1 TIMOTHY

¹ Nashandampa u Pathien le na`ngakmining u Pumi Jesu Christa chawngpek dungjuia, Jesu Christa tirtawn, ² Paul kiei na takashawn jar a kashapa diktak, Timothy nang dieng kimiejiek inih. Napa u Pathien le nupumi u Christa Jesu ah put ah numpokmirit, roihoina, khan lungdamna kha nang dieng a`awm nih rosho. ³ Macedonia ah kurushelam a Ephesus ah awmna rang kunurudawi. Makha tukhat na ruchukna shik ruchukna boi rang, chawngnangbiena rang a inih. ⁴ Khan jokrishim le dawngawmboi thoinakeina khan mulung repena boi rang a inih. Ajarla Pathien dieng takashawn a rawshawnnek khan chawngrieshietna kha imothoi inih. ⁵ Khati chawngbie kha na ikhin kha tu, mulung riethieng, lungthim atha, khan thanunchan jaw boi takashawn ah put ah ajong, numpok kha inih. ⁶ Khania miring eshen na tu chawngbiena ah put ah riephiei ua, chawngshok boi chawngrieina tieng ruhiei u joi. ⁷ Dan oja hai kha chang jawt uh, inia iriei u kha imaw nih iti rujet u mak, khan ngartak a dingna u kha imaw nih, iti rujet u mak. ⁸ Inia tukhat na Dan kha dantak a rotokna joiatu, makha atha inih, iti nejet uh. ⁹ Dan hi midik rang a imushung nimak, inia danishawnboi le danjui boi, pathienjet boi le munu miring, riethieng boi le richi boi, nupa athat hai le mithat hai, ¹⁰ rejai hai, palepa rishih hai, mimuruh hai, mielieishiei thaw hai, khan chawngrakham akhoi hai rang a inih, iti kha nejet uh. Khan ih kha nita`awm atha ruchukna le kairekhe hai rang a dan hi ikon inih, iti hi nejet uh. ¹¹ Makha ruchukna atha kha le rahvantha Pathien lurna athachawng dungjuia inih. Makha le kiei hi inanganshie inih. ¹² Anamaratpa nupumi u Christa Jesu kha kamapak, ajarla ama na kiei hi ngamna `khat a nuruloi a, ama chon thaw rang nurumadan joi. ¹³ Matienglai khan kiei hi Pathien mieshiet miring, shawnapek miring, khan miphing `khat kurunih. Khania jet boi a le takashawn boi a kiruthaw nit jarkhan, numpokmirit kha kurumuk joi. ¹⁴ Christa Jesu dieng a awm takashawn le numpok kha le nupumi numpokmirit kha kiei dieng ship a awm joi. ¹⁵ Mahi takashawn rang a rutuk, vanoi na pawm rang a rutuk chawng kha inih. Makhala rieliei a Christa Jesu ajong kha munu miring hai shanna rang a inih. Makha kar khan kiei hi lutu kuruchang. ¹⁶ Nitjoiawm kiei dieng Jesu Christa na dawngkhit doiratna kha malarna rang, kumshawt ringna rang, takashawn a ama dieng ava hai dieng endar niminitna rang a inih. Makha jarbak khan kiei na numpokmirit kha kirumuk inih. ¹⁷ Rongrong rang a Reng, athi boi, malang boi, ashing Pathien khatte ama dieng richit le lurna kha kumshawt a awm nih rosho. ¹⁸ Kashapa Timothy, pha mala a nang chungchanga rophongchawng hai dungjuia, mahi chawngpek hi nang dieng kinepek inih. Hihai nangijui hi na ra atha kha inawmawthaw rang a inih. ¹⁹ Takashawn le atha lungthim nangnieilai khan ra thaw roh. Mi eshen na makha ruheng u jarkhan, amani takashawn u kha rokong ang a koi pe u joi. ²⁰ Amani hai kar a Hymenaeus le Alexander jaw uh. Amani na Pathien mieshietna chawng kha ruchukna boi rang, amani kha Satan khut ah kepek joi.

