A béalohe tii te Paulo
nge céii
Timoté
Atabuhi ko a tii
Woo na e tii a tii ce?
Wo Paulo, pa apostolo.
E tii éniile?
Ha awieme a jo 66 me 67, ha a béalohe bwo mu he karépu te Paulo ne Rome. Omehi Atabuhi ko a tii 1 Timoté. A bénebwéne tii na e tii, be time uce bwolihi, ke te ju é alecehen, ke e pwo me taunueng wo Néron, pa daame he lépwo Roma. Be pana e tééti lépwona lé céihi ne ko Iésu.
E tii me dee?
Te Timoté. Omehi Atabuhi ko a tii 1 Timoté.
É ko ade na e tii?
E temehi wo Paulo pie, o caa time uce bwali a mulihen, ke e pwotii nge céii Timoté, be te junihe eânimen den, pwohewiin hemepie te pace ju naîn (1.3). E tii beme e habwii a bwo pipwoééhen den, ke me e pamwoiueng ne ha a céihi ten. Ke e pii ten ni bwomunen ne ko lépwo apipune na lépwo agele.
Ade ace âne a tii ce?
Wo Paulo, ke pa apulie na te junihe ubwo nang ne ha a céihi. É ne ha a tii ce, ke e tii ni bénebwéne bwo niimihinaado ten, ke genye alihi a pwonimen, ke ana a junaado ne ten. Weengi a pune na e ne te Timoté ne ha a tii ce:
• Go te ome Iésu, ke go te âcéin taaci, dieli ha a pwonehin, pwohewiiéo (2.8−13; 4.6−8).
• Go paciitihi a mulihem (2.21−22).
• Go nemwo pwo me piwâ go heme go pwo ni penem na e ne tem wo Padaame, be e ne tem a junuun (1.6−8).
• Go tee cumang ne he ni picani me ni téé na e tuie ne kom, mu ko ana wogo, ke pa apulie te Iésu (2.3−7; 4.5).
• Go te cuwo ko piténedehi ni pwooti na juuju, na e mu ha a Tii Iitihi (1.13; 4.14−17), ke go te cuwo ko pipatemehi ke pacémuni ni apulie kon (2.15; 4.5).
• Go tahi taabwon ni cémun na gele (2.21), ke go pipwocile lépwona lé âbé pipwohuô te ni apulie te Padué (3.1−9).
• Go pipégali ni apulie na jan me lé pacémuni ni béén (2.1−2).
A bwomune a tii 2 Timoté
Pipwobwocu (1.1−2)
Nye te cumang ne he ni céihi tenye (1.3―2.13)
E pamwoiu Timoté wo Paulo (1.3−18)
Pa coda na e piténede Padaame (2.1−7)
Wo Iésu Kériso ke pa béhabwiinen denye (2.8−13)
Pipwocile nina lé piâ ité koja a juuju (2.14―3.9)
Ni cémun ne te Timoté (3.10―4.8)
Bénebwéne pwooti ke bépinelé (4.9−22)
1Pipwobwocu
1Woéo Paulo [na é pwotii lé céiiko go Timoté] woéo pa *apostolo te *Kériso Iésu, âcehi ana nime Padué kon. Be e pahedeéo ngen me é pii beetihi a pwooti ko a mulip. Be e caa pii ânebun pie, e bo ne tenye a mulip naa, na e pwaadeniin bé wo Kériso Iésu.
21.2 Apostolo 16.11; 1 Timoté 1.2Wogo pa ju naîng ne ha a céihi, go Timoté, na te junihe eânimung dem. Wâé heme e mu kom a *pipwoééhe tice ja kon me a péém na e âbé mu ko Padué henye me Padaame Kériso Iésu. Ke [wâé heme go temehi] a bwo bwala julu ne kom. Adéiko!
E pamwoiu Timoté wo Paulo
31.3 Apostolo 23.1É heme bwén ke pwang, heme é pwoiitihi, ke é mu tee cuwo ko pii a niim. Ke é pwo-olé te Padué, pali lé pipwoeabwé ten wo lépwoli ukéiu tenye. Ke é ko pipwoeabwé ten mwo, mu ha a ju *pwonimung na time uce pipé ne kong. 4É niimihi ali bwo é tem [he li é engen kojako]. Ke junihe nimung me é aliko mwo, ke é o te junihe pipwodéén hemepie genyu bo pitookenyu mwo.
