Гэршэлгэ

Гэршэлгэ

¹ Һаяар юун болохоёо байнаб гэжэ бүгэдыень зарасанартаа харуулхын тула Иисус Христосой гэршэлгые Бурхан тэрээндэ даалгаа һэн. Христос Ѳѳрынгѳѳ зараса Иоаннда Бурханай Эльгээмэлые ябуулжа, энээн тухай соносхоһон юм. ² Иоанн хараһан үзэһэнѳѳ бултыень үнэн зүб гэжэ баталба. Энэнь Бурханай үгэ, Иисус Христосой гэршэлгэ мүн. ³ Энэ ном дотор бэшээтэй Бурханай хэлэһэн үгэнүүдые уншадаг, шагнадаг ба сахидаг хүнүүд жаргалтай юм, юуб гэхэдэ, саг ойртошоод байна. ⁴ Аси можын һүзэглэгшэдэй долоон бүлгэмүүдтэ би Иоанн ханданаб. Бурхан бии юм, байһаншье, байхашье юм. Бурханһаа, тэрэнэй хаан шэрээгэй урдахи долоон Һүлдэнүүдһээ, ⁵ мүн үнэн бодото Гэршэ байһан, үхѳѳд, анха түрүүн амидырһан, газар дэлхэйн хаашуулай Эзэн бологшо Иисус Христосһоо таанадта амгалан байдал, буян хайра үршѳѳгдэнэ. Иисус Христос манда дуратай, тиимэһээ ѳѳрынгѳѳ шуһа адхажа, бидэниие нүгэлһѳѳмнай сүлѳѳлѳѳ. ⁶ Иисус Христос бидэниие хаан түрэ дотор нэгэдүүлээд, Эсэгэ Бурхандаа алба хэдэг санаартаниинь болгоо. Иисус Христосто хэтэ мүнхын алдар соло, эршэ хүсэн байхань болтогой! ⁷ Хаража байгты: үүлэн соогуур тэрэ ерэхэ. Бүхы хүнүүд, мүн жадаар хадхаашадшье тэрээниие хараха. Газар дэлхэйн бүхы арадууд тэрээниие шаналан хайрлаха. Үнэхѳѳрѳѳ тиихэ юм. Болтогой! ⁸ «Би хадаа Альфа, Омега гээшэб! – гэжэ Эзэн Бурхан хэлэнэ». Тэрэ хододоо байгаа, байнашье, байхашье, Хамагые зонхилогшо гээшэ. ⁹ Би Иисусай шаби, Иоанн ахатнай гээшэб. Бурханай хаан түрын эрхэтэн мүн туладаа би таанартал адляар зобожо тулижа, тэсэжэ байнаб. Бурханай үгэ номноһонойнгоо, Иисусые гэршэлһэнэйнгээ түлѳѳ би Патмос гэжэ олтирогто сүлэгдѳѳ һэм. ¹⁰ Дээдын Эзэнэй үдэр би Нангин Һүлдын нүлѳѳдэ абтабаб – ара тээмни бүдүүн дуутай бүреэ шэнги юумэнэй хүнхинэтэр дуугархые дуулабаб. ¹¹ Тэрэ абяан намда иигэжэ хэлэбэ: хаража байһан юумэеэ ном соо бэшээд, Эфесэй, Смирнын, Пергамай, Тиатирай, Сардисай, Филадельфиин, Лаодикиин һүзэглэгшэдэй бүлгэмүүдтэ эльгээлши. ¹² Намтай хэн хѳѳрэлдэнэб гэжэ һонирхон гэдэргээ эрьехэдээ, алтан долоон дэнгүүдые харабаб. ¹³ Долоон дэнгүүдэй дундань хүнтэй адлирхуу амитанай зогсохые харааб. Тэрэ болбол уужам ута хубсаһатай, сээжээрээ бооһон алтан бэһэтэй һэн. ¹⁴ Тэрэнэй үһэниинь сагаанаар будаһан нооһондли, саһан шэнги саб сагаан, нюдэниинь дүлэтэн носожо байһан гал шэнги байгаа бэлэй. ¹⁵ Хүлнүүдынь шатама халуун пеэшэндэ халаажа улайлгаһан зэд шэнги, хоолой гээшэнь хүүюур уһан мэтэ хүнхинэжэ байгаа һэн. ¹⁶ Тэрэ хүн баруун гартаа долоон одонуудые баряад байгаа, тиин хоёр тээшээ хурса эритэй элдэ аманһаань бултайжа байгаа, шарайнь шатама шанга гэрэлтэй наран шэнги байһан юм. ¹⁷ Тэрэниие харамсаараа, би үхэһэн шэнгеэр хүлэйнь хажууда унашабаб. Тиихэдэмни тэрэ хүн баруун гараа мүрэ дээрэмни табяад, намда иигэжэ хэлэбэ: бү ай; би хадаа Түрүүшынхинь, Һүүлшынхинь гээшэб, ¹⁸ би амидыб; үхѳѳд байһанаа мүнѳѳ хэтэ мүнхэдѳѳ амиды ябахаб; үхэлэй ба үхэлэй ороной түлхюурнүүдынь намда бии юм. ¹⁹ Ши юу хараабши, мүнѳѳ ямар юумэн боложо байнаб, хожом юун болохоб – энээн тухай ши бэшээрэй. ²⁰ Минии гартаа баряад байхые шинии хараһан долоон одонуудай, алтан долоон дэнгүүдэй нюусань иимэ: долоон одонууд һүзэглэгшэдэй долоон бүлгэмүүдэй Бурханай Эльгээмэлнүүд мүн, шинии хараһан долоон дэнгүүд һүзэглэгшэдэй долоон бүлгэмүүд мүн гээшэ.

¹ Эфесэй һүзэглэгшэдэй бүлгэмэй түлѳѳлэгшэдэ иигэжэ бэшээрэй: «Баруун гартаа долоон одонуудые баряад, алтан долоон дэнгүүдэй дундуур ябагша иигэжэ хэлэнэ: ² танай бүтээһэн үйлэ хэрэгые, танай хэһэн ажалые, танай тэсэбэриие би мэдэнэб. Хара һанаатанда таанад тон дурагүйт гэжэ мэдэнэб, Иисусай элшэд бэшэ аад, элшэнэрынь гээшэбди гээд ѳѳһэдыгѳѳ тоологшодые шалгажа үзѳѳд, тэдэнэр хадаа худалшад мэхэшэд мүн гэжэ таанадай элирүүлһыетнай би мэдэнэб; ³ таанад ехэ бэрхэшээлнүүдые гаталаат, тэсэбэритэй байнат, минии нэрэ хүндын түлѳѳ эсэшэ сусашагүйгѳѳр ажаллаат гэжэ мэдэнэб. ⁴ Теэд анха түрүүшынхидээл адляар намда дурагүй болоһондотнай таанадые зэмэлнэб. ⁵ Хаанаһаа бууһанаа һанажа, нүгэл хэхэеэ болиит, анханайнгаа хэрэгүүдые бүтээгыт. Нүгэл хэхэеэ болёогүй һаатнай таанадта ерээд, танай дэнгые абаад ябашахаб. ⁶ Зүгѳѳр, николаидуудай үйлэ хэрэгүүдтэ дураа гутан зэбүүрхэдэгтнай һайн гээшэ. Бишье тэдэндэ дураа гутагшаб. ⁷ Һүзэглэгшэдэй бүлгэмүүдтэ Нангин Һүлдын хэлэһэниие шэхэтэй юм һаа, шагнаг лэ! Бурханай сэсэрлигтэ ургадаг мүнхэ амидаралай модоной жэмэсые амталха эрхэ илаашада үгэхэб». ⁸ Смирнын һүзэглэгшэдэй бүлгэмэй түлѳѳлэгшэдэ иигэжэ бэшээрэй: «Үхѳѳд байһанаа амидырһаниинь, Түрүүшынхи, Һүүлшынхинь гээшэб: ⁹ танай зоболон гашуудалые, үгытэй ядуу байһыетнай мэдэнэб, – үнэндѳѳ хадаа таанад баянта! Мүн еврейнүүд бэшэ аад, еврейнүүдбди гэгшэдэй таанадые хардаашадые би мэдэнэб, юундэб гэбэл, тэдэнэр Сатанагай мэдэл доро сугларһан улад гээшэ. ¹⁰ Зобохо тулихаяа байнабди гэжэ бү айгаарайт. Таанарые туршажа үзэхэеэ заримыетнай Шолмос түрмэдэ хааха, арбаад хоног соо тамалуулхат. Теэд үхэн үхэтэрѳѳ үнэн сэхэ байгаарайт, би танда мүнхын амидарал үршѳѳхэб! ¹¹ Һүзэглэгшэдэй бүлгэмүүдтэ Нангин Һүлдын хэлэһэниие шэхэтэй юм һаа, шагнаг лэ! Илаашые хоёрдохиёо һүнѳѳхэгүй». ¹² Пергамай һүзэглэгшэдэй бүлгэмэй түлѳѳлэгшэдэ бэшээрэй: «Хоёр тээһээ хурса эритэй һэлмэтэ иигэжэ хэлэнэ: ¹³ таанад сатанагай хаан шэрээгэй газарта байдагта гэжэ би мэдэнэб. Зүгѳѳр таанад намда үнэн сэхээр хандадагта, сатанагай байдаг газартатнай минии үнэн сэхэ гэршэ Антипын алуулһан үдэрнүүдтэшье намһаа таанад арсаагүйт. ¹⁴ Теэд таанадые зэмэлхэ зарим юумэн намда бии: Валаамай һургаалые баримталагша хүнүүд таанарай дунда байдаг. Валаам хадаа Израилиин зониие нүгэл шэбэлдэ оруулха, хуурмаг бурхануудта үргэһэн эдеэнһээ амсуулха, зальхай һамуу ябадалтай болгохо тухай Валак хааниие һургаа һэн. ¹⁵ Мүн баһа николаидуудай һургаалые баримталагшадшье таанадай дунда бии. ¹⁶ Нүгэл хэхэеэ болигты! Тиигээгүй һаатнай, удангүй таанадта ерээд, аманһаамни гарагша эритэ һэлмээр николаидуудай һургаал баримталагшадтай тэмсэхэб. ¹⁷ Һүзэглэгшэдэй бүлгэмүүдтэ Нангин Һүлдын хэлэһэниие шэхэтэй юм һаа, шагнаг лэ! Илагшада би далда хадагалаатай манна эдеэ үгэхэб, сагаан шулуу үгэхэб. Шулуун дээрэнь шэнэ нэрэ бэшээтэй байха, тиин шулуу абагшаһаа ондоо хэншье тэрэ нэрые мэдэхэгүй юм». ¹⁸ Тиатирай һүзэглэгшэдэй бүлгэмэй түлѳѳлэгшэдэ бэшээрэй: «Носожо байһан гал дүлэн шэнги ялалзама нюдэтэй, халуун пеэшэн соо халаажа улайлгаһан зэд шэнги хүлнүүдтэй Бурханай Хүбүүн иигэжэ хэлэнэ: ¹⁹ танай бүтээһэн хэрэгые, танай дуратай байһые, алба хэһые, этигэл найдабариие, тэсэбэри зоригые мэдэнэб, мүнѳѳ бүтээгшэ үйлэ хэрэгтнай урдынхиһаа бүри ехэ юм гэжэ мэдэнэб. ²⁰ Теэд таанадые зэмэлхэ зарим юумэн намда бии: ѳѳрыгѳѳ лүндэншэ гээд тоолодог Иезавель һамгые таанад зүбшѳѳнэт; тэрэ һамган ѳѳрынгѳѳ һургаал заабариие номножо, минии зарасанарай тархи толгой эрьюулнэ, тэдэниием зальхай һамуу ябадалтай болгоно, худал бурхануудта үргэһэн хоол эдюулжэ һургана. ²¹ Нүгэл шэбэл үйлэдэхэеэ болихынь тула тэрэ эхэнэртэ саг гаргажа үгѳѳб, теэд нүгэл шэбэлээ тэрэ орхихо дурагүй байна. ²² Тиимэһээ би тэрэ һамганда үбшэн зоболон асаруулхаб, хэрбээ нүгэл үйлэдэхэеэ болёогүй һаань, тэрэ эмэтэй гүйлдэгшэдые туйлай ехэ уйдхар гашуудалда оруулхаб. ²³ Тэрэ гэргэнэй үхибүүдые үхүүлхэб. Тиихэдэмни хүнэй зүрхэ сэдьхэлые, һанал бодолые сүм мэдэдэг юм байна, тиин хүн бүхэндэ хэһэн үйлэ хэрэгэйнь зэргээр хүртѳѳхэ юм байна гэжэ намайе һүзэглэгшэдэй бүхы бүлгэмүүд ойлгохо. ²⁴ Тиатирда байгша бусад бүхы таанадта, энэ һургаал заабариие баримталдаггүй ба сатанагай гүн нюуса гэдэгыень мэдэдэггүйшүүлдэ иигэжэ хэлэнэб: үшѳѳ ондоо бэрхэшээлнүүдые таанадта эльгээхэгүйб. ²⁵ Теэд мүнѳѳ таанадта бии байһан юумэеэ минии ерэтэр баряад байгты. ²⁶ Минии бүхы зарлигые эсэстэнь хүрэтэр бэелүүлдэг илагшын эрхэ мэдэлдэнь арадуудые үгэхэб. Бишье баһал тиигэжэ ѳѳрынгѳѳ Эсэгэһээ засаг түрые абаа һэм. Илагша тэрэ хүн тэдэ арадуудые түмэр таягаараа захиргаалан зонхилжо байха; тэдэ зон шабар амһартануудтал адляар хяа бута сохюулха. Тэрэ илагшада үглѳѳнэй одые үгэхэб. ²⁹ Һүзэглэгшэдэй бүлгэмүүдтэ Нангин Һүлдын хэлээшые шэхэтэй юм һаа, шагнаг лэ!»

