1 Фессалоникиинхидтэ

¹ Фессалоники хотын һүзэглэгшэдэй бүлгэм, таанадые Павел, Силуан, Тимофей гурбан амаршална. Эсэгэ Бурхан ба Дээдын Эзэн Иисус Христос таанадта үршѳѳл хайра ба амгалан тайбаниие үршѳѳг лэ! ² Та бүхэнэй түлѳѳ бидэ Бурханда ходо баясхалан хүргэжэ, та бүхэниие үргэлжэ зальбаралдаа дурдажа байдагбди. ³ Эсэгэ Бурханай урда тээ этигэл һүзэгѳѳ хэрэг дээрээ бэелүүлдэг байһыетнай, хайра дуран ажалыетнай бүхэжүүлдэг байһыень, Дээдын Эзэн Иисус Христосто бэхи батаар найдажа байдагыетнай бидэ үргэлжэ һанадагбди. ⁴ Аха дүүнэрни, Бурхан таанадта дуратай, таанадые шэлэжэ абаа юм гэжэ бидэ мэдэнэ ха юмди. ⁵ Һайн Мэдээсэлые таанадта асархадаа бидэ ганса үгэнүүдые хэрэглээ бэшэ, үшѳѳ Нангин Һүлдын хүсэ хэрэглээбди. Һайн Мэдээсэлэй үнэн зүб байһыень харуулаабди. Таанадай дунда байхадаа, танай аша туһада яажа амидаржа байһыемнай таанад мэдэнэт. ⁶ Таанад маанадта болон Дээдын Эзэндэ һажаан ажамидаржа эхилээ һэнта. Ехэ зобожо байһаншье һаа, Бурханай үгые таанад баяртайгаар угтажа абаа һэнта. Энэ баяр таанадта Нангин Һүлдэ олгожо байна. ⁷ Тиигэжэ таанад Македонидо ба Ахайяда амидарһан бүхы һүзэглэгшэдтэ жэшээ харуулбат. ⁸ Таанад Македонидо ба Ахайяда ганса Бурханай үгэ тараагаа бэшэт, үшѳѳ таанадай Бурханда һүзэглэдэг тухай мэдээсэл хаа хаанагүй тараа. Тиимэһээ дахин дурдаһанай хэрэггүй байна. ⁹ Маанадай таанадта ошоходо, таанадай яажа бидэниие угтажа абаһан тухай, онгонуудаа орхижо, Бурханда хандаһан тухайтнай булта хѳѳрэлдэжэ байна. Үнэн зүб ба амиды Бурханда алба хэхэ һанаатайгаар, маанад дээрэ ерээдүйдэ бууха ёһотой Бурханай уур сухалһаа аршалжа байһан, үхѳѳд амидырһан Христосой тэнгэриһээ буужа ерэхые хүлеэхэ һанаатайгаар таанад Бурханда хандаһан байгаат.

¹ Аха дүүнэрни, бидэнэй таанадта ерэһэн хэрэг дэмы үнгэрѳѳгүй гэжэ таанад ѳѳһэдѳѳ мэдэнэт. ² Филиппы хотодо байхадамнай ямар муугаар бидэндэ хандажа, бидэниие баһажа доромжолһыень таанад мэдэнэт. Манда эсэргүүсэһэн зоной олон байһаншье һаань, Һайн Мэдээсэлые номнохо зориг бидэндэ Бурхан үгѳѳ юм. ³ Манай таанадта номножо байгаа һургаалда алдуушье үгы, булхайтай ушар шалтагааншьегүй, бидэ хэнииешье мэхэлхэ гэжэ оролдоногүйбди. ⁴ Бурхан бидэниие туршаад, Һайн Мэдээсэл номнохыемнай даалгаа. Тиимэһээ номноходоо бидэ хүнүүдтэ һайшаагдаха гэжэ оролдодоггүйбди, харин бидэнэй һанал бодолые туршажа байдаг Бурханда һайшаагдаха гэжэ оролдодогбди. ⁵ Бидэ һаймһарһан үгэнүүдые хэлэхэеэ таанадта ерээгүйбди, хомхолзоһон сэдьхэлээ нюужа уран үгэнүүдые хэлэжэ байгаагүйбди