Esekiyela

Esekiyelarini kuku

Yuwaa kirak Esekiyelarini yandarangu anoo pakich kamanchintspa

¿Chakaja anoo yandarang?

Esekiyelarini nee kiraka yandarangiya. Ichtaru, Esekiyelarini Irusarinash taarangiya. Anush apanllpan taarangu, Apanllish pang’ ksutarangiya. Babiloniyshuchsha urkar kuseeru, wamarisha Irusarinshuchee kasirangu, Irusarinshuchee urkar tipstirpa zapan Babiloniyap machtarangiya. Esekiyelarineetstam machtarangiya. Babiloniyash taarangu, Apanllsha Esekiyelarinee ipusarangiya waama kuk kamanimaama.

¿Chakaama yandarang?

Esekiyelarini Apanllee kuk kamanimaam kizpur yasarangiya. Waanpatatin Utaáchichpatatin Babiloniyash waneerangiya. Itaru, Irusarinshuchee waneerangitamta. Utaáchchee tputsi mangoo zapan p’tseerangu, Sambaytarintspa, tárangu, tputssha Irusarinaa nda mbizaranganaya.

¿Mayaamaja yandarang?

Esekiyelarini tsiyatsis tsimbun kamanirangiya. Wandari Irusarinash taarangu, Papcha, Apanll waneerunts. Nee yakat Apanll izuuru kapeetchiya, tárangiya. Ashirucha, zapishsha Babiloniyshuch tputs Irusarinaa izuuru kapeetarangsin, tputssha, Paja. ¿Waninll zurampatari kamaniranguwa? Ashiri Esekiyelarinee kukoo mazinayani, táranganaya. Anumunsha, Esekiyelarinsha, Sambaytarintspa. Apanll iyaa Utaáchcheetsini zapshinaa yusur iyaanpee tsapunni zanganchiya, tárangiya. Táyaru, tputsee mang’ p’tseerangiya.

¿Mayaatseeja kamanik?

Na yuwaa kamanku anoo kamanchintspa.

Kapitoro 1—3: Apanll Esekiyelarinee, Siy nuwaa kuki kamaningcha, tárangiya.

Kapitoro 4—24: Apanll ateeja: Nuw yaktaa Irusarina zurampatari kapeetchima, watam siy yutaritshishireetsis kasamaam nda zandaksawa, tárangiya.

Kapitoro 25—32: Apanll ateeja: Nuw zurampatari arapchee urkar tiptsirpatari kizpur wanichima, tárangiya.

Kapitoro 33—39: Apanll zurampatari átcha: Nuw Israelchichee yutaritshishirineetsi kapeetkachuri, anoo mbizakchuri, yusur watsapunish wayachima, tárangiya.

Kapitoro 40—48: Apanll zapshinaa Irusarinaa yusur wanasir wayaru, waanaatstam pang’ kizpur wanasireetstam panguchiya,

tárangiya.

Nuw Esekiyeli yuwaa Apanll kamanirangu anoo kamanchintspa

Apanll Esekiyelaa kamanimapaneem kamachtarangiya Pamazookpazi ashiruri Apanllee watsirar parangina

¹ Nuw Esekiyeltana Apanllee kuk kamanimapani, Busi wipa. Minush zar nuw Babiloniyash kungumun wingu Kebaramun Apanllee parangina. Washunand ichinguruni anush putamanandani apusap tsap puzap taaranganiya. Yuw Israelchichee kurak Jowakimarini putayarusin, arap apusap tsap machtarangana, an zameetpa masach tushiychu, zarsha zameetpatash, tsupsha ipunpunaru, anush kanind tawatarangu,* 1:1-3 Apanll wanichu anu 19.11 tsiyatsis nipta tatsamooru taaritamta. Apanllee pamazukpazi ashiruri parangina. Anush zar Apanllsha nuwamun uwee wayayaru, tuwizpurtangiya.

⁴ Amb ashirangu, yap zar puwachingarattu ambeem kambusur kizpur kambustarangu, psassha yakarangitamta. Sumassha watsam kurakurtaru patarich, misha mamar tamatarparee ashiru mamartarangiya. Ashirangu, annungirisha kizpur kuraa ashirangu, kachich ksimunamaam waritarangiya. Ipusanandsha sumas ashiru tuwasineeru, kurakurtaru, maachi ngusamb chumbeepimash ksaneeyaruch tamatarparee ashiru parangina. ⁵ Anushsha ipusanand tputs ashtamaru ipunpunar parangitamana. ⁶ Ansha tputs ashiru minamtashuri nutsas ipunpunar tash taaru parangina. Itaru, wazitpungachsha ipunpunartam taarangitamta. ⁷ Upazsha, misha wanumbitam waj itsinsaru zúkikiru, wanashirsha wakar karupan waxizup ashiru kurakurtaru tuwasineerangiya. Maachi ngusamb kizpur wanasir kapasirumchichtaru kurakurtar ashtaru ashirangiya. ⁸ Ansha ipunpunar tshiz, misha wach ipunpunartam, misha wazitpungach ipunpunartam taaru, ansha tputsich ashtamaru taarangiya. Ansha wazitpungach yuwaptartatam tasasaru anpatari kandanirangiya. Naamaam zandkachu, yapiri tasasaru ambiri naarangiya. ¹⁰ Yuwsha tash ipunpunar taarangu, ambiritam tasasaru, tputsich tashich tamaparee ashtamarangiya. Uputsitsinungichsha tash tumuz ashtamarangiya. Mbazinungichsha tash wakar toro tamaparee ashtamaru taarangiya. Anumunsha, ushipsha yungan* 1:10 Apanll wanichu anu 4.7 tsiyatsis nipta tatsamooru taaritamta. ashtamaru taarangiya. ¹¹ Pursha wazitpungach íwar itsiraru izandararu taarangiya. Anshitisin tsimbunari wazitpungachpatatin kandanirangitamta. Minpasha wazitpungach tsimbunatam waanaatsi irpungarangiya. ¹² Washunandari wanandari tsinisaru naanataraa ashirangiya. Nda kanapku, yapiri tasasaru ambiri naatarangiya. Yapiri tsinisaru Apanll wizpur kamachtarangu ambiri naarangiya. ¹³ Anshacha, yuw tputs ashtamaru kinarangu, ansha sumas watsam ashtamaru, misha maachi tuzaz* 1:13 Apanll wanichu anu 4.5 tsiyatsis nipta tatsamooru taaritamta. sunlleerutaru patarich ashirangiya. Naanatara, piyamsha naanatara, ipusanand ashishtar ashirangiya. Sumas tamaparee ashiru kurakurtaru anushsha shitungarangitamta. Mamarsha kizpur mamartarangiya. ¹⁴ Yuw tputs ashiru anshat naanat, kanapta, yusur naanat, tsípat ashirangiya. Mamar ashiru ansha tsípatara ashirangtamta.

