Pii Beetihi
Ni naado na habwii te Ioane
Atabuhi ko a tii
Woo na e tii a tii ce?
Wieli wo Ioane, pa apostolo. (Omehi Atabuhi ko a tii 1 Ioane.) Wo lépwo Roma, ke lé neeng he karépu ne pwo a één Patmos (na e mwonuhi a amu Turki jenaa). Ke e paciheeng nelang wo pa céiu âcélo te Padué, ke e habwii ten ni naado na o bo tuie.
E tii éniile?
Ha awieme a jo 95 me 96 alecehe Iésu Kériso. É ha a benaamwon naa, ke e daame he lépwo Roma wo Domitien. Ke e te junihe pwotahi ne ko ni acéihi ne ko Iésu.
E tii me dee?
Te ni acéihi ne ha a province Asia (ha amu Turki jenaa). Hiwon mu kolé na pinekepé ne telé ko a bwo pwotahi ne kolé. Kehe time e uce téele mwojuia cemwo wo Iésu ne ha a bwo piwéden den, pwohewii ana e caa mi pii telé.
É ko ade na e tii?
E pamwoiu lépwo acéihi na te junihe pwotahi ne kolé pie, wo Iésu, ke e o te piwéden koja ati lépwona lé cubwonieng, woélé me Caatana, pa caa telé. Ke e o tee mu dieli mwo a Mwametau tenye me Kériso.
Ade ace âne a tii ce?
Wo Ioane, ke e tii a pwooti te Iésu te ni 7 puco te ni acéihi ne Asia, beme e paténelé me pamwoiulé (pwahamii tii 2―3).
É alecehen, ke e tii ni naado na hiwon, na o bo tuie, na e habwii ten wo pali âcélo. Be e alihi a pa na ubwo te Caatana me ni apulie ten na lé pwopa ne ko Iésu me ni apulie ten.
• Ke o piubwo ngen a ta, ke o te junihe hiwon lépwoceli lé o ne jéilé ne ko Padué. A pwomwo ubwo Babulona na pii kon pie ‘Ê toomwo pwopwaaden’ (pwahamii tii 17―18), ke a ocine ko a pwomwo ubwo Rome, ke a ocine mwo ko ati ni apulie pwo bwohemwo na upwonimelé, ke lé cubwoni Padué me pwotahi ne ko ni apulie ten.
• Wo Caatana, ke a ocine kon, ke a dragon, ke e bo junihe pwotahi ne ko ni apulie te Kériso. (A ocine kolé, ke ê toomwo ha a pwahamii tii 12.) E pwotahi ne kolé dieli e â taunu ni béén. Kehe icehi ana wo Padué, ke e bo wéihi ni jenelé.
• Lu bo cuwoda wo lupwo alo apulie na te junihe ta julu, lupwo eabwé te Caatana na pii kolu pie ‘pa iténaado’, ke ‘pa péroféta agele’ (pwahamii tii 13), ke o patupwo ne telu me lu pwo ni naado na ta ne éni pwo bwohemwo ha ace céiu benaamwon.
• O bo tuie ni inenaado na ité, ke o tieden a céiu duaa miiden me a bwohemwo, ke o hiwon ni picani me ni téé na e o bo tuie ne ko ni apulie (pwahamii tii 6―10; 15―16).
• Kehe icehi ana é alecehen, ke e bo mwojuia mwo wo Padaame Iésu, ke e bo piwéden koja Caatana me ni apulie ten. E bo tanahi ‘Babulona’, ke e bo imwi Caatana, ke e bo tahieng ne ha a miû dieli mwo (pwahamii tii 19―20).
• O tieden a bwohemwo me a miiden ânebun, ke e o tuie a bwohemwo me a miiden na mwo coho, na e o mu dieli mwo. Lé o mulie nelang dieli mwo, ne ha a tebwo ehi me a pipwodéén, ati ni apulie te Padué (pwahamii tii 21―22).
Hiwon ni bwo niimihinaado ne ko nina tii ne he ni pwahamii tii 4―19 ne pele lépwo dotéén ko a Tii Iitihi. Be pii pie:
• Ni naado na tai cuwo ha a benaamwon de Ioane;
• Ni naado na e ko cuwo, dieli ha a tan den, ke é jenaa, ke é alecehen;
• Ni naado na mwo time uce téele tuie.
Wieli te tai ni juuju ni bwo niimihi nen naa, be nina e mi pii ânebun wo Padué ne he ni tii iitihi, ke hiwon ni bwo pacuwohi nen: pacuwohi ha a benaamwon na tii, ke pacuwohi mwo alecehen, ke bo pacuwohi ati, ha a pwonehi a bwohemwo.
Hiwon ni ocine na ité, na élé ha a tii ce: ni ocine na lé temehi ehi ni bwopiinen ne ni acéihi, he ni benaamwon ânebun. Kehe icehi ana time genye uce ju temehi ehi jenaa. Kehe icehi ana te junihe pwéélang ni âne a tii: E te piwéden koja a ta wo Iésu, tabuhi jenaa dieli ha a pwonehi a bwohemwo, ke wâé heme nye mu kon, wogenye ni apulie ten.
Numéro 7 ne ha a tii Pii Beetihi
E pé a numéro 7 wo Ioane me inenaado ko nina iitihi ke hején, beme e habwii pie, wo Iésu, ke Padaame na hején nang. (Omehi mwo a Tii te Ioane Atabuhi ko a tii.) Weengi ni 7 x 7 naado ne ha a tii ce:
<α> Ni muko tii te ni 7 puco te ni acéihi (2.1―3.22)
<β> 7 apinyihi ko tii (5.1―6.17; 8.1−5)
<γ> 7 âcélo ke 7 tutu (8.6―11.18)
<δ> 7 ni inenaado (11.19―15.4)
<ε> 7 mwotabe ko a apwohi (15.5―16.21)
<ζ> 7 pwooti ko Babulona (18.1−24)
<η> 7 naado na o cuwo ha a pwonehi a bwohemwo (19.11―21.8)
A bwomune a tii Pii Beetihi
A bécéiuhe pwooti te Ioane (1.1−8)
Ni naado na o mu jenaa (1.9―3.22)
E wéi ni apulie ten wo Kériso @ —Ni muko tii te ni 7 puco
Ni naado na e bo tuie (4.1―22.5)
Tehi a miiden (4.1−11)
Ni picani me ni téé (5.1―8.5)
Patieden a céiu duaan mu ko a bwohemwo me a miiden (8.6―11.18)
Lé pwopa ne ko Kériso wo Caatana me ni apenem den (11.19―14.20)
Ni apwohi (15.1―16.21)
Patieden ê toomwo pwopwaaden Babulona (17.1―19.10)
Pwonehi a bwohemwo. E piwéden wo Kériso (19.11―20.15)
A miiden me a bwohemwo na mwo coho (21.1―22.5)
Bénebwéne pwooti (22.6−21)
1A bécéiuhe pwooti te Ioane
11.1 Pii Beetihi 22.6Weengi ana e habwii wo Iésu *Kériso, ne ko ni naado na o te ju téele tuiebé. Be e hegi mu ko Padué Caa, ke e bwo pahede pa céiu *âcélo ten, beme e pébé céiiéo a pwooti, woéo Ioane, pa eabwé ten, ke e huôhi ne tong pie, me é pii beetihi te ni apulie te Padué. 2É *pajuujuhi ne tewé ni, pie, ati nina é alihi, ke ni pwooti na e pii tong wo Padué, ne ko Iésu Kériso1.2 Ne ko Iésu Kériso—ai A pwooti te Iésu Kériso.. 31.3 Pii Beetihi 22.7,10*Adéi pa apulie na e pine [te ni apulie] a pwooti ce, na e âbé mu pele Padué. Ke adéi mwo lépwona lé téne, ke lé âcehin! Be caa e mwonu a tan na e bo pacuwohi ati ninaa [wo Padué].
Pipwobwocu
41.4 Exode 3.14−15; Pii Beetihi 3.1, 4.5É pwotii nge he ni 7 *puco te ni acéihi, ha a province Asia1.4 Asia—Ha amu Turki jenaa. A pwomwo na junihe ubwo ne Asia, ke é Éféso.: Wâé heme e mu pelewé a adéihi, me a *pipwoééhe tice ja kon, me a péém:
A adéihi na e âbé mu pele Padué na e ânebun, ke é jenaa, ke e te mu dieli mwo!
A adéihi na e âbé mu ko a *Jenen Iitihi, na e mu ânebuhe a atebwo te Padaame. [A Jenen Iitihi, ke pwohewii ni 7 jenen1.4 Jenen Iitihi, ke pwohewii ni 7 jenen… Grek: Ni 7 jenen. Numéro 7, ke a ocine ko a bwo hején Padué, âcehi a bwo niimihi nen de lépwo Juif. ne ha a bwo hején nang]!
51.5 Psaume 89.28; Kolosé 1.18A adéihi na e âbé mu ko Iésu Kériso! Weeng pana e pipatemehi Padué ko a juuju. Ke weeng pa apulie na e mi mulie cemwo mu ha amele. Ke weeng kuti Padaame he ati ni daame éni pwo bwohemwo!
Ke weeng na te junihe eânimen denye, ke e tuwokenye koja ni ta pwo tenye, ko a cewéhen [na tée he li e mele me denye]. 61.6 1 Pétéru 2.9; Pii Beetihi 5.10, 20.6Ke e pwo me genye nahi a Mwametau ten, ke me genye cuwo he pwahamii Padué1.6 Genye cuwo he pwahamii Padué—Grek: Wogenye ni apwoâpwailo., Caa ten, beme genye pipwoeabwé ten. Wâé heme e mu pelen a bwo ubwo na a wâé, me a junuun, dieli mwo! Amen!
71.7 Daniel 7.13; Zakari 12.10; Mataio 24.30; Ioane 19.34−37; 1 Tésalonik 4.17Geé alihi! Be e o te ju téele âbé, he ni nii. Ke lé o tai alieng, ati ne ni apulie, me ni béén mwo li lé tidihi kon ali da. Ke lé o bo é me pihemun, ati ni bele éni pwo bwohemwo. Amen!
81.8 Pii Beetihi 21.6, 22.13E pii wo Padaame Padué pie: «Woéo, ke é Alfa1.8 Alfa—A bécéiuhe atii ha a alphabet he pwo grek; Oméga—Bénebwénen., ke é Oméga †, pa atabuhi kon, ke pa anebwén kon. Woéo ânebun, ke é jenaa, ke é te mu dieli mwo. Woéo pana junihe pwojunuung, ne ko ati ni naado.»
E ali Iésu Kériso ne ha a wâé ten
9Woéo Ioane, pa acéihi bééwé, na nye tai picani, be wonaa mu ko *a bwo âcéi Iésu tenye. Kehe icehi ana nye te cumang ne he ni bwo picani tenye, me nye tai ucéihi a Mwametau ten.
[É ha a benaamwon na e paciheéo wo Padaame] ke he li é mu [he karépu] ne pwo a één Patmos, mu ko a bwo pipatemehi nen dong a pwooti te Padué, me a bwo pajuuju Iésu tong. 10Ke é ha a céiu tan ko pwoiitihi, a tan de Padaame1.10 Tan de Padaame—Ni bécéiuhe acéihi ne ko Iésu, ke lé pii pie, ‘a tan de Padaame’, ke a bwo cihe ko a tan ko pwoiitihi. A bwopiinen naa pie ‘dimanche’, ke âbé mu he latin‘dies dominicus’, ‘a tan de Padaame’., [he é mwo ko pwoiitihi] ke e pééo na a Jenen Iitihi. Ke é téne ne céing a pwocihe na te junihe ubwo, pwohewii ni pwocuu tutu.
11Ke e pii tong pie: «Go tii ne ha a tii ni naado na go alihi. Ke go pawie nge he ni 7 puco te ni acéihi he ni pwomwo ubwo ce: é Éféso, ke Smirne, ke Pergame, ke Tiatire, ke Sarde, ke Filadelfi, ke Laodicé.»
12Ke é biteéo, beme é alihi pie, woo celi e paciheéo, ke é alihi ni 7 mwomiû na mwani megele. 131.13 Daniel 7.13, 10.5Ke é ha awiemelé, ke e cuwo lang wo pa *Nahi Apulie1.13 Pa Nahi Apulie—ai Pana e pwohewii ni apulie.. Ke e cuwohe a epwén na bwali. Ke mwani megele a taihenan1.13 Taihenan—A taihena na cie ni bwaangenye, ne ko pa.. 141.14 Ézékiel 43.2; Daniel 7.9, 10.6; Pii Beetihi 2.18, 14.2, 19.12Ke pwojo ni apunin, pwohewii ni nii na te junihe pwojo1.14 Te junihe pwojo—Pii ehi he pwo grek pie: Pwohewii ni pumii muto na pwojo, ke pwohewii mwo a neige.. Ke lupwo naamiin, ke pwohewii a duwele miû. 15Ke lupwo an, ke pwohewii ni toki megele, na éle ko miû, ke te junihe pwomelaan. Ke te junihe ubwo a patin, pwohewii a éé tabe pwobwaatéép na te junihe ubwo1.15 Pwohewii a éé tabe pwobwaatéép na te junihe ubwo—ai Pwohewii ni jié na te junihe ubwo.. 161.16 Ébéru 4.12; Pii Beetihi 2.12, 19.15Ke e pé ne ha a in pwo jui ni ceni na 7. Ke e wie mu pwon a teua na pipwon waalihi. Ke a pwahamiin, ke pwomelaan, pwohewii a téale, heme te ju goahen ehi.
171.17−18 Ésaïe 44.6, 48.12; Pii Beetihi 2.8, 22.13Ke é tupwo ne ko watihe an, pwohewiin heme é caa mele.
Kehe icehi ana e ne a in pwo jui huîing, ke e pii tong pie: «Go nemwo pwo me mwotiko! Be woéo pa atabuhi kon, ke pa pwonehin. 18Ke woéo Pana é mulip1.18 Pana é mulip—ai Pana é ne a mulip., li é caa mele, kehe icehi ana é caa *mulie dieli mwo, be pwojunuung ne ko a mele. Be é te pé a kilé ko a amu te ni amele. 19Ke go tii ne ha a tii nina go alihi: ni naado jenaa, me ni naado na lé bo tee tuie.
20«Weengi a bwopiinen na e ha aduwo, ne ko ni 7 mwomiû mwani megele, me li 7 ceni, li go alihi ne ha a ing ne pwo jui: Be ili 7 mwomiû, ke 7 puco te ni acéihi, ke ili 7 ceni, ke ni âcélo telé1.20 Ni âcélo telé—Wieli lépwo âcélo, ai wieli lépwo apulie. Âcélo he pwo grek, ke a bwopiinen pie: Pana e pébé a pwooti..»
2tii te ni 7 puco te ni acéihi <α>
(Pwahamii tii: 2―3)
1 <α> Te ni acéihi ne Éféso
12.1 Pii Beetihi 1.16[E pii tong2.1 Tong—Wo Ioane na e tii a tii. wo pa *Nahi Apulie pie]: «Go tii nge céii pa âcélo2.1 Pa âcélo—ai Pa apihuô. Piwien ne ha a niide a tii 8,12,18. Omehi note ko Pii Beetihi 1.20. te ni acéihi ne Éféso pie:
«Weengi a pwooti tong, woéo pana é imwi ne ha a naatiing pwo jui ni 7 ceni; ke é engen ha awieme ni 7 mwomiû mwani megele. 22.2 1 Ioane 4.1É caa temehi ni mulihewé2.2 Mulihewé—Grek: A mulihem. A tii, ke e tii ne te pa apiwéihi puco te ni acéihi, be me de ati ni acéihi na e wéihi., me ni penem dewé me ni bwo picani tewé, be geé te cumang. Ke é caa temehi pie, geé cubwoni ni béén na nimelé me lé pwo nina ta. Be geé caa temehi lépwo agele, na lé pii pie lépwo *apostolo [na é pahedelé ngen]. 3Ke geé cumang ne he ni picani, be wonaa mu kong. Kehe icehi ana time geé uce patupwo a céihi tewé ne kong2.3 2e phrase—Grek: Time uce emaan gewé..
4«Kehe te ju céiu cehi ana geé pwo na ta, ke é cihe me mwoiu ne kowé. Be geé caa patieden ni pwonimewé kong2.4 Pwonimewé kong—ai Ni pwonimewé ko lépwo acéihi bééwé. na e mu kowé ânebun. 52.5 Pii Beetihi 3.3Wâé heme geé niimihi, he celi geé tupwo nelang. Ke geé pininim ke geé bitekewé, me geé mulie mwo he ni bwomu tewé bwolihi [na wâé te Padué]! Be koli é bo âbé mwonukewé, ke é pé kojakewé ni mwomiû tewé.
6«Kehe icehi ana weengi ni bwomu tewé na wâé. Be geé téétihi, pwohewiiéo, ni penem de lépwo Nicolaïte2.6 Lépwo Nicolaïte—Lépwo apwopune na lépwo agele na lé pacémuni lépwo acéihi ne ko Kériso ko ni pwooti na gele. Wieli lé pii pie, e kolé a bwo temehinaado na neduwohi, ke lé niimihi pie a jenenye cehi na a junaado, kehe time uce a éénye, é mulang kuti na wâé heme nye mulie hauli ko a éénye. Wieli lé âcéi pa apulie na a niin pie Nicolaüs..
72.7 Genèse 2.9; Pii Beetihi 22.2,19«Wo paceli pwo ce pwojéénen, ke wâé heme e téne ana e pii na a *Jenen Iitihi te ni acéihi!
«Ke wo lépwona lé piwéden [koja a ta] ke é bo ne telé a mwomwon, me lé wii a acehi a acuwo ko a mulip, na e ha apwoamu te Padué na e he *miiden.»
2 <α> Te ni acéihi ne Smirne
8[Ke e pii tong mwo wo pa Nahi Apulie pie]: «Go tii nge céii pa âcélo te ni acéihi ne Smirne pie:
«Weengi a pwooti tong, woéo na é atabuhi kon, ke é anebwén kon, li é caa mele, ke é caa mulie cemwo. Ke é pii tewé pie:
92.9 2 Korénit 11.14−15; Pii Beetihi 3.9«É caa temehi a bwo mu he ni picani tewé, me a bwo tice dewé. Ke te junihe hiwon ni *adéihi te Padué ne kowé! Ke é caa temehi ni pihota te lépwona lé pii pie lépwo *Juif, kehe time uce lépwo Juif. Be lépwo apulie te *Caatana.
