A béalohe tii
te
Pétéru
Atabuhi ko a tii
Woo na e tii a tii ce?
Wo Simon Pétéru, pa céiu acémun de Iésu Kériso. Pa apulie na piubwo nang ne hadenii ni acéihi.
E tii éniile?
Ha awieme a jo 65 me 67. E tii wo Pétéru mu Rome, ânebuhe a bwo mele ten ne ko a kuricé, pwohewii Iésu.
E tii me dee?
Te ati ni acéihi ne ko Iésu Kériso.
É ko ade na e tii?
Ha a benaamwon na e tii, ke hiwon lépwo apipune na lépwo agele, na lé pwo me lé piâ ité wo lépwo acéihi koja a pwooti ko Iésu na juuju. Ke e tii wo Pétéru, beme e paténe lépwo acéihi, beme time lé uce âcéilé. Ke e tii mwo beme e pinelé, be e temehi pie, e o te ju téele mele.
Ade ace âne a tii ce?
E pamwoiukenye wo Pétéru, beme nye te cuwo ko âcéi Iésu, beme o te cuwo ko piubwo ngen ace bwo temehieng denye, me a pipwoééhe tice ja kon ne konye. E o caa mwojuia mwo wo Padaame Iésu Kériso, ke genye nemwo pipéce ne ko lépwona lé pii pie, time o uce wonaa. O ubwo a cuhinaado te lépwo apwopune na lépwo agele. Hiwon ni pwooti na piwien me ni pwooti na e ha a Tii te Jude.
A bwomune a tii 2 Pétéru
Pipwobwocu (1.1−2)
Mulie ha a mulie na wâé te Padué (1.3−21)
Lépwo apwopune na lépwo agele (2.1−22)
E o bo tuie mwo wo Padaame (3.1−13)
Bénebwéne pwooti ke bépinelé (3.14−18)
1Pipwobwocu
1Woéo Simon Pétéru [na é pwotii]. Woéo pa eabwé te Iésu *Kériso, ke é apostolo ten [be e pahedeéo ngen, beme é â pipatemehi a pwooti ten]. É pwotii lé céiikewé, wogewé nina céiu a céihi tenye. A céihi tenye naa, ke a naado na te junihe wâé, be genye caa hegi mu ko Iésu Kériso, Padué henye, na weeng wo Padué ke pa *aceluimikenye. Junihe mwomwon ati ni bwopwonen den, be time e uce pipwoinen ne konye, be e tai ne tenye a céihi na piwien1.1 Dernière phrase—ai Weeng na e pwo me nye mwomwon ne he pwahamii Padué. Grek: Ko a bwo mwomwon nang..
2Wâé heme lu adéikewé wo Padué henye ke wo Padaame henye Iésu Kériso. Wâé heme te piubwo ngen a bwo temehinaado tewé ne kolu, beme piubwo ngen ne kowé a *pipwoééhe tice ja kon me a péém delu!
Mulie ha a mulie na wâé te Padué
3E todekenye wo Padaame1.3 Padaame—Wieli wo Iésu, ai wieli wo Padué Caa., beme nye mu ha *a wâé ten na te junihe ubwo! Ke é mu ko a bwo temehieng denye, ke jan me nye mulie ha a mulie na iitihi ke wâé ten. Ke e ne tenye, ko a junuun, ati ni junaado, be me wonaa a bwo mulie tenye. 4É mu ko ati ninaa, ke e ne tenye ali e caa mi pii ânebun: ati ni *adéihi na te junihe wâé, ke te junihe ubwo wéden! [Geé imwi ehi ninaa] beme o tuwokewé koja nina nimewé kon na ta, na e pwotahi ne ko ni apulie pwo bwohemwo! Ke o céiu a pwonimewé me Padué, ke geé o pwohewiieng.
5Ke geé te nihe hane beme e ne kowé ni acehin ce, na a céihi tewé1.5 Beme e ne kowé ni acehin ce, na a céihi tewé—Grek: Geé ne mwo te a céihi tewé a mwomwon. Ke geé ne mwo pwo a mwomwon… É ha a Tii Iitihi he pwo grek, ke piokelo ko pii ati ni naado ne he ni niide a tii 5−7.:
Geé mulie ha a mulie na mwomwon;
Geé temehi Padué, ke o piubwo da a bwo temehieng dewé;
61.6 Galat 5.22−23Geé pipwoiipikewé;
Geé cumang ne he ni picani;
Geé paciiti Padué me piténedeeng;
7Geé pwo me eânimewé te ni acéihi bééwé;
Geé pipwoééhe ati ni apulie.
