Римэйхиндэ

Римэйхиндэ

¹ Бурханай хайра дурада хүртэһэн, тэрэнэй нангин арадынь байхаар дуудуулагдаһан Рим хотын бүгэдэ зон, таанадта Иисус Христосой зараса, элшэнгээр һунгагдаһан Павел бэшэнэ. Манай Эсэгэ Бурхан ба Дээдын Эзэн Иисус Христос таанадта үршѳѳл хайра ба амгалан тайбаниие үршѳѳг лэ! Бурхан Һайн Мэдээсэл номнохыемни намайе шэлэжэ абаа юм. Нангин Бэшэг соо хэлэгдэһэнэй ёһоор Бурхан тэрэ Һайн Мэдээсэлые урдань лүндэншэдѳѳрѳѳ дамжуулан найдуулһан байгаа. Тэрэ Мэдээсэлнь Бурханай Хүбүүн, манай Дээдын Эзэн Иисус Христос тухай. Иисус хүнэй бэе бэелхэдээ Давидай үри һадаһан боложо түрѳѳ. Харин тэрэнэй һүр хүсэтэй Бурханай Хүбүүн байһыень, үхѳѳд амидырхадань Нангин Һүлдэ харуулаа. Бүхы яһатаниие, тиихэдэ Иисус Христосой дуудаһан таанадые этигэл һүзэгтэй, мэдэлдэ оросотой болгохын тула Бурхан Хүбүүгээрээ дамжан, тэрэнэй аша туһада намайе элшэн болгон үршѳѳгѳѳ юм. ⁸ Бүхы газар дэлхэйнхидэй танай этигэл һүзэг тухай дуулажа байһандань би Иисус Христосоор дамжуулан та бүхэнэй түлѳѳ нэн түрүүн Бурханда баяр баясхалан хүргэнэб. ⁹ Зальбарха бүхэндѳѳ таанад тухай дурдажа, таанадтай хэзээшьеб уулзуулхыень гуйдаг байһыемни Бурхан мэдэхэ. Би Хүбүүн тухайнь Һайн Мэдээсэл номнон, үнэн зүрхэнһѳѳ тэрээндэ алба хэнэ ха юмбиб. ¹¹ Би таанадтай уулзажа, Бурханай Һүлдын үршѳѳһэн аша буянгаар хубаалсахаяа аргагүй ехээр хүсэжэ байнаб. Тиигэбэл этигэл һүзэгтнай бэхижэхэ байгаа. ¹² Этигэл һүзэгѳѳрѳѳ бидэ бэе бэеэ урмашуулха байгаалди. ¹³ Аха дүүнэр, таанадта ошохо гэжэ минии оло дахин тэмүүлдэг байһые мэдэжэ байха ёһотойт. Гэхэдэ, нэгэл юумэн намда ходо һаалта болодог байгаа. Бусад арадуудай дунда хүнүүдые Христосто хандуулдагтайгаал адляар таанадайшье дунда үрэ дүнтэйгѳѳр ажаллаха дуратай байгааб. ¹⁴ Хүнүүд хүмүүжүүлэгдэһэн гү, али хүмүүжүүлэгдээгүй гү, эрдэм ухаантай гү, али ном болбосоролгүй байна гү, илгаагүй юм. Би хүн бүхэндэ Һайн Мэдээсэлые номнохо ёһотой хүм. Тиимэл ушарһаа би Римдэ байһан таанадташье ошожо номнохые аргагүй ехээр хүсэжэ байнаб. ¹⁶ Һайн Мэдээсэл тухай номнохоёо би эшэнэгүйб. Ушарынь юуб гэхэдэ, тэрэ һүзэглэһэн хүн бүхэниие, нэн түрүүн еврейнүүдые, тиихэдэ баһал бусад арадуудые абарха Бурханай һүр хүсэн юм. ¹⁷ Гансал этигэл һүзэгэй ашаар хүнүүдые Бурханай үнэн сэдьхэлтэн болгодогынь Һайн Мэдээсэл соо элеэр харуулагдана. «Үнэн сэдьхэлтэн этигэл һүзэгэйнгѳѳл ашаар ажамидарха», – гэжэ Нангин Бэшэг соо бэшээтэй. ¹⁸ Нүгэлтэ болон бузар муухай юумэнүүдые үйлэдэжэ, үнэн зүбые даража байһан хүнүүдтэ ехэ уур сухалтай байһанаа Бурхан тэнгэриһээ харуулна. ¹⁹ Бурхан тухай мэдэжэ болохо бүхы юумэнүүдые тэдэ зон мэдэнэ, юундэб гэхэдэ, тэдэ зондо бултандань Бурхан ѳѳрыгѳѳ элирүүлэн харуулаа юм. ²⁰ Бурханай харагдадаггүй мүнхэ һүр хүсэн болон Бурханай мүн шанарынь газар дэлхэйн зохёон бүтээгдэхэһээ эхилэн тэрэнэй бүхы бүтээһэн юумэнүүдэй ашаар эли харуулагдана. Тиимэһээл үнѳѳхи зондо ѳѳһэдыгѳѳ хамгаалха юумэн байхагүй. ²¹ Тэдэнэр Бурханиие мэдэһэншье һаа, Бурханда алдар соло дуудаагүй, баяр баясхаланшье хүргѳѳгүй. Тэдэнэй һанал бодолынь удхагүй хооһон боложо, тэнэг зүрхэ сэдьхэлынь харанхыда хушагдаба. ²² Тэдэнэр ѳѳһэд тухайгаа ухаантай сэсэнбди гэнэ, үнэн дээрээ тэдэнэр үбэштэй тэнэгүүд юм. ²³ Тэдэнэр алдарта, мүнхэ Бурханда һүгэдэхын орондо мүнхэ амидаралгүй хүнүүдтэ гү, али шубуудта, амитадта, мүлхигшэдтэ адли онгонуудта шүтэнэ. ²⁴ Тиимэһээ Бурхан тэдэ зониие ѳѳһэдынь замаар ябуулаа. Тэдэнэр хэхэ дуратай юумэеэ хээ, бузар муухай һанал бодолнуудынь эшэхээр юумэнүүдые хүүлэн, бэеыень бузарлуулжа байгаа. ²⁵ Тэдэнэр Бурхан тухай үнэн зүбые худал хуурмагаар һэлгээ, тиигээд хэтын хэтэдэ магтаал солотой байха Бүтээгшэ Бурханда шүтэхын орондо Бурханай бүтээһэн юумэнүүдтэ шүтэжэ байна. ²⁶ Тиигэхэдэнь ѳѳһэдынгѳѳ хүсэлэнгүүдые дахан ажамидархадань Бурхан тэдэндэ һаалта хээгүй. Тэдэнэй эхэнэрнүүдыньшье дэлхэйн жама ёһоор хурисалда орохоёо болёод, юрэ бусын аргаар хурисалда ородог болобо. ²⁷ Эрэшүүлшье тон тиигэжэл ябадаг болоо. Тэдэнэр эхэнэрнүүдтэй унтахаяа болёод, эрэ хүнтэй унтахые аргагүй ехээр хүсэдэг болоо. Тиигэжэ эрэшүүл бэе бэетэйгээ эшэмээр юумэ худхана, тиигээд һүүлэй һүүлдэ буруу ябадалнуудайнгаа түлѳѳ хэһээлтэдэ хүртэнэ. ²⁸ Тэдэ зоной Бурхан тухай бодожо байхаяа арсаһан хадань тэдэнэй тэнэг хооһон ухаан бодолойнгоо хүсэлэнгѳѳр ябахадань Бурхан һаалта хээгүй. Тиимэһээл тэдэ зон хэхэ ёһогүй юумэнүүдые хэнэ. ²⁹ Тиимэһээл тэдэнэр нүгэл шэбэлдэ унаһан, зальхай забхай ябадалтай, алта мүнгэндэ шунаһан, хара һанаатай зон. Тэдэнэр атаархадаг, аладаг, хэрүүл ама гаргадаг, худалаар хэлэдэг, харата ааша гаргадаг, хүниие хардадаг, ³⁰ хоблодог, Бурханда дурагүй байдаг, хүниие доромжолдог, ѳѳрѳѳрѳѳ омогорходог, һайрхадаг, муу муухай юумые ходо һанаашалжа байдаг, аба эжынгээ үгэ дууладаггүй юм. ³¹ Тэдэнэр тэнэг хооһон, хэлэһэн үгэдѳѳ хүрэдэггүй, хүниие үршѳѳхэ, хайрлаха гэжэ мэдэдэггүй юм. ³² Тиимэ юумэ үйлэдэжэ байһан хүн бүхэн үхэлдэ хүртэхэ табилантай гэжэ Бурханай хэлэһые мэдэжэ байһаншье һаа, тэдэнэр нүгэлтэ юумэ хэжэл байдаг, үшѳѳ тиихэдэ бусад зониие тиимэ юумэ үйлэдүүлхэдэ түлхидэг юм.

¹ Заримантнай буруу юумэ хэжэ байһан зониие шүүбэрилдэг. Зүгѳѳр тиигэжэ байһандатнай таанадта ямаршье хүлисэл байхагүй. Бусад зониие зэмэлхэдээ, таанад ѳѳһэдыгѳѳ зэмэлнэт, ушарынь юуб гэхэдэ, таанад үнѳѳхил зонтойгоо адли буруу юумэ хэһэн гэмтэй болонот. ² Тиимэ мэтын юумэнүүдые үйлэдэжэ байһан хүнүүдые гэмнэн шүүбэрилжэ байһан Бурхан үнэн зүб юм гэжэ бидэ мэдэнэбди. ³ Гэмнэжэ байһан хүнүүдтэйгээл тон адли юумэ үйлэдэжэ байхадаа таанад Бурханай хэһээлтэдэ хүртэхэгүйбди гэжэ үнэхѳѳрѳѳ һанана гүт? ⁴ Али таанад Бурханай агууехэ үршѳѳл хайра, хүлисэл, тэсэбэри тооногүй аалта? Таанадые ѳѳртѳѳ хандуулхын тула Бурхан танда үршѳѳл хайратай байна гэжэ мэдэнэгүй аалта? ⁵ Харин таанад зүрюутэжэ, Бурханда хандахаяа арсанат. Тиигэжэ тэрэнэй уур сухалаа элирүүлхэ, газар дэлхэйнхидые гэмнэн шүүбэрилхэ үдэр хүрэтэр таанад ѳѳһэдтѳѳ бүрил муу хэһээлтэ бэлдэжэ байнат. ⁶ Бурхан хүн бүхэнииемнай хэһэн хэрэгүүдээрнь шиидхэхэ юм. ⁷ Һайн һайхан хэрэгүүдые бүтээжэ ябадаг, алдар соло, нэрэ түрэ, һүнэшэгүй ажамидарал бэдэржэ байдаг зондо Бурхан мүнхын амидарал үршѳѳхэ. ⁸ Харин ѳѳһэд тухайгаал бододог, үнэн зүбые буруушаадаг, тиихэдэ буруу хэрэг үйлэдэхэ дуратай зондо Бурхан уур сухалаа, хоро шараяа харуулха. ⁹ Харата бузар юумэ үйлэдэжэ байһан хүн бүхэндэ, нэн түрүүн еврей хүндэ, баһа ондоошье яһатанай хүндэ зоболон ба бэрхэшээл тудаха юм. ¹⁰ Харин һайн һайхан юумэ бүтээжэ байһан хүн бүхэндэ, нэн түрүүн еврей хүндэ, баһа ондоошье яһатанай хүндэ Бурхан алдар соло, нэрэ түрэ, амгалан байдал үршѳѳхэ юм. ¹¹ Бурхан яһа илгадаггүй юм! ¹² Бусад арадуудта Моисейн Хуули байгаагүй. Тэдэнэр Хуулигүйгѳѳр нүгэл шэбэл хээ, тиимэһээ Хуулигүйгѳѳр хосорхо. Еврейнүүд Хуулитай байгаа. Тэдэнэр Хуули доро нүгэл шэбэлээ хээ, тиин Хуулиин ёһоор гэмнүүлэн шүүлгэхэ юм. ¹³ Хуули юрэ шагнажа байһан хүнүүд бэшэ, харин тэрэниие сахижа байһан хүнүүд Бурханай урда үнэн сэдьхэлтэй байха. ¹⁴ Бусад арадуудай зарим хүнүүд Хуулигүй байһаншье һаа, Хуулиин заабаринуудые зүнгѳѳрѳѳ мэдэн сахижашье байдаг. Тиимэһээ тэдэнэр Хуулигүй байһаншье һаа, сэдьхэл дотороо хуулитай байһанаа харуулна. ¹⁵ Тэдэнэр ѳѳрынгѳѳ үйлэ хэрэгүүдээр Хуулиин эрилтэнүүдэй зүрхэ сэдьхэлдэнь бэшээтэй байһые харуулна. Тэдэнэй һэшхэлшье тэрэ ушар гэршэлнэ: заримдаа һанал бодолнуудынь тэдэниие зэмэлнэ, заримдаа хамгаална. ¹⁶ Тон энээндэл адляар номноһон Һайн Мэдээсэлэймни ёһоор тэрэ Үдэр Иисус Христосой ашаар бүхы хүнүүдэй нюуса һанал бодолнуудыень Бурхан гэмнэн шүүхэ юм. ¹⁷ Заримантнай ѳѳһэдыгѳѳ еврейби гэжэ нэрлэнэ, Хуулида найдана, Бурханаар бахархана. ¹⁸ Ѳѳһэдыгѳѳ яажа абажа ябабалтнай Бурхан һайшаахаб гэжэ мэдэнэт, Хуули шудалан, үнэн зүбые илгадаг болобот. ¹⁹ Һохор хүнүүдэй хүтэлэгшэдынь, харанхыда ябагшадай гэрэл туяань гээшэбди гэжэ ѳѳһэд тухайгаа бата этигэлтэй байнат. ²⁰ Хуули соо эрдэм ухаанай ба үнэн зүйлэй байхада таанад тэнэг зондо заабарилха, залуушуулые һургаха аргатайбди гэжэ бодонот. ²¹ Бусадые һургадаг аад лэ, юундэ ѳѳһэдѳѳ һуранагүйбта? Хулгай хэжэ болохогүй гэжэ номножо байгаад, ѳѳһэдѳѳ хулгай хэнгүй байдаг аалта? ²² Гэрлэхэдээ нүхэртѳѳ үнэн сэхэ байха хэрэгтэй гэжэ хүнүүдтэ хэлээд, ѳѳһэдѳѳ үнэн сэхэ байдаг аалта? Таанад онгонуудые үзэжэ яданат, үшѳѳ тиихэдэ һүмэнүүдые тононот. ²³ Таанад Хуулитай байһандаа бахарханат, гэхэтэй сасуу Хуули сахингүй Бурханай нэрэ гутаанат. ²⁴ «Еврей таанадһаа боложо бусад арадууд Бурханиие муудхана», – гэжэ Нангин Бэшэг соо хэлээтэй байдаг. ²⁵ Бэлгээ отолуулһан ушарта Хуули сахижа байбалтнай, тэрэ отолуулга танда аша туһатай юм. Хэрбээ Хуули сахидаггүй байбал, отолуулаагүй зонһоо таанад юугээрээшье дээрэ бэшэт. ²⁶ Хэрбээ отолуулаагүй хүнэй Хуулиин тогтоолнуудые сахижа байгаа һаа, Бурхан тэрэниие отолуулһантай адляар бодохо бэшэ аал? ²⁷ Тиимэһээ хэзээшье отолуулаагүй Хуули сахидаг хүн бүхэн еврейнүүдые гэмнэхэ бэшэ аал? Таанад отолуулһан байнат, Хуулитай байнат, гэхэдэ таанад тэрэ Хуули сахинагүйт. ²⁸ Гадна талаһаа еврейдэл адляар ажамидарһантнай, отолуулһан байдалтнай таанадые жэнхэни еврейнүүд болгоногүй. ²⁹ Жэнхэни еврей болбол гансал махабад бэеэ отолуулһан бэшэ, харин зүрхэ сэдьхэлэйнгээ гүн соо отолуулһан байха ёһотой. Энэнь Хуулиин тогтоолнуудай бэшэ, харин Нангин Һүлдын ажал юм. Тиимэ хүн уладай магтаалда бэшэ, харин Бурханай магтаалда хүртэхые хүсэдэг.