¹⁵ Nap ashiranguri, tputsinungiri tsapush wanungeetari pshiyrshish iripich parangina. ¹⁶ Ashpari ipunpunari iripich waanandari tatsamooru, wayarutaru, kurakurtaru, tuwasineerangiya. Wich patumbich wanasirimash tamatarparee ashirangiya. Pshiyrshish tamaparee ashtamaru, anush wachush washunand tapamta tapamta ashiru, wanasireew parangina. ¹⁷ Anpasha mikeeru purangamaam waritarangiya. An yuw ipunpunar taaru anpata wapitam kanapta ashishtamaam nda waritarangiya. ¹⁸ Mishat, nap ashkuri, parangitamana, yuw ipunpunaru iripich anich tamatarparee ashiru, kapung iripich torreezaru kurakurtaru, annungirisha tuwasineerangu,* 1:18 Apanll wanichu anu 4.8 tsiyatsis nipta tatsamooru taaritamta. isping tamaparee ashirangiya. ¹⁹ Ansha Apanllsha wan tputs ashiru, mikeeru naakchu, uwma kárkachu, iripichsha naarangitamta. Ansha chiyzata ashkachu, uwsha chiyzata, naata ashkitamta. ²⁰ Apanllsha tputs ashtamaru, yapiri waana kamachtaku, wizpur Apanll tuyamzakachu, iripichsha washunandari tatsamooru naaktamta. Watam minamari waanandari washunand tapatstakpaz ashiru nuw parangina. ²¹ Tputssha chiyzata, naanatara ashkachu, uwsha iripich chiyzata, naanatara ashkitamta. Tputs ashiru an zanaykachu, uwsha zanayta ashkitamta. Wandaya tputs Apanll wani chiyzayaru, naakchu, uwsha washunandarit naata ashkitamta. Watatam iripchimash washunandari tapatstarangiya.

²² Muchumunsha iwaz ispingu* 1:22 Apanll wanichu anu 4.6 tsiyatsis nipta tatsamooru taaritamta. ashiru kurakurtaru, wiriwirtaru, taarangiya. ²³ Tsapushoomsha tputs ashiru waanpatatin wazitpungachpatartin kandaninir ashirangiya. Tsimbunartisin waanaatsi irpungapaz ashiranganaya. ²⁴ Mishat, zunganeerangu, kitsishi mazinarangitamana. Wazindpungachsha íwar itsirataraa, naanataraa ashkachu, kung tawangur kumbiykchu,* 1:24 Apanll wanichu anu 1.15; 19.6 tsiyatsis nipta tatsamooru taaritamta. amtarparee ashiru zunganeerangiya. Itaru, an waana Apanll kizpureeru, wizpur zunganeeku tárangiya. Sundar marchaku, zapan zunganeeku amtarparee ashirangiya. Nuw anoo mazinarangina. Itaru, wanuts xiykamchu, wazitpungachsha yaruwawataraa, zanayta ashirangiya. ²⁵ Shitungeeshinu, kapung zunganeerangiya. Yuwamun ispingu ashiru kurakurtaru, anumun iwaz yusarangiya, yuwashtam much itsiparu anshutam zunganeerangitamta.

²⁶ Muchimun iwaz wanasir ispingu ashtamaru wayarangu anumun iwaz Apanll uxinash ashiru parangina. Anushsha patumbich wanasirimish kawamban kizpur mbamash parangina. Anushsha uxinashish tputs ashiru* 1:26 Apanll wanichu anu 4.2-3 tsiyatsis nipta tatsamooru taaritamta. kuxinarangiya. ²⁷ Yuw tputs ashiru parangi, ansha waturtumand káru íwar kizpur kurakurtar ksimunamaam waritarangiya. Ngusamb chumbeepimash ashiru kawapshitaru anamunsha taturpiru, sumas ashiru kurakurtar ashirangiya. Waturta tsapushoomsha sumas ashiritam kinarangu, waanaatsim ashchiri tuwasineerangiya. ²⁸ Tsung sinash tamatarparee ashiru tureezaru íwar kanindap Apanll nuwaa waanaatsi wizpur tuyamandarangiya. Anootssha paranguri, nuwsha timuchta, tsapumun muchi tuw ashirangina.

Na kamaneena yuwaa pamazukpazi ashiruri Apanllee watsirar parangi anootsi.

Apanll nuwaa Esekiyela ipusarangiya

¹ Anumunsha, nuw k’kuzee mazinarangina. Nuwaa tárangiya; Shiy Esekiyelaa, nutsish musásimashtaati,* 2:1 Matiwa 8.20 tsiyatsis nipta tatsamooru taaritamta. chiyzangi. Nuw shiyapa tsiyatpi, atina tárangu.

² Apanll nuwaa tsiyatku, zunganeekchinandari, anush wizpur nuwash pshturangu, nuwaa ichiyzataraa ashirangiya. Ashkachinandari, k’kuzee zunganeekchu, kitsiptarti mazinarangina.

³ Aranginasha k’kuz tsiyatku tárangiya. Shiy Esekiyelaa, nutsish musásimashtaati, ashiritaa shiyash na tsiyatsis zanganchima. Shiysha Israelchichpatatis nuwaa kuki kamaningcha, yuw tputs nuwaa ngatarangusin, wits nda mazinarangana anootsi. Anchichtam zitaminarini nuwaa ngatarangitamsinaya. Na in zari wandaritam nlluranursha ashiritam ngatkusin taakanaya. ⁴ Wipshitisin ashiritam yutaritaw, mangshartawana. Chínash mangoonamaam mbama. Ashirucha, shiyaa zanganimaam zandkina. Shiysha nuwaa kuki kamaningcha; Ambtanda siyaa Apanll átu, tángcha nuwaa kuki. ⁵ Amb átush, mazinamana mazinachpasinaya. Witsi nduntaatiya, kaapa mazinaksinaya. Itaru, an tputs Israelchich yutaritawsincha. Itaru, anush mangush chinachpasinaya; Nish iyash Apanllee kuk kamanipan taarparee, táchpasinaya.

⁶ Shiy Esekiyelaa, nutsish musásimashtaati, ashiritaa mangish punirustarinllpa. Mishat, yuwaa mantsir tsiyatkana, anoo punirinllpa. Wandtaatiya punikush, kpapapaz taturpiru, misha ztunllpaz shiyamun matarutaru ashipaz ashiritaati, anoo punirinllpa. Shiyaa mantsir tsiyatkitaateesinaya, misha shiyanung tsiyanuspa tash napkitaateesinaya, yuwamand nda wits mazinakana anumand punirinllpa. ⁷ Shiysha mapiyrush nuwaa kuki tsiyatangcha. Yuw mazinamaam zandkana an mazinachinllinaya. Mishat, nduntaatiya mazinamaam zandkusin, waani ashtachinllinaya. Watam uwin mang’ yutaritsincha; nda k’kuzee wits mazinakanaya. ⁸ Yuwaa nuw kamachtaki anoo payungcha. Shiynaa mangsheerinllpa. Uwin tamakpasinaya shirinllpa. Natu kukish xipungangee. Yuw nuw shiyaam panayanllee anoo ktungangee, tárangiya.

⁹ Tárangu, uw paxayeeru, nuwanungi uwish minam kirak yandam turpiru payu ashirangiya. ¹⁰ Anootssha kirakaa ipursarangu, yandam ashchiri minungichich kirak yandam, arangichsha tash yandamatam ashiru, mangooz mantsashish, waneeshish tanumaam tsiyatsis yandam taarangiya.* 2:10 Apanll wanichu anu 5.1 tsiyatsis nipta tatsamooru taaritamta.

¹ Ashiriya, nuwaa tárangiya. Shiy Esekiyelaa, nutsish musásimashtaati, ashiritaa nee yandam tsiyatssee ktungangi. Sheerush, Israelchichee tputs tsiyatashincha, tárangiya.