¹ Сардисай һүзэглэгшэдэй бүлгэмэй түлѳѳлэгшэдэ иигэжэ бэшээрэй: «Бурханай Нангин долоон Һүлдын, мүн долоон одонуудай Эзэн иигэжэ хэлэнэ: танай бүтээһэн үйлэ хэрэгые мэдэнэб; таанад амиды гэжэ тоологдонот, үнэхѳѳрѳѳ таанад үхѳѳд байнат. ² Һэргэлэн байгты; үлѳѳшэ юумэеэ хуу барандаа хосороодүйдэнь бэхижүүлэгты, юуб гэбэл, үйлэ хэрэгүүдтнай Бурханаймни урда хүсэд дүүргэгдээгүй гэжэ би һананаб. ³ Таанад юу абаа, юу дуулаа һэмта, тэрэнээ сахин хадагалжа байгты, нүгэл хэхэеэ болигты! Хэрбээ һэргэлэн байгаагүй һаатнай, би таанадта хулгайшан шэнгеэр гэнтэ ерэхэб, хэдыдэ ерэһыемни таанад мэдэхэгүйт. ⁴ Теэд ѳѳһэдынгѳѳ хубсаһа бузарлаагүй хэдэн хүнүүд Сардистатнай бии байна, тэдэтнай сагаан хубсаһа үмдѳѳд, намтай хамта ябалсаха, юундэб гэбэл, этигэл найдабарида тэдэ хүрэнэ. ⁵ Илагша баһал сагаан хүбсаһа үмдэхэ; тэрэнэй нэрые амидаралай номһоо би хэзээшье зуража хаяхагүйб, тэрэ хүн минии юм гэжэ ѳѳрынгѳѳ Эсэгын урда, Бурханай Эльгээмэлнүүдэй урда мэдэрхэб. ⁶ Һүзэглэгшэдэй бүлгэмүүдтэ Нангин Һүлдын хэлэһэниие шэхэтэй юм һаа, шагнаг лэ!» ⁷ Филадельфиин һүзэглэгшэдэй бүлгэмэй түлѳѳлэгшэдэ бэшээрэй: «Нээгээ һаа, хэнэйшье хаажа шадахагүй, хаагаа һаа, хэнэйшье нээжэ шадахагүй Давидай оньһон түлхюуртэй Нангин Үнэн сэдьхэлтэн иигэжэ хэлэнэ: ⁸ танай бүтээһэн үйлэ хэрэгые мэдэнэб, – тиин би урда тээхи үүдыетнай нээбэб, тэрэниие хэншье хаажа шадахагүй, юундэб гэхэдэ, таанад хүсэ багатайшье һаа, минии һургаал сахинат, минии һургаалһаа арсаагүйт. ⁹ Хаража байгаарайт! Ѳѳһэдыгѳѳ еврейнүүд гэжэ тоолодог аад, сатанагай мэдэлдэ байһан уладые танда асараад, хүлдэтнай унан дохихыень баадхахаб. Үнэхѳѳрѳѳ тэдэнэр еврейнүүд бэшэ юм, худалаар хэлэнэ. Мүн танда дуратай байһыемни тэдэ улад мэдэхэ. ¹⁰ Тэсэбэритэй байха тухай минии зарлиг заабариие сахиһан туладатнай, газар дэлхэйнхидые туршажа үзэхэеэ бүхы юртэмсэдэ тохёолдохоёо байгаа гай аюулай үедэ би таанадые хамгаалан үлѳѳхэб. ¹¹ Иигээд удангүй ерэхэб. Илалтынтнай аша үрые хэнэйшье абажа ябашахагүйн тула бии байһан юумэеэ шангаар баряад байгаарайт. ¹² Илагшые би ѳѳрынгѳѳ Бурханай Һүмэ доторхи бахана тулгань болгохоб, тиин тэрэ илагша хэтэ заяандаа тэндэ үлэхэ. Ѳѳрынгѳѳ Бурханай нэрые, минии Бурханай үршѳѳлѳѳр тэнгэриһээ бууха ѳѳрынгѳѳ Бурханай хотын, шэнэ Иерусалимай нэрые, мүн ѳѳрынгѳѳ шэнэ нэрые тэрэ Һүмын бахана дээрэ бэшэхэб. ¹³ Һүзэглэгшэдэй бүлгэмүүдтэ Нангин Һүлдын хэлэһэниие шэхэтэй юм һаа, шагнаг лэ». ¹⁴ Лаодикиин һүзэглэгшэдэй бүлгэмэй түлѳѳлэгшэдэ иигэжэ бэшээрэй: «Болтогой гэжэ нэрэтэй үнэн бодото найдабаритай Гэршэ, Бурханай бүтээлэй Эхиниинь иигэжэ хэлэнэ: ¹⁵ танай бүтээһэн үйлэ хэрэгые мэдэнэб. Таанад хүйтэншье бэшэт, халууншье бэшэт. Ай даа, таанадай нэгэн гэбэл хүйтэн, али үгы һаа халуун байгаа һаатнай ямар һайн бэлэй даа! ¹⁶ Теэд таанад хүйтэншье бэшэ, халууншье бэшэ, харин юрэл миин дулаан байнат. Би таанадые аман сооһоо нёлбоһо гаргаһандал адляар, ѳѳрһѳѳ холуур намнахамни. ¹⁷ Юундэб гэхэдэ, таанад: «Би баяжааб, ехэ зѳѳритэй болооб, юугээршье дутанагүйб!» – гэнэт. Теэд таанад ямаршье зол хубигүй, үгытэй ядуу, баарһан, һохор балай, нюсэгэн болоод байһанаа мэдэнэгүйт! ¹⁸ Баян болохын тула галаар арюудхагдаһан алта намһаа худалдажа абахыетнай зүблэнэб, шарбай нюсэгэн бэеэ харуулжа ябахагүйн тула сагаан хубсаһа намһаа абажа үмдэгты, юумэ харадаг болохын тула нюдэнэй эм абажа, нюдэндѳѳ түрхигты. ¹⁹ Дуратай хүнүүдээ би элишэлэн шүүмжэлдэг, хэһээдэгби. Тиимэһээ таанад хэшээл оролдолго гаргагты, нүгэл хэхэеэ болигты. ²⁰ Энэ би үүдэнэй хажууда ерээд, үүдэ тоншожо байнаб. Минии абяа дуулаад, үүдэ нээһэн хүнэйдэ би орожо, хамта эдеэлхэб, тэрэ хүн намтай суг эдеэлхэ. ²¹ Би илажа гараад, ѳѳрынгѳѳ Эсэгэтэй хамта хаан шэрээдэнь һуугаа һэм, тэрээндэл адляар, намтай хамта минии хаан шэрээдэ һууха эрхые би илагшада олгохоб. ²² Һүзэглэгшэдэй бүлгэмүүдтэ Нангин Һүлдын иигэжэ хэлэһэниие шэхэтэй юм һаа, шагнаг лэ!»

¹ Тэрэнэй удаа би тэнгэри ѳѳдэ шэртэхэдээ, тэнгэриин үүдэнэй онгорхой байхые обёорбоб. Тиин бүреэгэй дуугарһандал адли абяа дуулабаб. Түрүүн хандаһан абяан намда иигэжэ хэлэбэ: – Ѳѳдѳѳ гара. Тиигээд юунэй болохые шамда хѳѳрэхэб. ² Удангүй би Нангин Һүлдын нүлѳѳдэ абтажа, ѳѳдѳѳ дэгдэшэбэб. Тиин тэнгэридэ хаан шэрээ урдамни байба, дээрэнь хэншьеб һуужа һууба. ³ Хаан шэрээ дээрэ тэрэ Һуугаашань үнэтэ хас шулуун, мана шулуун шэнгеэр толоржо байба. Хаан шэрээень тойроод, номин шулуун мэтээр һолонго ялалзан татажа байба. ⁴ Энэ хаан шэрээе тойроод, баһа хорин дүрбэн хаан шэрээнүүд байгаа. Тэдэ хаан шэрээнүүд дээрэ хорин дүрбэн ахамадууд һуугаа. Эдэ ахамадууд сагаан сагаан хубсаһа үмдэнхэй, толгойдонь алтан алтан титим малгайнууд табяатай. ⁵ Хаан шэрээһээнь сахилгаан сахилжа, тэнгэриин дуун нэрьежэ, шанга шууяан гаража байба. Хаан шэрээгэй урда долоон зула носоно. Эдэнь Бурханай долоон Нангин Һүлдэ мүн бэлэй. ⁶ Баһа хаан шэрээгэй урда болор мэтэ сэбэр тунгалаг шэл далай шэнги юумэн байба. Хаан шэрээгэй дүрбэн буланда дүрбэн амитад байба. Тэдэ амитад урдаһаашье, хойноһоошье тон олон нюдэтэй һэн. ⁷ Түрүүшынь амитан арсалантай адлишуу, хоёрдохинь залуу буха шэнги, гурбадахинь нюураараа хүн мэтэ, харин дүрбэдэхинь ниидэжэ байһан бүргэд шэнги бэлэй. ⁸ Эдэ дүрбэн амитад тус бүридѳѳ зургаа зургаан далитай һэн. Далинуудайнь дээгүүршье, доогууршье олон нюдэнүүд байгаа. Тэдэ дүрбэн амитад эсэн сусангүй, үдэр һүнигүй иигэжэ ходо дабтагша һэн: – Хамагые зонхилогшо арюун нангин, арюун нангин, арюун нангин Эзэн Бурхан түрүүншье байгаа, мүнѳѳшье байна, саашадаашье байхал! ⁹ Хаан шэрээ дээрэ Һуугаашада – хэтэ мүнхэдѳѳ Амидарагшада алдар соло, нэрэ түрэ, баяр баясхалангаа тэдэ амитадай хүргэхэдэнь, ¹⁰ хорин дүрбэн ахамадууд хаан шэрээ дээрэ Һуугаашын урда тээ газарта нюураараа сохин унаха, хэтэ мүнхэ Амидарагшын урда доро дохин мүргэхэ, тиин хаан шэрээгэйнь урда титим малгайнуудаа табяад, иигэжэ хэлэхэ: ¹¹ – Манай Эзэн Бурхан, ши али бүхы алдар солодо, нэрэ хүндэдэ, засаг түрэдэ хүртэмѳѳр байнаш, яахадааб гэбэл, бүхы юумэн шамаар бүтээгдээ, шинии хүсэл зоригоор байгуулагдаа.

¹ Тиигээд долоон тамгаар тамгалан хаагаатай, дотор, гадаргүй бэшээтэй номые хаан шэрээдэ Һуугаашын баруун гартань би харабаб. ² Бурханай түгэлдэр хүсэтэ эльгээмэлые харабаб. – Хэн тамгыень эбдэжэ, энэ ном нээжэ шадахаб? – гэжэ Бурханай тэрэ эльгээмэл шангаар дуугарба. ³ Теэд тэнгэридэшье, газар дээрэшье, газар дорошье энэ номые нээжэ, хаража шадаха хэншье байбагүй. ⁴ Энэ номые зүйтэйгѳѳр нээгээд, уншажа шадаха, угайдхадаа үзэжэ хаража шадаха нэгэшье хүнэй олдоогүйдэнь би ехээр гашуудан уйлаа бэлэйб. ⁵ – Бү уйла! Харалши! Илаашань Иудын угай, Давидай үри һадаһан болохо Арсалан тээ тэрэ байна. Долоон тамгыень эбдэжэ, энэ номые тэрэл нээжэ шадаха, – гэжэ нэгэ ахамадынь намда хэлэбэ. ⁶ Харан гэхэдэмни хаан шэрээгэй урда дүрбэн амитадай, мүн ахамадуудай урда тахил болгогдон табигдаһан янзатай Үргэлэй Хурьган зогсожо байба. Тэрэ Хурьган долоон эбэртэй, долоон нюдэтэй һэн. Эдэнь бүхы газар дэлхэйдэ Бурханай эльгээһэн Нангин долоон һүлдэнь байгаа. ⁷ Үргэлэй Хурьган хаан шэрээдэ дүтэлэн ерэжэ, тэндэ Һуугаашын баруун гарһаань ном абаба. ⁸ Номые тэрэнэй абахадань, дүрбэн амитад, хорин дүрбэн ахамадууд Үргэлэй Хурьганай урда һүгэдэн, доро дохибо. Тэдэнэр тус бүридѳѳ нэгэ нэгэ ятагануудые, хүжэ санзай дүүрэтэр хэһэн алтан аягануудые гартаа баряад байгаа. Эдэ бүгэдэнь Бурханай зоной бүтээдэг мүргэл зальбаралынь мүн бэлэй. ⁹ Тиин тэдэнэр иимэ шэнэ дуу дуулаба: ши энэ ном абажа, тамгыень эбдэжэ тайлаха эрхэтэйш, ши үргэл болгогдожо алуулаад, ѳѳрынгѳѳ улаан шуһанай сэнгээр али бүхы угсаатаниие, элдэб янзын хэлэтэй зониие, бүхы уг изагууртаниие, үндэһэ яһатаниие Бурханда абажа үгѳѳш. ¹⁰ Ши манай Бурханай аша туһада тэдэ хүнүүдые санаартад, хаашуул болгоош – тэдэнэр газар дэлхэйн зониие зонхилжо байха! ¹¹ Хаан шэрээе, амитадые, ахамадуудые тойроод, Бурханай олон эльгээмэлнүүдэй дуугаржа байхые би харааб, шагнааб. Тэдэнэр үй түмэн, тоо томшогүй олон байгаа бэлэй. ¹² Тэдэ шанга шангаар иигэжэ хашхаралдан байгаа һэн: Тахил болгогдожо табигдаһан Үргэлэй Хурьган засаг түрэ, зѳѳри баялиг, сэсэн бодол, хүсэ шадал, нэрэ түрэ, алдар соло, магтаал юрѳѳлдэ хүртэхэ эрхэтэй. ¹³ Тэнгэри, газар дээрэ, газар доро, далайда байһан бүхы амитадай иигэжэ хэлсэхые би дуулааб: – Хаан шэрээ дээрэ Һуугаашада, мүн Үргэлэй Хурьганда хэтэ мүнхын магтаал юрѳѳл, нэрэ хүндэ, алдар соло, хуули засаг олгогдохонь болтогой! ¹⁴ Дүрбэн амитадынь: – Болтогой! гэбэд. Ахамадуудынь газарта дохин унажа, һүгэдэн мүргэбэ.

