Israelchich Apanlleem yaseerangana anu
Yuwaa Israelchich tputs Apanlleem yaseerangana anoo pakich kamanchintspa
¿Chakaja anoo yandarang?
Israelchich tputs zapan yanda yanda ashiranganaya. Ichtaru Móysisarini yaseesshee númeru 90 yandarangiya. Anumunsha kurak Dapiyarini zapan yandarangitamta. Leviychich tputs, Asafa, misha Koré, misha Korérinchich nlluranur zapantam yandaranganaya. Nee ichingaru Apanlleem shaniyamaam yandaranganaya. Zapishsha tputs Babiloniyash tsap taarangsin, Salmoo 89, misha 137 yandarangiya. Anumunsha nllitarit tputs yusur Irusarinash kuseersin, Salmoo 118, misha 126 yandarangitamta.
¿Chakaama yandarang?
Israelchich tputs Apanlleem shaniyeersin, kis yaseerangusin, Apanllee kuk mazinanatarach ashiranganaya. Nee kiraka kis payuranganaya Apanlleem shaniyamaama.
¿Mayaamaja yandarang?
Israelchich tputs ashpatam Apanllee chinarangusin, yuwaa mangush chinarangana anoo Apanllee kamaniranganaya. Mang’ ksarangusin, yaseeranganaya. Kiyung kachiyarangsin, Apaa, istangasinda, táranganaya. Yutaritshishish pantsarangusin, Apaa, mangeetsi yarangandama, táta ashiranganaya. Tputsee wanasir taamaam waneerangusin, yandaranganaya. Apanlleem pang’ kizpur wanasir parangusin, anootstam yaseeranganaya. Zapishparee Apanll waanaatsi ipusamarini zanganchiya atusin, Kuskachu, chiyaa izuuru tapachindachiya, atusin, yaseeranganaya. Tsapurunashuch tputs ichingarusin Apanllee chinachinllinaya, atusin, yaseesshee yandaranganaya. Wanipamasaja chinaranganaya. Yuwari chinarangana anootsiri yandaranganaya. Apanllee nda punikchusin, kis tsiyatarangsin, yaseeranganaya. Washunand 150 yaseesshish yandaranganaya.
Israelchich Apanlleem yaseerangana anu
1Tputs Apanllee kisa tachitamaama anoo kamankiya
1 Tputs Apanllimun mang’ tatku,
mapiyru kis taakiya.
Yutaritshiship nda tachitkiya;
Tputs Apanllee kuk tayutaritku,
anpat nda kis ipunkiya.
Apanllee zarungchaku anoo nda mazinakiya.
2 Apanlleetsimari kuk payumaam chinakiya.
Kaschiritam, psaantam uru Apanllee chinachintar ashkiya.
3 Yasin wanasirimash tamapari ashiru taamaam waritariya.
Napa yasinaam kung nda pishtaku, kchitaru taaku,
yuwash zar tatsamkachu, anush kis yusikiya.
Warsha nda mawirukiya.
Tputsshat Apanllimun wizpur ambitam ashkachu,
kchitaru kis taakitamanaya.
4 Itaru, yashingchichsha tputs nda ashirusin taakanaya.
Wayapureetspaz ashiru kambusur arap tpurangangpaz ashkiya.
5 Apanllshat anoo izuuru waneeship kapeetchiya.
Amb ashkachu Apanllchichpat tputs ayamtaati nda washunand yapandchinlliniya.
6 Watam Apanll waanaatstamari tiptsir uru ksutkuwa.
Itaru, tputs yashingup tachitkachu,
waneeship naachiya.* 1:6 Matiwa 7.13-14 tsiyatsis nipta tatsamooru taaritamta.
2Apanll wipaa tsapurunasshucheem waamari kasimaam wayarangiya, anoo wasina kamankiya.
1 ¿Mayaamshitaja tputs yashingchich kapung tsiyantaksin zamangakana?
Shaniyeeshtisin yuwari zandakana anuri tsiyatkanaya.
2 Kurakawtamsin, wipunashpat shaniyeersin, Apanllee mishat Apanlleetstam ipusamarini tayutaritkanaya.* 2:2 Yuwaa nish átu anootstam Tayaspatampani 4.25-26 tayusima kamankiya.
3 Kapung tsiyatkusin, Apanll kuweetsini kateenpapaz ashiru kamurikpaz ashkiya. Na watsta.
Iyaanaatsi kateenaa ichipeeruni kapeeteeni, atanaya.
4 Itaru, Apanllsha waamari kasiru kanindash taaku an,
mazinakchu kurakaa kuk stakiya.
5 Sheeru, kizpur tsiyantakachu, ¿Mayaamsa nuwaa átssa? átu, kurakshitisin punikanaya.
6 Watam Apanll tsiyatarangu,
Nuwaana ipari kurakaa uwamari kasiru taamaam ipuseena.
Machi Siyonamand tputsee ztaru ksutku taachiya,
Apanll táranguwa.
7 Apanlltam ipusamarini Apanlleetstam kuk kamanku, tárangiya:
Apari nuwapat tsiyatku tárangu;
Nuw shiyaa ipartana.
Nat in shiyaam taarashish kaneesich panayana.* 2:7 Yuwaa nish átu anootstam Tayaspatampani 13.33; Utaáshucheema 1.5; 5.5 tayusima kamankiya.
8 Shiyshat nuwaa mashangandama.
Tsapurunasshuchee nuwamari kasiruri taamaam wayangandama, tángcha.
Tákchush, nuwshat shiyamari tsapurunasshuchee ichinguru kasimaam wayachinllpa.
9 Shiysha tsapurunasshuchee kurak wizpurirpatish izuuru tpachingachsha.* 2:9 Apanll wanichu anu 2.27; 12.5; 19.15 tsiyatsis nipta tatsamooru taaritamta.
Tputs muritsaa yasinpat pátangtaru
shiysha, kundarareetsish ambtam ashtachsha.
Apari nuwaa tárangiya: Apanll ipusamarini waparee kuk kamanku, tárangiya.
10 Ashiri siysa tsapurunasshuchis kurakis,
mangiptis taangtsa.
11 Apanllee chinayarus, mangis kis ungirtangtsa.
Apanllee waneesh puniyarus,
Nuw shiyaa kurakartana, tángtsa.
12 Ashiriya paptsa. Nduniya siy Apanllish tachitkus,
Apanll siyaa tsiyantakachu tpachingayantspa.
Watam Apanll musásiri tsiyantamaam yasaruwa.
Itaru, tputs Apanllimun mang’ tatkusin, mang’ kis taachinllinaya.
3Dapiyarini, Ipari Absalon pcharundama, átu, suwayaru, Apanlleetssha; Istanda, tárangu anoo kamankiya
1 Apaa, Nuw kundarari zapancha.
Tputs zapan nuwaa kasimaam zandkanaya.
2 Waanpatatin tsiyatkusin, ¿Apanll Dapiyaa tamaree
istach? Istacheeja ndambaree, atanaya nuwaatsi.
3 Itaru shiysha Apaa, nuwaa kámanakush ksutakshawa.
Nuwaa kasimaam istaksha,
Uru mangeetsi tuwizpurtaksha.
4 Nuw shiyaa kuruzkuri, Apaa, istanda, tákchuri,
Shiyshat Apaa, pangishish, Siyonash mach,
nuwaa kuki mazinaksha.
Nuwaa istaksha. 5 Ashirucha nuwshat nda punikuri, mapiyruri maaranguri,
yusur chiyzayanll ashkina.
Watam shiysha, Apaa, nuwaa ksutakshawa.
6 Kundarari zapantaa nuwaam pachamaam kuseersin,
turipingaktaatsin, nuwsha nda punikina.
7 ¡Apaa, istanda! ¡Nuwaa tapachindangandama!
watam shiyamun mangi tatkinawa.
Kundarareesti tpazangcha.
Tputsee nda arang pachamaam waneeyarush ksangcha.
Tumuzee wanas kurumbatarich sheerush ksangcha.
8 Apaa, shiyamari tapachindampanish taaksha.
Ashiri, tputsireetsish istangcha. Ksutangcha, Apaa.
Dapiyarini Apanllee, Istangandama, átu, tárangiya
8Apanll tputsee tsapurunasee ksutamapaneem wayarangu, anoo kamankiya
Dapiyarini wayasee. Yandayaru, yasimpaneem panarangiya, kitarpata yasimaama.
1 Apaa, shiyamari ichingarootsini kasirush taaksha.
Shiyaa taarashipaneetsish, tputs ztaru wizpurireetsish pakanaya.
Kanindaatstaa arang kasiru taaksha.
2 Tputs tsapurunasshuch shiyaa natsaktaatssin,
itaru nllursha, kanxutaa shiyaa kis yaseeksin, zamangakchusin,
kundararshitish anoo mazinakchusin, paziksin
zamakanaya.* 8:2 Yuwaa nish átu anootstam Matiwa 21.16 tayusima kamankiya.
3 Apaa, yuwaa shaana tinarangish, anoo psaan kanindap napkuri,
tsupeetstam, tsangacheetstam pakuri, napuxtakina.
4 Ichingaroo pakuri, mangishi Apaa chinakina,
¿Mayaama iy tputsini taakanee? atina.
¿Mayaamsha shiy iyaa tputseetsini chinaksha?
¿Mayaamsha iyapa mapeerush taaksha?
5 Shiy iyaa tputseetsini tinarangush, shaana tamapari ashtamartam iyaa tinarangsha.
6 Tínamareetsish ichingaru kasiru iyaatsimari wayarangsha.
Ksutamapaneemtam iyaatssha wayarangsha.* 8:6 Yuwaa nish átu anootstam Utaáshucheema 2.6-8 tayusima kamankiya.
Sheerush iyaatssha tputseetsini kamachtakush tárangsha:
7 Siysa opeejaa, wakaraatstam, mishat manginshucheetstam,
8 íwar mangataru anootstam,
mishat kayupcheetstam, maachi ichinguru kungush taataru anootstam siyamari kasirus taatssa, tárangsha Apaa.
9 Itaru Apaa, shiyamarisha ichingarootsini kasirush taaksha.
Shiyaa taarashipaneetsish wizpurireetsish tputs ztaru pakanaya.
Dapiyarini wayas átu yandarangiya.
10Tputs yutaritshishpan Apanllee staktaa, itaru Apanll izuuru waneekchu tsipachinllina, anu kamankiya.
1 Apaa, ¿mayaamsha shiy iyaa arap kasaksha?
watam kiyung kachiykiniwa. ¿Mayaamsha tapishuksha?
2 Yutaritshishpan tputs pukiree urutamari kiyung yachaksin taakanaya.
Tputseem zapan nazanllish tupantsakpaz ashkanaya,
Itaru zapish waantatamsin anush pantsayarusin tsipachinlliniya.
3 Yutaritshishpan tputs waanaatstamari ungirtaku tsiyatstar ashkiya.
Yuwaa waana zandku, anootsimari tsiyatkiya.
Itaru, shiyaatsshat, Apaa, mantsir tsiyatkanaya.
Nda pakchiyam shiyaa chinamaam zandkanaya.
4 Waanaatstamari kapung ungirtaku,
¿Chakaja nuwaa wanichinda? Apanll wanindaja,
ambimari átu mangush chinaku taakiya.
5 Waamatamari waana mangush chinaku wanasiri shitungkiya.
Itaru shiyaatsshat, Apaa, waneeshish nda pakchiyam punikiya.
Tputs waneektaa, anoo nda pakchiyam paziksin, stakanaya.
6 ¿Chaka nuwaa kasichinda? Urutari nuw kis taachina,
Nuwaam xarashish ayamtaatiya taacheeja, ndambaree, atanaya.
7 Uru tputsee mantsir tsiyatkanaya. Ngichzeetsimari tsiyatkusin taakanaya.* 10:7 Yuwaa nish átu anootstam Romshucheema 3.14 tayusima kamankiya.
Tputsee mangutamari tamapingaku wanasir tsiyatkanaya.
Itaru mangush kiyung yachamaam chinakanaya.
8 Tamapingampan washchir tamatarparee ashkanaya.
Napa washchir yaktashtaa tapisheeru, tsangayaru,
tputsee pachayaru, maachiritaatssha ichingkanaya.
Tamapingampani ashkitamanaya.
9 Mishat, tamapingampan tumuz tamapari ashkitamsina. Tputsee tachitakpaz ashku tsangayaru, tamapingayaru, zata ashkiya.
Amb ashkusin, tputsee kasiksin, kiyung yachakanaya.
Tputs waanaatsi tapachindamaam pinasakanaya.
10 Yutaritshishpan tputsee kawashishpapaz ashiru kawakanaya.
Tputssha shitungamaam pinasakanaya.
Kiyung kachiykanaya. Wamarisha yashingchich kasikanaya.
11 Mangush chinaku,
Yuwaa ashki anoo Apanll mbizachparee,
watam wachoo kámanakuri, nuwaa nda pakuwa,
atusin, mapiyrsin taakanaya.
12 Ashiriya, Apaa shiysha, kuwish paxayarush,
wizpurirpatish yutaritshishpanee waneengcha.
Watam tputsee kiyung yachakanawa.
Ashiri shiysha tputsireetsish nayaniyarush istangcha.
13 Apaa ¿mayaamshta yashingchich shiyaa stakana?
Staksin, ¿Mayamandaja nuwaa wanichinda, atanaya?
14 Itaru, shiysha Apaa, ichingaru paksha.
Yuwaa yutarit ashkana anoo napanapaw ashkush, izuuru shiy wanichsha.
¿Chakaja, Apaa, tputs pukiree istach? Wanindaja.
Shiyamaricha istampan taaksha.
Ashirucha shiyamun mang’ tatkanaya.
Watam shiy mxaxzeetsta uru nayaniyarush istatarshawa.
15 Apaa, yashingchichee pachtama chpakpaz sheerush wizpuree tasámbaytangi.
Ndusha tputsee kiyung yachamaam izuuru pastamamari waneengcha.
16 Apaa, shiyamaricha kurakish urutamari kasirush taaktasha.
Yashingchich tputs nda minamtiyam shiyash pshtuchinlliniya.
Ichingarootssin kapeeteerush kasachsha.
17 Apaa, shaana tputsirish, shiyaa; Istanda tákchusin,
shiysha uru mazinakchush istaksha.
Tputsireetsish kapung chinakush, uru tuwizpurtaksha.
18 Shiy mxaxzeetstam, misha pukireetstam tputs istangcha.
Yutaritshishpan nda urutamari taachinllina,
watam tsapurunasshuchiwa.
Shiysha anoo tpachingangcha,
nimun ayamtaati ndusha tputsee kiyung yachamaama.
Ashiri Apaa, wapparee.
14Tputs yutaritshishpan Apanllchichee kiyung yachamaam zandkanaya. Itaru Apanll waana tiptsiree ksutkiya
Dapiyarini wayasi. Dapiyarini yasimpaneem tputs yandarangiya.
1 Tputs mangshari ashirusin, Apanll wanindaja, atanaya.
Ichingarusin mantsir chinaksin,
kizpur yutarit taakanaya.
Nda minumtiyam wanasir taakanaya.
2 Apanllsha kanindamanda tsapurunasshuchee napku,
¿Ndush minamtam tputs mang wanasir taaru, nuwaa chinamaam zandak? átu,
3 Napku, itaru ichingurusin yutarit chinaksin mantsir taakana.
Nda minamtiyam Apanllee chinamaam zandakanaya.
4 Yutaritshishpan nda pakchiyam mazinamaam zandkanaya. Mangsharitssincha.
Apanllee tiptsir kiyung yachaksin, urkiree itutskusin waamarishtisin shamangarsin wanuts kapungu taakanaya.
Ashkusin, nda pakchiyam Apanllee chinakanaya.
5 Yuwash zar Apanll tputsee waneekchu anush, puniksin nungtachinlliniya.
Itaru, Apanllsha yuwaatsimari waanaatsee kuk payukana anootsimari uru ksutkiya.
6 Apanll tiptsir wanasir taamaam zandkitaatssin itaru yashingchichsha staksin tayutaritkanaya.
Ashkitaatssin Apanllsha waana tiptsiree ksutkiya.
7 Apanll mikeeru iyaam Israelchicheemani tapachindampaneem zanganichpa,
Siyonamand machi.
Apanll ashkachu, iysha Israelchichini ichinguruni mapiyshtini taachiniya.
Mangini kis shambatkuni Apanlleetsimarisha ungirtakuni taachiniya.
15Dapiyarini, ¿Chakaja Apanllish pshtumaam waritak? tárangu, anoo kamankiya
Dapiyarini wayasi.
1 Apaa, ¿chaka shiyash pangish pshtumaam waritak?
¿Chak shiyapat Siyonash mach ipunamaam waritak?
Yuwamari tputs itsinsaru taaku,
minamari tsiyatssee payuku,
anumari shiyash pshtumaam waritariya.
Tputs ashku anu uru mangpatari itsinsaru tsiyatkiya.
3 Tputsee nda yutaritam ínakiya.
Wamkuree nda kiyung yachakiya.
Waanpatatin nda waratku taakiya.
4 Yutaritshishpanee nda kis napku
itaru Apanllchicheetssha chinakiya.
Uru waanaatsee kuk payukiya,
uwaana kiyungutaa kachiyku, itaru ashtaa payukiya.
5 Urkiree tputseem panaku, nda yanusha tuwapanda, atiya.
Anuritam tatsamooru tuwapanda, atiya.
Tputsee ngichimaam izuuru ngatkiya.
Wanasirimshee tputs, Tayutaritamaam kurik panachintspa, atitaatssin anoo ngatkiya.
Apaa, tputs shiyaa ashirinaari chinaku, shiyaa kasacheeja, ndambaree.
16Dapiyarini waanaatsi tsiyatarangu, itaru Apanlleetssha ipusamarini wasina tsiyatarangitamta, anoo kamankiya.
Dapiyarini yandamarini.
1 Apaa, nuwaa ksutangandama, watam nuw shiyash kamungkina.
2 Apaa, nuw shiyaa kurakartana. Shiy nuwaa uru istaksha.
Shiyapa wizpurirish tatsamoorazinllinaja.
3 Nishuch tputs zapan apanllputsee ungirtakanaya.
Kizpurtanicha, atanaya.
4 Aranginasha, aranginasha ashkusin, apanllputsee izapaneekchinlliniya.
Itaru, nuwsha minamtiyam wakaraa pachayaruri, apanllputsee ungirtacheezee.
Apanllputsee sur minamtiyam tsiyatcheezee.
5 Nuw shiyamunari mangi ksakina.
Shiy nuwaa uru istaksha.
Nuwaa tapachindaksha.
Ichinguru zaree nuwaa ksutaksha
6 Shiy nuwaam taarashee kizpur wanasiri ipusarangsha.
Kapung mangi kisa.
Arang taarashish min nuwaam wanindaja.
7 Apaa, nuw shiyaa kapung chinakina.
Shiy uru nuwaa machiksha.
Psaantam nuwaa mangi p’tseeksha shiyaa itsinsaru tachitamaama.
8 Shiy urutari nuwapa ipunarush taaksha.
Uru nuwaa napaksha.
Shaana nuwaa mbutsinungich wayaksha.
Ashiri ¿Chaka nuwaa kasichinda?
9 Ashirucha, nuw mangi ksakina.
Nuw kuki murcha.
Nuw mangi punirustacheezi,
10 watam nuwaa mapumashta nda pakchiyam kasachshawa.
Kani kanizeem kinacheeja.
Nuw nutsi kuchacheeja, watam shaana nuwaa ipusamarshawa.* 16:10 Yuwaa nish átu anootstam Tayaspatampani 2.27, 13.35 tayusima atitamta.
11 Urutamari Apaa, shiyapa kis taachina.
Shiyashumari kis shamangkashish taariya.
Shiyash taarashish urutamari kizpur wanasir taariya.* 16:11 Yuwaa nish átu anootstam Tayaspatampani 2.25-28 tayusima kamankiya.
19Yuwamand Apanll kanindaa tinarangu anumand, Apanll kizpurcha atiniya. Yuwamand Apanll waanaatsee kuku tputseem tuyandarangu anumand, Apanll iyaa kizpur chinakiya, atini, anoo kamankiya
Apanll; Tputs nuwaa yasapanda, átu, kanindush waana wizpuri chiyaam tuyamandarangiya. Dapiyarini wayasi.
1 Kanind iyaam Apanllee wizpur tuyamandakiya.
Zari, tsuptam, tsangachtam iyaa; tsiyatakpaz ashku; Apanllimarita kizpurcha, atanaya.* 19:1 Romshucheema 1.20 tsiyatsis nipta tatsamooru taaritamta.
2 Apanll zaree kanindush wayarangu, uru putam taraseeta, putam taraseeta ashimaam kamachtarangiya.
Tapeekchu anush, tsupeetstam, tsangacheetstam wayarangiya.
3 Tsup nduntaati tsiyatku, zartam nduntaati tsiyatku,
tputssha nduntaa kukoo mazinaksin, ashtaa,
4 Yuwamand Apanll kanindaa tinarangu,
anumand tputs ztaru Apanllee yasakanaya.* 19:4 Yuwaa nish átu anootstam Romshucheema 10.8 tayusima kamankiya. Waamari kasiriya, atanaya.
5 Apanll zaree kanindush wayarangu, zarsha putam shitungata, putam shitungata ashku, itsinsaru naakiya.
Kanungas kizaa yamapi átu, kizapiri itsinsaru naataru, zarsha ambtampaz ashiru shitungachu, itsinsaru naakiya.
Mishat, zar, tputs mang’ kis iriptaru ashiritam nda nizimaam yasariya.
6 Zari puturita shitungeeru, itsinsaru naaku,
yap pshtuku amb izuuru pshtukiya.
Ichingaroom tputs zarish ksaneekanaya.
Apanll taarashee kaneesich tputseem panapi átu, waanaatsee kuk iyaam panarangiya.
7 Apanlli kuk kizpurcha wanasiri. Apanll nda minamtiyam yutarit tsiyatarangiya.
Ichinguru tputs Apanllee kuk mangoonamaam taariya.
Tputs mang’ nduntaa, itaru Apanllee kuk mangoonku, yasampaz ashiru wanasiri chinakiya.
8 Apanll kuk iyaam itsinsaru taamaam kamankiya.
Tputssha payukinaariya, kissha taachiya.
Apanll kuk nda minamtiyam yutam kamankiya.
Tputsush mang’ tuwasineekiya wanasiri chinamaama.
9 Tputs Apanllee puniku, uru itsinsaru tachitkiya.
Apanll; Tputs wanasiri kis taapana, átu, anooma kamachtamarineetsi panarangiya.
Nda iyaa kiyung yachamaam zandkiya.
10 Apaa, shiy kukish kizpur wanasircha.
Shiyaa kukish payumaam orootstaa arangeem kasiru wanasiri.
Kinduraa wakunguri waakuri kizpur kisa.
Itaru, shiyaatssha kukish payukuri, aranginasha mangi ksakina.
11 Apaa, nuwaa shiycha tputsirish.
Shiy kukish nuwaa mangi p’tseeku, shiyaatsimari tuminpi, atina.
Tputs shiyaa kukish payuksin, shiysha aranginasha istaksha.
12 Itaru Apaa, ¿chakaja waanaatsee yutaritshishirini ichingaru yásach?
Ichingaru yasamaam pinasakaniya
Ashiri Apaa, shiysha nuwaa yutaritshishireetsi ichingaru tchingangandama.
13 Istangandama Apaa, nda nuwaanaatstamari chinamaama. Watam an yutaritawa.
Shiy nuwaa istakush, nuwsha yutaritshishireetsi kasichima.
14 Ashkachuri, yuwaa wanasir chinaki, mishat wanasir tsiyatki, anoo shiysha kis mazinachsha.
Shiy nuwaa tapachindaksha; mishat ksutaksha.
Ashiri Apaa, wappari, atina.
Dapiyarini Apanllpat tsiyatku tárangiya.
22Dapiyarini wasina Apanll ipusamarini tsipachu anoo kamanirangu, anoo kamankiya.
Dapiyarini yandarangu, yasimpaneem yaseessheem panarangiya.
1 Apaa, Apaa, ¿mayaamsha nuwaa kasaksha?* 22:1 Yuwaa nish átu anootstam Matiwa 27.46; misha Márkosa 15.34 tayusima kamankiya.
¿Mayaamsha shiy nda nuwaa tapachindaksha?
Nuw mangi kapung mantsakuri, shiyaa kuruzkina.
¿Tamasha shiy nda mazinaksha?
2 Apaa, kaschiritam, Psaantam shiyaa kuruzkina.
Itaru, shiysha nda nuwaa mazinaksha.
Mapiymaam nuw pinasakina.
3 Itaru Apaa, shiyamari wanasirtishcha.
Iy Israelchichini shiyaatsimari ungirtakaniya.
4 Iy pachirini shiyaatsimaritam chinaranganiya.
Shiyaa kapung chinarangusin, shiysha tapachindarangsha.
