A bécéiuhe tii te Paulo
nge céii
Timoté
Atabuhi ko a tii
Woo na e tii a tii ce?
Wo Paulo, pa apostolo.
E tii éniile?
Ha awieme a jo 62 me 66, alecehe a bwo tabuhi mu he karépu te Paulo ne Rome, ana tii ne ha a Apostolo pwahamii tii 28. Wieli bwo é alecehen na e bo engen pitihi ni béé amu (wieli é die ha amu Espagne) beme e pipatemehi mwo a Pwooti Wâé. Wieli e tii mu Macédoine a tii ce. Ke é alecehen, ke lé imwieng mwo wo lépwo Roma, ke lé taunueng.
E tii me dee?
Te Timoté. Wo pa caa ten, ke pa Grek; ke wo nyaa ten, ke ê toomwo Juif, êna e céihi ne ko Iésu Kériso. E too Timoté wo Paulo ha a béalohe bwo engen den, he e mu Listre, ha a jo 49. Ke wo Timoté, ke e caa â acémun den (Apostolo 16.1−3). É alecehen, ke wo Paulo, ke e pahedeeng nge Tésalonik, ke é Korénit (1 Korénit 4.14−17), ke é nge Éféso, beme e pwoiipi ni acéihi lang (1 Timoté 1.3).
É ko ade na e tii?
E téne wo Paulo pie, wo lépwo béén, ke lé ko pacémuni ni acéihi ne Éféso ko ni naado na gele. Ke e tii nge céii Timoté, beme e bo pwopune te lépwo acéihi me lépwo apihuô telé.
Ade ace âne a tii ce?
Weengi ni béé pune na e ne te Timoté wo Paulo, ne ha a tii ce:
• Go cumang ne ha a bwo engen dem, âcehi a Tii Iitihi.
• Go mwoiu ne ha a penem dem ko a Pwooti Wâé.
• Go pii te lépwo acéihi pie, wâé heme lé te cuwo ko pwoiitihi ibu.
• Go pwoiipi ni acéihi.
• Go pipégali lépwoce awéihi nen.
A bwomune a tii 1 Timoté
Pipwobwocu (1.1−2)
Pipwocile ni apwopune na lé gele (1.3−20)
A pwooti ko a bwo pwoiitihi (2.1―3.13)
Ni bwomu tenye heme nye pwoiitihi ibu (2.8−15)
Lépwo apihuô me lépwo dikone (3.1−13)
A pihuô te Paulo ne te Timoté (3.14―4.16)
Lé bo piâ ité wo lépwo béén (4.1−5)
Wo pana e penem ehi me de Kériso (4.6−11)
Go pipwocile a bwo mulie tem (4.12−16)
A bwo pacémuni ni pétaapwo acéihi (5.1―6.2)
Bénebwéne pwooti ke bépinelé (6.2−21)
1Pipwobwocu
1-21.2 Apostolo 16.1−3; Tit 1.4Woéo Paulo na é pwotii lé céiiko, go Timoté. Woéo pa apostolo te *Kériso Iésu, pa watihe a céihi tenye. Be lu pahedeéo ngen, woilu me Padué, pa *aceluimikenye [beme é patemehi a pwooti te Kériso]. Wogo pa ju naîng ne ha a céihi ne ko Kériso. Wâé heme e mu kom a *pipwoééhe tice ja kon, me a péém na e âbé mu ko Padué henye me Padaame Kériso Iésu. [Ke wâé heme go temehi] a bwo wâé julu ne kom.
Pipwocile ni apwopune na lé gele
3Pa bééng, é te ju paniimihi tem ali é pii he li é engen kojako me é â ha a province Macédoine. Be é pii tem pie, wâé heme go tee mu ha a pwomwo ubwo Éféso, beme go pacuwo lépwo apwopune na lé gele. 41.4 1 Timoté 4.7; Tit 1.14Lé te cuwo ko cihe ko ni jemaa na gele, ke ni jame jepule ko ni nii lépwo watihenye. Ke go pii telé pie me lé necu ninaa. Be ninaa kuti na bo taapwii ni pitaacunaado1.4 Ni pitaacunaado—ai Ni bwo picihe na piticenaado ne kon., ke time lé uce picani ko ni penem de Padué, a penem na nye pwo ne ha a céihi1.4 Penem na nye pwo ne ha a céihi—ai A penem den, ke a bwo celuimi lépwo apulie. Ke genye temehieng cehi ko a céihi..
5É pii tem pie, me go pwo anaa, [go Timoté, ke me go pacémuni ni acéihi] beme lé pipwoééhelé mu he ni ju pwonimelé. A pipwoééhe, ke e âbé mu ko a bwo piténedehi nen denye a *pwocihe na e âbé mu he ni pwonimenye. Ke e âbé mwo mu ko a bwo céihi nen denye na juuju.
6Kehe icehi ana wo lépwo apwopune na lé gele1.6 Lépwo apwopune na lé gele—Grek: Wo lépwo béén., ke lé piâ ité koja a pwaaden na wâé. Ke lé pipatieden ne he ni jepule telé na te ju piticenaado ne kon. 7Be nimelé me lé pacémuni ni apulie ko ni *patén de Moosé. Kehe icehi ana time lé uce temehi nina lé tee ko mwoiu ko pacémunihi!
