मत्ती

Matthew

मत्ती

यीशु जी रा खानदान

¹ अब्राहम री ओलाद,दाऊद री औलाद, यीशु मसीह जी रा खानदान। ² अब्राहम का इस्हाक पैदा होया, इस्हाक का याकूब पैदा होया, याकूब का यहूदा अते तिसेरे भ्याळ पैदा होए, ³ यहूदा ते तामार का फिरिस ते जोरह पैदा होए, फिरिस का हिस्त्रोन पैदा होया, ते हिस्त्रोन का एराम पैदा होया, ⁴ एराम का अम्मीनादाब पैदा होया, अम्मीनादाब का नहशोन, अते नहशोन का सलमोन पैदा होया, ⁵ सलमोन ते राहब का बोअज पैदा होया, बोअज ते रूत का ओबेद पैदा होया, अते ओबेद का यिशै पैदा होया, ⁶ ते यिशै का दाऊद राज्जा पैदा होया। ते दाऊद का सुलैमान तिस जनानी का पैदा होया जेह्ड़ी पैल्ले उरिय्याह री लाड़ी थी, ⁷ सुलैमान का रहबाम पैदा होया, रहबाम का अबिय्याह पैदा होया, ते अबिय्याह का आसा पैदा होया, ⁸ आसा का यहोशाफात पैदा होया, यहोशाफात का योराम पैदा होया, योराम का उज्जियाह पैदा होया, ⁹ उज्जियाह का योताम पैदा होया, योताम का आहाज पैदा होया, अते आहाज का हिजकिय्याह पैदा होया, ¹⁰ हिजकिय्याह का मनश्शिह पैदा होया, मनश्शिह का आमोन पैदा होया, ते आमोन का योशिय्याह पैदा होया; ¹¹ अते कैद होई करी बेबीलोन जाणे रे बेल्ले योशिय्याह का यकुन्याह, ते तिसेरे भ्याळ पैदा होए। ¹² कैद होई करी बेबीलोन पुजाए जाणे का बाद यकुन्याह का शालतिएल पैदा होया, ¹³ जरुब्बाबिल का अबीहूद पैदा होया, अबीहूद का इल्याकीम पैदा होया, ते इल्याकीम का अजोर पैदा होया, ¹⁴ अजोर का सदोक पैदा होया, सदोक का अखीम पैदा होया, ते अखीम का इलीहूद पैदा होया, ¹⁵ इलीहूद का इलियाजार पैदा होया, इलियाजार का मत्तान पैदा होया, अते मत्तान का याकूब पैदा होया, ¹⁶ याकूब का यूसुफ पैदा होया, जेह्ड़ा मरियम रा लाड़ा थिया, अते मरियम का यीशु जी जिन्हा जो कि मसीह बोलेया जांदा, पैदा होए। ¹⁷ इस तरिक्के कने अब्राहम का दाऊद ताँईं चौदाह् पीढ़ी होईयाँ, ते दाऊद का बेबीलोन जो कैद होई करी पुजाए जाणे ताँईं चोदाह् पीढ़ियाँ, अते कैद होई करी बेबीलोन जो पुजाए जाणे रे बेल्ले का मसीह ताँईं चोदाह् पीढ़ी होईयाँ।

यीशु जी रा पैदा होणा

¹⁸ यीशु मसीह जी रा जन्म इस तरिक्के कने होया, जाँ तिन्हेरी अम्मा मरियम री मंगोळी यूसुफ कने होई गेई अत्ते तिन्हेरे इक-दुज्जे रे मिलाप का पैल्ले ई पता चलेया कि मरियम पवित्र आत्मा री सक्ति कने दुपराणी है। ¹⁹ इधेरे ताँईं तिसेरे लाड़े यूसुफ ने जे इक धर्मी मह्णु थिया इस गल्ल जो जाहिर करी के मह्णुआं बिच तिस जो बदनाम नी करणा चांदा थिया, इधेरे तांई तिन्ने सोची लेया कि चुप-चाप ई मंगणी तोड़ी देयाँ ²⁰ जाँ से इन्हा गल्लां रे बारे अन्दर सोच्चेया ई करदा थिया ता प्रभु रा स्वर्गदूत तिस जो सुपने अन्दर आई करी बोलणा लगेया, “ओ यूसुफ! दाऊद री औलाद, तू मरियम जो अपणी लाड़ी बणाणे का मत डर, किजोकी जे बच्चा तिसेरे पेट अन्दर है, से पवित्र आत्मा री तरफ का है। ²¹ तिस ने इक निक्के जो जमणा ते तू तिसेरा नां यीशु रख्खेयाँ, किजो कि तिनिए अपणे मह्णुआँ रा तिन्हेरे पापाँ का उद्धार करणा।” ²² एह् सब इधेरे ताँईं होया कि जे वचन प्रभू ने भविस्यवाणी करणे वाळेयाँ रे जरिए जे किच्छ बोलेया थिया, से पूरा होई जाओ: ²³ “दिख्खो, इक कुआँरी ने दुपराणी होणा ते तिस ने इक्क निक्के जो जमणा, ते तिसेरा नां इम्मानुएल रख्खेया जाणा, “जिसेरा मतलब हुन्दा – परमेश्वर म्हारे कन्ने हिन। ²⁴ ता यूसुफ निन्दर का जाग्गी करी प्रभु रे दूत रे हूकम रे ह्साब कने अपणी लाड़ी जो ब्याई करी अपणे घरे लेई आया; ²⁵ ते जाँ ताँईं तिस ने निक्का नी जम्मेया ताँ ताँईं यूसुफ तिसेरे नेड़े नी गेया: अते यूसुफ ने अपणे बच्चे रा नां यीशु रख्खेया।

जोषतियां रा आणा

¹ राज्जा हेरोदेस जाँ राज करेया करदा थिय्या उन्हा ई रोज्जां अन्दर यहूदिया रे बैतलहम अन्दर यीशु जी पैदा होए, ता पूरव पास्से का मते सारे जोषती यरूशलेम अन्दर आई करी पुछणा लगे, ² “यहूदियाँ रा राज्जा जिसेरा जन्म होया है, कुते है?” किजोकी असां पूरव अन्दर तिसेरा तारा दिख्खेया अते तिसेरी जै-जै-कार करणा आए रे हिन।” ³ एह् सुणी करी राज्जा हेरोदेस घबराई गेया अत्ते तिस कने यरूशलेम रे होर मह्णु बी फिकर बिच पेई गे। ⁴ ताँ तिनिए यहूदी समाज रे सब परोह्तां रे प्रधानां जो अते सास्त्रियाँ जो इकठ्ठा करी के तिन्हा जो पुछ्छेया, “मसीहा जो कुते पैदा होणा चहिन्दा ?” ⁵ तिन्हा ने तिस जो बोल्लेया, “यहूदिया रे बैतलहम अन्दर, किजो की भविस्यवक्ता ने इय्याँ लिख्खे रा है कि : ⁶ “ओ बैतलहम, तू जे यहूदा री धरती अन्दर है, तू कुसी बी तरिक्के कने यहूदा रे अधिकारियाँ अन्दर सबका छोटा नी है; किजो कि तेरे बिच का इक अधिपति ने निकळणा, जिनिए मेरे इस्त्राएल रे मह्णुआं री दिख्ख-रिख्ख करणी है।” ⁷ ताँ हेरोदेस ने जोतिषियां जो चुप-चाप सदवाई करी तिन्हा का पुछ्छेया कि से तारा ठीक कुस बेल्ले लिब्बेया थिया, ⁸ ते तिनिए एह् बोल्ली करी तिन्हा जो बैतलहम भेज्जेया, “जाओ, तिस निक्के रे बारे अन्दर ठीक-ठीक पता करो, ते जाँ से मिल्ली जांगा ता मिन्जो खबर देई दे ताकि मैं बी आई करी तिस जो नमस्ते करां।” ⁹ से राज्जे री गल्ल सुणी करी चली गे, अते से तारा बी जे तिन्हा ने अम्बर बिच दिख्खेया थिय्या तिन्हेरे अग्गे-अग्गे थिय्या चलेया करदा। फिरी जां से जगह आई जित्ते निक्का थिया, उस जगह रे उप्पर तारा रुकी गेया। ¹⁰ तिस तारे जो दिख्खी करी से बड़े खुस्स होए। ¹¹ से घरे रे अन्दर गे अत्ते तिन्हा ने तिसेरी अम्मा मरियम रे कने उस निक्के जो दिख्खेया, ते मुंए रे भारे पेई करी निक्के जो नमस्ते कित्ती, ते अपणे-अपणे थैल्लू खोल्ली करी तिन्हा जो सोना, लोबान अत्ते गंधरस री भेंट चढ़ाई। ¹² अपण परमेश्वर ने इक सुपने अन्दर उन्हा जो सावधान करी दित्तेया, कि से वापस हेरोदेस का ना जान, इधेरे तांई से इक दुज्जे रस्ते का अपणे देस जो चली गे।

मिस्र देश जो जाणा

¹³ जां से चली गे ता यूसुफ जो प्रभु रे इक स्वर्गदूत ने सुपने अन्दर आई करी बोल्लेया, “उठ, तिस निक्के जो ते तिसेरी अम्मा जो लेई करी मिस्र देस जो नह्स्सी जा; ते जाँ ताँईं मैं तिज्जो नी बोलगा, ताँ ताँईं तित्ते ई रेह्याँ; किजोकी हेरोदेस इस निक्के जो मारणे तांई तोप्पेया करदा है।” ¹⁴ ताँ से रात्ती ई उठ्ठी करी निक्के अते तिसेरी अम्मा जो लेई करी मिस्र जो चली गेया, ¹⁵ ते हेरोदेस रे मरणे ताँईं तित्ते ई रेह्या। इधेरे ताँईं कि से वचन पूरा होई जाओ जे प्रभु ने भविस्यवक्ता रे जरिए बोल्लेया थिया : “मैं अपणे पुत्र जो मिस्र का सद्देया। ¹⁶ जाँ हेरोदेस ने एह् दिख्खेया, कि जोतिषियां ने तिस कने धोखा कित्तेया है, ता से बड़ा लैह्रितेया, अते मह्णुआँ जो भेज्जी करी हूकम दित्तेया कि जोतषियाँ रे दस्से रे बेल्ले रे ह्साब कने बैतलहम अते तिसेरे नेड़े-भेड़े रे सबनी इलाकेयाँ बिच जे दो साल्ले रे या इसका छोटे सबनां जो मारी दित्तेया जाये। ¹⁷ ता से वचन जे यिर्मयाह भविस्यवक्ता रे जरिए बोल्लेया गेरा थिया, से पूरा होया : ¹⁸ “रामाह अन्दर इक करूण-नाद सुणितेया, रोणा अते बड़ा मात्तम, राहेल अपणे निक्केयाँ ताँईं रोया करदी थी, अते चुप होणा नी चांदी थी, किजो कि से अवे मरी गेरे थिये।”

मिस्र देश का वापस हटणा

¹⁹ हेरोदेस रे मरणे का बाद, प्रभु रे दूत ने मिस्र अन्दर यूसुफ जो सुपने अन्दर आई करी बोल्लेया, ²⁰ “उठ, निक्के अते तिसेरी अम्मा जो लेई करी इस्राएल रे देस अन्दर चली जा, किजोकी जे निक्के री जान लैणा चांदे थिये, से मरी गेरे हिन।” ²¹ से उठ्ठेया, अते निक्के ते तिसेरी अम्मा जो कन्ने लेई करी इस्राएल देस जो आई गेया। ²² अपण जा यूसुफ ने एह् सुणेया कि यहूदिया बिच अपणे प्यो हेरोदेस री जगह पर अरखिलाउस राज करेया करदा है ता से तित्ते जाणे का डरेया। फिरी सुपने बिच परमेश्वर का चेतावनी पाई करी गलील प्रदेस बिच चली गेया, ²³ अत्ते तित्ते नासरत नां रे सैह्र अन्दर जाई बसेया, ताकि से वचन पूरा होई जाओ, जे भविस्यवक्ता रे जरिए बोल्लेया गेया थिया : “तिस जो नासरी बोलेया जाणा।”

यूहन्ना पतिस्मा दैणे वाळा

¹ तिन्हा रोज्जे यूहन्ना बपतिस्मा दैणे वाळा यहूदिया री उजाड़ जगह अन्दर आई करी ऐ प्रचार करणा लगेया: ² “अपणे पापा का तौबा करी लेयो, किजोकी स्वर्ग रा राज्य नेड़े आई गेरा है।” ³ ऐ सेई एह् जिसेरे बारे अन्दर यशायाह भविस्यवाणी करणे वाळे ने बोल्लेया थिया: “उजाड़ जगह अन्दर इक हक्का लाणे वाळे री अवाज सुणिया करदी है, ‘प्रभु रा रस्ता त्यार करो, तिन्हेरी सड़कां सिधी करो।” ⁴ यूहन्ना ऊँट रे बाळां रे कपड़े पांदा थिया, अते तिसेरी कमर बिच चमड़े रा पट्टा बन्नेरा हून्दा थिया। उसेरा खाण टिड्ड़े अते जंगली मखीर थिया। ⁵ ताँ तिसेरे का यरूशलेम, यहूदिया, यरदन अत्ते आस्से- पास्से रे सबनी इलाकेयाँ रे मह्णु तिस का चली आये। ⁶ तिन्हा ने अपणे-अपणे पापा जो मन्नी करी यरदन द्रया अन्दर तिस का बपतिस्मा लेया। ⁷ जाँ तिनिए मते सारे फरीसियाँ अते सदूकियाँ जो बपतिस्मा लैणे ताँईं अपु का आँदे दिख्खेया, ता तिन्हा जो बोलणा लगेया, “ओ सप्प रे बच्चेयों, तुसां जो कुनिए दस्सेया कि तुसा परमेश्वर रे न्याय रे प्रकोप का बची जाणा ? ⁸ इधेरे ताँईं अपणे कम्मां रा इदेह्या फळ लियाओ कि जिस कने लग्गो कि तुसां ने अपणे पापा का तौबा करी लेरी ए। ⁹ अते अपणे-अपणे मनां अन्दर ऐ मत सोच्चो कि म्हारा प्यो अब्राहम ए, किजोकी मैं तुसां जो बोलदा कि परमेश्वर इन्हा बट्टेयाँ का अब्राहम ताँई औलाद पैदा करी सकदा। ¹⁰ अवे झोंटू बुट्टेयाँ री जड़ा पर रख्खितेरा है, इधेरे ताँईं जे जे बुट्टा खरा करी नी फळदा, से बड्ड़ी करी अग्गी अन्दर पाई दैणा। ¹¹ “मैं ता पाणी कने तुसां जो पापा का तौबा करणे रा बपतिस्मा दिंदा, अपण जेह्ड़ा मेरे का बाद ईणे वाळा है, से मेरे का जादा सक्तिसाली ए; मैं तिन्हेरी चप्पल चुकणे जोग्गा बी नी ए। तिन्हा ने तुसां जो खुद पवित्र आत्मा ते अग्ग कने बपतिस्मा दैणा ए। ¹² तिन्हेरा अनाज फटकणे वाळा छज्ज तिन्हेरे हत्थां बिच है, अते तिन्हा ने अपणे खलाड़े जो खरा करी साफ करणा, अते कणक जो खत्ते अन्दर इकट्ठा करणा, ते भू जो तिस अग्ग अन्दर फुक्की दैणा, जे कदी बी नी बुझणी। ”

यूहन्ना यीशु जी जो बपतिस्मा दिदां

¹³ उस बेल्ले यीशु जी गलील का चली करी यरदन रे कनारे यूहन्ना का बपतिस्मा लैणे ताँईं आये। ¹⁴ अपण यूहन्ना ऐ बोल्ली करी तिन्हा जो रोकणा लगेया कि, “मिन्जो ता तुम्हारे का बपतिस्मा लैणे री जरूरत है, अते तुसी मेरे का आये हिन ?” ¹⁵ अपण यीशु जी ने तिस जो ऐ जवाब दित्तेया, “इस बेल्ल इय्याँ ई होणा दे, किजोकी असां तांई सही ए कि ईय्याँ ई सारी धार्मिकता जो पूरा करन।” ताँ यूहन्ना ने तिन्हेरी गल्ल मन्नी लेई। ¹⁶ ते यीशु जी बपतिस्मा लेई करी तिस्सी बेल्ले पाणी का बाहर आई गे, ते दिख्खो, तिन्हा ताँईं स्वर्ग खुल्ली गेया, अते तिन्हा ने परमेश्वर री आत्मा जो इक कबूतर साह्ई उतरदे अते अपणे उपराल्ले आंदे दिख्खेया। ¹⁷ अते दिख्खो, ऐ अवाज आई: “ऐ मेरा प्यारा पुत्तर है, जिस का मैं बड़ा-भरी जादा खूस है।”

यीशु जी रा परखेया जाणा

¹ फिरी पवित्र आत्मा यीशु जी जो उजाड़ जगह अन्दर लेई गेया ताकि सैतान रे दूत इब्लीस का तिन्हेरी परख होई सको। ² जाँ यीशु जी चाळी रोज अते चाळी रातां रा ब्रत रख्खी बैठ्ठे ता तिन्हा जो भूख्ख लग्गी। ³ तां सैतान यीशु जी का आया अत्ते बोलणे लग्गेया, “जे तू परमेश्वर रा पुत्तर ए ता इन्हा बट्टेयां जो बोल कि ऐ रोटी बणी जान।” ⁴ यीशु जी ने जवाब दित्तेया, “सास्त्र बिच लिख्खेरा ऐ, ‘मह्णु सिरफ रोटी कने ई नी जिंदा, अपण से हर इक वचन कने जिंदा जे परमेश्वर रे मुँह् का निकळदा।’ ” ⁵ ताँ इब्लीस तिन्हा जो पवित्र सैहर यरुशलेम बिच लेई गेया अते मन्दिर री चोटि पर खड़ा करी के, ⁶ उसने यीशु जी जो बोलेया, “जे तू परमेश्वर रा पुत्र ऐ ता तू इत्ते का छाळ मार किजोकी सास्त्र बिच लिख्खे रा ए: तिस ने तेरी रक्षा तांई अपणे स्वर्गदुतां जो हूकम दैणा अत्ते तिन्हा तिज्जो हत्थों हत्थ चुक्की लैणा, ताकि तेरे पैरां कने कोई पत्थर तक ना लगो ” ⁷ यीशु जी ने तिस जो बोल्लेया, “ऐ बी लिख्खेरा है : ‘तू प्रभु अपणे परमेश्वर जो मत परख।’ ” ⁸ फिरी इब्लीस तिन्हा जो इक बड़े ऊच्चे पाह्ड़ पर लेई गेया अते दुनिया रे सारे राज्य अते तिन्हेरी शान दिखाई करी, ⁹ तिन्हा जो बोल्लेया, “जे तू मेरे अग्गे झुकगा अत्ते मेरी जै-जै कार करगा, ता मैं एह् सारा किच्छ तिज्जो देई दैणा।” ¹⁰ ताँ यीशु जी ने तिस जो बोल्लेया, “ओ सैतान, दूर होई जा। किजोकी सास्त्र बिच लिख्खेरा है, ‘तू प्रभु अपणे परमेश्वर री ई जै-जै कार कर अते सिरफ उन्हेरी ई सेवा कर।’ ” ¹¹ ताँ सैतान तिन्हा जो छड्डी करी चली गेया, अते दिख्खो, स्वर्गदूत आई करी यीशु जी री सेवा-टहल करणा लग्गे।

यीशु जी रा सेवा रा कम्म शुरू करणा

¹² अते जाँ यीशु जी ने ऐ सुणेया कि यूहन्ना कैद करी लित्तेया गेरा है, ता से गलील जो चली गे। ¹³ अते से नासरत जो छड्ड़ी करी कफरनहूम अन्दर, जे जबूलून अते नप्ताली रे इलाके बिच गलील री झील रे नेड़े थिय्या, रैह्णे लग्गे। ¹⁴ ताकि जे यशायाह भविस्यवाणी करणे वाळे ने बोल्लेया थिया, से पूरा होई जाओ : ¹⁵ “जबूलून ते नप्ताली रे देस, समुन्द्र रे रस्ते पर, यरदन झील रे पार, होर जाति रे देस गलील बिच, ¹⁶ जे मह्णु निह्यारे बिच जिया करदे थिय्ये उन्हा ने इक महान ज्योति दिख्खी अते जे मह्णु मौत री छौंठ बिच रैह्न्दे थिय्ये उन्हा पर से ज्योति चमकी।” ¹⁷ तिस बेल्ले का यीशु जी ने शुभ-बसेख रा प्रचार करणा सुरू करी दित्तेया, “पापां का तौबा करी लेयो किजोकी स्वर्ग रा राज्य नेड़े आई गेरा ए।”

पैल्ले चेल्लेयां रा सद्देया जाणा

¹⁸ जां यीशु जी गलील री झील का जाया करदे थिय्ये ता तिन्हा ने दो भ्याळ, शमौन जिस जो पतरस बी बोलदे, अते तिसेरा भ्याळ अन्द्रियास जो झील अन्दर जाल पांदे दिख्खेया। से मछुआरे थिय्ये। ¹⁹ यीशु जी ने तिन्हा जो बोल्लेया, “मेरे पिच्छे चलो। मैं तुसा जो मह्णुआँ जो पकड़णे वाळा मछुआरा बणांगा।” ²⁰ तिन्हा तिस्सी बेल्ले जाल छड्ड़े अते तिन्हेरे पिच्छे चली पे। ²¹ तित्ते का अग्गे चली करी, यीशु जी ने जब्दी रे पुत्र याकूब अते युहन्ना जो दिख्खेया। से अपणे प्यो कने किस्ती पर जाल जो ठीक करेया करदे थिये। यीशु जी ने तिन्हा जो बी सद्देया। ²² से तिस्सी बेल्ले किस्ती अते अपणे प्यो जो छड्ड़ी करी तिन्हेरे पिच्छे चली पे।

यीशु जी बमारा जो ठीक करदे

²³ यीशु जी सारे गलील इलाके बिच यहूदी धर्म सभा अन्दर स्वर्ग रे राज्य रे सुभ-बसेख री सिक्सा दिंदे अते हर तरह री बमारियां का खरा अते मह्णुआं री कमजोरी जो दूर करदे घूमणे लग्गे। ²⁴ अते सारे सीरिया देस अन्दर तिन्हेरा बसेख फैल्ली गेया; ते मह्णु इदेय सब मह्णुआं जो, जे नेक-बनेक्की बमारियाँ अते दुखां अन्दर जकड़ित्तेरे थिये, जिन्हा अन्दर बुरी आत्मां थियाँ, जिन्हा जो मिरगी आंदी थी अत्ते जे अधरगं रे मारे थिय्ये यीशु जी का लियाणा लग्गे। यीशु जी ने तिन्हा जो खरा कित्तेया। ²⁵ इधेरे ताँई गलील, दिकापुलिस, यरूशलेम, यहूदिया ते यरदन दरिया रे पार का मह्णुआं री भीड़ री भीड़ यीशु जी रे पिच्छे चली पेई।

यीशु जी रा पहाड़ी उपदेश

¹ यीशु जी ने जां भीड़ दिख्खी ता से पाह्ड़ पर चली गे। से तित्ते बेह्ई गे ते तिन्हेरे चेल्ले तिन्हेरे का आये गे। ² तां यीशु जी तिन्हा जो सिक्सा दैणा लगे :

धन वचन

³ “धन्न हिन् से , जेह्ड़े मने रे दीन हिन्, किजोकी स्वर्ग रा राज्य तिन्हेरा ई है। ⁴ “धन्न हिन् से, जे मात्तम करदे हिन, किजोकी तिन्हा जो सांती मिलणी। ⁵ “धन्न हिन् से, जह्ड़े निम्ते हिन्, किजोकी तिन्हा ने धरती रे उत्तराधिकारी होणा । ⁶ “धन्न हिन् से, जेह्ड़े धार्मिकता रे भुख्खे अते प्यासे हिन्, किजोकी तिन्हा जो रजाया जाणा । ⁷ “धन्न हिन् से, जे दरदयाळू हिन्, किजोकी तिन्हा पर दया कित्ती जाणी। ⁸ “धन्न हिन् से, जिन्हेरे मन सुच्चे हिन्, किजोकी तिन्हा ने परमेश्वर जो दिखणा । ⁹ “धन्न हिन् से, जे मेल करांदे हिन्, किजोकी तिन्हा जो परमेश्वर रे पुत्र बोल्या जाणा। ¹⁰ “धन्न हिन् से, जिन्हा जो धार्मिकता री वजह कने तंग कित्तेया जांदा, किजोकी स्वर्ग रा राज्य तिन्हेरा ई है। ¹¹ “धन्न हिन् तुसी, किजोकि जाँ मह्णुआं ने मेरी वजह् कने तुम्हारी बेजती करनी, अते तंग करणा ते झूठ बोल्ली करी तुम्हारे खलाफ हर तरह री गल्लां बोलणी। ¹² ताँ खूस ते मगन होई जायो, किजोकी तुसां ताँईं इधेरे बदले स्वर्ग अन्दर ईनाम ए। तिन्हा ने उन्हा भविस्यवक्तां जो जे तुम्हारे का पैल्ले थिये इय्याँ ई तंग कित्तेया थिया।

लूण ते रौसनी

¹³ “तुसी धरती रे लूण हिन्; अपण जे लूण रा स्वाद बिगड़ी जाओ, ता से फिरी तिस्स जो लूणका नी कित्तेया जाई सकदा जांणा? फिरी से कुसी बी कम्म जोग्गा नी रैह्न्दा। सिरफ इधेरे कि तिस जो बाहर सुट्टी दित्तेया जाओ ते मह्णुआँ रे पैरां हेठ आई जाओ। ¹⁴ तुसी दुनिया री लौ हिन्। इक इदेया सैहर जे पाह्ड़ पर बस्से रा है, जे लूकाये नी लूकी सकदा। ¹⁵ मह्णु दीय्या बाळी करी टोकरी रे हेठ नी रखदा अपण दीवट पर रखदा तां से पूरे घरे रे लोकां जो लौ दिंदा। ¹⁶ इय्याँ ई तुम्हारी लौ मह्णुआँ रे साह्मणे चमकणा चहिंदी कि से तुम्हारे भले कम्मां जो दिख्खी करी तुम्हारे प्यो री, जे स्वर्ग अन्दर हिन्, बड़ाई करन।

व्यवस्था री सीख

¹⁷ “इयां मत समझदे, कि मैं नियम या भविस्यवाणी करणे वाळेयाँ री कताबां जो खत्म करणे ताँईं आये रा है। मैं उन्हा जो खत्म करणे ताँईं नी, अपण पूरा करणे ताँई आये रा ए। ¹⁸ किजोकी मैं तुसां जो सच्च बोलदा कि जाँ ताँईं अम्बर ते धरती टळी नी जांदे, तां ताँईं नियम री इक सियारी या इक बिंदी बी, जां तांई सब किच्छ पूरा नी होई जांदा, तां तांई नी मिह्टी नी सकदी। ¹⁹ इधेरे ताँईं जे इन्हा छोटे का छोटे हुक्मां बिच का कुस्की इक जो नी मनगा, ते तिय्याँ ई होरनी मह्णुआँ जो सिखांगा, तिनिए स्वर्ग रे राज अन्दर सब का छोटा होणा; अपण जे कोई इन्हा हुक्मां पर चलगा ते इन्हा जो सिखांगा, तिस्स जो ई स्वर्ग राज्य अन्दर महान मन्नेया जाणा. ²⁰ किजोकि मैं तुसां जो बोलदा, जां तांई तुसी धार्मिकता बिच सास्त्रियां अते फरीसियाँ री धार्मिकता का अग्गे नी निकळी जांदे, तुसी स्वर्ग रे राज्य अन्दर नी जाई सकदे।

गुस्सा ते खून करणा

²¹ “तुसी सुणी बैठ्ठेरे हिन् कि पूरखां कने बोल्या गेया थिया, ‘कुस्की री जान नी लैणी’ ते जे कोई कुस्की री जान लिंगा ता से कचैहरी अन्दर सजा रा हकदार है।’ ²² अपण मैं तुसां जो बोलदा कि जे कोई अपणे भाई पर गुस्सा करगा से कचैहरी अन्दर सजा भुगतणे रा हकदार है। अते जे अपणे भ्याळ री बेज्जती करगा से बड्डी कचैहरी अन्दर सजा भुगतणे रा हकदार ए। अते जे कोई अपणे भ्याळ जो, ‘ओ बेवकूफ्फ’ बोलगा से नरक री अग्ग री सजा भुगतणे रा हकदार ए। ²³ इधेरे ताँईं जे तू वेदी पर अपणी भेंट चढ़ाया करदा हो अत्ते तिज्जो चेत्ता आओ कि तेरे भ्याळ रे दिल बिच तेरे खिलाफ किच्छ है, ²⁴ ता अपणी भेंट तित्ते ई छड्ड़ी दे ते पैल्ले जाई करी अपणे भ्याळ कने सुलह् कर। अते फिरी आई करी अपणी भेंट चढ़ा। ²⁵ तेरा दुश्मण तिज्जो कचैहरी लेई चले रा हो अत्ते जां तुसी रस्ते बिच हो, ता तिस जो उस्सी बेल्ले अपणा दोस्त बणाई लै कुदखी इय्यां ना हो कि से तिज्जो न्यायधीश का देई देयो ते फिरी न्यायधीश सपाई जो। ते तिज्जो जेल होई जाओ। ²⁶ मैं तिज्जो सच्च बोलदा तू जेल का तां तांई नी छूटणा जाँ ताँई तू इक-इक पैसा चुकाई नी दिंगा।

व्यभिचार

²⁷ “तुसी सुणी बैठ्ठे रे हिन् कि बोल्लेया गेरा थिया, ‘व्याभिचार नी करणा।’ ²⁸ अपण मैं तुसां जो ऐ बोलदा, कि जे कोई कुस्की जनानी जो गंदी नजर कने दिखदा ता से अपणे मनां अन्दर पैल्ले ई तिस कने व्याभिचार करी बैठ्ठा रा है। ²⁹ जे तेरी सज्जी हाख्ख पाप करणे री वजह् बणदी, ता तिस जो कड्डी करी सुटी दे; किजोकी तेरे ताँईं एह्ई खरा है कि तेरे सरीर रे अंगा बिच का इक अंग नास होई जाओ अते तेरा सारा सरीर नरक अन्दर नी सुट्टेया जाओ। ³⁰ जे तेरा सज्जा हत्थ पाप करणे री वजह् बणदा, ता तिस जो कट्टी करी सुटी दे; किजोकी तेरे ताँईं एह्ई खरा है कि तेरे अंगा बिच का इक नास होई जाओ ते तेरा सारा नरक अन्दर नी सुट्टेया जाओ।

तलाक

³¹ “एह् बी बोल्लेया गेरा थिया, ‘जे कोई अपणी लाड़ी जो तलाक दैणा चाओ, ता से तिस जो त्यागपत्र देयो।’ ³² अपण मैं तुसां जो ऐ बोलदा कि जे कोई अपणी लाड़ी जो व्याभिचार जो छड्ड़ी करी कुस्की होरसी वजह कने तलाक दिंगा, ता से तिस का व्याभिचार करवांदा; अते जे कोई तिस छड्डे री जनानी कने ब्याह् करगा, से तिस कने व्याभिचार करदा।

कसम खाणा

³³ “फिरी तुसी सुणी बैठ्ठेरे हिन् कि पूरखाँ कने बोल्लेया गेया थिया, ‘तू कसम मत तोड़ बल्कि प्रभु कने कित्ते री कसमां जो पूरा कर।’ ³⁴ अपण मैं तुसां जो ऐ बोलदा कि कदी कसम मत खांदे; नां ता स्वर्ग री, किजोकी से परमेश्वर रा सिंहासन है; ³⁵ नां धरती री, किजोकी से तिन्हेरे पैरां री चौकी है; ना यरूशलेम री, किजोकी से महाराज्जे रा सैहर है। ³⁶ अपणे सरे री बी कसम मत खांदे किजोकि तू इक बाळ जो बी नां चिट्टा अते नां ई काळा करी सकदा। ³⁷ अपण जे तू ‘हाँ’ चाह्न्दा ता ‘हाँ’ बोल अत्ते ‘नां’ चाह्न्दा ता सिरफ ‘नां’ बोल। किजोकी जे किच्छ बी इस का जादा हुन्दा से बुराई री तरफ का हुन्दा।