¹ Долоон тамгын түрүүшынхииень Үргэлэй Хурьганай эбдэхые би харааб, тиигээд: «Наашаа ерэ!» – гэжэ түрүүшын амитанайнь тэнгэри дуугарһандал адляар хүнхинэмэ шангаар хэлэхые би дуулааб. ² Би сагаан мори харабаб. Гартаа ном бариһан хүн тэрэ мори унаад ябаба. Толгойдоо үмдэхэ титим малгай абаһан тэрэ хүн илагша мэтээр гаража, илалта туйлахаяа ябаба. ³ Хоёрдохи тамгыень Үргэлэй Хурьганай тайлахада: «Наашаа ерэ!» – гэжэ хоёрдохи амитанайнь хэлэхые би дуулабаб. ⁴ Тиихэдэнь ондоо, гал улаан зээрдэ морин гараба. Мори унаһан тэрэ хүндэ газар дайда дээрэхи амгалан тайбан байдалые эбдэжэ, дэлхэйн зоной бэе бэеэ алалсалгын эрхэ засаг олгогдоһон байгаа. Тиин тэрээндэ томо гэгшын һэлмэ үгтѳѳ бэлэй. ⁵ Гурбадахи тамгыень Үргэлэй Хурьганай тайлахада: «Наашаа ерэ!» – гэжэ гурбадахи амитанайнь хэлэхые би дуулабаб. Харан гэхэдэмни, хара мори унаһан хүн гартаа шэгнүүр баринхай байба. ⁶ Тиигээд дүрбэн амитанай зүгһѳѳ иимэ абяанай гарахые дуулабаб: «Нэгэ килограмм шэниисын түлѳѳ бүхэли үдэр ажаллаха, гурбан килограмм ешмээнэй түлѳѳ бүхэли үдэр ажаллаха! Теэд оливай модо үзэмэй модо хоёрые бү гутаа!» ⁷ Дүрбэдэхи тамгыень Үргэлэй Хурьганай тайлахада: «Наашаа ерэ!» – гэжэ дүрбэдэхи амитанайнь хэлэхые би дуулабаб. ⁸ Харан гэхэдэмни, сунхигар сагаабтар морин байба. Дээрэнь Үхэл һууба, тэрэниие дахаад, Үхэлэй орон ябаба. Газар дэлхэйдэ һуугаашадай дүрбэнэй нэгэ хубиие һэлмэ жадаар, үлэсхэлэн хооһон байдалаар, үбшэн тахалаар, ан арьяатанаар алуулха хюдуулха эрхэ засаг Үхэлдэ, Үхэлэй орондо олгогдоһон байна. ⁹ Табадахи тамгыень Үргэлэй Хурьганай тайлахадань, Бурханай Үгын түлѳѳ, гэршэ болоһонойнгоо түлѳѳ алуулагшадай һүнэһэ һүлдэнүүдые тахилай шэрээ доро харабаб. ¹⁰ «Нангин гэгээн, хамагые зонхилогшо үнэн бодото Эзэн Бурхан аа! Газар дэлхэй дээрэ бидэниие алаашадые гэмнэнгүй, хэһээнгүй хэды болотор хүлеэхэ гээ юмши!» – гэжэ тэдэ алуулагшад шанга шангаар хашхаралдаба. ¹¹ Тэдэнэй хүн бүхэндэнь сагаан хубсаһа үгтэбэ. Тэдэ алуулагшадта: «Христосто алба хэһэн тусгаар тооной аха дүүнэрэйтнай алуултар таанар үшѳѳ нэгэ бага амаржа байгты. Тэдэтнай таанартал адляар алуулха», – гэжэ хэлэгдэбэ. ¹² Зургаадахи тамгыень Үргэлэй Хурьганай тайлахадань, харан гэхэдэмни, газар ехээр хүдэлбэ; наран гээшэ үхэһэн хүнүүдэй хойноһоо шаналан уйлаашадай хара хубсаһандал адли баларташоод, һара гээшэ шуһан улаан болошоод байба. ¹³ Аргагүй шанга хуй һалхинай болоходо боди модоной эдеэшээдүй үрэ жэмэсүүдэй хиидэн унадагтал адляар, огторгойн одо мүшэд газарта унашаба. ¹⁴ Огторгой тэнгэри гээшэ орёоһон саарһан мэтээр монсогойршобо, бүхы хада ууланууд, арал олтирогууд ѳѳһэдынгѳѳ һууринуудһаа хүдэлшэбэ. ¹⁵ Газар дэлхэйн хаашуулшье, дээгүүр тушаалтай дарганаршье, сэрэгэй ноёдшье, баяшуулшье, засаг баригшадшье, барлаг богоолнуудшье, юрын хүнүүдшье агы нүхэнүүдтэ, хада уулын хабшалда орожо хоргодобо. ¹⁶ Тэдэ хүнүүд хада, хабсагайнуудта хандан, иигэжэ гуйба: – Дээрэмнай унажа, хаан шэрээдэ Һуугшаһаа, Үргэлэй Хурьганай уур сухалһаа абарыт! ¹⁷ Юундэб гэбэл, эдэ хоёрой айхабтар ехэ уур сухалай үдэр хүрэжэ ерэбэ, тиин тэрэ ехэ уур сухалыень хэн тэсэжэ шадахаб?

¹ Тэрэнэй һүүлээр газар дэлхэйн дүрбэн буланда Бурханай дүрбэн эльгээмэлнүүдэй зогсожо байхые харабаб. Тэдэ эльгээмэлнүүд газар дайда руу, уһан далай руу, ой модо руу һалхилхагүйн тула дэлхэйн дүрбэн һалхиие халхалан барижа байгаа. ² Гартаа амиды Бурханай тамга баряад, зүүн зүгһѳѳ ерэжэ ябаһан баһа нэгэ Бурханай Эльгээмэлые харабаб. Тэрэ эльгээмэлынь газар дайдада, уһан далайда гэм хоро хүргэхэ эрхэтэй дүрбэн эльгээмэлнүүдтэ хандан, иигэжэ шангаар хашхарба: ³ «Бурханай бүхы албатанай магнай духадань тамга даража тэмдэглээдүйдэмнай газар дайдадашье, уһан далайдашье, ой модондошье гэм хоро бү хэгты». ⁴ Хэды хүн духадаа тамга табюулааб гэжэ хэлсэхые дуулааб. Израилиин бүхы угсаата зоной зуун дүшэн дүрбэн мянган хүниинь тамга даруулһан байна: ⁵ Иудын угсаатанһаа арбан хоёр мянган хүн, Рувимай угсаатанһаа баһал арбан хоёр мянга, Гадай угсаатанһаа арбан хоёр мянга, ⁶ Асирай угсаатанһаа арбан хоёр мянган хүн, Неффалимай угсаатанһаа арбан хоёр мянга, Манассиин угсаатанһаа арбан хоёр мянга, ⁷ Симеоной угсаатанһаа арбан хоёр мянга, Левиин угсаатанһаа арбан хоёр мянган хүн, Иссахарай угсаатанһаа арбан хоёр мянга, ⁸ Забулоной угсаатанһаа арбан хоёр мянга, Иосифой угсаатанһаа арбан хоёр мянга, Вениаминай угсаатанһаа арбан хоёр мянган хүн духадаа тамга даруулһан байна. ⁹ Тэрэнэй удаа харахадамни, тооложо барагдашагүй олон зон урдамни үзэгдэбэ. Тэдэ зоной дунда бүхы үндэһэ яһатан, арадууд, угсаатан, янза бүриин хэлэтэй хүнүүд ерээд байгаа һэн. Тэдэ зон хаан шэрээгэй урда, Үргэлэй Хурьганай урда зогсожо байгаа. Тэдэнэр сагаан хубсаһа үмдэнхэй, гартаа пальма модоной мүшэрнүүдые баринхай байһан юм. ¹⁰ Тэдэ иигэжэ хашхаралдан байгаа бэлэй: «Хаан шэрээдэ Һуугааша манай Бурхан, мүн Үргэлэй Хурьган абарха байна». ¹¹ Хаан шэрээе, ахамадуудые, дүрбэн амитадые тойроод, Бурханай бүхы эльгээмэлнүүд зогсожо байба. Тэдэнэр хаан шэрээгэй урда уруугаа хаража бултадаа унаад, Бурханда мүргэбэд. ¹² Тиихэ зуураа, тэдэ иигэжэ хэлээ: «Болтогой! Манай Бурханда магтаал соло, сэсэн бодол, баяр баясхалан, нэрэ хүндэ, эрхэ засаг, хүсэ шадал хэтын хэтэдэ үршѳѳгдѳѳ! Болтогой!» ¹³ Тиигээд нэгэ ахамадынь: «Сагаан хубсаһа үмдѳѳд байһан ямар хүнүүд гээшэб? Тэдэ хаанаһаа ерээб?» – гэжэ намһаа һураа. ¹⁴ «Ноён аа, ши мэдэнэш», – гэжэ харюусааб. Тиихэдэмни намда тэрэ иигэжэ хэлэбэ: «Эдэ хүнүүд гайтай ехэ гасалан зоболон үзэжэ ерэгшэд мүн. Эдэнэр хубсаһа хунараа Үргэлэй Хурьганай шуһанда угаажа, сагаан болгобо. ¹⁵ Тиимэһээ эдэ хүнүүд Бурханай хаан шэрээгэй урда зогсоод, тэрэнэй һүмэ дотор үдэр һүнигүй тэрээндэ алба хэнэ. Тиин хаан шэрээдэ Һуугааша эдэ хүнүүдые хамгаалха юм. ¹⁶ Тэдэ хүнүүд саашадаа үлэн хооһоор ябахагүй, ундаа хүрэжэ зобохогүй, ааяма шанга наранда шаруулхагүй, бүгшэм халуунһаа боложо ядархагүй. ¹⁷ Юундэб гэхэдэ, хаан шэрээгэй урда зогсожо байгааша Үргэлэй Хурьган тэдэ хүнүүдэй адуулагша эзэниинь боложо, мүнхэдѳѳ амидаралай уһанда тэдэниие залан абаашаха. Тиин эдэ хүнүүдэй нюдэнэй нулимсые Бурхан ѳѳрѳѳ аршаха».

¹ Долоодохи тамгыень Үргэлэй Хурьганай тайлахадань, хахад сагай туршада огторгой тэнгэридэ абяа шэмээгүй болошобо. ² Тиигээд Бурханай урда долоон эльгээмэлнүүдэйнь зогсожо байхые харабаб. Тэдэ эльгээмэлнүүдтэ долоон бүреэнүүд үгтэһэн байба. ³ Удаань Бурханай баһа нэгэ эльгээмэл дүтэлэн ерээд, үргэлэй шэрээгэй хажууда зогсобо. Тэрэ эльгээмэл гартаа алтан бойпуур баряад байгаа. Бурханай бүхы хүнүүдэй мүргэлтэй нэгэдүүлхын тула, хаан шэрээгэй урдахи тахилай алтан шэрээ дээрэ табяад утахынь тула обоо собоо хүжэ санзай Бурханай тэрэ эльгээмэлдэ үгтѳѳ һэн. ⁴ Хүжэ санзайн утааниинь Бурханай хүнүүдэй мүргэлтэй хамта Бурханай Эльгээмэлэй гартаа баряад байһан бойпуур сооһоо ѳѳдѳѳ дэгдээ бэлэй. ⁵ Удаань тэрэ эльгээмэлынь бойпуур абажа, үргэлэй шэрээһээ залаһан галаар бойпуураа дүүргээд, газарта хаяжархиба. Тиихэдэнь газар дэлхэйдэ огторгойһоо дуун нэрьебэ, тэнгэри нижаганаса дуугарба, ехээр сахилгаан сахилба, газар хүдэлбэ. ⁶ Долоон бүреэнүүдые баряад байһан Бурханай долоон эльгээмэлнүүд бүреэгээ дуугаргахаяа бэлдэбэд. ⁷ Түрүүшын эльгээмэлэй бүреэгээ дуугаргахадань, шуһатай холисолдоһон мүндэр оробо, гал дүлэн гараба, тиихэдэнь газар дэлхэйн гурбанай нэгэ хубинь, ой модоной гурбанай нэгэ хубинь, бүхы үбһэ ногоон шаташаба. ⁸ Бурханай хоёрдохи эльгээмэлэй бүреэгээ дуугаргахадань, дүрэжэ байһан мантан томо хада шэнги юумэн далайда унашаба. Тиихэдэнь далайн гурбанай нэгэ хубинь шуһан болошобо. ⁹ Далайда байһан амиды бүхы юумэнүүдэй гурбанай нэгэ хубинь үхэшэбэ, далайн бүхы онгосонуудай гурбанай нэгэ хубинь хосоршобо. ¹⁰ Гурбадахи эльгээмэлэй бүреэгээ дуугаргахадань, дүлэн шэнгеэр носожо байһан угаа томо одо мүшэн огторгойһоо ерэжэ гол мүрэнүүдэй, уһа горхонуудай гурбанай нэгэ хуби дээрэ унашаба. ¹¹ Тэрэ одо мүшэн Тобшо Үрмэдэһэн гэжэ нэрэтэй һэн. Уһа мүрэнэй гурбанай нэгэ хубинь үрмэдэһэндэл адли гашуун боложо, иимэ уһа уугаад, хүн түрэлхитэнэй гурбанай нэгэ хубинь үхѳѳ бэлэй. ¹² Дүрбэдэхи эльгээмэлэй бүреэгээ дуугаргахадань, наран, һара, одо мүшэд гэмтэжэ, гурбанай нэгэ хуби саг соо тэдэнэр гэрэл туяа үгэхэеэ болёод байба. Наран үдэрэй гурбанай нэгэ хуби саг соо гэрэл туяа үгэхэеэ болёод, һара ба одо мүшэд һүниин гурбанай нэгэ хуби саг соо гэрэл туяа үгэхэеэ болёод байба. ¹³ Зогсоод хаража байтарни, огторгойдо нэгэ бүргэд ниидэн, иигэжэ шангаар дуугаржа байба: «Газар дэлхэйдэ һуугшадта гайтай ехэ уйдхар гашуудал тохёолдохонь, юуб гэбэл, Бурханай бусад гурбан эльгээмэлнүүд бүреэгээ дуугаргахаяа байна».

¹ Табадахи эльгээмэлэй бүреэгээ дуугаргахадань, огторгой дээрэһээ одо мүшэнэй газарта унаад байхые обёорон харабаб. Газарай оёоргүй гүнзэгы нүхэ руу орохо түлхюур тэрэ одо мүшэндэ үгтэһэн байгаа. ² Газарай тэрэ оёоргүй гүнзэгы нүхэнэй үүдые одо мүшэнэй нээхэдэнь, тэндэһээнь аргагүй томо пеэшэн сооһоо гараһан шэнги бѳѳн хара утаан дэгдэн гараба. Тэрэ утаанһаань боложо, огторгой тэнгэри, нараншье бүрүүл харанхы болошобо. ³ Хара утаан сооһоо таршаанууд бии боложо, газарта унаба. Тэрэ таршаануудта газар дэлхэйн хорото абаахайнуудтал адли ехэ эрхэ засаг үгтэһэн байгаа. ⁴ Теэд үбһэ ногоондошье, ургамал, модонуудташье хоро хүргэхэгүйт, харин духадаа Бурханай тамгагүйл хүнүүдтэ хоро хүргэхэт гэжэ тэдэ таршаануудта хэлэгдэһэн байгаа. ⁵ Мүн тиимэ хүнүүдые алахагүйт, харин таба һара соо миил үбэдхѳѳжэ зобоохот гэжэ тэдэ таршаануудта захигдаһан байна. Тэрэ үбшэниинь хүниие хорото абаахайн хадхаһандал адли ехэ үбшэнтэй байгаа. ⁶ Тиихэ үедэнь хүнүүд зобоходоо үхэлѳѳ бэдэрхэ, теэд үхэлынь олдохогүй, үхэхэ гэжэ ехэ оролдохо, теэд үхэлынь тэдэндэ ерэхэгүй. ⁷ Тэдэ таршаанууд хараха янзада дайлалдахаяа байһан морид шэнги һэн. Таршаануудай толгойнуудтань алтан титим малгайнуудтал адлишуу юумэн үмдѳѳтэй, тэдэнэй нюур шарайнуудынь хүнэйхидэл адлинууд һэн. ⁸ Таршаануудай толгойнуудай үһэниинь эхэнэр хүнэй үһэндэл адли, шүдэнүүд гээшэнь арсаланай һоёонуудтал адлирхуу бэлэй. ⁹ Тэдэ таршаанууд дээгүүрээ түмэр шэнги хуягтай һэн, тэдэнэй ниидэхэдэ далинуудайнь хииганаан гээшэ олон тоото мори тэргээр дайн байлдаанда наяргалдан түергэлдэн орожо байһандал үзэгдѳѳ бэлэй. ¹⁰ Тэдэ таршаануудай һүүлнүүдынь хорото абаахайнуудайхидал адли һэн, таршаануудай һүүлнүүдтэнь хадхуурнууд бии һэн; таршаанууд тэдэ хадхуурнуудаараа таба һарын туршада хүнүүдые хадхажа зобоохо эрхэ засагтай байгаа. ¹¹ Тэдэ таршаануудай хааниинь оёоргүй гүнзэгы нүхэнэй эльгээмэл байһан юм; тэрэ эльгээмэлынь еврей хэлээр Аваддон, грек хэлээр Аполлион (оршуулбал: «Эбдэгшэ») бэлэй. ¹² Нэгэ аюул зоболонгой үнгэрхэдэ, хойноһоонь баһа хоёр ехэ гашуудал зоболон ерэхэ ёһотой байгаа. ¹³ Зургаадахи эльгээмэлэй бүреэгээ дуугаргахадань, Бурханай урдахи тахилай алтан шэрээгэй дүрбэн булангай эбэрнүүдһээ абяа дуулабаб. ¹⁴ Томо бүреэ бариһан зургаадахи эльгээмэлдэ тэрэ абяан иигэжэ хэлэбэ: «Агууехэ Евфрат мүрэнэй шадар хүлеэтэй Бурханай дүрбэн эльгээмэлнүүдые таби». ¹⁵ Тиихэдэнь хүн зоной гурбанай нэгэ хубиие алаха хюдаха эгээл тэрэ саг, үдэрѳѳ, һара, жэлээ хүлеэжэ, бэлэн болоод байһан тэдэ дүрбэн эльгээмэлнүүд табигдаа бэлэй. ¹⁶ Хамта дээрээ тэндэнь хоёр зуун сая морин сэрэгшэд байна гэлсэхые дуулааб. ¹⁷ Эдэ моринуудай, унаад ябаһан хүнүүдэйнь иимэ байхые харааб: сэрэгшэдынь гал улаан, миндаргадал адли сэнхир, хүхэртэл адли шара хуягуудые үмдѳѳд байгаа. Моридойнь тархи толгой арсаланайхидал адли һэн. Моридой аман сооһоо гал, утаан, хүхэр гаража байгаа. ¹⁸ Үхэлэй аюулта гал, утаан, хүхэр гурбан зүйлнүүд моридой аманһаа гараад, хүн зоной гурбанай нэгэ хубиие алаа хюдаа һэн. ¹⁹ Юундэб гэбэл, моридойнь хүсэ шадал тэдэнэй амандань, һүүлнүүдтэнь байгаа. Тэдэнэй һүүлнүүдынь тархи толгойнуудтай могойнуудай түхэлтэй һэн, тиимэ һүүлнүүдээрээ хүн зониие хорложо аладаг бэлэй. ²⁰ Иимэ ехэ аюул зоболондо орожо үхѳѳгүй үлэһэн хүнүүд ѳѳһэдынгѳѳ нүгэлтэ хара хэрэгүүдые үйлэдэжэл байгаа. Тэдэнэр алта, мүнгѳѳр, гуули зэдээр, шулуу модоор хэгдэһэн худал хуурмаг шүтѳѳнүүдтэ, ада шүдхэрнүүдтэ урдынхидаал адляар һүгэдэн мүргэһѳѳр байгаа. Харин тиихэдэ тэдэ хуурмаг шүтѳѳнүүдынь юумэ үзэжэ харажашье, дуулажа шагнажашье, ябажа хүдэлжэшье шадахагүй юм. ²¹ Бусад үлэһэн тэдэ зон хүнүүдые аладаг хюдадаг, эльбэ шэди үйлэдэдэг, забхай зальхай ябадал гаргадаг, хулгай худал хэдэг ябадалаа орхёогүй байһаар.

