TIRTAWN

¹ Aw Theophilus, akhat changna behangbuk khan Jesu na iruthaw le iruruchukna putna kholok le ama kha ravan a iruchawina nikhoshe kha jar a kirumiejiek inih. ² Ama kha ruchawi mala khan Jesu na irumadan tirtawn hai kha Ratha Riethieng dieng chawng rupekna. ³ Ama shawdoi shole, akalangshok ngieichon tampui le amani dieng ama na aring a awm kha nining a rumumuk. Ni shawm mili hi amani dieng rular a Pathien rengchangna jar kha ruriei pe. ⁴ Amani kha lawp `khat a ruruchun puilai khan Jerusalem kha rumathan u naw roh, kiei ah put ah nangirujet u Apa chawngrakham kha rungak u roh, tia amani dieng chawng rupek. Jesu na ruti, “Mahi keng kiei ah put ah nangirujet u kha. ⁵ Ajarla John na tui a baptisma nurupek uh, inia nikhothang shawt boi a Ratha Riethieng le baptisma nepek u rang kanih.” ⁶ Khashole amani na vak ruruchun ua ama dieng rawdawn a ruti uh, “Pumi, mahi pha hin Israel hai rengchangna kha nihawngmikir rang a maw nih?” ⁷ Amani dieng ruti, “Apa na ama chamtak a imuchuk rang a pha ninawkle kumletha ajet rang a kha nangni nih u makche. ⁸ Inia Ratha Riethieng na nang chung ua jong phakhan, ranak nangtum u rangnih. Khan Jerusalem shung ah, Judea le Samaria kholok ah, khan rieliei dawngkhitshe khan kiei rang kungchang miring hai kha anih rang nangnih uh.” ⁹ Hihaihi ruriei shole, amani na i`en u le roroia, ama kha chung tieng rudawm a amani mik`en ah put ah romiei na ama kha ruringi joi. ¹⁰ Ama na ruka le roroia, amani na ravan tieng ruenrep u lai khan enro, ponchek rieshiei pasha `di na amani dieng ruding uh. ¹¹ Khan amani dieng ruti uh, “Galilee miring hai, iloia ravan tieng khonga a ading maw nangnih uh? Nangni ah put ah ravan a iruchawi Jesu hi, ravan a aka nangimuk u hi ang a, jong rangnih.” ¹² Khashole amani na Olivet iti Lawn ah put ah Jerusalem ah jong kir u joi. Makha Sabbath nikho a lawnnathiei Jerusalem dieng ah awm inih. ¹³ In khan jong lut ua, awmna u chungindan khan ruka u joi. Amani khala: Peter, James, John, Andrew, Philip, Thomas, Bartholomew, Matthew, Alphaeus shapa James, Zealot iti Simon, khan James shapa Judas runih uh. ¹⁴ Hihai kholok na nupang hai, Jesu nu Mariam, khan anaipangpa hai le mulung `khat a nikna le rieina runiei jawnjai uh. ¹⁵ Khalaikhan Peter na takashawn hai kar a thoi a ruti (Ruchun mirawp kha rajakhat shawm `di dawr runih), ¹⁶ “Uliennai hai, Jesu ashur hai lamkai ruchang, Judas chungchanga Ratha Riethieng na David kam a irurieimashana, Miejiek kha ashokngir rang a inih. ¹⁷ Ajarla Judas kha kieini le techen runih, khan mahi chonmun hin ama na tum irumuk inih.” ¹⁸ (Khan mahi miringpa hi na idikna boi lawh kha le loimun irurawchawkna mun khan shuk tieng jongcho, khan awvawn rupok pe a ariei kholok vak shok pe. ¹⁹ Mahi Jerusalem ah awm mi kholok na rujet uh. Khajarkhan amani chawng a Akeldama, makhala, Thishen Loimun ruti uh.) ²⁰ “Ajarla Lah behangbuk ah hitihin rumiejiek: ‘Ama awmna mun kha ramthim chang pe rosho; tute na makhan awm naw rosho.’ Khan ‘Ama chonmun kha shik `khat na loi pe rosho.’ ²¹ Khan thoiretna chungchanga kieini le kungchangna rang, nimadan u rang a shok. Kieini na nimadan u rang a kha tu, Pumi Jesu na kieini le shehawng a ruawmlai khan kieini le rawtawp jawnjai ²² makhala, John na ama baptisma irupek ah put ah kieini ah put ah iruchawina nikho haishe miring `khat aningir rang a inih.” ²³ Khajarkhan Barsabbas tia ikoi u, Justus iti Joseph le Matthias, pasha `di hi rumiding uh. ²⁴ Khan amani na runik a ruti uh, “Pumi nang na mi kholok mulung nangjet, idi kar hin akhat nimadan kha numumuk u roh. ²⁵ Mahi Judas na irukhoi a nining a iminingna mun a rushe jar a irumak chonmun le tirtawn changna kha lona rang a inih.” ²⁶ Amani rang khan vanmuk ruen ua, Matthias dieng ruchu joi, khan amani na ama kha tirtawn shawmlieikhat khan rubo u joi.

¹ Pentecost ni kha hawng shok phakhan, amani kholok kha mun `khat ah mulung khatte a ruawm uh. ² Khan jetboithieiboi a helehoi kha ravan ah put ah rithirang ang a jong a, rushutna u inshung kholok kha jong miship. ³ Mieliei hai kha na mieichon ang a amani dieng jong lar. Khahaikha na jong reshen ua, amani rikip dieng jong chutna uh. ⁴ Khan Ratha Riethieng na jong miship ua, Ratha na baishona irupek u le roroia, amani kholok na chawngshik a achawng ruput u joi. ⁵ Kha mun khan ramram ah awm phung rikip ah put ah richichawi Jihudi hai kha Jerusalem ah ruawm uh. ⁶ Makhan helehoi kha rujet u phakhan, mipui kha vak ruchun ua, shindawngna runiei uh. Ajarla tirtawn rikip na amama phung chawng a achawng rujet uh. ⁷ Shindawng le amramalam a amani na khatlekhat dieng rurierieina uh, “Enro, achawng miring kholok khaw Galilee miring hai nih u mak maw? ⁸ Itia kieini na nojongshokna u phung chawng rikip a nijet u hi? ⁹ Parthia, Mede, Elam miring hai, khan Mesopotamia, Judea le Cappadocia, Pontus le Asia ram ah awm miring hai, ¹⁰ Phyrgia le Pamphylia, Egypt, khan Cyrene le ranai Lybia shie `khat, khan Rome ah put ah khomijin hai, Jihudi hai le phungtho hai dire, ¹¹ Crete tuikawram le Arab miring hai, kieini na Pathien chon thaw hai rekhek kha nawchawngtak a nijet u inih.” ¹² Amani kholok shindawng le amramalam a khatlekhat dieng ruti uh, “Mahi ih itina maw nih?” ¹³ Eshen na erawh a ruti uh, “Amani khaw juning le aship u keng.” ¹⁴ Inia Peter na shawmlieikhat le ding a amani dieng he rashangtak a ruriei, “Judea le Jerusalem ah awm miring hai, mahi nangijet u nih rosho, khan kawchawng hai hi rangairep u roh. ¹⁵ Hihai miring hi nangimining u kha ang a, jukhawp nih u mak. Jingkar nidan kobak cholai. ¹⁶ Inia mahi thiempulien Joel dieng irureina kha inih: ¹⁷ ‘Nikho dawng khan hitihin awm rangnih. Makhala, karatha kha miring kholok shung a thong pe rang kanih. Nang shapa u hai le nang shanu u hai na chawng rophong u rangnih. Nang khangdawng u hai na mulungmik muk u rangnih, khan nang khanglui u hai na ramang raman u rangnih. ¹⁸ Kha nikho hai khan koshok hai nupang apa diengshe karatha thong pe rang kanih. Amani na chawng rophong u rangnih. ¹⁹ Chung ravan a rekhekchon hai le noi rieliei a jetna hai kha mumuk rang kanih. Khahaikha thishen, miei, khan mieikhu ruhu nih rangnih. ²⁰ Alien le alur PUMI Nikho jong mala khan ni na ajing a, khan tha na thishen a jir rangnih. ²¹ Khan PUMI riming aban mi rikip kha shan rangnih, tia Pathien na ieriei.’ ²² “Aw Israel miring hai, chawng hai hi rangai u roh. Pathien na ama jar a nang kar ua iruthaw chonrekhek hai, rekhekchon hai le jetna hai kha rotokna a, mahi miring Nazareth Jesu hi irumuchuk nih joi. Nangnitak na mahi nangijet u inih. ²³ Pathien na irumuchuksha le irujetsha dungjuia mahi miringpa hi nangni dieng inurupek u inih. Danishawnboi hai khut kha rotokna a cross ling ah nangruthat uh. ²⁴ Pathien na thitna natna ah put ah rumoshok a rumiring joi, ajarla thitna ranak kha na ama ikhop rang a kha anithiei nimak. ²⁵ Ajarla David na Jesu chungchanga ruti: ‘PUMI kha kamaton a kumuk jawnjai. Ih kha na kiei hi nanawk ngam naw nih. Ajarla ama kha kukhut chang tieng awm. ²⁶ Khajarkhan kumulung na apar, khan kiemieliei na ningaidet. Kha khea kupum na ngakmining a ring rangnih. ²⁷ Ajarla Thikho khan kiringphuk kha namak pe naw tinih, ninawkle nang Riethieng Akhat kha na omoro imuk rang a kha jawt pe naw tinih. ²⁸ Ringkho lam hai kha kiei dieng nangnumumuk joi. Kiei dieng a nangawm kha na mulungparna kha le nangnimiship joi.’ ²⁹ “Uliennai miring hai, phungpa David jar a lungartak a riei rawng, makhala ama kha ruthi a rukhum u joi. Ama than kha von nikhoshe hin kieini le awmlai. ³⁰ Thiempulien `khat runit jarkhan, taksha dungjuia ama vawnchawi ara ah put ah Christa kha Pathien na mothoi a ama rengmun ah mushut rang, tia Pathien na riming ban a chawngirurakham pe kha David na rujet. ³¹ Mahi rumukmasha jarkhan, David na Christa thoiretna jar a ruriei, makhala ama ringphuk kha Thikho khan rumak pe mak, khan ama taksha kha na`awm morona, iti kha rumuh mak. ³² Mahi Jesu hi Pathien na irumothoi inih. Mahi nokholok na kungnachang uh. ³³ Pathien khut chang tieng rulawm a apa ah put ah chawngirurakham Ratha Riethieng kha ruman shole, tun a nangimuk u le nangijet u hi ama na ijongmephe nih joi. ³⁴ Ajarla David na ravan tieng ruka mak, inia amatak na ruti, ‘PUMI na kupumi dieng ruti, ³⁵ “Nang rahapui hai kha nang kekhawng kamachang malalim, kukhut chang tieng shuh roh.” ’ ³⁶ “Khajarkhan Israel inshung kholok na jet rosho, makhala cross ling ah nangiruthat u mahi Jesu hi Pumi le Christa dire kha iruminit inih.” ³⁷ Amani na rujet u phakhan, amani mulung rushit pe ua Peter le tirtawn kholok dieng ruti uh, “Uliennai miring hai, kieini na imaw thaw u ning?” ³⁸ Peter na amani dieng ruriei, “Pathien na nang munu u kha arangaidamna rang, nang mulung lek u tana mi rikip na Jesu Christa riming a baptisma loi u roh. Khan Ratha Riethieng khutchawi kha nangmuk u rangnih. ³⁹ Ajarla chawngrakham hi nangni rang le nang nai hai rang, khan latak ah awm hai rang le Pumi napathien na tukha nitjoiawm ikoi amani rang a inih.” ⁴⁰ “Nangni ashie hi rong ah put ah rekhe u roh,” tia chawng tampui le chawng rupek a rumawshawk uh. ⁴¹ Khan ningaitak a ama chawng aloi hai kha na baptisma ruloi uh. Makha nikhotak khan miring bawp `thum hi irubo inih. ⁴² Amani na tirtawn hai ruchukna le rawlawpna, shakriethieng shakna le nikna khan mulung rupek uh. ⁴³ Mi rikip chung a ratharakakna jong shok, ajarla tirtawn hai na rekhekchon le jetna tampui kha ruthaw uh. ⁴⁴ Takashawn kholok na lawp `khat a ruawm ua, nieinak kholok rureshem uh. ⁴⁵ Iniei u inleloi le nieinak kholok kha rujor ua, irangai u dungjuia amani dieng rupek uh. ⁴⁶ Nikhonikho a riethiengmun ah mulung pum `khat a ruruchun uh. In rikip ah tan rukhoi uh, khan rawshaw le mulung renem a nekleshak kha rushak uh. ⁴⁷ Amani na Pathien kha rumapak uh, khan miring kholok le riengieihiem a ruawm uh. Ishan miring hai kha Pumi na nikhonikho a biekrup khan rubo a ruawm.

¹ Khan Peter le John na riethiengmun ah nikna pha nidan `thum hin riethiengmun ah ruhawng uh. ² Unu vawn shung ah put ah kekhawr miring `khat vak chawi uh. Makha riethiengmun ah alut hai dieng numpokpek nikna rang, Metha iti riethiengmun pakawt khan ningthingkip rutet uh. ³ Peter le John na riethiengmun lut rang a rasham u kha rumuk phakhan, numpokpek kha runik a ruawm. ⁴ Peter le John na enrep a ruti uh, “Kieini hi ne`en roh.” ⁵ Ih `khat kumuk rangnih ti jarkhan, amani kha rumiejierep. ⁶ Inia Peter na ruti, “Kiei na rangkachak le dangka kha niei mi`ing, inia kiniei hi kinepek inih: Nazareth Jesu Christa riming a thoi tana lawn rang roh.” ⁷ Peter na ama khut chang khan rurak a rumothoi, khan relentak a eke hai le ekeartui hai kha hawng ngar pe joi. ⁸ Ama na hawng chawm a hawng ding le roroia rulawn joi. Khan chawmlam a amani le lawn a Pathien mapaklam a riethiengmun khan rulut joi. ⁹ Khan lawnlam a Pathien imapak kha mi kholok na rumuk uh. ¹⁰ Khan ama kha riethiengmun Metha Pakawt ah rushuthiei khutdawpa kha inih, iti kha amani na rujet uh. Ama chung a ashok khan erekhek a shindawngna runiei uh. ¹¹ Kekhawrpa kha na Peter le John kha irumukui le roroia, mi kholok na, shindawngtak a, Solomon shumkung iti khan ah awm amani dieng rutan uh. ¹² Peter na mahi rumuk phakhan, mi hai dieng khan rumashang, “Aw Israel miring hai, ijar a mahi chung hin shindawngna nanginiei u maw nih? Ninawkle, karanak ua ninawkle kirichichawina u khan a ama hi kimawlawn u ang a, ijar a nine`enrep u maw nih? ¹³ Abraham Pathien, Isaac Pathien, Jacob Pathien, pilepu hai Pathien kha na ama shok Jesu kha rumulur joi. Ama kha Pilate na rumoshok jawt phakhan, nangni na Pilate maikung a nangirujawt boi ua, mi hai dieng a nangirupek u kha inih. ¹⁴ Inia nangni na Riethieng le Midik kha rujawt u makche a mithatpa kha nangni rang moshokna rang, nangrunik uh. ¹⁵ Khan nangni na ringna apeh Rengshapa kha nangruthat uh. Pathien na ama kha athi ah put ah rumothoi. Mahin kieini na kungkachang uh. ¹⁶ Ama riming a takashawntak kha na nangimuk u le nangijet u miringpa hi imarat inih. Khan Jesu dieng ama takashawn kha na nang kholok maikung a miringpa hi amadamna joi. ¹⁷ “Tun uliennai hai, nang rampo hai na iruthaw u kha ang a, nangni na jet boi a niruthaw u inih, iti kha kejet. ¹⁸ Hitihin Pathien na ama thiempulien hai kholok ner a irurophongna, makhala Christa kha ashawngir rang a inih, iti kha hawng shok nih joi. ¹⁹ Khajarkhan nang mulung lek u roh, khan jir u roh. Khanitatu Pathien na nang munu u hai kholok kha nurushuk pe rangnih. Makha pha khan Pumi ah put ah matharnaret pha kha jong rangnih. ²⁰ Khan nangni dieng matieng a irurophong Jesu Christa kha jong tir rangnih. ²¹ Nieinak kholok hawng mikir masheng, Jesu kha ravan a awmngir rang a inih. Makha chungchanga Pathien na manmieshie put mala a ama thiempulien riethieng hai ner a irurieina inih. ²² Ajarla Moses na pilepu hai dieng diktak a iruriei inih, ‘Nang PUMI nang Pathien na kiei a`ang Thiempulien `khat nang miring ah put ah mothoi rangnih. Nangni dieng a iriei kholok kha nangirangai u rang a shok. ²³ Khan makha Thiempulien chawng rangai boi mi rikip kha mi hai kar ah put ah mathang rangnih.’ ²⁴ Samuel ah put ah anujui thiempulien kholok na hihai nikho chungchanga irurophongmasha inih. ²⁵ Khan nangni hi thiempulien hai nai hai kha nangnih uh. Pathien na nangpa hai dieng irupek rawjawtna nai hai kha nangnih uh. Abraham dieng ruti, ‘Nang chicha jar a rieliei a inshungkhur kholok dieng rahvan pek rangnih.’ ²⁶ Pathien na ama shok Jesu kha rumothoi shole, akhat changna a ama kha nangni dieng rahvan pek rang jong tir joi. Makha nang kholok kha nang thatna boi uah put ah niemiehieina u rang a inih.”

¹ Peter le John na mi hai dieng chawngruriei u lai khan thiempu hai, riethiengmun arung ralamkai le Sadducee hai na amani dieng va uh. ² Jesu dieng athi ah put ah thoiretna awm, tia miring hai kha iruruchuk a irurophong u kha na amani mulung kha rumahang pe. ³ Khajarkhan amani kha rushur uh. Nitak runit jarkhan, jing tiengshe khan lungroko shung ah amani kha rukhum uh. ⁴ Inia chawng rangai hai tampui na takarushawn uh, khan amani jat kha bawp rahnga dawr runih. ⁵ Jing tieng hin rampo hai, lamkai hai, khan danoja hai kha na Jerusalem ah ruruchun joi. ⁶ Thiempu rashang Annas le Caiaphas, John, Alexander, khan thiempu rashang inshung hai tampui ruawm uh. ⁷ Peter le John kha alai ah miding a rurawdawn uh, “Ih ranak ninawkle tu riming a mahi nangithaw u maw nih?” ⁸ Ratha Riethieng shiplam a Peter na amani dieng ruriei, “Miring chung a chamniei hai le Israel lamkai hai, ⁹ von hin anapa dieng chon atha thaw jar a le itia hi miringpa damna dan kha kieini dieng ennanginerete u nitjoiatu, ¹⁰ nang kholok le Israel miring kholok na ijet nih rosho, mahi Nazareth Jesu Christa riming a nang kar ua damveng a ading nih joi. Mahi Jesu hi nangni na cross ah nangiruthat u, khan Pathien na athi ah put ah irumothoi kha inih. ¹¹ Mahi ‘Inthaw hai nangni na nirudawnda u runiei kik ah lung ruchang kha inih.’ ¹² Tute jar a shandamna hi awm mak, ajarla kieini niringna u rang ravan noi a awm miring hai kar a ipek riming shik awm mak.” ¹³ Khan amani na Peter le John mulung ngar kha rumuk u phakhan, amani kha behangthiei boi, miriem inih, iti kha rujet ua shindawngna runiei uh. Khan amani kha Jesu le rawtawp miring hai keng, iti kha rujet uh. ¹⁴ Amani na irumadam u miringpa kha akar ua ading kha rumuk u jarkhan, amani na ama chung a chawngruriei ngam u mak. ¹⁵ Khajarkhan Sanhedrin kha mathan a shena rang, chawng rupek u shole, chonmun kha amani na rureshe uh. ¹⁶ Khan amani na ruti uh, “Amani dieng imaw nithaw u rang? Ajarla Jerusalem ah awm mi kholok dieng jetna ithawna hi madang joi. Mahi kieini na shok mak ti rang a hi anithiei boi inih. ¹⁷ Inia miring hai dieng dawnshe a majarna boi rang le hi riming hin tute dieng rieina boi rang, michitrip u rang rawi.” ¹⁸ Khajarkhan amani kha rukoi ua Jesu riming a chawngriei ninawkle ruchukna boipet rang, chawng rupek u joi. ¹⁹ Inia Peter le John na rumashang uh, “Pathiennek a nang chawng u rangai rang a hi Pathien mik`en a dikna maw chang nih, chawngshat u roh. ²⁰ Ajarla kimuk u le kijet u chungchanga chawngriei hi bang ngam u naw ning.” ²¹ Takthar a amani kha rumichitsho u le, rumeshe u joi. Ajarla ashok chon jarkhan mi kholok na Pathien kha mapak a ruawm le khan amani jarkhan, amani chepna rang, lam rumuk u mak. ²² Ajarla damna chonrekhek ithawna miringpa kha kum shawm mili khe miring runih joi. ²³ Amani kha rumoshoksho u le, thiempu ulien le shierulien hai na amani dieng iruriei hai kha Peter le John na amani lawm hai dieng thang vak koi uh. ²⁴ Khan amani na rujet u `le, mulung `khat a he rashangtak a Pathien dieng ruti uh, “Aw Pumpa, nang ravan le rieliei, thampui le ushung ah awm kholok akonpa kha nangnih. ²⁵ Nang shokpa David ner a nangruriei: ‘Ijar a phung hai kha rurang u maw nih, khan miring hai na nemna boi a chonirashak u maw nih? ²⁶ Rieliei reng hai na rumiding u joi, khan rampo hai na PUMI chung a le ama Christa chung a re`erpuina rang, ruruchun u joi.’ ²⁷ Ajarla diktak a thao nangirunawt nang shok riethieng Jesu chung a Herod le Pontius Pilate na Phungshik hai, khan Israel miring hai le lawp `khat a ruruchun u joi. ²⁸ Makha nang ranak le nang mulungmining nirumuchuksha kha ashok inih. ²⁹ Tun, Aw Pumi, amani mimichit hi enro, khan mulungartak a nang chawng kha rieina rang, nang shok hai dieng hin ranak peh roh. ³⁰ Nang mimadamna nang ranak kha jong peh tana, jetna le rekhekchon hai kha nang shok riethieng Jesu riming a thaw u rosho.” ³¹ Amani na nikna kha runieisho u le, lawp `khat a ruchunna u mun kha hawng rawnawk, khan amani kholok dieng Ratha Riethieng na jong ship ua Pathien chawng kha ngartak a ariei ruput u joi. ³² Khan takashawn mipui kha mulung `khat le ringphuk `khat a ruawm uh. Tute na`awm inleloi kha bing niei rumachang u mak, inia irawkhawm u rikip kha mun `khat a rurotokna uh. ³³ Ranaknieitak a tirtawn hai kha na Pumi Jesu thoiretna khan kungruchang uh, khan amani kholok chung a numpokmirit kha lawmlawm a jong pe uh. ³⁴ Amani kar a ravat `khatshe ruawm pe u mak, ajarla inleloi aniei hai kha na rujor ua khahai man kha vak chawi uh. ³⁵ Amani na tirtawn hai keshun khan vak tet ua rangai hai dieng khan rushem pe uh. ³⁶ Cyprus tuikawram a ashok, Levi phung Joses iti miring `khat ruawm. Tirtawn hai na ama dieng Barnabas iti riming kha rupek uh (Makha mawshawkna apeh shapa tina inih). ³⁷ Ama na iniei loipuk kha rujor a shier kha tirtawn hai keshun a vak tet.

