Эфесэйхиндэ

Эфесэйхиндэ

¹ Иисус Христостой нэгэдэһэн Эфес хотын һүзэг этигэлтэй Бурханай хүнүүд, Бурханай эрхэ мэдэлээр Иисус Христосой элшэн болоһон Павел таанадые амаршална. ² Бурхан Эсэгэһээ болон манай Дээдын Эзэн Иисус Христосһоо үршѳѳл хайра ба амгалан тайбаниие таанадта хүсэнэб. ³ Манай Дээдын Эзэн Иисус Христосой Эсэгэ болохо Бурханда магтаал соло дуудаял! Маанадай Христостой нэгэдэһэн ушарһаа дээдын тэнгэриһээ оюун ухаанда хабаатай буян хэшэг тэрэ маанадта хайрлаа юм. ⁴ Бурханай урда арюун нангин ба дутуу дутагдалгүй байхымнай тулада тэрэ бидэниие Христостой нэгэдхэн ѳѳрын болгожо, газар дэлхэйн бүтээгдэхэһээ урда шэлэжэ абаа юм. Бурхан бидэндэ дуратай байжа, ⁵ ѳѳрынгѳѳ һайн дураар, эрхэ хүсэлѳѳр Иисус Христосоор дамжан бидэниие ѳѳрынгѳѳ үхибүүд болгохо гэжэ заяаһан байна. ⁶ Инаг хайрата Хүбүүнэйнгээ ашаар маанадые буян хэшэгтээ элбэг дэлбэг хүртѳѳһэнэйнь түлѳѳ Бурханиие алдаршуулаял. ⁷ Тэрэ агууехэ буян хэшэгтээ маанадые элбэг дэлбэгээр хүртѳѳгѳѳ. Тэрэнэйнь ашаар бидэ Хүбүүнтэйнь нэгэдээд, шуһанайнь сэнгээр сүлѳѳтэй боложо, нүгэлнүүдээ хүлисүүлээ гээшэбди. Тэрэ сэсэн ухаагаараа, оюун мэдэлээрээ ⁹ зориһон юумээ бүтээгээ, Христосоор дамжан бүтээхэ гэжэ анханһаа шиидэһэн ѳѳрынгѳѳ эрхэ мэдэлэй нюусые бидэндэ нээгээ. ¹⁰ Дээдэ огторгойдо, доодо замбида байһан бүхы амитадые Христос соо нэгэдхүүлэн, тэрэнэй хүтэлбэри доро байлгахые түлэблэбэ. Энэ хүсэлэнгѳѳ Бурхан тогтооһон сагтаа бэелүүлхэ. ¹¹ Бурхан ѳѳрынгѳѳ зорилгоор, заяаһан ёһоороо маанадые Христостой нэгэдхүүлэн ѳѳрынгѳѳ арад болгон шэлэжэ абаа. ¹² Тиин Христосто найдаһан түрүүшын хүнүүдэй дунда байһан хадаа тэрэнээр алдаршуулжа байял! ¹³ Таанадшье баһа ѳѳрынгѳѳ абаралга тухай үнэн зүб Бурханай үгэ дуулаад, Христосто этигээт, тиин Бурхан Нангин Һүлдэеэ таанадта үгэн, ѳѳрынгѳѳ тамга таанад дээрэ дараба. ¹⁴ Бурханай ѳѳрынгѳѳ хүнүүдтэ найдуулһан бүхэниие маанадай абаха тухай тэрэ Һүлдэнь батална, тиин Бурханай ѳѳрынгѳѳ хүнүүдые бодото сүлѳѳтэй болгохо тухай баһа батална. Бидэ тэрэнэй алдар солые дуудаял! ¹⁵ Тиимэһээ таанадай Дээдын Эзэн Иисуста һүзэглэжэ, Бурханай хүнүүдые бүгэдыень энхэржэ хайрлажа ябадаг тухай дуулахадаа, ¹⁶ би зальбархадаа таанадые һанан, таанадай түлѳѳ үргэлжэ Бурханда баяр баясхалан хүргэжэ байдагби. ¹⁷ Манай Дээдын Эзэн Иисус Христосой Бурхан, алдарай Эсэгэ ѳѳрыень таанадай мэдэрхынтнай тулада сэсэн ухаан үршѳѳдэг Һүлдые таанадта хайрлаг лэ. ¹⁸ Бурханай таанадые дуудахада таанадта үгтэһэн найдабариин ямар байдагые, ѳѳһэдынгѳѳ хүнүүдтэ тэрэнэй үгэхэб гэһэн найдуулгын элбэг дэлбэг байдагые, тэрээндэ этигэһэн бидэн соо хүдэлжэ байһан хүсэ шадалынь аргагүй ехэ байдагые мэдэжэ байхынтнай тулада оюун ухаанайтнай нюдые тэрэ нээжэ үгэг лэ. ²⁰ Тэрэл хүсэ шадалаараа Бурхан Христосой үхэхэдэнь амидыруулаад, дээдын огторгойдо баруун таладаа ²¹ захирагшад, ноёд, эзэд, элдэб хүсэнүүдэй дээгүүр табин һуулгаба. Бурхан тэрэниие мүнѳѳнэйшье сагта, ерээдүйдэшье бүхы нэрэ түрэнүүдэй дээгүүр үргэн табиба. ²² Бүхы юумые хүлдэнь хаяжа мэдэлдэнь оруулаад, бүхы юумэнэй Дээдын Эзэн байһан хадань һүзэглэгшэдэй бүлгэмэй хүтэлэгшѳѳр томилоо бэлэй. ²³ Һүзэглэгшэдэй бүлгэм Христосой махабад бэень гээшэ, бүтээгдэһэн бүхы юумые ѳѳрѳѳрѳѳ дүүргэдэг тэрэниие һүзэглэгшэдэй бүлгэм бүрин түгэс болгоно.

