Filipenses

Ri wuj rutzꞌibꞌan kan ri apóstol Pablo chake ri hermanos ekꞌo pa tinamit Filipos

Ri Pablo nduyaꞌ ruxunaqil kiwech ri hermanos aj Filipos

¹Riyin Pablo y ri hermano Timoteo1:1 Hch. 16:1 rusamajelaꞌ ri Cristo Jesús, ndiqatzꞌibꞌaj e re wuj reꞌ chiwa rix ri loqꞌolej rutinamit ri Dios ri rixkꞌo pa tinamit Filipos,1:1 Hch. 16:12 ri xe jun ibꞌanun rikꞌin ri Cristo Jesús y chiwa chuqaꞌ rix ri ukꞌuey bꞌey chikiwech ri hermanos, y chiwa rix ri rix diáconos. ²Ri Qatataꞌ Dios y ri Ajaw Jesucristo, kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Ri Pablo ndikikot chupan ri kꞌayew nduqꞌasaj

³Atoq ngixinkꞌuxlaꞌaj, nimatioxij chare ri nu-Dios iwoma. ⁴Y jumul atoq nibꞌen orar iwoma rix iwonojel, ngikikot nibꞌen orar. ⁵Porque xe jampeꞌ xitaqij ri Jesucristo, ja qꞌij riꞌ xitzꞌuk pe chi yin itoꞌon chutzijoxik ri utzulej teq tzij chin kolotajik,1:5 Fil. 4:15 y hasta re qꞌij reꞌ keriꞌ ngixtajin rikꞌin. ⁶Y kin kuqul nukꞌuꞌx chi ri utzulej samaj rutzꞌukun pe ri Dios pa iwánima, qꞌij-qꞌij ndajin rikꞌin, y ndutzꞌaqatisaj hasta chupan ri qꞌij atoq nduqaqa ri Cristo Jesús. ⁷Y kin utz chi riyin keriꞌ ninaꞌ iwoma, porque rixkꞌo pa wánima y jun iwánima ibꞌanun wikꞌin chupan ri nimalej favor ruyoꞌon ri Dios chuwa. Jun iwánima ibꞌanun wikꞌin re yinkꞌo pa cheꞌ, y jajun atoq niqꞌalajrisaj chi ri utzulej teq tzij chin kolotajik kin qetzij y utz chi nditzijox. ⁸Ri Dios kin retaman chi ma ngireqꞌon ta atoq nibꞌij chi tzꞌan ngixinwojoꞌ rix iwonojel, achel ngixrajoꞌ ri Cristo Jesús. ⁹Riyin nibꞌen orar chi ri Dios ndubꞌen chiwa chi más ngixojowan, y chi ngixojowan rikꞌin qetzij nojibꞌel1:9 Col. 1:9 y rikꞌin jun iwánima ri ndunaꞌ ri achike más utz chi ndibꞌen. ¹⁰Chin keriꞌ ndichaꞌ ri más utz chi ndibꞌen, y keriꞌ, chupan ri qꞌij atoq nduqaqa ri Cristo, ngixuꞌilitej chi loqꞌolej ri ikꞌaslen, y ma jun itzel achike ndilitej chiwij,1:10 Ro. 12:1; Ef. 5:3¹¹xa kin ngixuꞌilitej chi pa ruchojmil ibꞌanaloꞌon nojel, roma ri rubꞌanun ri Jesucristo pa ikꞌaslen.1:11 Jn. 15:5 Y keriꞌ ndinimrisex y ndiyoꞌox ruqꞌij ri Dios.

Ri utzulej teq tzij chin kolotajik bꞌaneq rutzijoxik

¹²Hermanos, niwojoꞌ chi rix ndiwetamaj chi nojel ri nuqꞌasan pa nukꞌaslen, hasta más rubꞌanun chi bꞌaneq rutzijoxik ri utzulej teq tzij chin kolotajik. ¹³Y romariꞌ konojel ri ngechajin ri palacio y konojel ri wineq, kakꞌaxan y ketaman chi yin tzꞌapel pa cheꞌ1:13 2Ti. 2:9 roma xe jun nubꞌanun rikꞌin ri Cristo. ¹⁴Y ri hermanos roma ketaman chi ri Dios yin rutoꞌon pa cheꞌ, jubꞌama konojel chikiwech rejeꞌ xkikuqubꞌaꞌ más kikꞌuꞌx rikꞌin ri Ajaw y xkꞌojeꞌ pe más ruchuqꞌaꞌ kánima y wokami ma ndikixibꞌij ta kiꞌ1:14 2Co. 3:12 ndikiyaꞌ rutzijol ri rutzij ri Dios.