¹ Khajarkhan mi kholok rang anih le ariei a, mi rang ninikna a, mapakna rang akhat changna a kawnawmawshawk uh. ² Reng hai le chamniei hai kholok rang nikna niei pe u roh. Makha kieini na Pathienjet a le richittak a rithip le lungdam ring a niringna u rang a inih. ³ Mahi nashandampa u Pathien maikung a atha le ijawt kha inih. ⁴ Pathien na mi rikip hi shan a adik jetna khan mavatna rang adit. ⁵ Ajarla Pathien `khat awm, khan Pathien le miring kar a palai `khat awm, makha miring kha Christa Jesu kha inih. ⁶ Ama na mi kholok khekman rang amatak kha rurepeh joi. Mahi pha rutukthep a irupek kungchangna kha inih. ⁷ Mahi kungchangna rang hin, Pathien chawngriei le tirtawn `khat a, takashawn le adik chungchanga, Phungshik hai oja `khat a, kiei hi nurumadan joi (Christa maikung a adik kiriei inih, kiei na mielieishiei thaw mi`ing). ⁸ Khajarkhan mun rikip ah apa hai na inik rang a kha kadit. Lunghangna le chawngrieshietna jaw boi a khut riethieng hai kha lawm u rieshie nikna niei u rosho. ⁹ Khan nupang hai na`awm ponledier kha miri`ir a le riemhiei a rielienna rang, mulung niei u rosho. Sham rikinmashak a ninawkle rangkachak ninawkle kongkeplung ninawkle manrawp ponledier le rielien u naw rosho. ¹⁰ Kha ruhut a Pathien achih kanih ati nupang hai rang a rohoi atha chon hai kha le rielien u rosho. ¹¹ Nupang `khat na rede kholok le miri`ir a ruchuh rosho. ¹² Nupang `khat na miruchuh rang a ninawkle apa `khat chung a chamniei rang hin kiei jawt mi`ing, a`awmchien rang a inih. ¹³ Ajarla Adam kha akhat changna a rumijir shole, Eve kha irumijir inih. ¹⁴ Khan Adam kha rumohon mak, inia nupangnu kha rumohon a, shietna miring `khat ruchang inih. ¹⁵ Khania takashawn a, numpok a, takshur le riethieng a awm joiatu, shanai mawshawmna shung khan Pathien na shan rangnih.

¹ Tukhat na bieklamkai rang khan aditmer joiatu, atha chon kha idit inih. Mahi takashawn rang a rutuk chawng kha inih. ² Bieklamkai `khat hi rawkawkna chung a awm rang a inih. Nungak `khat inko, acheveng, ariemhiei, richit pekthiei, jinchonthiei, ruchuthiei miring anih rang a shok. ³ Juneh boi, arang boi, nieinak a vanhat boi, mulung renem, lungdamna numapoh, shier a rapham boi, ⁴ inlothiei, nai hai kha lam rikip a richit ipek a chawngijui pe miring kha anih rang a inih. ⁵ Ajarla tukhat na ama intak kha lothiei nawkala, itia maw Pathien biekrup kha tinta ngam nih? ⁶ Lienrashatna khan ruphuk a diabol chawngshatna khan chona boi rang, ama kha takashawn `thar anih boi rang a shok. ⁷ Vai a awm mi hai na kungichangna aningir rang a shok. Khanitnawkatu mimieshietna le diabol lim khan cho rangnih. ⁸ Kha ang a deacon hai kha richitpekthiei, mulung ra`ak boi, juneh boi, khan shumleshier a rapham boi miring kha aningir rang a shok. ⁹ Amani na takashawn murukchawng kha lungthim riethieng le irakrep u rang a shok. ¹⁰ Rapapek a amani kha enrete rang a shok. Khashole eshebe awm nawkatu deacon a jaw rosho. ¹¹ Kha ang a amani nupang hai kha richitpekthiei, mimieshiet boi, takshur ngam, irikip a takashawn rang a rutuk kha anih rang a shok. ¹² Deacon hai kha nupang `khat inkopa nih rosho. Inshung le nai hai kha thaning a chon thaw pe rosho. ¹³ Ajarla deacon `khat a thaning a chon thaw hai kha na amani rangbak dingna atha kha iman inih. Khan Christa Jesu dieng a awm takashawn khan mulung ngarna tampui iman inih. ¹⁴ Nang dieng avarelen rang kanih, iti ngakmining jar a hihaihi kimiejiek inih. ¹⁵ Inia kavakshumawm jawt. Khajarkhan nang na Pathien inshung a itia aring rang a maw kanih, iti kha nangjetna rang a kimiejiek inih. Makha aring Pathien biekrup khan adik chawkier le chawkhur kha inih. ¹⁶ Pathienjet chungchanga murukchawng adik hi ielien, iti hi najawtviek uh: Pathien kha pum a rumalang, makha Ratha kha na idik, tia rurophong. Ama kha ravantir hai na rumuk, ama kha Phungshik hai kar a chawng a irushem inih. Manmieshie kholok na ama kha takarushawn, alur a Pathien na ruloi joi.