¹ Урдань таанад ѳѳһэдынгѳѳ муу муухай хэрэгүүдһээ болон нүгэл шэбэлһээ боложо үхэһэн амитад байгаат. ² Тиихэдэ таанад газар дэлхэйн нүгэл шэбэлтэ замаар ябажа, Бурханай мэдэлдэ байдаггүй хүнүүдые мүнѳѳшье захиржа байдаг һүлдын, хара хүсэнүүдэй ноёной мэдэлдэ байгаат. ³ Бидэ булта тэдэ зондол адли Бурханай мэдэлдэ байдаггүй байгаабди, ѳѳһэдынгѳѳ бэеын ба һанал бодолой хүсэлэнгүүдые ханган, махабад бэеын жама ёһоор амидаржа байгаабди. Тиимэһээ ѳѳһэдынгѳѳ мүн шанарһаа боложо, бидэ хүн бүхэндэл адли Бурханай уур сухалһаа зобохо табилантай бэлэйбди. ⁴ Харин үршѳѳл хайраар элбэг Бурхан бидэндэ аргагүй ехээр дуратай байжа, ⁵ нүгэл шэбэлһээ боложо үхэһэн бидэниие Христостой хамта амидыруулаа гээшэ. Таанад Бурханай үршѳѳл хайраар абарагдаба гээшэт. ⁶ Бурхан бидэниие Иисустай хамта амидыруулаад, тэрэнэй хажууда дээдын огторгойдо һуулгаа юм. ⁷ Иигэжэ Бурхан Иисусаар дамжуулан маанадта тон ехээр дуратай байһанаа, аргагүй ехэ үршѳѳл хайраа ерээдүй сагуудта харуулаа. ⁸ Этигэл һүзэгэйтнай ашаар таанадые Бурханай үршѳѳл хайра абараа. Тиин тэрэ этигэл һүзэгтнай ѳѳһэдһѳѳтнай бэшэ, харин Бурханай үршѳѳһэн бэлэг гээшэ. ⁹ Тэрэ болбол танай оролдолгын үрэ дүн бэшэ, тиимэһээ хэншье ѳѳрыгѳѳ магтахые бү һануужа. ¹⁰ Ямар байнабди, тиимээр Бурхан бидэниие бүтээгѳѳ, бидэниие Иисус Христостой нэгэдүүлэн һайн һайхан хэрэгүүдые хэдэг заншалтай байхыемнай анханһаа түлэблэн бүтээгѳѳ юм. ¹¹ Таанад түрэхын еврей-бэшэнүүд байгаат, ѳѳһэдыгѳѳ отолуулһан (бэеын эрхэтэниие гараараа отолхо гэһэн удхатай) гэжэ нэрлэдэг еврейнүүд таанадые «отолуулаагүй» гэжэ нэрлэдэг байгаа, урдань хэд байһанаа бү мартагты, ¹² тиихэдэ таанад Христосгүй амидардаг байгаат. Таанад Бурханай шэлэһэн хүнүүдэй тоодо ородоггүй байгаат. Бурханай ѳѳрынгѳѳ хүнүүдтэ үгэһэн найдуулгада, тэрэнэй Хэлсээндэ таанад ямаршье хабаагүй байгаат. Таанад энэ газар дэлхэй дээрэ найдалгагүй, Бурхангүй амидаржа байгаа һэнта. ¹³ Харин мүнѳѳ Иисус Христостой нэгэдээд, урдань Бурханһаа холо байһан хүнүүд Христосой шуһаар тэрээндэ ойртобот. ¹⁴ Христос ѳѳрѳѳ еврейнүүдые болон бусад арадуудые нэгэ арад болгон, бидэндэ энхэ тайбаниие асараа. Тэрэ маанадые хубаажа, эбыемнай таһалжа байһан ханые ѳѳрѳѳрѳѳ эбдээ. ¹⁵ Тэрэ хоёр арадһаа ѳѳртэйгѳѳ хамта нэгэ шэнэ арад нэгэдүүлэн бүтээжэ, энхэ тайбаниие мандуулхын тула Моисейн Хуули тогтоолнуудтайнь болон дүримүүдтэйнь хүсэнгүй болгоо. ¹⁶ Христос хэрээһэн дээрэ үхэхэдѳѳ тэдэнэй үһѳѳ хиһаае усадхаад, нэгэ бэе соо хоёр арадые эблүүлээд, тэдэниие һѳѳргэнь Бурханда асараа. ¹⁷ Христос ерэжэ бүхы хүнүүдтэ, Бурханһаа холо байһан бусад