Галадуудта

Галадуудта

¹ Нэгэ хүнэй гү, али хэдэн хүнүүдэй эрхэ мэдэлээр бэшэ, харин Иисус Христосой, тэрэниие амидыруулһан Эсэгэ Бурханай мэдэлээр шэлэгдээд, элшэнгээр табигдаһан Павелһаа, ² тиин тэрээнтэй хамта байгааша һүзэглэгшэдһѳѳ Галат можын һүзэглэгшэдэй бүлгэмдэ ³ Эсэгэ Бурханһаа болон манай Дээдын Эзэн Иисус Христосһоо амар мэндые хүргэнэбди. ⁴ Христос болбол манай Эсэгэ Бурханай эрхэ мэдэлээр бидэниие нүгэл шэбэлһээ, оршон үеын хорото муу байдалһаа аршалан сүлѳѳлхын түлѳѳ ами бэеэ үргэл болгожо үгэһэн байна. ⁵ Эсэгэ Бурханда хэтын хэтэдэ алдар соло! Болтогой. ⁶ Агууехэ үршѳѳл хайраараа таанадые дуудаһан Христосһоо иимэ түргѳѳр холодожо, ондоо һургаал номнолдо хулжан ороходотнай би ехэ шаналжа байнаб. ⁷ Христосой һургаалһаа ондоо үнэн зүб һургаал үгы юм! Харин таанадые үймүүлжэ, Христосой һургаалые буруудхаха һанаатай хүнүүд лэ бии. ⁸ Таанадта урдань номногдоһон һургаалһаа ондоо һургаалые зааһан хүн бүхэн, бишье байгаа һаа, али тэнгэриһээ бууһан Бурханай Эльгээмэлшье байгаа һаа, булта хатуу хэһээлтэдэ хүртэг лэ. ⁹ Таанадай хүлеэжэ абаһан һургаалда эсэргүүсэн зүршэһэн юумэндэ һургаһан хүн бүхэн хатуу хэһээлтэдэ хүртэг гэжэ би һаяхан хэлээ һэм, мүнѳѳшье дахин дабтанаб. ¹⁰ Иигэжэ хэлэхэдээ би хүнүүдэй һайшаалда хүртэхэеэ оролдоно гүб, али Бурханай һайшаалда гү? Иихэдээ хүнүүдтэ һаймһархаяа оролдоһон болоно гүб? Хэрбээ би хүнүүдэй урда хойгуур гүйдэг байгаа һаа, Христосой зараса байхагүй һэм. ¹¹ Аха дүүнэрни, минии таанадта номноһон Һайн Мэдээсэл хүнүүдээр дамжан ерээгүй юм гэжэ мэдэжэ абагты. ¹² Би тэрэниие хүнүүдһээ дуулаагүйб, нэгэшье хүн намайе тэрээндэ һургаагүй, харин Иисус Христос тэрэниие намда нээгээ юм. ¹³ Урдань иудейн ёһо гуримые бодотоор сахин ажамидаржа ябаһан тухаймни таанад дуулаа ёһотойт. Би Христосто һүзэглэдэг зониие гайтайгаар хашан мүрдэдэг, һандарган хосороодог һэм. ¹⁴ Би үбгэ эсэгэнэрэйнгээ ёһо гуримуудые ханалгатайгаар баримталдаг, шажанайнгаа хуули ёһые ѳѳрынгѳѳ үетэнһѳѳ үлүү һайнаар сахидаг бэлэйб. ¹⁵ Үшѳѳ эхынгээ умайда байхадамни Бурхан агууехэ үршѳѳл хайраараа намайе шэлэжэ абаад, ¹⁶ Хүбүүн тухайгаа үнэн зүбые нээгээд, бусад арадуудта Христос тухай номнохыемни захираа бэлэй. Тиихэдэ би ѳѳртѳѳ хүнгэн харгы шэлээгүй һэм. ¹⁷ Намһаа урда элшэнэрээр табигдаһан зонтой уулзахаяашье би Иерусалим ошоогүй бэлэйб. Харин Аравиин газар нютагаар ябаад, һүүлдэнь Дамаск хото бусажа ерээ һэнби. ¹⁸ Гурбан жэлэй үнгэрһэн хойно би Пётртой уулзахаяа Иерусалим ошоо бэлэйб. Тэндэ тэрээнтэй арбан дүрбэн үдэр байлсаа һэм. ¹⁹ Иисусай дүү хүбүүн Яковһаа бэшэ ондоо элшэнэрые би хараагүй һэм. ²⁰ Таанадта минии бэшэжэ байһан бүхы юумэн үнэн зүб юм гэжэ Бурхан мэдэнэ. ²¹ Һүүлдэнь би Сириин, Киликиин газар дайдаар ябааб. ²² Иудейн орон нютагта ажаһуудаг Христосто һүзэглэгшэ бүлгэмүүд намайе нюураарни танихагүй байгаа. ²³ Урдань тэдэниие хашан мүрдэдэг, һургаалыень һандарган һалгаадаг хүн байһан аад, мүнѳѳ тэрэ һургаалые номнодог гэжэл тэдэ нам тухай дуулаһан байна. ²⁴ Намтай тохёолдоһон ушарта баярлан, тэдэ һүзэглэгшэд Бурханиие алдаршуулжа байгаа.