¹⁵Kin qetzij chi ekꞌo jujun ri ndikiyaꞌ rutzijol ri Cristo xa roma ndiququt kánima chuwij y ndikajoꞌ ndikiqasaj ruqꞌij ri samaj ngitajin rikꞌin. Pero ekꞌo chik chꞌaqa, kin rikꞌin chꞌajchꞌaj kánima ndikiyaꞌ rutzijol ri Cristo. ¹⁶Re chꞌaqa reꞌ ndikiyaꞌ rutzijol ri Cristo roma ngeꞌojowan, porque ketaman chi ri Dios yin ruyoꞌon1:16 1Co. 9:17 chin nikꞌut chi qetzij ri ndubꞌij ri utzulej teq tzij chin kolotajik. ¹⁷Pero ri ndiququt kánima chuwij ndikiyaꞌ rutzijol ri Cristo, xe chin ndikajoꞌ ngeqꞌalajin chi más jabꞌel rutzijoxik ndikibꞌen chare ri rutzij ri Dios ke chinuwech riyin, y xa ma nojel ta kánima ndikibꞌen, y chuqaꞌ ndikajoꞌ chi ndiqꞌaxa ta qa ri wánima chikij waweꞌ pa cheꞌ. ¹⁸Pero, ¿utz kami chi ndipuꞌun woyowal romariꞌ? Ma utz ta, porque si rikꞌin nojel kánima ndikiyaꞌ rutzijol ri Cristo o ma rikꞌin ta nojel kánima, ri más ndikꞌatzin, ja ri ndiyoꞌox rutzijol ri Cristo, y jariꞌ ri ndibꞌanun chuwa chi santienta ngikikot.

Y kin jumul wi xkikikot ¹⁹porque yin kuqul nukꞌuꞌx chi roma ri oración ndibꞌen rix woma,1:19 2Co. 1:10, 11 y roma chuqaꞌ ngirutoꞌ ri Espíritu Santo ri ruyoꞌon ri Jesucristo pa wánima, nginel chuwech nojel ri nukꞌulwachin pa nukꞌaslen wokami, ²⁰kin achel nurayin pe, y nukuqubꞌan nukꞌuꞌx chi ma jun achoq roma xkikꞌixbꞌisex,1:20 Sal. 25:2; Ro. 9:33 xa kin nibꞌen achel nubꞌanun pe xe jampeꞌ pa nabꞌey, chi ma jun xibꞌriꞌil pa wánima ninimrisaj ruqꞌij ri Cristo rikꞌin ri nu-cuerpo, si kꞌa ngikꞌaseꞌ na o ngikamisex. ²¹Porque chuwa riyin, ri rukꞌuꞌx nukꞌaslen chochꞌulew ja ri Cristo, y si xkiken, kin kꞌo utz ndukꞌen pe chuwa. ²²Pero si rikꞌin ri kꞌa ngikꞌaseꞌ na más, kꞌo utz ndukꞌen pe chare rusamaj ri Dios, entonces ma wetaman ta achike ri más utz, si ja ri kꞌa ngikꞌaseꞌ o ja ri ngiken. ²³Kin ma niwil ta achike ri más utz, bꞌaláta ngiken e1:23 2Co. 5:8 chin ngibꞌekꞌojeꞌ apeꞌ kꞌo ri Cristo, porque riꞌ más yalan utz chuwa riyin. ²⁴Pero chiꞌitoꞌik rix, más ndikꞌatzin chi kꞌa ngikꞌojeꞌ chireꞌ chochꞌulew. ²⁵Y roma kuqul nukꞌuꞌx chi kin ndikꞌatzin chi kꞌa ngikꞌaseꞌ, ninaꞌ chi ma ngiken yan ta, xa kin kꞌa ngikꞌojeꞌ chin ngixintoꞌ chin ngixkꞌiy pa ikꞌaslen chiraqen ri Ajaw, y más ngixkikot chi kuqul ikꞌuꞌx rikꞌin rijaꞌ. ²⁶Chin keriꞌ rix más ndiyaꞌ ruqꞌij ri Cristo Jesús ri achoq ikꞌin xe jun ibꞌanun, atoq xtitzꞌet chi rijaꞌ ndubꞌen chi ngibꞌeqaqa chik jumbꞌey chiꞌikajal.

Tiqakꞌuaj ri qakꞌaslen achel ndubꞌij ri utzulej teq tzij chin kolotajik

²⁷Ri más ndikꞌatzin, ja ri rukꞌuaxik ri ikꞌaslen1:27 Ef. 4:1 kin ta achel ndubꞌij ri utzulej teq tzij ri ndichꞌaꞌa pa ruwiꞌ ri kolotajik ri nduyaꞌ ri Cristo. Keriꞌ nibꞌij chiwa, chin keriꞌ si xkibꞌeqaqa o ma xkibꞌeqaqa chi ta chiꞌitzꞌetik, kin ta nduqaqa rutzijol wikꞌin chi kaw rixkꞌo chiraqen ri Ajaw, jumul jun iwánima ibꞌanun, junan ngixsamej chin nditaqix ri utzulej teq tzij chin kolotajik, ²⁸y ma jun ta roma ndixibꞌij iwiꞌ1:28 Is. 41:10; Mt. 10:28 chikiwech ri ma ndikajoꞌ ta chi rix nditzijoj ri utzulej teq tzij chin kolotajik, porque ri ma ndixibꞌij ta iwiꞌ, riꞌ jun etal chikiwech rejeꞌ chi xa pa qꞌaqꞌ ngebꞌekꞌis wi, pero chuqaꞌ jun etal chi rix iwilon chik ri kolotajik ri nduyaꞌ ri Dios. ²⁹Porque chiwa rix, yoꞌon jun nimalej favor, y riꞌ ma xe ta chi itaqin ri Cristo, xa kin yoꞌon chuqaꞌ qꞌij chiwa chi ndiqꞌasaj kꞌayew roma itaqin rijaꞌ.1:29 Mt. 5:12; Hch. 5:41³⁰Keriꞌ nibꞌij chiwa, porque rix y riyin junan ndiqaqꞌasaj kꞌayew achel xitzꞌet chi xinqꞌasaj kꞌayew atoq xikꞌojeꞌ chiꞌikajal, y wokami ndiwakꞌaxaj chi ri apeꞌ yinkꞌo, kin niqꞌasaj chuqaꞌ kꞌayew.