Ni patén ke wâé, heme nye mulie hen
81.8 Roma 7.12,16Genye te temehi pie te wâé ni patén, heme nye mulie ehi hen. 9Be time e uce ne ni patén [wo Padué] me de lépwona wâé ni mulihelé. Kehe e ne, beme de lépwona lé te cuwo ko pwo nina ta. Be muhi telé me lé piténedehi, ke lé caada ni pihuô ten:
Lé bitelé koja Padué, ke muhi telé me lé pipaunueng;
Lé pihoonihi ni naado na iitihi;
Lé taunuhi apulie die ko ni nyaa me caa telé;
10Lé cibe mwa;
Lé pipule hauli me ni béén, die ko ana wo lépwo aiu, ke lé te pipule mwo me ni aiu;
Lé pwo âicu ko ni apulie1.10 Lé pwo âicu ko ni apulie—Trafiquants d’esclaves. Lé imwi ni apulie, ke lé iculé beme lépwo apenem tice ja kon de lépwo béén.;
Lé gele;
Lé pipé ne ko ni béén ne he ni mwopitautinaado.
Be [e ne ni patén wo Padué me de lépwona wonaa jélé] me ati lépwona lé pwo ni béé huô na ta. Be time lé uce piténedehi ni pune na mwomwon na genye hegi, 11ke e âbé mu ko a *Pwooti Wâé, na e ne tong wo Padué [beme é wéihi, ke me é patemehi]. Ke wâé heme nye pipaunueng1.11 Wâé heme nye pipaunueng—ai E ne tenye a péém me a pipwodéén., be te junihe wâé nang.
Pwo-olé te Kériso na e celuimikenye
121.12 Apostolo 9.15; 1 Korénit 15.9−10; Galat 1.15−16É pwo-olé te Padaame henye Kériso Iésu. Be e niimihi pie jan ne kong me é pwo a penem na e ne tong, ke e ne tong mwo a niihen beme é pwo. 131.13 Apostolo 8.3, 9.1−5Kehe é ânebun, ke é mu cihe me ta ne kon. Ke é mu pwotahinaado [ne ko ni apulie ten]. Kehe icehi ana e pipwoééhung, [ke time e uce pwocuhinaado tong. Be e alihi pie] é wonaa be time é uce temehi, be time é uce téele céihi ne kon.
14Nihe ubwo a pipwoééhe tice ja kon de Padaame Padué ne konye; a pipwoééhe na e pieda me dong. Ke e pwo me é céihi ne ko Kériso Iésu, ke e pwo me é pipwoééhe ni apulie ko a pipwoééhe na e âbé mu kon. 151.15 Luka 19.10Be [nye mu pii pie]: «E âbé ne pwo a bwohemwo wo Kériso Iésu, me e celuimi nina ta jélé.» Ke weengaa a pwooti na juuju, ke nina wâé heme genye céihi ne kon.
Ke te woéo kuti pana é te nihe pwo nina ta! 16Kehe icehi ana e pipwoééhung wo Padué, beme e habwii pie e picani ne kong wo Iésu Kériso. Be, heme e wonaa tong, woéo pa apulie na junihe ta jo, ke o bo a cémun de ni béé apulie. Ke lé bo céihi ne kon, ke lé o bo hegi mu pelen a *mulie dieli mwo.
17Me genye pipaunu Padué me pipii den!
Be weeng Padaame ne ha a wâé ten;
Pana te tice anebwén kon;
Pana te mulie dieli mwo;
Pana time nye uce alieng;
Pana te céiu nang!
Me genye pipwoun den dieli mwo!
Wâé heme wonaa! Amen!
Go cumang ne ha a céihi
18Ana é pii tem, go Timoté pa naîng, ke te ju piwien me ali lé pii wo lépwo péroféta [he li lé pébé a pwooti te Padué] ne kom. Ni pwooti naa, ke e bo ne ace niihem, beme go pwopahi [a Pwooti Wâé]. 19Wâé heme go *cumang ne ha a céihi tem [ne ko Kériso]. Ke go pipwocile, beme go mulie ehi âcehi ni pwooti na e âbé mu ha a pwonimem.
Be wo lépwo béén, ke muhi telé me lé piténedehi a pwocihe na e âbé mu he ni pwonimelé. Ke lé caa patieden a céihi telé. 201.20 1 Korénit 5.5; 2 Timoté 4.14−15Woilu pelelé wo Iméné me Alexandre. Ke é caa nelu te *Caatana1.20 É caa nelu te Caatana—Wieli a bwopiinen pie, e pawielu wo Paulo mu ha a puco te ni acéihi, ucéihi a benaamwon na lé taatééhi ni mulihelé., be me wonaa, ke me lu temehi pie, lu nemwo pii pie lu cihe ne he nii Padué1.20 Pii pie lu cihe ne he nii Padué—ai Pii me ta a nii Padué (blasphémer).!
2A pwooti ko a bwo pwoiitihi
1É mu ko ati ninaa, ke é pamwoiukewé [go Timoté, me ati ni acéihi] pie me geé pwoiitihi te Padué me de [lépwo acéihi bééwé me ati] ni apulie [mu he ni ju pwonimewé]. Geé ilehi kojaeng pie, me e pwo ce naado celi wâé me delé; ke geé pwo-olé ten ko ninaa. Weengaa kuti a junaado.
