A bécéiuhe tii
te
Pétéru
Atabuhi ko a tii
Woo na e tii a tii ce?
Wo Simon Pétéru, pa apostolo, ke pa apulie na piubwo nang ne hadenii ni acéihi. E picani ten wo Silas (omehi 5.12), be wieli e temehi pwotii he pwo grek.
E tii éniile?
Ha awieme a jo 62 me 64, ha a benaamwon na wo pa daame he lépwo Roma wo Néron, ke e pwotahi ne ko lépwo acéihi ne ko Iésu. Wieli e tii mu Rome wo Pétéru (he na pii kon lang pie ‘Babulona’ ne ha a niide a tii 5.13).
E tii me dee?
Te lépwo acéihi ne ko Iésu Kériso na time uce lépwo Juif, na lé mulie ha a province Asia te lépwo Roma, ha a duaan na pii kon pie Turki jenaa. Ke e pwotii nge céii mwo ati lépwo acéihi na pwotahi ne kolé.
É ko ade na e tii?
Wo lépwo acéihi, ke lé mu ha a péém he ni jo na hiwon. Kehe icehi ana pwo ni apulie na lé tabuhi cubwonilé, ke lé pwotahi ne kolé. Ke lé cine pa daame he lépwo Roma, wo Néron, beme e pwotahi ne kolé mwo. E tii wo Pétéru, beme e pamwoiu lépwo acéihi ne he ni picani na lé mu hen.
Ade ace âne a tii ce?
Wogenye na genye céihi ne ko Iésu, ke genye caa apulie ne ha a bele te Padué, mu ko a bwo pwoâpwailo ko Iésu Kériso. Caa puukenye ne he nii Kériso, ke wâé heme nye mulie ha a mulie na iitihi ati he ni tan. Hemepie pwotahi ne konye, ke wâé heme nye niimihi pie junihe pwotahi ne ko Iésu, ke wâé heme nye picani ha a pipwodéén pwohewiieng. Be me wonaa, ke e o mu konye ni adéihi mu jeda he miiden na e o tee mu dieli mwo (1.3−4, 5.12).
A bwomune a tii 1 Pétéru
Pipwobwocu (1.1−2)
E celuimikenye wo Padué, ke e adéikenye (1.3−12)
Mulie ha a mulie na iitihi (1.13―2.10)
A mulihenye ne pele nina time lé uce temehieng (2.11−25)
A pwooti ne te lu aadomwin (3.1−7)
Nye adéilé heme lé pwotahi ne konye (3.8―4.19)
A pwooti ne te lépwo apihuô (5.1−4)
Bénebwéne pwooti ke bépinelé (5.5−14)
1Pipwobwocu
1Woéo Pétéru, na é pwotii, woéo pa *apostolo te Iésu *Kériso. [Be e neéo ngen beme é patemehi a pwooti ten.] É pwotii lé céiikewé lépwo apulie te Padué, na geé mu he ni pétaapwo province: Pont†, Galat, Kapados, Asia ke Bitini1.1 Pont…Bitini—Ati ni province naa, ke lé mu ha amu Turki jenaa.. 21.2 Roma 8.29; 2 Tésalonik 2.13Wo Padué Caa, ke e caa pipégalikewé, be weengaa a âniimihinaado ten na caa te bwolihi. Ke a *Jenen Iitihi ten, ke e ne me wogewé a puapulie ten, na iitihi. Ke wo [pa Naîn] Iésu Kériso, ke e caa pétaabwon ni ta pwo tewé, ko a bwo tée na a cewéhen1.2 3e phrase—Grek: A bwo puukewé ko a cewéhe Iésu Kériso. Wo lépwo Juif, ke lé taunuhi a paaci, ke lé puu ni apulie ko a cewéhen, beme lé pétaabwon ni ta pwo telé. Jenaa ni, ke a bwo mele te Kériso, ke e âpwailo beme pétaabwon ni ta pwo tenye. A ocine mwo ko a piapwo tenye me Padué. Omehi Exode 24.5−6, me Ébéru 9.18−21.. Ke caa wogewé lépwo apulie na geé piténedehi.
Wâé heme etewé a pipwoééhe me a péém na piwéden!
E celuimikenye wo Padué
3Pipaunu Padué, pa Caa te Padaame henye, Iésu Kériso! Be te nihe ubwo wéden a pipwoééhe ten me denye. Ke e ne tenye a mulie na mwo coho mu ko a bwo mulie cemwo mu ha amele te Iésu Kériso. Ke é mu ko anaa, ke etenye a céihi na mang, 41.4 Kolosé 1.12é ne ko ati ni *adéihi na nye ucéihi. Ke weengi: Ke o tai ni de ni naî Padué a mulie na e jeda he miiden1.4 A mulie na e jeda he miiden—Grek: A tau, héritage, a bwopiinen pie: Adéihi na e ne wo Padué dieli mwo., é he na time uce ta ni naado nelang, ke time uce alili, ke time uce tieden, be e mu dieli mwo!
