Еврейнүүдтэ

Еврейнүүдтэ

¹ Урдандаа Бурхан лүндэншэдѳѳр дамжуулжа элдэб аргаар, олон удаа манай үбгэ эсэгэнэртэ үгэ хэлэдэг байгаа. ² Харин һүүлшын эдэ үдэрнүүдтэ тэрэ Хүбүүгээрээ дамжуулан бидэндэ үгэ хэлэжэ байна. Бурхан Хүбүүнэйнгээ ашаар замбуулин дэлхэйе бүтээжэ, бүхы юумые залгамжалхаар тэрэнээл шэлэжэ абаа гээшэ. ³ Бурханай алдарай туяа сасаруулан, Бурханай шанар шэнжэтэй байжа, тэрэ бүхы замбуулин дэлхэйе ѳѳрынгѳѳ үгын хүсѳѳр баридаг. Бүхы хүн түрэлхитэниие нүгэлнүүдһээнь сүлѳѳлэн, огторгой дээрэ һүр жабхаланта Бурханай баруун гарынь болоо. ⁴ Бурханай Хүбүүнэй нэрэ түрэ Эльгээмэлнүүдэй нэрэ түрэһѳѳ аргагүй шухала юм, тиин Хүбүүн ѳѳрѳѳшье Эльгээмэлнүүдһээ холо дээгүүр юм. ⁵ «Ши минии Хүбүүмни гээшэш. Мүнѳѳдэр би шинии Эсэгэшни болооб», – гэжэ Бурхан ѳѳрынгѳѳ Эльгээмэлнүүдэй нэгэндэньшье хэлээ аал? «Би тэрэнэй Эсэгэнь болохоб, тэрэ минии Хүбүүн болохо», – гэжэ Бурхан нэгэшье Эльгээмэл тухай хэлээ аал? ⁶ Тиихэдэ Бурхан ѳѳрынгѳѳ ууган Хүбүүе газар дэлхэй руу эльгээжэ байхадаа: «Бурханай бүхы Эльгээмэлнүүд тэрээндэ мүргэхэнь болтогой», – гэжэ хэлээ бэлэй. ⁷ Харин Эльгээмэлнүүд тухай: «Бурхан ѳѳрынгѳѳ Эльгээмэлнүүдые һалхин болгоно, ѳѳрынгѳѳ зарасанарые галай дүлэн болгоно», – гэжэ Бурхан хэлээ бэлэй. ⁸ Гэхэдэ Хүбүүн тухайгаа Бурхан: «Ай Бурхан, шинии хаан түрэ хэтэдээ оршохо, ши арад зоноо үнэн зүбѳѳр захиржа байхаш. ⁹ Ши үнэн зүбтэ дуратайш, зүгѳѳр ёһо гуримые эбдэхэдэ ехэ дурагүй байдагши. Тиимэһээ Бурхан, шинии Бурхан, шамайе шэлэжэ абаад, нүхэдһѳѳшни дээгүүр табиба, тиихэдэнь ши ехэл баяртай байбаш», – гэжэ хэлээ бэлэй. ¹⁰ Тэрэ үшѳѳ иигэжэ хэлээ юм: «Ши, Дээдын Эзэн, анха түрүүн газар дэлхэйе бүтээгээ бэлэйш. Ѳѳрынгѳѳ гараар огторгой тэнгэриие байгуулааш. ¹¹ Тэдэ бүтээһэн юумэнүүдшни һүнэхэ, харин ши үлэхэш. Тэдэ юумэнүүдшни хубсаһан мэтэ үмхирхэ. ¹² Ши тэдэниие хубсаһандал адли эбхэхэш, хубсаһандал мэтэ һэлгэхэш. Харин ши ѳѳрѳѳ хододоо хэбээрээ байхаш, тиин үдэрнүүдшни дууһахагүй». ¹³ Бурхан ѳѳрынгѳѳ Эльгээмэлнүүдэй нэгэндэньшье: «Шинии дайсадые улан дорошни оруултарни ши эндэ, баруун таладамни һуу», – гэжэ хэлээгүй бэлэй. ¹⁴ Тиихэдээ Бурханай Эльгээмэлнүүд хэд гээшэб? Тэдэ Бурханда алба хэжэ, абарагдаха ёһотой хүнүүдтэ туһалхаар Бурханай эльгээһэн һүлдэнүүд гээшэ.

¹ Тиимэһээ урасхалда абтахагүйн тула бидэ дуулажа абаһан юумэеэ хатуугаар сахижа байха ёһотойбди. ² Манай үбгэ эсэгэнэртэ Эльгээмэлнүүдээр дамжуулан хэлэгдэһэн Бурханай үгэ үнэн зүб байгаа. Тиин тэрэ үгые баримталаагүй, али үгы һаа дуулаагүй хүн хүртэхэ ёһотойл хэһээлтэдэ хүртэдэг байгаа. ³ Тиимэ агууехэ абаралгые тоонгүй, бидэ хэһээлтэһээ яажа зугадаха гээшэбибди? Дээдын Эзэн энэ абаралга тухай анхан ѳѳрѳѳ айладхаа юм. Тэрэниие дуулаһан хүнүүд абаралга болбол үнэн юм гэжэ бидэндэ баталан хэлээ бэлэй. ⁴ Бурхан тэрэ гэршэлгэдэ элдэб янзын гайхамшагта үзэгдэлнүүдые болон дүлгэ тэмдэгүүдые нэмэн харуулжа, ѳѳрынгѳѳ һайн дураар Нангин Һүлдэ хайрлажа байгаа. ⁵ Бидэнэй дурдаһан шэнэ газар дэлхэйе захиржа байхаар Бурхан Эльгээмэлнүүдые табяагүй юм. ⁶ Харин Нангин Бэшэгэй нэгэ газарта: «Хүн гээшэ юун бэ, яагаад тэрэниие ши мартахагүй байнабши? Хүнэй хүбүүн юун бэ, яагаад ши тэрэниие анхарнабши? ⁷ Ойро зуура тэрэниие ши Эльгээмэлнүүдһээ доогуур байлгааш. Тэрээндэ алдар соло, нэрэ түрэ олгоош, бүтээһэн бүхы юумэнэйнгээ захирагшаар табяаш. ⁸ Бүхы юумые тэрэнэй мэдэлдэ үгѳѳш», – гэжэ бэшээтэй байдаг. Бурхан «бүхы юумые тэрэнэй мэдэлдэ үгѳѳ» гэхэдээ, хүнэй мэдэлдэ хамаг юумэ үгѳѳ гэһэн удхатай юм. Тиихэдэ бидэ хүнэй бүхы юумэ мэдэлдээ оруулаад байһыень үшѳѳл харанагүйбди. ⁹ Харин ойро зуура Эльгээмэлнүүдһээ доогуур табигдаад, Бурханай үршѳѳл хайраар бүхы хүнүүдэй түлѳѳ үхэһэн Иисусые бидэ харанабди. Үхэлые дабажа гараад, алдар солодо ба нэрэ түрэдэ тэрэнэй хүртэһые бидэ мүнѳѳ харанабди. ¹⁰ Бурхан бүхы юумэ бүтээгѳѳ, бүхы юумэн тэрэнэй тула оршодог. Тэрэ олон үхибүүдые алдар солодоо хүртѳѳхэ һанаатай байгаа. Тиимэһээ хүнүүдые абаралгада Хүтэлжэ байһан Иисусые Бурхан зоболон дабуулаад, эрхим түгэс болгоо. ¹¹ Арюудхагша ба арюудхагдаһан бүхы хүнүүд нэгэ Эсэгэтэй юм. Тиимэһээ Иисус тэдэниие аха дүүнэрни гэжэ нэрлэхэеэ эшэдэггүй. ¹² Иисус: «Би аха дүүнэртээ шинии хэһэн бүхы юумэн тухай хѳѳрэжэ үгэхэб, тэдэнтэй уулзахадаа би шамайе алдаршуулхаб», – гэжэ Бурханда хэлээ бэлэй. ¹³ Тэрэ үшѳѳ: «Би Бурханда найдажа байхаб», «Бурханай намда даалгаһан үхибүүдтэй би мүнѳѳ эндэ байнаб», – гэжэ хэлээ. ¹⁴ Үхибүүдэй махабад бэе ба шуһанһаа бүридэһэн хадань Иисус ѳѳрѳѳ тэдэнтэйл адли хүн болоо. Үхэлые эрхэ мэдэлдээ абаад байһан шолмосые ѳѳрынгѳѳ үхэлѳѳр һүнѳѳхын тула, ¹⁵ үхэлһѳѳ айжа бүхы наһаараа барлагууд байһан хүнүүдые сүлѳѳлхын тула тэрэ тиимэ юумэ хэһэн байгаа. ¹⁶ Дээдын Эзэн үнэндѳѳ Эльгээмэлнүүдые дэмжэжэ байгаа бэшэ, харин Абраһамай үри һадаһые дэмжэжэ байгаа. ¹⁷ Найдабаритай ба үршѳѳл хайратай Ахамад Санаарта болоод, бүхы хүнүүдэй нүгэлнүүдыень хүлисүүлхын тула Бурханда алба хэжэ байхадаа ѳѳрынгѳѳ аха дүүнэртэй адли болохо ёһотой байгаа юм. ¹⁸ Тэрэ ѳѳрѳѳ туршуулжа, зоболон эдлэһэн юм хадаа мүнѳѳ туршалгада ороһон хүнүүдтэ туһалха аргатай юм.

