LUKE

¹ Kieini kar a hawng rupum chawngshok hai chungchanga rishim miejiekna rang, mi tampui na rurashak uh. ² Putna a mik a muk a kungruchang hai le athachawng shepding ruchang hai kha na kieini dieng khut inururotho pui u tak kha le ra`ang, ³ richit`awm Aw Theophilus, kiei na kung ah put ah riringtak a kihawngjui rikip kha nang dieng dawdawn a kimiejiek rang a hi, kiei na`awm atha, tia koloi. ⁴ Makha mi na nang dieng a inururuchuk chawng hai chungchanga adik kha rupumping a nangjetna rang a inih. ⁵ Judea reng, Herod rong khan, Zacharias iti thiempu `khat ruawm. Ama kha Abijah rui a rushok inih. Unungak kha Elizabeth iti Aaron tunu hai kar a akhat runih. ⁶ Adinre kha Pathien maikung a midik runih uh. Amani na Pumi chawngpek hai le ridikna hai kholok kha jui jarkhan, metekna awm boipet a ruring uh. ⁷ Khania Elizabeth kha nairong runih jarkhan, amani na nai runiei u mak. Adinre kha kumletha na rulim u joi. ⁸ Nikhat hin Zacharias na Pathien maikung a ama thiempu thoi thawna rang, ama lawmdawn ⁹ Thiempumun shena dungjuia, ama na Pumi riethiengmun rulut a berawh ha rang vanmuk en a ama chung a rucho pe. ¹⁰ Berawh kha ruhalai khan, mipui ruchun kha na vai tieng nikna niei a ruawm uh. ¹¹ Berawh hana maicham chang tieng khan Pumi ravantir `khat na ama dieng rular. ¹² Khan Zacharias na ama kha rumuk phakhan, rurawnawk, khan chitna kha na ama kha rumukhu. ¹³ Khan ravantir na ama dieng ruti, “Chih naw roh Zacharias, ajarla nanginik kha Pathien na rangai joi. Nang inkonu Elizabeth na nang rang shapa `khat niei rangnih. Ama riming kha John nangti pe rangnih. ¹⁴ Ama kha nang rang rawshawna le mapakna chang rangnih. Khan ama shok phakhan, mi tampui ningai rangnih. ¹⁵ Ajarla Pumi maikung a ama kha lur rangnih. Khan itikte nita`awm ama na ju ninawkle khawpnathiei ju neh naw nih. Unu vawn shungshe khan Ratha Riethieng le ship rangnih. ¹⁶ Ama na Israel miring tampui hi amani Pumi Pathien dieng hawng mikir rangnih. ¹⁷ Elijah ratha le ranak khan Pumi maikung a lawn rangnih. Makha ‘apa hai mulung kha nai hai dieng hieina rang,’ chawngjui boi kha midik lungvar dieng hieina rang, khan Pumi rang a rasham miring konna rang a inih.” ¹⁸ Khan Zacharias na ravantir dieng ruti, “Mahi kiei na itia maw jet ning? Ajarla kiei hi atar `khat kanih joi, khan ki`inkonu`awm kumletha na alim joi.” ¹⁹ Ravantir na mashang a ruti, “Kiei hi Pathien maikung a ading Gabriel kha kanih. Kiei hi nang dieng chawngriei rang le mahi ningaina chawng rophong rang a inojongtir inih. ²⁰ Khania enro, pha dungjuia hawng rupum rang a kawchawng hai khan takanangshawn boi jarkhan, nang heshok boi a awm rang nangnih, khan hihai kholok hi shok masheng, nang chawng ngamlai naw tinih.” ²¹ Khan mi hai na Zacharias kha rungak a ruawm uh. Riethiengmun ah put ah vak shumhai jarkhan, shindawngna runiei uh. ²² Ama na vak shok phakhan, amani dieng herusho thieilai mak. Riethiengmun ah mulungmik imuk keng joi, iti kha amani na rujet uh. Ajarla ama na jetna hai kha ruthaw, khan hesho thiei boi a ruawm joi. ²³ Khan hitihin rushok, ama richichon thawna nikho hai kha ruhek phakhan, i`in ah rushe joi. ²⁴ Khan khahai nikho shole, i`inkonu Elizabeth na nairuvawng joi, khan tha rahnga dawr hi bitlam a ruawm. ²⁵ Ama na ruti, “Pumi na kiei hi ne`en phakhan, hihaihi ithaw inih. Makha mi hai kar a maimawkna kha kiei ah put ah noloina pe rang a inih.” ²⁶ Tha `ruk changna khan Nazareth iti Galilee ah awm kho `khat ah, Pathien na ravantir Gabriel kha ²⁷ David inshung a awm Joseph iti rothar `khat na ishot shimnu `khat dieng rutir. Khan shimnu riming kha Mariam ruti. ²⁸ Ama dieng she a ruti, “Pathien na imiritnu, chubai. Pumi na nang kha nawrawtawp pui joi. Nang hi nupang hai kar a rahvantha nangnih!” ²⁹ Khania ama chawng hai khan rurawnawk a mahi ih chat chubai maw nih, tia rumining. ³⁰ Ravantir na ama dieng ruti, “Chih naw roh Mariam, ajarla nang na Pathien miritna kha nangmuk joi. ³¹ Enro, nang na nai nangvawng a shapa `khat nangniei rangnih. Ama riming kha Jesu nangti pe rangnih. ³² Ama kha lur rangnih, khan ama kha Rashang chungchon Shapa ti rangnih. Pumi Pathien na ama dieng apa David rengshutna kha pek rangnih. ³³ Khan hektiknieiboi a Jacob inshung a ama na reng chang rangnih. Ama rengchangna kha kumshawt a awm rangnih.” ³⁴ Mariam na ravantir dieng ruti, “Kiei apa le rishih boipet a mahi itia maw nithiei nih?” ³⁵ Ravantir na mashang a ama dieng ruti, “Ratha Riethieng na nang dieng jong rangnih, khan Rashang chungchon ranak kha na nang kha nirilip rangnih. Khajarkhan Nai Riethieng nanginiei rang a kha Pathien Shapa ti rangnih. ³⁶ Enro, nang shokpuinu Elizabeth ama na`awm atar tieng shapa `khat vawng joi. Nairong itinu u kha tun tha `ruk nih joi. ³⁷ Ajarla Pathien le anithiei boi iti awm mak.” ³⁸ Khashole Mariam na ruti, “Enro, kiei hi Pumi shoknu kha kanih! Nangiriei dungjuia, kiei dieng ashok nih rosho.” Khan ravantir kha ama ah put ah rushe joi. ³⁹ Khalaikhan Mariam na ruthoi a mo ram, Judea khopui khan nawtshun a ruhawng joi. ⁴⁰ Kha mun khan ama na Zacharias in ah rulut a Elizabeth kha chubai rupek. ⁴¹ Khan hitihin rushok, Elizabeth na Mariam chubai kha rujet phakhan, anaikawk ah nai kha ruchawm pe. Khan Elizabeth kha Ratha Riethieng na jong ship joi. ⁴² Elizabeth na he rashangtak a rura`ai a ruti, “Nupang hai kar a nang rahvantha nangnih, nang naikawk ara kha rahvantha inih! ⁴³ Khan kupumi unu nang na kiei dieng nangva hi itia shok maw nih? ⁴⁴ Ajarla nang chubai pek hesho kha kejetphit `le, kanaikawk ah nai hi na rawshaw a ruchawm. ⁴⁵ Khan Pumi na ama dieng a iruriei kha rupum rangnih, tia takashawn ama kha rahvanmuh miring kha inih.” ⁴⁶ Khan Mariam na ruti, “Kiringphuk na Pumi kha mielien, ⁴⁷ khan karatha na kashandampa Pathien jar a ningai. ⁴⁸ Hijarhin ama shoknu adawk awmchan kha jet joi. Ajarla enro, tun ah put ah rong kholok na kiei hi rahvanmuh, tia nokoi rangnih joi. ⁴⁹ Hijarhin Ranaknieipa kha na kiei dieng chon lientak thaw joi. Ama riming kha riethieng inih. ⁵⁰ Ama achih miring hai dieng rongrong a ama roihoina kha awm. ⁵¹ Ama banbo kha le aranak kha rumumuk; amani mulungmining a lienrasha hai kha rangrang a rutet. ⁵² Ranakniei hai kha rengmun ah put ah rumocho, khan rede hai kha ama na alawm. ⁵³ Vawncham hai kha nekleshak atha hai kha le rumiship, khan rawchawng miring hai kha rok a rumikir. ⁵⁴ Ama roihoina miningna khan ama shok Israel kha rushan joi. ⁵⁵ Makha napa u hai dieng, Abraham dieng le ama chicha hai dieng kumshawt a chawng iruriei dungjuia ashok inih.” ⁵⁶ Khan Mariam na Elizabeth le tha `thum dawr ruawm a i`in ah rukir joi. ⁵⁷ Khan Elizabeth na nai inieina rang a pha kha hawng rupum pe a ama na shapa `khat runiei joi. ⁵⁸ Pumi na ama chung a roihoina lientak irutetna kha ringchangpui le inkoshangram hai kha na rujet ua, ama le ningrungaishom uh. ⁵⁹ Khan hitihin rushok, ni `riet changna khan amani na naitepa vunepna rang le apa riming moloh a Zacharias, tia riming phona rang rushe uh. ⁶⁰ Inia unu na rumashang, “Nimak, ama riming John, tia pho pe rang a inih.” ⁶¹ Amani na ama dieng ruti uh, “Nang shokpui hai kar a tute na mahi riming hi pho maklai.” ⁶² Amani na apa dieng itia maw koi jawt, iti jetna rang, ama dieng jetna rupek uh. ⁶³ Ama na miejiekna rang lungpek `khat runik, khan rumiejiek a ruti, “Ama riming hi John inih.” Makhan amani lawpsheng a shindawngna runiei uh. ⁶⁴ Khan relentak a Pathien na abai kha rumawlawng pe a iemieliei kha ruthut pe joi. Khan ama na achawng ruput a Pathien kha rumapak joi. ⁶⁵ Ringchangpui kholok dieng chitna kha jong shok, khan Judea lawn ah awm mi kholok na chonshok jar a ruriei uh. ⁶⁶ Ajet hai mi rikip na amani mulungmining a ruti uh, “Mahi naitepa hi imaw hawng rachang nih?” Khatikhan Pumi khut kha ama le rurawtawp. ⁶⁷ Khan apa Zacharias kha Ratha Riethieng na jongship, khan chawng rurophong a ruti, ⁶⁸ “Israel Pumi Pathien kha rahvantha inih, hijarhin ama na nojong phak a ama miring hai rang, khekna chon kha jong thaw joi. ⁶⁹ Khan ama shok David inshung a shandamna riki kha kieini rang mothoi joi. ⁷⁰ Makha, rong put ah put ah, ama thiempulien riethieng hai bai a chawng irurieitak kha dungjuia ashok inih. ⁷¹ Ama na naraha pui hai ah put ah le namumah hai khut ah put ah nashan rangnih. ⁷² Khatikhan ama na napa hai dieng a chawngirurakham roihoina kha numumuk joi. Ama rawjawtna riethieng kha mininghep joi. ⁷³ Napa u Abraham dieng chawngirurakham kha: ⁷⁴ Narahapui hai khut ah put ah nurukhek jarkhan, kieini na chih boipet a ama chon nawthawna pe rang a inih. ⁷⁵ Makha amaikung a riethieng a le dikna khan niringlailim chon thawna rang a inih. ⁷⁶ Khan naitepa nang hi Rashang chungchon thiempulien, tia koi rangnih. Ajarla Pumi maton ah, ama Lam hai kha arasham rang, she rang nangnih. ⁷⁷ Munu hai rangaidamna jar a shandamna varna kha imiring hai pekna rang a inih. ⁷⁸ Pathien roihoina renem jar a rashang ah put ah nuchung ua Ni shok joi. ⁷⁹ Makha ajing le thitna rilip a awm amani dieng mieivar pekna rang a inih. Lungdamna lam a neke u hai kha lamnakaina pe rang a inih.” ⁸⁰ Naitepa kha hawng rawshawn a ratha a hawng rat joi. Khan Israel miring hai dieng ama vanoichon kha ruput masheng, ama na ramthim ah ruawm.

¹ Khalaikhan hitihin ruawm, makhala rieliei mi rikip na riming mulut rang a inih, tia Caesar Augustus na chawng rumocho joi. ² Mahi riming mulutna hi Quirinius na Syria rupoklai a akhat changna a ashok inih. ³ Mi rikip na amama khopui ah riming mulut rang rushe joi. ⁴ Joseph`awm Galilee ah awm Nazareth ah put ah Judea ah awm Bethlehem iti David khopui khan rushe joi. Ajarla ama kha David inshungrui ah put ah rushok inih. ⁵ Ama na inkonu rang a ishot tawngta boi Mariam le riming mulut rang a rushe inih. ⁶ Amani na makhan ruawm u lai khan, ama na nai nieina rang a nikho hai kha hawng shun pe joi. ⁷ Khan Mary na sharapa shapa `khat runiei a naipon le rutum joi. In khan amani rang mun ruawm boi jarkhan, shiei shakshakna rokong `khat ah ama kha rumaja. ⁸ Makha ramtak khan kengamroi hai na phaijaw ah kengam roi a ruawm uh. Jan a amani kengam hai kha rurung uh. ⁹ Khan enro, Pumi ravantir `khat na amani maton ah jong ding a Pumi lurna kha na amani kha hieichip a jong eh. Makhan amani ajeng a ruchih uh. ¹⁰ Khania ravantir na amani dieng ruti, “Chih u naw roh, ajarla enro, ningaina lientak apeh ningaina chawng kha nangni rang kojongchoi. Mahi mi kholok rang a inih. ¹¹ Ajarla von nikho hin David khopui ah nangni rang Shandampa `khat shok joi. Ama kha Pumi Christa kha inih. ¹² Nangni na naitepa kha shiei shakshakna rokong ah naipon le rojo a aja kha nangmuk u rangnih. Mahi nangni rang a jetna `khat inih.” ¹³ Khan jetboithieboi a ravanmi hawi `khat na ravantir kha le ruawm ua Pathien kha mapaklam a ruti uh, ¹⁴ “Rashangtak a awm Pathien dieng lurna kha awm rosho, khan rieliei a awm Pathien na imirit miring hai kar a lungdamna kha awm rosho!” ¹⁵ Khan hitihin ruawm, ravantir kha na amani kha rumak a ravan a ruhawng phakhan, kengamroi hai na khatlekhat dieng ruti uh, “Kieini na Bethlehemshe she u taia, Pumi na kieini dieng a inemejetsha ashok chon hai kha vak en u rang rawi.” ¹⁶ Amani na nawtshun a va ua Mariam le Joseph kha vak muk uh. Khan naitepa kha shiei shakshakna rokong ah aja a ruawm kha vak muk uh ¹⁷ Khan amani na rumuk u phakhan, naitepa chungchanga amani dieng iruriei kha mipui dieng vak mejet u joi. ¹⁸ Khan mi kholok na kengamroi hai na amani dieng iriei chungchang khan, shindawngna runiei uh. ¹⁹ Khania Mariam na hihai chawng hai hi arerep a umulung shung a mining a ruawm. ²⁰ Khan kengamroi hai na irujet u le irumuk u jarkhan, Pathien kha mulur le mapaklam a rukir u joi. Makha ravantir na amani dieng a irurieitak kha ashok inih. ²¹ Ashin naitepa kha vunepna rang a ni `riet kha hawng rupum phakhan, ama kha Jesu tia riming rupho pe u joi. Makha riming kha Mary na naikawk ah vawng mala a ravantir na irupek riming inih. ²² Moses Dan dungjuia riethiengmashakna nikho kha hawng rupum phakhan, Pumi dieng pekna rang, Jerusalem ah vak chawi uh. ²³ Hitihin Pumi Dan khan rumiejiek, “Naikawk mawlawng apa rikip kha PUMI rang a madansha inih, tia koi rang a inih. ²⁴ Khan Pumi Dan ah iriei dungjuia pharphali rawbaw `khat ninawkle pharphali tete idi le thawi rang a inih.” ²⁵ Khan enro, Jerusalem ah Simeon iti miring `khat ruawm. Ama kha midik le richichawi miring `khat runih. Israel kha Maw`awina rang a pha kha ama na ingak a ruawm inih. Khan Ratha Riethieng kha ama chung a ruawm. ²⁶ Ama na Pumi Christa kha muk masheng thi naw nih, iti kha Ratha Riethieng na ama dieng irumumuk inih. ²⁷ Ratha Riethieng na lamrukai pe a ama na riethiengmun khan rushe. Khan Naitepa Jesu kha unulepa na, ama rang Dan dungjuia thoithawna rang, vak chawi uh. ²⁸ Simeon na Naitepa kha rupawm a Pathien mapaklam a ruti: ²⁹ “Aw Pumi, tun nang chawngriei dungjuia, nang shokpa kiei hi lungdam a noloi rang roh. ³⁰ Ajarla nang na mi kholok maikung a nangirurasham, ³¹ Nang shandamna kha, kimik hai hi na muk joi. ³² Ama hi Phungshik hai dieng chawngrophong rang a mieivar `khat inih, khan nang miring Israel dieng lurna rang a inih.” ³³ Khan Joseph le unu na ama chungchanga irieina khan shindawngna runiei uh. ³⁴ Khashole Simeon na amani kha rahvan rupek a unu Mariam dieng ruti, “Enro, Israel shung a mi tampui chona rang le thoina rang, nai hi imadan nih joi; khan amani na ire`erna pui u jetna kha chang rangnih. ³⁵ (Inia nang mulungtak kha nokhoi pe rangnih). Khatikhan makha na mi tampui mulungmining kha rophong pe rangnih.” ³⁶ Khan Asher phung Phanuel shanu Anna iti thiempilien `khat ruawm. Ama kha atarber, inruniei ah put ah inkopa le kum shiribak ruawm inih. ³⁷ Khashole kum shawmrietlieimili dawr hi mieirawng ruchang. Ama na shunlejan a chamradoi a le anih a chubai irubawk a riethiengmun kha mathan boi a ruawm inih. ³⁸ Kha phatak khan ama`awm ava a Pumi kha vak mapak. Ama na Jerusalem rekhekna rang a rungak mi kholok dieng ama chungchanga chawngruriei. ³⁹ Pumi Dan dungjuia kholok kha rupummashaksho u le, amani na Galilee ah awm amani khopui Nazareth khan rukir u joi. ⁴⁰ Naitepa kha hawng rawshawn, khan Ratha a hawng rat joi. Varna kha na ruship a Pathien numpokmirit kha ama chung a ruawm joi. ⁴¹ Khan unulepa kha na kumkip Rakanna rohoi rang, Jerusalem ah rushe uh. ⁴² Khan ama na kum shawmlieidi hawng nih phakhan, amani na rohoi shena dungjuia, Jerusalem ah rushe uh. ⁴³ Khan nikho hai kha rumeheksho ua amani rukir u le roroia, Pashanai Jesu kha Jerusalem ah rurangah joi. Makha Joseph le unu na rujet u mak. ⁴⁴ Hawi khan ajaw rawrawi keng, tia rumining ua amani na nikho `khat rulawn u joi. Khashole amani shokpui hai le lawm hai kar a atawk ruput u joi. ⁴⁵ Amani na muk boi phakhan, ama atawk rang Jerusalem tieng vak kir uh. ⁴⁶ Ni `thum shole, riethiengmun ah ama na oja hai kar a rushuh, amani chawng kha irurangai, khan chawngrurawdawn a ruawm kha vak muk uh. ⁴⁷ Ama ijetna le awchawng mashang hai rangai mi rikip kha na shindawngna runiei uh. ⁴⁸ Unulepa kha na ama kha rumuk phakhan, shindawngna runiei ua unu na ama dieng ruti, “Naitepa, ijar a hitihin a kieini dieng nangithaw maw nih? Enro, nangpa le kiei na mulungshawlam a kinatawk u keng.” ⁴⁹ Ama na amani dieng rumashang, “Ijar a kiei hi ninatawk u maw nih? Kiei hi kapa in ah awmngir rang kanih, iti hi jet u makche maw?” ⁵⁰ Khania amani dieng a iruriei kha rujet u mak. ⁵¹ Khashole amani le rushe a Nazareth tieng va joi, khan amani chawng kha rurangai. Unu na hihai kholok hi umulung shung a arerep a rutet. ⁵² Khan Jesu kha varna le taksha a rurawshawn, khan Pathien le miring hai numpokmirit kha rumuk.

¹ Tiberius Caesar kum shawmlieirahnga changna rengchangna khan, Pontius Pilate na Judea rampo ruchang, Herod na Galilee tetrarch ruchang, anaipangpa Philip na Iturea le Trachonitis tetrarch ruchang, khan Lysanias na Abilene tetrarch ruchang. ² Annas le Caiaphas na thiempu rashang runih u lai khan, Pathien chawng kha Zacharias shapa John dieng ramthim ah ajong inih. ³ Ama na Jordan shie `di ah awm ram kholok khan rushe a mulung lek mumukna rang le Pathien dieng hiei a munu hai rangaidamna kha mukna rang, baptisma iloi u rang a inih, tia chawng rushem. ⁴ Hitihin thiempulien Isaiah chawngriei hai behangbuk ah rumiejiek, ama na ruti, “Ramthim ah hesho `khat na ra`ai, ‘PUMI lam kha kon pe roh, ama lam hai kha moton pe roh. ⁵ Phaijaw rikip kha miship rangnih, khan lawn rikip kha redemashak rangnih. Khan lamkawi hai kha moton, khan aphor lam hai kha ranamashak rangnih. ⁶ Khan miring kholok na Pathien shandamna kha muk rangnih.’ ” ⁷ Ama dieng baptisma loi ava mipui hai dieng ruriei, “Nangni moro chicha hai! Jong shok rang a lunghangna ah put ah atan rang, tu na maw nangni kha nierieimasha u joi? ⁸ Khajarkhan mulung lekna rutuk ara hai kha moshok u roh. ‘Abraham kha kapa u `khat a kieniei uh,’ ti nenek u naw roh. Ajarla hihai lung ah put ah Abraham rang Pathien na nai hai kha mothoi ngam, iti hi nangni dieng kinieriei u inih. ⁹ Tunawm thing hai rujung khan riei kha rutung a awm joi. Khajarkhan ara atha moshok boi thingkung rikip kha tuk a miei a apai.” ¹⁰ Khan mipui na ama dieng ti uh, “Khanitala kieini na imaw thaw u ning?” ¹¹ John na mashang a amani dieng ruti, “Kotai idi aniei ama kha na aniei boi ama dieng peh rosho, khan nekleshak aniei ama kha na khatikhan thaw rosho.” ¹² Khan khaichana rawkhawm haiawm ama dieng baptisma aloi rang ava ua, ama dieng ruti uh, “Oja, kieini na imaw thaw u ning?” ¹³ Amani dieng rumashang, “Nangni dieng inepek dan kha khea rawkhawm u naw roh.” ¹⁴ Khan ramiring hai na`awm ama dieng rurawdawn uh, “Kieini na imaw thaw u ning?” Amani dieng ruti, “Tute na ranak a shier rawkhawm u naw roh, ninawkle anih boi a mi bieh u naw roh, khan nang lawh u kha le hun u roh.” ¹⁵ Mi na ngakrala le roroia, John hi Christa kha nithiei, tia mulung shung a rurawdawn uh. ¹⁶ John na mi kholok dieng ruriei, “Kiei na nangni kha tui a baptisma kenepek uh, inia ajong rang a ama hi kieinek a ranak nieidet. Kiei hi ama kekawkrui thut rang khan rutuk mi`ing. Ama na nangni kha Ratha Riethieng le miei a baptisma nepek u rangnih. ¹⁷ Ama pher kha khoreng a riethiengmashakna rang le gehu kha achu ah mulutna rang, rieliei kha ama khut chung a awm joi. Khania irishi hai kha chiemtiknieiboi miei a ha rangnih.” ¹⁸ Khajarkhan mawshawkna tampui le athachawng kha mi hai dieng rurophong. ¹⁹ Inia anaipangpa Philip inkonu Herodia jar a le ochonthaw ashie kholok jar a, tetrarch Herod kha John na rurawkawk. ²⁰ Hihai kholok chung a, ama na John kha lungroko shung ah irukhum inih. ²¹ Khan hitihin rushok, mi kholok kha baptisma rumoloi phakhan, Jesu kha`awm baptisma rumoloi joi. Khan ama na runik phakhan, ravan kha rurawlawng joi. ²² Khan Ratha Riethieng na vashu ang a taksha me a ama chung ah jong chum, khan ravan ah put ah he `khat jong a iti, “Numkipoktak kashapa kha nangnih, nang chung a ningnitna kha kieniei joi.” ²³ Khan Jesu na chon ruput phakhan, kum shawm `thum dawr runih joi. Mi na imining dungjuia, ama kha Joseph shapa inih. Joseph kha Heli shapa inih. Heli kha Matthat shapa inih. ²⁴ Matthat kha Levi shapa inih. Levi kha Melki shapa inih. Melki kha Jannai shapa inih. Jannai kha Joseph shapa inih. ²⁵ Joseph kha Mattathiah shapa inih. Mattathiah kha Amos shapa inih. Amos kha Nahum shapa inih. Nahum kha Esli shapa inih. Esli kha Naggai shapa inih. ²⁶ Naggai kha Maath shapa inih. Maath kha Mattathiah shapa inih. Mattathiah kha Semei shapa inih. Semei kha Joseph shapa inih. Joseph kha Judah shapa inih. ²⁷ Judah kha Joanna shapa inih. Joanna kha Rhesa shapa inih. Rhesa kha Zerubbabel shapa inih. Zerubbabel kha Shalathiel shapa inih. Shalathiel kha Neri shapa inih. ²⁸ Neri kha Melki shapa inih. Melki kha Addi shapa inih. Addi kha Cosam shapa inih. Cosam kha Elmodam shapa inih. Elmodam kha Er shapa inih. ²⁹ Er kha Joses shapa inih, Joses kha Eliezer shapa inih. Eliezer kha Jorim shapa inih. Jorim kha Matthat shapa inih. Matthat kha Levi shapa inih. ³⁰ Levi kha Simeon shapa inih. Simeon kha Judah shapa inih. Judah kha Joseph shapa inih. Joseph kha Jonan shapa inih. Jonan kha Eliakim shapa inih. ³¹ Eliakim kha Melea shapa inih. Melea kha Menan shapa inih. Menan kha Mattatha shapa inih. Mattatha kha Nathan shapa inih. Nathan kha David shapa inih. ³² David kha Jesse shapa inih. Jesse kha Obed shapa inih. Obed kha Boaz shapa inih. Boaz kha Salmon shapa inih. Salmon kha Nahshon shapa inih. ³³ Nahshon kha Aminadab shapa inih. Aminadab kha Aram shapa inih. Aram kha Hezron shapa inih. Hezron kha Perez shapa inih. Perez kha Judah shapa inih. ³⁴ Judah kha Jacob shapa inih. Jacob kha Isaac shapa inih. Isaac kha Abraham shapa inih. Abraham kha Terah shapa inih. Terah kha Nahor shapa inih. ³⁵ Nahor kha Serug shapa inih. Serug kha Reu shapa inih. Reu kha Peleg shapa inih. Peleg kha Eber shapa inih. Eber kha Shelah shapa inih. ³⁶ Shelah kha Cainan shapa inih. Cainan kha Arphaxad shapa inih. Arphaxad kha Shem shapa inih. Shem kha Noah shapa inih. Noah kha Lamech shapa inih. ³⁷ Lamech kha Methusala shapa inih. Methusala kha Enoch shapa inih. Enoch kha Jared shapa inih. Jared kha Mahalalel shapa inih. Mahalalel kha Cainan shapa inih. ³⁸ Cainan kha Enos shapa inih. Enos kha Seth shapa inih. Seth kha Adam shapa inih. Khan Adam kha Pathien shapa inih.