बदला लैणा

³⁸ “तुसी सुणी बैठ्ठेरे हिन कि बोल्लेया गेरा थिया, ‘हाख्खी रे बदले हाख्खी, अते दंद रे बदले दंद।’ ³⁹ अपण मैं तुसां जो बोलदा कि बुरेयां रा साह्मणा मत करदे; अपण जे कोई तेरे सज्जी खाड्डी पर चांड़ मारो, तिसेरे पास्से दूई खाड्डी बी करी दे। ⁴⁰ अते जे कोई तेरे पर मुकद्दमा चलाई करी तेरा कुरता बी उतारणा चाओ, ता तिस जो अपणी फड़द तक देई दे। ⁴¹ जे कोई तिज्जो बेगार बिच इक किलोमीटर लेई जाये ता तिसेरे कने दो किलोमीटर दूर चली जा। ⁴² जे कोई तेरे का मंगो तिस जो दे; अते जे कोई तेरे का उधार लैणा चाओ, तिस जो पीठ्ठ मत दिख्खा।

दुस्मणा कने प्यार करणा

⁴³ “तुसी सुणी बैठ्ठेरे हिन कि बोल्लेया गेरा थिया, ‘अपणे गुआन्डियां कने प्यार करो, अते अपणे बैरियां कने नफरत।’ ⁴⁴ अपण मैं तुसां जो बोलदा, अपणे दुस्मणां कने प्यार करो अते जे तुम्हारे जो तंग करदे तिन्हा ताँई प्रार्थना करो, ⁴⁵ ताकि तुसां अपणे स्वर्गीय प्यो रे बच्चे बणी सको किजोकी से खरे अते बुरे दोन्नां पर अपणा सूरज चमकान्दा, अते धर्मी अते अधर्मी दोन्नां पर बरखा करदे। ⁴⁶ किजोकि जे तू उन्हा कने ई प्यार करगा जे तेरे कने प्यार करदे हिन, ता तुसां जो कै ईनाम मिलणा ? कै इय्यां ई चुंगी लैणे वाळे नी करदे ? ⁴⁷ “जे तुसी सिरफ अपणे भ्याळाँ जो ई नमस्ते करदे, ता कुण जह्णा बड्ड़ा कम्म करदे? कै होर जाति रे मह्णु बी इय्याँ ई नी करदे? ⁴⁸ इधेरे ताँईं जरूरी ऐ है कि तुसी इकदम सही बणो, जदेया तुम्हारा स्वर्ग बिच रैह्णे वाळा प्यो इकदम सही है।

दान

¹ “सावधान रेह्यो! तुसी मह्णुआं जो दसणे ताँई भलाई रे कम्म मत करो, नी ता तिज्जो अपणे स्वर्ग अन्दर रैह्णे वाळे पिता का कोई ईनाम नी मिलणा। ² इधेरे ताँई जिस बेल्ले तुसी दान करो ता तिसेरा ढिडोंरा मत पिट्टो, जिह्याँ कि यहूदी सभाघर ते गळियाँ बिच कपटी मह्णु होर लोकां का तारिफ सुनणे तांई करदे। ताकि लोक तिन्हेरी इज्जत करंन। मैं तुसाँ कने सच्च बोलदा कि तिन्हा जो अपणे हेस्से रा ईनाम पैल्ले ई मिल्ली गेरा है । ³ अपण जाँ तुसी दान करन् ता तुम्हारे ख्ब्बे हत्थ जो पता नी लगणा चहिंदा कि तुम्हारा सज्जा हत्थ कै करेया करदा ए। ⁴ ताकि जे दान तू दित्ता से कुस जो पता ना लग्गे। तेरा से परम-पिता जे तू लुकी करी करदा, उस ने तिज्जो उधेरा ईनाम दैणा।

प्रार्थना

⁵ जिस बेल्ले तू प्रार्थना करो ता कपटियां सांह्ई मत करेया कर। किजोकी से यहूदी धर्म-सभा अन्दर ते सड़कां रे मोड़ां पर खड़े होई करी प्रार्थना करणा चाह्न्दे हिन ताकि मह्णु तिन्हा जो दिख्खी सकन। मैं तुम्हारे कने सच्च बोलदा कि तिन्हा जो अपणे हेस्से रा ईनाम पैल्ले ई मिल्ली बैठ्ठे रा है। ⁶ अपण जाँ तू प्रार्थना करगा, ता अपणे अन्द्रलै कमरे चली जा ते दुरवाज्जा बंद करी के गुप्त तरिक्के कने अपणे परम-पिता कने प्रार्थना कर। फिरी तेरे परम-पिता ने जे तेरे लूकी करी कित्ते रे कम्मां जो दिखदे हिन, तिज्जो उधेरा ईनाम दैणा । ⁷ ते जां तू प्रार्थना करगा ता होर जाति रे मह्णुआँ साई बे-मतलब री गल्लां जो मत घड़ी-घड़ी मत बोल, किजोकी से सोच्चदे कि तिन्हेरे जादा बोलणे कने तिन्हेरी सुणी लित्ती जाणी। ⁸ इधेरे ताँई तुसी तिन्हा साई मत बणो, किजोकी तुम्हारा पिता तुम्हारे मंगणे का पैह्ले ई जाणदा कि तुम्हारी कै-कै जरूरतां हिन् । ⁹ इधेरे ताँई तुसी इस तरीक्के कने प्रार्थना करेया करो: ‘ओ म्हारे पिता, तुसी जेह्ड़े कि स्वर्ग अन्दर हिन्; तुम्हारा नां पवित्र मन्नेया जाओ। ¹⁰ तुम्हारा राज्य आओ। जिह्याँ तुम्हारी मरजी स्वर्ग अन्दर पूरी हुन्दी, तिह्याँ ई धरती पर बी पूरी हो। ¹¹ ‘म्हारी दिन भर री रोटी अज्ज असां जो देयो।। ¹² ते जिह्याँ असां ने अपणे गुनेह्गारां जो माफ कित्तेया ए तिह्य्यां ई तुसी बी म्हारे गुनांह् जो माफ करी देयो, ¹³ ‘अते असां जो परखदे मत, अपण बुराई का बचाई लेयो; (किजोकी राज्य, पराक्रम ते महिमा हमेसा तुम्हारा ई ए।’ आमीन।) ¹⁴ इधेरे तांई जे तुसी मह्णुआं रे पापा जो माफ करगे, ता तुम्हारे स्वर्ग अन्दर रैह्णे वाळे पिता ने बी तुसां जो माफ करी दैणा। ¹⁵ अते जे तुसी मह्णुआं रे गुनांह् माफ नी करगे, ता तुम्हारे पिता ने बी तुम्हारे गुनांह् माफ नी करणे।

बरत

¹⁶ “जां तुसी व्रत्त रख्खो, ता तुम्हारे मुंह् कपटियां साह्ई उत्तरे रे नी होणे चहिंदे, किजोकी से अपणा मुंह् उदास जह्णा बणाई रखदे ताकि सबनी मह्णुआं जो पता लग्गो कि तिन्हा ने व्रत्त ए रख्खेरा। मैं तुसाँ जो सच्च सच्च बोलदा कि तिन्हा जो अपणे हेस्से रा ईनाम मिल्ली गेरा ए। ¹⁷ जाँ तू व्रत्त रख्खो ता मुंह् धोई करी अपणे सरा पर तेल लाई ले, ¹⁸ ताकि मह्णुआँ जो नी अपण तेरे पिता जो जिन्हा जो तू दिख्खी नी सकदा, पता लग्गो कि तैं व्रत्त रख्खे रा है; तां तेरे परम-पिता ने जे तेरे लूकी करी कित्ते रे सब कम्मां जो दिखदे हिन, तिज्जो उन्हेरा ईनाम दैणा।

स्वर्गीय धन

¹⁹ अपणे तांई धरती पर धन-दौलत मत कठेरो, जित्ते कीड़ा लग्गी जान्दा ते जंग कने खराब होई जांदी अते जित्ते चोर सेंध लाई करी चोरी लिन्दे। ²⁰ अपण अपु ताँई स्वर्ग अन्दर धन-दौलत कठेरो, जित्ते ना कीड़ा लगदा ते ना जंग कने से खराब हुन्दी ते ना चोर सेंध लाई करी चोरी करदे। ²¹ किजो की जित्ते तेरी धन-दोलत होणी तित्ते ई तेरा मन बी लगी रैह्णा।

सरीर री रौसनी

²² सरीर रा दिय्या हाख्खी हुन्दी: ते तेरी जे तेरी नजर खरी है, ता तेरा सारा सरीर बी रोशनी कने भरी रैह्णा। ²³ अपण जे तेरी हाख्खी बुरी हो, ता तेरा पूरा सरीर न्ह्यारे बिच होणा। इधेरे ताँई से लौ जे तेरे अन्दर है जे सेह्ई न्ह्यारा हो ता सै न्ह्यारा कदेया घणा होणा!

परमेश्वर ते धन

²⁴ कोई मह्णु दो मालकां री सेवा नी करी सकदा, किजोकी तिनिए इक कने नफरत अते दुज्जे कने प्यार रखणा, या तिनिए इक जह्णे कने वफादार रैह्णा अते दुज्जे जो नफरत करणी। तुसी परमेश्वर ते धन-दौलत, दोन्नां री सेवा नी करी सकदे। ²⁵ इधेरे ताँई मैं तुसां कने बोलदा कि अपणी जिंदगी ताँई खाणे-पीणे री फिकर मत करो कै पींगे। अते अपणे सरीर ताँई कपड़ेयां री फिकर छड्डी देयो। कै मह्णु री जिंदगी रोटी का या सरीर कपड़ेयाँ का बद्धी करी नी ए ? ²⁶ दिख्खो, अम्बरे रे चिड़ु-पखेरु ना ता बीह् बान्दे, ना बड्डदे, ते ना ई खलाड़े अन्दर कठेरदे; फिरी बी तुम्हारा स्वर्ग अन्दर रैह्णे वाळा पिता तिन्हा जो खुआन्दा। कै तुम्हारी कीमत तिन्हा का जादा नी ए ? ²⁷ तुसा बिच का इदेह्या कुण ए, जे फिकर करी के अपणी उमर अन्दर इक घड़ी बी बद्धाई सकदा हो ? ²⁸ कपड़ेयाँ ताँई तुसी किजो फिकर करदे हिन ? जंगली फूलां जो दिख्खो कि से किह्य्यां बद्धदे; से ना ता मैह्नत करदे, ना कतारी करदे। ²⁹ ताँ बी मैं तुसां जो बोलदा कि राज्जा सुलैमान री इत्तणी शान होणे रे बावजूद बी से उन्हा बिच का कुसकी इक साह्ई बी नी सजी सकेया। ³⁰ इधेरे ताँई जाँ परमेश्वर द्रबड़ री घा जो, जेह्ड़ी अज्ज है ते कल भठ्ठी बिच सुटी दित्ती जाणी, इस तरिक्के कने सजांदे हिन, ता ओ घट्ट विस्वास करणे वाळेयो कै तिन्हा तुम्हारे तांई इसका जादा नी करणा ? ³¹ इधेरे ताँई तुसी ऐ बोल्ली करी फिकर मत करो, ‘असी कै खान्गें या असी कै पिन्गे या कै पान्गें ?’ ³² किजो की होर जाति रे मह्णु इन्हा सबनी चीजां रे पिच्छे दौड़दे रैह्न्दे हिन, अपण तुम्हारे स्वर्ग अन्दर रैह्णे वाळे पिता जो पता है कि तुसां जो इन्हा सबनी चीजां री जरूरत ए। ³³ अपण पैल्ले तुसी परमेश्वर रे राज्य ते तिन्हेरी धार्मिकता जो तोपो ता ऐ सब चीजा तुसां जो मिली जाणियाँ। ³⁴ इधेरे ताँई कल री फिकर मत करो, किजोकी कल रा दिन अपणी फिकर अप्पु करी लिंगा; अज्ज ताँई अज्ज रा दुख ई बड़ा ए।

दुज्जेया पर इल्जाम मत लादें

¹ “दूज्जेयां पर इल्जाम मत लगाओ ताकि तुम्हारे पर बी इल्जाम नी लगाया जाये। ² किजोकी जिह्य्यां तुसी इल्जाम लगांदे, तिह्य्यां ई तुसां पर बी इल्जाम लगाया जाणा; अते जिस नाप कने तुसी नापदे, तिस्सी नाप कने तुम्हारे ताँई बी नाप्पेया जाणा। ³ तू किजो अपणे भ्याळ री हाख्खी रे कण जो दिखदा है? हालांकि तिज्जो अपणी हाख्खी रा कण तिज्जो सूझदा नी ए ? ⁴ जे तेरी अपणी हाख्खी अन्दर ई कण है ता तू अपणे भ्याळ जो किह्य्यां बोल्ली सकदा, कि तू मिंजो अपणी हाख्खी का कण कड्डणा दे। ⁵ ओ कपटी! पैल्ले तू अपणी हाख्खी का कड्ड, फिरी तू साफ दिख्खी पाणा अत्ते अपणे भ्याळ री हाख्खी का कण कड्डी पांगा। ⁶ “कुत्तेयाँ जो पवित्र चीज मत देयो। अते अपणे मोती सुअरां रे अग्गे मत सुट्टो। नी ता तिन्हा सुअरां ने अपणे पैरां हेठ घरैच्ची रखणा। ते कुत्तेयां ने हटी करी तुसां जो फाड़ी रखणा।

मगंगे ता मिलणा

⁷ “परमेश्वर का मन्गगे ता तुसा जो दित्तेया जाणा। तोपगे ता तुसा जो मिल्ली जाणा ते खटखटांगे ता तुम्हारे ताँई दुआर खोल्लेया जाणा। ⁸ किजोकी हर इक जे मन्गदा, तिस जो मिली जान्दा। जे तोपदा से तिस जो पाई लिंदा अते जे खटखटांदा ई रैह्न्दा तिसेरे ताँई दुआर खोल्ली दित्तेया जाणा। ⁹ तुसा बिच का इदेया कुण ए जे अपणे पुत्र जो जां से रोटी मन्गो ता पत्थर देयो ? ¹⁰ या मछ्छी मन्गो, ता तिस जो सप्प देयो ? ¹¹ इधेरे ताँई जे चाये तुसी बुरे ई किजो नी हिन, अपणे बच्चेयाँ जो खरी चीज्जां दैणा जाणदे। ता तुम्हारा स्वर्ग अन्दर रैह्णे वाळा परम-पिता तुम्हारे मन्गणे पर खरी चीज्जां किजो नी दिंगा ? ¹² इधेरे ताँई जिय्यां तुसी चाह्न्दे कि मह्णु तुसा कने करन, तुसी बी तिन्हा कने तिय्यां ई करो; किजो की नियम अते भविस्यवाणी करणे वाळेयां री एह् ई सिक्सा ए।

भीडा़ ते चौडा़ रस्ता

¹³ “तंग रस्ते का जाओ, किजोकि चौड़ा दरवज्जा अत्ते बड्डा रस्ता ता विनास रे पास्से लेई जांदा। मते जणे हिन् जे तिस रस्ते पर चलदे हिन। ¹⁴ अपण कितणा तंग ए से दुआर अत्ते कितणा मुस्किल है से रस्ता जे जिन्दगी रे पास्से जांदा। बड़े घट्ट जणे हिन् जे तिस पर चलदे ।

जदेया बुट्टा तदेया फळ

¹⁵ “झूठे भविस्यवाणी करणे वाळेयाँ का बच्ची रेह्यो, जे भैड्ड़ां रे भेस अन्दर तुसा का आन्दे, अपण अन्दरा का से खूंखार भेड़िए हिन्। ¹⁶ तिन्हेरे फळां का तुसां ने तिन्हा जो पछियाणी लैणा। कै झिल्लां का अंगुर या कंडेया का अंजीर तोड़ी सकदे ? ¹⁷ इह्य्यां ई हर इक खरा बुट्टा खरे फळ दिंदा अते बुरा बुट्टा बुरे फळ दिंदा। ¹⁸ खरा बुट्टा बुरे फळ नी देई सकदा, अते ना ई बुरा बुट्टा खरा फळ देई सकदा। ¹⁹ हर इक बुट्टा जे खरा फळ नी दिंदा, से बड्डेया अते अग्गी अन्दर पाई दित्तेया जान्दा ए। ²⁰ इस तरीक्के कने तुसा तिन्हेरे फळां कने तिन्हा जो पछियाणी लैणा। ²¹ प्रभु-प्रभु बोलणे वाळा हर मह्णु स्वर्ग रे राज्य अन्दर नी जाई पाणा बल्कि से जे मेरे स्वर्ग अन्दर रैह्णे वाळे परम-पिता री मरजी पर चलदा तिन्ने अन्दर जाई पाणा। ²² तिस रोज मते जह्णेयाँ ने मिन्जो पूच्छेणा ‘प्रभू जी, ओ प्रभू जी! कै असां तुम्हारे नां कने भविस्यवाणी नी कित्ती? कै तुम्हारे नां कने बुरी आत्मां नी निकाळियां अते कै असा तुम्हारे नां कने मते सारे अजूबे नी कित्ते?’ ²³ तां मैं तिन्हा कने साफ बोलणा मैं तुसा जो नी जाणदा, ‘ओ पापियों, मेरे का दूर हटो।’

घर बनाणे वाळे दो म्हणु : समजदार ते बेवकूफ

²⁴ “इधेरे ताँई जे कोई मेरे इन्हा वचना जो सुणी करी तिन्हा पर चलदा, से उस समझदार मह्णु साह्ई ए जिनिए अपणा घर पक्के सप्पड़ा पर बणाया। ²⁵ अते बरखा होई, हड़ आया, ते हनेरियाँ चलियाँ अते एह् सब तिस घर कने बज्जियां अपण से नी ढैत्तेया। किजोकी तिसेरी निय्याँ पक्के सप्पड़ा पर बणेरी थियाँ। ²⁶ अपण जेह्ड़ा कोई मेरे इन्हा वचनां जो सुणदा अपण उन्हा पर चलदा नी, से उस बेवकूफ मह्णु साह्ई हिन, जिनिए अपणा घर लेतरी पर बणाया। ²⁷ बरखा होई, हड़ आया, ते हनेरियाँ चलियाँ ते उस घर कने बज्जियां; जिस कने से पूरा घर ढेह्ई गेया।” ²⁸ इसेरे नतिजे ऐ होया कि जां यीशु जी एह् गल्लां बोल्ली बेठ्ठे ता मह्णुआं जो तिन्हेरी सिक्सा जो सुणी करी हरानगी होई, ²⁹ किजो कि से तिन्हा जो तिन्हेरे सास्त्रियां साह्ई नी बल्कि इक अफशरा साह्ई सिक्सा थिये देया करदे।

कोढ़ रे बमारी वाळे जो ठीक करणा

¹ जाँ यीशु जी पाह्ड़ का उतरे ता मह्णुआं री इक बड़ी बड्डी भीड़ तिन्हेरे पिच्छे चली पेई। ² तित्ते इक कोढ़ी भी थिय्या। से यीशु जी का आया अते तिन्हेरी जै-जै कार करी के बोल्णा लग्गेया, “ओ प्रभू जी, जे तुसी चाह्न ता मिन्जो सुच्चा करी सकदे।” ³ यीशु जी ने अपणा हत्थ अग्गे करी के तिस जो छुत्तेया, अत्ते बोल्लेया, “मैं चाह्न्दा, तू सुच्चा होई जाओ।” ते से तिस्सी बेल्ले कोढ़ी सुच्चा होई गेया। ⁴ यीशु जी ने तिस जो बोल्लेया, “दिख्ख, कुसी जो बी मत बोलदा, अपण जाई करी अपु जो परोह्त जो दस्स अते जे चढ़ाणे ताँई मूसा ने दस्से रा ए तिस जो चढ़ा, ताकि उन्हा पर गवाई होई जाओ।”

इक्क सुबेदार र विश्वास

⁵ जाँ यीशु जी कफरनहूम सैहर अन्दर आए ता इक सूबेदार तिन्हा का आया ते तिन्हेरे छन्दे करी के बोलणा लग्गेया, ⁶ “ओ प्रभू जी, मेरा इक सेवक बमार घरे पेरा है। तिस जो अंधर्ग मारी गेया। अते तिस जो बड़ी भरी तकलीफ ए हुन्दी। ⁷ यीशु जी ने तिस जो बोल्लेया, “मैं आई करी तिस जो ठीक करी दिंगा। ⁸ सूबेदार ने जवाब दित्तेया, “ओ प्रभू जी, मैं इस जोग्गा नी ए कि तुसी मेरी छत्त हेठ आन। इधेरे तांई सिरफ तुसी हुकम देई देयो, बस मेरे सेवक ने खरे होई जाणा। ⁹ किजोकी मैं बी कुस्की रे हेठ कम्म करदा, ते मेरे हेठ बी सपाह्ई हिन्। जाँ मैं इक जो बोलदा, ‘जा’ ता से चली जान्दा; अते दुज्जे जो, ‘आ’ ता से आई जान्दा; अते जाँ अपणे नौकर जो बोलदा कि, ‘इयां कर’ ता से करदा।” ¹⁰ ऐ सुणी करी यीशु जी जो बड़ी हरानी होई अते जे तिन्हेरे पिच्छे आया करदे थिये तिन्हा जो बोल्लेया, “मैं तुसा जो सच्च बोलदा कि मैं इस्राएल अन्दर कुसकी बी इक मह्णु बिच इदेया विसवास नी दिख्खेया। ¹¹ मैं तुसा जो बोलदा कि पूरब ते पश्चिम का मते जह्णेयाँ ने आई करी अब्राहम, इस्हाक अते याकूब कने स्वर्ग रे राज्य बिच रोटी खाणा बैह्णा। ¹² अपण राज्य रे बच्चेयां जो बाहर न्ह्यारे अन्दर सुट्टी दित्तेया जाणा: तित्ते रोणा अते दंद पिह्णा होणा।” ¹³ ताँ यीशु जी ने सूबेदार जो बोल्लेया, “जा, तियां ई तेरे कने हो जदेया तेरा विसवास ए।” अते तिस्सी बेल्ले सुबेदार रा सेवक खरा होई गेया।

मते सारे बमारां जो ठीक करणा

¹⁴ जाँ यीशु जी पतरस रे घरे आये, ता तिन्हा ने तिसेरी सस्सू जो बुखार री वजह् कने बिस्तर पर पेरा दिख्खेया। ¹⁵ तिन्हा ने तिसेरा हत्थ छुत्तेया अते तिसेरा बुखार उतरी गेया, अते से उठी करी यीशु जी री सेवा-पाणी करणा लगी पेई। ¹⁶ जाँ सांझ होई, ता मह्णु उन्हा का इदेय बड़े मह्णुआं जो लेई करी आये जिन्हा बिच बुरी आत्मा थी, अत्ते उसने अपणे इक ई शब्द कने बुरी आत्मा जो निकाळी दित्तेया। इस तरिक्के कने उस ने सब बमारां जो खरा करी दित्तेया। ¹⁷ ताकि जे वचन यशायाह भविस्यवाणी करणे वाळे रे जरिये बोल्लेया गेया थिया से पूरा हो: “तिस ने अपु ई म्हारी कमजोरियाँ जो लेई लित्तेया अते म्हारी बमारियाँ जो चुक्की लित्तेया।”

यीशु जी रा चेल्ला बनणे री किमत

¹⁸ यीशु जी ने जाँ अपणे चोन्नी पास्से इक बड़ी बड्डी भीड़ दिख्खी ता उन्हा ने अपणे चेल्लेयां जो हुकम दित्तेया कि झील रे दुज्जे कनारे चलन। ¹⁹ ते कुसकी सास्त्री ने आई करी तिन्हा जो बोल्लेया, “ओ गुरु जी, जित्ते कुते तुसी जान्गे, मैं तुम्हारे पिच्छे चलणा।” ²⁰ यीशु जी ने तिस जो बोल्लेया, “गिद्दड़ां री खोह् अते अम्बरे रे चिड़ू-पखेरुआं रे घोंसले हुन्दे हिन; अपण मह्णु रे पुत्तर जो सर ढ़कणे तांई कोई जगह् नी ए।” ²¹ तिन्हेरे चेल्लेया बिच का कुसकी ने तिन्हा जो बोल्लेया, “प्रभू जी, पैह्ले मिंजो जाई करी अपणे प्यो जो दब्बणे रा हुकम देयो।” ²² अपण यीशु जी ने तिस जो बोल्लेया, “मुरदेयाँ जो अपणे मुरदे दबणा दे अते तू मेरे पिच्छे चल।”

तूफान जो शातं करणा

²³ तां यीशु जी इक किस्ती पर जाई बैठ्ठे। तिन्हेरे चेल्ले बी तिन्हा कने थिय्ये। ²⁴ उस्सी बेल्ले झील अन्दर इक इदेयी बड़ी बड्डी हनेरी आयी कि तिन्हेरी किस्ती पाणी री छलारां कने ढक्किई गेई, अपण यीशु जी सुत्ते रे थिय्ये। ²⁵ ताँ चेल्लेयां ने आई करी तिन्हा जो जगाया अते बोल्लेया, “ओ प्रभू जी, असा जो बचा, नी ता असा ने मरी जाणा।” ²⁶ यीशु जी ने तिन्हा जो बोल्लेया, “तुम्हारा विस्वास छोटा ए, तुसी इत्तना किजो ड़रेया करदे हिन् ?” ताँ यीशु जी ने उठी करी हनेरी अते झील जो झिड़ख दित्ती, अते सब किच्छ सान्त होई गेया। ²⁷ अते से हरान होई करी बोलणा लगे, “एह् कदेया मह्णू ए कि हनेरी अते झील बी इसेरा हुक्म मन्दे हिन?” ²⁸ अते जाँ से दुज्जे पास्से गदरेनियाँ रे देस अन्दर पुज्जे, ता तिन्हा जो कब्र का बाहर आन्दे दो मह्णु मिल्ले जिन्हा बिच बुरी आत्मां थियां। से इतणे भयंकर थिये कि कोई तिस रस्ते का जाई तक नी सकदा थिया। ²⁹ अते दिख्खो, तिन्हा ने लैर देई करी बोल्लेया, “ओ परमेश्वर रे पुत्तर, म्हारा तुसा कने कै कम्म ए? कै तुसी असा जो बेल्ला पूरा होणे का पैल्ले ई दुख दैणे आये हिन?” ³⁰ थोड़ी ई दूर बड़े सारे सुअरां रा इक झुण्ड चरेया करदा थिया। ³¹ ता उन्हा बुरी आत्मां ने तिन्हा कने एह् बोल्ली करी छन्दे करणा लग्गी, “जे तुसी असा जो कड़णा लग्गे रे हिन् ता म्हारे जो इन्हा सुअरां रे झुण्ड़ अन्दर भेजी दे। ³² ता यीशु जी ने उन्हा जो बोल्लेया, “ चली जाओ”! ते से उन्हा मह्णुआं का निकळी करी सुअरां अन्दर चली गेइयां। फिरी से सारा झुण्ड़ खड़ी ढलान का रूळकदे-रूळकदा दौड़दे पाणी अन्दर जाई पेया, ते डूब्बी करी मरी गेया। ³³ सुअरां रे रखवाले तित्ते का न्ह्सी करी सैहर जो आये अते सुअरां कने ते उन्हा कने जिन्हा बिच बुरी आत्मा थी जे होया थिया से सब किच्छ दस्सी दित्तेया। ³⁴ फिरी ता सैहर रे सब मह्णु यीशु जी का मिलणे ताँई आये। जाँ तिन्हा ने यीशु जी जो दिख्खेया ता उन्हेरे छन्दे कित्ते कि से उन्हेरे उत्ते का कुदखी होरथी चली जाओ।

इक्क म्हणु री लकवे री बमारी जो ठीक करणा

¹ फिरी यीशु जी किस्ती पर चढ़ी करी पार अपणे सैहरा जो आई गे। ² अते दिख्खो, किच्छ मह्णु अधरंग रे इक मरीज जो बाणी वाळे मन्जे पर रख्खी करी यीशु जी का लेई आये। तिन्हा ने तिन्हेरा विस्वास दिख्खी करी, तिस अधरंग रे मरीज जो बोल्लेया, “ओ पुत्र, हिम्मत रख; तेरे पाप माफ होई गे।” ³ अते सास्त्रियाँ बिच किच्छ अपु-मित्ते बोलणा लग्गे, “ए ता परमेश्वर री बेजती करेया करदा है।” ⁴ यीशु जी ने तिन्हेरे मन री गल्लां जो जाणी करी बोल्लेया, “तुसी अपणे-अपणे मन अन्दर बुरा किजो सोच्चेया करदे हिन् ⁵ असान कै है ? ए बोलणा, ‘तेरे पाप माफ होई गे, ’या ए बोलणा, ‘उठ अते हन्ड़ फिर्?’ ⁶ ताकि तुसी एह् जाणी जाओ कि मह्णु रे पुत्र जो धरती पर पाप माफ करणे रा हक्क है।” तां तिन्हा ने अधरंग रे मरीज जो बोल्लेया, “उठ, अपणा मन्जा चुक्क, अते अपणे घरे चली जा।” ⁷ से उठी करी अपणे घरा जो चली गेया। ⁸ मह्णु ए दिख्खी करी डरी गे अते परमेश्वर री महिमा करणा लग्गे जिन्ने मह्णु जो इदेयी सक्ति दित्ती।

मत्ती रा सद्देया जाणा

⁹ जिय्यां ई यीशु जी तित्ते का अग्गे बद्धे उन्हा ने मत्ती नां रे इक मह्णु जो चुंगी लैणे वाळी चोक पर बैठ्ठे रा दिख्खेया, अते तिस जो बोल्लेया, “मेरे पिच्छे चली आ।” ते से उठी करी तिन्हेरे पिच्छे चली पेया। ¹⁰ फिरी इय्यां होया कि जाँ से मत्ती रे घरे रोटी खाणा बैठ्ठे रे थिये ता मते सारे चुंगी लैणे वाळे अते पापी मह्णु आई करी यीशु जी अते तिन्हेरे चेल्लेयाँ कने रोटी खाणा बेह्ई गे। ¹¹ ते जां फरीसियाँ ने ए दिख्खेया ता तिन्हा ने यीशु जी रे चेल्लेयाँ जो बोल्लेया, “तुम्हारा गुरू चुंगी लैणे वाळेयां कने अते पापियां कने रोटी किजो खाया करदा ए ?” ¹² ए सुणी करी यीशु जी ने तिन्हा जो बोल्लेया, “वैद री जरूरत भले-चंगेयाँ जो नी अपण मरीजां जो हुन्दी। ¹³ अपण तुसी जाओ अते इस गल्ल रा मतलब समझो, ‘मैं बली नी अपण रैह्म चाह्न्दा।’ किजो कि मैं भले अते नेक मह्णुआं जो नी, अपण पापियां जो सदणे आये रा ए।”