¹ Бурханай баһал ѳѳртѳѳ дуудаһан арюун нангин аха дүүнэрни! Баримталжа байһан һүзэгэймнай Ахамад Санаарта болгогдон эльгээгдэһэн Иисус тухай һанажа байгты. ² Бурханай гэртэ ажаллажа байхадаа Моисей ямар үнэн сэхэ, шударга байгша һэм, тон тиигэжэл Иисус энэ ажалые хэжэ байхаар шэлэжэ абаһан Бурхандаа үнэн сэхэ байгаа юм. ³ Гэр бариһан хүн гэрһээ үлүү нэрэ түрэдэ хүртэдэг. Тон тиигэжэл Иисусшье Моисейһээ үлүү ехэ алдар солодо хүртэхэ ёһотой юм. ⁴ Бүхы гэрнүүдые ямар нэгэ хүн баряа, харин бүхы юумые Бурхан баряа. ⁵ Моисей Бурханай гэртэ зарасадал адли найдабаритай байхадаа, Бурханай ерээдүйдэ хэлэхэ юумые гэршэлэн хэлэхэ ёһотой байгаа. ⁶ Харин Христос тэрээндэ ороходоо Бурханай гэртэ байһан Хүбүүндэл адли найдабаритай юм. Ѳѳһэдынгѳѳ этигэжэ байһан зориг ба найдабари хадагалжа байбал, бидэ тэрэнэй гэрынь болохобди. ⁷ «Үбгэ эсэгэнэртнай сүл губида ябахадаа Бурханиие туршажа, үймѳѳ татаа һэн. Дүшэн жэл соо Бурханай юу хэжэ байһыень хаража байһаншье һаа, тэдэнэр Бурханиие тэндэ шалгаба, туршаба. Тиимэһээ Бурхан тэдэ зондо сухалаа хүрэжэ: „Тэдэнэр ходо эндүүржэ ябадаг, харгы замаарни ябадаггүй“, – гэжэ хэлэһэн байна. Бурхан уур сухалаа хүрэхэдѳѳ: „Амаруулха гэһэн газартаа тэдэниие хэзээшье оруулхагүйб“, – гэжэ тангариглаһан байна. Тиимэһээ таанад Бурханай дуу дуулахадаа, үбгэ эсэгэнэртэйгэйл адляар зүрюу зан бү гаргагты», – гэжэ Нангин Һүлдэ хэлэнэ. ¹² Аха дүүнэрни, амиды Бурханһаа холодохогүйн тула таанад булта нүгэлгүй, этигэлтэй байхые оролдожо байгты. ¹³ Таанадай хэн нэгэнэй нүгэлѳѳр хорхойтуулагдан дошхорхогүйн тула, Нангин Бэшэгтэ бэшээтэй «мүнѳѳдэр» гэдэг үгын маанадта хандажа байхада, та бэе бэеэ үдэр бүхэндэ урмашуулжа байха ёһотойт. ¹⁴ Хэрбээ бидэ эхилһэн амидаралаа һүүл болоторнь хатуугаар баримталжа байбал, Христосто хабаатай болонобди. ¹⁵ Нангин Бэшэг соо: «Таанад мүнѳѳдэр Бурханай дуу дуулахадаа, Бурханай урдаһаа үймѳѳ татаһан үбгэ эсэгэнэртээл адли зүрюу зан бү гаргагты», – гэжэ хэлэгдэһэн байдаг. ¹⁶ Бурханай дуу дуулаһаншье һаа, урдаһаань үймѳѳ татаһан хүнүүд хэд байгааб? Тэдэнэр булта Моисейн хүтэлбэри доро Египедһээ гараһан хүнүүд байгаа. ¹⁷ Ямар хүнүүдтэ Бурхан дүшэн жэлэй туршада сухалдажа байгааб? Нүгэлдэ унажа, сүл губида үхэһэн хүнүүдтэ бэшэ аал? ¹⁸ «Амаруулха гэһэн орондоо тэдэниие хэзээшье оруулхагүйб», – гэжэ Бурхан тангариглажа байхадаа, хэд тухай хэлэжэ байгааб? Урдаһаань үймѳѳ татаһан хүнүүд тухай хэлэжэ байгаа ха юм. ¹⁹ Этигэл һүзэггүй байһанайнгаа түлѳѳ тэдэ хүнүүдэй Бурханай амаруулха гэһэн орондо орожо шадахагүй байһыень бидэ харабабди.

¹ Тэрэ найдуулһан амаралтадань хүртэнгүй үлэшэхэгүйн тула бидэ булта болгоомжотой байха ёһотойбди. ² Сүл губяар ябаһан зондол тон адли бидэ Һайн Мэдээсэл дуулажа абаһан байгаабди. Тэдэнэр Бурханай үгые дуулаһаншье һаа, һайн болоогүй юм. Ушарынь хэлэхэдэ, тэдэ Бурханай үгые шагнажа байхадаа, тэрэ үгыень этигэл һүзэгтэйгээр тогтоожо абаагүй. ³ Харин бидэ, һүзэглэһэн хүнүүд, Бурханай найдуулһан амаралтадань хүртэжэ байнабди. «Уур сухалдаа би тэдэниие амаруулха гэһэн газартаа хэзээшье оруулхагүйб гэжэ тангариглаһан байгааб», – гэжэ тэрэ ѳѳрѳѳ хэлээ. Газар дэлхэйе бүтээхэ сагһаа хойшо тэрэ ажалаа гүйсэдхэһэншье һаа, тиигэжэ хэлэһэн байгаа. ⁴ Нангин Бэшэг соо долоодохи үдэр тухай иигэжэ бэшээтэй: «Хэжэ байгаа ажалаа Бурхан долоодохи үдэртѳѳ дүүргэжэ, хэжэ байгаа бүхы ажалнуудһаа долоодохи үдэртѳѳ Бурхан амарба ха». ⁵ «Тэдэниие амаруулха гэһэн газартаа хэзээшье оруулхагүйб», – гэжэ тэндэ баһа бэшээтэй байдаг. ⁶ Һайн Мэдээсэл түрүүн дуулаһан хүнүүд этигэлгүй байһан хадаа амаралтада хүртээгүй. Тиин тэрэ амаралтада хүртээгүй зон үшѳѳ байна. ⁷ «Мүнѳѳдэр» гэгдэдэг ондоо үдэрые Бурханай шэлэһыень тэрэ харуулна. Нилээд сагай үнгэрһэн хойно тэрэнэй Давидаар дамжуулан хэлэһэниинь Нангин Бэшэг соо үгтэнхэй байдаг: «Таанад мүнѳѳдэр Бурханай дуу дуулахадаа зүрхэ сэдьхэлээрээ бү дошхорогты». ⁸ Хэрбээ Бурханай найдуулһан амаралтые Навинай Иисусай үгэһэн байбал, Бурхан тэрэнэй һүүлдэ ондоо үдэр тухай хэлэхэгүй бэлэй. ⁹ Гэхэтэй сасуу Бурхан ѳѳрынгѳѳ хүнүүдтэ субботын амаралтын үдэрые амалаа юм. ¹⁰ Бурханай найдуулһан амаралтада хүртэһэн хүнүүд ѳѳрынгѳѳ хэрэгүүдһээ амаржа байһан Бурхандал адли баһал хэрэгүүдһээ амаржа байха. ¹¹ Этигэлгүй байһанайнгаа тула унаһан тэдэ хүнүүдтэл адли нэгэмнайшье унангүй, тиимэ амаралтада хүртэхын тула бүхы шадалаараа шармайе. ¹² Бурханай үгэ амиды ба хүсэтэй юм, хоёр талаһаан хурсалуулагдаһан ямаршье эриһээ хурса юм. Тэрэнь һүнэһэ һүлдэ хоёрой уулзалта, бүридэл болон уураг тархи, алишье юумэн хүрэтэр хүрэдэг. Тэрэ зүрхэнэй хүсэлэн ба бодолнуудые шиидхэжэ байдаг. ¹³ Бурханһаа далда, нюуса юумэн гэжэ үгы. Харин бүхы юумэн тэрэнэй харасада элиржэ, нээгдэжэ байдаг. Тиин бидэ булта тэрээндэ ѳѳһэд тухайгаа тоосоо үгэхэ ёһотой гээшэбди. ¹⁴ Бидэ Бурханай дэргэдэ байһан Бурханай Хүбүүн Иисус гэдэг агууехэ Ахамад Санаартатай ха юмди. Тиимэһээ ѳѳһэдынгѳѳ шүтэжэ байгаа һүзэг этигэлые хатуугаар сахижа ябаял. ¹⁵ Манай Ахамад Санаарта бидэнэй ядаруу тулюур байдал тухай һанаагаа зобонгүй ябажа шадахагүй. Тэрэ бидэндэл тон адли бүхы талаһаа туршуулһан байбашье, нэгэшье нүгэл хээгүй юм. ¹⁶ Тиин бидэ зоригжожо, буян хэшэгтэй Бурханай хаан шэрээдэ ойртожо үзэел даа. Бидэ маанадтал туһа болохо хэмжээгээр тэндэ үршѳѳл хайрада хүртэжэ, буян хэшэг олохобди.