¹ Khan Jesu na, Ratha Riethieng shiplam a, Jordan ah put ah vak kir a Ratha na ramthim ah ruchawi joi. ² Kha mun khan diabol na ni shawm mili rulem. Khahai nikho khan ih shak boi a ruawm, khan nikho hawng shun phakhan, vawnrucham pe joi. ³ Diabol na ama dieng ruti, “Pathien Shapa kha nangnih a tu, hi lung dieng hin tan rachangna rang, chawng peh roh.” ⁴ Makhan Jesu na mashang a ama dieng ruti, “Hitihin miejiek, ‘Miring na nekleshak ranga kha le ring naw nih, inia Pathien chawng rikip kha le aring rang a inih.’ ” ⁵ Khashole diabol na lawn rashang a ruchawi a richinkhatte hin manmieshie rengchangna hai kha rumumuk. ⁶ Khan diabol na ama dieng ruti, “Hihai kholok cham le amani lurna hai hi nang dieng nepek rang kanih, ajarla mahi kiei dieng nepek joi, khan kidit miring tukhat dieng nita`awm kiei na kipek inih. ⁷ Khajarkhan kiei hi chubainangnabawk a tu, kholok hi nang tah chang rangnih.” ⁸ Jesu na mashang a ama dieng ruti, “Kiei ah put ah rechen roh, Satan! Ajarla hitihin miejiek, ‘Nang PUMI nang Pathien kha chubainangibawk rang a inih, khan ama ranga kha chon nangithaw pe rang a inih.’ ” ⁹ Khan ama kha Jerusalem ah ruchawi a riethiengmun moidawn khan rumiding, khan ama dieng ruti, “Pathien Shapa kha nangnih a tu, nang nining a chawm roh. ¹⁰ Ajarla hitihin miejiek, ‘Nang nurudon rang, ama ravantir hai dieng chawng pek rangnih,’ ¹¹ khan ‘Nang ke kha lung le rawtawna boi rang, amani khut le nurudawm u rangnih.’ ” ¹² Makhan Jesu na mashang a ama dieng ruti, “Hitihin ruriei, “Nang PUMI nang Pathien kha nangilem boi rang a inih.” ¹³ Khan diabol na lemna rikip kha le rulem shole, chanthatna pha `khatshe rang khan ama ah put ah rushe joi. ¹⁴ Khashole Jesu na Ratha ranak a Galilee tieng vak kir joi. Khan ama chungchanga khakawt ah awm ram kholok dieng chawngrucherak joi. ¹⁵ Amani synagogue hai khan mi ruruchuk a mi kholok na ama kha rumapak uh. ¹⁶ Ama hawng lienna Nazareth ah vat phakhan, eshena dungjuia, Sabbath nikho hai khan synagogue ah rulut a ate rang ruding. ¹⁷ Khan thiempulien Isaiah behangbuk kha ama khut chung ah rupek uh. Ama na behangbuk kha rumawlawng a hitihin a irumiejiek mun kha rumuk: ¹⁸ “PUMI Ratha kha kuchung a awm, ajarla shara hai dieng athachawng rophong rang, ama na kiei hi thaonanawt joi. Mulungkoi miring hai kha madam rang, shurkhop hai dieng ningchamna, khan mikchaw hai dieng mikmuknaret rophong rang, epshie a iruthaw miring hai kha ningchamna apeh rang, ¹⁹ khan PUMI enlar kum kha rophong rang, inojongtir nih joi.” ²⁰ Khan behangbuk kha rujo a shepding dieng khan rupek a rushuh joi. Khan synagogue ah awm mi kholok na ama kha ruen uh. ²¹ Khashole amani dieng ariei ruput, “Von nikho hin mahi Miejiek hi nangirangai u shung hin rupum nih joi.” ²² Khan mi kholok na kungruchang uh, khan ama bai ah vak shok numpokmirit chawng hai khan shindawngna runiei uh. Amani na ruti uh, “Hi miring hi Joseph shapa kha nimak maw?” ²³ Khan amani dieng ruriei, “Mahi chawngrichi hi ban a kiei dieng nangti u rangnih, ‘Mimadampa, nang nining a madan nana roh! Capernaum ah ashok chon kijet u hai kha nang kho hinawm thaw roh.’ ” ²⁴ Khan ama na ruti, “Diktak a nangni dieng kiriei inih, thiempulien tuteawm amatak kho khan pawm naw nih. ²⁵ Khania adik a nangni dieng kieriei, Elijah pha khan Israel ram ah mieirawng tampui ruawm. Kum `thum le tha `ruk ravan kha rakhar phakhan, ram kholok ah nekleshak ajeng a rukhawk. ²⁶ Inia Sidon ah awm Zarephath ah mieirawng `khat dieng niboia, tute dieng Elijah kha rutir mak. ²⁷ “Thiempulien Elisha pha khan Israel ah raithawnaw tawng miring tampui ruawm, inia Syria miring Naaman niboia, tute ruriethiengmashak mak.” ²⁸ Hihaihi rujet u phakhan, synagogue ah awm kholok mulung ruhang pe uh. ²⁹ Amani na ruthoi ua ama kha kho vai tieng runawt uh. Khan lawntiktibir khan ama kha jong vawrna u rang, amani kho imothoina u lawnmawr kha rumawjawn uh. ³⁰ Inia amani kar khan rurilik a rupang joi. ³¹ Khan Galilee khopui `khat, Capernaum khan rushe a ama na Sabbath nikho hai khan mi ruruchuk. ³² Ama na chamnieitak a chawngruriei jarkhan, ama miruchukna khan shindawngna runiei uh. ³³ Synagogue khan raikho rono ratha aniei akhat ruawm a he rashangtak a rura`ai a ³⁴ ruti, “Namathan u roh! Kieini hi ih lawt rang a nangiti maw nih, Aw Nazareth Jesu? Kieini hi namathang rang a ava maw nangnih? Tumaw nangni iti kenejet. Nang hi Pathien Miring Riethieng kha nangnih!” ³⁵ Khan Jesu na rawkawk a ruti, “Awmchien roh, ama shung ah put ah vak shok roh!” Raikho rono kha na ama kha amani kar a vawrving a shiekho mawtawng boi a ama ah put ah vak shok joi. ³⁶ Khan mi kholok chung a shindawngna ruawm. Khan akhat na akhat dieng ruti uh, “Mahi ih chawng maw nih! Ajarla cham le ranak a raikho rono hai dieng chawng pek a amani na vak shok u hi.” ³⁷ Khan khakawt ah awm ram kholok khan ama chungchanga chawngrucherak joi. ³⁸ Ama na synagogue ah put ah ruthoi a Simon in khan rulut joi. Khan Simon tarpi kha raitun na enchak a rutun a ruawm, khan ama kha madamna rang, rudawi uh. ³⁹ Khan Jesu na ama dieng ruding a raitun kha rurawkawk phakhan, raitun kha na ama kha rumathan joi. Ama na relentak a ruthoi a amani chon kha ruthaw pe joi. ⁴⁰ Khan ni hawng tah le roroia, Jesu dieng natna shikshik aniei hai kha vak chawi uh. Ama na amani rikip dieng khut rutetna a rumadam. ⁴¹ Mi tampui ah put ah raikho haiawm vak shok ua rura`ai uh, “Nang hi Pathien Shapa Christa kha nangnih!” Inia amani na ama kha Christa keng iti jet u jarkhan, Jesu na amani kha rurawkawk a rumawchawng u lai mak. ⁴² Khan ni hawng shok `le, ama na ramthim mun ah rushe joi. Khan mipui kha na ama kha rutawk ua ama dieng rushe uh. Khan amani ah put ah ashe rang kha rumakha uh. ⁴³ Khania amani dieng ruti, “Kho shik hai dieng hinawm Pathien rengchangna jar a athachawng kha kirophongir rang a inih, ajarla hi rang hin a kiei hi inojongtir inih.” ⁴⁴ Khan ama na Galilee ah awm synagogue hai khan chawng shem a ruawm joi.

¹ Khan hitihin ruawm, Jesu na Gennesaret Thampui kawriei ah rudinglai khan, Pathien chawng mierieina rang, mipui na ama kha ruep uh. ² Thampui kawmchang ah rokong `di ruawm kha ama na rumuk; inia ngashur miring hai kha na amani kha rumak ua amani len hai kha rushuk a ruawm uh. ³ Ama na rokong hai kar a Simon rokong khan rulut a pieipak ho ah put ah meshenadet rang ruriei. Khan rokong khan rushuh a mipui dieng ruruchuk. ⁴ Ama na ariei rubang phakhan, Simon dieng ruti, “Medena rang, nang len u kha tuithukna khawn vak vawr u roh.” ⁵ Simon na mashang a ruti, “Aw Pumpa, janshawt kieini na enchak a kiruthaw ua iawm ruman u mi`ing, khania nang chawngriei dungjuia len hi muchum rang kanih.” ⁶ Makha ruthaw u phakhan, amani na nga hawi `khat kha rumede uh. Khan amani len kha achiet ruput pe uh. ⁷ Khan rokong shik `khat ah ochonthaw pui hai kha she a vak shanna u rang, jetna rupek uh. Amani na va ua rokong dire kha ship`hai a amani kha rurawnawm dedeng uh. ⁸ Makha Simon Peter na rumuk phakhan, Jesu keshun ah rukhuk shun a ruti, “Aw Pumi, kiei ah put ah she rang roh, ajarla kiei hi munu miring kha kanih!” ⁹ Ajarla amani nga shur khan, ama le khan ama le awm kholok shinrudawng pe uh. ¹⁰ Khan Simon le chonthawshom Zebedee shapa hai, James le John`awm, ruawm uh. Khan Jesu na Simon dieng ruti, “Chih naw roh, tun ah put ah miring hai ashur kha nangchang rangnih joi.” ¹¹ Khajarkhan rokong hai kha kawmchang vak shok puiphit u `le, nieinak kholok kha rumak ua ama anu rujui u joi. ¹² Khan hitihin ruawm, Jesu na khopui `khat ah ruawmlai khan, enro, raithawnaw na ibuk miring `khat ruawm. Ama na Jesu kha rumuk phakhan, bawklap a nik a ruti, “Aw Pumi, nangjawt a tu, kiei hi nangnieriethieng ngam.” ¹³ Khan Jesu na ukhut kha rushawn a ama kha irushit le roroia ruti, “Kajawt, nang riethieng kha nih rang roh.” Relentak a raithawnaw kha na ama kha rumathan joi. ¹⁴ Khan tute dieng rieina boi rang, ama dieng chawng rupek, “Khania shetana thiempu dieng vak mumuk roh, khan Moses na chawngirupek kha ang a riethiengna chungchanga vak rawthawi roh. Makha na amani dieng kungchangna kha nih rangnih.” ¹⁵ Inia liekliek a ama chungchanga chawng roshok joi. Khan amani natna hai ah put ah damna rang le chawng rangai rang, mipui lientak `khat vak ruchun uh. ¹⁶ Inia ama na ramthim khan rurakai a nikna runiei. ¹⁷ Hitihin ruawm, ni `khat hin Jesu na mi ruchuk a ruawmlai khan, Pharisee hai le Dan oja haiawm rushuh uh. Amani kha Galilee, Judea, khan Jerusalem rikip ah put ah ajong runih uh. Khan amani madamna rang, Pumi ranak kha ama dieng ruawm pe. ¹⁸ Khashole enro, mi hai na atakthi miring `khat jana chung ah jalam a vak chawi uh. Amani na lut pui a Jesu maton ah tetna rang, rurashak uh. ¹⁹ Inia mi rawphai jarkhan, amani na inshung khan rulut pui ngam u mak. Amani na inphu chung ah ruka pui ua rurevengmashak uh, khan ama jana kha le Jesu matontak ah mipui kar a jong muchum uh. ²⁰ Amani takashawn kha rumuk a ama dieng ruti, “Aw miringpa, nang munu hai kha anarangaidam pe joi.” ²¹ Khan danoja hai le Pharisee hai na amani mulung a rumining uh, “Mieshietna chawng ariei ama hi tumaw nih? Pathien niboia tu na maw munu hi arangaidam ngam?” ²² Jesu na amani mulungmining kha rushur pe a amani dieng rumashang, “Iloia nang mulung shung a nangimining u maw nih? ²³ ‘Nang munu hai kha arangaidam joi,’ iti le ‘Thoi tana lawn rang roh,’ iti idi kar hin ih kha maw baidet? ²⁴ Inia Miring Shapa kha na rieliei chung hin munu rangaidamna cham iniei kha nangjetna u rang a inih.” Khan takthipa dieng ruti, “Nang dieng kiriei inih, thoi rang roh, khan nang pher kha loi tana nang in ah she rang roh” ²⁵ Khan ama na relentak a amani maikung a ruthoi joi, khan ajana nieinak hai kha ruloi a Pathien mapaklam a in tieng rushe joi. ²⁶ Khan shindawngna kha na mi kholok dieng jong ship a Pathien kha rumapak uh. Khan chitna kha na ship a ruti uh, “Von nikho hin rekhek chon nimuk u keng joi!” ²⁷ Khan hihaihi theng shole, Levi iti khaichana rawkhawm miring `khat khaichana in ah rushuh a awm kha vak muk. Khan Jesu na ama dieng ruti, “Nujui roh.” ²⁸ Khan nieinak kholok kha rumak a ama anu rujui joi. ²⁹ Khan Levi na ama in ah Jesu rang bumichinna lientak `khat ruthaw. Kha mun khan khaichana rawkhawm hawi tampui le eshen hai kha rushuh, khan amani le nekleshak rushak uh. ³⁰ Khan amani danoja hai le Pharisee hai kha na akhaichawi hai dieng ruti uh, “Ijar a nangni na khaichana rawkhawm hai le khan munu miring hai le nineknishak u maw nih?” ³¹ Khan Jesu na mashang a ruriei, “Adam miring hai na loipu rangai mak, inia ana hai na irangai inih. ³² Midik miring hai akoi jong nimi`ing, inia mulung lekna rang, munu miring hai akoi jong kanih.” ³³ Khan Pharisee hai na ama dieng ruti uh, “Ijar a John khaichawi hai na rawnaw a chamradoi a nikna iruniei ua, kha le ra`ang a, Pharisee khaichawi hai na`awm ruthaw uh, inia nang khaichawi hai tu aneh-ashah ranga iruthaw u maw nih?” ³⁴ Jesu na amani dieng rumashang, “Moipa kha awmlai khan moilawm hai kha chamra modoi u rawng maw? ³⁵ Moipa kha amani ah put ah iloi pe pha kha hawng rangnih, makha nikho hai khan amani na chamradoi u rangnih.” ³⁶ Ama na`awm rangshim `khat ruriei pe uh: “Tute na ponlek athar kha ther a alui pon ah chingai mak. Khanitatu ama na athar kha ther rangnih, khan ponlek athar kha alui kha le rohoi naw nih. ³⁷ Khan tute na mevun jukawk alui hai khan ju athar thongai mak. Khanitatu ju athar kha na mevun jukawk hai kha khoi ning, tia obo rangnih. Khan mevun jukawk hai kha mathang rangnih. ³⁸ Inia ju athar kha mevun jukawk athar hai khan thong a dire kha reh rang a inih. ³⁹ Khan tute na, ju alui kha nek shole, relentak a athar kha neh jawt mak. Ajarla ama na iti, ‘Alui kha atha inih.’ ”

¹ Khan hitihin rushok, Sabbath nikho `khat hin Jesu na shangbiei hai kha rurakanlai khan, akhaichawi hai na shangvui hai kha ruchin uh, khan khut hai kha le rumawnawi ua rushak uh. ² Khan Pharisee hai eshen na ruti uh, “Iloia Sabbath nikho a Dan nih boi nangithaw u maw nih?” ³ Jesu na mashang a amani dieng ruti, “David amatak na vawncham pe phakhan, irawtawp pui hai le iruthaw kha nangni na te u makche maw? ⁴ Ama na Pathienin kha rulut a Pathien dieng a rawthawina tan kha ruloi a rushak. Khan ama le rawtawp hai diengawm rupek. Makha thiempu hai ranga na ishak niboia, Dan nih boi runih.” ⁵ Khan amani dieng ruti, “Miring Shapa kha Sabbath Pumi kha`awm inih.” ⁶ Sabbath nikho `khatret hin synagogue ah rulut a mi ruruchuk. Kha mun khan ukhutchang achar miring `khat ruawm. ⁷ Danoja hai le Pharisee hai na Sabbath nikho a madam pe maw, tia ruva uh. Makha amani na jar pekna rang a inih. ⁸ Inia amani mulungmining kha rujet pe a khutchar miringpa dieng ruti, “Thoi tana amani kar a ding roh.” Khan thoi a ruding joi. ⁹ Jesu na amani dieng ruti, “Kiei na nangni dieng ih `khat nawrawdawn u rang kanih, Sabbath nikho hin atha thaw, ninawkle ashie thaw, ringkho shan, ninawkle ringkho mathang, ih kha maw Dan nidet?” ¹⁰ Khan amani kholok kha enruroko a ama dieng ruti, “Nang khut kha vak shawn roh.” Khan ama na khatikhan ruthaw, khan ama khut kha shik `khat kha ang a rudam pe joi. ¹¹ Makhan amani kha ajeng a mulung ruhang pe ua Jesu kha imaw lawt rang, tia khatlekhat na rureshe u joi. ¹² Khalaikhan Jesu na anih rang lawn ah ruhawng. Khan janshawt hin ama na Pathien dieng nikna runiei. ¹³ Khan kho hawng var phakhan, ama na akhaichawi hai kha rukoi. Amani kar khan ama na shawmlieidi rumadan a amani kha tirtawn, tia`awm riming rupho joi: ¹⁴ Peter iti Simon, anaipangpa Andrew, James le John, Phillip le Bartholomew, ¹⁵ Matthew le Thomas, Alphaeus shapa James, Zealot iti u Simon, ¹⁶ James shapa Judas, khan Jesu ajorpa Judas Iscariot, hihaihi inih. ¹⁷ Ama na amani le jong chum a phaijaw mun `khat ah ruding joi. Akhaichawi hawi `khat le miring hawi `khat ruawm uh. Amani kha Judea kholok, Jerusalem, khan Tyre le Sidon tuikaw ah awm runih uh. Amani kha chawng rangai rang le amani natna hai kha damna mukna rang a ahawng u inih. ¹⁸ Khan raikho rono hai na imawshaw hai kha ama na rumadam. ¹⁹ Mipui kholok na ama kha shitna rang, rurasham uh, ajarla ranak kha ama ah put ah vak shok a mi kholok kha irumadam inih. ²⁰ Khashole ama na iringrakang a akhaichawi hai dieng ruriei: “Shara hai kha rahvanmuh miring kha inih, ajarla Pathien rengchangna kha nang tah u inih. ²¹ Tun a vawncham miring hai kha rahvanmuh miring kha inih, ajarla nimiship pe u rangnih. Tun a achap hai kha rahvanmuh miring kha inih, ajarla nang munui u rangnih ²² Miring Shapa jarbak a mi hai na numukmak u phakhan, nawnawt u phakhan, jak nepek u phakhan, khan ashie keng, tia nang riming hai kha pek u phakhan, rahvanmuh miring hai kha nangnih uh. ²³ Khanikhan ningai u roh, ningai a chawm u roh, ajarla enro, ravan a nangni rang a lawh kha awrawp. Ajarla hitak hi ang a apa u hai kha na thiempulien hai dieng iruthaw u inih. ²⁴ “Inia rawchawng miring hai nangni dieng mieriemna kha awm, ajarla maw`awina kha nangtum u joi. ²⁵ Vawnship miring hai nangni dieng mieriemna kha awm, ajarla nang vawncham u rangnih. Tun a munui miring hai nangni dieng mieriemna kha awm, ajarla mulungkur a nangchap u rangnih. ²⁶ Mi kholok na nangtha iti miring hai dieng mieriemna kha awm, ajarla hitak hi ang a apa u hai kha na thiempulien jok hai dieng iruthaw u inih. ²⁷ “Inia rangai nangni dieng kieriei: Nang rahapui hai kha numpoh u roh, namumah hai dieng atha thaw u roh. ²⁸ Pumnaboh miring hai kha rahvan peh u roh, maimawk napeh miring hai rang nik pe u roh. ²⁹ Nang riengiei ah anaben ama dieng khan shir `khat kha`awm daw pe roh. Nang ponledier naloi pe miring ama dieng khan, nang kotai kha`awm mitik peh naw roh. ³⁰ Nanih miring rikip dieng peh roh. Khan nang nieinak hai aloi ama dieng khan vak mikirna rang, riei naw roh. ³¹ Khan nangni dieng mi hai nangimawthaw jawttak kha ang a, amani diengawm thaw pe u roh. ³² “Khania numnapoh hai kha numnangpok u joiala, nang thawlawh u kha imaw awm nih? Ajarla munu miring haishe na`awm numapoh miring hai kha numipok u inih. ³³ Khan nangni dieng atha thaw hai dieng atha nangthaw u joiala, nang thawlawh u kha imaw awm? Ajarla munu miring haishe na`awm khakha ithaw u inih. ³⁴ Khan nangmuk u rangnih, tia nangimining u ama dieng phuk a nangpek uala, nang thawlawh u kha imaw awm? Ajarla munu miring haishe na`awm munu miring hai dieng koi boipet a mukna rang, phuk a ipek u inih. ³⁵ Inia nangirahapui hai kha numpoh u roh, khan atha kha thaw u roh. Vak kir rangnih, tia mining boi a phuk a peh u roh, khan nang thawlawh kha lien rangnih. Khan Rashang Chungchon shapa hai kha nangchang u rangnih. Ajarla ningaithiei boi le mi shie hai dieng khan Pathien tu roihoi inih. ³⁶ Nangpa u kha roihoi anih hi ang a, nangniawm roihoi miring kha chang u roh. ³⁷ “Nang chung ua chawngshatna boi rang, mi chung a chawngshat u naw roh. Mi na nahengna boi u rang, mi kha heng u naw roh. Mi na rangaidam nepek na u rang, mi kha rangaidam peh u roh. ³⁸ Peh u roh, khan nangni dieng nepek u rangnih. Makha inamtit, lawp `khat a inawk, khan imubungpim danlak atha kha nang maton ah nubun pe u rangnih. Ajarla nangni na dannangilaktak u kha nangni dieng danlak rangnih.” ³⁹ Khan amani dieng rangshim `khat ruriei pe: “Mikchaw `khat na mikchaw miring `khat rang lamkai pe ngam nih maw? Adinre kha khur ah cho u naw nih maw? ⁴⁰ Khaichawi `khat na ama oja chung a awm mak, khania rupumping a iruchuk mi rikip na ama oja kha hawng ang rangnih. ⁴¹ “Ijar a nang miktak shung ah thinglong kha tinta boi a nang uliennai mik ah thinglek kha nangi`en pe maw nih? ⁴² Nang miktak ah thinglong kha muk boi a, nang uliennai dieng ‘Uliennai, nang mik ah thinglek kha nawmawkaw roh,’ itia maw ti ngam rawng? Aw thanunchan thaw miring! Nang mik ah thinglong kha kawbak roh, khashole nang uliennai mik ah put ah thinglek kha kawna rang, malangsheng a nangmuk rangnih. ⁴³ “Ajarla thingkung atha na ara ashie moshok mak, khan thingkung ashie na ara atha moshok mak. ⁴⁴ Ajarla thingkung rikip kha ama aratak kha na mejet, ajarla riling hai ah put ah thieichang ara rawkhawm mak, khan rilingbuk ah drakha ara shar mak. ⁴⁵ Mitha kha na umulung atha niei`in ah put ah atha kha hawng moshok, khan mi shie kha na umulung ashie niei`in ah put ah ashie kha hawng moshok. Ajarla mulung ruphu ah put ah abai kha na chawngiriei inih. ⁴⁶ “Kiriei kha thaw boipet a ijar a ‘Pumi, Pumi,’ nanginiti u maw nih? ⁴⁷ Tunita`awm kawchawng hai kha irangai a athaw le kiei dieng ava ama kha, tu kha maw ang, iti kiei na numumuk u rang kanih. ⁴⁸ Ama kha thukmet a ichoi a lung chung ah keshun mocho a in rashak ama kha a ang inih. Tui hawng lien phakhan, tuirawnawng na hawng jem a in kha rawnawkmashak ngam mak, ajarla in kha lungpum chung ah iphun inih. ⁴⁹ Inia kawchawng hai kha irangai a athaw boi ama kha pieipak ah keshun mocho boi a in rashak ama kha le ra`ang inih. Tuirawnawng na hawng jem phakhan, relentak a upur, khan in athang dan kha ajeng a lien.”

