2 THESSALONICA

¹ Napa u Pathien le khan Pumi Jesu Christa takashawn, Thessalonica miring hai biekrup dieng Paul, Silvanus le Timothy kieini na kimiejiek u inih. ² Napa u Pathien le Pumi Jesu Christa ah put ah numpokmirit le lungdamna kha nangni dieng a`awm nih rosho. ³ Uliennai hai, nang kholok rang hin Pathien kha kimapak jawnjai u rang a shok. Mahi rutuk inih, ajarla nang takashawn u kha lien shishit joi, khan khatlekhat rang a mi rikip numropokna kha ra`ar shishit joi. ⁴ Khatikhan nang jar ua Pathien biekrup hai dieng lienrashatna kha kieini na kieniei uh, ajarla epshawna le shawrievieina kholok kha nangdoi u phakhan, takashawn le doiratna kha nangniei uh. ⁵ Hihai kholok hi na Pathien chawngshat dikna kha imadangmashak inih. Makha Pathien rengchangna khan nangni hi rutuk `khat a loinathiei rang a inih. Khajarkhan a nangniawm ashaw nangnih uh. ⁶ Nangni nawmawshaw hai kha Pathien na shawrievieina pek phakhan, Pathien rang tu, makha dikna inih. ⁷ Makha Pumi na ravan ah put ah ranakniei ama ravantir hai le lar phakhan, shawrieviei rudoi miring hai nangni kha kieini le shawmenemna kha nangnieina u rang a inih. ⁸ Pathien ajet boi hai le nupumi u Jesu Christa athachawng ajui boi miring hai dieng khan mieichonshok miei le ruhut jong loi rangnih. ⁹ Amani na kumshawt thangna chepna kha muk u rangnih. Mahi Pumi awmna vai tieng le ama lurna ranak vai tieng a ashok rang a chon inih. ¹⁰ Ajarla nangni dieng kukungchangna u kha takanangshawn u jarkhan, miriethieng hai jar a lurna rang le takashawn hai kholok jar a amani kha shinmawdawngna rang, makha Nikho khan jong rangnih. ¹¹ Hi rang hin nangni rang nikna kieniei jawnjai uh. Makha napathien u na inokoina u khan rutuk namachangna u rang a inih. Khan atha ningawna kholok le khan takashawn chon kha, ama ranak kha le rupummashakna rang a inih. ¹² Makha nangni jar a nupumi Jesu riming kha mulurna rang le ama jar a nangni kha mulurna rang a inih. Makha napathien u le Pumi Jesu Christa numpokmirit dungjuia inih.

¹ Uliennai hai, nupumi Jesu Christa jongna rang le kieini na ama dieng nuruchunna u rang khan kawnawdawi uh. ² Christa Nikho kha jong joi, tia ratha a ninawkle chawng a ninawkle kieini ah put ah chawngmawchawi `khat ang a, ih kha na nita`awm nang mulungmining u kha irawnawkmashak, ninawkle imuchunrelen chang naw rosho. ³ Ih khan nita`awm tute na nangni kha nomohon u naw rosho. Ajarla akhat changna richimathanna kha jong masheng, khan munubukpa kha rophong masheng, makha Nikho kha jong naw nih. Ama kha imathang rang a miring kha inih. ⁴ Ama na re`erpui ning, tia Pathien iti rikip ninawkle biekna iti rikip chung a nining a rawlawm rangnih. Khatikhan ama na Pathien riethiengmun khan Pathien ang a shuh a nining a Pathien kanih, tia irophong inih. ⁵ Kiei na nangni le kuruawmlai khan hihaihi nangni dieng kururiei joi, iti kha mininghep u makche maw? ⁶ Tun a rakhar hi imaw nih, iti kha nangjet u joi, makha ama phatak khan rophongna rang a inih. ⁷ Ajarla danishawnboi murukchawng kha na chon thaw joi. Akharpa kha vai moshok masheng ama na khatikhan thaw rangnih. ⁸ Danishawnboipa kha rophongning, tia khan Pumi na abairuhu kha le miechiem rangnih, khan ama jongna malang kha le mathang rangnih. ⁹ Danishawnboipa kha jong phakhan, Satan na ranak kholok le, jetna kholok le, khan mohonna rekhekchon kholok le ama dieng chon thawna rangnih. ¹⁰ Athang rang a miring hai dieng khan adik boi kholok le mohonna chon kha thaw rangnih. Ajarla amani ringna rang a numpok adik kha tum jawt u mak. ¹¹ Khajarkhan Pathien na amani dieng reheshuna ranaknieitak `khat jong tir pe rangnih. Makha amani na adik boi kha takashawnna u rang a inih. ¹² Makha adik kha takashawn boi a dikna boi a hoiriethieina runiei hai kha hengna rang a inih. ¹³ Inia Pumi na numipok uliennai hai, nangni rang Pathien kimapakchak u rang a shok. Ajarla Ratha jar a riethiengna chon le adik shung a takashawn jar a putna ah put ah Pathien na nangni kha shandamna rang inurumadan u nih joi. ¹⁴ Kishem u athachawng jar a nangni kha makha rang khan nokoi u joi. Makha nupumi u Jesu Christa lurna kha manna rang a inih. ¹⁵ Khajarkhan uliennai hai kawchawng jar a nit a, ninawkle kawchawngmawchawi jar a nita`awm, kinuruchuk u shena hai kha mukui u tana nettak a ding u roh. ¹⁶ Numpokmirit jar a ngakmining atha kha le kumshawt maw`awina nurupeh, kieini numnoropoh Pumi Jesu Christa amatak le, ¹⁷ khan napathien u le napa u kha na nang mulung u kha inemenem pe ua, chon atha kha le chawng adik rikip shung khan inomothoi u nih rosho.