¹ Удаань үүлэ нэмэрһэн бата хүсэтэй ондоо нэгэ эльгээмэлэй тэнгэриһээ буужа ябахые харабаб. Толгой дээгүүрнь һолонго татанхай, нюур шарайнь наран шэнги, хоёр хүлынь гал баханануудтал адли һэн. ² Дэлгээтэй багахан ном тэрэнэй гарта байба. Тиигээд баруун хүлѳѳ далай дээрэ, зүүн хүлѳѳ газар дээрэ табиба. ³ Тиигээд Бурханай Эльгээмэл арсаланай хэрхирһэндэл шангаар хашхарба. Тиихэдэнь долоон аянганууд ѳѳһэдынгѳѳ абяагаар дуугаралдаба. ⁴ Тиигэжэ дуугаралдахадань, юумэ бэшэхэеэ бэлдээд байгааб, теэд: «Долоон аянгануудай хэлээшые бү бэшэ, нюугаад бай», – гэжэ тэнгэри дээрэһээ хэлэхые дуулабаб. ⁵ Далай дээрэ, газар дээрэ байхыень минии хараһан Бурханай Эльгээмэл баруун гараа огторгой ѳѳдэ үргэбэ. ⁶ Огторгой тэнгэриие, газар дэлхэйе, уһан далайе, тэндэхи бүхы юумэнүүдые заяаһан хэтэ мүнхэдѳѳ Амидаран мандагшын алдар нэрээр Бурханай тэрэ эльгээмэл иигэжэ тангариглан хэлэбэ: «Саашадаа удааруулагдахагүй. ⁷ Теэд Бурханай долоодохи эльгээмэлэй бүреэгээ дуугаргахадань, Бурханай нюуса түсэб бүрин бэелүүлэгдэхэ. Бурхан энэ түсэб тухай ѳѳрынгѳѳ зарасанар-лүндэншэдтэ урид мэдээсэһэн байгаа». ⁸ Удаань тэнгэриһээ дуулдаһан абяан дахин намда хандажа: «Далай газар хоёрой дээрэ зогсожо байһан эльгээмэлһээ дэлгээтэй ном ошожо аба», – гэбэ. ⁹ Би тэрэ эльгээмэлдэ ошожо, дэлгээтэй номыень эрибэб. Тэрэ намда иигэжэ хэлэбэ: «Энэ ном абаад эдижэрхи. Хото гэдэһэндэшни гашуун байха, теэд аман соошни зүгын бал шэнги амтатай байха». ¹⁰ Бурханай Эльгээмэлэй гарһаа номыень абаад эдижэрхибэб. Аман доторни ороходоо, зүгын бал шэнги амтатай байһанаа, харин тэрэ номоо эдихэдэмни, хото гэдэһэн соомни ехэ гашуун байгаа бэлэй. ¹¹ Тиигээд Бурханай Эльгээмэл намда иигэжэ айладхан хэлэһэн юм: «Ши олон ондоо арадууд, үндэһэ яһатан, элдэб янзын хэлэтэй зон, хаашуул тухай урид мэдэжэ, дахин саашадаа абарал буулгадаг болохош».

¹ Газар хэмжэдэг модон шэнги таяг намда үгѳѳд, иигэжэ хэлэбэд: «Ши ѳѳдѳѳ бодоод, Һүмэ, тахилай шэрээ хоёрые хэмжэ, тиигээд энэ Һүмэ дотор хэр олон хүнүүд Бурханда мүргэнэб гэжэ тооло. ² Теэд Һүмын гадаада хорёое бү тоололсо, бү хэмжэ, юуб гэбэл, тэрэ хорёонь бусад арадуудай мэдэлдэ үгтэнхэй юм. Тэдэ хүнүүд нангин хотые дүшэн хоёр һарын туршада хүлѳѳрѳѳ гэшхэжэ дэбһэжэ ябаха. ³ Би хоёр гэршэнэрээ эльгээхэб: тэдэмни уйдхар гашуудалай хубсаһа үмдѳѳд, мянга хоёр зуун жаран үдэр соо Бурханай үгэ айладхажа ябаха». ⁴ Эдэ лүндэншэд газарай Эзэнэй урдахи хоёр дэн, хоёр олива модон мүн гээшэ. ⁵ Эдэ хоёр лүндэншэдые хорлохоёо һанаа һаань, тэдэ хоёрой аманһаа гал дүлэн гаража, дайсадыень үгы хэжэрхидэг байна. Эдэ хоёрто хоро хэхэеэ һанагшад үхэн хосорхо үйлэтэй юм. ⁶ Тэдэ хоёрой Бурханай үгэ айладхажа байха бүхы үдэрнүүдтэнь хура бороогой орохогүйн тула тэдэндэ огторгой тэнгэриие хаажархиха эрхэ засаг үгтэхэ; уһа мүрэнүүдые шуһан болгожорхихо, газар дэлхэйдэ ѳѳһэдынгѳѳ дура зоргоор гай аюул тохёолдуулха эрхэ засаг үгтэхэ. ⁷ Тэдэ хоёр лүндэншэдэй гэршэлгэеэ хэжэ дүүргэхэдэнь, оёоргүй нүхэн сооһоо ан арьяатан гаража ерээд, тэдэ хоёртой дайлалдан, алаха хюдаха байна. ⁸ Тэдэнэй үхэһэн бэень Содом гү, али Египедтэл адли муу суутай хотонуудай нэгэ тон ехэ хотын гудамжада хэбтэхэ. Тэрэ хотодо мүн тэдэнэй Дээдын Эзэн хэрээһэндэ хадагдажа саазалуулаа һэн. ⁹ Али бүхы арадууд, угсаатан, элдэб янзын хэлэтэй зон, бүхы үндэһэ яһатан тэдэ хоёрой үхэһэн бэеые гурба хахад үдэрэй туршада һонишоон хаража байгаа, хүдѳѳлүүлхыень зүбшѳѳнгүй байлгаа һэн. ¹⁰ Газар дэлхэйдэ һуудаг хүнүүд хүхилдэн баясажа, найр зугаа хэнэ, бэе бэедээ бэлэг сэлэгүүдые барина, юундэб гэбэл, эдэ хоёр лүндэншэд газар дэлхэй дээрэ һуугшадые тамалан хэһээдэг байгаа. ¹¹ Теэд гурба хахад үдэрэй үнгэрхэдэ тэдэ хоёрой досоонь амидарал үгэдэг Бурханай һүлдэ орожо, мүнѳѳхи хоёрынь хүл дээрээ бодошобо, тиихэдэнь тэндэ хаража байһан хүнүүд айхын ехээр айжа мэгдээ бэлэй. ¹² «Наашаа дэгдэгты!» гэжэ тэнгэри дээрэһээ шангаар дуугарха абяан лүндэншэдтэ дуулдаба. Тиин дайсадайнгаа хараһаар байтарынь, лүндэншэд үүлэнэй дээгүүр тэнгэри ѳѳдэ дэгдэшэбэ. ¹³ Тэрэ үедэнь газар ехээр хүдэлжэ, хотын арбанай нэгэ хубинь һандарба. Долоон мянган хүн газарай хүдэлѳѳнһѳѳ боложо үхэбэ, бэшэниинь айжа мэгдээд, Тэнгэриин Бурханиие алдаршуулан магтаба. ¹⁴ Хоёрдохи гай аюул үнгэрбэ. Тиигээд гурбадахи гай аюул дүтэлшэбэ! ¹⁵ Долоодохи эльгээмэл бүреэгээ дуугаргаба. Тиихэдэнь тэнгэридэ иигэжэ шангаар дуугарха абяанууд дуулдаба: – Дэлхэйн засаг түрэ Эзэн Бурханаймнай, тэрэнэй Табисууртын засаг түрэ болоо. Тэрэ засаг түрые Бурхан хэтэ мүнхэдѳѳ барижа байха. ¹⁶ Бурханай урдахи хаан шэрээ дээрэ һууһан хорин дүрбэн ахамадууд Бурханай урда нюураараа уруугаа хаража газарта унаад, һүгэдэн мүргэбэ. ¹⁷ Тэдэ иигэжэ хэлэбэ: – Хододоо байһан, мүнѳѳшье байгаа Хамагые зонхилогшо Бурхан, шамда баяр баясхалан хүргэнэбди, ушарынь гэбэл, ши агууехэ һүр хүсэеэ харуулжа, Хаан болобош. ¹⁸ Бусад арадууд уур сухалаа хүрэбэ, баһа шишье уур сухалаа хүрэбэш – үхэһэн хүнүүдые шүүбэрилхэ сагшни, шинии зарасанар-лүндэншэдтэ, шинии арюун нангин арадта, шинии алдар нэрые хүндэлдэг юрыншье, засаг баридагшье хүнүүдтэ шагнал хайра үршѳѳхэ сагшни, газар дайда усадхан хосороогшодые үгы хэхэ сагшни хүрэжэ ерэбэ. ¹⁹ Тэнгэри дээрэхи Һүмэ тайлдан нээгдэжэ, тэрэнэй Хэлсээнэй абдарынь Һүмэ дотор харагдаба. Тиин гал ехэ сахилгаан сахилба, оог шууяан болобо, тэнгэриин дуун нэрьебэ, газар хүдэлбэ, мүндэр ехээр оробо.

¹ Тиин тэнгэри дээрэ гайхамшаг дүлгэ тэмдэг үзэгдэбэ: нараар хубсаһа хэжэ үмдэһэн эхэнэр; тэрэнэй хүл доронь һара, толгойдонь – арбан хоёр одо мүшэтэй титим малгай. ² Хүл хүндэ байһан тэрэ эхэнэр түрэхын урдахана тохёолдодог үбшэнһѳѳ зобожо хашхарна. ³ Тэнгэридэ баһа ондоо нэгэ дүлгэ тэмдэг бии болобо: долоон толгойтой, арбан эбэртэй, толгойнууд дээрээ долоон титимтэй томо гэгшын улаан луу харагдаба. ⁴ Тэрэнь одо мүшэдэй гурбанай нэгэ хубиие һүүлээрээ хамаад, тэнгэриһээ газарта хаяба. Үхибүүнэй түрэмсѳѳр залгижархихаяа бэлдээд, нарайлха эхэнэрэй урда луу зогсожо байба. ⁵ Нарайлха эхэнэр хүбүү түрэбэ. Тэрэнь бүхы арадуудые түмэр таягаараа ударидан зонхилжо байха юм. Тэрэ хүбүүниинь Бурханда, Бурханай хаан шэрээдэ дэгдүүлэн абаашагдаба. ⁶ Харин эхэнэр сүл губи руу тэрьелжэ ошобо. Тэндэ эхэнэрэй байха байрые Бурхан түхеэрээ һэн. Мянга хоёр зуун жаран үдэрэй турша соо тэрэ байрадань эхэнэрые харууһалжа байха юм. ⁷ Харин тэнгэри дээрэ дайн сэрэг боложо байгаа: Михаил ѳѳрынгѳѳ эльгээмэлнүүдтэй суг луугай урдаһаа тэмсэн дайлалдаа һэн. Луу ѳѳрынгѳѳ эльгээмэлнүүдтэй хамта дайлалдаа. ⁸ Теэд луу эльгээмэлнүүдтэйгээ диилдэжэ, тэнгэридэ байха һуури байраяа алдаа һэн. ⁹ Юртэмсэ дэлхэйн бүхы зониие мэхэлжэ хууража байһан шолмос, сатана гэжэ нэрэтэй ехэ үнинэй Могой бологшо луу тэнгэриһээ газарта шэдүүлһэн, тэрээнтэйгээ хамта эльгээмэлнүүдыньшье шэдүүлһэн юм. ¹⁰ Тэнгэри дээрэһээ шангаар хэлэһэн иимэ үгэнүүдые би дуулаа һэм: – Одоошье Бурханай хүнүүдэй абарагдаха саг ерэбэ. Одоошье манай Бурхан засаг түрые абаад, хаан болохо. Тиин Бурханай Табисуурта бүхы дэлхэйе ударидан зонхилжо байха. Юуб гэбэл, бидэнэй аха дүүнэрые Бурханаймнай урда үдэр һүнигүй гэмнэгшэ газар руу шэдүүлэн унаба. ¹¹ Манай аха дүүнэр Үргэлэй Хурьганай шуһаар, мүн гэршэлһэн үгѳѳрѳѳ тэрэ гэмнэгшые илаа. Аха дүүнэрнай ами наһаа гамнаагүй, үхэлһѳѳ айгаагүй. ¹² Огторгой тэнгэри, тэндэ байгшад бултадаа баясан хүхигты! Газар дэлхэйнхидтэ, уһан далайнхидта гашуудал зоболон болохонь! Айхабтар ехэ уур сухалтай шолмос танда бууба: хаһа сагынь бага үлѳѳ гэжэ тэрэ шолмос ойлгоо. ¹³ Луу газарта шэдүүлһэнээ мэдээд, хүбүү түрэһэн эхэнэрые хойноһоонь мүшхэн намнаба. ¹⁴ Болзоото сүл губи газартаа лууда баригдангүй ниидэжэ ошохынь тула тэрэ эхэнэртэ бүргэд шубуунай аргагүй томо хоёр дали үгтэбэ. Гурба хахад жэл соо тэрэ эхэнэрые харууһалжа байха юм. ¹⁵ Далай ехэ уһанда абтажа тэрэ эхэнэрэй урдашахынь тула тэрэнэй хойноһоонь луу хадаа гол мүрэн шэнги ехэ уһа аман сооһоо гаргажархиба. ¹⁶ Теэд эхэнэртэ газар туһалаа: луугай гаргаһан уһа мүрэниие газар амаа ангайлгаад уужархиба. ¹⁷ Тиихэдэнь луу тэрэ эхэнэртэ ехээр сухалдан хэрүүлхэжэ, эхэнэрэй бусад үхибүүдтэй дайлалдахаяа ошобо. Тэдэ үхибүүдынь Бурханай захяа заабариие дүүргэжэ, Иисусай үнэн зүб һургаалые үнэн сэхээр сахидаг һэн. ¹⁸ Тэрэ луу далайн эрьедэ зогсожо байгаа.