арадуудташье, Бурханай ойро байһан еврейнүүдтэшье энхэ тайбан тухай Һайн Мэдээсэл номноо. ¹⁸ Еврейнүүдшье, ондоо яһатаншье, бидэ булта Христосой ашаар нэгэ Һүлдѳѳр Эсэгэдэ ойртохо аргатайбди. ¹⁹ Тиимэһээ таанад, еврей бэшэ зон, хариин гү, али ерүүл зон бэшэт, харин Бурханай хүнүүдтэй нэгэ хотын зон гээшэт, Бурханай бүлын гэшүүд гээшэт. ²⁰ Таанад элшэнэрэй ба лүндэншэдэй табиһан һуури дээрэ бодхоогдоһон байнат. Тэрэ һууриин түшэг тулгуурынь Иисус Христос ѳѳрѳѳ гээшэ. ²¹ Тэрэ ѳѳрѳѳрѳѳ байшангые холбожо бүхэлѳѳд, Дээдын Эзэндэ зорюулагдаһан Һүмэ болгон дээшэнь бодхоно. ²² Христостой нэгэдэн таанадшье баһа Һүлдын ашаар Бурханай байдаг байра болохын тулада бодхоогдожо байна гээшэт.

¹ Тиимэл шалтагаанаар би, Павел, еврей бэшэ таанадай түлѳѳ Иисус Христосһоо боложо хаалтада һуунаб. ² Бурхан ѳѳрынгѳѳ үршѳѳл хайраар таанадай һайн һайханай тулада энэ ажал хэхыемни намда даалгаһан байна гэжэ таанад сохом мэдэжэ байгаа ёһотойт. ³ Бурхан нюусаяа намда нээжэ үгѳѳ. (Энээн тухай би түрүүн тобшохоноор бэшэһэн байгааб). ⁴ Тэрэ бэшэһэн юумыемни уншаад, Христос тухай нюусые яажа ойлгожо байһыемни таанад мэдэжэ абахат. ⁵ Энэ нюусые урданай хүнүүдтэ нээдэггүй байгаа, харин мүнѳѳ Бурхан Нангин Һүлдѳѳрѳѳ дамжуулан гэгээн элшэнэртээ ба лүндэншэдтэ тэрэ нюусаа нээгээ. ⁶ Тэрэнь бусад арадууд Һайн Мэдээсэлэй ашаар баһал Бурханай үршѳѳлдэ хүртэхэ, тэдэнэр баһал нэгэ бэеын эрхэтэн болохо, Бурханай Иисус Христосоор дамжуулһан найдуулга баһа тэдэндэ үгтэхэ гэһэн удхатай юм. ⁷ Бурханай хүсэ шадалай нүлѳѳгѳѳр намда үгтэһэн тусгай үршѳѳлѳѳр би Һайн Мэдээсэлэй зарасань болоһон байгааб. ⁸ Ой ухаандаа оруулхын аргагүй ехэ Христосой баялиг тухай Һайн Мэдээсэлые бусад арадуудта номнохые, Бурханай нюусын яажа бэелхэ тухай бүхы хүнүүдтэ харуулхые Бурханай хүнүүдэй эгээл багань байһан намда Бурхан хайрлаа бэлэй. Үнгэрһэн сагуудта хамаг юумые Бүтээгшэ Бурхан нюусаяа хадагалжа байһан юм. Тиин мүнѳѳнэй үе сагта тэрэ ѳѳрынгѳѳ оюун ухааниие һүзэглэгшэдэй бүлгэмѳѳр дамжуулан тэнгэриин захирагшадта, огторгойн хүсэнүүдтэ элдэб янза хэбээрнь харуулаа. ¹¹ Замбуулин дэлхэйе бүтээхэһээ урда түлэблэжэ байһан юумэеэ Бурхан манай Дээдын Эзэн Иисус Христосой ашаар бэелүүлээ. ¹² Христостой нэгэдэһэн, тэрээндэ этигэжэ һүзэглэжэ байһанаараа бидэ зоригтойгоор, найдамжатайгаар Бурханда ойртожо байна гээшэбди. ¹³ Тиимэһээ минии тулижа, зобожо байһанда урмаа бү хухарагты гэжэ би таанадые гуйнаб. Минии зоболон танай аша туһада юм. ¹⁴ Эсэгэдээ би үбдэгѳѳ бохиилгон мүргэнэб. ¹⁵ Тэнгэри дээрэшье, газар дэлхэйдэшье байһан бүхы изагуур угсаатан Эсэгэһээ эхитэй юм. ¹⁶ Досоогоо хүсэ шадалтай болохынтнай тула Һүлдѳѳрѳѳ дамжуулан алдарайнгаа баялигһаа таанадтай хубаалсахыень би Бурханиие гуйнаб. ¹⁷ Танай этигэл һүзэгэй ашаар зүрхэ сэдьхэлдэтнай Христос һууришаһай, инаг дуран танай үндэһэ, һуури болоһой гэжэ би баһал зальбарнаб. ¹⁸ Тиигэбэл таанад Бурханай хүнүүдээр хамта Христосой хайра дуранай хизааргүй ехэ үргэн, ута байһые, аргагүй үндэр, гүнзэгы байһые тухайлха аргатай болохот. ¹⁹ Тэрэ гүйсэд мэдэрхын аргагүй байһан хайра дурые таанад мэдэрдэг болохот. Тиигээд таанад алишье талаһаа Бурхандал адли эрхим түгэс болоһойт гэжэ би зальбарнаб. ²⁰ Досоомнай хүсэ шадалаа ажаллуулжа, бидэнэй гуйжа хүсэхэ гү, али һанажа бодохоһоо үлүү юумые бүтээхэ аргатай Бурхан алдаршаһай. ²¹ Бурхан һүзэглэгшэдэй бүлгэмѳѳр болон Иисус Христосоор дамжан хэтын хэтэдэ, үеһѳѳ үедэ алдар солотой байг лэ! Болтогой!

¹ Дээдын Эзэндэ алба хэжэ байһан дээрэһээ хаалтада һууһан би Бурханай таанадта даалгаһан уялгада зохистойгоор амидарагты гэжэ ехэтэ гуйнаб. ² Ходо даруу, номгон, тэсэбэритэй байгты. Бэе бэедээ тэсэбэритэйгээр хандажа, ѳѳһэдынгѳѳ хайра дурые харуулжа байгты. ³ Нангин Һүлдын таанадта хайрлаһан, энхэ тайбанаар таанадые холбоһон нэгэдэлые сахиха гэжэ бүхы хүсэ шадалаараа оролдогты. ⁴ Бурханай таанадые уряалһан найдуулгын гансал юм хадань таанад нэгэ бэе гээшэт, нэгэ Нангин Һүлдэтэй байнат. ⁵ Гансал Дээдын Эзэн, гансал һүзэг этигэл, гансал уһан арюудхалга бии юм. ⁶ Бүхы юумэн дээгүүр байһан, бүхы юумэн соо болон бүхы юумээр дамжан ажаллажа байһан гансал Бурхан – бүхы хүнүүдэй Эсэгэ бии юм. ⁷ Христосой маанадта үгэхэ гэжэ шиидэһэн хэмжээгээр хүн бүхэмнай онсо абьяас бэлигтэ хүртэбэ. ⁸ Тиимэһээ Нангин Бэшэгтэ иигэжэ бэшээтэй байдаг: «Дайлажа мэдэлдээ оруулһан олон хүнүүдые абаад, тэрэ үндэртэ дээшээ гараба, хүнүүдые бэлэгтэ хүртѳѳбэ». ⁹ «Дээшээ гараад» гэдэгынь баһа ямар удхатай юм? Урдань тэрэнэй газарай доодо үнсэгтэ бууһыень харуулна бэшэ гү? ¹⁰ Газарай доодо үнсэгтэ бууһан нэгэн замбуулиниие ѳѳрѳѳрѳѳ дүүргэхын тулада огторгой тэнгэриһээ дээгүүр дэгдэһэн лэ хүн бэшэ аал? ¹¹ Тэрэл хүнүүдые абьяас бэлигтээ хүртѳѳбэ, хэһэг хүнүүдые элшэнэр болгожо табиба, үшѳѳ хэһэг хүнүүдые лүндэншэд болгожо табиба, зарим хүнүүдые Һайн Мэдээсэл номнохыень табиба, бусадые һүзэглэгшэдэй хүтэлэгшэдѳѳр, багшанараар томилбо. ¹² Тэрэ Бурханай хүнүүдые Бурханда алба хэхэ ажалда бэлдэхын тула, Христосой бэеые бодхохын тула тиигээ юм. ¹³ Тиимэһээ бидэ бултадаа нэгэ этигэл һүзэгтэй болохо, Бурханай Хүбүүниие мэдэрхэ ёһотойбди. Бидэ Христосой хүсэд болбосорһон хэмжээндэ хүрэн, хүсэд болбосорһон хүнүүд болохо