1 CORINTH

¹ Pathien mulungmining jar a Jesu Christa tirtawn `khat rang a irukoi, ² Christa Jesu jar a riethieng rang a irukoi a iruriethieng, khan mun rikip ah nupumi u Jesu Christa riming aban, Corinth ah awm Pathien biekrup dieng, uliennai Sosthenes le Paul kiei na kimiejiek u inih. Jesu Christa hi amani le kieini Pumi kha inih. ³ Napa u Pathien le Pumi Jesu Christa numpokmirit le lungdamna kha nangni dieng a`awm nih rosho. ⁴ Christa Jesu jar a nangni dieng inurupek Pathien numpokmirit chungchang khan kapathien kha kamapak jawnjai. ⁵ Makhala ama na chawng kholok a le varna kholok a nawrawchawngmashak uh. ⁶ Christa chungchanga kukungchangnashe kha`awm nangni dieng runet joi. ⁷ Khajarkhan nupumi u Jesu Christa larna kha nangingak u le roroia, khutchawi hai khan nangravatna u awm mak. ⁸ Nupumi u Jesu Christa Nikho khan metek boi nangnitna u rang, dawngshe khan ama na nemenet u rangnih. ⁹ Pathien hi takashawn rang a rutuk inih. Ama na ashapa nupumi u Jesu Christa rawlawpna shung khan nangni kha inurukoi inih. ¹⁰ Tun uliennai hai, mi kholok na khatte a nangrieina u rang le nang kar ua reshenrokhoi awmna boi rang, mulungmining khatte a nangruchunna u rang le khan chawngnangshatna u rang, nupumi u Jesu Christa riming a kinawmawshawk u inih. ¹¹ Ajarla kuliennai hai, nang kar ua roshorakhana awm, tia Chloe inshungkhur ah put ah kiei dieng thangkoina vak niei uh. ¹² “Paul tah kha kanih,” “Apollos tah kha kanih,” “Cephas tah kha kanih,” “Christa tah kha kanih,” tia nangiriei u kha kiriei inih. ¹³ Christa hi reshen maw? Nangni rang Paul na cross ling ah maw ruthi? Ninawkle, nangni na Paul riming a baptisma maw nangruloi uh? ¹⁴ Crispus le Gaius niboia, nangni `khatshe baptisma kunurupek boi u jarkhan, Pathien kha kamapak. ¹⁵ Makha tute na kiriming a tui kurumulut tina boi rang a inih. ¹⁶ Khanita`awm Stephanas inshungkhur kha tu baptisma kurupek. Makha niboia kiei na tute dieng baptisma kurupek, iti jet mi`ing. ¹⁷ Ajarla Christa na kiei hi baptisma pek rang a inojongtir nimak, inia lungvar chawng a niboia, athachawng kha rophongna rang a inih. Makha Christa cross kha ranakniei changna rang a inih. ¹⁸ Ajarla athang a awm hai rang tu, cross chawng hi mawngna kha inih, inia ishan a awm kieini dieng tu mahi Pathien ranak kha inih. ¹⁹ Ajarla hitihin rumiejiek: “Kiei na ashing miring hai lungvar kha mathang pe rang kanih. Ajet miring hai jetthieina hai kha momot pe rang kanih.” ²⁰ Ashing miring kha khoshekawt ah maw awm? Danoja kha khoshekawt ah maw awm? Mahi rong a mihepa kha khoshekawt ah maw awm? Pathien na hi manmieshie lungvar kha mawngna imachangsho nimak maw? ²¹ Ajarla, Pathien lungvar shung khan manmieshie na lungvar jar a Pathien kha rujet maklai. Takashawn miring hai kha shanna rang, amawng chawngshem jar a, Pathien kha ningiruminit pe inih. ²² Jihudi hai na jetna inik uh, khan Greek hai na lungvar atawk uh. ²³ Inia kieini na tu cross ling ah iruthat u Christa kha chawng a korophong uh. Jihudi hai rang mahi keruthuina inih, khan Greek hai rang mahi mawngna inih. ²⁴ Inia Jihudi nit a Greek nita`awm, irukoi miring hai dieng tu, Christa hi Pathien ranak le Pathien lungvar kha inih. ²⁵ Ajarla Pathien mawngna kha miring hai shingnanek a shingdet, khan Pathien dawkna kha miring hai ranaknek a ratdet. ²⁶ Ajarla uliennai hai, inokoina u kha en u roh. Manmieshie ichatna dungjuia ashing tampui, ranakniei tampui, rashang a shok tampui hai kha irukoi nimak. ²⁷ Inia ashing hai kha majakna rang, manmieshie a awm amawng hai kha Pathien na irumadan inih. Arat hai kha majakna rang, manmieshie a awm adawk hai kha irumadan inih. ²⁸ Khan manmieshie a awm ih nih boi, inawng a awm hai, khan a`awm boi hai kha Pathien na irumadan inih. Mahi a`awm nieinak hai kha ih nih boi machangna rang a nih. ²⁹ Makha tute na Pathien maikung a lienrashatna boi rang a inih. ³⁰ Inia ama jar a Christa Jesu dieng nangawm u joi. Ama kha kieini rang a Pathien ah put ah jong lungvar kha inih. Christa kha kieini rang a dikna, riethiengna le rekhekna kha inih. ³¹ Makha “Lienrasha ama kha na PUMI dieng lienrashatna kha niei rosho,” tia imiejiek kha nitna rang a inih.

¹ Khan uliennai hai, kiei na nangni dieng kavat phakhan, chawngriei thieitak a ninawkle lungvar kha le Pathien kungchangna kha rophong va mi`ing. ² Ajarla Christa Jesu le cross ah thitna kha niboia, kiei na nangni dieng iawm jetna boi rang, mulung kurumiding. ³ Khan dawkna le chitna khan rawnawklam a nangni le kuruawm inih. ⁴ Khan kawchawng le kawchawngshem kha hawrna lungvar chawng hai kha runimak, inia Ratha na ranaknieitak a chon thaw, tia imumuk inih. ⁵ Makha nang takashawn u kha miring hai lungvar khan niboia Pathien ranak khan ngieina rang a inih. ⁶ Nitjoiawm puichang miring hai kar khan lungvar chawng kha kieriei uh. Inia mahi rong lungvar chawng kha nimak, khan athang a awm mahi rampo hai rong lungvar kha`awm nimak. ⁷ Inia rethe a awm Pathien lungvar kha kishem u inih. Makha murukchawng lungvar kha nulurna u rang, Pathien na rong hai mala a irumadansha nih joi. ⁸ Makha mahi rong rampo hai tute na rujet mak. Ajarla makha rujet u joiatu, lurna aship Pumi kha cross ling ah ruthat u naw nih. ⁹ Khania irumiejiek kha a`ang inih: “Mik na mumaklai, nokor na jet maklai, ama numapoh amani rang a Pathien na irurasham nieinak hai kha miring mulung a lut maklai.” ¹⁰ Inia aratha jar a amani kha kieini dieng malangmashak joi. Ajarla Ratha na nieinak kholok kha atawk, awh, Pathien nieinak hai athukshe kha`awm itawk inih. ¹¹ Ajarla ih miring kha na maw, ama shung a awm ratha kha na niboia, miring `khat mulungmining hai kha jet nih? Makha ang a Pathien Ratha na niboia, tute na Pathien mulungmining hai kha jet mak. ¹² Tun manmieshie ratha nih boi, Pathien ah put ah Ratha kha, kieini na naman u joi. Makha Pathien na kieini dieng manboi a inurupek nieinak hai kha nejetna u rang a inih. ¹³ Miring lungvar na iruchuk chawng a niboia, Ratha Riethieng na iruchuk chawng a kiriei u inih. Rathalam nieinak hai kha rathalam chawng a kimeler u inih. ¹⁴ Inia balam miring kha na Pathien Ratha nieinak hai kha muh mak, ajarla hihaihi ama dieng mawngna kha inih. Khan amani kha jet ngam mak, ajarla amani kha ratha le enrete rang a inih. ¹⁵ Inia Ratha miring kha na nieinak kholok enirete inih, khania ama chung a chawngshat pe mak. ¹⁶ “Ajarla ama kha chawng peknathiei rang, PUMI mulungmining ajet tumaw awm joi? Inia Christa mulungmining kha niniei u inih.”