¹ Арбан дүрбэн жэлэй үнгэрһэн хойно би Варнава Тит хоёрые абажа, дахин Иерусалим ерээ бэлэйб. ² Бурханай хүсэһэн хадань би иишэ ерээ һэм. Дэмы юумэ хэжэ байгаагүйгѳѳ тодорхойлхын тула би бусад арадуудта номнодог һургаалаа эгээн хүндэтэ багшанарта баһа хѳѳрѳѳ бэлэйб. ³ Юун гэжэ һананат? Замаймни нүхэр болохо Тит гэдэг грек хүбүүе бэлгээ отолуула гэжэ хэншье баалаагүй юм. ⁴ Гансал худал хуурмаг һүзэгтэн энээн тухай хэлээ һэн. Иисус Христосой бидэндэ үгэһэн эрхэ сүлѳѳ тухай тэдэнэр мэдэжэ, бидэниие дахин дарлаха һанаатайгаар тагнуулшад мэтэ мэхэ гохо гарган, бидэнэй дунда нюусаар шурган ороо бэлэй. ⁵ Харин бидэ һургаалай бодото удхые хэбээрнь таанадта дамжуулхын тула тэдэнэй үгэдэ ойро зуурашье ороогүй һэмди. ⁶ Харин Яков, Кефас (Пётр), Иоанн гэдэг эгээн хүндэтэ багшанар тухай хэлэбэл, урдань тэдэнэй ямар хүнүүд байһаниинь намда хамаагүй, юуб гэхэдэ, Бурхан хүниие яһаарнь илгадаггүй юм. Тэдэнэр Һайн Мэдээсэл номнохыемни намда зүбшѳѳгѳѳ юм. Тэдэ нэрэ хүндэтэй зон бидэнтэй нэгэ ажал хэрэг бүтээжэ байһанаа баталан, Варнава бидэ хоёрой гарые бариба, Бурханһаа үршѳѳл хайра бидэндэ үгтэһые зүбшѳѳбэ. Тиигээд бидэ бусад арадуудые, харин тэдэ еврейнүүдые һургахань зүбтэй гэжэ тоолобо. Юундэ тиигээб гэбэл, еврейнүүдтэ номнохо үүргэ Пётрто Бурханһаа үгтэһэндэл адли бусад арадуудые һургаха үүргэ намда үгтѳѳд байһые тэдэнэр хараа ха юм. Яажа Пётр Бурханай хүсѳѳр элшэн болгогдоод, еврейнүүдтэ номнодог бэ, тон тиигэжэл бишье Бурханай хүсѳѳр элшэн болгогдоод, бусад арадуудые һургадаг болооб. ¹⁰ Тэдэ элшэнэр Иерусалимай ядуу һүзэглэгшэдэй бүлгэм тухай һанаагаа табижа ябахымнай бидэнһээ гуйгаа бэлэй. Тиимэһээ би энээндэ һаналаа табижа, тэдэ зондо туһалдаг байгааб. ¹¹ Пётрой Антиох хото ерэхэдэнь, би тэрэниие шүүмжэлээб, юундэб гэхэдэ, тэрэ ѳѳрыгѳѳ доогуур абажа ябаа. ¹² Яковай хүнүүдэй Антиох ерэхын урда тээ Пётр бусад арадуудай дундаһаа Христосто һүзэглэһэн зоноор хамта хоол баридаг байгаа. Теэд Яковай зоной ерэхэдэ еврейнүүдһээ айжа, бусад арадуудай дундаһаа һүзэглэһэн зонһоо гэнтэ холодоод, суг эдеэлэлсэхэеэ болибо. ¹³ Тон тиигэжэл бусад еврей һүзэглэгшэд, тэдэнэй тоодо Варнавашье зүб харгыһаа хадууржа, нюур харадаг болоо. ¹⁴ Пётр үнэн зүб һургаалай ёһоор бэеэ абажа ябанагүй гэжэ мэдэхэдээ, би хүн зоной дунда: «Ши еврей хүн аад, бусад арадуудай дунда еврейнүүдэй ёһо гуримаар бэшэ, харин бусад арадуудай гуримаар бэеэ абажа ябаһан аад, яахадаа тэдэниие еврейнүүдэй ёһо гуримаар ябахыень баалаа хүмши», – гэжэ тэрээндэ сэхэ хэлэбэб. ¹⁵ Бидэшье түрэхэһѳѳ еврейнүүд гээшэбди. Нүгэлтэ бусад арад бэшэ ха юмбибди. ¹⁶ Теэд нэгэшье хүн Хуули сахижа ѳѳрыгѳѳ хамгаалхагүй, харин Иисус Христосто этигэжэ абарагдаха юм гэжэ бидэ мэдэнэбди. Хуули сахижа «нэгэшье хүн абарагдахагүй» байһан дээрэһээ бидэ Хуули сахяад бэшэ, харин Иисус Христосто найдан абарагдахабди гэжэ Иисус Христосто этигээбди. ¹⁷ Хэрбээ бидэ Христостой нэгэдэн ѳѳһэдыгѳѳ сүлѳѳлхэ гэжэ байтараа, Хуули сахин нүгэл хэнэбди гэжэ баһа мэдэрбэл, Христос нүгэл хэлгэдэ хамһалсагша болоно гээшэ гү? Үгы даа! ¹⁸ Хэрбээ би гараараа һандарган һалгааһан юумэеэ дахин һэргээн бодхообол, үнэхѳѳрѳѳ нүгэлтэн болохоб. ¹⁹ Хуули үхэлһѳѳ ондоо юумэ намда үгэжэ шадахагүй хадаа ажамидаралдамни ямаршье удхагүй юм. Тиимэһээ би Бурханай түлѳѳ амидарнаб. Мүнѳѳ би ѳѳрѳѳ амидарна бэшэб, харин Христос зосоомни амидарна. Намда хайра дуратай байжа, минии түлѳѳ ѳѳрыгѳѳ үргэһэн Бурханай Хүбүүндэ һүзэглэн этигэдэг дээрэһээ би мүнѳѳ амиды ябанаб. Би Христостой хамта хэрээһэндэ хадуулааб. ²¹ Бурханай үршѳѳл хайраһаа би арсанагүйб. Хэрбээ гансал Хуули сахижа аршалагдаха аргатай байбал, Христос дэмы наһа бараһан болоно гээшэ.

¹ Ай, мунхаг тэнэг галадууд! Хэн таниие эльбэдэбэ гээшэб? Минии номноходо хэрээһэндэ саазалагдаһан Христосые таанад нюдѳѳрѳѳ хаража байһандал байгаа бэшэ һэн гүт? ² Таанад Хуули сахижа байһан дээрэһээ гү, али Христосто этигэһэн дээрэһээ Нангин Һүлдэдэ хүртэбэ гүт гэжэ би таанадһаа һураха һанаатай байнаб. ³ Нангин Һүлдѳѳр дахуулжа ябаһан аад, мүнѳѳ махабад бэедээ татуулаа гүт? Тиихэдээ таанад иимэ балар мунхаг хүнүүд гээшэ гүт? ⁴ Али таанадтай ушарһан бүхы юумэн дэмы үнгэрѳѳ гээшэ гү? Дэмы үнгэрѳѳгүйл байгаа даа! ⁵ Хуули сахижа байһан дээрэһээтнай бэшэ, харин Христосто этигэһэн дээрэһээтнай Бурхан таанадта Нангин Һүлдые хайрлажа, гайхамшагта үйлэ хэрэгүүдые бүтээгээ юм. ⁶ Энээндэл адляар Абраһамай Бурханда этигэхэдэ, Бурхан тэрэниие үнэн сэдьхэлтэн гэжэ тоолоо һэн. ⁷ Абраһамдал адли Бурханда һүзэглэдэг зон Абраһамай үри һадаһад гэжэ таанар мэдэжэ байгты. ⁸ Арадуудые этигэлээрнь Бурхан аршалан сүлѳѳлхэ юм гэжэ Нангин Бэшэгтэ үни гэһээр уридшалан бэшэгдэһэн байна. Тэндэ Абраһамда: «Бурхан шамаар дамжуулан, бүхы арадуудые абарха», – гэжэ хэлэгдэһэн байна. ⁹ Тиимэһээ Бурханда һүзэглэһэн зон Абраһамтай хамта үршѳѳгдэхэ. ¹⁰ Харин Хуули сахижа аршалагдахаб гэжэ һанаһан хүн бүхэн хэһээгдэхэ. Юундэб гэхэдэ, «Хуулиин зүйл бүхэниие үргэлжэ гүйсэдхэжэ байгаагүй хүн бүхэн хэһээгдэхэ», – гэжэ Нангин Бэшэгтэ хэлээтэй байдаг. ¹¹ Хуули сахижа байһанаараа хэншье Бурханай абарал үршѳѳлдэ хүртэхэгүй, юундэб гэхэдэ, Нангин Бэшэгтэ: «Үнэн сэдьхэлтэн этигэлээрээ амидарха», – гэжэ бэшэгдэнхэй юм. ¹² Хуули гээшэмнай һүгэдэлгэ бэшэ, тиимэһээ тэндэ: «Хуулиин зүйл бүхэнииел