1 Пётрой

¹ Понт, Галат, Каппадоки, Аси, Бетани нютагуудаар таража һууһан ерүүл зон, Бурханай шэлэжэ абаһан хүнүүд, таанадые Иисус Христосой Пётр элшэн амаршална. ² Иисус Христосой үгэ дуулажа, шуһаарнь сэбэрлүүлхын тула таанад Эсэгэ Бурханай эрхэ мэдэлээр шэлэгдэжэ абтаһан байгаат, тэрэнэй Нангин Һүлдын ашаар арюудхагдаһан байгаат. Бурханай үршѳѳл хайра, амгалан тайбан та бүхэнтэй элбэг дэлбэг байхань болтогой. ³ Манай Дээдын Эзэн Иисус Христосой Эсэгэ Бурханда баяр хүргэе! Үхэһэн Иисус Христосые амидыруулхадаа, Бурхан агууехэ үршѳѳл хайраараа шэнэ амидарал бидэндэ үршѳѳгѳѳ. Тиин маанадые амиды найдалаараа дүүргээ, ⁴ тиимэһээ Бурханай ѳѳрынгѳѳ хүнүүдтэ үгэхѳѳр хадагалжа байһан элбэг дэлбэг буян хэшэгтэ хүртэхэбди гэжэ бидэ найданабди. Тэрэ буян хэшэг таанадта тэнгэри дээрэ хадагалагдана, тэрэ үмхирхэгүй, һүнэхэгүй, бузарлагдахагүй. ⁵ Бурханай хүсэн этигэл һүзэгэйтнай ашаар сагай эсэстэ абаралгада хүртэтэртнай таанадые һахижа байна. ⁶ Тиимэһээ энээндэ баясажа байгты. Мүнѳѳ түр зуура элдэб янзын туршалгануудһаа зобожо тулижашье байбал, баясажа байгты. ⁷ Юундэб гэхэдэ, тэдэ зоболонгууд танай һүзэг этигэл бодото байна гү гэжэ туршана, батална гээшэ. Галда шатажа үгы болодог алтаншье галаар туршагдадаг ха юм, зүгѳѳр танай һүзэг этигэл алтанһаа үлүү үнэтэй, тиимэһээл тэрэнэйтнай үнэн байһыень заабол туршаха, баталха хэрэгтэй юм. Тиигээд лэ таанад Иисус Христосой заларан ерэхэ Үдэр магтаалда, алдар солодо, нэрэ түрэдэ хүртэхэт. ⁸ Тэрэниие хараагүйшье һаа, таанад тэрээндэ дуратай байнат; мүнѳѳ тэрэниие харангүйшье байхадаа, тэрээндэ этигэжэ байнат. Тиимэһээ таанад үгэнүүдээр дамжуулхын аргагүй, гайхалтай баяраар баясанат, ⁹ юундэб гэхэдэ, ѳѳрыгѳѳ абарха һүзэг этигэлэйнгээ зорилгодо хүрэжэ байнат. ¹⁰ Таанадта үгтэхэ Бурханай иимэ үршѳѳл хайра тухай энэ абаралгада хабаатай, бүхы юумэнүүдые шудалжа, шүүбэрилжэ байһан лүндэншэд уридшалан хэлээ юм. ¹¹ Ямар сагта, яажа тэрэ буян хэшэгэй үгтэхые лүндэншэд досоогоо байһан Христосой Һүлдын зааһан сагаар тодоруулха гэжэ оролдоо. Тиихэдээл Христос зоболонгуудые дабажа гараад, һүүлдэнь алдаршаха гэжэ Һүлдэ уридшалан хэлээ юм. ¹² Ѳѳһэдынгѳѳ аша туһада бэшэ, харин һүзэглэгшэ таанадай аша туһада тэдэнэр алба хэнэ гэжэ Бурхан тэдэ лүндэншэдтэ элирхэйлээ, тиимэһээ тэнгэриһээ эльгээгдэһэн Нангин Һүлдын дамжуулһан Һайн Мэдээсэлые айладхаһан хүнүүдые таанад мүнѳѳ шагнаба гээшэт. Тэрэ нюуса Бурханай Эльгээмэлнүүдшье нээжэ мэдэхэ хүсэлтэй байна. ¹³ Тиимэһээ һэргэлэн байгты, оюун ухаагаараа хүдэлхэдэ бэлэн байгты. Иисус Христосой ерэхэ Үдэр таанадта үгтэхэ буян хэшэгтэ аргагүй ехээр найдажа байгты. ¹⁴ Бурханиие мэдэхэгүй байһан үе сагтаа ажамидаралыетнай хүтэлдэг байһан хүсэлэнгүүдые дахангүй, Бурханай мэдэлдэ байгты. ¹⁵ Таанадые дуудаһан Бурханай арюун нангин байдагтал адляар, таанад алишье талаһаа арюун нангин байгты. ¹⁶ «Би арюун нангин байнаб, тиимэһээ таанадшье арюун нангин байгты», – гэжэ Нангин Бэшэгтэ хэлэгдэнэ. ¹⁷ Нюур харангүй бүхы хүнүүдые хэһэн хэрэгүүдэйнь хэмжээгээр шүүбэрилдэг Бурханиие таанад Эсэгэмнай гэжэ нэрлэнэт, тиимэһээ эндэ, энэ дэлхэйдэ байха үдэрнүүдээ тэрээндэ һүрдэн һүгэдэн үнгэргыт даа. ¹⁸ Үбгэ эсэгэнэрһээ залгамжалһан удхагүй хооһон ажамидаралһаа таанад үмхирдэг мүнгэ алтаар абтаһан бэшэт, ¹⁹ харин бэеын дутагдалгүй, сэбэр Хурьганай, Христосой үнэтэй сэнтэй шуһаар худалдажа абтагдаһан байгаат. ²⁰ Юртэмсэ дэлхэйн зохёон бүтээгдэхэһээ урда таанадайл аша туһада Бурхан Христосые шэлэжэ абаа юм, үе сагай дүүрэжэ байхада тэрэниие элирхэйлэн харуулаа юм. ²¹ Тэрэнэйл аша туһаар таанад Бурханда этигэнэт. Бурхан тэрэниие үхѳѳд байхадань амидыруулаа, алдаршуулаа, тиимэһээл таанад Бурханда һүзэглэнэт, найданат. ²² Үнэн зүбые дахажа, Бурханда һүзэглэдэг аха дүүнэртээ үнэн зүрхэнһѳѳ дуратай байхын тула таанад сэдьхэл зүрхэеэ арюудхабат. Тиимэһээ бүхы һанал бодолоороо бэе бэедээ дуратай байгты. ²³ Юундэб гэхэдэ, таанад үмхирдэг үрэһѳѳ бэшэ, харин үмхирдэггүй үрэһѳѳ дахин түрэһэн байгаат. Тэрэ үрэ болбол амиды Бурханай бодото Үгэ юм. ²⁴ «Ямаршье махабад бэе ногоондо адли. Ямаршье хүнэй алдар нэрэ талын сэсэг мэтэ. Ногооной хатахада сэсэгынь унадаг. ²⁵ Гэхэтэй хамта Дээдын Эзэнэй Үгэ хэтын хэтэдэ мүнхэ оршодог», – гэжэ Нангин Бэшэг соо хэлэгдэнэ. Энэ Дээдын Эзэнэй Үгэ таанадта номногдоһон Һайн Мэдээсэл гээшэ.