102.10 2 Timoté 4.8; Cang 1.12«Ke é pii tewé pie: O bo pwo ace cuwo benaamwon2.10 Ace cuwo benaamwon—Grek: 10 ni tan, a ine a cuwo benaamwon. celi geé o mu he ni picani, me téé hen. Be wo Caatana, ke e o te ju pwome ne ce béén mu kowé he karépu, beme a bwo tacebwénikewé ati he na 10 ni tan. Kehe icehi ana geé nemwo pwo me mwotikewé. Kehe geé cumang ne he ni céihi tewé, piwien heme e â taunukewé. Be é bo pwo ce ceme ni penem dewé2.10 É bo pwo ce ceme ni penem dewé: a mulie dieli mwo—ai É bo ne tewé a ju mulip, ai É bo ne tewé ce cemewé me geé mulie ha a mulie. Grek: A kuron ko a mulie.: a *mulie dieli mwo.
112.11 Pii Beetihi 20.14, 21.8«Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi!»
«Wo lépwona lé piwéden [koja a ta] ke time uce tatéélé a béalohe mele. [Be lé bo mulie pele Padué dieli mwo]!»
3 <α> Te ni acéihi ne Pergame
12[Ke e pii tong mwo wo pa Nahi Apulie pie]: «Go tii nge céii pa âcélo te ni acéihi ne Pergame pie:
«Weengi a pwooti tong, woéo pana pwo a teua tong, na pipwon waalihi, ke é pii tewé pie:
13«É temehi pie, é he na geé mu lang, ke e pihuô nelang wo Caatana. Kehe icehi ana geé te cumang ne kong. Ke é caa temehi pie, lé pé kojakewé Antipas, pana mwomwon nang, ke e pajuujuéo. Ke lé taunueng, ne ha a pwomwo ubwo tewé, he na e mu lang wo Caatana. Kehe icehi ana time geé uce tahi taabwon a céihi tewé ne kong.
142.14 Nombres 22―24, 25.1−2, 31.16; 2 Pétéru 2.15«Kehe te ju céiu cehi ana pwo a bwopemiko na ta, ke é cihe me mwoiu ne kowé. Be élé pelewé wo lépwo apulie na lé pipwohewii Balaam. Be [pa *péroféta agele ânebun, he li] e picani te pa daame Balak, beme e pipatiedeni a bele *Isaraéla. Be e pwo me lé wii ni *âpwailo na ne te ni *déme duéé. Ke e pwo me lé jéilé ne ko Padué ne ni béén.
15«Ke wonaa ne pelewé jenaa, be pwo ce bééwé celi lé âcehi ni cémun de lépwo Nicolaïte. 162.16 Pii Beetihi 3.11Ke é pii tewé pie, geé pininim, ke geé bitekewé! Be koli é tuie ne kowé. Ke é pwopa ne kolé, ko a teua na e wie mu pwong2.16 A teua na e wie mu pwong—A ocine ko a pwooti te Padaame na juuju. Wo Iésu, ke e bo pé a pwooti ten, beme e tauti lépwo agele na lé pibitehi ni pwooti ten..
172.17 Exode 16.4,14−15,33−34; Ésaïe 62.2; Ioane 6.48−50«Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi!
«Wo lépwona lé piwéden [koja a ta] ke é bo ne telé a wiinaado mu he miiden: a manne na neduwohi2.17 Manne na neduwohi—Wo Padué, ke e pwo me lé wiinaado ne ni Isaraéla na lé mu ha a da, ko a manne. Omehi 2enote ko Ébéru 9.4. Lé niimihi wo lépwo béé Juif pie, wo péroféta Iérémia, ke e neduwohi ce nehi manne, ucéihi a tan na bo pacuwohi a pwodaame te pa Mesia.. Ke é bo ne telé a péi na pwojo, na tii ne kon a nii na mwo coho. Ke time e uce temehi a nii naa wo pace céiu apulie, kehe te icehi pa apulie na e hegi!»
4 <α> Te ni acéihi ne Tiatire
182.18 Pii Beetihi 1.14−15[Ke e pii tong mwo wo pa Nahi Apulie pie]: «Go tii nge céii pa âcélo te ni acéihi ne Tiatire pie:
«Weengi a pwooti tong, woéo pa *Naî Padué, woéo na lupwo naamiing, ke pwohewii a duwele miû. Ke lupwo ang, ke pwohewii ni toki megele, na éle ko miû, ke te junihe pwomelaan. Ke é pii tewé pie:
19«É caa temehi ni mulihewé, me ni penem dewé. Be geé céihi ne kong, ke eânimewé te ni apulie, ke geé picani telé. Ke geé picani ne kowé, ke geé te cumang. Ke é temehi pie, geé te junihe pwo ni penem na hiwon kojan ânebun.
202.20 1 Rois 16.31; 2 Rois 9.22«Kehe te ju céiu cehi ana pwo a bwopemiko na ta, ke é cihe me mwoiu ne kowé. Be [te junihe muhi tong he] time geé uce pacuwo Jézabel2.20 Jézabel—Wieli a ocine ko Jézabel, ne ha a Élele Iitihi Ânebun, he li e pébé a pwoiitihi te Baal. Omehi 1 Rois 16.31−33.. Wo ênaa, ke e pii pie, ê péroféta celi e pébé a pwooti tong. Kehe icehi ana e gele, ke e bite ni apulie tong, me lé pwo nina ta. Be e pwo me lé wii ni âpwailo na ne te ni déme duéé. Ke e pwo me lé jéilé ne ko Padué ne ni béén.
21«E pwohewii ni toomwo pwopwaaden2.21 E pwohewii ni toomwo pwopwaaden—A ocine ko a mulie na time e uce paciiti Padué.. Ke é te junihe ne ten ni benaamwon me e pininim me biteeng. Kehe icehi ana time uce nimen me e pitaatééhi a mulihen, be nimen me e te pwo toomwo pwopwaaden.
22«Ke me wonaa, ke é o tahieng ne pwo apule ko picani, me lépwona piwie ni huô telé na ta, hemepie time lé uce pininim me lé pibitelé koja ni huô naa.
232.23 Psaume 7.10; Jérémie 17.10; Pii Beetihi 20.12−13«Éa, é bo pwo me lé mele ati, wo lépwona lé âcéin2.23 Lépwona lé âcéin—Grek: Ni naîn.. Ke ati ni acéihi, ke lé bo tai temehi pie, woéo pana é temehi ati ni bwo niimihinaado me nina nime ni apulie kon. [Geé pipwocile!] Be é bo muko pétaapwo ne tewé, âcehi ni muko pétaapwo penem dewé.
24«Mepwo é ne ko lépwona lé âcéi Jézabel, ke lé pii pie, lé hane ce cémun celi eda. Kehe lé te ju gele, be lé hane Caatana2.24 1re & 2e phrases—Grek: Lé pii pie, lé temehi nina pieda ne pele Caatana.. Kehe icehi ana time lé uce wonaa wo lépwo béén mu kowé mulang Tiatire. Kehe [a pwooti tong me dewé, ke] time uce ace âneule celi junihe téé. 252.25 Pii Beetihi 3.11Kehe geé imwi mangihi nina etewé2.25 Nina etewé, ke geé imwi mangihi—Ni céihi telé, me ni naado na wâé na lé pwo., die ha ace bwo mwojuia mwo tong.
26-272.26−27 Psaume 2.8−9«Wo lépwona lé piwéden, wo lépwona lé piténedeéo dieli ha a pwonehin, ke é bo ne telé a mwomwon na e ne tong wo Caa tong. Ke lé bo pihuôhi ati ni bele pwo bwohemwo. Ke lé bo taiilé ko a betoki, pwohewii a bwo taii ne ni tam pule. 282.28 Pii Beetihi 22.16Ke é o ne telé mwo a ceni pwopwometan, na e pé da a téale [beme a inenaado ko a bwo piwéden delé].
29«Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi!»
35 <α> Te ni acéihi ne Sarde
13.1 Pii Beetihi 1.4,16[Ke e pii tong mwo wo pa *Nahi Apulie pie]: «Go tii nge céii pa âcélo3.1 Pa âcélo—ai Pa apihuô. Piwien ne ha a niide a tii 7 me 14. Omehi note ko Pii Beetihi 1.20. te ni acéihi ne Sarde, pie:
«Weengi a pwooti tong, woéo na e tidiéo [na a junuu a *Jenen Iitihi, na e pwohewii] ni 7 jenen [ne ha a bwo hején nang]; ke dong mwo ni 7 ceni. Ke é pii tewé pie:
«É caa temehi ni mulihewé, me ni penem dewé. É téne a pwooti kowé, pie geé teko ûmiê, kehe icehi ana geé caa mele. 2Ke é alihi pie, ni huô tewé, ke time uce wâé te Padué Caa tong. É mu ko anaa, na é pii tewé pie: Geé cuwoda! Ke geé pamwoiuhi a cuwo nehinaado na wâé na mwo te e pelewé. Be koli geé bwobe ju mele.
33.3 Mataio 24.43−44; 1 Tésalonik 5.2; Pii Beetihi 2.5, 16.15«Geé pininim, ke geé bitekewé! Ke geé niimihi ni pwooti, na geé caa téne ke hegi. Ke geé piténedehi! Be koli é âbé pwohewii pa abune. Be time geé o uce temehi ace benaamwon celi é o tookewé hen.
43.4 Jude 1.23«Kehe céiu cehi ana pwo ni béén mu kowé, mu Sarde, na time lé uce pwo me tooli ni epwénelé; na wâé tong ni mulihelé. Ke é bo ne telé ni epwén pwojo na mwo wâé. Ke geme bo piengen ibu.
53.5 Exode 32.32−33; Mataio 10.32; Luka 10.2, 12.8«Be lépwona lé piwéden [koja a ta] ke lé o cuwohe ce epwén pwojo celi wonaa, ke time é o uce ciitili ni niilé, mu ha a tii ko ni apulie na lé bo hegi *a ju mulip dieli mwo3.5 Tii ko ni apulie na lé bo hegi a ju mulip dieli mwo—Grek: Tii ko a mulip. Omehi Filipi 4.3.. Ke é bo pipatemehi, ne he pwahamii Caa tong me ni *âcélo ten, pie, ni apulie tong.
6«Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi!»
6 <α> Te ni acéihi ne Filadelfi
73.7 Ésaïe 22.22[Ke e pii tong mwo wo pa Nahi Apulie pie]: «Go tii nge céii pa âcélo te ni acéihi ne Filadelfi pie:
«Weengi a pwooti tong, woéo pana é iitihi, ke é juuju. Woéo pana é pé a kilé ko a pwodaame te *Davita3.7 Pana é pé a kilé ko a pwodaame te Davita—A bwopiinen pie, pana pwo mwomwon den me e pihuôhi a pwomwo he daame ne he nii pa daame. Omehi Ésaïe 22.22. A pwodaame te Davita, ke a pwodaame te pa Mesia.. Woéo pana é tehi3.7 Woéo pana é tehi… A bwopiinen pie, e pihuô ne ko ati ni naado wo Kériso, ke e te pacuwohi ana nimen kon. Te tice aceli jan me e cubwonieng., ke o te tice paceli jan ne kon me e capuhi; ke me é capuhi, ke o te tice paceli jan ne kon me e tehi. Ke é pii tewé pie:
83.8 1 Korénit 16.9«É caa temehi ni mulihewé, me ni penem dewé. Te junihe tice niihewé, me junuuwé, kehe icehi ana geé te piténedehi ni pwooti tong. Ke time geé uce téétihi a niing. Geé téne, be é caa ne he pwahamiiwé a pwaaden, ke te tice paceli me e capuhi.
93.9 Ésaïe 45.14, 49.23, 60.14; Pii Beetihi 2.9«Pwo ni béén mu pelewé, na lé pii pie, lépwo *Juif. Kehe icehi ana time uce lépwo Juif, be lépwo apulie te *Caatana. Ke é bo pwo me lé tidihi jililé he pwahamiiwé. Ke lé o te temehi pie te junihe eânimung dewé.
103.10 Luka 21.19; 2 Timoté 2.12«Be geé te piténedehi ni pwooti tong, beme geé cumang! Ke é mu ko anaa, ke é bo wéikewé, he ni tan ko téé me picani. He ni tan naa, ke o tacebwéni ati ni apulie pwo bwohemwo.
11«Kehe icehi ana geé te ûmiê! [Be koli é bo patéetikewé.] Kehe geé imwi mangihi ni wâé [na e he ni pwonimewé]. Be koli bo pé kojakewé ni cemewé.
123.12 Ésaïe 62.2, 65.15; Pii Beetihi 14.1, 21.2«Wo lépwona lé piwéden [koja a ta] ke é bo pwo me lé amwo ha a *mwaiitihi te Padué Caa tong. Ke lé o te mu lang dieli mwo. Ke é bo tii ne kolé a nii Padué Caa tong, ke a nii a pwomwo ubwo te Padué Caa tong: a *Iérusaléma na mwo coho, na e opé mu he miiden, pele Padué. Ke é bo tii mwo, ne kolé, a niing na mwo coho.
13«Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi!»
7 <α> Te ni acéihi ne Laodicé
14[Ke e pii tong mwo wo pa Nahi Apulie pie]: «Go tii nge céii pa âcélo te ni acéihi ne Laodicé pie:
«Weengi a pwooti tong, woéo pana pii kong pie ‘Amen, ke Wâé heme wonaa’. Woéo kuti na é pii beeti Padué ha a juuju. Ke woéo pa atabuhi ko ati ni naado na e pwo wo Padué. Ke é pii tewé pie:
15-163.15 Roma 12.11«É caa temehi ni mulihewé, me ni penem dewé. [Time geé uce pipwoeabwé tong, ati he ni pwonimewé.] Kehe te ju cuniê gewé. Ke geé pipwocile, be koli é bo unyehikewé!
173.17 Luka 12.21; 1 Korénit 4.8«Geé pipii dewé pie, te junihe hiwon ni naamuuwé me ni mwani tewé, ke te tice ace céiu naado celi tieden kojakewé.
«Kehe icehi ana tice tewé, be time geé uce alihi temehi pie, te junihe pwoééhewé! Be te ju tice ace cuwo naamuuwé, ke bwi gewé, ke tice mwaanu kowé!
183.18 Ésaïe 55.1; Pii Beetihi 4.4«Ke é pii tewé pie: Wâé heme geé pwocuhin, kojaéo, ni mwani megele na cini ne pwo miû, na te junihe pwomelaan, ke te tice alili hen, ke ubwo a cuhin. Ke o pwo naamuuwé, ne he pwahamii Padué. Ke geé pwocuhi ce epwén celi te junihe pwojo, me geé cuwohen. Be me wonaa, ke o time bo uce tanim gewé ko a bwo tice mwaanu kowé. Ke geé pwocuhin kojaéo, ce etihe naamiiwé, beme geé o niê ehi.
193.19 1 Korénit 11.32; Ébéru 12.6; Pii Beetihi 2.5«É ne pune ke é pwocuhinaado te lépwo apulie na te junihe eânimung delé. Ke é mu ko anaa, ke geé ûmiê, ke geé pininim, ke geé bitekewé. Ke geé taatééhi ni mulihewé!
203.20 Ioane 14.23«Be é cuwo he pomwa, ke é cii. Ke mepie e téne a pating wo pace céiu apulie, ke me e tehi ne tong, ke é o taa céiieng, me gemu piwiinaado ibu!
21«Wo lépwona lé piwéden [koja a ta] ke é bo pwo me lé tebwo pwohewiiéo, ne pwo a atebwo tong. Be é caa piwéden, ke gemu caa tebwo pwo a atebwo he daame me Caa tong. 22Wo paceli pwo ce pwojéénen, ke wâé heme e téne ana e pii na a Jenen Iitihi te ni acéihi.»
4Lé pipaunu Padué ne he miiden
14.1 Pii Beetihi 1.1,10É ne alecehe ni naado naa, ke é alihi mwo a céiu naado. É alihi ne jeda he miiden a pomwa na tehi. Ke é téne mwo ali pwocihe, li pwohewii a pati tutu. Ke e pii tong pie: «Go taabé éni, beme é habwii tem ni naado na o te ju téele tuie.»
24.2 Ésaïe 6.1Ke e ole kong a *Jenen Iitihi, ke é alihi a atebwo jeda he miiden, ke é ali Padaame he e ko tebwo pwon. 34.3 Ézékiel 1.28Ke te junihe wâé nang, ne ha a wâé ten, be pwodaadiin, pwohewii ni péi na pun bupwi ke megele, na te junihe ubwo a cuhin4.3 Péi na pun bupwi ke megele—Péi ‘jaspe’ me ‘sardoine’.. Ke e aujenihi a atebwo na a aduwoho, na pwomelaan pwohewii a péi émeraude.
Lépwo 24 ukéiu
44.4 Pii Beetihi 3.18Aujenihi a atebwo he daame, ke é alihi ni béé atebwo na 24; na lé ko tebwo pwon wo lépwo ukéiu na 24 jélé, na lé cuwohe ni epwén na pwojo, ke lé pwobo he ni kuron na mwani megele. 54.5 Ézékiel 1.13; Zakari 4.2; Pii Beetihi 1.4, 8.5, 11.19, 16.18Ni ilehi, ke a huu he a tikekele, ke lé wie mu ko ali atebwo. Ke é ânebuhe a atebwo naa, ke 7 ni mwomiû na tole. Ke weengaa [ni inenaado ko] a Jenen Iitihi te Padué. 64.6 Ézékiel 1.5−10,22, 10.14Ke é alihi ne mwo lang, a jié, na te junihe bwakenu.
Lépwo âcélo na paa jélé
É ha awiemen, ke é aujenihi a atebwo he daame, ke lé cuwo lang wo lépwo âcélo na paa jélé4.6 Lépwo âcélo na paa jélé—Grek: Êtres vivants. Pwocoon me nye pii pie, pwohewii ace de. Wieli te pipwohewii ni wota, ai ni apulie, ai ni âcélo, ai ni jenen., na lé pwohewii ni wota, na hiwon ni naamiilé ânebun ke é alecehelé. 7Pa bécéiuhen, ke pwohewii ni liô†; pa béalohen, ke pwohewii ni nahi paaci; pa béciéhen, ke e pé ana pwohewii ni pwahamii apulie; pa bépaahen, ke pwohewii a bwaaoléé4.7 Liô—Lion; Bwaaoléé—Aigle. heme e téé. 84.8 Ésaïe 6.2,3; Ézékiel 1.18, 10.12Muko pétaapwo pi 6 telé ni puuilé. Ke pwo ni naamiilé ati, pwo ni puuilé, ke é haahi ni puuilé. Ke bwén, ke pwang, ke lé tee pwonyebi, ke lé pii pie:
«E iitihi! E iitihi!
