Esdra

Esdrarini kuku

Yuwaa kirak Esdrarini yandarangu anoo pakich kamanchintspa

¿Chakaja anoo yandarang?

Esdrarini waanaatsi kamanku nee kiraka yandarangiya.

¿Chakaama yandarang?

Esdrarini waanpatatin Utaáchichpatatin waneeku yandarangiya.

¿Mayaamaja yandarang?

Esdarinsha, Utaáchich tputs ayamtaati mbiztapa, átu, yandarangiya yuwaa Utaáchich tputs wapitam watsapunip kanapurangana anootsi. Apanll waana istarangu, wanasir kanapurangana. Undararsha xarashish zapan wayarangitaatssin, ashiritaa Apanll kapung istarangu, Apanlleem pang’ wanasir panguranganaya. Mishat, Utaáchich tputs, zitaminarin tamarangpasinaya ashiritam arapchingaz wizanur támararangusin, zapan yamayamtar ashiranganaya. Anumand apanllputsee zapan chinarangana. Ashiriya, shaniyeersin, Arapchee wizanur wayuchip zanganeeni. Ashkachuni, yutaritshishee izuuru kasachinipa, táranganaya. Tputs anoo mbiztapa, átu, Esdarin nee kirakaa yandarangiya.

¿Mayaatseeja kamanik?

Na yuwari kamanku anoo kamanchintspa.

Kapitoro 1.1—2.70: Sírurini, Babiloniyshuch urkar Utaáchchee tputsi istarangiya. Yuwis waptam tsapunpis kanapumaam zandkis anis naangtsa. Nuw siyaa istachintspa. Apanlleem pang’ yusur wanasiritam pangoongtsa. Neewa maachirita ichingaru. Nabukodonosorarini nee ichingaru yarangu, siysa yantsa, tárangiya Sírurini. Zapan tputs ayu táyarusin, waptam kanapuranganaya.

Kapitoro 3.1—4.5: Kuseeramchusin, mikeersin chichiree puyayarusin, musásiritam Apanlleem pang’ pangumaam chinarangana. Apanlleem suma ichtaru kayataranganaya. Sheersin, tputssha ichingarusin shaniyeersin, shambatshisheem itupshingamaam tambta tambta ashiranganaya. Kis shambataranganaya.

Kapitoro 4.6-23: Sheersin, Apanlleem pang’ pangooyani, táranganaya. Itaru, undararshitisin tsiyantarangusin, Watsta. ¿Mayaama shiy ashiksa? tárangusin, kirakaa Babiloniyap zanganiranganaya. Anumunsha, Babiloniyshuch urkar kirak yandaru, Apanlleem pangumaam watsta, tárangiya. Tsiyatssee yaramaam Esdrarinsha Babiloniyap naatarangiya.

Kapitoro 4.24—6.22: Zapishsha, wanipamasaja masach tushiyrangu, Apanll waanaatsi wamachtash tsimbun zanganirangiya. Jagayarini, misha Sakáriyasarintam Irusarinush kuseeramchusin, Apanlleem pang’ mikeerus pangoongtsa, táranganaya. Sheersin, mikeersin pangoorangusin, musásiritam iwaparanganaya. Ashiriya, kapung shambateeni, tárangusin, shambatshish yuw Ijiptosh tsap shitungarangana anoom shaniyarangsin shambataranganaya.

Kapitoro 7.1—10.44: Esdarinsha yusur Utaáchichpa tputs zapan Babiloniyamand káyarusin, Irusarinap kanapuranganaya. Anush kuseeru, mang’ kapung mantsarangiya, yuwamand Utaáchich tputs arapchee wizanur zapan yamarangana anumanda. Zitaminarin tamarangpasinaya ashiritam wizanlleem zapan yamarangana. Ashirucha, tputseetssha waneerangu, tputssha kuseersin, Ashiriya, arapchee wizanur wayuchip zanganeeni. Ashkachuni, yutaritshishee izuuru kasachinipa, táranganaya.

Esdrarini kuku

[Babiloniyashuch sundar Utaáchchee Babiloniyap tsap machtarangiya. Itaru, ndatuma macheerusin, wasina Apanllee kuk kamanimapan, Jeremiyas sura, Utaáchchee tputs kamanirangu: Siysa Babiloniyash 70 masach taachpasa. Sheeru, Apanll siyaa saanpeetam tsapunpis zanganchiya, tárangiya. Ashiri 70 masach tushiyrangu, Persiyashuch urkar, Síru sura, Babiloniyashcheemtam urkar kinarangiya. Anumunsha, Síru Utaáchchee waptam wanpeetam watsapun zanganimaam chinarangiya.]

Ashiriya, na kamanchinllpa yuwaa Apanll kurakaa Síru mangu p’tseerangu, Utaáchchee waanpeetam watsapun zanganichparina, tárangu anootsi

¹ Persiyashuch urkar, Síru, sura, waanaatsisha Babiloniyashcheem urkar ínarangiya. Ndatuma minam masach tushiychu, Apanllee kuk tuminumaam tatsamoorangiya, yuwaa Jeremiyasarini tsiyatarangu anootsi. Ashiri Apanllsha Síroo mangu p’tseerangu, Sírsha Utaáchchee waptam wanpeetam watsapun zanganimaam chinarangiya.