¹ Хүнүүдэй дундаһаа шэлэгдэжэ абтаһан ямаршье ахамад санаарта хүнүүдэйл аша туһада Бурханда алба хэхээр табигдадаг. Тэрэ санаарта хүнэй нүгэлые хүлисүүлхэ гэжэ Бурханда тахил тахидаг, үргэл асардаг. ² Тэрэ ѳѳрѳѳ олон дутагдалнуудтай ушарһаа эндүүржэ, алдуу хэжэ байһан хүнүүдые хүлисэдэг юм. ³ Тиимэһээ тиимэ ахамад санаарта гансал хүнэй хэһэн нүгэлнүүдэй түлѳѳ бэшэ, харин ѳѳрынгѳѳ нүгэлнүүдэй түлѳѳ баһал үргэл үргэхэ ёһотой байдаг. ⁴ Хүн ѳѳртѳѳ ахамад санаартын нэрэ хүндые олгодоггүй, харин Аарондол адли Бурханай уряалаар ахамад санаарта болодог. ⁵ Тон тиигэжэл ахамад санаартын нэрэ хүндые Христос ѳѳрѳѳ ѳѳртѳѳ зүүгээгүй, харин «Ши минии Хүбүүн гээшэш. Мүнѳѳдэр би шинии Эсэгэшни болооб» гэһэн Бурхан тэрээндэ ахамад санаартын нэрэ түрые үгѳѳ юм. ⁶ Нангин Бэшэг соо нүгѳѳ газарта Бурхан: «Мелхиседегэй табиһанаар ши хэтын хэтэдэ санаарта болоод байхаш», – гэжэ хэлэнэ. ⁷ Газар дэлхэй дээрэ амидаржа байхадаа, тэрэниие абарха аргатай Бурханда Иисус шангаар хүхирэн, нулимсаа гоожуулан зальбараа, тэрэниие гуйгаа. Иисусай номгон, үнэр шударга байһан хада Бурхан тэрэниие дуулаа һэн. ⁸ Бурханай Хүбүүн байһаншье һаа, зоболонгуудые дабан тэрэ хүнэй үгѳѳр байжа һураа. ⁹ Эрхим түгэс болоходоо, тэрэ үгыень дууладаг бүхы хүнүүдэй мүнхын абаралгын эхиниинь болоо. ¹⁰ Тиигээд Мелхиседегэй заяаһанаар Бурхан тэрэниие ахамад санаарта болгожо табяа юм. ¹¹ Энэ талаар бидэ олон юумэ хэлэхэ байгаабди, гэхэтэй хамта таанадай ойлгосо доройтоһон тула тайлбарилжа үгэхэмнай ехэл бэрхэшээлтэй байна. ¹² Саг хугасаагаар багсаахада таанад багшанар болоод байха байгаат, харин Бурханай Үгын түрүүшын хэшээлнүүдые таанадта дахин дабтаха хэрэгтэй болоод байна. Хатуу хоол барихын орондо таанад һүгѳѳр ундалха болонот. ¹³ Һүгѳѳр тэжээлгэжэ байһан хүн бүхэн үнэн зүбые, буруугай ушарые илгаха туршалгагүй үхибүүн гээшэ. ¹⁴ Хатуу хоол бэеэ хүсэһэн хүнүүдэй эдеэн юм. Тэдэ хүнүүд туршалга дадалгатай хадаа һайн, муу хоёрые илгаха аргатай байдаг.

¹ Христосой һургаалай түрүүшын хэшээлнүүдые хойноо орхижо, урагшаа дабшаял. Хэрэггүй ажалнуудаа орхижо, Бурханда һүзэглэхэ, уһаар арюудхаха болон гараараа адислаха тухай, үхэһэн хүнүүдэй амидырха, хэтын зарга шүүбэри тухай һургаалай һуури дахин табиха хэрэггүй. ³ Бурханай зүбшѳѳбэл, бидэ энэниие бэелүүлхэбди. ⁴ Һүзэг этигэлээ алдаһан хүнүүд яажа дахин гэм хэхэеэ болёод, Бурханда хандахаб? Тэдэнэр нэгэ үедэ Бурханай гэрэл туяада ябаа, тэнгэриин бэлэг абажа, Нангин Һүлдые тогтоожо абаһан байгаа. ⁵ Тэдэнэр ѳѳһэдынгѳѳ туршалгаһаа Бурханай үгэ һайн гэжэ мэдээ, ерээдүйн зуун жэлүүдэй хүсэ шадал мэдэжэ абаа. ⁶ Тиибэшье тэдэнэр һүзэг этигэлээ алдаа. Тэдэниие дахин нүгэлһѳѳнь Бурханда хандуулха аргагүй юм. Юундэб гэхэдэ, тэдэнэр Бурханай Хүбүүе дахин хэрээһэндэ хадажа, тэрэниие хүнүүдэй урда гутааха ха юм. ⁷ Оло дахин орожо байһан бороогой уһаар уһалагдаад, эдлэжэ байгаа эзэдтээ аша туһатай ургаса үгэжэ байһан газар Бурханай үршѳѳлдэ хүртэнэ. ⁸ Харин тиихэдэ хашаг болон буртаг үбһэ ургуулһан газар юундэшье хэрэггүй, Бурханай хараалда арай хүртѳѳгүй, галда шатаагдаха хойшолонтой байдаг. ⁹ Инаг хайрата нүхэдни, маанадай иигэжэ хатуугаар хэлэжэ байһаншье һаа, таанад үлүү һайн нүхэсэлдэ байнат, тиимэһээ абарагдахат гэжэ найданабди. ¹⁰ Бурхан болбол найдабаритай үнэн сэхэ юм. Тэрэ хэһэн хэрэгүүдыетнай, бусад һүзэглэгшэдтэ туһалһан, мүнѳѳшье туһалан, ѳѳртэнь үзүүлһэн хайра дурыетнай мартахагүй. ¹¹ Таанадай найдажа байһан юумэнэй үнэн зүб байхын тулада таанадай хүн бүхэн эсэстэ хүрэтэрѳѳ зүдхэмжэтэй байһай гэжэ хүсэнэбди. ¹² Таанадые залхуурангүй, һүзэг этигэлтэй, тэсэбэритэй байгаад, Бурханай найдуулһан юумые хүлеэжэ абадаг хүнүүдтэл адли байхыетнай хүсэнэбди. ¹³ Бурхан Абраһамые найдуулхадаа, найдуулһанаа бэелүүлхэб гэһэн дашаа тангариг үгэһэн байгаа. Ѳѳрһѳѳнь дээгүүр хүнэй үгы юм хада Бурхан ѳѳрынгѳѳ нэрээр тангариглаһан байгаа. ¹⁴ «Би шамайе үршѳѳл хайрадаа хүртѳѳхэб, олон үри һадаһадые шамда хайрлахаб гэһэн үгѳѳ үгэнэб», – гэжэ Бурхан Абраһамда хэлээ бэлэй. ¹⁵ Абраһам ехэл тэсэбэритэй байжа, Бурханай найдуулһанда хүртэһэн байгаа. ¹⁶ Бидэ тангариглахадаа ѳѳһэдһѳѳ ехэ дээгүүр хүнѳѳр тангаригладагбди, тиин тангариг ямаршье арсалдаа заргалдаае үгы хэдэг юм. ¹⁷ Найдуулһан юумыень абаха ёһотой байһан хүнүүдтэ эрхэ хүсэлѳѳ хубилгахагүй байһанаа элеэр харуулхын тулада Бурхан найдуулгаа тангаригаараа баталһан байгаа. ¹⁸ Бурханай худалаар хэлэжэ болохогүй, хубилдаггүй хоёр юумэн бии юм. Тиимэһээ бидэ урдамнай оршожо байһан найдуулга хатуугаар адхаад, ехэтэ урмашажа, Бурхантай хамтархадаа хоргодохо газар олобобди. ¹⁹ Тэрэ найдалга манай амиин бархагтал мэтэ юм. Тэрэ найдалга аюулгүй, бата, тэнгэриин һүмын хүшэгэй саагуур досоонь ородог юм. ²⁰ Тиихэдэ Иисус бидэнэй аша туһада урдамнай тиишээ ороод, Мелхиседегэй заяаһанаар хэтын хэтэдэ ахамад санаарта болоо бэлэй.

