2 Фессалоникиинхидтэ

¹ Эсэгэ Бурхан болон Дээдын Эзэн Иисус Христостой нэгэдэһэн Фессалоники хотын һүзэглэгшэдэй бүлгэм, таанадые Павел, Сила, Тимофей гурбан амаршална. ² Эсэгэ Бурхан болон Дээдын Эзэн Иисус Христос таанадта үршѳѳл хайра ба амгалан тайбаниие үршѳѳг лэ! ³ Аха дүүнэрни, таанадай түлѳѳ бидэ үргэлжэ Бурханда баясхалан хүргэжэ байха ёһотойбди. Юундэб гэхэдэ, таанад бүри ехээр Бурханда һүзэглэжэ байнат, бүри ехээр бэе бэеэ хайрлажа байнат. ⁴ Тиимэһээ бидэ һүзэглэгшэдэй бүлгэмүүдэй урда таанадаар омогорхожо байнабди. Бүхы хашалан мүрдэлгэнүүдтэ, зоболонгуудта һүзэг этигэлээ алдангүй таанадай тэсэбэритэй байһандатнай омогорхожо байнабди. ⁵ Эдэ бүхэн Бурханай зарга шүүбэриин үнэн зүб байһыень батална. Саашадаа таанад Бурханай хаан орондо орохо эрхэтэй болохот, юундэб гэхэдэ, тэрэнэй түлѳѳ зобожо байнат. ⁶ Бурханай урда үнэн зүб юумэ бүтэхэнь болтогой: таанадые зобоожо байһан хүнүүд зобохо, ⁷ харин зобожо байһан таанад, мүн бидэ баясахабди. Дээдын Эзэн Иисусай һүр хүсэтэй Эльгээмэлнүүдтэйгээ тэнгэридэ аһажа байһан гал соо харагдахадань, Бурхан эдэ бүхэниие бэелүүлхэ. Бурханиие буруушааһан хүнүүдые, Һайн Мэдээсэлыень баримталдаггүй хүнүүдые Дээдын Эзэн Иисус хэһээхэ. ⁹ Дээдын Эзэнэй ерэхэ тэрэ үдэр тэдэ зон Дээдын Эзэнһээ, тэрэнэй алдарта һүр хүсэнһѳѳ илгагдаад, хэтын хэтэдэ хэһээгдэн зобохо. ¹⁰ Дээдын Эзэнэй тэрэ үдэр ерэхэдэнь, гэгээн арадынь, бүхы һүзэглэгшэдынь тэрэниие хүндэлхэ, тэрээндэ алдар соло дуудаха. Бидэнэй номноһон һургаалда этигэһэн хадаа таанадшье баһа тэрэ зоной дунда байлсахат. ¹¹ Тиимэһээл бидэ таанадай түлѳѳ ходо зальбаржа байдагбди. Зохистой ажамидархынтнай тула Бурхан таанадые дуудаа. Тиин тэрэ ажамидаралые Бурхан таанадта үршѳѳг лэ. Һайн һайхан юумэ хэжэ байха гэһэн хүсэлэнгүүдыетнай Бурхан ѳѳрынгѳѳ хүсѳѳр бэелүүлэг лэ, этигэл һүзэгтэйгѳѳр хэжэ байһан хэрэгүүдыетнай эсэстэнь хүргэг лэ. ¹² Манай Бурхан болон Дээдын Эзэн Иисус Христосой үршѳѳл хайраар Дээдын Эзэн Иисус Христосой нэрэнь таанад соо алдаршаһай, таанад тэрээн соо алдаршаһайт.

