1 Timoteo

Ri nabꞌey wuj rutzꞌibꞌan kan ri apóstol Pablo chare ri Timoteo

Ri Pablo nduteq ruxunaqil ruwech ri Timoteo

¹Riyin Pablo, jun ru-apóstol ri Cristo Jesús, roma keriꞌ xkibꞌen mandar ri Dios Qakolonel y ri Cristo Jesús ri achoq roma qoyobꞌen ri qakolotajik.1:1 Col. 1:27²Nitzꞌibꞌaj e re wuj reꞌ chawa rat Timoteo, ri kin qetzij rat achel nukꞌajol1:2 2Ti. 1:2 roma ataqin ri Cristo. Ri Qatataꞌ Dios y ri Qajaw Cristo Jesús kin ta xtikiyaꞌ ki-favor pa awiꞌ, xtikijoyowaj awech, y xtikiyaꞌ uxlanen pa awánima.

Ma tiqayaꞌ qaxikin kikꞌin tijonik ma eqetzij ta

³Achel ri xinchilabꞌej kan chawa atoq ja nitzꞌen bꞌey chin ngibꞌa pa rochꞌulew Macedonia,1:3 Hch. 20:1, 3 keriꞌ chuqaꞌ nibꞌij chawa wokami, chi kakꞌojeꞌ pa tinamit Éfeso, chin ndabꞌij chake jujun ri ngeyoꞌon juley chik tijonik ri xa ma junan ta rikꞌin ri utzulej teq tijonik ri eqatijon kan roj rikꞌin, chi ma tikibꞌen chik keriꞌ, ⁴y chi ma tikiyaꞌ kixikin rikꞌin tzij1:4 1Ti. 4:7; 2Ti. 2:23; Tit. 1:14 ri ngetzijox pa kiwiꞌ ri tzaq teq wineq ri xekꞌojeꞌ e chochꞌulew ojer, tzij ri eyoꞌon qa ruqꞌa-raqen, y ma jumbꞌey ngekꞌis, ri ndikibꞌen chake ri wineq chi ndikichuquchaꞌ kiꞌ pa ruwiꞌ ri xa ma jun reqalen. Tzij achel riꞌ ma ngerutoꞌ ta ri wineq chin ta más ndikikuqubꞌaꞌ kikꞌuꞌx rikꞌin ri Dios chubꞌanik ri ndirajoꞌ rijaꞌ.

⁵Nojel re nuchilabꞌen chawa chi ndabꞌij, chin kin ta konojel ngeꞌojowan1:5 Ro. 13:8; Gá. 5:14 rikꞌin chꞌajchꞌaj kánima, chin chuqaꞌ ndikinaꞌ pa kánima chi ma jun mak keqalen chuwech ri Dios, y chin qetzij kuqul kikꞌuꞌx rikꞌin ri Dios. ⁶Porque ekꞌo jujun sachineq chikiwech chi jariꞌ ri ndirajoꞌ ri Dios chake, y xa xbꞌa kánima chirij tzij ri ma jun utz ndukꞌen pe. ⁷Rejeꞌ ndikinaꞌ chi etijonelaꞌ chin ri ley xyoꞌox chare ri Moisés, pero ma kikꞌoxoman ta utz-utz ri achike ndikibꞌilaꞌ, y ri tijonik ri ndikibꞌij chi kin keriꞌ, nixta riꞌ kikꞌoxoman utz-utz.

⁸Qetaman chi ri ley1:8 Neh. 9:13; Ro. 7:12 utz, pero ndikꞌatzin chi ndikusex pa ruchojmil. ⁹Porque ri Dios xuyaꞌ pe ri ley ma koma ta ri wineq chojmilej kikꞌaslen, xa xuyaꞌ pe koma ri ngeqꞌajo ruwiꞌ ri ley, koma chuqaꞌ ri ma ngeniman ta, koma ri maneq Dios pa kiwech, ri ngebꞌanun mak, ri ngeqasan ruqꞌij rubꞌiꞌ ri Dios y ma jun reqalen ndikibꞌen chare, ri ndikikamisaj ri kitataꞌ, ri ndikikamisaj ri kiteꞌ, ri ndikikamisaj xa achike na chi wineq.1:9 Ap. 21:8¹⁰Xyoꞌox chuqaꞌ koma ri ndikikꞌamalaꞌ qa kiꞌ xa achoq na ikꞌin chin ndikibꞌen mak, ri achiꞌaꞌ ri ndikikꞌamalaꞌ qa kiꞌ chi achiꞌaꞌ chin ndikibꞌen mak,1:10 1Co. 6:9 ri ngekitzꞌen wineq chin ngekikꞌayij,1:10 Ex. 21:16 ri ngereqꞌon, ri ngeꞌukusan rubꞌiꞌ ri Dios chin ngereqꞌon,1:10 Mt. 5:33-37 y koma chuqaꞌ ri eyakatajneq chirij ri utzulej teq tijonik1:10 2Ti. 4:3 ruyoꞌon ri Dios, ¹¹utzulej teq tijonik ri rukꞌuan riꞌ rikꞌin ri utzulej teq tzij chin kolotajik ri pataneq rikꞌin ri Dios ri kin jabꞌel roruqꞌij. Y ja utzulej teq tzij riꞌ ri ruchilabꞌen ri Dios chuwa chi niyaꞌ rutzijol.1:11 1Ti. 2:7

Ri Pablo ndumatioxij roma xjoyowex ruwech roma ri Dios

¹²Nimatioxij chare ri Qajaw Cristo Jesús ri ruyoꞌon wuchuqꞌaꞌ chin nibꞌen ri rusamaj, porque xunikꞌoj ri wánima, xutzꞌet chi kin xtinbꞌen wi ri rusamaj nduyaꞌ pa nuqꞌaꞌ, y nimatioxij chuqaꞌ chare chi xiruyaꞌ1:12 Col. 1:25 chin nibꞌen ri samaj riꞌ. ¹³Xiruyaꞌ pa rusamaj, maske rubꞌanun kan riyin xinyoqꞌolaꞌ rubꞌiꞌ y xentzeqlebꞌej ri kitaqin rijaꞌ chin xinbꞌen itzel1:13 Hch. 8:3; 9:1 chake; y santienta kichapik xinbꞌen. Pero ri Dios xujoyowaj nuwech, porque ri tiempo riꞌ, kꞌajani tintaqij ri Cristo y pa nutzij riyin, kin utz ri ngitajin rikꞌin. ¹⁴Pero ri Qajaw tzꞌan favor1:14 1Co. 15:10 xuyaꞌ pa nuwiꞌ, y xuyaꞌ pa wánima chi kuqul nukꞌuꞌx rikꞌin y chi nginojowan roma nutaqin ri Cristo Jesús.

