MATTHEW

¹ Mahi behangbuk hi Abraham Shapa, David Shapa Jesu Christa thoinakeina kha inih: ² Abraham kha Isaac apa runih. Isaac kha Jacob apa runih. Khan Jacob kha Judah le ama shokpui hai apa runih. ³ Judah kha Perez le Zerah apa runih. Khan unu u kha Tamar runih. Perez kha Hezron apa runih. Khan Hezron kha Aram apa runih. ⁴ Aram kha Aminadab apa runih. Aminadab kha Nahshon apa runih. Khan Nahshon kha Salmon apa runih. ⁵ Salmon kha Boaz apa runih. Rahab kha unu runih. Boaz kha Obed apa runih. Ruth kha unu runih. Khan Obed kha Jesse apa runih. ⁶ Jesse kha reng David apa runih. Reng David kha Solomon apa runih. Solomon unu kha Uriah nungak kha runih. ⁷ Solomon kha Rehoboam apa runih. Rehoboam kha Abijah apa runih. Khan Abijah kha Asa apa runih. ⁸ Asa kha Jehoshaphat apa runih. Jehoshaphat kha Joram apa runih. Khan Joram kha Uzziah apa runih. ⁹ Uzziah kha Jotham apa runih. Jotham kha Ahaz apa runih. Khan Ahaz kha Hezekiah apa runih. ¹⁰ Hezekiah kha Manasseh apa runih. Manasseh kha Amon apa runih. Khan Amon kha Josiah apa runih. ¹¹ Israel nai hai kha Babylon ah ruchawi u lai khan, Josiah kha Jeconiah le ama shokpui hai apa u runih. ¹² Amani kha Babylon ah ruchawi u shole: Jeconiah kha Shalathiel apa runih. Khan Shalathiel kha Zerubbabel apa runih. ¹³ Zerubbabel kha Abiud apa runih. Abiud kha Eliakim apa runih. Eliakim kha Azor apa runih. ¹⁴ Azor kha Zadok apa runih. Zadok kha Akhim apa runih. Khan Akhim kha Eliud apa runih. ¹⁵ Eliud kha Eleazar apa runih. Eleazar kha Matthan apa runih. Matthan kha Jacob apa runih. ¹⁶ Jacob kha Joseph apa runih. Joseph kha, Christa iruti u Jesu rumoshok Mariam inkopa kha runih. ¹⁷ Khajarkhan Abraham ah put ah Davidshe thoinakeina hai kha rong shawmlieimili inih. David ah put ah Babylon ah iruchawina u kha rong shawmlieimili inih. Khan Babylon ah iruchawina uah put ah Christa shoknashe kha rong shawmlieimili inih. ¹⁸ Jesu Christa shokna kha hitihin ruawm: Unu Mariam kha Joseph rang rushot pe u joi, inia rawtawng mala khan Ratha Riethieng ah put ah nairuvawng joi. ¹⁹ Inia imiringpa Joseph kha midik `khat runih, khan vanoi dieng chawng moshok a jak pek rang rudit boi jarkhan, ama na muruk a rumathan jawt joi. ²⁰ Inia hihaihi rumining laitak hin, enro, Pumi ravantir `khat na ama dieng ramang a jong lar a ruti, “David shapa Joseph, nang inkonu Mariam nangiloi rang a kha chit pui naw roh. Ajarla ivawng nai kha Ratha Riethieng ah put ah inih. ²¹ Ama na shapa `khat moshok rangnih, khan ama riming kha JESU nangti pe rangnih. Ajarla imiring hai kha amani munu ah put ah shan rangnih.” ²² Hihai kholok hi Pumi na thiempulien dieng a bai`irushona kha hawng rupumna rang a inih. ²³ Hitihin ruriei: “Enro, shimnu `khat na naivawng a shapa `khat moshok rangnih, khan ama riming kha Imanuel ti pe u rangnih.” Makha “Pathien na kieini le awm,” tina inih. ²⁴ Joseph na aja ah put ah hawng thoi phakhan, Pumi ravantir na chawngirupek dungjuia ama kha ruloh joi. ²⁵ Inia asharapa shapa kha runiei masheng, Joseph na rurishih pui mak. Khan ama riming kha JESU, tia rupho pe joi.

¹ Herod na reng ruchanglai, Judea ah awm Bethlehem khan Jesu rushok shole, enro, shim tieng ah arshi behangthiei hai kha Jerusalem hawng shok u joi. ² Amani na ruti uh, “Ashok Jihudi hai Reng kha khoshekawt ah maw awm? Shim tieng hin ama arshi kha kumuk u jarkhan, ama chubaibawk hawng kanih uh.” ³ Reng Herod na makha rujet phakhan, umulung ruraha pe joi. Ama le awm Jerusalem miring kholokawm mulung ruraha pe u joi. ⁴ Ama na miring hai thiempu ulien hai le danoja hai kha ruruchun a Christa kha khoshekawt ah shok rang a maw nih, tia amani dieng rurawdawn joi. ⁵ Ama dieng rumashang uh, “Judea ah awm Bethlehem ah inih, ajarla hitihin thiempulien dieng irumiejiekna inih: ⁶ ‘Judah ram ah awm Bethlehem, nang tu Judah rampo hai kar a noishieving kha nimakche. Ajarla nang ah put ah kimiring Israel hai aroi rang, Rampo `khat jong rangnih.’ ” ⁷ Khashole Herod na muruk a arshi behangthiei hai kha rukoi a amani dieng arshi larna phatak kha jetna rang riringtak a rurawdawn joi. ⁸ Amani kha Bethlehem ah rutir a ruti, “She u tana Naitepa kha vak tawk u roh. Ama kha nangmuk u phakhan, chawng kha kiei dieng vak mikir u roh. Kiei na`awm ama kha chubai vak bawk rawng.” ⁹ Rengpa chawng kha rujet u shole, rushe u joi. Khan enro, shim tieng ah irumuk u arshi kha na Naitepa ruawmna riding khan ding masheng, amani maton ah rulawn. ¹⁰ Amani na arshi kha muk u phakhan, ajeng a ningrungai pe uh. ¹¹ Khan in khan amani na rulut u phakhan, Naitepa kha unu Mariam le ruawm kha vak muk uh. Amani na bawklap a ama kha chubairubawk uh. Amani na nieibawm hai kha rumawlawng ua, khutchawi hai kha ama dieng rupek uh. Khahaikha la: rangkachak, libanos, khan myrrh inih. ¹² Khania Pathien na amani dieng ramang a, Herod dieng kirna boi rang, chawngruriei pe u joi. Khajarkhan lam shik arawh ua amani ram tieng rukir u joi. ¹³ Khan amani na rumathan u shole, Pumi ravantir na Joseph dieng ramang a jong lar a ruti, “Thoi rang roh, Naitepa le unu kha chawi tana Egypt ah tan rang roh. Kienieriei masheng kha mun khan awm roh. Ajarla Herod na Naitepa kha mathangna rang, atawkdeng joi.” ¹⁴ Khajarkhan Joseph na ruthoi a Naitepa le unu kha Egypt tieng jan a rushe pui joi. ¹⁵ Ajarla Pumi na thiempulien dieng irurieina, “Egypt ah put ah kashapa kha kokoi joi,” iti kha hawng rupumna rang a inih. Khan Herod na thit masheng, kha mun khan ruawm joi. ¹⁶ Khan arshi behangthiei hai kha na nomohon joi, iti kha Herod na rujet `le, ajeng a mulung ruhang pe joi. Khan arshi behangthiei hai ah put ah kungler irujetsha dungjuia, ama na mi rutir a Bethlehem le khakawt ah awm kum `di le kum `di thoi a shapa kholok ruthat joi. ¹⁷ Makha thiempulien Jeremiah dieng a irurieina kha hawng rupumna rang a inih. Ama na ruti, ¹⁸ “Rama khan hesho `khat rujet. Awina, chaprie`iek, khan lungkurna hesho kha inih. Rachel na anai hai rang rie`ieklam a chap a awm. Tute na imaw`awi rang a kha rudit mak, ajarla amani kha awm u lai mak.” ¹⁹ Khania Herod kha ruthi phakhan, enro, Egypt khan Pumi ravantir `khat na Joseph dieng ramang a jong lar joi. ²⁰ Ama na ruti, “Thoi tana unu le Naitepa kha Israel ram tieng she pui rang roh. Ajarla Naitepa ringkho atawk miring hai kha thisho joi.” ²¹ Joseph na ruthoi a unu le Naitepa kha Israel ram tieng vat pui joi. ²² Inia Archelaus na apa Herod ruhut a Judea ipok kha rujet `le, makha mun ah ashe rang kha, ruchih. Ramang a chawngiruben le roroia, ama na Galilee ram tieng rushe joi. ²³ Khan ama na ava a Nazareth iti kho khan vak awm joi. Makha thiempulien hai dieng “Ama kha Nazareth miring, tia koi rangnih,” tia irurieina kha hawng rupumna rang a inih.

¹ Khalaikhan baptisma apeh John na Judea ramthim khan rular a chawng rushem: ² “Nang mulung lek u roh, ajarla ravan rengchangna kha jong nai joi!” ³ Ajarla mahi miringpa chungchang hin thiempulien Isaiah dieng a irurieina inih. Ama na ruti, “Ramthim ah hesho `khat na ra`ai, ‘PUMI lam kha kon pe roh. Ama lam hai kha moton pe roh.’ ” ⁴ Makha Johntak na sharingshiei sham kha rurieshiei, mevun kawngkhit kha rukhit. Ama nekleshak kha khaishawr hai le ram khoining runih. ⁵ Khashole Jerusalem, Judea le Jordan na iroko ram ah awm miring kholok na ama dieng rushe uh. ⁶ Khan amani munu hai kha ruruphong ua Jordan khan ama na baptisma rupek uh. ⁷ Inia Pharisee hai le Sadducee hai na ama baptisma loina mun ah ava kha rumuk phakhan, amani dieng ruti, “Aw moro chicha hai! Jongshok rang a lunghangna ah put ah atan rang, tu na maw nangni kha nierieimasha u joi? ⁸ Khajarkhan mulung lekna rutuk ara hai kha mupung u roh. ⁹ ‘Abraham kha kapa u `khat a kieniei uh,’ tia mining u naw roh. Ajarla hihai lung ah put ah Abraham rang Pathien na nai hai kha mothoi ngam, tia nangni dieng kinieriei u inih. ¹⁰ Tunawm thing hai rujung khan riei kha rutung a awm joi. Khajarkhan atha ara moshok boi thing rikip kha tuk a miei ah apai rangnih. ¹¹ “Nang mulung nangilek u le roroia, kiei na nangni kha tui a baptisma kenepek uh, inia kanuk a ava rang a pa kha kieinek a ranak nieidet. Ama kethawp hai arak rang khan kiei rutuk mi`ing. Ama na nangni kha Ratha Riethieng le miei a baptisma nepek u rangnih. ¹² Jamja kha ukhut le arak joi. Ama na pher kha machai rangnih joi. Khan ama gehu kha achu khan rawkhawm rangnih joi, inia irishi hai kha chiemtiknieiboi miei le ha rangnih joi.” ¹³ Khashole John na baptisma moloina rang, Jesu na Galilee ah put ah Jordan khan rushe joi. ¹⁴ Inia John na rumakha a ruti, “Nang na kiei hi baptisma ninomoloi rang a hi kirangai inih. Inia iloia kiei dieng ava maw nangnih?” ¹⁵ Inia Jesu na mashang a ama dieng ruti, “Tun a hin tu hi nih rosho, ajarla dikna kholok hitihin a rupummashak rang a hi kieini rang rutukthep inih.” Makhan John na rujawt pe joi. ¹⁶ Khan baptisma rupek shole, Jesu kha relentak a tui ah put ah hawng thoi a enro, ravan kha rumawlawng pe joi. Khan Pathien Ratha na vashu ang a jong chum a ama dieng jong chuh kha rumuk. ¹⁷ Khan enro, ravan ah put ah he `khat na ruti, “Mahi kashapa numpoktak kha inih, ama chung a ningnitna kha kieniei joi.”

¹ Khashole Jesu kha diabol na lemna rang, Ratha na ramthim ah ruchawi joi. ² Khan ama na ni shawm mili jan shawm mili chamrarudoi shole, vawnrucham pe joi. ³ Makhan milempa kha na ava a ama dieng ruti, “Pathien Shapa kha nangnih a tu, hihai lung hi tan rachangna rang, chawng peh roh.” ⁴ Inia mashang a ama na ruti, “Hitihin miejiek, ‘Miring na nekleshak ranga kha le ring naw nih, inia Pathien bai ah put ah vak shok chawng rikip kha le aring rang a inih.’ ” ⁵ Khashole diabol na khopui riethieng khan ruchawi a riethiengmun moidawn khan rumiding. ⁶ Khan ama dieng ruti, “Pathien Shapa kha nangnih a tu, nang nining a chawm roh, ajarla hitihin miejiek, ‘Pathien na ama ravantir hai kha nang chungchanga chawng pek rangnih,’ khan ‘Nangke kha lung le rawtawna boi rang, amani khut le nurudawm u rangnih.’ ” ⁷ Jesu na ama dieng ruti, “Hitihin miejiek a awmret, ‘Nang PUMI nang Pathien kha nangilem boi rang a inih.’ ” ⁸ Takthar a diabol na ama kha lawn rashangtak ah ruchawiret a manmieshie rengchangna kholok le amani lurna hai kha rumumuk. ⁹ Khan Jesu dieng ruti, “Kiei hi chubainangnabawk a tu, hihai kholok hi nepek rang kanih.” ¹⁰ Khashole Jesu na ama dieng ruti, “Kiei ah put ah rechen roh, Aw Satan! Ajarla hitihin miejiek a awm, ‘Nang PUMI nang Pathien kha chubainangibawk rang a inih, khan ama ranga kha chon nangithaw pe rang a inih.’ ” ¹¹ Khashole diabol na ama kha rumathan joi. Enro, ravantir hai na jong ua ama chon kha jong thaw pe u joi. ¹² Khan John kha lungroko shung a rutet joi, iti kha Jesu na rujet `le, Galilee tieng rushe joi. ¹³ Khan Nazareth kha rumathan shole, ava a Capernaum ah ruawm joi. Makha Zebulun le Naphtali ram ah thampui kawriei ah awm inih. ¹⁴ Makha thiempulien Isaiah dieng irurieina kha hawng rupumna rang a inih: ¹⁵ “Zebulun le Naphtali ram, thampui kawriei ah le Jordan vara ah awm, Phungshik hai awmna Galilee. ¹⁶ Ajing a awm miring kha na mieivar lientak `khat muk joi. Khan kha ram le thitna rilip a awm miring amani dieng khan mieivar kha na hawng eh joi.” ¹⁷ Khan ah put khan Jesu na chawngshem ruput a ruriei, “Nang mulung lek u roh, ajarla ravan rengchangna kha jong nai joi.” ¹⁸ Khan Galilee Thampui pang kha rujotlai khan, poro `di, Peter iti Simon le anaipangpa Andrew, na thampui chung ah len iruvawr u kha vak muk, ajarla amani kha ngashur miring runih uh. ¹⁹ Khan adin u dieng ruti, “Kanu nujui u roh, kiei na nangni kha mishur miring niminit u rang kanih.” ²⁰ Khan relentak a len hai kha mak ua Jesu anu kha rujui u joi. ²¹ Khan ah put ah rushe a ulienpa le naipangpa shik idi, Zebedee shapa James le anaipangpa John kha rokong shung ah vak muk uh. Amani kha apa u Zebedee le rokong shung ah len hai kha iphawt a ruawm u inih, khan amani kha rukoi uh. ²² Khan relentak a rokong le apa u kha mak ua Jesu anu kha rujui u joi. ²³ Jesu na Galilee kholok khan rushe a amani synagogue hai khan mi ruruchuk. Khan rengchangna athachawng kha rurophong. Ama na rai rikip le miring hai kar a taksha natna kholok kha rumadam pe joi. ²⁴ Khan Syria kholok shung khan iriming rushe joi. Khan ana hai kholok kha ama dieng ruchawi uh. Amani kha rai shikshik natna na imawshaw, raikho na ichutna, pingbawprai tawng miring hai le takthi miring hai kha runih uh. Jesu na amani kha rumadam uh. ²⁵ Khan Galilee, Decapolis, Jerusalem, Judea, khan Jordan vara ah put ah mipui na ama anu kha rujui u joi.

¹ Khashole mirawp kha rumuk phakhan, ama na lawn ah ruhawng joi. Khan shutna ruloi phakhan, akhaichawi hai na ama dieng va uh. ² Khan amani kha ruchuk put a ruriei: ³ “Ratha a sharachang hai kha rahvanmuh miring kha inih, ajarla ravan rengchangna kha amani tah inih. ⁴ Mulung thangta hai kha rahvanmuh miring kha inih, ajarla amani mulung kha menem pe rangnih. ⁵ Mulung renem hai kha rahvanmuh miring kha inih, ajarla amani na rieliei kha tum u rangnih. ⁶ Dikna rang a vawncham le tuira hai kha rahvanmuh miring kha inih, ajarla miship pe u rangnih. ⁷ Roihoi miring hai kha rahvanmuh miring kha inih, ajarla roihoina kha muk u rangnih. ⁸ Mulung a riethieng hai kha rahvanmuh miring kha inih, ajarla amani na Pathien kha muk u rangnih. ⁹ Riengieina athaw miring hai kha rahvanmuh miring kha inih, ajarla amani kha Pathien shapa hai, tia koi rangnih. ¹⁰ Dikna jar a mi na epshawna ipek hai kha rahvanmuh miring kha inih, ajarla ravan rengchangna kha amani tah inih. ¹¹ “Kajar a mi na jakna le epshawna kha nepek uh, khan chawng shie kholok le nangni kha niebiek u phakhan, rahvanmuh miring kha nangnih uh. ¹² Ningai u roh, khan rawshaw u roh, ajarla ravan a nang lawh u kha ielien. Ajarla khatak kha ang a nang maton uah thiempulien hai kha amani na epshawna kha irupek u inih. ¹³ “Nangni rieliei michi kha nangnih uh. Inia michi kha a`ah boi chang joiala, itia maw ma`aret rawng? Ajarla ih rangbak khan nemnalai naw nih, inia makha pai a miring hai na eke le ichongna rangte keng joi. ¹⁴ “Nangni manmieshie mieivar kha nangnih uh. Lawn ah imothoi khopui kha mi na the ngam naw nih. ¹⁵ Tute na thaomiei kha muchuk a tiengkum thoi ah tetngai mak, inia thaomieishut khan atet a in shung ah awm kholok dieng aeh. ¹⁶ Kha ang khan nang mieivar u kha na miring hai maikung a var rosho. Makha nang chonthaw u atha kha amani na muk a ravan a awm nangpa u kha mapakna rang a inih. ¹⁷ “Dan ninawkle Thiempulien hai na imiejiek kha mathang ajong kanih keng, tia mining u naw roh. Amani kha mathang rang, kiei ajong nimi`ing, inia rupummashak ajong kanih. ¹⁸ Diktak a nangni dieng kiriei inih, ravan le rieliei hi hek masheng, khan kholok hi rupum masheng, Dan ah put ah chawng shundet ninawkle hailak `khatshe thang naw nih. ¹⁹ Khajarkhan tunita`awm hihai chawngpek kar hin ashinving `khat ikhoi a mi ruchuh miring kha ravan rengchangna khan ashinving, tia koi rangnih. Inia tunita`awm chawngpek hai kha ithaw a mi hai kha iruchuk ama kha ravan rengchangna khan alien, tia koi rangnih. ²⁰ Ajarla nang dikna kha na danoja hai le Pharisee hai dikna kha khe joi nawkatu, ravan rengchangna khan shuklut a lut u naw tinih, tia nangni dieng kiriei hi inih. ²¹ “Tolai khan dan na mi hai dieng, ‘Mi nangithat boi rang a inih, tunita`awm mithat miring kha na chawngshatna kha rawtawng pui rangnih,’ iti kha nangjet uh. ²² Inia kiei na nangni dieng kiti makhala tunita`awm jar boi a uliennai chung a mulung hang mi rikip na chawngshatna kha rawtawng pui rangnih. Khan uliennai dieng, ‘Nemna boi miring!’ atipa kha na Sanhedrin maikung a ding rangnih. Khan ‘Mivet!’ atipa ama kha na Gehenna ah lut rangnih. ²³ “Khajarkhan maicham ah khutchawi nangchawi phakhan, nang uliennai na nang chung a mulunghoina boi kha nanghawngmining a tu, ²⁴ maicham khan nang khutchawi kha mah tana, rapapek a, nang uliennai kha le riengieina vak thaw roh, khan va tana nang khutchawi kha vak peh roh. ²⁵ “Nangire`er pui miring kha le danin ah nangshelam khan relentak a riengiei pui roh. Khanawkatu nangire`erpui miring kha na chawngshatpa dieng nepek rangnih, khan chawngshatpa kha na alienpa dieng nepeh ning, tia lungroko shung ah nothong rangnih. ²⁶ Diktak a nang dieng kiriei inih, itikte nita`awm dawngkhit quadron kha nangpek masheng, makha mun ah put ah vak shok naw tinih. ²⁷ “Tolai khan dan na mi hai dieng, ‘Uire nangithaw boi rang a inih,’ iti kha nangrujet u joi. ²⁸ Inia kiei na nangni dieng kiti hi inih, makhala tunita`awm nupang `khat dieng takjatlam a aen miring kha na umulung shung a ama kha le uire ithawsha nih joi. ²⁹ Khan nang chang tieng ah mik kha na inamabak rang a nitjoiatu, kaw tana pai roh. Ajarla nang pumplang kha Gehenna a ithong rangnek a tu, nang pasha `khat athang rang a kha thadet. ³⁰ Khan nang khut chang kha na inamabak rang a nitjoiatu, tuh tana pai roh. Ajarla nang pumplang kha Gehenna a ithong rangnek a tu, nang pasha `khat athang rang a kha thadet. ³¹ “Hitihinawm ruriei, ‘I`inkonu le reshen mi kha na ama dieng imelena jawtnapek kha peh rosho.’ ³² Inia kiei na nangni dieng kiriei hi inih makhala muruk a ponpha niboia, tunita`awm i`inkonu ireshen pui kha na ama kha uire imawthaw inih. Khan mi na imelenu anieipa kha na uire ithaw inih. ³³ “Takthar a, tolai a iruriei: ‘Adik boi a chawngnangrakham boi rang a inih. Inia Pumi dieng a nang chawngrakham hai kha rung roh,’ iti kha nangrujet uh. ³⁴ Inia chawngrakham thalak mak, iti hi kiei na kinieriei u inih. Ravanawm ban a chawngrakham u naw roh, ajarla mahi Pathien rengmun kha inih. ³⁵ Rielieiawm ban a chawngrakham u naw roh, ajarla mahi Pathien kekhawng kha inih. Jerusalemawm ban a chawngrakham u naw roh, ajarla mahi alientak Reng khopui `khat inih. ³⁶ Nang luawm ban a chawngrakham u naw roh, ajarla sham pum `khat kha mongoi ninawkle mahang ngam u makche. ³⁷ Nang ‘Awh’ chawng u kha ‘Awh’ nih rosho, nang ‘Nang’ chawng u kha ‘Nang’ nih rosho, inia makha akhe kha ashie ah put ah inih. ³⁸ “ ‘Mik `khat ruhut a mik `khat, khan ha `khat ruhut a ha `khat,’ iti kha nangrujet u joi. ³⁹ Inia kiei na nangni dieng kieriei, mi shie kha rodoi pui u naw roh, inia tukhat na nang ngem chang tieng naben phakhan, shir `khat kha`awm daw pe roh. ⁴⁰ Tukhat na nang kotai kha loina rang nemeher joiatu, nang pon inoloi pe rang a kha`awm jawt roh. ⁴¹ Tukhat na nang kha majin `khat shena rang ne`ep joiatu, majin `di she pui roh. ⁴² Nang dieng nanih ama dieng khan peh roh. Nang dieng naphuk jawt miring ah put ah nang mai miehiei naw roh. ⁴³ “ ‘Nang ringchangpui kha numnangipok rang a inih, khan nang rahapui kha nangimukmak rang a inih,’ iti kha nangrujet uh. ⁴⁴ Inia nangni dieng kieriei, nang rahapui hai kha numpoh u roh. Pumnaboh hai kha rahvan peh u roh. Namumah hai dieng atha thaw u roh. Mawchawlaw a norotokna le epshawna napeh amani rang nik pe u roh. ⁴⁵ Hihaihi nangthaw uatu, ravan a awm nangpa u shapa hai kha nangchang u rangnih. Ajarla atha ashie hai rang ama ni imoshok pe inih. Midik midik boi hai rang ro imushur pe inih. ⁴⁶ Ajarla numnapoh hai kha numnangpok a la, ih lawh kha maw niei rawng? Khaichana rawkhawm hai na`awm makha ithaw u nimak maw? ⁴⁷ Khan nang uliennai ranga kha chubai nangthaw pui a la, shik hainek a imaw nangithawdet awm? Phungshik hai na`awm ithaw u nimak maw? ⁴⁸ Khajarkhan ravan a awm nangpa u urupum kha ang a, nangniawm rupum u roh.