2Geé pwoiitihi me de lépwo daame, [me lépwo apihuô, me lépwona piubwo jélé] me ati lépwona lé pipwahamiinye [ne he ni amu tenye]. Be me wonaa, ke genye mulie ha a péém. Ke genye o bo paciiti Padué, ke genye o engen ehi ati he ni bwomunen. 3Weengaa kuti [a bwo pwoiitihi] na wâé heme genye pwo, be ana piwâénime Padué kon, pana e celuimikenye. 4Be nimen me e *celuimi ni apulie ati, ke me [lé hegi ke] temehi a juuju [ko Iésu].
5Be te céiu cehi Padué
[he ati ni apulie].
Ke te céiu cehi pa apipépwooti
hadeniinye me Padué:
ke wo Kériso Iésu.
Be e â pa apulie pwohewiikenye,
62.6 Roma 3.29−30; Galat 1.4ke e patupwo a mulihen,
beme e tuwo ati ni apulie
[koja a ta me a mele].
Weengaa ali e caa habwii
wo Padué
ha a tan na e caa te mi ne,
pie nimen me celuimi
ni apulie ati.
72.7 Apostolo 9.15; Galat 2.7−8; 2 Timoté 1.11Ke é mu ko anaa kuti, na e pahedeéo, beme pa apostolo ten me de lépwona time uce lépwo *Juif. Be e pahedeéo ngen, me é â pwopune telé, ke me é pacémunilé ko a pwooti na juuju [ko Iésu] na nye ko céihi ne kon. Ke heme é ko pii anaa, ke é te juuju, kehe time é uce gele!
Ni bwomu tenye heme nye pwoiitihi ibu
8Weengi ana é huôhi: Ati he ni benaamwon, [heme geé pipitikewé ne he nii Padaame] ke wâé heme geé pwoiitihi ten. Ke geé necu a pipééle me a pitaacunaado. Ke me geé eti ni iwé da céii Padué, ke wâé heme geé pwo, mu he ni ju pwonimewé na wâé.
92.9 1 Pétéru 3.3−5Ke é huôhi ne te ni toomwo pie: [Heme geé pipitikewé ne he nii Padaame] ke wâé heme geé pipwocile a bwo cuwohe ni epwénewé, ke a bwo tuti ne ni puniwé, beme geé nemwo pihabwiikewé. Ke geé nemwo cuwohe ni epwén na junihe ubwo ni cuhin. Ke geé nemwo ne ni mwani megele, me ni perle. 102.10 1 Timoté 5.10Be a ju wâé te ê acéihi, ke e habwii ko ni penem den na wâé.
11-122.12 1 Korénit 14.34Wâé heme ni toomwo, ke me lé pwo me piwahin jélé, ke me lé te ju mu me lé tabemi a pune2.11−12 Tabemi a pune—Wieli é ha a benaamwon de Paulo, ke hiwon ni toomwo na lé niimihi pie, pwo mwomwon delé me lé picihe hauli heme lé pitapitilé wo lépwo acéihi. Ke nimen me e pacuwohi a bwopwonen naa wo Paulo. É mu ko anaa, na e paciitihi kolé me lé cihe ne he ni puco te ni acéihi na e pihuô ne hen.. Be time é uce ne telé a mwomwon me lé pacémuni lépwo aiu, ai me lé pwohuu telé ne he nina lé pwo2.11−12 Me lé pwohuu telé ne he nina lé pwo—ai Ke lé nemwo tahagéi a pwooti heme e cihe wo pa aiu.. 132.13 Genèse 2.7,21−22; 1 Korénit 11.8−9Be wo Padué, ke e mi tabuhi [pa aiu, wo] *Adamu; ke é alecehen, ke e bwo ne [ê toomwo na wo] Éva. 142.14 2 Korénit 11.3; Galat 3.1−6Ke time uce wo Adamu li e pihaamieng [na ali bwien, wo *Caatana]. Kehe wo êgi toomwo li e pihaamieng, ke time e uce ténedehi ni patén de Padué. 15Kehe icehi ana o celuimi ni toomwo ne ha a bwo picile ewa telé2.15 Ne ha a bwo picile ewa telé—ai Heme lé hegi ehi ni penem delé, he lé cile ehi ni naîlé, ai É mu ko a bwo pituie te pali Cuwo ewa [Iésu]., hemepie lé tee mulie ha a mulie na wâé te Padué, ne ha a céihi, me a pipwoééhe, ke me lé pwo me piwahin jélé.
3A pwooti te ni apihuô te ni céihi
13.1 Apostolo 20.28Weengi a céiu pwocihe [na nye mu pii pie]: «Hemepie nime pace céiu apulie me pa caa te lépwo apihuô te ni acéihi, ke a penem na wâé.» Ke a pwooti na juuju. 2-33.2 Tit 1.6−9Ke wo pa apulie naa, ke wâé heme e pipwoiipihi a mulihen [ne he pwahamii ni apulie ati]. Ke wâé heme te tice celi me pipé ne kon:
Me e ju mu ehi ko ê mwoden3.2−3 E ju mu ehi ko ê mwoden—Grek: Te céiu cehi ê mwoden.;
Me time e uce nihe wiinaado, me ûdu;
Me time uce pa apipééle, ke pitaacunaado;
Me time e uce pwo me wâé ten a mwani.
Me e éewo ko ni apulie;
Me e cihe me bwala;
Me e hegi ehi ni apulie na lé âbé tuie ne pelen;
Me e temehi pacémuni ni acéihi;
4Me e temehi pihuôhi a pomwa ten, beme lé piténedeeng ne ni naîn ne ha a bwo pwo me piwahin jélé.
5Be mepie time e uce temehi me e wéihi ehi a pomwa ten, ke kona e bo woté ko ace bwo pé na a puapulie te Padué, a Mwaiitihi ten? 6Wo pace apihuô, ke time uce wâé hemepie paceli e mwo ju tabuhi céihi. Be koli e bo cibehede, ke koli e bo paupaaeng wo *Caatana3.6 Koli e bo paupaaeng wo Caatana… ai Koli e bo â hegi a cuhinaado ten, pwohewii Caatana, pana ta nang.. 73.7 2 Korénit 8.21Ke a céiu mwo: Ke wâé heme a mulihen, ke me wâé te lépwona time uce lépwo acéihi, beme te tice apulie celi me lé pii celi ta ne kon. Ke me time e uce tupwo ne ha a pwojé na e pipwopweehi me den wo Caatana.
Lépwo dikone
8Te piwien ne ko lépwo dikone3.8 Dikone—A bwopiine a pwooti ce, he pwo grek, pie: Pa eabwé. Ne he ni bécéiuhe puco te ni acéihi, ke wo lépwo dikone, ke lépwo bépicani te lépwo apihuô. Omehi Apostolo 6.1−6., be wâé heme lépwo apulie na lé woni:
Me lé pipaciitilé;
Me mwomwon jélé, ke me lé nemwo te pitaatééhi pwocihe;
Me time lé uce nihe ûdu tabe megele;
Me time uce lépwo ahane mwani.
9Ke wâé heme lé âcehi3.9 Âcehi—ai Wéihi. a céihi [na caa pacémunilé kon]. Be a juuju li e ha *aduwo ânebun, ke e caa habwii tenye wo Padué3.9 2e phrase—Wonaa a bwopiine a pwooti mystère.. Ke wâé heme lé tabemi ehi a *pwocihe na e âbé mu he ni pwonimelé. 10Ânebuhe ace bwo pipégali pace apulie beme pa dikone, ke wâé heme nye mwo mi alihi ni penem den, beme te tice naado celi me o bo pipé ne kon.
113.11 Tit 2.3Ke é ne ko ni dikone toomwo3.11 Ni dikone toomwo—ai Ni mwode dikone., ke wâé heme lé woni:
Me lé pipaciitilé;
Me time lé uce pipii apulie;
Me time lé uce wiinaado me ûdu hauli;
Me lé juuju ne he nina lé pwo.
12Wo lépwo dikone, ke wâé heme lé paciiti ni mwodelé3.12 Lé paciiti ni mwodelé—Grek: Te océiu ko piaten.. Ke wâé heme lé pacihe ehi ni naîlé, me ni pwomwoiu telé. 13Be mepie lé pwopweehi ni penem delé, ke nye o tai paciitilé. Ke o te mu mang ni céihi telé3.13 Ke o te mu mang ni céihi telé—ai Me lé pipatemehi a céihi telé. ne ko Kériso Iésu.
A pihuô te Paulo ne te Timoté
14Nimung me é mwo âdé die pelem, kehe icehi ana é mi pwo a tii ce lé céiiko, 15be wieli o bwoliéo. [Be wâé tong] me go temehi ce bwomu tenye celi wâé ne ha a pwomwoiu te Padué. A pwomwoiu naa, ke a Mwaiitihi te Padué na e mulip, a puapulie ten. Ke a Mwaiitihi, ke e imwi me pwopahi a ju pipwopune [ko Kériso]. Be e pwohewii pa acuimi na a mwa3.15 Pa acuimi na a mwa—Pa amwo ha awieme mwa ne pelenye ne Kalédoni. A pwooti ni ko a puco te ni acéihi, kehe icehi ana é ne he ni béé tii, ke a pwooti mwo ko Kériso. Omehi 1 Korénit 3.11; 1 Pétéru 2.4−8..
Nihe ubwo a wâé te Kériso
163.16 Ioane 1.14; 2 Pétéru 3.3; 1 Ioane 2.18Go alihi, a juuju na e habwii tenye wo Padué3.16 A juuju na e habwii tenye wo Padué—Grek: Mystère., ke a naado na te nihe ubwo wéden. Ke genye nihe céihi ne kon! Be:
E pé a éé apulie wo Iésu Kériso.
Ke e pajuujueng a *Jenen Iitihi.
Ke lé alieng ne ni *âcélo.
Genye patemehieng te ni bele.
Ke lé céihi ne kon
pitihi a bwohemwo.
Ke céieng da he *miiden
ne ha a wâé te Padué Caa.
