1 Тимофейдэ

¹ Этигэл һүзэгѳѳрѳѳ үнэн сэхэ хүбүүмни болоһон Тимофей, шамайе би Павел амаршалнаб. Би манай Абарагша Бурханай ба манай этигэл найдал болоһон Дээдын Эзэн Христос Иисусай захиралтаар Христос Иисусай элшэн болоһон байгаа хүнби. Бурхан Эсэгэ болон манай Дээдын Эзэн Иисус Христос шамда һайн һайханиие, үршѳѳл хайра ба амгалан тайбаниие үршѳѳг лэ. ³ Македони ошоходоо би шамайе Эфес хотодо үлэхыешни гуйгаа һэнби. Зарим хүнүүд тэндэ хуурмаг юумэндэ һургажа байна, ши тэдэниие зогсоохо ёһотойш. ⁴ Арсалдаан лэ гаргадаг үльгэрнүүдээ, дууһашагүй угай бэшэгүүдээ хѳѳрэхэеэ болигты гэжэ тэдээндэ захираарай. Һүзэгынь Бурханай түсэбтэй таарахагүй байһаниинь мэдээжэ. ⁵ Һүзэглэгшэдэй бэе бэедээ дуратай байхые урмашуулхань тэрэ захиралтын зорилго болоно. Тиимэ хайра дуран үнэн зүрхэнһѳѳ, арюун сэбэр һанаанһаа, бодото һүзэг этигэлһээ эхи абадаг. ⁶ Зарим хүнүүд сэхэ замһаа буруу замда ороод, дэмы юумэ шашаад байна. ⁷ Тэдэнэр Бурханай хуулиин һургагшад байха һанаатай аад, ѳѳһэдынгѳѳ хэлэһэншье юумэ, баталһаншье юумэеэ ойлгоногүй. ⁸ Хуули хэрэглэхэ ёһотой аргаар лэ хэрэглэбэл, тэрэ һайн үрэ дүнтэй байдаг юм гэжэ бидэ мэдэнэбди. ⁹ Хуули гээшэмнай үнэн сэдьхэлтэндэ зорюулагдаһан бэшэ, харин хуули эбдэдэг, Бурханай мэдэлдэ оросогүй зондо, Бурханда шүтэдэггүй, нүгэл хэгшэ зондо, Бурханииешье, нангин юумэнүүдыешье тоодоггүй зондо, эсэгэ эхэеэ алаһан хүнүүдтэ, алууршадта, ¹⁰ зальхай ба ташаяан ябадалтай зондо, хүнүүдые хулуудаг, худал юумэ хэлэдэг, хуурмаг гэршэлгэ үгэдэг зондо, үнэн зүб һургаалда зохихогүй элдэб юумэ хэдэг зондо зорюулагдаһан байгаа юм гэжэ һанажа байха хэрэгтэй. ¹¹ Һайн Мэдээсэлэй үнэн зүб һургаалые намда алдарта ба үршѳѳлтэ Бурхан айладхажа байхыемни даалгаһан байна. ¹² Намда ажаллаха хүсэ шадал үгэһэн Дээдын Эзэн Христос Иисуста би баясхалан хүргэжэ байнаб. Намайе найдабаритай гэжэ тоолоод, ѳѳртэнь алба хэхыемни табиһандань баясхалан хүргэнэб. ¹³ Урдань би тэрэниие доромжолжо, хашан мүрдэжэ, гомдохоожо байгааб. Гэхэдээ һүзэг этигэлгүй байхадаа би тиимэ юумэ хээб. Юу хэжэ байһанаа ойлгоногүй байһандамни, Бурхан намайе хүлисѳѳ. ¹⁴ Дээдын Эзэн Иисус Христосой ашаар намда буян хэшэгээ хайрлаа. Тиигэжэ би Дээдын Эзэндэ һүзэглэдэг, тэрээндэ ба тэрэнэй хүнүүдтэ дуратай болоо хүм. ¹⁵ Иисус Христос нүгэлтэдые абарха гэжэ газар дэлхэйдэ ерээ гэдэгынь үнэн зүб юм, тиигэжэ хэлэһэндэ этигэжэ боломоор юм. Би болбол тэдэ нүгэлтэдэй эгээн мууниинь байгааб. ¹⁶ Бурхан намайе үршѳѳл хайрадаа хүртѳѳгѳѳ. Ушарынь юуб гэбэл, нүгэлтэдэй мууниинь байһан