¹ “Miring hai maikung a amani muk rang numpokpek chon hai kha nangthawna boi u rang, riring u roh. Khanawkatu ravan a awm nangpa uah put ah lawh kha muh u naw tinih. ² “Khajarkhan numpokpek chon nangthaw phakhan, thanunchan thaw hai na, miring hai na mapakna rang, synagogue ah le lamlien ah ithaw u kha ang a, tekawlawi kha nang maton ah tum naw roh. Diktak a nangni dieng kiriei inih, amani na lawh kha iman u nih joi. ³ Inia numpokpek nangpek phakhan nang khut chang na ithaw kha nang khut viei kha mejet naw roh. ⁴ Khatikhan nang numpokpek kha rethe minit roh, khan rethe a amuh nangpa ama na nang dieng amalang a nemele rangnih. ⁵ “Khan nangnik phakhan, thanunchan thaw hai kha nangang boi rang a inih. Ajarla amani na synagogue ah le lamlien kona hai khan ding ua miring hai na mukna rang, anih kha adit uh. Diktak a nangni dieng kiriei inih, amani na lawh kha iman u nih joi. ⁶ Inia nangnik phakhan nang indan shung ah lut roh, khan khar tana rethe a awm nangpa dieng nih roh. Khan rethe a awm nangpa kha na nang dieng amalang a nemele rangnih. ⁷ Khan nangnik u phakhan, Phungshik hai kha ang a, nemna boi a mikirreret u naw roh, ajarla amani chawngriei rawp khan amani kha rangai pe rangnih, tia mining uh. ⁸ “Khajarkhan amani kha ang u naw roh, ajarla ama dieng nangnik u mala khan nangpa u kha na nangirangai u nieinak hai kha ejet. ⁹ Khajarkhan hitihin nih u roh: Ravan a awm kapa u, nang riming kha riethieng nih rosho. ¹⁰ Nang rengchangna kha ajong nih rosho. Ravan a nang mulungmining nangithaw kha ang a, rieliei hinawm nih rosho. ¹¹ Von a nekkhawp nekleshak kha nikip nepeh u roh. ¹² Kielieishie ton hai kirangaidam u hi ang a, lieishie kiton u hai hi narangaidam pe u roh. ¹³ Lemna a nomocho u naw roh. Inia ashie ah put ah nakhek u roh. Ajarla rengchangna, ranak, khan lurna kha kumshawt a nang tah inih. Amen. ¹⁴ “Ajarla miring hai dieng amani shietna kha le nangrangaidam u joiatu, ravan a awm nangpa u na`awm nangni kha narangaidam u rangnih. ¹⁵ Inia miring hai kha amani shietna kha le nangrangaidam u joi nawkatu, nang shietna u kha nangpa u na rangaidam naw nih. ¹⁶ “Khan chamranangdoi u phakhan, thanunchan thaw hai kha ang a, rungui miring kha chang u naw roh. Amani chamradoi kha mi hai dieng malarna rang, amai u kha memieshiet uh. Diktak a nangni dieng kiriei inih, amani na lawh kha iman u nih joi. ¹⁷ Inia chamranangdoi u phakhan, nang lu ah thao nawt u roh, khan nang mai kha phie u roh. ¹⁸ Makha mi hai dieng nang chamradoina u kha larna boi rang a inih. Inia muruk a awm nangpa u, khan muruk a amuh nangpa u na amalang a nemele u rangnih. ¹⁹ “Nangni rangbak khan rieliei chung a niei bawm u naw roh. Makha mun kha lieida le ek na imathangnathiei mun inih, khan murushah hai na ikhoi a imuruknathiei mun inih. ²⁰ Inia nangni rangbak khan ravan a niei bawm u roh. Makha mun kha lieida le ek na imathangnathiei boi le murushah hai na ikhoi a imuruknathiei boi mun inih. ²¹ Ajarla nang niei bawmna mun khan nang mulungawm awm rangnih. ²² “Mik hi pum mieivar kha inih. Khajarkhan nang mik kha tha joiatu, nang pumplang kha mieivar kha na ship rangnih. ²³ Inia nang mik kha shie joiatu, nang pumplang kha ajing na ship rangnih. Khajarkhan nang dieng a awm mieivar kha ajing nitjoiala, ajing kha idawr a lien maw nih! ²⁴ “Tute na pumi `di chon thaw ngam naw nih, ajarla akhat kha mukmak a shik `khat kha numpok rangnih. Ninawkle, akhat kha pawm a shik `khat kha aheng rangnih. Pathien le nieilelung dire chon thaw ngam u naw tinih. ²⁵ “Hijarhin a nangni dieng kiriei inih, imaw nangishak u rang ninawkle imaw nanginek u rang, tia nang ringkho u rang, imaw nangirieshiei u rang, tia nang pum u rang mulung mawshaw u naw roh. Nekleshaknek a ringkho, khan ponlediernek a nang pum u kha manludet nimak maw? ²⁶ Ravan a va hai khi en u roh, vawrawm vawr u mak, at`awm at u mak, khan achu a`awm bawm u mak; inia ravan a awm nangpa u na amani kha ivai inih. Amaninek a manlu nih u makche maw? ²⁷ Khan nang kar ua, tu na maw lungkhamna niei a atak chung ah rajang `khat abo ngam? ²⁸ “Khan ponledier rang ijar a lungkhamna nanginiei u maw nih? Ram ah tuirieipar hai ringdan khaw tinta u roh. Chonawm thaw u mak, khan patawm kher u mak. ²⁹ Inia nangni dieng kiriei inih, makhala Solomonshe na ama lurna kholok le hihaihi kar a akhat ang a rielien ngam mak. ³⁰ Von mawng a jing tieng ratapkung ah ipai, ram ah champi hai khaw, Pathien na khatikhan rielien joiala, Aw ashin a takashawn miring hai, Pathien na nangni kha thadet a inierielien boi u rang a maw nih? ³¹ Khajarkhan, ‘Imaw kenek rang’? ninawkle, ‘Imaw kashak rang’? ninawkle, ‘Imaw kierieshiei rang’? tia lungkhamna niei u naw roh. ³² Ajarla Phungshik hai na hihai rangbak hin rieirit a atawk uh. Ravan a nangpa u na hihaihi nangrangai u, iti kha ejet. ³³ Inia Pathien rengchangna le ama dikna kha masha a tawk u roh, khan hihai kholok hi nangni dieng nobo pe u rangnih. ³⁴ Khajarkhan jing a rang khan lungkhamna niei u naw roh. Ajarla jing kha na nining a lungkhamna kha niei rangnih. Nikho rikip na shawna kha rutukthep a iniei inih.

¹ “Nang chung ua chawngshatna boi rang, mi chung a chawngshat u naw roh. ² Ajarla mi chung a chawngnangishattak u kha na nang chung ua chawngshat rangnih. Nangni na dannangilak u kha na nangni dieng dannalak rangnih. ³ “Ijar a nang mik ah awm thinglong kha tinta boi a, nang uliennai mik ah thinglek kha nangi`en maw nih? ⁴ Ninawkle, enro, thinglong kha nang mik ah awm a la, itia maw nang uliennai dieng ‘Nang mik ah awm thinglek kha napai pe rawng jawt roh,’ tia riei rawng? ⁵ Aw thanunchan thaw miring! Nang mik ah awm thinglong kha paibak roh, khashole nang uliennai mik ah put ah thinglek kha paina rang, malangsheng a nangmuk rangnih. ⁶ “Riethieng nieinak kha ui hai dieng peh u naw roh, khan rangkachak hai kha vawk hai maton ah vawr pe u naw roh. Khanitatu amani chung khan eke le achongna rangnih, khan vak hiei ning, tia leklek a nether u rangnih. ⁷ “Nih u roh, nangni dieng nepek rangnih. Tawk u roh, nangmuk u rangnih. Tawh u roh, nangni rang nawmawlawng pe rangnih. ⁸ Ajarla anih miring rikip na umuk, atawk ama kha na aman, khan atawh ama rang khan mawlawng pe. ⁹ “Ninawkle, nang kar ua tukhat na ashapa na tan nik phakhan, ama dieng lung peh nih maw? ¹⁰ Ama na nga nik `le ama dieng moro peh nih maw? ¹¹ Mi shie nangnih ua`awm, nang nai hai dieng khutchawi atha hai kha pekna rang, nangjet uala, ravan a awm nangpa u na, ama dieng a anih hai dieng khan khutchawi atha hai kha idawrshe maw arawp a peh nih? ¹² Khajarkhan irikip a nangni dieng nangimawthaw jawt u kha thawna rang, amani dieng thaw u roh. Ajarla mahi Dan le Thiempulien hai na imiejiek kha inih. ¹³ “Pakawt rebe khan lut u roh, ajarla rajai pakawt le lamlien kha na thangna kha akhin, khan makhan a alut miring hai kha awrawp. ¹⁴ Ajarla ringna akhin pakawt kha rebe, lam kha matat, khan makha amuh hai kha awtawm. ¹⁵ “Thiempulien jok hai ah put ah riring u roh. Amani na kengam rielien thaw a va uh, inia amani shung a tu melang arang hai kha nih uh. ¹⁶ Amani ara hai khan nangjet u rangnih. Miring hai na riling kung ah put ah drakha, ninawkle thieimu kung ah put ah thieichang rawkhawm u maw? ¹⁷ Kha ang khan thingkung atha rikip na ara atha moshok, inia thingkung ashie na ara ashie moshok. ¹⁸ Thingkung atha na ara ashie moshok mak, khan thingkung ashie na ara atha moshok mak. ¹⁹ Ara atha moshok boi thingkung rikip kha tuk a miei ah apai. ²⁰ Khatikhan amani ara khan nangjet u rangnih. ²¹ “Kiei dieng ‘Pumi, Pumi,’ ati mi rikip na ravan rengchangna khan alut rang a nimak. Khania ravan a awm kapa mulungmining athaw ama kha na alut rang a inih. ²² Makha Nikho khan mi tampui na ‘Pumi, Pumi, nang riming a chawng kirophong boi u, nang riming a raikho hai kinawt boi u, khan nang riming a ranakniei chon tampui kithaw boi u maw nih,’ ti u rangnih. ²³ Khan amani dieng ‘Danishawnboi a chon thaw miring hai! Kiei na nangni kha shukjet a nejet u mi`ing, kiei ah put ah she u rang roh,’ tia korophong pe u rangnih. ²⁴ “Khajarkhan tunita`awm kawchawng hai hi irangai a athaw miring hai kha lungpum chung ah inthaw miring ashing kha le ra`angmashak rang kanih. ²⁵ Khan ro jong shur, tui hawng lien, khan rithi na ajap, khan amani na in kha ejem, inia pur mak, ajarla in kha lungpum chung ah iphun inih. ²⁶ Tunita`awm kawchawng hai hi rangai a athaw boi rikip kha nge chung ah inthaw mimawng kha le ra`angmashak rang kanih. ²⁷ Ro jong shur, tui hawng lien, rithi na ajap, khan hihaihi na in kha ejem, khan shietak a upur.” ²⁸ Khan hitihin ruawm, Jesu na hihai chawng hi ruriei shole, ama miruchukna khan mipui kha shinrudawng pe uh. ²⁹ Ajarla danoja hai kha ang boi a, chamnieitak `khat a amani kha iruruchuk inih.

¹ Jesu na lawn `khat ah put ah jong chum phakhan, mirawp na ama kha rujui uh. ² Khan enro, raithawnaw tawng miring `khat na ama dieng rushe, khan chubairubawk a ruti, “Aw Pumi, nangjawt a tu, kiei hi nangnieriethieng ngam.” ³ Jesu na ukhut kha rushawn a ama kha irushit le roroi a ruti, “Kajawt, riethieng kha nih rang roh.” Khan relentak a ama raithawnaw kha ruriethieng pe joi. ⁴ Khan Jesu na ama dieng ruriei, “Enro, tute dieng vak riei naw roh. Inia she tana thiempu dieng vak mumuk roh, khan Moses na chawngirupek khutchawi hai kha vak peh roh. Makha na amani dieng kungchangna kha nih rangnih.” ⁵ Jesu na Capernaum rulut le roroia, rarajakhat lamkai `khat na ama dieng ava a runik. ⁶ Ama na ruti, “Pumi, in ah koshokpa khaw takthi na ajeng a mawshaw a ana joi.” ⁷ Jesu na ama dieng rumashang, “Kiei na va a ama kha vak madam rang kanih.” ⁸ Inia rarajakhat lamkai kha na ruti, “Pumi, ki`in ah nangva rang a hi kiei rutuk mi`ing. Chawng ranga nangiriei khan koshokpa khaw dam rang keng. ⁹ Ajarla kieiawm cham thoi a awm, kothoi a ramiring hai aniei `khat kanih. Kiei na akhat dieng ‘She roh,’ kiti `le, eshe, khan shik `khat dieng ‘Va roh,’ kiti `le ava. Khan koshokpa dieng ‘Hi thaw roh,’ kiti `le awthaw.” ¹⁰ Makha Jesu na rujet `le, shinrudawng pe a anujui miring hai dieng khan ruti, “Diktak a nangni dieng kiriei inih, Israelshe hin takashawn hi ang a lien hi kiei na muh mi`inglai! ¹¹ Nangni dieng kieriei makhala shim le mar ah put ah mi tampui hawng a ravan rengchangna mun khan Abraham, Isaac, khan Jacob le shushom u rangnih. ¹² Inia rengchangna nai hai kha vai tieng ah jingna mun khan pai ning, tia kha mun khan chapna le hareshena kha awm rangnih.” ¹³ Khan Jesu na rarajakhat lamkai dieng khan ruti, “She rang roh, nang takashawn dungjuia ithaw nih rang rosho.” Kha phatak khan oshokpa kha rudam joi. ¹⁴ Khan Jesu na Peter in kha rulut phakhan, Peter tarpi kha raitun na itun a ruja kha vak muk. ¹⁵ Ama khut kha rushit pe a raitun kha na rumathan joi. Khan ruthoi a amani chon kha ruthaw pe joi. ¹⁶ Khan ni hawng tah phakhan, raikho na ichutna mi tampui ama dieng vak chawi uh. Ratha hai kha chawng `khat le runawt a ana kholok kha rumadam. ¹⁷ Makha thiempulien Isaiah dieng irurieina kha hawng rupumna rang a inih. Ama na hitihin ruriei, “Ama na nawdawkshamna u kha ruloi joi, khan nanatna u kha ruphung joi.” ¹⁸ Khan ama kha hieichip a ruchun mipui kha Jesu na rumuk phakhan, thampui vara `khat tieng shena u rang, chawng rupek joi. ¹⁹ Khan danoja `khat na ama dieng va a ruti, “Oja, nang shena mun rikip a nujui rang kanih.” ²⁰ Jesu na ama dieng ruriei, “Ramui hai na khur niei uh, ravan a va hai na rubu niei uh, inia Miring Shapa na tu lu tetna rang mun niei mak.” ²¹ Akhaichawi hai kar a shik `khat na ama dieng ruti, “Aw Pumi, rapapek a kashe a kapa khaw kivak khum rang a hi nawjawt pe roh.” ²² Inia Jesu na ama dieng ruti, “Nujui roh, athi hai kha na amanitak athi hai kha khum u rosho.” ²³ Khan rokong ah rulut phakhan, akhaichawi hai na ama kha rujui uh. ²⁴ Khan enro, thampui chung khan rithikhopui lientak `khat ruthoi a tuirawnawng kha na rokong kha ihawnghup rang dan a awm joi, inia ama tu ruja a ruawm. ²⁵ Akhaichawi hai na ama dieng ava ua rumothoi uh, khan ruti uh, “Pumi nashan u rang roh! Kathi u rang keng joi!” ²⁶ Amani dieng ruti, “Aw ashin a takashawn aniei miring hai, ijar a chih maw nangnih uh?” Khashole hawng thoi a rithikhopui le thampui kha hawng rawkawk phakhan, rinimchien joi. ²⁷ Miring hai kha na shindawngna runiei a ruti uh, “Rithi le thampuishe na ama chawng irangai pe hi, ih miring maw nih?” ²⁸ Thampui vara ah awm Gergesenes ram ah vat phakhan, raikho na ichutna miring `di rurawtawng pui. Amani kha ajeng a rang, than ah put ah hawng shok miring runih uh. Khajarkhan tute na makha lam kha rurakan ngam mak. ²⁹ Amani na rura`ai uh, “Enro, Pathien Shapa Jesu, kieini hi ih nawlawt u rang a nangiti maw nih? Pha shok mala a kieini hi shawna pek rang a ava maw nangnih joi?” ³⁰ Khan ralaviei a vawk hawi lientak `khat shak shak a ruawm uh. ³¹ Khan raikho hai kha na ama dieng rudawi a ruti uh, “Nangnawnawt u joiatu, vawk hawi khawn lutna rang nawjawt pe u roh.” ³² Amani dieng ruti, “She u rang roh.” Khan miring pasha `di ah put ah vak shok ua, vawk hawi `khat shung khan rulut u joi. Khan enro, vawk hawi kholok kha na rawkham tieng shorshor a jong tan ua, thampui khan rulut u joi, khan tui shung khan ruthi u joi. ³³ Inia amani aroi hai kha na khopui khan rutan ua, raikho na ichutna miring hai chungchanga irikip vak riei u joi. ³⁴ Khan enro, khopui ah miring kholok na Jesu rumuk pui rang rushe u joi. Khan Jesu kha rumuk u phakhan, amani ram ah put ah shokna rang rudawi uh.

¹ Khan Jesu na rokong ah rulut a makha thampui kha rurakan joi. Khan ama khopuitak kha rushok joi. ² Khan enro, amani na takthi miring `khat jana chung ah jalam a ama dieng vak chawi uh. Khan amani takashawn kha Jesu na rumuk phakhan, takthi miringpa dieng ruti, “Naitepa, ranak thaw roh, nang munu hai kha anarangaidam joi.” ³ Khan enro, danoja hai kar a eshen na manilemani shung a ruti uh, “Hi miring hi na Pathien kha mieshiet!” ⁴ Jesu na amani mulungmining kha rujet pe a ruti, “Ijar a nang mulung shung a ashie nangimining u naw nih? ⁵ ‘Nang munu hai kha arangaidam joi,’ ninawkle, ‘Thoi tana lawn rang roh,’ iti hin ih kha maw baidet? ⁶ Inia makha Miring Shapa kha na rieliei chung a munu hai rangaidamna ranak kha ieniei, iti nangjetna u rang a inih.” Khashole takthi miringpa dieng ruti, “Thoi rang roh, nang jana kha loi tana nang in ah she rang roh.” ⁷ Khan ama na ruthoi a i`in ah rushe joi. ⁸ Khania mirawp kha na rumuk phakhan, shindawngna runiei uh. Khan miring hai dieng kha ang cham apeh Pathien kha rumapak uh. ⁹ Jesu na khan ah put ah rupang `le, lam a khaichana tena in ah rushuh Matthew iti miring `khat rumuk. Ama na ruti, “Nujui roh.” Khan Matthew na thoi a ama kha rujui joi. ¹⁰ Khan hitihin rushok, makhala Jesu na in khan rushuh le roroia, enro, khaichana rawkhawm hai le munu miring tampui va uh. Amani na Jesu le akhaichawi hai kha rushut puishom uh. ¹¹ Khan Pharisee hai na rumuk u phakhan, Jesu khaichawi hai dieng ruti uh, “Ijar a nang Ojapa u na khaichana rawkhawm hai le khan munu miring hai le inekishakshom maw nih?” ¹² Inia Jesu na rujet phakhan, amani dieng ruriei, “Adam miring hai na loipu rangai mak, inia ana hai na irangai inih. ¹³ Inia she u tana mahi ih itina maw nih, iti kha vak ruchuh u roh, ‘Kiei na roihoina kha kadit, rawthawina kha dit mi`ing.’ Ajartu midik miring hai kha akoi jong nimi`ing, inia mulung lekna rang, munu miring hai kha akoi jong kanih.” ¹⁴ Khashole John khaichawi hai na ama kha vak dep ua ruti uh, “Ijar a nang khaichawi hai na chamra`idoi boi a, kieini le Pharisee hai na rawnaw a chamrakidoi u maw nih?” ¹⁵ Makhan Jesu na amani dieng ruriei, “Moilawm hai kha na moipa le awmlai khan mulungkur ngam u nih maw? Inia moipa kha amani ah put ah ichawina pe nikho hai kha hawng rangnih. Makha phakhan amani na chamradoi u rangnih. ¹⁶ “Tu na`awm irikin boilai ponlek kha alui ah chingai mak. Ajarla ibo kha na hawng rikin ning, tia shiedet a chiet rangnih. ¹⁷ Khan tu na`awm alui mevun jukawk khan ju athar thangai mak. Atha joiatu, ju athar kha na mevun jukawk kha mokoi rangnih. Khan ju kha bo ning, tia mevun jukawk kha thang rangnih. Inia amani na mevun jukawk athar khan ju athar kha atha a dire kha tin inih.” ¹⁸ Amani dieng hihaihi rurieilai khan, enro, rampo miring `khat ava, khan ama dieng hawng bu a ruti, “Tuntak khan kashanu kha thi joi, inia navat pe tana nang khut le navakshit pe roh, khan ama na ringna muk rangnih.” ¹⁹ Jesu na thoi a akhaichawi hai le ama kha rujui uh. ²⁰ Khan enro, kum shawmlieidi thijanrai tawng nupang `khat na Jesu anuk ah ava a opon mawr kha rushit pe. ²¹ Ajarla ama na mulung a ruti, “Opon mawrtaka kha kishit pe joiatu, kadam rangnih.” ²² Jesu na ruhiei a ama kha rumuk phakhan, ruti, “Shanu, ranak thaw roh, nang takashawn kha na nang kha namadam joi.” Kha phatak khan nupangnu kha rudam joi. ²³ Khan Jesu na rampopa in ah avat phakhan, thieikhang tum hai le mirawp na helehoi irumoshok u kha vak muk. ²⁴ Amani dieng ruti, “She u rang roh, ajartu naitenu hi athi nimak, inia amiei keng.” Makhan amani na ama kha rumunui uh. ²⁵ Khan ama na mipui kha vai rumoshok shole, rulut joi, khan ama khut kha rumukui pe a naitenu kha hawng thoi joi. ²⁶ Makha chawngshok kha ram kholok a rurajar joi. ²⁷ Jesu na khan ah put ah rushe le roroia, mikchaw pasha `di na anu rujui ua ra`ailam a ruti uh, “David Shapa, kieini dieng hin nang roihoina kha natetna u roh!” ²⁸ Khan in kha rulut phakhan, mikchaw miring pasha `di kha na ama dieng va uh. Jesu na amani dieng ruti, “Kiei na mahi kawthaw ngam, iti hi takanangshawn u maw?” Amani na rumashang uh, “Awh, Pumi.” ²⁹ Khashole Jesu na amani mik hai kha shit pe a ruti, “Nang takashawn u dungjuia mahi nangni dieng ashok nih rang rosho.” ³⁰ Khan amani mik hai kha mavar pe joi. Jesu na amani kha chawng bierep a ruti, “Enro, kha chungchang khan tute na jet naw rosho.” ³¹ Inia amani na rushe phakhan, ama chungchanga ram kholok dieng chawng kha rutheh u joi. ³² Khan amani na rushe le roroia, enro, raikho na ichutna a chawngthieiboi, miring `khat, ama dieng vak chawi uh. ³³ Raikho kha runawt shole, chawngthieiboi miring kha na, ruchawng joi. Khan mipui kha na shindawng a ruti uh, “Israel shung hin mahi mulak u makmelai!” ³⁴ Inia Pharisee hai na ruti uh, “Raikho reng jar a raikho hai hi inawt keng.” ³⁵ Khan Jesu na khopui le kho rikip ah rushe joi. Ama na amani synagogue hai khan ruruchuk a rengchangna athachawng hai kha rurophong a miring hai rai rikip le natna rikip kha rumadam joi. ³⁶ Khan mipui kha rumuk phakhan, amani rang khan lairunat pui. Ajarla amani kha mi na tenireh boi, mulungraha miring, khan kengamroi awm boi kengam hai kha ruang uh. ³⁷ Khashole akhaichawi hai dieng ruti, “Par rawkhawm rang a hi diktak a rawp, inia chon thaw miring hai hi awtawm. ³⁸ Khajarkhan par Pumi dieng ama loimun ah chon thaw rang miring jong tirna rang, nikna niei u roh.”

