thung üng thoja ö te vi. Tätang khaw-a nädylä äni ce lä mä-ai hai aesui ö te y lyng. Äni ce mä-ai hai aesui dylä, mä-ai hai mangtä awng jawjaw ö vi ai. Tungaila mä-ai thung üng tho kha ly ja vi dylä, mä-ai hai aesui te y näte tea mätü ö te vi dy.
20Tungaila Khrista lä äma üng Muilaw Käcai2:20 Käri lo-a lä Muilaw Käcai situi kätyng bälawng te näkha awng vi. tea nang ce tähang py kha nang ce angxynlyng na lä lo mitang tea mäny ö king te vi dy. 21Kai ma nang ce tea cae tärü te lä, lo mitang tea nang ce mäny ö y te phüng-a y vi. Tungaila nang ce lä honi tea mäny ö te phüng-a, kai lä cae tärü te vi dy. Kaeling kaemae lä lo mitang te üng tho y näte nang ce lä mäny ö te phüng-a vi.
22Kaeling kaemae sa saite kung lä ämi mei. Isu lä Mesia y vi näkha thui saite kung vi. Äni lä Khrista üng täre kälengky vi dy. Äni lä Pä-ai Säthaw hai Äcäpaw Isu Khrista bung aephae te vi. 23Äcäpaw bung aephae saite kung lä Äpä-ai hai bungtä awng haw y lyng. Isu lä Säthaw üng Cäpaw näkha cüngpra-a thui dylä äni lä mä-ai üng Pä-ai Säthaw hai bungtä kae vi dy.
24Angcü üng hai thai saite angthang na tea nang ce lä nang ma ce üng bälung thung-a aedawng khü ö ba. Honi angthang tea bälung thung-a khaimy dylä, nang ce lä Äcäpaw ni Äpä-ai hai bungtä-a lawng jawjaw ö vi ai. 25Honi lä Khrista ma mä-ai tea py hethang älo aedo saite vi dy. Äni lä “Kai lä nang ce tea dungtäsa hing saite py ai” näkha älo aedo te vi.
26Nang ce tea lang tämang hai hethang the saite khimi na üng phüng na kai lä tärü te vi. 27Nang ce tea lä Khrista ma Muilaw Käcai py te vi dy. Honi Muilaw Käcai lä nang ce üng bälung thung-a awng jawjaw ö te vi. Tukätephüng-a nang ce tea lä lo mitang phüng khimi kälang na ma mätu hethang ngai y dy lyng. Muilaw Käcai ma nang ce tea angxynlyng phüng na mätu te vi dy. Äni üng mätu saite na lä mitang khaw te vi. Kaeling kaemae thui te y lyng. Muilaw Käcai üng mätu saite nang ce lä tängai kha Khrista hai bungtä awng ö lawi.
28Kai üng bälung aevaw saite caw nade na ä, Khrista hai bungtä awng jawjaw ö ba. Hokä dylä Khrista ly haile tyng te käni-a, mä-ai lä äni üng maw-a ri hethang hai saerae hethang la ngai y dy lyng. 29Khrista lä cüng vi näsaite tea nang ce lä mäny ö vi. Tukätephüng-a kätüng-a sa saite khimi angxynlyng na lä äni üng caw nade na näte nang ce lä mäny ö haw te vi.
3Säthaw üng caw nade na
1Mä-ai üng Pä-ai Säthaw lä matangtä mä-ai tea bälung aevaw mei näte aedawng ö lawi. Säthaw lä mä-ai bung äma üng caw nade na näkha mäthi te vi. Mä-ai lä äni üng caw nade na tätang khaw ö vi dy. Hini älawngpre hai aesui saite khimi na ma mä-ai bung mäny y te lä Säthaw tea mäny ö y te phüng-a vi. 2Kai üng bälung aevaw saite rawijae na ä, vaihi mä-ai lä Säthaw üng caw nade na ö vi. Tungaila vaimaw mang-a mä-ai lä ätemakä aelawng ai mei näte mäny ö te y rawng. Tungaila Khrista tyng haile te kätü-a, mä-ai lä äma kätyng aelawng ai näte mä-ai lä mäny ö te vi. Ätephüng-a mei nädylä äni üng tätang khaw lawng saite tea mä-ai lä nung ö ai. 3Khrista tea aethang khai rüng saite khimi angxynlyng na lä Khrista lä caiping te kätyng mä-ai ma tea mä-ai ma aemäcai hethang kae.