гэжэ таанад яһала һайн мэдэжэ байнат. Бурхан манай гэршэ юм! ⁶ Бидэ хэнэйшье, таанадайшье, бэшэшье зоной магтаалда хүртэхые оролдоногүйбди. ⁷ Бидэ Христосой элшэд юм хадаа таанадһаа мүнгэнэй туһаламжа абаха аргатай байгаабди. Зүгѳѳр бидэ үхибүүдтээ һаналаа табижа байдаг эхэнэр шэнги таанадтай энхэргэн байгаабди. ⁸ Таанадта дуратай байһан хадаа бидэ Бурханай Һайн Мэдээсэлээр хубаалсахаһаа гадна ами наһаараа хубаалсахада бэлэн байгаабди. Бидэ таанадта ехэл дуратай байгаабди. ⁹ Аха дүүнэрни, яажа ажаллажа, эсэжэ сусажа байһан тухаймнай таанад һанана байхат. Таанадые ямаршье юумээр зобоохогүй гэжэ бидэ таанадта Бурханай Һайн Мэдээсэлые үдэр һүнигүй номножо байгаа һэмди. ¹⁰ Та һүзэглэгшэдтэ бидэ арюун һайханаар, үнэн сэхээр, хандадаг байгаабди. Бидэниие зэмэлхээр юумэн үгы. Таанад ѳѳһэдѳѳшье, Бурханшье тэрэниие гэршэлхэ. ¹¹ Эхэ эсэгэ хоёрой үхибүүдтээ хандадагтал адляар бидэ та бүхэндэ хандажа байгаабди. ¹² Хаан түрѳѳрѳѳ ба алдар солоороо хубаалсаха гэжэ таанадые дуудаһан Бурханда һайшаагдаха амидаралаар амидархыетнай бидэ гуйжа, идхажа, аргадажа байгаабди. ¹³ Бурханда үргэлжэ баясхалан хүргэжэ байха ондоошье шалтагаан бидэндэ бии юм. Таанадта Бурханай үгэ асархадамнай, таанад тэрэниие хүнүүдэй үгэдэл бэшэ, харин Бурханай үгэдэл шагнажа, угтажа абаа һэнта. Тэрэ үнэхѳѳрѳѳ Бурханай үгэ байгаа, та һүзэглэгшэдэй дунда ажаллажа байгаа. ¹⁴ Аха дүүнэрни, Иисус Христостой нэгэдэһэн Иудейн һүзэглэгшэдэй бүлгэмүүдтэй ямар юумэн ушараа һэм, тон тиимэ юумэн таанадтайшье ушараа. Дээдын Эзэн Иисус Христосые, лүндэншэдые алаһан, бидэниие хашажа мүрдэжэ байһан Иудейн зонһоо боложо, тэдэ зоной зобоһондол адли таанад баһа ѳѳһэдынгѳѳ хотынхидтэ хашуулан мүрдүүлэн зобоот. Тэдэ Иудейн зон Бурханда ехэл жэрхэдэһэтэй байна. Хүн бүхэндэ үһѳѳрхэжэ байна. ¹⁶ Бусад арадуудай абарагдахын тулада Бурханай үгэ номноходомнай тэдэ баһал һаалта хэнэ. Тиигэжэ Иудейн зон хэһэн нүгэлнүүдэйнгѳѳ һүүлшын нүгэлые хэбэ. Одоол мүнѳѳ Бурхан тэдэниие хэһээхэнь даа. ¹⁷ Аха дүүнэрни, таанадтай саг зуура хахасаад байхадаа таанадаа ехэл үгылѳѳбди, таанадтай дахин уулзахаяа ехээр оролдообди. Үшѳѳ бидэ һанал бодолоороо ходо таанадтай байгаабди. ¹⁸ Бидэ таанадта ошохо һанаатай байгаабди. Би ѳѳрѳѳ таанадта ошохоёо хэдэ дахин зүдхѳѳб, зүгѳѳр сатана бидэндэ һаалта хэжэ байгаа. ¹⁹ Һүүлэй һүүлдэ таанад лэ манай найдабари, манай баяр, манай Дээдын Эзэн Иисусай ерэхэдэ илаһандаа бахархаха шалтагаамнай болоно гээшэт. ²⁰ Таанад үнэхѳѳрѳѳ манай бахархал, манай баяр болонот.

