Tii nge céii lépwo
Ébéru
Atabuhi ko a tii
Woo na e tii a tii ce?
Time nye uce temehi ace nii paceli e tii a tii ce. Kehe icehi ana nye temehi pie, te pa céiu Juif, na e céihi ne ko Iésu. Pana e temehi ehi a pwoiitihi te lépwo Juif, me a Élele Iitihi Ânebun. Ke pa apulie na e temehi ehi a bwo pwotii he pwo grek, be a bwo pwotii ten, ke te junihe wâé.
E tii éniile?
Ânebuhe a jo 70. Be é ha a jo 70, ke wo lépwo coda roma, ke lé tanahi a mwaiitihi te lépwo Juif ne Iérusaléma, ke lé pacuwohi ati ni âpwailo te lépwo Juif, na e pii wo pana e tii a tii ce. (Omehi ni pwahamii tii 9 me 10.)
E tii me dee?
Te lépwo Juif, lépwo Ébéru, na lé caa céihi ne ko Iésu. Wieli lé neibuhi ni pwooti ten na hiwon, ne ha a tii na céiu, beme lé ne te ace céiu puco te ni acéihi.
É ko ade na e tii?
E tii beme lé temehi ehi a penem na e pwo wo Iésu me delé. Ke e pamwoiulé, beme lé cumang, ke me lé picani ne kolé, be lé ko mulie ha a benaamwon na lé pipwotahi ne kolé.
Ade ace âne a tii ce?
Ati ni patén me ni âpwailo te lépwo Juif ne ha a Élele Iitihi Ânebun, ke te a déme cehi a âpwailo na e pwo wo Iésu Kériso he e mele me denye. Be a âpwailo ten, ke e taatééhi ati ni âpwailo ânebun. Be, é ne he Kériso, ke wo Padué, ke e pwo ne te ni apulie a piapwo na mwo coho. Wo Iésu pana e pébé ni adéihi ko ni piapwo, ke weeng pa apipépwooti, ha awiemenye ni apulie me Padué. Be te pa apulie, ke te pa ju naî Padué, na te céiu nang. Be e mu pele Padué Caa, ânebun, ke é dieli mwo. Kehe icehi ana e opé ne éni pwo bwohemwo, ke e pé a éé apulie. Ke e pwo a âpwailo na hején, he e pineeng me e mele. Ke tée a cewéhen he e mele ne ko a kuricé, beme pineuhi ati ni ta pwo tenye. Ke é mu ko Kériso, ke jan me nye â pele Padué ha a pipwodéén. Ke caa time nye uce hane mwo me nye pwo mwo ace céiu âpwailo.
A bwomune a tii Ébéru
Wo Iésu Kériso, ke e piwéden (1.1―4.13)
E piwéden koja ni âcélo (1.4−14)
E pébé a pwaaden na te nihe pwonaado ne kon (2.1−18)
E piwéden koja Moosé wo Iésu (3.1−6)
Hegi a ju péém na e pébé wo Iésu (3.7―4.13)
Wo Iésu ke pa apipépwooti hadeniinye me Padué (4.14―10.18)
E pé a éé apulie, ke e piténede Padué (4.14―5.10)
A bwo paténe lépwo acéihi (5.11―6.12)
E pacuwohi nina e caa mi pii wo Padué (6.13−20)
Wo Melkisédek ke e déme Kériso (7.1−28)
Pa apwoâpwailo ubwo tenye wo Iésu Kériso (8.1−13)
Time uce jan ni âpwailo ânebun me pineuhi ni ta (9.1−10)
Hején a âpwailo te Kériso (9.11−28)
E te océiu ko pwoâpwailo wo Kériso (10.1−18)
Ni béhabwiinen de lépwo acéihi (10.19―13.25)
A céihi te ni Isaraéla ânebun (11.1−40)
Genye tai cumang pwohewii Iésu (12.1−29)
Bénebwéne pwooti (13.1−25)
1wo iésu kériso ke e piwéden
(Pwahamii tii: 1.1―4.13)
1É ânebun, ke e pacihe lépwo watihenye1.1 Watihenye—Wo pana e tii a tii ce, ke pa céiu Juif, ke e tii ne te lépwo béén na te lépwo Juif mwo. Ke lé caa tai céihi ne ko Kériso. wo Padué, na lé pwaadeniin bé ne ni *péroféta ten, ne he ni bwopwonen na hiwon. 21.2 Ioane 1.3Ke, é ha a benaamwon ce, na caa *ni bénebwéne tan, ke e pacihekenye ko pa Naîn. Be é mu kon, ke wo Padué, ke e tabuhi a miiden me a bwohemwo me ati ni naado na lé mu hen. Ke te weeng kuti, na e pipégalieng wo Padué, beme e bo ne ten ati ni naado naa. 31.3 Apostolo 2.33−34; Kolosé 1.20; Ébéru 8.1Me genye ali pa Naîn, ke genye alihi *a wâé me a bwo ubwo Padué Caa. Be te piwielu ne ha ati ni bwopwonen. Ati ni naado na lé tuie, ke lé te tai mulie mu ko ni pwooti ten, na nihe pwojunuun.
Te weeng kuti pa Naîn, li e puu taabwon ni ta pwo tenye. Ke é alecehen, ke e mwojuia daamwo he *miiden, pele Padué. Ke wo Padué, pana te nihe pwojunuun, ke e pwo me e tebwo *pwo a juin [beme e pihuôhi ati ni naado].
E piwéden koja ni âcélo
41.4 Filipi 2.9Wo Padué, ke e ne me e piwéden1.4 E piwéden—ai E caa piwéden, ai E bo â piwéden. koja ati ni *âcélo wo pa Naîn. Ke e ne ten a nii apulie, na te nihe pwonaado ne kon, koja ati ni nii apulie. 51.5 2 Samuel 7.14; 1 Chroniques 17.13; Apostolo 13.33Be time e mu uce pii te pace céiu âcélo wo Padué pie:
É jenaa, ke é pii beetihi:
Wogo pa naîng,
ke woéo pa caa tem.Psaume 2.7
Ke a céiu mwo:
O woéo pa caa ten,
ke bo pa naîng.2 Samuel 7.14
61.6 Roma 8.29Kehe me e habwii pa Naîn1.6 Me e habwii pa Naîn… Grek: Me e pé pa cuwo ni ewa ne pwo bwohemwo [monde]. Wieli a bwo pituie te Kériso, ai a bwo mwojuia cemwo ten ha ace céiu tan. A pwooti grek ce, ke a bwopiinen pie: A atebwo, ai a amu, ai a mwametau. Wieli é ne éni pwo bwohemwo, ai hemepie é jeda he miiden., ne pele lépwona lé mu pelen, ke e ne ten a mwomwon de pa bécéiuhe ewa. Ke e huôhi pie:
Wâé heme ati ni âcélo tong,
ke me lé tai pipaunueng.Psaume 97.7
71.7 Psaume 104.4Ke mepwo é ne ko ni âcélo, [ni apipenem den] ke e pii wo Padué pie:
É ne me lé pwohewii a dan1.7 A dan—He pati ni Ébéru, ke a bwopiine a dan, ke te a jenen mwo.,
ke me lé pwohewii ni duwele miû.Psaume 104.4
Pwooti ko pa Naîn
81.8 Psaume 45.7−8Kehe icehi ana weengi ana e pii ne ko pa Naîn:
Te wogo [pa Naîng]
ke wogo Padué1.8 Wogo Padué—Ni pwooti naa na e ha a Psaume 45, ke a pwooti te pa céiu apwonyebi, ko a bwo piaten de pa céiu daame. É ne éni, ke e pii wo pana e tii a tii te lépwo Ébéru, pie, wo Padué Caa, ke e pii anaa te Iésu Kériso, pa Naîn. E wonaa wo Padué beme e habwii te ni apulie pie, wo Iésu, ke pa daame he a bwohemwo ati.!
O te tice pwonehi a Mwametau tem.
Go bo Daame dieli mwo.
O mwomwon a bwo pihuô tem.
9Wâé tem a mwomwon,
ke muhi tem ko a ta.
Ke woéo Padué Caa tem,
ke é caa pipégaliko1.9 Pipégaliko—Grek: Oint. Omehi note ko Luka 4.18.koja ni béém.
É céihi a tabe ûde ne pwo punim.
É ne tem a pipwodéén
na te nihe ubwo wéden.Psaume 45.7−8
101.10−12 Psaume 102.26−28E pii mwo wo Padué ne ko pa Naîn pie:
É ha atabuhi kon,
ke te wogo Padaame1.10 Te wogo, Padaame—Ni pwooti naa na e mu ha a Psaume 102, ke ni pwooti te pa céiu apulie te Padué. É ne éni, ke e pii wo pana e tii a tii te lépwo Ébéru pie, wo Padué Caa, ke e pii anaa te pa Naîn, Iésu Kériso.,
na go tabuhi a bwohemwo.
Go pwo ko ni im a miiden.
11-12O bo tieden a bwohemwo ati,
me a miiden [me ati nina e mu hen].
Kehe icehi ana te wogo cehi
na go o bo mu dieli mwo.
Go o tapipidulé pwohewii a epwén.
Go o capipilé
pwohewii a ukéiu talihi.
Te wogo cehi na go te mu cawi;
go te *mulie dieli mwo.Psaume 102.26−28
131.13 Psaume 110.1Ke weengi a céiu naado li e pii wo Padué:
Go âbé tebwo éni pwo a juing.
[É ne tem a pihuô.
Ke o pipaunuko dieli mwo.]
É pwo me go caaite
nina lé pipwopa ne kom.Psaume 110.1
Kona geé niimihi pie, e pii anaa te pace céiu âcélo ten? [Ûhu! E pii anaa te pa Naîn!]
141.14 Psaume 34.8, 91.11Be mepwo é ne ko lépwo âcélo, ke te ju ni apipenem cehi. Be e pahedelé wo Padué, beme ni apicani tenye, wogenye na e bo celuimikenye.
2E pébé a pwaaden @ na te nihe pwonaado ne kon
Nemwo pwo me piticenaado ne kon
1É mu ko anaa2.1 Anaa—A bwo ubwo na a wâé te pa Naî Padué, na e pii ehi ne ha a pwahamii tii 1., ke wâé heme genye engen ehi, cehi ni pwooti na genye téne. Be koli genye bo piâ ité kojan. 22.2 Galat 3.19Be é ne ko ni *patén de Moosé2.2 Patén de Moosé—Grek: A pwooti na lé pébé wo lépwo âcélo, ke e cuwo. Lé pii wo lépwo Juif pie, lé hegi ni patén de Moosé na lé pwaadeniin bé wo lépwo âcélo. Omehi Apostolo 7.53., ke e habwii pie a juuju, ke e pwo me lé pwocuhinaado ati wo lépwona time lé uce ju âcehin.
32.3 Ébéru 10.29, 12.25Kehe icehi ana [wo Padué, ke] e caa ne tenye a pwaaden na te nihe pwonaado ne kon! Ke genye o woté ko ace bwo cela tenye ko a cuhinaado, hemepie time genye uce âcehi a pwaaden naa?! Be te wo Padaame Iésu li e mi patemehi a pwaaden. Ke wo lépwona lé téneeng, ke lé *pajuujuhi ne tenye.
42.4 Maréko 16.20; 1 Korénit 12.4,11Ke wo Padué mwo, ke e pipajuujueng ne ko ni *inenaado na pwojunuun: ni naado na lé o téetihi ne ni apulie. Ke e muko ne ni âpipati, na e pwaadeniin bé na a *Jenen Iitihi, âcehi ana nimen kon.
E pwo me piwahin nang me denye
5É ko pacihekewé ko a Mwametau2.5 Mwametau—Grek: Monde. na e o bo tuie. Ke o time uce ni âcélo na e bo nelé me lé pihuô nelang wo Padué. 62.6 Psaume 8.5−7Be e pii ten wo pa céiu apulie, ne ha a céiu duaan ne he ni *tii iitihi pie:
Woo pa apulie,
beme go o niimieng, [go Padué]?
Ke é mu ko ade na eânimem
de pa nahi apulie2.6 Pa nahi apulie—A pwooti mu ha a Psaume 8.5−7, na a pwooti konye ni apulie. Kehe icehi ana wo pana e tii a tii te lépwo Ébéru, ke e pii pie wo Iésu, na pii kon pie, pa Nahi Apulie.?
7Go pineeng ole koja lépwo âcélo
ha a cuwo benaamwon.
Go ne ten a kuron he daame.
Go pwo me pipaunueng.
8Go tai ne haahi ni an
[me e pihuô ne ko ati ni naado].Psaume 8.5−7
Be te tice ace céiu naado celi e o mu ité koja ni pihuô ten2.8 Pihuô ten—ai Pihuô tenye. Wieli e piikenye ni apulie, ai wieli wo Iésu Kériso, pa Nahi Apulie.. Kehe icehi ana é jenaa, ke genye te ju alihi ehi, pie mwo time uce cuwo ati ni pwooti naa. 92.9 Filipi 2.8−9Ke genye alihi mwo pie, e caa neole Iésu haahi ni âcélo, ha a cuwo benaamwon. Be e mu he ni picani, ke e mele me denye, ati ni apulie, é mu ko a *pipwoééhe tice ja kon de Padué. Ke é mu ko ana e pwo wo Iésu, ke caa ne ten a kuron: a bo lépwo daame. Ke genye alihi pie pipaunueng [pwohewii a pwooti naa, ne he ni tii iitihi].
Pa cuwo ati ni naî Padué
10Wo Padué, ke e ne ati ni naado me den, ke e tee ko wéa kolé. Pwo ni béé naî Padué mwo, na te nihe hiwon jélé [wogenye kuti2.10 Wogenye kuti—Geme caa tii pie wogenyeni naîn ne he ni niide a tii 10−18, be wogenye ni naî Padué, wogenye na nye céihi ne ko Iésu. Omehi Ébéru 3.6.]. Ke wâé ten, me genye tai mu ha a bwo ubwo na a wâé ten, na e pipwaadeniin bé a bwo mu he ni picani te Iésu me a bwo mele ten. Ke é mu ko anaa kuti, ke wo Padué, ke e ne te Iésu a atebwo na hején, ke jan ne kon. Be wo Iésu, ke Padaame na e *celuimi ati ni naî Padué, ke e pipéélé nge [ha *a ju mulip2.10 (Niide a tii)—ai Ati ni naado, ke ni den [de Padué] ke lé âbé mu kon, ke lé mu kon. Ke e pé ni naîn na hiwon jélé ne ha a bwo ubwo na a wâé ten. Ke wâé ten me e pwo me hején [Iésu] na e pwaadeniin bé a bwo mele ten, weeng [Iésu] pana e tabuhi a bwo celuimilé. Ni pwooti, ke lé pwo me hején [Iésu] ke wieli a bwo hegi nen den a atebwo ten ne he miiden, ai wieli a bwopiinen pie, o hején a bwo celuimikenye ten.].