намда Христос Иисус ехэл тэсэбэритэй байгаа. Хүн зон тэрээндэ һүзэглэжэ, һүүлдэнь мүнхын амидаралда хүртэхынь тулада Христос тиимэ тэсэбэри үзүүлээ юм. ¹⁷ Хэтэдээ амиды, нюдэндэ харагдадаггүй мүнхын Хаан, ори ганса Бурхан хэтын хэтэдэ хүндэтэй, алдар солотой байг лэ. Болтогой! ¹⁸ Тимофей хүбүүмни, түрүүн шам тухай уридшалан хэлэгдэһэнэй ёһоор би шамдаа иимэ юумэ даалганаб. Һайн тэмсэхын тула тэдэ уридшалан хэлэгдэһэн үгэнүүдые зэбсэгтэ мэтэ ашаглаарай, ¹⁹ тиихэдэ һүзэгѳѳ хадагалжа, һэшхэлтэй байгаарай. Зарим хүнүүд һэшхэлээрээ болонгүй һүзэгѳѳ алдаа. ²⁰ Тэдэнэй дунда Именей ба Александр байна. Бурханиие доромжолхоёо болихынь тула би тэдэниие сатанагай гарта үгэжэ хэһээгээб.

¹ Бурханда һүгэдэн, үнэн зүбѳѳр ѳѳһэдыгѳѳ абажа, аажам тэнюун, амгалан тайбан ажамидархын тула бүхы хүн зоной, бүхы хаануудай, бүхы зонхилжо захиржа байгаа хүнүүдэй түлѳѳ таанар Бурханда зальбарагты, гуйлта баригты, мүргэгты, баясхалан хүргэгты гэжэ нэн түрүүн таанадые гуйнаб. ³ Хүн бүхэн абарагдажа, үнэн зүбые мэдэрэг гэжэ хүсэһэн манай Абарагша Бурханда эдэ бүхэн һайшаагдаха, таатай байха. ⁵ Ушарынь юуб гэхэдэ, Бурхан ори ганса юм. Тиихэдэ Бурханай болон хүнүүдэй хоорондо гансал зууршалагша бии. Тэрэнь бүхы хүн түрэлтэниие абарха гэжэ ѳѳрыгѳѳ үргэл болгоһон Христос Иисус гэдэг хүн юм. Бурхан ѳѳрынгѳѳ тогтооһон сагта тэрээниие харуулаа. ⁷ Тиимэһээ һүзэг ба хайра дурын үгэ айладхахаар һургагша ба элшэнээр табигдан, би бусад арадуудта эльгээгдэһэн байгааб. Би худал юумэ хэлэнэгүйб, би үнэниие хэлэнэб. ⁸ Бурханда ѳѳрыгѳѳ зорюулһан хүн бүхэнэй ямаршье газарта уур сухалгүйгѳѳр, хэрүүлгүйгѳѳр гараа ѳѳдэнь һарбайгаад, зальбаржа байхыень хүсэнэб. ⁹ Эхэнэрнүүдшье хубсаһа хунартаа бодолтойгоор хандажа, даруухан, зохидоор хубсалжа байг. Үһэеэ гоёохо, алтан зүүдхэлээр гү, али эрдэни субадаар гү, али үнэтэй хубсаһаар ѳѳһэдыгѳѳ шэмэглэхэеэ оролдонгүй, ¹⁰ харин шажан Бурханда зорюулһан эхэнэрнүүдтэл зохихо үлзытэй һайхан үйлэ хэрэгүүдээр ѳѳһэдыгѳѳ шэмэглэжэ байхыень хүсэжэ байнаб. ¹¹ Эхэнэр хүн абяагүй, номгоноор юумэндэ һуража байха ёһотой. ¹² Эхэнэрэй үбгэеэ һургахыень гү, али тэрээндээ захирхыень би хорижо байнаб. Эхэнэр хүн дуугүй байха ёһотой. ¹³ Юундэб гэхэдэ, түрүүн Адам бүтээгдэжэ, һүүлдэнь Ева бүтээгдэһэн байгаа. ¹⁴ Тиихэдээ могой Адамые мэхэлээгүй, харин эхэнэрыень лэ мэхэлһэн байгаа, тиигэжэл эхэнэрынь Бурханай хуулиие эбдээ юм. ¹⁵ Гэхэтэй сасуу эхэнэр хүн Бурханда һүзэглэжэ, бусад зондо дуратай, арюун нангин ажамидаралтай байбал, үхибүү түрэжэ абарагдаха юм.