Ashiri waanaatsi tiptsir kamanirangu, mishat kirakamuntam yandarangu, tiptsireem ztaru tsiyatssee zanganirangiya. ² Nuw Persiyashchi kuraki siyaa nuw tputsireetsi atina: Apanll Taarashipan waamari kasiru anu, nuwaa tputsee ztaru ksutamaam kurakaam ínarangiya. Sheeru, nuwaa waama pangu yakat Irusarinush, Utaásh tsap pangumaam kamachtarangiya. ³ Ashiri siysa Apanllis tiptsiris yuwis Apanlleem pang’ pangumaam zandkis anis, Irusarinap, Utaáp tsap, kanapungtsa. Siy Israelchichis Apanllee chinakus, Apanllsha siyash Irusarinush uru taachiya. Ashiriya, siysa Utaáchchis Irusarinap naayarus, anush Apanlleem pangumatssa. Siy Israelchichis uru Apanllee chinaksa. Mishat, Apanll siyash Irusarinush uru taachiya. ⁴ Itaru, siy Utaáchchis, yuwshtis Irusarinap kanapumaam ngatkis anis, maachtapa istakus taangtsa. Orootstam, misha katungtseetstam panangtsa. Wakarareetstamtis, opeejaatstam panakus taangtsa. Mishat, kurikpatatam istangtsa, Apanlleem pang’ Irusarinush pangumaama, kurak Síru kamachtaku tárangiya.

Ashiriya, na kamaneena yuwaa Síru Utaáchchee, Irusarinap kanapungints, tárangu anootsi.

Ashiriya, na kamanchintspa yuwaa Israelchich waptam Irusarinap kanapumaam chinarangana anootsi

⁵ Ashiri Apanll tputsee mangu p’tseerangu, Utaáchich tputs, mishat Benjaminchichtam tputs maachiri, mishat apanllpantam, Leviychichpatatam ichingurusin zapan tputs waanpatatin, Pza, kanapeeni, Apanlleem pang’ pangumaama, táranganaya. ⁶ Ashiri yuwshtisin kanapumaam nda zandarangana anshtisin, Ashiriya, iyshat maachtapa istachinipa, tárangusin, kurikee, orootstam, mishat wakaraatstam, opeejaatstam, maacheewaatstam kizpur wanasiri anuwaatstam panaranganaya. Zapan yuwaam Apanlleem pang’ pangukana anoom panaranganaya. Mishat, yuw tputs waana zandarangana, an maacheetsi zapan Apanlleem zanganiranganaya. ⁷ Anumunsha, kurak Sírsha, muchchuree kuruzurangu, Siysa maachee ichinguru Apanllish pang’ Irusarinush sirútama Nabukodonosor yarangu, anoo ashparit yáyarus, xanateerus, Utaáchcheem tuwanpungtsa. Nabukodonosor waana apanllirinshini pang’ Babiloniyash wayarangu, anoo kurak Síru kamachtaku tárangiya. ⁸ Ashiri tputssha maacheetsi ichinguru yarangusin, Sírsha, waanaatsi urkir ksutamapanee, Mitridatee sur, kamachtarangu, Shiysha ichinguru tácheerush, tatsamooru Utaáchcheem gobernador, Sesbasaraam panangcha, kurak tárangiya. Ashiri Mitridatissha ichingaru maachee táchirangu,

⁹ 30 mangaw kapungamash orpa chumbeepimashpa tinam, mishat,

1,000 mangawatam orpa mburshimashpata tinam, anumunsha

29 k’chiru kizpur wanasirimish, ¹⁰ mishat

30 mangawtam waashi orpa chumbeepimashpa tinama,

410 mangawtamta waashi orpa mburshimashpa tinama, anumun arangeem

1,000 maachee zapan nllitaritaw táchirangtamta.

Anoo ichinguru táchirangu, Utaáchcheem gobernador tuwanpurangiya. ¹¹ Ashiri ichinguru washunandari maachi ashpari orpa chumbeepimashpa tinama, misha orpa mburshimashpa tinam maachee ashpirit 5,400 tuwanpurangusin, anoo Sesbasar yarangiya.

Utaáchich tputs zapan masach Babiloniyash tsap taarangsin, itaru kuraksha Sírsha, Na kanapungints, tárangu, Babiloniyash tsap shitungeerandsin waptamta Irusarinap kanapuranganaya.

¹ Tputssha tsap Utaáp kanapeeshinusin, ichingarusin yaptam zitaminarini sirútama taarangana ambtam kanapuranganaya.

Ashiriya, na kamaneena yuwaa Israelchich waptam Irusarinap kanapumaam chinarangana anootsi.

Kamanchintspa yuwaa Apanlleem pang’ pangumaam chtarangana anootsi

¹ Irusarinash kuseersin, pangurangusin, mazareemsha mzarangitamsin, 7 tsup tarawaztarangusin, iwaparanganaya. Ashirangsin anush, Na pzaya. Irusarinush shaniyeeni, tárangusin, ichingarusin Irusarinap naataranganaya. ² Ashiri anush apanllpansha urkar Josuey, Josadak wipa, apanllpanee ichingaru kuruzurangu, Ashiri natu, Apanlleem tazumaam kayateeni chineetsini muchimaama, Josuey tárangiya. Apanllpansha ichingarusin, mishat yakat Irusarinshuch kurak, Sorobabela sura, Sálatiela wipa, maachiritpatatamta, Apanlleem tazumaam kayatamaam chtaranganaya. Yuwaa Móysisarini Apanll wamachtash kamanirangu, anuritam tuminumaam, chinootstam Apanlleem muchimaam zandaranganaya. ³ Minshuch tputs, nda Utaáchich, Irusarinnung watsirit taarangana, anootssha Utaáchich puniranganaya. Itaru ashiritaa, tarawaztaranganaya. Apanlleem tazumaam yuwashutam sirútama wayarangana anshutam wayaranganaya. Anoo iwaparangusin, Apanlleem muchiranganaya. Puturi, mishat pukamchitam muchiranganaya. ⁴ Mishat, zar yuwash masharpa tambtarangana ansha tsup tatsamoorangu, tputssha ichingarusin shambatamaam shaniyaranganaya. Apanllee kamachtamarini tuminurangsin, apanllpansha wakaraa, mishat opeejaatstam puturit pachat, pukamachsha pachat ashiranganaya. ⁵ Anumunsha, kaneesich tsup tututkachu anushsha shambatkusin, Apanlleem yusur ashparitam wakaraa pacharanganaya. Mishat, yuwash Apanlleetssha wappari támaam shaniyarangtamsin, anushsha ashparitam wakaraa, misha opeejaatstam pacharanganaya. Tputs waantari zandarangsin, arangeem Apanlleem maachta panaranganaya. ⁶ Ashiri ndaturita Apanlleem pang’ pangursin, uru Apanlleem tazumaam kayataranganaya. Sheersin, anush chínootssha muchiranganaya. Tsup Octubrish kaneeschiri yáyaru, anush Apanlleem muchimaam chtaranganaya. ⁷ Apanlleem pang’ pangumaam tatsamoorangu, ashiri pangumpaneetssha, misha karpinterootstam kuruzurangsin, tsiyatarangsin, Tarawuztakchis anoom kurik tuwapchintspa, táranganaya.