¹ Jesu na akhaichawi shawmlieidi kha rukoi a raikho rono hai kha nawtna rang, khan rai rikip le natna rikip madamna rang, amani dieng cham rupek joi. ² Tirtawn shawmlieidi riming kha hihaihi inih: Akhat changna a, Peter iti Simon le anaipangpa Andrew, Zebedee shapa James le anaipangpa John, ³ Philip le Bartholomew, Thomas le khaichana rawkhawmpa Matthew, Alphaeus shapa James, Thaddaeus iti Lebbaeus, ⁴ Canaan miring Simon le Jesu ajorpa Judas Iscariot. ⁵ Jesu na shawmlieidi kha hihai chawngpek hi le rutir joi: “Phungshik hai kar a she u naw roh, khan Samaria miring hai khopui khan lut u naw roh. ⁶ Kha ruhut a Israel inshung a athang kengam hai dieng she u roh. ⁷ Nangshe u le roroia, ‘Ravan rengchangna kha jong nai joi,’ tia chawng vak shem u roh. ⁸ Ana hai kha madam u roh, raithawnaw tawng hai kha riethiengmashak u roh, athi hai kha miring u roh, khan raikho hai kha nawt u roh. Manboi a nangirumuk u kha manboi a peh u roh. ⁹ Rangkachak, dangka ninawkle shumeng kha shierkawk ah poh u naw roh. ¹⁰ Khomijin pai, kotai rawbaw ninawkle kekok hai, ninawkle shunshawraw poh u naw roh. Ajarla chon thaw miring kha na nekleshak ishak rang kha rutuk inih. ¹¹ “Khopui nit a khote nita`awm nanglutna u makha shung khan rutuk kha tumaw nih, iti kha tawk u roh, khan nangmathan u masheng, kha mun khan awm u roh. ¹² Khan nanglut u phakhan, chubai thaw pui u roh. ¹³ In kha rutuk joiatu, kha chung khan nang mulung damna u kha awm rosho, inia rutuk joi nawkatu, nang mulung damna u kha nangni dieng hawng kir rosho. ¹⁴ Mi hai kha na lamjawng nuruthaw u joi nawk a, khan nangiriei u kha narangai pe u joi nawkatu, makha in ninawkle khopui kha mathan a nangshe dieng u khan, nang kepha uah vaiphin kha khawng u roh. ¹⁵ Diktak a nangni dieng kiriei inih, chawngshatna Nikho khan makha khopui rangnek khan, Sodom le Gomorrah ram rang a kha doithieidet chang rangnih! ¹⁶ Enro, melang hai kar a kengam hai kha ang a kinitir u inih. Khajarkhan moro hai ang a ashing miring kha nih u roh, khan vashu hai ang a metek boi miring kha chang u roh. ¹⁷ “Miring hai maikung a riringtak a awm u roh; ajarla amani na Sanhedrin hai dieng nepek u rangnih, khan amani synagogue hai khan nejem u rangnih. ¹⁸ Nangni kha rampo hai le reng hai maikung a, kajar a amani dieng le phungshik hai dieng kungchang rang, nawchawi u rangnih. ¹⁹ Inia amani na nepek u phakhan, itia ninawkle imaw nangiriei u rang, iti chungchanga nang mulung mawshaw u naw roh. Ajarla nangiriei u rang a kha makha phatak khan nangni dieng nepek u rangnih. ²⁰ Ajarla chawng ariei kha nangni nih u makche, inia nangpa u Ratha na nangni kha chawng inierieina u inih. ²¹ “Shokpui `khat na shokpui `khat thitna rang, khan apa na anai thitna rang, mohon rangnih. Nai hai na nulepa hai kha rodoi pui ning, tia amani kha mi hai mathat u rangnih. ²² Khan kiriming jar a mi kholok na naraha pui u rangnih, inia dawngshe a adoi ama kha shan rangnih. ²³ Inia khopui `khat ah amani na nangni kha epshawna nepek u phakhan, shik `khat a tan u roh. Ajarla nangni dieng diktak a kiriei inih, Miring Shapa kha jong mala khan Israel khopui hai kha itikte nita`awm rawtawngsho u naw tinilai. ²⁴ “Khaichawi `khat na ama oja chung a awm mak, shok `khat na upumi chung a awm mak. ²⁵ Khaichawi `khat na ama oja kha hawng ang, khan shok `khat na upumi kha hawng ang kha rutuk inih. Inpumi kha Beelzebul, tia koi u joiala, idawrshe khawk a ama inshungkhur hai dieng khan koi u nih! ²⁶ “Khajarkhan amani kha chih u naw roh. Ajarla imukhu nieinak kholok phawngthiei boi, iti awm mak, khan jetthiei boi rethe, iti awm mak. ²⁷ Ajing a kiei na nangni dieng kiriei hi, nangni na avar a riei u roh. Nokor ah nangirangai u kha, in chung ah rophong u roh. ²⁸ Pum athat hai kha chih u naw roh, amani na ringphuk kha that ngam u mak. Inia Gehenna a ringphuk le pum dire mathang ngam ama kha chih u roh. ²⁹ Varawchawngpi idi hi asharion `khat a jor nimak maw? Inia amani kar a `khatshe nangpa u jet boi a rieliei a cho mak. ³⁰ Nanglu uah sham kholokshe kha jat iteviek inih. ³¹ Khajarkhan chih u naw roh; varawchawngpi tampuinek a manlu nangnih uh. ³² “Tunita`awm miring hai maikung a kiei hi norophong ama kha kiei na`awm ravan a awm kapa maikung a rophong rang kanih. ³³ Inia tunita`awm miring hai maikung a kiei najawt boi ama kha kiei na`awm ravan a awm kapa maikung a jawt naw ning. ³⁴ “Kiei hi rieliei chung a lungdamna chawi ajong, tia mining u naw roh. Lungdamna apeh jong nimi`ing, inia chemjam apeh jong kanih. ³⁵ “Ajarla ‘miring `khat na apa chung a, shanu `khat na unu chung a, khan moinu `khat na atarpi chung a re`ermashak’ ajong kanih, ³⁶ khan, ‘tukhat rahapui kha ama inshungkhurtak nih rangnih.’ ³⁷ “Kieinek a unu ninawkle apa numapoh ama kha kiei rang rutuk mak. Kieinek a ashapa ninawkle ashanu numapoh ama kha kiei rang rutuk mak. ³⁸ Ama cross kha loi a kanu ajui boi miring kha kiei rang rutuk mak. ³⁹ Iringkho ashan ama kha na makha mathang rangnih, khan kajar a iringkho mathang ama kha na makha muk rangnih. ⁴⁰ “Nangni naphawm miring kha na kiei hi inawphawm inih. Kiei hi naphawm miring kha na nojongtirpa kha iphawm inih. ⁴¹ Miring `khat na thiempulien kha thiempulien nit jar a phawm a tu, thiempulien lawh kha muk rangnih. Khan miring `khat na midik miring kha midik miring nit jar a phawm a tu, midik miring lawh kha muk rangnih. ⁴² Diktak a nangni dieng kiriei inih, khaichawi riming a ashin miring hai kar a akhat dieng tuirachak hai `khattak a nita`awm rumenek ama kha na itikte nita`awm ama lawh kha mathang naw nih.”

¹ Khan hitihin ruawm, akhaichawi shawmlieidi kha chawng rupek shole, kha mun ah put ah amani khopui hai khan miruchuh rang le chawngshem rang, Jesu na rushe joi. ² Khan Christa chonthaw hai kha John na lungroko shung ah rujet le, akhaichawi hai idi rutir. ³ Khan amani na Jesu dieng ruti uh, “Ajong rang a kha nang maw nangnih, ninawkle shik `khat kingak u rang a maw nih?” ⁴ Jesu na mashang a amani dieng ruti, “She u tana nangijet u le nangimuk u hai hi John dieng vak riei u roh: ⁵ mikchaw hai na imuk, kekhawr hai na alawn, raithawnaw tawng hai na riethieng, nokorshet hai na ijet, athi hai kha imothoi, khan shara hai dieng athachawng iriei pe. ⁶ Kajar a keruthui boi miring kha rahvanmuh miring kha inih.” ⁷ Amani na rushe u le roroia, Jesu na John chungchanga mipui dieng ariei ruput, “Ramthim khan ih en rushe maw nangnih uh? Rithi na inawk shingnang kha maw? ⁸ Inia ih en rushe maw nangnih uh? Miring `khat na ponrenem irieshiei kha maw nih? Enro, ponrenem rieshiei miring hai kha reng hai in khawn awm uh. ⁹ Inia ih en rushe maw nangnih uh? Thiempulien `khat kha maw nih? Awh, thiempulien `khatnek a alien inih, iti kha kiriei inih. ¹⁰ Ajarla mahi ama chungchanga irumiejiek inih: ‘Enro, nang maton a kapalai `khat kitir, ama na nang maton a lam nokon pe rangnih.’ ¹¹ “Diktak a nangni dieng kiriei inih, nupang hai na imoshok kar a baptisma apeh Johnnek a aliendet awm maklai, khania ravan rengchangna mun a ashinving ama kha amanek a liendet. ¹² Inia baptisma apeh John pha ah put ah tunshe hin, ravan rengchangna kha na ranaknieitak a hawng, khan rangrat miring hai na makha ranak a ruloi u joi. ¹³ Ajarla John jong malalim Thiempulien hai le Dan na chawngrurophong joi. ¹⁴ Nangni na mahi nangloi jawt uatu, ajong rang a miring kha mahi Elijah hi keng. ¹⁵ Nokor aniei ama kha na rangai rosho. ¹⁶ “Inia ih le maw mahi rong hi ra`angmashak ning? Mahi naite hai na rievieithawna mun ah shuh a amani lawm hai le rashai nana kha le ra`ang inih. ¹⁷ “Amani na ruti uh, ‘Nangni rang thieikhang kurutum uh, inia rulam u makche. Mulungkurna kuruniei uh, inia mulung thangtana runiei u makche.’ ¹⁸ Ajarla John na jonglai khan, neawm runeh mak sha`awm rushah mak, khan amani na ruti uh, ‘Ama na raikho ieniei.’ ¹⁹ Miring Shapa kha jong a runek, khan rushak. Khan amani na ruti uh, ‘Enro, shak a rapham le ju a vanhat thaw miring, khaichana rawkhawm hai le munu miring hai lawm `khat khaw!’ Khania varna hi ama chonthaw hai kha na idikna kha imumuk inih.” ²⁰ Khashole ama na ranakniei chon arawplam iruthawna khopui hai kha rurawkawk joi, ajarla amani na mulung lekna kha runiei u mak. ²¹ “Aw Chorazin, nang dieng mieriemna awm! Aw Bethsaida, nang dieng mieriemna awm! Ajarla nangni dieng ranakniei chon iruthaw hai kha Tyre le Sidon dieng runih joiatu, bawra rieshiei a, khan ruvut robo ning, tia amani mulung lekna kha shawt rangnih joi. ²² Inia nangni dieng kiriei hi inih, chawngshatna Nikho khan nangni rangnek hin Tyre le Sidon rang a kha doithieidet chang rangnih. ²³ Khan ravan a irulawm, Aw Capernaum, nang hi Thikho a nawvawr rangnih. Ajarla nang dieng a ranakniei chon iruthaw hai kha Sodom dieng runih joiatu, vonshe hin awm rangnilai. ²⁴ Inia kiei na nang dieng kiriei inih, chawngshatna Nikho khan nangni rangnek hin Sodom ram rang a kha doithieidet chang rangnih.” ²⁵ Kha phakhan Jesu na mashang a ruti, “Ravan le rieliei Pumi, Aw kapa, nang kha kanamapak, ajarla nang na hihaihi mishing le mithiei kanih ati miring hai kar a nangruthe a naite hai dieng nangrumalar joi. ²⁶ Inih, Aw kapa, makha keng nang dieng a awm enlar kha. ²⁷ “Kapa na nieinak kholok kha kiei dieng nurupek joi. Kapa na niboia, tute na shapa kha jet mak. Khan ashapa na niboia, tute na apa kha jet mak. Ashapa na ama kha rophongna rang a idit imadan tukhat kha na niboia, tute na apa kha jet mak. ²⁸ “Nangni shawrieviei le doila phung miring kholok, kiei dieng hawng u roh, kiei na nangni dieng shawmuchumna kha nepek rang kanih. ²⁹ Kiringkaw hi rupu u roh, khan kiei ah put ah ruchuh u roh. Ajarla kiei hi mulung a renem le rede kha kanih, khan nang ringphuk u rang khan shawmuchumna kha nangmuk u rangnih. ³⁰ Ajarla kiringkaw hi abai, khan kodoila hi ajang inih.”

¹ Sabbath nikho `khat hin Jesu na shangbiei hai kha rakan a rupang. Akhaichawi hai kha vawnrucham pe uh, khan shangvui hai kha ruchin ua rushak uh. ² Inia Pharisee hai na rumuk ua Jesu dieng ruti uh, “Enro, nang khaichawi hai na Sabbath nikho a Dan nih boi thaw uh.” ³ Inia amani dieng ruti, “David na vawnrucham pe phakhan, ama le rawtawp hai kha le iruthaw kha te u makche maw? ⁴ Makhala ama na Pathien in khan rulut a rawthawina tan kha rushak. Makha ama le khan irawtawp pui hai na ishak u rang a kha Dan nih boi inih. Makha thiempu hai ranga na ishakthiei inih. ⁵ Ninawkle, Sabbath nikho hin riethiengmun ah thiempu hai na Sabbath kha pawrmechet ua amani dieng metekna awm mak, tia Dan a imiejiek kha te u makche maw? ⁶ Inia kiei na nangni dieng kiriei inih, riethiengmunnek a aliendet miring kha hin awm. ⁷ Inia ‘Rawthawina kha kidit nimak a roihoina kha kidit inih,’ itina hi nangrujet u joiatu, shietniei boi miring hai kha ruheng u naw tinih. ⁸ Ajarla Miring Shapa kha Sabbath Pumi kha`awm inih.” ⁹ Khan ah put ah rushe a amani synagogue khan rulut joi. ¹⁰ Khan enro, kha mun khan khutchar miring `khat ruawm. Ama dieng rawdawn a ruti uh, “Sabbath nikho hin mimadam hi Dan na maw jawt?” Makha amani na Jesu kha jar peknathiei rang a inih. ¹¹ Inia amani dieng ruti, “Nang kar ua miring `khat na kengam `khat ieniei a khur `khat ah cho pe joi. Mahi Sabbath nikho hai hin shok joiala, nang khut shawn a roshoh u naw rawng maw? ¹² Kengamnek khan miring hi khadawr khan manludet nimak maw? Khajarkhan Sabbath nikho hai hin atha thaw rang khan Dan inih.” ¹³ Khashole ama na miringpa dieng khan ruti, “Nang khut kha vak shawn roh.” Khan ama na rushawn, khan shik `khat kha ang a rudam pe joi. ¹⁴ Inia Pharisee hai na rushe ua ama kha itia maw that rang, tia chawng rureshe u joi. ¹⁵ Inia Jesu na makha rujet `le, khan ah put ah rurakai joi. Khan mirawp lien `khat na anu rujui a amani kholok kha rumadam. ¹⁶ Ama kha memejetna boi rang, amani kha chawngruben uh. ¹⁷ Makha thiempulien Isaiah dieng a irurieina kha hawng rupumna rang a inih. Hitihin ruriei, ¹⁸ “Enro, koshokpa hi kiei na kimadan kha inih. Ama hi kiringphuk na ningnitna inieitak kunumpok kha inih. Ama chung a karatha thong pe rang kanih. Ama na Phungshik hai dieng dikna kha rophong pe rangnih. ¹⁹ Ama na chawngrieshiet thaw naw nih ninawkle ra`ai naw nih. Lamlien hai khan tute na ama hesho kha jet naw nih. ²⁰ Mi na irawnawisha shingnang kha khoi naw nih. Chawngshatna kha ramawtawrna tieng chawi masheng, ama na akang patro kha shem a that naw nih. ²¹ Ama riming khan Phungshik hai na ngakmining niei u rangnih.” ²² Khashole raikho na ichutna miring `khat hi Jesu dieng vak chawi uh. Ama kha mikchaw le chawngthieiboi runih. Jesu na rumadam a mikchaw le chawngthieiboipa kha na hawng chawngthiei le roroia, hawng muk joi. ²³ Khan mirawp kha shinrudawng pe ua ruti uh, “Mahi David Shapa kha nih ngam nih maw?” ²⁴ Inia Pharisee hai na rujet u phakhan, ruti uh, “Raikho hai reng Beelzebul ranak a niboia, hi miring hi na raikho hai hi nawt mak.” ²⁵ Inia Jesu na amani mulungmining kha rujet pe a amani dieng ruti, “Nining a reshen rengchangna rikip thangbieng rangnih, khan nining a reshen khopui ninawkle in rikip na ding naw nih. ²⁶ Satan na Satan kha nawt joiatu, nining a reshen inih. Itia maw ama rengchangna kha ding nih? ²⁷ Kiei na Beelzebul ranak a raikho hai hi kawnawt joiala, nang nai hai na tu ranak le inawt u maw nih? Hijarhin amani na chawngnashat pe u rangnih. ²⁸ Inia kiei na Pathien Ratha ranak a raikho hai kha kawnawt joiatu, Pathien rengchangna kha nangni dieng ajong nih joi. ²⁹ “Ninawkle, tukhat na miratpa in ah lut a, miratpa kha khopbak nawkatu, itia maw ienieinak hai kha ranak a ro pe ngam nih? Makha shole ama in kha ranak a aro pe rangnih. ³⁰ “Kiei le rachang boi ama kha kiei le re`er inih, khan kiei na kiroshong pui boi ama kha na chaiachai a atet. ³¹ Hijarhin a kiei na nangni dieng kiriei inih, munu le mimieshietna rikip miring hai dieng arangaidam rangnih, inia Ratha chung a mieshiet kha tu miring hai dieng rangaidam naw nih. ³² Tunita`awm Miring Shapa chung a chawng arieipa kha arangaidam rangnih. Inia tunita`awm Ratha Riethieng chung a chawng arieipa kha tu, hi rong hin ninawkle ajong rang a rong hin, rangaidam naw nih. ³³ “Thingkung kha mathat roh, khan ara kha tha rangnih. Ninawkle, thingkung kha mieshie roh, khan ara kha shie rangnih. Ajarla ama ara khan thingkung kha nijet inih. ³⁴ Nangni moro chicha hai! Nang mulungpok shielam khan itia maw atha riei ngam u rawng? Ajarla mulung ah put ah hawng put a ner na chawngiriei inih. ³⁵ Mitha kha na umulung atha niei`in ah put ah atha hai kha hawng moshok. Mi shie kha na umulung ashie niei`in ah put ah ashie hai kha hawng moshok. ³⁶ Inia chawngshatna Nikho khan riring boi a iriei rikip kha amani na jar pek u rangnih, tia kiriei inih. ³⁷ Ajarla nang chawngriei hai kha na nangni kha nimidik u rangnih, khan nang chawng hai kha na nangni kha naheng u rangnih.” ³⁸ Khashole danoja hai le Pharisee hai eshen na mashang a ruti uh, “Oja, nang ah put ah jetna kumuk jawt uh.” ³⁹ Inia Jesu na mashang a amani dieng ruriei, “Ashie le uire rong na jetna atawk uh. Thiempulien Jonah jetna niboia jetna peh naw nih. ⁴⁰ Ajarla Jonah na ngalien vawn shung ah ni `thum jan `thum a`awm kha le ra`ang a, Miring Shapa kha`awm rieliei mulung shung ah ni `thum jan `thum awm rangnih. ⁴¹ Chawngshatna khan Nineveh miring hai kha na hi rong miring le ding u rangnih, khan amani na mahi rong hi aheng u rangnih. Ajarla Jonah na Pathien chawng riei phakhan, amani na mulung lekna kha runiei uh. Khan enro, Jonahnek a aliendet miring `khat kha hin awm joi. ⁴² Chawngshatna khan thang tieng ah rengnu kha na hi rong miring hi le dingchen rangnih, khan mahi aheng rangnih. Ajarla rieliei dawngkhit ah put ah Solomon varna kha rangai ahawng inih. Khan enro, Solomonnek a aliendet miring kha hin awm joi. ⁴³ “Raikho rono kha na miring `khat ah put ah rushok phakhan, ama na shawmuchumna rang, ram hona mun hai kha rakan a rushe, inia rumuh mak. ⁴⁴ Khashole ama na ruti, ‘Kavakshokna ki`in khan kiei kir rang kanih.’ Khan ama na rukir phakhan, makha iruphietviek, khan rietienir a irutet kha vak muk. ⁴⁵ Khashole ama na rushe a amanek a shiedet ratha shiri shik ruchawi. Khan amani na rulut ua kha mun khan ruawm uh. Khan dawngkhit a miringpa awmchan kha matiengnek khan rushiedet joi. Mahi rong ashie chung hinawm hitihin awm rangnih.” ⁴⁶ Ama na mirawp dieng khan chawng riei a ruawmlai khan, enro, unu le ama shokpui hai na ama dieng chawng ruriei jawt ua vai tieng ruding uh. ⁴⁷ Mi `khat na ama dieng ruti, “Enro, nangnu le nang naipang hai na nang le chawng riei rang, vai tieng ding a natawk uh.” ⁴⁸ Inia ama dieng a chawng arieipa dieng khan Jesu na rumashang, “Tu kha maw kunu, khan tu hai kha maw kanaipang hai?” ⁴⁹ Khan akhaichawi hai dieng ukhut le akhin a ruti, “Enro, kunu le kanaipang hai kha hin awm! ⁵⁰ Ajarla tunitjoiawm ravan a awm kapa mulungmining athaw ama kha kanaipangpa, kanaipangnu, khan kunu kha inih.”