Pwo me piubwo da ana wâé
8Weengaa ni wâé na me e mu kowé. Ke mepie ubwo ne kowé, ke o pepule gewé, beme geé pwo celi wâé, ke o jan ne kowé me geé temehi ehi1.8 O jan ne kowé me geé temehi ehi—ai O piubwo da a bwo temehi nen dewé. Padaame henye, Iésu Kériso. 9Hemepie pwo pace apulie celi tieden ne ten ni wâé naa, ke e pwohewii pana bwi nang. Be e neuhi pie, caa puueng mu he ni ta na e pwo bwolihi.
10E caa pipégalikewé wo Padué, wogewé lépwo bééng, ke e todekewé beme lépwo apulie ten. Ke wâé heme geé te junihe mwoiu, me geé habwii anaa ne he ni bwomu tewé1.10 Habwii anaa ne he ni bwomu tewé—Grek: Pajuujuhi.. Be me wonaa, ke time o uce tacida mwodawé, ke o time geé uce tupwo. 11Ke e bobe hegikewé ha a pipwodéén1.11 Ha a pipwodéén—Grek: Me ubwo., ne ha a Mwametau te [pa Naîn] Iésu Kériso, Padaame henye, ke pa aceluimikenye; ne ha a Mwametau na tice pwonehin.
Time o uce bwolihi ke é o mele
12Geé caa te temehi ati ni naado naa, na é ko pii ni, ke geé caa te cumang, ne ha [a bwo mulie tewé âcehi] a juuju. Kehe icehi ana [time uce piwâ jo me] é te paniimihi tewé mwo. 13Ke é niimihi pie, o wâé heme é te cuwo ko wonaa, he é mwo teko mu éni pwo bwohemwo. 141.14 Ioane 21.18−19; 2 Korénit 5.1Be e caa habwii tong wo Padaame Iésu Kériso pie, time o uce bwolihi, ke é o caa engen mu éni pwo a bwohemwo ce1.14 É o caa engen mu éni pwo a bwohemwo ce—Grek: É o caa necu a mwa mwaanu ce.. 15Ke wâé heme é te nihe penem ni, beme é alecehen, ke me geé bo tee niimihi nina é patemehi tewé.
Geme piuti tewé nina geme alihi
161.16 Mataio 17.1−5[Wogeme me lépwo *apostolo bééng, ke] geme caa pipatemehi tewé a junuu Padaame Iésu Kériso, me a bwo mwojuia cemwo ten1.16 A bwo mwojuia cemwo ten—ai A bwo tehenebé ten.. Time uce ace céiu jemaa te lépwo apulie, ke time uce ace jepule celi e âbé mu ko ace pitemang deme1.16 2e phrase—Grek: Time geme uce âcehi ni jepule na [geme] pwo ko a bwo temehinaado [teme]..Be geme te ju piuti tewé cehi nina geme alihi ko ni naamiime.
Be geme alihi a bwo ubwo na a wâé te Padaame Iésu na pwomelaan, 17-181.17 Mataio 17.5he li geme mu pwo ali juwole iitihi. Ke geme téne a pwocihe te Padué Caa mu he miiden, Padaame henye na te junihe ubwo a wâé ten ke a junuun. Be e te junihe pipaunu me pipwoun de Iésu [ânebuheme] he e pii beetihi pie: «Wo paje, ke pa Naîng [na te céiu nang] na te junihe eânimung den. Weeng na é caa te pipégalieng ha a pipwodéén dong.»
A Tii Iitihi ke a pwooti te Padué
19É mu ko anaa kuti1.19 É mu ko anaa kuti—A bwopiinen pie, é mu ko ana caa te pacuwohi li pwooti li lé caa mi pébé wo lépwo péroféta ânebun: pwooti ko a bwo ubwo na a wâé te Kériso., ke jan me nye céihi ne ko ati ni pwooti te lépwo *péroféta, ke me nye nenimenye ne kon. Be lé pwohewii a mwomiû na e pwéélang ha a melepiing, ucéihi a bwo taa te a ceni pwopwometan, ânebuhe a téale. [Be é jenaa, ke wo Kériso] ke e caa tuie ne he ni pwonimenye!