² Tárangu, nuw kuki xipungaranguri, uwsha nuwaam tsiyatssee yandama tapshturangiya. ³ Sheeru, Na pishayarush, tzazangee, tárangu, nuwsha, Ayu aturi, katungarangina. Káchakuri, kindur wakungur ashiru kam kácharangina.* 3:3 Apanll wanichu anu 10.9-11 tsiyatsis nipta tatsamooru taaritamta⁴ Ashiranguri, nuwaatssha tárangiya. Israelchichip tputs napashini. Nuwaa kuki kamanishincha. ⁵ Yap tputs k’kuzee mbam tsiyatkana amb, nda nuw shiyaa zangankina. Itaru, saanpatatis Israelchichpatatis kamanimaam zanganchima. ⁶ Nuw nda shiyaa piyam tsapurunas yap tputs zapan taarusin, min k’kuz tsiyatkusin, nda anoo kuk shiy mangoonamaam waninda. Amb nda shiyaa zangankina. Itaru, ashiritaa arapichsha tputs shiyaa kukish mazinachpasinaya. ⁷ Itaru, Israelchichinaa tputs shiyaa kukish mazinamaam ngatchinllinaya. Watam nuwaa kuki payumaam nda zandkanawa. Ashpari Israelchich tputs mang’ ndunareewcha. Nda tputs mangurir tamatarparee ashiranaya. ⁸ Itaru, na nuwsha shiyaa kamachtakchuri, shiyaatssha tumangshartakpaz sheerunll, shiysha mangish mbampaz ashirush, waantin tamapsinaya ashiritam kasachinllpa. ⁹ Nuw shiyaa mbammash ashiru maachi patumbich tamatarparee ashtachinllpa. Shiysha anoo tputs punirinllpa. Waantaatiya tputs tsiyanuspa shiyaa napkusin, nda zandkusin, anoo punirinllpa, tárangiya.

¹⁰ Anumunsha, nuwaa tárangitamta. Kaapa mazinangcha. Zurampatarta yuw shiyaa kamachtakchi, anoo mangiptish mazinangcha. ¹¹ Amb sheerush, yap Israelchich tputs arap pseertambarangana amb naayarush, napashincha. Wandtaatiya mazinamaam nda zandkusin, Waana Apanll nuwaa atuwa, tángcha, nuwaa tárangiya.

¹² Apanllsha nuwaa tuwizpurtarangu, tuchiyzarangiya. Sheeru, Taarashipan kizpur wanasirimash, Naamachima, táyaranllu, kushinungshiti kizpur zunganeerangu, mundaz tamaparee ashiru mazinarangina. ¹³ Yuw zunganitaru, an wazitpungach tputs pur ashiru, anush yusarangiya. Waanpatatin kitatsingarangusin, yusarangiya. Iripichpa washunand yusarangana. Mundaz amtarparee ashiru zunganeerangiya. ¹⁴ Apanllsha wizpurpa nuwaa tuchiyzarangu, nuwaa uwpa itsirarangu, arapiri minup tsap wayarangiya. Naayaranlluri, tsiyantakuri, kapung mangi mantsarangina. ¹⁵ Yuwash Israelchich tashitungam taarangana, annung yakat Tel-abib, kungumun Kebaramun wing nuw kusarangina. Anushsha Israelchichpa taar ashirangina. Tsimbun kuwiz matayaru maats nguti taaranguri, ¿Amcheezi? tárangina.

Ashiriya, kamaneena yuwaa Apanll nuwaa Esekiyelaatsi kamachtarangu anootsi.

Apanll nuwaa Esekiyelaatsi wanimpaneem wayarangiya

¹⁶ Tsimbun kuwiz matayaru maats kachingaranllu, Apanllsha nuwaa yusur tsiyatku tárangiya. ¹⁷ Shiy Esekiyelaa, nutsish musásimashtaati, ashiritaa nuw shiyaa tputsee wanimpaneem wayayana, sundar tsangampan ashirush Israelchichee tputs ksutamaama. Nuwsha shiyaa tsiyatkachuri, shiysha nuwaa kuki kamanimantar shingcha. Amb ashkush, uwshtisin nuwaa kuki intsinsaru mazinachinllinaya. ¹⁸ Wandaya nuw, Nee tputsee yutaritshisimand tsipatspatari wanichima, aturi, itaru shiysha nda anoo tputs mangoo p’tseekush, yutaritshishee nda kasaku, uru waanamandari yutaritshishirini tsipachinllinaya. Ashkatssin, nuwsha shiyaa yutaritam ínachtamparina, watam nda waneerangshawa. ¹⁹ Shiy yutaritamapanee tputs mangoo p’tseektaatish, itaru nda mangoonkusin, waanamandari yutaritshishirini tsipachinllinaya. Itaru, shiynaa tsipatsee kamungachpasha. ²⁰ Wandaya tputs wanasirimash piyari chinakchusin, yutaritshish pshtukchusin, uru tsipachinllinaya. Watam sirú wanasir taarangana anoo ndusha chinakuri mapiychtinawa. Ashkatssin, waanamandari yutaritshishirini tsipachinllinaya. Itaru, shiysha anoo tputs nda mangoo p’tseerangush, waanamandari tumshiri tsiparangana anumand nuwsha shiyaatstam yutaritam ínchinllpa, watam nda waneerangshawa. ²¹ Shiy nda yutaritshishush pantsamaam mangoo p’tseekush, uwsha mazinakchusin, mangush wanasir chinakchusin, tsipachazinllinaja. Watam k’kuzee payuranganawa. Ashkachu, shiysha tsipatsee kamungchitamsha, Apanll nuwaa tárangiya.

Ashiriya, kamaneena yuwaa Apanll nuwaa wanimpaneem wayarangu anootsi.

Esekiyel kuk makuksheerangiya

²² Apanll nuwamun uwi putayaru tsiyatarangiya. Chiyzayarush naangee. Tsap paramashtaru anush nuw shiyaa tsiyatchinllpa, tárangiya. ²³ Nuwsha chiyzaranguri, yapiri waana tárangu ambiritam shitungeeranlluri naatarangina. Watandsash nuw Apanllee wanasirimshirini yusur parangina. Síru parangi ashiritam kungumun Kebaramun wing paranguri, timuchta, tsapumun tuw charipti ashirangina. ²⁴ Itaru, Apanllsha wizpur nuwash pshturangu, nuwaatssha tuchiyzarangiya. Tsiyatku tárangiya, Pangipish kanapungcha. Anush pangishish pshtuyarush shtandayarush ksangcha. ²⁵ Papcha. Tputs shiyaa wanumpa kamuriruch. Ashkatssin, shiysha ndusha shitungamaam waritakush, yaktashuchpa tputs nduntam ipunachsha. ²⁶ Amb ashkatssin, nuwsha shiyaa k’keetsish mbam tapatstachima. Ashkachuri, kukish tsiyatamaam mbamatachsha. Ndusha kukish tsiyatamaam waritachsha. Nduntam tputs kizpur yutaritawaa wanimaam waritachsha. Muxareemsha kinachsha. ²⁷ Itaru, nuwaana zandkachuri, yuwash ashkachi, anush yusur shiyaa tutsiyachtachinllpa. Ashkachuri, shiysha yusur tsiyachtachsha. Shiysha tputsee, Apanll nuwaa amb tárangiya, táchsha. Wandaya tputs mazinamaam wits zandku, mazinachinllinpa. Itaru, nduniya mazinamaam zandkusin, mazinamaam nda waritachinllinaya. Watam uwin tputs yutaritanawa; mangshartawanawa, Apanll nuwaa tárangiya.

Ashiriya, kamaneena yuwaa nuw kuki makuksheerangi anootsi.

Chaanaatsi ksutamaam kamankiya

¹ Apanll nuwaa kamachtaku, tárangiya. ² Israelshuchish tsiyatsis uru taariya. Wapar wachin kapzee katungkachu, wipsha wanas kapzimun chtay ashchiya, atanaya. ¿Mayaamsha Israelchich anoo tsiyatsis tayus tayus ashkanaya? ³ Nuw Taarashipaneeruri siyaa atina. Nuwaanamuni suri zurampatari atina. Ayamtaati siysa anoo yusur tsiyatcheezis. ⁴ Yuw tputs yutaritshishee chinakana, anootsiri waneekchuri, tsipachinllinaya. ¿Antaati nuw waparimand yutaritshishiri wipaa wanicheezi? nda. Nuw tputsee ichingaru amuytakina. Ashirucha, itsinsaru natstayaruri, amuyaatsiri waneekina.