बरत पर सवाल

¹⁴ तां बपतिस्मा दैणे वाळे यूहन्ना रे चेल्ले यीशु जी का आई करी बोलणा लग्गे, “असी अते फरीसी इतणे व्रत्त रखदे, अपण तुम्हारे चेल्ले व्रत्त नी रखदे?” ¹⁵ यीशु जी ने तिन्हा जो बोल्लेया, “ जां तांई नौलाड़ा बरात्ती कने ए कै से दुखी होई सकदे ? अपण से रोज बी आणा जां नौलाड़ा तिन्हा का बखरा कित्तेया जाणा, अते तिस बेल्ले तिन्हा व्रत्त रखणे। ¹⁶ पुराणे कपड़े पर कोरे कपड़े री टल्ली कोई नी लगान्दा, किजोकी से टल्ली तिस कपड़े जो छिक्की लिन्दी, अते से पैल्ले का बी जादा फटी जान्दा। ¹⁷ ते ना ई पुराणे खलड़ू अन्दर बिच नौआ अंगूर रा रस्स भरदे, किजो की इय्यां करणे कने खलड़ू फटी जान्दे; अते अंगूर रा रस्स रुड़ी जांदा; ते खलड़ू बेकार होई जांन्दे; अपण नौये अंगूर रे रस्स जो नौये खलड़ू बिच भरदे अते दोनो ई बची रेह्न्दे।”

इक्क मरे री कुड़ी ते इक्क बमार जनानी

¹⁸ जां से तिन्हा कने ए गल्लां करेया ई करदे थिये ता दिख्खो, यहूदी धर्म-सभा रा इक अधिकारी आया अते तिन्हेरी जै-जै कार करी के बोलणा लग्गेया “मेरी कुड़ी अब्बे-अब्बे ई मरी, अपण तुसी चली करी तिस पर अपणा हत्थ रखी दिह्न्गे, ता तिस ने जिन्दे होई जाणा।” ¹⁹ यीशु जी ते तिन्हेरे चेल्ले उठ्ठे अते तिसेरे पिच्छे चली पेह्। ²⁰ अते दिख्खो, इक जनानी ने जिस जो बारह साल्लां का खून चलणे री बमारी थी, से पिच्छे का आई अत्ते तिन्ने यीशु जी रे कपड़े रे कुणे जो छुह्ई लित्तेया। ²¹ किजो कि से अपणे मन अन्दर सोचदी थी, “जे इन्हेरे कपड़े जो ई मैं छुह्ई लेयां ता खरी होई जाणा।” ²² यीशु जी ने मुड़ी करी तिस जो दिख्खेया अते बोल्लेया, “कुड़िये हिम्मत रख्ख; तेरे विस्वास ने तिज्जो खरा कित्तेया ए।” से जनानी तिस्सी बेल्ले खरी होई गेई। ²³ जां यीशु जी तिस यहूदी धर्म सभा रे प्रधान रे घरे पुज्जे ता तिन्हा ने दिख्खेया कि मात्तम वाळी धुन बजान्दे बौंसरी बजाणे वाळे अते तित्ते इकठ्ठा होये रे मह्णु कुड़ी री मौत पर रोळा पाया करदे हिन, ²⁴ यीशु जी ने उन्हा जो बोल्लेया, “हटी जाओ, कुड़ी मरे री नी ए, अपण सुत्ते री ए।” इस गल्ल पर से मह्णु तिन्हेरा मजाक उड़ाणा लगे। ²⁵ अपण जां मह्णुआं जो बाहर भेजी दित्तेया, ता यीशु जी ने अन्दर जाई करी कुड़ी रा हत्थ पकड़ी करी उठाया, ते कुड़ी जिन्दी होई गी। ²⁶ अते इस गल री चर्चा तिस इलाके बिच फैली गेई।

दो अन्ने म्हणुआं जो ठीक करणा

²⁷ जां यीशु जी तित्ते का अग्गे जाणा लग्गे ता दो अह्न्ने तिन्हेरे पिच्छे लैरां अते ए बोलदे-बोलदे चली पे, “ओ दाऊद रे पुत्र, असा पर रैह्म करो!” ²⁸ जां से घरा अन्दर पुज्जे ता से अह्न्ने तिन्हेरे का आये। यीशु जी ने तिन्हा जो बोल्लेया, “कै तुसा जो विस्वास ए कि मैं ए करी सकदा ?” तिन्हा ने यीशु जी जो बोल्लेया, “हाँ, प्रभु जी!” ²⁹ तां यीशु जी ने ए बोलदे तिन्हेरी हाख्खियाँ जो छुत्तेया, “तुम्हारे तांई तियां ई हो जदेया तुम्हारा विस्वास है।” ³⁰ अत्ते अह्न्नेया जो लौ मिली गेई। यीशु जी ने तिन्हा जो सावधान कित्तेया अते बोलेया, "दिख्खो, ए कुस जो बी मत बोलदे।” ³¹ अपण तिन्हा ने तित्ते का जाई करी इस गल्ल जो उस इलाके बिच चारो पास्से फैलाई दित्तेया।

इक्क गुगें म्हणु जो ठीक करणा

³² जिस बेल्ले से बाहर जाया करदे थिये, ता किच्छ मह्णु यीशु जी का इक जह्ल्ले जो लेई करी आये। जह्ल्ले बिच बुरी आत्मा थी अत्ते इधेरे तांई से किच्छ बोली नी पांदा थिय्या। ³³ अते जाँ बुरी आत्मा कड्ड़ी दित्ती, ता से जह्ल्ला बोलणा लगी पेया। इस गल्ल पर मह्णु हरान होई करी बोलणा लग्गे, “इस्त्राएल बिच इदेया कदी बी नी दिख्खेया।” ³⁴ अपण फरीसी बोलणा लग्गे, “ए ता बुरी आत्मां रे राज्जे री मदत कने बुरी आत्मां जो कड्डदा।”

मजदूर घट हिन

³⁵ यीशु जी यहूदी धर्म-सभा अन्दर सिक्सा दिन्दे, परमेश्वर रे राज्य रे शुभ-बसेख रा प्रचार करदे, मह्णुआं री बमारी अत्ते हर तरह री कमजोरियां जो दूर करदे सारे इलाके बिच ग्रां-ग्रां अत्ते सैहर-सैहर घूमदे रेह्। ³⁶ अते मह्णुआं री भीड़ जो दिख्खी करी यीशु जी जो मह्णुआं पर तरस आया, किजोकी से उन्हा भैड्ड़ां साह्ई थक्के रे अते बिखरे रे थिय्ये जिन्हेरा कोई पुहाळ नी थिय्या। ³⁷ तां तिन्हा ने अपणे चेल्लेयां जो बोल्लेया, “पक्के री फसल ता बड़ी है अपण मजदूर घट्ट हिन। ³⁸ इधेरे ताँई फसल रे मालक कने प्रार्थना करो कि से अपणी फसल जो बढ़णे ताँई मजदूर भेजन।”

यीशु जी रे बरा चेल्ले

¹ तां यीशु जी ने अपणे बाहरां चेल्लेयां जो सद्दी करी तिन्हा जो भिट्ठी आत्मा जो बाहर निकालणे, अत्ते हर तरह री बमारी ते कमजोरी जो दूर करणे रा हक दित्तेया।। ² इन्हा बारहा खास चेल्लेयां रे ना एह् हिन, पैह्ला शमौन, जिस जो कि पतरस बी बोलदे अते तिसेरा भाई अन्द्रियास, जबदी रा निक्का याकूब अते तिसेरा भाई यहून्ना; ³ फिलिप्पुस; बरतुलमै, थोमा, चुंगी लैणे वाळा मत्ती हलफई रा पुत्तर याकूब, तद्दै; ⁴ शमौन कनानी अते यहूदा इस्करियोती, जिन्ने यीशु जी जो पकड़वाई बी दित्तेया।

बारा चेल्लेयां रा सेवा रा कम्म

⁵ इन्हा बारहा जो यीशु जी ने एह् हुकम देईकरी भेजेया, “होर जाति रे लोकाँ का मत जांदे, अते ना सामरी रे सैहरां बिच बड़दे। ⁶ अपण इस्त्राएल रे खानदान री गुअची री भेड़ां का जायो। ⁷ अते जांदे-जांदे तुसी एह् प्रचार करी के बोलेयो, ‘स्वर्ग रा राज्य नेड़े आई गेरा है।’ ⁸ बमारां जो खरा करो, मरे रेयां जो जिंदा करो, कोढियां जो सुच्चा करो, बुरी आत्मां जो कड्डो। तुम्हारे जो मुफ्त बिच मिलेया है मुफ्त बिच ई देयो। ⁹ अपणी कमर रे थैल्ले बिच ना ता सुन्ना, चाँदी अते ना ता तांबा रखयो, ¹⁰ अते ना सफर तांई झोळा, इत्ते तांई कि दो कुरते ना, जूत्ते अते ना सोठी लैणी, किजोकि मजदूर अपणी रोटी रा हकदार है। ¹¹ जिस बी सैहर या ग्राँ बिच तुसी बड़गे ता पता करो कि इत्ते कुण लायक है, अते तिस जगह जो छडणे तक तित्ते ई रेयो। ¹² जां तुसी तिस घरे बड़गे ता तित्ते सांति री असीस देयो। ¹³ जे से घर लायक होया ता तुम्हारी असीस तिन्हा पर बणी रेह्णी, अपण जे नी हुन्गा ता सांति री तुम्हारी असीस तुम्हारे का हटी आणी। ¹⁴ जे कोई तुम्हारे जो नी अपनांदा अते तुम्हारी गल्लां नी सूणदा, ता तिस घर या तिस सैहर का जांदे बेल्ले अपणे पैरां धूळ झम्मी आयो। ¹⁵ मै तुम्हारे जो सच्च बोलदा न्याय वाळे रोज्जे उस सैहर री हालत का सदोम अते अमोरा रे देश री हालत केई जादा खरी होणी।

आणे वाळी मुसीबत

¹⁶ दिख्खो, मै तुम्हारे जो भेड़ां साह्ई भेड़िये रे बीच भेजदा। इधेरे तांई सांप साह्ई चलाक अते कबूतरां साह्ई भोळे बणो। ¹⁷ अपण मह्णुआं का बची करी रेयो, किजोकि तिन्हा तुम्हारे जो पंचायता बिच देई दैणा, अते तिन्हा तुम्हारे जो अपणी धर्म सभा बिच कोड़े मारणे। ¹⁸ तुम्हारे जो मेरी वजह कने राज्यपालां अते राज्जेयां रे सामणे लित्तेया जाणा, ताकि उन्हा पर अते होर जाति रे लोकाँ तांई गवाह बणो। ¹⁹ जां से तुम्हारे जो पकड़न ता फिकर मत करदे, कि तुम्हारे जो कै बोलणा ए अत्ते कियां बोलणा ए। किजोकि उस बेल्ले तुम्हारे जो दस्सी दित्तेया जाणा कि तुम्हारे जो कै बोलणा है। ²⁰ किजोकि बोलणे वाळे तुसी नी हिन, अपण तुम्हारे परम-पिता री आत्मा ने तुम्हारे अन्दर का बोलणा। ²¹ भाई ने अपणे भाई जो पकड़वाई करी मरवाई दैणा, मां-प्यो ने अपणे बच्चे जो पकड़वाई दैणा अते बच्चेयां ने अपणे मां-प्यो रे खलाफ होई जाणा ते तिन्हा जो मरवाई दैणा।’ ²² मेरी नां री वजह कने सब ने तुम्हारे कने नफरत करणी, अपण जे आखर तांई सबर रखगा तिसेरा ई उद्धार होणा। ²³ जां बी से तुम्हारे जो इस सैहर बिच तंग करो, ता दूज्जे सैहर नह्स्सी जायो; किजोकि मै तुम्हारे जो सच्च बोलदा इस का पैह्ले तुसी इस्त्राएल रे सब सैहरां बिच जाणा खत्म करो मह्णु रे पुत्र ने आई जाणा। ²⁴ ना चेल्ला अपणे गूरू का अते ना नौकर अपणे मालक का बड्डा हून्दा। ²⁵ चेल्ले तांई एह् काफी है कि से अपणे गूरू रे बराबर है, अते नौकर तांई एह् कि से अपणे मालक रे बराबर है। जे तिन्हा घरे रे मालक जो बालजबूल बोल्ली दित्तेया ता घरे रे दूज्जेयां बंदेया जो कै किच्छ नी बोलणा।

कुस का डरणा चएदा ?

²⁶ इधेरे तांई उन्हा का डरदे मत, किजोकि जे किच्छ लूक्के रा है, सब सामणे आई जाणा। ²⁷ जे मै तुम्हारे कने न्यहारे बिच बोलदा उस जो तुसी लौ बिच बोलो अते जे मैं तुम्हारे कन्ना बिच बोलेया है, तिस जो घरे री छत्त पर चढ़ी करी प्रचार करो। ²⁸ उन्हा का मत डरो जे सरीर जो मारदे हिन अपण आत्मा जो नी मारी सकदे, बल्कि उसका डरो जे आत्मा अते सरीर दोनां जो नरक बिच खत्म करी सकदा। ²⁹ कै दो पैसे री दो गौरेयां चीड़ी नी बिकदी? फिरी बी तुम्हारे पिता री मर्जी रे बगेर इन्हा बिच का इक बी धरती पर नी पेई सकदी। ³⁰ तुम्हारे सिर रे बाळ तक बी गिणे रे हिन। ³¹ इधेरे तांई डरो मत तुम्हारी कीमत ता तदेयी मती सारी चिड़ियाँ का बी केई जादा है।

यीशु जी जो अपनाणा या ना अपनाणा ।

³² जे कोई मिंजो मह्णुआं रे सामणे अपनांगा, मै बी तिस जो अपणे स्वर्ग बिच रैह्णे वाळे परम-पिता रे सामणे अपनाई लैणा। ³³ अपण जे मह्णुआं रे सामणे मिंजो नी अपनांगा, मै बी तिस जो अपणे पिता रे सामणे जे स्वर्ग बिच हिन, नी अपनाणा।

यीशु जी रे आणे रे अजांम

³⁴ “एह् मत सोचो कि मै धरती बिच मिलाणे तांई आये रा है। मै मिलाणे नी, अपण तलवार चलवाणे तांई आये रा है। ³⁵ मै मह्णु जो उसेरे प्यो रे खिलाफ, कुड़ी जो उसेरी मां रे खिलाफ, नूह् जो तिसेरी सास्स रे खिलाफ करणे तांई आये रा है। ³⁶ अते मह्णुआं रे दुश्मण तिसेरे घरे रे ई मह्णु होणे। ³⁷ जे अपणे मां-प्यो जो मेरे का जादा प्यार करदा, से मेरा होणे रे लायक नी है। जे अपणे बच्चेयां जो मेरे का जादा प्यार करदा, से मेरा होणे रे लायक नी है, ³⁸ अते जे अपणी सूळी चुक्की करी मेरे पिच्छे नी चलदा, से मेरे लायक नी है। ³⁹ जे अपणी जिंदगी जो बचाणे री इच्छा रखदा तिस ने उस जो खोणा, अते जे मेरी वजह कने अपणी जिंदगी जो खोंदा तिन्ने तिस जो पाणा।

प्रतीफळ

⁴⁰ “जे तुम्हारे जो अपनांदा से मिंजो अपनांदा, अते जे मिंजो अपनांदा से मेरे भेजणे वाळे जो अपनांदा। ⁴¹ जे भविष्यवाणी करणे वाळे जो भविष्यद्वक्ता समझी करी अपनांदा, तिस जो सेह्ई ईनाम मिलणा जे भविष्यद्वक्ता जो मिलणा, अते जे तुसी धर्मी मह्णु जो धर्मी मह्णु मन्नी करी अपनांदे ता तुम्हारे जो सेह्ई ईनाम मिलणा जे धर्मी मह्णु जो मिलणा चहिंदा। ⁴² जे कोई मेरे इन्हा भोळे-भाळे चेल्लेयाँ जो इक गलास ठण्डा पाणी पीणे जो दे कि से मेरा चेल्ला है, ता मैं तुम्हारे कने सच्ची बोलदा कि तिस जो इधेरा ईनाम मिलणा ई मिलणा।”

यीशु जी ते यूहन्ना बपतिस्मा दैणे वाळा

¹ जां यीशु जी अपणे बारा चेल्लेयाँ जो हुकम देई दैणे का बाद से गलील प्रदेस रे सैहरां बिच सिक्सा अते प्रचार करणे जो तित्ते का चली गे। ² यहून्ना ने जेल्ला बिच मसीह रे कम्मा री खबर सुणी करी अपणे चेल्लेयाँ जो तिन्हा का एह् पूछणे भेजेया। ³ कि कै आणवाळे तुसी ई हिन कि असा दुज्जे री भाळ करन? ⁴ यीशु जी ने जवाब दित्तेया, कि जे किच्छ तुसा दिखदे सुणदे हिन, से सब किच्छ जाईकरी यहून्ना जो बोल्ली देयो। ⁵ कि अह्न्ने दिखदे हिन, अते अपाईज हंडदे फिरदे हिन, कोढ़ी सुच्चे कित्ते जाया करदे हिन, अते टोणे सुणदे हिन, मुर्दे जिंदा होया करदे हिन, अते गरिबाँ जो शुभ-बसेख सुणाया जाया करदा है। ⁶ अते धन्न हिन से, जिन्हा जो मेरी वजह कने ठोकर ना लग्गो। ⁷ जाँ से तित्ते का चली गे, ता यीशु जी यहून्ना रे बारे बिच मह्णुआँ जो बोलणा लगे, तुसा बणा बिच कै दिखणा गे थिये? कै ब्यार कने हिलदे नळू ? ⁸ फिरी तुसा कै दिखणे गे थिये? दिखो, जे मुलायम कपड़े पान्दे, से राजमैह्लां बिच रेह्न्दे हिन। ⁹ ता फिरी किजो गे थिये? कै कुसकी भविष्यद्वक्ता जो दिखणे गे थिये? हाँ, मैं तुसा जो बोलदा, बल्कि भविष्यद्वक्ता का वी बड्डे जो। ¹⁰ से ऐई है, जिसेरे बारे बिच लिखेरा है कि दिख; मैं अपणे दूत जो तेरे अग्गे भेजदा, जे तेरे अग्गे तेरा रस्ता त्यार करगा। ¹¹ मैं तुसा जो बोलदा, बपतिस्मा दैणे वाळे यहून्ना का बड्डा कोई मह्णु पैदा नी होया, अपण स्वर्ग रे राज्य बिच छोटा का छोटा मह्णु बी यहून्ना का बड्डा है। ¹² यहून्ना बपतिस्मा देणे वाळे रे रोज्जे का अब्बे ताँई स्वर्ग राज्य बिच जबरदस्ती आणा हुन्दा रेया है, अते हिंसा रे जोर पर इस जो खोणे री कोसीस होया करदी है। ¹³ यहून्ना रे आणे तक सारे भविष्यद्वक्तां ने अते मूसा रे नियमां ने भविष्यवाणी कित्ती थी, ¹⁴ ते जे तुसी नियमां अत्ते भविष्यद्वक्तां ने जे किच्छ बोलेया थिय्या, तिस जो मनणे तांई त्यार हिन ता जिसेरे आणे री भविस्यवाणी कित्ती थी, एह् यहून्ना सेह्ई एलिय्याह है। ¹⁵ जे सुणी सकदा, सुनण! ¹⁶ मैं इस जुग रे मह्णुआँ री बराबरी कुस कने कराँ? से तिन्हा निक्केयाँ साह्ई हिन, जे बजारा बिच बैठे रे इक दुज्जे जो हक्कां लाई करी बोलदे: ¹⁷ ‘असा ने तुसा ताँई बोंसरी बजाई, अपण तुसा नी नच्चे, असा ने अवशोश वाळे गाणे गाये, अपण तुसी नी रोये।’ ¹⁸ यहून्ना ना होरनियाँ साह्ई खान्दा अत्ते ना पीन्दा थिय्या, अते लोकाँ ने बोलेया थिय्या कि उस बिच बुरी आत्मा है।’ ¹⁹ मह्णु रा पुत्र होरनियाँ साह्ई खान्दा-पीन्दा आया, अपण मह्णु बोलदे हिन, ‘ इस मह्णु जो दिख्खो, एह् भूखान्गहै, पियक्कड़ है। एह् चुंगी लेणे वाळे अते पापियाँ रा मित्र है! अपण बुद्धिमत्ता री उत्तमता उसेरे कम्मा कने पूरी सही हुन्दी।’

अविश्वास पर लाणत

²⁰ फिरी यीशु जी उन्हा सैहराम जो धिक्कारणा लगे, जिन्हा बिच तिन्हा ने बड़े चम्तकारी कम्म कित्ते थिये, किजो कि तिन्हा ने अपणे पापां का तौबा नी कित्ती थी। ²¹ “हाय खुराजीन! हाय, बैतसैदा! जे चमत्कारी कम्म तुसा बिच कित्ते गे, जे से सूर अते सैदा बिच कित्ते जान्दे, ता टाट रे कपड़े लेईकरी अते अपणे जिस्म बिच राख मळी करी अवशोष करदे अपणे पापां का तौबा करी लित्ते रा होणा थिय्या। ²² अपण मैं तुसा जो बोलदा कि न्याये वाळे रोज्जे सूर अते सैदा री हालत तुम्हारे का जादा सैह्णे जोग्गी होणी। ²³ “ओ कफरनहूम, कै तू सोचदा कि तिज्जो स्वर्ग री महिमा ताँई ऊंच्चा उठाया जाणा? तू ता अधोलोक ताँई नीच्चे जाणा। जे चम्तकारी कम्म तेरे बिच कित्ते गे हिन, जे सदोम बिच कित्ते हून्दे, ता से अज ताँई बणी रेह्न्दा। ²⁴ अपण मैं तुसा जो बोलदा कि न्याये वाळे रोज्जे सदोम री हालत तुम्हारे का केई जादा खरी होणी।

बोझ कने दबे रे लोक्कां तांई अराम

²⁵ तिस्सी बेल्ले यीशु जी ने बोलेया, “ओ पिता, स्वर्ग अते धरती रे प्रभु, मैं तेरा सुकर करदा कि तुसी ने इन्हा गल्लाँ जो बुद्धिमाना अते समझदारा का लुकाई रखेया, अते बच्चेयां पर जाहीर कित्तेया। ²⁶ हाँ परम पिता एह् इधेरे ताँई होया किजोकि तुम्हारे जो ऐई खरा लगेया । ²⁷ “मेरे परम पिता ने मिन्जो सब किच्छ मेरे हवाले करी दित्तेया; अते कोई पुत्र जो नी जाणदा, सिरफ परम पिता जाणदा; अते कोई परम पिता जो नी जाणदा, सिरफ पुत्र जाणदा; अते हर से मह्णु परम पिता जो जाणदा जिसेरे तांई पुत्र ने उस जो जाहिर करणा चाये। ²⁸ “ओ सब मैह्नत करणे वाळेयों अते बोज कने दबितेरे मह्णुओं, मेरे का आओ; मैं तुम्हारे जो अराम दिन्गा। ²⁹ मेरा ज़ुंगळ अपणे ऊप्पर लेई लेयो, अते मेरे का सीखो; किजोकि मैं सांत अते मन का दीन है: अते तुसा अपणे दिला बिच अराम मिलणा। ³⁰ किजोकि मेरा ज़ुंगळ असान अते मेरा बोज हल्का है।”

सब्त रा दिन

¹ उस बेल्ले यीशु जी सब्त वाळे रोज्जे खेत्रां रस्ते का होई करी जाया करदे थिये, ते तिन्हेरे चेल्लेयां जो भूख्ख लग्गी ते से कणकां री फळियां जो तोड़ी-तोड़ी करी खाणे लग्गे। ² ताँ फरीसियां ने एह् दिख्खी करी बोलेया, कि “दिख्ख, तेरे चेल्ले से करेया करदे हिन जिसेरा सब्त वाळे रोज्जे करणा मूसा रे नियमां रे साह्ब कने ठीक नी है?” ³ अपण यीशु जी ने तिन्हा का पूछ्छेया, कि “कै तुसा ने पवित्तर सास्त्र बिच एह् नी पढ़ेया कि दाऊद अते तिन्हेरे मित्तरां ने, जां तिन्हा जो भुख्ख लग्गी थी, ता कै कित्ता थिया? ⁴ तिस ने परमेश्वर रे मन्दिर अन्दर जाई करी परमेश्वर जो चढ़ाये री रोटियां किह्य्यां खाई थी? जिन्हा जो खाणा ना ता तिसेरे तांई अते ना तिसेरे साथियां तांई, अपण सिरफ परोह्तां तांई ठीक थिया। ⁵ या मूसा रे नियम बिच तुसा एह् नी पढ़ेया कि सब्त वाळे रोज्जे मन्दिर रे परोह्त ई सब्त री विधि जो तोड़दे हिन। अत्ते फिरी बी तिन्हा जो कोई किच्छ नी बोलदा। ⁶ अपण मैं तुसा जो बोलदा, इत्ते कोई है जे मन्दिर का बी बद्धि करी है। ⁷ जे तुसी शास्त्र बिच जे लिख्खे रा हे, तिस जो जाणदे कि, ‘मैं लोकाँ बिच दया चांह्दा, बलिदान नी’ ता तुसी उन्हा जो कसुरवार नी बोलदे जे बेकसुर हिन। ⁸ किजोकि मह्णु रा पुत्तर सब्त वाळे रोज्जे रा बी मालक है।

सुक्के हात्थ वाळे म्हणु जो ठीक करणा

⁹ फिरी यीशु जी तित्ते का यहूदी धर्म सभा जो चली गे। ¹⁰ तित्ते इक मह्णु थिया, जिसेरा इक हत्थ सुक्कड़ीह् गेरा थिया। ता मह्णुआं ने पुछ्‌छेया, “मूसा री रीति रे साह्ब कने सब्त वाळे रोज्जे कुसकी जो खरा करणा, सही है?” तिन्हा ने उन्हा का एह् इधेरे तांई पुछ्‌छेया ताकि से तिन्हा पर इल्जाम लगाई सकन। ¹¹ अपण यीशु जी ने उन्हा जो जवाब दित्तेया, “मन्नो, तुम्हारे बिच का कुसकी का इक भेड्ड हो, ते से भेड्ड सब्त वाळे रोज्जे कुसकी गत्ता बिच जाई पेयो, ता कै तुसी तिस जो पकड़ी करी बाहर नी कड्डणा? ¹² फिरी इक मह्णु ता इक भेड्ड का बी जादा जरुरी है। इधेरे तांई सब्त वाळे रोज्जे भलाई करणा सही है।” ¹³ तां यीशु जी ने तिस सुक्कड़ितेरे हत्थ वाळे जो बोल्या, “अपणा हत्थ अग्गे कर” अते तिन्ने अपणा हत्थ अग्गे कित्तेया अते से खरा होई गेया। ठीक तियां ई जियां तिसेरा दूज्जा हत्थ थिया। ¹⁴ फिरी फरीसी तित्ते का बाहर निकळी आये अते यीशु जी जो मारणे तांई कोई तरकिब सोच्चणा लग्गे।

परमेश्वर रा चुणे रा सेवक

¹⁵ अपण यीशु जी एह् जाणी गे अते तित्ते का चली गे। बड़े भरी लोक्की तिन्हेरे पिच्छे चली पेह् अते यीशु जी ने तिन्हा सबनियां जो खरा कित्तेया, ¹⁶ अते तिन्हा जो समझाया कि से तिन्हेरे बारे बिच मह्णुआं जो किच्छ ना दस्सन। ¹⁷ एह् इधेरे तांई होया कि भविष्यवाणी करणे वाळे यशायाह रे जरिये प्रभु जी ने जे बोल्या थिया, से पूरा हो: ¹⁸ “दिख्खो, एह् मेरा सेवक है, जिस जो मैं चुणे रा है। एह् मेरा लाडला है, मैं इस का खुस है। मै तिसेरे ऊपर अपणी ‘आत्मा’ रखणी अते तिस ने होर जाति रे लोकां जो न्याय रा बसेख दैणा। ¹⁹ इन्ने ना ता लड़ाई-झगड़ा करणा अते ना ई लैरां मारणियां, अते ना कुन्ने इसेरी अवाज गळियाँ बिच सुनणी। ²⁰ इन्ने झुके रे नळू जो नी तोड़ना, इन्ने बुझदे दीये जो तक नी बुझाणा, जां तांई से न्याय जो विजयी नी बणाई लिंदा। ²¹ अते तिसेरे ई ना बिच होर जाति रे लोकाँ ने उमेद रखणी।”

यीशु जी ते बालज़बूल

²² फिरी मह्णु यीशु जी का इक अह्न्ने जो लियाये जेह्ड़ा कि जह्ल्ला बी थिया किजोकि तिस बिच बुरी आत्मा थी। यीशु जी ने तिस जो खरा करी दित्तेया, अते से अह्न्ना जह्ल्ला बोल्णे अते दिखणे लग्गेया। ²³ अते सबनी मह्णुआं जो बड़ी हरानी होई अते से बोल्णा लग्गे, “कै एह् मह्णु दाऊद रा पुत्र होई सकदा?” ²⁴ जां फरीसियां ने एह् सुणेया ता से बोल्णा लग्गे, “एह् ता बुरी आत्मा जो, तिन्हेरे राज्जे बालजबूल री मदत कने कड़दा।” ²⁵ यीशु जी जो तिन्हेरे विचारां रा पता लग्गी गेया अत्ते से तिन्हा जो बोल्णा लग्गे, “जिस राज्य बिच फूट पेई जांदी, से खत्म होई जांदा, अते जिस सैहर या टब्बर बिच फूट पेई जाओ से नी टिकदा। ²⁶ अते जे सैतान ई सैतान जो बाहर कड्डे ता से अपणे ई खलाफ होई गेया; ता फिरी तिसेरा राज्य कियां टिकी सकदा? ²⁷ भला, जे मैं सैतान री मदत कने बुरी आत्मा जो कडदा ता तुम्हारे चेल्ले कुसेरी मदत कने तिन्हा जो बाहर कडदे हिन? इधेरे ताँई तुम्हारे चेल्लेयां ई ने तुम्हारा न्याय करणा। ²⁸ अपण जे मैं बुरी आत्मां जो परमेश्वर री आत्मा रे जरिये कडदा। ता परमेश्वर रा राज्य तुसा का आई गेरा है। ²⁹ या कियां कोई ताकतवर मह्णु रे घरे घुसड़ी करी तिसेरे चोरी करी सकदा, जां ताँई से पैह्ले ताकतवर मह्णु जो बह्न्नी ना लेंन? ताँ ई से तिसेरा घर जो लूटी सकदा । ³⁰ जे मेरे कने नी हिन, से मेरे खलाफ हिन। अते जे बिखरियाँ भेड़ां जो इकठ्ठा करणे बिच मेरी मदत नी करदा, से बिखेरेया करदा है। ³¹ “इधेरे तांई मैं तुसा जो बोल्दा, मह्णु रा हर इक पाप अते हर इक बेज्जती माफ कित्ती जाणी अपण पवित्र आत्मा री बेज्जती करणे वाळे जो माफ नी कित्तेया जाणा। ³² अते जे कोई मह्णु रे पुत्र रे खलाफ बिच बोलगा तिस जो माफ कित्तेया जाणा, अपण जे कोई पवित्र आत्म रे खलाफ बिच किच्छ बोलगा, तिसेरा एह् गुनाह ना ता इस जुग बिच अते ना आणे वाळे जुग बिच माफ कित्तेया जाणा।

बुट्टा ते तिसेरा फळ

³³ “जे बूट्टे जो खरा बोलो, ता तिसेरे फळां जो बी खरा बोलो, या बूट्टे जो निक्कमा बोलो अते तिसेरे फळाँ जो बी, किजोकि बूट्टा अपणे फळ कने ई पछाणेया जांदा। ³⁴ “ओ सप्प रे बच्चयों! जे तुसा बुरे ई हिन ता खरी गल्लां कियां करी सकदे हिन? किजोकि जे तिसेरे मन बिच है। सेह्ई मूँह पर आंदा। ³⁵ इक खरा मह्णु जे खराई तिसेरे दिला बिच इकठ्ठी ऐ तिस्सी बिच का ई से खरी गल्लां कडदा। अते बुरा मह्णु जे बुराई तिसेरे मन बिच है, उस्सी बिच का बुरा गल्लां कडदा। ³⁶ अपण मैं तुसा जो बोलदा मह्णु री हर इक फजूल गल्ल रा हिसाब तिस जो न्याय वाळे रोज्जे दैणा पैणा। ³⁷ तू अपणी ई गल्लां रे साह्ब कने ई बेकसुर अते अपणी ई गल्लां रे साह्ब कने कसुरवार होणा।