4Hunghö na sa saite khimi qütä lä Säthaw üng Ubädi tea elekhei sa te vi. Ätephüng-a mei nädylä hunghö lä Säthaw üng Ubädi tea elekhei sa te vi. 5Khrista lä mä-ai üng hunghö na tea nähaija hethang tyng te tea nang ce lä mäny ö te vi. Äni lä äte hunghö la sa te y lyng. 6Khrista hai bungtä awng saite khimi lä hunghö tea sa jawjaw y lyng. Tungaila hunghö sa jawjaw saite khimi lä Areng bung nung la nung vai y, mäny la mäny vai y saite khimi vi.
7Kai üng caw nade na ä, nang ce tea ämi ma la the haw y hang sy. Käcüng tea sa saite khimi na ni Säthaw maw-a khimi käcüng kätyng aelawng ö te vi. Hini khimi na lä Säthaw maw-a Khrista kätyng cüng saite na vi dy. 8Hunghö na sa jawjaw saite na lä Setan angra hai aesui saite na vi. Ätephüng-a mei nädylä Setan angra lä angcü üng hai ma hunghö na sa te phüng-a vi. Tukätephüng-a Säthaw üng Cäpaw lä Setan angra üng kälu na tea täphra hethang ly te vi dy.
9Säthaw üng caw nade na lawng saite lä hunghö na tea sa jawjaw ö y lyng. Säthaw üng hing saite lä äni ce äthung-a awng te phüng-a vi. Säthaw lä äni ce üng Äpä-ai vi te phüng-a hunghö na sa haw jawjaw y dy lyng. 10Tukätephüng-a Säthaw üng caw nade na hai Setan angra üng caw nade na näte tea lä hini kätyng-a mäny haw ö vi. Kätüng sa y saite khimi na, yng saite rawijae na tea bälung aevaw y saite na lä Säthaw üng caw nade na y lyng.
Lawng lawngtä tea bälung aevaw ö
11Nang ce angcü üng hai ma thai saite angthang lä lawng lawngtä tea bälung aevaw ö hethang kae näsaite vi. 12Äkangby Abela bung bädü kha Setan hai aesui saite Ka-i-na kätyng aelawng ö hang. Ätephüng-a Ka-i-na ma äkangby tea bädü mei nädylä, äni lä kähawi y na sa kha äkangby lä kätüng na sa te phüng-a vi.
13Kai üng rawijae na ä, älawngpre üng khimi na ma nang ce tea esäre dylä cangxei ö hang. 14Mä-ai lä mä-ai ma üng yng saite rawijae na tea bälung aevaw te phüng-a dü saite üng hai hing saite mang-a aekae saite tea mäny ö vi. Mä-ai ma rawijae na tea bälung aevaw y saite khimi na lä kädü üng haidae täkui-a awng te ö kae vi rawng. 15Mä-ai ma üng rawijae na tea esäre saite lawngtä lä khimi bung bädü ö te kätyng kae. Khimi bung bädü saite lawngtä tea lä dungtäsa kähing awng y näte nang ce lä mäny ö te vi. 16Isu Khrista lä äma üng hing saite mä-ai tähang py te phüng-a, bälung aevaw saite lä äte mei näte tea mä-ai lä mäny haw ö te vi. Mä-ai la rawijae na tähang mä-ai üng hing saite tea py hethang kae ö te by vi. 17Khimi lawngtä lä mä-ai ma tawngnang kha rawijae na mätang te tea säbawng hethang ngai y te vi rawng dylä, Säthaw tea bälung aevaw näkha thui haw ö te y lyng. 18Kai üng bälung aevaw saite caw nade na ä, mä-ai üng bälung aevaw saite lä älo hai ma qaitä aecyng haw y. Mitang khaw saite hai kähawi na sa kha mä-ai üng bälung aevaw saite na tea mätü ö si ba.
Säthaw maw-a bälung ae-y khü saite awng ö
19Honi kätyng mä-ai lä tätang khaw lawng lawngtä tea bälung aevaw qi dylä, mä-ai lä khimi ce tea kätüng mätü saite Säthaw hai aesui saite tea mäny ö ai. Hini hai-a Säthaw üng maw-a mä-ai lä bälung awngneng saite awng ö vi ai. 20Mä-ai üng käsi kähawi mäny saite bälung ma mä-ai tea cy raw dylä, Säthaw lä mä-ai üng käsi kähawi mäny saite bälung qawng-a lengky kha äte angxynlyng na tea mäny te vi. 21Kai üng bälung aevaw saite rawijae na ä, mä-ai üng käsi kähawi mäny saite bälung na hai mä-ai ma tea cy raw y dylä, mä-ai lä Säthaw maw-a bälung ae-y khü saite awng ö vi dy. 22Mä-ai lä Säthaw üng Ubädi na tea tängai kha äni üng bälung tea kawng hai vi te phüng-a, mä-ai üng mäkai saite angxynlyng na Säthaw te üng dang ö vi. 23Hini Säthaw üng Ubädi-a äma üng Cäpaw Isu Khrista vi näte yng kha lawng lawngtä tea mä-ai lä bälung aevaw hethang kae. 24Äni üng Ubädi na tea tängai saite na lä Säthaw hai bungtä awng kha Säthaw la äni ce hai bungtä awng te by vi. Säthaw ma mä-ai tea py saite Muilaw Käcai hai-a Säthaw lä mä-ai hai bungtä awng saite tea mä-ai lä mäny haw ö te vi.
