2 Пётрой

¹ Манай Бурхан ба Абарагша болохо Иисус Христосой үршѳѳһэн үнэн сэдьхэлэй ашаар маанадтал адли этигэл һүзэгтэй болоһон хүнүүд, таанадта Иисус Христосой зараса болон элшэн Симон Пётр бэшэнэ. ² Манай Бурхан ба Дээдын Эзэн Иисусые мэдэрһэнэйтнай ашаар Бурханай үршѳѳл хайра, амгалан тайбан та бүхэнтэй элбэг дэлбэг байхань болтогой! ³ Бурханай эрхэ мэдэлээр ажамидаржа байхымнай тула тэрэниие мэдэрһэнэймнай ашаар Иисусһаа эхитэй Бурханай хүсэн бүхы хэрэгтэй юумые маанадта үгѳѳ. Бурхан алдараараа болон буян хэшэгээрээ хубаалсахын тула бидэниие дуудаа, ⁴ тэдэнэйнгээ ашаар бидэндэ агууехэ, ехэ үнэтэй найдуулга үгѳѳ. Энэ дэлхэйн хүсэлэнгүүдтэй холбоотой үхэлые дабажа, Бурханай ажамидаралаар ажаһуухынтнай тула энэ найдуулга үгтѳѳ юм. ⁵ Тиимэһээл таанад һайн һайхан хэрэгүүдээрээ һүзэг этигэлээ бэхижүүлхые бүхы хүсэ шадалаараа оролдогты, һайн һайхан хэрэгүүдһээ гадна эрдэм ухаантай байхые, эрдэм ухаантай байхаһаа гадна бэеэ бариха аргатай, бэеэ барихаһаа гадна тэсэбэритэй байхые, тэсэбэритэй байхаһаа гадна Бурханда ѳѳрыгѳѳ зорюулан ажамидархые, Бурханда ѳѳрыгѳѳ зорюулан ажамидархаһаа гадна аха дүүнэрэй найрамдалтай, аха дүүнэрэй найрамдалһаа гадна хайра дуратай байхые бүхы хүсэ шадалаараа оролдожо байгты. ⁸ Иимэ һайн һайхан шанарнуудаа бэхижүүлжэ байбалтнай, манай Дээдын Эзэн Иисус Христосые мэдэрхэдэ тэдэтнай таанадые үрэ дүнгүй, аша туһагүй байлгахагүйл. ⁹ Харин иимэ шанарнуудгүй хүнүүд холо харадаггүй һохорнууд юм: урданайгаа нүгэлнүүдһээ аршалагдаһанаа мартажархидаг юм. ¹⁰ Тиимэһээл, аха дүүнэр, Бурханда дуудуулһанаа, шэлэгдэжэ абтаһанаа баталхые һайса оролдогты. Тиигэжэ байбал таанад зүб замһаа хадуурхагүйт. ¹¹ Тиигэбэлтнай манай Дээдын Эзэн, Абарагша Иисус Христосой мүнхын хаан орондо орохо бүрин эрхэ таанадта үгтэхэл. ¹² Эдэ бүгэдые мэдээд, таанадта үгтэһэн үнэн зүбые хатуу баримталжа байгаашье һаатнай, би эдэниие таанадта дахин дахин һануулжа байхаб. ¹³ Амиды ябаха хаһадаа эдэ бүгэдые таанадта ходо һануулжа байхань зүб гэжэ бодоноб. ¹⁴ Ушарынь юуб гэбэл, мүнхынгѳѳ гэртэ мордохо сагни ойртоо гэжэ би мэдэнэб, манай Дээдын Эзэн Иисус Христосшье тиигэжэ намда хэлээ. ¹⁵ Үхэһэншье хойномни хэдыдэшье эдэ бүгэдые һанажа байхынтнай тула би бүхы хүсэ шадалаа үгэхэб. ¹⁶ Манай Дээдын Эзэн Иисус Христосой заларан ерэхэ тухай хэлэхэдээ бидэ хэн нэгэнэй зохёоһон үльгэрнүүдые дабтаагүйбди. Бидэ ѳѳһэдѳѳ тэрэнэй һүр жабхалангые үзэһэн гэршэнэр байгаабди. ¹⁷ «Энэ минии дуратай Хүбүүн, би тэрэниие һайшаанаб» гэжэ Бурханай Агууехэ Алдарай дуугай һонортонь хүрэхэтэйнь зэргэ Бурхан Эсэгэһээ нэрэ түрэдэ, алдар солодо хүртэхэдэнь бидэ байгаа һэмди. ¹⁸ Тэрээнтэй хамта нангин хада дээрэ байхадаа, тэнгэриһээ бууһан энэ Бурханай дууе бидэ ѳѳһэдѳѳ дуулаа һэмди. ¹⁹ Тиимэһээ таанад лүндэншэдэй айладхаһан юумэнүүдтэ бүришье ехээр этигэжэ байгты. Үдэр мандаад, үглѳѳнэй толон зүрхэ сэдьхэлдэтнай бадарха үе саг болотор харанхы газарта аһажа байһан зуладал адли лүндэншэдэй үгэнүүдтэ анхаралаа хандуулбал, таанад зүб юумэ хэхэт. ²⁰ Нангин Бэшэгтэ хэлэгдэһэн лүндэншэдэй үгэнүүдые хүн ѳѳрѳѳ тайлбарилжа шадахагүй гэжэ таанад нэн түрүүн һанажа байгты. ²¹ Юундэб гэхэдэ, нэгэшье лүндэншэ ѳѳрынгѳѳ дура хүсэлѳѳр уридшалан хэлээгүй, харин Нангин Һүлдѳѳр хүтэлүүлэгдэн Бурханай үгэ айладхадаг байгаа.

