TITUS

¹ Pathien na imadansha hai takashawn dungjuia le Pathienjet le adik jetna `khat a, Pathien shok le Jesu Christa tirtawn, Paul kiei na nang dieng kimiejiek inih. ² Kiei hi rong put mala a mielieishiei boi Pathien na chawngirurakham kumshawt ringna ngakmining khan a`awm kanih. ³ Apha rutukthep a chawngshem jar a ama chawng kha amalar joi. Makha le, nashandampa u Pathien chawngpek dungjuia, kiei hi inurunganshie nih joi. ⁴ Takashawn nuruchun dungjuia kashapa dik, Titus nang dieng napa u Pathien le nashandampa u nupumi u Jesu Christa ah put ah numpokmirit, roihoina le lungdamna kha a`awm nih rosho. ⁵ Hijarhin a inih, kiei na nang kha Crete tuikawram ah kinurumakna kha. Makha thaw rang a ravat hai kha dawna nangtetna rang le, chawng kinepek kha ang a, khopui rikip ah bieklamkai hai kha nangmadanna rang a inih. ⁶ Ama kha metek boi, nungak `khat inkopa aningir rang a inih. Anai hai kha takashawn rang a rutuk, chonrekhe thaw a ninawkle chawngjui boi a nawng boi aningir rang a inih. ⁷ Bieklamkai rang tu, Pathien inchonpo `khat a, bieniei boi, iminingrok a she boi, ashangrat boi, ju a vanhat boi, chichairoi boi, shier a rapham boi, ⁸ inia jinchonthiei, atha kha numapoh miring, mirachan, midik, miriethieng, takshur ngam anih rang a inih. ⁹ Ama kha miruchukna dungjuia takashawn rang a rutuk, chawng arakrep miring anih rang a inih. Makha miruchukna atha kha shemna rang le makha le perawlaw miring hai kha rachak a demna rang a inih. ¹⁰ Ajarla chungrasha miring tampui awm uh, khinniei a vunep hai kar a rathashie methena a mohon a chawngriei hai kha inih uh. ¹¹ Amani kha maw`awmchien rang a shok. Amani na mulung riethieng boi nemna rangbak a ruchuk rang adik boi kha le miruchuk ua, inshung kholok kha pawrimechet u inih. ¹² Amanitak thiempulien `khat na ruti, “Crete miring hai kha mielieishiei, ramsha mulung apoh, rathashie, shak a rapham miring kha nih jawnjai uh.” ¹³ Mahi kungchangna hi adik inih. Khajarkhan takashawn khan atha changna u rang, khawktak a amani kha rawkawk roh. ¹⁴ Jihudi hai jokrishim hai le adik ah put ah ahiei miring hai chawngpek kha rangai naw roh. ¹⁵ Riethieng hai dieng tu ih kholok riethieng inih. Inia rono hai dieng tu iawm riethieng awm mak. Amani mining le lungthimshe kha pawrche chang pe uh. ¹⁶ Amani na Pathien jet miring kha kanih ti uh, inia amani chonthaw a ama kha jawt u mak. Amani na mipawrche, chawng rangai boi miring chang u jarkhan, atha chon rikip rang khan rutuk boi chang uh.