¹⁵Y re tzij re nibꞌij chawa, kin qetzij wi, y kin utz chi nditaqix koma konojel wineq: Ri Cristo Jesús xuqaqa chochꞌulew chin xerukal ri eꞌaj mak,1:15 Mt. 9:13; 1Jn. 3:5 y chikikajal rejeꞌ, ja yin ri más santienta numak. ¹⁶Pero maske santienta numak, ri Cristo Jesús xujoyowaj nuwech y xukuy numak. Y keriꞌ ndukusaj chi ejemplo ri nukꞌaslen chin ndukꞌut chikiwech ri wineq ri xketaqin richin, chi layaj eroyobꞌen chin ndikiyaꞌ kan ri kimak y ndikiyaꞌ kánima rikꞌin, chin keriꞌ nduyaꞌ ri kꞌaslen ma ndikꞌis ta chake. ¹⁷Romariꞌ, ¡kin ta jumul xtiyoꞌox ruqꞌij ri Dios ri kin Rey1:17 Sal. 10:16; 45:1, 6 wi chin jumul.1:17 Sal. 145:13; Dn. 2:44; 7:14 Rijaꞌ ma nditzꞌetetej ta y jumul kꞌo rukꞌaslen y kin xe wi rijaꞌ Dios! Amén.

¹⁸Y rat Timoteo, ri kin rat achel nukꞌajol roma ataqin ri Cristo, nichilabꞌej chawa chi tatzijoj nojel re nubꞌiꞌin chawa. Ma tamestaj ri tzij kibꞌiꞌin pa awiꞌ ri hermanos ri ngeqꞌalajrisan ri ndubꞌij pe ri Dios pa kánima.1:18 1Ti. 4:14 Rikꞌin ri tzij riꞌ tawilaꞌ ruchuqꞌaꞌ ri awánima chin ndabꞌen ri utzulej rusamaj ri Dios ri ruyoꞌon chawa chin ndabꞌen. ¹⁹Y chin ndabꞌen ri utzulej samaj riꞌ, ndikꞌatzin chi kuqul akꞌuꞌx rikꞌin ri Dios, y ndikꞌatzin chuqaꞌ chi pa awánima ndanaꞌ chi ma jun mak aweqalen chuwech.1:19 1Ti. 3:9 Ekꞌo jujun ri ma xkiyaꞌ chi ta pa cuenta ri ndubꞌij pe ri kánima, y romariꞌ ma kuqul chi ta kikꞌuꞌx rikꞌin ri Cristo Jesús. ²⁰Keriꞌ xkibꞌen ri Himeneo1:20 2Ti. 2:17, 18 y ri Alejandro. Y romariꞌ xenjech pa ruqꞌaꞌ ri Satanás, chin keriꞌ tiketamaj chi ma tikiyaqꞌ rubꞌiꞌ ri Dios.

Ndikꞌatzin ndibꞌan orar koma konojel wineq

¹Ngatinpixabꞌaj chi pa ruwiꞌ nojel, takꞌutuꞌ chikiwech ri hermanos chi ndikꞌatzin ndikibꞌen orar koma konojel wineq,2:1 Ef. 6:18 chi tikꞌutux chare ri Dios pa ruwiꞌ ri ndikꞌatzin chake, chi tikꞌutux ri ru-favor ri Dios pa kiwiꞌ y timatioxix nojel chare ri Dios, ²y tibꞌan chuqaꞌ orar koma ri reyes y koma konojel ri kꞌo uchuqꞌaꞌ pa kiqꞌaꞌ, chin keriꞌ ndikꞌojeꞌ uxlanen chiqakajal roj wineq y ma jun oyowal xtibꞌanatej, chin ma cuesta ta ndiqakꞌuaj jun loqꞌolej kꞌaslen chuwech ri Dios y chikiwech ri wineq. ³Riꞌ kin utz wi y ndiqaꞌ chuwech ri Dios2:3 Ro. 12:2 ri Qakolonel. ⁴Porque rijaꞌ ndirajoꞌ chi konojel wineq ngekolotej2:4 Jn. 3:16, 17 y ndiketamaj utz-utz ri qetzij. ⁵Porque xaxe jun Dios kꞌo.2:5 Ro. 3:30 Y xaxe Jun ri ndibꞌanun chaqe roj wineq chi ma jun qamak ndiqeqalej chuwech ri Dios y keriꞌ kꞌo cheꞌel ngojbꞌeqaqa chuwech. Y ri Jun ri ndibꞌanun riꞌ, ja ri Cristo Jesús, ri aj chikaj ri xuꞌok wineq chiqakajal. ⁶Rijaꞌ xuyaꞌ ri rukꞌaslen pa kamik chin xutaj2:6 Ef. 1:7 ri qamak roj qonojel wineq, y ri kamik riꞌ ndukꞌut chi xuqaqa ri tiempo2:6 Gá. 4:4 ri rubꞌanun pe ruwech ri Dios chin xuqꞌalajrisaj chi ri rurayibꞌel ja ri ngekolotej ri wineq. ⁷Y ri Dios xiruchaꞌ chin niyaꞌ utzulej rutzijol chi rijaꞌ ndirajoꞌ chi ri wineq ngekolotej, y xiruchaꞌ chuqaꞌ chin xinok apóstol. Kin qetzij ri nibꞌij, y ma ngireqꞌon ta. Xiruchaꞌ chin ngentijoj ri wineq ma israelitas ta2:7 Hch. 9:15 chin ndikitaqij ri Cristo Jesús y ndikinimaj ri qetzij.

Ri ndikꞌatzin ndikibꞌen ri achiꞌaꞌ y ri ixoqiꞌ atoq ndikimal kiꞌ pa rubꞌiꞌ ri Dios

⁸Niwojoꞌ chi ri achiꞌaꞌ tikibꞌanaꞌ orar xa achike na chi lugar.2:8 Mal. 1:11 Rikꞌin chꞌajchꞌaj kánima tikijotobꞌaꞌ kiqꞌaꞌ chikaj atoq ndikibꞌen orar, y ma jun oyowal kiyakon pa kánima chikij chꞌaqa chik. ⁹Y keriꞌ chuqaꞌ ri ixoqiꞌ, atoq ndikiweq kiꞌ, kekikusaj tzieq ri ndutzꞌapij ri ki-cuerpo.2:9 1P. 3:3 Tikinojij utz-utz achike chi tzieq rukꞌulun ndikikusaj, y ja ta ri más rukꞌulun ri ndikikusaj. Y ma ndikibꞌen rukꞌojlen kiwiꞌ xe chin ndikibꞌananelaꞌ, y atoq ndikiweq kiꞌ, ma tibꞌa kánima chirij rukusaxik achikejeꞌ ebꞌanun chare qꞌanapueq o perla, nixta kekikusalaꞌ tzieq santienta kajel. ¹⁰Pa rukꞌexel riꞌ, tikiweqaꞌ ri kikꞌaslen rikꞌin ndikibꞌen ri utz2:10 1P. 3:4 chake chꞌaqa chik, achel rukꞌulun chi ndikibꞌen ri ixoqiꞌ ri kꞌo ruqꞌij ri Dios pa kiwech. ¹¹Y nibꞌij chuqaꞌ chake chi atoq ndikimal kiꞌ kikꞌin ri eralkꞌuaꞌl ri Dios chin ngetijox, ma jun kechꞌaꞌa apu2:11 1Co. 14:34 y keniman. ¹²Porque ma niyaꞌ ta qꞌij chi ri ixoqiꞌ ngekitijoj o ndiqꞌax kitzij pa kiwiꞌ ri achiꞌaꞌ. Ma jun achike tikibꞌij apu atoq ekꞌo chikikajal ri ndikimal kiꞌ pa rubꞌiꞌ ri Dios. ¹³Porque ri Dios nabꞌey xubꞌen ri Adán, y kꞌajariꞌ xubꞌen ri Eva. ¹⁴Y chuqaꞌ ma ja ta ri Adán ri xchꞌakatix, xa ja ri ixaq2:14 2Co. 11:3 ri xchꞌakatix, y keriꞌ xuqꞌej ri mandamiento xuyaꞌ ri Dios. ¹⁵Pero ri ixoqiꞌ kin ngekolotej wi, roma ngeꞌalan, si jumul kuqul kikꞌuꞌx rikꞌin ri Dios, si ngeꞌojowan, si ndikikꞌuaj jun loqꞌolej kꞌaslen, y si ndikibꞌen ri rukꞌulun chi ndikibꞌen.

Ri kꞌaslen ndikꞌatzin ndikikꞌuaj ri ndikajoꞌ ngeꞌok ukꞌuey bꞌey chikiwech ri hermanos

¹Re nibꞌij chawa kin qetzij wi y utz chin nditaqix: Si jun hermano ndurayij ndok ukꞌuey bꞌey3:1 Hch. 20:28; Tit. 1:7 chikiwech ri ndikimal kiꞌ pa rubꞌiꞌ ri Dios, kin utz samaj ri ndurayij. ²Pero ri ukꞌuey bꞌey, ndikꞌatzin chi kereꞌ ndiqꞌalajin pa rukꞌaslen: Man ta jun itzel ndibꞌix chirij ri kꞌaslen rukꞌuan, xaxe jun rixjayil kꞌo, retaman nduqꞌet riꞌ rikꞌin ri ngerubꞌanalaꞌ, kin ndikaney runoꞌoj, kin utz nditzꞌetetej rukꞌaslen koma chꞌaqa chik, jabꞌel ndukꞌen apu kiwech pa rachoch ri epataneq jukꞌan chik apeꞌ, jabꞌel nditiker nduyaꞌ tijonik pa ruwiꞌ ri rutzij ri Dios, ³nditiker nduqꞌet riꞌ chuwech rutijik yaꞌ, ma chꞌeyonel ta, kin utz runoꞌoj, maneq oyowal ndirajoꞌ y ma ndijamem ta chirij méra. ⁴Ndikꞌatzin chuqaꞌ chi utzulej ukꞌuey bꞌey chikiwech ri aj pa rachoch, y chi ri eralkꞌuaꞌl ndikinimaj rutzij3:4 Tit. 1:6 y kikꞌuan jun chojmilej kꞌaslen. ⁵Porque si jun hermano ma retaman ta ndukꞌuaj utz kibꞌey ri aj pa rachoch, ¿nditiker kami ngeruchajij ri eralkꞌuaꞌl ri Dios? Maneq. ⁶Ma rukꞌulun ta chi ri ukꞌuey bꞌey, jun hermano ri kꞌa jubꞌaꞌ ok tiempo tutaqij ri Jesucristo, ma kꞌateꞌ tunimrisaj riꞌ y keriꞌ ndukꞌulwachij ri castigo xukꞌulwachij ri itzel roma xunimrisaj riꞌ. ⁷Ri ukꞌuey bꞌey, ndikꞌatzin chi utz rukꞌaslen chikiwech ri wineq3:7 Hch. 6:3 ma kitaqin ta ri Cristo, ma kꞌateꞌ tibꞌanatej chi ndilitej jun itzel pa rukꞌaslen y nditzaq pa ruqꞌaꞌ ri itzel.