¹ Еврей байхада юугээрээ һайн юм? Отолуулһан байхада ямар аша туһатай юм? ² Алишье талаһаа һайн, илангаяа еврейнүүдтэ Бурханай һургаалай даалгагдаһаниинь шухала юм. ³ Үнэн дээрээ тэдэнэй зариманиинь тэрэ һургаалда этигээгүй. Тиин тэдэнэй этигэл һүзэггүй байхада Бурхан найдабаригүй байха аал? ⁴ Үгыл даа. Хүн бүхэнэй худал хуурмаг юумэ хэлэжэ байбашье, Бурхан үнэн зүбые хэлэдэг юм. «Хэлэһэншни үнэн зүб байһыеш баталха, Зарга шүүбэриин болоходо ши илажа гарахаш», – гэжэ Нангин Бэшэг соо Бурхан тухай хэлэгдэнэ. ⁵ Хэрбээ Бурханай үнэн зүб байһые нүгэлтэ хэрэгүүднай элирүүлжэ байбал, бидэ юун гэжэ хэлэхэбибди? Уур сухалаа хүрѳѳд маанадые хэһээжэ байһан Бурхан буруу юумэ хэнэ аал? (Энэ оршолонгой зон тиигэжэ һурадаг юм). ⁶ Үгыл даа. Бурхан үнэн зүб бэшэ һаа, газар дэлхэйнхидые яажа шүүбэрилхэб? ⁷ «Хэрбээ манай буруу ябадал Бурханай үнэн сэхэ байһые харуулан, тэрээндэ агууехэ алдар соло олгожо байбалнь, юундэ Бурхан мүнѳѳ болотор маанадые нүгэлтэн гэжэ нэрлэнэб», ⁸ үшѳѳ «Нүгэлтэ юумэ үйлэдэжэ байя, тиигэбэл тэрэмнай һайн үрэ дүнтэй байха», – гэлдэнэбди гэжэ зарим зон маанадые зэмэлнэ. Зүгѳѳр Бурхан тэдэниие үнэн зүб зарга шүүбэридэ оруулха. ⁹ Зай, хэлэһэн бүхы юумэмнай ямар удхатайб? Бидэ еврейнүүд бусад яһатанһаа дээрэ болоно гээшэ гүбди? Үгыл даа. Еврейнүүд бусад яһатанай зондол тон адляар нүгэл шэбэлдэ хүтэлүүлэгдэдэг юм гэжэ би һаяхан хэлээ һэнби. ¹⁰ Нангин Бэшэг соо иигэжэ хэлэгдэнэ: «Үнэн сэдьхэлтэй нэгэшье хүн үгы, Бурханда һайшаагдаха нэгэшье хүн үгы, ¹¹ Сэсэн ухаатай, Бурханиие бэдэрһэн нэгэшье хүн үгы. ¹² Булта Бурханһаа хадуураа, Булта хэндээшье хэрэггүй болоо. Хэншье, нэгэшье хүн үнэн зүб юумэ хэнэгүй. ¹³ Тэдэнэй үгэнүүдынь үхэлэй зам руу татадаг, Хэлэнүүдынь худал хуурмаг юумэ үгүүлхэдээ бэрхэ. Үгэ бүхэниинь могойн хэлэндэ адли аюултай. ¹⁴ Тэдэ хорон үгэ, хараалһаа ондоо юумэ хэлэдэггүй. ¹⁵ Тэдэнэр гэмтээхэ, алахадаа түргэн юм. ¹⁶ Гэшхэһэн газартаал тэдэнэр һүйдхэл һүнэлгэ асардаг. ¹⁷ Тэдэнэр эб найрамдалда ажамидархые мэдэхэгүй юм. ¹⁸ Тэдэнэр Бурханһаашье айн һүрдэдэггүй юм». ¹⁹ Хүн түрэлхитэнэй ѳѳрыгѳѳ сагааруулхаяа болихын тула, бүхы газар дэлхэйнхидые Бурханай зарга шүүбэридэ оруулхын тула Хуули соо хэлэгдэһэн бүхы юумэнүүд Хуулиин мэдэлдэ байһан хүнүүдтэ хандуулаатай гэжэ бидэ мэдэнэбди. ²⁰ Юундэб гэхэдэ, Хуулиин тогтоолнуудые дүүргэжэ байһанаараа нэгэшье хүн Бурханда һайшаагдахагүй. Хуули болбол маанадай нүгэлтэй байһые мэдэрүүлхэ зорилготой юм. ²¹ Харин мүнѳѳ Бурханай урда үнэн сэдьхэлтэй байха арга зам харуулагдаба. Тэрээн тухай Моисейн Хуулиин ба лүндэншэдэй гэршэлһэншье байбалнь, тэрэ арга зам Хуулида ямаршье хабаагүй юм. ²² Иисус Христосто һүзэглэһэн этигэл һүзэгэйнь ашаар Бурхан хүн бүхэниие, ямаршье илгаагүйгѳѳр, үнэн сэдьхэлтэнэй тоондо оруулна. ²³ Ушарынь юуб гэхэдэ, хүн бүхэн нүгэл шэбэл хээд, Бурханай алдарта хүртэнэгүй. ²⁴ Зүгѳѳр маанадые сүлѳѳлһэн Иисус Христосой ашаар бидэ Бурханай аша буянда хүртэн, үнэн сэдьхэлтэй болонобди. ²⁵ Бурхан маанадтай эбтэй эетэй болохын тула Христосые тахил болгон эльгээгээ. Тиимэһээ бидэ тэрээндэ һүзэглэһэнэйнгѳѳ ашаар Бурхантай эблэрнэбди. Бурхан урдань тэсэбэритэй, нүгэлтэнүүдые тоонгүй байһанаараа үнэн зүб байһанаа харуулба. Баһа Иисуста һүзэглэһэн зониие үнэн сэдьхэлтэй гэжэ тоолоходоо Бурхан үнэн зүб байһанаа харуулна. ²⁷ Зай, тиихэдээ юугээрээ бахархахамнайб? Юугээршье бахархалтагүй. Хуули сахиһанаараа үнэн сэдьхэлтэнэй тоодо ороо гүбди? Үгыл даа. Этигэл һүзэгэйнгѳѳ ашаар үнэн сэдьхэлтэн болообди. ²⁸ Ушарынь юуб гэхэдэ, хүн Хуулиин тогтоолнуудые дүүргэһэнээрээ бэшэ, харин этигэл һүзэгэйнгѳѳ ашаар Бурханай урда үнэн сэдьхэлтэй болодог гэжэ бидэ тоолонобди. ²⁹ Али Бурхан гансал еврейнүүдэй Бурхан болоно гү? Тэрэ баһал бусад арадуудай Бурхан бэшэ аал? Тиимэл даа, ³⁰ Бурхан ори ганса юм хадаа бүхы арадуудай Бурхан мүн. Тиин Бурхан бусад арадуудые еврейнүүдтэй тон адляар этигэл һүзэгэйнь ашаар ѳѳрынгѳѳ урда үнэн сэдьхэлтэй байлгадаг юм. ³¹ Тиихэдээ бидэ этигэл һүзэгѳѳрѳѳ Хуули хүсэгүй болгоно гүбди? Үгыл даа, бидэ Хуули бүришье хүсэн түгэлдэр болгонобди.

¹ Зай, ѳѳрынгѳѳ үбгэ эсэгэ Абраһам тухай юун гэжэ хэлэхэбибди? ² Хэрбээ тэрэ хэһэн хэрэгүүдээрээ Бурханай урда үнэн сэдьхэлтэн гэжэ тоологдобол, бахархаха юумэтэй байха. Гэхэтэй сасуу Абраһам тэрэ хэрэгүүдээрээ Бурханай урда хэзээшье бахархажа шадахагүй юм. ³ «Абраһамай Бурханда этигэһэн хадань Бурхан тэрэниие үнэн сэдьхэлтэнэй тоондо оруулаа», – гэжэ Нангин Бэшэг соо хэлээтэй байдаг. ⁴ Хүдэлмэришэндэ түлэгдэһэн мүнгэн болбол бэлэг бэшэ юм. Тэрэ мүнгые хүн хүлһѳѳрѳѳ олоно. ⁵ Хүнүүд хэһэн юумээрээ бэшэ, харин этигэл һүзэгѳѳрѳѳ Бурханай урда үнэн сэдьхэлтэн гэжэ тоологдохо юм. ⁶ Хэһэн хэрэгүүдтэйнь холбонгүй хүниие үнэн сэдьхэлтэн гэжэ Бурханай тоолоходонь, тиимэ хүниие Давид аза жаргалтай гэжэ нэрлэбэ. ⁷ «Хара хэрэгүүдынь хүлисэгдэһэн, нүгэл шэбэлнүүдынь сагааруулагдаһан хүнүүд жаргалтай юм, ⁸ Дээдын Эзэнэй хэһэн нүгэлнүүдыень хүндэ тохоогүй һаа, тэрэ хүн жаргалтай юм». ⁹ Үнѳѳхи Давидай хэлээшэ аза жаргал гансал отолуулһан зондо хабаатай аал? Үгыл даа. Тэрэнь отолуулаагүйшье зондо адлихан хабаатай юм. «Абраһамай Бурханда этигэһэн хадань Бурхан тэрэниие үнэн сэдьхэлтэнэй тоодо оруулаа», – гэжэ Нангин Бэшэг соо хэлэгдэһые бидэ дурдаа һэмди. ¹⁰ Тэрэнь хэзээ ушарһан байгааб? Абраһамай отолуулһанһаа урда гү, али отолуулһан хойнонь гү? Отолуулһанайнь хойно бэшэ, харин отолуулхынь урда тээ болоһон байгаа. ¹¹ Абраһам этигэл һүзэгэйнгѳѳ түлѳѳ үшѳѳ отолуулхынгаа урда тээ үнэн сэдьхэлтэнэй тоодо ороод, тэрэнээ баталан отолуулһан байгаа. Тиигэжэл Абраһам отолуулаагүй аад, Бурханда һүзэглэһэнэйнгѳѳ ашаар үнэн сэдьхэлтэн гэжэ тоологдоһон бүхы һүзэглэгшэдэй эсэгэнь болоо юм. ¹² Тэрэнэй отолуулхынгаа урда тээ Бурханда һүзэглэдэгтэйнь адляар һүзэглэдэг отолуулһаншье хүн бүхэнэй эсэгэнь болоо юм. ¹³ Бурхан Абраһамда, тэрэнэй үри һадаһадта газар дэлхэйе залгамжалан абахаш гэһэн найдуулга үгэһэн байгаа. Абраһамай Хуули сахижа байһан дээрэһээнь бэшэ, харин Бурханда һүзэглѳѳд, үнэн сэдьхэлтэй болоһон хадань тэрэ найдуулга үгтэһэн байгаа. ¹⁴ Хэрбээ тэрэ найдуулгын Хуули сахиһанай түлѳѳ үгтэһэн байбалнь, этигэл һүзэг юуншье бэшэ, найдуулга ямаршье үрэ дүнгүй байха һэн. ¹⁵ Хуули эбдэхэдэ Бурханай уур сухалынь хүрэдэг юм. Харин Хуулиин үгы байбал, тэрэниие эбдэхын аргагүй юм. ¹⁶ Тиимэһээ найдуулга этигэл һүзэг дээрэ үндэһэлнэ, тиин Абраһамай бүхы үри һадаһадта, гансашье Хуули сахидаг бэшэ, харин Абраһамдал адляар һүзэглэһэн хүн бүхэндэ Бурханай агууехэ үршѳѳл хайраар тэрэ найдуулгань батаар үгтэбэ. Абраһам бултанаймнай эсэгэ. ¹⁷ Нангин Бэшэг соо: «Би шамайе олон арадуудай эсэгээр табяаб», – гэжэ хэлээтэй байдаг. Үхэһэн юумые амидыруулдаг, байхагүй юумые захиралтаараа бии болгодог Бурханда һүзэглэһэн Абраһам манай эсэгэ юм. ¹⁸ Найдаха шалтагаанайшье үгы байхада, Абраһам этигээ, найдаа, тиимэһээ «олон арадуудай эсэгэнь» болоо, Нангин Бэшэг соо хэлэгдэһэн ёһоор үри һадаһадынь одо мүшэдтэл адли тоогүй олон байха. ¹⁹ Тэрэ үедэ Абраһам зуу хүрэхэ тооной байгаа, зүгѳѳр үхэхын наана болоһон махабад бэе тухайгаа, үри хүүгэдые түрэхэ сагайнь үнгэрһэн Сарра тухайгаа бодоходоо, тэрэнэй этигэл һүзэгынь һулараагүй. ²⁰ Абраһам Бурханай найдуулгые һэжэглээгүй, тэрээндэ бата этигэжэ байгаа, тиин этигэл һүзэгынь бүришье ехэ болоо. Тэрээгээрээ Абраһам Бурханиие алдаршуулаа. ²¹ Бурхан найдуулһан юумэеэ дүүргэхэ аргатай гэжэ Абраһам бата этигэлтэй байгаа. ²² Тиимэһээл Абраһам этигэл һүзэгэйнгѳѳ ашаар «үнэн сэдьхэлтэнэй тоодо оруулагдаһан байгаа». ²³ «Үнэн сэдьхэлтэнэй тоодо оруулагдаа», – гэдэгынь гансал Абраһамда хабаатай бэшэ. ²⁴ Тэрэнь баһал манай Дээдын Эзэн Иисус Христосые амидыруулһан Бурханда һүзэглѳѳд, үнэн сэдьхэлтэнэй тоодо ороһон маанадта хабаатай юм. ²⁵ Бурхан манай нүгэл шэбэлэй түлѳѳ Иисусые үхэлдэ үгѳѳд, үнэн сэдьхэлтэй байхымнай тула һүүлдэнь тэрэниие амидыруулаа юм.

