MARK

¹ Mahi Pathien Shapa Jesu Christa athachawng putna kha inih. ² Hitihin Thiempulien hai behangbuk ah rumiejiek: “Enro, chawngchawipa kha nang matieng kojongtir joi. Ama na nang maton ah lam nokon pe rangnih.” ³ “Ramthim ah hesho `khat na ra`ai, ‘PUMI lam kha kon pe roh. Ama lam hai kha moton pe roh.’ ” ⁴ John na ramthim a rular a mulung lek mumukna rang le Pathien dieng hiei a munu hai rangaidamna kha mukna rang, baptisma iloi u rang a inih, tia chawng rushem. ⁵ Khan Judea ram ah awm le Jerusalem ah awm mi kholok na ama dieng rushe uh. Makhan amani munu hai kha rurophong ua, Jordan tuidung khan amani kholok kha ama na baptisma rupek uh. ⁶ Khan John na sharingshiei sham kha rurieshiei, mevun kawngkhit kha rukhit, khan ama na khaishawr le ram khoining rushak. ⁷ Khan ama na ruriei, “Kanuk ah ajong rang a ama hi kieinek a ranak nieidet, kiei na bu a ama kethawp rui thut rang khan rutuk mi`ing. ⁸ Kiei na nangni kha tui ah baptisma kunurupek uh, inia ama na tu Ratha Riethieng le baptisma nepek u rangnih.” ⁹ Khalaikhan Jesu na Galilee ah awm Nazareth ah put ah rushe a, Jordan khan John na baptisma rumoloi joi. ¹⁰ Tui shung ah put ah hawng shokphit `le, ama na ravan rawlawng a Ratha na vashu ang a ama riding a jong chum kha rumuk. ¹¹ Ravan ah put ah he `khat hi jong shok, “Numkipoktak kashapa kha nangnih, nang chung a ningnitna kha kieniei joi.” ¹² Khan Ratha na ama kha ramthim ah ruchawirelen joi. ¹³ Makha ramthim khan ni shawm mili Satan na rulem a ramsha hai le ruawm. Khashole ravantir hai na ama chon kha jong thaw pe uh. ¹⁴ Khan John kha lungroko shung a rutet shole, Jesu na Galilee ah rushe a Pathien rengchangna athachawng kha rushem. ¹⁵ Ama na ruriei, “Apha kha hawng shun joi, Pathien rengchangna kha nai joi. Nang mulung lek u roh, khan athachawng kha takashawn u roh.” ¹⁶ Khan ama na Galilee Thampui pang kha rujotlai khan, Simon le anaipangpa Andrew na thampui ah len iruvawr u kha vak muk; ajarla amani kha ngashur miring runih uh. ¹⁷ Khan Jesu na amani dieng ruriei, “Kanu nujui u roh, kiei na nangni kha mishur miring namachang u rang kanih.” ¹⁸ Khajarkhan relentak a len hai kha mak ua anu rujui u joi. ¹⁹ Khan ama na rushebawt `le, Zebedee shapa James le anaipangpa John kha rokong shung ah len hai kha iruphawt ua ruawm u kha vak muk. ²⁰ Relentak a amani kha rukoi. Khan apa u Zebedee kha shok moroi hai le rokong ah mak ua, anu rujui u joi. ²¹ Khan amani na Capernaum ah rushe a, relentak a Sabbath nikho hin ama na synagogue ah rulut a ruruchuk. ²² Ama miruchuh hai khan, shinrudawng pe uh, ajarla danoja hai kha ang boi a, chamnieitak a amani kha iruruchuk inih. ²³ Ratha rono na ichutna miring `khat synagogue khan ruawm. ²⁴ Ama na ra`ai a ruti, “Kieini hi ih lawt rang a nangiti maw nih, Aw Nazareth Jesu? Kieini hi mathang rang a va maw nangnih? Nang tu Pathien Miriethieng ama kha nangnih, iti hi kejet uh!” ²⁵ Makhan Jesu na ama kha rawkawk a ruti, “Awmchien roh, ama shung ah put ah vak shok roh!” ²⁶ Khan ratha rono kha na enchak a runawk a helehoi le ama shung ah put ah vak shok joi. ²⁷ Makhan mi kholok na shindawngna runiei uh. Khajarkhan rawdawn nana ua ruti uh, “Mahi imaw nih? Ih miruchukna athar maw nih? Raikho rono haishe chamnieitak a chawngpek a amani na ama chawng kha jui pe uh.” ²⁸ Khajarkhan Galilee ram ah awm miring kholok dieng ama riming kha rular perelen joi. ²⁹ Khan synagogue ah put ah vak shokphit `le, James na John le roroia Simon le Andrew in ah rushe uh. ³⁰ Simon tarpi kha raitun na tun a ruja a ruawm. Khajarkhan amani na relentak a Jesu dieng rumejet uh. ³¹ Khan ama kha rujawng a ama khut ah mukui a rumothoi. Khan raitun kha na relentak a rumathan a amani chon kha ruthaw pe joi. ³² Khan nitak a nilut pha khan, ana miring le raikho hai na ichutna miring hai kha ama dieng vak chawi uh. ³³ Kha khopui shung ah awm mi hai kha na mawkawt kha lochip a ruruchun uh. ³⁴ Khan rai shikshik le ana hai kha rumadam, khan raikho haiawm runawt. Raikho hai na achawng rang a kha rujawt pe mak, ajarla amani na ama kha rujet uh. ³⁵ Khan jingkara varmuk hin ama na ruthoi a ramthim ah rushe, khan makha mun khan nikna runiei. ³⁶ Khania Simon, khan ama le rawtawp hai na ama anu kha ruthir uh. ³⁷ Khan rumuk u phakhan, ama dieng ruriei uh, “Mi kholok na nang kha natawk uh.” ³⁸ Inia amani dieng ruriei, “Chawng keshemnathiei rang, aranai kho `khat ah she u rang rawi, ajarla hijarhin a ajong kanih.” ³⁹ Khan Galilee shung kholok ah awm amani synagogue hai khan ama na chawng rushem, khan raikho hai kha runawt. ⁴⁰ Makhan raithawnaw tawngpa kha na ama dieng rushe, rukhuk rushun, khan nik a ruti, “Nangjawt a tu, kiei hi nangnieriethieng ngam.” ⁴¹ Ama chung a lainatna runiei, khan Jesu na ukhut rushawn a rushit, khan ama dieng ruti, “Kajawt, riethieng kha nih rang roh.” ⁴² Ama na rurieisho le relentak a raithawnaw kha na ama kha rumathan joi. ⁴³ Khan Jesu na khawktak a chawngruben a ama kha rumesherelen joi. ⁴⁴ Khan ama dieng ruriei, “Riring roh, tute dieng riei naw roh. Inia thiempu dieng nang pumtak kha vak mumuk rang roh. Nang riethiengna jar a Moses na chawngirupek hai kha le vak rawthawi roh. Makha na amani dieng kungchangna kha nih rangnih.” ⁴⁵ Khanikengta ama na rushe phakhan, ranaktak a chawng kha rophong vak put joi. Khajarkhan Jesu na malangsheng a khopui ah rulut ngamlai mak. Inia thimnabieng mun ah ruawm joi, khan shie rikip ah mi hai na ama dieng va uh.

¹ Nikhothang shawtbawt `le Capernaum vak lutret phakhan, ama kha in `khat ah awm, iti kha rujet uh. ² Relentak a mi tampui vak ruchun ua mawkawtshe khan mun rutawnglai mak. Makhan ama na amani dieng chawngruriei pe. ³ Makhan takthi miring `khat pasha mili na dawm a ama dieng vak chawi uh. ⁴ Inia mi rawphai jarkhan, ama kung ah vat pui ngam u lai mak. Khajarkhan inphu kha ama riding ah lik ua rurevengmashak uh, khan takthipa kha ajana kha le jong muchum uh. ⁵ Khan amani takashawn kha rumuk phakhan, Jesu na takthipa dieng ruti, “Shapa, nang munu hai kha arangaidam joi.” ⁶ Inia khakawt ah rushuh danoja hai kha na amani ningmuruk a rurawdawn nana uh, ⁷ “Ijar a hi miring hi na Pathien mieshietna chawngiriei maw nih? Pathien niboia tu na maw munu hi arangaidam ngam awm?” ⁸ Jesu na amani ningmuruk a khatikhan rawdawn nana u kha aratha a rujetrelen a, amani dieng ruti, “Ijar a hihaihi mulung a nangimining u maw nih? ⁹ Atakthipa dieng hin, ‘Nang munu hai kha arangaidam joi,’ iti ninawkle, ‘Thoi roh, khan nang jana kha chawi tana lawn rang roh,’ iti hi kar hin ih kha maw baidet? ¹⁰ Miring Shapa na rieliei chung a munu rangaidamna cham kha ieniei,” iti hi nangjetna u rang a inih, khan takthipa dieng ruti, ¹¹ “Nang dieng kienieriei, thoi rang roh, khan nang jana kha loi tana nang in ah she rang roh.” ¹² Khan relentak a ruthoi a ama jana kha lik a vanoi maikung a rushe joi. Mahin mi kholok kha shinrudawng pe uh, khan Pathien kha mulurlam a ruti uh, “Hi ang hi mulak u makmelai!” ¹³ Khashole thampui kawmchang tieng rusheret a mipui na ama dieng va uh, khan ama na amani kha ruruchuk. ¹⁴ Khan ashe le roroia, Alphaeus shapa Levi na khaichana pekna in ah rushuh kha vak muk. Jesu na ama dieng ruti, “Nujui roh.” Khan ama na ruthoi a anu kha rujui joi. ¹⁵ Khan hitihin ruawm, ama na Levi in ah rushulai khan, khaichana roshong hai le munu miring hai na`awm Jesu le khan akhaichawi hai le maicham ah rushuh ua bu runek uh. Ajarla anujui hai kha rurawp uh, khan amani na anu kha rujui uh. ¹⁶ Ama na munu miring hai le khaichana roshong hai le bu irunekshom kha Pharisee hai le danoja hai na vak muk u phakhan, akhaichawi hai dieng ruti uh, “Ijar a khaichana roshong hai le munu miring hai le nekleshak ishakshom maw nih?” ¹⁷ Khan Jesu na rujet a amani dieng ruti, “Adam miring hai na loipu rangai mak, inia ana hai na irangai inih. Midik hai kha akoi jong nih mi`ing, inia mulung lekna rang, munu miring hai kha akoi jong kanih.” ¹⁸ Khan John khaichawi hai le Pharisee hai na chamrarudoi uh. Khan amani na ama dieng va ua vak rawdawn uh, “John le Pharisee hai shok hai na chamradoi uh, inia ijar a nang khaichawi hai na idoi boi u maw nih?” ¹⁹ Makhan Jesu na amani dieng rumashang, “Moilawm hai kha na moipa kha le awm shung khan chamradoi u nih maw? Moipa kha le awmlailim tu chamradoi u naw nih. ²⁰ Inia moipa kha amani ah put ah ichawina pe nikho hai kha hawng shok rangnih. Kha nikho hai khan amani na chamradoi u rangnih. ²¹ “Tu na`awm irikin boi pon `thar lek kha pon lui a chingai mak, khanitatu ibo `thar kha na hawng rikin ning, tia shiedet a chiet rangnih. ²² Khan tu na`awm alui mevun jukawk ah ju `thar thangai mak, tha joiatu, ju `thar kha na mevun jukawk lui kha khoi rangnih. Inia ju `thar kha mevun jukawk `thar ah thong rang a inih.” ²³ Khan hitihin rushok, Sabbath nikho `khat hin Jesu na shangbiei hai kha rakan a rupang. Amani na rupang le roroia, akhaichawi hai na shangvui hai kha achin ruput uh. ²⁴ Khan Pharisee hai na ama dieng ruti uh, “Enro, Sabbath nikho a ijar a amani na Dan nih boi ithaw u maw nih?” ²⁵ Inia amani dieng ruriei, “David na irawtawp pui hai le ravat a vawnrucham pe pha a iruthaw: ²⁶ Abiathar na thiempu rashang ruthawlai khan, David na Pathien in ah rulut a, thiempu hai nih boi na shak rang Dan nih boi rawthawina tan kha irawtawp pui hai diengawm irupek a irushak kha nangni na rutelak u makche maw?” ²⁷ Khan amani dieng ruti, “Sabbath nikho hi miring hai rang a ikon inih, inia miring hai hi Sabbath rang a ikon nimak. ²⁸ Khajarkhan Miring Shapa kha Sabbath Pumi kha`awm inih.”