स्वर्गीय निसानी री माँग

³⁸ ताँ किच्छ सास्त्रियाँ अते फरीसियां ने यीशु जी जो बोल्या, “गुरु जी, असा तुसा का इक निसानी दिख्खणा चांदे हिन।“ ³⁹ अपण यीशु जी ने जवाब दित्तेया, “एह् बुरी अते व्यभिचारी पीढ़ी निसानी दिखणे री इच्छा रखदी, फिरी बी योना भविष्यवाणी करणे वाळे जो छड्डी होर कोई नसाणी नी दित्ती जाणी, ⁴⁰ किजोकि जियां योना त्रै रोज्ज अते त्रे रात बड्डी मच्छी रे पेट्टा बिच रेया थिया, तियां ई मह्णु रे पुत्र ने बी त्रै रोज अते त्रै रात धरती रे पेट्टा बिच रैह्णा। ⁴¹ न्याय रे बेल्ले नीनवे रे मह्णुआं ने अज्ज री इस पीढ़ी रे मह्णुआं कने उठी करी उन्हा जो कसुरवार दस्सणा। किजोकि नीनवे रे लोकां ने योना री सिक्सा सुणी करी अपणे पापां का तौबा कित्ती थी। अते इत्ते ता कोई योना का बी बड्डा है। ⁴² न्याय रे रोज्जे दक्षिण री राणी ने इस पीढ़ी रे लोकां कने उठी करी तिन्हा जो कसुरवार दस्सणा, किजोकि से सुलैमान का सिक्सा री गल्लाँ सुनणे जो धरती रे इक कुणे का आई थी, अत्ते दिख्खो, इत्ते ता कोई सुलैमान का बी बड्डा है। ⁴³ “जां कोई भिट्ठी आत्मा कुसकी मह्णु बिच का निकळदी, ता से अराम री तोप बिच सुक्की जगह बिच भटकदी फिरदी रेह्न्दी, अपण से तिस जो नी मिलदी। ⁴⁴ तां से बोलदी, ‘जिस घर का मै आई थी, अपणे उस्सी घरे हटी जांदी,’ अते जाँ से हटी करी आंदी ता तिस जो खाली, साफ-सुथरा अते सजा सजाये रा दिख्खदी। ⁴⁵ ता से जाईकरी अपणे कने होर जादा बुरी, होर सत्त आत्मां जो लेई आंदी अते तित्ते रेह्णा लग्गी पैंदी। ते तिस मह्णु री हालत पैह्ले का बी जादा बुरी होई जांदी। अज्ज री इस बुरी पीढ़ी रे मह्णुआँ री हालत बी इय्यां ई होणी।”

यीशु जी रे माँ ते भाई

⁴⁶ जाँ से मह्णुआं री भीड़ कने गल्ल करेया करदे थिये कि यीशु जी मां अते भाई तित्ते आई करी बाहर खड़े होई गे अते से यीशु जी कने गल्ल करणे तांई भाळेया करदे थिये। ⁴⁷ अते कुसकी ने यीशु जी जो बोल्या, “सुणो तुम्हारी मां अते भाई बाहर खड़ितेरे हिन ते तुसा कने गल्ल करणा चांदे हिन।” ⁴⁸ एह् सुणी करी यीशु जी ने उस बोलणे वाळे जो जवाब दित्तेया, “कुण है मेरी मां? कुण है मेरा भाई?” ⁴⁹ अते अपणे चेल्लेयां पास्से हत्थ बद्धाई करी के बोल्या, “दिख्खो, मेरी मां अते मेरे भाई! ⁵⁰ किजोकि जे कोई मेरे परम-पिता री जे स्वर्ग बिच हिन मर्जी पूरी करदा, सेह्ई मेरा भाई, भैण अते मेरी मां है।

बी बाणे वाले रा उपनाण

¹ तिस्सी रोज यीशु जी घरे का निकळी करी झीले रे कनारे जाईकरी बैई गे। ² बड़े भरी मह्णु यीशु जी रे चौं पास्से कठ्ठी गे। इधेरे तांई से किस्ती पर चढ़ी गे। अत्ते लोकां री भीड़ कनारे खड़िह् रेह्ई। ³ यीशु जी ने उन्हा कने उदारण देई करी मती सारी गल्लां कित्ती, उन्हा ने बोलेया कि, “इक किसान बीह् बाणे निकळेया। ⁴ अते बी बाँदे-बाँदे किच्छ बीह् सड़का रे कनारे पर पेई गे अते से पैरां हेठ आई गे, ते चिड़ू-पखेरूआँ ने से बीह् चुग्गी ले। ⁵ किच्छ पत्थरा वाळी मिट्टी पर पे, जित्ते तिन्हा जो जादा मिट्टी नी मिल्ली अते डुग्गी मिट्टी नी मिलणे री वजह कने से झट उगी आये। ⁶ अपण जाँ सूरज निकळेया ता से फुक्कीह् गे, ते जड़ नी पकड़ने री वजह कने से सुक्की गे। ⁷ अते किच्छ झिल्ला बिच पे, अते से बद्धे ता बद्धे अपण झिल्ला ने तिन्हा जो दब्बी दित्तेया। ⁸ अपण किच्छ खरी मिट्टी पर पे, अते फळ बी लियाये, किच्छ सौ गुणा, किच्छ साठ्ठ, अते किच्छ तीह् गुणा। ⁹ जे सुणी सकदे, से सुणी लेंन।”

उपनाण दसणे रा मकसद

¹⁰ अते चेल्लेयां ने यीशु जी का आई करी बोल्या, तुसी उन्हा कने उदारणां बिच गल्लां किजो करेया करदे हिन? ¹¹ यीशु जी ने जवाब दित्तेया, “तुम्हारे जो स्वर्ग रे राज्य रे भेदां री समझ दित्ती गेरी है, अपण इन्हा जो नी। ¹² किजोकि जिसका घट्ट है, तिस जो दित्तेया जाणा अते उसका बड़ा जादा होई जाणा। अपण जिसका किच्छ बी नी है, तिस का जे किच्छ है, से बी लेई लित्तेया जाणा। ¹³ मैं तिन्हा कने उदारणां बिच गल्लां इधेरे तांई करदा, किजोकि जे से दिख्खदे हिन अपण असलियत बिच तिन्हा जो किच्छ लिबदा नी, से जे सुणदे हिन असलियत बिच से ना सुणदे हिन, ना समझदे हिन। ¹⁴ अते तिन्हेरे बारे बिच यशायाह री एह् भविस्वाणी पूरी हुन्दी, तुसी सुणदे ता रेह्णा, अपण तुम्हारी समझ बिच नी आणा, अते दिख्खदे ता रेह्णा, अपण तुसां जो किच्छ बी सूझणा नी: ¹⁵ किजोकि इन्हेरे मन मोट्टे होई गेरे हिन, अते एह् कन्ना का ऊच्चा सुणदे हिन, ते इन्हा ने अपणी हाख्खियां बंद करी रख्खे री हिन ताकि से दिख्खी ना पांन, ते कन्ना का किच्छ बी सुणी ना पांन, ते दिल्ल का समझन, अते मेरे पास्से आई जांन, ते मै तिन्हा जो खरा करां। ¹⁶ अपण धन्न हिन तुसी जे दिखदे सुणदे हिन सुणदे हिन। ¹⁷ किजोकि मैं तुम्हारे कने सच्च बोल्दा कि बड़े जह्णे भविस्यवाणी करणे वाळेयां ने अते भले ते नेक मह्णुआं ने एह् चाया कि जे तुसी दिख्खेया करदे हिन तिस जो दिखन, अपण नी दिख्खी पाये, अते जे तुसी सुणेया करदे हिन, सुनण, अपण नी सुणी पाये।

बी बाणे वाळे उपनाण रा मतलब

¹⁸ “अवे तुसी बीह् बाणे वाळे रे उदारण रा मतलब समझो: ¹⁹ से बीह् जे रस्ते पर पेया थिया, उसेरा मतलब है कि जां कोई राज्य रा वचन सुणान्दा अते तिस जो नी समझदा, ता से सैतान आईकरी, जे किच्छ तिन्हेरे दिल्ला बिच बाया गेरा थिया, तिस जो से खोई लिन्दा। ²⁰ अते जे बीह् पत्थरा वाळी मिट्टी पर पेया थिया, एह् से हिन, जे वचन सुणी करी झट ई खुसी कने उस्सी बेल्ले ई मन्नी लिन्दे। ²¹ अपण से अपणे बिच जड़ नी पकड़ी पाणे री वजह कने थोड़ी ई हाण तांई हुन्दे, अते जां वचन री वजह कने दुख या कोई मुसिबत आंदी ता से झट ई डगमगाई जांदे। ²² जे बी झिल्लां बिच पेया थिया, एह् से हिन, जे वचना जो सुणदे, अपण इस दुनियां री फिकरां अते पैसेयां रा लालच वचनां जो दबी रखदा, अते से कामयाब नी हून्दे। ²³ जे खरी मिट्टी पर बीह् पे थिये, एह् से हिन, जे वचनां जो सुणदे अते समझी करी फळ लियान्दे हिन, किच्छ सौ गुणा, ते किच्छ साठ्ठ, ते किच्छ तीह् गुणा।”

जगंळी बी रा उपनाण

²⁴ यीशु जी ने तिन्हा जो इक होर उदारण दित्तेया, कि स्वर्ग रा राज्य तिस मह्णु साह्ई है जिनिये अपणे खेत्रा बिच खरा बीह् बाया। ²⁵ अपण जां से सुत्तेरा रा थियां तां तिसेरा दुस्मण आईकरी कणका रे बिच जंगली बी पाई करी चली गेया। ²⁶ जां कणक बड्डी होई करी बडणे तांई त्यार होई गेई, ता तिस बिच जंगळी घा बी लिब्बी। ²⁷ एह् दिख्खी करी घरे रे नौकर ने आईकरी अपणे मालक जो बोल्या, ओ मालका, कै तुसां अपणे खेत्रा खरा बीह् नी बाया थिया? फिरी तिस बिच जंगळी घा कुदखा आई? ²⁸ तिस ने अपणे नौकरां जो बोल्या, एह् कुसकी दुस्मण रा कम्म है। नौकरां ने तिस जो बोल्या कै तुसी चांदे कि असी जाईकरी तिन्हा जो इकट्टा करी लेंन? ²⁹ अपण तिस ने बोल्या, ‘ना, कुदखी इह्य्यां ना होई जाये कि जंगली घा कठ्ठेरदे-कठ्ठेरदे तुसी तिसेरे कने कणक जो बी कठ्ठेरी लेंन। ³⁰ दोनां जो बडणे रे बेल्ले तांई बद्धणा दो, अते बडणे बेल्ले इन्हा जो बडणे वाळे जो बोल्गा, पैह्ले जंगली घा जो फुक्कणे तांई कठ्ठेरी करी बैठ् बिच बन्नी लै, अते कणका जो मेरे खत्ते बिच इकठ्ठा करी दे।’ ”

राई रे बी रा उपनाण

³¹ यीशु जी ने तिन्हा जो इक होर उदारण दित्तेया, कि स्वर्ग रा राज्य संरेयां रे इक दाणे रे बराबर है, जिस जो कुसकी मह्णु ने अपणे खेत्रा बाई दित्तेया। ³² से सबनी बीआं का हल्का हुन्दा अपण जा बद्धदा ता सब साग पात का बड्डा हुन्दा, अते इह्देया बूट्टा बणी जांदा, कि चिड़ू-पखेरु आईकरी तिसेरी डालियां पर रैह्न्दे हिन।”

खमीर रा उपनाण

³³ यीशु जी ने इक होर उदारण तिन्हा जो दित्तेया, कि स्वर्ग रा राज्य तराक्क साह्ई है जिस जो कुसकी जनानी ने कोई बारह किलो आट्टे बिच मिलाया अते हुन्दे-हुन्दे पूरा आट्टा तराक्क होई गेया।”

उपनाण रा इस्तेमाल

³⁴ एह् सब गल्लां यीशु जी ने उदारण बिच लोकां कने बोल्ली, अते बिना उदारण रे यीशु जी तिन्हा कने किच्छ बी नी बोल्दे थिये। ³⁵ जे वचन भविस्यवाणी करणे वाळेयां रे जरिये बोल्या गेया थिया, से पूरा हो कि मैं उदारण बोल्णे तांई अपणा मूंह् खोलणा, मैं उन्हा गल्लां जो बोलणा जे दुनियां री सुरुआत का गुप्त रेह्ई हिन।”

जगंळी बी रे उपनाण रा मतलब

³⁶ फिरी यीशु जी लोकाँ री भीड़ जो छड्डी करी घरे चली गे। तां चेल्ले आई करी यीशु जी जो बोल्णा लग्गे, खेत्र री जंगली घा रा उदारण असां जो समझाई देयो। ³⁷ यीशु जी ने जवाब दित्तेया, कि खरे बीह् बाणे वाळा मह्णु रा पुत्र है, ³⁸ खेत्र दुनियां है, खरे बीह् स्वर्ग राज्य रे बच्चे हिन, अते जंगली बीह् सैतान रे बच्चे हिन। ³⁹ अते जिस दुस्मण ने तिन्हा जो बाया थिया से सैतान है, अते कणक बडणे वाळे स्वर्गदूत हिन। ⁴⁰ जियां जंगली घा कठ्ठेरी करी अग्ग बिच फुक्की दित्ती, तियां ई दुनियां रे अंत बिच बी होणा। ⁴¹ मह्णु रे पुत्र ने अपणे स्वर्ग दूतां जो भेजणा, अते तिन्हा तिसेरे राज्य बिच सब पापियां जो अते उन्हा जो, जे पाप कराणे री वजह बणदे थिये तिन्हा जो इकठ्ठा करणा। ⁴² अते तिन्हा जो अग्ग रे भठ्ठे बिच पाई दैणा, तित्ते सबने रोणा अते अपणे दान्द पिहिणे। ⁴³ तिस बेल्ले भले अते नेक मह्णु अपणे परम-पिता रे राज्य बिच सुरज साह्ई चमकणे। जे सुणी सकदे हिन, सुणी लेंन।

लुके रे खजाने रा उपनाण

⁴⁴ स्वर्ग रा राज्य खेत्रा बिच छिपे रे धन रे बराबर है जिस जो कुसकी मह्णु जो मिल्लेया अते तिन्ने खेत्र बिच छुपाई दित्तेया, अते खुसी रे मारे तिन्ने अपणा सब किच्छ बेची करी से खेत्र खरीदी लेया।

अनमोल मोती रा उपनाण

⁴⁵ फिरी स्वर्ग रा राज्य इक कम्म-धंदा करणे वाळे साह्ई है, जे खरे मोतियां री तोप बिच थिया। ⁴⁶ जां तिस जो इक किमती मोती मिल्लेया ता तिस ने जाई करी अपणा सब किच्छ बेची करी तिस जो खरीदी लेया।

जाल रा उपनाण

⁴⁷ फिरी स्वर्ग रा राज्य तिस बड्डे जाल साह्ई है, जिस जो समुंद्र बिच पाया अते हरेक किस्म री मच्छलियां जो बटोरी लेई आया। ⁴⁸ अते जां भरी गेया तां मछुआरे तिस जो खिच्ची करी कनारे लेई आये, अते बेईकरी खरी-खरी जो भान्डेयां बिच इकठ्ठा करी लित्तेया अते बेकार मच्छियां जो सुट्टी दित्ती। ⁴⁹ दुनियां रे अंत बिच बी किच्छ इह्य्यां ई होणा, स्वर्गदूत ने आईकरी बुरे जो भले अते नेक मह्णुआं का बखरा करी के अग्ग रे भठ्ठे बिच पाई दैणा। ⁵⁰ तित्ते रोणा अते लोकां ने अपणे दांद पिहणे।

पुराणी ते नौई सीख रा महत्व

⁵¹ यीशु जी ने अपणे चेल्लेयां का पूच्छेया, कै तुसी एह् गल्लां समझे? तिन्हा ने यीशु जी जो बोल्या, “हां!” ⁵² यीशु जी ने उन्हा जो बोल्या, “दिख्खो, इधेरे तांई हर इक सास्त्री जे कि स्वर्ग रे राज्य जो जाणदा, से उस घर रे मालक बराबर है जे अपणे भण्डार का नोई अते पुराणी चीजाँ जो बाहर कडदा।

नासरत बिच यीशु जी री बेज्ज़ती

⁵³ जां यीशु जी एह् उदारण बोल्ली बैठे ता से तित्ते का चली गे। ⁵⁴ अते अपणे सैहर आइकरी यहूदी धर्म सभा बिच तिन्हा जो सिक्सा दैणा लगे। इस कने हर कोई हरान होई गेया ते बोल्णा लगे, “इस जो इदेयी समझ अते चमत्कारी सक्ति कुते का मिल्ली? ⁵⁵ कै एह् यूसूफ रा निक्का है? अते कै इसेरी मां रा ना मरियम नी है अते इसेरे भ्याळां रे ना याकूब, यूसूफ, शमौन, यहूदा नी हिन? ⁵⁶ अते कै इसेरी सारी भैणा असां रे बिच नी रैह्न्दी? ता फिरी इस जो एह् सब किच्छ कुते का मिल्लेया? ⁵⁷ अते उन्हा ने उस जो अपनाया नी, अपण यीशु जी ने बोल्या “अपणे सैहर अते अपणे घरे बिच ई भविस्ययवाणी करणे वाळे री इज्जत नी हून्दी। ⁵⁸ अते यीशु जी ने तिन्हेरे छोटे विस्वास री वजह कने तित्ते जादा सक्तिसाली कम्म नी कित्ते।

यूहन्ना बपतिस्मा दैणे वाले रा खून होणा

¹ उस बेल्ले गलील रे राज्जे हेरोदेस ने जां यीशु जी रे कम्मां रे बारे अन्दर सुणेया। ² तां तिस ने अपणे नौकरां जो बोल्या, “एह् यहून्ना बपतिस्मा दैणे वाळा है, जे मरी करी फिरी जिन्दा होई गेरा है, इधेरे तांई एह् सक्तियां तिस बिच कम्म करेया करदी हिन।” ³ किजोकि एह् ओई हेरोदेस थिय्या जिन्ने हेरोदेस जो बन्धी बणाई करी, संगळा कन्ने बन्नी करी जेल्लां बिच पाई दित्तेया थिय्या। एह् उसने हेरोदियास रे बोलणे पर कित्तेया थिय्या, जे पैल्ले उसेरे भाई फिलिप्पुस री लाड़ी थी। ⁴ किजोकि यहून्ना ने उस जो बोलदा रेह्न्दा थिया, कि “तिज्जो इस कने नी रैह्णा चहिंदा। ⁵ इधेरे तांई हेरोदेस तिस जो मारी दैणा चांह्दा थिया, अपण से लोकां का डरदा थिया किजोकि मह्णु यहून्ना जो भविस्यवाणी करणे वाळा मनदे थिये। ⁶ अपण जां हेरोदेस रा जन्म दिन आया ता हिरोदियास री कुड़ी ने हेरोदेस अते तिसेरे परोणे रे अग्गे नच्ची करी तिन्हा जो इतणा खुस करी दित्तेया ⁷ कि हेरोदेस ने कसम खाई करी वचन दित्तेया, “तू जे किच्छ बी मंन्गगी, मै तिज्जो दिंगा। ⁸ अते अपणी मां रे उकसाणे पर तिन्ने बोल्या, “मिंजो थाळी बिच यहून्ना बपतिस्मा दैणे वाळे रा सिर देयो।” ⁹ इस गल्ल कने राज्जा बड़ा दुखी होया, अपण अपणी कसम री अते अपणे परोणेयां री वजह कने तिस ने तिसेरी जरुरत जो पूरा करणे रा हुकूम देई दित्तेया। ¹⁰ उस ने जेल बिच यहून्ना रा सिर बडणे ताँई आदमी भेजे। ¹¹ अते यहून्ना रा सिर इक थाळी बिच रख्खी करी लियाये अते कुड़ी जो देई दित्तेया ते से तिस जो अपणी मां का लेई गेई। ¹² फिरी यहून्ना रे चेल्ले आई करी लाह्स जो लेई गे अते तिन्हा ने उस दब्बी दित्तेया। अत्ते फिरी तिन्हा ने जाई करी यीशु जी जो दस्सेया।

पाँज हजार म्हणुआं जो खुआणा

¹³ जां यीशु जी ने एह् सुणेया, ता से तित्ते का किस्ती बिच कुसकी सांत जगह पर किल्ले चली गे। अपण जां लोकां जो पता चलेया तां से अपणे सैहरा का पैदल ई तिन्हेरे पिच्छे चली गे। ¹⁴ यीशु जी जां किस्ती का निकळी करी बन्ने आये तां तिन्हा लोकाँ री बड़ी बड्डी भीड़ दिख्खी। तिन्हा जो तिन्हा पर बड़ा तरस आया ते तिन्हा ने बमारा जो खरा कित्तेया। ¹⁵ जां सांझ होई ता तिन्हेरे चेल्लेयां ने यीशु जी का आई करी बोल्या, “एह् सुनसान जगह है ते बड़ी हाण बी होई गेरी है, इधेरे ताँई मह्णुआं जो भेजी देयो, ताकि से ग्रां बिच जाई करी अपणे तांई रोटी खरीदी लेंन।” ¹⁶ अपण यीशु जी ने तिन्हा जो बोलेया, “इन्हा जो कुते जाणे री जरूत नी है: तुसा ई इन्हा जो खाणे जो देयो।” ¹⁷ तिन्हा ने यीशु जी जो बोलेया, “असा का सिरफ पंज रोटियां ते दो मच्छियां हिन।” ¹⁸ यीशु जी ने बोल्या, “तिन्हा जो इत्ते मेरे का लेई आओ।” ¹⁹ यीशु जी ने लोकां री भीड़ जो बोल्या कि तुसी घा बिच बैई जाओ। फिरी यीशु जी ने पंज रोटियां ते दो मच्छियां जो लेया ते स्वर्ग पास्से दिख्खी करी परमेश्वर रा सुकर कित्तेया अते रोटियां रे टुकड़े तोड़ी-तोड़ी करी चेल्लेयां जो दित्ती अते चेल्लेयां ने मह्णुआं बिच बंडी दित्ती। ²⁰ सब खाई करी करी रज्जी गे। तां चेल्लेयाँ ने बचे रे टुकड़ेयां कने भरितेरे बाहरा टोकरे चुक्के। ²¹ जनानियां अते बच्चेयां जो छड्डी करी तित्ते खाणे वाळे कोई पंज हजार मड़द थिये।

यीशु जी रा पाणी पर चलणा

²² तां यीशु जी ने झट ई अपणे चेल्लेयां जो किस्ती पर चढ़ाया ते जां तांई से भीड़ जो भेजदे, उन्हा जो गलील री झील रे पार अपणे का पैह्ले ई जाणे जो बोल्या। ²³ मह्णुआं जो भेजणे का बाद यीश् जी कल्ले ई प्रार्थना करणे तांई पाह्ड़ पर चली गे। सांझ होणे तांई से कल्ले ई थिये। ²⁴ अपण किस्ती बन्ने का किच्छ दूर छलारा रे थपेड़ेयां बिच डगमगाया करदी थी, किजोकि ब्यार सामणे का थी आया करदी। ²⁵ भ्यागा रे कोई त्रै अते छै बजे रे बिच यीशु जी झील रे ऊपर चलदे तिन्हा का आये। ²⁶ जां चेल्लेयां ने तिन्हा जो झील रे ऊपर चलदे दिख्खेया ता से घबराई गे ते अपु-मिते बोलणा लग्गे, “एह् ता कोई भूत है!” अते डरे रे मारे चिन्डा मारणा लग्गे। ²⁷ अपण यीशु जी ने उस्सी बेल्ले तिन्हा कने गल्ल कित्ती ते बोल्या, “हिम्मत रख्खो! मैं है! डरा मत।” ²⁸ तां पतरस ने यीशु जी जो बोल्या, “प्रभु जी, जे तुसा हिन, ता मिन्जो पाणी पर चली करी अपु का आणे तांई हुकुम देयो।” ²⁹ यीशु जी ने बोल्या, “चली आ।” अते पतरस किस्ती का निकळी करी पाणी पर चलदे यीशु जी का चली पेया। ³⁰ अपण तेज ब्यार जो दिख्खी करी से डरी गेया अते डूबणे लग्गेया ते लेरां मारदे बोलणे लग्गेया, “प्रभु जी, मिंजो बचाओ।” ³¹ यीशु जी ने झट ई तिस जो हत्थ दित्तेया ते संभाळी लेया अते तिस जो बोल्या, “तेरा विस्वास छोटा है, तू सक्क किजो कित्तेया थिय्या?” ³² अते जां से किस्ती पर चढ़ी आये ता ब्यार रुकी गेई। ³³ किस्ती पर जे मह्णु थिये तिन्हा यीशु जी री जै-जै कार कित्ती अते बोल्या, ”तुसा वाक्केई परमेश्वर रे पुत्र हिन।”

गन्नेसरत मे बमारां जो ठीक करणा

³⁴ ता से झील रे पार गन्नेसरत पूज्जे, ³⁵ अते तित्ते रे मह्णुआं ने जां यीशु जी जो पछयाणेया ता तिन्हा ने अख्खी-बख्खी री सब जगह पर तिन्हेरे आणे रा बसेख भेजी दित्तेया, अते मह्णु बमारां जो तिन्हेरे का लेई आये। ³⁶ ते से तिन्हा कने बिन्ती करणा लगे कि से तिन्हा जो अपणे कपड़े जो ई छुणा देयो, अते जितणेया ने छुत्तेया, से पूरी तरह कने खरे होई गे।

परम्परा जो मनणे पर सवाल

¹ ताँ यरुशलेम का किच्छ फरीसी अते शास्त्री यीशु जी का आई करी बोलणा लग्गे, ² “तेरे चेल्ले पूरखाँ रे रिवाजां जो किजो नी मन्दे? से रोटी खाणे का पैह्ल्ले हत्थ-पैर किजो नी धोन्दे?” ³ यीशु जी ने उन्हा जो जवाब दित्तेया, तुसी वी अपणे रिवाजाँ री वजह कने किजो परमेश्वर रे हुकमा जो नी मन्दे? ⁴ किजोकि परमेश्वर ने बोलेया है, ‘अपणे माँ-प्यो री इज्जत करो, अते, ‘जे कोई माँ-प्यो जो बुरा बोले, तिस जो मारी दैणा चहिन्दा।’ ⁵ अपण तुसी बोलदे कि जे कोई अपणे माँ-प्यो जो बोले, ‘किजोकि मैं अपणा सब किच्छ परमेश्वर जो अर्पित करी बैठ्ठे रा है, इधेरे तांई तुम्हारी मदत नी करी सकदा।’ ⁶ ता तिस जो अपणे माँ-प्यो री इज्जत करणे री जरुरत नी है, इस्सी तरिक्के कने तुसी परमेश्वर रे हुकमां जो टाळदे हिन। ⁷ ओ ढोगियों!, यशायाह ने तुसाँ रे बारे बिच एह् भविष्यवाणी ठीक ई कित्ती थी। ⁸ ‘एह् मह्णू सिरफ होंठाँ कने मेरी इज्जत करदे हिन, अपण इन्हेरे मन मेरे का दुर हिन। ⁹ एह् बेकार मेरी भक्ति करदे हिन, अते मह्णूआँ री सिक्सा जो धर्म रे सिद्धान्त करी के सिखान्दे हिन’।”

भिठा करणे वाळी गल्लां

¹⁰ ताँ यीशु जी ने मह्णूआँ जो अपणे का सद्दी करी तिन्हा जो बोलेया, “सुणो अते समझो: ¹¹ मह्णू रे मूँह् अन्दर जे जान्दा, से मह्णु जो अपवित्र नी करदा, अपण उसेरे मूँह् का निकळेरी गल्ल तिस जो अपवित्र करदी।" ¹² ताँ चेल्लेयाँ ने आईकरी तिन्हा जो बोलेया, “कै तुसी जाणदे हिन कि फरीसि तुम्हारी गल्ल रा बड़ा बुरा मन्नी गेरे हिन?” ¹³ अपण यीशु जी ने जवाब दित्तेया, “हर इक पनिरी जे मेरे स्वर्गीय पिता ने नी लगाई, बूट्टी दित्ती जाणी। ¹⁴ तिन्हा जो छड्डो; से ता खुद अह्न्ने होई करी दूज्जे अह्न्ने जो रस्ता दसणे वाळे हिन, इन्हा दोनां ने ई गत्ता बिच पेई जाणा।” ¹⁵ पतरस ने बोलेया, एह् उदारण असा जो समझाई देयो।” ¹⁶ यीशु जी ने बोलेया, “कै तुसी हल्ले ताँई बी नी समझे? ¹⁷ कै तुसी नी जाणदे कि जे किच्छ बी मूँह् बिच जान्दा से पेट्टा बिच जान्दा, अते सण्डास का निकळी जान्दा? ¹⁸ अपण जे किच्छ मूँह् का निकलदा, से दिल का निकळदा, ते सेह्ई मह्णु जो अपिवत्र करदा। ¹⁹ किजोकि बूरी गलाँ, खून करणा, बगेर ब्याहतिरी जनानी कने व्यभिचार, ब्याहतिरी कने व्यभिचार, चोरी, झूठी गुवाई, बेज्जती करणा जदेई बुराईयाँ दिल का ई निकळदी हिन। ²⁰ एह् ई गल्लां हिन जे मह्णु जो अपवित्र करदी हिन, बगेर हत्थ-पैर धोये रे रोटी खाणे कने कोई अपवित्र नी हून्दा।”

कनानी जाती री इक्क जनानी रा विश्वास

²¹ फिरी से तित्ते का निकळी करी, सूर अते सैदा प्रदेस रे पास्से चली गे। ²² अते दिख्खो, तिस प्रदेस का इक कनानी जनानी आई अते चिंडा मारी के बोलणा लग्गी, “ओ प्रभु, दाऊद री संतान, मेरे पर दया करो! मेरी कुड़ी जो बुरी आत्मा बड़ी तंग है करेया करदी।” ²³ अपण तिन्हा ने तिस जो कोई जवाब नी दित्तेया। ताँ यीशु जी रे चेल्लेयाँ ने आईकरी तिन्हेरे छन्दे कित्ते कि, “इस जो भेजी देंन, किजोकि एह् लैरां मारदी म्हारे पिच्छे है आया करदी।” ²⁴ अपण यीशु जी ने उन्हा जो बोलेया, इस्त्राएल रे खानदान री गुम होयेरियां भेड़ां जो छड्डी मैं होर कुसकी का नी भेजेया गेरा है।” ²⁵ अपण से आई अते यीशु जी री जै-जै कार करी के बोलणा लग्गी, “ओ प्रभु, मेरी मदत करो।” ²⁶ यीशु जी ने उस जो बोलेया, “मुन्डेयाँ री रोटी लेइकरी कुतेंयाँ रे मुहागर पाणा ठीक नी है।” ²⁷ तिनिये बोलेया, “सच्च है प्रभु, अपण कुते वी से चुरा चारा खान्दे जे तिन्हेरे मालका रे मेज का पुन्दा।” ²⁸ तां यीशु जी ने बोलेया, “ओ जनानी, तेरा विस्वास बड्डा है। जियाँ तू चान्दी, तियां ई तेरे ताँई हो।” तिसेरी कुड़ी तिस्सी बेल्ले खरी होई गेई।

