1 Korin

KORIN

kangkawng tea angcü üng Pawlae tärü saite cae

Angcü üng älo

Korin märü lä pangle pyng-a awng te vi. Kaepai sa te hawi bärai kha tawngnang bärai saite märü vi. Tungaila honi märü üng khimi na lä deirei kha täkübäjang sa ö te vi. Angtawtha Pawlae lä äbaeni Angthang Kähawi thui hethang khölawng tho te kätü-a, äni phüng-a Korin kangkawng lä awng te vi. Pawlae lä A.D. 55 khösäning Ephesi märü-a awng te kätü-a hini cae tärü te daila awng ai. Honi Korin märü-a awng saite khimi na lä cae kaw phi kha bälung leng bärai ö te vi. Äni ce lä älo aepekaw bärai saite na tea ngai ö phi te vi. Tukätephüng-a kangkawng thung üng phütä lä älo aepekaw phi saite angtawtha kälang na üng älo tea Pawlae üng thui te lo qawng-a tängaiky te phüng-a, kangkawng-a aetäphü ö te vi. Pawlae üng cae tärü te mawlang kaedawng lä Korin märü kangkawng üng aetäphü saite hai täkübäjang sa saite na tea mäcai pang hethang vi.

Äphüng äkädawiky

Angcü üng älo 1:1-9

Kangkawng-a aetäphü saite na 1:10-4:21

Täkübäjang sa y saite hai ingthung phüng 5:1-7:40

Khristen na hai ceng kälang 8:1-11:1

Kangkawng üng reitae hai cäphaw saite na 11:2-14:40

Khrista kädü thung üng aetha haile saite hai yng saite na üng aetha haile saite 15:1-58

Judae khö-a awng saite Khristen na tähang khai aecö saite tangkae na 16:1-4

Pawlae üng khölawng phüng na hai cibai sa saite lo na 16:5-24

Angcü üng lady te lo

¹Hini cae lä kai, Pawlae, hai mä-ai üng yng saite kangby jä-ai Sothene ni ma nang ce tea tha saite vi. Isu Khrista üng angtawtha lawng hai hethang Säthaw lä äma aely kängai kätyng-a kai bung re vi dy.

²Korin märü-a awng saite Säthaw üng kangkawng, Säthaw ma Isu Khrista hai-a cai hai kha Säthaw üng khimi käcai-a Isu Khrista hai bungtä mäthi saite nang ce tea hini cae kai lä tärü te vi. Mityng qütä mä-ai üng Areng Isu Khrista tea cäphaw saite khimi angxynlyng na tähang hini kätyng sa te vi. Khrista lä äni ce hai mä-ai üng Areng vi.

³Mä-ai üng Pä-ai Säthaw hai Areng Isu Khrista ma nang ce tea tähang kähawi hai awngneng saite py sy.

Khrista hai-a dang saite tähang kähawi na

⁴Kai lä nang ce tähang Säthaw tea kawng te lo thui jawjaw vi. Ätephüng-a mei nädylä Säthaw lä Isu Khrista hai-a nang ce tea tähang kähawi py te phüng-a vi. ⁵Nang ce lä Khrista hai bungtä te phüng-a, Säthaw lä nang ce tea ngai saite angxynlyng na cungrü-a py pyng te vi dy. Säthaw lä nang ce tea äma üng Angthang Kähawi khimi kälang na tea thuikaw saite hai bälunghae saite angxynlyng na py te vi dy. ⁶Hini hai-a kai ce ma thui saite Khrista üng Angthang Kähawi lä mitang vi näte Säthaw lä nang ce tea mätü te vi dy. ⁷Nang ce lä bälung aethaw awng bärai te hai mä-ai üng Areng Isu Khrista tyng haile te kätü tea aering ö te vi. Nang ce aering ö te kätü-a, Muilaw Käcai hai aesui kha sakaw saite angxynlyng na tea lä Säthaw ma py te vi dy. ⁸Kangteng khytä yng te cakhi haw hethang nang ce tea Säthaw lä säbawng vi ai. Tukätephüng-a mä-ai üng Areng Isu Khrista tyng haile te kätü-a lä, ämi lawngtä ma la nang ce tea hunghö awng näkha cy haw y vi ai. ⁹Säthaw lä nang ce bung mä-ai üng Areng, äma üng Cäpaw Isu Khrista hai mangtä kangby jä-ai lawng hai hethang re pyng vi dy. Säthaw lä äma üng aedo saite älo kätyng sa te vi.

Kangkawng aetäphü saite

¹⁰Kai üng kangby jä-ai na ä, mä-ai üng Areng Isu Khrista ma kai tea äma üng aenae hai thui hethang py vi dy. Nang ce lä lawng lawngtä ae-e ö hethang kae y dy lyng. Kangkawng thung-a aetäphü hethang kae y vi dy. Nang ce lä bälung mangtä, dawng saite la mangtä awng ö lawi näkha kai lä nang ce tea mäci khü te vi dy. ¹¹Kangby jä-ai na ä, nang ce lä lawng lawngtä aejaw aemang saite na phüng, kai tea Kälaw-i engthung üng na ma thui pyng vi dy. ¹²Kai ma thui hethang ngai te lä, nang ce thung üng lawngtä ma, “Kai lä Pawlae üng äkähui vi,” Kälang lawngtä ma lä, “Kai lä Apolo üng äkähui vi.” Äkälang lawngtä ma, “Kai lä Peterae üng äkähui vi” näkha thui vi. Khimi kälang lawngtä lä, “Kai lä Khrista üng äkähui vi” näkha thui ö vi. ¹³Khrista bung lä täphü sangxang ö te vi mei. Kai, Pawlae, lä nang ce bung aeqang hethang thinglang qawng-a dü te y. Khimi ce ma nang ce tea Pawlae üng ämüng hai baptismae py te y lyng.

¹⁴Kai lä Krispus hai Kaju änini tea xyng baptismae py te phüng-a, Säthaw tea kawng te lo thui te vi. ¹⁵Tukätephüng-a ämi la, “Pawlae üng äkähui lawng hethang äni üng ämüng hai kai ce lä baptismae dang te vi” näkha thui haw y lyng. ¹⁶Kai lä Stephana hai äni üng engthung na tea la baptismae py khaw te vi dy. Khimi kälang na tea baptismae py te tea lä kai sämai haw y vi dy. ¹⁷Khrista lä baptismae py hai hethang kai bung mätaw te y. Äni üng Angthang Kähawi khimi ce tea thui hai hethang kai bung mätaw te vi dy. Kai lä Angthang Kähawi thui te thüng-a, khimi ce üng bälungkähae lo hai-a thui te y lyng. Kai ma hini kätyng thui dylä, Khrista üng thinglang qawng-a dü saite angthang lä haidae awng haw y lyng.

Säthaw üng bälungkähae

¹⁸Khimi phütä na lä Khrista üng thinglang qawng-a dü saite angthang tea kangthö lo na kae näkha dawng ö vi. Hini khimi ce tea lä Säthaw ma täphra vi ai. Tungaila Säthaw ma aeqang saite mä-ai tähang, hini angthang lä Säthaw üng haidae awng vi. ¹⁹Caekäcai thung-a tärü te lä,

“Bälunghae saite awng näkha aedawng saite khimi na üng bälunghae saite tea lä kai ma täphra ai.

Mänykaw saite khimi na üng mänykaw saite na tea la kai ma täkhüja ai” näkha awng vi.

²⁰Bälunghae saite na phüng tea mä-ai lä ätemakä thui haw ö ai mei. Judae na üng ubädi mänykaw saite na phüng tea mä-ai lä ätemakä thui haw ö ai mei. Hini älawngpre-a älo aepekaw bärai saite na phüng mä-ai lä äte mäny haw ö mei. Hini älawngpre khimi ce üng bälunghae saite lä aetütü kae näkha Säthaw ma mätü te vi.

²¹Säthaw üng bälunghae saite mawlang kaedawng hai-a khimi ce lä äma ce üng bälunghae saite hai manila Säthaw tea mäny haw ö y näkha Säthaw lä aedawng khü te vi. Säthaw üng mawlang kaedawng lä mä-ai thui saite Khrista üng bälunghae y te Angthang tea yng saite khimi na bung äni ma aeqang saite na tea näte vi. ²²Judae khimi na lä yng hethang cangxei saite na mäkai ö vi. Käri khimi na lä bälunghae saite kaedawng na tea ha ö te vi. ²³Tungaila kai ce lä thinglang qawng-a bädü saite Khrista üng Angthang tea thui ö vi. Judae khimi na lä hini Angthang tea thai hethang ngai ö y. Ceng kälang khimi na lä hini Angthang tea aetütü kae näkha dawng ö vi. ²⁴Tungaila Säthaw lä Judae khimi phütä na hai ceng kälang khimi phütä na tea äma üng khimi na lawng hethang re pyng vi dy. Hini khimi ce lä Khrista üng Angthang thai kha yng te kätü-a, Säthaw üng haidae hai bälunghae saite lä Khrista vi näte tea äni ce lä mäny ö vi dy. ²⁵Khimi phütä na lä thinglang qawng-a dü saite Khrista üng angthang tea kangthö lo näkha dawng ö vi. Tungaila Säthaw lä khimi angxynlyng na qawng-a bälunghaeky vi. Khimi phütä na lä Säthaw ma Khrista bung thinglang qawng-a dü hai te phüng-a, Säthaw lä haidae awng y näkha dawng ö vi. Tungaila Säthaw lä haidae awng saite khimi na qawng-a haidae awngky vi dy.

²⁶Kangby jä-ai na ä, nang ce bung Säthaw ma ka y te kälang-a, nang ce lä makä sa kha awng ö mei näte phüng tea aedawng ö. Hini älawngpre üng khimi na ma dawng te kätyng, nang ce thung üng bälunghae saite na lä awng mang ö te y vi. Nang ce thung üng aenae awng saite hai ceng thawng kaesang na mang üng ly saite na lä awng mang te y. ²⁷Tungaila Säthaw lä hini älawngpre üng dawng te kätyng aetütü saite khimi na hai aely leng y saite khimi na bung re vi dy. Hokä sa te phüng-a Säthaw lä hini älawngpre üng bälunghae saite khimi na tea lä saerae hai ö te vi dy. ²⁸Säthaw lä khimi ceng kaeneng na hai älawngpre üng khimi na ma mäthi y saite na, aetütü kätyng dawng saite na bung re te vi dy. Ätephüng-a Säthaw ma hikä sa te mei nädylä, älawngpre üng khimi na ma aely leng vi näsaite na tea täkhüja hethang vi. ²⁹Tukätephüng-a, Säthaw ma hini kä sa vi dy te phüng-a, ämi lawngtä la äni üng maw-a lä aethaw haw y lyng. ³⁰Säthaw ma sa te phüng-a, nang ce lä Isu Khrista hai bungtä lawng ö vi dy. Säthaw lä Khrista bung mä-ai tähang bälunghae hai hethang sa te vi dy. Äni hai-a Säthaw ma mä-ai tea khimi käcüng-a dawng te vi. Äni hai-a mä-ai bung lä khimi käcai-a lawng hai vi dy. Äni lä mä-ai üng hunghö sa jawjaw y hethang bälawi te vi dy. ³¹Tukätephüng-a Caekäcai thung-a, “Khimi lawngtä aethaw hethang ngai dylä, Areng üng sa saite phüng tea xyng ni aethaw hethang kae” näkha tärü vi.

Thinglang qawng-a dü saite Khrista üng Angthang

¹Kai üng kangby jä-ai na ä, nang ce üng mityng-a Säthaw üng angthang thui hethang tyng te kätü-a, kai lä älo thuikaw bärai saite, bälungkähae hai nang ce tea thui te y lyng. ²Nang ce hai mangtä awng te thüng-a, kai lä Isu Khrista phüng hai äni üng thinglang qawng-a dü pa saite phüng xyngtä ni thui kha äte kälang phüng lä thui y hethang dawng khü te vi dy. ³Kai lä nang ce tea tyng te kätü-a, aethawdi kha ri te hai käsawtho te vi dy. ⁴Kai lä nang ce tea Säthaw üng angthang thui te kätü-a, kai ma üng bälunghae saite hai thui te y vi. Nang ce tea the saite lo na tawng kha thui te y lyng. Kai lä nang ce tea Muilaw Käcai üng haidae mätü hethang ngai te vi dy. ⁵Ätephüng-a mei nädylä nang ce lä khimi ce üng bälunghae saite phüng-a yng hai hethang ngai te y vi. Säthaw üng haidae phüng-a nang ce tea yng hai hethang kai lä ngai te vi dy.

Säthaw üng bälunghae saite

⁶Tungaila yng te ryng saite khimi na tea kai ce lä bälunghae saite angthang na hai thui ö te vi. Hini bälunghae saite lä hini älawngpre üng khimi na üng bälunghae saite hai hini älawngpre tea pyng hethang aenae awng saite na hai aesui te y. Hini älawngpre tea pyng saite mätawngky na üng aenae lä la vi ai. ⁷Kai ce ma thui te bälunghae saite lä Säthaw ma ho te bälunghae saite vi. Angcü üng hai ma Säthaw lä khimi ce tea hini bälunghae saite mätü te y vi. Säthaw lä hini älawngpre sa y te kälang üng hai ma, äni üng bälunghae saite hai-a mä-ai tea phung-ang py hethang sa rüng pyng te vi dy. ⁸Vaihi dung üng hini älawngpre tea pyng saite mätawngky na lä Säthaw üng bälunghae te hai sa rüng saite mawlang kaedawng tea mänykaw ö y vi. Säthaw ma sa saite na tea mänykaw dylä, äni ce lä phung-ang awng saite mä-ai üng Areng bung thinglang qawng-a saemu hai täheng kha bädü ö y lyng. ⁹Tungaila Caekäcai thung-a,

“Säthaw tea bälung aevaw saite khimi na tähang cangxei saite na jangni üng hai ma Äni lä sa rüng pyng vi dy.

Honi na tea lä ämi la nung y kha honi na phüng ämi la thai ö y dy.

Honi phüng ämi la dawng vai ö y vi dy” näkha tärü te vi.

¹⁰Tungaila Säthaw lä äma üng Muilaw Käcai hai-a honi ho saite na mä-ai tea mäny hai te vi dy. Muilaw Käcai lä äte angxynlyng na tea täphawng kha Säthaw ma ho saite mawlang kaedawng tea la täphawng ea mä-ai tea mäny hai vi dy. ¹¹Khimi üng bälung thung-a awng saite kaedawng angxynlyng na tea lä ämi la mäny haw y. Mä-ai ma üng bälung qaitä ni mä-ai ma üng dawng saite na tea mäny haw te vi. Honi kätyng, Säthaw üng bälung thung-a awng saite na tea mäny saite lawngtä lä äma üng Muilaw kae vi. ¹²Säthaw lä hini älawngpre-a khimi ce üng älang kaedawng saite kätyng mä-ai tea py te y. Äni lä äma üng Muilaw mä-ai tea py te vi dy. Tukätephüng-a Säthaw ma mä-ai tea py saite angxynlyng na mä-ai lä mäny haw ö te vi.

