PHILEMON

¹ Christa Jesu shurkhop Paul kiei le uliennai Timothy na kunumpok le kochonthaw puishom u Philemon nang dieng le ² kunumpok Apphia, khan karamiring chang pui Archippus, khan nang in ah biekrup dieng kiemiejiek. ³ Napa u Pathien le Pumi Jesu Christa na numpokmirit le lungdamna kha nangni dieng nepeh u rosho. ⁴ Nang rang kapathien kha kamapak. Kiei na nikna kieniei phakhan, nang riming kaban jawnjai. ⁵ Ajarla Pumi Jesu le miriethieng hai kholok dieng a nanginiei nang numpok le nang takashawn kha kejet joi. ⁶ Nang takashawn ringruchunna kha nangni dieng a awm atha kholok nangijetna jar a takimachang inih, tia kinik inih. Mahi atha nieinak hai hi Christa jar a inih. ⁷ Ajarla nang numpok kha na ajeng a ningaina le lungar nepek uh. Ajarla uliennai, miriethieng hai mulung kha nang na nangmathar u joi. ⁸ Khajarkhan thaw rang a rohoi thawna rang a Christa riming a chawng pekna rang, lungar kha kieniei. ⁹ Khanikengta numpok dungjuia Paul kiei na, tar `khat a le tun Jesu Christa shurkhop `khat a, kinengen inih. ¹⁰ Khoplam a kaw`awmlai a kimoshok, kashapa Onesimus rang, nang dieng nikna kiniei inih. ¹¹ Ama kha matienglai tu nang rang nemna boi runih, inia tuntu nang le kiei rang nemna kha chang joi. ¹² Ama hi nang dieng kivaktirret inih. Khajarkhan kumulungtak `khat ang a, nurupawm pe roh. ¹³ Athachawng rang a shurkhop a kaw`awm shung hin, nang ruhut a, kochon nawthawna pe rang, ama hi kiei dieng kirutet jawt inih. ¹⁴ Inia nang jawtna awm boi a kiei na iawm ruthaw jawt mi`ing. Makha nang chonthaw atha kha thawboithaboi `khat a niboia, ningrepeh a nitna rang a inih. ¹⁵ Ama kha kumshawt a nangruloina rang, pha bawngte ama na nang le rureshen nithiei. ¹⁶ Ama kha shok `khat a niboia, shok chung a awm, khinniei a numkipok uliennai kha nih joi. Nang na numpodet roh, ajarla ama hi miring le Pumi maikung a uliennai kha inih. ¹⁷ Khajarkhan kiei hi nang le chonthawshom `khat a nangnoloi joiatu, kiei nanginoloi rang a kha ang a, ama kha ruloi roh. ¹⁸ Khania ama na nang dieng irehena ninawkle lieishie niei joiatu, makha kieshiermushung khan tet roh. ¹⁹ Hihai chawng hi Paul kiei na kukhuttak le kimiejiek inih. Kiei na thung rang kanih. Nang pumtak kha kiei dieng a lieishie `khat inih, ti jar a kiei na kiriei nimak. ²⁰ Inih, Aw uliennai, Pumi riming a nang ah put ah mahi nemna hi kiei na niei rawng. Pumi riming a kumulung hi namapar pe roh. ²¹ Nang chawngjuina khan rangamna kieniei jar a, nang dieng kimiejiek inih. Kirieinek hin khedet a nangthaw rangnih, iti hi kejet. ²² `Khatret tu, kiei rang tungna nururasham pe roh. Ajarla nangnik jar a Pathien na kiei hi nang dieng navakpek rangnih, iti hi takakawshawn. ²³ Christa Jesu jar a koshurkhop chang pui, Epaphras na chubai nepek. ²⁴ Kochonthaw pui hai: Mark, Aristarchus, Demas le Luke na chubai nepek uh. ²⁵ Nupumi Jesu Christa numpokmirit kha na nang ratha u le a`awm nih rosho. Amen.