Ri achike chi kꞌaslen ndikꞌatzin ndikikꞌuaj ri diáconos

⁸Y keriꞌ chuqaꞌ ri diáconos, jareꞌ rubꞌeyal kikꞌaslen ndikꞌatzin ndikikꞌuaj: Ndikꞌatzin chi chojmilej kikꞌaslen, ma kaꞌiꞌ ta ruwech kitzij ndikiyaꞌ, ndikiqꞌet kiꞌ chuwech rutijik yaꞌ, y ma bꞌaneq ta kánima chirij rubꞌanik itzel teq achike chuchꞌakik méra. ⁹Ndikꞌatzin chuqaꞌ chi rikꞌin chꞌajchꞌaj kánima3:9 2Ti. 1:3 ndikikuqubꞌaꞌ kikꞌuꞌx rikꞌin ri utzulej teq tijonik ri ndichꞌaꞌa pa ruwiꞌ ri Cristo, tijonik ri ruqꞌalajrisan ri Dios chiqawech chupan re tiempo reꞌ. ¹⁰Ri ngeꞌok diáconos, nabꞌey ndikꞌatzin chi tzꞌeton pe achike chi kꞌaslen3:10 Tit. 1:6, 7 kikꞌuan, y si ma jun achike ndilitej chikij, utz ndikitzꞌen ri samaj. ¹¹Keriꞌ chuqaꞌ ri ixoqiꞌ3:11 Re ixoqiꞌ reꞌ ja ri ngeꞌok diaconisas o ja ri kixjayil ri diáconos. ndikꞌatzin chi kereꞌ ndiqꞌalajin pa kikꞌaslen: Kikꞌuan jun chojmilej kꞌaslen chikiwech ri wineq, man ta chuqaꞌ eꞌixokiꞌ ri ma ndikiqꞌet ta kiꞌ rikꞌin ri kaqꞌ chikij wineq,3:11 Sal. 15:3; Pr. 10:18; Jer. 9:4 ketaman ndikiqꞌet kiꞌ rikꞌin ri ngekibꞌanalaꞌ, y kuqul kikꞌuꞌx ri hermanos kikꞌin chi pa ruchojmil ndikibꞌen ri samaj. ¹²Ri diácono, ndikꞌatzin chi xaxe jun rixjayil kꞌo, y ndikꞌatzin chi utzulej ukꞌuey bꞌey chikiwech ri aj pa rachoch. ¹³Porque ri diáconos ri utz kibꞌanun pe chare ri samaj, kin kꞌo keqalen chikiwech ri eralkꞌuaꞌl ri Dios, y más kuqul kikꞌuꞌx chin ndikitzijoj chake ri wineq chi tikitaqij ri Cristo Jesús.

Ri reqalen ri qataqin

¹⁴Timoteo, riyin kin nuyoꞌon pa wánima chi ngatentzꞌetaꞌ yan. Pero nitzꞌibꞌaj e re wuj reꞌ chawa, ¹⁵chin keriꞌ si ma xkibꞌeqaqa yan ta, awetaman ri achike chi kꞌaslen ndikꞌatzin ndakꞌuaj chikiwech ri eralkꞌuaꞌl ri Dios. Porque ja rejeꞌ ri rutinamit ri Kꞌaslik Dios, y ja rejeꞌ ri etemeyon richin ri qetzij, kin achel jun ruxeꞌ3:15 2Ti. 2:19 jay nditemen richin ri jay. ¹⁶Y kin qetzij chi santienta reqalen ri qataqin, ri ewan pe rubꞌeyal ojer kan, pero wokami qꞌalajrisan chiqawech roma ri Dios pa ruwiꞌ ri Cristo. Y jareꞌ ri rukꞌuꞌx:

Ri Cristo xqꞌalajrisex chiqawech rikꞌin jun cuerpo achel qa-cuerpo roj wineq.

Xqꞌalajrisex chiqawech roma ri Espíritu Santo chi kin chojmilej ri rukꞌaslen.

Xtzꞌetetej koma ángeles.

Xyoꞌox utzulej rutzijol chake ri ma israelitas ta,

Xtaqix koma wineq chochꞌulew,

Xukꞌuꞌex e3:16 Hch. 1:9 y xkꞌan ruwech chikaj rikꞌin nimalej ruqꞌij.

Ri Pablo ndupixabꞌaj ri Timoteo chi tukꞌuaj jun chojmilej kꞌaslen

¹Pero kin qꞌalej ri rubꞌiꞌin pe ri Espíritu Santo chi chupan re rukꞌisibꞌel tiempo rojkꞌo, ekꞌo ri ndikiyaꞌ kan rokacheq chuwech ri qetzij tijonik ri xkuqeꞌ kikꞌuꞌx rikꞌin. Xa ngekinimaj tzij epataneq kikꞌin espíritu ri ngechꞌakatin kichin y tijonik4:1 2P. 2:1 epataneq kikꞌin itzel teq espíritu. ²Ri wineq ri ndikiyaꞌ ri tijonik riꞌ xa kaꞌiꞌ kipalej, xa echꞌakatinelaꞌ y kikowirisan ri kánima, romariꞌ ma jun achike ndikinaꞌ chare ri itzel teq achike ngetajiyaj4:2 Ef. 4:19 rikꞌin. ³Ndikibꞌij chi xajan ngekꞌuleꞌ ri wineq, ndikibꞌij chuqaꞌ chi xajan ngekꞌuxeꞌ jujun achike ri ebꞌanun roma ri Dios chin rikꞌin matioxinik ngekꞌux4:3 Gn. 1:29; 9:3; Ec. 5:18 koma ri ketaman utz-utz ri qetzij y kitaqin ri Ajaw. ⁴Porque nojel ri ebꞌanun roma ri Dios chin ngekꞌuxeꞌ kin utz wi, y maneq roma man ta ndikꞌuxeꞌ atoq ndimatioxix chare rijaꞌ. ⁵Porque ri tzꞌibꞌan chupan ri rutzij ri Dios y ri matioxinik ri ndiqayaꞌ chare pa ruwiꞌ ri achike ndiqakꞌux, jariꞌ ngebꞌanun chꞌajchꞌaj chare ri ndiqakꞌux.