Pwo mwo me éle a miû na e kom
51.5 Apostolo 16.1É temehi pie wogo, ke go céihi ne ko Padaame mu ha a ju pwonimem. Be go pwohewii gee tem Loïs, êgi te mi ê acéihi kojako, ke wo Eunice êgi nyaa tem. 61.6 1 Timoté 4.14É mu ko anaa kuti, na é pamwoiuko, beme go wéihi ehi a âpipati te Padué na e kom, li go hegi he li é ne lupwo ing huîim. Be caa pwohewii a miû na e caa pwo me e mele. Ke wâé heme go pwo me éle mwo1.6 Miû na e caa pwo me e mele…éle mwo—ai A miû, na wâé heme go pwo me junihe tole..
71.7 Roma 8.15Be a *Jenen Iitihi, na e ne tenye wo Padué, ke time e uce ne me piwâ genye, ai me mwotikenye. Be e pébé céiikenye a junuun, me a pipwoééhe, me a bwo pipwoiipikenye! 8É mu ko anaa, na go nemwo pwo me piwâ go me go patemehi Padaame henye. Ke go nemwo pwo me mwotiko1.8 Go nemwo pwo me mwotiko—A pwooti tanim he pwo grek, ke a bwopiinen pie Mwotikenye ne éni, ke é ne ha a niide a tii 12 ke 16. ko a bwo mu tong éni he karépu me den! Kehe wâé heme nyu pimu ibu he ni picani, mu ko [a bwo patemehi na] a *Pwooti Wâé. [Ke go cumang ne ko Padué] be e ne tem a junuun [li é caa pii tem].
A nyebi da céii Padué na e celuimikenye
91.9 Éféso 2.8−9; Tit 3.5E caa *celuimikenye [wo Padué].
Ke e todekenye ati,
beme wogenye ni apulie ten.
Time uce wogenye
na nye pwo anaa;
Kehe te a bwo niimihinaado ten,
na e caa te mi *pajuujuhi,
he mwo te tieden a bwohemwo.
E habwii tenye a pipwoééhe ten
na e pwaadeniin bé wo Kériso.
101.10 Ébéru 2.14E tuiebé wo Kériso,
pa aceluimikenye;
e pwo me tieden a niihe a mele.
Ke e ne tenye a *mulie dieli mwo.
Weengaa a Pwooti Wâé ten1.10 Weengaa a Pwooti Wâé ten—ai É mu ko a Pwooti Wâé.!
Time uce piwâ jo me é patemehieng
111.11 1 Timoté 2.7Wo Padué, ke e pwo me woéo pa céiu apostolo ten, beme é patemehi a Pwooti Wâé ten naa, ke me é pacémuni ni apulie kon. 12Weengaa kuti nina é ko mu he ni picani kon jenaa. Kehe icehi ana time uce mwotiéo kon. Be é te temehi Pana é céihi ne kon. Ke é te céihi me ubwo pie, e bo te wéihi ali e ne tong1.12 Ali e ne tong—Wieli a mulihe Paulo, ai wieli a Pwooti Wâé., dieli ha a *Tan Alece.
13Go âcehi ni pwooti na juuju, na go caa hegi kojaéo, ke go mulie hen, ne ha a céihi me a pipwoééhe na e ne tenye wo Kériso Iésu. 141.14 1 Timoté 6.20Ke go cile ehi a [Pwooti Wâé] na ne tem. Be e bo picani tem a Jenen Iitihi na e mulie konye.
Pa béénye Onésifor
15É ne ko lépwo acéihi mu ha a province Asia, ke go teko temehi pie, lé bitelé kojaéo; wonaa mwo ne ko lupwo bééng, wo Figèle me Ermogène. 16Te icehi Onésifor. Ke wâé hemepie wo Padaame, ke me e ne a pipwoééhe ten me de a pwomwoiu ten. Be e tee cuwo ko picani tong, ke time uce mwotieng me e pwokarépu pwohewiiéo1.16 Time uce mwotieng me e pwokarépu pwohewiiéo—Grek: Time uce tanim nang ko ni itihe toki kong.. 17Be é he e tuiebé ha a pwomwo ubwo *Rome, ke time uce mwaale nang ko haneéo ati he ni piduaan, ke e te tooéo.