मते सारे बमारां जो ठीक करणा

²⁹ यीशु जी तित्ते का गलील री झील रे कनारे पूज्जे। से इक पाह्ड़ पर चढ़ी करी तित्ते बेई गे। ³⁰ अते मह्णुआं री बड़ी बड्डी भीड़ तिन्हा का आई अते से अपणे कने लंगड़े, लूले, अह्न्ने, जल्ले अते होर बी बड़े जणेया जो तिन्हेरे का लियाये अते तिन्हा जो यीशु जी रे पैरा का रखी दित्तेया। अते यीशु जी ने उन्हा जो खरा करी दित्तेया। ³¹ जाँ मह्णुआं ने दिख्खेया कि जल्ले बोलदे हिन, लूले खरे होई गे, लंगड़े चलदे अते अह्न्ने दिखदे हिन ता से हैरान होई गे। अत्ते से इस्त्राएल रे परमेश्वर री बड़ाई करणा लग्गे।

चार हजार लोक्कां जो खुआणा

³² यीशु जी ने अपणे चेल्लेयाँ जो अपणे का सद्देया अते बोलेया, “मिन्जो इस भीड़ पर तरस आन्दा किजोकि एह् मह्णु तिन्न रोज्ज का मेरे कने हिन अते इन्हा का किच्छ बी खाणे जो नी है, मैं इन्हा जो भूखा भेजणा नी चान्दा, कुदखी ईयाँ नी हो कि रस्ते बिच ई अद्ध-मरे होई जाओ।" ³³ चेल्लेयां ने उन्हा जो बोलेया, "असा जो इस बंजर जगह बिच कुदेका इन्नी रोटी मिलणी कि असा इन्नी बड्डी भीड़ जो रजाई सकन?” ³⁴ यीशु जी ने तिन्हा जो पूछेया, “तुम्हारे का किन्नी रोटी हिन?” तिन्हा ने बोलेया, “सत्त रोटियां, अते थोड़ी करी हल्कियां मछियां बी हिन।" ³⁵ ता तिन्हा ने मह्णुआ जो भुईयां बैणे रा हुकम दित्तेया। ³⁶ ते तिन्हा सत्त रोटियां अते मछियां जो लेया अते सुकर करी के तोड़ेया, ते अपणे चेल्लेयाँ जो दिदें गे ते चेल्ले मह्णुआं जो। ³⁷ से सब खाई करी रजी गे अते चेल्लेयां ने बचे रे टुकड़ेयां कने भरितेरे सत्त टोकरे चुक्के। ³⁸ खाणे वाळे जनानियां अते निक्केयां रे अलावा चार हजार मड़द थिये। ³⁹ ताँ से भीड़ जो भेजी करी किश्ती पर चढ़ी गे, अते मगदन देस री सीमा बिच आये।

स्वर्गीय निसानी री माँग

¹ फरीसियां अते सदूकी यीशु जी का आये। से यीशु जी जो परखणे चाह्न्दे थिय्ये, इधेरे तांई तिन्हा ने यीशु जी जो बोलेया, “असा जो स्वर्ग री कोई निशानी दिखाओ।” ² अपण यीशु जी ने जवाब दित्तेया, “जां सांझ हून्दी ता तुसी बोलदे , अम्बर लाल है, ‘मौसम ठीक रेह्णा।’ ³ अते भ्यागा बोलदे , ‘अज्ज हनेरी चलणी, किजोकि अम्बर लाल अते डरोणा है।’ तुसा अम्बर रे लछण दिखी करी तिसेरे भेद दस्सी सकदे, अपण इस जुग रे बेल्ले री निशानियां रा भेद किजो नी दस्सी सकदे? ⁴ इस जुग रे बुरे अते व्यभिचारी पीढ़ी निशानी तोपदी, अपण योना री निशानी जो छड्डी तिन्हा होर कोई निशानी नी दित्ती जाणी।” अते तां यीशु जी तिन्हा जो छड्डी करी चली गे।

फरीसी ते सदुकियां री सीख र खमीर

⁵ यीशु जी रे चेल्ले झील रे पार पुज्जे, अपण से रोटी लेणा भूली गे। ⁶ यीशु जी ने तिन्हा जो बोलया, “दिख्खो, फरिसियां अते सदूकियां री तराक्क का सावधान रेह्यो।” ⁷ से अपु-मिते गल्ल-बात करी के बोलणा लग्गे, “से इधेरे तांई बोलया करदे हिन किजोकि असा रोटी नी लियाये।” ⁸ अपण यीशु जी एह् जाणी लेया अते बोलया, "तुम्हारा विस्वास छोटा है, तुसी अपु-मिते किजो बैह्स-बाजी करेया करदे हिन कि असा का रोटी नी है? ⁹ कै तुसा हल्ले तांई नी समझे? जां पंज हजार मह्णुआं तांई पंज रोटियां थियां ता तुसी किन्ने टोकरे भरी के चुक्की थिये? ¹⁰ अते ना तिन्हा चार हजार तांई सत्त रोटियां थियां ते तुसी किन्ने टोकरे भरी के चुक्की थिये? ¹¹ तुसी किजो नी समझदे कि मैं तुम्हारे जो रोटियां रे बारे नी बोलेया थिया अपण एह् कि तुसी फरिसियां अते सदूकियां री तराक्क का सावधान रेह्यो।” ¹² तां तिन्हेरी समझ बिच आया कि तिन्हा रोटी री तराक्क का नी, अपण फरीसियां अते सदूकियां री सिक्सा का सावधान रेह्णे तांई बोलेया थिया।

पतरस रा यीशु जी जो मसीह मनणा

¹³ जां यीशु जी कैसरिया फिलिप्पी रे प्रदेस जो आये, ता अपणे चेल्लेयां जो पूच्छणा लग्गे, “लोक मह्णु रे पुत्र जो कै बोलदे हिन?” ¹⁴ तिन्हा ने बोलेया, “किच्छ ता यहून्ना बपतिस्मा देणे वाळा बोलदे हिन, किच्छ एलिय्याह, अते होर यिर्मयाह या भविष्यद्वक्तां बिच का कोई इक बोलदे हिन।” ¹⁵ यीशु जी ने उन्हा जो बोलेया, “अपण तुसी मिन्जो कै बोलदे?” ¹⁶ शमौन पतरस ने जवाब दित्तेया, “तुसी जिंदा परमेश्वर रे पुत्र मसीह हिन।” ¹⁷ यीशु जी उन्हा जो बोलेया, "ओ शमौन, योना रे पुत्र, तू धन्न है; किजोकि मांस अते खून ने नी, अपण मेरे पिता ने जे स्वर्ग बिच हिन, एह् गल्ल तिन्हा पर जाहिर कित्ती है। ¹⁸ ते मैं वी तिज्जो बोलदा कि तू पतरस है, ते मैं इस्सी पत्थर पर अपणी कलीसिया बनाणी ते अधोलोक रे दुआर तिस पर हावी नी होणे। ¹⁹ मैं तिज्जो स्वर्ग रे राज्य री चाबियां देणी, अते जे किच्छ तू धरती पर बनगा, से स्वर्ग बिच बनिह्णा, अते जे किच्छ तू धरती पर खोलगा, से स्वर्ग बिच खुलणा।" ²⁰ फिरी यीशु जी ने चेल्लेयां जो सख्ती कने समझाई करी बोलया कि मेरे बारे बिच एह् कुसकी कने मत बोलदे कि मैं मसीह है।

अपणे मरणे रे बारे बिच यीशु जी री भविष्यवाणी

²¹ उस बेल्ले यीशु जी अपणे चेल्लेयां जो दस्सणा लगे, "जरुरी है कि मैं यरूशलेम जो जाँ, ते पुरखाँ, परोतां रे प्रधान, अते शास्त्रियां रे हत्थे बड़े दु:ख उठां, अते मारी दित्तेया जां, ते तिज्जे दिन जिंदा होई जां।” ²² तां पतरस तिन्हा जो अलग ले जाई करी बकणे लगेया, “ओ प्रभु, परमेश्वर न करन! तुम्हारे कने इदेया कदी बी हो।” ²³ तां यीशु जी ने मुड़ी करी पतरस जो बोलेया, “ओ शैतान, मेरे सामणे का दूर होई जा; तू मेरे तांई इक अड़चन है; किजोकि तू परमेश्वर री गल्लां पर नी, अपण मह्णुआं री गल्लां पर मन लगादां।”

यीशु जी रे पिच्छे चलणे रा मतलब

²⁴ ताँ यीशु जी ने अपणे चेल्लेयां जो बोलेया, “जे कोई मेरे पिच्छे आणा चान्दा ता अपणे आपे का इन्कार करन, ते अपणी सूळी चुकी करी, मेरे पिच्छे चलन। ²⁵ किजोकि जे कोई अपणी जिंदगी जो बचाणे री इच्छा रखदा, तिन्ने तिस जो खोई दैणा, अपण जे कोई मेरे तांई अपणी जिंदगी जो खोगां, तिन्ने तिस जो पाई लैणा। ²⁶ जे मह्णु सारी दुनिया जो पाई लेंन, ते अपणे प्राण जो खोई दे, ता तिस जो कै फायदा होणा? या मह्णु अपणे प्राण रे बाट्टे कै दिंगा? ²⁷ किजोकि मह्णु रा पुत्र अपणे स्वर्ग दूताँ कने अपणे पिता री महिमा बिच आणे वाळा है। ताँ तिन्ने हर इक मह्णु जो तिसेरे कम्मा रे साह्ब कने ईनाम देणा’ ²⁸ मैं तुसा कने सच्च बोलदा कि इत्ते खड़ितेरेयाँ बिच का किच्छ, इदेय बी हिन कि जाँ तांई मह्णु रे पुत्र जो तिसेरे राज्य बिच का आन्दे नी दिख्खी लिन्दे, तां तांई तिन्हा मौत रा सुआद नी चखणा।”

यीशु जी रा रूप बदलणा

¹ यीशु जी छै रोजाँ बाद पतरस, याकूब, अते तिसेरे भ्याळ यहून्ना जो अपणे कने कल्ले बिच इक ऊँचे पाह्ड़ पर बिच लेई गे। ² तित्ते तिन्हेरे सामणे यीशु जी रा रुप बदली गेया। उन्हेरा मूंह् सूरज साई चमकी पेया, अते तिन्हेरे कपड़े इय्यां चमके जियाँ लौ हो। ³ फिरी अचानक मूसा ते एलिय्याह उन्हेरे सामणे आये अत्ते यीशु जी कने गल्ल-बात करणा लग्गे। ⁴ पतरस ने यीशु जी जो बोलया, “ओ प्रभु, असा ताँई ईत्ते रैह्णा ठीक है। जे तुम्हारी मर्जी हो ता मैं इत्ते त्रै डेरे बणां; इक तुम्हारे ताँई, इक मूसा ताँई, अते इक एलिय्याह ताँई।” ⁵ से बोलया ई करदा थिया कि दिख्खो, इक चमकदे बदळ ने तिन्हा जो ढक्की लेया, अते तिस बदळ बिच का इक अवाज निकळी, “एह् मेरा प्यारा पुत्र है, जिस का मैं बड़ा खुस है: इसेरी सुणो।” ⁶ जां चेल्लेयां ने एह् सुणेया ता से इतणे डरी गे कि से उन्दे मूंहा पेई गे। ⁷ यीशु जी ने आई करी तिन्हा जो छुत्तेया, अते बोलेया, “उठा, डरा मत।” ⁸ ताँ तिन्हा ने अपणी हाख्खियाँ चुक्कियां अते तिन्हा यीशु जो छड्डी होर कुसकी जो नी दिख्खेया। ⁹ जाँ से पाह्ड़ का थल्ले उतरदे थिये ता यीशु जी ने तिन्हा जो हुकम देईकरी बोलेया, “जाँ ताँई मह्णू रा पुत्र मरे रेयाँ बिच का जिन्दा नी होई जान्दा, ताँ ताँई जे किच्छ तुसी ने दिखेया से कुसकी कने मत बोलदे।” ¹⁰ फिरी तिन्हेरे चेल्लेयां ने तिन्हा का पूछेया, “फिरी शास्त्री किजो बोलदे कि एलिय्याह रा पैह्ले आणा जरुरी है?” ¹¹ तिन्हा ने जवाब दित्तेया, एलिय्याह ने जरुर आणा, अते तिस ने सब किच्छ सुधारणा। ¹² अपण मैं तुम्हारे जो बोलदा कि एलिय्याह आई गेया है, अपण मह्णुआं ने तिस जो पछियाणेया नी, तिन्हा ने जियाँ चाया तियाँ ई तिसेरे कने कित्तेया। इय्यां ई मह्णू रे पुत्र ने वी दुख उठाणे हिन।” ¹³ तां चेल्लेयां ने समझेया कि तिन्हा ने म्हारे जो यहून्ना बपतिस्मा देणेवाळे रे बारे बिच दस्सेया।

बुरी आत्मा रे सताए मुडें जो ठीक करणा

¹⁴ जाँ यीशु जी भीड़ का वापस आये ता इक मह्णु यीशु जी का आया अते जानू भारे बेईकरी बोलणे लग्गेया, ¹⁵ “ओ प्रभु, मेरे पुत्र पर दया करो! किजोकि इस जो मिर्गी आन्दी अते इस जो बड़ी तकलीफ हून्दी; अते घड़ी-घड़ी अग्ग अते पाणी बिच पेई जान्दा। ¹⁶ मैं तिस जो तुम्हारे चेल्लेयाँ का लियाया थिया अपण से तिस जो खरा नी करी सके।” ¹⁷ यीशु जी ने जवाब दित्तेया, “विस्वास रे छोटे अते भटके रे मह्णूओं! मैं कधाड़ी ताँई तुम्हारे कने रैह्णा? कधाड़ी ताँई तुम्हारी सैणी? तिस जो मेरे का लियाओ।” ¹⁸ फिरी यीशु जी ने बुरी आत्मा जो झिड़केया अते से तिस बिच का निकळी गेई; अते मुन्डा उसी ई बेल्ले खरा होई गेया। ¹⁹ फिरी चेल्लेयाँ ने कल्ले बिच यीशु जी का आई करी पूच्छेया “असा उस जो किजो नी निकाळी सके?” ²⁰ यीशु जी ने उन्हा जो बोलेया, अपणे विश्वास री कमी री वजह कने, किजो कि मैं तुम्हारे सच्च बोलदा, जे तुम्हारा विस्वास इक सरेयाँ रे दाणे रे बराबर वी हो, ता इस पाह्ड़ जो बोलगे, इत्ते का घिरी करी उत्ते जा, अते तिन्ने घिरी जाणा। तुम्हारे ताँई किच्छ बी मुस्किल नी होणा। ²¹ [ अपण एह् जाति बगेर प्रार्थना अते ब्रत रे नी निकळदी। ]”

अपणे मरणे रे बारे बिच यीशु जी री दुई भविष्यवाणी

²² जाँ से गलील बिच थिये, यीशु जी ने तिन्हा जो बोलया, “मह्णु रा पुत्तर मह्णुआं रे हत्था पकड़वाया जाणे वाळा है; ²³ अते तिन्हा तिस जो मारी रखणा, अपण तिस ने तिज्जे रोज्जे जिंदे होई जाणा।" अते इस गल्ल पर यीशु जी रे चेल्ले बड़े उदास होई गे।

मन्दर रा कर

²⁴ जाँ से कफरनहूम पुज्जे, ताँ मन्दिर री चुंगी लेणे वाळेयां ने पतरस का आईकरी पूच्छेया, “कै तुम्हारा गुरु मन्दिर री चुंगी नी दिन्दा?” ²⁵ तिस ने बोलेया, “हाँ दिन्दे हिन।” जाँ से घरे आया, ता यीशु जी ने पैह्ले उसका पूच्छेया, “ओ शमौन, तू कै है सोचदा? धरती रे राज्जे कर य़ा चुंगी कुस का लिन्दे हिन? अपणे बच्चेयां का या दूज्जेयां का।” ²⁶ पतरस ने उन्हा जो बोलेया, “दूज्जेयाँ का।” यीशु जी ने तिस जो बोलेया, “ताँ ता बच्चे चुंगी दैणे का बची गे। ²⁷ अपण असी उन्हा लोकां जो नराज ना करी देंन, इधेरे तांई तू झील रे बन्ने पर जाई करी कंडा पा, अते जे मच्छी पैह्ले निकळगी, तिस जो ले; अते तिसेरा मूँह् खोलण तिज्जो इक सिक्का मिलणा, तिस जो लेई करी मेरे अते अपणे बदले तिन्हा जो देई देयां।”

स्वर्ग बिच बड्डा कुण ?

¹ तां यीशु जी रे चेल्ले यीशु जी का आईकरी पुच्छणा लगे, कि स्वर्ग रे राज्य बिच बड्डा कुण है?” ² अते यीशु जी ने इक निक्के जो सद्देया अते तिन्हेरे मझाटे खड़ा करी दित्तेया। ³ ते बोल्य, मैं तुसां कने सच्च बोल्दा, जां तांई तुसी अपणे पापां का तौबा नी करी लिन्दे अते बच्चेयाँ साह्ई नी बणी जान्दे, स्वर्ग रे राज्य बिच जाई नी सकणा। ⁴ जे कोई अपणे आप जो इस निक्के रे बराबर निम्मता करगा, तिनिये स्वर्ग राज्य बिच बड्डा होणा। ⁵ अते जे कोई मेरे नां कने इस निक्के जो अपनान्दा करदा, से मिंजो अपनान्दा।

पाप करणे री परिक्षा

⁶ अपण जे कोई मेरे पर विस्वास करणे वाळे मेरे कुसकी निम्मते चेल्ले रे रस्ते री रूकावट बणदा, खरा हून्गा कि तिसेरे गल्ले बिच इक चक्की रा पाट लटकाई करी तिस जो समुंद्र बिच डुब्बाई दित्तेया जाये। ⁷ अड़चना री वजहा कने दुनियां पर हाय! रूकावट ता आणी ई हिन, अपण हाय तिस मह्णु पर जिसेरी वजह कने आंदी। ⁸ जे तेरे हत्थ या तेरे पैर तेरे का पाप कराणे री वजहा बणदे, ता तिन्हा जो कट्टी करी सुट्टी दे, किजोकि लगड़ा-लुला होईकरी जिन्दगी बिच आणा इस का केई जादा खरा है, कि दो हत्थ अते पैर हुन्दे-सुन्दे तिज्जो कदी नी बुझणे वाळी अग्ग बिच पाई दित्तेया जाये। ⁹ अते जे तेरी हाख्खी तेरे का पाप करान्दी, ता तिस जो कड्डी सुट्ट।

गुआचे री भेडां

¹⁰ किजोकि टीणा होईकरी जिंदगी बिच आणा इस का केई जादा खरा है, कि दो हाख्खियां हुन्दे सुन्दे तू नरक री अग्ग बिच पाई दित्तेया जाये। ¹¹ इधेरे तांई दिख्खो, तुसां इन्हा मेरे भोळे चेल्लेयां बिच का कुसकी जो बी छोटा मत समझदे, किजोकि मैं तुसां जो बोल्दा, कि स्वर्ग बिच उन्हेरे दूत मेरे स्वर्गिय पिता रा मुंह् हमेसा दिख्खदे हिन। ¹² तुसां कै समझदे हिन? जे कुसकी मह्णु री सौ भैडां होन, ते तिन्हा बिच का इक गुअची जान, ता कै से नड़िनुये जो छड्डी करी तिस गुअची री भैड जो नी तोपणा नी जांगा? ¹³ अते जे जां से तिस जो मिल्ली जाणी, मैं तुसां जो सच्च बोल्दा, तिस जो तिन्हा नड़िनुये भैंडा तांई इतनी खुसी नी होणी जितनी कि इस इक भैड़ तांई होणी। ¹⁴ इह्य्यां ई तुसां रे स्वर्गिय पिता बी नी चाह्न्दे कि इन्हा छोटेयां बिच का कोई नास हो।

मुल्जिमां कने कदेया बर्ताव करणां चाएदा?

¹⁵ जे तेरा भ्याळ तेरे कने बुरा करन ता, जा ते कल्ले बिच तिस कने गल्ल-बात करी के समझा, जे से तेरी सुणदा ता समझी ले कि तू तिस जो पाई लेया। ¹⁶ अपणे जे से तेरी नी सुणदा ता अपणे कने इक-दो जणे होर लेई जा, ताकि हर गल्ल री दो-तीन गवाई होई जाओ। ¹⁷ जे से उन्हेरी बी ना सुनण ता कलीसिया जो बोल। जे से कलीसिया री बी नी सुनण ता तू तिस कने इदेया बरताव कर जिय्यां से तेरे तांई अन्यजाति या चूंगी लैणे वाळा हो।

रोकणा ते मौक्का दैणा

¹⁸ मै तुम्हारे जो बोलदा, जे किच्छ तुसी धरती पर बनणा स्वर्ग बिच बन्नेया जाणा अत्ते जे किच्छ तुसी धरती पर खोलणा से स्वर्ग अन्दर खोलेया जाणा। ¹⁹ मै तुसा कने फिरी बोलदा, जे तुम्हारे बिच का दो जणे कुसकी प्रार्थना तांई इकमत हो, ता तिस जो मेरे स्वर्ग बिच रेह्णे वाळे पिता ने पूरा करी दैणा। ²⁰ किजोकि जित्ते दो या त्रै मेरे नां कने इकठ्ठा हून्गे, तिन्हेरे बीच मै होणा।”

बेरहम नौकर रा उपनाण

²¹ तां पतरस ने आई करी यीशु जी जो पुच्छेया, “प्रभु मेरा भयाळ कितणी बरी मेरे कने गलत करदा रेह् कि मै तिस जो माफ करां? कै सत्त बरी तांई?” ²² यीशु जी ने तिस जो बोलेया, “मै तेरे कने एह् नी बोलदा कि सत्त बरी तांई ई, अपण सत्त बरी रे सत्तर गुणा तांई माफ कर। ²³ इधेरे तांई स्वर्ग रे राज्य री बराबरी इदेय राज्जे कने करी सकदे जिन्ने अपणे नौकरां का हिसाब-कताब मंगेया। ²⁴ जां से हिसाब-कताब लैणा लगेया ता इक मह्णु जो लियाया जिस पर दस हजार तोड़े रा उधार थिया। ²⁵ अपण जां तिस का उधार चुकाणे तांई किच्छ नी थिया ता उसेरे मालक ने हुकम दित्तेया कि, उस जो अते उसेरे लाड़ी-बच्चे, ते जे किच्छ तिस का है, सब बेची करी उधार पूरा कित्तेया जाये। ²⁶ ताँ से नौकर पैरा पेई गेया अते बोलणे लग्गेया, ‘मालक सबर रखो। मै सब किच्छ चुकाई दिंगा।’ ²⁷ ताँ उस नौकर रे मालक ने तरस खाईकरी तिस जो छड्डी दित्तेया अते तिसेरा उधार बी माफ करी दित्तेया। ²⁸ अपण से नौकर बाहर निकळेया अते तिस जो तिसेरा इक साथी नौकर मिलेया जिस का तिस ने सौ दिनार लैणे थिये । उस ने तिस जो पकड़ेया अते तिसेरा गळा पकड़ी करी बोलेया, ‘मेरा पैसे दे! ²⁹ तां से तिसेरा साथी नौकर पैरा पेई करी छन्दे करणा लगेया, ‘सबर रखो, मै सब देई दिंगा। ³⁰ से फिरी बी नी मन्नेया अते तिस जो तां ताँई जेल्ला पाई रख्खेया जां ताँई उधार देई ना देंन। ³¹ एह् दिख्खी करी तिसेरे साथी नौकराँ जो बड़ा जादा बुरा लगेया अते तिन्हा ने जाई करी एह् सारी गल्ल अपणे मालक जो सुणाई दित्ती। ³² ताँ तिसेरे मालक ने तिस जो सद्दी करी बोलेया, ‘ ओ बुरे नोकर, इधेरे तांई कि तू मेरे छन्दे कित्ते थिये, मैं तेरा उधार माफ कित्तेया थिया। ³³ मै जियाँ तेरे पर तरस खाया थिया, तिज्जे बी तियाँ ई अपणे साथी नौकर पर बी तरस खाणा चहिंदा थिया।’ ³⁴ अते मालक ने गुस्सा होई करी तिस जो सजा दैणे वाळे रे हत्थे देई दित्तेया ताकि से उधार चुकाणे तक तिन्हेरे ई हत्थां रेह्। ³⁵ इय्याँ ई जे तुसा बिच सब अपणे भ्याळ जो माफ नी करगे ता मेरे स्वर्ग बिच रेह्णे वाळे पिता ने बी तुसा कने तियाँ ई करणा।”

तलाक रे बारे बिच यीशु जी री सीख

¹ जां यीशु जी एह् गल्लां बोल्ली बैठ्ठे ता से गलील का चली गे ते यरदन रे पार यहूदिया रे परदेस अन्दर आई गे। ² इक बड़ी बड्डी भीड़ तित्ते का तिन्हेरे पिछ्छे चली पेई, ते यीशु जी ने तिन्हा जो खरा कित्तेया। ³ तां फरीसी परखणे ताँई यीशु जी का आई करी बोलणा लगे, “कै अपणी लाड़ी जो कुस्की बी वजह कने तलाक देई सकदे?” ⁴ उन्हा जो यीशु जी ने जवाब दित्तेया, “कै तुसा ने शास्त्र बिच नी पढ़े रा है कि दुनियाँ जो रचणे वाळे ने शूरु बिच, ‘उन्हा जो इक जनानी ते इक मड़द रे रूप बिच रचेया थिया?’ ⁵ ते बोलेया थिया, ‘इधेरे ताँई प्यो ते अम्मां जो छड्डी करी मड़द अपणी लाड़ी कने दो हून्दे बी इक तन रैह्णा।’ ⁶ इधेरे ताँई अवे से दोह्ई जह्णे बखरे-बखरे नी अपण से इक-तन हिन्। इधेरे ताँई जे परमेश्वर ने जोड़े रा है, तिस जो कोई बखरा ना करो।” ⁷ तां फरीसियाँ ने तिन्हा का पुछ्छेया, “फिरी मूसा नबी ने एह् कानून किजो दस्सेया कि लाड़ी जो तलाक-पत्तर देई करी तिस का तलाक लेई सकदे? ⁸ यीशु जी ने तिन्हा जो बोल्लेया, “मूसा ने तुम्हारे सख्त मना जो दिख्खी करी इह्याँ कित्ता अपण पैह्ले इह्याँ नी हुन्दा थिया। ⁹ अते मैं तुसा जो बोलदा, कि जे बी मह्णु अपणी लाड़ी जो व्याभिचार जो छड्ड़ी करी कुस्की होरसी वजह कने तलाक दिंगा ते दुज्जी लाड़ी ब्याह्ई लिन्गा, से व्याभिचार करदा; ते जे तिस छड्ड़ेरी जनानी कने ब्याह् करगा, तिस ताँई से बी व्याभिचार ई होणा है।” ¹⁰ चेल्लेयाँ ने यीशु जी जो बोल्लेया, “अगर लाड़ा-लाड़ी रे बिच इदेह्या रिस्ता हो ता ब्याह् करणा ई नी चहिंदा।” ¹¹ यीशु जी ने तिन्हा जो बोल्लेया, “इस सिक्सा पर हर कोई नी चली सकदा। सिरफ सेह्ई चली सकदे, जिन्हा जो ए दान मिल्ले रा हुन्दा। ¹² किजोकी किच्छ हिजड़े इदेह् हिन्, जे मां रे पेट्टा का ई इदेह् पैदा होए रे हिन; ते किच्छ हिजड़े इदेह् हिन्, जिन्हा जो मह्णुआं ने हिजड़ा बणाए रा है; अते किच्छ हिजड़े इदेह् हिन, जिन्हा ने स्वर्ग रे राज्य ताँई अपु जो हिजड़ा बणाए रा है। जे इस गल्ल जो मन्नी सकदा से मन्नो।”

बच्चेयां जो आशीर्वाद

¹³ फिरी मह्णु अपणे निके-निकेयाँ जो यीशु जी का लेई आये कि से तिन्हेरे सरां पर अपणा हत्थ रखी करी असीस देंन ते प्रार्थना करन, अपण चेल्लेयाँ ने तिन्हा मह्णुआं जो ठाक्की दित्तेया। ¹⁴ यीशु जी ने बोल्लेया, “निके-निकेयाँ जो मेरे का आणा देयो, इन्हा जो मत रोको, किजोकी स्वर्ग रा राज्य इदेह्यां रा ई है।” ¹⁵ अते से तिन्हा पर अपणा हथ्थ रख्खी करी तित्ते का चली गे।

अमीर आदमी ते हमेसा री जिदंगी

¹⁶ इक मह्णु यीशु जी का आया ते तिन्हा जो बोलणा लगेया, “ओ गुरू जी, मैं कुण इदेह्या भला कम्म करां कि मिन्जो हमेसा ताँई जिन्दगी मिल्ली जाओ?” ¹⁷ तिन्हा ने तिस जो बोल्लेया, “तू मेरे का भलाई रे बारे अन्दर किजो पुछ्छेया करदा है ? भला ता इक्क ई है, अपण जे तू जिन्दगी हासल करणा चाह्न्दा, ता हुक्मां जो मन्नेया कर।” ¹⁸ तिनिए यीशु जी का पुछ्छेया, “कुण वाळे हुक्म?” यीशु जी ने बोल्लेया कि, “ए कि कुस्की री जान नी लैणी, व्याभिचार नी करणा, चोरी नी करणी, झूठी गवाई नी दैणी, ¹⁹ अपणे प्यो अते अपणी अम्मां री इज्जत करणी, ते अपणे गुवांड़ी कने अपु साह्ई प्यार रखणा।” ²⁰ तिस जुआन मह्णु ने यीशु जी जो बोल्लेया, “इन्हा सब गल्लां जो ता मैं सच्चे मनां कने पूरा करदा ई है; अवे मेरे अन्दर कुस गल्ले रा घाट्टा है? ²¹ यीशु जी ने तिस जो बोल्लेया, “जे तू पूरा सही होणा चाह्न्दा, ता जे किच्छ बी तेरे का है से बेच्ची करी पैसे गरीबां जो बंड़ी दे, ताकि तिज्जो स्वर्ग अन्दर धन-दौलत मिल्ले; ते आई करी मेरे पिछ्छे चली पे।” ²² अपण जाँ उस जुआन ने एह् सुणेया ता दुखी होई करी चली गेया किजो कि से बड़ा अमीर थिया। ²³ तां यीशु जी ने अपणे चेल्लेयाँ जो बोल्लेया, “मैं तुसा जो सच्च बोलदा कि अमीर मह्णु रा स्वर्ग अन्दर जाणा बड़ा मुस्कल ए। ²⁴ मैं तुसा जो फिरी बोली दिन्दा कि अमीर मह्णु रा परमेश्वर रे राज्य अन्दर जाणे का इक ऊँट रा सूई रे भोक्का का घुसड़ी जाणा जादा असान है। ²⁵ ए सुणी करी चेल्लेयाँ ने बड़ी हरानी कने पुछ्छेया, “फिरी कुसेरा उद्धार होई सकदा?” ²⁶ यीशु जी ने तिन्हा पास्से दिख्खी करी बोल्लेया, “मह्णुआं ताँई एह् नामुमकिन ए, अपण परमेश्वर ताँई सब किच्छ मुमकिन ए।” ²⁷ इस गल्ल पर पतरस ने तिन्हा जो बोल्लेया, “दिख्खो, असी ता अपणा सब किछ छड्ड़ी करी तुम्हारे पिछ्छे चली पेरे हिन्: ता असां जो कै मिलणा?” ²⁸ यीशु जी ने तिन्हा जो बोल्लेया, “मैं तुसा जो सच्च बोलदा कि नौये जुग अन्दर जां मह्णु रे पुत्र ने अपणे प्रतापी सिंहासन पर बैह्णा ता तुसा बी, जे मेरे पिछ्छे चले रे हिन्, बारा सिंहासनां पर बेह्ई करी इस्त्राएल रे बारा गोत्रां रा न्याय करणा है। ²⁹ ते मेरे ताँई जिनिए बी अपणा घर-बार, भैण-भ्याळ, मां-प्यो, निके-निके या अपणे खेतरां जो छड्डी दित्तेया है, तिस जो सौ गुणा जादा मिलणा अते तिनिए हमेसा री जिन्दगी रा बी हकदार बनणा। ³⁰ अपण मते जह्णे जे अब्बे पैह्ले हिन्, आखरी होई जाणे अते जे आखरी हिन्, पैह्ले होई जाणे।”