¹ Һүзэглэгшэдэй бүлгэмэй хүтэлэгшэ болохые һанаһан хүн дэмбэрэлтэ һайхан хэрэг һанаашалаа гэдэгынь үнэн гээшэ. ² Гэхэтэй сасуу һүзэглэгшэдэй бүлгэмэй хүтэлэгшэ болбол ямаршье гэмгүй, гансал һамгатай, ухаансар, бэеэ баридаг, ехэ томоотой, аяншадые угтажа абадаг, хүнүүдые һургаха абьяастай, ³ архиншан бэшэ, дошхон зангүй, номгон даруу зантай, эб найрамдалда дуратай, алта мүнгэ тоодоггүй, ⁴ гэр бүлэдѳѳ һанаагаа табидаг хүн байха ёһотой, тэрэнэй үхибүүдынь үгыень дууладаг, хүндэлдэг байха ёһотой. ⁵ Гэр бүлэдѳѳ һанаагаа табидаггүй хүн яажа Бурханай һүзэглэгшэдэй бүлгэмые анхаржа шадахаб. ⁶ Тэрэ хүн Дээдын Эзэндэ һаял һүзэглэһэн зоной дундаһаа табигдаха ёһогүй, тиигээ һаа тэрэ хамараа дээшэнь үргѳѳд, һүүлдэнь шолмостой хамта буруушаагдажа магадгүй. ⁷ Тиихэдээ муугаар хэлүүлхэгүйн тула, шолмосой һабарта орохогүйн тула тэрэ хүн һүзэглэгшэдэйнгѳѳ бүлгэмһѳѳ гадна хүн зондо хүндэтэй байха ёһотой. ⁸ Һүзэглэгшэдэй бүлгэмэй туһалагшад баһал һайхан зантай, билдагуушалдаггүй хүнүүд байха ёһотой. Тэдэ архи дарһанда болон алта мүнгэндэ шунахай бэшэ, ⁹ һүзэг этигэлэйнгээ элирүүлһэн үнэн зүбые һэшхэлтэйгээр баримталха ёһотой. ¹⁰ Тиимэ хүнүүдые түрүүн туршаад, тэдэнэй шалгалтаяа бариһан хойнонь алба хэхэ эрхэ тэдэндэ олгожо болохо юм. ¹¹ Тэдэнэй һамгадыньшье һайхан зантай, хоб-жэб зѳѳдэггүй, архинша бэшэ, ямаршье юумэндэ этигэл найдабаритай байха ёһотой. ¹² Һүзэглэгшэдэй бүлгэмэй туһалагша гансал һамгатай байха, үхибүүдтээ, гэр бүлэдѳѳ һанаагаа табижа байха ёһотой. ¹³ Ажалаа һайн хэжэ байһан туһалагшад нэрэ түрэтэй болохо, Христос Иисуста найдаһан һүзэг тухайгаа зоригтойгоор хэлэхэ аргатай байха. ¹⁴ Энэ бэшэгээ бэшэжэ һуухадаа, шамда һаядаа ошохоб, шамтай уулзахаб гэжэ найданаб. ¹⁵ Хэрбээ минии һаатабал, үнэн зүбэй тулга ба түшэг болохо амиды Бурханай һүзэглэгшэдэй бүлгэмдэ, али Бурханай гэртэ яажа бидэ ѳѳһэдыгѳѳ абажа ябаха ёһотойбибди гэжэ энэ бэшэг сооһоо мэдэжэ байхаш. ¹⁶ Һүзэг этигэлэймнай элирүүлһэн үнэн зүбынь үнэхѳѳрѳѳ агууехэ юм: Хүнэй дүрсэ дүрсэлэн Бурхан ерээ, Тэрэнэй үнэн зүб байһыень Нангин Һүлдэ харуулаа, Тэрэ ѳѳрыгѳѳ Эльгээмэлнүүдтэ харуулаа. Арадуудай дунда тэрээн тухай номноо, бүхы газар дэлхэйн зон тэрээндэ этигээ, Тиигээд тэрэ тэнгэридэ дэгдэһэн байгаа.