¹³Tukätephüng-a kai ce lä hini phüng na khimi ce tea thui te kätü-a, khimi ce ma mätu te bälunghae saite lo na hai tawng ö te y. Muilaw Käcai ma mä-ai tea mätu te bälunghae saite lo na hai kai ce lä Muilaw Käcai hai aesui saite na tea thui mäcai ö te vi. ¹⁴Muilaw Käcai awng y saite khimi lä Säthaw üng Muilaw ma mä-ai tea mätu saite na tea yng hethang ngai te y vi. Hini mätu saite na lä kangthö lo na vi näkha äni lä dawng kha thaikaw haw y. Ätephüng-a mei nädylä Muilaw Käcai awng saite khimi qaitä ni Muilaw Käcai ma thui hai hethang ngai saite lo tea thaikaw haw te vi. ¹⁵Säthaw üng Muilaw awng saite khimi xyng ni äte angxynlyng na tüng te hai tüng y te tea mäny haw te kae. Tungaila Muilaw Käcai awng y saite khimi lä Muilaw Käcai awng saite khimi üng dawng saite tea tüng te, hai tüng y te, tea thui haw y vi. ¹⁶Caekäcai thung-a tärü te lä,

“Ämi la Areng üng bälung thung-a dawng saite tea mäny haw y.

Ämi lawngtä la Säthaw tea mätu haw y lyng” näkha awng te vi.

Tungaila mä-ai yng saite khimi na lä Khrista kätyng aedawng ö te vi.

Säthaw üng mawsawng na

¹Kai üng kangby jä-ai na ä, kai lä Korin märü-a awng saite kätü-a, nang ce tea lä Muilaw Käcai ma pyng saite khimi na tea thui te kätyng thui haw y. Hini älawngpre üng khimi na tea thui te kätyng, kai lä nang ce tea thui hethang kae. Nang ce üng Khrista tea yng saite lä aethawdi te phüng-a, Khrista tea yng saite üng nade na-a lawng ö te vi rawng. ²Nade cäpi lawngtä lä känö tui qaitä ni nei haw te kae. Äni lä bö aeke na tea lä ca haw te y vi rawng. Honi kätü-a nang ce lä nade cäpi na kätyng vi. Tukätephüng-a kai lä nang ce tea Säthaw üng angthang angcü üng na tea mätu te kae. Vaihi mäteng ma nang ce lä Säthaw üng aesang saite mawlang kaedawng tea thaikaw ö te y vi rawng. ³Ätephüng-a mei nädylä nang ce lä nang ma ce üng ngaiphi tüng y saite leithung hui ö te vi rawng. Nang ce lä lawng lawngtä tea pä-e ö kha nang ma ce tingtawi älo ae-e ö jawjaw te vi. Hini kätyng sa te lä, ngaiphi tüng y saite leithung hui vi näte tea nang ce lä mätü ö te vi. Nang ce lä Säthaw bung mäny y saite khimi na kätyng awng ö te vi. ⁴Nang ce thung üng lawngtä ma, “Kai lä Pawlae leithung hui te vi” näkha nä vi. Khimi kälang lawngtä ma, “Kai lä Apolo üng äkähui vi” näkha nä vi. Honi kätyng nang ce lä Säthaw bung mäny y saite khimi na kä awng ö te vi.

⁵Pawlae lä ämi mei. Apolo lä ämi mei. Kai ni lawng netä lä Isu Khrista tea nang ce yng hethang säbawng saite Säthaw üng mawsawng na kae. Areng lä mä-ai tea py saite aetawng y te kälu tea mä-ai ni lä sa haw qi hawi te vi. ⁶Kai lä ämöti mäthu saite khimi kätyng vi. Apolo lä aepra te äkung na tea tui baw saite khimi kätyng vi. Tungaila äkung na tea ryng kha leng hai hethang sa saite na lä kai ni y. Säthaw kae vi. ⁷Ämöti mäthu saite hai tui baw saite lä aely leng te y. Säthaw qaitä ni aely lengky vi. Äni lä äkung tea ryng hai hethang sa te vi. ⁸Ämöti mäthu saite khimi hai tui baw saite khimi lä kälu mawlang kaedawng mangtä hai sa hawi te vi.

Säthaw lä änini tea änini üng sa saite kälu tähang-a ävang py vi ai. ⁹Kai ni lä Säthaw üng kälu tea sa saite kangby jä-ai na vi. Nang ce la Säthaw üng lai kätyng vi. Nang ce lä Säthaw üng Ingkäcai kätyng by vi. ¹⁰Säthaw ma kai tea py saite tähang kähawi hai-a kai lä ing kähawi sakaw bärai saite kälu tea sa te vi. Kai lä Korin märü-a Angthang Kähawi thui kha Isu tea nang ce yng hethang säbawng te vi dy. Hini kätyng kai lä Säthaw üng ing aenyng nae sa vi dy. Hini pyng-a kai ma aetawng saite hini ing tea Khristen kangby jä-ai kälang na lä sa ö jawjaw te vi dy. Tungaila mä-ai angxynlyng na makä Säthaw üng ing tea sa hethang kae mei näte kähawi-a dawng ö qi hethang kae. ¹¹Säthaw lä Isu Khrista bung äma üng ing aenyng nae-a khai pyng te vi dy. Aenyng nae kälang tea lä ämi lawngtä la khai haw y lyng. ¹²Säthaw üng kälu sa saite kangby jä-ai phütä na lä hini aenyng nae qawng-a ing sa hethang sui hai sa ö te vi. Phütä kälang na lä tangkae, ävang ting saite kälung na tea tawng kha ing sa ö te vi. Khimi phütä na lä ing sa hethang thingkawng, cawphe hai aeca na tea tawng ö vi. ¹³Isu Khrista ly haile te kätü-a, äni lä Säthaw ma py saite kälu tea, mä-ai lä kähawi-a sa mei, sa y mei näte mätü king vi ai. Honi käni-a, Khrista lä khimi qütä na üng kälu tea mai hai mäcae kha honi kälu lä ävang ting mei, ting y mei näte mätü vi ai. ¹⁴Khimi lawngtä üng kälu tea mai ma kang y dylä, Khrista lä hini kälu sa saite kung tea ävang py vi ai. ¹⁵Sa saite kung lawngtä üng kälu tea mai ma kang vi dylä, Khrista lä äni tea ävang py pa y lyng. Tungaila hini khimi tea Säthaw ma py saite dungtäsa kähing lä la y vi ai. Äni lä maikang te ing üng aelawi saite khimi lawngtä kätyng awng vi ai.

¹⁶Nang ce lä Säthaw üng Ingkäcai kätyng vi näte mäny tätang ö vi. Säthaw üng Muilaw Käcai lä nang ce üng äthung-a awng te vi. ¹⁷Khimi lawngtä ma Säthaw üng Ingkäcai tea täphra dylä, Säthaw lä honi khimi tea täphra vi ai. Ätephüng-a mei nädylä, Säthaw üng Ingkäcai lä caiping te phüng-a vi. Nang ma ce khekhe lä Säthaw üng Ingkäcai lawng ö te vi.

¹⁸Nang ma ce thung üng ämi lawngtä la mä-ai ma tea kaeling sa hethang kae y. Nang ce thung üng khimi lawngtä lä älawngpre üng älang na kätyng mä-ai ma tea khimi bälunghae te vi näkha dawng dylä, äni lä äma tea kangthö kätyng aedawng hethang kae te vi. Hokä dawng dylä, Säthaw ma ni äni tea bälunghae saite py haw te vi. ¹⁹Hini älawngpre üng khimi na ma bälunghae te kätyng dawng saite lä Säthaw üng maw-a aetütü kae vi. Caekäcai thung-a lä, “Säthaw ma bälunghae vi näkha dawng saite khimi na tea lä äma ce üng bälung kaeke kaeme hai-a mäthang sa pa vi ai” näkha tärü te vi. ²⁰Caekäcai thung-a la, “Hini älawngpre hai aesui te bälungkähae awng saite khimi na üng kaedawng lä aetütü kae näte tea Areng lä mäny vi” näkha tärü te awng vi. ²¹Tukätephüng-a nang ce lä khimi üng mätawngky na phüng tea aethaw ö hethang kae y. Säthaw lä nang ce tea aely ngai saite angxynlyng na py pyng vi dy. ²²Kai, Pawlae, Apolo hai Peterae ce lä nang ce tea säbawng hethang Säthaw ma py saite särae na vi. Säthaw lä älawng qawng-a awng saite angxynlyng nang ce tähang äkähawi na lawng hai hethang sa vi dy. Nang ce hing saite hai dü saite tea la, Säthaw lä nang ce üng hawi saite tähang sa vi ai. Vaihi awng saite angxynlyng na, vaimaw mang-a awng saite na tea Säthaw lä nang ce tähang kähawi sa vi ai. Säthaw ma hini angxynlyng na lä nang ce tea py pyng vi dy. ²³Nang ce lä Khrista hai aesui ö te vi. Khrista lä Säthaw hai aesui te vi.

Khrista üng angtawtha saite na

¹Kai ce lä Khrista üng mawsawng na näte nang ce lä dawng hethang kae. Säthaw lä äma üng ho saite angthang khimi ce tea thui hethang kai ce bung mätaw vi dy. ²Ingkung ma äma üng mawsawng aely lengky aeme aeqa saite lä aeykhü haw hethang kae. ³Nang ce hai khimi kälang na lä kai üng sa saite kälu tea hawi te, hawi y te, näkha dawng te lä, kai tähang aely leng te y. Kai ma mäteng ma la kai ma üng sa saite kälu lä hawi te, hawi y te näkha käny te y vi. ⁴Kai mäny saite rytä, Khrista üng mawsawng kätyng kai lä sa tämang te awng y. Tungaila kai lä tämang y näkha mätü haw y. Kai ma sa saite kälu hawi te, hawi y te tea lä Areng lawngtä xyng ma tärae cei vi ai. ⁵Tukätephüng-a Säthaw ma khai saite kätü tyng y te kälang-a lä, khimi ce tea tärae cei ö hang. Areng tyng haile te kätü-a, ämi lä kähawi-a sa mei, sa y mei, näte Areng ma thui vi ai. Äni lä käving thung-a ho saite na kaevang-a täphawng vi ai. Areng ma khimi ce lä äma ce üng bälung thung-a dawng saite na khimi qütä tea mäny hai vi ai. Honi kätü-a, Säthaw lä khimi qütä tea äma ce hai aeteng khaw te kätyng bälaw qi pa vi ai.

⁶Kangby jä-ai na ä, nang ce tea hae haetä mätu hethang kai hai Apolo phüng kai ma thui pyng te vi dy. Nang ce lä Caekäcai thung üng thui saite tea thaikaw hethang aely ngai te vi. Honi lo Caekäcai thung-a, “Tärü saite mätu nae tea nang ce lä hui kha äte kälang na tea sa ö hang” näkha awng vi. Nang ce hui saite särae lä särae kälang qawng-a kawky näkha bälaw hethang kae y. ⁷Ämi lawngtä ma la nang ce bung lä khimi kälang na qawng-a aely lengky hethang sa y lyng. Nang ce tea awng saite angxynlyng na hai sakaw saite na lä Säthaw ma py vi dy. Tukätephüng-a nang ce lä nang ma ce tea aethaw hethang kae y. Nang ce tea awng saite hai sa haw saite lä Säthaw üng lasawng na vi.

⁸Nang ce aely ngai saite angxynlyng na lä nang ce tea awng rüng pyng te vi dy näkha dawng ö vi. Muilaw Käcai ma py saite kähawi angxynlyng na lä nang ce tea awng rüng pyng te vi dy näkha nang ce lä dawng ö te vi. Nang ce lä sanphrang na kätyng pyng rüng ö te by vi dy. Tungaila kai ce lä nang ce üng sanphrang sa saite na thung-a qa ö te y. Kai lä nang ce bung sanphrang na lawng tätang hethang ngai te vi dy. Tupyng-a ni kai la nang ce hai mangtä pyng by vi ai. ⁹Säthaw lä ämi lawngtä ma la mäthi y saite khimi na üng mityng-a kai ce angtawtha na bung khai vi näte kai lä dawng te vi. Kai ce lä khimi angxynlyng na üng maw-a bädü hethang dengpy saite khimi na kätyng vi. Älawng qawng-a khimi ce, Känipre üng angtawtha na hai angra na lä kai ce tea ätemakä tyng ai mei näsaite tea kheng ö te vi. ¹⁰Kai ce lä Khrista tähang sa te phüng-a, khimi ce ma kai ce tea kangthö na näkha dawng ö te vi. Tungaila nang ce lä Khrista hai bungtä te phüng-a, bälungkähae awng vi näkha nang ce lä aedawng ö te vi. Kai ce tea haidae awng y. Nang ce lä ätete angxynlyng na sa hethang haidae awng näkha aedawng ö te vi. Khimi ce ma mä-ai tea mäthi y ngaila, nang ce tea äni ce lä tämö khai ö te vi. ¹¹Vaihi khytä kai ce lä äjo käkawi-a ca nei hethang awng ö y. Kä-o kämawng na aelawng ö te kae. Khimi ce lä kai ce tea bo ö te vi. Kai ce lä awng nae ing awng y kha angvüng angvaw na kätyng aevi ea aeke ö te vi. ¹²Kai ce lä ca nei hethang mä-ai ma üng äkö na hai bäsae saite kälu tea sa ö vi. Khimi ce ma kai ce tea täking ngaila, kai ce lä äni ce tea tähang kähawi py ö te vi. Khimi ce ma kai ce tea lä mätang bälaica-a sa ngaila, kai ce lä khung ö te vi. ¹³Khimi ce ma kai ce tea käsi thui te kätü-a mäteng ma, kai ce lä äni ce tea älo kähawi na mäthang haile ö te vi. Vaihi khytä hini älawngpre üng khimi na lä kai ce tea angnüng angsaw kätyng dawng ö te vi. Äni ce lä kai ce tea aetütü saite khimi na kae näkha mäthi ö te vi.

¹⁴Kai lä nang ce tea saerae hai hethang hini phüng na tärü te y. Kai ma üng caw nade na khekhe kätyng nang ce tea sädi py hethang kai lä ngai te vi. ¹⁵Nang ce tea Khristen särae na awng mang ö ngaila, nang ce tea lä Pä-ai lawngtä xyng awng te vi. Nang ce lä Isu Khrista hai bungtä awng te phüng-a, kai lä nang ce üng Pä-ai-a lawng vi dy. Ätephüng-a mei nädylä, nang ce tea Angthang Kähawi angcüky thui pa saite lä kai vi. ¹⁶Tukätephüng-a kai kätyng täthei nang ce la sa ö hethang kai lä nang ce tea aesi aebai hethang ngai te vi. ¹⁷Tukätephüng-a, kai lä Timothe bung nang ce tea mätaw te vi. Kai lä äni tea bälung aevaw kha cäpaw khekhe kätyng khai te vi. Äni lä Areng tea yng khü saite lawngtä vi. Timothe ma kai lä Khrista Isu hai bungtä lawng kha makä awng mei näte aedawng haile tyng hethang nang ce tea thui pa ai. Hini lä kai ma mityng qütä hai kangkawng qütä-a mätu pa te hai lä aebäla khaw te vi.

¹⁸Nang ce thung üng phütä na lä aethaw ö te vi. Kai lä Korin märü-a tyng haile y lyng näkha nang ce la dawng ö te vi. ¹⁹Tungaila Areng ma aely awng dylä, nang ce tea kai lä qae y te kälang-a ly ai. Kai ly te kätü-a, khimi ce ma äma ce üng aethaw saite lo na qawng-a cang y, haidae lä awng ai näte kai ce lä mäny ö vi ai.