¹ Uliennai hai, kiei na nangni dieng rathalam miring `khat dieng a ang a chawng riei mi`ing, inia Christa dieng a naite hai taksha miring hai dieng a ang a chawng kiriei inih. ² Burum le niboia runutui le kinavai u inih. Ajarla burum kha neh ngam u makchelai, khan tunshe hin mawtawr u makchelai. ³ Ajarla taksha a nangawm u lai. Ajarla mukmakna, roshona, khan reshenna awmlai jarkhan, nangni taksha le balam miring hai kha ang a aleng nih makche maw? ⁴ Ajarla tukhat na “Paul tah kha kanih” khan shik `khat na “Apollos tah kha kanih,” ti phakhan, nangni taksha a awm nih makche maw? ⁵ Khanitala Paul hi tumaw nih? Apollos hi tumaw nih? Pumi na amama dieng a chon ipek dungjuia, amani kha shepding hai kha nih mak maw? Amani jar a takanangirushawn u nih mak maw? ⁶ Kiei na kiruling inih, Apollos na tui`iruliei inih, inia Pathien na irumawmawng inih. ⁷ Khajarkhan alingpa le tuilieipa kha iawm nimak, inia runiei tu mawmawng Pathien kha inih. ⁸ Alingpa le tuilieipa kha akhat inih, khan amani ithawithaw dungjuia amama lawh kha tum u rangnih. ⁹ Ajarla kieini hi Pathien chon athawshom miring kha kanih uh, khan nangni kha Pathien loipuk le Pathien inrashak kha nangnih uh. ¹⁰ Kiei dieng a inurupek Pathien numpokmirit dungjuia, inrashak thiemtak `khat a, kiei na inmun kha kirurashamsho nih joi. Khan shik `khat na makha chung khan irashak inih. Inia mi rikip na makha chung khan itia irashak maw nih, iti kha riring pui rosho. ¹¹ Iruphunsha chawpui Christa kha niboia, tute na shik `khat chawpui kha phun ngam naw nih. ¹² Inia iphun chawpui chung hin tukhat na rangkachak, dangka, manlu lung, thing, rangai, khan shawpaw le inrashak joiatu, ¹³ amama chon hai kha malangmashak rangnih, ajarla Nikho kha na makha rophong rangnih. Ajarla miei na makha rophong rangnih. Khan miei na amama chonthaw kha ih maw nih, iti kha enrete rangnih. ¹⁴ Makha chung a irashak tukhatpa chonthaw kha kang pe joinawkatu, ama na lawh kha tum rangnih. ¹⁵ Ama chonthaw hai kha miei na kang joiatu, lawh kha thang pe rangnih, inia mieichon ah put ah rekhe `khat ang a, thiethien a tu shanna kha muk rangnih. ¹⁶ Pathien riethiengmun kha nangnih uh, khan Pathien Ratha kha nangni dieng awm, iti kha jet u makche maw? ¹⁷ Tukhat na riethiengmun kha pawrmechet joiatu, Pathien na ama kha mathang rangnih. Ajarla Pathien riethiengmun kha riethieng inih, makha nangni nangnih uh. ¹⁸ Tute na nining a mohon nana naw rosho. Tukhat na mahi rong hin ashingdan a awm joiatu, ashing miring kha changna rang, amawng kha chang rosho. ¹⁹ Ajarla mahi manmieshie varna hi tu Pathien rang a mawngna kha inih. Ajarla hitihin iemiejiek: “Amani hongthawtak khan ashing miring hai kha ishur inih.” ²⁰ Khan takthar a, “PUMI na mishing hai lungthim kha nemna boi inih, iti kha jet pe.” ²¹ Khajarkhan tute na miring hai jar a lienrashatna niei naw rosho. Ajarla nieinak kholok hi nang tah u inih. ²² Paul ninawkle Apollos ninawkle Cephas ninawkle manmieshie ninawkle aring ninawkle thitna ninawkle a`awm nieinak ninawkle ajong rang a nieinak kholok hi nang tah u inih. ²³ Khan nangni hi Christa tah, khan Christa hi Pathien tah kha inih.

¹ Mi na kieini hi Christa shok hai le Pathien murukchawng inchonpo hai `khat a noloi rosho. ² Makha chung a, inchonpo hai rang a kha takashawn rang a rutuk anih rang a hi rangai. ³ Inia nangni ninawkle miring danin ih khan nita`awm, kuchung a ennanginerete u hi, kiei rang tu ashinving inih. Kininingshe a enrete nana mi`ing. ⁴ Ajarla kuchung a ashie iti jet mi`ing, inia mahi na kiei hi inimidik tu nimak. Inia kiei enneretepa kha Pumi inih. ⁵ Khajarkhan, Pumi jong masheng, pha mala khan tute chung a iawm chawngshat u naw roh. Ama na ajing a rethe nieinak hai kha avar tieng vak chawi rangnih. Khan mulung hai chonmuchuk kha malangmashak rangnih. Khashole mi rikip na itum rang a mapakna kha Pathien ah put ah muk rangnih. ⁶ Uliennai hai, hihaihi nangni rangbak khan meloi a kiei le Apollos chung a kimocho inih. Makha nangni na imiejiek kha khea mining boi a kieini ah put ah nangruchukna u rang a inih. Khan tukhat jar a tukhat chung a liennangrashatna boi u rang a inih. ⁷ Ajarla tu na nangni kha shik miring ah put ah kai`inerekhemashak u maw nih? Khan Pathien ah put ah nangiruloi boi u imaw nangniei uh? Khan nangni na nangruloi u joiala, aloi boi ang a, ijar a lienrasha maw nangnih uh? ⁸ Nangni ashipsha kha nangnih joi! Nangni rawchawngsha kha nangnih joi! Kieini jaw boi a reng hai kha ang a rengnangchang u joi! Makha kieiniawm nangni le rengkachangna u rang, rengnangchang u rang a kha kidit inih! ⁹ Ajarla kiei na kimining, Pathien na kieini hi, athi rang a iheng ang a, inophoi u tirtawn adawkving hai kha kanih u joi. Ajarla kieini hi manmieshie, ravantir le miring hai en rang a kha namachang u joi. ¹⁰ Christa rangbak khan kieini hi mimawng hai kha kanih u joi, inia nangni tu Christa jar a ashing kha nangnih uh! Kieini hi kadawk uh, inia nangni tu nangrat uh! Nangni kha lurna nepek uh, inia kieini tu nepeh u mak! ¹¹ Tunshe hin tuiravawncham a ka`awm uh, ponledier boi a ka`awm uh, nejem uh, khan inleloi niei boi a ka`awm uh. ¹² Khan chon ranak kawthaw uh, khuttak le chon kawthaw uh. Narachai u phakhan, rahvan kepek uh, epshawna nepek u phakhan, kodoi uh. ¹³ Maimawk nepek u phakhan, renem a kamashang uh. Vonshe hin manmieshie arih le rieliei pawrche kha kachang u lai. ¹⁴ Nangni dieng jak pekna rang a hihaihi kimiejiek nimak, inia kunumpok naite hai `khat a kinarachak u inih. ¹⁵ Ajarla Christa chungchanga mirachah hai kha tengamboi a nangniei u joiawm, nangpa u hai kha tampui niei u makche. Ajarla athachawng jar a Jesu Christa riming a nangpa u kha achang kanih joi. ¹⁶ Khajarkhan kunun kha ruchuh u roh, tia kinawmawshawk u inih. ¹⁷ Mahi jar hin Timothy kha nangni dieng kivaktir inih. Pumi jar a ama kha kunumpok le takashawn rang a rutuk shapa kha inih. Kiei na, mun rikip ah awm biekrup rikip ah kiruchuk kha ang a, Christa dieng a kaw`awmchan hai kha nangni dieng nemejet rangnih. ¹⁸ Kiei na nangni dieng kava boi rang ang a eshen na liennangrasha uh. ¹⁹ Inia Pathien na jawt joiatu, nangni dieng kiei varelen rang kanih. Khan lienrasha miring hai chawng kha niboia, amani ranak kha kiei na jet rang kanih. ²⁰ Ajarla Pathien rengchangna kha chawng kha nimak a ranak kha inih. ²¹ Rawmaw le maw ninawkle numpok le maw, khan mulung renem le maw nangni dieng kiei va ning? Ih kha maw nangdit uh?

¹ Nang kar ua pawrche chon awm, iti thangkoina `khat hi kiei dieng jong tung. Kha`ang pawrche chon hai kha Phungshik hai diengshe riming ban boi inih, makhala miring `khat na apa inkonu le irishih hi inih! ² Khan nangni na lienrashatna nangniei uh, makha chon athaw miring kha nang kar uah put ah nawtna rang, mulung shaw puidet u makche. ³ Ajarla taksha a ka`awm joi nawkawm ratha a ka`awm. Khan a`awm miring `khat ang a, kha`ang chon athaw miring chung khan chawngkashat joi. ⁴ Pumi Jesu Christa riming a nangni na lawp `khat a karatha le, nupumi u Jesu Christa ranak le nangruchun u phakhan, ⁵ taksha mathangna rang, kha`ang miring kha Satan dieng peh u roh. Makha Pumi Jesu Nikho khan aratha kha shannathiei rang a inih. ⁶ Nang lienrashatna u kha atha nimak. Chawh shilite kha na vaipaw kholok kha rakangmashak, iti kha jet u makche maw? ⁷ Khajarkhan vaipaw athar nangchangna u rang, chawh alui kha riethieng u roh, ajarla diktak a chawjawboi kha nangnih uh. Ajarla diktak a narakanna u Christa kha kieini rangbak khan irurawthawina inih. ⁸ Khajarkhan alui chawh kha le niboia, ashie le pawrche chawh kha leawm niboia, chawjawboi mulung riethieng le adik khan rachang kha rung u rawi. ⁹ Pawrche miring kha le nangrawtawpna boi u rang, kawchawngmawchawi khan kirumiejiek inih. ¹⁰ Inia hi manmieshie pawrchetna ninawkle phamrai athaw hai ninawkle mishiersho hai ninawkle rilim chubaibawk hai kha kiti nimak. Makha nitjoiatu, nangni na hi manmieshie hi nangimathan u rang a inih. ¹¹ Inia tun uliennai tu iti pawrche chon thaw, phamrai athaw ninawkle rilim chubaibawk, ninawkle mi maimawk apeh, ninawkle jukhawp miring, shierliemthaw miring hai kha le rawtawpna boi rang, amani le aneh-ashashe thawna boi rang, kiei na nangni dieng kirumiejiek inih. ¹² Ajarla biekrup vai tieng a awm miring hai kha chawngshat pe a kiei na imaw thaw ning? Biekrup shung a awm miring hai kha nangni na chawngnangishat pe boi maw nih? ¹³ Inia vai tieng a awm miring hai kha Pathien na chawngishat pe inih. Khajarkhan “pawrche miring kha nangni ah put ah nawt u roh.”