¹ Inia Ananias iti miring `khat na ama inkonu Sapphira le rejet a ram `khat hi rujor. ² Ama na, ama inkonu le rejet a, ikhawn shier kha eshen rurawt, khan khoikhat kha ruchawi a tirtawn hai keshun a vak tet. ³ Inia Peter na ruti, “Ananias, ijar a Satan na nang mulung kha ibuk a Ratha Riethieng chung a mielieishiei inawmawthaw a makha ram man kha eshen nangirawt maw nih? ⁴ Nangjor mala khan makha nang tah anih boi maw nih? Nangjor sholeawm shier chung khan nang cham a awm boi maw nih? Ijar a nang mulung shung a hiti chon hi nangirashak maw nih? Nang na miring hai dieng mielieishiei nangithaw nimak a Pathien dieng mielieshiei nangithaw inih.” ⁵ Ananias na hihai chawng hi rujet phakhan, pur a ruthi joi, khan hihai chon ajet miring kholok na ajeng a chitna runiei uh. ⁶ Rothar hai na va ua rok kha vak jo uh, khashole ruchawi ua vak khum u joi. ⁷ Khan nidan `thum dawr hi rakar `le ashok chon kha jet boi a ama inkonu kha vak lut. ⁸ Peter na ama dieng rurawdawn, “Ram kha kha jat khan a nangijor u maw nih?” Ama na rumashang, “Inih, kha jat khan a kijor u inih.” ⁹ Peter na ama dieng ruti, “Itia Pumi Ratha kha enretena rang, rawjawtshom maw nangnih uh? Enro, nang inkopa akhum miring hai na mawkawt kung ah ding a awmlai, nangawm nawchawi u rangnih joi.” ¹⁰ Relentak a ama kha rupur a eke kung a ruthi joi. Rothar hai na va ua athi kha vak muk u phakhan, ruchawi ua ama inkopa diengtak khan vak khum u joi. ¹¹ Khajarkhan biekrup le khahai ajet kholok chung a chitna jong shok joi. ¹² Khan tirtawn hai khut dieng jetna le rekhekchon tampui hi miring hai kar a ruthawna. Khan amani lawpsheng ua mulung khatte a Solomon Tomai`in khan ruruchun uh. ¹³ Mi hai na amani kha rashangtak a ruen uh, khan tute na amani dieng rujaw ngam u mak. ¹⁴ Inia Pumi takashawn nupang apa tampui kha rubo uh. ¹⁵ Khajarkhan Peter na vak pang pha a, ama riliptak a kha nita`awm, amani dieng chona rang, ruti ua ana miring hai kha lamlien khan jana le pher chung ah rumaja uh. ¹⁶ Diengvai ah awm mipui kholok na Jerusalem ah vak ruchun ua, amani na ana miring hai le raikho rono na ichutna miring hai kha vak chawi uh, khan amani lawpsheng a damna rumuk uh. ¹⁷ Khashole thiempu rashang na ama le rawtawp Sadducee lawpreshen kholok le ruthoi joi. Manarshie kha na amani kha rubuk joi. ¹⁸ Amani na tirtawn hai kha rushur ua mithat miring hai thongna lungroko shung ah rutet u joi. ¹⁹ Inia Pumi ravantir na jan a lungroko mawkawt hai kha rumawlawng pe a vai rumoshok uh, khan ruti, ²⁰ “She u rang roh, riethiengmun ah vak ding u tana mahi ringna chawng kholok hi mi hai dieng vak riei pe u roh.” ²¹ Amani na mahi rujet u phakhan, kha jingkar khan jingkara riethiengmun ah rulut ua mi hai kha ruruchuk u joi. Thiempu rashang na ama le rawtawp hai kha le vak shok phakhan, Sanhedrin le Israel nai hai shierpui rikip ruruchun ua, amani kha lungroko shung ah put ah vak chawina rang, mi rutir uh. ²² Inia mirung hai kha na rushe u phakhan, amani na lungroko shung khan tirtawn hai kha vak muh u lai mak. Khajarkhan vak kir ua thang vak koi uh. ²³ “Kieini na lungroko kha thatak a rakhar, mirung hai kha mawkawt ah ading kha`awm kumuk uh, inia kawmawlawng u phakhan, shung ah tute muh u mi`ing.” ²⁴ Khan thiempu rashang hai, riethiengmun arung lamkai, khan thiempu ulien hai na hihaihi rujet u phakhan, imaw shok nih, tia shindawngna runiei uh. ²⁵ Khalaitak khan miring `khat vak shok a vak rophong, “Enro, lungroko shung ah nangikhum u hai kha na riethiengmun ah ding a mi hai kha ruchuk a awm uh.” ²⁶ Khan lamkaipa kha na mirung hai kha le rushe a rawmawreshem moshok boi a amani kha vak chawi uh, ajarla mi hai kha na lung le nedeng u nih, tia ruchih uh. ²⁷ Amani na vak chawi u phakhan, Sanhedrin maikung a rumiding ua thiempu rashang kha na amani dieng rurawdawn, ²⁸ khan ama na ruti, “Mahi riming hin mi ruchukna boi rang, kieini na chawngkinabenrep u nimak maw? Inia enro, nangiruchuk u kha na Jerusalem hi ship joi. Hi miring thishen kha kieini dieng nangmocho jawt uh.” ²⁹ Inia Peter le tirtawn hai na mashang a ruti uh, “Miring hainek khan Pathien chawng kha kirangai u rang a shok. ³⁰ Thingling ah nangirumakhai ua nangiruthat u Jesu kha nipilepu hai Pathien kha na irumothoi inih. ³¹ Pathien na Israel hai dieng mulung lekna le munu rangaidamna pekna rang, Rengshapa le Shandampa `khat a, ukhut chang tieng awmna rang, rumulur joi. ³² Khan hihai jar hin kieini na kungachang kanih uh. Pathien na ama chawng rangai miring hai dieng ipek Ratha Riethieng na`awm hihai chungchang hin kungachang u inih.” ³³ Amani na mahi rujet u phakhan, ajeng a mulung ruhang pe ua amani kha thatna rang, lam rutawk u joi. ³⁴ Inia mi kholok na richit ipek, Dan oja, Gamaliel iti Pharisee miring `khat na Sanhedrin khan ruding a tirtawn hai kha vai ah tetbawtna rang, chawng rupek. ³⁵ Khashole amani dieng ruti, “Israel miring hai, hihai miring dieng hin thaw rang nangiti u kha miningrep u roh. ³⁶ Ajartu kum `khat le `di mala khan Theudas iti miring `khat ruawm, ama na kiei kanih, tia miring rajamili dawr na ama anu rujui uh, inia ama kha ruthat uh. Khan ama rungamna miring kholok kha`awm chekrurachai ua ruthangsho u joi. ³⁷ Ama shole, Judas iti Galilee miring `khat ruthoi. Mijattelai khan mitampui na ama anu kha rujui uh. Ama`awm khatikhan ruthang a ama rungamna miring hai kha chekrurachai uh. ³⁸ Khajarkhan tunawm chonmun hi nangni dieng kinieriei u inih: hihai miring hi ralat pui u roh, ithaw jawt kha thaw u rosho. Hihai chonmun hai hi manmieshie miring na irashak chonmun nitatu, thang rang keng. ³⁹ Inia mahi Pathien ah put ah nitatu, mathang ngam u naw tinih. Pathien le rosho nangchang u rang keng.” ⁴⁰ Amani kha khatikhan ama na rumawjawt. Khashole amani na tirtawn hai kha koi ua, rujem uh. Khan Jesu riming a chawngriei tha mak, tia chawngrubenrep ua rumoshok u joi. ⁴¹ Sanhedrin kha irumathan u le roroia, ama riming jar a maimawk rang a kha Pathien na irutukmashak inih, tia ningaina kha runiei uh. ⁴² Khan ningthingkip hin riethiengmun ah nit a in ah nita`awm, Jesu hi Christa inih, iti kha ruchuh le rophong ruchat u mak.

¹ Khalai a nikho hai khan akhaichawi hai jat kha hawng rawp shishit le roroia, Greek hai na, nikhonikho a nekleshak reshemna khan, amani mieirawng hai kha ruenda uh, tia Hebrew hai chung a ningnitna boi kha rurophong uh. ² Khan tirtawn shawmlieidi kha na khaichawi hai kholok kha ruchun a ruti uh, “Tirtawn kieini na Pathien chawng kha mathan a tebol chung ah nekleshak reshepna niboi pui u hi adik nimak. ³ Khajarkhan uliennai hai mahi chonmun hin a rashap pui rang, mi na kungichangna, Ratha Riethieng le shingna aship, ashing miring shiri nang kar ua tawk u tana kieini na madan u rang kanih. ⁴ Inia kieini tu anih le chawngshemna a repeh u rang kanih.” ⁵ Mahi chawng hi na mipui kha ningruminit pe a takashawn anieitak le Ratha Riethieng aship, Stephen, Philip, Prochorus, Nicanor, Timon, Parmenas, khan Jihudi ajir Antioch miring, Nicolas, amani hai hi rumadan uh. ⁶ Amani kha tirtawn hai maikung a rumiding ua nikna runiei pe uh, khan amani chung a khut rutet pe uh. ⁷ Khan Pathien chawng kha rurajar a Jerusalem shung ah khaichawi hai jat kha ajeng a rupung joi. Khan thiempu hai kar a tampui na takashawn kha rushap u joi. ⁸ Stephen na, takashawn le ranak ship a, miring hai kar a rekhekchon le jetna lienpui ruthaw. ⁹ Khania Synagogue Moshok Miring hai iti ah put ah miring, Cyrene, Alexandria, khan Cilicia le Asia miring hai na Stephen le chawngrieshietna rumothoi uh. ¹⁰ Inia ama ruchawngna shingna le Ratha chung khan rumene ngam u mak. ¹¹ Khashole amani na miring eshen muruk a rurachak ua, “Ama na Moses le khan Pathien mieshietna chawngiriei kha kejet uh,” rumiti uh. ¹² Amani na shierulien hai, danoja hai kha le roroia, mi hai kha rumarang uh. Khashole amani na jetboithieiboi a va uh, khan ama kha rushur ua Sanhedrin ah ruchawi uh. ¹³ Amani na adik boi kungchangna hai kha rupek ua ruti uh, “Mahi miringpa hi na riethiengmun le Dan irodoi pui mieshietna chawngriei kha bang mak. ¹⁴ Ajarla ama na iriei kejet uh, makhala mahi Nazareth Jesu hi na hi mun hi mathang rangnih, khan kieini dieng inepek Moses shedan kha melet rangnih.” ¹⁵ Khan Sanhedrin shung a rushuh miring kholok na ama kha ruenrep u phakhan, ama meh kha ravantir meh ang a rumuk uh.

¹ Khashole thiempu rashang na ama dieng rurawdawn, “Hihaihi khati maw nih?” ² Stephen na rumashang, “Uliennai miring hai le kapa hai, narangai pe u roh. Nupu u Abraham na Haran ah ruawm mala khan, Mesopotamia ah ruawm. Khan Pathien alur na ama dieng rular. ³ Khan Abraham dieng ruti, ‘Nang ram le nang inkoshangram kha mah tana kinumumuk rang a ram khawn she rang roh.’ ⁴ Khashole ama na Chaldea miring hai ram kha rumathan a Haran khan kho ruloh. Apa thit shole, Pathien na tun a nangawmna u ram hin ivakthawt inih. ⁵ Ama na kepha tetna khawpshe inkoklo `khat a rupeh mak. Inia Abraham na nai runiei joi nawkawm, Pathien na ama dieng le ama shole ichicha dieng mahi ram hi tumna rang, chawngirurakham inih. ⁶ Pathien na hitihin ama dieng ruti, makhala ama chicha hai na mejet boi ram ah khotang chang u rangnih, khan amani na shok machang a kum rajamili engshiet a thaw u rangnih. ⁷ Inia Pathien na ruti, ‘Kiei na shok namachang hai phung kha chep rang kanih, khashole amani na vak shok u ning, tia mahi mun hin kiei hi chubainabawk u rangnih.’ ⁸ Khashole Abraham dieng vunepna rawjawtna kha rupek. Khatikhan Abraham na Isaac runiei a ni `riet changna a vunruep pe. Khan Isaac na Jacob kha runiei, khan Jacob na phungpa hai shawmlieidi kha runiei. ⁹ “Khan phungpa hai kha na Joseph kha rueng ua, Egypt ah rujor uh. Inia ama kha Pathien na rurawtawp pui. ¹⁰ Khan shawna kholok ah put ah rukhek a ama dieng Egypt reng Pharaoh maikung a numpokmirit mukna ngam rang, varna kha Pathien na rupek. Khan Pharaoh na Egypt le ama inshungkhur kholok chung a rampo rumachang. ¹¹ Tun Egypt le Canaan ram kholok ah nekleshak hawng ravat joi. Mahi na shawna lientak `khat hawng moshok a pilepu hai kha na nekleshak rumuh u lai mak. ¹² Jacob na Egypt ah nekleshak awm, iti rujet phakhan, akhat changna a pilepu hai kha rutir. ¹³ Adi changna a Joseph na ama ulien hai dieng ama kha tumaw nih, iti kha rumejet. Khan Joseph inshungkhur hai kha Pharaoh dieng rumejet. ¹⁴ Khashole Joseph na rutir a apa Jacob le ama inshung shawm shirilieirahnga kholok kha rukoi joi. ¹⁵ Jacob na Egypt khan rushe a ruthi joi, khan pilepu hai kha`awm kha ram khan ruthi u joi. ¹⁶ Amani rok hai kha Shechem khan ruchawi ua Abraham na Shechem apa Hamor shapa hai dieng a irurawchawk thanmun khan rukhum uh. ¹⁷ “Inia Pathien na Abraham dieng chawngirurakham kha hawng rupumna rang a pha kha hawng nai phakhan, ¹⁸ Joseph ajet boi reng shik `khat hawng awm malalim Egypt ah amani jat kha rupung shishit uh. ¹⁹ Mahi reng hi na nuphung u kha rumohon uh, shietak a rutawn, khan pilepu hai kha engshiet a ruthaw a amani nai shentengek hai kha ringna boi rang, ranak a rumapai uh. ²⁰ Hi pha hin a Moses kha rushok inih. Khan ama kha Pathien maikung a metha `khat ruchang, khan apa in khan tha `thum rujawk uh. ²¹ Khan ama kha vai ah rupai u phakhan, Pharaoh shanu na rushar a ashapatak ang a rujawk. ²² Khajarkhan Moses na Egypt miring hai varna kholok khan hawng ruchuk a, chawng le chon hai khan ranak hawng niei. ²³ “Ama na kum shawm mili hawng nih phakhan, ama uliennai Israel nai hai kha phakna rang, mulung hawng niei. ²⁴ Khan mi `khat hi na adik boi a ama uliennai itawn kha rumuk phakhan, rumakhana khan khutrumieshiei a Egypt miringpa kha Moses na ruthat. ²⁵ Pathien na amani kha ama khut le ishanna inih, iti kha jet u rangnih, tia rumining, inia amani na rujet u mak. ²⁶ Jing tieng hin ama na rushe a Israel miring pasha `di rosho a ruawm kha riengieimashakna rang, ama na ruti, ‘Miring hai nangni uliennai nangnih uh, ijar a nangni khatlekhat adik boi a rawtawn maw nangnih uh?’ ²⁷ Inia adik boi a rutawnpa kha na Moses kha rutor a ama dieng ruti, ‘Tu na nang kha kieini anapo rang le chawngshat rang a inamadan maw nih? ²⁸ Majan a Egypt miring nangiruthat kha ang a ninathat jawt maw nih?’ ²⁹ Makha chawng khan Moses na rutan a Midian ram ah khotang ruchang. Makha mun khan shapa `di apa ruchang. ³⁰ “Khan kum shawm mili shole, Pumi ravantir `khat na Sinai Mo ramthim khan rampabuk mieichon a ama dieng rular. ³¹ Moses na makha rumuk phakhan, imuk khan shindawngna runiei a tintana rang, rujawng phakhan, Pumi he kha ama dieng jong. ³² ‘Kiei hi nang pilepu hai Pathien, Abraham Pathien, Isaac Pathien, khan Jacob Pathien kha kanih.’ Moses na chihai a ruen ngam mak. ³³ ‘Khashole PUMI na ama dieng ruti, “Nang kekawk kha thut roh, ajarla nang dingna mun kha mun riethieng inih. ³⁴ Egypt ah kimiring hai dieng a tawnshie kha kiei na kumuk joi. Khan amani shawra`ai kha kurujet joi. Amani akhek rang khan ajong kanih joi. Tun va rang roh, Egypt ah nitir rang kanih joi.” ’ ³⁵ “Mahi Moses hi keng amani na irujawt boi u kha. Amani na ruti uh, ‘Tu na rampo rang le chawngshat rang, inamadan maw nih?’ Ama kha Pathien na lamkai rang le noroshoh a nakhek rang, rampabuk ah rular ravantir ranak jar a irutir inih. ³⁶ Egypt ram ah Thampui Shen khan ama na rekhekchon le jetna ruthaw shole, amani kha lamirukai pe inih. Khan ramthim khan rekhekchon kha kum shawm mili iruthaw inih. ³⁷ “Mahi Moses hi na keng Israel hai dieng a iruriei, ‘Nang PUMI nang Pathien na nangni rang, kiei a`ang Thiempulien `khat nang uliennai hai kar a mothoi rangnih. Ama chawng kha nangijui u rang a inih.’ ³⁸ Mahi Moses hi na ramthim ah puiruchun khan rujaw. Makhan ravantir na Sinai Mo khan ama dieng le nipilepu hai dieng chawngruriei. Khan kieini dieng a pek rang a ringna chawng hai kha ruloi. ³⁹ Pilepu hai kha na ama chawng kha rujui jawt u mak. Kha ruhut a ama kha ruheng ua amani mulung a Egypt tieng rukir jawt uh. ⁴⁰ Amani na Aaron dieng ruti uh, ‘Kamaton uah lawn rang pathien hai kha nokon pe u roh. Egypt ah put ah lamnawhawngkai pe u mahi Moses hi tu, ama chung a ih shok maw nih joi, iti jet u mi`ing.’ ⁴¹ Makha phakhan, shieite rukon ua rilim khan rurawthawi uh, khan amani khutkontak khan ningrungai pe uh. ⁴² Inia Pathien na amani ah put ah mai rumiehiei a ravan a arshi chubaibawk rang rupek joi. Hitihin Thiempulien hai behangbuk ah rumiejiek: ‘Aw Israel inshung miring hai, nangithat u juleva hai kha le ramthim ah kum shawm mili nangrurawthawi u lai khan, kiei dieng nanginurupek u boi maw nih? ⁴³ Moloch thamber in le nang pathien u Remphan arshi nangruchawi uh. Moloch le Remphan kha chubaibawk rang a nangirukon u konrilim hai kha inih. Khajarkhan Babylon kha mekhe a nawnawt u rang kanih joi.’ ⁴⁴ “Nipilepu hai na ramthim khan kungchangna thamber kha runiei uh. Makha Pathien na Moses dieng irilim irumumuk a chawngirupek dungjuia irukon inih. ⁴⁵ Khan pilepu hai na, Phungshik hai khut chung a put ah amani ram rukhek u lai khan, makha Joshua le ivakchawi u inih. Pathien na amani kha pilepu hai maikung a runawt a thamber kha David phashe khan ruawm. ⁴⁶ David na Pathien maikung a enlar rumuk a Jacob Pathien awmna rang, mun irunik inih. ⁴⁷ Inia Solomon kha keng Pathien rang a in rumothoi kha. ⁴⁸ “Nitjoiawm Chungchon a Rashang ama na miring hai khut le kon rilimin khan awm mak. Mahi thiempulien na iruriei kha le ra`ang inih: ⁴⁹ ‘Ravan hi kerengmun inih, khan rieliei hi kekekhawng inih. Ih ang in kha maw kiei rang nomothoi pe u rawng? Ninawkle kawshawmuchumna mun kha imaw nih? ⁵⁰ Kukhut na hihai kholok hi ikon nimak maw? tia PUMI na ieriei.’ ⁵¹ “Aw kangshawng, khan mulung le nokor a vunep boi miring hai! Nang pilepu hai kha ang a Ratha Riethieng kha nangre`erpui jawnjai uh. ⁵² Ih ang thiempulien hai kha maw nang pilepu hai na epshawna irupek boi uh? Amani na Midik `Khat jong rangnih, tia rurieimasha hai kha ruthat uh, khan ama ajor le athat hai kha nangruchang uh. ⁵³ Nangni hi ravantir hai na irumuchuk Dan kha ruloi a rujui boi miring kha nangnih uh.” ⁵⁴ Miring hai kha na hihaihi rujet u phakhan, mulungruhang pe ua, ama chung a harureshe uh. ⁵⁵ Ratha Riethieng ship a ravan tieng ruen a Pathien lurna le Jesu na Pathien khut chang tieng ading kha rumuk. ⁵⁶ Ama na ruti, “Enro! Kiei na ravan rawlawng a Miring Shapa kha na Pathien khut chang tieng ading a awm kha kumuk.” ⁵⁷ Inia amani na nokor rushing uh, khan ra`ailam a rushukbir a ama kha rujawng uh. ⁵⁸ Khashole amani na khopui vai tieng rupawt ua lung le rudeng u joi. Khan a kungachang hai kha na Saul iti rothar `khat keshun ah amani ponledier kha rubawm uh. ⁵⁹ Amani na Stephen kha rudeng u lai khan, ama na nikna runiei, “Aw Pumi Jesu, karatha hi noloi pe roh.” ⁶⁰ Khashole rukhuk shunlam a he rashangtak a rura`ai, “Aw Pumi, hihai munu hi amani dieng mutung pe naw roh.” Mahi ruriei shole, arangruchat joi. Khan amani na Stephen iruthat u khan Saul rujawt.