बारी रे मजदुरां रा उपनाण

¹ स्वर्ग रा राज कुसकी घरे रे माळक साइं है,जे भ्यागा निकळेया कि अपणे अगूंरा रे बगीच्चे बिच मजदूरां जो लाए। ² उन्निये मजदूरां पर इक्क दिनार रोज रा ठहराया ते उन्हेरे जो अपणे बगीच्चे बिच भेज्जेया। ³ फिरी इक्क पैह्र दिन चढ़णे रे बाद उन्निये निकळीकरी होर लोक्कां जो बजार बिच बेकार खड़ित्ते रे दिख्खेया ⁴ ते उन्हा जो बोल्लेया,‘तूसी बी अगूंर रे बगीच्चे बिच जाओ,ते जे किछ ठीक हूगां,तूसां जो दिगां।’अते से बी गेय। ⁵ फिर उन्निये दुए ते त्रिये पैह्र रे नेड़े निकळी करी तिय्यां ही कित्तेया। ⁶ धिहाड़ी रा इक्क घटां रेया उन्निये फिरी निकळी करी लोक्कां जो खड़ित्ते रे दिख्खेया,ते उन्हेरे जो बोल्लेया,‘तूसी किजो सारी धिहाड़ी इत्ते बेकार खड़ी रेय?’उन्हाने उसजो बोल्लेया,‘इस ताइं किजोकी कुसकि ने असां जो मजदूरी पर नी लाया।’ ⁷ उन्निये उन्हा जो बोल्लेया,‘तूसी बी अगूंर रे बगीच्चे बिच जाओ।’ ⁸ “सज्जां वेल्ले अगूंर रे बगीच्चे रे माळक ने अपणे मून्सि जो बोल्लेया, ‘मजदूरां जो सद्दी करी पिछळेयां का लेइ करी पैह्लयां तिकर सारेयां जो धिहाड़ी देइ दे।’

अपणे मरणे रे बारे बिच यीशु जी री तिज्जी भविष्यवाणी

⁹ जां ओ आए जे घटां भर धिहाड़ी लाए गेय थिए,उन्हा जो इक्क-इक्क दिनार मिल्लेया। ¹⁰ जे पैह्ले आए उन्हा ने ए समजेया कि असां जो जादा मिळणा, अपण उन्हा जो बी इक्क-इक्क दिनार ही मिल्लेया। ¹¹ जां मिल्लेया तां ओ घरे रे माळक पर बूड़बूड़ाइइ करी बोळणा लग्गे, ¹² इन्हा पिछळेयां ने इक्क ही घटां काम्म कित्तेया,ते तूसी उन्हेरे जो हमारे बराबर करी दित्तेया,जिन्हा ने सारी ढिहाड़ी रा भार चुक्केया ते धूप सैह्इ?’ ¹³ उन्निये तिन्हेरे बिच का इक्क जो जवाब दित्तेया,‘हे मित्तर,मै तेरे कने किछ अन्नयाय नी हे करेया करदा।क्या तैं ही मेरे का इक्क दिनार नी ठैहराया थिया? ¹⁴ जे तेरा है,चुक्कि ले ते चली जा;मेरी मर्जी ए है कि जिन्ना तेरे जो देयां उन्ना ही इस पिछले जो बी देयां। ¹⁵ जे तेरा है,चुक्कि ले ते चली जा;मेरी मर्जी ए है कि जिन्ना तेरे जो देयां उन्ना ही इस पिछले जो बी देयां। ¹⁶ इसी तरिके कने जे पिछळे हिन,पैह्ले कित्ते जाणे;ते जे पैह्ले हिन,से पिछले होणे।” ¹⁷ यीशू जी ने यरुशलेम जादें वेल्ले बारां चेल्लेयां जो किल्ले बिच लेइ गेया ते रस्ते बिच उन्हा जो बोळणा लग्गेया, ¹⁸ “दिख्खो,असी यरूशलेम जो जाया करदे हिन;ते मणू रा पुत्तर प्रधान याजकां ते शास्त्रियां रे हथ्थां पकड़वाया जाणा,ते उन्हा ने उन्हेरे जो मारणे जोग्गे ठैहराणा। ¹⁹ ते उसजो गैर यहुदियां रे हथ्‌थां बिच सौपंणा ताकी ओ उन्हेरा मजाक उड़ाण ते कौड़े मारण,ते सूळी पर चढाण,ते ओ तीसरे दिन जिन्दा कित्तेया जाणा।’ ²⁰ तां जब्दि रे पुत्तरां री माँ ने,अपणे पुत्तरां कने यीशू जी रे नेड़े आइ करी उन्हा जो प्रणाम कित्तेया,ते उन्हा का किछ मगंणा लग्गि। ²¹ उन्हा ने उन्हेरे जो बोल्लेया,“तू क्या चाह्दि?”ओ उन्हा जो बोळणा लग्गि,“ए वचन दयो कि मेरे ए दो पुत्तर तेरे राज बिच इक्क तूसां रे दाईणे ते इक्क तूसां रे बाइ पास्से बैठ्ठे।” ²² यीशू जी ने जवाब दित्तेया,“तूसी नी जाणदे कि क्या मगेंया करदे हिन।जे कटोरा मै पीणे वाळा है,क्या तूसी पी सकदे?”उन्हाने उन्हेरे जो बोल्लेया,“पी सकदे।” ²³ उन्हा ने उन्हेरे जो बोल्लेया,“तूसी मेरा कटोरा ता पिग्गें अपण अपणे दाईणे ते बाइ बेठ्ठाणा मेरा काम्म नी है,अपण जिन्हेरे ताइं मेरे पीता रे पास्से का तैयार कित्ते रे गेया है उन्हेरे ताइं है।” ²⁴ ए सूणी करी सारे दसों इ चेल्ले उन्हा दोन्नां भाईयां पर गूस्सा होए। ²⁵ यीशू जी ने उन्हा जो नेड़े सद्दी करी बोल्लेया,“तूसी जाणदे कि गैर-यहुदियां रे हाकम उन्हा पर राज करदे;ते जे बड्डे हिन,से उन्हा पर हक्क जतादें। ²⁶ अपण तूसां बिच इय्यां नी होणा;अपण जे कोइ तूसां बिच बड्डा होणा चाह्दां,ओ तूसां रा नौक्कर बणे; ²⁷ ते जे तूसां बिच प्रधान बनणा चाह्दां ओ तूसां रा नौक्कर बणे; ²⁸ जिय्यां मणू रा पूत्तर;ओ इस ताइं नी आया कि उसदी सेवा-टैह्ल कित्ति जाए,अपण इस ताइं आया कि अप्पु सेवा टैह्ल करे ते मते जणेया रे छुटकारे ताइं अपणी जान दे।”

दो अन्नेयां री हाक्खि ठीक करणा

²⁹ जां ओ यरिहो का निकळेया करदे थिये,तां इक्क बड्डि भीड़ उन्हेरे पिछ्‌छे चळी पेइ। ³⁰ ते दो अन्ने,जे सड़क रे कनारे बैठ्‌ठे रे थिये,ए सूणी करी कि यीशू जी जाया करदे हिन,हाक्क मारी करी बोळणा लग्गे,“हे प्रभू दाउद री औळाद,असां पर दया कर।” ³¹ लोक्कां ने उन्हेरे जो झीड़केया कि चुप रैह्ण;अपण ओ होर बी चिल्लाइ करी बोळणा लग्गे,“हे प्रभू दाउद री औळाद असां पर दया करो:” ³² तां यीशू जी ने खड़ी करी,उन्हेरे जो सद्देया ते बोल्लेया,“तूसी क्या चाह्दें कि मै तूसां ताइं करां?” ³³ तां यीशू जी ने खड़ी करी,उन्हेरे जो सद्देया ते बोल्लेया,“तूसी क्या चाह्दें कि मै तूसां ताइं करां?” ³⁴ यीशू जी ने तरस खाइ करी उन्हेरी हाख्खि छुई,ते ओ तिस्सि वेल्ले दिखणा लगी पेय;ते उन्हेरे पिछ्छे चली पेय।

यरुशलेम बिच विजय प्रवेश

¹ जां से यरुशलेम रे नेड़े पुज्जे तां जैतून पहाड़ पर बैथफगे रे नेड़े आए,तां यीशु जी ने दो चेल्लेयां जो ए बोल्लि करी भेज्जेया, ² सामणे वाळे ग्राँ बिच जाओ । उत्ते जादें कने इ गधी बन्ने,ते तिसेरे कन्ने बच्चा बन्ने रा मिळणा। तिन्हेरे जो खोल्लि करी लेइ आओ। ³ जे कोइ तुसां जो किछ बोले,तां बोलि देयो कि प्रभू जो इन्एरि जरुरत है,तां तिनिये तिस्सि वेल्ले तिसजो भेजि दैणा। ⁴ ए इस तां ई होया की जे गल्ल भविष्यद्वक्ता रे जरिए बोल्लि गेइ थी से पुरी हो: ⁵ "सिय्योन री कुड़ी जो बोल्लो,‘ दिख्ख तेरा राज्जा तेरे का आदां है,से नमर,ते गद्हे पर बैठ्ठे रा है: बल्कि लादू रे बच्चे पर।” ⁶ चेल्लेयां ने जाई करी जिय्यां यीशू जी ने बोल्लेया थिया,तिय्यां ई कित्तेया। ⁷ ते गद्ही ते तिसेरे बच्चे जो लाई करी तिन्हेरे पर अपणे कपड़े पाई दित्ते ,ते से तिन्हेरे पर बेइ गे। ⁸ तां मते सारे लोक्कां ने अपणे कपड़े रस्ते बिच बिछाए,ते होर लोक्कां ने बुट्टेयां का डाळ कटी करी रस्ते बिच बिछाए। ⁹ जे भीड़ आग्गे-आग्गे जाया करदी थी ते जे पिच्छे का आया करदी थी,हक्कां लाई-लाई करी बोलदी थी “दाऊद री सतान री जय हो है से जे प्रभू रे नां कने आदां आसमान बिच जय हो। ¹⁰ जां तिन्हा ने यरुशलेम बिच बड़े,तां सारे नगर बिच हलचल मची गेइ कि ए कुण है? ¹¹ लोक्कां ने बोल्लेया,“गलील रे नासरत रे भविष्यद्वक्ता यीशु जी हिन।

देहरे का दुकानदारां जो कडणा

¹² यीशु जी ने परमेश्वर रे देहरे बिच जाई करी तिन्हा सारेयां जो,जे देहरे बिच लेन देन करदे थिये,कडि दित्ता,ते सर्राफेयां रे पीढ़े ते कबूतर बेचणे वाळेयां री चौकियां पलटी दित्ति। ¹³ ते तिन्हेरे जो बोल्लेया, “लिख्खे आ है की मेरा घर प्रार्थना रा घर होणा अपण तुसी तिसजो डाकुआं रा अड्डा बणादें। ¹⁴ तां अन्ने ते लगंड़े तिन्हेरे का देहरे बिच आए,ते तिन्हा ने तिन्हेरे जो ठीक कित्ता। ¹⁵ अपण जां प्रधान याजकां ते शास्त्रियां ने इन्हा अनौखि गल्लां जो दिख्खेया जे तिन्हा ने कित्ते थिये, ते मुडेंया जो देहरे बिच दाऊद री सतांन री जय हो बोलदे सुणेया,तां से गुस्से होए, ¹⁶ ते तिन्हा जो बोलणा लग्गे,“ क्या तू सुणदा कि ए लोक क्या हिन बोल्लेया करदे?” यीशु जी ने तिन्हा जो बोल्लेया, हाँ; क्या तुसी ए कदी नी पढ़ेया : मुडेंया ते दुध पिदें बच्चेयां का तू अपणी महीमा कराई?” ¹⁷ तां से तिन्हा जो छडि करी नगर का बार बैतनिय्याह जो गे ते तित्ते रात बिताई।

बगैर फल वाळे अजींर रे बुट्टे रा उपनाण

¹⁸ भ्यागा जां से नगर जो हटेया करदे थिये तां तिन्हा जो भुख लगी। ¹⁹ सड़क रे कनारे इक्क अजींर रा इक्क बुट्टा दिख्खि करी तिसेरे नेड़े गे ते पत्तेयां जो छडि करी तिस बिच होर किछ ना पाई करी तिसजो बोल्लेया,“अब्बे का का तेरे बिच फिरी कदी फळ ना लगे।”ते अजींर रा बुट्टा तिसी वेल्ले सुकी गेया। ²⁰ ए दिख्खिकरी चेल्लेयां जो हैरानी होइ ते तिन्हा ने बोल्लेया,“ए अजींर रा बुट्टा इन्नि तौळे किय्यां सुकी गेया?” ²¹ यीशु जी ने तिन्हा जो जवाब दित्तेया,“मै तुसां कने सच बोलदा,जे तुसी भरोसा रखो ते शक ना करो,ते ना सिर्फ ए करगे जे इस अजींर रे बुट्टे कने कित्ते रा है,अपण जे इस पहाड़ कने बी बोलगे,‘उखड़ी जा,ते समुदंर बिच जाई पे,‘तां ए होइ जाणा।” ²² ते जे किछ तुसी प्रार्थना बि मेरे का मगंगे से सारा किछ तुसां जो मिलणा।”

यीशु जी रे हक्क पर सवाल

²³ से देहरे बिच जाई करी भाषण देया करदे थिये,तां बड्डे याजकां ते लोक्कां ए पुरनियां ने तिसेरे का जाई तिन्हेरे का पुच्छेया,“तु ए कम्म कुस हक्क कने करदा? ते तेरे जो ए हक्क कुनिये दित्ते रा है?” ²⁴ यीशु जी ने तिन्हेरे जो जवाब दित्तेया,“मै बी तुसां का इक्क गल्ल पुछदा जे तुसी मेरे से दसगे तां मै वी तुसां जो दसणा कि ए कम्म कुस हक्क कने करदा। ²⁵ युहन्ना रा बपतिस्मा कुते का थिया? स्वर्ग रे पास्से का या म्हणुआं रे पास्से का?” तां से अप्पु बिच बैह्स करणा लगी पेय,“जे असी बोलण’स्वर्ग रे पास्से का,‘तां तिनिये असां कने बोलणा‘फिरी तुसी तिसेरा भरोसा किजो नी कित्ता?’ ²⁶ ते जे बोलिये‘म्हणुआं रे पास्से का,‘तां असजो भीड़ रा डर है,किजोकी से सारे युहन्ना जो भविष्द्वक्ता मनदे।” ²⁷ अते तिन्हा ने यीशु जी जो जवाब दित्ता,“असी नी जाणदे।”तिन्हा ने बी तिन्हेरे जो बोल्लेया,“तां मै बी तुसां जो नी दसदा की ए कम्म कुस हक्क कने करदा।

दो पुत्तरां रा उपनाण

²⁸ “तुसी क्या सोचदे? कुसकी म्हणु रे दो पुत्तर थिये;तिसने पैहल्ले का जाइ करी बोल्लेया,‘हे पुत्तर आज्ज अगुंर रे बगिचे बिच कम्म कर।” ²⁹ तिसने जवाब दित्ता,‘मै नी जाणा,”अपण बाद बिच पछताई करी गेया। ³⁰ फिरी प्यो ने जाई करी दुए जो इय्यां ई बोल्लेया,तिसने जवाब दित्तेया,“जी हाँ,जादां,” अपण नी गेया। ³¹ इन्हा दोन्नां बिच का कुसने पचयो री मर्जी पुरी कित्ती?” तिन्हा ने बोल्लेया,“पैहल्ले ने।” यीशु जी तिन्हा जो बोल्लेया,“मै तुसां कने सच बोलदा की महसुल लैणे वाले ते वैश्या तुसां का पैहल्ले स्वर्ग रे राज बिच हासिल हुदें।” ³² किजोकी युहन्ना धर्म रा रस्ता दसदे-दसदे तुसां का आया,ते तुसां ने तिसेरा भरोसा नी कित्ता; अपण महसुल लैणे वाळेया ने ते वैश्या ने तिसेरा भरोसा कित्ता,ते तुसी ए दिख्खि करी बाद बिच बी नी पछताए की तिसेरा भरोसा करी लिदें।

बूरे किसानां रा उपनाण

³³ इक्क होर उदारण सुणो: इक्क घर रा माळक थिया जिनिये अगुंर रा बगिचा लाया,तिसेरे चारो पास्से बाड़ा लाया,तिस बिच रस रा कुआं खोदेया ते गुम्मट बणाया,ते कसानों जो तिसेरा ठेका देइ करी परदेस चळी गेया। ³⁴ जां फळ रा वेल्ला नेड़े आया तां तिसने अपणे नौकरां जो तिसेरा फळ लैणे तांई कसानां का भेज्जेया। ³⁵ अपण किसानां ने तिसेरे नौकरां जो पकड़ी करी,कुसकी जो कुट्टेया,ते कुसकी जो मारी रख्खेया ते कुसकी पर बट्टे मारे। ³⁶ फिरी तिसने पैहल्ले का जादा नौकरां जो भेज्जेया,ते तिन्हा ने तिन्हेरे का बी तिय्यां ई कित्तेया। ³⁷ आखर बिच तिसने अपणे मुडें जो तिन्हेरे का ए सोच्चि करी भेज्जेया की से मेरे मुडें री इज्जत करगे। ³⁸ अपण किसानां ने तिस मुडें जो दिख्खि करी अप्पु बिच बोल्लेया,“ए ता वारिस है,आओ,इसजो मारी रखदे ते इसेरी मिरास लेइ लिदें।” ³⁹ अते तिन्हा ने तिसजो पकड़ेया ते अगुंर रे बगिचे का बार कड्डि करी मारी रख्खेया। ⁴⁰ इस तांइ जां अगुंर रे बगिचे रा माळक आगां तां तिन्हा किसानां कने क्या करगा?” ⁴¹ तिन्हा ने तिस कने बोल्लेया,“ तिनिये तिन्हा बुरे लोक्कां जो बुरे तरिक्के कने खत्म करी रखणा;ते अगुंर रे बगिचे रा ठेका दुए किसानां जो दैणा,जिन्हा ने ठीक वेल्ले तिसजो फळ दैणा। ⁴² यीशु जी ने तिन्हा जो बोल्लेया,“क्या तुसी कदी पवित्रशास्त्र बिच ए नी पढ़ेया:“जिस बट्टे जो राजमिस्त्रियां ने निकम्मा दस्सेया थिया,सेइ कुणे रे सिरे रा बट्टा होइ गेया? ए परेश्वर रे पास्से का होया ते असां री नजर बिच अनौखा है।” ⁴³ इसी तांई मै तुसां जो बोलदा की परमेश्वर रा राज तुसां का लेइ लित्तेया जाणा ते इदेइ जाती जो जे तिसेरा फळ लाए दित्तेया जाणा। ⁴⁴ जे इस बट्टे पर पैगां,से चकनाचूर होइ जाणा;ते जिस पर से पैणा,तिसजो पि रखणा।’ ⁴⁵ बड्डे याजक ते फरिसी तिसेरे उदारणा जो सुणी करी समजी गे की से तिन्हेरे बारे बिच बोल्लेया करदे थिये। ⁴⁶ ते तिन्हा ने तिन्हेरे जो पकड़णा चाएया अपण लोक्कां का डरी गे किजोकी से तिन्हेरे जो भविश्यद्वक्ता।

ब्याह री धाम रा उपनाण

¹ तां यीशु जी ने भीड़ जो ते अपणे चेल्लेयां जो बोल्लेयां, ² “शास्त्रि ते फरिसी मूसा री गद्दि पराले बैठ्ठे रे हिन; ³ इस ताईं से तुसां कने जे किछ्छ बोल्ले से करणा ते मणना,अपण तिन्हेरे जदेय कम्म मत करदे;किजोकी से बोलदे ता हुदें अपण करदे नी। ⁴ ओ इक्क इदेय भरी बोज्जे जो जिसजो चुकणा मुस्किल है,बन्नि करी तिसजो म्हणुआं रे मुन्डे पराले रखदे; अपण अप्पु तिसजो अपणी उग्गंळ कने बी खसकाणा नी चाह्दें। ⁵ से अपणे सारे कम्म लोक्कां जो दसणे ताईं करदे: से अपणे ताबीजां जो चैडा॰ करदे ते अपणे कपड़ेयां रे कुणे बधादें। ⁶ धाम बिच खास-खास जगह,ते देहरे बिच खास-खास जगह, ⁷ तां राज्जे जो गुस्सा आय ते तिनिये अपणी सेना जो भेजि करी तिन्हा खुनियां जो खतम करवाई दित्तेया, ते तिन्हेरे शहर जो फुकि रखेया ⁸ अपण तुसी गुरू मत कहलवादें,किजोकी तुसां रा इक्क ई गुरू है,ते तुसी सारे भ्याळ हिन। ⁹ धरती पर कुसकी जो अपणे प्यो मत बोलदे,किजोकी तुसां रा इक्क ई प्यो है, जे स्वर्ग बिच है। ¹⁰ ते माळक बी मत कहलवादें,किजोकी तुसां रा इक्क ई माळक है,मतलब की मसीह। ¹¹ जे तुसां बिच बड्डा हो,से तुसां रा नौक्कर बणे। ¹² जे कोइ अप्पु जो बड्डा बणागां,ओ छोटा कित्ता जाणा: ते जे कोई अप्पु जो छोटा बणागां,से बड्डा कित्ता जाणा।" ¹³ हे बेमान शास्त्रि ते फरिसीयों, तुसां पर ळाणत है! तुसी लोक्कां ताईं स्वर्ग रे राज रा दरवाज्जा बदं करदे, ना ता अप्पु ई तिस बिच जादें ते ना ई तिस जाणे वाळेयाँ जो तिस बिच जाणा दिदें। ¹⁴ (हे बेमान शास्त्रि ते फरिसीयों तुसां पर ळाणत है! तुसी विधवा जनानियां रे घरां जो खाई जादें,ते दिखाणे ताईं बड़ी देर तिकर प्रार्थना करदे रैन्हदे: इस ताईं तुसां जो जादा सजा मिळणि।)

कैसर जो कर दैणा

¹⁵ ”हे बेमान शास्त्रि ते फरिसीयों तुसां पर ळाणत है! तुसी इक्क जणे जो अपणे पथं बिच मिळाणे ताईं सारे जमीन ते पाणी बिच फिरदे,ते जां से पथं बिच आई जादां तां तिसजो अपणे का दूगणा नरक जोग्गा बणाई दिदें। ¹⁶ “हे अन्ने सिखाणे वाळेयों,तुसां पर ळाणत है! जे बोलदे की जे कोई देहरे री कसम खाए तां कोई गल्ल नी,अपण जे कोई देहरे रे सोन्ने री कसम खाए तां तिस कने बन्निह जाणा। ¹⁷ हे बेवकुफों ते अन्नेयों,कुण बड्डा है“सोन्ना या फिरी से देहरा जिस कने से सोन्ना पवित्र हुदां? ¹⁸ फिर बोलदे कि जे अगर कोई वेदी री कसम खाए तां किछ् नी,अपण जे चढावा तिस पराले है,जे अगर कोई तिसेरी कसम खाए तां तिस कने बन्निह जाणा। ¹⁹ हे अन्नो कुण बड्डा है;चढावा या वेदी जिस कने चढावा पवित्र हुदां? ²⁰ इस ताईं जे वेदी री कसम खादां,से उसेरी ते किछ्छ तिस पर है,उसेरी बी कसम खादां। ²¹ जे देहरे री कसम खादां,से तिसेरी ते तिसेरे बिच रैहणे वाळे री बी कसम खादां। ²² जे स्वर्ग री कसम खादां,से परमात्मा रे सिहांसन री ते तिस पर बैह्णे वाळे री बी कसम खादां।

दोबारा जिदां होणे ते ब्याह रे बारे बिच

²³ “ हे बेमान शास्त्रि ते फरिसीयों तुसां पर ळाणत है! तुसी पुदिने,ते सौफं, ते जीरे रा दसवां हिस्सा ता दिदें, अपण तुसी व्वस्था री गहरी गल्लां जो मतलब की ईसांफ, ते दया, ते भरोसे जो छड्डि दित्ते रा है; चाह्एदा थिय्या कि इन्हा जो बी करदे रैहन्दे ते तिन्हा जो बी नी छडदे। ²⁴ हे अन्ने सिखाणे वाळेयों,तुसी मच्छर जो ता छाणी रखदे,अपण ऊँट जो निगळी जादें। ²⁵ हे बेमान शास्त्रि ते फरिसीयों तुसां पर ळाणत है! तुसी कटोरे ते थाळी जो उप्पर-उप्पर का ता मंजदे अपण ओ अन्दर का न्याहरे ते बेसबरी कने भरे रे हिन। ²⁶ हे अन्ने फरिसी,पैह्ए कटोरे ते थाळी जो अन्दर का मंज ताकी से बार का बी साफ होन। ²⁷ हे बेमान शास्त्रि ते फरिसीयों तुसां पर ळाणत है! तुसी सफेदी फेरी री कब्रां साईं हिन जे उप्पर का ता छैळ नजर दिसदी अपण अन्दर का मुर्देयां री हड्डियां ते सारे तरिके री गन्दगी कने भरे री हिन। ²⁸ इसी तरिक्के कने तुसी बी उप्पर का लोक्कां जो धर्मी नजर आंदे अपण, अन्दर बेमानि ते बूराई कने भरित्ते रे हिन। ²⁹ हे बेमान शास्त्रि ते फरिसीयों तुसां पर ळाणत है! तुसी भविष्यद्क्तां री कब्रां सजादें ते धर्मियां री कब्रां बणादे, ³⁰ ते बोलदे,‘जे अगर अपणे बाब्बे-दाद्दे रे जमाने बिच हुदें तां भविष्यद्क्तां रे खून बिच तिन्हेरे साथी नी बणदे।‘ ³¹ इस कने ता तुसी अप्पु ई गुआई दिदें कि तुसी भविष्यदक्ता रे खुन करणे वाळेयां री ओलादां हिन। ³² अते तुसी अपणे बाब्बे-दाद्ए रे पाप्पां रा घडा़ पूरे तरिक्के कने भरी देयो। ³³ हे साँपो,हे क्रेतां रे बच्चों,तुसी नरक रे सजा का किय्यां बचगे?

सबका बड्डा हुकम

³⁴ इस ताईं दिख्खो,मै तुसां का भविष्द्वक्ता ते समजदारां ते शास्त्रियां जो भेजदा; ते तुसी तिन्हा बिच का किछ जो मारी रखणा ते क्रुस पर चढाणा,ते किछ जो अपणे देहरे बिच कौड़े मारणे ते इक्क सैहर का दुए सैहर तिकर मारदे फिरणा। ³⁵ जिस कने धर्मी हाबिल का लेई करी बिरिक्याह रे पुत्तर जकरयाह तिकर,जिस जो तुसी देहरे ते वेदी रे मझाटे मारी रख्खेया थिय्या,जिन्ने धर्मियां रा खून धरती पर बहाया गे रा है ओ सारा तुसां रे सर पर पैणा। ³⁶ मै तुसा कने सच बोलदा,ए सारी गल्लां इस जमाने रे लोक्कां पर आई पैणी। ³⁷ हे यरुशलेम,हे यरुशलेम! तु भविष्द्क्तां जो मारी रखदा, ते जे तेरे का भेज्जे गे, उन्हा जो बट्टे मारदा। किन्नि बारी मै चाह‍या कि जिय्यां मूर्गी अपणे बच्चेया जो अपणे पँखा रे थल्ले कठ्ठेर दी,तिय्यां ई मै तेरे बच्चेयां कठ्ठेरी लेयां,अपण तुसी नी चाह्या। ³⁸ दिख्खो तुसां रा घर तुसां ताईं उजाड़ छड्डेया जादां। ³⁹ किजोकी मै तुसां जो बोलदा कि अब्बे का जां ताईं तुसी नी बोलणा,‘धन्य हिन से,जे परमात्मा रे नां कने आदां’ तां तिकर तुसी मेरे जो दोबारा कदी नी दिखणा।” ⁴⁰ ए इ दो हुकम सारी व्यव्था ते भविष्यद्वक्तां रा आधार है।"

मसीह कुसेरा पुत्तर है?