¹ Khan ama na synagogue ah rulutret a makhan khutchar miring `khat ruawm. ² Khan amani na ama jar pekna rang, Sabbath nikho khan madam maw, tia ruva uh. ³ Inia khutcharpa dieng ruti, “Akar hin vak ding roh.” ⁴ Khan amani dieng ruti, “Sabbath nikho hin atha thaw, ninawkle ashie thaw, ringkho shan, ninawkle ringkho mathang, ih kha maw Dan nidet?” Inia ruawmchien uh. ⁵ Makhan mulung hang le roroia, amani kha enroko ruthaw phakhan, amani mulung michimna u khan mulung jumna runiei. Khan anapa dieng ruti, “Nang khut kha vak shawn roh.” Khan ama na rushawn, khan ama khut kha shik `khat kha ang a rudam pe joi. ⁶ Khan Pharisee hai na nawtshun a rushok ua ama kha itia maw that rang, tia Herod miring hai kha le chawng vak rashak u joi. ⁷ Inia Jesu na akhaichawi hai le roroia thampui tieng rukir joi. Khan Galilee le Judea ah put ah mipui na rujui uh. ⁸ Jerusalem, Idumea, khan Jordan vara ah put ah, Tyre le Sidon ramroko ah awm mipui `khat na ama na iruthaw chon hai kha jet ua ama dieng rushe uh. ⁹ Khan mipui kha na ru`umna boi rang, ama rang rokong ashin `khat rashamna pe rang, akhaichawi hai dieng ruriei. ¹⁰ Ajarla khadawr a arawp hai kha irumadam inih. Khajarkhan raitawng hai kholok na shih rawng, tia ama dieng rurawshawn uh. ¹¹ Khan raikho rono hai kha na ama kha rumuk u `le, bawklap a ra`ailam a ruti uh, “Nang hi Pathien Shapa kha nangnih.” ¹² Khan amani na ama kha malarna boi rang, khawktak a chawngruben uh. ¹³ Tun Jesu na lawn ah ruhawng a ama na idit miring hai kha rukoi a ama dieng rushe uh. ¹⁴ Khashole ama le rawtawp rang le chawngshem tir rang, ¹⁵ khan chamniei a ana hai kha madamna rang le raikho hai kha nawtna rang, shawmlieidi kha rumadan joi. ¹⁶ Amani khala, ama na Peter iti rimingrothom irupekna Simon, ¹⁷ Zebedee shapa James le James anaipangpa John. Amani dieng Boanerges iti rimingrothom ama na rupek. Makha tina tu “Khomelek Shapa hai” tina inih. ¹⁸ Andrew, Philip, Bartholomew, Matthew, Thomas, Alphaeus shapa James, Thaddaeus, Canaan miring Simon, ¹⁹ khan ama rujor Judas Iscariot, hihaihi inih. Khan amani na in `khat ah rulut u joi ²⁰ Khan mipui kha vak ruchunret ua amani kha tanshe rushah ngam u mak. ²¹ Khania ama inko hai na mahi rujet u `le, ashur rang rushe uh. Ajarla amani na ruti uh, “Ama kha vet joi.” ²² Khan Jerusalem ah put ah ajong danoja hai kha na ruti uh, “Ama dieng Beelzebul lut joi,” khan “Raikho hai reng ranak a raikho hai hi inawt inih.” ²³ Khajarkhan amani kha rukoi a rangshim a ama na ruriei pe, “Iti a maw Satan na Satan kha nawt ngam nih? ²⁴ Khan rengchangna `khat hi nining a reshen joiatu, makha rengchangna kha ding ngam naw nih. ²⁵ Khan in `khat hi nining a reshen joiatu, makha in kha ding ngam naw nih. ²⁶ Khan Satan na bibing a reshen joiatu, ama kha ding ngam naw nih, inia ama rang dawng kha nit pe rangnih. ²⁷ Tute na miratpa in ah lut a, miratpa kha khopbak nawkatu, ienieinak hai kha ranak a ro pe ngam nawnih. Makha shole ama in kha ranak a aro pe rangnih. ²⁸ Nangni dieng diktak a kinieriei u inih, miring hai munu kholok, khan amani na isho mimieshietna kholok kha arangaidam rangnih. ²⁹ Inia Ratha Riethieng chung a mieshiet ama kha na rangaidamna kha niei mak, inia kumshawt chepna kha muk rangnih.” ³⁰ Ajarla amani na “Ama shung a raikho rono awm pe,” ruti uh. ³¹ Khashole unu le anaipang hai kha va ua vai tieng dinglam a rungak uh, khan ama akoi mi rutir uh. ³² Mipui na ama kha ru`um uh. Khan ama dieng ruti uh, “Enro, nangnu le nang naipang hai na vai tieng natawk uh.” ³³ Makhan mashang a amani dieng ruti, “Tu kha maw kunu ninawkle kanaipang hai?” ³⁴ Ama na rokochip a rushuh hai kha enroko a ruti, “Enro, kunu le kanaipang hai kha hin awm! ³⁵ Tunita`awm Pathien mulungmining athaw ama kha kunu, kanaipangnu, khan kanaipangpa kha inih.”

¹ Khan ama na thampui kawmchang ah miruchuh ruputret. Makhan ama dieng mipui vak ruchun jarkhan, rokong `khat ah rushuh joi. Khalaikhan mipui kholok kha tu kawmchang ah ruawm uh. ² Khan amani kha rangshim tampui le ruruchuk, khan iruchukna khan amani dieng ruti, ³ “Rangai u roh! Enro, muchi vawrpa kha na muchi vawr rushe. ⁴ Ama na iruvawr le roroia hitihin ruawm, eshen kha lamkaw ah ruchu, khan ravan a va hai na jong shar uh. ⁵ Eshen kha piei arawp awmna boi lung kar ah ruchu. Pieipak kha thuk boi jarkhan, makha na relentak a hawng kei. ⁶ Khania ni hawng sha phakhan hawng re`em, khan rujung loi boi jarkhan, makha rovoi. ⁷ Eshen na riling hai kar a ruchu, khan riling hai kha hawng lien dedet a makha hawng liep. Makha na ara rumoshok ngam mak. ⁸ Inia eshen kha pieipak thatna mun ah ruchu a ara rumoshok. Ara kha hawng rawp dedet a shawm `thum, shawm `ruk, khan rajakhat hawng nih.” ⁹ Khan amani dieng ruriei, “Rangaina rang a nokor aniei ama kha na rangai rosho!” ¹⁰ Khan Jesu kha thiente a ruawmlai khan, iedieng ah awm hai kha le khan akhaichawi shawmlieidi kha na rangshim chungchang khan rurawdawn uh. ¹¹ Makhan amani dieng ruti, “Nangni dieng Pathien rengchangna chungchanga murukchawng kha jetna rang nurupek uh, inia vai tieng ah awm hai rang tu, rangshimrok a ipek inih. ¹² Makhala, ‘Aen miring hai na enthiei, inia muh u mak. Rangai miring hai na rangaithiei, inia jet u mak. Khanitnawkatu, amani na mulung lek a rangaidam rumuk u rangnih joi.’ ” ¹³ Khan amani dieng ruti, “Hi rangshim hi nangijet boi u maw nih? Itia maw rangshim kholok hai hi jet u rawng?” ¹⁴ Muchi vawrpa kha na chawng kha awvawr. ¹⁵ Inia hihai miring hi lam kaw ah acho muchi hai kha inih: chawng kha vawr pe, inia rangai u phakhan, Satan na varelen a amani dieng a ivawr chawng kha loi pe. ¹⁶ Khan lung arawp chung ah ivawrna miring hai kha hihaihi inih: chawng kha rangai u phakhan, ningai le roroia loirelen uh. ¹⁷ Inia rujung loi u boi jarkhan, ring shawt u mak. Chawng jar a epshawna ninawkle shawrana hawng phakhan, keruthuirelen uh. ¹⁸ Khan hihai miring hai hi riling kar ah achu muchi hai kha inih. Amani na chawng kha rangai uh, ¹⁹ inia ringkho mulungdawngna, nieilelung lemna le shikshik chung a ditrekhena kha na chawng kha liep pe u jarkhan, ara boi kha chang uh. ²⁰ Khania rieliei thatna ah ivawrna miring hai kha chawng rangai hai kha inih, ajarla irangai u chawng kha loi uh. Khajarkhan shawm `thum a, shawm `ruk a, khan arajah a ara kha moshok uh.” ²¹ Khan amani dieng ruriei, “Thaomiei kha tiengkum thoi ah ninawkle jakhang thoi ah itetngai boi nimak maw? Thaomiei shutna chung ah itetngai nimak maw? ²² Ajartu rophong boi rang rethe ih awm mak, khan avar ah avangir rang a rethe boi ih awm mak. ²³ Tunita`awm rangaina rang a nokor aniei ama kha na rangai rosho.” ²⁴ Khan amani dieng ruriei, “Nangni na nangijet u kha riring pui u roh. Nangni na dannangilak u kha nangni dieng danlak rangnih. Rangai hai nangni dieng nobo pe u rangnih. ²⁵ Khan aniei ama dieng khan arawpdet kha pek rangnih. Inia aniei boi ama dieng khan inieidakshe kha`awm, ama ah put ah loi pe rangnih.” ²⁶ Khan ama na ruriei, “Pathien rengchangna hi loipuk ah muchi ivawr miring kha le ra`ang inih. ²⁷ Shun le jan a aja nit a, athoi nita`awm, muchi kha hawng kei a hawng rawshawn; inia itia maw nih, iti kha ama na jet mak. ²⁸ Ajarla rieliei na nining a ara imoshok inih: rapapek a awdawn, dawn a uvui, khan dawn a vui shung ah uru hawng ship. ²⁹ Khashole ara kha hawng min phakhan, kawite le i`at inih, ajarla rawkhawm pha kha hawng shok nih joi.” ³⁰ Khan ama na ruriei, “Pathien rengchangna hi kieini na ih le maw ra`angmashak rang? Ninawkle, ih rangshim kha le maw mahi angriei rang? ³¹ Makha anchamru le ra`ang inih: pieipak chung ah vawr phakhan, rieliei a muchi kholok kar a ashindet inih. ³² Khania vawr phakhan, hawng kei, khan anshawbo kung kholok kar a aliendet kha hawng chang, khan abak lien hawng moshok. Khajarkhan ravan a va hai na ama rilip ah rubu konna uh.” ³³ Khan amani dieng chawng kha rangshim tampui le amani na irangai thieituk a khatikhan ruriei pe. ³⁴ Khan rangshim a niboia amani dieng ruriei pe mak. Khan ama khaichawitak hai dieng bing a rangshim kholok kha rumeler pe. ³⁵ Khanikhan ni hawng tah phakhan, amani dieng ruti, “Kieini thampui shir `khat tieng khawn she u rang rawi.” ³⁶ Khan amani na mirawp kha meshe shole, rokong shung ah ruawm kha ang a, ama kha rushe pui u joi. Khan rokong eshen haiawm iedieng ah ruawm. ³⁷ Khan shur hawng thoi a tuilawm kha na rokong kha hawng jem a rokong ah tui hawng lut joi. ³⁸ Inia Jesu na rokong kik `khat ah lukham thawir a ruja. Makhan amani na mothoi a ruti uh, “Oja, kathi u rang a hi nare u makche maw?” ³⁹ Khan ama na hawng thoi a rithi kha rawkawk a thampui dieng ruti, “Renem roh, awmchien roh.” Makhan rithi rang kha bang a rurinim joi. ⁴⁰ Khan amani dieng ruti, “Ijar a khadawrtak achih maw nangnih uh? Takashawn nanginiei boi u maw nih?” ⁴¹ Makhan amani kha ajeng a ruchih ua khatlekhat dieng ruriei uh, “Ih miringtak maw nih, rithi le thampuishe na`awm ama chawng irangai pe hi!”

¹ Khan amani na thampui vara `khat ah awm Gadarenes ram ah va u joi. ² Khan ama na rokong ah put ah vak shokphit `le, raikho rono alut miring `khat hi than ah put ah hawng shok rurawtawng puirelen. ³ Ama awmna kha thankung inih. Tute na ama kha thirakarui le khop ngam mak. ⁴ Ajarla shan hai, khan thirakarui hai kha le ama kha khop ua`awm, shan hai kha changhawt a thaw a thirakarui hai kha bawngbawng a irutet inih. Khan tute na`awm ama kha adek ngam ruawm mak. ⁵ Shunlejan a ama na thankung ah le maw chung ah enchak a rura`ai a, thiethien a ataksha kha lung le irit a ruawm jawnjai inih. ⁶ Khan ama na Jesu kha rakhat a rumuk phakhan, vak tan a ama kha chubai vak bawk. ⁷ Khan he rashangtak a ra`ai a ruti, “Rashangving Pathien Shapa, Aw Jesu, kiei hi ih nawlawt rang a nangiti maw nih? Kiei hi nangnawmawshawna boi rang, Pathien ban a kenengen.” ⁸ Ajarla ama dieng ruti, “Aw raikho rono, ama ah put ah vak shok rang roh!” ⁹ Khan Jesu na rurawdawn, “Nang riming imaw ti?” Ama na rumashang a ruti, “Kiriming tu Legion iti, ajarla kieini hi karawp uh.” ¹⁰ Khan amani kha makha ram shung ah put ah nawtna boi rang, ama kha enchak a irudawi inih. ¹¹ Makha mopang hai dieng khan vawk hawi lientak `khat na shak shak a ruawm uh. ¹² Khan raikho hai kha na runik a ruti uh, “Vawk hai dieng khawn lutnathiei rang, nitir u roh.” ¹³ Nawtshuntak a Jesu na rujawt pe, khan raikho rono hai kha vak shok ua vawk hai shung ah rulut u joi. Khan vawk hai kha rawkham ah shorshor a jong loi ua thampui ah rucho u joi, khan tui arah ua ruthisho u joi. Vawk hai kha bawp `di dawr runih uh. ¹⁴ Khan vawkroi hai kha na rutansho ua, makha khopui le kho shung khan chawng kha vak riei uh. Khan mi hai na ashok chon hai kha aen va uh. ¹⁵ Khan amani na Jesu dieng vatna u khan raikho na iruchutnapa, khan legion na irushurpa kha ponledier thaning a iruthaw a mulung ridiktak a rushuh a ruawm kha vak muk u `le, ruchih uh. ¹⁶ Khan raikho na iruchutna miringpa le vawk chung a ashok dan amuh hai na jirjar kha ava hai dieng ruriei uh. ¹⁷ Khan ram kha mathan a shokna rang ama dieng adawi ruput u joi. ¹⁸ Khan ama na rokong ah rulut phakhan, raikho na irushurpa kha na ama le rawlawpna rang, rudawi. ¹⁹ Inia Jesu na rujawt pe mak. Ama na ruti, “She tana nang inshung miring hai dieng Pumi na inuruthaw pe, khan lainatna inurutetna kha vak rophong rang roh.” ²⁰ Khan Decapolis ah rushe a Jesu na ama dieng khadawr a chon iruthaw pe chungchanga rophong vak put joi. Khan mi kholok na shindawngna runiei uh. ²¹ Khan Jesu na vara `khat tieng rokong a rakanthep phakhan, thampui kawmchang ah ruawm joi. Makhan mirawp lientak `khat na ama dieng vak ruchun uh. ²² Khan enro, Jairus iti synagogue lamkai hai kar a akhat na ama dieng rushe. Ama na Jesu kha rumuk phakhan, ekekung a rubawklap. ²³ Khan ama dieng enchak a inik a ruti, “Kashanu ashin kha athi rang rasham joi. Ama damna rang, navat pe tana nang khut hai kha le navakshit pe roh, khan ama kha madam a ringna muk rangnih.” ²⁴ Khan Jesu na ama le rawtawp a rushe joi. Khan mirawp kha na anu rujui ua ru`um uh. ²⁵ Khan kum shawmlieidi thijanrai tawng nupang `khat ruawm. ²⁶ Khan ama hi loipu hai dieng rure`en a shawna rudawi, ajarla inieilim mehekviek a rure`enawm, runemna mak a adam ruhut a rushie shishit inih. ²⁷ Jesu jar kha rujet phakhan, mipui kar a vak lut a ama na irieshiei pon kha vak shit pe. ²⁸ Ajarla ama na ruti, “Irieshiei pontak a kha`awm kishit pe a tu, kiei kadam rangnih.” ²⁹ Kha phatak khan, ama thishen ajan kha ruchat pe joi. Khan ama na natna ah put ah adam kha upumtak a rujet joi. ³⁰ Khan Jesu na nining a ama ah put ah ranak she joi, iti rujet jarkhan, mipui kar a hieirelen a ruti, “Kirieshiei pon hi tu na inishit pe maw nih?” ³¹ Makhan akhaichawi hai na ama dieng ruti, “Mirawp hituk hi na inaum kar hin ‘Tu na kiei hi inishit maw nih?’ nangti.” ³² Khan ama ashinu kha mukna rang, enruroko joi. ³³ Inia nupangnu kha na atak chung a ashok hai kha rujet a ichihai a rawnawklam a amaikung a bawklap a adik kha ruriei joi. ³⁴ Khan ama dieng ruti, “Shanu, nang takashawn kha na nang kha namadam joi, damveng a she rang roh. Khan nang natna ah put ah dam rang roh.” ³⁵ Khatikhan Jesu na roirurieilai khan, synagogue lamkaipa in ah put ah mi eshen va ua ama dieng thang vak koi uh, “Nang shanu kha thi joi, Ojapa kha ashawt a nangimawshaw maw nilai?” ³⁶ Inia Jesu na amani riebiekna kha jetphit `le, synagogue lamkaipa dieng khan ruriei, “Chih naw roh, ringte ringrep roh.” ³⁷ Khan Peter, James, khan James naipangpa John, hihailim hi niboia, tute na irawtawp pui rang kha rujawtlai mak. ³⁸ Khan amani na synagogue lamkaipa in kha rushok u `le, rie`ieklam a le murungmurung a ruchap u kha ama na vak muk. ³⁹ Khan ama na in ah rulut a amani dieng ruti, “Ithaw reshereshe a chap maw nangnih uh? Naitenu hi athi nimak, inia amiei keng.” ⁴⁰ Inia amani na ama kha rumunui uh. Makhan ama na amani kha vairumoshokviek a, naitenu nulepa, khan ama le rawtawp hai kha ruchawi a naitenu jana mun khan rulut joi. ⁴¹ Khan naitenu kha ukhut le rudawm a ama dieng rubiek, “Talitha cumi.” Mahi “Naitenu, kieina kieniebiek, thoi rang roh,” tina inih. ⁴² Kha phatak khan, naitenu kha othoi a hawng lawn joi, ajarla ama kha kum shawmlieidi runih joi. Khajarkhan amani kha shindawngna chung a shinrudawng pe uh. ⁴³ Khan tute na hihaihi jetna boi rang, ama na chawngruben joi, khan naitenu kha nekleshak pekna rang, amani dieng ruriei pe joi.