¹ Һүүлшын үдэрнүүдтэ зарим хүнүүд этигэл һүзэгѳѳ алдаха, ада шүдхэрнүүдэй альбанда орохо, шолмосой һургаалые анхарха юм гээд Нангин Һүлдэ элеэр хэлэнэ. ² Тэрэ хуурмаг һургаал халуун түмэртэ хайруулжа һэшхэлээ алдаһан билдагууша худалшадай оролдолгоор тараха юм. ³ Тэдэ зон гэрлэхые, зарим юумэ эдихые хорихо. Зүгѳѳр Бурхан тэрэ эдеэ хоолые баясхалан хүргэһэн зальбаралай һүүлдэ һүзэглэгшэдтэ, үнэн зүбые мэдэрһэн хүнүүдтэ эдихыень бүтээгѳѳ юм. ⁴ Бурханай бүтээһэн бүхы юумэн һайн, тиимэһээ ямаршье юумэнһээ арсангүй, харин баясхалангай зальбарал хүргэн абаха ёһотойбди. ⁵ Ушарынь гэхэдэ, Бурханай үгѳѳр, зальбаралаар тэдэ юумэнүүд арюудхагдана. ⁶ Иимэ заабаринуудые һүзэглэгшэдтэ үгэжэ байбал, ѳѳрыгѳѳ зорюулһан үнэн зүб һургаалаар ба һүзэг этигэлэй үгэнүүдээр һанал бодолоо дүүргэжэ, ши Христос Иисусай һайн албатан болохош. ⁷ Бурханиие буруушааһан үльгэр зугаануудһаа холодожо, Бурханай мэдэлдэ байжа һура. ⁸ Бэеын һорилго нэгэ талаһаа туһатай, гэхэдэ Бурханай мэдэлдэ байхань аргагүй ехэ туһатай юм. Юундэб гэбэл, Бурханай мэдэлдэ байһан хүн энэшье амидаралдаа, ерээдүйдэшье, Бурханай найдуулһан мүнхын амидаралда хүртэхэ. ⁹ Минии хэлэһэн үнэн зүб юм, тэрээндэ этигэжэ болохо. ¹⁰ Амиды Бурханда найдажа байһан хадаа бидэ тэмсэжэ, хүндэ ажал хэжэ байнабди. Ушарынь юуб гэхэдэ, амиды Бурхан бүхы хүн зоной, илангаяа һүзэглэгшэдэй Абарагша юм. ¹¹ Эдэ бүхэниие хүнүүдтэ захи, эдэ бүхэндэ хүнүүдые һурга. ¹² Залуухан байнаш гээд шамда хайхарамжагүйгѳѳр бү хандаг. Ши хэлэһэн үгѳѳрѳѳ, амидаралаараа, хайра дураараа, һүзэгѳѳрѳѳ, арюун сэбэрээрээ һүзэглэгшэдтэ жэшээ харуулжа байгаарай. ¹³ Шамда ошоторни, ши хүнүүдтэ Нангин Бэшэг уншажа, номножо, тайлбарилжа байгаарай. ¹⁴ Бүлгэмэй хүтэлэгшэдэй уридшалан хэлээд дээрэшни гараа табихадань, шамда абьяас бэлиг үгтэһэн байгаа. Тэрэ абьяас бэлигээ хэрэглэжэ байгаарай. ¹⁵ Хүн бүхэндэ амжалтануудайшни элеэр харагдажа байхынь тула ши эдэ үүргэнүүдээ дүүргэжэ бай, ѳѳрыгѳѳ бүрин тэдэндэ зорюула. ¹⁶ Ажабайдалдаа, һургажа байһан юумэндээ анхаралаа хандуула. Тиигэжэ байбал ши ѳѳрыгѳѳшье, ѳѳрынгѳѳ шагнагшадыешье абархаш.