E iitihi wo Padaame,
be weeng Padué.
Te junihe pwo niihen
ne ko ati ni naado.
Be weeng jenaa,
ke weeng ânebun,
ke e te mu dieli mwo!»
9Lé pwonyebi beme lé pipwoun, me pipwo-olé te pana e ko tebwo pwo a atebwo he daame, pana e *mulie dieli mwo. 104.10 Pii Beetihi 7.10,15, 19.4Ke ati he ni benaamwon na lé pipwoun den hen, ke lé tidihi jililé he pwahamiin wo lépwoli 24 ukéiu. Ke lé pipaunu pana e mulie dieli mwo. Ke lé tahi ni kuron delé ne he pwahamiin, ke lé pii ten pie:
11«Wogo Padaame, Padué heme,
ke wogo pana jan me pipaunuko
ne ha *a wâé tem,
me a junuum.
Wogo pana go tabuhi
ati ni naado.
Wogo na go pacuwohi
ana te nimem kon!»
57 apinyihi ko tii <β>
(Pwahamii tii: Pii Beetihi 5―7; Pii Beetihi 8.1−5)
E tehi a tii wo pa Nahi Muto
15.1 Ésaïe 29.11; Ézékiel 2.9−10É alihi a tii na capuhi, na e pé ne ha a in ne pwo juin wo pana e ko tebwo pwo a atebwo he daame. Pwo a atii he ni piduaa a tii naa. Ke pwo ni apinyihi kon na 75.1 Ni apinyihi kon na 7—Pwomangihi ehi ko duhi bougie (cire de bougie). Ke wo pa apwotii, ke e pwo ni inen ko a bougie..2Ke é ali pa céiu *âcélo na te junihe pwojunuun, ke e toii da pie: «Woo celi jan ne kon me e tuwo ni apinyihi, ke me e pale a tii ce?»
3Kehe icehi ana te tice pace apulie celi jan ne kon me e tuwo, ke me e pale ali tii, me e alihi. Te tice jeda he miiden, ke éni pwo bwohemwo, ke é haahi a bwohemwo. 4Ke é te junihe é kuti, ko ana te tice pace céiu apulie celi jan ne kon me e tuwo.
55.5 Genèse 49.9; Ésaïe 11.1,10; Pii Beetihi 22.16Ke e pii tong wo pa céiu béé lépwoli ukéiu pie: «Go nemwo é! Be te pwo pa céiu apulie na jan ne kon me e tuwo ni apinyihi na 7 naa, ke me e pale a tii. Be wo [pana lé pii kon pie] pa Liô mu ha a pwomwoiu *Juda, pa apulie mu ha a pwomwoiu te pa daame *Davita, ke e caa piwéden, ke e bo tuwo ni 7 apinyihi naa, me e tehi a tii.»
Jan ne ko pa Nahi Muto
65.6 Zakari 4.10; Ioane 1.36; Pii Beetihi 13.8Ke nebwén, ke é ali pa *Nahi Muto, na e ko cuwo ânebuhe a atebwo te Padaame, ha awieme ni âcélo na paa jélé, na lé pwohewii ni wota, me lépwoli ukéiu. Ke pwohewiin heme taunueng me *pwoâpwailo kon. Ke 7 ni gi ten, ke 7 ni naamiin. Ni naamiin, ke a *Jenen Iitihi5.6 Jenen Iitihi—Grek: 7 jenen. Omehi 2enote ko 1.4. [na pwohewii ni 7 jenen ne ha a bwo hején nang] na e neeng opé wo Padué ne pwo a bwohemwo ati.
7Ke e âbé wo pali Nahi Muto, ke e pé ali tii mu ha a in ne pwo jui pali e tebwo pwo ali atebwo he daame. 85.8 Psaume 141.2; Pii Beetihi 8.3−4Ke lé tai miibule, ke tidihi jililé he pwahamiin wo lépwoli âcélo li paa jélé, me lépwoli 24 ukéiu, ke lé pipaunueng. Ke te pipétaa lépwoli 24 ukéiu ni gitar5.8 Gitar—Grek: Cithare, Lyre, Harpe. telé, me ni mwotabe mwani megele, na oba ko tabe ûde. Be anaa, ke ni pwopwoiitihi te ni apulie te Padué. 95.9 Psaume 33.3, 40.4, 96.1, 98.1Ke lé pwo a céiu nyebi na mwo coho, ke lé pii pie:
«Wogo na jan ne kom
me go pé a tii,
me go tuwo ni apinyihi kon.
Be caa wogo pa âpwailo,
ke lé taunuko.
Tée a cewéhem me de ni apulie:
ati he ni pwomwoiu,
me ati he ni pati apulie
mu he ni amu ati,
me ati ni bele.
Ke go pwo me lé bele te Padué.
105.10 Exode 19.6; Ésaïe 61.6; Pii Beetihi 1.6, 20.6Ke go pwo me lé nahi
a Mwametau ten,
ke me lé pipwoeabwé ten.
Lé bo pihuôhi ni apulie
pwo bwohemwo!»
115.11 Daniel 7.10; Ébéru 12.22Ke é alecehen, ke é alihi, ke é téne ni âcélo, na te junihe hiwon jélé, na pwocoon me nye pinelé, na lé tai cuwo aujenihi a atebwo he daame: Lé cuwo ânebun ne ni âcélo na paa jélé, ke lé cuwo lang wo lépwoli ukéiu, ke lé panebwénihi ne ni âcélo naa. 12Ke lé te junihe toii da wo lépwo âcélo, na lé pwonyebi pie:
«Pipaunu pa Nahi Muto,
pali lé taunueng!
Be eten ni pipwojunuun,
me ni wâé ten,
me a temehinaado ten.
Pwo niihen ko a wâé ten.
Jan me pietieng da!»
13Ke é téne ni pwocihe te ati ni naado na e pwo wo Padué ne jeda he miiden, ke éni pwo bwohemwo, ke é he jié, ke é haahi a bwohemwo. Ke lé tai pwonyebi, me pii pie:
«Me nye pipaunu
pana e tebwo pwo a atebwo,
me pa Nahi Muto!
Nye pipwoun delu dieli mwo!
Pwo *a wâé telu,
me a niihelu dieli mwo!»
14Ke lé pii wo lépwoli âcélo li paa jélé pie: «Amen! Wâé heme wonaa!» Ke lé tai miibule ke tidihi jililé wo lépwoli 24 ukéiu, ke lé pipaunulu.
6Tuwo li 7 apinyihi ko tii
1 <β> Pa atebwo pwo a haricaan pwojo
16.1 Pii Beetihi 4.6, 5.1É alecehen, ke é ali pali *Nahi Muto, he e tabuhi tuwo a bécéiuhe apinyihi ko ali tii. Ke é téne pa céiu béé lépwoli âcélo li paa jélé, li lé pwohewii ni wota, he e cihe ha a patin na te junihe pwo niihen, ke e pii pie: «Go âbé!» 26.2−5 Zakari 1.8, 6.1−6Ke e tehenebé wo pana e tebwo pwo a haricaan pwojo6.2 Haricaan pwojo—A inenaado ko a bwo piwéden., na e pé a mwonyigé. E hegi a cemen, be e caa piwéden, ke e engemwo beme e piwéden mwo.
2 <β> A pa
3Ke e tuwo mwo ali béalohe apinyihi ko tii wo pali Nahi Muto. Ke é ha a benaamwon naa, ke é téne pa béalohe âcélo, he e toii pie: «Go âbé!» 4Ke e tehenebé wo pa haricaan na megele nang6.4 Haricaan na megele nang—A inenaado ko a pa me a bwo taunu ni apulie. pwohewii a duwele miû. Ke wo pana e tebwo pwon, ke ne ten a teua na te junihe ubwo. Ke pwo mwomwon den me e pétaabwon a péém, mu éni pwo bwohemwo, beme lé pitaunulé wo lépwo apulie.
3 <β> A menele
5É alecehen, ke e tuwo a béciéhe apinyihi ko tii wo pali Nahi Muto. Ke é ha a benaamwon naa, ke é téne pa béciéhe âcélo, he e toii pie: «Go âbé!» Ke e tuiebé pa haricaan na bwiile nang6.5 Haricaan na bwiile nang—A inenaado ko a menele me a mele na e pébé.. Ke e pé a béja6.5 Béja—Balance pour mesurer le poids. wo pana e tebwo pwon. 6Ke é téne a céiu pwocihe mu ha awieme lépwoli âcélo li paa jélé. Ke e pii pie: «Céiu a béja ko blé ha a tan ko penem, ke cié ni béja ko orge ha a tan ko penem. Kehe go nemwo pwotahi a géréén, me a tabe megele6.6 Go nemwo pwotahi a géréén, me a tabe megele—ai Go nemwo pwotahi ni acuwo olivier me ni ni tabe megele.!»
4 <β> Mele
7Ke e tuwo a bépaahe apinyihi ko ali tii wo pali Nahi Muto. Ke é ha a benaamwon naa, ke é téne pa bépaahe li âcélo, he e toii pie: «Go âbé!» 86.8 Jérémie 15.1−3; Ézékiel 5.12,17, 14.21Ke é alihi a haricaan na pwiu. Ke wo pana e tebwo pwon, ke a niin pie ‘Mele’. Ke pwo pa céiu na e âcéin, na a niin pie ‘Amu te lépwo Amele’. Ke ne telu a mwomwon, me lu pihuô ne ha a céiu duaan, mu ko ni duaan na paa, mu ko ni apulie pwo bwohemwo. Ke lu ne a pa me a menele, me ni wota apiaba pwo bwohemwo, me ati nina e pébé a mele.
5 <β> Lépwona taunulé
9Ke é alecehen, ke e tuwo a bénim he ni apinyihi wo pali Nahi Muto. Ke é ha a benaamwon naa, ke é alihi, ne haahi *apwoâpwailo6.9 Apwoâpwailo—Autel. Omehi mwo Âpwailo ne ha a Niinaado (Vocabulaire) ha anebwén ko a tii. Wieli a inenaado ko a âpipati na lé ne te Padué ne ni apulie ten, na lé patupwo ne ten ni mulihelé. Omehi Filipi 2.17; 2 Timoté 4.6., ni jene ni apulie na taunulé watihen a pwooti te Padué, ke woélé mwo lépwo apajuujueng.
10Ke lé toii da pie: «Padaame wé! Wogo na te junihe pwojunuum ke go iitihi ke go juuju, ke go bo tauti ni apulie pwo bwohemwo, ke go bo pwocuhinaado telé, be lé taunukeme. Ke kona go o mwo te jame uca?»
116.11 Pii Beetihi 7.9,13, 19.14Ke muko pétaapwo ne telé ni epwén pwojo. Ke e pii telé pie: «Geé mwo te ju pwome mwaale, ucéihi ace bwo âbé te ati ni bééwé: [ni eabwé te Iésu] na o taunulé pwohewiikewé. Be mwo time lé uce tuie ati.»
6 <β> Penem ati ni naado
126.12 Mataio 24.29; Apostolo 2.20; Pii Beetihi 8.12, 11.13, 16.18Ke é ali mwo pali Nahi Muto, he e tuwo a bé6 he apinyihi ko ali tii. Ke é ha a benaamwon naa, ke e te tuie kuti a penem bwohemwo na te junihe ubwo. Ke a téale, ke bwiile pwohewii a epwén he doole mele. Ke a wole, ke megele pwohewii a cewéle. 136.13 Ésaïe 34.4Ke lé tai tupwo ne pwo bwohemwo ne ni ceni, pwohewii ni ace majing wamin heme patupwohi na a udan. 146.14 Pii Beetihi 16.20Ke te pieadi ngen a miiden, pwohewii a talihi6.14 Talihi—Grek: Livre, Rouleau. heme nye capipihi. Ke ati ni juwole me ni één, ke péélé mu he ni amu telé.
156.15 Ésaïe 2.10,19,21Ke lé tai cela wo lépwo daame pwo bwohemwo, me lépwo apulie na piubwo jélé, me lépwo caa te coda, me lépwo apulie na pwo naamuulé, me lépwo apulie na pwo niihelé, me ati lépwo *apenem tice ja kon me ati lépwo béén mwo. Ke lé â taduwo he ni péi, ke é he ni mwa péi ne pwo juwole.
166.16 Luka 23.30; Osé 10.8Ke lé pii te ni juwole, me ni péi pie: «Geé tupwo ne huîime! Geé neduwokeme ité koja pana e ko tebwo pwo a atebwo he daame! Geé neduwokeme ité koja a okéé te pa Nahi Muto!
176.17 Joël 2.11; Malachie 3.2«Be e tuie a tan na ubwo ko a okéé telu. Ke woo paceli e o mwo mulie?»
7A bele te Padué
17.1 Jérémie 49.36; Daniel 7.2Ke é alecehen, ke é ali ni béé âcélo na paa jélé, na lé ko cuwo he ni uhin ko a bwohemwo, ke lé imwi ni dan na paa na te junihe ubwo ne pwo a bwohemwo. Ke wonaa, beme te tice dan celi me e cuu a bwohemwo, ke a jié, me ni acuwo.
2É ali mwo pa céiu âcélo he e ko taa ha a duaan na e taa tuie hen a téale, he e ko pé ana me e ne me a ine† Padué na e mulip7.2 Ine—Sceau; Padué na e mulip—A bwopiinen mwo pie: Padué na e ne a mulip..
Ke e toii da me ubwo te lépwo béé âcélo na paa jélé, na ne telé ni pipwojunuun, me lé pwotahi a bwohemwo me a jié. Ke e pii telé pie: 37.3 Ézékiel 9.4,6; Pii Beetihi 9.4«Geé mwo neme cuwo! Geé nemwo téele pwotahi a bwohemwo, me a jié, me ni acuwo! Be geme o mwo mi ne ânebun a inen ne pwo bwaade lépwo eabwé te Padué henye.»
47.4 Pii Beetihi 14.1,3Ke é téne a jéhi lépwona lé hegi a ine Padué. Be lépwo 1440007.4 144000—A inenaado ko a bwo hején jélé ati ni apulie te Padué (12 x 12 x 1000). Omehi note ko Pii Beetihi 21.16. ni apulie, mu ha ati ni pwomwoiu te a bele *Isaraéla:
512000 mu ha a pwomwoiu te *Juda,
12000 mu ha a pwomwoiu te Ruben,
12000 mu ha a pwomwoiu te Gad,
612000 mu ha a pwomwoiu te Asser,
12000 mu ha a pwomwoiu te Neftali,
12000 mu ha a pwomwoiu te Manassé,
712000 mu ha a pwomwoiu te Siméon,
12000 mu ha a pwomwoiu te Lévi,
12000 mu ha a pwomwoiu te Issakar,
812000 mu ha a pwomwoiu te Zabulon,
12000 mu ha a pwomwoiu te Josef,
12000 mu ha a pwomwoiu te *Benjamin.
Tai woélé, ke lé tai hegi a ine Padué.
Lé pipaunu Padué ne ni apulie na te junihe hiwon jélé
9É alecehe ninaa, ke é omehi mwo, ke é ali ni apulie na te junihe hiwon jélé, na time uce jan me nye pinelé. Be lé âbé mu ati he ni bele, me ni pwomwoiu, me ni amu, me ni pati apulie pwo bwohemwo. Ke lé tai cuwo ânebuhe a atebwo te Padaame, me pali *Nahi Muto. Ke lé tai cuwohe ni epwén pwojo, ke lé tai pé ne he ilé, ni madi alica.
107.10 Pii Beetihi 4.10Ke lé tai toii da pie: «Geu caa celuimikeme, wogo Padaame Padué heme, na go tebwo pwo a atebwo tem, ke wogo pa Nahi Muto!»
11Ke lé tai cuwo aujenihi a atebwo naa: Ke é aujeni lépwo ukéiu, ke wo lépwoli âcélo li paa jélé, li lé pwohewii ni wota. Ke lé tai miibule, me tidihi jililé ânebuhe a atebwo he daame, ke lé pipwoun de Padué. 127.12 Pii Beetihi 5.12Ke lé pii pie:
«Amen! Wâé heme wonaa!
Pipaunu Padué henye!
Olé me ubwo ten!
Be eten ni pipwojunuun,
ke a bwo temehi nen den,
ke a niihen, me a wâé ten!
Jan me pietieng da!
Wâé heme wonaa! Amen!»
Lé âbé mu he ni picani me ni téé
13Nebwén, ke e [biteeng ne kong] wo pa céiu ukéiu, ke e tahimwoéo pie: «He woélé ni apulie na lé ko cuwohe ni epwén pwojo, ke lé âbé mu wé?»
147.14 Daniel 12.1; Mataio 24.21Ke é hegi ne ten pie: «Pa daame, te wogo pana go temehi.»
Ke e pii tong pie: «Woélé, ke lépwona lé âbé mu he ni picani me ni téé na junihe ubwo. Lé caa puu ni epwénelé ne ha a cewéhe pa Nahi Muto7.14 Lé caa puu ni epwénelé ne ha a cewéhe pa Nahi Muto—A ocine ko Iésu Kériso, he e pwo me wâé ni pwonimelé ne he pwahamii Padué, he e mele me delé ne ko a kuricé., ke ni epwénelé, ke caa pwojo.
15«Lé cuwo he pwahamii Padué,
na e tebwo pwo a atebwo ten.
Ke lé pipwoeabwé
heme bwén ke pwang,
ne ha a *mwaiitihi ten.
Ke e bo wéilé wo pana e tebwo
pwo a atebwo he daame.
167.16 Ésaïe 49.10Ke o caa time uce menelé,
ke o caa time uce nimelé
me lé ûdu;
ke o caa time uce éle jélé
ko a téale, me a éle.
177.17 Psaume 23.2; Ésaïe 25.8; Pii Beetihi 21.4Éa, be bo pa awéihi muto telé
wo pa Nahi Muto na e mwonuhi
a atebwo he daame.
E bo péélé nge ha acaamatabe,
a tabe na e ne a mulip.
Ke wo Padué, ke e bo tahi
ati ni tabehaamiilé.»
8Tuwo a bénebwéne apinyihi ko ali tii
7 <β> Pwopweehi ni tutu
1E tuwo ali bé7 he apinyihi ko ali tii wo pali *Nahi Muto. Ke é ha a benaamwon naa, ke te ju tice pwocihe jeda he miiden he na céiu bebehi inetéale. 2Ke é ali ni *âcélo na 7 jélé na lé ko cuwo he pwahamii Padué. Ke muko pétaapwo ne telé ni tutu.