⁶Y rat Timoteo, si ngaꞌatijoj ri hermanos rikꞌin ri tijonik nitzꞌibꞌaj e chawa, kin ndiqꞌalajin chi rat jun utzulej rusamajel ri Cristo Jesús, ri kin kꞌiyineq pa awánima ri utzulej teq tijonik awoqan pe pa akꞌaslen y kꞌiyineq chuqaꞌ pa awánima ri utzulej teq tzij ri rubꞌanun chawa chi akuqubꞌan akꞌuꞌx rikꞌin ri Cristo Jesús.

⁷Ma tayaꞌ axikin kikꞌin tzij4:7 1Ti. 1:4; 2Ti. 2:23 eyoꞌon qa ruqꞌa-raqen ri ndikiqasaj ruqꞌij ri Dios, ri xa rijilej teq ixoqiꞌ etzijoyon pe. Xa kin tatijaꞌ aqꞌij chi qꞌij-qꞌij ndakꞌuaj jun utzulej kꞌaslen chuwech ri Dios. ⁸Porque ri ndabꞌen ejercicio qꞌij-qꞌij ndukꞌen pe jubꞌaꞌ utz chare ri a-cuerpo. Pero ri ndakꞌuaj jun utzulej kꞌaslen chuwech ri Dios kꞌo utz ndukꞌen pe chare nojel akꞌaslen, porque kꞌo utz ndukꞌen pe chare ri akꞌaslen chireꞌ wokami y chare ri akꞌaslen nduyaꞌ ri Dios más chiqawech apu. ⁹Re nibꞌij chawa kin qetzij wi, y kin utz wi chi nditaqix koma konojel wineq.4:9 1Ti. 1:15¹⁰Romariꞌ ndiqatij qaqꞌij y ndiqakosisaj qiꞌ chin ndiqabꞌen rusamaj ri Dios. Porque qakuqubꞌan qakꞌuꞌx4:10 1Ti. 6:17 rikꞌin ri Kꞌaslik Dios chi nduyaꞌ chaqe ri qoyobꞌen. Xe wi rijaꞌ ri ndikolo kichin konojel wineq, y ja ri ngetaqin richin ri ngerukal.

¹¹Kaꞌatijoj ri hermanos rikꞌin nojel reꞌ, y tabꞌij chake chi tikibꞌanaꞌ. ¹²Man ta jun ri xtubꞌen chawa chi ma jun aweqalen4:12 1Co. 16:11 roma kꞌa rat kꞌajol. Pero chin ma tibꞌanatej keriꞌ, katok ejemplo chikiwech ri hermanos rikꞌin ri tzij ngeꞌel pa achiꞌ, rikꞌin chuqaꞌ akꞌuan jun chojmilej kꞌaslen, rikꞌin ngatojowan, rikꞌin kuqul akꞌuꞌx rikꞌin ri Dios, y rikꞌin akꞌuan jun chꞌajchꞌaj kꞌaslen. ¹³Tatijaꞌ aqꞌij chi jumul ndabꞌen leer ri rutzij ri Dios chikiwech ri hermanos atoq ndikimal kiꞌ, kaꞌapixabꞌaj y kaꞌatijoj. Keriꞌ tabꞌanaꞌ jumul hasta kꞌa kibꞌeqaqa na awikꞌin. ¹⁴Tabꞌanaꞌ cuenta ri loqꞌolej sipanik ruyoꞌon ri Espíritu Santo chawa, sipanik ri xqꞌalajrisex pe roma ri Dios chin ndiyoꞌox chawa4:14 1Ti. 1:18 y kin xyoꞌox wi atoq ri eꞌukꞌuey bꞌey chikiwech ri rutinamit ri Dios xkiyaꞌ kiqꞌaꞌ pa awiꞌ.4:14 2Ti. 1:6

¹⁵Tatijaꞌ aqꞌij chi jumul ndabꞌen nojel reꞌ, chin ndiqꞌalajin chikiwech konojel chi kꞌiyineq ri akꞌaslen chiraqen ri Ajaw. ¹⁶Tachajij ri akꞌaslen y tachajij chuqaꞌ ri tijonik ndayaꞌ. Jumul keriꞌ tabꞌanaꞌ, porque si keriꞌ ndabꞌen, ma xe ta rat ngakolotej, xa kin ngekolotej chuqaꞌ ri ngeꞌakꞌaxan awichin.

Ri Pablo ndubꞌij chare ri Timoteo chi pa rubꞌeyal tipixabꞌan

¹Si jun hermano rijilej chi ok y ma ja ta ndajin rikꞌin, ma tachꞌolij, xa relik tapixabꞌaj, achel kin ta chare atataꞌ ngachꞌaꞌa keriꞌ. Y keriꞌ chuqaꞌ ri kꞌajolaꞌ, kaꞌapixabꞌaj achel kin ta achaqꞌ-animal awiꞌ kikꞌin keriꞌ. ²Ri hermanas erijilej chi ok, kaꞌapixabꞌaj achel kin ta chare ateꞌ ngachꞌaꞌa keriꞌ. Y ri xtaniꞌ, rikꞌin chꞌajchꞌaj awánima kaꞌapixabꞌaj, achel ta chake eꞌawanaꞌ ngachꞌaꞌa keriꞌ.