²⁰Säthaw üng pyng saite pre lä älo awng mang thui saite y vi. Säthaw üng haidae-a awng te kae vi. ²¹Kai tyng saite kätü-a, nang ce lä kai tea äte älang hai-a sa hethang ngai hai te vi mei. Nang ce ae-ui ö y dylä, nang ce tea thingbyng hai kai ly vi ai. Tungaila nang ce ae-ui ö dylä, nang ce tea kai lä kangby jä-ai na kätyng bälung aevaw saite mätü vi ai.

Kangkawng-a sa tämang saite

¹Nang ce thung-a lawngtä lä täkübäjang sa vi näte khimi ce ma kai tea thui khü te vi. Säthaw bung mäny y saite na mäteng ma hini kätyng täkübäjang sa y lyng. Nang ce thung-a lawngtä lä änä-awitaw hai i vi näte kai lä thai te vi. ²Nang ce lä saerae kha bälungsi hethang awng ngaila, aethaw ö lae te vi. Hini khimi bung lä nang ma ce thung üng mäthoja hethang kae. ^3-4Kai lä nang ce hai kähanglaw-a awng ngaila, kai üng bälung-a lä nang ce hai mangtä awng te vi. Vaihi nang ce üng aekäcö saite thung-a kai awng te kätyng, Areng Isu ma kai tea py saite aenae hai kai lä hini känyng he hawi te hunghö sa saite khimi tea dengpy hethang phüng dawng rüng pyng te vi dy. Nang ce lä kangkawng kätyng aecö ö hethang kae. Honi kätü-a kai üng bälung-a lä nang ce hai mangtä awng vi ai. Areng Isu üng haidae lä nang ce hai mangtä awng by vi ai. ⁵Nang ce lä hini khimi bung Setan angra üng äkö thung-a, a hethang kae. Äni üng ätabung tea Setan ma mätangbälai hai te phüng-a, äni lä ae-ui haw te vi. Tupyng-a Areng ly haile te kätü-a lä äni bung aeqang vi ai.

⁶Nang ce lä nang ma ce üng kangkawng phüng tea aethaw hethang hawi te y. Caekäcai thung-a, “Täkaw aepae saite aesi äjecäcaw lä täkaw awngmang-a aepae hai vi” näte tea nang ce lä aedawng haile ö. Honi kätyng, hunghö sa saite hini khimi lä awng mang saite khimi na tea hunghö sa haw hai te by vi. ⁷Nang ce lä hunghö hai aesui saite täkaw aepae te aesi kangrüng tea lä käde phae ö la. Hini kätyng sa dylä, nang ce lä täkaw aepae saite aesi qa y te täkaw kangthae kätyng lawng ö vi ai. Nang ce lä Säthaw üng khimi käcai tätang na lawng ö vi ai. Khrista lä mä-ai üng hunghö na tähang äma bung löci aesa te vi dy. Äni lä Judae na üng Cäqengja te pawi-a löci mawi-a bädü saite beram caw kätyng vi. ⁸Tukätephüng-a, Säthaw üng Cäqengja saite pawi kätü-a, mä-ai lä hunghö hai käsi sa te phüng thui saite täkaw aepae te aesi kangrüng hai sa hethang kae y. Mä-ai lä täkaw aepae saite aesi qa y te hai pawi sa ö si. Kai lä cai saite hai lo mitang phüng thui hethang ngai te vi.

⁹Kai ma tärü pyng saite cae thung-a, kai lä nang ce tea täkübäjang sa saite khimi na hai mangtä kangby jä-ai aesa y hethang thui te vi dy. ¹⁰Kai ma Säthaw bung mäny y saite khimi na lä täkübäjang sa saite na, bädö saite na, kaeling kaemae sa saite na hai mimi na tea cäphaw ö saite na vi näkha thui te y lyng. Nang ce lä hini khimi ce tea aehi dylä, hini älawngpre üng tho ö hethang kae. ¹¹Kai ma thui hethang ngai te lä khimi lawngtä ma, “Kai lä Khristen vi” näkha thui pyng-a, täkübäjang sa kha ae-aw saite, mimi na tea cäphaw saite, khimi ce tea käsi prawng saite, märui saite, kaeling kaemae sa saite na awng dylä, nang ce lä äni hai kangby jä-ai sa hethang kae y. Nang ce lä hini kätyng khimi ce hai bö mäteng mangtä ca ö hang.

¹²Kangkawng üng ärang-a awng saite khimi na tea tärae cei hethang lä kai üng kälu y lyng. Tungaila kangkawng hai aesui saite khimi tea nang ce lä tärae cei hethang kae. ¹³Kangkawng üng ärang-a awng saite khimi na tea lä Säthaw ma tätang tärae cei vi ai. Caekäcai thung-a honi phüng thui te lä, “Hawi y saite khimi bung lä nang ce thung üng mäthoja la” näkha awng vi.

Khristen tingtawi tärae aesa ö hang

¹Nang ce thung-a yng saite khimi lawngtä hai kälang lawngtä älo ae-e kha Säthaw yng y saite tärae cei te kung tea ly dylä aesyng ö te y vi. Tämang saite tea lä Säthaw üng khimi na ma tärae cei kae sy. ²Vaimaw mang-a Säthaw üng khimi na lä älawngpre üng khimi na tea tärae cei ai näte nang ce lä mäny ö y mei. Nang ce ma hini älawngpre üng khimi na tea tärae cei ai nädylä, nang ma ce thung-a ämö cäpi tea nang ce lä tärae cei haw hethang kae. ³Mä-ai lä Känipre angtawtha na tea mäteng ma tärae cei ai näte nang ce lä mäny ö y mei. Tukätephüng-a käni qütä mä-ai aeting te älo ae-e saite na tea lä nang ce ma tärae cei khü haw ö hethang kae. ⁴Hini kätyng nang ce ämö cäpi na awng dylä, kangkawng üng khimi na ma mäthi y saite tärae cei te kung tea nang ce lä ätephüng-a ly ö te vi mei. ⁵Nang ce lä saerae hethang tähang-a, kai lä nang ce tea hini phüng thui te vi. Nang ce üng kangkawng-a, yng saite khimi tingtawi älo ae-e saite tea mädü hethang bälunghae saite khimi lawngtä mäteng la awng ai be. ⁶Hini kätyng sa te jüng-a, Khristen lawngtä lä äma üng kangby jä-ai sa tämang kha cy hethang yng y saite tärae käcei kung tea ly te vi. Yng y saite tärae cei te kung tea ly kha tärae mädü hai ö te vi.

⁷Nang ma ce tingtawi tärae aesa te lä, nang ce tea Setan ma mäja vi näte mätü ö te vi. Nang ce üng kangby jä-ai ma nang ce tea hunghö sa kha kaeling kaemae sa te na tea lä khung ö hethang hawiky te vi. ⁸Honi jüng-a nang ce lä nang ma ce tingtawi sa tämang ö te vi. Nang ce lä nang ma ce tingtawi kaeling kaemae aesa ö te vi. Honi kätyng nang ce lä yng saite kangby jä-ai na tea sa ö te vi. ^9-10Säthaw bung mäny saite khimi na lä Säthaw üng pyng saite pre hai aesui y näte nang ce lä kähawi-a mäny ö te vi. Nang ce lä mä-ai ma tea kaeling kaemae sa ö hethang kae y. Täkübäjang sa saite khimi na, mimi tea cäphaw saite na, nawngpui, nawngpaw kälang na hai i saite na, nawngmäcaw tingtawi i saite na, bäru saite na, ae-aw saite na, bärui saite na, käsi prawng saite na lä Säthaw üng pre pyng saite hai aesui ö te y vi. ¹¹Angcü üng hai ma nang ce thung üng khimi phütä lä honi kätyng käsi na sa ö te vi. Tungaila Säthaw lä nang ce üng hunghö na tea bäse pang kha cai hai te vi. Areng Isu Khrista hai Säthaw üng Muilaw hai-a nang ce lä Säthaw üng maw-a khimi käcüng-a lawng ö vi dy.

Säthaw üng phung-ang tähang nang ce üng ätabung tea tawng ö

¹²Nang ce thung-a khimi phütä lä, “Kai ce lä ngai saite angxynlyng na tea sa haw te vi” näkha nä ö vi. Älawng cy. Tungaila äte angxynlyng na lä nang ce üng tähang lä hawi te y vi. “Kai lä kai ma ngai saite angxynlyng na tea sa haw vi” Tungaila, kai lä ätete hae haetä üng mawsawng-a lawng hang sy. ¹³Khimi kälang lawngtä ma, “Käcakänei lä äjo tähang vi. Äjo lä käcakänei tähang vi” näkha nä vi. Älawng cy. Tungaila Säthaw lä hini känetä tea lä teng hai vi ai. Ätabung lä täkübäjang sa hethang tawng y käla, Areng üng mawsawng lawng hethang tawng ö vi ai. Areng lä mä-ai üng ätabung tea rui pa vi ai. ¹⁴Säthaw ma Areng Isu bung kädü thung üng mäning haile tyng vi dy. Mä-ai bung la äma üng haidae hai-a mäning haile tyng by vi ai.

¹⁵Nang ce üng ätabung na lä Khrista üng ätabung kaepreng na kätyng vi näte tea nang ce lä mäny ö te vi. Khrista üng ätabung kaepreng tea lä nawngmädi kangdei üng ätabung hai aesätawng ö hang. ¹⁶Khimi lawngtä lä nawngmädi kangdei hai mangtä i dylä, honi nawngmädi hai ätabung haetä-a lawng vi dy näte nang ce lä mäny ö te vi dy. Caekäcai thung-a, “Nawngmäcaw hai nawngmädi lä ingthawng sa hawi te kätü-a, änini lawng netä lä bungtä-a lawng vi ai dy” näkha tärü te vi. ¹⁷Tungaila Areng hai aesätawng saite khimi lä, Muilaw Käcai hai-a Areng hai bungtä-a lawng te vi.

¹⁸Täkübäjang sa ö hang. Khimi ma sa saite hunghö kälang qütä lä äma üng ätabung ärang mang üng kae vi. Tungaila täkübäjang sa saite khimi üng hunghö lä äma üng ätabung tea sa tämang te vi dy. ¹⁹Nang ce üng ätabung lä Muilaw Käcai ma aeta saite Ingkäcai vi näte mäny ö te vi. Säthaw lä Muilaw Käcai bung nang ce tea py te vi dy. Nang ce üng ätabung lä nang ma ce üng y vi. Säthaw ma pyng te kae. ²⁰Säthaw lä nang ce bung ävang py kha rang te vi dy. Tukätephüng-a nang ce lä Säthaw üng phung-ang leng hethang nang ma ce üng ätabung tea tawng ö hethang kae.

Ingthawng sa saite phüng

¹Nang ce ma cae tärü kha älo düng saite phüng tea kai lä älo mäthang te vi. Ingthawng sa y käla awng te dylä hawi vi. ²Tungaila khimi ce lä täkübäjang sa vävawi te phüng-a, nawngmäcaw qütä lä äma ce üng nawngpui awng hethang kae. Nawngmädi qütä la äma üng nawngpaw awng hethang kae. ³Nawngpaw lä änawngpui hai i hethang kae. Änawngpui la änawngpaw hai i hethang kae te by vi. ⁴Ingthawng sa saite nawngmädi lawngtä üng ätabung lä äma qaitä pyng te y. Äni üng ätabung lä änawngpaw hai la aesui te vi. Honi kätyng ingthawng sa saite nawngmäcaw la äma üng ätabung tea äma qaitä pyng te y by vi. Äni üng ätabung la änawngpui hai aesui te by vi. ⁵Änawngpui hai änawngpaw lä mangtä i y käla awng hethang kae te y. Änini lä aetang he kätü awng mang rae hethang ngai hawi dylä, lawng netä bälung aedü saite kätü khai kha, i y käla awng haw vi. Honi pyng dylä, änini lä mangtä i haile hethang kae. Hokä dylä Setan angra lä änini tea täkübäjang sa hai hethang the y vi ai. Ätephüng-a mei nädylä, ingthawng sa saite nawngpui nawngpaw lä mangtä i y käla ma awng hethang lä jahaw te y vi.

⁶Hini na kai lä nang ce tea särilo hai thui te y lyng. Älang kähawi mätü te kae vi. ⁷Kai lä ingthawng sa y käla awng te kätyng, khimi qütä awng dylä, hawiky vi näkha kai lä dawng te vi. Tungaila khimi qütä tea lä Säthaw ma äma ce üng sakaw saite na py qi te vi. Säthaw ma khimi ce tea py te sakaw saite na lä haetä hai haetä aetawng te y vi.

⁸Ingthawng sa y rawng saite nawngmädi nawngmäcaw na hai lömai na tea, kai lä thui hethang ngai. Kai kätyng mä-ai ma qaitä awng kha ingthawng sa y dylä, nang ce tähang lä hawiky te vi. ⁹Tungaila nawngpui läsy, nawngpaw läsy kangby jä-ai hai i hethang ngaiphi saite bälung aepä-üng haw y dylä, ingthawng sa hethang kae. Nawngpui läsy, nawngpaw läsy kangby jä-ai hai i hethang ngaiphi saite bälung awng te qawng-a ingthawng sa te lä hawiky te vi.

¹⁰Ingthawng sa saite khimi na tea hini särilo py hethang kai lä ngai te vi. Hini särilo lä kai te üng y. Areng üng särilo vi. Nawngpui lä änawngpaw hai aekhai hethang kae y dy. ¹¹Nawngmädi ma aekhai dylä, äni lä ingthawng sa haile tyng hethang kae y. Tukä y dylä änawngpaw hai aebädü hai kha änawngpaw tea vawi haile tyng sy. Änawngpaw la änawngpui hai aekhai hethang kae y.

¹²Yng saite khimi kälang na tea kai lä älo thui hethang ngai. Hini särilo lä Areng te üng y. Hini lä kai te üng vi. Yng saite nawngpaw lawngtä lä yng y saite nawngpui lawngtä hai ingthawng sa vi nä mai si. Änawngpui lä änawngpaw hai mangtä awng hethang ngai dylä, änawngpaw lä äni hai aekhai hethang kae y. ¹³Yng saite nawngpui lawngtä lä yng y saite nawngpaw lawngtä hai awng vi nä mai si. Änawngpaw lä änawngpui hai awng hethang ngai dylä, änawngpui lä äni hai aekhai hethang kae y. ¹⁴Ätephüng-a mei nädylä, yng y saite nawngpaw lä, äma üng yng saite nawngpui hai-a Säthaw maw-a cai hai te vi. Honi kätyng yng y saite nawngpui lä äma üng yng saite nawngpaw hai-a Säthaw maw-a ca hai te vi. Hokä dylä, änini üng caw nade na lä Säthaw maw-a cai hai ö te vi. Hokä y dylä änini üng caw nade na lä Säthaw bung mäny y saite na kätyng vi ai. Tungaila änini üng caw nade na lä Säthaw maw-a cai hai tätang ö te vi. ¹⁵Tungaila yng y saite änawngpui y dylä, änawngpaw lä yng saite änawngpui y dylä, änawngpaw hai aekhai he ngai dylä, yng saite khimi lä honi tea mäkhang hethang kae te y. Yng y saite kangby jä-ai lä äma üng yng saite kangby jä-ai hai aekhai dylä, yng saite khimi lä honi ingthawng sa saite üng aelawi te vi. Säthaw lä mä-ai bung awngneng-a hing hai hethang ngai te vi. ¹⁶Änawngpui na ä, nang ce ma nang ma ce üng yng y saite nawngpaw na bung aeqang ai näte nang ce lä mäny haw ö y. Honi kätyng nawngpaw na ä, nang ce ma nang ma ce üng yng y saite nawngpui na bung aeqang ai näte nang ce lä mäny haw ö y.