¹ Nang kar ua tukhat na tukhat chung a chawngreperna niei phakhan, makha chawngshatna rang, miriethieng hai dieng niboia, midik boi hai dieng nangshe u maw nih? ² Miriethieng hai na manmieshie hi chawngshat pe rangnih, iti kha nangijet boi u maw nih? Khan manmieshie hi chawngnangishat pe u rang a nitjoiatu, ashinving chon hai kha chawngshatna rang, rutuk boi maw nangnih uh? ³ Kieini na ravantir hai kha chawngnishat pe rang a inih, iti kha nangijet boi u maw nih? Khanitala hihai ringkho hi idawr a chawngnishat pe u rang a maw nih? ⁴ Mahi ringkho chon chungchanga chawngshatna kha nangniei u joiala, biekrup na ashinving a imining miring hai kha chawngshat rang madan u roh! ⁵ Mahi nang jakna u rang a kiriei inih. Uliennai hai kar a chawngshat ngam, nang kar ua ashing miring `khatshe awm boi maw nih? ⁶ Inia uliennai `khat na uliennai `khat chung a chawngreperna pui rang, danin ah ashe kha takashawn boi hai dieng ashe inih! ⁷ Khajarkhan khatlekhat chung a danin ah nangshe u hi maimawk kha nangimuksha u nih joi. Kha ruhut a erehe chang rang ithaw maw jawt u makche? Mi na inomohon u rang khan ithaw maw jawt u makche? ⁸ Inia nangnitak na adik boi kha nangthaw uh, khan mi kha nang mohon uh. Khan mahi nang uliennai dieng nangthaw uh! ⁹ Midik boi hai na Pathien rengchangna kha tum ngam naw nih, iti kha jet u makche maw? Mi na nangni kha inelem boi chang rosho. Pawrche chon thaw hai, rilim chubaibawk hai, uire thaw hai, nupangmunlo hai, palepa rishih hai, ¹⁰ murushah hai, rapham miring hai, jukhawp miring hai, maimawk apeh hai, khan shierliemthaw hai kha na Pathien rengchangna kha tum ngam naw nih. ¹¹ Nangni eshenawm kha`ang miring hai kha nangrunih uh. Inia nangni tu Pumi Jesu riming le napathien u Ratha kha na nururushuk u joi, nururiethieng u joi, khan nurumidiksho u joi. ¹² Ih kholok hi kiei rang dan niviek, inia ih kholok hi nemna nimak. Ih kholok hi kiei rang dan niviek, inia amani ranak thoi khan awm mi`ing. ¹³ Nekleshak hai hi vawnpui rang a inih, khan vawnpui hi nekleshak hai rang a inih, inia Pathien na adinre kha mathang rangnih. Pum hi pawrche thawna rang a nimak, inia Pumi rang a inih, khan Pumi hi pum rang a inih. ¹⁴ Khan Pathien na Pumi kha irumothoi inih, ama ranak khan kieiniawm nomothoi u rangnih. ¹⁵ Nang pum u hai kha Christa pasha hai kha inih, iti kha jet u makche maw? Christa pasha hai kha loi a nawchijor pasha hai kha machang ning maw? Makha nihet mak! ¹⁶ Ninawkle, nawchijor `khat le ruchun ama kha, ama kha le pum `khat chang joi, iti kha jet u makche maw? Ajarla Pathien na iti, “Idi kha taksha `khat nih joi.” ¹⁷ Inia Pumi le ruchun ama kha ama le ratha `khat nih joi. ¹⁸ Pawrche chon ah put ah tan u roh. Miring `khat na ithaw munu rikip kha pum vai tieng ah inih, inia pawrche chon athaw ama kha na upumtak chung a munu ithaw inih. ¹⁹ Ninawkle, nang pum u kha nangni dieng a awm, Pathien ah put ah nangimuk u, Ratha Riethieng riethiengmun kha inih, iti jet u makche maw? Nangni hi nang tah u nih u lai makche. ²⁰ Ajarla nangni hi aman pek a inawrawchawk u nih joi. Khajarkhan Pathien tah nang pum u le nang ratha u khan Pathien kha mulur u roh.

¹ Khan kiei dieng a nivakmiejiek u chungchanga kiemiejiek jawt: apa na nupang ishit boi rang a hi atha inih. ² Nitjoiawm pawrche chon jar hin, apa rikip na amama inkonu niei rosho, khan nupang rikip na amama inkopa niei rosho. ³ Inkopa na ama inkonu dieng a thaw rang a rangai kha thaw rosho, khan inkonu kha na`awm khatikhan ama inkopa dieng khan thaw rosho. ⁴ Inkonu na upumtak chung a cham niei mak, inia inkopa na iniei. Kha le ra`ang a, inkopa na upumtak chung a cham niei mak, inia inkonu na iniei. ⁵ Chamradoina le nikna rang a pha bawng `khat rang nangrawjawtshom u niboia, khatlekhat idit kha heng u naw roh. Takshur ravat jar a Satan na nelemna boi u rang, vak ruchunret u roh. ⁶ Mahi kiei na themna `khat a kiriei inih, chawngpek `khat a kiriei nimak. ⁷ Ajarla mi kholok na kiei hi ang a a`awm rang hi kadit. Inia mi rikip na Pathien ah put ah khutchawi inieirim inih, akhat dieng hitihin, khan akhat dieng khatikhan. ⁸ Inia inniei boi hai le mieirawng hai dieng kieriei: kiei hi ang a awm u joiatu, thadet. ⁹ Inia amani na takshurna kha niei u joi nawkatu, inniei u rosho. Ajarla taksha mieisha doinek a tu inniei kha thadet. ¹⁰ Khan inniei miring hai dieng mahi chawngpek hi kepek (Kiei na nimak Pumi chawngpek kha inih): inkonu na inkopa le reshen boi rang a inih. ¹¹ Inia reshen joiatu, ama na inniei boi a awm rosho, ninawkle ama inkopa kha le riengiei rosho. Khan inkopa na inkonu kha mele naw rosho. ¹² Inia mienienglim dieng (Pumi na nimak, kiei na kiriei inih): uliennai `khat na takashawn boi inkonu`khat niei a, amanu kha na ama le awm jawt joiatu, ama na mele naw rosho. ¹³ Khan nupang `khat na takashawn boi inkopa `khat niei a, amapa kha na ama le awm jawt joiatu, ama na mele naw rosho. ¹⁴ Ajarla inkopa takashawn boi kha inkonu jar a ieriethieng joi, khan inkonu takashawn boi kha inkopa jar a ieriethieng joi. Khanawkatu naite hai kha rono rangnih, inia tuntu amani kha riethieng chang u joi. ¹⁵ Inia takashawn boi kha tan joiatu, tan rosho, kha`ang chonmun khan uliennai ninawkle uliennainu kha ikhop nimak. Inia Pathien na kieini hi lungdamna rang a inokoi inih. ¹⁶ Ajarla, Aw nupang, nanginkopa kha nangshan rangnih, iti kha itia nangijet maw nih? Ninawkle, Aw apa, nanginkonu kha nangshan rangnih, iti kha itia nangijet maw nih? ¹⁷ Inia Pathien na mi rikip dieng irushem pe le Pumi na mi rikip irukoi kha ang a, khatikhan ring rosho. Khatikhan biekrup kholok ah kirachak inih. ¹⁸ Tukhat kha vunep anuk khan irukoi maw nih? Vunep boi kha changlai naw rosho. Tukhat kha vunep mala khan irukoi maw nih? Vunep kha changlai naw rosho. ¹⁹ Vunep, iti hi iawm nimak, khan vunepboi, iti hi iawm nimak, inia Pathien chawngpek hai arung, iti hi runiei inih. ²⁰ Mi rikip na amama irukoina awmchan khan awm rosho. ²¹ Shok nangchanglai khan a inurukoi maw nih? Makha shaw pui naw roh, inia nang kha nomoshok ngam joiatu, makha rotokna roh. ²² Ajarla shok ruchanglai a Pumi jar a irukoi ama kha Pumi moshok miring kha inih. Kha le ra`ang a, rukoilai a moshok ruchang ama kha Christa shok kha inih. ²³ Nangni hi man pek a inururawchawk u nih joi, miring hai shok kha chang u lai naw roh. ²⁴ Uliennai hai, mi rikip na, irukoilai a awmchantak khan, Pathien le awm rosho. ²⁵ Khan nungak hai chungchanga, kiei na Pumi ah put ah chawngpek kha niei mi`ing. Inia Pumi ama roihoina thoi a takashawn rang a rutuk miring `khat a, kimining hi kipek inih. ²⁶ Tuntun a rangai dungjuia miring `khat na amama awmchan a a`awm kha atha, tia kiei na kimining. ²⁷ Inkonu `khat na inikhit maw nih joi? Nang na ruthutna rang, tawk naw roh. Inkonu `khat ah put ah ruthut maw nangnih joi? Nang na nungak tawk naw roh. ²⁸ Inia innanginiei nitsheawm, munu thaw makchelai. Khan nungak `khat na inniei joiatu, munu thaw maklai. Inia inniei miring hai kha na ringkho shawna niei u rangnih, inia kenerekhemashak jawt uh. ²⁹ Inia uliennai hai, kiei na mahi kieriei, apha hi tawi joi. Inkonu niei hai kha na aniei boi ang a awm u rosho. ³⁰ Khan achap miring hai kha na, achap boi ang a awm u rosho. Khan ningai hai kha na ningai boi ang a awm u rosho. Khan nieinak rawchawh miring hai kha na aniei boi ang a awm u rosho. ³¹ Khan rieliei nieinak rotokna hai kha na irotoknahet boi ang a awm u rosho. Ajarla hi rieliei shung ah awm nieinak hi hawng hek shishit joi. ³² Inia mulungshaw boi a awm rang khan kanadit uh. Inniei boi ama kha na Pumi dieng a awm nieinak hai kha ishaw pui inih. Ama na itia maw Pumi kha ningkiminit pe rang, tia mining. ³³ Inia inniei miring ama kha na manmieshie nieinak kha mulungshaw pui. Itia maw ama inkonu kha ningkiminit pe rang, tia mining. ³⁴ Inniei nupang le nungak kairekhena awm. Inniei boi nupang kha na pum a le ratha dire a riethiengna rang, Pumi nieinak jar a mulungshaw ieniei. Inia inniei nupang kha na, itia maw ama inkopa kha ningkiminit pe rang, tia manmieshie nieinak jar a mulungshaw kha ieniei. ³⁵ Nang maton u kharna rang a nimak, inia mahi nangnemna u rang a kiriei inih. Mahi nangni na perepet boi a Pumi chon kha nangthawna u rang, iriding kha hitihin a kiriei inih. ³⁶ Inia tukhat na ama na ishot nungaknu chung a riding boi awmchan a ka`awm, tia mining a khan nungaknu kha kumletha na ilim rang a nitjoiatu, khan ama na iloingir rang a inih, tia mining joiatu, imining kha thaw rosho. Ama na munu kha thaw mak, amani na inniei u rosho. ³⁷ Khanikengta tukhat na mulung a dingrep a rangai, iti niei boi a, ama mulungminingtak chung khan ranak niei a, nungaknu kha loilai naw ning, tia mulungmiding joiatu, ama na`awm atha kha ithaw inih. ³⁸ Khajarkhan nungaknu aloipa kha na atha ithaw inih, khan aloi boi ama kha na athadet ithaw inih. ³⁹ Inkonu `khat na ama inkopa ringlaishe khan Dan thoi a awm inih, inia ama inkopa kha thi joiatu, imining tukhat dieng in`iloh rang khan rakharna awm pe mak, nitjoiawm Pumi kha takashawn anih rang a inih. ⁴⁰ Inia khatikhan inniei boi a awm joiatu, kimining dungjuia tu, ama kha rahvanthadet kha inih. Pathien Ratha kha kiei na kieniei, tia kimining.