112.11 Mataio 25.40Te wo Iésu kuti, na e pwo me pwéélang ni pwonimenye, ke e péékenye, wogenye ni apulie ten, nge céii Padué2.11 E péékenye…nge céii Padué—ai E tuwo ni apulie koja ni ta pwo telé. Grek: E pwo me lé iitihi. [pa caa ten] beme céiu pa caa tenye ati me weeng. É mu ko anaa kuti, na time uce tanim nang me e pii konye pie ni âjiénen. 122.12 Psaume 22.23Be weeng na e pii te Padué pie:
É bo pipatemehi a niim
te lépwo âjiénung.
É bo pwonyebi ko ni nyebi tem,
heme lé pitapitilé2.12 Ni pwooti mu ha a Psaume 22.23, ana e tii wo pa daame Davita. Wo pana e tii a tii ce te lépwo Ébéru, ke e pii pie, te wo Iésu na e mi pii ni pwooti naa te Padué, he li lu mu he miiden, ânebuhe a bwo tabuhi na a bwohemwo..Psaume 22.23
132.13 Ésaïe 8.17,18Ke e pii mwo pie: Woéo mwo, ke é bo céihi ne ko Padué.Ésaïe 8.17
Ke a céiu mwo:
Woéo-ni, me ni béén
na e nelé tong wo Padué,
beme ni naîng.Ésaïe 8.18
E pé a éé apulie pwohewiikenye
142.14 1 Ioane 3.8; Pii Beetihi 12.10Wogenye ni naî Padué, ke tai etenye ati, a éé apulie na e bo mele. Ke e pé a éé apulie wo Iésu, beme e pwohewiikenye. Ke e caa mele me denye, beme e pétaabwon a junuu *Caatana, pana e pwo me genye mele. 15Ke me wonaa, ke e tuwokenye koja a bwo mwotikenye ko a mele, na genye teko mu hen ânebun, ati he ni tan.
16Genye temehi ehi pie, time e uce âbé wo Iésu beme e picani te ni âcélo. Kehe e âbé picani te ni piebehi *Abérama. 17Ke e pipwohewiikenye, ne ha ati ni bwomunen. Be [mepie time uce wonaa, ke wieli o time uce jan me] pa apipépwooti2.17 Pa apipépwooti… e caa apwoâpwailo. Omehi a note ko Ébéru 6.19−20. ha awiemenye me Padué. Ke e caa *apwoâpwailo ubwo tenye, na e piténede Padué, ne ha a bwo penem den. Ke e pipwoééhenye [wogenye na tice niihenye]. Ke e pwo a âpwailo, beme pineuhi ni ta pwo tenye. 18Ke te jan me e picani tenye, hemepie e tuiebé ne konye ni tacebwén. Be e temehi ni tacebwén, me ni picani mwo.
3E piwéden koja Moosé wo Iésu
13.1−2 Nombres 12.7; Ébéru 4.14, 7.26Ni acéihi bééng, wo Padué, ke e caa todekewé, beme geé apulie ten. Ke wâé heme geé nenimewé ne ko Iésu, be pa watihe a céihi tenye. Be e neeng bé céiikenye wo Padué, beme pa *apwoâpwailo ubwo tenye. 2Ke e piténede Padué na e pipégalieng, ke e penem den ehi pwohewii *Moosé, he li e penem me de ati a puapulie te Padué, a mwa ten.
3Kehe icehi ana te nihe pwonaado ne ko Iésu, ke wâé heme te nihe pipaunueng koja Moosé. Be pa abahi mwa, ke e te nihe piwéden koja a mwa. 4Be muko pétaapwo ni mwa, ke te pwo ni abahi mwa, ke te wo Padué, na e pwo ati ni naado.
53.5 Nombres 12.7Mepwo é ne ko Moosé, ke te nihe pa apenem ehi, ne ha ati a mwa te Padué, ke e te nihe piténedeeng. Kehe icehi ana te ju pa apenem cehi. Be te ju pa déme3.5 Pa déme—Grek: Pa apajuujuhi nen. ati nina e bo patemehi wo Padué, alecehen. 6Ke wo *Kériso, ke pa *Naî Padué ne ha a mwa te Padué, ke ne ten a pihuô. Ke a mwa naa, ke wogenye, hemepie genye te *ucéihi ne ha a céihi, ke genye imwi mangihi a céihi tenye.
Hegi a ju péém na e pébé wo Iésu
Nemwo pwohewii ni Isaraéla
73.7 Psaume 95.7−11É mu ko ninaa, ke [wâé heme nye piténedehi] nina e pii na a *Jenen Iitihi pie:
Me geé téne a pwoto te Padué
ha a tan jenaa,
83.8 Exode 17.7; Nombres 20.2−5ke geé piténedehi3.8 Ke geé piténedehi… Grek: Geé nemwo pwo me mwoiu ni pwonimewé, pwohewiin ânebun, he muhi tewé kon.!
Geé nemwo bitekewé kojan
pwohewii [ni *Isaraéla] ne ha a melé3.8 Melé—Da (désert). A duaan na ticie hen..
Be muhi telé ko Padué helé,
ke lé ne jéilé ne kon.
Lé tee pipwopwocihe
ko ni bwomu telé.Psaume 95.7−8
9[Ke te piwien mwo me ana e pii ne kolé wo Padué, pie]:
Lé tacebwéniéo ne ha a melé
wo lépwo caa tewé,
ke lé alihi3.9 Ke lé alihi—Ai, É mu ko anaa, ke lé alihi—ai Kehe icehi ana lé caa alihi.ana é pwo
10ne he na 40 ni jo.
É okéé ne kolé, ke é patemehi pie:
“Lé ne jéilé ne kong,
ke time lé mu uce piténedeéo3.10 Dernière phrase—Grek: E pahaulilé taaci ni pwonimelé. Time lé uce temehi ni pwaadeniing.!
113.11 Nombres 14.21−23O time lé bo uce tuie
nge ha amwaale tong,
[a péém] na é caa pipwopweehi!”Psaume 95.9−11
Nye nemwo pwo me mwoiu ni puninye
12Geé pipwocile, wogewé ni bééng! Be mepie geé cile ni âniimihinaado na ta, ke mepie muhi tewé me geé céihi, ke wieli geé bo piâ ité koja Padué na e mulip. 13Be a ta na genye pwo, ke e pahaulikenye, ke e pwo me mwoiu ni puninye [ke e pwo me genye bitekenye koja Padué]. Ke anaa, na me geé te pipamwoiukewé ibu, beme time e uce tuiebé kowé ninaa! Ke geé wonaa ati he ni tan. Be a tan naa, [na caa te tii ne he ni tii iitihi] ke caa te é jenaa [kehe time bo uce é meé]!
14Genye caa béé Kériso, wogenye na nye céihi ne kon. Ke wâé heme genye imwi mangihi a céihi naa, pwohewiin he li genye céihi, die ha a pwonehin [beme o pwo ce denye mu ko nina eten].
153.15 Ébéru 3.7−8Ke [genye nemwo pineuhi ana genye] pine ne he ni tii iitihi pie:
Me geé téne a pwoto te Padué
ha a tan jenaa,
ke geé piténedehi!
Geé nemwo bitekewé kojan
pwohewii [ni Isaraéla] ne ha a melé.Psaume 95.7−8
Time lé uce tuie nge ha amwaale
163.16 Nombres 14.1−35Wooélé lépwona lé téne a pwoto te Padué, ke li lé bitelé ne kon? Te wo lépwo watihenye kuti, li e péélé wie wo Moosé mu ha amu *Aigupito, 173.17 1 Korénit 10.10ke li e ne a pwo-okéé kon wo Padué, ne he na 40 ni jo. Te woélé, li lé pwo ana ta ne ha a melé, ke li lé tai mele nelang. 18Ke te woélé, li e apwolé wo Padué pie, o time lé uce tuie nge ha amu li e caa pipwopweehi me delé. 19Ke caa time lé uce tuie nge ha amwaale [me a péém] te Padué mu ko ana muhi telé me lé céihi ne kon.
41Wo Padué, ke e caa mi pii [te ni watihenye] pie: «É bo péékewé nge ha amwaale [me a péém] na é caa pipwopweehi me dewé.» Ke ana e caa mi pii, ke e caa cuwo me denye jenaa. Ke anaa, me genye pipwocile, be koli e bo tauti ce béén mu konye wo Padué, be e bo pii pie, time lé bo uce tuie4.1 Be koli…pii pie, time lé bo uce tuie—ai Be koli lé niimihi ne ce béén mu konye pie, caa pibwolilé. nge ha amwaale ten.
2Be caa te patemehi tenye a pwooti na wâé [ko a amwaale naa] pwohewiilé. Kehe icehi ana woélé, ke te tice ceme a pwooti na lé téne, mu ko ana time lé uce hegi ko a céihi4.2 Time lé uce hegi ko a céihi—ai Time e uce mu kolé a céihi te nina lé piténedeeng. Be te wo Kaléba me Iosua cehi na lu céihi ne ko Padué. Omehi Nombres pwahamii tii 13 me 14.. 34.3 Psaume 95.11; Ébéru 3.11[Weengaa a watihen me] e pii wo Padué pie:
É okéé ne kolé, ke é patemehi pie:
O time lé bo uce tuie
nge ha amwaale tong,
[a péém] na é caa pwopweehi!Psaume 95.11
Tehi ne tenye a amwaale naa
Kehe icehi ana wogenye na nye céihi, ke genye o hegi a ju mwaale4.3 Genye o hegi a ju mwaale… Grek: Genye o te taa ha a ju mwaale. Genye hegi a ju péém naa heme nye mu ko Iésu Kériso. me a péém de Padué [na e caa nebwén ko pwopweehi wo Padué ha atabuhi kon]. Be ati ni âniimihinaado ten ne ko ni penem na e bo pacuwohi, ke caa hején, ânebuhe a bwo tabuhi na a bwohemwo.
44.4 Genèse 2.2Genye te pine mwo ne ha a céiu duaan ne he ni tii iitihi [li e pwo wo Padué, ha atabuhi kon]. Be caa tii pie: E mwaale wo Padué ha a bé7 he ni tan, alecehe ni penem na e pwo.Genèse 2.2
[Weengaa a bé7 he ni tan ha a naadenitan.]
54.5 Psaume 95.11Genye mwojuia ne mwo ko a niide a tii, li e pii pie:
O time lé bo uce tuie
nge ha amwaale tong,
[a péém] na é caa pwopweehi! Psaume 95.11
6[Me genye pine anaa, ke genye te temehi pie] te pwo amwaale [me a péém] na e caa pwopweehi wo Padué. Ke genye caa alihi pie, ni béén na lé caa mi hegi a pwooti na wâé [ko a amwaale naa] ke time lé uce taa hen, be time lé uce piténedeeng. 74.7 Psaume 95.7−8Ke anaa kuti, na e ne a céiu tan wo Padué [beme lé o hegi a ju péém4.7 Hegi a ju péém—Omehi note ko a niide a tii 3. den wo lépwo béé apulie]. Ke a tan naa, ke “é jenaa”! Ke ali e pii, ne ha ali niide a tii, ne he ni tii iitihi pie:
Me geé téne a pwoto te Padué
ha a tan jenaa,
ke geé piténedehi4.7 Ke geé piténedehi—Grek: Nemwo pwo me mwoiu ni pwonimewé!!Psaume 95.7−8
Ke a pwooti naa, ke caa junihe bwolihi, ke wo pa daame *Davita na e pwaadeniin mwobé [ne ko a bwo engen de ni ukéiu tenye ne ha a melé].
84.8 Deutéronome 31.7; Josué 22.4Ana genye alihi pie, a amwaale [me a péém] ke time uce a amu li e péélé nge hen wo Iosua4.8 1re phrase—Grek: Be heme e ne telé a amwaale wo Iosua…; Iosua—Omehi Apostolo 7.45.. Be mepie wonaa, ke wieli time e bo uce cihe mwo ko ace céiu tan wo Padué. 9-104.10 Ébéru 4.4É mu ko anaa, ke pwo amwaale [me a péém] tenye, ni apulie te Padué. Ke genye o taa hen, ke genye o bobe mwaale koja a penem denye. Ke genye o pwohewii Padué, li e mwaale ha a bé7 he ni tan [alecehe a bwo pwo nen den a bwohemwo].
11Mepie wonaa, ke wâé heme genye hane ne he ni ju pwonimenye me genye hegi a ju péém de Padué. Ke genye nemwo pioi ko ni watihenye [lépwo *Isaraéla] be li lé cibe. Be wo pana time e uce piténede Padué, ke e piâ ité4.11 Dernière phrase—Grek: Beme time e o uce tupwo wo pace céiu..
A pwooti te Padué ke a teua
124.12 Éféso 6.17; Pii Beetihi 1.16, 19.13−15A pwooti te Padué, ke te nihe pwojunuun, beme e penem konye. Be e pwohewii a teua, na te nihe ânyee lupwo piduaan, be e tahagéi die ko ni acipetééhi konye, ke é die ko ni béle he duunye. Be e gaale die ko ana nimenye kon, me a âniimihinaado na e ha aduwo, ne he ni pwonimenye. Ke e [pwo me pwéélang kolé, me] tautilé.
13Be te tice ace céiu naado, me pace apulie celi e ha aduwo ne ko Padué. Be weeng na e nelé ati, ke e te temehi a bwopwonen ne kolé4.13 E te temehi a ju bwopwonen ne kolé—Grek: Ke lé te tai tuiebeele ne hamiin.. Ke te weeng kuti, na genye bo cuwo he pwahamiin, me habwii ten ati ni penem na genye pwo.
wo iésu ke pa apipépwooti hadeniinye me padué
(Pwahamii tii: 4.14―10.18)
E te temehi a bwo tice niihenye
144.14 Ébéru 3.1, 10.23[É ko pii tewé pie] wo Iésu, pa *Naî Padué, ke pa *apwoâpwailo ubwo tenye, na e caa taa he miiden [beme pa apipépwooti hadeniinye me Padué]. É mu ko anaa, na wâé heme genye imwi mangihi a céihi tenye ne kon.
15Time uce pa apwoâpwailo na e ité kojakenye, be e te temehi ehi a bwo tice niihenye, be te tacebwénieng, ne ko ati nina tacebwénikenye kon. Kehe icehi ana time e uce tupwo ne hen, ke time e uce pwo celi ta.