¹ Далай сооһоо арбан эбэртэй, долоон толгойтой арьяатанай гаража ябахые харааб. Эбэрнүүд дээрэнь арбан титим табяатай, толгой дээрэнь Бурханиие доромжолһон нэрэнүүд бэшээтэй байба. ² Минии хараһан арьяатан болбол эрбэдэй түхэлтэй, хүлнүүдынь баабгайнхитай адлишуу, аманиинь арсаланайхи шэнги байгаа бэлэй. Тэрэ арьяатанда луу ѳрынгѳѳ хаба шадал, хаан шэрээ, тон ехэ түрэ засаг үгэбэ. ³ Арьятанай нэгэ толгойнь үхэлэй ехээр шархатаһан байбашье, эдэгэжэ, газар дэлхэйн хүнүүд бултадаа гайхалдан, тэрэ арьяатанай хойноһоо дахаба. ⁴ Тэдэ хүнүүд арьяатанда засаг үгэһэн луугай урда һүгэдэн мүргѳѳд, мүн арьяатанда һүгэдэн мүргэхэ зуураа, иигэжэ хэлэбэ: «Энэ арьяатантай тэнсэхэ амитад олдохо аал? Энээнтэй дайлалдажа шадаха хүн амитан байха аал?» ⁵ Ѳѳрыгѳѳ магтаха, Бурханиие доромжолхо эрхэ засаг тэрэ арьяатанда үгтэһэн байна. Дүшэн хоёр һара соо тиимэ юумэ хэжэ байха эрхэ тэрээндэ олгогдоһон юм. ⁶ Бурханиие муушалхаяа, тэрэнэй алдар нэрые, майхан байрые, тэнгэридэ һуугшадые муушалхаяа тэрэ арьяатан амаа ангайлгаба. ⁷ Бурханай табисуурта арад зоной урдаһаа тэмсэжэ, тэрэ зониие илаха эрхэ засаг тус арьяатанда үгтэнхэй. Алишье угсаатаниие, арадуудые, элдэб янзын хэлэтэй зониие, бүхы яһатан үндэһэтэниие захиран зонхилжо байха эрхэ засаг тэрэ арьяатанда үгтэнхэй. ⁸ Үргэлэй Хурьганай тэмдэглэдэг амидаралай ном соо нэрэнүүдэйнь бэшэгдээгүй бүхы газар дайдын зон тэрэ арьяатанда һүгэдэн мүргэхэ. Үргэлэй Хурьган тахил болгогдон Бурханда үргэгдэхэ юм гэжэ газар дэлхэйн бүтээгдэхэһээ түрүүн хараалагдаа һэн. ⁹ Шэхэтэй юм һаа, шагнаг лэ! ¹⁰ Плендэ орохо хубитай хүн плендэ орохо. Һэлмээр сабшуулжа үхэхэ хубитай хүн һэлмээр сабшуулжа үхэхэ. Бурханай табисуурта арад зон хатуу зоригтой, үнэн шударгы байха ёһотой гэжэ эдэ үгэнүүдһээ элирнэ бшуу! ¹¹ Удаань газар дороһоо гаража ябаһан ондоо арьяатаниие харабаб. Тэрэнь Үргэлэй Хурьгандал адли хоёр эбэртэй байгаа һэн, теэд луу шэнгеэр дуугараа. ¹² Энэ арьяатаниинь үхэтэрѳѳ шархатуулаад эдэгэһэн нэгэдэхи арьяатанда мүргэгты гэжэ газар дэлхэйн бүхы зониие баадхана. Хоёрдохи арьяатаниинь нэгэдэхи арьяатанай нэрээр, тэрэнэй эрхэ засагые хэрэглэн, тиимэ юумэ хэнэ. ¹³ Хоёрдохи арьяатаниинь гайхамшаг ехэ дүлгэ тэмдэгүүдые үйлэдэнэ: хүнүүдэй хараһаар байтар тэнгэри дээрэһээ газар уруу гал дүлэ буулгана. ¹⁴ Тиин энэнь нэгэдэхи арьяатанай нэрээр гайхамшаг ехэ дүлгэ тэмдэгүүдые харуулжа, газар дэлхэйн зониие мэхэлнэ. Һэлмээр сабшуулаад амидырһан арьяатанай нэрэ хүндэдэ тэрэнэй хүрэг дүрсэ хэгты гэжэ газар дэлхэйн зондо хоёрдохи арьяатан захиралта үгэбэ. ¹⁵ Нэгэдэхи арьяатанай хүрэг дүрсые амидыруулха эрхэ, тэрэ хүрэг дүрсыень юумэ хэлэжэ шададаг болгохо эрхэ, нэгэдэхи арьяатанай хүрэг дүрсэдэ һүгэдэн мүргэдэггүй хүнүүдые алаха эрхэ хоёрдохи арьяатанда үгтэһэн байгаа. ¹⁶ Энэ хоёрдохи арьяатан бүхы хүнүүдые: юрыншье, засаг баридагшье, баяншье, үгытэйшье уладые, эрхэ сүлѳѳтэйшье зониие, богоол барлагуудыешье баруун гартаа гү, али духа магнайдаа тамга табюулха гэжэ баадхадаг бэлэй. ¹⁷ Тамгагүй һаа, хэншье юумэ наймаалха, худалдажа абаха эрхэгүй һэн. Тамга гээшэнь арьяатанай нэрэ гү, али тэрэнэй нэрын тоо мүн. ¹⁸ Иихэдээ мэргэн бодолтой ябахые уряална гээшэ: ухаансар хүниинь арьяатанай тоое бодожо гаргаг лэ. Энэ тоонь, хүнэйхидэл адли, зургаан зуун жаран зургаа юм.

¹ Би иимэ юумэ харааб: Сион хада дээрэ Үргэлэй Хурьган зогсоно, тэрээнтэй хамта зуун дүшэн дүрбэн мянган хүнүүдэй духада Үргэлэй Хурьганай нэрэ, тэрэнэй Эсэгын нэрэ бэшээтэй. ² Уһан хүүюур шэнги, тэнгэриин дуун шэнги абяан огторгойһоо дуулдаба. Намда тэрэ абяан ятагаар наадахадаа, ятагашадай наададаг дуундал адляар һанагдаба. ³ Тэдэнэр хаан шэрээгэй урда, дүрбэн амитадай болон ахамадуудай урда байгаад, магтаал дуу зэдэлүүлнэ. Газар дэлхэйһээ сүлѳѳлэгдэһэн зуун дүшэн дүрбэн мянган тэдэ хүнүүдһээ бэшэ ондоо хэншье эдэ дуунуудые дуулажа шадаагүй. ⁴ Тэдэ хүнүүд эхэнэрнүүдээр орёоһолдон бэеэ бузарлаагүй, гэр бүлэ болоогүй зандаа үлѳѳ, Үргэлэй Хурьганай ошоһон тээшэ дахажа ябаа. Гансал тэдэ хүнүүд газар дэлхэйһээ абтан абарагдаһан байгаа. Тэдэнэр Бурханда болон Хурьганда үргэһэн түрүүшын ургасын дээжэ мэтэ бэлэй. ⁵ Тэдэнэр хэзээдэшье худал хуурмаг үгэ хэлэдэггүй, гэм зэмэгүй байһан юм. ⁶ Газар дэлхэй дээрэ һуугшадта, али бүхы арадуудта, угсаатанда, элдэб янзын хэлэтэй зондо, бүхы үндэһэ яһатанда хэтэ мүнхын Һайн Мэдээсэл дуулгахын тула Бурханай үшѳѳ нэгэ эльгээмэлэй огторгойдо элин ниидэжэ ябахые би удаань харааб. ⁷ «Бурханһаа айжа түбэгшѳѳжэ байгыт! Тэрэнэй алдар солые суурхуулан магтажа байгыт! Юуб гэбэл, Бурханай зарга шүүбэри хэхэ сагынь ерээд байнал! Огторгой тэнгэриие, газар дайдые, далай, мүрэнүүдые Бүтээгшын урда һүгэдэн мүргыт!» ⁸ Дары хойноһоонь баһа ондоо, хоёрдохи эльгээмэл иигэжэ хашхаран ниидэжэ ябаа: «Бүхы арад үндэһэтэниие забхайралайнгаа бузар архи уулгажа хорлоһон агуу ниислэл Вавилон хото хосороо, хосороо!» ⁹ Тэдэнэй хойноһоо баһа ондоо, гурбадахи эльгээмэл шанга шангаар иигэжэ хашхаран ооглобо: «Арьяатанда, тэрэнэй хүрэг дүрсэдэ мүргэн һүгэдэжэ, духадаа гү, али баруун гартаа тамгатай байгаа һаа, ¹⁰ Бурханай уур сухалай аягаһаа тэрэнэй уур сухалай холисогүй сэбэр архи ууха, тэдэ хүнүүдые арюун нангин эльгээмэлнүүдэй урда, Үргэлэй Хурьганай урда асараад, гал түймэр руу, хүхэрэй хүхэ дүлэн руу хаяжа, тамалан хэһээхэ. ¹¹ Тэдэниие зобоогшо галай хара утаан хэтын хэтэдэ ѳѳдѳѳ хѳѳрэн дэгдэхэ, тиин арьяатанда, тэрэнэй хүрэг дүрсэдэ һүгэдэн мүргэгшэдтэ, тэрэнэй нэрэтэй тамгатайшуулда үдэр һүнигүй амар заяа үзүүлэгдэхэгүй». ¹² Бурханай табисуурта зон, Бурханай захяа заабари сахижа, Иисуста үнэн сэхэ ябадаг хүнүүд тэсэбэритэй шанга байха ёһотой гэжэ эдэ үгэнүүдһээ элирнэ бшуу! ¹³ Удаань огторгойһоо иигэжэ дуугарха абяа дуулааб: «Буулгажа бэшээд аба: энэ сагһаа эхилэн Дээдын Эзэндэ үнэн сэхэ байжа наһа бараһан хүнүүд ямар жаргалтайб даа!» «Тиимэл даа, тэдэнэр хүндэ хүшэр ажалһаа одоол сүлѳѳржэ амархань, юундэб гэбэл, тэдэнэй бүтээһэн буянтай һайхан хэрэгүүдынь хойноһоонь ябалсана гэжэ Нангин Һүлдэ хэлэнэ». ¹⁴ Иимэ юумэ харааб: сагаан үүлэн, тэрэнэй дээрэнь хүнтэй адлирхуу амитан һууна. Толгой дээрэнь алтан титим, гартаа хурса хадуур баринхай. ¹⁵ Һүмэ сооһоо баһа нэгэ эльгээмэл гараад, үүлэн дээрэ Һуугшада хандан, иигэжэ шангаар ооглон дуугарба: «Хадуураа наашань эльгээ, тиигээд таряагаа хада! Газар дээрэ ургаса таряан эдеэшээ – хуряаха саг ерээ!» ¹⁶ Үүлэн дээрэ Һуугаашань хадуураа газар уруу шэдэбэ. Тиихэдэнь газар дээрэхи таряан хадагдашаба. ¹⁷ Ондоо нэгэ эльгээмэл тэнгэриин Һүмэ сооһоо гараба, баһал хурса хадуур гартаа баринхай. ¹⁸ Гал гуламта даажа байһан баһа нэгэ эльгээмэл Һүмын үргэлэй газарһаа гараба. Хурса хадууртай эльгээмэлдэ хандан, тэрэнь иигэжэ хашхарба: «Хурса хадуураа абаад яба, тиигээд газар дээрэ ургадаг үзэмэй модоной жэмэсүүдые хада, тэдэнь эдеэшээд байна». ¹⁹ Тэрэ эльгээмэлынь хадуураа газар уруу шэдэжэ, газарай үзэмэй баглаануудые отолоод, үзэмэй шүүһэ шахадаг, Бурханай уур сухалай томо тогоо худар шэдэжэрхибэ. ²⁰ Хотын гадна оршоһон томо мандагар тогоон соо үзэмэй баглаа жэмэсүүдые низа тэһэ дэбһэбэ, тиихэдэнь тогооной халитар улаан шуһан урдажа, мориной хазаарта хүрэмѳѳр гурбан зуун хараа модоной зайда халин тарашаба.