¹ Khan konrilim hai dieng a pek nieinak hai chungchanga: nokholok dieng shingna awm, iti hi nokholok na nijet u inih. Shingna na lienrashatmashak, inia numpok na rawshawnmashak. ² Tukhat na kejet, tia mining a tu, ijet rang a rutuk kha iawm ijet boi inih. ³ Inia tukhat na Pathien kha numpok joiatu, ama kha Pathien na ejet. ⁴ Khajarkhan konrilim hai dieng a pek nieinak hai shakna chungchanga, manmieshie hin konrilim hi iawm nimak, khan Pathien shik awm mak, inia khatte awm, iti hi nijet u inih. ⁵ Ajarla pathien hai le pumi hai tampui a`awm ang hin, ravan ninawkle rieliei chung hin pathien iti u hai kha a`awm nitsheawm, ⁶ kieini rang tu napa u Pathien khatte awm. Ih kholok ama ah put ah jong shok inih. Kieini hi ama rang a ring nanih uh. Pumi Jesu Christa khatte awm. Nieinak kholok ama jar a jong shok inih. Kieini hi ama jar a ring nanih uh. ⁷ Inia mi rikip na makha shingna kha niei mak. Eshen na tu, konrilim hai kha ruriejiei pui jarkhan, tunshe hin konrilim dieng a pek nieinak ang a shak u lai. Khan amani lungthim kha dawk pe u jarkhan, amani lungthim kha pawrimechet pe u inih. ⁸ Inia nekleshak kha na Pathien dieng namathatdet mak, ajarla nashak le nemnadetawm awm mak, khan nashak nawk `le, thangnadetawm awm mak. ⁹ Inia riring u roh. Mahi ningchamna hi adawk hai keruthuina achangthiei inih. ¹⁰ Ajarla shingna aniei nang na konrilimin ah nangishak kha tukhat na navakmuk phakhan, lungthim dawk anieipa kha na konrilim hai dieng a pek nieinak hai kha shakna rang, lungar niei naw nih maw? ¹¹ Khan adawk uliennai, Christa na ama rang a ruthi miring kha nang shingna kha na mathang naw nih maw? ¹² Inia khatikhan uliennai chung a munu nangthaw a, amani lungthim dawkna kha nang mawpawp pe phakhan, Christa chung a munu nangithaw inih. ¹³ Khajarkhan nekleshak kha na ku`uliennai kha keruthuimashak joiatu, uliennai keruthuimashakna boi rang, kiei na me kha shukshah a shalai naw ning.

¹ Kiei hi tirtawn `khat anih boi maw kanih? Kiei hi moshok anih boi maw kanih? Nupumi u Jesu Christa kha kimuk boi maw nih? Pumi riming a nangni hi kochonthaw ara kha nih u makche maw? ² Shik miring hai dieng kiei hi tirtawn kinit joi nawkawm, rakhana niei boi a, kiei hi nangni dieng tu tirtawn `khat kanih. Ajarla Pumi riming a nangni hi kitirtawnchangna jetnam kha nangnih uh. ³ Ennerete hai dieng a korohonna kha tu hi inih: ⁴ Kieini na nekna rang le shakna rang cham kiniei boi maw nih? ⁵ Tirtawn shik hai, Pumi naipang hai le Cephas ang a, takashawn nupang hai kha niei a chon thawna pui rang, cham kiniei boi u maw nih? ⁶ Ninawkle, Barnabas le kadinte na chon thaw boi a ringna rang, cham kiniei boi maw nih? ⁷ Tu na maw ama cholam thaw a ramun ah ashe awm joi? Tu na maw drakha iling a ama ara kha ashah boi awm? Ninawkle, tu na maw kengam ohoi a kengam hai runu aneh boi awm? ⁸ Hihaihi miring `khat chang a kiriei nenek maw nih? Ninawkle, Dan na`awm khatak kha iriei boi maw nih? ⁹ Ajarla Moses Dan khan hitihin ieriei: “Shiecha `khat na shang achieilai khan ener nangikhop pe boi rang a inih.” Pathien na tenireh kha shiecha hai kha maw nih? ¹⁰ Ninawkle, nokholok jar a iriei maw nih? Rakhana boipet a, mahi kieini rangbak a iriei inih. Makhala, loikhoi miring kha na ngakmining a ikhoi inih, khan makha ngakmining a mawnawi miring kha na, ngakmining a ara kha lokna rang a ithaw inih. ¹¹ Rathalam nieinak hai kha nangni rang kawvawr uala, kieini na nang rielieiniei hai kha kirawkhawm u khan rekhe chon maw nih? ¹² Mahi cham hi shik miring hai na nangni ah put ah tum u joiala, kieini na ruphu a kitum u rang a nimak maw? Nitjoiawm kieini na mahi cham hi rotokna u mi`ing, inia Christa athachawng kha kakharna boi u rang, kholok kha kidoi u inih. ¹³ Riethiengmun ah chon thaw hai kha na riethiengmun ah put ah nekleshak hai kha ishak rang a inih. Maicham ah chon thawa hai kha na maicham ah pek nieinak hai kha itum rang a inih, iti kha jet u makche maw? ¹⁴ Kha le ra`ang a athachawng rophong hai kha na athachawng ah put ah ravaina kha imuk rang a inih, tia Pumi na chawng rupek joi. ¹⁵ Inia kiei na hihai cham hi `khatshe rotokna mi`ing. Hihaihi kiei dieng thaw rang a inih, tia kiei na nangni dieng kimiejiek nimak. Ajarla kielienrashatna hi tukhat na nemna boi imachang rangnek a tu, kiei rang tu athi kha athadet inih. ¹⁶ Ajarla kiei na athachawng kha korophong joiawm, makha chung a lienrashatna rang niei mi`ing, ajarla thawngir rang a chon kha kiei dieng nepek joi. Inia kiei na athachawng kha korophong joi nawkatu, kuchung a idawr a shawna a`awm rang a maw nih naw! ¹⁷ Ajarla mahi kupum repeh a kithaw nitjoiatu, kiei na lawh kha kieniei. Inia kimining kha le re`er a nitjoiatu, inchonpona `khat le roiruputna kha kiei dieng inepek nilai. ¹⁸ Khanitala kawlawh kha imaw nih joi? Makha, athachawng kha korophong phakhan, Christa athachawng kha manboi a keshemna rang le athachawng chung a cham korotokna boi rang a inih. ¹⁹ Ajarla mi kholok ah put ah moshok kha kanih joiawm, arawp kamanna rang, mi kholok dieng kinining a shok achang kanih. ²⁰ Jihudi hai kha kamanna rang, Jihudi hai kar a Jihudi `khat ang a ka`awm, khan Dan thoi a awm hai kha kamanna rang, Dan thoi a awm hai kar a Dan thoi a awm `khat ang a ka`awm. ²¹ Danishawnboi hai kha kamanna rang, Danishawnboi hai kar a Danishawnboi `khat ang a ka`awm (Pathien maikung a danishawnboi kha nimi`ing a Christa maikung a dan thoi a awm kanih). ²² Adawk miring hai kha kamanna rang, adawk miring hai kar a adawk miring `khat ang a ka`awm. Mi kholok dieng ih kholok kha kanih. Makha nitthieishe a eshentak a nita`awm kashan ngamna rang a inih. ²³ Khan athachawng rangbak a kithaw hi nangni le atumshom kachangna rang a inih. ²⁴ Tanrieshiet khan mi kholok tan a miring khatte na lawh kha aman, iti kha jet u makche maw? Makha nangmannathiei u rang, tan u roh. ²⁵ Khan rieshietna ajaw mi rikip na irikip a takshurna kha ieniei. Amani na athangthiei renglukhum kha manna rang, ithaw u inih, inia kieini tu athangthiei boi renglukhum kha manna rang a inih. ²⁶ Khajarkhan munmangboi a kiei tan mi`ing, rithi kar a ijem kha ang a, kiei na ra thaw mi`ing. ²⁷ Inia kupum kha kiei na kachep a shok kamachang, khanawkatu, shik miring hai dieng chawng tu kishem, inia kinining a rutuk boi kha kachang rangnih.