164.16 Ébéru 10.19É mu ko anaa kuti, na me time uce piwâ genye, me genye âbé ne he pwahamii Padué4.16 Ne he pwahamii Padué, Padaame—Grek: Ne ko a atebwo he daame (trône)., Padaame [na e pwaadeniin bé wo Iésu]. Be genye o bo hegi a *pipwoééhe tice ja kon den. Ke e bo picani tenye [wogenye na tice niihenye] ke e bo te nihe pwo celi wâé ne konye, ha a benaamwon den.
5Wo Padué na e ne ten a penem den
1Pa *apwoâpwailo ubwo, ke pa apulie na pipégalieng, beme pa apipépwooti hadenii ni apulie me Padué. Be e ne te Padué ni âpipati me ni âpwailo, beme pineuhi ni ta pwo te ni apulie. 2Ke [te pa apulie] pwohewiilé, ke e temehi a bwo tice niihe ni apulie. Ke bwala nang ne kolé, ke e pipwoééhelé, heme lé piâ ité, mu ko a bwo time uce temehi nen delé. 35.3 Lévitique 9.7, 16.6Ke, é ha a benaamwon na e pwo a âpwailo me pineuhi ni ta pwo te a puapulie, ke e pwo a âpwailo me den mwo, mu ko ana te pa apulie mwo na tice niihen, pwohewiilé.
45.4 Exode 28.1Be te tice pace apulie celi me e te picaamada mu kon, beme pa apwoâpwailo. Be a penem na te nihe pwonaado ne kon. Kehe te icehi Padué na jan ne kon me e pipégali pace apulie, pwohewii a bwopwonen den ne ko *Aarona.
5Piwien ne ko Kériso. Be time e uce pipaunueng mwo. Ke te wo Padué na e neeng me pa apwoâpwailo ubwo. Be e pii ten pie:
É jenaa, ke é pii beetihi:
Wogo pa Naîng,
ke woéo pa caa tem.Psaume 2.7
65.6 Psaume 110.4; Ébéru 6.20, 7.1Ke genye pine [ne ha a céiu niide a tii ne he ni tii iitihi] ana e pii wo Padué pie: Wogo pa apwoâpwailo dieli mwo, âcehi a bwopwonen de Melkisédek5.6 Melkisédek—Wo pa daame, me pa céiu apwoâpwailo te a céiu bele, ha a benaamwon de Abérama, pa caa te a bele Isaraéla. Omehi pwahamii tii 7, me Genèse 14.17−24.. Psaume 110.4
E piténedehi wo Kériso he ni picani
75.7 Mataio 26.36−46; Filipi 2.6−8É he e mwo mulie ne éni pwo bwohemwo wo Iésu, ke pwo a benaamwon na e é me toii da céii Padué pie, me e celuimieng [koja a bwo mele ten]5.7 1re phrase—ai Pwo a benaamwon na e é, ke to da céii Padué, beme e celuimieng. Be pwojunuu Padué na e celuimikenye koja a mele. Wo pana e tii a tii ce, ke e niimihi a pwopwoiitihi te Iésu ne Getsémané. Omehi Mataio 26.36−46. Wieli e niimihi mwo ni béé benaamwon na e é hen wo Iésu, pwohewiin alecehe a bwo mele te Lazare. Omehi Ioane 11.35.. Ke e téne a pwopwoiitihi ten wo Padué. Be wo Iésu, ke e te nihe paciitieng ke e piténedeeng.
8Ke te pa *Naî Padué, kehe icehi ana jan me e picaa a bwo piténedehi, ko a bwo mu he ni picani ten. 9Ke [e piténedehi die ha anebwén kon, ke] e caa panebwénihi ati5.9 Ke…e caa panebwénihi ati ni penem den—ai E neeng wo Padué, beme pa apwoâpwailo ubwo ten. Grek: Ke me e caa pwo me e hején. ni penem den. Ke é mu ko anaa kuti, na o caa pa aceluimi ati lépwona lé piténedeeng. Ke e ne telé *a ju mulip ne pelen. 10Ke e etieng wo Padué, me pa apwoâpwailo ubwo pwohewii Melkisédek.
A bwo paténe lépwo acéihi
11Hiwon ni naado na nimung me é5.11 É—Grek: Geme. A bwopwonen de ni apulie ânebun, na lé tii pie: Wogeme; ke a bwopiinen pie: Woéo. Omehi note ko 2 Korénit 1.6. pii tewé ne ko [a bwo piwie Iésu me Melkisédek]. Kehe icehi ana time geé uce temehi, be wogewé lépwo apwoemaan, ke time geé uce pininim ehi5.11 Wogewé lépwo apwoemaan, ke time geé uce pininim ehi—Grek: Caa bwéjé gewé. [ne ko ni céihi tewé].
125.12 1 Korénit 3.1−3Caa bwolihi [na geé céihi, kehe icehi ana mwo te junihe wahin ni bwo temehinaado tewé, ne ko a pwooti te Padué. Ke mepie geé te cumang] ke me geé caa ko pacémuni lépwo béén. Kehe wogewé, ke mwo te lépwo acémun, ke mwo time geé uce nihe ân.
Geé pwohewii ni cuwo nahi ewa na lé mwo dile. Be mwo time lé uce wii ce wiinaado celi mwoiu. 13-14Ke wo pa [acéihi] na e wonaa, ke mwo time uce jan me e pineitééhi ana juuju me ana ta5.13−14 Pineitééhi ana juuju me ana ta—ai Temehi a pwooti na juuju.. Kehe wo pana e cumang [ne ha a céihi] ke e temehi, be e caa mulie hen, ke e picaa. Ke jan me e wii a wiinaado na mwoiu.
6Genye pitaa koja ni cémun ânebun
1-2Wâé heme wogenye ni apulie, na genye cumang ne he ni céihi tenye ne ko Kériso. Genye pitaa koja ni cémun ânebun, li genye caa hegi, ke li genye caa céihi ne kon:
A bwo pininim me a bwo bitekenye koja ni bwomu tenye na ta, na lé péékenye nge ha amele;
A bwo céihi ne ko Padué;
A bwo *pipuu apulie;
A bwo ne inye [ne ko pana e mwo ju pineeng];
A bwo mulie cemwo mu ha amele, te ati ni apulie;
A pitautinaado te Padué [beme e ne telé ni cemelé ko ni penem delé]. Ke mepwo é ne ko a tautinaado ten, ke o te cuwo dieli mwo.
Be ati ni naado naa, ke genye caa mi picaa ânebun. Ke time o uce jan me genye mwo picaa mwo. 3Be wâé heme genye pitaa, âcehi ana nime Padué kon6.3 A bwopiinen pie, wâé heme nye pininim ne ko ni naado na e bwolu ko ni céihi tenye: ni naado na e mu ha a Tii Iitihi na time nye uce ju téele temehi. Ke e habwii ni béé naado naa, ne ha a tii ce. Be hiwon ni ocine ko Iésu Kériso, na lé mu ha a Élele Iitihi Ânebun..
4Ade aceli genye pii ne ko lépwona lé caa tupwo mwo ne ha a mulie na ta6.4 Lépwona lé caa tupwo mwo ne ha a mulie na ta—Niide a tii 4−8, ke wieli a pwooti ko lépwona lé céihi ânebun, kehe icehi ana lé necu ni céihi telé. Ai wieli a pwooti ko lépwona lé mu pele lépwo acéihi, ke lé temehi a juuju, ke lé alihi ni naado na wâé na e pwo wo Padué, kehe icehi ana lé tahi taabwon.? [O caa pwocoon me lé bitelé mwo.] Be li e caa pwo me pwaale ne telé [a juuju ten]. Ke lé caa hegi ni *adéihi ten, na e âbé mu he miiden. Ke e caa te e kolé a *Jenen Iitihi. 5Ke lé caa te nemi mu ko a bwo wâé na a pwooti te Padué. Ke lé caa te alihi mwo, a junuu a *Mwametau te Padué6.5 A junuu a Mwametau te Padué… Grek: A junuu a benaamwon na e bo âbé., na e o bo tuie.
66.6 Mataio 12.31; Ébéru 10.26−27; 1 Ioane 5.16Ke mepie lé necu ati ninaa, ke lé o te nihe pipwotahinaado ne kolé mwo6.6 Lé o te nihe pipwotahinaado ne kolé mwo—Grek: Telé mwo. Ni pwooti naa, ke ni behi ni pwooti na e pii pie, lé cemeite pa Naî Padué, ke wieli a bwopiinen pie: Ko lupwo ilé.. Ke o te nihe pwocoon me nimelé me lé pininim, ke me lé mwojuia mwo. Be pwohewiin heme lé cemeite mwo pa *Naî Padué ne ko a *kuricé, ke lé pwo me tanim nang, ne ânebuhe ni apulie.
7[Wo lépwona lé wonaa, ke lé pwohewii a pule na ta.] Mepwo é ne ko a pule na wâé, ke e hegi ehi a ute, ke e pwo me cim ni âdaanu beme a wiinaado te ni apenem hen. Ke e adéihi a pule naa wo Padué. 86.8 Genèse 3.17−18Ke a pule na e ne me cim ni acuwo pwo dan me ni meté na ta, ke te ju piticenaado ne kon. Ke wieli e o apwohi a pule naa wo Padué, me cini taabwon.
Geé cumang die ha a pwonehin
9Mepwo wogewé, lépwo ju bééng, ke é te nihe céihi ne kowé. Be é niimihi pie, geé teko mu ha a ju pwaaden6.9 Geé teko mu ha a ju pwaaden… ai Etewé ni naado na te junihe wâé [koja anaa] na lé o pébé a bwo celuimikewé. na wâé, na e péékewé nge ha a bwo celuimikewé. 106.10 Ébéru 10.32−34Be wo Padué, ke e mwomwon, ke time e uce pineuhi a pipwoééhe tewé ne kon, me ni apulie ten. Be geé te nihe picani telé, ke geé teko cumang hen jenaa.
11Ke te nihe wâé tong, heme geé teko mwoiu ko penem [ne he ni pipwoééhe tewé naa] die ha anebwén kon. Geé o bo hegi ni cemewé na wâé, na geé ucéihi. 12Ke geé nemwo pwoemaan! Wâé heme geé pipwohewii lépwona lé cumang ne he ni céihi telé. Be lé *ucéihi ne ha a céihi, die ko ana e bo ne telé ce cemelé ne ko ni penem delé wo Padué, li e caa mi pii telé.
E pacuwohi nina e caa mi pii
13-146.14 Genèse 22.16−17É ânebun, ke e pwo a *piapwo wo Padué ne he niin, be te tice pace apulie celi nihe pwonaado ne kon kojaeng. Ke e pii te *Abérama [pa watihenye] pie: É o te nihe adéiko. Ke é bo pwo me te nihe hiwon ni piebehiko.Genèse 22.17
15Ke wo Abérama, ke e ucéihi ne ha a céihi ana e caa mi pii wo Padué. Ke é mu ko anaa, na e te hegi.
16Ne pelenye ni apulie, ke me nimenye me genye habwii te ni béén pie, genye pii a juuju, ke genye pwo ace piapwo ne he nii pa apulie na te nihe pwonaado ne kon kojakenye. Be me wonaa, ke e pacuwohi ni picihe hadeniilé, ke genye capuhi ni pwolé.
17Te piwien mwo ne ko Padué. Be he e pii pie, e bo adéi ni apulie, ke e te pwo a piapwo ne kon, beme e *pajuujuhi ne telé nina e pii. É mu ko anaa, na lé temehi pie, lé o te hegi ana e caa mi pii, ke time e o uce pitaatééhi ana e caa pii ânebun.
186.18 Nombres 23.19[Be genye temehi pie, hemepie e pii pie, e bo pwo ace céiu naado] wo Padué, ke time e uce gele. [Ke mepie e piapwo ne kon, ke e te pacuwohi.] Weengaa lupwo alo naado na me nye céihi mu kon, ke weengaa a bépamwoiukenye, wogenye na genye cela nge pelen. Ke pwo niihenye me genye imwi mangihi ana e caa mi pii ânebun me denye, na nye ucéihi ne ha a céihi.
19-206.19−20 Lévitique 16.2−3A piuca tenye naa, ke e pwohewii a pehinyu na binyi na taa me mang he ni pwonimenye. Ke e ceta ehi ne ha a duaan na junihe iitihi ne he miiden. Be wo Iésu, ke e caa tehi a mwaanu ubwo na e capuhi a duaan naa6.19−20 Mwaanu ubwo… Omehi Mataio 27.51., ke e mi engen kojakenye, beme e taa lang, [beme pa apipépwooti ha awiemenye me Padué]. Be te weeng kuti na e caa *apwoâpwailo ubwo tenye, na e pwohewii pa daame Melkisédek ânebun6.19−20 3e phrase—Ke me e wonaa wo Iésu, ke e pipwohewii pa apwoâpwailo ubwo ha a mwaiitihi te lépwo Juif, na e ne lang ni âpwailo bépineuhi ni ta pwo te a bele.. Ke e bo wonaa wo Iésu dieli mwo.
7Wo Melkisédek ke e déme Kériso
Wooélé Melkisédek?
17.1 Genèse 14.17−20Wo Melkisédek, ke pa daame ne ha a pwomwo ubwo Salem, ha a céiu benaamwo amu. Pa *apwoâpwailo te Padué henye na nihe e daaité. Ke wo Melkisédek, ke pitapitilu me *Abérama [pa watihenye] he e mwojuia mwobé mu he pa. Be e piwéden koja ni daame. Kehe me pitapitilu, ke e adéieng wo Melkisédek. 2Ke wo Abérama, ke e ne ten a céiu duaan mu ko ni duaan na 10 mu ko nina e hegi ne ha a bwo pwopa ten.
A nii Melkisédek, ke a bwopiinen pie ‘pa daame na e mwomwon’. Ke Salem, ke a bwopiinen pie a ‘péém’. Ke é mu ko anaa, na e daame he a péém mwo. 3[Time uce hiwon ni pwooti kon ne he ni tii iitihi. Be]:
Time uce pii tenye
luce nyaa me caa ten,
me ce watihen.
Ke time uce patemehi
ace bwo âbeele ten,
me ace bwo mele ten.
Pa ocine ko pa *Naî Padué,
pa apwoâpwailo dieli mwo.
4Geé te alihi pie wo Melkisédek, ke te nihe pwonaado ne kon. Ke wo Abérama, pa ukéiu tenye, ke te pwonaado ne kon mwo. Kehe icehi ana e ne, ne ânebuhe Melkisédek, ni âpipati ten: a céiu duaan mu ko ni duaan na 10 mu ko nina e hegi mu ha a bwo pwopa ten. 57.5 Nombres 18.21Ke weengaa a jéhi nina e pihuôhi wo *Moosé ne he ni patén den, beme o bo ni mwoto te lépwo apwoâpwailo. Ke ni patén naa, ke ni denye, wogenye ni piebehi Abérama. Ke nina genye ne, ke genye ne te ni béénye mwo, wo lépwo apwoâpwailo tenye, mu ha a pwomwoiu te Lévi7.5 A pwooti te lépwo acéihi na te lépwo Juif mwo. Grek: Âcehi a patén, ke pwo mwomwon de lépwo naî Lévi, me lépwo apwoâpwailo mwo, me lé hegi a céiu duaan mu ko a 10, mu ko nina ete ni apulie te a bele Isaraéla. A bwopiinen pie, lépwo âjiénelé. Kehe icehi ana woélé mwo, ke lépwo piebehi Abérama..