5 Shiyaa, Istanda, tárangusin,
shiyshat tapachindarangsha.
Shiyamun mang’ taturangsin, shiysha uwaatsee istamaam nda ngatarangsha.
Nda tamapingarangsha. Itsinsaru istarangsha.
6 Itaru, nuwaatssha tputs, ¿Antaati in tputseeja? Nda.
Mbich tamatarpachi ashiru kátimaam waritachcha,* 22:6 Wanga 19.5 tsiyatsis nipta tatsamooru taaritamta. nuwaa atusin stakanaya.
7 Mantsir tsiyateersin, stakanaya.* 22:7 Matiwa 27.39; Márkosa 15.29; Lukasa 23.35 tsiyatsis nipta tatsamooru taaritamta.
Nuwap napeersin,
8 ¿Tamasha in Apanllimuntaa mang’ tatku,
Apanll uwaa nda tapachindaka?
Apanll uwaa chinakinaariya,
taarashee tapachindachinaparee,* 22:8 Yuwaa nish átu anootstam Matiwa 27.43 tayusima kamankiya. atanaya nuwaatsi.
9 Itaru, shiysha Apaa, nuwaa aneershi nllurtamaam wayarangsha.
Nllurtaranguri, aneereemi ksutamaam wayarangsha.
10 Ndatumastaa nllurtachuri, shiy uru nuwaa ksutarangsha.
Urutari nuw shiyaa aparimuna.
11 Ashiri Apaa, shiy nuwaa ksarishpa.
Kapung kiyung kachiykuri tsipamaam waritakina.
¿Chakaja nuwaa tapachindachinda? aturi,
min tputs nuwaa tapachindampan wanindaja.
12 Kundarari nuwaa turipingaranaya.
Basanshuch wakar upapchir watseenur tamapari ashirusin,
nuwaa pachamaam zandkanaya.
13 Tumuz manginshuch kázamish tamaparee ashirusin,
kuksha kapung xipungayarusin,
nuwangaz tsipusamamari zandkanaya.
14 Nuw kung tamapari ashiruri zaw ashkachuri, wizpuriri ndunariritara ashkina.
Ichinguru napuri itaximbarangiya.
Mangi kungusakpaz ashiru zaw ashkiya.
15 Sachisimun kuki mazach ashiru puzaku
neepuritamti ptsutkiya.
Shiy nuwaa wazawash tsipamaama wayarangsha.
16 Kundarari shaniyeersin,
tumuz chinuz watseenur tamapari ashirusin nuwaa turipingaranaya.
Nuwaa kuweetsi, k’tseetstamti tshutaranganaya.
17 Ichingaru napuritaati wasuree táchakiya.
Kundarari nuwaa natsaksin, napatara, napatara ashkanaya.
18 Nuwaatssha ktuniri, ¿Chakaja yach? atusin,
waanpata michitaranganaya.
Sheersin, waanpatachtisin ashpatam ashpatam sheersin yaranganiya.* 22:18 Matiwa 27.35; Márkosa 15.24; Lukasa 23.34 tsiyatsis nipta tatsamooru taaritamta; yuwaa nish átu anootstam Wanga 19.24 tayusima kamankiya.
19 Itaru Apaa, shiy nuwaa tuwizpurtaksha.
Ashiri nuwaa ksarishpa.
Nuwaa mikeerush istanda, Apaa.
20 Tputs pcharundama.
Shiyshat nuwaa tsipani tapachindangandama.
Nuwaa ksarishpa
21 Kundarari nuwaa nda pachamaam tapachindangandama.
Kundarari tumuz tamapari ashirusin, nuwaa zamaam zandkana.
Wakar upapchir tamapari ashirusin, nuwaa witspa pachamaam zandkana.
¡Istanda Apaa!
Shiysha Apaa, nuwaa kuki mazinarangsha.
22 Ashiri shiyachich tputs shaniykatssin anush, nuwsha,
Zuwanllchee, wanip Apanll nuwaa istaranga, Apanll kizpurcha,* 22:22 Yuwaa nish átu anootstam Utaáshucheema 2.12 tayusima kamankiya. táchima.
23 Ashiri siysa Apanllchichis; Apaa, shiy kizpurtishcha, tángtsa.
Ichingarus Israelchichis, Apanlleetsimari ungirtangtsa.
Shiyaa ksumish chinakaniya.
Shiy kizpurtishcha, tángtsa.
24 Tputs kiyung kachiykana anoo Apanll nda niyrkiya.
Nda wchumari napkiya, nda waanaatsi pishukiya.
Tputs Apanllee; Istanda, tákchu, Apanllshat uru mazinakiya.
25 Ashiri, Apaa, shiy tputsirish shaniykana, anush
nuwsha, Apanll nuwaa kasarangeeja.
Kiyung kachiyrangtaati, nuwaa tuwizpurtarangiya,
táyaruri, ichingaru kamanchima.
Sheeruri, k’keetsi tuminamaam wakaraa shiyaam pachayaruri,
26 tputs kiyung kachiykana anoo, yambiyaruri,
Katungeerus tazazangtsa, táchima.
Sheerus Apanllingaz chinakis anis, Apanllee ungirtakus, yaseengtsa.
Amb ashkachus, zapan masach siy kis taatssa, táchima.
27 Ichingaru minshucheewis tsapurunasis, arapcheewtamtis,
Apanllee kuk mazinakchus,
mangoonkachus, tutunlltayarus, Apanlleetsimarisha ungirtangtsa.
28 Apanll waatatcha kizpur kuraka.
Wamari ichingaru tsapurunasee ksutku taakiya.
29 Yuwis maacheetsi zapan payukis anis,
Apanlleetsimarishat chinayarus ungirtangtsa.
Watam siysa uru tsipachtamsawa.
Siy saanamuntari wizpuriris urutamari taamaam pinasaksawa.
30 Nuwashuch nlluranuri uru Apanlleetsimaritam chinaksin taachinlliniya.
Ichingaru zari Apanllee tsiyatkusin taachinlliniya.
31 Nllursha kaneesich nllurtakachu, anootstam kamaningtsa.
Apanll iyashchee tputs kapung tapachindarangu,
kamankus tángtsa,
tárangiya.
23Dapiyarini, Shiy Apaa, opeejpan ksutamapan ashirush nuwaa uru ksutaksha
Dapiyarini wayasi.
1 Shiy Apaa, opeejpan tputs tamapari ashirush, nuwaa wanasir ksutaksha.* 23:1-2 Wanga 10.14-16; Utaáshucheema 13.20; 1 Pitoru 5.4 tsiyatsis nipta tatsamooru taaritamta.
Opeejpan chinoo wanasir ksutku, pastush maritachu, kungootstam waamaam wayakchu,* 23:1-2 Apanll wanichu anu 7.17 tsiyatsis nipta tatsamooru taaritamta. kis kanuskanaya.
Shiyshat Apaa, ashikpaz ashiritam nuwaa wanasir ksutkush,
nuwsha Apaa, shiyamun mangi kis kanuskina.
Nuwaam pishtats wanindaja.
3 Wizpuriri ndunareekchu, shiysha Apaa, nuwaa arang tuwizpurtaksha.
Mangeetsi p’tseekush shiyaa itsinsaru tachitkina.
Ashkachuri, nuwamun tputssha shiyaa wanasir napchinllinaya.
4 Wazawshutaati, tapish tsipamaam waritaktaati,
nuw tsipatsee punikeezi, watam shiysha Apaa, nuwaa nda kasakshawa.
Chinuzpan tamapari ashirush yungashpatish, mishat tushuwashpatish nuwaa ksuteerush machiksha.
Ashiri nuwsha shiyapat mapiyru kis naakina.
5 Kundarari nuwaa natsaktaatssin, nuwaa napanapaw ashkitaatssin, itaru shiysha Apaa, nuwaa chinakush, katungsheemtamti nuwaam panaksha.* 23:5 Lukasa 22.17-21 tsiyatsis nipta tatsamooru taaritamta.
Mishat, kzammashee muchimuni taparaksha.
Shiysha Apaa, nuwaa kizpur kasiru ksutaksha.
6 Ashiri nish tsapurunasush taakuri,
shiy kizpur nuwaa chinakush, nayanikush, taarasheetsi ichingaru zar ksutaksha.
Ashiri tsipakchuri, shiyash urutamari kis taachima,
tárangiya Dapiyarini.
24Tputs Apanllee itsinsaru chinamaam kamankiya. Mishat, Apanll waamari kasiru kuschu anootstam kamankitamta
Dapiyarini wayasi.
1 Apanll ichingaru tsapurunasee ztaru kasiru taakiya.
Tputseetstam, maacheetstam kasiru taakiya.* 24:1 Yuwaa nish átu anootstam 1 Koríndshucheema 10.26 tayusima kamankiya.
2 Watam Apanll waana tsapurunasee tinarangu,
kungumun iwaz tsapoo mbamari wayarangiya.
3 ¿Chakaja Apanllip machirini kárimaam waritak?
¿Chakaja Apanllish pang’ pshtumaam waritach?
4 Yuw tputs yutaritshishirini tachingama,
nda yutaritshishee chinaku,* 24:4 Matiwa 5.8 tsiyatsis nipta tatsamooru taaritamta.
nda apanllputsee ungirtaku,
nda ngicheeru tputsee tayutaritku, anumari pshtumaam waritakiya.
5 Tputs zurampatari Apanllingaz chinaku anoo
Apanllshat tapachindachiya.
Kistam napku, Shiy yutaritshishish nduncha, táchiya.
6 Tputs Akoparini Apanllingaz tamarangparee chinaku
Apanllingaz wizpur támaraku izuuru Apanllish pang’ pshtumaam waritariya.
7 Irusarin pstushini wach urutamash izuuru tawatangcha.
Urutamari tawatam taachpa.
Kurak yuw wamari kasiru anu, wasundururpat pshtumaam naanllpa.
8 ¿Chakshita kurak wamari kasiru anu?
An Apanll Taarashipancha. Uw kizpurcha.
Nda sambaytaku waamari kasiyanlliya.
Apanlliritcha, yuw undararee waamari kasirangu ancha.
9 Ashiri Irusarinaa pshtushini wach tawatangcha.
Urutari tawatam taachpa,
Watam Kurak wamari kasirangu anu pshtumaam naanllpa.
10 ¿Tamamshita kurak kizpur kasirangu anu?
watacha Apanll Taarashipani, waamari ichingaru kasiru anu.
Ichingaru tsapurunasee kanindaatstam waamari kasiru taakiya.
27Apanll mangeetsi tuwasineeku mishat taarasheetsi tapachindakiya
Dapiyarini wayasi.
1 Apanll nuwaa mangeetsi tuwasineeku,
nuwaa taarashi tapachindakiya.
¿Ashiri nuw mayaatsee punichi?
Watam Apanll urutamari nuwaa ksutkuwa.
¿Ashirucha nda puniki?
2 Kundarari, yutaritshishpan, nuwaa pachamaam zandkitaateesinaya,
Itaru xapoochinlliniya.
3 Nuwaa sundartaa kayangayarusin,
Nuwsha punicheezi.
Nuwaa, Pachayani, atitaatssin,
Nuw Apanllimunari mangi tatkuri taachina.
4 Apaa, yuw kizpur chinaki anootsimari mashchinllpa,
Ichingaru zar pangishish pshtukuri,
shiyaatsimari uru ungirtakuri taapi atina.
Watam shiy kizpur wanasirshawa,
anungazimari zandkina.
5 Ashiri, Apaa, yutaritshish nuwash kuskachu,
shiysha nuwaa shaanshu pangish wayakchush,
nuwsha anush kamungchina.
Ashkachush nuwaa tapachindachsha.
6 Shiyamun wizpurirish kundarareetsi kasichina.
Ashiri shiyaatssha, Wapparee, aturi,
chinuzee pachayaruri muchchina.
Mucheeruri, kapung mangi ksakuri, yaseessheetssha yasichina.
7 Apaa, shiyaa kuruzki anoo mazinangandama.
Shiysha nuwaa nayanikush, kamaninganda.
8 Nuw Apanlli mashkuri mangishi; Apaa, nuwaa istanda, atina.
Ashirucha nuwsha Apaa, shiyaa, Istanda, áti. 9 Apaa, shiysha nuwaa tpishishpa.
Tsiyantayarush, nuwaa niyrishpa.
Watam shiyamari nuwaa istakush taakshawa.
Ashiri nuwaa ksarishpa. Istangandama.
Tputs nllitari nuwaa istamaam wanindaja.
Shiyamari nuwaa tapachindakush taaksha, Apaa.
10 Wandtaati apari, aneertamti nda nuwaa ksutkusin,
itaru shiysha Apaa, urutari nuwaam ksutamapaniri taaksha.
11 Mishat, Apaa, nda kundarari nuwaa tayutaritamaam,
shiysha nungipish machinda.
Itsinsaru shiyashumari tachitpi túri, atina.
12 Yutaritshishpan tputs nuwaa ksirundama.
Ksarishpa.
Watam nuwaa kapung natsakanawa.
Nuwaa mangu ngicheersin, mantsir tsiyatkanaya.
13 Itaru, Apaa, nuw shiyaa yasaktana.
shiy nuwaa chinakush, urutamari istakush taaksha;
Ayamtaati kasacheezish, ndambaree.
14 Ashiri siysa Apanllchichis, Apanllimun mangis tatungtsa.
Kizpur taangtsa. Sambaytarintspa,
Izuuru Apanllimun mangis tatungtsa, atina.
32Tputs Apanllpat mang’ yaramaw taaku, itsinsaru Apanllee tachitku anoo kamankiya
Dapiyarini yandamarini.
1 Apanll tputsee yutaritshishirini tachingeeru, izuuru mbizakchu,
tputssha mapiyshaparee taachiya.
Tputs yutaritshishirineetsi Apanllee kamanku, nda kamapshiku,
Apanllsha izuuru tachingeeru, ndusha yusur anoo chinachiya.* 32:1-2 Yuwaa nish átu anootstam Romshucheema 4.6-8 tayusima kamankiya.
3 Nuw ndatuma mangeetsi yarchuri, kis taamaam pinasarangina.
Putam putam ashiranguri mangi mantsaranguri,
nuw wizpuriri ndunareerangiya.
4 Watam shiysha Apaa, nuwaa waneerangshawa.
Psaantam, kaschiritam kis taamaam pinasarangina.
Chap zarish mawirtaru ashiru, taarashi taarangina.
5 Sheeruri, shiyaa Apaa, yutaritshishireetsi ichinguru kamanirangina.
Nda minamtiyam kamapshirangina.
Ashiranguri, shiysha Apaa, nuwaa mangeetsi tachingarangsha.
Izuuru mbizamamari yutaritshishireetsi kapeetarangsha.* 32:5 1 Wanga 1.9 tsiyatsis nipta tatsamooru taaritamta.
6 Ashiri na, Apaa, shiyshacha iyaa tputsirish
yutari tushiykchitaa, iyshat uru shiyaa mashkiniya.
Ashkachuni yutaritshish taaktaa, itaru iyaa nda kasichiya.
7 Apaa, shiyashumari kamungamaam waritakina.
Taarasheetstamti shiy nuwaa kámanaksha.
Ashirucha Apaa, mangi kis shambatkuri kapung yaseekina.
Watam shiy yutaritshishireetsi tachingarangshawa.
8 Mishat, Apaa, shiysha nuwaa ateezish.
Nuw shiyaa uru napkina. Mangeetsish p’tseekina,
nuwash itsinsaru tachitamaama.
9 Nuwash tachitkush, kapaach, mishat burr
mang’ tamapari ashirush nuwash tchitinllpa.
Watam kapaach, mishat burrutam tputsush tachitamaam uru ngatkanawa.
Tputssha putayarusin, sukpat tusiseersin,
pshiyrkatssin, annaa naaksin tachitkanaya.
Itaru, shiysha an tamaparee ashirush shirinllpa.
Nuwash itsinsarush tchitangcha, átsha Apaa.
10 Tputs yutaritshishpan uru kiyung kachiykanaya.
Itaru, tputs shiyamun mang’ tatkana anootssha
shiy ksumish chinakush, uru ksutaksha.
11 Ashiri siy Apanllchichis, Apanllimun mangis kis taangtsa, átana.
Uru mangis kis Apanllimun shambatangtsa, nuw siyaa atashina.
Ashiri na wapparee nuw kuki tawatspayana.
33Yuwaa Apanll waana zandku anoo izuuru tatsamkiya. Ashiri mangis kis Apanllee ungirtakus seengtsa
1 Siy Apanllis tiptsiris Apanlleetsimari ungirtangtsa. Ancha Apanlleem kizpur wanasiriya.
2 Ashiri yaseeyarus, Wappari Apaa, tángtsa.
Arpapat, misha kitarpat ashirus,
mangis kis yaseengtsa.
3 Yaseeshish kaneeschee seengtsa.* 33:3 Apanll wanichu anu 5.9; 14.3 tsiyatsis nipta tatsamooru taaritamta.
Tputs kitartamaam yasaru, anpat ipuneerus, mangis kis seengtsa.
4 Apanll yuw ichingaru tsiyatarangu an zurampatari tárangiya.
Iyaa chinaku, ¿wanip iyaa istaranga?
Uru wamunari mangich tatumaam taariya.
5 Apanll ngitzipanee natsakiya. Wanasirimsheetsimari tputs chinakiya.
Tputsee ztaru chinakiya.
6 Ichtakachuri Apanll tsiyateeru, kanindaa tinarangiya.
Sheeru, Kanindush zar, tsup, tsangach ashiru taachpa, tárangu, ichingaru tinarangiya.
7 Ichinguru kungunandari taarangu,
anoo Apanll, Kungoo waanitam wayachima, tárangu,
maree kapungumashee wayarangiya.* 33:7 Wanga 1.3 tsiyatsis nipta tatsamooru taaritamta.
8 Ashirucha, nuw siyaa tsapurunasshucheetsis, Apanlleetsimari chinangtsa, atina.
9 Watam waana tsiyateeru, maacheetsi ichingaru tinaranguwa.
Mishat, ichingaru urutamari taamaam wayarangiya.
10 Tsapurunasshuch kurak uru yutarit chinaksin, waana zandkana anumari ashimaam chinakanaya.
Zandkitaatssin itaru Apanllsha xarashish wayat, wayat ashku, xapookanaya.
11 Itaru, Apanllinaa waana yuwaa, Ashchima, tákchu anoo,
zurampatari tatsamkiya.
Tputs ayamtaatiya Apanllee tuxaramaam pinasachinlliniya.
12 Itaru, Apanll waana iyashchee, Israelchicheetsini tiptsireem ipusarangiya.
Iysha Apanll Taarashipani kapung chinakaniya.
Ashirucha, kis mapiyruni taakaniya.
13 Apanll kanindash taaku, anumandari napku,
ashpaatsiri tputs ztaru tsapurunasush pakiya.
15 Yuwaa tputs mangush chinakana anoo yasakiya.
Watam waana mangeetsich tinaranguwa.
16 Kurak wasundurur zapantaa taaru,
itaru, undarar, Kurakaa pachapani, atusin,
Apanll nda istaku wasundurur urkareetsi tapachindamaam pinasakanaya.
Kizpuritaa kurak waanaatsi tapachindamaam pinasakiya.
17 Mishat, kapaach tapazpan kizpuritaati, sundaroo tapachindamaam wanindaja;
Apanllimari tputsee tapachindamaam taariya.
18 Itaru, Apanllchich tputs, Apanllimun mang’ tatkusin,
Apanll iyaa ksumish chinakiya, atusin,
Apanllsha urutari waatssin napku ksutkiya.
19 Tsipamaam waritaktaa, Apanll tapachindakiya.
Katungats maringaktaa, Apanll istaku, nda tsipachinlliniya.
20 Ashiriya, iysha Apanllimun mangini tatkuni,
Apanllsha iyaa izuuru ksutkiya; nda kasakiya.
21 Apanllimunari mangini ksakaniya, watam zurampatari Apanllee mangiptini chinakaniwa.
22 Apanll, urutamari iyaa chinaku,
iyapat ipunakcha.
Watam Apanllimunari mangini tatkiniwa, atiniya.
34Yuwamand Apanll iyaa nayaniku anumand yaseekaniya
Yuwapur Dapiyarini muxar tamapari ashiru undararish, kurak Abimelekush taarangu, anpur nee yaseesish yandarangiya.
1 Apaa, nuw shiyaa urutari, Wappari aturi,
ichingaru zari taakina.
Nuw urutari shiyaa ungirtakuri, mangi kis yaseekuri, taakina.
2 Nuw shiyaa ungirtakuri, tputs putit tamatarpari ashiruri,
mangi kis shambatkuri shiyaa yaseekina, Apaa.
Siysa tputsis mazinangtsa yuwaa nuw Apanllee yaseeki anootsi.
3 Ashiriya, na ichingaruni washunand yaseeyani.
Apanlleetsimari wanasirimshee ungirtayani, nuw siyaa atina.
4 Nuwsha Apanllee, Nuwaam istanganda, táranguri,
nuwaa istarangiya.
Nuw kapungtaa puniranguri,
itaru Apanllsha nuwaa tapachindarangiya.
5 Yuw tputs Apanllimun mang’ tatkana, anin mang’ ksakanaya.
¿Ayamtaatiya Apanllee pazichazinllinaja?
Urutari mang’ kis taachinlliniya.
6 Nuw kapungtaa puniranguri, itaru nuwsha,
Apaa, Nuwaa tapachindanda, táranguri, kapung kuruziranguri,
Apanllsha nuwaa kuki mazinarangu, nuwaam mangooz mapiymash panarangiya.
7 Yuw tputs Apanllimun mang’ tatkana anoo Apanll istakiya.
Apanll waana tiptsiree ksutkiya.
8 Apanllee chínash izuuru yasangtsa,
watam kizpur chinakuwa.* 34:8 1 Pitoru 2.3 tsiyatsis nipta tatsamooru taaritamta.
Yuw tputs Apanllee chinakana, an mang’ ksakanaya.
9 Apanllee mangiptis zurampatarit chinangtsa.
Ashkachus, Apanllsha siyaa ksutchiya.
10 Tumuz wip wanir nda katungtsee yaku,
marizimunsha kiyung kachiychinlliniya.
Itaru, yuwsha tputs Apanllee chinaku,
anoomsha nda katungats pishtachiya.
11 Ashiriya, naanints nlluris. Nuwaa kuki mazinangtsa.
Apanllish wanasiri tachitamaam tayaspatachintspa.
12 Siy zapan masach mapiyrus taamaam zandkinaareesa,
13 Ashiri nda mantsir tsiyatamaam saanaatsis wanasir ksutangtsa.
Ngutis tputsee tamasingarus ngichintspa.
14 Yutaritshishee kasayarus, wanasir chinangtsa.
Mangis kis taamaam taarashish wanasirimsheetsimari chinangtsa.
Ashiriya, siysa mangis kis taapi atinaareesa,
Apanllee chinangtsa, nuw siyaa atina.
15 Yuw tputs Apanllee chinakana, anoo Apanllsha urutamari ksutkiya.
Yuwaa mashkana anoo Apanll uru mazinakiya.
16 Itaru, yuw tputs yutaritshisheetsimari chinaku, anoo nduntam Apanll istakiya.
Waani yachimbanllina átu, nda pakchiyam istamaam zandkiya; izuuru mapiykiya.* 34:16 Yuwaa nish átu anootstam 1 Pitoru 3.10-12 tayusima kamankiya.
17 Itaru, yuwsha tputs Apanllee chinaku, ansha kiyung kachiykachu, Apanlleetssha mashku,
Apanllsha anoo mazinakchu, tapachindakiya.
18 Apanll waanaatsi tiptsiri uru kapung istamaam zandkiya.
Tputssha kapung mang’ mantsaku, waani itamsamaam pinasaku, anoo waana Apanllsha tuwizpurtakiya.
19 Tputs Apanllee mangpatari chinaku, kapung kiyung kachiykitaa,
Apanllsha anoo istaku tapachindakiya.* 34:19 2 Koríndshucheema 1.8-10; 2 Tímoteyooma 3.10-12 tsiyatsis nipta tatsamooru taaritamta.
20 Apanll waanaa tiptsiri kizpur ksutku, wanap nda minamtiyam ichipchiya.* 34:20 Yuwaa nish átu anootstam Wanga 19.36 tayusima kamankiya.
21 Yutaritshishpansha tputs waanamandari yutaritshishirini tsipachinlliniya.
Apanllee tiptsiri natsaksin, Apanllsha anumand izuuru wanichiya.
22 Itaru, Apanll urutamari tiptsiree tapachindachiya.
Yuw tputs Apanllee chinakana, anoo nda wanichiya.
Ayamtaatiya tiptsiree wanicheeja, ndambaree.
Ashirucha, nuwaa kuki mazinangtsa. Watam nuw siyaa tayaspatakuri atinawa.
37Apanllimun mangis tatungtsa
Dapiyarini wayasi.