¹ Мелхиседек болбол Салимай хаан, Дээдын Бурханай санаарта байгаа юм. Абраһамай дүрбэн хаашуулые дараад, дайнһаа бусажа ябахадань, Мелхиседек тэрээнтэй ушаржа үршѳѳл хайрадаа хүртѳѳгѳѳ бэлэй. ² Тиин Абраһам байһан юумэнэйгээ арбанай нэгэн хубиие Мелхиседегтэ үгэһэн байгаа. (Мелхиседегэй нэрынь нэгэ удха болбол «үнэн сэдьхэлэй хаан»; тиихэдэ Салимай хаан байһан хадань тэрэнэй нэрэ үшѳѳ «энхэ тайбанай хаан» гэһэн удхатай). ³ Тэрэ эхэ эсэгэгүй, угай бэшэггүй; тэрэнэй түрэһэн гү, али үхэһэн тухай гэршэлгэ байдаггүй. Тэрэ Бурханай Хүбүүндэ тон адли, мүнхэдѳѳ санаарта байха юм. ⁴ Тэрэнэй агууехэ байхые таанар харагты. Манай үбгэ эсэгэ Абраһам дайнда олзолһон бүхы юумэнэйнгээ арбанай нэгэ хубиие тэрээндэ үгэһэн байгаа. ⁵ Санаартадаар табигдаһан Левиин үри һадаһад Хуулиин ёһоор баһал Абраһамай үри һадаһад байһан ѳѳрынгѳѳ аха дүүнэрһээ, Израилиин арад түмэнэй олзын арбанай нэгэ хубиие суглуулха эрхэтэй. ⁶ Мелхиседек болбол Левиин үри һадаһан бэшэшье һаа, Абраһамһаа арбанай нэгэ хубииень абаад, Бурханай найдуулгада хүртэһэн тэрэ Абраһамые үршѳѳл хайрадаа хүртѳѳгѳѳ. ⁷ Үршѳѳлдѳѳ хүртѳѳжэ байһан хүнэй үршѳѳгдэжэ байһан хүнһѳѳ үлүү дээгүүр байһаниинь арсашагүй. ⁸ Эндэ арбанай нэгэ хубиие суглуулжа байдаг санаартад үхэлтэ хүнүүд юм, харин тэндэ арбанай нэгэ хубиие абаһан Мелхиседек амиды гэжэ гэршэлэгдээтэй юм. ⁹ Абраһамай арбанай нэгэ хубиие түлэхэдэ, Левийшье (үри һадаһадынь арбанай нэгэ хубиие суглуулдаг) ѳѳрѳѳ баһал түлѳѳһэ үгэһэн болоно. ¹⁰ Мелхиседегэй Абраһамтай уулзахада Левий үшѳѳ түрѳѳгүй, харин үбгэ эсэгэ Абраһамайнгаа досоонь байгаа гэжэ хэлэхэдэ болоно. ¹¹ Израилиин арадта үгтэһэн Хуулиин ёһоор левидүүд санаартан болоо. Хэрбээ левидүүд түгэс түгэлдэр санаартад байбал, Аароной табиһанаар бэшэ, харин Мелхиседегэй заяаһанаар ондоо санаартын гаража ерэхын хэрэг үгы һэн даа. ¹² Санаарталгын ээлжэлгэ хубилбал, Хуулииншье тогтоолнууд хубилгагдаха ёһотой байдаг. ¹³ Бидэнэй дурдаһан Дээдын Эзэн ондоо обогой хүн байгаа, тиин обогойнь нэгэшье хүн санаартын алба гүйсэдхэдэггүй бэлэй. ¹⁴ Дээдын Эзэн болбол Иудын обогой гэжэ һайн мэдээжэ юм. Санаартад тухай асуудал хүндэхэдѳѳ Моисей энэ обог тухай юушье хэлээгүй һэн. ¹⁵ Мелхиседегтэл адли ондоо санаартын бии болоһониинь эндэһээ бүри элеэр харагдана. ¹⁶ Тэрэ Хуулиин ёһоор гү, али тогтоолоор бэшэ, харин дууһашагүй амидаралай хүсѳѳр санаарта болоо юм. ¹⁷ «Мелхиседегэй заяаһанаар ши хэтын хэтэдэ санаарта байхаш», – гэжэ Нангин Бэшэг соо хэлэгдэнэ. ¹⁸ Хуушан тогтоол бирагүй, аша туһагүй байһан дээрэһээ мүнѳѳ хүсэгүй болгогдонхой. ¹⁹ Моисейн Хуули ямаршье юумые эрхим түгэс болгоогүй. Тиимэһээ маанадай Бурханда ойртохын тула мүнѳѳ бүри һайн найдуулга үгтэнэ. ²⁰ Тиихэдэ үшѳѳ Бурханай тангариг үгтѳѳ. Ондоо хүнүүдэй санаарта болоходо Бурхан тиимэ тангариг үгѳѳгүй һэн. ²¹ Харин Иисус болбол Бурханай тэрээндэ үгэһэн тангаригай ёһоор санаарта болоо юм: «Дээдын Эзэн „Ши хэтын хэтэдэ санаарта байхаш“ гээд тангариглаа юм, тиин хэлэһэн үгѳѳ бусаажа абахагүй». ²² Энэ илгаа Иисусые баһал бүри һайн хэлсээнэй найдабари болгоно. ²³ Ондоошье илгаа байгаа: бусад санаартад үхэдэг ушарһаа ехэ олон байгаа. ²⁴ Харин Иисусай мүнхэ амидаржа байһан хадань тэрэнэй санаартын албан баһа мүнхэ юм. ²⁵ Тиимэһээ зониие үргэлжэ абаржа байха аргатай тэрэ санаарта хэтын хэтэдэ амиды байжа, тэрээгүүр дамжан Бурханда ерэһэн хүнүүдэй түлѳѳ Бурханай урда гуйдаг юм. ²⁶ Үнэндѳѳ Иисус маанадтал хэрэгтэй Ахамад Санаарта юм. Тэрэ болбол арюун нангин; харата хэрэгүүдые үйлэдѳѳгүй, нүгэл шэбэлдэ унаагүй; нүгэлтэ зонһоо илгаруулагдаад, тэнгэридэ дэгдүүлһэн байгаа. ²⁷ Ондоо ахамад санаартадтал адли түрүүн ѳѳрынгѳѳ нүгэлнүүдэй түлѳѳ, һүүлдэнь арад зоной нүгэлнүүдэй түлѳѳ үдэр бүхэн үргэл асарха тэрээндэ хэрэггүй. Тэрэ нэгэтэ, тиихэдэ хэтын хэтэдэ ѳѳрыгѳѳ үргэл болгон үргѳѳ. ²⁸ Моисейн Хуули дутагдалнуудтай хүнүүдые ахамад санаартаар табидаг, харин Хуулиин һүүлдэ үгтэһэн Бурханай тангариг хододоо эрхим түгэс Хүбүүниие ахамад санаартаар табяа юм.

¹ Хэлэжэ байһан юумэнэймнай гол удха: бидэ тэнгэридэ Үндэр дээдэ түрэлтын баруун талада һууһан Ахамад Санаартатайбди. ² Тэрэ болбол хүнүүдэй гараар бариһан бэшэ, харин Дээдын Эзэнэй бодхооһон бодото майханда, хамагай нангин газарта ахамад санаартынгаа үүргэ гүйсэдхэжэ байна. ³ Ямаршье ахамад санаарта Бурханда үргэл асархаар, тахил тахихаар табигдадаг юм, тиин манайшье Ахамад Санаарта үргэхэ юумэтэй байха ёһотой. ⁴ Хэрбээ тэрэмнай газар дэлхэй дээрэ байбал, санаарташье бэшэ байха һэн, юундэб гэхэдэ, газар дэлхэйн санаартад Хуулиин ёһоор лэ үргэлнүүдые асардаг юм. ⁵ Тэдэ санаартад ажалаа хэхэдээ үнэн дээрээ тэнгэриин юумые һажаана, тэнгэриин юумэнэй һүүдэрынь лэ болоно. Тиимэл юумэн Моисейтэй тохёолдоо һэн. Тэрэнэй майханаа татаха гэжэ байхада, Бурхан тэрээндэ: «Хада дээрэ шамда харуулагдаһантайл адляар бүхы юумые хэ», – гэжэ хэлээ бэлэй. ⁶ Үлүү һайн найдуулга дээрэ үндэһэлһэн Бурханай болон тэрэнэй хүнүүдэй хоорондохи Иисусаар дамжаһан хэлсээн хэды ехэ һайн гээшэб. Тон тиигэжэл Иисуста мүнѳѳ тэдэ санаартадта ороходоо бүри эрхим түгэс албан тушаал үгтѳѳ. ⁷ Хэрбээ түрүүшын хэлсээн дутагдалгүй байбал, хоёрдохи хэлсээнэй хэрэг үгы байха һэн даа. ⁸ Зүгѳѳр Бурхан арадаа зэмэлэн, иигэжэ хэлэбэ: «Израилиин арадтай болон Иудын арадтай шэнэ хэлсээн баталха үдэрнүүд ерэжэ байна гээд Дээдын Эзэн хэлэнэ. ⁹ Энэ хэлсээн тэдэнэрэй үбгэ эсэгэнэрые гарһаань хүтэлэн Египедһээ гаргаха гэһэн үдэр тэдэнтэй баталһан хэлсээндэл адли бэшэ байха. Үбгэ эсэгэнэрынь минии хэлсээе сахидаггүй байгаа, тиимэһээ би тэдэниие тоохоёо болёоб. ¹⁰ Тэдэ үдэрнүүдэй һүүлдэ Израилиин арадтай баталха хэлсээн иимэ: хуулинуудаа тэдэнэй һанал бодолдо оруулхаб, зүрхэ сэдьхэлдэнь бэшэхэб. Би тэдэнэй Бурханиинь болохоб, тэдэнэр минии арад болохо гэжэ Дээдын Эзэн хэлэнэ. ¹¹ Тэдэнэй хэнииньшье Дээдын Эзэниие мэдэ гэжэ нүхэдѳѳ гү, али аха дүүнэрээ һургахагүй, юундэб гэхэдэ, тэдэ бултадаа багаһаа агууехэ хүрэтэрѳѳ намайе мэдэжэ байха. ¹² Тэдэнэй нүгэлнүүдые би хүлисэхэб, худал хуурмагыень дахин һануулхагүйб». ¹³ Шэнэ хэлсээн тухай хэлэхэдээ Бурхан түрүүшын хэлсээнэй хуушарһые харуулаа, тиихэдэ хуушаржа ба үмхиржэ байһан юумэн мэнэ гэһээр лэ һүнэн һаладаг.