¹ Khan makha mun kha mak a ama kho tieng rushe joi, khan akhaichawi hai na ama kha rujui uh. ² Khan Sabbath nikho hawng nih phakhan, synagogue ah miruchuh ruput. Rangai mi tampui kha shinrudawng pe ua amani na ruti uh, “Hi miring hi na hihaihi khoshekawt a imuk maw nih? Khan ama dieng a ipek shingna hai le ama khuttak le ranakniei chon hai ithaw hi imaw nih? ³ Mahi James le Joses, khan Juda le Simon ulienpa, Mariam shapa, thingthiempa kha nimak maw? Khan ashar hai hi hin kieini le awm nimak maw?” Hitihin ama kha rurakhana uh. ⁴ Khan Jesu na amani dieng ruriei, “Thiempulien `khat hi ama khotak, ama inkoshangramtak le ama inshungkhurtak dieng niboia, richit kha imuk boi nimak.” ⁵ Khan kha mun khan, ana dikhat chung ah ukhut le shit a irumadam kha niboia, ranakniei chon `khatshe ruthawlai mak. ⁶ Khan amani takashawn boi khan shinrudawng pe. Khan khokho ah miruchuh rang rushe joi. ⁷ Khan ama na shawmlieidi kha rukoi a raikho rono hai kha nawtna rang, cham kha rupek a ididi a rawtawpmashak a atir ruput joi. ⁸ Ama na amani dieng chawng rupek, makhala khomijin nangshena u khan shunshawraw `khat niboia, nekleshak, pai, khan kawngkhit a shier chawi u naw roh. ⁹ Khan kethawp thaw u roh, khan kotai idi ko u naw roh. ¹⁰ Khan amani dieng ruriei, “Nanglutna ih in khan nita`awm, makha mun ah put ah nangrawthawt u malalim, kha mun khan awm u roh. ¹¹ Makhan mi hai na nangni kha thaning a nurujawng u nawk a, khan nangiriei u kha narangai pe u nawkatu, makha nangmathan a nangshe dieng u khan, amani chung a kungchangna rang, nang kepha u thoi ah vaiphin kha khawng u roh. Nangni dieng diktak a kinieriei u inih, chawngshatna Nikho khan, makha khopui rangnek hin Sodom le Gomorrah rang a kha doithieidet chang rangnih!” ¹² Khan mi hai na mulung lekna rang, amani na rushe ua chawng vak shem uh. ¹³ Khan raikho tampui runawt pe uh, khan ana hai tampui kha thaorunawt pe ua rumadam uh. ¹⁴ Khan Jesu riming kha ajeng a rular jarkhan, Herod reng na rujet a ruti, “Baptisma apeh John hi athi hai kar a hawng thoi joi. Hijarhin a ranakniei chon hai hi ithaw inih.” ¹⁵ Eshen na ama kha “Elijah keng,” ruti uh, inia eshen na tu ama kha “Thiempulien `khat, ninawkle thiempulien hai le ra`ang akhat inih,” ruti uh. ¹⁶ Herod na rujet `le, ruti, “Kiei na ring kitan pe John kha hawng ring joi!” ¹⁷ Ajarla Herod amatak na ama ulienpa Philip nupuinu Herodia kha iruniei inih. Khajarkhan John kha irushur, khan lungroko shung ah khop a irutet inih. ¹⁸ Ajarla John na Herod dieng ruti, “Nang ulienpa nupuinu nangiloi hi Dan nimak.” ¹⁹ Mahi jar hin, Herodia na rumukmak a ama kha thatna rang, rumining; inia ama na ruthaw ngam mak. ²⁰ Ajarla Herod na John kha midik le miriethieng, iti rujet jarkhan, ruchih a ama kha irurung inih. Khan John na iruthaw tampui kha rujet `le, ningaitak a rurangai. ²¹ Khan chanthatna nikho `khat hawng shok joi, makhala Herod shokna nikho hin chamniei hai, chonpo hai, ramiring tieng a alien hai le Galilee tieng ah alienarang hai rang bumichinna `khat runiei. ²² Hipha hin Herodia shanu hawng lut a hawng lam. Herod le ama dieng ah buneh rang a ashuh hai kha ningruminit pe. Rengpa kha na nungaknu dieng ruti, “Nangiditlim kha nieriei roh, makha kiei na nepek rang kanih.” ²³ Khan ama dieng chawngrurakham, “Ih kha nita`awm nieriei roh, kerengchangna khoi `khat nita`awm, nang dieng nepek rang kanih.” ²⁴ Khan ama na rushe a unu dieng vak rawdawn, “Kiei na imaw nih ning?” “Baptisma apeh John lu,” tia unu na rumashang. ²⁵ Khan ama na rengpa dieng pangrek a vak nik a ruti, “Tuntak hin baptisma apeh John lu kha rangmai chung hin nanginepek rang a hi kadit.” ²⁶ Makhan rengpa kha ajeng a mulungrushaw pe. Inia ama chawngrakham le iedieng ah ishut pui koimiring hai jarkhan, jawt pe boi, iti ruthawlai mak. ²⁷ Khan rengpa kha na relentak a mimahangpa kha vak mokoi a ama lu kha vak chawina rang, chawng rupek joi. Khan ama na rushe a lungroko shung ah awm John kha ring vak tuk pe joi. ²⁸ Kheng `khat ah John lu kha vak chawi a nungaknu dieng vak pek a nungaknu kha na makha unu dieng rupek joi. ²⁹ Khan John khaichawi hai na rujet u phakhan, rushe ua ama rok kha vak loi uh, khan than ah makha vak khum u joi. ³⁰ Khan tirtawn hai kha na Jesu dieng vak ruchun ua iruthaw u le iruruchuk u kholok chungchanga thangrukoi uh. ³¹ Khan amani dieng ruti, “Thawh, nangni richinkhat ramthimna mun ah shik a shawvakmuchum u roh.” Ajarla mi tampui shehawng a awm jarkhan, bu nekna rangshe chanthatna runiei u lai mak. ³² Khajarkhan lawpte u hin ramthimna mun ah rokong a rushe u joi. ³³ Khan amani rushe u kha mirawp na rumuk uh. Khan mipui kha na rujet u jarkhan, khopui rikip miring hai kha na vak tan ua matieng rushok uh, khan ama dieng lawp `khat a vak ruchun u joi. ³⁴ Makhan Jesu na kawmchang tieng hawng phakhan, mirawp kha vak muk `le, kengamroi awm boi kengam hai kha ruang u jarkhan, amani chung a lainatna runiei. Khajarkhan amani kha chonmun-lamun tampui ruchuh ruput joi. ³⁵ Khan nikhothang shawtbawt `le, akhaichawi hai na ama dieng she a ruti uh, “Mahi mun hi ramthim inih, khan apha`awm shemeng joi. ³⁶ Amani hi diengvai ah awm khopui le kho hai dieng tan vak rawchawkna u rang, tir rang roh. Ajarla nekleshak `khatshe niei u lai mak.” ³⁷ Makhan mashang a amani dieng ruti, “Amani kha shak rang dikhat peh u roh.” Makhan amani na rumashang uh, “Kieini na she a dinari rajadi a tan vak rawchawk a amani dieng kipek u rang maw nih?” ³⁸ Makhan amani dieng rumashang, “Nangni na tanpek ijat maw nangniei uh? She u tana vak en u roh.” Khan amani na rujet ua ruti uh, “Tanpek rahnga le nga idi awm.” ³⁹ Khan kholok kha lawplawp a champi chung ah mushutna rang, amani dieng chawng rupek joi. ⁴⁰ Khan amani na hawi rajakhat a le hawi shawm rahnga a lawplawp a rushuh u joi. ⁴¹ Khan ama na tanpek rahnga le nga idi kha loi a ravan tieng en a rahvan runik. Khan tan hai kha okhoi a amani dieng shemna rang, akhaichawi hai dieng rupek. Khan nga idi kha vanoi dieng ama na rushemviek joi. ⁴² Khan amani kholok na rushak ua vawn ruship pe uh. ⁴³ Khan lekvai le nga hai kha tiengkum shawmlieidi shipmer a rurawkhawm uh. ⁴⁴ Aneh-ashah apa hai kha bawp rahnga runih uh. ⁴⁵ Khan mipui kha rureshen pui laitak khan, akhaichawi hai kha thampui shir `khat ah awm Bethsaida tieng rokong a rurelenmashak joi. ⁴⁶ Khan amani kha le mathanna chawngruriei shole, anih rang lawn tieng ruhawng joi. ⁴⁷ Khan nitak pha hawng shok `le, rokong kha thampui laitak ah ruawm joi, inia ama tu, mo khan iethien a ruawmlai. ⁴⁸ Khan rithi na maton khar a rang jarkhan, amani shawna kha rumuk pe. Khan voimili changna vengpa pha khan, thampui chung ah vak lawn a amani dieng rushe a amani kha khe rang ruthaw. ⁴⁹ Khan tui chung ah vak lawn kha amani na rumuk u `le, rathamieshie keng ti ua amani na rura`ai uh. ⁵⁰ Ajarla amani kholok na ama kha muk u `le, rurawthawk uh. Relentak a amani le riebieh a ruriei, “Nang mulung mangar u roh! Kiei kanih keng; chih u naw roh.” ⁵¹ Khan amani awmna rokong khan, hawng ka a rithi kha rubang joi, khan ibibing ua rekhenna awm boi a shinrudawng pe uh. ⁵² Ajarla amani mulung rumichim pe u joi jarkhan, amani na tanpek chungchanga chonshok khan, shingna ruman u mak. ⁵³ Khan amani na rurakan ua Gennesaret ram kha vak shok u joi. Khan rokong kha makha kawmchang khan ruthung uh. ⁵⁴ Rokong ah put ah ruchumphit u `le, mi hai na ama me kha rujetrelen uh. ⁵⁵ Khan akieiakiei ah rutan ua amani na ama awm, tina mun khan, ana hai kha jana le dawmlam a vak chawi uh. ⁵⁶ Khan ama lutnalutna: kho ah nit a, khopui ah nit a, inleloi mun ah nita`awm, ana hai kha rievieithawna mun a rutet uh. Ama pon rieshiei mawrtaka kha nita`awm mishitna rang, ama dieng runik uh. Khan ponmawr ashih miring rikip kha irumadam inih.