¹ Урдань израильшуудай дунда хуурмаг лүндэншэдэй бии болодогтол адляар таанадай дунда хуурмаг һургагшад байха. Тэдэнэр зүб замһаа хадууруулдаг хуурмаг һургаалнуудые нюусаар асарха, тэдэниие эрхэ сүлѳѳтэй болгоһон Дээдын Эзэнһээ арсаха, тиигэжэ тэдэнэр ѳѳһэдтѳѳ түргэн хосорол олохо. ² Олон хүнүүд тэдэнэрэй бузар хэрэгүүдые һажааха, тиигэжэ Үнэн бодото зам муушалха шалтаг тэдэнэр бусад зондо үгэхэ. ³ Тэдэ хомхой хуурмаг һургагшад, зохёоһон үльгэрнүүдээ таанадта хѳѳрѳѳд, нилээн олзо ѳѳһэдтѳѳ олохо. Гэхэтэй сасуу хэһэн хэрэгүүдэйнь түлѳѳ хэһээлтэ үни гэһээр бэлэн хүлеэжэ байна, тэдэнэй үхэлынь удахагүй. ⁴ Бурханай Эльгээмэлнүүдэйшье нүгэл хэхэдэ Бурхан тэдэниие хайрлаагүй юм, Зарга сүүдэй Үдэрэй ерэтэр тэдэниие тамада мүнхын харанхыда хүлеэд барижа байгаа. ⁵ Бурхан урдын хүнүүдыешье хайрлаагүй, муу муухай ябадал гаргагшадые уһан галабаар һүйдхѳѳ юм. Тиихэдэ Бурханда үнэн зүбѳѳр хандаха тухай һургадаг Нойе, тэрээнтэй хамта үшѳѳ долоон хүнэй амиие үлээгѳѳ юм. ⁶ Муу муухай ябадал гаргадаг зониие һэргылэн, Бурхан Содом ба Гоморро хотынхидые гэмнээд, үнэһэ болгон усадхаа. ⁷ Зүгѳѳр тэрэ зальхай забхай хүнүүдэй дунда арай шамай тэсэжэ байһан үнэн сэдьхэлтэй Лотые абараа. ⁸ Тэрэ үнэн сэдьхэлтэн тэдэ зоноор ажамидархадаа, нүгэлтэ үйлэ хэрэгүүдыень харахадаа, дуулахадаа, үдэр бүхэн аргагүй ехээр тулижа байгаа бэлэй. ⁹ Үнэн сэдьхэлтэй зониие туршалгануудһаа яажа аршалхые, муу муухай ябадал гаргагшадые Зарга шүүбэриин Үдэрэй хэһээлтэ хүрэтэр яажа һахижа байхые Дээдын Эзэн мэдэхэ юм гэжэ урда хэлэгдэһэн харуулна. ¹⁰ Илангаяа энэнь махабад бэеынгээ муу муухай хүсэлэнгүүдэй мэдэлдэ байдаг, Бурханай эрхэ засагые тоодоггүй хүнүүдтэ хабаатай юм. Тэдэ убайгүй, һэшхэлгүй хуурмаг һургагшанар огторгойншье хүсэнүүдые доромжолхоёо айдаггүй. ¹¹ Эдэ хуурмаг һургагшадта ороходоо нилээн хүсэтэй, һүр жабхалантай Бурханай Эльгээмэлнүүдшье тэдэ огторгойн хүсэнүүдые доромжолдоггүй, Дээдын Эзэнэй урда тэдэниие зэмэлдэггүй. ¹² Харин эдэ хүнүүд гансал зүнгѳѳрѳѳ мэдэдэг, баригдажа алуулхын тула түрэдэг зэрлиг амитадтал адли юм: ухаанаараа ойлгохо аргагүй юумэнүүдээ хардадаг юм, тиимэһээ тэдэ зэрлиг амитадтал адли үхэхэ. ¹³ Тэдэнэр хүнүүдтэ хүргэһэн гэмээ эдлэнэ. Тэдэнэр үдэр дунда найрлаха, архидаха, һамгадаар орёолдохонь зохистой гэжэ тоолодог. Тиимэһээ таанадтай хамта хоол барихадаа тэдэнэр ѳѳһэдынгѳѳ худал хуурмаг ябадалаар сэдьхэл ханажа, танай нэрэ түрые унагаадаг, бузарладаг юм. ¹⁴ Тэдэнэй нюдэдынь ташаяан хүсэлэнгѳѳр дүүрэнхэй, тэдэ нүгэл хэжэ бэеэ ханахагүй. Тэдэнэр тулгагүй ахир хүнүүдыел зангадаа оруулдаг. Тэдэнэй сэдьхэлынь хомхолзожо һуршанхай. Тэдэнэр үхэхэл табилантай юм. ¹⁵ Тэдэ сэхэ замһаа хадуураад, тѳѳришэбэ; буруу юумэ хэжэ, мүнгэ абаха дуратай байһан Веорой Валаам хүбүүнэй замаар ябаба. ¹⁶ Гэбэшье Валаамай нүгэлынь элирүүлэн шүүмжэлэгдээ: хэлэгүй элжэгэнь хүндэл адли дуугаржа, лүндэншын тэнэг юумэ хэхэ гэжэ байхадань зогсоогоо юм. ¹⁷ Тэдэ хүнүүд хатаһан булагуудта, шуурганда туугдаһан үүлэнүүдтэл адли дэмы юм: Бурхан тэдэндэ хаб харанхыда газар бэлдээд байна. ¹⁸ Бардам хооһон үгэнүүдые хэлэн, тэдэнэр буруу замда ороһон хүнүүдһээ арай шамай холодоһон хүнүүдые бэеын хурисалай, зальхайралай зангада оруулдаг. ¹⁹ Ѳѳһэдѳѳ үхэлэй барлагууд байһан мүртѳѳ мэхэдээ оруулһан хүнүүдтэ эрхэ сүлѳѳ амалдаг. Бидэниие ямар юумэн иланаб, бидэ тэрэ юумэнэй барлагууд болонобди. ²⁰ Манай Дээдын Эзэн, Абарагша Иисус Христосые мэдэрээд, энэ дэлхэйн бузарнуудһаа мултаржа шадаһан аад, һүүлдэнь дахин тэдэ хүсэнүүдтэ баригдажа илагдаһан хүнүүд һүүлэй һүүлдэ түрүүшынхиһээ бүри муу нүхэсэлдэ ороно гээшэ. ²¹ Үнэн сэдьхэлтэнэй замые мэдээд, ѳѳһэдтэнь даалгагдаһан Бурханай нангин захяа заабариие сахихаяа болинхаар, тэдэ хүнүүдэй тэрэ замые юрэдѳѳ мэдэнгүй байһань холо дээрэ байгаа. ²² «Нохой бѳѳлжэһэндѳѳ бусажа ошодог», «Угаагдаһан гахай һѳѳргѳѳ шабар шабхайда хэбтэхэеэ ошодог» гэһэн үнэн зүб оньһон үгэнүүдтэ тэдэ хүнүүдэй тушаа хэлэгдэнэ гээшэ.