1 Tputsimand yutaritshishirini musá tsiyantarinllpa.
Tputs yutarit taakana anoo, siysa pakus, Ambtam ashpi átus, támararintspa.
2 Watam yutaritshishpan mikeeru pchirukpaz ashkuwa.
Karut tamatarparee ashiru mikeeru mawirukiya.* 37:2 Sandeeku 1.10-11; 1 Pitoru 1.24 tsiyatsis nipta tatsamooru taaritamta.
3 Ashiriya, tsapurunasush taakus,
Apanllimunari mangis tatungtsa; izuururu yutaritshishee mapiyngtsa.
Saanaatsi taarashis wanasir ksutangtsa; wanasir taangtsa.
4 Apanllimunari mangis tatkus,
Yuwaa saana chinakus ashchima, átis anoo Apanllsha uru istachiya.
5 Ashiriya, Apanll waana uwpa putayaru,
wanasiripimari siyaa machchiya.
Ashiri Apanllimunamari mangis tatungtsa.
6 Ashkachus, izuuru wanasiriri taakus,
zar wachamureetskachu, tuwasintaru ashikpaz ashitssa.
7 Ashiri mangiptartis wanasir taakus,
izuurus Apanlleem k’tangtsa.
Watam Apanll siyaa istachuwa.
Ashkus, tputs siyaa tayutaritkitaa, anoo ksatarintspa. Waani taachpa. Watam yutarit chinaksin, atanawa.
8 Ashiri tsiyanis zambazangtsa. Arangeem tsiyantarintspa.
Mishat, tsiyanpatis taarintspa.
Watam ashkachus, aranginasha saanaatsi tayutaritatssawa.
9 Apanll yutaritshishpanee tputs kapeetchiya.
Itaru, yuwsha tputs Apanllimunari mang’ tatku, an urutamari taachiya.
10 Nimun ayamtaatiya yutaritshishpanee pangcheezich.
Kapungtaa nachungakuch, nda pangachchee. Izuuru pastachiya.
11 Itaru, yuw tputs Apanllee chinakana, an tsapurunasish wipapat, wachinllinuptatam,
wanasirimshinandari taachinlliniya.* 37:11 Matiwa 5.5 tsiyatsis nipta tatsamooru taaritamta.
12 Yutaritshishpan tputs Apanllchichee kiyung yachamaam chinakanaya.
Natsaksin, kiyung yachamaam zandkanaya.
13 Itaru, Apanllsha yutaritshishpanee; Waani ashtap, atiya,
watam yuwash zari waritakchu, izuuru wanichuwa.
14 Ashiriya, yutaritshishpan tputs wáchiruree yáyarusin,
Apanllchichee tputs tupantsakanaya.
Timbanllizeetssha itintangayarusin, tsak ashchinlliniya.
Ashkusin, Apanllchichee tputs pachamaam zandchinllinaya.
15 Itaru, Apanllsha waanpatatam wáchirur waanaatstatam pachachiya.
Timbanllzirineetsi izuuru ichipambayaru kasachiya.
16 Apanllchich maacheetsi pakchitaa payuksin, itaru Apanllimunsha kis taakanaya.
Yashingchichsha maacheetsi zapan payuktaa, kis taamaam wanindaja.
17 Apanllsha yutaritshishpanee izuuru kapeetchiya.
Itaru, wanasirimsheetsinaa tputs zurampatari tapachindachiya.
18 Apanll tputsee wanasirimshi ksutkiya.
Taársheetstam tachingkiya.
An tputs Apanllush urutari taachinlliniya.
19 Ashiri yuwash yuwariz maringakchu anush
Apanllchichinaa tputs marizimun nda kiyung kachiychinlliniya.
Watungasheem nda pshatachiya.
20 Yashingchich tputs izuuru kurayaru, muchinlliniya.
Karutaa puza tirookuch, kurataru ashiru kurachiya.
Amb ashkachu, Apanll undarar izuuru pastachiya.
Msas ashiru mzeetaru tsípatara ashchinllinaya.
21 Tputs yashingchich maacheetsi yáyaritaatssin, itaru nda tuwanpukanaya.
Itaru, Apanllchichsha maacheetsi yaksin, aranginasha tuwanpukanaya.
22 Yuwaa Apanll tputsee kis napku, anoo tputs watsapun wanasir ksutkiya.
Itaru, yuwaatssha nda kis napku, anoo watstamari kapeetchiya. Nda istachiya.
23 Ashiri tputs Apanllee chinaku, Apanllee kuk payuku, anoo Apanll machkiya.
Wanungish wanasirimshish machkiya.
24 Yashing xarashshee wayaktaa, nda izuuru pantsakiya.
Watam Apanllsha uwpat putayaru, tuxiyzakuwa.
25 Nuw kanungasimasi taaranguri, itaru natsha wachinayanllina.
Apanllee tiptsir uru yasakuri,
Apanllsha waanaatsi tiptsir nda minamtiyam kasarangiya.
Tiptsireemsha pishtats ndunimuna; tputsish pangaa nda mashtaranaya.
Wipaamtamsha katungats nduntam pishtarangiya.
26 Ashiriya, tputs Apanllee chinaksin, nayanimpatari taaksin,
tputseem mangutari maachiritaa istakiya.
Ashirucha, wipshtisin ashiritam tputseem mangutaritam istakitamanaya.
27 Ashiri yutaritshishee mapiyngtsa.
Saanaatsi wanasir ksutangtsa.
Ashkus, waanasirimshee pangatssa.
Yap tsap taakamchis anush uru kis taatssa.
28 Apanll tputsee tsiyatssee yaramapani chinakiya.
Waanaatsee tiptsir nda ayamtaati kasachiya.
Itaru, yutaritshishpanee izureeru waneeyaru, kasachiya.
Nlluranur izuuru pastachiya.
29 Itaru, Apanllinaa tiptsir urutamari tsapurunasush kis taachinllinaya.
30 Ashiri tputs wanasirimish uru mangpatari wanasiri tputsee tsiyatkanaya.
Tsiyatssee wanasirimsheetsimari yarkanaya.
31 Apanllee kuk izuuru chinaksin, nda pantsakanaya. Uru tachitkanaya.
32 Tputs yutaritshishpan Apanllee tiptsir natsaku, pachapi, átu pachamaam tsangakiya.
33 Itaru, Apanllsha tiptsiree nda kasakiya.
Tputs kurakap tputsee wanasirimshee tupantsamaam tsiyatkitaateesinaya,
Apanll waana tapachindachiya. Kurak tputsireetsi tayutarittapa, átu ashkiya.
34 Ashiri siysa Apanllee chinangtsa. Kukoo tuminungtsa.
Ashkachus, tputssha siyamun mang’ tatchinlliniya,
Ashiri Apanll siyaamanaa tsapuneemis ksutamaam panachiya.
Itaru, yutaritshishpani waneekchu, anoo siysa kchiptartis pangatssa.
35 Nuw tputsee yutaritshishpanee parangina.
Nuw kizpurtana. Nuwamari kasirina, tárangiya.
Yasin tamatarpari ashiru natumasamaam pzeena, pzeena sheeru, támungayaru,
wanasir wayanaptaru ashiru taarangiya.
36 Amb ashirangtaa, itaru musásiri izuuru tsiparangu,
nuwsha nachungaranguri, nda ayamtiyam parangina.
37 Mazinangtsa. Tputs wanasirimish Apanllee kuk payuksin,
urutari Apanllish pang’ mang’ ksaw wanasir taachinlliniya.
38 Itaru, Apanllsha yutaritshishpaneetssha tputs ashpaatsiri tpachingachiya.
Ayamtaati tputsee mantsirimshee pangcheezich, ndambaree.
Ichingaru Apanll wanichiya.
Izuuru kachingeeru kasachiya.
39 Yuwash yutarit tushiychu anush Apanll waanaatstanaa tiptsir tapachindachiya.
Apanll watacha tapachindampani.
40 Apanll waana tiptsiree tapachindakiya.
Yutaritshishpan tuxarakchu, anoo suwamaam istakiya.
Waana wizpurpa ksutku istakiya.
Watam iy Apanllimun mangini tatkiniwa.
40Apaa, nuw shiyaa kukish kis payukina, átu, anoo kamankiya.
Dapiyarini wayassi. Yandarangu, yasimpaneem urkar panarangiya.
1 Nuw Apanlleetsimari mangishi chinakuri taakina.
Yuwaa nuw kuruzki anoo Apanll mazinarangiya.
2 Nuw wizpuriri nduneerangu, tsipamaam waritarangitaati,
Apanll nuwaa tapachindarangiya.
Nuwaa itsipungayaru, yuwash tsap kis taachi anush ndatuma tsiparuri wayarangiya.
3 Wizpurpa nuwaa kuki murimash wayarangu,
nuwsha kaneeschee yaseesshish yaseekuri,
Apanllee, Wappari, tárangina.
Tputssha nuwaa parangusin, punirustarangusin,
Apanllimunarisha mang’ taturangtamanaya.
4 Yuw tputs Apanllee chinaku an mang’ kis taachiya.
Tputsee yutaritshishpani izuuru mapiykiya.
Yuwaa apanllputsee ungirtakana anungaz nda chinachiya,
watam Apanllee kapung chinakuwa.
5 Apaa, nuw shiyaa apartana.
Iyashchee istamaam kapung chinarangush, wizpurpatatish istarangsha.
Wanip iyaa istarangsha. Tputsee kamanpi, atitaati, pinasakani, watam ichingaru kamanimaam wanindaja.
Shiyapat tatsamaam wanindaja.
6 Tputs chinuzee pachayarusin, muchkusin,
anumun shiy nda mangish ksaksha.
Shiy anumun yutaritshishee yaramaam nda kapung chinaksha.* 40:6 Matiwa 9.13 tsiyatsis nipta tatsamooru taaritamta.
Mishat, tirikoo pangishish yushindakuni,
anumuntam nda mangish ksaksha.
Itaru, Apaa, shiy nuwaa tsiyatkush,
K’keetsi zurampatari tuminungcha,* 40:6 Utaáshucheema 10.5 tsiyatsis nipta tatsamooru taaritamta. tárangsha.
7 Ashirucha, nuwsha shiyaa, Tputsip nuwaa zanganingandama,
Shiy nuwaa kirakarishish kamanirangsha. Ashiri nuwsha,
8 shiyaa kukish tuminumaam mangi kizpur ksakina.* 40:8 Yuwaa nish átu anootstam Utaáshucheema 10.5-7 tayusima kamankiya.
9 Ashiri shiyashchi tputs shaniykusin, anush
shiyaa kamachtamareetsish tatsamooru tayaspatakina.
Nda minumtiyam niyrkina. Shiysha anoo yasaksha, Apaa.
10 Nuw nda zamaruri taakina.
Shiyaa kukish tsinsampaneetsish uru tputsee kamankuri taakina, atina.
Apanll uru iyaa ksutku taakiya. Iyaa tapachindachiya.
Tsipakchuni iyaa waanpee machchiya,
nuw tputsee tayaspatakuri atina.
Shiysha Apaa, uru iyaa chinakush, istaksha.
Ayamtaatiyam shiy chinashish pastacheeja.
Shiy kukish urutamari tputsirishish taachiya.
11 Apaa, shiy nuwaa ksarishpa. Urutamari nuwaa chinakush taangcha.
Shiy tsinsampantishcha.
12 Nuwaanamandari chayari zapan xarashish nuwash tushiykiya.
Nuw yutarit zapan ashirangi anoo ichingaru kamanimaam pinasakina.
Na nuwaa xarashish kámanakcha.
¿Tamayareezi nuwaana yutarit ashirangi anoo tushiychee?
Zapan taaru anoo nuw táchimaam pinasakina.
Muchishi zapan kasiru taariya.
Ashirucha, mangi tsíparangu, izuuru sambaytarangina.
13 Apaa, nuwaa nayaningandama.
Yutaritshishireetsi tchingangandama.
Mikeerush nuwaa istanda.
Zapshtarinllpa.
14 Mishat tputs nuwaa pachamaam zandkitamsinaya.
Ashiri shiysha yuwaa tputs nuwaa tayutaritkana anoo ipazangcha.
Waani paziksin suwasuwachinllinpa.
15 Waani kapung pazichinllinpa.
16 Itaru, yuw tputs shiyaa kukish payukana, anin mang’ ksaksin shambatchinlliniya.
Mishat, yuw tputs shiyamun mang’ tatkana anoomsha, Apaa,
shiy wizpurirish urutamari shiyash tachitamaam panangcha.
17 Apaa, nuw kapung mangi mantsakina,
watam kiyung kachiykinawa.
Ashiri Apaa, nuwaa mbizarishpa,
watam shiy nuwaa istakshawa.
Shiy nuwaa tapachindaksha.
Itaru Apaa, zapshtarinllpa.
Mikeerush istangandama,
Apaa, nuw shiyaa apartana,
Dapiyarini tárangiya.
42Apanllpanee tputs undarar arap machtarangu, Apanllish pang’ pshtupi átu, támararangu, tsiyatstar ashirangu, anoo kamankiya
Koréchich yasimpan tputs yandamarini.
1 Manllanus tsap puzash taaku, sachitku, kungungaz waapi átu,
nuwsha ashiritamti shiyangaz Apaa, támarakuri nachungakina.
2 Nuw shiyangaz sachitakpaz ashkina, Apaa.
Watam shiysha taarashipanshawa.
¿Ashinooja nuw shiyash pangish yusur pshtuchee? aturi,
3 shiyangaz kaschiritam psaantam tanukuri taakina.
Amb ashkuri sureemariti taakina.
Kundararshiti nuwaa, ¿Apanllirish yuwshta?
átangat ashkanaya.
4 Síru shiyash pangish tputspata kis pshtutarini,
anoo chinachintar ashkuri, kapung mangi mantsakina.
Watam na ndusha ashkinawa.
Yuwataati nuwma tputsee yamazayaruri, shiyash pangish kuseeruri, shambatkuni,
washunand mangini kis ungirtakuni, yasiyastar ashtariniya.
Yusur tamayareezi ashchi aturi, kapung mangi mantsakuri, tanutantar ashkina. Ashiritaati,
5 ¿Mayaama nuw sambaytachi?
¿Mayaama nuw mangi mantsachee?
Nuw Apanllimunari mangi tatkina.
Anootsimari ungirtakuri taachima.
An watacha nuw Apanlliri, tapachindampani.
6 Nuw kapungcha sambaytamaam zandki.
Ashirucha, shiyaatsimari kapung chinakuri taakina.
Araptaa kung Ortagamanda, mach Hermonamanda, Mispamandtamta uru mangishi shiyaatsimari chinakuri taakina.
7 Íwar machimand kung wazawash pantsaku, zaw shitaru, arap zunganeetar ashtariya.
Nuwamun kungpaz ashiru zaw, zaw shitarpaz ashku mangi mantsakuri taakina.
8 Ashtaa Apaa, shiysha nuwaa nda kasaksha.
Kaschiritam nuwaa chinakush istaksha.
Psaantam nuw yasiyastar ashkina.
Uru shiyapa Apaa, tsiyatkina, watam shiysha uru nuwapat taakshawa.
9 Apaa, Shiy tapachindampantishcha, atina.
¿Mayaamsha shiy nuwaa mapiyksha?
¿Mayaamaja mangi mantsakuri taachi?
¿Mayaama kundarari nuwaa kiyung yachaku taak?
10 Nuwaa kiyung yachaksin, napuritamti ichingaru ksukiya.
Urutari nuwaa tamundaksin, ¿Yapshata shiy Apanllirish? átangat ashkanaya.
Atitaateesinaya,
11 ¿Mayaama nuw sambaytachi?
¿Mayaama nuw mangi mantsachee?
Nuw Apanllimunari mangi tatkina.
Anootsimari ungirtakuri taachima.
An watacha nuw Apanlliri, tapachindampani.
43(Salmo 42 nish tspakiya)
1 Apaa, nuwaa tapachindangandama.
Nishuch tputs shiyaa chinakazinllinaja.
Yutaritshishpansincha.
Wayangichirirsincha.
Ashiri nuwaa tapachindangandama.
2 Watam nuw shiyaa Aparinawa.
Shiy tapachindampantishcha.
Nuwaa kundarari kiyungutaa yachaku,
¿Mayaamaja shiy nuwaa kasachish?
¿Mayaamaja nuw mangi mantsakuri taachee?
3 Ashiriya, Apaa, shaana wizpurirish zanganingi,
Nuwaa mangi tuwizpurtamaama.
Sheerush, shaanpee pangish machinda yap shiy taarish ambi.
4 Shiyash pangish yusur kuskachuri, sumeetsish pakchuri,
shiyaa kapung ungirtachima.
Tamburpa, kitarpa yasichima.
Shaana, Apaa, nuwaam mangooz ksashish pshtangandama shiyaa kis yasimaama.
Shiyamunari Apaa, mangi kis taakina.
5 ¿Mayaama nuw sambaytachi?
¿Mayaama nuw mangi mantsachee?
Nuw shiyamunari mangi tatkina.
Shiyaatsimari ungirtakuri taachima.
Watam shiy tapachindampancha.
46Apanll uru iyaa Israelchicheetsini ksutkiya
Koréchich tputs yandarangiya, tiruchizpa yasimaama.
1 Apanll iyaa ksutkiya. Iyaam wizpuree panakiya.
Apanllish kamungamaam uru taariya.
Yuwash xarashish taakchu anush istakiya.
2 Ashiriya, ¿mayaamaja punichich?
Mundaz mundaztakchitaa, misha tsap kizpuritaa zpoozakchu,
machsha pátangambachtaa,
marush imurish pantsambachtaa,
ashiritaa ¿mayaamaja nuw punichee?
3 Mar kapungtaati warastakchu,
mach kizpuritaa zpoozakchu, itaru nda nuw punichina.
4 Kungsha wanasirimish Apanllish yaktarini taariya.* 46:4 Apanll wanichu anu 22.1-2 tsiyatsis nipta tatsamooru taaritamta.
Anush tputs kungumun wip mang’ ksachinlliniya.
Watam waana Apanll wamari kasiru an anush taakuwa.
5 Waanaatsi yaktarini uru ksutku, tapachindachiya.
Zar taraseetaranllu anush kundararini kuskatssin,
Undarsha; Taraseekchu pshtuyani, atitaatssin,
ayamamtiyam nda kasachiya.
Watam Apanll waana naparu iyaa tapachindakiya.
6 Kizpuri kuk kimaku, tputs ztaru puniksin zamangachinlliniya.
Tsapurunasshuch kurak nungtachinllinaya.
Apanll izuuru wizpurpa tsapoo kapeetku pastachiya.
7 Apanll kizpurcha. Iyachchee Akoparinchicheetsini nlluranurini uru ksutkiya.
Apanllimun mangini tatkuni, urutamari iyaa izuuru tapachindaku taachiya.
Apanllishumarisha kamungchiniya.
8 Naapangints.
Apanll iyaa tsapurunasshucheetsini ichingarootsini tpuxtayanlliya.
9 Tapazpaneetsi tsapurunas ztaru;
Na Waapa. Zanayangints, tákchu,
Tapazpan ztaru zanayanllinaya.
K’chirpungoo ichingaru ichip ichip sheersin,
Turuwaatstam pátangambeeru kasayanllinaya.
Tapazpanee pshiyrshini sumasush mucheenlliya.
10 Apanll tputsee kamachtaku;
Na waapa. Zanayangints, tákchu; Nuw Apanlli Taarashipantana.
Tputsee urkar ztaru tiptsirpatatam nuwaatssha;
Shiy Apanlltishcha. Shiyamari kasirush taaksha, nuwaa táchinllinaya,
átcha Apanlli.
11 Apanll kizpuri iyash taakiya. Iyachchee Akoparinchicheetsini nlluranurini uru ksutkiya.
Uwamun kamungchiniya.
47Apanllimari kurak kasiru taakchu, tsapurunasshuch ztaru kis shambatkusin taachinllina, anoo kamankiya
Tputs Koréchich nlluranuri yandamarini.
1 Apanllee shambatkuni ichingaruni zamangayani.
Mangis ksaptari shambatkus zamangakus, Jai, jai, tángtsa.
2 Watam Apanll kizpureeru waamari kasiru tpuxtakiya.
Ichingaroom tsapurunas Apanllimari kurak taakiya.
3 Apanll Kanaanshuchee tputs tpachingarangu
watsapunee iyaamshat panarangiya.
Tputseetstam m’chachureemani wayarangitamta.
4 Apanll iyaa kapung chinarangu, iyaam waana tsapoo ipuseeru panarangiya.
Anush na iyshat Akoparinchichini kis taakaniya.
5 Na Apanll ichingaru kurakaam wayarangu, na mapiyshat uxinashimun kuxinkiya.
Ashiriya na iyshat mangini kis shambatkuni tamburtakuni, tirucheeni.
6 Apanllee shambatkuni yaseeyani.
Kurakareetsini ungirtakuni yaseeyani.
7 Apanlleem yaseesshish yandayaruni yaseeyani.
Watam wamari tsapurunasshucheetsini kasiru kurak taakuwa.
Mangiptis yaseengints.
8 Apanll uxinashimand kuxinaru tputseetsini ztaru ksutariya.
Ichingaroo tsapurunasee napkiya.
9 Tsapurunasshuch kurak Apanllpat tiptsir,
Apramarinchichpa, washunand shaniyeersin,* 47:9 Matiwa 8.11 tsiyatsis nipta tatsamooru taaritamta. Apanllee ungirtakanaya.
Watam Apanllimari tsapurunasshuchee kurak kasiru taakuwa.
Ashiriya, ichingaruni Apanllimunari shambateeni.
48Apanll waana tiptsiree ksutku, anoo kamankiya
Koréchich nlluranur yandamarini.
1 Apanll taarashipani waamari kasiriya.
Waana yaktarinshini, Irusarinush Apanllee ungirtamaam
wanasircha, waanpee pangu, machip Siyonshu.
2 Apanll machirini Siyon kizpurcha wanasiri.
Minumari mach ichingaru kasiriya.
Tputs ztaru machip Siyonamand mang kis shambtkanaya.
Watam anush Apanll, iy kurakarini, wamari kasiru an taakuwa.* 48:2 Matiwa 5.35 tsiyatsis nipta tatsamooru taaritamta.
3 Irusarinaa mbamari tandapunurangusin,
Undarar pshtumaam pinasakanaya.
4 Kurak shaneerangusin, Irusarinshuchee kasiyani, tárangitaatssin,
Itaru, kuskatssin,
5 Kizpurcha, táyarusin, napuxtayarusin, suwaranganaya.
6 Kapung puniksin, nungtaranganaya.
Kiz nlluraa tatsipku, wasurimun nungtataru ashiranganaya. Sheeru Apanll undararee kachingarangiya.
7 Boti marush kung kizpur kambusurush naanatan ashku, mikeeru ichip ichip ashku kachingkachu, ambpaz ashirangu Apanllsha undarareetsi kachingarangiya.
8 Tputs iyaa: Apanll yaktarini kizpurcha, táranganaya.
Natsha iysha anootstam, Apanll yaktarini kizpurcha, atitamaniya.
Apanll wamari kasiru waanaatsi yaktarini urutari ksutchiya.
9 Apaa, shiyash pangish pshtuyaruni,
mangini kis shiyaa chinakuni, Apanll urutamari iyaa chinakiya, atiniya.
10 Tsapurunas ztaru shiyaa ungirtachinlliniya.
watam shiy taarashipanshawa.
Shiyamari kasiru taakush, tputsee ichingarusin tatsamooru ksutaksha.
11 Iysha, Irusarinshuchini ichingaruni shiyamun mangini ksakuni, shambatchinlliniya.
Zuwanlltamani yuw minush Utaáshuch yaktash taakana
antamsin, shiyamuntam Apaa, shambatchinlliniya.
Watam iyaa chinarangush, tputsireetsish itsinsaru kamachtarangsha.
12 Yakat Irusarinap iturpirus, ichinguru napangints.
¿wanipaja tandapunuzush torre pshkurutara?
¡Tandapunuzi wamaneewa!
Sundar ksutamapan pang’ zapanitamta.
Yakat Irusarin kizpurcha.
Ashiri napeerus, yasayarus ipareetsis ichingaroo kamaningtsa.
Yuwaa kaneesich nllurtachinllina anootstamta kamaningtsa.
Apanll yaktarini kizpurcha, tángcha.
14 Iy Aparini urutamari wamari kasiru taarashipan taakiya.
¡An watacha iyaa itsinsaru urutamari machkiya!
51Apaa, nuwaa nayiningandama. Yutaritshishireetsi tachingandama, Dapiy tárangu, anoo kamankiya
Dapiyarini Betsabeyaa yutarit patatarangu, anumandsha Natán nambarangu, Dapiyarinsha nee yandarangiya.
1 Apaa, shiy uru chinampanish taaksha.
Ashiri nuwaa nayaninganda. Yutaritshishireetsi tachingandama.