Tiqaqasaj qiꞌ y xe jun qánima tiqabꞌanaꞌ

¹Hermanos, ri Cristo ngixrubꞌochiꞌij rix ri xe jun ibꞌanun rikꞌin, nduyaꞌ chuqaꞌ ruchuqꞌaꞌ iwánima roma ngixrajoꞌ, ri Espíritu Santo ngixrutoꞌ chi xe jun iwánima ndibꞌen chiwech, y ri Cristo kin ndujoyowaj iwech. ²Romariꞌ, tibꞌanaꞌ chi riyin tzꞌaqet ngikikot rikꞌin ndibꞌen kereꞌ: Xe jun ruwech itzij tibꞌanaꞌ, tiwojoꞌ iwiꞌ chiwech, xe jun iwánima tibꞌanaꞌ,2:2 1P. 3:8 y xe jun ruwech tinojij rix iwonojel. ³Atoq ndibꞌen jun achike, ma tibꞌen xe chin ndiwojoꞌ ngixqꞌalajin chi más kꞌo iqꞌij ke chuwech jun chik, nixta tibꞌen xe roma nim ndinaꞌ chare, xa kin tiqasaj iwiꞌ.2:3 1P. 5:5, 6 Chiꞌijununal tinaꞌ pa iwánima chi más kꞌo keqalen ri chꞌaqa chik.2:3 Stg. 3:13, 14⁴Ma jun chiwech rix tukanoj ri xe chare rijaꞌ kꞌo utz ndukꞌen pe, xa kin tukanoj chuqaꞌ ri kꞌo utz ndukꞌen pe chake ri chꞌaqa chik.2:4 1Co. 10:24

Ri Cristo xuqasaj riꞌ y xnimrisex ruqꞌij

⁵Tibꞌanaꞌ chare ri iwánima, achel xubꞌen chare ránima ri Cristo Jesús,2:5 Jn. 13:15

⁶Porque rijaꞌ kin Dios wi,2:6 Is. 9:6; Jn. 1:1-4; 5:18 pero ma rikꞌin ta riꞌ,

Xa kin xubꞌen achel man ta Dios y xuyaꞌ kan jubꞌaꞌ chi junan ruqꞌij rikꞌin ri Dios,

⁷Xa kin xuyaꞌ kan ri nimalej ruqꞌij chikaj,

Xuꞌalex chochꞌulew achel xa achike na chi wineq,2:7 Jn. 1:14

Y xok achel jun loqꞌon samajel.2:7 Mt. 20:28; Mr. 10:45

⁸Y chupan teq ri qꞌij atoq xkꞌojeꞌ chochꞌulew, xuqasaj riꞌ,

Xunimaj nojel ri xubꞌij ri Dios chare, hasta janipeꞌ na xkamisex,

Y xuqꞌasaj jun kꞌixbꞌilej kamik cho cruz.2:8 He. 12:2

⁹Romariꞌ, ri Dios santienta xunimrisaj2:9 Mt. 28:18 rubꞌiꞌ ri Jesús,

Y xubꞌen chare chi xkꞌojeꞌ más nimalej ruqꞌij ke chikiwech konojel ri kꞌo kiqꞌij,2:9 Ef. 1:21

¹⁰Chin keriꞌ konojel ri ekꞌo chikaj, ri ekꞌo chochꞌulew y ri ekꞌo chuxeꞌ ulew,2:10 Ap. 5:13

Kexukeꞌ chin ndikiyaꞌ ruqꞌij.

¹¹Y konojel tikibꞌij chi ri Jesucristo kin Ajaw wi,2:11 Ro. 14:9

Chin ndiyoꞌox ruqꞌij ri Tataꞌaj Dios.

Roj ri qataqin ri Cristo, tiyikꞌan qakꞌaslen chochꞌulew

¹²Roma kꞌa riꞌ, hermanos ri tzꞌan ngixinwojoꞌ, achel jumul xixniman, ma xe ta atoq xikꞌojeꞌ chiꞌikajal, xa kin más wokami ri ma yinkꞌo ta apu iwikꞌin, tiyaꞌ pa iwánima chi kin nimalej wi ruqꞌij ri Dios, y romariꞌ ndikꞌatzin chi ndikꞌuaj ri kꞌaslen ri rukꞌulun chi ndikꞌuaj roma rix kolotajneq chik. ¹³Porque ja ri Dios ndiyoꞌon pa iwánima chi ndirayij ndibꞌen ri ndiqaꞌ chuwech,2:13 He. 13:21 y nduyaꞌ chuqaꞌ iwuchuqꞌaꞌ chin ndibꞌen.