⁵ Tputs wanasirimash taarash watacha wanasir taatarasha. ⁶ An tputs apanllputsip machip íwar kárkachu, anush nda apanllputseem shambatshisheem pshtukiya. Mishat, nduntam ngichzimun apanllputsimun Israelchichimun mang’ tatkiya. Mishat, nduntam wamkuree wizanll itutskitamta. Ashiritam, wizanll yuwash kurasee mantsaru anush nda ipunkiya. ⁷ Mishat, minamtiyam tputsee nda kiyung yachakiya. Wandtaati tputseem urkirpa istarangu, Arangiri suwatpa, átu, maachiritaa púnlluree yarangu, anoo yusur kachizpazsha púnlluree tuwanpukiya. Mishat, minamtiyam nda tputsee maachiri shuchikiya. Tputsee nayaniku, mariz kayatku anoom katungtsee istakiya. Yuwaatssha tputs zapeeku anoomtam wamareem panakiya.* 18:7 Matiwa 25.35-40 tsiyatsis nipta tatsamooru taaritamta.⁸ Urkirpa tputseem istaku, nda anumand, Arangeem tuwapangandama, atiya. Mishat, tputs waanpatatin tsiyatssee yaramaam zandkusin, ichingaru mazinayaru, itsinsaru yasayaru, yuwaatsiri yutarit tsiyatarangu anootsiri waneeku, tputsee wanasirimsheetssha kis napkiya. ⁹ Yuw nuwaana kamachtarangi anoo tatsamaru, wanasir waanaatsi yámandaku, taarash wanasiriri taaku, kamachtamareetsi payuku, an tputs zurumarpataricha tsinsa. An urutamari taaratartachiya. Nuwsha Apanlleeruri anumashee tputs kis napchima, Apanll tárangiya.

¹⁰ Itaru, insha tputs wip tayutaritamapan pachampan xarashee wayampaniri taaku, ¹¹ itaru waparsha anumashee nda chinarangu, wipamarisha mantsir taaku, apanllputsip machip íwar kárkachu, anush apanllputsish shambatshishush pshtuku, kis apanllputseem tínarana anumun mang’ tatku, misha wamkureetstaa wizanll itutseeru yamaku, ¹² tputsee pukiri kiyung yachaku, misha tputseetssha maachiree shuchikitam, misha urkiree tputseem istaku, anumand maachiritaa yaku, itaru ayamtaa anoo nda tuwanpuku, ashiritam apanllputsimun mang’ tatku, ngichzimunari apanllputsimun yuwaa nuw kizpur tsiyantakuri, ksimun musáki, anoo kis chinaku, ¹³ tputseem kurikee nayanikina, mangu átu, itaru yusursha tamundaku, arangitamanasha kurikirish tuwanpungandama táta, táta ashku, anumash tputs zapan masach taacheeja. Ichinguru ashpari yuw mantsir ashkana anoo, nuw kizpur tsiyantakina. Nuwsha waneekchuri, izuuru watstamamari watsipunpatari pastachiya. Waanamand yutaritshishirini tsipachiya.

¹⁴ Mishat, apaz wapar yutaritshishush tachitku, itaru wipsha nda mantsirimshee chinaku, ¹⁵ misha apanllputsip machip íwar kárkachu, anush nda apanllputseem shambatshisheem pshtuku, misha nduntam ngichzimun apanllputsimun Israelchichimun mang’ tatku, misha nduntam tputsee wamkuree wizanll itutsku, ¹⁶ nduntam minamtiyam tputsee kiyung yachaku, misha nda tamundaku, yuwaa kachiz tushiykchu anush maachiritaa yusur tuwanpuku, misha nduntam minamtiyam tputsee maachiri shuchiku, yuw tputs mariz kayatku anoom katungtsee istaku, yuw tputs zapeeku anoom wamareem panaku, ¹⁷ nda tputsee natsaku, mantsir tayutaritku, urkirpa tputsee istaku, ndusha, Arangeem tuwapangandama, átu, misha tputs waanpatatin tsiyatssee yaramaam zandkusin, ichingaru mazinayaru, itsinsaru yasayaru, yuwaatsiri yutarit taarangu anootsiri waneeku, wanasirimsheetssha tputs kis napku, misha nuwaanaa kamachtarangi anootsiritam tatsamku, wanasir waanaatsi yámandaku, an tputs waparimand yutaritshishirini nda tsipachiya. Itaru, zurampatari kis taachiya.

¹⁸ Itaru, waparsha mantsir taarangu, misha tputsee maachirita shuchirangitam, tputspatatin mantsirimash ashirangu; waanamandari yutaritshishirini waneeshimun tsipachparee.

¹⁹ Siy saanpatataa tsiyatkus, táchpasa, ¿Tamashtaja nda waparimand yutaritshishirini, wipsha nda tsipamaam waritak tuwapamaama? táchpasa. Itaru, nuwsha siyaa atina. Watam wipsha nda mantsir yutaritshishee patataranguwa. Tputspatatin wanasir chinarangiya. K’kuzee tuminurangiya. Nuwaa kamachtamari kapung mangoonarangiya. Ashirucha, amb ashirangu, zurumpatari kis taachiya. ²⁰ Yuwamarisha mantsir tputs ashkana anumari tsipachinllinaya. Wipatam waparimand tumshir tuwapamaam pinasa, misha waparitam wipamand tumshir tuwapamaam pinasa. Tputs wanasirimash wanasirimsheetsimaritam taarash yachiya. Yutaritshishpansha tputs mantsirimsheetsiritam waneeshish pshtuchiya, Apanll tárangiya.

Ashiriya, na kamaneena yuwaa chaanaatsi ksutchich anootsi.

Apanll, Yutaritshishee kasakchus, ndusha siyaa wanichintspa, tárangiya

²¹ Apanll tárangiya; Yutaritshishpan tputs mantsirimshee kasakchinaareesinaya, nuwaatssha kuki payukchusin, wanasirsha taakchusin, tputsee wanasir tatsamooru chinakchusin, zurampatari an tputs tsipachazinllinaja. ²² Nuwsha yuwaa mantsir ashirangana anoo yusur ayamtaati chinacheezi. Yuwamand wanasirsha taakchinllina, anumand kisshaparee taachinllinaya. ²³ Tputs mantsirimash msangaru tsipamaam nuw nda zandkina. Itaru, nuw tínatana; Taárashee mantsirimshee kasayarusin, wanasirsha taapana átana,* 18:23 2 Pitoru 3.9 tsiyatsis nipta tatsamooru taaritamta. nuw Apanlli zurampatari atina.

²⁴ Itaru, tputs wanasirimshee kasayarusin, mantsirimshishsha yusur pshtukchusin, yuwash tputs mantsirimish ashkana, anush ¿antaati an tputs arangiri taacheeja? nda. Ichtarima wanasir nuwash tachitarangsin, itaru anumunsha nuwaa kasakchusin, nuw anoo pakchiyam nayanikuri, tácheezi, ndambaree. Yutaritshishingaz chinarangusin, nuwaa kasaranganaya. Ashirucha, waanamandari chayarini waneekchuri, tsipachinllinaya, Apanll tárangiya. ²⁵ Itaru, siy nuwaa; Apanll mangu tputsee waneekiya, táchpasa. Itaru, mazinangints, Israelchichis. Siy; ¿Mayaamsa anoo chinakus, nuwaa yutaritam ínaksa? Saantari sáricheeru mantsir chinaksa. Watam siy mantsir taarasheetsis yámandaksawa.

