Efesios

Ri wuj rutzꞌibꞌan kan ri apóstol Pablo chake ri hermanos ekꞌo pa tinamit Éfeso

Ri Pablo nduteq ruxunaqil kiwech ri hermanos

¹Riyin Pablo jun apóstol chin ri Cristo Jesús roma jariꞌ rurayibꞌel ri Dios. Nitzꞌibꞌaj e re wuj reꞌ chiwa rix ri loqꞌolej rutinamit ri Dios ri rixkꞌo pa tinamit Éfeso, ri xe jun ibꞌanun rikꞌin ri Cristo Jesús ri itaqin. ²Ri Qatataꞌ Dios y ri Ajaw Jesucristo kin ta xtikiyaꞌ ki-favor pa iwiꞌ y xtikiyaꞌ chuqaꞌ uxlanen pa iwánima.

Tiqayaꞌ ruqꞌij ri Dios roma ri samaj rubꞌanun chiqakolik

³Kin ta xtiyoꞌox ruqꞌij ri ru-Dios y Rutataꞌ ri Qajaw Jesucristo, roma ruyoꞌon nojel ruwech favores chin chikaj chaqe roma xe jun qabꞌanun rikꞌin ri Cristo. ⁴Porque ri Dios xojruchaꞌ xe jampeꞌ pa nabꞌey atoq kꞌajani tubꞌen ri rochꞌulew chin xubꞌen chaqe chi xe jun xqabꞌen rikꞌin ri Cristo chin ngojok chꞌajchꞌaj y loqꞌolej chuwech. Y roma santienta roj rojowan pe, ⁵xubꞌen ruwech xe jampeꞌ pa nabꞌey1:5 Ro. 8:29 chi nduyaꞌ rubꞌiꞌ chiqij chin ngojok ralkꞌuaꞌl,1:5 Jn. 1:12 kin achel ri rurayibꞌel y achel xqaꞌ chuwech chi xubꞌen, y riꞌ roma ri xubꞌen ri Jesucristo pa qakꞌexel, ⁶chin ndiqayaꞌ ruqꞌij ri Tataꞌaj Dios, roma ri nimalej ru-favor rusipan chaqe y ruyoꞌon pa qawiꞌ roj ri xe jun qabꞌanun rikꞌin ri Rukꞌajol ri kin tzꞌan ndirajoꞌ. ⁷Y roma xbꞌiyin ri rukikꞌel ri Rukꞌajol, xojrelesaj pa ruqꞌaꞌ ri tzꞌamayon qichin1:7 Ro. 3:24; He. 9:12 y xukuy qamak, chin keriꞌ ndiqꞌalajin chi ri favor ruyoꞌon pa qawiꞌ kin nimalej bꞌeyomal. ⁸Y kin santienta favor ruyoꞌon pa qawiꞌ, roma ruyoꞌon nojel ruwech etamabꞌel y nojibꞌel1:8 Col. 2:3 chaqe, ⁹chin xqakꞌoxomaj ri rurayibꞌel, ri ma kin ta qꞌalej rubꞌeyal ojer kan y chupan re tiempo reꞌ xuqꞌalajrisaj1:9 Col. 1:26 chiqawech, porque keriꞌ xubꞌen ruwech xe jampeꞌ pa nabꞌey chi ndubꞌen y ja ri Cristo xukusaj chin xubꞌen. ¹⁰Porque xubꞌen ruwech chi nojel ri achikejeꞌ ekꞌo chochꞌulew y ekꞌo chikaj ngeruyaꞌ chuxeꞌ rutzij ri Cristo atoq nderilaꞌ ri tiempo ri rubꞌanun pe ruwech xe jampeꞌ pa nabꞌey.

¹¹Y roj ri xe jun qabꞌanun rikꞌin ri Cristo, ri Dios roj ruchaꞌon pe xe jampeꞌ pa nabꞌey chin ngojok rutinamit, porque rubꞌanun pe ruwech chi keriꞌ ndubꞌen chaqe roma ja wi riꞌ ri rurayibꞌel.1:11 Ro. 9:11; He. 6:17¹²Roj ruchaꞌon pe chin ndiyoꞌox ruqꞌij rijaꞌ, roma ndiqꞌalajin ri nimalej ruqꞌij pa qakꞌaslen roj ri más nabꞌey xqataqij ri Cristo. ¹³Keriꞌ chuqaꞌ rix ri ma israelitas ta, atoq xiwakꞌaxaj rutzijol ri qetzij, ri utzulej teq tzij ri rukꞌamon pe kolotajik chiwa, xitaqij ri Cristo, y xe jun xibꞌen rikꞌin, romariꞌ ri Dios xuyaꞌ pe ri Espíritu Santo pa iwánima, achel rubꞌiꞌin kan chi nduyaꞌ. Y ri Espíritu Santo, ja rijaꞌ ri etal1:13 2Co. 1:22 chi rix richin ri Dios. ¹⁴Y ri Espíritu Santo yoꞌon pa qánima, jun etal chuqaꞌ chi ri Dios kꞌo más nduyaꞌ chaqe chupan ri qꞌij atoq nditzꞌaqet ri qakolotajik roj ri roj loqꞌon roma rijaꞌ chin ndinimrisex rubꞌiꞌ roma kin nimalej ruqꞌij.

Ri Pablo ndubꞌen orar koma ri kitaqin ri Ajaw

¹⁵Riyin xinwakꞌaxaj chi kuqul ikꞌuꞌx rikꞌin ri Ajaw Jesús, y tzꞌan ngeꞌiwojoꞌ konojel ri loqꞌolej ralkꞌuaꞌl ri Dios.1:15 Col. 1:4¹⁶Romariꞌ jumul ngimatioxin chare ri Dios iwoma y ngixinkꞌuxlaꞌaj pa teq nu-oración.1:16 Col. 1:3¹⁷Nikꞌutuj chare ri Tataꞌaj Dios ri kin nimalej ruqꞌij, ri ru-Dios ri Qajaw Jesucristo, chi tusipaj nojibꞌel pataneq rikꞌin ri Espíritu Santo chiwa1:17 Col. 1:9 y tuqꞌalajrisaj chiwech ri utzulej runoꞌoj chin ndiwetamaj utz-utz achike rijaꞌ. ¹⁸Nikꞌutuj chuqaꞌ chare ri Dios chi tuyikꞌaj más ri iwánima, chin ndiwetamaj más chirij ri favor qoyobꞌen ri achoq roma xojroyoj ri Dios, y chi ndiwetamaj chuqaꞌ janipeꞌ reqalen y roruqꞌij ri herencia rusujun chaqe roj ri loqꞌolej rutinamit, ¹⁹y chin ndiwetamaj chuqaꞌ chi ri ruchuqꞌaꞌ1:19 Col. 1:29 ri Dios ri ndisamej pa qánima roj ri qataqin, kin santienta nim. Y riꞌ ja ri uchuqꞌaꞌ ri xukusaj ri Dios ²⁰chin xukꞌastajbꞌaꞌ pe ri Cristo chikikajal ri animaꞌiꞌ, y chin chuqaꞌ xubꞌen chare chi xbꞌetzꞌuyeꞌ e chikaj1:20 Col. 3:1 rikꞌin pa rikiqꞌaꞌ. ²¹Ri Dios xubꞌen chare ri Cristo chi más nim ruqꞌij1:21 Fil. 2:9; Col. 2:10; He. 1:4 pa kiwiꞌ konojel ri espíritus ri ngebꞌanun gobernar, ri espíritus kꞌo nimalej uchuqꞌaꞌ pa kiqꞌaꞌ, ri kꞌo ruchuqꞌaꞌ kitzij pa kiwiꞌ chꞌaqa chik, ri kin enimalej teq ajaw, y pa kiwiꞌ konojel ri kin nimalej kibꞌiꞌ. Ri Cristo más nim ruqꞌij ke chikiwech rejeꞌ chupan re tiempo rojkꞌo y ri tiempo más chiqawech apu. ²²Ri Dios xubꞌen chi chuxeꞌ rutzij ri Cristo xkꞌojeꞌ nojel, y xuyaꞌ ri Cristo chi ukꞌuey bꞌey kichin konojel ri loqꞌolej ralkꞌuaꞌl. ²³Rejeꞌ eꞌokuneq ruqꞌa-raqen ri Cristo, y chupan ri cuerpo1:23 Ro. 12:5 riꞌ nditzꞌaqatisex kikꞌaslen roma ri Cristo, ri nditzꞌaqatisan nojel.