ёһотойбди. ¹⁴ Тиин бидэ уһанай долгиндо, али һалхинай һэршэгэнэлгэдэ абтаһан юумэндэл ямаршье һургаалда абтан хэлбэлзэдэг, хүнэй мэхэ гоходо орожо, ехэ шадамараар мэхэлүүлдэг балшар хүүгэд байхаяа болиёл. ¹⁵ Тиигэхын орондо хайра дураар халин, үнэн сэхые хэлэжэ байбал, бидэ толгой болохо Христосто алишье талаһаа ойртон ургахабди. ¹⁶ Христосой хүтэлбэри доро бэеын эрхэтэнүүд бүхэ зангилаагаар холбогдонхой байһанһаа боложо бэе ѳѳрѳѳ бүрин бүтэн байна. Эрхэтэн бүхэн ѳѳрынгѳѳ хэхэ ёһотой үүргые дүүргээд, бүхы бэе хайра дурын ашаар ургажа, ѳѳрыгѳѳ бүрилдүүлнэ. ¹⁷ Дэмы хооһон бодолтой, оюун ухааниинь балартаһан ондоо яһатанда адли бэеэ абажа ябахаяа болигты гэжэ би таанадые Дээдын Эзэнэй нэрээр гуйжа найжа байнаб. Сэдьхэл зүрхэниинь шулуундал адли шэрүүн байжа, Бурханиие мэдэрхэ гэжэ огто хүсэхэгүй байһан дээрэһээ тэдэнэр Бурханай хайрлажа байһан амидаралһаа хасагдаба. ¹⁹ Һэшхэлээ бүрин алдан, тэдэнэр ямаршье хэмжээ ханалые мэдэнгүй хуули буса юумэ үйлэдэжэ, ѳѳһэдыгѳѳ ташаяангы хүсэлэнгүүдэй мэдэлдэ үгѳѳ. ²⁰ Христос тухай һургахадаа таанадта тиимэ юумэ заагаагүй юм. ²¹ Таанад тэрээн тухай дуулаһан байгаат, тэрээнһээ һуража абаат. Тэрэ болбол үнэн зүб ха юм. ²² Тэрээнһээ иимэ юумэндэ һураһан байгаат: хуурмаг хүсэлэнгүүдээрээ ѳѳһэдыгѳѳ һүнѳѳн урданайхяараа амидархаяа болигты. ²³ Зүрхэ сэдьхэлтнай, һанал бодолтнай хубилан шэнэрхэ ёһотой. ²⁴ Бурханай дүрые һажааһан үнэн сэдьхэлтэй, арюун гэгээн амидаралтай шэнэ хүн боложо хубилагты. ²⁵ Тиимэһээ худал юумэ хэлэхэеэ болёод, дүтынгѳѳ хүндэ хүн бүхэнтнай үнэниие хэлэжэ байг, ушарынь хэлэхэдэ, бидэ бултадаа нэгэ бэеын эрхэтэнүүд ха юмди. ²⁶ Уур сухалда абтаһаншье һаа, нүгэл шэбэл бү үйлэдэгты, наранай орохоһоо урда уур сухалтнай бууран намдаг. ²⁷ Шолмосто шургажа орохо боломжо бү үгэгты. ²⁸ Юумэ хулуудаг байбал, дахин юумэ хулуухаяа болёод, гараараа аша туһатай юумэ хэжэ, дутажа зүдэржэ байһан хүнүүдтэй юумээрээ хубаалдажа, үнэн зүбые баримталан амидаржа байгты. ²⁹ Хорото үгэнүүд аманһаатнай бү гараг. Шагнажа байһан хүнүүдтэ хэрэгтэй, һүзэгыень бэхижүүлхэ аргатай, аша туһатайл үгэнүүдые хэлэжэ байгты. ³⁰ Ойртожо байгаа тэрэ Үдэр таанадай сүлѳѳтэй болохые баталан, Бурхан таанад дээрэ Нангин Һүлдын тамга табиһан байна. Тиимэһээ Нангин Һүлдые гуниглуулан шаналуулангүй ябагты. ³¹ Гомдохо голхорхоёо, хорон хэлэндэ абтахаяа, уур сухалаа хүрэхэеэ, хэрүүл хэхэеэ, хардахаяа, бусадшье эдэ мэтын харата муухай юумэ үүсхэхэеэ огтолон болигты. ³² Харин бэе бэеэ энхэрэн, хайрлажа ябагты, Бурханай Христосоор дамжан таанадые хүлисэһэндэл адляар бэе бэеэ хүлисэжэ байгты.