¹ Khanitak khan Jesu na in ah put ah rushe a thampui kawmchang ah rushuh. ² Ama dieng vak ruchun mirawp kha lienhai jarkhan, rokong ah rulut a rushuh joi. Khan mirawp kha na kawmchang ah ruding uh. ³ Khan ama na chawng tampui rangshim a ruriei pe uh. Ama na ruriei, “Enro, muchi vawrpa kha na muchi vawr rushe. ⁴ Ama na iruvawr le roroia, eshen kha lamkaw ah ruchu. Khan va hai na jong a amani kha rushak. ⁵ Eshen kha pieipak rawpna boi lungbiei chung ah ruchu. Pieipak kha thuk boi jarkhan, makha na relentak a hawng kei. ⁶ Ni hawng sha phakhan, hawng re`em, khan rujung loi boi jarkhan, makha rovoi. ⁷ Khan eshen kha riling hai kar ah ruchu. Riling hai kha hawng thoi a amani kha liep uh. ⁸ Inia eshen kha pieipak thatna mun ah rucho a ara rumoshok. Eshen kha arajah a, eshen kha shawm `ruk a, khan eshen kha shawm `thum a rupung. ⁹ Rangaina rang nokor aniei ama kha na rangai rosho!” ¹⁰ Khan akhaichawi hai na ama dieng va ua rurawdawn uh, “Ijar a amani dieng rangshim a chawng nangiriei maw nih?” ¹¹ Amani dieng mashang a ruriei, “Ajarla nangni dieng ravan rengchangna chungchanga murukchawng hai kha jetna rang, nurupek uh, inia amani dieng tu rupeh mak. ¹² Ajarla aniei ama dieng khan arawpdet kha pek rangnih, khan ruphu a niei rangnih. Khan aniei boi ama dieng khan inieidakshe kha`awm, ama ah put ah loi pe rangnih. ¹³ Hijarhin a amani dieng rangshim a kiriei pe inih, ajarla umuk tu muk uh, inia muhet u mak, rangai tu rangai uh, inia rangaihet u mak, rieirit a`awm jet u mak. ¹⁴ Isaiah rophongchawng kha amani dieng jong rupum inih: ‘Nangni na nangrangai tu nangrangai u rangnih, inia shukjet a jet u naw tinih. Nangni na nangen tu nangen u rangnih, inia shukmuh a muh u naw tinih. ¹⁵ Ajarla mahi miring hai mulung hi moh pesho u joi. Khan amani nokor hai rang khan rangaina matat pe u joi. Imik u kha mawchawt pe u joi. Khanawkatu imik u kha le muh u ning, tia onokor u kha le rangai u rangnih. Khan amani mulung kha le jet u ning, tia kiei dieng hawng hiei ua kamadam u rangnih.’ ¹⁶ “Inia nang mik u kha rahvanmuh inih, ajarla amani na muk u joi, khan nang nokor u kha rahvanmuh inih, ajarla amani na rangai u joi. ¹⁷ Diktak a nangni dieng kiriei inih, thiempulien le midik hai tampui na nangimuk u hai hi rumuk jawt uh, inia amani na rumuh u mak. Nangirangai u hai hi rurangai jawt uh, inia rurangai u mak. ¹⁸ “Khajarkhan muchi vawrpa rangshim jar hi rangai u roh. ¹⁹ Tukhat na rengchangna chawng kha rangai phakhan, jet mak. Mi shie `khat na ava a ama mulung shung a ivawr kha loi pe. Mahi inih lamkaw ah ivawr muchi kha. ²⁰ Lungbiei ah ivawr muchi kha hi le ra`ang inih, tukhat na chawng kha ningai le roroia relentak a loi. ²¹ Inia bing a ama na rujung niei boi jarkhan, pha bawngte ring. Khan chawng jarkhan shawrana, ninawkle epshawna hawng shok phakhan, ama na keruthuina nieirelen. ²² Riling hai kar ah ivawr muchi kha hi le ra`ang inih, ama na chawng kha rangai, inia mahi ringkho lungkhamna le rawchawngna mohonna kha na chawng kha liep jarkhan, ama kha arathiei boi achang. ²³ Inia pieipak thatna a ivawr muchi kha hi le ra`ang inih, ama na chawng kha rangai a ejet, khan ara kha moshokhet. Eshen arajah a, eshen shawm `ruk a, khan eshen shawm `thum a mupung.” ²⁴ Amani maikung a rangshim shik `khat ama na ruriei pe, “Ravan rengchangna hi miring `khat na ama loipuk ah muchi atha ivawr kha le ra`ang inih. ²⁵ Inia ajariethiei hin irahapui kha na gehu kar khan loihar athe pe a rushe joi. ²⁶ Muchi kha hawng kei a ara hawng moshok phakhan, loihar kha`awm hawng malang joi. ²⁷ “Inpumi shok hai kha na ama dieng ruti, ‘Pumi, nang loipuk khan muchi atha nangivawr nimak maw? Hihai loihar hi ih ah put ah maw nih?’ ²⁸ “Amani dieng rumashang, ‘Mahi inarahapui miring `khat na ithaw inih.’ Khan shok hai kha na ama dieng ruti, ‘Kieini na she a kivakphawi u rang hi nangjawt maw?’ ²⁹ “Inia ama na ruti, ‘Thaw u naw roh. Ajarla loihar nang phawina khan gehu kha nangphawichen u rang keng. ³⁰ Parrawkhawm phashe khan dire kha mawng rosho. Parrawkhawm phakhan, rawkhawm miring hai dieng ti rang kanih, “Loihar kha masha a rawkhawm u roh. Khan lawp a khop u tana amani kha miei ah ha u roh. Inia gehu kha kachu shung khan mulut u roh.” ’ ” ³¹ Amani maikung a rangshim shik `khat ruriei pe, “Ravan rengchangna hi anchamru kha mi `khat na iruchawi a ama loipuk ah ivakvawr kha le ra`ang inih. ³² Mahi muchi kholok kar a ashinving inih. Inia hawng mawng phakhan, anshawbo hainek a aliendet thingkung `khat hawng chang. Khan ravan a va hai na jong a abak hai khan rubu jong thawna uh.” ³³ Amani dieng rangshim shik `khat ruriei pe, “Ravan rengchangna hi nupang `khat na chawh ichawi a jam haikhup `thum le ireche a chawh rachangviek masheng a iruthe kha le ra`ang inih.” ³⁴ Hihai kholok hi Jesu na mipui dieng rangshim a iruriei pe inih. Rangshim a niboia amani dieng ruriei pe mak. ³⁵ Mahi thiempulien dieng irurieina kha hawng rupumna rang a inih. Hitihin ruriei, “Rangshim a kiei na chawng riei rang kanih; manmieshie kungput ah put ah rethe nieinak hai kha kiei na rophong rang kanih.” ³⁶ Khashole Jesu na mipui kha rumeshe a in ah rushe joi. Khan akhaichawi hai na ama dieng va ua ruti uh, “Loipuk ah loihar rangshim kha kieini dieng nemeler pe u roh.” ³⁷ Amani dieng mashang a ruriei, “Muchi atha avawrpa kha Miring Shapa kha inih. ³⁸ Loipuk kha rieliei hi inih. Muchi atha hai kha rengchangna nai hai kha inih, inia loihar kha mi shie nai hai kha inih. ³⁹ Khan loihar athepa mirahapui kha diabol kha inih. Parrawkhawm kha rong mawtawrna kha inih. Parrawkhawm hai kha ravantir hai kha inih. ⁴⁰ “Loihar hai kha rawkhawm a miei ah iha ang a, mahi rong mawtawrna kha nih rangnih. ⁴¹ Miring Shapa kha na ama ravantir hai kha jongtir rangnih. Ama rengchangna ah put ah keruthuimashak hai le danishawnboi hai kholok kha rawkhawm u rangnih. ⁴² Khan amani kha Ratapkung Miei shung ah apai u rangnih. Kha mun khan chapna le hareshena kha awm rangnih. ⁴³ Khashole midik hai kha na apa u rengchangna khan ni ang a var u rangnih. Nokor aniei ama kha na rangai rosho! ⁴⁴ “Takthar a, ravan rengchangna hi loipuk ah rethe bawmniei, tukhat na imuk a irumukhu, khan ama na ningailam a rushe a ieniei kholok kha ivakjor a loipuk kha irawchawk, kha le ra`ang inih. ⁴⁵ “Takthar a, ravan rengchangna hi rievieithaw miring `khat na lunglu hai kha itawk a ⁴⁶ manlu lung `khat muk phakhan, she a iniei kholok kha ivakjor a makha irawchawk kha le ra`ang inih. ⁴⁷ “Takthar a, ravan rengchangna hi thampui shung ah len ivawr a nga tintin irawkhawm, ⁴⁸ khan iship phakhan, kawmchang tieng irupawt, khan amani na rushuh ua atha hai kha be hai shung ah ithong a ashie hai kha ipai u kha le ra`ang inih. ⁴⁹ Rong dawng ni khan hitihin awm rangnih. Ravantir hai na jong u ning, tia mi shie hai kha midik hai ah put ah reshenmashak rangnih. ⁵⁰ Khan mi shie hai kha ravantir hai na ratapkung miei shung ah apai u rangnih. Kha mun khan chapna le hareshena kha awm rangnih.” ⁵¹ Jesu na amani dieng rurawdawn, “Hihai kholok hi nangjet u joi maw?” Amani na rumashang uh, “Awh, Pumi.” ⁵² Khan amani dieng ruti, “Khajarkhan ravan rengchangna chungchanga chawngirurachak danoja rikip, ienieibawmna ah put ah, athar alui bawmniei hai kha ivakmoshokpa inpumi kha le ra`ang inih.” ⁵³ Jesu na hihai rangshim hi ruriei shole, makha mun kha rumathan joi. ⁵⁴ Ama khotak khan vat phakhan, amani synagogue khan miruchuh ruput. Makhan amani na shindawnglam a ruti uh, “Hi miring hi na mahi varna le ranakniei chon hai hi khoshekawt a imuk maw nih? ⁵⁵ Ama hi thingthiempa shapa kha nimak maw? Unu riming kha Mariam nimak maw? Anaipang hai, James le Joses, khan Simon le Judas iti nimak maw? ⁵⁶ Anaipangnu hai kholokawm kieini le awm nimak maw? Khoshekawt ah hi miring hi na hihaihi imuk maw nih?” ⁵⁷ Khajarkhan ama ah put ah mairumiehiei uh. Inia Jesu na amani dieng ruriei, “Thiempulien `khat na ama khotak le ama inshungkhurtak dieng niboia, richit kha imuk boi nimak.” ⁵⁸ Khan amani takashawn boi u jarkhan, ama na ranakniei chon tampui kha ruthawlai mak.

¹ Khalaikhan tetrarch Herod na Jesu chungchanga rujet joi. ² Ama na shok hai dieng ruti, “Hipa hi baptisma apeh John kha keng. Ama hi athi ah put ah hawng thoi inih. Hijarhin a chonrekhek thawna ranak kha na ama shung a chonithaw inih.” ³ Ajarla Herod na John kha shur a rukhop, khan lungroko shung ah rutet joi. Makha anaipangpa Philip nungak Herodia jar a inih. ⁴ Ajarla John na ama dieng ruti, “Ama nanginiei rang a hi Dan nimak.” ⁵ Herod na ama kha ruthat jawt joiawm, ama na mirawp kha ruchih, ajarla amani na John kha thiempulien `khat a ruloi uh. ⁶ Inia Herod shokna nikho hawng shok phakhan, Herodia shanu na amani kar a vak lam a Herod kha ajeng a ningruminit pe. ⁷ Iniklim kha pek rang, tia ama dieng chawngrurakham joi. ⁸ Khan, unu na chawngirurachak le roroia, “Hi rangmai chung hin baptisma apeh John lu kha nepeh roh,” tia runik. ⁹ Makhan rengpa kha mulung rushaw pe, inia ama chawngrakham le koilawm hai jarkhan, makha pekna rang, chawng rupek joi. ¹⁰ Khan ama na rutir a lungroko shung khan John lu kha vak tuk pe joi. ¹¹ Rangmai chung khan ulu kha vak chawi a nungaknu dieng rupek joi. Khan ama na unu dieng ruchawi joi. ¹² Khan akhaichawi hai kha na va ua ama rok kha ruloi u joi, khan vak khum u joi. Khashole rushe ua amani na Jesu dieng vak riei u joi. ¹³ Jesu na rujet `le, khan ah put ah ramthim ah thien a rokong a rushe joi. Makha mirawp na rujet phakhan, khopui ah put ah eke a anu rujui uh. ¹⁴ Jesu na kawmchang kha vak shok phakhan, mirawp lientak `khat vak muk. Amani chung a lainatna runiei a amani natna kha rumadam pe. ¹⁵ Ni hawng tah phakhan, akhaichawi hai na ama dieng va a ruti uh, “Mahi ramthim inih, khan pha`awm shemeng joi. Kho hai khawn she a nekleshak vak rawchawkna u rang, mipui hi meshe rang roh.” ¹⁶ Jesu na amani dieng rumashang, “Amani ashe rang a kha rangai mak, amani dieng shak rang peh u roh.” ¹⁷ Inia ama dieng ruti uh, “Tanpek rahnga le nga `di niboia niei u mi`ing.” ¹⁸ Ama na ruti, “Khahaikha hin kiei dieng vak chawi u roh.” ¹⁹ Khashole mipui kha champi chung ah shutna rang, chawng rupek. Khan tanpek rahnga le nga `di kha ruloi a, ama na ravan tieng khongalam a, rahvan rupek a rukhoi joi. Khan tanpek hai kha khaichawi hai dieng rupek, khan akhaichawi hai kha na mipui dieng rushem pe. ²⁰ Amani kholok na rushak ua vawn ruship pe uh. Khan amani na lekvai mienieng hai kha tiengkum shawmlieidi shipmer rurawkhawm uh. ²¹ Khan aneh-ashah hai kha, nupang le naite te boi a, apa bawp rahnga runih uh. ²² Khan relentak a Jesu na akhaichawi hai kha rokong ah lutna rang, rurawnawt mashak a vara `khat tieng matieng rumeshe joi. Khariethiei khan mipui kha rureshen pui joi. ²³ Mipui kha rumeshe shole, bing a anih rang. lawn ah ruhawng joi. Ni hawng tah phakhan, ama tu thien a ruawm joi. ²⁴ Inia rokong kha thampui laitak khan tuirawnawng na shehawng a runawng a ruawm. Ajarla rithi kha amani le rodoi a rujap. ²⁵ Khashole imili changna vengpa pha khan, Jesu na thampui chung ah vak lawn a amani dieng rushe joi. ²⁶ Ama na thampui ah vak lawn kha akhaichawi hai na rumuk u phakhan, ajeng a ruchih uh. Amani na ruti uh, “Mahi rathameshie keng joi!” Khan chitlam a rura`ai uh. ²⁷ Inia relentak a Jesu na amani dieng ruti, “Nang mulung mangar u roh. Chih u naw roh, kiei kanih keng.” ²⁸ Peter na mashang a ruti, “Pumi, nang nangnih joiatu, nang dieng tui chung ah vatna rang, chawng nepeh roh.” ²⁹ Ama na ruti, “Va roh.” Khan Peter na rokong ah put ah vak shok, khan tui chung ah lawn a Jesu dieng rushe joi. ³⁰ Inia ama na rithi enchak a arang kha rumuk phakhan, ruchih. Khan rawnawm ruput a rura`ai, “Nashan roh, Pumi.” ³¹ Jesu na relentak a ukhut rushawn a ama kha rumukui. Khan ama dieng ruti, “Aw nang takashawn kha dawkhaidak a! Ijar a nangirurakhana maw nih?” ³² Amani na rokong shung khan rulut phakhan, rithi kha rubang joi. ³³ Rokong shung ah awm miring hai kha na ama kha chubairubawk ua ruti uh, “Diktak a nang hi Pathien Shapa kha nangnih.” ³⁴ Amani na thampui kha rurakan ua Gennesaret ram kha rushok u joi. ³⁵ Kha mun ah miring hai kha na Jesu kha rujet u phakhan, kha ram kawkaw ah awm kholok dieng chawng rumeshe ua, amani na ana hai kha ama dieng vak chawi uh. ³⁶ Ama pon mawrtak a kha nita`awm shit jawtna rang, amani na rudawi uh. Ama pon ashih miring kholok na damna rumuk uh.

¹ Khashole Jerusalem ah put ah Pharisee hai le danoja hai na Jesu dieng va ua ruti uh, ² “Ijar a nang khaichawi hai na pipu hai shena kha ikhoi u maw nih? Ajarla amani na tan shak mala ua khut hai kha rushuk u mak.” ³ Jesu na mashang a amani dieng ruti, “Nang shena u jarkhan ijar a Pathien chawngpek kha nangikhoi u maw nih? ⁴ Ajarla Pathien na chawng rupek a ruti, ‘Nangnu le nangpa kha richit peh roh,’ khan ‘Unu le apa pumabot ama kha thitna niei rosho.’ ⁵ Inia nangni na nangti uh ‘Tunita`awm unu ninawkle apa dieng “Ih nita`awm kiei dieng a nanginemna kha khutchawi inih,” ati ama kha na ⁶ unu ninawkle apa kha richit pek rang a kha irangaimashak boi inih.’ Hitihin nang shena u jarkhan, Pathien chawngpek kha nemna boi nangmachang uh. ⁷ Aw thanunchan thaw miring hai! Isaiah na nang chungchang ua thatak a rurophong a ruti, ⁸ ‘Hihai miring hi na amani bai a naranai pui uh, khan amani ner a richit nepek uh. Inia amani mulung tu kiei ah put ah rala pe uh. ⁹ Inia rohong a kiei hi chubainabawk uh. Amani na miring hai chawngpek kha danpui `khat a ruchuk uh.’ ” ¹⁰ Khan Jesu na mipui kha okoi a amani dieng ruti, “Rangai u roh, khan jet u roh. ¹¹ Makhala, miring bai ah alut kha na miring kha pawrmechet mak, inia bai ah put ah hawng shok kha na miring kha pawrimechet inih.” ¹² Khashole akhaichawi hai na va ua ama dieng ruti uh, “Pharisee hai na nangiriei kha jet u `le, amani mulung rukoi pe uh, iti hi nangjet maw?” ¹³ Ama na mashang a ruriei, “Ravan a awm kapa na iruling boi thingkung rikip kha phawi rangnih. ¹⁴ Amani kha bieh u naw roh. Amani kha mikchaw miring hai rang a mikchaw lamkai hai kha inih. Mikchaw `khat na mikchaw miring kha lamkai pe joiatu, dire kha khur ah cho rangnih.” ¹⁵ Peter na mashang a ama dieng ruti, “Hi rangshim hi kieini dieng nemeler pe u roh.” ¹⁶ Inia Jesu na ruti, “Nangniawm nangijet boi u maw nih? ¹⁷ Ih kha nita`awm bai ah alut kha vawn ah lut a vai`imoshok inih, iti hi jet u makche maw? ¹⁸ Inia bai ah put ah hawng shok nieinak kha mulung ah put ah hawng shok inih, khan hihaihi na miring kha pawrimechet inih. ¹⁹ Ajarla mulung a mining shie, mithat, uire, rejai, murushah, adik boi a kungachang, khan mimieshiet, hihaihi hawng shok inih. ²⁰ Hihaihi na miring kha pawrimechet inih. Inia khut rushuk boi a shakshah kha na miring kha pawrimechet nimak.” ²¹ Jesu na kha mun kha rumathan a Tyre le Sidon ram tieng rushe joi. ²² Khan enro, kha ram ah awm Canaan nupang `khat na vak shok a ama dieng rura`ai, “Aw David Shapa Pumi! Nang roihoina kha kuchung a natetna roh. Kashanu khaw raikho na shietak a chutna joi.” ²³ Inia Jesu na ama kha i`awm rumashang mak. Khan akhaichawi hai na ama dieng va uh, khan mawshawklam a ruti uh, “Meshe rang roh, ajarla ama na nanuk uah mawkra`ai a ra`ai joi.” ²⁴ Inia mashang a ama na ruti, “Kiei hi Israel inshung ah athang kengam ranga dieng a inojongtir inih.” ²⁵ Inia ama na ava a ama dieng butlam a ruti, “Pumi, nashan roh.” ²⁶ Inia mashang a ruti, “Naite hai tan kha loi a ui hai dieng vawr rang a hi atha nimak.” ²⁷ Inia ama na ruti, “Awh, Pumi, inia ui hai na amani pumi hai tebol ah put ah acho burama hai kha enek.” ²⁸ Khashole mashang a ama dieng ruti, “Aw nupang, nang takashawn kha ielien! Nangidit dungjuia nih rang rosho.” Kha pha ah put khan ashanu kha rudam pe joi. ²⁹ Khan Jesu na kha mun kha rumathan shole, Galilee Thampui tieng rushe joi. Khan lawn ah ruhawng a kha mun khan rushuh. ³⁰ Khan mipui lientak `khat na ama dieng va uh. Amani na kekhawr, mikchaw, chawngthieiboi, takkhawr, khan shik tampui vak chawi uh, khan Jesu keshun khan vak tet ua ama na rumadam uh. ³¹ Makha na mipui kha shindawngna rupek. Chawngthieiboi na achawng, takkhawr na adam, kekhawr na alawn, khan mikchaw na imuk kha amani na rumuk u phakhan, Israel Pathien kha rumapak uh. ³² Khashole Jesu na akhaichawi hai kha ama dieng rukoi a ruti, “Kiei na mipui dieng hin lainatna kieniei joi. Ajarla amani na kiei le rawtawpna u hi ni `thum nih joi, inia iawm shah u lai mak. Amani na lam ah shawramana boi rang, kiei na amani hi ih mashak boi a meshe jawt mi`ing.” ³³ Akhaichawi hai na ama dieng ruti uh, “Hidawr a lien mipui hi vaina rang, hi ramthim hin khoshekawt ah nekleshak kimuk u rang a maw nih?” ³⁴ Jesu na amani dieng rurawdawn, “Tanpek ijat maw nangniei uh?” Amani na ruti uh, “Shiri le nga shin lekte.” ³⁵ Khashole ama na mipui kha pieipak chung ah shutna rang, chawng rupek. ³⁶ Ama na tan shiri le nga kha ruloi a mapakna runiei. Khan ama na rukhoi a mipui dieng pekna rang, akhaichawi hai dieng rupek. ³⁷ Khan aneh-ashah kholok kha vawn ruship pe uh. Lekvai mienieng kha lawngkai shiri shipmer a rurawkhawm uh. ³⁸ Khan ah runeh-rushah miring hai kha, nupang le naite te boi a, pasha bawp mili runih. ³⁹ Mipui kha rumeshe shole, ama na rokong shung khan rulut a Magdala ram tieng rushe joi.