гүйсэдхэдэг хүн амидарха», – гэжэ хэлэгдэнэ. ¹³ Дээрэмнай бууха ёһотой байһан Хуулиин хэһээлтэһээ бидэниие Христос аршалжа, тэрэ хэһээлтые ѳѳр дээрээ даажа абаһан юм. Тиимэһээ Хуули соо баһа иигэжэ бэшэгдэһэн байна: «Модондо үлгэжэ саазалуулһан хүн хараалда хүртѳѳ». ¹⁴ Иисус Христосоор дамжан найдуулагдаһан Нангин Һүлдые этигэлээрээ тогтоожо абахынь тула Абраһамай үршѳѳл хайра мүнѳѳ бүхы арадуудта үгтэбэ гээшэ. ¹⁵ Аха дүүнэрни! Юрэ хэлэбэл, хүнэйшье бэшээд орхиһон һүүлшын захяае хэншье хубилгажа шадахагүй юм. ¹⁶ Харин Абраһамда, тэрэнэй үридэ Бурхан найдуулга үгэһэн байгаа. Үри хүүгэдтэш гэжэ хэлэгдээгүй, харин үридэшни гэжэ нэгэл хүн тухай хэлэгдээ, тиин тэрэ нэгэнь – Христос гээшэ. ¹⁷ Христос тухай хэлсээе Бурханай баталһан сагһаа дүрбэн зуун гушан жэл үнгэрһэн хойно бии болоһон Хуули энэ хэлсээе болюулха аргагүй, тиимэһээ Бурханай найдуулгань хүсэндѳѳ үлэбэ гэжэ би хэлэнэб. ¹⁸ Юундэб гэхэдэ, хэрбээ уг залгамжалга Хуулиин ёһоор үгтэдэг һаа, найдалга хэрэггүй байгаа. Гэбэшье Бурхан Абраһамые найдуулһан ёһоороо шагналдаа хүртѳѳгѳѳ ха юм. ¹⁹ Юундэ Хуули үгтэһэн байгааб? Абраһамай үри бэеын ерэхэ гэжэ Бурханай найдуулһан саг хүрэтэр гэмтэ ябадал юун бэ гэжэ ойлгожо байхын тула энэ Хуули үгтэһэн байна. Энэ Хуули хүн зондо Эльгээмэлээр болон зууршалагшаар дамжуулан үгтэһэн байна. ²⁰ Теэд Бурхан гансаараа ха юм, тэрэ зууршалагшые хэрэглэдэггүй юм. ²¹ Иихэдээ Хуули Бурханай найдуулга буруушаана гү? Үгы даа! Хэрбээ Хуули хүниие абарха аргатай байбал, Хуули гүйсэд сахидаг хүн бүхэн үнэн сэдьхэлтэн болохо һэн. ²² Гэбэшье хүн бүхэн нүгэл шэбэлдэ унаад байна гэжэ Нангин Бэшэг соо хэлэгдэнэ. Энэ бэшэгдэһэн бүхэнэй ушарынь гэхэдэ, Иисус Христосто һүзэглэһэн бүхы зон этигэлээрээ Бурханай найдуулһые хүлеэжэ абаха байна. ²³ Этигэлэй сагай ерээдүйдэ, этигэл һүзэгэй бидэндэ нээгдэтэр бидэ Хуулиин эрхэ мэдэлдэ ороод байгаабди. ²⁴ Иихэдээ Хуули гээшэмнай этигэл һүзэгѳѳрнай абардаг Христосто этигэхыемнай бидэниие бэлдэһэн шэрүүн һургагша байгаа гээшэ. ²⁵ Тиимэһээ этигэлэй сагай ерэхэдэ бидэ энэ шэрүүн һургагшын мэдэлһээ мултаран гараабди. ²⁶ Мүнѳѳ таанад булта Иисус Христосто һүзэглэһэн этигэлээрээ Бурханай үхибүүд гээшэт. ²⁷ Иисус Христосой нэрэ алдараар уһаар арюудхуулһан зон, таанад булта Иисус Христостой нэгэдэбэ гээшэт. ²⁸ Тиимэһээ мүнѳѳ еврейнүүдшье, бусад арадуудшье илгаагүй, барлагуудшье, сүлѳѳтэйшүүлшье илгаагүй, эрэшүүлшье, эхэнэрнүүдшье илгаагүй. Таанад булта мүнѳѳ нэгэн адли боложо, Иисус Христостой нэгэдэбэт. ²⁹ Хэрбээ Христостой нэгэдээд байбал, таанад Абраһамай үри һадаһад гээшэт, тиигээд Абраһамда найдуулһан бүхэниие залгамжалжа абахат.