2 Mangeetsi izuuru tachingeerush, mburish wayangandama.
3 Nuw kizpur yutarit ashirangina, Apaa.
Anoo mbizamaam pinasakina.
4 Nuw shiyaa tayutaritarangina;
Nuw ashirangi anoo, shiy, Izuuru watsta, tárangsha.
Nuwaa wanimaam waritarangsha. Shiy tsinastishcha.
Shiy tputsee waneekchush,
¿Chaka shiyaa, yutarittishcha tách?* 51:4 Yuwaa nish átu anootstam Romshucheema 3.4 tayusima kamankiya.
5 Itaru, nuw aneershi nllurtarangi anumandari yutarittana.* 51:5 Romshucheema 7.14-21 tsiyatsis nipta tatsamooru taaritamta.
6 Itaru, shiysha tputsee mang’ izuuru natstaksha.
Tputs shiyaa itsinsaru chinaku, shiysha wanasiri napaksha.
Anush Apaa, nuwaa mangi p’tseeksha mangoonamaama.
7 Ashiri Apaa, mangeetsi tchinganda.* 51:7 Utaáshucheema 9.13-14, 19 tsiyatsis nipta tatsamooru taaritamta.
Izuuru tachingeerush, mangi mburshinandarisha wayangandama, Apaa.
8 Nuwaa waneerangush, mangi kapung mantsakina.
Yusur shiyamun mangi tatkuri, mapiyri kis taapi, átana.
Istanda, Apaa.
9 Ashiri, yutaritshishireetsi mbizamamari izuuru kpitangcha, Apaa.
10 Nuwaa mangeetsi mburish tsarun ndunar ksangandama.
Sheerush, tuwizpurtangandama, shiyaa itsinsaru chinamaama.* 51:10 2 Koríndshucheema 5.17 tsiyatsis nipta tatsamooru taaritamta.
11 Apaa, nuwaa iwanlltarinllpa.
Kanish wanasirimshee nuwaa itutsinllpa, Apaa.
12 Síru yutaritshishireetsi ichinguru tachingarangush, mangi kis taarangina.
Ashiri na ashiritam mangeetsi yusur isichinda.
Wizpurirpatish chinasheemi wanasir panangandama.
13 Ashkachush, nuwsha tputsee yutaritshishpanee shiyaa itsinsaru chinamaam tayaspatachima.
Ashkachuri, uwsha yusur shiyash itsinsartam tachitchitamtaya.
14 Nda tputsee pachamaam izuuru watsta aturi,
Apaa, nuwaa istangandama.
Apaa, shiy nuwaa tapachindarangsha.
Ashiri shiy nuwaa itsinsaru chinamaam istakush,
nuwsha yaseesshpati, shiyaa; Apanll itsinsampancha, tputsee kamankuri táchima.
15 Apaa, shiy nuwaa kuki mureem wayangandama.
Sheerush, nuwsha shiyaa ungirtakuri, k’kipti shiyaa yasichima.
16 Shiyaam chineetsi muchamaam pangipish wayapi tina.
Itaru, anpa yutaritshishee yaramaam nda shiy kis napachsha.
17 Tputsee yutaritshishimand mang’ kapung mantsaku, anoo shiysha izuuru mangoo yaraksha.
Tputsee yutaritshshimand izuuru mang’ mantsaku shiysha Apaa, mangoo yaramaam nda watsta átsha. Uru yaraksha.
18 Apaa, tputsireetsish shaana yaktarinish Siyonash shaniykusin, wanasir napaksha.
Irusarinaa watandpunu yusur mbammash wanasir wayamaama istangcha.
19 Wanasiri napkachush, tputsirish shiyaam wakaraatstam, opeejaatstam shiyaam muchkusin,
shiy tputsireetsish chinachpasha.
Yutaritshishirineetsi yarachsha.
63Dapiyarini Apanllingaz támararangu, Undararee kasimaam istanda, tárangu, anoo kamankiya
Dapiyarini wayandamari. Dapiyarini Absalon pacharundama átu, apusap suwatat ashirangiya.
1 Apaa, shiyaa nuwcha Apari.
Nuw Shiyangaz támarakina.
Tputs tsap mazachinandari taaru, amb naayaru,
sachittaru, ashiritamti nuw shiyangaz kizpur sachitakpaz ashkuri támarakina.
2 Shiyash pangish pshtupi tina.
Shiyaa pangasi, atitamana.
Anush shiyaatsimari chinamaam zandkina.
Shiy kizpurtishcha, wanasirish.
3 Shiyamari kasiru nuwaa chinakush,
tsipaneetstaati nda pachindkina.
Ashirucha shiyaa mangi kis ungirtakina.
4 Urutari nish tsapurunasush taakuri,
shiyaa ungirtakuri taachina.
Kuwee íwar paxayeeruri shiyapat tsiyatchina
5 Shiyamun mangi kisa.
Tputs kapung katungeeru, tazazayaru, mang kis taaku,
nuwsha shiyaa ungirtakuri ambtam ashchina.
shiyaa kis yasichina.
6 Psaantam Apaa, maamaw ashkuri,
shiyaatsimari mangishi chinachintar ashkina.
7 Waninll nuwaa istakush ksutakshawa.
Ashirucha, mangi kis nda punikuri taakina.
8 Shiyash izuuru tachitpi tina.
Shiyaa kasamaam zandkeezi.
Kuwish mbutsanungich nuwaa mbam patsisakush,
nda kasaksha.
9 Tputs nuwaa pachamaam zandkitaatssin,
waantatamsin k’chirpungamun tsipachinlliniya
Wazawash waantsush tputs
tsiparpat wan washunand taachinlliniya.
Wanutseetsina tumuz manginshuch katungchinlliniya.
11 Itaru, nuwsha shiyamun Apaa, mangi kis taachina
Shiy nuwaa tputsireetseerush kurakaam ínarangsha.
Ashiri siysa Apanllis tiptsiris, Apanllee mangis kis yaseekus ungirtangtsa.
Itaru, wayangichirirsha tputs izuuru zamayarusin taachinlliniya.
Ashiriya, Apaa, wapparee.
67Tputs ztaru Apanllee ungirtachinllinaya, anoo kamankiya
Yasimpan tputs kitarpanpat yaseeyarusin anoo yandarangiya.
1 Shiy Apaa, uru iyaa nayaniyarush, istangcha.
Iyaa wanasiri napangcha.
2 Ashkachush, tputs ztaru, Apanllee mangooneeni.
Iyaa tapachindachtamparee, táchinlliniya.
3 Apaa, tsapurunas ztaru shiyaa ungirtachinllinpa.
Shiyamun mang’ kis shambatchinllinpa.
4 Tputs ztaru ichingurusin shiyamun mang’ kis yaseeksin, zamangachinllinpa.
Shiysha, Apaa, kurakish tputsee ichingarootssin ksutkush k’kuzee yaramapan taaksha.
Tatsamooru tputsireetsish chinaksha.
5 Ashiri Apaa, tsapurunas ztaru shiyaa ungirtachinllinpa.
Shiyamun mang’ kis shambatchinllinpa.
6 Apanllirini iyaam kapung istarangu,
na tsapurunasish waanaatsee kuk wanus pzapaneerangiya.
7 Apanll uru iyaa chinachiya.
Tputs ztaru Apanllee chinachinllinpa.
Mang’ kis Apanllimun shambatchinllinpa.
69Tputs Dapiyarinee kiyung yacharangusin, Dapiyarinsha, Apaa, istanda, tárangu anoo kamankiya
Dapiyarini wayandamari.
1 Apaa, nuwaa tapachindanda.
Papcha, nuwaa pachamaam kapung zandeenllinpa.
Tputs kungush imurish yangakchu,
tamatarpari ashiru itamsamaam pinasakina.
Kung wizpur nuwaa kapeetamaam zandkiya.
3 Apaa, shiyaa, Istanda, aturi,
kapung kuruztat ashkuri, yarpuni ksukshita.
Shiyaam kutakuri, kapung tanukuri, kachi manamawshita.
4 Tputs zapan msangarusin, nuwaa natsakanaya.* 69:4 Yuwaa nish átu anootstam Wanga 15.25, atitamta
Mucheetsich kasiru tputs nuwaa zapan natsakanaya.
Mangutari nuwaa tayutaritkanaya.
Maacheetsi shuchitarpazi ashiru,
nuwaa taxiyrsin; Tuwanpunda, átangat ashkanaya.
5 Itaru Apaa, shiy nuwaa yasaktishcha.
Nuw yutarit ashiranginaareena, anoo shiy izuuru yasaksha.
¿Tamayareezi yutaritshishireetsi pishuchi?
6 Apaa, shiyamaricha kizpurish.
Iy shiyaa Israelchichini Apanllirtanicha.
Iyashuch zapan shiyamun mang’ tatkanaya.
Ashiriya, tputsirish nuwamand yutaritshishiri pazirusinapa.
Kundarari nuwamand tputsireetsish tpazarusinapa, átana.
7 Shiyaa kapung chinaki, anumand tputs nuwaa yutari tsiyatkanaya.
Nuwaa tpazakanaya.
Kizpur pazirsa.
8 Zuwanlli tunar tamapari ashirusin nuwaa niyrkanaya.
9 Itaru nuwsha, pangimandaritish wamin tsiyanis nuwaa kasichiya.* 69:9 Yuwaa nish átu anootstam Wanga 2.17 tayusima kamankiya.
Tputs shiyaa tpazamaam zandkusin,
nuwaatssha tpazaktamsinaya.* 69:9 Yuwaa nish átu anootstam Romshucheema 15.3 tayusima kamankiya.
10 Nuw mangi kapung mantsakuri, tanukuri, mishat mangukuri,
nuwaa yutarit tsiyatkanaya.
11 Mangi mantsakuri, kamari kuchar kamartakuri,
nuwaa paksin, ichingarusin stakanaya.
12 Tputs yaktaa washitungash shaniyeersin,
nuwaa tsiyatstangat ashkusin taakanaya.
Karusamapantaatssin nuwaa tayutaritkusin yaseekanaya.
13 Itaru Apaa, nuw shiyaa kapung tsiyatkina.
Ashiri yuwash shaana zandkachish, anush istangandama.
Shiy kapung chinampantishcha.
Nuwaa kapung chinaksha. Ashiri tapachindangandama.
14 Nuwaa imurish yangamaam ksarishpa.
Tputs zapan nuwaa natsakanaya.
Itaru, shiysha nuwaa tapachindangandama.
15 Mureenush nuwaa ksarinllpa.
Nda nuwaa mureen pumaam izuuru istanda.
16 Apaa, shiy nuwaa istangandama.
Shiy wanasiri chinaksha. Shiy kchinamishtishcha.
Ashiri nuwaa nayanikush, wanasiri napangandama.
17 Apaa, shiy watam nuwaa tputsirshawa.
Ashiri Apaa, nuwaa mapiyrinllpa.
Tputs pacharundama, átana.
Ashiri mikeerush nuwaa istanganda.
18 Nuwanung kayumayarush, nuwaa tapachindanda.
Kundarareetsi arap zanganingcha.
19 ¿Waninll nuwaa natsakanawa?
Nuwaa tpazakanaya.
Mangutari nuwaa mantsir tsiyatkanaya.
Shiy anoo ichinguru yasaksha.
Nuwaa kundarari paksha.
20 Nuwaa uru yutarit tsiyatkusin, kapung natsaksin,
mangi kapung mantsakina.
Mangi mantsakuri wizpuriri ndunareekina.
Nuwaa mangeetsi tuwizpurtapanda, atitaati,
itaru tputs nda minumtiyam nuwaa istamaam zandaranganaya.
21 Nuwaamsha katungtsee tspaspa íseersin panakanaya.
Kapung sachitaranguri, kapizsha nuwaam panakanaya.* 69:21 Matiwa 27.34, 48; Márkosa 15.23, 36; Lukasa 23.36; Wanga 19.28-29 tsiyatsis nipta tatsamooru taaritamta.
22 Ashiri, Apaa, uwsha shiyaam katungamaam shaniykusin, shiysha waneengcha.* 69:22 Yuwaa nish átu anootstam Romshucheema 11.9-10 tayusima kamankiya.
23 Wach mchus tamapari ashiru mangu masaru taachinllinpa.
Uru kiyung kachiychinllpa.
Urutamari puniksin, wanumb nungtachinllinpa.
24 Shiy kapung tsiyantayarush, waneengcha.
Tsiyanish zambazarinllpa.
Izuuru waneengcha. Pakchiyam nayanirinllpa.
25 Mishat, kundarareetsi pang’ kapeeteerush ksangcha.
Anush minumtiyam taarusinapa.* 69:25 Yuwaa nish átu anootstam Tayaspatampani 1.20 tayusima kamankiya.
26 Shiy nuwaa kiyung yacharangish,
anoo kasiranasha uwshtisin nuwaa kiyung yachakanaya.
Nuwaa stakanaya.
27 Ashiri shiysha Apaa, aranginasha waneengcha.
Nayanirinllpa. Izuuru waneeyarush ksangcha.
28 Kirakarishish yuwash shaanaa tputsirish sur yandam taaru,
anush kundarareetsi sur izuuru tchingangcha.
Watam nda urutamari shiyapat taachinllinawa.
Ashiri tputsiriptish sur washunand kundarareetsi sur yandarinllpa.
29 Apaa, Nuw kapung kiyung kachiykina. Istanda.
Nuwaa tuwizpurtanda. Tapachindanda.
30 Ashkachush, nuwsha shiyaa ungirtakuri, yaseesshish yasichima.
Mangipti itsinsaru shiyaa ungirtachima, atina.
31 Ashiriya, chiy tputsich chinuzee toro pachayaruch,
nduntaati ashiru karupanaa witspatari, wachizuppatari muchkachuch,
anoo Apanll kispari napchiya.
Itaru, chiy tputsich mangiptartich itsinsaru Apanllee ungirtakuch,
Apanllsha aranginasha chiyaa kis napkiya.
32 Anoo Apanll pakchu, mang’ ksaku,
chiyaatssha mangeemich ksashish wayachiya.
Apanllingaz támarakuch, tuwizpurtachiya.
33 Watam tputs kiyung kachiyku, Apanllee istapanda átu,
mashku, Apanllsha uru mazinakuwa.
Tputs tumanamaw taakana, anootstam nda niyrkiya.
34 Ashiri kanindshuchis, mishat tsapurunasshuchis, mishat marshuchis,
ichingarus, Apanllee ungirtangtsa, nuw siyaa atina.
35 Apanll waana Siyonshuchee tapachindachiya.
Yusursha Utaáchchee yaktarin yapungachiya.
Sheeru, Apanll tiptsir anush taachinllinaya.
Amuytachinllinaya.
Wipshitisin izapaneeyarusin, kapungushsha yakat taachinllinaya.
Apanllchichinandarishtisin anush taachinllinaya.
Ashiri na kamaneena Dapiy kiyung kachiyku, Sitatsti, tárangu anootsi.
72Apanll ipusamarini tsapurunaseem kurak taachu anoo kamankiya
Salomonarini wayasi.
1 Apaa, shiy ipusamareetsish kurakaam ínakchush,
wizpureetsish tputsee itsinsaru ksutamaam, panangcha,
2 Ashkachush, kuraksha chinampa tputsireetsish
ksutku, tsiyatssee wanasir yarku,
pukireetstam wanasiri istachiya.
3 Yuw tputs machip taakana, antamsin wanasirsha mapiyrsin taachinllinaya.
4 Kurak pukiree tputs istakchu, wanasirsha tsiyatssee yarku taachiya.
Wipawaatstam istakchu mapiyrtamsin taachinllinaya.
Watam tamundampanee tputs tununumbayaru kasachuwa.
5 Urutamari an kurak taachpa.
Zar, misha tsup tamaparee ashiru urutamari taachpa.
6 Kurak ashkachu, tputsee kapung istachiya.
Sin sinakchu, mzats tatsumim kis kxuntaru,
kuraksha ambtam ashiru tiptsiree istakchu, kis
taachinllinaya. 7 Nduma tsup pastachu,
kurak tiptsir waanpatatin wanasir tsiyatkusin,
mapiyrsin kis taachinllinaya. 8 Kurak tputsee ztaru ksutku, wamari kasiru taachiya.
Kung Eufratismand yaru, ichingaru tputsee wamari kasiru taachiya.
9 Undararshitisin, tsap puzap taaksin, waantatamsin,
tutunlltayarusin, Kurakaa, Shiyaa kukish payuchinipa, puniksin táchinllinaya.
10 Tarisshuch tputs urkar, Sambashuchtam urkar,
Sibashuchtam urkar, arapcheewtamsin minpich tputs urkari,
ichingarusin kurakaam maacheetsi wanasirimshee yushindayarusin,
mangutari kurakaamsha panachinllinaya.
11 Ashiri tsapurunasshuchsha kurak ichingarusin waatsimarisha tutunlltaksin taachinllinaya.
Tputsee ztaru kurakaa wamachtasheetssha payuksin taachinllinaya.
12 Pukirsha tputs, Kurakaa istanda. Tpachindanda, tákchu, kuraksha tputsee taárash tapachindachiya,
Watam wamin istamaama ndunariwa.
¿Chakaja pukiree istach?
13 Kuraksha waanaatsi tiptsir chinampatari tuwizpurtachiya.
Pukireetstam tputs taárasheetstam tapachindachiya.
14 Tputs Kurakaa tiptsiri kiyung yachamaam zandkitaatssin,
uwsha tiptsiree tapachindachiya,
watam kapung chinakuwa.
15 Urutari kurak kasiru taachiya.
Sambashuch tputs orootsee kurakaam panachinllinaya.
Kurakaam Apanllee urutamari mashkusin taachinllinpa.
Sheeru, Apanll urutamari istaku taachiya.
16 Ashkachu, wanus zapan iyash tsapuni taachiya.
Machpitam wanus zapantam tatsumim paratungachiya.
Libanush tsap tamapari ashiru wanusi tsapurunasush izuuru tatsitchiya.
Chirichir tamaparee ashiru izapanichiya.
17 Tputs urutamari kurakaa sur yasachinllinpa.
Urutamari zar tamapari ashiru kurakaa taachpa.
Ashkachu, ztaru tputs kissha taachinllinaya.
Wamachtashee wanasirimshi uru payuchinllinaya.
Tsapurunasshuch tputs ichingurusin kurakaa ungirtaksin,
Shiyamari kasirush taaksha, táchinllinaya.
18 Apanll Taarashipani iyamari Israelchichini Apanllirini
taakiya.
Wamari kasiru wanasircha.
Waamari iyaa kizpur istakiya.
19 Shiysha Apaa, urutamari Taarashipanish taaksha.
Shiyamari wanasirtishcha.
Shiyamari tapachindampantishcha.
Apaa, tputs ztaru shiyaa wanasirimshireetsish yasachinllinpa, atina.
Ashiri Apaa, Wappari.
20 Anumari apap Dapiyarini mangush chinarangu, shiyapat tsiyatku tárangitamta.
73Yashingchich tputs sambarchimunpaz ashiru naakana, anoo kamankiya
Asafarini yandarangu anu.
1 Apanll iyashchee Israelchicheetsini kis istakiya.
Tputs mang’ yaramaw taaku anoo Apanll kis istakiya.
2 Itaru, nuwsha Apanllee chinaktaati,
sambarchishpaz ashiru pakchim pantsamaam pishtarangina.
Apanllee kasamaam pakchim pishtarangina 3 Watam mangishi yutarit chinaranguri,
¿Tamashta tputs yashingchich yutarittaa taaksin, shamangarsin kis taakana?
Nuwsha ashingasi, mangishi tárangina.
4 Uwshtisin tsipatsee nda punikanaya, watam
nda kas yutakanawa.
Nda kiyung kachiykanawa.
Itaru, pukir tputs urkir ndunar,
¿Maypataja maacheetsi paxanxchi? atusin, kiyung kachiykanaya.
Yashingchichshat, kurikpan, mapiyrsin kis taakanaya.
6 Waanaatsi kis tuwaraksin, wayarangashirini xanumba ashkanaya.
Pukireetssha natsaksin, kiyung yachakanaya.
7 Kapung katungkusin, wanuts kapungu, tash kapukpuru wach shunlleew ashkanaya.
Mantsir chinaksin, tputsee tamapingaksin,
waamaritssin kasimaam zandkanaya.
8 Sheersin, tputsee kasiyarusin stakanaya.
In tputs mang’ ndunparee, atusin,
aranginasha kiyung yachakanaya.
Pukireewaa wintsareem wayakanaya.
9 Apanllee natsaksin yutarit tsiyatkanaya.
Ichinguroom tputs ngitzee wayakanaya.
10 Ashkusin, tputssha, ¿Ndusha zurku át? atusin,
yutaritshishpanip tachitamaam zandkanaya.
11 Waanpatatin tsiyatkusin, ¿Kaapaneeja Apanll kurikpanee kuk mazinak?
¿Apanll kaapaneeja pak? Ndunparee, atanaya.
12 ¡Pa, in urkirpan tamara!
nduntaa tarawaztaksin, aranginasha kurikee putakanaya.
13 Nuwsha, ngutparina wanasir taakina.
Mangi yaram taaktaati, itaru ichinguru zari Apanll nuwaa waneekpaz ashku,
kiyung kachiykuri taakinawa, átssincha tputsi.
15 Itaru, nuwsha anumashee chinarangeezi.
Anumashee tsiyataranginaareena ashiru,
Apanllee tiptsir tayutaritaranginaaparina.
16 Nuw nda tsiyatarangtaati, itaru mangishi chinaranguri,
¿Tamari yashingchich kis taakana? táranguri, yasamaam zandaranguri, xapoorangina.
17 Minush zari shiyash pangish, Apaa, pshturanguri, shiysha mangeetsi mangoonamaam p’tseerangsha.
18 Yashingchich kurikpaneew sambarchimunpaz ashirusin naakanaya.
Yuwash nda chinarana anush,
shiysha Apaa, tununukpaz ashkachush wazawush pantsachinllinaya.
19 Ayamtaati nda kis taachinllinaya.
Napuxtayarusin, sitatstee táchapsinaya.
20 Taárashee tputs pamazukpaz ashku musásiri pastachinllinaya.
21 Apaa, nuw nduma mangoonchuri, mangishi kapung tsiyantarangina.
Nuw wanipa yutarit chinarangi.
22 Mangshari ashirangina. Nda mangoonarangina.
Manginshuch ashiruri, nda mangoonkuri tárangina.
23 Itaru Apaa, yutarit chinarangitaati,
shiysha kuwiptish nuwaa mbam patsisakush, nda kasaksha.
24 Shiyash itsinsaru tachitamaam nuwaa mangi p’tseeksha,
Shiyash kuskachuri, shiysha nuwaa mangish ksaptari, Naani, táchsha.
25 Kanindap shiyangzimari nuw kusamaam zandkina.
Nuw shiyapa ipuneeruri taakuri,
¿mayangazeeja nuw nish tsapurunasush tamarachee?
26 Nuw nutsi mizpurishtaati,
itaru shiysha Apaa, nuwaa nda kasakush arang tuwizpurtaksha.
27 Itaru, yuwaatssha tputs shiyaa tuwanlltakana, anoo
shiysha tpachingayarush kasachsha.
28 Itaru, nuwsha shiyaa nda kasakina.
Nuw shiyangzimari ipunamaam chinakina.
Shiyamunari Apaa, kamungkina.
Tputsee kamankuri ¿Wanip nuwaa Apari istaka? táchina.
Ashiri, Apaa, wapparee.
80Yuwapur Asiriyashchi tputs Israelchichee kasiyarusin, zapan waanpee watsapun muchchureem machtarangana, anpur Asafarinchich tputs kapung mang’ mantsarangu, nee yaseesshee yandarangiya
Asafarinchich tputs yandamarini; yuw Apanllish pang’ Irusarinush yasimpan taarangu, anoo.
1 Apaa, shiyamari Osiyarinchichee ksutarangsha.
Opeejaa ksutamapan tamapari ashirush machtarangsha.
Shiy kanindush kurakish kuxinshishimunish kuxineerush,
sundarurish shiyaa ksutkanaya.
Ashiri Apaa, iyaa k’kini mazinangcha.
2 Iyashchee tputs, Osiyarin nlluranuri Efrayinchichee, Manaseschicheetstam wanasiri napangcha, Apaa.
Mishat Benjaminchicheetstam wanasiritam napangcha.
¡Támangi, Apaa! Wizpurpatatish tputsee tapachindangcha.
3 Apaa, yusur iyaa ichingarootsini wanasir taamaam wayangcha.
Iyaa wanasiri napkush, tapachindangcha, atiniya.
4 Apaa, shiy kizpurtishcha.
Shiyamari kasirush taaksha.
¿Ashiri mayaamsha tputsireetsish nda istaksha?
Iy shiyaa, Istapanda atuni, mashkuni,
itaru shiysha tsiyantakush nda iyaa istaksha.
¿Ashinooja tsiyanis zambazachish?