51.5 Ioane 10.28, 17.11Be e celuimikenye wo Padué mu ko a céihi tenye [ne ko Iésu Kériso]. Ke e wéikenye ko a niihen ke a junuun, beme nye bo hegi ati ni adéihi ten1.5 Ati ni adéihi ten—Grek: A bwo celuimikenye., na e bo habwii tenye ha a *Tan Alece1.5 Tan Alece—A tan na e bo mwojuia mwo wo Iésu Kériso, beme e pihuô ne ko ati ni naado ne éni pwo bwohemwo, ke é jeda he miiden. Ke wo Padué, ke e bo pwo me mwo coho ati ni naado..
61.6 Cang 1.2; 1 Pétéru 5.10É mu ko ati ninaa, ke wâé heme geé pipwodéén, heme geé muko pétaapwo mu he ni picani na téé. Be wâé heme wonaa ha a benaamwon ce te ju bahin, 71.7 Proverbes 17.3; Zakari 13.9; Malachie 3.3; Cang 1.3beme e tacebwénihi a céihi tewé. Be pwohewii a mwani megele na cini ne pwo miû, beme pétaabwon ana alili mu kon1.7 Pwohewii mwo a bwo tole na a miida ne pwo miû.. Ke a céihi, ke te nihe a junaado koja a mwani megele, be o tieden ha ace céiu tan. Ke mepie te mang a céihi tewé, ke [é alecehe ni tacebwén] ke geé bo hegi a pipwowâé na nihe ubwo ke piwéden, ha a tan na e bo pihabwiieng de ati ni apulie wo Iésu Kériso.
8-91.8 Ioane 20.29; 2 Korénit 5.7Time geé mu uce ali Iésu, kehe icehi ana o eânimewé ten. Ke time geé uce téele alieng, kehe icehi ana geé tee ko céihi ne kon. Ke é mu ko anaa, ke e celuimikewé wo Padué, ke o te junihe ubwo wéden a pipwodéén dewé, na pwocoon me nye pii.
Patemehi ânebun a bwo celuimikenye
10-111.10 Mataio 13.16−171.11 Psaume 22; Ésaïe 53; Luka 24.26−27Lé mi pébé a pwooti te Padué wo lépwo *péroféta bwolihi, ke lé cihe ko a âpipati na genye bo hegi: a bwo celuimikenye. Be e mu kolé, ke a Jenen Iitihi te Kériso, ke e ne me lé pii pwaatihi a bwo picani ke a bwo mele te Kériso, me a bwo ubwo na a wâé ten alecehen. [Kehe icehi ana time lé uce temehi a pwooti na lé pébé] ke lé te nihe hane me lé temehi pie o [wooélé, ke] éniile, ke o woté.
12Be e pii telé wo Padué pie, ati ni naado na lé pii pwaatihi ne he niin, ke e bo pacuwohi alecehelé, me denye jenaa. Ke [weengaa ana e tuiebé. Be] li apulie [li e pahedelé ngen wo Padué] ke lé caa patemehi tewé a *Pwooti Wâé, ne ha a junuu a Jenen Iitihi na e âbé mu he miiden. Ke a Pwooti Wâé naa, ke te nihe nime lépwo *âcélo me lé temehi [ke me lé alihi aceli e o bo âbé alecehen].
Mulie ha a mulie na iitihi
13É mu ko anaa, ke geé pipwoiipikewé, ke geé tee ûmiê, ke geé tee niimihi ni adéihi na e bo ne tewé ha a tan na e bo pihabwiieng hen wo Kériso. 141.14 Roma 12.2; Éféso 2.3, 4.17−18Geé piténedehi, be wogewé ni naîn, ke geé nemwo âcehi nina te nimewé kon na ta ânebun, he time geé uce téele temehi Kériso. 15Geé pipaciitikewé ne he ni huô tewé, be wo Padué na e todekewé, ke Padué na e iitihi. 161.16 Lévitique 11.44−45; Mataio 5.48Be caa te tii ne he ni *tii iitihi pie: Geé pipaciitikewé, be é iitihi.Lévitique 19.2
Paciiti Padué
171.17 Roma 2.11; Pii Beetihi 2.23Geé pwoiitihi te Padué, ke geé pii kon pie Caa. Ke [wâé heme geé tee niimihi pie] te weeng na e bo muko tautikenye ko nina nye pwo, ke time e uce pipwoinen ne ko ni apulie. Ke é ko anaa na me geé paciitieng he geé mwo ko mulie éni pwo bwohemwo.