Ri Dios xojrukal chuwech ri kamik roma xqataqij ri Cristo

¹Rubꞌanun kan, rix kamineq2:1 Jn. 5:24 chupan ri imak y ri itzel teq achike xeꞌibꞌanalaꞌ. ²Xikꞌuaj jun itzel kꞌaslen achel kikꞌaslen ri wineq kꞌa bꞌaneq kánima chirij ri ndusuj ri rochꞌulew. Xikꞌuaj jun kꞌaslen achel xrajoꞌ ri itzel, ri ukꞌuayon kibꞌey ri itzel teq espíritu ekꞌo pa kaqiqꞌ, y ndisamej chuqaꞌ wokami pa kánima ri ma ngeniman ta chuwech ri Dios. ³Rubꞌanun kan, roj chuqaꞌ xqabꞌen achel ndikibꞌen ri wineq ri kꞌa bꞌaneq kánima chirij ri ndusuj ri rochꞌulew, y ja ri itzel teq rayinik2:3 Tit. 3:3 chin ri qa-cuerpo y ri itzel teq achike xeqanojij ri xeqabꞌanalaꞌ, y kin qichin wi chi roj yakoy royowal ri Dios pa qawiꞌ, achel ri chꞌaqa chik ri ma ngeniman ta chuwech. ⁴Pero ri Dios ri kin santienta ndijoyowan, xojrajoꞌ rikꞌin ri nimalej rajowabꞌel rijaꞌ. ⁵Keriꞌ ndiqꞌalajin, porque atoq kꞌa roj kamineq pa mak2:5 Ro. 5:6 xubꞌen chaqe achel xubꞌen chare ri Cristo. Xuyaꞌ chik rukꞌaslen ri Cristo y xuyaꞌ chuqaꞌ kꞌakꞌakꞌ qakꞌaslen roj ri roj kamineq pa qamak. Kin roma ri favor ruyoꞌon ri Dios pa iwiꞌ, rix kolotajneq. ⁶Y achel xukꞌastajbꞌaꞌ pe ri Cristo chikikajal ri animaꞌiꞌ, xojrukꞌastajbꞌaꞌ pe chuqaꞌ roj rikꞌin, y xojrutzꞌuyubꞌaꞌ chikaj rikꞌin ri Cristo Jesús. ⁷Keriꞌ xubꞌen rijaꞌ, porque ndirajoꞌ chi ndiqꞌalajin chupan ri tiempo más chiqawech apu, ri nimalej favor ruyoꞌon pa qawiꞌ roma utzulej runoꞌoj qikꞌin roj ri xe jun qabꞌanun rikꞌin ri Cristo Jesús. ⁸Porque rix, roma ri favor ruyoꞌon ri Dios pa iwiꞌ, xixkolotej roma xitaqij ri Cristo, y ma jun achike xibꞌen chin xixkolotej, porque reꞌ rusipan ri Dios chiwa. ⁹Y ri kolotajik rusipan ri Dios chiwa, ma jun achike xibꞌen chin ta xichꞌek, chin keriꞌ nixta jun ndunimrisaj riꞌ y xtubꞌij chi xuchꞌek ri kolotajik. ¹⁰Porque ja ri Dios bꞌanayon kꞌakꞌakꞌ chare ri qakꞌaslen roj ri xe jun qabꞌanun rikꞌin ri Cristo Jesús, chin keriꞌ ndiqabꞌanalaꞌ ri utz ri runabꞌan pe ri Dios chin ndiqabꞌen.2:10 Ef. 1:4

Qonojel ri qataqin ri Cristo, roj okuneq xe jun rutinamit ri Dios

¹¹Romariꞌ, tikꞌuxlaꞌaj chi ma rix ta rutinamit ri Dios rubꞌanun kan. Y ndibꞌix chiwij koma ri israelitas chi ma ibꞌanun ta circuncidar ri i-cuerpo achel ndikibꞌen rejeꞌ ri kin nim ndikinaꞌ chare roma ri circuncisión ndibꞌan chare ri ki-cuerpo, circuncisión ri xa wineq ngebꞌanun richin. ¹²Rubꞌanun kan chuqaꞌ, rix maneq ri Cristo pa iwánima, ma rix richin ta ri tinamit Israel, ma jun iqꞌaꞌ chare ri rusujun ri Dios chupan ri pactos erubꞌanun kikꞌin ri israelitas. Xetal rixkꞌo chochꞌulew, y maneq ri Dios pa ikꞌaslen, y ma jun iwoyobꞌen chi nduyaꞌ chiwa.2:12 Gá. 4:8; Col. 1:21¹³Nej rixkꞌo chuwech ri Dios, pero wokami xe jun ibꞌanun rikꞌin ri Cristo Jesús y romariꞌ naqaj rixkꞌo rikꞌin ri Dios2:13 Gá. 3:28 porque xbꞌiyin rukikꞌel ri Cristo cho cruz.

¹⁴Ja chuqaꞌ rijaꞌ xbꞌanun chi xkꞌojeꞌ uxlanen chiqakajal roj israelitas iwikꞌin rix ma israelitas ta, y xe jun tinamit xubꞌen chaqe porque rikꞌin ri rukamik cho cruz xrelesaj e chiqakajal ri oyowal ri jachayon qawech. ¹⁵Xubꞌen chuqaꞌ chi maneq chik kuchuqꞌaꞌ pa qawiꞌ roj israelitas ri mandamientos y ri jalajaj teq achike ndubꞌij chupan ri ley ri xyoꞌox chare ri Moisés chi tiqabꞌanaꞌ. Xubꞌen jun kꞌakꞌakꞌ tinamit chaqe roj chi israelitas y ma israelitas ta ri xe jun qabꞌanun rikꞌin, y xuyaꞌ uxlanen chiqakajal. ¹⁶Y roma ri rukamik ri Cristo cho cruz, xubꞌen chake ri kaꞌiꞌ tinamit chi xeꞌok jun tinamit y xkꞌojeꞌ uxlanen chikikajal rikꞌin ri Dios, y keriꞌ ri Dios xukꞌis ri oyowal kꞌo chikikajal.