¹⁴Y nojel ri ndibꞌen, ma tibꞌen rikꞌin wololenik, nixta tichꞌolilaꞌ iwiꞌ pa ruwiꞌ. ¹⁵Chin keriꞌ ma jun itzel ndilitej pa ikꞌaslen,2:15 Fil. 1:10 y ndiqꞌalajin chi qetzij rix ralkꞌuaꞌl ri Dios y chꞌajchꞌaj ikꞌaslen chikikajal ri wineq ri ma chaj ta chi kꞌaslen kikꞌuan y emachꞌikilik chikibꞌanik. Y keriꞌ ngixyikꞌan2:15 Mt. 5:14 chikikajal achel ngeyikꞌan ri chꞌumilaꞌ chuwech ri kaj. ¹⁶Ma jumbꞌey tiyaꞌ kan rutaqixik ri utzulej teq tzij chin ri kꞌaslen ma ndikꞌis ta, chin keriꞌ chupan ri qꞌij atoq nduqaqa chik ri Cristo, riyin yalan ngikikot iwoma, porque ndiqꞌalajin chi kꞌo xkꞌatzin chi xintij nuqꞌij xinbꞌen rusamaj ri Dios chiꞌikajal. ¹⁷Porque rix kuqul ikꞌuꞌx rikꞌin ri Dios y romariꞌ ndibꞌen ri rusamaj. Ri keriꞌ ngixtajin rikꞌin, kin achel rix jun ofrenda ri ndiyaꞌ chare rijaꞌ. Y si riyin ngikamisex, ri nukamik ndok rutzꞌaqat ri ofrenda riꞌ, kin achel ri vino rutzꞌaqat ri ofrenda ri ndisujeꞌ cho altar.2:17 Atoq ri israelitas xkikꞌen pe ofrendas cho altar, ri sacerdotes ma xe ta ri ofrendas riꞌ xkisuj chuwech ri Dios, xa kin xkiqꞌij chuqaꞌ vino pariꞌ (Nm. 15:5-10). Y maske xkikamisex, kin xkikikot junan iwikꞌin rix iwonojel, porque rix y riyin ndiqayaꞌ qiꞌ chi ofrenda chare ri Dios. ¹⁸Kixkikot chuqaꞌ rix, y kixkikot junan wikꞌin.

Ri Pablo rubꞌanun ruwech chi nduteq ri Timoteo pa tinamit Filipos

¹⁹Nubꞌanun ruwech chi niteq yan e ri hermano Timoteo chiꞌitzꞌetik, si keriꞌ ndirajoꞌ ri Ajaw Jesús, chin keriꞌ achel ndikuqer qa ikꞌuꞌx rix ri ndiwetamaj achike nubꞌanun riyin, keriꞌ chuqaꞌ riyin ndikuqer qa nukꞌuꞌx ri niwetamaj achike ibꞌanun rix. ²⁰Porque maneq chik jun chikiwech ri ekꞌo wikꞌin ri kin ta junan qánima rikꞌin pa ruwiꞌ ri ndikꞌatzin chiwa rix, porque rijaꞌ qetzij nderutijaꞌ ruqꞌij chin ndubꞌen ri kꞌo utz ndukꞌen pe chiwa. ²¹Porque konojel xe ri kꞌo utz ndukꞌen pe chake chikijununal ri bꞌaneq kánima chirij,2:21 Is. 56:11; Ro. 15:2 y ma ja ta ri achike ndikꞌatzin pa rusamaj ri Jesucristo. ²²Y rix iwetaman ri utzulej runoꞌoj ri Timoteo, porque kin samajneq pe wikꞌin chutzijoxik ri utzulej teq tzij chin kolotajik, rubꞌanun pe achel jun akꞌual ri ndiretamaj apu rusamaj ri rutataꞌ. ²³Roma kꞌa riꞌ, nubꞌanun ruwech chi niteq e apeꞌ rixkꞌo. Atoq xtinwetamaj achike chi tzij xtiqꞌat pa nuwiꞌ, kin ja paqiꞌ niteq e. ²⁴Y kuqul nukꞌuꞌx rikꞌin ri Ajaw chi ngibꞌa yan chuqaꞌ riyin chiꞌitzꞌetik.