¹ Түрүүшын хэлсээн мүргэл тухай тогтоолтой, мүргэлѳѳ хэхэ нангин газартай байгаа. ² Майханай нэгэдэхи таһалгые Нангин Газар гэжэ нэрлэдэг бэлэй. Досоонь зула, шэрээ дээрэ Бурханда үргэгдэһэн хилээмэн табяатай һэн. ³ Хоёрдохи хүшэгэй саана Хамагай Нангин Газар байгаа. ⁴ Досоонь алтан шэрээ дээрэ утадаг сан хүжэ, бүхы талаһаан алтаар хушагдаһан Хэлсээнэй абдар, тэрээн соо маннатай алтан домбо, набшалжа байһан Аароной таяг, захяа заабари һиилэгдэнхэй шулуун хабтагайнууд байгаа. ⁵ Абдарай хаабариин, абаралгын газарай дээгүүр тэнгэриин амитад бии һэн. Мүнѳѳ дээрээ энээн тухай тодорхойгоор хэлэһэнэй хэрэггүй. ⁶ Энэ бүхэн ямар ёһо гуримтай байбаб гэбэл, санаартад үдэр бүхэн ѳѳһэдынгѳѳ алба хэхэеэ майханай гадаада таһалгада ородог байгаа, ⁷ харин майханай дотоодо таһалгада жэлдээ нэгэл дахин гансал ахамад санаарта ородог бэлэй. Ахамад санаарта ороходоо ѳѳрынгѳѳ түлѳѳ, арад зоной нүгэл хэжэ байнабди гэжэ мэдэрэнгүй хэжэ байһан нүгэлнүүдэйнь түлѳѳ Бурханда үргэхэ шуһа абажа ородог байгаа. ⁸ Майханай гадаада таһалгын байха үедэ Хамагай Нангин газарта орохо харгы хаалгаатай байнал гэжэ Нангин Һүлдэ элеэр харуулна. ⁹ Энэ болбол мүнѳѳнэй үе сагые зураглаһан бэлгэ тэмдэг болоно. Бурханда үргэгдэжэ байһан үргэл тахилнууд мүргэл хэжэ байһан хүниие гүйсэд абарха аргагүй гэһэн удхатай юм. ¹⁰ Энэнь Бурханай шэнэ тогтоол зарлаха үе саг хүрэтэр эдихэ, ууха, янза бүриин арюудхалга сэбэрлэлгын гадна талын заншалнуудтай холбоотой шухала бэшэ юумэнүүд байгаа. ¹¹ Харин Христос ерээдүйн һайн һайханай Ахамад Санаарта болон ерээ. Тэрэнэй алба хэжэ байһан майхан бүри ехэ, улам һайхан юм, тэрэ майхан хүнүүдэй гараар бүтээгдээгүй, тиимэһээ зохёон бүтээгдэһэн энэ газар дэлхэйн хубинь бэшэ. ¹² Христос майханда нэгэтэ ороходоол Хамагай Нангин газарта хэтын хэтэдэ ороо, тиин тэрэ тэхын гү, али буха буруугай шуһа тахил болгон абажа ороогүй, харин ѳѳрынгѳѳ аминай ба шуһанай сэнгээр нүгэлнүүдыемнай арилгаа. ¹³ Хэрбээ бузарлагдаһан хүнүүд дээрэ тэхын гү, али бухын шуһа, шатааһан үнеэнэй үнэһэ сасахадань, тэрэ хүнүүдэй бузарынь арилгагдадаг юм бол, ¹⁴ Христосой шуһан бузарнуудыень бүрин түгэс арилгадаг юм. Тэрэ мүнхын Һүлдѳѳр дамжуулан ѳѳрыгѳѳ Бурханда үргѳѳ. Тэрэнэй шуһань сэдьхэлыемнай дэмы хэрэгүүдһээ арилгаад, амиды Бурханда алба хэхэ аргатай болгохо. ¹⁵ Бурханай уряалһан хүнүүд Бурханай найдуулһан мүнхын үршѳѳлдэ хүртэхэ. Христос түрүүшын хэлсээнэй хүсэн түгэлдэр байхадань хүнүүдые үйлэдэһэн нүгэлнүүдһээнь сүлѳѳлѳѳд, Шэнэ хэлсээ баталха боломжо олгобо. ¹⁶ Эдэ хүрэнгэ залгамжалхын тула һүүлшын захяа үгтэдэг. Тиимэ һүүлшын захяа байбал, тэрэ захяа орхиһон хүнэй үхэл баталһан гэршэлгэ хэрэгтэй. ¹⁷ Һүүлшын захяа орхиһон хүнэй амиды байбал, тэрэ захяань юуншье бэшэ, харин тэрэ хүнэй үхэһэн лэ хойно һүүлшын захяа хүсэндѳѳ ородог. ¹⁸ Тиимэһээл адхарһан шуһаар баһа түрүүшын хэлсээн баталагдаа. ¹⁹ Моисей түрүүн бүхы арад зондо захяа заабаринуудые Хуулиин ёһоор тайлбарилан айладхаад, тиигээд бухануудай ба тэхэнүүдэй шуһые уһантай худхаад, иссопой мүшэрѳѳр ба улайлгаһан нооһоор тэрэ шуһаараа Хуулиин ном болон бүхы арад зониие сасаба ха. ²⁰ «Энэ шуһан Бурханай танда заяаһан хэлсээе батална», – гэжэ Моисей хэлэбэ. ²¹ Моисей тон тиигэжэл Майханиие болон мүргэлдэ хэрэглэгдэдэг амһартануудые шуһаар сасаһан байгаа. ²² Үнэндѳѳ Хуулиин ёһоор бүхы юумэн шуһаар лэ арюудхагдадаг, тиимэһээ шуһа адхаруулангүй нүгэл сагааруулжа болоогүй һэн. ²³ Тэнгэридэхи юумые дуряаһан юумэнүүд тиигэжэ арюудхагдаха ёһотой байгаа. Тиигэхэдэ бодото тэнгэриин юумэн бүри һайн тахилаар арюудхагдаха ёһотой. ²⁴ Бодото юумые һажаан хүнэй гараар бүтээһэн Нангин Газарта Христос ороогүй юм. Тэрэ мүнѳѳ манай орондо Бурханай урда зогсохын тулада тэнгэридэ ѳѳртэнь ороо юм. ²⁵ Тиихэдэ иудейн ахамад санаартын Хамагай Нангин газарта жэл болгон ондоо амитанай шуһа абаад ородогтол адляар ѳѳрыгѳѳ оло дахин тахил болгожо байхаар Христос тэнгэридэ ороогүй юм. ²⁶ Тиигээгүй һаа, тэрэ газар дэлхэйн зохёон бүтээгдэхэһээ эхилээд оло дахин зобохо бэлэй. Үе сагай эсэстээ хүрэжэ байхада тэрэ ѳѳрыгѳѳ тахил болгон үргѳѳд, нүгэлые усадхахаар нэгэтэл, гэхэдэ хэтын хэтэдэ ерээ юм. ²⁷ Хүн бүхэн нэгэтэ үхѳѳд лэ, удаань зарга шүүбэридэ орохо ёһотой. ²⁸ Тон тиигэжэл Христос олон зоной нүгэлнүүдые хүлисүүлхээр ѳѳрыгѳѳ нэгэтэ үргэл болгон асараа бэлэй. Тэрэ хоёрдохиёо нүгэлнүүдые арилгахаяа бэшэ, харин тэрэниие хүлеэжэ байһан зониие абархаяа ерэхэ.

¹ Иудейн Хуули болбол бодото юумэнүүдэй тон зүб хэбынь бэшэ, харин һайн юумэнүүдэй һүүдэрынь лэ гээшэ. Жэлһээ жэлдэ, хододоо нэгэ адли амитадые тахил болгон үргэжэ, Бурханда ерэжэ байһан хүнүүдые Хуули яажа эрхим һайн болгохоб. ² Хэрбээ Бурханда мүргэл хэжэ байһан хүнүүдэй нүгэлнүүдынь үнэхѳѳрѳѳ хүлисэгдэһэн байгаа һаа, тэдэ хүнүүд нүгэлтэйбди гэжэ ѳѳһэдыгѳѳ тоолохоёо болёод, тахил үргэхэеэ болихо һэн лэ. ³ Бухануудай болон тэхэнүүдэй шуһа хүнүүдэй нүгэлнүүдые хэзээдэшье арилгажа шадахагүй юм. Тиимэһээ тэдэниие жэл бүри үргэл болгожо асардаг. Тиигээд тэдэ тахилнууд хүнүүдтэ нүгэлнүүдыень һануулаад байдаг. ⁵ Тиимэһээ Христос энэ газар дэлхэйдэ ерэхэдээ, Бурханда иигэжэ хэлээ юм: «Ши үргэлнүүдые үргүүлхэ болон тахилнуудые тахюулха дурагүй байнаш. Тиихэдэ намда махабад бэе олгоош. ⁶ Нүгэлнүүдые арилгаха гэжэ үргэлэй шэрээ дээрэ үргэгдэһэн бүтэн бүхэлеэрээ шатаагдаһан амитадые, олон тахилнуудые ши һайшаагаагүйш. ⁷ „Ай, Бурхамни, Хуулида нам тухай юун гэжэ бэшээтэй байнаб, тэрэнииел, шинии эрхэ хүсэлые бэелүүлхэеэ би ерэнэб“ – гэжэ би удаань хэлэбэб». ⁸ «Тахил, үргэлнүүдые, үргэлэй шэрээ дээрэ шатаагдаһан амитадые, нүгэлнүүдээ арилгахын тула тахигдаһан тахилнуудыешье ши абаха дурагүй байгааш, тэдэниие һайшаагаагүйш», – гэжэ тэрэ түрүүн хэлэбэ. Эдэ бүхы тахилнуудые Хуулиин ёһоор үргэдэг байһаншье хадань, тэрэ тиигэжэ хэлээ. ⁹ «Ай, Бурхамни, шинии эрхэ хүсэлые бэелүүлхэеэ би ерэнэб», – гэжэ удаань тэрэ хэлэбэ. Тиихэдээ Бурхан бүхы хуушан тахилнуудые болюулжа, орондонь Христосые тахил болгон табина. ¹⁰ Иисус Христосой Бурханай эрхэ хүсэл бэелүүлэн