³Takꞌutuꞌ chi ndikꞌatzin ngetoꞌox ri malkaꞌ teq ixoqiꞌ ri kin eꞌintéra chik y ma jun ndibꞌanun cuenta kichin. ⁴Pero si jun malkaꞌ ixaq ekꞌo ral o riy, ja rejeꞌ keꞌilin richin. Porque ja rejeꞌ ri nabꞌey ndikꞌatzin ndikibꞌen ri utz chake ri kite-kitataꞌ, chin ndikitzolij jubꞌaꞌ nojel ri utz bꞌanun pe chake5:4 Mt. 15:4 koma ri kite-kitataꞌ. Keriꞌ ndikꞌatzin ndikibꞌen porque jariꞌ ri ndiqaꞌ chuwech ri Dios. ⁵Pero ri malkaꞌ ixaq ri ma jun roxpochel nditoꞌon richin, royobꞌen rutoꞌik rikꞌin ri Dios y chi chaqꞌaꞌ chi paqꞌij5:5 Lc. 2:37 ndubꞌen orar y jumul ndukꞌutuj chare ri Dios ri ndikꞌatzin chare. ⁶Pero ri malkaꞌ ixaq ri ndujech riꞌ pa ruqꞌaꞌ ri rayinik chin ri ru-cuerpo, maske kꞌo rukꞌaslen, xa kamineq5:6 Ap. 3:1 chuwech ri Dios. ⁷Rat tabꞌanaꞌ mandar chake konojel chi tikinimaj nojel reꞌ, chin keriꞌ nixta jun itzel achike xtilitej chirij ri kikꞌaslen. ⁸Ndikꞌatzin chi jun ngerutoꞌ ri roxpochel, pero más ndikꞌatzin chi ngerilij ri ekꞌo pa rachoch, porque si jun ma nduyaꞌ ta ri ndikꞌatzin chake, xa más itzel rukꞌaslen ke chuwech jun ri ma rutaqin ta ri Ajaw y xa ruyoꞌon kan roracheq chuwech ri Dios.

⁹Ri malkaꞌ teq ixoqiꞌ ri rukꞌulun chi nditzꞌibꞌex kibꞌiꞌ chupan ri lista5:9 1Ti. 5:3 chin ngeꞌilix koma ri hermanos, ja ri ixoqiꞌ ri más 60 kijunaꞌ y xe ok jun kachijil xkꞌojeꞌ, ¹⁰ri etaman chikij chi ekibꞌanun ri utz achel reꞌ: Ekikꞌiytisan jabꞌel ri kal, xkikꞌen apu kiwech pa kachoch5:10 Hch. 16:15; He. 13:2; 1P. 4:9 ri epataneq jukꞌan chik apeꞌ, kichꞌajloꞌon pe kaqen5:10 Gn. 18:4; 19:2; Jn. 13:5 ri loqꞌolej teq ralkꞌuaꞌl ri Dios, ekitoꞌon ri ndikiqꞌasaj kꞌayew, y nojel ruwachinel utz kibꞌanun pe.

¹¹Pero ri malkaꞌ ri kꞌa ma eꞌintéra ta ixoqiꞌ, ma titzꞌibꞌex kibꞌiꞌ chupan ri lista, porque rejeꞌ maske ndikiyaꞌ kitzij chi ndikibꞌen rusamaj ri Cristo, pero xa kꞌateꞌ ruwech ndikitzolij kitzij, roma ndiyakatej pe kirayinik chin ngekꞌuleꞌ chik jumbꞌey. ¹²Y romariꞌ xtiqaqa castigo pa kiwiꞌ, roma ma xkibꞌen ta cumplir ri kitzij xkiyaꞌ pa nabꞌey.5:12 He. 6:4, 6¹³Y ri malkaꞌ teq ixoqiꞌ riꞌ, xa ngerutzꞌen chuqaꞌ qꞌoral, xe torowen ndikiyal chi teq jay. Y ma xe ta ngeqꞌorayaj, xa ja man jaꞌ teq tzij ngekibꞌij chikij wineq, ndikitzeq kiꞌ5:13 2Ts. 3:13 xa apejeꞌ na y ndikibꞌilaꞌ tzij ri ma rukꞌulun ta chi ndikibꞌij. ¹⁴Romariꞌ, ngenpixabꞌaj ri malkaꞌ ri kꞌa ma eꞌintéra ta ixoqiꞌ chi kekꞌuleꞌ5:14 1Co. 7:9 chik jumbꞌey, kekikꞌiytisaj kal. Kin ta utz ndikibꞌen cuenta ri kachoch, chin keriꞌ ma ndikiyaꞌ jun roma chake ri itzel ngetzꞌeto kichin ri eralkꞌuaꞌl ri Dios, chi ngechꞌaꞌa itzel teq tzij chikij.5:14 Tit. 2:8¹⁵Porque ekꞌo malkaꞌ teq ixoqiꞌ ri xkiyaꞌ kan ri Cristo y koqan yan chik ri ndirajoꞌ ri Satanás.

¹⁶Si jun hermana ekꞌo malkaꞌ ixoqiꞌ pa ru-familia, ja rijaꞌ tilin kichin. Y keriꞌ ma ndiyoꞌox ta eqaꞌ pa kiwiꞌ ri eralkꞌuaꞌl ri Dios, chin keriꞌ ri hermanos ngetiker ngekitoꞌ ri chꞌaqa chik malkaꞌ ixoqiꞌ ri qetzij ma jun ngeꞌilin kichin.

¹⁷Ri eꞌukꞌuey bꞌey chikiwech ri hermanos ri ndikibꞌen ri samaj pa rubꞌeyal, kin rukꞌulun chi ndinimrisex kibꞌiꞌ y ndiyoꞌox ri ndikꞌatzin chake5:17 1Co. 9:10; Gá. 6:6 koma ri hermanos. Y más ndikꞌatzin ndibꞌan keriꞌ chake ri ngetzijon ri rutzij ri Dios y ndikiyaꞌ tijonik pa ruwiꞌ. ¹⁸Porque chupan ri rutzij ri Dios kereꞌ tzꞌibꞌan kan: Ma tayaꞌ ruwosal ri wakx atoq ndupetzelaꞌ ri trigo chin ndipochꞌotej, chin kꞌo cheꞌel ndukꞌux5:18 Dt. 25:4 jubꞌaꞌ. Y ndubꞌij chuqaꞌ: Jun samajel rukꞌulun chi nditoj5:18 Dt. 24:14; Lc. 10:7 roma ri samaj ndubꞌen.

¹⁹Ma tataqij ri sujunik ndibꞌan chirij jun ukꞌuey bꞌey kichin ri hermanos, si ma ekaꞌi-oxiꞌ ta5:19 Dt. 19:15 ri junan ndikibꞌij chirij.