¹ Khan Pharisee le Sadducee hai na Jesu kha enretena rang le ravan ah put ah jetna mumukna u rang, ama dieng ru`awt uh. ² Inia mashang a amani dieng ruti, “Nitak tieng ravan kha eshen `le, ‘Kho tha rangnih,’ nangti uh. ³ Jingkar a ravan kha eshen a khomelek `le, ‘Von hin rithikhopui rang rangnih,’ nangti uh. Aw thanunchan thaw hai! Nangni na ravan maisho kha melerna nangjet uh, inia apha jetna hai kha tu meler ngam u makche. ⁴ Ashie le miropoboi rong kha na jetna atawk uh, inia thiempulien Jonah jetna niboia, jetna kha pelai naw nih.” Khashole amani kha mathan a rushe joi. ⁵ Khan thampui shir `khat khan vak shok u phakhan, akhaichawi hai na tan rumieniei uh. ⁶ Jesu na amani dieng ruti, “Pharisee hai le Sadducee hai chawh kha riring pui u roh.” ⁷ Amani kar a rawdawnna ua ruti uh, “Irieina hi kieini na tan vak chawi u lai makme a khana keng joi.” ⁸ Jesu na makha rujet a amani dieng ruti, “Aw nangni takashawn ashin aniei miring hai, tan nangniei boi u jarkhan, imaw nangiriei uh? ⁹ Nangni na makha mininghep u makchelai maw? Miring bawp rahnga rang a tanpek rahnga khan, tiengkum ijat maw nangrawkhawm uh? ¹⁰ Miring bawp mili rang a tanpek shiri khan, lawngkai ijat maw nangrawkhawm uh? ¹¹ Kiei na tan chungchanga kiriei nimak, iti kha ijar a nangijet boi u maw nih? Inia Pharisee le Sadducee hai chawh kha riring pui u roh, kiti inih.” ¹² Khashole akhaichawi hai kha na tan chawh kha riring pui roh, iti nimak a Pharisee le Sadducee hai danpui kha riring pui roh, itina keng, iti kha rujet u joi. ¹³ Khan Jesu na Caesarea Philippi ram ah vat phakhan, akhaichawi hai kha rawdawn a ruti, “Miring hai na Miring Shapa hi tu kha maw nih ti uh?” ¹⁴ Amani na rumashang uh, “Eshen na baptisma apeh John, shik `khat na Elijah, khan shik `khat na Jeremiah ninawkle thiempulien hai kar a akhat keng ruti uh.” ¹⁵ Amani dieng ruti, “Nangni na la kiei hi tu kha maw nih nangniti uh?” ¹⁶ Simon Peter na mashang a ruti, “Nang hi Christa, aring Pathien Shapa kha nangnih.” ¹⁷ Khan mashang a ama dieng ruti, “Barjona Simon, nang hi rahvanmuh miring kha nangnih. Ajarla mahi nang dieng miring na inorophong pe nimak, inia ravan a awm kapa na inih. ¹⁸ Kiei na nang dieng kieriei makhala nang hi Peter kha nangnih, hi lungpum chung hin kiebiekrup kha mothoi rang kanih. Thikho mawkawt kha na mahi mawtawr naw nih. ¹⁹ Kiei na nang dieng ravan rengchangna chabi hai kha nepek rang kanih. Ih nita`awm rieliei a nangikhop kha ravan a`awm khop rangnih. Ih nita`awm rieliei a nangithut kha ravan a`awm athut rangnih.” ²⁰ Khashole ama kha Jesu Christa kha keng, iti kha tute dieng rieina boi u rang, akhaichawi hai kha chawngruben joi. ²¹ Khani ah put ah ama na Jerusalem ah ashe rang a, shierulien hai, thiempu ulien hai le danoja hai khut ah put ah shawna tampui idoingir rang a, amani na ama kha ithat u rang a, khan ni `thum changna a imothoi rang a kha Jesu na akhaichawi hai dieng mejet ruput joi. ²² Khan Peter na ama kha mun `khat ah ruchawi a rawkawk ruput. Ama na ruti, “Nithiei naw nih, Pumi; mahi nang dieng shukshok a shokthiei naw nih!” ²³ Inia Jesu na hiei a Peter dieng ruti, “Kiei ah put ah rechen roh, Aw Satan! Nang na kalam kha nangnakhar pe. Ajarla nangimining kha miring mulungmining inih, Pathien mulungmining nimak.” ²⁴ Khashole Jesu na akhaichawi hai dieng ruti, “Tukhat na kanu nujui jawt a tu, amarilik chung a rapha rosho, khan ama cross kha rupu rieshie nujui rosho. ²⁵ Ajarla iringkho ashan jawt kha na makha mathang rangnih. Inia kajar a ama ringkho mathang kha na makha man rangnih. ²⁶ Ajarla tukhat na manmieshie hi atah machang a, ama ringphuktak kha mathang joiala, imaw nemna nih? Ninawkle, miring `khat na ama ringphuk kha le rotho rang, imaw peh nih? ²⁷ Ajarla Miring Shapa na Apa lurna khan, ama ravantir hai le, jong rangnih. Khashole mi rikip dieng amama chonthaw dungjuia, lawh kha pek rangnih. ²⁸ Nangni dieng diktak a kiriei inih, hin ah ading miring eshen hi na Miring Shapa na ama rengchangna a ajong muk u masheng, thitna tuidan kha en u naw nih.”

¹ Ni `ruk shole, Jesu na Peter, James le anaipangpa John, amani kha lawp a lawn rashang `khat a ruhawng pui. ² Khan amani maikung a Jesu kha merurelek. Amai kha ni ang a rueng pe, khan ama ponledier kha mieivar ang a ruvar pe. ³ Khan enro, Moses le Elijah na amani dieng rular a Jesu le ruriebieh uh. ⁴ Peter na mashang a Jesu dieng ruti, “Pumi, kieini na hin na`awm u hi atha. Nangjawt a tu, thamber `thum kon u rawi: nang rang akhat, Moses rang akhat, khan Elijah rang akhat.” ⁵ Ama na chawngrurieilai khan, enro, romiei avarpeng na amani kha ruhup u joi. Khan enro, romiei ah put ah he `khat na ruti, “Mahi numkipoktak kashapa kha inih, ama chung a ningnitna kha kieniei joi, ama chawng kha rangai u roh!” ⁶ Khan khaichawi hai kha na he kha rujet u phakhan, chihai ua khup tieng rubawk uh. ⁷ Jesu na amani dieng va a amani kha rushit a ruti, “Thoi u roh, chih u naw roh.” ⁸ Amani na khonghawngnga u phakhan, Jesu ranga kha niboia, tute hawng muh u lai mak. ⁹ Amani na lawn ah put ah jong chum u le roroia, Jesu na amani dieng ruti, “Miring Shapa kha na athi ah put ah hawng thoi masheng, mahi mulungmik hi tute dieng riei u naw roh.” ¹⁰ Khan akhaichawi hai kha na ama dieng rurawdawn uh, “Khanitala ijar a Elijah kha matieng jong rangnih, tia danoja hai na iruti u maw nih?” ¹¹ Jesu na mashang a amani dieng ruriei, “Diktak a Elijah na matieng jong a nieinak kholok hawng mikir rangnih. ¹² Inia kiei na nangni dieng kieriei, Elijah kha ajongsha keng joi, inia amani na rujet u mak. Ama dieng ithaw jawt kha ruthaw uh. Khatak kha ang a, Miring Shapa na amani khut chung a shawna mukdeng joi.” ¹³ Khashole baptisma apeh John chungchanga amani dieng iriei keng, iti kha akhaichawi hai kha na rujet uh. ¹⁴ Khan amani na mipui dieng va u phakhan, miring `khat na ama dieng ava, khan amaton ah vak bu a ruti, ¹⁵ “Pumi, nang roihoina kha kashapa chung a natetna pe roh. Ajarla ama hi pingbawprai iniei a dawnga shaw joi. Ama na miei ah le tui ah cho jawnjai. ¹⁶ Nang khaichawi hai dieng kuruchawi, inia amani na rumadam ngam u mak.” ¹⁷ Jesu na mashang a ruti, “Aw takashawn boi le shuklet rong hai, idawrshe a nangni le a`awm rang a maw kanih? Khan idawrshe a nangni le kidoi rang a maw nih? Ama kha hin kiei dieng vak chawi u roh.” ¹⁸ Khan Jesu na raikho kha rurawkawk a ama ah put ah rushok joi. Kha phatak khan naitepa kha hawng dam joi. ¹⁹ Khashole khaichawi hai na muruk a Jesu dieng rushe a ruti uh, “Ijar a kieini na kinawt ngam boi u maw nih?” ²⁰ Jesu na amani dieng rumashang, “Nangni na takanangshawn boi u jar a inih. Diktak a nangni dieng kiriei inih, nangni na anchamru ang a takashawn kha nangniei u joiatu, mahi lawn dieng hin ‘Hin ah put ah rawthawt tana khawn she roh,’ nangti ua`awm she rangnih. Nangni rang anithiei boi `khatshe awm naw nih. ²¹ Inia hi ang raikho hi nikna le chamradoilam a niboia, nawtthiei nimak.” ²² Khan amani na Galilee ah ruruchun u lai khan, Jesu na amani dieng ruriei, “Miring Shapa kha miring hai khut a pek rang a nih joi. ²³ Amani na ama kha that u rangnih. Khan ni `thum changna khan ama kha mothoi rangnih.” Makhan amani mulung ajeng a rushaw pe uh. ²⁴ Khan amani na Capernaum kha rushok u phakhan, riethiengmun khaichana rawkhawm hai kha na Peter dieng va a ruti uh, “Nang Ojapa na riethiengmun khaichana peh mak maw?” ²⁵ Peter na rumashang, “Awh.” Khan ama na in rulut phakhan, masha a Jesu na ama dieng ruti, “Simon, imaw nangmining? Rieliei reng hai na tu hai dieng maw shan ruloi? Ashapa hai dieng, ninawkle milak hai dieng?” ²⁶ Peter na ama dieng rumashang, “Milak hai dieng.” Jesu na ruriei, “Khanitatu amani shapa hai na ipek rang a kha rangai mak. ²⁷ Inia amani kha mulung hoi boi a tetna boi rang, thampui ah she tana koi vak makhai roh, khan rapapek a hawng nga abai kha kham pe tana dangka nangmuk rangnih. Makha chawi tana nang le kiei rang vak peh roh.”

¹ Kha phakhan khaichawi hai na Jesu dieng va a ruti uh, “Ravan rengchangna khan tu kha maw alienving chang nih?” ² Jesu na naite `khat hi okoi a amani kar a rutet. ³ Khan ama na ruti, “Diktak a nangni dieng kiriei inih, nang mulung nanglek u nawk a, khan naite hai hi ang a nangawm u nawkatu, ravan rengchangna khan lut ngamlak u naw tinih. ⁴ Khajarkhan tunita`awm hi naite hi ang a nining a rede miring kha ravan rengchangna khan alienving inih. ⁵ “Khan tunita`awm kiriming a kha ang naite aloi miring kha kiei analoi miring kha inih. ⁶ Tukhat na kiei takanashawn naite hai kar a akhat hi keruthuimashak joiatu, shumhiei kha ama rek ah makhai pe a tuikhanglien thukna ah imulut kha ama rang tha pedet rangnih. ⁷ “Keruthuimashak miringpa jar a manmieshie chung a mieriemna awm! Keruthuimashakna kha ajongngir rang a inih. Inia keruthuimashak jongna miring dieng khan mieriemna awm! ⁸ Nang khut ninawkle nang ke kha na munu nawmawthaw joiatu, makha tanbang tana nang ah put ah pai roh. Khut `di ninawkle ke `di niei a kumshawt a Miei shung khan rothongnek a tu, kekhawr ninawkle takkhawrlam a ringna mun a lut kha athadet inih. ⁹ Khan nang mik kha na munu nawmawthaw joiatu, makha kawbang tana nang ah put ah pai roh. Mik `di niei a Gehenna Miei khan rothongnek a tu, mik `khat le ringna mun ah lut kha nang rang athadet inih. ¹⁰ “Hihai ashin naite hai hi kar a akhat eshena boi rang, riring u roh. Kirieina ajartu, ravan a awm kapa mai kha amani ravantir hai na chatboia i`en u inih. ¹¹ “Ajarla Miring Shapa kha athang miring hai ashan jong inih. ¹² “Imaw nangmining uh? Miring `khat na kengam rajakhat ieniei a amani kar khan akhat na lamrehe a chai joiala, ama na shawmkolieiko kha mo khan mak a lamirehe a achai kha atawk she naw nih maw? ¹³ Diktak a nangni dieng kiriei inih, ama na makha muk phakhan, lamrehe boi shawmkolieikonek khan ama chung a ningaina kha ieniei. ¹⁴ Khatak kha ang a, hihai ashin hai hi kar a akhat athang rang kha ravan a awm nangpa u mulungmining nimak. ¹⁵ “Nang uliennai `khat na nang chung a munu thaw phakhan, she tana nangdin u kar a irehena kha vak khin pe roh. Ama na anarangai pe joiatu, nang uliennai kha nangimukthep nih joi. ¹⁶ Inia ama na narangai pe nawkatu, nang le shik dikhat she pui roh. Makha ‘miring dithum kungchangna kha na nang chawngriei rikip kha menetna rang a inih.’ ¹⁷ Inia ama na amani kha rangai nawkatu, biekrup dieng riei roh. Ama na biekrup kha`awm rangai nawkatu, nang na Phungshik hai le khaichana rawkhawm hai nangitawn dan khan tawn roh. ¹⁸ “Diktak a nangni dieng kiriei inih, ih nita`awm rieliei a nangikhop u kha ravan a khop rangnih. Ih nita`awm rieliei a nangithut u kha ravan a athut rangnih. ¹⁹ “Takthar a, kiei na nangni dieng kiriei, rieliei a pasha `di na rawjawt a ih `khat nanginik u kha ravan a awm kapa na nangni rang thaw rangnih. ²⁰ Ajarla kiriming a idi ninawkle uthum ruchun amani kar khan kiei ka`awm.” ²¹ Khashole Peter na ama dieng va a ruti, “Pumi, uliennai `khat na kiei dieng munu thaw joiala, ama kha voijat rangaidam kipek rang a maw nih? Voishirishe maw?” ²² Jesu na ama dieng ruriei, “Kiei na nang dieng voishiri niti mi`ing, inia voishawm shiri kha voishirishe rangaidam roh. ²³ “Hijarhin ravan rengchangna hi reng `khat na oshok hai shierton imushung pe kha le ra`ang inih. ²⁴ Ama na shierton hai kha imushung pe le roroia, talent bawp shawm atonpa kha ama dieng vak chawi uh. ²⁵ Inia ama na rupek ngam boi jarkhan, upumpa kha na ama kha unungak nai hai le khan iniei kholok le jor a ieshierton kha thungna rang, chawng rupek joi. ²⁶ “Khajarkhan shokpa kha na bawklap a ama dieng chubairubawk a ruti, ‘Pumpa, kiei hi nurungakbawt roh, nang dieng kholok a vak mikir rang kanih.’ ²⁷ Shok pumpa kha na ama chung a lainatna runiei a rumoshok joi, khan ieshierton kha rurangaidam pe joi. ²⁸ “Inia makha shok kha na rushe a, ama dieng dinari rajakhat aton, oshok chang pui `khat vak muk. Ama na ama kha rushur a erek a shawmlam a ruti, ‘Kiei dieng a nangiton kha nepeh rang roh.’ ²⁹ Oshok chang pui kha na ekeshun ah rubu a dawilam a ruti, ‘Nurungakbawt roh, kholok a vak mikir rang kanih.’ ³⁰ “Inia ama na rujawt pe mak. Ama na rushe a, iton kholok kha peksho masheng, tia ama kha lungroko shung ah vak thong joi. ³¹ Oshok chang pui hai kha na ashok chon rikip kha rumuk u phakhan, ajeng a ningrushie pui uh. Amani na rushe ua upumpa u dieng ashok chon kholok kha vak riei uh. ³² “Khashole upumpa kha na shok kha rukoi a ama dieng ruti, ‘Shok tha boi nang! Nangninik jarkhan, nangiton kholok kha kunururangaidam pe. ³³ Kiei na nang chung a koroiruhoi kha ang a, nang shokchang pui chung a roihoina tet naw rawng maw?’ ³⁴ Upumpa kha mulung ruhang pe a, ama dieng a iton kholok kha thungsho masheng, tia micheppa dieng khan rupek joi. ³⁵ “Khajarkhan nang mulung uah put ah, nang uliennai hai shietna nangrangaidam u nawkatu, ravan a awm kapa na`awm khatikhan nangni dieng thaw rangnih.”

¹ Khan hitihin rushok, Jesu na hihai chawng hi ruriei shole, Galilee ah put ah rushe a, Jordan vara ah awm Judea ram kha rushok joi. ² Mipui kha na anu rujui ua kha mun khan amani kha rumadam uh. ³ Ama kha enretena rang, Pharisee hai eshen va ua ama dieng ruti uh, “Mi `khat na jar `khat a unungak imele hi Dan maw nih?” ⁴ Inia mashang a amani dieng ruti, “Amani akonpa kha na putna khan ‘nupang le apa kha rukon,’ ⁵ khan ruti, ‘Hijarhin apa na unulepa kha mak a ama inkonu le ruchun rangnih. Idi kha taksha `khat chang rangnih,’ iti kha te u makche maw? ⁶ Khajarkhan amani kha idi nih u lai mak, inia taksha `khat kha nih u joi. Khajarkhan Pathien na shamishuisha kha miring na shenlai naw rosho.” ⁷ Ama dieng ruti uh, “Khanitala ijar a Moses na melena jawtnapek a ama kha mathanna rang chawngirupek maw nih?” ⁸ Amani dieng ruti, “Nang mulung u kha michim jar a, nang inkonu u hai mele rang kha, Moses na irujawt inih, inia putna ah put khan tu, kha runimak. ⁹ Kiei na nangni dieng kiriei, muruk a ponpha niboia, tunita`awm ama inkonu kha mele a shik `khat niei a tu, uire ithaw inih. Khan mi na imele aniei ama kha na uire ithaw inih.” ¹⁰ Akhaichawi hai na ama dieng ruti uh, “Miringpa le inkonu chungchanga khatikhan a awm nitatu, inniei boi kha atha inih.” ¹¹ Inia amani dieng ruti, “Ipek hai amani dieng niboia, mi rikip na kha chawng kha loi ngam mak. ¹² Ajarla unu naikawk shung ah put ah khatikhan a rushok Eunuch hai awm, miring hai na irumachang Eunuch hai awm, khan eshen na ravan rengchangna rangbak khan a nining a Eunuch ruchang hai awm. Tunita`awm makha aloi ngam kha na loi rosho.” ¹³ Khashole naite hai kha amani chung a khut tet a nikna pe rang, amani na vak chawi uh. Inia akhaichawi hai kha na rurawkawk uh. ¹⁴ Inia Jesu na ruti, “Naite hai na kiei dieng ava rang a kha jawt pe u roh. Amani kha makha u naw roh, ajarla kha ang hai dieng khan ravan rengchangna kha awm.” ¹⁵ Khan amani chung khan khut rutet pe shole, khan ah put ah rushe joi. ¹⁶ Khan enro, mi `khat na ava a ama dieng ruti, “Aw Oja Atha, chon atha ih kawthaw `le maw kiei na kumshawt ringna kha muthiei ning?” ¹⁷ Ama dieng rumashang, “Kiei hi ijar a atha nanginiti maw nih? Pathien niboia tute atha awm mak. Hektiknieiboi ringna khan nanglut jawt a tu, chawngpek hai hi jui roh.” ¹⁸ Ama dieng ruti, “Ih hai kha maw?” Jesu na ruriei, “ ‘Mi nangithat boi rang a inih,’ ‘Uire nangithaw boi rang a inih,’ ‘Nangimuruk boi rang a inih,’ ‘Adik boi a kungachang boi rang nangnih,’ ¹⁹ ‘Nangnu le nangpa kha richit peh roh,’ khan ‘Nang ringchangpui kha nang pumtak ang a numnangipok rang a inih.’ ” ²⁰ Shanaipa kha na ama dieng rumashang, “Hihai kholok hi korothar chang ah put ah kihawngrung nih joi. Karavatna imaw awmlai?” ²¹ Jesu na ama dieng ruti, “Rupumping kha nangnih jawt joiatu, she tana nang niei hai kha vak jor tana shara hai dieng vak peh roh. Khan ravan a bawmniei kha nangniei rangnih, khan va tana nujui roh.” ²² Inia shanaipa kha na chawng kha rujet `le, mulungshawlam a rushe joi, ajarla ama na niei tampui runiei. ²³ Jesu na akhaichawi hai dieng ruti, “Diktak a nangni dieng kiriei inih, rawchawng miring `khat na ravan rengchangna alut rang a hi matat. ²⁴ Takthar a nangni dieng kieriei, rawchawng miring `khat na Pathien rengchangna alut rangnek a tu, sharingshiei `khat na shim nokor ah apang rang a kha baidet.” ²⁵ Akhaichawi hai na makha rujet u phakhan, ajeng a shindawngna niei a ruti uh, “Khanitala tu na maw shanna muh ngam nih?” ²⁶ Inia Jesu na amani dieng en a ruti, “Miring hai rang tu mahi anithiei boi inih, inia Pathien rang tu kholok nithieiviek.” ²⁷ Khashole Peter na mashang a ruti, “Enro, ih kholok kurumak ua kinurujui u inih. Khajarkhan kieini na imaw muh u ning?” ²⁸ Jesu na amani dieng ruti, “Diktak a nangni dieng kieriei, Pathien na nieinak kholok mathar phakhan, Miring Shapa kha na lurna rengmun khan shuh rangnih. Kiei nurujui hai nangniawm rengmun shawmlieidi chung a shuh a Israel phung shawmlieidi kha chawngnangshat pe u rangnih. ²⁹ Khan kiriming rangbak a in le loi ninawkle uliennai nupang apa ninawkle nu le pa hai rumathan miring rikip na rajarajah a muk rangnih, khan kumshawt ringna kha tum rangnih. ³⁰ Inia masha mi tampui kha nukna rangnih, khan nukna hai kha masha rangnih.

¹ “Ajarla ravan rengchangna hi ama drakha rohon ah mi moroi rang atawk, jingkarra rushe loipumi kha le ra`ang inih. ² Moroimi hai kha nikho `khat a dinari `khat pek rang rurawjawt pui a, ama drakha rohon ah amani kha rutir joi. ³ “Khan ama na nidan `ko dawr a rushe a miring eshen rievieithawna khan ih thaw boi a ading hai kha vak muk. ⁴ Amani dieng ruti, ‘Nangniawm drakha rohon khawn she u roh. Ih nita`awm rutuk kha nepek rang kanih.’ Khan amani kha rushe u joi. ⁵ Takthar a nidan shawmlieidi le nidan `thum dawr a rushe phakhan, khatikhan ruthaw. ⁶ Khan nidan rahnga dawr hin rushe phakhan, miring eshen chon thaw boi a ading vak muk a amani dieng ruti, ‘Ijar a shunshawt ih thaw boi a hin ading maw nangnih uh?’ ⁷ Ama dieng rumashang uh, ‘Ajarla tute na kieini hi nomoroi u mak.’ Amani dieng ruti, ‘Nangniawm drakha rohon khawn she u roh. Ih nita`awm rutuk kha nangmuk u rangnih.’ ⁸ “Khan nitak tieng hin drakha rohon pumpa kha na chonpopa dieng ruti, ‘Moroimi hai kha mutumna ah put ah akhat changnashe kha koi tana amani nilawh kha peh roh.’ ⁹ “Nidan rahnga dawr a chon thaw hai kha na ava ua dinari `khatkhat hi tumrim uh. ¹⁰ Akhat changna ah put ah chon thaw hai kha na va ua arawpdet mukna rang rumining uh. Inia amaniawm dinari `khatkhat tumrim uh. ¹¹ Amani na rutum u phakhan, loipumi kha rumieshiet uh. ¹² Amani na ruti uh, ‘Nukkhit a ava hai na nidan `khat chon thaw uh. Khan shunshawt pokrik phung a nisha rophoi kieini hi amani le nangnara`angmashak uh.’ ¹³ “Inia mashang a amani kar a akhat dieng ruti, ‘Kawlawmpa, kiei na nang dieng rehe mi`ing. Dinari `khat rang a kiei le rurawjawt nimakche maw? ¹⁴ Nang tum kha loi tana she rang roh. Nang dieng kipek kha le ra`angre a nukkhit miringpa dieng kepek jawt. ¹⁵ Ninawkle, kiei dieng a awm kha kidit dan a kithaw hi Dan nih boi maw nih? Ninawkle, katha jarkhan, nang mik`en shie maw nih?’ ¹⁶ “Khajarkhan nuknakhit miring kha na mashakhit kha nih rangnih, khan mashakhit kha na nuknakhit kha nih rangnih. Ajarla miring tampui kha okoi, khania lekte kha amadan.” ¹⁷ Khan Jesu na Jerusalem ah ruhawnglai khan, khaichawi shawmlieidi kha lawp a ruchawi a, lam ah amani dieng ruriei, ¹⁸ “Enro, Jerusalem ah nahawng uh, Miring Shapa kha thiempu ulien hai le danoja hai dieng pek rangnih, khan thitnashe rang khan ama kha aheng u rangnih. ¹⁹ Khashole ama kha engshiet a thawna rang, jemna rang, khan cross ah thatna rang, Phungshik hai dieng pek u rangnih. Khan ni `thum changna khan thoiret rangnih.” ²⁰ Khashole Zebedee shapa hai unu na ashapa hai le Jesu dieng rushe a, chubaibawklam a ih `khat runik. ²¹ Ama dieng ruti, “Imaw nangidit?” Ama dieng rumashang, “Kashapa idi hai hi, nang rengchangna mun khan, akhat chang tieng, akhat viei tieng shutna rang, nepek pe roh.” ²² Jesu na mashang a ruti, “Nanginik kha jet u makche. Kiei na kinek rang a hai aneh, kiloi rang a baptisma le baptisma loi, mahi mawtawr u rawng maw?” Amani na rumashang uh, “Mawtawr u rang kanih.” ²³ Amani dieng ruti, “Kahai kha nangnek u rangnih, khan kabaptisma loina kha nangloi u rangnih. Inia kieviei le kachang a shutna apeh rang a kha kiei nimi`ing, inia kapa na irasham pe hai rang a inih.” ²⁴ Khan shawm hai kha na makha rujet u phakhan, poro `di hai chung khan mulung rumohoina u lai mak. ²⁵ Inia Jesu na amani kha ama dieng rukoi a ruti, “Phungshik hai rampo hai na amani miring hai kha adek a pumi achang inih, khan amani alien-arang hai na amani chung a cham ieniei uh, iti hi nangjet uh. ²⁶ Khania nang kar uatu khatikhan nih naw nih. Inia tunita`awm nang kar ua alien anih jawt miring kha na nang shepding u kha chang rosho. ²⁷ Khan tunita`awm nang kar ua akhat changna anih jawt miring kha na nang shok u chang rosho. ²⁸ Khatak kha ang a, Miring Shapa kha ama chon mawthaw rang a ajong nimak, inia mi chon thaw rang le mi tampui khekman rang khan, iringkho apeh jong inih.” ²⁹ Khan amani na Jericho ah put ah rushe u le roroia, mipui hawi `khat na anu rujui uh. ³⁰ Enro, mikchaw pasha `di na lam kawriei ah rushuh uh. Jesu na ivakrakan kha rujet u `le, ra`ai a ruti uh, “Aw David Shapa Pumi, nang roihoina kha kieini dieng hin natetna u roh.” ³¹ Inia mipui kha na awmchienna rang, adin u kha rurawkawk uh. Inia adin u na ra`ai shishit a ruti uh, “Aw David Shapa Pumi, nang roihoina kha kieini dieng hin natetna u roh.” ³² Jesu na ruding a adin u kha koi a ruti, “Kiei na nangdin u rang ih kithaw rang maw nangdit uh?” ³³ Ama dieng rumashang uh, “Pumi, kimik u hi nangimavar rang kadit uh.” ³⁴ Jesu na lainatna kha runiei a imik u hai kha rushit pe, khan relentak a imik u hai kha hawng var pe ua anu rujui u joi.