ѳѳрынгѳѳ махабад бэеые нэгэтэ болон хэтын хэтэдэ үргэл болгон асарһан юм хадань бидэ булта нүгэлнүүдһээн мултаран арюудхагдаһан байнабди. ¹¹ Хэдышье иудейн санаартадай үдэр бүхэн ѳѳрынгѳѳ алба гүйсэдхэн, нэгэ адли юумэеэ оло дахин тахил болгон асардаг байхадань, тэдэ тахилнуудынь нүгэлнүүдые хэзээшье арилгажа шададаггүй. ¹² Христос болбол нүгэлнүүдэй түлѳѳ нэгэ тахил тахяад, хэтын хэтэдэ Бурханай баруун талада һуугаа. ¹³ Тэрэ мүнѳѳ дайсадыень хүлэйнь ула доро Бурханай оруулхыень хүлеэжэ байна. ¹⁴ Нүгэлнүүдээ арилгажа байһан хүнүүдые Христос нэгэ үргэлѳѳрѳѳ хэтын хэтэдэ эрхим түгэс болгоо. ¹⁵ Нангин Һүлдэшье энээн тухай бидэндэ гэршэлэн хэлэнэ: ¹⁶ «Тэрэ үдэрнүүдэй һүүлдэ тэдэнтэй баталагдаха хэлсээн энэ байна: хуулинуудаа тэдэндэ һануулхаб, һанаа сэдьхэлдэнь бэшэхэб гэжэ Дээдын Эзэн хэлэнэ. ¹⁷ Тэдэнэрэй нүгэлнүүдые би хүлисэхэб, харата муухай хэрэгүүдыень дахин һануулхагүйб. ¹⁸ Нүгэлнүүдэй хүлисэгдэһэн хойно тэдэнэй түлѳѳ дахин үргэл хэхэ хэрэггүй юм. ¹⁹ Аха дүүнэрни, Иисусай үхэлэй ашаар бидэ Нангин Газарта орохо дүүрэн эрхэтэйбди. ²⁰ Тэрэ болбол хүшэгэй саагуур – ѳѳрынгѳѳ махабад бэеэр – бидэндэ шэнэ, мүнхын амидаралда хүргэдэг харгы зам нээгээ. ²¹ Бидэ Бурханай гэр хараха агууехэ санаартатайбди. ²² Тиимэһээ үнэн сэдьхэлтэйгээр, дүүрэн һүзэг этигэлтэйгээр, бузар һанал бодолнуудһаан сэбэрлэгдэһэн зүрхэ сэдьхэлтэйгээр, сэбэр уһаар угаагдаһан махабад бэетэйгээр Бурханай ойро ошоёл. ²³ Бурхан найдуулһанаа дүүргэхэ гэжэ этигэлтэй байгаа юм хадаа этигэжэ байһан тэрэ найдуулгаяа бата баримталан ябаял. ²⁴ Хүнүүдэй бэе бэедээ анхарал табижа, бэе бэедээ инаг хайраяа харуулхадань, дэмбэрэлтэй һайхан юумэ хэхэдэнь туһалжа байял. ²⁵ Маанадай зариман суглаагаа хаяжа ошодог заншалтай. Тиигэхэеэ болёод, орондонь Дээдын Эзэнэй ерэхэ Үдэрэй ойртохо туһамынь бэе бэеэ бүри ехээр зоригжуулжа, урмашуулжа байял. ²⁶ Үнэн зүбые мэдэрһэн хойноо бидэнэй зорюута нүгэл шэбэл хэжэ ороболнай нүгэлнүүдые арилгаха тахил дахин бидэндэ байхагүйл. ²⁷ Тиимэһээ зарга шүүбэриин болохые, Бурханда эсэргүүсэһэн хүнүүдые һүнѳѳхэ дошхон галые айжа байгаад хүлеэхэмнай үлэнэ гээшэ. ²⁸ Моисейн Хуули буруушааһан хүн хоёр гурбан хүнэй гэршэлбэл, ямаршье үршѳѳл хайрагүйгѳѳр үхэлѳѳр хэһээгдэдэг. ²⁹ Зүгѳѳр Бурханай Хүбүүндэ зэбүүрхэдэг, ѳѳһэдыень нүгэлнүүдһээнь арилгаһан Бурханай хэлсээнэй шуһые нангин юумэн гэжэ тоодоггүй хүнүүд, үршѳѳл хайрын Һүлдые доромжолдог хүнүүд тэрээнһээ долоон доро хэһээлтэдэ хүртэхэ ёһотой юм! ³⁰ «Би үһѳѳгѳѳ абахаб, би ашыень харюулхаб», баһа «Дээдын Эзэн арад зоноо шүүхэ», – гэжэ хэлэгшые бидэ мэдэнэбди. ³¹ Амиды Бурханай гартань орохонь аймшагтай юм! ³² Таанадтай урдань юунэй тохёолдоһые һанаандаа оруулагты. Бурханай гэрэл туяагай таанадые гэрэлтүүлхэдэ, таанад зоболонгуудые дабан, агууехэ баатаршалга гаргабат. ³³ Таанадые урдань хүнүүд гомдохоодог, доромжолдог бэлэй, тиимэһээ тон тиигэжэ доромжолуулжа байһан хүнүүдые таанад хамгаалхада бэлэн байдаг бэлэйт. ³⁴ Таанад түрмэдэ һууһан хүнүүдэй зоболонгые хубаалсадаг, зѳѳри зѳѳшыетнай буляажа абахадань, баяртай байдаг һэнта, юундэб гэхэдэ, таанад тэнгэридэ хэтэдээ оршодог бүри һайн зѳѳри зѳѳшэтэй байһанаа мэдэжэ байгаат. ³⁵ Зоригоо бү алдагты, тиигэбэл агууехэ шагналда хүртэхэт. ³⁶ Бурханай эрхэ хүсэлые бэелүүлэн, найдуулһан юумыень абаха гэбэл, таанад тэсэбэритэй байха ёһотойт. ³⁷ Үшѳѳ нэгэ хэды болоод, уданшьегүй һаатангүй Заларан ерэгшэ ерэхэл. ³⁸ Үнэн сэдьхэлтэнгүүд этигэл һүзэгѳѳрѳѳ амидаржа байха, хэрбээ хэн нэгэнэй таталзабалнь, би тэрэниие һайшаахагүйб. ³⁹ Бидэ татагалзан хосорогшод бэшэбди. Харин һүзэг этигэлтэй зомди, абарагдахабди.

¹ Һүзэг этигэлтэй байхань найдажа байһан юумэндээ бата һаналтай байха, нюдѳѳрѳѳ харадаггүй юумэнүүдтэ найдажа байха гээшэ. ² Һүзэг этигэлээрээ манай үбгэ эсэгэнэр Бурханай һайшаалда хүртэһэн байна. ³ Һүзэг этигэлээрээ бидэ Бурханай үгѳѳр замбуулин зохёон бүтээгдээ гэжэ мэдэрнэбди, тиимэһээл нюдэндэмнай харагдадаг юумэнүүд харагдадаггүй юумэнүүдһээ бии болоо юм. ⁴ Һүзэг этигэлээрээ Авель Каинһаа үлүү һайн үргэл Бурханда асарһан байгаа. Бурхан ѳѳрѳѳ тэрэнэй үргэлые һайшаажа, һүзэг этигэлээрнь Авелиие үнэн сэдьхэлтэн байна гэжэ һайшаагаа юм. Авелиин үхэһэншье һаа, этигэл һүзэгынь мүнѳѳ хүрэтэр маанадые һургажа байна. ⁵ Һүзэг этигэлэйнгээ ашаар Енох үхэлтэй уулзаагүй. Үнэндѳѳ болбол Бурхан тэрэниие дээшэнь дэгдээгээ, хэншье Енохые оложо шадаагүй юм. Дэгдүүлхынгээ урда тээ Енох Бурханай һайшаалда хүртѳѳ гэжэ Нангин Бэшэгтэ бэшээтэй байдаг. ⁶ Һүзэг этигэлгүй хүнүүдэй хэнииньшье Бурханай һайшаалда хүртэжэ шадахагүй: Бурханда ерэжэ байһан хүн Бурхан бии, тэрэниие бэдэржэ байһан хүнүүдэй ашыень тэрэ харюулха гэжэ һүзэглэжэ байха ёһотой. ⁷ Ерээдүйдэ тохёолдохо уһан галаб тухай хэнэйшье уридшалан мэдээгүй байхада Ной этигэл һүзэгѳѳрѳѳ Бурханһаа һэргылэмжэ абаад, Бурханай үгѳѳр байжа, ѳѳрыгѳѳ болон ѳѳрынгѳѳ гэр бүлые абарха корабль бариһан байна. Эсэстэнь, газар дэлхэйнхид гэмнэгдээд, Ной этигэл һүзэгѳѳрѳѳ Бурханһаа үнэн сэдьхэлдэ хүртэбэ. ⁸ Бурханай үгэхэб гэжэ найдуулһан орон нютаг руу ошо гэжэ Бурханай уряалхада Абраһам этигэл һүзэгѳѳрѳѳ үгыень дуулаһан байна. Хайшаашье ошохо байһанаа мэдэнгүй, тэрэ ѳѳрынгѳѳ орон нютагые орхёо бэлэй. ⁹ Бурханай үгэхэб гэжэ найдуулһан орон нютагта тэрэ баһал Бурханай найдуулгада хүртэһэн Исаак Иаков хоёртойгоо этигэл һүзэгѳѳрѳѳ хариин хүндэл майханууд соо амидардаг һэн. ¹⁰ Бурханай зохёон бодхооһон бата һууритай хотые Абраһам хүлеэжэ байгаа. ¹¹ Абраһамай ехэ наһатай болоод, Саррын үри багагүй байһаншье хада, тэдэнэр этигэл һүзэгѳѳрѳѳ үхибүүтэй болоо. Бурхан найдуулһанаа бэелүүлхэ гэжэ Абраһам ехэ этигэжэ байгаа. ¹² Үхэхын наана болоод байһан ганса Абраһамһаа огторгойн мүшэдтэл адли, далайн эрьеын элһэндэл адли тоогүй олон үри һадаһад түрэһэн байгаа. ¹³ Тэдэ булта этигэл һүзэгтэйгѳѳр наһа бараа. Тэдэнэр Бурханай найдуулһан юумэндэ хүртэнгүй үхэһэншье һаа, тэрэ найдуулгыень холоһоо хаража баясадаг бэлэй, ѳѳһэд тухайгаа бидэ газар дэлхэй дээрэ хариин хүнүүд, ерүүл хүнүүд гээшэбди