¹ Uliennai hai, nangijet boi u rang a kha kiei dit mi`ing, makhala napa u hai kha romiei thoi ah ruawm uh, kholok na tuipui kha rurakan uh. ² Kholok na romiei shung ah le tuipui shung ah Moses dieng baptisma ruloi uh. ³ Khan mi kholok na rathalam nekleshak kha rushak uh. ⁴ Mi kholok na amani rujui rathalam Lungpum ah put ah runek uh. Makha Lungpum kha Christa runih. ⁵ Inia arawplam dieng Pathien na ningnitna runiei mak, khajarkhan amani rok hai kha ramthim khan chaiachai a irutet pe inih. ⁶ Amani na ashie ningiruaw u kha ang a, kieini na`awm ashie kha ningnawawna boi rang, hihaihi kieini dieng endar hai kha ruchang inih. ⁷ Amani eshen kha ang a konrilim chubaibawk hai kha chang u naw roh. Hitihin rumiejiek: “Miring hai kha na nekna rang le shakna rang rushuh uh, khan rishirajam a hoiriethieina rang ruthoi uh.” ⁸ Amani eshen na iruthaw u kha ang a, kieini na taksha rono chon kha thaw u naw rawi. Khan ni `khat shung a bawp shawmdilieithum ruthi uh. ⁹ Amani eshen na iruthaw u kha ang a, kieini na Christa kha lem u naw rawi. Khan amani kha moro hai na rumathang uh. ¹⁰ Amani eshen na irurieishiet u kha ang a, rieishiet u naw roh. Amani kha mimathangpa kha na irumathang inih. ¹¹ Hihai kholok hi endar hai `khat a amani dieng rushok inih. Rong mawtawrna jong tungna kieini dieng rachakna `khat a irumiejiek inih. ¹² Khajarkhan kading, tia imining ama kha na riring rosho, khanawkatu ama kha apurthiei inih. ¹³ Miring dieng a tangjam a awm lemna kha niboia, ih lemna kha na nushur u maklai. Inia Pathien tu takashawn rang a rutuk inih. Nangidoi ngam boi u rang a lemna kha ama na jawt naw nih. Lemna kha nangdoina ngam u rang, ama na rekhena rang, lam mawlawng rangnih. ¹⁴ Khajarkhan, kunumpok uliennai hai, konrilim chubaibawk ah put ah rechen u roh. ¹⁵ Miningthiei miring hai dieng ang a kiriei inih, kiriei hi nang nining ua enrete u roh. ¹⁶ Nimapak u mapakna hai kha Christa thishen rawlawpna kha nithawshom u anih boi maw nih? Nikhoi u tan kha Christa pum rawlawpna kha anih boi maw nih? ¹⁷ Khajarkhan kieini hi tampui nanih joiawm, tan `khat le pum `khat kha nanih uh, ajarla tan khatte kha niloi u inih. ¹⁸ Israel miring hai kha miring shena dungjuia en u roh: rawthawina nieinak ashah hai kha na maicham hai ah put ah rawlawpna kha imuk u nimak maw? ¹⁹ Khanitala kiei na imaw kiriei? Makha konrilim kha ih kha maw nih? Ninawkle konrilim hai dieng a pek hai kha ih kha maw nih? ²⁰ Inia kiei na kieriei, makhala Phungshik hai rawthawi kha Pathien dieng nimak a raikho hai dieng a rawthawi inih. Khan nangni hi raikho hai le nawrawlawpmashak jawt u mi`ing. ²¹ Nangni na Pumi hai le raikho hai hai kha neh ngam u naw tinih. Nangni na Pumi le raikho hai tebol ah nekleshak kha shathiei u naw tinih. ²² Ninawkle, Pumi kha ningnangimaw`aw u maw nih? Kieini hi amanek a aliendet maw nanih uh? ²³ Kiei rang tu nieinak kholok hi thawthieibiek inih, inia nieinak kholok hi nemna nimak. Kiei rang tu nieinak kholok hi thawthieibiek inih, inia nieinak kholok na rawshawnmashak mak. ²⁴ Tute na ama idit ranga kha tawk naw rosho, inia shik miring hoina rangawm tawk rosho. ²⁵ Nang lungthim ah put ah rawdawnna niei boi a, me rievieithawna mun a ijor hai kha shah u roh. ²⁶ Ajarla, “rieliei hi PUMI tah inih, khan makhan a awm kholokawm ama tah inih.” ²⁷ Takashawn boi hai kar a akhat na nang kha nitakbu nek rang nokoi a nangshe jawt joiatu, nang lungthim rangbak khan rawdawn boi a, ih kha nita`awm nang maton ah itet hai kha shah roh. ²⁸ Inia “Mahi konrilim dieng a ipek kha keng,” tia tukhat na nang dieng nieriei joiatu, anarieipa le nang lungthim rangbak khan makha shah naw roh. Ajarla, “rieliei hi PUMI tah inih, khan makhan a awm kholokawm ama tah inih.” ²⁹ Kiei na kiti tu, miringpa lungthim rangbak a inih, nang lungthim rang a kiti nimak. Ajarla kiningchamna kha miring shik `khat lungthim na ijar a maw chawngshat nih? ³⁰ Inia kiei na mapak le roroia kashak joiatu, kimapaksha nekleshak jarkhan, ijar a kiei hi ashie a inierieina rang a maw nih? ³¹ Khajarkhan nangishak nanginek u, ninawkle ih kha nita`awm, nangithaw u kholok kha Pathien lurna rang thaw u roh. ³² Jihudi hai diengawm, ninawkle Greek hai diengawm, ninawkle Pathien biekrup hai diengawm, tute kha`awm keruthuimashak naw roh. ³³ Mahi amani kha shanna mukna rang, kenemna kha tawk boi a, vanoi nemna kha tawk a, ih kholok a, mi kholok ningkiminit pe hi ang a, thaw u roh.

¹ Christa awmchan kiruchuk hi ang a, nangniawm kaw`awmchan hi ruchuh u roh. ² Uliennai hai, irikip a kiei hi nangnimininghep ua, nangni dieng a kinuruchuk u kha nangrung u jarkhan, kanamapak uh. ³ Inia apa rikip lu kha Christa inih, nupang lu kha apa inih, khan Christa lu kha Pathien inih, iti hi nangni dieng kenemejet jawt uh. ⁴ Apa rikip na nik pha ninawkle chawng rophong phakhan, ulu kha mukhu joiatu, ama lu kha richit ipek boi inih. ⁵ Inia nupang rikip na nik phakhan, ninawkle chawng rophong phakhan, ulu kha mukhu nawkatu, ulu kha richit ipek boi inih, ajarla makha ama na lu iboi kha le ra`angre inih. ⁶ Ajarla nupang `khat na mukhu nawkatu, asham kha ep rosho. Inia nupang `khat na sham i`ep ninawkle lu iboi kha jaknaroi chon nitjoiatu, ulu kha mukhu rosho. ⁷ Ajarla apa na ulu kha imukhu boi rang a shok, ajarla ama kha Pathien meloi le lurna kha inih, inia nupang hi apa lurna kha inih. ⁸ Ajarla apa hi nupang ah put ah nimak, inia nupang hi apa ah put ah inih. ⁹ Khan apa hi nupang rang a ikon nimak, inia nupang hi apa rang a ikon inih. ¹⁰ Hijarhin, ravantir hai jar a, nupang na ama chung a chamniei akhat awm iti jetna ulu ah itet rang a inih. ¹¹ Nitjoiawm, Pumi riming a apa hi nupang ah put ah, khan nupang hi apa ah put ah rechenving tu nimak. ¹² Ajarla nupang hi apa ah put ah anih kha ang a, apa`awm nupang jar a inih. Inia nieinak kholok Pathien ah put ah inih. ¹³ Nang nining a chawngshat u roh. Nupang `khat na lu mukhu boi a Pathien dieng inik hi iriding maw nih? ¹⁴ Balamshe na`awm nangni kha inuruchuk boi u maw nih? Apa `khat na asham kha mieshiei a tu, ama dieng richitna boi a`awm inih. ¹⁵ Inia nupang `khat na sham mieshiei joiatu, makha ama lurna inih. Ajarla sham kha ama mukhu rang a ipek inih. ¹⁶ Inia tukhat na makha chungchang khan roshorakhana rang mining a tu, kha ang shena kha niei u makme, Pathien biekrup hai diengawm niei u mak. ¹⁷ Hihai chawngrachakna hi kinepek u le roroia, nangni kha namapak u mi`ing, ajarla nangni na lawp `khat a nangva u hi thatnadet rang a nimak a shienadet rang a inih. ¹⁸ Ajarla, rapapek a, nangni na biekrup `khat a lawp a nangva u phakhan, nang kar ua reshenna awm, iti hi kejet: makha ichanshe tu takakawshawn. ¹⁹ Ajarla nang kar ua lawpreshen awmngir rangnih. Makha Pathien na ijawt amani kha meh nangjetna u rang a inih. ²⁰ Khajarkhan nangni na mun `khat a lawp a nangvakruchun u phakhan, nangishak u kha Pumi shakriethieng kha nilai mak. ²¹ Ajarla mi rikip na ama nitakbu kha shik hai mala a shak uh, khan akhat na vawncham phakhan, shik `khat tu jukhawp joi. ²² Nangnekna u rang le nangshakna u rang, in niei u makche maw? Ninawkle, Pathien biekrup kha maimawk nangipek u maw nih, khan iawm aniei boi miring hai kha jak nangipek u maw nih? Nangni dieng imaw riei ning? Mahin nangni kha namapak u ning maw? Namapak u mi`ing. ²³ Ajarla nangni dieng a kinurupek u kha Pumi ah put ah kirumuk kha inih: Pumi Jesu kha ijorna jantak khan ama na tan kha ruloi. ²⁴ Khan ama na mapakna runiei phakhan, ama na tan kha rukhoi a ruti, “Loi u roh, shah u roh. Mahi nangni rang a akoisha kupum kha inih. Nangnimininghepna u rang, mahi thaw u roh.” ²⁵ Khatak kha ang a, nitakbu shole, hai kha ruloi a ruti, “Mahi hai hi kithishen jar a rawjawtna `thar kha inih. Mahi nangnek u laisheng, nangnimininghepna u rang thaw u roh.” ²⁶ Ajarla mahi tan hi nangshak ua mahi hai hi nangnek u laisheng, Pumi jong masheng, ama thitna kha nangirophong u inih. ²⁷ Khajarkhan tukhat na mahi tan le mahi hai hi rutuk boi awmchan a enek-ashak a tu, Pumi pum le thishen chung a shietna kha thaw rangnih. ²⁸ Inia miring `khat na nining a enrete rieshie, makha tan kha shah rosho, khan hai kha loi rosho. ²⁹ Urutuk boi awmchan a aneh-ashah ama kha na amatak chung a chawngshatna pe rang a inek-ishak inih. Ajarla Pumi pum chung khan mulungmining thaning a peh mak. ³⁰ Mahi jar hin nang kar ua mi tampui na takshon, ana, khan athi inih. ³¹ Ajarla ninining ua ennerete nana uatu, nuchung ua chawngshat naw nih. ³² Inia nuchung ua chawngshat phakhan, kieini hi Pumi na inimidik inih. Makha kieini hi manmieshie le nahengchenna boi rang a inih. ³³ Khajarkhan uliennai hai, aneh rang lawpkhat a nang vak ruchun u phakhan, khatlekhat rangak nana u roh. ³⁴ Inia tukhat kha vawncham pe joiatu, i`in ah vak neh rosho. Khanawkatu chawngshatna rang a nang vak ruchun u inih. Inia shik chonmun hai rang tu, kavat phakhan, midik rang kanih.