¹ Khan Pharisee hai le khan Jerusalem ah put ah ajong danoja hai eshen na va ua ama dieng vak ruchun uh. ² Khan akhaichawi hai eshen na ronolam a, makhala khut rushuk boi a, tan irushak u kha vak muk u `le, Jesu dieng jar rupek uh. ³ Ajarla Pharisee le Jihudi hai kholok na pipu shedan hai kha rung ua, khut hai kha khinniei a rushuk u nawkatu, shak shah u mak. ⁴ Khan rievieithawna ah put ah va u `le, riethieng u joi nawkatu, bu neh u mak. Hi nih boi irumuk ua irushena u tampui awmlai, makhala, hai, haikiek, bube, khan jakhang riethiengmashak hai hi inih. ⁵ Khan Pharisee hai le danoja hai na Jesu dieng rurawdawn uh, “Nang khaichawi hai na pipu hai shedan kha jui boi a, ijar a khut hai kha rushuk boi a tan ishak u maw nih?” ⁶ Makhan ama na mashang a ruti, “Thanunchan thaw hai, nang jar ua Isaiah na thatak a rurophong a hitihin rumiejiek, ‘Hihai miring hi na amani ner a richit nepek uh, inia amani mulung tu kiei ah put ah rala pe uh. ⁷ Nemna boi a kiei hi chubainabawk uh. Miring hai chawngpek hai kha danpui a ruchuk uh.’ ⁸ Ajarla nangni na Pathien chawngpek kha nangheng ua mi hai shena kha nangjui uh, makhala, haikiek rushuk, hai rushuk, khan hi ang tampui nangruthaw uh.” ⁹ Khan amani dieng ruti, “Nangni na nang shena u kha miringna rang, Pathien chawngpek kha thatak a nangheng uh. ¹⁰ Ajarla Moses na ruti, ‘Nangnu le nangpa kha richit peh roh,’ khan ‘Tukhat na unu ninawkle apa kha pumabot a tu, ama kha thitna niei rosho.’ ¹¹ Inia nangni na nangti uh, ‘Mi `khat na apa dieng ninawkle unu dieng “Ih kha nita`awm kiei dieng a nanginemna kha Corban inih” ’ (makhala Pathien dieng a pek khutchawi tina inih). ¹² Nangni na unu ninawkle apa dieng a thawphawm shok kha dawnshe a thaw rang a kha jawt pe u makche. ¹³ Hitihin rongrong a khut nangirurotho u shedan jar a Pathien chawng kha nemna boi nangmachang uh. Khan kha ang tampui kha nangthaw uh.” ¹⁴ Khan mipui kha iedieng ah koiret a ama na ruriei, “Mi kholok na narangai u tana jet u roh: ¹⁵ Miring shung ah alut vai tieng a nieinak kha na miring hai kha ronomashak ngam naw nih, inia miring shung ah hawng shok hai kha na miring kha ironomashak inih. ¹⁶ Tunita`awm rangaina rang a nokor aniei ama kha na rangai rosho!” ¹⁷ Khan mipui ah put ah in rulut phakhan, akhaichawi hai kha na rangshim jar kha ama dieng rurawdawn uh. ¹⁸ Khajarkhan amani dieng ruti, “Nangniawm makha jet u makche maw? Vai tieng ah put ah miring shung ah alut ih kha na ama kha ronomashak ngam mak. ¹⁹ Ajarla mahi na ama mulung ah lut mak, inia ama bukawk ah lut a, khan ah put ah vai ashok inih. Khatikhan nekleshak kholok kha iriethiengmashak inih, iti hi jet u makche maw?” ²⁰ Khania ama na ruriei, “Miring shung ah put ah hawng shok kha na mi kha ironomashak inih. ²¹ Ajarla shung ah put ah, nititu miring mulung ah put ah hihaihi hawng shok inih: mining shie, uire, rejai, mithat, ²² murushah, manarshie, chon shie, milem, rejaikawk, mikturniei, mimieshiet, lienrasha le mawngna, hihaihi inih. ²³ Hihai kholok hi shung rieirit ah hawng shok miring ironomashak chon shie hai kha inih.” ²⁴ Khashole makha mun ah put ah Jesu na thoi a Tyre le Sidon ram tieng rushe joi. Ama na in `khat ah rulut kha tute dieng rumejet jawt mak, inia ama kha rurethe ngam mak. ²⁵ Ajarla raikho rono aniei shanu `khat unu na Jesu jar kha rujet `le, varelen a ama kekung a vak bu. ²⁶ Nupangnu kha Syria ram ah awm Phoenicia kho ah shok, Greek miring `khat runih. Ashanu shung a awm raikho kha nawtna rang, ama dieng nik a ruawm. ²⁷ Khania Jesu na ama dieng ruti, “Naite hai hi na matieng vawn mishipbak rosho, ajarla naite hai tan kha loi a ui hai dieng vawr rang a hi atha nimak.” ²⁸ Khan Jesu dieng ruti, “Idik`het, Pumi, naite hai burama mocho haishe khala tebol thoi ah awm ui hai na ishak inih.” ²⁹ Khan ama dieng ruti, “Hi chawng mashang jar hin she rang roh, raikho rono kha nang shanu ah put ah shok joi.” ³⁰ Khan ama na in rushok phakhan, ama kha raikho na irumathan a jakhang ah ruja a ruawm kha vak muk joi. ³¹ Khashole ama na Tyre le Sidon kha rumathan a Decapolis ram kha rakan a Galilee Thampui kha rushok joi. ³² Makhan nokorshet le chawngra`ak miring `khat ama dieng vak chawi uh. Khan ama chung a Jesu na khut atetna pe rang, amani na runik uh. ³³ Khan ama na mi hai kar ah put ah ruchawi a ama nokor dire khan ukhut lawi ruraw pe, khan rumiechiei a iemiechiei kha ama mieliei khan runawt pe. ³⁴ Khan ravan tieng en a ruphuher a ama dieng ruti, “Ephphatha.” Mahi “Rawlawng kha nih roh,” tina inih. ³⁵ Khan relentak a ama nokor dire kha rawlawng pe joi, khan iemieliei akhop pe arang kha ruthut pe a, thaning a ruchawng ngam joi. ³⁶ Khan tute dieng rieina boi rang, chawngruben joi, inia amani dieng chawngibie dawrthep kha khea mi hai dieng rurophong u joi. ³⁷ Khan amani na rieingamboi a shindawngna niei a ruti uh, “Ama na irikip thaning a thaw. Ama na nokorshet hai kha irangaimashak, khan chawngthieiboi hai kha imawchawng inih.”

¹ Khalai a nikho `khat hin mi tampui ruawm a nekleshak runiei boi u phakhan, Jesu na akhaichawi hai kha rukoi a amani dieng ruti, ² “Kiei na mipui dieng hin lainatna kieniei joi, ajarla kiei le rawtawpna u hi ni `thum nih joi, inia iawm shah u lai mak. ³ Kiei na vawnchamlam a in ah kemeshe joiatu, lam ah shawramathiei uh, ajarla eshen hai hi alatak ah put ah ava u inih.” ⁴ Inia akhaichawi hai na ama dieng rumashang uh, “Hi ramthim hin tu `khat na iti a tan le ivai ngam rang a maw nih?” ⁵ Khan amani dieng rurawdawn, “Tanpek ijat maw nangniei uh?” Amani na rumashang uh, “Shiri.” ⁶ Khan mi hai kha pieipak chung ah shutna rang, chawng rupek. Khan tan shiri kha ruloi, khan mapakna runiei a rukhoi. Khan mipui dieng machangna rang, akhaichawi hai dieng rupek a akhaichawi hai kha na mipui dieng rumachang uh. ⁷ Khan amani na nga rimi lekteawm runiei uh. Makha Jesu na rahvan rupek shole, khahaikha`awm shemna rang, amani dieng ruti. ⁸ Khatikhan amani na rushak ua vawn ruship pe uh. Khan aliemlim tanpek hai kha lawngkai shiri shipmer rurawkhawm uh. ⁹ Aneh-ashah hai kha bawp mili dawr runih uh. Khashole ama na amani kha rumeshe u joi. ¹⁰ Khan nawtshuntak a akhaichawi hai le rokong ah rulut a Dalmanutha ram tieng rushe joi. ¹¹ Makhan Pharisee hai kha va ua ama le chawngrieshiet vak put uh. Ajarla ama kha enretena rang, ravan ah put ah ama dieng jetna kha rudit uh. ¹² Khan ama na ratha ruphuher a ruriei, “Ijar a tun a rong hai hi na jetna itawk u maw nih? Diktak a nangni dieng kiriei inih, tun a rong dieng hin jetna shukpeh a pelai naw nih.” ¹³ Khan amani kha rumathan shole, rokong ah rulut a vara `khat tieng rushe joi. ¹⁴ Khan amani na nekleshak chawi rang rumieniei uh, khajarkhan tan `khatte niboia, rokong shung khan ih runiei u mak. ¹⁵ Amani dieng chawng pek a ruriei, “Enro, Pharisee hai le Herod chawh kha riring pui u roh.” ¹⁶ Khan amani na “Tan nieniei boi u jar a maw nih,” tia amani kar a rawdawn nana a ruti. ¹⁷ Khan Jesu na makha rujet jarkhan, amani dieng ruti, “Tan nangniei boi u jarkhan, ih rang a nangireshe u maw nih? Nangni na nangimuk u ninawkle nangijet boi u maw nilai? Nang mulungmichim u maw nilai? ¹⁸ Mik la nangniei uh, inia nangimuk boi u maw nih? Nokor la nangniei uh, inia nangirangai boi u maw nih? Khan nangimininghep boi u maw nih? ¹⁹ Kiei na miring bawp rahnga rang tanpek rahnga kurukhoilai khan, aliemlim lekvai kha tiengkum shipmer ijat maw nangrushar uh?” Amani na rumashang uh, “Shawmlieidi.” ²⁰ “Khan miring bawp mili rang tanpek shiri kurukhoilai khan, aliemlim lekvai kha lawngkai shipmer ijat maw nangrushar uh?” Amani na rumashang uh, “Shiri.” ²¹ Khan amani dieng ruriei, “Makha itia anih maw nih, iti kha nangijet boi u maw nilai?” ²² Khashole ama na Bethsaida ah rushe, khan amani na mikchaw `khat hi ama dieng vak chawi uh. Khan Jesu na shitna pe rang rudawi uh. ²³ Khan ama na mikchawpa khut kha rujum pe. Khan ama kha kho ah put ah vai rushok pui. Khan imik kha ama na rumiechiei pe, khan ukhut atet pe a ama dieng ih `khat maw nangmuk, tia rurawdawn. ²⁴ Khan ama na khonga a rumashang, “Kiei na miring hai hi thingkung alawn ang a kumuk.” ²⁵ Khashole ama khut le miringpa mik hai kha rushit pe a chung tieng rume`en. Ama mik kha hawng kir pe joi, khan ih kholok kha riethienghiei a rumuk joi. ²⁶ Khan ama na ama in tieng rumeshe a ruti, “Nang na kho khawnawm lutlai naw roh, khan khoshung a tute diengawm vak rieilai naw roh.” ²⁷ Khan Jesu na akhaichawi hai le Caesarea Philippi kho tieng rushe, khan ama na akhaichawi hai dieng rawdawn a ruti, “Miring hai na kiei hi tumaw niti uh?” ²⁸ Khan amani na rumashang, “Baptisma apeh John, eshen na Elijah, khan eshen na thiempulien hai kar a akhat keng niti uh.” ²⁹ Khan amani dieng rurawdawn, “Nangni na la kiei hi tumaw nangniti uh?” Makhan Peter na mashang a ruti, “Nang hi Christa kha nangnih.” ³⁰ Khan ama jar a tute dieng rieina boi rang, amani dieng chawng ruben joi. ³¹ Khan akhaichawi hai kha ruchuk ruput, makhala Miring Shapa na chonmun tampui chung a shawna doingir rangnih. Shierulien hai, thiempu rashang hai, khan danoja hai na aheng u rangnih. Miring hai na that u rangnih, khan ni `thum shole, hawng thoi rangnih. ³² Hihai chawng hi rophongleng a ruriei pe uh. Khashole Peter na ama kha mun `khat a ruchawi a rawkawk ruput. ³³ Inia ama na vak hiei le akhaichawi hai kha ruen a Peter kha rurachai, “Kiei ah put ah rechen roh, Aw Satan! Ajarla nang imining kha miring mulungmining inih, Pathien mulungmining nimak.” ³⁴ Khan ama na akhaichawi hai kha le roroia, mipui kha ama dieng okoi a ruriei, “Tunita`awm kanu nujui jawt joiatu, amarilik chungchanga rapha rosho, khan ama cross kha loi rieshie nujui rosho. ³⁵ Ajarla tunita`awm iringkho ashan jawt kha na makha mathang rangnih, inia tunita`awm kajar a le athachawng jar a iringkho mathang a tu, iringkho kha shan rangnih. ³⁶ Ajarla mi `khat na manmieshie kholok hi utum a, ama ringphuktak kha mathang joiala, imaw nemna nih? ³⁷ Ninawkle, miring `khat na ama ringphuk kha le rotho rang imaw peh nih? ³⁸ Ajarla tunita`awm, mahi uire munuphung rong shung hin, kajar a le kawchawng hai jar a jakna niei a tu, Miring Shapa kha na`awm, Apa lurna khan ravantir riethieng hai le jong phakhan, jak pui rangnih.”

¹ Khan amani dieng ruti, “Diktak a nangni dieng kiriei inih, makhala hin ah ading miring eshen hi na Pathien rengchangna kha na ranak le ajong kha muk u masheng, thitna tuidan kha en u naw nih.” ² Khan ni `ruk shole, Jesu na Peter, James, khan John hai kha lawn rashang `khat ah lawp `khat a ruhawng pui a amani maikung a merurelek. ³ Ama ponledier hai kha varlang a ruawm pe. Avar dan kha rieliei shung a jitho hai na amani ang a mechek ngam naw nih. ⁴ Makhan Elijah na Moses le amani dieng rular a Jesu le ruriebieh uh. ⁵ Khan Peter na Jesu dieng ruti, “Rabbi, kieini na hin na`awm u hi atha, thamber `thum rashak u rawi: nang rang akhat, Moses rang akhat, khan Elijah rang akhat.” ⁶ Ajarla ama na riei rang rujet mak, ajarla amani kha ajeng a ruchih uh. ⁷ Khan amani kha romiei na jong buk uh, khan romiei ah put ah he `khat jong a ruti, “Mahi numkipoktak kashapa kha inih, ama chawng kha rangai u roh.” ⁸ Khan amani na relentak a enruroko phakhan, tute rumuh u lai mak, inia Jesu rang a kha amani le ruawm joi. ⁹ Lawn ah put ah jong chum u le roroia, amani na irumuk u hai kholok kha, Miring Shapa kha na athi ah put ah hawng thoi masheng, tute dieng rieina boi rang chawng rupek joi. ¹⁰ Khan amani na chawng shok hai kha ruip ua, athi ah put ah hawng ringret, iti hi ih tina maw nih, tia manilemani dieng rurawdawn uh. ¹¹ Khan ama dieng rurawdawn uh, “Khanitala ijar a Elijah kha matieng jong rangnih, tia danoja hai na iruti u maw nih?” ¹² Khania amani dieng rumashang, “Irikip mun hawng molonaret rang, Elijah na matiengpek jong rangnih, inia ijar a Miring Shapa na shawna lientak doi rangnih, tia irumiejiek maw nih, khan mi hai na ama kha iruheng u rang a maw nih? ¹³ Inia nangni dieng kienieriei uh, makhala Elijah kha matieng jong joi, khan ama jar a irumiejiek ang a amani idit dungjuia ama kha rutawn uh.” ¹⁴ Khan ama na akhaichawi hai dieng vat phakhan, mipui na amani kha iruhieichip ua danoja hai na chawngirurieshiet pui u kha vak muk. ¹⁵ Khan relentak a mirawp kha na ama kha rumuk u `le, shindawngna lientak runiei uh. Khan ama dieng vak tan ua chubai vak thaw pui uh. ¹⁶ Makhan Jesu na danoja hai dieng rurawdawn, “Nangni na amani le ih chawng maw nangirieshiet pui uh?” ¹⁷ Khan mipui kar a akhat na rumashang, “Oja, ratha rono na imawchawngthiei boi kashapa hi nang dieng kavak chawi. ¹⁸ Ratha rono na shur pharoia, mupurving, khan chiephon moshok, aha reshemashak, khan atak rikinmashak. Nawtnathiei rang, nang khaichawi hai dieng kieriei, inia amani na mawtawr u mak.” ¹⁹ Khan Jesu na ama dieng ruti, “Aw takashawn boi rong hai, Idawrshe a nangni le awm rang a maw kanih? Idawrshe a nangni le kidoi rang a maw nih? Ama kha kiei dieng vak chawi u roh.” ²⁰ Khan amani na ama dieng ruchawi uh. Ama kha rumukphit `le, ratha rono kha na enchak a runawk a pieipak chung ah tumtum a ruloi a chiephon rumoshok. ²¹ Khan Jesu na apa dieng rurawdawn, “Ama na hitihin a awmna hi ituk maw shawt joi?” Khan ama na rumashang, “Anaite chang ah put ah nih joi. ²² Khan mahi na ama hi thatna rang, miei ah le tui ah rawnawrawnaw a ruvawr. Inia nangthaw ngam a tu, nang lainatna kha natetna u tana nashan u roh.” ²³ Makhan Jesu na ama dieng ruti, “Takanangshawn a tu, takashawn miring ama dieng khan irikip nithieiviek.” ²⁴ Relentak a apa kha na he rashangtak a le imikrithi cholam a rura`ai, “Pumi, takakawshawn, takakishawn boi hi maimawk kepekna ngam rang, narachang pui roh.” ²⁵ Khan mipui na lawp `khat a vak tan u kha Jesu na rumuk `le, ratha rono kha rurawkawk a ama dieng ruti, “Nang achawngthiei boi, ratha nokorshet, chawng kenepek, nang ama ah put ah vak shok tana ama dieng hin lutretlai naw roh.” ²⁶ Khan ratha rono kha na ra`ai a naitepa kha enchak a runawk a ama ah put ah vak shok joi, khan naitepa kha thimekaiving a mi arawplam na “Ithi joi,” ruti uh. ²⁷ Inia Jesu na ama khut ah rumukui, khan rumothoi a ama kha hawng thoi joi. ²⁸ Khan ama na in ah vat phakhan, akhaichawi hai na bing a rurawdawn uh, “Ijar a kieini na kinawt ngam boi u maw nih?” ²⁹ Amani dieng ruriei, “Hi ang hai hi nikna le chamradoilam a niboia, nawtthiei nimak.” ³⁰ Khashole khan ah put ah rushe ua Galilee kha rurakan uh, khan tute dieng mejet rang, rudit mak. ³¹ Ajarla akhaichawi hai kha hitihin ruruchuk, “Miring Shapa kha miring hai khut a pek rang a nih joi. Amani na ama kha that u rangnih, khan that u shole, ni `thum changna a hawng ring rangnih.” ³² Inia iriei pe u hai kha amani na rujet u mak, khan ama dieng rawdawn rangawm ruchih uh. ³³ Khan Capernaum kha vak shok a, in `khat a awm phakhan, amani dieng rurawdawn, “Nangni na lam ah ih chawng maw nangivakrieshiet pui uh?” ³⁴ Inia amani kha ruawmchien uh, ajarla lam ah khatlekhat na tu kha maw runieiving, tia chawng vak rieshiet u inih. ³⁵ Khan ama na shutlam a shawmlieidi kha okoi a amani dieng ruriei, “Tukhat na akhat changnakhit kha adit joiatu, ama kha vanoi kar a dawngkhit kha anih rang a inih, khan vanoi shok kha anih rang a inih.” ³⁶ Khan naite `khat hi loi a amani maikung a rumiding pe, khan awpawm a amani dieng ruriei, ³⁷ “Tu nitjoiawm hi ang naite hai kar a akhat kha kiriming a loi a tu, kiei hi inoloi inih. Khan kiei analoi ama kha na, kiei hi inoloi nimak a, nojongtirpa ama kha iloi inih.” ³⁸ Khan John na ama dieng rumashang, “Oja, mi `khat na nang riming a raikho inawt pe kurumuk uh, inia ama kha nanu u ajui miring nih boi jarkhan, kurumakha uh.” ³⁹ Inia Jesu na ruti, “Ama kha makha u naw roh, ajarla kiriming a ranakniei chon athaw ama kha na baitek a nuk a kiei hi niemieshiet ngam naw nih. ⁴⁰ Ajarla kieini nere`erpui boi ama kha narachang pui miring kha inih. ⁴¹ Ajarla Christa miring nangnit u jar a, nangni dieng tui hai `khattak a nita`awm kiriming a nemenek uatu, kiei na diktak a kiriei inih, ama shawlawh kha itikte nita`awm thang pe naw nih. ⁴² “Khan tukhat na kiei takanashawn ashin naite hai kar a akhat hi keruthuimashak joiatu, ama kha iring ah shumhiei `khat makhai pe a tuikhanglien lai ah vawr rang a kha ama rang tha pedet. ⁴³ Khajarkhan nang khut `khat na munu inawmawthaw rang a nitatu, makha tubang roh. Khut `di le chiemtiknieiboi Gehenna le chiemtiknieiboi miei a lutnek a tu, khawrlam a ringna amuh kha nang rang thadet. ⁴⁴ “Makhan ‘Amani rulung kha athi, iti awm mak. Khan miei kha chiemtik, iti niei mak.’ ⁴⁵ Khan nang ke `khat na munu inawmawthaw rang a nitatu, makha tubang roh, nangke idi kawp a Chiemtiknieiboi Miei a lutnek a tu, kengawlam a ringna mun a lut kha thadet. ⁴⁶ “Makhan ‘Amani rulung kha athi, iti awm mak. Khan miei kha chiemtik, iti niei mak.’ ⁴⁷ Khan nang mik kha na munu inawmawthaw rang a nitatu, makha kawbang roh, nang mik `di kawp a Gehenna Miei a lutnek a tu, nang mik `khat le Pathien rengchangna a lut kha thadet. ⁴⁸ “Makhan ‘Amani rulung kha athi, iti awm mak. Khan miei kha chiemtik, iti niei mak.’ ⁴⁹ “Ajarla mi rikip shung a michi thak ang a miei thak rangnih. Khan michi kha rawthawina rikip ah obo rangnih. ⁵⁰ “Michi hi atha, inia michi ama a`ah kha hek pe joiatu, itia maw makha ma`aret rawng? Khania nang shung ua michi tuidan kha awm rosho, khan khatlekhat riengiei u roh.”