¹ Мүнѳѳ бидэ этигэл һүзэгэйнгѳѳ ашаар Бурханай урда үнэн сэдьхэлтэй болообди, тиин манай Дээдын Эзэн Иисус Христосоор дамжан Бурхантай эбээ нэгэдхээбди. ² Христос баһа этигэл һүзэгэймнай ашаар маанадые мүнѳѳ манай оршожо байһан Бурханай үршѳѳл хайрада хүтэлэн асараа. Тиимэһээ Бурханай алдарта хүртэхэбди гэжэ найдан, баяр жаргалтай байнабди. ³ Бидэ зобожо байһандаа баһа баяр жаргалтай байнабди, юундэб гэхэдэ, зоболон бэрхэшээлнүүд тэсэбэри тэнхээтэй болгодог, ⁴ харин тэсэбэри тэнхээтэй байхада Бурхан һайшаадаг, тиихэдэ Бурханай һайшаал найдабари түрүүлдэг, ⁵ тиимэһээ тэрэ найдабари маанадай урма хухалхагүй. Эдэ бүхы юумэнүүд Бурханай маанадта хайрлаһан Нангин Һүлдэһээ, тэрэнэй зүрхэ сэдьхэлдэмнай бүрилдүүлдэг хайра дуранһаа эхитэй юм. ⁶ Христос Бурханай тогтооһон сагта манай түлѳѳ маанадай ахир һула, нүгэл шэбэлтэй байхада үхѳѳ гээшэ. ⁷ Үнэн сэдьхэлтэнэй түлѳѳ үхэхые хүн үнэндѳѳ хүсэдэггүй, тиихэдэ эрхим һайн хүнэй түлѳѳ үхэхые хэншьеб хүсэһэн байжа магадгүй. ⁸ Харин манай үшѳѳ нүгэлтэй байхада Бурхан маанадай түлѳѳ Христосые үхэлдэ хүртѳѳгѳѳд, манда аргагүй ехэ дуратай байһанаа баталаа. ⁹ Христосой адхарһан шуһанай ашаар бидэ мүнѳѳ Бурханай урда үнэн сэдьхэлтэй болоод, Бурханай хэһээлтэһээ заатагүй абарагдахабди. ¹⁰ Хэрбээ Бурханай дайсадынь байхадамнайшье тэрэ ѳѳрынгѳѳ Хүбүүнэй үхэлѳѳр маанадтай эбээ нэгэдхэһэн байгаа хадаа, мүнѳѳ эбтэй эетэй байхадамнай, тэрэ Хүбүүнэйнгээ аминай ашаар маанадые хэһээлтэһээ заабол абарха бэшэ аал. ¹¹ Бурханай маанадтай эб найрамдал тогтоохоор Дээдын Эзэн Иисус Христосые эльгээһэн ушарта бидэ аргагүй баяртай байнабди. ¹² Нүгэл нэгэ хүнѳѳр дамжан газар дэлхэйдэ буугаа, тиигээд тэрэ нүгэл үшѳѳ үхэл дахуулан асараа. Тиимэһээ хүн бүхэнэй нүгэлтэй байһан хадань, хүн түрэлхитэнэй дунда үхэл тараһан байгаа. ¹³ Хуулиин үгтэхэһѳѳшье урда газар дэлхэй дээрэ нүгэл байгаа. Зүгѳѳр Хуулиин үгы байхада нүгэлшье тоогдодоггүй. ¹⁴ Адамай үе сагһаа эхилээд, Моисейн үе саг хүрэтэр бүхы хүн түрэлхитэниие, тэдэнэй тоодо Бурханай захиралтые Адамай эбдэһэндэл адляар зүршѳѳгүй байһан хүнүүдыешье үхэл мэдэлдээ абаад байгаа. Адам болбол һүүлдэнь ерэһэн Христосой анхан жэшээ байгаа. ¹⁵ Гэхэтэй сасуу Бурханай элбэг дэлбэгээр үршѳѳһэн бэлэгынь Адамай нүгэлтэй адли бэшэ. Тэрэ нүгэл бусад олон зондо үхэл асараа. Харин гансал Иисус Христосой олон зондо асарһан Бурханай буян хэшэгтэ бэлэг бүришье һүр жабхалантай байгаа. ¹⁶ Адамай нүгэлэй ба Бурханай бэлэгэй хоорондо тон ехэ илгаа байна. Үнѳѳхи нүгэл хэһээлтэдэ хүтэлжэ байгаа. Харин Бурханай үршѳѳл бэлэгынь олон нүгэл шэбэлнүүдыемнай хүлисүүлэн, маанадые үнэн зүб болгожо байна. ¹⁷ Ганса хүнэй нүгэлѳѳр дамжан, тэрэ ганса хүнһѳѳ боложо, үхэл захиржа байһан юм. Гэхэтэй сасуу ганса хүнэй, Иисус Христосой бүтээһэн үрэ дүн бүришье агууехэ юм. Бурханай элбэг үршѳѳл бэлэгээр үнэн зүб болоһон хүн бүхэн Иисус Христосой ашаар ажамидаржа, захиржа байха. ¹⁸ Тиимэһээ нэгэ нүгэлэй бүхы хүнүүдые гэмнэн буруудхажа байхада, үнэн зүб нэгэ хэрэгэй ашаар хүн бүхэн үнэн сэдьхэлтэй болоно, ами наһанда хүртэнэ. ¹⁹ Нэгэ хүнэй Бурханай мэдэлһээ гарахада яажа бүхы хүнүүд нүгэлтэнүүд болоо һэм, тон тиигэжэл нэгэ хүнэй Бурханай мэдэлдэ байһанай ашаар хүнүүд булта үнэн сэдьхэлтэй болохо. ²⁰ Нүгэл шэбэлые элеэр харуулхын тула Хуули үгтэһэн байгаа. Зүгѳѳр нүгэл шэбэлэй ехэ элбэг байһан газарта Бурханай үршѳѳл хайрашье бүри элбэг дэлбэг үгтэжэ байгаа. ²¹ Хүн бүхэниие нүгэлэй хүтэлэн үхэлдэ хүргэдэг байһантайл тон адляар Бурханай үршѳѳл хайра маанадые хүтэлэн, үнэн сэдьхэлтэй болгодог, манай Дээдын Эзэн Иисус Христосой ашаар мүнхын амидаралда хүргэдэг.

¹ Зай, яахабибди? Бурханай үршѳѳл хайрын элбэгжэжэ байхын тула саашадаашье нүгэл шэбэл хэжэл байхамнай гээшэ гү? ² Үгыл даа. Нүгэлэй талаар үхѳѳд, эрхэ мэдэлһээнь мултарһан хадаа яажа саашадаашье нүгэл хэжэ ажамидархабибди? ³ Иисус Христостой нэгэдэн уһаар арюудхагдахадаа бидэ тэрэнэй үхэлыешье хубаалсан, тэрээнтэй нэгэдэһэн байгаабди гэжэ мэдэнэгүй аалта? ⁴ Уһаар арюудхуулхадаа бидэ Христостой хамта үхѳѳд хүдѳѳлүүлэгдэһэн байгаабди. Тиимэһээ Эсэгынь алдарта һүр хүсэнэй Христосые амидыруулһандал адляар бидэшье ажамидаралай шэнэ зүргѳѳр ябахабди. ⁵ Хэрбээ бидэ Иисустай үхэлыень хубаалсан нэгэдэһэн байбал, тэрээнтэй хамта баһа амидыруулагдахабди. ⁶ Нүгэлтэ махабад бэемнай саашадаа маанадые нүгэлэй барлаг болгохогүйн тула урданаймнай байдал Христостой хамта хэрээһэн дээрэ хадагдан һүнэгдѳѳ юм гэжэ бидэ мэдэнэбди. ⁷ Хүн үхэхэдѳѳ нүгэлэй мэдэлһээ мултарна. ⁸ Христостой хамта үхэһэн хадаа бидэ тэрээнтэйл хамта амидархабди гэжэ этигэнэбди. ⁹ Ушарынь юуб гэбэл, Христос үхѳѳд амидыруулагдаһан байгаа, тиигээд дахин үхэхэгүй, юундэб гэбэл, үхэл тэрээн дээрэ ондоо ямаршье эрхэ засаггүй ха юм. ¹⁰ Христос нэгэл дахин манай нүгэлнүүдэй түлѳѳ үхѳѳд, мүнѳѳ Бурханай түлѳѳ ажамидаржа байна. ¹¹ Тиимэһээ таанадшье нүгэлэй талаар үхѳѳбди, харин Иисус Христосой үгэһэн амяар Бурханай түлѳѳ ажамидарнабди гэжэ ѳѳһэд тухайгаа бодохо ёһотойт. ¹² Махабад бэеынгээ хүсэлэнгүүдые дахахагүйн тула хүүртэ бэеэ нүгэлэй мэдэлдэ бү байлгагты. Һүүлэй һүүлдэ махабад бэетнай һүнэн хосорхо, тиимэһээ тэрэнэй хүсэлэнгүүдые дахажа бү ябагты. ¹³ Махабад бэеынгээ алишье эрхэтэниие нүгэлдэ хүтэлхэ хуурмаг ябадалай зэбсэг бү болгогты. Зүгѳѳр үхѳѳд амидырһан зондол адляар ѳѳһэдыгѳѳ Бурханда зорюулан, махабад бэеынгээ алишье эрхэтэниие Бурханай хэрэглэхэ зүб ябадалай зэбсэг болгогты. ¹⁴ Нүгэл танай ажамидаралые захирха ёһогүй. Таанад Хууляар бэшэ, харин Бурханай үршѳѳл хайраар ажамидарна ха юмта. ¹⁵ Зай, тиигээд яахамнайб? Хуулиин доро бэшэ, харин Бурханай үршѳѳл хайра доро ябажа байгаа хадаа нүгэл шэбэлээ саашадаашье үйлэдэхэмнай гээшэ гү? Үгыл даа! ¹⁶ Хэнэй үгэ дууланат, тэрэнэйл барлагынь болонот гэжэ таанад мэдэнэгүй аалта? Таанад нүгэлэй барлагынь байбал, үхэлдэ хүртэхэт, али үгы һаа, Бурханай үгѳѳр байдаг барлагынь байбал, үнэн сэдьхэлтэй болохот. ¹⁷ Бурханда баяр баясхалан хүргэе! Таанад нэгэ үедэ нүгэлэй барлагууд байһан аад, номногдоһон һургаалай үнэн зүбые бүхы зүрхэ сэдьхэлээрээ дуулажа абаат. ¹⁸ Тиин нүгэлэй мэдэлһээ мултараад, таанад зүб юумэнэй барлагууд болобо гээшэт. ¹⁹ Таанадай үшѳѳл гүйсэд болбосороогүй хада би юрын жэшээнүүдые хэрэглэнэб. Урдань таанад бузар муухай юумэнүүдые үйлэдэхэ зорилготойгоор махабад бэеынгээ эрхэтэнүүдые нүгэлэй барлаг болгоһон байгаат. Харин мүнѳѳ махабад бэеынгээ бүхы эрхэтэнүүдые нангин хэрэгүүдые бүтээжэ байхаарнь зүб юумэнэй барлагууд болгогты. ²⁰ Нүгэлэй барлагууд байхадаа таанад зүб юумэндэ ямаршье хабаагүй байгаат. ²¹ Урдань үйлэдэдэг хэрэгүүдһээ таанад юу оложо абабат? Мүнѳѳ тэдэ хэрэгүүдһээ эшэжэ улайхаһаа бэшэ ондоо юумэн үгы, тэдэтнай таанадые үхэлдэ хүтэлжэ байгаа ха юм. ²² Мүнѳѳ таанад нүгэл шэбэлһээ сүлѳѳлэгдѳѳд, Бурханай барлагууд болобот. Тэрэнэй үрэ дүндэнь таанад арюун гэгээн болобот, мүнхын амидаралда хүртэбэт. ²³ Хэһэн нүгэл шэбэлэйтнай түлѳѳһэниинь үхэл юм. Харин манай Дээдын Эзэн Иисус Христостой нэгэдэн мүнхэ амидархань Бурханай үршѳѳл бэлэг юм.