²⁶ Tputs taarashish wanasirimshee kasayaru, mantsirimshishsha pshtukchu, tputsee nda tatsamooru chinaku, tsipatshaparee, yuwamand mantsir patatku anumandarita. ²⁷ Itaru, tputs yutaritshishee izuuru kasayaru, wanasirsha taakchu, kamungachshaparee. ²⁸ Waanaatsi mangoo p’tseeku, Xam; ¿nuw tamakuri ashkina? átu, ichingaru mantsir ashku anoo kapeetkachu, zurampatari an tputs zapan masach kis taachiya, atina; waneeshshee ndusha taachachiya.

²⁹ Itaru, siy Israelchichis nuwaa; Apanll mangu tputsee waneekiya, átpasa. Siy; ¿Mayaamsa anoo chinakus, nuwaa yutaritam ínaksa? Saantari sáricheeru mantsir chinaksa. Nda itsinsaru mangoonaksa. ³⁰ Nuw siyaa minamtawaatsiritis natstayaruri, Israelchicheetsis yuwamand mantsir ashirangis, anumand wanichintspa.* 18:30 Matiwa 16.27; Romshucheema 2.6 tsiyatsis nipta tatsamooru taaritamta. Nuw Apanlleeruri atina; Nda ashishtamaam yutaritshisheetsis ksangints, zurampatari atina. ³¹ Yuw ichinguru yutaritshishee mantsir patatarangis anoo ksangtsa. Nuw ashkis anoo nda kis naparangina. Ksimun musárangina. Mangooz kaneesichsha chinangints, watam ndunnaa ashkus, Israelchichis uru tsipatssawa. ³² Nuw tina; Siyaa nda waani tsipapana, atina. Yutaritshishireetsis ksangtsa. Ashkachus, kis taachpasa, nuw Apanlli zurampatari atina, Apanll tárangiya.* 18:32 2 Pitoru 3.9 tsiyatsis nipta tatsamooru taaritamta.

Ashiriya, kamaneena yuwaa Apanll, Yutaritshishee kasakchus, ndusha siyaa wanichintspa, tárangu anootsi.

Zurampatari nuwaa kuki Israelchichee kamaningcha, Apanll nuwaa tárangiya

¹ Apanll Taarashipan nuwaa tárangiya. ² Shiy Esekiyelaa, nutsish musásimashtaati, ashiritaa shiy saanpatatis tsiyatashincha. Amb tángcha; Nuw yaktashchee wanimaam undararee zangankachuri, yaktashuchsha minam sundar tsangampaneem wayachinllinaya. ³ Ansha sundar ksutamapan undarar kayumatanu anoo pakchu, uwsha kukunkachu, tputsee, Papcha, kundararini naanllpa, táchiya. ⁴ Wandaya tputs anoo mapiyksin, nda wits mazinaksin, undararsha kuskachu, pachakchu, waanamandari chayarini tsipachinllinaya. ⁵ Watam mazinarangitaatssin, itaru ndusha k’kuzee payuranganawa. Wanaree wits mazinarangusin, tsipatsee kamungchinaapsinaya.

⁶ Itaru, sundarsha ksutamapan undararee pakeertaa, itaru uwsha tputs nda mangoonamaam puu puu átu, undararsha kuseeru, tputsee minamtaati pachakchu, nuwsha ksutamapanee, Na, nishuri shiy tsipanlltampasha, watam tputsee nda nayanirangush, puu puu tárangshawa, táchima.

⁷ Ashiriya, nuw siyaa Esekiyelaatsis atina. Shiy Esekiyelaa, nutsish musásimashtaati, ashiritaa nuw shiyaa tsangampaneempaz ashiru wayarangina. Israelchichee tputs ksutkush, sundar tamatarparee shingcha. Shiy nuwaa kuki payungcha. Yuwaa aship kamaneenlli anoo kamanimantar shingcha. ⁸ Wanari nuw, Tputs mantsirimshee tsipatspatari wanichima, atinaareena, itaru shiysha nda anoo tsiyatkush, yutaritshishee kasamaam nda mangoo p’tseerangush, an tputs yutaritshishimandarit tsipachpasinaya. Itaru, nuwsha shiyaa, Na, nishuri tsipanlltamcha, watam tputsee nda nayanirangush, nda waneerangshawa, táchparina. ⁹ Itaru, shiy wanasir chinakush, tputsee istarangitaatish, yutaritshishpanee tputs, Ksangtsa; yutaritshishee kpitangtsa, tárangitaatish, itaru uwshtisin nda ayu tárangusin, uru waanamuntari tumshiri tsipachpachinllinaya. Itaru, shiynaa sitarunasee pangachsha, Apanll nuwaa tárangiya.

Ashiriya, kamaneena yuwaa Apanll, Zurampatari nuwaa kuki kamaningcha Israelchicheetsi, tárangu anootsi.

Apanll chiyaa tputseetsich taarashich yasakiya

¹⁰ Shiy Esekiyelaa, nutsish musásimashtaati, ashiritaa Israelchichee tputs tsiyatashincha. Ashiriya, tángcha. Siy átssa; Yutaritshishee zapan pataranguni, anumand kizpur kiyung kachiykiniya. Ashirucha, ngutini tsipatsiptar ashkiniya. Ashiriya, ¿tamayareezich wanasir taaychich? átischa siya. ¹¹ Nuw Taarashipaneeruri nuwaanamuni suri zurampatari atina. Yutaritshishpaneetstaatiya tputs nuw, Waani tsipap, ateezi, nda. Itaru, waani yutaritshishirineetsi kasayarusin, nuwashsha tachitap, Israelchicheetsis atina. Ashkachus, uru wanasirsha taatssa. Ashiriya, Israelchichis mazinangtsa. Yutaritshishireetsis ksangtsa. ¿Mayaam tsipatsee zandaksa?* 33:11 2 Pitoru 3.9 tsiyatsis nipta tatsamooru taaritamta. Apanll Israelchichee tárangiya.

¹² Shiy Esekiyelaa, nutsish musásimashtaati, ashiritaa saanpata tputsee tsiyatashincha. Tputs wanasirimshish tachitarangsin, itaru yutaritshishushsha pantsakchusin, yuw sirútama wanasir taarangana, anumand waanaatsi tapachindamaam wanindaja. Mishat, tputs yutaritshishpan mantsirimshee kasakchinaareesinaya, yuwamand sirútama yutaritshishee mantsir patatarangana, anumand nda tsipachinllinaya. Mishat, tputs wanasirimshishtaatiya tachitarangsin, itaru yutaritshishushsha pantsakchusin, yuw sirútama wanasir taarangana, an ¿taárasheem istacheeja? nda. ¹³ Nuw tputs wanasirimshee, Siyaam kis taamaam panachintspa, aturi, itaru uwsha yuwaa áti anoo mapiyksin, yusursha mantsirish pantsakchusin, anoo tputs ndusha kis napchima, atina. Anumashee tputs tsipatspatari wanichima. ¹⁴ Nuw tputsee mantsirimshee, Nuw siyaa wanichintspa, tákchuri, itaru uwsha yusur taarshee wanasir yámandakchusin, ¹⁵ yuw chirikoo iripungashee yarangana anoo, nduntaati ashiru shuchirangana anoo tuwanpukchusin, misha nuwaa kamachtamari izuuru tuminkatssin, tputsee wanasir tatsamooru chinakchusin, mantsirimshee taarashish izuuru kapeetkatssin, zurampatari zapan masach taachinllinaya. Waneeshshee ndusha wayachina. Watam nuw kamachtamari taarashipaniwa. ¹⁶ Waanari tputs wanasirimshee chinakchusin, tputspatatin wanasirsha tatsamooru chinakchusin, wanasirshaparee taachinllinaya. Nuwsha yuwaa sirú mantsir taarangana anoo ndushapari chinachina.