¹ Miring hai ijet a ama chawngriei hai kha rumawtawr shole, Jesu na Capernaum ah rushe joi. ² Khan rarajakhat lamkai kha na shok imanartak `khat runiei. Ama kha runa pe a athi rang rurasham joi. ³ Ama na Jesu chungchanga rujet phakhan, ama na rushe a oshokpa kha vak madamnathiei rang, ama adawi Jihudi hai kar a lamkai hai kha rutir. ⁴ Khan amani na Jesu dieng rushe ua ama na ithaw pe rang a ama hi rutuk inih, tia richit`awmtak a rudawi uh, ⁵ “ajarla kuphung u hi ama na numpok, khan ama na synagogue `khat nurumothoi pe uh.” ⁶ Khan Jesu na amani le rushe joi. Ama na in kha vak shokdeng `le, rarajakhat lamkai kha na awlawm hai kha Jesu dieng vak mieriei, “Pumi, nawshaw puilai naw roh, ajarla ki`in ah nangva rang a hi kiei rutuk mi`ing. ⁷ Khajarkhan kiei nang dieng ava rangshe hi rutuk mi`ing. Inia chawng ranga nangiriei khan koshokpa khaw dam rang keng. ⁸ Ajarla kieiawm kothoi a ramiring kieniei a cham thoi a awm kanih. Akhat dieng, ‘She roh,’ kiti `le eshe, shik `khat dieng, ‘Va roh,’ kiti `le ava. Khan koshokpa dieng, ‘Hi thaw roh,’ kiti `le awthaw.” ⁹ Khan Jesu na khahai chawng kha rujet phakhan, shinrudawng pe, khan anujui mipui dieng hiei a ruti, “Kiei na nangni dieng kiriei inih, Israelshe hin takashawn hi ang a lien hi kiei na muh mi`inglai!” ¹⁰ Khan irutir hai kha na in khan vak kir ua shokpa kha adam a vak muk u joi. ¹¹ Khan hitihin rushok, jing tieng hin ama na Nain iti khopui `khat ah rushe. Akhaichawi hai le mipui lientak `khat na ama le rushe uh. ¹² Kho pakawt kha vak ranai pui phakhan, enro, athi miring `khat hi ruruput uh. Ama kha unu shapa khatte runih, khan ama kha mieirawng runih. Khan makha khopui miring tampui na ama kha rurawtawp pui uh. ¹³ Pumi na ama kha rumuk phakhan, lairunat pui a ama dieng ruti, “Chap naw roh.” ¹⁴ Ama na vak dep a rokong kha vak phak phakhan, urupu miring hai kha na ruding uh. Khan ama na ruti, “Rothar, nang dieng kienieriei, thoi rang roh.” ¹⁵ Khan athipa kha na hawng thoi a achawng hawng put joi. Khan ama kha unu dieng rupek joi. ¹⁶ Khan mi kholok na chitna runiei uh, khan Pathien kha mapak a ruti uh, “Thiempulien alientak `khat nakar u a shok joi,” khan “Pathien na ama miring kha apha jong joi.” ¹⁷ Khan Judea le khakawt ah ram kholok khan Jesu chungchanga chawng rucherak joi. ¹⁸ Hihai kholok chungchang hin John khaichawi hai na ama dieng chawng rumejet uh. ¹⁹ Khajarkhan John na akhaichawi hai kar a pasha `di hi rukoi a, “Ajong rang a kha nang maw nangnih, ninawkle shik `khat kingak u rang a maw nih?” tia Jesu dieng rawdawn rang, rutir joi. ²⁰ Jesu dieng ava hai kha na ruti uh, “Baptisma apeh John na nang dieng inavaktir u inih. Hitihin iti, ‘Ajong rang a kha nang maw nangnih, ninawkle shik `khat kingak u rang a maw nih?’ ” ²¹ Makha pha khan, ama na rai, shawrieviei, ratha thaboi hai ah put ah mi tampui rumadam, khan mikchaw tampui kha rumavar pe. ²² Jesu na amani dieng mashang a ruti, “She u tana nangimuk u le nangirangai u hai hi John dieng vak riei u roh: mikchaw hai na imuk, kekhawr hai na alawn, raithawnaw tawng hai na riethieng, nokorshet hai na ijet, athi hai kha imothoi, khan shara hai dieng athachawng iriei pe. ²³ Kajar a keruthui boi miring kha rahvanmuh miring kha inih.” ²⁴ John palai hai kha na rushe u phakhan, Jesu na John chungchanga mipui dieng ariei ruput, “Ramthim khan ih en rushe maw nangnih uh? Rithi na inawk shingnang kha maw? ²⁵ Inia ih en rushe maw nangnih uh? Miring `khat kha ponrenem irieshiei kha maw nih? Enro, ponledier lurtak le rielien a hoiriethiei miring hai kha rengin hai khawn awm uh. ²⁶ Inia ih en rushe maw nangnih uh? Thiempulien `khat kha maw? Awh, thiempulien `khatnek a alien inih, iti kha kiriei inih. ²⁷ Mahi ama chungchanga irumiejiek inih: ‘Enro, nang maton a kapalai `khat kitir, ama na nang maton a lam nokon pe rangnih.’ ²⁸ “Ajarla kiei na nangni dieng kiriei inih, nupang hai na imoshok kar a baptisma apeh Johnnek a aliendet thiempulien awm maklai, khania Pathien rengchangna mun a ashinving ama kha amanek a liendet.” ²⁹ Khan mi kholok le khaichana rawkhawm hai kha na ama chawngriei kha rurangai u phakhan, Pathien chawngshat kha idik ruti uh. Ajarla amani na John baptisma pek khan a baptisma iruloi u inih. ³⁰ Khania Pharisee hai le danthiei hai na tu John baptisma pek kha ruloi boi u jarkhan, Pathien rentukna kha ruheng uh. ³¹ Pumi na ruti, “Hi rong a miring hai hi ih le maw rekhenna ning, amani hi ih le maw ra`ang uh? ³² Amani hi naite hai na rievieithawna ah shuh a khatlekhat rashai nana kha le ra`ang inih. Amani na ti uh, ‘Nangni rang thieikhang kurutum uh, inia rulam u makche, mulungkurna kuruniei uh, inia ruchap u makche.’ ³³ “Ajarla baptisma apeh John kha tan shah rang le ju neh rang a ajong nimak, khan ‘Ama na raikho ieniei,’ nangti uh. ³⁴ Miring Shapa kha na rushak, khan runek, inia nangni na nangti uh, ‘Enro, shak a rapham le ju a vanhat thaw miring, khaichana rawkhawm hai le munu miring hai lawm `khat khaw!’ ³⁵ Inia varna hi ama chonthaw hai kholok kha na idikna kha imumuk inih.” ³⁶ Pharisee hai kar a akhat na Jesu kha ama le bu nekna rang ruriei. Khan ama na Pharisee in kha rulut a bu runek. ³⁷ Khan enro, kha khopui khan ah awm munu miring nupang `khat na Jesu kha Pharisee in ah bunek a awm iti kha rujet. Ama na lungngoi kawk ah manamhoi rieipartui kha vak chawi. ³⁸ Ama na Jesu anuk ah chap a ruawm. Ama mikrithi kha le Jesu ke hai kha rumiechier pe a asham kha le hona rang runo pe. Khan ama ke hai kha rutum pe a rieipartui kha runawt pe. ³⁹ Khania ama akoipa Pharisee kha na umulung shung a ruti, “Mahi miringpa hi thiempulien nitjoiatu, ama ashinu hi tumaw nih, khan ih ang nupang maw nih, iti jet rangnih, ajarla ama kha munu miring runih.” ⁴⁰ Jesu na mashang a ama dieng ruti, “Simon, kiei na nang dieng riei rang dikhat kieniei.” Ama na ruti, “Oja, riei roh.” ⁴¹ “Shierphukshem akhat hi na lieishieton miring idi runiei, akhat kha na dinari rajarahnga, khan shik `khat kha na dinari shawm rahnga ruphuk uh. ⁴² Amani na ruthung ngam boi u phakhan, ama na adinre lieishieton kha rupai pe joi. Tu na maw ama kha numpokdet nih, nieriei roh?” ⁴³ Makhan Simon na rumashang, “Lieishie arawpdet ipai pe ama kha na numpokdet rangnih, tia kimining.” Khan ama dieng ruti, “Thaning a chawngnangshat.” ⁴⁴ Ama na nupangnu tieng khan hiei a Simon dieng ruti, “Mahi nupangnu hi nangmuk maw? Kiei na nang in ah kavaklut a keke rang tuishe nepeh makche. Khania hi nupang hi na ama mikrithi le keke hai hi nururushuk pe a asham le nuruno pe. ⁴⁵ Nang na nurutum makche, inia hinu hi na tu kawhawnglut ah put ah keke atum hi chat maklai. ⁴⁶ Kulu kha thao nurunawt pe makche, khania hinu hi na keke kha rieipartui nurunawt pe. ⁴⁷ Khajarkhan nang dieng kiriei inih, ama munu hai arawp kha arangaidam pe joi. Khajarkhan a ama na numinurupokdet inih. Inia rangaidam lekte ipekna kha na lekte le numipok inih.” ⁴⁸ Khashole nupangnu dieng ruti, “Nang munu hai kha arangaidam joi.” ⁴⁹ Inia ama le tebol ah ashuh miring hai kha na khatlekhat dieng ati ruput uh, “Munushe rangaidam apeh ngam ama hi tumaw nih?” ⁵⁰ Inia ama na nupangnu dieng ruti, “Nang takashawn kha na nang kha nashan joi. Damveng a she rang roh.”

¹ Khan Jesu na khopui ah put ah khopui, khan khote ah put ah khote dawna rushe a, Pathien rengchangna athachawng kha rushem a rurophong joi. Khaichawi shawmlieidi kha ama le rurawtawp uh. ² Khan ratha thaboi hai le natna hai ah put ah irumadam nupang hai, Mary Magdalene iti, ama ah put ah raikho shiri rushok pe, ³ khan Herod inshung apoh Chuza inkonu Joanna, Susanna, khan amani shumleshiertak le amani cholam ruthaw shik nupang tampui ruawm uh. ⁴ Ama dieng mipui hawng ruchun a khopui rikip ah put ah mi hawng phakhan, ama na rangshim a ruriei pe uh: ⁵ “Muchi vawrpa kha na ama muchi vawr rushe. Ama na iruvawr le roroia, eshen kha lamkaw ah rucho, khan mi na ruchongna, khan ravan a va hai na jong shar uh. ⁶ Eshen kha lungbiei chung ah rucho, khan hawng mawngphit `le, ruchar ajarla tuiruhu ruawm mak. ⁷ Eshen kha rilingbuk ah rucho, khan riling hai kha le hawng thoichen a makha ruliep. ⁸ Khan eshen kha pieipak thatna mun ah rucho a hawng mawng, khan makha na arajah a ara rumoshok.” Hihaihi iruriei le roroia, ama na rura`ai, “Rangaina rang nokor aniei ama kha na rangai rosho!” ⁹ Khan akhaichawi hai na ama dieng rawdawn a ruti uh, “Mahi rangshim hi ih itina maw nih? ¹⁰ Khan ama na ruriei, “Nangni dieng Pathien rengchangna chungchanga murukchawng hai kha jetna rang, nurupek uh. Inia shik hai rang tu rangshim hai khan a irupek inih, makha ‘Amani na muk tu muk ua mukna boi rang, khan rangai tu rangai ua jetna boi rang a inih.’ ¹¹ “Rangshim kha hi inih: Muchi kha Pathien chawng kha inih. ¹² Lamkaw ah acho hai kha chawng kha irangai a amani mulung ah put ah diabol na ichawi pe kha inih. Makha amani na takashawn boi rang le shandamna mukna boi rang a inih. ¹³ Lungbiei ah acho hai kha chawng rangai a ningai le roroia aloi hai kha inih. Inia hihaihi na rujung loi u mak; khan pha bawngte takashawn uh, inia enretena hawng phakhan, rurakai uh. ¹⁴ Rilingbuk ah acho hai kha chawng rangai hai kha inih. Khania ringkho lungkhamna, rawchawngna le hoina hai hi na ruliep, khan amani ara hai kha hawng chang ngam mak. ¹⁵ Pieipak thatna ah acho hai amani kha mulung atha le mulung riethieng a chawng rangai hai kha inih. Amani na chawng kha rangai phakhan, chawng kha arakrep uh. Khan amani doiratna khan ara kha mupung uh. ¹⁶ “Tute na thaomiei kha muchuk shole, tiengkum thoi ah the ninawkle jakhang thoi ah tet mak. Inia makha hawng lut miring hai na mieivar kha mukna rang, shutna `khat ah itet inih. ¹⁷ Ajarla imalar boi rang a rethe `khatshe awm mak, khan mejet a vai moshok boi rang a rukhum `khatshe awm mak. ¹⁸ Khajarkhan nang irangai dan u kha riring pui u roh, ajarla aniei ama dieng khan arawpdet pek rangnih. Khan aniei boi ama dieng khan kieniei, tia iminingshe kha ama ah put ah loi pe rangnih.” ¹⁹ Khashole unu le anaipang hai na ama dieng va uh. Amani na mirawp jarkhan, ama dieng rulut ngam u mak. ²⁰ Khan mi eshen na ama dieng ruriei, “Nangnu le nang naipang hai na vai tieng ding a nang kha nurumuk pui jawt uh.” ²¹ Inia mashang a amani dieng ruti, “Pathien chawng arangai le athaw hihaihi kunu le kuliennai hai kha inih.” ²² Nikhat hin ama na akhaichawi hai le rokong shung ah rulut a amani dieng ruti, “Thampui shir `khat tieng khawn she u rawi.” Khan amani kha rokong a rushe u joi. ²³ Amani na rushe u lai khan, ama kha ruja joi. Khan thampui chung ah rithikhopui hawng rang, khan rokong ah tui hawng ship a thangna le ruranai u joi. ²⁴ Ama kha rujawng ua rumothoi uh, khan amani na ruti uh, “Oja, Oja, kieini hi kathi u rang keng joi!” Inia ama na hawng thoi a rithi le tuirawnawng kha hawng rawkawk. Khan amani kha rubang a rurenem joi. ²⁵ Khashole amani dieng ruti, “Nang takashawn u kha ih ah awm maw nih joi?” Amani na achih le shindawnglam a khatlekhat dieng ruti uh, “Ih miringtak maw nih? Ajarla ama na chawng pek phakhan, rithi le tuishe na`awm irangai pe u hi!” ²⁶ Khan amani na Galilee le re`en Gadarenes kha rushok u joi. ²⁷ Ama na lieiho khan jong chumphit `le, kha khopui ah awm, raikho hai na ichutna miring `khat na rurumuk pui. Khan ama kha phashawttak ponledier thaw boi a ruawm inih. Khan ama na in ah niboia, than hai khan ruawm inih. ²⁸ Ama na Jesu kha rumuk le amaikung a rubawklap, khan ra`ai a ruti, “Rashangving Pathien Shapa Jesu, kiei hi ih nawlawt rang a nangiti maw nih? Nang na kiei hi shawna nangnepekna boi rang, kawnawdawi!” ²⁹ Raikho rono kha miringpa ah put ah vak shokna rang, ama na chawng rupek. Ajarla mahi na voitampui ama kha irushur inih. Khan ama kha thirakarui, khan thir banriei le irukhop ua irurung u inih. Khopna hai kha changhawt a iruthaw a raikho kha na ramthim ah irunawt inih. ³⁰ Jesu na ama dieng rurawdawn, “Nang riming imaw ti?” Ama na ruti, “Legion,” ajarla raikho hai tampui na ama shung a rulut nih joi. ³¹ Khan amani kha dawngawmboi athuk a thongna rang chawng pekna boi rang, ama dieng runik uh. ³² Khan mopang `khat ah vawk hawi lientak `khat na shak shak a ruawm uh. Khan raikho hai kha na amani dieng lut jawtna rang, ama dieng rudawi uh. Makhan amani kha ama na rujawt pe. ³³ Amani na miringpa ah put ah vak shok ua vawk hai shung khan vak lut u joi. Khan vawk hai kha na thampui khan rucho ua tui arah a ruthi u joi. ³⁴ Vawkroi hai kha na ashok chon hai kha rumuk u phakhan, rutan ua khopui le khote hai khan ruriei u joi. ³⁵ Khashole miring hai na ashok chon kha aen va uh, khan amani na Jesu dieng vat u phakhan, raikho hai vak shokna miringpa kha ponledier rurieshiei a pashalak a Jesu keshun ah rushuh kha vak muk ua, amani kha ruchih uh. ³⁶ Makha amuh hai kha na raikho na ichutna miringpa imadamna dan kha amani dieng ruriei uh. ³⁷ Khan Gadarenes ram diengvai ah awm mipui na amani ram ah put ah shena rang, rubiek uh; ajarla amani kha ajeng a ruchih u joi. Khajarkhan ama na rokong shung ah rulut a rukir joi. ³⁸ Khan raikho hai vak shoknapa kha na ama le rawtawpna rang, runik, khania Jesu na tir a ruti, ³⁹ “Nang in ah kir rang roh, khan idawrthep a Pathien na inawthawna pe kha vak riei roh.” Khan ama na khopui kholok ah rushe a Jesu na ama chung a ithawna chon hai kha vak rophong joi. ⁴⁰ Khan Jesu na vak kir phakhan, mipui na ama kha lamjawng ruthaw uh, ajarla amani kholok na ama kha irungakrala u inih. ⁴¹ Khan enro, Jairus iti miring `khat na ama dieng ava. Ama kha synagogue lamkai miring `khat runih. Ama na Jesu keshun ah rubawklap a ama in ah vatna rang runik. ⁴² Ajarla kum shawmlieidi dawr anih ashanu khatte iruniei kha athi rang rurasham pe joi. Khan Jesu ashe le roroia, mipui kha na ama kha ru`umchip uh. ⁴³ Khan kum shawmlieidi thijanrai tawng, iringna rang a iniei kholok kha le loipu hai dieng rure`en joiawm, tute na irumadam ngam boi, nupang `khat ruawm. ⁴⁴ Ama anuk khan rujawng a opon mawr kha rushit pe a ama thijan kha ruchat perelen joi. ⁴⁵ Khan Jesu na ruti, “Tu na kiei hi inishit maw nih?” Mi kholok na jawt boi phakhan, Peter na ruti, “Oja, mipui na inaum a ine`ep inih, inia ‘Tu na kiei hi inishit maw nih?’ nangti.” ⁴⁶ Inia Jesu na ruti, “Miring `khat na kiei hi inishit, ajarla kiei ah put ah ranak ashe kha kejet.” ⁴⁷ Nupangnu kha na rethe a awm ngam boi phakhan, rawnawklam a ava a amaikung a rubawklap joi. Khan ama na mipui maikung a ishitna jar le relentak a damna jar kha rurophong. ⁴⁸ Khan ama dieng ruti, “Shanu, ranak thaw roh, nang takashawn kha na nang kha namadam joi, damveng a she rang roh.” ⁴⁹ Ama na chawngrurieilai khan synagogue lamkai in ah put ah mi `khat ava a ruti, “Nang shanu kha thi joi, Ojapa kha mawshawlai naw roh.” ⁵⁰ Inia Jesu na rujet a Jairus dieng ruti, “Chih naw roh, takateshawn roh, ama kha ashan rang keng.” ⁵¹ Ama na in khan ava a Peter, James, John, khan naitenu nulepa ranga niboia, tute rumulut mak. ⁵² Mi kholok rie`ieklam a ruchap ua ama chung a mulungkurna runiei uh. Inia ama na ruti, “Chap u naw roh, ama hi athi nimak, amiei keng.” ⁵³ Amani na ama kha rumunui uh, ajarla amani na athi kha rujet uh. ⁵⁴ Ama na lawpsheng a vai rumoshok shole, ukhut kha rumukui pe, khan okoi a ruti, “Naitenu, thoi rang roh.” ⁵⁵ Khan aratha kha hawng kir pe a, ama kha hawng thoirelen joi. Khan ama dieng shakthiei pekna rang, ama na chawng rupek joi. ⁵⁶ Khan unulepa kha na shindawngna runiei uh. Inia ashok chon kha tute dieng rieina boi rang, ama na chawngruben joi.