¹ Khan Jesu na makha mun ah put a ruthoi a Jordan vara kha arawh a Judea ram tieng rushe joi. Khan takthar a mipui na vak rawtawp pui uh, khan shena balam a amani kha ruruchuk. ² Khan Pharisee hai na ama kha enretena rang, va ua ama dieng rurawdawn uh, “Mi `khat na unungak imele hi Dan maw nih? ³ Jesu na amani dieng rumashang, “Moses na nangni dieng ih chawng maw nurupek uh?” ⁴ Amani na rumashang uh, “Melena jawtnapek kha miejiek a melena rang, Moses na rujawt.” ⁵ Inia Jesu na amani dieng rumashang, “Nang mulung u kha michim jar a, kha ang chawngpek kha irumiejiek inih. ⁶ Inia konputpek a Pathien na ‘apa le nupang hi irukon inih.’ ⁷ ‘Hijarhin apa na unulepa kha mak a ama inkonu le ruchun rangnih. ⁸ Idi kha taksha `khat chang rangnih. Khajarkhan amani kha idi nih u lai naw nih, inia taksha `khat kha nih u joi.’ ⁹ Khajarkhan Pathien na shamishuisha kha miring na shenlai naw rosho.” ¹⁰ Khashole in `khat ah akhaichawi hai na hi jar hin rurawdawn u ret. ¹¹ Khan ama na amani dieng ruriei, “Tukhat na inkonu kha reshen pui a nupang `khat niei joiatu, ama chung a uire ithaw inih. ¹² Khan nupui `khat na ama inkopa kha reshen pui a shik `khat niei joiatu, uire ithaw inih.” ¹³ Khan ashin naite hai kha shitnathiei rang, amani na Jesu dieng vak chawi uh, inia khaichawi hai na rurawkawk uh. ¹⁴ Jesu na makha rumuk phakhan, mulung hanglam a ruti, “Naite hai na kiei dieng ava rang a kha jawt pe u roh, amani kha makha u naw roh, ajarla kha ang hai dieng khan Pathien rengchangna kha awm. ¹⁵ Kiei na nangni dieng diktak a kiriei inih, ashin naite hai ang a, tukhat na Pathien rengchangna kha loi joi nawkatu, makhan shuklut a lut naw nih.” ¹⁶ Khashole ama na naite hai kha rupawm a amani chung ah khut rutet pe a rahvan rupek. ¹⁷ Khan Jesu na lam ah rulawnlai khan, miring `khat vak tan a, amaikung a rukhuk shun a rurawdawn, “Aw Oja Atha, kiei na ih kawthaw le maw kumshawt ringna kha tumthiei ning?” ¹⁸ Jesu na ama dieng rumashang, “Ijar a kiei hi atha, tia nanginokoi maw nih? Pathien niboia tute atha awm mak. ¹⁹ Chawngpek kha nangjet: ‘Uire thawthiei naw tinih,’ ‘Mi thatthiei naw tinih,’ ‘Muruthiei naw tinih,’ ‘Anih boi a kungchangthiei naw tinih,’ ‘Miniei kha lemthiei naw tinih,’ khan ‘Nangnu le nangpa kha richit peh roh.’ ” ²⁰ Mashang a ama dieng ruti, “Oja, hihai kholok hi korothar chang ah put ah kihawngrung nih joi.” ²¹ Inia Jesu na ama dieng en phakhan, numrupok, khan ama dieng ruti, “Nang dieng ravat `khat awm: she tana nanginiei kholok kha vak jor roh, khan shara hai dieng vak peh roh. Khan ravan a bawmniei kha nangniei rangnih. Va roh, khan cross kha loi tana nujui roh.” ²² Inia chawng chung khan amai mukhut a mulungshawlam a rushe joi, ajarla ama na shumleshier tampui runiei. ²³ Khan Jesu na akhaichawi hai dieng enroko a ruti, “Shumleshier aniei hai na Pathien rengchangna a alut rang a hi idawr a matat maw nih!” ²⁴ Inia khaichawi hai na ama chawng chung khan shindawngna runiei uh. Khan Jesu na amani dieng mashang a rurieiret, “Aw naite hai, Pathien rengchangna a lut hi idawr a matat maw nih! ²⁵ Rawchawng miring `khat na Pathien rengchangna a alut rangnek a tu, sharingshiei `khat na shim nokor ah apang rang a kha baidet.” ²⁶ Inia amani kha dawnga shindawng pe ua manilemani dieng ruti uh, “Khatnitala tu na maw shanna muh ngam nih?” ²⁷ Jesu na amani dieng enrep a ruriei, “Miring le anithiei boi kha Pathien le tu nimak, ajarla Pathien le tu kholok nithieiviek.” ²⁸ Peter na Jesu dieng ariei ruput, “Enro, ih kholok kurumak ua kinurujui u inih.” ²⁹ Makhan Jesu na ruti, “Nangni dieng diktak a kiriei inih, kajar a le khan athachawng jar a in ninawkle uliennai nupang apa, ninawkle nu le pa, ninawkle nai hai, ninawkle loimun hai kha rumathan ³⁰ khan epshawna kholok rudoi tute na tun a rongtak hin, in hai uliennai nupang apa, nu le nai hai, khan loi hai kha rajarajah a tum boi a awm naw nih, khan ajong rang a rong hinawm kumshawt ringna kha muk u rangnih. ³¹ Khan masha mi tampui kha nukna rangnih, khan nukna hai kha masha rangnih.” ³² Khan amani na Jerusalem tieng shena lam kha rurawh u lai khan, Jesu na amani maton ah rulawn. Ajui hai mi kholok na shindawngna le chitna runiei uh. Khan shawmlieidi kha takthar a ruchawiret a ama chung a ashokdet rang a jar a ariei ruput: ³³ “Enro, Jerusalem ah nahawng uh, khan Miring Shapa kha thiempu ulien hai le danoja hai dieng pek rangnih. Khan ama kha thitnashe rang khan aheng u rangnih, khan Phungshik hai dieng pek u rangnih. ³⁴ Khan ama kha erawh a biek u rangnih, khan ama kha miechiei u rangnih. Ama kha jem u rangnih, khan that u rangnih. Khan ni `thum changna khan thoiret rangnih.” ³⁵ Khan Zebedee shapa hai, James le John na, ama dieng vak rawshawn ua ruti uh, “Oja, ih nita`awm kidit u kha nepeh u roh, tia kininik uh.” ³⁶ Khan Jesu na amani dieng ruti, “Nangni rang imaw nangnawmawthaw jawt uh?” ³⁷ Ama dieng ruti uh, “Nang lurna a kushutna u rang, nang chang tieng `khat, khan nang viei tieng `khat mun nepeh u roh.” ³⁸ Inia Jesu na amani dieng ruriei, “Nangininik u kha nangni na jet u makche. Kiei na kinek rang a hai aneh, khan kiloi rang a baptisma le baptisma loi, mahi mawtawr u rawng maw?” ³⁹ Khan amani na ruti uh, “Mawtawr u rang kanih.” Inia Jesu na amani dieng ruriei, “Kiei na kinek rang a hai hi nangnek u rangnih, khan kiei na kiloi rang a baptisma hi nangloi u rangnih. ⁴⁰ Inia kieviei le kachang a shutna apeh rang a kha kiei nimi`ing, inia irasham pe hai rang a inih.” ⁴¹ Khan shawm hai kha na James le John jar a rujet u phakhan, mulung rumohoina u lai mak. ⁴² Khan Jesu na amani kha rukoi a amani dieng ruriei, “Nangni na nangjet uh, Phungshik hai rang a madan rampo hai kha na Phungshik hai kha idek a pumi achang inih. Khan amani alien-arang hai kha na amani chung a cham niei uh. ⁴³ Inia nang kar uatu khatikhan nih naw nih. Khania tunita`awm nang kar ua alien anih jawt miring kha na nang shepding u kha chang rosho. ⁴⁴ Khan tunita`awm nang kar ua akhat changna anih jawt miring kha na kholok shok kha achang rang a inih. ⁴⁵ Ajarla Miring Shapashe kha`awm ama chon mawthaw rang a ajong nimak a, mi chon thaw rang le mi tampui khekman rang a iringkho apeh jong inih.” ⁴⁶ Khashole amani na Jericho kha vak shok u joi. Khan ama na akhaichawi hai le khan mirawp le Jericho ah put ah rushe phakhan, Timaeus shapa mikchaw Bartimaeus kha lampang a khutdawlam a rushuh a ruawm. ⁴⁷ Nazareth Jesu kha keng, iti ama na rujet phakhan, ra`ailam a ruti, “Aw David Shapa Jesu, kiei dieng hin nang rsoihoina kha natetna roh!” ⁴⁸ Khan awmchienna rang, mi tampui na ama kha enchak a rurawkawk uh, inia “David Shapa nang roihoina kha kiei dieng hin natetna roh!” tia liekshang a rura`ai. ⁴⁹ Jesu na ding a ama kha koina rang chawng rupek. Khan amani na mikchawpa kha rukoi ua ama dieng ruti uh, “Ranak thaw roh. Thoi roh, nang kha nokoi.” ⁵⁰ Khan opon rieshiei kha ama na rulik, khan ruthoi a Jesu dieng rushe joi. ⁵¹ Jesu na ama dieng rawdawn a ruti, “Nang rang imaw nangnawmawthaw jawt?” Inia mikchawpa kha na Jesu dieng ruti, “Rabboni, kimik hi namavar pe roh.” ⁵² Makhan Jesu na ama dieng ruti, “She rang roh, nang takashawn kha na namadam joi.” Khan relentak a imik kha hawng var pe a lam khan Jesu anu rujui joi.