¹⁷ Shiyashuch Israelshuch tputs táchinllinaya. Apanll mangu tputsee waneekiya, atitaateesinaya, itaru zurumari waanasincha nda wanasir taarash taaksin, tputsee nda tatsamooru chinakshinllinaya. ¹⁸ Tputs wanasirimash taárshee wanasirimshee kasakchusin, mantsirimashsha yusur chinakchusin, waanaamandari chayarini tsipachinllinaya. ¹⁹ Yutaritshishpan tputs yuw mantsir taakana anoo kasayarusin, yusursha wanasirsha taakchusin, tputsee wanasir tatsamooru chinakchusin, anumand wanasir kis taachinllinaya. ²⁰ Siy tsiyatkus, tayus, tayus ashiksa; ¿Apanll iyaa wanasiree chinak? Mangu tputsee waneekiya, ántangat ashiksa. Yuwamand átis, misha mantsir patatkis anumand minamtawaatsiritis Israelchicheetsis wanichintspa,* 33:20 Matiwa 16.27; Romshucheema 2.6 tsiyatsis nipta tatsamooru taaritamta. Apanll tárangiya.

Ashiriya, kamaneena yuwaa Apanll chiyaa tputseetsich taarashich yasaku anootsi.

Israelchich kurak tiptsiree mantsir ksutarangana anoo kamanchintspa

¹ Apanll nuwaa Esekiyelaatsi tárangiya. ² Esekiyelaa, nutsish musásimashtaati, ashiritaa nuwaa kuki Israelchichee kurak kamanishini. Ashiri tángcha. Paptsa. Apanll siyaa kurakaatsis waneerunts. Siy Israelchichee wanasir ksutangtsa. Opeeja ksutamapan tamatarparee shingtsa. Itaru, siy nda ashkus saanaatstamari ksutaksa. ³ Nduntaa opeeja siy ksutkus, itaru mimireetsimsha kis waaksa. Mishat, purootstam kamareemis k’tayarus, kamartaksa. Yuwaatssha yungantataru anoo pachaksa. ⁴ Ashkitaatis, nda yuwaa opeej wanguytaku anoo nda yaramaam zandaksa. Mishat, yuwaatstam kuchakcharu anoo nda irimiypa puntayarus yaraksa. Mishat, yuwaa suwakana anungaz nda nachungayarus, yamayarus waashtam watandpunush wayaksa. Itaru, siysa opeejareetsis mangu kiyung yachaksa, nuw siyaa ksutamapaneetsis atina. ⁵ Ashiri nuw tputsiri opeej tamapari ashiriya. Kurak nuwaa tputsiri nda ksutkusin, opeeja ksutamapan ndunar, yapsha waritaku ambsha masatumbachusin, tumuzsha anoo katungtariya, nuw tputsiri ashikpaz ashkanaya.* 34:5 Matiwa 9.36; Márkosa 6.34 tsiyatsis nipta tatsamooru taaritamta.⁶ Ashiriya, opeej manginap, misha machpitam suwasuwarangana, anungaz ¿chakshtaja nayaniku nachungayach? watam tputs anoo ksutamapan ndunariwa.

⁷ Ashiri na ksutamapanis nuwaa kuki kaapaniri mazinangtsa. ⁸ Nuw Apanlli Taarashipani zurampatari siyaa ksutamapaneetsis atina. Ngichkinaareena, tsipatspatari tuwapchima. Siy nda tputsireetsi wanasir ksutkus, saanaatstamari ksutarangus, nuw tputsiri opeej tamatarpari ashirusin masatambarangusin, siy nda nachungakus, tumuzeewsha anoo zayarusin katungaranganaya. ⁹ Ashirucha, nuw Taarashipani siyaa ksutamapaneetsis atashina. Yuwaa nuw tsiyatkachi anoo kaapaniri mazinangtsa. ¹⁰ Nuw Apanlli Taarashipani siyaa atina. Nuw siyaa kundartaktana, watam tputsireetsi istamaam nda zandaksawa. Nuwaa tputsiri ¿tamareeja ksutarangis? anoo mashchintspa. Ashiri yuwaa ashirangis anoo yasayaruri, siyaa tashitungakchuri, ndusha nuwaa tputsiri ksutatssa. Watam nda wanasir ksutkus, kiyung yachaksawa. Ashkachuri, nuwaanasha tputsireetsi ksutchima, Apanll átcha, nuw Esekiyeli siyaa atina.

¹¹ Apanll Taarashipan átcha. Nuwaanasha tputsireetsi ksutkuri taachima. ¹² Ksutamapan wanasirimish opeejarini tsípakchu, anungaz urutari nachungtaru, nuwsha ashiritam tputsiri tsípachusin, anungaz uru nachungakuri taachima. Ashiri masatkatssin, tapishpaz ashiru kiyung kachiykachinllina. Anoo uru tapachindachima. ¹³ Minupsha tsap naatambarangana, anoo yamayaruri, yusur waanshutam watsapun wayachima. Sheeruri, Israelap mach machima. Mishat, wazawpitam kungup machima. Ichingaru yakat yámandachima. ¹⁴ Anush wanasirsha katungats katungchinllinaya. Sheersin, Israelamun mach taachinllinaya. Anush nuwaana katungtsee panakuri, katungkusin, anshurisha kanuskusin taachinllinaya. ¹⁵ Nuwaantari opeejaa ksutamapan ashiruri, ksutkuri taachina. Ashkuri, tputsiri nizichinllina, anoo wanasirsha wayakchuri, uru kanuschinllinaya, nuw Apanll Taarashipani atina. ¹⁶ Tputsireetsi nuwaana wanasir ksutchima. Ksutamapan wanasir opeejarineetsi ksutaru ashtachima. Tputsiri masatkatssin nuwaanasha anungaz uru nachungayaruri,* 34:16 Lukasa 15.4-7 tsiyatsis nipta tatsamooru taaritamta. yusur anshutam wayachima. Wandtaati wats chpamawsha yamayachuri, nuwaanasha anoo tapatstashipa tapatstayaruri, uru yarchima. Nuw wanguyawaa, misha matambsheetam, wanuts kapunguwaatstam tatsamooru ksutchima.

¹⁷ Nuw Apanlli Taarashipani siyaa atina; mazinangtsa. Ashpatamtis opeej tamapari ashirus taaksa. Itaru, ashpatamtis kaapar tamapari ashirus taaksa. Opeejaa, misha kaaparaatstam tatsamooru nuw wanichima.* 34:17 Matiwa 25.31-34 tsiyatsis nipta tatsamooru taaritamta.¹⁸ Ashpatamtis pastoo wanasirimshee kis katungeerus, tazazarus, anootstam pastoo ktsiptis tayutaritamaam kapchaksa. Wakunguree wiree kis waayarus, itaru anootstam kapchayarus kasaksa. ¹⁹ Ashiriya, yuwaa pastoo siy kapcharangis anoo nuwsha opeejari nda kis katungkanaya. Yuwaatssha kungoo kaptsayarus, shshutaramchu kasarangis, anootstam nduntam kis waakanaya. ²⁰ Ashirucha, nuw Apanlli Taarashipani atina. Opeej yungatataru an xangitamaa kiyung yachaksin, nuw tatsamooru yasayaruri, wanichima, atina. ²¹ Siy matambsheewis wizpureerus wanguyawaa kitsiptis kayungambayarus, tununeerus tuzanganiksa. Ashkus, suwasuwakanaya. ²² Itaru, ashkitaatis, nuwaanasha kiyung kachiykana anoo tapachindachima. Antaati anoo opeejareetsi shuchichtarusin, taamaam zandkeezi. Nuwaana opeejareetsi tatsamooru wanasir wayachima. ²³ Dapiyaa nuwaanaatsi tputsiri amb zanganchima. Uwsha anush ksutamapan taachiya.* 34:23 Wanga 10; Apanll wanichu anu 7.17 tsiyatsis nipta tatsamooru taaritamta. An kizpurcha wanasiri. Uwaatssin ksutku taachiya. ²⁴ Nuwaa Apanlleetsi Apanllirineem ínachinllinaya. Tputsireetsshiti Dapiyaa urkareem ínachinllinaya, nuw Apanlli atina. ²⁵ Ashiri nuwsha Israelchichpa tputs wanasir tatsuyakchuri, kissha taachinllinaya. Kpachamsheetssha arap zanganchima. Tputsiri mapiyshtisin kis taaksin, mzatsish, misha manginshutam kis maachinllinaya.