¹ Khanikhan Jerusalem biekrup chung a epshawna lientak `khat hawngshok joi. Tirtawn hai niboia, takashawn kholok kha Judea le Samaria ram ah rurethehmashak joi. ² Khan richichawi miring hai na Stephen kha rukhum ua, ama chung a mulung jumna runiei uh. ³ Inia Saul na tu in rikip ah lut a biekrup kha mupuhok a ruthaw, khan nupang apa jet boi a lungroko shung ah rukai a rukhum joi. ⁴ Khajarkhan retherak miring hai kha na munmun ah rushe ua athachawng kha rushem uh. ⁵ Philip na Samaria ah rushe a amani dieng Christa kha rurophong. ⁶ Philip na iruthaw jetna hai kha rujet a rumuk u phakhan, mipui na ama chawngriei kha mulungluttak a rurangaishom uh. ⁷ Ajarla raikho rono hai kha na ra`ailam a, aniei miring tampui ah put ah, vak shok uh, khan takthi ninawkle kekhawr miring tampui kha rumadam. ⁸ Khajarkhan kha khopui khan ningaina lientak `khat ruawm joi. ⁹ Khalaikhan makha khopui shung khan matienglai a dawileai chon thaw, Simon iti miring `khat ruawm. Ama na ibibing a alien `khat kanih, tia, Samaria miring hai kha shinrumawdawng pe uh. ¹⁰ Ashinalien mi kholok na “Hi miring hi Pathien ranak alien kha keng,” tia mulunglut a rurangai uh. ¹¹ Ama dieng mulungluttak a irurangaina u ajartu, pha shawttak mahi dawileai hai hi le shinirumawdawng pe u inih. ¹² Inia amani na Pathien rengchangna jar a le Jesu Christa riming chungchanga chawng rushem, Philip kha takarushawn u phakhan, nupang apa dire na baptisma ruloi uh. ¹³ Simonshe kha na`awm takarushawn joi. Khan ama na baptisma ruloi shole, Philip le chatboi a rurawtawp joi, khan ranakniei chon le jetna hai kha rumuk phakhan, shinrudawng pe. ¹⁴ Khan Samaria miring hai na Pathien chawng kha loi u joi, iti chawng kha Jerusalem ah awm tirtawn hai na rujet u phakhan, Peter le John kha amani dieng rutir uh. ¹⁵ Idi hai kha na rushe ua, takashawn `thar hai na Ratha Riethieng tumna u rang, runik pe uh. ¹⁶ Ajarla Ratha Riethieng na amani `khat diengshe jong maklai. Amani na Pumi Jesu riming ranga kha le baptisma iruloi u nilai. ¹⁷ Khashole Peter le John na amani chung ah khut rutet pe ua Ratha Riethieng kha rutum u joi. ¹⁸ Khan tirtawn hai khut kha amani chung ah atet shole, Ratha Riethieng irupek kha Simon na rumuk phakhan, amani dieng shier rupek. ¹⁹ Khan ama na ruti, “Tukhat chung ah khut hai hi katet `le, Ratha Riethieng muknathiei rang, kiei diengawm mahi cham hi nepeh u roh.” ²⁰ Inia Peter na ama dieng ruti, “Pathien khutchawi hi shier pek a mukthiei, tia nangmining jarkhan, nang shier hi nang le athangchen nih rosho! ²¹ Mahi chonmun hin tum ninawkle roiruputna niei makche, ajarla nang mulung kha Pathien maikung a dik mak. ²² Khajarkhan mahi ashie ah put ah mulung lek tana Pathien dieng nikna niei roh. Khanitatu nang mulung na ikhin kha rangaidam pekthiei rangnih. ²³ Ajarla mulung akha na inubuk khan dikna boi thirakarui na inokhop kha kiei na kumuk.” ²⁴ Simon na mashang a ruti, “Nangiti hai kholok kha kiei dieng shokna boi rang, kiei rang Pumi dieng ninik pe roh.” ²⁵ Tun Peter le John na kungruchangsho ua, Pumi chawng kha rushemsho u `le, Jerusalem ah rukir u joi. Khan lam ah athachawng kha Samaria miring hai kho tampui dieng vak shem u joi. ²⁶ Khashole Pumi ravantir na Philip dieng ruriei, “Thoi roh, khan thang tieng she tana Jerusalem ah put ah Gaza tieng shena lamshuk ramthim lam kha rawh roh.” ²⁷ Khajarkhan Philip na thoi a rushe joi. Khan enro, chamnieitak Ethiopia eunuch `khat ruawm. Ama kha Ethiopia miring hai rengnu Candace niei`in kholok apana runih. Ama na Jerusalem ah Pathien bieh rushe inih. ²⁸ In tieng rukirna ama shakawr gari chung ah shutlam a thiempulien Isaiah behangbuk kha rute a ruawm. ²⁹ Khashole Ratha na Philip dieng ruti, “Jawng tana shakawr gari khaw vak dep roh.” ³⁰ Philip na rutan a ama na thiempulien Isaiah behangbuk irute a ruawm kha vak rangai phakhan, rurawdawn, “Nangite kha nangjet maw?” ³¹ Ama na ruti, “Mi `khat na lamnakai pe nawkala, itia maw kiei na jet ngam ning?” Khan Philip kha hawng lut a hawng shutna rang, ama na rudawi. ³² Ama na irute Miejiek khala hi inih: “That rang a ichawi kengam ang a, khan moeppa maikung a a`awmchien kengamte kha ang a, ama na bai rumakak mak. ³³ Ama redena khan, ama dikna kha loi pe joi. Tu na maw ama chicha hai jar a rophong nih? Ajarla rieliei ah put ah iringkho kha loi pe joi.” ³⁴ Eunuch na Philip dieng ruti, “Nawrawdawn rawng, thiempulien na tu jar a iriei maw nih, ibibing jar a maw nih ninawkle tu `khat chungchanga iriei maw nih?” ³⁵ Khashole Philip na ener rumakak a mahi miejiektak hin ah put ah Jesu chungchanga athachawng kha rurophong pe joi. ³⁶ Khan amani na lam kha ivakrawh u le roroia, tui awmna mun `khat ruawm, khan eunuch na ruti, “Enro, hin tui awm joi, kiei baptisma ninomoloi rang hin tu na maw namakha nih?” ³⁷ Khan Philip na ruti, “Nang mulung kholok le takanangshawn a tu, nangthawthiei.” Khan ama na mashang a ruti, “Kiei na Jesu Christa hi Pathien Shapa kha inih, iti hi takakawshawn.” ³⁸ Shakawr gari kha dingna rang chawng rupek a, Philip le eunuch adin u tui awmna tieng khan ruchum uh, khan ama na baptisma rupek joi. ³⁹ Amani na tui ah put ah hawng shok phakhan, Pumi Ratha na Philip kha ruchawi joi. Eunuch na ama kha rumulai mak, khan ama na ningailam a rupang joi. ⁴⁰ Inia Philip na Azotus khan rurumuh joi, khan Philip na khopui kholok ah athachawng kha Caesarea vak shok masheng, rushem joi.

¹ Khalaikhan Saul na Pumi khaichawi hai kha michitna rang le thatna rang, chawngrumoshok a thiempu rashang dieng rushe. ² Ama na Damascus ah awm synagogue hai dieng mawchawi rang, chawngmawchawi `khat runik. Makha ama na Lam khan a awm, nupang apa, muk joiatu, Jerusalem ah vak chawi a lungroko shung ah thongna rang a inih. ³ Khan ama na rushe a Damascus rushokdeng le jetboithieiboi a ravan ah put ah mieivar na ama kha rokochip a jong eh joi. ⁴ Pieipak ah rupur a he `khat na ama dieng iriei kha rujet: “Saul, Saul, iloia kiei hi epshie a ninawthaw maw nih?” ⁵ Ama na rurawdawn, “Tumaw nangnih, Pumi?” Khan Pumi na rumashang, “Kiei hi epshie a nangithaw Jesu kha kanih. Rujumjap ruthui, iti hi amatat inih.” ⁶ Ama na rawnawk le shindawnglam a ruti, “Pumi, kiei hi nang rang imaw ninawmawthaw jawt?” Khan Pumi na ama dieng rumashang, “Thoi tana khopui khawn lut roh, nangithaw rang a kha nieriei rangnih.” ⁷ Ama le rurawtawp hai kha na chawng boi a ruding uh, ajarla he kha rujet u joiawm, tute rumuh u mak. ⁸ Pieipak ah put ah Saul na ruthoi a imik hawng makak phakhan, mik rumuh ngamlai mak. Khajarkhan amani na khut ah rumuroi ua Damascus tieng ruchawi u joi. ⁹ Khan ama na ni `thum mik muh boi a le nekleshak shah boi a ruawm. ¹⁰ Damascus shung khan Ananias iti khaichawi `khat ruawm. Pumi na mulungmik a ama dieng ruriei, “Ananias.” Ama na rumashang, “Hin ka`awm, Pumi.” ¹¹ Pumi na ama dieng ruriei, “Thoi tana Lamton iti lamlien khawn she roh, khan Saul iti Tarsus miring `khat Judas in ah vak tawk roh, ajarla enro, ama na nikna niei a awm. ¹² Khan imik hawng muknathiei rang, Ananias iti miring `khat va a ama chung ah khut ivaktet pe rang a kha Saul na mulungmik a rumuk joi.” ¹³ Inia Ananias na rumashang, “Pumi, Jerusalem ah awm nang miriethieng hai dieng khadawr khan ashie ruthaw, iti hi mi tampui ah put ah hi miringpa jar hi kurujet. ¹⁴ Khan mahin nang riming aban kholok kha shurna rang, thiempu ulien hai ah put ah cham `khat iniei inih.” ¹⁵ Inia Pumi na ama dieng ruti, “She roh, ajarla Phungshik hai, reng hai le Israel miring hai maikung a kiriming achawi rang khutshui `khat a kiei rang kamadan joi. ¹⁶ Hijarhin kiriming jarbak a idawrshe a shawna idoingir rang a maw nih kiei na mumuk rang kanih.” ¹⁷ Khashole Ananias na rushe a in khan rulut joi. Khan Saul chung ah ukhut rutet pe a ruti, “Uliennai Saul, lam ah nang dieng rular Pumi Jesu na, nangmuknathiei rang le Ratha Riethieng na nang chung a shipnathiei rang, kiei hi inavaktir inih.” ¹⁸ Khan relentak a imik ah put ah ngalip a`ang kha jongcho pe a imik kha hawng var pe joi, khan ruthoi a baptisma ruloi joi. ¹⁹ Khan nekleshak lekte rushak shole, ranak hawng niei joi. Khashole Damascus ah awm khaichawi hai le nikho shawtlawk ruawm. ²⁰ Khan relentak a ama hi Pathien Shapa kha inih, tia Christa kha synagogue ah rophong ruput joi. ²¹ Ama chawng rurangai mi kholok na shindawngna runiei ua, ruti uh, “Hi miringpa hi Jerusalem ah Jesu riming aban hai mathangpa le amani kha shur a thiempu ulien hai dieng chawina rang, hin ah ava nimak maw?” ²² Saul na ranak ajeng a hawng niei shishit joi, khan Jesu hi Christa inih, iti hi akalang madangmashak phakhan, Damascus ah awm Jihudi hai kha awkruchak u joi. ²³ Nikhothang hawng shawtbawt le Jihudi hai na ama kha thatna rang, rurashak uh. ²⁴ Inia Saul na amani chonrashak kha rujet. Ama kha thatna rang, shumkawtpakawt ah shunlejan a amani na ruva uh. ²⁵ Inia khaichawi hai na ama kha ruchawi ua jan a bang rebeng ah tiengkum lien `khat a rumuchum u joi. ²⁶ Ama na Jerusalem ah vat phakhan, khaichawi hai kha le rawlawpna rang ruthaw. Inia amani kholok na ama kha ruchih uh, ajarla amani na khaichawi `khat chang joi, iti kha takarushawn u mak. ²⁷ Inia Barnabas na ama kha vak moroi a tirtawn hai dieng vak chawi. Ama na lamlien ah Pumi kha irumuk a ama dieng chawng irurieina le Jesu riming a ngartak a Damascus shung ah chawng irurieina hai kha amani dieng rumejet. ²⁸ Khashole amani le shehawng a Jerusalem ah ruawm joi. ²⁹ Khan Pumi Jesu riming a ngartak a chawngruriei joi. Ama na Greek chawng a chawng Jihudi hai le chawngrurieshiet, khan amani na ama kha that rang rurashak uh. ³⁰ Uliennai hai kha na makha rujet u phakhan, Caesarea tieng ruchawi ua Tarsus tieng rumuchum u joi. ³¹ Khalaikhan Judea, Galilee khan Samaria ah awm biekrup hai kha lungdamtak a ruawm ua rulien uh. Pumi chitna le Ratha Riethieng maw`awina kha le amani jat kha rupung shishit uh. ³² Khan hitihin ruawm makhala Peter na ram kholok a rushe a Lydda ah awm miriethieng hai kha`awm ruphak. ³³ Kha mun khan rishi delap a kum riet ana, Aeneas iti miring `khat hi Peter na vak muk. Ama kha takthi miring runih. ³⁴ Peter na ama dieng ruti, “Aeneas, Jesu Christa na nang kha namadam joi. Thoi tana nang jana kha jo rang roh.” Khan ama na relentak a ruthoi joi. ³⁵ Khan Lydda le Sharon ah awm mi kholok na ama kha rumuk ua, Pumi dieng ruhiei u joi. ³⁶ Khalaikhan Tabitha iti khaichawi `khat hi Joppa khan ruawm. Makha nemele `le, Dorcas tina inih. Ama kha chon atha le numpokpek chonthaw miring `khat runih. ³⁷ Khalaikhan ama kha ana a ruthi joi. Amani na tuirobomashaksho u le, chungindan `khat a rumaja u joi. ³⁸ Lydda kha Joppa le ranai nit jarkhan, khaichawi hai na Peter kha khawn awm iti kha rujet ua akoi pasha `di rutir uh. Amani na relentak a navat pe u roh, tia rudawi uh. ³⁹ Khajarkhan Peter na ruthoi a rushe, khan kha mun kha rushok phakhan, amani na ama kha chungindan khan ruhawng pui uh. Mieirawng hai kholok na ama dieng ruding ua, amani le ruawmlai a, Dorcas na iruchi pe u takdep le ponledier hai kha rumumuk ua ruchap uh. ⁴⁰ Peter na amani kholok kha vai rumoshok a rukhuk shunlam a nikna runiei. Ama na rok tieng khan hiei a ruti, “Tabitha, thoi rang roh.” Khashole ama na imik hawng makak a Peter kha hawng muk phakhan, hawng shuh joi. ⁴¹ Khan ama na khut rushawn a ama kha rumothoi joi. Khashole miriethieng hai le mieirawng hai kha rukoi a, iringlam a ama kha rupek joi. ⁴² Mahi Joppa ah awm kholok na rujet ua, miring tampui na Pumi kha takarushawn uh. ⁴³ Khalaikhan Joppa ah Simon iti mevunchonthaw `khat le nikho shawtbawt ruawm.

¹ Caesarea ah Cornelius iti miring `khat ruawm. Ama kha Italy rarup iti rarajakhat lamkai runih. ² Ama inshung kholok le ama kha richichawi, Pathien kha achih, mi hai dieng numpokpek arat, khan Pathien dieng nikna aniei jawnjai miring `khat runih. ³ Nishun nidan `thum dawr hin Pathien ravantir `khat na jong a “Cornelius!” tia ijonghai kha mulungmik a malangsheng a ama na rumuk. ⁴ Ama dieng chitlam a ruenrep a ruti, “Mahi imaw nih, Pumi?” Ama na rumashang, “Nanginikna le nang numpokpek hai kha miningna `khat a Pathien maikung hawng shok joi. ⁵ Tun Joppa ah miring hai kha tir tana Peter iti Simon kha vak mokoi roh. ⁶ Ama kha thampui kawmchang ah awm, mevunchonthaw miring, Simon iti miring `khat in ah awm inih. Peter na nangithaw rang a kha nieriei rangnih.” ⁷ Ama dieng chawng ariei ravantir kha rushe shole, Cornelius na ama inshung shok `di le ama arung richichawi ramiring `khat rukoi. ⁸ Khan amani dieng irikip ruriei shole, Joppa ah rutir joi. ⁹ Jing tieng, nidan shawmlieidi dawr hin, amani na lam rurawh ua khopui kha ivakdep u le roroia, Peter na inphu chung ah Pathien dieng anih rang ruka. ¹⁰ Ama kha vawnrucham pe a ih `khat rushak jawt. Khan amani na ama rang rurasham pe u lai khan, ama kha shuika a ruawm joi. ¹¹ Ama na ravan rawlawng kha rumuk, khan ama dieng nieinak `khat pon alien mawr mili a khit a rieliei a ijongmuchum kha rumuk. ¹² Makha shung khan ke mili niei rieliei ranring kholok, ramsha hai, vawn a rawshawn, khan ravan a va haiawm ruawm. ¹³ Khan he `khat na ruriei, “Peter, thoi roh, that tana shah roh.” ¹⁴ Inia Peter na ruti, “Nithiei naw nih, Pumi! Ajarla itikte nita`awm orono ninawkle riethieng boi nieinak kiei na shah mi`ing.” ¹⁵ He kha na voidi changna a jong rieiret, “Pathien na iriethiengsho hai kha nang na orono keng tithiei naw tinih.” ¹⁶ Hitihin voithum rushok a nieinak hai kha ravan tieng ruchawiret joi. ¹⁷ Peter na mulungmik a irumuk kha ih tina maw nih, tia shindawngna runieilaitak khan, Cornelius na ivaktir hai kha na pakawt khan ruding ua, Simon in kha rurawdawn uh. ¹⁸ Amani na rukoi ua Peter iti Simon kha hin maw awm, tia rurawdawn uh. ¹⁹ Peter na mulungmik chungchanga rumininglaitak khan, Ratha na ama dieng ruriei, “Enro, miring pasha `thum na nang kha natawk uh. ²⁰ Thoi tana chum rang roh, khan rakhana niei boi a amani le she roh, ajarla amani hi kivaktir hai kha inih.” ²¹ Khajarkhan Peter na jong chum a Cornelius na ivaktir miring hai dieng ruti, “Nangitawk u kha kiei hi kanih, ijar a va maw nangnih uh?” ²² Amani na rumashang uh, “Rarajakhat lamkai, midik, Pathien kha achih miring, khan Jihudi phung kholok na richit ipek u, Cornelius na nang kha ama in ah koi a nang ah put ah chawng rangaina rang hin, ravantir riethieng na jong mejet.” ²³ Khajarkhan Peter na amani kha rukoi a ama in ah rumutung joi. Jing tieng hin ama na ruthoi a amani le khan Joppa ah awm uliennai eshen le rawtawp a rushe joi. ²⁴ Jing tieng hin amani na Caesarea vak shok u joi. Cornelius na amani kha rungak a ruawm, khan inshung miring hai le lawmdit hai kha lawpkhat a rukoi. ²⁵ Peter na vak shok le roroia, Cornelius na lamjawng ruthaw a ekeshun ah bawklap a ama kha chubairubawk. ²⁶ Inia Peter na rumothoi a ruti, “Thoi roh, keiawm miring kanih keng.” ²⁷ Khan Peter na chawngiruriei pui le roroia, in rulut a mi tampui ruchun a ruawm kha vak muk. ²⁸ Khan amani dieng ruti, “Jihudi `khat na Phungshik le rawtawp ninawkle alawn hi dan nih boi inih, iti hi nangjet uh. Inia kiei na tu kha`awm rono ninawkle riethieng boi kitina boi rang, Pathien na kiei dieng numumuk joi. ²⁹ Khajarkhan kiei hi nangnavak mokoi phakhan, rakhana niei boi a kava hi inih. Khajarkhan tun kiei na nawrawdawn rawng: ijar a kiei hi ninavakmokoi u maw nih?” ³⁰ Cornelius na rumashang, “Ni mili mala khan, mahi phatak hin kiei na chamrakurudoi, khan nidan `thum dawr hin ki`in ah nikna kuruniei. Khan enro, pon cheklak rieshiei miring `khat na kamaton ah jong ding. ³¹ Khan ama na ruti, ‘Cornelius, nanginikna kha Pathien na rangai joi, khan nang numpokpek hai kha Pathien na nimininghep pe joi. ³² Khajarkhan Joppa ah awm, Peter iti Simon kha akoi tir roh. Ama kha thampui kawmchang ah awm, mevunchonthaw Simon in ah awm inih. Ama na vat phakhan, nang dieng chawng nieriei pe rangnih.’ ³³ Khajarkhan relentak a nang kha anakoi rang kivaktir inih. Nangnavat pe jar hin mapak awm. Pathien na nang dieng chawng inepek kholok rangai rang, tun Pathien maikung a kokholok a ka`awm u hi inih.” ³⁴ Khashole abai makak a Peter na ruti, “Diktak a Pathien na enshietenlar thaw mak iti hi kejet joi. ³⁵ Inia phung rikip shung a tunita`awm ama achih le adik athaw miring kha ama na ipawm inih. ³⁶ Mahi Pathien na Israel miring hai dieng ijongtir chawng kha inih. Jesu Christa jar a lungdamna kha ama na irushem inih. Ama kha kholok Pumi inih. ³⁷ Baptisma chungchanga John na rushem shole, Galilee ah put ah Judea kholok ah ashok chon kha nangrujet u joi. ³⁸ Pathien na Ratha Riethieng le khan ranak le Nazareth Jesu kha thaoirunawt kha nangjet uh. Pathien na ama kha rawtawp pui jarkhan, shehawng a chon atha kha ruthaw a diabol ranak thoi a ruawm kholok kha irumadam inih. ³⁹ “Jihudi hai ram ah le Jerusalem ah iruthaw hai kholok kha kungkuruchang uh. Amani na ama kha thing ling ah makhai a iruthat u inih. ⁴⁰ Inia Pathien na ni `thum changna khan rumothoi a malangsheng a ruralarmashak. ⁴¹ Mi kholok dieng rular nimak, inia kungchang rang, Pathien na matieng irumadan hai, khan athi ah put ah hawng thoi shole, ama le runerusha hai, kieini dieng a inih. ⁴² Mi hai dieng chawngshem rang le khan Pathien na irumadan ama kha aring le athi hai chung a chawngshatpa kha inih, tia kungchangna rang, chawng nurupek u joi. ⁴³ Thiempulien kholok na mahi Jesu chungchanga kungruchang uh, makhala tunita`awm ama dieng takashawn kha na ama riming jar a munu ah put ah rangaidamna kha muk rangnih.” ⁴⁴ Peter na chawngriei a ruawmlai khan, Ratha Riethieng na chawngrurangai hai kholok dieng jong chutna joi. ⁴⁵ Peter le ava vunep takashawn hai kha na, Phungshik hai diengawm Ratha Riethieng khutchawi jong shok jarkhan, shindawngna runiei uh. ⁴⁶ Ajarla amani na chawngshik a ruchawng ua Pathien imapak u kha rujet uh. Khashole Peter na ruriei, ⁴⁷ “Kieini na niniei u tak kha ang a, Ratha Riethieng amuh miring hai hi baptisma aloi ah put ah tu maw amakha ngam rang?” ⁴⁸ Khajarkhan Pumi riming a amani kha baptisma loina rang, chawng rupek uh. Khashole amani na nikho shawtbawt awmna rang, Peter kha rudawi uh.