Säthaw ma ka te kätyng awng ö

¹⁷Tudylä nang ce bung Säthaw ma ka te kätü-a, nang ce awng saite kätyng-a nang ce lä awng ö jawjaw ba. Kai lä kangkawng qütä-a hini kätyng mätu te vi. ¹⁸Säthaw lä lengkhüng täke pyng saite khimi bung ka vi dylä, äni lä äma üng lengkhüng täke pyng saite ätabung hai awng jawjaw ba. Säthaw lä lengkhüng täke y saite khimi bung ka vi dylä, äni tea lä lengkhüng täke hai vi hang lawi. ¹⁹Khimi lawngtä lengkhüng täke te, täke y te lä aely leng te y. Säthaw üng lo tängai hethang xyng ni aely lengky te kae vi. ²⁰Säthaw ma nang tea ka te kätü-a, nang ma ce awng saite kätyng-a awng ö jawjaw ba. ²¹Säthaw ma nang ce bung ka te kätü-a mawsawng tangnae lawngtä vi dylä, nang ce lä bälungbi ö hang. Tungaila khimi kaelawi lawng hethang älang haetä awng dylä, honi kätyng tawng ba. ²²Nang ce lä mawsawng tangnae lawng te kätü-a Säthaw ma nang ce bung ka vi dylä, Areng Isu Khrista hai-a vaihi nang lä khimi kaelawi kätyng lawng vi dy. Honi kätyng Säthaw ma khimi kaelawi bung ka vi dylä, äni lä vaihi Khrista hai aesui kha äni lä Khrista üng mawsawng tangnae-a lawng te vi. ²³Säthaw lä nang ce tähang ävang py kha nang ce bung rang vi dy. Tukätephüng-a nang ce lä khimi ce üng mawsawng tangnae na lawng ö hang. ²⁴Kangby jä-ai na ä, nang ce bung Säthaw ma ka qi te kätü-a, awng saite kätyng-a Säthaw üng maw-a nang ce lä awng jawjaw hethang kae.

Ingthawng sa y saite anglaw na, särai na hai lömai na phüng

²⁵Ingthawng sa vai y saite anglaw na hai särai na tähang särilo Areng ma kai tea py te y vi. Tungaila Areng üng tähang kähawi hai-a nang ce lä kai tea ae-y haw ö te phüng-a, kai üng dawng saite na tea kai lä thui vi ai.

²⁶Mä-ai lä rae saite kätü-a hing te phüng-a, awng saite kätyng nang ce lä awng jawjaw ö hethang hawiky vi näkha kai lä dawng te vi. ²⁷Nang ce lä ingthawng sa rüng pyng te vi dylä, aekhai hethang bälung awng he kae y. Ingthawng sa y te rawng nädylä, nang ce lä ingthawng sa ö y ma hang. ²⁸Tungaila nang ce ingthawng sa dylä, nang ce lä hunghö awng ö y. Anglaw lawngtä ingthawng sa dylä, äni lä hunghö awng y. Tungaila nang ce ingthawng sa dylä, mätang saite na hai aeting ö ai. Kai lä nang ce tea hini mätang saite na aeting hai hethang ngai te y vi.

²⁹Kangby jä-ai na ä, Säthaw üng kälu sa hethang kätü lä awng mang y vi näte kai thui hethang ngai te vi. Nawngpui awng saite yng te khimi lawngtä lä änawngpui awng y te kätyng awng hethang kae. ³⁰Bälungsi xüng saite na lä bälungsi y te kätyng awng hethang kae. Anghawtho hethang awng saite na lä anghawtho hethang awng y te kätyng awng hethang kae. Lawng lawngtä ma ätete hae haetä tea rang dylä, honi lä äma hai aesui y te kätyng äni lä awng hethang kae. ³¹Vaihi khimi phütä na lä älawngpre üng khimi na kätyng awng ngaila hini älawngpre hai aesui saite na tea lä bälungrui sui jawjaw ö hethang kae y. Ätephüng-a mei nädylä, älawngpre hai hini älawngpre qawng-a awng saite angxynlyng na lä la ö vi ai.

³²Tungaila kai lä nang ce tea hini na phüng bälungbi hai hethang ngai te y vi. Ingthawng sa y saite khimi lä Areng üng kälu sa saite hai äma tea kawng hai saite phüng xyng tea dawng te vi. ³³Tungaila ingthawng sa saite lawngtä lä änawngpui aely ngai saite phüng dawng he kae. Äni lä äma üng nawngpui kawng hethang ngai hai te vi. ³⁴Tukätephüng-a äni üng bälung lä phü netä awng te vi. Ingthawng sa y saite nawngmädi, y dylä anglaw lä Areng üng kälu sa saite phüng xyng dawng te vi. Äni lä Areng hai aesui king kha cai hethang ngai te vi. Ingthawng sa saite nawngmädi lä käni qütä änawngpui hai caw nade na tähang aely ngai saite phüng dawng hethang kae te by vi. Äni lä änawngpaw üng bälung kawng hai hethang la ngai te vi.

³⁵Kai lä nang ce tea säbawng hethang ngai te phüng-a, hini kätyng thui te vi. Nang ce tea kai lä särilo thui te y lyng. Nang ce lä Säthaw üng khimi na tähang aeteng khaw-a awng hai hethang kai lä nang ce tea säbawng he ngai te vi. Areng üng kälu tea bälung känetä awng y käla ma sa hethang kai lä nang ce tea ngai hai te vi.

³⁶Nawngmäcaw lawngtä ma ingthawng sa hethang nawngmädi lawngtä bung aengang vi dy nä mai si. Äni ma honi nawngmädi hai aepawng y dylä aevaw y näkha äni lä dawng te vi. Y dylä äni lä nawngmädi hai mangtä i hethang ngaiphi vi näre mai si. Hokä dylä äni lä ingthawng sa hethang kae. Hini lä hunghö awng te y lyng. ³⁷Tungaila khimi lawngtä lä kähawi-a dawng kha äma üng kängai tea aepä-üng haw dylä, äma aengang saite nawngmädi hai mangtä i hethang ngaiphi te bälung awng y dylä, äni hai aepawng y te lä hawiky te vi. ³⁸Tukätephüng-a aengang pyng saite nawngmädi bung khimi lawngtä ma ingthawng sa dylä hawi. Tungaila äni lä ingthawng sa y käla awng dylä, hawiky te vi.

³⁹Ingthawng sa saite nawngmädi lä änawngpaw hing te khytä äni üng nawngpui-a lawng jawjaw te vi. Tungaila änawngpaw dü dylä, äma ngai saite nawngmäcaw hai ingthawng sa haw te vi. Hini nawngmäcaw lä yng saite khimi lawng hethang kae. ⁴⁰Tungaila nawngmädi lömai lä ingthawng sa y käla awng dylä, äni tähang lä hawiky näkha kai lä dawng te vi. Kai tea Säthaw üng Muilaw la awng vi dy näkha kai lä dawng te vi.

Mimi na tea löci sa saite mawi phüng

¹Vaihi mä-ai lä Säthaw bung mäny y saite khimi na ma mimi na tea löci sa saite mawi phüng thui ö si.

Mä-ai angxynlyng na lä hini tea mäny saite bälung awng näte nang ce lä thui haw ö vi. Mäny saite khimi phütä na tea bälung leng ö te vi. Tungaila mä-ai Khristen na tingtawi bälung aevaw dylä, mä-ai ma tingtawi aethaw aepy ö te vi. ²Äte angxynlyng na mäny hethang äma ma dawng saite khimi lawngtä lä äma mäny hethang kae saite tea mäny te y vi rawng. ³Tungaila khimi lawngtä ma Säthaw tea bälung aevaw dylä, Säthaw lä honi khimi bung mäny te vi.

⁴Tukätephüng-a kai lä nang ce tea mimi na tea löci sa pyng te mawi ca saite phüng, thui hethang ngai. Mimi hai aesui saite äte khömang la älawng-a awng y näte hai Säthaw lä lawngtä xyng awng näte tea mä-ai yng saite na lä mäny ö te vi. ⁵Käni hai älawng qawng-a khimi ce ma khömang hai Areng näkha mäthi saite awng mang te vi. Tungaila äni ce lä haidae awng tätang te y vi. ⁶Tungaila mä-ai tähang lä Säthaw lawngtä xyng kha äni lä mä-ai üng Pä-ai vi. Äni lä äte angxynlyng na tea sa vi dy. Äni tähang mä-ai lä hing ö te vi. Mä-ai tähang Areng lawngtä xyng awng kha äni lä mä-ai üng Areng Isu Khrista vi. Säthaw lä äte angxynlyng na tea äni hai-a sa vi dy. Äni hai-a mä-ai lä Säthaw tähang hing ö te vi.

⁷Tungaila khimi qütä lä honi tea mäny y. Khimi phütä na lä vaihi khytä mimi cäphaw saite reitae na tea tämang haw ö te y vi. Tukätephüng-a äni ce lä mimi na tea löci sa pyng saite mawi ca dylä, mimi na hai aesui vi näkha vaihi khytä äni ce lä dawng ö te vi. Äni ce üng käsi kähawi mäny saite bälung lä aethawdi te phüng-a, äni ce lä mimi na tea löci sa pyng saite mawi ca te lä äma ce tea pawprae hai te vi näkha äni ce lä dawng ö te vi. ⁸Tungaila mä-ai lä ca saite amäjy na hai-a Säthaw tea kawng hai haw te y. Mä-ai lä hini löci mawi ca te, ca y te lä Säthaw üng maw-a aely leng te y lyng.

⁹Säthaw ma mä-ai tea ngai saite amäjy na ca hethang py pyng te vi dy. Tungaila nang ce lä mä-ai ma üng ca saite na phüng-a yng te aethawdi saite mä-ai üng kangby jä-ai na hunghö sa y hethang sädi khai ö he kae. ¹⁰Käsi kähawi mäny saite bälung aethawdi saite nang ce üng yng saite kangby jä-ai lä mimi üng ing-a nang ce ma ca saite tea nung vi näkha thui ö nä mai si. Nang ce lä bälunghae saite khimi vi näte äni lä mäny te vi. Tukätephüng-a äni lä mimi tea löci sa pyng saite mawi tea lä ca haw vi näkha dawng haw te vi. ¹¹Hini kangby jä-ai tähang Khrista lä dü pa te vi dy. Tungaila äni üng yng saite lä aethawdi te phüng-a, nang ce üng mänykaw saite ma äni üng yng saite tea lä täphra vi ai. ¹²Hini kätyng-a käsi kähawi mäny saite bälung lä aethawdi saite nang ce üng kangby jä-ai tea tämaw ca kha sa tämang hai te vi. Hini kätyng nang ce lä Khrista tea sa tämang ö te by vi. ¹³Tukätephüng-a kai üng ca saite, yng saite hai-a kai üng kangby jä-ai tea hunghö sa hai vi dylä, kai lä manila ängang ca haile tyng y vi ai. Tudylä yng saite na lä hunghö sa hai ö y vi ai.

Pawlae lä angtawtha vi näte mätü vi

¹Kai lä khimi kaelawi kha angtawtha lawngtä vi. Kai lä mä-ai üng Areng Isu bung kai ma üng ämi na hai nung khe vi dy. Kai üng kälu phüng-a, nang ce lä Areng hai aesui te vi. ²Khimi kälang na ma kai tea angtawtha kätyng dawng y ngaila, nang ce lä kai bung angtawtha lawngtä-a mäthi khü hethang kae ö te vi. Nang ce lä Areng hai bungtä-a awng saite lä kai lä angtawtha lawngtä näte tea mätü saite äsäny vi.

³Angtawtha lawngtä kätyng kai üng aenae tea e saite khimi na tea honi kätyng kai lä älo mäthang te vi. ⁴Kai ma sa saite kälu tähang kai lä käcakänei aeteng khaw-a dang näte lä älawng khaw te vi. ⁵Angtawtha kälang na, Areng üng kangby khekhe hai Peterae lä äni ce khölawng ly te kätü-a, äma ce üng Khristen nawngpui na bung mangtä nähai ö te vi. Kai lä hini kätyng sa haw te by. ⁶Ca saite tähang tangkae awng hethang Banaba hai kai ni ma qaitä lä kai ma ni üng äkö na hai-a sa te vi mei. ⁷Reisae na lä mä-ai ma üng tangkae hai täre aety ö te y. Cäpje angkhaw-a kälu sa saite khimi na lä äthai na ca ö khaw te vi. Beram rui saite kung na lä äma ce üng beram na üng känö tui nei hethang dang ö khaw te vi.

⁸Kai lä käni qütä khimi ce aeting saite phüng na thui te vi. Tungaila hini kätyng Mosi üng ubädi thung-a la tärü te by vi. ⁹Mosi üng Ubädi thung-a, “Caw aeti saite raebawi üng täbawng tea lä tämüng pa hang” näkha näte vi. Säthaw ma hini kätyng thui te kätü-a, raebawi phüng qaitä tea äni lä dawng te y. ¹⁰Areng üng kälu sa saite mä-ai phüng äni lä tätang dawng kha thui te vi. Tätang khaw-a, hini lo na lä mä-ai tähang tärü te vi dy. Laithawng saite khimi na hai caw ae saite khimi na lä äma ce üng ävang dang hethang aethang khai kha sa ö khaw te vi. ¹¹Kai ce lä Muilaw Käcai ma py saite ämöti na üng bälung thung-a mäthu ö pyng te vi dy. Tukätephüng-a kai ce lä caw ae te kätyng nang ce te üng käcakänei hai kä-o nitha na dang hethang aeteng khaw ö te vi. ¹²Nang ce lä Khrista üng kälu sa saite khimi kälang na tea säbawng dylä, kai ce tea la nang ce lä säbawng he kae khaw ö te vi. Tungaila kai ce lä nang ce ma säbawng hethang kae saite tea kai ce lä la ö te y.

Kai ce lä Khrista üng Angthang Kähawi tea mäkhang y hethang awng te phüng-a, mätangbälai saite na thung-a awng ö te vi. ¹³Säthaw üng Ingkäcai-a kälu sa saite khimi na lä honi üng äma ce üng käcakänei na dang ö vi. Maicang-a löci sa saite mäthykung lä maicang üng mawi na tea ca haw vi näte nang ce lä mäny ö khaw te vi. ¹⁴Honi kätyng Angthang Kähawi thui saite khimi na lä honi Angthang thui te hai-a hing hethang kae näkha Areng ma särilo py pyng te vi dy.

¹⁵Tungaila kai ma dang hethang kae saite üng äte la kai lä tawng te y vi. Nang ce ma kai tea hae haetä py hai hethang ngai te phüng-a, kai lä nang ce tea hini cae tärü te y. Kai lä tangkae la y käla, Angthang Kähawi thui saite phüng tea aethaw haw te vi. Hokä aethaw saite tea tüng y näkha khimi ce ma thui ö te qawng-a lä, kai tähang dü te lä hawiky vi ai. ¹⁶Kai lä Angthang Kähawi thui te phüng-a, aethaw hethang awng te y vi. Säthaw ma kai tea hini lo thui hai pyng te vi dy. Honi Angthang Kähawi thui y dylä, kai lä tähang si vi ai. ¹⁷Kai lä Angthang Kähawi thui hethang kai ma üng aely kängai kätyng re dylä, kai lä ävang dang hethang kae. Tungaila Säthaw lä kai tea hini kälu sa hethang särilo py kha kai lä äni üng lo tea tängai khü te vi. ¹⁸Tukätephüng-a kai dang hethang lä äte ävang mei. Kai tähang lä tangkae y käla, Angthang Kähawi thui saite lä kai üng ävang vi. Angthang Kähawi thui te kätü-a, kai üng dang hethang kae saite tea kai lä mäkai te y lyng.