Ri Pablo ndirajoꞌ nduteq chuqaꞌ ri hermano Epafrodito pa tinamit Filipos

²⁵Pero ndunaꞌ wánima chi wokami ndikꞌatzin niteq chi apu jumbꞌey iwikꞌin ri hermano Epafrodito,2:25 Fil. 4:18 ri itaqon pe chin ngirutoꞌ rikꞌin ri achike ndikꞌatzin chuwa. Rijaꞌ jun hermano ri yin rachibꞌilan chutzijoxik ri utzulej teq tzij chin kolotajik y junan qatijon qaqꞌij ndiqakꞌut chi kin qetzij ri ndubꞌij ri tzij riꞌ, maske ekꞌo wineq ma ndiqaꞌ ta chikiwech. ²⁶Porque rijaꞌ bꞌaláta ngixbꞌerutzꞌetaꞌ rix iwonojel ndirajoꞌ, y tzꞌan ruchajin pena iwoma, porque xretamaj chi rix chuqaꞌ ichajin pena roma xiwakꞌaxaj chi xyawej. ²⁷Kin qetzij chi rijaꞌ xyawej, y hasta jubꞌama xken, pero ri Dios xujoyowaj ruwech y xujoyowaj chuqaꞌ nuwech riyin. Porque xa ta xken ri Epafrodito, más ta xumal qa riꞌ bꞌis pa wánima pa ruwiꞌ ri bꞌis nuchajin. ²⁸Romariꞌ, niteq e paqiꞌ chiꞌitzꞌetik, chin ngixkikot atoq xtitzꞌet chik ruwech jumbꞌey, y keriꞌ ngikikot chuqaꞌ riyin y ma ngibꞌison chi ta más iwoma. ²⁹Y atoq ndeqaqa apeꞌ rixkꞌo, kixkikot tikꞌamaꞌ apu ruwech2:29 Ro. 16:2 achel rukꞌulun chi ndibꞌen roma itaqin ri Ajaw, y ri hermanos eꞌachel rijaꞌ, kin ta kꞌo kiqꞌij pa iwech. ³⁰Porque ri Epafrodito, chubꞌanik rusamaj ri Cristo, hasta jubꞌama xken, porque maske xuqꞌasaj jun yabꞌil ri jubꞌama xukꞌuaj pa kamik, xurubꞌanaꞌ ri achike ndikꞌatzin chuwa, ri maneq cheꞌel xibꞌen rix porque ma rixkꞌo ta pe chireꞌ.

Nim reqalen ri kuqul akꞌuꞌx rikꞌin ri Cristo

¹Nu-hermanos, jun chik achike ri niwojoꞌ nibꞌij chiwa, jareꞌ: Kixkikot3:1 Fil. 4:4; 1Ts. 5:16 roma xe jun ibꞌanun rikꞌin ri Ajaw. Riyin ma ngikos ta nitzꞌibꞌaj chi e jumbꞌey chiwa ri xinbꞌij yan, y wetaman chi reꞌ kin ngixrutoꞌ chin ma ngixsach. ²Tibꞌanaꞌ cuenta iwiꞌ chikiwech ri ngeyoꞌon itzel teq tijonik. Ri wineq riꞌ ndikiqꞌabꞌaj kiꞌ chi erusamajelaꞌ ri Dios y ndikikꞌut chi ndikꞌatzin ndabꞌen circuncidar awiꞌ chin ngakolotej. Xa eꞌachel yawaꞌ teq tzꞌiꞌ ri kin ja paqiꞌ ngatikiqetz ndikajoꞌ. Tibꞌanaꞌ cuenta iwiꞌ chikiwech. ³Porque ri circuncisión ri kꞌo reqalen chuwech ri Dios, ja ri bꞌanun pa qánima roj3:3 Dt. 10:16; Jer. 4:4 ri rikꞌin rutoꞌik ri Espíritu Santo ndiqayaꞌ ruqꞌij ri Dios, y yalan ngojkikot chi xe jun qabꞌanun rikꞌin ri Cristo Jesús, y ma kuqul ta qakꞌuꞌx chi ngojkolotej roma ri circuncisión bꞌanun chare ri qa-cuerpo. ⁴Pero xa ta riyin niwojoꞌ, kꞌo ta cheꞌel nikuqeꞌ nukꞌuꞌx chi ngikolotej roma rubꞌeyal ri nukꞌaslen. Porque si kꞌo jun ndunojij chi rukꞌulun ndikolotej roma rubꞌeyal ri rukꞌaslen, riyin más kꞌo ta cheꞌel ninojij keriꞌ. ⁵Porque riyin waqxaqiꞌ qꞌij kinalex atoq xbꞌan ri circuncisión chuwa, achel rubꞌiꞌin ri Dios chi tibꞌan chaqe roj israelitas. Yin israelita, jun riy-rumam kan ri ojer tataꞌatz rubꞌiniꞌan Benjamín. Riyin walaxibꞌen pe chi yin jun wineq hebreo, xinok jun fariseo,3:5 Hch. 23:6 y ja ri fariseos ri más ndikitij kiqꞌij ndikibꞌen ri ndubꞌij ri ley xyoꞌox chare ri Moisés. ⁶Y chuqaꞌ rikꞌin nojel wánima xinbꞌen ri pa nutzij yin ndiqaꞌ chuwech ri Dios, y romariꞌ hasta xentzeqlebꞌej ri kitaqin ri Cristo chin xinbꞌen itzel chake.3:6 Hch. 8:3; Gá. 1:13 Y nixta jun nditiker ndubꞌij chi ma xinbꞌen ta cumplir ri ndubꞌij ri ley ri xyoꞌox chare ri Moisés. ⁷Pero nojel re kin tzꞌan reqalen chuwa3:7 Lc. 14:33 rubꞌanun kan, wokami nubꞌanun chare chi ma jun reqalen, roma niwojoꞌ nibꞌen ri ndirajoꞌ ri Cristo chuwa. ⁸Y ma xe ta riꞌ, porque hasta nojel ri nubꞌanaloꞌon pa nukꞌaslen ma jun reqalen chuwa atoq nijunumaj rikꞌin retamaxik ri nimalej runoꞌoj3:8 Jn. 17:3 ri Cristo Jesús ri Wajaw. Y roma niwojoꞌ ri kolotajik ri ndusuj rijaꞌ, ma kuqul chi ta nukꞌuꞌx chi ngikolotej roma rubꞌeyal ri nukꞌaslen rubꞌanun kan, xa nubꞌanun achel seqꞌ chare ri ojer kꞌaslen riꞌ, chin keriꞌ ja ri Cristo Rajaw ri nukꞌaslen. ⁹Riyin niwojoꞌ nginilitej chi xe jun nubꞌanun rikꞌin rijaꞌ. Niwojoꞌ chuqaꞌ chi nixta jun mak weqalen chuwech ri Dios,3:9 Ro. 1:17; 10:3; Gá. 2:16 pero ma roma ta nibꞌen ri ndubꞌij ri ley xyoꞌox chare ri Moisés, xa kin roma nutaqin ri Cristo. Porque roma ndiqataqij ri Cristo nixta jun qamak ndiqeqalej chuwech ri Dios. ¹⁰Niwojoꞌ niwetamaj utz-utz runoꞌoj ri Cristo, y niwojoꞌ chuqaꞌ niwetamaj pa nukꞌaslen ri ndubꞌen ri ruchuqꞌaꞌ ri Dios ri xkꞌastajbꞌan pe ri Cristo chikikajal ri animaꞌiꞌ. Niwojoꞌ niqꞌasaj kꞌayew3:10 1P. 4:13 achel ri Cristo xuqꞌasaj kꞌayew, y niwojoꞌ nijech nukꞌaslen pa kamik chubꞌanik ri ndirajoꞌ ri Dios, achel xubꞌen ri Cristo, kin xujech rukꞌaslen pa kamik. ¹¹Jariꞌ ri niwojoꞌ nibꞌen, porque niwojoꞌ chuqaꞌ ngikꞌastajbꞌex pe chikikajal ri animaꞌiꞌ, si yin kamineq chik atoq ngekꞌastajbꞌex pe ri animaꞌiꞌ.