4Lé bo piâ ité wo lépwo béén
1E patemehi na a *Jenen Iitihi pie, lé o bo patieden ni céihi telé wo lépwo béén he *ni bénebwéne tan. Be lé o âcehi ni bwo temehinaado na gele na e âbé mu ko ni duéé. 2Wo lépwo apulie naa, ke ni agele na lé pipwohuô tenye, be lé caa patieden a *pwocihe na e âbé mu he ni pwonimelé, ko a bwo time lé uce tabemieng4.2 Grek: A pwocihe na e âbé mu he ni pwonimelé, ke caa cini ko toki megele (marqués au fer rouge dans leur conscience). É ha a benaamwon de Paulo, ke hemepie lé cela wo lépwo apwokarépu, ke wo lépwo coda, ke lé te junihe tanahi pwotahi ni béé duaan ko ni éélé ko toki megele, beme a ine ni ta pwo telé.. 34.3 Genèse 9.3; Roma 14.6; 1 Korénit 10.30−31Lé huôhi [te lépwo acéihi] pie me lé nemwo piaten, ke lé paciitihi kolé ni béé wiinaado. Kehe icehi ana ni wiinaado naa, ke nina e ne wo Padué beme nye wii.
Kehe wogenye ni acéihi, ke genye caa temehi a juuju, ke te wâé heme genye wiinaado, ke me nye pwo-olé te Padué kon. 4Éa! Te tai wâé ati ni naado na e pwo wo Padué! Ke te tice celi me genye paciitihi! Kehe genye te tai hegi ati [ne ha a pipwodéén] ke genye pwo-olé te Padué. 5Be ni naado naa, ke nina wâé te Padué mu ko a pwooti ten, ke ni pwopipwo-olé ten.
Wo pana e penem ehi me de Kériso
6Wâé heme go te picaa ni naado naa te lépwo acéihi béém. Be me wonaa, ke bo wogo pa ju eabwé te Kériso Iésu. Ke go te hegi [ne ha a pwonimem] ni pune na juuju ko a céihi tenye [ne ko Kériso]. Be go caa te âcehin, ke wâé mwo heme pwohewii ni wiinaado tem ati he ni tan.
74.7 1 Timoté 1.4Go nemwo pipéce ne ko ni jemaa na gele, be te ju piticenaado ne kon ne te pa apulie na e paciiti Padué. Wâé heme go tee mwoiu ko penem, beme wogo pa apipwoiipi, ke me go paciiti Padué. 8Be [nye mu pii pie]: «Ni jele, ke ni penem na lé pwopweehi a éénye, ke ni naado na wâé. Kehe icehi ana a naado na nihe wâé, ke a penem ko a mulihenye, beme wâé te Padué. Be é mu ko anaa, na nye hegi *a ju mulip tabuhi jenaa, ke é dieli mwo.»
9A pwooti naa, ke a juuju, ke wâé heme lé hegi ati ne ni apulie. 104.10 1 Timoté 2.3−4É mu ko anaa kuti, na me genye mwoiu ko penem, be genye caa céihi ne ko Padué, na e mulie [ke e ne a mulip]. Be weeng li e *celuimi ati ni apulie; ke anaa, ke a juuju te lépwona lé céihi ne kon. 11Ke weengaa kuti ana me go te cuwo ko pacémunilé kon.
Go pipwocile a bwo mulie tem
124.12 Tit 2.15Wâé heme go habwii ce bwomu tem celi wâé te ni acéihi ne he ni bwo cihe tem me ni penem dem, me a pipwoééhe tem, ke a céihi tem, me a bwo pipaciitiko. Ke me wonaa, ke o te tice bwopwonen me e pihooniko wo pace céiu apulie, mu ko ana wogo, ke mwo pa ewa aiu.
13Heme go ucéihi a bwo tuie tong, ke wâé heme go te cuwo ko pine ni *tii iitihi te ni apwoiitihi4.13 Pine…te ni apwoiitihi—É ha a benaamwon de Paulo, ke time uce hiwon nina lé temehi pine tii.. Ke go tee pamwoiulé, ke go tee pacémunilé. 144.14 2 Timoté 1.6Go nemwo neuhi ali âpipati li e ne tem na a Jenen Iitihi, he li lé ne li ilé huîim4.14 Lé ne li ilé huîim—Lé wonaa alecehe a bwo pipégali Timoté, beme lé adéieng, ke pamwoiueng ne ko ni penem. wo lépwo apihuô te ni acéihi, ke li lé pii li pwooti ne huîim [ne he nii Padué]. 15Ke wâé heme go ju mu cehi ko li penem [li é caa pii tem]. Ke go penem ehi, beme lé alihi ne ni apulie pie, caa piubwo da a utehe a penem dem. 16Go pipwocile a bwo mulie tem me a bwo pwocémun dem. Ke go te ju mu kon cehi. Ke e o bo celuimikewé [wo Padué]: wogo me lépwona lé hegi ni pwooti tem.
5A bwo pacémuni ni pétaapwo acéihi
1Go nemwo cihe me mwoiu te pace ukéiu. Hemepie go pwopune ten, kehe go paciitieng, pwohewiin heme pa caa tem. Ke go pwopune te ni ewa pwohewiin heme ni ciéém; 2ke ni ukéiu toomwo, pwohewiin heme ce nyaa tem; ke ni ewa toomwo pwohewiin heme ce toomwo pwaadeniim.