¹ Дээдын Эзэн Иисус Христосой ерэхэ болон бидэнэй тэрээнтэй хамта байха суглаан тухай хэлэбэл, аха дүүнэрни, ² Дээдын Эзэнэй үдэр ерээ гэхэдэ таанад бэлээр ухаан бодолоороо мэгдэжэ, һанаагаа бү зобооройт гэжэ гуйнаб. Тэрэ үдэр ерээ гэжэ бидэниие уридшалан хэлээ, али номноо, али үгы һаа бэшэг соогоо бэшээ гэжэ таанад бодожо магадгүйт. ³ Таанадые хэншье, ямаршье аргаар бү мэхэлэг. Бурханда эсэргүүсэһэн һүүлшын үймѳѳнэй болотор, һүйдхэл асардаг харата хүнэй элиртэр тэрэ Үдэр ерэхэгүй. ⁴ Бурханда, нангин гэжэ нэрлэгдэдэг бүхы юумэндэ тэрэ хүн эсэргүүсэхэ, тэдэ бүхэнэй дээгүүр ѳѳрыгѳѳ табиха. Тиихэдээ тэрэ бүри Бурхан Һүмэдэ һуугаад, ѳѳрыгѳѳ Бурханби гэжэ баталан хэлэхэ. ⁵ Таанадтай хамта байхадаа би эдэ бүхэн тухай хѳѳрэжэ байгаа һэм, һанана гүт? ⁶ Харата хүнэй ерэхэдэнь ямар юумэн һаалта болоноб гэжэ таанад ѳѳһэдѳѳ мэдэнэт. Тэрэ томилогдоһон сагтаал ерэхэ. ⁷ Бурханай дайсан нюусаар ажаллажа байна ха юм, гэхэдээ тэрэниие халхалжа байһан хүсэн түрүүн буураха ёһотой. ⁸ Тиигээд Бурханай дайсан элирхэ, харин Дээдын Эзэн Иисус ерэхэдээ, тэрэниие аманайнгаа амисхалаар алаха, ѳѳрынгѳѳ һаргама ялагар байдалаар тэрэниие һүнѳѳхэ. ⁹ Бурханай дайсан шолмосой хүсэ барижа ерэхэ, тиигээд элдэб янзын хуурмаг гайхамшагта үзэгдэлнүүдые, дүлгэ тэмдэгүүдые үзүүлжэ, ¹⁰ үхэлдэ хүртэхэ хүнүүдтэ элдэб янзын мэхэ гохо хэрэглэхэ. Ѳѳһэдыгѳѳ абаран, үнэн зүб юумэндэ этигээгүй, дурлаагүй зон үхэхэ. ¹¹ Тэрэнэйнь түлѳѳ Бурхан тэдэ зониие эндүүрүүлхэ аргатай хүсэ эльгээхэ, тиигээд тэдэ зон хуурмаг юумэндэ этигэжэ байха. ¹² Һүүлдэнь үнэн зүб юумэндэ этигээгүй, харин нүгэлтэ юумэ үйлэдэхэ дуратай байһан хүн бүхэн буруушаагдаха. ¹³ Дээдын Эзэндэ инаг хайрата байһан аха дүүнэрни, бидэ таанадай түлѳѳ үргэлжэ Бурханда баясхалан хүргэжэ байха ёһотойбди. Таанадай Нангин Һүлдын хүсѳѳр Бурханай хүнүүд боложо, үнэн зүб юумэндэ этигэһэн һүзэгѳѳрѳѳ абарагдахынтнай тула Бурхан таанадые эхинһээ нааша шэлэжэ абаа. ¹⁴ Бидэнэй таанадта номноһон Һайн Мэдээсэлэй ашаар абарагдахынтнай тула Бурхан таанадые дуудаа юм. Дээдын Эзэн Иисус Христосой алдарые хубаалсахаар тэрэ таанадые дуудаа. ¹⁵ Тиимэһээ, аха дүүнэрни, бидэнэй номноһон ба бэшэһэн һургаалнуудые баримталжа, бата бэхи байгты. ¹⁶ Маанадта дуратай, хайра үршѳѳлѳѳрѳѳ маанадые хэтын хэтэдэ урмашуулдаг, бата найдабари үршѳѳдэг Эсэгэ Бурхамнай болон манай Дээдын Эзэн Иисус Христос ѳѳрѳѳ ¹⁷ һанааетнай заһажа, һайн һайхан үйлэнүүдые ходо хэжэ, хэлэжэ байхаартнай таанадые батажуулаг лэ.