4Buisaw kätüng hai kaeling
1Kai üng bälung aevaw saite rawijae na ä, Säthaw üng Muilaw lä kai tea awng näsaite khimi qütä üng älo na tea lä yng ö hang. Khimi lawngtä lä Säthaw üng Muilaw hai thui mei, thui y mei näte tea mäny hethang nang ce lä kähawi-a aedawng khü kha säny hethang kae ö te vi. Buisaw kaeling awng mang saite na lä älawngpre mityng qütä-a tyng kha awng ö te phüng-a vi dy. 2Khimi lawngtä ma Säthaw üng Muilaw hai thui saite tea lä hini kätyng mäny haw te vi. Isu Khrista lä hini älawngpre üng khimi-a aelawng vi dy näkha thui saite khimi lä Säthaw üng Muilaw hai thui te vi. 3Tungaila Isu Khrista lä hini älawngpre-a Säthaw te üng ly te näkha thui y saite khimi na lä Säthaw üng Muilaw awng ö y lyng. Hini lä Khrista üng täre kälengky üng haidae vi. Äni lä ly ai näte angthang nang ce lä thai ö te vi dy. Hini älawngpre-a äni lä vaihi kätü-a mäteng ma awng rüng te vi dy.
4Kai üng bälung aevaw saite caw nade na ä, nang ce lä Säthaw hai aesui saite na vi te phüng-a, buisaw kaeling na tea bäja ö vi dy. Ätephüng-a mei nädylä nang ce üng äthung-a awng saite Muilaw Käcai lä hini älawngpre-a pyng saite Setan üng haidae qawng-a lengky te phüng-a vi. 5Buisaw kaeling na lä hini älawngpre hai aesui ö saite na vi. Tukätephüng-a äni ce ma thui saite na tea lä Säthaw bung mäny y saite na ma thui saite kätyng ö by vi. Säthaw bung mäny y saite khimi na lä äni ce üng mätu saite na tea tängai ö vi. 6Mä-ai lä Säthaw üng khimi na vi. Säthaw bung mäny saite na lä mä-ai üng mätu saite lo na tea tängai ö vi. Säthaw hai aesui y saite khimi na lä mä-ai üng mätu saite na tea tängai ö y. Hini kätyng khimi lawngtä lä lo mitang tea Muilaw hai-a thui te, y dylä khimi ce tea kaeling kaemae sa hethang Setan ma py saite haidae hai-a thui te tea mä-ai lä mäny haw ö te vi.
Säthaw lä bälung aevaw saite kung
7Kai üng bälung aevaw saite yng saite rawijae na ä, bälung aevaw saite lä Säthaw te üng tho te phüng-a, mä-ai lä lawng lawngtä tea bälung aevaw tingtawi ö si ba. Khimi lawngtä lä äma üng yng saite rawijae na tea bälung aevaw vi dylä Säthaw üng caw nade-a lawng kha äni lä Säthaw bung mäny vi. 8Äpy na tea bälung aevaw y saite lä Säthaw tea mäny y. Ätephüng-a mei nädylä Säthaw lä bälung aevaw saite Kung lawng te phüng-a vi. 9Säthaw lä äma tea lawngtä xyng awng saite Äcäpaw bung hini älawngpre-a mätaw te lä mä-ai tea äni ma matangtä bälung aevaw mei näsaite tea mätü te vi dy. Honi Äcäpaw hai-a mä-ai lä dungtäsa cungrü saite kähing dang ö te vi dy. 10Hini mitang khaw-a bälung aevaw saite lä mä-ai üng Säthaw tea bälung aevaw saite tea y vi. Äni ma mä-ai tea bälung aevaw saite lä Äcäpaw bung mä-ai üng hunghö na bälawi hai hethang mätaw saite vi.