¹ Аха дүүнэрни, таанад Хуули ойлгонот, тиимэһээ Хуули гансал амиды хүнүүдые захиржа шадаха гэжэ мэдэнэт. ² Жэшээлбэл, хуулиин ёһоор хадамтай эхэнэр нүхэрэйнгѳѳ амиды мэндэ байха үедэл нүхэртэйгѳѳ холбоотой юм; хэрбээ нүхэрынгѳѳ наһа барабалнь, тэрэ эхэнэр гэрлэлгын Хуулиһаа сүлѳѳтэй болоно. ³ Тиимэһээ нүхэрэйнгѳѳ амиды мэндэ байха сагта ондоо хүнтэй ханилбалнь, тэрэ эхэнэр эрэдээ урбагша гэжэ нэрлэгдэхэ, харин нүхэрэйнь нүгшэһэн байбал, тэрэ эхэнэр хуулиин ёһоор сүлѳѳтэй болоод, ондоо хүнтэй һугаашье һаа, эрэдээ урбагша гэжэ тоологдохогүй. ⁴ Аха дүүнэрни, таанадай ушар тон тиимэл юм. Таанад мүнѳѳ Христосой бэеын эрхэтэн болоод, Хуулитай холбоогоо таһалба гээшэт. Мүнѳѳ таанад Бурханда алба хэжэ аша туһатай байхын тула үхѳѳд амидырһан Христосой хүнүүд болобот. ⁵ Энэ дэлхэйн жама ёһоор ажамидархадамнай Хуули махабад бэеымнай нүгэлтэ хүсэлэнгүүдые һэргээдэг байгаа, бидэ булта үхэхэ хойшолонтой байгаабди. ⁶ Харин мүнѳѳ бидэ урдань маанадые хүлеэд байһан Хуулиин талаар үхѳѳд, эрхэ мэдэлһээнь мултараабди. Саашадаа бидэ бэшэгдэһэн Хуули сахижа, хуушан аргаар алба хэхэгүйбди, харин шэнэ аргаар Һүлдын мэдэлдэ байгаад, Бурханда алба хэхэбди. ⁷ Зай, тиигээд Хуули ѳѳрѳѳ нүгэлтэй гэжэ хэлэхэмнай гү? Үгыл даа! Зүгѳѳр Хуулиин үгы байбал, би нүгэл гээшэ юун бэ гэжэ мэдэхэгүй байха һэнби. «Ондоо хүнэй юумэндэ бү һанаарха», – гэжэ Хуулиин хэлээгүй юм һаа, би тиигэжэ һанаархаха гээшэ нүгэл юм гэжэ мэдэхэгүй һэм. ⁸ Зүгѳѳр нүгэл тэрэ захяа заабариин ашаар элдэб янзын харата хүсэлэнгүүдые зосоомни түрүүлээ. Нүгэл Хуулигүйгѳѳр ямаршье хүсэгүй. ⁹ Урдань Хуули мэдэхэгүй байхадаа би амиды ябааб, теэд энэ захяа заабариие дуулахадаа, зосоомни нүгэл бүрилдэбэ, ¹⁰ тиигээд би хосорооб. Тиигэжэ амидарал асарха ёһотой байһан захяа заабари намда үхэл асараа. ¹¹ Боломжо гарахада, нүгэл энэ захяа заабаряар намайе мэхэлбэ, тиигээд алаба. ¹² Тиибэ яабашье Хуули ѳѳрѳѳ арюун нангин юм, захяа заабаринууднь баһа арюун нангин, үнэн зүб, һайн һайхан юм. ¹³ Зай, тиихэдээ һайн һайхан юумэн намда үхэл асараа гээшэ гү? Үгыл даа, нүгэл үхэлые асараа. Үнэн байдалаа элирүүлхын тула нүгэл һайн һайхан юумые хэрэглэн, зосоомни үхэл түрүүлээ. Тиимэһээ захяа заабариин ашаар нүгэлэй бүришье аймшагтай, бүришье бузар булай байһаниинь харуулагдаа юм. ¹⁴ Хуули оюун сэдьхэлтэй холбоотой, харин би бэе махабадтаа хүлюулээд, нүгэлэй богоолынь болон худалдагдаһан байгааб гэжэ би мэдэнэб. ¹⁵ Би юу хэжэ байһанаашье ойлгоногүйб, юундэб гэхэдэ, би хэхэ дуратай юумэеэ хэнэгүйб, харин хэхэ дурагүй байһан юумэеэ үйлэдэжэ байнаб. ¹⁶ Хэхэ дурагүй юумэеэ хэжэ байхадаа би Хуулиин үнэн зүб байһые баталнаб. ¹⁷ Тиимэһээ үнэндѳѳ болбол би бэшэ, харин зосоомни оршожо байһан нүгэл тиимэ юумэ үйлэдэнэ гээшэ. ¹⁸ Һайн һайхан юумэн зосоомни, махабад бэе соомни оршоногүй гэжэ би мэдэнэб. Һайн һайхан юумэ бүтээхэ хүсэлтэй байдагшье һаа, үнэндѳѳ бүтээжэ шададаггүй хүм. ¹⁹ Хэхэ дуратай байһан һайн һайхан юумые хэнэгүйб, харин орондонь хэхэ дурагүй байһан харатай муухай юумые үйлэдэнэб. ²⁰ Хэрбээ хэхэ дурагүй байһан юумэеэ хэжэ байгаа юм хадаа би ѳѳрѳѳ тиимэ юумэ хэнэгүйб, харин зосоомни оршожо байһан нүгэл тиимэ юумэ үйлэдэнэ. ²¹ Тиимэһээ һайн һайхан юумэ бүтээхэ дуратай байхадамни, харата һаналнууд намда һаалта болодог заншалтай. ²² Зүрхэ сэдьхэлдээ би Бурханай Хуули дэмжэжэ байна ха юмбиб. ²³ Харин бэеымни эрхэтэнүүдые хүдэлгэдэг ёһон ухаан бодолоймни дэмжэдэг хуулита ёһонтой тулалдадаг юм. Бэе махабад соомни хүдэлдэг нүгэлэй ёһон намайе богоолшолоод байна. ²⁴ Ямар азагүй хүн гээшэбиб! Үхэлдэ хүргэжэ байһан энэ махабад бэеһээмни хэн намайе аршалхань гээшэб? ²⁵ Бурханда баяр баясхалан хүргэнэб, тэрэ манай Дээдын Эзэн Иисус Христосой ашаар аршалха юм. Зай, иигээд би бэеэрээ нүгэлэй хуулида, харин ухаан бодолоороо Бурханай Хуулида алба хэжэ байгаа хүнби.

¹ Иисус Христостой нэгэдэн ажамидаржа байһан хүнүүд мүнѳѳ зэмэлэгдэхэгүй. ² Ушарынь юуб гэбэл, Иисус Христостой хамта ажамидаруулжа байһан Һүлдын хуули намайе нүгэлэй ба үхэлэй хуулиһаа сүлѳѳлѳѳ юм. ³ Манай нүгэлтэ мүн шанарһаа боложо Хуулиин бүтээжэ шадаагүй юумые Бурхан бүтээбэ. Тэрэ Хүбүүгээ нүгэлтэ маанадтайл адли бэетэйгээр нүгэлнүүдэймнай түлѳѳ тахил болгон эльгээжэ, махабад бэеэрнь манай нүгэлнүүдые гэмнэн шүүбэрилээ юм. ⁴ Ѳѳһэдынгѳѳ хүсэлэнгүүдые дахангүй, харин Һүлдые дахан ажамидардаг маанад соо Хуулиин шаардаһан нангин зүйл бүтэхын тула Бурхан тиигээ. ⁵ Нүгэлтэ шанарай хүсэлэнгүүдые дахан ажамидардаг хүнүүдэй ухаан бодолынь нүгэлтэ шанарай хүсэлэнгүүдэй мэдэлдэ байдаг. Харин Һүлдын хэлэһэн ёһоор ажамидардаг хүнүүдэй ухаан бодолынь Һүлдын эрхэ мэдэлээр болодог юм. ⁶ Нүгэлтэ мүн шанарай мэдэлдэ байһань үхэлдэ хүргэдэг, харин Һүлдын мэдэлдэ байһань амидарал ба энхэ тайбан найруулдаг. ⁷ Хүнүүд махабад бэеынгээ мэдэлдэ байхадаа Бурханай дайсадынь байдаг, ушарынь хэлэбэл, тэдэнэр Бурханай хуулиие сахинагүй, сахижа шадахашьегүй юм. ⁸ Нүгэлтэ мүн шанарайнгаа хүсэлэнгѳѳр ажамидарһан хүнүүд Бурханда таатай байжа шадахагүй. ⁹ Таанад нүгэлтэ мүн шанарайгаа хүсэлэнгүүдые даханагүйт, тиин зосоотнай Бурханай Һүлдын оршожо байхадань, Һүлдын эрхэ хүсэлѳѳр ажамидарнат. Зосоогоо Христосой Һүлдэгүй хүн тэрэнэй бэшэ юм. ¹⁰ Хэрбээ зосоотнай Христосой оршожо байбал, нүгэл шэбэлһээ боложо бэе махабадайтнай һүнэхэдэ, Бурханай урда үнэн сэдьхэлтэй байһан ашаартнай һүнэһэ һүлдэтнай амиды байха. ¹¹ Иисусые үхэхэдэнь амидыруулһан Бурханай Һүлдын зосоотнай оршожо байхадань, Христосые Амидыруулагша зосоотнай оршожо байһан Һүлдѳѳрѳѳ таанадайшье үхэлтэ бэедэ ами үршѳѳхэл. ¹² Тиимэһээл, аха дүүнэрни, бидэ нүгэлтэ мүн шанар байдалайнгаа хүсэлэнгүүдые дахан ажамидарха ёһогүйбди. ¹³ Тиигэжэ ажамидараа хадаа үхэхэт, харин Һүлдѳѳрѳѳ нүгэлтэ хэрэгүүдээ һүнѳѳжэ байбал, амиды байхат. ¹⁴ Бурханай Һүлдѳѳр хүтэлүүлэгдэһэн хүнүүд Бурханай үхибүүдынь гээшэ. ¹⁵ Бурханай Һүлдэ таанадые тэрээнһээ айжа байдаг барлаг болгоогүй, харин Бурханай үхибүүдынь болгоо, тиин Һүлдын хүсѳѳр бидэ Бурханиие: «Аба, Эсэгэмнай!» – гэжэ нэрлэдэгбди. ¹⁶ Бурханай Һүлдэ манай һүнэһэ һүлдэтэй ниилэн, маанадые Бурханай үхибүүд гэжэ батална. ¹⁷ Бидэ тэрэнэй үхибүүдынь хадаа ѳѳрынгѳѳ хүнүүдтэ хадагалажа байһан буян хэшэгэйнь залгамжалагшад гээшэбди, баһа Христосто бэлдээтэй юумые Христостой хамта залгамжалхабди. Христосой зоболонгуудые хубаалсаа юм хадаа, тэрэнэй алдарташье хүртэлсэхэ ха юмбибди. ¹⁸ Мүнѳѳнэй сагта зобожо байһамнай ерээдүйдэ маанадта үгтэхэ алдарай хажууда юуншье бэшэ гэжэ бодоноб. ¹⁹ Бүтээгдэһэн бүхы юумэнүүд Бурханай ѳѳрынгѳѳ үхибүүдые элирүүлэн харуулхыень аргагүй ехээр хүлеэжэ байна. ²⁰ Бүтээгдэһэн бүхы юумэнүүд ѳѳһэдынгѳѳ дура зоргоор бэшэ, харин Бурханай эрхэ хүсэлѳѳр зорилгоёо бэелүүлээгүй юм. ²¹ Тэдэ ѳѳһэдѳѳ үхэлтэ богоолшолгоһоо нэгэ сагта мултаржа, Бурханай үхибүүдэй һүр жабхаланта эрхэ сүлѳѳе хубаалсаха юм гэжэ Бурхан түлэблэжэ байгаа ха. ²² Мүнѳѳнэйшье саг хүрэтэр бүтээгдэһэн бүхы юумэнүүд үхибүү түрэхэдѳѳ үбдэжэ байһан эхэнэртэл адляар үбдэн ёолоно гэжэ бидэ мэдэнэбди. ²³ Гансашье бүтээгдэһэн бүхы юумэнүүд ёолоно бэшэ, харин Бурханай түрүүшын үршѳѳл бэлэгтэ, Һүлдэдэнь хүртэһэн бидэшье Бурханай маанадые үхибүүдынь болгохые, махабад бэеыемнай сүлѳѳлхые хүлеэжэ байхадаа баһал зосоогоо ёолонобди. ²⁴ Ушарынь хэлэбэл, бидэ иимэ найдалтай болоод абарагдаһан байгаабди. Хэрбээ маанадай найдажа байһан юумэеэ хаража байбалнай, тэрэмнай бодото найдал бэшэ байха һэн. Хаража байһан юумэндээ яажа найдалтайб? ²⁵ Харин хараагүй юумэндээ найдажа байхадаа бидэ ехэл тэсэбэритэйгээр хүлеэжэ байдагбди. ²⁶ Маанадай шадал тэнхээгүй байхада маанадта Һүлдэ туһалдаг. Яажа зальбарха хэрэгтэйб гэжэ мэдэхэгүй байхадамнай Һүлдэ тайлбарилхын аргагүй ёолоогоор манай түлѳѳ зальбардаг. ²⁷ Харин зүрхэ сэдьхэлыемнай соо харадаг Бурхан Һүлдын һанал бодолые мэдэжэ байдаг юм. Һүлдэ Бурханай эрхэ хүсэлѳѳр лэ тэрэнэй арадай түлѳѳ тэрээниие гуйна ха юм. ²⁸ Бурханда дуратай, тэрэнэй эрхэ хүсэлѳѳр дуудуулагдаһан хүнүүдэй бүхы юумэнүүдтэнь Бурхан урагшатай байдаг. ²⁹ Бурханай шэлэжэ абаһан хүнүүд Хүбүүндэнь адли байха табилантай, тиин Хүбүүниинь олон һүзэглэгшэ аха дүүнэрэй дунда ууган Хүбүүниинь байха юм. ³⁰ Бурхан шэлэжэ абаһан хүнүүдээ дуудаа, дуудаһан хүнүүдээ үнэн сэдьхэлтэй болгоо, үнэн сэдьхэлтэнгүүдые алдар солодоо хүртѳѳгѳѳ. ³¹ Эдэ бүхэн тухай бидэ юун гэжэ хэлэхэбибди? Хэрбээ Бурханай манай талада байбал, маанадта эсэргүүсэһэн хүн байха аал? ³² Бурхан ѳѳрынгѳѳ Хүбүүниие хайрлангүй, бидэнэй бултанаймнай түлѳѳ үргэһэн байгаа. Бурхан маанадта Хүбүүгээ үгэжэ байбал, бусадшье бүхы юумэнүүдээ элбэгээр үгэхэ бэшэ гү? ³³ Бурханай шэлэжэ абаһан хүнүүдые хэн гэмнэхэб? Бурхан ѳѳрѳѳ тэдэниие зэмэгүй гээ ха юм. ³⁴ Тиихэдээ хэн тэдэниие зэмэлхэб? Үхѳѳд, тиигээд амидыраад, Бурханай баруун гарынь болоһон, маанадай түлѳѳ гуйлта үргэжэ байһан Христос Иисус тэдэниие гэмнэхэгүйл! ³⁵ Тиихэдээ юун бидэниие Христосой хайра дураһаа холодуулхаб? Зоболонгууд гү, али бэрхэшээлнүүд гү, али хашалга мүрдэлгэнүүд гү, али үлбэр үлэсхэлэн байдал гү, али ядуу тулюур байдал гү, али аюул оһол гү, али үхэл холодуулха болоно гү? ³⁶ «Шинии түлѳѳ бидэ үдэр бүхэн үхэлэй аюултай тохёолдонобди. Гаргуулхаяа байһан хониндол адли байнабди», –гэжэ Нангин Бэшэг соо хэлэгдэнэ. ³⁷ Эдэ бүхы ушарнуудта бидэ маанадта дуратай байһан Христосой ашаар илалта туйлан гаранабди. ³⁸ Амиды байна гүбди, али үхэһэн байна гүбди, юуншье бидэниие Бурханай хайра дуранһаа хаһаахагүйл. Эльгээмэлнүүдшье, бусад огторгойн хүсэнүүдшье, оршон үеын юумэнүүдшье, ерээдүй сагай юумэнүүдшье, ³⁹ дээдын хүсэнүүдшье, доодын хүсэнүүдшье, бүтээгдэһэн бүхы юумэнүүдшье манай Дээдын Эзэн Христос Иисус соо оршоһон Бурханай хайра дуранһаа маанадые холодуулжа шадахагүй гэһэн бата этигэлтэй байнаб.