¹⁷Y atoq xuqaqa ri Cristo chochꞌulew, xuruyaꞌ rutzijol ri utzulej teq tzij chin kolotajik ri nduyaꞌ uxlanen chaqe roj qonojel, chiwa rix ri nej kꞌo ri iwánima chuwech ri Dios rubꞌanun kan, y chake chuqaꞌ ri israelitas ri naqaj kꞌo ri kánima.2:17 Is. 57:19¹⁸Y roma rukamik ri Cristo cho cruz, kꞌo cheꞌel ngojjel apu chuwech ri Qatataꞌ Dios chi israelitas y ma israelitas ta,2:18 Jn. 14:6; Ef. 3:13 y xe jun mismo Espíritu Santo ukꞌuayon qichin roj qonojel chin ngojjel apu chuwech.2:18 1Co. 12:13¹⁹Romariꞌ, rix ma rix chi ta aj jukꞌan tinamit, nixta rix wineq ri ma etaman ta iwech, wokami rix richin chik ri loqꞌolej rutinamit ri Dios, y roj qonojel roj okuneq qachaqꞌ-qanimal qiꞌ, y roj ralkꞌuaꞌl ri Dios. ²⁰Y rix kin rix achel jun jay pabꞌan pariꞌ jun jabꞌel ruxeꞌ, y ri ruxeꞌ ri jay riꞌ, ja ri tijonik kiyoꞌon kan ri apóstoles y ri profetas. Y ja ri Cristo Jesús okuneq ruchuqꞌaꞌ ruxeꞌ ri jay riꞌ, kin achel jun abꞌej ri nduyaꞌ ruchuqꞌaꞌ ruxeꞌ jun jay. ²¹Ja ri Cristo ndibꞌanun chi nojel rukꞌuan riꞌ chiqakajal, chin ngojkꞌiy pa qakꞌaslen, y keriꞌ roj ri xe jun qabꞌanun rikꞌin ri Ajaw, ngojbꞌeꞌok jun loqꞌolej rachoch.2:21 1Co. 3:16²²Y keriꞌ chuqaꞌ rix roma itaqin ri Jesucristo, ngixkꞌiy pa ikꞌaslen chiraqen ri Dios chin ngixok rachoch,2:22 1P. 2:5 roma ri Espíritu Santo ri kꞌo pa iwánima.

Ri rusamaj ri Pablo chikikajal ri eralkꞌuaꞌl ri Dios

¹Riyin Pablo, yin tzꞌapel pa cheꞌ roma niyaꞌ rutzijol ri utzulej rutzij ri Cristo Jesús chiwa rix, ri ma rix israelitas ta. ²Y riyin ninaꞌ pa wánima chi rix iwakꞌaxan chi ri Dios pa nuqꞌaꞌ ruyoꞌon chi nitzijoj ri utzulej rutzij chiwa, chin ndiwil ri favor nduyaꞌ. ³Achel xintzꞌibꞌaj yan jubꞌaꞌ chiwa, chi ri Dios xuqꞌalajrisaj chinuwech ri rubꞌanun pe ruwech pa iwiꞌ, ri ewan rubꞌeyal ojer kan, pero wokami xqꞌalajrisex. ⁴Y atoq rix ndibꞌen leer ri nutzꞌibꞌan e chiwa, ndikꞌoxomaj chi qetzij qꞌalajrisan chinuwech ri ewan rubꞌeyal ojer kan pa ruwiꞌ ri xurubꞌanaꞌ ri Cristo chochꞌulew. ⁵Reꞌ ma xqꞌalajrisex ta chikiwech ri tzaq teq wineq ri xekꞌojeꞌ chochꞌulew ojer. Pero wokami ri Espíritu Santo ruqꞌalajrisan chikiwech ri loqꞌolej teq apóstoles y profetas. ⁶Y ri ruqꞌalajrisan ri Espíritu Santo jareꞌ: Rix ri ma rix israelitas ta, itaqin ri utzulej teq tzij chin kolotajik, y romariꞌ kꞌo favor ndiyoꞌox chiwa junan qikꞌin roj israelitas, y junan roj okuneq ruwachinel ruqꞌa-raqen ri Cristo y junan chuqaꞌ ndiyoꞌox chaqe ri rusujun ri Dios chi nduyaꞌ, porque xe jun qabꞌanun qonojel rikꞌin ri Cristo Jesús.

⁷Y roma ri favor rusipan ri Dios chuwa rikꞌin ri nimalej ruchuqꞌaꞌ ri ndisamej pa nukꞌaslen, yin okuneq rusamajel chin nitzijoj ri utzulej teq tzij chin kolotajik. ⁸Y riyin maske maneq ok weqalen ke chuwech ri más maneq ok ruqꞌij chikikajal ri loqꞌolej rutinamit rijaꞌ, chuwa riyin yoꞌon ri favor chi nitzijoj chake ri ma israelitas ta ri utzulej teq tzij chin kolotajik ri kin jun bꞌeyomal3:8 Col. 1:27 rukꞌamon pe ri Cristo, jun bꞌeyomal ri ma ngojtiker ta ndiqakꞌoxomaj janipeꞌ reqalen. ⁹Xyoꞌox chuqaꞌ qꞌij chuwa chi nitzijoj chake konojel ri rubꞌeyal ri favor ri rubꞌanun pe ruwech chi nduyaꞌ ri Dios, favor ri xe ojer kan tiempo ewan rubꞌeyal y wokami xqꞌalajrisex roma rijaꞌ ri bꞌanayon nojel.3:9 Sal. 33:6; Jn. 1:3; Col. 1:16¹⁰Chin keriꞌ, rikꞌin ri rubꞌanun rijaꞌ chiqakajal roj ri roj rutinamit, ndiqꞌalajin ri jalajaj ruwech retamabꞌel chikiwech konojel ri kꞌo uchuqꞌaꞌ pa kiqꞌaꞌ y ri qꞌatoy teq tzij ri ma ngetzꞌetetej ta ekꞌo chikaj. ¹¹Keriꞌ xubꞌen ri Dios, kin achel ri rubꞌanun pe ruwech chi ndubꞌen xe ojer kan.3:11 Ef. 1:11 Y ri rubꞌanun pe ruwech xbꞌanatej roma ri xurubꞌanaꞌ ri Cristo Jesús ri Qajaw. ¹²Y roj roma xe jun qabꞌanun rikꞌin ri Cristo Jesús, kuqul qakꞌuꞌx ngojjel apu chuwech ri Dios y ma ndiqaxibꞌij ta qiꞌ ngojchꞌaꞌa chare roma qataqin rijaꞌ.3:12 Ef. 2:18¹³Romariꞌ nikꞌutuj kamelal chiwa chi ma tipoꞌ ikꞌuꞌx roma ri kꞌayew niqꞌasaj riyin iwoma. Porque ri kꞌayew niqꞌasaj, xa kin chin ndikꞌojeꞌ iqꞌij rix.