¹ Уг залгамжалагша балшар үхибүүн ябахадаа бүхы юумэнэй эзэн байбашье, зарасаһаа юугээрээшье илгардаггүй юм. ² Тиимэһээ Эсэгын тогтооһон саг болзор хүрэтэр тэрэ үхибүүн даалгагдаһан хүнүүдэй болон гэрэй захирагшын харууһа доро байдаг. ³ Бидэшье бага балшар наһандаа энэ дэлхэйн эмхи гуримгүй хүсэнүүдэй мэдэлдэ ороод байгаабди. ⁴ Харин саг болзорой ерэхэдэ, эхэнэрһээ түрэһэн Хүбүүгээ Бурхан эльгээбэ. Хуулиин эрхэ мэдэлдэ байһан хүнүүдые абархын тула, Бурханай найдуулһан юумэнэй уг залгамжалагшад болгохын тула түлѳѳһэ үгэжэ, эльгээһэн тэрэ Хүбүүниинь Хуулиин ёһоор ажамидаржа байгаа бэлэй. ⁶ Таанадай Бурханай уг залгамжалагшад болоһон хадатнай, Бурхан таанадта: «Аба, Эсэгэ», – гэжэ ооглоһон Хүбүүнэйнгээ Һүлдые эльгээгээ. ⁷ Иихэдээ ши зараса бэшэ, харин Христосоор дамжан, Бурханай хүбүүниинь, уг залгамжалагшань болобо гээшэш. ⁸ Урдань таанад Бурханиие мэдэхэгүй байһан дээрэһээ үнэн дээрээ бурхад бэшэ «бурхадуудта» алба хэжэ байгаа бэлэйт. ⁹ Мүнѳѳ таанад Бурханиие мэдэһэн аад лэ, тодорхойлон хэлэбэл, Бурханай таанадые мэдэһэн хойно таанад яагаад һүр хүсэгүй, ахир тулюур хүсэнүүдтэ дахин бусабат, тиигээд тэдэндэ алба хэхэеэ һанабат? ¹⁰ Таанад шажанай тусхай һайндэрнүүдые тэмдэглэн үнгэргэнэт. ¹¹ Танай дунда дэмы һурган номножо ябаа гээшэ гүб гэжэ би һанаагаа зобоноб. ¹² Аха дүүнэрни, намдал адли Хуулиин мэдэлһээ мултаран гарыт гэжэ би гуйнаб, юундэб гэхэдэ, би Хуулиин мэдэлһээ гаран, таанадтал адли хүн болоо һэнби. Таанад намайе огто гомдоогоогүй ха юмта. ¹³ Үбшэн ядуу байхадаа анха түрүүшынхиеэ таанадта һургаал номноһыемни таанад һанана ёһотойт. ¹⁴ Үбшэн ядуу байхадамни таанад һэжэглэнгүй, намайе ѳѳһэдһѳѳ түлхингүй, Бурханай Эльгээмэл мэтэ, Иисус Христостол адляар угтажа абаа бэлэйт. ¹⁵ Урматнай хосороо гээшэ гү? Тэрэ үедэ таанар нюдѳѳшье хайрлангүй, таһа татажа гаргаад, намда үгэхѳѳр бэлэн байгаа һэнта гэжэ би гэршэлнэб. ¹⁶ Таанадта үнэн зүбые номножо байһан дээрэһээ дайсантнай болобо гүб? ¹⁷ Тэдэ хүнүүд таанарта муу һанана, таанад тухай һанаагаа зобоһон хэбэр үзүүлхэ гэһэн хара