¹ Худалаар хэлэхэеэ, нүгэл хэхэеэ болигты, хүнэй нюур бү харагты, хүндэ бү атаархагты, худалаар бү гэршэлэгты. ² Һая түрэһэн үхибүүд яажа һүндэ дуратай байдаг бэ, тэдэндэл адляар таанадшье Бурханай Үгэдэ дуратай байгты. Тэрэнэй ашаар таанад ургахат, абарагдахат. ³ «Дээдын Эзэнэй үршѳѳлые таанад мэдэрээт», – гэжэ Нангин Бэшэгтэ хэлэгдэнэ ха юм. ⁴ Хүнүүдэй голоһон, зүгѳѳр Бурханай шэлэжэ абаһан, Бурханай нюдэндэ үнэтэй сэнтэй байдаг амиды шулуунда – Дээдын Эзэндэ – ерэгты. ⁵ Таанад амиды шулуунуудта адли Бурханда ерэгты, тиигээд Бурхан таанадһаа һүмэ бодхоохо, тиигээд тэрэ һүмэдѳѳ таанад нангин санаартан болоод, Иисус Христосоор дамжуулан Нангин Һүлдэһѳѳ Бурханда һайшаагдаха оюун ухаанай үргэл асаржа байгты. ⁶ Нангин Бэшэг соо: «Эгээн шухала, шэлэгдэжэ абтаһан, үнэтэй сэнтэй шулууе Сион дээрэ мүнѳѳ би табинаб; тэрээндэ этигэһэн хүн хэзээшье эшэхэгүй», – гэжэ хэлэгдэнэ. ⁷ Тиимэһээ һүзэглэгшэ таанадта Христос агууехэ баялиг болоно, харин һүзэглэдэггүй хүнүүдтэ тэрэ «барилгашадай голоһон шулуун» байһан аад, эгээн шухала, ⁸ хүнүүдэй бүдэрдэг шулуун, хүнүүдэй торожо унадаг шулуун болоо. Һайн Мэдээсэлдэ этигэдэггүйл хадаа тэдэнэр бүдэржэ байна. Тэдэнэр тиимэ табилантай юм. ⁹ Тиихэдэ таанад шэлэгдэжэ абтаһан угсаатан гээшэт, Хаанай санаартад, нангин арад, Бурханай хүнүүд болонот, шэб харанхыһаа таанадые гайхалтай гэрэл туяадаа дуудаһан Бурханай агууехэ үйлэ хэрэгүүд тухай номнохоор шэлэгдэһэн хүнүүд гээшэт. ¹⁰ Урдань таанад Бурханай хүнүүд бэшэ һэнта, зүгѳѳр мүнѳѳ таанад тэрэнэй хүнүүд гээшэт. Урдань таанад Бурханай үршѳѳл хайрые мэдэхэгүй һэнта, мүнѳѳ таанад тэрэнэй үршѳѳл хайрада хүртэбэт. ¹¹ Хүндэтэ аха дүүнэрни, энэ дэлхэйдэ таанад хариин, ерүүл хүнүүд юм хадаа танай ухаан бодолые һамааруулдаг нүгэлтэ хүсэлэнгүүдһээ холодожо, ¹² бусад арадуудай дунда ѳѳһэдыгѳѳ һайн абажа ябагты гэжэ гуйнаб. Тиигэбэлтнай мүнѳѳ таанадые нүгэл хэгшэд гэжэ хардажа байһан зон таанадай һайн һайхан үйлэ хэрэгүүдые харахадаа, Бурханай газар дэлхэй дээрэ хүнүүдые шалгахаяа ерэхэдэнь, тэрэниие алдаршуулха. ¹³ Дээдын Эзэнэй түлѳѳ засаг захиргаанай үгэ дуулажа байгты: дээдэ засаг захиргааниие түлѳѳлһэн хаанай мэдэлдэ байгты, ¹⁴ хуули эбдэһэн хүнүүдые хэһээхын тула, һайн һайхан хэрэгүүдые бүтээһэн хүнүүдые урмашуулхын тула хаанай табиһан захирагшадай үгэ дуулажа байгты. ¹⁵ Бидэ һайн һайхан лэ хэрэгүүдые бүтээжэ, хэрэггүй юумэ шашадаг тэнэг хүнүүдэй амыень хааха ёһотойбди. Бурхан тэрэнииел хүсэдэг. ¹⁶ Эрхэ сүлѳѳтэй хүнүүдтэл адляар ажамидарагты. Зүгѳѳр элдэб