6-7Ke wo Melkisédek, ke time uce pa apulie mu ha a pwomwoiu te Lévi. Kehe icehi ana e te hegi koja Abérama a céiu duaan mu ko ni duaan na 10 mu ko nina e pé.
A céiu mwo: Ke wo Abérama, ke [pa apulie na ubwo nang, be] li e pwo a *piapwo ne ten wo Padué7.6−7 Be li e pwo a piapwo ne ten wo Padué—Grek: He li e hegi a piapwo (promesse) te Padué.. Ke genye temehi mwo pie, pa apulie na ubwo nang, ke e *adéi pa apulie na wahin nang. Kehe icehi ana [genye pine pie] wo Melkisédek, li e adéi Abérama.
8-9Ke ni apwoâpwailo, wo lépwo piebehi Lévi, ke lé hegi ni âpipati na wonaa. Kehe icehi ana ni apulie naa, ke lé o te tai mele pwohewiikenye. Ke mepwo é ne ko Melkisédek, ke pii kon pie, pa apulie na e *mulie dieli mwo.
Ke heme e ne te Melkisédek ali âpipati ten wo Abérama, ke pwohewiin heme lé tai wonaa ten ati ni piebehi Lévi7.8−9 Pwohewiin heme lé tai wonaa ten ati ni piebehi Lévi—Grek: Pwohewiin heme e wonaa ten wo Lévi. (A bwopiinen ne éni pie lépwo piebehi Lévi. É ne ha a Tii Iitihi, ke ni piebehilé, ke lé te cuwo ko toii kon a nii pace watihelé. «Isaraéla», ke a nii pana te céiu nang, kehe te a nii mwo a bele na lé wie mu kon.). [Be wo Abérama, ke pa ukéiu telé ati.] 10Be mepie wo Lévi [pa caa telé] ke he mwo time e uce âbeele, kehe e caa te mu ha a éé pa watihen, Abérama, pali e ne ali âpipati ten ne te Melkisédek.
Taatééhi a bwo pwoâpwailo ânebun
11Genye tabuhi alihi a bwo pwoâpwailo, ha a benaamwon ko ni patén de Moosé. Be te wo *Aarona me lépwo apulie ha a pwomwoiu te Lévi, na lépwo apwoâpwailo tenye. Kehe icehi ana genye alihi pie, a bwo pwoâpwailo naa, ke time e uce pacuwohi ana nime Padué kon7.11 Time e uce pacuwohi ana nime Padué kon—Grek: Time e uce pébé a bwo hején [genye].. Be mepie [wo Padué, ke] wieli time e o uce neopé céiikenye pace céiu apwoâpwailo ubwo, celi ité nang kojalé, na pwohewii Melkisédek. 12Ke mepie e tuie wo pa apwoâpwailo ubwo, ke me e pwo a âpwailo na mwo ju coho, ke wâé mwo heme taatééhi ni patén.
13-147.14 Ésaïe 11.1; Mataio 2.6; Pii Beetihi 5.5Geé téne ehi pie, é ko cihe tewé [ko Melkisédek] ke é pwo-ocine ko Padaame henye, Iésu Kériso, na e wie mu ha a pwomwoiu te *Juda, kehe time uce é mu ha a pwomwoiu te Lévi. Ke te tice pace apulie mu ha a pwomwoiu ten celi e mu pwoâpwailo. Be te tice mwomwon delé me lé pwo a penem naa, ne he ni *patén de Moosé.
E piwéden wo Iésu Kériso
15Geé caa alihi pie, wo pa apwoâpwailo tenye [wo Iésu Kériso] ke te ité nang [koja ni apwoâpwailo âcehi ni patén de Moosé]. Ke geé bwobe temehi, hemepie genye pii pie, e pwohewii Melkisédek. 16Be time uce etieng mu ko ace bwo wie ten7.16 Mu ko ace bwo wie ten… Grek: Watihen ace céiu patén celi e âbé mu ko a éé apulie. Wieli a bwopiinen pie, é mu ko ni patén de ni apulie, ai é mu ko nina genye alihi ko ni naamiinye. mu ha ace céiu pwomwoiu. Kehe te icehi mu ko a junuu a mulihen na e dieli mwo. 17Be genye caa alihi pie, caa te tii ne he ni tii iitihi pie: Wogo pa apwoâpwailo dieli mwo, âcehi a bwopwonen de Melkisédek.Psaume 110.4
18Weengaa ana e ne me tieden ni patén de Moosé [ne konye]. Be te tice niihen me e pacuwohi [ana nime Padué kon]. 197.19 Ébéru 9.9Be time uce jan me e ne me hején genye [me mwomwon ne ale Padué]. Ke é jenaa, ke e ne tenye a pwaaden nge pelen, na te nihe wâé koja ni patén [mu ko a piapwo ten ne tenye, na mwo coho]7.19 Mu ko a piapwo ten ne tenye… Ke ni pwooti naa, ke lé âbé mu ha a niide a tii 22.. Ke genye *ucéihi ne ha a céihi [ace bwo pacuwohi nen].
E te mu dieli mwo
20-217.21 Ébéru 5.6A céiu mwo: É he e pipégali Kériso wo Padué, ke e pwo a piapwo pie, bo pa apwoâpwailo ten dieli mwo. Kehe time e mu uce pii pie wonaa te lépwo béé apwoâpwailo. Be weengi ana e pii:
E caa pwo a piapwo wo Padaame.
E caa pii tem pie:
‘Wogo pa apwoâpwailo
dieli mwo.’
O time e bo uce pitaatééhi mwo
ana e caa ne.Psaume 110.4
227.22 Ébéru 8.6, 12.24É mu ko anaa kuti, na wo Iésu, ke caa pa inenaado7.22 Wo Iésu, ke caa pa inenaado—Be é mu kon, ke genye temehi pie wo Padué, ke e bo pacuwohi a piapwo ten. ko a piapwo na e pwo tenye wo Padué, na te nihe wâé koja ni patén.
23A céiu mwo, ke wo [Iésu, ke e piwéden koja] lépwo apwoâpwailo ânebun. [Be weeng, ke te céiu nang, ke woélé] ke te nihe hiwon jélé. Be mepie e mele wo pace céiu, ke e o taatééeng wo pana e âbé céin. 24Ke o te tice apulie celi me lé taatéé Iésu, be e te mu dieli mwo. 257.25 Roma 8.34Ke me wonaa, ke jan me e *celuimi lépwona lé âbé céii Padué ne he niin. Be e mulie dieli mwo, ke e te pwoiitihi me delé.
E iitihi ke hején nang
26Te tice pace apulie celi jan me pa apwoâpwailo tenye, [ke me pa apipépwooti tenye ne ânebuhe Padué] kehe te wo Iésu cehi. Be e iitihi, ke te tice ta kon. Ke wâé te Padué nang. Ke wo Padué, ke e caa pwo me e mu daaité koja lépwona lé pwo nina ta. Be e céieng da, ne ha a duaan na e daaité ne he miiden [beme o te nihe pipaunueng].
277.27 Ébéru 5.3Wo Iésu, ke time e uce pwohewii lépwo béé apwoâpwailo, na lé pwoâpwailo ati he ni tan, me de ni ta pwo telé mwo, ke me de ni ta pwo te a puapulie. Be e te océiu ko pwoâpwailo dieli mwo, he li e pineeng me e mele [ne ko a *kuricé].
28Wo lépwo *daame he lépwo apwoâpwailo na e nelé ne ni patén de Moosé, ke wo lépwo apulie na tice niihelé [pwohewiikenye]. Ke wo Padué, ke [e taatééhi ni patén] ko a piapwo ten. Ke e eti pa Naîn, na e hején dieli mwo.
8Pa apwoâpwailo ubwo tenye @ wo Iésu Kériso
1Weengi a âne ana é pii: Pwo pa *apwoâpwailo ubwo tenye, na e he miiden, [ke pa apipépwooti tenye] ne ânebuhe Padué. Wo Padué na te nihe pwojunuun, ke e neeng me e tebwo pwo juin [beme e pihuôhi ati ni naado]. 2Ke e pwo a penem den, ne ha a duaan na junihe iitihi ne ha a ju mwa ko pwoiitihi. Be a naado na e pacuwohi wo Padué, kehe time uce ana e pwo wo pa apulie.
3-4Pwo a âpipati na e ne, ke weengaa a penem de lépwo apwoâpwailo ne éni pwo bwohemwo. Be mepie e mwo teko mu éni pwo bwohemwo wo Kériso, ke wieli time o uce jan me pa apwoâpwailo. Be wo lépwo béén, ne éni pwo bwohemwo, ke ni apwoâpwailo âcehi ni *patén de Moosé. Ke a penem delé, ke me lé pwoâpwailo, ke me lé ne ni âpipati. 58.5 Exode 25.40; Kolosé 2.17; Ébéru 9.23Kehe icehi ana ati ninaa, ke te ju a déme a ju *mwaiitihi na e jeda he miiden. Be wo Moosé li e pacuuli a mwaiitihi pwo ko mwaanu, ke e huôhi ne ten wo Padué pie: Go pwo ati ni naado âcehi ana é caa habwii tem ne pwo ali juwole.Exode 25.40
68.6 Ébéru 7.22Be a penem na e ne te Kériso wo Padué, ke te nihe pwonaado ne kon [koja a bwo pwoâpwailo âcehi ni patén de Moosé]. Be wo Iésu, ke pali e pébé céiikenye ali *piapwo [li mwo ju wâé, na e pwo tenye wo Padué]. Ke a piapwo naa, ke te junihe pwojunuun koja ni patén, ke e pébé céiikenye ni *adéihi na te nihe wâé.
A piapwo na mwo coho
7[Ânebun, ke wo Padué, ke e pwo a piapwo ne te a bele ten, *Isaraéla, ko ni patén de Moosé.] Ke mepie a bécéiuhe piapwo ânebun naa, ke mepie e caa te *pajuujuhi a bwo niimihinaado te Padué8.7 Mepie e caa te pajuujuhi a bwo niimihinaado te Padué—Grek: Mepie hején., ke wieli time e bo uce pwo mwo ace béalohen. 88.8−12 Jérémie 31.31−34[Kehe icehi ana a piapwo ânebun, ke time uce hején be] e cihe okéé ne ko a bele ten wo Padué, ke e pii pie:
O tuie a benaamwon
na geme bo piténekeme
me lupwo bele Isaraéla me *Juda.
Ke geme bo pwo mwo
ace piapwo celi mwo coho.
9Li geme pwo ali piapwo
me ni caa telé,
li é pawielé mu ha amu *Aigupito.
[É péélé wie beme é celuimilé.]
Ke geme pwo a piapwo.
Kehe time lé uce piténedehi,
ke lé pineuhi ni pwooti.
Ke é ne a jéing ne kolé.
Kehe time o uce piwien
10me a piapwo na mwo coho
na me gemu bo pwo,
wogemu me Isaraéla,
lépwo apulie tong.
É bo ne ni patén dong
ne he ni pwonimelé.
É bo tii a pwooti tong
ne he ni bwo temehinaado telé.
Ke é bo Dué helé,
ke bo woélé a bele tong.
11O time lé uce tahimwo ni béélé
beme lé temehiéo.
Be lé tai temehiéo ati,
lépwona pwonaado ne kolé
ke nina piticenaado ne kolé.
12É bo pineulé ko ni ta pwo telé.
Ke o time é bo uce niimihi
ni bwomu telé na ta.Jérémie 31.31−34
13Ke me e pii kon pie, a piapwo na mwo coho, ke a bwopiinen pie, caa ukéiu a piapwo ânebun. Be a naado na caa ukéiu, ke o caa tieden.
9Time uce jan ni âpwailo ânebun
A bwomune lupwo duaan na iitihi
19.1−2 Exode 25.23−40, 26.1−30A *piapwo ânebun [ke tii ne he ni *patén de Moosé]. Ke, he ni patén ânebun, ke e pihuôhi ne te lépwo apulie a bwo pwoiitihi telé, ne he ni duaan na iitihi ne kolé, ne éni pwo bwohemwo.
2-39.3 Exode 26.31−33Ke lé pacuuli a mwa mwaanu beme a *mwaiitihi, ke alo lupwo nemwa hen. Pwo ‘a nen na iitihi’, ke a céiu nen, ke ‘a nen na junihe iitihi’. Ke a nen naa, ke capuhi bwonihi ko a mwaanu. Ke a nen na iitihi, ke e hen a taap, me a mwomiû, me ni pwoloa na ne te Padué.49.4 Exode 16.33, 25.10−16, 30.1−6; Nombres 17.23−26; Deutéronome 10.3−5Ke a nen na junihe iitihi, ke e hen a *apwoâpwailo9.4 Apwoâpwailo—A duaan na cini encens nelang, beme a âpipati te Padué. Omehi a Luka 1.10−11. Nye pine ne ha a Exode pwahamii tii 30 pie, a apwoâpwailo, ke e mu ha a duaan na iitihi. Kehe icehi ana e pii wo pana e tii a tii te lépwo Ébéru pie, etelé a duaan na junihe iitihi. Be a apwoâpwailo, ke e ân ne ko a penem na pwo ne ha a duaan na junihe iitihi. na timi ko mwani megele, na lé mu cini encens [ni dep na ûde wâé] nelang. Ke e lang mwo a piélele mwopiapwo na timi ati ko mwani megele. Ke é ha a mwopiapwo naa, ke pwo ni naado [na cié, na te junihe iitihi] na élé hen:
A piélele na mwani megele na oba ko ni nehi pwoloa manne9.4 Manne—Wo Padué, ke e pwo me lé wiinaado ne ni Isaraéla ne ha a melé ko a manne, a wiinaado bé mu he miiden, na pwohewii ni cuwo nahi pide memepo. opé mu he miiden;
Ali bwaja *Aarona9.4 Bwaja Aarona—Wo Padué, ke e pwo me e pé a bwajaan wo Aarona, beme e pwo ni penem ko ni pipwojunuun de Padué. Omehi Exode pwahamii tii 30. li e muu;
Lupwoli péi na tii ne pwon li 10 patén ko a piapwo ânebun.