¹ Удаань баһа нэгэ аргагүй ехэ, гайхамшаг дүлгэ тэмдэг: һүүлшын долоон гай аюултай долоон эльгээмэлнүүдые тэнгэри дээрэ харабаб. Юундэ һүүлшын гай аюул юм гэбэл, Бурханай уур сухалынь эдэнээр түгэсэһэн байна. ² Галтай холиһон шэл далай шэнги юумэ харабаб. Энэ шэл далайн хажууда арьяатаниие, тэрэнэй хүрэг дүрсые, арьяатанай нэрын тоое илаашад байна. Тэдэнэр тус бүридѳѳ Бурханай ятага баряад зогсоно. ³ Тиихэ зуураа, Бурханай зараса Моисейн дууе, Үргэлэй Хурьганай иимэ дууе дууланад: шинии бүтээһэн хэрэг аргагүй ехэл, гайхалтай һайхан лэ, Хамагые зонхилогшо Дээдын Бурхан! Арадуудай Хаан! Шинии хэрэгүүд үнэхѳѳр зүб, үнэн сэхэ лэ! ⁴ Хэн шамһаа айхагүйб даа, Эзэн Бурхан, шинии нэрэ солые хэн алдаршуулан магтахагүйб даа?! Гансал ши нангин гэгээн ха юмши! Бүхы арадууд шинии урда һүгэдэн унажа мүргэхэл. Юундэб гэбэл, шинии үнэн зүб хэрэгые бултадаа үзэһэн хараһан ха юм. ⁵ Удаань иимэ юумэ харааб: тэнгэри дээрэ Гэршэлгын Майханай Хамагай Нангин газарынь нээгдэбэ. ⁶ Тэндэһээ долоон гай аюултай долоон эльгээмэлнүүд гараба. Тэдэнэр сэбэрхэн, ялагар нарин улһаар оёһон хубсаһа үмдэнхэй, сээжээрээ алтан бэһэ бэһэлэнхэй байба. ⁷ Дүрбэн амитадай нэгэниинь долоон эльгээгдэмэлнүүдтэ хэтэ мүнхэ оршодог Бурханай угаа ехэ уур сухалай долоон алтан аягануудые барюулба. ⁸ Һүмэнь Бурханай Алдар солын, тэрэнэй Хүсэ шадалай утаагаар дүүрэшэбэ, тиин долоон эльгээмэлнүүдэй долоон гай аюулай дууһан зайлатар Һүмэдэ хэншье орожо шадаагүй.

¹ Удаань долоон эльгээмэлнүүдтэ хандан, Һүмэ доторһоо шангаар иигэжэ хэлэхые дуулааб: «Эндэһээ ошожо, Бурханай уур сухалай долоон аяга соохиие газарта адхагты!» ² Нэгэдэхи эльгээмэл ѳѳрынгѳѳ аяга соохиие газарта адхаба, тиигэмсээрнь арьяатанай тамгатай хүнүүдэй ба арьяатанай дүрсэдэ һүгэдэн мүргэгшэдэй бэедэнь бузар муухай эдеэртэй шарханууд гарашаба. ³ Хоёрдохи эльгээмэл ѳѳрынгѳѳ аяга соохиие далайда адхаба, далай тиихэдэнь үхэһэн хүнүүдэй шуһан шэнги боложо, далайн амитад бултадаа хосорон һалашаба. ⁴ Гурбадахи эльгээмэл ѳѳрынгѳѳ аяга соохиие гал мүрэн, уһа горхо руу адхаба, тиихэдэнь гол мүрэнүүд, уһа горхонууд улаан шуһан болошобо. ⁵ Уһа мүрэнүүдэй эльгээмэлэй иигэжэ хэлэхыень дуулабаб: мүнѳѳнэйшье, урданайшье Нангин гэгээн Бурхан, ши, зүбѳѳр иигэжэ шиидхэһэн байнаш: ⁶ Тэдэнэр Бурханай арадай, лүндэншэдэй улаан шуһа адхаруулаа, тиихэдэнь ши тэдэндэ шуһа уулгажа, тэдэнэй гэмые зүб амсуулааш! ⁷ Тахилай шэрээгэй хажууһаа иигэжэ хэлэхыень би дуулааб: Тиимэ даа, Хамагые зонхилогшо Эзэн Бурхан, шинии гаргаһан шиидхэбэринүүд үнэн зүб байна! ⁸ Дүрбэдэхи эльгээмэл ѳѳрынгѳѳ аяга соохиие нара руу адхаба, тиихэдэнь хүнүүдые шатааха эрхэ наранда үгтэһэн байна. ⁹ Аргагүй халуун болоходонь, хүнүүд шататараа халуудажа байгаа бэлэй. Иимэ ехэ гай аюул даажа байһан Бурханай нэрые хүнүүд хараалай муугаар хараагаа һэн. Теэд тэдэ хүнүүд гэм хэхэеэ болёогүй, Бурханиие магтаагүй бэлэй. ¹⁰ Табадахи эльгээмэл ѳѳрынгѳѳ аяга соохиие арьяатанай хаан шэрээ руу адхаба, тиихэдэнь арьяатанай засаг түрэ соо балай харанхы болошобо. Тэнсэлгүй үбшэнтэй байһан туладань тэндэхи хүнүүд хэлээ хазажа байбад. ¹¹ Тиин үбшэн зоболон, яра шарха асарһанайнь түлѳѳ тэдэнэр Тэнгэриин Бурханиие хараалай муугаар хараажа байгаа. Теэд тэдэ хүнүүд гэм хэхэеэ болёогүй һэн. ¹² Зургаадахи эльгээмэл ѳѳрынгѳѳ аяга соохиие асари ехэ Евфрат мүрэн руу адхаба. Тиихэдэнь тэрэ мүрэн хатажа, Зүүн зүгэй хаашуулай хуурай газараар ябаха харгы гаргагдашаба. ¹³ Луугай аман сооһоо, арьяатанай аман сооһоо, худал хуурмаг лүндэншын аман сооһоо бахын түхэлтэй гурбан һүнэһэ һүлдэнүүдэй гаража байхые харабаб. ¹⁴ Эдэ болбол дүлгэ тэмдэг үйлэдэдэг ада шүдхэрнүүдэй һүнэһэ һүлдэнүүд мүн: Хамагые зонхилогшо Бурханай агууехэ Үдэртэ дайлалдахыень бүхы замбуулин дайдын хаашуулые суглуулхаяа тэдэ ошожо ябаа. ¹⁵ Обёоржо байгты! Би хулгайшан шэнгеэр гэб гэнтэ орожо ерэхэб. Хубсаһаа бэлдээд, һэргэлэн байһан хүн жаргалтай: тэрэ хүн улад зоной дунда салдаган нюсэгѳѳр гаража, нэрээ гутаахагүйл. ¹⁶ Тиин гурбан һүнэһэ һүлдэнүүдынь еврей хэлээр Армагедон гэжэ нэрэтэй газарта бүхы хаануудые суглуулба. ¹⁷ Долоодохи эльгээмэл ѳѳрынгѳѳ аяга соохиие агаар руу сасан адхаба. Тиихэдэнь «Бүтэбэ даа!» – гэһэн шанга абяан Һүмын хаан шэрээгэй зүгһѳѳ дуулдаба. ¹⁸ Сахилгаан сахилгаалба, ооглоон хашхараан болохонь дуулдаба, тэнгэри дуугарба, газар хүдэлбэ. Дэлхэй дээрэ хүн амитанай бии болохоһоо нааша тиимэ ехээр газар хүдэлѳѳгүй юм. ¹⁹ Аргагүй томо хото гурбан хуби боложо бутаран һандаршаба, бусад арадуудай хотонууд хяа бута һүрэн унашаба. Агуу ниислэл Вавилон тухай Бурхан һанажа, аргагүй ехэ уур сухалайнгаа аягатай архиие тэрэ ниислэлдэ уулгаба. ²⁰ Ольторог аралнууд баран булта тэрьелшэбэ, хада уулануудшье олдохоёо болишобо. ²¹ Огторгой тэнгэриһээ дүшэн килограмм шахуу болохо томо гэгшын мүндэр орожо, хүнүүд дээрэ унаба. Теэд аргагүй томо мүндэр оруулжа, аюул тодхор асарһанайнь түлѳѳ Бурханиие хүнүүд хараалай муугаар харааба. Юундэб гэбэл, айхабтар ехэ гай аюул тохёолдоо бшуу.

¹ Долоон аягатай долоон эльгээмэлнүүдэй нэгэниинь ерээд, намтай хѳѳрэлдэжэ эхилбэ: «Наашаа ерэ даа, олон гол мүрэнүүдэй эрьедэ һуугша аргагүй забхай Янхан эмые ямар хатуу шанга хэһээлтэдэ оруулха байһыень шамда харуулхамни. ² Газар дэлхэйн хаашуул тэрэ янхантай холбоорилдон забхайрдаг, газар дэлхэйнхид тэрэ эмын зальхайралай архиие һогтосороо уудаг байгаа». ³ Удаань тэрэ эльгээмэл Нангин Һүлдэтэй болгогдоһон намайе сүл губида асарба. Бурханиие доромжолһон нэрэнүүдэй бэшээтэй, улаан арьяатанай дээрэ һуужа байһан эхэнэрые харабаб. Тэрэ арьяатан долоон толгойтой, арбан эбэртэй һэн. ⁴ Тэрэ эхэнэр улаабтар хүхэ ба шад улаан бүдѳѳр оёһон хубсаһатай, шэжэр алта, эрдэниин шулуу, һубад һубһа ялалзуулан зүүгээд байба. Гартаа алтан хундага баринхай. Тэрэ хундага соонь янхан эмын һамуу зальхай ябадалай жэрхэштэй муухай, бузар булай юумэнүүд хэгдээд байгаа. ⁵ Духа дээрэнь нюуса удхатайгаар иигэжэ бэшээтэй: «Агуу ниислэл Вавилон – газар дэлхэйн янхан эмэнүүдэй жэрхэштэй муухай юумэнүүдэй эхэ». ⁶ Бурханай арад зоной шуһа, Иисусай гэршэнэрэй шуһа уугаад, тэрэ эхэнэрэй һогтошоод байхые харахадаа, гайхахын ехээр гайхабаб. ⁷ Эльгээмэл иигэжэ намда хэлэбэ: «Ши юундэ гайхаабши? Эхэнэрэй нюусые, тэрэ эхэнэрэй унажа ябагша долоон толгойтой, арбан эбэртэй арьяатанай нюусые, шамда тайлбарилан хэлэжэ үгэхэб. ⁸ Шинии хараһан арьяатан бии байһанаа, мүнѳѳ үгы болонхой. Оёоргүй гүнзэгы нүхэн сооһоо һаяар гаража ерэхэ, теэд тэрэ хосорон һалаха. Дэлхэйн бүтээгдэхэһээ нааша угай дэбтэртэ бэшэгдээгүй газар дэлхэйнхид тэрэ арьяатаниие харахадаа, хүхихэ баярлаха, ушарынь гэбэл, бии байһанаа, үгы болоод, дахин бии болохо арьяатаниие хараха юм. ⁹ Эндэ сэсэн ухаан бодол хэрэгтэй. Долоон толгой гээшэнь эхэнэрэй һуугша долоон добо гүбээнүүдынь мүн. Тэдэ долоон гүбээнүүдынь мүн баһа долоон хаанууд гээшэ. ¹⁰ Тэдэ хаануудай табаниинь хосоронхой, нэгэниинь бии, нүгѳѳдэхинь үшѳѳ ерээдүй, ерэхэдээшье удаан байхагүй юм. ¹¹ Бии байһанаа, үгы болоһон арьяатан наймадахи хааниинь болоно; энэнь түрүүшын долоон хаануудай нэгэниинь тиин хосорон һалаха тээшээ боложо байна. ¹² Шинии хараһан арбан эбэрнүүд хадаа хаан түрые үшѳѳл абаагүй арбан хаанууд гээшэ, теэд тэдэнэр арьяатантай хамта нэгэ сагай турша соо хаанай засаг түрэ абаад байха. ¹³ Тэдэнэр хаба шадалаа, засаг түрэеэ арьяатанда үгэхэ гэһэн гансал зорилготой. ¹⁴ Тэдэ хаанууд Үргэлэй Хурьганай урдаһаа дайлалдаха, тиин Үргэлэй Хурьган тэрэнэй урижа асарагшадтай, тэрэнэй шэлэжэ абагшадтай, тэрээндэ үнэн шударгы байгшадтай хамта тэмсэжэ тэдэниие диилэхэ. Юуб гэбэл, Үргэлэй Хурьган эзэдүүдэй Дээдын Эзэн, хаануудай Хаан мүн». ¹⁵ Эльгээмэл намда иигэжэ хэлээ: «Янхан эмын һуугша гол мүрэнүүд хадаа элдэб янзын арадууд, улад зон, үндэһэ яһатан, янза бүриин хэлэтэй зон гээшэ. ¹⁶ Шинии хараһан эдэ арбан эбэрнүүд, мүн арьяатан тэрэ Янхан эмые үзэн ядажа зэбүүрхэхэ, тэрэниие үгырүүлэн хооһоруулха, салдаган нюсэгѳѳр үлѳѳхэ, тэрэ эмые эдижэрхихэ, тиигээд галда шатааха байна. ¹⁷ Юундэб гэбэл, Бурхан номнол үгэнүүдыень бэелүүлэгдэтэр табиһан зорилгыень бэелүүлхэ хүсэл арбан хаануудай зүрхэ сэдьхэлдэ хадуун оруулаа. Бурханай хүсэл иимэ: тэдэ хаанууд хоорондоо зүбшѳѳд, хаанай засаг түрые арьяатанда үгэхэ. ¹⁸ Шинии хараһан эхэнэр болбол газар дэлхэйн хаануудые зонхилогшо агууехэ ниислэл мүн гээшэ».