Ri Pablo ndubꞌen orar y nduyaꞌ ruqꞌij ri Dios

¹⁴Romariꞌ riyin ngixukeꞌ chin nibꞌen orar chuwech ri Tataꞌaj Dios, ¹⁵ri achoq ikꞌin pataneq kikꞌaslen konojel ri ekꞌo chikaj y ri ekꞌo chochꞌulew. ¹⁶Y nikꞌutuj chare rijaꞌ ri kꞌo nimalej ruqꞌij ri kin achel jun bꞌeyomal, chi nduyaꞌ santienta ruchuqꞌaꞌ iwánima roma ri Espíritu Santo. ¹⁷Nikꞌutuj chuqaꞌ chare chi ri Cristo ndikꞌojeꞌ jumul pa iwánima,3:17 Jn. 14:23 roma kuqul ikꞌuꞌx rikꞌin, y chi ndikꞌojeꞌ chuqaꞌ ruxeꞌ ri ikꞌaslen chupan ri ajowabꞌel, ¹⁸chin ndikꞌoxomaj junan kikꞌin konojel ri loqꞌolej ralkꞌuaꞌl, ri janipeꞌ ruwech, janipeꞌ raqen, janipeꞌ rujotolen y janipeꞌ qa rupan ri rajowabꞌel rijaꞌ. ¹⁹Y keriꞌ ndikꞌoxomaj janipeꞌ ngixrajoꞌ ri Cristo, maske ri rajowabꞌel rijaꞌ más nim ke chuwech ri ngojtiker ndiqakꞌoxomaj. Keriꞌ nikꞌutuj pa iwiꞌ chare ri Tataꞌaj Dios, chin keriꞌ ri inoꞌoj rix nderubꞌanaꞌ achel ri utzulej runoꞌoj rijaꞌ.

²⁰Tiqayaꞌ ruqꞌij ri Dios ri nditiker ndubꞌen más chuwech ri achike ndiqakꞌutuj o ndiqanojij, rikꞌin ri nimalej ruchuqꞌaꞌ ri ndisamej pa qánima. ²¹Kin ta ndiqayaꞌ nimalej ruqꞌij ri Tataꞌaj Dios,3:21 1Ti. 1:17 roj ri roj rutinamit, roma xe jun qabꞌanun rikꞌin ri Cristo Jesús. Kin ta ndiyoꞌox ruqꞌij koma nojel tzaq teq wineq ri ngetuꞌalex chochꞌulew chupan nojel ri tiempo pataneq más apu chiqawech y chin jumul. Amén.

Ri Cristo ndirajoꞌ chi ri kitaqin rijaꞌ, xe jun kánima ndikibꞌen

¹Riyin Pablo, yin tzꞌapel pa cheꞌ roma nibꞌen rusamaj ri Ajaw. Ngixinpixabꞌaj chi tikꞌuaj jun chojmilej kꞌaslen achel rukꞌulun chi ndikꞌuaj chuwech ri xoyon iwichin. ²Tiqasaj iwiꞌ, utz inoꞌoj tibꞌanaꞌ chake ri wineq, ma tikꞌo ikꞌuꞌx chupan ri ndiqꞌasaj, rikꞌin ajowabꞌel tikochꞌoꞌ iwiꞌ chiwech,4:2 Col. 3:14³titijaꞌ iqꞌij chi jumul xe jun iwánima ndibꞌen chiwech roma rix ukꞌuan roma ri Espíritu Santo, porque riꞌ ndubꞌen chiwa chi ndikꞌojeꞌ uxlanen chiꞌikajal. ⁴Roj ri qataqin ri Cristo xe jun cuerpo roj okuneq rikꞌin,4:4 Ro. 12:5 y xe jun Espíritu kꞌo pa qánima. Y qonojel ri roj oyon roma ri Dios, kin junan ruwech favor qoyobꞌen chi nduyaꞌ chaqe. ⁵Xe jun ri Qajaw, xe jun rubꞌeyal ri utzulej teq tzij qataqin, y xe jun ri bautismo. ⁶Xe jun Dios kꞌo y ja rijaꞌ ri Qatataꞌ roj qonojel ri qataqin rijaꞌ, kꞌo pa qawiꞌ roj qonojel, ngojrukusaj qonojel chin ndiqabꞌen ri rusamaj y kꞌo chuqaꞌ pa qánima.

⁷Pero chiqajununal ri Cristo xuyaꞌ ri ru-favor pa qawiꞌ, achel xrajoꞌ xuyaꞌ rijaꞌ chin ndiqabꞌen ri rusamaj rikꞌin ri loqꞌolej teq sipanik ruyoꞌon chaqe. ⁸Romariꞌ, chupan ri rutzij ri Dios tzꞌibꞌan kan, kereꞌ ndubꞌij:

Xeruyaꞌ chuxeꞌ rutzij ri xerelesaj chuxeꞌ rutzij ri itzel, y xerukꞌuaj atoq xtzolij e chikaj,

Y xuyaꞌ loqꞌolej teq sipanik chake ri erutinamit.4:8 Sal. 68:18

Keriꞌ tzꞌibꞌan kan.

⁹Y atoq ndubꞌij ri rutzij ri Dios chi ri Cristo xtzolij e chikaj, riꞌ ndubꞌij tzij chi nabꞌey xuqaqa chochꞌulew y xqaqa qa chupan ri lugares más nej qa chin ri rochꞌulew.4:9 Jn. 3:13¹⁰Y ri Jun ri xqaqa qa, jariꞌ ri xtzolij e chin xbꞌekꞌojeꞌ pa kiwiꞌ nojel teq ri kaj, y keriꞌ nojel apeꞌ kꞌo wi. ¹¹Y ja rijaꞌ xyoꞌon loqꞌolej teq sipanik chake ri rutinamit. Chake jujun xuyaꞌ chi xeꞌok apóstoles, chake jujun chik xuyaꞌ chi ndikiqꞌalajrisaj ri ndubꞌij pe ri Dios pa kánima, chake jujun chik xuyaꞌ chi ndikitzijoj ri utzulej teq tzij chin kolotajik, y chake chꞌaqa chik xuyaꞌ chi xeꞌok ukꞌuey kibꞌey y chuqaꞌ kitijonelaꞌ ri hermanos. ¹²Rijaꞌ xeruyaꞌ re samajelaꞌ reꞌ chin ngekitijoj ri loqꞌolej rutinamit ri Dios, chin keriꞌ ri tinamit riꞌ ndikibꞌen chuqaꞌ ri rusamaj, y keriꞌ ngekꞌiy ebꞌaneq pa kikꞌaslen chuwech ri Dios konojel ri ruwachinel ruqꞌa-raqen ri Cristo. ¹³Y ja samaj riꞌ jumul ndikibꞌen ri rusamajelaꞌ ri Dios hasta kꞌa xe na jun qánima ndeqabꞌanaꞌ roj qonojel roma kuqul qakꞌuꞌx rikꞌin ri Rukꞌajol ri Dios, y utz-utz ndiqetamaj runoꞌoj, y keriꞌ ri qakꞌaslen ndok achel rukꞌaslen ri Cristo ri kin tzꞌaqet wi.4:13 Col. 1:28¹⁴Chin keriꞌ, ma roj chi ta achel ri ma ekꞌiyineq ta pa kikꞌaslen chiraqen ri Dios. Porque rejeꞌ xa achike na ndikitaqij, y ngeꞌukꞌuꞌex roma jalajaj teq tijonik ri ma eqetzij ta ri ngekiyaꞌ achiꞌaꞌ ri kin ketaman ndikikanoj rubꞌeyal chin ngechꞌakatin. ¹⁵Pa rukꞌexel riꞌ, ndikꞌatzin ndiqoqaj ri qetzij y ndiqajoꞌ qiꞌ chiqawech, y keriꞌ ngojkꞌiy pa qakꞌaslen chin ndubꞌen qa qanoꞌoj achel runoꞌoj ri Cristo, ri okuneq ukꞌuey qabꞌey. ¹⁶Ja rijaꞌ ndibꞌanun chi qonojel ri roj ruwachinel ruqꞌa-raqen ndiqatoꞌ qiꞌ chin ndiqil qakꞌiyilen roj qonojel. Achel ndibꞌanatej pa ru-cuerpo jun wineq, nojel rubꞌochꞌil kiyuqen kiꞌ ndikitoꞌ kiꞌ. Keriꞌ chuqaꞌ ndibꞌanatej qikꞌin roj. Atoq ndiqajoꞌ qiꞌ, ndiqabꞌen ri samaj yoꞌon chaqe chupan ri ru-cuerpo ri Cristo, y qayuqen qiꞌ ngojkꞌiy y ndikꞌojeꞌ pe quchuqꞌaꞌ.