20Go nemwo niimihi pie, jan me go te pitemehi cehi ce bwopiine ni pwooti he ni *tii iitihi, na lé pwaadeniin bé wo lépwo péroféta1.20 2e phrase—A bwopiinen pie: Temehi a bwopiine a pwooti te Padué, ke a penem de ati ni acéihi. Ai, Wâé heme geé temehi pie, te tice pwooti he ni tii iitihi celi e te ju âbé cehi mu ko ce bwo niimihi nen de lépwo péroféta.. 211.21 2 Timoté 3.16; 1 Pétéru 1.11−12Be time uce aceli e âbé mu kolé lépwo apulie. Kehe te a *Jenen Iitihi na e penem kolé, beme lé pébé a pwooti na e âbé mu ko Padué.
2Lépwo apipune na lépwo agele
12.1 Mataio 24.11; Jude 1.4Ânebun, ke lé tuie ne ko a bele *Isaraéla ne ni péroféta agele. Ke o te piwien mwo jenaa ni. Be lé o êjele bé céiikewé ni apipune na lépwo agele. [Ke lé o pii pie, lépwo apulie te Padaame henye.] Kehe icehi ana muhi telé kon, weeng pali [e pineeng beme] e celuimilé2.1 Celuimilé—Grek: Pwocuhilé.. Ke lé o pwo me lé bitelé ne ni apulie mu he ni céihi telé2.1 6e phrase—Grek: Lé pébé ni pwooti na e pwo me tieden (doctrines de perdition).. [Kehe icehi ana o te woélé mwo, na] o te junihe epin me ta ace bwo tanahilé taabwon!
2O hiwon ce béén celi lé o âcehi ni cémun delé, me ni huô telé na mwiihi ko ni éélé. Ke é mu ko anaa, ke o pii me ta a ju céihi [ne ko Kériso]. 3Ke wo lépwo apipune naa, na lépwo agele, ke lépwo atapi. Ke lé o pipwohuô tewé, beme lé pé ni mwani tewé. Kehe icehi ana time o uce bwolihi ace bwo pwo me tielé. Be e caa te niimihi [wo Padué] ânebun pie, me e bo ne cuhinaado telé.
Lé o pwocuhinaado
42.4 Jude 1.6Be e epin wo Padué me e ne cuhinaado te lépwoli *âcélo li lé cubwonieng. Be e cielé ko ni itihe toki, ke e nelé ha a melepiing, ucéihi a Tan na e bo tauti ni apulie hen.
52.5 Genèse 6―8; 2 Pétéru 3.6A céiu mwo, ke é bwolihi, ke e pwocuhinaado te ni apulie ne pwo bwohemwo na time lé uce paciitieng. Be li e pwopune telé wo Noé, me lé mulie ha a mulie na mwomwon [ne he pwahamii Padué. Kehe icehi ana time lé uce piténedeeng. Ke lé tai mele] ne ha a jaa na te junihe ubwo wéden, na e tilihi a bwohemwo ati. Ke te 8 cehi nina celuimilé: wo Noé me [a pwomwoiu ten].
62.6 Genèse 19.24; Jude 1.7A céiu mwo, ke wo Padué, ke e pwo me tieden lupwo pwomwo ubwo *Sodome me Gomore. Ke te tice aceli e cuwo, te icehi ni dehe miû. E wonaa beme a béhabwiinen ne ko ati ni apulie na time lé uce paciitieng, he ni tan na mwo e he pwaaden2.6 He ni tan na mwo e he pwaaden—ai (A béhabwiinen) ne ko nina e bo tuie ne kolé.. 7-82.7 Genèse 19.1−16Kehe icehi ana pwo pa apulie na te céiu nang, mu kolé, na mwomwon ni huô ten ne he pwahamii Padué: wo Lota2.7−8 Lota—Pa acim ko Abérama. Omehi note ko Luka 17.28.. É ati he ni tan, he e ko mulie ha awiemelé, ke e te alihi ke téne ni naado na mwiihi na lé pwo. Ke te junihe téé a pwonimen kon. Ke te weeng cehi na e celuimieng wo Padué [koja a miû].
9Be wo Padaame, ke te jan me e *celuimi lépwona lé paciitieng koja ni picani telé. Ke mepwo é ne ko lépwo apulie na ta jélé, ke pwojunuun me e nelé he karépu, ucéihi a Tan na e bobe tauti a bwohemwo ati hen. 102.10 Jude 1.7−8,16Ke o te junihe ubwo a cuhinaado na e bo ne te lépwona lé mulie he nina nimelé kon na ta, ke lé pwo ni huô na mwiihi ne ko ni éélé. Ke piwien ne mwo ko ni béén na lé pwo me piticenaado ne ko ni pihuô ten.