⁴¹ जां फरिसी कठी रे थिये, तां यीशु जी ने तिन्हा का पुच्छेया, ⁴² “मसीह रे बारे बिच तुसी क्या सोचदे? से कुसेरा पुत्तर है?" तिन्हा ने जवाब दित्तेया, “दाऊद रा ।” ⁴³ तिन्हा ने फरिसी म्हणुआं क पुच्छेया, “तां दाऊद आत्म बिच होई करी तिसजो प्रभु किजो बोलदा ? ⁴⁴ ‘प्रभु ने’ मेरे प्रभु जो बोल्लेया, जां तीकर मै तेरे दुस्मणा जो तेरे हेठ ना करी देयां तां तीकर मेरे सज्जे पास्से बै।’ ⁴⁵ भला, जां दाऊद अप्पु ई तिसजो प्रभु बोलदा, तां से तिसेरा पुत्तर कियां होया ?” ⁴⁶ ईसेरे जवाब बिच कोई इक्क बी गल्ल नी बोलि पाया। तिस दिन का कुसकी जो बी तिन्हेरे का किछ बी पुछणे री हिम्मत नी हुई।

शास्त्रियां ते फरीसियां का खबरदार

¹ तां यीशु जी ने भीड़ जो ते अपणे चेल्लेयां जो बोलेया, ² “शास्त्री ते फरीसी मूसा री गद्दी पराले बैठ्ठे रे हिन; ³ इधेरे तांई जे किच्छ से बोल्ले उस पर चलणा अत्ते उन्हा जो मनणा, अपण तिन्हेरे साह्ई कम्म मत करदे; किजोकी से बोलदे ता हुदें अपण करदे नी। ⁴ से मह्णुआं रे मूंडेया पर इतणा बोझ लद्दी दिंदे कि से उन्हा जो चुकी करी चली ई ना पान अत्ते मह्णुआं पर जोर पांदे कि से उस जो लेई करी चलन। अपण से खुद उन्हा पर कुसकी पर बी चलणे तांई पैर तक नी हिलान्दे। ⁵ से खरे कम्म इधेरे तांई करदे कि मह्णु उन्हा जो दिखन, से अपणे ताबिजा जो चौड़ा करदे अत्ते अपणे कपड़ेयां री झालरां जो बड़ा बड्डा करदे हिन। ⁶ धाम बिच खास जगह, ते सभा घर बिच खास आसन चाह्न्दे, ⁷ बजारां बिच नमस्ते ते मह्णुआं बिच तिन्हा जो गुरू बोलन किजोकि तिन्हा जो एह् सब खरा लगदा। ⁸ “अपण तुसी मह्णुआं बिच अपु जो रब्बी मत बुलवान्दे, किजोकी तुसां रा इक्क ई गुरू है, ते तुसी सारे सिरफ भैण भाई हिन। ⁹ धरती पर मह्णुआं जो तुसी अपणे बिच का कुसकी जो बी अपणा ‘प्यो’ मत बोलदे, किजोकी तुसां रा इक्क ई प्यो है, जे स्वर्ग बिच हिन। ¹⁰ ते ना ई मह्णुआं जो तुसी अपु जो मालक बोलणा दिंदे, किजोकि तुम्हारा मालक ता बस इक ई है, अत्ते से मसीह ए। ¹¹ तुम्हारे बिच का सबका खास मह्णु सेह्ई होणा जे तुम्हारा नोकर बणगा। ¹² जे कोई अप्पु जो बड्डा बणागां, ओ छोटा कित्ता जाणा: ते जे कोई अप्पु जो छोटा बणागां, से बड्डा कित्ता जाणा।”

शास्त्रियां ते फरीसियां रे पाखंड री बेज्जती

¹³ “ओ कपटी धर्म शास्त्रियों ते फरिसीयों तुसां पर लाणत है! तुसी लोकां तांई स्वर्ग रे राज्य रा दुआर बंद करेया करदे हिन। ना ता अपु खुद उस बिच जांदे अत्ते ना ई उन्हा जो जाणे दिंदे जे जाणे तांई कोसिस करेया करदे हिन। ¹⁴ (“ओ कपटी धर्म शास्त्रियों ते फरिसीयों तुसां पर लाणत है! तुसी विधवा रे घर जो खाई जांदे, अत्ते दिखाणे तांई लम्बी-लम्बी प्रार्थना करदे हिन।इधेरे तांई तुम्हारे जो कड़ी सजा मिलणी।” ¹⁵ “ओ कपटी धर्म शास्त्रियों ते फरिसीयों तुसां पर लाणत है! तुसी कुसकी जो अपणे रस्ते पर लियाणे तांई धरती अत्ते समुन्द्र लन्गी जांदे। अत्ते जां से तुम्हारे रस्ते पर आई जांदे ता तुसी उन्हा जो अपणे का बी दो गुणा नरक रा पात्र बणाई दिंदे। ¹⁶ “ओ अहन्ने अगुवों, तुसां पर लाणत है! जे बोलदे हिन जे कोई मन्दिर री कसम खांदा ता उस जो उस कसम जो रखणा जरूरी है, अपण जे कोई मन्दिर रे सुन्ने री कसम खांदा ता उस जो कसम जो मनणा जरूरी है। ¹⁷ ओ अह्न्ने बेवकूफों! बड्डा कुण है? मन्दिर रा सुन्ना या से मन्दिर जिन्ने उस सुन्ने जो पवित्र बणया। ¹⁸ तुसी एह् बी बोलदे जे कोई वेदी री कसम खांदा ता किच्छ नी, अपण जे कोई वेदी पर रखे रे चढ़ावे री कसम खांदा ता से अपणी कसम बिच बह्नितेरा है? ¹⁹ ओ अह्न्नेयो! कुण बड्डा है? वेदी पर रखे रा चढ़ावा या से वेदी जिस कने से चढ़ावा पवित्र हून्दा? ²⁰ इधेरे तांई जे कोई मन्दिर री कसम खादां, ता से वेदी कने वेदी पर जे रखे रा है, उसेरी बी कसम खांदा। ²¹ जे मन्दिर री कसम खांदा, से उसेरी अत्ते जे मन्दिर अन्दर है उसेरी बी कसम खांदा। ²² जे स्वर्ग री कसम खांदा, से परमेश्वर रे सिंहासन कने जे जे उस सिंहासन पर बैठ्ठे रा है उसेरी बी कसम खांदा। ²³ “ओ कपटी यहूदी धर्मशास्त्रियों अत्ते फरीसियों! तुम्हारा जे किच्छ है, तुसी उसेरा दसमां हेस्सा, इत्ते तक कि अपणे पुदीने, सौंफ, अत्ते जीरे तक रा दसमां हेस्सा परमेश्वर जो दिंदे हिन। फिरी बी तुसी व्यवस्था री जरूरी गल्लां जो यानी न्याय, दया ते विस्वास जो छड्डी दित्तेया है, हून्दा एह् कि इन्हा जो बी करदे रैह्न्दे अत्ते उन्हा जो बी नी छडदे। ²⁴ ओ अन्धे अगुवों! तुसी अपणे पाणी का मच्छर ता छानी लिंदे अपण ऊँट जो निगळी जांदे। ²⁵ “ओ कपटी यहूदी धर्म शास्त्रियों! ते फरिसीयों! तुसा पर लाणत है। तुसी अपणी कोलियां अत्ते थाळियां बाहर का धोई करी साफ करदे हिन अपण से अन्दर का छल-कपट कने बड़ी जादा भरितेरी हिन। ²⁶ ओ अह्न्ने फरीसियों! पैह्ले अपणे डोन्गेया जो अन्दर का मांजो ताकि अन्दर कने से बाहर का साफ होई जाये। ²⁷ “ओ कपटी यहूदी धर्मशास्त्रियों! अत्ते फरीसियों! तुसा पर लाणत है। तुसी चूने कने लिपि री कब्रां साह्ई हिन जे बाहर का ता छैळ लिबदी अपण अन्दर का मरे रेयां रे हड्डियां अत्ते हर तरह री गन्दगी कने भरितेरे हिन। ²⁸ इय्यां ई तुसी बाहर का ता धर्मी लिबदे हिन अपण अन्दर का छल-कपट अत्ते बुराई कने भरितेरे हिन।

शास्त्रियां ते फरीसियां पर सजा री भविष्यवाणी

²⁹ “ओ कपटी यहूदी धर्मशास्त्रियों! अत्ते फरीसियों! तुसा पर लाणत है। तुसी भविष्यद्वक्ता तांई कब्रां सजान्दे हिन अत्ते धर्मी री कब्रां जो बणान्दे हिन, ³⁰ अत्ते बोलदे हिन कि, ‘जे तुसी अपणे पूरखां रे बेल्ले बिच हून्दे ता भविष्यद्वक्तां जो मारणे बिच उन्हेरा हत्थ बटान्दे।’ ³¹ इस कने तुसी एह् मन्दे कि तुसी उन्हेरे बच्चे हिन जे भविष्यद्वक्तां रे खूनी थिय्ये। ³² इधेरे तांई जे तुम्हारे पूरखां ने शुरू कित्तेया, उस जो पूरा करो ³³ “ओ सांप अत्ते सांप रे बच्चेयो! तुसी कियां सोचदे कि तुसी नरक भोगणे का बची जाणा। ³⁴ इधेरे तांई दिख्खो, मैं तुम्हारे का भविष्यद्वक्तां, समझदारां ते गुरुओं जे भेजेया करदा है। तुसी उन्हा बिच का किन्नेया जो मारी दैणा अत्ते किन्नेया जो सूळी पर चढ़ाई दैणा। किच्छ जो तुसी अपणी धर्म सभा बिच कोड़े लगाणे अत्ते इक सैहर का दूज्जे सैहर उन्हेरा पिच्छा करदे फिरणा। ³⁵ जिस कने धर्मी हाबिल का लेई करी बिरिक्याह रे पुत्र जकरयाह तांई, जिस जो तुसी मन्दिर अत्ते वेदी रे मझाटे मारी रख्खेया थिय्या, जितणे धर्मियां रा खून धरती पर बहाया है उन्हा सब री सजा तुसा जो मिलणी। ³⁶ मैं तुम्हारे कने सच्च बोलदा इस सब तांई किच्छ तांई इस पीढ़ी रे मह्णुआं जो सजा भोगणा पैणी।”

यरुशलेम तांई अफसोस

³⁷ “ओ यरुशलेम, यरूशलेम! तू से हे जे भविष्यद्वक्तां जो मारी रखदा अत्ते परमेश्वर रे भेजे दूतां जो पत्थर मारदा। मैं कितणी बरी चाया कि जियां कोई मुर्गी अपणे चूजेयां जो अपणे परा हेठ इकठ्‌ठा करी लिंदी तियां ई मैं तेरे बच्चेयां जो इकठ्‌ठा करी लेयां। अपण तुसी मह्णुआं ने नी चाया। ³⁸ अवे तेरा मन्दिर पूरी तरह कने उजड़ी जाणा। ³⁹ किजोकि मैं तुसां जो दसदा कि तुसी मिंजो तां तांई नी फिरी दिख्खी सकणा जां तांई तुसी एह् नी बोलणा: “धन्न ए से जे प्रभु रे नां कने आया करदा है!’ ”

देहरे रे बर्बाद होणे रे बारे बिच भविष्यवाणी

¹ जां यीशु जी देहरे बिच का निकळी करी जाया करदे थिये,तां तिन्हेरे चेल्ले तिन्हेरे जो देहरे रे बनाणे रे काम्म जो दिखाणे तांई तिन्हेरे का आए। ² तिन्हा ने तिन्हेरे जो बोल्लेया, “तुसी ए सारा किछ दिख्खेया करदे हिन’ मै तुसां जो सच बोलदा,इत्ते इक्क बट्टे पर बट्टा बी नी बचणा जे ढाया नी जाणा।”

सकंट ते मुसीबत

³ जां से जैतून पहाड़ पर बैठ्ठे रे थिये, तां चेल्लेयां ने किल्ले बिच तिन्हेरे का आई करी बोल्लेया, “असां जो दस्सो ए गल्लां कधाड़ी होणी?तुसां रे आणे रा ते दुनिया रे खतम होणे री क्या निसानि होणी?” ⁴ यीशु जी ने तिन्हेरे जो जवाब दित्तेया, “चोकन्ने रेयो ! कोई तुसां जो भड़काई ना सके, ⁵ किजोकी मते सारे इदेय होणे जिन्हा ने मेरे नां कने आई करी बोलणा, मै मसीह है, ते मते जणेया जो भड़काणा। ⁶ तुसी लड़ाईयां ते लड़ाईया री गल्लां सुनणी,तां डरी मत जादें किजोकी इन्हेरा होणा पक्का है, अपण तिस वेल्ले खातमा नी होणा। ⁷ किजोकी जाति पर जाति, ते राज्य पर राज्य ने हमला करणा, ते जगह-जगह अकाल पैणे, ते भुकम्प होणे। ⁸ ए सारी गल्लां दुख-मुसीबतां री सुरुआत होणी। ⁹ ता तिन्हा ने तुसां जो दुख दैणे तांई पकड़वाणा, ते तिन्हा ने तुसां जो मारी रखणा, ते मेरे नां री वजह कने सारी जातियां रे लोक्कां ने तुसां कने नफरत रखणी। ¹⁰ तां मते जणेया ने ठोकर खाणी ते इक्क-दुए जो पकड़वाणाते इक्क-दुए कने नफरत रखणी। ¹¹ मते सारे झुठे भविष्यद्वक्ता उठी खणे होणे, ते मते जणेया जो भड़काणा ¹² अधर्म रे बदणे री वजह कने मते जणेया रा प्यार ठडां पेइ जाणा, ¹³ अपण जे आखर तक सबर रखगा, तिसेरा ई छुटकारा होणा। ¹⁴ ते राज्य री ए खुसखबरी सारी दुनिया बिच बिच सुणाई जाणी, कि सारी जातियां पर ए गुआई हो, तां आखर आई जाणा।

सबका बड्डि मसीब री सुरूआत

¹⁵ इधेरे तांई जां तुसी तिस उजाड़ने वाळी तिस घटिया चीज जो दिख्खो जिसेरी गल्ल दानिय्येल भविष्द्व्क्त रे जरिये सुणे री थी, पवित्र जगह पर खड़ित्ते रे दिख्खो(जे पढे,से समजे), ¹⁶ तां जे यहुदियां बिच होणे से पहाड़ां पर न्हसि जाण। ¹⁷ जे छत पर होणे, से अपणे घरे का समान लैणे तांई ना उतरे; ¹⁸ ते जे खेतरां बिच होणे से अपणे कपड़े लैणे तांई वापस ना मुड़े। ¹⁹ तिन्हा दिनां बिच जे दुप्राणी ते दुद पुआणी वाली होणी, तिन्हेरे तांई हाय, हाय। ²⁰ प्रार्थना करेया करो की तुसां जो सर्दियां बिच या सब्त रे दिन पर न्हसणा ना पेयो। ²¹ किजोकी तिस वेल्ले इदेया भारी दुख होणा,जदेया दुनिया री सुरुआत का अब्बे तिकर होया ते ना कदी होणा। ²² अगर से दिन घटाये ना गये रे हुदें तां म्हणु ई नी बचदा, अपण चुणे रे लोक्कां री वजह कने से दिन घटाए जाणे। ²³ तिस वेल्ले जे कोई तुसां जो बोल्ले कि मसीह इत्ते है ! या उत्ते है ! तां भरोसा मत करदे। ²⁴ किजोकी झूटे मसीह ते झूटे भविष्यदव्क्ता उठी खड़े होणे, ते बड्डि-बड्डि चिजां ते हैरान करणे वाळी काम्म दिखाणे कि जे होइ सके ते चुणे रे लोक्कां जो बी भड़काई दे। ²⁵ दिख्खो मै पैल्ले का ई तुसां जो सब किछ दस्सि रख्खे रा है। ²⁶ इस तांई, जे से तुसां जो बोल्ले, ‘दिख्खो से जगंल बिच है’, तां बार मत निकळी जादें; या ‘दिख्खो से कोठरियां बिच है’, तां भरोसा मत करदे। ²⁷ किजोकी जियां बिजली पुरब का लेई करी पश्चिम तकर चमकदी, तियां म्हणु रे पुत्तर रा आणा बी होणा। ²⁸ जित्ते लाश हो,तित्ते ई गिध कठिणे।

म्हणु रे पुत्तर रा वापस आणा

²⁹ तिन्हा दिनां रे दुखां रे बिल्कुल बाद बिच ई आसमान न्याहरा होई जाणा, ते चाँद री रौसनी चली जाणी, ते तारें आसमान का डिगि पैणे ते आसमान री ताकतां हिलाई जाणी। ³⁰ तां म्हणु रे पुत्तर री निसानी आसमान बिच दिसणी,ते तां धरती रे सारे कुल रे लोक्कां ने अपणी छाति कुटणी; ते म्हणु रे पुत्तर जो बड़ी ताकत ते शान कने बदळां पर आदें दिखणा। ³¹ तिन्हा ने तुहरी री बड़ी अवाज कने अपणे दुतां जो आग्गे भेजणा, ते तिन्हा आसमान रे इस कुणे का लेई करी तिस कुणे तिकर, चारों पास्से का तिन्हेरे चुणे रे लोक्कां जो कठेरणा।

अजींर रे बुट्टे रा उपनाण

³² “अजींर रे बुट्टे रे उदारण कने ए गल्ल सिख्खो : जां तिसेरी डाळां नरम होइ जादीं ते पत्ते निकळणा लगदे, तां तुसी समजी जादें की गरमी रा मौसम नेड़े है। ³³ इसी तरिक्के कने जां तुसी इन्हा गल्लां जो हुदें दिख्खो, तां समजी जायो की से नेड़े है,बल्कि दरवाज्जे पर ई है। ³⁴ मै तुसां जो सच बोलदा की जां तिकर ए सारी गल्लां पुरी ना होइ जाण,तां तिकर इस पिढ़ी रा अन्त नी होणा। ³⁵ आसमान ते धरती टळी जाणे अपण मेरी गल्लां बगैर पुरे होए नी टलणी।

जागदे रेयो

³⁶ तिस दिन ते तिस घड़ी रे बारे बिच कोइ नी जाणदा, ना स्वर्ग रे दूत ते ना पुत्तर,अपण सिर्फ प्यो। ³⁷ जदेय नूह रे दिन थिये, तियां ई म्हणु रे पुत्तर रा बी आणा होणा। ³⁸ किजोकी जियां जल-प्रलय रे पैल्ले रे दिनां रे दिनां बिच,जिस दिन तिकर नूह जहाज पर नी चढेया थिया,तिस दिन तिकर लोक खादें-पिदें, ते तिन्हा बिच ब्याह हुदे थिये। ³⁹ ते जां तिकर तिन्हा जो रुड़ाई करी लेइ ना गेया,तां तिकर तिन्हेरे जो किछ बी पता नी चलेया; तियां ई म्हणु रे पुत्तर रा आणा बी होणा। ⁴⁰ तिस दिन दो जणे खेतरां बिच होणे, इक्क लेइ लित्ता जाणा ते दुआ छड्डि दित्ता जाणा। ⁴¹ दो जनानियां चक्कि पिस्सेया करदी होणी, इक्क लेइ लित्त जाणी ते दुई छड्डि दित्ती जाणी। ⁴² ईधेरे तांई जागदे रेयो ते किजोकी तुसी नी जाणदे तुसां रा प्रभू कधाड़ी आणे वाळा है। ⁴³ अपण ए जाणी लेयो की जे माळक जाणदा की चोर ने कुस वेल्ल आणा तां से जागदा रैहन्दा,ते अपणे घर बिच तिसजो बड़णा नी दिदां। ⁴⁴ ईधेरे तांई तुसी बी तयार रेयो,किजोकी जिस घड़ी रे बारे बिच तुसी सोचदे बी नी होणे,तिसी घड़ी म्हणु रे पुत्तर ने आई जाणा।

भरोसेमदं नौकर ते बुरा नौकर

⁴⁵ “अते से भरोसेमदं ते समजदार दास कुण है,जिसजो माळक ने नौकरां-चाकरां पर सरदार ठेहराया की ठीक-ठीक समय पर तिन्हेरे जो रोटि देय? ⁴⁶ धन है से दास,जिसजो तिसेरा माळक आई करी इयां ई करदे पाए। ⁴⁷ मै तुसां जो सच बोलदा,तिनिये तिसजो अपणी सारी दौलत पर अधिकारी ठेहराणा। ⁴⁸ अपण जे से बुरा दास सोचणा लगे कि मेरे माळक रे आणे बिच देर है, ⁴⁹ ते अपणे कन्ने वाळे नौकरां जो कुटणा लगी पेय,ते पियक्कड़ा कने खाए-पिए। ⁵⁰ तां तिस दास रे माळक ने ऐसे दिन आणा,जा से तिसेरी भाळा ना बैठे रा हो,ते ऐसी घ़ड़ी जिसजो से जाणदा ना हो, ⁵¹ तां तिनिये तिसजो भारी सजा दैणी ते तिसेरा हिस्सा बेइमानां कने ठेहराणा : उत्ते रोणा ते दादं पिह्णा होणा।

दस कुवाँरियां र उपनाण

¹ स्वर्ग रा राज्य उन्हा दस कुवांरियां रे साह्ई है जे मसाल लेई करी नौय़े लाड़े जो मिळणे तांई निकळी। ² उन्हा बिच का पंज लापतवाह थी ते पंज समजदार थियां। ³ जे लापरवाह थी उन्हा अपणी मसांला लित्ती, अपण उन्हा कने तेल नी लित्तेय़ा। ⁴ अपण समजदारां ने अपणी मसांला कने अपणी कुप्पियाँ बिच तेल बी भरी लेया। ⁵ जां नौये लाड़े जो आणे बिच देर होई गेई, ता सारी कुआँरिया उबणा लग्गी अत्ते सोई गेई। ⁶ “अद्धी रात्ती रोळा पेय़ा, “दिख्खो, नौआ लाड़ा आय़ा करदा है! तिसेरे कने मिलणे बाहर चलो।’ ⁷ ते उस्सी बेल्ले से सारी कुवांरियाँ उठी अत्ते अपणी मसांला त्यार कित्ती। ⁸ ते लापरवाह कुआंरिया ने समजदार कुआंरिया जो बोल्लेय़ा, “अपणे तेल बिच का किच्छ असां जो बी देय़ो, किजोकी असां री मसांला बुझी चल्ले री हिन्न।” ⁹ अपण समजदारां ने उन्हा जो जवाब दित्तेय़ा, ‘नी! असी नी देई सकदी। किजोकि फिरी ना एह् म्हारे तांई पूरा होणा अत्ते ना ई तुम्हारे तांई। इधेरे ताँई तुसी तेल बेचणे वाळे का जाई करी अपणे तांई तेल खरीदी लेयो।’ ¹⁰ “जां से तेल खरीदणे जाय़ा करदी थी ता नौआ लाड़ा आई रेया। ते जे कुँआरिया, जे पैह्ले का त्यार थी, से तिस कने ब्याह वाळे घरे जो चली गेईयाँ अत्ते दुआर बंद करी दित्तेया। ¹¹ इसेरे बाद से बाकी कुवांरिय़ाँ बी आई अत्ते उन्हा ने बोलेया, ‘मालक, ओ मालक, दुआर खोलो, असां जो बी अन्दर आणे देयो।’ ¹² अपण उस ने जवाब दित्तेय़ा, ‘मै तुसां जो सच बोलदा, मैं तुम्हारे जो नी जाणदा।’ ¹³ इधेरे तांई चौकन्ने रेयो, किजोकी तुसी ना उस दिन जो जाणदे, ना उस उस वेल्ले जो।

तोडे़यां रा उपनाण

¹⁴ स्वर्ग रा राज्य उस मह्णु साह्ई है जिन्ने सफर पर जान्दे अपणे नौकरां जो सद्दवाई करी अपणी धन-दौलत तिन्हा जो देई दित्ती। ¹⁵ तिन्ने इक्क जो पंज तोड़े चाँदी, अत्ते दुए जो दो, ते त्रिये जो इक्क। से हर इक जो उसेरी काबलियत रे साह्ब कने देई करी परदेस जो चली गेया। ¹⁶ तां, जिस जो पँज तोड़े मिल्ले थिय्ये, उसने झट ई उन्हा जो कम्म पर लाई दित्तेया अत्ते पंज तोड़े होर कमाई ले। ¹⁷ तिय्यां ई जिस जो दो तोड़े मिल्ले थिय्ये, तिन्निए बी दो होर कमाए। ¹⁸ अपण जिस जो इक्क तोड़ा मिल्लेया थिया तिसने जाई करी मिट्टी खोदी, ते अपणे मालक रे पैसेयां जो लुकाई दित्ते। ¹⁹ “बड़े दिनां बाद तिन्हा नौकरां रा मालक आई रेह्या अत्ते तिन्हा का लेखा-जोखा मंगेया। ²⁰ जिस जो पंज तौड़े मिल्ले थिये, तिस ने पंज तौड़े होर लेई जाई करी बोल्लेया, “मालक, तुसी मिंजो जे पंज तोड़े दित्ते थिय्ये। पंज तोड़े होर मैं कमाये हिन।’ ²¹ तिसेरे मालक ने तिस जो बोल्लेया, ‘शाबास, तू विस्वास रे लायक खरा नौकर है, तू थोड़े बिच ई विस्वास रे लायक रेया, मैं तिज्जो बड़ी चीजां पर हक दैणा। ²² “अते जिस जो दो तौड़े मिल्ले थिये तिस ने बी आई करी बोल्लेया, “मालक, तुसी मिंजो जे दो तोड़े दित्ते थिय्ये, मै दो तौड़े होर कमाए हिन।’ ²³ तिसेरे मालक ने तिस जो बोल्लेया, ‘शाबास, तू विस्वास रे लायक खरा नौकर है, तू थोड़े बिच ई विस्वास रे लायक रेया। मैं तिज्जो बड़ी चीजां पर हक दैणा। अपणे मालक री खुसी बिच शामिल होई जा। ²⁴ “तां जिस जो इक्क तौड़ा मिल्लेया थिया, “मालक, मै तेरे जो जाणदा था की तु सख्त मह्णु है, तू से कटदा जे तू बाया नी, अत्ते जित्ते बीह् नी बाया तित्ते फसल बटोरदा। ²⁵ इधेरे तांई मैं डरी गेया थिय्या इधेरे तांई मैं जाई करी तेरे तोड़े जो दब्बी दित्तेया। एह् लेयो जे तुम्हारा है एह् रेया, लेई लो। ²⁶ तिसेरे मालक ने तिस जो जवाब दित्ता, ‘तू एक बुरा अत्ते आलसी नौकर है, तू जाणदा थिय्या कि मैं बगैर बाये रे कटदा अत्ते जे मैं बीह् नी बाया, तित्ते का फसल बटोरदा; ²⁷ ता तिज्जो मेरे पैसेयां जो साहूकारां का जमा करी दैणा चाईदा थिया, तां मैं आईकरी अपणे पैसे ब्याज समेत लेई लिंदा। ²⁸ इधेरे तांई इस का तोड़ा लेई लो, जिस का दस तौड़े हिन तिस जो देई देयो। ²⁹ किजो की हर उस मह्णु का, जिस ने जे किच्छ उसका थिय्या उसेरा सही इस्तेमाल कित्तेया, तिस जो होर जादा दित्तेया जाणा। अपण उस का, जिसका जे किच्छ थिय्या उसेरा सही इस्तेमाल नी कित्तेया, सब किच्छ लेई लित्तेया जाणा। ³⁰ इधेरे तांई उस बेकार नौकर जो बाहर न्यहारे बिच सूट्टी देयो जित्ते मह्णुआं ने रोणा अत्ते अपणे दांद पिह्णे।”

ईसाफं रा दिन

³¹ “जां म्हणु रे पुत्र ने अपणी महिमा बिच अपणे सब स्वर्गदूतां कने अपणी महिमा रे सिंहासन बैठ्ठे रा होणा। ³² ते सारी जातियां तिसेरे सामणे इकठ्ठी कित्ती जाणी; अत्ते तिन्हा इक दूज्जे जो इयां बखरा करणा, जियां इक पुहाळ बकरियां का भैड़ां बखरी करदा। ³³ तिनिये भेड्डां जो अपणे सीद्धे पास्से ते बकरियां जो पूठ्ठे पास्से खड़ेरणा। ³⁴ फिरी राज्जे ने अपणे सीद्धे पास्से वाळेयां जो बोलणा, ’ओ मेरे प्यो का असीस पाये रे लोक्कों, आओ ते जे राज्य तुम्हारे तांई दुनिया रचणे का पैह्ल्ले त्यार कित्तेया गेया है उसेरे अधिकारी होई जाओ। ³⁵ किजोकि मैं भूख्खा थिया ते तुसी मिंजो खाणे तांई दित्तेया, मैं प्यासा थिया ते तुसी मिंजो पाणी पीणे जो दित्तेया, मैं परदेसी थिया, तुसी मिंजो अपणे घरे रुकाया; ³⁶ मैं नगां थिया, ते तुसी मिंजो कपड़े पुआये; मै बुमार थिया; ते तुसी मेरी सेवा कित्ती; मैं जेल बिच थिया ते तुसी मिंजो मिलणे तांई आए।’ ³⁷ तां धर्मी लोकां ने तिन्हेरे जो जवाब दैणा’ ‘ओ प्रभु, असी कधाड़ी तुसा जो भूख्खा दिख्खेया ते खुआया ते पाणी पियाया? ³⁸ असी कधाड़ी तुसां जो परदेसी दिख्खेया ते अपणे घरे रुकाया ते बगैर कपड़े रे दिख्खी करी कपड़े पुआये? ³⁹ असा ने कधाड़ी तुसां जो बुमार या जेल बिच दिख्खेया ते तुसां जो मिलणे जो आए? ⁴⁰ फिरी राज्जे ने उन्हा जो जवाब दैणा, ‘मैं तुम्हारे कने सच्च बोलदा जां बी तुसा ने मेरे भोळे-भाळे भाइयां बिच का कुसकी इक तांई बी किच्छ कित्तेया ता से तुसी मेरे तांई कित्तेया।’ ⁴¹ “तां तिनिये पूठ्‌ठे पास्से वाळेयां कने बोलणा‘ “ओ अभागेयों! मेरे का दूर चली जाओ, अत्ते जे अग्ग सैतान अत्ते उसेरे दूतां तांई त्यार कित्ती गेई है, उस कदी ना बूझणे वाळी अग्ग बिच पेई जाओ। ⁴² किजोकी मै भूख्खा थिया, ते तुसी मिंजो खाणे तांई नी दित्तेया, मैं प्यासा थिया ते तुसी मेरे जो पाणी नी पियाया; ⁴³ मै अजनबी थिया, पर तुसी मेरे जो अपणे घरे नी रुकाया; मै नगां थिया, ते तुसी मिंजो कपड़े नी पुआए; मैं बुमार ते जेल बिच थिया; अपण तुसी मेरा ध्यान रख्खेया।’ ⁴⁴ तां तिन्हा ने जवाब दैणा, ‘ओ प्रभु, असी तुसां जो भूख्खा, प्यासा, परदेसी, बिना कपड़े रे, बुमार, ते जेल बिच कधाड़ी दिख्‌खेया ते तेरी सेवा नी कित्ती?’ ⁴⁵ तां तिन्हा ने उन्हा जो जवाब दैणा, ‘मैं तुसां जो सच बोलदा कि तुसी जे किच्छ मेरे इन्हा भोळे-भाळे बिच का कुसकी इक्क कने बी नी करदा, से मेरे कने बी नी करदा। ⁴⁶ ते इन्हा बुरे लोकाँ ने हमेसा री सजा भुगतणी अपण धर्मी ने हमेसा री जिन्दगी बिच चली जाणा।”

पिलातुस रे सामणे यीशु जी

¹ जां यीशु जी ए सारी गल्लां बोल्लि बैठे तां अपणे चेल्लेयां जो बोलणा लग्गे, ² “तुसी जाणदे की दो दिनां बाद फसह रे त्योहार है ते म्हणु रा पुत्तर क्रुस पर चढ़ाए जाणे तांई पकड़वाया जाणा।"

यहूदा रा आत्म हत्या करणा

³ तां प्रधान याजक ते प्रजा रे पुनरिये काईफा नां रे महायाजक रे अगँणे कठि गे, ⁴ ते अपु बिच सलाह करण लगे की यीशु जी जो चलाकी कने पकड़ी करी मारी रखण। ⁵ अपण से बोलदे थे,“पर्व से वेल्ले नी कुथकी इय्यां ना हो की लोक्कां रे मन बिच बलवा मची जाए।” ⁶ जां यीशु जी बैतनियाह बिच शमौन कौढ़ी रे घरे थिया ⁷ तां इक्क जनानी सगंमरमर रे बर्तन बिच किमती इत्तर लेइ करी तिसका आई,ते जां से रोटि खाणे तां बैठे रे थिये तां तिन्हेरे सिर पराल्ले उन्धेरी दित्तेया। ⁸ ए दिख्खि करी तिन्हेरे चेल्ले गुस्से होए ते बोलणा लगे,“इसेरी बर्बादी किजो कित्ती गी? ⁹ इसजो ता अच्छे दाम पर बेची करी गरिब्बां बिच बडेंया जाई सकदा था।” ¹⁰ ए जाणी करी यीशु जी ने तिन्हा जो बोल्लेया,“जनानी जो किजो तगं करेया करदे हिन?तिसने मेरे कने अच्छाई कित्ति।

पिलातुस रे सवाल

¹¹ गरीब तां तुसां कने हमेसा रैहन्दे,अपण मै तुसां कने हमेसा नी रैहणा। ¹² इनिये मेरे सरीर पर जे ए इत्तर उन्धेरे रा है, ए मेरे गाड़े जाणे तांई कित्ते रा है। ¹³ मै तुसां कने सच बोलदा,की सारी दुनिया बिच जित्ते कुथकी ए सुसमाचार दस्सेया जाणा,तित्ते इसेरे इस कम्म रा ज़िकर बी इसेरी याद बिच कित्तेया जाणा। ¹⁴ तां यहुदा इस्करियोती ने,जे बारा चेल्लेयां बि का इक्क थिया प्रधान याजकां का जाई करी ए बोल्लेया,