18Ke go teko temehi ehi ati ni penem na wâé na e pwo me dong ne ha amu ten é Éféso. Ke é ile Padaame me e habwii ten a pipwoééhe ten1.18 A pipwoééhe ten—ai A pipwoééhe te Padué., ha ace Tan celi e bo tauti a bwohemwo wo Padué.
2Pa coda na e piténede Padaame
1É mu ko ati [ni naado naa] go pa naîng, ke wâé heme go cumang ne ko a *pipwoééhe tice ja kon de Kériso Iésu. 2A pwooti na go caa téne heme é pii ne ânebuhe ni apulie na hiwon jélé, ke wâé heme go ne te ni apulie na mwomwon jélé, lépwona jan ne kolé me lé pacémuni ni béé apulie.
32.3 2 Timoté 1.8Go pé ce dem mu ko ni picani na genye mu hen, pwohewii pa coda te Kériso Iésu. 4Be pa coda na nimen me e piwâéeng wo pa caa ten, ke time e uce nenimen ne ko ni penem na e pwomwo koja a mwocoda. 52.5 2 Timoté 4.8Ke wo pace ajele, ke te tice cemen hemepie time e uce âcehi ni patén ko a jele.
62.6 1 Korénit 9.7[Pwohewii ali nye mu pii pie]: Wo pana e te nihe penem he ni apwoamu, ke e o te mi pé ni acehi ni penem den. 7Go pitautinaado ehi ne ko nina é ko pii tem, be e o bo pwo me go temehi ati wo Padué.
Wo Iésu ke pa béhabwiinen denye
82.8 Roma 1.3; 1 Korénit 15.4Wâé heme go piniimihi pie, e caa mulie cemwo mu ha amele wo Iésu Kériso, pa piebehi pa daame *Davita. Weengaa kuti a Pwooti Wâé na é ko patemehi.
92.9 Éféso 3.1,13; Filipi 1.12−14Ke é ko mu he ni picani mu ko a Pwooti Wâé naa, ke lé taa kong ni itihe toki pwohewii pace ataunuhi apulie. Kehe pwocoon me lé taa a pwooti te Padué! 10Ke é te pé ne huîing ati ninaa, be me de nina e pipégalilé wo Padué. Ke me woélé mwo, ke me celuimilé mu ko Kériso Iésu, ke me lé mulie ha *a wâé na ubwo [te Padué] dieli mwo. 112.11 2 Korénit 4.11Be a juuju a pwooti [na nye mu pii pie]:
Hemepie genye mele me Iésu,
ke genye o te mulie mwo
me weeng.
122.12 Mataio 10.33Ke é hemepie genye cumang,
ke genye o pihuô me weeng.
Kehe mepie muhi tenye kon,
ke weeng mwo,
ke o te muhi ten konye.
132.13 Roma 3.3−4; Tit 1.2Kehe mepie time nye uce cumang,
kehe icehi ana weeng,
ke e te cumang.
Be weeng ke e te mu
ha a bwo mu ten.
Pipwocile nina lé â ité koja a juuju
142.14 1 Timoté 6.4; Tit 3.9Go paniimihi ni pwooti naa te ati [lépwo acéihi]. Ke go pii me mwoiu telé ne he pwahamii Padué pie, me lé nemwo pitaacunaado. Be te ju piticenaado ne ko ni pwocihe naa, be e pwotahi ne ko lépwona lé ko tabemi.
152.15 1 Timoté 4.6Wogo, ke go mwoiu ne he ni penem dem, ke go pii ehi a pwooti na juuju, beme e o pipwodéén wo Padué ko a penem dem, ke me time o uce tanim go kon.
16-172.16 1 Timoté 4.72.17 1 Timoté 1.20Go nemwo mu pele lépwo apulie na lé uti ni jepule na te ju piticenaado ne kon, pwohewii Iméné me Filète. Be ni pwooti naa, ke pwohewii ni ahinaado ne he ni ééwé na tee piubwo ngen. Ke e pébé ni huô na time e uce paciiti Padué.
18Kehe é ne ko lupwonaa, ke lu caa piâ ité koja a juuju, be lu pii pie, lé caa mulie cemwo wo lépwo amele, [ke o caa te tice mulie cemwo celi me nye ucéihi]. Ke me lu wonaa, ke lu pwotahi ni céihi te ni béé apulie.