¹ Khan uliennai hai, rathalam khutchawi hai chungchanga nangijet boi u rang a kha kiei dit mi`ing. ² Nangni hi Phungshik nangruchang u lai khan, laminurukai pe u kha ang a, chawngthieiboi konrilim tieng khan shehawng a nuruchawi u, iti kha nangjet uh. ³ Khajarkhan nangni dieng kinemejet u hi inih, makhala Pathien Ratha jar a achawng tute na “Jesu kha pumbot chang rosho,” ti mak, khan Ratha Riethieng jar a niboia, tute na “Jesu hi Pumi inih,” ti ngam mak. ⁴ Khutchawi hai hi shikshik awm, inia Ratha khatte inih. ⁵ Pathien chon hai kha shikshik awm, inia Pumi khatte inih. ⁶ Chonmun hai kha shikshik awm, inia Pathien khatte na mi kholok dieng chon ithaw inih. ⁷ Inia kholok nemna rang mi rikip dieng Ratha ralarna kha ipek inih. ⁸ Ajarla Ratha jar a tukhat dieng lungvar chawng kha ipek inih, shik `khat dieng makha Ratharilik jar a, shingna chawng kha ipek inih. ⁹ Shik `khat dieng makha Ratha kha na takashawn kha ipek inih, khan shik `khat dieng makha Ratha kha na madamna khutchawi kha ipek inih. ¹⁰ Shik `khat dieng chonrekhek thawna, shik `khat dieng chawngrophongna, shik `khat dieng ratha hai kha kairekhemashakna, shik `khat dieng chawng shikshik, shik `khat dieng chawngshik hai kha melerna khutchawi hai kha ipek inih. ¹¹ Inia Ratha khatte na hihai kholok hi ithaw inih, ama idit dungjuia a mi rikip dieng ipekrim inih. ¹² Ajarla pum hi `khat nita`awm, pasha tampui ieniei. Makha pum `khat khan pasha tampui awm joiawm, amani kha pum `khat anih kha ang a, Christa kha`awm kha inih. ¹³ Ajarla pum `khat khan Jihudi nit a, Greek nit a, shok nit a, moshok nita`awm, Ratha `khat jar a nawlawpsheng u na baptisma kha niloi u inih. Khan Ratha khatte kha inemenek u inih. ¹⁴ Ajarla pum kha pasha khatte nimak a tampui inih. ¹⁵ “Kiei hi khut kha kinit boi jarkhan, kiei hi pum khan jaw mi`ing,” tia ke kha na ti jarkhan, pum khan ajaw boi maw nih? ¹⁶ “Kiei hi mik kha kinit boi jarkhan, pum khan kiei jaw mi`ing,” tia nokor kha na ti jarkhan, pum khan a ajaw boi maw nih? ¹⁷ Pumplang kha na mik kha nit joiala, ih na maw rangai nih? Pumplang kha na rangai a la, ih na maw manam nih? ¹⁸ Inia tun Pathien na pasha rikip kha pum khan ama imining dungjuia itetrim inih. ¹⁹ Khan amani kha pasha khatte nitjoiala, pum kha ih ah maw awm nih? ²⁰ Khania pasha tampui awm, inia pum kha khatte inih. ²¹ Mik kha na khut dieng “Kiei na nang kha narangai mi`ing,” khan lu kha na ke dieng “Kiei na nang kha narangai mi`ing,” tithiei naw nih. ²² Makha le kairekhe a, pum shung ah adawkdet a malang pasha kha runieitak `khat inih. ²³ Khan pum shung ah runiei nimak, tia nimining pasha kha runieidet inih. Khan inishawn boi pasha kha teniredet inih. ²⁴ Inia nimoroidet pasha kha tenredet rang, rangai mak. Inia Pathien na adawkdet pasha kha mieliendet a, pum kha ikon inih. ²⁵ Makha pum shung ah reshenna awmna boi rang le pasha hai kha na ra`angre a khatlekhat dieng tenreh nana rang a inih. ²⁶ Khan pasha `khat kha nat joiatu, pasha kholok kha ama le anashom inih. Ninawkle pasha `khat kha na lurna muk joiatu, pasha kholok na ama le ningaishom inih. ²⁷ Nangni Christa pum kha nangnih u joi, khan khatkhat a makha pum pasha kha nangnih u joi. ²⁸ Khan hihaihi Pathien na biekrup shung a imadan inih: akhat changna a tirtawn hai, adi changna a thiempulien hai, athum changna a oja hai, khashole chonrekhek thaw hai, khashole madamna khutchawi amuh hai, mishan miring hai, inlevaipona, chawng shikshik a chawng miring hai kha inih. ²⁹ Mi rikip kha tirtawn maw nih? Mi rikip kha thiempulien hai kha maw nih? Mi kholok kha oja hai kha maw nih? Mi rikip kha chonrekhek thaw hai kha maw nih? ³⁰ Mi rikip na madamna khutchawi maw niei? Mi rikip na chawngshik a maw chawng? Mi rikip na meler maw? ³¹ Khania athadet khutchawi hai kha mulungluttak a dit u roh. Khan kiei na athadet lam kha numumuk u rang kanih.

¹ Kiei na miring hai le ravantir hai chawng a kachawng joiawm, numpok kha kieniei joi nawkatu, imiri khong ninawkle thirkhong kha le ra`ang kanih. ² Khan chawng rophongna khutchawi kha kieniei joiawm, murukchawng kholok le shingna kholok kha kejet joiawm, khan mo hai kha thawtna rang, takashawn kholok kha kieniei joiawm, numpok kha kieniei joi nawkatu, kiei iawm nimi`ing. ³ Khan shara hai vaina rang, kienieinak kholok kha kepek joiawm, khan kupum kha ha rang kepek joiawm, numpok kha kieniei joi nawkatu, kiei dieng nemna iawm nepeh mak. ⁴ Numpok tu ashawt a odoi, khan roihoi inih, numpok na manarshie thaw mak, numpok na nining a mapak mak, khan lienrasha mak. ⁵ Numpok na rum mak, ama rangbak khan tawk mak, baitek a shang mak, ashie kha mining mak. ⁶ Dikna boi khan ningai mak, inia adik khan ningai. ⁷ Nieinak kholok kha odoi, nieinak kholok kha takashawn, nieinak kholok kha ngakmining, nieinak kholok kha ruput. ⁸ Numpok tu shukcho a cho mak. Inia chawngrophong hai kha mawngawh rangnih, chawngshik hai kha rangatna awm rangnih, khan shingna kha mathang rangnih. ⁹ Ajarla khoite kha nijet u inih, khan khoite a nirophong u inih. ¹⁰ Inia rupumping kha jong phakhan, rupumpingna kha mathang rangnih. ¹¹ Kiei na naite kuruchanglai, naite ang a kuruchawng, naite ang a kurujet, naite ang a kurumining. Inia kawhawngchang phakhan, naite awmchan hai kha kapai joi. ¹² Ajarla tun mengsheng a varjinglam a nimuk u inih, inia makha nimiktak na riethienghiei a numuk u rangnih, tun khoite kha kijet inih, inia nuk a Pathien na inejet hi ang a, urupum a kejet rangnih. ¹³ Khan takashawn, ngakmining, numpok, hihai `thum hi, awm. Khania hihai kar a alienving tu numpok hi inih.