5 Iyaa kapung kiyung yacharangush,
nda katungkuni, nduntam waakuni,
ichingaru zar tanukuni taakiniya.
6 Minshuch tputs iyanung watsiri taakana,
anin iyaa tsapunee itutsimaam zandkanaya.
Kundararini iyaa kasirangusin, iyaa stakanaya.
7 Apaa, shiyamari kasirush taaksha.
Yusur iyaa wanasir taamaam wayangcha.
Iyaa chinakush tapachindangcha.
8 Iyaa zitaminarineetsini Ijiptomand tsap kizarunaatspaz ashirush,* 80:8 Matiwa 21.33-43; Wanga 15.1-6 tsiyatsis nipta tatsamooru taaritamta. xpuyarush, nish Kanaanushsha tsap yushindarangsha.
Kanaanshuchee tputsee kasirangush, tpachingarangsha.
Sheerush iyashcheetssha kizarunaatspaz ashirush anush tsap tatsumirangsha.
9 Karutaatssha wanasir puyakpaz,
sheerush, kizarunsha zapan kxunarangiya.
Izuuru ashchiri tsapoo tatsitarangiya.
10 Macheetstam íwar izuuru ashchiri yambutarangu,
wapzar zapan pzeeneeru, wanasinarsha wazurantam kanungarangiya.
11 Zapan izapaneerangu, marshutam kusaranganaya.
Mishat, kung Eufratisshutam kusaranganaya.
Iyashcheetssha tputs ashikpaz ashirush iyaa izapaneerangsha.
12 ¿Ashiri natsha mayaamsha tandapunuzeetspaz ashiru tunuparangush, iyaa nda wanasir ksutaksha?
Tputs iyaa kiyung yachakanaya.
Na tputs ngootsip naakchusin,
kizarunaa wanus pusayarusin, kapeeta kapeeta ashkanaya.
13 Mishat, manginshuch kazum, kázamzitam
kizarunapaz wanus ashirusin katungkusin, iyaa kiyung yachaksin taakanaya.
Wapzareetspaz ashirusin iyashchee ichip ichip ashkusin pamuxakaniya.
14 Apaa, shiy kizpurtishcha.
¿Mayaamsha nda iyaa nayaniksha?
Apaa, tputsireetsish kanindamandari napangcha.
Iyaatssha kizarunareetspazish ashiru yusur ksutangcha.
Izuuru wanasir iyaa napangcha.
15 Watam shaana tatsumarangshawa.
Shiy iyaa nish yushindarangush, tatsumikpaz ashirangush kis ksutarangsha.
16 Itaru, kundararini tzayarusin, tirooranganaya.
Ashiri, Apaa, shiysha kundarareetsini tpachingayarush ksangcha.
17 Itaru, tputsireetsinaarish, yuwaa kapung chinakish ipusirangish,
anootsinaa tuwizpurtangcha.
18 Ashkachush, iysha ayamtaatiyam shiyaa kasacheezini.
Taarasheemani kaneesich iyaam panangcha.
Ashkachush, iysha Apaa, yusur shiyaatsimari tsiyatkuni taachinipa.
19 Apaa, yusur iyaa wanasir taamaam wayangcha.
Iyaa chinakush tapachindangcha.
84Apanllpan tputs, Apanllip pang’ naamaam pinasarangu kapung naamaam támaraku, anoo kamankiya.
Koréchich tputs wayasi. Yasinpaneem Apanllish pang’ yasimaam yandarangiya.
1 Apaa, shiy kizpurtishcha.
¿Tamara shiy pangish wanasiree?
2 Nuw shiyash pangish tipuranllizshumari napamaam kapung támarakina.
Pshtuyaruri, mangi ksakuri shiyaa ungirtakuri yaseekina, Apaa Taarashipani.
3 Tsiripchitaa shiyash pangish mapiyru kis taakanaya.
Suminungish mapiyrsin ngichtakanaya.
Zangatatam ixateersin, anushsha iparinayarusin, kis taakanaya.
Ashiri nuwsha tsiripich ashiritam ashingasinda aturi, támarakina.
Apaa, nuwcha shiyaa kurakari.
Shiy tsapurunasee kanindaatstam shiyamari kasiru taaksha.
4 Tputs shiyash pangish taaksin, mang’ kis taakanaya.
Shiyaa uru yasiyastar ashkusin, ungirtakanaya.
5 Tputsirish shiyamun mang’ kis taakanaya.
Ashiri shiysha tuwizpurtangcha.
Uru mang’ kis, Apanllip pang’ naapani, atusin,
shiyap pangish, machip Siyonap naakanaya.
6 Naakchusin, tsap sur Tanushinung tushiykchusin,
shiysha istakush, nda sambaytakanaya.
Sin sinakchu, tsapoo kachachtakchu,
kissha aranginasha naakanaya.
7 Ashiri mang’ ksaptari nda sambaytakusin,
shiyap pangish machip kárkanaya.
Siyonash kuseersin, shiyash pshtukanaya.
Shiy kizpurtishcha Apaa.
8 Apaa Taarashipani, shiyamari kasiru taaksha.
Iy Israelchichini shiyaa Apanllirtanicha.
Ashiriya, nuw shiyaa mashki anoo mazinangcha.
9 Apaa, shiy iyaa kurakarini ipusarangush,
wanasiri napangcha. Ksutangcha.
10 Shiyash pangish pshtumaam kizpurcha wanasiri.
Zapantaa zari arap taakuri nda mapiykina.
Itaru, shiyash pangish minamaritaatiya zar taakuri, mapiyruri kis taakina.
Mangi kis mapiyruri taachina.
M’chachtaati, shiyash pangish tuchinamapan taakuri,
kisshapari taachina.
Itaru, tputs yutaritshishpanpa taakuri,
¿antaati ksaja taachi?
11 Shiy Apaa Taarashipani,
zar tamapari ashiru iyaa tuwasineekush, iyaa ksutaksha.
Yuw tputs itsinsaru taaku, anoo kapung chinakush,
shaanshu pangish tapshtukush,
Uru wanasiri ksutaksha.
12 Apaa, shiyamari kasiksha.
Tsapurunaseetstam, kanindaatstam ichinguru kasiru taaksha.
Shiy tputsirish shiyamun mang’ tatkusin, mang’ kis taakanaya.
87Tputs ztaru Apanllimun nllurtakchu, Apanllichcheemsha kinachinllinaya
Korérinchich yasimpan tputs yandamarini.
1 Apanll machee Siyona yaktarineema ipusarangu,
anush patuzinazee mbam pashuchirangusin pangurangana.
2 Apanll Israelchichinee yaktarini ichingaru kis napkiya,
itaru Irusarinaa aranginasha kasiru kis napkiya.
3 Tputs Irusarinaa tsiyatkusin; Kizpur wanasiri. Apanllcha yaktarini átssincha.
[Apanll anush waana panguseem ipusarangu, na uru ksutku taachiya, atanaya.]
4 Apanllsha tsapurunasshuchee napkachu;
Ijiptshuch tputs, Mishat Babiloniyashuchtam, Filistewshuchtam, Tírshuchtam, Etiyopshuchtam
anshuch tputs zapan nuwamun nllurtarangana.
Ashiri nuwsha, Irusarinshuchtam tputsee, táchima.
5 Tputs ztaru nuwaa mangoonkusin,
nuwsha, Irusarinshuch tputsi, táchima, tárangiya Apanlli.
Apanll waana yaktarinish tiptsirpata urutamari kizpur taachiya.
6 Tiptsiree sur kirakamun yandakchu;
Nee nuwamun nllurtarangu,
ashiri Irusarinshuch tputsi, yandayaru táchiya.* 87:6 Lukasa 2.1-3 tsiyatsis nipta tatsamooru taaritamta.
7 Sheeru Irusarinush ichingarusin, mang kis yaseeksin, michitkusin,
Apanllimun nllurtaranguni Irusarinshuchtanicha tputsini, yaseeksin táchinllinaya.
89Apanll Dapiyarinpa amikurtarangu, Urutamari shiyaa nlluranureetsish kizpur kuraktam wayachima, tárangu, itaru nlluranursha kapung yutarit taarangsin, Apanllsha istamaam ngatarangu, anoo kamankiya
Apanllpan, Etána, Esrachich tputs, yandamarini.
1 Apanllee nuw uru yaseekuri, Shiy Apaa, nayanimpantishcha.
Shiy k’keetsish minamari payuksha;
nda ayamamtiyam kapeetaksha.
Ashirucha, nuwsha uru yaseekuri tputsee anoo kamanimantar ashkina.
2 Apaa, nuw tputsee kamankuri, Apanll chínash ayamtaatiya pastacheeja, atina.
Apanll waanaatsi kuk urutamari payukiya.
Apanlli kuk kanind tamaparee ashiru urutamari taachiya, atina.
3 Apaa, sirútama shiy minam mangooz chinayarush, Dapiyarineetsi wanasir tsiyatarangsha.
Tsiyatarangush amikurtarangsha.
Shiy Dapiyarineetsi tsiyatarangush;
4 Shiyachich nlluranur uru kushimunish kurakaam kinataranllu taachinlliniya,* 89:4 Yuwaa nish átu anootstam Tayaspatampani 2.30 tayusima kamankiya. tárangsha Apaa.
5 Apaa, shiy sundarurish shiyaa ungirtaksin; Apanll uru waanaatsee kuk payukiya. Apanlleem xapoomaam wanindaja, atanaya shiyaatsee.
6 Apaa, ¿Antaati apanllputs minamtiyam shiyapa waritarazinllinaja?
Arutamatam ¿antaati shiyapa tatsamooreeja?
Nduni, wanindaja.
7 Shiyamari kapung kasirush kizpur taaksha Kanindpich sundarurish ztaru anu shiyaa taturpiranaya.
8 Shiy kizpurtishcha kurakish.
Wizpurireetsish shaana payuksha.
Shiyamari itsinsaru tsiyataksha.
Nish tsapurunasish ¿yapeeja ashima pangchich?
Shiyapa tatsamooru wanindaja.
9 Shiyamari kasiksha.
Mus kapungumash mar warastakachu, anoo shiysha wizpurirpatish tuzanaksha.
10 Shiyamari kungushchee watarimashee kapunguwaa kamiran kasiksha.
Maachee tsipama ashiru kamiran kachingaksha.
Wizpurirpatish kundarareetstamtish kasiksha.
Tusuwambeerush, arap kapeetambayarush, kasaksha.
11 Kanindaatstam, misha tsapurunaseetstam shaana urutamari taamaam tinarangsha.* 89:11 1 Koríndshucheema 10.26 tsiyatsis nipta tatsamooru taaritamta.
Tsapurunasee tinarangush ichingaru maacheetsi tinayarush wayarangsha.
12 Shiyamari ichingaru ashpiri tsapurunasee tinarangsha.
Macheetstam íwar tinarangush, mach Taborshuchtam, mach Hebronshuchtam tinarangush,
mang’ kis shiyamun shambatkusin; Apanll kizpurcha wanasir, atanaya.
13 Apaa, pachtamishish wizpurish kapung taariya.
Kuwish mbutsinungich wizpurirpatish shiyamari kasiksha.
14 Shiy kurakarush, shaana tputsee mangoo yasayarush, wanasiri wayaksha.
Misha, urutamari kurak wanasirimash watsinas taaksha.
Uru iyaa tputseetsini chinaksha, iyaa nda kasaksha.
15 Ashiri Apaa,
Tputs shiyaa kis shambatkusin, ungirtaksin, uru mang’ kis taakanaya.
Shiyash nungish tachitkusin, ’sinish kis taakanaya.
16 Shiyamunatam mang’ ksakanaya.
Watam shiyamari itsinsaru tputsee yasakush itsinsaru tsiyatakshawa.
17 Apaa, Iy tputsini shiyamun wizpurirish kchitaruni wanasir taakaniya.
Shaana zandkush, iyaam wizpureetsish aranginasha panaksha.
18 Shiy wizpurirpatish xanxapishpapaz ashiru iyaa kámanaksha.
Iysha Israelchichini Apanllee iycha kurakarini. Kizpur wanasircha, atiniya.
Ashiri, Apaa, mazinangcha: 19 Apaa, sirútama shiysha miranish tputsireetsish tsiyatarangush,
Nuwsha tputsee, yuw nda puniku anu, kurakaam ipusarangina.
Kizpur putit nda puniku, anoo ipusaranguri istarangina.
Tputs sur Dapiyaa. Nuwtanda tputsiri. Ashiri nuwsha Israelchichee ksutamaam wayarangina,
Wamari kasiru tsapurunasshuchee kánuru taachiya,
20 Nuw Dapiyaa wayungunpa wanasirimashpa tapararanguri,
Israelchicheem ksutamaam kurakaam ínarangina.* 89:20 Tayaspatampani 13.22 tsiyatsis nipta tatsamooru taaritamta.
21 Ayamtaati Dapiyaa istamaam mbizcheezi.
Nuwaanpata wizpuriri tuwizpurtataw ashkuri kizpur taachiya,
22 Undararshitisin, Kasiyani, tusin, pinasachinllinaya.
Natsampansha tputs kasichazinllinaja.
23 Nuwsha Dapiyaa undararee wizpurirpati kátimbayaruri kasachima.
Ayamtaati Dapiya undarareetsi yusur pangcheeja.
Undararee zurampatari kachingeeruri, kasachima.
shiy shaana Dapiyaatsee tárangsha Apaa. Mishat Apaa, shiy Dapiyarineetsi tárangitamtish 24 Nuw urutari Dapiyaa chinakuri, uwsha nuwamun mang’ tatchiya.
Nuwamunatam wizpuriri aranginasha wizpur kapung taachiya.
25 Dapiy wamari tputsee kasikchu,
ashchiri Mediterranewshucheetstam, misha Eufratisshucheetstam shuneerusin kasichiya.
26 Dapiya nuwapat tsiyatku. Apaa, shiyaa nuwcha Apari.
Mishat, shiyaa nuwcha Apanlliri.
Watam nuwaa tapachindakush, ksutakshawa, Dapiya nuwaa táchiya.
27 Nuwaa tákchu, nuwsha Dapiyaa, ipareetspazi iwachiztamaa ashiruri aranginasha istachima.
Tsapurunasshuchee kurak wamari kasichiya.* 89:27 Apanll wanichu anu 1.5 tsiyatsis nipta tatsamooru taaritamta.
28 Nuw nuwaana Dapiyaa kapung kasiru chinakuri,
yuwaa nuw Dapiyaa tárangi anu urutamari taachiya.
Nllitaritaa chinacheezi, shiysha Apaa Dapiyaa tárangsha, Mishat Apaa, shiy Dapiyaa wachinllinootsi tárangitamtish, 29 Dapiyaa wachinllinur tputs pzapaneekchusin,
kanind nduma pastachu, uru kurakaamtam kinachinlliniya.
30 Itaru, uwshtisin nuwaa kuki kapeetkinaareesinaya,
yuw nuw kamachtarangi, anoo nda ambi ashirusin taaksin, nuwsha wanichima.
31 Wandaya nuwaa kuki nda payuksin,
kamachtamareetsi kapeetkusin,
32 waneeshshipasha wanichima.
Anumandtam pzkooshishpa pzkookpaz ashtachima.* 89:32 Utaáshucheema 12.5-11 tsiyatsis nipta tatsamooru taaritamta.
33 Ashiritaati, ayamtaati Dapiychichee tputs kasacheezi.
Chinakuri, urutamari uwapa taarataraw ashtachina.
34 Nuwaanaatsi kuki kapeetcheezi.
Urutamari payuchima.
35 Nuw kuki ayamamtiyam pastacheeja, tárangi, an zurampataricha tárangi.
Nuwaanamuntari suri tárangina. Nuwaanaatsi ngichcheezi.
36 Ndatuma sitarunas pastachu,
Dapiychichtisin tputs kurakawtam taachinlliniya.
37 Ndatuma kanind íwari pastachu,
tsup tamatarparee ashiru urutamari taachinllinaya, shiy Apaa, shaana tárangshawa.
38 Itaru Apaa, shiy ambtaa tárangush,
ashiritaa Dapiyarinchichee nlluranur kasarangsha. Kushtarangsha.
Tayutaritarangsha. Shaantataa kurakaam ipusarangush,
ashiritaa shiy tsiyantarangush, na kapeetarangsha.
39 Yuwaa sirú Dapiyaa tárangish anoo kapeetarangsha.
Dapiyarinchichee nlluranur ngatarangush, na zurampatari kasarangsha.
40 Shiysha Undarareetsi zanganirangush Utaáchchee yaktarini ichingaroo kapeetaranganaya.
Watandpunoo pátang, pátang, tawata, tawata ashimbaranganaya.
41 Watam shaana tputsireetsish kanasarangshawa.
Minshuchtisin tputs anoo parangusin,
yaktash pshtuyarusin, maacheetsi shuchiranganaya.
Sheeru iyashcheetsi napeersin staranganaya.
42 Shiy iyaa kasarangush, kundararshitini iyaa kasirangusin, mang’ ksaksin; Iyamari kasiyani, atusin,
uw paxayarusin shambatkanaya.
43 Shiy Dapiyarinee machtari itutsirangush, tamuramach ashirangu,
ndusha tapazish iyaa tapachindarangiya.
44 Dapiyarini pangusee, maacheetstam zapan wanasiri wayarangu,
itaru ichingaroo shiysha Apaa, tayutaritarangsha.
Dapiyarineetsi wizpuririni, izuuru tsapush kapeetarangsha.
45 Mishat, shiy iyaa musásiri tsipatsiptamaam wayarangitamsha.
Iyachchee kapungsha ipazarangsha.
46 Apaa, nuwaa mazinangandama.
¿Ashinooja Apaa, yusur iyaa kis napchish?
Tsiyanish musákchush, kapung tashish ksaneekpaz ashichsha.
47 Apaa, nuw taarashi pakichcha; tsipasa.
Nuw tputstana.
Shaana iyaa tputseetsini tinarangush, nish tsapurunasish ningat masach taachini.
48 ¿Chakaja nda tsipach?
Ichingarupariniya tsipachiniya.
Tputs waanaatsi watsipun tapachindamaam wanindaja.
49 ¡Apaa! chtakchuri shiy Dapiyarinee chinarangush, tsiyatarangush: Ayamtaati shiyashchee kasacheezi, tárangsha. Ashiri ¿tamasha natsha Dapiyarinchichee nlluranur istamaam ngataksha?
50 Apaa, napangasindaniya. Tputs wanip shiyaa tputsirish natsakanaya.
Nda achim kamaskanaya; stakanaya iyaatsi.
Nuwsha tsiyani tanukuri, zansimun tsipamaam waritakina.
¡Apaa, iyaa nayaningcha!
51 Apaa, nuwaa mazinangandama. ¡Iyaa kundararini mundakanaya!
¡Kukush mantsir tsiyatkusin, shiyaa ipusamarinish ichinguru zar natsakanaya!
52 Ashtaa Apaa, shiyamari kurakish kasirush, na wandari kizpur kurak taaksha.
Apaa, wapparee.
90Urutamari Apanll taaratartanlliya. Itaru, chiy tputsich nutsich musásimashi anoo kamankiya
Móysisarini Apanllpa tsiyatamapanimuncha, apanllpanimuna yandamarini.
1 Apaa, shiycha iyaa kapung tapachindampanish.
Iyashchi tputs uru shiyash kamunganiya.
2 Ndatumastaa macheewa, mishat tsapurunaseetstam tinchush, shiy urutari taarangsha.
Mishat, tsapurunasee uru tinayarush shiy wand urutari Apanllish kurakish taarangsha.
Shiy urutamari Apanllish taaratartanllsha.
3 Apaa, shiy tputseetsich, Waani tsipachpa;
tsapoomtam puyumboom kinachpa, tákchush, tputssha tsipakanaya.
4 Shiyaamanaa Apaa, minam mil masach minampaz zar ashiru tushiykiya.
Shiyaam minampaz maats ashiru nda táchaksha.* 90:4 2 Pitoru 3.8 tsiyatsis nipta tatsamooru taaritamta.
5 Apaa, shiy shaana zandkush wizpurpatish tputseetsich machiksha.
Iy taarasheetsini pamazukpazich ashiru mikeeru kanatsipkiniya.
6 Iy tputsini chirichirpaz ashiruni musásiri tsipakaniya.
Napa chirichir wanasir kxuneeru, puturit wanasiri chaptayaru,
itaru zar pukamachsha mawiruyaru, tsipatariya.
Chy tputsich ashkitamchi.
7 Shiy tsiyantakachush, musásiri iyaa tpachingamaam waritaksha.
Ashkachush, iysha mangini tsípataraa ashchiniya.
8 Shiy iyaa yutaritshishiri ichingaru yasaksha.
¿Yapeeja chiy kamungchich?
9 Shiy tsiyantakchush, uru taarashini tsípchiya.
Tputsich masachirich kambusurpaz ashiru tushiyshtar ashkiya.
10 70 masach tputs taakiya. Itaru, tputs kizpur putit 80 masach taamaam waritakiya.
Kapungtaa taakuch, itaru xarashish uru iyaam tachitarpaz ashkiya.
Mikeeru tushiyshtar ashku, chiy mikeeru tsipachich.
11 ¿Chakaja shiyaa tsiyanish yasach?
¿Tamayari shiyaa tsiyanish kamungchich?
12 Ashirucha Apaa, putam putam ashiru mangeetsini p’tseengcha nda mangutaritini taamaama.
Mangiptartanaariniya taakuni, shiyaa aranginasha mangoonachshapariniya.* 90:12 Ipísshucheema 5.15-16; Kólosénshucheema 4.5 tsiyatsis nipta tatsamooru taaritamta.
13 Apaa, iyaatssha yusur wanasir chinangcha.
¿Ashinooja iyaa istachish? Iyaa nayaningcha.
Watam iyaa shaana tputsirshawa.
14 Uru zar taraseekchu anush, chinasheetsish iyaam panangcha.
Mangishini tatsitangcha.
Ashkachush, iysha uru shiyaa mangini kis yasichinipa.
15 Apaa, ¿wanip masach na kiyung kachiykuni taakaniya?
Itaru, Apaa, shiy ashpirittam masachee tatsamooru kis taamaam iyaam wayangcha.
16 Ashkachush, iysha mishat iy ipartamani shiyaa wanasirimshirish pangchinlliniya.
Shiy iyaa kizpur istakush, anoo kis pangchiniya.
17 Ashiriya Apaa, shiy kchinamsheerush, iyaa kapung istangcha.
Iyaa tarawazirini, shiysha Apaa, wanasiri napangcha.
Zurkuri tina, Apaa. Iyaa istangcha.
91Iy kurakarini kchinamishcha; misha nayanimpancha
1 Iy Apanllirini waamari kasiru kizpur taariya.
Ashiri yuw tputs Apanllimun mang’ tatku,
anoo Apanllsha uru kámanaku ksutkiya.
2 Ashiri uwsha Apanllee tsiyatku;
Apaa, shiyamari nuwaa ksutaksha.
Nuwaa tapachindaksha.
Ashiri Apaa, nuwsha shiyashumari kamunguri taakina.
Watam shiyamunari mangi tatkuri taakinawa, táchiya.
3 Ashiri siy, Apanllis tiptsiris nuwaa kuki mazinangtsa.
Yashing siyash tsutashish tsipatsimash wayaktaatiya,
Itaru, Apanllimari siyaa tapachindamaam waritariya.
4 Wazitpungachpapaz ashiru siyaa kámananaw ashku, siysa punicheezis, ndambari.
Siyaa uru istachintspa, tárangu, waanaatsee kuk kapeetcheeja, ndambaree.
Xanxapishpapaz ashiru siyaa imanta imanta ashku, kámanaku tapachindakiya.
5 Psaantaatiya naakchus, tunimshutaatiya, ¿antaati siy kanizee punicheezis? ndambaree.
Kaschiritam kundarareetsish punichtamtazis.
Xarasheetstam punichtamtazis.
7 Zapantaa tputs siyanung tsipatsiptar ashkusin,
itaru siysa matambshis taatssa.
8 Apanll tputsee mantsirimshee waanamandari chayarini waneekchu,
anoo siysa kchiptis pangatssa.
Itaru, siyaa nda wanichiya.
9 Yuwamand siy Apanllimunari mangis taturangis,
anumand Apanll siyaa ksutchiya.
10 Maachi yutamash siyash kusamaam pinasachiya.
Wanguytam tsutashish siyash pangis tsutacheeja, ndambari.
11 Watam Apanllsha waana wasundururee siyaa ksutamaam zangankuwa.
Yaptaa naakis ambtaa wasundurursha uru siyaa ksutchiya.
12 Uwpat siyaa pazurangpaz ashtachiya,
nda siy patumbchimun pazis tpuu ashimaama.* 91:12 Yuwaa nish átu anootstam Matiwa 4.6, misha Lukasa 4.10-11 kamankiya.
13 Kázamshiptaati, isariyap, mkaptam naakinaareesa,
Apanllsha siyaa wanasir naamaam istachiya.* 91:13 Lukasa 10.19 tsiyatsis nipta tatsamooru taaritamta.