¹ Khan amani na Jerusalem kha vak ranai pui ua, Olive Lawn ah awm Bethphage le Bethany kha vak shok u phakhan, akhaichawi idi hi rutir joi. ² Amani dieng ruti, “Nang maton uah kho khawn she u roh. Nanglutphit u `le, miring khatshe na ishutna boilai ranngam acha remet ruthung a awm nangmuk u rangnih, khan makha thut u tana vak chawi u roh. ³ Khan tukhat na, ‘Ijar a nangithaw u maw nih?’ niti uatu, ‘Pumi na rangai,’ tia mashang u roh, khan relentak a amani kha hin vak tir rangnih.” ⁴ Khajarkhan amani na rushe ua, ranngam acha remet `khat pakawt vai lamkaw ah ruruthung vak muk uh, khan makha amani na ruthut uh. ⁵ Khakawt ah ading miring hai na amani dieng ruti uh, “Ijar a ranngam acha remet kha nangithut u maw nih?” ⁶ Inia Jesu na iruriei kha ang a, amani dieng ruriei ua amani kha rumathan uh. ⁷ Khan ranngam acha remet kha Jesu dieng vak chawi u joi. Khan ama chung ah pon rumukhu ua ama ling ah ruchong joi. ⁸ Mi tampui na lam ah pon hai kha rupha uh, khan eshen na thing ah put ah boship thingbak hai kha rutuk ua lamlien khan rupha uh. ⁹ Amaton ah alawn hai le anuk ah ajui hai kha na he rashangtak a rura`ai uh, “Hosanna! ‘PUMI riming a ajong ama kha rahvantha inih!’ ¹⁰ Pumi riming a ajong napa u David rengchangna kha rahvantha inih! Rashangving a Hosanna!” ¹¹ Khan Jesu na Jerusalem kha rulut a riethiengmun ah rushe. Khan nieinak kholok kha enruroko shole, apha kha hawng shum joi jarkhan, shawmlieidi kha le Bethany tieng rushe joi. ¹² Khan jing tieng hin amani na Bethany ah put ah vat phakhan, Jesu kha vawnrucham pe joi. ¹³ Khan ralaviei a thieichangkung boniei `khat rumuk phakhan, makhan dikhat kumukthiei a la, tia rushe. Inia iedieng vak shok le obo ranga niboia, `khatshe vak muh mak, ajarla thieichang rat pha kha runimak. ¹⁴ Khan mashang a thieichangkung dieng Jesu na ruti, “Dawnshe a tute na nang ah put ah ara kumshawt a shalai naw rosho.” Makha akhaichawi hai na rujet uh. ¹⁵ Khan amani na Jerusalem ah rushe u joi. Khan Jesu na riethiengmun ah rulut a ajor hai le rawchawh hai kha runawt. Khan shierleshier rotho hai tebol hai le pharphali jor hai shutna hai kha shukthala a rutet pe. ¹⁶ Khan ama na riethiengmun kha rakan a irujor u nieinak hai kha `khatshe rumawchawi mak. ¹⁷ Khan ama na ruruchuk a amani dieng ruriei, “ ‘Ki`in hi phung kholok nikna in ti rangnih,’ tia imiejieksha nimak maw? Inia nangni na mahi ‘minieisho hai koh’ nangmachang u joi!” ¹⁸ Khan thiempu ulien hai le danoja hai kha na rujet ua, amani na itia maw mahang rang, tia lam rutawk uh. Inia amani kha ruchih uh, ajarla ama miruchukna khan vanoi shinrudawng pe u inih. ¹⁹ Khan ni hawng tah phakhan, amani na khopui kha mak a rushe u joi. ²⁰ Jingkar a amani vak pang phakhan, thieichangkung kha ama rujung ah put ah ruchar kha vak muk uh. ²¹ Khan Peter na rumininghep phakhan, ama dieng ruti, “Rabbi, enro! Pumnangibot thieichangkung khaw char joi.” ²² Khan Jesu na mashang a ama dieng ruriei, “Pathien kha takashawn u roh. ²³ Nangni dieng diktak a kiriei inih, tukhat na mahi lawn dieng hin ‘Rechen tana tuikhanglien ah vak rothong roh,’ itina khan mulung rakhana iniei boi, inia iriei kha nih rangnih, iti takashawn ama dieng khan, iriei rikip kha minit pe rangnih. ²⁴ Khajarkhan nangni dieng kinieriei u inih, nanginik nangiriei u kholok a nangmuk u joi, tia takashawn u roh. Khanitatu nangni dieng shok rangnih. ²⁵ Khan anih rang nangding u phakhan, tukhat chung a ir nangniei uatu, rangaidam u roh. Khanitatu ravan a awm nangpa u na`awm nang shietna u kha arangaidam rangnih. ²⁶ Inia rangaidam nangpek u nawkatu, ravan a awm nangpa u na nang shietna u kha rangaidam naw nih. ²⁷ Khan Jerusalem ah amani rushe u ret. Khan riethiengmun shung ah rulawn phakhan, thiempu ulien hai, danoja hai le shierulien hai kha ama dieng va uh. ²⁸ Khan ama dieng ruti uh, “Ih cham nanginiei a hihaihi nangithaw maw nih? Khan hihaihi nangthawnathiei rang, tu na cham inurupek maw nih?” ²⁹ Inia Jesu na amani dieng ruriei, “Nangni dieng chawng `khat nawrawdawn u rawng, khan kiei dieng namashang u roh. Makhan kiei na ih cham kiniei a hihaihi kithaw maw nih, iti kha nangni dieng riei rang kanih. ³⁰ John baptisma kha ravan ah put ah maw nih ninawkle miring hai ah put ah maw nih? Namashang u roh.” ³¹ Khan lawpte na reshe ua ruti uh, “ ‘Ravan ah put ah keng’ niti uala, ‘Khanitala, ijar a ama kha takanangishawn boi u maw nih?’ ti rangnih. ³² Inia ‘Miring hai ah put ah keng’ niti uala,” mipui kha ruchih uh, ajarla mi kholok na John kha thiempulien adiktak `khat inih, tia iruloi u inih. ³³ Khajarkhan Jesu dieng mashang a ruti uh, “Jet u mi`ing.” Khan mashang a Jesu na amani dieng ruti, “Kiei na`awm hihaihi ih cham le kithaw maw nih, iti kha nangni dieng nieriei u naw ning.”

¹ Khan amani dieng rangshim a ariei ruput: “Miring `khat na drakha rohon `khat runiei. Ama na makha rurokorep, khan juepna rang khur `khat ruchoi a vendai `khat ruthaw. Makha loithaw hai dieng rumashan a khomijin rushe joi. ² Khashole ara rawkhawm phakhan, drakha rohon ah put ah ara dikhat mukna rang, loithaw hai dieng shok `khat rutir joi. ³ Inia ama kha rushur ua rujem uh, khan rokpet a rumikir uh. ⁴ Khan shok `khat rutirret. Ama kha ulu a shebe rupek uh, khan maimawktak a rutawn ua rumikir uh. ⁵ Khan shik `khat rutirret, inia ama kha ruthat uh. Khatikhan shik tampui: eshen kha rujem uh, khan eshen kha ruthat uh. ⁶ “Numipoktak shapa `khat runieilai. ‘Kashapa hi tu richit nurupek pe u rangnih,’ ti jarkhan, dawngkhit a ama kha amani dieng rutir. ⁷ “Inia loithaw hai kha na khatlekhat dieng ruti uh, ‘Koklo kha hi nih joi. Khai! Ama hi that u rang rawi, khanitatu inkoklo hi natah u chang rangnih joi.’ ⁸ Khajarkhan ama kha pawttap a ruthat u joi, khan drakha rohon vai tieng rupai u joi. ⁹ “Makhan drakha rohon pumpa kha na imaw lawt nih? Ama na she a loithaw hai kha vak mathang rangnih, khan drakha rohon kha shik hai dieng pek rangnih. ¹⁰ ‘Inthaw hai na i`enda u lung kha kik ah runiei lung kha ruchang. ¹¹ Mahi PUMI na iruthaw inih, khan nimik ua mahi shindawngroi `khat inih,’ tia irumiejiek kha rute u makche maw?” ¹² Khan ama kha shurna rang rurai uh, inia mipui kha ruchit pui uh. Ajarla rangshim kha amani jar a iruriei inih, iti kha rujet uh. Khajarkhan ama kha mak a rushe u joi ¹³ Khan ama chawngriei a rikhitmashakna rang, amani na Pharisee hai le Herod miring hai kha ama dieng rutir uh. ¹⁴ Ama dieng ava a ruti uh, “Oja, nang hi adik nangnih, khan nang na miring hai hi khatte a nangtawn, ajarla miring hai mai kha en makche, inia Pathien lam kha adik a nangruchuk, iti kha kejet uh. Khajarkhan Caesar dieng khaichana pek hi Dan maw nih? Peh u ning maw ninawkle pek boi a maw thaw u ning?” ¹⁵ Inia amani jetnawawm kha ijet le roroia, amani dieng ruti, “Ijar a ennanginerete u maw nih? Dinari kha en rawng, kiei dieng vak chawi u roh.” ¹⁶ Khan amani na makha ruchawi uh. Amani dieng ruti, “Mahi rilim le khetmiejiek hi tu tah maw nih?” Amani na rumashang uh, “Caesar.” ¹⁷ Jesu na amani dieng ruti, Caesar tah kha Caesar dieng peh u roh, Pathien tah kha Pathien dieng peh u roh.” Khajarkhan ama chung a shindawngna runiei uh. ¹⁸ Khan thoiretna awm mak ati Sadducee hai na ama dieng rushe ua rurawdawn uh, ¹⁹ “Oja, Moses na kieini dieng rumiejiek, makhala tukhat ulienpa kha ithi a unungak kha nai mieniei boi a mak joiatu, anaipangpa na ama kha loi a ulienpa rang chi mothoithiei. ²⁰ Poro shiri ruawm. Akhat changna kha na inruniei, inia chi mak boi a ruthi joi. ²¹ Khan adi changna kha na nupangnu kha ruloi, inia ama`awm chi mak boi a ruthi joi. Khan athum changna kha`awm khatikhan. ²² Khajarkhan poro shiri kholok kha na chi rumak u lai mak. Dawngkhit a nupangnu kha`awm ruthi joi. ²³ Thoiretna nikho khan nupangnu kha tu nungak maw chang nih? Ajarla shiri kha na ama kha amani nungak rang iruloi u inih.” ²⁴ Jesu na amani dieng ruriei, “Miejiek le Pathien ranak kha nangjet boi u jar a, nangirehe u nimak maw? ²⁵ Ajarla amani na athi ah put ah hawng thoi u phakhan, inawm niei u naw nih, khan inawm mieniei u naw nih. Inia ravan a ravantir hai kha ang u rangnih. ²⁶ Inia athi miring na hawng thoina chungchanga, mieichong rampabuk chungchanga irumiejiek Moses behangbuk kha rute u makche maw? Makhan Pathien na ama dieng ruriei, ‘Kiei hi Abraham Pathien, Isaac Pathien, khan Jacob Pathien kha kanih.’ ²⁷ “Ama hi athi hai Pathien kha nimak a aring hai Pathien kha inih. Khajarkhan ajeng a nangrehe uh.” ²⁸ Khashole chawngrurieshiet ua ama na thatak a irumashang kha rumuk `le, danoja `khat na ama dieng vak rawdawn, “Chawngpek hai kar a ih kha maw runieiving?” ²⁹ Jesu na rumashang, “Chawngpek kholok kar a akhat changna chawngpek kha hi inih: ‘Rangai u roh, Aw Israel, PUMI hi napathien u inih. Ama ranga hi PUMI inih. ³⁰ Khan PUMI Pathien kha nang mulung kholok le, nang ringphuk kholok le, nang mining kholok le khan nang ranak kholok le numnangipok rang a inih.’ ³¹ Adi changna chawngpek kha hi inih: ‘Nang ringchangpui kha nang pumtak ang a numnangipok rang a inih.’ Hihainek a aliendet chawngpek shik awm mak.” ³² Khan danoja kha na ama dieng ruti, “Atha joi Oja, adik kha nangriei joi, Pathien khatte awm, ama niboia shik awm mak. ³³ Khan mulung kholok le, jetna kholok le khan ranak kholok le ama kha numipok, khan iringchangpui kha upumtak ang a numipok hi na pumha a pek le rawthawina kha ikhe inih.” ³⁴ Khan shingveng a imashang kha Jesu na rumuk `le, ama dieng ruriei, “Pathien rengchangna le ralalai makche.” Khashole tute na ama dieng chawng rawdawnna ranak kha runiei u lai mak. ³⁵ Khan Jesu na riethiengmun ah iruruchuk le roroia ruti, “Iti dan a danoja hai na Christa hi David Shapa keng iruti u maw nih? ³⁶ Davidtak na Ratha Riethieng jar a ruti: ‘PUMI na kupumi dieng ruriei, “Nang rahapui hai kha nang kekhawng kamachang malalim, kukhut chang tieng hin shuh roh.” ’ ³⁷ “Khajarkhan Davidtak na ama kha ‘Pumi,’ iti. Iti dan a ama kha ashapa achang maw nih?” Khan mi hawipui ruchun kha na ningaitak a rurangai uh. ³⁸ Khan iruruchukna `khat a ruriei, “Ponrosho rieshiei a alawn jawt, khan rievieithawna mun ah mi hai na richit ipek adit danoja hai kha riring pui u roh. ³⁹ Khan synagogue hai khan shutna runieiving hai kha loh jawt uh, khan bumichinna hai khan mi matonkhit ah shutna rang, adit uh, ⁴⁰ mieirawng hai nieilelung asho, khan thanunchan a richichawi rasha a nikna mieshiei, danoja hai kha riring pui u roh. Amani na akhawkdet hengna kha muk u rangnih.” ⁴¹ Khan nieibawmna le vararashan khan Jesu na rushuh. Mipui na nieibawmna ah shier ivawr u dan kha rumuk. Khan rawchawng hai tampui na arawp a iruvawr u kha rumuk. ⁴² Khan mieirawng `khat na lepton idi hi ruvawr. Mahi quadron `khat runih. ⁴³ Khan ama na akhaichawi hai kha rukoi a amani dieng ruti, “Diktak a nangni dieng kiriei inih, nieibawmna ah ivawr hai kholok kar a mieirawng sharanu ivawr khaw rawpdet. ⁴⁴ Ajarla mi kholok na amani ruphu ah put ah ivawr u inih, inia ama tu aravatna kar a iniei kholok le iringna rang a kholok kha ivawr inih.”