¹ Jesu na akhaichawi shawmlieidi kha lawp a rukoi a raikho kholok anawt rang le rai kholok madam rang, ranak le cham kha rupek joi. ² Khan Pathien rengchangna chungchanga chawngshem rang le ana hai kha madam rang, rutir joi. ³ Ama na ruti, “Nang khomijin shena u khan iawm chawi u naw roh: shunshawraw, pai, tan, shier, khan kotai idi ko u naw roh. ⁴ Nanglutna u ih in khan nita`awm, makhan awm u roh, khan kha mun ah put ah rawthawt u roh. ⁵ Ih mun ah nita`awm nangni nuruphawm boi hai dieng khan nangni na makha khopui kha nangmathan u phakhan, nang kepha uah put ah vaiphin kha khawng u roh. Makha amani le re`erna kungchangna kha inih.” ⁶ Amani na karuchawi ua khote hai khan athachawng kha rushem uh, khan mun rikip ah rumadam uh. ⁷ Khan tetrarch Herod na ashok chon hai kholok kha rujet phakhan, mulung rurakak pe joi, ajarla mi eshen na John kha athi ah put ah thoi joi, ⁸ eshen na Elijah kha jong lar joi, khan eshen na matienglai a thiempulien hai kar a akhat hawng thoi joi ruti uh. ⁹ Khania Herod na ruti, “Kiei na John kha ring kurutuk pe joi, inia kiei na tu jar a hihai hi kijet maw nih?” Khajarkhan ama kha mukna rang rutawk joi. ¹⁰ Khan tirtawn hai kha hawng kir ua, ithaw u hai kholok jar a Jesu dieng thanghawngkoi u joi. Khan amani kha shikjek a Bethsaida iti khopui khan ama na rushe pui joi. ¹¹ Inia mipui na rujet ua anu rujui uh. Khan amani kha ruphawm a amani dieng Pathien rengchangna jar a chawngruriei pe, khan adam rang a rangai miring hai kha ama na rumadam. ¹² Khan ni hawng tadeng `le, khaichawi shawmlieidi kha na vak jawng a ruti uh, “Mipui kha meshe rang roh. Amani na diengvai kho hai khawn she u rieshie, jana rang le nekleshak vak muh u rosho, ajarla kieini hi ramthim hin ah awm nanih uh.” ¹³ Khania amani dieng ruti, “Amani kha shak rang dikhat peh u roh.” Amani na ruti uh, “Kieini na hihai miring kholok rang hin rawchawh kashe u joi nawkatu, tan rahnga le nga idibak kieniei u joi.” ¹⁴ Ajarla kha mun khan apa bawp rahnga dawr ruawm uh. Khan ama na akhaichawi hai dieng ruti, “Amani kha shawm rahnga dawr a lawplawp a mushut u roh.” ¹⁵ Khatikhan amani kholok kha rumushut u joi. ¹⁶ Khan ama na tan rahnga le nga idi kha ruloi, ravan tieng khongrunga, khan rahvan irupek le roroia rukhoi. Khan mipui dieng shemna rang, amani dieng rupek. ¹⁷ Amani kholok na rushak ua vawn ruship pe uh. Khan lekvai mienieng kha tiengkum shawmlieidi rurawkhawm uh. ¹⁸ Nikhat hin ama na thien a nikna runiei, khan akhaichawi hai kha ama na ruawm pui a amani dieng ruti, “Mipui kha na kiei hi tumaw nih niti uh?” ¹⁹ Amani na mashang a ruti uh, “Baptisma apeh John, khania eshen na Elijah, khan eshen na matienglai a thiempulien hai kar a akhat, hawng thoi.” ²⁰ Amani dieng ruti, “Khania nangni na la kiei hi tumaw nih nangniti uh?” Peter na mashang a ruti, “Nang hi Pathien ah put ah ijongtir Christa kha nangnih.” ²¹ Khania tute dieng rieina boi rang, amani dieng chawng anatak rupek joi. ²² Ama na ruti, “Miring Shapa hi na shawna lientak idoingir rang a inih. Ama kha shierulien hai, thiempu ulien hai, khan danoja hai na heng ning, tia ama kha that u rangnih. Khan ni `thum changna khan ama kha mothoi rangnih.” ²³ Khan mi kholok dieng ruti, “Tukhat na kanu nujui jawt joiatu, amarilik chung a rapha rosho, khan ama cross kha ningthingkip rupu rieshie nujui rosho. ²⁴ Ajarla iringkho ashan jawt kha na makha mathang rangnih, khania kajar a iringkho mathang miring kha na makha ashan rangnih. ²⁵ Ajarla ama na manmieshie pumpui kha ama tah machang a iringkhotak kha mathang a, ninawkle pawrmechet joiala, inemna imaw awm pe nih? ²⁶ Ajarla tunita`awm kajar a le kawchawng hai jar a jakna niei a tu, Miring Shapa kha na, ama lurna, Apa lurna, khan ravantir riethieng hai lurna khan jong phakhan, jak pui rangnih. ²⁷ Khania diktak a nangni dieng kiriei inih, hin ah ading miring eshen hi na Pathien rengchangna kha muk u masheng, amani na thitna tuidan kha en u naw nih.” ²⁸ Khan hitihin ruawm, hihaihi irieina ni `riet dawr shole, Jesu na Peter, John, khan James kha ruchawi a lawn ah anih rang ruhawng pui. ²⁹ Ama na nikna runieilai khan, ama maisho kha rurelek pe. Khan ama ponledier hai kha retelang a ruawm pe. ³⁰ Khan enro, miring pasha `di, Moses le Elijah, na ama le ruriebieh uh. ³¹ Amani kha ajeng a rulur. Khan ama kachawina rang a jar a ruriei uh. Makha Jerusalem ah ashok rang a inih. ³² Khania Peter le irawtawp pui hai kha rumiei uh. Amani na hawng chehep u `le, ama lurna kha hawng muk uh. Khan ama le pasha `di ading kha hawng muk uh. ³³ Khan hitihin ruawm, ama ah put ah rushe u le roroia, Peter na Jesu dieng ruti, “Pumpa, kieini na hin na`awm u hi atha, thamber `thum rashak u rawi: nang rang akhat, Moses rang akhat, khan Elijah rang akhat.” Ama na imaw iriei, iti kha rujet mak. ³⁴ Ama na makha rurieilai khan, romiei na ava a amani kha vak rilip joi. Amani na romiei shung ah rulut u le roroia, akhaichawi hai kha ajeng a ruchih uh. ³⁵ Khan romiei ah put ah he `khat jong a ruti, “Mahi numkipoktak kashapa kha inih, ama chawng kha rangai u roh.” ³⁶ He kha jong phakhan, Jesu kha iethien a ruawm joi. Amani kha ruawmchien uh, khan amani na khalai a irumuk u jar kha tute dieng ruriei u mak. ³⁷ Khan jing tieng hin amani na lawn ah put ah jongchum u phakhan, mipui hawi `khat na ama kha rurumuk pui uh. ³⁸ Mipui kar a mi `khat na he rashang a ruti, “Oja, kashapa khaw nangne`en pena rang kininik. Ajarla ama hi kashapa khatte inih. ³⁹ Enro, raikho na shur phakhan, jetboithieiboi a ama na ra`ai, khan chiephon moshoklam a ruvawr. Ama na mawpawp ning, tia dengre a ama kha irumathanthiei inih. ⁴⁰ Nawtnathiei rang, nang khaichawi hai kha kurudawi, inia amani na rumawtawr u mak.” ⁴¹ Jesu na mashang a ruti, “Aw takashawn boi le shuklet rong hai, idawrshe a nangni le awm a kidoi rang a maw nih? Nang shapa kha hin vak chawi roh.” ⁴² Naitepa kha na vak jawng phakhan, raikho kha na ama kha vakvawklap a thirthir a rawnawkmashak. Inia Jesu na ratha rono kha rurawkawk, khan ama na naitepa kha rumadam a apa dieng rupek joi. ⁴³ Khan mi kholok na Pathien lienna khan shindawngna runiei uh. Jesu na iruthaw hai kholok chung a mi rikip na shindawngna runiei u lai khan, ama na akhaichawi hai dieng ruti, ⁴⁴ “Hihai chawng hi nang nokor shung ua tet u roh, ajarla Miring Shapa kha miring hai khut a pek rang a nih joi.” ⁴⁵ Khania amani na hi chawng hi rujet u mak. Amani na tina jetna ngam boi rang, mahi amani ah put ah rethe inih. Khan amani na mahi chawng jar a rawdawn rang khan ruchih uh. ⁴⁶ Amani na amani kar a tu kha maw alienving, tia chawng rurieshiet uh. ⁴⁷ Khan Jesu na amani mulungmining kha rujet pe a naite `khat rukoi, khan ama dieng ah rumiding. ⁴⁸ Khan amani dieng ruriei, “Tunita`awm kiriming a mahi naite hi loi a tu, kiei le khan nojongtirpa kha iloi inih. Ajarla nang kar ua ashinving ama kha alienving kha inih.” ⁴⁹ John na mashang a ruti, “Aw Pumpa, nang riming a raikho hai runawt miring `khat kurumuk uh, kieini le nang ajui miring nit boi jarkhan, kurumakha uh.” ⁵⁰ Jesu na ama dieng rumashang, “Makha u naw roh. Kieini le re`er boi ama kha kieini le rachang inih.” ⁵¹ Khan hitihin ruawm, ama kha ravan tieng kana rang, nikho kha hawng rupum le roroia, ama na Jerusalem tieng shena rang, mai rumiehiei joi. ⁵² Khan ama na palai hai kha amaton ah rutir joi. Ama tungnajana rashamna rang, amani na rushe ua Samaria miring hai kho `khat ah rulut uh. ⁵³ Khania ama na Jerusalem tieng rushe jarkhan, amani na ama kha ruphawm u lai mak. ⁵⁴ Akhaichawi hai, James le John na makha muk u phakhan, ruti uh, “Pumi, Elijah na iruthaw kha ang a, ravan ah put ah miei koi a amani hi mathang u rang rawi maw?” ⁵⁵ Inia Jesu na hiei a amani kha rurawkawk khan ama ruti, “Ih ratha khan a awm maw nangnih u, iti kha jet u mak che? ⁵⁶ Miring Shapa kha na miring ringkho kha mathang ajong nimak, inia ringkho ashan jong inih.” Khan amani na kho shik `khat ah rushe u joi. ⁵⁷ Khan hitihin ruawm, amani na lam ah rulawn u lai khan, akhat na ama dieng ruti, “Pumi, kiei na nang shena mun rikip ah nujui rang kanih.” ⁵⁸ Jesu na ama dieng ruriei, “Ramui hai na khur niei uh, khan ravan a va hai na rubu niei uh, inia Miring Shapa na tu, lu tetna rang mun niei mak.” ⁵⁹ Khan shik `khat dieng ama na ruti, “Nujui roh.” Inia ama na rumashang, “Pumi, kapa akhum rang kiei hi nawjawt pemasha roh.” ⁶⁰ Inia ama dieng rumashang, “Athi hai kha na amanitak athi hai kha khum u rosho, inia nang tu Pathien rengchangna chungchanga chawng vak shem roh.” ⁶¹ Khan shik `khat na`awm ama dieng ruti, “Pumi, nangnu nujui rang kanih, khania ki`in ah awm miring hai dieng reshenna vak thawna pui rang nawjawt pe roh.” ⁶² Jesu na ama dieng rumashang, “Ukhut ah langkon mukui a nukhiei athaw ama kha Pathien rengchangna rang rutuk mak.”

¹ Hihaihi shole Pumi na shawm shiri shik hai kha rumadan joi. Ama na ashe rang a rashamna khopui le mun rikip ah amaton a amani kha ididi a rutir joi. ² Ama na ruriei, “Parrawkhawm rang a hi awrawp, inia chon thaw miring hai hi awtawm. Khajarkhan par Pumi dieng ama loimun a chon thaw rang miring jong tirna rang, nikna niei u roh. ³ She u tana en u ro, kiei na nangni kha melang hai kar a kengamte hai kha ang a kinitir u inih. ⁴ Shierkawk, pai, khan kekawk chawi u naw roh. Lam ah tute le chubai thaw u naw roh. ⁵ “Nanglutna u in kha ih kha nita`awm akhat changna a, ‘Mahi in hin lungdamna kha awm rosho,’ ti u roh. ⁶ In khan lungdamna miring kha awm joiatu, nang mulung damna u kha ama dieng awm rosho. Khanitnawkatu makha nangni dieng vak kir rangnih. ⁷ Nangawmna u intak khan bulean kha shah u roh, ajarla chonthaw miring kha na ama lawh imuk rang a kha rutuk inih. In `khat ah put ah in `khat ah rechen u naw roh. ⁸ “Khan nanglutna u khopui khan lamjawng nuruthaw uatu, ih kha nita`awm nangni rang a inarasham pe u kha shah u roh. ⁹ Makhan ah awm ana hai kha madam u roh. ‘Pathien rengchangna kha na nojongranai pui joi,’ tia riei u roh. ¹⁰ Nanglutna u ih khopui kha nita`awm, noroloi boi u phakhan, amani lamlien ah she u tana ti u roh, ¹¹ ‘Kekepha uah kawp nang khopui u vaiphin haishe hi kieini na kakhawng uh. Mahi nangni le kere`erna u jetna kha inih. Khanikengta Pathien rengchangna kha jong nai joi, iti kha jet u roh.’ ¹² Nangni dieng kienieriei uh, makha Nikho khan mahi khopui rangnek hin Sodom rang a kha doithieidet chang rangnih. ¹³ “Aw Chorazin, nang dieng mieriemna awm! Aw Bethsaida, nang dieng mieriemna awm! Ajarla nangni dieng ranakniei chon iruthaw hai kha Tyre le Sidon dieng runih joiatu, bawra rieshiei a, ruvut robolam a shuh ning, tia amani mulung lekna kha shawt rangnih joi. ¹⁴ Inia nangni rangnek hin Tyre le Sidon chung a chawngshatna rang a kha doithieidet chang rangnih. ¹⁵ Khan ravan a irulawm, Aw Capernaum, nang hi thikho a nawvawr rangnih. ¹⁶ “Nang chawng u rangai ama kha na kawchawng kha irangai inih. Nangni anaheng ama kha na kiei hi inaheng inih. Khan kiei anaheng ama kha na nojongtirpa kha iheng inih.” ¹⁷ Khan khaichawi shawm shiri kha ningailam a vak kir ua ruti uh, “Pumi, raikho haishe na`awm nang riming a kieini dieng rubu uh.” ¹⁸ Khan amani dieng ruriei, “Kiei na Satan kha ravan ah put ah jong cho khomelek kha ang a kurumuk. ¹⁹ Enro, kiei na nangni dieng moro hai le aikoshangpa hai chung a ke le chongna rang, rahapui ranak kholok chung a cham kha kenepek u joi. Ih na`awm nangni kha nawmawpawp u lai naw nih. ²⁰ Khanikengta nangni dieng ratha hai kha rubu u jarkhan, ningai u naw roh. Kha ruhut a nang riming u hai kha ravan a rumiejiek jarkhan, ningai u roh.” ²¹ Kha pha khan Jesu na Ratha a ningaina runiei a ruti, “Ravan le rieliei Pumi, Aw kapa, nang kha kanamapak, ajarla nang na hihaihi mishing le mithiei kanih ati hai kar a nangruthe a, naite hai dieng nangrumalar joi. Inih, Aw kapa, makha keng nang dieng a awm enlar kha. ²² Kapa na nieinak kholok kha kiei dieng nurupek joi, khan kapa na niboia, tute na Shapa kha tumaw nih, iti kha jet mak; khan Shapa na niboia tute na Apa kha tumaw nih, iti kha jet mak. Khan Shapa na Apa imalarna jawt miring ama kha na Apa kha tumaw nih, iti kha ejet.” ²³ Khan akhaichawi hai dieng hiei a ruti, “Nangimuk u hai hi amuh hai kha rahvanmuh mik hai kha nih uh. ²⁴ Ajarla kiei na nangni dieng kiriei inih, thiempulien hai le reng tampui na nang imuk u hai hi rumuk jawt uh, inia rumuh u mak. Khan nangirangai u hai hi rurangai jawt uh, inia rurangai u mak.” ²⁵ Enro, danthiei `khat na ruding a ama kha enrurete, khan ama na ruti, “Oja, kumshawt ringna kha kutumnathiei rang, kiei na imaw thaw ning?” ²⁶ Ama dieng ruti, “Dan ah imaw miejiek? Nang na itia maw makha nangte?” ²⁷ Ama na mashang a ruti, “ ‘Nang PUMI nang Pathien kha nang mulung kholok le, nang ringphuk kholok le, nang ranak kholok le khan nang mulungmining kholok le numnangipok rang a inih,’ khan ‘Nang ringchangpui kha nang pumtak ang a numnangipok rang a inih.’ ” ²⁸ Khan ama dieng ruti, “Thaning a nangrumashang. Mahi thaw roh, khan nangring rangnih.” ²⁹ Inia ama na nining a rudik jawt jarkhan, Jesu dieng ruti, “Kiringchangpui kha tumaw nih?” ³⁰ Jesu na ama dieng ruriei, “Miring `khat hi Jerusalem ah put ah Jericho ah rushe, khan ama kha shiersho miring hai khut ah rucho joi. Ama kotai kha ruthut pe uh, khan rujem ua ama kha athideng a rumak uh. ³¹ Rethenna `khat a makha lam khan thiempu `khat rupang a ama kha rumuk phakhan, ama na shir `khat tieng rulawi. ³² Khatak kha ang a Levi miring `khat hi kha mun khan vak pang a rumuk phakhan, shir `khat tieng rulawi. ³³ Khania Samaria miring `khat na khomijin vatna a ama ruawmna tieng vak pang a ama kha rumuk phakhan, lairunat pui. ³⁴ Ama na rujawng a pawpna hai kha thao le ju ruliei pe a rutum pe, khan ama shatak khan rumushut joi. Khan jinin `khat ah ruchawi a ama chon kha ruthaw pe. ³⁵ Khan jing tieng hin ama na rushe phakhan, dinari `di rurosho a jinin rungpa dieng rupek. Khan ama dieng ruti, ‘Ama hi ruen roh, kiei na kavakkir phakhan, nangimulut ijat kha nita`awm nathung rang kanih.’ ³⁶ “Khajarkhan hihai uthum kar hin tu kha maw shiersho miring hai khut ah acho miringpa ringchangpui?” ³⁷ Makhan ama na rumashang, “Ama chung a roihoina itetna miringpa kha keng.” Khan Jesu na ama dieng ruti, “She tana kha ang khan vak thaw roh.” ³⁸ Khan amani na rushe u le roroia, khote `khat ah rulut uh. Khan Martha iti nupang `khat na ama kha in ah rumutung. ³⁹ Ama na Mary iti anaipangnu `khat runiei. Ama na Jesu keshun a rushuh a ama chawng rangai a ruawm. ⁴⁰ Inia Martha kha chonthaw a chonruchin pe. Khan ama dieng ava a ruti, “Pumi, kanaipangnu na kiethien a chon inawmawthaw hi nang na ih nangishawn boi maw nih? Khajarkhan ama na nashanna rang, nieriei pe roh.” ⁴¹ Jesu na mashang a ama dieng ruti, “Martha, Martha, nang na nieinak tampui chung a nang mulungshaw a narahamashak. ⁴² Khania nieinak khatte hi rangai, ajarla ama ah put ah shothiei boi, tum atha kha Mary na madan joi.”

¹ Khan hitihin ruawm, Jesu na mun `khat ah nikna runiei. Ama na rubang phakhan, akhaichawi hai kar a akhat na ama dieng ruti, “Pumi, John na akhaichawi hai iruchuk kha ang a, nikna dan nuruchuh u roh.” ² Khan ama na ruti, “Nangni na nangnik u phakhan, hitihin ti u roh: Ravan a awm kapa u, nang riming kha riethieng nih rosho, nang rengchangna kha jong rosho. Ravan a nang mulungmining nangithaw kha ang a, rieliei hinawm nih rosho. ³ Von a nekkhawp nekleshak kha nikip nepeh u roh. ⁴ Kielieishie ton miring rikip kha karangaidam u jarkhan, kumunu u hai hi narangaidam pe u roh. Lemna a nomocho u naw roh. Inia ashie ah put ah nakhek u roh.” ⁵ Khan amani dieng ruriei, “Nang kar ua akhat na lawm `khat ieniei, khan ama na janchim a ama dieng she a iti, ‘Kama, tan `thumbak nepeh roh. ⁶ Ajarla kawlawm `khat khomijin ah put ah jong tung a ama shak rang ih nieilai mi`ing.’ ⁷ Khan ama na inshung ah put ah rumashang, ‘Kiei hi nachawklai naw roh, tun mawkawt kha rakhar joi, khan kanai hai kha kiei le jakhang ah ja u joi; kiei na thoi a nepeh ngamlai naw ning.’ ⁸ Kiei na nangni dieng kieriei, ama kha awlawm nitjoiawm, ruthoi pe mak, inia ringrawrat jarkhan, ama na thoi a irangai rikip kha pek rangnih. ⁹ “Khan kiei na nangni dieng kieriei, nih u roh, nangni dieng nepek rangnih. Tawk u roh, nangmuk u rangnih. Tawh u roh, nangni rang nawmawlawng pe rangnih. ¹⁰ Ajarla anih miring rikip na umuk, atawk ama kha na aman, khan atawh ama rang khan mawlawng pe. ¹¹ “Nang kar ua apa `khat dieng shapa kha na tan nik `le, lung peh nih maw? Nga nik `le, kha ruhut a moro peh nih maw? ¹² Khan arrutui nik `le, kha ruhut a aikoshangpa peh nih maw? ¹³ Khajarkhan, ashie nangnih u awm, nang nai hai dieng nieinak atha apeh kha nangthiei uala, ravan a awm nangpa u kha na anih miring hai dieng Ratha Riethieng kha idawr maw nepeh u nih!” ¹⁴ Khan ama na chawngthieiboi raikho `khat runawt. Raikho kha ama ah put ah rushok phakhan, chawngthieiboi miring kha ruchawng joi. Khan mipui kha shinrudawng pe uh. ¹⁵ Inia eshen na ruti uh, “Raikho hai reng Beelzebul ranak a raikho hai hi inawt inih.” ¹⁶ Khan eshen na, enretena rang, ravan ah put ah jetna ama dieng runik uh. ¹⁷ Inia amani mulungmining kha rujet pe a amani dieng ruti, “Nining a reshen rengchangna rikip thangbieng rangnih, khan malema re`er in kha upur. ¹⁸ Khan Satan kha na nining a reshen joiala, iti a maw ama rengchagna kha ding nih? Ajarla Beelzebul ranak a raikho hai kha kinawt keng nangti uh. ¹⁹ Inia kiei na Beelzebul ranak a raikho hai kha kawnawt joiala, nang nai hai na tu ranak a maw amani kha nawt uh? Khajarkhan amani kha nang chawngshat hai kha nih u rangnih. ²⁰ Inia Pathien khutlawi kha le raikho hai kha kawnawt joiatu, nang chung ua Pathien rengchangna kha jong shok joi. ²¹ Miratpa kha na mieriem le rashamjer a ama in kha rung phakhan, ienieinak hai kha rekhe pe. ²² Khania amanek a aratdet akhat na ava a ama kha vak hum phakhan, ama na irangamna pui mieriem hai kha chawi pe a shoniei hai kha mi dieng vak shem pe. ²³ Kiei le rachang boi ama kha kiei le re`er inih, khan kiei na kiroshong pui boi ama kha na chaiachai a atet. ²⁴ “Raikho rono kha na miring `khat ah put ah rushok phakhan, ama na shawmuchumna rang, ram hona mun hai kha rakan a rushe. Inia rumuk boi phakhan ruti, ‘Kavakshokna ki`in khan kiei kir rang kanih.’ ²⁵ Ama na rukir phakhan, makha iruphietviek, khan rietienir a irutet kha vak muk. ²⁶ Khashole ama na rushe a ashiedet ratha shiri shik vak chawi. Khan amani na rulut ua kha mun khan ruawm uh. Khan dawngkhit a miringpa awmchan kha matiengnek khan rushiedet joi.” ²⁷ Jesu na mahi rurieilai khan, mipui kar khan nupang `khat na ra`ai a ruti, “Nang navawng naikawk le nangirumujup runu kha rahvanmuh inih!” ²⁸ Inia ama na ruti, “Hinek hin a rahvanmuh miring hai kha, Pathien chawng rangai a ajui miring hai kha nih.” ²⁹ Khan mipui kha hawng re`ep shishit phakhan, ama na ariei ruput, “Mahi rong hi ashie rong kha inih. Mahi na jetna atawk. Jonah jetna kha niboia amani dieng peh naw nih. ³⁰ Ajarla Jonah kha Nineveh miring hai rang a jetna ruchang kha ang a, Miring Shapa kha mahi rong rang hin jetna kha nih rangnih. ³¹ Chawngshatna khan thang tieng ah rengnu kha na hi rong miring haihi le dingchen ning, tia amani kha aheng rangnih. Ajarla rieliei dawngkhit ah put ah Solomon varna kha rangai ahawng inih. Khan enro, Solomonnek a aliendet miring kha hin awm joi! ³² Nineveh miring hai kha na mahi rong miring hai hi le chawngshatna khan dingchen ning, tia aheng rangnih. Ajarla Jonah chawngriei khan amani na mulung lekna runiei uh. Khan enro, Jonahnek a aliendet miring kha hin awm joi! ³³ “Tute na thaomiei kha muchuk shole, rethe a ninawkle tiengkum thoi ah tet mak. Khania hawng lut miring hai na mieivar kha mukna rang, thaomieishut ah itet inih. ³⁴ Mik hi pum mieivar kha inih. Mik kha tha phakhan, nang pumplang kha var rangnih. Mik kha shie phakhan, nang pumplang kha jing rangnih. ³⁵ Khajarkhan nang dieng a awm mieivar kha jingna boi rang, riring roh. ³⁶ Nang pumplang kha var a ajing `khatshe awm nawkatu, retelang thaomiei `khat na mieivar inepek kha ang a, nang pumplang kha mieivar kha na ship rangnih.” ³⁷ Khan Jesu na chawngruriei a awmlai khan, Pharisee `khat na ama kha bunek puina rang, runik. Khajarkhan ama na rulut a bunek rang rushuh joi. ³⁸ Jesu na bunek mala a ukhut irushukbak boi kha rumuk phakhan, Phariseepa kha shinrudawng pe. ³⁹ Inia Pumi na ama dieng ruti, “Aw Pharisee hai, nangni na hai le kheng kha vai tieng nanglap uh, inia nang shung uatu phamrai le mulungpok ashie kha shipmer a awm. ⁴⁰ Aw amawng miring hai! Vai akonpa kha na shung kha`awm ikon nimak maw? ⁴¹ Khanikengta shung a awm phamrai thaw nanginiei u hai kha numpokpek a peh u roh. Khan enro, nangni rang irikip riethieng rangnih. ⁴² “Inia Pharisee hai, nangni dieng mieriemna awm! Ajarla nangni na pudina le lengmesher, khan rohon ah anshawbo hai kha shemshawm a nangpek uh. Khan chawngshatna le Pathien numpok kha ishawn boi a nangthaw uh. Shik hai kha enda boi a hihaihi nangithaw u rang a shok. ⁴³ “Pharisee hai, nangni rang mieriemna awm! Ajarla nangni na synagogue ah shutna runiei kha nangdit uh, khan rievieithawna mun hai khan mi na chubai inawthaw pui u kha nangdit uh. ⁴⁴ Pharisee hai, danoja hai, khan thanunchan thaw hai, nangni dieng mieriemna awm! Ajarla nangni hi madang boi thankhur hai kha nangnih uh; mi hai na jet boi a makhan lawn a awm uh.” ⁴⁵ Khan danthiei `khat na mashang a ama dieng ruti, “Oja, hihaihi nangriei phakhan, kieini hiawm maimawk nanginepek u inih.” ⁴⁶ Khan ama na ruti, “Danthiei hai nangni diengawm mieriemna awm! Ajarla mi hai dieng iruput ngam boi pokrik kha nangpek uh. Nangni na pokrik hai kha nang khutlawi hai kar a akhatshe le shih u makche. ⁴⁷ “Nangni dieng mieriemna awm! Ajarla nangpa hai na iruthat u thiempulien hai thanmun kha nangkon pe uh. ⁴⁸ Diktak a nangpa hai na iruthaw chon hai kha idik, tia kungnangchang uh. Ajarla amani na thiempulien hai kha iruthat`het u inih, khan nangni na amani thanmun hai kha nangkon pe uh. ⁴⁹ Khajarkhan Pathien na ama varna khanawm ruti, ‘Kiei na amani dieng thiempulien hai le tirtawn hai kha tir rang kanih. Amani eshen kha ruthat u rangnih, khan epshawna rupek u rangnih.’ ⁵⁰ Khajarkhan makha rieliei phun ah put ah rulong thiempulien kholok thishen kha mahi rong dieng hin biena rang a inih. ⁵¹ Makha Abel thishen ah put ah Zachariah thishenshe nih rangnih. Zachariah na lungkheng le riethiengmun kar ah ruthi. Inih, mahi rong dieng hin a bie rang a inih, tia nangni dieng kiriei inih. ⁵² “Danthiei hai, nangni dieng mieriemna awm! Ajarla shingna chabi kha nangni na nangthe uh. Nangnirilikawm lut u makche, khan alut hai kha nangkhar uh.” ⁵³ Ama na hihaihi amani dieng irurieisho le roroia, danoja hai le Pharisee hai na ama kha ajeng a hawng raha pui ua, rahamothoina chawng tampui kha ama dieng rawdawn ruput u joi. ⁵⁴ Khan ama kha shurna rang, ama na iriei rang a chawng ih khan nita`awm hengna rang, ruva a ruawm u joi.