192.19 Ésaïe 52.11; Ioane 10.14; 1 Korénit 8.3Kehe e te mu mang a paan na e ne wo Padué. Weengi ni pwooti na pii ne kon: Wo Padaame, ke e te temehi nina te ni apulie ten [ke e te alihi ni penem delé me den].Nahoum 1.7
Ke a céiu mwo: «Ke wo pana e pii pie, pa apulie te Padué, ke wâé heme e piâ ité koja a ta.»
20Ha a mwa te paceli te junihe pipwonaado ne kon2.20 A mwa te paceli te junihe pipwonaado ne kon—Grek: A mwa na ubwo., ke time e o uce mu hen cehi ce tam celi ubwo a cuhin2.20 Ce tam celi ubwo a cuhin—Grek: Ce tam na pwo ko mwani megele me mwani pwojo.. Kehe o te pwo mwo ce tam pule, be te ni pihe ati ni tan. Ke ni tam na junihe wâé, ke ni pihe ni tan na genye pwo ni piwiinaado hen na ubwo. 21Ke hemepie go pétaabwon ni ta pwo tem mu ha a pwonimem, ke ni cémun na gele, ke go o pwohewii a tam na wâé me de Padué. Ke e bo pééko me pa bépenem den. Ke o bo hiwon ce pétaapwo penem celi wâé celi e bo pwo ne kom.
Go cela ko a ta me a gele
222.22 1 Timoté 6.11Go cela ko ni bwo niimihinaado na ta te ni ewa, go Timoté. Ke go hane me go mulie ha a mulie na mwomwon ne ha a céihi, me a pipwoééhe, me a péém. Be weengaa a bwomu te lépwona lé paciiti2.22 Paciiti—Grek: Tode. Padaame, mu he ni ju pwonimelé na wâé ne he pwahamiin.
232.23 1 Timoté 4.7Go nemwo pipéce ne ko ni picihe na tice ânen, ke piticenaado ne kon, be e âbé mu ko ninaa ni pitaacunaado. 24Kehe wo pana e pipwoeabwé te Padaame, ke wâé heme time uce pa ataacunaado. Ke wâé heme bwala nang, ke me e pé ne kon ni naado na lé pii ne kon. Ke me e temehi pacémunilé ehi.
25Be wâé heme e temehi cihe me bwala ne ko lépwona lé cubwonieng. Ke é mulang, ke e bo picani telé wo Padué me lé pininim, ke me lé temehi a juuju. 26Ke lé o bo wie mu he ni pwojé te *Caatana na e teko imwilé. Ke o caa time lé uce pwo nina nimen kon, be caa wâé ni bwo niimihinaado telé.
3O hiwon nina lé pipwohuô
13.1 1 Timoté 4.1Wâé heme go temehi pie, he *ni bénebwéne tan, ke o caa tuiebé ni benaamwon na binyi. 2Be ni apulie ke [o te junihe ta jélé]:
Lé o te piniimilé cehi;
Ke o wâé telé a mwani;
Ke ubwo ni pwonimelé, ke lé o pipii delé;
Ke lé o pii me ta Padué;
Ke o time lé uce piténede lu nyaa me caa telé;
Ke o caa time lé uce pwo-olé.
Ke o time lé uce paciitihi ni naado na iitihi;
3Ke mwoiu ni pwonimelé, ke te tice pipwoééhe kolé;
Ke lé pii me ta lépwo béén;
Ke lé mulie hauli;
Ke lépwo a-okéé;
Ke lé cubwonihi ni naado na wâé;
4Ke lé icu lépwo béélé;
Ke lé o pwohewii lépwona pipenem ni punilé3.4 Lé o pwohewii lépwona pipenem ni punilé—ai Lépwo a-okéé.;
Ke lé pipwohauli;
Ke wâé telé a pipwodéén ité koja Padué.
53.5 Mataio 7.15,21; Tit 1.16Ke lé o gahe pwo me lépwo apulie te Padué, ke lé âcehi ni bwomu te ni acéihi, kehe icehi ana o te tice niihe ni céihi telé [ne he ni mulihelé]. Ke go cela ko ni apulie na lé wonaa!
6[Ke mwo teko wonaa jenaa] be lé mwo te picedi pwomwo wo lépwo béén mu kolé, ke lé pihaami ni toomwo na time uce mang ehi ni céihi telé. Be ni toomwo naa, ke lé te niimihi pie nihe ubwo ni ta pwo telé3.6 Lé tee niimihi pie nihe ubwo ni ta pwo telé—ai Hiwon ni ta pwo telé., be te nihe gaale ni pwonimelé ne ko ni pétaapwo naado. 7Ke lé tee cuwo ko picaa ni naado, kehe pwocoon me lé temehi a juuju.