¹ Khan Judea ah awm tirtawn hai le uliennai hai na Phungshik hai na`awm Pathien chawng kha man u joi, iti kha rujet u joi. ² Khajarkhan Peter na Jerusalem ah rushe phakhan, vunep miring hai na chawngrurieshiet pui uh. ³ Amani na ruti uh, “Vunep boi hai dieng nangshe a amani le nekleshak nangvakshak pui.” ⁴ Khania Peter na amani dieng dawdawn a ariei ruput, ⁵ “Kiei na Joppa ah nikna kuruniei a shuika a kuruawmlai khan mulungmik `khat kurumuk. Makhan pon alientak `khat ang a ravan ah put ah nieinak `khat shir mili ah khitlam a jong rede a nojong dep. ⁶ Depkhit a kuruen phakhan, rieliei a awm ke mili niei ranring, ramsha, vawn a rawshawn, khan chung a va hai kha kurumuk. ⁷ He `khat na kiei dieng inieriei kha kurujet, ‘Peter, thoi roh. That tana shah roh.’ ⁸ “Inia kiei na kurumashang, ‘Nithiei naw nih, Pumi! Ajarla itikte nita`awm orono ninawkle riethieng boi kabai ah lut mak lai.’ ⁹ Inia voidi changna a ravan a he kha na nurumashang, ‘Pathien na iriethiengsho hai kha nang na rono tithiei naw tinih.’ ¹⁰ Hitihin voithum rushok, khan irikip kha ravan tieng ruchawiret joi. ¹¹ “Khalaitak khan enro, Caesarea ah put ah ivaktir miring `thum kha kaw`awmna in khan vak tung uh. ¹² Amani le rakhana niei boi a sheshomna rang, kiei dieng Ratha na nururiei. Uliennai `ruk hi na`awm nawrawtawp pui ua miringpa in khan kurulut uh. ¹³ Ama in ah ravantir na jong ding kha rumuk a ‘Joppa ah awm Peter iti Simon akoi rang miring tir roh. ¹⁴ Nang le nang inshung miring kholok inashanna rang a chawng kha ama na nepek u rangnih,’ tia ijongriei dan kha kieini dieng nururiei uh. ¹⁵ “Kiei na amani dieng chawngriei kiruput le roroia, putna ah put ah kieini dieng ajong kha ang a, Ratha Riethieng kha amani dieng jong shok nih joi. ¹⁶ Khan ‘John na tui a baptisma nurupek uh, inia kiei na tu Ratha Riethieng a baptisma nepek u rang kanih,’ iti Pumi chawng kha kurumininghep. ¹⁷ Kieini na Pumi Jesu Christa kha takanurushawn u phakhan, inurupek u kha le ra`angre a, khutchawi kha Pathien na amani dieng rupek u joiatu, Pathien kha makha ngam rang kiei tumaw kanih?” ¹⁸ Amani na makha rujet u phakhan, ruawmchien uh, khan Pathien kha mulur a ruti uh, “Khanitatu Pathien na Phungshik hai diengawm ringna muknathiei mulung lekna kha rupek joi.” ¹⁹ Khan Stephen chung a iruthaw u epshawna jar a achairak hai kha Phoenicia ram, Cyprus tuikawram, khan Antiochshe kha ruravak u joi. Amani na Jihudi hai dieng niboia, tute dieng chawng kha rushem u mak. ²⁰ Inia amani kar a Cyprus tuikawram le Cyrene miring eshen na Antioch ah va ua Greek chawng a chawng Jihudi hai diengawm Pumi Jesu chungchanga athachawng kha rurophong uh. ²¹ Pumi khut kha amani le ruawm, khan miring tampui na takarushawn ua, Pumi dieng ruhiei uh. ²² Mahi chawng hi Jerusalem biekrup nokor vak shok phakhan, Barnabas kha Antioch ah shena rang, rutir u joi. ²³ Ama na ava a Pathien numpokmirit kha vak muk phakhan, ningrungai pe, khan amani na mulungdingrep a Pumi dieng awmna jawnjai u rang, amani kholok kha rumawshawk uh. ²⁴ Ajarla Barnabas kha miring atha runih, khan Ratha Riethieng le takashawn kha aship miring kha runih. Khan Pumi dieng mi tampui rubo joi. ²⁵ Khan Barnabas na Tarsus tieng Saul atawk rushe joi. ²⁶ Khan ama kha rumuk phakhan, Antioch ah vak chawi joi. Khajarkhan kum rupumping a biekrup le ruruchun ua, mi tampui ruruchuk uh. Antioch hin akhat changna a khaichawi hai kha Christian hai, tia rukoi uh. ²⁷ Kha pha khan thiempulien hai na Jerusalem ah put ah Antioch tieng va uh. ²⁸ Amani hai kar a Agabus iti miring `khat ruding a Ratha na nuk a ashok rang a kha rurieina, makhala manmieshie pumpui hin nekleshak hawng ravat rangnih. Mahi Claudius Caesar na reng ruchanglai khanawm rushok nih joi. ²⁹ Akhaichawi hai na imawtawrtuk ua Judea ah awm takashawn hai dieng shanna mawchawina rang, mulungrumiding uh. ³⁰ Hitihin ruthaw ua Barnabas le Saul khut a bieklamkai hai dieng rumawchawi uh.

¹ Khalaikhan reng Herod na khut ruraw a epshie a thawna rang, biekrup miring eshen hi rushur joi. ² Ama na John ulienpa James kha chemjam le ruthat joi. ³ Khashole makha na Jihudi hai kha ningmangai pe, iti rujet `le, dawn a Peter kha`awm shurna rang, rurashak joi. Makha Chawjawboi Tan Nikho hai khan a inih. ⁴ Ama na ama kha rushur shole, lungroko shung ah ruthong joi. Ama kha arung rang tetradion mili dieng khutrurotho joi. Makha Rakanna shole, miring hai dieng vak chawina rang a inih. ⁵ Peter kha lungroko shung ah rutetlai khan, biekrup na ama rang mulungluttak a Pathien dieng nikna runiei uh. ⁶ Herod na vai ivakmoshokna rang a jantak khan, Peter na thirakarui `di le khoplam a ramiring `di kar ah ruja, khan mawkawt maton khan mirung hai kha na lungroko kha rurung uh. ⁷ Khan jetboithieiboi a Pumi ravantir na Peter maikung a jong lar a lungroko kha jong erak joi. Khan Peter kha edep ah jong shun, khan mothoi a ruti, “Relentak a thoi roh.” Khan aban ah thirakarui hai kha ruruthut pe joi. ⁸ Ravantir na ama dieng ruti, “Rasham tana nang kethawp kha mawrawn roh.” Makha Peter na ruthaw. Khan ravantir na rutiret, “Nang kotai rosho kha ko tana nujui roh.” ⁹ Peter na vak shok a ama anu kha rujui joi. Inia ravantir na iruthaw kha tak keng, tia rumining mak, inia mulungmik imuk `khat a rumining. ¹⁰ Amani na akhat changna le adi changna mirungna kha vak rakansho u le, khopui jawngna thirkawtpui kha vak shok uh. Amani rang khan nining a rurawlawng a makha vak rakan u joi. Khan kholaidung `khat hi rulawn u `le, jetboithieiboi a ravantir kha na rumak joi. ¹¹ Khashole Peter na hawng chehep a ruti, “Herod khut ah put ah le Jihudi miring kholok na irumining uah put ah nashan rang, Pumi na ama ravantir kha ijongtir inih, iti hi ridinghet a kejet joi.” ¹² Mahi jetphit `le, Mark iti John unu, Mary in ah rushe joi. Makha mun khan miring tampui ruruchun a nikna niei a ruawm uh. ¹³ Peter na vai tieng mawkawt kha rutaw phakhan, mashang rang, Rhoda, iti nungak-shok `khat hi rushe. ¹⁴ Peter hesho keng, iti rujet le ningai pe hai a mawkawt kha mawlawng ruhut a inshung tieng rutan a Peter mawkawt ah ding joi, tia vak riei. ¹⁵ Amani na ama dieng ruti uh, “Nang vet joi.” Inia ama na dikhet, tia ranaktak a ruriei. Khan amani na “Makha Peter ravantir keng,” ruti uh. ¹⁶ Peter na mawkawt kha rutaw a ruawm. Amani na mawkawt kha mawlawng a rumuk u phakhan, dawnga shinrudawng pe uh. ¹⁷ Amani kha awmchienna u rang, khut le rumakha a, Pumi na ama kha lungroko ah put ah ivakmoshokna dan kha ruriei. Khan ama na ruti, “Hihaihi James le uliennai hai dieng vak rophong u roh.” Khashole makha mun kha mathan a mun `khat tieng rushe joi. ¹⁸ Peter chung a khatikhan a ashok chon jarkhan, jingkar tieng ramiring hai kar a roshorakhana lientak rushok. ¹⁹ Herod na ama kha rutawk a rumuk boi phakhan, arung hai kha riringtak a enrete a thatna rang, chawng rupek joi. Hi shole hin Herod na Judea kha mathan joi, khan Caesarea ah rushe a makhan ruawm joi. ²⁰ Khalaikhan Herod na Tyre le Sidon miring hai dieng dawnga mulung hangna runiei. Inia amani na mulung `khat a rengpa jana apana Blastus kha le rurashap ua, lungdam awmna rang ruthaw uh, ajarla rengpa ram kha na amani ram miring hai kha nekleshak irupek u inih. ²¹ Herod na nikho madan `khat a rengpon kha rurieshiei a chawngshatna shutna kha ruloh joi. Makhan Herod na mipui dieng chawngruriei pe. ²² Miring hai na hitihin rura`ai uh, “Pathien he keng, manmieshie he nimak!” ²³ Ama na Pathien kha rumulur boi jarkhan, relentak a, Pumi ravantir `khat na ama kha jong jem a rulung na shak a ruthi joi. ²⁴ Inia Pathien chawng kha rupung a rurajar joi. ²⁵ Khashole amani chonmun kha rurupummashak ua, Barnabas le Saul kha Jerusalem ah put ah vak kir u joi. Khan amani na Mark iti John kha vak rawtawp pui uh.

¹ Khan Antioch biekrup khan thiempulien hai le oja hai ruawm uh. Amani khala: Barnabas, Niger iti Simeon, Cyrene ah awm Lucius, tetrarch Herod le rulienshom Manaen, khan Saul, hihaihi runih uh. ² Amani na Pumi chon thaw a chamrarudoi u lai khan, Ratha Riethieng na ruti, “Barnabas le Saul kha kikoina chonmun khan kiei rang shikjek a natet pe u roh.” ³ Khashole chamradoilam a nikna runiei uh, khan amani chung ah khut rutet pe ua amani kha rutir u joi. ⁴ Khajarkhan amani kha Ratha Riethieng na rutir ua Seleucia khan rushe u joi. Khan ah put ah Cyprus tieng rokong a rushe u joi. ⁵ Amani na Salamis kha rushok u phakhan, Jihudi hai synagogue ah Pathien chawng kha rushem uh. Khan John kha`awm amani rashap pui rang, rurawtawp pui uh. ⁶ Amani na tuikawram kholok kha rakan a Paphosshe kha rushok uh, khan Bar-Jesu iti Jihudi miring `khat rurawtawng pui uh. Ama kha dawipu le thiempulien jok `khat runih. ⁷ Ama na proconsul Sergius Paulus mishingtak `khat le ruawm. Sergius Paulus na Barnabas le Saul kha rukoi a Pathien chawng kha rurangai jawt. ⁸ Inia dawipu, Elymas (makha iriming imele inih) ama na amani kha rure`erpui a proconsul kha makha takashawn ah put ah hieina rang, ruthaw. ⁹ Inia Paul tia`awm ikoi, Saul na, Ratha Riethieng na jong ship a, ama kha enrep a ¹⁰ ruti, “Nang hi mimohonna kholok le milemmidawi aship, dikna kholok le raha, diabol shapa kha nangnih. Pumi lam ridik nangirehermashak kha bang naw rawng maw? ¹¹ Enro, Pumi khut kha nang dieng jong cho joi. Nang mik chawning, tia richinkhat ni kha muh ngamlai naw tinih.” Relentak a romiei le ajing kha ama dieng jong pe a tukhat na khut mukui a lamikai pe rang a kha rutawk joi. ¹² Proconsul kha na ashok chon kha rumuk phakhan, takarushawn, khashole Pumi chungchanga ruchukna khan shindawngna runiei. ¹³ Khashole Paul le irawtawp pui hai kha na Paphos ah put ah rushe ua, Pamphylia ah awm Perga khan rokong a va u joi. Inia John tu amani kha mak a Jerusalem tieng rukir joi. ¹⁴ Inia amani na Perga ah put ah rokong a rushe ua Pisidia ah awm Antioch ah va uh, khan Sabbath nikho khan synagogue ah rulut a rushuh uh. ¹⁵ Synagogue lamkai hai kha na Dan le Thiempulien behangbuk hai kha rutesho u le, amani dieng chawngrumeshe a ruti uh, “Uliennai miring hai, nangni na miring hai rang mawshawkna nangniei u joiatu, nieriei pe u roh.” ¹⁶ Khajarkhan Paul na ruthoi a khut le jetna thawlam a ruti, “Aw Israel miring hai le Pathien kha achih miring hai, rangai u roh. ¹⁷ Mahi Israel miring hai Pathien hi na nipilepu hai kha iruramadan inih. Amani na Egypt ram ah milak `khat a ruawm u lai khan, Pathien na amani kha irumielien a banbo rashang kha le makha ram ah put ah ivakroshoh u inih. ¹⁸ Ajarla ramthim khan kum shawm mili dawr hi amani ringdan kha irushaw pui inih. ¹⁹ Pathien na Canaan ram khan phung shiri rumathang shole, amani ram kha inkoklo `khat a amani dieng irushem pe inih. ²⁰ Makha shole, thiempulien Samuelshe kha, kum rajamili shawm rahnga dawr hi amani dieng chawngshat hai kha rupek. ²¹ Makha shole, amani na reng runik uh, khan Pathien na Kish shapa Saul kha amani rang rupek. Ama kha Benjamin phung ah put ah inih, khan ama na kum shawm mili reng ruchang. ²² Ama kha rumabang shole, David kha Pathien na amani reng rumachang. Ama chungchanga kungchang a ruti, ‘Kumulung le racha rang Jesse shapa David kha kumuk joi. Ama na kimining kholok kha thaw rangnih.’ ²³ “Chawngrakham dungjuia David chicha ah put ah Israel hai rang Shandampa Jesu kha ijongmoshok inih. ²⁴ Jesu jong shok mala khan John na mulung lek a baptisma loina chungchanga Israel miring kholok dieng rurophong pe joi. ²⁵ Khan John na ama chon kha rumawtawr shole, ruti, ‘Kiei hi tumaw kanih, tia nangmining uh? Kiei hi ama kha nimi`ing, inia enro, kanuk a ajong rang a ama kha tu, ama kethawp thut rangshe kiei rutuk mi`ing.’ ²⁶ “Uliennai miring hai, Abraham chicha hai le nang kar ua Pathien kha achih miring hai, nangni dieng mahi shandamna chawng hi jong tir joi. ²⁷ Ajarla Jerusalem ah awm miring hai le rampo hai kha na ama kha rujet u mak. Amani na Jesu kha iruheng u kha na, Sabbath rikip a irute u, Thiempulien hai hesho hai kha irurupummashak u inih. ²⁸ Ama thitna rang a jar kha rumuk pe u nawkawm, ama kha thatna rang, amani na Pilate dieng runik uh. ²⁹ Ama chungchanga irumiejiek rikip kha rurupummashaksho u `le, thing ling ah put ah ruloi ua than ah rumaja uh. ³⁰ Inia Pathien na ama kha athi hai kar ah put ah irumothoi inih. ³¹ Khan nikhothang shawtbawt `le, Galilee ah put ah Jerusalemshe a ihawngpuishom hai dieng rular. Khan amani na mi hai dieng kungruchang uh. ³² “Khan pilepu hai dieng chawngirurakham athachawng kha nangni dieng kirophong u inih. ³³ Jesu kha athi hai kar ah put ah rumothoi a, mahi chawngrakham hi Pathien na amani nai hai kieini rang rurupummashak joi. Mahi adi changna Lah a imiejiek kha le ra`ang inih: ‘Nang kashapa kha nangnih, von nikho hin konomoshok joi.’ ³⁴ Ama rok kha thutna boi rang, Pathien na athi hai kar ah put ah rumothoi joi. Ama chungchanga Pathien na hitihin ruriei: ‘David dieng irupek takashawn rang a rutuk le chawngrakham riethieng kha nang dieng nepek rang kanih.’ ³⁵ Khajarkhan Lah `khat a`awm ruti: ‘Nang Miring Riethieng kha na thutna imuk rang a kha nang na jawt naw tinih.’ ³⁶ “Ajarla David na Pathien idit dungjuia ama rongtak hai chon kha ruthaw shole, ruthi joi. Khan pilepu hai jana khan rumaja uh, khan thutna kha rumuk. ³⁷ Inia Pathien na imothoi miring kha na tu thutna rumuh mak. ³⁸ “Khajarkhan uliennai miring hai, mahi miring jar a munu chung a rangaidamna kha nangni dieng kirophong inih. Mahi nangni na nangijet u nih rosho. ³⁹ Takashawn miring rikip kha, Moses Dan na iridik ngam boi kholok ah put ah, Jesu jar a iridik ngam inih. ⁴⁰ Khajarkhan thiempulien behangbuk ah iruriei hai kha nangni dieng shokna boi rang, riring u roh: ⁴¹ ‘Enro, mi ishawnboi a thaw hai, shindawngna niei u tana thang u roh. Ajarla nang nikho u hai hin, tukhat na nangni dieng nieriei u sheawm takashukshawn a nangishawn boi u rang a chon kha thaw rang kanih.’ ” ⁴² Jihudi miring hai synagogue kha irumathan le roroia, hawng shok rang a Sabbath hin Paul le Barnabas na hi hai chungchanga roirieinaret rang, Phunshik hai kha na rudawi uh. ⁴³ Synagogue ah ruchun kha ruchin u `le, Jihudi hai tampui le Jihudi richi a jir richichawi hai kha na Paul le Barnabas kha rujui ua, amani na Pathien numpokmirit khan ruawm jawnjaina u rang, chawngruriei pe uh. ⁴⁴ Ahawng rang a Sabbath khan khopui shung ah awm miring arawplam na Pathien chawng rangai rang, ruruchun uh. ⁴⁵ Inia Jihudi hai na mipui kha rumuk u phakhan, mukmakna runiei uh. Paul na iriei hai kha perawlaw le mieshietna chawng rumachang pe ua rurodoi pui uh. ⁴⁶ Khashole Paul le Barnabas na mulungar`er a rumashang uh, “Akhat changna a Pathien chawng hi nangni dieng riei rang a hi irangai inih. Inia makha nangni na nangheng ua kumshawt ringna rang khan nang nining ua rutukmashak u lai makche. Khajarkhan enro, kieini Phungshik hai dieng kahiei u joi. ⁴⁷ Ajarla Pumi na kieini dieng chawng nurupek uh: ‘Phungshik hai rang mieivar nitna rang, kiei na nang kha kanamadan joi. Makha rieliei dawngshe khan shandamna kha nangchawina rang a inih.’ ” ⁴⁸ Phunshik hai na mahi rujet u phakhan, ningai a Pumi chawng kha rumulur uh. Khan kumshawt ringna rang a madansha hai kholok kha na takarushawn uh. ⁴⁹ Khatikhan Pumi chawng kha ram kholok khan rura`ar joi. ⁵⁰ Inia Jihudi hai na richichawi le richit`awm nupang hai, khan khopui shung ah lamkai hai kha rumawphawk ua, Paul le Barnabas chung a epshawna pek rang rumuchun uh. Khan amani ram ah put ah amani kha runawt u joi. ⁵¹ Khajarkhan Paul le Barnabas na eke uah akawp vaiphin kha amani le re`erpuina `khat a rukhawng ua Iconium ah rushe u joi. ⁵² Khan khaichawi hai kha na ningai le Ratha Riethieng khan ruship uh.

¹ Khan Iconium ah hitihin rushok makhala Paul le Barnabas na Jihudi hai synagogue ah rulut a khatikhan chawngruriei u shole, Jihudi le Greek mipui lientak `khat na takarushawn uh. ² Inia takarushawn boi Jihudi hai kha na Phungshik hai kha rumuchun ua, uliennai hai chung a ningshietna rumieniei uh. ³ Khajarkhan amani na pha shawttak kha mun khan ruawm ua, ama numpokmirit chawng chungchanga kungruchang, jetna le rekhekchon hai kha amani khut hai kha le thawna rang rupeh, Pumi chungchanga mulungar`er a chawng ruriei uh. ⁴ Inia khopui shung ah awm miring hai kha rureshen uh. Eshen na Jihudi hai kha rurachang pui uh, khan eshen na tirtawn hai kha. ⁵ Khan Phungshik hai le Jihudi hai na amani rampo hai kha le engshiet thawna rang le lung le dengna rang, rurasham u joi. ⁶ Makha tirtawn hai kha na rujet ua Lycaonia ah awm Lystra le Derbe, khan makha ramroko shung hai khan rutan u joi. ⁷ Khan kha mun khan athachawng kha rurophong uh. ⁸ Lystra shung khan eke mothoi thiei boi miring `khat rushuh, ajarla ama kha unu shung ah put ah kekhawr, alawn boilak, miring `khat runih. ⁹ Paul na chawngrurieilai khan ama na mulungluttak a rurangai. Paul na ama kha ruenrep a damnathiei rang a ama takashawn kha rumuk pe. ¹⁰ He rashangtak a ruti, “Thoi tana nang ke a thaning a ding roh.” Khan ama na hawng chawm a rulawn joi. ¹¹ Paul na iruthaw hai kha mirawp na rumuk phakhan, Lycaonia chawng a ra`ai a ruti uh, “Pathien hai kha na manmieshie me loi a jong chum u joi!” ¹² Barnabas kha Zeus ruti uh, khan Paul kha lutu a chawngriei miring nit jarkhan, Hermes ruti uh. ¹³ Zeus thiempu kha na, ama riethiengmun kha khopui vaitak a awm jarkhan, shieratcha hai le rieiparrui hai kha pakawt hai khan vak chawi a mirawp kha le rawthawina `khat pekna rang, rurasham. ¹⁴ Tirtawn Paul le Barnabas na makha rujet u phakhan, amani ponledier hai kha ruther uh, khan mipui kar khan rutan ua, rura`ai uh. ¹⁵ Amani na ruti uh, “Miring hai, ijar a hihaihi nangithaw u maw nih? Nangni le ra`angre kanih u keng. Nangni na hihai nemna boi ah put ah aring Pathien dieng nanghieina u rang, athachawng hi kivakchawi u inih. Pathien hi na ravan le rieliei, thampui, khan kha shung ah awm kholok hi irukon inih. ¹⁶ Ashesho rong khan phung kholok dieng amani ningnom a ringna rang, ama na rujawt pe. ¹⁷ Inia ama na atha thaw a kungchangna mak boi a ruawm mak, makhala ravan ah put ah ro nomojong pe a choicha thatna pha hai kha kieini dieng nurupek uh. Khan ama na numulung u hai hi nekleshak, khan ningaina kha le nimiship pe uh.” ¹⁸ Hihai chawng haishe leawm, amani dieng rawthawina pek ah put ah mipui kha rumakha ngam u mak. ¹⁹ Inia Antioch ah put ah le Iconium ah put ah Jihudi hai jong shok ua, chawng jong mielien pe uh. Khajarkhan amani na Paul kha lung le rudeng ua thi joi, tia ama kha khopui ah put ah rupawt u joi. ²⁰ Khanikengta khaichawi hai kha na ruhieichip u phakhan, ama na hawng thoi a khopui khan rulut joi. Khan jing tieng hin ama na Barnabas le Derbe tieng rushe joi. ²¹ Amani na kha khopui khan athachawng kha rurophongsho ua khaichawi tampui rukonsho u le, Lystra, Iconium, khan Antioch ah vak kir u joi. ²² Kha mun khan khaichawi hai mulung hai kha rumenet pe uh, khan takashawn kha awm jawnjaina rang, mulung rumangar pe ua ruti uh, “Kieini na Pathien rengchangna kha hihai epshawna tampui hi doi a alutngir rang nanih uh.” ²³ Khan amani na biekrup rikip ah bieklamkai rumadan ua chamradoi a nikna runieisho u le, amani na taka`irushawn u Pumi dieng pekna runiei uh. ²⁴ Khashole Pisidia kha rurakan ua Pamphylia tieng rushe u joi. ²⁵ Amani na Perga ah Pathien chawng kha rurieisho u le, Attalia tieng rushe u joi. ²⁶ Khan ah put ah Antioch ah rokong a rushe u joi. Makha mun kha irurupummashak u chon hai rang khan Pumi numpokmirit kha irupekna u mun kha inih. ²⁷ Amani na vak shok u phakhan, biekrup hai kha mun `khat ah ruruchun pui ua Pathien na amani le chon ithawna dan le Phungshik hai dieng takashawn mawkawt imawlawng pena dan kha ruriei uh. ²⁸ Khan amani na khaichawi hai kha le pha shawttak ruawm uh.