¹ Hilaitak hin, miring bawpbawp na hawng ruchun ua khatlekhat chung ah reter nana u phakhan, akhat changna a Jesu na akhaichawi hai dieng ariei ruput, “Pharisee hai chawh ah put ah nangni riring u roh. Makha amani thanunchan thaw kha inih. ² Ajarla imukhu nieinak kholok phawngthiei boi, iti awm mak, khan jetthiei boi rethe, iti awm mak. ³ Khajarkhan ih nita`awm ajing a nangiti u kha avar a jet rangnih. Khan indan hai shung ah nangiriei u kha inphu hai khan rophong rangnih. ⁴ “Kawlawm hai, nangni dieng kiriei inih, pum athat hai kha chih u naw roh, makha shole ithaw ngam rang niei u mak. ⁵ Inia nangni na nangichih u rang a kha kiei na nangni dieng kirieimasha inih. That shole Gehenna a thongna rang a cham anieipa kha nangni na chih u roh, inih, ama kha chih u roh! ⁶ Varawchawngpi rahnga hi asharion idibak a ijor nimak maw? Nikengta amani kar a `khatshe Pathien maikung a mieniei awm mak. ⁷ Nang lu uah sham kholokshe kha jat iteviek inih. Khajarkhan chih u naw roh; varawchawngpi tampuinek a manlu nangnih uh. ⁸ “Inia kiei na nangni dieng kiriei inih, tunita`awm kiei hi miring hai maikung a norophong ama kha Miring Shapa na`awm Pathien ravantir hai maikung a rophong rangnih. ⁹ Inia miring hai maikung a najawt boi ama kha Pathien ravantir hai maikung a jawt naw nih. ¹⁰ Miring Shapa mieshiet mi rikip kha arangaidam rangnih, inia Ratha Riethieng mieshiet ama kha tu rangaidam naw nih. ¹¹ “Nangni kha synagogue hai le lamkai hai, khan chamniei hai maikung a nawchawi u phakhan, itia nangimashang u rang ninawkle imaw nangiriei u rang, tia mulung mawshaw u naw roh. ¹² Ajarla Ratha Riethieng na, kha phatak khan, nangiriei u rang a kha nuruchuk u rangnih.” ¹³ Khan mipui ah put ah mi `khat na ama dieng ruti, “Oja, inkoklo shemna rang, kulienpa dieng khawn nieriei pe roh.” ¹⁴ Inia ama dieng ruti, “Aw miring, nang chung ua chawngshat rang le nieinak ashem rang, kiei hi tuna maw namadan?” ¹⁵ Khan amani dieng ruriei, “Nangni raphamna kholok ah put ah riring u tana rurung u roh, ajarla miring `khat ringkho hi ruphu a iniei khan awm mak.” ¹⁶ Khan ama na rangshim `khat amani dieng ruriei pe a ruti, “Rawchawng miring `khat loimun khan par tampui rushok pe. ¹⁷ Ama na nining a rumining, ‘Par hai hi atetna rang kieniei boi jarkhan, kiei na imaw thaw ning?’ ¹⁸ Ama na ruti, ‘Kiei na hi thaw rang kanih, kachu hai hi shiet a aliendet mothoi rang kanih. Khan kiei na par hai le kienieinak kholok hi khawn ruchun rang kanih. ¹⁹ Khan kiringphuk dieng ti rang kanih, “Aw ringphuk, kum tampui rang nieinak tampui nangbawm joi, hoiriethiei roh, neh roh, khan ningai roh.” ’ ²⁰ “Inia Pathien na ama dieng ruti, ‘Aw amawng miring! Von jan hin nang ratha kha nang ah put ah koi rang kanih joi, nangirasham nieinak hai kha tu rang a maw nih?’ ²¹ Khajarkhan, ama rangbak a niei ibawm a, Pathien rang a sharachang miring hai dieng khan hi ti rangnih.” ²² Khan akhaichawi hai dieng ruti, “Khajarkhan nangni dieng kiriei inih, imaw nanginek u rang, tia nang ringkho u rang; ninawkle imaw nangirieshiei u rang, tia nang pum u rang nang mulung mawshaw u naw roh. ²³ Ajarla ringkho hi nekleshaknek a, khan nang pum u kha ponlediernek a manlu inih. ²⁴ Va`ak hai khi tinta u roh, amani na vawrawm vawr u mak, khan parawm rawkhawm u mak. Amani rang nieirutungna le achuawm awm pe u mak. Khania Pathien na amani kha ivai inih. Va hainek a khadawr khan a manlu nangnih uh! ²⁵ Khan nang kar uatu na maw lungkhamna niei a atak chung ah rajang `khat maw bo ngam? ²⁶ Khajarkhan shilitetak a`awm nangthaw ngam nawk uala, ijar a nangni na shik hai rang khan lungkhamna nanginiei u maw nih? ²⁷ “Tuirieipar hai khaw tinta u roh, amani na chonawm thaw u mak, khan patawm kher u mak. Inia nangni dieng kiriei inih, Solomonshe na ama lurna kholok le hihai kar a akhat ang a rielien ngam mak. ²⁸ Khan von loipuk ah aring, khan jing a ratapkung ah ivawr champi kha Pathien na khatikhan rielien joiala, Aw ashin a takashawn aniei hai, nangni kha idawrshe maw nierielien u nih? ²⁹ Khan imaw nangnek rang imaw nangshak rang, tia tawk u naw roh, khan lungkhamna niei u naw roh. ³⁰ Ajarla rieliei shung a phung kholok na hihaihi itawk u inih. Inia nangpa u na hihaihi nangrangai u, iti ejet. ³¹ Khania Pathien rengchangna kha tawk u roh, khan hihai kholok hi nangni dieng nobo pe u rangnih. ³² “Chih u naw roh, hawi ashin hai, ajarla nangni dieng rengchangna inepek u hi, nangpa u ningnitna kha inih. ³³ Nang niei u hai kha jor u tana numpokpek peh u roh. Achiet boi shierkawk kha shawng u tana ahek boi niei kha ravan a bawm u roh. Makha murushah na idepna boi, khan lieida na imathangna boi mun inih. ³⁴ Ajarla nang niei u awmna khan nang mulungawm awm rangnih. ³⁵ “Rasham u tana nang thaomiei u kha muchuk u rang roh. ³⁶ Upumpa kha na moiloi bumichinna ah put ah vak kir phakhan, rungak a awm miring hai kha ang u roh. Makha ama na ava a mawkawt kha vak tawh phakhan, amani na relentak a mawlawngna rang a inih. ³⁷ Upumpa kha na vat phakhan, cheveng a ruawm ivakmuk shok hai kha rahvanmuh miring kha nih uh. Diktak a nangni dieng kiriei inih, ama na kawngkhit thaw ning, tia amani kha mushut rangnih, khan va ning, tia amani chon kha thaw pe rangnih. ³⁸ Ama na adi le athum changna vengpa ding phakhan, khatikhan a ivakmuk amani kha rahvanmuh miring kha nih uh. ³⁹ Inia mahi jet u roh, inpumipa kha na murushapa vatna rang a pha kha rujet joiala, ruche ning, tia i`in kha mokhoi naw nih. ⁴⁰ Khajarkhan nangni`awm rasham u roh, ajarla nangrumining boi u phakhan, Miring Shapa kha jong rangnih.” ⁴¹ Khan Peter na ruti, “Pumi, mahi rangshim hi kieini rang ninawkle mi kholok rangawm nangiriei maw nih?” ⁴² Pumi na ruti, “Rangam puithiei le ashing shok kha tumaw nih? Ama kha upumpa kha na ama shok hai apana rang le amani kha rutukthep pha khan nekleshak apeh rang a roiruputna ipek miring kha inih. ⁴³ Upumpa kha jong phakhan, khatikhan a chon iruthaw ivakmuk shok kha rahvanmuh miring tha inih. ⁴⁴ Nangni dieng diktak a kiriei inih, ama niei kholok chung a apoh rang madan rangnih. ⁴⁵ Inia shokpa kha na umulung shung a, ‘Kupumpa kha vak shumthiei,’ tia apashok hai le nupangshok hai kha ajem iput, inek-ishak a jurukhawp joiatu, ⁴⁶ shok pumpa kha na, ama na irumining boi pha le irujet boi nidantak va rangnih, khan ama kha chepna natak pek ning, tia takashawn boi hai kha le atet rangnih. ⁴⁷ “Khan upumpa mulungmining ijet a rurasham boi, ninawkle imining dungjuia athaw ama kha na rawmaw ajeng a tawng rangnih. ⁴⁸ Inia pumpa mulungmining rujet boi, inia rawmaw tawng rang a rutuk inia chon tu ruthaw, ama kha na jangdet a tawng rangnih. Inia arawp ipekna mi rikip dieng arawpdet loi rangnih, khan arawpdet inganshiena ama dieng arawpdet a rangai rangnih. Lungdamna Nimak ⁴⁹ “Rieliei chung hin miei kijongchawi inih. Khan makha achuksha kha nitjoiala, atha rangnih kiti! ⁵⁰ Kiloi rang a baptisma `khat awm, khan baptisma kha hawng rupum masheng kiei hi ajeng a phainaravaimashak! ⁵¹ Rieliei chung hin lungdamna achawi ajong, tia maw nangmining uh? Nimak, kinieriei u hi inih, reshenmashakna kha inih. ⁵² Ajarla tun ah put ah in `khat ah rahnga kha reshen u rangnih: uthum le idi kar a, idi le uthum kar a. ⁵³ Apa le ashapa kar a, ashapa le apa kar a, unu le ashanu kar a, ashanu le unu kar a, tarpi le moinu kar a, khan moinu le tarpi kar a reshenna awm rangnih.” ⁵⁴ Khan mipui diengawm ruti, “Nangni na romiei na mar tieng hawng rajam phakhan, ‘Roshur rangnih’ nangtirelen uh, khan makha oshok. ⁵⁵ Khan thang tieng ah rithi hawng rang phakhan, ‘Nisha rangnih’ nangti uh, khan makha oshok. ⁵⁶ Aw thanunchan thaw hai! Nangni na rieliei le ravan maisho kha nangmelerthiei uh, inia ijar a tun a pha hi nangimeler ngam boi u maw nih? ⁵⁷ “Iloia adik khan nang nining ua chawngnangishat boi u maw nih? ⁵⁸ Ajarla khatikhan nangni na chamniei miring maikung a nere`erpui kha le nangshe phakhan, lam khan machaina rang, thaw roh. Khanawkatu, ama na chawngshat miring dieng ranak a nepek rangnih, khan chawngshat miring kha na lungrokorung ama dieng, khan lungrokorung miring kha na lungroko shung ah nothong rangnih. ⁵⁹ Nang dieng kiriei inih, nang na dawngkhit lepton kha nangpek masheng, makha mun ah put ah vak shok naw tinih.”

¹ Khan Galilee miring hai na rurawthawi u lai khan, Pilate na amani kha ruthat, tia kha mun ah awm mi eshen na Jesu dieng ruriei uh. ² Amani dieng mashang a ruti, “Amani chung a hihaihi shok jarkhan, hihai Galilee miring hai hi Galilee miring shik hainek a munu nieidet miring hai keng, tia nangimining u maw nih? ³ Nangni dieng kinieriei inih, makha nimak, inia nang mulung nanglek u nawkatu, hitihin nangthi u rangnih. ⁴ Ninawkle, Siloam vendai jong pur a shawmlieiriet ide a ruthi hai kha, Jerusalem ah awm miring kholoknek a munu nieidet miring hai keng, tia nangimining u maw nih? ⁵ Nangni dieng kinieriei u inih, makha nimak, inia nang mulung nanglek u nawkatu, hitihin nangthi u rangnih.” ⁶ Khan ama na mahi rangshim hi ruriei, “Miring `khat na ama drakha rohon shung ah thieichangkung `khat runiei. Ama na ara en vat phakhan, vak muh mak. ⁷ Khan ama na drakha rohon aenpa dieng ruti, ‘Mahi thieichangkung hin ara kivak enna hi kum `thumhet nih joi, inia vak muh mi`ing. Mahi tuh rang roh. Ijar a mahi ramshe hi ilo rang a maw nih?’ ⁸ “Ama na mashang a ruti, ‘Pumi, diengvai hin choi a hir katheh malalim, hikum hin tu endi rawi. ⁹ Unuk a ama na ara moshok joiatu atha, khanitnawkatu, mahi nangtukthiei joi.’ ” ¹⁰ Khan ama na Sabbath nikho a synagogue `khat hin mi ruruchuk a ruawm. ¹¹ Khan enro, ratha thaboi na kum shawmlieiriet imawkhawr nupang `khat ruawm, khan awkawng kha rukaier pe a tonpeng a ruding ngam mak. ¹² Jesu na ama kha rumuk phakhan, ama dieng ruti, “Nupangnu, nang khawr ah put ah inathut pe nih joi.” ¹³ Ama na ukhut hai kha ama chung ah rutet pe a relentak a ama kha rumotonpeng joi, khan ama na Pathien kha mapak a ruawm joi. ¹⁴ Jesu na Sabbath nikho a irumadam khan synagogue lamkaipa kha na shanglam a rumashang, khan mipui dieng ruti, “Chon thawna rang ni `ruk awm. Kha nikho hai khan va u tana damna vak muh u roh, inia Sabbath nikho a tu nih naw rosho.” ¹⁵ Inia Pumi na mashang a ruti, “Aw thanunchan thaw miring hai! Nangni `khatkhat na Sabbath nikho khan nang shiecha ninawkle nang ranngam kha shiekon ah put ah nangmoshok a tuineh nangimeshe boi maw nih? ¹⁶ Enro, Abraham shanu mahi nupang hi kum shawmlieiriet Satan na ikhop a irutet inih, Sabbath nikho hin irukhop ah put ah ama hi moshok boi rang a maw nih?” ¹⁷ Ama na hihaihi ruriei phakhan, ere`erpui hai kholok kha jak rumumuk. Khan ama na irumoshok alur chon kholok chung khan ningaina runiei uh. ¹⁸ Khajarkhan ama na ruti, “Pathien rengchangna kha imaw ang? Mahi ih le maw kiei na rekhenna ning? ¹⁹ Mahi mi `khat na anchamru ichawi a orohon ah ivakthe, khan hawng mawng a thingkung hawng chang, khan abak hai khan va hai na rubu ithawna kha le ra`ang inih.” ²⁰ Khan ama na rurieiret, “Pathien rengchangna kha kiei na ih le maw rekhenna ning? ²¹ Mahi nupang `khat na chawh ichawi a jam haikhup `thum le ireche a chawh rachangviek masheng a iruthe kha le ra`ang inih.” ²² Khashole ama na Jerusalem ah rushena lam khan mi ruchuklam a ama na khopui hai le khote hai kha rupangna. ²³ Khan mi `khat na ama dieng ruti, “Pumi, ishan miring hai kha atawm rang a maw nih?” Ama na amani dieng ruriei, ²⁴ “Pakawt rebe khan lutna rang, rojo u roh, ajarla mi tampui na lutna rang, atawk u rangnih, inia mawtawr u naw nih, iti hi kinieriei u inih. ²⁵ Inpumipa kha na othoi a mawkawt kha khar phakhan, nangni na vai tieng ading nangput u rangnih, khan mawkawt kha tawh u ti ning, tia nangti u rangnih, ‘Pumi, Pumi, nawmawlawng pe u roh.’ Khan ama na nangni dieng niti rangnih, ‘Ih ah put ah va maw nangnih uh, kiei na nejet u mi`ing.’ ²⁶ “Khashole nangti u rangnih, ‘Nang maton ah nekleshak kenek uh, khan lamlien hai khan nang nuruchuk uh.’ ²⁷ Khan ama na riei rangnih, ‘Kiei na nangni dieng kieriei, dikna boi chonthaw miring kholok kiei ah put ah shok u rang roh, ih ah put ah va maw nangnih uh, kiei na nejet u mi`ing.’ ²⁸ “Khan nangni na Abraham, Isaac, Jacob, khan thiempulien kholok na Pathien rengchangna khan awm a, nangni kha vai tieng inapai u kha nangmuk u phakhan, chapna le hareshena kha awm rangnih. ²⁹ Khashole miring hai na shim le mar, khan shak le thang ah put ah hawng u ning, tia Pathien rengchangna khan shuh u rangnih. ³⁰ Khan enro, nukna hai kha masha rangnih, khan masha hai kha nukna rangnih.” ³¹ Kha phatak khan Pharisee hai eshen na Jesu kha vak jawng ua ama dieng ruti uh, “Hin ah put ah she rang roh, ajarla Herod na nang kha nathatna rang, mining joi.” ³² Khan amani dieng ruti, “Makha ramui dieng khan she u tana vak ti u roh, ‘Von le jing hin kiei na raikho hai kha nawt rang kanilai, khan ana hai kha madam rang kanilai, khan ni `thum changna khan kikhinmun kha shok rang kanih joi.’ ³³ Khanikengta kiei na von, jing a le thiem a kakichawingir rang a shok joi, ajarla thiempulien `khat kha Jerusalem vai ah ithat rang a kha nithiei naw nih. ³⁴ “Aw Jerusalem, Aw Jerusalem, thiempulien hai athat le ama dieng ijongtir hai kha lung le adeng! Arpui `khat na ete hai kha amatha noi ah irawkhawm kha ang a, idawrshe maw nang nai hai kha kururawkhawm jawt! Inia rujawt u makche. ³⁵ Enro, nang in u kha rokpet a rangah joi. Khan nangni dieng kiriei inih, ‘PUMI riming a ava ama kha rahvantha inih,’ nangti u masheng, numuh u lai naw tinih.”

¹ Khan hitihin ruawm, Sabbath nikho `khat hin Jesu na Pharisee hai lamkai `khat in ah buneh rushe phakhan, amani na ama kha tinruta uh. ² Khan enro, pomrai tawng miring `khat amaton a ruawm. ³ Jesu na mashang a danthiei hai le Pharisee hai dieng rurawdawn, “Sabbath nikho a mi madam hi Dan maw nih, ninawkle dan nih boi maw nih?” ⁴ Inia amani ruawmchien uh. Khan Jesu na ama kha apawttap a rumadam a rumeshe joi. ⁵ Khan ama na amani dieng ruti, “Nang kar ua nang shapa `khat ninawkle nang shiecha `khat hi Sabbath nikho khan khur ah cho joiala, relentak a roshoh naw rawng maw?” ⁶ Hihai chung hin amani na rumashang ngam u mak. ⁷ Khan koimiring hai kha na runiei a richit ipek itawk u awmchan kha rumuk `le, amani dieng rangshim `khat ruriei pe: ⁸ “Tukhat na nangni kha moiloi bumichinna khan nokoi u phakhan, shutna hoi hai khan shuh u naw roh. Miringpa kha na nangnek a richit pekdet rang a miring koithiei. ⁹ Nang dinre akoipa kha na ‘Nang mun kha hipa dieng hin peh roh,’ tia nang dieng nitithiei, khan jaklam a, nang na renemving shutna kha nanglothiei. ¹⁰ Inia mi na nang kha nokoi phakhan, she tana renemving mun khan vak shuh roh. Makha nang anakoi miring kha na nang dieng ‘Kama, hoinadet mun hi hawng loh roh,’ nitina rang a inih. Makhan nang le ashuh miring hai maikung khan nang lurna kha awm rangnih. ¹¹ Ajarla nining a rawlawm ama kha redemashak rangnih, khan nining a rede ama kha alawm rangnih.” ¹² Khan ama akoipa dieng khan ruti, “Jingkarbu ninawkle nitakbu nangrasham phakhan, nang lawm hai, nang uliennai hai, nanginshungkhur hai, khan ringchangpui rawchawng hai kha koi naw roh. Khanitatu amani na`awm nokoi u rangnih; makha inimikirna kha chang rangnih. ¹³ Inia bu nangmichin phakhan, shara miring, khutkekhawr, khan mikchaw miring hai kha koi roh. ¹⁴ Amani na nemele boi jarkhan, nang rahvantha kha nangnih. Ajarla midik hai thoiretna khan nang dieng nimikir rangnih.” ¹⁵ Ama le rushuh hai kar a akhat na makha rujet phakhan, ama dieng ruti, “Pathien rengchangna a buneh rang a ama kha rahvanmuh miring kha inih!” ¹⁶ Khan ama na ama dieng ruriei, “Mi `khat na bumichinna lientak `khat runiei a mi tampui rukoi. ¹⁷ Nitakbu nek dieng khan koimiring hai kha ‘Va u rang roh, irikip rashamsho keng joi,’ tia akoi rang shokpa kha ama na rutir joi. ¹⁸ “Inia kholok na mulung khat a methena ruthaw uh. Akhat changna kha na ruti, ‘Kiei na ram mun `khat kawrawchawk, khan makha aen she boi thalai mak, narangaidam roh.’ ¹⁹ “Akhat na ruti, ‘Kiei na shiecha rawkawt rahnga kawrawchawk, kiei amani enrete she rang kanih, narangaidam roh.’ ²⁰ “Shik `khat na ruti, ‘Kiei nungak kienieilimlai, va ngamlai naw ning.’ ²¹ “Khan shokpa kha vak kir a hihai kholok hi upumpa dieng thangvakkoi joi. Inpumipa kha ashang a oshokpa dieng ruti, ‘Relentak a lamlien ah le khopui lamkawt hai khawn she tana shara miring, khutngaw, mikchaw le kekhawr miring hai kha hin vak chawi roh.’ ²² Khan shokpa kha na ruti, ‘Pumi nang iti kha thawsho keng joi, inia mun tawnglai.’ ²³ “Khan pumi kha na shokpa dieng ruti, ‘Lamton ah le lamkawi khan she tana vak mulut boi tha makche. Makha ki`in hi mishipna rang a inih. ²⁴ Ajarla kikoi hai tute na kinitakbu hi tuidan en naw nih, tia nangni dieng kiriei inih.’ ” ²⁵ Khan mipui kha ama dieng vak ruchun uh, khan amani dieng hiei a ruti, ²⁶ “Kiei dieng ava mi rikip na apa, unu, unungak nai hai, uliennaipangpa hai le uliennaipangnu hai, khan kha kar khan, iringkhotak amumak boi ama kha kakhaichawi kha nih ngam naw nih. ²⁷ Ama cross rupu a kanu ajui boi ama kha kakhaichawi kha nih ngam naw nih. ²⁸ “Ajarla nang kar ua tukhat na vendai mothoi jawt a tu, makha mawtawrna rang, rapapek a shuh ning, tia alut rang a jat kha mushung naw nih maw? ²⁹ Ama na keshun phun a mawtawr ngam nawkatu, ama amuh mi rikip na nuijat a ithaw inih. ³⁰ ‘Hi miring hi na in rashak tu put, inia mawtawr ngam mak,’ iti u inih. ³¹ “Ninawkle, ih reng kha na maw reng shik `khat chung a ra thaw dieng, rapapek a shuh ning, tia ama na bawp shawmdi vak chawi a ama le rathaw ava rang a hi bawp shawm le mawtawr ngam nih maw, tia mining vak naw nih maw? ³² Ama na ra`ithaw pui ngam boi rang a nitjoiatu, ala ah awmlai khan, ama na palai tir a riengieina thaw pui rangnih. ³³ Khajarkhan hitihin nanginiei kholok kha nangpai u nawkatu, nang kar ua akhatshe na`awm kakhaichawi kha nih ngam u naw tinih. ³⁴ “Michi hi atha inih, inia ama tuidan kha thang joiatu, itia maw ma`aret rawng? ³⁵ Pieipak rangawm, khan hir rangawm tha naw nih. Ama kha apai rangnih. Tunita`awm rangaina rang a nokor aniei ama kha na rangai rosho.”