11Kai üng bälung aevaw saite rawijae na ä, Säthaw lä mä-ai tea honi kätyng bälung aevaw dylä mä-ai la lawng lawngtä tea bälung aevaw ö hethang kae. 12Säthaw bung ämi la nung vai te y. Tungaila mä-ai lä lawng lawngtä tea bälung aevaw ö vi nädylä, Säthaw lä mä-ai hai bungtä awng te vi dy. Äni üng bälung aevaw saite lä mä-ai üng äthung-a cungrü hai ö te vi.
13Säthaw lä mä-ai tea äma üng Muilaw bung py te phüng-a, äni lä mä-ai hai bungtä awng kha mä-ai la äni hai bungtä awng saite tea mä-ai lä mäny haw ö te vi. 14Mä-ai üng Pä-ai Säthaw lä hunghö ma pyng saite khimi qütä tähang Äcäpaw bung Aeqangkung kätyng hini älawngpre-a mätaw saite tea nung kha mä-ai lä thui ö te vi. 15Isu lä Säthaw üng Cäpaw vi näkha thui dylä, mä-ai lä Säthaw hai bungtä awng ö te vi. Säthaw la mä-ai hai bungtä awng te by vi. 16Tukha Säthaw ma mä-ai bung bälung aevaw saite tea mä-ai lä mäny khe kha yng ö te vi.
Säthaw lä bälung aevaw saite Kung vi. Khimi lawngtä ma Säthaw hai khimi kälang na tea bälung aevaw jawjaw dylä Säthaw hai bungtä äni lä awng te vi. Säthaw la äni hai bungtä awng te by vi. 17Äni üng bälung aevaw saite lä mä-ai thung-a cungrü hai ö te vi dy. Tukätephüng-a hini älawngpre-a awng saite khimi angxynlyng na tea Säthaw ma tärae cei hethang Käni-a mä-ai lä äni tea ri hethang awng y vi dy. Isu Khrista lä hini älawngpre-a hing te kätyng mä-ai la hing ö te by vi. 18Säthaw tea bälung aevaw saite khimi lä Säthaw üng tärae cei saite tea ri te y lyng. Cungrü-a bälung aevaw saite lä ri saite angxynlyng na tea mäthoja te vi. Säthaw ma tärae cei te tea ri saite khimi lä äma üng bälung aevaw saite cungrü te tea mäny te y vi.
19Säthaw lä mä-ai tea angcü üng hai ma bälung aevaw te phüng-a, mä-ai la Säthaw hai khimi kälang na tea bälung aevaw ö he kae. 20Khimi lawngtä ma, “Kai lä Säthaw tea bälung aevaw vi” näkha thui kha äma üng yng saite rawijae na tea esäre te vi rawng nädylä äni lä kaeling kaemae sa te lawngtä kae vi. Nung haw saite äma üng rawijae na tea bälung aevaw y saite khimi lä, nung haw y saite Säthaw tea la bälung aevaw haw y lyng. 21Khrista lä mä-ai tea hini Ubädi py te vi dy. Säthaw tea bälung aevaw saite khimi lä äma üng yng saite rawijae na tea la bälung aevaw hethang kae te by vi.
5Säthaw üng Cäpaw tea yng saite
1Isu lä Mesia näkha yng saite khimi qütä na lä Säthaw üng caw nade na vi. Äpä-ai bung bälung aevaw saite khimi qütä lä äcaw na tea la bälung aevaw ö bawi te by vi. 2Mä-ai lä Säthaw tea bälung aevaw kha äni üng Ubädi na tängai dylä, Säthaw üng caw nade na tea bälung aevaw tätang te vi näkha mäny ö te vi. 3Mä-ai lä Säthaw tea bälung aevaw tätang vi nädylä, Äni üng Ubädi na tea tängai ö te vi. Säthaw üng Ubädi na lä rae te y lyng. 4Ätephüng-a mei nädylä Säthaw üng caw nade na qütä lä hini älawngpre üng hawi y saite na tea bäja haw ö te phüng-a vi. Mä-ai lä Isu Khrista tea yng te phüng-a, hini älawngpre üng hawi y saite na tea bäja haw ö te vi dy. 5Älawngpre üng hawi y saite na tea bäja saite lä ämi mei. Isu lä Säthaw üng Cäpaw vi näkha yng saite khimi xyngtä ni hini älawngpre üng hawi y saite na tea bäja haw te kae.