¹ Наһатай хүнүүдтэ хатуу үгэ бү хэлэ, харин эсэгэдээл адляар хандажа бай. Шамһаа залуу хүбүүдтэ ѳѳрынгѳѳ дүүнэртэл адли ханда, ² эгэшэ хүндэ эжыдээл адляар ханда, ѳѳрһѳѳн дүү басагадта дүү басагандаал адли сэхэ сэбэрээр хандажа байгаарай. ³ Үнэхѳѳр гансаардажа байһан бэлбэһэн эхэнэрнүүдтэ хүндэлһэнѳѳ мэдүүлжэ байгаарай. ⁴ Хэрбээ бэлбэһэн эхэнэр үхибүүдтэй, үгы һаа аша зээнэртэй байбал, тэдэнь шажанай ёһоор анха түрүүн гэр бүлэдѳѳ дүүргэхэ ёһотой уялгануудаа дүүргэг. Тиигэжэ тэдэнэр аба эжынгээ, хүгшэн аба эжынгээ ашыень харюулха. Энэнь Бурханда һайшаагдаха. ⁵ Хойноһоонь хараха хүнгүй, үнэндѳѳ бэлбэһэн эхэнэр хүн гансал Бурханда найдажа, үдэр һүнигүй тэрэниие гуйжа, тэрээндэ зальбаржа байдаг. ⁶ Харин хүсэлэнгүүдээ хангажа байдаг бэлбэһэн эхэнэр амилжа байһаншье мүртѳѳ үхэһэнтэй адли юм. ⁷ Бэлбэһэн эхэнэрнүүдэй бусад зондо зэмэлүүлхэгүйн тула үгэһэн захяануудыемни тэдээндэ һануулжа байгаарай. ⁸ Ѳѳрынгѳѳ аба эжыдэ, илангаяа гэр бүлэдѳѳ һанаагаа табидаггүй хүн этигэл һүзэгһѳѳ арсаба, тиимэ хүн һүзэглэдэггүй хүнһѳѳ доро гээшэ. ⁹ Бэлбэһэн эхэнэрнүүдэй тоодо жаран наһа хүрѳѳгүй бэлбэһэн эхэнэрнүүдые бү оруула. Жара наһа гараһан үнэхѳѳрѳѳ бэлбэһэн эхэнэр нэгэл дахин хадамда гараһан, ¹⁰ һайн һайхан үйлэ хэрэгүүдээрээ суурхаһан байха ёһотой: үхибүүдээ һайн хүмүүжүүлһэн, аяншадые гэртээ амаруулжа байһан, бусад һүзэглэгшэдэй урда ѳѳрынгѳѳ уялгануудые дүүргэжэ, зобожо байһан зондо туһалжа, ѳѳрыгѳѳ үлзытэй һайхан хэрэгүүдтэ зорюулжа байха ёһотой. ¹¹ Залуу бэлбэһэн эхэнэрнүүдые энэ тоодоо бү оруулаарай. Тэдэ хүсэлэнгүүдээ даган, хадамда гарахые хүсэхэдѳѳ, анхан үгэһэн үгэһѳѳн арсаад, Христосһоо холододог. ¹³ Тиигэхэтэйгээ сасуу тэдэнэр айлаар зайжа, юумэ хэнгүй байжа һурадаг. Тэдэнэр гансашье юумэ хэдэггүй бэшэ, үшѳѳ үргэеэ бэлюудэдэг, хүнэй хэрэгтэ оролсодог, хэлэжэ болохогүй юумэнүүдые шашадаг юм. ¹⁴ Тиимэһээ залуу бэлбэһэн эхэнэрнүүд хадамда гараад, үхибүүдые түрѳѳд, гэрээ хараад, манай дайсадта бидэниие муулаха шалтагаан олгонгүй байхыень би хүсэжэ байнаб. ¹⁵ Юундэб гэхэдэ, зарим бэлбэһэн эхэнэрнүүд буруу замда ороод, сатанае дахана. ¹⁶ Хэрбээ Христосто һүзэглэгшэ эхэнэрнүүд гэртээ бэлбэһэн эхэнэрнүүдтэй байбал, тэдэниие һүзэглэгшэдэй бүлгэмэй ашаан болгонгүй, ѳѳһэдѳѳ тэдээндээ анхаралаа