Ni depwele
3Geé pwopweehi ne ko ni depwele5.3 Depwele—Veuve. na te tice apulie celi me lé picani telé. 4Ke mepie te pwo ce naîlé, me ce pabulé, ke wâé heme lé mi pwopweehi te ni pwomwoiu telé. Be weengaa kuti a ju penem de pa acéihi. Be ni taacu me mwojuia ko ni naado na lé hegi mu ko ni caa me nyaa telé, me ni ao me gee telé. Ke o te junihe wâé te Padué.
5Ke mepwo é ne ko ni depwele na te tice apulie celi me lé picani telé, ke woélé kuti ni toomwo na lé céihi ehi ne ko Padué. Be lé te pwoiitihi ten heme bwén ke pwang. Ke lé te cuwo ko ilehi kojaeng me e picani telé. 6Ke mepwo é ne ko ni depwele na lé te ju hane cehi ni pipwodéén delé, ke pwohewiin heme lé caa mele, te piwien heme lé mwo teko mulie.
7Weengaa kuti a huô na me go pii te ni depwele, [me ni pwomwoiu telé]5.7 Go pii te ni depwele, [me ni pwomwoiu telé]—Grek: Go pii telé. Wieli ni depwele, ai wieli ati ni acéihi., beme o te tice naado celi me nye o bo pipé ne kolé kon. 8Be [te a penem denye] me nye pwopweehi ne ko a pwomwoiu tenye, tabuhi mu ha a pomwa tenye. Ke wo pana time e uce wonaa, ke e â ité koja a céihi ten, ke caa junihe ta nang koja pana time uce pace acéihi.
Ni depwele na nye ne mwani telé
9É ne ko ni depwele na nye ne mwani telé ne ha a Mwaiitihi5.9 Ni depwele…a Mwaiitihi—Grek: Ni depwele na tii ni niilé ne ha a tii. Piwien ne ha a niide a tii 11. Ni depwele naa, ke lé pinelé, beme lé penem de Padué, ke lé hegi ni mwani bépicani koja a puco te ni acéihi., ke wâé heme lé caa wédenihi a 60 ni jo helé. Ke nina lé te mu ehi ko ni aiu helé ânebuhe a bwo mele telé5.9 Lé te mu ehi ko ni aiu helé… Grek: Te picéiu ni aiu helé.. 10Ke wâé mwo hemepie ni toomwo na nye temehilé mu ko ni naado na wâé na lé mu pwo:
Me lé te ju cile ehi ni naîlé;
Me lé te hegi ehi ni apulie;
Me lé pipenem ehi te ni acéihi5.10 Pipenem ehi—Grek: Puu ni a lépwo apwoiitihi. (A bwo pihegi apulie te lépwo Juif me lépwo atabuhi céihi ne ko Iésu, ha a benaamwon de Paulo.);
Me lé picani te lépwona lé mu he ni picani me ni téé;
Me lé pwo ati ni pétaapwo naado na wâé.
11Geé nemwo ne ce bépicani te ni depwele na mwo ni ewa. Be koli lé bo âcehi ana te nimelé kon, beme lé piaten mwo. Ke koli lé bo piâ ité koja [ni penem na lé mi pii pie me lé pwo me de] Kériso. 12Ke é he ko wonaa, ke time lé uce pacuwohi a *piapwo telé me den, 135.13 2 Tésalonik 3.11ke koli lé bo uce pwoemaan. Ke a naado na nihe ta koja anaa, ke koli lé bo te â he ni pwomwo, ke lé pipii apulie, ke lé gaale he ni naado na te tice panelé ne kon, ke lé tee pwome pii ni naado.
145.14 1 Korénit 7.9Ke é mu ko anaa kuti, na é pii te ni toomwo depwele na mwo ni ewa pie, wâé heme lé piaten mwo. Ke wâé heme lé cile ehi ni naîlé, ke me lé pwoiipihi ehi ni pomwa telé. Ke me wonaa, ke time lé o uce ne pwaadeni lépwona muhi telé konye5.14 Lépwona muhi telé konye—ai Wo Caatana, pana muhi ten konye., me lé pipii me ta genye. 15Be é ne ko ni béé depwele, ke lé caa te piâ ité, be lé âcéi *Caatana, ke lé caa pipatieden.
16[Go pii te] ni toomwo na lé céihi pie, mepie pwo ce depwele he ni pwomwoiu telé, ke wâé heme lé picani telé. Be me wonaa, ke me time uce a âneule te a *puco te ni acéihi, beme e bo te ju picani cehi te ni depwele na tice apulie celi me lé picani telé.