38.3 Exode 30.1−3; Pii Beetihi 5.8Ke e âbé cuwo mwonuhi a *apwoâpwailo wo pa céiu âcélo, ke e pé a mwocini tabe ûde na mwani megele, ke e hegi ni tabe ûde na te junihe hiwon. Ke e patihi ne pehi ni pwopwoiitihi te ati ni apulie te Padué, ne pwo a apwoâpwailo mwani megele na e ânebuhe a atebwo he daame. 4É mu ha a naatii pali âcélo, ke e taa he pwahamii Padué a muu tabe ûde ne pehi ni pwopwoiitihi te ati ni apulie ten.
58.5 Exode 19.16−19; Lévitique 16.12; Pii Beetihi 11.19, 16.18Ke e pé ali mwocini tabe ûde wo pali âcélo, ke e paobaahi ko a miû ko ali apwoâpwailo, ke e tahi ole pwo bwohemwo. Ke pwo ni pwocihe8.5 Pwocihe—Ai, Tihinaado., ke te ilehi kuti, ke e huu wo tikekele, ke penem a bwohemwo.
7 âcélo ke 7 tutu <γ>
(Pwahamii tii: 8.6―11.18)
6Lé pipwopweelé wo lépwoli 7 âcélo, beme lé cuu li tutu telé.
1 <γ> Cini a céiu duaa bwohemwo
78.7 Exode 9.23−26; Ézékiel 38.22; Joël 3.3E cuu a tutu ten wo pa bécéiuhen, ke lé te tupwo kuti, ne pwo bwohemwo, ni aceute na te junihe ubwo ke te junihe bwala8.7 Ni aceute na te junihe ubwo ke te junihe bwala—Grêle., ke a miû na pwo cewéle hen. Ke e cini taabwon a céiu duaan8.7 A céiu duaan—Grek: A céiu duaan mu ko ni duaan na cié. Piwien ne he ni niide a tii 8−12. mu ko a bwohemwo, ke a céiu duaan mu ko ni acuwo, me ni meté na e mu pwon.
2 <γ> Megele a céiu duaa jié
8E cuu a tutu ten wo pa béalohe âcélo, ke e te tupwo kuti ne he jié a miû, na pwohewii a juwole na te junihe ubwo. Ke cewéle a céiu duaan mu ko a jié. 9Ke lé mele a céiu duaan mu ko nina lé mulie ne he jié, ke tanahi a céiu duaan mu ko ni ong.
3 <γ> Maga a céiu duaa éémwa
10E cuu a tutu ten wo pa béciéhe âcélo. Ke e te tupwo kuti a ceni na te junihe ubwo, ke e pwéélang ngen pwohewii ni ei, ke e tupwo ne pwo a céiu duaan mu ko ni éémwa, me ni acaamatabe. 118.11 Jérémie 9.14A nii a ceni naa pie ‘Muceni’. Ke a céiu duaan mu ko a tabe, ke mucenihi. Ke te junihe hiwon ni apulie na lé mele kon.
4 <γ> Bwiile a céiu duaa téale me a wole
128.12 Ézékiel 32.7; Pii Beetihi 6.12−13E cuu a tutu ten wo pa bépaahe âcélo. Ke tanahi a céiu duaan mu ko a téale, ke a wole, ke ni ceni. Ke bwiile ni duaan na tanahi: Ke patieden a céiu duaan mu ko a pwéélang he a tan, ke a bwén mwo.
138.13 Pii Beetihi 9.12, 11.14Ke é niê daamwo, ke é alihi a bwaaoléé na e ko téé ko miiden, ke é téneeng he ko toii da pie: «Pwoééhe! Pwoééhe! Pwoééhe ni apulie pwo bwohemwo, heme lé bo cuu ni tutu telé wo lépwo béé âcélo na cié jélé!»
9A bénim he ni tutu
5 <γ> Koléé na pwo dan
19.1 Pii Beetihi 20.1E cuu a tutu ten wo pa bénim he ni *âcélo. Ke é alihi a ceni na e caa tupwo ne pwo bwohemwo mu he miiden. Ke e hegi a kilé, ko a pwon na te tice anebwén kon9.1 Pwon na te tice anebwén kon—Karépu te ni duéé me ni jenen na ta, âcehi a bwo niimihi nen de lépwo Juif (omehi Luka 8.1); ai a amu te lépwo amele (omehi Roma 10.7 me a note)., é lang he na lé pwocuhinaado nelang ne ni iténaado. 29.2−3 Genèse 19.28; Exode 10.12−15; Joël 2.2,10E tehi ali pwon na tice anebwén kon na ali ceni, ke e taawie a muun, na pwohewii ni muu miû na te junihe ubwo. Ke piing a téale, me a amu, wonaa mu ko a muu ali pwon.
3Ke lé wie mu ha ali muu miû ne ni koléé, ke lé talui a bwohemwo. Lé hegi ni pipwojunuun, na piwien me ni scorpion pwo bwohemwo, heme lé wolikenye. 49.4 Pii Beetihi 7.3Kehe icehi ana paciitihi kolé me lé nemwo pwotahi ni meté, ke ni naado na cemi, me ni acuwo. Kehe te ju pwo mwomwon delé cehi me lé pwotahi ne ko ni apulie na tice ine Padué pwo bwaadelé. 5Te tice mwomwon delé me lé taunulé, kehe me lé te junihe pwo me lé picani he na nim ni wole, pwohewii a bwo cunu ne ni awoli he ni scorpion.
69.6 Job 3.21; Jérémie 8.3É ha a benaamwon naa, ke ni apulie, ke lé o hane a mele, kehe icehi ana time lé o bo uce tooli mwo. Ke o nimelé me lé mele, kehe a mele, ke e caa ecelé.
Ni duéé na lé wie mu ha ali pwon
79.7 Joël 2.4Ni koléé, ke lé pwohewii ni haricaan na lé piwâamihi ne ko pa. Ke pwo ni boolé, na pwohewii ni kuron na mwani megele. Ke ni pwahamiilé, ke pwohewii ni pwahamii apulie. 89.8 Joël 1.6Ke ni apunilé, ke bwali pwohewii ni apuni ni toomwo. Ke ni pecuwolé, ke pwohewii ni pecuwo liô. 99.9 Joël 2.5Pwohewiin heme lé cuwohe ce epwén toki. Ke a tihi ni puuilé, ke pwohewii a tihi ni otuun na lé céi ne ni haricaan na hiwon jélé, na lé téte ne ko pa. 10Ke pwo ni tubwolé, na pwohewii ni tubwo scorpion, ke don ni utehen. É ko ni tubwolé, ke jan me lé pwotahi ne ko ni apulie he na nim ni wole.
11Pa daame he ni koléé, ke pa âcélo he ali pwon li tice anebwén kon. É he pwo *ébéru, ke a niin pie Abadon9.11 Abadon—A bwopiinen mwo pie: a Amu te lépwo Amele. Omehi Job 26.6; 28.22; Psaume 88.11b; Proverbes 15.11., ke é he pwo *grek, ke a niin pie Apolion, a bwopiinen pie ‘pa ataunuhi apulie’.
12E caa âdé a bécéiuhe apwohi9.12 Apwohi—Malheur, plaie, fléau.. Ke é alecehe anaa, ke o alo lupwo apwohi na lu o mwo âmwobé.
A bé6 he tutu
6 <γ> A pa na te junihe ubwo
13E cuu a tutu ten pa bé6 he âcélo. Ke é téne a pwocihe na e âbé mu he ni uhi a *apwoâpwailo mwani megele na e mu he pwahamii Padué. 14A pwocihe, ke e pii te pa bé6 he âcélo, na e cuwo imi a tutu pie: «Go pawie lépwo âcélo na paa jélé9.14 Lépwo âcélo na paa jélé—Wieli lépwoce âcélo celi ta jélé. Time uce lépwo âcélo na paa jélé ne ha a niide a tii 7.1. Ke time uce lépwo âcélo na paa jélé na lé pwohewii ni wota., na cielé ne mwonuhi a éémwa ubwo Eufrate.»
159.15 Pii Beetihi 8.7−12Ke e pawie lépwoli âcélo li paa jélé, li lé caa piwâamilé ne ko a inetéale, ke a tan, ke a wole, ke a jo na me lé taunuhi a céiu duaan9.15,18 A céiu duaan—Grek: A céiu duaan mu ko ni duaan na cié. mu ko ni apulie pwo bwohemwo.
16Lé pii tong a jéhi ni coda na lé tebwo pwo haricaan pie, 200 million. 17Te wonaa mwo a bwo alilé tong: Pwo ni epwén toki pwo bwaangelé, na hiwon ni apunen, ke megele pwohewii ni miû, ke pun bwiile pwohewii ni péi na pwomelaan, ke nyen pwohewii a dep na éle9.17 Dep na éle—Soufre.. Ke ni puni ni haricaan, ke pwohewii ni puni ni liô. Ke lé puutihi ni miû, ke ni muu miû, ke ni dep na éle.
18A miû, ke a muu miû, ke a dep na éle, na lé wie mu pwo ni haricaan, ke ni cié apwohi na ubwo. Ke lé taunuhi a céiu duaan mu ko ni apulie pwo bwohemwo. 19Be a junuu ni haricaan, ke e mu pwolé, ke é ko ni tubwolé. Ni tubwolé, ke pwohewii ni bwien; pwo ni punilé beme lé pwotahi ne ko ni apulie.
Time lé uce bitelé ne ni apulie
209.20 Psaume 115.4−7, 135.15−17; Daniel 5.23; Pii Beetihi 16.9,11Te junihe ubwo ni apwohi naa, kehe time lé uce taatééhi ni mulihelé ne ni apulie na lé mu. Be lé mwo te cuwo ko pwoeabwé te ni duéé me ni démenaado9.20 Démenaado—Idole. na time lé uce niê, ke time lé uce téne, ke time lé uce engen. Be nina lé te pwo, woélé, ko ni mwani megele, me ni mwani pwojo, ke ni toki na te junihe mwoiu, ke ni péi, me ni ba-acuwo. 21Ke lé mwo te cuwo ko pitaunulé, ke lé pwodooki, ke lé pipule hauli, ke lé bune.
10Pa âcélo me a cuwo nahi tii
1É ali pa céiu *âcélo na pwojunuun, na e opé mu he miiden. Ke pwo a nii na e tawiieng, beme a epwénen. Ke e mu pwo punin aduwoho, beme a boon. Ke a pwahamiin, ke pwomelaan pwohewii a téale. Ke te junihe pwo niihe lupwo an, ke pwohewii ni duwele miû. 2Ke e pé ne he in a cuwo nahi tii na tehi. Ke e ca pwo jié ko a an ne pwo juin, ke e ca ha a meiuhi ko a an ne pwo eaamun.
3Ke e cihe da me ubwo pwohewii a liô [heme e okéé]. Ke me e cihe, ke ni tikekele na 7 jélé, ke lé hegi ko ni pwohuu telé.
410.4 Daniel 12.4,9É alecehe ni 7 pwohuu te tikekele naa, ke nimung me é tii nina lé pii ne li 7 pwohuu te tikekele. Ke é ha a benaamwon naa, ke é téne a pwocihe mu he miiden na e pii tong pie: «Go nemwo tii nina lé pii ne ni 7 pwohuu te tikekele. Kehe go neduwohi!»
510.5 Deutéronome 32.40; Daniel 12.7Ke wo pali âcélo li é alieng, he e ko cuwo pwo jié, ke é ha a meiuhi, ke e eti da he miiden a in ne pwo juin, 6beme e *piapwo ne he nii Padué na e *mulie dieli mwo, ke e pwo a miiden, me a bwohemwo, me a jié, ke ati ni naado na e hen.
Ke e pii wo pali âcélo pie: «O caa time uce bwolihi [ace bwo ucéihi nen dewé]! 710.7 Amos 3.7É ha a benaamwon na e bo tabuhi cuu a tutu wo pali bé7 he ni âcélo, ke e o bo caa pacuwohi *a bwo niimihinaado ten wo Padué, na e ha aduwo. E caa pipatemehi anaa te ni eabwé ten, ni péroféta.»
Go wii ke go pii beetihi
8Ke e cihe tong mwo a pwocihe mu he miiden na é caa mi téne, ke e pii pie: «Go â pé a [cuwo nahi] tii na tehi, mu ha a i pa âcélo na e ko cuwo pwo a jié, ke é ha a meiuhi.»
910.9 Ézékiel 2.8, 3.1−3Ke é piâ céii pali âcélo, ke é ileeng me e ne tong ali cuwo nahi tii. Ke e pii tong pie: «Go pé ke go wii. O maga ne tinam, kehe é ne pwom, ke o te junihe neje pwohewii ni duhimepu.»
1010.10 Ézékiel 3.3É pé ali cuwo nahi tii mu ha a i pali âcélo, ke é wii. Ke te junihe neje ne pwong pwohewii ni duhimepu. Kehe me é nemihi, ke te junihe maga ne tinang.
11Ke e pii tong mwo pie: «Go pii beetihi mwo a pwooti te Padué, ne ko ni bele na hiwon, ke ni amu, ke ni pati apulip, ke é ne mwo ko ni daame na hiwon jélé.»
11Lépwo apajuuju Padué
111.1 Ézékiel 40.3; Zakari 2.5−6Pwo pa céiu na e ne tong a bewomeéle na pwohewii a ba-acuwo, beme a béja. Ke e pii tong pie: «Go â jahi a *mwaiitihi te Padué, ke a *apwoâpwailo. Ke go pine mwo nina lé pwoiitihi ne ha a mwaiitihi. 211.2 Luka 21.24; Pii Beetihi 13.5Ke go nemwo jahi a napwomwo ko a mwaiitihi. Go nemwo jahi, be genye necu ne ko nina time lé uce temehi Padué. Lé o pé pihuô ati ha a pwomwo ubwo iitihi11.2 A pwomwo ubwo iitihi—Iérusaléma. he na 42 ni wole.
3«Ke é bo ne a pihuô te lupwo apajuujuéo na lu cuwohe ni epwén he doole mele. Ke lu bo cihe ko a nii Padué he na 1260 ni tan.» 411.4 Zakari 4.3,11−14Lupwonaa, ke lupwo olivier, ke lupwo mwomiû na lu cuwo he pwahamii Padaame he a bwohemwo ati.
511.5 2 Samuel 22.9; Psaume 97.3Mepie nime pace céiu apulie me e pwotahi ne kolu, ke e o wie mu pwolu a miû, ke o éle nang. Éa, wo pace apulie celi nimen me e pwotahi ne kolu, ke o wonaa ace bwo mele ten. 611.6 Exode 7.17−20; 1 Samuel 4.8; 1 Rois 17.1Ke pwojunuulu me lu pacuwohi a ute me ole ha a benaamwon na lu ko cihe ko a nii Padué. Pwojunuulu me lu taatééhi a tabe me a cewéle. Jan me lu tanahi a bwohemwo ko ni toto bwomunen ko ni apwohi na ubwo, piohiwon julu heme nimelu.
Ana e o tuie ne kolu
711.7 Daniel 7.21; Pii Beetihi 12.17, 13.7, 17.8Ke me lu caa panebwénihi a bwo *pajuujuhi nen delu, ke pa iténaado11.7 Iténaado—Grek: A wota apiaba [na e mu kon a junuu Caatana]. na e taa mu ha ali pwon li tice anebwén kon, ke e o pwopa ne kolu, ke e o piwéden kojalu, ke e o taunulu.
811.8 Luka 13.34Ni éélu, ke e o te mu ha apimu ibu ne ha a pwomwo ubwo11.8 Pwomwo ubwo—Wieli Iérusaléma, ai wieli a ocine ko a bwo pimu ibu te ati ni apulie na time lé uce paciiti Padué., é lang he na lé cemeite Padaame helu ne ko a *kuricé. A nii a pwomwo ubwo naa pie ‘Sodome’ ai ‘Aigupito’11.8 Sodome ai Aigupito—A ocine ko lépwo apulie na time lé uce paciiti Padué.. 9Ke ni apulie mu ati he ni bele, ke é mu he ni pwomwoiu, ke é mu ati he ni pati apulie, ke é mu ati he ni amu, ke lé bo âbé alihi ni éélu he na cié ni tan, ke pwo a behin. Ke time lé o uce pwo me lé neduwolu.
10Ke ni apulie pwo bwohemwo, ke lé o te nihe pipwodéén ko a bwo mele te lupwo péroféta naa. Lé o te junihe pituume, ke lé o muko pine telé ni âpati, be lupwo apulie naa, ke lu te junihe pwo me lé picani.
1111.11 Ézékiel 37.5,10Kehe é alecehe ni tan na cié, ke pwo a behin, ke e te pamulipilu mwo wo Padué. Ke lu te cuwoda kuti. Ke te junihe mwoti nina lé alilu.
1211.12 2 Rois 2.11Ke lu téne a pwocihe na e âbé mu he miiden wo lupwoli péroféta, na e pii telu pie: «Geu taabé éni!»
Ke lu taa he miiden, ne he ni nii, ne he pwahamii nina lé téétilu.
1311.13 Pii Beetihi 6.12, 16.18Ke é ha a benaamwon naa, ke te pwo kuti a penem bwohemwo na te junihe pwo niihen. Ke niihi a céiu duaan mu ko ni duaan na 10 mu ko a pwomwo ubwo, ke 7000 ni apulie na lé mele. Ke te junihe mwoti nina lé mwo te mulie, ke lé pipaunu Padué na e he miiden.
1411.14 Pii Beetihi 9.12E caa âdé a béalohe apwohi. Kehe a béciéhen, ke e o te ju téele tuie.
A bénebwéne tutu
7 <γ> Mwametau te Padué
1511.15 Exode 15.18; Psaume 10.16; Daniel 2.44, 7.14E cuu a tutu ten wo pa bé7 he ni *âcélo. Ke geme téne ni pwocihe na te junihe pwo niihen ne he miiden, na lé pii pie:
«A mwametau pwo bwohemwo,
ke caa ne mwo
te Padué Padaame henye
me pa *Mesia ten.
Ke e o Daame dieli mwo.»
16Ke lé tai miibule, me tidihi jililé wo lépwoli 24 ukéiu, li lé tebwo pwo li atebwo telé ne he pwahamii Padué. Ke lé pipaunueng, 17ke lé pii pie:
«Padaame Padué na pwojunuum
ne ko ati ni naado,
wogo ânebun, ke wogo jenaa.