18Be geé te temehi ehi pie [wogewé ni apulie ten jenaa. Be] e pwocuhikewé ko a cuhin na te junihe ubwo. E celuimikewé mu ha a mulihewé ânebun na geé pé koja lépwo watihewé; a mulie na time uce jan me e ne tewé a ju adéihi1.18 Na time uce jan me e ne tewé a ju adéihi—Grek: Na ticenaado ne kon..
Time e uce pwocuhikewé ko mwani megele ai mwani pwojo, ai ko ce béé naado celi nyaale, ke muti. 191.19 Apostolo 20.28; Ébéru 9.12−14Ûhu! E celuimikewé ko a cewéhe Kériso [na e tée he li e mele me dewé]: a cewéle na nihe ubwo wéden a cuhin. Wo Kériso, ke te tice ta kon, pwohewii a nahi muto na *pwoâpwailo kon, na te tice alili me cunu kon.
201.20 Éféso 1.4Be e caa mi pipégalieng wo Padué, ânebuhe a bwo tabuhi na a bwohemwo [beme e bo mele, ke me e tuwokenye mu he ni ta pwo tenye]. Ke e habwiieng tewé wo Padué he ni benaamwon ce, be caa *ni bénebwéne tan. 211.21 Ioane 14.6; Roma 5.1−2É mu ko Kériso na geé céihi ne ko Padué na e caa pwo me e mulie cemwo mu ha amele, ke e ne ten a bwo ubwo na a wâé. Weengaa ana me geé temehi pie, wo Padué, ke e bo ne tewé ana e caa te pii. Ke geé *ucéihi ne ha a céihi1.21 Dernières phrases—Espérance en Dieu..
Geé pipwoééhewé
221.22 Ioane 13.34; Roma 12.10Geé caa hegi a [pwooti na] juuju: [a Pwooti Wâé ko Iésu Kériso] ke geé piténedehi, ke caa ciitili taabwon ni ta pwo tewé mu he ni pwonimewé. Ke é mu ko anaa, ke caa jan me geé pipwoééhe lépwo acéihi bééwé mu he ni ju pwonimewé. Ke te nihe wâé heme geé te cuwo ko wonaa. 23Be geé caa âbeele cemwo, ke a mulie na geé caa hegi, ke te nihe piwéden koja ana geé hegi koja lu nyaa me caa tewé! Be anaa, ke o nyaale ke tépu1.23 1re & 2e phrases—Grek: A bwo piâbeele tewé mwo, ke time uce é mu ko a âdaanu na o muti; kehe te é mu ko a âdaanu na e mu dieli mwo.. Kehe te icehi a mulie na mwo coho na é pii, ke e o mu dieli mwo, be e âbé mu ko a pwooti te Padué, a pwooti na e *mulie dieli mwo.
241.24 Ésaïe 40.6−8Ati ni apulie,
ke lé pwohewii ni muu meté.
O meiu jélé ati.
O tieden a bwo wâé jélé,
pwohewii a muu buké
na caa meiu, ke e tupwo.
25É ne ko a pwooti te Padaame,
ke e o te mu die ha a pwonehin!
Ke e o tee cumang dieli mwo.Ésaïe 40.6−8
A pwooti naa, ke a Pwooti Wâé na caa patemehi tewé!
212.1 Éféso 4.22; Cang 1.21É hemepie wonaa, ke tahi taabwon ni huô na ta, pwohewii a pipwohuô, a gele, a pipwokonaado, me a pipii apulie. 2Wâé heme geé pwohewii a cuwo nahi ewa na mwo ju picileeng, be te céiu cehi a naado na wâé ten, ke a dile ten. Ke wâé heme geé wonaa ko a pwooti te Padué. Geé nenimewé ne kon, ke geé te nihe ilehi, be weengaa a wiinaado [ne ko a pwonimewé] na time e uce pimu ibu me ace céiu naado. Ke e ne tewé, beme ubwo gewé da ne ha a mulie na mwo coho na e kowé2.2 Ne ha a mulie na mwo coho na e kowé—Grek: Ne ha a bwo celuimikewé.. 32.3 Psaume 34.9Be geé caa nemi mu ko a bwo wâé Padaame.