¹ Христосто һүзэглэдэг би үнэн зүбые хэлэнэб, худалаар хэлэнэгүйб. Тиин Нангин Һүлдэшье, һэшхэлнишье минии хэлэһые үнэн гэжэ гэршэлнэ. ² Би угаа ехээр уйдана гашууданаб, зүрхэ сэдьхэлни зогсонгүй үбдэнэ. ³ Ѳѳрынгѳѳ арадые абархын түлѳѳ Бурханай хараалда хүртѳѳд, Христосһоо холодуулхадашье би бэлэнби. ⁴ Тэдэ израильшууд Бурханай шэлэжэ абаһан хүнүүд юм. Бурхан тэдэндэ алдараа харуулаа, тэдэнтэй хэлсээ баталаа, тэдэндэ Хуули, тиигээд шүтэлгын Һүмэ ба найдуулгаа үгѳѳ. ⁵ Тэдэнэр агууехэ үбгэ эсэгэнэртэй юм, тиихэдэ Бурханай табисуурта махабад бэеэрээ баһал тэдэнэй яһанай хүн юм. Бүхы юумые захиржа байһан Бурхан хэтын хэтэдэ магтаал солотой байһай гэжэ би зальбарнаб! Болтогой! ⁶ Бурхан амалһан юумэеэ дүүргээгүй гэжэ хэлэхын аргагүй. Һүүлэй һүүлдэ Израилиин арад зон бултадаа Бурханай бодото хүнүүд бэшэ. ⁷ Тиин Абраһамай үри һадаһад бултадаа Бурханай үхибүүд бэшэ. «Ши Исаагаар лэ дамжан минии амалһан үри һадаһадтай болохош», – гэжэ Бурхан Абраһамда хэлэһэн байгаа. ⁸ Ондоогоор хэлэбэл, юрын аргаар түрэһэн үхибүүд Бурханай үхибүүд бэшэ. Бурханай найдуулһанай ёһоор лэ түрэһэн үхибүүд бодото үри һадаһад гэжэ тоологдодог гээшэ. ⁹ «Хойто жэл энэл сагтаа би дахин ерэхэб, тиин Саррашни хүбүүтэй болоод байха», – гэжэ хэлэһэниинь Бурханай найдуулһан үгэ байһан юм. ¹⁰ Энээнһээ гадна Ребекка ба манай үбгэ эсэгэ Исаагай хоёр хүбүүтэй болоходо тиимэ юумэн баһа тохёолдоо һэн. ¹¹ Үшѳѳ тэдэ хоёрой түрѳѳгүй, һайн гү, али муу юумэ хээгүй байхадань, «Ехэ хүбүүншни дүүдээ алба хэжэ байха», – гээд Дээдын Эзэн Ребеккэдэ хэлэһэн байгаа. Тиигэжэ хэлэхэдээ Дээдын Эзэн хүнүүдэй хэрэгүүдээр бэшэ, харин ѳѳрынгѳѳ эрхэ хүсэлѳѳр шэлэжэ байһанаа харуулһан байгаа. ¹³ «Яковта би дуратай, харин Исаавта дурагүй байгааб», – гэжэ Нангин Бэшэг соо хэлээтэй байдаг. ¹⁴ Зай, тиихэдээ Бурхан үнэн зүб бэшэ гэжэ хэлэхэмнай гээшэ гү? Үгыл даа! ¹⁵ Тэрэ Моисейдэ: «Дуратайл хүнѳѳ би үршѳѳхэб, дуратайл хүнѳѳ би хайрлахаб», – гэжэ хэлэһэн байгаа. ¹⁶ Тиимэһээ бүхы юумэн бидэ хүнэй хүсэһэнһѳѳ гү, али хэһэнһээ бэшэ, харин Бурханайл үршѳѳһэнһѳѳ дулдыдана. ¹⁷ «Шамаар дамжан һүр жабхалангаа харуулхын тула, бүхы газар дэлхэйн зоной магтаал солодо хүртэхын тула би шамайе хаанаар табяа хүм», – гэжэ Дээдын Эзэн Египедэй фараондо Нангин Бэшэг соо хэлэнэ. ¹⁸ Тиимэһээ Бурхан дуратайл хүнѳѳ үршѳѳнэ, дуратайл хүнѳѳ зүрюу болгоно. ¹⁹ «Тиигэбэл Бурхан яахадаа хүниие зэмэлнэб? Бурханай эрхэ хүсэлдэ хэн эсэргүүсэхэ аргатайб?» – гэжэ хэн нэгэн намһаа һураха. ²⁰ Ай, нүхэр, Бурханда үсэрхэжэ байхаар ши хэн гээшэбши? Бүтээлынь тэрэниие бүтээгшэдэ: «Юундэ намайе иигэжэ бүтээгээбши?» – гэжэ хэлэхэ аал? ²¹ Домбонуудые бүтээдэг хүн нэгэл адли шабарһаа тусгай хэрэглэлэй домбо ба үдэр бүхэн хэрэглэгдэдэг юрын домбо бүтээхэ эрхэтэй бэшэ аал? ²² Бурхан уур сухалаа харуулха, һүр жабхалангаа элирүүлхэ һанаатай байгаа, гэхэдэ, хосорхо заяатай байһан хүнүүдтэ тэрэ ехэл тэсэбэритэйгээр хандана. ²³ Бурхан алдартаа хүртѳѳхэ гэжэ бэлдээд байһан үршѳѳлтэ хүнүүдтээ баһал элбэг дэлбэг алдараа элирүүлхэ дуратай байна. ²⁴ Бидэ гансал еврейнүүдэй дундаһаа бэшэ, харин бусадшье арадуудай дундаһаа шэлэгдэжэ абтаһан хүнүүд гээшэбди. ²⁵ Тон тиигэжэл Дээдын Эзэн Осиин ном соо хэлэнэ: «Минии арад бэшэшье байгаа һаань, Би тэдэниие ѳѳрынгѳѳ арад болгохоб. Дурагүй байһан яһатандаа Би хайра дуратай болохоб». ²⁶ «Таанад минии арад бэшэт гэжэ хэлэгдэһэн эгээл тэрэ һууринда тэдэнэр Амиды Бурханай үхибүүд гэжэ нэрлүүлхэ». ²⁷ «Дээдын Эзэн зарга шүүбэреэ газар дэлхэй дээрэ шуумгайгаар ябуулха. Тиимэһээ Израилиин арад зоной далайн элһэндэл адли тоогүй олон байгаашье һаань, тэдэнэй үсѳѳниинь абарагдаха», – гэжэ Израилиин арад зон тухай Исайя лүндэншэн айладхаа юм. ²⁹ «Хэрбээ Һүр хүсэтэй Дээдын Эзэн зарим үри һадаһадые маанадта үлѳѳгѳѳгүй юм болбол, бидэ Содомдол адли һүнѳѳгдэхэ, Гоморродол адли усадхагдаха байгаабди», – гэжэ баһал Исайя лүндэншэн уридшалан хэлэнэ. ³⁰ Зай, юун гэжэ хэлэхэбибди? Бурханай урда үнэн сэдьхэлтэй байхые оролдоогүй бусад арадууд этигэл һүзэгэйнгѳѳ ашаар үнэн сэдьхэлтэй болоо. ³¹ Харин Хуули сахин үнэн сэдьхэлтэй болохые зориһон Израилиин арад зон үнэн сэдьхэлтэй болоогүй. ³² Юундэ болоогүйб? Юуб гэбэл, тэдэнэр этигэл һүзэгтѳѳ бэшэ, харин хэрэгүүдтээ найдаһан байгаа. Тиимэһээ «бүдэрдэг шулуунда» тэдэнэр бүдэрһэн байгаа. ³³ Бурхан Нангин Бэшэг соо тон тиигэжэ хэлэнэ: «Хара даа! Би Сион дээрэ хүнүүдэй бүдэрдэг, хүнүүдые гомдохоодог шулуу табинаб. Харин тэрээндэ этигэл һүзэгтэй хүнүүд хэзээдэшье урмаа хухархагүй».

¹ Аха дүүнэр! Израилиин арад зоной абарагдахые би бүхы зүрхэ сэдьхэлээрээ хүсэнэб, тэрээн тухай Бурханда зальбарнаб. ² Тэдэнэр Бурханда һүгэдэдэг гэжэ гэршэлнэб, гэхэтэй сасуу тэдэнэй хайра дуран үнэн зүб мэдэрэл дээрэ оршоногүй. ³ Тэдэнэр Бурханай урда яажа үнэн сэдьхэлтэй байхые мэдэнгүй, ѳѳһэдынхеэрээ болоод, Бурханай мэдэлһээнь гаран, үнэн сэдьхэлтэй болгодог Бурханай замһаа хадуурна. ⁴ Ушарынь хэлэбэл, һүзэглэһэн хүн бүхэнэй үнэн сэдьхэлтэй болохын тула Христос Хуулиин зорилго бэелүүлнэ. ⁵ Хуули сахин үнэн сэдьхэлтэй болохо тухай: «Хуулиин захяа заабаринуудые сахиһан хүн бүхэн амиды байха», – гэжэ Моисей бэшээ. ⁶ Харин этигэл һүзэгэйнгѳѳ ашаар үнэн сэдьхэлтэн гэжэ тоологдодог зондо хэлэгдэнэ: «Христосые ѳѳһэдтѳѳ доошонь буулгахаяа тэнгэри ѳѳдэ гараһанай хэрэггүй». ⁷ Али «Христосые үхэлһѳѳ бодхоохын тула үхэлэй доодо орондо бууһанай хэрэггүй». ⁸ Юундэб гэбэл, «Бурханай мэдээсэл хажуудашни байна, хэлэ амандашни, зүрхэ сэдьхэлдэшни байна». Эгээл тэрэ мэдээсэлые бидэ таанадта номнонобди. ⁹ Хэрбээ Иисусые Дээдын Эзэн гэжэ айладхаад, Бурхан тэрэниие амидыруулаа гэжэ зүрхэ сэдьхэлээрээ этигэжэ байбал, ши абарагдахаш. ¹⁰ Зүрхэ сэдьхэлээрээ һүзэглэһэнэйнгѳѳ ашаар бидэ үнэн сэдьхэлтэн болонобди, хэлэ амаараа айладхан абарагданабди. ¹¹ «Тэрээндэ һүзэглэһэн хүн бүхэн урмаа хухархагүй», – гэжэ Нангин Бэшэг соо хэлэгдэнэ. ¹² Еврей хүн гү, али ондоо яһанай хүн гү, ямаршье илгаагүй юм. Дээдын Эзэн хүн бүхэндэ ори ганса юм, тиин тэрээндэ хандаһан хүн бүхэниие тэрэ элбэг дэлбэгээр үршѳѳлдѳѳ хүртѳѳдэг. ¹³ «Дээдын Эзэниие дуудаһан хүн бүхэн абарагдаха», – гэжэ Нангин Бэшэг соо хэлээтэй байдаг ха юм. ¹⁴ Тиигээд һүзэглѳѳгүй байһан хүнѳѳ яажа гуйн дуудалтайб? Тиихэдэ тэрээн тухай дуулаагүй аад, яажа һүзэглэлтэйб? Тиихэдэ хүнэй номноогүй ушарта яажа мэдээсэлые дуулалтайб? ¹⁵ Тиихэдэ номногшодые ябуулаагүй һаа, яажа мэдээсэлые номнолтойб? «Һайн Мэдээсэл асаржа байһан номногшодой ерэхые харахада үзэсхэлэнтэ гоё юм», – гэжэ Нангин Бэшэг соо хэлэгдэнэ. ¹⁶ Гэхэтэй сасуу Һайн Мэдээсэлдэ булта этигээгүй юм. «Дээдын Эзэн, хэн манай мэдээсэлдэ этигээб?» – гэжэ Исайя лүндэншэн хэлэнэ. ¹⁷ Тиимэһээ этигэл һүзэгтэй болохын тула хүн мэдээсэл дуулаха ёһотой, тиин мэдээсэлэй үгтэхын тула Христос тухай номногдохо ёһотой. ¹⁸ Израилиин арад зон мэдээсэл дуулаагүй аал гэжэ би асуужа байнаб. Юундэ дуулаагүй байха юм, «Тэдэнэй дуун бүхы газар дэлхэйгээр тараа, тэдэнэй үгэнүүдынь газар дэлхэйн заха хизаар хүрѳѳ», – гэжэ Нангин Бэшэг соо хэлэгдэнэ ха юм. ¹⁹ Израилиин арад зон ойлгоо гү, али үгы гү гэжэ би дахин асуунаб. Моисей ѳѳрѳѳ энээндэ Дээдын Эзэнэй нэрһээ харюу үгѳѳ юм: «Юуншье бэшэ яһатанаар би арад зонойнгоо атаархал түрүүлхэб, юушье ойлгодоггүй хүнүүдээр би арад зонойнгоо уур сухалынь хүргэхэб». ²⁰ «Намайе бэдэрээгүй хүнүүд намайе олоо. Нам тухай асуужа байгаагүй хүнүүдтэ би ѳѳрыгѳѳ нээгээб», – гэжэ Исайяшье Бурханай нэрһээ зоригтой хатуугаар айладхана. ²¹ «Үгэ дууладаггүй, үһэрхүү зүрюу арадта Дээдын Эзэн бүхэли үдэртѳѳ гараа һарбайжа байгаа», – гэжэ Исайя Израилиин арад тухай хэлэнэ.