¹⁹Kai lä khimi kaelawi lawngtä vi. Kai lä ämi üng mawsawng tangnae la y. Tungaila khimi awng mang saite na Khrista tea yng hai hethang kai lä khimi qütä üng mawsawng tangnae kätyng lawng te vi. ²⁰Kai lä Judae khimi na hai mangtä awng te kätü-a, äni ce lä Khrista tea yng ö te phüng-a, Judae khimi lawngtä kätyng awng te vi. Mosi üng ubädi lä kai tea pyng te y vi dy. Tungaila Mosi üng ubädi tea hui saite Judae khimi na hai mangtä awng te kätü-a lä äni ce kätyng kai lä awng te by vi. Tudylä Judae khimi na lä Khrista tea yng ö vi ai. ²¹Kai lä khimi ceng kälang na hai mangtä awng dylä, Mosi üng Ubädi awng y saite ceng kälang na kätyng awng te vi. Äni ce Khrista tea yng ö hethang, kai lä hini kätyng sa te vi. Kai lä Säthaw üng Ubädi tea tängai y lyng näkha thui te y. Kai lä Khrista üng Ubädi tea hui tätang te vi. ²²Kai lä yng te aethawdi saite khimi na hai mangtä awng dylä, äni ce Khrista tea yng ö hethang kai lä yng te aethawdi saite khimi lawngtä kätyng awng te vi. Tudylä äni ce lä Khrista tea yng ö vi ai. Khimi phütä na ätemakä hai la yng haw hethang kai lä khimi cawngkhang na kätyng awng te by vi.

²³Kai lä Angthang Kähawi aethang hai dü hethang hini kätyng sa te vi. Kai lä Angthang Kähawi hai-a dang saite tähang kähawi khimi qütä tea dang hai hethang ngai te vi. ²⁴Aehui te aepreng saite thung-a aehui saite khimi na lä awng mang-a ngaila, ävang lä khimi lawngtä xyng dang te kae vi näte nang ce lä mäny ö vi. Tukätephüng-a nang ce lä ävang dang hethang aehui ö. ²⁵Aepreng saite thung-a qa saite khimi na lä äma ce tea mityng qütä-a aeküng ö. Äni ce lä bäja hethang hai pra saite ävang dang hethang aethawsa ö te vi. Tungaila mä-ai lä dungtäsa awng jawjaw saite ävang dang hethang aethawsa ö te vi. ²⁶Tukätephüng-a kai lä mawkung awng pyng saite mityng-a kätaw-a aehui te vi. Kai lä aeli tea äkö hai thy kha aetu saite khimi kätyng y lyng. ²⁷Kai lä aepreng saite khimi lawngtä kätyng kai ma üng ätabung hai kai ma üng bälung tea aeküng te vi. Hokä y dylä kai lä khimi kälang na tea Angthang Kähawi thui ngaila, kai ma khekhe lä Säthaw üng aely kätyng awng y saite khimi-a lawng haw te vi.

Mimi cäphaw saite na tea sädi py saite

¹Kangby jä-ai na ä, jangni-a mä-ai üng kangsi kangjaw na lä Mosi hai mangtä daithung kärang-a awng te kätü-a, äni ce lä ätemakä awng mei näte tea nang ce lä dawng tämang ö hethang kae y. Säthaw lä äni ce angxynlyng na tea khö angnüng hai khu kha lolang mätü pa te vi. Äni ce angxynlyng na lä pangle kangthing tea äkho sui y käla ma aekae ö te vi dy. ²Äni ce angxynlyng na lä Mosi üng äkähui na lawng hethang khö angnüng hai pangle thung-a baptismae la ö vi dy. ³Äni ce angxynlyng na lä Säthaw ma äma üng haidae hai-a py saite täkaw tea mangtä ca ö te vi dy. ⁴Äni ce angxynlyng na lä Säthaw ma py saite tui tea mangtä nei ö vi dy. Äni ce lä Säthaw ma äma ce tähang sa rüng pa saite lungphö üng lawng saite tui tea nei ö vi dy. Honi lungphö lä äni ce hai mangtä awng jawjaw saite Khrista Äma khekhe vi dy. ⁵Tungaila Säthaw lä äma üng khimi awng mang saite na tea kädawtho vi dy. Tukätephüng-a Säthaw lä äni ce tea dü hai kha äni ce üng äro na tea lä daithung kärang-a aehi sangxang hai ö pa vi dy.

⁶Hini tyng saite na lä mä-ai tähang aetu nae haetä lawng te vi. Mä-ai üng kangsi kangjaw na lä ngaiphi tüng y saite bälung na awng te kätyng mä-ai lä awng ö hethang kae y. ⁷Äni ce thung üng phütä na lä mimi na tea cäphaw te kätyng mä-ai lä cäphaw ö hethang kae y. Caekäcai thung-a tärü te lä, “Isrelae khimi na lä pawi sa kha nei ca ea ceng kälang na kätyng lang kha täkübäjang sa ö te vi dy” näkha awng te vi. ⁸Äni ce thung üng phütä na täkübäjang sa te kätyng mä-ai lä sa ö hethang kae y. Tukätephüng-a Säthaw lä känitä-a äni ce thung üng khimi lawng 23,000tä na bung dü hai ö pa te vi dy. ⁹Mä-ai lä Areng tea käny hethang kae y. Äni ce thung üng phütä na lä Areng tea käny te phüng-a, bärui na kei kha äni ce lä dü ö vi dy. ¹⁰Äni ce thung üng phütä na ma thuisung te kätyng, mä-ai lä thui sung ö hethang kae y. Säthaw lä täphra saite Känipre angtawtha tea mätaw kha äni ce bung bädü hai ö pa vi dy.

¹¹Mä-ai üng kangsi kangjaw na tea hini kätyng aeting te lä mä-ai tähang aetu nae haetä-a lawng te vi. Hini tyng saite na lä mä-ai tea sädi py hethang tärü te vi dy. Mä-ai hing saite kätü lä kangkhüng üng kätü hai aenai ö te vi dy.

¹²Tukätephüng-a nang ce lä yng te cakhi-a aedaw te vi näkha dawng dylä, aetüng kha nang ce üng yng saite pra y hethang sädi khai ö. ¹³Hunghö sa hethang the saite nang ce aeting saite lä khimi qütä na la aeting ö te by vi. Säthaw lä äma üng älo aedo saite tea hui khü te phüng-a, bäja haw y te the saite na tea aeting y vi ai. Nang ce lä the saite aeting te kätü-a, bälung cakhi hai hethang Säthaw ma nang ce tea aethaw py vi ai. The saite thung üng Säthaw lä nang ce tähang tho hethang älang la sa rüng vi ai.

Mimi tea cäphaw saite pawi hai Areng üng Kädüngbö

¹⁴Tukätephüng-a kangby jä-ai na ä, nang ce lä äni ce ma cäphaw saite mimi na tea aehi ö. ¹⁵Kai lä bälunghae saite khimi na kätyng nang ce tea thui te vi. Kai thui saite lo tüng dylä, nang ce lä dawng ö. ¹⁶Areng üng kädüngbö ca te üng bynglyng tea mä-ai lä nei te kätü-a, Säthaw tea bälaw ö te vi. Honi kätü-a mä-ai lä Khrista üng äthi mangtä nei kha äni üng dü saite tea aedawng haile tyng ö te vi. Täkaw tea täpe te kätü-a, mä-ai lä Khrista üng ätabung tea mangtä ca ö te vi. ¹⁷Täkaw lä haetä awng te phüng-a, hini täkaw tea ca saite mä-ai lä awng mang ö ngaila, ätabung lä haetä kätyng vi.

¹⁸Isrelae khimi na phüng aedawng ö. Säthaw tähang maicang qawng-a löci sa te üng mawi ca saite khimi na lä Säthaw hai äma ce tingtawi bungtä lawng ö te vi. ¹⁹Kai thui hethang ngai te lä mimi hai mimi na tea löci sa saite na lä haedae awng y vi. ²⁰Tungaila mimi na tähang löci na sa saite lä angra na tähang löci aesa ö tätang te vi. Äni ce lä Säthaw tea löci na sa ö te y. Kai lä nang ce tea angra na hai kangby jä-ai aesa hethang ngai hai te y vi. ²¹Nang ce lä Areng üng bynglyng hai angra na üng bynglyng tea nei mei haw ö y lyng. Nang ce lä Areng üng loka hai angra na üng loka tea ca mei haw y lyng. ²²Mä-ai lä Areng tea pä-e hai hethang ngai ö te vi mei. Mä-ai ma lä Areng qawng-a aethaw awngky näkha dawng ö te vi mei.

Säthaw üng phung-ang tähang awng ö

²³Nang ce ma, “Kai ce lä sa hethang ngai saite angxynlyng na tea sa haw ö te vi” näkha nä ö te vi. Tätang khaw vi. Tungaila äte angxynlyng na lä yng saite na tähang aerawi te y lyng. Nang ce ma, “Mä-ai lä äte angxynlyng na sa haw vi” näkha nä ö te vi. Tungaila äte angxynlyng na lä yng saite na tea säbawng ö te y. ²⁴Ämi lawngtä la äma üng tähang qaitä ävang dang hethang dawng hang. Khimi kälang na ävang dang hethang dawng hai pa ö.

²⁵Nang ce lä seng-a jaw saite ängang angxynlyng na tea ca ö haw te vi. Hini ängang phüng düng y käla ma käsi kähawi mäny saite bälung käcai hai nang ce lä ca ö. ²⁶Caekäcai thung-a, “Älawng hai hini älawngpre-a awng saite angxynlyng na lä Areng hai aesui saite vi” näkha näte vi.

²⁷Yng y saite khimi lawngtä ma nang ce bung bö ca hethang ka ea ly hethang ngai dylä, ly kha ca ö. Loka thung-a awng saite käcakänei na tea düng y käla ma käsi kähawi mäny saite bälung käcai hai nang ce lä ca ö. ²⁸Tungaila khimi lawngtä ma nang ce tea, “Honi ängang lä mimi tea löci sa pyng saite mawi vi” näkha nädylä, honi tea nang ce lä ca hethang kae y. Nang ce tea thui pa saite hini khimi üng käsi kähawi mäny saite bälung tähang nang ce lä ca ö hang. ²⁹Nang ce üng käsi kähawi mäny saite bälung phüng kai lä thui te y. Kai lä nang ce tea thui saite khimi üng käsi kähawi mäny saite bälung phüng tea thui te vi.

Nang ce thung üng khimi phütä lä, “Säthaw ma kai tea ätete na sa hethang aelawi saite py vi nädylä, ätephüng-a khimi kälang üng käsi kähawi mäny saite bälung kätyng kai tea tärae cei hethang kae te vi mei” näkha nä ö te vi. ³⁰Kai lä Säthaw tea bälaw kha käcakänei ca dylä, kai bälaw saite käcakänei phüng-a “Ämi ma kai tea cy haw ai mei” näkha näte vi.

³¹Nang ce lä ca saite läsy, nei saite läsy, sa saite läsy, Säthaw üng phung-ang tähang sa ö hethang kae. ³²Nang ce lä Judae khimi na, Ceng kälang na, Khristen kangkawng üng khimi na ma hunghö sa hai y hethang-a awng ö ba. ³³Kai üng sa saite na hai-a khimi angxynlyng na kawng hai ö hethang kai lä aethawsa te vi. Nang ce la honi kätyng sa ö. Kai lä kai ma ävang dang hethang tähang sa te y. Khimi kälang na ävang dang hai hethang sa te vi. Ätephüng-a mei nädylä, kai lä khimi awng mang saite na bung Säthaw ma aeqang hethang ngai hai te vi.

¹Kai lä Khrista tea aetu nae-a khai te kätyng, nang ce la kai tea aetu nae kätyng khai ö.

Kangkawng-a Säthaw tea cäphaw hethang älang

²Nang ce lä kai bung älang cawngkhang hai aedawng haile kha kai ma mätu pyng saite reitae na kätyng hui ö te phüng-a, kai lä nang ce tea bälaw te vi. ³Tungaila nawngmäcaw qütä üng älö lä Khrista vi näte kai lä nang ce tea mäny hai hethang ngai te vi. Nawngmädi qütä üng älö lä äma üng nawngpaw vi. Khrista üng älö lä Säthaw vi. ⁴Nawngmäcaw lawngtä lä äma üng älö aekhu ea aetang kha buisaw lo na thui dylä, äni lä Khrista tea mäthi y te vi. ⁵Nawngpui lawngtä lä äma üng älö-a tea aekhu y käla aetang kha buisaw lo na thui dylä, änawngpaw tea mäthi y te vi. Äni lä äma üng älö-a aekhu y dylä, äma üng älö tea äsang aeba pang saite nawngmädi hai aetawng te vi.11:5 Pawlae üng kätü-a, nawngmädi lawngtä äma üng äsang aeba dylä, honi lä dengpy saite üng äsäny kha äni tea saerae hai te vi. Y dylä honi nawngmädi lä mawsawng tangnae lawng te vi.⁶Nawngmädi lawngtä lä äma üng älö tea aekhu hethang ngai y dylä, äni lä äma üng äsang kädawi-a aeba sy. Äni äsang kädawi aeba kha aeba pang vi dylä, nawngmädi tähang lä saerae hethang hawi vi te phüng-a, äni lä äma üng älö tea aekhu hethang kae. ⁷Nawngmäcaw lawngtä aetang te kätü-a, äni lä älö-a aekhu hethang kae y. Ätephüng-a mei nädylä, nawngmäcaw bung lä Säthaw äma hai ämaw äcae aetawng-a sa te phüng-a vi. Nawngmäcaw lä Säthaw üng phung-ang mätü te vi. Honi kätyng, änawngpui la änawngpaw üng phung-ang mätü te by vi. ⁸Säthaw lä nawngmäcaw bung nawngmädi te üng hai sa te y. Tungaila äni lä nawngmädi bung nawngmäcaw te üng hai sa te vi. ⁹Säthaw lä nawngmäcaw bung nawngmädi tähang sa te y lyng. Tungaila äni lä nawngmädi bung lä nawngmäcaw tähang sa te vi. ¹⁰Nawngpui lä äma üng änawngpaw üng aenae täkui-a awng näte mätü hethang äma üng älö tea aekhu hethang kae vi. Ätephüng-a mei nädylä, nawngmädi na lä kangkawng thung-a aecö te kätü-a, Känipre angtawtha na ma kheng ö te vi. ¹¹Tungaila mä-ai lä Areng hai bungtä hing te kätü-a, nawngpui lä äma üng nawngpaw tea aely ngai te vi. Honi kätyng nawngpaw la äma üng nawngpui tea aely ngai te by vi. ¹²Nawngmädi bung lä Säthaw ma nawngmäcaw te üng sa ngaila, nawngmäcaw bung lä nawngmädi ma aepeng te vi. Tungaila angxynlyng na bung lä Säthaw ma sa te vi.