¹ Nikhothang anuk a mi eshen na takashawn ah put ah hiei a milem-midawi ratha hai chawng le raikho hai miruchukna kha jui u rangnih, tia Ratha na madanghet a ieriei. ² Anih boi chawngriei hai na thanunchan khan amani lungthimrilik kha imawmaw u inih. ³ Amani na inniei le nekleshak eshen ah put ah amakha uh. Khahaikha takashawn hai le adik ajet miring hai na mapaklam a loi rang a Pathien na irukon inih. ⁴ Pathien na irukon rikip kha atha inih. Amani kha mapaklam a noloi joiatu, `khatshe pai rang awm mak. ⁵ Ajarla mahi Pathien chawng le nikna jar a iriethiengmashak inih. ⁶ Hihai chawngbiena hi uliennai hai maikung a nangte pe joiatu, Jesu Christa deacon atha `khat kha nangchang rangnih. Ajarla nangirujuirep takashawn chawng hai kha le miruchukna atha kha le inuruvai inih. ⁷ Inia richiniei boi le tarshevet jokrishim kha jawt naw roh. Kha ruhut a nang nining a Pathienjetna rang ruchuh roh. ⁸ Ajarla pum takmajangna khan nemna dikhat awm, inia Pathienjet tu irikip a nemna awm. Mahi na tun a ringkho le ajong rang a ringkho rang chawngrakham kha iniei inih. ⁹ Mahi takashawnthiei le mi kholok na pawm rang a rutuk chawng kha inih. ¹⁰ Aring Pathien dieng khan ngakmining kha niniei u inih. Pathien hi mi kholok, khinniei a takashawn hai, Shandampa kha inih. Mahi rang hin chon nithaw u, khan rachainiphung u hi inih. ¹¹ Hihaihi chawngpek le roroia ruchuh roh. ¹² Nang khangdawng kha tute na mitir naw rosho. Khania chawng a, awmchan a, ratha a, riethieng a, takashawn hai rang a endar kha chang roh. ¹³ Kiei na nang dieng kavat masheng ate a, arachah a, khan miruchuh a mulung repeh roh. ¹⁴ Nang dieng a awm khutchawi kha enda naw roh. Makha chawngrophong jar a bieklamkai hai khut donglai a Pathien na nang dieng inurupek inih. ¹⁵ Hihaihin nang mulung mulut tana awm roh. Khanitatu mi hai kar a nang mameshe kha lar rangnih. ¹⁶ Nang pumtak chungchanga le nangiruchuk kha rung tana awm roh. Makha nangithaw kha na nang pumtak le khan nang chawng rangai hai kha nangshan rangnih.