¹ Зай, тиихэдээ Бурхан ѳѳрынгѳѳ арадһаа арсаба гээшэ гү гэжэ би һуранаб. Үгыл даа! Би ѳѳрѳѳшье Израилиин хүн, Абраһамай үри һадаһан, Вениаминай обогой хүн гээшэб. ² Эхинһээ нааша шэлэжэ абаһан арадһаа Бурхан арсаагүй. Нангин Бэшэг соо Израилиин арадые зэмэлэн Илиягай Бурханда хандаһые һананагүй аалта? ³ Тэрэ: «Дээдын Эзэн, тэдэнэр шинии лүндэншэдые алаа, үргэлэй газарнуудыешни һандаргаа, би гансаараал үлѳѳд байнаб, тиин тэдэнэр намайешье алаха гэжэ забдана», – гээ һэн. ⁴ Бурхан харюудань юун гэжэ хэлээ һэм? «Хуурмаг бурхан Ваалда мүргѳѳгүй долоон мянган хүнүүдые би ѳѳртѳѳ үлѳѳгѳѳб». ⁵ Мүнѳѳнэйшье сагта тон тиимэ: Бурханай үршѳѳл хайраар шэлэгдэжэ абтаһан хүнүүд үшѳѳл бии юм. ⁶ Тэрэ хүнүүдые хэһэн хэрэгүүдээрнь бэшэ, харин үршѳѳл хайраараа шэлэжэ абадаг юм. Тиигээгүй болбол тэрэнэй үршѳѳл хайра бодото бэшэ байха һэн. ⁷ Зай юун болоноб? Израилиин арад зон бэдэрһэн юумэеэ олоогүй. Зүгѳѳр үсѳѳхэн лэ Бурханай шэлэжэ абаһан хүнүүд бэдэрээшэеэ олоо юм, харин бусад зониинь Бурханай уряалые анхараагүй юм. ⁸ Нангин Бэшэг соо хэлэһэнэй ёһоор: «Бурхан тэдэнэй сэдьхэлые мэдэрэлгүй болгоо, тиин тэдэнэр мүнѳѳдэршье болотор хараха гү, али дуулаха аргагүй байна». ⁹ «Найр баярай шэрээдэ һуухадаа тэдэнэр зангада орог, бүдэржэ унаг, хэһээлтэдэ орог! ¹⁰ Хаража шадахагүй байхаар Тэдэ һохорог лэ! Бэрхэшээл зоболонгуудта дарагдан хэтын хэтэдэ тахииг лэ!» – гэжэ Давид бэшэнэ. ¹¹ Тиигэбэл еврейнүүд дахин хэзээшье һэргэжэ бодохогүйгѳѳр бүдэржэ унаа гү гэжэ би һуранаб. Үгыл даа! Тэдэнэй нүгэл шэбэлдэ унахада, атаархалынь хүргэжэ байхаар бусад арадууд абаралда хүртѳѳ. ¹² Еврейнүүдэй нүгэлһѳѳ боложо газар дэлхэйнхид элбэг дэлбэгээр буян хэшэгтэ хүртѳѳ, тэдэнэй оюун сэдьхэлэй ядуу байһанһаа бусад арадууд баян бардамаар буян хэшэгтэ хүртѳѳ. Тиихэдэ еврейнүүдэй Бурханда хандабалнь, буян хэшэг бүришье элбэг дэлбэгээр үгтэхэ бэшэ аал. ¹³ Бусад арадууд, мүнѳѳ би таанадта ханданаб. Бусад арадуудай элшэнээр ажаллажа байһандаа би бахархажа байхаб. ¹⁴ Тиигэжэ ѳѳрынгѳѳ яһанай аха дүүнэрэй дунда атаархал түрүүлжэ, заримыеньшье абаржа магадгүйб. ¹⁵ Тэдэнһээ арсахадаа, Бурхан бусад арадуудтай эбгүй байһанаа эбтэй эетэй болоо. Харин Бурханай еврейнүүдые ойртуулбалнь, юун болохоб? Тиигэбэл үхэһэн хүнүүдэй амидырһантай адли байха! ¹⁶ Хэрбээ дээжынь Бурханда зорюулаатай байбал, үлэһэнииньшье арюун сэбэр байхал. Хэрбээ модоной үндэһэниинь Бурханда зорюулаатай байбал, эшэ һалаануудыньшье баһа арюун сэбэр байха юм. ¹⁷ Һуулгагдаһан модоной зарим һалаануудыень таһалаад, орондонь зэрлиг оливай һалаануудые һуурижуулба ха. Бусад арадуудай түлѳѳлэгшэ таанад эгээл тэрэ зэрлиг оливай модотой адлит, мүнѳѳ таанад үндэһэндэ, шэмэ шүүһэндэ баһа хабаатай болобот. ¹⁸ Тиимэһээ таанад үнѳѳхи һалаануудта адляар таһалагдажа хаягдаһан хүнүүдые доогуур бү харагты. Яахадаа таанад хамараа дээгүүр үргэбэбта? Таанад миин лэ һалаанууд ха юмта, таанад үндэһэ тэнжүүлэн баринагүйт, харин үндэһэн таанадые тэнжүүлэн барина. ¹⁹ «Минии һуурижахын лэ тула һалаанууд таһалагдаһан байгаа», – гээд таанад хэлэхэт. ²⁰ Тэрэшни зүб. Тэдэнэр этигэл һүзэггүй байһан хадаа таһаржа унаа, харин таанад этигэл һүзэгѳѳрѳѳл тэрэ һууринда баригдажа байнат. Тиимэһээ тэрээгүүрээ бү бахархагты, зүгѳѳр айжа һүрдэжэ байгты. ²¹ Бурхан жэнхэни һалаанууд болохо еврейнүүдыешье хайрлаагүй, тиихэдэ тэрээндэ үһэрхэбэлтнай, тэрэ таанадые бүришье хайрлахагүй. ²² Бурхан ямар үршѳѳл хайратай, ямар уур сухалтай байдаг бэ гэжэ таанад эндэһээ харабат. Бурхан ѳѳртэнь үһэрхэһэн зондо уур сухалтайгаар, зүгѳѳр тэрэнэй үршѳѳл хайрада байһан танда үршѳѳл хайратайгаар хандадаг. Тэрэнэй үршѳѳл хайрадань оршоогүй һаатнай, таанадые баһал таһалжа хаяха. ²³ Харин үнѳѳхи этигэл һүзэггүй еврейнүүд хубилбал, дахин һууриндаа байрлуулагдаха. Бурхан тэдэниие бусаажа һууриндань байрлуулха арга хүсэтэй юм. ²⁴ Бусад арадууд таанад зэрлиг оливай һалаа набшаһадта адлит. Хэрбээ ѳѳһэдынгѳѳ зэрлиг модонһоо таһалагдаад, ондоо таримал оливай модондо һуурижуулагдадаг байхадань, таримал модоной һалаада адли еврейнүүдые түрэл һууриндань һуулгахада Бурханда бүришье амархан бэшэ гү? ²⁵ Аха дүүнэр, ѳѳһэдыгѳѳ сэсэн ухаатайбди гэжэ бодожо байхагүйнтнай тула энэ нюуса үнэниие таанадта мэдүүлхэ һанаатайб. Израилиин зарим хүн зон хододоо тиимэ зүрюу байхагүй, тэдэнэр шэлэгдэһэн бусад арадуудай бүрин Бурханда ерэтэр лэ тиимэ байха. ²⁶ Тиигэжэ Израилиин бүхы арад зон абарагдаха. «Сион хадаһаа Абарагша ерэхэ, Яковай үри һадаһадһаа нүгэл шэбэлые зайсуулха. ²⁷ Тэдэнэй нүгэл шэбэлыень зайсуулаад, Би тэдэнтэй энэ хэлсээ баталхаб», – гэжэ Нангин Бэшэг соо бэшээтэй байдаг. ²⁸ Бусад арадууд таанадай аша туһада Һайн Мэдээсэлые буруушааһан еврейнүүд Бурханай дайсадынь болоо. Харин Бурханай шэлэжэ абаһанай, үбгэ эсэгэнэртэнь үгэһэн найдуулгын ашаар тэдэнэр Бурханай нүхэдынь юм. ²⁹ Ушарынь юуб гэбэл, Бурхан шэлэжэ абаһан, буян хэшэгтээ хүртѳѳһэн хүнүүд тухайгаа һаналаа хубилгадаггүй. ³⁰ Бусад арад таанадай урдань Бурханай үгэ дууладаггүй байһантайтнайл адляар мүнѳѳ еврейнүүд баһа Бурханай үгэ дууладаггүй. Тэрээнһээнь боложо таанад Бурханай үршѳѳл хайрада хүртэбэт. ³¹ Тон тиигэжэл танай хүртэһэн үршѳѳл хайрада хүртэхын тула еврейнүүд Бурханай үгэ дууланагүй. ³² Үршѳѳл хайраяа бултанда харуулхын тула Бурхан бүхы хүнүүдые үсэд зүрюу ябадалайнь түлѳѳ баряад байгаа. ³³ Хэн Бурханай баян бардамые, сэсэн ухааниие, мэдэрэл ойлгосые хэмжэжэ барахаб? Хэн тэрэнэй шиидхэбэри шүүбэриие тайлбарилжа шадахаб? Хэн тэрэнэй харгы замые ойлгохоб? ³⁴ Бурханай һанал бодолнуудые мэдэжэ байһан, али тэрээндэ зүблэл үгэжэ байһан хүн олдохо аал? ³⁵ Бусаажа үгэхэ уялгатайгаар Дээдын Эзэндэ юумэ зээлидэһэн хүн байха аал? ³⁶ Бүхы юумые тэрэ бүтээһэн байна, бүхы юумэн тэрэнэй ашаар ба тэрэнэй тулада оршоно ха юм. Бурхан хэтын хэтэдэ алдар солотой байһай! Болтогой.