Lépwo apihuô te ni acéihi
17Wâé heme nye paciitihi, ke me nye pwocuhi lépwo apihuô na lé pé a puapulie te Padué5.17 1re phrase—Grek: Wâé heme okelo ko pipaunu lépwo ukéiu na lé pihuô ehi.. Ke me nye pwocuhilé ehi, hemepie lé te mwoiu ko pwopune me patemehi a Pwooti Wâé. 185.18 Mataio 10.10; 1 Korénit 9.9Be caa te tii ne he ni tii iitihi pie: Go nemwo pacuwohi a paaci me e wii ni ace blé, heme e ko penem me dem5.18 Penem me dem—Grek: Caaite ni pidenaado..Deutéronome 25.4
Ke caa tii mwo pie: «Wo pa apenem, ke wâé heme e hegi a cuhieng5.18 …Wâé heme e hegi a cuhieng—A pwooti te Iésu ne ha a tii te Luka (Luka 10.7). Habwii tenye pie, e niimihi wo Paulo pie, te piwie ana tii ne ha a Élele Iitihi na mwo Coho (le Nouveau Testament), me nina e ha a Élele Iitihi Ânebun (l’Ancien Testament), be tai a pwooti te Padué..»
195.19 2 Korénit 13.1É hemepie pwo pace céiu apulie celi e pipé ne ko pace céiu apihuô, ke go nemwo uce pipéce ne kon, hemepie te weeng cehi. Be wâé heme alo ai cié lépwoceli lé *pajuujuhi.
205.20 Éféso 5.11Wo lépwona lé te cuwo ko pwo nina ta, ke go pacihelé ne he pwahamii ni apulie ati. Be me wonaa, ke me mwoti lépwo béén me lé pwo nina ta.
21Weengaa nina é huôhi ne tem ne he pwahamii Padué, me Kériso Iésu, me ni *âcélo na lé pipenem delu5.21 Ni âcélo na lé pipenem delu—Grek: Ni âcélo na pipégalilé. Wieli lépwo âcélo na lé pipwoeabwé te Padué, ne ânebuhe a atebwo ten ne he miiden. Omehi Pii Beetihi 5.11.. Ke go piténedelé ehi, ke go nemwo pipwoinen ne ko ni apulie.
22Wâé heme go omehi a mulihe pa apulie ânebuhe a bwo pipégalieng beme pa apihuô te ni acéihi. Be koli go bo habwii pie, te wâé tem ni ta na e pwo. Go pipwocile, ke go pipwoiipiko ati ne he ni bwomunen5.22 Grek: Go nemwo piepin me go ne ni im ne ko pace céiu apulie. Go nemwo pipabéé me pipwohewii pana e pwo nina ta. Kehe go pipaciitiko..
23Ke é ne ko wogo, go Timoté, ke wo pana mu te cuwo ko cunu go, kehe é pii tem pie: Go nemwo ju ûdu ju tabe cehi; kehe go neibuhi me ace tabe megele, beme wâé a nam.
24É ne ko lépwona lé cuwo ko pwo nina ta, ke genye te mi alihi ni ta pwo telé ânebuhe a tan ko tautinaado5.24 Tan ko tautinaado—Heme a tautinaado te Padué, ai a tautinaado te Timoté me ni béé acéihi.. Ke é ne pele lépwo béén, ke genye bo tee alihi mwo alecehen. 25Pwohewii ni penem na wâé. Be pwo ni béé penem na te ju epin ko alihi. Ke ni béén, ke nye bo tee alihi alecehen5.25 Nye bo te alihi alecehen—Grek: Time uce jan me neduwolé..
6Lépwo apenem tice ja kon
16.1 Éféso 6.5Weengi a pwooti me de lépwo acéihi na lépwo *apenem tice ja kon: Geé paciiti lépwo caa tewé me piténedelé ehi. Be me wonaa, ke wo lépwo apulie, ke me o time lé uce pihooni Padué, ke é ne ko ni cémun denye. 26.2 Filémon 1.16Hemepie pa caa tem ke pa acéihi béém, ke time uce a bwopiinen pie, me go nemwo paciitieng na ati he ni bwomunen. Wâé heme go te penem ehi me den, beme go picani te pa acéihi béém, na te wâé mwo te Padué nang.
Bénebwéne pwooti
Wâé heme go pacémuni lépwo acéihi ati ko ninaa, go Timoté. Ke go wâgo kolé me lé piténedehi.
Lépwo agele
36.3 Galat 1.6−9Pwo ni béé apulie na lé pacémuni ni acéihi ko ni naado na te ité koja [nina é pii tem]. Ke time lé uce âcehi a pwooti te Padaame henye, wo Iésu Kériso. A pwooti naa, ke juuju, ke wâé, ke e pacémunikenye ko a mulip na wâé te Padué6.3 E pacémunikenye ko a mulip na wâé te Padué—ai E engen ne ko a céihi tenye. me nye mulie hen. 4Wo lépwo apulie naa, ke te nihe lépwo acibehede, kehe te tice celi lé temehi. Caa te a cunu kolé anaa: Wâé telé heme lé tee pitaacunaado. Kehe ati ni pwooti telé naa, ke e taapwii a pitaaba, me a pineité, me ni piciheta, me ni bwo niimihinaado na ta. 56.5 2 Timoté 3.8, 4.4; Tit 1.14[Te nihe wâé telé] ni picihe na tice anebwén kon, be lé âcehi ni bwo niimihinaado telé na time uce mwomwon. Be time lé uce alihi a juuju. Ke lé niimihi pie, a céihi ne ko Padué, ke a pwaaden beme o pwo ce delé.