¹ Patar `khat dieng hare a rawkawk naw roh. Khania nangpa `khat ang a, rothar hai kha nang naipangpa hai `khat ang a dawi roh. ² Nutar hai kha nangnu hai `khat ang a, nungak hai kha nang naipangnu hai `khat ang a riethieng kholok le dawi roh. ³ Mieirawng hai kha, aliendet a mieirawng jielak hai kha, richit peh roh. ⁴ Mieirawng tukhat na nai hai ninawkle tu hai niei joiatu, ama inshung a naite hai kha na richichawi nitna u rang, akhat changna a ruchuh u rosho. Khan unulepa hai kha ruhutthung rosho. Ajarla mahi Pathien maikung a atha le ningnitroi kha inih. ⁵ Thien a awm mieirawng adik kha na Pathien dieng ngakmining niei rosho. Khan shunlejan a anih le ariei chat naw rosho. ⁶ Inia hoiriethiei a awm ama kha iringlam a athi inih. ⁷ Amani na mieshiet nieina boi rang, hihai chawng hi peh roh. ⁸ Tukhat na amatak, khinniei a, ama inshung mi hai kha avai nawkatu, ama takashawn kha ijawt boi inih, khan takashawn boi miringnek khan ashiedet miring kha inih. ⁹ Kum shawm `ruk thoi a awm boi kha mieirawng a tethiei inih. Ama kha pa khatte inkonu anih rang a shok. ¹⁰ Amani kha chon atha a rimingniei, shanai rumawshawm, jinchon ruthaw, miriethieng hai ke rushuk, shawdoi hai rurachang pui, khan atha chon kholok a mulung rurepeh miring anih rang a shok. ¹¹ Inia mieirawng noi hai kha te naw roh. Ajarla amani takjatna kha na Christa kha re`erpui ning, tia inniei jawt uh. ¹² Amani na arapa a atakashawn u kha rupai u jarkhan, chawngshatna kha muk uh. ¹³ Kha le roroia adaw ruchuk a inin ah she ua, adaw ranga kha niboia, michawk a chonchin uh, khan riei boi rang a kha ieriei uh. ¹⁴ Khajarkhan mieirawng noi hai na in`iniei uh, nai`iniei uh, khan inshungkhur kha i`en ua mirahapui ama na mieshietna rang a mun kha ipek boi rang a kha kadit. ¹⁵ Ajarla mieirawng eshen na Satan anu juina rang, hieisho u joi. ¹⁶ Takashawn apa ninawkle nupang `khat na mieirawng hai kha awm pui joiatu, amani kha rachang pui u rosho. Khan biekrup pokrik machang u naw rosho. Makha mieirawng jielak hai kha biekrup na rachangna pui rang a inih. ¹⁷ Thatak a makai bieklamkai hai, khinniei a Pathien chawng ariei le miruchuh a chon ranak athaw hai kha na richit rothom imuk rang kha rutuk inih. ¹⁸ Ajarla Miejiek na ieriei, “Shiecha `khat na shang achieilai khan ener nangikhop pe boi rang a inih,” khan “Chon thaw miring kha na ama nilawh imuk rang a kha rutuk inih.” ¹⁹ Miring idi ninawkle uthum na kungchang joi nawkatu, bieklamkai akhat chung a jar peh u naw roh. ²⁰ Eshen hai na`awm chitna nieina rang, munu thaw hai kha vanoi maikung a rawkawk u roh. ²¹ Hihaihi nangrungna rang, ningsha boi a le enshietenlar boi a nangthawna rang, Pathien le nupumi Jesu Christa, khan madan ravantir maikung a kungachang kanih. ²² Tute chung ah nawtshun a nang khut dong naw roh. Khan munu hai khan jaw naw roh. Nang pumtak kha riethieng a tet roh. ²³ Tui neh roh, khania nang bukawk le khan phapha a nangnatna jarkhan, ju lekte neh roh. ²⁴ Miring eshen hai munu kha malangsheng a awm a chawngshatna mun khan amani maton ah rushe pe uh. Khan mi eshen hai munu kha na unuk ah ujui uh. ²⁵ Kha ang khan, chon atha hai kha malangsheng a awm, khan ashie chon hai kha`awm the ngam chat nimak.