¹ Тэрэнэй удаа иимэ юумэ харабаб: аргагүй ехэ эрхэ засагтай ондоо нэгэ эльгээмэл тэнгэриһээ буужа байба, тиин газар дайда тэрэнэй алдар солоор гэрэлтэн толоршобо. ² Тэрэ эльгээмэл бардаастай шангаар иигэжэ хашхарба: Агуу ниислэл Вавилон һалаа, һалаа! Энэ ниислэл ада шүдхэрнүүдэй шэбээлдэг газар, элдэб эсын боохолдойнуудай обооролдодог үүр, элдэб эсын бузар шубуудай суглардаг үүр, элдэб эсын бузар булай, жэрхэштэй муухай арьяатадай шэбээлдэг газар болошоо. ³ Юундэб гэхэдэ, ниислэл Вавилон забхайралайнгаа бузар архяар бүхы арадуудые һогтоогоо, тиин газар дэлхэйн хаашуул тэрээнтэй холбоорилдоо, наймаашад хонжоошодшье үлүүсэ һайн байдалдань дашууран орожо, хэтэртэрээ баяжаа. ⁴ Тэнгэриһээ иигэжэ хэлэһэн ондоо абяан намда дуулдаа: Энэ ниислэлэй нүгэл шэбэлынь таанарта нүлѳѳлхэгүйн тула, гай аюулынь таанарые дайрахагүйн тула, арад зомни тэрэ хотые орхиит. ⁵ Юундэб гэбэл, тэрэнэй нүгэл шэбэлынь огторгой тэнгэридэ туласараа обооршоод байна, тиин тэрэ ниислэлэй хэһэн гэмтэ ябадалые Бурхан һанаандаа оруулба. ⁶ Тэрэ ниислэлые хэһэн үйлэйнь хэмжээгээр хэһээгты, хэһэн үйлэ хэрэгүүдэйнь түлѳѳ хоёр дахин хатуугаар хэһээгты, хоёр дахин хатуу архи тэрэнэй аяга руу хэгты! ⁷ Ѳѳрыгѳѳ тэрэ хэды ехээр магтуулаа гээшэб, хэды ехэ баялиг соо умбаа гээшэб, тэды ехэ ядарал зоболон, уйдхар гашуудал тэрээндэ асарагты! Юундэб гэбэл, тэрэ ниислэл иигэжэ досоогоо һанаа: «Би хатан шэнги һайн һуунаб, би бэлбэһэн эхэнэр бэшэб, уйдхар гашуудалые үзэхэгүйб!» ⁸ Тиимэһээ али бүхы гай аюулнууд: үхэл хосорол, гай гашуудал, үлэсхэлэн зоболон тэрэ эмэдэ гэнтэ буужа ерэхэ даа! Тэрэниие галда шатааха, ушарынь гэбэл, тэрэниие шүүбэрилхэ Эзэн Бурхан угаа хүсэтэй юм. ⁹ Тэрэ ниислэлэй шатахада гараһан гал түймэрэй утаа уняар харахадаа, зальхайралга, баялиг соогуур дураараа хүльбэрэлдэжэ ябаһан газар дайдын хаашуул тэрэ ниислэлые шаналжа уйлаха гашуудаха байна. ¹⁰ Тиин хаашуул холо зогсон тэрээниие хараад, ядарал зоболонһоонь үхэтэрѳѳ айжа, иигэжэ хэлэхэ юм: Аргагүй хүсэтэй, агуу ниислэл Вавилон, аймшагтай ехэ гашуудал зоболон шамда тудаба – зарга шүүбэридэ шаамайе үгэжэ хэһээхэ саг гэб гэнтэ ерэбэ! ¹¹ Наймаашад хонжоошодшье тэрэ хотые шаналан уйлана, гашуудан зобоно, ушарынь гэбэл, тэдэнэй эд бараае хэншье худалдажа абахагүй. ¹² Тэдэнэй обоо собоо алта, мүнгые, үнэтэ шулуунуудые, һубад һубһые, нарин улһые, шад улаан бүдѳѳр, дардам торгоор, үнэтэй улаабтар бүдѳѳр оёһон хубсаһыень, хоншуухан үнэртэй модонуудые, заанай яһаар хэһэн бүтээлнүүдые, үнэтэ модоор, гуули, түмэрѳѳр, гантиг шулуугаар хэһэн амһартануудыень ондоо хэншье саашадаа абахагүйл. ¹³ Эдеэ амтатай болгодог зүйлнүүдыень, һайхан үнэртэй ургамалай шүүһыень, хүжэ санзайень, либанон гэдэг уталгыень, архи дарһыень, оливай тоһыень, хурабшаадхан сагаан гурилыень, шэниисэ таряаень, үхэр, хони, моринуудыень, ута тэргэнүүдыень, барлагуудыень, сэрэгэй плендэ абтаһан хүнүүдыень ондоо хэншье саашадаа абахагүйл. ¹⁴ Шинии сэдьхэн шунажа байдаг юумэнүүдшни үгы болошобо, шинии бүхы алдар соло, үнэтэ баялигшни хосорон һалаа. Ондоо тэдэшни хэзээш бусажа ерэхэгүй! ¹⁵ Эдэ бүхы эд бараануудые худалдажа, тэһэ баяжаһан наймаашад тэрэ ниислэлые холоһоо хараад, ядарал зоболонһоонь үхэтэрѳѳ айһандаа, уйлан, гэгэн, ¹⁶ иигэжэ хэлэхэ юм: Нарин гэгшын улһаар, алта мүнгѳѳр, үнгэтэ шулуу, һубадаар толоржо байһан үнэтэй сэнтэй улаан бүд хубсаһа үмдэһэн агуу ниислэл, шамда гашуудал зоболон тудаба! ¹⁷ Тиимэ ехэ баялиг зѳѳри гэб гэнтэ һалашабал! Тиин бүхы капитанууд, уһан далайгаар тамарагшад, морягууд, далайн албанда ябажа, амидарагша бүхы хүнүүд холо зогсоод, ¹⁸ ниислэл хотын шатаха дүрэхэдэ гараһан утаа уняарые харахадаа, орилон шашхан, иигэжэ хэлэхэ: «Агуу ниислэлтэй жэшэмээр хото байха гү? ¹⁹ Тиин тэдэ зон тархи дээрээ үнэһэ адхан, уйлалдан гэгэлдэн иигэжэ хашхаралдаха: Агуу ниислэл, шамда айхабтар ехэ гашуудал зоболон тудаба! Далайда онгосотой байһан хүнүүд ниислэл хотын баялигаар тэһэ баяжаа. Харин тэрэ хото гэб гэнтэ хооһон сүл губи болошоо! ²⁰ Огторгой тэнгэри, Бурханай хүнүүд, элшэд, лүндэншэд, энээндэ хүхин баясыт! Таанарай түлѳѳ тэрэ ниислэлые Бурхан хэһээгээл! ²¹ Удаань баатар ехэ хүсэтэй эльгээмэл тээрмын шулуунай зэргын томо гэгшын шулуу үргэжэ, далай руу шэдэхэ зуураа, иигэжэ үгүүлбэ: Агуу ниислэл Вавилониие иимэл хүсэтэйгѳѳр холо шэдэжэ хаяхань! Энэ ниислэл саашадаа оршохоёо болёо! ²² Хүгжэмэй дуугархань дахин дуулдахагүй, ятага, жэмбүүршэдэйшье, бүреэ дуугаргагшадайшье хүгжэм дуун дахин дуулдахагүй. Гар дархашуулшье, урлалгын ажалшье саашадаа эндэ хэхэгүй. Тээрмын шулуунай эрьелдэн түерхые ондоо хэншье дуулахагүй. ²³ Дэнгэй гэрэлые хотодо ондоо хэншье харахагүй. Гэрлэхэеэ байгаа хүбүүн басаган хоёрой хѳѳрэлдэжэ зугаалхые ондоо хэншье дуулахагүй. Юундэб гэбэл, шинии наймаашад газар дэлхэйн амбан һайдууд байгаа, шинии үйлэдэн хэдэг байһан эльбэ жадханууд али бүхы арад зониие мэхэлээ. ²⁴ Бурханай хүнүүдэй, лүндэншэдэй, газар дэлхэйдэ амидаржа ябахадаа алуулһан зоной шуһа адхарһанда энэ хото зэмэтэй!

¹ Тэрэнэй удаа аргагүй олоороо хүнүүдэй суглараад, дүүелдэн шууялдан байһан шэнгеэр иигэжэ хашхаралдаха абяан намда тэнгэри дээрэһээ дуулдаба: Бурханда магтаал соло! Манай Бурханда абарал, алдар соло, хүсэ шадал байна! ² Ушарынь хэлэбэл, тэрэнэй шиидхэбэринүүд үнэн зүб юм: бүхы газар дэлхэйнхидые зальхайруулһанайнь түлѳѳ аргагүй забхай Янхан эмые Бурхан шүүбэрилэн гэмнээ: зарасанарайнь шуһа адхаруулһанайнь түлѳѳ Янхан эмые Бурхан хэһээгээ! ³ Тиин тэдэ дахин ооглон хашхаралдаа: Бурханда магтаал соло! Янхан эмые шатаахада гараһан утаан хэтын хэтэдэ дэгдэжэ байна! ⁴ Хорин дүрбэн ахамадууд, дүрбэн амитад ерэжэ, хаан шэрээдээ һууһан Бурханай урда һунан унаад, һүгэдэн мүргэхэ зуураа: Болтогой! Бурханда магтаал соло! – гэжэ хэлэбэд. ⁵ Хаан шэрээгэй зүгһѳѳ иигэжэ хэлэхэ абяан дуулдаба: Бурханай бүхы зарасанар, Бурханиие хүндэлдэг бүхы хүнүүд, юрыншье хүнүүд, засаг баридагшье хүнүүд, манай Бурханиие магтан һайшаагыт! ⁶ Аргагүй олоороо хүнүүдэй суглараад дүүелдэжэ байһан шэнги гү, али уһан хүүюурэй шууяжа, шангаар тэнгэри дуугаржа байһан шэнги иимэ абяан намда дуулдаба: Бурханда магтаал соло! Хамагые зонхилогшо Бурхамнай, Дээдын Эзэн засаг түрѳѳ абаба! ⁷ Бидэ баярлахабди, хүхихэбди, тэрэниие магтан, алдар сууень дуудахабди, ушарынь хадаа Үргэлэй Хурьганай түрэ болохонь! Хадамда ошохо басаганиинь бэлэн болоод, тэрэнээ хүлеэжэ байна: ⁸ Басагандань нарин улһаар оёһон ялагар, сэбэр хубсаһан үгтэнхэй. Нарин улһан гээшэнь Бурханай арад зоной үнэн зүб үйлэ хэрэг гэһэн удхатай. ⁹ Удаань намда Бурханай Эльгээмэл иигэжэ хэлэбэ: «Буулгажа бэшээд аба! Үргэлэй Хурьганай түрэ найрта урилга абагшад жаргалтай! Энэ Бурханай хэлэһэн ёһотойл үнэн зүб үгэнүүд гээшэ!» ¹⁰ Би газарта һунан хэбтэжэ, хүлдэнь мүргѳѳб. Теэд тэрэ намда хэлэбэ: «Иимэ юумэ бү хээрэй, мэдэжэ бай! Би Иисус тухай гэршэлдэг шамтайл адли, шинии аха дүүнэртэл адли зарасань гээшэб! Бурханда һүгэдэн мүргэ! Иисус тухай гэршэлэгшэд лүндэншэдые урмашуулдаг һүлдэтэй юм». ¹¹ Тиин сэлеэтэй байһан тэнгэри харабаб – тэндэ сагаан морин байба, тэрэниие хүн унаад һууба. Мори унаашань Үнэн зүб, Сэхэ шударгы гэжэ нэрэтэй юм. Тэрэ һуугаашань зарга шүүбэриие, дайн сэрэгые үнэн зүбѳѳр хэгшэ юм. ¹² Тэрэнэй нюдэнүүдынь гал дүлэн шэнги ялалзана, толгой дээрэнь олон тоото титимүүд байна. Бэе дээрэнь нэрэнь бэшээтэй, тэрэнииень ѳѳрһѳѳнь бэшэ хэншье мэдэнэгүй. ¹³ Шуһан соо шиихажа норгоһон суба нэмэрэнхэй; тэрэнэй нэрэнь – Бурханай Үгэ юм. ¹⁴ Тэнгэри дээрэхи сэрэгшэд сагаан моринуудые унаад, нарин сагаан улһаар оёһон сэбэрхэн хубсаһа үмдѳѳд, хойноһоонь дахажа ябанад. ¹⁵ Арадуудые илан дарахын тула амандаа хурса һэлмэтэй; тэрэнь бүхы арадуудые түмэр таягаараа ударидан зонхилжо байха. Тэрэ Хамагые зонхилогшо Бурханай ехэ уур сухалай томо тогоон соо үзэмэй жэмэсые низа тэһэ дэбһэнэ. ¹⁶ Тэрэнэй суба дээрэ, гуя дээрэ иигэжэ бэшээтэй: хаашуулай Хаан, эзэдүүдэй Дээдын Эзэн. ¹⁷ Нара дээрэ зогсожо байһан эльгээмэлые би харааб. Огторгой доохонуур ниидэжэ ябаһан бүхы шубуудта хандан, тэрэ эльгээмэл иигэжэ шангаар хашхаржа байба: «Бурханай ехэ эдеэ хоол барихаяа эндэ сугларагты! ¹⁸ Хаашуулай, сэрэгэй дарганарай, хүсэ ехэтэ хүнүүдэй мяха, моринуудай, тэдэниие унаад ябагшадай мяха, сүлѳѳ ажалтанай, барлаг богоолнуудай мяха, багашуул, ехэшүүлэй мяха эдихэт». ¹⁹ Сагаан мори унаад ябагшын, тэрэнэй сэрэгшэдэй урдаһаа тэмсэн дайлалдахаяа арьяатанай, газар дэлхэйн хаашуулай, тэдэнэй сэрэгүүдэй суглараад байхые би харааб. ²⁰ Арьяатаниие шүүрэн бариба, тэрээнэй урда элдэб дүлгэ тэмдэг харуулжа, арьяатанай тамга табяад, тэрэнэй хүрэг дүрсэдэ һүгэдэн мүргүүлжэ байһан хуурмаг лүндэншые арьяатантай хамта шүүрэн бариба. Тэдэ хоёрые хоюулыень дүрэжэ байһан хүхэртэй нуур худар амидыгаар шэдэбэ. ²¹ Бэшэниинь сагаан мори унаад ябагшын аман соохи һэлмээр сабшуулжа алуулһан байна. Тэдэнэй мяхые бүхы шубуу шонхорнууд эдижэ садаба.

¹ Тэнгэриһээ буужа ябаһан эльгээмэлые харабаб. Оёоргүй гүнзэгы нүхэнэй түлхюур тэрээндэ байгаа. Гартаа аргагүй томо гэнжэ баринхай. ² Ехэ үнинэй могой, шолмос, сатана байһан лууе Бурханай Эльгээмэл барижа ерээд, мянган жэлдэ мултархагүй бүхѳѳр гэнжэлэн хүлижэрхибэ. ³ Тэрэ лууе Бурханай Эльгээмэл оёоргүй гүнзэгы нүхэ руу шэдэжэ хаагаад, нүхыень тамгалжархиба. Мянган жэлэй дууһатар тэрэ луу арадуудые саашадаа мэхэлхэ аргагүй болоһон байна. Тэрэ болзоройнь үнгэрхэдэ, луу ойро зуурахана сүлѳѳлэгдэхэ юм. ⁴ Зарга шүүбэри хэхэ эрхэтэй хүнүүдэй һууһан хаан шэрээнүүдые харабаб, мүн Иисус тухай, Бурханай Үгэ тухай гэршэлһэнэйнгээ түлѳѳ толгойгоо таһа сабшуулаашадай һүнэһэнүүдые, арьяатанда, тэрэнэй хүрэг дүрсэдэ һүгэдэн мүргѳѳгүйшүүлэй, духадаа гү, али гартаа тэрэ арьяатанай тамга табюулаагүйшүүлэй һүнэһэнүүдые би харабаб. Тэдэнэр дахин амидыруулагдажа, мянган жэл соо Иисустай хамта засаг түрэ барижа байгаа. ⁵ Бусад үхѳѳшэдынь мянган жэлэй үнгэртэр һѳѳргѳѳ амидыруулагдаагүй һэн. Энэ анха түрүүшын амидыралга мүн байгаа. ⁶ Түрүүшын амидыруулгын үедэ дахин амидырагдаха хүнүүд жаргалтай. Тэдэнэр Бурханай хүнүүд мүн. Тэдэнэр хоёрдохиёо үхэхэгүй юм. Тэдэнэр Бурханай, Христосой санаартадынь болохо, мянган жэлэй туршада Иисустай хамта засаг түрэ барижа байха. ⁷ Мянган жэлэй үнгэрхэдэ сатана түрмэһѳѳ табигдаха байна. ⁸ Тиигээд сатана арадуудые мэхэлхэеэ ошохо, дайн сэрэг үүдхэхын тула дэлхэйн бүхы дүрбэн зүгүүдээр ябаха, гога, магого гэжэ арадуудта ошохо. Далайн эрьеын элһэ хайр мэтэ үй түмэн хүнүүдые сатана гулидхан суглуулха байна. ⁹ Тэдэнэр бүхы газар дайдые алхалан гаража, Бурханай зоной байрлаһан газарые, тэрэ зоной эгээн дуратай хотые хүреэлхэ. Теэд тэрэ үедэнь тэнгэри дээрэһээ гал буужа ерээд, бултыень шатаажархиха юм. ¹⁰ Тэдэ зониие мэхэлэгшэ Шолмос дүрэжэ байһан дүүрэн хүхэртэй нуур худар хаюулаа һэн. Түрүүн тэрэ нуур руу арьяатан, хуурмаг лүндэншэ хоёр шэдүүлһэн байна. Тэдэниие хэтын хэтэдэ, үдэр һүнигүй тэндэ зобоожо туляажа байха юм. ¹¹ Тиигээд би сагаан үнгэтэй асари томо хаан шэрээе, тэрэ шэрээ дээрэ Һуугшые харабаб. Шэрээдэ Һуугшын байһан ушарһаа газар тэнгэри хоёр тэрьелэн далда орошобо: тэрэ хоёрой һууха һуури байгаагүй. ¹² Үхѳѳшэдые, багашуулые, ехэшүүлые хаан шэрээгэй урда зогсожо байхыень би харабаб. Номууд нээлгээтэй байба. Удаань баһа нэгэ ном – ажамидаралгын ном дэлгэгдэбэ. Үхѳѳшэд тэдэнэй ѳѳһэдынь үйлэ хэрэгэй ёһоор, мүн номуудта бэшээтэй байһан ёһоор шиидхүүлээ бэлэй. ¹³ Бии байһан үхѳѳшэдѳѳ далай үгѳѳ, бии байһан үхѳѳшэдѳѳ үхэл, үхэлэй орон хоёр үгѳѳ, тиин үхѳѳшэн бүхэниие тэрэнэй хэһэн үйлэ хэрэгэйнь хэмжээгээр шиидхээ. ¹⁴ Удаань үхэл, үхэлэй орон хоёрые гал дүлэтэ нуур руу хаяһан байна. Энэнь хоёрдохи үхэл – гал дүлэтэ нуур мүн байһан юм. ¹⁵ Амидаралгын ном соо бэшэгдээгүйшүүлые гал дүлэтэ нуур худар шэдээ һэн.