Mishat, Tirshuchee, mishat Sidonshucheetstam tputs karipanaa yushindamaam kamachtaranganaya, watam kurak Síru, shingints, táranguwa. Katungatspa, vinpa, mishat wayungunpatatam, tuwapchintspa, táranganaya. Ashiri uwshtisin, Ayu, tárangusin, machip Libanup naatarangsin, karipanaa katspayarusin, marish kung yushindaranganaya, patussishu yakat Jopshu.

Ashiri Apanlleem pang’ pangumaam chtarangusin, ⁸ yuwamun tputs Irusarinap kanapurangana, anumun minum masach tushiyramachu, anumunsha tsimbunatam tsup anush Apanlleem pang’ pangumaam chtaranganaya. Sorobabela, Sálatiel wipa, mishat Josuey, Josadak wipa, apanllpanpatatam, Leviychichpatatam yuwatamsin tputs Irusarinush shaneerana, anshuchtam ichingarusin tarawaztamaam chtaranganaya. Ashiri Leviychich tputs, yuwanandari wachina masachirini veintimunari yaru, an tarawzipanee ksutamaam kamachtaranganaya. ⁹ Itaru, kaapaneeritana kurak tuchip taaranganaya. Apanllpan urkar Josuey, mishat Kadmira, Leviychich tputs, mishat Henadad Leviychichtam tputs, ichingurusin wipaptari, zoonllpa, washunanda tarawzipanee ksutaranganaya. ¹⁰ Ashiri pangumpansha tsapoo wantsush ktseeyarusin, patuzinazeem patumbich tinam zapan pashuchuranganaya. Sheersin, iwaparangusin, tputssha mang’ ksaksin shambataranganaya.

Apanllpansha urkar wamari wanasirimshee kamartarangu, wakaraa wits yáyaru, puu puu tárangana, anoo tputssha mazinayarusin, kusarteersin, ichingarusin Apanllee ungirtarangana. Leviychich, yasimpan Asafarinchich tputs, tamburaa yáyarusin, tamburtaksin, Apanllee mang’ kis shambatkusin yaseeranganaya. Yuwaa kurak Dapiyarini Asafarinchichee sirútama yasimaam kamachtarangu, anoo yaseeranganaya. ¹¹ Tputs ichingarusin Apanllee yaseeranganaya. Yaseeksin,

Wappari, Apaa. Shiy kizpur wanasirtishcha.

Israelchicheetsini kizpur chinaksha.

Nda iyaa mbizaksha.

Urutamari chinaksha.

Amb yaseeksin, atusin zamamtar ashiranganaya. Apanllee Taarashipani kis ungirtaranganaya, watam Apanlleem pang’ pangumaam chtaranganawa. ¹² Kizpur wachinawa tputsi, yuw sirútama nllurtama Apanllee pang’ parangana, anshatssin tanuranganaya, watam kaneesichsha pangumaam chtaranganawa. Apanllpan wachina, Leviychichtam, mishat tputs ichingarusin wachinawa tanuranganaya. Anpuritam zar ichingurusin zamangaranganaya, mang’ ksaksina. ¹³ Wachinaw tputs zapan tanuksin, mishat tputs zapantam mang’ ksaksin yasiyastar ashirangsin, zamangarangana. ¿Chak tanuka? ¿Chak yaseeka? tputs tárangitaatssin itaru, yasamaam pinasaranganaya. Washunandari tputs zapan tanuksin, yaseeksin, Jay, jay, atusin, kapung zamangaranganaya. Arapchitaa tputs anoo mazinarangitamsinaya, watam arap kimaranguwa.

Apanlleem pang’ pangumaam chtarangana anoo kamaneena.

Utaáchchee undarar xarashish kapung wayarangana anoo kamanchintspa

¹ Ashiriya, Utaáchich mishat Benjaminchichtam undarar Utaásh tsap taarangitamta, yuw Asiriyshuch urkar anush tsap wayarangu anu. Uwshtisin tsiyatssee mazinaranganaya. Utaáchich wapitam watsapuni kanapurangsin, yusur Irusarinush Apanlleem pang’ pangukanaya, tárangana. Anoo mazinarangusin, ² Pza, pangani Irusarinpi, táranganaya. Irusarinush kuseersin, Sorobabelpat, mishat Israelchichpatatam wachin tsiyataranganaya. Apanllee iy ungirtaktamanicha. Yuwapur kurak Isaradon, Asiriyshuch urkar, iyaa nish tsap wayarangu, anpur iysha Apanllee ungirtataritamaniya. Chineetstamani Apanlleem muchtariniya. Ashirucha, iysha Apanlleem pang’ pangumaam siyaam istamaam zandkitamaniya, táranganaya. ³ Itaru, Sorobabelsha, Josueypat, mishat Utaáchchitam urkar ichingarusin yamarangsin, Nduni. Siy iyaam istamaam waritacheeja, ndambaree. Watam kurak Síru, Persiyashuch urkar, iyaatsimari, Siy Israelchichis Apanllireemis Taarashipaneem pangungints, táranguwa. Ashirucha, siy istamaam pinasaksa. Iyamari panguchinipa, tárangusin, tputsee waptam zanganiranganaya. ⁴ Ashiri tputssha waptam kanapeerandsin, Utaáchich Apanllee pang’ nda pangumaam tamundat tamundat ashirangsin, uwshtisin puniranganaya. Kis tarawaztamaam pinasaranganaya. ⁵ Arangeem undararsha urkar waanaa tiptsireem kurikee tuwaparangu, Siysa Irusarinap naakchus, Apanlleem pang’ pangukana anoo ksangints táshinints, tárangiya. Ashiriya, Irusarinap naakchusin, mantsir Utaáchchee tsiyataranganaya. Utaáchichsha tputs Apanlleem pang’ pangumaam puniksin, kasaranganaya. Washunand 20 masach nda tarawaztarangana.

Yuwapur Persiyashuch kurak Sír taarangu, anpur nda tarawaztaksin, Sírsha tsiparangu, anumunsha Artarjerjes kurakaam kinarangu, anushsha nduntam tarawaztarangana.

Zapishsha Daríysha Persiyashcheem kurak kinarangu, anshunaa yusur tarawaztamaam chtaranganaya.

Ashiriya, kamaneena yuwaa Utaáchchee undarar xarashish kapung wayarangana anootsi.

[Yuwarpur Daríy Persiyashcheem urkar kinarangu, anpur Apanllsha waanaatsi kuk kamanimapani Haguew suru tsiyatarangu, Nuwaa tputsiri Israelchichi kamaningcha. Siy ¿mayaamsa nuwaam pangi pangumaam kasayarus, saamaatamsha pangis wanasir panguksa? Itaru, nuwaamsha pangi nda iwaparangus kasarangsawa, tputsee tángcha, tárangiya.]

¹ Ashiriya, Apanllee kuk kamanimapansha Haguew, mishat Sakáriyastam Apanllee kuk Utaáchcheem Irusarinush kamanirangana. Mishat, Utaáchichtam tputs yuw arangeem Utaá tsap taarangana, anoomtam kamaniranganaya. ² Ashirucha, kurak Sorobabelsha, misha Josueytam Apanllee kuk mazinarangusin, Ashiriya, Apanlleem pang’ panguyani, táyarusin, yusur pangumaam chtaranganaya. Haguewtam, Sakáriyastam tputseem istaranganaya. ³ Itaru, yuwapur Apanlleem pangumaam yusur chtarangana, anpur gobernadorsha Tatenay Irusarinush kusarangiya. Kuraksha Daríy Tatenayaa kung Eufratis arachich, yap zar pshtuku amb taarangana, anoo ksutamapaneem ipusarangiya. Ashiri Tatenaysha, wipunashpata Setar-Bosnayi, mishat istampanpatatam Irusarinush kuseersin, Utaáchcheetssha urkar tsiyatarangu, ¿Chaksha siyaa Apanlleem pang’ pangumaam kamachtayaru, siysa panguksa? ¿Chak siyaa shingints, táranga? ¿Siy kurakaris chaka suru? Tatenay tárangiya. Utaáchichsha ichinguru kamaniranganaya. ⁵ Itaru, Apanllsha Utaáchchee urkar ksutarangu, Tatenaysha nda tsiyantarangiya. Ashiri natumasamta tarawaztamaam ksarintspa. Itaru, nuwsha kurak Daríypat yasachimasima. Kirak kurakaam zanganchima. ¿Amcheeja uwa? Ashiriya, kurak nuwaa kamankachu, nuwsha siyaa kamanchintspa, táyaru kasarangiya.

⁶ Ashiri Tatenay wipunashpat kirakaa yandaku kurakaam Daríyoom táranganaya. ⁷ Kurakaa Daríyoo, ¿tamarimta? ¿Wanasiri taarish? ¿Nda kas yutakish? ¿Tputsirish mapiyrsin taarana? ⁸ Ashiri shiyaa kurakaa, tsiyatsis kamanimaam zandkina. Ashiri itsinsaru kamanchinllpa. Nuw ipunshipti Utaáchchip tsap naataranganiya. Irusarinush kusaranguni, Utaáchich tputs Apanlleem pang’ panguksin paranginiya. Apanll waamari kasiru anoom pangukanaya. Patumbich kapungumashpat pangukanaya. Tandapunuzeemsha na karipanpata tandapunukchinllina. Ashiri mangpatari tarawaztaksin, mikeeru uru iwapachpasinaya. ⁹ Iysha masharanguni, Siy kurakaris, ¿chaka suru? Mishat, ¿tarawzu ksutamapan chaka suru? táranginiya. Shiyaa kamanimaam masharanginiya. ¿Chaksha siyaa Apanlleem pang’ yusur pangumaam kamachtayaru, siysa panguksa? ¿Chak siyaa shingints, táranga? tárangitamaniya. Utaáchichsha, ¹¹ Iy Apanlleetsimari waamari kasiru anoo chinakuni, Apanlleem pang’ yusur kaneesich pangukaniya. Sirútamasa iyashuch kurak, yuw kizpur taarangu an, Apanlleem pang’ pangumaam kamachtarangu, kizpur wanasiri panguranganaya.