Geme pipwo-olé tem.
Go pihuô ha a junuum na ubwo,
ke é jenaa, ke go daame.
1811.18 Psaume 110.5, 115.13; Roma 2.5; Pii Beetihi 20.11−13Lé okéé ne ni bele.
Kehe caa a benaamwon
na go habwii a okéé tem
beme go tauti ni amele.
Caa a benaamwon
na go pwoceme ni eabwé tem,
ni péroféta, me ni apulie tem,
nina lé paciitiko,
nina piticenaado ne kolé,
me nina pwonaado ne kolé.
Caa a benaamwon na go tanahi
nina lé pwotahi a bwohemwo.»
7 ni inenaado <δ>
(Pwahamii tii: 11.19―15.4)
1911.19 Ébéru 9.4; Pii Beetihi 8.5, 15.5, 16.21Ke tehi a mwaiitihi te Padué he miiden, ke é alihi a mwopiapwo11.19 Mwopiapwo—Lé mu lang ni 10 patén de Padué. Omehi Deutéronome 10.1−5 me Ébéru 9.4. A ocine ko a bwo pimu ibu te Padué me a bele ten. ne ha a mwaiitihi ten. Ke pwo ni ilehi, ke a tihinaado na ubwo11.19 Tihinaado na ubwo—ai Pwocihe na ubwo., ke e huu na a tikekele, ke penem a bwohemwo, ke e ole a ute na te junihe ubwo, ke te junihe bwala11.19 Ute na te junihe ubwo, ke te junihe bwala—Grêle..
121 <δ> Ê toomwo me a dragon
1Pwo a inenaado na te nihe ubwo, na e tuie ne he miiden: ê toomwo na tawiieng ko a téale12.1 Toomwo na tawiieng ko a téale—A ocine ko a bele te Padué, he na e wie mulang wo pa Mesia, pa Naî Padué. A bele te Padué, ke wo lépwo Isaraéla, ke é jenaa, ke caa ati nina lé âcéi Iésu.. Ke a wole, ke e haahi ni an. Ke e pwobo ha a kuron na pwo ko ni ceni na 12. 212.2 Miché 4.10E o te ju téele piâbeele ewa, ke e é ko ni picani ko piâbeele ewa.
312.3 Daniel 7.7Pwo a céiu inenaado na e tuie ne mwo he miiden: a dragon12.3 Dragon—Ne ha a cihedéé te lépwo Juif, ke a paile na te junihe ubwo nang, na e mu ha anumwihi. A niin mwo pie Léviatan (Psaume 74.14). É ne éni, ke a dragon, ke a céiu niin pie Caatana. Omehi a niide a tii 9. na te junihe ubwo nang, ke megele nang pwohewii a miû. Ke 7 ni punin, ke 10 ni gi ten, ke é pwo ni pétaapwo punin, ke e mu pwon ni kuron. 412.4 Daniel 8.10Ke é ko a tubwon, ke e baléhi a céiu duaa12.4 A céiu duaa—Grek: A céiu duaa mu ko ni duaa na cié. ceni mu he miiden, ke e tahi ole pwo bwohemwo. Ke e cuwo ânebuhe ê toomwo na me e piâbeele ewa, beme e wii a naîn, hemepie e âbeele.
512.5 Psaume 2.9; Ésaïe 7.14, 66.7; Pii Beetihi 19.15Ke e picile pa cuwo nahi aiu wo êgi toomwo. Ke e bo pihuôhi ati ni bele wo panaa, ko a bwaja toki ten.
Ke me e pituie, ke te celuimieng kuti koja ali dragon, ne pele Padué, ne pwo a atebwo he daame ten. 6Ke e cela nge ha a melé12.6 Melé—Da (désert). A duaan na ticie hen. wo êgi toomwo. É lang he na e piwâamihi a amu ten nelang wo Padué, beme cileeng nelang, he na 1260 ni tan.
E pwopa ne kon wo Michel
712.7 Jude 1.9Ke é mulang, ke pwo a pa ne he miiden. Wo Michel me ni *âcélo ten, ke lé pwopa ne ko ali dragon me ni duéé ten12.7 Ni duéé ten—Grek: Ni âcélo ten. Éni, ke a bwopiinen pie ni âcélo na ta jélé, na nye pii kolé pie, ni duéé.. 8Ke time uce pwo niihe ali dragon, be te tice mwomwon delé me lé mu he miiden. 912.9 Genèse 3.1,14; Luka 10.18, 22.31; Pii Beetihi 20.2Ke ali dragon ubwo, ke tahieng ole pwomwo. Be pali bwien he li bécéiuhe tan, a niin pie ‘pa apipé ne konye’, ai wo *Caatana, ‘pa acubwonikenye’. Ke e pipwohuô te a bwohemwo ati. Ke tahieng ole pwo bwohemwo, woélé me ni âcélo ten.
1012.10 Job 1.11; Zakari 3.1Ke é téne a pwocihe na ubwo na e âbé mu he miiden, na e pii pie:
«É jenaa, ke a benaamwon
na e *celuimi wo Padué.
É jenaa, ke e daame
ko a junuun.
E habwii a mwomwon den
wo pa *Mesia.
Be e caa tahi ole Caatana,
pana e pipé ne ko ni béénye,
he ni tan ke ni bwén.
11Kehe lé piwéden kojaeng,
ko a cewéhe pa *Nahi Muto;
ko a pwooti na lé *pajuujuhi.
Be time uce piwâ jélé,
me lé patupwo ni mulihelé,
ke me lé mele me den.
1212.12 Ésaïe 44.23, 49.13Geé pipwodéén,
wogewé a miiden,
ke wogewé na geé mu hen!
Apwohi a bwohemwo me a jié!
Be e oté céiikewé wo Caatana.
Kehe e te junihe okéé,
be e caa te temehi pie,
caa tice benaamwon den.»
E tai êgi toomwo na ali dragon
13Ke me e alihi na ali dragon pie, caa tahieng ole pwo bwohemwo, ke e tai êgi toomwo12.13 E tai êgi toomwo—Hiwon ni naado jenaa, na pwohewii a bwo celuimi lépwo Isaraéla koja pa daame Faraô mu Aigupito. Omehi Exode 1.22; 14.8; 19.4; Nombres 16.31−33. li e picile pali cuwo nahi aiu. 1412.14 Daniel 7.25, 12.7Ke wo êgi toomwo, ke e hegi lupwo puui a bwaaoléé na te junihe ubwo nang. Ke e téé kojaeng nge ha a melé, ha a duaan na caa piwâamihi me den, ne ité koja a bwien. Ke e bo hegi ni wiinaado nelang he na cié ni jo, ke pwo a behin12.14 Cié ni jo, ke pwo a behin—A bwopiinen pie: 42 ni wole: 1260 ni tan. Omehi Pii Beetihi 11.2−3. Grek: Ha a benaamwon na céiu, me ni benaamwon, me a céiu bebehi benaamwon..
15Ke wo pali bwien, ke e puutihi a tabe na pwohewii a tabe he éémwa céi êgi toomwo, beme cetieng. 16Kehe icehi ana e picani te êgi toomwo na a pule, ke e tehi a pwon, ke e nemihi ali tabe. 1712.17 Pii Beetihi 11.7Ke e te junihe okéé kuti na ali dragon, ne ko êgi toomwo, ke e â pwopa ne ko ni nehi naîn. Ninaa, ke nina lé piténedehi ni pihuô te Padué, ke lé pajuuju Iésu12.17 Lé pajuuju Iésu—ai Lé te cumang ne ko a juuju na e habwii wo Iésu..
18Ke e te cuwo ticepwon ali dragon.
132 <δ> Pa iténaado mu he jié
113.1 Pii Beetihi 12.3, 17.3,7−12Ke é ali pa iténaado na e taawie mu he jié. Ke a wota na 10 ni gi ten, ke 7 ni punin. É pwo ni pétaapwo gi ten, ke e mu pwon ni kuron. Ke é pwo ni pétaapwo punin, ke e mu pwon a nii na e pihooni Padué.
213.2 Daniel 7.4−6A één, ke pwohewii a léopard†. Ni an, ke pwohewii ni a ours, ke a pwon, ke pwohewii a pwo liô13.2 Léopard, be e te junihe téte; Ours, be te junihe bwali ni piimwodéin; Liô, be te junihe bwali ke ânyee ni pecuwon.. Ke e ne ten a niihen na ali dragon, ke a atebwo he daame ten, ke a pihuô ten na junihe ubwo. 313.3 Pii Beetihi 17.8Ke pwo ahinaado ko a céiu puni pali iténaado, ke te junihe ubwo, ke pwohewiin heme e caa mele. Kehe icehi ana caa te mali mwo, ke caa wâé.
Ke lé picedieng ati ne ni apulie pwo bwohemwo, ke lé âcéin. 4Ke lé pipaunueng, ke lé pii pie: «Woo celi pwo niihen pwohewii pa iténaado? Woo celi jan me e pwobwonieng? Te tice!»
Ke lé pipaunu mwo ali dragon, be weeng na e ne ten a junuun.
E pii me ta Padué
513.5 Daniel 7.8,25, 11.36; Pii Beetihi 11.2E caa te hegi wo pa iténaado, me e pii ni pwooti na ta ne ko Padué, ke ne ten a pihuô he na 42 ni wole. 6Ke e te junihe pii me ta Padué me a niin, me a atebwo ten ne he miiden, me ati nina lé mu lang.
713.7 Daniel 7.21; Pii Beetihi 11.7Ke e caa te hegi a junuun me e pwopa, ke me e piwéden koja ni apulie te Padué. Ke e caa te hegi mwo ni pihuô, ne ko ati ni apulie pwo bwohemwo: ati ni pwomwoiu, me ni pati apulie, me ni amu, me ni bele. 813.8 Psaume 69.29; Pii Beetihi 17.8, 20.12,15, 21.27Ke lé tai pipwoun den ati ne ni apulie pwo bwohemwo na time uce tii ni niilé ne ha a Tii te pa *Nahi Muto, ha atabuhi ko a bwohemwo. Wo pa Nahi Muto, ke weeng kuti pana e caa mele, beme e *âpwailo.
9[Woéo Ioane na é tii a tii ce, ke é pii pie]: Wo paceli pwo ce pwojéénen me e téne, ke wâé heme e téne! 1013.10 Jérémie 15.2, 43.11; Pii Beetihi 14.12[Be o pwotahi ne ko ni apulie te Padué.] Lé o pwokarépu ne ce béén, ke o taunu ce béén. Kehe wâé heme lé imwi mangihi a céihi telé, ke me lé cumang [ne he celi e o tuie ne kolé].
3 <δ> Pa iténaado mu he pule
11É alecehen, ke é ali pa céiu iténaado, na e taa tuie mu he pule. Ke a wota na alo ni gi ten, pwohewii ni gi te ni nahi muto, kehe icehi ana a patin he e cihe, ke pwohewii a dragon. [Ke a niin mwo pie pa péroféta agele13.11 Pa péroféta agele—Omehi Pii Beetihi 16.13 me a note, 19.20, 20.10..] 12Ke e penem me de pa iténaado: ali wota ânebun, li caa mali mwo ali ahinaado kon. Be e hegi koja pali iténaado ati a pihuô ten, me a junuun.
Ke e cuwoko ati ni apulie pwo bwohemwo, beme lé pimiibule, ke pipwoun de pali iténaado li caa mali mwo ali ahinaado kon. 13-1413.13−14 1 Rois 18.24−39; Mataio 24.24; Pii Beetihi 19.20Ke e pwo ni inenaado na te junihe ubwo, ko ni pipwojunuun, ne he pwahamii pali iténaado. Be e neole a miû mu he miiden, ke lé tai téetihi ne ni apulie pwo bwohemwo. Ke ne ten me e pahaulilé, ke e huôhi ne telé me lé pwo ace déme pali iténaado li caa mali mwo ali ahinaado kon13.13−14 Li caa mali mwo ali ahinaado kon—ai Li e caa mulie mwo..
E pamulipihi a déme iténaado
15Wo pa béalohe wota naa, ke wo pali péroféta agele, ke e hegi a pihuô me e pamulipihi ali déme iténaado. Ke e ne te ali démen me e cihe, ke me e taunu ati ni apulie na time lé uce pipaunueng. 1613.16−17 Pii Beetihi 14.9−11, 16.2, 20.4Ke e cuwoko ni apulie ati, me lé hegi a inen ne ko ni ilé ne pwo jui, ai é ne mwo pwo ni bwaadelé. E wonaa te ati ni apulie na piubwo jélé me nina piwahin jélé, ke ni béén na pwo naamuulé, ke nina tice delé, ke ni *apenem tice ja kon, ke ni apulie na time uce ni apenem tice ja kon13.16 Ni apenem tice ja kon, ke ni apulie na time uce ni apenem tice ja kon—Esclaves et personnes libres.. 17Ke te tice apulie celi jan me e pi-icu heme te tice inen. A inen naa, ke a nii pali iténaado, me a numéro na a ocine ko a niin13.17 He pwo ébéru, ke grek, ke ni béé pwocihe, ke ni pétaapwo atii, ke te pwo a jéhin na e te â ko ni muko atii..
18[Woéo Ioane na é tii a tii ce, ke é pii tewé pie]: Wo pace apulie celi e pitemang, ke wâé heme e temehi ehi a numéro te pali iténaado. Be a numéro ten, ke a nii pa céiu apulie: Ke 66613.18 666—Âcehi a bwo niimihi nen de lépwo Juif, ke 6, ke a numéro te ni apulie. 666, ke a numéro te pana nimen me e tebwo pwo a atebwo te Padué..
144 <δ> Pipaunu pa Nahi Muto
1[É alecehen, ke é alihi mwo ni béé naado na o bo tuie]: É ali pali *Nahi Muto, he e ko cuwo pwo a juwole *Sion. Ke lé ko mu pelen ne ni apulie na 144000 jélé14.1 144000 jélé—Omehi note ko Pii Beetihi 7.4.. Woélé ati, ke caa tai tii ne pwo bwaadelé a niin, ke a nii Caa ten.
214.2 Pii Beetihi 1.15, 19.6Ke é téne a pwocihe, na e âbé mu he miiden, na pwohewii ni tihi gitar celi te junihe hiwon. Te junihe ubwo a tihin, pwohewii a éé tabe pwobwaatéép14.2 Pwohewii a éé tabe pwobwaatéép… ai Pwohewii ni jié na nihe ubwo. na te junihe ubwo, ke a huu he a tikekele. 314.3 Ésaïe 42.10; Pii Beetihi 5.9, 7.4Ni apulie naa, ke lé pwonyebi ânebuhe a atebwo iitihi, ke é he pwahamii ni âcélo na paa jélé, na pwohewii ni wota, me ni ukéiu na 24 jélé. Ke mwo coho a nyebi telé, ke te tice pace céiu apulie celi e temehi, kehe te icehi ni 144000 na caa celuimilé mu pwo bwohemwo.
4Woélé, ke ni apulie na time lé uce pwo me alili ni mulihelé, ne ko ni toomwo pwopwaaden14.4 1re phrase—A ocine ko a mulie na wâé ne he pwahamii Padué, be te tice ta hen.. Lé te pipaciitilé, ke lé âcéi pa Nahi Muto ati ne he na e â lang. Be e caa pwocuhilé14.4 Pwocuhilé—A ocine ko a bwo pipatupwo na a mulihe Kériso. mu hadenii ni apulie, beme lé bécéiuhe âpipati ne te Padué, me pa Nahi Muto. 5Time lé mu uce gele. Ke te tice ta pwo telé.
5 <δ> A pwooti te ni âcélo
6Ke é ali mwo pa céiu *âcélo na e ko téé ko miiden, beme e â pipatemehi te ni apulie pwo bwohemwo a *Pwooti Wâé na e dieli mwo, ne ha ati ni amu, ke ati ni pwomwoiu, me ati ni pati apulie, me ati ni bele.
7Ke e toii da pie: «Geé paciiti Padué, me pipaunueng ne ha *a wâé ten! Be e caa tuie a benaamwon, na me e tauti ni apulie pwo bwohemwo hen. Pipwoun de pana e tabuhi a miiden me a bwohemwo, me a jié, me ni acaamatabe!»
814.8 Ésaïe 21.9; Jérémie 51.7,8; Pii Beetihi 17.2, 18.2,3Ke e âbé alecehen wo pa béalohe âcélo, ke e toii da me ubwo pie:
«E caa tupwo, e caa tupwo
ali pilehe Babulona14.8 Babulona—Omehi mwo Babulona ne ha a Niinaado (Vocabulaire) ha anebwén ko a tii. Ocine ko ati lépwona lé cubwoni Padué, ke pwotahi ne ko ni apulie ten.!
E pwo me lé ûdu
a tabe megele ten
ne ni amu ati.
Ke lé pipule hauli
pwohewiieng.»
914.9 Pii Beetihi 13.12−17Ke e âbé alecehen wo pa béciéhe âcélo, ke e pii ha a patin na ubwo pie: «Mepie pwo pace apulie celi e pipaunu pa iténaado me a démen, ke me e hegi a inen ne pwo bwaaden, ai é ne pwo a in, 1014.10 Genèse 19.24; Psaume 75.9; Ésaïe 51.17,22; Jérémie 25.15−16; Ézékiel 38.22; Pii Beetihi 16.19, 20.10, 21.8ke e o te ûdu mwo weeng, a tabe megele ko a okéé te Padué, na time uce tahagéi, na céihi ne ha a béûdu ko a okéé ten. Ni apulie naa, ke lé o te junihe picani ne ha a miû, me a dep na éle, ne he pwahamii ni âcélo iitihi, me pa Nahi Muto.
1114.11 Ésaïe 34.10«Tee taa dieli mwo a muu a miû na e pwo me lé te nihe picani. Nina lé pipaunu pali iténaado me a démen, ke lé hegi a ine a niin, ke time lé uce mwaale, heme pwang ke bwén.»
1214.12 Pii Beetihi 13.10Nina élé ko Padué, ke me lé ténedehi ni patén den, ke me lé cumang ne he ni céihi telé ne ko Iésu [he ni picani].
13Ke é téne a pwocihe na e âbé mu he miiden, na e pii pie: «Go tii pie: “*Adéi nina lé mele, tabuhi jenaa, mu ko a bwo céihi telé ne ko Padaame!”»