Wo Iésu ke pa ju péi paamwa
4Geé âbé céii Padaame Iésu. Be weeng pa péi na e mulie, [ke pa paa a mulihenye]. Lé téétieng wo lépwo apulie [na ta jélé] kehe icehi ana e pipégalieng wo Padué, be te junihe pwonaado ne kon. 52.5 Éféso 2.21−22; Pii Beetihi 1.6Ke wogewé mwo, ke geé pwohewii ni péi na lé mulie. Wâé heme geé pinekewé [te Padué] beme e nekewé ha a Mwaiitihi ten na e ko bahi. A céiu mwo, ke geé pwohewii ni *apwoâpwailo [âpipégali te Padué]. Ke a penem dewé, ke me geé ne ten ni âpwailo, mu ko a *Jenen Iitihi na e kowé. Ke e bo hegi wo Padué mu ko ana e pwo wo Iésu Kériso. 62.6 Ésaïe 28.16; Éféso 2.20Be caa te tii ne he ni tii iitihi [ko Iésu] pie:
Go téne ani, go a puapulie!
É ne ha amu *Sion a péi
na te junihe pwonaado ne kon,
beme a péi paan.
Ke wo pana e céihi ne kon,
ke time e o uce tupwo2.6 Time e o uce tupwo—Grek: O time uce tanim nang..Ésaïe 28.16
72.7 Psaume 118.22Te junihe a junaado ne tenye a péi naa, [wo Iésu Kériso] be genye caa céihi ne kon. Kehe icehi ana [weengi a pwooti ko] lépwona muhi telé me lé céihi ne kon:
Ali péi li lé tahi taabwon
wo lépwo abahi mwa,
ke te anaa kuti a ju paamwa.Psaume 118.22
82.8 Ésaïe 8.14−15Ke a céiu mwo:
Ke a péi na lé téneda kon;
Ke a péi na e pwo me lé tupwo.Ésaïe 8.14
Be te muhi telé me lé mwomwohi a pwooti te Padué. Ke wonaa ana me e tuie ne kolé.
Wogewé a puapulie te Padué
92.9 Exode 19.6Kehe wogewé, ke a puapulie na e pipégali, beme e pipwoâpwailo te Padaame: a amu na iitihi, a bele ten. E todekewé mu ha a melepiing nge ha a pwéélang den na junihe wâé, beme geé pii ni wâé ten.
102.10 Osé 2.25Wogewé ânebun lépwona time geé uce puapulie ten, kehe é jenaa, ke wogewé a puapulie te Padué. É ânebun, ke time geé uce hegi a pipwoééhe te Padué, kehe é jenaa, ke geé caa hegi.
A mulihenye ne pele @ nina time lé uce temehieng
112.11 Galat 5.17,24Wogewé ni ju bééng, wogewé ni apulie na geé âbé ke geé o te engemwo mu pwo a bwohemwo ce. É mu ko anaa, na é ilekewé pie, geé nemwo âcehi nina te nimewé kon na ta, na lé pwopa ne ko a mulihewé.
122.12 Mataio 5.16Geé pwo me wâé ace bwopemikewé ne ha awieme nina time lé uce temehi Padué. Be mepie lé pipé ne kowé pie geé pwo aceli ta, ke lé bo alihi nina geé pwo na wâé. Ke me wonaa, ke lé bo pipaunu Padué ha a tan na e bo âbé hen2.12 Ha a tan na e bo âbé hen—Wieli a tan celi e bo tauti a bwohemwo hen wo Padué, ai wieli ace tan celi e céihi ne kon wo pace céiu apulie, ke e hegi a ju mulip. Ai wieli é ha ace tan celi e mu he ni picani hen wo pace céiu apulie..
Geé piténede lépwo apihuô ha amu
132.13 Tit 3.1Geé piténede lépwo apihuô, wonaa mu ko Padaame: wo pa daame he amu, 14ke wo lépwo gupéno mwo. Be nelé ngen beme lé pwocuhinaado te lépwona lé pwo ana ta, ke me lé piwâé lépwona lé pwo ana wâé. 152.15 1 Pétéru 3.16Be nime Padué ko ani: É mu ko ni bwopemikewé na wâé, ke me geé capuhi ni pwo nina time lé uce temehinaado, be te ju piticenaado ne ko nina lé pii2.15 Time lé uce temehinaado…nina lé pii—Grek: Na tice pwonimelé..
16Geé engen ehi ne he ni bwomu tewé, be caa tuwokewé mu he na geé mu lang. Ke ni bwomu tewé naa, ke me time e uce neduwohi ni penem dewé na ta. Geé engen ehi pwohewii lépwo eabwé te Padué. 172.17 Roma 12.10Geé éewo ko ni apulie ati. Ke geé pwo me eânimewé te ni bééwé, ke geé pipaunu Padué, ke geé éewo ko pa daame he amu.