Tiqakꞌuaj jun kꞌakꞌakꞌ kꞌaslen roma xe jun qabꞌanun rikꞌin ri Cristo

¹⁷Wokami pa rubꞌiꞌ ri Ajaw nichilabꞌej chiwa chi ma tikꞌuaj chik jun kꞌaslen achel kikꞌaslen ri wineq ma ngeniman ta chuwech ri Dios, porque ri wineq riꞌ, kikꞌuan jun kꞌaslen ri pa kiwech rejeꞌ kin utz, pero xa esachineq rikꞌin ri keriꞌ ndikinojij. ¹⁸Ri wineq riꞌ xqꞌeqꞌumer qa kinojibꞌal, maneq kiqꞌaꞌ chare ri kꞌaslen nduyaꞌ ri Dios, porque ma ndikajoꞌ ta ndiketamaj ri qetzij, roma kikowirisan ri kánima. ¹⁹Rejeꞌ ma jun chik kꞌix ndikinaꞌ rikꞌin ri itzel ngetajiyaj rikꞌin, xa kijachon kiꞌ pa ruqꞌaꞌ ri itzel teq rayinik, ma ndikiqꞌet ta kiꞌ ngekibꞌanalaꞌ nojel ruwech mak ri ndukꞌen pe kꞌix. ²⁰Pero ri itzel kꞌaslen riꞌ ma junan ta rikꞌin ri tijonik xkꞌut kan chiwech pa ruwiꞌ ri chojmilej rukꞌaslen ri Cristo. ²¹Porque rix kin xiwakꞌaxaj ri tijonik pa ruwiꞌ ri Jesús, y xiwetamaj achike ruchojmil ri kꞌaslen ndirajoꞌ rijaꞌ chi ndikꞌuaj,4:21 Ef. 1:13 kꞌaslen ri kin rukꞌuan riꞌ rikꞌin ri qetzij rukꞌutun kan, ²²romariꞌ ndikꞌatzin ndiyaꞌ kan rukꞌuaxik ri kꞌaslen xikꞌuaj pa nabꞌey,4:22 Ro. 6:6; Col. 3:8, 9 kꞌaslen ri ndikꞌis ruqꞌij bꞌaneq, porque ukꞌuan roma ri itzel teq rayinik ri ngixruchꞌakatij. ²³Rix xixtijox chuqaꞌ chi ndikꞌatzin ndiyaꞌ qꞌij chare ri Espíritu Santo chin nduyaꞌ jun kꞌakꞌakꞌ nojibꞌel chiwa chin ndijalatej ri ikꞌaslen,4:23 Ro. 12:2; Col. 3:10 y keriꞌ pa ruchojmil ngixnojin pa ruwiꞌ nojel. ²⁴Y xixtijox chi ndikꞌatzin ndiweq iwiꞌ rikꞌin ri kꞌakꞌakꞌ kꞌaslen nduyaꞌ ri Dios,4:24 2Co. 5:17 kꞌaslen ri kin loqꞌolej y chojmilej achel ri rukꞌaslen rijaꞌ, porque ukꞌuan roma ri qetzij.

Tichajij iwiꞌ chin ma kixtzaq chupan jun itzel kꞌaslen

²⁵Romariꞌ, ma kixreqꞌon chik, xa kin ja ri qetzij tibꞌilaꞌ chiwech,4:25 Zac. 8:16 porque roj ri qataqin ri Cristo, roj ruwachinel ruqꞌa-raqen rijaꞌ.

²⁶Atoq kꞌo jun roma ndiyakatej iwoyowal, ma tiyaꞌ qꞌij chi ngixtzaq pa mak,4:26 Sal. 4:4; 37:8 y ma tiyaꞌ qꞌij chi ri oyowal ndikꞌojeꞌ jun qꞌij entéra pa iwánima. ²⁷Ma tiyaꞌ qꞌij chare ri itzel chin ngixrutaqchiꞌij chin ngixqaqa pa ruqꞌaꞌ.4:27 Ef. 6:11; Stg. 4:7

²⁸Si kꞌo jun xeleqꞌan jumbꞌey kan, ma teleqꞌ chik, más utz tisamej rikꞌin ruqꞌaꞌ chuchꞌakik ruméra, chin keriꞌ kꞌo achike ruchajin chin ngerutoꞌ ri ndikꞌatzin kitoꞌik.4:28 1Ts. 4:11, 12; Ro. 12:13

²⁹Ma tibꞌij itzel teq tzij, xa kin xe utzulej teq tzij ri ndukꞌen pe kꞌiyilen chake chꞌaqa chik.4:29 Mt. 12:36, 37; Col. 4:6 Tibꞌij tzij ri kin rukꞌulun chi ndibꞌij ri ndukꞌen pe ru-favor ri Dios pa kikꞌaslen ri ngeꞌakꞌaxan iwichin. ³⁰Y ma tibꞌen chare ri Espíritu Santo chin ri Dios chi ndibꞌison qa, porque ja ri Espíritu riꞌ, ri etal ruyoꞌon ri Dios pa iwánima chi atoq nduqaqa chik ri Cristo, kin xkixkolotej wi e.4:30 1Ts. 5:19

³¹Tiwelesaj e nojel kꞌayilej teq noꞌoj pa iwánima, nojel oyowal, ri ndikꞌuxkꞌut iwánima, ri ndireq ichiꞌ roma iwoyowal, ri chaponik, y nojel itzel teq achike ri ndalex pe pa iwánima chikij chꞌaqa chik. ³²Pa rukꞌexel riꞌ, utz inoꞌoj tibꞌanaꞌ chiwech, kixpoqonan y tikuyuꞌ imak chiwech, achel ri Dios rix rukuyun roma xe jun ibꞌanun rikꞌin ri Cristo.4:32 Mt. 6:14; Col. 3:12, 13

¹Romariꞌ, rix ri rix ralkꞌuaꞌl chik ri Dios y tzꞌan ngixrajoꞌ, tiwoqaj ri utzulej runoꞌoj rijaꞌ. ²Tikꞌuaj jun kꞌaslen ri ndukꞌut chi ndiwojoꞌ iwiꞌ chiwech, kin achel xojrajoꞌ ri Cristo5:2 Jn. 13:34 y xusuj riꞌ pa kamik chuwech ri Dios pa qakꞌexel, y keriꞌ xok jun ofrenda jubꞌubꞌ ruxlaꞌ ri kin xqaꞌ chuwech ri Dios.