मौत री सजा दैणा

¹⁵ “ जे मै तिसजो तुसां रे हत्थ पकड़वाई देयां तां मेरे जो दिगें?” तिन्हा ने तिसजो ति चाँदी रे सिक्के तौळी करी देई दित्ते, ¹⁶ ते से तिसी वेल्ले का तिन्हेरे जो पकडवाणे रा मोक्का तोपणा लग्गेया। ¹⁷ अखमिरी रोट्टि रे पर्व रे पैहल्ले दिन,चेल्ले यीशु जी का आई करी पुछणा लग्गे,“ तुसी कुते चाह्दें की असी तुसां तांई फसह खाणे री तयारी करण?” ¹⁸ तिन्हा ने बोल्लेया,“नगर बिच अमुक म्हणु का जाई करी तिसजो बोल्लो की गुरू बोलदे की मेरे वेल्ला नेड़े है,मै अपणे चेल्लेयां कने तेरे इत्ते पर्व मनाणा’।” ¹⁹ अते चेल्लेयां ने यीशु जी री गल्ल मन्नि ते फसह तयार कित्ता ते फसह तयार कित्ता। ²⁰ जां साजं होइ तां से बारा जणेया कने रोट्टि खाणे तांई बैठ्ठे। ²¹ जां से खाया करदे थिये तां तिन्हा ने बोल्लेया,“मै तुसां कने सच बोलदा की तुसां बिच का इक्क ने मेरे जो पकड़वाणा।” ²² इस पर से बड़े उदास होए, ते हर इक्क तिन्हा का पुछणा लग्गेया,“हे गुरू,क्या से मै है।” ²³ तिन्हा ने जवाब दित्तेया,“जिस ने मेरे कने थाळी बिच हत्थ पाए रा है तिनिये ई मेरे जो पकड़वाणा। ²⁴ म्हणु रा पुत्तर ता जदेया तिसेरे बारे बिच लिख्खे रा है,जाया ई करदा है; अपण तिस म्हणु तांई अफसोस है जिसेरे वजह कने म्हणु रा पुत्तर पकड़वाया जादां:जे तिस महणु रा जन्म ई नी हुदां तां तिसेरे तांई भला हुदां।” ²⁵ तां तिसेरे पकड़वाणे वाऴे यहुदा ने बोल्लेया,“हे गुरू क्या से मै है?“तिन्हा ने तिसजो बोल्लेया,“तु बोल्लि बैठा।” ²⁶ जां से खाया करदे थे तां यीशु जी ने रोट्टि ली,ते आशीष मगीं करी तौड़ी,ते चेल्लेयां जो देइ करी बोल्लेया,“लेयो,खाओ;ए मेरा सरीर है।”

सिपाईयां रा यीशु जी री बेज्जती करणा

²⁷ फिरी तिन्हा ने कटोरा लेई करी धनवाद कित्ता,ते तिन्हा जो देइ करी बोल्लेया,“तुसी सारे इस बिच का पियो, ²⁸ किजोकी ए मेरा वादे रे मुताबक से खुन है,जो मतेयां रे पाप्पां री माफी तांई बहाया जादां। ²⁹ मै तुसां कने सच बोलदा की अगुंर रा ए रस तिस दिन तिकर कदी नी पिगां जां तिकर तुसां कने अपणे पिता रे राज बिच नौया ना पियां। ³⁰ फिरी से भजन गाई करी जैतुन पहाड़ पर गे,तां यीशु जी ने तिन्हा जो बोल्लेया,“तुसी सारेयां ने आज्ज ई रात्ती मेरे बारे बिच धोखा खाणा,किजोकी लिख्खे रा है:‘मै पुहाळ जो मारणा,ते हड़ री भेडां ने तित्तर-बित्तर होइ जाणा।’ ³¹

यीशु जी रा क्रूस पर चढा़या जाणा

³² अपण मै जिन्दे होणे रे बाद तुसां का पैहल्ले गलील जो जाणा।” ³³ इस पर पतरस ने तिन्हा जो बोल्लेया,“जे सारे तुसां रे बारे बिच धोखा खाण ते खाण, अपण मै कदी बी धोखा नी खाणा।” ³⁴ यीशु जी ने तिसजो बोल्लेया,“मै तेरे कने सच बोलदा की आज्ज ई रात्ति मुर्गे रे बागं मारणे का पैहल्ले, तैं त्रै बारी मेरे का मुकरी जाणा।” ³⁵ पतरस ने तिन्हा जो बोल्लेया,“जे मेरे जो तुसां कने मरणा बी पे,तां बी मै तुसां का कदी नी मुकरणा।"ते इदेया ई सारे चेल्लेयां ने बी बोल्लेया। ³⁶ तां यीशु जी अपणे चेल्लेयां कने गत समनी नां रे इक्क जगह पर आये ते अपणे चेल्ळेया जो बोलणा लग्गे इत्ते ई बेइ रेह्यो जां तिकर मै तित्ते जाई करी प्रार्थना करां।" ³⁷ से पतरस ते जब्दि रे दोई मुडेंया जो कन्ने लेई गे,ते उदास ते व्याकुल होणा लग्गे। ³⁸ तां तिन्हा ने तिन्हेरे जो बोल्लेया,”मेरा दिल बड़ा उदास है इत्ते तिकर की मेरी जान निकळेया करदी है। तुसी इत्ते ई रुको ते मेरे कने जागदे रेयो।” ³⁹ फिरी से थोड़ा होर आग्गे बधी करी मुँह रे भारे पेय,ते प्रार्थना कित्ती,“हे मेरे पिता जे होइ सके ता ए कटोरा मेरे का टळी जाए तां बी जिय्‍यां मै चाह्दां तिय्यां नी अपण जिय्यां तुसी चाह्दें तिय्यां ई हो।” ⁴⁰ फिरी तिन्हा ने चेल्लेयां का आई करी तिन्हा जो सुत्ते रे पाया ते पतरस जो बोल्लेया“क्या तुसी मेरे कने इक्क घड़ी बी नी जाग्गि सके? ⁴¹ जागदे रेयो,ते प्रार्थना करदे रेयो की तुसी परिक्षा बिच ना पेयो: आत्मा ता तयार है,अपण सरीर कमजोर है।” ⁴² फिरी तिन्हा ने दुई बारी जाई करी प्रार्थना कित्ती”हे मेरे पिता,जे ए मेरे पिए बगैर नी हटई सकदा तां तुसां री मर्जी पुरी हो।” ⁴³ तां तिन्हा ने आई फिरी तिन्हा जो सुत्ते रे पाया किजोकी तिन्हेरी हाक्खियां निन्र्दां कने भरे री थी। ⁴⁴ तिन्हेरे जो छडि करी से फिरी चली गे,ते तिन्हा ई शब्दां बिच फिरी तिज्जि बारी प्रार्थना कित्ती।

यीशु जी रा मरणा

⁴⁵ तां तिन्हा ने चेल्लेयां का आई करी तिन्हेरे जो बोल्लेया,“अवे सोदें रेयो,ते अराम करो: दिख्खो,से वेल्ला आई पुज्जे रा है,ते म्हणु रा पुत्तर पापियां रे हत्थां पकड़वाया जादां। ⁴⁶ उठो,चलिये; दिख्खो,मेरा पकड़वाणे वाळा नेड़े आई पुज्जे रा है।” ⁴⁷ से ए बोल्लेया ई करदे थिये की यहुदा जे बारां बिच का इक्क थिया,आया ते तिसेरे कने प्रधान याजकां ते लोक्कां रे पुनरियां रे पास्से का बड्डि भीड़,तलवारां ते लठ लेई करी आई। ⁴⁸ तिन्हेरे पकड़वाणे वाळे ने तिन्हेरे जो ए निसानी दित्ति री थी:“जिसजो मै चुमि लेयां सेई है; तिसजो पकड़ी लेयो।” ⁴⁹ ते तिसी वेल्ले यीशु जी का आई करी बोल्लेया,“हे गुरू,नमस्कार!” ते तिन्हेरे जो बड़ा चुम्मेया। ⁵⁰ यीशु जी ने तिसजो बोल्लेया,“हे दोस्त जिस कम्म तांई तु आए रा है तिसजो करी लेय।”तां तिन्हा ने नेड़े आई करी यीशु जी पर हत्थ पाए ते तिन्हा जो पकड़ी लेया। ⁵¹ यीशु जी रे साथियां बिच का इक्क ने हत्थ बधाई करी अपणी तलवार खिची ली ते महायाजक रे नौकर पर चलाई करी तिसेरा कान्न उड़ाई दित्ता। ⁵² तां यीशु जी ने तिस जो बोल्लेया,“ अपणी म्यान बिच रखी ले,किजोकी जे तलवार चलादें से सारे तलवार कने खत् कित्ते जाणे। ⁵³ क्या तु नी जाणदा की मै अपणे पिता का विनती करी सकदा, ते से स्वर्गदुतां री बारां पलटन का जादा अब्बे ई हाजिर करी सकदा। ⁵⁴ अपण पवित्रशास्त्र री से गल्लां की इय्यां ई होणा जरुरी है,किय्यां पुरी होणी?” ⁵⁵ तिस वेल्ले यीशु जी ने भीड़ जो बोल्लेया,“क्या तुसी तलवारा ते लाठियां लेई करी मेरेजो डाकु सांई पकड़णे तांई निकळे रे हिन? मै हर रोज देहरे बिच बेई करी उपदेस देया करदा था ते तुसी मेरेजो नी पकड़ेया,ते तुसि मेरेजो नी पकड़ेया। ⁵⁶ अपण ए सारा किछ इस तांई होए रा है की भविष्यद्वक्ता रे वचन पुरे होण।”तां सारे चेल्ले तिन्हेरे जो छडी करी न्हसी गे।

यीशु जी रा दब्बेया जाणा

⁵⁷ तां यीशु जी रे पकड़णे वाळे तिन्हेरे जो काईफा नां रे महायाजक का लेइ गे,जित्ते शास्त्रि ते पुनरिये कठे होए थे। ⁵⁸ पतरस दुर ई दुर तिन्हेरे पिच्चे पिच्चे महायाजक रे अगँण तिकर गेया,ते अन्दर जाई करी आखर दिखणे जो प्यादेयां कने बेइ गेया। ⁵⁹ प्रधान याजक ते सारी महासभा यीशू जी जो मारी रखणे तांई तिन्हेरे खलाफ झुटी गुआई री तलाश बिच थिये, ⁶⁰ अपण मते सारे झुटे गुआह रे ईणे पर बी ना मिल्लि।आखर बिच दो जणे आए, ⁶¹ ते बोल्लेया,“इन्ने बोल्ले रा है की मै परमेश्वर जो गिराई सकदा ते तिसजो त्रै दिनां बिच बणाई सकदा।”

कबर पर पैहरा

⁶² तां महायाजक न खड़ी करी यीशु जी जो बोल्लेया,“ क्या तू कोइ जवाब नी दिदां? ए लोक तेरे बारे बिच क्या गुआई देया करपे हिन?” ⁶³ अपण यीशू जी चुप रेय,तां महायाजक ने तिन्हेरे जो बोल्लेया,“मै तेरे जो जिन्दे परमेश्वर री कसम दिदां की जे तू परमेश्वर रा पुत्तर मसीह है तां असां कने बोल्लि दे।” ⁶⁴ यीशु जी ने तिसजो बोल्लेया,तू अपु ई बोल्लि दित्ता; ते तुसां कने ए बी बोलदा क अब्बे का परमेश्वर रे पुत्तर जो सर्वशक्तिमान रे सज्जे पास्से बैठे रे ते आसमान रे बदळां पर आदें दिखगे।” ⁶⁵ इस पर महायाजक ने अपणे कपड़े फाड़े ते बोल्लेया,“इस ने परमेश्वर ई बेज्जती कित्ति री है,अवे असजो गुआई री क्या जरुरत? दिख्खो,तुसी अब्बे ए बेज्जती सुणे री है। ⁶⁶ तुसी क्या सोचदे?”तिन्हा ने जवाब दित्ता”ए मारे जाणे रे जोग्गे है।” ⁶⁷ तां तिन्हा ने तिन्हेरे मुँह पर थुक्केया ते तिन्हेरे जो मुक्के मारे,दुएयां ने तिन्हेरे जो थप्पड़ मारी करी बोल्लेया, ⁶⁸ “ हे मसीह असां कने भविष्वाणी करि के बोल की कुसने तेरे जो मारेयां?” ⁶⁹ पतरस बार अगँणे बिच बैठे रा थिया की इक्क नौकराणी तिसेरा का आई ते बोल्लेया: तु बी यीशु गलीली रे कन्ने थिया।” ⁷⁰ तिस ने सारेयां रे सामणे ए बोलदे होए इन्कार कित्तेया,“मै नी जाणदा की तू क्या बोल्लेया करदी है।” ⁷¹ जां से बार डेवड़ी बिच गया,तां दुई नौकरानी ने तिसजो दिख्खि करी जे तित्ते थोये तोनहेरे जो बोल्लेया,“ए बी ता यीशु नासरी जी कने थिया।” ⁷² तिसने कसम खाई करी फिरी इन्कार कित्तेया: मै तिस म्हणु जो नी जाणदा।” ⁷³ थोड़ी देर बाद लोक्कां ने तित्ते खड़ित्ते रे थिये,पतरस का आई करी तिसजो बोल्लेया,सचमुच तु बी तिन्हा बिच का इक्क है किजोकी तेरी बोलि तेरा राज खोलि दिदीं।” ⁷⁴ तां से धिक्कारणे ते कसमां खाणां लग्गेया:“मै तिस म्हणु जो नी जाणदा ते तिसी वेल्ले मुर्गे नै बागं मारी।” ⁷⁵ तां पतरस जो यीशु जि री बोल्ले री गल्ल याद आई:“मुर्गे रे बागं दैणे का पैहल्ले तू तिन बारी मेरा इन्कार करणा।” ते से बार करी फुटि-फुटि करी रोणा लग्गेया।

पिलातुस रे सामणे यीशु जी

¹ जा भ्याग होइ तां सारे प्रधान याजकां ते लोक्कां रे पुरनियां ने यीशु जी जो मारीरखणे री सलाह कित्ती। ² तिन्हा ने तिन्हेरे जो बन्नेया ते लेई जाई करी पिलातुस हाकर रे हत्थां सौपिं दित्ता।

यहूदा रा आत्म-हत्या करणा

³ तिन्हा ने तिन्हेरे जो बन्नेया ते लेई जाई करी पिलातुस हाकर रे हत्थां सौपिं दित्ता। ⁴ ते बोल्लेया,“मैं बेगुनाह जो मरवाणे तांई पकड़वाई करी पाप कित्तेया।” तिन्हा ने बोल्लेया,”असां जो क्या? तु ई जाण।” ⁵ तां से तिन्हा सिक्केया जो देहरे बिच सुटि करी चली गेया,ते जाई करी अपु जो फाह लाई लित्ता। ⁶ प्रधान याजकां ने तिन्हा सिक्केयां जो लेइ करी बोल्लेया,“इन्हा जो,भडांर बिच रखणा ठीक नी किजोकी ए खून री किमत है।” ⁷ अते तिन्हा ने सलाह करी के तिन्हा सिक्केयां कने परदेसियां रे गाढ़े जाणे तांई कुम्हार रे खेत्तर जो खरिदी लित्तेया। ⁸ इस तांई से खेत्तर आज तिकर खुन रा खेत्तर केहलादां। ⁹ तां जे वचन यीर्मयाह भविष्यद्वक्ता रे जरिए बोल्लेया गेया थिया से पुरा होया:“तिन्हा ने से ति सिक्के मतलब तिस मन्नि री कीमत जो(जिसजो इस्राएल री औलादां बिच का किन्नेया ने ठेहराया थिया)लेइ लित्ता। ¹⁰ ते जियां परमात्मा ने मिजों हुक्म दित्तेया थिया तियां ई तिन्हा जो कुम्हार रे खेत्तर रे मोल बिच देइ दित्ता।

पिलातुस रे सवाल

¹¹ जां यीशु जी हाकम रे सामणे खड़ित्ते रे तां हाम ने तिन्हा जो पुच्छेया,“क्या तु यहुदियां रा राज्जा है?” यीशु जी ने तिन्हा जो बोल्लेया“तु अप्पु ई बोल्ल्येया करदा है। ¹² जां प्रधान याजक ए पुरनिये तिस पर इल्जाम लाया करदे थिये,तां तिन्हा ने कोई जवाब नी दित्ता। ¹³ इस पर पिलातुस ने तिन्हा जो बोल्लेया,“क्या तू नी सुणदा कि ए तेरे खलाफ किन्नि गल्लां बोल्लेया करदे हिन। ¹⁴ अपण तिन्हा ने तिसजो इक्क बी गल्ल रा जवाब नी दित्तेया,इत्ते तिकर हाकम जो बड़ी हरानी होइ।

मौत री सजा रा हुकम

¹⁵ हाकम री ए रीति थी कि ति त्योहार बिच लोक्कां ताईं कुसकी इक्क कैदी जो जिसजो से चाह्दें थे,छड्डि दिदां था। ¹⁶ तिस वेल्ले तिन्हेरे इत्ते बरब्बा नां रा इक्क मन्ने रा कैदी था। ¹⁷ अते जां से कठिये,तां पिलातुस ने तिन्हेरे जो बोल्लेया“तुसी कुसजो चाह्दें की मे तुसां तांई छड्डि देयां?बरअब्बा जो या यीशु जी जो जे मसीह केहलादें?” ¹⁸ किजोकी से जाणदा था की तिन्हा ने तिन्हेरे जो चलाकी कने पकड़वाया रा है। ¹⁹ जां से न्याय री गद्दि पर बैठ्ठे रा थिया तां तिसेरी लाड़ी ने तिसजो बोलि भेज्जेया,“तु तिस धर्मी रे मामले बिच हात्थ मत पादां,किजोकी मै आज्ज सुपणे बिच तिसेरी वजह कने बड़ी तकलीफ झेलि री है। ²⁰ प्रधान याजक ते पुरनियां ने लोक्कां जो उकसाया कि से बरअब्बा जो मगीं लेण ते यीशु जी रा खातमा करवाण। ²¹ हाकम ने तिन्हेरे जो पुच्छेया,“इन्हा दोन्नां बिच का कुसजो चाह्दें की मै तुसां तांई छड्डि देयां?” तिन्हा ने बोल्लेया,“बरअब्बा जो।” ²² पिलातुस ने तिन्हेरे जो पुच्छेया“फिर यीशु जी जो,जे मसीह केहलादां क्या करां?”सारेयां ने तिन्हा जो बोल्लेया”से क्रूस पर चढ़ाया जाए।” ²³ हाकम ने बोल्लेया,“किजो,तिसने क्या बुराई कित्ते री है? अपण से होर बी चिल्लाई करी बोलणा लग्गे,“से क्रूस पर चढ़ाया जाए।” ²⁴ जां पिलातुस ने दिख्खेया कि किछ बी नी बणेया करदा है अपण तिसेऱे उलट हगांआ बदेया जाया करदा है ता तिनिये पाणी लेई करी भीड़ रे सामणे अपणे हात्थ धोए ते बोल्लेया“मै इस धर्मी रे खून का बेगुनाह है;तुसी ई जाणो।” ²⁵ सब लोक्कां ने जवाब दित्ता,“इसेरा खून असां पर ते असां रे औलादां पर हो!” ²⁶ इस पर तिसने बरअब्बा जो तिन्हेरे तांई छड्डि दित्तेया,ते यीशु जी जो कौड़े लगवाई करी तिन्हेरे जो देइ दित्ता की क्रूस पर चढ़ाया जाए।

सिपाईयां रा यीशु जी रा मजाक उडा़णा

²⁷ तां हाकम रे सिपाईयां ने यीशु जी जो किले बिच लेइ जाई करि सारी पलटन तिन्हेरे चारो पास्से कठेरी, ²⁸ ते तिन्हेरे कपड़े उतरवाई करी तिन्हेरे जो लाल रगं रा बागा पुआया, ²⁹ ते कडेंया रा मुकूट दबाई करी तिन्हेरे सिर पर रख्खेया ते तिन्हेरे सज्जे हात्थ बिच सरकडां दित्तेया ते तिन्हेरे आग्गे घुटने टेकी करी तिन्हेरा मजाक उड़ाणा लगे ते बोल्लेया,“हे यहुदियां रे राज्जे,नमस्कार! ³⁰ ते तिन्हेरे पर थुक्केया;ते सेई सरकडां लेइ करी तिन्हेरे सिर पर मारणा लग्गे। ³¹ जां से तिन्हेरा मजाक उड़ाई बैठे तां से बागा उतरवाई करी फिर तिन्हेरे ई कपड़े तिन्हेरे जो पहनाए ते क्रूस पर चढ़ाणे तांई लेई चले।

यीशु जी रा क्रूस पर चढा़णा

³² बार जादें वेल्ले तिन्हेरे जो शमौन नां रा इक्क कुरैनी म्हणु तिन्हेरे जो मिल्लेया तिन्हा ने तिसजो बेगार बिच पकड़ेया की से तिन्हेरा क्रूस चुकि करी लेइ चले। ³³ तिस जगह पर जे गुलगुला मतलब की खौपड़ी री जगह केहलादां पुज्जि करी ³⁴ तिन्हा ने पित्ता मिळे रा दाखरस तिन्हेरे जो पिणे तांई दित्तेया अपण तिन्हा ने चखी करी पिणा नी चाएया। ³⁵ तां तिन्हा ने तिन्हा जो क्रूस पर चढ़ाया,ते चिठ्ठिया पाई करी तिन्हेरे कपड़े बडीं लित्ते ³⁶ ते तित्ते बेई करी तिन्हेरा पेहरा दैणा लग्गे, ³⁷ ते तिन्हेरा दोष पत्र तिन्हेरे सिर का उप्पर लाया कि”ए यहुदियां रा राज्जा यीशु है”। ³⁸ तां तिन्हेरे कने दो डाकू इक्क सज्जे पास्से ते दुआ खब्बे पास्से,क्रूस पर चढाए गे, ³⁹ आणे-जाणे वाळे सिर हिलाई-हिलाई करी तिन्हेरा मजाक उड़ाया करदे थे, ⁴⁰ ते बोलदे थे,“हे देहरे रे तोड़णे वाळे ते त्रै दिनां बिच बनाणे वाळे अप्पु जो ता बचा! जे तू परमात्मा रा पुत्तर है तां क्रूस पर का उतरी आ।” ⁴¹ इसी तरिक्के कने प्रधान याजक भी शास्त्रियां ते पुरनिये समेत मजाक उड़ाई-उड़ाई करी बोलदे थे, ⁴² इनिये होरां जो बचाया,ते अप्पु जो नी बचाई सकदा।ए ता‘इस्राएल रा राज्जा है।अवे क्रूस का थल्ले उतरी आए तां असी तिस पर भरोसा करण। ⁴³ तिसने परमात्मा प भरोसा रखे रा है; जे से इसजो चाह्दें ता अवे इसजो छुड़ाई लेय,किजोकी इसने बोल्लेया थिया‘मै परमात्मा रा पुत्तर है’।” ⁴⁴ इसी तरिक्के कने डाकु बी जे तिन्हेरे कने क्रूस पर चढाए गे रे थिये इसि तरिक्के कने तिन्हेरा मजाक उड़ाया करदे थे,

यीशु जी रा मरणा

⁴⁵ दोपहर का लेइ करी त्रिये पहर तिकर तिस सारे देस बिच न्याहरा छाया रेया। ⁴⁶ त्रिये पहर रे नेड़े यीशु जी ने बड़ी जोर कने हाक्क लाई करी बोल्लेया“एली,एली लमा शबक्तनि?“मतलब हे मेरे परमात्मा,हे मेरे परमात्मा,तुसी मेरे जो किजो छड्डि दित्तेया?” ⁴⁷ जे तित्ते खड़ित्ते रे थिए तिन्हा बिच का किन्नेया ने ए सुणी करी बोल्लेया,“से ता एलिय्याह जो सद्देया करदा है, ⁴⁸ तिन्हा बिच का इक्क तिसी वेल्ले दोड़ेया,ते स्पजं लेई करी सिरके बिच डुबाया,ते सरकडें रखि करी तिन्हा जो चुसाया। ⁴⁹ ते तिन्हा जो बोल्लेया,“रुकी जाओ,दिखदे एलिय्याह तिसजो बचाणे आदां या नी।” ⁵⁰ तां यीशु जी ने फिरी बड़ी हाक्क लाई करी साह छड्डि दित्ते। ⁵¹ ते दिख्खो,देहरे रा परदा उप्पर का लेई करी थल्ले तिकर फटी करी दो टोट्टे होइ गेया: ते धरती हिली गी ते चट्टानां त्रिड़की गेइ। ⁵² ते कबरां खूली गेइ,ते सुत्ते रे(मरे रे)पवित्तर लोक्कां री मते सारी लाशां फिरी जिन्दा होइ गेइ। ⁵³ ते तिन्हेरे जिन्दा होणे रे बाद से कबरां बिच का निकळी करी पवित्तर नगर बिच गे ते मते लोक्कां जो दिस्से। ⁵⁴ तां सुबेदार ते जे तिन्हेरे कने यीशु जी रा पेहरा देया करदै थिये,हिल्लण ते जे किछ होया थिया तिसजो दिखिकरी बड़े भारी डरी गे ते बोल्लेया,“सचमुच ए परमात्मा रा पुत्तर थिया!” ⁵⁵ तित्ते मती सारी जनानियां जे गलील का यीशु जी री सेवा करदे होए तिन्हेरे कने आई री थी,दूर का ए सब किछ दिख्खेया करदी थी। ⁵⁶ तिन्हा बिच मरीयम मगदलिनी,ते याकूब ते योसेस री माता मरीयम,ते जब्दी रे पुत्तरां री माँ थी।

यीशु जी रा दब्बेया जाणा

⁵⁷ जां शाम होइ तां युसूफ नां रे अरिमतिया रा इक्क अमीर आदमी,जे अप्पु बी यीशु जी रा चेल्ला थिया आया। ⁵⁸ तिसने पिलातुस का जाई करी यीशु जी री लास मगीं इस पर पिलातुस ने देइ दैणे रा हुक्म दित्ता। ⁵⁹ युसूफ ने लास लित्ती,तिसजो चमकदार चद्दर बिच लपेटेया, ⁶⁰ ते तिसजो अपणी नोयी कबर बिच रख्खेया,जे तिसने चट्टान बिच खुदवाई थी ते कबर रे दरवाज्जे पर बड्डा बट्टा लुड़काई करी चली गेया। ⁶¹ मरियम मगदलिनी ते दुई मरीयम तित्ते कबर रे सामणे बैठे री थी।

कबर पर पैहरा

⁶² दुए दिन जे तयारी रे बाद रा दिन थीया, प्रधान याजकां ते फरिसियां ने पिलातुस जो कठी करी बोल्लेया, ⁶³ “हे महाराज,असां जो याद है की तिस भरमाणे वाळे ने जां से जिन्दा थिया,बोल्लेया था,‘मै त्रै दिनां रे बाद जिन्दा होइ जाणा।’ ⁶⁴ अते हुक्म देयो की त्रिये दिन तिकर कबर री रखवालि कित्ती जाए,इयां ना हो की तिसेरे चेल्ले आई करी तिसजो चोरी करी के लेइ जाण ते लोक्कां जो बोलणा लग्गे,से मरेयां बिच का जिन्दा होई गे रा है।’तां पिछला धोखा पैहल्ले का बी बुरा होणा।’ ⁶⁵ पिलातुस ने तिन्हा जो बोल्लेया,“तुसां का पैहरेदार ता हिन। जाओ,अपणी समझ रे हसाब कने रखवाल्लि करो। ⁶⁶ अते से पेहरुआं जो कन्ने लेई करी गे ते बट्टे पर मोहर लाई करी कबर री रखवालि कित्ति।

यीशु जी रा दोबारा जिन्दा होणा

¹ सब्त वाळे रोज्जे रे बाद रविवार जो भ्याग हून्दे ई मरियम मगदलीनी अत्ते दूसरी मरियम कब्र जो दिखणे तांई आई। ² अत्ते दिख्खो, इक बड़ा बड्डा हिलण गेया, किजोकि स्वर्ग का इक स्वर्गदूत तित्ते उतरेया अत्ते तित्ते आई करी उस ने पत्थर जो लुढ़ाकाई दित्तेया अत्ते उस पर बैई गेया। ³ उसेरा रुप अम्बर री बिजळी साह्ई थिय्या अत्ते उसेरे कपड़े बर्फ साह्ई साफ थिय्ये। ⁴ से सिपाई जे कब्रां पर पैह्रा देया करदे थिय्ये, डरे रे मारे कमणे लगे अत्ते इदेय होई गे जियां मरी गे हो। ⁵ तां स्वर्गदूत ने उन्हा जनानियां जो बोलेया, “डरो मत, मैं जाणदा कि तुसी यीशु जी जो तोपेया करदे हिन जिस जो सूळी पर चढ़ाई दित्तेया थिय्या। ⁶ से इत्ते नी हिन। जियां कि उन्हा ने बोलेया थिय्या, तिन्हा मरणे बाद फिरी जिंदा होई जाणा। आओ, उस जगह जो दिख्खो, जित्ते से लेटे रे थिय्ये। ⁷ अत्ते फिरी झट जाओ अत्ते उसेरे चेल्लेयां जो बोलो, ‘से मरे रेयां बिच का फिरी जिंदा होई गेया, अत्ते से तुम्हारे का पैह्ले गलील जो जाया करदे हिन, तुसा उस जो उत्ते ई दिखणा। दिख्खो, मैं तुम्हारे बोली दित्तेया है।” ⁸ से डर अत्ते बड़ी खुसी कने कब्र का हटी करी उसेरे चेल्लेयां जो बसेख दैणे तांई दौड़ी गेईयां। ⁹ तां यीशु जी उन्हा जो मिल्ले। अत्ते बोलेया, “सलाम”। उन्हा ने तिन्हा का जाई करी उन्हेरे पैर पकड़ी करी उन्हेरी जै-जैकार कित्ती। ¹⁰ तां यीशु जी ने उन्हा जो बोलेया, “डरो मत, मेरे भाईयां का जाओ, अत्ते उन्हा जो बोलो कि से गलील तांई से निकळे, तित्ते ई तिन्हा मिंजो दिखणा।”

सिपाईयां रा खबर पुजाणा

¹¹ हल्ले से जनानियां अपणे रस्ते बिच ई थी कि किच्छ सिपाई जे पैहरेदार थिय्ये, सैहर जो गे अत्ते जे किच्छ होया थिय्या, उस सब री जानकारी परोह्तां रे प्रधाना जो दस्सी दित्ती। ¹² तां तिन्हा बुज़ुर्ग यहूदी नेतेयां कने मिल्ली करी इक योजना बणाई। उन्हा ने सिपाईयां जो सारी चाँदी देईकरी बोलेया, ¹³ “ मह्णुआं जो एह् बोलेयो कि से यीशु रे चेल्ले राती आये अत्ते जां असी सुत्ते रे थिय्ये उसेरी लास जो चोरी करी लेई गे। ¹⁴ अत्ते जे तुम्हारी गल्ल राज्यपाल तक पूजदी ता असी उस जो समझाई लिंगे अत्ते तुसा जो कोई आँच नी आणे दिंगे। ¹⁵ पैहरेदारां ने चाँदी लेई करी तियां ई कित्तेया, जियां उन्हा जो दस्सेया गेया थिय्या। अत्ते एह् गल्ल यहूदियां बिच अज्ज तांई इस्सी तरिक्के कने फैली री है।

यीशु जी रा चेल्लेयां जो दिसणा ते आखरी हुकम

¹⁶ फिरी ग्यारा चेल्ले गलील बिच उस पहाड़ी बिच पूज्जे जित्ते जाणे जो यीशु जी ने बोलेया थिय्या। ¹⁷ जां उन्हा ने यीशु जी जो दिख्खेया ता उसेरी जै-जैकार कित्ती। बल्कि किच्छ रे दिला बिच शक थिय्या। ¹⁸ फिरी यीशु जी ने उन्हेरे का जाई करी बोलेया, “स्वर्ग बिच अत्ते धरती बिच सब हक मिंजो दित्ते गे हिन। ¹⁹ इधेरे तांई तुसी जाओ अत्ते सब देसां रे मह्णुआं जो मेरा चेल्ला बणाओ। तुम्हारे जो एह् कम्म परम पिता रे नां बिच, पुत्र रे नां बिच अत्ते पवित्र आत्मा रे नां बिच उन्हा जो बपतिस्मा देई करी पूरा करणा है। ²⁰ से सब हुकम जे मैं तुम्हारे जो दित्ते हिन, उन्हा जो उन पर चलना सिखाओ: अत्ते दिख्खो, मैं दुनियां रे अंत तक हमेसा तुम्हारे कने है।”