¹ Khan Jesu na riethiengmun ah put ah vak shok phakhan, akhaichawi hai kar a akhat na ama dieng ruti, “Oja, hidawr a shindawngroi lung le hidawr a shindawngroi inrashak hai hi enro!” ² Khan Jesu na ama dieng mashang a ruti, “Hi inrashak alur hai hi nangimuk maw nih? Akhat chung ah akhat rotho hi achim boi a hin ah imak lung `khatshe awm naw nih.” ³ Khan ama na riethiengmun le vararashan Olive Lawn ah rushulai khan, Peter, James, John, khan Andrew na ama dieng muruk a vak rawdawn uh, ⁴ “Hihai rikip hi itik a ashok rang a maw nih? Hihai kholok hi hawng shoknaviek rang a jetna kha imaw ninih? Nieriei u roh.” ⁵ Khan Jesu na amani dieng ariei ruput joi, “Tu na`awm nangni kha lam nerehemashakna boi u rang, riring u roh. ⁶ Ajarla ‘Kiei Christa kha kanih,’ tia mi tampui kiriming a va u rangnih, khan mi tampui mohon u rangnih. ⁷ Khan nangni na ra le ra chawng chawngpar a nangjet u rangnih. Makhan nangni puh u naw roh. Ajarla mahi ashok rang a awmsha inih, inia dawng nikho kha tu nimaklai. ⁸ Ajarla phung `khat na phung `khat chung a, khan reng `khat na reng `khat chung a, rahana mothoi rangnih. Munmun ah nieinu hawng rangnih, khan nekleshak awm boi a shawna kha hawng awm rangnih. Hihai kholok hi shawna putna kha nih rangnih. ⁹ “Khania nang bibing a riring u roh. Ajarla nangni kha amani na Sanhedrin hai dieng nepek u rangnih, khan synagogue hai khan nejem u rangnih. Khan nangni kha rampo hai le reng hai maikung a, kajar a amani dieng kungchang rang, nawchawi u rangnih. ¹⁰ Khan matiengpek athachawng hi phung kholok dieng shemngir rang a inih. ¹¹ Khan amani na nangni kha nawchawi ua nepek u phakhan, ih nangiriei u rang a kha matieng mulung mawshaw u naw roh, nitnawkle rashamjer u naw roh. Inia kha phatak khan inemejetinemejet u kha riei u roh. Ajarla ariei miring kha nangni nih u makche, inia Ratha Riethieng kha inih. ¹² “Khan shokpui `khat na shokpui `khat thitna rang, apa na anai thitna rang, mohon rangnih. Khan nai hai na nulepa hai kha rodoi pui ning, tia amani kha mihai mathat u rangnih. ¹³ Khan kiriming jar a mi kholok na naraha pui u rangnih, inia dawngshe a adoi ama kha shan rangnih. ¹⁴ “Inia thiempulien Daniel na iruriei kha ang a, ‘Mitiroi thitnathangna miring’ kha na idingna lawm boi mun ah ading kha nangmuk u phakhan (ate miring kha na jet rosho), Judea ah awm amani kha na lawn hai khan tan u rosho. ¹⁵ In chung ah awm kha na`awm noi ah jong chumlai naw rosho, inshung ah awm nieinak hai kha aloi rang lutlai naw rosho. ¹⁶ Khan loi ah ruawm ama kha na oponledier aloi rang, hong kirretlai naw rosho. ¹⁷ Kha pha khan nai ruvawng hai le rununeh nainoi runiei hai kha ituk a lungboiroi u rang a maw nih! ¹⁸ Nangtanna u rang a pha kha phabi a nitna boi rang, nikna niei u roh. ¹⁹ Ajarla makha pha kha Pathien na rieliei konpek ah put ah tunshe hin a rushok boilai, nuk a`awm ashok boi rang a, ajeng a shawna kha nih rangnih. ²⁰ Khan Pumi na nikho hai kha rumushum nawkatu, taksha `khatshe hawi naw nih. Inia ama na ithang a irumadansha hai jar a nikho hi irumushum inih ²¹ Kha pha khan tukhat na ‘Enro, Christa kha hin awm joi!’ ninawkle ‘Khawn awm joi!’ ti joiawm, takashawn u naw roh. ²² Ajarla christa jok hai le thiempulien jok hai kha hawng pung rangnih. Khan nitthiei a tu madansha haishe kha mohonna rang, jetna le rekhekchon hai kha numumuk u rangnih. ²³ Khania nangni riring u roh. Kiei na nangni dieng hihai kholok hi shok mala a kinieriei u nih joi. ²⁴ “Shawrievieina nikho kha thengphit `le, ni kha mijing rangnih. Tha na`awm ama mieivar kha pelai naw nih. ²⁵ Ravan a arshi hai kha jong cho rangnih; ravan a ranak kholok rawnawk rangnih. ²⁶ “Khashole Miring Shapa kha na ranak alien, khan lurna kha le romiei kar a ajong kha amani na muk u rangnih. ²⁷ Khashole ama na ravantir hai kha jong tir ning, tia kiei mili, ravan dawngkhit ah le rieliei dawngkhit, ah put ah awm ama madansha hai kha lawp a ruchun rangnih. ²⁸ “Khan thieichangkung ah put ah rangshim hi jet u roh: abak hai kha dawnglai khan, obo hawng moshok. Makhan, kholum kha hawng nai joi, iti kha nangjet uh. ²⁹ Khatikhan khahaikha nangmuk u phakhan, ama kha vak ranai a mawkawkungtak ah ding a awm joi, iti kha jet u roh! ³⁰ Diktak a nangni dieng kiriei inih, hihaihi hawng rupum masheng, hi rong hi shukhek a hek naw nih. ³¹ Ravan le rieliei hi hek rangnih, inia kawchawng hai hi tu shukthang a thang naw nih. ³² “Inia makha Nikho le nidan chungchanga tute na ajet awm mak, ravan a ravantir hai na`awm, khan Shapa kha na`awm, inia Apa ranga kha na ijet inih. ³³ Riring u roh, cheveng a nikna niei u roh; ajarla nangni na pha kha itik a jong shok rang a maw nih, iti kha jet u makche. ³⁴ “Mahi miring `khat na khomijin she dieng hin, ama shok hai dieng cham irotho pui, mi rikip dieng amama ithaw rang a chon irotho pui, khan mawkawt rungpa dieng riringtak a rungna rang a chawngipek a ama in imak kha le ra`ang inih. ³⁵ “Khajarkhan cheveng u roh, ajarla in pumi kha nitak a maw, nitnawkle janchim a maw, nitnawkle arkhon a maw, nitnawkle jingkar a maw, avatna rang a pha kha jet u makche. ³⁶ In pumi kha na jetboithieiboi a vat phakhan, jalam a nangruawm u kha navaktawng u nih. ³⁷ Khan kiei na nangni dieng kinieriei u hi vanoi dieng a kiriei inih: Cheveng u roh!”

¹ Khan ni `di shole, Rakanna le Chawjawboi Tan Rohoi kha hawng nih joi. Thiempu ulien hai le danoja hai na ama kha itia maw mohon a that rang, iti hi enchak a rutawk u joi. ² Khania “Rohoi hin tu nidiei naw rosho, miring hai kha puh rang keng,” ruti uh. ³ Khan Bethany ah raithawnaw tawngpa Simon in ah rushuh a ruawmlai khan, nupang `khat na manamhoi, ajeng a manlu nard riethienghiei rieipartui lungngoi kawk `khat a vak chawi a ava. Ama na thao kawk kha rukhoi a ama lu ah runawt pe. ⁴ Amani kar a eshen na mulung rahana niei a khatlekhat dieng ruti uh, “Iloia mahi thao hi ariem a imathang maw nih? ⁵ Ajarla thao hi dinari rajathum khea jor joiatu, shara hai dieng nepek ngamdet rangnih,” ruti ua ama kha ajeng a rumieshiet uh. ⁶ Khania Jesu na ruti, “Ithaw jawt kha thaw rosho, ijar a ama kha nirahamashak u maw nih? Ama na kiei dieng chon atha kha ithaw keng joi. ⁷ Ajarla shara hai kha ningthingkip nangawm pui uh, khan amani dieng chon atha nangithawna pe jawt u pha khan, nangthaw pe ngam uh, inia kiei tu nawawm pui jawnjai u makche. ⁸ Ama na ingamtuk kha ithaw inih. Kupum hi khumna rang, thao nawt avamasha keng joi. ⁹ Nangni dieng diktak a kiriei inih, ih mun khan nita`awm, rieliei pumpui ah athachawng shem phakhan, mahi nupangnu na iruthaw hi, ama miningna `khat a, riei rangnih.” ¹⁰ Khan shawmlieidi kar a akhat Judas Iscariot na Jesu kha pekna rang, thiempu ulien hai dieng rushe joi. ¹¹ Khan amani na jet u `le ningrungai pe ua ama dieng shier pek rang chawngrurakham u joi. Khan ama na Jesu kha itia maw mohon a amani dieng pek rang, tia chanthatna kha rutawk joi. ¹² Khan Chawjawboi Rohoi akhat changna nikho a amani na Rakanna kengamte kha ruthat u phakhan, akhaichawi hai na ama dieng rurawdawn uh, “Rakanna nangshakna rang, khoshekawt ah maw she a nangnarashammashak jawt uh?” ¹³ Ama na akhaichawi hai idi tir a amani dieng ruti, “Khopui khawn lut u roh, khan tuibe ruput miring `khat na nurumuk pui u rangnih. Ama anu kha jui u roh. ¹⁴ Ama lutna in pumi dieng rawdawn u roh, ‘Ojapa na iti, “Kakhaichawi hai le Rakanna kishakna u rang a indan kha khoshekawt ah maw nih?” ’ ¹⁵ Khan ama na rieliensha chungindan lienpui `khat numumuk u rangnih. Makhan kieini rang vak rasham u roh.” ¹⁶ Akhaichawi hai kha rushe ua khopui ah rulut u phakhan, ama na iruriei ang a, vak rawtawng pui uh, khan amani na Rakanna kha rurasham u joi. ¹⁷ Khan nitak hin ama na shawmlieidi kha le rushe joi. ¹⁸ Khan amani na rushuh a rushak u lai khan, Jesu na ruriei, “Kiei na nangni dieng diktak a kiriei inih, nang kar ua kiei le ashashom miring `khat na kiei hi nojor rangnih.” ¹⁹ Amani kha mulung rushaw pe ua akhat shole akhat na ama dieng “Kiei maw kanih?” ruti. Khan shik `khat na “Kiei maw kanih?” ruti. ²⁰ Amani dieng mashang a ruti, “Shawmlieidi, nang kar ua akhat, kiei le khengkam a khut ashunshom ama kha inih. ²¹ Miring Shapa kha ama chungchanga irumiejiek dungjuia ashok pe inih. Inia Miring Shapa ajor miring chung khan idawr a rahvanshie maw nih! Jong shoklam nawkala ama rang tha pe rangnih.” ²² Khan amani na rushak u lai khan, Jesu na tan kha ruloi, rahvan runik a rukhoi, khan amani dieng pek a ruti, “Loi u tana shah u roh, mahi kupum kha inih.” ²³ Khashole ama na hai kha ruloi, khan mapakna niei a amani dieng rupek. Khan amani kholok na makha runek uh. ²⁴ Khashole amani dieng ruti, “Mahi rawjawtna `thar kithishen, miring tampui rang a jong long, kha inih. ²⁵ Kiei na nangni dieng diktak a kiriei inih, Pathien rengchangna khan athar a kinekna rang a makha Nikho kha hawng shok masheng, kiei na mahi drakha tui hi nelai naw ning.” ²⁶ Khan amani na lah `khat ruthaw ua, Olive Lawn ah ruhawng u joi. ²⁷ Khashole Jesu na amani dieng ruriei, “Von jan hin, kajar a nang kholok na keruthuina nangniei u rangnih, ajarla hitihin rumiejiek: ‘Kiei na Kengamroi kha that rang kanih, khan kengam hawi kha chaiachai a awm rangnih.’ ²⁸ “Khanikengta kiei hi nomothoi shole, nang matieng u Galilee ah rushe rang kanih.” ²⁹ Inia Peter na ama dieng ruti, “Mi kholok na keruthuimashak joiawm, kiei tu kenuruthuimashak naw nih.” ³⁰ Jesu na ama dieng rumashang, “Diktak a kiei na nang dieng kiriei inih, von jantak hin arkhawng na voidi khong mala hin, kuchung a voithum nangrapha rangnih.” ³¹ Inia ama na ranaktak a ruti, “Kiei na nang le roroia thitnashom shokshe khanawm, kiei na nang chung a rapha naw ning!” Amani kholok na hitihin rutiviek uh. ³² Khan amani na Gethsemane iti mun khan va ua akhaichawi hai dieng ruti, “Kiei na nikna kienieilai hin, hi mun hin rushuh u roh.” ³³ Khan Peter, James, khan John, hi ama na rushe pui a, ama na mulungrahana le phairavaina niei ruput joi. ³⁴ Khan amani dieng ruti, “Kiringphuk hi thitna dawr a ajeng a shaw joi. Hin rurangah u roh, khan cheveng u roh.” ³⁵ Khan ama na amaton tieng rushebawt a rieliei chung ah bawklap a, nitthiei rang a tu makha pha kha na ama kha alimna rang, nikna runiei. ³⁶ Khan ama na ruti, “Abba, Kapa, irikip hi nang dieng tu nithieiviek, khajarkhan kahai hi kiei ah put ah noloi pe roh, khanikengta kimining kha nih naw rieshie nangimining kha nih rosho.” ³⁷ Khan ama na vak kir phakhan, amani kha amieilam a ruawm u kha vak tawng. Khan Peter dieng ruti, “Simon, nang amiei maw nangnih? Nang na nidan `khatshe cheveng a awm ngam makche maw? ³⁸ Nangni na lemna a nangchona boi u rang, cheveng u roh khan nikna niei u roh. Ratha na tu adithet, inia taksha hi na dawkshamna ieniei.” ³⁹ Khan ama na rusheret a matieng a inik kha le ra`angre a vak nikret. ⁴⁰ Ama na vak kirret `le, amiei a ruawm u kha vak tawngret, ajarla ajeng a mikrukhu pe uh. Khan amani na ama dieng ih imashang u rang a maw nih, iti rujet u mak. ⁴¹ Khan ama na voithum changna a vak kirret a amani dieng ruti, “Tunshe hin nangni amiei a shawmuchum maw nangnih u lai? Hun joi! Pha kha jong shok joi. Enro, Miring Shapa kha munu miring hai khut chung a pek joi. ⁴² Thoi u tana she u rang rawi. Enro, kiei najorpa kha na navakdep joi!” ⁴³ Ama na chawngruriei laitak khan, shawmlieidi kar a akhat, Judas kha mirawp lientak `khat le chemjam le mawbawng raklam a vat pui joi. Amani kha thiempu ulien hai, danoja hai, khan shierulien hai na ivaktir u inih. ⁴⁴ Ama ajorpa kha na amani dieng jetna pek a ruti, “Kiei na bieng kitumpa kha, ama kha inih. Shur u tana riringtak a chawi u roh.” ⁴⁵ Khan vaphit `le, ama na Jesu kha vak jongtir a “Rabbi, Rabbi!” tia iebieng ah vak tum joi. ⁴⁶ Khashole ama chung a khut rujawn ua amani na rushur u joi. ⁴⁷ Khan iedieng ah ading hai kar a akhat na echemjam kha rupawttap a, thiempu rashang shok `khat rutuk a, onokor kha rutan pe joi. ⁴⁸ Khan Jesu na amani dieng ruti, “Minieisho shur rang ang a, chemjam le rawmaw le kiei nashur rang, vak shok maw nangnih uh? ⁴⁹ Ningthingkip riethiengmun ah mi hai kha kururuchuk, khan nangni le kuruawmshom a nurushur u makche. Inia Miejiek kha hawng shokna rang a inih.” ⁵⁰ Khan akhaichawi kholok na ama kha mathan ua rutan u joi. ⁵¹ Khan rothar `khat na takmukhu pon ranga rieshiei a ama anu kha rujui joi. Khan amani na rushur u `le, ⁵² ama ponledier kha amak a rekengver a rutan joi. ⁵³ Khan amani na Jesu kha thiempu rashang dieng ruchawi u joi. Kha mun khan thiempu ulien kholok, danoja hai le shierulien hai kholok kha vak ruchun u joi. ⁵⁴ Peter na thiempu rashang tolawngshe kha ralaviei a vak jui, ama na riethiengmun shipai hai le rushuh a miei ru`u uh. ⁵⁵ Khan thiempu ulien hai le khan Sanhedrin kha na Jesu thatna rang ajar rutawk pe u joiawm, rumuk pe u mak. ⁵⁶ Ajarla arawplam na ama chung a adik boi kungchangna kha rupek uh. Inia kungchangna hai kha rura`ang pe u mak. ⁵⁷ Khan miring eshen kha thoi ua adik boi kungchangna kha rupek uh. ⁵⁸ Amani na ruti uh, “ ‘Kiei na khut ah kon riethiengmun hi mathang a, ni `thum shung a khut a kon boi riethiengmun mothoi rang kanih,’ tia iruriei kha kieini na kejet uh.” ⁵⁹ Khatikhan ruti ua`awm kungchangna ipek u kha tu rura`ang pe u mak. ⁶⁰ Khan thiempu rashang kha na alaitak ah ding a Jesu dieng rurawdawn, “Mashanglai naw rawng maw? Nang chung a mi hai na kungchangna ipek u hi imaw nih?” ⁶¹ Inia ama kha ruawmchien a iawm rumashang mak. Khan thiempu rashang kha na rurawdawnret, “Ashapa, kimapak u Christa kha nang maw nangnih?” ⁶² Jesu na rumashang, “Kiei kanih. Miring Shapa kha na Ranaknieipa chang tieng a ashuh, khan ravan a awm romiei le ajong kha nangni na nangmuk u rangnih.” ⁶³ Makhan thiempu rashang kha na ama ponledier kha ther a ruti, “Dawn a kungchangna rang, imaw nirangai u lai? ⁶⁴ Pathien imieshiet hi nangni na nangjet u joi! Ih maw nangmining uh?” Khan amanilim kha na ama kha athi rang rutuk ti ua ruheng u joi. ⁶⁵ Khan eshen na ama kha miechiei ruput uh, khan imik kha rushing pe uh. Khan rujem ua, “Rophong roh!” ruti uh. Khan riethiengmun shipai hai kha na khutmaja le ruben uh. ⁶⁶ Peter na thoi tieng ah shumkung khan ruawm le roroia, thiempu rashang shoknu `khat hi ava. ⁶⁷ Peter na miei iruru`u kha vak muk `le, miejierep a ruti, “Nangawm Nazareth Jesu le nangrurawtawp.” ⁶⁸ Inia Peter na rapha a ruti, “Nangiriei miring kha kiei jet mi`ing, khan nangiti kha imaw nih itiawm jet mi`ing.” Khan ama na shumkung ah put ah toh rushokphit `le, arkhawng hawng khong joi. ⁶⁹ Khan shoknu kha na rumukret a iedieng ah ading hai dieng ruti, “Amapa hiawm amani kar a akhat keng” ⁷⁰ Inia makhan`awm rurapharet. Khashole richinkhat awm a iedieng ah ading hai kha na Peter dieng rutiret uh, “Diktak a nang hi amani kar a akhat nangnih, nang chawngriei hi na Galilee miring nangnih, iti madangmashak.” ⁷¹ Inia ama na nining a pumrobot, khan chawngrurakham, “Nangiriei u miring kha kiei jet mi`ing.” ⁷² Kha phatak khan arkhawng kha voidi changna hawng khong joi. Khan Jesu na ama dieng iruriei, “Arkhawng na voidi khong mala, kuchung a voithum nangrapha rangnih,” iti kha hawng mininghep a Peter na rie`ieklam a ruchap joi.