Lépwo upwonimelé
Lé wonaa wo lépwo apipune na lépwo agele. Be lé pwo upwonimelé, ke time uce piwâ jélé me lé pwo ati nina ta, ke me lé pii me ta ni âcélo na junihe ubwo *a wâé telé2.10 Ni âcélo na junihe ubwo a wâé telé—Grek: Lépwona caa telé a wâé (êtres glorieux). Wieli lépwo âcélo, ai lépwo eabwé te ni âcélo, ai ni duéé, ai lépwo apulie na lé pihuô ne éni pwo bwohemwo.. 112.11 Jude 1.9Kehe ni âcélo, nina te junihe pwo niihelé kojalé†, ke time lé uce niimihi pie, me lé pii me ta lépwonaa2.11 Kojalé; Lépwonaa—Wieli lépwo apipune na lépwo agele, ai wieli nina caa etelé a wâé na piilé ne ha a niide a tii 10., ne he pwahamii Padué! 122.12 Jude 1.10Kehe icehi ana wo lépwo apwocémun naa, ke [time uce mwotilé, me] lé pihoonihi ni naado [na te junihe piwéden kojalé] na te tice aceli lé temehi ne kon.
Mepwo é ne ko a mulihelé, ke pwohewii ni wota apiaba na te tice pwonimelé, na lé mu éni [pwo bwohemwo] beme o tailé, me taunulé. Ke mepwo ni huô telé na mwiihi, ke e o péélé nge ha a cuhinaado dieli mwo2.12 Dernière phrase—Grek: Lé o mele pwohewii ni wota.. 13Ke o pwotahi ne kolé, pwohewii a bwo pwotahi ne ko lépwo béén.
Wo lépwo apulie naa, ke te nihe piwâénimelé heme lé getikewé, wogewé [lépwo ju acéihi]. Be lé temehi neduwohi ni ta pwo telé, heme lé mu he ni piwiinaado tewé, ke lé pwo me time wâé a pimu ibu tewé, ke lé pwo me tanim gewé. Be:
Lé pwo ni naado na mwiihi ne ha a pwaale2.13 2e, 3e & 4e phrases—Grek: Be wâé telé me lé âcehi nina nimelé kon na ta, heme pwang. Pwo alili me ni huô telé na ta. Wâé telé me lé pipwohuô [tewé] me geé piwiinaado ibu.;
14Lé te cuwo ko ome ni toomwo, ke ta ni pwonimelé ne kolé;
Lé te pwo taaci ni bwo niimihinaado na ta;
Lé te hane taaci ni naado na ânenimelé kon;
Lé picéide lépwona time uce mang ni céihi telé, beme lé pwo nina ta.
É mu ko ati ninaa, ke e caa piapwolé wo Padué, [ke e bo ne telé a cuhinaado na junihe ubwo].15-162.15−16 Nombres 22―24; Jude 1.11; Pii Beetihi 2.14Be lé caa piâ ité koja a pwaaden na mwomwon. Ke lé pipwohewii Balaam, pa naî Béor2.15−16 Béor—ai Bosor.. Be weeng, [ke pa péroféta agele ânebun] ke te junihe wâé ten a bwo hegi mwani, beme e pwo nina ta. Kehe icehi ana [wo Padué] ke e pééleeng ko ni huô ten na ta. Ke e pacuwoeng koja nina e niimihi me e bo pwo ha a bwo tice pwonimen. Ke e pwo me e paciheeng na a buriko ten, ha a pati apulie!
Lépwo eabwé te a ta
172.17 Jude 1.12−13Wo lépwo apipune na lépwo agele, ke [te tice naado celi lé pébé celi wâé]. Lé pwohewii ni pwomiidu na tice tabe hen, me ni nii na pé na a dan: [Te junihe bwiile, kehe te tice ute hen.] Ke e caa imwi ni atebwo telé wo Padué ne ha a melepiing iitihi.
18Ubwo ni pwolé, ke lé tee pipii delé ko ni jame pwocihe na te tice ânen. Ke lé cine lépwona lé caa âbé koja a mulie na ta, beme lé pwo mwo ati ni bwopemilé na mwiihi. [Be lé pii telé pie, wâé heme nye] âcehi ati nina nimenye kon na ta.