¹ Һүүлэй һүүлдэ бидэ тэсэхэ аргагүй болообди. Тиимэһээ Христос тухай Һайн Мэдээсэл номнон бидэнтэй Бурханда алба хэжэ байһан Тимофей дүүгээ таанадта эльгээгээд, ѳѳһэдѳѳ Афины хотодо үлэхэ гэжэ шиидээ һэмди. Хэнэйтнайшье хашалга мүрдэлгэнүүдһээ айн сухарихагүйн тула таанадые бата бэхи болгохо, һүзэгыетнай урмашуулха зорилготойгоор бидэ Тимофейе ябуулаа һэмди. Тиимэ хашалга мүрдэлгэнүүдые Бурханай бидэндэ заяаһые таанад ѳѳһэдѳѳшье мэдэнэт. ⁴ Түрүүн таанадтай хамта байхадаа хашуулан мүрдүүлхэбди гэжэ бидэ уридшалан хэлээ һэмди. Тон тиимэл юумэн ушараа. ⁵ Саашадаа тэсэхэ аргагүй байһандаа, һүзэг тухайтнай мэдэжэ ерэхээрнь Тимофейе эльгээгээ һэмди. Шолмос таанадые хорхойтуулаашье һаань, бүхы манай ажал дэмы үнгэрѳѳгүйл байха гэжэ этигэлтэй байнабди. ⁶ Мүнѳѳ Тимофей бусажа ерээ, танай һүзэг ба дуран тухай һайн мэдээсэл асараа. Таанад бидэниие ходо һайнаар дурданат, таанадые харахаяа ехээр хүсэдэгтэмнайл адляар таанадшье бидэниие харахаяа ехэл хүсэнэт гэжэ тэрэ хѳѳрѳѳ. ⁷ Аха дүүнэрни, зоболонтой, дутагдалтай ажамидаржа байхадамнай таанад бидэниие этигэл һүзэгѳѳрѳѳ урмашуулбат. ⁸ Дээдын Эзэнтэй нэгэдэһэн амидаралаа бата бэхеэр сахижа байхадатнай бидэ мүнѳѳ бодотоор амидарбабди. ⁹ Таанадай бидэндэ асарһан бүхы баярай түлѳѳ бидэ яажа Бурханда гүйсэд баясхалан хүргэхэ гээшэбибди? ¹⁰ Таанадтай уулзаха, этигэл һүзэгтэтнай дутажа байһан юумые үгэхэ хүсэлтэйгѳѳр бидэ үдэр һүнигүй Бурханиие үнэн зүрхэнһѳѳ гуйнабди. ¹¹ Таанадта ошохо харгыемнай Эсэгэ Бурхан ѳѳрѳѳ, манай Дээдын Эзэн Иисус бэлдэжэ үгэг лэ. ¹² Таанадта аргагүй ехэ дуратай байдагтамнайл адляар бэе бэедээ болон бусад зондо дуратай байхыетнай Дээдын Эзэн таанадта үршѳѳг лэ. ¹³ Тиигэбэл Дээдын Эзэн Иисусай ѳѳрынгѳѳ хүнүүдтэй хүрэжэ ерэхэдэнь, Эсэгэ Бурханай урда нүгэлгүй, арюун сэбэр байхынтнай тула Дээдын Эзэн таанадые бэхижүүлхэ.