¹ Бурханай инаг хайрата үхибүүдынь юм хадаа Бурханиие һажаан ажамидархые оролдогты. ² Христосой бидэндэ дуратай байгаад, ами наһаяа хангалтай, Бурханда таатай тахил болгон маанадай түлѳѳ үгэһэндэл адляар хайра дуранай жама ёһоор амидарагты. ³ Таанад Бурханай хүнүүд юм хадаа зальхайралга, бэлиндэлгэ, али хомхойролго гэхэ мэтын юумэнүүд тухай ѳѳһэд хоорондоо хэлэхэ, хүндэхэшье ёһогүйт. ⁴ Уйгарлажа, дэмы юумэ шашажа, бузар муухай үгэ дуугаржа ябахань таанадта зохихогүй юм. Бурханда баясхалан хүргэжэ байбал таараха. ⁵ Зальхайржа, бэлиндэжэ, али алта мүнгэндэ шунашаһан ямаршье хүн (алта мүнгэндэ шунаһан байдал онгондо мүргэһэндэл адли) Христосой болон Бурханай хаан орониие залгамжалхагүй юм гэжэ таанад мэдэхэ ёһотойт. ⁶ Хооһон үгэтэй хүнэй мэхэ гоходо бү орогты, ушарынь гэхэдэ, Бурхан тиимэ юумэнүүдэй түлѳѳ үгыень дууладаггүй хүнүүд дээрэ уур сухалаа буулгаха. ⁷ Тиимэһээ тэрэ хүнүүдээр орёолдохо огто хэрэггүй. ⁸ Урдань таанад ѳѳһэдѳѳ харанхы мунхагта байгаат, харин Дээдын Эзэнэй хүнүүд болоходоо, гэрэл туяада байдаг болоот. Тиимэһээ таанад гэрэл туяагай хүнүүдтэ адляар амидарха ёһотойт. ⁹ Гэрэл туяа таанадые һайн һайхан, гэнэн сэхэ, үнэн сэдьхэлтэй болгодог. ¹⁰ Дээдын Эзэндэ һайшаагдадаг юумые мэдэхэ гэжэ оролдогты. ¹¹ Харанхы мунхагай үрэ дүнгэй хэрэгүүдтэ ямаршье хабаагүй байгты, тэрэ хэрэгүүдые гэрэл туяада гаргажа элирүүлжэ байгты. ¹² Нюусаар хэгдэжэ байһан тэрэ хэрэгүүд тухай хэлэхэдэшье эшхэбтэр юм. ¹³ Элирүүлэгдэжэ байһан юумэнэй гэрэл туяадал гарахадань, бүхы юумэн эли болодог. ¹⁴ Гэрэл туяагай ашаар элирүүлэгдэһэн бүхы юумэн гэрэл туяа болоно. Тиимэһээ иигэжэ хэлэдэг байха: «Унтажа байһан хүн, һэри, амидыра, Христос шамайе гэрэлтүүлхэ». ¹⁵ Тиимэһээ ѳѳһэдынгѳѳ алхамуудые бодомжолжо үзѳѳд хэжэ байгты. Тэнэг хүнүүдтэл адли бэшэ, харин сэсэн хүнүүдтэл адли ѳѳһэдыгѳѳ абажа ябагты. ¹⁶ Гараһан боломжо бүхэнѳѳ ашаглан, һайн һайхан юумэ бүтээжэ байгты, юундэб гэхэдэ, мүнѳѳнэй саг ехэл муу үе саг юм. ¹⁷ Бодолгүй тэнэг юумэнүүд ябахын орондо Дээдын Эзэнэй эрхэ хүсэлые ойлгохо гэжэ шармайгты. ¹⁸ Таанадые гансал уруунь татаха аргатай архи дарһа һогтотороо уунгүй, орондонь ѳѳһэдыгѳѳ Һүлдѳѳр дүүргэжэ байгты. ¹⁹ Бурханай дуунуудаар, магтаалта дуунуудаар, Һүлдын хайрлаһан дуунуудаар бэе бэеэ урмашуулжа байгты. Үнэн зүрхэнһѳѳ Дээдын Эзэниие алдаршуулан дуулажа, магтажа ябагты. ²⁰ Манай Дээдын Эзэн Иисус Христосой нэрээр Эсэгэ Бурханда бүхы юумэнэй түлѳѳ үргэлжэ баяр баясхалан хүргэжэ байгты. ²¹ Христостые шүтэдэг юм һаа, бэе бэеынгээ үгѳѳр ябагты. ²² Эхэнэрнүүд, Дээдын Эзэнэй үгѳѳр ябадагтал адляар нүхэрэйнгѳѳ үгэ дуулажа байгты. ²³ Ушарынь ямар бэ гэхэдэ, яажа Христос һүзэглэгшэдэй бүлгэмэй, ѳѳрынгѳѳ бэеын толгойлогшо болон Абарагша байнаб, тон тиигэжэл үбгэниинь һамганайнгаа толгойлогшонь юм. ²⁴ Тиин һүзэглэшэдэй бүлгэм яажа Христосой мэдэлдэ байдаг бэ, тон тиигэжэл һамгад үбгэдэйнгѳѳ мэдэлдэ бүримүһэн байха ёһотой. ²⁵ Эрэшүүл, Христос яажа һүзэглэгшэдэй бүлгэмдэ дуратай байжа, тэрэнэй түлѳѳ ами наһаяа үгѳѳ һэм, тон тиигэжэл таанад һамгадтаа дуратай байгты. ²⁶ Һайн мэдээсэл номнон, уһаар мэтэ үгѳѳрѳѳ сэбэрлэн, һүзэглэгшэдэй бүлгэмые Бурханда зорюулхын тула Христос ами наһаяа үгѳѳ юм. ²⁷ Һүзэглэгшэдэй бүлгэмые тэрэ ѳѳрынгѳѳ урда ямаршье гэм бузаргүй, дутуу дутагдалгүй үзэсхэлэнтэ гоё байлгаха һанаатай байгаа. ²⁸ Тон тиигэжэл нүхэд ѳѳһэдынгѳѳ бэедэ дуратай байһандал адляар һамгадтаа дуратай байха ёһотой. Һамгандаа дуратай эрэ ѳѳртѳѳ дуратай гэһэн үгэ юм. ²⁹ Ѳѳрынгѳѳ бэе үзэжэ ядаһан хүн хэзээдэшье байгаагүй. Зүгѳѳр Дээдын Эзэнэй ѳѳрынгѳѳ һүзэглэгшэдэй бүлгэмые анхарһандал адляар хүн ѳѳрынгѳѳ бэеые тэжээжэ, бѳѳмэйлжэ ябадаг гээшэ. ³⁰ Юундэб гэхэдэ, бидэнэр Христосой бэеын эрхэтэнүүд гээшэбди. ³¹ «Тиимэһээл хүн эхэ эсэгэ хоёроо орхёод, һамгантайгаа ниилэхэ, тиин хоёр эрхэтэн нэгэ бэе болохо». ³² Эдэ бүхэндэ агууехэ нюуса далдалаатай юм. Христос болон тэрэнэй һүзэглэгшэдэй бүлгэмэй талаар би хэлэнэб. ³³ Гэхэдэ энэ бүхэн таанадташье хабаатай: ямаршье эрэ ѳѳртѳѳ дуратай байһандал адляар һамгандаа дуратай байха ёһотой, тиин ямаршье эхэнэр нүхэрѳѳ хүндэлжэ ябаха ёһотой юм.