Ri Pablo tzꞌan ndurayij nderilaꞌ ri ndusuj ri Cristo

¹²Riyin ma nibꞌij ta chi nubꞌanun chik nojel reꞌ y ma nibꞌij ta chuqaꞌ chi yin okuneq nojel ri ndirajoꞌ ri Dios chi nginok. Pero nitij nuqꞌij3:12 1Ti. 6:12 chi tzꞌaqet ndubꞌen pa nukꞌaslen nojel ri xrajoꞌ ri Cristo Jesús chuwa atoq xirukal. ¹³Hermanos, yin ma nibꞌij ta chi wilon chik nojel ri ndirajoꞌ rijaꞌ chuwa, pero ri nibꞌen, ja ri nimestaj jumul ri xeqꞌax yan kan, y nitij nuqꞌij chin newilaꞌ ri kꞌa ndikꞌatzin na chare ri ndirajoꞌ rijaꞌ chuwa. ¹⁴Y roma ri xubꞌen ri Cristo Jesús woma, ri Dios yin royon chin newilaꞌ ri ndusuj rijaꞌ chikaj. Kin nixikꞌ wiꞌ chin newilaꞌ, achel ndubꞌen jun ri ndok pa jun maratón, kin nduxikꞌ riꞌ chin nderukꞌisaꞌ ri janipeꞌ bꞌey qꞌaton chin nduchꞌek ri premio3:14 2Ti. 4:7, 8 sujun.

¹⁵Roma kꞌa riꞌ, qonojel ri roj kꞌiyineq pa qakꞌaslen chuwech ri Dios, keriꞌ tiqanojij, pero si rix ma junan ta ndinojij wikꞌin, ri Dios kin xtuqꞌalajrisaj chuqaꞌ rubꞌeyal chiwech. ¹⁶Pero ma qojtzolij chiqij, xa kin jumul tiqꞌalajin qikꞌin ri jarupeꞌ roj kꞌiyineq pa qakꞌaslen chuwech ri Dios.