14 Apanll átcha; Siy nuwaa mangoonkus, nuwaa chinakus,
nuwsha siyaa tapachindachintspa.
Ashiri yutamashi siyaa kasicheeja.
15 Nuwaa mashkus, nuwsha uru yámchintspa.
Nuwaana siyapa washunand taachima.
Mangis kapung mantsakus, mangeetsis tuwizpurtachintspa.
Tputssha siyaa yasaksin, Apanll waa kapung chinaku istakiya, táchinllinaya.
16 Zapantam masach taamaam wayachintspa.
Sheeruri, izuuru nuwaanpee machchintspa, Apanll tárangcha, nuw siyaa atina.
93Apanll wamari kasiru taakiya
1 Apanll Taarashipan waamari kasiru taakiya.
Kizpur wamar kurakurtaru, ’sinish taakiya.
Wizpur wamari kasiriya.
Tsapurunasee tinarangu,
nda zpuzamaam mbam wayayaru kasarangiya.
2 Ashirucha, atashiniya;
Apaa, shiy tsapurunasee wayarangush, urutamari ksutaksha.
Shiy urutamari kizpur kurak taaksha.
3 Apaa, mar kung kapungumash warastakchu,
zaw, zaw, zaw, ántaru, kizpur zungantaru,
4 anoo shiy wizpurish kasirinashta. Watam shiy kanindush íwar taakshawa.
5 Apaa, shiy kamachtamarish urutamari taaratartachiya.
Shiy nllitarit chinacheezish, ndambaree.
Ashiriya, tputsirish uru shiyash pangish pshtukchusin,
Shiyaa Apaa, Kizpur wanasirtishcha.
Nda pakchiyam yutarit chinaksha, atusin, shiyaa ungirtachinllinaya, nuw shiyaa Apaa, atina.
95Apanlleem mangooz ksaptari yaseeyani
1 Naanints. Mangooz ksaptari Apareetsich yaseeyani;
watam iyaa ksutataw ashku, tapachindakuwa.
2 Ashiri Apanllish pang’ pshtuyaruni,
Apanlleem yaseeyani. Ungirtayani.
3 Watam Apanll Taarashipan minamaritawa.
Uwamari kapung kasiriya.
Apanllputsee ichingaru kasiru, kizpur kurak taakiya.
4 Tsapurunasee ichingaru ksutkiya.
Tsapoo wantsshuchee ksutku,
Íwaree machee ksutkitamta.
Tsapurunasee ztaru waana amuytakiya.
5 Kung mar kapungumashee Apanll waana tinarangiya.
Tsapoomtam uwpatari patateeru tinarangiya.
6 Ashirucha, naanints. Ungirtayani Apareetsich.
Tuchimtayaruni, wánungeetari ungirtayani Apareetsich.
Watam iyaamtam tinaranguwa, atina.
7 Apanll watacha kaapaniritana yaana Aparini.
Iysha Apanlltanicha tiptsirini.
Apanll opeej ksutamapan ashiru iyaa wanasiri ksutkiya.
Ashiri siysa waanaatsee kuk kitsis mazinangtsa. Watam Apanll siyaa atuwa:
8 Sirútama zitaminaris tsap apusash
Meribash taarangsin,
nuwamun mang’ tatumaam ngataranganaya.
9 Nuwaatssha michitaranganaya.
Nuw wizpurirpati tapachindarangitaati,
nuwaa wizpurireetsi parangitaatssin,
itaru nuwamun mang’ tatumaam ngataranganaya.
10 Ashiri nuwsha kapung tsiyantaranguri,
40 masach apusap masatarusin naamaam wayarangina.
In tputs nda mangpa chinakanaya; kizpur yutarit ashkanaya.
Nuwaa kamachtamari wits nda mazinakana.
11 Ashirucha, nee zurampatari wanichima.
Yuwash tsap taamaam wayarangi anush pshtuchazinllinaja, ndambaree.
Anush kanuschazinllinaja, ndambaree,* 95:11 Yuwaa nish átu anootstam Utaáshucheema 4.3 tayusima kamankiya. atina,
Apanll tárangiya.* 95:11 Utaáshucheema 3.7-11 tsiyatsis nipta tatsamooru taaritamta.
96Yaseeshish kaneeschi yaseeyarus, Apanllee ungirtangints
1 Apareetsich yaseengints.
Tputs ztaru yaseesshish kaneeschee Apanllee yaseengints.
2 Apareetsich yaseeyani.
Taarashipanee, shiy kizpurtishcha, táyani.
Putam, putam, tputsee kamankus,
Apanll iyaam tapachndampaneem taakiya, tángtsa.
3 Tputsee ztaru Apanllee kamaningtsa;
Apanll tsinsampancha.
Wamari kasiru, ¿waninll wizpurpat iyaa istakuwa? tángints.
4 Watam Apanll uwamari kizpur kurakawa.
Ashiriya, uru ungirtakuch yasimaam kizpurcha wanasiri.
Apanllputsee ichinguru uwamari kasiriya.
5 Minshuch tputs apanllputsirini wizpur nda pakchiyam taariya.
Itaru, Apanllsha kizpureeru kanindaa tinarangiya.
6 Shiy Apaa, kizpur wanasirtishcha.
Pangish kurakurtaru anush, ’sinish kizpur taaksha.
7 Ashiri siysa ichingarus tputsis, maachiritpatawis Apanllee ungirtangints.
Apaa, wappari wizpuririmandish.
Shiyamari urutamari kasiksha, tángints.
8 Sheerus, pangup naakchus, maacheetsi, yuwaa waana kamachtarangu
anoo yáyarus, ungirtangints.
9 Apanll pang’ kizpurcha wanasiri.
Ashiri anushsha ungirtangints.
Tputsis ichingarus, Nuw shiyaa kurakartana, Apanllee tángtsa.
10 Apanll uwamari kizpur kurakcha, kamankus tángtsa.
Tsapurunasee tinayaru, wayarangu, na anootsiri taakiya. Nda shpukiya.
Amb ashirangu, tputsee ichingaru tatsamooru chinaku taakiya.
11 Ashiriya, siysa Apanll tínarangu anis,
misha yuwis kanindush taakis antamtis,
misha yuwis tsapurunasush taakis antamtis,
misha yuwis marush taakis antamtis,
ichingarus Aparimuni mangis kis shambatangtsa.
12 Yuwis mzatsish tatsumis taakis,
mishat manginshuchtamtis, yasinawtamtis,
Apanllimun kis shambatangtsa.
13 Watam waana tsapurunasshuchee ichingaru ksutamaam kuschima, táranguwa.
Tputsee natstayaru, wanasiri zurampatari tsiyatku, anoo ksutchiya.
100Apanllimun shambateeni, watam Apanll urutamari tiptsiree chinaku taakuwa, anoo kamankiya
1 Kayanu, ichingaruni ztaru Apanllee mangini kis yaseeyani.
2 Ichinguruni Apanllee ungirtayani.
Mangini kis Apanllish pang’ pshtuyaruni yaseeyani.
3 Apanll taarashipancha anoo yasangtsa.
Iyaa tinarangu, ichingurootsini wipaam ínarangiya.
Ashiri iy na Apanllshatanicha tiptsiri taakiniya.
Apanll iyaam opeejapaz ashiru ksutamapan taakiya.
Iyaa uru ksutku taakiya.
4 Ashiri Apanllush pang’ pshtuyaruni,
mangini kis, Wapparee, Apaa, táyani.
Apanllee yaseeyani, ungirtayani.
5 Watam shiysha Apaa kizpurshawa.
Shiy kchinamishtishcha.
Urutamari tputsee chinakush taaksha.
Nlluranureetstam kasachtamtazish, ndambaree.
Ashirucha, shiyaa, Apaa, Wapparee atiniya.
103Apanllee uru kis yasichima
Dapiyarini wayassi
1 Nuw shiyaatsimari Apaa,
izuuru mangiptarti ungirtachima.
Shiy wanasirimshiri chinaksha.
Ashiriya, mangi kis urutamari shiyaa
2 Apaa, ungirtakuri taachima.
Wanip nuwaa istarangsha. Kapung istarangsha.
Nuw anoo ayamamtiyam nda mbizachina.
3 Apanll nuwaa yutaritshishireetsi ichinguru tachingarangiya.
Kas yutaki anootstam yararangu,
4 tsipaneetsi tapachindarangiya.
Urutari nuwaa chinaku, ksutku taakiya.
5 Ashirucha nuwaam pishtats ndunari.
Mangi kis taakina.
Nuwaa tuwizpurtaku, nuwsha
kanungas tamapari ashiruri taakina.
Yungan tamapari ashiruri kizpur taakina.
6 Natsampan tputs tputsee kiyung yachaku,
Apanllsha anoo yasakiya.
Natsampanee izuuru waneekchu,
yuw tputs kiyung kachiykana anoo mapiyrsin taamaam wayakiya.
7 Iyaa zitaminarini Israelchichee waanpata wizpur tapachindarangiya.
Sheeru, Móysisarinee waanaatsi kuk kamanirangu,
Móysissha tputsee tayaspatarangiya.
8 Apanll chinampancha. Nayanimpancha.
Tputseetsi chinaku nda mikeeru tsiyantamaam yasariya.* 103:8 Sandeeku 5.11 tsiyatsis nipta tatsamooru taaritamta.
9 Nda iyaa yutaritshishirini chinaru taakiya.
Nda urutari tsiyantataw nda ashku taakiya.
10 Iy zapantaa mantsir taakuni,
nda anumand iyaa tatsamooru waneekiya.
11 Apanll iyaa chinaku, kanindaa arangpaz kánaru ashiru kapung iyaa chinakiya.
12 Yutaritshishirineetsini arap yap tsapurunas tspakatu amb kapeetarangiya.
13 Tputs wipaa kizpur chinaku tamatarparee ashiru,
Apanll waanaatsi tiptsir chinakiya.
14 Iyaa tsapupa tinarangu anoo nda mbizakiya.
Yuwaa sambaytakani anoo yasariya.
15 Chiy tputsich taarashich karut tamapari ashicha.
Karut natuma kizpur wanasir chaptayaru,
kis napamaam waritakiya.
16 Itaru, kambusursha kizpur kambustakchu,
chapoo izuuru turambatkachu, ndunarshat ashtariya.
Mbizamamari tsípakiya.
Ashiritamcha, iy tputsini taarashini.
17 Itaru, Apanllsha Taarashipan waanaatsee tiptsir nda ayamamtiyam mbizachiya.
Tputs Apanllimun mang’ tatku, wamachtashee payuku,
Apanllsha anoo tputs urutari kapung chinakiya.
Wipaatstamta, misha ichingaru nlluranureewaatstam kasacheeja ndambaree.
Izuuru ksutchiya.
19 Apanll waanaa uxinashimun kanindash wayarangu,
anumandari tsapurunasee ashchiri ksutkiya.
20 Ashiriya, siysa Apanllis wasundururis,
Apanllee ungirtangints.
Watam siy kizpur taaksawa.
Uru Apanlleetsimari wamachtash izuuru tuminuksa.
Mangiptis uru waanaatsee kuk zurampatari payuksa.
Ashiri siysa, ichingarus Apanllee ungirtakus taangtsa.
22 Mishat siysa, yuwis Apanll tinarangants anis,
maachtawtamtis, kanindshuchtamtis,
tsapurunashutamtis taakis
anis ichingarus Apanlleetsimari Taarashipani ungirtakus taangtsa.
Nuwsha ashiritam zurampatari mangiptarti Apanllee ungirtakuri taachima.
104Yuwamand Apanll maachtawaa ichingaru tínarangu, anumand Apanllee yaseekaniya
1 Apanllimun mangini kis shambateeni.
Apaa, shiyamari taarashipantishcha.
Shiyaatsimari mangiptini kis shambatkiniya.
Shiyamari kasirush taaksha.
Shiyaatsimari ungirtakaniya, táchiniya.
Shaana ’sinee kamartapzish ashiru taaksha.* 104:1-2 1 Tímoteyooma 6.16 tsiyatsis nipta tatsamooru taaritamta.
Kanindap íwar kawambananandari wayarangush,
3 Anumunsha, kungumun iwaz pangeemish wayarangitamsha.
Mishat, Apaa, shiy psaseem kinakataraa sheerush,
pshirshishushpaz ashirush psasish naaksha.
Kambusurpaz ashirush wizpurirpatish naaksha.
4 Kambusur watacha shiy tsiyatsipaneem k’kuz zanganikpaz ashiksha.
Shiy mamarootssha zangankush wizpureetsish tuyamandakiya.* 104:4 Yuwaa nish átu anootstam Utaáshucheema 1.7 tayusima kamankiya.
5 Tsapurunaseetssha wanasir tinarangush, nda ayamamtiyam
piyam naata, piyamsha shpuzata nda ashishtamaam mbam wayarangsha.
6 Mar kung tsapurunasimun iwaz ashchiri kamispapaz ashiru purangsha.
7 Itaru, shiysha Apaa, kungoo kamachtarangush;
Tsapush naangcha, tárangush, kungsha k’keetsish kariyaatspaz ashiru mazinarangu,
mikeeru karuwataraa ashirangiya.
8 Machimun naanaataraa ashirangu, karuwataraa, yuwash shaana;
Neetsiri taangcha, tárangish, anush tsap watandsush kusarangu, zanayarangiya.
9 Nda piyam pseertaku anshuri wanasir wayarangsha.
Nda tsapoo yusur pumaam amb ashiru wayarangsha.
10 Shiy ichinguru zar kungoo wir zangankush,
zaw ashkachu, manginapsha naanaataraa ashkiya.
11 Zamizsha manginshuch anootssha kung waakanaya.
Burrutam kayustan waaksin, wasachee imayungakanaya.
12 Kpurangamash kungumun wing kachuteersin, ixateersin, ngichtayarusin, iparinakanaya.
Sheersin, mang’ ksaksin yusakanaya.
Yasinamunaw piz waziweeru kis yusakanaya.
13 Apaa, shaana shiy sinapat maacheetsi kchitamaam istaksha.
Íwar taakush, anumandari shiy msasish kariytakchu,
sin sinakchu, anpasha tsapoo kachachtaksha.
14 Pastootssha wakaraam, zamzeem watungash wanasir chirichiree yanungaksha.
Mishat, chiy tputsich tatsumtarich, ansha tsapurunasish pzapaneechiya.
15 Yuw chiy tputsich katungkuch, wizpurireemich panaku kchitatarich,
misha kizarun wakunguree waakuch, mangich kis taatarich.
Mishat kizarun wakungur wayungunoo kasiru tsheetsich kapasarumcheekpaz ashkiya.
16 Libanush tsap shiy yasin washitanimash tatsumarangish,
anshat xixpurish kungoo waaktamsinaya.
Ashkusin, yasinsha kis taakanaya.
17 Anushsha yasin tsiripcheew pakcheew wipaam pzapanimaam ixatkanaya.
Mishat, karsa yasinash pinosh sura taakanaya.
18 Machish íwar kaaparaw kayustan kis taakanaya.
Mishat, patumbchish maachi pakchimash anshutam taakanaya.
19 Iyaam zareetstam, tsupeetstam táchimaam wayarangsha.
Zarsha waana puku anoo yasariya.
20 Zar pshtuyaru, tapeeramchu, anushsha manginshuch shitungartakanaya.
21 Manginshuch tumuz yusaku, Apanllee tsiyatku atanaya.
Zapan katungpani atusin, Apaa, Pananda, shiyaa atusin atanaya.
22 Itaru, zar sitataranllu, wapitam kanapkanaya.
Wachushtam pshtuyarusin, wantsush maakanaya.
23 Anushsha tputs tarawaztamaam shitungartakanaya.
Tapeekachsha tárawziree kasayarusin, kanuskanaya.
24 ¿Wanip maacheetsi wanasir tinarangsha? Apaa.
Yuw ichinguru wayarangish an shaana wizpurirpatish, misha yasashpatish, tinarangsha.
Tsapurunasee tinarangish, anush tatsitarangsha.
25 Mishat, maree kung kapungu, waman, imur wayarangish an taariya.
Maachi zapan kapungumash, pakchimashtam anush taakana.
Táchimaam pinasa.
26 Anushsha marish bot naaktamanaya.
Misha, anshutam maachi kapungumash puraw kis taakiya.
Kis kungush michitku anootssha shiy kis napaksha.
27 Anshitisin, Apanll nuwaam katungsheemi panapanda, atusin,
Apaa, shiyaam kutakanaya.
28 Shiy shaana, Neewa, tákchush, anootssha katungkanaya.
Shiy kuwish paxayakpaz ashkush, anoo mang’ ksakanaya.
Kapung tazaz taakanaya.
29 Itaru Apaa, shaana zandkush, wizpurireetsish kanasakchush,
uwshtisin kapung punikanaya.
Shiy taárashee kasakchush, tsipakanaya. Sheersin, wanuts tsapoomtam kinakanaya.
30 Itaru, Apaa, shiy wizpuririrpatish taárasheem tapus ashkachush, wipsha kis kanungartakanaya.
Ambi ashkush, tsapurunasee maachirit uru tanischichtar ashiksha, nuw shiyaa atina.
31 Ashiriya, Apanll wizpur ayamtaati pastacheeja; urutamari taachiya.
Apanll waanaa tinamarineetsi napku, mang’ kis ashkiya.
32 Apanll wizpurpa tsapurunasee napkachu, tsapsha shpuzakiya.
Machee íwar patatkachu, machush psas tuwapeew shitungkiya.
33 Ashirucha, nuw ndatuma tsiparuri, kchitariti, Apanllireemi Taarashipaneem urutari yaseekuri taachima.
34 Ashiri yuw nuwaana chinaki anoo, shiysha, Apaa, nuwaa kis napanda, atina.
Watam nuw shiyamunari wizpurirish mangi kis taakina.
35 Yutaritshishpani waani tsipachpa; pastachpa.
Ayamamtiyam an ndusha taamaam izuuru pastachpa, Apaa, nuw shiyaa tina.
Itaru nuwsha shiyaa, Taarashipanee, mangipti kis ungirtachima.
Shiy kizpurtishcha.
Apaa, ¡Yungpaktishcha! shiyaa atina.
105Apanll Israelchichee kapung istarangu anoo kamankiya
1 Israelchichis, Apanllee, Wapparee tángints, atina.
Apanllee ungirtakus, kukootstam tsapurunas ztaru tputsee kamaningtsa.
2 Apanllee ungirtakus seengtsa.
Iyashchee istamaam ¿waninll Apanll wizpuree yámandaranguwa?
Ashiriya, siysa tputsee kaman kaman shingints.
3 Tputsee kamankus, Iy Apanllirini Apanlliritcha kiki. Min Apanll wanindaja.
Ashiri yuwis Apanllee chinakis anis,
Apanllimunari mangini kis taayani, nuw siyaa atina.
4 Iy Apanllirini kizpurcha. Ashiriya, Apanllee masheeni.
Ashkachuni, iyaa wanasiri napchiya.
5 ¿Wanip iyashchee istaranga?
¿Tamaru iyashchee tapachindaranga?
Mishat, waanaatsi kuk iyaam zanganirangu,
ichinguru anoo mbizamaam wanindaja.
6 Iy Aprahamarinchichtanicha.
Akoparinchichtamanicha.
Apanll iyaa waama tiptsireem ipusarangu,
iysha Apanllinandarishtini tiptsir taakaniya.
Ashiriya, siysa nuwaa kuki mazinangtsa:
7 Apanll Taarashipani iyaana Aparini waanpatatari wizpur tsapurunasee ksutkiya.
8 Zitaminarineetsini tsiyatarangu;
Nuwaa kuki payukinaareesa, nuwsha izuuru istachintspa.
Siyaa ayamtaatiya kasacheezee, tárangu,
anoo mbizcheeja, ndambaree.
9 Aprahamarinpa tsiyatarangu,
kuk nda pastamaam zurampatari tsiyatarangiya.
Anumunsha Isaakarineetstam tsiyatarangiya.
10 Sheeru, Israelarineetstam tsiyatarangu,
Nuw shiyaam Kanaanaa tsap panachintspa,
shiyachich tputs anush urutari taamaama, Apanll tárangiya.
12 Zitaminarini Israelchich tputs machin anush taaranganaya.
Kanaanaa tsap nda amuytaranganaya.
13 Uru xitangat ashkuni, minup tputs watsapun taarangsin,
minupsha tputs watsapun taaratarshin ashtaranaya.
Min kurak iyashchee istaku, minshat kurak istaku, ashtaranaya.
14 Itaru, xitangat ashirangtaatani, Apanll iyachchee tputs kapung ksutarangiya,
tputs nda natsamaama. Watam Apanll waana kurakaa,
15 Nuwaa tputsiri mantsir tsiyatintspa.
Nuwaa kuki kamanimapanee kiyung yacharintspa, táranguwa.
16 Apanll anpur Kanaanush tsap maringamaam wayarangiya.
Izuurumamari iwariz maringarangiya.
17 Itaru, Apanllsha wasina Osiyarinee iyashchee tapachindamaam ipusarangiya.
Israelarini wip zoonllee Osiyaa natsayarusin,
tputseem muchchur kurikpa tupaxanxarangana.
18 Osiyarini Ijiptosh tsap taarangu, anpur tputs Osiyarinee kiyung yacharanganaya.
Tumanshishush wantsush tumanaranganaya.
19 Itaru, Apanll Osiyarinee ambtaa ashirangu,
yuwartatam Osiyarini nllurtama pamazurangu, zoonllee kamanirangu,
anuritam tatsamoorangiya.
20 Osiy wand tumanshishush taarangu,
Ijiptshuch tputs kurak, yuw zapan tputsee ksutarangu,
an wasundururee Osiyaa tashitungamaam kamachtarangiya.
21 Ashiri kuraksha Osiyaa waama istamaam ínarangiya. Shiysha nuwaa tputsiri ksutangcha.
Mishat, maacheewaatstatam ksutangcha, tárangiya.
22 Ashiri Osiysha kurakaa wipunashee,
istampaneetstam ichingaroo yasashee zapan yapstarangiya.
23 Anumunsha iwaz zitaminarini, Israel wipapat Ijiptop tsap naataranganaya.
Anush tunarish Ijiptosh watsapun kuseersin taaranganaya.
24 Ambtaa ashirangu, itaru Apanllsha iyashchee istarangu,
wip izapaneeranganaya.
Kizpureew taaranganaya.
Ijiptoshchee tputs kasiru taaranganaya.
25 Ashirucha, Ijiptoshuchsha tputs; Iyaa kasiruneepa, atusin,
iyashchee natsaksin, kiyung yacharanganaya.
26 Ashiriya, Apanllsha Móysisarinee, Aaronarineetstam tapachindampaneem ipusarangu,
tiptsiree tapachindamaam zanganirangiya.
27 Móysissha, zoonllpa Aaronpa, Ijiptosh tsap Apanllee wizpur tuyamandarangusin,
tputsee tpuxtaranganaya.
28 Apanllsha Ijiptosh tsap zaree kzatarangu,
tuneeramach ashirangtaa,
itaru Ijiptoshuchsha tputs Apanllee kuk payumaam ngataranganaya.
29 Apanll kungoo zángana kuraseem ínarangu,
anumun kayupichsha pchingarangiya.
30 Ashiri Apanllsha yusur purumburoo zanganirangu,
ashchiri yaktash tatsitarangiya. Kurakshutam pang’ tatsitarangiya.
31 Anumunsha, Apanll yusur yáyanlleetssha, mishat manxootstam zanganirangu,
ashchiri Ijiptosh tsap shuneeranganaya.
32 Anumunsha, sinaatssha pachindarangu,
itaru siseetssha ashcheew patumbich kapungumash zanganirangiya.
Sheeru, mamarootstam zanganirangu,
mamarshat kizpur mamartarangu, puuj ashirangu, tsapoo muchirangiya.
33 Amb ashirangu, Ijiptoshuch mazar tatsumma tpachingarangiya.
Mishat, yasinaatssha ichipeeru muchirangtamta.
34 Anumunsha, yusur putindaree zanganirangu,
putindarsha zapan parat ashirangu,
35 wanusee tatsumma, manginawaatstam war,
chirichireewaatstam war kapzingta, kapzingta ashirangu, waroo kachingaranganaya.
36 Anumunsha, yusur tsipatsimasheetssha Ijiptoshchee wip iwachiztamaw tsipamaam wayarangiya.
Ashchiri tsap shuneerangiya.
37 Aship ashirangu, Ijiptoshchee zapan yachayaranllu,
sheeru wizpurpa tiptsireetssha Ijiptoo tsap tashitungayaranllu, machtarangiya.
Ijiptoshchee urkir, oroo mburshimasheetstam,
oroo chumbeepimasheetstam zapan yáyarusin, naataranganaya.
Nda pakchiyam xararanganaya.
Mapiyrsin ksanandari naataranganaya.