¹ Аха дүүнэрни, Бурханда һайшаагдадаг ажамидарал ямар байдаг бэ гэжэ таанад бидэнһээ һураа бэлэйт. Мүнѳѳшье таанад тиимэ ажамидаралтай байнат. Тиин саашадаашье тиигэжэл ажамидарагты гэжэ бидэ мүнѳѳ Дээдын Эзэн Иисусай нэрээр таанадые гуйха, аргадаха байнабди. ² Дээдын Эзэн Иисусай эрхэ мэдэлээр бидэнэй таанадта үгэһэн захяа заабаринуудые ѳѳһэдѳѳ мэдэжэ байна ха юмта. ³ Бурхан таанадые забхай бэшэ, харин гэгээн хүнүүд байхыетнай хүсэнэ. ⁴ Хүн бүхэнтнай бэеэ арюун нангин ба сэбэрээр абажа ябаха ёһотой. ⁵ Бурханиие мэдэхэгүй бусад арадуудта адли зальхай забхай хүсэлэнгүүдтэ бү абтагты. ⁶ Тиимэһээ таанадай хэншье Христосто һүзэглэгшэ ондоо хүндэ муу юумэ хэхэ, мэхэлэн барашхаа ёһогүй. Тиимэ юумэ хэһэн зониие Дээдын Эзэн хэһээхэ гэжэ бидэ уридшье хэлээ һэмди, мүнѳѳшье хатуугаар һэргылнэбди. ⁷ Бурхан бидэниие забхайралдахыемнай бэшэ, харин арюун гэгээнээр амидархыемнай уряалаа юм. ⁸ Тиимэһээ энэ һургаал буруушааһан хүн болбол хүниие буруушаана бэшэ, харин таанадта Нангин Һүлдэеэ үршѳѳжэ байгаа Бурханиие буруушаана. ⁹ Бэе бэедээ дуратай байгты гэжэ бэшэхэ хэрэггүй байха. Бэе бэедээ дуратай байхые Бурхан таанадта заажа үгѳѳ ха юм. ¹⁰ Таанад Македонидо ажаһуугаа бүхы һүзэглэгшэдтэ дуратайт. Аха дүүнэрнай, бүришье ехээр бэе бэедээ дуратай байгты гэжэ таанадые гуйнабди. ¹¹ Бидэнэй түрүүн хэлэһэн ёһоор таанад даруухан ажамидарха, ѳѳрынгѳѳ ажал хэхэ, ѳѳһэдѳѳ бэеэ тэжээхэ зорилго табигты. ¹² Тиигэжэл таанад һүзэггүй хүнүүдтэ хүндэтэй, ямаршье дутагдалгүй, эрхим түгэс хүнүүд байхат. ¹³ Аха дүүнэрни, этигэл найдабаригүй байһан хүнүүдтэй адли гашуудахагүйнтнай тула наһа бараһан хүнүүд тухай үнэнииень мэдэжэ байхыетнай бидэ хүсэнэбди. ¹⁴ Иисус үхѳѳд амидыраа гэжэ бидэ этигэнэбди. Тиимэһээ тэрээндэ һүзэглэжэ байгаад, наһа бараһан хүнүүдые Бурхан Иисустай хамта хүтэлжэ ерэхэ гэжэ бидэ этигэнэбди. ¹⁵ Мүнѳѳ бидэ таанадта Дээдын Эзэнэй һургаал номнонобди: Дээдын Эзэнэй ерэхэдэ амиды байгаа бидэ үхэһэн хүнүүдһээ түрүүн тэрээнтэй уулзахагүйбди. ¹⁶ Айладхаһан абяанай гарахада, Бурханай ахалагша Эльгээмэлэй дуу дуулдахада, Бурханай бүреэгэй дуугархада, Дээдын Эзэн ѳѳрѳѳ тэнгэриһээ доошоо бууха юм. Эдэ бүхэнэй болохын урда тээ Христосто һүзэглэжэ байгаад үхэһэн хүнүүд амидырха. ¹⁷ Тиигээд амиды байһан бидэнэр тэдэ үхэһэн хүнүүдтэй хамта Дээдын Эзэниие угтахаяа агаарта үүлэн дээрэ гарахабди. Тиигээд Дээдын Эзэнтэй ходол хамта байхабди. ¹⁸ Иигэжэл, эдэ үгэнүүдээр бэе бэеэ урмашуулжа байгты.