һанаатай байна. Тэдэнэр бидэнэй эб таһалаад, анхаралыетнай ѳѳһэдтѳѳ хандуулха һанаатай юм. ¹⁸ Гансашье минии таанадтай суг байха сагта бэшэ, мүн хододоо нам тухай һонирхожо байбалтнай ехэ һайн байгаа. ¹⁹ Үхибүүдни, Христосто һүзэглэжэ байһантнай эли болохын тула би түрэжэ байһан эхэнэртэл адли зобожо байнаб, найдажа байнаб. ²⁰ Мүнѳѳ таанадай дунда байбал, таанадтай ондоохоноор хѳѳрэлдэхэ байгааб, харин эндэһээ таанадтай юу хэхэеэ ойлгохоёо болёод байнаб. ²¹ Хуули сахихые һанаһан таанар мүнѳѳ намда хэлэжэ үгыт, таанад Хуули гүйсэд ойлгоно аалта? ²² Абраһам хоёр хүбүүтэй байгаа: нэгыень зараса эхэнэр түрѳѳ, нүгѳѳдыень сүлѳѳтэй эхэнэр түрѳѳ гэжэ тэрэ Хуули соо бэшээтэй юм. ²³ Зараса эхэнэрһээ гараһан хүбүүниинь хүнүүдэй шиидхэбэреэр түрѳѳ, харин сүлѳѳтэй эхэнэрһээ гараһан хүбүүниинь Бурханай найдуулһан ёһоор түрѳѳ бэлэй. ²⁴ Энэ ушар гүнзэгы удхатай юм: эдэ хоёр эхэнэрнүүд хоёр хэлсээнүүдтэл адли бшуу. Синай хада дээрэ үгтэһэн нэгэдэхи хэлсээниинь Хуули дээрэ үндэһэлнэ. Энэ хэлсээн зараса Агарьдал адли, барлагуудай хэлсээн юм. ²⁵ Агарь гэжэ Аравида оршодог Синай хада нэрлэдэг юм. Энэнь дарлалта доро байһан мүнѳѳ үеын Иерусалим хотые бүхы хүн амитантайнь тэмдэглэдэг. ²⁶ Харин тэнгэриин Иерусалим эрхэ сүлѳѳтэй юм. Тэрэ Иерусалим бидэнэй эхэ гээшэ. ²⁷ Тэрээн тухай Нангин Бэшэгтэ иигэжэ хэлэгдэнэ: «Үхибүү түрѳѳгүй, үри хүүгэдгүй эхэнэр, хүхин баясыш! Үхибүү түрэхын зоболон мэдэрээгүй эхэнэр, хүхииш, баярлыш! Юуб гэхэдэ, хадамда гараагүй эхэнэр хадамтай эхэнэртэ ороходоо тоогүй олон үхибүүтэй байха». ²⁸ Аха дүүнэрни, таанад баһа Исаагтал адли Бурханай найдуулһан ёһоор түрѳѳ гээшэт. ²⁹ Тиихэдэ хүнүүдэй хэлсээгээр түрэһэн хүбүүн Бурханай найдуулгаар түрэһэн хүбүүе яажа хашан мүрдѳѳ һэм, тиигэжэл мүнѳѳ таанадыешье хашажа байна. ³⁰ Нангин Бэшэг соо энээн тухай: «Барлаг эхэнэрэй хүбүүн сүлѳѳтэй эхэнэрэй хүбүүнтэй хамта уг залгамжалхагүйн тула ши барлаг эхэнэрые хүбүүнтэйнь намна», – гэжэ бэшэгдэнхэй. ³¹ Тиимэһээ, аха дүүнэрни, бидэ зараса эхэнэрэй бэшэ, харин сүлѳѳтэй эхэнэрэй үхибүүд гээшэбди.