¹ Numpok kha rojo u roh, rathalam khutchawi hai kha ningaw u roh. Aliendet a rophongna rang ratha khutchawi kha ningaw u roh. ² Ajarla chawngshik a chawng miring kha na miring hai dieng a chawngiriei nimak a, Pathien dieng a chawngiriei inih, ajarla tute na ama chawngriei kha jet pe mak. Nitjoiawm ratha jar a murukchawng kha iriei inih. ³ Inia chawngirophong ama kha na rawshawnna le mawshawkna chawng, khan mulung renemna chawng kha iriei inih. ⁴ Chawngshik a achawng ama kha nining a rawshawn inih, inia chawngirophong ama kha na biekrup kha irawshawnmashak inih. ⁵ Nang kholok na chawngshik a achawng rang kadit, inia chawngnangirophong u rang kha kaditdet. Ajarla biekrup rawshawnna rang, ama na meler joi nawkatu, chawngirophong ama kha chawngshik a achawng amanek khan liendet. ⁶ Inia tun, uliennai hai, chawngshik a chawnglam a nangni dieng kava a, chawngrophong ninawkle varna ninawkle rophongchawng ninawkle miruchukna a kieriei nawkala, imaw nenemna u rawng? ⁷ Phukniei boi thieikhang ninawkle shalangdar kha na he moshok. Hesho hai khan kairekhena awm joi nawkatu, idai kha thieikhang maw nih, ninawkle shalangdar maw nih, iti kha itia maw jet nih? ⁸ Ajarla tekawlawi kha na munmangboi hesho kha moshok joiala, tu na maw rathaw rang rasham nih? ⁹ Nangniawm kha inih, mieliei kha le baitek a jetna rang chawngnangriei u nawkatu, nangiriei u kha itia maw jet nih? Rithi kar a chawngniriei u kha chang rangnih. ¹⁰ Manmieshie shung hin chawng tampui a`awm inih. Amani kha tina niei boi `khatshe awm mak. ¹¹ Khajarkhan kiei na chawng kha tina kejet nawkala, chawngrieipa dieng kiei hi mejet boi kachang rangnih, khan chawng arieipa kha kiei dieng mejet boi chang rangnih. ¹² Nangni diengawm khatak kha inih, nangni na ratha khutchawi kha ningnangaw u jarkhan, makha biekrup rawshawnna rang a athadet kha tawk u roh. ¹³ Khajarkhan chawngshik a achawng ama kha na melerna rang, Pathien dieng nikna niei rosho. ¹⁴ Ajarla kiei na chawngshik a nikna kieniei a tu, karatha na inik inih, inia kijetna kha ara boi inih. ¹⁵ Khanitala imaw nih? Kiei na ratha le nikna niei rang kanih, khan kiei na kijet chawng a`awm nikna niei rang kanih. Kiei na ratha le lah thaw rang kanih, khan kijet chawng a`awm kiei na lah thaw rang kanih. ¹⁶ Khanawkatu, ratha le mapakna nangniei phakhan, itia maw arangaithiei boi miring kha na nangiriei kha jet boi jarkhan nimapak na chawng khan “Amen,” tinih? ¹⁷ Ajarla nang na mapakna chawng kha thaning a nangriei, inia shik miring kha na rawshawnna niei mak. ¹⁸ Nang kholok nek a chawngshik a kachawng jarkhan, kapathien kha kamapak. ¹⁹ Jetthiei boi chawngrama bawp shawm kirieinek khan, biekrup shung a mi kuruchukna rang, kiei na jetthiei chawngrama rahngabak kha riei rawng. ²⁰ Uliennai hai, jetnathiei khan naite hai chang u naw roh, inia ashie chon khan naishen hai kha chang u roh. Inia jetnathiei khan puichang kha nih u roh. ²¹ Dan ah hitihin miejiek: “Miring chawngshik le milak hai ner a, hi miring dieng hin chawngriei rang kanih. Khashe khan amani na kawchawng kha rangai u naw nih,” tia Pumi na ieriei. ²² Khajarkhan chawngshik hai hi jetna `khat inih, takashawn hai dieng a nimak a takashawn boi hai dieng a inih. Inia rophongchawng hi takashawn boi hai rang a nimak a takashawn miring hai rang a inih. ²³ Khajarkhan biekrup miring kholok na mun `khat ah vak ruchun a mi rikip na chawngshik a chawng u joiala, makha mun ah ajet boi ninawkle takashawn boi miring vak lut hai kha na nangvet u joi, niti u naw nih maw? ²⁴ Inia mi rikip na chawngrophong a, takashawn boi `khat ninawkle ajet boi miring `khat va joiatu, kholok na ama kha mawjawthet, khan kholok na ama chung a enretena kha ieniei. ²⁵ Khatikhan umulung irawt kha mawlawng pe a ama na bawklap a Pathien kha chubai abawk rangnih, khan Pathien hi nangni kar a awmhet, tia rophong rangnih. ²⁶ Khanitala mahi imaw nih, uliennai hai? Nangni na nang vak ruchun u phakhan, lah kha nangnieirim uh, ruchukna kha nangniei uh, chawngshik kha nangniei uh, chawngrophong kha nangniei uh, melerna kha nangniei uh. Hihai kholok hi rawshawnna rang a thaw chang rosho. ²⁷ Tukhat na chawngshik a chawng a tu, idi ninawkle rawptak a uthum, dawna chawng riei rosho, khan akhat na meler rosho. ²⁸ Inia meler miring awm nawkatu, biekin khan awmchien rieshie ibing dieng le Pathien dieng khan chawng riei rosho. ²⁹ Thiempulien idi ninawkle uthum na chawng riei rosho, khan shik miring hai kha na mushung rosho. ³⁰ Inia rophongchawng kha iedieng ah ashuh ama dieng khan jong joiatu, akhat changna miring kha na awmchien rosho. ³¹ Mi kholok na jetna rang le lungar pekna rang, nang kholok na dawna chawng nangrophongthiei uh. ³² Khan thiempulien hai ratha kha thiempulien hai awnoi a awm inih. ³³ Ajarla Pathien hi reheshuna Pathien kha nimak a, miriethieng hai biekrup kholok shung a kha ang a, ama hi lungdamna apeh Pathien kha inih. ³⁴ Nang nupang hai kha na biekrup khan awmchien u rosho, ajarla amani dieng chawngrieina rang jawt pe mak. Inia Dan na iriei dungjuia amani na luraw thaw a a`awm u rang a inih. ³⁵ Khan amani na ih `khat kha ruchuk jawt u joiatu, i`inkopa hai dieng in ah rawdawn u rosho. Ajarla nupang `khat na biekin ah chawngiriei rang kha jaknaroi `khat inih. ³⁶ Ninawkle, Pathien chawng kha nangni ah put ah hawng put maw nih? Ninawkle nangni dieng ranga vak tung maw nih? ³⁷ Tukhat na nining a thiempulien ninawkle rathalam miring kha kanih ti joiatu, kiei na kimiejiek chawng hai hi Pumi chawngpek hai kha inih, tia loi rosho. ³⁸ Inia tukhat na jet nawkatu, ajet boi kha chang rosho. ³⁹ Khajarkhan uliennai hai, chawngrophong rang a kha ditmer u roh, khan chawngshik a chawngriei kha makha u naw roh. ⁴⁰ Ih kholok kha imirit niei a le rieshieihiem a thaw chang rosho.