¹ Аха дүүнэрни, эдэ бүхэнэй ушарха саг, болзор тухай таанадта бэшэһэнэй хэрэггүй. ² Дээдын Эзэн ерэхэдээ һүниндѳѳ орожо ерэһэн хулгайшандал хүлеэгээгүй байхада ерэхэ юм гэжэ таанад ѳѳһэдѳѳ яһала һайн мэдэжэ байнат. ³ Хүнүүдэй «амгалан тайбан, аюулгүй байнабди» гэжэ байхада тэдэниие гэнтэ һүйдхэхэ. Тэрэ һүйдхэл болбол түрэхѳѳ байһан эхэнэрэй үбдэдэг мэтэ гэнтэ эхилхэ, тиимэһээ хүнүүд тэрээнһээ зайлажа шадахагүй. ⁴ Харин таанад, аха дүүнэрни, харанхы бүрэнхы соо байна бэшэ ха юмта. Тиимэһээ тэрэ Үдэр болбол хулгайшан мэтэ хүлеэгээгүй байхадатнай ерэхэ ёһогүй. ⁵ Таанад булта гэрэл туяа бэдэрһэн, үдэрэй харьяалай хүнүүд гээшэт. Бидэ болбол һүниин, харанхы бүрэнхыгэй хүнүүд бэшэбди. ⁶ Тиимэһээ бидэ бэшэ зондо адли унтаха ёһогүйбди. Бидэ һэргэлэн, эрүүл байха ёһотойбди. ⁷ Юундэб гэхэдэ, һүниндѳѳл хүнүүд унтадаг, һүниндѳѳл хүнүүд һогтотороо уудаг юм. ⁸ Гэхэдээ бидэ үдэрэй харьяалай хүнүүд хадаа эрүүл байха ёһотойбди. Бидэ һүзэг ба дуран хоёроо хуяг мэтэ үмдэжэ, абарагдаха найдалгаа дуулга мэтэ үмдѳѳд байха ёһотойбди. ⁹ Бурхан хэһээхын тула бэшэ, харин Дээдын Эзэн Иисус Христосоор дамжан абархын тула бидэниие шэлэжэ абаа юм. ¹⁰ Иисус бидэнэй орондо үхѳѳ, тиимэһээ тэрэнэй ерэхэдэ бидэ амидышье һаа, наһа бараһаншье һаа, тэрээнтэй хамта амидарха ёһотойбди. ¹¹ Тиимэһээ таанад бэе бэеэ урмашуулдаг, бэе бэедээ туһалдаг заншалаа үргэлжэлүүлжэл байгты. ¹² Аха дүүнэрни, таанадай дунда ажаллажа, Бурханда һайшаагдаха ажамидаралда таанадые хүтэлжэ, һургажа байһан хүнүүдые хүндэлжэ байгты гэжэ бидэ гуйнабди. ¹³ Хэжэ байһан ажалайнь түлѳѳ тэдэнээ хүндэлжэ, тэдээндээ дуратай байгты. Ѳѳһэд хоорондоо амгалан тайбан байгты. ¹⁴ Аха дүүнэрни, залхуу хүнүүдтэ ухаан заагты, зориггүй хүнүүдые урмашуулжа байгты, һулахан хүнүүдтэ дэмжэлгэ үзүүлэгты, хүн бүхэндэ ехэ тэсэбэритэй хандажа байгты гэжэ бидэ баһа гуйха байнабди. ¹⁵ Таанадта муу юумэ хэхэдэнь харюудань муу юумэ бү хэгты, харин бэе бэедээ, хүн бүхэндэ ходо һайн юумэ хэхые оролдогты. ¹⁶ Ходо баяртай байгты. ¹⁷ Ходо зальбаржа ябагты. ¹⁸ Ямаршье нүхэсэлдэ бүхы юумэнэй түлѳѳ бүгэдэндэ баясхалан хүргэжэ байгты. Иисус Христосой харуулһан ёһоор тиимэ юумэ хэжэ байхыетнай Бурхан таанадһаа хүсэжэ байна. ¹⁹ Нангин Һүлдынгѳѳ гэрэлыень бү унтараагты. ²⁰ Уридшалан хэлэгдэһэн юумэнүүдые бү доромжологты. ²¹ Бүхы юумые шалгажа үзѳѳд, һайнииень баримталжа ябагты. ²² Элдэб гэмтэ ябадалнуудые хэнгүй байхые хэшээгты. ²³ Бидэндэ амгалан тайбаниие үршѳѳжэ байһан Бурхан таанадые бүримүһэн арюун нангин болгог, Дээдын Эзэн Иисус Христосой ерэтэр танай һанал бодол, һүнэһэ һүлдэ, махабад бэе бүрин бүтэнѳѳрѳѳ ямаршье дутуу дутагдалгүй хадагалагдажа байг. ²⁴ Таанадые дуудаһан Бурхан найдабаритай юм хадаа тэрэ бүхэниие бэелүүлхэ. ²⁵ Аха дүүнэрни, бидэнэй түлѳѳ баһа зальбаржа байгты. ²⁶ Бүхы һүзэглэгшэдые арюунаар таалан амаршалагты. ²⁷ Бүхы һүзэглэгшэдтэ энэ бэшэгые уншажа үгэгты гэжэ би Дээдын Эзэнэй нэрэ түрѳѳр гуйнаб. ²⁸ Дээдын Эзэн Иисус Христосой үршѳѳл хайра та бүхэнтэй оршожо байхань болтогой.