¹² Itaru, iy zitaminarini Apanllee kapung tatsiyuntarangusin, Apanllsha, Tputs waani kasichpa, táyaru, kurakaa Nabukodonosoraa iyashchee kasimaam zanganirangiya. Nabukodonosorsha wasundururpat Irusarinshuchee kasirangu, Apanllee pang’ izuuru kapeetarangiya. Sheeru, iyashchee ichinguroo Babiloniyap tsap machirangiya. ¹³ Anush Babiloniyash tsap kapung taaranguni, zapishsha kurak Sírurini Babiloniyshuchee kasirangu, kurakaam kinarangiya. Anumunsha, masach kaneesich yáyaru, anush kurak Sírurini iyaa Utaáchcheetsini Irusarinush Apanlleem pang’ kaneesich pangumaama kamachtarangiya. ¹⁴ Sheeru, Sírurinsha Apanllish pang’ maachee kizpur wanasireew, orpat tinama yuw Nabukodonosor waanpee watsapun yarangu, anu tuwanpumaam tiptsiree kamachtarangiya. Yanpuyaru, iyashcheem tputs Sesbasaraam, Utaáshcheem gobernador maacheetsi ichingaru tuwanpurangiya. ¹⁵ Kurak Sírurini, Sesbasaraam panarangu, Shiysha ichinguru yáyarush, yuwashtam sirú Apanllush pang’ Irusarinush taarangu, anshutam wayashini. Apanlleem pang’ panguyarus, anush wayangints, kurak Sírurini iyashchee kamachtaku tárangiya, ¹⁶ Ashiri Sesbasarsha Irusarinush kusarangu, Ashiri panguyani, tárangu, tputssha patuzinazee pashuchirangsin, Sesbasarsha istarangitamta. Tputs tarawaztakana an wand iwapamaam pishtakiya, táranganaya. Utaáchich kurak anoo iyaa kamaniranganaya. ¹⁷ Ashiriya, kurakaa Daríyoo, siyaam wanasiriya, ashiri shiysha tputsireetsish, kurak Sírurini wirkar nachungashinints tángcha, yuw Apanlleem pang’ Irusarinush pangumaam kamachtarangu anootsi. Sírurinshini pang’ taarparee, yuwash wirkar xanataru anshu. Anush napkachusin, pangachpasinaya.

Ashiri shiysha, kurakaa Daríyo, Sírurineetsi kuk natstaramchush, iyaatssha kamaningcha yuw chinakish anootsi, Tatenay kirakaa yandaku, kurakaam Daríyoom táyaru, zanganirangiya.

Ashiriya, na kamanchintspa yuwaa kurak Daríy tiptsiree ichingaru Utaáchcheem istamaam kamachtarangu, anootsi

¹ Ashiriya, kurak Daríy Tatenayaa wirkar natstarangu, tiptsiree tárangiya. Mang kurak Sírurinee Apanlleem pang’ Irusarinush yusur pangumaam tputsee kamachtarangiya. Ashiri siysa Sírurinee wirkar nachungashinints. Pangush yuwash kurak wirkar xanattaru anush nachungashinints, tárangiya. ² Tiptsirsha kurakap pang’, yakat Ekbatanush, Mediyanush tsap nachungarangusin, kirakaa yandama, kuraka Sírurini yandamarini paranganaya. Anoo kiraka natstarangusin, tárangiya. ³ Síru, Babiloniyashcheem kurak kaneesich kinarangu, tiptsiree kirakaa yandamaam kamachtarangiya.

Nuwaa kuki yandayarus, tputsireemi zanganingtsa, tárangiya. Ashiriya, kirak yandam tárangiya.

Apanlleem pang’ Irusarinush sirú taarangu, anshutam yusur pangungints. Siysa Israelchichis tsapunpitamtis kanapungtsa. Yusur Apanlleem pang’ pangumatssa. Patuzinazeem patumbichpat pashucheerus, anumun pangungtsa. Wazuranirini 27 metro, wamanirini 27 metrotam pangungints. Pangum iwaparamchus, wakaraatstam, opeejaatstam Apanlleem muchingtsa.

⁴ Patumbich kapungumash wayakatara sheerus, yusur anumunsha tsimbunarinsha patumbchitam wayayarus, tuchparinsha patumbchitamta tushurangayarus ksangtsa. Anumunsha iwaz táwar kaneesich yáyarus, patumbchimun tandapunungtsa. Nuwsha nuwaanaatsi kurikiree ksutamapanee kamachtachima ichinguru tuwapamaama. ⁵ Mishat, yuw maachee Apanllish pang’ Irusarinush sirú taarangu, orpa tinama, misha ur mburshimashpatatam tinama, anoo Nabukodonosor yátarangu, waanshu watsapun wayarangu, anoo tuwanpungcha. Irusarinpitam, yuwash Apanllish pang’ sirútama taarangu anshutam wayangcha.

Kurak Sír kirakamun yandaku, Israelchicheem tputs tárangiya. ⁶ Ashirucha, kurak Daríysha, anoo natstayaru, gobernadoroom Tatenayaam kirak yandarangiya. Mishat, wipunasheemtam Setar-Bosnayi, mishat tiptsireemtam yuw kung Eufratisa arachich tputsee ksutamapan taarana ambcheemtam tputs, ichingaroom kirakaa yandarangiya.

Siysa Irusarinshuchee tamundarintspa. ⁷ Utaáchich urkar wipunashpatari waanee Apanlleem pang’ panguchpa. Yuwashtam sirú taarangu anshutam yusur panguchpa. Siysa muntarintspa. ⁸ Itaru, Utaáchcheem tarawzupaneem kurikpat istangtsa, watam nuw ashiru kamachtakinawa.