¹ Аха дүүнэрни, түгэсхэлдэнь иимэ юумэн хэлэхэ байнаб: Дээдын Эзэнэй һургаал таанадай дунда яажа таража байнаб, тон тиигэжэл саашадаа таража, алдаршажа байхын тула таанад бидэнэй түлѳѳ зальбаржа байгты. ² Бидэниие нүгэлтэ, хуурмаг хүнүүдһээ зайсуулжа байхыень баһа Бурханда зальбаржа байгты. Хүн бүхэн Бурханай Үгэдэ үнэн сэхэ байдаггүй ха юм. ³ Гэхэдэ Дээдын Эзэн этигэл найдабаритай юм. Тиимэһээ тэрэ таанадые батажуулжа, шолмосһоо аршалжа байха. ⁴ Таанад бидэнэй захирһан юумые хэхэт, саашадаашье хэжэ байхат гэһэн хатуу этигэл Дээдын Эзэн бидэндэ үгэжэ байна. ⁵ Бурханай хайра дурые мэдэрүүлжэ, Христосой ерэхые хүлеэхэ тэсэбэри Дээдын Эзэн таанадта үршѳѳг лэ. ⁶ Аха дүүнэрни, бидэнэй үгэһэн захяа заабариие сахидаггүй, журамгүй һүзэглэгшэдһѳѳ зайсажа байгты гэжэ Дээдын Эзэн Иисус Христосой нэрэ алдараар таанадтаа захиран ханданабди. ⁷ Бидэнэйл хэһэн юумые һажаажа хэхэ ёһотойгоо таанад ѳѳһэдѳѳшье һайн ойлгоно ха юмта. Таанадтай хамта байхадаа бидэ журам сахидаг бэлэйбди. ⁸ Бидэ хэнээшье туһаламжые түлѳѳһэгүй абадаггүйбди. Таанадай хэндэшье ашаан болохогүй гэжэ бидэ үдэр һүнигүй ажалладаг бэлэйбди. ⁹ Туһаламжа эрихэ эрхэгүй байһандаа бидэ тиигээ бэшэбди, харин таанадта һажаажа байха жэшээ харуулхын тула тиигэжэ ажаллажа байгаабди. ¹⁰ Бидэ таанадаар суг байхадаа, «Ажаллаха дурагүй хүн эдихэ ёһогүй» гэжэ хэлэдэг бэлэйбди. ¹¹ Таанадай дунда журам сахидаггүй, юушье хэдэггүй, гансал ондоо хүнүүдэй хэрэгтэ оролсожо байдаг хүнүүд бии гэжэ дуулаһан хадаа эдэ бүхэниие хэлэнэбди. ¹² Тэдэ зониие дарууханаар амидаржа, ѳѳһэдѳѳ ажаллажа, ѳѳһэдыгѳѳ тэжээжэ байхыень Дээдын Эзэн Иисус Христосой нэрэ алдараар бидэ уряалжа, идхажа байнабди. ¹³ Аха дүүнэрни, таанад ходол һайн юумэ хэжэ ябагты. ¹⁴ Энэ бэшэг соогоо захиһан үгэнүүдыемнай дуулаха дурагүй хүнүүд байжа магадгүй. Тиигэбэл таанад тэдэ хүнүүдэй эшэжэ улайхын тула тэдэниие ажаглажа байгаад, тэдэнээр харилсангүй байгаарайт. ¹⁵ Тиихэдээ тэдэндэ дайсадта адли бү хандаарайт, харин аха дүүнэрээ һургажа байһандал ухаан заажа байгаарайт. ¹⁶ Амгалан тайбанай эхин болохо Дээдын Эзэн ѳѳрѳѳ таанадта хододоо бүхы юумэндэ амгалан тайбаниие үршѳѳжэ байг лэ. Дээдын Эзэн та бүхэнтэй оршожо байг лэ. ¹⁷ Ѳѳрын гараар би энээниие бэшэнэб: Павел таанадые амаршална. Иимэ арга бүхы хандалгануудаймни бэлгэ тэмдэг болодог юм. Иигэжэл би бэшэдэг хүм. ¹⁸ Дээдын Эзэн Иисус Христосой үршѳѳл хайра та бүхэнтэй оршожо байг лэ.