E pii na a *Jenen Iitihi pie: «Éa, be lé o mwaale koja ni téé me ni picani telé. Ke lé o hegi ni cemelé mu ko ni penem delé14.13 Dernière phrase—ai Ni penem delé, ke pajuujulé. Grek: Ni penem delé, ke te piâcéilé..»
6 <δ> Pitii âdaanu
1414.14 Daniel 7.13É niê ngemwo, ke é ali pa *Nahi Apulie14.14 Pa Nahi Apulie—ai Pa apulie na pwohewii pa Nahi Apulie (Iésu Kériso)., he e ko tebwo ha a nii na pwojo. Ke e pwobo ha a kuron na mwani megele, ke e pé a bépwopwi na te junihe ânyee.
15Ke é ali mwo pa céiu âcélo na e wie mu ha a *mwaiitihi14.15 Mwaiitihi—A ocine cehi, be te tice ju mwaiitihi celi e jeda he miiden. Omehi Pii Beetihi 21.22. [jeda he miiden]. Ke e toii da céii pali e tebwo ha ali nii pie: «Go penem ko a bépwopwi tem! Be caa tuie a benaamwon ko pitii âdaanu14.15 Pitii âdaanu—Récolter. Wieli a ocine ko ni apulie ati, na o todelé ne ha a tautinaado te Padué (Osé 6.11), ai te ni apulie te Padué cehi, na lé bo taa ha a Mwametau ten (Maréko 4.29)., be caa pun ni âdaanu!»
16Ke e tahi ole pwo bwohemwo ali bépwopwi ten wo pali e tebwo ha ali nii, ke e pitii âdaanu ati pwo a bwohemwo.
17Ke é alecehen, ke e wie mu ha a mwaiitihi he miiden wo pa céiu âcélo. Weeng mwo, ke e te pé mwo a bépwopwi na te junihe ânyee.
1814.18 Joël 4.13Ke pwo pa céiu âcélo na e âbé mu ko *apwoâpwailo, na jan ne kon me e pihuôhi a miû. Ke e toii da céii pali e pé ali bépwopwi li te junihe ânyee pie: «Go penem ko a bépwopwi tem, na te junihe ânyee, ke go tahagéi ni jele ace tabe megele pwo bwohemwo! Be caa megele.»
19Ke e tahi ole pwo bwohemwo ali bépwopwi ten wo pali âcélo. Ke e tahagéi li jele ace tabe megele pwo bwohemwo. Ke e tahi nge ha a mwopwoti tabe megele ko a okéé te Padué. 2014.20 Ésaïe 63.3; Pii Beetihi 19.15Ke lé hegeti li ace tabe megele, ne ha a mwopwoti nen ne pwomwo koja a pwomwo ubwo. Ke e tée a cewéle, ke e pwice nge he na 300 kilomètre, ke e taa die ko a paapwo haricaan.
157 <δ> Pwopweehi ni 7 apwohi
1É alihi ne he miiden a céiu inenaado na te junihe ubwo, ke é téetihi: 7 ni *âcélo na lé pé ni 7 apwohi. Weengaa kuti ni bénebwéne picani, be a okéé te Padué, ke e o caa cuwo ne kolé.
2Ke é alihi a céiu jié na pwohewii ni kéle, na pwo miû hen. Ke é alihi nina lé piwéden koja pali iténaado me a démen, ke a numéro na e habwii mwo a niin, he lé ko cuwo pwo a jié na piniêdiihi, ke lé pé ni gitar te Padué. 315.3 Exode 15.1; Psaume 139.14, 145.17Lé pwo a nyebi te *Moosé, pa eabwé te Padué, ke a nyebi te pa *Nahi Muto:
«Te junihe ubwo ni penem dem,
ke ubwo a wâé tem, go Padué!
Te junihe pwo niihem
ne ko ati ni naado.
A pwodaame tem
ati ne ko ni bele!
Mwomwon ni pwaadeniim!
415.4 Psaume 86.9; Jérémie 10.6−7Te wogo cehi na go iitihi.
Te wogo cehi Padué.
Woo pace apulie
celi time uce mwotieng kom?
Woo pace apulie
celi time e o uce pipaunuko?
O te tice paceli te ju céiu nang!
Lé o tai âbé ne ni bele,
ke lé o pimiibule
ne he pwahamiim.
Be lé caa tai alihi
ni penem dem na wâé!»
7 mwotabe ko a apwohi <ε>
(Pwahamii tii: 15.5―16.21)
515.5 Exode 38.21É alecehen, ke é omehi, ke é alihi a *mwaiitihi na pwo ko mwaanu, he tehi ne he miiden. 6Ke lé wie ne ni âcélo na 7 jélé, na lé pé ni 7 apwohi15.6 Apwohi—Malheur, plaie, fléau. na te junihe ubwo. Ke lé cuwohe ni epwén na pwojo pwomelaan. Ke lé cie ni bwaangelé ko ni taihena na mwani megele. 7Ke pwo pa céiu béé lépwo âcélo na paa jélé na lé pwohewii ni wota, na e muko ne te lépwo 7 âcélo naa, ni mwotabe mwani megele, na oba ko a okéé te Padué, pana e *mulie dieli mwo.
815.8 1 Rois 8.10−11; 2 Chroniques 5.13−14; Ésaïe 6.4Ke te oba kuti ali mwaiitihi ko muu miû, mu ko a bwo ubwo na a wâé te Padué, me a junuun. Ke te tice pace céiu apulie celi jan ne kon me e taa ha ali mwaiitihi, heme mwo time uce pacuwohi ni apwohi na 7 te ni 7 âcélo.
161É alecehen, ke é téne a pwocihe na ubwo, na e âbé mu ha ali *mwaiitihi, na e pii te lépwoli 7 *âcélo pie: «Geé â céihi ole pwo bwohemwo ni 7 mwotabe ko a okéé te Padué.»
1 <ε> Ni tongo
216.2 Exode 9.10; Pii Beetihi 13.12−17E ân wo pa bécéiuhe âcélo, ke e céihi ole pwo bwohemwo a mwotabe ten. Ke e te tuie kuti ni tongo na te junihe ta ke mwiihi, ne ko nina e kolé a ine pa iténaado, me pipaunuhi a démen.
2 <ε> A jié na megele
316.3−4 Exode 7.17−21Ke e âbé wo pa béalohe âcélo, ke e céihi a mwotabe ten ne he jié. Ke te bitehi kuti a jié, ke megele tooli, pwohewii a cewéhe pa apulie na e caa mele. Ke lé te tai mele ati ni naado na lé mu he jié.
3 <ε> A éémwa na megele
4Ke e âbé wo pa béciéhe âcélo, ke e céihi a mwotabe ten, ne he ni éémwa, me ni acaamatabe; ke te cewéle kuti. 5Ke é téne pa céiu âcélo, na e pihuôhi ati ni tabe, he e pii te Padué pie:
«Te wogo cehi
pana go mwomwon!
Be wogo jenaa,
ke wogo ânebun!
Wogo pana go iitihi.
Mwomwon ke juuju
a bwo tautilé tem.
6[Be lé pwo ana ta]:
Lé pwo me tée
a cewéhe a bele tem
me ni péroféta tem.
Ke go te paûdulé mwo
ko a cewéle,
beme a cuhinaado telé!»
716.7 Psaume 19.10; Pii Beetihi 15.3Ke é téne mwo a pwocihe na e âbé mu pwo ali *apwoâpwailo, na e pii pie:
«Éa, go Padaame,
Padué na pwojunuun
ne ko ati ni naado:
Be juuju, ke mwomwon
ati ni tautinaado tem!»
4 <ε> A éle
8Ke e âbé wo pa bépaahe âcélo, ke e céihi a mwotabe ten ne pwo a téale. A téale, ke e hegi a junuun me e éle ni apulie ko a miû kon. 916.9 Pii Beetihi 9.20−21Ke te junihe éle kuti ni apulie ko a éle na te junihe pwo niihen. Ke lé pii me ta a nii Padué na pwojunuun, na e ne ni apwohi naa. Kehe time lé uce pitaatééhi ni mulihelé, ke time uce nimelé me lé temehi a bwo ubwo Padué.
5 <ε> A bwén
1016.10 Exode 10.22; Ésaïe 8.21−22Ke e âbé wo pa bénim he ni âcélo, ke e céihi a mwotabe ten, ne pwo a atebwo te pa iténaado. Ke a bwén, ke e tawii a mwametau te pali iténaado. Ke lé piwii ni upehelé ne ni apulie, ko ni bwo picani telé. 11Ke lé pii me ta Padué he miiden, watihen ni bwo picani telé, me ni ahinaado kolé, kehe time lé uce pininim me lé cuwo koja ni ta pwo telé.
6 <ε> Meiu a éémwa Eufrate
1216.12 Ésaïe 11.15Ke e âbé wo pa bé6 he ni âcélo, ke e céihi a mwotabe ten ne ha a éémwa ubwo Eufrate, ke te ju meiu kuti ali éémwa. Beme o bo a pwaadeni lépwo daame na lé bo âbé mu ha a duaan na e taa tuie hen a téale.
13Ke é alecehen, ke é alihi ni duéé na cié jélé, pwohewii ni gérénuen16.13 Gérénuen—Wieli a ocine ko a pwooti te lépwo duéé na mwiihi.. Ke lé wie mu pwo a dragon, ke é mu pwo pa iténaado, ke é mu pwo pa péroféta agele16.13 Pa péroféta agele—Tabuhi mu ko a niide a tii ce, ke a béalohe wota, na e taa tuie mu he pule (13.11−15), ke a niin pie, pa péroféta agele (omehi 19.20; 20.10)..
1416.14 Pii Beetihi 19.19Be e nelé bé wo *Caatana, beme lé pwo ni *inenaado na pwojunuun. Lé â too ni daame ati pwo bwohemwo, be nimelé me lé neibulé, ne ko a pa he a tan ubwo te Padué na te junihe pwojunuun.
1516.15 Mataio 24.43−44; Pii Beetihi 3.3E pii wo Padaame pie: «É bo mwojuia mwobé16.15 É bo mwojuia mwobé—A bénebwéne bwo tuiebé te Iésu. [ke é o patéetikewé] pwohewii pa abune [he bwén]. Ke *adéi pana time e uce pule, ke e te cile ni epwénen ne cebwon, beme time e o uce engen heme te tice naamuun, ke me time o uce tanim nang, heme lé alieng ne ni apulie.»
1616.16 Zakari 12.11Wo lépwoli duéé, ke lé taineibu ni daame pwo bwohemwo, ne ha a duaan na pii kon he pwo *ébéru pie Armaguédon.
7 <ε> Penem a bwohemwo
17Ke e âbé wo pa bé7 he ni âcélo, ke e céihi a mwotabe ten nge ko miiden. Ke é téne a pwocihe na ubwo na e âbé mu pwo a atebwo te Padué, ne ha a mwaiitihi, na e toii da pie: «Caa tai cuwo ati!»
1816.18 Pii Beetihi 4.5, 8.5Ke ilehi, ke pwo ni pwocihe, ke e huu wo tikekele, ke pwo a penem bwohemwo, na te junihe pwo niihen. Tabuhi he pwo ni apulie pwo bwohemwo, ke time genye uce téele alihi ace penem bwohemwo celi wonaa. 1916.19 Pii Beetihi 14.10Ke tanahi ni pwomwo ubwo ne pwo bwohemwo. Ke pipii me cié mu ko a pwomwo na junihe ubwo16.19 Pwomwo… Wieli Babulona (ocine ko Rome. Omehi a note ko Pii Beetihi 17.1), ai wieli Iérusaléma.. Ke time e uce neuhi *Babulona wo Padué, ke e pwo me e ûdu ha a mwotabe na oba ko tabe megele ko a okéé ten na ubwo.
2016.20 Pii Beetihi 6.14Ke tieden ati ni één, ke caa time nye uce alihi ni juwole. 2116.21 Exode 9.23−24; Pii Beetihi 11.19Ke lé te tupwo kuti mu he miiden ni aceute na pwo 40 kilo, na bwala. Ke lé tanahi ni apulie. Ke lé pii me ta Padué, watihen a apwohi na ubwo ko a ute na bwala. Be te junihe ubwo a apwohi naa.
17Ê toomwo pwopwaaden Babulona
117.1 Jérémie 51.12−13É alecehen, ke e âbé céiiéo wo pa céiu béé lépwoli 7 *âcélo, li lé céihi li 7 mwotabe. Ke e pii tong pie: «Go âbé, me é habwii tem a cuhinaado [na e bo ne wo Padué] te ali pwomwo ubwo li e mu ko jije ni tabe na hiwon17.1 Pwomwo ubwo… Babulona ânebun, ke a ocine ko Rome, na junihe ubwo ha a benaamwon de Ioane. Ke a ocine ko ati ni pubu apulie na time lé uce paciiti Padué., na pii kon pie ‘Ê toomwo pwopwaaden, na te junihe ta nang’. 217.2 Ésaïe 23.17; Jérémie 51.7; Pii Beetihi 14.8[Be te junihe mwiihi ni penem den.] Be lé pipule17.2 Lé pipule—A mulie pwopwaaden (prostitution), ke a ocine ko a bwo pipaunuhi ne ni duéé hauli. Ke a ocine mwo ko a bwo time uce paciiti Padué. me ati ni daame pwo bwohemwo. Ni huô ten, ke pwohewii a tabe megele, na e ne te ni apulie pwo bwohemwo, beme lé tai piolo, ke me lé pipule hauli me weeng.»
317.3 Pii Beetihi 13.1Ke e âbé kong a *Jenen Iitihi, ke e pééo nge ha a melé wo pali âcélo. Ke é ali ê toomwo na e tebwo pwo a wota na megele, [pali iténaado17.3 Pali iténaado—Omehi Pii Beetihi 13.1.]. Ke 7 ni puni a wota naa, ke 10 ni gi ten, ke tawiieng he ni niinaado na pii me ta Padué kon.
417.4 Jérémie 51.7; Pii Beetihi 18.16Wo êgi toomwo, ke e cuwohe a epwén na pun ke megele [pwohewii ni epwéne lépwo daame, me ni apulie na piubwo jélé]. Ke te ju oba nang ko mwani megele, ke perle, ke ni péi na ubwo ni cuhin, na pwomelaan. Ke e pé a mwotabe mwani megele, na oba ko ni naado na mwiihi. Be ni naado na ta ko ni bwomu ten na te junihe ta. 5Ke tii ne pwo bwaaden a nii na neduwohi, na pii pie:
Babulona na te junihe ubwo:
nyaa te ni toomwo pwopwaaden,
me ati ni huô na mwiihi
ne pwo bwohemwo.
617.6 Pii Beetihi 18.24, 19.2Ke é alihi pie e piolo, be e caa junihe ûdu a cewéhe ni apulie te Padué na taunulé mu ko a céihi telé ne ko Iésu.
Pii te Ioane a bwopiinen
É omeeng, be é te junihe téetieng. 717.7 Pii Beetihi 13.1Ke e pii tong wo pali âcélo pie: «É ko ade na go téetieng? É bo pii tem a bwopiinen na neduwohi ne ko ê toomwo naa, me a wota na e ko pééeng: [pali iténaado] li 7 li punin, ke 10 ni gi ten.
817.8 Daniel 12.1; Pii Beetihi 11.7, 13.7«A wota na go alihi, ke e mwo te mulie bwolihi, kehe é jenaa, ke caa tieeng. Ke e bo taamwobé, mu ha a pwon na te tice anebwén kon17.8 Pwon na te tice anebwén kon—Omehi note ko Pii Beetihi 9.1., beme e â pipatiedenieng. Ke lé o téetieng ne ni apulie pwo bwohemwo: nina time uce tii ni niilé ne ha a tii ko a mulip, ânebuhe a bwo tabuhi na a bwohemwo.
9«Wo pana e tauti ehi ni naado, ke wâé heme e temehi ni, pie: Ni 7 punin naa, ke ni cuwo nahi juwole na 717.9 Ni cuwo nahi juwole na 7—A ocine ko a pwomwo ubwo Rome, na bahi ne pwo ni nahi juwole na 7. Lépwo 7 daame, ke wieli ce béé daame (empereur) nelang., na e mu pwon ê toomwo naa. Ke te ni daame na 7 jélé. 10Be lé caa tupwo ne nina nim mu kolé, ke e mwo te mu wo pa céiu. Ke mwo te tie pa céiu. Ke hemepie e bo tuie, ke time o uce bwolihi ace bwo mu ten. [Be e caa te pacuwohi anaa wo Padué.]
11«Wo pali iténaado li e mulie ânebun, ke caa tieeng, ke weeng kuti pa bé8 he ni daame. Be te pa céiu béé lépwoli 7 daame ânebun. Ke e bo mwojuia mwo, beme e bé8 mwo he ni daame, ânebuhe a bwo pipatiedenieng.
1217.12 Daniel 7.7,24«Mepwo ni gi ten, na go alihi, ke ni 10 daame, na mwo te tice mwametau telé. Ke o te ju ne telé cehi a cuwo benaamwon na time uce bwali17.12 Cuwo benaamwon na time uce bwali—Grek: A inetéale na te ju céiu., me lé pihuô hen, me pa iténaado.
13«Te céiu a bwo niimihinaado telé, me lé ne te pali iténaado ni junuulé, me a mwomwon me lé pihuô. 14Be lé bo pwopa ne ko pa *Nahi Muto. Kehe icehi ana e o te piwéden kojalé. Be te weeng kuti pa Apihuô te ni apihuô, ke e Daame he ni daame. Ke lé o tai piwéden me weeng17.14 Lé o tai piwéden me weeng—ai Lé o mu me weeng. ne nina e todelé wo Padué, ke pipégalilé, na lé cumang ne he ni céihi telé.»
Lé tééti êgi toomwo wo lépwo daame
15E pii tong mwo wo pali âcélo pie: «Go alihi ni tabe na hiwon, he na e mu lang wo êgi toomwo pwopwaaden, ke ni puapulie, me ni pati apulie, me ni amu, me ni bele.
1617.16 Pii Beetihi 18.8«Ni 10 gi ten na go alihi, ke pa iténaado, ke lé bo tééti êgi toomwo pwopwaaden. Lé bo pé kojaeng ati nina eten, ke lé bo pwo me tice naamuun. Lé bo wii a één, ke lé bo tahi da pwo miû ni nehin.
17«Lé wonaa, beme lé pacuwohi a bwo niimihinaado te Padué. Be weeng kuti na e ne a bwo niimihi nen naa, he ni pwonimelé, beme lé tai piténelé, me lé ne te pa iténaado ni pwodaame telé. Ke o wonaa dieli ha ace bwo pacuwohi ati na ali e caa mi pii wo Padué.