¹ Dawngkhit a, uliennai hai, kieini rang nikna nieniei pe u roh. Makha, nangni dieng a kha ang a, Pumi chawng kha ma relenmashakna rang le mun rikip a mulurna rang a inih. ² Khan makha pawrche le mi shie ah put ah kieini hi nashannathiei rang a inih, ajarla mi kholok na takashawn kha niei mak. ³ Inia Pumi tu takashawn rang a rutuk miring kha inih. Mitha boi ah put ah ama na nangni kha namarat u rangnih, khan nurung u rangnih. ⁴ Kieini na chawng kinepek u kha nangthaw u, khan nangthaw u rangnih, tia nang jar ua Pumi kha karangam pui uh. ⁵ Pumi na Pathien numpok le Christa doiratna shung khan nang mulung u kha lamikhin pe nih rosho. ⁶ Khania uliennai hai, Pumi Jesu Christa riming a chawngkenepek uh. Kieini dieng a irumuk shena dungjuia aring niboia, lule a aring uliennai rikip ah put ah rechen u roh. ⁷ Kunun u nangiruchuk u rang a kha nangnitak na nangjet uh. Nang kar ua kuruawm u lai khan, lule a ruring u mi`ing. ⁸ Kieini na tute dieng manboi a nekleshak rushak u mi`ing. Inia nangni kha pokrik pekna boi rang, shunlejan a shawrana doilam a chon enchak a kiruthaw u inih. ⁹ Cham kha kiniei boi u tu nimak, inia nangni na itia kunun u kha nangijui u rang a maw nih, iti endar kha kinepek u inih. ¹⁰ Ajarla nangni le kuruawm u laishe khan, mahi chawngpek hi nangni dieng kinurupek u inih. Tunita`awm chon thaw jawt boi miring kha na nekleshakawm shah naw rosho. ¹¹ Ajarla nang kar ua lule a ring, chon thaw jawt boi, inia chon mawrawp miring nangawm uh, iti kha kejet uh. ¹² Tun, kha hai miring dieng khan, kupumi Jesu Christa riming a chawng kepek uh, khan kawmawshawk uh. Amani na muruk a chon thaw u rieshie amani nekleshaktak kha shah u rosho. ¹³ Khania uliennai hai, nangni na atha nangithaw u khan mohot u naw roh. ¹⁴ Mahi chawngmawchawi hin ah kiriei u hi ajui boi ama kha khin u roh. Ama na jak mukna rang, rawtawp pui u naw roh. ¹⁵ Rahapui miring `khat a loi u naw roh, inia uliennai `khat a rachah u roh. ¹⁶ Tun lungdamna apeh Pumi amatak kha na nangni dieng lam rikip a lungdamna kha inepek u jawnjai nih rosho. Pumi na nang kholok dieng a`awm nih rosho. ¹⁷ Kukhuttak le Paul kiei na mahi chubai hi kimiejiek inih. Kimiejiek chawngmawchawi rikip khan mahi jetna hi awm. ¹⁸ Nupumi u Jesu Christa numpokmirit kha nang kholok dieng a`awm nih rosho. Amen.