¹ Khan Judea ah put ah miring eshen jong ua, uliennai hai kha ruruchuk uh, “Nangni na Moses shena dungjuia vunnangep u joi nawkatu, shandamna kha muh ngam u naw tinih.” ² Paul le Barnabas na jawtna boi lientak `khat runiei ua, amani le chawngrieshietna runiei uh. Khajarkhan mahi rawdawnna chungchang hin tirtawn hai le bieklamkai hai le reshena rang, Paul le Barnabas, khan miring eshen hi Jerusalem ah hawngna rang rumadan uh. ³ Khajarkhan biekrup na amani kha rutir u joi. Phoenicia le Samaria vak rakan u lai khan, Phungshik hai na Pathien dieng hieina u kha amani dieng thang vak koi uh. Amani na uliennai kholok kha ajeng a ningrumangai pe uh. ⁴ Amani na Jerusalem vak shok u phakhan, biekrup, tirtawn hai, khan bieklamkai hai na amani kha lamjawng ruthaw uh. Khan Pathien na amani dieng chon iruthawna hai kholok chungchanga thangrukoi uh. ⁵ Inia Pharisee lawp takashawn miring eshen na ding a ruti uh, “Amani na vuni`ep ua, khan Moses Dan kha juina rang, chawngnipek u rang a hi rangai.” ⁶ Tirtawn hai le bieklamkai hai na hi roireshena rang hin ruruchun u joi. ⁷ Ashawttak roireshena ruawm shole, Peter na ding a ruti, “Uliennai miring hai, nikhothang shawtbawtlai khan Pathien na nakar ua madanna runiei. Makha, kenertak na kiriei a Phunshik hai na athachawng kha irangai ua, takashawn miring changna u rang a inih. ⁸ Khan miring mulung ajet Pathien na kieini dieng a iruthawtak kha ang a, amani dieng Ratha Riethieng kha irupek a kungruchang inih. ⁹ Khan takashawn jar a amani mulung hai kha riethiengmashak joi jarkhan, kieini le amani kar a kairekhena tetlai mak. ¹⁰ Khajarkhan tun, ih jar a pilepu hai na`awm, khan kieini na`awm niruput ngam boi ringkaw kha khaichawi hai ring ah tet a Pathien kha ennangirete u maw nih? ¹¹ Inia Pumi Jesu Christa numpokmirit jar a amanitak kha ang a, kieini na ringna numuk u rangnih, iti hi takanishawn u inih.” ¹² Ruchun kholok kha ruawmchien uh. Khan amani dieng Phungshik hai kar a jetna le rekhekchon hai kholok Pathien na iruthawna chungchanga Barnabas le Paul na iruriei u kha rurangai uh. ¹³ Amani na ruawmchiensho u le, James na rumashang, “Uliennai miring hai, narangai pe u roh, ¹⁴ Pathien na putna ah put ah Phungshik hai kha iruphak a, amani ah put ah ama riming rang miring hai iruloina dan kha Simeon na rurophong joi. ¹⁵ Mahi thiempulien hai chawng kha aracha inih, hitihin a miejiek hi le ra`ang inih: ¹⁶ ‘Mahi shole kiei jong kir rang kanih, khan apur David thamber kha jong mothoi rang kanih. Achim hai kha kiei na mothoi a rietienret rang kanih. ¹⁷ Makha mienieng miring kholok na le kiriming aban Phungshik kholokshe na PUMI kha atawkna rang a inih. Hihai kholok athaw PUMI na ieriei.’ ¹⁸ “Kumshawt a ama chonthaw kholok kha Pathien na ejet. ¹⁹ Khajarkhan Pathien dieng vak hiei Phungshik hai kha nimatatmashak boi rang a shok, iti hi kawchawngmocho inih. ²⁰ Inia mirilim le rawpawr nieinak, rejai, rek meher a that me, thishen, hihai ah put ah rechenna u rang, miejiek a nimejet u rang a shok. ²¹ Ajarla Moses chawng kha tu ashawt rong ah put ah khopui rikip ah irurophong u, khan Sabbath rikip a synagogue ah irute u nih joi.” ²² Kha pha khan tirtawn hai le bieklamkai hai kha na, biekrup kholok le rawjawt a, Paul le Barnabas rawtawp pui rang, amani kar a madan miring Antioch ah tir rang hi atha, tia rumining uh. Amani khala: uliennai hai kar a lamkai hai, Barsabbas iti Judas le Silas runih uh. ²³ Amani dieng mahi chawngmawchawi hi miejiekna uh: Kieini, tirtawn hai le bieklamkai hai na Antioch, Syria le Cilicia ah awm Phungshik uliennai hai dieng chubai kenepek uh. ²⁴ “Nangni vunepngir rang nangnih uh, khan Dan kha nangijuingir u rang a inih,” tia nangni kha chawng a chawkna rang le nang mulung u kha shukletna rang, kieini ah put ah ava u, iti kejet uh. Kieini na kha ang chawngpek kha amani dieng peh u mi`ing. ²⁵ Khajarkhan kunumpok u Barnabas le Paul, khan amani le roroia madan miring hai kha nangni dieng tirna rang a rawjawtshom hi atha, tia kurumining uh. ²⁶ Amani kha Pumi Jesu Christa riming rang a iringkho rupeh miring hai kha runih uh. ²⁷ Khajarkhan kieini na Judas le Silas hi kavaktir u joi, amani na ra`angre a ner a`awm nieriei u rangnih. ²⁸ Thawboithaboi hihaihi niboia, nangni dieng dawnshe a pokrik pekna boi rang, Ratha Riethieng dieng le kieini dieng atha `khat ruchang joi. ²⁹ Makhala, mirilim dieng a rawthawina nieinak a, thishen a, rek meher a that me, khan rejai, hihai chon ah put ah rechen u roh. Hihaihi nangrung u joiatu, atha joi. Chubai. ³⁰ Khajarkhan amani kha rutir ua Antioch tieng rushe u joi. Amani na mipui kha ruruchun a chawngmawchawi kha rupek uh. ³¹ Amani na rute u phakhan, kha mawshawkna chawng khan ningrungai pe uh. ³² Thiempulienawm achang, Judas le Silas, na uliennai hai dieng mawshawkna chawng tampui ruriei pe a rumenet uh. ³³ Amani na makha mun khan ruawmbawt u shole, uliennai hai kha na lungdamna chawng le tirtawn hai dieng rumikir u joi. ³⁴ Inia Silas na tu makha mun khan a`awmbawt rang a kha atha, tia rumining. ³⁵ Khan Paul le Barnabasawm Antioch ah rurangah uh, khan kha mun khan shik miring tampui le, Pumi chawng kha ruruchuk ua rushem uh. ³⁶ Nikhothang shawtbawt `le, Paul na Barnabas dieng ruti, “Pumi chawng rophongna khopui rikip a shetaia uliennai hai khaw itia maw awm u vak phah u rawi.” ³⁷ Barnabas na Mark iti John kha amani le rushe pui jawt. ³⁸ Inia Paul na, Pamphylia ah amani kha irumak a chon iruthaw pui boi miring kha, amani le rushe pui jawt mak. ³⁹ Rawjawtna boi kha ratanbang jarkhan, amani kha rureshen u joi. Barnabas na Mark kha rawtawp pui a Cyprus tieng rokong a rushe joi. ⁴⁰ Inia Paul na Silas kha rumadan a uliennai hai na Pathien numpokmirit kha ipek u le roroia, rokong a rushe u joi. ⁴¹ Amani na Syria le Cilicia kha palam a rushe ua biekrup hai kha vak menet uh.

¹ Paul na Derbe le Lystra kha vak shok joi. Khan enro, kha mun khan Timothy iti khaichawi `khat ruawm. Ama kha takashawn Jihudi nupang `khat shapa runih, inia apa kha tu Greek miring runih. ² Ama kha Lystra le Iconium ah awm uliennai hai na atha a iruriei u akhat runih. ³ Paul na ama kha rurawtawp pui jawt. Khan makha mun ah awm Jihudi hai na apa kha Greek miring inih, iti rujet u jarkhan, ama kha vunruep pe. ⁴ Amani na khopui hai kha irurakan u le roroia, Jerusalem ah tirtawn hai le bieklamkai hai na irumocho u chawngpek hai kha rungna u rang, amani dieng rurophong uh. ⁵ Khajarkhan biekrup hai kha takashawn a rumenet uh, khan miring jat kha nikhonikho a rupung shishit joi. ⁶ Amani na Phyrgia le Galatia ram kha rurakan u phakhan, Asia shung ah Pathien chawng irophong u rang a kha Ratha Riethieng na rumakha joi. ⁷ Amani na Mysia kha vak shok u phakhan, Bithynia lutna rang, rurashak uh, inia Ratha na rujawt pe u mak. ⁸ Khajarkhan Mysia kha rurakan ua, amani kha Troas tieng khan ruchum u joi. ⁹ Makha jan khan Paul na mulungmik `khat rumuk. Macedonia miring `khat na iding a ama dieng rudawi a ruti, “Macedonia hin va tana kieini hi navakshan u roh.” ¹⁰ Ama na mulungmik kha rumuk shole, amani dieng athachawng rophong rang hin Pumi na inokoi u inih, iti kha kejet ua, relentak a Macedonia ah shena rang, kurudit uh. ¹¹ Kieini na Troas ah put ah Samothrace kha jawngphit a rokong a kurushe uh. Khan jing tieng hin Neapolis kurushok uh. ¹² Khan ah put ah colony `khat, Macedonia ah runiei khopui, Philippi khan kurushe uh. Makha khopui khan pha shawtlawk kuruawm uh. ¹³ Sabbath nikho khan khopui vai tieng ah awm vapui khan kurushe uh. Kha mun khan mi hai na nikna inieina u mun `khat awm, tia kiruring u inih. Kha mun ah ruruchunsha nupang hai dieng kurushuh ua chawng kururiei pe uh. ¹⁴ Pathien rubieh miring, Lydia iti nupang `khat ruawm. Ama kha Thyatira ah put ah ponshendup jor miring `khat runih. Pumi na ama mulung mawkawt kha rumawlawng pe a Paul na iriei hai kha mulungluttak a rurangai. ¹⁵ Ama le ama inshungkhur hai kha baptisma ruloisho u le, kieini kha nawdawi ua ruti, “Kiei hi Pumi dieng takashawn miring `khat a nangnoloi u joiatu, va tana ki`in hin vak tung u roh.” Hitihin ama na nurukhap uh. ¹⁶ Nikhat hin kieini na nikna mun ah kurushe u le roroia, tashanna ratha ranak aniei nungak-shok `khat kururawtawng pui uh. Ama na tashanna khan upumi hai rang shier tampui irumuk inih. ¹⁷ Paul le khan kieini kha nurujui ua rura`ai, “Hihai miring hi Rashangving Pathien shok hai kha inih. Amani hi shandamna lam kha kieini dieng rophong ava u inih.” ¹⁸ Khanu kha na nikho shawttak khatikhan ruthaw. Paul kha iningrunih pelai mak a ratha thaboi dieng khan iehiei a ruti, “Jesu Christa riming a chawngkenepek, nang ama ah put ah vak shok rang roh.” Kha phatak khan ama kha vak shok joi. ¹⁹ Inia upumi hai kha na shier imukna u miring athang kha rumuk u phakhan, Paul le Silas kha shur u joi, khan rievieithawna mun khan vak kai ua chamniei hai dieng ruchawi u joi. ²⁰ Amani na chawngmocho hai dieng vak chawi u phakhan, ruti uh, “Mahi Jihudi miring hai hi na nokhopui u hi achawk u joi. ²¹ Kieini Rome miring `khat a niloithiei boi le nishenathiei boi shena le dan nih boi kha amani na rophong u joi.” ²² Mipui kha na amani chung a mulung hangna kha rutet uh. Khan chawngmocho hai kha na amani kotai hai kha ruther ua, amani kha rawmaw le jemna rang, chawng rupek u joi. ²³ Amani kha khawktak a rujemsho u le, lungroko shung ah ruthong uh. Khan lungroko rungpa kha na nettak a atetna rang, chawng rupek uh. ²⁴ Ama na chawngpek rumuk shole, shungkhit ah atet a thinglong a eke u kha ruthung pe uh. ²⁵ Inia janchim khan, Paul le Silas na Pathien dieng runik uh, khan Pathien mapakna lah kha ruthaw uh. Khan shurkhop miring hai kha na rurangai uh. ²⁶ Jetboithieiboi a nieinu lientak `khat hawng rawnawk a, lungroko keshunshe kha hawng rawnawk joi. Khan relentak a mawkawt kholok kha hawng rawlawngsho a, mi rikip rokhopna thirakarui hai kha hawng ruthutsho joi. ²⁷ Lungroko rungpa kha hawng che a lungroko mawkawt hai kha rurawlawngbiek kha hawng muk phakhan, lungroko shung ah awm hai kha shoksho joi, tia rumining jarkhan, ama chemjam kha rosho a nining a rathatna rang ruthaw. ²⁸ Inia Paul na he rashangtak a ra`ai a ruti, “Kokholok a hin ka`awm uh, nang nining a rathatna rang thaw naw roh.” ²⁹ Ama na mieivar runik a khan Paul le Silas tieng khan vak tan a amani maikung a rawnawklam a vak bawklap joi. ³⁰ Khashole amani kha vai tieng ruchawi a ruti, “Pumi hai sheng, kiringna rang imaw kithawngir rang?” ³¹ Amani na ruti uh, “Pumi Jesu Christa kha takashawn roh, khanitatu nang kha nashan rangnih, khan nang inshungawm shan rangnih. ³² Amani na Pumi chawng kha ama dieng le ama in ah awm kholok dieng khan ruriei pe uh. ³³ Makha jantak khan ama na amani kha ruchawi a rawmaw shebe hai kha rurushuk pe, khan relentak a ama le ama inshungkhur kholok kha na baptisma ruloi uh. ³⁴ Ama in ah vat pui phakhan, bu rumenek uh. Khan ama inshungkhur kholok le Pathien kha takarushawn u jarkhan, ningaina kha runiei. ³⁵ Jingkar tieng hin chawngshat hai kha na amani police hai kha lungroko rungpa dieng khan “Miring hai kha meshe u rang roh,” ti rang khan vak tir u joi. ³⁶ Khajarkhan lungroko rungpa kha na hihai chawng hi Paul dieng thangrukoi. Ama na ruti, “Nang shena u rang khan chawngmocho hai na chawng vak mawchawi u joi, lungdamtak a she u rang roh.” ³⁷ Inia Paul na rumashang, “Rome khomiring kanih u chuchung a chawng mocho boi a mipui maikung a nejem ua lungroko shung ah nothong uh. Khan tun, muruk a meshe rawng initi u maw nih? Mahi nithiei naw nih. Amani pumtak va u rieshie kieini hi navak moshok u rosho.” ³⁸ Police hai kha na hihai chawng hi chawngmawcho hai dieng thang vak koi uh. Khan amani kha Rome khomiring hai keng, iti kha rujet u phakhan, ruchih uh. ³⁹ Khajarkhan amani dieng va ua vak dawi uh. Amani kha vak shok pui ua khopui kha mathan a shena u rang ruriei u joi. ⁴⁰ Khajarkhan lungroko kha rumathan ua Lydia in ah rulut u joi. Khan uliennai hai kha rurumuk pui u phakhan, lungarna chawng ruriei pe u shole, rushe u joi.

¹ Amani na Amphipolis le Apollonia kha rurakan u shole, Jihudi hai synagogue awmna Thessalonica ah vak lut u joi. ² Khan ama shena dungjuia Paul na amani dieng rulut a, Sabbath nikho `thum khan amani le Miejiek ah put ah chawng ruthir. ³ Makhala Christa hi na shawna idoingir rang a inih, khan athi ah put ah hawng thoingir rang a inih, iti kha rumeler, khan rumumuk a ruti, “Nangni dieng a kirophong mahi Jesu hi Christa kha inih.” ⁴ Amani eshen kha rumawjawt, khan richichawi Greek mipui lientak le runiei nupang hai na`awm Paul le Silas kha rushap uh. ⁵ Inia imawjawt boi Jihudi hai kha na rumukmak uh. Amani na rievieithawna ah put ah mi tha boi hai kha vak chawi ua, hawipui `khat ruruchun uh. Khopui kholok kha marang a Jason in kha rukhoi uh. Amani kha miring hai dieng vak chawina rang, rutawk uh. ⁶ Inia amani kha rumuk boi u phakhan, Jason le uliennai eshen hi khopui rampo hai dieng rupawt ua, rura`ai uh, “Manmieshie shukthala a atet hihai miring hi hinawm va u joi. ⁷ Jason na amani kha rumutung a Caesar chawngmocho kholok le re`er a, Jesu iti Reng shik `khat awm, ruti uh.” ⁸ Khan amani na mahi rujet u phakhan, amani na mipui le khopui rampo hai kha mulung rahalam a rutet. ⁹ Khajarkhan Jason le shik hai kha roiruputna rumoloi ua, amani kha rumoshok u joi. ¹⁰ Khashole relentak a Paul le Silas kha Berea tieng rumeshe u joi. Amani na rushok u phakhan, Jihudi hai synagogue ah rulut uh. ¹¹ Berea miring hai kha Thessalonica miring hainek a mulungliendet miring runih uh. Amani na ningawroitak a chawng kha ruloi uh, khan hihaihi anih maw nih, tia ningthingkip hin Miejiek hai kha enrurete uh. ¹² Khajarkhan mi tampui na takarushawn uh, khan runiei Greek miring apa le nupang tampui na`awm takarushawn uh. ¹³ Inia Thessalonica Jihudi hai kha na Berea ah awm Pathien chawng kha Paul na rophong joi, iti kha rujet u phakhan, makhan va ua mipui kha vak marang uh. ¹⁴ Khashole uliennai hai kha na Paul kha relentak a thampui tieng rumeshe u joi. Inia Silas le Timothy tu kha mun khan rurangah u lai. ¹⁵ Khajarkhan Paul aroi miring hai kha na Athenshe kha vak thak uh. Silas le Timothy na relenthieishe ama kha vak rawlawp puina u rang, amani dieng chawng rupek a rushe u joi. ¹⁶ Khan Athens ah Paul na amani kha rungaklai khan, makha khopui khan konrilim shipmer a awm kha rumuk. Makha na aratha kha ajeng a rumawshaw pe. ¹⁷ Khajarkhan Jihudi hai, khan richichawi miring hai kha le synagogue ah le rievieithawna ah awm miring hai kha le ningthingkip chawngruthir a ruawm. ¹⁸ Khashole Epicurean le Stoic lungthimthiei hai kha na ama kha rurodoi pui uh. Khan eshen na ruti uh, “Mahi chawng rawkhawmpa hi na imaw iriei jawt?” Shik eshen na ruti uh, “Ama hi milak pathien hai ashem miring ang.” Ajarla ama na Jesu le thoiretna kha amani dieng irurophong inih. ¹⁹ Amani na ama kha rushur ua Areopagus mun ah ruchawi uh. Amani na ruti uh, “Nangiriei mahi ruchukna `thar hi imaw nih? Kieini na jet maw tha? ²⁰ Ajarla nang na chonrekhek hi konokor uah nangivakchawi inih. Khajarkhan hihaihi ih itina maw nih kejet jawt uh.” ²¹ Ajarla khan ah awm Athens miring hai le milak hai kholok kha na ih thaw boi a chawng `thar riei rang, ninawkle chawng `thar rangai rang, amani pha hai kha irumehek u inih. ²² Khashole Paul na Areopagus kar khan ruding a ruti, “Athens miring hai, kholok dungjuia nangni hi richi a ajeng a mulunglut nangnih u, iti hi kumuk. ²³ Ajarla nangni na chubainangibawk u nieinak hai hi kahiei a kimuk le roroia, MEH JET BOI PATHIEN `KHAT DIENG, tia khetimiejiek maicham ading `khatawm kumuk. Khajarkhan meh jet boi a chubainangibawk u ama kha nangni dieng kirophong inih. ²⁴ “Manmieshie le mahi shung ah awm rikip akonpa, Pathien hi ravan le rieliei Pumi nit jarkhan, miring hai na khut a ikon rilimin khan awm mak. ²⁵ Ama na ih kha irangai a, miring hai khut le ama chon thaw pe rangawm nimak, ajarla amatak na miring kholok dieng ringkho, phuk, khan kholok kha ipek inih. ²⁶ Thishen `khat ah put ah rieliei mai kholok hin awmna rang, phung kholok rukon, khan amani awmna mun hai khan pha le ramri hai kha`awm irumuchuk pe inih. ²⁷ Ama kha kieini ah put ah ala ah awm boi nitjoiawm, malam a ama kha mukthiei `khat a, amani na Pumi kha itawk u rang a shok. ²⁸ Ajarla ama dieng hin naring, naper, khan na`awm inih. Khan nang thiemshun haitak eshen na`awm iruti kha inih: “Ajarla kieini hiawm ama chicha kha nanih uh. ²⁹ Kieini hi Pathien chicha kha nanih u jarkhan, Pathien hi miring hai khut thiemna le mulungmining na ikon, rangkachak ninawkle dangka ninawkle konrilim lung keng, tia mining boi rang a inih. ³⁰ Hihai jetna boi pha hai hi Pathien na imik le irumilim inih, inia tuntu ama na mun rikip ah mi kholok dieng mulung lekna rang, chawng pek joi. ³¹ Ajarla manmieshie hi dikna kha le imadan miring dieng khan ama na chawngishatna rang a pha le nikho kha madan joi. Ama kha athi ah put ah rumothoi a mi kholok dieng akalang chona rang, rupeksho joi.” ³² Athi ah put ah thoiretna rujet phakhan, mi eshen na rumunui uh, khan shik eshen na tu “Hi chawngmun jarhin rangai u ret rang kanih,” ruti uh. ³³ Khan amani ah put ah Paul rushe joi. ³⁴ Inia amani kar a eshen tu ama kha rushap ua, takarushawn uh. Amani hai khala, Areopagite Dionysius le Damaris iti nupang `khat, khan amani le rawtawp shik hai kha runih uh.