18«Mepwo é ne ko ê toomwo naa, na go alieng, ke a pwomwo na junihe ubwo na e pihuôhi ati ni daame pwo bwohemwo.»
187 pwooti ko babulona <ζ>
(Pwahamii tii: 18)
1É alecehe ninaa, ke é ali mwo pa céiu *âcélo na e opé mu he miiden, ke ne ten a junuun na ubwo. Ke pwéélang pitihi a bwohemwo *a wâé ten.
E tautieng wo Padué
1 <ζ> O tupwo Babulona
218.2−3 Ésaïe 13.21, 21.9, 34.11−14; Jérémie 50.39; Pii Beetihi 14.8Ke e toii da pie18.2 Wieli a bécéiuhe pwooti ko Babulona, ke e mu ha a pwahamii tii 17.:
«E caa tupwo, e caa tupwo
ali pilehe *Babulona.
É jenaa, ke lé caa mu lang
ne ni iténaado.
Caa a ataduwo te ni jenen na ta,
ke ni toto meni na *mwiihi.
3Be e pwo me lé ûdu
a tabe megele ten
na ati ni bele
ke ni daame pwo bwohemwo.
Ke lé pipule hauli me weeng.
Ke pwo naamuu
ni a-icu pwo bwohemwo
mu ko ni huô ten na ta.»
2 <ζ> Te junihe ubwo a cuhinaado ten
418.4 Ésaïe 48.20; Jérémie 50.8, 51.6,45; 2 Korénit 6.17Ke é téne a céiu pwocihe bé mu he miiden, na e pii pie:
«Go wie koja Babulona,
wogo a bele tong,
beme time go bo uce mu
he ni huô ten na ta,
ke me time go uce picani
ne he ni apwohi na ubwo
na é bo ne ten.
518.5 Genèse 18.20−21; Jérémie 51.9Éa, ni ta pwo ten,
ke pitahipwon die he miiden.
Ke wo Padué,
ke time e uce pineuhi
ni ta pwo ten.
618.6 Psaume 137.8; Jérémie 50.15,29; 2 Tésalonik 1.6Wâé heme pwocuhinaado ten
âcehi ati nina e pwo.
Ne ten aceli junihe ubwo
koja ana e pwo.
Paobaanihi a mwoûdu ten.
Be e ne a tabe megele ten
[beme e pwotahi ne ko ni bele].
Paobaanihi beme e te ûdu mwo
[ke me te nihe cunu nang kon].
718.7 Ésaïe 47.7−9Te nihe eânimen ko a wâé ten,
me ni naamuunaado.
Ne mwo ten ni picani,
me ni doole tahagéi.
Be e pipii den pie:
“É tebwo pwo a atebwo
he toomwo daame,
ke time é o uce depwele,
ke time o uce piwahin jo.”
818.8 Pii Beetihi 17.16É mu ko anaa,
ke weengi ni apwohi me den:
O tupwo ne huîin a mele,
ke a piwahin, ke a menele,
ha a tan na te céiu,
ke o éle nang ko a miû.
Éa, pwojunuu Padaame Padué
na e tautieng.»
Lé é niimieng ne ni apulie
3 <ζ> Lépwo daame
918.9−10 Ézékiel 26.17, 27.30−35Lépwo daame pwo bwohemwo, na lé pipule hauli me weeng, ke lé téele ne kon, mu ko ni naamuun na te junihe ubwo. Ke heme lé bo alihi a muu a miû na éle nang kon, ke lé bo é, ke pihemun ne ko a pwomwo ubwo naa. 10Ke lé bo cuwo ité kojaeng, be bwo mwotilé ko ni picani na e mu hen. Ke lé bo pii pie:
«Mwoli Babulona!
Mwolihi a pwomwo ubwo!
Tanahi me tieeng18.10 Tanahi me tieeng—Grek: Tautiko.,
ha a inetéale na te ju céiu!»
4 <ζ> Lépwo api-icu
1118.11 Ézékiel 27.36Lé é niimieng, me pihemun wo lépwo api-icu éni pwo bwohemwo, be caa tice apulie celi me lé pwocuhi ni âicu telé. 1218.12 Ézékiel 27.12,13,22[Be weeng na e mu pwocuhi ati ni naado] na te junihe ubwo ni cuhin, na lé mu icuhi:
Ni mwani megele, me ni mwani pwojo;
Ni péi na te junihe ubwo ni cuhin;
Ni toto mwaanu na te junihe wâé;
Ni ba-acuwo na ûde wâé;
Ni naado na pwo ko ni béokéé te ni éléphant18.12 Béokéé te ni éléphant—Défenses d’éléphant, Ivoire.;
Ni naado na pwo ko ba-acuwo;
Ni toki na mwoiu;
Ni péi na pwojo na te junihe wâé18.12 Péi na pwojo na te junihe wâé—Marbre.;
13Ni toto tabe ûde, me ni eti na ûde wâé;
Ni wie acuwo na ûde wâé heme nye cini;
Ni tabe megele, me géréén, me farine, me blé;
Ni paaci, me muto, me haricaan, me otuun;
Ni *apenem tice ja kon.
5 <ζ> Lépwo pwo mwani telé
14Lé pii te a pwomwo ubwo wo lépwo a-icu pie:
«Ati ni âicu na nimem kon,
ke caa tieden mu pelem.
Ati ni naamuunaado na wâé,
ke caa tice dem kon.
Ati ninaa,
ke time go bo uce tooli mwo!»
1518.15 Ézékiel 27.31,36Lépwo a-icu na pwo delé, ko a bwo icu ha a pwomwo ubwo naa, ke lé o cuwo ité kojaeng, ko ni bwo mwotilé ko ce picani celi e o mu hen, ke lé bo é me pihemun. 1618.16 Pii Beetihi 17.4Ke lé bo pii pie:
«Mwoli Babulona!
Weeng na e cuwohe
ali mwaanu megele pun,
ke te junihe wâé,
ke ubwo a cuhin.
Ke oba nang ko mwani megele,
ke ni péi na pwomelaan.
1718.17 Ésaïe 23.14; Ézékiel 27.27−29É he na te ju céiu inetéale,
ke te jan me tai tanahi
ati ni naamuunaado naa!»
6 <ζ> Lépwo a-engen pwo ong
Ati ni apihuô pwo ong, ke nina lé engen pwo ong, ke ni apenem, me lépwo awoli ikua, ke lé caa mu ité kojaeng.
1818.18 Ézékiel 27.32É he lé alihi a muu a miû na éle nang kon, ke lé toii da pie: «Mwo te tice ace pwomwo ubwo celi pwohewii a pwomwo ubwo ce!»
1918.19 Ézékiel 27.30−31Ke lé o é me pihemun, ke lé tahi muu pule ne he ni punilé [ko ni bwo téé jélé]. Ke lé o wiikau ko pii pie:
«Mwoli Babulona!
Mwolihi a pwomwo ubwo naa,
be te junihe pwo naamuu
ati nina pwo ni ongelé he jié.
Ke é he na te ju céiu inetéale,
ke tanahi ati ninaa!»
2018.20 Deutéronome 32.43; Ésaïe 44.23; Jérémie 51.48Miiden, go pipwodéén!
Caa tanahi a pwomwo ubwo!
Geé pipwodéén mwo,
wogewé ni apulie te Padué,
ni *apostolo, ke ni péroféta!
Éa, be e caa tautieng wo Padué
ko ni ta na e pwo tewé.
Bénebwéne pwooti kon
7 <ζ> O time bo uce alieng mwo
2118.21 Jérémie 51.63−64; Ézékiel 26.21Ke é ali pa âcélo na te junihe pwojunuun, na e pé a péi na te junihe ubwo18.21 A péi na te junihe ubwo—A bwopiinen he pwo grek pie: Pwohewii ace paaeete celi ubwo. Omehi a déme mwohaii olive ha awieme tii., ke e tahi ne he jié, ke e pii pie: «O wonaa ace bwo pabetii Babulona, a pwomwo na te junihe ubwo, ke o tahi taabwonieng. Ke time genye bo uce alieng mwo. 2218.22 Ésaïe 24.8; Ézékiel 26.13Ke time genye bo uce téne mwo, ce pati gitar, me ce pwocuu oopwé, me ce pwocuu tutu. O te tice pace apenem ko ba-acuwo me toki celi te ju céiu nang. Ke time genye bo uce téne mwo ce tihi bécemeii blé. 2318.23 Jérémie 7.34, 16.9, 25.10Ke o caa time bo uce pwéélang mwo ce miû lang. Ke o caa time genye uce téne mwo ce pwocihe te pa apiaten me ê mwoden.
«[O pé kojako, go Babulona, ati ninaa, watihen ni huô tem na ta.] Be go pwohewii ni toomwo apwodooki18.23 Go pwohewii ni toomwo apwodooki—Wieli a ocine ko a bwo ubwo ne ni pwonime ni apulie, ke ni bwo ne jéilé ne ko Padué.. Be lé pwo me lé pipatieden ati ni bele wo lépwo a-icu tem, na caa junihe piubwo jélé ne pwo a bwohemwo ati.
2418.24 Jérémie 51.49; Pii Beetihi 17.6«A céiu mwo, ke tée ne pelem a cewéhe ni péroféta, ke a cewéhe mwo ni apulie te Padué, ke ati nina taunulé ne pwo bwohemwo18.24 Wieli a pwooti te Ioane, pana e tii a tii ce, ai wieli a behi pwooti te pa âcélo..»
19Nyebi ko piwéden ne he miiden
1É alecehe ni naado naa, ke é téne a éénaado na pwohewii ni pwocihe te nina te junihe hiwon jélé, ne jeda he miiden. Lé toii da pie:
«Pwonyebi pipaunu Padaame!
Be e caa celuimikenye!
A den a wâé me a pipwojunuun!
219.2 Deutéronome 32.43; Pii Beetihi 6.10Juuju ke mwomwon
ni tautinaado ten.
E pwocuhinaado
te ê toomwo pwopwaaden
na e pwo me alili a bwohemwo,
ko ni huô ten na ta.
Ke e pwocuhinaado ten wo Padué,
be e taunu ni eabwé ten!»
3Ke lé toii daamwo ne nina te junihe hiwon jélé pie:
«Pwonyebi pipaunu Padué!
Be tee taa dieli mwo a muu a miû
na e cini a pwomwo ubwo!»
4Ke wo lépwo 24 ukéiu, me ni âcélo na paa jélé na lé pwohewii ni wota, ke lé miibule, ke tidihi jililé he pwahamii Padué ne pwo a atebwo he daame ten, ke lé toii da pie: «Amen! Pwonyebi pipaunu Padaame!» 5Pwo a pwocihe, na e âbé mu pwo a atebwo he daame, na e pii pie:
«Pwonyebi pipaunu Padué,
wogewé ati ni eabwé ten,
na geé pipaciitieng,
me céihi ne kon,
na ubwo gewé ke wahin gewé!»
E piaten wo pa Nahi Muto
619.6 Pii Beetihi 14.2Ke é téne a éénaado na pwohewii ni pwocihe te ce apulie celi te junihe hiwon jélé. Te junihe ubwo a tihin, pwohewii a éé a tabe pwobwaatéép19.6 Pwohewii a éé a tabe pwobwaatéép—ai Pwohewii ni jié na junihe ubwo., me a pwohuu te a tikekele heme e huu me ubwo, he lé ko pii pie:
«Aléluia! Aléluia!
E pihuô wo Padué,
Padaame henye!
Te junihe pwo niihen
ne ko ati ni naado!
719.7−8 Ésaïe 61.10; Pii Beetihi 21.2Genye tai pipwodéén
me pituume,
ke genye pipaunueng!
Be, é jenaa, ke e piaten
wo pa *Nahi Muto.
Ke e pipwopweeng
ê toomwo na e pipégalieng
me ê mwoden.
8Caa ne ten a epwénen,
na a mwaanu elélowo
na pwomelaan,
na tice alili hen.»
A mwaanu elélowo, ke ni penem na wâé, na lé muko pwo ne ni apulie te Padué.
919.9 Mataio 22.2−3Ke e pii tong wo pali *âcélo pie: «Go tii pie: “*Adéi nina todelé ne ko a piwiinaado ko piaten de pa Nahi Muto.”»
Ke e pii mwo pie: «Juuju ni pwooti naa, be ni pwooti te Padué.»
1019.10 Apostolo 10.25,26; Pii Beetihi 22.8−9Ke é tidihi jiling he pwahamii pali âcélo beme é pipaunueng. Ke e pii tong pie: «Ûhu! Go nemwo wonaa, be wogenyu, ke tai lupwo eabwé te Padué, pwohewii ni béénye na lé *pajuujuhi pie, woélé ni apulie te Iésu19.10 Na lé pajuujuhi… ai Nina lé te cumang ha a juuju, na e habwii wo Iésu.. Te wo Padué cehi na me go pipaunueng. Éa, ati lépwona lé pajuuju Iésu, ke e mu kolé a *Jenen Iitihi na e mu ko lépwo péroféta, ke e ne me lé patemehi a pwooti te Padué19.10 Dernière phrase—ai A juuju na e habwii wo Iésu, ke a juuju na e pamwoiu lépwo péroféta, beme lé pipatemehieng..»
pwonehi a bwohemwo: @ 7 naado na e alihi wo Ioane <η>
(Pwahamii tii: 19.11―21.8)
1 <η> Pa atebwo pwo a haricaan pwojo
1119.11 Psaume 96.13; Ésaïe 11.4; Pii Beetihi 1.5, 6.2É alecehen, ke é alihi a miiden he tehi, ke é alihi a haricaan na pwojo. Ke pwo pa apulie na e tebwo pwon, na pii kon pie ‘Mwomwon ke Juuju’. Be mwomwon ke juuju a bwo tauti ne ni apulie ten. Ke e tauti ke e pwopa ko a mwomwon. 1219.12 Daniel 10.6; Pii Beetihi 1.14, 2.17Ni naamiin, ke pwohewii ni duwele miû, ke hiwon ni kuron pwo punin. Pwo a nii apulie na tii ne kon, na te tice pace apulie celi e temehi. Te weeng cehi na e te temehi. 1319.13 Ésaïe 63.1−3; Ioane 1.1,14Ke e cuwohe a epwén na timi ko cewéle. Ke a niin pie: ‘Pwooti te Padué’.
14Lé âcéin ne ni mwocoda he miiden, pwo ni haricaan na pwojo. Ke te ju elélowo ni epwénelé, ke te ju pwojo ehi.
1519.15 Psaume 2.9; Pii Beetihi 1.16, 14.20E wie pwon a teua na te junihe ânyee, beme pwocuhinaado te ni bele. Ke e bo pihuô me mwoiu ko a bwaja toki. Ke e bo caagetilé pwohewii a bwo caageti ne ni ace tabe megele. Weengaa a pwo-okéé ko Padué, na te junihe pwojunuun. 1619.16 Pii Beetihi 17.14Ke é pwo a epwénen, ke é pwo a pan19.16 É pwo a epwénen, ke é pwo a pan (cuisse)—Wieli é pwo a epwén na tawii lupwo pan., ke tii ne pwon pie:
Pa Apihuô te ni apihuô,
ke e Daame he ni daame.
2 <η> A meni bwaaoléé me a pa
1719.17 Ézékiel 39.17−20Ke é ali pa âcélo, na e cuwo ha a téale. Ke e ko toii da céii ni meni bwaaoléé, na lé ko téé ko miiden pie: «Geé âbé ne ko a piwiinaado ubwo na e piwâamihi wo Padué me dewé.18Geé âbé, beme geé wii a mehi ni daame, ke a mehi ni caa te coda, ke a mehi nina pwo niihelé, ke a mehi ni haricaan, me nina lé tebwo pwon. Geé wii a mehi ni apulie ati: ni *apenem tice ja kon me nina time uce ni apenem tice ja kon; ni apulie na piubwo jélé me nina piwahin jélé.»
3 <η> Imwi pa iténaado me pa péroféta agele
19Ke é ali pa iténaado me ni daame pwo bwohemwo, he lé ko pitapitihi ni mwocoda telé, beme lé pipwopa ne ko pali e tebwo pwo ali haricaan pwojo, me a mwocoda ten.
2019.20 Pii Beetihi 13.12−17, 20.10Ke imwi pali iténaado me pali péroféta agele. Weeng kuti pali e pwo li *pipwojunuun me de pali iténaado, beme e pipwohuô te li apulie, li lé hegi a ine pali iténaado, ke lé pipaunuhi a démen.
Ke lé tahilu ne ha a jié miû, he lu mwo teko mulie, beme e cinilu na a dep na éle. 21Ke tai taunu ati lépwoli apwopa telu, ko ali teua li e wie mu pwo pali e tebwo pwo ali haricaan pwojo. Ke ni bwaaoléé, ke lé tai wii, ke pwoluu jélé ko ni mehi li apulie.
204 <η> Cie Caatana he na 1000 ni jo
120.1 Pii Beetihi 9.1É alecehen, ke é ali pa *âcélo na e opé mu he miiden. Ke e pé ne he in a kilé ko a pwon na te tice anebwén kon, me a itihe toki na te junihe ubwo. 220.2 Genèse 3.1; Pii Beetihi 12.9Ke e imwi ali dragon. A dragon naa, ke pa bwien he ni bécéiuhe tan, a niin pie ‘pa apipé ne kon’, ai wo *Caatana, ‘pa acubwonikenye’. Ke e cieeng wo pali âcélo he na 1000 ni jo. 3Ke e tahieng ole ha ali pwon li te tice anebwén kon20.3 Pwon li te tice anebwén kon—Omehi note ko Pii Beetihi 9.1., ke e kiléhi bwonieng ne ha ali pwon, beme time e bo uce pipwohuô mwo te ni bele, ânebuhe a anebwén ko ni jo na 1000. Ke é alecehe anaa, ke bo tuwoeng mwo, ha a cuwo benaamwon.
420.4 Daniel 7.9,22,27; 1 Korénit 6.2; Pii Beetihi 13.17Ke é alihi ni atebwo he daame. Nina lé tebwo pwon, ke lé hegi a mwomwon me lépwo atautinaado. Ke é ali mwo lépwona taunulé. Weengi a watihen me taunulé: Be woélé lépwo apajuuju Iésu, ke lé pipatemehi a pwooti te Padué. Time lé uce pipaunuhi pa iténaado me a démen. Ke time lé uce hegi a inen ne pwo bwaadelé, ai é ne ko ni ilé. Be e caa pamulipilé mwo wo Padué mu ha amele, ke lé caa daame me Kériso he na 1000 ni jo.