Chikaj kꞌo wi ri qetzij qatinamit

¹⁷Hermanos, junan iwánima tiwoqaj rij ri nukꞌaslen, y tiyaꞌ utz-utz cuenta chare rubꞌeyal kikꞌaslen3:17 Sal. 37:37 ri kikꞌuan jun kꞌaslen achel qakꞌutun kan roj chiwech. ¹⁸Porque ekꞌiy maneq reqalen ndikibꞌen chare rukamik ri Cristo cho cruz rikꞌin ri kꞌaslen kikꞌuan. Y reꞌ kꞌiy mul nubꞌiꞌin chiwa, y wokami rikꞌin oqꞌej nikamuluj rubꞌixik chiwa. ¹⁹Ri wineq riꞌ pa qꞌaqꞌ ngebꞌekꞌis wi, y xa ja ri itzel teq rayinik chin ri ki-cuerpo3:19 Ro. 8:5 ri okuneq ki-dios. Rejeꞌ nim ngekinaꞌ chare ri kꞌixbꞌel palej ngetajin rikꞌin, y xe ri achike chin re rochꞌulew ndikinojij. ²⁰Pero rix tiwoqaj rij ri qakꞌaslen roj, porque chikaj3:20 Col. 3:1, 2 kꞌo wi ri qetzij qatinamit, y nojel qánima qoyobꞌen3:20 2Ti. 4:8; Tit. 2:13 chi chikaj ndipuꞌun wi ri Kolonel, ri Ajaw Jesucristo. ²¹Rijaꞌ kin xtujel ruwech ri qa-cuerpo ri xa kin chin wi ndiken. Ndubꞌen kꞌakꞌakꞌ chare chin ndikꞌojeꞌ ruqꞌij achel ruqꞌij ri ru-cuerpo rijaꞌ.3:21 1Jn. 3:2 Keriꞌ ndubꞌen chaqe rikꞌin ri nimalej ruchuqꞌaꞌ ri ndubꞌen chi pa ruqꞌaꞌ rijaꞌ ndikꞌojeꞌ nojel ri kꞌo.3:21 Ef. 1:18-23

¹Romariꞌ, nu-hermanos ri tzꞌan ngixinwojoꞌ y tzꞌan nurayin ngixbꞌentzꞌetaꞌ, rix ri ngixbꞌanun chuqaꞌ chi santienta ngikikot, y rix rajel-rukꞌexel ri nusamaj,4:1 1Ts. 2:19 tiwakꞌaxaj ri nibꞌij chiwa rix ri kin ngixinwojoꞌ: Kaw kixkꞌojeꞌ chiraqen ri Ajaw, achel ri nutzꞌibꞌan pe chiwa, y chin kaw ngixkꞌojeꞌ, kereꞌ kꞌa tibꞌanaꞌ:

Ri Pablo ngerupixabꞌaj jujun hermanos aj Filipos

²Rat hermana Evodia y rat hermana Síntique, xe jun ruwech itzij tibꞌanaꞌ,4:2 Fil. 2:2 porque xe jun ibꞌanun rikꞌin ri Ajaw. ³Y rat ri rat wachibꞌil chubꞌanik rusamaj ri Dios, ri kin kuqul nukꞌuꞌx awikꞌin chi ndabꞌen ri nibꞌij, nikꞌutuj chawa chi kaꞌatoꞌ ri hermanas riꞌ, ri kin xkitij kiqꞌij junan wikꞌin chutzijoxik ri utzulej teq tzij chin kolotajik, junan rikꞌin ri hermano Clemente y ri chꞌaqa chik ri xinkitoꞌ chupan rusamaj ri Ajaw. Ri kibꞌiꞌ rejeꞌ tzꞌibꞌan chik chupan ri wuj apeꞌ tzꞌibꞌan kibꞌiꞌ ri ndiyoꞌox ri kꞌaslen ma ndikꞌis ta chake.

Ri Pablo ngeruyaꞌ jujun chik pixabꞌanik chake konojel

⁴Jumul kixkikot4:4 Ro. 12:12; 1Ts. 5:16 roma xe jun ibꞌanun rikꞌin ri Ajaw. Y nibꞌij chik jumbꞌey chiwa: ¡Kixkikot! ⁵Kin ta nditzꞌetetej koma konojel wineq chi kin utz inoꞌoj. Ri Ajaw naqaj chik kꞌo.4:5 Stg. 5:8, 9

⁶Man ta jun roma ndichꞌujrisaj iwiꞌ, xa kin tiyaꞌ nojel4:6 Sal. 55:22; Pr. 16:3 pa ruqꞌaꞌ ri Dios pa oración, tikꞌutuj chare ri achike ndikꞌatzin chiwa, y kixmatioxin chuqaꞌ chare. ⁷Si keriꞌ xtibꞌen, ri uxlanen4:7 Is. 26:3; Jn. 14:27; Col. 3:15 ri nduyaꞌ ri Dios kin xtikꞌojeꞌ pa iwánima, y ri uxlanen riꞌ más nim chuwech ri janipeꞌ nditiker ndunojij jun wineq. Y ri uxlanen riꞌ kin xtuchajij ri iwánima y ri achike ngeꞌinojij, roma xe jun ibꞌanun rikꞌin ri Cristo Jesús.

⁸Hermanos, ri jun chik achike niwojoꞌ nibꞌij chiwa, jareꞌ: Kixnojin pa ruwiꞌ ri qetzij, pa ruwiꞌ nojel ri utz chi ndinimrisex rubꞌiꞌ, pa ruwiꞌ nojel ri kin chojmilej chuwech ri Dios, pa ruwiꞌ nojel ri ndukꞌen pe chꞌajchꞌaj kꞌaslen, pa ruwiꞌ chuqaꞌ nojel ri achike utz chi ndibꞌa iwánima chirij, pa ruwiꞌ nojel ri kꞌo utz rutzijol, pa ruwiꞌ ri kꞌo utz ndukꞌen pe chare ri iwánima, y pa ruwiꞌ nojel ri utz chi ndiyoꞌox ruqꞌij.