²⁶ Nuw tputsireetsi nuwaanshu pangi tipuranllizee machish wayachima. Nuwaana istakuri sinaatssha zangankachuri, yuwash waritakchu anush sin sinaku taachiya. ²⁷ Tatsumarini wanasir mazarish yusiychiya. Tsap tatsumaam wanasir yanungaku, zapan yusiyku, anoo pusaksin, waanshu watsapun taachinllinaya. Tputsireetsi wanasirsha wayakchuri, yuw tputsireetsi kiyung yachaksin, tumuchchurtarangana, anshtisin tputs nuwaa naatstakchusin, in Apanll Taarashipancha, táchinllinaya. ²⁸ Arapcheewtam tputs ndusha tputsireetsi kiyung yachaksin taachinllinaya. Mishat, manginshuchtam kázamish ndusha zayaru katungku, uru kissha taaksin, nda punichinllinaya. ²⁹ Anuw nuw tsap wanasir wayakchuri, zapan tatsumarineetsi pusachinllinaya. Ashkusin, ndusha marizimum kiyung kachiychinllinaya. Mishat, nduntam tputs waatsin tayutaritkusin, michitchinlliniya. ³⁰ Anumun tputs nuwaa yasachinllinaya, nuw Apanlleeruri tputsiripti taaki anootsi. Nuw Israelchichee tputsirtana. Nuw zurampatari atina. ³¹ Nuw tputsireetsi opeej tamapari ashiruri siyaa ksutchima. Siysa nuwaa apartana taatssa, nuw Apanlli Taarashipani siyaa atina, Apanll siyaa Israelchicheetsis átcha, nuw Esekiyeli atina.

Ashiriya, kamaneena yuwaa Israelchich kurak tiptsiree mantsir ksutarangsin, itaru Apanllsha waana wanasir ksutchu anootsi.

Israelchich yusur watsapunish kis taakchusin, anush tputs ichingarusin Apanllee yasachinllina anoo kamankiya

²² Ashiri shiy Esekiyelaa, Israelchichee tángcha. Yuw nuw ashkachi an nda saanamuntari ashtatssa. Itaru, nuwaanamuntari wanasirimshiri ashtachima. Siy nuwaa yutaritaam ínarangitaatis, ashiritaa siyaa tapachindachintspa. ²³ Arapchish tputsi taarangus, nuwaa yutaritaam ínarangitaateesa, ashiritaa nuwsha nuwaanaatsi wizpuriri uru tuyamandachima. Ashkachuri, tputssha nuwaa Apanlleetsi yasachinlliniya. Watam nuw Taarashipani atinawa. ²⁴ Nuw siyaa minush tsap taaris anoo tashitungayaruri, washunandsha tushaniyaruri, saanpeetarisha tsapunis machintsa. ²⁵ Mishat, siy yutarishishee chinarangus, apanllputsirimunis mangis taturangus, mangeetsis taminllurtarangis, anoo nuwsha kungupapaz ashiru kupachintspa. ²⁶ Sheeruri, siyash mangishis kaneetsi pshtakchuri, siyaam taarashish kaneesichsha panakchuri, mangis yutaritaatstaa patumbich tamapari ashiru mbamaatstaa, nuwsha tachingachuri, mangeetsis wanasirsha kasachintspa. Ashkachuri, siysa nuwaatsimarisha kuki payukus taatssa. ²⁷ Siyash kaneetsi tapshtukchuri, siy nuwaatsimarisha kuki payukus, nuwaa kamachtamari izuurasha tuminkus taatssa.* 36:27 Romshucheema 8.5-6; Gálatasshcheema 5.22-25; 1 Wanga 3.24 tsiyatsis nipta tatsamooru taaritamta.²⁸ Ashiri yuwaa nuw siyaam zitaminaris tsapoo panarangi anshuritam taakchus, nuw siyaa tputsireemi ínakchuri, siysa nuwaa Apanllireemis ínatssa. ²⁹ Yutaritash taarus, kiyung kachiykus taarangis, anoo nuwsha tapachindakchuri, kissha taakus, mzarshis tatsumaris tirik zapan kayanaku, anoo katungkus, ndusha marizimun kiyung kachiykus, wanasirsha kis taatssa. ³⁰ Mishat, tatsumaris zapan yusimaam mzarshis wayachima. Ndusha katungats siyaam pshataku, nda siy arapchee tputs pazitssa. ³¹ Amb ashkachuri, mangeetsis p’tseekchuri, yuwaa mantsir taarus, zapan yutari ashirangis, anoo chinakchus, saanamand yutarishishiris pazitssa. ³² Nuw Apanlli siyaa Israelchicheetsis táchintspa. Kaapaniri mangoonangtsa. ¿Antaati siy wanasir taakis, anumand nuw siyaa istachee? Nda. Anumand kizpur pazikus, mangis mantsakus taangtsa.

³³ Apanlleeruri siyaa atashina. Nuw siyaa yutaritshishiris tachingachuri, mapiyshtis saanshutarisha tsapunis taatssa. Yaktaris kapeetampaz ashiritaa taarangu, anoo yusur wanasir yaratssa. ³⁴ Tsapuneetsis kasambarangus, yutaritamuntaa anoo yusur puyakchus, tputs amb napkatssin, wanasirsha yaram pangchinllinaya. ³⁵ Tputssha anoo tsap, In tsap anuritana kasamunawa. Itaru, natsha Edeng watipuranll tamapari ashisha taariya. In yakat anuritana izuuru kapitam maachi ndunar taarangtaa, natsha wanasirsha tputs zapan kizpur taaranaya, táchinllinaya. ³⁶ Ashiri yaktashuch yuw annungiri watsiri taararutaru, nda tsiparangana, anshitisin nuwaa Apanlleetsi Taarashipaneetsi yasachinllinaya, nuw yakat kapeetamaatstaa yusur kizpurinasha wanasir wayachi anootsi. Mishat, yuwaa mazareem wanasiritam wayachitamti anootstam yasachinllinaya. Nuw Apanlli Taarashipani uru amb sheeruri kasachima.

³⁷ Ashiri nuw atina. Uru siyaa Israelchicheetsis aranginasha istachima. Yuwaa mashkis anoo izuuru tatsamchima. Ashkachuri, opeej wazapan waniptarparee aship tiptsirineem izapanichima. ³⁸ Yaktarini izuuru kapeetam, tputs ndunarimuna, anush tputs tatsitachtaya. Irusarinash shambatshishush opeejaa muchimaam yushindakchusin, zapan tatsitangat ashtaru, ashiritam tputssha Irusarinush tatsitchiya. Ashkachi anush, nuwaa Apanlleetsi natstachinlliniya, tángcha, Apanll nuwaa Esekiyelaatsi tárangiya.