янзын нүгэлнүүдээ нюухын тула тэрэ эрхэ сүлѳѳгѳѳ бү хэрэглэгты. Таанад Бурханай зарасанарта адляар ажамидарагты. ¹⁷ Хүн бүхэниие хүндэлжэ байгты. Һүзэглэгшэ бүлгэмдѳѳ дуратай байгты. Бурханһаа айн һүрдэгты, хааниие хүндэлжэ ябагты. ¹⁸ Зарасанар, эзэдээ хүндэлжэ, үгыень дуулажа байгты. Гансал һайн аашатай, зѳѳлэн зантай эзэдээ бэшэ, харин шэрүүншье зантай эзэдээ дуулажа байгты. ¹⁹ Бурханай дура хүсэлые мэдэрһэн дээрэһээ гэм зэмэгүй зобожо, гай гасалан дабажа байһан хүниие Бурхан буян хэшэгтээ хүртѳѳхэ. ²⁰ Зэмэтэй байһандаа сохюулаад лэ, тэсэжэ ябабалтнай, тэрэтнай таанадта аша туһатай байха аал? Харин һайн һайхан хэрэгүүдые бүтээжэ байхадаа тэсэбэритэйгээр зоболон эдлэжэ байбалтнай, Бурхан таанадые һайшааха. ²¹ Тиимэ тэсэбэритэй байхынтнай тула Бурхан таанадые дуудаа, тиихэдэ Христос ѳѳрыень һажаажа байхынтнай тула таанадай түлѳѳ зоболон эдлэжэ, таанадта жэшээ харуулаа. ²² Тэрэ ямаршье нүгэл хээгүй, тэрэнэй худал юумэ хэлэжэ байхыень нэгэшье хүн дуулаагүй. ²³ Тэрэниие доромжолжо байхада, тэрэ доромжолһон харюу үгѳѳгүй, тэрэ зобожо байхадаа, зобоогшодойнгоо урдаһаа занаагүй, зүгѳѳр тэрэ ѳѳрыгѳѳ үнэн сэхэ Заргашын гарта үгѳѳ юм. ²⁴ Бидэнэй нүгэл шэбэлһээ зайсажа, үнэн зүбѳѳр амидархымнай тула Иисус ѳѳр дээрээ нүгэл шэбэлыемнай үргэлжэ абаа, модон дээрэ үргэгдѳѳ: тэрэнэй шархаар таанад аршалагдан эдэгээгдэһэн байгаат. ²⁵ Таанад тѳѳриһэн хонид мэтэ адуулагшагүй ябаат, мүнѳѳ Адуулагшадаа, харууһалагшадаа таанад бусажа ерээт.

¹ Эхэнэрнүүд, таанад баһал нүхэдэйнгээ мэдэлдэ байгты; хэрбээ тэдэнэрэй дунда Бурханай Үгэдэ этигэдэггүй хэн нэгэн байгаа һаа, эхэнэрэйнгээ арюун сэбэр, һүзэгтэй ажамидаралые хараад, этигэхэл. Тиихэдэ таанадта юумэ хэлэжэ байхын хэрэг үгы. ³ Гоё һайхан болохын тула таанад ѳѳһэдыгѳѳ гадна талаһаа шэмэглэжэ, үһэеэ гоёожо гү, али алтан зүүдхэлнүүдые зүүжэ гү, али зѳѳлэн хубсаһа үмдэжэ бү байгты. ⁴ Харин Бурханда аргагүй һайшаагдадаг сэдьхэлэй даруу ба зѳѳлэн занһаа гараһан үнэн бодото мүнхын гоёолтоор ѳѳһэдыгѳѳ шэмэглэгты. ⁵ Урдань Бурханда найдадаг эхэнэрнүүд ѳѳһэдыгѳѳ тиигэжэл шэмэглэдэг, нүхэдэйнгээ үгэ дууладаг байһан юм. ⁶ Сарра тиигэжэл Абраһамай үгэ дууладаг, тэрэнээ эзэмни гэжэ нэрлэдэг һэн. Һайн һайхан хэрэгүүдые бүтээжэ, ямаршье юумэнһээ айдаггүй байбал, таанадшье баһал Саррын басагад гээшэт. ⁷ Эрэшүүл, таанадшье һамгадаа хүндэлжэ, ойлгожо байгты, тэдэтнай таанадта ороходоо һула хүнүүд ха юм. Тиихэдэ тэдэтнай таанадтайл адлихан Бурханай ажамидаралай шагналда хүртэхэ. Бурханай үгын ёһоор эхэнэрнүүдтээ хандажа байбалтнай, ямаршье юумэн зальбархадатнай һаалта болохогүй. ⁸ Түгэсхэлдэнь хэлэхэдэ, таанад булта нэгэ һанал бодолтой байгты, адляар юумэндэ хандажа байгты, бэе бэедээ аха дүүнэдтэл адли дуратай байгты, бэе бэеэ хайрлажа, даруухан ажамидарагты. ⁹ Таанадта муу юумэ хэхэдэнь, харюудань муу юумэ бү хэгты; таанадые хараахадань, урдаһаань бү хараагты. Харин буян хэшэгтээ хүртѳѳхын тула Бурхан таанадые уряалан дуудаа гэжэ мэдэн, һайн һайхан хэрэгүүдые бүтээжэ, һайн үгѳѳр үреэлжэ байгты. ¹⁰ «Ажамидаралда дуратай, һайн һайхан үдэрнүүдые үзэхэ дуратай хүн нүгэлтэ юумэ бү хэлэг, худалаар дуугархаяа болиг. ¹¹ Тэрэ хүн нүгэл үйлэдэхэеэ болёод, һайн һайхан хэрэгүүдые бүтээжэ байг, энхэ тайбан байдалые найруулжа байг, энхэ тайбан байдалые тогтоожо байг. ¹² Дээдын Эзэн үнэн сэдьхэлтэниие хаража байдаг, тэдэнэй зальбаралнуудые дуулажа байдаг, харин муу юумэ хэгшэдые тэрэ буруушаадаг юм», – гэжэ Нангин Бэшэг соо хэлэгдэнэ. ¹³ Һайн юумэ хэхэ дуратай байбалтнай, хэн таанадта һаалта болохоб? ¹⁴ Зүб юумэ хэжэ байһанайнгаа түлѳѳ зоболон эдлэжэ байбалтнай, Бурхан ашыетнай харюулхал! Хэнһээшье бү айгты, һанаагаа бү зобогты. ¹⁵ Харин зүрхэ сэдьхэлдээ Дээдын Эзэн Христосые аргагүй хүндэлжэ ябагты. Ямаршье хүнэй ажамидаралайтнай найдал тухай һурабалнь, хэзээшье харюу үгэхэдэ бэлэн байгты. ¹⁶ Тиихэдээ дарууханаар, хүндэлһэнѳѳ харуулан харюусаарайт. Һэшхэлтнай арюун сэбэр байг, тиигэбэл Христосто һүзэглэдэг танай үлзытэй ажамидаралые хардадаг хүнүүд ѳѳһэдынгѳѳ хэлэһэн үгэнүүдһээ эшэхэл. ¹⁷ Бурханай хүсэлѳѳр нүгэл хэжэ байһанайнгаа түлѳѳ бэшэ, харин һайн һайхан хэрэгүүдые бүтээжэ байһанайнгаа түлѳѳ зобожо байһань дээрэ юм. ¹⁸ Бидэниие Бурханда хандуулхын тула Христос манай нүгэл шэбэлэй түлѳѳ нэгэтэ зоболон эдлэһэн байна. Тэрэ үнэн сэдьхэлтэн хара һанаатай зоной түлѳѳ бэеэ һүнѳѳлгэжэ, һүлдѳѳрѳѳ амидырһан юм. ¹⁹ Тиигээд һүлдѳѳрѳѳ хаалтада байһан һүлдэнүүдтэ ошожо номноо юм. ²⁰ Нойн томо корабль барижа дүүргэхые Бурханай ехэ тэсэбэритэйгээр хүлеэжэ байха үе сагта тэдэ һүлдэнүүд мэдэлдэнь байхаяа арсаа бэлэй. Нойн бариһан корабльда үсѳѳн хүн, хамтадаа найман хүн уһанһаа абарагдаһан юм. ²¹ Тиигэжэ уһанһаа абарагдаһаниинь мүнѳѳ бидэниие абаржа байдаг уһан арюудхалай бэлгэ тэмдэг болоо. Уһан арюудхалга бэеын муухайе арилгана бэшэ, харин Иисус Христосой амидыралгын ашаар һайн һайхан сэдьхэл үршѳѳхыень Бурханһаа гуйна. ²² Христос тэнгэридэ дэгдээд, бүхы Эльгээмэлнүүдые, тэнгэриин бүхы захиргаан, хүсэнүүдые эрхилэн, Бурханай баруун таладань оршоно.