²⁰Ri ukꞌuey bꞌey kichin ri hermanos ri ma nduyaꞌ ta kan ri mak, chikiwech konojel tabꞌij chare5:20 Tit. 1:13 chi ma utz ta ri ndajin rikꞌin, chin keriꞌ ri chꞌaqa chik ndikixibꞌij kiꞌ.5:20 Dt. 13:11

²¹Y chuwech ri Dios y ri Cristo Jesús y chikiwech ri ángeles echaꞌon, nibꞌij chawa chi tabꞌanaꞌ nojel ri nubꞌiꞌin e chawa, ma nabꞌey tanojij jun achike chirij jun si ma awetaman ta chaj ri bꞌanatajneq, y junan kiwech kaꞌatzꞌetaꞌ konojel. ²²Ma xetal chaꞌanin tayaꞌ aqꞌaꞌ pariꞌ jun hermano chin ndok pa rusamaj ri Dios, si ma awetaman ta achike rubꞌanun rukꞌaslen. Ma kꞌateꞌ ndajin rikꞌin mak, y jajun rat ndaweqalej ri rumak.5:22 2Jn. 11 Xa kin tachajij awiꞌ, chin keriꞌ jabꞌel chꞌajchꞌaj ri akꞌaslen.

²³Y roma jutaqil ngayawej, ma xe raxyaꞌ tatij, xa tatijaꞌ jubꞌaꞌ vino roma ri qꞌaxon pamaj ndabꞌen.

²⁴Ekꞌo jujun ri kin ndiqꞌalajin wi ri mak5:24 Tit. 3:11 ngetajin rikꞌin atoq kꞌajani tinikꞌox ri kikꞌaslen chin ta ngeyoꞌox pa rusamaj ri Dios, pero ekꞌo jujun ri ma ndiqꞌalajin yan ta ri mak kibꞌanun, kꞌa atoq ndinikꞌox na utz-utz ri kikꞌaslen. ²⁵Keriꞌ chuqaꞌ ekꞌo jujun ri kin ndiqꞌalajin ri utz ngetajin rikꞌin, y ekꞌo jujun ri ma ndiqꞌalajin yan ta ri utz ngetajin rikꞌin, kꞌa atoq ndinikꞌox na utz-utz ri kikꞌaslen. Pero maneq cheꞌel man ta xtiqꞌalajin pe.

¹Konojel ri loqꞌon teq samajelaꞌ6:1 Tit. 2:9 ri kitaqin ri Cristo, tikiyaꞌ pa kánima chi ri ekajaw kin nim kiqꞌij, chin ma tiyoqꞌotej rubꞌiꞌ ri Dios,6:1 Is. 52:5 nixta tiyoqꞌotej ri tijonik ndiqayaꞌ. ²Ri loqꞌon teq samajelaꞌ ri kitaqin ri Cristo ri ekꞌo kajaw ri kitaqin chuqaꞌ ri Cristo, ma tikinojij chi ma ndikꞌatzin ta ndikinimrisaj kiqꞌij ri kajaw roma ki-hermanos kiꞌ. Pa rukꞌexel riꞌ, más utz tikibꞌanaꞌ chare ri samaj,6:2 Col. 3:22, 23 porque ri achoq chake kꞌo utz ndukꞌen pe ri kisamaj, kin kitaqin ri Cristo y eꞌojowan chuqaꞌ roma rijaꞌ. Y rat Timoteo, kaꞌatijoj y kaꞌapixabꞌaj ri hermanos rikꞌin nojel reꞌ.

Ri qetzij bꞌeyomal

³Xa achike na jun ri ndukꞌut jun chik tijonik6:3 1Ti. 1:10 ri ma junan ta rubꞌeyal rikꞌin ri utzulej tijonik chin ri Qajaw Jesucristo, y ma junan ta chuqaꞌ rubꞌeyal rikꞌin ri tijonik ri ndukꞌen pe utzulej kꞌaslen ri ndiqaꞌ chuwech ri Dios, ⁴xa ruyon chuwech nim ndunaꞌ y ma jun rukꞌoxoman6:4 1Co. 8:2 pa ruwiꞌ ri ngerubꞌilaꞌ. Xa kin ndiqaꞌ chuwech ndutaqꞌ kiwech wineq pa ruwiꞌ tzij ri ma jun utz ndukꞌen pe, tzij ri xa ndukꞌen pe chi ri wineq itzel ndikinaꞌ roma utz kibꞌanun chꞌaqa chik, ndukꞌen pe chuqaꞌ oyowal, ndukꞌen pe chi ri wineq ngechꞌaꞌa itzel chirij jun chik, ndukꞌen pe chi ndinojix itzel teq achike chirij jun chik, ⁵y ndukꞌen pe chi jutaqil kꞌo oyowal chikikajal wineq. Ri ngekꞌutu jun chik tijonik, xa kin suqꞌurneq kinoꞌoj6:5 Ro. 1:28; 2Ti. 3:8 roma ri itzel ngekinojilaꞌ,6:5 Tit. 1:15 y kiyoꞌon kan rokacheq chuwech ri qetzij, y xa ndikinojij chi rikꞌin ri tijonik ndikiyaꞌ, kin kꞌo cheꞌel ndikibꞌen méra chin ngebꞌeyomer. ⁶Pero ri más nim bꞌeyomal ja ri akꞌuan jun loqꞌolej kꞌaslen y ngakikot rikꞌin ri achajin.6:6 Sal. 37:16, 17⁷Porque atoq xojalex, ma jun achike qakꞌamon pe. Y atoq ngojken e, ma jun chuqaꞌ achike ngojtiker ndiqakꞌuaj.6:7 Job 1:21; Sal. 49:17⁸Pero si kꞌo achike ndiqakꞌux y kꞌo chuqaꞌ qatziaq6:8 Gn. 28:20 chin ndiqakusaj, qojkikot rikꞌin riꞌ. ⁹Pero ri ndikirayij ngeꞌok bꞌeyomaꞌ,6:9 Pr. 12:27 ngeqaqa pa ruqꞌaꞌ ri itzel teq rayinik, y jariꞌ ndiximo kichin, y chuqaꞌ ngetzaq pa ruqꞌaꞌ ri jalajaj teq achike ri nditaqchiꞌin kichin, ri ndusuqꞌ kinoꞌoj y ndukꞌen pe kꞌayew chake. Ri itzel teq rayinik riꞌ, ndubꞌen chake ri wineq chi ndikꞌis kiqꞌij y ngerukꞌuaj chupan ri kamik ri ma ndikꞌis ta. ¹⁰Porque ri ndibꞌa awánima chirij méra ndukꞌen pe nojel ruwech itzel teq achike. Y ekꞌo jujun roma ngejamem chirij méra, xeꞌel e pa rubꞌey6:10 Stg. 5:19 ri Ajaw, y kiyon chikiwech xkiwulij santienta qꞌaxomal chikij.