Siy kung Eufratis arachich taakis anis, yuwapat kurik nuwaam zangankis anpat nuwsha yuwaam Apanlleem pang’ pangukana anoom tuwapachima. Kurikee panamaam zapshtarinllpa. Tarawzupaneem kurik nda pshitaku kasamaama. ⁹ Mishat, apanllpan siyaa mashkusin, wakaraatstam putam mashta, putam mashta ashkusin, opeejaatstam, Apanlleem muchimaam mashkusin, siysa tatsamooru panangtsa. Mishat, tirikootstam, yumeetstam, vinootstam, wayungunootstam apanllpan mashku, siysa panangtsa. ¹⁰ Ashiri apanllpansha ichingaroo yáyaru, Apanlleem yuw waamari kasiru, kanindush taaku, anoom muchkachu, nuwaam kurakaami, ipareemtamti istamaam Apanllee mashachpa. ¹¹ Ashiri siysa kurakis tputsireetsis nuwaa kuki kamaningtsa. Tputs nda nuwaa kamachtamari tuminkusin, siysa anoo waansshu pangu yasinaa yusheerus, anpatatam waanaatsi pachayarus, ksangtsa. Pang’ waani ichipambayaru pantsachpa, átana. ¹² Apanll waana Irusarinush taarasheem wayarangiya. Ashiriya, nllitarit tputs, kuraktaati, nduntaati ashiru nllitaritpich tsap, Apanlleem pang’ Irusarinush pangumaam tayutaritkinaariya, ashiru siysa anoo pachayarus ksangtsa. Nuw kuraki Daríyi anoo kamachtakina. Ashiriya, siysa nuwaa kuki izuuru tuminungtsa, átana,

kurak Daríy yandaku, tárangiya.

Ashiri na kamaneena yuwaa kurak Daríy tiptsiree Utaáchcheem istamaam kamachtarangu anootsi.

Ashiriya, na kamanchintspa yuwaa Israelchich Apanlleem pang’ pangumaam yuwapayarusin, kasarangana anootsi

¹³ Ashiri gobernador Tatenaysha, yuw kung Eufratis arachich tputseem ksutarangu, mishat istamapantam Setar-Bosnay, wipunashpatatam an ichingurusin kurakaa kuk mazinarangusin, izuuru tuminuranganaya. ¹⁴ Ashiri, Israelchichsha kurak tiptsirpatari Apanllee kuk kamanimapanee Haguew, mishat Sakáriyastam kuk mazinarangusin, kis tarawaztaranganaya. Ashirangsin, musásiri Apanlleem pang’ pangumaam iwaparanganaya.

Apanllee kuk tuminurangsin, mishat Persiyashcheetstam kurak Sírurini, Daríyootstam, Artarjereetstam kuk payurangusin, wanasir tarawaztarangusin, iwaparanganaya.

¹⁵ Ashiri yuwapur Daríy 6 masach Persiyashcheem kurak taarangu, anpur Apanlleem pang’ pangumaam izuuru yuwaparangana. Marsush tsup, zar tuchparinshini ashiranganaya. ¹⁶ Ashiri mang’ ksaksin, ashpiritssin Israelchich yuw waanpee watsapun kanapurangana, apanllpantam, Leviychichtam an kis Apanllish pang’ shaniyaranganaya. Apanllee mashkusin. Apaa, shaanaatsi pangish iwaparanginiya. Na shaana nish pangusish iyaa ksutamaam urutamari taangcha, tárangusin, shambataranganaya. ¹⁷ Ashirangsin, Apanllee ungirtaksin, wakaraa wip 100 putayarusin, opeejaatssha upapchir 200 putayarusin, anumunsha opeejaatstam wip 400 putayarusin, Apanlleem muchiranganaya. Arangeemsha 12 chipootstam putayarusin, minchicheem tputs minamtawamari chipoo pacharanganaya, yutaritshishirineetsi tachingamaama. Ashpari 12 chip Israelchicheem tputs pacharanganaya. ¹⁸ Sheersin, apanllpani, Aaronarinchichee, Apanlleem pang’ ksutamaam wayaranganaya. Minuma tputs wipaptari minamtam siman ksutamaam wayaranganaya. Sheeru, minootssha tputs arangtachsha siman ksutamaam wayat, arangeem mishat tputs wayat ashiranganaya.

Anumunsha Leviyarinchicheetstam yasimpaneem, Apanllee ungirtamaam wayaranganaya. Mishat, Apanllish pang’ ksutamaam wayarangitamsina.

Yuwari Móysisirin sirútama kirakamun yandarangu, anuritam tuminaranganaya.

¹⁹ Anshurtatam tsup katursish zar ashpari tputs, yusur shaniyaranganaya. Apanll zitaminarineetsi Ijiptosh tsap tapachindarangu, an zar tatsamoorangu, uwshtisin anush zar mang’ kis shambatamaam shaniyaranganaya. ²⁰ Apanllpan tputs, mishat Leviyarinchichtam ndatuma tputs kusarusin, Apanllish tachitamaam wasina yutaritshishirineetsini Apanllpat yararanganaya. Ashiri zurampatari mang’ yararangsin, opeejaa wip ichingaroom tputs pacharanganaya. Mishat, waanpatatssin, apanllpanpatatssin waanaatsee opeejarini pacharangitamsina. Mang’ ksaksin ashirangana, watam waanshu watsapun yusur kusarangsin, anush taaranganawa. ²¹ Ashiri ichingaru Israelchich tputs yuw Babiloniyamand kanapurangana an, mishat Utaáchichtam tputs yuw nda Babiloniyap naatarangana, antamsin anshutam washunand shaniyaranganaya. Tputs yutaritshishpaneetssha kasarangusin, waanitaritssin taar ashiranganaya. Ashiri Israelchich tputs ichingarusin Apanllee Taarashipanee, Israelchichee Apanllirini, kis ungirtaranganaya.