¹³Kangkawng maw-a nawngmädi lä äma üng älö tea aekhu y käla Säthaw tea aetang te lä tüng mei, tüng y mei, näte nang ce lä aedawng ö. ¹⁴Nawngmäcaw lawngtä lä äma üng äsang käsadui-a khai dylä, äni tähang saerae hethang hawi vi näkha mä-ai lä mäny ö te vi. ¹⁵Tungaila nawngmädi lawngtä äma üng äsang käsa-a awng dylä, honi lä äma üng ämaw äcae tea hawi hai te vi. Äni üng äsang lä äma tähang aekhu te kätyng vi. ¹⁶Tungaila khimi lawngtä lä hini phüng-a älo ae-e hethang ngai dylä, mä-ai hai Säthaw üng kangkawng na thung-a reitae kälang na awng y vi näkha kai lä thui te vi.

Areng üng kädüngbö

Mat 26:26-29; Mar 14:22-25; Luk 22:14-20

¹⁷Vaihi kai lä nang ce tea täru saite hai-a, nang ce tea bälaw haw y lyng. Nang ce üng kangkawng-a mangtä aecö te kätü-a, yng saite üng hing te tähang lä hawi hai hethang tähang y käla, aethawsi hai hethang tähang vi. ¹⁸Angcü-a, nang ce üng kangkawng mangtä aecö te kätü-a, nang ce thung-a lä aetäphü te na awng ö vi näte kai lä thai vi dy. Hini phütä na lä tätang vi näkha kai lä aethang khai te vi. ¹⁹Nang ce thung-a aetäphü saite na lä awng hethang kae. Hokä ea ni ämi lä Säthaw üng aely kängai-a awng mei näte mäny haw ai. ²⁰Nang ce mangtä aecö te kätü-a lä, Areng üng kädüngbö ca hethang y vi. ²¹Nang ce lä ca te kätü-a, kangby jä-ai na tea aering y käla ma, nang ce lä langmaw-a nang ma ce üng bö ca ö te vi. Tukätephüng-a khimi phütä na lä böjo aelang kha khimi phütä na lä bärui ö te vi. ²²Nang ce lä ca hethang hai nei hethang ing na awng ö te vi. Nang ce lä Säthaw üng kangkawng tea mäthi y te hai khimi kangtang na tea saerae hai ö te vi. Nang ce tea kai lä äte thui haw ai mei. Kai lä nang ce tea bälaw haw y lyng.

^23-24Areng ma kai tea mätu saite hini lä kai ma nang ce tea mätu rüng pyng te vi dy. Khimi ce ma Areng Isu bung äma üng täre na äkö thung-a a te kärung-a, äni lä täkaw la kha Säthaw tea bälaw pyng-a, täkaw tea täpe ea, “Hini täkaw lä nang ce tähang täpe saite kai üng ätabung vi. Kai tea aedawng haile tyng hethang hini kätyng ca ö jawjaw ba” näkha näpa. ²⁵Honi kätyng, äni ce lä ca ö pyng-a, äni lä bynglyng la kha, “Hini bynglyng thung-a awng saite cäpje tui lä kai üng äthi vi. Kai üng äthi lä Säthaw hai khimi ce säla-a aenai saite kangthae üng kamarae vi. Kai tea aedawng haile tyng hethang hini kätyng nei ö jawjaw ba” näkha näpa.

²⁶Nang ce lä hini täkaw ca kha hini bynglyng thung üng cäpje tui nei saite kätü qütä, Areng tyng haile te khytä äni üng dü saite phüng thui ö te vi. ²⁷Tukätephüng-a khimi lawngtä lä Areng tea tämö khai y käla, hini täkaw ca kha bynglyng thung üng cäpje tui tea nei dylä, äni lä Areng üng dü saite tea mäthi y te vi. Äni lä Areng Isu bung thinglang qawng-a bädü te khimi ce hai aetawng te vi. ²⁸Tukätephüng-a täkaw ca y te kälang-a hai bynglyng thung üng cäpje tui nei y te kälang-a, khimi lawngtä lä äma tea aecei hethang kae. ²⁹Khimi lawngtä lä Areng üng äthi hai ätabung phüng tea aedawng y käla ca nei vi dylä, Säthaw ma honi khimi tea lä dengpy vi ai. ³⁰Tukätephüng-a nang ce thung-a awng mang saite na lä naw kha aethawdi ö te vi. Khimi phütä na lä dü ö pyng te vi. ³¹Tungaila mä-ai ma tea aecei mang dylä, Säthaw lä mä-ai tea tärae cei y lyng. ³²Säthaw ma mä-ai tea tärae cei kha dengpy dylä, äni lä hini älawngpre üng khimi na hai mangtä mä-ai tea täphra y hethang sa vi ai.

³³Tukätephüng-a kangby jä-ai na ä, nang ce lä Areng üng kädüngbö ca hethang mangtä aecö te kätü-a, nang ma ce tingtawi tea lä aering ö. ³⁴Nang ce bö aelang dylä, angcü-a ma ing-a ca ö hethang kae. Hini kätyng sa dylä, Säthaw lä nang ce tea tärae cei y vi ai. Kai ly te kätü-a, kai lä nang ce tea äphüng kälang na thui vi ai.

Muilaw Käcai ma py te sakaw saite na

¹Kangby jä-ai na ä, kai lä Muilaw Käcai ma mä-ai lawng lawngtä tea py qi saite sakaw saite na phüng nang ce tea mäny hai khaw hethang ngai te vi. ²Nang ce lä Säthaw bung mäny ö y te kätü-a, Setan lä nang ce tea lang tämang hai hethang älo aepe haw y saite mimi na tea cäphaw hethang the te tea nang ce lä mäny ö pyng te vi dy. ³Tukätephüng-a khimi lawngtä ma, “Isu tea täking saite tyng sy” näkha thui dylä, Säthaw üng Muilaw hai-a thui te y vi näte kai lä nang ce tea mäny hai hethang ngai te vi. Honi kätyng ämi lawngtä la Muilaw Käcai hai y dylä, “Isu lä Areng vi” näkha thui haw y by vi.

⁴Muilaw Käcai ma sakaw saite cawngkhang na py ngaila, Säthaw üng Muilaw lä lawngtä xyng awng te kae vi. ⁵Yng saite khimi na lä Säthaw üng mawsawng-a älang cawngkhang hai sa ngaila, mä-ai angxynlyng na lä Areng mangtä tähang sa ö te vi. ⁶Säthaw lä älang cawngkhang na hai kälu sa ngaila, honi Säthaw lawngtä ma yng saite khimi qütä na thung-a kälu sa qi te vi dy. ⁷Muilaw Käcai lä sakaw saite na mä-ai tea py qi vi dy. Tudylä mä-ai yng saite na lä lawng lawngtä tea sabawng haw ö qi te vi. ⁸Muilaw Käcai ma khimi lawngtä tea lä bälungkähae hai thuikaw saite py vi dy. Lawngtä tea lä äni ma mänykaw saite hai Säthaw üng Angthang Kähawi thuikaw saite py te vi dy. ⁹Mangtä Muilaw Käcai ma khimi lawngtä tea yng phi hethang py te vi dy. Khimi kälang lawngtä tea lä äni ma nawsaw hawi sa hethang haidae py vi dy. ¹⁰Muilaw Käcai ma khimi lawngtä tea cangxei saite na sa hethang haidae py vi dy. Kälang lawngtä tea lä buisaw lo thuikaw saite py vi. Kälang tea lä äni ma Muilaw Käcai üng haidae hai-a khimi lawngtä ma kälu sa te, y dylä Setan üng haidae hai-a kälu sa te tea mäny haw hethang sakaw saite py vi dy. Khimi lawngtä tea lä äni ma mäny haw y saite lo cawngkhang aepe hethang thuikaw saite py, äkälang lawngtä tea lä äni ma khimi ce thaikaw haw hethang mäny haw y saite lo cawngkhang aepe tea thui mäcai haile kaw saite py vi dy. ¹¹Säthaw üng lawngtä xyng saite Muilaw lä hini sakaw saite angxynlyng na py te vi. Muilaw Käcai lä äma ngai te kätyng yng saite khimi qütä tea aetawng y saite sakaw te na py te vi.

Kaepreng na awng mang saite ätabung

¹²Mä-ai Khrista tea yng saite na lä kaepreng na awng mang saite ätabung haetä kätyng vi. Ätabung lä kaepreng awng mang te hai-a sa ngaila, honi ätabung lä haetä kae. ¹³Honi kätyng-a, Säthaw ma mä-ai angxynlyng na, Judae khimi na, khimi ceng kälang na, mawsawng tangnae na hai, khimi kaelawi na tea lä Muilaw Käcai hai-a mä-ai bung ätabung haetä thung-a baptismae py te vi dy. Säthaw lä mä-ai üng bälung thung-a mangtä saite Muilaw Käcai bung mäkung pyng vi dy.

¹⁴Ätabung lä kaepreng haetä xyngtä hai sa te y. Kaepreng awng mang hai-a sa te vi. ¹⁵Äkho ma, “Kai lä äkö y te phüng-a, ätabung hai aesui te y” näkha thui ngailä äkho lä ätabung üng kaepreng jawjaw vi. ¹⁶Känawkhing ma, “Kai lä ämi y te phüng-a, ätabung hai aesui te y” näkha thui ngaila, känawkhing lä ätabung üng kaepreng jawjaw vi. ¹⁷Ätabung angxynlyng na ämi haetä-a lawng dylä, makä sa kha älo thai haw ai mei. Ätabung angxynlyng na känawkhing haetä-a lawng dylä, makä sa kha ämui dang haw ai mei. ¹⁸Tungaila Säthaw lä mä-ai üng ätabung tea kaepreng awng mang saite na hai sa pyng te vi dy. Äni lä hini kaepreng angxynlyng na tea äma üng ngai saite kätyng sa rüng pa te vi dy. ¹⁹Kaepreng lä haetä xyng awng dylä, ätabung lä awng haw y lyng. ²⁰Ätabung-a kaepreng na awng mang ngaila, ätabung lä haetä xyng awng te vi.

²¹Ämi ma äkö tea, “Nang bung kai lä aely ngai te y” näkha thui haw y. Älö la äkho tea, “Kai lä nang bung aely ngai te y” näkha thui haw y te by vi. ²²Tätang thui si nädylä, aethaw awng bärai y saite ätabung kaepreng na lä ätabung thung-a aely lengky te vi. ²³Ävang ting bärai y näkha mä-ai aedawng saite kaepreng na tea mä-ai lä kähawi-a rui ö te na vi. Khimi ce ma nung hethang kae y saite ätabung üng kaepreng na tea kähawi-a kä-o na hai bälawng ö te vi. ²⁴Äcae hawiky saite ätabung üng kaepreng na tea mä-ai lä kä-o nitha na hai täphung ö te y. Säthaw lä ätabung üng kaepreng na tea äma üng älang hai mangtä khai kha aethawdi saite kaepreng na tea hawiky rae-a rui te vi. ²⁵Tudylä ätabung üng kaepreng na lä ätäphü hethang kae y. Kaepreng na lä haetä tea haetä aesäbawng hethang kae. ²⁶Kaepreng haetä mätangbälai dylä, kaepreng kälang angxynlyng na la mätangbälai ö tyng te by vi. Khimi phütä ma kaepreng haetä tea bälaw dylä, kaepreng kälang angxynlyng na la anghawtho ö te by vi.

²⁷Nang ce lä Khrista üng ätabung vi. Nang ma ce thung üng khimi qütä lä honi ätabung üng kaepreng haetä lawng qi te vi. ²⁸Kangkawng thung-a Säthaw lä kaepreng na tea äma ce üng mityng py pyng te vi dy. Angcüky üng na tea äni lä angtawtha na-a khai te vi. Äbaeni üng na tea lä buisaw na, ämäthung üng na lä Säthaw üng mätu saite särae na-a khai ö vi dy. Honi pyng-a lä cangxei te na sa haw saite khimi na, honi pyng dylä känaw käsaw tea hawi sa haw saite na, khimi kälang na tea säbawng haw saite na, kangkawng tea bähawi saite na hai mäny haw y saite lo cawngkhang thui haw saite na tea äma ce üng mityng-a py pa vi dy. ²⁹Angxynlyng na lä angtawtha na, buisaw na hai, Säthaw üng lo mätu saite särae na y lyng. Khimi angxynlyng na lä cangxei sa haw saite na y lyng. ³⁰Angxynlyng na lä känaw käsaw kähawi sa haw saite na y, angxynlyng na lä mäny y te lo cawngkhang aepe saite khimi na y, angxynlyng na lä mäny haw y saite lo cawngkhang na khimi kälang na tea thaikaw haw hethang thui mäcai tyng haw saite khimi na y vi. ³¹Nang ce lä kangkawng tea säbawng mang te sakaw saite na dang hethang ngaiphi te bälung awng ö te v.

Tudylä kai lä nang ce tea älang kähawiky mätü vi ai.

Bälung aevaw saite

¹Kai lä älawngpre khimi angxynlyng na üng älo na hai Känipre angtawtha na üng älo na aepe haw ngaila, kai üng kangby jä-ai na tea bälung aevaw y dylä, kai üng älo na lä mawng, y dylä qala the te tüng kätyng kae vi. ²Kai lä buisaw lo thui haw te läsy, Säthaw üng ho saite lo angxynlyng na tea mänykaw te läsy, bälunghae saite angxynlyng na awng te läsy, me anghung na tea mäthuija haw te khytä yng te awng ngaila, kai üng kangby jä-ai na tea bälung aevaw y dylä, kai lä aetütü kae. ³Kai tea awng saite vyngsai angxynlyng na mätang saite khimi na tea py king te läsy, löci mawi kätyng maisawi hethang kai ma üng ätabung tea mäteng ma aepy te läsy, kai üng kangby jä-ai na tea bälung aevaw y dylä, kai lä äte ävang la dang y lyng.

⁴Bälung aevaw saite khimi lä änawngsa te vi. Äni lä bälung hawi kha khimi kälang na tea säbawng te vi. Äni lä pä-e te, aethaw te hai bälungleng te awng y. ⁵Bälung aevaw saite khimi lä rang y, mä-ai ma tähang qaitä dawng te y vi. Äni lä kädawtho te jahaw y. Äni lä khimi ce tea dawsae khai te y. ⁶Bälung aevaw saite khimi lä sa tämang saite na nung dylä, bälung hawi y vi. Äni lä kätüng sa saite khimi tea anghawtho te vi. ⁷Bälung aevaw saite khimi lä äma tea hawi y sa saite angxynlyng na tea khung te vi. Äni lä Säthaw tea ae-y jawjaw kha aethang khai jawjaw te hai yng te cakhi-a awng jawjaw te vi.

⁸Bälung aevaw saite khimi lä dungtäsa bälung aevaw haw te vi. Tungaila buisaw lo thuikaw saite na, mäny haw y saite lo thuikaw saite na hai mänykaw saite angxynlyng na lä khimi ce ma tawng ö y vi ai dy. ⁹Mä-ai üng mänykaw saite lä cungrü te y. Buisaw lo thui haw saite khimi mäteng ma äjecäcaw xyng mäny te kae. ¹⁰Tungaila Säthaw lä mä-ai tea äma üng käcungrü-a aerü saite mätü te kätü-a, mä-ai üng äjecäcaw mänykaw saite la king ö vi ai.

¹¹Kai lä nade te kätü-a, nade kätyng älo aepe te vi. Kai lä nade kätyng aedawng kha bälung kaedawng awng te vi. Kai lä ryng te kätü-a, nade lawngtä kätyng awng saite tea kädephae te vi. ¹²Vaihi mä-ai lä Säthaw üng ämaw äcae tea khawitälae thung-a awng te kätyng sävui sävai-a nung ö te kae. Tungaila kangkhüng kätü-a, mä-ai lä Säthaw tea mimai hai nungsy ö vi ai. Vaihi kai üng mäny saite lä äje cäcaw kha cungrü te y vi rawng. Tungaila Säthaw lä kai tea vaihi mäny te kätyng kangkhüng kätü-a, kai lä äte angxynlyng na cungrü-a mäny king vi ai.