¹ Khan Jerusalem kha vak ranai pui ua Olive Lawn ah awm Bethphage kha vak shok u joi. Khashole Jesu na akhaichawi pasha `di rutir. ² Khan adin u dieng ruti, “Nang maton uah awm kho khawn she u roh. Khan nangni na ranngam `khat hi acha remet `khat le ruthung nangmukrelen u rangnih. Thut u tana kiei dieng vak chawi u roh. ³ Tukhat na nangni dieng chawng riei a tu, ‘Hihaihi Pumi na rangai,’ tia ama dieng riei u roh, khan relentak a amani kha vak tir rangnih.” ⁴ Mahi thiempulien dieng irurieina kha hawng rupumna rang a inih. Hitihin ieriei, ⁵ “Zion shanu dieng ti roh, ‘Enro, nang rengpa kha nang dieng jong joi. Mulung renemtak a ranngam chung ah, khan ranngam acha remet, nititu ranngam ete chung ah jong shuh.’ ” ⁶ Khaichawi idi kha na rushe ua Jesu na chawngirupek dungjuia, ruthaw uh. ⁷ Amani na ranngam le ranngam acha remet kha vak chawi ua amani chung khan amani pon hai kha rumukhu uh. Jesu kha amani chung ah rumushut u joi. ⁸ Khan mipui lientak `khat na opon u hai kha lamlien khan rupha uh. Eshen na thingkung ah put ah thingbak hai kha rutuk ua lamlien khan rupha uh. ⁹ Amaton ah alawn le anuk ah rujui mipui kha na ra`ai a ruti uh, “David Shapa dieng khan Hosanna! ‘PUMI riming a ajong ama kha rahvantha inih!’ Rashangving a Hosanna!” ¹⁰ Ama na Jerusalem kha rulut phakhan, khopui kholok kha rumuchun joi. Khan amani na ruti uh, “Ama hi tumaw nih?” ¹¹ Mipui kha na ruti, “Ama hi Galilee ah awm Nazareth ah put ah thiempulien Jesu kha keng.” ¹² Jesu na Pathien riethiengmun khan rulut a riethiengmun ah put ah ajor hai le rawchawh hai kholok kha runawt. Khan shierleshier rotho hai tebol hai le pharphali jor miring hai shutna hai kha shukthala a rutet pe. ¹³ Khan amani dieng ruti, “Hitihin rumiejiek, ‘Ki`in hi nikna in ti rangnih,’ inia nangni na mahi ‘minieisho hai koh’ nangmachang u joi.” ¹⁴ Khan riethiengmun khan mikchaw le kekhawr hai na ama dieng va ua amani kha rumadam. ¹⁵ Inia thiempu ulien hai le danoja hai na ama na erekhek chon iruthaw, khan naite hai na “David Shapa dieng Hosanna,” tia rura`ai u kha rumuk u phakhan, mulung ruhang pe uh. ¹⁶ Ama dieng ruti uh, “Hihaihi na iti hi nangjet maw?” Jesu na amani dieng rumashang, “Awh, ‘Naite hai le khan rununeh hai bai ah put ah nang rangbak mapakna kha nangrurasham joi,’ iti kha te u makche maw?” ¹⁷ Amani kha rumathan a khopui ah put ah Bethany khan rushe a, kha mun khan ruriek joi. ¹⁸ Jingkar tieng hin ama na khopui ah rukir phakhan, vawnrucham pe. ¹⁹ Lam dieng khan thieichangkung `khat rumuk a makha ama na rujawng. Inia bo hai ranga niboia, ih vak muh mak. Khan ama dieng ruti, “Kumshawt a nang dieng ara shoklai naw rosho.” Khan relentak a thieichangkung kha ruchar joi. ²⁰ Khaichawi hai na makha rumuk u phakhan, shindawngna niei a ruti uh, “Itia thieichangkung hi achar maw nih?” ²¹ Jesu na mashang a amani dieng ruti, “Diktak a nangni dieng kiriei inih, rakhana nieiboia takanangshawn uatu, thieichangkung ah ithaw hi ang a, nangithaw u ranga niboia, mahi lawn hi ‘Rechen tana tuikhanglien ah vak rothong roh,’ nangti u joiawm, makha shok rangnih. ²² Nikna a takashawn le nanginik u kholok kha nangmuk u rangnih.” ²³ Riethiengmun kha lut a Jesu na ruruchuk phakhan, thiempu ulien hai le Jihudi hai shierpui lamkai hai kha ama dieng va a ruti uh, “Ih cham nanginiei a hihaihi nangithaw maw nih? Khan tu na mahi cham hi nang dieng inurupek maw nih?” ²⁴ Jesu na mashang a amani dieng ruti, “Kiei na`awm nangni dieng chawng `khat nawrawdawn u rang kanih, nangnamashang u joiatu, kiei na`awm hihaihi ih cham le kithaw maw nih, iti kha nieriei u rang kanih. ²⁵ John baptisma pekna kha ih ah put ah maw nih? Ravan ah put ah maw nih, ninawkle miring hai ah put ah maw nih?” Amani na reshe a ruti uh, “ ‘Ravan ah put ah inih’ niti u le la, ‘Ijar a ama kha takanangishawn boi u maw nih?’ niti u rangnih. ²⁶ ‘Miring hai ah put ah inih’ niti u le la, mipui hi kieini na nichih uh. Ajarla mi kholok na John hi thiempulien `khat a iloi u inih.” ²⁷ Mashang a Jesu dieng ruti uh, “Jet u mi`ing.” Khan amani dieng ruti, “Kiei na`awm hihaihi ih cham le kithaw maw nih, iti kha nangni dieng nieriei u naw ning. ²⁸ “Imaw nangmining uh? Miring `khat na shapa `di runiei. Akhat changnapa dieng ava a, ‘Kashapa, von tu drakha rohon ah chon thaw she roh,’ ruti. ²⁹ “Mashang a ama na ruti, ‘She jawt mi`ing.’ Inia unuk a mulung lek a rushe joi. ³⁰ “Khan adi changnapa dieng ava a khatikhan ruti. Mashang a ama na ruti, ‘She rang kanih, Aw pumi.’ Inia rushe pelai mak. ³¹ “Idi kar khan tu na maw apa mulungmining kha ruthaw pe?” Amani na rumashang uh, “Akhat changnapa.” Jesu na amani dieng ruriei, “Nangni dieng diktak a kiriei inih, khaichana rawkhawm hai le nawchijor hai na Pathien rengchangna khan, nang matieng rushe u joi. ³² Ajarla John na dikna lam khan jong a ama kha takarushawn u makche, inia khaichana rawkhawm hai le nawchijor miring hai na takarushawn uh. Mahi nangmuk u she hin, mulung lek a ama kha takarushawn u makche. ³³ “Rangshim shik `khat rangai u roh. Loipumipa `khat na drakha rohon `khat runiei a ama na rurokorep. Juepna rang khur `khat ruchoi a khan vendai `khat ruthaw. Khan loithaw hai dieng rumashan a khomojin rushe joi. ³⁴ Khan parrawkhawm rang hawng nai phakhan, oshok hai kha ara rawkhawm rang, loithaw hai dieng rutir joi. ³⁵ “Inia loithaw hai kha na shok hai kha rushur pe ua akhat kha rujem uh, akhat kha ruthat uh, khan akhat kha lung le rudeng uh. ³⁶ Matiengnek a arawpdet a, ama shok shik hai kha rutirret. Kha ang khan amani dieng ruthaw uh. ³⁷ Dawngkhit a amani dieng ashapa kha rutir. Imining a ruti, ‘Amani na kashapa hi tu richit nepek pe u rangnih.’ ³⁸ “Inia loithaw hai kha na ashapa kha rumuk u phakhan, manilemani kar a ruti uh, ‘Mahi koklo kha nih joi. Khai! That u taia ama inkoklo kha loi pe u rang rawi.’ ³⁹ Ama kha rupawttap ua drakha rohon ah put ah rupai ua ama kha ruthat u joi. ⁴⁰ “Khajarkhan drakha rohon pumi kha jong phakhan, loithaw hai dieng khan imaw thaw nih?” ⁴¹ Ama dieng ruti uh, “Mi shie hai kha khawktak a ama na mathang rangnih, khan drakha rohon kha parrawkhawm pha rikip a ama dieng ara apeh rang a loithaw hai shik dieng pek rangnih.” ⁴² Jesu na amani dieng ruti, “ ‘Inthaw hai na i`enda u lung kha kik ah runiei lung kha ruchang. Mahi PUMI na ithaw inih, khan nimik ua mahi shindawngroi `khat inih,’ tia irumiejiek kha rute u makche maw? ⁴³ “Mahi kirieina ajartu Pathien rengchangna kha nangni ah put ah loi rangnih joi, khan ara moshok rang a Phungshik hai dieng pek rangnih joi. ⁴⁴ Khan mahi lung chung a acho ama kha leklek a koi rangnih. Tunita`awm ichona miring kha rawnawi ning, tia vaiphin rachangmashak rangnih.” ⁴⁵ Thiempu ulien hai le Pharisee hai na ama rangshim kha rujet u phakhan, amani chung a iriei keng, iti kha rujet uh. ⁴⁶ Amani na ama kha rushur tu jawt uh, inia mipui kha ruchih uh. Ajarla amani na ama kha thiempulien `khat a iruloi u inih.

¹ Jesu na amani dieng rangshim a chawngruriei peret: ² Ama na ruriei, “Ravan rengchangna hi reng `khat na ashapa rang moiloi bumichinna irasham pe kha le ra`ang inih. ³ Makha moiloi bumichinna rang, koirawkhawmsha hai kha akoi rang, ama shok hai kha rutir, inia amani kha va jawt u mak. ⁴ “Shok shik hai kha tirret a ama na hitihin ruti, ‘Koirawkhawmsha hai dieng khan ti roh, “Enro, kieshiecha hai le imawnaw shieite hai kha that a bunekna `khat karasham a irikip karashamsho joi. Thaw, moiloi bumichinna hin va u rang roh.” ’ ⁵ “Inia amani na irushawn pe u mak. Akhat na loi ah, khan akhat na rievieithawna ah rushe u joi. ⁶ Khan aliemlim kha na ama shok hai kha rushur pe uh, khan engshiettak a rutawn ua ruthat uh. ⁷ Rengpa kha na rujet phakhan, mulung ruhang pe joi. Ama na ama ramiring hai kha rutir a mithat hai kha vak mathang joi, khan amani khopui kha miei le ruha pe u joi. ⁸ “Khashole ama na oshok hai dieng ruti, ‘Moiloina rang rashamsho nih joi, inia koimiring hai hi tu rutuk maklai. ⁹ Nangni na khopui jawngna lamlien khawn she u tana nangimuklim kha moiloi bumichinna hin vak rawkhawm u roh.’ ¹⁰ Shok hai kha na rushe ua lamlien ah imuktuk, atha ashie lawp `khat a vak chawi ua, moiloina in kha rumiship u joi. ¹¹ “Inia rengpa kha na koimiring hai kha aen vat phakhan, moiloina ponledier thaw boi miring `khat vak muk. ¹² Khan ama dieng ruti, ‘Kama, itia moiloi bumichinna ponledier thaw boipet a hin ah nangvaklut maw nih?’ Inia ama kha chawngrieithiei boi a ruawm. ¹³ “Khashole rengpa kha na oshok hai dieng ruti, ‘Ukhutleke kha khop pe u roh, khan chawi u tana vai tieng ah jingnakhap khawn vak pai u roh. Makha mun khan chapna le hareshena kha awm rangnih.’ ¹⁴ “Ajarla mi tampui kha okoi rangnih, inia mi lekte kha madan rangnih.” ¹⁵ Khashole Pharisee hai na rushe ua ama chawngriei khan lim rudaw pe uh ¹⁶ Amani na amani khaichawi hai kha Herod miring hai kha le Jesu dieng rutir uh. Amani na ruti uh, “Oja, nang na adik kha nangriei, khan miring hai kha maila boi a le enshietenlar thaw boi a adik a Pathien lam kha nangruchuk, iti kejet uh. ¹⁷ Khajarkhan imaw nangmining? Kieini dieng nieriei u roh. Caesar dieng khaichana pek hi Dan maw nih ninawkle dan nih boi maw nih?” ¹⁸ Inia Jesu na amani thatna boi u kha jet pe a ruti, “Aw thanunchan thaw hai, ithaw kiei hi ennanginerete u maw nih? ¹⁹ Khaichana chandi kha kiei dieng numumuk u roh.” Khan amani na dinari `khat kha ama dieng vak chawi uh. ²⁰ Khan amani dieng ruti, “Mahi rilim le khetmiejiek hi, tu tah maw nih?” ²¹ Amani na rumashang uh, “Caesar.” Khashole amani dieng ruti, “Khanitatu Caesar tah hai kha Caesar dieng peh u roh, khan Pathien tah hai kha Pathien dieng peh u roh.” ²² Amani na makha rujet u `le, shindawngna runiei ua ama kha mathan a rushe u joi. ²³ Khanikhan thoiretna awm mak, ati Sadducee hai na ama dieng va ua rurawdawn uh. ²⁴ Amani na ruti uh, “Oja, Moses na ruti makhala tukhat na nainiei boi a thi joiatu, ulienpa chi mothoina rang, anaipangpa na unungak kha loh rangnih. ²⁵ Poro shiri hi kieini le ruawm. Akhat changna kha na inniei a ruthi joi. Khan chi mak boi a unungak kha anaipangpa dieng rumak joi. ²⁶ Khatikhan adi changnapa, athum changna, khan ishiri changnashe kha ruthi joi. ²⁷ Dawngkhit a nupangnu kha`awm ruthi joi. ²⁸ Thoiretna khan ama kha, shiri hai kar a, tu nungak maw chang nih? Ajarla lawpsheng u na ama kha iruniei u inih.” ²⁹ Jesu na mashang a amani dieng ruti, “Nangrehe uh, ajarla nangni na Miejiek hai kha`awm, khan Pathien ranak kha`awm rujet u makche. ³⁰ Ajarla thoiretna khan innieina awm naw nih, khan inawm mieniei u naw nih. Inia ravan a Pathien ravantir hai kha ang u rangnih. ³¹ Khan athi hai thoiretna chungchang khan tu, Pathien na iruti chawng kha te u makche maw? ³² Ama na ruti, ‘Kiei hi Abraham Pathien, Isaac Pathien, khan Jacob Pathien kha kanih.’ Pathien hi athi hai Pathien kha nimak, inia aring hai Pathien kha inih.” ³³ Ama miruchukna khan mipui kha shindawngna runiei uh. ³⁴ Inia ama na Sadducee hai kha rumaw`awmchien joi, iti kha Pharisee hai kha na rujet u phakhan, amani na lawp `khat a ruruchun u joi. ³⁵ Khan amani kar a danthiei `khat na ama kha enretena rang, chawng rawdawn a ruti, ³⁶ “Oja, Dan shung ah ih chawngpek kha maw aliendet?” ³⁷ Jesu na ama dieng ruti, “ ‘Nang PUMI nang Pathien kha nang mulung kholok le, nang ringphuk kholok le khan nang mulungmining kholok le numnangipok rang a inih.’ ³⁸ Mahi akhat changna le aliendet chawngpek kha inih. ³⁹ Khan adi changna kha hitihin awm: ‘Nang ringchangpui kha nang pumtak ang a numnangipok rang a inih.’ ⁴⁰ Mahi chawngpek idi chung hin Dan le Thiempulien hai kholok kha rushui a awm inih.” ⁴¹ Inia Pharisee hai na ruruchun u lai khan, Jesu na amani dieng rurawdawn. ⁴² Ama na ruti, “Christa chungchang hin imaw nangmining uh? Ama hi tu shapa kha maw nih?” Ama dieng rumashang uh, “David Shapa.” ⁴³ Amani dieng ruti, “Khanitala itia Ratha jar a David na ‘Pumi,’ tia irukoi a ⁴⁴ ‘PUMI na kupumi dieng ruriei, “Nang rahapui hai kha nang kekhawng kamachang malalim, kukhut chang tieng hin shuh roh,” ’ tia iti maw nih? ⁴⁵ David na ama kha ‘Pumi,’ ti joiala, iti dan a ama kha ashapa achang maw nih?” ⁴⁶ Tute na ama dieng rumashang ngam u mak, khan khani ah put ah tute na ama dieng chawngawm rurawdawn ngam u lai mak.

¹ Khashole Jesu na mipui dieng le akhaichawi hai dieng chawngruriei. ² Ama na ruti, “Danoja hai le Pharisee hai na Moses shutna khan shuh uh. ³ Khajarkhan nangni dieng iriei rikip kha jui u tana thaw u roh, inia amani ithaw ang a tu, thaw u naw roh, ajarla iriei u kha thaw u mak. ⁴ Ruput ngam boi pokrik hai kha amani na khop ua miring hai dar a atet pe uh, inia amani kha amani khutlawihai kar a akhatshe le meper jawt u mak. ⁵ “Khan ithaw u kholok kha miring hai muk rang thaw uh. Ajarla amani uitangmili hai kha mielien uh, khan amani ponmawr hai kha mieshiei uh. ⁶ Bumichinna hai khan mi matonkhit ah shutna rang, adit uh, khan synagogue hai khan shutna runieiving hai kha loh jawt uh. ⁷ Khan mi na ‘Rabbi, Rabbi,’ iti le khan rievieithawna mun ah richit ipek rang, adit uh. ⁸ “Inia mi na ‘Rabbi,’ tia nokoi u naw roshoh. Ajarla nang Oja u `khat awm. Ama kha Christa kha inih, khan nang kholok hi uliennai kha nangnih uh. ⁹ Rieliei a awm tute dieng kapa, tia koi u naw roh, ajarla nangpa u `khat awm, ama kha ravan a awm. ¹⁰ Mi na lamkai hai, tia`awm nokoi u naw rosho, ajarla nang Lamkai `khat awm. Makha Christa kha inih. ¹¹ Inia nang kar ua alienving kha nang shok u achang rang a inih. ¹² Khan nining a rawlawm miring kha redemashak rangnih. Khan nining a rede miring kha rawlawmmashak rangnih. ¹³ “Inia nangni rang idawr a khawk shawna maw nih naw, Aw danoja hai, Pharisee hai, thanunchan thaw hai! Ajarla ravan rengchangna kha mi hai rang nangkhar uh. Ajarla nangnirilikawm lut u makche, khan alut rang a miring hai kha`awm mulut jawt u makche. ¹⁴ Nangni rang idawr a khawk shawna maw nih naw, Aw danoja hai, Pharisee hai, thanunchan thaw hai! Ajarla mieirawng hai in kha ranak a nangsho uh. Khan rohong a nikna kha nangmieshiei uh. Hijarhin hengna kha liendet a nangmuk u rangnih. ¹⁵ “Nangni rang idawr khawk maw nih naw, Aw danoja hai, Pharisee hai, thanunchan thaw hai! Ajarla miring `khat Jihudi mijirna rang, tuikhanglien le maw nangrakan ua nangshe uh. Makha miring kha na ijir phakhan, nangni kha ang a, rothom a Gehenna shapa kha nangmachang uh. ¹⁶ “Nangni rang idawr a khawk maw nih naw, Aw lamkai mikchaw hai! Nangni na nangti uh, ‘Tunita`awm riethiengmun ban a chawngrakham ama chung khan iawm shok naw nih. Inia tunita`awm riethiengmun ah awm rangkachak ban a chawngrakham ama kha chawngrakham kha na ikhit inih.’ ¹⁷ Aw amawng le mikchaw hai, ih kha maw liendet, rangkachak kha maw, ninawkle rangkachak riethiengmashak riethiengmun kha maw? ¹⁸ Nangni na nangti uh, ‘Tunita`awm maicham ban a chawngrakham ama chung khan ih shok naw nih, inia tunita`awm kha chung ah awm khutchawi ban a chawngrakham ama kha chawngrakham kha na ikhit inih.’ ¹⁹ Aw amawng le mikchaw hai, ih kha maw liendet, khutchawi kha maw ninawkle khutchawi riethiengmashak maicham kha maw? ²⁰ Khajarkhan tunita`awm maicham ban a chawngrakham miring kha na makha iban a, khan kha chung ah awm kholok kha iban a chawngrakham inih. ²¹ Tunita`awm riethiengmun ban a chawngrakham miring kha na makha le kha shung ah awm ama kha iban a chawngirakham inih. ²² Tunita`awm ravan le chawngrakham miring kha na Pathien rengmun le khan kha chung ah ashupa ama kha le chawngirakham inih. ²³ “Nangni rang idawr a khawk maw nih naw, Aw danoja hai, Pharisee hai, thanunchan thaw hai! Ajarla pudina le patikhawm, khan jira hai kha shemshawm a nangpek uh. Inia Dan a aludet kha ishawn u makche. Khahaikha la, dikna, roihoina, khan takashawn inih. Shik hai kha enda boi a hihaihi nangithaw u rang a shok. ²⁴ Aw lamkai mikchaw hai, thoiphurlangshan kha nangshawr uh, inia sharingshiei tu nangva uh! ²⁵ “Nangni rang idawr a khawk maw nih naw, Aw danoja hai, Pharisee hai, thanunchan thaw hai! Ajarla nangni na hai le kheng kha vai tieng nanglap ua, shung ah tu phamrai le takshurna ngam boi kha ship a awm. ²⁶ Aw Pharisee mikchaw hai, hai le kheng shung kha masha a machai u roh. Khanitatu amani vai tieng a kha`awm chai rangnih. ²⁷ “Danoja hai, Pharisee hai, thanunchan thaw hai, nangni rang mieriemna awm! Ajarla mi na vai tieng metha a imuk, inia ushung ah tu athi hai ru hai le orono kholok aship thankhur hai lieina ithaw kha le nangra`ang uh. ²⁸ Khatikhan mi hai dieng khan vai tieng tu richichawi `khat a nangmalang uh, inia shung ah tu nang thanunchan thawna le dannangishawnna boi u kha na shipmer a awm. ²⁹ “Nangni rang idawr a khawk maw nih naw, Aw danoja hai, Pharisee hai, thanunchan thaw hai! Ajarla nangni na thiempulien hai than kha nangkon uh, khan miriethieng hai than hai kha nangrielien uh. ³⁰ Khan nangni na nangti uh, ‘Kieini na kapa hai rong khan kuruawm uatu, amani na thiempulien hai thishen moshokna khan rujaw u naw ning.’ ³¹ Khatikhan thiempulien hai kha ruthat nai hai kha kanih, tia nang nining ua kungnangchang uh. ³² Nang pilepu hai munu danlakna kha miship u roh. ³³ “Aw moro hai! Rawshawk chicha hai! Nangni na itia maw Gehenna chawngshatna ah put ah rekhe u rawng? ³⁴ Hijarhin, en u ro, thiempulien hai, mishing hai le danoja hai kha nangni dieng kijongtir inih. Eshen kha cross ling ah nangthat u rangnih. Khan eshen hai kha nang synagogue u hai khan rawmaw le nangjem ua khopui `khat ah put ah khopui `khat ah shawna nangpek u rangnih. ³⁵ Makha rieliei chung a thijan miriethieng thishen kholok shietna kha nangni dieng chuna rang a inih. Makha miriethieng Abel thishen shok ah put ah Barachiah shapa Zechariah thishen shokshe kha nangni dieng shokna rang a inih. Zechariah kha riethiengmun le lungkheng kar ah nangiruthat u inih. ³⁶ Diktak a nangni dieng kiriei inih, hihai kholok hi mahi rong chung hin chuh rangnih. ³⁷ “Aw Jerusalem, Aw Jerusalem, thiempulien hai athat le ama dieng a ijongtir hai kha lung le adeng! Arpui `khat na ete hai kha amatha noi ah irawkhawm kha ang a, idawrshe maw nang nai hai kha lawp `khat a kururawkhawm jawt, inia rujawt u makche! ³⁸ Enro, nang in u kha rokpet a rangah joi. ³⁹ Ajarla kiei na nangni dieng kiriei inih, ‘PUMI riming a ava ama kha rahvantha inih,’ nangti u masheng, numuh u lai naw tinih.”