³Pero ri mak ri ngekibꞌanalaꞌ ri wineq ri ndikikꞌamalaꞌ qa kiꞌ xa achoq na ikꞌin, o ndikichꞌabꞌaqrisaj kikꞌaslen, o ngejamem chirij méra, nojel mak achel reꞌ ma utz ta nixta ndibꞌan rutzijol chiꞌikajal rix ri loqꞌolej rutinamit ri Dios. ⁴Ma tibꞌilaꞌ chuqaꞌ mal teq tzij, ma tibꞌilaꞌ tzij ri ma jun rubꞌeyal y chuqaꞌ ma tibꞌilaꞌ etzꞌanin teq tzij ri ma eꞌutz ta, porque tzij achel riꞌ ma rukꞌulun ta chi ngeꞌibꞌilaꞌ. Pa rukꞌexel riꞌ, ja ri tzij ndukꞌen pe matioxinik chare ri Dios tibꞌilaꞌ. ⁵Porque rix iwetaman chi pa ru-reino ri Cristo y ri Dios, ma ngeꞌok ta ri ndikikꞌamalaꞌ qa kiꞌ xa achoq na ikꞌin chin ndikibꞌen mak, nixta ri ndikibꞌanalaꞌ itzel teq achike ri nduchꞌabꞌaqrisaj ri kikꞌaslen, nixta ri ngejamem chirij méra, porque ri ngajamem chirij méra xa achel ndayaꞌ kiqꞌij tiox keriꞌ.

Tiqꞌalajin chi ja ri Cristo ndiyikꞌan ri ikꞌaslen

⁶Ma jun tiqasan ijolon rikꞌin teq tzij ri ma jun utz ndukꞌen pe, ri ndubꞌij chi ma jun ndubꞌen maske ndabꞌen mak achel ri xinbꞌij yan pe chiwa, porque roma mak achel riꞌ, ndiqaqa royowal ri Dios pa kiwiꞌ ri ma ngeniman ta. ⁷Rix ma jun titzeq iwiꞌ kikꞌin ri ngebꞌanun keriꞌ.

⁸Jumbꞌey kan, pa qꞌequꞌ xkꞌojeꞌ ri ikꞌaslen, pero wokami roma xe jun ibꞌanun rikꞌin ri Ajaw, ri ikꞌaslen kꞌo pa luz, romariꞌ tikꞌuaj ri ikꞌaslen achel kikꞌaslen ri ekꞌo pa luz.5:8 Jn. 8:12; 1Jn. 2:9⁹Porque jun ri kꞌo pa luz, kin kereꞌ ndiqꞌalajin pa rukꞌaslen: Utz ndubꞌen chake chꞌaqa chik, kin rukꞌuan jun chojmilej kꞌaslen, y ja ri qetzij roqan.5:9 Gá. 5:22¹⁰Titijaꞌ iqꞌij chin ndiwetamaj utz-utz achike ri ndiqaꞌ chuwech ri Ajaw chi ndibꞌen.5:10 Ro. 12:2; Fil. 1:10¹¹Ma titzeq iwiꞌ chupan ri itzel teq achike ngekibꞌanalaꞌ ri wineq ri pa qꞌequꞌ kꞌo kikꞌaslen,5:11 Lv. 19:17; 1Co. 5:11 porque ri ngekibꞌanalaꞌ ma jun utz ndukꞌen pe. Xa kin titijaꞌ iqꞌij chin ndiqꞌalajrisaj chikiwech chi ma utz ta ri ngetajin rikꞌin. ¹²Porque ri ndikibꞌen rejeꞌ chilaqꞌel, hasta kꞌixbꞌel palej ndukꞌen pe si xtatzijoj ta chake chꞌaqa. ¹³Pero atoq ri luz nduqꞌalajrisaj ri ndikibꞌen rejeꞌ, ndikikꞌoxomaj chi mak ri ngetajin rikꞌin. ¹⁴Y keriꞌ kꞌo cheꞌel ndikiyaꞌ kan ri mak ngekibꞌanalaꞌ chin ngeꞌok ralkꞌuaꞌl ri Dios ri kin luz wi. Romariꞌ kereꞌ ndibꞌix:

Kakꞌastej rat ri ngawer;

Kayakatej pe chikikajal ri ekamineq pa mak,

Y ri Cristo nduyikꞌaj ri akꞌaslen.

Keriꞌ ri ndibꞌix.

¹⁵Romariꞌ, titzꞌetaꞌ utz-utz ri ndibꞌanalaꞌ pa ikꞌaslen. Ma tibꞌen achel ndikibꞌen ri wineq ri xetal ngetajiyaj rikꞌin, xa kin tikusaj ri utzulej inojibꞌal chin ndibꞌen nojel. ¹⁶Utz rukusaxik tibꞌanaꞌ ri tiempo,5:16 Col. 4:5 porque ri tiempo rojkꞌo wokami, santienta itzel teq achike ngebꞌanaloꞌox. ¹⁷Romariꞌ, ma tibꞌen achel ndikibꞌen wineq ri xetal ngetajiyaj, xa kin titijaꞌ iqꞌij tiwetamaj achike ndirajoꞌ ri Ajaw chi ndibꞌen.5:17 Ro. 12:2¹⁸Ma tiqꞌabꞌarisaj iwiꞌ, porque riꞌ ndubꞌen chiwa chi ma ngixtiker ta ndiqꞌet iwiꞌ chuwech ri itzel teq achike.5:18 Pr. 20:1; Ro. 13:13, 14 Pa rukꞌexel riꞌ, tiyaꞌ qꞌij chare ri Espíritu Santo chi ndunojisaj ri iwánima, ¹⁹chin keriꞌ atoq ndimal iwiꞌ pa rubꞌiꞌ ri Ajaw, ndiyalaꞌ ruchuqꞌaꞌ iwánima chiwech rikꞌin salmos, himnos y chꞌaqa chik bꞌix ri nduyaꞌ ri Espíritu Santo pa iwánima. Kixbꞌixan y tiyaꞌ ruqꞌij ri Ajaw rikꞌin nojel iwánima.5:19 Col. 3:16²⁰Y jumul timatioxij nojel chare ri Tataꞌaj Dios pa rubꞌiꞌ ri Qajaw Jesucristo.