¹ Ringkaw rupu shok kholok na upumpa hai kha richit ipek rang khan urutuk inih, tia imining u rang a shok. Makhan Pathien riming le miruchukna kha mieshiet naw nih. ² Takashawn pumpa aniei hai na amani kha uliennai nit jar a noishie a mining u naw rosho. Khania inemna hai kha takashawn miring le amani na numipok nit jarkhan, thadet a chon ithaw pe u rang a shok. Amani dieng hihaihi ruchuh le roroia rachah u roh. ³ Tukhat na shik miruchukna kha loi a nupumi Jesu Christa le Pathienjet ruchukna aracha chawng hai kha ijawt boi nitatu, ⁴ ama kha lienrasha le ih jet boi miring kha inih. Inia ama kha chawngreper le chawngrishietna khan ditrekhe iniei inih. Makhan ah put ah mukmakna, roshona, mieshietna, riringna boi khan ashie vak shok inih. ⁵ Makhan ah put ah mulung tha boi miring hai kar a chawng rekherna tampui vak shok inih. Amani ah put ah adik kha imuruk pe u inih. Amani na Pathienjet hi shumleshier mukna `khat inih, tia imining hai kha nih uh. Kha ang miring hai kha le rawtawp u naw roh. ⁶ Inia ninghien le roroia Pathienjet hi nemna lientak `khat inih. ⁷ Ajarla kieini na manmieshie shung hin iawm jong chawi u makme, khan hin ah put ah iawm chawi ngam makme, iti hi madangsheng inih. ⁸ Nekleshak le ponledier nieniei uh, hihaihi le ninghienna nieniei u rangnih. ⁹ Inia rawchawng jawt miring hai na lemna le lim, khan mawngna le mawpawpthiei ditrekhe tampui khan acho u inih, makha na thitna le thangna khan imulut inih. ¹⁰ Ajarla shumleshier numpoh hi ashie kholok rujung inih. Mi eshen na makha ahotna khan takashawn ah put ah iehiei a nining a mulungshaw tampui kha le rushun inih. ¹¹ Aw Pathien miringpa, hihai ah put ah tan rang roh. Dikna, Pathienjet, takashawn, numpok doiratna le mulung renem hi rojo rang roh. ¹² Takashawn ra atha kha thaw rang roh, kumshawt ringna kha mukui rang roh. Makha rang khan a inurukoi inih. Khan makha rang khan a nang na kungachang mi tampui maikung a rieirophongna atha kha nangirurophong inih. ¹³ Nieinak kholok chung a ringkho apeh Pathien maikung a, khan Pontius Pilate maton a kungruchang, khan thatak a rieirophongna rupeh Christa Jesu maikung a, nang dieng chawngkenepek. ¹⁴ Makha nupumi Jesu Christa na jong lar masheng, mahi chawngpek hi mawk boi a le metek boi a rungna rang a inih. ¹⁵ Pathien na Christa kha pha rutukthep a numumuk rangnih. Pathien hi nimapak u rang a ranakniei khatte, reng hai Reng, khan pumi hai Pumi kha inih. ¹⁶ Ama ranga na thitniei boi iniei, khan banngam boi varna mun ah awm, tute na imuk boilai, ninawkle imuk boi inih. Ama dieng richit le kumshawt ratna kha nih rosho. Amen. ¹⁷ Tun a rong a rawchawng miring hai kha mining rashang mashakna boi rang, ninawkle madang boi rawchawngna khan ngakmining nieina boi rang, rachah u roh. Khania nohoina u rang a nieinak kholok rawchawngtak a napeh, aring Pathien dieng khan ngakmining kha itet u rang a shok. ¹⁸ Khan atha thawna rang, atha chon hai khan rawchawng nitna rang, khutjang le mi hai le reshem jawt nitna rang, amani kha chawngbie roh. ¹⁹ Nuk rang a keshun atha kha amani rangbak khan ibawm u rang a shok. Makha kumshawt ringna kha mukuina rang a inih. ²⁰ Timothy, nang dieng a kinanganshie kha rungrep roh. Anih boi a shingnavarna iti richiboi, chawngnawk le mining kairekhe hai kha lawi roh. ²¹ Mi eshen na makha varna kha kieniei, ti ua takashawn kha imahien u inih. Numpokmirit kha nang dieng a`awm nih rosho. Amen.