¹ Khania nang tu miruchukna atha kha le aracha kha riei roh. ² Patar hai kha mulung renem a awmna rang, ningsha a, mulungnet a, takashawn a riethieng le numpok a adoirat kha changna rang, riei pe roh. ³ Nutar hai kha khatikhan richit a awmna rang, ashie mulung pokna boi rang, juneh khan shok changna boi rang, atha ruchuh oja nitna rang, riei pe roh. ⁴ Makha nainu noi hai na amani inkopa hai kha numpokna rang le amani nai hai kha numpokna rang, mawshawkna `khat nitna rang a inih. ⁵ Khan makha mulung menetna rang, riethieng, inshung kha thatak a ishinna rang, amani inkopa haitak dieng khan redena rang a inih. Makha na Pathien chawng kha mieshietna boi rang a nih. ⁶ Khatikhan mieila noi hai kha`awm mulung menet ngamna rang, rachah roh. ⁷ Ih kholok a atha chon endar `khat nitna rang, nang nining a mumuk roh. Nang miruchukna khan ningsha le a`am boi kha machang roh. ⁸ Nang chawngriei khan atha le heng boi kha machang roh. Makha na nang norodoi pui ama kha majak rangnih. Khan nang dieng ashie rieina kha niei naw nih. ⁹ Shok hai na amani pumpa hai awnoi a awmna rang le irikip a ningminit pe a amani le perawlawna boi rang, riei pe roh. ¹⁰ Amani na rawt boi a rutukthep takashawn kha mumuk rosho. Makha na ih kholok a nashandampa u Pathien miruchukna kha rohoimashak rangnih. ¹¹ Ajarla mi kholok rang a shandamna jong chawi Pathien numpokmirit kha jong lar joi. ¹² Pathienjet boi le manmieshie ditrekhena kha jawtna boi rang kieini hi nuruchuk u joi. Khajarkhan mahi tun a pha hin tu mulungnet a, adik a, Pathien jet a aring rang nashok uh. ¹³ Khan ngakmining rahvanmukna, khan rashang napathien u le nashandampa u Jesu Christa na lurtak a larna kha kieini na ngaklam a na`awm u inih. ¹⁴ Christa kha na nining a kieini rang khan rurepeh joi. Makha danishawnboi kholok ah put ah nakhekna rang le, atha chon hai rang a ningaw, ama miring `khat a riethiengmashakna rang a inih. ¹⁵ Hihaihi riei tana mawshawk roh. Chawngpek kholok kha le rachah roh. Tute na nang kha adawk `khat a numuh naw rosho.

¹ Amani kha rampo hai le chamniei hai awnoi a awmna rang, chawng juina rang, atha chon rikip a rashamna rang, ² tute dieng chawng shie rieina boi rang, lungdam a awmna rang, mulung renem a awmna rang le mi kholok dieng redena kha mumukna rang, amani kha miningmashakret roh. ³ Ajarla kieiniawm pha `khat khan mimawng, chawngrangai boi, mi na imohon, ditrekhe hai le hoina shikshik chon ruthaw, ashie awmchan le manarshie khan a ruring, mi na imukmak le khatlekhat chung a mukmakna aniei nuruchang uh. ⁴ Inia nashandampa u Pathien miritna le numpok kha miring hai dieng lar phakhan, ⁵ tharmoshok rushukna le Ratha Riethieng matharna jar a, ama na kieini hi inurushan inih. Makha kieini na niruthaw u dikna chon hai jar a nimak a, ama ninghoina jar a inih. ⁶ Nashandampa u Jesu Christa jar a Ratha Riethieng kha nuchung ua rothom a ama na inojongliei pe u inih. ⁷ Makha, ama numpokmirit jar a kieini hi nimidiksho u le, kumshawt ringkho ngakmining dungjuia, koklo hai kha nachangna rang a inih. ⁸ Mahi takashawn rang a rutuk chawng inih. Khan hihaihi nangni na rawnaw a nimenet u rang a hi kidit inih. Makha Pathien takarushawn miring hai kha na atha chon hai kha riringtak a tawnna u rang a inih. Khahaikha miring hai rang a atha le nemna nieinak kha inih. ⁹ Inia chawngrieshiet amawng hai, thoinakeina hai, roshona hai, Dan chungchanga rieshietna hai kha lawi u roh. Ajarla amani kha nemna boi le arok nieinak kha inih. ¹⁰ Akhat changna le adi changna khan mi reshenmashak chonthaw miring kha riei pe roh. Khashole ama kha lawi roh. ¹¹ Kha`ang miring kha ashawi le munu ithaw khan nining a reheng nana inih, iti kha jet roh. ¹² Artemas ninawkle Tychicus kha nang dieng kavaktir phakhan, Nicopolis ah kiei dieng vatnangir rang thaw roh. Ajarla makhawn kiei na phabi kemehek jawt. ¹³ Danthieipa Zenas le Apollos amani khomijinna khan ravatna boi rang, nang ngamtukshe a shan roh. ¹⁴ Khan nimiring hai na`awm atha chon khan mulung repena rang le rangai akhawk niei miring hai kha mumuknathiei rang, ruchuh u rosho. Makha amani na ara boi changna boi rang a inih. ¹⁵ Kiei le awm miring kholok na nangni kha chubai nepek uh. Takashawn a kieini numnapoh miring hai kha chubai peh u roh. Nang kholok chung a numpokmirit kha a`awm nih rosho. Amen.