¹ Христосой үршѳѳһэн эрхэ сүлѳѳдэ ажамидаржа байгты, дахин барлагууд бү бологты. ² Хэрбээ бэлгээ отолуулһан байбалтнай, Христос таанадта ямаршье аша туһа хүргэхэгүй гэжэ би Павел таанадта хэлэнэб. ³ Харин бэлгээ отолуулһан хүн бүхэн Хуулиин бүхы зүйлнүүдые гүйсэдхэхэ ёһотой болоно гэжэ баталан гэршэлнэб. ⁴ Хуули сахин ѳѳһэдыгѳѳ абарха һанаатайшуул Христосһоо түгдэрэн унажа, Бурханай үршѳѳл хайраһаа арсана гээшэ. ⁵ Харин бидэ Бурханай үршѳѳл хайрада хүртэжэ, ѳѳһэдынгѳѳ этигэлээр абарагдахабди гэжэ найданабди. ⁶ Иисус Христосой ашаар абарагдаха һанаатай байбал, бэлгээ отолуулаа гүбди, али отолуулаагүй гүбди – ямаршье илгаагүй юм, гансал хайра дура үгэдэг этигэл шухала юм. ⁷ Таанад һайнаар эхилээ бэлэйт, теэд саашадаашье үнэн зүбые баримталхадатнай хэн таанадта һаалта хэбэб? ⁸ Иимэ буруу һанал бодолнуудые урдань таанадые дуудаһан Бурхан таанадта идхуулаа бэшэ. ⁹ Багахан эһээбэри бүхы эдьхүүрые эһээдэг юм. ¹⁰ Гэхэтэй сасуу таанад зүбѳѳр бодомжолжо байхат гэһэн найдалга Бурхан намда үгэнэ. Харин таанадые зүб харгыһаа хадууруулһан хүн, хэншье байг, илгаагүй зэмэлэгдэхэ. ¹¹ Аха дүүнэрни, хэрбээ бэлгээ отолуулхада аша туһатай юм гэжэ минии хѳѳрэжэ байбал, намайе хашан мүрдэхэгүй байгаа. Тиигэбэл Иисус Христосой хэрээһэн тухай һургаал би номнохогүй һэм, хүн зонойшье дунда худхаляа хуймаа гарахагүй һэн. ¹² Танай дунда худхаляа хуймаа гаргадаг зон таанадһаа холодобол һайн байгаа. ¹³ Аха дүүнэрни, Бурхан таанадые эрхэ сүлѳѳдэ дуудаа юм. Энэ эрхэ сүлѳѳтнай хүсэлэнгүүдээ хангахын тулада муу юумэ үйлэдэхэ харгыда таанадые гансал бү түлхиг. Таанад бэе бэедээ дуратай байгты, бэе бэедээ туһалжа байгты. ¹⁴ Юундэб гэхэдэ, Хуулиин бүхы зүйлнүүд: «Дүтынгѳѳ хүндэ ѳѳртѳѳл адли дуратай бай», – гэһэн энэ захяа заабари соо тобшологдоно. ¹⁵ Харин бэе бэеэ таһара удара таталсажа, эдилсэжэ байһаар таанар ѳѳһэдыгѳѳ бү сүм хюдажа һалгаажархигты. ¹⁶ Һүлдын һургаһан ёһоор ажамидаржа байгты, тиигэбэл муу муухай ябадал гаргахагүйт гэжэ би хэлэнэб. ¹⁷ Юуб гэхэдэ, махабад бэеымнай һанаашалһан юумэн Һүлдынхиһѳѳ тад ондоо юм, тиин Һүлдын һанаашалһан юумэн махабад бэеынхиһээ тад илгаатай юм. Тиимэһээ таанад һанаһан юумэеэ олон ушарта хэдэггүй бшуут. ¹⁸ Хэрбээ таанадые Һүлдэ хүтэлжэ ябабал, Хуули таанадта хэрэггүй юм. ¹⁹ Махабад бэеын хүсэлэнгүүд гэхэдэ иимэ: эрэдээ гү, али эхэнэртээ урбаха, забхай зальхай, һамуу һэбхи ябадал гаргаха, ²⁰ онгонуудта мүргэхэ, эльбэ жадха хэхэ, зэбүүрхэхэ, хэрүүл ама гаргаха, атаархаха, уурлаха, дээрэлхүү зантай байха, арсалдаха ба хэрэлдэхэ, буруу үзэл номнохо, ²¹ жүтѳѳрхэхэ, алалсаха ба хюдалсаха, архидаха ба аашалха гэхэ мэтын буруу ябадалнууд. Иимэ муу юумэ үйлэдэжэ байгаа хүнүүд Бурханай хаан орондо уг залгамжалан орожо шадахагүй гэжэ урда хэлэһэнээ би дахин дабтанаб. ²² Нангин Һүлдын үрэ дүн болбол иимэ: хайра дуран, баяр, энхэ тайбан, тэсэбэри, һайн һанаан, ниигүүлэсхы сэдьхэл, үнэн сэхэ ябадал, ²³ номгон даруу зан. Иимэ зондо Хуули хэрэггүй. ²⁴ Ѳѳһэдыгѳѳ Христос Иисуста зорюулһан хүнүүд махабад бэеэ хорхойтолготойнь, хурисал ташаяантайнь хэрээһэндэ хадаба гээшэ. ²⁵ Хэрбээ бидэ Нангин Һүлдѳѳр ажамидаржа байбал, Һүлдын һургаһан ёһоор лэ ябаял. ²⁶ Ехээрхүү дээрэлхүү зан гаргангүй, бэе бэедээ ѳѳдэрхэн хэрүүлхэнгүй, атаархангүй ябаял даа.