¹³Tätang khaw-a lä yng saite, aethang khai saite hai bälung aevaw saite näkha hini äthungtä na lä awng jawjaw ö ai. Hini äthungtä thung-a, bälung aevaw saite lä aesangky vi.

Muilaw Käcai ma py te sakaw saite na

¹Nang ma ce üng kangby jä-ai na tea bälung aevaw hethang aethawsa ö. Muilaw Käcai ma py saite sakaw saite na dang hethang nang ce lä ngaiphi saite bälung awng ö. Angcüky-a buisaw lo thui hethang nang ce lä ngaiphi saite bälung awng ö lawi. ²Ätephüng-a mei nädylä, nang ce lä mäny haw y saite älo na aepe dylä, khimi ce tähang aepe te y. Nang ce lä Säthaw tähang aepe ö te vi. Mäny haw y saite lo na lä ämi la thaikaw y lyng. Hini kätyng aepe saite lawngtä lä, Muilaw Käcai hai-a ho saite lo mitang na tea äni lä aepe te vi. ³Tungaila buisaw lo na thui saite khimi lä yng saite na tea säbawng hethang, aethaw py hethang hai äni ce tea bälung bädang hethang aepe te vi. ⁴Mäny haw y saite lo na aepe saite khimi lä äma ma aethaw dang hethang aepe te vi. Buisaw lo thui saite lawngtä lä kangkawng angxynlyng na aethaw dang hethang thui te vi.

⁵Kai lä nang ce angxynlyng tea mäny haw y saite lo cawngkhang aepekaw hai hethang ngai te vi. Tungaila nang ce lä hini qawng-a cang y buisaw lo thuikaw hethang kai lä ngai hai te vi. Ätephüng-a mei nädylä buisaw lo thui saite lä mäny haw y saite lo cawngkhang na aepe te qawng-a aely lengky vi. Hokä y dylä mäny haw y saite lo na aepe saite khimi lawngtä lä thui mäcai kha kangkawng tea säbawng haw te vi. ⁶Kangby jä-ai na ä, kai lä nang ce tea ly kha mäny haw y saite lo cawngkhang aepe dylä, nang ce tähang äte la ävang ting te y. Säthaw ma kai tea mätü pyng saite phüng, äni ma py pyng saite bälunghae te phüng, buisaw lo, y dylä mätu saite lo phüng na kai thui dylä, nang ce tähang ävang ting te vi.

⁷Hing y saite phüsävü tea äma älang kätyng-a üng y dylä, hing y saite tingtyng tea äma üng älang kätüng-a kätho y vi dylä, tängai saite khimi lä äte ae-awi mei näte mäny haw y vi ai. ⁸Baw tea älang kätüng-a üng y dylä, reisae na lä täre aety hethang aerü y lyng. ⁹Honi kätyng nang ce lä khimi ce tea äni ce thaikaw y saite lo hai aepe dylä, nang ce aepe saite lo tea äni ce lä mäny ö y lyng. Honi lä aeli thung-a nang ce älo aepe te kätyng vi. ¹⁰Hini älawngpre-a lä älo amäjy cawngkhang na awng mang te vi. Tungaila älo qütä lä älawngsai awng bawi te vi. ¹¹Tungaila kai lä khimi lawngtä ma aepe saite lo tea thaikaw y dylä, älo aepe saite honi khimi lä kai ma mäny y saite pre kälang üng khimi kätyng awng vi ai. Kai la äni tähang lä pre kälang üng khimi kätyng awng by vi ai. ¹²Nang ce lä Muilaw Käcai üng py saite sakaw te na tea ngai ö phi te vi. Tukätephüng-a Khristen kangkawng aethaw awng hai hethang säbawng saite sakaw te na dang he nang ce lä ngaiphi te bälung awng ö.

¹³Mäny haw y saite lo na aepe te khimi qütä lä thui mäcai kaw saite dang hethang aetang he kae. ¹⁴Kai lä mäny haw y saite lo hai aetang dylä, kai lä Muilaw Käcai hai-a aetang te vi. Tungaila kai ma khekhe lä kai aepe saite lo na tea thaikaw te y. ¹⁵Kai lä makä sa ai mei. Kai lä Muilaw Käcai hai-a aetang vi ai. Tungaila kai lä kai ma thaikaw saite älo na hai la aetang by ai. Kai lä Muilaw Käcai hai-a ae-awi thui ai. Tungaila kai lä kai ma üng thaikaw saite lo na hai la ae-awi thui by ai. ¹⁶Nang ce lä Muilaw Käcai hai-a Säthaw tea bälaw dylä, nang ce hai mangtä Säthaw tea cäphaw saite khimi na lä nang ce üng lo tea thaikaw ö y vi. Äni ce lä nang ce üng thui saite lo thaikaw y te phüng-a, ätemakä sa kha aetang saite thung-a qa kha “Amen” näkha thui haw ö ai mei. ¹⁷Nang ce üng Säthaw tea bälaw saite lä hawi ngaila, nang ce hai mangtä awng saite khimi na tähang lä ävang ting te y vi.

¹⁸Kai lä nang ce angxynlyng qawng-a mäny haw y saite lo na aepeky te phüng-a, Säthaw tea bälaw te vi. ¹⁹Tungaila kangkawng-a mangtä aecö te kätü-a, kai lä khimi ce thaikaw y saite älo bälang na täsawngtä aepe te qawng-a, khimi ce ma thaikaw saite lo bälang bangawtä aepe hethang ngaiky te vi.

²⁰Kangby jä-ai na ä, nang ce lä ryng y saite nade na kätyng dawng ö hethang kae y. Hunghö sa saite-a lä nade na kätyng awng ö. Tungaila ryng saite khimi na kätyng nang ce lä aedawng ö lawi. ²¹Caekäcai thung-a Areng ma,

“Kai lä kai ma üng khimi na tea mäny haw y saite älo na hai pre kälang üng

khimi na hai-a aepe vi ai.

Tungaila honi kätü-a mäteng ma

äni ce lä kai üng älo tea tängai ö y” näkha thui te vi.

²²Tukätephüng-a mäny haw y saite lo na aepe saite lä yng y saite khimi na tähang äsäny vi. Honi lä yng saite khimi na tähang y lyng. Buisaw lo thui te lä yng saite khimi na tähang vi. Yng y saite khimi na tähang y lyng.

²³Kangkawng-a mangtä aecö te kätü-a, khimi angxynlyng na lä mäny haw y saite lo na aepe kha yng y saite khimi na, y dylä ärang üng khimi na ma äthung-a kung dylä, äni ce ma, “Hini khimi ce lä kangthö na vi” näkha thui ö vi ai. ²⁴Tungaila nang ce angxynlyng ma buisaw lo thui te kätü-a, yng y saite khimi na, y dylä ärang üng khimi na kung dylä, nang ce üng thui saite lo na phüng-a, äni ce lä hunghö awng näte mäny ö ai. Nang ce angxynlyng üng älo na ma äni ce tea tärae cei ö vi ai. ²⁵Muilaw Käcai lä äni ce üng bälung thung-a ho saite kaedawng na tea mätü ai. Tukätephüng-a äni ce lä aebo kha Säthaw tea cäphaw ö ai. Äni ce lä khimi ce üng maw-a, “Säthaw lä nang ce thung-a awng tätang te vi” näkha thui ö ai.

Kangkawng-a cäphaw saite älang

²⁶Kangby jä-ai na ä, kai thui hethang ngai te lä hini vi. Nang ce lä Säthaw tea cäphaw hethang mangtä aecö te kätü-a, lawngtä lä ae-awi thui, lawngtä lä Säthaw lo mätu, lawngtä lä äma tea Säthaw ma aetüng hai saite phüng thui, lawngtä lä mäny haw y saite lo hai angthang thui kha lawngtä ma lä mäny haw y saite lo tea thui mäcai pa te vi. Hini sakaw saite angxynlyng na lä kangkawng tea säbawng hethang tawng he kae. ²⁷Mäny haw y saite lo na thui dylä, lawng netä, y dylä lawng thungtä lä aepe haw vi. Lawngtä thui pyng dylä khimi kälang lawngtä ma thui hethang kae. Mäny haw y saite lo aepe dylä, thui mäcai saite khimi lä awng hethang kae te vi. ²⁸Tungaila mäny haw y saite lo tea thui mäcai kaw saite khimi lawngtä awng y dylä, mäny haw y saite lo na thui saite khimi lä kangkawng thung-a aecö tea lä sitäri-a awng kha äma ma tea hai Säthaw tea aepe kae sy. ²⁹Buisaw lo na tea khimi lawng netä y dylä, lawng thungtä thui ö sy. Khimi kälang na ma hini buisaw lo na hai thui saite lä Muilaw Käcai hai thui mei, thui y mei, näte dawng ö khü sy. ³⁰Tungaila Säthaw ma aety kha awng saite khimi lawngtä tea buisaw lo haetä täphawng dylä, angcüky üng thui saite lawngtä lä aenawng hethang kae. ³¹Nang ce angxynlyng lä buisaw lo na, lawngtä pyng-a lawngtä thui haw ö te vi. Tukha nang ce angxynlyng lä mäny haw kha aethaw dang ö ai. ³²Buisaw lo thui haw saite khimi lä äma üng sakaw saite tea aepä-üng hethang kae. ³³Ätephüng-a mei nädylä, Säthaw lä xhuxa saite tea ngai te y vi.

Säthaw lä äma üng khimi na mangtä aecö te kätü-a, äni ce tea bälung mangtä aedü kha awngneng hai hethang ngai te vi. ³⁴Nawngmädi na lä kangkawng üng aecö saite thung-a sitäri-a awng hethang kae. Äni ce lä älo aepe haw y. Judae na üng Ubädi-a awng te kätyng nawngmädi lawngtä lä aemäneng hethang kae. ³⁵Nawngmädi na ma Säthaw üng älo düng hethang hae haetä awng dylä, äni ce lä äma ce üng änawngpaw na tea ing-a düng hethang kae. Nawngmädi na lä kangkawng-a aecö tea älo thui dylä, saerae he hawi vi.

³⁶Säthaw üng lo lä nang ce te üng tho te y. Äni üng lo lä nang ce tea qaitä tyng te y. ³⁷Khimi lawngtä ma äni lä buisaw läsy, äni tea lä Muilaw Käcai ma py saite sakaw saite awng te läsy, näkha dawng dylä vaihi nang ce tea kai ma tärü saite lä Areng üng särilo vi näte äni lä mäny hethang kae. ³⁸Tungaila äni lä hini särilo tea tängai y dylä, kangkawng-a lä äni üng lo tea tängai hang sy.

³⁹Tukätephüng-a kangby jä-ai na ä, buisaw lo na thui haw hethang ngaiphi te bälung awng ö. Nang ce lä mäny haw y saite lo na thui te tea mäkhang ö hang. ⁴⁰Tungaila nang ce lä äte angxynlyng na tea xhuxa hai y käla älang kätüng-a sa ö hethang kae.

Khrista hing haile tyng saite

¹Kangby jä-ai na ä, angcü-a ma nang ce tea kai thui pyng saite Angthang Kähawi tea lä aedawng haile ö. Nang ce lä Angthang Kähawi yng kha honi tea aedaw ö khi te vi. ²Kai ma nang ce tea thui pyng saite lä Angthang Kähawi tea nang ce yng khi ö dylä, Säthaw ma Angthang Kähawi hai-a nang ce bung aeqang ai. Hokä y dylä nang ce üng yng saite lä aetütü-a lawng ö te vi.

³Kai lä kai ma thai khe saite aely kälengky nang ce tea thui täryng te vi dy. Caekäcai thung-a tärü te kätyng, Khrista lä mä-ai üng hunghö na tähang dü pa vi dy. ⁴Caekäcai thung-a tärü te kätyng, äni bung ö pyng-a, Säthaw ma ämäthung käni-a la mäning haile tyng pa te vi dy. ⁵Areng lä Peterae maw-a ämaw aetüng pyng-a, angtawtha lawng hawlai netä na maw-a la ämaw aetüng pa vi dy. ⁶Honi pyng-a Areng lä äkähui lawng cungvai bangawtä cang y saite na maw-a qengtäma ämaw aetüng pa vi dy. Nung saite na thung üng phütä na lä dü pyng te ngaila, vaihi khytä awng mangky saite na lä hing ö te vi rawng. ⁷Honi pyng-a Areng lä Jaeko maw-a ämaw aetüng kha angtawtha angxynlyng na maw-a la ämaw aetüng pa vi dy.

⁸Kangkhüngky aepeng te kätü tyng y kälang-a, aepeng saite nade cäpi lawngtä kätyng kai ma mäteng ma Areng bung nung haw te vi dy. ⁹Kai lä angtawtha na thung-a aely lengky y saite lawngtä vi. Kai lä Säthaw üng kangkawng tea mätangbälai hai te phüng-a, kai tea lä angtawtha näkha mäthi hethang mäteng ma aeteng te y. ¹⁰Tungaila Säthaw üng tähang kähawi phüng-a, kai lä äni üng angtawtha-a lawng te vi dy. Kai tea Säthaw ma py saite tähang kähawi lä aetütü-a lawng te y vi. Kai lä angtawtha kälang na qawng-a aethaw saky te vi. Tungaila kai ma sa te y lyng. Säthaw üng tähang kähawi lä kai hai mangtä awng te phüng vi. ¹¹Tukätephüng-a, kai ma Angthang Kähawi thui te läsy, angtawtha kälang na ma honi Angthang tea thui te läsy, Angthang Kähawi lä mangtä vi. Nang ce lä hini Angthang tea yng ö te vi.

Dü saite thung üng hing haile tyng pa saite

¹²Kai ce thui saite angthang lä Säthaw ma kädü üng mäning haile saite Khrista üng angthang vi. Tukätephüng-a nang ce thung üng ämi lawngtä la “Dü saite thung üng hing haile saite lä awng te y” näkha thui haw y lyng. ¹³Dü saite khimi na tähang hing haile saite awng y dylä, Khrista la dü saite thung üng lä hing haile y by lyng. ¹⁴Säthaw ma Khrista bung dü saite thung üng mäning haile y dylä, mä-ai thui saite angthang hai nang ce üng Khrista tea yng saite lä ävang käting y-a lawng te vi. ¹⁵Hini qawng-a cang y, mä-ai lä Säthaw phüng kaeling kaemae thui saite na lawng ö te vi. Ätephüng-a mei nädylä mä-ai lä Säthaw ma Khrista bung dü saite thung üng mäning haile vi dy näkha mä-ai lä thui ö te vi. Dü saite khimi na hing haile y näte lo tätang khaw vi dylä, Säthaw ma Khrista bung la mäning haile tyng y by lyng. ¹⁶Dü saite khimi na hing haile ö y dylä, Khrista la hing haile tyng y by lyng. ¹⁷Säthaw lä Khrista bung kädü üng mäning haile y vi dylä, nang ce üng yng saite lä aetütü lawng te vi. Nang ce üng hunghö na tea Säthaw lä bälawi y te vi rawng. ¹⁸Hini kätyng awng dylä, Säthaw lä Khrista tea yng kha dü saite khimi na tea lä dungtäsa dengpy ai. ¹⁹Khrista tea mä-ai üng aethang khai saite lä vaihi hing saite xyngtä tähang ävang ting te kae vi dylä, mä-ai lä hini älawngpre üng khimi na thung-a bäheng hethang hawiky saite na lawng ö te vi.