¹ Hihaihi shole, Paul na Athens kha mathan a Corinth ah rushe joi. ² Makha mun khan Pontus ah shok Aquila iti Jihudi miring `khat rurumuk pui. Jihudi miring kholok na Rome mathanna rang, Claudius na chawngrumocho jarkhan, i`inkonu Priscilla le Italy ah put ah ava `thar runih uh. Paul na amani kha rumuk pui rushe. ³ Amani kha khoiruponin chonthawshom runih u jarkhan, amani le ruawm a chon ruthaw. ⁴ Sabbath rikip khan ama na Jihudi hai le Greek hai kha mawkawina rang, synagogue ah chawngruthir pui uh. ⁵ Silas le Timothy na Macedonia ah put ah jong tung u phakhan, Ratha na Paul kha rumawshawk a Jesu kha Christa inih, tia Jihudi hai dieng kungruchang. ⁶ Amani na ama kha rurodoi pui ua rumieshiet u phakhan, ama ponledier hai kha akhawng a amani dieng ruti, “Nang thishen u kha nang lu uah awm nih rosho, kiei tu roiruputna nieilai mi`ing, tun ah put ah kiei Phungshik hai dieng she rang kanih joi.” ⁷ Khashole makha mun kha rumathan a Justus iti miring `khat in ah rulut joi. Ama kha Pathien mining runih, khan ama in kha synagogue diengtak ah ruawm pe inih. ⁸ Khan synagogue ulienchang Crispus na ama inshungkhur kholok le Pumi kha takarushawn. Corinth miring tampui na rurangai u phakhan, takarushawn ua baptisma ruloi uh. ⁹ Jan `khat hin Pumi na Paul dieng mulungmik a ruriei, “Chih naw roh, chawng kha riei roh, bang naw roh. ¹⁰ Ajarla kiei na nang kha kawnawrawtawp pui. Khan tute na nang kha nishih naw nih, khan engshiet a nawthaw naw nih. Ajarla mahi khopui hin kimiring tampui awm.” ¹¹ Kha mun khan kum `khat le tha `ruk hi amani le awm a, Pathien chawng kha ruruchuk. ¹² Inia Gallio na Achaia ram kha rupoklai khan, Jihudi hai na rushukbir a Paul kha rurudoi pui ua danin khan vak chawi uh. ¹³ Amani na ruti uh, “Miringpa hi na Dan le racha boi Pathien biekna rang, mi hai kha mawkawi.” ¹⁴ Paul na ener makak diengtak khan Gallio na Jihudi hai dieng ruti, “Aw Jihudi miring hai, danrekhe ninawkle chon shie jar a nitatu, kiei na kirangai rang a hi rutuk inih. ¹⁵ Inia chawng hai le riming hai, khan nang dan u jar a nit jarkhan, nang nining ua vak riethiengmashak u roh. Hihai chung hin kiei na chawngshat jawt mi`ing.” ¹⁶ Khashole danin kha mathanna rang, amani kha runawt joi. ¹⁷ Khashole Greek hai kholok na synagogue lamkai Sosthenes kha shur ua, danin khan rujem uh, inia Gallio na hihai kholok kha irushawnlai mak. ¹⁸ Paul na Corinth khan ashawtbawt ruawm. Khan uliennai hai kha chubai ruthaw pui a Syria tieng rokong a rushe joi. Priscilla le Aquila na ama kha rurawtawp pui uh. Ama chawngrakhamna Cenchrea khan ama sham kha ruep joi. ¹⁹ Ephesus rushok u phakhan, amani kha kha mun khan rumak joi. Paultak na synagogue ah rulut a Jihudi hai kha le chawngruthir. ²⁰ Amani na ama kha ashawtbawt awm puina rang, rudawi uh, inia rujawt pe mak. ²¹ Amani le reshenna ruthaw shole, ruti, “Ih kha nita`awm ahawng rang a rohoi hi Jerusalem ah kithawngir rang a inih. Pathien na ijawt nitjoiatu, nangni dieng vak kirret rang kanih.” Khashole Ephesus ah put ah rokong ah rushe joi. ²² Caesarea kha rushok shole, Jerusalem ah ruhawng a biekrup miring hai kha le chubai hawng thaw pui. Khashole Antioch tieng ruchum joi. ²³ Kha mun khan pha bawng `khat ruawm shole, ama na Galatia le Phrygea ram ah dawdawn a rushe a, akhaichawi hai kholok kha vak menet joi. ²⁴ Khan Alexandria ah ashok Jihudi miring Apollos iti `khat na Ephesus ah put ah vak shok. Ama kha chawngrieilariei thiei le Miejiek kha ajeng a ajet miring runih. ²⁵ Ama kha Pumi lam khan tukhat na iruruchuksha inih, khan ratha a mulungluttak a Pumi chungchanga ridingpip a chawng iruriei kha iruruchuk inih. Inia John baptisma jar ranga kha irujet inih. ²⁶ Ama na lungar nieitak a synagogue ah chawngriei ruput. Inia Aquila le Priscilla na rujet u phakhan, shir `khat a ruchawi ua, ama dieng Pathien lam chungchanga ridingdet a ruriei pe uh. ²⁷ Khan ama na Achaia tieng rushe jawt phakhan, akhaichawi hai na ama kha lamjawng ruthawna u rang, uliennai hai na mawshawkna chawng kha rumiejiek pe uh. Khan rushok phakhan, numpokmirit jar a takashawn ruchang hai kha ajeng a vak shan. ²⁸ Ajarla mipui maikung a, Jihudi hai kha chawngrieshietna khan maimawk rupek. Khan Jesu hi Christa inih, tia Miejiek hai ah put ah ama na rumumuk joi.

¹ Khan hitihin rushok joi, Apollos kha Corinth ah ruawmlai khan, Paul na shak tieng ah ram hai kha vak rakan a Ephesus ah va joi. Kha mun khan khaichawi eshen vak muk. ² Amani dieng ama na rurawdawn, “Takanangshawn u ni khan Ratha Riethieng maw nangmuk uh?” Amani na rumashang uh, “Muh u mi`ing, Ratha Riethieng awm, iti hi jetshe jet u mi`ing.” ³ Khashole ama na rurawdawn, “Ih baptisma khan maw baptisma nangruloi uh?” Amani na rumashang uh, “Baptisma apeh John baptisma kha kuruloi uh.” ⁴ Paul na ruti, “John na ama anuk a ajong rang a Christa Jesu kha miring hai na taka`ishawnngir rang a inih, tia iruriei pe a, mulung lek a baptisma loina kha le baptisma irupek inih.” ⁵ Mahi rujet u phakhan, Pumi Jesu riming a baptisma ruloi uh. ⁶ Paul na amani chung ah ukhut `hai kha rutet pe phakhan, Ratha Riethieng na amani chung a jong, khan chawng shikshik a ruchawng ua, chawng kha rurophong uh. ⁷ Amani lawpsheng a miring shawmlieidi dawr runih uh. ⁸ Synagogue kha rulut a tha `thum hi Pathien rengchangna chungchanga thirna le mawkawina kha lungartak a ruriei. ⁹ Inia amani eshen na mulung rumichimmashak ua takarushawn u mak. Khan mipui maikung a Lam kha rumieshiet u phakhan, Paul na amani kha rumak joi. Khan khaichawi hai kha ruchawi a Tyrannus behangin khan ningthingkip chawngruthir pui joi. ¹⁰ Makha kum `di rawjawn a rumeshe uh. Makha na Asia ram shung ah awm Jihudi hai le Greek hai adinre na Pumi Jesu chawng kha rurangai u joi. ¹¹ Khajarkhan Pathien na rekhekchon hai kha Paul khut hai dieng khan ajeng a ruthawna joi. ¹² Khan amatak le rishih khutrakpon hai ninawkle rekpon hai kha ana hai dieng ivakchawi pe u she khanawm, rai hai kha na rumathan uh, khan raikho ashie hai kha na amani ah put ah vai rushok uh. ¹³ Khashole shehawng a alawn Jihudi dawithiei hai kha na, Pumi Jesu riming kha ban a ratha thaboi hai chung a ruti uh, “Paul na ishem Jesu riming a kawnawdawi uh.” ¹⁴ Jihudi thiempu ulien Sceva shapa shiri kha na mahi ruthaw uh. ¹⁵ Inia ratha thaboi kha na amani dieng rumashang uh, “Kiei na Jesu kha kejet, khan Paul kha`awm kejet, inia nangni hi tumaw nangnih uh?” ¹⁶ Khashole ratha thaboi anieipa kha na amani dieng vak chawm a, aranak le vak mukhu a ruchutna u joi. Khan amani na makha in ah put ah ponledier boi a pawplam a rutan u joi. ¹⁷ Mahi Ephesus ah awm, Jihudi le Greek kholok na rujet ua, amani kholok dieng chitna ruthoi joi. Makha na Pumi Jesu riming kha rumielien shishit joi. ¹⁸ Makhan a takarushawn miring tampui na`awm rushe ua ithaw u chon shie hai kha malangsheng a rurophong u joi. ¹⁹ Dawithiei miring tengamthoiboi na`awm amani behangbuk hai kha rurawkhawm ua mipui maikung a miei le ruha u joi. Amani man kha ruthai pha ua dangka bawp shawm rahnga inih. ²⁰ Khatikhan Pumi chawng kha ranaknieitak a rupung a ruawm. ²¹ Hihaihi mawtawr shole, Macedonia le Achaia ram rakan a Jerusalem tieng shena rang, Paul na mulung rumiding joi. Ama na ruti, “Makhawn kashe shole, Rome`awm kimukngir rang a shok.” ²² Khashole ama chonthaw pui, Timothy le Erastus, kha Macedonia ah rutir joi. Ama tu pha bawng `khat Asia ah rurangalai. ²³ Khalaikhan Lam chungchanga helehoi lientak `khat rushok. ²⁴ Dangkashupa Demetrius iti miring kha na Artemis rang rilimin `khat rukon a khutthiem hai rang shiertong ashin runih pe u mak. ²⁵ Ama chonmun ra`ang pui hai kha le lawp `khat a ruruchun a ruti, “Miring hai, mahi shierraban ah put ah kieini na nieilelung niniei u inih, iti hi nangijet u inih. ²⁶ Ephesus ranga hin niboia Asia kholok hin, mahi Paul hi na khut a kon pathien hai hi tu pathien nimak, tia miring tampui mawkawi a rumiehiei joi, iti hi nangmuk ua nangrangai u joi. ²⁷ Khan mahi na nieshierraban u ranga hi riming imieshiet nimak a pathiennu alien Artemis rilimin hiawm iriming mieshiet pe ning, tia ama lurna kha mawmawk pe rangnih. Inia Asia shung ah awm mi kholok na la chubai ibawk inih.” ²⁸ Amani na mahi rujet u phakhan, mulung hanglam a rura`ai uh, “Ephesus miring hai Artemis hi alien inih!” ²⁹ Khopui khan reheshuna ruship joi, khan Paul na khomijin a ivakrawtawp pui, Macedonia miring hai, Gaius le Aristarchus, kha radainamun khan lawp `khat a vak tan ua vak shur u joi. ³⁰ Paul na mirawp shung khan rulut jawt, inia khaichawi hai kha na rumakha uh. ³¹ Khan Asia shung ah ama lawmdit chonpo haishe na`awm radainamun khan lutna boi rang, rudawi uh. ³² Ruchunna kha reheshuna kha na ruship, eshen na akhat jar a rura`ai uh, eshen na shik jar a rura`ai uh. Khan arawplam na, makha mun khan ijar a vak ruchun u maw nih, iti kha rujet u mak. ³³ Jihudi hai eshen na chawngiriei rang a kha riei rosho, tia Alexander kha mi kar khan vak tor uh. Khan Alexander na ukhut kha rulawm a miring hai mai kung a ama rohonna kha ruriei jawt. ³⁴ Inia ama kha Jihudi miring keng, iti rujet u phakhan, nidan `di dawr hi lawp `khat a, “Ephesus miring hai Artemis hi alien inih!” tia amani kholok rura`ai uh. ³⁵ Inia khopui behang miejiekpa kha na mipui kha phuk muchummashak a ruti, “Ephesus miring hai, Ephesus miring hai hi pathiennu alien Artemis rilimin le Zeus ah put ah jong cho rilim arung hai kha inih, iti hi ajet boi tumaw awm?” ³⁶ Hihaihi jawt boi tha boi `khat nit jarkhan, renem u roh, mulungmining boipet a iawm thaw u naw roh. ³⁷ Nangivakchawi u hihai miring hi rilimin muru rang a le nang pathiennu u kha mieshiet rang a kha nih u mak. ³⁸ Khajarkhan Demetrius le khutthiem miring hai kha na tukhat chung a chawngmeshie niei u joiatu, danin hai kha rawlawng a awm, khan kha mun khan rampo hai awm, amani na khatlekhat chung a awm nawngna hai kha vak chawi u rosho. ³⁹ Inia chonmun shik chungchanga nangtawk jawt u joiatu, dan dungjuia ruchunna ah imuchuk rang a inih. ⁴⁰ Ajarla von a ashok phumoshokna chungchanga rawdawnna `khat inokoi u rang a chitroina `khat awm joi. Ajarla mahi chawngshok jar hin ajar pek rang `khatshe awm mak. ⁴¹ Ama na hihaihi ruriei shole, ruchunna kha rureshenmashak joi.

¹ Phumoshokna kha theng shole, Paul na akhaichawi hai kha rukoi a amani kha chubai ruthaw pui a Macedonia tieng khan rushe joi. ² Irurakan ram ah awm uliennai hai kha mawshawkna rupek shole, Greece tieng va joi. ³ Kha mun khan tha `thum ruawm. Ama na Syria tieng rokong a rushe diengtak khan, Jihudi hai na ama kha rurep u jarkhan, ama na Macedonia kha rakan a kirna rang, mulung rumiding joi. ⁴ Ama kha Berea ah awm Sopater, Thessalonica ah awm Aristarchus le Secundus, Derbe ah awm Gaius, khan Asia ram ah awm Timothy, Tychicus, khan Trophimus, amani hai hi na Asia ramshe khan rurawtawp pui uh. ⁵ Amani kha matieng rushe ua Troas ah nurungak uh. ⁶ Inia Chawjawboi Tan Nikho hai shole, Philippi ah put ah kurushe ua ni rahnga shung a Troas ah amani kha kuruphak uh. Kha mun khan ni shiri kuruawm uh. ⁷ Hapta shung a akhat changna nikho khan khaichawi hai le tan khoina rang kururuchun u phakhan, Paul na, jing tieng shena rang mining jarkhan, janchimshe khan chawngruriei. ⁸ Kururumukna u chungindan khan thaomiei tampui ruawm. ⁹ Eutychus iti rothar `khat hi tukber ah rushuh a ruawm. Paul na chawng rieilai khan, Eutychus kha imik rukhu pe a ningnittak a inrurungui jarkhan, indan `thum ah put ah jongcho a ithitlam a rushar u joi. ¹⁰ Inia Paul na ruchum a ama chung ah jong bawkna, khan ama kha rukawrep a ruti, “Nang mulung rakakmashak u naw roh, ajarla ama dieng ringphuk awmlai.” ¹¹ Khashole Paul na chungindan khan rukaret a tan kha rukhoi a rushak shole, khovarshe khan amani le chawngruriei a, rushe joi. ¹² Khashole rotharpa kha ringlam a ruchawi u jarkhan, ajeng a mulung rumangar pe uh. ¹³ Kieini na maton shawn a Assos tieng rokonglien ah kurushe u joi. Assos ah put khan kieini na Paul kha rokonglien ah kurushe pui jawt uh, ajarla ama na Assos rang khan kelam a rurasham inih. ¹⁴ Assos ah nurumuk pui u phakhan, kurumulut ua, khan Mitylene ah kurushe u joi. ¹⁵ Khan ah put ah kava ua, jing tieng hin Chios dieng khan kavak shok uh. Khan thiem hin Samos kavak shok ua Trogyllium khan kuruawm uh. Khan thiem `khat hin Miletus kha kavak shok uh. ¹⁶ Asia ram ah pha mehekna boi rang, Paul na Ephesus kha rakan a rushe jawt. Initthiei a tu Pentecost nikho khan Jerusalem kha rushokna rang, rurawnawt jawt inih. ¹⁷ Ephesus ah bieklamkai hai kha rurumukna pui rang, Miletus ah put ah Paul na mi rutir. ¹⁸ Ama dieng va u phakhan amani dieng ruti, “Akhat changna a Asia ram ah kekimuchum nikho ah put ah nangni le rawtawp jawnjai a kuruawm dan kha nangni na nangjet uh. ¹⁹ Redena kholok le, mikrithi le khan kiei dieng ah hawng Jihudi hai repna le enretena kholok le Pumi chon kha kiruthaw inih. ²⁰ Nang nemna u rang a kholok kha kiei na mitik mi`ing. In rikip ah vanoi maikung a kinururuchuk u inih. ²¹ Jihudi miring hai le Greek miring hai dieng Pathien maikung a mulung lekna rang le Pumi Jesu Christa dieng takashawnna rang, mirittak a kungkuruchang inih. ²² “Khan tun enro, Ratha na Jerusalem ah shena rang ne`ep joi. Makhawn kuchung a imaw shok nih, iti kiei jet mi`ing. ²³ Kiei na kijet khatte kha tu lungroko le shawrana kha na kiei hi inangakchak a awm inih, tia Ratha Riethieng na khopui rikip ah kiei dieng inierieisha inih. ²⁴ Inia hihai kholok hi na nerephetmashak mak. Pathien numpokmirit athachawng kha kamalarna rang, katanrieshiet hi ningailam a kumutum a Pumi Jesu na inepek chonmun hi kurupummashak joiatu, kiringkho hi kiei rang man awm tia loi mi`ing. ²⁵ “Pathien rengchangna chungchanga nangni dieng chawngkirushem inih, inia tuntu nangni na kemeh hi numuh u lai naw tinih, iti hi kejet joi. ²⁶ Khajarkhan hi nikho hin kiei na kamalar, makhala nang kholok thishen rang khan kiei roiruputna niei mi`ing. ²⁷ Ajarla Pathien chonmuchuk kholok kha kiei na ip boipet a kururophong. ²⁸ Ama thishentak le irurawchawk Pathien biekrup aroi rang, Ratha Riethieng na kengam hai kar a kengamroi hai `khat a inamadan u nih joi. Khajarkhan nang bibing u rang le kengamhawi hai rang riring u roh. ²⁹ Kiei kanuk `le, melang arangtak hai kha nang kar ua va rangnih. Khan amani na kengam `khatshe hawi naw nih iti kha kejet. ³⁰ Nang kar u she khanawm khaichawi hai kha amani anu mujuina rang, adik kha rehermashak miring hawng thoi rangnih. ³¹ Khajarkhan kum `thum shung a shunlejan a mikrithi le chatboia kirieisha hai kha mining u tana riring u roh. ³² “Uliennai hai, tun kiei na nangni hi Pathien dieng le ama numpokmirit chawng khan kenepek u joi. Makha chawng kha na iniemielienna u rang a inih, khan iriethieng hai amani kholok le inkoklo kha nangni dieng nepekna u rang a inih. ³³ Kiei na tute dangka ninawkle rangkachak ninawkle ponledier hai kha ningaw mi`ing. ³⁴ Kiei le khan kirawtawp pui hai vaina rang, kukhuttak le chon kawthaw, iti hi nangjet uh. ³⁵ Hihai kholok hin kiei na nangni dieng rekhenna kinepek u inih. Adawk miring hai kha chon thaw tana vai u roh. Pumi Jesu amatak na, ‘Amunek a apeh hi rahvantha inih,’ iruti kha mining u roh.” ³⁶ Ama na chawngruriei shole, amani kholok le rukhuk shun a Pathien dieng runik uh. ³⁷ Amani lawpsheng a rie`ieklam a ruchap uh, khan amani na Paul kha rukawrep a rutum uh. ³⁸ Ama me kha muret, iti awmlai naw nih ruti chawng jardet khan, amani kha mulung rujum pe uh. Khashole amani na rokonglien tieng khan rushe pui u joi.

¹ Khan hitihin rushok, makhala amani kha kurureshen pui u shole, kieini na Cos kha jawngphit a kurujap uh. Khan jing tieng hin Rhodes le khan kha mun ah put ah Patara ah rokong a kurushe uh. ² Kha mun khan Phoenicia ah she rang rokonglien `khat kurumuk uh, khan kurulut ua kurupang u joi. ³ Cyprus kha kurumuk u `le, viei tieng kuruhiei ua Syria tieng kurujap uh, khan Tyre khan kuruchum u joi, ajarla rokonglien kha kha mun khan nieinak muchum rang a inih. ⁴ Kha mun khan khaichawi hai kha kurumuk ua ni shiri kuruawm uh. Ratha jar a Jerusalem ah shena boi rang, Paul dieng ruti uh. ⁵ Inia kinikho u kha hawng heksho phakhan, kieini na kakuruchawi u joi. Inkonu hai le khan nai hai, amani kholok na khopui vaishe kha navakthak uh. Khan tuikawmchang khan rukhuk shun a Pathien dieng nikna kuruniei uh. ⁶ Khan khatlekhat dieng chubai kururepeh u shole, rokonglien shung khan kurulut u joi, khan amaniawm in tieng rukir u joi. ⁷ Tyre ah put ah kajaplawn u kha kurumawtawr u shole, Ptolemais ah kurushe uh, khan uliennai hai kha chubai kuruthaw pui ua amani le ni `khat kuruawm uh. ⁸ Jing tieng hin Paul le rawtawp kieini na makha kurumathan ua Caesarea ah kava u joi. Khan shiri hai kar a akhat, chawngshempa Philip, in ah kurulut ua ama le kuruawm uh. ⁹ Ama na chawng rophongna ngam khutchawi aniei shanu nungak mili runiei. ¹⁰ Kha mun khan nikho shawttak kuruawm u lai khan, Agubus iti thiempulien `khat Judea ah put ah ava. ¹¹ Ama na kieini dieng va a Paul kawngkhit kha loi pe a makha le ukhut le eke hai kha nining a rukhit a ruti, “Ratha Riethieng na hitihin nieriei, ‘Hitihin mahi kawngkhit anieipa kha Jihudi hai na Jerusalem ah khop u rangnih, khan Phungshik hai khut ah pek u rangnih.’ ” ¹² Hihaihi kurujet u phakhan, kieini le kha mun ah awm hai kha na Jerusalem ah hawngna boi rang, kurudawi uh. ¹³ Khashole Paul na rumashang, “Ithaw chap a kumulung ninumujum pe u maw nih? Ajarla inokhopte kha niboia Jerusalem ah Pumi Jesu riming rang athi rangshe rasham kanih.” ¹⁴ Ama kha kurudawi ngam boi u jarkhan, “Pumi mulungmining kha nih rosho,” kuruti ua kuruawmchien u joi. ¹⁵ Hihai nikho shole, kieini na kururasham ua Jerusalem ah kuruhawng u joi. ¹⁶ Caesarea ah put ah khaichawi eshenawm kieini le vashom uh. Amani na khaichawi alui Cyprus tuikawram miring Mnason dieng tungna rang, ama in ah nuruchawi uh. ¹⁷ Kieini na Jerusalem kurushok u phakhan, uliennai hai na ningaitak a lamjawng nuruthaw uh. ¹⁸ Jing tieng hin Paul na James dieng kieini le rulut. Makhan bieklamkai hai kholok ruawm uh. ¹⁹ Chubai ruthaw pui u shole, ama chonmun ah put ah Pathien na Phungshik hai kar a iruthaw dan hai kha khatkhat a ruriei. ²⁰ Amani na rurangai u phakhan, Pumi kha rumapak uh. Khashole ama dieng ruti uh, “Uliennai, nangmuk makhala Jihudi hai kar a takashawn miring bawpbawp a awm joi, amani kholok hi Dan kha ningawmer miring runih uh. ²¹ Phungshik hai kar a awm Jihudi hai kholok na Moses Dan kha paina rang le amani nai hai kha na vunepna boi rang, ninawkle shena hai dungjuia ringna boi rang, nangruruchuk, iti chungchanga nang jar kha rujet uh. ²² Dawn a imaw shok nih? Amani na nangva joi, iti jetngir u rangnih joi, amani na mipui rawkhawmngir u rangnih joi. ²³ Khajarkhan kiriei u hi thaw roh. Nining a Pathien dieng a chawngrakham miring pasha mili kieniei uh. ²⁴ Amani hi le rashap a nang nining a vak riethieng roh. Khan amani sham voina rang a shier kha pek pe roh. Khanitatu mi kholok na nang jar a ijet u kha dik mak, tia loi u rangnih, khan nang na`awm Dan kha nangrung a nangjui ti u rangnih. ²⁵ Inia Phungshik takashawn hai rang tu amani na konrilim hai dieng a rawthawina, changkhit me, thishen le uire ah put ah rechen u rang a inih, khan tieitang kha tu amani na irung boi u rang a inih, tia kimiejiek ua chawngkimocho u nih joi.” ²⁶ Jing tieng hin Paul na miring hai kha ruchawi a khan amani kha le ruriethieng, khan riethiengmun khan rulut a riethiengna nikho mawtawrna kha rurophong joi. Mahi pha hin a inih amani rikip rang rawthawina kha ithaw u rang a kha. ²⁷ Ni shiri kha hawng rupumdeng `le, Asia ah awm Jihudi hai na ama kha riethiengmun ah rumuk u phakhan, mirawp kholok kha rurawphawk ua, ama chung a khut rujawn u joi. ²⁸ Amani na ra`ai a ruti uh, “Israel phung miring hai, nashan u roh! Hi miringpa hi na mun rikip ah nimiring hai le hi mun Dan le re`er a mi kholok iruchuk inih. Makha khea ama na Greek miring hai kha riethiengmun ah ivakchawi a mahi mun riethieng hi ironomashak inih. ²⁹ Ajarla matienglai khan Ephesus miring Trophimus kha Paul le rawtawp a khopui shung ah ruravak kha rumuk uh. Khan amani na ama kha Paul na riethiengmun ah irulut pui ang a rumining uh. ³⁰ Khashole khopui kholok kha rumawphawk ua miring hai kha lawp `khat a vak tan uh. Amani na Paul kha vak shur ua, riethiengmun ah put ah vak pawt uh. Khan relentak a mawkawt hai kha rukhar u joi. ³¹ Amani na ama kha thatna rang, rutawk u laitak khan, Jerusalem kholok phumoshok a awm joi, iti chawng kha Rome rarup rabawpkhat lamkai kung rushok joi. ³² Relentak a ramiring hai kha ruchawi a rarajakhat lamkai hai kha amani dieng rutan joi. Amani na rabawpkhat lamkai le ramiring hai kha rumuk u phakhan, Paul ajem kha rubang uh. ³³ Khashole Rome rabawpkhat lamkaipa kha ava a ama kha rushur joi. Khan ama kha thirakarui `di le khitna rang, chawng rupek. Khan ama kha tumaw nih, khan imaw iruthaw iti kha rurawdawn. ³⁴ Mirawp eshen na akhat, khan eshen na akhat riei a, rura`ai uh. Phumoshok kha na jar chang a ama na chawngkung chawngler kha rujet ngamlai mak. Khajarkhan ama kha rakhur tieng chawina rang, chawng rupek joi. ³⁵ Paul na kabe hai khan hawng lawn phakhan, mipui kha ranghai jarkhan, ramiring hai na ama kha iruphung u inih. ³⁶ Ajui mipui kha na “Ama kha mathan u roh!” ti a rura`ai uh. ³⁷ Rakhur shung ah lut diengtak khan Paul na rabawpkhat lamkai dieng ruti, “Kiei na nang dieng chawng dikhatte riei maw tha nih?” Ramiring lamkai kha na rumashang, “Greek chawng maw nangjet? ³⁸ Nang hirachangtak khan ra moshok a mithat hai bawp mili ramthim ah lamrukai Egypt miring kha maw nangnih?” ³⁹ Paul na rumashang, “Kiei hi Jihudi miring kanih keng. Cilicia ah awm runiei khopui, Tarsus ah shok kanih. Nang dieng kawnawdawi, miring hai dieng hin niemieriei roh.” ⁴⁰ Ama na jawtna rupek phakhan, Paul na kabe hai khan hawng ding a miring hai kha awmchienna rang, khut rumajap. Khan mi hai kha ruawmchien `le, ama na Hebrew chawng a amani dieng chawngruriei pe,