Nye pwo me piwahin genye @ pwohewii Kériso
182.18 Éféso 6.5Wogewé ni *apenem tice ja kon, ke geé ténede lépwo caa tewé ko penem: time uce é ne ko lépwona wâé jélé cehi, ke wâé telé gewé, kehe é ne mwo ko lépwona lé pwo a okéé. 19Geé mu he ni picani, na me time geé uce mu hen. Ke heme wonaa be nimewé me geé ténede Padué, ke anaa a naado na junihe wâé2.19 Anaa a naado na junihe wâé—ai E bo adéikewé wo Padué.. 202.20 1 Pétéru 3.14,17Be é hemepie geé pwo ana ta, ke ade aceli wâé heme geé mu he ni picani kon?
Ke hemepie geé cumang ne he ni picani hemepie geé pwo ana wâé, ke a naado na te junihe wâé ne he pwahamii Padué. 212.21 Mataio 16.24; Ioane 13.15Be é mu ko anaa, na e todekewé wo Padué. Ke wo Kériso, ke e te mu mwo he ni picani me dewé. Ke e habwii a pwaaden beme geé uti ni apuwon. 222.22 Ésaïe 53.9Weeng panaa:
Time e uce pwo aceli ta.
Mwo te time e uce téele
pipwohuô te pace céiu.Ésaïe 53.9
232.23 Ésaïe 53.7; 1 Pétéru 3.9Lé pii nina ta ne kon,
ke time e uce hegi ko a ta.
É he e mu he ni picani,
ke time e uce heni pace céiu.
E ne a céihi ten ne ko Padué,
na e tauti ne ha a mwomwon.
242.24 Ésaïe 53.5−6; Roma 6.11E pé ne ha a één ni ta pwo tenye
ne ko a *kuricé.
É mu ko anaa, ke nye nebwén
me genye mulie ha a ta,
ke jan me genye mulie
ne ha a mulie na wâé te Padué.
É mu ko ni ahinaado kon
na e pwo me wâé gewé.
252.25 Ézékiel 34.5−6; Mataio 9.36; Ioane 10.14; Ébéru 13.20−21Ânebun, geé pwohewii
lépwo muto na lé pipatieden,
kehe é jenaa,
ke geé caa mwojuia mwobé
céii pa awéihi muto
na e wéihi ni mulihewé.
3A pwooti ne te lu aadomwin
Ni toomwo
13.1 Éféso 5.22Wogewé mwo ni toomwo, geé piténede ni pétaapwo aiu hewé. Te piwien hemepie pa aiu hem, ke me time e uce céihi ne ko a pwooti te Padué. Be e bo âbé ha a céihi mu ko ace bwomu tem, ke heme te tice pwooti tem ne ten. 2Be e o alihi ni huô tem pie go éewo kon. 33.3 1 Timoté 2.9A bwo wâé gewé, ke me time uce ju é pwomwo cehi, pwohewii ni apun na péi, ke ne mwani megele, ke cuwohe ni epwén na nihe wâé.
4A ju bwo wâé gewé, ke me e te mu tinawé: a péém me a pwonime na bwala. Weengaa a bwo wâé gewé na te junihe pwonaado ne kon ne te Padué, ke time o uce tieden. 5Be, wonaa a bwo wâé ni toomwo na lé céihi ne ko Padué he ni benaamwon na caa âdé, be lé piténede lépwo aiu helé. 63.6 Genèse 18.12Pwohewii ne ko Sara, be e piténede *Abérama, ke e toii kon pie: ‘pa daame hung’. É jenaa, ke caa wogewé ni naîn toomwo, hemepie geé pwo ana wâé, ke me time geé uce pwo me mwotikewé.
Ni aiu
73.7 Éféso 5.25Te piwien mwo ne ko wogewé lépwo aiu helé. Geé cilelé ehi ne ha a bwo pimu ibu tewé, be te junihe pwo niihewé kojalé. Ke geé éewo kolé, be lé bo hegi *a ju mulip pwohewiikewé. Hemepie geé pwo anaa, ke o te tice aceli e o pacuwokewé ne he ni pwopwoiitihi tewé.
Nye adéilé heme lé pwotahi ne konye
8Me tai céiu gewé ne he ni bwo niimihinaado, ke geé pwo me pieânimewé tewé pwohewii lépwo pwénaâjién, me ni ténaâjién. Geé pwo nina wâé, ke geé pwo me piwahin gewé ne pele ni béén. 9Geé nemwo taacu a naado na ta ko a naado na ta, ke geé nemwo taacu a piciheta ko a piciheta. Kehe geé hegi pie: «Me e adéiko wo Padué!» Be e todekewé wo Padué beme geé wonaa, ke a bwopwonen me e ne tewé a *adéihi. 103.10 Psaume 34.13−17Be caa te tii ne he ni tii iitihi pie:
He nimem me go mulie
ha ace mulie celi wâé?