¹ Khan khaichana rawkhawm hai kholok le munu miring hai kholok na ama chawngriei rangai rang, hawng ranai pui uh. ² Khan Pharisee hai le danoja hai na mieshietlam a ruti uh, “Hi miring hi na munu miring hai kha awphawm a amani le ashak.” ³ Ama na mahi rangshim hi riei pe a, amani dieng ruti, ⁴ “Nangni kar a tu `khat na kengam rajakhat iniei kar khan akhat thang pe joi. Ama na shawmkolieiko kha ramthim ah mak a athang `khat kha muk masheng, atawk she naw nih maw? ⁵ Ama na muk phakhan, iring ah mushut a ama na ningai pui. ⁶ Khan in ah va a awlawm hai le ringchangpui hai kha okoi a iti, ‘Kekengam athang kha kumuk joi jarkhan, va u tana ningnavakngai pui u roh.’ ⁷ Kiei na nangni dieng kiriei inih, hitihin mulung lek rang rangai boi midik shawmkolieiko chungnek khan munu miring `khat na mulung lek phakhan, ravan a aliendet ningaina kha awm rangnih. ⁸ “Ninawkle, nupang `khat na drachma shawm ieniei, ama na drachma `khat mathang joiatu, thaomiei muchuk ning, tia in kha phiet rangnih. Khan ama na muk masheng rieirit a tawk naw nih maw? ⁹ Ama na muk phakhan, awlawm hai le ringchangpui hai kha rawkhawm a ‘Kimathang drachma kha kumuk joi jarkhan, ningnavakngai pui u roh,’ iti. ¹⁰ Khan nangni dieng kiriei inih, hitihin munu miring `khat na mulungilekna chung khan, Pathien ravantir hai maikung a ningaina kha awm rangnih.” ¹¹ Khashole Jesu na ruriei, “Miring `khat na shapa `di runiei. ¹² Naipanglampa kha na apa dieng ruti, ‘Kapa, kitumphawm nieinak kha nepeh rang roh.’ Apa na nieilelung kha adin u dieng rushem pe joi. ¹³ “Nikhothang shawt boi a shapa naipanglampa kha na kholok kha rurawkhawm a ramlatak a rushe joi. Khan ienieinak hai kha pawrshawnawk a ruringna joi. ¹⁴ Ama na kholok kha rumeheksho phakhan, makha ram kholok khan nekleshak ajeng a hawng tang joi. Ama kha ravat hawng put joi. ¹⁵ Khan ama na rushe a makha ram ah awm miring `khat dieng chon vak nik joi. Khan ama kha loipuk ah vawk hai aroi rang, rutir joi. ¹⁶ Ama na vawkbu hai kha le vawn rumiship jawt, khan tute na iawm rupelai mak. ¹⁷ “Nining a hawng chehep a ruti, ‘Kapa shok hai na nekleshak ijat kha le ruphu a awm uh, inia kiei la hin vawnchamtuira le athang a ka`awm naw! ¹⁸ Kiei na thoi a kapa dieng kir a ama dieng ti rang kanih, “Kapa, ravan chung a le nang maikung a munu kawthaw joi. ¹⁹ Nang shapa `khat, tia koi rang hi kiei rutuklai mi`ing, kiei hi nang imoroi shok `khat namachang rang roh.” ’ ²⁰ “Khan ama na ruthoi a apa dieng hawng joi. Khan ama na ralaviei a ruawmlai khan, apa kha na ama kha rumuk a lairunat pui. Ama na tan a ruthaw a ama kha rukaw a rutum joi. ²¹ “Khan ashapa kha na ama dieng ruti, ‘Kapa, ravan chung a le nang maikung a munu kawthaw joi. Nang shapa `khat, tia koi rang hi kiei rutuklai mi`ing.’ ²² “Inia apa kha na oshok hai dieng ruti, ‘Relentak a pon athaving kha vak chawi u tana ama hi vak rieshieimashak u roh, khan ukhut hin shumkieviek vak mietieng u roh; khan eke hai hin kekok vak mawrawn pe u roh. ²³ Khan shiecha remet amarting kha vak chawi u tana that u roh. Khan shah u taia ningai moshok u rawi. ²⁴ Ajarla kashapa hi ruthi a hawng ringret, khan ruthang a kimuk nih joi.’ Khan amani na ningai moshok ruput u joi. ²⁵ “Inia ashapa ulienchang kha loipuk ah ruawm. Ama na hawng a in hawng shokdeng `le, larichin le lamna helehoi kha hawng jet. ²⁶ Ama na shok `khat hi rukoi a hihaihi imaw nih, tia rurawdawn. ²⁷ Ama na ama dieng ruti, ‘Nang naipangpa kha hawng kir joi. Ama na damveng a rumuk jarkhan, nangpa na shiecha remet amarting `khat ithat pe keng.’ ²⁸ “Inia mulung ruhang pe a hawng lut jawtlai mak. Khajarkhan apa kha na vai vak shok a ama kha rudawi. ²⁹ Inia ama na apa dieng mashang a ruti, ‘Enro, kum khadawr shawt khan nang chon kihawngthaw inih, khan itikte nita`awm nang chawngpek kha rakan mi`ing, khan nang na itikte nita`awm kawlawm hai le ningai moshokna rang, kecha remet `khatshe nurupeh makche. ³⁰ Inia mahi nang shapa hi na nang nieilelung kholok kha nawchijor hai le shakshoviek shole, hawng kir a nang na shiecha remet amarting `khat nangruthat pe.’ ³¹ “Khan apa na ama dieng ruti, ‘Naitepa, nangtu ningthingkip kiei le nangawm, khan kienieinak hai kholok hi nangtah inih. ³² Kieini na mapak a ningaingir rang nashok, ajarla nang naipangpa hi ruthi a hawng ringret inih, khan ruthang a kimuk nih joi.’ ”

¹ Khan Jesu na akhaichawi hai diengawm ruriei pe, “Rawchawng miring `khat ruawm, ama na inchonpo `khat runiei. Ienieinak hai kha pawrshawnawk a thaw, tia ama chung a chawng hawng tung joi. ² Khajarkhan rukoi a ama dieng ruti, ‘Nang chungchanga kijet hi imaw nih? Nang inchonpona mushungna kha kiei dieng nepeh rang roh, ajarla ki`inchonpo kha nang nithieilai naw tinih.’ ³ “Inchonpo kha na nining a ruti, ‘Kiei na imaw kithawthiei awm? Kupumi na inchonpona kha kiei ah put noloi pe rangnih joi. Pieipak choi la kiei ngam mi`ing; khutdaw lawn rang la kiei kajak. ⁴ Miring hai na amani in ah kiei hi nuruloinathiei rang, kiei na imaw kithaw rang, iti kha kiei kejet joi.’ ⁵ “Ama na upumi lieishieton hai kha akhatkhat a rukoi a akhat changna dieng ruti, ‘Nang na kupumi shier ijat maw nangton?’ ⁶ Ama na rumashang, ‘Thao batos rajakhat.’ Khan ama dieng ruti, ‘Nang shierche hi loi tana relentak a shawm rahnga miejiek roh.’ ⁷ Khashole akhat dieng rurawdawn, ‘Nang la ijat maw nangton?’ Ama na rumashang, ‘Gehu koros rajakhat.’ Ama dieng ruti, ‘Nang shierche hi loi tana shawm riet miejiek roh.’ ⁸ “Dikna boi inchonpo kha na shingveng a ruthaw jarkhan, pumi kha na rumapak. Ajarla hi rong miring hai na amani rong hin mieivar miring hainek a shing uh. ⁹ Khan kiei na nangni dieng kiriei inih, dikna boi nieilelung kha le lawm thaw u roh, makha rieshiet phakhan, amani na kumshawt a awmna khan noloi u rangnih. ¹⁰ “Lekte chung a takashawn rang a rutuk ama kha tampui chung a awm takashawn rang a rutuk inih, khan lekte chung a adik boi miring kha tampui chung a awm adik boi miring kha inih. ¹¹ Dikna boi nieilelung khan takashawn rang a rutuk boi nangrunih uala, tu na maw nangni kha adik nieilelung khan nanganshie u nih? ¹² Khan mi nieinak khan takashawn rang a rutuk nangrunih u nawkala, tu na maw nang tatak u kha nepeh u nih? ¹³ “Shok tute na pumi `di chon thaw ngam naw nih, ajarla ama na akhat kha mukmak a shik `khat kha numpok rangnih. Ninawkle, akhat kha pawm a shik `khat kha aheng rangnih. Pathien le nieilelung dire chon thaw ngam u naw tinih.” ¹⁴ Khan shierdit Pharisee hai kha na`awm hihai kholok hi rujet ua ama kha eshe a rulai uh. ¹⁵ Khan amani dieng ruti, “Nangni na miring hai maikung a nang nining a dik nangrasha uh, inia Pathien na nang mulung u kha ejet. Ajarla miring hai maikung a rashang kha Pathien maikung a tu mitiroi `khat inih. ¹⁶ “John phashe khan Dan le Thiempulien hai kha rurophong uh. Khan ah put khan Pathien rengchangna kha rurophong a makha shung khan mi rikip na rangrat a rulut uh. ¹⁷ Inia Dan hailak `khat acho rangnek a ravan le rieliei athang rang a kha baidet. ¹⁸ “I`inkonu kha imele a shik `khat iniei mi rikip uire ithaw inih, khan imele nupang aniei ama kha na uire ithaw inih. ¹⁹ “Rawchawng miring `khat na ponshenrin le ponramasha thaning rieshiei a ruawm. Ama na ningthingkip lungtawr a nekleshak rushak. ²⁰ Khan Lazarus iti shara miring `khat apan a tuisharlam a apakawt khan ruawm. ²¹ Ama na rawchawngpa tebol ah put ah jong cho burama hai kha le vawn rumiship jawt. Khan ui haishe na`awm ava ua, ama apan a tuishar kha rumieliek pe uh. ²² Sharapa kha ruthi a Abraham makap ah awmna rang, ravantir hai na ruchawi u joi. Khan rawchawngpa kha`awm ithi a rukhum u joi. ²³ Khan thikho khan shawrievieilam a ring rakang a, ralaviei a Abraham na amakap ah Lazarus pawmlam a awm kha hawng muk. ²⁴ “Khan ama na he rashangtak a ruti, ‘Aw kapa Abraham, nang roihoina kha kiei dieng natetna roh, khan Lazarus kha jong tir tana ukhut par le tui shun rieshie kiemieliei hi nojong rachakmashak pe rosho. Ajarla kiei na mahi mieichon hin shawrievieilam a ka`awm joi.’ ²⁵ Inia Abraham na ruti, ‘Naitepa, nang na nangringlai khan atha hai kha nangmuk a Lazarus na ashie hai imuk kha mininghep roh, inia tun ama na hoina muk a nang na shawrievieina kha nangmuk joi. ²⁶ Khan hihai kholok hi khea nangni le kieini kar a atawngvawng lientak `khat awm joi. Khajarkhan hin ah put ah nangnishe, khan khan ah put ah kieinishe hawng a rakan rawng, tia imining hai kha na mawtawr u lai naw nih.’ ²⁷ “Khan ama na ruti, ‘Aw kapa, ama kha kapa in ah nangtirnathiei rang, kininik. ²⁸ Ajarla kuliennai hai rahnga kieniei, amani dieng kungnojongchang pe rosho, khanawkatu amaniawm mahi shawrievieina mun hin hawng u rang keng.’ ²⁹ Inia Abraham na ama dieng ruti, ‘Amani na Moses le thiempulien hai kha niei uh, amani chawng kha rangai u rosho.’ ³⁰ Inia ama na ruti, ‘Nimak, Aw kapa Abraham, athi ah put ah mikhat she joiatu, amani na mulung lek u rangnih.’ ³¹ Inia Abraham na ama dieng ruti, ‘Amani na Moses le thiempulien hai chawng kha rangai u nawkatu, athi ah put ah hawng thoi miring kha na`awm mawkawi ngam u naw nih.’ ”

¹ Khan Jesu na khaichawi hai dieng ruriei, “Keruthuina hai ajong boi rang a hi nithieilai naw nih, inia omojong ama rang khan, idawr a khawk maw nih naw! ² Ashin hihaihi kar a akhat keruthuimashak rangnek a tu, ama rek ah shumhiei makhai pe a tuikhanglien shung ah vawr rang a kha ama rang thadet rangnih. ³ Riring u roh. Nang uliennai kha na munu thaw joiatu, rawkawk roh, khan umulung lek joiatu, rangaidam pe roh. ⁴ Khan nikhat a voishiri nang chung a munu thaw joiawm, nang dieng voishiri vak hiei a ‘Kumulung kelek joi,’ ti joiatu, rangaidam nangipek rang a shok.” ⁵ Khan tirtawn hai kha na Pumi dieng ruti uh, “Katakashawn u hi namarat pe shishit u roh.” ⁶ Pumi na ruriei, “Nangni na anchamru tiettak a`awm takashawn kha nangniei uatu, mahi mana thingkung dieng hin ‘Nang rawphawi tana tuikhanglien shung khawn vak mawng roh,’ nangti u sheawm ama na anarangai pe rangnih. ⁷ “Nang kar ua tuna maw shok `khat loipuk ah put ah ninawkle kengam hai aroi ah put ah hawng shoklim nangniei ua, ‘Relentak a va tana bu vak neh rang roh,’ ti u rawng? ⁸ Inia makha tinaw tinih. Kha ruhut a ‘Kenek rang shakthiei rasham roh, khan nang kawng kha khit tana kenek kashaklai hin chon nawthaw pe roh, khan hihai shole, nangnek nangshak rangnih,’ ti u naw rawng maw? ⁹ Chawngpek hai kha thaw jarkhan, ama na mapakna maw niei nih? Mapakna niei naw nih, tia takakawshawn. ¹⁰ Khatikhan nangniawm, nangni dieng a pek chawngpek kholok kha nangthaw u phakhan, ti u roh, ‘Kieini hi rutuk boi shok hai kha nanih uh, kieini na thawphawm kha nithaw u inih.’ ” ¹¹ Khan hitihin ruawm, Jesu na Jerusalem ah rushena khan Samaria le Galilee kha phaw a rupang. ¹² Khan ama na kho `khat ah rulut phakhan, raithawnaw tawng apa shawm na rurumuk pui uh. ¹³ Amani na ralaviei a ruding ua he rashangtak a ruti uh, “Aw Pumpa Jesu, nang roihoina kha kieini dieng natetna u roh!” ¹⁴ Khan ama na rumuk phakhan, amani dieng ruti, “Nangni na she u tana thiempu hai dieng khawn vak mumuk u roh.” Khan ashe u le roroia, amani kha ruriethieng u joi. ¹⁵ Inia amani kar a akhat na adam kha rumuk `le, Pathien mapaklam a vak kir. ¹⁶ Khan ekeshun a vak bawklap a ama kha rumapak. Ama kha Samaria miring runih. ¹⁷ Khan Jesu na mashang a ruti, “Iriethieng hai kha shawm anih boi maw nih? Oko hai kha khoshekawt ah maw awm u joi? ¹⁸ Mejet boi hipa hi niboia vak kir a Pathien lurna kha ipek boi u maw nih?” ¹⁹ Khan ama dieng ruti, “Thoi tana she rang roh, nang takashawn kha na nang kha namadam joi.” ²⁰ Khan Pharisee hai na Pathien rengchangna kha itik a jong shok rang a maw nih, tia rurawdawn u phakhan, Jesu na amani dieng rumashang, “Pathien rengchangna hi mukthiei nieinak kha le ajong rang a nimak, ²¹ ninawkle amani na ‘Enro, hin awm joi!’ ninawkle ‘Enro, khawn awm joi!’ tithiei nimak. Ajartu Pathien rengchangna kha nang shung ua awm inih.” ²² Jesu na khaichawi hai dieng ruti, “Nangni na Miring Shapa nikho hai kar a akhat nangimuk jawtna u nikho kha jong rangnih. Makha nangni na muh u naw tinih. ²³ Amani na niti u rangnih, ‘Enro, hin awm joi!’ ninawkle ‘Enro, khawn awm joi!’ niti u rangnih. Makhan she u naw roh, khan rojo u naw roh. ²⁴ Khomelek a ravan shir `khat ah put ah shir `khatshe i`eh kha ang a, Miring Shapa kha ama Nikho khan, kha ang rangnih. ²⁵ Inia rapapek a ama na shawna tampui doi rangnih, khan mahi rong hi na nawt rangnih. ²⁶ “Khan Noah nikho hai khan a ashok kha ang a, Miring Shapa nikho hai khanawm kha ang rangnih. ²⁷ Noah na rokongpui khan rulut masheng, khan tui hawng lien a amani kholok kha rumathangviek masheng, miring hai na rushak runek uh, inruniei uh, khan inniei rang khan rupek uh. ²⁸ “Khatikhan Lot nikho hai kha ang a, amani na rushak uh, runek uh, nieinak rurawchawk uh, nieinak rujor uh, choicha ruling uh, khan in rumothoi uh. ²⁹ Inia Lot na Sodom imathanna nikho khan miei le mieidi kha ravan ah put ah roshur ang a jong shur a amani kholok kha rumathang uh. ³⁰ “Miring Shapa kha jong malarna nikho khan makhatak kha ang rangnih. ³¹ Makha nikho khan inphu ah awm mi kha na jong chum a in ah awm ienieinak hai kha jong loilai naw rosho. Kha ang khan loipuk ah awm mi kha na vak kirlai naw rosho. ³² Lot inkonu kha mininghep u roh. ³³ Iringkho shanna rang a atawk miring kha thang rangnih, khan iringkho mathang ama kha na makha ashan rangnih. ³⁴ Kiei na nangni dieng kiriei hi inih, makha jan khan jakhang `khat ah miring `di awm rangnih, akhat kha chawi rangnih, khan shik `khat kha mak rangnih. ³⁵ Nupang pasha `di shum ah shanghak shukshom u rangnih, akhat kha loi rangnih, khan shik `khat kha mak rangnih. ³⁶ Miring pasha `di loipuk ah awm rangnih, akhat kha loi rangnih, khan shik `khat kha mak rangnih.” ³⁷ Amani na mashang a ruti uh, “Khoshekawt a maw, Pumi?” Ama na amani dieng rumashang, “Rok awmna mun khan langke hai na lawp `khat a ruchun u rangnih.”

¹ Khashole ningthingkip mulungrakai boi a nikna rang, Jesu na amani dieng rangshim ruriei pe. ² Ama na ruriei, “Khopui `khat hin Pathien chih boi le mi ishawn boi athaw chawngshat miring `khat ruawm. ³ Khan makha khopui khan mieirawng `khat ruawm; mieirawng kha na ama dieng ava a ruti, ‘Nere`erpui ah put ah kiei hi nimidik roh.’ ⁴ “Phabawng `khat hi ama na rujawt pe mak, inia hihaihi shole, nining a ruti, ‘Kiei na Pathien kha kichih joi nawkawm, khan mi ishawn boi a kawthaw joiawm, ⁵ hi mieirawng hi na kiei hi shutnadingna nemejet boi jarkhan, ama hi kiei na midik rang kanih, khanawkatu ama na rawnaw a ava hi na kiei hi nomoboi rang keng joi’ ” ⁶ Khan Pumi na ruti, “Midik boi chawngshatpa iriei kha rangai u roh. ⁷ Ama na amani le shawttak doi pui joiawm, shun le jan a ra`ai imadansha hai kha Pathien na midik boi a maw tet nih? ⁸ Kiei na nangni dieng kiriei inih, ama na amani kha relentak a midik rangnih. Khania Miring Shapa kha na jong phakhan, rieliei chung hin takashawn kha jong muh nih maw?” ⁹ Khan amanirilik dieng rangamna midik kanih ati hai dieng khanawm mahi rangshim hi ruriei pe: ¹⁰ “Miring pasha `di hi na riethiengmun ah anih rushe uh. Akhat kha Pharisee inih, khan akhat kha khaichana rawkhawm miring inih. ¹¹ Pharisee miringpa kha na ding a hitihin runik: ‘Pathien, kanamapak, ajarla kiei hi miring shik hai, murushah miring hai, midik boi hai, uirethaw miring hai, ninawkle khaichana rawkhawm miringpa hi a`ang nimi`ing. ¹² Kiei na hapta `khat a voidi chamrakodoi, kimuk hai ijat kha kiei na shawm a `khat kepek.’ ¹³ “Inia khaichana rawkhawm miring kha na ralaving a ding a ravan tiengsheawm khonga ngam boi a, umulung teilam a, ruti, ‘Pathien, kiei hi munu miring kha kanih, nang roihoina kha natetna roh!’ ¹⁴ Kiei na nangni dieng kiriei inih, mahi miringpa hi na, akhatpanek khan, midik a i`in ah rukir joi. Ajarla nining a mapak mi rikip kha redemashak rangnih, khan nining a rede mi rikip kha alawm rangnih.” ¹⁵ Khan naite hai kha Jesu na shitna rang, amani na ama dieng vak chawi uh, inia akhaichawi hai na rumuk phakhan, amani kha rurawkawk uh. ¹⁶ Inia Jesu na amani kha rukoi a ruti, “Naite hai kha kiei dieng ava rang a kha jawt pe u roh, amani kha makha u naw roh, ajarla kha ang hai dieng khan Pathien rengchangna kha awm. ¹⁷ Diktak a nangni dieng kiriei inih, naite `khat ang a, Pathien rengchangna kha aloi boi ama kha na itikte nita`awm makhan lut naw nih.” ¹⁸ Khan rampo miring `khat na ama dieng rurawdawn, “Aw Oja atha, kumshawt ringna kutumna rang, kiei na imaw thaw ning?” ¹⁹ Khan Jesu na ama dieng ruti, “Ijar a kiei hi atha, tia nanginokoi maw nih? Pathien niboia tute atha awm mak. ²⁰ Chawngpek hai kha nangjet: ‘Uire thawthiei naw tinih,’ ‘Mi thatthiei naw tinih,’ ‘Muruthiei naw tinih,’ ‘Adik boi a kungchangthiei naw tinih,’ ‘Nangnu le nangpa kha richit peh roh.’ ” ²¹ Khan ama na ruti, “Hihai kholok hi korothar chang ah put ah kihawngrung nih joi.” ²² Inia Jesu na rujet phakhan, ama dieng ruti, “Khanikengta thaw rang `khat nangvatlai, nanginiei ijat kha jor tana shara hai dieng vak shem pe roh, khan ravan a bawmniei kha nangniei rangnih. Khan va tana nujui roh.” ²³ Inia mahi ama na rujet phakhan, ajeng a mulung rushaw pe joi, ajarla ama kha ajeng a rawchawng miring `khat runih. ²⁴ Khan makha rumuk phakhan, Jesu na ruti, “Shumleshier aniei hai na Pathien rengchangna a alut rang a hi idawr a matat maw nih! ²⁵ Rawchawng miring `khat na Pathien rengchangna alut rangnek a tu, sharingshiei `khat na shim nokor ah apang rang a kha baidet.” ²⁶ Khan rangai miring hai kha na ruti uh, “Khanitala tu na maw shanna muh ngam nih?” ²⁷ Khan ama na ruti, “Miring hai dieng a anithiei boi chon hai kha Pathien dieng tu anithiei inih.” ²⁸ Khan Peter na ruti, “Enro, ih kholok kurumak ua kinurujui u inih.” ²⁹ Khan Jesu na amani dieng ruriei, “Diktak a nangni dieng kiriei inih, in le loi ninawkle nungak le nai ninawkle uliennai shokpui ninawkle nu le pa hai kha Pathien rengchangna rangbak khan a rumathan ³⁰ tute na tun a pha le ajong rang a rong hin kumshawt ringna kha rothom a muk boi a awm naw nih.” ³¹ Khan khaichawi shawmlieidi kha shemrushai a amani dieng ruti, “Enro, kieini hi Jerusalem ah ahawng rang a nanih u joi. Khan Miring Shapa chungchanga thiempulien hai dieng irumiejiekna kholok kha hawng rupum rangnih joi. ³² Ajarla ama kha Phungshik hai dieng rupek u rangnih, ama kha engshiet a ruthaw u rangnih. Ama kha maimawk rupek u rangnih, khan ama kha rumiechiei u rangnih. ³³ Ama kha rujem u ning, tia ruthat u rangnih, khan ni `thum changna khan thoiret rangnih.” ³⁴ Inia hihaihi amani na rujet ngam u mak, khan mahi rieichawng hi amani ah put ah rethe ruchang, khan amani na rieichawng kha rujet u mak. Mikchaw khutdaw ³⁵ Khan hitihin ruawm, ama na Jericho ivakranai pui le roroia, mikchaw miring `khat na lamkaw khan khutdawlam a ruawm. ³⁶ Ama na mipui vak pang kha rujet `le, mahi ih chonshok maw nih, tia rurawdawn. ³⁷ Khan amani na Nazareth Jesu vak pang keng, tia ama dieng thangrukoi uh.” ³⁸ Khan ama na ra`ailam a ruti, “David Shapa Jesu, nang roihoina kha kiei dieng hin natetna roh!” ³⁹ Khan amaton ah alawn hai kha na awmchienna rang, rurawkawk uh, inia ama na rura`ai shishit, “David Shapa, nang roihoina kha kiei dieng hin natetna roh!” ⁴⁰ Jesu na ding a ama dieng vak chawina rang, chawng rupek. Khan avak ranai pui phakhan, ama dieng rurawdawn, ⁴¹ Ama na ruti, “Nang rang kiei hi imaw nang nawmawthaw jawt?” Khan ama na ruti, “Aw Pumi, kumukthieina rang, kimik hi namavar pe roh.” ⁴² Khan Jesu na ama dieng ruti, “Muh rang roh, nang takashawn kha na namadam joi.” ⁴³ Khan relentak a imik kha hawng var pe joi, khan Pathien kha mapaklam a anu rujui joi. Khan amuh miring kholok na Pathien kha rumapak uh.