Ri Pablo ndupixabꞌaj ri Timoteo

¹¹Pero rat Timoteo, rat jun achi rusamajel ri Dios. Katanimej chuwech nojel ri ngetajin rikꞌin rejeꞌ. Takꞌuaj jun chojmilej kꞌaslen, tabꞌanaꞌ ri ndiqaꞌ chuwech ri Dios, takuqubꞌaꞌ más akꞌuꞌx rikꞌin rijaꞌ, katojowan, kakochꞌon y loqꞌ awánima tabꞌanaꞌ chake konojel. ¹²Rikꞌin ri kuqubꞌel kꞌuxlaj kꞌo pa awánima, tatijaꞌ aqꞌij chi jumul6:12 2Ti. 4:7 ndabꞌen pa akꞌaslen ri ndubꞌij ri rutzij ri Dios. Kin tiqꞌalajin utz-utz chi kꞌo chik awikꞌin6:12 Fil. 3:12 ri kꞌaslen ma ndikꞌis ta, porque chin riꞌ xatoyox roma ri Dios. Y kin chikiwech ekꞌiy testigos xabꞌij chi akuqubꞌan akꞌuꞌx rikꞌin ri Ajaw. ¹³Y chuwech ri Dios ri ndiyoꞌon rukꞌaslen nojel y chuwech ri Cristo Jesús6:13 1Ti. 5:21 ri xubꞌij chi rukuqubꞌan rukꞌuꞌx rikꞌin ri Dios atoq kꞌo chuwech ri Poncio Pilato, nibꞌij chawa: ¹⁴Tabꞌanaꞌ nojel ri ndubꞌij ri Dios rikꞌin jun chꞌajchꞌaj kꞌaslen, ma ndayaꞌ jun roma chi ndibꞌix itzel achike chawij.6:14 1Ts. 3:13 Keriꞌ tabꞌanaꞌ jumul hasta kꞌa nduruqꞌalajrisaj chi na riꞌ ri Qajaw Jesucristo. ¹⁵Rijaꞌ nduqꞌalajrisaj riꞌ atoq nduqaqa ri qꞌij rubꞌanun ruwech ri Dios, ri Dios ri kin jabꞌel roruqꞌij y kin xe wi rijaꞌ kꞌo pa ruwiꞌ nojel. Ja rijaꞌ ri nimalej Rey pa kiwiꞌ konojel teq reyes. Y ja rijaꞌ ri nimalej Ajaw pa kiwiꞌ konojel teq ajaw. ¹⁶Y ja rijaꞌ ri jumul kꞌo rukꞌaslen, y kꞌo pa jun lugar apeꞌ nojel ndiyikꞌan, apeꞌ nixta jun wineq nditiker ndeqaqa, y chuqaꞌ nixta jun wineq tzꞌeteyon richin6:16 Ex. 33:20; Dt. 4:12; Jn. 1:18 y nixta xtitzꞌetetej. ¡Ja rijaꞌ ri tinimrisex rubꞌiꞌ y pa ruqꞌaꞌ rijaꞌ tikꞌojeꞌ jumul nojel uchuqꞌaꞌ! Amén.

¹⁷Tachilabꞌej chake ri kꞌo kibꞌeyomal wokami chochꞌulew chi ma tikinimrisaj kiꞌ, nixta tikikuqubꞌaꞌ kikꞌuꞌx rikꞌin ri bꞌeyomal kichajin, porque ri bꞌeyomal riꞌ xa ndikꞌis. Tabꞌij chake chi tikikuqubꞌaꞌ kikꞌuꞌx rikꞌin ri Dios ri nduyaꞌ nojel ruwech achike chaqe chin ndikikot ri qánima. ¹⁸Tabꞌij chake chi tikibꞌanaꞌ ri utz, chi tikikusaj ri kibꞌeyomal chin ngekitoꞌ chꞌaqa chik, ma tikikꞌekꞌej ndikiyaꞌ ri kichajin, y ma tikichꞌiquj kiꞌ chin ngetoꞌon. ¹⁹Porque si keriꞌ ndikibꞌen, ndikinabꞌeyirisaj apu utzulej bꞌeyomal chikaj, y ndikibꞌen kichin chare ri qetzij kꞌaslen nduyaꞌ ri Dios.

Ndikꞌatzin ndibꞌan cuenta ri utzulej tijonik

²⁰Y rat Timoteo, tatijaꞌ aqꞌij ndabꞌen cuenta ri utzulej tijonik ri chilabꞌen chawa chi ndayaꞌ. Ma tatzeq awiꞌ chupan teq tzij ri ma jun rubꞌeyal. Y ma kaꞌawakꞌaxaj tzij ri ndibꞌix nimalej nojibꞌel chake, pero xa ma ke ta riꞌ,6:20 Ro. 1:22; 1Co. 3:19 tzij ri eyakatajneq chirij ri tijonik ndayaꞌ. ²¹Porque ekꞌo jujun xkitaqij ri tzij riꞌ, y romariꞌ xesach y ma koqan chi ta ri qetzij ri qataqin.

Ri Dios kin ta xtuyaꞌ ri ru-favor pa iwiꞌ.