¹ “Uliennai miring hai le kapa hai, kiei na nang maikung ua tun a korohonna hi narangai pe u roh.” ² Hebrew chawng a iruriei kha rujet u phakhan, amani rurenemdet uh. Khashole ama na ruti, ³ “Kiei hi Cilicia ah awm Tarsus ah shok Jihudi miring `khat kanih. Mahi khopui hin Gamaliel keshun a behang ruchuh a hawng lien miring `khat kanih. Ama na nulepa hai akhawktak Dan dungjuia riringtak a inuruchuk inih. Von a nangnitak hi ang a Pathien kha ningkiruawmer inih. ⁴ Kiei na mahi Lam hi thitnashe a epshawna kurupek, nupang apa kiruchawi a lungroko shung ah kirukhum inih. ⁵ Thiempu rashang na le Jihudi hai shierpui lamkai kholok na`awm mahi chungchang hin kiei rang kungchang ngam uh. Amani ah put ah chawngmawchawi hai kha uliennai hai rang kurumuk, khan amani kha khoplam a chawi a Jerusalem ah chepna rang, Damascus ah kurushe. ⁶ “Lam kururawh a Damascus kha kururanai pui phakhan, nishun dawr hin, ravan ah put ah mieivar lientak `khat na kiei hi rokochip a nojongeh. ⁷ Pieipak a kurupur phakhan, he `khat na kiei dieng nuruti, ‘Saul, Saul, ijar a kiei hi epshawna ninepek maw nih?’ ⁸ “Kiei na kurumashang, ‘Tumaw nangnih, Pumi?’ Khashole kiei dieng nuruti, ‘Kiei hi nang na epshie a nangithaw a awm Nazareth Jesu kha kanih.’ ⁹ Khalai a kiei le ruawm hai kha na mieivar kha rumuk ua ruchih uh, inia kiei dieng a chawng arieipa hesho kha tu rujet u mak. ¹⁰ “ ‘Pumi, kiei na imaw thaw ning?’ tia kururawdawn. Pumi na kiei dieng nururiei, ‘Thoi tana Damascus khawn she roh, khawn kiei na nang rang a kimadansha nangithaw rang a kholok kha nieriei rangnih.’ ¹¹ Mieivar lurna kha na kiei rumuh ngamlai mi`ing. Khajarkhan kiei le rawtawp hai kha na kukhut ah nomoroi ua Damascus tieng nuruchawi u joi. ¹² “Dan dungjuia richichawi miring, khan kha mun ah awm Jihudi hai kholok na atha, tia iriei u Ananias iti miring `khat ruawm. ¹³ Ama na ava a kiei dieng ding a ruti, ‘Uliennai Saul, muh rang roh.’ Kha phatak khan kimik kha hawng var a ama kha kawhawngen joi. ¹⁴ “Khashole ama na ruti, ‘Nulepa hai Pathien kha na, ama mulungmining kha jetna rang, Diknapa kha mukna rang le ama nertak a jetna rang, nang kha namadan joi. ¹⁵ Ajarla nangimuk nangijet chungchanga mi kholok dieng ama rang a kungachang miring kha anih rang a nangnih joi. ¹⁶ Khan tun, ithaw rashai maw nangnilai? Thoi tana baptisma loi rang roh, khan Pumi riming kha ban tana nang munu hai kha rushuksho rang roh.’ ¹⁷ “Khan hitihin rushok, makhala kiei na Jerusalem ah kavakkir shole, riethiengmun ah Pathien dieng kuruniklai khan, shuika a kuruawm. ¹⁸ Khalai khan Jesu na kiei dieng chawngiriei kha kurumuk, ‘Relentak a Jerusalem ah put ah shok rang roh, ajarla kuchungchanga nang kungchangna kha amani na loi u naw nih.’ ¹⁹ “Khan kiei na kuruti, ‘Pumi nang takanashawn hai kha synagogue rikip ah dawdawn a kieitak na lung roko shung ah kiruthong a kirujem kha amani na jet uh. ²⁰ Khan amani na nang kungachang miring, Stephen thishen rumolong pe u lai khan, iedieng ah kuruding a atha kuruti, khan ama athat hai ponledier hai kha kiei na kururung pe.’ ²¹ “Khashole Jesu na kiei dieng nuruti, ‘She rang roh, ajarla ram latak ah awm Phungshik hai dieng nitir rang kanih joi.’ ” ²² Khakawtshe khan amani na rurangai pe uh, inia dawdawn a rura`ai ua ruti uh, “Rieliei ah put ah ralatmashak u rang roh, ajarla ama kha aring a awm rang kha rutuklai mak.” ²³ Khan amani na rura`ai u le roroia, amani ponledier hai kha ruther ua rithi ah vaiphin ruvawr uh. ²⁴ Rabawpkhat lamkai kha na ama kha rakhur ah chawina rang, chawng rupek joi. Khan ama chung a ara`aina u jar kha jetna rang le jem a mawchawngna rang, chawng rupek joi. ²⁵ Inia amani na ama kha mevun rui le rukhit u phakhan, Paul na ama dieng ah ading rarajakhat lamkai dieng ruti, “Eheng boi Rome khomi jem rang a hi nang rang dan maw nih?” ²⁶ Rarajakhat lamkai kha na makha rujet phakhan, rushe a rabawpkhat lamkai dieng rumejet. Ama na ruti, “Thaw rang a nangiti khan riring roh, ajarla miringpa hi Rome khomi inih.” ²⁷ Rabawpkhat lamkai kha na Paul dieng rushe a rurawdawn, “Nang Rome khomi maw nangnih?” Khan ama na rumashang, “Awh.” ²⁸ Rabawpkhat lamkai kha na ruti, “Rome khomi changna rang shier ajeng a kurulut.” Paul na rumashang, “Kiei hi koshok ah put ah Rome khomi kha kanih keng.” ²⁹ Ama ajem rang le chawngrawdawn rang a rasham hai kha relentak a rurakai u joi, khan rabawpkhat lamkai kha`awm Rome khomi `khat irukhop nit jarkhan, ruchih joi. ³⁰ Ama na Paul kha ijar a Jihudi hai na inawng u maw nih, iti jetna rang, jing tieng hin Paul kha khop ah put ah rumoshok u joi. Khan ama na thiempu ulien hai kholok le Sanhedrin kholok rumukna rang, chawng rupek joi. Ama na Paul kha jong chawi a amani maikung a rumiding joi.

¹ Paul na Sanhedrin kha ruenrep a ruti, “Uliennai miring hai, vonshe hin irikip chung a lungthim riethienghiei a Pathien maikung a karinglai.” ² Khan thiempu rashang Ananias na iedieng ah ading hai dieng khan Paul kha ener ah jemna rang, chawng rupek. ³ Mahin Paul na ama dieng ruti, “Pathien na nang kha nejem rang nih joi, Aw angoi nawt bang! Ajarla Dan dungjuia kuchung a chawngshat rang a ashuh nangnih, dan le kairekhe a kiei hi jemna rang chawng nangipek maw nih?” ⁴ Iedieng ah ading hai kha na ruti uh, “Pathien thiempu rashang hi maimawk nangipek maw nih?” ⁵ Khan Paul na ruti, “Kiei na ama hi thiempu rashang keng, iti rujet mi`ing, ajarla uliennai hai, hitihin rumiejiek, ‘Nang miring hai rampo chung a ashie chawng a rachaithiei naw tinih.’ ” ⁶ Amani shenrajat hi Sadducee, khan shenrajat hi Pharisee keng, iti kha Paul na rujet le Sanhedrin khan rura`ai, “Uliennai miring hai, kiei hi Pharisee kanih, khan Pharisee shapa `khat kanih. Kiei na enretena a ka`awm hi ngakmining le athi ah put ah hawng thoiretna chungchanga inih.” ⁷ Makha ruti phakhan, chawngrieshietna alientak `khat Pharisee hai le Sadducee hai kar a ruthoi a puiruchun kha idi a rureshen joi. ⁸ Ajarla Sadducee hai na thoiretna ninawkle ravantir ninawkle ratha awm mak iti u inih, inia Pharisee hai na tu lawpsheng a ipawm u inih. ⁹ Khashole herum moshokna lientak `khat ruthoi joi. Makhan Pharisee hai le rachang danoja hai kha na ruthoi ua enchak a chawng rurieshiet pui ua ruti uh, “Miringpa chung hin ashie muk pe u mi`ing. Ratha ninawkle ravantir na ama chung a chawngiriei nitjoiala, Pathien le re`er chon thaw u naw rawi.” ¹⁰ Chawngrieshietna lientak hawng mothoi u phakhan, rabawpkhat lamkai kha na amani na leklek a ther u rang keng joi, iti kha ruchit pui jarkhan, ramiring hai dieng khan Paul kha amani ah put ah ranak a rakhur tieng chawina rang, chawng rupek joi. ¹¹ Makha jan khan Pumi na ama dieng ruding a ruti, “Nang mulung mangar roh, Paul. Ajarla Jerusalem ah kiei rang a kungnangruchang kha ang a, Rome a`awm kungachangngir rang nangnih.” ¹² Kho hawng var phakhan, Jihudi hai eshen na lawp `khat a ruruchun ua Paul kha that masheng bulean shah u naw nih, tia chawngrurakham uh. ¹³ Miring shawm mili mieliei na mahi repna hi rurashak uh. ¹⁴ Amani na thiempu ulien hai le shierulien dieng rushe ua ruti uh, “Kieini na Paul kathat u masheng iawm shah u naw ning, tia chawngkarakham u joi. ¹⁵ Khajarkhan tun nangni na, Sanhedrin le rashap u tana nangni na ama chungchanga jirjar kha dawn a riringdet a tawkna rang, jing hin nangni dieng ivakchawi u rang a dan a rabawpkhat lamkai dieng khan chawngrashak pui u roh, khan Paul na mun jong shok mala khan kieini na ruthat u rang kanih.” ¹⁶ Khan Paul sharnu shapa kha na amani na irep u kha rujet phakhan, rushe a rakhur khan rulut a Paul dieng thangrukoi joi. ¹⁷ Paul na rarajakhat lamkai kar a akhat kha rukoi a ruti, “Mahi shanaipa hi rabawpkhat lamkai dieng chawi roh, ajarla ama dieng iriei rang chawng dikhat ieniei.” ¹⁸ Khajarkhan ama na shanaipa kha rabawpkhat lamkai dieng khan ruchawi a ruti, “Shurkhop miring Paul na kiei hi nokoi a mahi shanaipa hi na nang dieng thanginokoi jawt awm ti jarkhan, nang dieng kivakchawi hi inih.” ¹⁹ Rabawpkhat lamkai kha na ama khut ah mukui a bingte a ruchawi a rurawdawn, “Kiei dieng thangnangikoi jawt kha imaw nih?” ²⁰ Ama na rumashang, “Jihudi hai na Sanhedrin ruchunna ah Paul kha nang jong chawina rang le nang dieng nikna rang, rawjawtna niei uh. Amani na ama chung a chawng reshethep rasha u inih. ²¹ Amani na nang kha nawdawi u phakhan, jawt pe naw roh. Ajarla amani miring shawm mili mieliei na Paul that malalim u nekleshak shah u naw ning, tia chawngrakham u joi. Tun amani na nang mulungding ranga kha ingak a awm u inih.” ²² Khajarkhan ramiring lamkaipa kha na shanaipa dieng khan “Nang na kiei dieng a thangnanginokoi hi tute dieng riei naw roh,” tia chawng rupek a ama kha rumeshe joi. ²³ Khashole ama na rarajakhat lamkai hai kar a idi rukoi a ruti, “Ramiring rajadi le shakawr ramiring shawm shiri, khan shiei rak ramiring rajadi le von jan nidan `ko a Caesarea ah shena rang, rasham u rang roh. ²⁴ Khan rampopa Felix kung damtak a shok puina rang, Paul rang shakawr rasham pe u roh.” ²⁵ Hitihin ama na chawngmawchawi a rumiejiek: ²⁶ Claudius Lysias kiei na richit`awm rampopa Felix dieng: Chubai. ²⁷ Miringpa hi Jihudi hai na ishur ua that rang a rasham u nih joi, inia ama hi Rome khomi `khat inih, iti hi kurujet phakhan, ramiring hai le kirushan inih. ²⁸ Ama dieng a inawngna kha kejet jawt jarkhan, ama hi amani Sanhedrin khan kuruchawi. ²⁹ Inawngna u kha tu amani dan rawdawnna chungchanga inih, iti hi kurujet. Inia inawngna u kha thitna ninawkle lungroko shung ah khumnashe rang a rutuk tu nimak. ³⁰ Khajarkhan miringpa chung a Jihudi hai irepna u chawng kha kejet jar a rawnawttak a nang dieng kivaktir hi inih. Khan ama anawng miring hai diengawm, amani na inawngna u jar kha nang maikung a peh u rosho, tia chawngkipek inih. Chubai. ³¹ Khajarkhan ramiring hai kha na chawngpek dungjuia, khan Antipatris rang khan jan a Paul kha ruchawi u joi. ³² Jing tieng hin amani na shakawr ramiring hai kha ama le dawn a she rang rumak ua, amani kha tu rakhur tieng vak kir u joi. ³³ Amani na Caesarea vak shok u phakhan, rampopa dieng chawngmawchawi kha rupek uh, khan Paul kha`awm ama dieng rupek u joi. ³⁴ Chawngmawchawi kha rampopa kha na rute shole, ih ram ah put ah maw nangnih, tia Paul dieng rurawdawn. Khan ama kha Cilicia ah put ah inih, iti kha rujet `le, ³⁵ ama na ruti, “Nang ananawng hai vak shok pha a nang ah put ah rangai rang kanih.” Khashole ama kha rung a Herod chawngshatna Praetorium ah tetna rang, chawng rupek joi.

¹ Ni rahnga shole thiempu rashang Ananias na shierulien eshen le Tertullus iti danthiei `khat le Caesarea ah rushe joi. Amani na Paul kha rampopa maikung a vak nawng uh. ² Paul kha rukoi phakhan, Tertullus na Paul inawngna chawng kha ariei ruput a ruti, “Nang sheshepna thoi a kieini na pha shawttak a lungdamna lientak hoikihawngthiei u inih. Khan nang mik`enshiei kha na phung dieng hin takchangna ihawngchawi inih. ³ Mahi munlepha rikip a mapak le roroia, kieini na lam rikip a kawpawm uh, Aw richit`awm Felix. ⁴ Inia ashawt nawmawshaw jawt u lai mi`ing, nang roihoina jar a pha bawngte kawchawng u dikhat hi ninarangaina pe rang hin kawnawdawi. ⁵ “Ajarla mahi miringpa hi railawn, manmieshie kholok a awm Jihudi hai dieng a shawna mothoi, khan Nazareth lawpreshen hai lutu a lamkai miring `khat inih, iti hi kieini na kumuk uh. ⁶ Ama na riethiengmunshe kha`awm pawrmechetna rang rurai jarkhan, kirushur ua kadan u dungjuia mawchawngna rang, kirumining u inih. ⁷ Inia ramiring lamkai Lysias na va a kukhut chung uah put ah ranak a inurosho u inih. ⁸ Ama anawng miring hai kha nang dieng vatna rang, chawng irupek inih. Ama hi nang na nangmawchawng phakhan, kieini na kinawngna u ajar kholok rupumping a nangjet ngam rangnih.” ⁹ Jihudi hai kholok na rurachang ua hihaihi adik inih, tia rurophong uh. ¹⁰ Rampopa kha na Paul kha chawng rieina rang ukhut le jetna ruthaw a pha rupek phakhan, Paul na rumashang, “Nang na mahi phung chung hin kumshawttak chawngshat miring nangnih hi kejet jarkhan, rangamna nieitak a korohonna hi kipek inih. ¹¹ Nang na nangjet rangnih, makhala kiei na Jerusalem ah Pathien chubaibawk kurushena kha ni shawmlieidi khe maklai. ¹² Kiei na riethiengmun ah ninawkle synagogue ah ninawkle khopui shung ah mipui kha kirumuputna nurumuk pe u mak. ¹³ Amani na inawnawngna u hiawm nang dieng rachamashak ngam u naw nih. ¹⁴ Inia Lam ajui miring `khat a, kiei hi lawpreshen initi u hi tu nang maikung a kiei kajawt. Dan shung ah ninawkle Thiempulien hai behangbuk ah irumiejiek kholok kha takakurushawn a pilepu hai Pathien kha kirubiek inih. ¹⁵ Amani na`awm ijawt u Pathien dieng a ngakmining kha kiei na`awm kieniei, makhala midik midik boi adinre athi ah put ah thoiretna awm rangnih, iti hi inih. ¹⁶ Khajarkhan Pathien dieng le miring hai dieng lungthim riethieng kha nieina rang, munlepha rikip a kiruthaw inih. ¹⁷ “Kiei na kum shawtbawt shole, kuphung hai dieng numpok-khutchawi le rawthawina pekna rang, kuruhawng. ¹⁸ Mahi kuruthawlai hin Asia ah put ah ajong Jihudi hai kha na riethiengmun ah kururiethieng kha nurumuk uh. Makhan mirawp`awm ruawm mak, khan roshorakhana`awm ruawm mak. ¹⁹ Kuchung a nawngna niei u joiatu, mahin nang maikung a a`awmngir u rang a shok. ²⁰ Sanhedrin ah kurudinglai khan, chonrehe kiruthawna maw nurumuk pe uh? Hin ah awm miring hai hi na riei u rosho. ²¹ Ninawkle, amani maikung a kuruding a kurura`aina `khat jar a runithiei, ‘Von a chawngrawdawnna ah ka`awm hi athi ah put ah thoiretna chungchang hin a inih.’ ” ²² Felix na hihaihi rurangai a ama na Lam jirjar kha thatak a rujet jarkhan, chawngmeshie kha rudeh a ruti, “Rabawpkhat lamkai Lysias vak shok `le, nang chawngmeshie u hi shat rang kanih joi.” ²³ Khashole Paul kha rungna rang le ama lawm hai na irangai hai kha ipek khan makha boi a ningchamna pekna rang, rarajakhat lamkai dieng ama na chawng rupek joi. ²⁴ Nikhothang shawtbawt le Felix na i`inkonu Drusilla, Jihudinu kha le ava a Paul kha vak mokoimashak. Paul na Christa dieng taka`ishawnna chungchanga iruriei kha ama na rurangai. ²⁵ Paul na dikna, takshurna, khan ajong rang a chawngshatna chungchanga ruriei pe phakhan, Felix na ajeng a ruchih a ruti, “Tun a hin tu she rang roh, kiei na pha rolotna kumuk phakhan, navakmokoi rang kanih joi.” ²⁶ Khalaikhan ama moshokna rang, Paul na shier maw nepekngai, tia rawnawrawnaw a Paul kha vak mokoi a chawngruriei puithiei. ²⁷ Inia kum `di theng shole, Porcius Festus na Felix mun kha hawng loh phakhan, Jihudi hai dieng enlar ruthaw jawt jarkhan, Felix na Paul kha lungroko shung khan rumak joi.