²² Ashiri tsimbun matayaru zar pangaa nda tputaru anoom katungamaam shaniyaranganaya. Shambatkusin, kis shaniyaranganaya. Yuwamand Apanll Persiyashchee urkar mang’ p’tseerangu, Siy Israelchichis Apanllireemis pang’ pangungints. Nuwsha kurikpat istachintspa, tárangu, anumand Apanllsha tiptsiree mangooz ksashish pshtarangu, kis shambataranganaya.

Ashiri na kamaneena yuwaa Israelchich izuuru Apanllimun shambatarangana anootsi.

Ashiriya, na kamanchintspa yuwaa Esdraa wipunashpata Irusarinap zanganirangana anootsi

¹ Ashiri zapishsha 58 masach tushiyramachu anush yuwapur Persiyashuch kurak Artarjeri taarangu, anpur Utaáchich tputs, Esdra sura, Babiloniyash tsap taarangiya. Esdar Aaronarinchichimuncha tputsi, Aaron yuw chtakchuri apanllpaneem kurak kinarangu anu.

Esdar wapar Serayamuncha.

Serayassha wapar Asariyasamuncha.

Asariyassha wapar Hilkiyasamuncha.

² Hilkiyassha wapar Salummuncha.

Salumsha wapar Sadokamuncha.

Sadoksha wapar Ahitubamuncha.

³ Ahitubsha wapar Amariyasamuncha.

Amariyassha wapar Asariyasamuncha.

Asariyassha wapar Merayotamuncha.

⁴ Merayotsha wapar Serayasamuncha.

Serayassha wapar Usimuncha.

Ussha wapar Bukimuncha.

⁵ Buksha wapar Abisuwamuncha.

Abisuwsha wapar Finesamuncha.

Finessha wapar Elíyasamuncha.

Elíyassha wapar Aaronamuncha, yuw apanllpaneem urkar ichtaru kinarangu anu.

⁶ Esdar Apanllee kuk tayapstampani taarangiya. Yuwaa Taarashipan, Israelchich Apanllirini, Móysisarinee kamachtarangu, anoo Esdarsha ichingaru yasarangiya. Ashiri Apanllimun mang’ taturangu, Apanllsha uru Esdraa istarangiya. Esdar watsapunip kanapumaam zandku, kurakaa Artarjeree masharangu, uwsha kukoo nda kapeetarangiya. Ashiri waritachparee. Kanapungi tsapunpish, tárangiya, ⁷ Ashiri Artarjeri 7 masach Persiyashcheem kurak kinaru taachu, anush Esdar Israelchichpa tputs apanllpantam, mishat Leviychichtam, Apanllee yasimpantam, Apanllee pang’ ksutamapanitam, apanllpaneem istamapanitam yápandayarandsin, Babiloniyaa tsap kasayarusin, Irusarinap naataranganaya. ⁸ Artarjeri kurakaam kinaru, 7 masachirini, tsup minamarita kaneeschiri yáyaru, anush Esdar Babiloniyaa tsap shitungeerandsin, naarsin, Apanll kapung istarangu, ipunpunar tsup kachingkachu, zameepatarinsha tsup kaneesich yáyaru, anush Irusarinush kusaranganaya.

Esdar, Apanllee kizpur chinaku, Apanllee kuk natstakuri uru payukuri taachima. Sheeri, Israelchichee tputs Apanllee kamachtamarinee payumaam tayapstachima, mangush chinarangu, tárangiya. ¹¹ Ashirucha, Kurak Artarjeri; Watam Esdar kizpur Apanllee mangoonkuwa.

Yuwaa Apanll Taarashipan, sirú Israelchichee kamachtarangu anoo ichingaru yasakiya, kurak mangush chinaku, átu, Esdar ndatuma naaru, kurak kirakaa yandayarangu panarangiya. ¹² Ashiri kirakamun átu, kurak Artarjeri yandarangiya.

Nuw Kuraki Artarjeri shiyaam Esdraa yandakina. Shiy apanllpantishcha. Apanll waamari kasiru anoo shiy mangoonaksha. Kukootstam ichinguru payuksha.

¹³ Ashiri nuw shiyaa atina, Shiyachich tputs, Israelchich, yuw nuwash tsapuni taakana an, wandaya Irusarinap kanapumaam zandkusin, shiyapa kanapchinllinpa. Apanllpantam tputs zandkusin, Leviychichtam tputs waana zandkusin, kanapchinllinpa, átana. ¹⁴ Ashiri shiysha kanapkachush, yasangcha. ¿Kamapa Utaáchich tputs Apanllee wamachtash payukanaya? anoo yasangcha. Shiy uru Apanllee kuk payuksha. Ashiri yasangcha. Anoom nuw shiyaa zanganchinllpa. Mishat, yuw tputs nuwaam istakana anu, 7 tputsi yasamaam zandkitamsinaya. ¹⁵ Ashiri nuwsha istampanpatatam oroo chumbeepimashee, mishat oroo mburshimasheetstam shiyaam mangutariti panachinipa. Shiysha anoo Irusarinush kuskachush, Apanllish pang’ wayangcha. Ashiri naakchush, kurikee yáyarush payutachcha. ¹⁶ Mishat, Babiloniyashuchtam tputs waana zandkusin, shiyaam mangutari orootstam panachpasinaya. Ashiri shiysha anoo ichinguru yángcha. Mishat, shiyachich tputs, apanllpantamta, Apanlleem pang’ Irusarinush kurikee, mishat maachtaatstam mangutari shiyaam panachinllinaya. Ashiri shiysha anoo yáyarush, Apanllish pang’ wayangcha. ¹⁷ Ashiri anpa kurik pxanxangcha, wakaraatstam, mishat wakaraatstam wip, mishat opeejaatstam wip, mishat yuw maachta Apanlleem urutari wayakis, tirikoo, vinoo aship paxanxeerush Irusarinush Apanllish pang’ muchingcha. ¹⁸ Ashiri yuwaa ur chumbeepimash, misha ortam mburshimashi katuchim taaru, anoo shiysha ipunashpatish Apanllpat yasayarus, yuw siyaam wanasiri anumari shingtsa. ¹⁹ Itaru, shiysha yuwaa tputs maacheetsi Apanlleem kizpur wanasiri wayarangana, anoo shiysha yáyarush, Apanllish pang’ izuuru wanasiritam wayangcha, Apanllee ungirtamaama.