Ri ndikꞌatzin ndikibꞌen ri eralkꞌuaꞌl ri Dios

²¹Tinimaj iwiꞌ chiwech, roma kin kꞌo ruqꞌij ri Cristo pa iwech. ²²Ri ixaq tunimaj rutzij ri rachijil,5:22 Col. 3:18 porque atoq keriꞌ ndubꞌen, ndiniman chuqaꞌ chuwech ri Ajaw. ²³Porque ja ri achi ukꞌuey bꞌey richin ri rixjayil, achel ri Cristo ukꞌuey bꞌey kichin konojel ri eralkꞌuaꞌl ri Dios.5:23 1Co. 11:3; Ef. 1:22, 23 Ja ri Cristo ri kikolonel y rejeꞌ eꞌokuneq ruwachinel ruqꞌa-raqen. ²⁴Y achel ri eralkꞌuaꞌl ri Dios ngeniman chuwech ri Cristo, keriꞌ chuqaꞌ ri ixaq rikꞌin nojel ri ndubꞌen pa rukꞌaslen, ndikꞌatzin ndunimaj rutzij ri rachijil.

²⁵Rat achi, tabꞌanaꞌ chare ránima ri awixjayil chi tunaꞌ chi qetzij ndawojoꞌ,5:25 Col. 3:19 achel ri Cristo xojrajoꞌ roj ri ralkꞌuaꞌl ri Dios y xuyaꞌ ri rukꞌaslen pa qakꞌexel. ²⁶Y achel ndikusex ri yaꞌ chin ndibꞌan chꞌajchꞌaj chare jun achike, ri Cristo ja ri rutzij ri Dios xukusaj chin xuchꞌajchꞌojrisaj ri qakꞌaslen, chin keriꞌ xubꞌen loqꞌolej chaqe, ²⁷chin keriꞌ roj ri roj ralkꞌuaꞌl ri Dios, kin ndiyikꞌilan ri qakꞌaslen atoq ngojurukꞌamaꞌ ri Cristo chin ndukꞌen apu qawech, y man ta tzꞌil, nixta yuchuyik rubꞌanun ri qakꞌaslen, nixta kꞌo jun achike ri ma chꞌajchꞌaj ta ndilitej chiqij. Porque rijaꞌ ndirajoꞌ chi roj loqꞌolej y chꞌajchꞌaj ngojbꞌeqaqa chuwech.5:27 Col. 1:10²⁸Y kin achel ri Cristo tzꞌan ngojrajoꞌ, keriꞌ chuqaꞌ ndikꞌatzin ndubꞌen ri achi chare ri rixjayil. Ndikꞌatzin ndirajoꞌ y ndubꞌen cuenta ri rixjayil achel ndubꞌen cuenta ri ru-cuerpo rijaꞌ roma ndirajoꞌ riꞌ. Ri ndirajoꞌ ri rixjayil, ndirajoꞌ riꞌ rijaꞌ. ²⁹Porque nixta jun wineq itzel ndutzꞌet ri ru-cuerpo, xa kin jabꞌel ndirilij y ndubꞌen cuenta. Keriꞌ chuqaꞌ ndubꞌen ri Cristo chaqe roj, ri roj rutinamit ri Dios. ³⁰Porque roj qonojel ri qataqin ri Cristo, roj okuneq ruwachinel ruqꞌa-raqen rijaꞌ.5:30 Ro. 12:5; 1Co. 6:15³¹Romariꞌ, ri rutzij ri Dios ndubꞌij chi ri kꞌajol nduyaꞌ kan rute-rutataꞌ chin ndikikꞌen qa kiꞌ rikꞌin ri rixjayil y chi ekaꞌiꞌ xe jun ndikibꞌen.5:31 Gn. 2:24; Mt. 19:5³²Re jun tzij reꞌ nimalej reqalen y ma qꞌalej ta nojel rubꞌeyal ojer kan, pero ndichꞌaꞌa chuqaꞌ pa ruwiꞌ ri Cristo y pa qawiꞌ roj, ri roj ralkꞌuaꞌl ri Dios. ³³Pero tikꞌoxomaj kꞌa chuqaꞌ reꞌ: Rix achiꞌaꞌ, tiwojoꞌ ri iwixjayil, achel ndiwojoꞌ iwiꞌ rix, y ri ixaq tuyaꞌ pa ránima chi ri rachijil kin kꞌo ruqꞌij chuwech.

¹Rix alkꞌualaxelaꞌ, ri xe jun ibꞌanun rikꞌin ri Ajaw, tinimaj kitzij ri ite-itataꞌ, porque jariꞌ ri rukꞌulun chi ndibꞌen. ²Tinimrisaj kibꞌiꞌ ri ite-itataꞌ. Jariꞌ ri nabꞌey mandamiento ri kꞌo rusujun kan ri Dios chupan, chin nduyaꞌ chare ri ndiniman ri mandamiento riꞌ, ³porque ri mandamiento riꞌ ndubꞌij: Tanimrisaj kibꞌiꞌ ri ate-atataꞌ, chin keriꞌ utz ndel nojel chawech y kꞌiy junaꞌ ngakꞌaseꞌ chuwech ri rochꞌulew.6:3 Ex. 20:12; Dt. 5:16

⁴Rix teꞌej-tataꞌatz, ma tiyek koyowal ri iwalkꞌuaꞌl,6:4 Col. 3:21 xa kin keꞌikꞌiytisaj y keꞌipixabꞌaj pa ruchojmil chin ndikinimaj rutzij ri Ajaw.

⁵Rix loqꞌon teq samajelaꞌ, tinimaj kitzij ri iwajaw.6:5 Col. 3:22 Rikꞌin nojel iwánima tibꞌanaꞌ ri ndikibꞌij chiwa chi ndibꞌen, y tiyaꞌ pa iwánima chi kin kꞌo kiqꞌij chiwech. Titijaꞌ iqꞌij chin ndibꞌen utz chare ri samaj, kin achel ta rusamaj ri Cristo ri ndibꞌen keriꞌ. ⁶Ma xe ta atoq kꞌo ri iwajaw chiꞌinaqaj utz kixsamej, xe roma ndiwojoꞌ chi utz ngixtzꞌat koma rejeꞌ. Kixsamej kin achel ta rix loqꞌon teq samajelaꞌ chin ri Cristo, tibꞌanaꞌ ri samaj bꞌiꞌin chiwa, achel ndurayij ri Dios chi ndibꞌen. ⁷Rikꞌin nojel iwánima tibꞌanaꞌ ri samaj bꞌiꞌin chiwa chi ndibꞌen, kin achel ta rusamaj ri Ajaw ngixtajin rikꞌin y ma kisamaj ta wineq. ⁸Keriꞌ kixsamej porque iwetaman chi ri Ajaw nduyaꞌ chare nojel samajel ri rajel-rukꞌexel ri samaj ndubꞌen. Keriꞌ ndubꞌen chake ri eloqꞌon roma jun aj rochꞌulew kajaw y chake ri e-libre.