¹ Uliennai hai, nangni dieng a kirophong athachawng kha tun nangni dieng kenemejet jawt uh. Makha nangni na niruloi ua, nirudingna u kha inih. ² Kiei na nangni dieng kirurophong chawng kha nangrurakrep u joiatu, makha jar a shanna kha nangimuk u inih. Khanawkatu nemna boi a takanangrushawn u joi. ³ Ajarla kiei na`awm kirumuk kha rapapek a nangni dieng kinurupek u inih. Makhala, miejiek dungjuia Christa na numunu u jar a ruthi inih. ⁴ Khan miejiek dungjuia, ama kha rukhum ua, ni `thum changna khan hawng thoiret inih. ⁵ Khan ama kha Cephas na rumuk, khashole khaichawi shawmlieidi na rumuk uh. ⁶ Makha shole ama kha uliennai rajarahnga chung a na pha khatte a rumuk uh. Amani kar khan eshen ruthi u joiawm, arawpdet ring a awm u lai. ⁷ Makha shole ama kha James na rumuk, khashole tirtawn kholok na rumuk uh. ⁸ Khan dawngkhit a, pha niboia shok, kiei diengawm rular. ⁹ Ajarla kiei hi tirtawn tia koi rang a rutuk boi, tirtawn hai kar a ashinving kha kanih, ajarla Pathien biekrup kha kiei na shawna kirupek inih. ¹⁰ Inia Pathien numpokmirit jar a kiei hi hi kanih joi, kiei dieng a ama numpokmirit kha nemna boi ruchang mak. Ajarla kiei na amani kholoknek a chon kuruthawdet, nitjoiawm makha kiei na kiruthaw nimak a, Pathien numpokmirit kha na kiei dieng a iruthawna inih. ¹¹ Khajarkhan kiei na ninawkle amani na nita`awm, hitihin a kirurophong ua khatikhan a takanangirushawn u inih. ¹² Khan ama kha athi ah put ah hawng thoi joi, tia Christa kha rophong u joiala, itia nang kar ua eshen na athi ah put ah thoiretna awm mak, iti u maw nih? ¹³ Inia athi ah put ah thoiretna kha awm nawkatu, Christa kha rumothoi mak. ¹⁴ Khan Christa kha ruthoi joi nawkatu, kawchawngrophong u kha nemna boi inih, khan nang takashawn u kha`awm nemna boi inih. ¹⁵ Khan athi hai kha hawng thoihet boi nitjoiatu, kieini hi Pathien kungchang jok hai `khat a numuk u joi, ajarla kieini na ama na irumothoi boi Christa kha ama na rumothoi, tia Pathien kungchang kha kanih u joi. ¹⁶ Ajarla athi hai kha thoi joi nawkatu, Christa kha thoi mak. ¹⁷ Christa kha thoi joi nawkatu, nang takashawn u kha nemna boi inih, nang munu u hai khan nangawm u lai! ¹⁸ Khajarkhan Christa riming a ruthi miring hai kha thang u joi. ¹⁹ Mahi ringkho shung ranga hin Christa dieng ngakmining aniei kha nanih u joiatu, mi kholok hai kar a minek a numpokroi kha nanih u joi. ²⁰ Inia Christa kha athi ah put ah thoi joi, khan athi miring hai akhat changna ara kha chang joi. ²¹ Miring `khat jar a thitna kha jong jarkhan, miring `khat jar a thitna ah put ah thoiretna kha`awm ajong inih. ²² Ajarla Adam jar a mi kholok ruthi kha ang a, Christa jar a mi kholokawm khatikhan miring rangnih. ²³ Inia mi rikip na amama pha khan nih rangnih: Christa kha akhat changna ara kha inih, khashole ama jong phakhan, Christa tah achang miring hai kha thoi rangnih. ²⁴ Rampona kholok, cham kholok khan ranak kholok kha dawng minit a, rengchangna kha Apa Pathien dieng pek phakhan, dawng kha jong rangnih joi. ²⁵ Ajarla irahapui kholok kha eke thoi ah atet masheng, ama na rengchangngir rang a inih. ²⁶ Imathang rang a irahapui dawngkhit kha tu thitna kha inih. ²⁷ Ajarla “Ama na ih kholok kha eke thoi ah atet joi.” Inia “ih kholok kha eke thoi ah atet joi,” tia ama na ti phakhan, ih kholok ama thoi ah atet Pathien kha ajaw boi inih. ²⁸ Khan nieinak kholok Christa thoi ah atet phakhan,shapa kha`awm, nieinak kholok ama thoi ah atet Pathien thoi ah awm rangnih. Makha Pathien kha kholok chung a Pumi changna rang a inih. ²⁹ Athi hai ruhut a baptisma aloi hai kha na imaw thaw u nih? Athi hai kha na hawng thoihet nawkatu, ijar a amani rang a baptisma iloi u maw nih? ³⁰ Ijar a nidan rikip a chitroina dingmun a awm maw nanih uh? ³¹ Nang jar ua nupumi u Christa Jesu dieng a kiniei lienrashatna kha jar a, ningthingkip kathi, tia kiriei inih. ³² Kiei na miring awmchan a, Ephesus ah ramsha hai kha le rakawthaw joiatu, kiei rang a nemna kha imaw nih? Athi hai kha na hawng thoi joi nawkatu, “Neh u rawi, khan shah u rawi, ajarla kieini jing a athi rang a nanih uh!” ³³ Mi na inomohon u kha chang u naw roh. “Lawm tha boi kha na awmchan atha kha me`imieshiet inih.” ³⁴ Mining ridiktak khan hawng kir u tana, munu thaw u naw roh, ajarla eshen na Pathien jetna lungvarshe kha niei mak. Mahi nang jakna u rang a kiriei inih. ³⁵ Inia tukhat na ti rangnih, “Itia maw athi hai kha na hawng thoi nih? Khan ih pum kha le maw amani na hawng lar nih? ³⁶ Aw amawng miring, nangivawr kha thi joi nawkatu miring naw nih. ³⁷ Khan nangvawr phakhan, hawng mawng rang a kung kha vawr makche, inia rumomoi, gehu ninawkle tieitang ru kha nangivawr inih. ³⁸ Inia Pathien na idit le roroia, muchi khan kung ipek inih; khan muchi rikip dieng ama na kung kha ipek inih. ³⁹ Taksha kholok kha ra`angre nimak, inia miring hai taksha `khat, sha hai taksha `khat, nga hai taksha `khat, khan va hai taksha `khat a`awm inih. ⁴⁰ Ravan pum hai le rieliei pum hai kha`awm awm, inia ravan lurna kha akhat inih, khan rieliei lurna kha shik inih. ⁴¹ Ni na lurna `khat ieniei, tha na lurna shik ieniei, khan arshi hai na lurna shik ieniei, ajarla arshi `khat lurna hi arshi `khat le kairekhe inih. ⁴² Athi ah put ah thoiretna kha`awm kha le ra`ang inih. Athangthiei a ivawr kha athangthiei boi a imothoi inih. ⁴³ Richit boi a ivawr kha lurna khan imothoi inih. Dawkshamna a ivawr kha ranak khan imothoi inih. ⁴⁴ Balam pum ivawr kha, rathalam pum khan imothoi inih. Balam pum kha a`awm inih, khan rathalam pum kha`awm a`awm inih. ⁴⁵ Ajarla hitihin miejiek, “Akhat changna miring Adam kha aring miring hawng chang inih.” Dawngkhit Adam kha ringkho apeh ratha kha hawng chang. ⁴⁶ Nitjoiawm rathalam kha masha nimak a balam kha masha inih, khashole rathalam kha inih. ⁴⁷ Akhat changna miring kha rieliei tah inih, pieipak ah put ah ikon inih. Adi changna miring kha ravan ah put ah Pumi kha inih. ⁴⁸ Pieipak ah put ah ikon miring kha, pieipak ah put ah ikon amani le ra`ang inih. Ravan ah put ah anih miring kha, ravan ah put ah anih amani kha le ra`ang inih. ⁴⁹ Khan pieipak miring rilim kha kieini na niloi u hi le ra`ang a, kieini na ravan miring rilim kha`awm noloi u rangnih. ⁵⁰ Uliennai hai, taksha le thishen kha na Pathien Rengchangna kha tum ngam naw nih, khan athangthiei nieinak kha na athangthiei boi nieinak kha tum ngam naw nih, tia kiriei inih. ⁵¹ En u roh, kiei na nangni dieng murukchawng kha kiriei inih: nokholok na miei naw minih, inia kieini hi menotho pe rangnih. ⁵² Makha pha bawngte shung a, mikmichim `khat shung a, dawngkhit tekawlawi kha miri phakhan, nih rangnih. Ajarla tekawlawi miri phakhan, athi hai kha athangthiei boi rang khan thoi rangnih, khan kieini hi menotho pe rangnih. ⁵³ Ajarla mahi athangthiei hi na athangthiei boi kha irieshieingir rang a inih, khan mahi athithiei hi na athithiei boi kha irieshieingir rang a inih. ⁵⁴ Khajarkhan mahi athangthiei hi na athangthiei boi kha irieshiei, khan mahi athithiei hi na athithiei boi hi rieshiei phakhan, mahi chawngriei hi hawng shok rangnih. Hitihin rumiejiek, “Ramawtawr kha na athi kha ava joi.” ⁵⁵ “Aw thitna, nang tur kha khoshekawt ah maw awm joi? Aw Thikho, nang ramawtawr kha khoshekawt ah maw awm joi?” ⁵⁶ Thitna tur kha tu munu kha inih, khan munu ranak kha tu dan kha inih. ⁵⁷ Inia nupumi u Jesu Christa jar a ramawtawr napeh Pathien dieng mapak chang rosho. ⁵⁸ Khajarkhan kunumpok uliennai hai, dingrep u roh, meperthiei boi kha chang u roh. Pumi rang khan nang chonthaw u kha nemna boi chang mak, iti kha jet u tana Pumi chon kha mulungluttak a thaw jawnjai u roh.

¹ Khan miriethieng hai rang a thawlawm chungchanga, Galatia biekrup hai dieng a chawngkirupek kha ang a, nangniawm khatikhan thaw u roh: ² Hapta a akhat changna nikho khan nangni khatkhat na ih kha nita`awm nangimadan u rang a shok. Nanginieidan u dungjuia makha thaw u roh. Makha kiei na nangni dieng kavat phakhan, thawlawm thawna rangaina boi rang a inih. ³ Kiei na kavat phakhan, nangmulung ua achu miring hai kha chawngmawchawi le khutchawi hai kha achawi rang, Jerusalem ah tir rang kanih. ⁴ Kieiawm kashe rang a kha iriding nitjoiatu, kiei le she u rangnih. ⁵ Khan Macedonia kha kavaklut shole, nangni dieng va rang kanih, ajarla Macedonia khan she rang kanih. ⁶ Nangni le ka`awmbawt jawt, ninawkle phabishawt khan nangni le ka`awmawm jawt. Makha kokhomijin shena ih mun khan nita`awm nangnashanna u rang a inih. ⁷ Ajarla lampapawt nawthaw jawt u mi`ing, inia Pumi na jawt joiatu, nangni le phabawng `khat awmna rang kimining. ⁸ Inia Ephesus khan Pentecostshe awm rang kanih. ⁹ Ajarla kiei rang hin ranak moshok a chon thawna rang, mawkawt `khat hi rajaitak a mawlawng joi, inia nere`erpui tampui awm. ¹⁰ Timothy kha nangni dieng va joiatu, chih boi a awmna rang, tinta u roh. Ajarla ama na`awm kithaw hi ang a, Pumi chon kha ithaw inih. ¹¹ Khajarkhan tute na ama kha maimawk peh naw rosho. Inia kiei dieng vatna rang, lungdamtak a vak tir u roh, ajarla ama kha uliennai hai le ngak a ka`awm inih. ¹² Khan nu`uliennai u Apollos chungchanga tu, uliennai hai kha le nangni dieng vatna rang hin enchak a kimawshawk inih, inia vatna rang hin tun hin mulungmining niei mak, inia chanthatna muk phakhan, va rangnih. ¹³ Riring u roh, takashawn khan dingrep u roh, rang u roh, khan ranak niei u roh. ¹⁴ Nangithaw u kholok kha numpok le roroi rosho. ¹⁵ Uliennai hai, kinawmawshawk u inih. Stephanas inshungkhur kha nangjet uh. Makha Achaia ah akhat changna ara kha inih. Amani kha miriethieng hai chon thawna khan mulunglut `khat nih uh. ¹⁶ Makha nangni na kha`ang miring, kieini le chon thaw kholok dieng, nangbutna u rang a inih. ¹⁷ Stephanas, Fortunatus le Achaicus na nangni dieng va jarkhan, kiningai, ajarla nang ravatna u khan amani na imiship inih. ¹⁸ Ajarla karatha le nang ratha u kha inamathar pe u inih. Khajarkhan kha ang miring hai runiei changna kha jet pe u roh. ¹⁹ Asia biekrup hai na chubai nepek uh. Pumi riming a Aquila le Priscilla, khan amani in ah awm biekrup kholok na chubai rothom nepek uh. ²⁰ Uliennai kholok na chubai nepek uh. Biengrutum riethieng kha le khatlekhat chubai repeh u roh. ²¹ Chubai pekna hi Paul, kiei na kukhuttak le kimiejiek inih. ²² Tukhat na Pumi Jesu Christa kha numpok joi nawkatu, ama dieng pumbotna kha chang rosho. Maranatha! ²³ Nupumi u Jesu Christa numpokmirit kha nangni le awm rosho. ²⁴ Christa Jesu riming a nang kholok chung a kunumpok hi a`awm nih rosho. Amen.