гэжэ хэлэдэг бэлэй. ¹⁴ Тиигэжэ хэлэдэг хүнүүд ѳѳрынгѳѳ орон нютагые бэдэржэ байнабди гэжэ элеэр харуулна. ¹⁵ Ѳѳһэдынгѳѳ орхижо ошоһон орон нютаг тухай тэдэнэр һанадаг байбал, һѳѳргѳѳ бусажа ерэхэ аргатай байха һэн. ¹⁶ Харин тэдэнэр үлүү һайн, тэнгэриин орон нютагта зорижо байба. Тиимэһээ Бурхан тэдэнэй Бурханби гэхэдээ тэдэнһээ эшэдэггүй: Бурхан тэдэ зондо хото бэлдээд байна. ¹⁷ Бурханай Абраһамые туршахадань, этигэл һүзэгѳѳрѳѳ тэрэ Исаак хүбүүгээ тахил болгон үргѳѳ. Бурхан Абраһамда найдуулга үгѳѳ, тиимэһээ Абраһам ганса хүбүүгээ тахил болгон үргэхэдэ бэлэн байгаа. ¹⁸ «Исаагаар дамжан, ши минии үгэхэб гэһэн үри хүүгэдтэй болохош», – гэжэ Бурхан тэрээндэ хэлэбэ. ¹⁹ Исаагай үхэбэлнь Бурхан тэрэниие амидыруулха аргатай гэжэ Абраһам һанажа байгаа, тиин Абраһам Исаагые үхэлһѳѳ бусаажа абаа гэжэ хэлэхэдэ болохо. ²⁰ Исаак ерээдүйдэ этигэн, Иаков Исав хоёрые үршѳѳлдѳѳ хүртѳѳһэн байгаа. ²¹ Иаков наһа барахынгаа урда тээ этигэл һүзэгтэйгѳѳр Иосифой хүбүүдые бултыень буян хэшэгтээ хүртѳѳгѳѳд, таягаа тулажа байгаад Бурханда мүргэһэн байна. ²² Иосиф наһа баража байхадаа, Израилиин хүбүүдтэ Египедые орхижо ошохыень этигэл һүзэгтэйгѳѳр дурадхаад, шарилыень хаана табихаб гэһэн захяа орхиһон юм. ²³ Этигэл һүзэгтэйгѳѳр Моисейн аба эжынь хүбүүгээ түрэхэһѳѳнь эхилжэ гурбан һара хоргодуулжа байба. Тэдэнэр үхибүүнэйнгээ һайхан байхыень хараад, хаанай захиралтатай зүрилдэхэеэ айгаагүй. ²⁴ Моисей наһаяа хүсэхэдѳѳ, этигэл һүзэгѳѳрѳѳ фараоной басаганай хүбүүн гэжэ нэрлүүлхэеэ арсаба. ²⁵ Тэрэ богони хугасаанда нүгэлтэй амидаралтай байжа аяшаахын орондо Бурханай арадтай зобохонь дээрэ гэжэ тоолобо. ²⁶ Христосой түлѳѳ зобохо гээшэ бүхы Египедэй баялигһаа үлүү ехэ баялиг гэжэ Моисей бодожо байгаа, ушарынь гэхэдэ, тэрэ ерээдүйдэ харюулха шагналаа хаража байгаа бэлэй. ²⁷ Тэрэ этигэл һүзэгѳѳрѳѳ хаанай уур сухалһаа айнгүй, Египедые орхёо һэн. Нюдэндэ харагдадаггүй Бурханиие хаража байһандал тэрэ бата хатуу байгаа һэн. ²⁸ Этигэл һүзэгѳѳрѳѳ тэрэ Паасхын баярые тогтоогоод, үхэлэй Эльгээмэлэй израильшуудай ууган хүбүүдтэнь хүрэнгүй үнгэрхын тула шуһаар үүдээ сасахыень арад зондоо захираа. ²⁹ Этигэл һүзэгѳѳрѳѳ израильшууд Улаан далайе хуурай газар мэтэл гаталба, харин египедэй сэрэгшэдэй тон тиимээр гаталжа туршахадань, уһан хана тэдэниие хушаба. ³⁰ Израильшууд долоон үдэрэй туршада Иерихониие тойрожо ябаад, этигэл һүзэгѳѳрѳѳ ханануудыень унагаагаа. ³¹ Янхан эмэ Раав этигэл һүзэгѳѳрѳѳ израилиин тагнуулшадые һайнаар угтан абаһандаал Бурханай үгые дуулаагүй хүнүүдтэй хамта хосороогүй. ³² Үшѳѳ юун тухай хэлэхэбиб? Гедеон, Барак, Самсон, Иеффай, Давид, Самуил, бусадшье лүндэншэд тухай хѳѳрэхэдэмни саг хүрэхэгүй. ³³ Тэдэнэр этигэл һүзэгѳѳрѳѳ хаан оронуудые дайлан диилэдэг, үнэн зүб юумэ хэдэг, Бурханай найдуулһан юумэндэ хүртэдэг, арсалануудай амыень хаадаг, ³⁴ галзуу гал унтараадаг, жадын эриһээ зайсадаг, һулахан бирагүй байгаад, шадалтай болодог, байлдаанда бүхэ байдаг, хариин сэрэгүүдые дарадаг бэлэй. ³⁵ Эхэнэрнүүдэй этигэл һүзэгэйнь ашаар үхэһэн түрэлхидыень амидыруулдаг байгаа. Нүгѳѳ зариман бүри һайн амидаралда хүртэхын тулада сүлѳѳлэлгэһѳѳ арсан, тамалуулагдан үхэдэг һэн. ³⁶ Зарим хүнүүд доромжолуулаад, сохюулаад, баһа гэнжэндэ хүлюулээд, түрмэдэ һуудаг бэлэй. ³⁷ Нүгѳѳдүүлынь шулуугаар шэдэдэг, хюрѳѳгѳѳр хоёр болгон таһалдаг, жадаар хадхан аладаг бэлэй. Тэдэнэр хониной гү, али ямаанай арһаар бэеэ орёогоод, дуталдан, хашуулан мүрдүүлэн, гомдохуулан тэнэдэг байгаа. ³⁸ Бүхы газар дэлхэйн хүнүүд тэдэнэй хаананьшье хүрэхэгүй! Гэхэдэ тэдэнэр сүл губяар болон хада уулаар тэнэжэ ябаа, агы нүхэнүүдтэ болон жалгануудта амидаржа байгаа. ³⁹ Этигэл һүзэгѳѳрѳѳ тэдэнэр булта Бурханай һайшаалда хүртэһэншье һаа, Бурханай найдуулһан юумэндэ хүртѳѳгүй юм. ⁴⁰ Ушарынь юун бэ гэхэдэ, Бурхан бидэндэ үлүү һайн юумэ түлэблѳѳд байна. Бидэнтэйл хамта тэдэниие эрхим түгэс болгохонь Бурханай зорилго мүн.

¹ Маниие тойроод үүлэндэл мэтэ олон гэршэнэр байна. Тиимэһээ бидэ замдамнай һаатуулжа байһан бүхы юумэнүүдһээ, тиихэдэ бидэниие амарханаар хүлижэрхидэг нүгэлһѳѳ сүлѳѳлэгдэжэ, урдамнай байһан, бидэндэ заяагдаһан замаар ябаял. ² Һүзэг этигэлэймнай эхи татаһан, тэрэнииемнай түгэс түгэлдэр болгоһон Иисусые шэртэжэ байял. Ерээдүйдэ үзэгдэхэ баярай түлѳѳ тэрэ ѳѳрыгѳѳ гутаалгахаяа айнгүй, хэрээһэндэ хадуулжа үхѳѳд, Бурханай баруун талада һуугаа. ³ Нүгэлтэнүүдэй зүгһѳѳ тэрэ аргагүй ехэ зэбүүрхэл үзэжэ, хэды ехэ зоболон дабажа гарааб гэжэ бодожо үзыт. Тиимэһээ таанад урмаа бү хухарагты. ⁴ Нүгэлтэй эсэргүүсэн тэмсэжэ байхадаа, таанад үшѳѳ үхэтэрѳѳ тулалдаагүй ха юмта. ⁵ Бурханай таанадые, ѳѳһэдынгѳѳ хүбүүдые, урмашуулан иигэжэ хэлэһые таанад мартаа аалта? «Хүбүүмни, Эзэн Бурханай шамда юумэ захижа байхадань, анхаралаа хандуулаарай, шамайе шүүмжэлэн элирүүлхэдэнь, урмаа хухарангүй байгаарай». ⁶ Ушарынь гэхэдэ, Эзэн Бурхан ѳѳртэнь хайратай баһан хүнѳѳл хэһээдэг, ѳѳрынгѳѳ хүбүүн гэжэ тоолоһон хүнѳѳл сохидог юм. ⁷ Журамтай болохын тула хэһээхэдэнь тэсэбэритэй байгты, Бурхан таанадые ѳѳрынгѳѳ хүбүүд гэжэ тоолоно ха юм. Эсэгынгээ хэһээлтэдэ ороогүй ямар нэгэн хүбүүн олдохо аал? ⁸ Бүхы үхибүүдтэнь лэ адли хэһээгдээгүй юм һаа, таанад бодото хүбүүдынь бэшэт, тиимэһээ энэ ушарта Бурхан танай хуулита эсэгэ бэшэ гээшэ. ⁹ Газар дэлхэйдэхи эсэгэнэрэйнгээ маанадые хэһээхэдэ бидэ тэдэниие хүндэлдэг һэмди. Тиимэһээ бидэ тэнгэриин Эсэгынгээ мэдэлдэнь бүрин байха ёһотой бэшэ аалди. ¹⁰ Газар дэлхэйдэхи эсэгэнэрнай маанадые газар дэлхэйдэхи ажамидаралаймнай түлѳѳ ѳѳһэдынгѳѳ дураар хэһээдэг байгаа, харин Бурхан бидэнэй аша туһада, арюун нангин юумэндээ хүртѳѳхын тула бидэниие хэһээнэ гээшэ. ¹¹ Хэһээлгэжэ байха үедѳѳ бидэ баярладаггүй, харин уйдадаг зантайбди. Тиин һүүлдэнь тэрэ хэһээлтэ ухаантай болоһон хүнүүдтэ үнэн сэдьхэлтэнэй амидаралай амгалан үрэ дүн асардаг юм. ¹² Эсэһэн гарнуудаа дээшэнь һарбайгты, һуларһан үбдэгүүдээ бэхижүүлэгты. ¹³ Дохолон хүлтнай гэмтэнгүй, бүри эдэгэжэ байхын тулада таанад сэхэ замаар ябажа байгты. ¹⁴ Хүн бүхэнтэй эбтэй эетэй