19Lé pii tewé pie, lé tuwokewé koja nina lé ciekewé [beme time geé uce pipwoeabwé ko ce patén]. Kehe icehi ana woélé, ke cielé ko ni bwomu telé na mwiihi, na péélé nge ha a mele2.19 Péélé nge ha a mele—Grek: Pwotahinaado ne kolé, ai Péélé nge ha a bwo pwo me tielé.! Be wo pa céiu apulie, ke pa eabwé ko ana e pé pihuô ne kon.
202.20 Mataio 12.45Ânebun, ke lé te temehi Iésu Kériso, Padaame henye, ke pa *aceluimikenye. Be e caa tuwolé koja ni huô na mwiihi te lépwo apulie pwo bwohemwo. Kehe icehi ana lé te mwojuia mwo, beme lé te pipwoeabwé te mwo a ta. [Te junihe pwoééhelé!] Be caa te junihe ta jélé kojan ânebun!
212.21 Luka 12.47−48Ânebun, ke lé hegi ni pihuô na iitihi [koja Padaame] ke lé temehi a pwaaden na mwomwon. Kehe icehi ana [lé tahi taabwon ati, beme] lé mwojuia cemwo. Ke mwo te wâé ne kolé, heme mwo time lé uce temehi a juuju! 222.22 Proverbes 26.11Genye alihi ne kolé pie, te a juuju [lupwo alo] apii kon ce: E pieni mwo ni unyehen wo pa wotaahen.Proverbes 26.11
Ke «Nye puu a puwokwo, kehe e mwojuia ne mwo ha a hepule.»
3E o bo tuie mwo wo Padaame
1Lépwo ju bééng wé, weengi a béalohe tii na é tii, beme é paniimihi tewé ati ni naado naa, ke me é pamwoiukewé, beme o mwomwon ke iitihi ni âniimihinaado tewé. 23.2 Jude 1.17Wâé heme geé pipaniimihi ni pwooti na lé caa mi pii ânebun wo lépwo péroféta iitihi [te Padué]. Ke geé cile ehi ni pihuô te Padaame, pana e caa celuimikenye, li lé caa pipatemehi tewé wo lépwo *apostolo tewé.
33.3 1 Timoté 4.1; Jude 1.18Weengi a pwooti na a junaado, na wâé heme geé temehi ehi: [Be caa mi pii tewé pie] lé o bo tuie ne kowé he *ni bénebwéne tan wo lépwo apulie na lé te ju engen cehi ne he nina nimelé kon na ta.
Ke lé o pihoonikewé 43.4 Mataio 24.48me pii tewé pie: «Kona e wé naa wo pali Iésu tewé li e pii pie e bo mwojuia cemwo? [O caa time e uce âbé!] Lé caa mele wo lépwoli lé mi céihi ne kon3.4 Lépwoli lé mi céihi ne kon—Grek: Wo lépwo caa tenye. [ke time lé uce alieng]! Be te tice ace céiu naado ne éni pwo bwohemwo celi me pitaatééhi mu ha atabuhi kon!»
53.5 Genèse 1.6−9Wo lépwo apihota na lé pii anaa, ke time uce nimelé me lé temehi pie, e ne a bwohemwo me a miiden wo Padué ko a pwooti ten. Be e taawie a bwohemwo mu ha a tabe, beme e mu aujenihi a bwohemwo na a tabe. 63.6 Genèse 7.11; 2 Pétéru 2.5Ke é alecehen, ke e pwo me tieden a bwohemwo ko a tabe. Be e patupwo ngen a jaa na junihe ubwo.
7[Weengaa ana é pii]: Ke me lu mu a miiden me a bwohemwo jenaa ni, ke te é mu ko a pwooti te Padué. Ke e cile ati ni naado ko a pwooti ten, ucéihi a Tan na e bo tai tautilé hen. Ke é ha a Tan naa, ke e bo cini a miiden me a bwohemwo, me ati ni apulie na time lé uce paciitieng.
E uca be e te junihe pipwoééhenye
83.8 Psaume 90.4Kehe icehi ana wogewé lépwo bééng, ke geé nemwo pineuhi pie: «A tan na céiu, ke pwohewii ni jo na 1000 ne ha a bwo alihi nen de Padaame. Ke nina 1000 ni jo, ke pwohewii a tan na te céiu.»