83.8 Exode 7.11Lépwo apipune agele naa, ke lé pwohewii Janès me Jambrès3.8 Janès me Jambrès—Wieli lupwo apulie mu ko lépwo apwotuté te pa daame Faraô na lé pwobwoni Moosé ne Aigupito. Omehi Exode 7.11,22., na lu cuwode *Moosé bwolihi. Be ni apulie na lé mu cubwonihi a juuju. Ke time uce wâé ni bwo niimihinaado telé, be te tice paa a céihi telé. 9Kehe icehi ana time lé o uce â ité. Be ni apulie ke lé o bobe alihi a bwo pipwohauli telé, pwohewii ali lé alihi ne ko Janès me Jambrès.
Ni cémun ne te Timoté
10Kehe icehi ana wogo go Timoté, ke go caa te nihe temehiéo, ke [wâé heme] go âcéing na ati he ni naado: ni cémun dong, ke ni bwomu tong, me ni bwo niimihinaado tong; ke a céihi tong ne ha a bwo uca tong; me a pipwoééhe tong, me a bwo cumang dong. 113.11 Apostolo 13.14−52, 14.5,8−20Go te temehi mwo a bwo pwotahinaado ne kong, ke ni picani na é mu hen, ne Antioche ne Pisidi, ne Ikone, ke é ne Listre. Kehe icehi ana e te celuimiéo mu he ni naado naa wo Padaame. 123.12 Mataio 16.24; Ioane 15.20; Apostolo 14.22Ke te wâé, be heme nimenye me nye âcéi Kériso Iésu, ke me nye mulie ha a mulie na wâé te Padué, ke lé o te pwotahinaado ne konye.
13Kehe é ne ko lépwona ta jélé me lépwo apipwohuô, ke lé bobe te junihe pwo kuti nina ta. Ke lé bo pipwohuô te ni béén, kehe icehi ana o bo uce te pipwohuô telé mwo.
14Kehe wogo, ke wâé heme go âcehi a juuju na go caa picaa, ke nina go caa céihi ne kon. Be go te temehi lépwona lé pacémuniko. 15Be go temehi ni *tii iitihi mu ha a bwo ewa go. Ke e ne tem a bwo temehinaado ko a bwo celuimikenye mu ko a céihi tenye ne ko Kériso Iésu.
163.16 Roma 15.4Be lé tai âbé mu pele Padué ati ni pwooti ne he ni tii iitihi, beme picaa tenye ana juuju, ke me patemehi tenye ko ni cémun na gele, ke me pamwomwonikenye, ke me e pacémunikenye ko a bwo mulie ha a mulie na wâé ke mwomwon3.16 Pacémunikenye ko a bwo mulie ha a mulie na wâé ke mwomwon—ai Patemehi tenye ni naado na wâé, ke ni naado na ta.. 17Te é mu ko ni tii iitihi na [e penem konye wo Padué, beme] wogenye lépwo apenem den3.17 1re phrase—Grek: Beme o hején pa apulie te Padué.. Ke e pipwopweekenye beme nye pwo ati ni naado na wâé.
4Go patemehi a pwooti te Padué
1E bo âbé pihuô te ni apulie ati wo Kériso Iésu, ke e bo tautilé: nina lé mwo mulie me lépwona lé caa mele. É mu ko anaa, na é huôhi ne tem ne he pwahamiin, ke é ne he pwahamii Padué pie: 2Go te cuwo ko patemehi a pwooti te Padué, ati he ni benaamwon, hemepie wâé, ai hemepie ta. Ke go pacihe lépwona lé pwo nina ta. Ke go picani ne kolé, ke go ne ni pune te ni apulie, ke go pacémunilé ehi, ke go pamwoiulé, ke go pwo ati ninaa ne ha a piuca.
34.3 1 Timoté 4.1Be e o caa tuiebé a benaamwon na o caa muhi te ni apulie me lé téne a [pwooti te Padué na] a juuju. Kehe lé o te âcehi nina nimelé kon na ta. Ke lé o tee hane lépwoce caa te cémun celi hiwon jélé, celi lé ju pii cehi nina wâé telé me lé téne. 4Be bwéjé jélé ne ko a juuju, ke lé bwo te tabemi ni jepule na gele.