¹ Khan Jesu na Jericho kha rulut a rupang joi. ² Khan enro, Zacchaeus iti miring `khat ruawm. Ama kha khaichana rawkhawm ulienchang le mirawchawng `khat runih. ³ Ama na Jesu kha tumaw nih, iti kha rumuk jawt, inia dungtawi miring runit jarkhan, mipui kar khan ama na rumuh ngam mak. ⁴ Khan ama na maton shawn a rutan a Jesu vak pangna rang a lam khan muknathiei rang, ama na thieipong kung `khat ah ruka. ⁵ Jesu na makha mun kha vak shok phakhan, chung tieng khongrunga a ama dieng ruti, “Zacchaeus, relentak a jong chum roh, ajarla von nikho hin kiei na nang in ah tungngir rang kanih.” ⁶ Khan ama na relentak a jong chum a ningailam a ama kha lamjawng ruthaw. ⁷ Khan amuh miring kholok na muruk a mieshiet a ruti uh, “Mununiei miring `khat in ah tungna rang lut joi.” ⁸ Zacchaeus na iding a Pumi dieng ruriei, “Enro, shara miring hai dieng kiei na kiniei khoi `khat pek rang kanih, Aw Pumi, khan lehawn a mi dieng koloi a tu, kiei na shem mili a thung rang kanih.” ⁹ Khan Jesu na ama dieng ruti, “Von nikho hin shandamna kha hi inshung hin jong joi. Ajarla ama hiawm Abraham shapa `khat inih. ¹⁰ Ajarla Miring Shapa kha miring athang atawk le ashan rang a ajong inih.” ¹¹ Khan amani na irangai u le roroia, rangshim shik `khat hi ruriei pe. Ajarla ama na Jerusalem ivakranai pui le roroia, Pathien rengchangna kha malangrelen rangnih joi, tia amani na rumining uh. ¹² Khajarkhan ama na ruriei, “Rimingniei miring `khat na ramlatak `khat ah ama rang rengchangna kha aloi she a vak kir rang a inih. ¹³ Khan ama na oshok shawm kha rukoi a mina shawm hi amani dieng rupek a ruti, ‘Kiei na kavakkir masheng, nangni na hihaihi le rievieiruthaw u roh.’ ¹⁴ “Khania ram miring hai kha na ama kha rumukmak uh, khan amani na palai rutir ua hitihin chawng rumawchawi uh, ‘Mahi miringpa hi na kieini inopok u rang a hi kieini na dit u mi`ing.’ ¹⁵ “Khan ama na rengchangna kha le vak kir phakhan, ama na shier irupek shok hai kha koina rang, chawng rupek joi. Makha tu nitjoiawm rievieithaw a irumupung kha jetna rang a inih. ¹⁶ “Khan akhat changna kha na ava a ruti, ‘Pumi, nang mina kha le mina shawm kurumupung joi.’ ¹⁷ “Khan ama dieng ruti, ‘Mapak awm, Aw shok atha; nang hi ashin nieinak khan takashawn rang a rutuk nangnit jarkhan, nang na khopui shawm chung a cham aniei kha nangnih rangnih.’ ¹⁸ “Khan adi changna kha na ava a ruti, ‘Pumi, nang mina kha le mina rahnga kurumupung joi.’ ¹⁹ “Khan hipa dieng hinawm ruti, ‘Nang khopui rahnga chung a cham aniei kha nangnih rangnih.’ ²⁰ “Khan shik `khatpa kha na ava a ruti, ‘Pumi, nang mina hi enro, kiei na pon le kitumrep inih. ²¹ Ajarla kiei na nang kha kinichih. Ajarla nang hi mikhawk `khat nangnih, nang itetna boi khan nangloi, khan nangivawrna boi khan nangrawkhawm.’ ²² “Khan ama dieng ruti, ‘Nang ner ah put ah kiei na nang chung a chawngshat rang kanih, Aw shok ashie nang. Kiei hi mikhawk, kitet boi kha kiloi, khan kivawr boi kha kiei na kirawkhawm, iti kha nangijet. ²³ Khan kavakkir phakhan, makha athoi le kawrawkhawmna rang, ijar a kieshier kha niei`in ah nangitet boi maw nih?’ ²⁴ “Khan iedieng ah ading hai dieng khan ama na ruti, ‘Mina kha ama ah put ah loi u tana, mina shawm anieipa dieng khan peh u roh.’ ²⁵ (Khan ama dieng ruti uh, ‘Pumi, ama na mina shawm niei joi.’) ²⁶ ‘Kiei na nangni dieng kiriei inih, aniei mi rikip dieng arawpdet a pek rangnih, khan aniei boi ama dieng khan, inieidakshe kha, loi pe rangnih. ²⁷ Khan kiei hi amani chung a reng iniminit jawt boi narahapui hai kha hin vak chawi u tana kamaikung hin that u roh.’ ” ²⁸ Khan Jesu na hihaihi ruriei shole, ama`awm Jerusalem tieng rushe joi. ²⁹ Khan hitihin ruawm, ama na Olivet iti Lawn ah awm Bethphage le Bethany vak shokdeng phakhan, akhaichawi hai pasha `di kha tir a ruti, ³⁰ “Nangni na vararashan kho khawn she u roh. Makhawn lut u tana tute na ishutna boilai ranngam acha remet `khat ruthung a awm nangmuk u rangnih. Makha thut u tana vak chawi u roh. ³¹ Khan tukhat na ‘Ijar a nangithut u maw nih?’ tia nawrawdawn u joiatu, ‘Pumi na rangai,’ tia mashang u roh.” ³² Khan tir miring hai kha na rushe ua, amani dieng iruti dungjuia vak muk uh. ³³ Khan amani na ruthut u phakhan, upum hai kha na amani dieng ruti uh, “Ijar a ranngam acha remet kha nangithut u maw nih?” ³⁴ Amani na rumashang uh, “Ajarla Pumi na mahi rangai.” ³⁵ Makha Jesu dieng ruchawi uh, khan ranngam acha remet chung khan pon rumukhu ua, ama chung khan Jesu kha rumushut u joi. ³⁶ Khan ashe le roroia, opon u hai kha lamlien khan rupha uh. ³⁷ Ama na Olive Lawn ah put ah lam chiengbai kha vak dep phakhan, khaichawi hawipui kha na imuk u chonrekhek kholok jarkhan, amani na he rashangtak a ningailam a Pathien kha rumapak uh. ³⁸ Amani na ruti uh, “ ‘PUMI riming a ajong Rengpa kha rahvantha inih!’ Ravan a lungdamna le lurna kha rashangving nih rosho!” ³⁹ Mipui kar a awm Pharisee eshen na ama dieng ruti uh, “Oja, nang khaichawi hai khaw rawkawk roh.” ⁴⁰ Ama na mashang a ruti, “Kiei na nangni dieng kiriei inih, amani khaw a`awmchien u rang a nitjoiatu, lung hai khaw na hawng ra`ai u rangnih.” ⁴¹ Khan ama na khopui kha vak ranai pui a rumuk phakhan, ama chung a rie`ieklam a ruchap. ⁴² Ama na ruti, “Von nikho hin nangni na nang lungdamna u rang a kha nangjet uala, thadet rangnih! Inia nang mik uah put ah rethesho joi. ⁴³ Nang narahapui hai na ramun kon a inahieichipna u le khan shie kholok a ine`epna u rang a pha kha jong rangnih joi. ⁴⁴ Khan nangni kha nang nai hai le pieipak chung ah nawrawnawi u rangnih. Khan lung hai kha akhat chung ah akhat rotho `khatshe mah u naw nih, ajarla Pathien na inojongphakna u pha kha nangni na rujet u makche.” ⁴⁵ Khashole ama na riethiengmun ah rulut a kha mun ah ajor le rawchawh hai kha anawt ruput joi. ⁴⁶ Khan ama na ruti, “Hitihin rumiejiek, ‘Ki`in hi nikna in inih,’ inia nangni na mahi ‘minieisho hai koh’ nangmachang u joi.’ ” ⁴⁷ Khan ama na riethiengmun khan ningthingkip mi ruruchuk a ruawm. Thiempu ulien hai, danoja hai, khan lamkai hai kha na ama kha thatna rang, lam rutawk u joi. ⁴⁸ Inia amani na thawnathiei lam kha rumuh u mak, ajarla ama chawng rangai hai kholok na ama chawng kha mulungluttak a rurangai uh.

¹ Khan hitihin ruawm, nikhat hin Jesu na riethiengmun ah miring hai kha ruruchuk a athachawng rushemlai khan, thiempu ulien hai le danoja hai na, shierulien hai le lawp `khat a, ama kha rurodoi pui uh. ² Amani na riei a, ruti uh, “Ih cham nanginiei a hihaihi nangithaw maw nih? Ninawkle, hihaihi nangthawnathiei rang, tu na cham inurupek maw nih?” ³ Amani dieng mashang a ruti, “Kiei na`awm nangni dieng chawng `khat nawrawdawn u rawng, khan kiei dieng namashang u roh: ⁴ John na baptisma imoloi kha ravan ah put ah maw nih, ninawkle miring hai ah put ah ajong maw nih?” ⁵ Amani khatlekhat na rureshe ua ruti uh, “Kieini na ‘Ravan ah put ah keng,’ niti u joiala, ‘Ijar a ama kha takanangishawn boi u maw nih?’ niti rangnih. ⁶ Inia kieini na ‘Miring ah put ah keng,’ niti u joiala, mi kholok na kieini hi lung le nedeng u rangnih. Ajarla amani na John hi thiempulien `khat keng, iti hi takarushawn uh.” ⁷ Khajarkhan ama kha ih ah put ah ajong maw nih, iti kha jet u mi`ing, tia rumashang uh. ⁸ Khan Jesu na amani dieng ruti, “Kiei na`awm hihaihi ih cham le kithaw maw nih, iti kha nangni dieng nieriei u naw ning.” ⁹ Khan ama na amani dieng mahi rangshim hi ariei ruput joi: “Miring `khat na drakha rohon `khat hi rurohon a loithaw miring hai dieng rupek joi. Khan ama na pha shawttak rang khan khomijin rushe joi. ¹⁰ Khan pha hawng shok phakhan, drakha rohon ah put ah ara kha loina rang, oshok `khat hi loithaw hai dieng rutir joi. Inia loithaw hai kha na jemjem ua, khut rokpet a ama kha rumikir uh. ¹¹ Khan ama na shok shik `khat rutirret. Makha`awm maimawk roitak a rujem u shole, khut rokpet a rumikir uh. ¹² Khan takthar a athum changna kha rutir a makha`awm shebe rupek ua rupai uh. ¹³ “Makhan drakha rohon pumi kha na ruti, ‘Kiei na imaw thaw ning? Kunumpoktak kashapa hi kiei na tir rang kanih joi. Ama hi rumuk u phakhan, richit rupek u awm jawt.’ ¹⁴ “Inia loithaw hai kha na ama kha rumuk u phakhan, khatlekhat na reshe a ruti uh, ‘Ama hi koklo kha inih. Inkoklo hi natah u changna rang, ama hi that u rang rawi.’ ¹⁵ Khan drakha rohon ah put ah rupai ua ama kha ruthat u joi. Khanitala drakha rohon pumpa kha na amani kha imaw lawt nih? ¹⁶ Ama na she ning, tia loithaw hai kha vak mathang rangnih, khan drakha rohon kha shik miring hai dieng pek rangnih.” Amani na rurangai u phakhan ruti uh, “Makha nihet mak!” ¹⁷ Khan Jesu na amani kha en a ruti, “ ‘Inthaw hai na iruenda u lung kha kik ah runiei lung kha ruchang,’ tia irumiejiek kha imaw itina? ¹⁸ Makha lung chung a acho ama kha leklek a koi rangnih. Tunita`awm ichona miring kha rawnawi ning, tia vaiphin rachangmashak rangnih.” ¹⁹ Khalaitak khan danoja hai le thiempu ulien hai na ama chung a khut rujawn jawt uh. Ajarla rangshim kha amani ikapna a iruriei keng, iti kha amani na rujet uh. ²⁰ Khajarkhan ama chawngriei ah put ah shurna rang, ranakniei dieng le chamniei rampo dieng pekna rang, amani na ama kha ruva uh. Khan midik rasha a mitinta hai kha rutir uh. ²¹ Khan amani na rawdawn a ruti uh, “Oja, thaning a nangriei khan nang ruchuk, iti kieini na kejet uh, khan nang na enshietenlar thaw makche, inia Pathien lam kha adik a mi nangruchuk. ²² Caesar dieng khaichana pek hi Dan maw nih, ninawkle dan nih boi maw nih?” ²³ Khan Jesu na amani hongthaw kha rujet pe a amani dieng ruti, “Ijar a kiei hi ennanginerete u maw nih? ²⁴ Dinari kha kiei dieng numumuk u roh. Mahi na tu rilim le tu khetmiejiek maw ieniei?” Khan amani na rumashang uh, “Caesar.” ²⁵ Khan amani dieng ruti, “Khanitatu Caesar tah hai kha Caesar dieng peh u roh, khan Pathien tah kha Pathien dieng peh u roh.” ²⁶ Khan vanoi maikung khan ama chawngriei a rumocho ngam u mak. Kha ruhut a ama chawng mashang khan shindawngna runiei ua ruawmchien u joi. ²⁷ Khan thoiretna awm mak ati Sadducee eshen na ama kha vak jawng uh, khan rurawdawn uh. ²⁸ Amani na ruti uh, “Oja, Moses na kieini dieng rumiejiek, makhala ulienpa `khat na nai niei boi a thi joiatu, ulienpa chi mothoina rang, ulienpa inkonu kha anaipangpa na iloi rang a shok. ²⁹ Poro shiri ruawm uh. Akhat changna kha na inruniei a nainiei boi a ruthi joi. ³⁰ Khan adi changna kha na nupangnu kha runiei a nai niei boi a ruthi joi. ³¹ Khashole athum changna kha na ama kha ruloi. Kha le ra`angre a poro shiri hai kha nai niei boi a ruthi u joi. ³² Dawngkhit a nupangnu kha`awm ruthi joi. ³³ Thoiretna khan nupangnu kha tu inkonu maw chang nih? Ajarla ama kha poro shiri kha na iruniei u inih.” ³⁴ Jesu na amani dieng ruti, “Inniei iti hi mahi rong hai rang a inih. ³⁵ Inia ajong rang a rong hin tu, kha nih naw nih. Ajarla athi ah put ah thoiretna rang a rutuk amani rang tu innieina, iti awmlai naw nih. ³⁶ Amani na thit, iti niei u lai naw nih, ajarla amani kha ravantir hai kha le ra`ang u rangnih. Thoiretna nai hai kha chang u jarkhan, Pathien nai hai kha nih u joi. ³⁷ Athi ah put ah hawng thoina jar hin Mosesshe na`awm rampabuk chungchanga irumiejiekna khan ruriei joi. Kha pha khan ama na Pumi kha ‘Abraham Pathien, Isaac Pathien khan Jacob Pathien,’ tia rukoi. ³⁸ Khan ama hi athi miring hai Pathien nimak a aring miring hai Pathien kha inih. Ajarla mi kholok na ama dieng khan ring a awm inih.” ³⁹ Khan danoja eshen na mashang a ruti uh, “Oja, thatak a nangriei joi.” ⁴⁰ Khashole tute na ama dieng chawng rurawdawn ngam u lai mak. ⁴¹ Khan amani dieng ruti, “Itia Christa hi David Shapa keng iti u maw nih? ⁴² Ajarla Lah khan David amatak na ‘PUMI na kupumi dieng ieriei, ⁴³ “Nang rahapui hai kha nang kekhawng kamachang malalim, kukhut chang tieng hin shuh roh.” ’ ⁴⁴ Khajarkhan David na ama kha ‘Pumi’ iti. Iti dan a ama kha ashapa achang maw nih?” ⁴⁵ Miring hai kholok ijet a ama na akhaichawi hai dieng ruti, ⁴⁶ “Ponrosho rieshiei alawn jawt, khan rievieithawna mun ah mi na richit ipek adit, khan synagogue hai khan shutna runieiving kha aloh jawt, khan bumichinna hai khan mi matonkhit ah shutna rang, adit danoja hai kha riring pui u roh. ⁴⁷ Amani na mieirawng hai nieilelung kha ikhawreng pe u inih, khan amalang rangbak khan nikna mieshiei uh. Amani na chawngshatna aliendet kha rawtawng pui u rangnih.”

¹ Khashole Jesu na khongrunga a rawchawng miring hai na nieibawmna khan amani khutchawi hai iruthong u kha rumuk. ² Khan mieirawng shara `khat na lepton `di iruthong kha`awm ama na rumuk. ³ Khan ama na ruti, “Kiei na nangni dieng diktak a kiriei inih, mahi mieirawng shara hi na amani kholoknek a arawpdet ithong inih. ⁴ Hihai miring hai hi na amani ruphu ah put ah Pathien dieng ipek u inih, inia mahi nupangnu hi na aravatna kar a iniei kholok le iringna rang a kha ipek inih.” ⁵ Khan riethiengmun kha idawr a metha lung hai kha le khan khutchawi hai kha le irielien maw nih, tia mi eshen na ruriei u phakhan, ama na ruti, ⁶ “Nangimuk u hihai nieinak hai rang hin nikho jong rangnih, makha pha khan akhat chung ah akhat rotho achim boi a imak lung `khatshe awm naw nih.” ⁷ Khan amani na rawdawn a ruti uh, “Oja, khanitala hihaihi itik a maw shok nih? Khan hihaihi shok rangnih, iti jetna kha imaw nih nih? ⁸ Khan ama na ruti, “Nangni kha nomohonna boi u rang, riring u roh. Ajarla ‘Ama kha kiei kanih,’ khan ‘Apha kha jong nai joi,’ tia kiriming a mi tampui va u rangnih.’ Khajarkhan amani anu kha jui u naw roh. ⁹ Khan nangni na ra le ramuruk nangjet u phakhan, rawthawk u naw roh. Ajarla hihaihi akhat changna a ashokngir rang a inih, inia dawng kha tu nirelen naw nih.” ¹⁰ Khashole amani dieng ruriei, “Phung `khat na phung `khat chung a ra thaw rangnih, rengchangna `khat na rengchangna `khat chung a ra thaw rangnih. ¹¹ Munmun ah nieinu arat shok rangnih, nekleshak hawng tang rangnih, khan railawn hawng rawjawh rangnih, ravan ah put ah chichairoi chon hai le jetna hai kha jong shok rangnih. ¹² Inia hihai kholok shok mala khan nangni kha khut numuchutna u rangnih, khan epshawna nepek u rangnih. Synagogue hai dieng nepek u ning, tia lungroko shung ah nothong u rangnih. Nangni kha kiriming jarbak khan reng hai le rampo hai maikung a nawchawi u rangnih. ¹³ Makha nang kungchangna u `khat chang rangnih. ¹⁴ Khajarkhan nangimashang u rang a kha rashamjerna boi rang, nang mulung miding u roh. ¹⁵ Ajarla nere`erpui hai kha na inorodoina pui ngam boi, ninawkle inamakha ngamna boi rang a ner le varna kha nepek u rang kanih. ¹⁶ Khan nangni kha nang nulepa hai, nang uliennai hai, nang inshungkhur, khan nang lawm haishe na nangni kha nomohon u rangnih. Nangni eshen tu nathat u rangnih. ¹⁷ Khan kiriming jar a mi kholok na naraha pui u rangnih. ¹⁸ Khania nang lu uah shampum `khatshe thang naw nih. ¹⁹ Nang doiratna u khan nang ringphuk u hai kha nangman u rangnih. ²⁰ “Inia Jerusalem kha ramiring hai na iroko u kha nangmuk u phakhan, mahi thangna rang a kha jong nai joi, iti kha jet u roh. ²¹ Khashole Judea ah awm miring hai na lawn hai khawn tan u rosho, khan makha khopui shung ah awm hai kha na makha mathan u rosho. Khan khopui vai ah ruawm amani kha na makha khopui shung khan hawng lut u naw rosho. ²² Ajarla irumiejiek kholok kha hawng rupumna rang, hihaihi ruhutthungna nikho hai kha inih. ²³ Makha pha khan naivawng nupang hai le nairunu peh hai rang idawr a khawk rang a maw nih naw! Ajarla rieliei chung a mulung koina alien le lunghangna hai hi miring hai chung a awm rangnih joi. ²⁴ Amani kha chemjam mawr khan cho u rangnih, khan phung rikip dieng shurmi chang u rangnih. Khan Phungshik hai pha kha hawng rupum masheng, Phungshik hai na Jerusalem kha terchawp a thaw u rangnih. ²⁵ “Ni, tha, khan arshi hai dieng jetna awm rangnih, khan rieliei chung a awm phung hai dieng phairavaina hawng awm rangnih, khan thampui le tuirawnawng miri khan mulung rakakna kha hawng awm rangnih. ²⁶ Khan manmieshie chung a chichairoi a rahvan shietna ajong rang a hai jar hin miring tampui hai lungar kha chekrachai rangnih, ajarla ravan ranak hai kha rawnawk rangnih joi. ²⁷ Khan Miring Shapa kha ranak le lurna alientak `khat le romiei chung ah ajong kha amani na muk u rangnih. ²⁸ Khan hihaihi ashok put phakhan, nang ring rakang u tana en u roh. Ajarla nang rekhekna u rang a kha jong nai joi.” ²⁹ Khan amani dieng rangshim `khat ruriei pe uh: “Thieichangkung le thingkung hai kholok kha en u roh. ³⁰ Amani na dawn hawng mawchawr u phakhan, kholum kha hawng nai joi, iti kha en u tana nang nining ua jet u roh. ³¹ Khan nangniawm hihai ashok hi nangmuk u phakhan, Pathien rengchangna kha jong nai joi, iti kha jet u roh. ³² “Diktak a nangni dieng kiriei inih, hihaihi hawng rupum masheng, hi rong hi shukhek a hek naw nih. ³³ Ravan le rieliei hi hek rangnih, inia kawchawng hai hi tu shukthang a thang naw nih. ³⁴ “Nangni riring u roh. Khanawkatu rekhe a aneh, jukhawp khan ringkho ditrekhena kha le nang mulung u hai kha pokrik chang rangnih. Khan makha Nikho khan ring boipet a nangni dieng jong rangnih. ³⁵ Ajarla makha, lim ang a, rieliei chung a awm miring kholok dieng jong rangnih. ³⁶ Riring jawnjai u roh. Ashok rang a kholok chon hai ah put ah nang rekhena u rang le Miring Shapa maton a nangdingna u rang, nikna niei u roh.” ³⁷ Khan Jesu na nishun a riethiengmun khan miruruchuk a awm, khan jan a Olivet iti Lawn khan janpha meshena rang, ruhawng. ³⁸ Khan mi kholok na riethiengmun khan ama chawngriei rangai rang, jingkara ama dieng rushe uh.