59.5 Exode 25.18−22; Ézékiel 10.12−15É ne pwo a capuhe ali piélele mwopiapwo, ke pwo lupwo déme âcélo9.5―9.6 Âcélo—Grek: Chérubin. Omehi Exode pwahamii tii 25, me Ézékiel pwahamii tii 10. na mwani megele. Be lu habwii a bwo mu te Padué me *a wâé ten. Ke ni puuilu, ke talui ali capuhe piélele, é nelang he na lé mu pétaabwon ni ta pwo te a bele, ko ni cewéhe ni wota.
Kehe mwo time uce téele a benaamwon me genye nihe cihe ko ni bwomunen naa.
Penem de ni apwoâpwailo
69.6 Nombres 18.2−6A mwa mwaanu, ke alo ni nemwa hen.
Ke lépwo apwoâpwailo, ke lé mu taa ha a duaan na iitihi, ati he ni tan, beme lé pwo ni penem delé. 79.7 Lévitique 16.2−34Kehe te icehi pa apwoâpwailo ubwo, na pwo mwomwon den me e taa ha a béalohe nemwa [ha a duaan na junihe iitihi]. Ke te océiu nang ko taa lang ha a jo. Ke e pé da a cewéhe ni wota, na e ne beme âpipati te Padué. Ke a cewéle naa, ke a âpwailo bépineuhi ni ta: ni ta pwo ten me ni ta pwo te a puapulie, na lé pwo he time lé uce temehi.
8Ati ninaa, ke weengi ana nime a *Jenen Iitihi me e habwii tenye: Be time uce jan ne konye me nye taa ha a duaan na junihe iitihi [jeda he miiden] mu ko a bwo pwoâpwailo ne ha a mwa mwaanu9.8 Mu ko a bwo pwoâpwailo ne ha a mwa mwaanu… Grek: Ke me e mwo ko mu a mwa mwaanu. A ocine ko a bwo pwoiitihi te lépwo Juif. [ânebun ne éni pwo bwohemwo].
99.9 Ébéru 10.1−2Be genye alihi pie é ha a benaamwon ce, ke hiwon ni utepanu me ni âpwailo na lé ne te Padué ne ni apulie. Kehe icehi ana time uce jan me e pwo me mwomwon ni pwonimelé ne ânebuhen9.9 Mwomwon ni pwonimelé ne ânebuhen—Grek: Hején a pwocihe na e âbé mu he pwonime (conscience).. 10Be a pwoiitihi naa, me ati ni patén den, ne ko ni wiinaado me ûdu, me ni bwo pipuulé, ke te ju ni naado ha a éé apulie, ke e te ju engen cehi die ko a ju bwopwonen de Padué.
Hején a âpwailo te Kériso
11Mepwo é ne ko Kériso, ke caa apwoâpwailo ubwo tenye, na e pébé céiikenye ati ni *adéihi na genye ko mulie hen9.11 Na genye ko mulie hen—ai Na genye bo mulie hen.. E caa taa ha a mwaiitihi na e jeda he miiden9.11 Na e jeda he miiden—Grek: Na pwo ko mwaanu., na e piwéden ke hején. Be time uce pwo ko ni i apulie, ke time uce a naado pwo a bwohemwo ce. 12Ke wo Kériso, ke e te taa me océiu ne ha a duaan na junihe iitihi. Ke e pé da lang a cewéle [beme âpwailo bépineuhi ni ta]. Time uce a cewéhe nani me paaci, kehe te a cewéhen [na e tée, he li e pineeng beme e âpwailo]. Ke me wonaa, ke e tuwo ni apulie mu ko ni ta pwo telé dieli mwo.
139.13 Lévitique 16.15−16; Nombres 19.9,17−19; Ébéru 10.4Âcehi ni patén ko a bwo pwoiitihi ânebun [ke hiwon ni naado na *mwiihi te ni apulie kon]. Ke hiwon ni âpwailo me ni pwopwoiitihi telé, beme puu taabwon ni ta pwo telé. Ke lé mu pitaipuulé ko a cewéhe nani, me a cewéhe paaci, me ni dep ko a nahi paaci na cini, ne ko nina lé pwo na ta. Ke é alecehe a bwo puu taabwon na a ta mu ko ni éélé, ke jan me lé bo pwoiitihi mwo9.13 Grek: …[Lé pé] a cewéhe ni nani me paaci, ne pehi a dep ko nahi paaci toomwo, beme lé puu lépwona mwiihi jélé, beme lé pétaabwon ni ta ko ni éé apulie..
149.14 1 Pétéru 1.18−19Te icehi a cewéhe Kériso na te nihe pwojunuun koja ninaa! Be e puu taabwon ni ta mu he ni pwonimenye dieli mwo. Ke e tuwokenye mu he ni huô me ni ta, na lé péékenye nge ha a mele. Be é mu ko a Jenen Iitihi, ke e pineeng wo Kériso ne te Padué, beme pa âpwailo na hején, na tice tooli me ta kon. Ke é mu ko anaa kuti, na o time e uce pipé ne konye ni *pwonimenye. Ke jan me genye cuwo ânebuhe Padué na e *mulie dieli mwo, beme genye pipaunueng, ke me genye penem den.
15Ke a bwo mele te Kériso, ke e tuwokenye koja ni ta na genye pwo, na genye mulie hen haahi a piapwo ânebun. Ke e ne a piapwo na mwo coho. Ke ati lépwona e caa todelé wo Padué, ke lé bo tai hegi ati ni adéihi naa, dieli mwo.
A piapwo ko a cewéle
16-17Mepwo é ne ko [a piapwo, ke pwohewii] a tii na e tii wo pa apulie, ânebuhe a bwo mele ten. Be e tii ni nii ati ni apulie na lé o hegi ni wâé ten9.16−17 Tii na e tii…na lé o hegi ni wâé ten—Testament.. Kehe icehi ana mwo time uce cuwo a tii naa, be mwo time e uce mele wo pa atii nen. [Ke o mwo te tice apulie celi me e hegi ce den mu ko ni wâé ten.] 18Ke piwien ne mwo ko a piapwo ânebun. Be e te *pajuujuhi cehi ne ko a bwo téte na a cewéhe [a wota na taunuhi].
199.19−20 Exode 24.6−8Be, me e pipatemehi ati ni patén te a puapulie wo Moosé, ke e pé a cewéhe ni nahi paaci me ni nani, na e bitehi neibuhi me a tabe. Ke e neole hen a dihe acuwo hysope na cie ko a pumajoo9.19 Pumajoo—La laine. megele. Ke e taipuu a tii ko patén. Ke e wonaa mwo ne ko ni apulie ati. 20Ke e patemehi telé pie: Weengi a cewéle bépajuujuhi na a piapwo na e pwo wo Padué me dewé, ke wâé heme geé âcehin.Exode 24.8
219.21 Lévitique 8.15,19Ke e taipuu ko a cewéle a *mwaiitihi na pwo ko mwaanu, me ati ni naado na iitihi na lé mu hen.
229.22 Lévitique 17.11Âcehi ni patén, ke te icehi a cewéle na jan me e ne me wâé9.22 Ne me wâé—Grek: Pétaabwon ni ta (purifier). ni naado ne ânebuhe Padué. Ke te tice ace bwo pineuhi ne ni ta, hemepie time uce téte a cewéle.
E habwiikenye te Padué
239.23 Ébéru 8.5, 10.1Genye caa alihi pie, a mwaiitihi pwo ko mwaanu, me ni naado na lé mu hen, ke wâé ne ânebuhe Padué. Be wâé ko a cewéhe ni wota. Kehe icehi ana ni naado naa, ke te ju a déme ni naado na piwéden, na e jeda he miiden. Ke é mu ko ninaa, ke o wâé mwo ni âpwailo na nihe piwéden. [Be time uce jan a cewéhe ni wota, me e ciitili ni ta.]
24Wo Kériso, ke e taa ha a mwaiitihi na e jeda he miiden, beme e habwiikenye te Padué. Kehe time e uce wonaa ne ha a mwaiitihi ne éni pwo bwohemwo, na pwo ko ni i apulie. Be a mwaiitihi naa, ke te ju a déme a junaado [na e jeda he miiden].
25[Ke a céiu mwo, ke] a âpwailo na e pébé wo Kériso, ke te a cewéhen [kehe time uce a cewéhe ni wota].
Ke time e uce pwo me piohiwon ko pwoâpwailo, pwohewii pa apwoâpwailo ubwo juif ne éni pwo bwohemwo, na e te pwo téteda ati he ni jo. 269.26 Ébéru 10.10Be mepie wonaa, ke me e o pwo me piohiwon ko mu he ni téé [me mele] tabuhi mu ha atabuhi ko a bwohemwo. Time uce wonaa! E caa te océiu ko tuie, ha a céiu benaamwon, ânebuhe a anebwén ko a bwohemwo. Ke e pineeng beme pa âpwailo. Ke e caa pwo me tieden a ta, ko a bwo mele ten.
27Mepwo é ne ko ni apulie, ke lé te océiu ko mele. Ke é alecehen, ke e bo tautilé wo Padué. 28Ke wo Kériso mwo, ke e te océiu ko mele, beme pineuhi ni ta pwo te ni apulie na hiwon jélé. Ke mepie e bo âmwobé, ke caa time uce a bwopwonen me e mwo tuwokenye mwo mu ha a ta. Kehe e o âmwobé beme e celuimikenye, wogenye na genye ucéieng. [Ke *a ju mulip na e ne tenye, ke o é dieli mwo.]
10E te océiu ko pwoâpwailo wo Kériso
1[É caa habwii tewé pie]: Ni *patén de Moosé, ke te ju a déme cehi, ni *adéihi na e bo âbé alece10.1 Na e bo âbé alece—Wo Kériso, ke e caa te pébé ni adéihi naa, alecehe a benaamwon ko ni patén de Moosé.. Ke time uce a ju déme ninaa. Be ni patén, ke e wâgo ko pa *apwoâpwailo ubwo pie, me e pwo me océiu ko pwoâpwailo ne ha a jo. Ke te piwien ati he ni jo.
Kehe icehi ana ati ni âpwailo naa, na te junihe hiwon, ke time uce jan me lé ne me mwomwon ke hején ni apulie na lé âbé mwonu Padué, 2ke me puu taabwon ni ta pwo telé. Be mepie jan, ke wieli caa time e o uce pipé ne kolé a pwonimelé, ke caa time lé bo uce pwoâpwailo mwo. 3Ni âpwailo na lé ne, ati he ni jo, ke lé paniimihi telé mwo ni ta pwo telé [na e teko mu kolé]. 410.4 Ébéru 9.13Be te nihe pwocoon me pétaabwon ni ta pwo te ni apulie, ko a cewéhe paaci me ni nani aiu.
5-610.5 Psaume 40.7−9Weengaa a watihe ni pwooti ce, li e pii te Padué wo Kériso, he li e tuiebé ne éni pwo bwohemwo:
Time uce nimem
ko ni âpwailo bépineuhi ne ni ta.
Time go uce hegi ni paaci na cini.
Time uce wâé tem ni âpipati.
Kehe go ne tong cehi
a éé apulie bépenem dem.
7Ke é pii tem pie:
“Woéo-ni ânebuhem.
É bo pacuwohi ana nimem kon.
Be wonaa apii kong ne he li tii tem.”Psaume 40.7−9
E ne a piapwo na mwo coho
8Go alihi, e pii wo Kériso pie, time uce wâé te Padué ni âpwailo me ni âpipati, me ni paaci na cini! Kehe icehi ana te ni patén, na e te wâgo konye, beme genye ne ati ninaa!
9Ke e pii mwo te Padué wo Iésu Kériso pie: Woéo-ni ânebuhem. É bo pacuwohi ana nimem kon. [Ke go alihi, ni pwooti naa, ke lé habwii tenye pie] e10.9 E—Kériso, ai Padué Caa. pwo me tieden a *piapwo ânebun, beme e ne a piapwo na mwo coho. 1010.10 Ébéru 9.12Ke wo Kériso, ke e caa te pwo ana nime Padué kon, ke e ne a één, beme âpwailo na te océiu ko pwo. Ke e caa tuwokenye mu he ni ta pwo tenye, ke e pwo me wogenye ni apulie te Padué10.10 2e phrase—Grek: Sanctifiés. Pineité. A bwopiinen mwo pie, jan me nye alihi a pwahamiin, me pipaunueng me pipwoeabwé ten..
1110.11 Exode 29.38[Ne ha a piapwo ânebun, ke] lé cuwo pwo apwoâpwailo wo lépwo apwoâpwailo ati he ni tan10.11 Ati he ni tan—Ni âpwailo na lé pwo, ke te ité koja ni âpwailo na piwéden, na te pwo cehi ha a tan na céiu ha a jo. Omehi a niide a tii 1. Kehe icehi ana te tice mu kolé celi pwojunuun me e tuwo ni ta pwo tenye.. Ke lé piohiwon ko pwo a âpwailo na te piwien. Kehe icehi ana te tice aceli te ju céiu mu ko ni âpwailo na lé pwo, celi jan me tuwokenye mu he ni ta pwo tenye.
12Ke mepwo é ne ko a âpwailo te Kériso10.12 A âpwailo te Kériso—A pipwoâpwailo ten naa, ke te weeng mwo, be e pineeng me e mele. Omehi Ébéru 9.28., ke e te océiu ko pwo. Ke te nihe pwojunuun me pineuhi ni ta pwo tenye dieli mwo10.12 Dieli mwo—Ni pwooti naa, ke wieli ni behi ni pwooti bépineuhi ne ni ta pwo tenye, ai wieli ni behi ni pwooti beme e tebwo pwo a juin.. Ke é alecehen, ke wo Padué, ke e pwo me e tebwo pwo juin [beme e pihuôhi ati ni naado] dieli mwo. 1310.13 Psaume 110.1Ke e te mu lang, die ha ace bwo caaite lépwona lé pwopa ne kon.
14Te é mu ko a âpwailo ten na te céiu, na e pwo me lé mwomwon ke hején dieli mwo ne ânebuhe Padué, ati ni apulie na e caa tuwolé koja ni ta pwo telé10.14 Na e caa tuwolé koja ni ta pwo telé—ai Ana e caa pwo me woélé ni apulie te Padué. Grek: Na caa paciitilé..
Ni patén na e ne he ni pwonimenye
15E te *pajuujuhi anaa tenye na a *Jenen Iitihi, ko a pwooti ce [na e pii wo Padué pie]:
1610.16 Jérémie 31.33; Ébéru 8.10Weengi kuti a piapwo
na geme o bo pwo
[me ni apulie tong]
ha a tan na é caa pacuwohi.
É bo ne ni patén dong
ne he ni pwonimelé.