A ju wâé tenye
66.6 Filipi 4.11−12; 1 Timoté 4.8; Ébéru 13.5Te a juuju pie, a céihi tenye ne ko Padué, ke caa te a wâé tenye na nihe ubwo! Ke wâé heme nye pipwodéén ko nina caa e pelenye. 76.7 Job 1.21Be te tice celi nye pébé ne éni pwo bwohemwo, ke e te tice mwo celi nye o mwojuia imi. 8Ke hemepie pwo ce wiinaado, me ce epwénenye, ke caa te jan ne konye ninaa.
9Ke é ne ko lépwona lé tee ko hane ce naamuulé, ke lé ne [te *Caatana a watihen] me e pipaupaalé, ke lé o bo â pwo ni naado na ta. Be time lé uce ko alihi pie, lé teko pipwotahinaado ne kolé mwo, be lé teko âcehi nina te nimelé kon, na te ju piticenaado ne kon. Pwohewiin heme ko cielé ko itihe toki, ke me tahilé ne he jié beme lé mwiiê, ke me tielé dieli mwo6.9 Dernière phrase—Grek: Tahilé [ne ha a jié]. Geme ne mwo ni béé pwooti, beme patemehi a ocine he pwo grek..
106.10 Éféso 5.5Be a watihe ni pétaapwo naado na ta, ke a bwo wâé tenye a mwani. Hiwon nina lé nihe hane a mwani, ke lé pineuhi a céihi. Ke lé te nihe mu he ni picani kon.
Ni béé huô te Timoté
116.11 2 Timoté 2.22Go cela ko ni naado na ta, go Timoté, be wogo ke pa apulie te Padué. Go pipwoiipiko, beme wâé te Padué go. Go mulie ne ha a céihi, me a pipwoééhe, me a piuca. Ke me bwala a pwonimem. 126.12 1 Korénit 9.25−26; 2 Timoté 4.7Go cumang ne ha a pa na wâé, âcehi a céihi tenye6.12 Âcehi a céihi tenye—ai Beme go pwopahi a céihi tenye.. Ke go imwi mangihi a mulip ne pele Padué dieli mwo [ke go mulie ehi hen jenaa]. Be e caa todeko ne ha a mulie naa, ha a tan na go patemehi a céihi tem ne ânebuhe ni apulie na hiwon.
13-146.13 Ioane 18.36−37É huôhi ne tem pie, me go piténedehi ni patén na go caa hegi. Ke é pii tem anaa ne he pwahamii Padué, na e ne a mulihe ati ni naado. Ke é pii mwo ne he pwahamii Kériso Iésu, pana e te pii cehi a juuju he li e cuwo he pwahamii gupéno Ponce *Pilate. Go ténedehi ni patén naa, beme o te tice alili kom; ke me o te tice celi me o tautiko kon, die ha a tan na e bo mwojuia mwobé hen wo Padaame henye Iésu Kériso. 156.15 Pii Beetihi 17.14Be:
E pihuôhi ati wo Padué henye,
na wâé heme nye pipaunueng6.15 Wâé heme nye pipaunueng—ai E ne tenye a péém me a pipwodéén..
Padaame he ni daame,
ke pa Apihuô te ni apihuô.
E caa pacuwohi a tan
na e bo habwii Kériso
[he e bo mwojuia mwobé.]
16Te weeng cehi kuti
na e *mulie dieli mwo.
Pwomelaa a pwéélang den6.16 Pwomelaa a pwéélang den—Grek: E mu ha a pwéélang na time uce jan ne konye me nye âmwonuhi.;
pwocoon me nye omeeng;
time uce jan me nye alieng.
O bo pipaunueng he ni tan ati.
Mu kon a pwojunuun dieli mwo.
Wâé heme wonaa! Amen!
Lépwo acéihi na pwo ni wâé telé
176.17 Luka 12.20Go pii ehi te lépwona pwo ni wâé telé ne éni pwo bwohemwo pie, me lé nemwo pipaunulé. Ke me lé nemwo céihi ne ko ni wâé telé, be time o uce mu dieli mwo. Ûhu! Wâé heme lé céihi ne ko Padué, pana e ne tenye me piticenaado ne kon ati ni naado beme nye pipwodéén kon. 18Go pii telé pie me lé pwo ce naado celi hiwon celi wâé. Ke me lé pati ni béén, ke me lé ne, me piticenaado ne kon. 196.19 Mataio 6.20Ke me wonaa, ke lé ne a wéa ko a céiu benaamwon, he na e lang a wâé na junihe wéden, na o time uce nyaale: ke *a ju mulip.
Bépinelé
20Go cile ehi, go Timoté, ana e ne tem wo Padué. Go nemwo tabemi ni pwocihe na tice ânen na lé nekenye ité koja a céihi. Be wo lépwona lé taacunaado ko ni naado naa, ke lé pii pie e pelelé ni bwo temehinaado [na e bwolu] kehe icehi ana lé gele. 216.21 1 Timoté 1.6; 2 Timoté 2.18Ke hiwon lépwona lé piâ ité koja a ju céihi, be lé âcehi ni âniimihinaado naa.
Wâé heme e mu pelewé ati a *pipwoééhe tice ja kon de Padué.
Adéikewé!