¹ Зай, аха дүүнэрни, Бурханай үршѳѳл хайраар ѳѳһэдыгѳѳ арюун сэбэр, таатай, амиды үргэл болгон Бурханда асарагты гэжэ гуйжа байнаб. Тиигэбэл тэрэтнай танай бодото алба болохо. ² Энэ дэлхэйн зондо адли бү байгты, харин ухаан бодолоо шэнэлүүлэн, ѳѳһэдыгѳѳ бүрин хубилгагты. Тиигэбэл таанад Бурханай эрхэ мэдэлые: тэрээндэ һайн һайхан, таатай, эрхим түгэс байхые мэдэжэ байхат. ³ Бурханай намда үршѳѳһэн абьяас бэлэгэй ашаар таанадай хүн бүхэндэ хэлэнэб: байһанһаан үлүү ехээр ѳѳр тухайгаа бү һанажа байгты. Зүгѳѳр Бурханай шамда үгэһэн этигэл һүзэгэй хэмжээгээр ѳѳр тухайгаа дарууханаар бодомжолжо байгты. ⁴ Манай ганса бэедэ олон эрхэтэнүүд байна ха юм, тиин бэеын эрхэтэн бүхэн ондо ондоо зорилготой гээшэ. ⁵ Тон тиигэжэл бидэ олоншье байһан мүртѳѳ бултадаа Христостой хамта нэгэ бэе болонобди, тиин бидэ нэгэ бэеын ондо ондоо эрхэтэнүүдтэл адли бэе бэетэйгээ холбоотойбди. ⁶ Тиимэһээ Бурханай маанадта хайрлаһан элдэб янзын абьяас бэлигүүдээ хэрэглэнэбди. Хэрбээ Бурханай хэлэһые дамжуулха абьяас бэлигтэй байгаа һаа, этигэл һүзэгэйнгѳѳ хэмжээгээр лэ хүргэхэ ёһотойбди. ⁷ Бусад зондо алба хэхэ табилантай һаа, алба хэхэ ёһотойбди; һургаха табилантай һаа, һургаха ёһотойбди; ⁸ бусадые урмашуулха табилантай һаа, урмашуулха ёһотойбди. Бусадтай хубаалсажа байгаа һаа, бардам баянаар хубаалсажа бай; хүтэлэгшэ юм һаа, бүхы хүсэ шадалаараа захиржа бай; буян хэгшэ юм һаа, баяртайгаар буян хэжэ бай. ⁹ Хүнүүдтэ үнэн зүрхэнһѳѳ дуратай байгты; нүгэлтэ юумэнүүдһээ зайсажа байгты; һайн һайхан юумэндэ эрмэлзэжэ байгты. ¹⁰ Бэе бэедээ аха дүүнэртэйл адляар дуратай байгты, бусад зониие ѳѳрһѳѳн дээгүүр хүндэлэгты. ¹¹ Дээдын Эзэндэ урматайгаар, оролдосотойгоор алба хэжэ байгты. ¹² Найдалаараа урмашажа, зоболон бэрхэшээлнүүдтэ тэсэбэритэй байжа, саг үргэлжэ зальбаржа байгты. ¹³ Дуталдажа байһан һүзэглэгшэдтэй хубаалсажа, аяншадые гэртээ оруулан хүндэлжэ байгты. ¹⁴ Таанадые хашан мүрдэжэ байһан хүнүүдые үреэжэ, хараалгүйгѳѳр үреэжэ байгты. ¹⁵ Баяр жаргалтай байһан зонтой баярлажа, уйлажа гашуудажа байһан зонтой гашуудажа байгты. ¹⁶ Хоорондоо нэгэ һанал бодолтой байгты. Омогорхон бахархангүй, юрын хүнүүдтэй нүхэсэжэ байгты. Ѳѳһэд тухайгаа сэсэн ухаантайбди гэжэ бү бодогты. ¹⁷ Таанадта муу юумэ хэһэн хүндэ харюудань муу юумэ бү хэгты. Харин хүн бүхэнэй һайн гэжэ бододог юумэ бүтээхэеэ оролдогты. ¹⁸ Хүн бүхэнтэй эбтэй эетэй байхын тула бүхы шадалаараа шармайжа байгты. ¹⁹ Аха дүүнэр, үһѳѳгѳѳ абаха гэжэ бү забдагты, харин Бурханай уур сухалда тэрэнээ даалгагты. «Би үһѳѳгѳѳ абахаб, би харюулхаб гэжэ Дээдын Эзэн хэлэнэ», – гээд Нангин Бэшэгтэ бэшээтэй байдаг ха юм. ²⁰ «Хэрбээ дайсаншни үлэсэжэ байбал, тэрээндээ эдеэ хоол үгэ; хэрбээ ангажа байбал, тэрээнээ ундалуула. Тиигэбэлшни тэрэ эшэһэндээ газар доро орон алдахал», – гэжэ Нангин Бэшэг соо баһа хэлэгдэнэ. ²¹ Харатай муу юумэн шамайе бү илаг, харин орондонь ши харатай муу юумые һайн һайхан юумээр илажа бай.

¹ Хүн бүхэн засаг баригшадай үгэ дуулажа байха ёһотой, ушарынь юуб гэбэл, ганса Бурханай зүбшѳѳлѳѳр лэ хүндэ засаг бариха эрхэ үгтэдэг юм, тиин мүнѳѳнэй засаг баригшадые Бурхан лэ табиһан болоно. ² Засаг захиргаанай урдаһаа эсэргүүсэһэн хүн Бурханай тогтоолдо эсэргүүсэнэ, тиимэһээ тэрэ хэһээлтэдэ орохо. ³ Засаг захиргаан һайн юумэ бүтээжэ байһан зондо бэшэ, харин харата муухай юумэ үйлэдэжэ байһан зондо аймшагтай байдаг. Засаг захиргаанһаа айхын хэрэггүй: һайн юумэл бүтээжэ байгаарай, тиигэбэл засаг захиргаанай магтаалда хүртэхэш. ⁴ Тэдэнэршни шинии һайн һайханай түлѳѳ ажаллажа байһан Бурханай зарасанар ха юм. Хэрбээ харата муухай юумэ үйлэдэжэ байбал, тэдээнһээ айжа бай, тэдэшни хэһээхээр бодото хүсэ шадалтай юм. Тэдэ засаг баригшадшни харата муухай юумэ үйлэдэжэ байһан зониие хэһээдэг Бурханай зарасанар юм. ⁵ Тиимэһээл ши гансал хэһээлтэһээ айгаад бэшэ, харин зүб юумэ хэнэб гэжэ һэшхэлээрээ ойлгон засаг баригшадай мэдэлдэ байха ёһотойш. ⁶ Засаг баригшад Бурханай ажал хэхэ уялгатай, тиимэһээл таанад тэдэндэ татабари түлэнэт. ⁷ Үгэхэ ёһотой юумэеэ бүхы хүнүүдтэ үгэжэ байгты: татабари үгэхэ ёһотой болбол, татабаряа үгэгты; алба түлэхэ ёһотой болбол, албаяа түлэгты; һүрдэхэ ёһотой болбол, һүрдэжэ байгты; хүндэлэл үзүүлхэ ёһотой болбол, хүндэлэл үзүүлжэ байгты. ⁸ Хэндэшье үритэй байха ёһогүйт, зүгѳѳр бэе бэедээ дуратай байһантнай гансал үри шэритнай байха ёһотой. Ондоо хүндэ дуратай байхадаа хүн Хуулиин зүйлнүүдые гүйсэдхэбэ гээшэ. ⁹ «Эрэдээ гү, али эхэнэртээ бү урба; бү ала; бү хулгайла; хүнэй юумэндэ бү һанаарха» гэһэн захяа заабаринууд болон бусадшье олон заабаринууд «Дүтынгѳѳ хүндэ ѳѳртѳѳл адли дуратай бай» гэһэн гансал захяа заабари соо тобшологдоно ха юм. ¹⁰ Хэрбээ таанад бусад зондо дуратай байбал, тэдэ зондоо хэзээшье муу юумэ хэхэгүйт. Хайра дуратай байхань Хуулиин зүйлнүүдые гүйсэдхэхэтэй адли юм. ¹¹ Ямар сагай ерээд байһые таанад мэдэнэ ха юмта: нойрһоо һэрихэ сагтнай болоо, анхан этигэһэн хаһада ороходоо абарагдаха сагтнай бүри ойртоо. ¹² Һүни үнгэрѳѳд, үдэр болохонь ойртобо. Харанхы мунхагта хабаатай юумэнүүдые хэхэеэ болёод, зэр зэбсэг баряад гэрэл туяа соо тулалдахаяа бэлэн байял! ¹³ Үдэрэй гэрэл туяада ажамидаржа байһан зондо зохихоор ѳѳһэдыгѳѳ абажа ябаял: забхай найр наада хэнгүй, архидангүй, ташаяаралдангүй, зальхайралдангүй, хэрүүл ама гаргангүй, атаархалдангүй байжа үзэел. ¹⁴ Харин Дээдын Эзэн Иисус Христосые хуяг дуулгадал адли үмдэел, нүгэлтэ мүн шанар байдалаа анхархаяа, хүсэлэнгүүдыень хангахаяа болиёл.

¹ Этигэл һүзэгѳѳр һула хүнүүдые хүндэлжэ байгты, һанал бодол тухайнь тэдэнтэй бү арсалдагты. ² Зарим хүнүүдэй этигэл һүзэгынь ямаршье юумэ эдихые зүбшѳѳдэг, харин этигэл һүзэгѳѳр һула хүнүүд гансал ургамал эдидэг. ³ Ямаршье юумэ эдидэг хүн нүгѳѳдэ эдидэггүй хүнѳѳ доогуур бү хараг; тиин гансал ургамал эдидэг хүн үнѳѳхи ямаршье юумэ эдидэг хүнѳѳ бү шүүбэрилэг, Бурхан тэрэ хүниие һайшаагаад байна ха юм. ⁴ Ондоо хүнэй зарасые шүүбэрилжэ байхаар ши хэн гээшэбши? Тэрэ хүнэйшни эзэниинь лэ зарасынгаа зүб гү, али буруу байһыень мэдэхэ юм. Тэрэ зүб байха, юундэб гэбэл, Дээдын Эзэн тэрэниие зүб байлгаха арга хүсэтэй юм. ⁵ Зарим хүнүүд нэгэ үдэрые бусад үдэрнүүдтэ ороходоо шухала гэжэ тоолоод, тусгайгаар тэмдэглэдэг, тиихэдэнь нүгѳѳ зарим хүнүүд үдэрнүүдые хоорондонь илгадаггүй. Хүн бүхэмнай хэжэ бодожо байһанайнгаа ушар шалтагынь ойлгожо байг. ⁶ Нэгэ үдэрые бусад үдэрнүүдтэ ороходоо шухала тусхай гэжэ тоолодог хүн Дээдын Эзэнэй алдарта тиигэнэ. Ямаршье юумэ эдидэг хүн Дээдын Эзэнэй алдарта эдинэ, тэрэ эдеэ хоолойнгоо түлѳѳ Бурханда баяр баясхалан хүргэнэ ха юм. Зарим юумэнүүдые эдидэггүй хүн Дээдын Эзэнэй алдарта эдинэгүй, тэрэ хүн Бурханда баяр баясхалан хүргэдэг юм. ⁷ Бидэ ганса бэеэ бодон ажамидардаггүйбди, али ганса бэеэ бодон үхэдэггүйбди. ⁸ Ажамидархадаа бидэ Дээдын Эзэниие бодон ажамидарнабди, үхэхэдѳѳ бидэ Дээдын Эзэниие бодон үхэнэбди. Тиимэһээ амидарна гүбди, али үхэнэ гүбди, бидэ Дээдын Эзэнэйл хүмди. ⁹ Амиды ба үхэһэн хүнүүдэй Дээдын Эзэн байхын тула Христос үхѳѳд амидырһан байгаа. ¹⁰ Тиихэдээ ши юундэ һүзэглэгшэ аха дүүгээ шүүбэрилээ хүмши? Али яахадаа ши һүзэглэгшэ аха дүүгээ доогуур хараа хүмши? Бидэ бултадаал Бурханай зарга шүүбэридэ орохо ха юмбибди. ¹¹ «Яһатан бүхэн урдамни мүргэхэ, ямаршье хэлэтэй хүн намайе Бурхан гэжэ айладхаха, ами наһаараа тангаригланаб гэжэ Дээдын Эзэн хэлэнэ», – гэжэ Нангин Бэшэг соо хэлээтэй байдаг. ¹² Хүн бүхэмнай ѳѳрынгѳѳ үйлэ ябадалай түлѳѳ Бурханай урда тоосохо юм. ¹³ Зай, бэе бэеэ шүүбэрилхэ шүүмжэлхэеэ болиёл даа. Харин бусад зониие бүдэрүүлхэ гү, али нүгэл шэбэлдэ унагааха юумэ хэхэгүй гэжэ оролдожо байял. ¹⁴ Ямаршье эдеэ хоол эдижэ болохо гэжэ Дээдын Эзэн Иисус намда бата этигэл үгѳѳ. Хэрбээ таанад зарим эдихэ юумээ бузартай гэжэ тоолоо һаа, тэрэ эдеэнтнай танда бузартай байха. ¹⁵ Хэрбээ эдижэ байһан юумээрээ ши ондоо хүниие гомдохооболшни, ши хайра дураар хүтэлүүлэгдэнэгүйш. Эдижэ байһан хоолоороо ши тэрэ хүниие доройтуулан бү хосороо. Тэрэ хүнэйшни түлѳѳ Христос ѳѳрынгѳѳ амиие үгѳѳ ха юм. ¹⁶ Шинии һайн гэжэ бодожо байһан юумэнүүдые хүнүүд бү шүүбэрилэг. ¹⁷ Ушарынь юуб гэбэл, Бурханай хаан орон эдихэ, ууха тухай бэшэ, харин Нангин Һүлдэһѳѳ эхи абадаг үнэн сэдьхэл, энхэ тайбан, баяр жаргал тухай юм. ¹⁸ Таанад тиимэ маягаар Христосто алба хэжэ байбал, Бурханда таатай ба хүн зондо хүндэтэй байхат. ¹⁹ Тиимэһээл бидэ энхэ тайбаниие найруулдаг, бэе бэеынгээ этигэл һүзэг бэхижүүлдэг юумэнүүдтэ зорижо байха ёһотойбди. ²⁰ Эдеэ хоолһоо боложо Бурханай хэһэн юумэ бү һандарга. Ямаршье эдеэ хоол эдижэ болохо юм, гэхэтэй сасуу ондоо хүниие нүгэл шэбэлдэ унагааха шалтаг болохо юумэ эдихэнь буруу юм. ²¹ Бусад һүзэглэгшэдые доройтон унагааха шалтаг болохо ямаршье юумэ хэнгүй, мяха эдингүй, архи уунгүй байхань зүб юм. ²² Эдэ мэтэ этигэжэ бодожо байһан юумэнүүдээ зосоогоо баряад, Бурхандаал мэдүүлээд бай. Эдиһэн ууһан юумээрээ һэшхэлдээ гэмнүүлээгүй хүн жаргалтай байна! ²³ Харин эдижэ байһан юумэн тухайгаа һэжэглэһэн хүниие Бурхан тэрэ юумээ эдижэ байхадань гэмнэдэг, юундэб гэбэл, тэрэ хүн этигэл һүзэгэйнгѳѳ ёһоор болоногүй ха юм. Тиин этигэл һүзэгэй ёһоор хэгдэдэггүй юумэнүүд булта нүгэлтэй юм.