Ashiriya, kamaneena yuwaa Israelchich yusur watsapunish kis taakchusin, anush tputs ichingarusin Apanllee yasachinllina anootsi.

Na kamanchintspa yuwaa Apanll Israelchichee yusur napuz tamapari ashirusin, kiyung kachiykana anoo ituyamayaru, waanshutam watsapun wayachu anootsi

¹ Apanll Taarashipan nuwaa putayaru, wizpurpa machtarangiya. Watandsap yuwash wanap xanaru anush nuwaa yushindarangiya. ² Anushsha watandsash nuwaa machichtara iturpiptara ashirangiya. Yuwash wanap puzanandari xanaru anush, ashirangiya. ³ Sheeru, nuwaatssha tárangiya. Shiy ¿amaksha? ¿In wanap yusur támeecheeja? nuw shiyaa atina, tárangu, nuwsha, Apaa Taarashipanee, shaanacha nee yasatasha, tárangina.

⁴ Ashiri Apanllsha nuwaa, Nuwamun suri tsiyatkush, Wanapoo, ichingarus chiyzayarus, Apanllee kuk mazinangtsa, tángcha. ⁵ Apanll Taarashipan siyaa ateeja. Nuw siyaa ituyamayaruri, yusur taarashee pangatssa. ⁶ Yanxeemtamtis wayakchuri, nutsis nutseenkachus, tasiritamtis taachiya. Sheeruri, siyash yusur tapuseeruri, sitarnasush taatssa. Ashkachuri, uwshtisin nuwaa Apanlleetsi Taarashipaneetsi yasachinllinaya, Apanll átcha tángcha, tárangiya. ⁷ Ashiri nuwsha anuritam tsiyataranguri, kizpur zunganeerangu anoo mazinarangina. Muntaz kizpur muntaztarangu, tsiparsha wanap yuw piyamaw tamutamuru ansha washunand ptsutaranganaya. ⁸ Anootssha wanapoo nap ashkuri, wayanxaam, misha nutsaseemtam kinarangiya. Ashirangu, anumun iwaz zapsha túmartarangiya. Itaru, nda kchitamuna.

⁹ Ashiri Apanllsha Taarashipan nuwaa tárangiya. Anoo tsiparee wan sur kuruzungi, tsipar yusur kchitamaama. Ashiri tángcha. Tsipareewis wanis naanints. Yap tsapurunas tspakatu taaris ambchiwis ichingarus naanints. Kuseerus, tsiparish pshtungints, in tsipar wanap yusur kchitamaama, tángcha, Apanll tárangu, ¹⁰ nuwsha anuritm tsiyataranguri, ansha tputs wan tsiparish pshturangusin, waanapsha yusur kchitaranganaya.* 37:10 Apanll wanichu anu 11.11 tsiyatsis nipta tatsamooru taaritamta. Ashpartarishtisin tsipar támandarangsin, aship sundar wazapan shaniyaranganaya.

¹¹ Anootssha Apanll nuwaa tárangiya. Israelchichin in napuz tamaparee ashirusin taaksin, in napurini izuuru puzama. Ashirucha, Chinashini nduneeru, masatangat ashkiniya, atanaya. ¹² Ashiri shiysha nuwaa kuki kamaningcha, Apanll siyaa átcha tángcha. Nuw Israelchichee tsipar ashirusin, mapshishush taarana, anoo tashitungayaruri, yusur watsapuniptam wayachima, átcha Apanlli, tángcha. ¹³ Nuw siyaa mapshishishpaz taarus ashiris anoo tashitungachintspa. Ashiri nuw siyaa taarashis ituyamakpaz sheeruri, tsapunshis wayachintspa. Ashkachuri, anush siy nuwaa Apanlleetsi yasatssa. Nuw yuwaa tsiyatki anoo uru tatsamchina, nuw siyaa Apanlli atina, Apanll siyaa Israelchicheetsis átcha, nuw Esekiyeli siyaa atina.

Ashiriya, kamaneena yuwaa Apanll Israelchichee yusur napuz tamapari ashirusin, kiyung kachiykana anoo ituyamayaru, waanshutam watsapun wayachu anootsi.

Israelchich Utaáchichpa washunand minumtashumarisha taachinllina anoo kamankiya

¹⁵ Apanll nuwaa yusur tárangiya. ¹⁶ Apaya yasina. Nimun yandangi, Utaáchich Israelpa amikurtayanllina anootsi, tárangu, anumunsha yusur, Apaya misha yasina. Nimun Osiyarinchich Israelshuchpatatam amikurtayanllina anoo yandangtamcha. ¹⁷ Sheerush, yasinaa washunandarisha minumarisha kinamaam kpatstayarush ksangcha. ¹⁸ Wandaya Utaáchich anoo mashkatssin, ¿In maya áta? kamaninda, ateesinaya ashiru, ¹⁹ shiysha nee Apanll átcha tángcha. Utaáchich Israelchichpa washunandarisha yapandarsin taachinlliniya, Apanll átcha, tángcha. ²⁰ Táyarush, anootsiri yandamaa payupayucha, wani yuwaa yandarangish anoo pangpana. ²¹ Ashiramchush, anumunsha tángcha. Apanll siyaa ateeja. Siy minup tsap naatambarus taakis, anoo tashitungayaruri, washunand tushaneeyaruri, tsapunpitamtis wayachintspa. ²² Ashkachuri, washunandarisha Israelshuchpat wayachintspa. Anush minumarisha kurak taakchu, ndusha chawpishtambarus taatssa. ²³ Mishat, ndutam apanllputsireetsis mantsirimshee ungirtakus, arangeem ndusha minu yutaritshish chinakus taatssa. Nuw yuwaa yutari zapan ashirangis, anoo izuuru tachikchima. Ashkachuri, tputsireemi siyaa ínchima. Siysa nuwaa Apanllireemis ínatssa. ²⁴ Dapiyarinchicheetssha tputsireetsi kurakareemis ínatssa. Ansha ichingurootsis ksutku, siysa nuwaa kuki izuuru payukus, kamachtamareetsi tuminutssa. ²⁵ Nuwash tputsiri Akoparinshini watsapun taatssa. Yuwashtam zitaminaris taarangu anshutamtaya. Taakus, ichingarus iparis, chinllinitamtis izapaneerus, urutamari taatssa. Anush nuw tputsiri Dapiyarinchich nlluranur urutamaritam kurak taachiya. ²⁶ Ashiri Israelchicheetsis tatsuyakchuri, wanasirsha taatssa. Yuw ashkachi an urutamari taamaama ashtachima. Mishat, tputsireemtamtis izapaneekchuri, anush pangeemi wanasirimshee wayachima. Ashkachuri, an urutamari taachiya. ²⁷ Anush nuw taakuri, nuwaa Apanllireemis ínatssa. Nuwsha siyaa tputsireemi ínachintspa.* 37:27 Yuwaa nish átu anootstam 2 Koríndshucheema 6.16 tayusima kamankiya. Itaru, Apanll wanichu anu 21.3 tsiyatsis nipta tatsamooru taaritamta.²⁸ Ashiri nuw pangi anush urutamari taaku, tputstisin nuwaa Apanlleetsi yasachinllinaya, Apanll átcha siyaa Israelchicheetsis, nuw Esekiyeli siyaa atina.

Ashiriya, kamaneena yuwaa Israelchich Utaáchchipa washunand minumtashumarisha taachinllina anootsi.

[Ashiri wappari. Watamaricha nuw Esekiyeli kuki.]