²⁰Tungaila Säthaw ma Khrista bung dü saite üng mäning haile tyng vi dy näte lä tätang khaw vi. Äni lä Säthaw ma dü saite üng mäning te khimi ce thung-a angcüky üng äthai kätyng lawng te vi. ²¹Adam näsaite khimi lawngtä phüng-a, khimi angxynlyng na lä dü hethang kae. Honi kätyng-a Khrista näsaite lawngtä phüng-a, khimi angxynlyng na lä dü saite thung üng hing haile tyng haw ö te vi. ²²Khimi angxynlyng na lä Adam hai aesui te phüng-a, dü ö te vi. Honi kätyng Khrista hai aesui saite khimi angxynlyng na lä Säthaw ma dü saite thung üng mäning haile tyng ö ai. ²³Tungaila khimi qütä lä Säthaw üng khai rüng saite kätyng-a dü saite thung üng hing haile ai. Angcüky-a Säthaw ma Khrista bung lä dü saite thung üng mäning haile tyng te vi dy. Honi pyng dylä, Khrista ly haile te kätü-a, äni hai aesui saite khimi na lä dü saite thung üng hing haile tyng ö ai. ²⁴Honi pyng-a kangkhüng kätü lä tyng ai. Khrista lä haidae awng saite angra angxynlyng na, Känipre angtawtha na hai älawngpre tea pyng saite angra käleng na üng aenae na tea täphra vi ai. Tupyng-a Khrista lä äma üng pyng hethang haidae lä Äpä-ai Säthaw tea a ai. ²⁵Säthaw ma äma üng täre angxynlyng na tea mäja kha Khrista üng äkho täkui-a äni ce bung khai saite kätü tyng y te khytä, Khrista lä pyng hethang kae. ²⁶Kangkhüng üng bäja saite täre lä dü saite vi. ²⁷Caekäcai thung-a, “Säthaw lä äte angxynlyng na tea Khrista üng äkho täkui-a khai pa vi dy” näkha awng te vi. “Angxynlyng” näkha thui saite lo lä Säthaw ma Khrista üng pyng saite thung-a qa y vi näte tea mäny haisy te vi. ²⁸Säthaw lä äte angxynlyng na Khrista üng pyng saite täkui-a khai pyng-a, äcäpaw äma khekhe la Säthaw üng pyng saite täkui-a khai vi ai. Honi kätyng Säthaw lawngtä xyng ni äte angxynlyng na tea Areng kätyng pyng vi ai.

²⁹Dü pyng saite khimi na hing haile y vi dylä, ätephüng-a dü pyng saite na tähang khimi ce lä baptismae la ö te vi mei. ³⁰Säthaw ma dü saite khimi na bung mäning haile y dylä, ätephüng-a mä-ai lä kätü qütä bädü saite na aeting hethang awng rüng ö te vi mei. ³¹Kangby jä-ai na ä, kai lä käni qütä dü saite hai aeting te vi. Nang ce lä mä-ai üng Areng Isu Khrista hai bungtä te phüng-a, kai lä hini kä thui te vi. ³²Kai lä Ephesi märü üng tawngbawi kärai na hai aetawng saite khimi na hai aety te vi. Honi tea khimi üng kaedawng hai kai sa dylä kai tähang lä ävang ting te y vi. Dü saite khimi na hing haile y vi dylä, mä-ai lä khimi ce ma thui saite kätyng “Mä-ai lä ca ö si, nei ö si, ätephüng-a mei nädylä khawngdang-a mä-ai lä dü ö ai” näkha awng haw ö te vi.

³³Khimi ce ma nang ce tea kaeling kaemae sa ö hang sy. Khimi ce üng thui saite lä, “Hawi y saite kangby jä-ai na ma nang ce üng aeme aeqa saite kähawi tea täphra te vi” näkha näte lä tüngkhaw te vi. ³⁴Lo mitang phüng tea kähawi-a dawng kha nang ce üng tämang saite lang mang-a hui jawjaw ö vi hang lawi. Kai lä nang ce thung-a Säthaw bung mäny y saite khimi na awng vi näte thui hethang kae. Hini phüng-a nang ce lä saerae hethang kae ö te vi.

Dü saite thung üng hing haile te ätabung

³⁵Khimi lawngtä ma, “Makä sa kha dü saite khimi na lä hing haile haw te mei. Äni ce lä äte makäti ätabung awng ö te mei” näkha düng ai. ³⁶Hini kätyng thui saite khimi lä aedawng kaw y te vi. Nang lä ämöti haetä tea älawng qawng-a mäthu te kätü-a, ämöti pra y dylä äkung kangthae tho haw y lyng. ³⁷Nang ce lä älawng ngang thung-a ryng saite äkung tea mäthu te y. Nang ce lä ämöti tea mäthu ö te kae. Hini lä kjung caw kung haetä üng ämöti, y dylä äkung kälang üng ämöti vi. ³⁸Säthaw lä äma üng aely ngai te kätyng ämöti qütä tea ätabung sa rüng pa te vi. Äni lä ämöti qütä hai aesui saite ätabung py qi te vi.

³⁹Hing saite angxynlyng na üng ängang lä aetawng te y. Khimi üng ängang lä kälang vi. Tawngbawi üng lä kälang, tävaw üng lä kälang, mawi üng lä kälang kälang-a awng ö qi te vi.

⁴⁰Känipre hai aesui saite ätabung na awng te hai älawng hai aesui saite ätabung na la awng ö te vi. Känipre hai aesui saite ätabung na lä ämaw äcae hawi kha älawngpre hai aesui saite ätabung na ämaw äcae hawi te lä aetawng ö te y vi. ⁴¹Käni, law, Tengpaw na üng ämaw äcae lä kälang kälang awng ö te vi. Tengpaw na üng ämaw äcae mäteng ma la hae haetä aetawng ö y qi te vi.

⁴²Tukha dü saite thung üng khimi na lä hing haile te kätü-a, hini kätyng awng ö vi ai. Älawng thung-a ö saite ätabung lä rawng vi ai. Säthaw ma mäning haile saite ätabung lä rawng y dy lyng. ⁴³Ätabung lä älawng thung-a ö te kätü-a, ämaw äcae lä si kha aethaw la awng y vi dy. Säthaw ma ätabung tea mäning haile te kätü-a lä, ämaw äcae lä hawi bei kha aethaw awng te vi. ⁴⁴Ö saite ätabung lä hini älawng hai aesui saite ätabung vi. Säthaw ma mäning haile saite ätabung lä, Muilaw Käcai hai aesui saite ätabung vi. Älawng hai aesui saite ätabung awng dylä, Muilaw Käcai hai aesui saite ätabung la awng te vi. ⁴⁵Caekäcai thung-a, “Säthaw lä angcü üng khimi Adam bung sa te kätü-a, Adam lä hing saite khimi lawng vi dy” näkha awng vi. Khrista näte kangkhüng üng Adam lä kähing py saite Muilaw vi. ⁴⁶Hini älawng hai aesui saite ätabung lä angcüky-a awng te vi dy. Honi pyng-a Muilaw Käcai hai aesui saite ätabung lä tyng te vi. ⁴⁷Angcüky üng khimi Adam bung Säthaw lä hini älawngdi hai sa te vi. Khrista näsaite äbaeni üng Adam lä Känipre mang üng tyng te vi. ⁴⁸Hini älawng hai aesui saite khimi na lä älawngdi hai sa saite khimi Adam hai aetawng te vi. Känipre hai aesui saite khimi na lä Känipre üng tho saite Khrista hai aetawng te vi. ⁴⁹Mä-ai lä älawng hai sa saite Adam üng ämaw äcae awng te kätyng mä-ai lä Känipre üng tyng saite Khrista üng ämaw äcae kätyng awng ö vi ai.

⁵⁰Kangby jä-ai na ä, kai thui hethang ngai te lä, äthi ängang awng saite ätabung la Säthaw üng pyng saite pre thung-a qa haw y. Rawng saite ätabung lä dungtäsa hing te dang haw y lyng.

⁵¹Kai lä ho saite phüng nang ce tea thui te vi. Mä-ai angxynlyng na lä dü ö y vi ai. Tungaila Säthaw lä mä-ai angxynlyng na üng ätabung tea mäqa vi ai. ⁵²Kangkhüng kangteng üng baw üng te kätü-a, ämi qengtä mäkhae te hai anglaw säde lang te kätyng awng vi ai. Baw üng te kätü-a, Säthaw lä dü pyng saite khimi na bung mäning haile kha dü y saite ätabung äni ce tea py pa vi ai. Säthaw lä hing ö saite mä-ai angxynlyng na bung mäqa vi ai. ⁵³Säthaw lä phra haw saite mä-ai üng ätabung tea phra y saite ätabung-a mäqa vi ai. Säthaw lä dü haw saite ätabung tea dü haw y saite ätabung-a mäqa pa ai. ⁵⁴Säthaw lä pra haw saite ätabung tea pra haw y saite ätabung-a mäqa te kätü-a, dü haw saite ätabung tea dü haw y saite ätabung-a mäqa vi dy. Caekäcai thung-a tärü te kätyng, “Dü saite lä phra te vi dy.

⁵⁵Dü saite üng areng, nang lä mäja haw y vi.

Dü saite üng areng, nang lä haidae la awng y vi dy” näkha thui saite lä cungrü tätang te vi.

⁵⁶Khimi ce ma hunghö sa ö te phüng-a, dü saite lä haedae awng te vi. Mosi üng Ubädi phüng-a, hunghö lä haidae awng te vi. ⁵⁷Tungaila Säthaw tea mä-ai lä bälaw ö si. Äni lä mä-ai üng Areng Isu Khrista hai-a, mä-ai dü saite hai hunghö tea mäja hai te vi dy.

⁵⁸Tukätephüng-a, kai bälung aevaw saite kangby jä-ai na ä, yng te cakhi kha kätüng lang mang kätaw-a ly ö jawjaw lawi. Areng üng kälu tea anghawtho bärai te hai ma sa ö jawjaw ba. Areng tähang nang ce ma sa saite angxynlyng na lä aetütü y lyng näte nang ce lä mäny ö.

Khristen kangtang na tea säbawng saite

¹Jerusalem märü-a awng saite Säthaw üng khimi na tähang tangkae käcö te phüng kai lä nang ce tea thui hethang ngai te vi. Kalatia khö üng kangkawng na tea sabawng hethang kai ma thui pyng te kätyng nang ce la sa ö. ²Säthaw Käni qütä, nang ce lä kälu sa saite hai-a dang te tangkae na thung üng nang ma ce üng aely ngai te kätyng kälang-a, khai ö hethang kae. Hini kätyng sa dylä kai tyng te kätü-a, nang ce lä tangkae käcö näpi hethang aely ngai y dy lyng. ³Kai tyng te kätü-a, kai lä cae tärü kha nang ce ma re saite khimi na tea py ea nang ce üng lasawng na hai-a Jerusalem märü-a mätaw ai. ⁴Kai la ly hethang aeteng khaw dylä, hini khimi ce hai mangtä ly ai.

Pawlae üng kangkhüng täru saite lo na

⁵Kai lä Makedonia khö-a cäqeng pyng-a, nang ce tea ly ai. Kai lä Makedonia khö-a ly hethang aedawng pyng te vi dy. ⁶Kai lä nang ce hai käqae-a mangtä awng kha y dylä, säding byng te khytä mäteng ma awng daila awng ai. Honi pyng dylä nang ce ma kai tea mityng kälang mang-a ly hethang säbawng haw ö ai. ⁷Kai lä vaihi nang ce üng mityng-a kung kha nang ce hai tänaetä aeting hethang ngai te y. Areng ma aely ngai dylä, kai lä kätü käqae-a nang ce hai awng hethang aethang khai te vi.

⁸Kai lä Pengticost Käni tyng te khytä, hini Ephesi märü-a awng ai. ⁹Areng ma Säthaw üng kälu sa hethang kätho käleng haetä pä-awng vi dy. Tungaila kai tea elekhei sa saite khimi na lä awng mang ö te by vi.

¹⁰Timothe tyng dylä, äni bung kähawi-a lady ö. Äni lä kai kätyng Areng üng kälu sa saite khimi lawngtä vi. ¹¹Ämi lawngtä la äni tea lä mäthi y sa hang. Kai tea ämi lä awng mang te hai tyng haile hethang säbawng ö. Kai lä yng saite kangby jä-ai na hai mangtä äni lä kai tea ly haile ai näte aethang khai te vi.

¹²Vaihi kai lä nang ce tea mä-ai üng kangby jä-ai Apolo phüng thui ai. Kai lä äni tea kangby jä-ai kälang na hai mangtä nang ce tea ly hethang mäci leilae te vi dy. Tungaila äni lä vaihi kätü-a nang ce tea ly hethang lä ngai te y vi rawng. Äni lä nang ce tea hawikhaw saite kätü-a ly vi ai.

Kangkhüng üng älo na

¹³Nang ce lä canglailing-a awng ö. Angthang Kähawi tea yng te cakhi ö. Ri ö hang. Ryng saite Khristen lawngtä kätyng aethaw awng ö. ¹⁴Nang ce sa saite angxynlyng na tea bälung aevaw saite hai sa ö.

¹⁵Kangby jä-ai na ä, kai lä nang ce tea mäci hethang ngai. Nang ce lä Stephana hai äni üng ingthung na phüng mäny ö te vi. Äni ce lä Käri pre-a angcüky üng yng saite khimi na vi dy. Äni ce lä Säthaw üng khimi na tähang kälu sa hethang äma ce bung ae-a ö te vi dy. ¹⁶Kai lä nang ce tea hini khimi ce bung mätawngky na kätyng mäthi kha äni ce hai mangtä kälu sa saite Khristen kangby jä-ai na lo tängai ö by hethang thui te vi.

¹⁷Kai lä Stephana, Fawtuna hai Akhika ce tyng ö te phüng-a, anghawtho te vi. Ätephüng-a mei nädylä, äni ce lä nang ce ma kai tähang säbawng haw y saite na tea sa ö pyng te phüng-a vi. ¹⁸Äni ce lä nang ce üng bälung tea kawng hai ö te kätyng kai üng bälung tea la kawng hai te by vi. Nang ce lä äni ce kätyng yng saite kangby jä-ai na tea tämö khai ö hethang kae.

¹⁹Asia pre cäpi-a awng saite kangkawng na ma nang ce tea cibai sa ö te vi. Nang ce lä Areng hai bungtä te phüng-a, Akuila hai Precila ni hai änini üng ing-a mangtä aecö saite kangkawng ma la Areng üng mimai hai-a nang ce tea kawng bärai te hai cibai sa ö te by vi. ²⁰Hi-a awng saite Khristen kangby jä-ai angxynlyng na lä nang ce tea cibai sa ö te vi.

Nang ma ce tingtawi Khrista üng bälung aevaw saite hai cibai aesa ö.

²¹Kai, Pawlae, lä honi cibai sa saite cae tea kai ma üng äkö hai tärü khe te vi.

²²Khimi lawngtä lä Areng tea bälung aevaw y dylä, äni lä täking aelawi sy. Mä-ai üng Areng ä, ly lawi ba.

²³Mä-ai üng Areng Isu üng tähang kähawi lä nang ce hai mangtä awng sy.

²⁴Kai lä Khrista Isu hai bungtä awng saite nang ce angxynlyng na tea bälung aevaw te vi. Amen.