É bo tii a pwooti tong
ne he ni bwo temehinaado telé.Jérémie 31.33
1710.17 Jérémie 31.34Ke e pii mwo pie:
É pineulé ko ni ta pwo telé,
ke o time é bo uce niimihi mwo
ni bwomu telé na ta.Jérémie 31.34
18Ke mepie e caa pineuhi ni ta pwo tenye, ke o caa time uce jan me genye mwo pwo mwo ace âpwailo.
ni béhabwiinen de lépwo acéihi
(Pwahamii tii: 10.19―13.25)
Nye imwi mangihi ni céihi tenye
19-2010.19 Ébéru 4.1610.20 Mataio 27.51Lépwo bééng, caa tehi ne tenye ali duaan li junihe iitihi [ne jeda he miiden] mu ko a bwo tée na a cewéhe Iésu. Be li e ne a één [beme e âpwailo] ke e tie ali mwaanu [bécapuhi bwonihi na ali duaan li junihe iitihi]. Ke o caa time uce piwâ genye me genye taa lang! Be anaa kuti a pwaaden10.19−20 E tie ali mwaanu…pwaaden—Grek: E tehi a pwaaden na mwo coho na e pitadiihi a mwaanu. Omehi Mataio 27.51. na mwo coho, ne ko a mulie [dieli mwo ne pele Padué].
21Ke caa pwo pa apwoâpwailo ubwo tenye, na e pihuô ne ha a mwa te Padué. 2210.22 Lévitique 8.30; Ézékiel 36.25; Éféso 5.26Ke e caa puu taabwon ni ta pwo tenye, beme pwaale konye, pwohewiin heme e puukenye ko a tabe na te ju bwakenu10.22 1re phrase—Grek: Caa pétaabwon ni tooli he ni pwonimenye, ke caa puu ni éénye ko a tabe na bwakenu.. Ke o caa te tice ace céiu naado celi me e o pipé ne konye kon. Ke bwobe jan me genye taa pele Padué, ne ha a pwonime na juuju, me a céihi na mang.
23Ke wâé heme genye imwi mangihi a céihi tenye ne ko ni adéihi na genye ucéihi [na e âbé mu pele Padué]. Be e o te pacuwohi nina e caa mi pii ânebun. 24Ke wâé heme genye picani tenye, me pipamwoiukenye ibu, beme piubwo da a pipwoééhe tenye me ni penem denye na wâé. 2510.25 Ébéru 3.13Ke genye nemwo cuwo koja ni pitihi tenye, pwohewii ni béén, ke wâé heme genye te pipamwoiukenye. Ke genye te cumang ne kon, be genye caa temehi pie, o caa tuie a Tan [na e bo mwojuia mwobé hen wo Padaame].
Genye pipwocile!
2610.26 Ébéru 6.4−8[Genye pipwocilekenye!] Be mepie genye te pwo me ubwo ni puninye, me genye pwo nina ta, wogenye nina genye caa temehi a juuju, ke o te tice ace âpwailo celi o jan me bépwonen me pineuhi ni ta pwo tenye naa! 2710.27 Ésaïe 26.11Ke te tice aceli genye hegi koja Padué, kehe te icehi a bwo tautikenye ten, me a bwo pwocuhinaado tenye ten! Ke anaa, na genye ucéihi ne ha a bwo mwotikenye, me éjén genye. Be ati lépwona lé pwobwoni Padué, ke e pwo me éle jélé ne ha a miû na junihe ubwo!
2810.28 Deutéronome 17.6, 19.15Ke é ne ko pa apulie na time e uce piténedehi ni patén de Moosé, ke tautieng me taunueng, hemepie alo ai cié celi lé pipé ne kon. Ke time uce piwâ lépwo béén me lé taunueng.
2910.29 Exode 24.8Ke o ade ace cuhinaado te lépwona lé tééti pa *Naî Padué ko ni bwomu telé? Be li e caa pwo me lépwo apulie ten10.29 E caa pwo me lépwo apulie ten—Grek: Il les a sanctifiés. Ke e caa pinelé ité., é mu ko a cewéhen: a cewéle li e pacuwohi a piapwo te Padué. Ke mepie lé ne me piticenaado ne kon, ke o ade ace cuhinaado telé? Ke mepie lé piciheta ne ko a Jenen Iitihi, pa apébé na a *pipwoééhe tice ja kon de Padué, ke o ade ace cuhinaado telé? [É pii tewé pie]: O te nihe ubwo dieli mwo! 3010.30 Deutéronome 32.25−36Be genye caa temehi pie, e caa pii [wo Padué] pie:
Te woéo cehi na é bo uje
[ne te nina lé pwo nina ta].
Te woéo cehi
na é o te muko ne telé
ce cemelé ko ni huô telé.Deutéronome 32.35
Ke a céiu mwo:
Ke e bo te tauti a bele ten
wo Padaame.Deutéronome 32.36
31Ke o te junihe pwoééhenye, hemepie wo Padué, na e *mulie dieli mwo, ke me e imwikenye beme e pwocuhinaado tenye!
Cumang ne ha a céihi die ha a pwonehin
32Wâé heme geé pipaniimihi ni tan ânebun, he geé hegi a pwéélang de Padué. Be é alecehe a bwo temehi nen dewé Kériso10.32 A bwo temehi nen dewé Kériso—Grek: A bwo pwo me pwéélang kowé., ke geé tooli ni tacebwén, me ni picani, me ni téé na te nihe binyi. Kehe icehi ana geé te cumang. 33Be lé pwotahinaado ne kowé, me pitaahikewé, ne ânebuhe ni apulie. Ke é he ni béé benaamwon10.33 É he ni béé benaamwon—ai Ce pibééwé. Wieli ce béén mu kolé, ke pwotahi ne kolé, ke ce béén, ke lé picani telé., ke geé picani te nina lé pwotahinaado ne kolé, pwohewiin ne kowé.
3410.34 Mataio 6.20, 19.29Be li geé mu he ni picani me ni téé ne ko ni [acéihi bééwé] na lé mu he karépu. Ke geé mu ha a pipwodéén, he li lé pé kojakewé ni dewé. Be geé temehi pie, caa etewé a adéihi [na e ne wo Padué] na piwéden, ke e mu dieli mwo.
35Ke é jenaa ni, ke geé mwoiu, ke geé nemwo pwo me emaan gewé. Be [mepie geé te cumang] ne he ni céihi tewé [ne ko Padué] ke o ubwo ace cemewé! 36Ke geé te cumang, beme geé pwo ana nime Padué kon. Ke geé o hegi ni adéihi, na e caa mi pii. 3710.37−38 Habakuk 2.3−4Be caa time uce bwolihi [ke e o tuiebé wo Padaame] pwohewii ana caa te tii ne he ni tii iitihi pie:
E o te ju pwome tuiebé
wo pana me e âbé.
O time uce bwolihi,
ke e o pihabwiieng.Habakuk 2.3
38[Ke e pii mwo wo Padué pie]: Wo pana e te céihi ne kong, ke mwomwon nang ne he pwahamiing. Ke e kon a mulie10.38 Grek: Wo pa apulie tong na mwomwon nang, ke e o mulie mu ko a céihi..Habakuk 2.4
Kehe wo pana e mwojuia mwo, ke muhi te Padué kon. 39Ke wo lépwona lé mwojuia mwo koja Padué, ke o tielé dieli mwo.
Kehe wogenye na genye céihi ne ko Padué, ke e celuimikenye.
11A céihi te ni Isaraéla ânebun
111.1 2 Korénit 5.7A céihi, ke a bwopiine ade? Me genye céihi, ke genye temehi me ubwo ne he ni pwonimenye, pie e o tuie ana wâé na genye ucéihi. Be a céihi, ke o *pajuujuhi ne he ni pwonimenye pie, e te cuwo, nina mwo time genye uce alihi ko ni naamiinye. 2-311.3 Genèse 1.1; Psaume 33.6; Ioane 1.3Te é mu ko a céihi, na genye temehi pie, wo Padué, ke e ne ati ni naado ko a pwooti ten. Be e ne a bwohemwo me a miiden11.2−3 A bwohemwo me a miiden… A pwooti grek éni, ke a bwopiinen pie, âge, monde, univers., me ati nina lé mu hen. Ati ni naado na genye alihi, ke lé tai âbé mu ko nina time genye uce alihi.
É bwolihi, ke lé céihi ne ko Padué wo lépwo ukéiu tenye. Ke te é mu ko anaa, na wâé ten jélé.
Abel
411.4 Genèse 4.3−10Wo Abel†, ke e céihi ne ko Padué. Ke te é mu ko a céihi ten, na e pwo a *âpwailo na wâé te Padué. Be piwéden koja ali e pwo wo pa cuwon, Kaina11.4 Abel; Kaina—Lupwo naî Adamu, pa bécéiuhe apulie ne pwo bwohemwo.. Ke e hegieng wo Padué, ke e pwo me mwomwon Abel ne he pwahamiin, mu ko a céihi ten. Ke hemepie caa bwolihi a bwo mele te Abel, kehe ninaa, ke lé mwo teko pacihekenye.
Énoka
511.5 Genèse 5.21−24Wo Énoka, ke e céihi ne ko Padué. Ke caa te tii ne he ni tii iitihi11.5 Caa te tii ne he ni tii iitihi—ai Wo Padué, ke e caa pipajuujuhi ne kon. pie, pa apulie na wâé te Padué nang. Ke te é mu ko a céihi ten, na wo Padué, ke e pééeng da he miiden, he e mwo teko mulie, be time e uce mele. Ke caa time lé bo uce alieng mwo ne éni pwo bwohemwo.
6Genye alihi pie, mepie tice céihi tenye, ke o pwocoon me ni apulie na wâé te Padué genye. Ke mepie [nimenye me] genye taa pelen, ke wâé heme genye céihi pie, te pwo Padué! Ke a céiu, ke wâé heme genye céihi pie, *adéi lépwona lé âbé céiieng mu he ni ju pwonimelé.
Noé
711.7 Genèse 6.13−22, 7.1Ke wo Noé, ke e céihi ne ko Padué. Ke te é mu ko a céihi ten, na e mi paciheeng wo Padué [ko a ujaa na nihe ubwo na e bo tuie]. Mwo time e uce alihi a ujaa wo Noé, kehe icehi ana e te paciiti Padué, ke e te piténedeeng. Ke e jili ali ong, ke tai celuimilé ati, me a pwomwoiu ten. Ke a céihi ten, ke e habwii tenye [a bwo time uce céihi te] lépwo béé apulie pwo bwohemwo, na caa tautilé me pwocuhinaado telé. Ke wo Padué, ke e ne me mwomwon Noé ne he pwahamiin, beme e ne ten ni adéihi ten. Tai cuwo ati ninaa mu ko a céihi te Noé.
Abérama
811.8 Genèse 12.1−5Wo *Abérama, ke e te céihi ne ko Padué. Ke te é mu ko a céihi ten, na e pitabemi Padué, he li e todeeng. Ke e engen koja a amu ten, nge ha amu na me e bo habwii ten wo Padué. Be mwo time e uce ju temehi, he na me e â lang. 911.9 Genèse 35.12Ke me e tuie nge ha ali amu li e ne ten wo Padué, ke e te mu lang ko a céihi ten, he ni mwa mwaanu, be e pwohewii pa coho.
Ke lu te wonaa mwo wo Isaaka, pa naîn, me Iakobo, pa pabun. Be ali *piapwo li e pwo te Abérama wo Padué, ke te a de mwo ni piebehieng11.9 Dernière phrase—Grek: Be lé hegi me weeng a piapwo.. 10Be a ju amu na e ucéihi wo Abérama, ke a amu na e bahi wo Padué, âcehi ana te nimen kon; amu na e te mu dieli mwo.
1111.11 Genèse 18.11−14, 21.2; Roma 4.19Wo Abérama, me Sara, ke caa lu ukéiu aiu me ukéiu toomwo. Wo Sara, ke ê toomwo na te tice naîn, be time uce jan me pwo naîn. Kehe icehi ana lu céihi ne ko Padué. Ke te é mu ko a céihi telu, na pwoapulie ko Sara11.11 Ni béé tii iitihi he pwo grek, ke lé pii a céihi te Sara, ne ha a niide a tii ce. Kehe icehi ana ni béén, ke lé pii Abérama. Ke ni béén mwo, ke lé tai piilu.. 1211.12 Genèse 15.5, 22.17Ke caa nihe hiwon ni niide apulie na lé tuie mu kon. Ke caa nihe hiwon jélé pwohewii ni ceni jeda he miiden, ke ni won jeoté ticepwon, na time uce jan me genye pine. [Be caa te cuwo, pwohewii ana e caa mi pii wo Padué.] Ke lé tai âbé ati mu ko pa apulie na te céiu nang, na caa te nihe pa ukéiu!
1311.13 Genèse 23.4; 1 Chroniques 29.15; Psaume 39.13; 1 Pétéru 2.11Wo Abérama, me Isaaka, me Iakobo11.13 Abérama, me Isaaka, me Iakobo—Grek: Ati lépwo apulie naa. Kehe icehi ana time uce pii ati lépwo piebehi Abérama na te junihe hiwon jélé, na piilé ne ha a niide a tii 12., ke time lé uce alihi ati [ni adéihi na e âbé mu ko] ana e caa mi pii wo Padué, he lé mwo mulie. Kehe icehi ana lé te céihi taaci [pie o te cuwo ha ace céiu tan]. Ke lé pipwodéén, be pwohewiin heme lé alihi mu ité a bwo pacuwohi nen. Be lé patemehi ati pie, woélé lépwo coho ne pwo a bwohemwo ce.
14Ke wo lépwona lé wonaa ko ni bwo cihe telé, ke lépwo apulie na lé ko hane ace céiu amu, na me bo te a ju amu telé. 15Be hemepie nimelé, ke jan me lé mwojuia mwo, kehe time lé uce niimihi ali amu li lé âbé mu hen.
16Be lé niimihi a amu na te junihe wâé koja ace céiu amu éni pwo bwohemwo. Be amu na e jeda he miiden, na e pwopweehi me delé wo Padué. Ke weengaa a watihen me genye alihi pie, wo Padué, ke time uce tanim nang, heme lé toii kon pie Padué helé.
17-1811.17−18 Genèse 21.12, 22.1−14Wo Abérama, ke e nihe céihi ne ko Padué. Ke e pii ten wo Padué pie, o bo te junihe hiwon ce piebehieng, celi lé o bo pituie mu ko pa naîm Isaaka.Genèse 21.12
Kehe icehi ana é alecehen, ke e tacebwéni a céihi ten wo Padué. Be e pii ten pie, me e *pwoâpwailo ten ko Isaaka. Ke wo Abérama, ke e te pipwopweeng ne kon beme e pwo. 1911.19 Roma 4.17Be e céihi pie, te jan ne ko Padué, me e pwo me lé mulie mwo wo lépwo amele. [Kehe icehi ana e pacuwoeng wo Padué] ke e ne Isaaka mwo te Abérama. Ke pwohewiin heme e caa mulie cemwo wo Isaaka11.19 Ke pwohewiin heme e caa mulie cemwo… ai Weengaa a céiu ocine [me denye]..