¹ Тиигээд би шэнэ тэнгэри, шэнэ газар хоёрые харабаб. Түрүүшын тэнгэри, түрүүшын газар хоёр хэтэ заяанда үгы болоо, далайшье хосороо бшуу. ² Нангин Хотые – шэнэ Иерусалимые би харааб. Хадамда гарахаяа нүхэр хүбүүгээ хүлеэжэ байһан шэнэ Иерусалим гоёнхой юумэ тэнгэриһээ, Бурханһаа буужа ябаба. ³ Хаан шэрээгэй тэндэһээ шангаар иигэжэ хэлэхые дуулабаб: «Харалши, энэ Бурханай майхан гээшэ. Хүнүүдшье тэрэ майханда байна, Бурхан хододоо тэдэнтэй байха! Тэдэ хүнүүд тэрэнэй арад зониинь болохо, Бурхан ѳѳрѳѳшье тэдэ хүнүүдтэй хамта ажаһууха, тэдэнэй Бурханиинь болохо. ⁴ Бурхан тэдэ хүнүүдэй нюдэнһѳѳ гараһан дуһал нулимса бүхэниие аршаха. Үхэлгэ хосоролгошье саашадаа байхагүй, уйдхар гашуудал, орилолдоон бархиралдаан, үбдэлгэ хабдалгашье саашадаа байхагүй, ушарынь гэбэл, урданай бүхы юумэн урдажа ошоо». ⁵ Хаан шэрээдэ Һуугша иигэжэ хэлээ: «Харалши, би баран шэнэ юумэ хэнэб!» Тиигээд тэрэ иигэжэ хэлэбэ: «Буулгажа бэшээд аба, эдэ үгэнүүдтэ этигэхэдэ болохо, юундэб гэбэл, эдэ бүхы үгэнүүд үнэн зүб юм». ⁶ Намда тэрэ хэлэбэ: – Бүтэбэ! Би Альфа, Омега гээшэб, Түрүүшынхинь, Һүүлшынхинь гээшэб. Ундаа хүрэһэн хүндэ амидаралгын булагай уһанһаа миинтэ уулгахаб. ⁷ Илагша бүхы эдэ юумэнүүдые намһаа абаха. Би тэрэнэй Бурханиинь болохоб, тэрэ минии хүбүүмни болохо. ⁸ Аймхай дүүлэгэрнүүд, Иисуста һүзэглэдэггүй хүнүүд, бузар муухай нүгэл хэгшэд, алууршад дээрмэшэд, зальхай ябадалтан, эльбэ хэгшэд, онгондо шүтэгшэд, элдэб худалшад гал, хүхэрѳѳр дүлэтэн носогшо нуур руу хаюулха. Энэнь хоёрдохи үхэлгэ мүн. ⁹ Удаань гай аюулай һүүлшын долоон дүүрэн аягатай долоон эльгээмэлэй нэгэниинь ерэжэ, намтай хѳѳрэлдэбэ: «Харалши даа, би шамда бэриеэ – Үргэлэй Хурьганай һамгые үзүүлхэб!» – гэбэ. ¹⁰ Тиин Нангин Һүлдѳѳр намайе аргагүй үндэр хада дээрэ абаашаад, тэнгэри дээрэһээ Бурханһаа доошоо буужа ябаһан Арюун нангин Иерусалим хотые намда харуулба. ¹¹ Тэрэ хотонь Бурханай алдар солоор толорон гэрэлтэжэ байба. Тэрэ гэрэл туяань болор мэтын сэбэр тунгалаг хас шулуун шэнги үнэтэй шухаг шулуунуудтал адляар ялалзажа байгаа бэлэй. ¹² Иерусалим хотые тойроод арбан хоёр хаалгатай үндэр гэгшын хананууд байба. Хаалгануудайнь хажууда – арбан хоёр эльгээмэлнүүд, хаалганууд дээрэнь Израилиин арбан хоёр угсаатанай нэрэнүүд бэшээтэй. ¹³ Гурбан хаалгань зүүн тээшээ, гурбаниинь – хойшоо, гурбаниинь – урагшаа, гурбаниинь – баруун тээшээ харанхай. ¹⁴ Хотын хана арбан хоёр шулуутай һуури дээрэ табяатай, тэдэнэй дээгүүр Бурханай Хурьганай арбан хоёр элшэдэй нэрэнүүд бэшээтэй. ¹⁵ Намтай хѳѳрэлдэһэн эльгээмэл хотые, тэрэнэй хаалгануудые, ханануудые хэмжэхын тула алтан таяг баряад ябаа. ¹⁶ Тэрэ хото болбол ута үргэнѳѳрѳѳ адли, тэбхэрхэн хэмжээнэй байгаа һэн. Эльгээмэлэй ѳѳрынгѳѳ таягаар хото хэмжэхэдэнь, утаашаа хоёр мянга дүрбэн зуун модо байба, үргэниинь, үндэрынь утатайгаа адли байба. ¹⁷ Эльгээмэлэй хотын хана хэмжэхэдэнь, үндэрынь жаран зургаан метр байба. Эльгээмэл хүнэй хэмжэдэг хэмжүүрые хэрэглээ һэн. ¹⁸ Ханань хас шулуугаар, харин хотонь нэбтэ харагдадаг шэл шэнги сэбэр алтаар баригданхай байгаа. ¹⁹ Хотын ханын һууринуудынь элдэб янзын эрдэни шулуунуудаар хэгдэһэн: нэгэ һууринь хас шулуугаар, хоёрдохи һууринь – миндарга шулуугаар, гурбадахинь – халтар манаар, дүрбэдэхинь – номин шулуугаар хэгдэһэн байба. ²⁰ Табадахи һууринь – сардониксаар, зургаадахинь – мана шулуугаар, долоодохинь – хризолидаар, наймадахинь – бериллээр, юһэдэхинь – бэгтэ болор шулуугаар, арбадахинь – хризопразаар, арбан нэгэдэхинь – оюун шулуугаар, арбан хоёрдохинь – аметистээр хэгдэһэн байба. ²¹ Арбан хоёр хаалгануудынь арбан хоёр һубадаар, хаалга болгониинь үргэлжэ хүжэ һубадаар хэгдээтэй. Хотын гол гудамжань шэл шэнги нэбтэ харагдажа байдаг сула алтаар хэгдэнхэй. ²² Хото соо Һүмэ би хараагүйб. Тэрэнэй Һүмэнь – Хамагые зонхилогшо Эзэн Бурхан ѳѳрѳѳ, мүн Үргэлэй Хурьган ха юм. ²³ Хотын һаруул гэрэлтэй байхын тула нара, һарашье хэрэггүй байгаа, юундэб гэбэл, Бурханай алдар солонь хотые гэрэлтүүлээ ха юм. Хурьган тэрэнэй дэнгынь мүн. ²⁴ Арадууд тэрэ хотын гэрэл туяа соо ябаха, газар дэлхэйн хаашуул ѳѳһэдынгѳѳ баялиг зѳѳриие тэрээндэ асаржа үгэхэ. ²⁵ Хотын хаалганууд бүхэли үдэртѳѳ суургалагдангүй, нээлгэтэй байха, ушарынь гэбэл, тэндэ һүни болохогүй бшуу. ²⁶ Арадуудай нэрэ солые, баялиг зѳѳриие тэрэ хотодо асарха. ²⁷ Бузарлагдаһан ямаршье юумэн тэрэ хотодо орохогүй, гутамшаг муухай юумэ хэгшэд, мэхэ гохо гаргагшад тэрэ хотодо орохогүй. Үргэлэй Хурьганай амидаралгын ном дэбтэртэ нэрээ бэшүүлһэн хүнүүд лэ тиишэ оруулагдаха.

¹ Болор мэтэ ялалзаһан амидаралгын уһанай гол мүрэниие удаань намда эльгээмэл харуулаа. Тэрэ гол мүрэн Бурханай болон Үргэлэй Хурьганай хаан шэрээгэй дороһоо урдан гарадаг. ² Тиигээд эгээн ехэ гудамжынь дундуур урдагша юм. Мүрэнэй хоёр эрьеэрнь амидаралгын модон ургадаг, тэрэ модон һара бүри ургаса үгэхэ зуураа, жэлдээ арбан хоёр дахин үрэ жэмэс асардаг, тэрэ модоной набшаһануудынь арадуудые аргалжа эдэгээхэдэ туһалдаг. ³ Бурханай хараалда хүрэмѳѳр муу юумэн тэндэ хэзээдэшье болохогүй. Бурханай ба Үргэлэй Хурьганай хаан шэрээ тэрэ хотодо байха. Бурханай зарасанар тэрээндэ алба хэхэ байна. ⁴ Зарасанарынь тэрэнэй нюурые хараха, тэрэнэй нэрэнь тэдэнэй магнайда байха. ⁵ Тэндэнь дахин һүни болохогүй, тэдэндэ дэнгэйшье гэрэл, наранайшье туяа ондоо хэрэггүй, юуб гэбэл, тэдэниие Эзэн Бурхан гэрэлтүүлхэ байна. Тиин тэдэнэр хэтын хэтэдэ хаан түрэ засаг барижа байха юм. ⁶ Бурханай Эльгээмэл намда иигэжэ хэлээ: «Эдэ үгэнүүдтэ этигэхэдэ болохо, юундэб гэбэл, эдэ үгэнүүд үнэн зүб юм. Лүндэншэдтэ ѳѳрынгѳѳ һүлдые үгэгшэ Эзэн Бурхан һаяар ямар юумэнэй болохые ѳѳрынгѳѳ зарасанарта харуулхынь тула эльгээмэлээ ябуулһан байна. ⁷ Иигээд лэ би һаяар ерэхэб! Энэ номой уридшалан хэлэһые сахин бэелүүлэгшэ жаргалтайл!» ⁸ Би, Иоанн энээниие дуулааб, харааб. Энэниие дуулаад, хараад байхадаа, эдэ бүгэдые намда харуулһан эльгээмэлэй хүлдэнь унажа, һүгэдэн мүргѳѳб. ⁹ Теэд эльгээмэл намда иигэжэ хэлээ: «Боли даа, иимэ юумэ бү хэ! Би шам шэнгил, шинии лүндэншэд – аха дүүнэр шэнгил, энэ номой үгэнүүдые сахин бэелүүлэгшэдтэйл адли зараса гээшэб. Ши Бурханда һүгэдэн мүргэ!» ¹⁰ Намда тэрэ иигэжэ хэлээ: «Энэ номой уридшалан хэлэһэн үгэнүүдые бү суургалан тамгалаарай! Саг бүри дүтэлѳѳд байна. ¹¹ Муу хүн муу юумэеэ хэжэ үргэлжэлүүлэг! Жэрхэмшэг муухай хүн тэрэл муухай юумэеэ хэг, һайн хүн һайе хэжэл байг, арюун нангин хүн тэрэл зандаа арюун ябаг». ¹² «Иигээд Би һаядаа ерэхэб! Хүн болгониие хэһэн хэрэгэйнь зэргээр шагнаха, хэһээхын тула шагналаа, хэһээлтэеэ ѳѳртѳѳ абажа ябанаб. ¹³ Би Альфа, Омега гээшэб, Түрүүшынхинь, Һүүлшынхинь, Эхиниинь, Эсэсынь гээшэб». ¹⁴ Хубсаһаа сэбэрлэгшэд жаргалтай! Тэдэнэр амидаралгын модондо хүртэлсэхэ эрхэтэй, тэдэнэр хаалгын үүдээр хотодо орохо эрхэтэй. ¹⁵ Теэд нохосууд, эди шэдитэн, зальхай забхай ябадалтан, алуурша этэгээдүүд, онгонуудта шүтэгшэд, худал хуурмаг ябадалда дуратайшуул, тиимэ юумэ хэгшэд – хотын гадаа тээ үлэхэ юм. ¹⁶ Иимэ гэршэлгые таанадта һүзэглэгшэдэй бүлгэмүүдэй дамжуулхынь тула ѳѳрынгѳѳ эльгээмэлые би, Иисус, ябуулһан байнаб. Би Давидай Үндэһэ, Һалааниинь гээшэб. Би үүрэй ялагар одон гээшэб». ¹⁷ Нангин Һүлдэшье, хадамай басаганшье: «Ерэ!»– гэнэд. Шагнажа байгаашашье: «Ерэ!»– гэг. Ундаа ехээр хүрэгшэдшье ерэг! Амидаралгын уһа абаха дуратайшуул ерэжэ, тэрэ уһа миинтэ абаг лэ! ¹⁸ Энэ номой уридшалан хэлэһэн үгэнүүдые шагнагша бүхэндэ иигэжэ дуулганаб: эдэ үгэнүүдтэ ямар нэгэн юумэ хэн нэмэлтэ оруулнаб, энэ ном соо бэшээтэй гай аюулые Бурхан нэмэжэ, бүри ехэ болгохо. ¹⁹ Энэ номой уридшалан хэлэгдэһэн үгэнүүд сооһоо ямар нэгэн юумэ хаһажа хаяа болболынь, тэрэнэй амидаралай модоной үрэ жэмэс эдихэ эрхые, Нангин Хотодо орохо эрхые Бурхан хаһаха юм. Энэ модон ба энэ хото тухай энэ ном соо бэшээтэй. ²⁰ Энээниие гэршэлэн баталагша иигэжэ хэлэнэ: «Тиимэ даа, би һаядаа ерэхэб!» Болтогой, Дээдын Эзэн Иисус, заларжа ерэ! ²¹ Дээдын Эзэн Иисусай үршѳѳл хайрань бултанда хүртэхэ байна!