¹ Христос махабад бэеэрээ зоболон эдлээ, тиимэһээ таанадшье тиигэжэ зобоходо бэлэн байха ёһотойт, юундэб гэхэдэ, зобожо байһан хүн нүгэл хэхэеэ болидог. Христосой түлѳѳ зобохые хүсэхэдѳѳ, таанад нүгэл хэхэеэ болиһоноо баталнат. ² Энэ сагһаа эхилээд, газар дэлхэй дээрэ үнгэргэхэ үдэрнүүдтээ хүнэй хүсэлэнгүүдые дахаха бэшэ, харин Бурханай дура хүсэлѳѳр ажамидарха ёһотойт. ³ Урдань таанад бусад арадуудай хэхэ дуратай юумэнүүдые хэжэ, нилээн саг үнгэргѳѳт. Зохихогүй юумэнүүдые үйлэдэжэ, зальхайржа, архидажа, һогтуу хүнүүдээр ниилэжэ, найрлажа, онгонуудта жэрхэдэһэтэйгээр мүргэжэ байгаат. ⁴ Мүнѳѳ тэдэнээр ниилэн зальхайрха, забхайрхаяа болиходотнай тэдэтнай ехээр гайхалдана, тиимэһээл таанадые доромжолно. ⁵ Гэхэтэй хамта амиды ба үхэһэн хүнүүдые һаядаа шүүхэ Бурханай урда тэдэнэр үйлэдэһэн бүхы юумэнүүдэйнгээ түлѳѳ харюусаха. ⁶ Тиимэһээл Христос Һайн Мэдээсэлые үхэһэн хүнүүдтэ баһа номноо гээшэ. Тэдэнэр махабад бэеэрээ хүн бүхэндэл адли зарга шүүбэридэ үгтэхэ, харин һүлдѳѳрѳѳ тэдэнэр Бурхандал адляар амидарха боломжотой юм. ⁷ Бүхы юумэнэй эсэс ойртожо байна. Тиимэһээ һүбэлгэн байгты, бэеэ баригты, тиигэбэл зальбарха аргатай байхат. ⁸ Юумэнэй түрүүндэ үнэн зүрхэнһѳѳ бэе бэедээ дуратай байгты, юундэб гэхэдэ, дуран олон нүгэлнүүдые хүлисэн арилгадаг юм. ⁹ Бэе бэеэ гэртээ айлшалуулхадаа, элдэбээр бү гэмэрэгты. ¹⁰ Хүн бүхэнтнай Бурханһаа абьяастай юм, тиин тэрэ олон янзын абьяаснуудаа ухаатайгаар, бэе бэедээ аша туһатайгаар хэрэглэжэ байгыт даа. ¹¹ Номножо байһан хүн Бурханай Мэдээсэлые номножо байг лэ; алба хэжэ байһан хүн Бурханай үршѳѳһэн хүсэ шадалаар ѳѳрыгѳѳ бэхижүүлжэ байг лэ. Бүхы юумэнүүд Иисус Христосоор дамжан Бурханиие алдаршуулжа байг лэ! Бурхан хэтын хэтэдэ алдар солотой, хүсэ шадалтай байхань болтогой! Зобоходоо баясажа байгты. ¹² Хүндэтэ аха дүүнэрни, зоболонто туршалгануудай тохёолдобол, бү гайхаарайт, гайхалтай юумэн гэжэ бү бодооройт. ¹³ Зүгѳѳр, Христосой зоболонгуудые хубаалсажа байһандаа баясажа байгаарайт, тэрэнэй һүр жабхалантайгаар ерэхэ Үдэрнь таанад баясахат, хүхихэт. ¹⁴ Христосой нэрэ алдарай түлѳѳ таанадые хүнүүдэй доромжолболнь, таанад жаргалтайт. Ушарынь хэлэбэл, алдар солын Һүлдэ, Бурханай Һүлдэ таанад соо оршоно гээшэ. ¹⁵ Алууршан, хулгайшан, хүнэй хэрэгүүдтэ оролсодог, хуули эбдэһэн хүн байһанһаа боложо хэнтнайшье зоболон эдлэхэгүйнь болтогой. ¹⁶ Гэхэтэй сасуу христос шажанай түлѳѳ зоболон эдлэбэл, бү эшэгты, тиимэ хубитай байһандаа Бурханиие алдаршуулжа байгты. ¹⁷ Зарга шүүбэриин эхилхэ саг дүтэлѳѳд байна. Тиихэдэ Бурханай хүнүүд хамагай түрүүн зарга шүүбэридэ орохо. Хэрбээ заргаяа бидэнһээ эхилбэл, Бурханда һүзэглэхэеэ арсаһан хүнүүд ямар хойшолонтой байхань гээшэб? ¹⁸ «Һайн хүнүүдэй абарагдахада хүшэр байхадань, Һүзэггүй, нүгэлтэй зон яахань гээшэб?» – гэжэ Нангин Бэшэг соо хэлэгдэнэ. ¹⁹ Тиимэһээ Бурханай дура хүсэлѳѳр зоболон эдлэжэ байһан хүнүүд үнэн сэхэ Бүтээгшэдэ ѳѳһэдыгѳѳ бүрин бүтэн даалгаг лэ, һайн һайхан хэрэгүүдые бүтээжэ байг лэ.