⁹Keriꞌ chuqaꞌ rix kajaw loqꞌon teq samajelaꞌ, utz inoꞌoj tibꞌanaꞌ chake, ma keꞌixibꞌij rikꞌin ndibꞌij chi ndiyaꞌ castigo chake. Ma timestaj chi ri Kajaw rejeꞌ, ja ri Dios kꞌo chikaj, y Iwajaw chuqaꞌ rix, y rijaꞌ junan qawech ndubꞌen chaqe roj qonojel.6:9 Col. 4:1; 1P. 1:17

Ri ruyoꞌon ri Dios chaqe chin ndiqatoꞌ qiꞌ chuwech ri itzel

¹⁰Hermanos, jun chik achike niwojoꞌ nibꞌij chiwa, jareꞌ: Rix ri xe jun ibꞌanun rikꞌin ri Ajaw, tiyaꞌ qꞌij chare chi rikꞌin ri nimalej ruchuqꞌaꞌ, nduyaꞌ ruchuqꞌaꞌ iwánima. ¹¹Tikusaj nojel ri ruyoꞌon ri Dios chiwa chin nditoꞌ iwiꞌ chuwech ri itzel, chin kaw ngixpeꞌeꞌ y ma ngixtzaq chupan ri chꞌakatinik ri xtuyaꞌ ri itzel pa ibꞌey.6:11 Ro. 13:12¹²Porque roj rojkꞌo pa guerra, pero ma wineq ta ri ngebꞌanun guerra chaqe, xa itzel teq espíritu ri ndikibꞌen reinar, ri espíritus ri kꞌo uchuqꞌaꞌ pa kiqꞌaꞌ, ri erajawal ri rochꞌulew ri eꞌukꞌuayon kikꞌaslen ri wineq qꞌequ-qꞌequꞌ kánima, y chuqaꞌ ri itzel teq espíritu ekꞌo pa kaqiqꞌ. ¹³Roma kꞌa riꞌ, tikusaj nojel ri ruyoꞌon ri Dios chiwa chin nditoꞌ iwiꞌ, chin keriꞌ atoq ri espíritus riꞌ ndikitij kiqꞌij chiwij chin ngixkitzeq pa mak, ma ngixtzaq ta y kaw ngixpeꞌeꞌ kan.

¹⁴Kaw kꞌa kixpeꞌeꞌ chiraqen ri Ajaw. Y chin ngixpeꞌeꞌ kaw, ndikꞌatzin chi inabꞌan chik iwiꞌ achel ndubꞌen jun soldado. Rijaꞌ nduxim xerupan chare jun cinturón, chin ndibꞌa pa guerra. Y rix ja ri qetzij richin ri Dios tikusaj achel cinturón chin nditoꞌ iwiꞌ chuwech ri itzel.6:14 Is. 11:5 Jun soldado nduyaꞌ chuqaꞌ jun perepik chꞌichꞌ chorukꞌuꞌx chin ndutoꞌ riꞌ pa guerra.6:14 Is. 59:17 Keriꞌ chuqaꞌ rix, si jumul ndikꞌuaj jun chojmilej kꞌaslen, ri chojmilej kꞌaslen riꞌ ngixrutoꞌ chuwech ri itzel atoq ndubꞌen guerra chiwa. ¹⁵Ri soldado chuqaꞌ kowilej teq xajabꞌ ndukusaj chin ndutoꞌ ri raqen chin ndibꞌa pa guerra. Keriꞌ chuqaꞌ rix, utz-utz tinabꞌaꞌ iwiꞌ chiretamaxik rubꞌeyal ri utzulej teq tzij chin kolotajik chin ngixbꞌa chutzijoxik,6:15 Is. 52:7 kolotajik ri nduyaꞌ uxlanen pa kánima ri wineq. ¹⁶Jun soldado ndukꞌuaj chuqaꞌ jun perepik chꞌichꞌ pa ruqꞌaꞌ ri achoq chare ndutoꞌ riꞌ chikiwech ri flechas kꞌo qꞌaqꞌ chikitzaꞌ ri ngekꞌaq chirij. Y rix rikꞌin ri chꞌaqa chik tobꞌel ndikusaj, ndikꞌatzin chuqaꞌ chi kuqul ikꞌuꞌx rikꞌin ri Dios chin nditoꞌ iwiꞌ chuwech nojel ri ndirajoꞌ ndukꞌeq ri itzel chiwij chin ngixrutzeq pa mak. ¹⁷Ri soldado ndukusaj chuqaꞌ jun casco chin ndutoꞌ rujolon pa guerra. Keriꞌ chuqaꞌ rix, ja ri kolotajik yoꞌon chiwa roma ri Dios tikusaj chin nditoꞌ iwiꞌ chuwech ri itzel. Ri soldado ndukꞌuaj chuqaꞌ espada chin ndubꞌen guerra chare ri yakatajneq chirij. Keriꞌ chuqaꞌ rix tikusaj ri rutzij ri Dios ri kin achel jun espada yoꞌon chiwa roma ri Espíritu Santo chin ngixtiker chirij ri itzel.6:17 He. 4:12; Ap. 1:16¹⁸Rix tikꞌutuj kamelal chare ri Dios y jutaqil tibꞌanaꞌ orar pa ruwiꞌ nojel ri ndiqꞌasaj pa ikꞌaslen, y tiyaꞌ qꞌij chare ri Espíritu Santo chi ndukꞌuaj ibꞌey pa oración. Y chin ndibꞌen keriꞌ, ndikꞌatzin chi rix kꞌes pa ruwiꞌ ri oración y man ta ndikꞌo ikꞌuꞌx6:18 Col. 4:2 chukꞌutuxik ri utz pa kiwiꞌ konojel ri loqꞌolej ralkꞌuaꞌl ri Dios. ¹⁹Tikꞌutuj chuqaꞌ chare ri Dios woma riyin, chi nduyaꞌ tzij pa nuchiꞌ chin niqꞌalajrisaj chikiwech ri wineq ri utzulej teq tzij chin kolotajik ri ma kin ta qꞌalej rubꞌeyal rubꞌanun kan, y man ta nixibꞌij wiꞌ chubꞌixik.6:19 Col. 4:3, 4²⁰Ri Dios yin rutaqon pa rubꞌiꞌ chin nitzijoj rubꞌeyal ri kolotajik riꞌ, y roma keriꞌ nibꞌen, wokami yin ximon rikꞌin cadenas.6:20 Hch. 28:20 Tibꞌanaꞌ orar chi man ta nixibꞌij wiꞌ nitzijoj ri utzulej teq tzij riꞌ, achel bꞌiꞌin chuwa chi nibꞌen.

Ri rukꞌisibꞌel teq tzij ndubꞌij ri Pablo chupan re wuj reꞌ

²¹Ri hermano Tíquico ri tzꞌan niwojoꞌ nderutzijoj chiwa ri rubꞌanun ri nukꞌaslen, y ri ax cheꞌel yinkꞌo. Rijaꞌ xe jun rubꞌanun rikꞌin ri Ajaw y rikꞌin nojel ránima ndubꞌen rusamaj ri Ajaw. ²²Niteq e chin ndiwetamaj ax cheꞌel qabꞌanun, y chin chuqaꞌ nderuyaꞌ ruchuqꞌaꞌ ri iwánima.

²³Ri Tataꞌaj Dios y ri Ajaw Jesucristo kin ta xtikiyaꞌ uxlanen pa iwánima rix hermanos, y kin ta xtikibꞌen chiwa chi ndiwojoꞌ iwiꞌ roma kuqul ikꞌuꞌx rikꞌin ri Ajaw Jesucristo. ²⁴Kin ta xtikꞌojeꞌ ri favor nduyaꞌ ri Dios pa iwiꞌ iwonojel rix ri ndiwojoꞌ ri Qajaw Jesucristo rikꞌin nojel iwánima.