38 Naatarangsin, Ijiptoshuch tputs mang’ ksarangusin,
napataranll ashirangana,
watam iyashchee puniranganawa.
39 Zitaminarinsha tsap puzap naatarangsin,
kaschir naamaam Apanll psaspa zaree kámanarangiya.
Psaansha naamaam sumas kizpur tuwasineemaam wayarangitamta.
40 Katungtseemsha Apanllee masharangsin,
katamsheetssha zamzee panarangitamta.
Katungats íwarpichee kis katungkusin, tazaz taaranganaya.
41 Kungsha pishtarangu, Móysisarinsha tushuwshishpa patumbchee tuw ashirangu,
Apanllsha kungoo patumbchish tashitungarangu, zaw wir ashirangu,
kungsha tsap puzawpitaa naantangatamach ashirangiya.
42 Mishat, Apanll yuwaa tiptsirpa Aprahamarinpa piy ashtachima,
tárangu anoo nda pakchiyam mbizarangiya.
Izuuru tuminurangiya.
43 Waana tiptsiree Ijiptosh tsap tapachindarangu, tashitungarangu,
tputssha shitungeerandsin, zamangakatarat, ashiranganaya.
Mang’ ksaksin shambataranganaya.
44 Apanll waana tiptsireem nllitaritaa tputs watsapun panarangu,
uwshtisin anoo itutseersin, mazareewaatstam, tatsumawaatstam,
wanuseewaa ichinguru zitaminarineem panarangiya.
45 Itaru, Apanll ashkachu; Papcha, Waneeyantspa.
Nuwaa kuki izuuru payungtsa.
Mishat, nuwaa tayaspatamaree tuminungtsa, tárangu, watsapuneem panarangiya.
Apaa, ¿shiy wizpurish tamara?
Apaa, ¡Yungpaktishcha! shiyaa atiniya.
107Apanll kchinamishcha
1 Apanllee, wapparee, tángints, watam minamari wanasiriwa.
Urutamari iyaa chinaku taakiya.
2 Apanllpa tsiyatkuni, amb táyani.
Watam kundararini iyaa kasirangitaateesinaya,
pseertartaatini taaranguni, Apanll iyaa yanpuyaru, iyaamshutam tsapunni wayarangiya.
Yap zar yaku ambtam,
yap zar puku ambtam,
yap zar puwachingarattu ambtam taaranguni,
Waana Apanll yanpuyaru, tsapunishtam wayarangiya.
4 Iyashuch tputs ashpatam masarsin,
Tsap puzap tputs ndunarip xixtarashin, ashiranganaya.
Yap ngoots ndunarip, yaktatam ndunari ambtam naataranganaya.
5 Mariz kayatarangsin,
sachitarangtamsin,
Marizimun pakchim tsipamaam pshataranganaya.
6 Kapung puniksin, tsipatureema, atusin,
Apanllee kuruzuranganaya. Apaa, Istanda, táranganaya.
Apanllsha mazinarangu, kapung istarangiya.
7 Yapsha ngoots wanasiri ambsha machtarangiya.
8 Ashiriya Apanllee, Wapparee, táyani,
yuwamand iyaa kapung istarangu anumanda.
Watam iyaa uru istaranguwa.
9 Tputs sachitkusin, wasachee imayungakiya.
Katungtsee kapung panarangitamta.
10 Mishat, iyashchi tputs tunimushpaz taaksina,
ashirusin kiyung kachiyaranganaya.
Putám kateenpa kamurim tamaparee ashirusin, mang’ kapung kiyung kachiyaranganaya.
11 Apanllee kuk kapung ngatkusin, nda mazinarangana.
Taarashipan wamaritaa kasiku, anootstaa kuk ngatarangsin,
Watsta. ¿Chak ashishtapa? tárangana.
12 Ashiri Apanllsha tsiyantarangu, Israelshuchee tputs tumuchchurtamaam wayarangiya.
Taárashee yutari wayarangiya.
Ashirangu, zarnasimun pakchim tsipamaam pishtarangana,
¿Watam tputs istampan ndunarimunawa?
13 Itamsamaam pinasaksin, ¿Chakaja iyaa istach? atusin,
Apanllee kuruzuranganaya. Apaa, Istanda, táranganaya. Apanllsha mazinarangu,
iyaa nayaniku, tapachindarangiya.
14 Sheeru, iyaanpee tsapunni kanapumaam ngoots wanasiripsha yámandarangiya.
15 Ashiriya Apanllee, Wapparee, táyani,
yuwamand iyaa kapung istarangu anumanda.
Watam iyaa uru istaranguwa.
16 Iy tumanampaz ashiruni taarangtaatini, tumanshish wach ngusambpapaz tinama ashiru,
anoo Apanll ichipambayaru, iyaa tashitungarangiya.
17 Mishat, iy zitaminarini ashpatam Apanllee kuk kapeetarangsin,
waanamandari yutaritshishirini, mang’ ndunpaz ashiranganaya.
Kizpur wanguytarangusin, kiyung kachiyarangsin,
18 tsipamaam zandakusin,
katungtsee tsachiyaksin, kataranganaya.
19 Waanaatsee tapachindamaam pinasarangana.
Tsipataruneepa atusin, Apanlleetssha, Apaa, shiyamari istamaam waritaksha.
Istangcha iyaatsi, táranganaya.
Apanllsha nayanirangu,
20 tsiyatarangu, Yarchintspa, tárangiya.
Tárangu, wánguyar tsipatsimasheetstaa arap kapeetarangiya.
21 Ashiriya Apanllee, Wapparee, táyani,
yuwamand iyaa kapung istarangu anumanda.
Watam iyaa uru istaranguwa.
22 Ashiri chineetsis putayarus, Apanllip pang’ machtayarus, muchingints.
Sheerus, Apanllee Wapparee, tángints.
Mangis ksanandari tputsee, ¿Apanll wanip iyaa istaka? Uru kapung istakiya, tángtsa.
23 Mishat, iy zitaminarini ashpatam marip mus kapungumaship xiyranganaya.
Maachiritaa tupaxanxangatu, minup tsap naatarangsin,
24 Mus apusanand Apanllee tínamarini parangusin, kapung puniranganaya.
25 Apanll kambusuroo kamachtaku, tárangiya.
Kizpur kambustangcha.
Ashkachush, kungsha kizpur warastachpa, tárangiya.
Tárangu, mussha kapung kizpur warastarangu,
íwar manginaa káchingkaru, zaw zaw ántaru,
pzachtataru, íwar kárirataraa,
yusursha wantsush imurip karuwataraa, yusursha kárirataraa ashtar ashirangiya.
Anoo tputs parangusin, kapung napuxtaranganaya.
Tsipachpachee, tárangana.
27 Watam mus kizpur warastarangu, bot tawinintara, tawinintara ashirangu,
naamam wanasir pinasaranganawa.
Tputs karusam naaku tamartarpari ashirusin naataranganaya.
28 Itaru, amb ashku anoo parangusin, kapung puniksin,
Apanllee tsiyatkusin, táranganaya. Apaa, iyaa istangcha. Tapachindangcha, tárangusin,
Apanllsha istarangiya.
29 Kapungtaa warastarangu, kambusursha zanayataramach ashirangu,
warassha achtamarisha maras, maras, ashishtaramach ashirangiya.
30 Waras zanaramchu, anoo parangusin, mang’ ksaranganaya.
Apanll ashirangu, waana tputsee machtarangu,
yap patusis wanasiri paramashtaru annung matayaranganaya.
31 Ashiriya Apanllee, Wapparee, táyani,
yuwamand iyaa kapung istarangu anumanda.
Watam iyaa uru istaranguwa.
32 Shaniyeeruni, Apanllee kurakareetsini ungirtayani.
33 Yuwamand tputs yutarit taarangana, anumand Apanll waana kamachtaku,
yuwaatstaa kung shungshungtaru anootstaa puzarangiya.
Tsapootstam tayutariteeyaru,
tatsumirangsin, nda pakchiyam wanasir kxoonarangiya.
35 Itaru, yuwshat tputs Apanllee kuk payurangana,
anshitisin tsap puzamunaatstaa, wanasireemsha wayarangiya.
Anumunsha, kungoots wanasir shungshungtaru wayarangitamta.
36 Tputs ichtaru marizimun kiyung kachiyarangana,
anshitisin pangoo kapung pangupangu ashirangsin, yaktaamsha kinarangiya.
37 Sheeru, mazareemsha kizarunaa wanusi tatsumeersin,
pzapaneerangusin, zapan wanusee pusaranganaya.
38 Waana Apanll istaku, ashirangiya.
Wipaatstamsin pzapaneeranganaya.
Anumunsha, chinuzee wakaraatstam pzapaneeranganaya.
39 Wandtaatiya tputs chawap tsipakchusin,
misha wakararinitam tsipakchu, pakchimsha katuchkachu,
anootssha tputs natsampansha kiyung yachakchu,
yuwamand tputs mang’ mantsaksin, tanukana,
anumand 40 Apanllsha natsampanee wanichiya.
Tsap puzap, ngoots ndunarip, apusap zanganchiya.
Ambiri yutaritshishpan masataru izuuru pastachiya.
41 Tputs pukir kiyung kachiyku, anoo Apanll pakchu, kapung istachiya.
Yap nda chinaru amb Apanll wipaamsha pzapanimaam,
misha maachiritam pzapanimaam istachiya.
Opeej ashiru wip zapan turutut, turutut ashtachiya.
42 Anootssha pakchusin, yuw tputs Apanllee kuk payuku, tuminku,
anshtisin mang’ ksachinllinaya.
Yutaritshishpansha tputs anoo pakchusin,
paziksin, kuk mbamatakpaz ashtachpasinaya.
43 Manguriri tputs anoo pakchusin,
mangush chinaku, uru yuwaa Apanll tputsee chinaku anoo yasachpasinaya.
110Dapiy yuwaa Apanll ipusamarini wamari kasichu anoo kamankiya
Dapiyarini wayassi.
1 Apanll Taarashipan nuwaa kurakari, waanaatsi ipusamarini, tárangiya;
Shiy ningich mbutsunungich k’xinangcha.
Nuwsha kundarareetsish kasiyeeruri, tpachingachima,* 110:1 Yuwaa nish átu anootstam Matiwa 22.44; Márkosa 12.36; Lukasa 20.42-43; Tayaspatampani 2.34-35; 1 Koríndshucheema 15.25; Ipísshucheema 1.20-22; Kólosénshucheema 3.1; Utaáshucheema 1.13; 8.1; 10.12-13 tayusima kamankiya. tárangiya.
2 Ashiriya kurakaa, Apanll shiyaam waanaatsi wizpur kundarareetsish kasimaam panachu,
shiysha mach Siyonamand kizpur kurak shiyamari kasiru taangcha.
Ashiriya, kundarareetsish ksingcha, atina.
3 Tapazeemsha waritakchu, Siyonash mach shiysha,
Kasiyeeni, tákchush, tputsirishtish, Ayu, táchinllinaya;
Anush kanungas wizpur ashirush nizcheezish, ndambaree.
4 Apanll waana zurampatari shiyaa kasimaam wayarangu,
nllitari ndusha chinachiya.
Shiy Melkisarin tamapari ashirush urutamari apanllpan urkar taachsha,
ayamamtiyam nda pastamaama,* 110:4 Yuwaa nish átu anootstam Utaáshucheema 7.17 tayusima kamankiya. Mishat, Utaáshucheema 5.6; 6.20—7.28 tsiyatsis nipta tatsamooru taaritamta. Apanll shiyaa tárangiya.
5 Apanll shiyaam tuwizpurtamaam washunand mbutsinungich naachiya.
Ashkachu, kundarareetsish waneeyarush,
kurakaatstam ichingaru kasiyarush tpachingachsha.
6 Tsapurunasee kurak ztaru, tpachingayarush,
tputseetssha, minchichee tputs, minchichee tputs ashiru ichinguroo waneeyarush
tsiparee washunand xanatatsha. 7 Sheerush, arangeem tapazeem naakchush, ngootsush kungoo waakchush,
yusur wizpurireetsish tuwizpurtachiya,
Dapiyarini yaseeku, Apanllee ipusamarini tárangiya.
115Apanll kanindshuri taaru anoo kamankiya
1 Apaa, tputs nda iyaa ungirtachinllinpa;
shiyaatsimari ungirtachinllinpa.
Watam shiyamari tputsee izuuru chinakshawa.
Shiyamari shaanaatsi kukish tatsamooksha.
2 Min tputs iyaa staksin, ¿Siy Apanlliris yapeeja?
Iy pakeezini, atanaya.
3 Itaru, shiysha Apaa, kanindush shiyamari kasiru taaksha.
Shiy yuwaa shaana zandkish anoo tinaksha.
4 Minshuch tputs waama apanllirini tinakanaya.
Ur chumbeepimashpa, misha ur mburshimashpatatam tinakanaya.
Uwpatari tinakanaya.
5 Kuk taaritaa, itaru nda tsiyatkanaya.
Wach taaritaa, itaru nda pakanaya.
6 Wits taaritaa, itaru nda mazinakanaya.
Ship taaritaa, itaru nda ishingkanaya.
7 Uw taaritaa, itaru nda patatkanaya.
Wats taaritaa, itaru nda naakanaya.
Wayarpunush nda pakchiyam zunganeekiya.
8 Tputs waama apanllirini tinayarusin, anumun mang’ tatkanaya.
Itaru, tinam tamapari ashirusin, mangsharitssincha,* 115:8 Apanll wanichu anu 9.20 tsiyatsis nipta tatsamooru taaritamta. nuw shiyaa Apaa, atina.
9 Ashiri siynaa Israelchichis, Apanllimunari mangis tatungtsa.
Apanlltanda iyaa istaku, ksutku.
10 Siy apanllpanis, Apanllimunari mangis tatungtsa.
Apanllcha iyaa istaku, ksutkiya.
11 Siysa ichingurus yuwis Apanllee chinakis anis,
Apanllimunari mangis tatungtsa.
Apanllcha siyaa istaku, ksutkasha, atina.
12 Apanll iyaa chinakiya. Iyaa mbizamaam wanindaja.
Uru istachiya. Iyaa Israelchichineetsini ichingaru ksutkiya.
Apanllpaneetstam ksutkiya.
13 Wachinawaatstam, nllurawaatstam ichingaru tputs yuwaa Apanllee chinakana anoo,
Apanll uru istachiya.* 115:13 Apanll wanichu anu 11.18; 19.5 tsiyatsis nipta tatsamooru taaritamta.
14 Ipartamtis, mishat chinllinitamtis uru izapanichiya.
15 Apanll Taarashipan yuw waana kaninda,
misha tsapootstam tinarangu an siyaam uru istachintsa.
16 Apanll kanindap taakiya.
Itaru, iyaamsha tputseemani tsapoo ksutamaam wayarangiya.
17 Yuw tputs tsiparangana an nda Apanllee ungirtakanaya.
Izuuru zaputar ashkanaya.
18 Itaru, yuwshtini nda tsiparini, anshtini
Uru Apanllee kis ungirtakuni taakaniya.
Apaa, ¡Yungpaktishcha! shiyaa atiniya.
116Apanllee, Wapparee, watam nuwaa istarangshawa, atiya
1 Apanllee nuw chinakina, watam, Apaa, istanda aturi,
nuwaa mazinakchu istakuwa.
2 Nuw urutari Apanllee mashkuri taachina.
Watam nuwaa mazinakuwa.
3 Tsipats nuwaa izuuru kasimaam waritarangu,
kapung puniranguri; Tsipatureema, táranguri,
itamsamaam pinasarangina.
4 Ashiranguri, nuwsha, Apaa, shiy taarashipantishcha.
Nuwaa taarashi tapachindandama, táranguri,
Apanllsha nuwaa tapachindarangiya.
5 Apanll iyaa taarasheetsini itsinsartaa yasaku,
itaru iyaa nayanikiya.
Apanll Taarashipan chinampancha.
6 Tputs waanaatsi tapachindamaam pinasakitaa,
itaru Apanllsha uru ksutkiya.
Nuw wizpuriri ndunnaar taarangi Apanllsha nuwaa tapachindarangiya.
7 Apanll nuwaa kapung istarangu,
ashirucha, nuwsha yusur nda punikuri, mapiyruri taakina.
8 Nuwaa tsipani tapachindarangiya.
Tsipamaam punikuri, kapung tanuranguri,
itaru Apanllsha nuwaa istarangu yararangiya.
9 Ashiriya, nuwsha urutari nish tsapurunasush taakuri,
Apanllee kuk tuminchima.
10 Nuwaam xarashish kapung taarangtaa,
itaru Apanllimun mangi taturangina.* 116:10 Yuwaa nish átu anootstam 2 Koríndshucheema 4.13 tayusima kamankiya.
11 Tputsimun mangich tatumaam wanindaja.
Ichingurusin tputs wayangichirirsincha.* 116:11 Romshucheema 3.4 tsiyatsis nipta tatsamooru taaritamta.
12 Itaru, Apanll ¿wanip nuwaa istaranga?
¿Maypata nuw Apanllee tuwapachi? Tuwapamaam pinasakina.
13 Itaru, itsinsaru Apanllee tachitkuri,
misha, Wappari Apaa, aturi, tuwapakpaz ashkina.
14 Mishat, yuwaa, Apanllee; Shiyaam ashtachparina, tárangi, anoo
tiptsirpata shaniykuni, itsinsaru k’keetsi tatsamchima.
15 Apanll waana tiptsir tsipakchu, kiyung kachiyku,
anungaz kapung mangu mantsakiya.
16 Shiyaa chinakina, Apaa. Nuw shiycha kamachtashish.
Aneeri shiyaa kapung chinaku,
ashiritam nuw shiyaa chinakina.
Nuw tsipamaam pakich pishtaranguri,
shiysha nuwaa tapachindarangsha.
17 Ashiri shiyaam, Apaa, chinuzee pachayaruri,
shiyash sumish muchima.
Sheeruri, shiyaatsimari ungirtachima.
18 Shiyashchi tputs shiyash pangish tipuranllizush shaniykatssin,
anush nuw izuuru k’keetsi, yuw shiyaa tsiyatarangi, anoo tuminchima.
Uru Irusarinush shiyaa ungirtakuri taachima.
Apaa, ¡Yungpaktishcha! atiniya shiyaatsi.
118Apanll wizpuririni ¡waninllee! átu, anoo kamankiya
1 Apanllee, Apaa, Wapparee, táyani,
watam Apanll wanasirimshiwa.
Urutamari iyaa chinakiya.
2 Siy Israelchichis,
Apanll iyaa urutamari chinakiya, tángtsa.
3 Mishat, siy apanllpanis,
Apanll iyaa urutamari chinakiya, tángtamtsa.
4 Mishat, siy tputsis yuwis Apanllee chinakis anis,
Apanll iyaa urutamari chinakiya, tángtamtsa.
Ichingarus Apanllimun shambatangtsa.
5 Nuwaam xarashish kapung taarangu,
Apanllee, Apaa, istanda, táranguri,
Apanllsha nuwaa mazinarangu, tapachindarangiya.
6 Apanll uru nuwash taakiya.
Ashirucha, nuwsha tputsee nda puniki.
¿Chakaja nuwaa kasiku kasich? Pinasakanaya.* 118:6 Yuwaa nish átu anootstam Utaáshucheema 13.6 tayusima kamankiya.
7 Apanll nuwapa ipunkiya.
Uru nuwaa istakiya,
Tputs nuwaa natsaktaa, Pachayani, atitaatssin,
Apanllsha nuwamari kasimaam wayachiya.
8 Apanllimunari mangich tatumaam waritariya.
¿Mayaamaja tputsimun mangich tatchich?
9 Apanllimunari mangich tatumaam waritariya, atina.
Tputs kizpuritaa taaksin,
¿mayaamaja uwamun mangich tatchich?
10 Minchich tputs nuwaa pachamaam turipungarangusin,
Pachapani tárangitaatssin,
Itaru, nuwsha Apanllimun wizpur nuwamarisha kasirangina.
11 Izuuru zapan nuwaa turipungarangusin,
itaru Apanllimun wizpur nuwamari
ichingaroo kasirangina.
12 Zan ashirusin, zapan nuwaa turipingarangana.
Itaru, sumas kpaa muchtaru ashiruri,
Apanllimun wizpur nuwamari ichingaroo kasirangina.
13 Wizpurpa nuwaa kasimaam,
izuuru tupantsamaam zandarangtaatssin,
itaru Apanllsha waanpata wizpur nuwaa tapachindarangiya.
14 Apanll nuwaa kasimaam tuwizpurtarangiya.
Ashirucha, nuwsha na Apanllee yaseekuri, ungirtakuri taakina.
Apanll watacha tapachindampani.
15 Apanll tiptsir waanshu pang’ Apanllimun shamangaksin,
Apaa, shaanpata wizpurirish iyaa tapachindarangush, iyamari kasiranginiya.
Shiy, Apaa, kizpurtishcha, atanaya.
16 Apanll waanpata wizpur wamari kasikiya.
Minamtiyam tputs ashimaam wanindaja.
17 Ashiriya, nuw nda tsipachina. Izuuri taachina. Tputsee, ¿Wanip Apanll nuwaa istaranga? tákchuri,
tputsee ichinguru kamanchina.
18 Apanll nuwaa kapung waneerangitaa,
itaru nda tsipamaam wayarangiya.
19 Ashiri nuwaam Apanll pang’ wach tawatangcha.
Nuwsha pshtuyaruri Apanllee, Wappari tápi, atina.
20 Iy Apanllchichini Apanllish pang’ pshtuyaruni,
anush Apanllpat ipunchiniya.
21 Ashirucha, nuwsha shiyaa, Apaa, wappari, atina,
watam shiy nuwaa kuki mazinarangush,
nuwaa tapachindarangshawa.
22 Siyaa Apanllchicheetsis k’kuzee napuxtamashee kamanchintspa.
Panguspan tputs panguksin, patumbchee wanasiriwaatstaa yaksin,
itaru; Annaa wanasireeja, tárangusin, kapeetaranganaya.
Ashiritaa, Apanllsha patumbchee ipuseeru, zurampatari wanasir wayarangiya.
Natunaa kizpur wanasiri pashuchima, Apanll tárangiya.* 118:22 Yuwaa nish átu anootstam Lukasa 20.17; Tayaspatampani 4.11, misha 1 Pitoru 2.7 atitamta.
23 Apanlltanda ashirangu atuni,
¿Tamaru Apanll kizpur wanasir ashiranga? táchiniya.* 118:23 Yuwaa nish átu anootstam Matiwa 21.42, misha Márkosa 12.10-11 tayusima kamankiya.
24 Apanllsha ashirangu, na in zar iyaa tapachindayanlliya.
Ashiri iysha shiyamun Apaa, mangini kis shambatkiniya.
25 Apaa, iyaa izuuru tapachindangcha.
Iyaam wanasiri taamaam istangcha, atiniya.
26 Shaana ipusamarineetsish iyaam zangankush
wanasiri napangcha.* 118:26 Yuwaa nish átu anootstam Matiwa 21.9; 23.39; Márkosa 11.9; Lukasa 13.35; 19.38; Wanga 12.13 tayusima kamankiya.
Sheerush, iysha shiyash pangish shaniyeeruni,
iyaatstam wanasiri napangcha, atina.
27 Apanll Taarashipan wamari kasiru taakiya.
Iyaa mangeetsini tuwasinichiya.
Ashiri Apanllimun shambateeni. Masharoo war kuyaruni,
Apanllish pangu pshtuyaruni,
Apanllip suma wakara witsip xanatchinipa, atina.
28 Apaa, shiyaa, Wappari, atina. Shiyamari kasiksha,
Shiyaa nuw Apareetseeruri, ungirtakina.
29 Shiy Apaa, kizpur wanasirtishcha.
Shiy urutamari iyaa chinaksha.
Ashiri ichinguruni, shiyaa Apaa, Wappari, atiniya.
119Apanllee kuk kizpur chinakina atiya
97 Tamaru nuw shiyaa kukish chinakina, Apaa.
Ichinguru zar shiyaa kukish chinakuri taakina.
98 Uru shiyaa kamachtamarish kis payukina.
Kamachtamareetsish kapung yasakuri, mangiptarti itsinsaru chinakina.
Kundarari nda ashkanaya.
Ashiriya, kundarareetsi kasiru mangoonkina. 99 Kamachtamareetish uru chinachintar ashkuri,
mayistorootstaa kasiru mangoonkitamana. 100 Tputsee wachinawaatstaa, kasiru mangoonkitamana,
watam shiyaa kukish tuminkinawa.
101 Shiyaa kukish izuuru mangipti payupi aturi,
yutaritshishireetsi izuuru kasarangina.
102 Shiy shaana Apaa nuwaa tayaspataksha.
Ashiriya, shiyaa kukish kasacheezi, ndambaree. 103 Watam shiy chinashish kizpur wanasircha.
Mishat, kama kinduraa wayar waakuch, kizpur kisa an
tamapari ashiriya nuwaama shiy kukish.