байхые, арюун амидаралтай һуухые оролдожо байг, тиигээгүй хүнүүд Эзэн Бурханиие харахагүй. ¹⁵ Хэн нэгэнэй Бурханай үршѳѳл хайраһаа хаһагдан үлэшэхэгүйень ойлгожо байгты. Хэн нэгэнэй хорото ургамалдал адли гэм хүргэжэ, олон хүнүүдые бузарлажа байхагүйень обёоржо байгты. ¹⁶ Ууган хүбүүнэй эрхые нэгэ бариха хоолоор худалдажархидаг забхай, тиихэдэ Бурханһаа холодоһон Исавтай адли хүн таанадай дунда бү байг. ¹⁷ Тэрэ эсэгынгээ буян хэшэгтэ хүртэхэ хүсэлэнтэй байһаншье һаа, нулимсаа гарган алдуугаа заһаха гэжэ оролдоһоншье һаа, хэһэн алдуугаа заһажа шадаагүй, тиимэһээл эсэгэнь тэрэниие угтажа абаагүй гэжэ таанад мэдэнэт. ¹⁸ Израилиин арадтал адли аһажа байһан галтай Синай хадада, харанхыда, боро хараанда, шуурганда, ¹⁹ бүреэгэй дуугархада, дуунуудай шууяандашье таанад ерээгүйт. Хүнүүд тэрэ дуу дуулахадаа ондоо нэгэшье үгэ хэлэнгүй байхыень гуйжа байгаа, ²⁰ ушарынь ямар бэ гэхэдэ, «Ан амитаншье энэ хадын хаяае гэшхэбэл үхэтэрѳѳ шулуудуулха» гэжэ хэлэхэдэнь, тэдэ хүнүүд тэсэхэ аргагүй байгаа. ²¹ Энэ үзэгдэлэй ехэл һүртэй байһан хадань Моисейшье: «Би айн һүрдэжэ, һалаганажа байнаб», – гэжэ хэлээ бэлэй. ²² Таанад Синай хадада, амиды Бурханай хотодо, тэнгэриин Иерусалимда, үй түмэн Бурханай Эльгээмэлнүүдэй баярай суглаанда ерээт. ²³ Нэрэнүүдынь тэнгэридэ бэшэгдэһэн Бурханай эгээн түрүүшын һүзэглэгшэдэй бүлгэмэй гэшүүдынь болон таанад ерээт. Таанад бүхы хүнүүдэй Зарга шүүгшэ болохо Бурханда, эрхим түгэс болоһон үнэн сэдьхэлтэнүүдэй һүлдэнүүдтэнь ерээт. ²⁴ Таанад Авелиин сасаһан шуһанда ороходоо бүри һайн юумэнүүдые үгэхѳѳр найдуулан Шэнэ Хэлсээе баталһан Иисусай сасагдаһан шуһанда ерээт. ²⁵ Дээдын Эзэнэй хэлэхэдэнь, шагнахагүйбди гэжэ бү арсаарайгты. Тэрэнэй газар дэлхэй дээрэ хэлэхэдэнь, шагнангүй ѳѳрыень буруушааһан хүнүүд хэһээлтэһээ мултараагүй юм. Харин тэнгэриһээ хэлэхэдэнь арсабал, хэһээлтэһээ бүришье мултархагүйбди. ²⁶ Урдань тэрэнэй абяан газар дэлхэйе хүдэлгѳѳ, харин мүнѳѳ тэрэ: «Үшѳѳ дахин би ганса газарые бэшэ, огторгой тэнгэриие хэлбэлзүүлхэб», – гэжэ үгѳѳ үгэһэн байна. ²⁷ Тэрэ хэлэһэниинь зохёон бүтээгдэһэн юумэнүүд сооһоо хубилгаха аргагүй юумэнүүдынь үлэжэ, харин хубилгагдаха юумэнүүдынь һүнэн хосорхо гэһые тайлбарилна. ²⁸ Хубилгаха аргагүй хаан орониие эзэлээд, бидэ баяр баясхалангаар дүүрэн байял. Бурханда хүндэтэйгѳѳр хандан, һүгэдэн, тэрээндэ һайшаагдажа баймаар алба хэжэ байял. ²⁹ Ушарынь гэхэдэ, манай Бурхан үнэхѳѳрѳѳ һүнѳѳдэг гал дүлэн гээшэ.

¹ Христосой һүзэглэгшэдтэл бэе бэедээ хайратай байгты. ² Аяншадые гэртээ угтан оруулхаяа бү мартагты. Тиигэжэ зарим хүнүүд ѳѳһэдѳѳшье мэдэнгүй Бурханай Эльгээмэлнүүдые гэртээ айлшалуулһан байна. ³ Түрмэдэ һууһан хүнүүд тухай тэдэнтэй суг хаагдаһан мэтэл һанажа байгты. Зобожо байһан хүнүүдтэй адли зоболсон, тэдэндэ һанаагаа табижа байгты. ⁴ Гэр бүлэ бүхы талаһаа үнэн сэхэ байг, үбгэн һамган хоёр бэе бэедээ шударга байг. Бурхан забхай ба ташаяаралдадаг зониие гэмнэхэ юм. ⁵ Алта мүнгэндэ шунангүй, бии юумээрээ сэдьхэл дүүрэн байгты. Ушарынь гэхэдэ, «Би шамайе хэзээшье орхихогүйб, би шамайе хэзээшье хаяхагүйб», – гэжэ Бурхан хэлээ. ⁶ Тиимэһээ: «Бурхан минии туһалагша гээшэ, би айхагүйб. Хүн намда юу хэжэ шадахаб?» – гэжэ бидэ зоригтойгоор хэлэхэбди. ⁷ Таанадта Бурханай үгэ хэлэдэг байһан хүтэлэгшэдѳѳ һанагты. Тэдэнэй яажа амидаржа, яажа наһа бараһыень хараад, этигэл һүзэгыень һажаажа ябагты. ⁸ Тэрэ этигэл һүзэгынь болохо Иисус Христос үсэгэлдэр, мүнѳѳдэршье, хэтын хэтэдэ хубилхагүй юм. ⁹ Тиимэһээ элдэб янзын һургаалнуудһаа зайсан, үнэн зүб замаар ябагты. Эдеэ хоол тухай гуримуудые сахихые бү оролдогты, тэдэ гуримууд хүнүүдтэ ямаршье аша туһагүй байгаа, харин Бурханай хайра үршѳѳлѳѳр сэдьхэл зүрхэнтнай бэхижэбэл һайн гээшэ. ¹⁰ Майханда алба хэжэ байһан санаартад үргэлэй шэрээ дээрэһээ манай үргэһэн юумэнһээ абажа эдихэ эрхэгүй юм. ¹¹ Ушарынь юун бэ гэхэдэ, ахамад санаарта амитадай шуһые нүгэлнүүдэй түлѳѳ үргэхэеэ Хамагай Нангин газарта абажа ородог, тиихэдэнь амитадай бэенүүдые отогһоо гаргаад шатаадаг юм. ¹² Тиимэһээ Иисусшье арад зоноо шуһаараа арюудхахын тула хотоһоо гаргуулжа үхэһэн байгаа. ¹³ Бидэшье тэрэниие угтан хотоһоо гаража, доромжолуулгыень хубаалсаял. ¹⁴ Бидэ газар дэлхэй дээрэ хододоо оршодог хотогүйбди, бидэ ерээдүйн хото бэдэржэ байнабди. ¹⁵ Тиимэһээ Иисусаар дамжуулан магтаалай үргэл Бурханда хододоо асаржа байял, тэрэниие Дээдын Эзэн гэжэ зүбшѳѳн үреэлээрээ үргэл асаржа байял. ¹⁶ Һайниие хэжэ, бэе бэедээ туһалхые бү мартагты. Эдэ болбол Бурханда һайшаагдадаг үргэл гээшэ. ¹⁷ Ѳѳһэдынгѳѳ хүтэлэгшэдэй мэдэлдэ байгты, захиралтануудыень дүүргэжэ байгты. Тэдэнэр һүүлдэнь алба хэһэн тухайгаа Бурханай урда тоосоо хэхэ ёһотой юм хадаа танай зүрхэ сэдьхэлдэ үргэлжэ һанаагаа табидаг юм. Хэрбээ таанадай хүтэлэгшэдэйнгѳѳ үгѳѳр байбалтнай, тэдэнэр баяртайгаар ажалаа хэхэ, үгы болбол, тэдэнэр гунигтайгаар үүргэеэ дүүргэжэ байха, тиимэ ажал хэрэгынь таанадта ашаг туһагүй юм. ¹⁸ Үргэлжэ зүб юумые хэхэ гэжэ оролдон, арюун сэдьхэлтэй байнабди гэжэ бидэ ѳѳһэд тухайгаа найданабди. Тиимэһээ бидэнэй түлѳѳ зальбаржал байгты. ¹⁹ Илангаяа, таанадта түргэн бусажа ошохымни түлѳѳ бүри һайса зальбархыетнай гуйнаб. ²⁰ Ѳѳрынгѳѳ шуһанай сэнгээр мүнхын хэлсээе оложо абаһан хонидой агууехэ Адуулагшые, Манай Дээдын Эзэн Иисусые Бурхан амидыруулаа юм. Энхэ тайбанай эрхэ хүсэлыень таанадай бэелүүлхын тула Бурхан таанадые хэрэгтэй һайн һайхан юумээр хангаг лэ, тиин ѳѳртэнь һайшаагдадаг юумые Иисус Христосоор дамжуулан таанад соо бүтээг лэ. Христосто хэтын хэтэдэ алдар соло! Болтогой! ²² Аха дүүнэрни, энэ урмашуулха зорилготой хандалга би тобшохоноор бэшээб, тиимэһээ тэсэбэритэйгээр шагнажа хайрлыт даа. ²³ Манай дүү Тимофей түрмэһѳѳ гараа гэжэ мэдэжэ байгты. Хэрбээ тэрэнэй һаяар хүрэжэ ерэбэлнь, би тэрээнтэй хамта таанадаа эрьехэб. ²⁴ Ѳѳһэдынгѳѳ бүлгэмүүдэй хүтэлэгшэдтэ болон Бурханай хүнүүдтэ бултандань бидэнһээ мэндые дамжуулаарайгты. Италиин һүзэглэгшэд таанадта баһал мэндые дамжуулжа байна. ²⁵ Та бүхэнтэй Бурханай үршѳѳл хайра байхань болтогой.