¹ Үхибүүд, таанад Дээдын Эзэнэй юм хадаа аба эжынгээ үгэ дуулажа байгты. Энэ танай уялга гээшэ. ² «Аба эжыгээ хүндэлжэ яба» гэһэн түрүүшын захяа заабариие: «Тиигэбэл шамда ехэ һайн байха, газар дэлхэйдэ ши ута наһа наһалхаш» гэһэн найдуулга дахадаг юм. ⁴ Аба эжынэрынь, үхибүүдээ уурлуулан урмыень бү хухалагты, зүгѳѳр Дээдын Эзэн тухай заажа, заабаришалжа, тэдэнээ хүмүүжүүлжэ байгты. ⁵ Барлагууд, Христосой үгэ дуулажа байһандал адляар газар дэлхэйдэхи эзэдээ үнэн зүрхэнһѳѳ хүндэлжэ, айн һүрдэжэ байгаад, үгыень дуулажа байгты. ⁶ Һайшаалдань хүртэхын тула тэдэнэйнгээ гансал хаража байхадань бү тиигэжэ байгаарайгты, харин Христосой барлагуудтал адляар Бурханай хүсэһэн юумые үнэн зүрхэнһѳѳ хэжэ байгаарайгты. ⁷ Юрын хүндэ бэшэ, харин Дээдын Эзэндэл шэнгеэр эзэдтээ баяртайгаар алба хэжэ байгаарайт. ⁸ Барлаг гүт, али эрхэ сүлѳѳтэй хүн гүт, Дээдын Эзэн илгаагүйгѳѳр һайн юумэ хэһэнэйтнай түлѳѳ ашыетнай харюулха гэжэ һанажа байгаарайгты. ⁹ Эзэд, таанад барлагуудтаа баһал тиигэжэ хандажа байгты, хэрзэгы хатуу бү байгты. Таанад ѳѳһэдѳѳ тэдэнтэй хамта тэнгэридэ яһа илгадаггүй нэгэ Эзэнтэй байһанаа мэдэнэ ха юмта. ¹⁰ Эсэстэнь иигэжэ хэлэһүү: Дээдын Эзэнэй һүр хүсѳѳр бэхижэжэ байгты. ¹¹ Шолмосой мэхэ гохоһоо ѳѳһэдыгѳѳ хамгаалжа байхын тула Бурханай үгэһэн хуяг дуулга бүрин үмдэгты. ¹² Ушарынь юуб гэбэл, бидэ хүнүүдэй урдаһаа бэшэ, харин замбуулинай харата хүсэнүүд, захирагшад, эрхэ засагууд, энэ харанхы мунхаг үеын замбуулинай хүсэнүүдэй урдаһаа тэмсэнэ гээшэбди. ¹³ Тиимэһээ Бурханай үгэжэ байһан хуяг дуулга үмдэгты. Тиигэбэл харата үдэрэй ерэхэдэ, таанад ѳѳһэдыгѳѳ дайсадһаа хамгаалха аргатай байхат; байлдаанда сухаришагүй зогсожо байхат. ¹⁴ Бэлэн байгты! Үнэн сэхэ ябадалаараа һур бэһэндэл адляар бэеэ бэһэлжэ байгты, үнэн сэдьхэлээрээ хуягтал адляар ѳѳһэдыгѳѳ хамгаалжа байгты. ¹⁵ Энхэ тайбан тухай һайн мэдээсэлые дуулгаха хүсэлтнай гуталдал адли бэлэн байг. ¹⁶ Ходо этигэл һүзэгэй бамбай халхабшатай ябагты, тиигэбэл таанад Харата Нэгэнэй галта һомо годлинуудыень зогсоохо аргатай байхат. ¹⁷ Абаралгые дуулгадал адляар, Бурханай үгые Һүлдын үгэжэ байһан һэлмэдэл адляар абагты. ¹⁸ Таанад Һүлдѳѳр хүтэлүүлэн, ямаршье ушарта элдэб янзын зальбарал гуйлтануудые үдэр һүнигүй Бурханда үргэжэ байгты. Тиимэһээ һэргэлэн байжа, Бурханай бүхы хүнүүдэй түлѳѳ ханамжатайгаар зальбаржа байгты. ¹⁹ Һайн Мэдээсэл тухай нюуса зоригтойгоор тайлбарилан элирүүлхэдэмни Бурханай намда хэрэгтэй үгэнүүдые үгэжэ байхын тула минии түлѳѳ баһа зальбаржа байгты. ²⁰ Тэрэ Һайн Мэдээсэл номноходоо ёһоорнь хэлэжэ байха зоригтой байхымни тула баһа зальбаржа байгты. Би, Бурханай элшэн, мүнѳѳ тэрэ Мэдээсэл номноһонойнгоо түлѳѳ түрмэдэ һуужа байна ха юмбиб. ²¹ Ажал хэрэгүүд тухаймни, хэр байһан тухаймни мэдээсэл, нам тухай бүхы һонинуудые таанадта манай инаг хайрата дүү, Дээдын Эзэнэй үнэн сэхэ албатан Тихик дуулгаха. ²² Би Тихигые таанадта манай ажабайдал тухай дуулгахыень, таанадые урмашуулхыень ябуулааб. ²³ Эсэгэ Бурхан болон Дээдын Эзэн Иисус Христос бүхы һүзэглэгшэ аха дүүнэртэ амгалан байдал, хайра дуран, этигэл һүзэг үршѳѳжэ байһай! ²⁴ Манай Дээдын Эзэн Иисус Христосто һүнэшэгүй хайра дураар дуратай хүн бүхэн үршѳѳл хайратай байһай!