He nimem me go mu ha a péém?
Go nemwo pii me ta lépwo béén.
Ke go nemwo gele.
11Cela ko a ta, ke go pwo ana wâé.
Hane a péém, ke âcehin.
12Be e wéi lépwona lé piténedeeng
wo Padaame,
ke e téne ni pwopwoiitihi telé.
E cuwode lépwona lé pwo nina ta.Psaume 34.13−17
Adéikenye he nye mu he ni picani
13Hemepie geé hane me geé pwo ana wâé mu he ni ju pwonimewé, ke time o uce hiwon celi lé pwotahi ne kowé. 143.14 Ésaïe 8.12−13; Mataio 5.10; 1 Pétéru 2.20, 4.14Kehe mepie geé mu he ni picani be geé pwo ana wâé, ke geé pwo me piwâénimewé!
Geé nemwo pwo me mwotikewé
ko ni apulie!
Nemwo pwo me pinekepé ne tewé!Ésaïe 8.12
15Ke wâé heme geé paciiti Kériso he ni ju pwonimewé. Geé tee pipwopweekewé me geé hegi ne te ni apulie, mepie lé tahimwokewé pie, é mu ko ade na geé céihi. 163.16 1 Pétéru 2.12Ke geé hegi ne telé he ni pwonimewé na bwala. Geé pipwocile ni bwomu tewé beme time e uce pipé ne kowé na a *pwonimewé. Ke hemepie lé pii me ta gewé ne ni apulie mu ko a mulihewé, be geé âcéi Kériso, ke bo tanim jélé. 17Éa, wâé heme geé mu he ni picani é mu ko a wâé na geé pwo âcehi a pihuô te Padué. Kehe time uce wâé heme geé mu he ni picani é mu ko a ta na geé pwo!
E mu he ni picani wo Kériso ke e piwéden
18Te océiu Kériso ko mele
ne ko ni ta pwo te ati ni apulie.
Te tice aceli e pwo celi ta,
kehe e mele me de nina ta jélé,
beme e péélé nge céii Padué.
Taunueng ne ha a één.
Ke a *Jenen Iitihi
ke e ne ten mwo a mulie3.18 Dernières lignes—Grek: Pamulipieng mwo ne ha a jenen..
19Ke e â patemehi a Pwooti Wâé ne te nina lé mele, na élé he karépu3.19 Nina lé mele, na élé he karépu—Wieli ni apulie ta he ni benaamwon ânebun he lé mele, kehe wo Kériso, ke e caa te pii beetihi a Pwooti Wâé telé. Ai wieli ni duéé: li âcélo li lé cubwoni Padué. Omehi Genèse 6.1−4. Ke wo Kériso, ke e â tautilé, beme pwocuhinaado telé dieli mwo.. 203.20 Genèse 6―7Ni amele naa, ke nina time lé uce piténede Padué bwolihi, he e mwo ko jili a ongen wo Noé. Ke e te junihe picani ne kolé wo Padué, ke e te junihe ucéilé. Kehe te ju mehin ni apulie, 8 jélé neibuhi, na lé taa ha a ong, ke celuimilé mu ha a tabe.
21Ati ninaa, ke a déme a *pipuu apulie na e celuimikewé jenaa, wogewé mwo. Be a bwopiine a pipuu apulie, ke time uce ana me pétaabwon a alili mu ko a éé apulie! Kehe a ine a bwo hegi a pwoto te Padué, ke ni ta pwo tenye, ke caa pineuhi3.21 Ni ta pwo tenye, ke caa pineuhi—Grek: Avec une conscience pure.. E celuimikewé a pipuu apulie, be e mwojuia cemwo mu ha amele wo Iésu Kériso. 22Ke e caa taa he *miiden, ke e pwo jui Padué. Ke ati ni *âcélo, ke ni jenenaado, ke ati nina pwojunuun, ke lé mu haahi ni pihuô ten.
4Mulie ne ha a mulie na wâé te Padué
14.1 Roma 6.2,7Wo Kériso, ke e mu he ni picani ne ha a één. Ke wogewé mwo, ke wâé heme geé mwomwohi pie: «Wo pa acéihi na e mu he ni picani, ke weeng kuti pana e caa necu a ta4.1 Wo pa acéihi na e mu he ni picani… Wieli a bwopiinen pie: Wo pa acéihi na e tupuu, beme e habwii pie e bo necu a ta..» Ke é ne tewé a bwo niimihinaado naa, beme a pihe pa tewé.