¹ Мүнѳѳ би танай һүзэглэгшэдэй бүлгэмэй хүтэлэгшэдтэ ханданаб. Би ѳѳрѳѳ бүлгэмэй хүтэлэгшэб, Христосой зобохыень хараа һэнби, һаядаа элирхэйлэгдэхэ тэрэнэй алдарые хубаалсахаб. ² Таанадта даалгагдаһан Бурханай һүрэгые адуулжа байгты. Баалалтаар хэжэ байһан мэтэ бэшэ, харин сэдьхэлээрээ энэ хэрэгые бүтээжэ байгты. Олзо олохо зорилготойгоор бэшэ, харин оролдосотойгоор алба хэжэ байгты. ³ Таанадта даалгагдаһан хүнүүдые захирха гэжэ бү оролдогты, харин тэдэндээ һайн жэшээ харуулжа байгты. ⁴ Тиигэбэл, таанад эгээн ехэ Адуулагшын ерэхэдэ, һүнэшэгүй алдарай шагналда хүртэхэт. ⁵ Залуушуул, таанад баһал бүлгэмэй хүтэлэгшэдэй үгэ дуулажа байгты. Таанад булта бэе бэедээ номгон даруугаар хандажа байгты. «Бурхан омог зантай зониие буруушаадаг, харин даруу номгон зондо үршѳѳлтэйгѳѳр хандадаг», – гэжэ Нангин Бэшэг соо хэлэгдэнэ. ⁶ Тиимэһээ һүр хүсэтэй Бурханай урда даруухан байгты, тиигэбэлтнай сагай ерэхэдэ, Бурхан таанадые дээшэнь үргэхэл. ⁷ Бүхы бэрхэшээлнүүдээ Бурханда даалгагты, тэрэ хойноһоотнай хаража байхал. ⁸ Һэргэлэн байгты, бү унтагты. Танай дайсан болохо шолмос эдихэ зууха хүниие бэдэржэ байһан арсалан мэтэ хүрхиржэ ябана. ⁹ Хатуу этигэл һүзэгтэй зогсогты, шолмосто бү абтагты; бүхы дэлхэйгээр аха дүүнэртнай тиимэл зоболонгуудые дабажа байна гэжэ мэдэжэ байгты. ¹⁰ Зүгѳѳр танай зоболонгууд һаядаа дууһаха. Иисус Христостой нэгэдүүлэн, мүнхэ алдараараа хубаалсахын тула таанадые дуудаһан, элдэб үршѳѳлнүүдэй эхин болохо Бурхан таанадые заһаха, бэхижүүлхэ, хүсэ шадалтай болгохо, батадхаха. ¹¹ Тэрэ хэтын хэтэдэ захиржа байг лэ. Болтогой! ¹² Христосой шударгы һүзэглэгшэ Силуанай туһаламжаар би таанадта энэ богонихон бэшэг бэшээб. Таанадые урмашуулха ба Бурханай буян хэшэгые таанадта дамжуулха зорилготойгоор бэшээб. Энэ буян хэшэгые хатуу баримталжа байгты. ¹³ Таанадтал адли шэлэгдэжэ абтаһан Вавилондохи эгэшэтнай, Марк хүбүүмни таанадта мэндые хүргэнэ. ¹⁴ Аха дүүнэрэй дура элирхэйлэн бэе бэеэ таалан амаршалагты. Христостой нэгэн хамта та бүхэн энхэ тайбан байхатнай болтогой.