Isaaka
2011.20 Genèse 27.27−29,39−40Wo Isaaka mwo, ke e te céihi ne ko Padué. Ke te é mu ko a céihi ten na e adéi [lupwo naîn]: wo Iakobo me pa cuwon Ésaü. Ke e ne telu ni adéihi, na o bo cuwo he ni tan na mwo e he pwaaden.
Iakobo
2111.21 Genèse 47.31―48.20Wonaa mwo ne ko Iakobo. Be e te céihi ne ko Padué. Be é ânebuhe a bwo mele ten, ke e caamada ko a bwajaan, ke e paunu Padué. Ke e adéi lupwoli naî Josef. Ke te é mu ko a céihi ten na e wonaa.
Josef
2211.22 Genèse 50.24−25; Exode 13.19Wo Josef, ke e céihi pie, alecehe a bwo mele ten, ke wo Padué, ke e bo pé a puapulie ten *Isaraéla mu ha amu *Aigupito. Ke é mu ko a céihi ten, na e mi pii te lépwo béén pie, mepie te cuwo a tan naa, ke me lé bo te pé mwo céilé ni duun mu ha amu Aigupito11.22 Dernière phrase—Grek: Ke e ne a pihuô ten, ne ko ni duun..
Lu nyaa me caa te Moosé
23-2411.23 Exode 1.22, 2.2Wo lu nyaa me caa te *Moosé, ke lu céihi ne ko Padué. Ke te é mu ko ni céihi telu, na time lu uce piténedehi a patén de Faraô, pa daame he lépwo Aigupito. [Be e huôhi pie, me lé taunu ati ni nahi ewa aiu na lé âbeele ne pele ni Isaraéla.] Lu neduwo Moosé he na cié wole. Be lu alihi pie te nihe wâé a bwo alieng11.23−24 Lu alihi pie te nihe wâé a bwo alieng—Wo lépwo Isaraéla ânebun, ke lé céihi pie, a bwo wâé na a pwahamii pa apulie, ke a inenaado pie, wâé te Padué nang. Omehi 1 Samuel 9.2; Apostolo 7.20.. [Ke e tooeng ê naî pa daame Faraô, ke e pééeng beme pa naîn.] Ke ubwo Moosé ne ha a pomwa te pa daame Faraô.
Moosé
Wo Moosé, ke e céihi ne ko Padué. Ke é mu ko anaa, na muhi ten me lé pii kon pie, pa naî êgi naî pa daame he lépwo Aigupito. 25Ke e mu pele [ni ju béén, wo lépwo Isaraéla], a puapulie te Padué, ha a benaamwon na ta ne kolé hen. Be nimen me e mu he ni picani na lé mu hen, koja a pipwodéén [ne pele Faraô] ne ha a mulie na muhi te Padué kon. Be time uce bwali a pipwodéén naa.
26Ke pihoonieng, pwohewii a bwo pihooni Kériso: pa *Mesia [li e neeng bé wo Padué, hiwon ni jo alecehen]. Wâé te Moosé anaa, koja ace bwo hegi ati ne ni wâé ne ha amu Aigupito. E wonaa, be e niimihi ni cemen na e bo ne ten wo Padué.
27Ke te é mu ko a céihi ten, na e [pé a bele ten, beme lé] wie mu Aigupito. Time uce mwotieng ko ace bwo okéé te pa daame Faraô. Ke e te cumang, be e te alihi, ko a céihi, pana time genye uce alieng ko ni naamiinye. 2811.28 Exode 12.21−30Ke te é mu ko a céihi ten, na e [huôhi ne te a bele ten pie, me lé] pwo a pipwodéén ko a *Pacika. Be nimen me lé niimihi he li lé timi ni jije pomwa telé, ko a cewéhe a nahi muto, beme time e uce taunulé wo pali *âcélo li e taunu ni bécéiuhe ewa aiu [ha amu Aigupito].
Lépwo Isaraéla
2911.29 Exode 14.21−31Wo lépwo watihenye, wo lépwo Isaraéla, ke lé céihi ne ko Padué [ke lé âcéi Moosé mu ha amu Aigupito]. Ke te é mu ko a céihi telé, na meiu a pwaadeniilé nge ha a jié Megele. Ke lé gaale ko a céiu goon [ke celuimilé]. Ke me lé tailé wo [lépwo coda te] lépwo Aigupito, ke e âbé huîilé ali tabe, ke lé tai mele.
3011.30 Josué 6.12−21Ke wo lépwo Isaraéla, ke lé te céihi mwo ne ko Padué. Ke te é mu ko a céihi telé mwo, na lé engen aujenihi a goomwa babé bwonihi Iériko he na 7 ni tan. Ke e te tupwo kuti ali goomwa.
Rahab
3111.31 Josué 2.1−21, 6.21−25; Cang 2.25Rahab, ê toomwo pwopwaaden [ne Iériko] ke e céihi ne ko Padué. Ke te é mu ko a céihi ten, na e hegi lupwo coda Isaraéla, li mi nelu ngen beme lu â alihi a pwomwo ubwo. Ke anaa, na e *celuimi [a pwomwoiu ten]. Kehe icehi ana lé tai mele ati ni apulie ha a pwomwo ubwo, mu ko ana time lé uce piténede Padué.
Hiwon mwo ni béén
3211.32 Juges 6.11―8.32, 4.6―5.31, 11.1―12.7, 13.2―16.31; 1 Samuel 16.1―1 Rois 2.11; 1 Samuel 1.1―25.1O ade aceli me é mwo pii mwo? Time uce jan ni benaamwon me é uti ati [nina lé pwo mu ko ni céihi telé, pwohewii] Gédéon, Barak, me Samasona, me Jefté, me *Davita, me Samuel, me ati lépwo péroféta mwo:
3311.33 Daniel 6.2−28Lé piwéden koja ni mwametau wo lépwo béén;
Lé pé a pihuô ko a juuju wo lépwo béén;
Lé [pwo nina wâé, ke lé] hegi a adéihi te Padué wo lépwo béén;
Lé capuhi a pwo ni liô beme lé nemwo wiilé;
3411.34 Daniel 3.23−27Lé taunuhi ni miû na ubwo wo lépwo béén;
Lé cela ko lépwona nimelé me lé taunulé;
Lé hegi ni niihelé na ubwo wo lépwo béén na tice niihelé, beme lé piwéden ne ko a pa, ke me lé pacelahi ni mwocoda na nihe ubwo.
3511.35 1 Rois 17.17−24; 2 Rois 4.25−37Ke pwo ni béé toomwo, ke [te é mu ko ni céihi telé, na] lé hegi mwo ni aiu helé, me ni béélé11.35 Ni aiu helé, me ni béélé, me ni naîlé—ai Lépwo âjiénelé. Grek: Lépwo amele telé., me ni naîlé li lé caa mele, be lé caa mulie cemwo.
Ke pwo ni béé apulie, na [te é mu ko ni céihi telé] na lé mu he ni picani, be lé pwotahi ni éélé [wo lépwona muhi telé ko Padué] die ko a bwo pwo me lé mele. Ke time lé uce [pawie ni céihi telé, beme o] tuwolé. Be lé caa mi niimihi a mulie na e alecehe a mele, na lé bo hegi; a mulie na te nihe piwéden [koja a mulie ce, ne éni pwo bwohemwo].
3611.36 1 Rois 22.26−27; 2 Chroniques 18.25−26; Jérémie 20.2, 37.15, 38.6Wo lépwo béén, ke pihoonilé, me ahilé ko bwaliiwota. Ke wo lépwo béén, ke nelé he karépu, ke cielé ko itihe toki. 37-3811.37 2 Chroniques 24.21Ke taunu ni béén ko péi. Ke woli ni béén ko teua. Ke ei me alo mu ko ni béén ko gili.
Ke pwo ni béén na pwotahinaado ne kolé, me cibéélé mu he ni béé duaan nge he ni béé duaan. Ke lé cela nge ha a melé, ke é nge pwo ni juwole, ke te tice mwaale telé. Ke tice naamuulé, ke lé cuwohe ni imuto, me nani. Ke lé taduwo nge he ni mwa péi, me ni pwon na ini ne he pule. Ke te nihe pwoééhelé, be lé te junihe mu he ni picani mwo. [Au, pwoééhelé!] Be te nihe wâé jélé koja a bwohemwo ce.
Lé tai ucéihi ana genye hegi
39Ati ni apulie naa, ke lé tai céihi ne ko Padué. Ke te é mu ko ni céihi telé, na e pii me wâé jélé. Kehe icehi ana te tice paceli e ne me e hegi, ha a benaamwon naa, ati [a adéihi] li e caa mi pii wo Padué [pie me e bo ne te a bele ten. 40Ke he é mu ko ade?] Be lé ko ucéikenye [wogenye na genye mwo ko mulie jenaa]. Be wo Padué, ke e caa mi pwopweehi ânebun pie, me e bo pwo me tai mwomwon genye, me hején genye ne ânebuhen, wogenye me woélé. Ke a naado na te nihe wâé ne konye jenaa11.40 Grek: Wo Padué, ke e caa mi alihi ana te junihe wâé me denye koja anaa, be time o uce wâé me e pwo me hején jélé kojakenye. Weengi a naado na te junihe wâé me denye: Be nye alihi a adéihi te Padué he nye mwo mulie éni pwo bwohemwo, mu ko a bwo mu ibu tenye me Kériso..
12Genye tai cumang pwohewii Iésu
112.1 1 Korénit 9.24−25Caa pajuujuhi ne tenye ni céihi te lépwona lé ânebuhenye, lépwona te junihe hiwon jélé. A mulihelé, ke a béhabwiinen denye12.1 1re & 2e phrases—Grek: Lé aujenikenye wo lépwo apipajuujuhi na lé pwohewii a nii na ubwo. Ocine ko a jéhilé, be te junihe hiwon jélé.. Ke mepie wonaa, wogewé lépwo bééng, ke wâé heme genye pétaabwon ati ni âneule na lé pacuwohi ni bwo téte tenye. Genye necu ni ta na e imwikenye! Ke genye cumang, beme genye te téte die ha anebwén kon.
2Genye ome Iésu cehi, be weeng na e céihi tenye, mu ha atabuhi kon, ke weeng na e wéihi, beme o hején die ha a pwonehin. Ke e hegi a penem den, ne ha a bwo uca ten. Ke e te nihe mu he ni picani, ke e mele ne ko a *kuricé: a bwo mele na pwo me tanim. Kehe icehi ana e pwo me piticenaado ne ko a tanim naa, be e niimihi a bwo pipwodéén den, ne ha anebwén kon. Ke wo Padué, ke e caa neeng me e tebwo pwo juin [beme e pihuôhi ati ni naado].
3Wâé heme genye niimihi a bwo picani ten ne ko ni apulie ta na lé te nihe pwotahinaado ne kon. Be mepie wonaa, ke o time genye uce pwoemaan, ke me nye patupwo [ni céihi tenye].
E punekenye be eânimen denye
4[É temehi pie, lé pwopa ne kowé wo lépwo apulie ta, pwohewii ali lé pwo te Kériso, ke geé te junihe mu he ni picani kon.] Kehe icehi ana mwo time geé uce téele [pwohewii Kériso] die ko ace bwo mele tewé12.4 Grek: Mwo te time geé uce ju téele pwobwonihi a ta die ko a bwo tée na a cewéhe[wé].! 512.5−6 Job 5.17; Proverbes 3.11−12; Pii Beetihi 3.19Ke a céiu mwo, kona geé caa pineuhi pie, e pii kowé pie, wogewé ni naîn, ke e punekewé [ko a bwo mu tewé he ni téé me ni picani]? Be e pii pie:
Pa ju naîng wé,
go tabemi Padaame na e punekewé.
Go nemwo pwo me pita tem.
6E pune ati ni ju naîn.
E pune ati lépwona
eânimen delé.Proverbes 3.11−12
7-812.7 Deutéronome 8.5É mu ko anaa, na geé hegi ehi ni pune te Padué, he e huôhi ne tewé ni naado. Be e wonaa te ati ni naîn. Be he woo pace ewa celi time e uce ne pune ten wo pace caa ten? Ke mepie time e uce wonaa tewé wo Padué, ke a bwopiinen pie wogewé, ke time uce ni ju naîn. 9Ke mepie genye paciiti ni caa tenye ne éni pwo bwohemwo, nina lé punekenye me pwopweehi ne konye, ke o te nihe wâé mwo heme genye hegi, beme e pwopweehi ne konye wo Padué Caa tenye, na e jeda he miiden. Ke e o mu konye *a ju mulip12.9 Ke e o mu konye a ju mulip—ai Ke genye bo picaa a bwo mulie ha a mulie na wâé ten. Grek: Ke genye bo mulie..
10Be wo lépwo caa tenye, ke lé te punekenye me éewo konye ha a cuwo benaamwon na te ju bahin, âcehi nina nimelé kon, me ni âniimihinaado telé. Kehe icehi ana wo Padué, ke e huôhi ne tenye ke e punekenye, beme e picani tenye [dieli mwo]. Be wâé ten heme genye â ni apulie ten na wâé genye, ke iitihi, ke hején pwohewiieng.
1112.11 Cang 3.17−18A juuju pie, time uce wâé tenye a cuwo benaamwon na genye mu he ni pihuô me ni pune tenye. Kehe icehi ana mepie genye hegi ehi, me picani ne kon, ke é alecehen, ke e o bo pwo ce cemenye celi o nihe wâé. Be genye o bo ni apulie ko a péém: nina lé te pwo nina wâé, ke mwomwon.
Go cuwoda!
1212.12 Ésaïe 35.3Anaa na [é muko pii tewé pie]:
[Go cuwoda!]
Go pamwoiuhi lupwo im!
Hane ce niihe lupwo am na éjén!
1312.13 Proverbes 4.26Go â ha a pwaaden na mwomwon!
Go nemwo padep kojan!
[Pwo taaci nina wâé!]
Beme o ne tem mwo ace niihem,
wogo pa tebwa!
Ke go engen mwomwon!
Go te cuwo ko piténede Padué!
14[Weengi ni pihuô tong me dewé]: Geé hane me geé mulie ha a péém me ni apulie ati. Ke geé mulie ha a mulie na wâé te Padué. Be o te junihe pwocoon me geé ali Padaame, hemepie time geé uce wonaa.
