3 JOHN
11 Ulienchang `khat a, adik a numkipok Gaius dieng kimiejiek inih. 2 Kunumpok, nang ratha rawchawng kha ang a, taksha damna khan nita`awm, irikip a nangrawchawngna rang, nikna kieniei. 3 Ajarla nang na adik a nangring dan khakha ang a, uliennai eshen na va ua, nang dieng a awm adik chungchanga kungvakchang u phakhan, kiei ajeng a kiningai. 4 Kanai hai na adik a ring u, iti chawng kha kejet le a kiningai dawrthep shik awm mak. 5 Kunumpok, nang na uliennai hai rang le, chungchon a, milak hai rang khan takashawnroi a chon nangthaw pe. 6 Amani na biekrup maikung a nang numpok chungchang khan kungvakchang uh. Amani kha Pathien maikung a rutuk, khan lam nangmojot joiatu, atha kha nangthaw joi. 7 Ajarla ama riming jarbak khan a ka`iruchawi u inih. Amani na Phungshik hai dieng shanna iawm muk boi a rushe u inih. 8 Khajarkhan adik khan chonthawshom nachangna u rang, kha ang miring hai kha nirachang pui u rang a shok. 9 Kiei na biekrup dieng kiemiejiek joi. Inia amani kar a ulienchang jawt, Diotrephes na kieini hi nawpawm u mak. 10 Khajarkhan kiei na kava a tu, ama na iruthaw, makhala anih boi a le ashie chawng a iniebiekna u kha, miring hai dieng hawng chawi rang kanih. Ama na, khan hun mak a, uliennai hai kha rupawm mak. Aloi jawt hai kha`awm amakha, khan amani kha biekrup ah put ah inawt inih. 11 Kunumpok, kha ang nunchan ashie kha loi naw roh, inia awmchan atha kha loi roh. Atha athaw ama kha Pathien ah put ah shok inih, ashie athaw ama kha na Pathien kha mumaklai. 12 Miring rikip na Demetrius chungchanga atha a kungchang uh, khan adiktak kha`awm ama dieng awm. Kieini na`awm ama chungchanga kungkachang uh, khan kukungchang u hi adik inih. 13 Kiei na kimiejiek jawt tampui awm, inia che le muk ah miejiek jawtlai mi`ing. 14 Inia relentak a rumuh a, kieini nokhoreng a mailemai re`en a nieriebieh u rangnih, tia ngakkimining joi. Nang dieng lungdamna kha awm rosho. Hin a awm lawm hai na chubai nepek uh. Khan a awm lawm hai kha riming ban a chubai pe roh.