хандуулха ёһотой. Һүзэглэгшэдэй бүлгэм ори гансаараа үлэһэн бэлбэһэн эхэнэрнүүдтэл анхаралаа хандуулха ёһотой. ¹⁷ Һайн хэрэг бүтээжэ байгаа хүтэлэгшэд, аргагүй оролдосотойгоор номножо, һургажа байһан хүнүүд дабхар шагнал абаха эрхэтэй юм. ¹⁸ «Таряа хадажа байһан сарай амыень бү хаа», «Хүдэлмэришэн шагналаа абаха эрхэтэй» гэжэ Нангин Бэшэг соо бэшээтэй байдаг. ¹⁹ Хүтэлэгшые зэмэлһэн үгэнүүдые хоёр гурбан гэршэнэрэй баталха аргатайл байбал шагна. ²⁰ Бусад зоной айжа байхын тула нүгэл хэгшэдые олоной дунда шүүмжэлэн элирүүлэ. ²¹ Ямаршье юумэ хэхэдээ хүнүүдые илгангүй, нюур харангүй эдэл үгэһэн заабаринуудыемни сахижа байхыешни Бурханай, Христос Иисусай ба шэлэгдэһэн Эльгээмэлнүүдэй урда би шамайе гуйжа найжа байнаб. ²² Дээдын Эзэндэ ѳѳһэдыгѳѳ зорюулан алба хэхэ һанаатай хүнүүдые гараараа адислахаяа бү яара. Хүнүүдэй нүгэлдэ бү оролсо, ѳѳрыгѳѳ арюун сэбэрээр абажа яба. ²³ Ганса уһа бү уу. Үбдэжэ байһан хотоёо, үргэлжэ хүдэлдэг үлбэр үбшэнгүүдээ хүнгэлхын тула бага зэргэ дарһа уужа бай. ²⁴ Зарим хүнүүдэй нүгэлнүүдынь эли харагдажа, гэмнэлгэдэ сэхэ хүтэлдэг юм. Харин нүгѳѳ зариманай нүгэлнүүдынь һүүлдэ элиржэ гарадаг. ²⁵ Тон тэрээндэл адли һайн хэрэгүүдэй зариманиинь мүнѳѳ эли байна, зүгѳѳр эли бэшэ байһаниинь һүүлдэ элирэн гараха.

¹ Бурханай нэрэ алдарые, манай һургаалые хүнүүдэй муулахагүйн тула дарлалтада байһан барлагууд эзэдээ алишье талаһаань хүндэлжэ байха ёһотой. ² Христосто һүзэглэдэг эзэнэй харьяалда байһан барлаг эзэнтэйгээ аха дүүнэр байһан ушарһаа эзэнээ хүндэлхэ ёһотой. Тэрээнһээ гадна, һүзэгтэй, Бурханай хайра дурада хүртэһэн хүндэ алба хэжэ байһан хадаа бүришье оролдосотойгоор ажаллаха ёһотой юм. Ши тиигэжэл хүнүүдые һургажа, идхажа байгаарай. ³ Ондоо юумэндэ һургажа байһан, Дээдын Эзэн Иисус Христосой үнэн үгые болон манай шажанай һургаалые баримталангүй байһан хүн ⁴ юушье мэдэхэгүй омог зантай хүн гээшэ. Тиимэ хүн арсалдаа гаргажа, үгэ буляалдажа һурашанхай юм. Тэдэнь атаа жүтѳѳн, хэрүүл ама, хорон үгэ ба хуурмаг һэжэг түрүүлдэг. ⁵ Тиимэ хүнүүд үнэн зүбһѳѳ холодоһон, балартаһан ухаантай хүнүүдээр дэмы заргалдажа байдаг. Тэдэнэр зѳѳри баялигтайл болохын тула Бурханда шүтэдэг гэжэ бододог юм. ⁶ Бурханда һүгэдэхэ, бии юумээрээ сэдьхэл дүүрэн байха маанадай асари ехэ баялиг гээшэ. ⁷ Газар дэлхэйдэ бидэ юушье асараагүйбди, тиин эндэһээ юушье абажа ябаха аргагүй ха юмди. ⁸ Тиимэһээ эдеэ хоол, хубсаһа хунар байбал, бидэндэ хүрэхэ бэшэ гү? ⁹ Харин баяжахаяа һанаһан хүнүүд хорхойтолгодо абтажа, тэдэниие гай зоболондо ба үхэлдэ хүргэдэг олон тэнэг ба хорото хүсэлэнгүүдэй һабарта ородог гээшэ. ¹⁰ Хамаг муу муухай юумэн алта мүнгэндэ шунаһанһаа болодог. Алта мүнгэндэ шунаад зарим хүнүүд этигэлээ алдаа, ѳѳһэдыгѳѳ тон ехээр зобоогоо, туляагаа юм. ¹¹ Харин ши, Бурханай хүн, эдэ бүхэнһѳѳ болгоомжоло. Ши Бурханай урда үнэн сэдьхэлтэй бай, Бурханай эрхэ хүсэлые гүйсэдхэ, тэрээндэ һүзэглэжэ, хайра дура сэдьхэлдээ бадараа, тэсэбэритэй, номгон даруу зантай бай. ¹² Христосто һүзэглэн, ажамидаралдаа илалта туйлажа бай. Мүнхын амидаралай дээдын шагналда хүртэхэеэ зори. «Христос болбол Дээдын Эзэн гээшэ» гэжэ гэршэнэрэй урда хэлэхэдэшни Бурхан шамайе мүнхын амидаралда дуудаа. ¹³ Бүхы юумэндэ ами хайрлажа байһан Бурханай урда, Понтий Пиладта һүзэгѳѳ баталжа хэлэһэн Христос Иисусай урда Дээдын Эзэн Иисус Христосой ерэхэ үдэр хүрэтэр гэмнүүлхэгүйн тула заабариие үнэн сэхээр сахижа байхыешни би шамда захинаб. ¹⁵ Ори ганса Захирагша, хаануудай Хаан, эзэдэй Дээдын Эзэн болохо үршѳѳлтэ Бурхан хэрэгтэй сагта Христосой ерэхые харуулха. ¹⁶ Бурхан гансаараал мүнхэ юм, тэрэ хэнээшье хүрэхэгүй гэрэл туяада байдаг. Нэгэшье хүн тэрэниие хаража үзѳѳгүй, хаража шадахашьегүй. Тэрээндэ нэрэ хүндэ ба мүнхын һүр хүсэ байг лэ. Болтогой! ¹⁷ Баян хүнүүдэй зѳѳри зѳѳшѳѳрѳѳ бүдүүрхэхэгүйень, иимэ мэтын найдабаригүй баялигта найдахагүйень захира, зүгѳѳр аяшаажа байха юумэ элбэг дэлбэгээр маанадта үршѳѳжэ байдаг амиды Бурханда найдажа байхыень заабаришалжа бай. ¹⁸ Дэмбэрэлтэ һайхан юумэ хэжэ, үлзы һайхан хэрэгүүдээрээ баяжажа, бардам гартай, бусад хүнүүдтэй юумээрээ хубаалсахада бэлэн байхыень заабаришалжа бай. ¹⁹ Тиигэжэл ерэдүйдэ мүнхын амидаралай бата һуури болохо баялигые тэдэ ѳѳһэдтѳѳ суглуулха юм. ²⁰ Тимофей, шамда даалгаһан юумые сахижа бай. Хэрэггүй хооһон үгэнүүдһээ, «эрдэм ухаан» гэжэ зарим хүнүүдэй худалаар нэрлэһэн, Бурханиие буруушааһан арсалдаанһаа зайсажа бай. ²¹ Зарим хүнүүд тиимэ «эрдэм ухаантайбди» гээд, һүзэгѳѳ алдаһан байгаа. Бурханай үршѳѳл хайра та бүхэнтэй оршожо байг лэ.