¹ Khashole Jesu na riethiengmun kha mathan a rushe joi. Khan akhaichawi hai na ama dieng rushe ua riethiengmun inrashak dan hai kha rumumuk uh. ² Makhan Jesu na amani dieng ruti, “Hihai kholok hi nangimuk boi u maw nih? Diktak a nangni dieng kiriei inih. Akhat chung ah akhat rotho hi achim boi a hin ah imak lung `khatshe awm naw nih.” ³ Khan Ama na Olive Lawn ah rushuh le roroia, akhaichawi hai na bing a ama dieng va uh. Amani na ruti uh, “Khahaikha itik a ashok rang a maw nih, iti kha kieini dieng nieriei u roh. Khan nang jongna rang le khan rong mawtawrna rang a jetna kha imaw ninih?” ⁴ Jesu na mashang a amani dieng ruriei, “Mi na nomohonna boi u rang, riring u roh. ⁵ Ajarla ‘Christa kha kanih,’ tia mi tampui kiriming a va u rangnih, khan mi tampui mohon u rangnih. ⁶ Khan ra le muruk a ra chawng nangjet u rangnih. Makhan nang rawthawkna boi u rang, riring u roh. Ajarla hihai kholok hi ashokngir rang a inih, inia dawng kha tu nih naw nilai. ⁷ Ajarla phung `khat na phung `khat chung a ra thaw rangnih, khan rengram `khat na rengram `khat chung a ra thaw rangnih. Nekleshak hawng tang rangnih, rikrai hawng rawjawh rangnih, khan nieinu munmun ah hawng rawnawk rangnih. ⁸ Hihai kholok hi shawna putna kha nih rangnih. ⁹ “Khashole shawrana khan nepeh u ning, tia nathat u rangnih. Khan kiriming jarkhan phung kholok na nangni kha numukmak u rangnih. ¹⁰ Khashole mi tampui na keruthui u rangnih, khatlekhat rojor nana rangnih, khan khatlekhat raha rangnih. ¹¹ Khan thiempulien jok tampui thoi ning, tia mi tampui kha mohon rangnih. ¹² Khan danishawnboi kha hawng pung ning, tia mi tampui numropokna kha hawng thang rangnih. ¹³ Inia dawngshe a adoi ngam ama kha shan rangnih. ¹⁴ Khan rengchangna athachawng hi manmieshie kholok dieng shem rangnih. Makha phung kholok dieng kungchangna `khat kha chang rangnih. Khashole tu dawng kha hawng rangnih joi. ¹⁵ “Khajarkhan thiempulien Daniel dieng irurieina, ‘Mitiroi thitnathangna miring,’ kha na mun riethieng ah ading kha nangmuk u phakhan (ate miring kha na jet rosho), ¹⁶ Judea ah awm miring hai kha na lawn hai khan tan u rosho. ¹⁷ In ah awm nieinak hai kha aloi rang, inphu chung ah awm ama kha na, jong chumlai naw rosho. ¹⁸ Loi ah awm ama kha na, oponledier loina rang hawng kirretlai naw rosho. ¹⁹ Khalai a naivawng nupang hai le nai runupeh hai rang khan idawr a shawna maw ninih naw! ²⁰ Nang tanna u rang a pha kha phabi le Sabbath nikho nitna boi rang, nikna niei u roh. ²¹ Ajarla makhan shawrana lientak `khat shok rangnih. Kha`ang kha manmieshie putna ah put ah vonshe hin ashok boipet nih rangnih, khan takthar a shokret, iti awmlai naw nih. ²² Khan kha pha hai kha imushum boi nitjoiatu, taksha `khatshe hawi naw nih. Inia madansha hai rangbak khan kha pha hai kha, mushum pe rangnih. ²³ Khashole tukhat na ‘Enro, Christa kha hin awm joi’ ninawkle ‘Khawn awm joi’! ti joiawm takashawn u naw roh. ²⁴ Ajarla christa jok hai le thiempulien jok hai kha thoi rangnih. Nitthieiatu madansha haishe kha mohonna rang, jetna le rekhekchon alienalien numumuk u rangnih. ²⁵ Enro, pha mala a kinierieisha u nih joi. ²⁶ “Khajarkhan, ‘Enro, ama kha ramthim ah awm joi!’ niti u joiawm, she u naw roh. Khan ‘Enro, ama kha indan shung ah awm joi!’ niti u joiawm, takashawn u naw roh. ²⁷ Ajarla shim tieng ah put ah khomelek a mar tiengshe i`eh kha Miring Shapa ajong kha le ra`ang rangnih. ²⁸ Ajarla thicho awmna mun khan, langke hai na lawp `khat a ruchun u rangnih. ²⁹ “Khahai shawrana nikho hai kha thengphit `le, ni kha mijing rangnih, tha na mieivar pelai naw nih; arshi hai na ravan ah put ah jong cho u rangnih, khan ravan ranak hai kholok kha rawnawk rangnih. ³⁰ “Kha pha khan ravan a Miring Shapa jetna kha malang rangnih, khan rieliei a phung kholok na mulung jumna niei rangnih. Ranak, khan lurna lien le ravan a romiei hai chung ah Miring Shapa ajong kha amani na muk u rangnih. ³¹ Khan tekawlawi lientak `khat miri le ama ravantir hai kha jong tir rangnih. Khan imadansha hai kha kiei mili ah put ah, ravan dawng `khat ah put ah dawng `khatshe, rawkhawm u rangnih. ³² “Khan thieichangkung ah put ah rangshim hi jet u roh: abak hai kha dawnglai khan, obo hawng moshok. Makhan kholum kha hawng nai joi, iti kha nangjet uh. ³³ Khatikhan khahaikha nangmuk u phakhan, ama kha vak ranai a kawtkungtak ah ding a awm joi, iti kha jet u roh! ³⁴ Diktak a nangni dieng kiriei inih, hihaihi hawng rupum masheng, hi rong hi shukhek a hek naw nih. ³⁵ Ravan le rieliei hi hek rangnih, inia kawchawng hai hi tu shukthang a thang naw nih. ³⁶ “Inia makha Nikho le nidan chungchanga tute na ajet awm mak, ravan a ravantir haishe na`awm jet u mak. Inia kapa ranga kha na ijet inih. ³⁷ Inia Miring Shapa jongna rang a dan kha Noah nikho hai kha le ra`ang rangnih. ³⁸ Ajarla tuilien mala nikho hai khan, miring hai kha na runek rushak uh, inruniei uh, khan inniei rang rupek uh. Makha Noah na rokonglien khan rulut masheng miring hai kha na ruthaw uh. ³⁹ Tuihawnglien a amani kholok kha ruchawiviek masheng, amani na iawm rujet u mak. Miring Shapa ajong rang a kha`awm, khatak kha ang rangnih. ⁴⁰ Kha pha khan miring pasha `di loipuk ah awm rangnih, akhat kha loi rangnih, khan shik `khat kha mak rangnih. ⁴¹ Nupang pasha `di na shum ah shanghakshuk u rangnih, akhat kha loi rangnih, khan shik `khat kha mak rangnih. ⁴² “Khajarkhan riring u roh, ajarla nangni na nang Pumi u jongna rang a pha kha jet u makche. ⁴³ Inia mahi jet u roh, inpumipa kha na murushapa vatna rang a pha kha rujet joiala, ruche ning, tia i`in kha mokhoi naw nih. ⁴⁴ Khajarkhan nangniawm rasham u roh, ajarla nangrumining boi u phakhan, Miring Shapa kha jong rangnih. ⁴⁵ “Rangam puithiei le ashing shok kha tumaw nih? Ama kha upumpa kha na ama inshungkhur apana rang le amani kha rutukthep pha a nekleshak apeh rang a roiruputna ipek miring kha inih. ⁴⁶ Upumpa kha jong phakhan, khatikhan a chon iruthaw ijongmuk shok kha rahvanmuh miring kha inih. ⁴⁷ Diktak a nangni dieng kiriei inih, ama na ienieinak kholok apoh kha iminit rangnih. ⁴⁸ Inia shok shie kha na mulung shung a, ‘Kupumpa ajong hi shum joi,’ iruti a ⁴⁹ oshok chang pui hai kha rujem, khan jukhawp hai le runek-rushak. ⁵⁰ Makha shok pumpa kha irumining boi pha le irujet boi nidantak khan jong phakhan, ⁵¹ ama na khawktak a achep rangnih, khan thanunchan thaw hai kha le atet rangnih. Kha mun khan chapna le hareshena kha awm rangnih.

¹ “Ravan rengchangna kha nungak shawm kha le ra`ang rangnih. Amani thaomiei hai kha ruchawi ua moipa kha rumuk pui rushe uh. ² Amani kar a rahnga kha ashing runih uh, khan rahnga kha amawng runih uh. ³ Amawng hai kha na amani thaomiei hai kha ruchawi uh, inia thao ruchawi u mak. ⁴ Inia ashing hai kha na thao kha amani thaokawk hai khan amani thaomiei hai kha le ruchawi uh. ⁵ Moipa kha jong shum jarkhan, amani kholok kha inrungui a rumiei u joi. ⁶ “Inia janchim khan he ra`ai `khat na ruti, ‘Enro, moipa kha jong joi. She u tana vak rumuk pui u rang roh!’ ⁷ Khashole nungak hai kholok kha na ruthoi ua amani thaomiei hai kha rumuchuk u joi. ⁸ Amawng hai kha na ashing hai dieng ruti uh, ‘Kawthaomiei u hai hi ithi rang keng joi, nang thao u kha eshen nepeh u rang roh.’ ⁹ “Inia ashing hai kha na rumashang uh, ‘Nithiei naw nih, kieini rangawm, khan nangni rangawm hun naw nih. Kha ruhut a nangni rangbak khan ajor hai dieng khawn vak rawchawh u rang roh.’ ¹⁰ “Amani na thao rawchawh rusheriethiei khan, moipa kha jong joi. Khan rurasham miring hai kha na moiloina khan moipa kha le rushe u joi. Khan in kha rukhar joi. ¹¹ “Kha anuk `le, nungak shik `khat hai kha`awm va ua ‘Pumi, Pumi, mawkawt nawmawlawng pe u roh!’ vak ti uh. ¹² Inia ama na rumashang, ‘Diktak a nangni dieng kiriei inih, tumaw nangnih u kiei na nejet u mi`ing.’ ¹³ Khajarkhan riring u roh, ajarla Miring Shapa jongna rang a Nikho le nidan kha nangni na jet u makche. ¹⁴ “Ajarla ravan rengchangna hi miring `khat na ama shoktak hai kha irukoi, khan ienieinak hai kha amani dieng khut irurothona a ramlatak `khat a khomijin rushe kha le ra`ang inih. ¹⁵ Akhat dieng talent rahnga rupek, shik `khat dieng idi, khan shik `khat dieng akhat, ingamtuk kha rupekrim a khomijin rushe joi. ¹⁶ Khashole talent rahnga atumpa kha na rushe a makha le rievieiruthaw a talent shik rahnga rumoshok. ¹⁷ Khatikhan idi atumpa kha na`awm idi rumoshok. ¹⁸ Inia akhat atumpa kha na rushe, khan pieipak ah rukhum a upumi shier kha ruthe. ¹⁹ “Pha shawtlawk shole, khahai shok pumi kha hawng kir a amani le talent hai kha rumushung u joi. ²⁰ Khan talent rahnga atumpa kha na ava a talent shik rahnga kha vak chawi a ruti, ‘Pumi, kiei dieng talent rahnga nangnurupek. Enro, kiei na amani ah put ah talent rahnga kurumupung joi.’ ²¹ “Upumi kha na ama dieng ruti, ‘Nangrat joi, atha le takashawn rang a rutuk shok. Nieinak lekte chung a takashawn rang rutuk kha nangnih. Kiei na nieinak tampui chung a apoh kha niminit rang kanih. Nang pumi ningaina khan lut rang roh.’ ²² “Talent idi atumpa kha na`awm ava a ruti, ‘Pumi, kiei dieng talent idi nangnurupek. Enro, amani ah put ah talent idi kurumupung joi.’ ²³ “Upumi kha na ama dieng ruti, ‘Nangrat joi, atha le takashawn rang a rutuk shok. Nieinak lekte chung a takashawn rang a rutuk kha nangnih. Kiei na nieinak tampui chung a apoh kha niminit rang kanih. Nang pumi ningaina khan lut rang roh.’ ²⁴ “Khashole talent `khat atumpa kha na ava a ruti, ‘Pumi, nang hi mikher, nangivawrna boi a parrawkhawm, khan nangithehna boi a rawkhawm kha nangnih, iti kha kiei na kejet. ²⁵ Khajarkhan kiei kuruchih, khan kurushe a nang talent kha pieipak ah kiruthe inih. Enro, nang tah kha loi rang roh.’ ²⁶ “Upumi kha na ama dieng ruti, ‘Nang ashie le rathashie shok, kivawrna boi khan kiei na parkirawkhawm, khan kithehna boi khan kirawkhawm, iti kha nangjet! ²⁷ Kieshier kha niei`in ah nangrutet a la, kawhawngkir phakhan athoi lele kumuk rangnih. ²⁸ ‘Khajarkhan talent kha ama ah put ah loi tana talent shawm anieipa dieng peh rang roh. ²⁹ Ajarla aniei ama dieng khan pek rangnih, khan ama na ruphu a niei rangnih, khan aniei boi ama dieng khan, inieidak kha`awm ama ah put ah loi pe rangnih. ³⁰ Khan rutuk boi shokpa kha vai tieng ah jingnakhap khan vak pai u roh. Kha mun khan chapna le hareshena kha awm rangnih.’ ³¹ “Miring Shapa kha na ama lurna le ravantir riethieng kholok le jong phakhan, ama lurna rengmun khan jong shuh rangnih. ³² Khan phung kholok kha amaikung a ruchun rangnih. Kengamroi kha na ekengam hai kha keh hai ah put ah ishen kha ang a, amani kha shikshik a shen rangnih. ³³ Khan kengam hai kha ama khut chang tieng atet rangnih, inia keh hai kha ukhut viei tieng atet rangnih. ³⁴ “Khashole ukhut chang tieng ah hai dieng khan Rengpa kha na iti rangnih, ‘Khai, kapa na rahvan ipek hai, rieliei phun ah put ah nangni rang a irurasham rengchangna kha tum u rang roh. ³⁵ Ajarla vawncham a kuruawm, nekleshak nangnurupek uh. Tuira a kuruawm, tui nangnurupek uh. Milak `khat a kuruawm, nangnurupawm uh. ³⁶ Ponledier boi a kuruawm, pon nangnururieshieimashak uh. Natlam a kuruawm, nangnawhawngphak uh. Lungroko shung ah kuruawm, kiei dieng nanghawng uh.’ ³⁷ “Khashole midik hai kha na mashang a ruti u rangnih, ‘Pumi, itiklai maw vawncham a nang kha kunurumuk ua nekleshak kunurupek uh, ninawkle tuira a kunurumuk ua tui kunurumenek uh? ³⁸ Itiklai maw kieini na nang kha milak `khat a kunurumuk ua kunurupawm uh, ninawkle ponledier boi a kunurumuk ua pon kunururieshieimashak uh? ³⁹ Ninawkle natlam a, ninawkle lungroko ah kawnawhawngphak uh?’ ⁴⁰ “Makhan Rengpa kha na amani dieng mashang rangnih, ‘Diktak a nangni dieng kiriei inih, ih nita`awm ashin ku`uliennai hihaihi kar a akhat dieng nangiruthaw u kha, kiei dieng nangiruthaw u inih.’ ⁴¹ “Khashole ukhut viei tieng ah hai dieng khanawm iti rangnih, ‘Nangni pumbotna amuh miring hai, diabol le ama ravantir hai rang a irurasham Kumshawt Miei khan, kiei ah put ah she u rang roh. ⁴² Ajarla vawncham a kuruawm, nekleshak nurupeh u makche, tuira a kuruawm, tui nurupek u makche. ⁴³ Milak `khat a kuruawm, in nurumulut u makche. Ponledier boi a kuruawm, pon nururieshieimashak u makche. Natlam a le lungroko ah kuruawm, inia nawhawngphak u makche.’ ⁴⁴ “Khashole amani na`awm rumashang a ruti u rangnih, ‘Pumi, itiklai maw nang kha vawncham a, ninawkle tuira a ninawkle milak a, ninawkle ponledier boi a, ninawkle dam boi a, ninawkle lungroko ah nang kha kunurumuk ua nang dieng chon kinuruthawna pe boi u awm?’ ⁴⁵ “Khashole ama na amani dieng rumashang, ‘Diktak a nangni dieng kiriei inih, ih nita`awm hihai ashin hai kar a akhat dieng nangiruthaw boi u kha kiei dieng nangiruthaw boi u inih.’ ⁴⁶ “Khan hihaihi na kumshawt a chepna khan she u rangnih, inia midik hai kha na kumshawt ringna shung khan lut u rangnih.”