15Geé pipwocile! Geé nemwo piâ ité koja a *pipwoééhe tice ja kon de Padué [be koli time geé bo uce hegi12.15 Time geé bo uce hegi—Wieli bwo time uce hegi ne he ni pwonimenye; wieli te ace céiu naado, ai pace céiu apulie, celi e patieden a péém ko pimu ibu, ke pineitééeng. Wieli a bwo pine jéinye ne ko Padaame, me a bwo âcehi ne ni duéé hauli. Omehi Deutéronome 29.17. ni adéihi ten]. Ke geé piwéa kowé, me pipwoiipikewé, be koli e bo ne waan ne kowé ace céiu ta, na pwohewii a meté na ta. Ke e epin ko engen, ke e ne ni acehin na maga.
16-1712.16−17 Genèse 25.29−34, 27.30−40Ke geé pipwocile mwo, beme o te tice mu kowé celi lé pipule hauli. Ke a céiu mwo, ke me time geé uce pipwohewii a bwomu te Ésaü ânebun. Be genye tai temehi a jepule kon. Be te pa cuwon, na eten ni *adéihi te caa ten. Ke e icuhi [haulihi te pa ciéén] ne ko a tami wiinaado na te céiu! Ke é alecehen, [ke e bwo alihi ana e pwo] ke e pimiibule ke é, ne he pwahamii caa ten, beme e ilehi kojaeng mwo ni adéihi ten. Kehe icehi ana caa time uce jan. Ke caa time e uce hegieng wo caa ten. Anaa na me geé pipwocile! Ke geé pwo me wâé tewé ni naado [ne ha a Mwametau] te Padué!
Genye piâmwonuhi a juwole iitihi
1812.18 Exode 19.16−20; Deutéronome 4.11−12Wogewé lépwo bééng, genye caa piâmwonuhi a juwole na time uce jan me genye ti kon [me alihi ko lupwo naamiinye]. Mepwo é ne ko lépwo ukéiu tenye, lépwo *Isaraéla ânebun, [ke te nihe mwotilé] he li lé piâmwonuhi a juwole Sinaï, [beme lé o hegi ni patén de Padué]. Be lé alihi nelang a duwele miû me a bwén, me a melepiing. Ke e ti kolé a dan-he-duéé12.18 Grek: Caa time geé uce âmwonuhi a juwole na jan me geé ti kon, na pwo a miû na junihe ubwo na e kon, me a nii, me a bwén, me a dan-he-duéé. Dan-he-duéé—Munying.. 19-2012.19 Exode 20.18−21; Deutéronome 5.22−2712.20 Exode 19.12−13Ke lé téne a pwocuu tutu. Ke e pacihelé [wo Padué] ha a pwocihe na nihe ubwo: [Iitihi me geé â pwo a juwole ce!] Pace wota, me pace apulie celi e ti kon, ke o taunueng ko péi!Exode 19.12−13
Ke [te junihe mwoti lépwo Isaraéla] ke lé toii da céiieng pie: «Éé! Go cuwo, go Padaame!» Be time uce jan me lé téneeng, 2112.21 Deutéronome 9.19die ko *Moosé mwo, [pa apihuô telé]. Be caamadaim kon, ke éjén nang ko a bwo mwotieng.
22-23Mepwo é ne konye, ke genye pipwodéén, me genye piâmwonuhi a juwole *Sion, me a pwomwo ubwo na e jeda he miiden. Be te é *Iérusaléma [na mwo coho] a amu te Padué na e mulip. Ke genye ko cuwo ha amu te pa atauti ati ne ni apulie. Ke pwia ni pwonimenye, be wogenye lépwo ju naî Padué12.22−23 Lépwo ju naî Padué—Grek: Lépwo cuwo ni naî Padué. É ne pele lépwo Juif, ke ni cuwo ni ewa, ke nina etelé a adéihi na ubwo., wogenye na caa tii ni niinye ne he miiden [beme etenye ni adéihi ten]. Ke genye o tai pimu ibu me nina lé caa mele12.22−23 Me nina lé caa mele… Grek: Me ni jene lépwona lé mwomwon, ke caa hején jélé. ânebun, nina wâé te Padué jélé: ati lépwoli e pwo me mwomwon jélé me hején jélé ne he pwahamiin. Ke lé aujenikenye ni *âcélo na te junihe hiwon jélé, na time uce jan me genye pinelé.
2412.24 Genèse 4.10; Ébéru 8.6Ke genye âbé céii Iésu, pali e pébé céiikenye a *piapwo na mwo coho [li e caa pwo wo Padué] me denye. Ke e caa pacuwohi wo Iésu, ko a bwo tée na a cewéhen [he li e mele me denye]. Ke a cewéhen, ke te nihe pwojunuun koja a cewéhe12.24 Cewéhe Abel—ai Ali âpwailo li e ne wo Abel. Abel12.24 A cewéhen, ke te nihe pwojunuun koja a cewéhe Abel—Wo Abel, ke pa bécéiuhe ni apulie na taunulé. Omehi Ébéru 11.4. A bwo tée na a cewéhen, ke e pébé a cuhinaado te pa cuwon, Kaina, li e taunueng. Kehe icehi ana a cewéhe Kériso, ke e pébé a bépineuhi ne ni ta pwo tenye ati, ke e pwo me wâé genye ne he pwahamii Padué..
2512.25 Ébéru 2.1−3, 10.26−29Anaa na me geé pipwocile, be koli muhi tewé me geé piténede Padué, na e ko pacihekewé! Be li pwocoon me lé cela ko a cuhinaado wo lépwo watihenye, lépwo Isaraéla, he li lé bitelé koja Moosé. Ke wo Moosé, ke te pa apulie pwo bwohemwo. Ke o bo woté ace cuhinaado te ati lépwona lé bitelé koja Padué, na e jeda he miiden?! 2612.26 Aggé 2.6Be li [é ne pwo a juwole Sinaï] he li e pwo me gun a bwohemwo ko a pwocihe ten, ke e caa pii tenye pie: É bo pwo me gun mwo a bwohemwo ati. Ke time uce a bwohemwo cehi, kehe o te a miiden mwo!Aggé 2.6
27A bwopiinen pie: O tieden a bwohemwo me ati nina lé mu pwon, be ni naado na e ne wo Padué. Kehe te icehi ni naado na lé mu pelen, na lé o tee mu dieli mwo.
A Mwametau na time o uce gun
28Genye caa hegi [a atebwo ne ha] a Mwametau ten na time uce gun! Anaa na wâé heme genye nihe pwo-olé ten, me pipaunueng. Ke genye penem den ko a mulip na iitihi ke wâé ten. Ke genye te nihe pwoiitihi ten, 2912.29 Deutéronome 4.24, 9.3be wo Padué henye, ke e pwohewii a miû na e pwo me éle tieden ati ni naado!
13Bénebwéne pwooti
1Wâé heme geé te pipwoééhewé, pwohewii ni acéihi ne ko Kériso. 213.2 Genèse 18.1−8, 19.1−3; Roma 12.13Ke geé hegi ni apulie na lé âbé pelewé. Be wo lépwo béén, ke time lé uce temehi pie, lé hegi ni *âcélo te Padué. 3Ke geé niimi mwo lépwo [acéihi bééwé] na élé he karépu, ke geé mu he ni picani me woélé, pwohewiin heme wogewé na ciekewé mwo. Ke te piwien mwo ne ko nina ahilé me pwo ahinaado ne ko ni éélé. Wâé heme geé pwo me cunu gewé me woélé, pwohewiin heme ni ééwé na lé pwotahi ne kolé13.3 Pwohewiin heme ni ééwé na lé pwotahi ne kolé—ai Be wogewé mwo, ke pwo ni ééwé, ai Be geé mwo mulie ne éni pwo bwohemwo me woélé, ai Be wieli o pwotahi ne kowé ha ace céiu tan celi mwo e he pwaaden. Grek: Be te wogewé ha a éé apulie..
413.4 Éféso 5.5Ke geé paciitihi a piaten. Ke geé nemwo pibune: Nemwo êjele koja ni mwodewé, ai ni aiu hewé. Be wo Padué, ke e bo ne cuhinaado te lépwona lé wonaa, me ati lépwona lé pipule hauli me ni béén.
E picani tenye wo Padaame
513.5 Deutéronome 31.6,8; Josué 1.5Geé nemwo pwo me ânenimewé ne ko a mwani! Geé pipwodéén ko ni naado na e pelewé. Be e caa te pii wo Padué pie: Time é o uce engen kojako, ke é bo te pwopweehi ne kom.Deutéronome 31.6
613.6 Psaume 118.6Ke anaa kuti, na me time uce pinekepé tenye. Be:
E te *celuimiéo wo Padaame hung.
O time uce mwotiéo ko ni apulie.
Te tice aceli jan me lé pwo tong.Psaume 118.6
Weengaa a pwooti na me genye pipatemehi, ne ha a pipwodéén!
713.7 1 Korénit 4.16Geé niimi lépwo apihuô tewé ne ha a céihi, li lé pébé céiikewé a pwooti te Padué. Ke geé nenimewé ne ko ni bwo mulie telé, me ni *adéihi na e âbé mu kolé13.7 Adéihi na e âbé mu kolé—ai A bwo mele telé.. Ke wâé heme geé pipwohewiilé.
Âcéi Iésu
8Wo Iésu, ke te céiu a bwo mu ten, ânebun, é jenaa, ke é dieli mwo! 913.9 Roma 14.17Geé nemwo hegi haulihi ni muko pétaapwo pune na ité. Be koli lé bo pipatiedenikewé. Be te icehi a *pipwoééhe tice ja kon de Padué, na e temehi me e pamwoiuhi ni pwonimenye, kehe time uce a bwo piténedehi nen denye ni patén ko ni wiinaado. Be te junihe piticenaado ne ko ninaa.
10Pwo a *apwoâpwailo tenye [na piwéden]. Ke wo lépwo apwoâpwailo éni pwo bwohemwo, ke te tice mwomwon delé ne kon. 1113.11 Lévitique 16.27Wo pa apwoâpwailo ubwo, ke e mu pébé a cewéhe ni wota na taunuhi, ne ha a duaan na junihe iitihi, beme a âpwailo bépineuhi ni ta. Ke ni éé ni wota naa, ke cini ne âoté pwomwo13.11 Cini ne âoté pwomwo… A inenaado ko a bwo tahi taabwon ne ni ta pwo te a bele. [ne ha a céiu duaan na e ité koja a pimu te ni apulie].
1213.12 Ioane 19.17Wo Iésu, ke [weeng pa âpwailo tenye. Ke lé téétieng, ke] e mu he ni picani, ke e mele ne pwomwo koja a pwomwo ubwo. Ke tée a cewéhen, beme puu taabwon ni ta pwo tenye, ke me pwéélang [ni pwonimenye ne ânebuhe Padué].
1313.13 Ébéru 12.2Wâé heme genye âcéi Iésu, ke me genye te mu he ni téé me ni tanim kon13.13 Tanim kon—A bwo mele ten ne ko a kuricé. Omehi Ébéru 12.2.. Ke genye wie me weeng koja ni bwo mulie te ni apulie [na ta jélé]13.13 Koja ni bwo mulie te ni apulie na ta jélé—Grek: Koja a duaan na lé mu hen ne ni apulie (hors du camp). Time uce a bwopiinen pie, genye mulie ité koja ni béé apulie; wâé heme nye mulie ha a mulie iitihi, ke ité koja a mulihelé na ta, be a ju amu tenye, ke time uce e éni pwo bwohemwo. Wâé heme nye picani, heme lé tahi taabwonikenye, me pwotahi ne konye, me pihoonikenye, be ni naado na lé te pwo te Iésu.. 1413.14 Ébéru 11.10,16, 12.22Be a ju amu tenye, ke time uce e pwo a bwohemwo ce, be o tieden. Kehe genye omehi cehi a amu na e jeda he miiden, he na genye o â lang13.14 2e phrase—Grek: Ke genye hane a amu na e bo tuiebé..
1513.15 Psaume 50.14,23Weengi ni âpwailo na wâé te Padué, na me genye ne ânebuhen: Me genye pipaunuhi a niin, me pipatemehi pie, Padaame henye. 1613.16 Filipi 4.18Ke a céiu: Ke me genye pwo ana wâé, ke me genye pipwoééhe nina tice delé. Anaa kuti a âpwailo na wâé ten.
Pwo me piwahin gewé ke geé pwoiitihi
1713.17 1 Tésalonik 5.12Wâé heme geé pwo me piwahin gewé, ke me geé piténede ni apihuô tewé [ne ha a céihi]. Be e bo tautilé wo Padué mu kowé. Ke geé pwo me lé pipwodéén ko ni bwomu tewé, ke geé nemwo pwo me téé ni pwonimelé. Be mepie piwahin jélé mu kowé, ke o te ta ne mwo kowé.
1813.18 Apostolo 24.16; 2 Korénit 1.12[Dieli jenaa ni, ke] time e uce pipé ne kome ni pwonimeme. Ke wâé heme geé te pwoiitihi me deme13.18 Me deme. Wieli e te pipiieng mwo wo pa atii na a tii ce., beme te wâé ni bwomu teme, ne ha ati ni bwomunen. 19Ke a céiu mwo, ke é te ju ilekewé me ubwo pie, me geé pwoiitihi beme é epin ko mwojuia ne mwo pelewé.
Adéihi
20-2113.20 Jérémie 32.40; Ézékiel 37.26; 1 Pétéru 2.25É ile Padué, pana e ne tenye a péém, pie, me e ne tewé ati celi tice tewé, beme geé pwo ana nimen kon. É ilehi kojaeng pie, me e penem kowé, na e pwaadeniin bé wo Padaame henye, Iésu Kériso, beme o pwo ce acehin ne kowé celi te junihe wâé ten. [Ke é pwoun de] Iésu Kériso, pa awéikenye, wogenye na genye pwohewii a pubu muto ten. [Be e pineeng me denye die ko a bwo mele ten.] Ke a cewéhen li e tée, ke anaa kuti ali âpwailo li e pacuwohi a *piapwo [te Padué] ne tenye, na o tee mu dieli mwo. Ke wo Padué, ke e pamulipieng mwo mu ha amele. Wâé heme te ete Kériso a bwo ubwo na a wâé dieli mwo! Amen!
Pinelé
22Wogewé lépwo bééng acéihi, é ilehi kojakewé pie, me geé hegi ehi ni âpihuô tong ne ha a tii ce. Be time uce bwolihi nina é tii, beme é pamwoiukewé, me patemehi tewé.
23A jepule wâé ko pa béénye Timoté: Be e caa wie mu he karépu! Ke mepie e epin ko tuiebé ne éni, ke e bo âbé céing hemepie é bo âdé caniêkewé.
24Geé ne a bwocu tong te lépwo apihuô tewé ne ha a céihi, me ati ni acéihi. Ke lé pwobwocu tewé mwo, ati ni acéihi éni ha amu Itali.
25Wâé heme e mu pelewé a pipwoééhe tice ja kon de Padué!
Adéikewé!