93.9 Habakuk 2.3; 1 Timoté 2.4Ke [weengaa ana geé alihi pie] time uce a juuju a bwopiinen de ni béén pie, te bwoli Padaame me e pacuwohi ana e pii! Ûhu! E tai ucéikenye, [be te junihe bwala nang] ke e picani ne konye ni apulie. Be time o uce wâé ten hemepie e mele ace apulie celi te ju céiu nang. [Ke e ne te ni apulie ati a benaamwon] beme lé bitelé ne mwo kon koja ni ta pwo telé [ke me tai celuimilé].
103.10 Mataio 24.29,35; Luka 12.39; 1 Tésalonik 5.2Kehe icehi ana e bo te mwojuia mwobé wo Padaame3.10 E bo te mwojuia mwobé wo Padaame—Grek: Ha a tan de Padaame., [ke e bo patéeti ni apulie] pwohewii pa abune. [Lé o bo téne] a tihinaado na te junihe ubwo, ke o te ju pwo é tieden a miiden. Ke o éle tieden ni ceni ne ha a miû na junihe ubwo. Ke o tieden3.10 Tieden—ai Tauti. a bwohemwo me ati ni naado na e pwon!
Mulie ha a mulie na iitihi
11Hemepie o tieden ati, ke o ade aceli me geé pwo? Weengi: Geé mulie ha a mulie na iitihi na wâé te Padué, ke geé te pipwoeabwé ten cehi. 12Geé wonaa a bwo ucéihi nen, be3.12 Be—ai Beme. e o bo tuiebé epin a Tan naa, [na e bo tauti ati ni naado wo Padué]; a tan na o éle ati a miiden me a bwohemwo ne ha a miû na ubwo. 133.13 Ésaïe 65.17, 66.22; Pii Beetihi 21.1,27Be e caa mi pii ânebun pie, me e bo ne a miiden me a bwohemwo na mwo coho. Ke ati ni naado na lé bo mu pwon, ke lé o mulie cehi ni bwo niimihinaado te Padué3.13 2e phrase—Grek: E bo mu lang a mwomwon.. Ke weengaa a bwohemwo na nye ucéihi [ha a pipwodéén]!
Bénebwéne pwooti
14É mu ko anaa kuti, ke wogewé lépwo ju bééng, ke geé hane me geé mulie ha a mulie na iitihi, ucéihi a Tan naa. Be mepie geé wonaa, ke o tice ta kowé celi me e bo tautikewé kon wo Padué. Ke o pwo a péém ha awiemewé me weeng.
15-163.15 Roma 2.4[É ko ade na bwoli Padaame me e mwojuia mwobé?] Te ju é ko [a bwo bwala nang, me] a bwo picani ten ne konye! Ke geé nemwo pineuhi pie, wogewé, ke e caa celuimikewé [koja a cuhinaado]. Ke weengaa ana e mu tii me dewé wo Paulo, pa ju béénye na te junihe eânimenye ten. Be e pipatemehi ninaa, ne he ni tii ten ati, ko a bwo temehi nen na e ne ten wo Padué.
A juuju pie, te pibinyi a bwo temehi ne ni béé pwooti ten. Ke pwo ni apulie na lé pibitehi nina e pii. Wo lépwonaa, ke time uce pwo waalé ne ha a juuju, ke time uce lépwo ju acémun [ko ni tii iitihi]3.15−16 8e phrase (Wo lépwonaa…)—Grek: Te tice aceli lé temehi [ko ni tii iitihi] ke time lé uce cumang [hen].. Be lé wonaa ne mwo he ni béé pwooti ne he ni tii iitihi. Ke é mu ko anaa kuti, ke lé â benihi a mele dieli mwo na e éité koja Padué3.15−16 A mele dieli mwo na e éité koja Padué—Grek: A bwo tanahilé..
Bépinelé
173.17 Maréko 13.33; 1 Korénit 10.12[É tii a tii ce, beme] é mi paténekewé, wogewé lépwo bééng, ko lépwo [apipune agele] na time lé uce paciitihi ana juuju! É ko anaa na geé tee ûmiê! Ke geé pipwocile, be koli lé pihaamikewé, ke koli geé bo tupwo mu he na geé cumang lang.
18Wâé heme piubwo ngen ne kowé a *pipwoééhe tice ja kon de Iésu Kériso, Padaame henye, ke pa *aceluimikenye. Wâé heme piubwo ngen ace bwo temehieng dewé! Pipaunueng ne ha a bwo ubwo na a wâé ten jenaa, ke é dieli mwo!
Wâé heme wonaa! Amen!