¹ Аха дүүнэрни, хэрбээ хэн нэгэнэй нүгэл хээ һаа, Һүлдын һургаһан ёһоор ажамидардаг таанад иимэ хүниие даруу зангаараа заһажа байгты. Тиихэдэ нүгэл шэбэл хэжэрхихэгүйн тулада ѳѳһэдынгѳѳ хойноһоо анхаржа ябагты. ² Христосой үгэһэн «хуули» иимэ: бэе бэеынгээ ашаа бэрхэшээлые хубаалсажа, бэе бэедээ туһалжа байгты. ³ Хэрбээ хэн нэгэн оройдоо хэншье бэшэ аад, бэеэ дээгүүр абабал, тэрэ хүн ѳѳрыгѳѳ дэмы мэхэлнэ гээшэ. ⁴ Тиимэһээ хүн бүхэн бүтээһэн хэрэгүүдэйнгээ зэргээр ѳѳрыгѳѳ үнэлжэ байг. Тиигэбэл тэрэ хүн бэеэ бэшэнтэй сасуулангүй, ажал амжалтануудаараа омогорхожо байха. ⁵ Юуб гэхэдэ, хүн бүхэн ѳѳрынгѳѳ ашаа бэрхэшээлые ѳѳр дээрээ абажа ябаха ха юм. ⁶ Бурханай һургаал заалгаһан хүн һурган хүмүүжүүлэгшэтэйгѳѳ бүхы эд зѳѳреэрѳѳ хубаалсаг. ⁷ Бурханиие мэхэлхэ аргагүй юм. Тиимэһээ бү эндүүрэгты. Хүн тариһанаал хададаг. ⁸ Махабад бэеынгээ хүсэлэнгүүдые хангажа байдаг хүн үхэл олохо, харин Нангин Һүлдын тулада оролдодог хүндэ Нангин Һүлдэ мүнхын амидарал олгохо. ⁹ Тиимэһээ эсэхэ сусахые мэдэнгүйгѳѳр һайн юумэ хэжэ ябагты. Гэдэргээ сухаряагүй һаа, бидэ саг болзортонь ургасаа хуряахабди. ¹⁰ Арга боломжотой байхадаа бүхы хүнүүдтэ, илангаяа ѳѳрынгѳѳ бүлгэмэй һүзэглэгшэдтэ үлүү ехээр һайниие хэжэ ябагты. ¹¹ Энэ хандалгаяа таанадта ямар томо үзэгүүдээр бэшэһыемни харагтыл даа. ¹² Хүнүүдтэ һайшаагдаха дуратай зон бэлгээ отолуулхыетнай баадхана, тиихэдээ тэдэнэр Христосой хэрээһэнэй түлѳѳ хашуулха мүрдүүлхэ дурагүй байна. ¹³ Тэдэ ѳѳһэдѳѳ отолуулһан мүртѳѳ Хуули сахидаггүй юм, харин бэеэ һайрхахын тула таанадые отолуулха һанаатай байна. ¹⁴ Харин би юугээршье һайрхахаяа һананагүйб, гансал манай Дээдын Эзэн Иисус Христосой хэрээһээр һайрханаб. Минии урда энэ хэрээһэн дээрэ бүхы дэлхэйн омогорхол хадагдаа, тиихэдэ би ѳѳрѳѳшье энэ дэлхэйн омогорхолой урда хэрээһэн дээрэ хадагдаад байнаб. ¹⁵ Отолуулһан гү, али отолуулаагүй гү – тэрэнь ямаршье хамаагүй. Шэнэ хүн бии боложо мүндэлһэниинь лэ шухала юм. ¹⁶ Энэ гурим сахидаг хүн бүхэн, Израилиин Бурханай хүнүүд энхэ тайбанда, үршѳѳл хайрада оршохонь болтогой! ¹⁷ Саашадаа хэншье намда зоболон бү асараг, юуб гэхэдэ, би Иисусай шархануудые бэе дээрээ абажа ябана ха юмбиб. ¹⁸ Аха дүүнэрни, манай Дээдын Эзэн Иисус Христосой үршѳѳл хайрань таанадтай оршожо байг лэ! Болтогой!