¹ Khan jingkar hin relentak a thiempu ulien hai, shierulien hai, danoja hai, khan Sanhedrin kholok na chawng rurashaksho u `le, Jesu kha rukhop ua Pilate dieng ruchawi u joi. ² Makhan Pilate na ama dieng rurawdawn, “Jihudi hai reng kha maw nangnih?” Khan ama na rumashang, “Nangiti kha inih.” ³ Khan thiempu ulien hai kha na ajar tampui rupek uh, inia ama na iawm rumashang mak. ⁴ Pilate na ama dieng rurawdawnret, “Nang na iawm mashang naw rawng maw? Enro, amani na nangchung a hidawr a jar inepek u hi!” ⁵ Inia Jesu na ih rumashang mak, khajarkhan Pilate kha shinrudawng pe. ⁶ Khan hi ang rohoi hin, amani na tukhat nita`awm nomoshok pe u roh, iti shurkhop `khat imoshok rang a hi ama shenangai inih. ⁷ Barabbas iti miring `khat ruawm. Ama kha ramuruk iruthaw pui hai kha le lawp a lungroko shung ah irukhopchen inih, ajarla ramuruk thawna a mi iruthat u inih. ⁸ Khan mipui kha na he rashang a ra`ai a ruti uh, “Matieng a ithawngai kha ang a, nawthaw pe u roh,” tia ama dieng anih ruput u joi. ⁹ Inia Pilate na amani dieng mashang a rurawdawn, “Nangni rang Jihudi hai Reng kimoshok rang a hi nangdit u maw?” ¹⁰ Ajarla thiempu ulien hai na Jesu kha mukmakna jar a irupek u keng, iti kha ama na rujet. ¹¹ Inia thiempu ulien hai na Barabbas kha moshokmashakna rang, mipui kha enchak a rumawshawk uh. ¹² Pilate na mashang a rurieiret, “Khanitatu Jihudi hai Reng nangitipa u hi kiei na imaw lawt ning?” ¹³ Ra`ai a amani na ruti uh, “Ama kha cross ah that roh!” ¹⁴ Khan Pilate na amani dieng ruti, “Ijar a maw? Ama na ashie imaw ruthaw joi?” Inia amani na rashangdet a ra`ai a ruti uh, “Ama kha cross ah that roh!” ¹⁵ Khan Pilate na mipui kha ningruminit pe jawt jarkhan, Barabbas kha amani rang rumoshok pe joi. Khan Pilate na Jesu kha enchak a rumejem a cross ah thatna rang, amani dieng rupek joi. ¹⁶ Khan ramiring hai na Jesu kha Praetorium iti tomai khan ruchawi ua amani na rarup kholok ruruchun u joi. ¹⁷ Khan amani na Jesu kha rengpon rurieshieimashak uh, khan riling le renglukhum `khat ruphan ua, ama lu ah rukhumashak u joi. ¹⁸ Khan amani na ama kha “Lawm roh, Jihudi hai Reng!” tia chubai rupek uh. ¹⁹ Khashole amani na shingnang pum le ulu ah rujem ua rumiechiei uh, khan rukhuk shun a ama kha chubairubawk uh. ²⁰ Khan ama kha engshiet a ruthaw u lai khan, rengpon irieshiei kha ruthut pe ua ama ponlediertak kha rurieshieimashak u joi. Khan amani na cross ah that rang, ruchawi u joi. ²¹ Khan Alexander le Rufus apa u Simon iti Cyrene miring `khat kha, kho ah put ah hawng kirna hin, ama cross kha rangrat a rumuphung uh. ²² Amani na Jesu kha Golgotha iti mun ah ruchawi u joi. Mahi nemele le Luru Mun tina inih. ²³ Khan ju le myrrh reche tui kha rupek uh, inia Jesu na runek pe mak. ²⁴ Amani na cross ah rumakhai u lai khan, ama ponledier hai kha rushen ua miring rikip na ih kha maw tu dieng chang nih, tia vanmuk ruen uh. ²⁵ Ama kha cross ah rumakhai u phakhan, nidan `ko cho joi. ²⁶ Khan ama kha ithatna u ajar kha JIHUDI HAI RENG, tia luchung tieng rumiejiek pe uh. ²⁷ Khan ama le rawtawp minieisho, akhat kha ama viei tieng, khan akhat kha ama chang tieng ah shir ah, cross hai khan idi kha rumakhai uh. ²⁸ Khatikhan Miejiek na iruriei kha hawng rupum inih, hitihin ieriei, “Ama kha danishawnboi hai kha le rutechen uh.” ²⁹ Iedieng ah shehawng hai na, amani lu nawklam a mieshiet a ruti uh. “Hawhawiaw! Riethiengmun kha mathang a ni `thum shung a mothoi rang a pa. ³⁰ Nang nining a rekhek tana cross ah put ah jong chum roh.” ³¹ Khatikhan thiempu ulien hai le danoja hai na`awm engshiet a ruthaw ua manilemani dieng ruti uh, “Ama na shik miring hai kha rushan, inia nining a tu rashan ngam mak. ³² Kimik u na kumuk u `le takakawshawnna u rang, Israel hai Reng Christa kha na cross ah put ah tun jong chum rosho.” Cross ah irukhai pui hai kha na`awm khatikhan erawh a rubiek uh. ³³ Khan nidan shawmlieidi ah put ah nidan `thumshe hin ram rikip kha rujing joi. ³⁴ Khan nidan `thumtak khan Jesu na he rashangtak a ra`ai a ruti, “Eloi, Eloi, lama sabachthani?” Mahi nemele le “Kapathien, kapathien, ijar a nanginamathan maw nih joi”? tina inih. ³⁵ Khan makhan ah ading eshen na makha rujet u phakhan, ruti uh, “Enro, ama na Elijah kha ahai joi.” ³⁶ Khan mi `khat na rutan a spongos kha ju athur khan runawm a, rawmaw mawr ah rukhop pe, khan nek rang rupek. Ama na ruti, “Bieh u naw roh. Elijah na jong a ama kha jongmuchum maw en u rawi.” ³⁷ Khan Jesu na he rashangtak a rura`ai a arang ruchat joi. ³⁸ Khan riethiengmun maikharpon kha chung ah put ah thoishe her `di a rether joi. ³⁹ Khan Jesu le mai re`enchak a ading rarajakhat lamkaipa kha na Jesu na khatikhan a athi kha muk a ruti, “Diktak a mahi miring hi Pathien Shapa kha keng!” ⁴⁰ Khan nupang hai kha na rakhat ah vak en uh. Amani kar a Magdala nupang Mary, Joses le mutumapa, James unu Mary le Salome ruawm uh. ⁴¹ Amani hai hi Galilee ah ruawm u lai a ama anu jui a ochon iruthaw pe, khan ama le rawtawp a Jerusalem tieng ah ahawng nupang hai kha`awm ruawm uh. ⁴² Khan ni hawng tah a Sabbath nikho mala a Rashamna Nikho kha hawng shok `le, ⁴³ rampo hai kar a mi na ila, khan Pathien rengchangna kha upumtak na irungak Arimathea Joseph kha ava. Khan ngar`er a Pilate dieng rushe a Jesu rok kha vak nik. ⁴⁴ Khan Pilate na Jesu kha thi joi, iti jet `le, shinrudawng pe. Khan rarajakhat lamkai kha rukoi a Jesu thitna kha shawt joi maw, tia rurawdawn. ⁴⁵ Khan rarajakhat lamkai dieng Pilate na rujet`het shole, Jesu rok kha Joseph dieng rupek joi. ⁴⁶ Khan Joseph na ponramasha `khat rurawchawk, khan ama kha cross ling ah jongmuchum a ponramasha kha le rujo joi. Khan lung iver khan rumaja a than mawkawt kha lung `khat le rukhar joi. ⁴⁷ Khan Mary Magdalene le Joses unu Mary na Jesu irumajana u mun kha tinruta uh.

¹ Khan Sabbath nikho theng shole, Mary Magdalene, James unu Mary, khan Solome, amani na she a ama chung ah nawt rang, rieipartui rurawchawk uh. ² Khan hapta shung a akhat changna nikho jingkara, ni hong shokphit `le, amani na thankung ah rushe uh. ³ Khan tu na maw than mawkawt kharna lung kha nemelet pe u nih, tia ruriebieh uh. ⁴ Khan amani na en u phakhan, mawkawt kha ajeng a rulien joiawm, rureletsha a rumuk u joi. ⁵ Khan amani na than shung khan rulut ua, rothar `khat ponrosho achek rieshiei a chang tieng ah shir ah rushuh kha muk u phakhan, rurawthawk uh. ⁶ Khan amani dieng ruti, “Nangni rawthawk u naw roh, Cross ah iruthat u Nazareth Jesu kha nangitawk u inih. Ama kha hawng ring joi! Ama kha hin awmlai mak. Enro, ama irumajana u mun hi. ⁷ Nangni na she u tana akhaichawi hai dieng le Peter dieng vak mejet u roh. Ajarla ama na nang matieng u Galilee ah rushe rangnih, tia nangni dieng inururiei u dungjuia, ama kha makhan nangmuk u rangnih.” ⁸ Makhan amani na relentak a than ah put ah vak shok ua rutan u joi. Ajarla amani kha shindawng a rurawnawk uh, khan ruchih u jarkhan, tute dieng ruriei u mak. ⁹ Khan hapta shung a akhat changna jingkara hin Jesu na hawng thoi shole, raikho shiri irunawt pe Mary Magdalene dieng matieng Christa na rular joi. ¹⁰ Khan ama na rushe a mulungjum a rie`ieklam a chap, ama le rurawtawp, hai dieng khan vak riei. ¹¹ Jesu na hawng ring kha kiei na kumuk joi, tia ivakriei kha rujet u phakhan, ruring u mak. ¹² Khashole pasha `di dieng, ram `khat ah rushena ua, eme shik a rularret. ¹³ Khan amani na rushe ua shik hai dieng vak riei uh, inia amani na`awm ruring u mak. ¹⁴ Khashole tebol ah rushuh khaichawi shawmlieikhat hai dieng Christa na rular. Khan amani na iringna boi u le amani mulung michimna khan rurawkawk. Ajarla ama kha hawng ring shole, amuh hai iriei kha ruring u mak. ¹⁵ Amani dieng ruti, “Nangni manmieshie kholok hin she u tana athachawng hi khutkon rikip dieng vak rophong u roh. ¹⁶ Khan takashawn a baptisma ruloi ama kha shan rangnih, inia takarushawn boi ama kha aheng rangnih. ¹⁷ Hihai jetna hai hi na takashawn hai kha jui rangnih: Kiriming a raikho hai kha nawt u rangnih, khan chawng `thar a chawng u rangnih. ¹⁸ Amani na khut le moro ashar a arak u rangnih, khan tur kha neksheawm ih ti u naw nih. Khan amani na ana hai chung ah khut tet pe u ning, tia amani kha dam u rangnih.” ¹⁹ Khan Pumi na hihai chawng hi ruriei pe shole, ama kha ravan tieng ruloi joi. Khan Pathien khut chang tieng rushuh joi. ²⁰ Khan amani na rushe ua mun rikip ah chawng kha rushem u joi. Khan Pumi na amani le chon ruthaw joi. Khan amani chawngriei hai kha chonrekhek jetna hai kha le irumenet pe inih. Amen.