²⁰ Ashiri Apanllireemis pang’ maachi pshatakinaariya, ashiriya, nuwaanaatsi kurikiri ksutamapaneem mashangcha. Uwsha shiyaam panachiya. ²¹ Mishat, nuw kuraki Artarjeri, ichinguroo kurikee ksutamapani tputs yuw kung Eufratis arachich taakana anoo kamachtakina. Apanllpan Esdar mashku, siysa anoo panangtsa. Zapshtarintspa. Mikeerus panangtsa, atina. Esdraa watam Apanllee waamari kasiru anoo kapung mangoonkiya. Apanllee kamachtamarini ichinguru yasakiya. Apanlleetstam kuk tputseem tayapstakiya. Ashiri siysa istangtsa. Xarashish wayarintspa. ²² Ashiri uwsha siyaa maacheetsi mashku siysa

3,300 kilo oroo mburshimashee panamaam waritakiya. Mishat, tirikoo mashku

22 mil litro panamaam waritartamta. Anumunsha vinoo mashku,

2,200 litro panamaam waritartamta. Wayungunoo mashku

2,200 litro panamaam waritartamta. Itaru, arangeem panarintspa. Mishat, yumeetstam mashku pchintintspa. Yuwaa siyaa mashku anoo uru panat panat shingtsa.

²³ Ashiri Apanll kanindush taaku anoom waanshu pang’ wayamaam kamachtaku, anoo siysa ichinguru yáyarus panangtsa. Mikeerus panangtsa. Ndunnaa ashkus, nuwaa Apanll wanichparee. Ipareetstamti, mishat tputsireetstamti ichingaru wanichtamparee. Ashiri siysa mangiptis taangtsa. ²⁴ Mishat, siysa kurikee yampanis, apanllpanee tputs kurikee yamaam mashintspa. Mishat, Leviychicheetstam, Apanllish pang’ yasimpan taakana, anootstam, mishat Apanllish pang’ ksutamapaneetstam, Kurikee pananda, tárintspa.

²⁵ Ashiri shiyaatssha Esdra atitamana. Apanll shiyaa mangeemish kapung panarangiya waanaatsee mangoonamaama. Ashiri shiysha tputsee ipusangcha, tputspat tsiyatssee wanasiri yaramaama. Mishat, gobernadoroomtam ipusangcha. Tputsee ichinguru istachu, anoom natstayarush, wayangcha, kung Eufratis arachich taakana anoo ksutamaama. Yuw Apanllee kuk mangoonkana anoo ipusangcha. Itaru, shiysha ichinguru tputsee Apanllee kuk tayapstangcha. Nda mangoonkana anoo, misha yuwaatstam mangoonkana anootstam tayaspatangcha. ²⁶ Ashiri tputssha Apanllee kamachtamarinee payumaam ngatkusin, misha nuwaatstam kuki nda payuksin, shiysha waneengcha. Pachamaam waritariya. Nduniya ashiru arap minup tsap zanganingcha. Nduniya ashiru, Kurik tuwapangi, tángcha. Kurikee tuwapamaam ngatkeesinaya, tumanangtsa.

Ashiri Esdraa, nuw kuki watamaricha shiyaa tsiyatamaam zandarangi anu,

Kurak Artarjeri kirakash yandaku táyaru, Esdraam panarangiya.

Ashiriya, na kamaneena yuwaa Artarjeri Esdraa kapung chinarangu, kirakaa yandayaru panarangu anootsi.

Ashiriya, na kamanchintspa yuwaa Esdar Apanllpa tsiyatarangu anootsi

²⁷ Esdar Apanllpa tsiyatku, Apaa, shiy kizpurtishcha. Shiyaa iycha aparini. Iyaa zitaminarini kapung istarangsha. Na iyaatstam istaktamsha. Kurakaa mangu p’tseerangush, shiyaamtam pangish Irusarinash kizpur wanasir wayamaam iyaa kamachtarangiya. ²⁸ Mishat, shiy nuwaa istarangush, Persiyashuch kurak, istampantam, ichingarusin nuwaa waanasir naparanganaya. Nuwaa chinampa tsiyatarangsin, Shaana Israelchichee tputs yuw kizpur wanasiri anoo tushaneeyarush, washunand ipuneerus, saanpee tsapunis kanapungtsa, nuwaa táranganaya. Ashiri Apaa, shiyamun mangi ksakina, Esdar Apanllpa tsiyatku ántar ashirangiya.

Ashiriya, na kamaneena yuwaa Esdar Apanllpa tsiyatku tárangu anootsi.

[Nuw Esdari siyaam yandarangina. Watamcha nuw koki.]