⁹Y nojel ri tijonik nuyoꞌon chiwa, nojel ri xiwakꞌaxaj chi yin xinbꞌij, y nojel ri xitzꞌet chi yin xinbꞌen,4:9 Fil. 3:17 nojel riꞌ tibꞌanaꞌ. Si keriꞌ xtibꞌen, ri Dios ri ndiyoꞌon uxlanen pa qánima kin xtikꞌojeꞌ iwikꞌin.

Ri Pablo ndumatioxij ri rutoꞌik kitaqon ri aj Filipos

¹⁰Tzꞌan ngikikot rikꞌin ri Ajaw, porque xinikꞌuxlaꞌaj chi pe rikꞌin ri ndikꞌatzin chuwa. Ma nibꞌij ta chiwa chi yin imestan. Ma ke ta riꞌ. Porque riyin wetaman chi ma yin itoꞌon ta pe, roma maneq modo itaqon pe nutoꞌik. ¹¹Y atoq nibꞌij keriꞌ chiwa, ma roma ta chi riyin maneq nikusaj chin niqꞌasaj nukꞌaslen. Porque riyin kin rukꞌamon wi chuwa chi ngikikot, si kꞌo nikusaj pa nukꞌaslen o maneq.4:11 1Ti. 6:6; He. 13:5¹²Wetaman ngikikot niqꞌasaj nukꞌaslen atoq ma jun ax kꞌo wikꞌin, y wetaman chuqaꞌ ngikikot niqꞌasaj nukꞌaslen atoq kꞌo kꞌiy achike wikꞌin. Wetaman ngikikot chupan xa achike na ri niqꞌasaj pa nukꞌaslen, si nojneq nupan o ndichꞌumu, si kꞌo kꞌiy achike wikꞌin o ma jun.4:12 1Co. 4:11; 2Co. 11:27¹³Chupan nojel ri niqꞌasaj pa nukꞌaslen ngitiker ngikikot, porque xe jun nubꞌanun rikꞌin ri Cristo ri ndiyoꞌon wuchuqꞌaꞌ.4:13 Jn. 15:5; 2Co. 12:9¹⁴Pero kin utz ri xibꞌen chi xinitoꞌ pe rikꞌin ri ndikꞌatzin chuwa, porque riꞌ ndubꞌij tzij chi junan iwánima ibꞌanun wikꞌin4:14 Fil. 1:7 chupan ri kꞌayew niqꞌasaj.

¹⁵Rix aj Filipos iwetaman chi pa nabꞌey atoq xintzijoj ri utzulej teq tzij chin kolotajik chiꞌikajal, kin xe wi rix xinitoꞌ pe atoq xinel pe pa irochꞌulew Macedonia, y nixta jun chik bꞌotzaj hermanos xetoꞌon pe wichin rikꞌin ri achike xkꞌatzin chuwa pa rusamaj ri Ajaw. ¹⁶Y ma xe ta riꞌ xibꞌen, porque atoq yinkꞌo chik pa tinamit Tesalónica, rix ma xe ta jumbꞌey xiteq pe ri achike xkꞌatzin chuwa. ¹⁷Pero riyin ma nitzꞌibꞌaj ta e reꞌ chiwa chin ta nditeq pe más nutoꞌik. Ri niwojoꞌ riyin, ja ta chi ndikꞌiyer ruwech ri jarupeꞌ rajel-rukꞌexel nduyaꞌ ri Dios chiwa. ¹⁸Wokami kꞌo chik wikꞌin nojel ri ndikꞌatzin chuwa, y hasta más chuwech ri ndikꞌatzin chuwa kꞌo wikꞌin roma ri achike xeꞌiteq pe chirij ri hermano Epafrodito.4:18 Fil. 2:25 Y ri xiteq pe chuwa, jun ofrenda ndikikot ri Dios rikꞌin y kin ndiqaꞌ chuwech, kin achel jun ofrenda ri ndiporox chuwech rijaꞌ, jun ofrenda ri kin ndijubꞌubꞌ ruxlaꞌ. ¹⁹Y ri nu-Dios ri kin nimalej rubꞌeyomal, kin xtuyaꞌ nojel ri ndikꞌatzin chiwa4:19 Sal. 23:1; 2Co. 9:8 rix ri xe jun ibꞌanun rikꞌin ri Cristo Jesús. ²⁰¡Kin ta jumul ndiyoꞌox ruqꞌij ri Qatataꞌ Dios!4:20 Ro. 11:36 Amén.

Ri Pablo nduteq ri rukꞌisibꞌel teq ruxunaqil kiwech ri hermanos aj Filipos

²¹Tiyaꞌ ruxunaqil kiwech konojel ri loqꞌolej hermanos ri xe jun kibꞌanun rikꞌin ri Cristo Jesús. Ri hermanos ekꞌo wikꞌin waweꞌ ndikiteq chuqaꞌ ruxunaqil iwech rix. ²²Konojel ri loqꞌolej hermanos ndikiteq ruxunaqil iwech. Pero ri más ngetaqo e ruxunaqil iwech, ja ri erusamajelaꞌ ri rey César.

²³Ri favor ri nduyaꞌ ri Ajaw Jesucristo, kin ta xtikꞌojeꞌ pa iwánima.