Shiyamun kukish mangi kisa.
104 Shiy kukish nuwaa itsinsaru chinamaam tayapstakiya.
Ashiri tputs yutarit taaku an nuwaam kizpur yutarita.
105 Shiy kukish mbarinpaz ashiru shiyaa itsinsaru tachitamaam
ktsishtamti naamaam tuwasineekiya.
106 Shiyaa Apaa, sirú tárangina:
Shiy kukish wanasirimishcha.
Ashiri izuuru payuchima, táranguri, anoomari chinakina.
107 Apaa, kapung kiyung kachiykina. Itaru shiysha,
Nuw uru ksutchinllpa, tárangsha.
Ashiri taarasheetsi ksutanda, Apaa.
108 Shiyaa ungirtakuri, shiysha nuwaa kuki kis mazinangcha.
Shiy uru nuwaa itsinsaru tayaspataksha.
Ashiri mangeetsi p’tseengcha, mangipti taamaama.
109 Yutaritshishpan tputs nuwaa pachamaam zandkusin,
uru nuwash xarashish wayakanaya.
Itaru, nuwsha shiyamun kukish mangi tatkina.
Kasacheezi, ndambaree.
111 Shiy shaanaatsi kukish uru nuwaam istamaam panarangsha.
Ashiri mangishi payukuri, mangi ksakina.
112 Ashiriya, urutamari izuuru tsipatspatari shiyaa kukish chinapi atina.
Kasacheezi, ndambaree.
129 Shiy kukish Apaa, kizpur wanasircha.
Ashirucha, nuw shiyaa kukish izuuru payukina.
130 Shiyaa kukish tputs tayaspataku, wazareetsiri tputsee mang’ p’tseekiya.
Tputs sirú nduntaa mazinarangu, mangoonamaam kamiranshita.
131 Nuwsha anungazimari mazinamaam zandkina.
Uru kis mazinakina.
132 Shiysha Apaa, uru tputsireetsish chinaksha.
Ashiri nuwaa nayanikush istanda.
133 Shiyaa kukish uru payumaam nda kapeetamaam istanda.
Yutaritshish nuwaa kasirundama, átana.
134 Tputs nuwaa, Pachayani, atusin, ashiri shiysha Apaa tapachindanda.
Nuw shiyaa kukish izuuru tuminpi atina.
135 Nuwaa chinampa wanasiri napangandama.
Shaanaatsi kukish aranginasha nuwaa tayaspatangandama.
121Apap uru iyaa ksutku anoo kamankiya
Tputs Apanllip pang’ Siyonap machip kárkatssin yaseeranganaya.
1 Apaa, íwar machip napkuri,
¿chakaja nuwaa istachinda? atina.
2 Itaru, shiysha Apaa, nuwaa istaksha,
watam shiy kanindaa mishat
tsapootstam tinarangshawa, atina.
3 Ashiri siysa Apanllchichis, mazinangantsa nuwaa kuki;
Yuwash naakish anush Apap siyaa pantsatpa átu, patsisakiya.
Siyaa uru ksutkiya. Psaantam, kaschiritam uru ksutkiya.
Watam Apanll maamaam nda yasaruwa.
Uru iyaa Israelchicheetsini ksutataw ashku taakiya.
Kaschir kizpuritaa zar zatku, ksaneeku nda siyaa kasikiya.
Psaansha tsup tuwasineektaa, nda siyaa tayutaritkiya.* 121:3-6 Apanll wanichu anu 7.16 tsiyatsis nipta tatsamooru taaritamta.
7 Apanll Taarasheetsis uru ksutkiya.
Yutaritshish tushiyku anootstam tapachindakiya.
8 Shitungachus, Apap uru napkitamta.
Kanapkachus uru napkitamta.
Ashku, siyaa urutamari ksutkiya.
Ayamtaati kasacheeja, ndambaree, átana nuwaya.
122Tputs Apanllip pang’ Siyonap machip kárkatssin yaseeranganaya. Dapiyarini wayassi.
1 Tputs nuwaa, Natu, pzaya. Apanllip pang’ naayani, atusin,
nuw mangi kis, Ayu, pzaya, tárangina.
2 Yakat Irusarinush pshtukamchuni;
Na kuseenicha, mangini kis atiniya.
3 Iyaam Israelchicheemani shaniymaam Irusarinaa panguranganaya.
4 Sirútama Apanll iyashchee kamachtarangu,
Uru shaniykus, nuwaa ungirtangtsa, tárangu,
anush iysha Israelchichini ichingaruni shaniyeeruni, Apanllee ungirtakaniya.
5 Kurak Dapiyash pang’ k’kuzee yaramaam shaniykanaya,
tputsee itsinsaru istamaama.
6 Ashiri siysa, yuwis nish shaniykis anis,
zurampatari mangiptis Apanllee tsiyatkus,
Irusarinush uru mapiyshish taachpa.
Apaa, shiy tputsirish uru nish kis taachinllinpa, tángcha.
7 Nimun tputs kisshapari tandapunuzish taachiya.
Tputs izuurasha mapiyrsin kurakush pang’ taachinllinpa.
Undarar kasitpa, Apanllee tsiyatkus tángtsa.
8 Nuw nimun zuwanlleetsi, misha amikureetsi táchima;
Na nimun mangis kisshapari mapiyrus taatssa.
9 Pangusimun yaanamuni Apanllirini pang’ anumunari mapiyrus taangtsa, atina.
Anuri chinangtsa, átana.
124Tputs Apanllip pang’ Siyonap machip kárkatssin yaseeranganaya. Dapiyarini wayasi.
1 Iyaa Israelchicheetsini Apanll ndunnaari istarangu,
iy ndunnaarpariniya. Anoo siy ichingarus yasaksa.
2 Apanll iyashchee ndunnaari istarangu,
kundararini iyaa tpachingayarinaapsinaya, kasaranganaya.
3 Iyaa kapung natsarangusin,
izuurinaapari watstamari iyaa ashpaatsiritini kachingaranganaya.
4 Kung ashirinaapsinaya iyamun kushini zaw sheersin,
izuuru iyaa arap kapeetaranganaya.
5 Kungushpaz imurish ashiruni iy yangaranginiya.
6 Ashiri, Apaa, Wappari, atiniya.
Watam iyaa ndunnaari istarangush,
kundararini izuurinaapari iyaa nutsini tachuwiyarusin,
watsiyunpa kasaranganaya.
7 Itaru, shiy iyaa istarangush, xarashee kamungaranganiya.
Maachi zamiz mirpanzee izicheeru, kamungtaru ashiruni,
iy xarashee kamungaranganiya.
8 Apanll Taarashipani, yuw kanindaa tinarangu,
mishat tsapootstam tinarangu, an iyaa tapachindarangiya.
Ashiri Apanllimunari mangini tatkiniya.
126Yuwapur Utaáchich tputs Babiloniyamand káyarusin, mang’ ksaksin, Irusarinap kanapurangana, anoo nda mbizamaam apanllpan nee yaseesshee yandarangiya
Tputs Apanllip pang’ naaksin, machip kárkatssin yaseeranganaya
1 Apanll iyaa; Waptam Irusarinap kanapungints, tárangu,
iysha, Pamazookpariniya, táranguni, mangini ksaranginiya.
2 Mangini kizpur ksaranguni, siriptini kis yasiyastar ashiranganiya.
Minshuchtisin tputs iyaa naparangsin;
Apanllpari kapung istarangiya, táranganaya.
3 Zurkusin táranganaya.
Apanll iyaa kizpur wanasiri istarangu,
waana iyaam mangooz ksashish panarangiya.
Ashirucha, mangini ksaranginiya.
4 Apaa, iyaa tsapuni kizpur wanasir yusur yánischingi,
tsapunshi wanasir kxunamaama.
Yusur sin sinakchu, ichinguru wanasir kxunchiya.
5 Tputs kiyung kachiykusin, tanuktaatssin,
mazarish tatsumirangana,
anootssha mang’ kissha pusachinlliniya.
Mang’ kis pusayarusin,
yasimpatari pangup kanapchinllinaya.
127Apanll iyaa ksutku, mapiym panaku anoo kamankiya
Tputs Apanllip pang’ naatarangsin yaseeranganaya. Salomonarini wayasi.
1 Apanll tputsee tarawzupani ndunnaar tuwizpurtaku,
tputssha waanpata wizpurini nda pangumaam waritakiya.
Apanll yaktaa nda ksutamaam istaku,
tsangampansha tputs mangutari ksutkanaya.
2 Mishat, Apanll ndunnaar tputsee mzatspani istaku, mangutari kiyung kachiykiya.
¿Mayaamsa punirustayarus, Marizpa, átus,
zar wazuran tarawaztakus, tapitaranllu kasaksa?
Ngutaritis saanaatsee kiyung yachakus ashiksa.
Watam Apanll tiptsiree chinaku, ksutku,
kanusshisheem wayaranguwa.* 127:2 Matiwa 6.25-34; Wanga 15.3-5 tsiyatsis nipta tatsamooru taaritamta.
3 Apanll tputseem wipaa zapan panaku, an kizpur wanasiricha.
4 Kanungas wipaa iparinaku, wipsha kanungaseeyarusin,
wásap tamapari ashiru waparee tapazeem tapachindachinllinaya.
5 An tputs wip zapan taaru, mang’ kis mapiyru taachiya.
Undararsha yutarit tsiyatku,
tputssha wipapat tasaskachu, punicheeja, ndambaree.
Kurakaa nda paziku, itsinsaru tsiyatchiya.
130Apanllimun mangich tatkuch, piy ashtarchi
Tputs Irusarinap naakchusin yaseeranganaya.
1 Zurampatari mangipti Apaa, shiyaa kuruzkina.
Mangi kapung mantsakina.
2 Apaa, nuwaa kuki mazinangandama.
Nayaningandama. Yutaritshishireetsi tchingangandama.
3 Apaa, shiy iyaa yutaritshishirineetsini kirakarishish yandaranginaareesha, nda mbizakush,
¿chakaja shiyash pshtuch?* 130:3 Romshucheema 3.23 tsiyatsis nipta tatsamooru taaritamta.
4 Itaru, shiyamaricha yutaritshishirineetsini yaramaam waritaksha.
Shiyaatsimari chinakaniya.
5 Ashiri Apaa, shiyangzimari mangiptarti kutakina.
Apaa, yaranganda, watam shiy, Mangeetsish tachingchinllpa, tárangshawa.
6 Ashirucha, nuwsha shiyaam kutakina.
Yaktashuch ksutamapan psaan kutaksin, uru tarasitan ashkana,
nuwsha ashiritamti shiyaam kutakina, nuw atina.
7 Ashiri siysa Israelchichis, Apanllimun mangis tatkus k’tangtamtsa, nuw tamakparina shingtamtsa.
Watam Apanllimari iyaa chinaku, izuuru tapachindakuwa.
Ashkachu, izuuru Apanllpatarisha kis taatssa.
8 Iyaa Israelchicheetsini yutaritshishirinee ichinguru yarchiya,* 130:8 Matiwa 1.21; Titooma 2.14 tsiyatsis nipta tatsamooru taaritamta. nuw siyaa atina.
137Yuwash Israelchich tputs Babiloniyash tsap taarangsin, mang’ kapung mantsarangana anoo kamankiya
1 Babiloniyash tsap kungumun wing washunand kuxineeruni,
Apanllingaz pang’ mach Siyonangaz chinayaruni, tanuranginiya.
2 Yasinamunsha wapzar kitararineetsini kayxuranguni, kasaranginiya.
3 Babiloniyashuchsha wasundurur,
yuw iyaa putayarusin machirangsin, muchchureem ínarangana
an iyaatssha: Natu, siy Siyonshuchis, Apanllireetsis yaseengints.
Mangis kis yaseengints,
iyaa táranganaya.
4 Itaru, iysha ¿nitaati nish tputsish watsapun Apanllee kis yasicheezini? Pinasakaniya.
5 ¿Tamaree Irusarinaa mbizachini?
Mbizakinaareeniya, shiysha Apaa, iyaa waneengcha.
Kuweetsini mbutsunungich mayapshingcha,
ayamtaati nda kitartamaama,
misha neepureetsini tpatstangtamcha,
ayamtaati nda mangini kis yasimaama.
7 Babiloniyashuch wasundurur Irusarinush pshturangusin,
misha Edomshuchsha tputs pshturangitamsina.
Iyaa natsaksin, Babiloniyashchee;
Natu, pangoo ichingaru pátang pátang sheerus, ksangtsa, táranganaya.
Ashiri shiysha Apaa, anoo mbizarinllpa.
Izuuru Edomshuchee waneengcha, átana.
8 Mishat, siyaa Babiloniyashcheetsis, Apanll izuuru wanichiya.
Kundararis siyash kuskatssin, siyaa watstamari kasichinllinaya.
¿Siy waninll iyaa kiyung yacharangsawa?
Ashiri kundararis siyash kuskachusin,
tatsamooru siyaatstam kiyung yachachtamsinaya.* 137:8 Apanll wanichu anu 18.6 tsiyatsis nipta tatsamooru taaritamta.
9 Ipareetstamtis putayarusin, patumbchimun tpuw tpuw shimbayarusin,
pachambeersin kasachinllinaya.
Yungpari ashchinllinaya.
139Apap waana tputsee taarash ichinguru yasaku anoo kamankiya
Dapiyarini yandarangu anoo.
1 Apaa, shiy nuwaa mangi yasaksha.
Shiy nuwaa taarashi yasaktamsha.
2 Ichinguru ashki anoo yasaktamsha;
Ichinguru chinaki anoo yasaktamsha.
3 Yuwaa naaki anoo yasaktamsha,
Aship ashki anoo paksha, Apaa.
4 Ndatumastaa tsiyataruri, nuwaa kuki uru wasina yasaksha.
5 Shiy Apaa, nuwaa ichingaru zar ksutaksha.
6 ¿Tamaru shiy ashiksha, Apaa?
Nuw anoo mangoonamaam pinasakina.
7 Shiyaa kasamaam zandkitaati,
itaru ¿yapeeja suwaychi?
Yaptaa naaki amb shiy kanish urutari nuwash tachitkiya.
8 Íwar kanindap kárkitaateena, itaru shiysha anshutamtishcha.
Tsapush waantsush pshtukitaateena, shiy anshutamtishcha.
9 Kambusurush arap naakitaateena,
yap zari shitungku amb naakuri, shiy anshutamtishcha.
10 Mus kapungumashee kitkitaateena,
yap zar pshtuku amb naakuri,
shiysha Apaa, anshutamtishcha.
Shiy uru nuwash taaksha.
Nuwaa patsisakush, nda kasaksha.
11 Tapish ipishungachima, aturi,
shiysha, Apaa, nuwaa pakshawa.
’Sinee kzateetaateena taakuri,
Apaa, shiysha nuwaa paktamsha;
Watam shiy nuwaa tuwasineekshawa.
12 Shiy tapshutaa nuwaa pamaam waritaksha.
Nuwaa kaschiritam paksha.
Shiyaam ichinguru kaschir tamapari ashiriya.
13 Shiy, Apaa, aneershi waxangan nutseemi tínarangsha.
Nutseetsi wanasiri tínarangsha.
14 Ashiri, Apaa, nuw wappari atina shiyaatsi.
Nuw mangishi chinakuri, ¿Tamaru Apanll ashiranga? aturi, napuxtakina,
watam nda mangoonkinawa.
Iyaa tputseetsini nutseemani kizpur wanasiri tínaksha.
Nuw aneershimasi waxangan taaruri,
shiysha Apaa, uru nuwaa yasarangsha.
16 Nuw ndatuma nllurtachuri, waantsshu tapish taaruri,
shiysha Apaa, nuwaa taarashi wasina kirakarimunish yandarangsha.
Ndatuma minamtiyam zari ’sinee paruri,
shiysha nuwaa taarashi ichingaru yasarangsha.
17 ¿Tamaru Apaa, nuwaa chinakush ashiksha?
Urutari nuwaa chinachintar ashkush taaksha.
Nuw maakuri, taraseekchuri, uru anshutam nuwapat taaksha.
Nuwaa ksutaksha.
19 Ashiriya, shiy Apaa, pachampanee tputs nuwaa kasimaam zandkusin,
anoo arap zanganingcha. Tpachingangcha.
20 Shiyaa mantsir tsiyatkitaa,
itaru shiyaa kasimaam pinasakanaya,
watam shiyamari kasikshawa.
21 Shiyaa undararsincha.
Shiyaa natsakana anumand nuwsha uwaa natsakuri, niyrkina.
23 Ashiri Apaa, nuwaa mangeetsi yasangandama.
Yachangandama.
Mantsir naakinaareena,
shiysha Apaa, nuwaa mangeetsi p’tseengandama.
Shiyap izuuru kusamaam nungipiritish machingandama, urutamari taamaama.
Ashiri Apaa, wapparee, Dapiyarini tárangiya.
145Ztaru tputs Apanllee ungirtamaama
Dapiyarini wayassi.
1 Shiyaa kurakareetseeruri urutamari ungirtakina.
Shiyaa chinakina.
Ayamtaati shiyaa mbizcheezi.
Apaa Taarashipanee, shiyaatsimari ungirtakina.
Putam putam shiyaa kis yaseekina.
3 Taarashipanee, shiyaatsimari tputs ztaru ungirtamaam waritariya.
Shiyapat min tatsamooru wanindaja.
Shiyaa izuuru yasamaam wanindtamtaja.
Shiyamari kasiksha.
4 ¿Wanipa Apaa, shiy wizpurirpatish iyaa Israelchicheetsini istarangsha?
Iyaa tapachindarangsha.
Ashiri ipartamani, chinllinitamani uru shiyaa tputsee kamanimantar ashchinllinaya.
5 Nuwsha urutamari shiyaa chinachintar ashkuri taachina.
Shiy kizpur wanasir ’sinish taaksha.
Mishat, iyaa uru ksutkush kizpur taaksha.
6 Tputs ztaru shiyaa uru ungirtaksin,
waanpataatssin kamanimantar ashchinllinaya.
Nuwsha ashchitamana.
Apanll ¿wanip wizpurpa iyashchee istaranga? nuwsha uru táchtamana.
7 Mishat, tputssha, Apanll iyaa ksumish chinakiya.
Iyaa ichingurootsini tatsamooru ksutkiya,
yaseeksin táchinllinaya.
8 Watam Taarashipanee, shiy kchinamishshawa.
Nayanimpantishcha.
Nda musá tsiyantakush, uru iyaa nayaniksha.* 145:8 Sandeeku 5.11 tsiyatsis nipta tatsamooru taaritamta.
9 Tputsee ichinguru tatsamooru chinaksha.
Ichinguroo istaksha.
Tínamareetsish ichinguru ksutkush taaksha.
10 Yuw shiy tínarangish an ichinguru shiyamun kis taakanaya.
Mishat, tputsiritamtish, shiyamun shambatchinllinaya.
11 Iy kurakarini kizpur wanasircha.
Waamari kasiru taakiya, táchinllinaya
12 Tsapurunasshuchee tputs yasashpatish mangoo p’tseekush, mang’ ksachinllinaya.
¡Apanll wizpurpa wanasir tuwasineerangu, atusin mang’ ksachpasinaya!
13 Shiyamari Apaa, kizpur kurak kasirush,
tsapurunasish urutamari taaratartachsha.
Shiyachich ayamamtiyam pastacheeja, ndambaree.
14 Tputsirish kiyung kachiykitaatssin,
waanaatsee tapachindamaam pinasaku,
shiysha Apaa, nayanikush istaksha.
Undarar kiyung yachaksin, shiysha Apaa, tapachindaksha.
15 Tsapurunasshuch ichingarusin, katungpani atusin,
watungasheem shiyaam kutakanaya.
Watam shiy uru panakshawa.
Yuwash zari waritakchu, maachi kayanakchu, pusayarusin, katungkanaya.
16 Watam shiy Apaa, kuwiptish tputseem kchitamaam panakshawa.
17 Apaa, uru itsinsaru tputsee natstayarush, ksutaksha.
Nayanimpatari tputsee istaksha.
18 Tputs shiyaa itsinsaru mashku, Istanda, tákchu,
shiysha uru mazinaksha.
Watam nda arap taakshawa.
19 Shiyamun Apaa, mang’ tatkusin,
shiysha uru istakush, mapiyrsin taakanaya.
Apaa, istangandama; sitatstee.
Maachee yutamash kasikchindama, tákchusin,
shiysha mazinakchush, tapachindaksha.
20 Apaa Taarashipanee, yuw tputs mangpatari shiyaa itsinsaru chinakana
anoo tputs uru ksutaksha.
Itaru, tputs shiyaa chinamaam ngatkusin, natsampan taaksin,
anumashee tputs shiysha izuuru tpachingayarush kasaksha.
21 Apaa Taarashipanee, nuw urutari shiyaa yaseekuri ungirtachima.
Tputs ztaru urutamari shiyaa wanasireem ínaksin, ungirtaksin taachinllinpa.
148Maachtawatamtis, tputstamtis, ichingarus yuwis Apanll tinarangu anis, Apanllee yaseengints
1 ¡Apanllee yaseengints!
¡Ichingarus yuwis íwar taakis anis, kanindamand zunganeengints! Ungirtangints.* 148:1 Lukasa 2.14 tsiyatsis nipta tatsamooru taaritamta.
2 ¡Siysa Apanllis wasundururis kurakareetsis seengints; ungirtangints!
3 ¡Zartamtis, tsupitamtis, Apanllee seengints, ungirtangints!
Siy ichingarus yuwis íwar sunlleerutarus kurakurtangatis, tsangachis, irunlltamtis anis,
Apanllee ungirtangints. Seengints.
4 Kanindawtamtis kawambanaris kungutamtis
yuwis kanindap iwaz taakis anis,
¡Apanllee ungirtangints; seengints!
5 Apanllee Taarashipanee ¡Seengints; ungirtangints!
Watam siyaa amb ashichpa átu,
kamachtambeeru, íwar waana tinambayaru, mbam wayambaranguwa.
6 Urutamari taachpa, tárangu,
¿Waa kuk chakaja michitach tayutaritach?
7 Mishat, ichingarus yuwis tsapurunasis taakis anis
¡Apanlleetsi seengints; ungirtangints!
Marshuchis kapungumashis, yuwis kungush watareewis imurishuw taakis anis,
Apanllee ungirtangints.
8 Siysa mamartamtis, sin kachizamashtamtis,
Sírinuwtamtis,
Apanllee ungirtangints.
Kambusurutam, yuw Apanll kamachtaku, kukoo tuminkis anuwis,
Apanllee ungirtangtsa.
9 Macheew íwaritamtis, manginawtamtis,
yasinawis,
Ichingarus karipanawis,
yasinawtamtis wanuseewtamtis.
Apanllee ungirtangints.
10 Wakarawtam, chinuzeewtamtis, manginshuchitamtis, kpurangamasheewis, pshiyrataru anuwtamtis,
Apanllee ungirtangints.
11 Mishat, siysa tsapurunastamtis urkaris tiptsirpatatis anis,
yaktashtam urkaris, misha yaktashucheewis tputsis,
12 kamuzini, kizawtamtis, kanungaseewtamtis, kamasinawtamtis, wachinawtamtis,
ichingaru ztaru tsapurunasshuchis,
13 ¡Apanllee Taarashipanee yaseengints; shambatangtsa!
¡Uwamari kasiru kanindaatstam, mishat tsapurunaseetstam ksutkiya!
Taarashipan nllitarita arang wanindaja.
14 Iyaa Israelchichini waana tiptsireem ipusarangu,
iyaatssha uru tuwizpurtakiya.
Ashiri iysha uru Apanllee chinakuni ungirtakuri taachiniya.
¡Apaa Taarashipani shiy kizpurtishcha!
150Ztaru tsapurunas yasimaam Apanlleetsi shambatangtsa, átcha
Dapiyarini wayasi.
1 ¡Apanllee waanshu pang’ shambatkus, seengtsa!
¡Yuwash kizpur wanasir kanindush taaku, anush shambatkus seengtsa!
2 Wanip iyaa istaranga, ashiri shambatkus seengtsa.
Wizpur ayamtaati nda kachingtaru,
Ashiri ungirtayarus, shambatkus seengtsa.
3 Uru trumpetaa tiruchkus, Apanllee shambatkus seengtsa.
Uru kis kitarpa kitartakus shambatkus seengtsa.
4 Mangis ksakus tamburpat michitkus, shambatkus, seengtsa.
Tiruchzipta tiruchingtsa, shambatkus seengtsa.
5 Ngusambpa tsireen, tsireen átus, zungan zungan shambatkus seengtsa.
Ngusambpa tushurangayarus arap zunganeerus shambatkus seengtsa.
6 ¡Yuwamun kanusis itsiparu, wizpuris anumun xipungayarus,
Kizpur yaseengtsa!
¡Shambatangtsa Apanlleetsi!
[Watamcha yuw Israelchich Apanlleem yaseerangana anu.]