Areng Isu üng phüng thui saite na
6Isu Khrista lä hini älawngpre-a ly kha Johan ma äni tea tui hai baptismae py pa vi dy. Isu lä tui hai baptismae la te cang y, honi pyng-a Isu Khrista üng dü saite kätü-a, äthi tho te vi.5:6 Käri Caekäcai-a lä Isu lä tui hai äthi hai-a ly te vi. Honi na lä tüngkhaw vi näkha Muilaw Käcai lä mä-ai tea mätü pa te vi. Ätephüng-a mei nädylä Muilaw Käcai lä khimi ce tea mitang khaw saite tea mätü jawjaw te vi. 7Isu üng mitang khaw saite angthang tea mä-ai mäny haw hethang thui saite äsäny äthungtä awng vi. 8Muilaw Käcai ma mä-ai hai älo aepe kha Johan lä Isu tea tui hai baptismae py ea Isu üng dü te kätü-a lä äthi tho te vi. Honi kätyng Muilaw Käcai, tui lä hai äthi äsäny-a aelawng kha honi äthungtä na lä mä-ai tea mätü saite mangtä kae. 9Mä-ai lä khimi ce üng thui saite angthang na tea thai kha yng ö saite na vi. Tungaila Säthaw üng thui saite angthang lä honi qawng-a lengky vi. Ätephüng-a mei nädylä Säthaw lä äma üng Cäpaw phüng thui khe te phüng-a vi. 10Säthaw üng Cäpaw tea yng saite khimi lawngtä lä honi angthang tea tätang khaw vi näkha äma üng bälung thung-a mäny te vi. Tungaila Säthaw tea yng y saite khimi lä Säthaw ma kaeling kaemae sa te kae näkha thui te vi. Ätephüng-a mei nädylä Säthaw lä äma üng Cäpaw phüng thui te tea äni lä yng y. 11Hini lä Säthaw ma thui khe saite angthang vi. Säthaw lä mä-ai tea dungtäsa hing saite py vi dy. Honi hing saite lä Äcäpaw hai-a dang haw te kae. 12Säthaw üng Cäpaw hai bungtä awng saite khimi lä dungtäsa kähing dang te vi dy. Äcäpaw hai bungtä awng y saite khimi lä dungtäsa kähing dang y lyng.
Dungtäsa hing saite
13Säthaw üng Cäpaw tea yng saite nang ce tähang kai lä hini cae na hai tärü te vi dy. Tukätephüng-a nang ce lä dungtäsa kähing dang näte tea mäny khü ö hethang vi. 14Mä-ai lä Säthaw tea ae-y khü haw ö te vi dy. Tukätephüng-a Säthaw üng aely kängai hai-a ätete na mäkai dylä, mäkai saite angxynlyng na tea tängai pa saite bung mä-ai lä mäny haw ö te phüng-a vi. 15Mä-ai mäkai saite angxynlyng na tea Säthaw lä tängai vi näte mäny dylä, mäkai saite angxynlyng na Äni lä mä-ai tea py ai näsaite tea mä-ai lä mäny ö khü vi.
16Khimi lawngtä äma üng yng saite rawijae lä Säthaw ma dü te khytä dengpy y saite hunghö tea sa te nung dylä, äni lä Säthaw tea aetang hethang kae. Dü hai saite hunghö sa y saite na tähang hai-a Säthaw lä honi khimi tea hing saite py ai. Dü hai saite hunghö lä awng vi. Honi hunghö sa saite khimi tea hunghö üng lawi hai hethang aetang pa näkha kai lä thui te y lyng. 17Sa tämang saite angxynlyng na lä hunghö vi. Tungaila Säthaw ma dü te khytä dengpy y saite hunghö la awng te vi.
18Säthaw üng caw nade na lä hunghö tea sa jawjaw y te mä-ai lä mäny ö te vi. Säthaw üng Cäpaw lä äni ce bung aedung hai pa te phüng-a Setan lä honi khimi tea käsi sa haw y lyng.
19Mä-ai lä Säthaw üng caw nade na vi näte hini älawngpre üng khimi angxynlyng na tea Setan ma pyng ngaila mäny ö te vi.
20Säthaw üng Cäpaw lä hini älawngpre-a ly kha mä-ai tea mänykaw saite py te vi dy. Tukätephüng-a Säthaw tätang tea mä-ai lä mäny haw ö te vi. Mä-ai lä äni üng Cäpaw Isu Khrista hai bungtä awng te phüng-a, vaihi mä-ai lä Säthaw tätang hai bungtä awng ö te by vi. Hini lä Säthaw tätang vi. Äni lawngtä xyng ni khimi ce tea dungtäsa kähing py haw te kae.
21Tukätephüng-a kai üng caw nade na ä, mimi na tea lä cäphaw y hethang nang ce lä sädi khai ö.