¹ Khan Rakanna iti Chawjawboi Rohoi kha hawng nai joi. ² Thiempu ulien hai le danoja hai na Jesu kha thatna rang, muruk a lam rutawk u joi, ajarla amani na miring hai kha ruchih uh. ³ Khashole Iscariot iti Judas shung khan Satan hawng lut joi. Ama kha shawmlieidi kar a akhat runih. ⁴ Ama na rushe a thiempu ulien hai le riethiengmun shipai hai le itia maw amani dieng Jesu kha jornathiei rang, tia chawngruriei pui joi. ⁵ Khan amani kha ningrungai pe uh, khan ama dieng shier pek rang, rujawt u joi. ⁶ Khan ama na rujawt a mipui boriethiei jorna rang, chanthatna rutawk joi. ⁷ Rakanna kengam thatna rang a Chawjawboi Tan Nikho kha hawng shok joi. ⁸ Khan Jesu na Peter le John kha rutir a ruti, “Rakanna kha nashakna u rang, she u tana vak rasham u roh.” ⁹ Khan amani na ruti uh, “Mahi rang hi khoshekawt ah maw nangnarashammashak jawt uh?” ¹⁰ Khan amani dieng ruti, “Enro, nangni na khopui shung khawn nanglut u phakhan, tuibe ruput miring `khat nangmuk u rangnih. Ama lutna in khan jui u roh. ¹¹ Khan in pumpa dieng ti u roh, ‘Ojapa na nang dieng iti, “Kakhaichawi hai le Rakanna kishakna u rang a indan kha khoshekawt ah maw nih?” ’ ¹² Khan rielienjiek chungindan alien `khat numumuk u rangnih, kha mun khan rasham u roh.” ¹³ Khan amani na rushe ua ama na iruriei kha ang a, vak rawtawng pui uh, khan amani na Rakanna kha rurasham u joi. ¹⁴ Apha kha hawng shok phakhan, ama na tirtawn shawmlieidi kha le tebol khan rushuh joi. ¹⁵ Khan amani dieng ruti, “Kiei na shawna kodoi mala hin mahi Rakanna hi nangni le kashak jawtngir. ¹⁶ Nangni dieng kiriei inih, ajarla Pathien rengchangna khan rupum masheng, mahi kiei na shalai naw ning.” ¹⁷ Khan hai kha ruloi a mapakna runiei, khan ruti, “Nangni na mahi loi u tana shem u roh. ¹⁸ Ajarla nangni dieng kieriei inih, tun ah put ah kiei na drakha tui hi Pathien rengchangna kha jong masheng, nelai naw ning.” ¹⁹ Khashole ama na tan kha ruloi a Pathien kha rumapak, khan rukhoi. Khan amani dieng rupek a ruti, “Mahi nangni dieng a peksha kupum kha inih. Kiei hi mininghepna rang, mahi thaw u roh.” ²⁰ Kha le ra`ang a, amani na rushak u shole, hai kha ruloi a ruti, “Mahi hai hi nangni rang a along kithishen jar a rawjawtna `thar kha inih. ²¹ Inia enro, kiei najorpa khut kha tebol chung ah kiei le awm joi. ²² Ajarla Miring Shapa kha irumuchuksha dungjuia ashe rang a inih, inia ama ajorpa rang khan idawr a khawk maw nih naw!” ²³ Khan hihai athaw rang a pa hi tumaw nih, tia khatlekhat dieng rurawdawn uh. ²⁴ Khan amani kar a alienving, tia imining u kha tumaw nih, iti chungchanga chawngrieshietna `khatawm rumothoi uh. ²⁵ Khajarkhan amani dieng ruti, “Phungshik hai reng hai na amani kha adek a pumi chang, khan amani chung a pumi chang hai kha chon atha thaw hai kha iti uh. ²⁶ Khania nangni tu kha nih u makche. Kha ruhut a nang kar ua alienving ama kha nang kar ua naipangving `khat a awm rosho, khan lamkai ama kha na shepding kha a ang rang a shok. ²⁷ Ajarla tebol ah bunepa le shepding kar khan tumaw aliendet? Tebol ah bunepa kha nimak maw? Inia kiei tu nang kar ua shepding `khat a ka`awm. ²⁸ Khania kiei na enretena a ka`awmlai khan kiedieng a rephet boi a nangawm uh. ²⁹ Khan kapa na kiei dieng rengchangna `khat kha inurupek kha ang a, kiei na nangni dieng kinepek u inih. ³⁰ Makha nangni na kerengchangna a awm tebol khan nangnek nangshakna u rang le nangni na rengmun a shuh a Israel phung shawmlieidi kha chawngnangshatna pe u rang a inih.” ³¹ Khan Pumi na ruti, “Simon, Simon! Satan na nangni kha gehu ang a mashap rang nadit u joi. ³² Inia nang takashawn kha rehena boi rang, nikna kieniei joi. Khan kiei dieng nangvakkir phakhan, nang uliennai hai kha ranak peh roh.” ³³ Khan Simon na ama dieng ruti, “Pumi, lungroko shung ah le thitna rangshe khan kiei rasham kanih.” ³⁴ Khania Jesu na rumashang, “Peter, kiei na nang dieng kiriei inih, nanginejet hi voithum nangraphat pui masheng, von nikho hin arkhawng na khong naw nih.” ³⁵ Khan amani dieng ruriei, “Kiei na nangni kha shierkawk boi a, pai boi a, khan kekawk boi a kunurutir u lai khan, nangravatna u imaw awm?” Amani na rumashang uh, “Ravatna `khatshe runiei u mi`ing.” ³⁶ Ama na amani dieng ruti, “Inia tuntu shierkawk le pai kha rawshawng pui u rang roh. Khan chemjam aniei boi ama kha na ponledier kha jor rieshie akhat rawchawh rosho. ³⁷ Ajarla nangni dieng a kiriei hi inih, irumiejiek kha kuchung a rupumngir rang a inih: ‘Ama kha danishawnboi miring hai kha le techen nih joi.’ Ajarla kuchungchanga irumiejiek kha rupum joi.” ³⁸ Khan amani na ruti uh, “Pumi, enro, hin chemjam `di awm.” Khan amani dieng ruti, “Makha hun joi.” ³⁹ Ama na vak shok a eshena dungjuia Olive Lawn ah ruhawng, khan akhaichawi hai na`awm ama kha rujui uh. ⁴⁰ Ama na kha mun kha rushok phakhan, amani dieng ruti, “Lemna khan nanglutna boi u rang, nikna niei u roh.” ⁴¹ Khan ama na lung `khat vawrna dawr hi rurakai a rukhuk shun a runik. ⁴² Ama na ruti, “Aw kapa, nang ningmuruk kha nitjoiatu, hai hi kiei ah put ah noloi pe roh, khanikengta kumulungmining kha nimak a nang mulungmining kha nih rosho.” ⁴³ Khan ravantir na ama dieng rular a ama kha ranak rupek. ⁴⁴ Khan ama na enchak a nikna runiei. Khan ama shawna kha lienhai a ahu kha thishen na pieipak ah lawmlawm a acho kha ruang pe. ⁴⁵ Ama na inikna ah put ah hawng thoi a akhaichawi hai dieng rushe phakhan, mulungshaw a aja a ruawm u kha vak muk. ⁴⁶ Khan amani dieng ruti, “Iloia ja maw nangnih uh? Lemna khan nangchona boi u rang, thoi u tana nikna niei u roh.” ⁴⁷ Ama na chawng riei a ruawmlai khan, jetboithieiboi a mipui kha va joi. Khan khaichawi shawmlieidi kar a Judas iti ama kha na lamvakkai pe a Jesu kha iebieng a tumna rang, ama kha rujawng joi. ⁴⁸ Inia Jesu na ama dieng ruti, “Judas, Miring Shapa kha bieng tum pe a nangijor rang a maw nih?” ⁴⁹ Khan Jesu dieng ah awm hai kha na, ashok rang a kha muk u phakhan, ruti uh, “Pumi, amani khaw chem le maw tuk u rang ning?” ⁵⁰ Khashole amani hai kar a akhat na thiempu rashang shok `khat rutuk a, achang tieng ah nokor kha rutan pe joi. ⁵¹ Khan Jesu na mashang a ruti, “Khashe kha nih rang rosho.” Khan onokor kha rushit pe a rumadam pe joi. ⁵² Khashole Jesu na ama dieng ava thiempu ulien hai le riethiengmun shipai hai, khan ama dieng ava lamkai hai dieng ruti, “Kiei hi minieisho miring `khat ang a ashur rang chemjam le mawbawng rak a ava maw nangnih uh? ⁵³ Kiei na riethiengmun ah nangni le ningthingkip ka`awm, inia nang khut nurujawnna u makche. Inia mahi nangni rang a pha kha nih joi, khan mahi cham ajing kha inih.” ⁵⁴ Khan ama kha rushur u phakhan, amani na rushe pui ua, thiempu rashang in khan ruchawi u joi. Khan Peter na ralaviei a anu rujui. ⁵⁵ Amani na tolawng khan miei muchuk ua lawp `khat a rushuh u phakhan, Peter na amani kar khan rushuh. ⁵⁶ Khan shok nungak `khat na Peter kha miei iru`u a awm kha rumuk phakhan, ruenrep a ama dieng ruti, “Mahi miringpa hiawm Jesu le rawtawp `khat inih.” ⁵⁷ Inia ama chung a rapha a ruti, “Nupang, kiei na ama hi jet mi`ing.” ⁵⁸ Khan awmbawt `le shik `khat miring na ama kha rumuk a ruti, “Nangawm amani hai kar a akhat nangnih.” Inia Peter na ruti, “Miringpa, kiei nimi`ing.” ⁵⁹ Khan nidan `khat dawr hi rakar le miring `khat hi na eplam a ruti, “Diktak a mahi miringpa hiawm ama le rawtawp miring `khat inih, ajarla ama hi Galilee miring `khat inih.” ⁶⁰ Inia Peter na ruti, “Miringpa, nangiriei kha imaw nih, iti kiei jet mi`ing.” Ama na chawng ruriei a awmlaitak khan, arkhawng na hawng khawng joi. ⁶¹ Makhan Pumi na vak hiei a Peter dieng ruen. Khan Jesu na ama dieng a iruriei chawng kha Peter na hawng mininghep, makhala “Arkhong na khong mala, kuchung a voithum nangrapha rangnih.” ⁶² Khan Peter na vai rushok a rie`ieklam a ruchap joi. ⁶³ Khan Jesu apana miring hai kha na ama kha engshiet a ajem ruput u joi. ⁶⁴ Amani na imik rushing pe uh, khan amai ah ruben ua chawng rurawdawn uh, “Nang anaben hi tumaw nih? Rophong roh!” ⁶⁵ Khan ama chung a mieshietna chawng tampui ruriei uh. ⁶⁶ Khan kho hawng varphit `le, miring lamkai hai, thiempu ulien hai khan danoja hai kha na amani Sanhedrin khan Jesu kha ruchawi u joi. Amani na ruti uh, ⁶⁷ “Nang Christa kha nangnih a tu, nieriei u roh.” Khan amani dieng ruti, “Kiei na kieriei a awm nangni na takashawn u naw tinih. ⁶⁸ Khan kiei na chawng kawnawrawdawn u joiatu, nangni na namashang u naw tinih, khan nomoshok u naw tinih. ⁶⁹ Inia von ah put ah Miring Shapa na ranakniei Pathien chang tieng shuh rangnih joi.” ⁷⁰ Khan kholok na rurawdawn uh, “Khanitala nang Pathien Shapa kha maw nangnih?” Khan ama na ruti, “Kiei kanih, iti kha nangnitak na nangti u joi.” ⁷¹ Khan amani na ruti uh, “Kungchangna dawnshe tawkna rang irangai maw nilai? Ajarla kieinitak na ama ner a narangai u joi.”

¹ Mipui kha na ruthoi ua Jesu kha Pilate dieng ruchawi u joi. ² Khan amani na ama kha mieshiet ruput ua ruti uh, “Mahi miringpa hi na nuphung u hi pawrmechet joi. Nining a Christa le Reng kha kanih, tia Caesar dieng a pek rang a khaichana kha irumakha inih.” ³ Khan Pilate na ama kha rawdawn a ruti, “Nang Jihudi hai Reng kha maw nangnih?” Khan ama na rumashang, “Nangiti kha inih.” ⁴ Khan Pilate na thiempu ulien hai le mipui dieng ruti, “Mahi miring dieng hin kiei na shietna muk pe mi`ing.” ⁵ Inia amani na eplam a ruti uh, “Ama na Judea kholok, khan Galilee ah put ah hi munshe hin miruchuh a mimuchun joi.” ⁶ Galilee iban u kha Pilate na rujet phakhan, miring kha Galilee miring maw nih, tia rurawdawn. ⁷ Khan ama na Herod ramroko shung a awm keng, iti kha rujet phakhan, Herod dieng rutir joi. Khalaikhan Herod kha Jerusalem ah ruawm. ⁸ Herod na Jesu kha rumuk phakhan, ajeng a ningrungai pe. Ajarla ama na Jesu kha phashawttak khan irumuk jawt inih. Ajarla ama na Jesu chungchanga chawng tampui rujet. Khan ama na jetna dikhat ithaw rang a kha rumuk jawt. ⁹ Khan ama na Jesu kha chawng tampui rurawdawn, inia `khatshe rumashang mak. ¹⁰ Ading thiempu ulien hai le danoja hai kha na ranaktak a rumieshiet uh. ¹¹ Khan Herod na ama ramiring hai kha le jak rupek, khan engshiet a ruthaw. Khan pon cheklak rurieshieimashak a Pilate dieng rumikir joi. ¹² Kha nikhotak khan Herod le Pilate kha lawmpa chang u joi, ajarla matienglai tu khatlekhat raha miring runih uh. ¹³ Khan Pilate na thiempu ulien hai, lamkai hai, khan miring hai kha rukoi a, ¹⁴ amani dieng ruti, “Hi miring hi, miring lamrehemashak `khat a nangni na kiei dieng nangivakchawi u inih. Khan enro, nang maikung ua kiei na ama hi enkereteviek a, mahi miring chung a nangimieshiet u khan rehena `khatshe muk pe mi`ing. ¹⁵ Herod na`awm rumuk pe mak. Khan enro, ama na thitna rang a rutuk shietna kha ih ruthaw mak. ¹⁶ Khajarkhan kiei na ama hi shawna pek a moshok rang kanih joi” ¹⁷ (Ajarla ama na rohoi hin miring `khat irumoshokngai inih). ¹⁸ Inia mipui kholok na lawp a ra`ai a ruti uh, “Mahi miring hi that tana kieini rang Barabbas kha moshok roh.” ¹⁹ Amapa kha khopui shung ah ramothoi a mithat jar a lungroko shung ah irukhum inih. ²⁰ Inia Pilate na Jesu kha moshok jawt jarkhan, amani dieng chawng rurieiret. ²¹ Inia amani na ra`ai a ruti uh, “Ama kha cross ah that roh, ama kha cross ah that roh!” ²² Inia voithum changna khan amani dieng ruti, “Ijar a maw, mahi miring hi na ashie ih maw thaw joi? Kiei na ama chung a thitnathiei rang a jar muk pe mi`ing, khajarkhan kiei na ama hi shawna pek a moshok rang kanih joi.” ²³ Inia amani na he rashangtak a ama kha cross ah thatna rang, shairuep uh. Khan amani le thiempu ulien hai he kha na derumukhu joi. ²⁴ Khajarkhan Pilate na amani nikna kha chon a meshena rang, mulung rumiding joi. ²⁵ Khan ama na ra mothoi jar a le mithat jar a lungroko shung ah thong ama kha rumoshok a Jesu kha amani idit dungjuia rupek joi. ²⁶ Khan amani na iruchawi u le roroia, Simon iti Cyrene miring `khat, khote ah put ah hawng kirna hin, cross kha rangrat a rumuphung ua, Jesu anuk a rumawlawn uh. ²⁷ Khan mipui hawi `khat na ama anuk a rujui uh, khan amani kar a nupang hai na mulungkur a ama kha ruchap pui uh. ²⁸ Inia Jesu na amani dieng hiei a ruti, “Jerusalem shanu hai, kuchung a chap u naw roh, nang chung ua le nang nai hai chung a chap u roh. ²⁹ Ajarla en u roh, ‘Nairong miring hai, naimoshon boi naikawk hai, khan nairunu peh boi runu hai kha rahvanmuh hai kha inih!’ itina u rang a nikho hai kha jong rangnih. ³⁰ Khashole ‘mo hai dieng “Kuchung uah jongcho roh!” khan lawn hai dieng “Kieini hi nojong mukhu u roh!” ’ ti u rangnih. ³¹ Ajarla thingkung kha ringlai khan hihaihi amani na thaw u joiala, makha char phakhan imaw shok nih?” ³² Khan mithat miring pasha `diawm, ama le that rang, ruchawi uh. ³³ Khan amani na Calvary iti mun kha rushok u phakhan, ama kha cross ah rumakhai u joi. Khan mithat miring hai kha`awm akhat kha chang tieng, khan shik `khat kha viei tieng rumakhai u joi. ³⁴ Khan Jesu na ruti, “Kapa, amani dieng hin rangaidam peh roh, ajarla amani na ithaw u hi ijet boi u inih.” Khan ama ponledier hai kha shemna rang, vanmuk ruen uh. ³⁵ Khan miring hai kha na ding a ruen uh. Khan rampo hai kha na engchawng a ruti uh, “Ama na shik miring hai kha rushan, miringpa hi Pathien na imadan Christa kha nitjoiatu, nining a rashan rosho.” ³⁶ Khan ramiring hai kha na`awm vak jawng ua engshiet a rubiek uh, khan ama kha ju athur kha rumenek uh. ³⁷ Khan amani na ruti uh, “Nang Jihudi hai Reng kha nangnih a tu, nang nining a rashan roh.” ³⁸ Khan ama chung khan Greek, Latin khan Hebrew chawng a khetmiejiek `khatawm rumiejiek: MAHI JIHUDI HAI RENG KHA INIH. ³⁹ Makhan ah akhai mithat hai kar a akhat na ama kha mieshiet a ruti, “Nang Christa kha nangnih a tu, nang nining a rashan roh, khan kieini hiawm nashan u roh.” ⁴⁰ Shik `khat kha na mashang a rawkawklam a ruti, “Chawngshatna khatte a nangawm hin Pathien kha chih makche maw? ⁴¹ Ajarla kieini na niruthaw u kha le rutukthep a chawngshatna kha nimuk u inih, inia mahi miring hi na rehena ih ruthaw mak.” ⁴² Khan ama na Jesu dieng ruti, “Aw Pumi, nang rengchangna a nanghawng phakhan, kiei hi nimininghep roh.” ⁴³ Khan Jesu na ama dieng ruti, “Diktak a nang dieng kiriei inih, von nikho hin paradise khan kiei le nangawm rangnih.” ⁴⁴ Khan nidan shawmlieidi ah put ah nidan `thum dawrshe hin ajing kha na rieliei kholok jong mukhu joi. ⁴⁵ Khan ni kha na jing phakhan, riethiengmun maikharpon kha alaitak a jong rether joi. ⁴⁶ Khashole Jesu na he rashangtak a ra`ai a ruti, “Kapa, ‘nang khut chung a karatha hi kenepek joi.’ ” Khan mahi ruti shole, arang ruchat joi. ⁴⁷ Khan rarajakhat lamkai kha na ashok chon hai kha rumuk `le, Pathien kha mapak a ruti, “Diktak a mahi miring hi midik `khat inih.” ⁴⁸ Khan aen rang a vak ruchun mipui kha na ashok chon hai kha rumuk u phakhan, mulung teilam a rukir uh. ⁴⁹ Khan ama le rejet hai, khan Galilee ah put ah ivakrawtawp pui nupang hai kha na ralaviei a ding a hihaihi ruen uh. ⁵⁰ Khan Joseph iti lamkai miring `khat ruawm. Ama kha mitha le midik `khat runih. ⁵¹ Ama na amani chonrashak le chonmeshe khan rujawt mak. Ama kha Jihudi hai kho Arimathea ah put ah inih. Ama na Pathien rengchangna kha ngak a ruawm inih. ⁵² Mahi miringpa hi na Pilate dieng rushe a, Jesu rok kha vak nik. ⁵³ Khan ama na cross ah put ah jong muchum a ponramasha le rujo joi. Khan tute na ijana boilai lung chung ah iver than khan vak maja joi. ⁵⁴ Makha nikho kha Rashamna Nikho kha runih, khan Sabbath nikho kha putdeng nih joi. ⁵⁵ Khan Galilee ah put ah ivat puishom a ama anu ivakjui nupang hai kha na thanmun ah ama rok itet dan kha vak muk uh. ⁵⁶ Khan amani na vak kir ua, rieipartui manamhoi kha vak rasham uh. Khan chawngpek dungjuia amani na Sabbath nikho khan shawrumuchum u joi.

¹ Khan hapta shung a akhat changna nikho jingkara hin, amani na irasham u rieipartui hai kha ruchawi ua, thanmun khan rushe uh. ² Amani na lung kha than ah put ah rurechen kha vak muk uh. ³ Amani na rulut u phakhan, Pumi Jesu rok kha vak muh u lai mak. ⁴ Amani na hi chungchang hin shindawngna runiei u lai khan, enro, miring pasha `di na poncheklak rieshiei a amani dieng khan ruding uh. ⁵ Nupang hai kha rurawthawk ua, pieipak tieng rubu uh, khan ravantir `di kha na amani dieng ruti, “Ijar a nangni na aring miring kha athi miring hai kar a nangitawk u maw nih? ⁶ Ama kha hin awmlai mak, inia ruthoi joi! Ama na Galilee ah awmlai a nangni dieng iruriei kha mininghep u roh. ⁷ Jesu na ruti, ‘Miring Shapa kha munu miring hai dieng pekngir a cross ah that rang a inih. Khan ni `thum changna khan hawng thoiret rangnih.’ ” ⁸ Khan amani na ama iruriei hai kha rumininghep uh. ⁹ Khan amani na than ah put ah rukir ua, khaichawi shawmlieikhat dieng le lawpsheng u dieng thang vak koi u joi. ¹⁰ Tirtawn hai dieng chawng vak riei hai kha Mary Magdalene le Joanna, James unu Mary, khan amani le rawtawp hai kholok kha runih uh. ¹¹ Inia tirtawn hai maikung khan hihai chawng hi chawngtawt ruang pe uh, khan amani kha takarushawn u mak. ¹² Inia Peter na ruthoi a thanmun tieng khan rutan. Khan butlam a ruen a ponramasha ranga kha shikjek a vak muk. Khashole ashok chon chungchang khan ishindawng le roroia rukir joi. ¹³ Khan enro, kha nikhotak khan miring pasha `di na Emmaus iti kho `khat ah khomijin rushe uh. Makha Jerusalem ah put ah majin shiri dawr runih. ¹⁴ Amani na ashok chon hihai kholok chungchanga rieilam a rulawn uh. ¹⁵ Amani na roiruriei u lai khan, Jesu amatak na amani kha vak ranai pui a amani le rusheshom joi. ¹⁶ Inia ama kha tumaw nih, iti kha amani dieng rumejet maklai. ¹⁷ Khan amani dieng ruti, “Nanglawnlam ua ih chawng maw nangiriei uh?” Amani na mulungshaw maisho kha le ruding uh. ¹⁸ Khan Cleopas iti akhat na mashang a ama dieng ruti, “Hirachang a Jerusalem ah ashok chon hai hi ajet boi milak hi nang ranga maw nangnih?” ¹⁹ Khan ama na ruti, “Ih chon maw ashok?” Khan amani na ruti uh, “Pathien maikung a le miring kholok maikung a chon a le chawng a ranak aniei Thiempulien `khat, Nazareth Jesu, ²⁰ thiempu ulien hai le karampo hai na ama kha iruheng ua thitna rang, irupekna u le cross ah ama kha iruthatna u awmchan jar a inih. ²¹ Inia kieini rang la ama kha Israel akhek rang a kangakmining u `khat kha runih. Inia hihai kholok hi khea ashok chon hi von a hi le ni `thum changna nih joi. ²² Khatekha niboia, nupang eshen na`awm kieini hi shindawngna nurupek uh. Amani na jingkara hin thanmun khan rushe uh. ²³ Khan amani na ama rok kha muk boi u phakhan, ama kha ring joi, tia amani dieng a ariei ravantir hai kha mulungmik a kumuk u, tia vak riei uh. ²⁴ Kieini le awm eshen na`awm thanmun ah rushe u phakhan, nupang hai iriei kha ang a vak muk uh, inia ama kha vak muh u mak.” ²⁵ Khan ama na amani dieng ruti, “Aw mimawng hai, thiempulien hai na iruriei hai kha takashawn rang khan ajeng a nangmatatmashak uh! ²⁶ Christa na hihai kholok shawna hi idoi a lurna shung khan alut rang a kha irangai boi maw nih?” ²⁷ Khan Moses ah put ah Thiempulien hai kholokshe khan, amatak chungchang khan Miejiek rikip ah irumeler inih. ²⁸ Amani na tungna u rang a kho kha vak ranai pui u phakhan, ama na ala shok rang a rasha a amani kha rukhe joi. ²⁹ Makhan amani na ama kha khap a ruti uh, “Kieini le awm rang roh, ajarla khohawngromo joi, khan nikho hi mawtawrdeng joi.” Khajarkhan ama na kho khan rulut a amani le rurangah joi. ³⁰ Khan ama na tebol ah rushuh phakhan, tan kha ruloi a rahvan rupek. Khan ama na rukhoi shole, amani dieng rupek. ³¹ Makhan amani mik hai kha mavar pe a amani na ama kha merujet u joi, khan amani mik`en ah put ah ruthangkhap joi. ³² Amani na khatlekhat dieng ruti uh, “Ama na lam ah chawngrurieilai, khan Miejiek rumelerlai khan, numulung u athoi boi maw nih?” ³³ Amani na kha phatak khan thoi ua, Jerusalem tieng vak kir u joi. Khan khaichawi shawmlieikhat, khan amani le awm hai kha mun `khat ah ruruchun u kha amani na vak muk uh. ³⁴ Amani na ruti uh, “Diktak a Pumi kha thoi joi, khan Simon dieng rular joi!” ³⁵ Khan amani na lam a ashok chon le ama na tan irukhoi a ihawngjetna u awmchan kha amani dieng ruriei uh. ³⁶ Amani na hihaihi ruriei u lai khan, Jesu na amani kar a ruding a amani dieng ruti, “Lungdamna kha nangni dieng a`awm nih rosho.” ³⁷ Amani kha chihai a rurawnawk uh, khan amani na ratha imuk u `khat a rumining uh. ³⁸ Khan amani dieng ruti, “Iloia nang mulung u kha raha maw nih? Iloia nang mulung ua rakhana athoi maw nih? ³⁹ Kukhut le keke hai hi vak en u roh, kieitak kanih keng. Nishih u tana en u roh, ajarla kiei na kiniei nangimuk u hi ang a, ratha na taksha le ru niei mak.” ⁴⁰ Khan ama na mahi ruriei shole, ama khut le ke hai kha amani dieng rumumuk. ⁴¹ Amani ningai kha na takashawn boi a le shindawnglam a rutetlai khan, Jesu na amani dieng ruti, “Mahin nekleshak maw nangniei uh?” ⁴² Amani na ngalek roisha le khoining kha ama dieng rupek uh. ⁴³ Khan amani maikung a loi a makha rushak joi. ⁴⁴ Khan amani dieng ruti, “Kiei na nangni le kaw`awmlai khan, hihai chawng hi nangni dieng kiriei inih, Moses Dan, Thiempulien hai le Lah hai khan kajar a irumiejiek hai kholok kha hawng rupumngir rang a inih.” ⁴⁵ Khashole amani na Miejiek hai kha jetna rang, amani mulungmining kha ama na rumawlawng pe uh. ⁴⁶ Khan ama na amani dieng ruti, “Hitihin rumiejiek, Christa na shawna kha idoingir rang a inih, khan ni `thum changna khan athi ah put ah hawng thoiret rang a inih. ⁴⁷ Khan Jerusalem ah put ah phung kholok dieng ama riming a mulung lekna le munu rangaidamna kha rophong rang a inih. ⁴⁸ Hihai chung a kungachang miring kha nangnih uh. ⁴⁹ Khan enro, kapa na kiei dieng a chawngirakham kha kiei na nangni dieng jong tir rang kanih. Khania chung ah put ah ranak kha le nangni kha najo u masheng, nangni na mahi Jerusalem hin rungak u roh.” ⁵⁰ Khashole ama na amani kha Bethanyshe kha rushe pui, khan ukhut hai kha alawm a amani kha rahvan rupek. ⁵¹ Amani kha rahvan rupeklai khan, Jesu na rurakai a amani ah put ah ravan a ruchawi joi. ⁵² Khan amani na ama kha chubairubawk ua, ningai le roroia Jerusalem ah rukir u joi. ⁵³ Khan amani na riethiengmun khan ningthingkip Pathien mapak a ruawm uh. Amen.