¹ Бата этигэл һүзэгтэй бидэнэр ганса бэеэ бодохо ёһогүйбди, харин этигэл һүзэгѳѳр бирагүйхэн зониие дэмжэхэ ёһотойбди. ² Бусад һүзэглэгшэдэй эрхим һайн байхын түлѳѳ, этигэл һүзэгынь бата бэхи болгохын тула бидэ булта тэдэндэ аша туһатай юумэ хэхэ ёһотойбди. ³ Юундэб гэбэл, Христосшье ганса бэеэ бодожо байгаагүй юм. Харин: «Шамайе доромжолһон баһалтанууд нам дээрэ буугаа», – гэжэ Нангин Бэшэг соо бэшэгдэһэнэй ёһоор болоо юм. ⁴ Нангин Бэшэг соо хэлээтэй бүхы юумэнүүд маанадта найдал үгэхэ зуураа һургаха, тэсэбэритэй болгохо, урмашуулха зорилготойгоор бэшээтэй байгаа. ⁵ Маанадые тэсэбэритэй байлгадаг, урмашуулдаг Бурхан Христос Иисусай жэшээгээр таанадые нэгэ һанал бодолтой байлгаһай. ⁶ Тиигэбэл таанад бултадаа нэгэ дуугаар Бурханда, манай Дээдын Эзэн Иисус Христосой Эсэгэдэ алдар соло дуудахат. ⁷ Христосой таанадые хүндэлдэг байһандал адляар таанадшье бэе бэеэ хүндэлжэ, Бурханда магтаал соло дуудажа байгты. ⁸ Бурханай үбгэ эсэгэнэртэ үгэһэн найдуулгын бүтэһые харуулан, Христос еврейнүүдэй зарасань болон ерээ гэжэ би хэлэнэб. ⁹ Баһа бусад арадуудай үршѳѳл хайрынь түлѳѳ Бурханда магтаал соло дуудажа байхын тула Христос ерээ юм. «Бусад арадуудай дунда би шам тухай айладхажа байхаб, шинии нэрэ алдарта би магтаалнуудые дуулажа байхаб», – гэжэ Нангин Бэшэг соо бэшээтэй байдаг. ¹⁰ «Бусад яһатад, Бурханай арадтай хамта баярлагты», – гэжэ баһа бэшээтэй байдаг. ¹¹ «Бусад яһатад, бултадаа Дээдын Эзэндэ магтаал соло дуудагты, бүхы арад, тэрээниие алдаршуулагты!» – гэжэ баһа бэшээтэй байдаг. ¹² «Иессэй үри һадаһан бии болохо, тэрэ бусад арадые захирхаяа ерэхэ, харин тэдэнэрынь тэрээндэ найдажа байха», – гэжэ баһа Исайя хэлэнэ. ¹³ Найдал үршѳѳдэг Бурхан этигэл һүзэгэйтнай ашаар таанадые бүтэн баяр жаргалаар ба амгалан байдалаар дүүргэг лэ, тиигэжэ Нангин Һүлдын хүсѳѳр этигэл найдалтнай нэмэгдэжэ байг лэ. ¹⁴ Аха дүүнэрни, таанад эрхим һайнта, элдэб янзын эрдэм мэдэрэлтэйт, бэе бэеэ һургаха аргатайт гэжэ би хатуу этигэлтэй байнаб. ¹⁵ Энэ бэшэг соогоо зарим юумэнүүдые һануулхадаа би сэхыень хэлээб. Бурханай үршѳѳл хайраар би ¹⁶ бусад арадуудай аша туһада Христос Иисусай зараса болооб. Бусад арадые Нангин Һүлдын ашаар Бурханда таатай арюун нангин үргэл болгохын тула би Бурханай Һайн Мэдээсэлые номнон, санаартанай ажал ябуулнаб. ¹⁷ Иисус Христосой ашаар Бурханда алба хэжэ байһанаараа би бахархаха аргатайб. ¹⁸ Бусад арадуудые Бурханай мэдэлдэ оруулхын тула Христос гайхамшагта тэмдэгүүдээр ба үйлэ хэрэгүүдээр, Бурханай Һүлдын хүсэ шадалаар намаар юу хэлүүлээ, хүүлээ һэм, тэрээн лэ тухай би хѳѳрэхэеэ зүрхэлхэб. Аяншалжа ябахадаа би Иерусалимһаа Иллирик хүрэтэр хаа хаанагүй Христос тухай Һайн Мэдээсэл номножо байгааб. ²⁰ Тиихэдээ би ондоо хүнэй татаһан һуури дээрэ барихагүйн тула Христос тухай хүнүүдэй огто дуулаагүй газар дайдаар номнохо гэжэ оролдожо байгааб. ²¹ Нангин Бэшэгэй хэлэһэн ёһоор: «Тэрээн тухай мэдээсэлгүй байһан хүнүүд хараха, Тэрээн тухай юумэ дуулаагүй хүнүүд ойлгохо». ²² Таанадта оло дахин ошохо гэхэдэмни, энэ ажални намайе табидаггүй байгаа. ²³ Харин мүнѳѳ эдэ нютагуудта ажалаа дүүргэһэн, олон жэлэй туршада таанадтай ошожо уулзаха һанаатай байһан юм хадаа ²⁴ Испани ошохо замдаа таанадые дайрахаб. Тиигээд нэгэ хэды саг соо таанадтайгаа уулзажа баярлахаб, һүүлдэнь замаа үргэлжэлүүлхэдэмни туһалхат гэжэ найданаб. ²⁵ Харин мүнѳѳ би Македониин ба Ахайяын һүзэглэгшэдэй һайн дураараа суглуулһан алта мүнгэ дуталдажа байһан Бурханай хүнүүдтэ хубаажа үгэхѳѳр Иерусалим хото ошоноб. ²⁷ Тэдэ һүзэглэгшэд туһалха гэһэн шиидхэбэри ѳѳһэдѳѳ гаргаа. Гэхэтэй зэргэ үнэн бодолоороо тэдэнэр туһалха ёһотойшье юм. Хэрбээ еврейнүүд оюун сэдьхэлэй буян хэшэгээрээ бусад арадуудтай хубаалдаһан байбал, бусад арадуудшье алта мүнгэнэй буян хэшэгээрээ еврейнүүдтэ туһалха ёһотой юм. ²⁸ Тэдэндэ суглуулагдаһан алта мүнгэ хүргэхэ ажалаа бүтээгээд, би таанадаа дайран Испани руу ябахаб. ²⁹ Таанадта ерэхэдээ би Христосой буян хэшэгээр таанадтай элбэг дэлбэгээр хубаалсахаб гэжэ мэдэнэб. ³⁰ Аха дүүнэр, намтай хамта минии түлѳѳ Бурханда ханалгатайгаар зальбаржа байгыт даа гэжэ гуйнаб. Бидэ манай Дээдын Эзэн Иисус Христосто нэгэ адли этигэл һүзэгтэй, Һүлдын үршѳѳдэг нэгэ адли хайра дуратай ха юмбибди. ³¹ Иудейн һүзэггүй зонһоо Бурхан намайе аршалһай, Иерусалимда хэхэ ажални тэндэхи Бурханай зондо һайшаагдаһай гэжэ зальбарыт даа. ³² Тиигэбэл би, Бурханай хүсѳѳ һаа, таанадта баяр жаргалтай ерэхэб, таанадтайгаа уулзаад һанаагаа амархаб. ³³ Амгалан байдал үршѳѳдэг Бурхан та бүхэнтэй оршожо байхань болтогой!

¹ Кенхрейын һүзэглэгшэдэй бүлгэмдэ хүдэлдэг Фойбэ эгэшэтэй таанадые танилсуулхамни. ² Тэрэниие Бурханай хүнүүдтэ зохихо ёһоор Дээдын Эзэнэй нэрээр угтажа абаарайгты, хэрэгүүдтэнь ѳѳһэдынгѳѳ зүгһѳѳ шадалаараа хамһалсажа байгаарайгты. Тэрэ эхэнэр намдашье, бусадшье олон зондо ехэ туһа хүргѳѳ юм. ³ Акила Прискилла хоёрто намһаа мэндэ дамжуулаарайгты. Тэдэнэр намтай хамта Христос Иисуста гансашье алба хэжэ байгаа бэшэ, ⁴ харин минии түлѳѳ ами наһанай аюул оһолдошье орожо байгаа. Гансашье би бэшэ, харин еврей-бэшэ һүзэглэгшэдэй бүлгэмүүд бултадаа тэдээндэ баяр баясхалан хүргэжэ байна. ⁵ Тэдэнэй гэртэ суглардаг һүзэглэгшэдэй бүлгэмдэ амар мэндэ хүргѳѳрэйгты. Аси можын Христосто һүзэглэгшэдэй түрүүшын хүниинь байһан инаг хайрата Эпанэт нүхэртэмни мэндэ дамжуулаарайгты. ⁶ Таанадай аша туһада аргагүй ехээр хүдэлжэ байһан Марияда амар мэндэ хүргѳѳрэйгты. ⁷ Намтай хамта түрмэдэ һууһан манай яһанай Андроник Юния хоёрто мэндэ дамжуулаарайгты. Тэдэ хоёр элшэнэрэй дунда мэдээжэ, намһаа урда Христосто һүзэглэһэн түүхэтэй юм. ⁸ Дээдын Эзэнээр намда ехэл хайра дуратай байдаг Амплиатда мэндэ дамжуулаарайгты. ⁹ Маанадаар хамта Христосто алба хэдэг Урбанда, минии инаг хайратай Стахида амар мэндэ хүргѳѳрэйгты. ¹⁰ Туршалгануудые дабахадаа Христосто үнэн сэхэ байһанаа баталһан Апеллестэ мэндэ дамжуулаарайгты. Аристобулай гэр бүлэдэ амар мэндэ хэлээрэйгты. ¹¹ Минии яһанай Иродиондо, Христосто һүзэглэдэг Наркисай гэр бүлынхидтэ амар мэндэ хүргѳѳрэйгты. ¹² Дээдын Эзэндэ алба хэжэ байһан Трюфана Трюфоса хоёрто, Дээдын Эзэнэй аша туһада аргагүй ехэ ажал бүтээһэн инаг хайрата Персидэдэ мэндэ дамжуулаарайгты. ¹³ Дээдын Эзэнэй шэлэжэ абаһан Руфта, намда хүбүүндээл адли хандадаг тэрэнэй эжыдэ мэндыемни дамжуулаарайгты. ¹⁴ Асинкрит, Флегонт, Ерми, Патроб, Ерма болон тэдэнтэй байһан бусад һүзэглэгшэ аха дүүнэртэ мэндыемни дамжуулаарайт. ¹⁵ Филолог Юлия хоёрто, Нерейдэ, тэрэнэй дүү басаганда, Олимпда, тэдэнтэй хамта байһан Бурханай бүхы хүнүүдтэ мэндыемни дамжуулаарайгты. ¹⁶ Бэе бэеэ таалажа амаршалаарайгты. Христосой һүзэглэгшэдэй бүхы бүлгэмүүд таанадта мэндэеэ дамжуулжа байна. ¹⁷ Аха дүүнэр, таанадай һуража абаһан бүхы юумые буруушаан, бэрхэшээл зоболон тулгаруулдаг, һүзэглэгшэдэй бүлгэмые хоорондонь хубаадаг хүнүүдһээ болгоомжолжо байгты гэжэ гуйнаб. Таанад тиимэ зонһоо зайсажа байгты. ¹⁸ Тэдэ зон тиимэ юумэ хэхэдээ, манай Дээдын Эзэн Христосто бэшэ, харин ѳѳрынгѳѳ гэдэһэ ходоодо алба хэнэ гээшэ. Тэдэнэр уран гоё үгэ хүүрээрээ гэнэн гэдэргэ зонииел зангадаа оруулдаг юм. ¹⁹ Дээдын Эзэнэй мэдэлдэ бүрин байдагыетнай хүн бүхэн мэдэхэ, тиимэһээ би таанадай түлѳѳ баярлажа байдаг хүнби. Һайн һайхан юумые ойлгожо байгаад, нүгэлтэ муухай юумэнһээ зайсажа байһайт гэжэ хүсэнэб. ²⁰ Маанадта амгалан байдал үршѳѳдэг Бурхан удангүй сатанае танай ула доро оруулан һүнѳѳхэ. Манай Дээдын Эзэн Иисусай үршѳѳл хайра таанадтай оршожо байхань болтогой! ²¹ Намтай хамта хүдэлдэг Тимофей, баһа манай яһатанай хамаатан Луций, Иасон, Сосипатр гэгшэд таанадта мэндые дамжуулна. ²² Энэ бэшэгые саарһан дээрэ буулгаһан һүзэглэгшэ Тертий би баһа таанадта амар мэндые дамжуулнаб. ²³ Гэртээ намайе айлшалуулжа байһан, һүзэглэгшэдэй бүлгэмые суглуулжа байһан Гай таанадта мэндые дамжуулна. Хотын мүнгэнэй һан эрхилэгшэ Эраст, Кварт дүүмнай таанадта баһа мэндые дамжуулна. ²⁴ Манай Дээдын Эзэн Иисус Христосой үршѳѳл хайра та бүхэнтэй оршожо байһай! ²⁵ Бурханда магтаал соло дуудая! Тэрэ болбол Иисус Христос тухай минии номноһон Һайн Мэдээсэлэй ёһоор танай этигэл һүзэгые бэхижүүлхэ аргатай юм. Урдань тэрэ Һайн Мэдээсэл үни удаан саг соо далда нюуса байгаа. ²⁶ Харин мүнѳѳ тэрэ үнэн зүбые лүндэншэдэй бэшэгүүд нээгээ; бүхы хүнүүдэй һүзэглэжэ, үгыень дуулажа байхын тула мүнхэ Бурхан захиралтаараа бүхы арадуудта тэрэниие мэдүүлээ. ²⁷ Ори ганса, сэсэн мэргэн Бурхан Иисус Христосой ашаар хэтын хэтэдэ алдар солотой байһай! Болтогой!