2É ha a benaamwon na e mwo ko ne tewé beme geé mulie ne pwo bwohemwo, ke geé nemwo âcehi nina te nimewé kon na ta, ke me geé piténede Padué. 34.3 Éféso 2.2−3Éa, é ha a céiu benaamwon, ke geé pwohewii lépwona time lé uce temehi Padué, ke geé te mulie hauli. Be geé te nihe wiinaado ke nihe ûdu tabe megele. Ke geé pitaaba. Ke geé pipaunu ni duéé hauli: Ke a naado na te junihe ta. 4É jenaa, ke lé téetihi wo lépwo bééwé ânebun, be caa time geé uce âcéilé ne he ni naado na lé pwo na tanim, ke lé pii nina ta ne kowé. 54.5 Apostolo 10.42Kehe lé bo pwocuhin nina lé pwo ne te Padué, be e caa pipwopweeng beme e tauti lépwona lé mulie, me lépwona lé caa mele.
6É mu ko anaa, na a Pwooti Wâé, ke patemehi die pele lépwona lé caa mele4.6 Lépwona lé caa mele—Wieli ni apulie na lé mele ânebuhe a bwo tuie te Iésu Kériso. Kehe wo Iésu, ke e pipatemehi telé ni tan na cié na e pwo tina a pule. Omehi lupwo niide a tii 19 me 20. Kehe icehi ana hiwon mwo ni bwo niimihi nen ne ko ni bwopiine ni pwooti naa.. Be woélé, ke tautilé ne he ni muko bwomu telé, pwohewii ni apulie ati. Kehe é jenaa, ke jan me lé mulie ne ha a bwomunen naa ne ko Padué, wonaa mu ko a *Jenen Iitihi.
Geé pipwoiipikewé
74.7 Roma 13.11−12E o caa piâbé a pwonehi ati ni naado. Ke geé mu ehi, ke geé te ûmiê, beme geé pwoiitihi. 84.8 1 Pétéru 1.22; Proverbes 10.12Weengaa kuti a junaado: Geé pwo me pieânimewé tewé he ni ju pwonimewé, be «a eânime, ke e pétaabwon ni ta na hiwon».
94.9 Ébéru 13.2Ke geé pihegikewé ne he ni pomwa tewé heme time geé uce pihuu. 104.10−11 Roma 12.6−8Geé papenemihi ne ko ni bééwé nina geé muko pétaapwo hegi. Wâé heme geé pwohewii lépwo apenem na wâé jélé na lé cile ehi nina pidodoni na e ne telé wo Padué.
11Wo pana e cihe, ke wâé heme pa apipépwooti te Padué. Wo pana e pipati, ke me e patihi ha a niihen na e ne ten wo Padué.
É nelang, ke ati ni apulie ke lé pipaunu Padué ati ne he ni naado, mu ko Iésu Kériso. Eten *a wâé ke a junuun dieli mwo! Amen!
Ni picani mu ko a bwo âcéi Kériso
12Wogewé ni ju bééng, geé nemwo téetihi hemepie geé bo mu he ni picani na pwohewii a miû na ubwo. 134.13 Apostolo 5.41; Cang 1.2; 1 Pétéru 1.6−7Hemepie geé mu he ni picani te Kériso, ke geé pwo me piwâénimewé, be geé temehi pie, bo junihe ubwo wéden a pipwodéén dewé, hemepie geé bo alihi a wâé ten. 144.14 1 Pétéru 2.20Hemepie lé piciheta ne kowé, be geé eabwé te Kériso, ke a naado na wâé ne kowé! Be caa e kowé a jene Padué, ke a jenen na junihe wâé wéden!
15Kehe icehi ana hemepie e mu he ni picani wo pace céiu, ke wâé heme time e uce âbé mu ko a taunuhi apulie, ai a bune, ai e pwo ana ta, ai e gaale he ni picihe te lépwo béén!
16Ke hemepie e mu he ni picani be pa acéihi, ke me time e uce pwo me pitanim nang. Ke wâé heme e pipwo-olé te Padué ko a bwo pé na a nii Kériso.
17Weengaa atabuhi ko a tautinaado, ke e tabuhi mu ha a pwomwoiu te Padué. Ke hemepie e tabuhi mu konye, ke ade aceli e o tuie ne ko lépwona te muhi telé me lé mwomwohi a Pwooti Wâé te Padué? 184.18 Proverbes 11.31Be caa te tii ne he ni tii iitihi pie:
Lépwona lé pwo ana wâé,
ke caa binyi me celuimilé.