¹ Хайрата аха дүүнэрни, таанадта хоёрдохиёо бэшэнэб. Түрүүн бэшэһэн юумэнүүдээ һануулан, зосоотнай арюун һанал бодолнуудые түрүүлхэ гэжэ оролдобоб. ² Гэгээн лүндэншэдэй хэлэһэн үгэнүүдые, элшэнэрэйтнай таанадта дамжуулһан Дээдын Эзэнэй ба Абарагшын захяа заабариие һануулха хүсэлтэй байгааб. ³ Нэн түрүүн таанад һүүлшын үдэрнүүдтэ хүсэлэнгүүдэйнгээ мэдэлдэ байдаг хүнүүд ерэхэ гэжэ мэдэжэ байха ёһотойт. Тэдэнэр таанадые наада барин, ⁴ «Ерэхэб гэжэ үгѳѳ таанадта үгѳѳ бэшэ һэн гү? Тиигээд хаанаб тэрэтнай? Үбгэ эсэгэнэрнайшье наһа бараа, теэд бүхы юумэн юртэмсэ дэлхэйн бүтээгдэһэнһээ хойшо тэрэл хэбээрээ байна бэшэ аал?» – гэжэ хэлэхэ. ⁵ Эртэ урда сагта Бурханай ѳѳрынгѳѳ үгѳѳр огторгой бүтээһэниие, уһые хумяад ба уһа тойруулаад хуурай газар бии болгоһониие, тэрэ уһанһаа боложо тэрэ үеын газар дэлхэй уһан галабта абтаад һүнѳѳгдэһэниие тэдэнэр зорюута анхарангүй байна. ⁷ Харин мүнѳѳ оршожо байһан огторгой дэлхэй хоёр галда һүнѳѳлгэхын тула тэрэл Бурханай үгѳѳр хадагалагдажа байгаа юм. Тэдэнэр Бурханиие буруушааһан хүнүүдэй шүүбэрилүүлжэ хосорхо Зарга шүүбэриин үдэрэй ерэтэр хадагалагдажа байха. ⁸ Хайрата аха дүүнэрни, Дээдын Эзэндэ нэгэ үдэр мянган жэлнүүдтэ адли, тиин мянган жэлнүүд нэгэ үдэртэл адли юм. Энээниие бү мартаарайгты. ⁹ Дээдын Эзэн найдуулһан юумэеэ бэелүүлхэеэ яаранагүй гэжэ зарим хүнүүд һанадаг. Үнэндѳѳ болбол тэрэ маанадай нэгэшье хүнэй хосоронгүй, нүгэлѳѳ мэдэрэн гэмшэхыемнай тэсэбэритэйгээр хүлеэжэ байгаа юм. ¹⁰ Гэхэтэй сасуу Дээдын Эзэнэй Үдэр хулгайшандал адли һанамсаргүй байхада ерэхэ. Тэрэ Үдэр огторгой шангаар дуугаран үгы болохо, огторгойдо байһан нара, һара, одо мүшэд шатажа һүнэхэ, газар дэлхэй болон дээрэнь оршоһон бүхы юумэнүүд галда шатан усадхагдаха. ¹¹ Эдэ бүхы юумэнүүдэй иимэ аргаар һүнэжэ байхада таанад ямархан хүнүүд байха ёһотойбта? Таанад гэгээн амидаралтай, ѳѳһэдыгѳѳ Бурханда зорюулһан байха ёһотойт, ¹² огторгойн шатажа һүнэхэ, огторгойдо байһан нара, һара, одо мүшэдэй галда хайлаха Бурханай тэрэ Үдэрые хүлеэжэ, тэрэ үдэрые ойртуулхын тула бүхы шадалаараа оролдохо ёһотойт. ¹³ Тиихэдэ бидэ Бурханай найдуулһан ёһоор ажамидарха шэнэ огторгой ба шэнэ газар дэлхэй хүлеэжэ байнабди. ¹⁴ Тиимэһээ, хайрата аха дүүнэрни, тэрэ Үдэрые хүлеэжэ байхадаа, Бурханай урда ямаршье бузаргүй, арюун сэбэр байхые, Бурхантай энхэ тайбан оршожо байхые оролдыт даа. ¹⁵ Бидэндэ абарагдаха боломжо үгэн, манай Дээдын Эзэн аргагүй удаан тэсэжэ байна гэжэ бодогты. Тон тиигэжэл хайрата Павел аха Бурханай хайрлаһан ухаанай хүсѳѳр таанадта бэшээ бэлэй. ¹⁶ Павел хандалга бүхэндѳѳ энээн тухай хэлэнэ. Тэрэнэй хандалганууд соо ойлгоходо хүшэр юумэнүүд баһа бии, тэрэнииень үндэһэ һууригүй, харанхы мунхаг хүнүүд Нангин Бэшэгэй ондоошье номуудтал адли буруугаар, хазагайруулан тайлбарилдаг юм. Тиигэжэ тэдэ зон ѳѳһэдтѳѳ үхэл бэдэрнэ гээшэ. ¹⁷ Хайрата аха дүүнэрни, таанад энээн тухай мэдэн болгоомжотой байгты, эдэ Бурханиие буруушааһан хүнүүдтэл адли үндэһэ һууригүй зон бү бологты. ¹⁸ Зүгѳѳр, манай Дээдын Эзэн ба Абарагша Иисус Христосые саашадаашье мэдэржэ, үршѳѳл хайрадань хүртэжэ байгты. Тэрэ мүнѳѳшье, хэтын хэтэдэшье алдар солотой байһай! Болтогой!