5Kehe wogo, ke wâé heme go pipwoiipiko ne ha ati ni naado. Ke go pé ne huîim ni picani, ke go cumang. Ke go patemehi a Pwooti Wâé, ke go panebwénihi ati ni penem na e ne tem wo Padué, be wogo ke pa apenem den.
É caa pwo a pa na wâé
64.6 Filipi 2.17É ne ko woéo, ke é o caa patupwo a mulihung beme é *pwoâpwailo kon te Padué. Be e o caa tuie a benaamwon na é o caa mele hen. 74.7 1 Timoté 6.12É caa pwo a pa na wâé, ke é caa panebwénihi a pitéte tong, kehe é te imwi mangihi a céihi tong4.7 É te imwi mangihi a céihi tong—ai Ke é caa piténedehi, dieli ha anebwén kon.. 84.8 1 Korénit 9.24−25Ke é ha a benaamwon ce, ke e ko ucéiéo na a cemung: a kuron na e bo ne tong wo pa atautinaado na mwomwon nang, ha a Tan na e bo tauti ni apulie hen. Be e bo ne te ati lépwona eânimelé ten, ke lé ucéihi a tan na e bo âmwobé hen.
Bénebwéne pwooti
9Wâé heme go epin bé céiiéo. 104.10−11 Apostolo 15.37−39; 2 Korénit 8.23; Kolosé 4.14Be e caa engen kojaéo wo Démas, be te junihe wâé ten ni naamuu a bwohemwo ce, ke e â Tésalonik. Kehe wo Kresen, ke e â Galat; ke wo Tit, ke e â Dalmati. 11Ke te icehi Luka na ko e éni pelong. Kehe go hane Maréko, ke go todeeng me e âbé céim. Be pana e te nihe picani tong ne he ni penem na e ne tong wo Padué. 12É ne ko Tichike, ke é neeng nge Éféso.
134.13 Apostolo 20.6Hemepie go bo âbé, ke go bwo pébé a palito li é ne pele Karpus ha a pwomwo ubwo Troas. Ke go bo pé mwobé ni tii tong; ke go nemwo neuhi ni tii li tii ne pwo li imuto4.13 Tii li tii ne pwo ni imuto—Parchemins. Ubwo a cuhin koja ni pwopié (papyrus), be nihe mwoiu..
144.14 Psaume 62.13; Roma 2.6; 1 Timoté 1.20E te nihe pwo tong ni naado na ta wo Alexandre, pa acii toki. Kehe icehi ana wo Padaame, ke e bo te ne ten ce cuhi ni penem den [na ta]. 15Ke go pipwocileeng, be e te junihe cubwonihi ni pwooti teme.
Lé tai patupwoéo
16É ha a tan na tabuhi tautiéo hen ne he mwopitautinaado, ke te tice celi lé picani tong, be lé te tai patupwoéo. Kehe wâé heme e pineulé wo Padué. 17Kehe icehi ana e te picani tong wo Padaame, ke e te pamwoiuéo. Ke e ne tong a niihen beme é patemehi ati a pwooti ten ne te lépwona time uce lépwo *Juif na lé mu éni. Ke e celuimiéo mu ha a pwo liô4.17 Liô—Lion. [a bwopiinen pie ha a mele]. 18[Ke é te temehi pie] e o bo te celuimiéo koja ati ni béé naado na ta, ke e bo pééo da ha a Mwametau ten he *miiden. Me paunueng ke adéieng dieli mwo! Wâé heme wonaa! Amen!
Bépinelé
194.19 Apostolo 18.2; 2 Timoté 1.16−17Bwocu te Priscile me Akilas me a pwomwoiu te Onésifor. 204.20 Apostolo 19.22, 20.4; Roma 16.23E te mu Korénit wo Éraste. É ne ko Trofime, ke é âbé kojaeng ne Milet, be cunu nang.
21Timoté, go piepin bé, ânebuhe a benaamwon na ubwo a bwala hen.
Lé pii pie me bwocu tem wo Eubule, ke Pudens ke Lin, me Klaudia, ke ati ni béénye na lé céihi ne ko Kériso na élé éni.
22Wâé heme e pelem wo Padaame [go Timoté]. Ke me e mu pelewé ati a *pipwoééhe tice ja kon den.
Adéikewé!