5Be woélé lépwo bécéiuhen na e pwiilé wo Padué mu ha awieme ni amele. Ni béé amele, ke time lé o uce mulie cemwo mu ha amele ânebuhe a anebwén ko ni jo na 1000. 620.6 Pii Beetihi 1.6Lé te junihe pipwodéén ne ni bécéiuhe amele, be e caa pwiilé mwo wo Padué, be eânimen delé. Ke a béalohe mele20.6 A béalohe mele—Omehi a niide a tii 14., ke te tice mwomwon den ne kolé. Ke lé o pipwoeabwé te Padué me Kériso. Ke lé o daame me Kériso he na 1000 ni jo.
5 <η> Tahi Caatana ne ha a miû
7Hemepie bo caa nebwén ni 1000 jo, ke wo Caatana, ke bo pawieeng mwo mu he karépu. 820.8 Ézékiel 38.2,9,15−16Ke e o engen pitihi a bwohemwo, beme e â pipwohuô te ati ni bele pwo bwohemwo, a bwopiinen pie Gog me Magog20.8 Gog me Magog—A inenaado ko lépwona lé cubwoni Padué. Omehi Ézékiel pwahamii tii 38 me 39.. Ke e neibulé, beme lé pipwopa [ne ko Padué, me ni apulie ten]. Ke te junihe hiwon jélé koja ni won jeoté ticepwon [ke pwocoon me nye pinelé].
920.9 2 Rois 1.10Ke lé â ati pwo a bwohemwo, ke lé mu aujenihi a apimu ibu te ni naî Padué: a pwomwo ubwo na te junihe eânime Padué kon. Ke e opé mu he miiden a miû te Padué, ke e te cini ati kuti a bele na e neibuhi wo Caatana.
1020.10 Psaume 11.6; Pii Beetihi 19.20, 21.8Ke mepwo é ne ko Caatana, pali e pipwohuô telé, ke tahieng ne ha a jié miû me a dep na éle, pele pali iténaado me pali péroféta agele. Ke lé o te junihe picani bwén ke pwang, dieli mwo.
6 <η> A bénebwéne tautinaado
11É alecehen, ke é alihi a atebwo ubwo he daame na te ju pwojo ati. Ke pwo pa apulie na e tebwo pwon. Ke tieden a miiden me a bwohemwo ne he pwahamiin, ke caa time genye bo uce alilu mwo. 1220.12 Daniel 7.9−10; Mataio 25.31−46; Apostolo 17.31; 2 Korénit 5.10; Pii Beetihi 13.8Ke é ali ni apulie na lé caa mele, nina pwonaado ne kolé ke nina piticenaado ne kolé, he lé ko cuwo ânebuhe ali atebwo he daame.
Ke tehi a tii ko [ni apulie na lé bo hegi] *a ju mulip dieli mwo. Ke pwo ni béé tii na tehi mwo, na tii ne hen ati ni bwomu te ni apulie. Ke tauti ni amele, âcehi ana tii ne he ni tii naa. 1320.13 Roma 2.6; 1 Pétéru 1.17; Pii Beetihi 2.23, 22.12A jié, ke e ne mwo nina lé mele ne he jié. A mele, ke a amu te ni amele, ke lé ne mwo ni amele na lé wéilé. Ke tai woélé, ke tai tautilé, ne he nina lé mu ko pwo. 14Ke a mele, ke a amu te ni amele, ke tai tahilé ne ha a jié miû. A jié miû, ke a béalohe mele. 1520.15 Psaume 69.30Ke mepie pwo ace apulie celi time uce tii a niin ne ha a tii ko a mulip, ke o tahieng ne ha a jié miû.
217 <η> A miiden me a bwohemwo @ na mwo coho
121.1 Ésaïe 65.17; 2 Pétéru 3.13É alecehen, ke é alihi a miiden me a bwohemwo na mwo coho. Be caa tieden a bécéiuhe miiden me a bécéiuhe bwohemwo, ke caa tieden mwo a jié. 221.2 Ésaïe 52.1, 61.10; Ébéru 11.16, 12.22; Pii Beetihi 3.12Ke é alihi a pwomwo ubwo iitihi, a *Iérusaléma na mwo coho, he e neopé mu he miiden wo Padué. E te junihe pipwopweeng, pwohewii êce toomwo celi e pipwopweeng ne ko pa aiu hen, beme lu piaten. 321.3 Lévitique 26.11,12; Ézékiel 37.27; Zakari 2.14; 2 Korénit 6.16Ke é téne a pwocihe na ubwo na e âbé mu pwo a atebwo he daame, na e pii pie:
«É jenaa, ke wo Padué,
ke e ha awieme ni apulie.
Ke lé o caa bele ten.
Ke e o caa mu pelelé,
ke o caa Padué helé.
421.4 Ésaïe 25.8, 35.10, 65.19; Pii Beetihi 7.17Ke e bo tahi ati ni tabehaamiilé.
Ke caa tieden a mele,
ke caa tice téé me picani.
Be caa tieden ni naado bwolihi.»
521.5 2 Korénit 5.17Ke e pii wo pana e ko tebwo pwo ali atebwo he daame pie: «Geé alihi! Be é pemihi ati ni naado me tai coho.»
Ke e pii mwo pie: «Go tii, be juuju ke mwomwon ni pwooti tong.»
621.6 Ésaïe 55.1; Jérémie 2.13; Ioane 7.37; Pii Beetihi 1.8,17, 22.17Ke e pii tong mwo pie: «Caa tai cuwo ati! Be woéo, ke é Alfa, ke é Oméga; woéo, na é atabuhi kon, ke é anebwén kon. Wo paceli nimen me e ûdu, ke é bo ne ten me e ûdu a tabe na te tice cuhin: a tabe he a acaamatabe ko a mulip. 721.7 2 Samuel 7.14; Psaume 89.27−28Ke é bo ne te lépwona lé piwéden ati ni *adéihi naa. Ke é bo Dué helé, ke lé bo naîng.
821.8 Mataio 25.41; Ébéru 10.38−39; Pii Beetihi 20.15, 22.15«Ke mepwo é ne ko ni béén [ke é bo pwocuhinaado telé]21.8 Time uce a pwooti te lépwona nimelé me lé piténede Padué kehe icehi ana lé tupwo, ke pwo nina ta he ni béé benaamwon. A pwooti te lépwona lé jéilé ne ko Padué die ha a pwonehin.:
Nina mwotilé me lé pwo celi wâé;
Nina muhi telé me lé céihi;
Nina lé gele;
Nina mwiihi ni bwomu telé;
Nina lé pipule hauli;
Nina lé pitaunulé;
Nina lé pwodooki;
Nina lé pipaunuhi ni *déme duéé.
«Ati ni apulie naa, ke o tahilé ne ha a jié miû, me a dep na éle. Be weengaa a béalohe mele te ni apulie naa.»
A Iérusaléma na mwo coho
9É alecehen, ke e âbé beniéo wo pa céiu béé lépwoli 7 *âcélo, li lé pé li mwotabe li oba ko li 7 bénebwéne apwohi li ubwo. Ke e pii tong pie: «Go âbé, me é habwii tem ê ewa toomwo na e caa pipégalieng wo pa *Nahi Muto me e mwoden.»
1021.10 Ézékiel 40.2Ke e âbé kong a *Jenen Iitihi, ke e pééo da pwo a juwole na te junihe ubwo, ke te junihe bwali. Ke e habwii tong a pwomwo ubwo iitihi Iérusaléma na e neopé wo Padué mu he miiden. 1121.11 Ésaïe 60.1−2,19Ke pwéélang kon *a wâé te Padué. Ke pwomelaan pwohewii a péi na te junihe ubwo a cuhin, pwohewii a péi na pun bupwi, na te junihe piniêdiihi pwohewii a kéle. 1221.12−13 Ézékiel 48.30−35Ni goomwa babé, ke te junihe bwali, ke tabo. Ke 12 ni pomwa kon, ke 12 ni âcélo na lé wéihi. Ke tii, ne ko ni pomwa, ni nii ni 12 pwomwoiu te a bele *Isaraéla. 13Cié ni pomwa he ni piduaan: cié he na e taa tuie lang a téale, ke cié he na e nuule lang na a téale, ke cié ne he pwon, ke cié ne cehimwa. 14Ni goomwa babé, ke ne a paan pwo ni péi na 12. Ke ni péi na 12 naa, ke e pwon ni nii ni 12 *apostolo te pa Nahi Muto.
A ja ko a pwomwo ubwo
1521.15 Ézékiel 40.3; Pii Beetihi 11.1Ke e pé a béja a womeéle na mwani megele wo pa âcélo na gemu picihe, beme e jahi a pwomwo ubwo, ni pomwa kon, ke a babé kon. 16Ke te ju piwie jame ni goomwa he ni piduaan na paa. Ke e jahi ko ali béja womeéle, ke te tai 12000 ni jame ni piduaan nge hemwo, ke é da ko miiden21.16 12000—A ocine ko a bwo pimu ibu te Padué me ni apulie ten. 12000 = 3 x 4 x 1000. 3 = numéro te Padué (Caa, me pa Naîn, me a Jenen Iitihi); 4 = ni 4 piduaan nord, sud, est, ouest; 1000 = ocine ko ni apulie na hiwon. A céiu mwo, 12 = a céiu inenaado ko lépwo apulie te Padué. Omehi Pii Beetihi 7.4−8.. 17Ke e jahi li goomwa babé, ke e pwo 144 béja21.17 Béja—Coudée: demi-mètre. (A jame a i pa apulie, mu ko ni mwodéin, die ko ni juluuin.). Be e te jahi ko a béja te ni apulie wo pali âcélo.
1821.18−21 Ésaïe 54.11−12Ni goomwa babé, ke pwo ko ni péi na te junihe ubwo a cuhin, na pun bupwi. A pwomwo ubwo, ke mwani megele, na te junihe piniêdiihi pwohewii a kéle. 19Ni péi paa a babé kon, ke lé pwonaamuun ko ni péi na te junihe ubwo a cuhin, ne he ni muko pétaapwo bwomunen:
A bécéiuhe péi paan, ke pun bupwi;
A béalohen, ke pun;
A béciéhen, ke pihiwon ni apunen;
A bépaahen, ke pun bupwi ke pun miiden;
20A bénim hen, ke megele pwohewii a cewéle;
A bé6 hen, ke megele bwiile;
A bé7 hen, ke pun bupwi pwojo;
A bé8 hen, ke muuéi pwojo;
A bé9 hen, ke nyen;
A bé10 hen, ke nyen pun bupwi;
A bé11 hen, ke megele nyen;
A bé12 hen, ke muuéi.
21Ni 12 pomwa, ke ni perle na 12. Ke ni muko pétaapwo pomwa, ke te pwo ko a perle na te céiu. Ke te ju mwani megele a apimu ibu te ni apulie, ke pwéélang pwomelaan.
Pwéélang a pwéélang de Padué
22Kehe time é uce alihi ace *mwaiitihi, be a mwaiitihi ten, ke wo Padaame Padué na pwojunuun ne ko ati ni naado, me pa Nahi Muto. 2321.23 Ésaïe 60.19−20; Pii Beetihi 22.5Ke a pwomwo ubwo, ke caa time e uce hane a pwéélang ko a téale, me a wole. Be a wâé te Padué, ke caa te pwéélang kon. Ke wo pa Nahi Muto, ke a pwéélang den. 2421.24 Ésaïe 60.3,5Ke lé bo mulie ha a pwéélang ko a pwéélang den na ati ni bele. Ke ni daame pwo bwohemwo, ke lé bo pé ngen ati ni wâé telé. 2521.25 Ésaïe 60.11Ke o caa time uce capuhi ni pomwa ten, be o caa time uce bwén hen. 26Ke ni bele pwo bwohemwo, ke lé bo pé ngelang, ati ni naamuulé me ni wâé telé.
2721.27 Ésaïe 52.1; Ézékiel 44.9; 1 Korénit 6.9−10Te tice ace céiu naado celi mwiihi, celi e o taa ha a pwomwo ubwo naa. Ke time lé o uce taa lang ne ni apulie na mwiihi ni huô telé, ke lépwo agele. Kehe te icehi nina caa tii ni niilé ne ha a tii ko a mulip te pa Nahi Muto.
22A éémwa na e ne a mulip
122.1 Ézékiel 47.1É alecehen, ke wo pali *âcélo, ke e habwii tong a éémwa na e ne a mulip. Te ju bwakenu, na e téte mu ko a atebwo te Padué, me pa *Nahi Muto, 222.2 Genèse 2.9; Ézékiel 47.12; Joël 4.18; Zakari 14.8é ha awieme a apimu te ni apulie ati ne ha a pwomwo ubwo. Ke é ko lupwo jije éémwa, ke e cuwo lang a acuwo ko a mulip. Ke e ne ni acehin, he na 12 ni wole ha a jo. Ke ni madihin, ke lé pwo me etihelé na a bele. 3Ke o caa te tice apwohi.
Ke o caa e ha a pwomwo ubwo a atebwo te Padué me pa Nahi Muto. Ke lé bo pipaunu Padué wo lépwo eabwé ten. 422.4 Mataio 5.8; Pii Beetihi 3.12Ke lé bo alihi a pwahamiin. Ke a niin, ke o bo tii ne pwo ni bwaadelé. 522.5 Daniel 7.18,27; Pii Beetihi 5.10, 20.6, 21.23,25Ke o caa te tice bwén, ke o caa te tice apulie celi lé hane me pwéélang kolé, ce mwomiû, ai a pwéélang ko a téale. Be wo Padué, ke e bo pwo me pwéélang ko ni eabwé ten a pwéélang den, ke lé bo daame dieli mwo.
Bénebwéne pwooti
622.6 Pii Beetihi 1.1É alecehen, ke e pii tong wo pali âcélo pie: «Ni pwooti ce, ke mwomwon, ke juuju. Ke e ne a *Jenen Iitihi te ni péroféta wo Padaame Padué. Ke e pahede pa âcélo ten, me e â habwii te ni eabwé ten, nina e o caa tuie.»
E mwojuia cemwo wo Iésu
722.7 Pii Beetihi 1.3E pii wo Iésu pie: «Geé téne, é o caa âbé!»
*Adéi pa apulie na e piténedehi ni pwooti te Padué na e ha a tii ce!
822.8 Pii Beetihi 19.10Woéo Ioane na é alihi ke é téne ni naado naa. Ke me é caa nebwén ko téne ke alihi ni naado naa, ke é tidihi jiling ko ni a pali âcélo na e habwii tong ni naado naa, beme é pipaunueng.
9Kehe e pii tong wo pali âcélo pie: «Ûhu! Go nemwo wonaa, be woéo, ke te pa eabwé pwohewiiko, pwohewii ni béé péroféta, ke pwohewii mwo nina lé ténedehi ni pwooti na e ha a tii ce. Te wo Padué cehi na me go pipaunueng.»
10Ke e pii tong mwo pie: «Go nemwo cile me dem cehi, ni pwooti te Padué na élé ha a tii ce. Be caa e mwonu a tan, na e o caa pacuwohi ati ninaa wo Padué.
1122.11 Daniel 12.10«Wo pana ta nang, ke wâé heme e te cuwo ko pwo ana ta! Ke wo pana wâé ten me e te cuwo ko pwo ana mwiihi, ke wâé heme e te cuwo ko pwo ana mwiihi! Ke wo pana wâé nang, ke wâé heme e te cuwo ko pwo ana wâé! Ke wo pana e mulie me de Padué, ke wâé heme e te cuwo ko mulie me de Padué!»
Woéo na é atabuhi kon ke é anebwén kon
1222.12 Ésaïe 40.10; Jérémie 17.10; Pii Beetihi 2.23E pii wo Iésu pie: «Go téne, be é o te ju téele âbé! Ke é bo pébé ni cemung. Ke é bo muko ne telé, ne he ni muko bwo penem delé. 1322.13 Ésaïe 44.6; Pii Beetihi 1.8,17, 21.6Woéo, ke é Alfa, ke é Oméga, pa bécéiuhen, ke pa bénebwénen, pa atabuhi kon, ke pa anebwén kon.»
1422.14 Genèse 2.9, 3.22«Adéi nina lé puu ni epwénelé. Be o pwo mwomwon delé me lé wii a acehi a acuwo ko a mulip. Ke o pwo mwomwon delé me lé taa he ni pomwa ko a pwomwo ubwo. 15Ke lé mu pwomwo ne nina lé mulie hauli, ke ni apwodooki, ke ni apipule hauli, ke ni ataunuhi apulie, ke nina lé pipaunuhi ni *déme duéé, ke ni agele!
1622.16 Nombres 24.17; Ésaïe 11.1,10; Roma 1.3; Pii Beetihi 2.28, 5.5«Woéo Iésu, ke é pahede pa âcélo tong, beme e â patemehi ninaa, me de ni acéihi. Ati ninaa, ke juuju. Be woéo, ke pa piebehi a pwomwoiu te pa daame *Davita; woéo pa ceni pwopwometan, na é pé da a téale.»
1722.17 Ésaïe 55.1; Pii Beetihi 21.6A Jenen Iitihi me ê Apiaten, ke lu pii pie: «Âbé!» Ke wo paceli e téne anaa, ke me e pii pie: «Âbé!» Ke me e âbé wo paceli nimen me e ûdu. Wo paceli nimen kon, ke e o hegi me tice cuhi a tabe na e ne a mulip.
Nemwo taatééhi ni âne a pwooti ce
1822.18−19 Deutéronome 4.2, 13.1Woéo Ioane, na é patemehi te ati ni apulie na lé téne ni pwooti na e ha a tii ce, pie: Mepie pwo pace apulie, celi e pibitehi ni pwooti na e ha a tii ce, ke wo Padué, ke e o pinebehi ni apwohi na ubwo na tii ne ha a tii ce. 19Ke mepie e pétaabwon ace céiu naado mu he ni pwooti na e ha a tii ce wo pace céiu apulie, ke wo Padué, ke e o pétaabwon kojaeng a den mu ko a acehi a acuwo ko a mulip, ke a den mu ko a pwomwo ubwo iitihi na tii ne ha a tii ce.
2022.20 Pii Beetihi 2.16Wo [Iésu] pana e *pajuujuhi ni naado naa, ke e pii pie: «Éa, é o te ju téele âbé!»
Amen! Âbé, go Padaame Iésu!
21Ke a wâé te Padaame Iésu, ke e bo mu pelewé ati!
Adéikewé!