Ke lé bo pwo de
wo lépwo apulie na ta jélé,
na lé jéilé ne ko Padué?Proverbes 11.31
19Ke wonaa, nina lé mu he ni picani heme lé pwo ana nime Padué kon, ke me lé ne ni mulihelé ne te pana e tabuhi ati ni naado. Ke me lé tee pwo ana wâé.
5A pwooti ne te lépwo apihuô
1É pamwoiukewé lépwo apihuô te ni acéihi, be woéo, ke pa apihuô pwohewiikewé. Ke é caa alihi ni picani na e mu hen wo Kériso, ke é o mu ha *a wâé ten heme e bo habwiieng [wo Padué]. Ke é ilekewé ha a ju pwonimung pie: 25.2 Ioane 21.15−17; Apostolo 20.28Geé cile ehi a pubu apulie na e ne tewé wo Padué. Geé nemwo pwo pie ana me geé pwo, kehe geé pwo mu he ni ju pwonime, pwohewii ana nime Padué kon. Ke geé nemwo pwo beme geé pé mwani kon. 35.3 2 Korénit 1.24; Filipi 3.17; Tit 2.7[Geé daame helé] kehe geé nemwo huôhi me binyi ne ko a pubu apulie na e ne tewé wo Padué. Kehe wâé heme wogewé lépwona me lé alikewé, ke me lé pwohewiikewé. 4Ke mepie e âbé wo pa Caa te lépwo awéihi na a pubu apulie, ke geé bo hegi a cemewé5.4 Cemewé—Grek: Kuron (couronne). na junihe wâé na e mu dieli mwo.
Bénebwéne pwooti
55.5 Éféso 5.21; Cang 4.6Wogewé ni ewa, ke geé piténede lépwo ukéiu! Ke tai wogewé, ke geé pipwoiipikewé ne he pwahamii ni béén. Be caa te tii ne he ni tii iitihi pie:
Wo Padué, ke e cuwode
lépwona lé pipaunulé.
Kehe wâé nang ne ko
lépwona lé pipwoiipilé.Proverbes 3.34
65.6 Mataio 23.12; Luka 14.11; Cang 4.10Geé pipwoiipikewé ne haahi a junuu a i Padué, ke e bo nekewé da, heme e bo âbé a benaamwon na e caa pipégali. 75.7 Mataio 6.25−30Geé tai ne ten ni gia kowé, be weeng pana e cilekewé.
85.8 1 Tésalonik 5.6Geé tee ûmiê, be pana e pwopa ne kowé, ke wo *Caatana, be e pwohewii pa liô na e okéé5.8 Liô na e okéé—Grek: Liô na e huu., ke e biteeng aujenikewé, be e hane paceli me e wiieng. 95.9 Éféso 6.11−13; Cang 4.7Geé cuwodeeng ne ha a céihi na mang, heme geé ko temehi pie, te piwie ni picani na pwo ne ko lépwo bééwé na élé pwo a bwohemwo ati.
10Ni picani tewé, ke mwo te ju é ha a cuwo benaamwon, kehe e todekewé wo Padué na junihe eânimen denye, beme geé mu ha a wâé ten na tice anebwén kon, ibu me Kériso. Ke e bo pwo me wâé gewé, ke bo pwo me geé cumang, ke pwo niihewé, ke o pwocoon me lé pwo me geé tupwo.
11Eten a junuun dieli mwo! Amen!
Bépinelé
125.12 Apostolo 12.2,25, 13.13, 15.22,37−40É pwotii lé céiikewé beme é pamwoiukewé, ke me é pii tewé pie: A *pipwoééhe tice ja kon de Padué, ke ana geé caa ko mu hen. Ke geé tee cumang hen. É ne te Silas a tii ce5.12 É ne te Silas a tii ce—ai E tii ne he niing wo Silas., pa âjién na e piténedehi [beme e pé lé céiikewé].
135.13 2 Timoté 4.11Ni acéihi na élé éni ‘*Babulona’5.13 ‘Babulona’—A bwopiinen pie a pwomwo ubwo Rome. Nime Pétéru me e neduwohi a niin ko ni béén na lé tééti ni acéihi. Babulona, ke a ocine ko lépwona lé pwopa ne ko a bele te Padué. Omehi tii Pii Beetihi 14.8 me 18.10,21., ke lé pwobwocu tewé. Be wo Padué, ke e pipégalilé pwohewii ne kowé.
Ke e pwobwocu tewé mwo wo Maréko, pa naîng ne ha a céihi.
14Geé pipwobwocu tewé mu he ni ju pwonimewé. Ke me e mu pelewé ati na a péém, wogewé na céiu gewé me Kériso!
Adéikewé!