¹ Festus na makha ram khan hawng shokna nithum shole, ama na Caesarea ah put ah Jerusalem tieng ruhawng. ² Kha mun khan thiempu ulien le Jihudi lamkai hai na ama kha rurumuk pui ua, Paul chungchanga thangrukoi uh. ³ Paul kha Jerusalem tieng vak rawthawtmashakna rang, amani na enlar runik uh. Makha thawna jartu, amani na lam a rurep ua ruthatna rang a inih. ⁴ Festus na rumashang makhala Paul hi Caesarea ah tet rang a inih, khan relentak a kha mun khan she rang kanih. ⁵ Khajarkhan ama na ruti, “Nang kar ua chamniei hai na kiei le she u rieshie, miringpa chung hin adik boi awm joiatu, amani na nawng u rosho.” ⁶ Amani kar khan ni shawm dawr ruawm shole, Caesarea tieng ruchum joi. Jing tieng hin ama na chawngshatna mun khan rushuh a Paul kha vak chawina rang, chawng rupek joi. ⁷ Ama na vak shok phakhan, Jerusalem ah put ah ahawng ama dieng ah ading Jihudi hai kha na ama chung a irachamashak ngam boi u akhawk nawngna kha Paul chung a rupek uh. ⁸ Paul na ibibing a rohonna kha rupek a ruti, “Khoshekhoshe ah nita`awm, kiei na Jihudi hai dan, riethiengmun, khan Caesar chung a rehena chon ruthaw mi`ing.” ⁹ Inia Festus na Jihudi hai enlar rang khan rumining a Paul dieng ruti, “Nang na Jerusalem ah she a hihai nawngna chungchanga kamaikung a chawngrawdawn rang hin nangdit maw?” ¹⁰ Paul na rumashang, “Caesar chawngshatna mun ah kading hin nang na chawngninashat penangir rang a mun kha inih. Nang na thaning a nangijet kha ang a, Jihudi hai dieng kiei na kirehena awm mak. ¹¹ Kiei na dikna boi, khan thitna rangshe rutuk chon kha kiruthaw nitjoiatu, athi rang khan kiei jawt boi thaw naw ning. Inia amani na inawnawng u hin iawm awm joi nawkatu, tute na kiei hi amani dieng nepeh ngam naw nih. Kiei na Caesar dieng chawngkito inih.” ¹² Khashole Festus na chawngrashak pui hai dieng chawngruloi shole, rumashang, “Caesar dieng chawng nangito maw nih joi? Caesar dieng she rang nangnih!” ¹³ Nikhothang shebawt `le, reng Agrippa le Bernice na Festus lamjawng thawna rang, Caesarea vak shok u joi. ¹⁴ Amani na makha mun khan nikhothang shawtbawt ruawm ua, Festus na Paul chawngmeshie chungchanga rengpa dieng rurophong a ruti, “Hi mun hin Felix na lungroko ah irumak miring `khat awm. ¹⁵ Jerusalem ah kuruawmlai khan, thiempu ulien hai le Jihudi shierulien hai na ama chung a kiei dieng jar rupek ua, chawngkishat rang kha rudit uh. ¹⁶ “ ‘Anawng hai kha na inawngpa u kha mailemai rumusheng a ama chung a nawngna kha mashangna rang chanthatna muk mala a, mi `khat thatna rang pek rang a hi Rome miring hai shena dan nimak,’ tia kiei na amani dieng kirumashang inih. ¹⁷ Khajarkhan amani na vat u phakhan, kiei na pha mathang boi a, jing tieng chawngshatna mun khan kurushuh a miringpa kha vak chawina rang chawng kirupek inih. ¹⁸ Anawng miring hai kha na ruding u phakhan, kirumining ang a chonshie hai kha le ama kha runawng u mak. ¹⁹ Inia amanirilik richi jar a ama chung a chawngrawdawnna runiei pui uh. Khan Jesu iti miring `khat ruthi a ama kha ring, tia Paul na irurophong chungchanga chawng rurieshiet pui uh. ²⁰ Hihai rawdawnna kha kurujet boi jarkhan, Paul kha Jerusalem ah she a hihai nawngna hi envakrete pui jawt maw, tia kururawdawn. ²¹ Inia Paul na Augustus chawngmocho mukna rang thangrukoi phakhan, Caesar dieng kurutir malalim, tetna rang chawngkirupek inih.” ²² Agrippa na Festus dieng ruti, “Kieitak na`awm miringpa chawng kha karangai jawt.” Ama na rumashang, “Jing a nangrangai rang keng.” ²³ Khashole jing tieng hin Agrippa na Bernice le va a, chawngrangaina mun kha rabawpkhat lamkai hai le khopui shung ah alien-arang hai le lieklawr a rulut u joi. Khashole Festus na chawng rupek a Paul kha vak chawi u joi. ²⁴ Festus na ruti, “Reng Agrippa le hin ah hawng ruchun miring kholok, miringpa hi nangmuk u joi. Ama chung hin, Jerusalem ah le hin ah awm, Jihudi mipui kholok na ama hi aring rang hin rutuklai mak, tia ra`ailam a kiei dieng thangnurukoi uh. ²⁵ Inia kiei na ama chung a thitna rangshe rutuk jar kha iawm rumuk pe mi`ing. Khan upumtak na Augustus dieng thangrukoi joi jarkhan, ama dieng tirna rang kumulung kimiding joi. ²⁶ Inia ama jar hi kupumi dieng khinrit a miejiek rang niei mi`ing. Khajarkhan ama hi nangni dieng, khinniei a reng Agrippa nang dieng kivakchawi inih. Makha kieini na nawmawchawng shole, miejiek rang dikhat kinieina rang a inih. ²⁷ Ajarla shurkhop `khat ama dieng a pek nawngna kha khin boipet a meshe rang a hi kiei rang rolotmashak mi`ing.”

¹ Agrippa na Paul dieng ruti, “Nang bibing rang khan chawngna rang, nang dieng pha pek inih.” Khashole Paul na khut kha rulawm a ibibing a rohonna kha ruriei, ² “Aw reng Agrippa, von a nang maikung a Jihudi hai na inawnawngna u kholok chungchanga rohonna `khat a kirieina rang a hi rahvantha `khat inih, tia koloi. ³ Ajarla khinniei a nang na Jihudi hai shena le chawngreper kholok kha nangjet joi. Nang na mulungluttak a narangai pe roh, tia kenengen. ⁴ “Putna ah put ah kimiring haitak kar a le Jerusalem ah karingdan hai kha Jihudi hai kholok na kanaite chang ah put ah rujet uh. ⁵ Amani na kungchang jawt uatu, inejetna u hi shawt joi. Kiei na nirichi u khawktak lawpreshen, Pharisee `khat a kuruawm. ⁶ Khan tun kiei na mawchawngna a kading hi Pathien na pilepu hai dieng chawngirurakham ngakmining jar a inih. ⁷ Mahi chawngrakhamtak hin nuphung u shawmlieidi na mulungluttak a Pathien chon kha shunlejan a iruthaw ua shokna rang, ngak`irumining u inih. Mahi ngakmining jar hin a, Aw reng Agrippa, Jihudi hai na kiei hi inurunawng u inih. ⁸ Pathien na athi miring kha mothoi, iti hi iloia takashawn nimatatmashak u maw nih? ⁹ “Kieitak na Nazareth Jesu riming le kairekhe chon tampui kha thaw rang, tia kirumining inih. ¹⁰ Makha inih kiei na Jerusalem ah kiruthaw kha. Thiempu ulien hai ah put ah cham kha kurumuk a miriethieng hai kha lungroko shung ah kirukhumte kha niboia, amani kha ruthat u phakhan, kawjawtna kha kirupek inih. ¹¹ Synagogue rikip ah amani kha kiruchep jawnjai a amani kha ranak a mieshietna mawthaw rang, kururai. Amani chung a kumulung ruhanghai a mejet boi khopui haishe khan epshawna pek rang khan kurushe. ¹² “Hilaihin thiempu ulien hai cham le amani tirna ah put ah Damascus khan kurushe. ¹³ Nishun dawr hin, Aw rengpa, ravan a ninek a avar `khat na lam ah kiei le khan kirulawn pui hai kha rokochip a nojong eh u kha kurumuk. ¹⁴ Kokholok na thoi a kurupur u phakhan, he `khat na kiei dieng Hebrew chawng a inieriei kha kurujet, ‘Saul, Saul, ijar a epshawna nanginepek maw nih? Rujumjap ruthui, iti hi nang rang matat inih.’ ¹⁵ “Kiei na kururawdawn, ‘Tumaw nangnih, Pumi?’ Ama na nurumashang, ‘Nang na epshawna nangipek a awm Jesu kha kanih. ¹⁶ Inia thoi tana nang ke khan ding rang roh. Ajarla nangimuk nieinak hai le kinumumuk rang a nieinak dire chungchanga shepding changna rang le kungmachangna rang, mahi chonmuchuk rang hin a, nang dieng jong lar kanih joi. ¹⁷ Khan tun kinitirna miring hai le Phungshik hai dire ah put ah nashan rang kanih. ¹⁸ Amani mik mavarna rang, ajing ah put ah mieivar tieng hieina rang, Satan cham ah put ah Pathien dieng hawng hieina u rang, kinitir inih. Makha amani munu hai kha rangaidam mukna rang le inkoklo kha takashawn jar a kiei dieng, riethiengsho hai le, mukna rang a inih.’ ¹⁹ “Khajarkhan Aw reng Agrippa, ravan ah put ah ajong mulungmik dieng kiei na rieirangai boi ruthaw mi`ing. ²⁰ Inia akhat changna a Damascus le Jerusalem ah awm, khashole Judea ram kholok ah awm, khan Phungshik hai dieng kieina kirurophong inih. Makha amani na mulung lek a Pathien dieng vak hieina u rang le mulungilek u kha le racha a chon thawna u rang a inih. ²¹ Hijarhin Jihudi hai na kiei hi riethiengmun ah nurushur ua that rang nururai uh. ²² Khajarkhan Pathien ah put ah ranak kumuk a, von nikhoshe hin dinglam a ashin-alien dieng kungkuruchang inih. Thiempulien hai na le Moses na iruriei ashok rang a kha niboia, iawm ruriei mi`ing. ²³ Makhala Christa na shawna idoingir rang a inih, khan ama kha athi ah put ah hawng thoi akhat changna nih rangnih. Khan ama na Jihudi miring hai le Phungshik hai adinre dieng mieivar kha rophong rangnih.” ²⁴ Ama na ibibing rang rurohonlai khan, Festus na rashangtak a “Nangvet joi Paul, nangthiemna hai kha na miropoboi namachang joi,” tia rura`ai. ²⁵ Inia Paul na rumashang, “Kiei vet mi`ing, Aw richit`awm Festus. Inia chawng adiktak le mulungmining riethieng kha kiriei inih. ²⁶ Ajarla rengpa na hihaihi ejet, khan kiei na rangamer a ama dieng kiriei inih. Khan karangam pui, makhala hihai kholok hi ama dieng rethe awm mak, ajarla muruk a thaw nimak. ²⁷ Reng Agrippa, thiempulien na iruriei hai kha takanangshawn maw? Takanangshawn iti kejet.” ²⁸ Agrippa na Paul dieng ruti, “Pha bawngte shung hin nang na kiei hi Christian nangnamachangdeng joi.” ²⁹ Paul na rumashang, “Pha shawt ninawkle pha bawngte loi a, shurkhop kanih hi niboia, nang ranga niboia, von a kiei narangai hai kholok na kiei hi angna u rang, tia Pathien dieng kinik.” ³⁰ Ama na hihaihi ruriei shole, rengpa kha na rampo Bernice, khan ama le rushuh miring hai kha le ruthoi joi. ³¹ Khan amani kha rushe u le roroia, khatlekhat dieng ruriei uh, “Hi miring hi na thatna rang ninawkle lungroko shung ah khumna rang rutuk chon iawm thaw mak.” ³² Agrippa na Festus dieng ruti, “Caesar dieng thangrukoi nawkatu, hi miring hi moshoktha inih.”

¹ Kieini hi Italy a meshena rang, mulung rumiding u phakhan, Paul le shurkhop eshen hai kha Augustus rarup a awm Julius iti rarajakhat lamkai dieng rupek joi. ² Asia ram shir tieng ah she rang a rasham Adramyttium rokonglien khan kurulut ua, makhan rokong a kurushe u joi. Khan Thesalonica ah put ah Macedonia miring Aristarchus kha kieini le rushe. ³ Jing tieng hin Sidon kurushok uh, khan Julius na Paul kha numpoktak a rutawn a awlawm hai dieng she a tenretna mukna rang, ningchamna kha rupek. ⁴ Khan ah put ah tuikhanglien tieng kuruchum ua, Cyprus tuikawram ringi a rokong a kurupang uh, ajarla rithi kha kieini dieng hawng rang. ⁵ Cilicia le Pamphylia ram kha kururakan u shole, Lycia khopui Myra khan kava uh. ⁶ Kha mun khan rarajakhat lamkai kha na Italy ah she rang, Alexandria rokonglien `khat rumuk a nurumulut u joi. ⁷ Nikho tampui loi a jamtia kurushe uh; dengre a Cnidus kha kuroshok uh. Khan rithi na nurukhar u jarkhan, Salmone le re`en Crete ringi a kurushe u joi. ⁸ Dengre a makha kavakrakan ua Lasea dieng ah awm Fair Havens, iti mun khan kava u joi. ⁹ Khan pha hawng hek a rokonglien torna rangawm chithawngroi joi. Ajarla Chamradoina pha kha`awm thengsho joi jarkhan, Paul na amani dieng chawng rupek joi. ¹⁰ Ama na ruti, “Miring hai nokhomijin she u hi hawng matat rang a hi kumuk, nieinak hai le rokonglien akoi`athang ranga niboia, niringkho u hiawm thang rangnih.” ¹¹ Inia rarajakhat lamkai kha na Paul iriei hainek khan rokonglien torpa le pumpa kha takarushawndet. ¹² Ajarla rokong muchumna mun kha phabi a awmna rang, rurolo mak. Mi arawpdet kha na dawn a rokong a shena rang, mulung rumiding u joi. Amani na itia maw thaw a Phoenix shokngir a phabi kha makhawn vak metheng rang, tia rumining uh. Makha thangmar le shakmar tieng ah maisho Crete ah rokong muchumna kha inih. ¹³ Thang tieng ah rithi na hawng renemdet le khan amani na irumining u kha hawng shok rangnih joi, ti u jarkhan, thirchuk kha ruthut ua Crete tuikawram kha deprit a rushe uh. ¹⁴ Inia shawt boipet a Euroclydon iti rithikhopui hawng rang joi. ¹⁵ Rithikhopui kha na rokonglien kha rushur a rithi shung khan maton shawn a lawn ngam boi jarkhan, tui a rulan u joi. ¹⁶ Clauda iti tuikawram ringi khan kurushe ua dengre a ringrokong hai kha kururethiei uh. ¹⁷ Amani na shung ah rumulutsho u le, rokonglien kha rui le rukhop uh. Khan amani na Syrtis Nge ah ruphun nih, tia ruchit pui u jarkhan, thirchuk mathaklam a amani kha rulan u joi. ¹⁸ Rithikhopui na shehawng a nawnawnghai u jarkhan, rokonglien shung ah awm nieinak hai kha rupai u joi. ¹⁹ Khan ni `thum changna khan tu kukhuttak u le rokonglien khutrak hai kha kurupai u joi. ²⁰ Nikhothang khadawr shawt a ni le arshi hawng malang boi jarkhan, khan rithikhopui kha`awm hawng renem, iti awm boi phakhan, karing u rangnih, iti ngakmining kholok kha ruthang joi. ²¹ Nikhothang khadawr shawt khan nekleshak shak boi a hawng awm u phakhan, Paul na amani kar a ding a ruti, “Miring hai nangni na kawchawng kha nangnarangai pe ua, Crete tuikawram ah put khan rokong a najong u nawkatu, mahi thangna le shietnakoina hai hi rawtawng pui u naw minih. ²² Mahi rokonglien hi niboia, ringkho thangna `khatshe awm naw nih. Khajarkhan nang mulungmangar u roh, tia kinawdawi u inih. ²³ Ajarla janginlai khan kiei na chonkithaw pe Pathien ravantir na kiei dieng jong ding a ²⁴ ruti, ‘Chih naw roh, Paul, nang Caesar maikung a adingngir rang nangnih, khan diktak a nang le rawtawp hai miring kholok kha Pathien na nang dieng nepek joi.’ ²⁵ Khajarkhan miring hai nang mulungmangar u roh, ajarla Pathien na kiei dieng inieriei hi ang a shok rangnih, iti hin Pathien kha takakawshawn. ²⁶ Inia kieini na tuikawram `khat nirojongir u rang a shoklai.” ²⁷ Jan shawmlieimili changna khan Adria Thampui khan shehawng a inotor u le roroia janchim a ator hai kha na`awm ram kha le karanai u kha ruring u joi. ²⁸ Amani na tui athuk dan kha ruen u phakhan, lam shawmdi rumuk uh. Khan rushebawt u phakhan, lam shawmlieirahnga rumuk uh. ²⁹ Lung alien le rawtaw nih, tia ruchit pui u jarkhan, amani na thirchuk mili kha rumuchum ua khovar rangte kha rungakrala u joi. ³⁰ Inia ator hai kha na thirchuk muchum rurasha ua, ringrokong hai kha muchum a atan rang rurashak uh. ³¹ Inia Paul na rarajakhat lamkai le ramiring hai dieng ruti, “Hihai miring hi rokonglien shung ah awm u joi nawkatu, nangni rekhe ngam u naw tinih.” ³² Khashole ramiring hai kha na ringrokong rui hai kha rushat ua rumalan u joi. ³³ Khovar diengtak khan Paul na amani kholok dieng nekleshak shakna rang, mawshawk a ruti, “Ih shak boi a, vawnchamlam a, nangingakna u hi von le ni shawmlieimili changna nih joi. ³⁴ Khajarkhan, nang ringna u rang nekleshak shak rang hin kawnawmawshawk uh. Ajarla nang lu uah shampum `khatshe thangna awm naw nih.” ³⁵ Mahi ruriei shole, ama na tan hai kha ruloi a, amani kholok maikung a Pathien dieng mapakna runiei, khan ama na makha rukhoi a ashah ruput joi. ³⁶ Amani kholok na lungarna runiei ua, ibibing u rang nekleshak kha ruloi uh. ³⁷ Rokonglien shung ah awm kha kokholok ua miring rajadi shawm shirilieiruk kurunih uh. ³⁸ Amani na rutukthep a rushak u shole, amani na rokonglien kha rumajangdet u joi, khan gehu hai kha thampui chung ah rupai u joi. ³⁹ Kho hawng var phakhan, amani na ram kha rujet u mak. Inia ngebuk ram kha rumuk uh. Kha mun khan nitthiei a la rokonglien kha shok puina rang, rumining uh. ⁴⁰ Thirchuk kha ruthut ua tui shung khan rumak u joi. Khan radar le rushui rui kha ruthut uh. Khashole rithiloi kha rulawm ua kawmchang tieng khan rushe u joi. ⁴¹ Thampui `di rumukna mun ah ngebuk kha rushuk ua rokonglien lu kha ruruphun a leh miehieibawt `le, ruper thieilai mak. Khan tuilawm kha na ama takdon kha leklek a akhoi ruput joi. ⁴² Ramiring hai chonrashak kha tu shurkhop hai kha tuihot thaw a rekhena boi rang that rang, iti hi inih. ⁴³ Inia rarajakhat lamkai kha na Paul kha rushan jawt jarkhan, amani chonrashak ah put ah rekhemashakna rang ruthaw. Ama na tuihot thiei hai kha akhat changna a chawm a kawmchang tieng shena rang, chawng rupek joi. ⁴⁴ Khan ravat sheng kha na thinglong le rokonglien lekvai hai kha rotokna rang, chawng rupek joi. Khatikhan mi kholok kha ramhona khan rurekhemashak joi.

¹ Khatikhan rurekhe u shole, makha tuikawram kha Malta iti kha rujet uh. ² Ajarla roshur a adaihai jarkhan, khomiring hai kha na shindawngroi a numnurupok uh. Khomiring hai kha na miei rurukum ua kieini kha lamjawng nuruthaw uh. ³ Paul na remrei pawm `khat vak rawkhawm a miei vak rukum phakhan, rawshawk `khat hi miei na re`em phakhan, vak shok a Paul khut kha vak kher pe joi. ⁴ Khomiring hai kha na ranring kha ama khut ah akhai kha rumuk u phakhan, khatlekhat dieng ruti uh, “Miringpa hi mithat miring ningir rangnih, ama na thampui ah put ah hawng rekhe joiawm, dikna hi na imiring jawt boi keng joi.” ⁵ Ama na ranring kha miei shung ah ruthing a, ama na shiekho kha rutawnglai mak. ⁶ Upum kha hawng pom pe ninawkle pur a thirelen rangnih joi, tia amani na rumining uh. Inia pha shawtbawt rungak uh. Ama dieng ih shok boi kha rumuk u `le, mulung rulek uh, khan ama kha pathien `khat keng ruti uh. ⁷ Makha ram khan tuikawram kholakpa kha na ram tampui runiei. Ama riming kha Publius ruti. Ama na lamjawng nuruthaw ua mirittak a ni `thum nurumieriek uh. ⁸ Hitihin rushok, makhala Publius apa kha raitun le ekshenrai na rumaja. Paul na rushe a Pathien dieng runik pe, khan ukhut rutet pe a damna runiei. ⁹ Mahi ruthaw shole, tuikawram ah awm natna aniei mi kholok na va ua damna rumuk uh. ¹⁰ Amani na lam tampui a richit nurupek uh. Khan rokong a kurushe u phakhan, kirangai u kholok kha nurupek uh. ¹¹ Tha `thum shole pathien aphir hai limbit akawp, Alexandria rokonglien khan kurushe u joi. Makha tuikawram khan phabi irumehek a ruawm inih. ¹² Syracuse khan kuruchum ua kha mun khan ni `thum kuruawm uh. ¹³ Kha mun ah put ah kavakhiei ua Rhegium kha kavakshok uh. Ni `khat shole, thang tieng ah rithi hawng a jing tieng hin Puteoli kawhawngshok uh. ¹⁴ Kha mun khan uliennai hai kurumuk ua amani le ni shiri awmna rang nururiei uh. Khatikhan Rome kurushok u joi. ¹⁵ Kha mun khan uliennai hai kha na kava u kha rujet u `le, Appius rievieithawna le tungna In ‘Thum iti munshe kha lamjawng navakthaw uh. Paul na amani kha rumuk phakhan, Pathien mapak a ngarna runiei. ¹⁶ Kieini na Rome kurushok u phakhan, rarajakhat lamkai kha na shurkhop hai kha mirung hai lamkai dieng rupek joi. Inia Paul kha tu arungpa ramiring `khat kha le ibibing a awmna rang rujawt pe. ¹⁷ Ni `thum shole Paul na Jihudi lamkai hai kha rukoi. Amani kha vak ruchun u shole, amani dieng ruti, “Uliennai miring hai, kiei na nimiring hai dieng ninawkle nipilepu hai shena le re`er a chon kha kuruthaw nawkawm, Jerusalem ah nurushur ua Rome miring hai dieng nurupek uh. ¹⁸ Amani na kiei hi nawmawchawng u phakhan, nurumoshok jawt uh. Ajarla kithitna rang a rutuk shikmieshiei kha ruthaw mi`ing. ¹⁹ Inia Jihudi hai na moshokna kha le re`er a chawngruriei u phakhan, kiei na Caesar dieng thangkoi boi thaboi `khat a kuruawm. Kuphung hai chung a nawngna kivakchawi tu nimak. ²⁰ Hijarhin a inih kiei na nangni le rumuh a chawng kiriei jawtna hi. Ajarla kiei na hitihin a thirakarui le kirikhit hi Israel hai ngakmining rangbak a inih.” ²¹ Amani na ruti uh, “Kieini na Judea ah put ah chawngmawchawi `khatshe nang jar a rumuh u mi`ing. Khan khan ah put ah ajong uliennai hai `khatshe na thanginavakkoi u ninawkle nang jar a chon shie `khatshe riei u mak. ²² Inia nang imining kha karangai jawt uh. Ajarla mahi lawpreshen chungchanga mun rikip a re`erpuilam a iriei u kha kejet uh.” ²³ Amani na nikho `khat ruren ua ama awmna khan mi tampui rushe uh. Jingkar ah put ah nitakshe Pathien rengchangna chungchanga rumeler a riringtak a kungruchang. Khan ama na Jesu chungchanga Moses Dan behangbuk ah le Thiempulien hai behangbuk ah put ah amani kha rumawjawtna rang ruthaw. ²⁴ Eshen hai na iruriei hai kha rujawt pe uh, inia eshen hai na takarushawn pe u mak. ²⁵ Amani khatlekhat rurawjawt boi u phakhan, Paul na chawng `khat ruriei shole, rushe u joi: “Ratha Riethieng na nipilepu hai dieng diktak a Isaiah thiempulien dieng irurieina inih. ²⁶ Hitihin ruti, ‘Hihai miring dieng hin she tana riei roh: “Nangrangai tu nangrangai u rangnih, inia nangni na jet u naw tinih, khan nangen tu nangen u rangnih, inia muh u naw tinih. ²⁷ Ajarla mahi miring hai mulung kha momo pe joi. Khan amani nokor u kha na rangai matatmashak u joi. Khan imik u kha mawchawt pe u joi. Khanawkatu amani mik le umuk u rangnih, khan amani nokor u le rangai u rangnih, khan amani mulung le jet u joiatu, kiei dieng vak hiei u rangnih. Khan kiei na madam u rang kanih.’ ²⁸ “Khajarkhan mahi nangni dieng kinemejet jawt u inih, makhala Pathien na Phungshik hai dieng ama shandamna kha jong tir joi, khan amani na rangai u rangnih!” ²⁹ Khahaikha Paul na ruti shole, Jihudi hai kha rushe ua amani kar a chawngrurieshiet u joi. ³⁰ Paul na manpekin khan kum `di rupumping a ruawm, khan ama dieng ava kholok kha rumulut. ³¹ Pathien rengchangna chungchang khan chawngrushem, khan Pumi Jesu Christa jar kha alo-atang boipet a lungartak a ruchuk a ruawm joi.