¹ Khan hitihin ruawm, Jesu na chawng hai hi ariei rumawtawr phakhan, akhaichawi hai dieng ruti, ² “Ni `di shole, Rakanna kha hawng rangnih joi, iti hi nangjet uh, khan Miring Shapa kha cross ah thatna rang pek u rangnih joi.” ³ Khashole Caiaphas iti thiempu rashang tolawng khan thiempu ulien hai, danoja hai le miring hai shierulien hai kha ruruchun uh. ⁴ Khan Jesu kha mohonchien a shur a thatna rang, muruk a chawng rurashak uh. ⁵ Inia “Rohoi khan tu mi muput rang keng, ama kha shur u naw roh,” tia amani na ruti uh. ⁶ Khan Jesu kha Bethany ah raithawnaw rutawngpa Simon in ah ruawm. ⁷ Kha pha khan nupang `khat na manrawp rieipartui hi lungngoi kawk `khat le Jesu dieng ava a, Jesu na tebol ah rushulai khan, makha ama lu ah ruliei pe. ⁸ Inia makha akhaichawi hai na rumuk u phakhan, mulungrahalam a ruti uh, “Ijar a mahi imathang maw nih? ⁹ Ajarla mahi rieipartui hi manrawptak a jor a shara hai dieng pekthiei inih.” ¹⁰ Makha Jesu na rujet a amani dieng ruti, “Ijar a nupangnu kha nangirahamashak u maw nih? Ajarla ama na kiei dieng chon atha `khat ithaw inih. ¹¹ Ajarla shara hai kha ningthingkip nangawm pui uh, inia kiei hi tu ningthingkip nawawm pui u makche. ¹² Ajarla katak a mahi rieipartui iliei hi kurukhumna rashamna rang a iruthaw inih. ¹³ Nangni dieng diktak a kiriei inih, ih mun khan nita`awm, rieliei pumpui ah athachawng shem phakhan, mahi nupangnu na iruthaw hi, ama miningna `khat a, riei rangnih.” ¹⁴ Khashole Judas Iscariot iti shawmlieidi kar a akhat na thiempu ulien hai dieng rushe joi. ¹⁵ Ama na ruti, “Nangni dieng ama hi kojor a la, kiei dieng imaw nepeh u rawng?” Amani na dangka shawm `thum le ama kha rurawjawt pui u joi. ¹⁶ Khan ah put ah Jesu jorna rang a chanthatna kha tawk a ruawm joi. ¹⁷ Khan akhat changna Chawjawboi Tan Rohoi Nikho khan khaichawi hai na Jesu dieng rushe a ruti uh, “Khoshekawt ah maw Rakanna shakna rang, nangnarashammashak jawt uh?” ¹⁸ Ama na ruti, “Khopui khawn she u tana mi `khat nangmuk u rangnih. Ama dieng ti u roh, ‘Ojapa na iti, “Kapha kha nai joi, kakhaichawi hai le nang in ah Rakanna kha rasham u rang kanih.” ’ ” ¹⁹ Khajarkhan Jesu na chawngirachak dungjuia, khaichawi hai na ruthaw ua Rakanna kha rurasham u joi. ²⁰ Khan ni hawng tah phakhan, ama na khaichawi shawmlieidi le maicham ah rushuh u joi. ²¹ Amani na runek u lai khan, ama na ruti, “Diktak a nangni dieng kiriei inih, nang kar ua akhat na kiei hi nojor rangnih joi.” ²² Khan amani kha dawnga mulungrushaw pe uh. Amani `khatkhat na ama dieng ruti uh, “Kiei maw kanih, Pumi?” ²³ Khan ama na rumashang, “Mahi khengkam hin kiei le khut apur miring kha na kiei hi nojor rangnih. ²⁴ Miring Shapa kha ama chungchanga irumiejiek dungjuia ashok pe inih. Inia Miring Shapa ajor miring chung khan idawrshe rahvanshie maw nih! Ama kha jong shoklam nawkala ama rang tha pe rangnih.” ²⁵ Khashole ama ajorpa Judas na mashang a ruti, “Kiei maw kanih, Rabbi?” Ama na rumashang, “Nangti joi.” ²⁶ Khan amani na irunek u le roroia, Jesu na tan kha ruloi, khan rahvan rupek a rukhoi. Khan akhaichawi hai dieng rupek a ruti, “Loi u tana shah u roh, mahi kupum kha inih.” ²⁷ Khan hai kha ruloi a mapakna runiei, khan amani dieng pek a ruti, “Nang lawpsheng u na hin ah put ah neh u roh. ²⁸ Ajarla mahi rawjawtna `thar kithishen kha inih. Mahi mi tampui munu rangaidamna rang a along kha inih. ²⁹ Inia kiei na nangni dieng kieriei, von ah put ah kapa rengchangna khan nangni le athar a kinekna rang a makha Nikho kha hawng shok masheng, mahi drakha tui hi kiei na nelai naw ning.” ³⁰ Khan amani na lah `khat ruthaw ua Olive Lawn ah ruhawng u joi. ³¹ Khashole Jesu na amani dieng ruriei, “Von jan hin, kajar a nang kholok na keruthuina nangniei u rangnih, ajarla hitihin rumiejiek: ‘Kiei na Kengamroi kha that rang kanih, khan kengam hawi kha chaiachai a awm rangnih.’ ³² Inia kiei hi nomothoi shole, nang matieng u Galilee ah rushe rang kanih.” ³³ Mashang a Peter na ama dieng ruti, “Nang jar a mi kholok kha keruthuimashak joiawm, kiei tu kenuruthuimashak naw nih.” ³⁴ Jesu na ama dieng ruti, “Diktak a nang dieng kiriei inih, von jantak hin, arkhawng na khong mala, kuchung a voithum nangrapha rangnih.” ³⁵ Peter na ama dieng ruti, “Kiei nang le athi rang kinitjoiawm, nang chung a raphatna niei naw ning!” Khatikhan akhaichawi hai kholok na ruti uh. ³⁶ Khashole Jesu na amani le Gethsemane iti mun khan rushe a, akhaichawi hai dieng ruti, “Khawn anih kesheriethiei, hin rushuh u roh.” ³⁷ Ama na Peter le Zebedee shapa idi kha rushe pui, khan mulungshaw a raha ruput joi. ³⁸ Khashole amani dieng ruti, “Kiringphuk hi thitna dawr a ajeng a shaw joi. Hin rurangah u roh, khan cheveng a nawawm puishom u roh.” ³⁹ Khan ama na rushebawt le butlam a nikna niei a ruti, “Aw kapa, nitthiei a tu, hai hi na kiei hi nalim rosho. Khanikengta kidit ang a niboia, nangidit kha ang a nih rosho.” ⁴⁰ Khan khaichawi hai dieng ava a rumiei u kha vak tawng a Peter dieng ruti, “Nidan `khatshe neche pui ngam u makche maw? ⁴¹ Chelam a nikna niei u roh. Khanitatu lemna khan lut u naw tinih; ratha na tu adithet, inia taksha hi na dawkshamna ieniei.” ⁴² Voidi changna khan rusheret, khan nik a ruti, “Aw kapa, hai hi kinek boi a inalim boi rang nitjoiatu, nang mulungmining kha nih rang rosho.” ⁴³ Khan ama na ava a amani kha mieilam a vak mukret, ajarla amani mik kha rumasha pe uh. ⁴⁴ Khan amani kha mak a voithum changna khan rusheret a, ra`angre a chawng hai kha vak riei. ⁴⁵ Khashole akhaichawi hai dieng ruti, “Tunshe hin amiei a shawmuchum maw nangnih u lai? Enro, apha kha nai joi, khan Miring Shapa kha munu miring hai khut a jor joi. ⁴⁶ Thoi u tana she u rang rawi. Enro, kiei najorpa kha na navakdep joi.” ⁴⁷ Khan ama na roirurieilai khan, shawmlieidi kar a akhat, Judas kha vak shok joi. Mirawp lientak `khat chemjam le mawbawng raklam a vat pui joi. Amani kha thiempu ulien hai le miring hai shierulien hai na ivaktir u inih. ⁴⁸ Khan ajorpa kha na amani dieng jetna pek a ruti, “Kiei na bieng kitumpa kha, ama kha inih, shur u roh.” ⁴⁹ Khan ama na Jesu kha vak jawngtir a “Rabbi, chubai!” tia iebieng ah vak tum joi. ⁵⁰ Jesu na ama dieng ruti, “Kama, ithaw va maw nangnih?” Khashole amani na rujawng uh, khan Jesu chung a khut rujawn ua ama kha rushur u joi. ⁵¹ Khan enro, Jesu le rawtawp hai kar a akhat na ukhut rushawn a echemjam kha rupawttap a, thiempu rashang shok `khat rutuk a, onokor kha rutan pe joi. ⁵² Khashole Jesu na ama dieng ruti, “Nang chemjam kha awkawk khan thong roh, ajarla chemjam rotokna miring kholok na chemjam a thi rangnih. ⁵³ Tun kiei na kapa dieng nik a kamaton a ravantir legion shawmlieidi kiei dieng nepeh ngam naw nih, tia nangimining maw nih? ⁵⁴ Khanitala hitihin a ashokngir rang a inih, iti Miejiek kha itia maw hawng rupum ngam nih?” ⁵⁵ Kha phatak khan Jesu na mipui dieng ruti, “Minieisho `khat chung a ang a, kiei ashur rang chemjam le mawbawng le ava maw nangnih uh? Ningthingkip kiei na riethiengmun ah mi kururuchuk, khan nangni le kuruawm a nurushur u makche. ⁵⁶ Khania hihai kholok hi thiempulien hai na irumiejiek hai kha hawng rupumna rang a ithaw inih.” Khashole khaichawi hai kholok na ama kha mathan a rutan u joi. ⁵⁷ Khan Jesu rushur hai kha na ama kha thiempu rashang Caiaphas dieng ruchawi u joi. Kha mun khan danoja hai le shierulien hai kha ruruchun uh. ⁵⁸ Inia Peter na ama kha thiempu rashang tolawngshe kha ralaviei a anu rujui. Khan ama na rulut, khan riethiengmun shipai hai kha le rushuh a imaw shok nih, tia ruen. ⁵⁹ Thiempu ulien hai, khan shierulien hai le Sanhedrin miring kholok na Jesu kha thatna rang, adik boi a kungchangna kha rutawk uh. ⁶⁰ Inia adik boi a kungruchang hai tampui kha va u joiawm, `khatshe rumuk pe u mak. Dawngkhit a adik boi a kungachang hai idi hawng lut uh. ⁶¹ Amani na ruti uh, “Hipa hi na ‘Pathien riethiengmun hi shiet a ni `thum shung a komothoi ngam,’ ruti.” ⁶² Khan thiempu rashang kha na thoi a Jesu dieng ruti, “Mashanglai naw rawng maw? Nang chung a mi hai na kungchangna ipek u hi imaw nih?” ⁶³ Inia Jesu kha ruawmchien. Khan thiempu rashang kha na mashang a ruti, “Pathien Shapa Christa kha nangnih a tu, Aring Pathien riming kha ban tana chawngrakham roh.” ⁶⁴ Jesu na ama dieng rumashang, “Nangti joi. Khanikengta kiei na nang dieng kieriei, tun ah put ah Miring Shapa kha na Ranaknieipa khut chang tieng shuh ning, tia ravan romiei kar a ajong kha nangmuk u rangnih.” ⁶⁵ Khashole thiempu rashang kha na opon hai kha ther a ruti, “Ama na Pathien mieshietna chawng kha iriei! Dawn a kungchangna rang, imaw nirangai u lai? Enro, tun ama Pathien mieshietna kha nangjet u joi! ⁶⁶ Imaw nangmining uh?” Amani na rumashang uh, “Ama hi athi rang rutuk joi.” ⁶⁷ Khashole amani na amai ah rumiechiei uh, khuttum le rushuk uh, khan eshen na khutmaja hai le ruben uh. ⁶⁸ Amani na ruti uh, “Kieini dieng rophong roh, Aw Christa! Tu na inaben maw nih?” ⁶⁹ Tun Peter na tolawng vai tieng rushuh. Khan nungak shok `khat na ama dieng va a ruti, “Nangawm Galilee Jesu kha le rurawtawp akhat nangnih.” ⁷⁰ Inia amani kholok maikung khan rapha a ruti, “Imaw nangiriei kiei jet mi`ing.” ⁷¹ Khan ama na tolawng lam ah rushok phakhan, nupang shik `khat na rumuk a, khan ah awm hai dieng ruti, “Hi miring hiawm Nazareth Jesu le rurawtawp inih.” ⁷² Khan ama na raphatlam a chawngrurakham, “Miring hi kiei jet mi`ing.” ⁷³ Khan awmbawt le ama dieng ah ading hai kha na ava ua Peter dieng ruti uh, “Diktak a nangawm amani kar a akhat nangnih, ajarla nang chawngriei na jawt mak.” ⁷⁴ Khashole pumrobot a chawngrakhamlam a ruti, “Hi miring hi kiei jet mi`ing!” Khan relentak a arkhawng hawng khong joi. ⁷⁵ Jesu na ama dieng iruriei chawng hai kha Peter na rumininghep joi, “Arkhawng na khong mala, kuchung a voithum nangrapha rangnih.” Khan ama na vai rushok a rie`ieklam a ruchap joi.

¹ Jingkara thiempu ulien hai le miring hai shierulien kholok na Jesu kha thatna rang, rurashak u joi. ² Khashole ama kha khop a ruchawi u joi, khan rampo Pontius Pilate dieng vak pek u joi. ³ Khashole ama kha iheng ua engshiet a iruthaw u kha ama rujor Judas na rumuk `le, mulung a shirna hawng niei, khan thiempu ulien hai le shierulien hai dieng dangka shawm `thum kha emele rushe joi. ⁴ Ama na ruti, “Kiei na jar boi thishen kinepekna u khan kiei munu kawthaw joi.” Inia amani na rumashang uh, “Makha kieini le ruirakaina imaw awm? Makha nang roiruputna keng joi!” ⁵ Riethiengmun khan dangka hai kha apai a rushe joi, khan nining a rui le vak rikhit joi. ⁶ Khan thiempu ulien hai kha na dangka hai kha rushar ua ruti uh, “Hihaihi nieibawmna ah tet rang a hi Dan nih naw nih, ajarla mahi thishen man inih.” ⁷ Khajarkhan shier hai kha le milak hai khumna rang, bekonpa loipuk `khat rawchawkna rang, rurawjawt u joi. ⁸ Khajarkhan makha loipuk kha Thishen Loimun, tia vonshe hin ti u lai. ⁹ Makha thiempulien Jeremiah dieng a irurieina kha hawng rupum inih. Hitihin ruriei, “Amani na dangka shawm `thum ruloi uh, makha Israel nai hai na ama rang a irumachat u aman kha inih. ¹⁰ Khatikhan PUMI na chawnginurupek kha ang a amani na bekonpa loipuk rang khan rupek u joi.” ¹¹ Khan Jesu na rampopa maikung a ruding joi. Khan rampopa kha na ama dieng rawdawn a ruti, “Nang Jihudi hai Reng kha maw nangnih?” Khan Jesu na ama dieng rumashang, “Nangiti kha inih.” ¹² Khan thiempu ulien hai le shierulien hai na ajar rupek u phakhan, ama na rumashang mak. ¹³ Khashole Pilate na ama dieng ruti, “Amani na nang chung a hidawr a kungachang u hi jet makche maw?” ¹⁴ Inia Jesu na chawng `khatshe rumashang mak. Makhan rampopa kha ajeng a shinrudawng pe joi. ¹⁵ Khan rampopa shena dungjuia, rohoi shung a mipui na imadan shurkhop miring `khat amani rang rumoshokngai. ¹⁶ Kha pha khan amani na Barabbas iti shurkhop miropoboi `khat runiei uh. ¹⁷ Khajarkhan amani na ruruchun u phakhan, Pilate na amani dieng rurawdawn, “Nangni rang tumaw nomoshok pe u ning? Barabbas maw, ninawkle Christa iti Jesu hi maw?” ¹⁸ Ajarla Jesu kha mukmakna jar a irupek u keng, iti kha ama na rujet. ¹⁹ Pilate na chawngshatna shutna khan rushuh phakhan, inkonu na hitihin chawng vak mawchawi a ruti, “Miring adik chung khan nang khut raw naw roh. Ajarla jangin ama jar a karamang a ajeng a kashaw.” ²⁰ Inia Barabbas kha nik a Jesu kha thatna rang, thiempu ulien hai le shierulien hai na mipui kha rumawshawk uh. ²¹ Rampopa kha na amani dieng rurawdawn, “Idi kar hin tumaw nangni rang nomoshok pe u ning?” “Barabbas!” tia amani na rumashang uh. ²² Pilate na amani dieng ruti, “Khanitala Christa iti Jesu chung hin kiei na imaw thaw ning?” Kholok na “Cross ling ah that rosho!” tia rumashang uh. ²³ Khan rampopa kha na ruti, “Ithaw maw, ashie imaw thaw joi?” Inia lieklawr a “Cross ling ah that rosho!” tia rura`ai uh. ²⁴ Pilate na ih ruman ngamlai mak, inia kha ruhut a mi hai kha mohok ruput u joi. Ama na makha rumuk phakhan, tui ruloi a mipui maikung a ukhut rurushuk a ruti, “Mahi midikpa thishen jar hin kiei kajar awm mak. Mahi nang roiruputna u keng joi.” ²⁵ Khashole mi kholok na ruti uh, “Ama thishen kha kuchung ua le kanai hai chung a cho rosho.” ²⁶ Khashole Barabbas kha amani rang rumoshok pe joi. Khan Jesu kha rumejem shole, cross ling ah that rang rupek joi. ²⁷ Khashole rampopa ramiring hai na Jesu kha Praetorium khan ruchawi ua ama kha rarup kholok na rurokochip joi. ²⁸ Khan amani na ama pon kha rulik pe ua ponshen kha rurieshieimashak u joi. ²⁹ Khashole riling renglukhum kha ruphan ua ulu ah rurukhumashak uh, khan rengshunshawraw kha ukhut chang tieng rumarak uh. Khan amani na amaikung a rukhuk rushun ua erawh a ruti uh, “Lawm roh, Jihudi hai Reng!” ³⁰ Khan ama kha rumiechiei uh, khan rengshunshawraw kha ruloi pe ua ulu ah rujem uh. ³¹ Khan engshiet a ruthaw u shole, ama ah put ah ponshen kha ruthut pe ua ama ponlediertak kha rurieshieimashak u joi. Khan cross ah that rang, ruchawi u joi. ³² Khan amani na vak shok u le roroia, Simon iti Cyrene miring `khat vak muk ua ama kha ranak a ama cross kha ruruputmashak uh. ³³ Khan Golgotha iti mun kha hawng shok u joi. Makha Luru Mun tina inih. ³⁴ Hiei le reche ju kha nek rang rupek uh, khan ama na makha tuidan ruen phakhan, runeh jawt mak. ³⁵ Khashole ama kha cross ling ah rumakhai u joi. Amani na vanmuk ruen ua ama ponledier hai kha rureshem uh. Makha thiempulien na iruriei kha hawng rupum inih: “Amani na koponledier hai kha amani kar a rushem uh, khan kopon rieshiei chung a vanmuk ruen uh.” ³⁶ Makhan amani na rushuh ua ama kha rurung uh. ³⁷ Ama lu chung khan jar ipekna u kha rumiejiek uh: MAHI JESU HI JIHUDI HAI RENG KHA INIH. ³⁸ Minieisho miring pasha `di, akhat chang tieng, khan shik `khat, viei tieng, ama le cross ah rumakhai uh. ³⁹ Iedieng ah shehawng hai na, amani lu nawklam a, ama kha rumieshiet uh. ⁴⁰ Amani na ruti uh, “Riethiengmun shiet a ni `thum shung a mothoi rang a nang, nang nining a rashan roh! Nang Pathien Shapa kha nangnih a tu, cross ah put ah jong chum roh.” ⁴¹ Kha le ra`ang a, thiempu ulien hai na, danoja hai le khan shierulien hai le, engshiet a ruti uh, ⁴² “Ama na shik miring hai kha rushan, inia nining a tu rashan ngam mak. Ama hi Israel hai Reng kha nitjoiatu, cross ah put ah jong chumrieshie kieini na takashawn u rang kanih. ⁴³ Ama na Pathien kha takarushawn. Pathien na adit joiatu, ama hi tun shan rosho, ajarla ama na ruti, ‘Kiei Pathien Shapa kha kanih.’ ” ⁴⁴ Kha le ra`ang a, ama le cross ah irumakhai minieisho hai kha na`awm erawh a rubiek uh. ⁴⁵ Khan nidan shawmlieidi ah put ah nidan `thumshe khan ram kholok rujing joi. ⁴⁶ Khan nidan `thum dawr khan Jesu na he rashangtak a ra`ai a ruti, “Eli, Eli lama sabachthani?” Makhala “Kapathien, kapathien ijar a kiei hi ninamathan maw nih joi?” itina inih. ⁴⁷ Khan ah ading eshen na makha rujet u phakhan, ruti uh, “Hi miring hi na Elijah kha ahai joi!” ⁴⁸ Khan amani kar a akhat na pangrek a spongos vak loi a ju athur khan runawm pe, khan rawmaw mawr ah rukhop pe a nek rang rupek. ⁴⁹ Eshen na ruti, “Bieh u naw roh, ama ashan rang, Elijah kha jong pe maw en u rawi.” ⁵⁰ Jesu na takthar a he rashangtak a rura`ai a aratha kha rupek joi. ⁵¹ Khan enro, riethiengmun maikharpon kha chung ah put ah thoishe kha her `di a rether, khan nieinu hawng rawnawk a lungbiei hai kha rukek. ⁵² Khan thanmun hai kha rurawlawng a ruja miriethieng tampui pum hai kha rumothoi joi. ⁵³ Amani na than ah put ah vak shok ua, ama thoiretna shole, khopui riethieng ah rushe ua mi tampui dieng rular u joi. ⁵⁴ Khan Jesu arung ruawm rarajakhat lamkai, khan ama le ruawm hai kha na nieinu rawnawk le ashok chon hai kha rumuk u phakhan, ajeng a ruchih ua ruti uh, “Diktak a ama hi Pathien Shapa kha inih!” ⁵⁵ Khan nupang tampui kha na ralaviei a enlam a ruawm uh. Amani kha Galilee ah put ah Jesu rujui a chon ruthaw pe hai kha runih uh. ⁵⁶ Amani kar khan Mary Magdalene, James le Joses unu Mary, khan Zebedee shapa hai unu rujaw uh. ⁵⁷ Ni hawng tah phakhan, Joseph iti Arimathea ah put ah rawchawng miring `khat na kha mun khan rushe. Ama kha`awm Jesu khaichawi `khat runih. ⁵⁸ Ama na Pilate dieng rushe a Jesu rok kha vak nik. Khashole rok kha ama dieng pekna rang, Pilate na chawng rupek joi. ⁵⁹ Khan Joseph na rok kha ruloi phakhan, thanpon achaining `khat le rujo joi. ⁶⁰ Lung ah iver ama thanmun athar khan rumaja joi. Khan mawkawt khan lung alientak `khat le rukhar a rushe joi. ⁶¹ Khan Mary Magdalene le Mary shik `khat kha than mai kha le re`en mun khan rushuh uh. ⁶² Khan Rashamna Nikho shole, jing tieng hin, thiempu ulien hai le Pharisee hai na lawp `khat a Pilate dieng rushe uh. ⁶³ Amani na ruti uh, “Mimohonpa kha na iringlai khan, ‘Ni `thum shole hawng thoi rang kanih,’ tia iruriei kha kimininghep uh. ⁶⁴ Khajarkhan than kha ni `thumshe hin rephetna boi rang chawng peh roh. Khanawkatu akhaichawi hai na jan a va u ning, tia ama kha vak muruk u rangnih, khan amani na ‘Ama kha athi ah put ah thoi joi,’ tia miring hai dieng riei u rangnih. Khajarkhan dawngkhit a mimohonna kha arapanek a shiedet rangnih.” ⁶⁵ Pilate na amani dieng ruti, “Ramiring nangniei uh, she u tana nangijet u dungjuia vak menet u roh.” ⁶⁶ Khajarkhan amani na rushe ua lung kha jetnam vak nam uh, khan arung miding ua rumenet u joi.

¹ Sabbath nikho theng shole, hapta shung a akhat changna nikho hawng shok le roroia, Mary Magdalene le Mary shik `khat na thanmun kha aen rushe uh. ² Khan enro, nieinu lientak `khat rurawnawk, ajarla Pumi ravantir na ravan ah put ah jong chum, khan rushe a mawkawt ah put ah lung kha vak moloi, khan makha chung khan rushuh. ³ Ama alar kha khomelek ruang, khan ama ponledier kha vur ang a ruchek pe. ⁴ Khan mirung hai kha na ama kha ruchih ua rurawnawk uh, khan athi miring ruang uh. ⁵ Khan ravantir kha na nupang hai dieng mashang a ruti, “Chih u naw roh, ajarla cross ah iruthat u Jesu kha nangitawk u keng, iti kha kejet. ⁶ Ama kha hin awmlai mak. Ajarla, iruriei dungjuia, ama kha thoi joi. Va u roh, Pumi jana hi vak en u roh. ⁷ Khan relentak a she u tana, ama kha athi ah put ah thoi joi, tia akhaichawi hai dieng vak riei u roh. Khan enro, ama na Galilee ah nang matieng rushe joi; kha mun khan ama kha nangmuk u rangnih. Enro, kiei na nangni dieng kienieriei u joi.” ⁸ Khajarkhan amani na thanmun ah put ah, chih u joiawm, ningaitak a rurelen u joi. Khan akhaichawi hai dieng chawng kha vak rieina rang, rutan u joi. ⁹ Akhaichawi hai dieng ariei rushe u le roroia, enro, Jesu na amani kha rurumuk pui ua ruti, “Ningai u roh.” Khan amani na rushe uh, khan eke rumukui pe ua chubairubawk uh. ¹⁰ Khashole Jesu na amani dieng ruti, “Chih u naw roh, she u tana ku`uliennai hai kha Galilee ah shena rang le, kha mun khan rumuk puina rang, vak riei u rang roh. Makhan amani na kiei hi numuk u rangnih.” ¹¹ Khan amani na rushe u lai khan, enro, mirung hai eshen na khopui ah rushe ua thiempu ulien hai dieng ashok chon kholok kha vak mejet u joi. ¹² Khan amani na shierulien hai le vak ruchun ua chon rurashak uh. Amani na ramiring hai dieng shier tampui rupek ua ¹³ ruti uh, “ ‘Akhaichawi hai na jan a va ua, kaja riethiei u, vak muruk u joi,’ tia amani dieng riei u roh. ¹⁴ Mahi rampopa nokor shok joiawm, ama kha kieini na dawi a nerekhemashak u rang kanih.” ¹⁵ Khajarkhan amani na shier kha ruloi ua amani na iti u kha ruthaw uh. Khan mahi rishim hi vonshe hin Jihudi hai kar a rajar`er a rushem uh. ¹⁶ Khashole khaichawi shawmlieikhat kha na, Jesu na amani dieng a irukhin lawn khan shena rang, Galilee tieng rushe u joi. ¹⁷ Khan amani na ama kha rumuk u phakhan, chubairubawk uh. Inia eshen na tu rurakhana uh. ¹⁸ Khan Jesu na ava a amani dieng ruriei, “Ravan le rieliei shung ah cham kholok kha kiei dieng nepek joi. ¹⁹ Khajarkhan nangni she u tana phung rikip kha khaichawi vak minit u roh. Amani kha Apa, Shapa, khan Ratha Riethieng riming a baptisma vak moloi u roh. ²⁰ Nangni dieng chawng kinepek u kholok kha juina rang, vak ruchuh u roh. Khan enro, kiei na nangni le ka`awmchak. Khan manmieshie mawtawrshe khan kiei na nangni kha nawawm pui u rang kanih.” Amen.